1 Thê-o-hui-lô ah，我已經將耶穌tùi起頭所行所教示ê， 2 直到伊託重聖神命令所揀ê使徒了後受chih接上天ê日，ta̍k項記載tī前ê冊。 3 伊受害了後，bat用chōe-chōe憑據，tī四十日ê中間，出現hō͘使徒看見，來顯明伊家己是活，續講論上帝國ê事。 4 伊kap in聚集ê時，命令in，講，M̄-thang離開耶路撒冷，tio̍h thèng候父所應允ê，就是lín bat tùi我聽見ê； 5 因為約翰用水行洗禮；獨獨lín，koh無幾日，beh tī聖神受洗。 6 Án-ni in聚集ê時，問伊，講，主ah，你tī chit時beh將國復到hō͘以色列mah？ 7 伊就kā in講，父所hē tī伊家己權內ê時kap期m̄是lín所thang知。 8 獨獨聖神臨到lín ê時，lín beh得tio̍h才能；koh tī耶路撒冷，遍偤太，kap撒馬利亞，直到地極，beh做我ê干證。 9 Chiahê話講了，in teh看ê時，耶穌受舉起上天；有雲chih接伊，in就看bōe見。 10 伊去ê時，in ǹg天注目看，忽然有兩人穿白衫，khiā tī身邊； 11 講，加利利人ah，啥事khiā-teh看天？Chitê耶穌離別lín受chih接上天，lín看伊án-ni上天，伊亦beh照án-ni來。 12 Hit時in tùi hitê名叫橄欖ê山tò去耶路撒冷，chitê山近耶路撒冷，相離開有安歇日ê路站。 13 已經入，就上in所tòa ê樓頂；有彼得、約翰、雅各、安得烈、腓力kap多馬，Pa-to-lô-mái kap馬太，A-le̍k-hui ê kiáⁿ雅各kap Se-lô-tí ê西門，kap雅各ê kiáⁿ偤大。 14 Chiahê人，kap kúi-nā個婦人人，以及耶穌ê老母馬利亞，chham伊ê兄弟，lóng同心專務祈禱。 15 當時同聚集ê眾人約略一百二十名，彼得tī兄弟中khiā起來講， 16 兄弟ah，聖神借大衛ê嘴所讖語chhōa人掠耶穌ê偤大ê，chitê聖經應驗是應該。 17 因為伊bat kap阮同列，koh tī chitê工亦有份。 18 (Taⁿ chit人用伊行不義所得tio̍h ê工錢來買園；身軀仆落來，腹肚爆裂，腸á lóng流出。 19 Tiàm-tī耶路撒冷ê人lóng知；所以照in ê腔口叫hit坵園做A-kek-tāi-má，就是血園。) 20 因為詩篇記載，講， hō͘伊ê厝拋荒， 無人tī hia khiā, koh講， 伊監督ê職hō͘別人擔當。 21 所以主耶穌tī咱中間出入ê時， 22 tùi約翰行洗禮起，到耶穌離別咱受chih接ê日，所有常常kap阮做伴ê人，tī in中間tio̍h有一个kap阮saⁿ-kap做伊koh活ê干證。 23 Tùi án-ni，舉兩人，就是約瑟，叫做Pa-sat-pa，亦名Iû-sū-to͘，koh一个是Má-thê-a。 24 就祈禱，講，主ah，你是bat眾人ê心ê，tī chit兩人中指明tá-lo̍h一人是你所揀ê， 25 來有份tī chitê工，kap使徒ê職，就是偤大所離開beh去伊家己ê所在ê。 26 Tùi án-ni， kā in 拈鬮；liam-tio̍h Má-thê-a；伊就kap十一个使徒同列。
1 Thê-o-hui-lô ah, góa í-keng chiong Iâ-so͘ tùi khí-thâu só͘ kiâⁿ só͘ kà-sī ê, 2 ti̍t-kàu I thok-tiōng Sèng Sîn bēng-lēng só͘ kéng ê sù-tô͘ liáu-āu siū chih-chiap chiūⁿ thiⁿ ê ji̍t, ta̍k hāng kì-chài tī chêng ê chheh. 3 I siū hāi liáu-āu, bat ēng chōe-chōe pîn-kù, tī sì-cha̍p ji̍t ê tiong-kan, chhut-hiān hō͘ sù-tô͘ khòaⁿ-kìⁿ, lâi hián-bêng I ka-kī sī oa̍h, sòa káng-lūn Siōng-tè kok ê sū. 4 I kap in chū-chi̍p ê sî, bēng-lēng in, kóng, M̄-thang lī-khui Iâ-lō͘-sat-léng, tio̍h thèng-hāu Pē só͘ èng-ún ê, chiū-sī lín bat tùi góa thiaⁿ-kìⁿ ê; 5 in-ūi Iok-hān ēng chúi kiâⁿ sóe-lé; to̍k-to̍k lín, koh bô kúi ji̍t, beh tī Sèng Sîn siū sóe. 6 Án-ni in chū-chi̍p ê sî, mn̄g I, kóng, Chú ah, lí tī chit sî beh chiong kok ho̍k-tò hō͘ Í-sek-lia̍t mah? 7 I chiū kā in kóng, Pē só͘ hē tī I ka-kī koân-lāi ê sî kap kî m̄ sī lín só͘ thang chai. 8 To̍k-to̍k Sèng Sîn lîm-kàu lín ê sî, lín beh tit-tio̍h châi-lêng; koh tī Iâ-lō͘-sat-léng, piàn Iû-thài, kap Sat-má-lī-a, ti̍t-kàu tōe ke̍k, beh chòe góa ê kan-chèng. 9 Chiah ê ōe kóng liáu, in teh khòaⁿ ê sî, Iâ-so͘ siū kú-khí chiūⁿ thiⁿ; ū hûn chih-chiap I, in chiū khòaⁿ bōe kìⁿ. 10 I khì ê sî, in ǹg thiⁿ chù-ba̍k khòaⁿ, hut-jiân ū nn̄g lâng chhēng pe̍h saⁿ, khiā tī sin-piⁿ; 11 kóng, Ka-lī-lī lâng ah, siáⁿ-sū khiā-teh khòaⁿ thiⁿ? Chit ê Iâ-so͘ lī-pia̍t lín siū chih-chiap chiūⁿ thiⁿ, lín khòaⁿ I án-ni chiūⁿ thiⁿ, I ia̍h beh chiàu án-ni lâi. 12 Hit sî in tùi hit ê miâ kiò Kaⁿ-ná ê soaⁿ tò-khì Iâ-lō͘-sat-léng, chit ê soaⁿ kūn Iâ-lō͘-sat-léng, saⁿ lī-khui ū an-hioh-ji̍t ê lō͘-chām. 13 Í-keng ji̍p, chiū chiūⁿ in só͘ tòa ê lâu-téng; ū Pí-tek, Iok-hān, Ngá-kok, An-tek-lia̍t, Hui-le̍k kap To-má, Pa-to-lô-mái kap Má-thài, A-le̍k-hui ê kiáⁿ Ngá-kok kap Se-lô-tí ê Se-bûn, kap Ngá-kok ê kiáⁿ Iû-tāi. 14 Chiah ê lâng, kap kúi-nā ê hū-jîn-lâng, í-ki̍p Iâ-so͘ ê lāu-bú Má-lī-a, chham I ê hiaⁿ-tī, lóng tâng-sim choan-bū kî-tó. 15 Tong-sî tâng chū-chi̍p ê chèng lâng iok-lio̍k chi̍t-pah jī-cha̍p miâ, Pí-tek tī hiaⁿ-tī tiong khiā-khí lâi kóng, 16 Hiaⁿ-tī ah, Sèng Sîn chioh Tāi-pi̍t ê chhùi só͘ chhàm-gú chhōa lâng lia̍h Iâ-so͘ ê Iû-tāi ê, chit ê sèng-keng èng-giām sī eng-kai. 17 In-ūi i bat kap goán tâng-lia̍t, koh tī chit ê kang ia̍h ū hūn. 18 (Taⁿ chit lâng ēng i kiâⁿ put-gī só͘ tit-tio̍h ê kang-chîⁿ lâi bóe hn̂g; seng-khu phak-lo̍h-lâi, pak-tó͘ piak-li̍h, tn̂g-á lóng lâu-chhut. 19 Tiàm-tī Iâ-lō͘-sat-léng ê lâng lóng chai; só͘-í chiàu in ê khiuⁿ-kháu kiò hit khu hn̂g chòe A-kek-tāi-má, chiū-sī Huih-hn̂g. ) 20 In-ūi Si-phian kì-chài, kóng, Hō͘ i ê chhù pha-hng, Bô lâng tī hia khiā: koh kóng, I kàm-tok ê chit hō͘ pa̍t lâng tam-tng. 21 Só͘-í Chú Iâ-so͘ tī lán tiong-kan chhut-ji̍p ê sî, 22 tùi Iok-hān kiâⁿ sóe-lé khí, kàu Iâ-so͘ lī-pia̍t lán siū chih-chiap ê ji̍t, só͘ ū siông-siông kap goán chòe-phōaⁿ ê lâng, tī in tiong-kan tio̍h ū chi̍t-ê kap goán saⁿ-kap chòe I koh-oa̍h ê kan-chèng. 23 Tùi án-ni kú nn̄g lâng, chiū-sī Iok-sek, kiò chòe Pa-sat-pa, ia̍h miâ Iû-sū-to͘, koh chi̍t-ê sī Má-thê-a. 24 Chiū kî-tó, kóng, Chú ah, lí sī bat chèng lâng ê sim ê, tī chit nn̄g lâng tiong chí-bêng tá-lo̍h chi̍t lâng sī lí só͘ kéng ê, 25 lâi ū hūn tī chit ê kang, kap sù-tô͘ ê chit, chiū-sī Iû-tāi só͘ lī-khui beh khì i ka-kī ê só͘-chāi ê. 26 Tùi án-ni kā in liam-khau; liam-tio̍h Má-thê-a; i chiū kap cha̍p-it ê sù-tô͘ tâng lia̍t.
1 五旬節ê期已經到，in lóng聚集tī一所在。 2 忽然tùi天有聲，親像大風teh吹，充滿in所坐kui間ê厝。 3 就有teh分開ê舌，出現hō͘ in看見，親像火ê舌，歇tī ta̍k人ê頂面。 4 In lóng受聖神充滿，chiah開嘴講別樣ê腔口，是照聖神所賞賜in講ê。 5 Hit時有虔誠ê偤太人，tùi天下ta̍k國來ê，tòa tī耶路撒冷。 6 Chitê聲一下起，眾人聚集紛紛亂亂，因為ta̍k人聽見in照伊家己ê土腔來講。 7 就lóng gông-ngia̍h奇怪，講，你看，chiahê teh講ê kiám無一概是加利利人mah？ 8 怎樣咱聽in講照咱ta̍k人所出世ê土腔ah？ 9 咱chiahê Phàⁿ-thê-a人、Bí-thài人、Í-lân人，kap tiàm-tī Bí-só͘-pho-tāi-bí，偤太kap Ka-phàⁿ-to-ka，Pún-to͘ kap亞西亞， 10 Hut-lū-ka kap Pông-hui-lī-a，埃及近óa 古利奈 ê Lū-pí-a，chiahê地方ê人，以及tùi羅馬來ê出外人，有ê是偤太人，有ê是入偤太教ê人、 11 Kek-lí-tí人、A-lat-pek人，lóng聽in用咱ê腔口來講上帝ê大事。 12 就lóng gông-ngia̍h躊躇，saⁿ-kap講，這甚麼意思？ 13 亦有別人恥笑in講，in是lim新酒teh醉。 14 總是彼得kap十一个使徒khiā-teh，大聲kā in講，偤太人，kap lóng總khiā起tī耶路撒冷ê百姓ah，lín tio̍h知chitê，亦tio̍h致意聽我ê話。 15 Chiahê人m̄是酒醉，親像lín所phah算；因為chit-tia̍p tú-chiah頂晡九點鐘： 16 這就是託先知約珥所講ê，講， 17 上帝講，Tī路尾ê時日， 我beh用我ê神降落tī凡有肉體ê； Lín ê後生lín ê cha-bó͘-kiáⁿ beh做先知講話， Lín ê少年人beh看見異象， Lín ê老人beh得tio̍h眠夢； 18 Tī hiahê日我也beh用我ê神 降落tī我ê奴僕女婢；in亦beh做先知來講。 19 頂面tī天裡我beh顯出奇事， 下面tī地裡我beh顯出神蹟， 就是血，kap火，kap煙霧； 20 日beh變做暗， 月beh變做血， Tī主大koh榮顯ê日，bē到ê事先； 21 Koh凡若求叫主ê名ê，會得tio̍h救。 22 以色列人ah，tio̍h聽我ê話：拿撒勒人耶穌，上帝bat用伊tī lín中間行各樣ê權能、奇事，kap神蹟，來tùi lín證明伊，這就是lín所知ê； 23 伊照上帝定tio̍h ê旨意kap事先知ê，已經受解送，lín chiahê借不法ê人ê手釘十字架害死伊； 24 總是上帝tháu放hiahê死ê苦痛，hō͘伊koh活；是伊bōe會hō͘死所把縛。 25 因為大衛有指伊講， 我看主常常tī我ê面前； 伊tiàm-tī我ê chiàⁿ-pêng，hō͘我免搖動； 26 所以我ê心歡喜，我ê舌快樂； Koh我ê肉體也beh tiàm-tī ǹg望中； 27 因為你無beh將我ê靈魂放下tī陰間， 也無beh hō͘你ê聖ê tú-tio̍h朽爛。 28 你bat用活命ê路指示我； Beh hō͘我tī你ê面前滿心快樂。 29 兄弟ah，先祖大衛ê事我thang好膽對lín講，伊已經死koh埋葬，伊ê墓到今á日iáu tī咱中間。 30 伊既然是先知，koh知上帝bat kap伊chiù-chōa，beh tī伊後裔中設立一人坐伊ê座位。 31 伊事先看出án-ni，就論基督ê koh活講，伊無放下tī陰間，亦伊ê肉體無tú-tio̍h朽爛。 32 Chitê耶穌，上帝已經hō͘伊koh活，阮chiahê lóng做伊ê干證。 33 伊既然hō͘上帝ê chiàⁿ手舉伊高高，koh tùi父受所應允ê聖神，就將chitê降落，就是lín所看見，所聽見ê。 34 因為大衛未bat上天；獨獨家己講， 主kā我ê主講， 你坐我ê大pêng， 35 thèng候我hō͘你ê對敵做你ê腳踏椅。 36 Án-ni以色列全家tio̍h確實知，chitê耶穌，上帝已經設立伊做主，做基督，就是lín所釘tī十字架ê。 37 眾人聽了，心內刺鑿，對彼得kap其餘ê使徒講，兄弟ah，阮tio̍h怎樣做？ 38 彼得kā in講，Lín tio̍h反悔，ta̍k人tī耶穌基督ê名受洗禮，到hō͘ lín ê罪赦免；koh beh受聖神ê賞賜。 39 因為所應允ê歸tī lín，kap lín ê kiaⁿ孫，以及lóng總遠遠ê人，就是見若主，咱ê上帝，所beh召ê。 40 Koh另外用chōe-chōe話干證，來苦勸in，講，Lín tio̍h救家己脫離chitê邪ê世代。 41 Tùi án-ni，接納in ê話ê人lóng受洗禮；hit日約略加添三千人。 42 常常專務使徒ê教示，saⁿ-kap交陪、peh餅、祈禱。 43 眾人lóng驚惶；使徒koh行chōe-chōe奇事神蹟。 44 信ê人lóng聚集tī一所在，所有ê物公家用； 45 koh賣物產家業，照ta̍k人所欠用分hō͘ in。 46 日日同心專務tī殿內，也tī人家peh餅，用歡喜誠實ê心來食，o-ló上帝， 47 亦得tio̍h眾百姓歡喜in。主將得救ê人日日加添hō͘ in。
1 Gō͘-sûn-choeh ê kî í-keng kàu, in lóng chū-chi̍p tī chi̍t só͘-chāi. 2 Hut-jiân tùi thiⁿ ū siaⁿ, chhin-chhiūⁿ tōa hong teh chhe, chhiong-móa in só͘ chē kui-keng ê chhù. 3 Chiū ū teh hun-khui ê chi̍h, chhut-hiān hō͘ in khòaⁿ-kìⁿ, chhin-chhiūⁿ hé ê chi̍h, hioh tī ta̍k lâng ê téng-bīn. 4 In lóng siū Sèng Sîn chhiong-móa, chiah khui chhùi kóng pa̍t iūⁿ ê khiuⁿ-kháu, sī chiàu Sèng Sîn só͘ siúⁿ-sù in kóng ê. 5 Hit sî ū khiân-sêng ê Iû-thài lâng, tùi thiⁿ-ē ta̍k kok lâi ê, tòa tī Iâ-lō͘-sat-léng. 6 Chit ê siaⁿ chi̍t ē khí, chèng lâng chū-chi̍p hun-hun loān-loān, in-ūi ta̍k lâng thiaⁿ-kìⁿ in chiàu i ka-kī ê thó͘-khiuⁿ lâi kóng. 7 Chiū lóng gông-ngia̍h kî-koài, kóng, Lí khòaⁿ, chiah ê teh kóng ê kiám bô it-khài sī Ka-lī-lī lâng mah? 8 Cháiⁿ-iūⁿ lán thiaⁿ in kóng chiàu lán ta̍k lâng só͘ chhut-sì ê thó͘-khiuⁿ ah? 9 Lán chiah ê Phàⁿ-thê-a lâng, Bí-thài lâng, Í-lân lâng, kap tiàm-tī Bí-só͘-pho-tāi-bí, Iû-thài kap Ka-phàⁿ-to-ka, Pún-to͘ kap A-se-a, 10 Hut-lū-ka kap Pông-hui-lī-a, Ai-ki̍p kūn-óa Kó͘-lī-nāi ê Lū-pí-a, chiah ê tōe-hng ê lâng, í-ki̍p tùi Lô-má lâi ê chhut-gōa lâng, ū-ê sī Iû-thài lâng, ū-ê sī ji̍p Iû-thài kàu ê lâng, 11 Kek-lí-tí lâng, A-lat-pek lâng, lóng thiaⁿ in ēng lán ê khiuⁿ-kháu lâi kóng Siōng-tè ê tōa sū. 12 Chiū lóng gông-ngia̍h tiû-tû, saⁿ-kap kóng, Che sím-mi̍h ì-sù? 13 Ia̍h ū pa̍t lâng thí-chhiò in kóng, In sī lim sin chiú teh chùi. 14 Chóng-sī Pí-tek kap cha̍p-it ê sù-tô͘ khiā-teh, tōa siaⁿ kā in kóng, Iû-thài lâng, kap lóng-chóng khiā-khí tī Iâ-lō͘-sat-léng ê peh-sìⁿ ah, lín tio̍h chai chit-ê, ia̍h tio̍h tì-ì thiaⁿ góa ê ōe. 15 Chiah ê lâng m̄ sī chiú-chùi, chhin-chhiūⁿ lín só͘ phah-sǹg; in-ūi chit tia̍p tú-chiah téng-po͘ káu tiám cheng: 16 che chiū-sī thok sian-ti Iok-jíⁿ só͘ kóng ê, kóng, 17 Siōng-tè kóng, Tī lō͘-bé ê sî-ji̍t, Góa beh ēng góa ê Sîn kàng-lo̍h tī hoān ū jio̍k-thé ê; Lín ê hāu-siⁿ lín ê cha-bó͘-kiáⁿ beh chòe sian-ti kóng ōe, Lín ê siàu-liân lâng beh khòaⁿ-kìⁿ īⁿ-siōng, Lín ê lāu-lâng beh tit-tio̍h bîn-bāng; 18 Tī hiah ê ji̍t góa iā beh ēng góa ê Sîn Kàng-lo̍h tī góa ê lô͘-po̍k lú-pī; in ia̍h beh chòe sian-ti lâi kóng. 19 Téng-bīn tī thiⁿ-ni̍h góa beh hián-chhut kî-sū, Ē-bīn tī tōe-ni̍h góa beh hián-chhut sîn-jiah, Chiū-sī huih, kap hé, kap ian-bū; 20 Ji̍t beh pìⁿ chòe àm, Ge̍h beh pìⁿ chòe huih, Tī Chú tōa koh êng-hián ê ji̍t, Bē kàu ê tāi-seng; 21 Koh hoān-nā kiû-kiò Chú ê miâ ê, ōe tit-tio̍h kiù. 22 Í-sek-lia̍t lâng ah, tio̍h thiaⁿ góa ê ōe: Ná-sat-le̍k lâng Iâ-so͘, Siōng-tè bat ēng I tī lín tiong-kan kiâⁿ koh-iūⁿ ê koân-lêng, kî-sū, kap sîn-jiah, lâi tùi lín chèng-bêng I, che chiū-sī lín só͘ chai ê; 23 I chiàu Siōng-tè tiāⁿ-tio̍h ê chí-ì kap tāi-seng chai ê, í-keng siū ké-sàng, lín chiah-ê chioh put-hoat ê lâng ê chhiú tèng si̍p-jī-kè hāi-sí I; 24 chóng-sī Siōng-tè tháu-pàng hiah ê sí ê khó͘-thàng, hō͘ I koh-oa̍h; sī I bōe-ōe hō͘ sí só͘ pé-pa̍k. 25 In-ūi Tāi-pi̍t ū chí I kóng, Góa khòaⁿ Chú siông-siông tī góa ê bīn-chêng; I tiàm tī góa ê chiàⁿ pêng, hō͘ góa bián iô-tāng; 26 Só͘-í góa ê sim hoaⁿ-hí, góa ê chi̍h khoài-lo̍k; Koh góa ê jio̍k-thé iā beh tiàm tī ǹg-bāng tiong; 27 In-ūi lí bô beh chiong góa ê lêng-hûn pàng-hē tī im-kan, Iā bô beh hō͘ lí ê Sèng-ê tú-tio̍h hiú-nōa. 28 Lí bat ēng oa̍h-miā ê lō͘ chí-sī góa; Beh hō͘ góa tī lí ê bīn-chêng móa-sim khoài-lo̍k. 29 Hiaⁿ-tī ah, sian-chó͘ Tāi-pi̍t ê sū góa thang hó-táⁿ tùi lín kóng, i í-keng sí koh bâi-chòng, i ê bōng kàu kin-á-ji̍t iáu tī lán tiong-kan. 30 I kì-jiân sī sian-ti, koh chai Siōng-tè bat kap i chiù-chōa, beh tī i hō͘-è tiong siat-li̍p chi̍t lâng chē i ê chō-ūi. 31 I tāi-seng khòaⁿ-chhut án-ni, chiū lūn Ki-tok ê koh-oa̍h kóng, I bô pàng-hē tī im-kan, ia̍h I ê jio̍k-thé bô tú-tio̍h hiú-nōa. 32 Chit ê Iâ-so͘, Siōng-tè í-keng hō͘ I koh-oa̍h, goán chiah-ê lóng chòe I ê kan-chèng. 33 I kì-jiân hō͘ Siōng-tè ê chiàⁿ chhiú kú I koâiⁿ-koâiⁿ, koh tùi Pē siū só͘ èng-ún ê Sèng Sîn, chiū chiong chit ê kàng-lo̍h, chiū-sī lín só͘ khòaⁿ-kìⁿ, só͘ thiaⁿ-kìⁿ ê. 34 In-ūi Tāi-pi̍t bē bat chiūⁿ thiⁿ; to̍k-to̍k ka-kī kóng, Chú kā góa ê Chú kóng, Lí chē góa ê tōa pêng, 35 Thèng-hāu góa hō͘ lí ê tùi-te̍k chòe lí ê kha-ta̍h-í. 36 Án-ni Í-sek-lia̍t choân-ke tio̍h khak-si̍t chai, chit ê Iâ-so͘, Siōng-tè í-keng siat-li̍p I chòe Chú, chòe Ki-tok, chiū-sī lín só͘ tèng tī si̍p-jī-kè ê. 37 Chèng lâng thiaⁿ-liáu, sim-lāi chhì-chha̍k, tùi Pí-tek kap kî-û ê sù-tô͘ kóng, Hiaⁿ-tī ah, goán tio̍h cháiⁿ-iūⁿ chòe? 38 Pí-tek kā in kóng, Lín tio̍h hoán-hóe, ta̍k lâng tī Iâ-so͘ Ki-tok ê miâ siū sóe-lé, kàu hō͘ lín ê chōe sià-bián; koh beh siū Sèng Sîn ê siúⁿ-sù. 39 In-ūi só͘ èng-ún ê kui tī lín, kap lín ê kiáⁿ-sun, í-ki̍p lóng-chóng hn̄g-hn̄g ê lâng, chiū-sī kìⁿ-nā Chú, lán ê Siōng-tè, só͘ beh tiàu ê. 40 Koh lēng-gōa ēng chōe-chōe ōe kan-chèng, lâi khó͘-khǹg in, kóng, Lín tio̍h kiù ka-kī thoat-lī chit ê siâ ê sè-tāi. 41 Tùi án-ni chiap-la̍p in ê ōe ê lâng lóng siū sóe-lé; hit ji̍t iok-lio̍k ke-thiⁿ saⁿ chheng lâng. 42 Siông-siông choan-bū sù-tô͘ ê kà-sī, saⁿ-kap kau-pôe, peh-piáⁿ, kî-tó. 43 Chèng lâng lóng kiaⁿ-hiâⁿ; sù-tô͘ koh kiâⁿ chōe-chōe kî-sū sîn-jiah. 44 Sìn ê lâng lóng chū-chi̍p tī chi̍t só͘-chāi, só͘ ū ê mi̍h kong-ke ēng; 45 koh bōe bu̍t-sán ke-gia̍p, chiàu ta̍k lâng só͘ khiàm-ēng pun hō͘ in. 46 Ji̍t-ji̍t tâng-sim choan-bū tī tiān-lāi, iā tī jîn-ke peh piáⁿ, ēng hoaⁿ-hí sêng-si̍t ê sim lâi chia̍h, o-ló Siōng-tè, 47 ia̍h tit-tio̍h chèng peh-sìⁿ hoaⁿ-hí in. Chú chiong tit kiù ê lâng ji̍t-ji̍t ke-thiⁿ hō͘ in.
1 三點鐘祈禱ê時，彼得kap約翰上殿。 2 有一人，tùi出世就軟腳，ta̍k日hō͘人扛來hē tī殿門，就是hitê叫做Súi ê門，beh求入殿 ê人捨施； 3 看見彼得約翰teh-beh入殿，就求捨施。 4 彼得kap約翰注目看伊，講，看阮。 5 伊就注神看in，ǹg望對in有所得tio̍h。 6 但是彼得講，金銀我lóng無；獨獨我所有ê hō͘你。Tī拿撒勒耶穌基督ê名，你起來行。 7 就牽伊ê chiàⁿ手，hō͘伊起來；伊ê腳kap腳目liâm-piⁿ勇健。 8 就跳起來khiā-teh，koh行，kap in入殿；亦行，亦跳，亦o-ló上帝。 9 眾百姓看見伊teh行teh o-ló上帝； 10 koh認得伊是平素坐tī 殿 ê Súi門求捨施 ê；就因為伊所tú-tio̍h ê事，滿心奇怪gông-ngia̍h。 11 Hit人牽彼得約翰ê時，眾百姓大奇怪，一齊走來就近in，tī hitê名叫所羅門ê léng廊。 12 彼得看見，就tùi百姓講，以色列人ah，啥事掠chitê做奇怪？啥事注目看阮，ná親像阮用家己ê才能，á是敬虔，hō͘伊行？ 13 亞伯拉罕、以撒、雅各ê上帝，就是咱列祖ê上帝，已經榮光伊ê奴僕耶穌；就是lín chiahê所送交ê，koh tī彼拉多ê面前，當伊擬beh放伊ê時，lín koh m̄認伊。 14 Án-ni lín m̄認hitê聖koh義ê，反tńg求伊用一个凶犯hō͘ lín； 15 lín害死活命ê人君，就是上帝tùi死人中hō͘伊koh活ê；阮chiahê做伊ê干證。 16 因為信伊ê名，就伊ê名hō͘ chitê lín所看所bat ê人勇健；是hitê對伊來ê信hō͘伊齊全好tī lín眾人ê面前。 17 兄弟ah，taⁿ我知lín án-ni行是tùi m̄知影，lín ê官府也是án-ni。 18 獨獨上帝用眾先知ê嘴讖語伊ê基督所beh受ê害，伊有án-ni應驗伊。 19 所以lín tio̍h反悔，來oa̍t-tńg頭，hō͘ lín ê罪會得擦消，hō͘安樂ê日期會tùi主ê面前來； 20 koh主beh差為tio̍h lín事先定tio̍h ê基督，就是耶穌。 21 天的確tio̍h接納伊，到萬物復到ê時，就是上帝tùi創世以來用伊聖先知ê嘴所講ê。 22 摩西bat講，主上帝beh tī lín兄弟ê中間kā lín挺起一个先知，親像我；凡若伊所kā lín講lín tio̍h聽伊。 23 凡若m̄聽chitê先知ê，beh tùi百姓ê中間一盡滅伊。 24 Koh chiahê先知，tùi撒母耳以來，見有講ê，lóng是傳報chiahê日。 25 Lín是先知ê kiaⁿ孫，承接上帝kap lín列祖所立 ê約，就是kā亞伯拉罕講，天下萬族beh tī你ê後裔得tio̍h福氣。 26 上帝已經挺起伊ê奴僕，差伊來事先賜福hō͘ lín，就是hō͘ lín ta̍k人oa̍t-tńg離開lín ê pháiⁿ。
1 Saⁿ tiám cheng kî-tó ê sî, Pí-tek kap Iok-hān chiūⁿ tiān. 2 Ū chi̍t lâng, tùi chhut-sì chiū nńg-kha, ta̍k ji̍t hō͘ lâng kng lâi hē tī tiān mn̂g, chiū-sī hit ê kiò chòe Súi ê mn̂g, beh kiû ji̍p tiān ê lâng siá-sì; 3 khòaⁿ-kìⁿ Pí-tek Iok-hān teh-beh ji̍p tiān, chiū kiû siá-si. 4 Pí-tek kap Iok-hān chù-ba̍k khòaⁿ i, kóng, Khòaⁿ goán. 5 I chiū chù-sîn khòaⁿ in, ǹg-bāng tùi in ū só͘ tit-tio̍h. 6 Nā-sī Pí-tek kóng, Kim gûn góa lóng bô; to̍k-to̍k góa só͘ ū ê hō͘ lí. Tī Ná-sat-le̍k Iâ-so͘ Ki-tok ê miâ, lí khí-lâi kiâⁿ. 7 Chiū khan i ê chiàⁿ chhiú, hō͘ i khí-lâi; i ê kha kap kha-ba̍k liâm-piⁿ ióng-kiāⁿ. 8 Chiū thiàu-khí-lâi khiā-teh, koh kiâⁿ, kap in ji̍p tiān; ia̍h kiâⁿ, ia̍h thiàu, ia̍h o-ló Siōng-tè. 9 Chèng peh-sìⁿ khòaⁿ-kìⁿ i teh kiâⁿ teh o-ló Siōng-tè; 10 koh jīn-tit i sī pêng-sò͘ chē tī tiān ê Súi-mn̂g kiû siá-si ê; chiū in-ūi i só͘ tú-tio̍h ê sū, móa-sim kî-koài gông-ngia̍h. 11 Hit lâng khan Pí-tek Iok-hān ê sî, chèng peh-sìⁿ tōa kî-koài, chi̍t chôe cháu lâi chiū-kūn in, tī hit-ê miâ kiò Só͘-lô-bûn ê léng-lông. 12 Pí-tek khòaⁿ-kìⁿ, chiū tùi peh-sìⁿ kóng, Í-sek-lia̍t lâng ah, siáⁿ-sū lia̍h chit-ê chòe kî-koài? siáⁿ-sū chù-ba̍k khòaⁿ goán, ná chhin-chhiūⁿ goán ēng ka-kī ê châi-lêng, á-sī kèng-khiân, hō͘ i kiâⁿ? 13 A-pek-la̍h-hán, Í-sat, Ngá-kok ê Siōng-tè, chiū-sī lán lia̍t-chó͘ ê Siōng-tè, í-keng êng-kng I ê Lô͘-po̍k Iâ-so͘; chiū-sī lín chiah-ê só͘ sàng-kau ê, koh tī Pí-lia̍p-to ê bīn-chêng, tng i gí beh pàng I ê sî, lín koh m̄ jīn I. 14 Án-ni lín m̄ jīn hit ê Sèng koh Gī ê, hoán-tńg kiû i ēng chi̍t ê hiong-hoān hō͘ lín; 15 lín hāi-sí oa̍h-miā ê Jîn-kun, chiū-sī Siōng-tè tùi sí-lâng tiong hō͘ I koh-oa̍h ê; goán chiah-ê chòe I ê kan-chèng. 16 In-ūi sìn I ê miâ, chiū I ê miâ hō͘ chit-ê lín só͘ khòaⁿ só͘ bat ê lâng ióng-kiāⁿ; sī hit-ê tùi I lâi ê sìn hō͘ i chiâu-chn̂g hó tī lín chèng lâng ê bīn-chêng. 17 Hiaⁿ-tī ah, taⁿ góa chai lín án-ni kiâⁿ sī tùi m̄ chai-iáⁿ, lín ê koaⁿ-hú iā sī án-ni. 18 To̍k-to̍k Siōng-tè ēng chèng sian-ti ê chhùi chhàm-gú I ê Ki-tok só͘ beh siū ê hāi, I ū án-ni èng-giām i. 19 Só͘-í lín tio̍h hoán-hóe, lâi oa̍t-tńg-thâu, hō͘ lín ê chōe ōe tit chhat-siau, hō͘ an-lo̍k ê ji̍t-kî ōe tùi Chú ê bīn-chêng lâi; 20 koh Chú beh chhe ūi-tio̍h lín tāi-seng tiāⁿ-tio̍h ê Ki-tok, chiū-sī Iâ-so͘. 21 Thiⁿ tek-khak tio̍h chiap-la̍p I, kàu bān mi̍h ho̍k-tò ê sî, chiū-sī Siōng-tè tùi chhòng-sè í-lâi ēng I sèng sian-ti ê chhùi só͘ kóng ê. 22 Mô͘-se bat kóng, Chú Siōng-tè beh tī lín hiaⁿ-tī ê tiong-kan kā lín théng-khí chi̍t ê sian-ti, chhin-chhiūⁿ góa; hoān-nā I só͘ kā lín kóng lín tio̍h thiaⁿ I. 23 Hoān-nā m̄ thiaⁿ chit ê sian-ti ê, beh tùi peh-sìⁿ ê tiong-kan it-chīn bia̍t i. 24 Koh chiah ê sian-ti, tùi Sat-bó͘-ní í-lâi, kìⁿ ū kóng ê, lóng sī thoân-pò chiah ê ji̍t. 25 Lín sī sian-ti ê kiáⁿ-sun, sêng-chiap Siōng-tè kap lín lia̍t-chó͘ só͘ li̍p ê iok, chiū-sī kā A-pek-la̍h-hán kóng, Thiⁿ-ē bān cho̍k beh tī lí ê hō͘-è tit-tio̍h hok-khì. 26 Siōng-tè í-keng théng-khí I ê Lô͘-po̍k, chhe I lâi tāi-seng sù hok hō͘ lín, chiū-sī hō͘ lín ta̍k lâng oa̍t-tńg lī-khui lín ê pháiⁿ.
1 In對百姓講話ê時，chiahê祭司，kap殿司，以及撒都該人忽然到； 2 因為in教示百姓，koh引起耶穌來傳tùi死人中koh活ê道理，就大m̄歡喜。 3 Tùi án-ni，下手掠in；因為日暗，關in tī監裡，來thèng候隔日。 4 但是聽道理ê人chōe-chōe信；人額約略到五千。 5 隔日，in ê官府、長老、經學士聚集tī耶路撒冷； 6 祭司頭A-ná tī-teh，koh有Kai-a-hoat、約翰、亞力山大，以及凡若屬祭司頭ê宗族亦tī-teh。 7 hō͘ in khiā tī中央，問講，lín用甚麼權能，用甚麼名，行chitê tāi-chì ah？ 8 彼得hit時hō͘聖神充滿，對in講， 9 百姓ê官府，kap長老ah，阮chiahê今á日若為tio̍h行tī軟弱ê人ê好事來受審問，看伊àn怎樣得救； 10 就lín眾人，kap thong以色列百姓tio̍h知，是tī拿撒勒人耶穌基督ê名，lín所釘tī十字架，上帝hō͘伊tùi死人中koh活ê，就是tī伊ê名，chit人好好khiā tī lín ê面前。 11 伊就是lín師傅所m̄-ti̍h ê石，已經成做厝角ê頭。 12 Koh tī別ê並無拯救；因為tī天下，無賞賜別個名tī人ê中間，hō͘咱tiàm-tī伊來得救。 13 眾人看見彼得約翰ê好膽，koh知in是無學問ê平常人，就奇怪；koh認得in bat tè耶穌。 14 亦看見得tio̍h好ê人kap in saⁿ-kap khiā-teh，就無話thang辯駁。 15 Chiah kah in出會所，也saⁿ-kap議論，講， 16 Chiahê人beh怎樣辦in？in顯然行神蹟，tiàm-tī耶路撒冷ê人lóng知；咱chiahê bōe講無--得。 17 總是免得chitê事益發報揚tī百姓ê中間，咱tio̍h哄in，斷斷m̄-thang koh將chitê名對人講。 18 就叫in來，禁止in，千萬m̄-thang用耶穌ê名來講起，來教示。 19 但是彼得約翰應講，聽lín khah過頭聽上帝，tī上帝ê面前合宜á無，lín chiah擬斷： 20 因為阮所bat看bat聽ê，bōe得thang無講。 21 Hiah-ê人，因為百姓ê緣故，想無步thang刑罰in；就koh再háng-hoah，chiah放in；是眾人為tio̍h in所行ê，來歸榮光上帝。 22 因為tùi神蹟得tio̍h醫好ê人，已經四十外歲。 23 In已經得tio̍h tháu放，就去chhē in ê朋友，將chiahê祭司頭kap長老所講ê話對in講。 24 In聽見，就同心出聲對上帝講，主宰ah，你是創造天、地、海，kap其中萬物ê； 25 你bat對聖神用你ê奴僕，阮ê祖，大衛ê嘴，來講， 列邦啥事大受氣， Chiahê百姓啥事計謀空空ê tāi？ 26 地上ê列王一齊khiā-teh， Chiahê官員也saⁿ-kap聚集， 來對敵主，kap伊ê基督； 27 因為希律，本丟彼拉多，kap外邦人，以及以色列chiahê百姓，果然聚集tī chitê城，來攻擊你所抹油聖ê奴僕耶穌， 28 來行你ê手，你ê旨意所事先定tio̍h一切beh成ê事。 29 Taⁿ主ah，tio̍h鑑察hiahê人ê háng-hoah；hō͘你chiahê奴僕好膽講你ê道理， 30 照時伸你ê手來醫病；hō͘神蹟奇事對你聖ê奴僕耶穌ê名來成。 31 祈禱soah，聚集ê所在大振動；眾人lóng受聖神充滿，好膽講上帝ê道理。 32 信ê人lóng一心一志；無人講伊所有ê屬家己；是ta̍k項物做公ê。 33 使徒用大權能干證主耶穌ê koh活；眾人也得tio̍h大恩典。 34 其中無欠缺ê人；因為見有田園厝宅ê，lóng賣伊，帶in所賣ê銀，hē tī使徒ê腳下； 35 照ta̍k人所欠用，分hō͘ in。 36 有利未族ê人，出世tī居比路，名約瑟，使徒叫伊做巴拿巴，(翻譯就是gâu安慰ê人) ， 37 伊有園就賣去，將所賣ê銀帶來，hē tī使徒ê腳下。
1 In tùi peh-sìⁿ kóng ōe ê sî, chiah ê chè-si, kap tiān-si, í-ki̍p Sat-thó͘-kai lâng hut-jiân kàu; 2 in-ūi in kà-sī peh-sìⁿ, koh ín-khí Iâ-so͘ lâi thoân tùi sí-lâng tiong koh-oa̍h ê tō-lí, chiū tōa m̄ hoaⁿ-hí. 3 Tùi án-ni hē chhiú lia̍h in; in-ūi ji̍t àm, koaiⁿ in tī kaⁿ-ni̍h, lâi thèng-hāu keh ji̍t. 4 Nā-sī thiaⁿ tō-lí ê lâng chōe-chōe sìn; lâng-gia̍h iok-lio̍k kàu gō͘ chheng. 5 Keh ji̍t, in ê koaⁿ-hú, tiúⁿ-ló, keng-ha̍k-sū chū-chi̍p tī Iâ-lō͘-sat-léng; 6 chè-si-thâu A-ná tī-teh, koh ū Kai-a-hoat, Iok-hān, A-le̍k-san-tāi, í-ki̍p hoān-nā sio̍k chè-si-thâu ê chong-cho̍k ia̍h tī-teh. 7 Hō͘ in khiā tī tiong-ng, mn̄g kóng, Lín ēng sím-mi̍h koân-lêng, ēng sím-mi̍h miâ, kiâⁿ chit ê tāi-chì ah? 8 Pí-tek hit sî hō͘ Sèng Sîn chhiong-móa, tùi in kóng, 9 Peh-sìⁿ ê koaⁿ-hú, kap tiúⁿ-ló ah, goán chiah-ê kin-á-ji̍t nā ūi-tio̍h kiâⁿ tī loán-jio̍k ê lâng ê hó sū lâi siū sím-mn̄g, khòaⁿ i àn-cháiⁿ-iūⁿ tit kiù; 10 chiū lín chèng lâng, kap thong Í-sek-lia̍t peh-sìⁿ tio̍h chai, sī tī Ná-sat-le̍k lâng Iâ-so͘ Ki-tok ê miâ, lín só͘ tèng tī si̍p-jī-kè, Siōng-tè hō͘ I tùi sí-lâng tiong koh-oa̍h ê, chiū-sī tī I ê miâ, chit lâng hó-hó khiā tī lín ê bīn-chêng. 11 I chiū-sī lín sai-hū só͘ m̄ ti̍h ê chio̍h, í-keng chiâⁿ-chòe chhù-kak ê thâu. 12 Koh tī pa̍t-ê pēng bô chín-kiù; in-ūi tī thiⁿ-ē, bô siúⁿ-sù pa̍t ê miâ tī lâng ê tiong-kan, hō͘ lán tiàm-tī i lâi tit kiù. 13 Chèng lâng khòaⁿ-kìⁿ Pí-tek Iok-hān ê hó-táⁿ, koh chai in sī bô ha̍k-būn ê pêng-siông lâng, chiū kî-koài; koh jīn-tit in bat tè Iâ-so͘. 14 Ia̍h khòaⁿ-kìⁿ tit-tio̍h hó ê lâng kap in saⁿ-kap khiā-teh, chiū bô ōe thang piān-pok. 15 Chiah kah in chhut hōe-só͘, iā saⁿ-kap gī-lūn, kóng, 16 Chiah ê lâng beh cháiⁿ-iūⁿ pān in? in hián-jiân kiâⁿ sîn-jiah, tiàm-tī Iâ-lō͘-sat-léng ê lâng lóng chai; lán chiah-ê bōe kóng bô--tit. 17 Chóng-sī bián-tit chit ê sū it-hoat pò-iông tī peh-sìⁿ ê tiong-kan, lán tio̍h háng in, toàn-toàn m̄-thang koh chiong chit ê miâ tùi lâng kóng. 18 Chiū kiò in lâi, kìm-chí in, chhian-bān m̄-thang ēng Iâ-so͘ ê miâ lâi kóng-khí, lâi kà-sī. 19 Nā-sī Pí-tek Iok-hān ìn kóng, Thiaⁿ lín khah kè-thâu thiaⁿ Siōng-tè, tī Siōng-tè ê bīn-chêng ha̍p-gî á bô, lín chiah gí-toàn: 20 in-ūi goán só͘ bat khòaⁿ bat thiaⁿ ê, bōe tit thang bô kóng. 21 Hiah ê lâng, in-ūi peh-sìⁿ ê iân-kò͘, siūⁿ bô pō͘ thang hêng-hoa̍t in; chiū koh-chài háng-hoah, chiah pàng in; sī chèng lâng ūi-tio̍h in só͘ kiâⁿ ê, lâi kui êng-kng Siōng-tè. 22 In-ūi tùi sîn-jiah tit-tio̍h i-hó ê lâng, í-keng sì-cha̍p gōa hè. 23 In í-keng tit-tio̍h tháu-pàng, chiū khì chhē in ê pêng-iú, chiong chiah ê chè-si-thâu kap tiúⁿ-ló só͘ kóng ê ōe tùi in kóng. 24 In thiaⁿ-kìⁿ, chiū tâng-sim chhut siaⁿ tùi Siōng-tè kóng, Chú-cháiⁿ ah, lí sī chhòng-chō thiⁿ, tōe, hái, kap kî-tiong bān mi̍h ê; 25 lí bat tùi Sèng Sîn ēng lí ê lô͘-po̍k, goán ê chó͘, Tāi-pi̍t ê chhùi, lâi kóng, Lia̍t-pang siáⁿ-sū tōa siū-khì, Chiah ê peh-sìⁿ siáⁿ-sū kè-bô͘ khang-khang ê tāi? 26 Tōe-chiūⁿ ê lia̍t-ông chi̍t chôe khiā-teh, Chiah ê koaⁿ-oân iā saⁿ-kap chū-chi̍p, Lâi tùi-te̍k Chú, kap I ê Ki-tok; 27 in-ūi Hi-lu̍t, Pún-tiu Pí-lia̍p-to, kap gōa-pang lâng, í-ki̍p Í-sek-lia̍t chiah ê peh-sìⁿ, kó-jiân chū-chi̍p tī chit ê siâⁿ, lâi kong-kek lí só͘ boah-iû sèng ê Lô͘-po̍k Iâ-so͘, 28 lâi kiâⁿ lí ê chhiú, lí ê chí-ì só͘ tāi-seng tiāⁿ-tio̍h it-chhè beh chiâⁿ ê sū. 29 Taⁿ Chú ah, tio̍h kàm-chhat hiah ê lâng ê háng-hoah; hō͘ lí chiah ê lô͘-po̍k hó-táⁿ kóng lí ê tō-lí, 30 chiàu sî chhun lí ê chhiú lâi i pīⁿ; hō͘ sîn-jiah kî-sū tùi lí sèng ê Lô͘-po̍k Iâ-so͘ ê miâ lâi chiâⁿ. 31 Kî-tó soah, chū-chi̍p ê só͘-chāi tōa tín-tāng; chèng lâng lóng siū Sèng Sîn chhiong-móa, hó-táⁿ kóng Siōng-tè ê tō-lí. 32 Sìn ê lâng lóng chi̍t sim chi̍t chì; bô lâng kóng i só͘ ū ê sio̍k ka-kī; sī ta̍k hāng mi̍h chòe kong ê. 33 Sù-tô͘ ēng tōa koân-lêng kan-chèng Chú Iâ-so͘ ê koh-oa̍h; chèng lâng iā tit-tio̍h tōa un-tián. 34 Kî-tiong bô khiàm-kheh ê lâng; in-ūi kìⁿ ū chhân-hn̂g chhù-the̍h ê, lóng bōe i, tòa in só͘ bōe ê gûn, hē tī sù-tô͘ ê kha-ē; 35 chiàu ta̍k lâng só͘ khiàm-ēng, pun hō͘ in. 36 Ū Lī-bī cho̍k ê lâng, chhut-sì tī Ku-pí-lō͘, miâ Iok-sek, sù-tô͘ kiò i chòe Pa-ná-pa, (hoan-e̍k chiū-sī gâu an-ùi ê lâng), 37 i ū hn̂g chiū bōe-khì, chiong só͘ bōe ê gûn tòa-lâi, hē tī sù-tô͘ ê kha-ē.
1 但是有一人名亞拿尼亞，kap伊ê bó͘ Sat-hui-lat，賣伊ê產業，將所賣ê銀，暗靜留kúi-nā份，伊ê bó͘亦知； 2 其餘ê帶來hē tī使徒ê腳下。 3 彼得講，亞拿尼亞，啥事撒旦充滿你ê心來騙聖神，將賣園ê銀暗靜留kúi-nā 份？ 4 園iáu-bē賣，kiám m̄是你ê？賣了，hitê銀kiám m̄是你主意？你心內啥事想出chitê tāi-chì ah？你m̄是騙人，就是騙上帝。 5 亞拿尼亞聽見chiahê話，就lek落去，斷氣；聽見ê人lóng大驚。 6 Chiahê少年人起來，收拾伊ê身屍，扛出去埋葬。 7 約略過三點鐘久，伊ê bó͘亦入來，iáu-bē知chitê事。 8 彼得應伊講，你kā我講，lín賣園ê價錢是chiah chōe mah？講，Tio̍h，是chiah chōe。 9 但是彼得對伊講，Lín啥事同心來試主ê神ah？你看，埋葬你ê丈夫ê，in ê腳已經到門口，亦beh扛你出去。 10 婦人人即時lek tī伊ê腳前，斷氣；hiahê少年人入來，看伊已經死，就扛伊出去，埋葬tī伊丈夫ê身邊。 11 全教會kap見若聽見chiahê tāi-chì ê，lóng大驚。 12 Tùi使徒ê手有行chōe-chōe神蹟kap奇事tī百姓ê中間；眾人lóng同心聚集tī所羅門ê léng廊。 13 其餘ê人無一个敢近óa in；但是百姓尊重in； 14 信來歸主ê人益發加添，男女lóng真chōe； 15 甚至有扛病人到tī街路，hē tī舖á，ǹg望彼得經過ê時，in有ê ōe hō͘伊ê影蔭tio̍h。 16 Iáu有chōe-chōe人tùi耶路撒冷四圍ê城來；chhōa病人kap hō͘邪神所苦楚ê；in lóng得tio̍h醫好。 17 獨獨祭司頭，以及lóng總同--伊ê人，(就是撒都該黨，) khiā起來，滿心怨妒， 18 下手掠使徒，關in tī公ê監。 19 但是主ê天使暝時開監門，chhōa in出，講， 20 Lín tio̍h去khiā tī殿裡，用chitê活命ê話lóng對百姓講。 21 In聽見chiahê話，天phú光就入殿來教示。祭司頭kap 同--伊ê人到，招集公會，kap以色列百姓ê老大，差人去監裡帶in來。 22 衙役到tè，chhē in無tī監裡；就tò來報，講， 23 阮看見監關到真堅固，顧守ê人khiā tī ta̍k-ê門口；到開ê時，chhē無人tī內面。 24 殿司kap chiahê祭司頭聽見chiahê話，就為tio̍h in大躊躇，m̄知chitê事beh怎樣。 25 有一人來報in講，Lín所關tī監裡ê人，現在khiā tī殿裡教示百姓。 26 殿司kap衙役就去chhōa in來，m̄敢用強；因為驚百姓，驚了hō͘ in用石頭tìm。 27 Chhōa來了，就hō͘ in khiā tī公會ê面前。祭司頭問in，講， 28 阮bat嚴嚴禁lín莫得用chitê名教示人，lín就將lín ê教示遍傳tī耶路撒冷，beh用chit人ê血歸tī阮。 29 彼得kap其餘ê使徒應，講，順thàn上帝khah過頭tī順thàn人，是合宜。 30 Lín所吊tī柴裡，來害死ê耶穌，咱列祖ê上帝已經hō͘伊koh活。 31 Chitê耶穌，上帝用家己ê chiàⁿ手舉起伊做人君，做救主，beh將反悔kap赦罪賞賜以色列百姓。 32 Koh阮為tio̍h chiahê事做干證；上帝所賞賜hō͘順thàn伊ê人ê聖神也做干證。 33 In聽了，盡在受氣，ài害死in。 34 獨獨有一个法利賽人，名Ka-má-lia̍t，是眾百姓所敬重ê教法師，起來khiā tī公會中，吩咐hō͘ hiahê人暫時出去。 35 就對大家講，以色列人ah，lín tio̍h家己謹慎，beh怎樣辨chiahê人。 36 因為前有Tiu-tāi出頭，家己誇口做大；óa伊ê人約略四百；伊受刣，tè伊ê人四散，無lô去。 37 Chit人以後造家甲ê時，koh有加利利ê偤大出頭引誘百姓thàn伊；伊也滅無，tè伊ê人lóng四散。 38 Taⁿ我kā lín講，莫得chhap chiahê人，放kù-chāi in；因為chitê計謀，chitê所做，若出tī人，的確beh敗壞； 39 若出tī上帝，lín就bōe敗壞in；koh驚了lín也是kap上帝交戰。 40 In就thàn伊；召使徒來phah in，命令in莫得用耶穌ê名來講，就放in。 41 使徒離開公會前，lóng歡喜，是因為in得tio̍h看做會堪得為tio̍h chitê名受凌辱。 42 就tī殿裡，tī人家，教示人，傳耶穌做基督，ta̍k日無soah。
1 Nā-sī ū chi̍t lâng miâ A-ná-nî-a, kap i ê bó͘ Sat-hui-lat, bōe i ê sán-gia̍p, chiong só͘ bōe ê gûn, àm-chīⁿ lâu kúi-nā hūn, i ê bó͘ iāh chai; 2 kî-û ê tòa lâi hē tī sù-tô͘ ê kha-ē. 3 Pí-tek kóng, A-ná-nî-a, siáⁿ-sū Sat-tàn chhiong-móa lí ê sim lâi phiàn Sèng Sîn, chiong bōe hn̂g ê gûn àm-chīⁿ lâu kúi-nā hūn? 4 Hn̂g iáu-bē bōe, kiám m̄ sī lí ê? Bōe liáu, hit ê gûn kiám m̄ sī lí chú-ì? Lí sim-lāi siáⁿ-sū siūⁿ-chhut chit ê tāi-chì ah? Lí m̄ sī phiàn lâng, chiū-sī phiàn Siōng-tè. 5 A-ná-nî-a thiaⁿ-kìⁿ chiah ê ōe, chiū lek-lo̍h-khì, tn̄g khùi; thiaⁿ-kìⁿ ê lâng lóng tōa kiaⁿ. 6 Chiah ê siàu-liân lâng khí-lâi, siu-si̍p i ê sin-si, kng chhut-khì bâi-chòng. 7 Iok-lio̍k kè saⁿ tiám cheng kú, i ê bó͘ ia̍h ji̍p-lâi, iáu-bē chai chit ê sū. 8 Pí-tek ìn i kóng, Lí kā góa kóng, lín bōe hn̂g ê kè-chîⁿ sī chiah chōe mah? Kóng, Tio̍h, sī chiah chōe. 9 Nā-sī Pí-tek tùi i kóng, Lín siáⁿ-sū tâng-sim lâi chhì Chú ê Sîn ah? Lí khòaⁿ, bâi-chòng lí ê tiōng-hu ê, in ê kha í-keng kàu mn̂g-kháu, ia̍h beh kng lí chhut-khì. 10 Hū-jîn-lâng chek-sî lek tī i ê kha-chêng, tn̄g khùi; hiah ê siàu-liân lâng ji̍p-lâi, khòaⁿ i í-keng sí, chiū kng i chhut-khì, bâi-chòng tī i tiōng-hu ê sin-piⁿ. 11 Choân kàu-hōe kap kìⁿ-nā thiaⁿ-kìⁿ chiah ê tāi-chì ê, lóng tōa kiaⁿ. 12 Tùi sù-tô͘ ê chhiú ū kiâⁿ chōe-chōe sîn-jiah kap kî-sū tī peh-sìⁿ ê tiong-kan; chèng lâng lóng tâng-sim chū-chi̍p tī Só͘-lô-bûn ê léng-lông. 13 Kî-û ê lâng bô chi̍t-ê káⁿ kūn-óa in; nā-sī peh-sìⁿ chun-tiōng in; 14 sìn lâi kui Chú ê lâng it-hoat ke-thiⁿ, lâm-lú lóng chin chōe; 15 sīm-chì ū kng pīⁿ-lâng kàu tī ke-lō͘, hē tī pho͘-á, ǹg-bāng Pí-tek keng-kè ê sî, in ū-ê ōe hō͘ i ê iáⁿ ìm-tio̍h. 16 Iáu ū chōe-chōe lâng tùi Iâ-lō͘-sat-léng sì-ûi ê siâⁿ lâi; chhōa pīⁿ-lâng kap hō͘ siâ-sîn só͘ khó͘-chhó͘ ê; in lóng tit-tio̍h i-hó. 17 To̍k-to̍k chè-si-thâu, í-ki̍p lóng-chóng tâng--i ê lâng, (chiū-sī Sat-thó͘-kai tóng,) khiā-khí-lâi, móa-sim oàn-tò͘, 18 hē chhiú lia̍h sù-tô͘, koaiⁿ in tī kong ê kaⁿ. 19 Nā-sī Chú ê thiⁿ-sài mî-sî khui kaⁿ mn̂g, chhōa in chhut, kóng, 20 Lín tio̍h khì khiā tī tiān-ni̍h, ēng chit ê Oa̍h-miā ê ōe lóng tùi peh-sìⁿ kóng. 21 In thiaⁿ-kìⁿ chiah ê ōe, thiⁿ phú-kng chiū ji̍p tiān lâi kà-sī. Chè-si-thâu kap tâng--i ê lâng kàu, chio-chi̍p kong-hōe, kap Í-sek-lia̍t peh-sìⁿ ê lāu-tōa, chhe lâng khì kaⁿ-ni̍h tòa in lâi. 22 Gê-ia̍h kàu tè, chhē in bô tī kaⁿ-ni̍h; chiū tò-lâi pò, kóng, 23 Goán khòaⁿ-kìⁿ kaⁿ koaiⁿ kàu chin kian-kò͘, kò͘-siú ê lâng khiā tī ta̍k ê mn̂g-kháu; kàu khui ê sî, chhē bô lâng tī lāi-bīn. 24 Tiān-si kap chiah ê chè-si-thâu thiaⁿ-kìⁿ chiah ê ōe, chiū ūi-tio̍h in tōa tiû-tû, m̄ chai chit ê sū beh cháiⁿ-iūⁿ. 25 Ū chi̍t lâng lâi pò in kóng, Lín só͘ koaiⁿ tī kaⁿ-ni̍h ê lâng hiān-chāi khiā tī tiān-ni̍h kà-sī peh-sìⁿ. 26 Tiān-si kap gê-ia̍h chiū khì chhōa in lâi, m̄ káⁿ ēng kiông; in-ūi kiaⁿ peh-sìⁿ, kiaⁿ-liáu hō͘ in ēng chio̍h-thâu tìm. 27 Chhōa lâi liáu, chiū hō͘ in khiā tī kong-hōe ê bīn-chêng. Chè-si-thâu mn̄g in, kóng, 28 Goán bat giâm-giâm kìm lín bo̍h-tit ēng chit ê miâ kà-sī lâng, lín chiū chiong lín ê kà-sī piàn thoân tī Iâ-lō͘-sat-léng, beh ēng chit lâng ê huih kui tī goán. 29 Pí-tek kap kî-û ê sù-tô͘ ìn, kóng, Sūn-thàn Siōng-tè khah kè-thâu tī sūn-thàn lâng, sī ha̍p-gî. 30 Lín só͘ tiàu tī chhâ-ni̍h, lâi hāi-sí ê Iâ-so͘, lán lia̍t-chó͘ ê Siōng-tè í-keng hō͘ I koh-oa̍h. 31 Chit ê Iâ-so͘, Siōng-tè ēng ka-kī ê chiàⁿ chhiú kú-khí I chòe Jîn-kun, chòe Kiù-chú, beh chiong hoán-hóe kap sià-chōe siúⁿ-sù Í-sek-lia̍t peh-sìⁿ. 32 Koh goán ūi-tio̍h chiah ê sū chòe kan-chèng; Siōng-tè só͘ siúⁿ-sù hō͘ sūn-thàn I ê lâng ê Sèng Sîn iā chòe kan-chèng. 33 In thiaⁿ-liáu, chīn-chāi siū-khì, ài hāi-sí in. 34 To̍k-to̍k ū chi̍t ê Hoat-lī-sài lâng, miâ Ka-má-lia̍t, sī chèng peh-sìⁿ só͘ kèng-tiōng ê kàu-hoat-su, khí-lâi khiā tī kong-hōe tiong, hoan-hù hō͘ hiah ê lâng chiām-sî chhut-khì. 35 Chiū tùi tāi-ke kóng, Í-sek-lia̍t lâng ah, lín tio̍h ka-kī kín-sīn, beh cháiⁿ-iūⁿ pān chiah ê lâng. 36 In-ūi chêng ū Tiu-tāi chhut-thâu, ka-kī khoa-kháu chòe tōa; óa i ê lâng iok-lio̍k sì pah; i siū thâi, tè i ê lâng sì-sòaⁿ, bô-lô-khì. 37 Chit lâng í-āu chō ke-kah ê sî koh ū Ka-lī-lī ê Iû-tāi chhut-thâu ín-iú peh-sìⁿ thàn i; i iā bia̍t-bô, tè i ê lâng lóng sì-sòaⁿ. 38 Taⁿ góa kā lín kóng, Bo̍h-tit chhap chiah ê lâng, pàng kù-chāi in; in-ūi chit ê kè-bô͘, chit ê só͘ chòe, nā chhut tī lâng, tek-khak beh pāi-hoāi; 39 nā chhut tī Siōng-tè, lín chiū bōe pāi-hoāi in; koh kiaⁿ-liáu lín iā sī kap Siōng-tè kau-chiàn. 40 In chiū thàn i; tiàu sù-tô͘ lâi phah in, bēng-lēng in bo̍h-tit ēng Iâ-so͘ ê miâ lâi kóng, chiū pàng in. 41 Sù-tô͘ lī-khui kong-hōe chêng, lóng hoaⁿ-hí, sī in-ūi in tit-tio̍h khòaⁿ-chòe ōe kham-tit ūi-tio̍h chit ê Miâ siū lêng-jio̍k. 42 Chiū tī tiān-ni̍h, tī jîn-ke, kà-sī lâng, thoân Iâ-so͘ chòe Ki-tok, ta̍k ji̍t bô soah.
1 當hit時，學生加添chōe-chōe，有講希利尼話ê偤太人，對希伯來人出怨言，因為ta̍k日ê供給，無顧tio̍h in ê 寡婦。 2 十二個使徒叫眾學生來對in講，阮將上帝ê道理放下teh，來辨理食食，m̄合宜。 3 所以兄弟ah，tio̍h tùi lín中間揀有好名聲，受神kap智慧充滿ê，七人，阮就設立in管理chitê事。 4 阮beh專務祈禱、傳道。 5 眾人歡喜chitê話；就揀司提反，伊是有信kap聖神滿滿ê人，koh揀腓力、Pek-lô-ko-lô、Nî-ka-ná、Thê-bûn、Pa-bí-ná，kap bat入偤太教ê安提阿人Nî-ko-lah； 6 hō͘ in khiā tī使徒ê面前；就祈禱，kā in按手。 7 上帝ê道理ná興旺；tī耶路撒冷學生ê數額加添真chōe；祭司順服tī福音亦chōe-chōe。 8 司提反受恩典kap才能滿滿，行大ê奇事神蹟tī百姓ê中間。 9 Hit時有會堂叫做Lī-pek-tē-ná ê，kap 古利奈 ê，A-le̍k-san-thài ê，以及tùi Ki-lī-ka、亞西亞來ê，kúi-nā人起來kap司提反辯論， 10 司提反用智慧用神來講，in bōe能抵擋。 11 就用人出來，講，阮bat聽見伊講謗瀆摩西kap上帝ê話。 12 In koh教唆百姓，kap長老，kap經學士，忽然到，掠伊，帶到公會，叫假干證來，講， 13 Chit人講話攻擊chitê聖ê所在kap律法無soah； 14 因為阮bat聽見伊講，Chitê拿撒勒人耶穌beh毀壞chitê所在，也beh改換摩西所傳hō͘咱ê規例。 15 Hit-tia̍p坐tī公會中ê人，lóng注目看伊，看伊ê面親像天使ê面。
1 Tng hit sî, ha̍k-seng ke-thiⁿ chōe-chōe, ū kóng Hi-lī-nî ōe ê Iû-thài lâng, tùi Hi-pek-lâi lâng chhut oàn-giân, in-ūi ta̍k ji̍t ê kiong-kip, bô kò͘-tio̍h in ê kóaⁿ-hū. 2 Cha̍p-jī ê sù-tô͘ kiò chèng ha̍k-seng lâi tùi in kóng, Goán chiong Siōng-tè ê tō-lí pàng-hē teh, lâi pān-lí chia̍h-si̍t, m̄ ha̍p-gî. 3 Só͘-í hiaⁿ-tī ah, tio̍h tùi lín tiong-kan kéng ū hó miâ-siaⁿ, siū Sîn kap tì-hūi chhiong-móa ê, chhit lâng, goán chiū siat-li̍p in koán-lí chit ê sū. 4 Goán beh choan-bū kî-tó, thoân-tō. 5 Chèng lâng hoaⁿ-hí chit ê ōe; chiū kéng Sū-thê-hoán, i sī ū sìn kap Sèng Sîn móa-móa ê lâng, koh kéng Hui-le̍k, Pek-lô-ko-lô, Nî-ka-ná, Thê-bûn, Pa-bí-ná, kap bat ji̍p Iû-thài kàu ê An-thê-o lâng Nî-ko-lah; 6 hō͘ in khiā tī sù-tô͘ ê bīn-chêng; chiū kî-tó, kā in hōaⁿ chhiú. 7 Siōng-tè ê tō-lí ná heng-ōng; tī Iâ-lō͘-sat-léng ha̍k-seng ê siàu-gia̍h ke-thiⁿ chin chōe; chè-si sūn-ho̍k tī hok-im ia̍h chōe-chōe. 8 Sū-thê-hoán siū un-tián kap châi-lêng móa-móa, kiâⁿ tōa ê kî-sū sîn-jiah tī peh-sìⁿ ê tiong-kan. 9 Hit sî ū hōe-tn̂g kiò chòe Lī-pek-tē-ná ê, kap Kó͘-lī-nāi ê, A-le̍k-san-thài ê, í-ki̍p tùi Ki-lī-ka, A-se-a lâi ê, kúi-nā lâng khí-lâi kap Sū-thê-hoán piān-lūn, 10 Sū-thê-hoán ēng tì-hūi ēng Sîn lâi kóng, in bōe-ōe tí-tng. 11 Chiū ēng lâng chhut-lâi, kóng, Goán bat thiaⁿ-kìⁿ i kóng pòng-to̍k Mô͘-se kap Siōng-tè ê ōe. 12 In koh kàu-so peh-sìⁿ, kap tiúⁿ-ló, kap keng-ha̍k-sū, hut-jiân kàu, lia̍h i, tòa kàu kong-hōe, kiò ké kan-chèng lâi, kóng, 13 Chit lâng kóng-ōe kong-kek chit ê sèng ê só͘-chāi kap lu̍t-hoat bô soah; 14 in-ūi goán bat thiaⁿ-kìⁿ i kóng, Chit ê Ná-sat-le̍k lâng Iâ-so͘ beh húi-hoāi chit ê só͘-chāi, iā beh kóe-ōaⁿ Mô͘-se só͘ thoân hō͘ lán ê kui-lē. 15 Hit tia̍p chē tī kong-hōe tiong ê lâng, lóng chù-ba̍k khòaⁿ i, khòaⁿ i ê bīn chhin-chhiūⁿ thiⁿ-sài ê bīn.
1 祭司頭就講，Chiahê事是án-ni mah？ 2 司提反講，列位父兄，請聽，咱ê祖亞伯拉罕，iáu tī Bí-só͘-pho-tāi-bí，bē khiā起Hap-lân ê時，榮光ê上帝對伊顯現，kā伊講， 3 離開你ê地方kap宗族，到我所beh指示你ê地方。 4 Hit時伊就出Ka-le̍k-tí人ê地方，khiā起tī Hap-lân；伊ê老父死了後，上帝tùi hia kā伊徙到chit所在，就是lín taⁿ所khiā起ê； 5 tī chia並無產業hō͘伊，連khiā腳ê所在也無；hit時伊iáu-bē有kiáⁿ，但是上帝應允beh用chit所在hō͘伊做業，續到伊ê後裔。 6 總是上帝有án-ni講，伊ê後裔teh-beh出外tī異邦，人beh用in做奴才，pháiⁿ款待in，四百年久。 7 上帝koh講，In做奴才所服事ê國，我beh審判伊；後來in beh出來，服事我tī chit位。 8 Koh用割禮ê約hō͘伊；Tùi án-ni，伊生以撒，第八日kā伊行割禮；以撒生雅各，雅各生咱十二個祖。 9 列祖怨妒約瑟，賣伊去埃及； 10 但是上帝kap伊tī-teh，救伊脫離lóng總ê苦難，hō͘伊tī埃及王法老ê面前得tio̍h恩典kap智慧；法老就立伊總理埃及國，kap伊ê全家。 11 Tú-tio̍h埃及、迦南，遍地飢荒，大艱苦；咱ê列祖chhē無米糧。 12 雅各聽見埃及有五穀，就頭一pái 差咱ê列祖去。 13 到第二pái約瑟hō͘兄弟bat伊；約瑟ê族法老續得tio̍h知。 14 約瑟就差人poaⁿ請老父雅各，kap全族，七十五人來。 15 雅各就落去埃及；伊kap咱ê列祖死tī hia； 16 運棺到Sī-kiàm，埋葬tī亞伯拉罕用銀tùi Hap-boat ê kiaⁿ孫所買tī Sī-kiàm ê墓地。 17 到上帝tùi亞伯拉罕用chiù-chōa所應允ê，hitê期已經近，百姓就生湠興旺tī埃及； 18 到別個王m̄-bat約瑟ê，起來管理埃及。 19 伊謀害咱ê族，pháiⁿ款待咱ê祖，命令tio̍h棄sak in ê嬰á，hō͘ in bōe活。 20 Hit時摩西出世，非常ê清秀；養飼tī老父ê家三月日； 21 受棄sak ê時，法老ê cha-bó͘-kiáⁿ拾去，養飼做家己ê kiáⁿ。 22 摩西學習埃及人lóng總ê學問；講話行tāi-chì lóng有才能。 23 將近四十歲，想beh去看伊ê兄弟，以色列ê kiaⁿ孫。 24 看見一人受冤枉，就保護伊，替受屈ê人伸冤，phah埃及人； 25 phah算兄弟會曉悟上帝用伊ê手救in；但是in bōe曉悟。 26 隔日tú-tn̄g in teh相phah，ài hō͘ in koh和，就講，Lín是兄弟，啥事相欺負？ 27 Hit-ê欺負厝邊ê人拒絕伊，講，Chī-chūi設立你做官府，做審判司，來治理阮ah？ 28 你ài beh害死我，親像昨日害死hitê埃及人mah？ 29 摩西因為chit句話就走，出外tī米甸ê地方；tī hia生兩個kiáⁿ。 30 過四十年，tī西奈山ê曠野，刺phè火燄ê中間，有天使對伊顯現。 31 摩西看了，奇怪所看見ê；tú-á近óa beh認真看，就有主ê聲，講， 32 我就是你ê列祖ê上帝，就是亞伯拉罕、以撒、雅各ê上帝。摩西ngia̍uh-ngia̍uh-chhoah，m̄敢認真看。 33 主kā伊講，你ê鞋tio̍h thǹg起來；因為你所khiā ê位是聖地。 34 我ê百姓tī埃及，我實在看見in ê困苦，亦聽見in ê吐氣，就降臨來救in；taⁿ你來，我beh差你去埃及。 35 Chitê摩西就是in所拒絕ê，講，Chī-chūi設立你做官府，做審判司ah？Chitê人上帝託刺phè內對伊所顯現ê天使，差伊做官府，做救贖ê。 36 Chitê人chhōa in出，行奇事神蹟，tī埃及、紅海，kap曠野，四十年久。 37 Chitê人就是hitê kā以色列kiáⁿ孫講ê摩西，講，上帝beh tùi lín兄弟ê中間為tio̍h lín théng-siⁿ一个先知，親像我。 38 Chitê人就是hitê tī曠野裡 ê會中，kap tī西奈山對伊講話ê天使，以及列祖，saⁿ-kap tī-teh ê；伊亦得tio̍h活ê詔命傳hō͘咱； 39 咱ê列祖m̄-ài順thàn伊，反tńg拒絕伊，心倒tńg tī埃及，kā亞倫講， 40 你tio̍h kā阮造神明做頭chhōa阮；因為chitê chhōa阮出埃及ê摩西，m̄知伊怎樣。 41 Hit時in就造牛á，koh獻祭tī hitê像，歡喜in家己ê手所做ê。 42 上帝就oa̍t-lìn-tńg，chhut-chāi in服事天象；親像先知ê冊所記載，講， 以色列家ah，lín tī曠野歷過四十年， Kiám bat用牲禮祭物獻hō͘我mah？ 43 Lín扛Mô͘-lo̍k ê布棚， Kap Lí-hoan神ê星， 就是lín所造來拜ê像； 我beh遷徙lín tī巴比倫外。 44 咱列祖tī曠野有證據ê會幕，親像tùi摩西講ê吩咐，Tio̍h照所看見ê款式來造伊。 45 後來上帝趕逐外邦人tī咱ê祖ê面前，咱ê祖kap約書亞既然承接chitê會幕，就帶伊入去tiàm-tī hitê地方，直到大衛ê時； 46 伊得tio̍h恩典tī上帝ê面前，ài beh kā雅各ê上帝chhē一个khiā起ê位。 47 獨獨所羅門chiah kā伊起厝。 48 總是至koân ê無tiàm-tī人ê手所起ê；親像先知講， 49 主講，天是我ê座位， 地是我ê腳踏椅。 Lín beh kā我起甚麼號ê厝？ Á是我安歇ê所在tī tá-lo̍h ah？ 50 Chiahê一切kiám m̄是我ê手所創造ê mah？ 51 Lín ê頷頸硬，心kap耳未受割禮ê人，常常悖逆聖神；lín ê祖án-ni，lín 也án-ni。 52 先知中tá-lo̍h一个無hō͘ lín ê祖khún-tio̍k伊ah？hiahê讖語義ê teh-beh到ê人，in也害死in；taⁿ chitê義ê lín bat送交來害死伊； 53 tùi天使來設ê律法，lín受tio̍h也無守伊。 54 In聽見chiahê話，心內盡在受氣，ǹg伊咬牙切齒。 55 獨獨司提反hō͘聖神充滿，注目看天，看見上帝ê榮光，耶穌khiā tī上帝ê大pêng， 56 就講，看ah！我看見天開，人子khiā tī上帝ê大pêng。 57 In大聲喉叫，ng耳孔，同心oe-khoeh伊； 58 趕伊出城，用石頭tìm伊；做干證ê人將in ê衫hē tī少年人，名叫掃羅，ê腳前。 59 In用石頭tìm司提反；司提反求，講，主耶穌ah，接納我ê神。 60 Koh跪落去，大聲叫，講，主ah，莫得用chitê罪歸tī in。講soah就睏。掃羅也歡喜伊死。
1 Chè-si-thâu chiū kóng, Chiah ê sū sī án-ni mah? 2 Sū-thê-hoán kóng, Lia̍t-ūi hū-heng, chhiáⁿ thiaⁿ, Lán ê chó͘ A-pek-la̍h-hán, iáu tī Bí-só͘-pho-tāi-bí, bē khiā-khí Hap-lân ê sî, êng-kng ê Siōng-tè tùi i hián-hiān, kā i kóng, 3 Lī-khui lí ê tōe-hng kap chong-cho̍k, kàu góa só͘ beh chí-sī lí ê tōe-hng. 4 Hit sî i chiū chhut Ka-le̍k-tí lâng ê tōe-hng, khiā-khí tī Hap-lân; i ê lāu-pē sí liáu-āu, Siōng-tè tùi hia kā i sóa kàu chit só͘-chāi, chiū-sī lín taⁿ só͘ khiā-khí ê; 5 tī chia pēng bô sán-gia̍p hō͘ i, liân khiā-kha ê só͘-chāi iā bô; hit sî i iáu-bē ū kiáⁿ, nā-sī Siōng-tè èng-ún beh ēng chit só͘-chāi hō͘ i chòe gia̍p, sòa kàu i ê hō͘-è. 6 Chóng-sī Siōng-tè ū án-ni kóng, i ê hō͘-è teh-beh chhut-gōa tī īⁿ-pang, lâng beh ēng in chòe lô͘-châi, pháiⁿ khoán-thāi in, sì-pah nî kú. 7 Siōng-tè koh kóng, In chòe lô͘-châi só͘ ho̍k-sāi ê kok, góa beh sím-phòaⁿ i; āu-lâi in beh chhut-lâi, ho̍k-sāi góa tī chit ūi. 8 Koh ēng kat-lé ê iok hō͘ i; tùi án-ni i siⁿ Í-sat, tē poeh ji̍t kā i kiâⁿ kat-lé; Í-sat siⁿ Ngá-kok, Ngá-kok siⁿ lán cha̍p-jī ê chó͘. 9 Lia̍t-chó͘ oàn-tò͘ Iok-sek, bōe i khì Ai-ki̍p; 10 nā-sī Siōng-tè kap i tī-teh, kiù i thoat-lī lóng-chóng ê khó͘-lān, hō͘ i tī Ai-ki̍p ông Hoat-ló ê bīn-chêng tit-tio̍h un-tián kap tì-hūi; Hoat-ló chiū li̍p i chóng-lí Ai-ki̍p kok, kap i ê choân ke. 11 Tú-tio̍h Ai-ki̍p, Ka-lâm, piàn tōe ki-hng, tōa kan-khó͘; lán ê lia̍t-chó͘ chhē bô bí-niû. 12 Ngá-kok thiaⁿ-kìⁿ Ai-ki̍p ū gō͘-kak, chiū thâu chi̍t pái chhe lán ê lia̍t-chó͘ khì. 13 Kàu tē jī pái Iok-sek hō͘ hiaⁿ-tī bat i; Iok-sek ê cho̍k Hoat-ló sòa tit-tio̍h chai. 14 Iok-sek chiū chhe lâng poaⁿ-chhiáⁿ lāu-pē Ngá-kok, kap choân cho̍k, chhit-cha̍p-gō͘ lâng lâi. 15 Ngá-kok chiū lo̍h-khì Ai-ki̍p; i kap lán ê lia̍t-chó͘ sí tī hia; 16 ūn koan kàu Sī-kiàm, bâi-chòng tī A-pek-la̍h-hán ēng gûn tùi Hap-boat ê kiáⁿ-sun só͘ bóe tī Sī-kiàm ê bōng-tōe. 17 Kàu Siōng-tè tùi A-pek-la̍h-hán ēng chiù-chōa só͘ èng-ún ê, hit ê kî í-keng kūn, peh-sìⁿ chiū siⁿ-thòaⁿ heng-ōng tī Ai-ki̍p; 18 kàu pa̍t ê ông m̄ bat Iok-sek ê, khí-lâi koán-lí Ai-ki̍p. 19 I bô͘-hāi lán ê cho̍k, pháiⁿ khoán-thāi lán ê chó͘, bēng-lēng tio̍h khì-sak in ê eⁿ-á, hō͘ in bōe oa̍h. 20 Hit sî Mô͘-se chhut-sì, hui-siông ê chheng-siù; iúⁿ-chhī tī lāu-pē ê ke saⁿ ge̍h ji̍t; 21 siū khì-sak ê sî, Hoat-ló ê cha-bó͘-kiáⁿ khioh-khì, iúⁿ-chhī chòe ka-kī ê kiáⁿ. 22 Mô͘-se ha̍k-si̍p Ai-ki̍p lâng lóng-chóng ê ha̍k-būn; kóng ōe kiâⁿ tāi-chì lóng ū châi-lêng. 23 Chiong-kūn sì-cha̍p hè, siūⁿ beh khì khòaⁿ i ê hiaⁿ-tī, Í-sek-lia̍t ê kiáⁿ-sun. 24 Khòaⁿ-kìⁿ chi̍t lâng siū oan-óng, chiū pó-hō͘ i, thòe siū khut ê lâng sin-oan, phah Ai-ki̍p lâng; 25 phah-sǹg hiaⁿ-tī ōe hiáu-ngō͘ Siōng-tè ēng i ê chhiú kiù in; nā-sī in bōe hiáu-ngō͘. 26 Keh ji̍t tú-tn̄g in teh saⁿ-phah, ài hō͘ in koh hô, chiū kóng, Lín sī hiaⁿ-tī, siáⁿ-sū saⁿ khi-hū? 27 Hit ê khi-hū chhù-piⁿ ê lâng kū-choa̍t i, kóng, Chī-chūi siat-li̍p lí chòe koaⁿ-hú, chòe sím-phòaⁿ si, lâi tī-lí goán ah? 28 Lí ài beh hāi-sí góa, chhin-chhiūⁿ chā-ji̍t hāi-sí hit ê Ai-ki̍p lâng mah? 29 Mô͘-se in-ūi chit kù ōe chiū cháu, chhut-gōa tī Bí-tiân ê tōe-hng; tī hia siⁿ nn̄g ê kiáⁿ. 30 Kè sì-cha̍p nî, tī Se-nái soaⁿ ê khòng-iá, chhì-phè hé-iām ê tiong-kan, ū thiⁿ-sài tùi i hián-hiān. 31 Mô͘-se khòaⁿ-liáu, kî-koài só͘ khòaⁿ-kìⁿ ê; tú-á kūn-óa beh jīn-chin khòaⁿ, chiū ū Chú ê siaⁿ, kóng, 32 Góa chiū-sī lí ê lia̍t-chó͘ ê Siōng-tè, chiū-sī A-pek-la̍h-hán, Í-sat, Ngá-kok ê Siōng-tè. Mô͘-se ngia̍uh-ngia̍uh-chhoah, m̄ káⁿ jīn-chin khòaⁿ. 33 Chú kā i kóng, Lí ê ôe tio̍h thǹg-khí-lâi; in-ūi lí só͘ khiā ê ūi sī sèng tōe. 34 Góa ê peh-sìⁿ tī Ai-ki̍p, góa si̍t-chāi khòaⁿ-kìⁿ in ê khùn-khó͘, ia̍h thiaⁿ-kìⁿ in ê thó͘-khùi, chiū kàng-lîm lâi kiù in; taⁿ lí lâi, góa beh chhe lí khì Ai-ki̍p. 35 Chit ê Mô͘-se chiū-sī in só͘ kū-choa̍t ê, kóng, Chī-chūi siat-li̍p lí chòe koaⁿ-hú, chòe sím-phòaⁿ si ah? Chit ê lâng Siōng-tè thok chhì-phè lāi tùi i só͘ hián-hiān ê thiⁿ-sài, chhe i chòe koaⁿ-hú, chòe kiù-sio̍k ê. 36 Chit ê lâng chhōa in chhut, kiâⁿ kî-sū sîn-jiah, tī Ai-ki̍p, Âng-hái, kap khòng-iá, sì-cha̍p nî kú. 37 Chit ê lâng chiū-sī hit ê kā Í-sek-lia̍t kiáⁿ-sun kóng ê Mô͘-se, kóng, Siōng-tè beh tùi lín hiaⁿ-tī ê tiong-kan ūi-tio̍h lín théng siⁿ chi̍t ê sian-ti, chhin-chhiūⁿ góa. 38 Chit ê lâng chiū-sī hit ê tī khòng-iá-ni̍h ê hōe-tiong, kap tī Se-nái soaⁿ tùi i kóng ōe ê thiⁿ-sài, í-ki̍p lia̍t-chó͘, saⁿ-kap tī-teh ê; i ia̍h tit-tio̍h oa̍h ê chiàu-bēng thoân hō͘ lán; 39 lán ê lia̍t-chó͘ m̄ ài sūn-thàn i, hoán-tńg kū-choa̍t i, sim tò-tńg tī Ai-ki̍p, kā A-lûn kóng, 40 Lí tio̍h kā goán chō sîn-bêng chòe thâu chhōa goán; in-ūi chit ê chhōa goán chhut Ai-ki̍p ê Mô͘-se, m̄ chai i cháiⁿ-iūⁿ. 41 Hit sî in chiū chō gû-á, koh hiàn-chè tī hit ê siōng, hoaⁿ-hí in ka-kī ê chhiú só͘ chòe ê. 42 Siōng-tè chiū oa̍t-lìn-tńg, chhut-chāi in ho̍k-sāi thian-siōng; chhin-chhiūⁿ sian-ti ê chheh só͘ kì-chài, kóng, Í-sek-lia̍t ke ah, lín tī khòng-iá le̍k-kè sì-cha̍p nî, Kiám bat ēng seng-lé chè-mi̍h hiàn hō͘ góa mah? 43 Lín kng Mô͘-lo̍k ê pò͘-pîⁿ, Kap Lí-hoan sîn ê chhiⁿ, Chiū-sī lín só͘ chō lâi pài ê siōng; Góa beh chhian-sóa lín tī Pa-pí-lûn gōa. 44 Lán lia̍t-chó͘ tī khòng-iá ū chèng-kù ê hōe-bō͘, chhin-chhiūⁿ tùi Mô͘-se kóng ê hoan-hù, Tio̍h chiàu só͘ khòaⁿ-kìⁿ ê khoán-sit lâi chō i. 45 Āu-lâi Siōng-tè kóaⁿ-tio̍k gōa-pang lâng tī lán ê chó͘ ê bīn-chêng, lán ê chó͘ kap Iok-su-a kì-jiân sêng-chiap chit ê hōe-bō͘, chiū tòa i ji̍p khì tiàm-tī hit ê tōe-hng, ti̍t kàu Tāi-pi̍t ê sî; 46 i tit-tio̍h un-tián tī Siōng-tè ê bīn-chêng, ài beh kā Ngá-kok ê Siōng-tè chhē chi̍t ê khiā-khí ê ūi. 47 To̍k-to̍k Só͘-lô-bûn chiah kā I khí chhù. 48 Chóng-sī Chì-koâiⁿ-ê bô tiàm tī lâng ê chhiú só͘ khí ê; chhin-chhiūⁿ sian-ti kóng, 49 Chú kóng, Thiⁿ sī góa ê chō-ūi, Tōe sī góa ê kha-ta̍h-í. Lín beh kā góa khí sím-mi̍h hō ê chhù? Á-sī góa an-hioh ê só͘-chāi tī tá-lo̍h ah? 50 Chiah-ê it-chhè kiám m̄ sī góa ê chhiú só͘ chhòng-chō ê mah? 51 Lín ê ām-kún ngī, sim kap hī bē siū kat-lé ê lâng, siông-siông pōe-ge̍k Sèng Sîn; lín ê chó͘ án-ni, lín iā án-ni. 52 Sian-ti tiong tá-lo̍h chi̍t-ê bô hō͘ lín ê chó͘ khún-tio̍k i ah? hiah ê chhàm-gú Gī-ê teh-beh kàu ê lâng, in iā hāi-sí in; taⁿ chit ê Gī-ê lín bat sàng-kau lâi hāi-sí I; 53 tùi thiⁿ-sài lâi siat ê lu̍t-hoat, lín siū-tio̍h iā bô siú i. 54 In thiaⁿ-kìⁿ chiah ê ōe, sim-lāi chīn-chāi siū-khì, ǹg i kā-gê chhiat-chhí. 55 To̍k-to̍k Sū-thê-hoán hō͘ Sèng Sîn chhiong-móa, chù-ba̍k khòaⁿ thiⁿ, khòaⁿ-kìⁿ Siōng-tè ê êng-kng, Iâ-so͘ khiā tī Siōng-tè ê tōa pêng, 56 chiū kóng, Khòaⁿ ah! góa khòaⁿ-kìⁿ thiⁿ khui, Jîn-chú khiā tī Siōng-tè ê tōa pêng. 57 In tōa siaⁿ âu-kiò, ng hī-khang, tâng sim oe-khoeh i; 58 kóaⁿ i chhut siâⁿ, ēng chio̍h-thâu tìm i; chòe kan-chèng ê lâng chiong in ê saⁿ hē tī siàu-liân lâng, miâ kiò Sò-lô, ê kha-chêng. 59 In ēng chio̍h-thâu tìm Sū-thê-hoán; Sū-thê-hoán kiû, kóng, Chú Iâ-so͘ ah, chiap-la̍p góa ê sîn. 60 Koh kūi-lo̍h-khì, tōa siaⁿ kiò, kóng, Chú ah, bo̍h-tit ēng chit ê chōe kui tī in. Kóng soah chiū khùn. Sò-lô iā hoaⁿ-hí i sí.
1 Hit日tī耶路撒冷ê教會tú-tio̍h大khún-tio̍k；使徒以外，lóng四散tī偤太、撒馬利亞chiahê地方。 2 有敬虔ê人埋葬司提反，為tio̍h伊搥胸大啼哭。 3 掃羅大陷害教會，入ta̍k人ê家，拖in ê男女，送交落監。 4 Tùi án-ni，hiahê四散ê人遍行，傳福音ê道理。 5 腓力落去撒馬利亞ê城，用基督傳hō͘ in。 6 眾人聽見，koh看見所行ê神蹟，就同心意向腓力ê話。 7 因為chōe-chōe人有犯tio̍h邪神，hiahê邪神大聲喉叫出去；piàn-sūi ê、跛腳ê，亦chōe-chōe得tio̍h醫好。 8 Hit-ê城內大歡喜。 9 總是有一人，名叫西門，平素tī城內行邪術，自誇做大，hō͘撒馬利亞ê百姓gông-ngia̍h； 10 tùi細到大，無m̄意向伊，講，Chit人是上帝ê權能，就是hitê稱做大ê。 11 In意向伊ê緣故，是因為伊久久用邪術hō͘ in gông-ngia̍h。 12 到in信腓力所傳ê福音，論上帝ê國kap耶穌基督ê名，就有男女受洗禮。 13 西門家己也信；已經受洗禮，常常跟隨腓力；看伊所行chiahê神蹟大權能，就gông-ngia̍h。 14 Tī耶路撒冷ê使徒聽見撒馬利亞已經接納上帝ê道理，就差彼得約翰去in hia。 15 In已經落去，就替in祈禱，hō͘ in受聖神； 16 因為聖神iáu-bē臨到in一人；in只有受洗禮，歸tī主耶穌ê名nā-tiāⁿ。 17 Tùi án-ni，kā in按手，in就受聖神。 18 總是西門看見tùi使徒ê按手就有聖神hō͘人，chiah將錢獻hō͘ in， 19 講，亦將chitê權hō͘我，致到我ê手所hōaⁿ ê人受tio̍h聖神。 20 獨獨彼得對伊講，你ê銀kap你saⁿ-kap滅無，因為你phah算上帝ê賞賜beh用錢來買。 21 你tī chitê事無份，無干涉；因為tī上帝ê面前你ê心不正。 22 所以tio̍h反悔離開你chitê pháiⁿ，來求主，kiám-chhái你心內ê念頭會得赦免。 23 因為我看見你入tī苦膽ê中間，hō͘不義綑縛。 24 西門應講，Lín替我求主，hō͘ lín所講ê lóng無到tī我。 25 In已經做干證來傳主ê道理，就tò去耶路撒冷；tī撒馬利亞人chōe-chōe ê鄉社傳福音。 26 主ê天使tùi腓力講，起來，tùi南勢去，到tùi耶路撒冷落去Ka-sat ê路；hia就是曠野。 27 就起來去；tú-tn̄g有一个Ai-thê-o-pek人，就是Ai-thê-o-pek女王，Kan-tāi-ki，有權ê太監，總管伊ê銀庫；伊已經到耶路撒冷敬拜； 28 倒tńg來，坐tī車裡，teh讀先知以賽亞ê冊。 29 聖神kā腓力講，進前去近óa hit張車。 30 腓力走去就近伊，聽見伊teh讀先知以賽亞ê冊，就講，你所讀ê，你會明白mah？ 31 伊講，無人指示我，thái-thó話？就請腓力上車saⁿ-kap坐。 32 所讀ê聖經就是chit段， 伊hō͘人牽，親像羊到受刣 ê所在， 伊無開嘴，親像羊á tùi煎毛ê無出聲； 33 伊卑微ê時，受無公義ê審判。 伊ê世代是誰 beh傳述？ 因為伊ê活命tùi地上受奪去。 34 太監應腓力講，請問，先知講chitê話是指甚麼人？是指本身，á是別人ah？ 35 腓力就開嘴，tùi chitê聖經起，用耶穌傳hō͘伊。 36 行路ê時，到有水ê位；太監講，你看，chia有水；我受洗禮有甚麼阻礙？ 37 【併tī頂節】 38 就吩咐停車；腓力kap太監兩人落水；腓力就kā伊行洗禮。 39 Tùi水裡上來ê時，主ê神帶腓力去；太監無koh看見伊，因為做伊上路，也真歡喜。 40 後來腓力tī A-só-to͘ hō͘人tú-tio̍h；就遍行chiahê城傳福音，直到該撒利亞。
1 Hit ji̍t tī Iâ-lō͘-sat-léng ê kàu-hōe tú-tio̍h tōa khún-tio̍k; sù-tô͘ í-gōa, lóng sì-sòaⁿ tī Iû-thài, Sat-má-lī-a chiah ê tōe-hng. 2 Ū kèng-khiân ê lâng bâi-chòng Sū-thê-hoán, ūi-tio̍h i tûi heng tōa thî-khàu. 3 Sò-lô tōa hām-hāi kàu-hōe, ji̍p ta̍k lâng ê ke, thoa in ê lâm-lú, sàng-kau lo̍h kaⁿ. 4 Tùi án-ni hiah ê sì-sòaⁿ ê lâng piàn kiâⁿ, thoân hok-im ê tō-lí. 5 Hui-le̍k lo̍h-khì Sat-má-lī-a ê siâⁿ, ēng Ki-tok thoân hō͘ in. 6 Chèng lâng thiaⁿ-kìⁿ, koh khòaⁿ-kìⁿ só͘ kiâⁿ ê sîn-jiah, chiū tâng sim ì-hiòng Hui-le̍k ê ōe. 7 In-ūi chōe-chōe lâng ū hoān-tio̍h siâ-sîn, hiah ê siâ-sîn tōa siaⁿ âu-kiò chhut-khì; piàn-sūi ê, pái-kha ê, ia̍h chōe-chōe tit-tio̍h i-hó. 8 Hit ê siâⁿ-lāi tōa hoaⁿ-hí. 9 Chóng-sī ū chi̍t lâng, miâ kiò Se-bûn, pêng-sò͘ tī siâⁿ-lāi kiâⁿ siâ-su̍t, chū-khoa chòe tōa, hō͘ Sat-má-lī-a ê peh-sìⁿ gông-ngia̍h; 10 tùi sòe kàu tōa, bô m̄ ì-hiòng i, kóng, Chit lâng sī Siōng-tè ê koân-lêng, chiū-sī hit ê chheng chòe Tōa ê. 11 In ì-hiòng i ê iân-kò͘, sī in-ūi i kú-kú ēng siâ-su̍t hō͘ in gông-ngia̍h. 12 Kàu in sìn Hui-le̍k só͘ thoân ê hok-im, lūn Siōng-tè ê kok kap Iâ-so͘ Ki-tok ê miâ, chiū ū lâm-lú siū sóe-lé. 13 Se-bûn ka-kī iā sìn; í-keng siū sóe-lé, siông-siông kun-sûi Hui-le̍k; khòaⁿ i só͘ kiâⁿ chiah ê sîn-jiah tōa koân-lêng, chiū gông-ngia̍h. 14 Tī Iâ-lō͘-sat-léng ê sù-tô͘ thiaⁿ-kìⁿ Sat-má-lī-a í-keng chiap-la̍p Siōng-tè ê tō-lí, chiū chhe Pí-tek Iok-hān khì in hia. 15 In í-keng lo̍h-khì, chiū thòe in kî-tó, hō͘ in siū Sèng Sîn; 16 in-ūi Sèng Sîn iáu-bē lîm-kàu in chi̍t lâng; in chí-ū siū sóe-lé, kui tī Chú Iâ-so͘ ê miâ nā-tiāⁿ. 17 Tùi án-ni kā in hōaⁿ chhiú, in chiū siū Sèng Sîn . 18 Chóng-sī Se-bûn khòaⁿ-kìⁿ tùi sù-tô͘ ê hōaⁿ chhiú chiū ū Sèng Sîn hō͘ lâng, chiah chiong chîⁿ hiàn hō͘ in, 19 kóng, Ia̍h chiong chit ê koân hō͘ góa, tì-kàu góa ê chhiú só͘ hōaⁿ ê lâng siū-tio̍h Sèng Sîn. 20 To̍k-to̍k Pí-tek tùi i kóng, Lí ê gûn kap lí saⁿ-kap bia̍t-bô, in-ūi lí phah-sǹg Siōng-tè ê siúⁿ-sù beh ēng chîⁿ lâi bóe. 21 Lí tī chit ê sū bô hūn, bô kan-sia̍p; in-ūi tī Siōng-tè ê bīn-chêng lí ê sim put-chèng. 22 Só͘-í tio̍h hoán-hóe lī-khui lí chit ê pháiⁿ, lâi kiû Chú, kiám-chhái lí sim-lāi ê liām-thâu ōe tit sià-bián. 23 In-ūi góa khòaⁿ-kìⁿ lí ji̍p tī khó͘-táⁿ ê tiong-kan, hō͘ put-gī khún-pa̍k. 24 Se-bûn ìn kóng, Lín thòe góa kiû Chú, hō͘ lín só͘ kóng ê lóng bô kàu tī góa. 25 In í-keng chòe kan-chèng lâi thoân Chú ê tō-lí, chiū tò-khì Iâ-lō͘-sat-léng; tī Sat-má-lī-a lâng chōe-chōe ê hiuⁿ-siā thoân hok-im. 26 Chú ê thiⁿ-sài tùi Hui-le̍k kóng, Khí-lâi, tùi lâm-sì khì, kàu tùi Iâ-lō͘-sat-léng lo̍h-khì Ka-sat ê lō͘; hia chiū-sī khòng-iá. 27 Chiū khí-lâi khì; tú-tn̄g ū chi̍t ê Ai-thê-o-pek lâng, chiū-sī Ai-thê-o-pek lú-ông, Kan-tāi-ki, ū koân ê thài-kàm, chóng-koán i ê gûn-khò͘; i í-keng kàu Iâ-lō͘-sat-léng kèng-pài; 28 tò-tńg-lâi, chē tī chhia-ni̍h, teh tha̍k sian-ti Í-sài-a ê chheh. 29 Sèng Sîn kā Hui-le̍k kóng, Chìn-chêng khì kūn-óa hit tiuⁿ chhia. 30 Hui-le̍k cháu-khì chiū-kūn i, thiaⁿ-kìⁿ i teh tha̍k sian-ti Í-sài-a ê chheh, chiū kóng, Lí só͘ tha̍k ê, lí ōe bêng-pe̍k mah? 31 I kóng, Bô lâng chí-sī góa, thái-thó ōe? Chiū chhiáⁿ Hui-le̍k chiūⁿ chhia saⁿ-kap chē. 32 Só͘ tha̍k ê sèng-keng chiū-sī chit tōaⁿ, I hō͘ lâng khan, chhin-chhiūⁿ iûⁿ kàu siū thâi ê só͘-chāi, I bô khui chhùi, Chhin-chhiūⁿ iûⁿ-á tùi chián-mn̂g ê bô chhut siaⁿ; 33 I pi-bî ê sî, siū bô kong-gī ê sím-phòaⁿ. I ê sè-tāi chī-chūi beh thoân-su̍t? In-ūi I ê oa̍h-miā tùi tōe-chiūⁿ siū toa̍t-khì. 34 Thài-kàm ìn Hui-le̍k kóng, Chhiáⁿ mn̄g, sian-ti kóng chit ê ōe sī chí sím-mi̍h lâng? sī chí pún-sin, á-sī pa̍t lâng ah? 35 Hui-le̍k chiū khui chhùi, tùi chit ê sèng-keng khí, ēng Iâ-so͘ thoân hō͘ i. 36 Kiâⁿ lō͘ ê sî, kàu ū chúi ê ūi; thài-kàm kóng, Lí khòaⁿ, chia ū chúi; góa siū sóe-lé ū sím-mi̍h chó͘-gāi? 37 【pēng tī téng chat】 38 Chiū hoan-hù thêng chhia; Hui-le̍k kap thài-kàm nn̄g lâng lo̍h chúi; Hui-le̍k chiū kā i kiâⁿ sóe-lé. 39 Tùi chúi-ni̍h chiūⁿ-lâi ê sî, Chú ê Sîn tòa Hui-le̍k khì; thài-kàm bô koh khòaⁿ-kìⁿ i, in-ūi chòe i chiūⁿ lō͘, iā chin hoaⁿ-hí. 40 Āu-lâi Hui-le̍k tī A-só-to͘ hō͘ lâng tú-tio̍h; chiū piàn kiâⁿ chiah ê siâⁿ thoân hok-im, ti̍t kàu Kai-sat-lī-a.
1 掃羅iáu-kú一味háng-hoah ài 刣主ê學生，去見祭司頭， 2 tùi伊求phoe hō͘大馬色chiahê會堂，若tú-tio̍h thàn chitê路ê人，無論男女，伊就thang縛in，帶到耶路撒冷。 3 行近大馬色ê時，忽然tùi天有光圍纍照伊； 4 伊就跋倒tī地裡，聽見聲kā伊講，掃羅，掃羅，啥事khún-tio̍k我？ 5 伊講，主ah，你是是誰？講，我就是你所khún-tio̍k ê耶穌。 6 總是你tio̍h起來入城，你所應該做ê beh kā你講。 7 同行ê人靜靜khiā-teh，聽見聲，也無看見人。 8 掃羅tùi地裡起來；目睭thí開，bōe看見甚麼；人牽伊ê手，chhōa伊入大馬色。 9 歷過三日bōe看見，無食也無lim。 10 Tī大馬色有一个學生名亞拿尼亞；主tī異象中kā伊講，亞拿尼亞ah。伊講，主ah，我tī chia。 11 主對伊講，起來，去 hit條街路叫做直ê，tī偤大ê 家chhē大數人，名掃羅：因為伊tú-tú teh祈禱； 12 koh有看見一人，名亞拿尼亞，入來，kā伊按手，hō͘伊能看見。 13 但是亞拿尼亞應講，主ah，我聽見chōe-chōe人講，chit人tī耶路撒冷bat怎樣大pháiⁿ款待你chiahê聖徒； 14 koh伊tī chia有chiahê祭司頭ê權，thang來縛見若求叫你ê名ê人。 15 獨獨主kā伊講，做你去；伊是我揀選ê器具，beh報揚我ê名tī外邦，kap國王，以及以色列kiaⁿ孫ê面前； 16 我也beh hō͘伊知，伊tio̍h 因為我ê名受jōa-chōe ê艱苦。 17 亞拿尼亞就去，入伊ê厝；手hōaⁿ伊，講，兄弟掃羅，主，就是你來ê時路中出現hō͘你看ê耶穌，差我來，hō͘你能看見，koh得tio̍h聖神充滿。 18 Liâm-piⁿ對伊ê目睭有物ka-la̍uh，親像魚鱗，伊就看見；起來受洗禮； 19 已經食就勇健。 掃羅kap大馬色ê學生saⁿ-kap tòa kúi-nā日。 20 Liâm-piⁿ tī chiahê會堂宣傳耶穌，講伊是上帝ê kiáⁿ。 21 聽見ê人lóng gông-ngia̍h，講，Chit人kiám m̄是hitê tī耶路撒冷殘害凡若求叫chitê名ê mah？koh來chia tiau-tî beh縛來拖in交hō͘ chiahê祭司頭。 22 獨獨掃羅益發有能力，駁倒tòa tī大馬色ê偤太人，辯明chitê是基督。 23 過chōe-chōe日，偤太人saⁿ-kap計謀beh 刣伊；總是in ê計謀掃羅知。 24 In亦日暝tī城門裡當等beh 刣伊； 25 但是伊ê學生透暝將掃羅用籃tùi城牆kā伊lūi落去。 26 已經到耶路撒冷，beh kap學生交陪；in lóng驚伊，m̄信伊是學生。 27 獨獨巴拿巴chhōa伊就近使徒，將伊tī路中怎樣看見主，主kap伊講話，以及伊tòa大馬色怎樣好膽tī耶穌ê名來傳，lóng總講起。 28 就tī耶路撒冷kap in出入，好膽tī主ê名來傳； 29 亦kap講希利尼話ê偤太人講話辯論；獨獨hiahê人圖謀beh 刣伊。 30 兄弟知，就送伊落該撒利亞，hō͘伊tò去大數。 31 Tùi án-ni，遍偤太、加利利，撒馬利亞ê教會有平安，得tio̍h建立，行tāi-chì敬畏主，也受聖神ê安慰，人額ná加添。 32 彼得遍行四方ê時，也落去就近tiàm-tī Lū-tāi ê聖徒。 33 Tī hia tú-tio̍h一人，名Í-nî-ngá，因為患tio̍h piàn-sūi，倒床八年。 34 彼得kā伊講，Í-nî-ngá，耶穌基督醫好你lah；起來，你ê舖á家己整頓。伊liâm-piⁿ起來。 35 見若tòa tī Lū-tāi kap Sat-lûn ê人看見伊，就歸服主。 36 Tī Iok-phàⁿ有一个女徒，名Tāi-pí-tāi，翻譯就是To-ka：行好事kap賑濟滿滿。 37 當時破病死；人洗伊ê身屍，hē tī樓頂。 38 Lū-tāi近Iok-phàⁿ，學生聽見彼得tī hia，就差兩人去chhē伊，求講，請來阮chia，m̄-thang 延chhiân。 39 彼得就起身kap in 去。已經到，chhōa伊上樓；眾守寡人khiā tī彼得ê身邊，teh哮，將To-ka kap in tī-teh ê時所做ê衣服hō͘伊看。 40 彼得就kah眾人出去，跪落去，祈禱；oa̍t-tńg身ǹg身屍，講Tāi-pí-tāi，起來。伊ê目睭thí開；看見彼得，就起來坐。 41 彼得伸手扶伊起來，叫chiahê聖徒kap守寡人入來，將koh活ê To-ka交hō͘ in。 42 Thong Iok-phàⁿ lóng知；就有chōe-chōe人信主。 43 彼得tī Iok-phàⁿ久久kap一个礬皮師傅西門saⁿ-kap tòa。
1 Sò-lô iáu-kú it-bī háng-hoah ài thâi Chú ê ha̍k-seng, khì kìⁿ chè-si-thâu, 2 tùi i kiû phoe hō͘ Tāi-má-sek chiah ê hōe-tn̂g, nā tú-tio̍h thàn chit ê Lō͘ ê lâng, bô lūn lâm-lú, i chiū thang pa̍k in, tòa kàu Iâ-lō͘-sat-léng. 3 Kiâⁿ kūn Tāi-má-sek ê sî, hut-jiân tùi thiⁿ ū kng ûi-lûi chiò i; 4 i chiū poa̍h-tó tī tōe-ni̍h, thiaⁿ-kìⁿ siaⁿ kā i kóng, Sò-lô, Sò-lô, siáⁿ-sū khún-tio̍k góa? 5 I kóng, Chú ah, lí sī chī-chūi? Kóng, Góa chiū-sī lí só͘ khún-tio̍k ê Iâ-so͘. 6 Chóng-sī lí tio̍h khí-lâi ji̍p siâⁿ, lí só͘ eng-kai chòe ê beh kā lí kóng. 7 Tâng kiâⁿ ê lâng chēng-chēng khiā-teh, thiaⁿ-kìⁿ siaⁿ, iā bô khòaⁿ-kìⁿ lâng. 8 Sò-lô tùi tōe-ni̍h khí-lâi; ba̍k-chiu thí-khui, bōe khòaⁿ-kìⁿ sím-mi̍h; lâng khan i ê chhiú, chhōa i ji̍p Tāi-má-sek. 9 Le̍k-kè saⁿ ji̍t bōe khòaⁿ-kìⁿ, bô chia̍h iā bô lim. 10 Tī Tāi-má-sek ū chi̍t ê ha̍k-seng miâ A-ná-nî-a; Chú tī īⁿ-siōng tiong kā i kóng, A-ná-nî-a ah. I kóng, Chú ah, góa tī chia. 11 Chú tùi i kóng, Khí-lâi, khì hit tiâu ke-lō͘ kiò chòe Ti̍t ê, tī Iû-tāi ê ke chhē Tāi-sò͘ lâng, miâ Sò-lô: in-ūi i tú-tú teh kî-tó; 12 koh ū khòaⁿ-kìⁿ chi̍t lâng, miâ A-ná-nî-a, ji̍p-lâi, kā i hōaⁿ chhiú, hō͘ i ōe khòaⁿ-kìⁿ. 13 Nā-sī A-ná-nî-a ìn kóng, Chú ah, góa thiaⁿ-kìⁿ chōe-chōe lâng kóng, chit lâng tī Iâ-lō͘-sat-léng bat cháiⁿ-iūⁿ tōa pháiⁿ khoán-thāi lí chiah ê sèng-tô͘; 14 koh i tī chia ū chiah ê chè-si-thâu ê koân, thang lâi pa̍k kìⁿ-nā kiû-kiò lí ê miâ ê lâng. 15 To̍k-to̍k Chú kā i kóng, Chòe lí khì; i sī góa kéng-soán ê khì-kū, beh pò-iông góa ê miâ tī gōa-pang, kap kok-ông, í-ki̍p Í-sek-lia̍t kiáⁿ-sun ê bīn-chêng; 16 góa iā beh hō͘ i chai, i tio̍h in-ūi góa ê miâ siū jōa chōe ê kan-khó͘. 17 A-ná-nî-a chiū khì, ji̍p i ê chhù; chhiú hōaⁿ i, kóng, Hiaⁿ-tī Sò-lô, Chú, chiū-sī lí lâi ê sî lō͘-tiong chhut-hiān hō͘ lí khòaⁿ ê Iâ-so͘, chhe góa lâi, hō͘ lí ōe khòaⁿ-kìⁿ, koh tit-tio̍h Sèng Sîn chhiong-móa. 18 Liâm-piⁿ tùi i ê ba̍k-chiu ū mi̍h ka-la̍uh, chhin-chhiūⁿ hî-lân, i chiū khòaⁿ-kìⁿ; khí-lâi siū sóe-lé; 19 í-keng chia̍h chiū ióng-kiāⁿ. Sò-lô kap Tāi-má-sek ê ha̍k-seng saⁿ-kap tòa kúi-nā ji̍t. 20 Liâm-piⁿ tī chiah ê hōe-tn̂g soan-thoân Iâ-so͘, kóng I sī Siōng-tè ê Kiáⁿ. 21 Thiaⁿ-kìⁿ ê lâng lóng gông-ngia̍h, kóng, Chit lâng kiám m̄ sī hit ê tī Iâ-lō͘-sat-léng chân-hāi hoān-nā kiû-kiò chit ê miâ ê mah? koh lâi chia tiau-tî beh pa̍k lâi thoa in kau hō͘ chiah ê chè-si-thâu. 22 To̍k-to̍k Sò-lô it-hoat ū lêng-le̍k, pok-tó tòa tī Tāi-má-sek ê Iû-thài lâng, piān-bêng chit-ê sī Ki-tok. 23 Kè chōe-chōe ji̍t, Iû-thài lâng saⁿ-kap kè-bô͘ beh thâi i; chóng-sī in ê kè-bô͘ Sò-lô chai. 24 In ia̍h ji̍t mî tī siâⁿ-mn̂g-ni̍h tng-tán beh thâi i; 25 nā-sī i ê ha̍k-seng thàu-mî chiong Sò-lô ēng nâ tùi siâⁿ-chhiûⁿ kā i lūi-lo̍h-khì. 26 Í-keng kàu Iâ-lō͘-sat-léng, beh kap ha̍k-seng kau-pôe; in lóng kiaⁿ i, m̄ sìn i sī ha̍k-seng. 27 To̍k-to̍k Pa-ná-pa chhōa i chiū-kūn sù-tô͘, chiong i tī lō͘-tiong cháiⁿ-iūⁿ khòaⁿ-kìⁿ Chú, Chú kap i kóng ōe, í-ki̍p i tòa Tāi-má-sek cháiⁿ-iūⁿ hó-táⁿ tī Iâ-so͘ ê miâ lâi thoân, lóng-chóng kóng-khí. 28 Chiū tī Iâ-lō͘-sat-léng kap in chhut ji̍p, hó-táⁿ tī Chú ê miâ lâi thoân; 29 ia̍h kap kóng Hi-lī-nî ōe ê Iû-thài lâng kóng ōe piān-lūn; to̍k-to̍k hiah ê lâng tô͘-bô͘ beh thâi i. 30 Hiaⁿ-tī chai, chiū sàng i lo̍h Kai-sat-lī-a, hō͘ i tò-khì Tāi-sò͘. 31 Tùi án-ni piàn Iû-thài, Ka-lī-lī, Sat-má-lī-a ê kàu-hōe ū pêng-an, tit-tio̍h kiàn-li̍p, kiâⁿ tāi-chì kèng-ùi Chú, iā siū Sèng Sîn ê an-ùi, lâng-gia̍h ná ke-thiⁿ. 32 Pí-tek piàn kiâⁿ sì-hng ê sî, iā lo̍h-khì chiū-kūn tiàm-tī Lū-tāi ê sèng-tô͘. 33 Tī hia tú-tio̍h chi̍t lâng, miâ Í-nî-ngá, in-ūi hoān-tio̍h piàn-sūi, tó chhn̂g poeh nî. 34 Pí-tek kā i kóng, Í-nî-ngá, Iâ-so͘ Ki-tok i-hó lí lah; khí-lâi, lí ê pho͘-á ka-kī chéng-tùn. I liâm-piⁿ khí-lâi. 35 Kìⁿ-nā tòa tī Lū-tāi kap Sat-lûn ê lâng khòaⁿ-kìⁿ i, chiū kui-ho̍k Chú. 36 Tī Iok-phàⁿ ū chi̍t ê lú-tō͘, miâ Tāi-pí-tāi, hoan-e̍k chiū-sī To-ka: kiâⁿ hó sū kap chín-chè móa-móa. 37 Tong sî phòa-pīⁿ sí; lâng sóe i ê sin-si, hē tī lâu-téng. 38 Lū-tāi kūn Iok-phàⁿ, ha̍k-seng thiaⁿ-kìⁿ Pí-tek tī hia, chiū chhe nn̄g lâng khì chhē i, kiû kóng, Chhiáⁿ lâi goán chia, m̄-thang iân-chhiân. 39 Pí-tek chiū khí-sin kap in khì. Í-keng kàu, chhōa i chiūⁿ lâu; chèng chiú-kóaⁿ lâng khiā tī Pí-tek ê sin-piⁿ, teh háu, chiong To-ka kap in tī-teh ê sî só͘ chòe ê i-ho̍k hō͘ i khòaⁿ. 40 Pí-tek chiū kah chèng lâng chhut-khì, kūi-lo̍h-khì, kî-tó; oa̍t-tńg-sin ǹg sin-si, kóng Tāi-pí-tāi, khí-lâi. I ê ba̍k-chiu thí-khui; khòaⁿ-kìⁿ Pí-tek, chiū khí-lâi chē. 41 Pí-tek chhun chhiú hû i khí-lâi, kiò chiah ê sèng-tô͘ kap chiú-kóaⁿ lâng ji̍p-lâi, chiong koh-oa̍h ê To-ka kau hō͘ in. 42 Thong Iok-phàⁿ lóng chai; chiū ū chōe-chōe lâng sìn Chú. 43 Pí-tek tī Iok-phàⁿ kú-kú kap chi̍t ê hoân-phê sai-hū Se-bûn saⁿ-kap tòa.
1 Tī該撒利亞有一人，名哥尼流，做意大利營ê百總， 2 伊是敬虔ê人，kap全家敬畏上帝，chōe-chōe賑濟百姓，常常祈禱上帝。 3 日時約略三點鐘，tī異象中明明看見上帝ê天使入來就近伊，對伊講，哥尼流。 4 伊注目看，真驚，講，主ah，有啥事？就kā伊講，你ê祈禱，你ê賑濟已經上到上帝ê面前做記念。 5 Taⁿ你tio̍h差人去Iok-phàⁿ，請hitê西門，稱做彼得ê，來； 6 伊歇tī礬皮師傅西門tau，伊ê厝tī海邊。 7 Kap伊講話ê天使已經退去，哥尼流就叫兩個奴僕，kap一个敬虔ê兵時常跟隨伊ê； 8 將chiahê tāi-chì lóng kā in講，就差in 去Iok-phàⁿ。 9 隔日，in行路已經近城，約略日中晝，彼得上厝頂祈禱； 10 真iau，ài食；人tú-tú teh備辦tǹg；彼得ê神魂遊tī象外； 11 就看見天開，有器具降落，親像大幅布，縛四ê角頭，墜tī地裡： 12 內面有地上ta̍k類四腳ê獸，蟲thōa，kap天中ê飛鳥。 13 Koh有聲對伊講，彼得，起來；刣來食。 14 但是彼得講，主ah，斷斷m̄-thang，因為凡若粗俗ê物kap無清氣ê，我未bat食。 15 第二pái有聲koh對伊講，上帝所hō͘伊清氣ê，你莫得掠做粗俗。 16 Án-ni三pái；hitê器具liâm-piⁿ收上天。 17 彼得心內teh躊躇所看見ê異象甚麼意思，tú-tú hit-tia̍p哥尼流所差來ê人，有問到西門ê厝，khiā tī門外， 18 出聲teh問看有西門，稱做彼得ê，歇tī chia á無。 19 彼得iáu teh想異象ê時，聖神kā伊講，有三人teh chhē你。 20 Taⁿ tio̍h起來，落去，kap in 去，m̄免僥疑；因為是我差in。 21 彼得落去，見hiahê人，講，我就是lín所chhē ê人；lín來是為tio̍h啥事？ 22 In就講，百總哥尼流是義人，koh敬畏上帝，hō͘偤太全國所o-ló，奉聖ê天使指示伊，tio̍h請你到伊ê厝，續聽你ê話。 23 彼得就請in入來，留in歇teh。 隔日起身kap in 去，koh有Iok-phàⁿ ê兄弟kúi-nā人kap伊同行。 24 Koh隔日，入該撒利亞。哥尼流已經聚集伊ê親人kap好朋友，teh thèng候in。 25 彼得tú-á入去ê時，哥尼流迎接伊，仆tī伊ê腳前，來拜伊。 26 總是彼得牽伊起來，講，起來；我家己也是人。 27 Kap伊講話就入去看見chōe-chōe人聚集； 28 就對in講，lín知偤太人kap別族ê人親近，á是來往，本是無合例；但是上帝已經指示我，無論甚麼人m̄-thang講伊做粗俗無清氣； 29 所以我受請，無推辭，就來。Taⁿ問，lín請我甚麼意思。 30 哥尼流講，四日前chitê時，我tī厝內，下晡三點鐘，teh祈禱；就忽然有一人，衣裳光iàⁿ-iàⁿ，khiā tī我ê面前， 31 講，哥尼流，tī上帝ê面前你ê祈禱已經聽見，你ê賑濟已經得tio̍h記念。 32 Taⁿ tio̍h差人到Iok-phàⁿ，請西門，稱做彼得ê，來；伊tiàm-tī海邊，礬皮師傅西門ê厝。 33 所以我liâm-piⁿ 差人到你hia；你來真好。Taⁿ阮lóng tī上帝ê面前，ài beh聽主所命令你lóng總ê話。 34 彼得開嘴，講，Taⁿ我真正知上帝無用外貌取人； 35 獨獨tī ta̍k邦國見有敬畏伊來行義ê人，hō͘伊歡喜接納。 36 上帝所寄hō͘以色列kiaⁿ孫ê話，tùi耶穌基督來傳和平ê福音，(伊是萬有ê主) ， 37 chitê消息lín知是tī約翰所傳ê洗禮以後，tùi加利利起到遍偤太； 38 就是拿撒勒人耶穌，上帝有怎樣用聖神kap才能抹伊；伊就四界行做好事，醫好見若魔鬼所壓制ê；因為上帝kap伊tī-teh。 39 見若伊tī偤太人ê地方kap耶路撒冷所行ê，阮做干證；人就吊伊tī柴裡，來害死伊。 40 到第三日，上帝hō͘伊koh活，續出現， 41 m̄是hō͘眾百姓看，是hō͘上帝事先所揀選為tio̍h伊做干證ê人看，就是阮chiahê，tī伊tùi死人中koh活ê了後kap伊saⁿ-kap lim食ê人。 42 伊koh命令阮傳hō͘百姓，干證chitê是上帝所立定做活人死人ê審判司。 43 眾先知亦為tio̍h伊做干證，就是凡若信伊ê人，tùi伊ê名得tio̍h罪赦。 44 彼得iáu-kú teh講chiahê話ê時，聖神降臨tī見若聽道理ê人。 45 奉割禮ê信徒，kap彼得saⁿ-kap來ê，因為聖神ê賞賜亦降落tī外邦人，就lóng奇怪。 46 因為聽見in用chiahê腔口teh講，koh o-ló上帝做大。 47 彼得就應講，Chiahê人已經受tio̍h聖神，親像咱一樣，是誰會禁得用水kā in行洗禮ah？ 48 就命令in tī耶穌基督ê名受洗禮。Tùi án-ni，請伊tòa kúi-nā日。
1 Tī Kai-sat-lī-a ū chi̍t lâng, miâ Ko-nî-liû, chòe Í-tāi-lī iâⁿ ê pé-chóng, 2 i sī kèng-khiân ê lâng, kap choân ke kèng-ùi Siōng-tè, chōe-chōe chín-chè peh-sìⁿ, siông-siông kî-tó Siōng-tè. 3 Ji̍t-sî iok-lio̍k saⁿ tiám cheng, tī īⁿ-siōng tiong bêng-bêng khòaⁿ-kìⁿ Siōng-tè ê thiⁿ-sài ji̍p-lâi chiū-kūn i, tùi i kóng, Ko-nî-liû. 4 I chù-ba̍k khòaⁿ, chin kiaⁿ, kóng, Chú ah, ū siáⁿ-sū? Chiū kā i kóng, Lí ê kî-tó, lí ê chín-chè í-keng chiūⁿ kàu Siōng-tè ê bīn-chêng chòe kì-liām. 5 Taⁿ lí tio̍h chhe lâng khì Iok-phàⁿ, chhiáⁿ hit ê Se-bûn, chheng chòe Pí-tek ê, lâi; 6 i hioh tī hoân-phê sai-hū Se-bûn tau , i ê chhù tī hái-piⁿ. 7 Kap i kóng ōe ê thiⁿ-sài í-keng thè-khì, Ko-nî-liû chiū kiò nn̄g ê lô͘-po̍k, kap chi̍t ê kèng-khiân ê peng sî-siông kun-sûi i ê; 8 chiong chiah ê tāi-chì lóng kā in kóng, chiū chhe in khì Iok-phàⁿ. 9 Keh ji̍t, in kiâⁿ lō͘ í-keng kūn siâⁿ, iok-lio̍k ji̍t tiong-tàu, Pí-tek chiūⁿ chhù-téng kî-tó; 10 chin iau, ài chia̍h; lâng tú-tú teh pī-pān tǹg; Pí-tek ê sîn-hûn iû tī siōng gōa; 11 chiū khòaⁿ-kìⁿ thiⁿ khui, ū khì-kū kàng-lo̍h, chhin-chhiūⁿ tōa pak pò͘, pa̍k sì ê kak-thâu, tūi tī tōe-ni̍h: 12 lāi-bīn ū tōe-chiūⁿ ta̍k lūi sì-kha ê siù, thâng-thōa, kap thiⁿ tiong ê pe-chiáu. 13 Koh ū siaⁿ tùi i kóng, Pí-tek, khí-lâi; thâi lâi chia̍h. 14 Nā-sī Pí-tek kóng, Chú ah, toàn-toàn m̄-thang, in-ūi hoān-nā chho͘-sio̍k ê mi̍h kap bô chheng-khì ê, góa bē bat chia̍h. 15 Tē jī pái ū siaⁿ koh tùi i kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k. 16 Án-ni saⁿ pái; hit ê khì-kū liâm-piⁿ siu chiūⁿ thiⁿ. 17 Pí-tek sim-lāi teh tiû-tû só͘ khòaⁿ-kìⁿ ê īⁿ-siōng sím-mi̍h ì-sù, tú-tú hit tia̍p Ko-nî-liû só͘ chhe lâi ê lâng, ū mn̄g kàu Se-bûn ê chhù, khiā tī mn̂g-gōa, 18 chhut siaⁿ teh mn̄g khòaⁿ ū Se-bûn, chheng chòe Pí-tek ê, hioh tī chia á bô. 19 Pí-tek iáu teh siūⁿ īⁿ-siōng ê sî, Sèng Sîn kā i kóng, Ū saⁿ lâng teh chhē lí. 20 Taⁿ tio̍h khí-lâi, lo̍h-khì, kap in khì, m̄ bián giâu-gî; in-ūi sī góa chhe in. 21 Pí-tek lo̍h-khì, kìⁿ hiah ê lâng, kóng, Góa chiū-sī lín só͘ chhē ê lâng; lín lâi sī ūi-tio̍h siáⁿ-sū? 22 In chiū kóng, Pé-chóng Ko-nî-liû sī gī lâng, koh kèng-ùi Siōng-tè, hō͘ Iû-thài choân kok só͘ o-ló, hōng sèng ê thiⁿ-sài chí-sī i, tio̍h chhiáⁿ lí kàu i ê chhù, sòa thiaⁿ lí ê ōe. 23 Pí-tek chiū chhiáⁿ in ji̍p-lâi, lâu in hioh-teh. Keh ji̍t khí-sin kap in khì, koh ū Iok-phàⁿ ê hiaⁿ-tī kúi-nā lâng kap i tâng kiâⁿ. 24 Koh keh ji̍t, ji̍p Kai-sat-lī-a. Ko-nî-liû í-keng chū-chi̍p i ê chhin-lâng kap hó pêng-iú, teh thèng-hāu in. 25 Pí-tek tú-á ji̍p-khì ê sî, Ko-nî-liû ngiâ-chih i, phak tī i ê kha-chêng, lâi pài i. 26 Chóng-sī Pí-tek khan i khí-lâi, kóng, Khí-lâi; góa ka-kī iā sī lâng. 27 Kap i kóng ōe chiū ji̍p-khì khòaⁿ-kìⁿ chōe-chōe lâng chū-chi̍p; 28 chiū tùi in kóng, lín chai Iû-thài lâng kap pa̍t cho̍k ê lâng chhin-kūn, á-sī lâi-óng, pún sī bô ha̍p lē; nā-sī Siōng-tè í-keng chí-sī góa, bô lūn sím-mi̍h lâng m̄-thang kóng i chòe chho͘-sio̍k bô chheng-khì; 29 só͘-í góa siū chhiáⁿ, bô the-sî, chiū lâi. Taⁿ mn̄g, lín chhiáⁿ góa sím-mi̍h ì-sù. 30 Ko-nî-liû kóng, Sì ji̍t chêng chit ê sî, góa tī chhù-lāi, ē-po͘ saⁿ tiám cheng, teh kî-tó; chiū hut-jiân ū chi̍t lâng, i-chiûⁿ kng-iàⁿ-iàⁿ, khiā tī góa ê bīn-chêng, 31 kóng, Ko-nî-liû, tī Siōng-tè ê bīn-chêng lí ê kî-tó í-keng thiaⁿ-kìⁿ, lí ê chín-chè í-keng tit-tio̍h kì-liām. 32 Taⁿ tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê, lâi; i tiàm tī hái-piⁿ, hoân-phê sai-hū Se-bûn ê chhù. 33 Só͘-í góa liâm-piⁿ chhe lâng kàu lí hia; lí lâi chin hó. Taⁿ goán lóng tī Siōng-tè ê bīn-chêng, ài beh thiaⁿ Chú só͘ bēng-lēng lí lóng-chóng ê ōe. 34 Pí-tek khui chhùi, kóng, Taⁿ góa chin-chiàⁿ chai Siōng-tè bô ēng gōa-māu chhú lâng; 35 to̍k-to̍k tī ta̍k pang-kok kìⁿ ū kèng-ùi I lâi kiâⁿ gī ê lâng, hō͘ I hoaⁿ-hí chiap-la̍p. 36 Siōng-tè só͘ kià hō͘ Í-sek-lia̍t kiáⁿ-sun ê ōe, tùi Iâ-so͘ Ki-tok lâi thoân hô-pêng ê hok-im, (I sī bān ū ê Chú), 37 chit ê siau-sit lín chai sī tī Iok-hān só͘ thoân ê sóe-lé í-āu, tùi Ka-lī-lī khí kàu piàn Iû-thài; 38 chiū-sī Ná-sat-le̍k lâng Iâ-so͘, Siōng-tè ū cháiⁿ-iūⁿ ēng Sèng Sîn kap châi-lêng boah I; I chiū sì-kè kiâⁿ chòe hó sū, i-hó kìⁿ-nā Mô͘-kúi só͘ ap-chè ê; in-ūi Siōng-tè kap I tī-teh. 39 Kìⁿ-nā I tī Iû-thài lâng ê tōe-hng kap Iâ-lō͘-sat-léng só͘ kiâⁿ ê, goán chòe kan-chèng; lâng chiū tiàu I tī chhâ-ni̍h, lâi hāi-sí I. 40 Kàu tē saⁿ ji̍t, Siōng-tè hō͘ I koh-oa̍h, sòa chhut-hiān, 41 m̄ sī hō͘ chèng peh-sìⁿ khòaⁿ, sī hō͘ Siōng-tè tāi-seng só͘ kéng-soán ūi-tio̍h I chòe kan-chèng ê lâng khòaⁿ, chiū-sī goán chiah-ê, tī I tùi sí-lâng tiong koh-oa̍h ê liáu-āu kap I saⁿ-kap lim-chia̍h ê lâng. 42 I koh bēng-lēng goán thoân hō͘ peh-sìⁿ, kan-chèng chit-ê sī Siōng-tè só͘ li̍p-tiāⁿ chòe oa̍h-lâng sí-lâng ê sím-phòaⁿ si. 43 Chèng sian-ti ia̍h ūi-tio̍h I chòe kan-chèng, chiū-sī hoān-nā sìn I ê lâng, tùi I ê miâ tit-tio̍h chōe sià. 44 Pí-tek iáu-kú teh kóng chiah ê ōe ê sî, Sèng Sîn kàng-lîm tī kìⁿ-nā thiaⁿ tō-lí ê lâng. 45 Hōng kat-lé ê sìn-tô͘, kap Pí-tek saⁿ-kap lâi ê, in-ūi Sèng Sîn ê siúⁿ-sù ia̍h kàng-lo̍h tī gōa-pang lâng, chiū lóng kî-koài. 46 In-ūi thiaⁿ-kìⁿ in ēng chiah ê khiuⁿ-kháu teh kóng, koh o-ló Siōng-tè chòe tōa. 47 Pí-tek chiū ìn kóng, Chiah ê lâng í-keng siū-tio̍h Sèng Sîn, chhin-chhiūⁿ lán chi̍t iūⁿ, chī-chūi ōe kìm-tit ēng chúi kā in kiâⁿ sóe-lé ah? 48 Chiū bēng-lēng in tī Iâ-so͘ Ki-tok ê miâ siū sóe-lé. Tùi án-ni chhiáⁿ i tòa kúi-nā ji̍t.
1 使徒kap tiàm-tī偤太ê兄弟聽外邦人亦受上帝ê道理。 2 到彼得上耶路撒冷ê時，hiahê奉割禮ê人kap伊爭辯，講， 3 你bat入去就近無受割禮ê人，kap in saⁿ-kap食。 4 但是彼得照次序對in排列講，我tī Iok-phàⁿ城祈禱； 5 神魂遊tī象外ê時，看見異象，有一个器具親像大幅布，縛四個角頭，tùi天墜落到我ê面前； 6 我注目看，詳細想伊，看見有地上四腳ê cheng-siⁿ、野獸、蟲thōa，kap天中ê飛鳥。 7 Koh聽見有聲kā我講，彼得，起來；刣來食。 8 我講，主ah，斷斷m̄-thang；因為凡若粗俗ê物，á是無清氣ê，lóng 未bat入我ê嘴。 9 但是聲第二pái tùi天應講，上帝所hō͘伊清氣ê，你莫得掠做粗俗。 10 親像án-ni三pái；ta̍k項物就koh收上天。 11 忽然有三人tùi該撒利亞差來就近我ê，tú-tú khiā tī阮所tiàm ê厝外。 12 聖神kā我講tio̍h kap in 去，莫得分別。Koh有chit六個兄弟kap我去；阮lóng入hit人ê厝； 13 伊就kā阮講，àn怎樣bat看見一个天使khiā tī伊ê厝，對伊講，Tio̍h差人到Iok-phàⁿ，請西門，稱做彼得ê來； 14 伊beh用話kā你講，你kap你全家tùi chiahê話beh得tio̍h救。 15 我tú-tú teh講ê時，聖神降臨tī in，親像起頭tī咱一樣。 16 我就記得主ê話，講，約翰是用水行洗禮；獨獨lín beh tī聖神受洗。 17 Taⁿ上帝既然用chitê恩賜hō͘ in，親像tī咱信主耶穌基督ê時所hō͘咱ê一樣，我是是誰，能阻擋上帝ah？ 18 Hiah-ê人聽這話，就靜靜，亦歸榮光上帝，講，Án-ni-siⁿ，是上帝亦hō͘外邦人反悔來得tio̍h活命。 19 為tio̍h司提反ê事所生起 ê苦難來四散ê人，遍行到腓尼基、居比路、安提阿；無tùi別人講道理，只有tùi偤太人講nā-tiāⁿ。 20 但是其中有居比路、古利奈，kúi-nā人到安提阿，亦tùi希利尼人傳主耶穌ê福音。 21 主ê手kap in tī-teh；信來歸tī主ê，in ê數額不止chōe。 22 論到chiahê人有消息傳到耶路撒冷，hō͘教會聽見；in就差巴拿巴去安提阿； 23 已經到，看見上帝ê恩，就歡喜；苦勸眾人用心志結聯tī主； 24 因為伊是好人，有聖神kap信滿滿；Tùi án-ni，加添chōe-chōe人歸tī主。 25 伊去大數chhē掃羅； 26 已經tú-tio̍h，就chhōa伊到安提阿。In tī教會中聚集一年久，教示chōe-chōe人；koh學生稱做基督徒是tùi安提阿起。 27 當hit時有kúi-nā個先知tùi耶路撒冷落去到安提阿。 28 其中一人，名A-ka-pò͘，起來khiā，靠聖神來指明普天下beh大飢荒；當Kek-ló-tiu ê年間果然有chitê事。 29 Tùi án-ni，學生定tio̍h意思，ta̍k人照伊ê力量，寄去供給tiàm偤太ê兄弟； 30 in就照án-ni行，tùi巴拿巴kap掃羅經手，寄交hiahê長老。
1 Sù-tô͘ kap tiàm-tī Iû-thài ê hiaⁿ-tī thiaⁿ gōa-pang lâng ia̍h siū Siōng-tè ê tō-lí. 2 Kàu Pí-tek chiūⁿ Iâ-lō͘-sat-léng ê sî, hiah ê hōng kat-lé ê lâng kap i cheng-piān, kóng, 3 Lí bat ji̍p-khì chiū-kūn bô siū kat-lé ê lâng, kap in saⁿ-kap chia̍h. 4 Nā-sī Pí-tek chiàu chhù-sū tùi in pâi-lia̍t kóng, Góa tī Iok-phàⁿ siâⁿ kî-tó; 5 sîn-hûn iû tī siōng gōa ê sî, khòaⁿ-kìⁿ īⁿ-siōng, ū chi̍t ê khì-kū chhin-chhiūⁿ tōa pak pò͘, pa̍k sì ê kak-thâu, tùi thiⁿ tūi-lo̍h kàu góa ê bīn-chêng; 6 góa chù-ba̍k khòaⁿ, siông-sè siūⁿ i, khòaⁿ-kìⁿ ū tōe-chiūⁿ sì-kha ê cheng-siⁿ, iá-siù, thâng-thōa, kap thiⁿ-tiong ê pe-chiáu. 7 Koh thiaⁿ-kìⁿ ū siaⁿ kā góa kóng, Pí-tek, khí-lâi; thâi lâi chia̍h. 8 Góa kóng, Chú ah, toàn-toàn m̄-thang; in-ūi hoān-nā chho͘-sio̍k ê mi̍h, á-sī bô chheng-khì ê, lóng bē bat ji̍p góa ê chhùi. 9 Nā-sī siaⁿ tē jī pái tùi thiⁿ ìn kóng, Siōng-tè só͘ hō͘ i chheng-khì ê, lí bo̍h-tit lia̍h chòe chho͘-sio̍k. 10 Chhin-chhiūⁿ án-ni saⁿ pái; ta̍k hāng mi̍h chiū koh siu chiūⁿ thiⁿ. 11 Hut-jiân ū saⁿ lâng tùi Kai-sat-lī-a chhe lâi chiū-kūn góa ê, tú-tú khiā tī goán só͘ tiàm ê chhù gōa. 12 Sèng Sîn kā góa kóng tio̍h kap in khì, bo̍h-tit hun-piat. Koh ū chit la̍k ê hiaⁿ-tī kap góa khì; goán lóng ji̍p hit lâng ê chhù; 13 i chiū kā goán kóng, àn-cháiⁿ-iūⁿ bat khòaⁿ-kìⁿ chi̍t ê thiⁿ-sài khiā tī i ê chhù, tùi i kóng, Tio̍h chhe lâng kàu Iok-phàⁿ, chhiáⁿ Se-bûn, chheng chòe Pí-tek ê lâi; 14 i beh ēng ōe kā lí kóng, lí kap lí choân ke tùi chiah ê ōe beh tit-tio̍h kiù. 15 Góa tú-tú teh kóng ê sî, Sèng Sîn kàng-lîm tī in, chhin-chhiūⁿ khí-thâu tī lán chi̍t iūⁿ. 16 Góa chiū kì-tit Chú ê ōe, kóng, Iok-hān sī ēng chúi kiâⁿ sóe-lé; to̍k-to̍k lín beh tī Sèng Sîn siū sóe. 17 Taⁿ Siōng-tè kì-jiân ēng chit ê un-sù hō͘ in, chhin-chhiūⁿ tī lán sìn Chú Iâ-so͘ Ki-tok ê sî só͘ hō͘ lán ê chi̍t iūⁿ, góa sī chī-chūi, ōe chó͘-tòng Siōng-tè ah? 18 Hiah ê lâng thiaⁿ che ōe, chiū chēng-chēng, ia̍h kui êng-kng Siōng-tè, kóng, Án-ni-siⁿ, sī Siōng-tè ia̍h hō͘ gōa-pang lâng hoán-hóe lâi tit-tio̍h oa̍h-miā. 19 Ūi-tio̍h Sū-thê-hoán ê sū só͘ siⁿ-khí ê khó͘-lān lâi sì-sòaⁿ ê lâng, piàn kiâⁿ kàu Hui-nî-ki, Ku-pí-lō͘, An-thê-o; bô tùi pa̍t lâng kóng tō-lí, chí ū tùi Iû-thài lâng kóng nā-tiāⁿ. 20 Nā-sī kî-tiong ū Ku-pí-lō͘, Kó͘-lī-nāi, kúi-nā lâng kàu An-thê-o, ia̍h tùi Hi-lī-nî lâng thoân Chú Iâ-so͘ ê hok-im. 21 Chú ê chhiú kap in tī-teh; sìn lâi kui tī Chú ê, in ê siàu-gia̍h put-chí chōe. 22 Lūn-kàu chiah ê lâng ū siau-sit thoân kàu Iâ-lō͘-sat-léng, hō͘ kàu-hōe thiaⁿ-kìⁿ; in chiū chhe Pa-ná-pa khì An-thê-o; 23 í-keng kàu, khòaⁿ-kìⁿ Siōng-tè ê un, chiū hoaⁿ-hí; khó͘-khǹg chèng lâng ēng sim-chì kiat-liân tī Chú; 24 in-ūi i sī hó lâng, ū Sèng Sîn kap sìn móa-móa; tùi án-ni ke-thiⁿ chōe-chōe lâng kui tī Chú. 25 I khì Tāi-sò͘ chhē Sò-lô; 26 í-keng tú-tio̍h, chiū chhōa i kàu An-thê-o. In tī kàu-hōe tiong chū-chi̍p chi̍t nî kú, kà-sī chōe-chōe lâng; koh ha̍k-seng chheng chòe Ki-tok-tô͘ sī tùi An-thê-o khí. 27 Tng hit sî ū kúi-nā ê sian-ti tùi Iâ-lō͘-sat-léng lo̍h-khì kàu An-thê-o. 28 Kî-tiong chi̍t lâng, miâ A-ka-pò͘, khí-lâi khiā, khò Sèng Sîn lâi chí-bêng phó͘ thiⁿ-ē beh tōa ki-hng; tng Kek-ló-tiu ê nî-kan kó-jiân ū chit ê sū. 29 Tùi án-ni ha̍k-seng tiāⁿ-tio̍h ì-sù, ta̍k lâng chiàu i ê le̍k-liōng, kià khì kiong-kip tiàm Iû-thài ê hiaⁿ-tī; 30 in chiū chiàu án-ni kiâⁿ, tùi Pa-ná-pa kap Sò-lô keng-chhiú, kià kau hiah ê tiúⁿ-ló.
1 將近hit時，希律王下手陷害教會中kúi-nā人。 2 用刀刣約翰ê兄弟雅各。 3 看見偤太人歡喜，就koh掠彼得。Hit時就是除酵ê日。 4 已經掠就關伊tī監裡，交hō͘四班ê兵顧守，每班四人；意思beh tī pôaⁿ過節後帶伊出，辦伊hō͘百姓看。 5 Tùi án-ni，彼得留tī監裡；獨獨教會替伊切切求上帝。 6 希律teh-beh提伊出，hit暝彼得縛tī兩條鐵鏈，綑tī兩個兵ê中間；koh顧守ê人tī門外teh顧守。 7 忽然有主ê天使khiā tī邊頭，房內有光teh照；搭彼得ê hia̍p下，叫伊醒，講，緊緊起來。鐵鏈就對伊ê手lak去。 8 天使kā伊講，Tio̍h hâ帶、穿鞋，伊照án-ni行。Koh kā伊講，Moa你ê衫，tè我。 9 就出來tè伊；m̄知天使所做是真，掠做是看見異象。 10 已經經過第一kap第二顧守ê所在，到透城ê鐵門；hitê門為tio̍h in家己開；就出去，行過一條街；天使liâm-piⁿ離開伊。 11 彼得醒悟，講，Taⁿ我真正知主差伊ê天使救我脫離希律ê手，kap偤太ê百姓一盡所ǹg望ê。 12 已經想明chitê事，就到約翰稱做馬可ê老母馬利亞ê厝；tī hia有chōe-chōe人聚集teh祈禱。 13 伊phah外門ê時，有cha-bó͘ gín-ná名Lô-tāi，出來聽。 14 認得彼得ê聲，因為歡喜ê緣故無開門，走入去kā人講，彼得khiā tī門外。 15 但是in對伊講，你teh狂lah。Cha-bó͘ gín-ná出力講真正是。In就講，是伊ê天使。 16 彼得koh phah門無soah；in開門看見伊，真gông-ngia̍h。 17 伊搖手kah in莫做聲，就對in講起主怎樣chhōa伊出監。Koh講，Tio̍h將chiahê事kā雅各kap兄弟講。就出去，去別所在。 18 到天光，兵丁m̄知彼得tá-lo̍h去，就大擾動。 19 希律chhē伊bōe tio̍h，就審問顧守ê兵，命令拖in 去 刣。就離開偤太，落去該撒利亞khiā起。 20 希律不止受氣Chhui-lô Se-tùn ê人；總是hiahê人同心就近伊，拜託跟隨王ê人臣Pek-lah-sū-to͘求和；因為in ê地方tùi王ê地方得tio̍h米糧。 21 希律tī所定tio̍h ê日期穿王服，坐tī座位，當面對in講。 22 百姓叫，講，這是上帝ê聲，m̄是人ê聲。 23 希律無歸榮光上帝，主ê天使隨時phah伊；就hō͘蟲咬，氣斷。 24 但是上帝ê道理ná開闊興旺。 25 巴拿巴掃羅，賑濟人ê事辨明白，就tùi耶路撒冷倒tńg，chhōa約翰，稱做馬可ê，saⁿ-kap 去。
1 Chiong-kūn hit sî Hi-lu̍t ông hē chhiú hām-hāi kàu-hōe tiong kúi-nā lâng. 2 Ēng to thâi Iok-hān ê hiaⁿ-tī Ngá-kok. 3 Khòaⁿ-kìⁿ Iû-thài lâng hoaⁿ-hí, chiū koh lia̍h Pí-tek. Hit sî chiū-sī tû-kàⁿ ê ji̍t. 4 Í-keng lia̍h chiū koaiⁿ i tī kaⁿ-ni̍h, kau hō͘ sì pan ê peng kò͘-siú, múi pan sì lâng; ì-sù beh tī pôaⁿ-kè-choeh āu tòa i chhut, pān i hō͘ peh-sìⁿ khòaⁿ. 5 Tùi án-ni Pí-tek lâu tī kaⁿ-ni̍h; to̍k-to̍k kàu-hōe thòe i chhiat-chhiat kiû Siōng-tè. 6 Hi-lu̍t teh-beh thê i chhut, hit mî Pí-tek pa̍k tī nn̄g tiâu thih-liān, khùn tī nn̄g ê peng ê tiong-kan; koh kò͘-siú ê lâng tī mn̂g-gōa teh kò͘-siú. 7 Hut-jiân ū Chú ê thiⁿ-sài khiā tī piⁿ-thâu, pâng-lāi ū kng teh chiò; tah Pí-tek ê hia̍p-ē, kiò i chhíⁿ, kóng, Kín-kín khí-lâi. Thih-liān chiū tùi i ê chhiú lak-khì. 8 Thiⁿ-sài kā i kóng, Tio̍h hâ tòa, chhēng ôe. I chiàu án-ni kiâⁿ. Koh kā i kóng, Moa lí ê saⁿ, tè góa. 9 Chiū chhut-lâi tè i; m̄ chai thiⁿ-sài só͘ chòe sī chin, lia̍h-chòe sī khòaⁿ-kìⁿ īⁿ-siōng. 10 Í-keng keng-kè tē it kap tē jī kò͘-siú ê só͘-chāi, kàu thàu siâⁿ ê thih mn̂g; hit ê mn̂g ūi-tio̍h in ka-kī khui; chiū chhut-khì, kiâⁿ kè chi̍t tiâu koe; thiⁿ-sài liâm-piⁿ lī-khui i. 11 Pí-tek chhíⁿ-gō͘, kóng, Taⁿ góa chin-chiàⁿ chai Chú chhe I ê thiⁿ-sài kiù góa thoat-lī Hi-lu̍t ê chhiú, kap Iû-thài ê peh-sìⁿ it-chīn só͘ ǹg-bāng ê. 12 Í-keng siūⁿ bêng chit ê sū, chiū kàu Iok-hān chheng chòe Má-khó ê lāu-bú Má-lī-a ê chhù; tī hia ū chōe-chōe lâng chū-chi̍p teh kî-tó. 13 I phah gōa-mn̂g ê sî, ū cha-bó͘ gín-ná miâ Lô-tāi, chhut-lâi thiaⁿ. 14 Jīn-tit Pí-tek ê siaⁿ, in-ūi hoaⁿ-hí ê iân-kò͘ bô khui mn̂g, cháu ji̍p-khì kā lâng kóng, Pí-tek khiā tī mn̂g-gōa. 15 Nā-sī in tùi i kóng, Lí teh kông lah. Cha-bó͘ gín-ná chhut-la̍t kóng chin-chiàⁿ sī. In chiū kóng, Sī i ê thiⁿ-sài. 16 Pí-tek koh phah mn̂g bô soah; in khui mn̂g khòaⁿ-kìⁿ i, chin gông-ngia̍h. 17 I iô chhiú kah in bo̍h chòe siaⁿ, chiū tùi in kóng-khí Chú cháiⁿ-iūⁿ chhōa i chhut kaⁿ. Koh kóng, Tio̍h chiong chiah ê sū kā Ngá-kok kap hiaⁿ-tī kóng. Chiū chhut-khì, khì pa̍t só͘-chāi. 18 Kàu thiⁿ kng, peng-teng m̄ chai Pí-tek tá-lo̍h khì, chiū tōa jiáu-tōng. 19 Hi-lu̍t chhē i bōe tio̍h, chiū sím-mn̄g kò͘-siú ê peng, bēng-lēng thoa in khì thâi. Chiū lī-khui Iû-thài, lo̍h-khì Kai-sat-lī-a khiā-khí. 20 Hi-lu̍t put-chí siū-khì Chhui-lô Se-tùn ê lâng; chóng-sī hiah ê lâng tâng-sim chiū-kūn i, pài-thok kun-sûi ông ê jîn-sîn Pek-lah-sū-to͘ kiû hô; in-ūi in ê tōe-hng tùi ông ê tōe-hng tit-tio̍h bí-niû. 21 Hi-lu̍t tī só͘ tiāⁿ-tio̍h ê ji̍t-kî chhēng ông-ho̍k, chē tī chō-ūi, tng bīn tùi in kóng. 22 Peh-sìⁿ kiò, kóng, Che sī Siōng-tè ê siaⁿ, m̄ sī lâng ê siaⁿ. 23 Hi-lu̍t bô kui êng-kng Siōng-tè, Chú ê thiⁿ-sài sûi-sî phah i; chiū hō͘ thâng kā, khùi tn̄g. 24 Nā-sī Siōng-tè ê tō-lí ná khui-khoah heng-ōng. 25 Pa-ná-pa Sò-lô, chín-chè lâng ê sū pān bêng-pe̍k, chiū tùi Iâ-lō͘-sat-léng tò-tńg, chhōa Iok-hān, chheng chòe Má-khó ê, saⁿ-kap khì.
1 Tī安提阿，tī教會中有先知kap教師kùi-nā人，就是巴拿巴，kap稱做Nî-kiat ê西門，古利奈人Lō͘-kiû，kap分封ê人君希律同培養ê Má-liām，以及掃羅。 2 In服事主禁食ê時，聖神講，Tio̍h kā我分派巴拿巴、掃羅，來成我召in 去擔當ê工。 3 Tùi án-ni，禁食祈禱，用手hōaⁿ in，就差in 去。 4 In已經奉聖神所差，落去Se-liû-ki；tùi hia搭船去居比路。 5 Tī Sat-lia̍p-bí傳上帝ê道理tī偤太人chiahê會堂；亦有約翰做in ê幫手。 6 行過thong海嶼到Phàⁿ-hut，tú-tio̍h一个行邪術，做假先知ê偤太人，名巴耶穌； 7 hit人常常kap總督Sū-kiû Pó-lô saⁿ-kap tiàm；總督是聰明ê人。伊tiàu巴拿巴掃羅來，ài聽上帝ê道理。 8 獨獨hitê行邪術ê Í-lū-má，(伊ê名翻譯就是行邪術ê) ，抵敵in兩人，ài引誘總督，hō͘伊無信。 9 但是掃羅，亦名保羅，hō͘聖神充滿，注目看伊，講， 10 Hàiⁿ ah！ 你充滿眾項詭譎kap奸惡ê，魔鬼ê kiáⁿ，眾項義ê對敵，你混亂主chiahê正路，iáu m̄ soah mah？ 11 Taⁿ你看，主ê手tī你ê身上，你beh chhiⁿ-mî，暫時bōe看見日。伊ê目睭liâm-piⁿ ian-n̄g烏暗；四界求人牽伊。 12 總督看見所做ê事，就信，大奇怪主ê教示。 13 保羅kap同伴tùi Phàⁿ-hut開船，到Pông-hui-lī-a ê Pia̍t-ka；約翰離開in，tò去耶路撒冷。 14 In就tùi Pia̍t-ka行，過去到Pí-se-tí ê安提阿；當安歇日入會堂，坐teh。 15 律法kap先知ê冊讀明白，hiahê 管會堂ê 差人就近in講，兄弟ah，lín若有苦勸百姓ê話，請講。 16 保羅起來khiā，搖手，講，列位以色列人，kap敬畏上帝ê，請聽。 17 Chitê以色列百姓ê上帝揀咱ê列祖，當百姓出外tī埃及地ê時，kā in升高，kia̍h起手chhōa in出hia。 18 Koh tī曠野吞忍寬容in，約略四十年久。 19 已經滅迦南地七族ê人，就將hitê土地分hō͘ in做業，約略有四百五十年； 20 chiahê tāi-chì了後，用士師hō͘ in，到tī先知撒母耳。 21 以後百姓求一个王；上帝就將便雅憫支派ê人，Ki-sū ê kiáⁿ，掃羅，hō͘ in，歷過四十年久。 22 已經廢伊，就舉大衛做in ê王；干證伊，講，我得tio̍h耶西ê kiáⁿ大衛，伊是合我ê心，凡事beh遵thàn我ê旨意。 23 Tùi chit人ê後裔，上帝照所應允ê，kā以色列人立一个救主，就是耶穌。 24 當伊bē出頭ê時，約翰事先用反悔ê洗禮宣傳tī以色列ê眾百姓。 25 約翰teh-beh上伊ê路站ê時，講，Lín phah算我是是誰？我m̄是基督。有路尾我來ê，我tháu伊ê鞋帶亦bōe堪得。 26 兄弟ah，亞伯拉罕ê後裔，kap lín中間敬畏上帝ê人，chitê拯救ê道已經傳到tī咱lah。 27 因為khiā起tī耶路撒冷ê人，kap in ê官府，m̄-bat伊，亦m̄-bat ta̍k-ê安歇日所讀先知ê話，chiah擬定伊，tú-tú是應驗chiahê話。 28 雖然查伊無死chōe，iáu-kú求彼拉多刣伊。 29 凡若所記載指伊ê話已經應驗，就tùi柴裡收伊落來，hē tī墓內。 30 獨獨上帝tùi死人中hō͘伊koh活。 31 伊chōe-chōe日hō͘ hiahê tùi加利利kap伊上耶路撒冷ê人看見；taⁿ in有對百姓做伊ê干證。 32 Koh阮報 lín好消息，就是早所應允列祖ê， 33 taⁿ上帝有kā咱ê kiaⁿ孫應驗伊，因為伊有hō͘耶穌koh活；亦親像詩篇第二篇記載，講，你就是我ê kiáⁿ，我今á日生你。 34 論到伊hō͘伊tùi死人中koh活無koh歸tī朽爛，有án-ni講，我beh用大衛聖koh實在ê恩惠hō͘你。 35 Koh別篇亦有講，你無beh hō͘你ê聖ê tú-tio̍h朽爛。 36 因為大衛tī伊ê世代遵thàn上帝ê旨意，就去睏，kap伊ê列祖saⁿ-kap hē-teh，來tú-tio̍h朽爛； 37 獨獨上帝所hō͘伊koh活ê無tú-tio̍h朽爛。 38 兄弟ah，án-ni lín tio̍h知，tùi chit人chiah有赦罪ê道理傳hō͘ lín； 39 lín 靠摩西ê律法，所bōe得tio̍h稱做義ê事，見若靠 chit人，就一切得tio̍h稱做義。 40 所以tio̍h謹慎，驚了先知ê話到tī lín： 41 伊ê話講， 藐視ê人ah，lín tio̍h看，來gông-ngia̍h，來滅無； 因為當lín ê時日我行一項事， 就是雖然有人kā lín講，lín 也m̄信ê。 42 In出去ê時，有人求in tī後ê安歇日用chiahê話koh kā in講。 43 會眾已經四散，偤太人，kap入in ê教敬虔ê人，chōe-chōe tè保羅、巴拿巴；in kap in講話，勸in長長tiàm-tī上帝ê恩。 44 後安歇日，thong城ê人差不多lóng聚集，來聽上帝ê道理。 45 但是偤太人看見人hiah chōe，就滿心怨妒，辯駁保羅所講ê，續謗瀆in。 46 保羅、巴拿巴好膽講，上帝ê道理事先tùi lín講，是應該。但是lín已經棄sak伊，擬斷家己bōe堪得受tio̍h永活，taⁿ阮chiahê beh轉ǹg外邦人lah。 47 因為主bat án-ni命令阮，講， 我已經設立你做外邦ê光， hō͘你做拯救ê到tī地極。 48 外邦人聽了，就歡喜，o-ló上帝ê道理；凡若受定tio̍h beh得tio̍h永活ê人lóng信。 49 Tùi án-ni，主ê道理遍傳tī hitê地方。 50 獨獨偤太人催逼敬虔尊貴ê婦人人，kap城內ê頭人，生事khún-pek保羅、巴拿巴，將in趕出境外。 51 但是in對眾人拌去腳ê土粉，就去Í-ko-liām。 52 學生滿心歡喜，koh hō͘聖神充滿。
1 Tī An-thê-o, tī kàu-hōe tiong ū sian-ti kap kàu-su kùi-nā lâng, chiū-sī Pa-ná-pa, kap chheng chòe Nî-kiat ê Se-biān, Kó͘-lī-nāi lâng Lō͘-kiû, kap hun-hong ê jîn-kun Hi-lu̍t tâng pôe-iúⁿ ê Má-liām, í-ki̍p Sò-lô. 2 In ho̍k-sāi Chú kìm-chia̍h ê sî, Sèng Sîn kóng, Tio̍h kā góa hun-phài Pa-ná-pa, Sò-lô, lâi chiâⁿ góa tiàu in khì tam-tng ê kang. 3 Tùi án-ni kìm-chia̍h kî-tó, ēng chhiú hōaⁿ in, chiū chhe in khì. 4 In í-keng hōng Sèng Sîn só͘ chhe, lo̍h-khì Se-liû-ki; tùi hia tah chûn khì Ku-pí-lō͘. 5 Tī Sat-lia̍p-bí thoân Siōng-tè ê tō-lí tī Iû-thài lâng chiah ê hōe-tn̂g; ia̍h ū Iok-hān chòe in ê pang-chhiú. 6 Kiâⁿ kè thong hái-sū kàu Phàⁿ-hut, tú-tio̍h chi̍t ê kiâⁿ siâ-su̍t, chòe ké sian-ti ê Iû-thài lâng, miâ Pa-Iâ-so͘; 7 hit lâng siông-siông kap chóng-tok Sū-kiû Pó-lô saⁿ-kap tiàm; chóng-tok sī chhang-miâ ê lâng. I tiàu Pa-ná-pa Sò-lô lâi, ài thiaⁿ Siōng-tè ê tō-lí. 8 To̍k-to̍k hit ê kiâⁿ siâ-su̍t ê Í-lū-má, (i ê miâ hoan-e̍k chiū-sī kiâⁿ siâ-su̍t ê), tí-te̍k in nn̄g lâng, ài ín-iú chóng-tok, hō͘ i bô sìn. 9 Nā-sī Sò-lô, ia̍h miâ Pó-lô, hō͘ Sèng Sîn chhiong-móa, chù-ba̍k khòaⁿ i, kóng, 10 Hàiⁿ ah! lí chhiong-móa chèng hāng khúi-khiat kap kan-ok ê, Mô͘-kúi ê kiáⁿ, chèng hāng gī ê tùi-te̍k, lí hūn-loān Chú chiah ê chiàⁿ-lō͘, iáu m̄ soah mah? 11 Taⁿ lí khòaⁿ, Chú ê chhiú tī lí ê sin-chiūⁿ, lí beh chhiⁿ-mî, chiām-sî bōe khòaⁿ-kìⁿ ji̍t. I ê ba̍k-chiu liâm-piⁿ ian-n̄g o͘-àm; sì-kè kiû lâng khan i. 12 Chóng-tok khòaⁿ-kìⁿ só͘ chòe ê sū, chiū sìn, tōa kî-koài Chú ê kà-sī. 13 Pó-lô kap tâng-phōaⁿ tùi Phàⁿ-hut khui chûn, kàu Pông-hui-lī-a ê Pia̍t-ka; Iok-hān lī-khui in, tò-khì Iâ-lō͘-sat-léng. 14 In chiū tùi Pia̍t-ka kiâⁿ, kè-khì kàu Pí-se-tí ê An-thê-o; tng an-hioh-ji̍t ji̍p hōe-tn̂g, chē-teh. 15 Lu̍t-hoat kap sian-ti ê chheh tha̍k bêng-pe̍k, hiah ê koán hōe-tn̂g ê chhe lâng chiū-kūn in kóng, Hiaⁿ-tī ah, lín nā ū khó͘-khǹg peh-sìⁿ ê ōe, chhiáⁿ kóng. 16 Pó-lô khí-lâi khiā, iô-chhiú, kóng, Lia̍t-ūi Í-sek-lia̍t lâng, kap kèng-ùi Siōng-tè ê, chhiáⁿ thiaⁿ. 17 Chit ê Í-sek-lia̍t peh-sìⁿ ê Siōng-tè kéng lán ê lia̍t-chó͘, tng peh-sìⁿ chhut-gōa tī Ai-ki̍p tōe ê sî, kā in seng koâiⁿ, kia̍h-khí chhiú chhōa in chhut hia. 18 Koh tī khòng-iá thun-lún khoan-iông in, iok-lio̍k sì-cha̍p nî kú. 19 Í-keng bia̍t Ka-lâm tōe chhit cho̍k ê lâng, chiū chiong hit ê thó͘-tōe pun hō͘ in chòe gia̍p, iok-lio̍k ū sì-pah gō͘-cha̍p nî; 20 chiah ê tāi-chì liáu-āu, ēng sū-su hō͘ in, kàu tī sian-ti Sat-bó͘-ní. 21 Í-āu peh-sìⁿ kiû chi̍t ê ông; Siōng-tè chiū chiong Piān-ngá-bín chi-phài ê lâng, Ki-sū ê kiáⁿ, Sò-lô, hō͘ in, le̍k-kè sì-cha̍p nî kú. 22 Í-keng hòe i, chiū kú Tāi-pi̍t chòe in ê ông; kan-chèng i, kóng, Góa tit-tio̍h Iâ-se ê kiáⁿ Tāi-pi̍t, i sī ha̍h góa ê sim, hoān sū beh chun-thàn góa ê chí-ì. 23 Tùi chit lâng ê hō͘-è, Siōng-tè chiàu só͘ èng-ún ê, kā Í-sek-lia̍t lâng li̍p chi̍t ê Kiù-chú, chiū-sī Iâ-so͘. 24 Tng I bē chhut-thâu ê sî, Iok-hān tāi-seng ēng hoán-hóe ê sóe-lé soan-thoân tī Í-sek-lia̍t ê chèng peh-sìⁿ. 25 Iok-hān teh-beh chīn i ê lō͘-chām ê sî, kóng, Lín phah-sǹg góa sī chī-chūi? góa m̄ sī Ki-tok. Ū lō͘-bé góa lâi ê, góa tháu I ê ôe-tòa ia̍h bōe kham-tit. 26 Hiaⁿ-tī ah, A-pek-la̍h-hán ê hō͘-è, kap lín tiong-kan kèng-ùi Siōng-tè ê lâng, chit ê chín-kiù ê tō í-keng thoân kàu tī lán lah. 27 In-ūi khiā-khí tī Iâ-lō͘-sat-léng ê lâng, kap in ê koaⁿ-hú, m̄ bat I, ia̍h m̄ bat ta̍k ê an-hioh-ji̍t só͘ tha̍k sian-ti ê ōe, chiah gí-tiāⁿ I, tú-tú sī èng-giām chiah ê ōe. 28 Sui-jiân chhâ I bô sí chōe, iáu-kú kiû Pí-lia̍p-to thâi I. 29 Hoān-nā só͘ kì-chài chí I ê ōe í-keng èng-giām, chiū tùi chhâ-ni̍h siu I lo̍h-lâi, hē tī bōng-lāi. 30 To̍k-to̍k Siōng-tè tùi sí-lâng tiong hō͘ I koh-oa̍h. 31 I chōe-chōe ji̍t hō͘ hiah ê tùi Ka-lī-lī kap I chiūⁿ Iâ-lō͘-sat-léng ê lâng khòaⁿ-kìⁿ; taⁿ in ū tùi peh-sìⁿ chòe I ê kan-chèng. 32 Koh goán pò lín hó siau-sit, chiū-sī chá só͘ èng-ún lia̍t-chó͘ ê, 33 taⁿ Siōng-tè ū kā lán ê kiáⁿ-sun èng-giām i, in-ūi I ū hō͘ Iâ-so͘ koh-oa̍h; ia̍h chhin-chhiūⁿ si-phian tē jī phiⁿ kì-chài, kóng, Lí chiū-sī góa ê Kiáⁿ, góa kin-á-ji̍t siⁿ lí. 34 Lūn-kàu I hō͘ I tùi sí-lâng tiong koh-oa̍h bô koh kui tī hiú-nōa, ū án-ni kóng, Góa beh ēng Tāi-pi̍t sèng koh si̍t-chāi ê un-hūi hō͘ lí. 35 Koh pa̍t phiⁿ ia̍h ū kóng, Lí bô beh hō͘ lí ê Sèng-ê tú-tio̍h hiú-nōa. 36 In-ūi Tāi-pi̍t tī i ê sè-tāi chun-thàn Siōng-tè ê chí-ì, chiū khì khùn, kap i ê lia̍t-chó͘ saⁿ-kap hē-teh, lâi tú-tio̍h hiú-nōa; 37 to̍k-to̍k Siōng-tè só͘ hō͘ I koh-oa̍h ê bô tú-tio̍h hiú-nōa. 38 Hiaⁿ-tī ah, án-ni lín tio̍h chai, tùi chit lâng chiah ū sià-chōe ê tō-lí thoân hō͘ lín; 39 lín khò Mô͘-se ê lu̍t-hoat, só͘ bōe tit-tio̍h chheng-chòe-gī ê sū, kìⁿ-nā khò chit lâng, chiū it-chhè tit-tio̍h chheng-chòe-gī. 40 Só͘-í tio̍h kín-sīn, kiaⁿ-liáu sian-ti ê ōe kàu tī lín: 41 i ê ōe kóng, Biáu-sī ê lâng ah, lín tio̍h khòaⁿ, lâi gông-ngia̍h, lâi bia̍t-bô; In-ūi tng lín ê sî-ji̍t góa kiâⁿ chi̍t hāng sū, Chiū-sī sui-jiân ū lâng kā lín kóng, lín iā m̄ sìn ê. 42 In chhut-khì ê sî, ū lâng kiû in tī āu ê an-hioh-ji̍t ēng chiah ê ōe koh kā in kóng. 43 Hōe-chiòng í-keng sì-sòaⁿ, Iû-thài lâng, kap ji̍p in ê kàu kèng-khiân ê lâng, chōe-chōe tè Pó-lô, Pa-ná-pa; in kap in kóng ōe, khǹg in tn̂g-tn̂g tiàm tī Siōng-tè ê un. 44 Āu an-hioh-ji̍t, thong siâⁿ ê lâng chha-put-to lóng chū-chi̍p, lâi thiaⁿ Siōng-tè ê tō-lí. 45 Nā-sī Iû-thài lâng khòaⁿ-kìⁿ lâng hiah chōe, chiū móa-sim oàn-tò͘, piān-pok Pó-lô só͘ kóng ê, sòa pòng-to̍k in. 46 Pó-lô, Pa-ná-pa hó-táⁿ kóng, Siōng-tè ê tō-lí tāi-seng tùi lín kóng, sī eng-kai. Nā-sī lín í-keng khì-sak i, gí-toàn ka-kī bōe kham-tit siū-tio̍h éng-oa̍h, taⁿ goán chiah-ê beh choán ǹg gōa-pang lâng lah. 47 In-ūi Chú bat án-ni bēng-lēng goán, kóng, Góa í-keng siat-li̍p lí chòe gōa-pang ê kng, Hō͘ lí chòe chín-kiù-ê kàu tī tōe-ke̍k. 48 Gōa-pang lâng thiaⁿ-liáu, chiū hoaⁿ-hí, o-ló Siōng-tè ê tō-lí; hoān-nā siū tiāⁿ-tio̍h beh tit-tio̍h éng-oa̍h ê lâng lóng sìn. 49 Tùi án-ni Chú ê tō-lí piàn-thoân tī hit ê tōe-hng. 50 To̍k-to̍k Iû-thài lâng chhui-pek kèng-khiân chun-kùi ê hū-jîn-lâng, kap siâⁿ-lāi ê thâu-lâng, siⁿ sū khún-pek Pó-lô, Pa-ná-pa, chiong in kóaⁿ chhut kéng-gōa. 51 Nā-sī in tùi chèng lâng pōaⁿ-khì kha ê thô͘-hún, chiū khì Í-ko-liām. 52 Ha̍k-seng móa-sim hoaⁿ-hí, koh hō͘ Sèng Sîn chhiong-móa.
1 In tī Í-ko-liām saⁿ-kap入偤太人ê會堂，來講論；致到偤太人kap希利尼人chōe-chōe來信。 2 但是hiahê m̄順thàn ê偤太人搖動外邦人ê心，hō͘ in怨恨chiahê兄弟。 3 In就tiàm hia chōe-chōe日，óa靠主好膽來講；主賞賜神蹟奇事，對in ê手來成，干證伊恩典ê道理。 4 城內ê眾人就分pêng，有ê tè偤太人，有ê tè使徒。 5 Hit時外邦人、偤太人，kap in ê序大ài oe-khoeh凌辱，用石頭tìm in。 6 In知，就逃走去Lū-ko-nî ê Lō͘-sū-tek、Te̍k-pì chiahê城，kap周圍ê地方； 7 tī hia傳福音。 8 Tī Lō͘-sū-tek有一人坐teh，雙腳無力，是tùi出世就軟腳，lóng 未bat行。 9 伊聽保羅講道理；保羅注目看伊，看見伊有信thang得tio̍h 好， 10 就大聲講，起來，雙腳khiā正，挺身。Hit人就跳起來行。 11 眾人看見保羅所做，就用Lū-ko-nî ê腔口大聲講，Chiahê神明借人ê形，臨到咱lah。 12 就稱巴拿巴做宙斯 ；因為保羅出頭講話，稱伊做Hi-ní-bí。 13 城外宙斯 ê祭司牽牛á，the̍h 花環，到門前，beh kap眾人獻祭。 14 但是使徒巴拿巴、保羅聽見，就拆裂衫，跳出來眾人ê中間，叫講， 15 Lín大家啥事行án-ni？阮chiahê亦是人kap lín tâng情，傳福音，hō͘ lín離開chiahê無影跡ê，來歸tī真活ê上帝，就是創造天、地、海，kap其中萬物ê。 16 伊tī事先ê世代，容允萬邦行in ê路。 17 但是伊未bat無為tio̍h本身顯出證據，就是行好事，kā lín tùi天落雨，照時出果子，用日食kap歡喜充滿lín ê心。 18 In講án-ni，lím-lím-á禁止眾人無祭獻in。 19 總是有偤太人tùi安提阿Í-ko-liām來；教唆眾人，就用石頭tìm保羅；phah算伊已經死，就拖伊出城外。 20 但是學生圍伊，伊就起來入城；隔日kap巴拿巴離開hia，去 Te̍k-pì。 21 已經傳福音tī hitê城，hō͘ chōe-chōe人來做學生，就倒tńg 去 Lō͘-sū-tek、Í-ko-liām、安提阿， 22 堅固學生ê心，勸in長長tiàm-tī信；koh講，咱tio̍h tùi chōe-chōe艱苦來入上帝ê國。 23 In tī ta̍k-ê教會kā in設立所揀ê長老，禁食祈禱，就將in交託tī in所信ê主。 24 就經過Pí-se-tí，到Pông-hui-lī-a。 25 已經講道理tī Pia̍t-ka，就落去A-tāi-lī； 26 tùi hia搭船到安提阿，就是in bat tī hia受交託tī上帝ê恩典，來行in所完滿ê工。 27 已經到，聚集教會，講起上帝所kap in行一切ê事，亦講上帝àn怎樣kā外邦人開信ê門。 28 就kap學生saⁿ-kap tòa嶄然久。
1 In tī Í-ko-liām saⁿ-kap ji̍p Iû-thài lâng ê hōe-tn̂g, lâi káng-lūn; tì-kàu Iû-thài lâng kap Hi-lī-nî lâng chōe-chōe lâi sìn. 2 Nā-sī hiah ê m̄ sūn-thàn ê Iû-thài lâng iô-tāng gōa-pang lâng ê sim, hō͘ in oàn-hūn chiah ê hiaⁿ-tī. 3 In chiū tiàm hia chōe-chōe ji̍t, óa-khò Chú hó-táⁿ lâi kóng; Chú siúⁿ-sù sîn-jiah kî-sū, tùi in ê chhiú lâi chiâⁿ, kan-chèng I un-tián ê tō-lí. 4 Siâⁿ-lāi ê chèng lâng chiū hun-pêng, ū-ê tè Iû-thài lâng, ū-ê tè sù-tô͘. 5 Hit sî gōa-pang lâng, Iû-thài lâng, kap in ê sī-tōa ài oe-khoeh lêng-jio̍k, ēng chio̍h-thâu tìm in. 6 In chai, chiū tô-cháu khì Lū-ko-nî ê Lō͘-sū-tek Te̍k-pì chiah ê siâⁿ, kap chiu-ûi ê tōe-hng; 7 tī hia thoân hok-im. 8 Tī Lō͘-sū-tek ū chi̍t lâng chē-teh, siang-kha bô la̍t, sī tùi chhut-sì chiū nńg-kha, lóng bē bat kiâⁿ. 9 I thiaⁿ Pó-lô kóng tō-lí; Pó-lô chù-ba̍k khòaⁿ i, khòaⁿ-kìⁿ i ū sìn thang tit-tio̍h hó, 10 chiū tōa siaⁿ kóng, Khí-lâi, siang-kha khiā chiàⁿ, thêng sin. Hit lâng chiū thiàu-khí-lâi kiâⁿ. 11 Chèng lâng khòaⁿ-kìⁿ Pó-lô só͘ chòe, chiū ēng Lū-ko-nî ê khiuⁿ-kháu tōa siaⁿ kóng, Chiah ê sîn-bêng chioh lâng ê hêng, lîm-kàu lán lah. 12 Chiū chheng Pa-ná-pa chòe Tiū-su; in-ūi Pó-lô chhut-thâu kóng ōe, chheng i chòe Hi-ní-bí. 13 Siâⁿ-gōa Tiū-su ê chè-si khan gû-á, the̍h hoe-khoân, kàu mn̂g chêng, beh kap chèng lâng hiàn-chè. 14 Nā-sī sù-tô͘ Pa-ná-pa, Pó-lô thiaⁿ-kìⁿ, chiū thiah-li̍h saⁿ, thiàu-chhut-lâi chèng lâng ê tiong-kan, kiò kóng, 15 Lín tāi-ke siáⁿ-sū kiâⁿ án-ni? Goán chiah-ê ia̍h sī lâng kap lín tâng chêng, thoân hok-im, hō͘ lín lī-khui chiah ê bô iáⁿ-chiah ê, lâi kui tī chin-oa̍h ê Siōng-tè, chiū-sī chhòng-chō thiⁿ, tōe, hái, kap kî-tiong bān mi̍h ê. 16 I tī tāi-seng ê sè-tāi, iông-ún bān pang kiâⁿ in ê lō͘. 17 Nā-sī I bē bat bô ūi-tio̍h pún-sin hián-chhut chèng-kù, chiū-sī kiâⁿ hó sū, kā lín tùi thiⁿ lo̍h hō͘, chiàu sî chhut ké-chí, ēng ji̍t-si̍t kap hoaⁿ-hí chhiong-móa lín ê sim. 18 In kóng án-ni, lím-lím-á kìm-chí chèng lâng bô chè-hiàn in. 19 Chóng-sī ū Iû-thài lâng tùi An-thê-o Í-ko-liām lâi; kàu-so chèng lâng, chiū ēng chio̍h-thâu tìm Pó-lô; phah-sǹg i í-keng sí, chiū thoa i chhut siâⁿ-gōa. 20 Nā-sī ha̍k-seng ûi i, i chiū khí-lâi ji̍p siâⁿ; keh ji̍t kap Pa-ná-pa lī-khui hia, khì Te̍k-pì. 21 Í-keng thoân hok-im tī hit ê siâⁿ, hō͘ chōe-chōe lâng lâi chòe ha̍k-seng, chiū tò-tńg khì Lō͘-sū-tek, Í-ko-liām, An-thê-o, 22 kian-kò͘ ha̍k-seng ê sim, khǹg in tn̂g-tn̂g tiàm tī sìn; koh kóng, Lán tio̍h tùi chōe-chōe kan-khó͘ lâi ji̍p Siōng-tè ê kok. 23 In tī ta̍k ê kàu-hōe kā in siat-li̍p só͘ kéng ê tiúⁿ-ló, kìm-chia̍h kî-tó, chiū chiong in kau-thok tī in só͘ sìn ê Chú. 24 Chiū keng-kè Pí-se-tí, kàu Pông-hui-lī-a. 25 Í-keng kóng tō-lí tī Pia̍t-ka, chiū lo̍h-khì A-tāi-lī; 26 tùi hia tah chûn kàu An-thê-o, chiū-sī in bat tī hia siū kau-thok tī Siōng-tè ê un-tián, lâi kiâⁿ in só͘ oân-móa ê kang. 27 Í-keng kàu, chū-chi̍p kàu-hōe, kóng-khí Siōng-tè só͘ kap in kiâⁿ it-chhè ê sū, ia̍h kóng Siōng-tè àn-cháiⁿ-iūⁿ kā gōa-pang lâng khui sìn ê mn̂g. 28 Chiū kap ha̍k-seng saⁿ-kap tòa chám-jiân kú.
1 有kúi-nā人tùi偤太落來，教示兄弟，講，若無遵thàn摩西ê律例受割禮，就lín bōe得tio̍h救。 2 保羅、巴拿巴已經kap in大相爭辯論，兄弟就phài保羅、巴拿巴kap in中間另外kúi-nā人，將所辯論ê事上耶路撒冷，見使徒kap長老。 3 Tùi án-ni，教會送in起身；in就經過腓尼基、撒馬利亞，講起外邦人ê歸正，hō͘ 眾兄弟大歡喜。 4 到耶路撒冷，hō͘教會kap使徒、長老接納；in就講起上帝所kap in行一切ê事。 5 但是有kúi-nā個信徒屬法利賽黨 ê起來講，的確tio̍h kā in行割禮，命令in 守摩西ê律法。 6 使徒、長老聚集參詳chit節事。 7 已經辯論久久，彼得就起來對in講，列位兄弟ah，lín lóng知，早上帝tī lín中間揀我，hō͘外邦人tùi我ê嘴聽見福音ê道理來信。 8 Koh, bat人ê心ê上帝kā in做干證， 9 用聖神賞賜in，親像賞賜咱一樣；無分別in kap咱，是用信清氣in ê心。 10 Taⁿ啥事試上帝，用咱ê祖kap咱所bōe背ê taⁿ，hē tī學生ê頷頸ah？ 11 咱是tùi主耶穌ê恩得救，親像in一樣，這是咱所信。 12 眾人lóng靜靜；聽巴拿巴、保羅講起上帝用in tī外邦人ê中間所行chiahê神蹟奇事。 13 講soah，雅各就應講，列位兄弟ah，請聽我講： 14 西門已經講起上帝起頭怎樣眷顧外邦人，對in中間取百姓來歸tī伊ê名。 15 Chiahê先知ê話，也kap chitê事相合； 16 親像所記載，講， Chiahê tāi-chì了後，我beh 倒tńg來， Koh起大衛倒落去ê布棚； Beh koh起hiahê破壞ê， 來建立伊； 17 Hō͘其餘ê百姓， Kap見若奉我ê名ê外邦人，lóng chhē主； 18 Chiahê話是tùi世間ê起頭顯明chiahê tāi-chì ê主所講ê。 19 所以我phah算外邦人歸主ê，m̄-thang攪擾伊； 20 獨獨寫phoe吩咐in禁戒偶像ê污穢，kap淫亂，kap食捏死ê物，kap血。 21 因為tùi 早以來tī ta̍k-ê城有傳摩西ê冊，就是ta̍k-ê安歇日tī會堂所讀ê。 22 Hit時使徒、長老kap thong教會，決意對in中間揀人，就是稱做Pa-sat-pa ê偤大kap Se-lah，chit兩人就是兄弟中出tioh ê，差in kap保羅、巴拿巴同去安提阿； 23 用phoe交帶in ê手，講，使徒kap chiahê老兄弟，請安tiàm-tī安提阿、敘利亞、Ki-lī-ka外邦中chiahê兄弟： 24 因為聽見kúi-nā人tùi阮中間出去，用話攪擾lín，phah亂lín ê心；其實m̄是阮所命令ê； 25 阮chiahê已經同心決意，揀人差伊kap阮所疼ê巴拿巴、保羅就近lín。 26 Chit兩人是為tio̍h咱ê主耶穌基督ê名，無惜性命ê。 27 所以差偤大kap Se-lah，in也beh親嘴講起chiahê事。 28 因為聖神kap阮決意，tû chit幾項要緊ê事以外，無用重擔hē tī lín ê身： 29 就是禁戒祭偶像ê物，kap血，kap捏死ê物，kap淫亂；lín若禁戒chiahê就會興通。願lín平安。 30 In奉差，就落去安提阿；已經聚集眾人，就將phoe交in。 31 眾人讀了歡喜hiahê安慰ê話。 32 偤大、Se-lah本身也是先知，用chōe-chōe話安慰兄弟，來堅固in。 33 Tiàm hia有hiah久，兄弟就hō͘ in平安tò去，就近差in ê。 34 35 但是保羅、巴拿巴tiàm-tī安提阿kap chōe-chōe別人saⁿ-kap教示人，傳主福音ê道理。 36 過 kúi-nā日，保羅對巴拿巴講，咱tio̍h koh去前傳主ê道理ê ta̍k-ê城，看兄弟怎樣。 37 巴拿巴ài beh帶約翰，名馬可ê，saⁿ-kap 去。 38 獨獨保羅phah算帶伊去是無合，因為伊tī Pông-hui-lī-a bat離開in，無kap in去做工。 39 就相激，致到大家分開；巴拿巴帶馬可搭船去居比路； 40 保羅揀Se-lah saⁿ-kap 去；兄弟將伊交託tī主ê恩。 41 伊遍行敘利亞、Ki-lī-ka，堅固chiahê教會。
1 Ū kúi-nā lâng tùi Iû-thài lo̍h-lâi, kà-sī hiaⁿ-tī, kóng, Nā bô chun-thàn Mô͘-se ê lu̍t-lē siū kat-lé, chiū lín bōe tit-tio̍h kiù. 2 Pó-lô, Pa-ná-pa í-keng kap in tōa saⁿ-chiⁿ piān-lūn, hiaⁿ-tī chiū phài Pó-lô, Pa-ná-pa kap in tiong-kan lēng-gōa kúi-nā lâng, chiong só͘ piān-lūn ê sū chiūⁿ Iâ-lō͘-sat-léng, kìⁿ sù-tô͘ kap tiúⁿ-ló. 3 Tùi án-ni kàu-hōe sàng in khí-sin; in chiū keng-kè Hui-nî-ki, Sat-má-lī-a, kóng-khí gōa-pang lâng ê kui-chèng, hō͘ chèng hiaⁿ-tī tōa hoaⁿ-hí. 4 Kàu Iâ-lō͘-sat-léng, hō͘ kàu-hōe kap sù-tô͘, tiúⁿ-ló chiap-la̍p; in chiū kóng-khí Siōng-tè só͘ kap in kiâⁿ it-chhè ê sū. 5 Nā-sī ū kúi-nā ê sìn-tô͘ sio̍k Hoat-lī-sài tóng ê khí-lâi kóng, Tek-khak tio̍h kā in kiâⁿ kat-lé, bēng-lēng in siú Mô͘-se ê lu̍t-hoat. 6 Sù-tô͘, tiúⁿ-ló chū-chi̍p chham-siông chit chat sū. 7 Í-keng piān-lūn kú-kú, Pí-tek chiū khí-lâi tùi in kóng, Lia̍t-ūi hiaⁿ-tī ah, lín lóng chai, chá Siōng-tè tī lín tiong-kan kéng góa, hō͘ gōa-pang lâng tùi góa ê chhùi thiaⁿ-kìⁿ hok-im ê tō-lí lâi sìn. 8 Koh bat lâng ê sim ê Siōng-tè kā in chòe kan-chèng, 9 ēng Sèng Sîn siúⁿ-sù in, chhin-chhiūⁿ siúⁿ-sù lán chi̍t iūⁿ; bô hun-piat in kap lán, sī ēng sìn chheng-khì in ê sim. 10 Taⁿ siáⁿ-sū chhì Siōng-tè, ēng lán ê chó͘ kap lán só͘ bōe pē ê taⁿ, hē tī ha̍k-seng ê ām-kún ah? 11 Lán sī tùi Chú Iâ-so͘ ê un tit kiù, chhin-chhiūⁿ in chi̍t iūⁿ, che sī lán só͘ sìn. 12 Chèng lâng lóng chēng-chēng; thiaⁿ Pa-ná-pa, Pó-lô kóng-khí Siōng-tè ēng in tī gōa-pang lâng ê tiong-kan só͘ kiâⁿ chiah ê sîn-jiah kî-sū. 13 Kóng soah, Ngá-kok chiū ìn kóng, Lia̍t-ūi hiaⁿ-tī ah, chhiáⁿ thiaⁿ góa kóng: 14 Se-biān í-keng kóng-khí Siōng-tè khí-thâu cháiⁿ-iūⁿ koàn-kò͘ gōa-pang lâng, tùi in tiong-kan chhú peh-sìⁿ lâi kui tī I ê miâ. 15 Chiah ê sian-ti ê ōe, iā kap chit ê sū saⁿ-ha̍p; 16 chhin-chhiūⁿ só͘ kì-chài, kóng, Chiah ê tāi-chì liáu-āu, góa beh tò-tńg-lâi, Koh khí Tāi-pi̍t tó-lo̍h-khì ê pò͘-pîⁿ; Beh koh khí hiah ê phòa-hoāi ê, Lâi kiàn-li̍p i; 17 Hō͘ kî-û ê peh-sìⁿ, Kap kìⁿ-nā hōng góa ê miâ ê gōa-pang lâng, lóng chhē Chú; 18 Chiah ê ōe sī tùi sè-kan ê khí-thâu hián-bêng chiah ê tāi-chì ê Chú só͘ kóng ê. 19 Só͘-í góa phah-sǹg gōa-pang lâng kui Chú ê, m̄-thang kiáu-jiáu i; 20 to̍k-to̍k siá phoe hoan-hù in kìm-kài ngó͘-siōng ê ù-òe, kap îm-loān, kap chia̍h ni̍h-sí ê mi̍h, kap huih. 21 In-ūi tùi chá í-lâi tī ta̍k ê siâⁿ ū thoân Mô͘-se ê chheh, chiū-sī ta̍k ê an-hioh-ji̍t tī hōe-tn̂g só͘ tha̍k ê. 22 Hit sî sù-tô͘, tiúⁿ-ló kap thong kàu-hōe, koat-ì tùi in tiong-kan kéng lâng, chiū-sī chheng chòe Pa-sat-pa ê Iû-tāi kap Se-lah, chit nn̄g lâng chiū-sī hiaⁿ-tī tiong chhut-tioh ê, chhe in kap Pó-lô, Pa-ná-pa tâng khì An-thê-o; 23 ēng phoe kau-tāi in ê chhiú, kóng, Sù-tô͘ kap chiah ê lāu hiaⁿ-tī, chhéng-an tiàm tī An-thê-o, Sū-lī-a, Ki-lī-ka gōa-pang tiong chiah ê hiaⁿ-tī: 24 in-ūi thiaⁿ-kìⁿ kúi-nā lâng tùi goán tiong-kan chhut-khì, ēng ōe kiáu-jiáu lín, phah-loān lín ê sim; kî-si̍t m̄ sī goán só͘ bēng-lēng ê; 25 goán chiah-ê í-keng tâng-sim koat-ì, kéng lâng chhe i kap goán só͘ thiàⁿ ê Pa-ná-pa, Pó-lô chiū-kūn lín. 26 Chit nn̄g lâng sī ūi-tio̍h lán ê Chú Iâ-so͘ Ki-tok ê miâ, bô sioh sìⁿ-miā ê. 27 Só͘-í chhe Iû-tāi kap Se-lah, in iā beh chhin-chhùi kóng-khí chiah ê sū. 28 In-ūi Sèng Sîn kap goán koat-ì, tû chit kúi hāng iàu-kín ê sū í-gōa, bô ēng tāng tàⁿ hē tī lín ê sin: 29 chiū-sī kìm-kài chè ngó͘-siōng ê mi̍h, kap huih, kap ni̍h-sí ê mi̍h, kap îm-loān; lín nā kìm-kài chiah-ê chiū ōe heng-thong. Goān lín pêng-an. 30 In hōng chhe, chiū lo̍h-khì An-thê-o; í-keng chū-chi̍p chèng lâng, chiū chiong phoe kau in. 31 Chèng lâng tha̍k-liáu hoaⁿ-hí hiah ê an-ùi ê ōe. 32 Iû-tāi, Se-lah pún-sin iā sī sian-ti, ēng chōe-chōe ōe an-ùi hiaⁿ-tī, lâi kian-kò͘ in. 33 Tiàm hia ū hiah kú, hiaⁿ-tī chiū hō͘ in pêng-an tò-khì, chiū-kūn chhe in ê. 34 35 Nā-sī Pó-lô, Pa-ná-pa tiàm tī An-thê-o kap chōe-chōe pa̍t lâng saⁿ-kap kà-sī lâng, thoân Chú hok-im ê tō-lí. 36 Kè kúi-nā ji̍t, Pó-lô tùi Pa-ná-pa kóng, Lán tio̍h koh khì chêng thoân Chú ê tō-lí ê ta̍k ê siâⁿ, khòaⁿ hiaⁿ-tī cháiⁿ-iūⁿ. 37 Pa-ná-pa ài beh tòa Iok-hān, miâ Má-khó ê, saⁿ-kap khì. 38 To̍k-to̍k Pó-lô phah-sǹg tòa i khì sī bô ha̍p, in-ūi i tī Pông-hui-lī-a bat lī-khui in, bô kap in khì chòe kang. 39 Chiū saⁿ-kek, tì-kàu tāi-ke pun-khui; Pa-ná-pa tòa Má-khó tah chûn khì Ku-pí-lō͘; 40 Pó-lô kéng Se-lah saⁿ-kap khì; hiaⁿ-tī chiong i kau-thok tī Chú ê un. 41 I piàn kiâⁿ Sū-lī-a, Ki-lī-ka, kian-kò͘ chiah ê kàu-hōe.
1 保羅到Te̍k-pì，koh到Lō͘-sū-tek：tú-tn̄g tī hia有一个學生名提摩太，伊ê老母是偤太信ê婦人人；伊ê老父是希利尼人。 2 伊hō͘ Lō͘-sū-tek、 Í-ko-liām chiahê兄弟所o-ló。 3 保羅ài chit人kap伊去；為tio̍h hiahê所在ê偤太人，就kā伊行割禮；因為in lóng知伊ê老父是希利尼人。 4 In經過chiahê城ê時，將耶路撒冷使徒、長老所定tio̍h ê命令傳hō͘ in 守。 5 Tùi án-ni，chiahê教會信ná堅固，人額日日加添。 6 In經過Hut-lū-ka、加拉太ê地方，因為聖神bat禁in傳道理tī亞西亞， 7 就行到Múi-se-a ê邊界，想beh去Pì-chhui-nî；耶穌ê神m̄准； 8 就tùi Múi-se-a經過，落到Te̍k-lô-a。 9 保羅暝時看見異象；有一个馬其頓人khiā-teh求伊講，請過來馬其頓幫贊阮。 10 保羅已經看見異象，阮chiahê liâm-piⁿ意愛beh去馬其頓，掠做是上帝召阮傳福音hō͘ in。 11 所以tùi Te̍k-lô-a搭船直直到Sat-mô͘-te̍k-lat，隔日到Nî-a-pho-lī； 12 tùi hia到腓立比，就是馬其頓hit-tè頭一个城，也是羅馬人分設ê城：阮tī chitê城tiàm kúi-nā日。 13 Tī安歇日出城門外到河邊，phah算tī hia有祈禱ê所在；就坐teh，kap所聚集ê婦人人談論。 14 有一个賣紫色布ê婦人人，名Lū-tí-a，來聽，伊是Chhui-ngá-chhui-lat城ê人，平素敬拜上帝；主開伊ê心，hō͘伊專ǹg保羅所講ê話。 15 伊kap伊ê家已經受洗禮，就求阮，講，若掠我做真實信主ê人，請kah我ê家tòa。就強強留阮。 16 後來阮去祈禱ê所在，有一个女婢tú-tio̍h阮，伊hō͘卜卦ê神上身；平素用卜卦hō͘ hiahê主人大thàn錢。 17 伊tè保羅kap阮，叫講，Chiahê人就是至koân上帝ê奴僕，用拯救ê路傳hō͘ lín。 18 伊chōe-chōe日án-ni行。保羅真厭恨，oa̍t-tńg身kā hitê神講，我託耶穌基督ê名，命令你對伊出去。神即時出去。 19 伊hiahê主人看見thàn錢ê ǹg望已經失落，就掠保羅、Se-lah，拖in入街市，去見有司官，koh解送到上司官講， 20 Chiahê人是偤太人，大攪擾咱ê城， 21 傳咱羅馬人所m̄應該守，m̄應該行ê規例。 22 眾人kui群起來攻擊in；上司官pak in ê衫，命令用棍phah in。 23 Phah真chōe下，就關in落監，吩咐顧監ê嚴謹顧守； 24 顧監ê受chit號命令，就關in 落內重監，kông in ê 腳tī柴kông裡。 25 但是半暝保羅、Se-lah祈禱吟詩，o-ló上帝； 26 關tī監裡ê人也注意teh聽；忽然地大動，致到監ê地基lóng搖動；chiahê門也 liâm-piⁿ lóng開；眾人ê刑具一盡lak。 27 顧監ê人醒，看見監門開，phah算監囚lóng已經逃走，就拔刀，beh家己刣。 28 但是保羅大聲叫，講，莫得家己傷害；阮lóng tī chia。 29 顧監ê人叫人kia̍h火來，跳入去，ngia̍uh-ngia̍uh-chhoah仆tī保羅、Se-lah ê面前，chhōa in出來，講， 30 先生ah，我tio̍h怎樣做，chiah會得tio̍h救？ 31 應講，Tio̍h信主耶穌，你就得tio̍h救，以及你ê家。 32 就用主ê 道理講hō͘伊kap伊家內lóng總ê人聽。 33 Tī hit暝 hit時，顧監ê人chhōa in 去洗in ê傷；伊kap全家ê人即時lóng受洗禮。 34 Chhōa in上伊ê厝，備辦hō͘ in食；已經信上帝，就kap thong家大歡喜。 35 到天光，上司官差衙役來，講，放hiahê人。 36 顧監ê將chiahê話kā保羅講，上司官差人來beh放lín；taⁿ thang出來，安然去。 37 但是保羅kā hiahê人講，阮是羅馬人，bē審問，就公刑phah阮，koh關阮落監；taⁿ beh暗靜趕阮出mah？的確bōe做得，tio̍h in親身來chhōa阮出。 38 衙役將chiahê話回覆上司官；上司官聽見in是羅馬人，就驚。 39 Chiah來苦勸in；chhōa in出，請in離開hitê城。 40 In出監，入Lū-tí-a ê厝；已經見tio̍h chiahê兄弟，就苦勸in，chiah離開hia。
1 Pó-lô kàu Te̍k-pì, koh kàu Lō͘-sū-tek: tú-tn̄g tī hia ū chi̍t ê ha̍k-seng miâ Thê-mô͘-thài, i ê lāu-bú sī Iû-thài sìn ê hū-jîn-lâng; i ê lāu-pē sī Hi-lī-nî lâng. 2 I hō͘ Lō͘-sū-tek Í-ko-liām chiah ê hiaⁿ-tī só͘ o-ló. 3 Pó-lô ài chit lâng kap i khì; ūi-tio̍h hiah ê só͘-chāi ê Iû-thài lâng, chiū kā i kiâⁿ kat-lé; in-ūi in lóng chai i ê lāu-pē sī Hi-lī-nî lâng. 4 In keng-kè chiah ê siâⁿ ê sî, chiong Iâ-lō͘-sat-léng sù-tô͘ tiúⁿ-ló só͘ tiāⁿ-tio̍h ê bēng-lēng thoân hō͘ in siú. 5 Tùi án-ni chiah ê kàu-hōe sìn ná kian-kò͘, lâng-gia̍h ji̍t-ji̍t ke-thiⁿ. 6 In keng-kè Hut-lū-ka, Ka-lia̍p-thài ê tōe-hng, in-ūi Sèng Sîn bat kìm in thoân tō-lí tī A-se-a, 7 chiū kiâⁿ kàu Múi-se-a ê pian-kài, siūⁿ beh khì Pì-chhui-nî; Iâ-so͘ ê Sîn m̄ chún; 8 chiū tùi Múi-se-a keng-kè, lo̍h kàu Te̍k-lô-a. 9 Pó-lô mî-sî khòaⁿ-kìⁿ īⁿ-siōng; ū chi̍t ê Má-kî-tùn lâng khiā-teh kiû i kóng, Chhiáⁿ kè-lâi Má-kî-tùn pang-chān goán. 10 Pó-lô í-keng khòaⁿ-kìⁿ īⁿ-siōng, goán chiah-ê liâm-piⁿ ì-ài beh khì Má-kî-tùn, lia̍h-chòe sī Siōng-tè tiàu goán thoân hok-im hō͘ in. 11 Só͘-í tùi Te̍k-lô-a tah chûn ti̍t-ti̍t kàu Sat-mô͘-te̍k-lat, keh ji̍t kàu Nî-a-pho-lī; 12 tùi hia kàu Hui-li̍p-pí, chiū-sī Má-kî-tùn hit tè thâu chi̍t ê siâⁿ, iā sī Lô-má lâng hun-siat ê siâⁿ: goán tī chit ê siâⁿ tiàm kúi-nā ji̍t. 13 Tī an-hioh-ji̍t chhut siâⁿ-mn̂g gōa kàu hô-piⁿ, phah-sǹg tī hia ū kî-tó ê só͘-chāi; chiū chē-teh, kap só͘ chū-chi̍p ê hū-jîn-lâng tâm-lūn. 14 Ū chi̍t-ê bōe chí-sek pò͘ ê hū-jîn-lâng, miâ Lū-tí-a, lâi thiaⁿ, i sī Chhui-ngá-chhui-lat siâⁿ ê lâng, pêng-sò͘ kèng-pài Siōng-tè; Chú khui i ê sim, hō͘ i choan ǹg Pó-lô só͘ kóng ê ōe. 15 I kap i ê ke í-keng siū sóe-lé, chiū kiû goán, kóng, Nā lia̍h góa chòe chin-si̍t sìn Chú ê lâng, chhiáⁿ kàu góa ê ke tòa. Chiū kiông-kiông lâu goán. 16 Āu-lâi goán khì kî-tó ê só͘-chāi, ū chi̍t ê lú-pī tú-tio̍h goán, i hō͘ pok-kòa ê sîn chiūⁿ sin; pêng-sò͘ ēng pok-kòa hō͘ hiah ê chú-lâng tōa thàn chîⁿ. 17 I tè Pó-lô kap goán, kiò kóng, Chiah ê lâng chiū-sī chì-koâiⁿ Siōng-tè ê lô͘-po̍k, ēng chín-kiù ê lō͘ thoân hō͘ lín. 18 I chōe-chōe ji̍t án-ni kiâⁿ. Pó-lô chin iàm-hūn, oa̍t-tńg-sin kā hit ê sîn kóng, Góa thok Iâ-so͘ Ki-tok ê miâ bēng-lēng lí tùi i chhut-khì. Sîn chek-sî chhut-khì. 19 I hiah ê chú-lâng khòaⁿ-kìⁿ thàn chîⁿ ê ǹg-bāng í-keng sit-lo̍h, chiū lia̍h Pó-lô, Se-lah, thoa in ji̍p koe-chhī, khì kìⁿ iú-si-koaⁿ, koh ké-sàng kàu chiūⁿ-si-koaⁿ kóng, 20 Chiah ê lâng sī Iû-thài lâng, tōa kiáu-jiáu lán ê siâⁿ, 21 thoân lán Lô-má lâng só͘ m̄ eng-kai siú, m̄ eng-kai kiâⁿ ê kui-lē. 22 Chèng lâng kui-kûn khí-lâi kong-kek in; chiūⁿ-si-koaⁿ pak in ê saⁿ, bēng-lēng ēng kùn phah in. 23 Phah chin chōe ē, chiū koaiⁿ in lo̍h kaⁿ, hoan-hù kò͘-kaⁿ ê giâm-kín kò͘-siú; 24 kò͘-kaⁿ ê siū chit hō bēng-lēng, chiū koaiⁿ in lo̍h lāi-têng kaⁿ, kông in ê kha tī chhâ-kông ni̍h. 25 Nā-sī pòaⁿ-mî Pó-lô Se-lah kî-tó gîm si, o-ló Siōng-tè; 26 koaiⁿ tī kaⁿ-ni̍h ê lâng iā chù-ì teh thiaⁿ; hut-jiân tōe tōa tāng, tì-kàu kaⁿ ê tōe-ki lóng iô-tāng; chiah ê mn̂g iā liâm-piⁿ lóng khui; chèng lâng ê hêng-kū it-chīn lak. 27 Kò͘-kaⁿ ê lâng chhíⁿ, khòaⁿ-kìⁿ kaⁿ-mn̂g khui, phah-sǹg kaⁿ-siû lóng í-keng tô-cháu, chiū pu̍ih to, beh ka-kī thâi. 28 Nā-sī Pó-lô tōa siaⁿ kiò, kóng, Bo̍h-tit ka-kī siong-hāi; goán lóng tī chia. 29 Kò͘-kaⁿ ê lâng kiò lâng kia̍h hé lâi, thiàu ji̍p khì, ngia̍uh-ngia̍uh-chhoah phak tī Pó-lô Se-lah ê bīn-chêng, chhōa in chhut-lâi, kóng, 30 Sian-siⁿ ah, góa tio̍h cháiⁿ-iūⁿ chòe, chiah ōe tit-tio̍h kiù? 31 Ìn kóng, Tio̍h sìn Chú Iâ-so͘, lí chiū tit-tio̍h kiù, í-ki̍p lí ê ke. 32 Chiū ēng Chú ê tō-lí kóng hō͘ i kap i ke-lāi lóng-chóng ê lâng thiaⁿ. 33 Tī hit mî hit sî, kò͘-kaⁿ ê lâng chhōa in khì sóe in ê siong; i kap choân-ke ê lâng chek-sî lóng siū sóe-lé. 34 Chhōa in chiūⁿ i ê chhù, pī-pān hō͘ in chia̍h; í-keng sìn Siōng-tè, chiū kap thong-ke tōa hoaⁿ-hí. 35 Kàu thiⁿ kng, chiūⁿ-si-koaⁿ chhe gê-ia̍h lâi, kóng, Pàng hiah ê lâng. 36 Kò͘-kaⁿ ê chiong chiah ê ōe kā Pó-lô kóng, Chiūⁿ-si-koaⁿ chhe lâng lâi beh pàng lín; taⁿ thang chhut-lâi, an-jiân khì. 37 Nā-sī Pó-lô kā hiah ê lâng kóng, Goán sī Lô-má lâng, bē sím-mn̄g, chiū kong-hêng phah goán, koh koaiⁿ goán lo̍h kaⁿ; taⁿ beh àm-chīⁿ kóaⁿ goán chhut mah? tek-khak bōe chòe tit, tio̍h in chhin-sin lâi chhōa goán chhut. 38 Gê-ia̍h chiong chiah ê ōe hê-hok chiūⁿ-si-koaⁿ; chiūⁿ-si-koaⁿ thiaⁿ-kìⁿ in sī Lô-má lâng, chiū kiaⁿ. 39 Chiah lâi khó͘-khǹg in; chhōa in chhut, chhiáⁿ in lī-khui hit ê siâⁿ. 40 In chhut kaⁿ, ji̍p Lū-tí-a ê chhù; í-keng kìⁿ-tio̍h chiah ê hiaⁿ-tī, chiū khó͘-khǹg in, chiah lī-khui hia.
1 In經過Àm-hui-pho-lí、A-pho-lô-nî-a，到帖撒羅尼迦，tī hia有偤太人ê會堂； 2 保羅照平常ê款入去就近in；tī三個安歇日， 3 引起聖經kap in辯論，開拆指明基督應該受害，tùi死人中koh活；koh講，我所對lín傳ê耶穌就是基督。 4 In中間有ê受苦勸，就歸óa保羅、Se-lah；koh有敬虔ê希利尼人不止chōe，尊貴ê婦人人亦無少。 5 獨獨偤太人怨妒，招街市ê 匪類kúi-nā人，教唆百姓kui群聚集，擾動thong城，攻入Iâ-sun ê厝，ài掠in出來交hō͘百姓。 6 無tú-tio̍h，就拖Iâ-sun kap kúi-nā個兄弟，送hō͘地方官；叫講，Chiahê phah亂天下ê人亦到chia； 7 Iâ-sun接納in；chiahê人lóng違逆該撒ê命令，講有別個王，耶穌。 8 眾百姓kap地方官聽見這，就驚惶。 9 已經收Iâ-sun kap其餘ê人ê 保狀，就放in。 10 Tùi án-ni，兄弟隨時差保羅、Se-lah透暝去Pì-lí-a；兩人已經到tè，就入偤太人ê會堂。 11 Hiah-ê人比帖撒羅尼迦人khah文明，因為in注意受道理，ta̍k日查考聖經，看chiahê事果然有án-ni á無。 12 所以其中有chōe-chōe人信；koh有希利尼尊貴ê婦人人，kap ta-po͘人無少。 13 獨獨帖撒羅尼迦ê偤太人知保羅tī Pì-lí-a傳上帝ê道理，就到hia，搖動攪擾眾人。 14 兄弟liâm-piⁿ 差保羅去到海邊；獨獨Se-lah、提摩太猶原tòa hia。 15 送保羅ê人chhōa伊教雅典；受命令叫Se-lah提摩太緊緊就近伊，就tò去。 16 保羅tī雅典thèng候in，看見滿城lóng是偶像，就傷心著急。 17 所以tī會堂kap偤太人以及敬虔ê人辯論，ta̍k日tī街市裡kap所tú-tio̍h ê亦是án-ni。 18 有Í-pí-kó͘-lô Sū-to-a，兩教門ê哲士kap伊辯論。有ê講，chitê拾人ê話phoh ê beh講甚麼？有ê講，伊是親像傳別邦國ê鬼神ê；是因為伊傳耶穌kap koh活ê道理。 19 In就chhōa伊到A-lio̍k山，講，你所講新ê教thang得tio̍h知mah？ 20 因為你用奇怪ê事傳入阮ê耳孔：所以阮ài知hiahê是甚麼意思。 21 (雅典人kap tiàm hia ê出外人bōe顧得別項事，獨獨是將新ê事來講，來聽nā-tiāⁿ) 22 保羅khiā tī A-lio̍k山中，講， 雅典人ah，我看lín凡事敬畏神明，嶄然熱心。 23 因為我teh行遊ê時,看見lín所敬拜ê，tú-tio̍h一座壇，頂面寫，講，未bat ê上帝。Lín所未bat來敬拜ê，我用伊來kā lín講。 24 Hit-ê創造世間kap其中萬物ê上帝，既然是天地ê主，無khiā起手造 ê殿； 25 無hō͘人ê手服事，ná親像伊有所欠缺；是家己用活命、喘氣，kap萬物hō͘眾人； 26 koh創造萬邦ê人，tùi一个本源，khiā起tī全地面，koh kā in限事先定tio̍h ê時期，kap所khiā起ê地界； 27 是beh hō͘ in chhē上帝，kiám-chhái thang揣摩來得tio̍h，其實伊離開咱ta̍k人無遠。 28 因為咱tiàm-tī伊來活，來振動，來tī-teh；親像lín中間做詩ê人有ê有講，因為咱chiahê亦是伊ê kiáⁿ類。 29 Taⁿ既然是上帝ê kiáⁿ類，就m̄應該掠做上帝ê本質親像金、銀、石，人ê工夫人ê心事所雕琢ê。 30 Hiah-ê m̄知影ê時代，上帝無窮勘；taⁿ就命令ta̍k所在ê人lóng總tio̍h反悔： 31 因為有定tio̍h一日，beh用伊所設立 ê人，照公義審判天下；是tùi死人中hō͘伊koh活，hō͘眾人有憑據thang信。 32 In聽見死人koh活ê話，有ê笑伊；有ê講，阮beh koh聽你講這。 33 Tùi án-ni，保羅對in中間出去。 34 但是有kúi-nā人óa伊來信；中間有A-lio̍k山ê會員Ttiu-nî-siu，kap一个婦人人，名叫Tāi-má-lí，koh也有別人。
1 In keng-kè Àm-hui-pho-lí, A-pho-lô-nî-a, kàu Thiap-sat-lô-nî-ka, tī hia ū Iû-thài lâng ê hōe-tn̂g; 2 Pó-lô chiàu pêng-siông ê khoán ji̍p-khì chiū-kūn in; tī saⁿ ê an-hioh-ji̍t, 3 ín-khí sèng-keng kap in piān-lūn, khui-thiah chí-bêng Ki-tok eng-kai siū hāi, tùi sí-lâng tiong koh-oa̍h; koh kóng, Góa só͘ tùi lín thoân ê Iâ-so͘ chiū-sī Ki-tok. 4 In tiong-kan ū-ê siū khó͘-khǹg, chiū kui-óa Pó-lô Se-lah; koh ū kèng-khiân ê Hi-lī-nî lâng put-chí chōe, chun-kùi ê hū-jîn-lâng ia̍h bô chió. 5 To̍k-to̍k Iû-thài lâng oàn-tò͘, chio koe-chhī ê húi-lūi kúi-nā lâng, kàu-so peh-sìⁿ kui kûn chū-chi̍p, jiáu-tōng thong siâⁿ, kong-ji̍p Iâ-sun ê chhù, ài lia̍h in chhut-lâi kau hō͘ peh-sìⁿ. 6 Bô tú-tio̍h, chiū thoa Iâ-sun kap kúi-nā ê hiaⁿ-tī, sàng hō͘ tōe-hng koaⁿ; kiò kóng, Chiah ê phah-loān thiⁿ-ē ê lâng ia̍h kàu chia; 7 Iâ-sun chiap-la̍p in; chiah ê lâng lóng ûi-ke̍h Kai-sat ê bēng-lēng, kóng ū pa̍t ê ông, Iâ-so͘. 8 Chèng peh-sìⁿ kap tōe-hng koaⁿ thiaⁿ-kìⁿ che, chiū kiaⁿ-hiâⁿ. 9 Í-keng siu Iâ-sun kap kî-û ê lâng ê pó-chn̄g, chiū pàng in. 10 Tùi án-ni hiaⁿ-tī sûi-sî chhe Pó-lô Se-lah thàu-mî khì Pì-lí-a; nn̄g lâng í-keng kàu tè, chiū ji̍p Iû-thài lâng ê hōe-tn̂g. 11 Hiah ê lâng pí Thiap-sat-lô-nî-ka lâng khah bûn-bêng, in-ūi in chù-ì siū tō-lí, ta̍k ji̍t chhâ-khó sèng-keng, khòaⁿ chiah ê sū kó-jiân ū án-ni á bô. 12 Só͘-í kî-tiong ū chōe-chōe lâng sìn; koh ū Hi-lī-nî chun-kùi ê hū-jîn-lâng, kap ta-po͘-lâng bô chió. 13 To̍k-to̍k Thiap-sat-lô-nî-ka ê Iû-thài lâng chai Pó-lô tī Pì-lí-a thoân Siōng-tè ê tō-lí, chiū kàu hia, iô-tāng kiáu-jiáu chèng lâng. 14 Hiaⁿ-tī liâm-piⁿ chhe Pó-lô khì kàu hái-piⁿ; to̍k-to̍k Se-lah Thê-mô͘-thài iû-goân tòa hia. 15 Sàng Pó-lô ê lâng chhōa i kàu Ngá-tián; siū bēng-lēng kiò Se-lah Thê-mô͘-thài kín-kín chiū-kūn i, chiū tò-khì. 16 Pó-lô tī Ngá-tián thèng-hāu in, khòaⁿ-kìⁿ móa siâⁿ lóng sī ngó͘-siōng, chiū siong-sim tio̍h-kip. 17 Só͘-í tī hōe-tn̂g kap Iû-thài lâng í-ki̍p kèng-khiân ê lâng piān-lūn, ta̍k ji̍t tī koe-chhī-ni̍h kap só͘ tú-tio̍h ê ia̍h sī án-ni. 18 Ū Í-pí-kó͘-lô Sū-to-a, nn̄g kàu-mn̂g ê tiat-sū kap i piān-lūn. Ū-ê kóng, chit-ê khioh lâng ê ōe-phoh ê beh kóng sím-mi̍h? Ū-ê kóng, I sī chhin-chhiūⁿ thoân pa̍t pang-kok ê kúi-sîn ê; sī in-ūi i thoân Iâ-so͘ kap koh-oa̍h ê tō-lí. 19 In chiū chhōa i kàu A-lio̍k soaⁿ, kóng, Lí só͘ kóng sin ê kàu thang tit-tio̍h chai mah? 20 In-ūi lí ēng kî-koài ê sū thoân ji̍p goán ê hī-khang: só͘-í goán ài chai hiah-ê sī sím-mi̍h ì-sù. 21 (Ngá-tián lâng kap tiàm hia ê chhut-gōa lâng bōe kò͘-tit pa̍t hāng sū, to̍k-to̍k sī chiong sin ê sū lâi kóng, lâi thiaⁿ nā-tiāⁿ) 22 Pó-lô khiā tī A-lio̍k soaⁿ tiong, kóng, Ngá-tián lâng ah, góa khòaⁿ lín hoān sū kèng-ùi sîn-bêng, chám-jiân jia̍t-sim. 23 In-ūi góa teh kiâⁿ-iû ê sî khòaⁿ-kìⁿ lín só͘ kèng-pài ê, tú-tio̍h chi̍t chō tôaⁿ, téng-bīn siá, kóng, Bē bat ê Siōng-tè. Lín só͘ bē bat lâi kèng-pài ê, góa ēng I lâi kā lín kóng. 24 Hit ê chhòng-chō sè-kan kap kî-tiong bān mi̍h ê Siōng-tè, kì-jiân sī thiⁿ tōe ê Chú, bô khiā-khí chhiú chō ê tiān; 25 bô hō͘ lâng ê chhiú ho̍k-sāi, ná chhin-chhiūⁿ I ū só͘ khiàm-kheh; sī ka-kī ēng oa̍h-miā, chhoán-khùi, kap bān mi̍h hō͘ chèng lâng; 26 koh chhòng-chō bān pang ê lâng, tùi chi̍t ê pún-goân, khiā-khí tī choân tōe-bīn, koh kā in hān tāi-seng tiāⁿ-tio̍h ê sî-kî, kap só͘ khiā-khí ê tōe-kài; 27 sī beh hō͘ in chhē Siōng-tè, kiám-chhái thang chhúi-mô͘ lâi tit-tio̍h, kî-si̍t I lī-khui lán ta̍k lâng bô hn̄g. 28 In-ūi lán tiàm-tī I lâi oa̍h, lâi tín-tāng, lâi tī-teh; chhin-chhiūⁿ lín tiong-kan chòe si ê lâng ū-ê ū kóng, In-ūi lán chiah-ê ia̍h sī I ê kiáⁿ-lūi. 29 Taⁿ kì-jiân sī Siōng-tè ê kiáⁿ-lūi, chiū m̄ eng-kai lia̍h chòe Siōng-tè ê pún-chit chhin-chhiūⁿ kim, gûn, chio̍h, lâng ê kang-hu lâng ê sim-sū só͘ tiau-tok ê. 30 Hiah ê m̄ chai-iáⁿ ê sî-tāi, Siōng-tè bô khêng-khàm; taⁿ chiū bēng-lēng ta̍k só͘-chāi ê lâng lóng-chóng tio̍h hoán-hóe: 31 in-ūi ū tiāⁿ-tio̍h chi̍t ji̍t, beh ēng I só͘ siat-li̍p ê lâng, chiàu kong-gī sím-phòaⁿ thiⁿ-ē; sī tùi sí-lâng tiong hō͘ I koh-oa̍h, hō͘ chèng lâng ū pîn-kù thang sìn. 32 In thiaⁿ-kìⁿ sí-lâng koh-oa̍h ê ōe, ū-ê chhiò i; ū-ê kóng, Goán beh koh thiaⁿ lí kóng che. 33 Tùi án-ni Pó-lô tùi in tiong-kan chhut-khì. 34 Nā-sī ū kúi-nā lâng óa i lâi sìn; tiong-kan ū A-lio̍k soaⁿ ê hōe-oân Tiu-nî-siu, kap chi̍t ê hū-jîn-lâng, miâ kiò Tāi-má-lí, koh iā ū pa̍t lâng.
1 Chit-tia̍p了後， 保羅離開雅典，到哥林多。 2 Tú-tio̍h一个偤太人，名亞居拉，出世tī本都，kap伊ê bó͘百基拉，tú-á對意大利來，因為Kek-ló-tiu命令偤太人lóng離開羅馬；保羅就就近in； 3 因為in同工藝，就kap in saⁿ-kap tiàm，合teh做；in ê工藝就是做布棚。 4 Ta̍k-ê安歇日保羅tī會堂辯論，苦勸偤太人kap希利尼人。 5 Se-lah、提摩太tùi馬其頓落來ê時，保羅就為tio̍h道理不止迫切，對偤太人干證耶穌是基督。 6 In對敵伊來謗瀆ê時，保羅就pōaⁿ衫，對in講，Lín ê血歸tī lín，無我ê關係；taⁿ了後我beh就近外邦人lah。 7 就離開去，入一人ê厝，hit人名Thê-to Iû-sū-to͘，是敬拜上帝ê人，伊ê厝tī會堂ê隔壁。 8 管會堂ê人，名Kek-lí-sū-pò͘，kap全家信主；哥林多人亦chōe-chōe聽見，信來受洗禮。 9 暝時，主tī異象中對保羅講，莫得驚，tio̍h講，m̄-thang靜靜； 10 因為我kap你tī-teh，無人beh攻擊來害你；因為我有chōe-chōe百姓tī chitê城。 11 保羅tòa hia一年koh六月日；tī in中間將上帝ê道理來教示人。 12 Ka-liû做A-kai-a總督ê時，偤太人同心攻擊保羅，拖伊到公座前，講， 13 Chitê人勸人拜上帝無照律法。 14 保羅tú-tú beh開嘴，Ka-liû kā偤太人講，偤太人ah，設使是甚麼不義奸惡ê事，照理我tio̍h容允lín； 15 總是辯論言語、名字，kap lín ê律法，lín去家己料理；我m̄-ài審判chiahê。 16 就趕 in離開公座前。 17 眾人掠管會堂ê Só͘-thê-nî，tī公座前phah伊。Chiahê tāi-chì Ka-liû lóng無掠做要緊。 18 保羅iáu tiàm kúi-nā日，就離別chiahê兄弟，搭船beh去敘利亞；百基拉、亞居拉saⁿ-kap 去；tī Kian-kek-lí剪頭毛；有下願ê緣故。 19 In到以弗所，保羅就留in tòa hia；家己入會堂，kap偤太人辯論。 20 In請伊加tòa幾日； 21 無允，就離別in，講，上帝若准，我beh 倒tńg來就近lín。 22 就開船離開以弗所。到該撒利亞，就上去請安教會，chiah落去安提阿。 23 Tòa hia幾日，koh起身，照次序經過加拉太、Hut-lū-ka ê地方，堅固眾學生。 24 有一个偤太人，名亞波羅到以弗所，伊出世tī A-le̍k-san-thài，是有學問，tī聖經亦不止能。 25 伊bat學習主ê路；熱心將耶穌ê事詳細講來教示人，只有知約翰ê洗禮nā-tiāⁿ。 26 伊tī會堂好膽來講，百基拉、亞居拉聽見，就chhōa伊來，對伊排列上帝ê路khah詳細。 27 亞波羅ài去A-kai-a ê時，兄弟勸勉伊，koh寄phoe請學生接納伊；已經到，就tùi恩典來大大幫贊hia ê信徒： 28 因為伊tī眾人ê面前出力辯倒偤太人，引聖經指明耶穌是基督。
1 Chit tia̍p liáu-āu, Pó-lô lī-khui Ngá-tián, kàu Ko-lîm-to. 2 Tú-tio̍h chi̍t ê Iû-thài lâng, miâ A-ku-lah, chhut-sì tī Pún-to͘, kap i ê bó͘ Pek-ki-lah, tú-á tùi Ì-tāi-lī lâi, in-ūi Kek-ló-tiu bēng-lēng Iû-thài lâng lóng lī-khui Lô-má; Pó-lô chiū chiū-kūn in; 3 in-ūi in tâng kang-gē, chiū kap in saⁿ-kap tiàm, ha̍p teh chòe; in ê kang-gē chiū-sī chòe pò͘-pîⁿ. 4 Ta̍k ê an-hioh-ji̍t Pó-lô tī hōe-tn̂g piān-lūn, khó͘-khǹg Iû-thài lâng kap Hi-lī-nî lâng. 5 Se-lah, Thê-mô͘-thài tùi Má-kî-tùn lo̍h-lâi ê sî, Pó-lô chiū ūi-tio̍h tō-lí put-chí pek-chhiat, tùi Iû-thài lâng kan-chèng Iâ-so͘ sī Ki-tok. 6 In tùi-te̍k i lâi pòng-to̍k ê sî, Pó-lô chiū pōaⁿ saⁿ, tùi in kóng, Lín ê huih kui tī lín, bô góa ê koan-hē; taⁿ liáu-āu góa beh chiū-kūn gōa-pang lâng lah. 7 Chiū lī-khui khì, ji̍p chi̍t lâng ê chhù, hit lâng miâ Thê-to Iû-sū-to͘, sī kèng-pài Siōng-tè ê lâng, i ê chhù tī hōe-tn̂g ê keh-piah. 8 Koán hōe-tn̂g ê lâng, miâ Kek-lí-sū-pò͘, kap choân ke sìn Chú; Ko-lîm-to lâng ia̍h chōe-chōe thiaⁿ-kìⁿ, sìn lâi siū sóe-lé. 9 Mî-sî Chú tī īⁿ-siōng tiong tùi Pó-lô kóng, Bo̍h-tit kiaⁿ, tio̍h kóng, m̄-thang chēng-chēng; 10 in-ūi góa kap lí tī-teh, bô lâng beh kong-kek lâi hāi lí; in-ūi góa ū chōe-chōe peh-sìⁿ tī chit ê siâⁿ. 11 Pó-lô tòa hia chi̍t nî koh la̍k ge̍h ji̍t; tī in tiong-kan chiong Siōng-tè ê tō-lí lâi kà-sī lâng. 12 Ka-liû chòe A-kai-a chóng-tok ê sî, Iû-thài lâng tâng-sim kong-kek Pó-lô, thoa i kàu kong-chō chêng, kóng, 13 Chit ê lâng khǹg lâng pài Siōng-tè bô chiàu lu̍t-hoat. 14 Pó-lô tú-tú beh khui chhùi, Ka-liû kā Iû-thài lâng kóng, Iû-thài lâng ah, siat-sú sī sím-mi̍h put-gī kan-ok ê sū, chiàu lí góa tio̍h iông-ún lín; 15 chóng-sī piān-lūn giân-gú, miâ-jī, kap lín ê lu̍t-hoat, lín khì ka-kī liāu-lí; góa m̄ ài sím-phòaⁿ chiah-ê. 16 Chiū kóaⁿ in lī-khui kong-chō chêng. 17 Chèng lâng lia̍h koán hōe-tn̂g ê Só͘-thê-nî, tī kong-chō chêng phah i. Chiah ê tāi-chì Ka-liû lóng bô lia̍h chòe iàu-kín. 18 Pó-lô iáu tiàm kúi-nā ji̍t, chiū lī-pia̍t chiah ê hiaⁿ-tī, tah chûn beh khì Sū-lī-a; Pek-ki-lah, A-ku-lah saⁿ-kap khì; tī Kian-kek-lí chián thâu-mn̂g; ū hē-goān ê iân-kò͘. 19 In kàu Í-hut-só͘, Pó-lô chiū lâu in tòa hia; ka-kī ji̍p hōe-tn̂g, kap Iû-thài lâng piān-lūn. 20 In chhiáⁿ i ke tòa kúi ji̍t; 21 bô ún, chiū lī-pia̍t in, kóng, Siōng-tè nā chún, góa beh tò-tńg lâi chiū-kūn lín. 22 Chiū khui chûn lī-khui Í-hut-só͘. Kàu Kai-sat-lī-a, chiū chiūⁿ-khì chhéng-an kàu-hōe, chiah lo̍h-khì An-thê-o. 23 Tòa hia kúi ji̍t, koh khí-sin, chiàu chhù-sū keng-kè Ka-lia̍p-thài, Hut-lū-ka ê tōe-hng, kian-kò͘ chèng ha̍k-seng. 24 Ū chi̍t ê Iû-thài lâng, miâ A-pho-lô kàu Í-hut-só͘, i chhut-sì tī A-le̍k-san-thài, sī ū ha̍k-būn, tī sèng-keng ia̍h put-chí ōe. 25 I bat ha̍k-si̍p Chú ê lō͘; jia̍t-sim chiong Iâ-so͘ ê sū siông-sè kóng lâi kà-sī lâng, chí-ū chai Iok-hān ê sóe-lé nā-tiāⁿ. 26 I tī hōe-tn̂g hó-táⁿ lâi kóng, Pek-ki-lah A-ku-lah thiaⁿ-kìⁿ, chiū chhōa i lâi, tùi i pâi-lia̍t Siōng-tè ê lō͘ khah siông-sè. 27 A-pho-lô ài khì A-kai-a ê sî, hiaⁿ-tī khoàn-bián i, koh kià phoe chhiáⁿ ha̍k-seng chiap-la̍p i; í-keng kàu, chiū tùi un-tián lâi tōa-tōa pang-chān hia ê sìn-tô͘: 28 in-ūi i tī chèng lâng ê bīn-chêng chhut-la̍t piān-tó Iû-thài lâng, ín sèng-keng chí-bêng Iâ-so͘ sī Ki-tok.
1 亞波羅tī哥林多ê時，保羅經過頂勢ê地方，到以弗所，tú-tio̍h kúi-nā 個學生； 2 問in，講，Lín信ê時bat受tio̍h聖神無？應講，連有聖神ê賞賜á無，阮亦未bat聽見。 3 講，Án-ni，就lín受洗禮來歸tī甚麼ah？In就講，約翰ê洗禮。 4 保羅講，約翰行反悔ê洗禮，kā百姓講tio̍h信tè尾伊來ê，就是耶穌。 5 Hiah-ê人聽見，就受洗禮歸tī主耶穌ê名。 6 保羅kā in按手，聖神就到tī in；in隨時講chiahê腔口kap先知ê話。 7 共約略十二人。 8 保羅入會堂，好膽來講，歷過三月日久，用上帝國ê事來辯論苦勸。 9 但是有kúi-nā人硬心m̄順thàn，當眾人ê面前譭謗chitê路；保羅就離開in，亦hō͘學生kap in相離，就tī Chhui-lat-lô͘ ê學堂日日辯論。 10 親像án-ni兩年久；致到tiàm-tī亞西亞ê人無論偤太、希利尼，lóng聽見主ê道理。 11 上帝用保羅ê手行罕得有ê權能； 12 甚至有人對伊ê身軀the̍h手巾，á是圍身裙，hē tī病人ê身上，in ê病就退去，惡神亦出去。 13 總是有kúi-nā個四界行，念chiù趕鬼ê偤太人，tùi hiahê hō͘惡神上身ê人，自專叫主耶穌ê名，講，我óa靠保羅所傳ê耶穌，命令你出去。 14 有偤太ê祭司頭Sū-ki-óa七個kiáⁿ，亦行chitê tāi-chì。 15 惡神應講，耶穌我知伊，保羅我亦bat伊；但是lín是是誰 ah？ 16 惡神上身ê人就跳tī in身上，贏in兩人，壓制in，致到in thǹg-pak-theh，受傷，走出hit間厝。 17 khiā起以弗所ê偤太人、希利尼人lóng知，無m̄驚惶；主耶穌ê名就大榮顯。 18 已經信ê人chōe-chōe到，明明認，koh講起in ê所行。 19 平素行法術ê，亦有chōe-chōe人將in ê冊聚集，hē tī眾人ê面前來燒；算in ê價錢，就知值銀五萬。 20 主ê道理大大興旺得勝，有親像án-ni。 21 Chiahê事已經明白，保羅定tio̍h意思，經過馬其頓、A-kai-a，chiah beh去耶路撒冷，講，到hia了後，我亦tio̍h去看羅馬。 22 就差跟隨伊ê從中兩人，提摩太、Í-lah-to͘去馬其頓；本身暫時tòa亞西亞。 23 當時，為tio̍h主ê路，有起大擾動。 24 因為有銀匠，名Tí-bí-tiu，平素做A-tí-bí ê銀龕，伊hō͘做chit號工ê人thàn錢無少； 25 就聚集in，以及thàn chit號食ê人，講，大家，lín知咱óa靠chitê手藝來thàn錢。 26 Taⁿ chitê保羅，m̄-nā tī以弗所，也差不多遍亞西亞，用伊ê勸勉來迷惑chōe-chōe人，講手所妝ê m̄是神明；這是lín所看見，所聽見ê。 27 親像án-ni，m̄-nā咱chit號工業危險hō͘人看輕；就大女神A-tí-bí ê廟亦beh hō͘人目地無，koh遍亞西亞kap天下所拜ê A-tí-bí beh失伊ê威風。 28 In聽見就大受氣，叫講，大ah！以弗所人ê A-tí-bí！ 29 Thong城擾亂；已經掠保羅同行ê馬其頓人，Kai-iû kap A-lí-ta̍t-kó͘，就同心khoeh入戲園。 30 保羅心想ài入去見百姓，學生m̄准。 31 iáu有亞西亞幾個頭目，是保羅ê朋友，差人勸伊莫得冒險入戲園。 32 會眾紛亂，一人hoah一款；大半m̄知是因為啥事來聚集。 33 有人牽亞力山大出眾人ê中間，偤太人亦舉伊進前。亞力山大搖手，ài對百姓分訴。 34 眾人知伊是偤太人，就同聲叫講，大ah！以弗所人ê A-tí-bí！親像án-ni，約量一時久。 35 書記官已經hō͘眾人安靜，就講，以弗所人ah，是誰 m̄知以弗所人ê城就是顧守大A-tí-bí ê殿，kap tùi宙斯所降落ê像ah？ 36 Chiahê事已經bōe辯駁得，lín眾人tio̍h靜靜，m̄-thang chhiong-pōng。 37 何況chiahê人m̄是偷the̍h廟內ê物，亦m̄是謗瀆咱ê女神ê，lín竟然帶in到chia。 38 若Tí-bí-tiu以及hiahê óa伊ê師傅，kap人有tāi-chì，就有聽相告ê日期，亦有總督，大家thang對訊。 39 Lín若問別物事，thang tī合例ê會來擬斷。 40 是因為今á日無緣故ê擾亂，驚了咱bōe免得受查問；koh亦無能thang解chitê聚會ê因由。 41 講soah，就散會。
1 A-pho-lô tī Ko-lîm-to ê sî, Pó-lô keng-kè téng-sì ê tōe-hng, kàu Í-hut-só͘, tú-tio̍h kúi-nā ê ha̍k-seng; 2 mn̄g in, kóng, Lín sìn ê sî bat siū-tio̍h Sèng Sîn bô? Ìn kóng, Liân ū Sèng Sîn ê siúⁿ-sù á bô, goán ia̍h bē bat thiaⁿ-kìⁿ. 3 Kóng, Án-ni, chiū lín siū sóe-lé lâi kui tī sím-mi̍h ah? In chiū kóng, Iok-hān ê sóe-lé. 4 Pó-lô kóng, Iok-hān kiâⁿ hoán-hóe ê sóe-lé, kā peh-sìⁿ kóng tio̍h sìn tè-bé i lâi ê, chiū-sī Iâ-so͘. 5 Hiah ê lâng thiaⁿ-kìⁿ, chiū siū sóe-lé kui tī Chú Iâ-so͘ ê miâ. 6 Pó-lô kā in hōaⁿ chhiú, Sèng Sîn chiū kàu tī in; in sûi-sî kóng chiah ê khiuⁿ-kháu kap sian-ti ê ōe. 7 Kiōng iok-lio̍k cha̍p-jī lâng. 8 Pó-lô ji̍p hōe-tn̂g, hó-táⁿ lâi kóng, le̍k-kè saⁿ ge̍h ji̍t kú, ēng Siōng-tè kok ê sū lâi piān-lūn khó͘-khǹg. 9 Nā-sī ū kúi-nā lâng ngī-sim m̄ sūn-thàn, tng chèng lâng ê bīn-chêng húi-pòng chit ê Lō͘; Pó-lô chiū lī-khui in, ia̍h hō͘ ha̍k-seng kap in saⁿ-lī, chiū tī Chhui-lat-lô͘ ê o̍h-tn̂g ji̍t-ji̍t piān-lūn. 10 Chhin-chhiūⁿ án-ni nn̄g nî kú; tì-kàu tiàm-tī A-se-a ê lâng bô lūn Iû-thài, Hi-lī-nî, lóng thiaⁿ-kìⁿ Chú ê tō-lí. 11 Siōng-tè ēng Pó-lô ê chhiú kiâⁿ hán-tit ū ê koân-lêng; 12 sīm-chì ū lâng tùi i ê sin-khu the̍h chhiú-kun, á-sī ûi-sin-kûn, hē tī pīⁿ-lâng ê sin-chiūⁿ, in ê pīⁿ chiū thè-khì, ok-sîn ia̍h chhut-khì. 13 Chóng-sī ū kúi-nā ê sì-kè kiâⁿ, liām-chiù kóaⁿ kúi ê Iû-thài lâng, tùi hiah ê hō͘ ok-sîn chiūⁿ sin ê lâng, chū-choan kiò Chú Iâ-so͘ ê miâ, kóng, Góa óa-khò Pó-lô só͘ thoân ê Iâ-so͘, bēng-lēng lí chhut-khì. 14 Ū Iû-thài ê chè-si-thâu Sū-ki-óa chhit ê kiáⁿ, ia̍h kiâⁿ chit ê tāi-chì. 15 Ok-sîn ìn kóng, Iâ-so͘ góa chai I, Pó-lô góa ia̍h bat i; nā-sī lín sī chī-chūi ah? 16 Ok-sîn chiūⁿ sin ê lâng chiū thiàu tī in sin-chiūⁿ, iâⁿ in nn̄g lâng, ap-chè in, tì-kàu in thǹg-pak-theh, siū siong, cháu-chhut hit keng chhù. 17 Khiā-khí Í-hut-só͘ ê Iû-thài lâng Hi-lī-nî lâng lóng chai, bô m̄ kiaⁿ-hiâⁿ; Chú Iâ-so͘ ê miâ chiū tōa êng-hián. 18 Í-keng sìn ê lâng chōe-chōe kàu, bêng-bêng jīn, koh kóng-khí in ê só͘ kiâⁿ. 19 Pêng-sò͘ kiâⁿ hoat-su̍t ê, ia̍h ū chōe-chōe lâng chiong in ê chheh chū-chi̍p, hē tī chèng lâng ê bīn-chêng lâi sio; sǹg in ê kè-chîⁿ, chiū chai ta̍t gûn gō͘ bān. 20 Chú ê tō-lí tōa-tōa heng-ōng tek-sèng, ū chhin-chhiūⁿ án-ni. 21 Chiah ê sū í-keng bêng-pe̍k, Pó-lô tiāⁿ-tio̍h ì-sù, keng-kè Má-kî-tùn, A-kai-a, chiah beh khì Iâ-lō͘-sat-léng, kóng, Kàu hia liáu-āu, góa ia̍h tio̍h khì khòaⁿ Lô-má. 22 Chiū chhe kun-sûi i ê chiông-tiong nn̄g lâng, Thê-mô͘-thài Í-lah-to͘ khì Má-kî-tùn; pún-sin chiām-sî tòa A-se-a. 23 Tng sî, ūi-tio̍h Chú ê Lō͘, ū khí tōa jiáu-tōng. 24 In-ūi ū gûn-chhiūⁿ, miâ Tí-bí-tiu, pêng-sò͘ chòe A-tí-bí ê gûn-kham, i hō͘ chòe chit hō kang ê lâng thàn chîⁿ bô chió; 25 chiū chū-chi̍p in, í-ki̍p thàn chit hō chia̍h ê lâng, kóng, Tāi-ke, lín chai lán óa-khò chit ê chhiú-gē lâi thàn chîⁿ. 26 Taⁿ chit ê Pó-lô, m̄-nā tī Í-hut-só͘, iā chha-put-to piàn A-se-a, ēng i ê khoàn-bián lâi bê-he̍k chōe-chōe lâng, kóng chhiú só͘ chng ê m̄ sī sîn-bêng; che sī lín só͘ khòaⁿ-kìⁿ, só͘ thiaⁿ-kìⁿ ê. 27 Chhin-chhiūⁿ án-ni, m̄ nā lán chit hō kang-gia̍p gûi-hiám hō͘ lâng khòaⁿ-khin; chiū tōa lú-sîn A-tí-bí ê biō ia̍h beh hō͘ lâng ba̍k-tē-bô, koh piàn A-se-a kap thiⁿ-ē só͘ pài ê A-tí-bí beh sit i ê ui-hong. 28 In thiaⁿ-kìⁿ chiū tōa siū-khì, kiò kóng, Tōa ah! Í-hut-só͘ lâng ê A-tí-bí! 29 Thong siâⁿ jiáu-loān; í-keng lia̍h Pó-lô tâng kiâⁿ ê Má-kî-tùn lâng, Kai-iû kap A-lí-ta̍t-kó͘, chiū tâng-sim khoeh ji̍p hì-hn̂g. 30 Pó-lô sim siūⁿ ài ji̍p-khì kìⁿ peh-sìⁿ, ha̍k-seng m̄ chún. 31 Iáu ū A-se-a kúi ê thâu-ba̍k, sī Pó-lô ê pêng-iú, chhe lâng khǹg i bo̍h-tit mō͘-hiám ji̍p hì-hn̂g. 32 Hōe-chiòng hun-loān, chi̍t lâng hoah chi̍t khoán; tōa pòaⁿ m̄ chai sī in-ūi siáⁿ-sū lâi chū-chi̍p. 33 Ū lâng khan A-le̍k-san-tāi chhut chèng lâng ê tiong-kan, Iû-thài lâng ia̍h kú i chìn-chêng. A-le̍k-san-tāi iô chhiú, ài tùi peh-sìⁿ hun-sò͘. 34 Chèng lâng chai i sī Iû-thài lâng, chiū tâng siaⁿ kiò kóng, Tōa ah! Í-hut-só͘ lâng ê A-tí-bí! chhin-chhiūⁿ án-ni, iok-liōng chi̍t sî kú. 35 Su-kì-koaⁿ í-keng hō͘ chèng lâng an-chēng, chiū kóng, Í-hut-só͘ lâng ah, chī-chūi m̄ chai Í-hut-só͘ lâng ê siâⁿ chiū-sī kò͘-siú tōa A-tí-bí ê tiān, kap tùi Tiū-su só͘ kàng-lo̍h ê siōng ah? 36 Chiah ê sū í-keng bōe piān-pok tit, lín chèng lâng tio̍h chēng-chēng, m̄-thang chhiong-pōng. 37 Hô-hòng chiah ê lâng m̄ sī thau-the̍h biō-lāi ê mi̍h, ia̍h m̄ sī pòng-to̍k lán ê lú-sîn ê, lín kèng-jiân tòa in kàu chia. 38 Nā Tí-bí-tiu í-ki̍p hiah ê óa i ê sai-hū, kap lâng ū tāi-chì, chiū ū thiaⁿ saⁿ-kò ê ji̍t-kî, ia̍h ū chóng-tok, tāi-ke thang tùi-sìn. 39 Lín nā mn̄g pa̍t mi̍h sū, thang tī ha̍p-lē ê hōe lâi gí-toàn. 40 Sī in-ūi kin-á-ji̍t bô iân-kò͘ ê jiáu-loān, kiaⁿ-liáu lán bōe bián-tit siū chhâ-mn̄g; koh ia̍h bô ōe thang kóe chit ê chū-hōe ê in-iû. 41 Kóng soah, chiū sòaⁿ hōe.
1 Hán-hōa已經定，保羅叫學生來，勸in；就kap in離別，起身beh去馬其頓。 2 已經經過hiahê地方，用chōe-chōe話苦勸in，就到希利尼。 3 Tiàm hia三月日；beh搭船去敘利亞。偤太人設計beh害伊；伊就定tio̍h意思tùi馬其頓倒tńg。 4 Tè伊去亞西亞ê人，有Pì-lí-a人，Pit-lō͘ ê kiáⁿ Só͘-pá-tek；帖撒羅尼迦人，A-lí-ta̍t-kó͘ kap Se-kong-to͘；Te̍k-pì人Ka-iû，kap提摩太；koh有亞西亞人Chhui-ki-kó͘ kap Te̍k-lô-hui-mô͘。 5 Chit幾人事先去，tī Te̍k-lô-a thèng候阮。 6 除酵節後，阮tùi腓立比開船，五日到Te̍k-lô-a，kap in相會；tiàm hia七日。 7 七日ê頭一日，阮chiahê聚集beh peh餅，保羅ài tī隔日起身，就kap in講論道理，chhiân到半暝。 8 阮所聚集ê樓有點chōe-chōe燈。 9 有一个少年人，名Iû-chhui-kó͘，坐tī窗á頂，睏重眠；保羅講論已經久，少年人因為睏，tùi三層樓跋落來；人來扶伊，已經死lah。 10 保羅落去仆tī伊ê身上，抱伊，講，Lín莫做聲；伊ê魂iáu tī-teh。 11 就koh上去peh餅來食，saⁿ-kap談論久久；到天光就起身。 12 Gín-ná已經活，人chhōa伊來，大受安慰。 13 阮事先上船，開船去 A-sok，ài tī hia chih接保羅：因為伊有án-ni吩咐，家己beh tùi路去。 14 已經tī A-sok kap阮相會，阮就chih伊上船，去Bí-chhui-lī-nî。 15 Tùi hia開船，第二日到Ki-o ê對面；隔日船擱tī Sat-mô͘；koh一日到Bí-lī-to͘。 16 因為保羅決意搭船閃過以弗所，免得久久tiàm-tī亞西亞；就趕緊行，看ōe-thang tī五旬節日到耶路撒冷。 17 Tùi Bí-lī-to͘差人到以弗所，請教會ê長老來。 18 In已經到，就對in講， Lín家己知我tùi起頭踏tio̍h亞西亞地 ê日，頭到尾kap lín怎樣； 19 我服事主凡事謙遜，koh流目屎，koh tùi偤太人ê 謀害歷過試煉； 20 凡有利益ê，我未bat kiu-koe̍h無kā lín講，來教示lín，無論tī眾人ê面前，á是tī chiahê人家； 21 tùi偤太kap希利尼人證明，tio̍h ǹg上帝來反悔，koh tio̍h ǹg咱ê主耶穌基督來信。 22 Taⁿ我ê心神受縛去耶路撒冷，未知tī hia beh tú-tio̍h怎樣； 23 獨獨聖神tī ta̍k-ê城對我證明，講有鎖鏈kap患難teh thèng候我。 24 但是我無掠性命做要緊，來看做寶貝，獨獨是beh盡我ê路站，kap tùi主耶穌所受ê職份，來證明上帝恩典ê福音。 25 我平素四界行tī lín中間傳上帝ê國，taⁿ我知lín眾人無koh見我ê面。 26 所以我今á日tùi lín干證，若有人沉淪，我無責成。 27 因為我未bat kiu-koe̍h無用上帝ê旨意一盡kā lín講。 28 Lín tio̍h家己謹慎，亦tio̍h謹慎全群，聖神tī in中間設立lín做監督，來照顧上帝ê教會，就是伊用家己ê血所得tio̍h ê。 29 我知我離開了後，beh有兇惡ê豺狼入lín中間，無惜羊群； 30 koh tùi lín家己ê中間，beh有人起來講逆理ê話，ài引誘學生thàn伊。 31 所以lín tio̍h警醒，記念我三年ê 久，暝日無soah，流目屎來警戒lín ta̍k人。 32 Taⁿ我將lín交託上帝，kap伊恩典ê道，是能建立lín，hō͘ lín得tio̍h業 tī lóng總成聖ê人ê中間。 33 我未bat貪人ê銀、金、衣服。 34 Lín家己知，chit兩支手有供給我ê欠用，以及kap我tī-teh ê人。 35 我凡事做lín ê模樣，tio̍h án-ni tio̍h磨，來扶持軟弱ê人；koh tio̍h記得主耶穌本身ê話，講，hō͘人ê，比tùi人the̍h ê，khah有福氣。 36 講soah，跪落kap in眾人祈禱。 37 眾人大啼哭，抱保羅ê頷頸，chim伊； 38 第一煩惱ê，就是伊所講ê話，以後bōe koh見tio̍h伊ê面。就送伊落船。
1 Hán-hōa í-keng tiāⁿ, Pó-lô kiò ha̍k-seng lâi, khǹg in; chiū kap in lī-pia̍t, khí-sin beh khì Má-kî-tùn. 2 Í-keng keng-kè hiah ê tōe-hng, ēng chōe-chōe ōe khó͘-khǹg in, chiū kàu Hi-lī-nî. 3 Tiàm hia saⁿ ge̍h ji̍t; beh tah chûn khì Sū-lī-a. Iû-thài lâng siat-kè beh hāi i; i chiū tiāⁿ-tio̍h ì-sù tùi Má-kî-tùn tò-tńg. 4 Tè i khì A-se-a ê lâng, ū Pì-lí-a lâng, Pit-lō͘ ê kiáⁿ Só͘-pá-tek; Thiap-sat-lô-nî-ka lâng, A-lí-ta̍t-kó͘ kap Se-kong-to͘; Te̍k-pì lâng Ka-iû, kap Thê-mô͘-thài; koh ū A-se-a lâng Chhui-ki-kó͘ kap Te̍k-lô-hui-mô͘. 5 Chit kúi lâng tāi-seng khì, tī Te̍k-lô-a thèng-hāu goán. 6 Tû-kàⁿ-choeh āu, goán tùi Hui-li̍p-pí khui chûn, gō͘ ji̍t kàu Te̍k-lô-a, kap in siong-hōe; tiàm hia chhit ji̍t. 7 Chhit ji̍t ê thâu chi̍t ji̍t, goán chiah-ê chū-chi̍p beh peh piáⁿ, Pó-lô ài tī keh ji̍t khí-sin, chiū kap in káng-lūn tō-lí, chhiân kàu pòaⁿ-mî. 8 Goán só͘ chū-chi̍p ê lâu ū tiám chōe-chōe teng. 9 Ū chi̍t ê siàu-liân lâng, miâ Iû-chhui-kó͘, chē tī thang-á téng, khùn tāng bîn; Pó-lô káng-lūn í-keng kú, siàu-liân lâng in-ūi khùn, tùi saⁿ chàn lâu poa̍h-lo̍h-lâi; lâng lâi hû i, í-keng sí lah. 10 Pó-lô lo̍h-khì phak tī i ê sin-chiūⁿ, phō i, kóng, Lín bo̍h chòe siaⁿ; i ê hûn iáu tī-teh. 11 Chiū koh chiūⁿ-khì peh piáⁿ lâi chia̍h, saⁿ-kap tâm-lūn kú-kú; kàu thiⁿ-kng chiū khí-sin. 12 Gín-ná í-keng oa̍h, lâng chhōa i lâi, tōa siū an-ùi. 13 Goán tāi-seng chiūⁿ chûn, khui chûn khì A-sok, ài tī hia chih-chiap Pó-lô: in-ūi i ū án-ni hoan-hù, ka-kī beh tùi lō͘ khì. 14 Í-keng tī A-sok kap goán siong-hōe, goán chiū chih i chiūⁿ chûn, khì Bí-chhui-lī-nî. 15 Tùi hia khui chûn tē jī ji̍t kàu Ki-o ê tùi-bīn; keh ji̍t chûn koa tī Sat-mô͘; koh chi̍t ji̍t kàu Bí-lī-to͘. 16 In-ūi Pó-lô koat-ì tah chûn siám kè Í-hut-só͘, bián-tit kú-kú tiàm tī A-se-a; chiū kóaⁿ-kín kiâⁿ, khòaⁿ ōe thang tī gō͘-sûn-choeh ji̍t kàu Iâ-lō͘-sat-léng. 17 Tùi Bí-lī-to͘ chhe lâng kàu Í-hut-só͘, chhiáⁿ kàu-hōe ê tiúⁿ-ló lâi. 18 In í-keng kàu, chiū tùi in kóng, Lín ka-kī chai góa tùi khí-thâu ta̍h-tio̍h A-se-a tōe ê ji̍t, thâu kàu bé kap lín cháiⁿ-iūⁿ; 19 góa ho̍k-sāi Chú hoān sū khiam-sùn, koh lâu ba̍k-sái, koh tùi Iû-thài lâng ê bô͘-hāi le̍k-kè chhì-liān; 20 hoān ū lī-ek ê, góa bē bat kiu-koe̍h bô kā lín kóng, lâi kà-sī lín, bô lūn tī chèng lâng ê bīn-chêng, á-sī tī chiah ê jîn-ke; 21 tùi Iû-thài kap Hi-lī-nî lâng chèng-bêng, tio̍h ǹg Siōng-tè lâi hoán-hóe, koh tio̍h ǹg lán ê Chú Iâ-so͘ Ki-tok lâi sìn. 22 Taⁿ góa ê sim-sîn siū pa̍k khì Iâ-lō͘-sat-léng, bē chai tī hia beh tú-tio̍h cháiⁿ-iūⁿ; 23 to̍k-to̍k Sèng Sîn tī ta̍k ê siâⁿ tùi góa chèng-bêng, kóng ū só-liān kap hoān-lān teh thèng-hāu góa. 24 Nā-sī góa bô lia̍h sìⁿ-miā chòe iàu-kín, lâi khòaⁿ chòe pó-pòe, to̍k-to̍k sī beh chīn góa ê lō͘-chām, kap tùi Chú Iâ-so͘ só͘ siū ê chit-hūn, lâi chèng-bêng Siōng-tè un-tián ê hok-im. 25 Góa pêng-sò͘ sì-kè kiâⁿ tī lín tiong-kan thoân Siōng-tè ê kok, taⁿ góa chai lín chèng lâng bô koh kìⁿ góa ê bīn. 26 Só͘-í góa kin-á-ji̍t tùi lín kan-chèng, nā ū lâng tîm-lûn, góa bô chek-sêng. 27 In-ūi góa bē bat kiu-koe̍h bô ēng Siōng-tè ê chí-ì it-chīn kā lín kóng. 28 Lín tio̍h ka-kī kín-sīn, ia̍h tio̍h kín-sīn choân kûn, Sèng Sîn tī in tiong-kan siat-li̍p lín chòe kàm-tok, lâi chiàu-kò͘ Siōng-tè ê kàu-hōe, chiū-sī I ēng ka-kī ê huih só͘ tit-tio̍h ê. 29 Góa chai góa lī-khui liáu-āu, beh ū hiong-ok ê chhâi-lông ji̍p lín tiong-kan, bô sioh iûⁿ-kûn; 30 koh tùi lín ka-kī ê tiong-kan, beh ū lâng khí-lâi kóng ge̍k-lí ê ōe, ài ín-iú ha̍k-seng thàn i. 31 Só͘-í lín tio̍h kéng-séng, kì-liām góa saⁿ nî ê kú, mî-ji̍t bô soah, lâu ba̍k-sái lâi kéng-kài lín ta̍k lâng. 32 Taⁿ góa chiong lín kau-thok Siōng-tè, kap I un-tián ê tō, sī ōe kiàn-li̍p lín, hō͘ lín tit-tio̍h gia̍p tī lóng-chóng chiâⁿ-sèng ê lâng ê tiong-kan. 33 Góa bē bat tham lâng ê gûn, kim, i-ho̍k. 34 Lín ka-kī chai, chit nn̄g ki chhiú ū kiong-kip góa ê khiàm-ēng, í-ki̍p kap góa tī-teh ê lâng. 35 Góa hoān sū chòe lín ê bô͘-iūⁿ, tio̍h án-ni tio̍h-bôa, lâi hû-chhî loán-jio̍k ê lâng; koh tio̍h kì-tit Chú Iâ-so͘ pún-sin ê ōe, kóng, Hō͘ lâng ê, pí tùi lâng the̍h ê, khah ū hok-khì. 36 Kóng soah, kūi-lo̍h kap in chèng lâng kî-tó. 37 Chèng lâng tōa thî-khàu, phō Pó-lô ê ām-kún, chim i; 38 tē it hoân-ló ê, chiū-sī i só͘ kóng ê ōe, í-āu bōe koh kìⁿ-tio̍h i ê bīn. Chiū sàng i lo̍h chûn.
1 阮已經離別in開船，直直到Ko-sū，隔日到Lô-tí，tùi hia koh到Phàⁿ-tāi-lah； 2 tú-tio̍h一隻船beh過去腓尼基，就搭伊起身。 3 已經能看見居比路，tùi chiàⁿ-pêng 行過，到敘利亞，tī Chhui-lô上山；因為船tī hia卸載。 4 Chhē-tio̍h有學生，kap in tòa 七日；in tùi神感動，kā保羅講莫得行到耶路撒冷。 5 Chiahê日已經滿，阮起身行，眾人kap bó͘ kiáⁿ送阮到城外； 6 就lóng跪落tī海邊祈禱，大家相辭；阮上船，in tò去in tau。 7 阮tùi Chhui-lô水路行盡，就到To-lī-mái，請安兄弟，kap in tòa一日。 8 隔日起身到該撒利亞；入傳福音ê人腓力ê家，kap伊saⁿ-kap tòa；伊是hit 七人中一个。 9 伊有四個cha-bó͘-kiáⁿ，lóng是在室女，也做先知。 10 阮tiàm hia kúi-nā日，有先知，名A-ka-pò͘，tùi偤太落來。 11 就近阮，the̍h保羅ê帶，縛家己ê腳手，講，聖神講，偤太人tī耶路撒冷beh án-ni縛chit條帶ê主人，交tī外邦人ê手。 12 阮聽見chiahê話，就kap hit所在ê人khǹg保羅m̄-thang上耶路撒冷。 13 保羅就應，講，Lín啥事啼哭，來chô-chak我ê心ah？我為tio̍h主耶穌ê名，m̄-nā受縛，就死tī耶路撒冷，亦已經便lah。 14 伊m̄受苦勸，阮就soah，講，主ê旨意得tio̍h成，就是。 15 Chiahê日了後，阮收拾行李，上耶路撒冷。 16 該撒利亞kúi-nā個學生kap阮去，亦chhōa一个居比路人Ná-sun，是舊ê學生；阮beh歇in tau。 17 到耶路撒冷兄弟歡喜chih接阮。 18 隔日，保羅kap阮入去見雅各；眾長老亦tī-teh。 19 保羅已經kā in請安，就將上帝用伊做工，所行tī外邦ê，一項一項講明。 20 In聽見就歸榮光上帝；也 對保羅講，兄弟ah，你看見偤太人ê中間信ê jōa-chōe萬； 21 lóng是為tio̍h律法teh熱心；in bat聽見人講你教示外邦中ê偤太人lóng背摩西，講莫得kā in ê kiáⁿ行割禮，亦莫得thàn chiahê規例。 22 Taⁿ beh怎樣？In的確會聽見你來。 23 所以阮所kā你講ê，你tio̍h 行伊。 24 阮chia有四個人hē願；你chhōa chiahê人kap in成清氣，出所費hō͘ in剃頭毛；án-ni就眾人會知所聽見講起你ê tāi-chì，是無影；就你本身亦是守律法來行。 25 論到信主ê外邦人，阮已經bat寄phoe議定tio̍h禁戒祭偶像ê物，kap血，kap捏死ê物，kap淫亂。 26 保羅就chhōa hiahê人，第二日kap in成清氣，入殿，報bêng清氣ê日期滿lah，thèng候kā in ta̍k人獻禮物。 27 Hit 七日teh-beh滿，tùi亞西亞來ê偤太人看見保羅tī殿裡，就教唆眾百姓，下手掠伊，叫講，以色列人ah，來幫贊； 28 chit人就是hitê tī ta̍k所在教示眾人，攻擊咱ê百姓，kap律法，kap chit所在ê；koh有chhōa希利尼人入殿，phah lâ-sâm chitê聖ê所在。 29 因為in bat看見以弗所人Te̍k-lô-hui-mô͘ kap伊tī城內，phah算保羅有chhōa伊入殿。 30 Tùi án-ni，thong城搖choah，百姓lóng走來；掠保羅，拖伊出殿；chiahê門liâm-piⁿ關。 31 In teh-beh 刣伊，有消息傳到營裡ê千總，講thong耶路撒冷紛亂。 32 伊liâm-piⁿ chhōa兵丁kap百總kúi-nā個，走落去到in hia；in看見千總kap兵丁，就停手，無koh phah保羅。 33 千總近前掠保羅，命令用兩條鏈縛伊；問伊是是誰，做甚麼tāi-chì。 34 眾人一个hoah一款；因為hán-hōa，bōe知hitê實情，就命令帶伊入營盤。 35 已經到崎á，因為眾人oe-khoeh真hiông，兵丁就將保羅chhah上去； 36 是眾百姓tè tī後面，叫講，kā伊除去。 37 保羅hō͘ in帶去beh入營盤ê時，對千總講，我一句話kā你講，thang mah？伊講，你bat希利尼話mah？ 38 你kiám m̄是hitê埃及人，前日起擾亂，chhōa四千ê兇手出去曠野ê mah？ 39 保羅講，我是偤太人，出世tī Ki-lī-ka ê大數，是出名ê城ê百姓；求你准我tùi百姓講。 40 已經准伊，保羅就khiā tī 崎á頂，對百姓搖手；眾人靜靜，就用希伯來ê腔口對in講，
1 Goán í-keng lī-pia̍t in khui chûn, ti̍t-ti̍t kàu Ko-sū, keh ji̍t kàu Lô-tí, tùi hia koh kàu Phàⁿ-tāi-lah; 2 tú-tio̍h chi̍t chiah chûn beh kè-khì Hui-nî-ki, chiū tah i khí-sin. 3 Í-keng ōe khòaⁿ-kìⁿ Ku-pí-lō͘, tùi chiàⁿ pêng kiâⁿ-kè, kàu Sū-lī-a, tī Chhui-lô chiūⁿ soaⁿ; in-ūi chûn tī hia sià chāi. 4 Chhē-tio̍h ū ha̍k-seng, kap in tòa chhit ji̍t; in tùi Sîn kám-tōng, kā Pó-lô kóng bo̍h-tit kiâⁿ kàu Iâ-lō͘-sat-léng. 5 Chiah ê ji̍t í-keng móa, goán khí-sin kiâⁿ, chèng lâng kap bó͘ kiáⁿ sàng goán kàu siâⁿ-gōa; 6 chiū lóng kūi-lo̍h tī hái-piⁿ kî-tó, tāi-ke saⁿ-sî; goán chiūⁿ chûn, in tò-khì in tau. 7 Goán tùi Chhui-lô chúi-lō͘ kiâⁿ chīn, chiū kàu To-lī-mái, chhéng-an hiaⁿ-tī, kap in tòa chi̍t ji̍t. 8 Keh ji̍t khí-sin kàu Kai-sat-lī-a; ji̍p thoân hok-im ê lâng Hui-le̍k ê ke, kap i saⁿ-kap tòa; i sī hit chhit-lâng tiong chi̍t ê. 9 I ū sì ê cha-bó͘-kiáⁿ, lóng sī chāi-sek-lú, iā chòe sian-ti. 10 Goán tiàm hia kúi-nā ji̍t, ū sian-ti, miâ A-ka-pò͘, tùi Iû-thài lo̍h-lâi. 11 Chiū-kūn goán, the̍h Pó-lô ê tòa, pa̍k ka-kī ê kha-chhiú, kóng, Sèng Sîn kóng, Iû-thài lâng tī Iâ-lō͘-sat-léng beh án-ni pa̍k chit tiâu tòa ê chú-lâng, kau tī gōa-pang lâng ê chhiú. 12 Goán thiaⁿ-kìⁿ chiah ê ōe, chiū kap hit só͘-chāi ê lâng khǹg Pó-lô m̄-thang chiūⁿ Iâ-lō͘-sat-léng. 13 Pó-lô chiū ìn, kóng, Lín siáⁿ-sū thî-khàu, lâi chô-chak góa ê sim ah? Góa ūi-tio̍h Chú Iâ-so͘ ê miâ, m̄ nā siū pa̍k, chiū sí tī Iâ-lō͘-sat-léng, ia̍h í-keng piān lah. 14 I m̄ siū khó͘-khǹg, goán chiū soah, kóng, Chú ê chí-ì tit-tio̍h chiâⁿ, chiū-sī. 15 Chiah ê ji̍t liáu-āu, goán siu-si̍p hêng-lí, chiūⁿ Iâ-lō͘-sat-léng. 16 Kai-sat-lī-a kúi-nā ê ha̍k-seng kap goán khì, ia̍h chhōa chi̍t ê Ku-pí-lō͘ lâng Ná-sun, sī kū ê ha̍k-seng; goán beh hioh in tau. 17 Kàu Iâ-lō͘-sat-léng hiaⁿ-tī hoaⁿ-hí chih-chiap goán. 18 Keh ji̍t, Pó-lô kap goán ji̍p khì kìⁿ Ngá-kok; chèng tiúⁿ-ló ia̍h tī-teh. 19 Pó-lô í-keng kā in chhéng-an, chiū chiong Siōng-tè ēng i chòe kang, só͘ kiâⁿ tī gōa-pang ê, chi̍t hāng chi̍t hāng kóng bêng. 20 In thiaⁿ-kìⁿ chiū kui êng-kng Siōng-tè; iā tùi Pó-lô kóng, Hiaⁿ-tī ah, lí khòaⁿ-kìⁿ Iû-thài lâng ê tiong-kan sìn-ê jōa chōe bān; 21 lóng sī ūi-tio̍h lu̍t-hoat teh jia̍t-sim; in bat thiaⁿ-kìⁿ lâng kóng lí kà-sī gōa-pang tiong ê Iû-thài lâng lóng pōe Mô͘-se, kóng bo̍h-tit kā in ê kiáⁿ kiâⁿ kat-lé, ia̍h bo̍h-tit thàn chiah ê kui-lē. 22 Taⁿ beh cháiⁿ-iūⁿ? In tek-khak ōe thiaⁿ-kìⁿ lí lâi. 23 Só͘-í goán só͘ kā lí kóng ê, lí tio̍h kiâⁿ i. 24 Goán chia ū sì ê lâng hē goān; lí chhōa chiah ê lâng kap in chiâⁿ chheng-khì, chhut só͘-hùi hō͘ in thì thâu-mn̂g; án-ni chiū chèng lâng ōe chai só͘ thiaⁿ-kìⁿ kóng-khí lí ê tāi-chì, sī bô iáⁿ; chiū lí pún-sin ia̍h sī siú lu̍t-hoat lâi kiâⁿ. 25 Lūn-kàu sìn Chú ê gōa-pang lâng, goán í-keng bat kià phoe gī-tiāⁿ tio̍h kìm-kài chè ngó͘-siōng ê mi̍h, kap huih, kap ni̍h-sí ê mi̍h, kap îm-loān. 26 Pó-lô chiū chhōa hiah ê lâng, tē jī ji̍t kap in chiâⁿ chheng-khì, ji̍p tiān, pò bêng chheng-khì ê ji̍t-kî móa lah, thèng-hāu kā in ta̍k lâng hiàn lé-mi̍h. 27 Hí chhit ji̍t teh-beh móa, tùi A-se-a lâi ê Iû-thài lâng khòaⁿ-kìⁿ Pó-lô tī tiān-ni̍h, chiū kàu-so chèng peh-sìⁿ, hē chhiú lia̍h i, kiò kóng, Í-sek-lia̍t lâng ah, lâi pang-chān; 28 chit lâng chiū-sī hit ê tī ta̍k só͘-chāi kà-sī chèng lâng, kong-kek lán ê peh-sìⁿ, kap lu̍t-hoat, kap chit só͘-chāi ê; koh ū chhōa Hi-lī-nî lâng ji̍p tiān, phah lâ-sâm chit ê sèng ê só͘-chāi. 29 In-ūi in bat khòaⁿ-kìⁿ Í-hut-só͘ lâng Te̍k-lô-hui-mô͘ kap i tī siâⁿ-lāi, phah-sǹg Pó-lô ū chhōa i ji̍p tiān. 30 Tùi án-ni thong siâⁿ iô-choah, peh-sìⁿ lóng cháu-lâi; lia̍h Pó-lô, thoa i chhut tiān; chiah ê mn̂g liâm-piⁿ koaiⁿ. 31 In teh-beh thâi i, ū siau-sit thoân kàu iâⁿ-ni̍h ê chhian-chóng, kóng thong Iâ-lō͘-sat-léng hun-loān. 32 I liâm-piⁿ chhōa peng-teng kap pé-chóng kúi-nā ê, cháu lo̍h-khì kàu in hia; in khòaⁿ-kìⁿ chhian-chóng kap peng-teng, chiū thêng chhiú, bô koh phah Pó-lô. 33 Chhian-chóng kūn chêng lia̍h Pó-lô, bēng-lēng ēng nn̄g tiâu liān pa̍k i; mn̄g i sī chī-chūi, chòe sím-mi̍h tāi-chì. 34 Chèng lâng chi̍t ê hoah chi̍t khoán; in-ūi hán-hōa, bōe chai hit ê si̍t-chêng, chiū bēng-lēng tòa i ji̍p iâⁿ-pôaⁿ. 35 Í-keng kàu kiā-á, in-ūi chèng lâng oe-khoeh chin hiông, peng-teng chiū chiong Pó-lô chhah chiūⁿ-khì; 36 sī chèng peh-sìⁿ tè tī āu-bīn, kiò kóng, Kā i tû-khì. 37 Pó-lô hō͘ in tòa-khì beh ji̍p iâⁿ-pôaⁿ ê sî, tùi chhian-chóng kóng, Góa chi̍t kù ōe kā lí kóng, thang mah? I kóng, Lí bat Hi-lī-nî ōe mah? 38 Lí kiám m̄ sī hit ê Ai-ki̍p lâng, chêng ji̍t khí jiáu-loān, chhōa sì-chheng ê hiong-siú chhut-khì khòng-iá ê mah? 39 Pó-lô kóng, Góa sī Iû-thài lâng, chhut-sì tī Ki-lī-ka ê Tāi-sò͘, sī chhut-miâ ê siâⁿ ê peh-sìⁿ; kiû lí chún góa tùi peh-sìⁿ kóng. 40 Í-keng chún i, Pó-lô chiū khiā tī kiā-á téng, tùi peh-sìⁿ iô chhiú; chèng lâng chēng-chēng, chiū ēng Hi-pek-lâi ê khiuⁿ-kháu tùi in kóng,
1 列位父兄ah，我taⁿ tùi lín家己分訴；請lín聽。 2 In聽見伊用希伯來ê腔口對in講，就koh khah安靜：保羅講， 3 我就是偤太人，出世tī Ki-lī-ka ê大數，長成tī chitê城做Ka-má-lia̍t ê學生，照咱祖宗律法ê嚴謹來受教示，為tio̍h上帝來熱心，親像今á日lín眾人一樣。 4 我bat khún-tio̍k thàn chitê路ê人hō͘伊死，無論男女lóng縛in，送落監。 5 祭司頭kap長老ê全會thang做我ê干證；我亦對in得tio̍h寄hō͘兄弟ê phoe，去大馬色，beh縛tiàm-tī hia ê人拖到耶路撒冷，受刑罰。 6 行近大馬色，hit時約略日中晝，忽然tùi天有大光圍纍照我。 7 我就仆tī地裡，聽見有聲對我講，掃羅，掃羅，啥事khún-tio̍k我？ 8 我應講，主ah，你是是誰？伊應我講，我就是拿撒勒ê耶穌，你所khún-tio̍k ê。 9 Kap我tī-teh ê人看見hitê光，無聽見kā我講ê ê聲。 10 我講，主ah，我tio̍h怎樣做？主kā我講，起來，入大馬色；凡所定tio̍h你行ê，tī hia beh kā你講。 11 我因為hitê光ê燦爛，就bōe看見，hō͘ saⁿ-kap tī-teh ê人牽入大馬色。 12 有一人，名叫亞拿尼亞，照律法是敬虔ê人，hō͘ tiàm-tī hia ê 眾偤太人所o-ló； 13 伊就近我來khiā tī身邊，kā我講，兄弟掃羅，你thang koh看。 14 我即時kia̍h目看伊。Koh講，咱列祖ê上帝已經定tio̍h你來知伊ê旨意，看hitê義ê，koh聽伊ê嘴所出ê聲。 15 因為你beh將所看見所聽見ê，為tio̍h伊做干證tī眾人。 16 Taⁿ啥事延chhiân ah？起來，求伊ê名，來受洗禮，洗除你ê罪。 17 後來我倒tńg到耶路撒冷，tī殿裡祈禱ê時，神遊tī象外， 18 看見伊對我講，你tio̍h趕緊出耶路撒冷，因為你為tio̍h我所干證ê，hiahê人teh-beh m̄接納。 19 我講，主ah，in lóng知我平素tī ta̍k-ê會堂將信你ê人關監koh phah in； 20 koh做你ê干證ê司提反流血ê時，我亦khiā-óa，同歡喜，koh顧害死伊ê人ê衫。 21 主kā我講，去 ah；我beh差你去遠遠，就近外邦人。 22 In聽到chit句話；就大聲講，chit號人tio̍h tùi地裡除去，伊m̄應該活。 23 眾人嘩嘩嚷，thǹg衫，pōaⁿ土粉tī空中。 24 千總就命令帶保羅入營盤，用鞭phah來審問伊，ài知為tio̍h甚麼緣故眾人án-ni嚷伊。 25 Tú-á用皮帶縛伊，保羅對邊á teh khiā ê百總講，做羅馬人，bē定罪，lín phah伊，thang mah？ 26 百總聽見，就去kā千總講，你beh怎樣做？因為chitê是羅馬人。 27 千總就近來對伊講，Kā我講，你是羅馬人á m̄是？伊講，是。 28 千總應講，我用chōe-chōe銀買入chitê籍。保羅講，我出世就是。 29 Tùi án-ni，beh phah問伊ê人就liâm-piⁿ離開伊；千總既然知伊是羅馬人，因為bat縛伊，亦真驚。 30 隔日，ài知保羅hō͘偤太人告ê實情，就kā伊tháu 開，命令chiahê祭司頭kap全公會聚集；就帶保羅落來，hō͘伊khiā tī in ê面前。
1 Lia̍t-ūi hū-heng ah, góa taⁿ tùi lín ka-kī hun-sò͘; chhiáⁿ lín thiaⁿ. 2 In thiaⁿ-kìⁿ i ēng Hi-pek-lâi ê khiuⁿ-kháu tùi in kóng, chiū koh khah an-chēng: Pó-lô kóng, 3 Góa chiū-sī Iû-thài lâng, chhut-sì tī Ki-lī-ka ê Tāi-sò͘, tióng-sêng tī chit ê siâⁿ chòe Ka-má-lia̍t ê ha̍k-seng, chiàu lán chó͘-chong lu̍t-hoat ê giâm-kín lâi siū kà-sī, ūi-tio̍h Siōng-tè lâi jia̍t-sim, chhin-chhiūⁿ kin-á-ji̍t lín chèng lâng chi̍t iūⁿ. 4 Góa bat khún-tio̍k thàn chit ê Lō͘ ê lâng hō͘ i sí, bô lūn lâm-lú lóng pa̍k in, sàng lo̍h kaⁿ. 5 Chè-si-thâu kap tiúⁿ-ló ê choân-hōe thang chòe góa ê kan-chèng; góa ia̍h tùi in tit-tio̍h kià hō͘ hiaⁿ-tī ê phoe, khì Tāi-má-sek, beh pa̍k tiàm tī hia ê lâng thoa kàu Iâ-lō͘-sat-léng, siū hêng-hoa̍t. 6 Kiâⁿ kūn Tāi-má-sek, hit sî iok-lio̍k ji̍t tiong-tàu, hut-jiân tùi thiⁿ ū tōa kng ûi-lûi chiò góa. 7 Góa chiū phak tī tōe-ni̍h, thiaⁿ-kìⁿ ū siaⁿ tùi góa kóng, Sò-lô, Sò-lô, siáⁿ-sū khún-tio̍k góa? 8 Góa ìn kóng, Chú ah, lí sī chī-chūi? I ìn góa kóng, Góa chiū-sī Ná-sat-le̍k ê Iâ-so͘, lí só͘ khún-tio̍k ê. 9 Kap góa tī-teh ê lâng khòaⁿ-kìⁿ hit ê kng, bô thiaⁿ-kìⁿ kā góa kóng ê ê siaⁿ. 10 Góa kóng, Chú ah, góa tio̍h cháiⁿ-iūⁿ chòe? Chú kā góa kóng, Khí-lâi, ji̍p Tāi-má-sek; hoān só͘ tiāⁿ-tio̍h lí kiâⁿ ê, tī hia beh kā lí kóng. 11 Góa in-ūi hit ê kng ê chhàn-lān, chiū bōe khòaⁿ-kìⁿ, hō͘ saⁿ-kap tī-teh ê lâng khan ji̍p Tāi-má-sek. 12 Ū chi̍t lâng, miâ kiò A-ná-nî-a, chiàu lu̍t-hoat sī kèng-khiân ê lâng, hō͘ tiàm tī hia ê chèng Iû-thài lâng só͘ o-ló; 13 i chiū-kūn góa lâi khiā tī sin-piⁿ, kā góa kóng, Hiaⁿ-tī Sò-lô, lí thang koh khòaⁿ. 14 Góa chek-sî kia̍h ba̍k khòaⁿ i. Koh kóng, Lán lia̍t-chó͘ ê Siōng-tè í-keng tiāⁿ-tio̍h lí lâi chai I ê chí-ì, khòaⁿ hit ê Gī-ê, koh thiaⁿ I ê chhùi só͘ chhut ê siaⁿ. 15 In-ūi lí beh chiong só͘ khòaⁿ-kìⁿ só͘ thiaⁿ-kìⁿ ê, ūi-tio̍h I chòe kan-chèng tī chèng lâng. 16 Taⁿ siáⁿ-sū iân-chhiân ah? khí-lâi, kiû I ê miâ, lâi siū sóe-lé, sóe-tû lí ê chōe. 17 Āu-lâi góa tò-tńg kàu Iâ-lō͘-sat-léng, tī tiān-ni̍h kî-tó ê sî, sîn iû tī siōng-gōa, 18 khòaⁿ-kìⁿ I tùi góa kóng, Lí tio̍h kóaⁿ-kín chhut Iâ-lō͘-sat-léng, in-ūi lí ūi-tio̍h góa só͘ kan-chèng ê, hiah ê lâng teh-beh m̄ chiap-la̍p. 19 Góa kóng, Chú ah, in lóng chai góa pêng-sò͘ tī ta̍k ê hōe-tn̂g chiong sìn lí ê lâng koaiⁿ-kaⁿ koh phah in; 20 koh chòe lí ê kan-chèng ê Sū-thê-hoán lâu huih ê sî, góa ia̍h khiā-óa, tâng hoaⁿ-hí, koh kò͘ hāi-sí i ê lâng ê saⁿ. 21 Chú kā góa kóng, Khì ah; góa beh chhe lí khì hn̄g-hn̄g, chiū-kūn gōa-pang lâng. 22 In thiaⁿ kàu chit kù ōe; chiū tōa siaⁿ kóng, chit hō lâng tio̍h tùi tōe-ni̍h tû-khì, i m̄ eng-kai oa̍h. 23 Chèng lâng hōa-hōa jióng, thǹg saⁿ, pōaⁿ thô͘-hún tī khong-tiong. 24 Chhian-chóng chiū bēng-lēng tòa Pó-lô ji̍p iâⁿ-pôaⁿ, ēng piⁿ phah lâi sím-mn̄g i, ài chai ūi-tio̍h sím-mi̍h iân-kò͘ chèng lâng án-ni jióng i. 25 Tú-á ēng phê-tòa pa̍k i, Pó-lô tùi piⁿ-á teh khiā ê pé-chóng kóng, Chòe Lô-má lâng, bē tēng chōe, lín phah i, thang mah? 26 Pé-chóng thiaⁿ-kìⁿ, chiū khì kā chhian-chóng kóng, Lí beh cháiⁿ-iūⁿ chòe? in-ūi chit ê sī Lô-má lâng. 27 Chhian-chóng chiū-kūn lâi tùi i kóng, Kā góa kóng, lí sī Lô-má lâng á m̄ sī? I kóng, Sī. 28 Chhian-chóng ìn kóng, Góa ēng chōe-chōe gûn bóe ji̍p chit ê che̍k. Pó-lô kóng, Góa chhut-sì chiū-sī. 29 Tùi án-ni beh phah-mn̄g i ê lâng chiū liâm-piⁿ lī-khui i; chhian-chóng kì-jiân chai i sī Lô-má lâng, in-ūi bat pa̍k i, ia̍h chin kiaⁿ. 30 Keh ji̍t, ài chai Pó-lô hō͘ Iû-thài lâng kò ê si̍t-chêng, chiū kā i tháu khui, bēng-lēng chiah ê chè-si-thâu kap choân kong-hōe chū-chi̍p; chiū tòa Pó-lô lo̍h-lâi, hō͘ i khiā tī in ê bīn-chêng.
1 保羅注目看公會，講，兄弟ah，我平素做人ǹg上帝，凡事存良心，到今á日。 2 祭司頭亞拿尼亞命令身邊teh khiā ê人phah伊ê嘴。 3 保羅就對伊講，粉白ê 牆ah，上帝beh phah你；你坐teh照律法審判我，竟然違逆律法命令phah我mah？ 4 身邊teh khiā ê人講，上帝ê祭司頭，你罵伊mah？ 5 保羅講，兄弟ah，我m̄-bat伊是祭司頭；因為聖經有記，講，莫得罵你ê百姓ê序大。 6 但是保羅知in一pêng是撒都該人，一pêng是法利賽人；就tī公會中叫講，兄弟ah，我是法利賽人，亦是法利賽人ê kiáⁿ；chit-tia̍p受審判就是因為死人koh活ê ǹg望。 7 講án-ni，法利賽人kap撒都該人相爭；眾人就分pêng。 8 因為撒都該人講無koh活，亦無天使，亦無神；但是法利賽人就認兩項lóng有。 9 就有大喧嚷；法利賽hit-pêng ê經學士kúi-nā個起來，爭辯講，阮看chit人lóng無pháiⁿ；若beh是有神，á是天使，kap伊講話ni̍h？ 10 Hit時tú-tú大相爭；千總驚了保羅hō͘ in拆裂，命令兵丁落去對in中間搶出，chhōa伊入營盤。 11 Hit暝主khiā tī保羅ê身邊，講，壯你ê心；你bat tī耶路撒冷為tio̍h我做干證，亦的確án-ni做干證tī羅馬。 12 到天光，偤太人結黨chiù-chōa，講，若無到刣死保羅，m̄ lim m̄食。 13 Án-ni同心chiù-chōa ê有四十gōa人。 14 就就近chiahê祭司頭kap長老，講，阮chiahê已經chiù重chōa，若無到刣死保羅，半項物to m̄食。 15 Taⁿ lín kap公會tio̍h kā千總講，請伊chhōa保羅到lín ê面前，ná親像lín beh koh詳細查問伊ê案情；阮已經備辦好lah，tī伊bē近óa ê時來刣伊。 16 獨獨保羅ê外甥聽見in beh埋伏，就去入營kā保羅講。 17 保羅叫一个百總來，講，Chhōa chitê少年人去見千總；因為伊有tāi-chì beh報伊知。 18 就牽伊，chhōa伊去見千總，講，Hit-ê受關ê保羅叫我去，求我chhōa chitê少年人見你；有tāi-chì beh kā你講。 19 千總牽伊ê手，到偏僻ê所在，問講，Beh報我知甚麼？ 20 講，偤太人相約，求你明á日chhōa保羅落公會，ná親像你beh詳細查問伊ê案情。 21 求你莫得thàn伊；因為in有四十gōa人埋伏teh當等伊；in bat chiù-chōa講，若無到刣死保羅，m̄ lim m̄食；taⁿ已經備辦好，teh thèng候你允准nā-tiāⁿ。 22 千總kah少年人去，吩咐伊講，M̄-thang對人講你有將chiahê tāi-chì通知我。 23 就召百總兩人，講，備辦步兵兩百，馬兵七十，kia̍h鎗ê兩百，今暝二更去該撒利亞； 24 koh備辦cheng-siⁿ hō͘保羅騎，保護伊到總督Hui-le̍k-sū hia。 25 就寫文書，hitê大略是講： 26 Kek-ló-tiu Lū-se-a請安總督Hui-le̍k-sū大人。 27 Chit人hō͘偤太人掠；beh 刣伊，我一下知伊是羅馬人，就chhōa兵去救伊。 28 Ài知in告伊ê緣故，就送伊落 in ê公會： 29 查出伊受告，是為tio̍h in律法ê辯論，並無應該死應該縛ê案情。 30 有人kā我講，teh-beh有計謀陷害chit人，我即時差伊就近你，亦命令告伊ê人tī你ê面前告伊。 31 兵丁奉命令，將保羅透暝chhōa到An-thê-phàⁿ-tí。 32 隔日hō͘馬兵kap伊去，in就tò去營盤。 33 Hiah-ê馬兵入該撒利亞，將文書獻總督，就hō͘保羅khiā tī伊ê面前。 34 看了，問伊是甚麼省ê人；知伊屬Ki-lī-ka。 35 就講，告你ê人若來，我beh詳細聽你ê事；就吩咐顧守伊tī希律ê衙門。
1 Pó-lô chù-ba̍k khòaⁿ kong-hōe, kóng, Hiaⁿ-tī ah, góa pêng-sò͘ chòe lâng ǹg Siōng-tè, hoān-sū chûn liông-sim, kàu kin-á-ji̍t. 2 Chè-si-thâu A-ná-nî-a bēng-lēng sin-piⁿ teh khiā ê lâng phah i ê chhùi. 3 Pó-lô chiū tùi i kóng, Hún-pe̍h ê chhiûⁿ ah, Siōng-tè beh phah lí; lí chē teh chiàu lu̍t-hoat sím-phòaⁿ góa, kèng-jiân ûi-ke̍h lu̍t-hoat bēng-lēng phah góa mah? 4 Sin-piⁿ teh khiā ê lâng kóng, Siōng-tè ê chè-si-thâu, lí mē i mah? 5 Pó-lô kóng, Hiaⁿ-tī ah, góa m̄ bat i sī chè-si-thâu; in-ūi sèng-keng ū kì, kóng, Bo̍h-tit mē lí ê peh-sìⁿ ê sī-tōa. 6 Nā-sī Pó-lô chai in chi̍t pêng sī Sat-thó͘-kai lâng, chi̍t pêng sī Hoat-lī-sài lâng; chiū tī kong-hōe tiong kiò kóng, Hiaⁿ-tī ah, góa sī Hoat-lī-sài lâng, ia̍h sī Hoat-lī-sài lâng ê kiáⁿ; chit tia̍p siū sím-phòaⁿ chiū-sī in-ūi sí-lâng koh-oa̍h ê ǹg-bāng. 7 Kóng án-ni, Hoat-lī-sài lâng kap Sat-thó͘-kai lâng saⁿ-chiⁿ; chèng lâng chiū hun-pêng. 8 In-ūi Sat-thó͘-kai lâng kóng bô koh-oa̍h, ia̍h bô thiⁿ-sài, ia̍h bô sîn; nā-sī Hoat-lī-sài lâng chiū jīn nn̄g hāng lóng ū. 9 Chiū ū tōa soan-jióng; Hoat-lī-sài hit pêng ê keng-ha̍k-sū kúi-nā ê khí-lâi, cheng-piān kóng, Goán khòaⁿ chit lâng lóng bô pháiⁿ; nā beh sī ū sîn, á-sī thiⁿ-sài, kap i kóng ōe ni̍h? 10 Hit sî tú-tú tōa saⁿ-chiⁿ; chhian-chóng kiaⁿ-liáu Pó-lô hō͘ in thiah-li̍h, bēng-lēng peng-teng lo̍h-khì tùi in tiong-kan chhiúⁿ-chhut, chhōa i ji̍p iâⁿ-pôaⁿ. 11 Hit mî Chú khiā tī Pó-lô ê sin-piⁿ, kóng, Chòng lí ê sim; lí bat tī Iâ-lō͘-sat-léng ūi-tio̍h góa chòe kan-chèng, ia̍h tek-khak án-ni chòe kan-chèng tī Lô-má. 12 Kàu thiⁿ kng, Iû-thài lâng kiat-tóng chiù-chōa, kóng, Nā bô kàu thâi-sí Pó-lô, m̄ lim m̄ chia̍h. 13 Án-ni tâng sim chiù-chōa ê ū sì-cha̍p gōa lâng. 14 Chiū chiū-kūn chiah ê chè-si-thâu kap tiúⁿ-ló, kóng, Goán chiah-ê í-keng chiù tāng chōa, nā bô kàu thâi-sí Pó-lô, pòaⁿ hāng mi̍h to m̄ chia̍h. 15 Taⁿ lín kap kong-hōe tio̍h kā chhian-chóng kóng, chhiáⁿ i chhōa Pó-lô kàu lín ê bīn-chêng, ná chhin-chhiūⁿ lín beh koh siông-sè chhâ-mn̄g i ê àn-chêng; goán í-keng pī-pān hó lah, tī i bē kūn-óa ê sî lâi thâi i. 16 To̍k-to̍k Pó-lô ê gōe-seng thiaⁿ-kìⁿ in beh bâi-ho̍k, chiū khì ji̍p iâⁿ kā Pó-lô kóng. 17 Pó-lô kiò chi̍t ê pé-chóng lâi, kóng, Chhōa chit ê siàu-liân lâng khì kìⁿ chhian-chóng; in-ūi i ū tāi-chì beh pò i chai. 18 Chiū khan i, chhōa i khì kìⁿ chhian-chóng, kóng, Hit ê siū koaiⁿ ê Pó-lô kiò góa khì, kiû góa chhōa chit ê siàu-liân lâng kìⁿ lí; ū tāi-chì beh kā lí kóng. 19 Chhian-chóng khan i ê chhiú, kàu phian-phiah ê só͘-chāi, mn̄g kóng, Beh pò góa chai sím-mi̍h? 20 Kóng, Iû-thài lâng siong iok, kiû lí bîn-á-ji̍t chhōa Pó-lô lo̍h kong-hōe, ná chhin-chhiūⁿ lí beh siông-sè chhâ-mn̄g i ê àn-chêng. 21 Kiû lí bo̍h-tit thàn i; in-ūi in ū sì-cha̍p gōa lâng bâi-ho̍k teh tng-tán i; in bat chiù-chōa kóng, Nā bô kàu thâi-sí Pó-lô, m̄ lim m̄ chia̍h; taⁿ í-keng pī-pān hó, teh thèng-hāu lí ún-chún nā-tiāⁿ. 22 Chhian-chóng kah siàu-liân lâng khì, hoan-hù i kóng, M̄-thang tùi lâng kóng lí ū chiong chiah ê tāi-chì thong-ti góa. 23 Chiū tiàu pé-chóng nn̄g lâng, kóng, Pī-pān pō͘-peng nn̄g pah, bé-peng chhit-cha̍p, kia̍h chhiuⁿ ê nn̄g pah, kim-mî jī kiⁿ khì Kai-sat-lī-a; 24 koh pī-pān cheng-siⁿ hō͘ Pó-lô khiâ, pó-hō͘ i kàu chóng-tok Hui-le̍k-sū hia. 25 Chiū siá bûn-su, hit ê tāi-lio̍k sī kóng: 26 Kek-ló-tiu Lū-se-a chhéng-an chóng-tok Hui-le̍k-sū tāi-jîn. 27 Chit lâng hō͘ Iû-thài lâng lia̍h; beh thâi i, góa chi̍t-ē chai i sī Lô-má lâng, chiū chhōa peng khì kiù i. 28 Ài chai in kò i ê iân-kò͘, chiū sàng i lo̍h in ê kong-hōe: 29 chhâ-chhut i siū kò, sī ūi-tio̍h in lu̍t-hoat ê piān-lūn, pēng bô eng-kai sí eng-kai pa̍k ê àn-chêng. 30 Ū lâng kā góa kóng, teh-beh ū kè-bô͘ hām-hāi chit lâng, góa chek-sî chhe i chiū-kūn lí, ia̍h bēng-lēng kò i ê lâng tī lí ê bīn-chêng kò i. 31 Peng-teng hōng bēng-lēng, chiong Pó-lô thàu-mî chhōa kàu An-thê-phàⁿ-tí. 32 Keh ji̍t hō͘ bé-peng kap i khì, in chiū tò-khì iâⁿ-pôaⁿ. 33 Hiah ê bé-peng ji̍p Kai-sat-lī-a, chiong bûn-su hiàn chóng-tok, chiū hō͘ Pó-lô khiā tī i ê bīn-chêng. 34 Khòaⁿ-liáu, mn̄g i sī sím-mi̍h séng ê lâng; chai i sio̍k Ki-lī-ka. 35 Chiū kóng, Kò lí ê lâng nā lâi, góa beh siông-sè thiaⁿ lí ê sū; chiū hoan-hù kò͘-siú i tī Hi-lu̍t ê gê-mn̂g.
1 五日後，祭司頭亞拿尼亞kap kúi-nā個長老，kap chitê辯護士 Thiap-thó͘-lô，落來；對總督告保羅。 2 保羅受召，Thiap-thó͘-lô就告伊，講， 3 Hui-le̍k-sū大人，阮對你得tio̍h太平，koh對你ê先見，chit國ê弊病得tio̍h 改正，ta̍k時ta̍k所在，阮承受伊，來感謝無soah。 4 Taⁿ m̄敢chhiân你siuⁿ久，求你寬容聽阮kúi句話。 5 因為有查出chit人親像瘟疫，tī天下生起擾亂，做拿撒勒黨 ê頭目， 6 連聖殿伊亦beh phah lâ-sâm； 7 8 阮就掠伊；你家己審問伊，就阮所告伊ta̍k項ê因端，能確實知。 9 偤太人同聲告伊講，tāi-chì實在是án-ni。 10 總督thìm頭，kah保羅講；伊就應講，我知你做chit邦國ê審判司chōe-chōe 年，所以歡喜分訴家己ê tāi-chì； 11 你會知，我上耶路撒冷敬拜到taⁿ不過十二日； 12 in未bat tú-tio̍h我tī殿內kap人辯論，á是擾動眾人，就tī會堂亦無，城內亦無。 13 Koh現在所告我ê事，in lóng bōe會對你顯出證據。 14 獨獨一項我對你認，就是in所叫做結黨ê路，我照án-ni來服事列祖ê上帝，koh信lóng總合tī律法ê以及記載tī先知ê冊ê； 15 koh對上帝有ǹg望，就是無論義人kap不義ê人beh lóng koh活，這亦是in家己所teh欣慕ê。 16 我tī chitê家己練習，就是對上帝，對人，常常存無虧負ê良心。 17 Taⁿ過 kúi-nā年，我tò來是beh賑濟本國，kap獻禮物； 18 teh獻ê時，in tú-tio̍h我tī殿裡已經清氣，並無結kui群，也無hán-hōa；只有幾個偤太人tùi亞西亞來ê， 19 in若有thang責罪我，就應該來tī你ê面前告我。 20 á是tī chia ê人，若看見我khiā tī公會ê面前，有甚麼不義，in亦tio̍h家己講； 21 設使有，亦不過chit一句nā-tiāⁿ，就是我khiā tī in中間，叫講，為tio̍h死人koh活ê事，我今á日tī lín ê面前受審判。 22 Hui-le̍k-sū本詳細知關涉chitê路ê事，就延chhiân in，講，千總Lū-se-a落來ê時，我就beh審斷lín ê tāi-chì。 23 Tùi án-ni，命令百總顧守保羅，亦放寬伊；伊ê人若來供給伊，lóng莫得阻擋。 24 過 kúi-nā日，Hui-le̍k-sū kap伊ê bó͘，Thó͘-se-lah，是偤太人，saⁿ-kap來，就召保羅，ài聽伊論信基督耶穌ê道理。 25 保羅議論公義、貞節，kap將來ê審判，Hui-le̍k-sū不止驚，應講，Taⁿ請退去；有利便ê時，chiah召你。 26 伊亦ǹg望保羅beh銀hō͘伊；所以ta̍uh-ta̍uh召伊來，kap伊談論。 27 過兩年，Pho-kiû Hui-sū-to͘接Hui-le̍k-sū ê任；Hui-le̍k-sū ài取偤太人歡喜，就留保羅猶原縛teh。
1 Gō͘ ji̍t āu chè-si-thâu A-ná-nî-a kap kúi-nā ê tiúⁿ-ló, kap chit ê piān-hō͘-sū Thiap-thó͘-lô, lo̍h-lâi; tùi chóng-tok kò Pó-lô. 2 Pó-lô siū tiàu, Thiap-thó͘-lô chiū kò i, kóng, 3 Hui-le̍k-sū tāi-jîn, goán tùi lí tit-tio̍h thài-pêng, koh tùi lí ê sian-kiàn, chit kok ê pē-pēng tit-tio̍h kái-chèng, ta̍k sî ta̍k só͘-chāi, goán sêng-siū i, lâi kám-siā bô soah. 4 Taⁿ m̄ káⁿ chhiân lí siuⁿ kú, kiû lí khoan-iông thiaⁿ goán kúi kù ōe. 5 In-ūi ū chhâ-chhut chit lâng chhin-chhiūⁿ un-e̍k, tī thiⁿ-ē siⁿ-khí jiáu-loān, chòe Ná-sat-le̍k tóng ê thâu-ba̍k, 6 liân sèng-tiān i ia̍h beh phah lâ-sâm; 7 8 goán chiū lia̍h i; lí ka-kī sím-mn̄g i, chiū goán só͘ kò i ta̍k hāng ê in-toaⁿ, ōe khak-si̍t chai. 9 Iû-thài lâng tâng siaⁿ kò i kóng, tāi-chì si̍t-chāi sī án-ni. 10 Chóng-tok thìm thâu, kah Pó-lô kóng; i chiū ìn kóng, Góa chai lí chòe chit pang kok ê sím-phòaⁿ si chōe-chōe nî, só͘-í hoaⁿ-hí hun-sò͘ ka-kī ê tāi-chì; 11 lí ōe chai, góa chiūⁿ Iâ-lō͘-sat-léng kèng-pài kàu taⁿ put-kò cha̍p-jī ji̍t; 12 in bē bat tú-tio̍h góa tī tiān-lāi kap lâng piān-lūn, á-sī jiáu-tōng chèng lâng, chiū tī hōe-tn̂g ia̍h bô, siâⁿ-lāi ia̍h bô. 13 Koh hiān-chāi só͘ kò góa ê sū, in lóng bōe-ōe tùi lí hián-chhut chèng-kù. 14 To̍k-to̍k chi̍t hāng góa tùi lí jīn, chiū-sī in só͘ kiò chòe kiat-tóng ê Lō͘, góa chiàu án-ni lâi ho̍k-sāi lia̍t-chó͘ ê Siōng-tè, koh sìn lóng-chóng ha̍p tī lu̍t-hoat ê í-ki̍p kì-chài tī sian-ti ê chheh ê; 15 koh tùi Siōng-tè ū ǹg-bāng, chiū-sī bô lūn gī lâng kap put-gī ê lâng beh lóng koh-oa̍h, che ia̍h sī in ka-kī só͘ teh him-bō͘ ê. 16 Góa tī chit-ê ka-kī liān-si̍p, chiū-sī tùi Siōng-tè, tùi lâng, siông-siông chûn bô khui-hū ê liông-sim. 17 Taⁿ kè kúi-nā nî, góa tò-lâi sī beh chín-chè pún kok, kap hiàn lé-mi̍h; 18 teh hiàn ê sî, in tú-tio̍h góa tī tiān-ni̍h í-keng chheng-khì, pēng bô kiat kui-kûn iā bô hán-hōa; chí-ū kúi ê Iû-thài lâng tùi A-se-a lâi ê, 19 in nā ū thang chek-chōe góa, chiū eng-kai lâi tī lí ê bīn-chêng kò góa. 20 Á-sī tī chia ê lâng, nā khòaⁿ-kìⁿ góa khiā tī kong-hōe ê bīn-chêng, ū sím-mi̍h put-gī, in ia̍h tio̍h ka-kī kóng; 21 siat-sú ū, ia̍h put-kò chí chi̍t kù nā-tiāⁿ, chiū-sī góa khiā tī in tiong-kan, kiò kóng, Ūi-tio̍h sí-lâng koh-oa̍h ê sū, góa kin-á-ji̍t tī lín ê bīn-chêng siū sím-phòaⁿ. 22 Hui-le̍k-sū pún siông-sè chai koan-sia̍p chit ê Lō͘ ê sū, chiū iân-chhiân in, kóng, Chhian-chóng Lū-se-a lo̍h-lâi ê sî, góa chiū beh sím-toàn lín ê tāi-chì. 23 Tùi án-ni bēng-lēng pé-chóng kò͘-siú Pó-lô, ia̍h pàng-khoan i; i ê lâng nā lâi kiong-kip i, lóng bo̍h-tit chó͘-tòng. 24 Kè kúi-nā ji̍t, Hui-le̍k-sū kap i ê bó͘, Thó͘-se-lah, sī Iû-thài lâng, saⁿ-kap lâi, chiū tiàu Pó-lô, ài thiaⁿ i lūn sìn Ki-tok Iâ-so͘ ê tō-lí. 25 Pó-lô gī-lūn kong-gī, cheng-chiat, kap chiong-lâi ê sím-phòaⁿ, Hui-le̍k-sū put-chí kiaⁿ, ìn kóng, Taⁿ chhiáⁿ thè-khì; ū lī-piān ê sî, chiah tiàu lí. 26 I ia̍h ǹg-bāng Pó-lô beh gûn hō͘ i; só͘-í ta̍uh-ta̍uh tiàu i lâi, kap i tâm-lūn. 27 Kè nn̄g nî, Pho-kiû Hui-sū-to͘ chiap Hui-le̍k-sū ê jīm; Hui-le̍k-sū ài chhú Iû-thài lâng hoaⁿ-hí, chiū lâu Pó-lô iû-goân pa̍k-teh.
1 Hui-sū-to͘到任三日，就tùi該撒利亞上耶路撒冷。 2 Chiahê祭司頭kap偤太ê頭人，對伊告保羅； 3 續求情beh害保羅，sòe伊帶保羅到耶路撒冷；in tī路裡teh設埋伏，beh 刣伊。 4 但是Hui-sū-to͘應講，保羅是顧守tī該撒利亞，我本身亦beh緊緊tò去。 5 Koh講，Lín中間khah能ê人thang saⁿ-kap落去；hit人若有甚麼不是，就thang告伊。 6 Hui-sū-to͘ tiàm hia不過十日八日，就落去該撒利亞；隔日坐堂，命令帶保羅來。 7 已經到，tùi耶路撒冷落來ê偤太人圍纍teh khiā，用chōe-chōe重 ê案件來告伊；但是無憑據thang證明。 8 保羅分訴講，偤太人ê律法，á是殿堂，á是該撒，我未bat犯tio̍h。 9 Hui-sū-to͘ ài hō͘偤太人歡喜，應保羅講，論chiahê事，你甘願上耶路撒冷，tī hia當我ê面前受審判mah？ 10 總是保羅講，我khiā tī該撒ê公堂，是我應該受審判ê位；我未bat用不義款待偤太人，這亦是你所明明知ê。 11 我若有行不義，á是犯tio̍h死罪，就死亦無推辭；但是in所告我ê無一項實，就無人thang順人情將我交hō͘ in。我對該撒告御狀。 12 Hui-sū-to͘ kap議會saⁿ-kap議論了，就應講，你已經對該撒告御狀，就去見該撒。 13 過 kúi-nā日，A-ki-phàⁿ王kap Pek-nî-ki到該撒利亞，請安Hui-sū-to͘。 14 Tiàm hia chōe-chōe日，Hui-sū-to͘將保羅ê事對王排列，講，有一人就是Hui-le̍k-sū所留tī監裡ê； 15 我tī耶路撒冷ê時，chiahê祭司頭kap偤太ê長老告伊，求定伊ê罪。 16 我應講，被告kap原告iáu-bē對訊，bē得tio̍h機會分訴伊ê案情，就順人情將伊交hō͘人，m̄是羅馬人ê例。 17 所以in聚集tī chia，我無延chhiân，隔日坐堂，命令帶hit人到。 18 告伊ê人lóng khiā-teh；所告ê m̄是我所事先phah算ê pháiⁿ事， 19 不過有幾項ê辯論，就是論 in敬神明ê事，koh論一个耶穌，已經死，保羅講伊活，為tio̍h án-ni來告伊。 20 Chiahê事tio̍h怎樣查問，我既然bōe明，所以問伊甘願去耶路撒冷，tī hia受審問chiahê事á m̄。 21 獨獨保羅已經告御狀，ài我留伊交hō͘皇帝判斷，我就命令留伊，thèng候解送hō͘該撒。 22 A-ki-phàⁿ對Hui-sū-to͘講，我本也ài聽chitê人。講，明á日thang聽伊。 23 隔日A-ki-phàⁿ kap Pek-nî-ki大設威儀來，kap chiahê千總，以及城內尊貴ê人，入公堂，Hui-sū-to͘出命令，就帶保羅到。 24 Hui-sū-to͘講，A-ki-phàⁿ王以及kap阮tī-teh ê眾人ah，lín看chitê人，就是眾偤太人，tī耶路撒冷kap tī chia，求我叫講，伊m̄應該iáu活 ê。 25 但是我查明伊未bat行應該死ê事；koh伊已經告御狀tī皇帝，所以我擬定解送伊。 26 獨獨bē得tio̍h伊ê實情thangh奏我ê 主。所以帶伊出來tī lín ê面前，koh khah要緊tī A-ki-phàⁿ王你ê面前，chiah tī審問了有所thang奏。 27 因為照我phah算，解送犯人，若無指明告伊ê事，是無合理。
1 Hui-sū-to͘ tò jīm saⁿ ji̍t, chiū tùi Kai-sat-lī-a chiūⁿ Iâ-lō͘-sat-léng. 2 Chiah ê chè-si-thâu kap Iû-thài ê thâu-lâng, tùi i kò Pó-lô; 3 sòa kiû chêng beh hāi Pó-lô, sòe i tòa Pó-lô kàu Iâ-lō͘-sat-léng; in tī lō͘-ni̍h teh siat bâi-ho̍k, beh thâi i. 4 Nā-sī Hui-sū-to͘ ìn kóng, Pó-lô sī kò͘-siú tī Kai-sat-lī-a, góa pún-sin ia̍h beh kín-kín tò-khì. 5 Koh kóng, Lín tiong-kan khah ōe ê lâng thang saⁿ-kap lo̍h-khì; hit lâng nā ū sím-mi̍h put-sī, chiū thang kò i. 6 Hui-sū-to͘ tiàm hia put-kò cha̍p-ji̍t poeh-ji̍t, chiū lo̍h-khì Kai-sat-lī-a; keh ji̍t chē tn̂g, bēng-lēng tòa Pó-lô lâi. 7 Í-keng kàu, tùi Iâ-lō͘-sat-léng lo̍h-lâi ê Iû-thài lâng ûi-lûi teh khiā, ēng chōe-chōe tāng ê àn-kiāⁿ lâi kò i; nā-sī bô pîn-kù thang chèng-bêng. 8 Pó-lô hun-sò͘ kóng, Iû-thài lâng ê lu̍t-hoat, á-sī tiān-tn̂g, á-sī Kai-sat, góa bē bat hoān-tio̍h. 9 Hui-sū-to͘ ài hō͘ Iû-thài lâng hoaⁿ-hí, ìn Pó-lô kóng, Lūn chiah ê sū, lí kam-goān chiūⁿ Iâ-lō͘-sat-léng, tī hia tng góa ê bīn-chêng siū sím-phòaⁿ mah? 10 Chóng-sī Pó-lô kóng, Góa khiā tī Kai-sat ê kong-tn̂g, sī góa eng-kai siū sím-phòaⁿ ê ūi; góa bē bat ēng put-gī khoán-thāi Iû-thài lâng, che ia̍h sī lí só͘ bêng-bêng chai ê. 11 Góa nā ū kiâⁿ put-gī, á-sī hoān-tio̍h sí chōe, chiū sí ia̍h bô the-sî; nā-sī in só͘ kò góa ê bô chi̍t hāng si̍t, chiū bô lâng thang sūn jîn-chêng chiong góa kau hō͘ in. Góa tùi Kai-sat kò gū-chn̄g. 12 Hui-sū-to͘ kap gī-hōe saⁿ-kap gī-lūn liáu, chiū ìn kóng, Lí í-keng tùi Kai-sat kò gū-chn̄g, chiū khì kìⁿ Kai-sat. 13 Kè kúi-nā ji̍t A-ki-phàⁿ ông kap Pek-nî-ki kàu Kai-sat-lī-a, chhéng-an Hui-sū-to͘. 14 Tiàm hia chōe-chōe ji̍t, Hui-sū-to͘ chiong Pó-lô ê sū tùi ông pâi-lia̍t, kóng, Ū chi̍t lâng chiū-sī Hui-le̍k-sū só͘ lâu tī kaⁿ-ni̍h ê; 15 góa tī Iâ-lō͘-sat-léng ê sî, chiah ê chè-si-thâu kap Iû-thài ê tiúⁿ-ló kò i, kiû tēng i ê chōe. 16 Góa ìn kóng, Pī-kò kap goân-kò iáu-bē tùi-sìn, bē tit-tio̍h ki-hōe hun-sò͘ i ê àn-chêng, chiū sūn jîn-chêng chiong i kau hō͘ lâng, m̄ sī Lô-má lâng ê lē. 17 Só͘-í in chū-chi̍p tī chia, góa bô iân-chhiân, keh ji̍t chē tn̂g, bēng-lēng tòa hit lâng kàu. 18 Kò i ê lâng lóng khiā-teh; só͘ kò ê m̄ sī góa só͘ tāi-seng phah-sǹg ê pháiⁿ sū, 19 put-kò ū kúi hāng ê piān-lūn, chiū-sī lūn in kèng sîn-bêng ê sū, koh lūn chi̍t ê Iâ-so͘, í-keng sí, Pó-lô kóng i oa̍h, ūi-tio̍h án-ni lâi kò i. 20 Chiah ê sū tio̍h cháiⁿ-iūⁿ chhâ-mn̄g, góa kì-jiân bōe bêng, só͘-í mn̄g i kam-goān khì Iâ-lō͘-sat-léng, tī hia siū sím-mn̄g chiah ê sū á m̄. 21 To̍k-to̍k Pó-lô í-keng kò gū-chn̄g, ài góa lâu i kau hō͘ hông-tè phòaⁿ-toàn, góa chiū bēng-lēng lâu i, thèng-hāu ké-sàng hō͘ Kai-sat. 22 A-ki-phàⁿ tùi Hui-sū-to͘ kóng, Góa pún iā ài thiaⁿ chit ê lâng. Kóng, Bîn-á-ji̍t thang thiaⁿ i. 23 Keh ji̍t A-ki-phàⁿ kap Pek-nî-ki tōa siat ui-gî lâi, kap chiah ê chhian-chóng, í-ki̍p siâⁿ-lāi chun-kùi ê lâng, ji̍p kong-tn̂g, Hui-sū-to͘ chhut bēng-lēng, chiū tòa Pó-lô kàu. 24 Hui-sū-to͘ kóng, A-ki-phàⁿ ông í-ki̍p kap goán tī-teh ê chèng lâng ah, lín khòaⁿ chit ê lâng, chiū-sī chèng Iû-thài lâng, tī Iâ-lō͘-sat-léng kap tī chia, kiû góa kiò kóng, i m̄ eng-kai iáu oa̍h ê. 25 Nā-sī góa chhâ-bêng i bē bat kiâⁿ eng-kai sí ê sū; koh i í-keng kò gū-chn̄g tī hông-tè, só͘-í góa gí-tiāⁿ ké-sàng i. 26 To̍k-to̍k bē tit-tio̍h i ê si̍t-chêng thang chàu góa ê chú. Só͘-í tòa i chhut-lâi tī lín ê bīn-chêng, koh khah iàu-kín tī A-ki-phàⁿ ông lí ê bīn-chêng, chiah tī sím-mn̄g liáu ū só͘ thang chàu. 27 In-ūi chiàu góa phah-sǹg, ké-sàng hoān-lâng, nā bô chí-bêng kò i ê sū, sī bô ha̍p lí.
1 A-ki-phàⁿ對保羅講，准你家己排列。保羅就kia̍h-起手分訴講： 2 A-ki-phàⁿ王 ah，我hō͘偤太人所告ê，今á日beh lóng分訴tī你ê面前，是真佳哉： 3 koh khah佳哉ê，是因為偤太人ê規例kap in ê辯論，你lóng知；所以求你寬容聽我。 4 我tùi起頭tī我ê百姓ê中間，kap tī耶路撒冷，tùi少年做人怎樣，偤太人lóng知。 5 In tùi起頭bat我，設使肯做干證，就知我照咱教中極嚴ê派，做法利賽人。 6 現在我khiā tī chia來受審判，就是因為ǹg望上帝對咱ê列祖所應允ê； 7 咱十二支派，日暝慇勤服事，亦是ǹg望到tī chitê。王 ah，我為tio̍h chitê ǹg望，chiah hō͘偤太人告。 8 上帝若hō͘死人koh活，lín怎樣掠做bōe信得ah？ 9 前我家己phah算tio̍h用chōe-chōe項來攻擊拿撒勒耶穌ê名。 10 Tī耶路撒冷果然bat án-ni行；已經受tio̍h chiahê祭司頭ê權，將chōe-chōe聖徒關tī監裡；in受刣死，我亦擬有份。 11 Koh tī ta̍k-ê會堂，我ta̍uh-ta̍uh刑罰in，強迫in講謗瀆ê話；攻擊in ná hiông，到外位ê城亦khún-tio̍k in。 12 Hit-tia̍p我去大馬色ê時，有得tio̍h chiahê祭司頭ê權kap命令。 13 王 ah，我tī路上，日中晝ê時，看見tùi天有光，贏過日ê燦爛，圍纍照我kap同行ê人。 14 阮lóng倒tī地裡，我聽見有聲用希伯來ê腔口對我講，掃羅，掃羅，你啥事khún-tio̍k我？你用腳踢刺是艱苦。 15 我講，主ah，你是是誰？主講，我就是你所khún-tio̍k ê耶穌。 16 總是你tio̍h起來khiā；因為我tiâu-tî對你出現，beh設立你做差用，做干證ê，tī你所看見我kap我所beh出現hō͘你看ê事； 17 救你出chitê百姓kap外邦人ê手，就是現今差你就近in ê； 18 來開in ê目睭，hō͘ in tùi暗oa̍t-tńg到tī光；離開撒旦ê權勢來歸ǹg上帝，tùi信我來得tio̍h赦罪，koh得tio̍h基業 tī成聖ê ê中間。 19 A-ki-phàⁿ王 ah，所以我無違逆tùi天所顯現ê： 20 就事先tī大馬色，後來tī耶路撒冷，kap偤太ê全地，以及外邦，勸人tio̍h反悔來歸ǹg上帝，行tāi-chì kap反悔相合。 21 因為án-ni，偤太人tī殿裡掠我beh 刣我。 22 但是我得tio̍h上帝ê庇佑，到今á日iáu tī-teh，tùi大到細做干證；所講ê無m̄是chiahê先知kap摩西所講beh到ê事； 23 就是基督怎樣tio̍h受苦，koh怎樣做頭用死人koh活ê事，來傳報光明hō͘ chitê百姓kap外邦。 24 保羅án-ni分訴，Hui-sū-to͘大聲講，保羅，你teh狂lah；你ê chōe-chōe學問hō͘你變做狂。 25 保羅講，Hui-sū-to͘大人，我m̄是狂；我是講真實端正ê話。 26 因為王知chiahê事，我亦好膽對伊講；是chiahê事，我深信無一項隱密tī王；因為這m̄是行tī偏僻ê所在。 27 A-ki-phàⁿ王 ah，你信chiahê先知mah？我知你信。 28 A-ki-phàⁿ對保羅講，你想用小khóa苦勸，beh hō͘我做基督徒ah。 29 保羅講，我求上帝，無論用小khóa，á是大，m̄-nā hō͘你，亦hō͘今á日見若聽我講ê，lóng kap我一樣，獨獨無chiahê鎖鏈。 30 王kap總督kap Pek-nî-ki，以及同坐ê人lóng起來： 31 退去saⁿ-kap談論講，Chit人所做無應該死應該縛ê事。 32 A-ki-phàⁿ kā Hui-sū-to͘講，Chit人若未有對該撒告御狀，就thang放伊。
1 A-ki-phàⁿ tùi Pó-lô kóng, Chún lí ka-kī pâi-lia̍t. Pó-lô chiū kia̍h-khí chhiú hun-sò͘ kóng: 2 A-ki-phàⁿ ông ah, góa hō͘ Iû-thài lâng só͘ kò ê, kin-á-ji̍t beh lóng hun-sò͘ tī lí ê bīn-chêng, sī chin kai-chài: 3 koh khah kai-chài ê, sī in-ūi Iû-thài lâng ê kui-lē kap in ê piān-lūn, lí lóng chai; só͘-í kiû lí khoan-iông thiaⁿ góa. 4 Góa tùi khí-thâu tī góa ê peh-sìⁿ ê tiong-kan, kap tī Iâ-lō͘-sat-léng, tùi siàu-liân chòe-lâng cháiⁿ-iūⁿ, Iû-thài lâng lóng chai. 5 In tùi khí-thâu bat góa, siat-sú khéng chòe kan-chèng, chiū chai góa chiàu lán kàu-tiong ke̍k giâm ê phài, chòe Hoat-lī-sài lâng. 6 Hiān-chāi góa khiā tī chia lâi siū sím-phòaⁿ, chiū-sī in-ūi ǹg-bāng Siōng-tè tùi lán ê lia̍t-chó͘ só͘ èng-ún ê; 7 lán cha̍p-jī chi-phài, ji̍t-mî un-khûn ho̍k-sāi, ia̍h sī ǹg-bāng kàu tī chit-ê. Ông ah, góa ūi-tio̍h chit ê ǹg-bāng, chiah hō͘ Iû-thài lâng kò. 8 Siōng-tè nā hō͘ sí-lâng koh-oa̍h, lín cháiⁿ-iūⁿ lia̍h chòe bōe sìn tit ah? 9 Chêng góa ka-kī phah-sǹg tio̍h ēng chōe-chōe hāng lâi kong-kek Ná-sat-le̍k Iâ-so͘ ê miâ. 10 Tī Iâ-lō͘-sat-léng kó-jiân bat án-ni kiâⁿ; í-keng siū-tio̍h chiah ê chè-si-thâu ê koân, chiong chōe-chōe sèng-tô͘ koaiⁿ tī kaⁿ-ni̍h; in siū thâi-sí, góa ia̍h gí ū hūn. 11 Koh tī ta̍k ê hōe-tn̂g góa ta̍uh-ta̍uh hêng-hoa̍t in, kiông-pek in kóng pòng-to̍k ê ōe; kong-kek in ná hiông, kàu gōa-ūi ê siâⁿ ia̍h khún-tio̍k in. 12 Hit tia̍p góa khì Tāi-má-sek ê sî, ū tit-tio̍h chiah ê chè-si-thâu ê koân kap bēng-lēng. 13 Ông ah, góa tī lō͘-chiūⁿ, ji̍t tiong-tàu ê sî, khòaⁿ-kìⁿ tùi thiⁿ ū kng, iâⁿ-kè ji̍t ê chhàn-lān, ûi-lûi chiò góa kap tâng kiâⁿ ê lâng. 14 Goán lóng tó tī tōe-ni̍h, góa thiaⁿ-kìⁿ ū siaⁿ ēng Hi-pek-lâi ê khiuⁿ-kháu tùi góa kóng, Sò-lô, Sò-lô, lí siáⁿ-sū khún-tio̍k góa? lí ēng kha that chhì sī kan-khó͘. 15 Góa kóng, Chú ah, lí sī chī-chūi? Chú kóng, Góa chiū-sī lí só͘ khún-tio̍k ê Iâ-so͘. 16 Chóng-sī lí tio̍h khí-lâi khiā; in-ūi góa tiâu-tî tùi lí chhut-hiān, beh siat-li̍p lí chòe chhe-ēng, chòe kan-chèng ê, tī lí só͘ khòaⁿ-kìⁿ góa kap góa só͘ beh chhut-hiān hō͘ lí khòaⁿ ê sū; 17 kiù lí chhut chit ê peh-sìⁿ kap gōa-pang lâng ê chhiú, chiū-sī hiān-kim chhe lí chiū-kūn in ê; 18 lâi khui in ê ba̍k-chiu, hō͘ in tùi àm oa̍t-tńg kàu tī kng; lī-khui Sat-tàn ê koân-sè lâi kui-ǹg Siōng-tè, tùi sìn góa lâi tit-tio̍h sià-chōe, koh tit-tio̍h ki-gia̍p tī chiâⁿ-sèng ê ê tiong-kan. 19 A-ki-phàⁿ ông ah, só͘-í góa bô ûi-ke̍h tùi thiⁿ só͘ hián-hiān ê: 20 chiū tāi-seng tī Tāi-má-sek, āu-lâi tī Iâ-lō͘-sat-léng, kap Iû-thài ê choân tōe, í-ki̍p gōa-pang, khǹg lâng tio̍h hoán-hóe lâi kui-ǹg Siōng-tè, kiâⁿ tāi-chì kap hoán-hóe saⁿ-ha̍p. 21 In-ūi án-ni, Iû-thài lâng tī tiān-ni̍h lia̍h góa beh thâi góa. 22 Nā-sī góa tit-tio̍h Siōng-tè ê pì-iū, kàu kin-á-ji̍t iáu tī-teh, tùi tōa kàu sòe chòe kan-chèng; só͘ kóng ê bô m̄ sī chiah ê sian-ti kap Mô͘-se só͘ kóng beh kàu ê sū; 23 chiū-sī Ki-tok cháiⁿ-iūⁿ tio̍h siū khó͘, koh cháiⁿ-iūⁿ chòe thâu ēng sí-lâng koh-oa̍h ê sū, lâi thoân-pò kng-bêng hō͘ chit ê peh-sìⁿ kap gōa-pang. 24 Pó-lô án-ni hun-sò͘, Hui-sū-to͘ tōa siaⁿ kóng, Pó-lô, lí teh kông lah; lí ê chōe-chōe ha̍k-būn hō͘ lí pìⁿ chòe kông. 25 Pó-lô kóng, Hui-sū-to͘ tāi-jîn, góa m̄ sī kông; góa sī kóng chin-si̍t toan-chiàⁿ ê ōe. 26 In-ūi ông chai chiah ê sū, góa ia̍h hó-táⁿ tùi i kóng; sī chiah ê sū, góa chhim-sìn bô chi̍t hāng ún-ba̍t tī ông; in-ūi che m̄ sī kiâⁿ tī phian-phiah ê só͘-chāi. 27 A-ki-phàⁿ ông ah, lí sìn chiah ê sian-ti mah? góa chai lí sìn. 28 A-ki-phàⁿ tùi Pó-lô kóng, Lí siūⁿ ēng sió-khóa khó͘-khǹg, beh hō͘ góa chòe Ki-tok-tô͘ ah. 29 Pó-lô kóng, Góa kiû Siōng-tè, bô lūn ēng sió-khóa á-sī tōa, m̄ nā hō͘ lí, ia̍h hō͘ kin-á-ji̍t kìⁿ-nā thiaⁿ góa kóng ê, lóng kap góa chi̍t iūⁿ, to̍k-to̍k bô chiah ê só-liān. 30 Ông kap chóng-tok kap Pek-nî-ki, í-ki̍p tâng chē ê lâng lóng khí-lâi: 31 thè-khì saⁿ-kap tâm-lūn kóng, Chit lâng só͘ chòe bô eng-kai sí eng-kai pa̍k ê sū. 32 A-ki-phàⁿ kā Hui-sū-to͘ kóng, Chit lâng nā bē ū tùi Kai-sat kò gū-chn̄g, chiū thang pàng i.
1 已經定tio̍h意思hō͘阮過海去意大利，就將保羅kap另外kúi-nā個犯人，交hō͘ Se-pa-sū-tok營ê百總，名Iû-liû。 2 有A-tāi-bí-tiân ê船beh行到亞西亞海墘kúi-nā所在，阮就搭伊起身；有馬其頓ê帖撒羅尼迦人，A-lí-ta̍t-kó͘，kap阮去。 3 隔日到Se-tùn；Iû-liû好款待保羅，准伊就近chiahê朋友，受in ê照應。 4 Tùi hia開船；因為對頭風ê緣故，就tùi居比路下勢經過。 5 已經過 Ki-lī-ka，Pông-hui-lī-a ê海，到Lū-ka ê Múi-lah。 6 Tī hia百總tú-tio̍h亞力山大ê船，beh去意大利ê，就kah阮搭伊。 7 行真慢，chōe-chōe日chiah lím-á到Kek-nî-thó͘對面；因為風阻擋，就閃Kek-lí-tí下，tùi Sat-mô͘-nî 過； 8 lím-lím-á ōe-thang沿岸行到一所在，名Ka-ò；近chia有Lah-se-a ê城。 9 歷過chōe-chōe日，禁食ê期已經過，行船危險，保羅勸in講， 10 大家ah，我看chit pái行船，m̄-nā貨物kap船，連咱ê性命亦beh受害kap大損失。 11 但是百總信舵工kap船主，khah過頭tī保羅所講ê。 12 Koh tī chitê垵澳過冬天m̄利便；大半ê人想ài開船離開chia，看ōe-thang到腓尼基過冬天；hit位就是Kek-lí-tí一个垵澳，一面ǹg東南，一面ǹg東北。 13 Chit時南風微微á來，眾人掠做得意，就起碇，óa Kek-lí-tí岸來行。 14 無jōa久，狂風tùi海嶼頂phah落來；hitê風名Iú-lah-ku-lûn； 15 船hō͘風掃，chih載bōe-tiâu，就chhut-chāi伊漂流。 16 駛到小海嶼下，名叫Ko-tāi lím-lím能收舢板起來。 17 舢板已經收起來，就用方法綑縛船底，koh驚了khòa-tio̍h Sài-ní-tí ê沙汕，就落帆，hō͘風押去。 18 阮hō͘風湧大搖簸，隔日in就用貨物hiat落海； 19 第三日koh親手hiat-ka̍k船裡ê器具。 20 日kap星chōe-chōe日無出現，koh hō͘ 風湧phah不止thiám，阮得救ê ǹg望就lóng無lah。 21 眾人久久無食，保羅khiā tī in中間，講，大家ah，lín前tio̍h聽我ê話，莫得開船離開Kek-lí-tí，來tú-tio̍h chit號傷害kap損失。 22 Taⁿ我勸lín安心；因為lín中間無一人會失落性命，獨獨失落船nā-tiāⁿ。 23 因為我所屬，所服事ê上帝，伊ê天使昨暝khiā tī我身邊，講，保羅，m̄免驚； 24 你的確tio̍h khiā tī該撒ê面前；看ah，上帝用船內ê人lóng總賞賜你。 25 所以大家ah，lín tio̍h安心；因為我信上帝，tāi-chì teh-beh照伊所kā我講ê。 26 但是咱chiahê的確khòa tī一个海嶼。 27 到第十四暝，阮漂流tī A-tí-a海，約略半暝，水手掠做近山； 28 phah水tô，得tio̍h二十siâm；略略á進前，koh phah水tô，得tio̍h十五siâm。 29 驚了lôe-tio̍h石，就tī船尾拋四弓碇，切切ǹg望天光。 30 水手ài beh離開船逃走；放舢板落海，假做beh tùi船頭拋碇。 31 保羅對百總kap兵丁講，Chiahê人無tiàm-tī船裡，lín bōe會得救。 32 兵丁就斬斷舢板ê索，chhut-chāi伊家己墜落。 33 到天beh光，保羅勸眾人tio̍h食，講，Lín大家teh暸望，忍iau m̄成食，今á日是第十四日lah。 34 所以勸lín tio̍h食；這是關係lín ê得救，因為lín無一人會失落一支頭毛。 35 講soah，the̍h餅，當眾人ê面前感謝上帝；peh破來食。 36 Tùi án-ni，眾人lóng安心，亦ta̍k-ê食。 37 阮tī船裡ê計共兩百七十六人。 38 已經食飽，hiat麥落海，hō͘船khah輕。 39 到天光，m̄-bat hitê所在；獨獨看見一个海灣有沙坡，就saⁿ-kap計謀看能hō͘船lôe-chiūⁿ頂面á bōe。 40 就棄sak chiahê綻，放tī海裡，也 tháu開吊船舵ê索；起頭帆，hō͘伊食風，ǹg沙坡進前。 41 Tú-tio̍h雙夾流ê位，船就khòa淺；船頭咬tiâu bōe振動，船尾hō͘大湧siak破。 42 兵丁ê意思beh 刣 chiahê犯人，驚了有ê泅走。 43 獨獨百總ài救保羅，阻擋in所計謀；命令會泅ê人事先落水上山； 44 其餘ê人有ê用枋，有ê用船內ê物。Tùi án-ni，眾人lóng得救上山。
1 Í-keng tiāⁿ-tio̍h ì-sù hō͘ goán kè hái khì Í-tāi-lī, chiū chiong Pó-lô kap lēng-gōa kúi-nā ê hoān-lâng, kau hō͘ Se-pa-sū-tok iâⁿ ê pé-chóng, miâ Iû-liû. 2 Ū A-tāi-bí-tiân ê chûn beh kiâⁿ kàu A-se-a hái-kîⁿ kúi-nā só͘-chāi, goán chiū tah i khí-sin; ū Má-kî-tùn ê Thiap-sat-lô-nî-ka lâng, A-lí-ta̍t-kó͘, kap goán khì. 3 Keh ji̍t kàu Se-tùn; Iû-liû hó khoán-thāi Pó-lô, chún i chiū-kūn chiah ê pêng-iú, siū in ê chiàu-èng. 4 Tùi hia khui chûn; in-ūi tùi-thâu hong ê iân-kò͘, chiū tùi Ku-pí-lō͘ ē-sì keng-kè. 5 Í-keng kè Ki-lī-ka, Pông-hui-lī-a ê hái, kàu Lū-ka ê Múi-lah. 6 Tī hia pé-chóng tú-tio̍h A-le̍k-san-tāi ê chûn, beh khì Í-tāi-lī ê, chiū kah goán tah i. 7 Kiâⁿ chin bān, chōe-chōe ji̍t chiah lím-á kàu Kek-nî-thó͘ tùi-bīn; in-ūi hong chó͘-tòng, chiū siám Kek-lí-tí ē, tùi Sat-mô͘-nî kè; 8 lím-lím-á ōe thang iân hōaⁿ kiâⁿ kàu chi̍t só͘-chāi, miâ Ka-ò; kūn chia ū Lah-se-a ê siâⁿ. 9 Le̍k-kè chōe-chōe ji̍t, kìm-chia̍h ê kî í-keng kè, kiâⁿ chûn gûi-hiám, Pó-lô khǹg in kóng, 10 Tāi-ke ah, góa khòaⁿ chit pái kiâⁿ chûn, m̄ nā hè-mi̍h kap chûn, liân lán ê sìⁿ-miā ia̍h beh siū hāi kap tōa sún-sit. 11 Nā-sī pé-chóng sìn tāi-kong kap chûn-chú, khah kè-thâu tī Pó-lô só͘ kóng ê. 12 Koh tī chit ê oaⁿ-ù kè tang-thiⁿ m̄ lī-piān; tōa pòaⁿ ê lâng siūⁿ ài khui chûn lī-khui chia, khòaⁿ ōe thang kàu Hui-nî-ki kè tang-thiⁿ; hit ūi chiū-sī Kek-lí-tí chi̍t ê oaⁿ-ù, chi̍t bīn ǹg tang-lâm, chi̍t bīn ǹg tang-pak. 13 Chit sî lâm hong bî-bî-á lâi, chèng lâng lia̍h chòe tek-ì, chiū khí tiàⁿ, óa Kek-lí-tí hōaⁿ lâi kiâⁿ. 14 Bô jōa kú, kông hong tùi hái-sū téng phah lo̍h-lâi; hit ê hong miâ Iú-lah-ku-lûn; 15 chûn hō͘ hong sàu, chih-chài bōe tiâu, chiū chhut-chāi i phiau-liû. 16 Sái kàu sió hái-sū ē, miâ kiò Ko-tāi lím-lím ōe siu sam-pán khí-lâi. 17 Sam-pán í-keng siu-khí-lâi, chiū ēng hong-hoat khún-pa̍k chûn-tóe, koh kiaⁿ-liáu khòa-tio̍h Sài-ní-tí ê soa-sòaⁿ, chiū lo̍h phâng, hō͘ hong ah[a̍h]-khì. 18 Goán hō͘ hong éng tōa iô-pòa, keh ji̍t in chiū ēng hè-mi̍h hiat-lo̍h hái; 19 tē saⁿ ji̍t koh chhin chhiú hiat-ka̍k chûn-ni̍h ê khì-kū. 20 Ji̍t kap chhiⁿ chōe-chōe ji̍t bô chhut-hiān, koh hō͘ hong éng phah put-chí thiám, goán tit kiù ê ǹg-bāng chiū lóng bô lah. 21 Chèng lâng kú-kú bô chia̍h, Pó-lô khiā tī in tiong-kan, kóng, Tāi-ke ah, lín chêng tio̍h thiaⁿ góa ê ōe, bo̍h-tit khui chûn lī-khui Kek-lí-tí, lâi tú-tio̍h chit hō siong-hāi kap sún-sit. 22 Taⁿ góa khǹg lín an-sim; in-ūi lín tiong-kan bô chi̍t lâng ōe sit-lo̍h sìⁿ-miā, to̍k-to̍k sit-lo̍h chûn nā-tiāⁿ. 23 In-ūi góa só͘ sio̍k, só͘ ho̍k-sāi ê Siōng-tè, I ê thiⁿ-sài chā-mî khiā tī góa sin-piⁿ, kóng, Pó-lô, m̄ bián kiaⁿ; 24 lí tek-khak tio̍h khiā tī Kai-sat ê bīn-chêng; khòaⁿ ah, Siōng-tè ēng chûn-lāi ê lâng lóng-chóng siúⁿ-sù lí. 25 Só͘-í tāi-ke ah, lín tio̍h an-sim; in-ūi góa sìn Siōng-tè, tāi-chì teh-beh chiàu I só͘ kā góa kóng ê. 26 Nā-sī lán chiah-ê tek-khak khòa tī chi̍t ê hái-sū. 27 Kàu tē cha̍p-sì mî, goán phiau-liû tī A-tí-a hái, iok-lio̍k pòaⁿ mî, chúi-siú lia̍h-chòe kūn soaⁿ; 28 phah chúi-tô, tit-tio̍h jī-cha̍p siâm; lio̍h-lio̍h-á chìn-chêng, koh phah chúi-tô, tit-tio̍h cha̍p-gō͘ siâm. 29 Kiaⁿ-liáu lôe-tio̍h chio̍h, chiū tī chûn-bé pha sì keng tiàⁿ, chhiat-chhiat ǹg-bāng thiⁿ kng. 30 Chúi-siú ài beh lī-khui chûn tô-cháu; pàng sam-pán lo̍h hái, ké-chòe beh tùi chûn-thâu pha tiàⁿ. 31 Pó-lô tùi pé-chóng kap peng-teng kóng, Chiah ê lâng bô tiàm tī chûn-ni̍h, lín bōe-ōe tit-kiù. 32 Peng-teng chiū chām-tn̄g sam-pán ê soh, chhut-chāi i ka-kī tūi-lo̍h. 33 Kàu thiⁿ beh kng, Pó-lô khǹg chèng lâng tio̍h chia̍h, kóng, Lín tāi-ke teh liâu bāng, lún iau m̄ chiâⁿ chia̍h, kin-á-ji̍t sī tē cha̍p-sì ji̍t lah. 34 Só͘-í khǹg lín tio̍h chia̍h; che sī koan-hē lín ê tit kiù, in-ūi lín bô chi̍t lâng ōe sit-lo̍h chi̍t ki thâu-mn̂g. 35 Kóng soah, the̍h piáⁿ, tng chèng lâng ê bīn-chêng kám-siā Siōng-tè; peh-phòa lâi chia̍h. 36 Tùi án-ni chèng lâng lóng an-sim, ia̍h ta̍k-ê chia̍h. 37 Goán tī chûn-ni̍h ê kè-kiōng nn̄g pah chhit cha̍p la̍k lâng. 38 Í-keng chia̍h pá, hiat be̍h lo̍h hái, hō͘ chûn khah khin. 39 Kàu thiⁿ kng, m̄ bat hit ê só͘-chāi; to̍k-to̍k khòaⁿ-kìⁿ chi̍t ê hái-oan ū soa-pho, chiū saⁿ-kap kè-bô͘ khòaⁿ ōe hō͘ chûn lôe-chiūⁿ téng-bīn á bōe. 40 Chiū khì-sak chiah ê tiàⁿ, pàng tī hái-ni̍h, iā tháu-khui tiàu chûn-tōa ê soh; khí thâu phâng, hō͘ i chia̍h hong, ǹg soa-pho chìn-chêng. 41 Tú-tio̍h siang-kiap lâu ê ūi, chûn chiū khòa chhián; chûn-thâu kā-tiâu bōe tín-tāng, chûn-bé hō͘ tōa éng siak phòa. 42 Peng-teng ê ì-sù beh thâi chiah ê hoān-lâng, kiaⁿ-liáu ū-ê siû cháu. 43 To̍k-to̍k pé-chóng ài kiù Pó-lô, chó͘-tòng in só͘ kè-bô͘; bēng-lēng ōe siû ê lâng tāi-seng lo̍h chúi chiūⁿ soaⁿ; 44 kî-û ê lâng ū-ê ēng pang, ū-ê ēng chûn-lāi ê mi̍h. Tùi án-ni chèng lâng lóng tit kiù chiūⁿ soaⁿ.
1 阮已經得tio̍h救，就知hitê海嶼名叫Bí-lī-tāi。 2 番人用罕得有ê仁愛款待阮；因為落雨koh寒，in就起火，接納阮眾人。 3 保羅拾柴一把，hē tī火裡；有毒蛇，因為火熱，chông出來，咬tiâu tī伊ê手。 4 番人看見毒物tiâu tī伊ê手，就saⁿ-kap講，Chitê人的確是兇手，雖bóng海裡得tio̍h救，天理 bōe容允伊活。 5 保羅pōaⁿ毒物tī火裡，lóng無受傷。 6 番人thèng候伊腫，á是忽然死，跋倒；thèng候久久，看見伊無tāi-chì，就反tńg phah算講伊是神明。 7 海嶼ê頭人，名Pō͘-pek-liû，有田園近tī hia；伊接納阮，三日久好禮相款待。 8 Tú-tio̍h Pō͘-pek-liû ê老父有熱病kap做痢，倒teh；保羅入去就近伊，祈禱，kā伊按手，醫好伊。 9 Tùi án-ni，海嶼中其餘ê破病人亦來得tio̍h醫好； 10 in也用chōe-chōe禮數尊敬阮；開船ê時，將所欠用ê，送到船裡。 11 過三月日，阮搭亞力山大ê船起身，hit隻船號做Tiu-sū ê雙生kiáⁿ，是tī chitê海嶼過冬天ê。 12 到Sū-lah-kó͘拋teh；阮tiàm hia三日。 13 Tùi hia se̍h到Lī-kî-ong；過一日南風起，第二日到Pō͘-tiu-lī； 14 tī hia tú-tio̍h兄弟，請阮saⁿ-kap tiàm 七日；就到羅馬。 15 羅馬ê兄弟聽見阮ê消息，就tùi hia來到A-pí-o͘市，kap Sam-koán ê所在，chih接阮；保羅看見in，感謝上帝，就壯膽。 16 已經入羅馬，准保羅kap一个看守伊ê兵另外tòa。 17 過三日，保羅請偤太人ê序大來相會；已經聚集，就對in講，兄弟ah，我雖然未bat犯tio̍h咱ê百姓，á是列祖ê規例，但是tùi耶路撒冷受縛，送交羅馬人ê手； 18 in已經審判我，看我無死罪，就ài放我。 19 獨獨偤太人反對，我不得已對該撒告御狀，lóng m̄是有因端beh告我ê百姓。 20 因為án-ni chiah請lín來相見，saⁿ-kap議論；是我為tio̍h以色列所ǹg望ê，chiah受chitê鎖鏈綑縛。 21 In對伊講，阮未bat tùi偤太接tio̍h phoe講到你ê事，也 未有甚麼兄弟到chia通報，á是講你有甚麼pháiⁿ。 22 獨獨阮ài聽你ê意見怎樣；因為chitê 黨，阮知ta̍k所在hō͘人嫌。 23 In已經kap伊定tio̍h日期，chōe-chōe人就近伊tī伊歇ê厝；保羅tùi早起到ê-hng排列來證明上帝ê國，引摩西ê律法，kap chiahê先知，用耶穌ê事苦勸in。 24 伊所講ê，有ê信，有ê m̄信。 25 兩pêng bōe相合，就四散；保羅事先講一句話，講，聖神用先知以賽亞ê嘴，kā lín ê列祖所講ê話是真tio̍h， 26 去kā chitê百姓講， Lín聽是beh聽，也 lóng bōe曉悟； Lín看是beh看，也看lóng bōe見； 27 因為chitê百姓心鈍， 耳孔重， 目睭放khoeh； 驚了in用目睭看見， 用耳孔聽見， 用心曉悟， 來oa̍t-lìn-tńg， 我就醫好in。 28 所以lín tio̍h知，上帝chitê拯救已經施行外邦，in亦beh聽受。 29 【併tī頂節】 30 保羅khiā家己稅ê厝兩年久；凡若入來見伊ê，伊lóng接納in， 31 傳上帝ê國，將主耶穌基督ê tāi-chì真好膽教示人，無人禁伊。
1 Goán í-keng tit-tio̍h kiù, chiū chai hit ê hái-sū miâ kiò Bí-lī-tāi. 2 Hoan-lâng ēng hán-tit ū ê jîn-ài khoán-thāi goán; in-ūi lo̍h hō͘ koh kôaⁿ, in chiū khí hé, chiap-la̍p goán chèng lâng. 3 Pó-lô khioh chhâ chi̍t pé, hē tī hé-ni̍h; ū to̍k chôa, in-ūi hé jia̍t, chông-chhut-lâi, kā-tiâu tī i ê chhiú. 4 Hoan-lâng khòaⁿ-kìⁿ to̍k mi̍h tiâu tī i ê chhiú, chiū saⁿ-kap kóng, Chit ê lâng tek-khak sī hiong-siú, sui-bóng hái-ni̍h tit-tio̍h kiù, Thian-lí bōe iông-ún i oa̍h. 5 Pó-lô pōaⁿ to̍k mi̍h tī hé-ni̍h, lóng bô siū siong. 6 Hoan-lâng thèng-hāu i chéng, á-sī hut-jiân sí, poa̍h-tó; thèng-hāu kú-kú, khòaⁿ-kìⁿ i bô tāi-chì, chiū hoán-tńg phah-sǹg kóng i sī sîn-bêng. 7 Hái-sū ê thâu-lâng, miâ Pō͘-pek-liû, ū chhân-hn̂g kūn tī hia; i chiap-la̍p goán, saⁿ ji̍t kú hó-lé saⁿ khoán-thāi. 8 Tú-tio̍h Pō͘-pek-liû ê lāu-pē ū jia̍t-pīⁿ kap chòe-lī, tó-teh; Pó-lô ji̍p-khì chiū-kūn i, kî-tó, kā i hōaⁿ chhiú, i-hó i. 9 Tùi án-ni hái-sū tiong kî-û ê phòa-pīⁿ lâng ia̍h lâi tit-tio̍h i-hó; 10 in iā ēng chōe-chōe lé-sò͘ chun-kèng goán; khui chûn ê sî, chiong só͘ khiàm-ēng ê, sàng kàu chûn-ni̍h. 11 Kè saⁿ ge̍h ji̍t, goán tah A-le̍k-san-tāi ê chûn khí-sin, hit chiah chûn hō chòe Tiū-su ê Siang-siⁿ-kiáⁿ, sī tī chit ê hái-sū kè tang-thiⁿ ê. 12 Kàu Sū-lah-kó͘ pha-teh; goán tiàm hia saⁿ ji̍t. 13 Tùi hia se̍h kàu Lī-kî-ong; kè chi̍t ji̍t lâm hong khí, tē jī ji̍t kàu Pō͘-tiu-lī; 14 tī hia tú-tio̍h hiaⁿ-tī, chhiáⁿ goán saⁿ-kap tiàm chhit ji̍t; chiū kàu Lô-má. 15 Lô-má ê hiaⁿ-tī thiaⁿ-kìⁿ goán ê siau-sit, chiū tùi hia lâi kàu A-pí-o͘ chhī, kap Sam-koán ê só͘-chāi, chih-chiap goán; Pó-lô khòaⁿ-kìⁿ in, kám-siā Siōng-tè, chiū chòng-táⁿ. 16 Í-keng ji̍p Lô-má, chún Pó-lô kap chi̍t ê khàn-siú i ê peng lēng-gōa tòa. 17 Kè saⁿ ji̍t, Pó-lô chhiáⁿ Iû-thài lâng ê sī-tōa lâi siong-hōe; í-keng chū-chi̍p, chiū tùi in kóng, Hiaⁿ-tī ah, góa sui-jiân bē bat hoān-tio̍h lán ê peh-sìⁿ, á-sī lia̍t-chó͘ ê kui-lē, nā-sī tùi Iâ-lō͘-sat-léng siū pa̍k, sàng-kau Lô-má lâng ê chhiú; 18 in í-keng sím-phòaⁿ góa, khòaⁿ góa bô sí chōe, chiū ài pàng góa. 19 To̍k-to̍k Iû-thài lâng hoán-tùi, góa put-tek-í tùi Kai-sat kò gū-chn̄g, lóng m̄ sī ū in-toaⁿ beh kò góa ê peh-sìⁿ. 20 In-ūi án-ni chiah chhiáⁿ lín lâi saⁿ-kìⁿ, saⁿ-kap gī-lūn; sī góa ūi-tio̍h Í-sek-lia̍t só͘ ǹg-bāng ê, chiah siū chit ê só-liān khún-pa̍k. 21 In tùi i kóng, Goán bē bat tùi Iû-thài chih-tio̍h phoe kóng kàu lí ê sū, iā bē ū sím-mi̍h hiaⁿ-tī kàu chia thong-pò, á-sī kóng lí ū sím-mi̍h pháiⁿ. 22 To̍k-to̍k goán ài thiaⁿ lí ê ì-kiàn cháiⁿ-iūⁿ; in-ūi chit ê tóng, goán chai ta̍k só͘-chāi hō͘ lâng hiâm. 23 In í-keng kap i tiāⁿ-tio̍h ji̍t-kî, chōe-chōe lâng chiū-kūn i tī i hioh ê chhù; Pó-lô tùi chá-khí kàu ê-hng pâi-lia̍t lâi chèng-bêng Siōng-tè ê kok, ín Mô͘-se ê lu̍t-hoat, kap chiah ê sian-ti, ēng Iâ-so͘ ê sū khó͘-khǹg in. 24 I só͘ kóng ê, ū-ê sìn, ū-ê m̄ sìn. 25 Nn̄g pêng bōe saⁿ-ha̍p, chiū sì-sòaⁿ; Pó-lô tāi-seng kóng chi̍t kù ōe, kóng, Sèng Sîn ēng sian-ti Í-sài-a ê chhùi, kā lín ê lia̍t-chó͘ só͘ kóng ê ōe sī chin tio̍h, 26 Khì kā chit ê peh-sìⁿ kóng, Lín thiaⁿ sī beh thiaⁿ, iā lóng bōe hiáu-ngō͘; Lín khòaⁿ sī beh khòaⁿ, iā khòaⁿ lóng bōe kìⁿ; 27 In-ūi chit ê peh-sìⁿ sim tūn, Hī-khang tāng, Ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi oa̍t-lìn-tńg, Góa chiū i-hó in. 28 Só͘-í lín tio̍h chai, Siōng-tè chit ê chín-kiù í-keng si-hêng gōa-pang, in ia̍h beh thiaⁿ-siū. 29 (Ū ê pán-pún ū 29 chat: Pó-lô kóng chiah-ê ōe liáu-āu, hiah-ê Iû-thài-lâng gī-lūn hun-hun, chiū lī-khui khì.) 30 Pó-lô khiā ka-kī sè ê chhù nn̄g nî kú; hoān-nā ji̍p lâi kìⁿ i ê, i lóng chiap-la̍p in, 31 thoân Siōng-tè ê kok, chiong Chú Iâ-so͘ Ki-tok ê tāi-chì chin hó-táⁿ kà-sī lâng, bô lâng kìm i.