1 Tùi上帝ê旨意受召做耶穌基督ê使徒保羅，kap兄弟Só͘-thê-nî， 2 phoe寄hō͘上帝ê教會tī哥林多ê，就是tiàm-tī基督耶穌成聖、受召做聖徒，以及見若ta̍k所在求叫咱ê主耶穌基督ê名ê，主是in ê，也是咱ê； 3 願lín對咱ê父上帝kap主耶穌基督得tio̍h恩典平安。 4 我常常替lín感謝我ê上帝，是為tio̍h上帝ê恩典tī耶穌基督bat賞賜lín ê， 5 因為lín tiàm-tī伊ta̍k項tāi-chì富足，口才知識無m̄齊備， 6 親像基督ê干證得tio̍h堅固tī lín ê中間； 7 致到lín tī chiahê恩賜無一項無夠額，來thèng候咱ê主耶穌基督ê顯現； 8 伊也beh堅固lín到路尾，tī咱ê主耶穌基督ê日無thang嫌。 9 上帝是信實，lín tùi伊受召來kap伊ê Kiáⁿ咱ê主耶穌基督結聯。 10 兄弟ah，taⁿ我對咱ê主耶穌基督ê名勸lín議論lóng tio̍h相同，lín中間莫得有分黨，就是tio̍h一心一意大家相契合。 11 我ê兄弟ah，是Kek-lâi氏家內ê人bat kā我講，lín中間有相爭。 12 我ê意思是lín ta̍k人有teh講，我屬保羅，我屬亞波羅，我屬磯法，我屬基督。 13 基督kiám有分開mah？保羅kiám替lín釘十字架mah？á是lín bat受洗禮歸tī保羅ê名mah？ 14 感謝上帝，tī Kek-你-sū-pò͘、Ka-iû以外，我未bat kā lín一人行洗禮， 15 免得人講lín受洗禮歸tī我ê名。 16 我也kā Sū-thê-hoán-à一家ê人行洗禮，其餘有kā別人行洗禮á無，我卻bōe記得。 17 因為基督差我m̄是beh行洗禮，是beh傳福音；不在言語ê智慧，驚了基督ê十字架歸tī空空。 18 因為十字架ê道理，沉淪ê人看做戇，咱得救ê人看做上帝ê權能。 19 因為有記載講， 我beh滅無智慧ê人ê智慧， 也beh棄sak聰明ê人ê聰明。 20 智慧ê人tī tá-lo̍h？經學士tī tá-lo̍h？chit世間好辯論ê人tī tá-lo̍h？上帝kiám m̄是hō͘世間ê智慧變成戇？ 21 因為世間既然tùi in ê智慧m̄-bat上帝，上帝就歡喜tùi所宣傳ê戇來救chiahê信ê人；這lóng是上帝ê智慧。 22 因為偤太人求神蹟，希利尼人chhē智慧。 23 但是阮傳釘十字架ê基督，tùi tī偤太人是塞礙，tùi tī外邦人是愚戇； 24 但是tùi tī受召ê，無論偤太、希利尼，基督做上帝ê權能，上帝ê智慧。 25 因為上帝ê愚戇比人khah智慧，上帝ê軟弱比人khah勇壯。 26 兄弟ah，試看lín ê受召，照肉體有智慧ê無jōa-chōe，有權力ê無jōa-chōe，有尊貴ê也無jōa-chōe； 27 但是上帝揀世間ê戇ê，來hō͘智慧ê人見笑；上帝也揀世間ê軟弱ê，來hō͘勇壯ê見笑； 28 上帝也揀世間卑賤ê，人看m̄上目ê，以及hiahê無ê，來廢無hiahê有ê； 29 hō͘見若有肉體ê tī上帝ê面前無thang誇口。 30 但是lín tùi上帝得tio̍h tiàm-tī基督耶穌；伊tùi上帝替咱成做智慧，koh做義、成聖，以及贖回； 31 致到照所記載講，誇口ê人tio̍h用主來誇口。
1 Tùi Siōng-tè ê chí-ì siū tiàu chòe Iâ-so͘ Ki-tok ê sù-tô͘ Pó-lô, kap hiaⁿ-tī Só͘-thê-nî, 2 phoe kià hō͘ Siōng-tè ê kàu-hōe tī Ko-lîm-to ê, chiū-sī tiàm-tī Ki-tok Iâ-so͘ chiâⁿ-sèng, siū tiàu chòe sèng-tô͘, í-ki̍p kìⁿ-nā ta̍k só͘-chāi kiû-kiò lán ê Chú Iâ-so͘ Ki-tok ê miâ ê, Chú sī in ê, iā sī lán ê; 3 goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an. 4 Góa siông-siông thòe lín kám-siā góa ê Siōng-tè, sī ūi-tio̍h Siōng-tè ê un-tián tī Iâ-so͘ Ki-tok bat siúⁿ-sù lín ê, 5 in-ūi lín tiàm-tī I ta̍k hāng tāi-chì hù-chiok, kháu-châi tì-sek bô m̄ chiâu-pī, 6 chhin-chhiūⁿ Ki-tok ê kan-chèng tit-tio̍h kian-kò͘ tī lín ê tiong-kan; 7 tì-kàu lín tī chiah ê un-sù bô chi̍t hāng bô kàu-gia̍h, lâi thèng-hāu lán ê Chú Iâ-so͘ Ki-tok ê hián-hiān; 8 I iā beh kian-kò͘ lín kàu lō͘-bé, tī lán ê Chú Iâ-so͘ Ki-tok ê ji̍t bô thang hiâm. 9 Siōng-tè sī sìn-si̍t, lín tùi I siū tiàu lâi kap I ê Kiáⁿ lán ê Chú Iâ-so͘ Ki-tok kiat-liân. 10 Hiaⁿ-tī ah, taⁿ góa tùi lán ê Chú Iâ-so͘ Ki-tok ê miâ khǹg lín gī-lūn lóng tio̍h saⁿ-tâng, lín tiong-kan bo̍h-tit ū hun-tóng, chiū-sī tio̍h chi̍t sim chi̍t ì tāi-ke saⁿ khè-ha̍p. 11 Góa ê hiaⁿ-tī ah, sī Kek-lâi--sī ke-lāi ê lâng bat kā góa kóng, lín tiong-kan ū saⁿ-chiⁿ. 12 Góa ê ì-sù sī lín ta̍k lâng ū teh kóng, Góa sio̍k Pó-lô, Góa sio̍k A-pho-lô, Góa sio̍k Ki-hoat, Góa sio̍k Ki-tok. 13 Ki-tok kiám ū pun-khui mah? Pó-lô kiám thòe lín tèng si̍p-jī-kè mah? Á-sī lín bat siū sóe-lé kui tī Pó-lô ê miâ mah? 14 Kám-siā Siōng-tè, tī Kek-lí-sū-pò͘, Ka-iû í-gōa, góa bē bat kā lín chi̍t lâng kiâⁿ sóe-lé, 15 bián-tit lâng kóng lín siū sóe-lé kui tī góa ê miâ. 16 Góa iā kā Sū-thê-hoán-à chi̍t ke ê lâng kiâⁿ sóe-lé, kî-û ū kā pa̍t lâng kiâⁿ sóe-lé á bô góa khiok bōe kì-tit. 17 In-ūi Ki-tok chhe góa m̄ sī beh kiâⁿ sóe-lé sī beh thoân hok-im; put-chāi giân-gú ê tì-hūi, kiaⁿ-liáu Ki-tok ê si̍p-jī-kè kui tī khang-khang. 18 In-ūi si̍p-jī-kè ê tō-lí, tîm-lûn ê lâng khòaⁿ chòe gōng, lán tit kiù ê lâng khòaⁿ chòe Siōng-tè ê koân-lêng. 19 In-ūi ū kì-chài kóng, Góa beh bia̍t-bô tì-hūi ê lâng ê tì-hūi, Iā beh khì-sak chhang-miâ ê lâng ê chhang-miâ. 20 Tì-hūi ê lâng tī tá-lo̍h? Keng-ha̍k-sū tī tá-lo̍h? chit sè-kan hò͘ⁿ piān-lūn ê lâng tī tá-lo̍h? Siōng-tè kiám m̄ sī hō͘ sè-kan ê tì-hūi piàn-chiâⁿ gōng? 21 In-ūi sè-kan kì-jiân tùi in ê tì-hūi m̄ bat Siōng-tè, Siōng-tè chiū hoaⁿ-hí tùi só͘ soan-thoân ê gōng lâi kiù chiah ê sìn ê lâng; che lóng sī Siōng-tè ê tì-hūi. 22 In-ūi Iû-thài lâng kiû sîn-jiah, Hi-lī-nî lâng chhē tì-hūi. 23 Nā-sī goán thoân tèng si̍p-jī-kè ê Ki-tok, tùi tī Iû-thài lâng sī that-gāi, tùi tī gōa-pang lâng sī gû-gōng; 24 nā-sī tùi tī siū tiàu ê, bô lūn Iû-thài Hi-lī-nî, Ki-tok chòe Siōng-tè ê koân-lêng, Siōng-tè ê tì-hūi. 25 In-ūi Siōng-tè ê gû-gōng pí lâng khah tì-hūi, Siōng-tè ê loán-jio̍k pí lâng khah ióng-chòng. 26 Hiaⁿ-tī ah, chhì-khòaⁿ lín ê siū-tiàu, chiàu jio̍k-thé ū tì-hūi ê bô jōa chōe, ū koân-le̍k ê bô jōa chōe, ū chun-kùi ê iā bô jōa chōe; 27 nā-sī Siōng-tè kéng sè-kan ê gōng ê, lâi hō͘ tì-hūi ê lâng kiàn-siàu; Siōng-tè iā kéng sè-kan ê loán-jio̍k ê lâi hō͘ ióng-chòng ê kiàn-siàu; 28 Siōng-tè iā kéng sè-kan pi-chiān ê, lâng khòaⁿ m̄ chiūⁿ ba̍k ê, í-ki̍p hiah ê bô ê, lâi hòe-bô hiah ê ū-ê; 29 hō͘ kìⁿ-nā ū jio̍k-thé ê tī Siōng-tè ê bīn-chêng bô thang khoa-kháu. 30 Nā-sī lín tùi Siōng-tè tit-tio̍h tiàm-tī Ki-tok Iâ-so͘; I tùi Siōng-tè thòe lán chiâⁿ-chòe tì-hūi, koh chòe gī, chiâⁿ-sèng, í-ki̍p sio̍k-hôe; 31 tì-kàu chiàu só͘ kì-chài kóng, Khoa-kháu ê lâng tio̍h ēng Chú lâi khoa-kháu.
1 兄弟ah，我前就近lín，無用深沉 ê言語，á是智慧，來對lín傳上帝ê奧妙。 2 因為我決斷tī lín中間m̄知別項，只有知耶穌基督釘十字架ê nā-tiāⁿ。 3 Koh我kap lín tī-teh ê時是軟弱、驚惶、gī-gī-chhoah。 4 我所講所傳ê不在智慧好聽ê話，是在tī聖神kap權能ê闡明； 5 beh hō͘ lín ê信不在人ê智慧，是在tī上帝ê權能。 6 但是阮tī練達ê人ê中間講智慧；獨獨m̄是chit世間ê智慧，也m̄是chit世間chiahê beh廢無ê掌權ê ê智慧； 7 是講上帝奧妙中ê智慧，前所隱密ê，就是上帝tī萬世代以前所事先定tio̍h hō͘咱得tio̍h榮光ê。 8 Chitê智慧chit世間掌權ê無一个知；若知，就無將榮光ê主釘tī十字架； 9 是照所記載講， 目睭未bat看見，耳孔未bat聽見， 人ê心未bat想tio̍h ê， 就是上帝為tio̍h疼伊ê人見若所備辦ê。 10 但是上帝有用聖神kā咱顯明伊；因為聖神透徹萬事kap上帝ê深奧。 11 Taⁿ人ê事，若m̄是伊家己ê神，別人是誰會知？án-ni上帝ê事，若m̄是上帝ê神，也無一个會知。 12 但是咱所得tio̍h m̄是世間ê神，就是tùi上帝來ê神，beh hō͘咱知上帝所白白賞賜咱ê。 13 Koh阮講伊，m̄是用人ê智慧所教示ê話，是用聖神所教示ê；將神靈ê話和合神靈ê事。 14 但是屬血氣ê人無承受上帝ê神ê事；in是看做戇；也bōe會bat伊，因為tio̍h tùi神chiah會忖度。 15 獨獨屬神ê人忖度萬項事，也家己無hō͘人忖度。 16 因為是誰有知主ê心thang教示伊ah？但是阮有基督ê心。
1 Hiaⁿ-tī ah, góa chêng chiū-kūn lín, bô ēng chhim-tîm ê giân-gú, á-sī tì-hūi, lâi tùi lín thoân Siōng-tè ê ò-biāu. 2 In-ūi góa koat-toàn tī lín tiong-kan m̄ chai pa̍t hāng, chí ū chai Iâ-so͘ Ki-tok tèng si̍p-jī-kè ê nā-tiāⁿ. 3 Koh góa kap lín tī-teh ê sî sī loán-jio̍k, kiaⁿ-hiâⁿ, gī-gī-chhoah. 4 Góa só͘ kóng só͘ thoân ê put-chāi tì-hūi hó thiaⁿ ê ōe, sī chāi-tī Sèng Sîn kap koân-lêng ê chhián-bêng; 5 beh hō͘ lín ê sìn put-chāi lâng ê tì-hūi, sī chāi-tī Siōng-tè ê koân-lêng. 6 Nā-sī goán tī liān-ta̍t ê lâng ê tiong-kan kóng tì-hūi; to̍k-to̍k m̄ sī chit sè-kan ê tì-hūi, iā m̄ sī chit sè-kan chiah ê beh hòe-bô ê chiáng-koân ê ê tì-hūi; 7 sī kóng Siōng-tè ò-biāu tiong ê tì-hūi, chêng só͘ ún-ba̍t ê, chiū-sī Siōng-tè tī bān sè-tāi í-chêng só͘ tāi-seng tiāⁿ-tio̍h hō͘ lán tit-tio̍h êng-kng ê. 8 Chit ê tì-hūi chit sè-kan chiáng-koân ê bô chi̍t-ê chai; nā chai, chiū bô chiong êng-kng ê Chú tèng tī si̍p-jī-kè; 9 sī chiàu só͘ kì-chài kóng, Ba̍k-chiu bē bat khòaⁿ-kìⁿ, hī-khang bē bat thiaⁿ-kìⁿ, Lâng ê sim bē bat siūⁿ-tio̍h ê, Chiū-sī Siōng-tè ūi-tio̍h thiàⁿ I ê lâng kìⁿ-nā só͘ pī-pān ê. 10 Nā-sī Siōng-tè ū ēng Sèng Sîn kā lán hián-bêng i; in-ūi Sèng Sîn thàu-thiat bān sū kap Siōng-tè ê chhim-ò. 11 Taⁿ lâng ê sū, nā m̄ sī i ka-kī ê sîn, pa̍t lâng chī-chūi ōe chai? án-ni Siōng-tè ê sū, nā m̄ sī Siōng-tè ê Sîn, iā bô chi̍t-ê ōe chai. 12 Nā-sī lán só͘ tit-tio̍h m̄ sī sè-kan ê sîn, chiū-sī tùi Siōng-tè lâi ê Sîn, beh hō͘ lán chai Siōng-tè só͘ pe̍h-pe̍h siúⁿ-sù lán ê. 13 Koh goán kóng i, m̄ sī ēng lâng ê tì-hūi só͘ kà-sī ê ōe, sī ēng Sèng Sîn só͘ kà-sī ê; chiong sîn-lêng ê ōe hô-ha̍p sîn lêng ê sū. 14 Nā-sī sio̍k hiat-khì ê lâng bô sêng-siū Siōng-tè ê Sîn ê sū; in sī khòaⁿ chòe gōng; iā bōe-ōe bat i, in-ūi tio̍h tùi sîn chiah ōe chhún-to̍k. 15 To̍k-to̍k sio̍k sîn ê lâng chhún-to̍k bān hāng sū, iā ka-kī bô hō͘ lâng chhún-to̍k. 16 In-ūi chī-chūi ū chai Chú ê sim thang kà-sī I ah? nā-sī goán ū Ki-tok ê sim.
1 兄弟ah，我前kap lín講話，bōe會掠lín做屬神ê人，是做屬肉體ê人，tiàm-tī基督是做嬰á ê。 2 我bat用奶飼lín，無用米糧； 3 因為lín前bōe堪得，到taⁿ iáu bōe會；是lín iáu thàn肉體；lín中間既然有怨妒相爭，kiám m̄是thàn肉體，照人ê款來行mah？ 4 因為chitê講，我屬保羅，hitê講，我屬亞波羅，án-ni lín kiám m̄是thàn人ê意思mah？ 5 亞波羅是甚麼？保羅是甚麼？是lín所tùi in來信ê差用，照主所賞賜ta̍k人ê。 6 我栽種，亞波羅ak水，獨獨上帝hō͘伊大叢。 7 Án-ni-siⁿ栽種ê，ak水ê，lóng bōe算得賬；只有hō͘伊大叢ê上帝nā-tiāⁿ。 8 栽種ê kap ak水ê是一樣；但是ta̍k人照家己ê tio̍h磨beh得tio̍h家己ê工錢。 9 因為阮是上帝ê同tio̍h磨ê；lín是上帝所作ê園，上帝所起ê厝。 10 照上帝所賞賜我ê恩，我親像智慧ê師傅頭有hē地基；別人起tī hit頂面。總是ta̍k人tio̍h謹慎怎樣起伊。 11 因為所hē ê地基以外無人會hē別個地基，地基就是耶穌基督。 12 總是人若用金、銀、寶石、柴、草、稻稿，起 tī chitê地基頂； 13 ta̍k人ê工teh-beh露現；是hit日beh顯明伊，因為beh tùi火來顯現；koh火beh試驗ta̍k人ê工是甚麼款。 14 人所起造ê工若iáu留teh，就伊beh得tio̍h工錢； 15 人ê工若燒lio去，伊就tú-tio̍h損失；獨獨本身beh得tio̍h救，m̄-kú是親像tùi火中脫出。 16 Kiám m̄知lín是上帝ê殿，上帝ê神tiàm-tī lín內面mah？ 17 人若毀壞上帝ê殿，上帝beh毀壞伊；因為上帝ê殿是聖，殿就是lín chiahê。 18 人m̄-thang家己騙，lín中間若有人掠家己tī chit世間做有智慧，就tio̍h成做戇，thang成做有智慧。 19 因為chit世間ê智慧照上帝看是戇；因為有記載講，Hō͘ chiahê智慧ê人中in家己ê詭譎ê； 20 koh講，主知有智慧ê人ê念頭是空空。 21 所以m̄-thang將人來誇口；因為萬物是lín ê； 22 無論保羅、亞波羅、磯法、世界、活、死、現今ê、將來ê，lóng是lín ê； 23 lín是基督ê，基督是上帝ê。
1 Hiaⁿ-tī ah, góa chêng kap lín kóng ōe, bōe-ōe lia̍h lín chòe sio̍k sîn ê lâng, sī chòe sio̍k jio̍k-thé ê lâng, tiàm-tī Ki-tok sī chòe eⁿ-á ê. 2 Góa bat ēng lin chhī lín, bô ēng bí-niû; 3 in-ūi lín chêng bōe kham-tit, kàu taⁿ iáu bōe-ōe; sī lín iáu thàn jio̍k-thé; lín tiong-kan kì-jiân ū oàn-tò͘ saⁿ-chiⁿ, kiám m̄ sī thàn jio̍k-thé, chiàu lâng ê khoán lâi kiâⁿ mah? 4 In-ūi chit-ê kóng, Góa sio̍k Pó-lô, hit-ê kóng, Góa sio̍k A-pho-lô, án-ni lín kiám m̄ sī thàn lâng ê ì-sù mah? 5 A-pho-lô sī sím-mi̍h? Pó-lô sī sím-mi̍h? Sī lín só͘ tùi in lâi sìn ê chhe-ēng, chiàu Chú só͘ siúⁿ-sù ta̍k lâng ê. 6 Góa chai-chèng, A-pho-lô ak-chúi, to̍k-to̍k Siōng-tè hō͘ i tōa châng. 7 Án-ni-siⁿ chai-chèng ê, ak-chúi ê, lóng bōe sǹg tit siàu; chí ū hō͘ i tōa châng ê Siōng-tè nā-tiāⁿ. 8 Chai-chèng ê kap ak-chúi ê sī chi̍t iūⁿ; nā-sī ta̍k lâng chiàu ka-kī ê tio̍h-bôa beh tit-tio̍h ka-kī ê kang-chîⁿ. 9 In-ūi goán sī Siōng-tè ê tâng tio̍h-bôa ê; lín sī Siōng-tè só͘ choh ê hn̂g, Siōng-tè só͘ khí ê chhù. 10 Chiàu Siōng-tè só͘ siúⁿ-sù góa ê un, góa chhin-chhiūⁿ tì-hūi ê sai-hū-thâu ū hē tōe-ki; pa̍t lâng khí tī hit téng-bīn. Chóng-sī ta̍k lâng tio̍h kín-sīn cháiⁿ-iūⁿ khí i. 11 In-ūi só͘ hē ê tōe-ki í-gōa bô lâng ōe hē pa̍t ê tōe-ki, tōe-ki chiū-sī Iâ-so͘ Ki-tok. 12 Chóng-sī lâng nā ēng kim, gûn, pó-chio̍h, chhâ, chháu, tiū-kó, khí tī chit ê tōe-ki téng; 13 ta̍k lâng ê kang teh-beh lō͘-hiān; sī hit ji̍t beh hián-bêng i, in-ūi beh tùi hé lâi hián-hiān; koh hé beh chhì-giām ta̍k lâng ê kang sī sím-mi̍h khoán. 14 Lâng só͘ khí-chō ê kang nā iáu lâu-teh, chiū i beh tit-tio̍h kang-chîⁿ; 15 lâng ê kang nā sio-lio-khì, i chiū tú-tio̍h sún-sit; to̍k-to̍k pún-sin beh tit-tio̍h kiù, m̄ kú sī chhin-chhiūⁿ tùi hé-tiong thoat-chhut. 16 Kiám m̄ chai lín sī Siōng-tè ê tiān, Siōng-tè ê Sîn tiàm-tī lín lāi-bīn mah? 17 Lâng nā húi-hoāi Siōng-tè ê tiān, Siōng-tè beh húi-hoāi i; in-ūi Siōng-tè ê tiān sī sèng, tiān chiū-sī lín chiah ê. 18 Lâng m̄ thang ka-kī phiàn. Lín tiong-kan nā ū lâng lia̍h ka-kī tī chit sè-kan chòe ū tì-hūi, chiū tio̍h chiâⁿ-chòe gōng, thang chiâⁿ-chòe ū tì-hūi. 19 In-ūi chit sè-kan ê tì-hūi chiàu Siōng-tè khòaⁿ sī gōng; in-ūi ū kì-chài kóng, Hō͘ chiah ê tì-hūi ê lâng tiòng in ka-kī ê khúi-khiat ê; 20 koh kóng, Chú chai ū tì-hūi ê lâng ê liām-thâu sī khang-khang. 21 Só͘-í m̄ thang chiong lâng lâi khoa-kháu; in-ūi bān mi̍h sī lín ê; 22 bô lūn Pó-lô, A-pho-lô, Ki-hoat, sè-kài, oa̍h, sí, hiān-kim ê, chiong-lâi ê, lóng sī lín ê; 23 lín sī Ki-tok ê, Ki-tok sī Siōng-tè ê.
1 人tio̍h掠阮做基督ê差用，做上帝chiahê奧妙ê管家。 2 Koh所ǹg望tī管家ê，是ài得伊盡忠。 3 但是我hō͘ lín á是別人批評，我掠做極小khóa ê事；我也無家己批評。 4 因為我m̄知家己有甚麼thang責備，總是我無tùi chitê得tio̍h稱做義；獨獨批評我ê就是主。 5 所以時未到，lín莫得批評甚麼；thèng候主到，伊beh用光照tī烏暗chiahê隱密ê事，顯明chiahê心內ê計謀；hit時ta̍k人beh tùi上帝得tio̍h伊ê o-ló。 6 兄弟ah，我為tio̍h lín chiahê借本身kap亞波羅來講起chiahê tāi-chì，是beh hō͘ lín tī款待阮ê事來學習chit句。莫得過頭tī所記載；免得lín自高，尊重chitê，看輕hitê。 7 因為是誰 hō͘你各樣tī別人ah？你所有ê，tá-lo̍h 一項m̄是tùi受ê？但是tùi受ê，怎樣誇口，ná親像m̄是tùi受ê ah？ 8 Lín已經飽足，已經富有，lín已經做王，阮無份；我真正ài lín做王，hō͘阮也kap lín saⁿ-kap做王。 9 因為我teh想，上帝有安置阮chiahê使徒tī尾溜，親像擬死ê犯人；因為阮成做一棚戲，hō͘世間，kap天使，kap人看。 10 阮為tio̍h基督做戇，lín tiàm-tī基督做智慧；阮軟弱，lín勇壯；lín尊貴，阮卑賤。 11 到tī chit-tia̍p阮也iau，也嘴乾，thǹg-pak-theh，hō͘人cheng，無定tio̍h ê所在； 12 也勞苦親手做工；受詈罵，就kā人祝福；受khún-tio̍k，就吞忍； 13 受譭謗，就kap人好嘴；竟然成做世間ê糞埽，萬物ê渣滓，到tī今á日。 14 我寫chiahê m̄是beh hō͘ lín見笑，是警戒lín，親像我所疼ê kiáⁿ。 15 因為lín tiàm-tī基督，先生雖然講萬，但是老父就無chōe ê；因為tī基督耶穌，我bat tùi福音來生lín。 16 所以我勸lín tio̍h學我。 17 因為án-ni，我已經差提摩太去lín hia，伊tiàm-tī主是我所疼koh盡忠ê kiáⁿ；伊beh hō͘ lín記得我tiām-tī基督ê行踏，就是親像我ta̍k所在，tī ta̍k-ê教會所教示ê。 18 有人自高，掠做我無beh到lín hia。 19 總是主若允准，我beh緊緊去就近lín；koh我所beh知ê，m̄是hiahê自高ê人ê話，就是in ê權能。 20 因為上帝ê國不在講話，是在tī權能。 21 Lín ài怎樣？我就近lín tio̍h kia̍h箠á去？á是用仁愛kap溫柔ê心神ah？
1 Lâng tio̍h lia̍h goán chòe Ki-tok ê chhe-ēng, chòe Siōng-tè chiah ê ò-biāu ê koán-ke. 2 Koh só͘ ǹg-bāng tī koán-ke ê, sī ài tit i chīn-tiong. 3 Nā-sī góa hō͘ lín á-sī pa̍t lâng phoe-phêng, góa lia̍h chòe ke̍k sió-khóa ê sū; góa iā bô ka-kī phoe-phêng. 4 In-ūi góa m̄ chai ka-kī ū sím-mi̍h thang chek-pī, chóng-sī góa bô tùi chit-ê tit-tio̍h chheng-chòe-gī; to̍k-to̍k phoe-phêng góa ê chiū-sī Chú. 5 Só͘-í sî bē kàu, lín bo̍h-tit phoe-phêng sím-mi̍h; thèng-hāu Chú kàu, I beh ēng kng chiò tī o͘-àm chiah ê ún-ba̍t ê sū, hián-bêng chiah ê sim-lāi ê kè-bô͘; hit sî ta̍k lâng beh tùi Siōng-tè tit-tio̍h i ê o-ló. 6 Hiaⁿ-tī ah, góa ūi-tio̍h lín chiah-ê chioh pún-sin kap A-pho-lô lâi kóng-khí chiah ê tāi-chì, sī beh hō͘ lín tī khoán-thāi goán ê sū lâi ha̍k-si̍p chit kù. Bo̍h-tit kè-thâu tī só͘ kì-chài; bián-tit lín chū-ko, chun-tiōng chit-ê, khòaⁿ-khin hit-ê. 7 In-ūi chī-chūi hō͘ lí koh-iūⁿ tī pa̍t lâng ah? lí só͘ ū ê, tá-lo̍h chi̍t hāng m̄ sī tùi siū ê? Nā-sī tùi siū ê, cháiⁿ-iūⁿ khoa-kháu, ná chhin-chhiūⁿ m̄ sī tùi siū ê ah? 8 Lín í-keng pá-chiok, í-keng pù-ū, lín í-keng chòe ông, goán bô hūn; góa chin-chiàⁿ ài lín chòe ông, hō͘ goán iā kap lín saⁿ-kap chòe ông. 9 In-ūi góa teh siūⁿ, Siōng-tè ū an-tì goán chiah ê sù-tô͘ tī bé-liu, chhin-chhiūⁿ gí-sí ê hoān-lâng; in-ūi goán chiâⁿ-chòe chi̍t pîⁿ hì, hō͘ sè-kan, kap thiⁿ-sài, kap lâng khòaⁿ. 10 Goán ūi-tio̍h Ki-tok chòe gōng, lín tiàm-tī Ki-tok chòe tì-hūi; goán loán-jio̍k, lín ióng-chòng; lín chun-kùi, goán pi-chiān. 11 Kàu tī chit tia̍p goán iā iau, iā chhùi-ta, thǹg-pak-theh, hō͘ lâng cheng, bô tiāⁿ-tio̍h ê só͘-chāi; 12 iā lô-khó͘ chhin-chhiú chòe kang; siū lóe-mē, chiū kā lâng chiok-hok; siū khún-tio̍k, chiū thun-lún; 13 siū húi-pòng, chiū kap lâng hó-chhùi; kèng-jiân chiâⁿ-chòe sè-kan ê pùn-sò, bān mi̍h ê che-tái, kàu tī kin-á-ji̍t. 14 Góa siá chiah-ê m̄ sī beh hō͘ lín kiàn-siàu, sī kéng-kài lín, chhin-chhiūⁿ góa só͘ thiàⁿ ê kiáⁿ. 15 In-ūi lín tiàm-tī Ki-tok, sian-siⁿ sui-jiân káng-bān, nā-sī lāu-pē chiū bô chōe ê; in-ūi tī Ki-tok Iâ-so͘, góa bat tùi hok-im lâi siⁿ lín. 16 Só͘-í góa khǹg lín tio̍h o̍h góa. 17 In-ūi án-ni góa í-keng chhe Thê-mô͘-thài khì lín hia, i tiàm-tī Chú sī góa só͘ thiàⁿ koh chīn-tiong ê kiáⁿ; i beh hō͘ lín kì-tit góa tiām-tī Ki-tok ê kiâⁿ-ta̍h, chiū-sī chhin-chhiūⁿ góa ta̍k só͘-chāi, tī ta̍k ê kàu-hōe só͘ kà-sī ê. 18 Ū lâng chū-ko, lia̍h-chòe góa bô beh kàu lín hia. 19 Chóng-sī Chú nā ún-chún, góa beh kín-kín khì chiū-kūn lín; koh góa só͘ beh chai ê, m̄ sī hiah ê chū-ko ê lâng ê ōe, chiū-sī in ê koân-lêng. 20 In-ūi Siōng-tè ê kok put-chāi kóng ōe, sī chāi-tī koân-lêng. 21 Lín ài cháiⁿ-iūⁿ? góa chiū-kūn lín tio̍h kia̍h chhê-á khì? á-sī ēng jîn-ài kap un-jiû ê sim-sîn ah?
1 確實聽見lín中間有淫亂，也hit號淫亂外邦中所無ê，就是有人有伊ê老父ê bó͘。 2 Lín iáu teh自高，也竟然無哀傷，將行chit號tāi-chì ê人tùi lín中間除去。 3 我身軀相離開，心神kap lín 相近，親像親身tī-teh，已經有擬定行chit號事ê人， 4 託咱ê主耶穌ê名，lín chiahê已經聚集，我ê神也tī-teh，koh有咱ê主耶穌ê權能， 5 將hit號人交hō͘撒旦，致到敗壞伊ê肉體，beh hō͘伊ê神tī咱ê主耶穌ê日得救。 6 Lín ê誇口m̄是好。Kiám m̄知淡薄酵會發kui-sn̂g mah？ 7 舊ê酵tio̍h除到清，hō͘ lín成做新ê sn̂g，親像lín是無酵ê。因為咱pôaⁿ過節ê羊羔也已經刣，就是基督。 8 所以咱tio̍h守節，無用舊ê酵，也無用pháiⁿ心惡毒ê酵，是用純全真實ê無酵餅。 9 前我寫hit張phoe hō͘ lín，kah lín m̄-thang kap淫亂ê人參chhap， 10 m̄是泛泛指chit世間淫亂ê，á是貪心ê，kap勒索ê，á是拜偶像ê；若beh án-ni，tio̍h離開世間chiah能。 11 總是taⁿ我寫phoe hō͘ lín是講，若有人稱做兄弟也有淫亂，á是貪心，á是拜偶像，á是詈罵，á是好酒，á是勒索ê，莫得kap伊參chhap；chit號人連kap伊食也m̄-thang。 12 因為判斷外面人kap我有甚麼干涉？ 13 內面ê人kiám m̄是lín判斷ê；也外面ê人上帝判斷伊ah？Hit-ê pháiⁿ人tio̍h tùi lín中間除去。
1 Khak-si̍t thiaⁿ-kìⁿ lín tiong-kan ū îm-loān, iā hit hō îm-loān gōa-pang tiong só͘ bô ê, chiū-sī ū lâng ū i ê lāu-pē ê bó͘. 2 Lín iáu teh chū-ko, iā kèng-jiân bô ai-siong, chiong kiâⁿ chit hō tāi-chì ê lâng tùi lín tiong-kan tû-khì. 3 Góa seng-khu saⁿ lī-khui, sim-sîn kap lín saⁿ-kūn, chhin-chhiūⁿ chhin-sin tī-teh, í-keng ū gí-tiāⁿ kiâⁿ chit hō sū ê lâng, 4 thok lán ê Chú Iâ-so͘ ê miâ, lín chiah-ê í-keng chū-chi̍p, góa ê sîn iā tī-teh, koh ū lán ê Chú Iâ-so͘ ê koân-lêng, 5 chiong hit hō lâng kau hō͘ Sat-tàn, tì-kàu pāi-hoāi i ê jio̍k-thé, beh hō͘ i ê sîn tī lán ê Chú Iâ-so͘ ê ji̍t tit kiù. 6 Lín ê khoa-kháu m̄ sī hó. Kiám m̄ chai tām-po̍h kàⁿ ōe hoat kui-sn̂g mah? 7 Kū ê kàⁿ tio̍h tû kàu chheng, hō͘ lín chiâⁿ-chòe sin ê sn̂g, chhin-chhiūⁿ lín sī bô kàⁿ ê. In-ūi lán pôaⁿ-kè-choeh ê iûⁿ-ko iā í-keng thâi, chiū-sī Ki-tok. 8 Só͘-í lán tio̍h siú choeh, bô ēng kū ê kàⁿ, iā bô ēng pháiⁿ sim ok-to̍k ê kàⁿ, sī ēng sûn-choân chin-si̍t ê bô kàⁿ piáⁿ. 9 Chêng góa siá hit tiuⁿ phoe hō͘ lín, kah lín m̄ thang kap îm-loān ê lâng chham-chhap, 10 m̄ sī hoàn-hoàn chí chit sè-kan îm-loān ê, á-sī tham-sim ê, kap le̍k-sek ê, á-sī pài ngó͘-siōng ê; nā beh án-ni, tio̍h lī-khui sè-kan chiah ōe. 11 Chóng-sī taⁿ góa siá phoe hō͘ lín sī kóng, nā ū lâng chheng chòe hiaⁿ-tī iā ū îm-loān, á-sī tham-sim, á-sī pài ngó͘-siōng, á-sī lóe-mē, á-sī hò͘ⁿ chiú, á-sī le̍k-sek ê, bo̍h-tit kap i chham-chhap; chit hō lâng liân kap i chia̍h iā m̄ thang. 12 In-ūi phòaⁿ-toàn gōa-bīn lâng kap góa ū sím-mi̍h kan-sia̍p? 13 Lāi-bīn ê lâng kiám m̄ sī lín phòaⁿ-toàn ê; iā gōa-bīn ê lâng Siōng-tè phòaⁿ-toàn i ah? Hit ê pháiⁿ lâng tio̍h tùi lín tiong-kan tû-khì.
1 Lín中間有人kap人冤家，kiám敢告tī不義ê人ê面前也無tī聖徒ê面前mah？ 2 á是lín m̄知聖徒beh審判世間？世間尚且hō͘ lín審判，也bōe堪得審判極小khóa ê事mah？ 3 Kiám m̄知咱beh審判天使？何況今世ê事mah？ 4 Taⁿ lín若有今世ê事tio̍h審判，lín kiám是用教會中無名字ê審判mah？ 5 我講án-ni是beh hō͘ lín見笑。kiám是lín中間無一个知識ê人，ōe判斷tī伊ê兄弟中？ 6 竟然兄弟告兄弟，續告tī m̄信ê人ê面前。 7 Taⁿ lín有相告ê事，已經lóng是lín ê大失錯。啥事m̄寧可受冤枉？啥事m̄寧可受剋虧ah？ 8 但是lín竟然冤枉人，剋虧人，hòng-kiam chiahê是兄弟。 9 Kiám m̄知不義ê人bōe會承接上帝ê國mah？莫得錯誤；淫亂ê，拜偶像ê，行姦淫ê，做攣童ê，好男色ê， 10 做賊ê，貪心ê，好酒ê，詈罵人ê，勒索人ê，lóng bōe得tio̍h承接上帝ê國。 11 Lín中間有人早是án-ni；但是tī主耶穌基督ê名，kap咱ê上帝ê神，已經洗清，已經得tio̍h成聖，已經稱做義。 12 凡事我lóng thang；但是無一盡有利益。凡事我lóng thang，但是無一項我beh hō͘伊管。 13 食是為tio̍h腹肚，腹肚也是為tio̍h食，總是chit兩項上帝beh廢伊。獨獨身軀m̄是為tio̍h淫亂，是為tio̍h主，主也是為tio̍h身軀。 14 上帝bat hō͘主koh活，也beh tùi伊ê權能hō͘咱koh活。 15 Kiám m̄知lín ê身軀是基督ê百體？我kiám thang將基督ê百體hō͘伊做娼妓ê百體mah？斷斷m̄-thang。 16 á是lín m̄知kap娼妓連合ê，是kap伊做一體？因為講，兩個beh成做一體。 17 獨獨kap主連合ê是一个神。 18 Tio̍h閃避淫行。人所犯ta̍k項ê罪lóng是身軀外ê；但是行姦淫ê是犯罪到tī家己ê身軀。 19 á是lín m̄知lín ê身軀就是聖神ê殿；聖神tiàm-tī lín，就是lín tùi上帝所有ê？koh lín m̄是家己ê； 20 因為是用價錢買ê；所以tio̍h tī lín ê身軀榮光上帝。
1 Lín tiong-kan ū lâng kap lâng oan-ke, kiám káⁿ kò tī put-gī ê lâng ê bīn-chêng iā bô tī sèng-tô͘ ê bīn-chêng mah? 2 Á-sī lín m̄ chai sèng-tô͘ beh sím-phòaⁿ sè-kan? Sè-kan siōng-chhiáⁿ hō͘ lín sím-phòaⁿ, iā bōe kham-tit sím-phòaⁿ ke̍k sió-khóa ê sū mah? 3 Kiám m̄ chai lán beh sím-phòaⁿ thiⁿ-sài? hô-hòng kim-sè ê sū mah? 4 Taⁿ lín nā ū kim-sè ê sū tio̍h sím-phòaⁿ, lín kiám sī ēng kàu-hōe tiong bô miâ-jī ê sím-phòaⁿ mah? 5 Góa kóng án-ni sī beh hō͘ lín kiàn-siàu. Kiám sī lín tiong-kan bô chi̍t ê tì-sek ê lâng, ōe phòaⁿ-toàn tī i ê hiaⁿ-tī tiong? 6 Kèng-jiân hiaⁿ-tī kò hiaⁿ-tī, sòa kò tī m̄ sìn ê lâng ê bīn-chêng. 7 Taⁿ lín ū saⁿ-kò ê sū, í-keng lóng sī lín ê tōa sit-chhò. Siáⁿ-sū m̄ lêng-khó͘ siū oan-óng? siáⁿ-sū m̄ lêng-khó͘ siū khek-khui ah? 8 Nā-sī lín kèng-jiân oan-óng lâng, khek-khui lâng, hòng-kiam chiah-ê sī hiaⁿ-tī. 9 Kiám m̄ chai put-gī ê lâng bōe-ōe sêng-chiap Siōng-tè ê kok mah? Bo̍h-tit chhò-gō͘; îm-loān ê, pài ngó͘-siōng ê, kiâⁿ kan-îm ê, chòe loân-tông ê, hò͘ⁿ lâm-sek ê, 10 chòe chha̍t ê, tham-sim ê, hò͘ⁿ-chiú ê, lóe-mē lâng ê, le̍k-sek lâng ê, lóng bōe tit-tio̍h sêng-chiap Siōng-tè ê kok. 11 Lín tiong-kan ū lâng chá sī án-ni; nā-sī tī Chú Iâ-so͘ Ki-tok ê miâ, kap lán ê Siōng-tè ê Sîn, í-keng sóe chheng, í-keng tit-tio̍h chiâⁿ-sèng, í-keng chheng-chòe-gī. 12 Hoān sū góa lóng thang; nā-sī bô it-chīn ū lī-ek. Hoān sū góa lóng thang, nā-sī bô chi̍t hāng góa beh hō͘ i koán. 13 Chia̍h sī ūi-tio̍h pak-tó͘, pak-tó͘ iā sī ūi-tio̍h chia̍h, chóng-sī chit nn̄g hāng Siōng-tè beh hòe i. To̍k-to̍k seng-khu m̄ sī ūi-tio̍h îm-loān, sī ūi-tio̍h Chú, Chú iā sī ūi-tio̍h seng-khu. 14 Siōng-tè bat hō͘ Chú koh-oa̍h, iā beh tùi I ê koân-lêng hō͘ lán koh-oa̍h. 15 Kiám m̄ chai lín ê seng-khu sī Ki-tok ê pah-thé? góa kiám thang chiong Ki-tok ê pah-thé hō͘ i chòe chhiong-ki ê pah-thé mah? Toàn-toàn m̄ thang. 16 Á-sī lín m̄ chai kap chhiong-ki liân-ha̍p ê, sī kap i chòe chi̍t thé? in-ūi kóng, Nn̄g ê beh chiâⁿ chòe chi̍t thé. 17 To̍k-to̍k kap Chú liân-ha̍p ê sī chi̍t ê sîn. 18 Tio̍h siám-pī îm-hēng. Lâng só͘ hoān ta̍k hāng ê chōe lóng sī sin-khu gōa ê; nā-sī kiâⁿ kan-îm ê sī hoān-chōe kàu tī ka-kī ê seng-khu. 19 Á-sī lín m̄ chai lín ê seng-khu chiū-sī Sèng Sîn ê tiān; Sèng Sîn tiàm-tī lín, chiū-sī lín tùi Siōng-tè só͘ ū ê? koh lín m̄ sī ka-kī ê; 20 in-ūi sī ēng kè-chîⁿ bóe ê; só͘-í tio̍h tī lín ê seng-khu êng-kng Siōng-tè.
1 論到lín所寫ê事：我講，Ta-po͘人無親近婦人人是好。 2 總是為tio̍h淫亂ê緣故，ta̍k人tio̍h有家己ê bó͘，婦人人也ta̍k-ê tio̍h有家己ê丈夫。 3 丈夫對婦人人tio̍h照所合宜ê款待伊；婦人人對丈夫也tio̍h án-ni。 4 婦人人無權thang主意家己ê身軀，是丈夫主意；丈夫也無權thang主意家己ê身軀，是婦人人主意。 5 莫得相虧負；獨獨若大家同心，就暫時相離，thang專務祈禱，後來猶原saⁿ-kap tôa，免得撒旦乘lín ê情慾bōe禁得，來試lín。 6 我講án-ni，是允准，m̄是命令。 7 我ái人lóng親像我。獨獨ta̍k人對上帝為家己ê恩賜；有ê chit款，有ê hit款。 8 我對未嫁娶ê kap守寡人講，In若長長親像我是好。 9 設使家己bōe禁得，就tio̍h嫁娶；因為嫁娶是khah好tī慾火teh to̍h。 10 我命令已經嫁娶ê，其實m̄是我，是主命令。婦人人莫得離開丈夫， 11 (但是已經離開，就tio̍h長長無嫁，或是kap丈夫koh和) ；丈夫也m̄-thang放sak婦人人。 12 Tùi其餘ê我講，m̄是主講： 若兄弟有婦人人無信主，也婦人人歡喜saⁿ-kap tòa，就莫得放sak伊。 13 婦人人有丈夫無信主，丈夫歡喜saⁿ-kap tòa，也莫得放sak伊ê丈夫。 14 因為無信主ê丈夫tùi婦人人得tio̍h聖；無信主ê婦人人tùi丈夫得tio̍h聖；若m̄是án-ni，lín ê kiáⁿ兒無清氣，總是taⁿ in是聖。 15 m̄信ê若離開，就kù-chāi伊離開；兄弟姊妹tī chiahê事無受拘束；獨獨上帝召咱是ài得和平。 16 婦人人ah，你thái-thó知能救丈夫á bōe？丈夫ah，你 thái-thó知能救婦人人á bōe？ 17 獨獨照主所賞賜ta̍k人ê，照上帝所召ta̍k人ê，tio̍h án-ni行。Tī ta̍k-ê教會我所吩咐也是án-ni。 18 有人已經受割禮來得tio̍h 召mah？就莫得廢無割禮。有人未受割禮來得tio̍h召mah？就莫得受割禮。 19 受割禮bōe算得賬，無受割禮也bōe算得賬；獨獨是守上帝ê誡nā-tiāⁿ。 20 Ta̍k人tī甚麼等第受召，tio̍h猶原tiàm-tī hitê 等第。 21 你做奴才來受召mah？M̄-thang因為án-ni來掛慮。總是若會得自由，是khah好。 22 因為做奴才，tī主得tio̍h召ê，是hō͘主所tháu放；án-ni做自由，來得tio̍h召ê，是做基督ê奴僕。 23 Lín是用價錢所買ê，m̄-thang成做人ê奴才。 24 兄弟ah，ta̍k人tī甚麼地步受召，伊tio̍h tī上帝ê面前長長tòa tī hitê地步。 25 論到未嫁娶ê，我無有主ê命令；總是我已經得tio̍h主ê憐憫來做盡忠，就將家己ê意見kā lín講。 26 因為看現今ê艱難，照我phah算，人若照伊平常ê款是好。 27 你有婦人人mah？莫得求tháu-放。你無婦人人mah？莫得求beh娶。 28 總是你若娶，m̄是犯罪；在室女若嫁，也m̄是犯罪。總是in hit號人beh tī肉體tú-tio̍h患難；我是teh顧lín。 29 兄弟ah，我koh講，時日促短lah，所以tùi taⁿ以後，有bó͘ ê tio̍h親像無bó͘， 30 啼哭ê親像無啼哭，歡喜ê親像無歡喜，買ê親像無所得tio̍h，用世間ê物ê親像無lām-sám用， 31 因為chit世間ê款teh過去lah。 32 我ài得lín無所掛慮。無bó͘ ê掛慮主ê事，怎樣會hō͘主歡喜； 33 但是有bó͘ ê掛慮世間ê事，怎樣會hō͘ bó͘歡喜。 34 婦人人kap在室女也有分別；無丈夫ê掛慮主ê事，beh hō͘伊ê身軀kap神魂lóng聖。但是有丈夫ê掛慮世間ê事，怎樣會hō͘丈夫歡喜。 35 我講chiahê是為tio̍h lín家己ê利益，m̄是beh籠絡lín，就是beh hō͘ lín行合適ê事，勤勤服事主，無所攪擾。 36 但是有人phah算款待伊ê cha-bó͘-kiáⁿ有m̄合適，設使年歲過時，也事情不得已tio̍h án-ni，就thang照意思去行；伊無犯罪；tio̍h hō͘ in合婚。 37 若有人堅心，無有不得已ê事，koh有權thang行家己ê意思，也伊家己ê心已經決定beh留伊ê cha-bó͘-kiáⁿ，án-ni行是好。 38 親像án-ni，hō͘家己ê cha-bó͘-kiáⁿ出嫁ê是好，無hō͘伊出嫁ê koh-khah好。 39 丈夫tī-teh ê時，婦人人受把縛；丈夫若死，婦人人得tio̍h自由，嫁伊所愛ê，獨獨tio̍h嫁屬主ê，chiah thang。 40 總是照我phah算，無嫁khah有福氣；koh我想我也有上帝ê神。
1 Lūn-kàu lín só͘ siá ê sū: góa kóng, Ta-po͘-lâng bô chhin-kūn hū-jîn-lâng sī hó. 2 Chóng-sī ūi-tio̍h îm-loān ê iân-kò͘, ta̍k lâng tio̍h ū ka-kī ê bó͘, hū-jîn-lâng iā ta̍k ê tio̍h ū ka-kī ê tiōng-hu. 3 Tiōng-hu tùi hū-jîn-lâng tio̍h chiàu só͘ ha̍p-gî ê khoán-thāi i; hū-jîn-lâng tùi tiōng-hu iā tio̍h án-ni. 4 Hū-jîn-lâng bô koân thang chú-ì ka-kī ê seng-khu, sī tiōng-hu chú-ì; tiōng-hu iā bô koân thang chú-ì ka-kī ê seng-khu, sī hū-jîn-lâng chú-ì. 5 Bo̍h-tit saⁿ khui-hū; to̍k-to̍k nā tāi-ke tâng-sim, chiū chiām-sî saⁿ-lī, thang choan-bū kî-tó, āu-lâi iû-goân saⁿ-kap tôa, bián-tit Sat-tàn sēng lín ê chêng-io̍k bōe kìm-tit, lâi chhì lín. 6 Góa kóng án-ni, sī ún-chún, m̄ sī bēng-lēng. 7 Góa ái lâng lóng chhin-chhiūⁿ góa. To̍k-to̍k ta̍k lâng tùi Siōng-tè ūi ka-kī ê un-sù; ū-ê chit khoán, ū-ê hit khoán. 8 Góa tùi bē kè-chhōa ê kap chiú-kóaⁿ lâng kóng, In nā tn̂g-tn̂g chhin-chhiūⁿ góa sī hó. 9 Siat-sú ka-kī bōe kìm-tit, chiū tio̍h kè-chhōa; in-ūi kè-chhōa sī khah hó tī io̍k-hé teh to̍h. 10 Góa bēng-lēng í-keng kè-chhōa ê, kî-si̍t m̄ sī góa, sī Chú bēng-lēng. Hū-jîn-lâng bo̍h-tit lī-khui tiōng-hu, 11 (nā sī í-keng lī-khui, chiū tio̍h tn̂g-tn̂g bô kè, he̍k-sī kap tiōng-hu koh hô); tiōng-hu iā m̄ thang pàng-sak hū-jîn-lâng. 12 Tùi kî-û ê góa kóng, m̄ sī Chú kóng: Nā hiaⁿ-tī ū hū-jîn-lâng bô sìn Chú, iā hū-jîn-lâng hoaⁿ-hí saⁿ-kap tòa, chiū bo̍h-tit pàng-sak i. 13 Hū-jîn-lâng ū tiōng-hu bô sìn Chú, tiōng-hu hoaⁿ-hí saⁿ-kap tòa, iā bo̍h-tit pàng-sak i ê tiōng-hu. 14 In-ūi bô sìn Chú ê tiōng-hu tùi hū-jîn-lâng tit-tio̍h sèng; bô sìn Chú ê hū-jîn-lâng tùi tiōng-hu tit-tio̍h sèng; nā m̄ sī án-ni, lín ê kiáⁿ-jî bô chheng-khì, chóng-sī taⁿ in sī sèng. 15 M̄ sìn ê nā lī-khui, chiū kù-chāi i lī-khui; hiaⁿ-tī chí-bē tī chiah ê sū bô siū khu-sok; to̍k-to̍k Siōng-tè tiàu lán sī ài tit hô-pêng. 16 Hū-jîn-lâng ah, lí thái-thó chai ōe kiù tiōng-hu á bōe? Tiōng-hu ah, lí thái-thó chai ōe kiù hū-jîn-lâng á bōe? 17 To̍k-to̍k chiàu Chú só͘ siúⁿ-sù ta̍k lâng ê, chiàu Siōng-tè só͘ tiàu ta̍k lâng ê, tio̍h án-ni kiâⁿ. Tī ta̍k ê kàu-hōe góa só͘ hoan-hù iā sī án-ni. 18 Ū lâng í-keng siū kat-lé lâi tit-tio̍h tiàu mah? chiū bo̍h-tit hòe-bô kat-lé. Ū lâng bē siū kat-lé lâi tit-tio̍h tiàu mah? chiū bo̍h-tit siū kat-lé. 19 Siū kat-lé bōe sǹg-tit siàu, bô siū kat-lé iā bōe sǹg-tit siàu; to̍k-to̍k sī siú Siōng-tè ê kài nā-tiāⁿ. 20 Ta̍k lâng tī sím-mi̍h téng-tē siū tiàu, tio̍h iû-goân tiàm-tī hit ê téng-tē. 21 Lí chòe lô͘-châi lâi siū tiàu mah? M̄ thang in-ūi án-ni lâi khòa-lū. Chóng-sī nā ōe tit chū-iû, sī khah hó. 22 In-ūi chòe lô͘-châi, tī Chú tit-tio̍h tiàu ê, sī hō͘ Chú só͘ tháu-pàng; án-ni chòe chū-iû, lâi tit-tio̍h tiàu ê, sī chòe Ki-tok ê lô͘-po̍k. 23 Lín sī ēng kè-chîⁿ só͘ bóe ê, m̄ thang chiâⁿ-chòe lâng ê lô͘-châi. 24 Hiaⁿ-tī ah, ta̍k lâng tī sím-mi̍h tē-pō͘ siū tiàu, i tio̍h tī Siōng-tè ê bīn-chêng tn̂g-tn̂g tòa tī hit ê tē-pō͘. 25 Lūn-kàu bē kè-chhōa ê, góa bô ū Chú ê bēng-lēng; chóng-sī góa í-keng tit-tio̍h Chú ê lîn-bín lâi chòe chīn-tiong, chiū chiong ka-kī ê ì-kiàn kā lín kóng. 26 In-ūi khòaⁿ hiān-kim ê kan-lân, chiàu góa phah-sǹg, lâng nā chiàu i pêng-siông ê khoán sī hó. 27 Lí ū hū-jîn-lâng mah? bo̍h-tit kiû tháu-pàng. Lí bô hū-jîn-lâng mah? bo̍h-tit kiû beh chhōa. 28 Chóng-sī lí nā chhōa, m̄ sī hoān chōe; chāi-sek-lú nā kè, iā m̄ sī hoān chōe. Chóng-sī in hit hō lâng beh tī jio̍k-thé tú-tio̍h hoān-lān; góa sī teh kò͘ lín. 29 Hiaⁿ-tī ah, góa koh kóng, sî-ji̍t chhek té lah, só͘-í tùi taⁿ í-āu ū bó͘ ê tio̍h chhin-chhiūⁿ bô bó͘, 30 thî-khàu ê chhin-chhiūⁿ bô thî-khàu, hoaⁿ-hí ê chhin-chhiūⁿ bô hoaⁿ-hí, bóe ê chhin-chhiūⁿ bô só͘ tit-tio̍h, ēng sè-kan ê mi̍h ê chhin-chhiūⁿ bô lām-sám ēng, 31 in-ūi chit sè-kan ê khoán teh kè-khì lah. 32 Góa ài-tit lín bô só͘ khòa-lū. Bô bó͘ ê khòa-lū Chú ê sū, cháiⁿ-iūⁿ ōe hō͘ Chú hoaⁿ-hí; 33 nā-sī ū bó͘ ê khòa-lū sè-kan ê sū, cháiⁿ-iūⁿ ōe hō͘ bó͘ hoaⁿ-hí. 34 Hū-jîn-lâng kap chāi-sek-lú iā ū hun-piat; bô tiōng-hu ê khòa-lū Chú ê sū, beh hō͘ i ê seng-khu kap sîn-hûn lóng sèng. Nā-sī ū tiōng-hu ê khòa-lū sè-kan ê sū, cháiⁿ-iūⁿ ōe hō͘ tiōng-hu hoaⁿ-hí. 35 Góa kóng chiah-ê sī ūi-tio̍h lín ka-kī ê lī-ek, m̄ sī beh lóng-lo̍k lín, chiū-sī beh hō͘ lín kiâⁿ ha̍p-sek ê sū, khûn-khûn ho̍k-sāi Chú, bô só͘ kiáu-jiáu. 36 Nā-sī ū lâng phah-sǹg khoán-thāi i ê cha-bó͘-kiáⁿ ū m̄ ha̍p-sek, siat-sú nî-hè kè-sî, iā sū-chêng put-tek-í tio̍h án-ni, chiū thang chiàu ì-sù khì kiâⁿ; i bô hoān-chōe; tio̍h hō͘ in ha̍p-hun. 37 Nā ū lâng kian-sim, bô ū put-tek-í ê sū, koh ū koân thang kiâⁿ ka-kī ê ì-sù, iā i ka-kī ê sim í-keng koat-tiāⁿ beh lâu i ê cha-bó͘-kiáⁿ, án-ni kiâⁿ sī hó. 38 Chhin-chhiūⁿ án-ni, hō͘ ka-kī ê cha-bó͘-kiáⁿ chhut-kè ê sī hó, bô hō͘ i chhut-kè ê koh khah hó. 39 Tiōng-hu tī-teh ê sî, hū-jîn-lâng siū pé-pa̍k; tiōng-hu nā sí, hū-jîn-lâng tit-tio̍h chū-iû, kè i só͘ ài ê, to̍k-to̍k tio̍h kè sio̍k Chú ê, chiah thang. 40 Chóng-sī chiàu góa phah-sǹg, bô kè khah ū hok-khì; koh góa siūⁿ góa iā ū Siōng-tè ê Sîn.
1 論到祭偶像ê物：咱知咱lóng有知識。知識會致到自高；但是仁愛會建立德行。 2 人若phah算伊有所知，就是伊iáu-bē知照所應該知。 3 人若疼上帝，chitê人就是hō͘伊所bat。 4 論到食祭偶像ê物，咱知偶像tī世間是無影ê，也知上帝獨獨一个，無別個。 5 因為雖然有稱做上帝ê，或是tī天裡或是tī地裡，親像有chōe-chōe上帝，chōe-chōe主； 6 但是咱chí有一个上帝，就是父，萬物本tùi伊，咱也歸tī伊；koh有一个主耶穌基督，萬物tùi伊，咱也tùi伊。 7 總是人無lóng有chit號知識；有ê拜偶像慣勢，到taⁿ掠hitê祭祀做祭偶像ê物來食伊，in ê良心既然軟弱，所以就bak-tio̍h。 8 總是食物bōe hō͘上帝歡喜咱；無食，咱無虧損；食，咱也無利益。 9 獨獨tio̍h謹慎，驚了lín chitê權做軟chiáⁿ ê人ê塞礙。 10 因為若有人看見你有知識ê坐桌tī偶像ê廟，hitê軟弱ê人ê良心kiám無tùi án-ni放膽，來食祭偶像ê物mah？ 11 因為對你ê知識hitê軟弱ê人沉淪，就是基督替伊死ê兄弟。 12 Lín án-ni得罪兄弟，傷tio̍h in軟弱ê良心，就是得罪基督。 13 所以食物若hō͘我ê兄弟跋倒，我就永永m̄食肉，免得hō͘我ê兄弟跋倒。
1 Lūn-kàu chè ngó͘-siōng ê mi̍h: Lán chai lán lóng ū tì-sek. Tì-sek ōe tì-kàu chū-ko; nā-sī jîn-ài ōe kiàn-li̍p tek-hēng. 2 Lâng nā phah-sǹg i ū só͘ chai, chiū-sī i iáu-bē chai chiàu só͘ eng-kai chai. 3 Lâng nā thiàⁿ Siōng-tè, chit ê lâng chiū-sī hō͘ I só͘ bat. 4 Lūn-kàu chia̍h chè ngó͘-siōng ê mi̍h, lán chai ngó͘-siōng tī sè-kan sī bô iáⁿ ê, iā chai Siōng-tè to̍k-to̍k chi̍t-ê, bô pa̍t ê. 5 In-ūi sui-jiân ū chheng chòe siōng-tè ê, he̍k-sī tī thiⁿ-ni̍h he̍k-sī tī tōe-ni̍h, chhin-chhiūⁿ ū chōe-chōe siōng-tè, chōe-chōe chú; 6 nā-sī lán chí ū chi̍t ê Siōng-tè, chiū-sī Pē, bān mi̍h pún tùi I, lán iā kui tī I; koh ū chi̍t ê Chú Iâ-so͘ Ki-tok, bān mi̍h tùi I, lán iā tùi I. 7 Chóng-sī lâng bô lóng ū chit hō tì-sek; ū-ê pài ngó͘-siōng koàiⁿ-sì, kàu taⁿ lia̍h hit ê chè-sū chòe chè ngó͘-siōng ê mi̍h lâi chia̍h i, in ê liông-sim kì-jiân loán-jio̍k, só͘-í chiū bak-tio̍h. 8 Chóng-sī chia̍h-mi̍h bōe hō͘ Siōng-tè hoaⁿ-hí lán; bô chia̍h, lán bô khui-sún; chia̍h, lán iā bô lī-ek. 9 To̍k-to̍k tio̍h kín-sīn, kiaⁿ-liáu lín chit ê koân chòe nńg-chiáⁿ ê lâng ê that-gāi. 10 In-ūi nā ū lâng khòaⁿ-kìⁿ lí ū tì-sek ê chē toh tī ngó͘-siōng ê biō, hit ê loán-jio̍k ê lâng ê liông-sim kiám bô tùi án-ni hòng-táⁿ, lâi chia̍h chè ngó͘-siōng ê mi̍h mah? 11 in-ūi tùi lí ê tì-sek hit ê loán-jio̍k ê lâng tîm-lûn, chiū-sī Ki-tok thòe i sí ê hiaⁿ-tī. 12 Lín án-ni tek-chōe hiaⁿ-tī, siong-tio̍h in loán-jio̍k ê liông-sim, chiū-sī tek-chōe Ki-tok. 13 Só͘-í chia̍h-mi̍h nā hō͘ góa ê hiaⁿ-tī poa̍h-tó, góa chiū éng-éng m̄ chia̍h bah, bián-tit hō͘ góa ê hiaⁿ-tī poa̍h-tó.
1 我kiám bōe得自由mah？Kiám m̄是使徒mah？Kiám m̄-bat看見咱ê主耶穌mah？Lín kiám m̄是我tiàm-tī主做成ê工mah？ 2 設使對tī別人我m̄是使徒，對tī lín我無m̄是；因為lín tiàm-tī主就是我做使徒ê印證。 3 有查問我ê，我就用chitê家己分訴。 4 阮kiám無權thang lim thang食mah？ 5 阮kiám無權thang娶信主ê姊妹做bó͘來kap阮saⁿ-kap行，親像其餘ê使徒，kap主ê兄弟，kap磯法mah？ 6 á是kan-ta我kap巴拿巴無權thang免做工mah？ 7 甚麼人當兵，來食家己ê糧mah？甚麼人栽葡萄園，無食伊ê果子mah？甚麼人飼cheng-siⁿ，無食hit陣ê奶mah？ 8 我講chiahê kiám是照人ê意見mah？á是律法無án-ni講mah？ 9 因為tī摩西ê律法有記載講，磨五穀ê牛，莫得láng伊ê嘴。上帝kiám是致意tī牛mah？ 10 á是一概為tio̍h咱來講伊？真正是為tio̍h咱來寫；因為犁園ê tio̍h存ǹg望來犁；磨五穀ê tio̍h ǹg望saⁿ-kap有份來磨。 11 阮若將屬tī神ê物也tī lín中間，就tùi lín收成屬tī肉體ê物，kiám是過頭mah？ 12 別人對tī lín尚且有份chitê權柄，何況阮mah？總是阮m̄-bat用chitê權，反tńg吞忍ta̍k項ê事，免得阮有甚麼阻擋基督ê福音。 13 Kiám m̄知tio̍h磨tī聖ê事ê食殿內ê物，跟隨祭壇ê，kap祭壇saⁿ-kap分物mah？ 14 親像án-ni，主設法hō͘傳福音ê人tio̍h tùi福音來度活。 15 但是chiahê事我lóng未bat用；koh我寫chiahê m̄是ài人án-ni款待我；因為我寧可死，不致人hō͘我所誇口ê歸tī空空。 16 我傳福音m̄是thang誇口ê事，是不得已nā-tiāⁿ；因為若無傳福音，我就有災禍。 17 我若甘心做chitê事，就有報賞；就若m̄甘心，有職任已經交帶我lah。 18 Án-ni我ê報賞是甚麼ah？就是我teh傳福音，hō͘人免所費也會得tio̍h福音；免得我tī福音所有ê權用到盡。 19 我對tī眾人sui-bóng是自由，iáu-kú將家己做眾人ê奴僕，為tio̍h beh得tio̍h人ná chōe。 20 Ǹg偤太人我就親像偤太人，beh得tio̍h偤太人；ǹg法下ê人，我雖然本身無屬tī法下，就親像法下ê人，beh得tio̍h法下ê人。 21 Ǹg法外ê人，我就親像法外人，beh得tio̍h法外ê人；其實我m̄是tī上帝ê法外，就是tī基督ê法內。 22 Ǹg軟弱ê人，我就成做軟弱，beh得tio̍h軟弱ê人。Ǹg ta̍k號人，我成做ta̍k號款，一概是beh救人。 23 ta̍k項事我因為福音來行，是hō͘我thang saⁿ-kap有份tī福音。 24 Kiám m̄知在場tàu走ê ta̍k-ê lóng走，但是得tio̍h報賞ê只有一个；lín tio̍h án-ni走chiah thang得tio̍h。 25 見若鬥力ê ta̍k項事撙節；in是beh得tio̍h會敗壞ê冕旒，但是咱是beh得tio̍h bōe敗壞ê。 26 所以我án-ni teh走，m̄是親像無定tio̍h ê方向；我phah拳，無親像teh phah空氣； 27 我phah我ê身軀到thiám-thiám，hō͘伊降服；驚了我已經傳hō͘別人，本身kiám-chhái tú-tio̍h拒絕。
1 Góa kiám bōe tit chū-iû mah? Kiám m̄ sī sù-tô͘ mah? Kiám m̄ bat khòaⁿ-kìⁿ lán ê Chú Iâ-so͘ mah? Lín kiám m̄ sī góa tiàm-tī Chú chòe-chiâⁿ ê kang mah? 2 Siat-sú tùi tī pa̍t lâng góa m̄ sī sù-tô͘, tùi tī lín góa bô m̄ sī; in-ūi lín tiàm-tī Chú chiū-sī góa chòe sù-tô͘ ê ìn-chèng. 3 Ū chhâ-mn̄g góa ê, góa chiū ēng chit-ê ka-kī hun-sò͘. 4 Goán kiám bô koân thang lim thang chia̍h mah? 5 Goán kiám bô koân thang chhōa sìn Chú ê chí-bē chòe bó͘ lâi kap goán saⁿ-kap kiâⁿ, chhin-chhiūⁿ kî-û ê sù-tô͘, kap Chú ê hiaⁿ-tī, kap Ki-hoat mah? 6 Á-sī kan-ta góa kap Pa-ná-pa bô koân thang bián chòe kang mah? 7 Sím-mi̍h lâng tng peng, lâi chia̍h ka-kī ê niû mah? sím-mi̍h lâng chai phû-tô hn̂g, bô chia̍h i ê ké-chí mah? sím-mi̍h lâng chhī cheng-siⁿ, bô chia̍h hit tīn ê lin mah? 8 Góa kóng chiah-ê kiám sī chiàu lâng ê ì-kiàn mah? Á-sī lu̍t-hoat bô án-ni kóng mah? 9 In-ūi tī Mô͘-se ê lu̍t-hoat ū kì-chài kóng, Bō ngó͘-kok ê gû, bo̍h-tit láng i ê chhùi. Siōng-tè kiám sī tì-ì tī gû mah? 10 Á-sī it-khài ūi-tio̍h lán lâi kóng i? Chin-chiàⁿ sī ūi-tio̍h lán lâi siá; in-ūi lôe hn̂g ê tio̍h chûn ǹg-bāng lâi lôe; bō ngó͘-kok ê tio̍h ǹg-bāng saⁿ-kap ū hūn lâi bō. 11 Goán nā chiong sio̍k tī sîn ê mi̍h iā tī lín tiong-kan, chiū tùi lín siu-sêng sio̍k tī jio̍k-thé ê mi̍h, kiám sī kè-thâu mah? 12 Pa̍t lâng tùi tī lín siōng-chhiáⁿ ū hūn chit ê koân-pèng, hô-hòng goán mah? Chóng-sī goán m̄ bat ēng chit ê koân, hoán-tńg thun-lún ta̍k hāng ê sū, bián-tit goán ū sím-mi̍h chó͘-tòng Ki-tok ê hok-im. 13 Kiám m̄ chai tio̍h-bôa tī sèng ê sū ê chia̍h tiān-lāi ê mi̍h, kun-sûi chè-tôaⁿ ê, kap chè-tôaⁿ saⁿ-kap pun mi̍h mah? 14 Chhin-chhiūⁿ án-ni, Chú siat-hoat hō͘ thoân hok-im ê lâng tio̍h tùi hok-im lâi tō͘ oa̍h. 15 Nā-sī chiah ê sū góa lóng bē bat ēng; koh góa siá chiah-ê m̄ sī ài lâng án-ni khoán-thāi góa; in-ūi góa lêng-khó͘ sí, put-tì lâng hō͘ góa só͘ khoa-kháu ê kui tī khang-khang. 16 Góa thoân hok-im m̄ sī thang khoa-kháu ê sū, sī put-tek-í nā-tiāⁿ; in-ūi nā bô thoân hok-im, góa chiū ū chai-ē. 17 Góa nā kam-sim chòe chit ê sū, chiū ū pò-siúⁿ; chiū nā m̄ kam-sim, ū chit-jīm í-keng kau-tāi góa lah. 18 Án-ni góa ê pò-siúⁿ sī sím-mi̍h ah? Chiū-sī góa teh thoân hok-im, hō͘ lâng bián só͘-hùi iā ōe tit-tio̍h hok-im; bián-tit góa tī hok-im só͘ ū ê koân ēng kàu chīn. 19 Góa tùi tī chèng lâng sui-bóng sī chū-iû, iáu-kú chiong ka-kī chòe chèng lâng ê lô͘-po̍k, ūi-tio̍h beh tit-tio̍h lâng ná chōe. 20 Ǹg Iû-thài lâng góa chiū chhin-chhiūⁿ Iû-thài lâng, beh tit-tio̍h Iû-thài lâng; ǹg hoat ē ê lâng, góa sui-jiân pún-sin bô sio̍k tī hoat ē, chiū chhin-chhiūⁿ hoat ē ê lâng, beh tit-tio̍h hoat ē ê lâng. 21 Ǹg hoat gōa ê lâng, góa chiū chhin-chhiūⁿ hoat gōa lâng, beh tit-tio̍h hoat gōa ê lâng; kî-si̍t góa m̄ sī tī Siōng-tè ê hoat gōa, chiū-sī tī Ki-tok ê hoat lāi. 22 Ǹg loán-jio̍k ê lâng góa chiū chiâⁿ-chòe loán-jio̍k, beh tit-tio̍h loán-jio̍k ê lâng. Ǹg ta̍k hō lâng, góa chiâⁿ-chòe ta̍k hō khoán, it-khài sī beh kiù lâng. 23 Ta̍k hāng sū góa in-ūi hok-im lâi kiâⁿ, sī hō͘ góa thang saⁿ-kap ū hūn tī hok-im. 24 Kiám m̄ chai chāi-tiûⁿ tàu-cháu ê ta̍k ê lóng cháu, nā-sī tit-tio̍h pò-siúⁿ ê chí ū chi̍t-ê; lín tio̍h án-ni cháu chiah thang tit-tio̍h. 25 Kìⁿ-nā tàu-la̍t ê ta̍k hāng sū chún-chat; in sī beh tit-tio̍h ōe pāi-hoāi ê bián-liû, nā-sī lán sī beh tit-tio̍h bōe pāi-hoāi ê. 26 Só͘-í góa án-ni teh cháu, m̄ sī chhin-chhiūⁿ bô tiāⁿ-tio̍h ê hng-hiùⁿ; góa phah kûn, bô chhin-chhiūⁿ teh phah khong-khì; 27 góa phah góa ê seng-khu kàu thiám-thiám, hō͘ i hâng-ho̍k; kiaⁿ-liáu góa í-keng thoân hō͘ pa̍t lâng, pún-sin kiám-chhái tú-tio̍h kū-choa̍t.
1 兄弟ah，我m̄ ài lín m̄知咱ê列祖lóng tī雲下，也lóng tùi海中經過， 2 也lóng tī雲中海中受洗禮歸tī摩西， 3 也lóng食同一樣靈ê食，也lóng lim同一樣靈ê奶； 4 因為in所lim ê是tùi tè in靈ê石磐出，hitê石磐就是基督。 5 但是in中間khah chōe人hō͘上帝無歡喜；因為in ê身屍橫逆tī曠野。 6 Taⁿ chiahê事是做咱ê鑑戒，hō͘咱莫得愛pháiⁿ，親像in愛pháiⁿ一樣。 7 Lín也莫得拜偶像，親像in中間有人拜伊；照所記載講，百姓坐teh lim食，起來跳舞。 8 咱也莫得行淫，親像in中間有人行淫，一日死兩萬三千人。 9 咱也莫得試主，親像in中間有人試伊，就hō͘蛇咬死。 10 Lín也莫得nga̍uh-nga̍uh念，親像in中間有人nga̍uh-nga̍uh念，就hō͘剿滅ê滅in。 11 Taⁿ in tú-tio̍h chiahê事是做鑑戒，續記載來警戒咱，就是chiahê世代尾ê人。 12 所以家己掠做khiā在ê，tio̍h謹慎驚了跋倒。 13 Lín所tú-tio̍h ê試無m̄是人ê常事；上帝是信實，無beh hō͘ lín tú-tio̍h試過頭tī lín所能當；就是tī受試ê時beh續開脫出ê路，hō͘ lín當會起。 14 所以我所疼ê兄弟ah，tio̍h閃避拜偶像ê事。 15 我所講是親像對知識ê人講；lín tio̍h省察我ê話。 16 祝謝ê杯，咱所祝謝ê，kiám m̄是saⁿ-kap有份tī基督ê血mah？咱所peh ê餅kiám m̄是saⁿ-kap有份tī基督ê身軀mah？ 17 因為餅既然一个，咱雖然chōe-chōe人也是一體；因為lóng有份tī一个餅。 18 試看照肉體ê以色列人，hiahê食祭物ê kiám m̄是saⁿ-kap有份tī祭壇mah？ 19 Án-ni我是teh講甚麼？kiám是teh講祭偶像ê物是甚麼？ 20 á是講偶像是甚麼？是teh講外邦人所祭ê是祭鬼，m̄是祭上帝；我m̄ ài lín有份tī鬼。 21 Lín bōe會lim主ê杯，兼lim鬼ê杯；bōe會有份tī主ê桌，兼有份tī鬼ê桌。 22 á是咱teh激hō͘主受氣mah？咱kiám khah勇壯伊mah？ 23 凡事lóng thang，總是無lóng有利益。凡事lóng thang，總是無lóng建立德行。 24 莫得求利益家己，tio̍h求利益別人。 25 見若街市所賣ê thang食，莫得為tio̍h良心ê緣故來查問； 26 因為地kap thong地裡ê物lóng是主ê。 27 若有一个m̄信ê人請lín，也lín ài beh去，見若排teh請lín ê，thang食伊；莫得為tio̍h良心ê緣故來查問。 28 設使有人kā lín講，chitê是祭物，就莫得食；這是為tio̍h hitê kā lín講ê人，以及良心ê緣故。 29 所講ê良心m̄是家己ê，是hit人ê；因為我ê自由啥事hō͘別個良心擬議ah？ 30 我若感恩來食，啥事為tio̍h我所感謝ê hō͘人譭謗ah？ 31 所以lín或是食，或是lim，或是做甚麼，lóng tio̍h因為榮光上帝來做。 32 無論偤太，á是希利尼，á是上帝ê教會，lín莫得做in ê塞礙。 33 親像我凡事hō͘眾人歡喜，無求家己ê利益，就是求眾人ê利益，ài beh hō͘ in得tio̍h救。
1 Hiaⁿ-tī ah, góa m̄ ài lín m̄ chai lán ê lia̍t-chó͘ lóng tī hûn ē, iā lóng tùi hái-tiong keng-kè, 2 iā lóng tī hûn-tiong hái-tiong siū sóe-lé kui tī Mô͘-se, 3 iā lóng chia̍h tâng chi̍t iūⁿ lêng ê chia̍h, iā lóng lim tâng chi̍t iūⁿ lêng ê lim; 4 in-ūi in só͘ lim ê sī tùi tè in lêng ê chio̍h-pôaⁿ chhut, hit ê chio̍h-pôaⁿ chiū-sī Ki-tok. 5 Nā-sī in tiong-kan khah chōe lâng hō͘ Siōng-tè bô hoaⁿ-hí; in-ūi in ê sin-si hoâiⁿ-ke̍h tī khòng-iá. 6 Taⁿ chiah ê sū sī chòe lán ê kàm-kài, hō͘ lán bo̍h-tit ài pháiⁿ, chhin-chhiūⁿ in ài pháiⁿ chi̍t iūⁿ. 7 Lín iā bo̍h-tit pài ngó͘-siōng, chhin-chhiūⁿ in tiong-kan ū lâng pài i; chiàu só͘ kì-chài kóng, Peh-sìⁿ chē-teh lim-chia̍h, khí-lâi thiàu-bú. 8 Lán iā bo̍h-tit kiâⁿ îm, chhin-chhiūⁿ in tiong-kan ū lâng kiâⁿ îm, chi̍t ji̍t sí nn̄g-bān saⁿ-chheng lâng. 9 Lán iā bo̍h-tit chhì Chú, chhin-chhiūⁿ in tiong-kan ū lâng chhì I, chiū hō͘ chôa kā-sí. 10 Lín iā bo̍h-tit nga̍uh-nga̍uh liām, chhin-chhiūⁿ in tiong-kan ū lâng nga̍uh-nga̍uh liām, chiū hō͘ châu-bia̍t-ê bia̍t in. 11 Taⁿ in tú-tio̍h chiah ê sū sī chòe kàm-kài, sòa kì-chài lâi kéng-kài lán, chiū-sī chiah ê sè-tāi bé ê lâng. 12 Só͘-í ka-kī lia̍h chòe khiā-chāi ê, tio̍h kín-sīn kiaⁿ-liáu poa̍h-tó. 13 Lín só͘ tú-tio̍h ê chhì bô m̄ sī lâng ê siông-sū; Siōng-tè sī sìn-si̍t, bô beh hō͘ lín tú-tio̍h chhì kè-thâu tī lín só͘ ōe tng; chiū-sī tī siū chhì ê sî beh sòa khui thoat-chhut ê lō͘, hō͘ lín tng ōe khí. 14 Só͘-í góa só͘ thiàⁿ ê hiaⁿ-tī ah, tio̍h siám-pī pài ngó͘-siōng ê sū. 15 Góa só͘ kóng sī chhin-chhiūⁿ tùi tì-sek ê lâng kóng; lín tio̍h séng-chhat góa ê ōe. 16 Chiok-siā ê poe, lán só͘ chiok-siā ê, kiám m̄ sī saⁿ-kap ū hūn tī Ki-tok ê huih mah? lán só͘ peh ê piáⁿ kiám m̄ sī saⁿ-kap ū hūn tī Ki-tok ê seng-khu mah? 17 in-ūi piáⁿ kì-jiân chi̍t-ê, lán sui-jiân chōe-chōe lâng iā sī chi̍t thé; in-ūi lóng ū hūn tī chi̍t ê piáⁿ. 18 Chhì-khòaⁿ chiàu jio̍k-thé ê Í-sek-lia̍t lâng, hiah ê chia̍h chè-mi̍h ê kiám m̄ sī saⁿ-kap ū hūn tī chè-tôaⁿ mah? 19 Án-ni góa sī teh kóng sím-mi̍h? kiám sī teh kóng chè ngó͘-siōng ê mi̍h sī sím-mi̍h? 20 á-sī kóng ngó͘-siōng sī sím-mi̍h? sī teh kóng gōa-pang lâng só͘ chè ê sī chè kúi, m̄ sī chè Siōng-tè; góa m̄ ài lín ū hūn tī kúi. 21 Lín bōe-ōe lim Chú ê poe, kiam lim kúi ê poe; bōe-ōe ū hūn tī Chú ê toh, kiam ū hūn tī kúi ê toh. 22 Á-sī lán teh kek hō͘ Chú siū-khì mah? Lán kiám khah ióng-chòng I mah? 23 Hoān sū lóng thang, chóng-sī bô lóng ū lī-ek. Hoān sū lóng thang, chóng-sī bô lóng kiàn-li̍p tek-hēng. 24 Bo̍h-tit kiû lī-ek ka-kī, tio̍h kiû lī-ek pa̍t lâng. 25 Kìⁿ-nā koe-chhī só͘ bōe ê thang chia̍h, bo̍h-tit ūi-tio̍h liông-sim ê iân-kò͘ lâi chhâ-mn̄g; 26 in-ūi tōe kap thong tōe-ni̍h ê mi̍h lóng sī Chú ê. 27 Nā ū chi̍t ê m̄ sìn ê lâng chhiáⁿ lín, iā lín ài beh khì, kìⁿ-nā pâi teh chhiáⁿ lín ê, thang chia̍h i; bo̍h-tit ūi-tio̍h liông-sim ê iân-kò͘ lâi chhâ-mn̄g. 28 Siat-sú ū lâng kā lín kóng, Chit-ê sī chè-mi̍h, chiū bo̍h-tit chia̍h; che sī ūi-tio̍h hit ê kā lín kóng ê lâng, í-ki̍p liông-sim ê iân-kò͘. 29 Só͘ kóng ê liông-sim m̄ sī ka-kī ê, sī hit lâng ê; in-ūi góa ê chū-iû siáⁿ-sū hō͘ pa̍t ê liông-sim gí-gī ah? 30 Góa nā kám-un lâi chia̍h, siáⁿ-sū ūi-tio̍h góa só͘ kám-siā ê hō͘ lâng húi-pòng ah? 31 Só͘-í lín he̍k-sī chia̍h, he̍k-sī lim, he̍k-sī chòe sím-mi̍h, lóng tio̍h in-ūi êng-kng Siōng-tè lâi chòe. 32 Bô lūn Iû-thài, á-sī Hi-lī-nî, á-sī Siōng-tè ê kàu-hōe, lín bo̍h-tit chòe in ê that-gāi. 33 Chhin-chhiūⁿ góa hoān sū hō͘ chèng lâng hoaⁿ-hí, bô kiû ka-kī ê lī-ek, chiū-sī kiû chèng lâng ê lī-ek, ài beh hō͘ in tit-tio̍h kiù.
1 Lín tio̍h學我，親像我學基督。 2 我o-ló lín，因為lín凡tāi-chì記念我，koh執守chiahê遺傳，照我所傳hō͘ lín ê。 3 總是我ài lín知基督是做ta-po͘人ê頭，ta-po͘人做婦人人ê頭，上帝做基督ê頭。 4 見若ta-po͘人祈禱á是傳道，若罩頭殼，就凌辱伊ê頭。 5 但是見若婦人人祈禱á是傳道，無罩頭殼，就凌辱伊ê頭，因為這kap剃頭毛無各樣。 6 婦人人若無罩頭殼，就tio̍h剪頭毛；婦人人剪頭毛á剃頭毛若是見笑，就khah好tio̍h 罩頭。 7 Ta-po͘人m̄應該罩頭，因為伊是上帝ê像kap榮光；但是婦人人就是ta-po͘人ê榮光。 8 因為ta-po͘人m̄是tùi婦人人出，獨獨婦人人是tùi ta-po͘人出。 9 因為ta-po͘人m̄是為tio̍h婦人人chiah創造，是婦人人為tio̍h ta-po͘人來創造。 10 所以婦人人tio̍h有降服權柄ê記號tī伊ê頭殼，為tio̍h使者ê緣故。 11 總是tī主若無ta-po͘人，就m̄成婦人人；無婦人人，就m̄成ta-po͘人。 12 因為親像婦人人tùi ta-po͘人出，ta-po͘人也是tùi婦人人chiah有；獨獨萬項是tùi上帝出。 13 Lín心內家己省察：婦人人無罩頭殼來祈禱上帝，是合適mah？ 14 Tùi本性kiám m̄知，ta-po͘人有長ê頭毛是做見笑mah？ 15 但是婦人人有長ê頭毛，是做伊ê榮光；因為伊ê頭毛是賞賜伊做帕。 16 設使有想ài beh辯駁ê，阮無chit號例，上帝chiahê教會也無。 17 Taⁿ我將chitê吩咐lín，m̄是o-ló lín，就是lín聚集，無致到利益，是致到損害。 18 頭一項，我聽見lín聚集做會ê時，lín中間有分黨，我也大略信。 19 因為lín中間bōe免得有黨派，beh hō͘真實ê人顯明tī lín中間。 20 Án-ni lín聚集tī一所在，m̄是食主ê晚餐。 21 因為食ê時，ta̍k人做伊事先食伊ê ê-hng頓；有人iau，有人醉。 22 Lín kiám無厝thang lim食mah？á是lín看輕上帝ê教會，也hō͘無ê見笑ah？我beh對lín怎樣講？Tī chitê我beh o-ló lín mah？我無o-ló。 23 因為我tùi主受，也bat傳hō͘ lín ê，就是主耶穌hō͘人賣hit暝有the̍h餅， 24 祝謝來peh伊，講，chitê是我ê身軀，為tio̍h lín phah破ê，lín tio̍h行án-ni來記念我。 25 食了後也án-ni捧杯，講，Chitê杯就是新約，tī我ê血設立ê，見若lim ê時，tio̍h行án-ni來記念我。 26 因為lín ta̍k-pái食chitê餅，lim chitê杯，是表明主ê死，直到伊koh來。 27 Án-ni凡若食主ê餅，á是lim主ê poe，無合宜ê，是辜負主ê身軀kap血。 28 但是人tio̍h家己省察，chiah thang食chitê餅，lim chitê杯。 29 人無分別主ê身軀來lim食，就是tùi lim食家己取審判。 30 所以lín中間衰lám ê，破病ê，chōe-chōe；死ê也無少。 31 咱若家己審問，就無受審判。 32 總是咱受審判，是hō͘主所警戒，免得kap世間人同受定罪。 33 我ê兄弟ah，所以lín聚集beh食ê時，tio̍h 相 thèng候。 34 若有人iau，tio̍h tiàm in厝食，免得聚集致到受審判。其餘ê等我來，chiah beh設法。
1 Lín tio̍h o̍h góa, chhin-chhiūⁿ góa o̍h Ki-tok. 2 Góa o-ló lín in-ūi lín hoān tāi-chì kì-liām góa, koh chip-siú chiah ê ûi-thoân, chiàu góa só͘ thoân hō͘ lín ê. 3 Chóng-sī góa ài lín chai Ki-tok sī chòe ta-po͘-lâng ê thâu, ta-po͘-lâng chòe hū-jîn-lâng ê thâu, Siōng-tè chòe Ki-tok ê thâu. 4 Kìⁿ-nā ta-po͘-lâng kî-tó á-sī thoân-tō, nā tà thâu-khak, chiū lêng-jio̍k i ê thâu. 5 Nā-sī kìⁿ-nā hū-jîn-lâng kî-tó á-sī thoân-tō, bô tà thâu-khak, chiū lêng-jio̍k i ê thâu, in-ūi che kap thì thâu-mn̂g bô koh-iūⁿ. 6 Hū-jîn-lâng nā bô tà thâu-khak, chiū tio̍h chián thâu-mn̂g; hū-jîn-lâng chián thâu-mn̂g á thì thâu-mn̂g nā sī kiàn-siàu, chiū khah hó tio̍h tà thâu. 7 Ta-po͘-lâng m̄ eng-kai tà thâu, in-ūi i sī Siōng-tè ê siōng kap êng-kng; nā-sī hū-jîn-lâng chiū-sī ta-po͘-lâng ê êng-kng. 8 In-ūi ta-po͘-lâng m̄ sī tùi hū-jîn-lâng chhut, to̍k-to̍k hū-jîn-lâng sī tùi ta-po͘-lâng chhut. 9 In-ūi ta-po͘-lâng m̄ sī ūi-tio̍h hū-jîn-lâng chiah chhòng-chō, sī hū-jîn-lâng ūi-tio̍h ta-po͘-lâng lâi chhòng-chō. 10 Só͘-í hū-jîn-lâng tio̍h ū hâng-ho̍k koân-pèng ê kì-hō tī i ê thâu-khak, ūi-tio̍h sù-chiá ê iân-kò͘. 11 Chóng-sī tī Chú nā bô ta-po͘-lâng, chiū m̄ chiâⁿ hū-jîn-lâng; bô hū-jîn-lâng, chiū m̄ chiâⁿ ta-po͘-lâng. 12 In-ūi chhin-chhiūⁿ hū-jîn-lâng tùi ta-po͘-lâng chhut, ta-po͘-lâng iā sī tùi hū-jîn-lâng chiah ū; to̍k-to̍k bān hāng sī tùi Siōng-tè chhut. 13 Lín sim-lāi ka-kī séng-chhat: hū-jîn-lâng bô tà thâu-khak lâi kî-tó Siōng-tè, sī ha̍p-sek mah? 14 Tùi pún-sèng kiám m̄ chai, ta-po͘-lâng ū tn̂g ê thâu-mn̂g sī chòe kiàn-siàu mah? 15 Nā-sī hū-jîn-lâng ū tn̂g ê thâu-mn̂g, sī chòe i ê êng-kng; in-ūi i ê thâu-mn̂g sī siúⁿ-sù i chòe phè. 16 Siat-sú ū siūⁿ ài beh piān-pok ê, goán bô chit hō lē, Siōng-tè chiah ê kàu-hōe iā bô. 17 Taⁿ góa chiong chit-ê hoan-hù lín, m̄ sī o-ló lín, chiū-sī lín chū-chi̍p, bô tì-kàu lī-ek, sī tì-kàu sún-hāi. 18 Thâu chi̍t hāng, góa thiaⁿ-kìⁿ lín chū-chi̍p chòe hōe ê sî, lín tiong-kan ū hun-tóng, góa iā tāi-lio̍k sìn. 19 In-ūi lín tiong-kan bōe bián-tit ū tóng-phài, beh hō͘ chin-si̍t ê lâng hián-bêng tī lín tiong-kan. 20 Án-ni lín chū-chi̍p tī chi̍t só͘-chāi, m̄ sī chia̍h Chú ê boán-chhan. 21 In-ūi chia̍h ê sî ta̍k lâng chòe i tāi-seng chia̍h i ê ê-hng tǹg; ū lâng iau, ū lâng chùi. 22 Lín kiám bô chhù thang lim-chia̍h mah? Á-sī lín khòaⁿ-khin Siōng-tè ê kàu-hōe, iā hō͘ bô-ê kiàn-siàu ah? Góa beh tùi lín cháiⁿ-iūⁿ kóng? Tī chit-ê góa beh o-ló lín mah? Góa bô o-ló. 23 In-ūi góa tùi Chú siū, iā bat thoân hō͘ lín ê, chiū-sī Chú Iâ-so͘ hō͘ lâng bōe hit mî ū the̍h piáⁿ, 24 chiok-siā lâi peh i, kóng, Chit-ê sī góa ê seng-khu, ūi-tio̍h lín phah-phòa ê, lín tio̍h kiâⁿ án-ni lâi kì-liām góa. 25 Chia̍h liáu-āu iā án-ni phâng poe, kóng, Chit ê poe chiū-sī sin iok, tī góa ê huih siat-li̍p ê, kìⁿ-nā lim ê sî, tio̍h kiâⁿ án-ni lâi kì-liām góa. 26 In-ūi lín ta̍k pái chia̍h chit ê piáⁿ, lim chit ê poe, sī piáu-bêng Chú ê sí, ti̍t kàu I koh lâi. 27 Án-ni hoān-nā chia̍h Chú ê piáⁿ, á-sī lim Chú ê poe, bô ha̍p-gî ê, sī ko͘-hū Chú ê seng-khu kap huih. 28 Nā-sī lâng tio̍h ka-kī séng-chhat, chiah thang chia̍h chit ê piáⁿ, lim chit ê poe. 29 Lâng bô hun-piat Chú ê seng-khu lâi lim-chia̍h, chiū-sī tùi lim-chia̍h ka-kī chhú sím-phòaⁿ. 30 Só͘-í lín tiong-kan soe-lám ê, phòa-pīⁿ ê, chōe-chōe; sí ê iā bô chió. 31 Lán nā ka-kī sím-mn̄g, chiū bô siū sím-phòaⁿ. 32 Chóng-sī lán siū sím-phòaⁿ, sī hō͘ Chú só͘ kéng-kài, bián-tit kap sè-kan lâng tâng siū tēng-chōe. 33 Góa ê hiaⁿ-tī ah, só͘-í lín chū-chi̍p beh chia̍h ê sî, tio̍h saⁿ thèng-hāu. 34 Nā ū lâng iau, tio̍h tiàm in chhù chia̍h, bián-tit chū-chi̍p tì-kàu siū sím-phòaⁿ. Kî-û ê tán góa lâi, chiah beh siat-hoat.
1 兄弟ah，論到神ê賞賜，我m̄ ài lín m̄知。 2 lín知lín做外邦人ê時，受迷惑去就近bōe講話ê偶像，chhut-chāi伊引誘。 3 所以我hō͘ lín知，hō͘上帝ê神感動來講ê，無人講，耶穌是thang咒詛；若m̄是hō͘聖神感動ê，也無人會講，耶穌是主。 4 Taⁿ恩賜有分別，但是神是siāng一个。 5 職份有分別，但是主是siāng一个。 6 功用有分別，但是上帝siāng一个，施行萬事tī眾人中ê。 7 但是聖神ê顯明是賞賜ta̍k人beh利益眾人。 8 因為有ê tùi神用智慧ê話hō͘伊；有ê照chitê神用知識ê話hō͘伊； 9 koh有人tī chitê神用信hō͘伊；有ê tī chitê神用醫病ê恩賜hō͘伊； 10 有ê hō͘伊能行各樣ê權能；有ê hō͘伊做先知；有ê hō͘伊能分別chiahê神；koh有ê hō͘伊能講ta̍k樣ê音語；有ê hō͘伊能翻譯ta̍k樣ê音語。 11 Chiahê lóng是siāng一个神所施行ê，照伊所ài ê，隨樣分hō͘ ta̍k人。 12 因為親像身軀是一个，也有chōe-chōe體，koh身軀ê體雖然chōe，lóng是一个身軀；基督也是án-ni。 13 因為咱眾人，無論是偤太，á是希利尼，做奴才ê á是自由ê，lóng bat受洗禮tī一个神，來屬tī一个身軀，也lóng總bat lim一个神。 14 因為身軀m̄是一體，是chōe-chōe體。 15 設使腳若講，我因為m̄是手，我無屬身軀；伊m̄是為tio̍h án-ni就無屬tī身軀。 16 設使耳á若講，我因為m̄是目睭，我無屬tī身軀；伊m̄是為tio̍h án-ni就無屬tī身軀。 17 設使thong身軀是目睭，tùi tá-lo̍h能聽？若lóng是耳á，tùi tá-lo̍h能phīⁿ？ 18 但是上帝照伊ê所ài，將chiahê體sûi-ê安排tī身軀。 19 若百體lóng siāng一款，就身軀tī tá-lo̍h？ 20 總是taⁿ體是chōe-chōe，也身軀是一个。 21 目睭bōe會對手講，我無欠用你；頭殼也bōe會對腳講，我無欠用lín。 22 M̄-nā án-ni，身軀chiahê體，看做khah軟chiáⁿ ê koh-khah bōe無得。 23 Koh咱看做身軀khah無貴氣ê體，咱就裝飾hō͘ in khah尊貴；也khah無文雅ê，咱hō͘ in koh-khah文雅。 24 因為咱文雅ê體無所欠缺。獨獨上帝調和身軀；tī有欠缺ê，益發hō͘伊尊貴； 25 免得身軀無相合是beh hō͘百體平平相眷顧。 26 若一體受苦，百體同受苦；一體受榮光，百體同快樂。 27 Lín chiahê是基督ê身軀，sûi-ê是做體。 28 上帝所設tī教會ê，一是使徒，二是先知，三是教師，koh有行權能ê，koh有醫病ê恩賜，幫贊ê，治理ê，講ta̍k樣ê音語ê。 29 眾人kiám lóng是使徒mah？lóng是先知mah？lóng是教師mah？lóng行權能mah？ 30 lóng有醫病ê恩賜mah？lóng會講ta̍k樣ê音語mah？lóng會翻譯mah？ 31 Lín tio̍h切切欣慕hiahê khah大ê恩賜。我用第一好 ê路續指示lín。
1 Hiaⁿ-tī ah, lūn-kàu Sîn ê siúⁿ-sù, góa m̄ ài lín m̄ chai. 2 Lín chai lín chòe gōa-pang lâng ê sî, siū bê-he̍k khì chiū-kūn bōe kóng ōe ê ngó͘-siōng, chhut-chāi i ín-iú. 3 Só͘-í góa hō͘ lín chai, hō͘ Siōng-tè ê Sîn kám-tōng lâi kóng ê, bô lâng kóng, Iâ-so͘ sī thang chiù-chó͘; nā m̄ sī hō͘ Sèng Sîn kám-tōng ê, iā bô lâng ōe kóng, Iâ-so͘ sī Chú. 4 Taⁿ un-sù ū hun-piat, nā-sī Sîn sī siāng chi̍t ê. 5 Chit-hūn ū hun-piat, nā-sī Chú sī siāng chi̍t ê. 6 Kong-iōng ū hun-piat, nā-sī Siōng-tè siāng chi̍t ê, si-hêng bān sū tī chèng lâng tiong ê. 7 Nā-sī Sèng Sîn ê hián-bêng sī siúⁿ-sù ta̍k lâng beh lī-ek chèng lâng. 8 In-ūi ū-ê tùi Sîn ēng tì-hūi ê ōe hō͘ i; ū-ê chiàu chit ê Sîn ēng chai-bat ê ōe hō͘ i; 9 koh ū lâng tī chit ê Sîn ēng sìn hō͘ i; ū-ê tī chit ê Sîn ēng i-pīⁿ ê un-sù hō͘ i; 10 ū-ê hō͘ i ōe kiâⁿ koh-iūⁿ ê koân-lêng; ū-ê hō͘ i chòe sian-ti; ū-ê hō͘ i ōe hun-piat chiah ê sîn; koh ū-ê hō͘ i ōe kóng ta̍k iūⁿ ê im-gú; ū-ê hō͘ i ōe hoan-e̍k ta̍k iūⁿ ê im-gú. 11 Chiah-ê lóng sī siāng chi̍t ê Sîn só͘ si-hêng ê, chiàu I só͘ ài ê, sûi-iūⁿ pun hō͘ ta̍k lâng. 12 In-ūi chhin-chhiūⁿ seng-khu sī chi̍t-ê, iā ū chōe-chōe thé, koh seng-khu ê thé sui-jiân chōe, lóng sī chi̍t ê seng-khu; Ki-tok iā sī án-ni. 13 In-ūi lán chèng lâng, bô lūn sī Iû-thài á-sī Hi-lī-nî, chòe lô͘-châi ê á-sī chū-iû ê, lóng bat siū sóe-lé tī chi̍t ê Sîn, lâi sio̍k tī chi̍t ê seng-khu, iā lóng-chóng bat lim chi̍t ê Sîn. 14 In-ūi seng-khu m̄ sī chi̍t thé, sī chōe-chōe thé. 15 Siat-sú kha nā kóng, Góa in-ūi m̄ sī chhiú, góa bô sio̍k seng-khu; i m̄ sī ūi-tio̍h án-ni chiū bô sio̍k tī seng-khu. 16 Siat-sú hī-á nā kóng, Góa in-ūi m̄ sī ba̍k-chiu, góa bô sio̍k tī seng-khu; i m̄ sī ūi-tio̍h án-ni chiū bô sio̍k tī seng-khu. 17 Siat-sú thong seng-khu sī ba̍k-chiu, tùi tá-lo̍h ōe thiaⁿ? Nā lóng sī hī-á, tùi tá-lo̍h ōe phīⁿ? 18 Nā-sī Siōng-tè chiàu I ê só͘ ài, chiong chiah ê thé sûi-ê an-pâi tī seng-khu. 19 Nā pah thé lóng siāng chi̍t khoán, chiū seng-khu tī tá-lo̍h? 20 Chóng-sī taⁿ thé sī chōe-chōe, iā seng-khu sī chi̍t ê. 21 Ba̍k-chiu bōe-ōe tùi chhiú kóng, Góa bô khiàm-ēng lí; thâu-khak iā bōe-ōe tùi kha kóng, Góa bô khiàm-ēng lín. 22 M̄ nā án-ni, seng-khu chiah ê thé, khòaⁿ chòe khah nńg-chiáⁿ ê koh khah bōe bô--tit. 23 Koh lán khòaⁿ chòe seng-khu khah bô kùi-khì ê thé, lán chiū chng-thāⁿ hō͘ in khah chun-kùi; iā khah bô bûn-ngá ê, lán hō͘ in koh khah bûn-ngá. 24 In-ūi lán bûn-ngá ê thé bô só͘ khiàm-kheh. To̍k-to̍k Siōng-tè tiâu-hô seng-khu; tī ū khiàm-kheh ê, it-hoat hō͘ i chun-kùi; 25 bián-tit seng-khu bô saⁿ-ha̍p sī beh hō͘ pah thé pîⁿ-pîⁿ saⁿ koàn-kò͘. 26 Nā chi̍t thé siū khó͘, pah thé tâng siū khó͘; chi̍t thé siū êng-kng, pah thé tâng khoài-lo̍k. 27 Lín chiah-ê sī Ki-tok ê seng-khu, sûi-ê sī chòe thé. 28 Siōng-tè só͘ siat tī kàu-hōe ê, it sī sù-tô͘, jī sī sian-ti, saⁿ sī kàu-su, koh ū kiâⁿ koân-lêng ê, koh ū i-pīⁿ ê un-sù, pang-chān ê, tī-lí ê, kóng ta̍k iūⁿ ê im-gú ê. 29 Chèng lâng kiám lóng sī sù-tô͘ mah? lóng sī sian-ti mah? lóng sī kàu-su mah? lóng kiâⁿ koân-lêng mah? 30 lóng ū i-pīⁿ ê un-sù mah? lóng ōe kóng ta̍k iūⁿ ê im-gú mah? lóng ōe hoan-e̍k mah? 31 Lín tio̍h chhiat-chhiat him-bō͘ hiah ê khah tōa ê un-sù. Góa ēng tē it hó ê lō͘ sòa chí-sī lín.
1 我設使能講人kap天使ê音語，若無仁愛，我就成做響ê銅器，tân ê lâ鈸。 2 我設使做先知，明白lóng總ê奧妙kap lóng總ê知識；koh設使有齊備ê信，夠額來移山，若無仁愛，我就bōe算做是甚麼。 3 我設使盡所有ê來賑濟，koh獻我ê身軀hō͘火燒，若無仁愛，就我無得tio̍h利益。 4 仁愛是gâu寬容慈悲；仁愛是無怨妒；仁愛無誇口，無phín-phóng， 5 無行見笑ê事，無求家己ê利益，無快受氣，無記得人ê pháiⁿ； 6 無歡喜不義，是kap真理saⁿ-kap歡喜； 7 凡事忍受，凡事相信，凡事ǹg望，凡事吞忍。 8 仁愛永遠bōe無去；但是先知ê職beh廢無，hiahê音語beh soah，知識beh廢無。 9 因為咱所知ê無完全，做先知也無完全； 10 完全ê若到，無完全ê就廢無。 11 我做gín-ná ê時，講話親像gín-ná，性情親像gín-ná，意見親像gín-ná；已經成人，就廢無gín-ná ê事。 12 因為咱taⁿ對鏡teh看，bū-bū無明；但是到hit時就當頭對面。我taⁿ所知無完全；到hit時就知，親像我hō͘主知一樣。 13 現今所存ê，就是信、ǹg望、仁愛；chit三項，其中第一大ê是仁愛。
1 Góa siat-sú ōe kóng lâng kap thiⁿ-sài ê im-gú, nā bô jîn-ài, góa chiū chiâⁿ chòe hiáng ê tâng-khì, tân ê lâ-poa̍h. 2 Góa siat-sú chòe sian-ti, bêng-pe̍k lóng-chóng ê ò-biāu kap lóng-chóng ê chai-bat; koh siat-sú ū chiâu-pī ê sìn, kàu-gia̍h lâi î soaⁿ, nā bô jîn-ài, góa chiū bōe sǹg chòe sī sím-mi̍h. 3 Góa siat-sú chīn só͘ ū ê lâi chín-chè, koh hiàn góa ê seng-khu hō͘ hé sio, nā bô jîn-ài, chiū góa bô tit-tio̍h lī-ek. 4 Jîn-ài sī gâu khoan-iông chû-pi; jîn-ài sī bô oàn-tò͘; jîn-ài bô khoa-kháu, bô phín-phóng, 5 bô kiâⁿ kiàn-siàu ê sū, bô kiû ka-kī ê lī-ek, bô khoài siū-khì, bô kì-tit lâng ê pháiⁿ; 6 bô hoaⁿ-hí put-gī, sī kap chin-lí saⁿ-kap hoaⁿ-hí; 7 hoān sū jím-siū, hoān sū siong-sìn, hoān sū ǹg-bāng, hoān sū thun-lún. 8 Jîn-ài éng-oán bōe bô--khì; nā-sī sian-ti ê chit beh hòe-bô, hiah ê im-gú beh soah, chai-bat beh hòe-bô. 9 In-ūi lán só͘ chai ê bô oân-choân, chòe sian-ti iā bô oân-choân; 10 oân-choân ê nā kàu, bô oân-choân ê chiū hòe-bô. 11 Góa chòe gín-ná ê sî, kóng ōe chhin-chhiūⁿ gín-ná, sèng-chêng chhin-chhiūⁿ gín-ná, ì-kiàn chhin-chhiūⁿ gín-ná; í-keng sêng-jîn, chiū hòe-bô gín-ná ê sū. 12 In-ūi lán taⁿ tùi kiàⁿ teh khòaⁿ, bū-bū bô bêng; nā-sī kàu hit sî chiū tng-thâu tùi-bīn. Góa taⁿ só͘ chai bô oân-choân; kàu hit sî chiū chai, chhin-chhiūⁿ góa hō͘ Chú chai chi̍t iūⁿ. 13 Hiān-kim só͘ chûn ê, chiū-sī sìn, ǹg-bāng, jîn-ài; chí saⁿ hāng, kî-tiong tē it tōa ê sī jîn-ài.
1 Tio̍h求仁愛；也tio̍h切切欣慕屬tī神ê恩賜；khah要緊ê是做先知來傳道。 2 因為講各樣ê音語ê m̄是kap人講，是kap上帝講，因為無人會曉聽；總是伊有teh講屬神ê奧妙。 3 獨獨做先知來傳道ê是kap人講，來建立，來勸勉，來安慰。 4 講音語ê是建立家己；做先知傳道ê是建立教會。 5 我ài得lín lóng會講音語，獨獨koh-khah ài，是lín做先知來傳道。因為講音語ê若無翻譯，hō͘教會得tio̍h建立，就做先知來傳道ê比伊khah大。 6 Taⁿ兄弟ah，我到lín hia，若清清講音語，也無用啟示，á是知識，á是做先知來傳道，á是用教示ê話來kā lín講，有甚麼利益lín？ 7 Hit號無活氣ê物teh出聲，親像簫親像琴，若無分別伊ê音，thái會知所pûn所彈ê是甚麼ah？ 8 但是哨角出無定tio̍h ê音，是誰會備辦交戰ah？ 9 Lín也是án-ni，若無用舌講快明ê話，thái會知所講ê ah？lín所講ê hō͘風飛去。 10 世上ê音語不論jōa-chōe樣，無一个無意思。 11 我若m̄-bat hitê聲ê意義，就講ê人beh掠我做番，我也beh掠伊做番。 12 Án-ni lín既然切切欣慕屬tī神ê恩賜，tio̍h求hō͘ lín充滿來建立教會。 13 所以講音語ê tio̍h求能翻譯。 14 我若用音語祈禱，我ê神有teh祈禱，但是我ê心思無所利益。 15 Án-ni是怎樣？我beh用神祈禱，也beh用心思祈禱；我beh用神吟詩，也beh用心思吟詩。 16 若無，就lín用神祝謝，hit號平常人既然m̄知你teh講甚麼，伊thái能當你感謝ê時來講，À-bēng？ 17 你ê感謝是好，但是別人無得tio̍h建立。 18 我感謝上帝，我講音語比lín眾人khah-chōe。 19 總是tī教會中我ài用心思講五句thang教示人ê話，贏過講萬句ê音語。 20 兄弟ah，論智慧莫得做gín-ná；論pháiⁿ tio̍h做嬰á，論智慧tio̍h做大人。 21 Tī律法有記載，主講，我beh用別樣音語ê人，kap別樣人ê嘴唇，kā chit國ê百姓講；án-ni，in猶原m̄聽我。 22 所以音語做兆頭，m̄是為tio̍h信ê人，是為tio̍h m̄信ê人；做先知來傳道，m̄是為tio̍h m̄信ê人，是為tio̍h信ê人。 23 設使全教會聚集tī一所在，若lóng講音語，有平常人á是m̄信ê入來，kiám無beh講lín teh siáu mah？ 24 設使lóng做先知來傳道，有一个m̄信ê á是平常人入來，伊就hō͘眾人叫-醒，hō͘眾人擬斷； 25 伊心內所隱密ê露現；就仆落去拜上帝，講上帝真正tī lín中間。 26 兄弟ah，án-ni是怎樣？Lín聚集ê時，ta̍k人有詩歌ê，有教示ê，有啟示ê，有音語ê，有翻譯ê。ta̍k項事tio̍h行來致到建立。 27 若有講音語ê，只堪得兩個，siōng chōe三個，也tio̍h照次序，koh tio̍h一人翻譯。 28 若無人thang翻譯，就tī教會中伊tio̍h靜靜；獨獨對本身kap對上帝講。 29 做先知來傳道ê，也只堪兩個á三個來講，其餘ê tio̍h分別伊。 30 若邊頭坐ê有人得tio̍h啟示，hitê事先講ê tio̍h靜靜。 31 因為lín一人一人lóng會thang做先知來傳道，hō͘眾人thang學習，hō͘眾人thang受苦勸。 32 Koh先知ê神是順服tī先知。 33 因為上帝m̄是紛亂ê，是和平ê；親像tī聖徒lóng總ê教會一樣。 34 婦人人tī教會中，tio̍h靜靜；因為m̄准in講；就是tio̍h順服，親像律法也是án-ni講。 35 In若ài學習甚麼，tio̍h tī家內問家己ê丈夫；因為婦人人tī教會中來講是見笑， 36 上帝ê道理kiám是tùi lín出？á是kan-ta傳hō͘ lín ah？ 37 若有人家己掠做先知，á是做屬tī神ê人，就tio̍h知我所寫hō͘ lín ê是主ê命令。 38 若有人m̄知，就kù-chāi伊m̄知。 39 所以我ê兄弟ah，tio̍h切切欣慕做先知來傳道，也莫得禁止講音語。 40 凡事tio̍h文雅也照規矩來行。
1 Tio̍h kiû jîn-ài; iā tio̍h chhiat-chhiat him-bō͘ sio̍k tī sîn ê un-sù; khah iàu-kín ê sī chòe sian-ti lâi thoân-tō. 2 In-ūi kóng kok iūⁿ ê im-gú ê m̄ sī kap lâng kóng, sī kap Siōng-tè kóng, in-ūi bô lâng ōe hiáu thiaⁿ; chóng-sī i ū teh kóng sio̍k sîn ê ò-biāu. 3 To̍k-to̍k chòe sian-ti lâi thoân-tō ê sī kap lâng kóng, lâi kiàn-li̍p, lâi khoàn-bián, lâi an-ùi. 4 Kóng im-gú ê sī kiàn-li̍p ka-kī; chòe sian-ti thoân-tō ê sī kiàn-li̍p kàu-hōe. 5 Góa ài tit lín lóng ōe kóng im-gú, to̍k-to̍k koh khah ài, sī lín chòe sian-ti lâi thoân-tō. In-ūi kóng im-gú ê nā bô hoan-e̍k, hō͘ kàu-hōe tit-tio̍h kiàn-li̍p, chiū chòe sian-ti lâi thoân-tō ê pí i khah tōa. 6 Taⁿ hiaⁿ-tī ah, góa kàu lín hia, nā chheng-chheng kóng im-gú, iā bô ēng khé-sī, á-sī chai-bat, á-sī chòe sian-ti lâi thoân-tō, á-sī ēng kà-sī ê ōe lâi kā lín kóng, ū sím-mi̍h lī-ek lín? 7 Hit hō bô oa̍h-khì ê mi̍h teh chhut siaⁿ, chhin-chhiūⁿ siau chhin-chhiūⁿ khîm, nā bô hun-piat i ê im, thái ōe chai só͘ pûn só͘ tôaⁿ ê sī sím-mi̍h ah? 8 Nā sī sàu-kak chhut bô tiāⁿ-tio̍h ê im, chī-chūi ōe pī-pān kau-chiàn ah? 9 Lín iā sī án-ni, nā bô ēng chi̍h kóng khoài bêng ê ōe, thái ōe chai só͘ kóng ê ah? lín só͘ kóng ê hō͘ hong pe-khì. 10 Sè-chiūⁿ ê im-gú put-lūn jōa chōe iūⁿ, bô chi̍t ê bô ì-sù. 11 Góa nā m̄ bat hit ê siaⁿ ê ì-gī, chiū kóng ê lâng beh lia̍h góa chòe hoan, góa iā beh lia̍h i chòe hoan. 12 Án-ni lín kì-jiân chhiat-chhiat him-bō͘ sio̍k tī sîn ê un-sù, tio̍h kiû hō͘ lín chhiong-móa lâi kiàn-li̍p kàu-hōe. 13 Só͘-í kóng im-gú ê tio̍h kiû ōe hoan-e̍k. 14 Góa nā ēng im-gú kî-tó, góa ê sîn ū teh kî-tó, nā-sī góa ê sim-su bô só͘ lī-ek. 15 Án-ni sī cháiⁿ-iūⁿ? Góa beh ēng sîn kî-tó, iā beh ēng sim-su kî-tó; góa beh ēng sîn gîm si, iā beh ēng sim-su gîm si. 16 Nā bô, chiū lín ēng sîn chiok-siā, hit hō pêng-siông lâng kì-jiân m̄ chai lí teh kóng sím-mi̍h, i thái ōe tng lí kám-siā ê sî lâi kóng, À-bēng? 17 Lí ê kám-siā sī hó, nā-sī pa̍t lâng bô tit-tio̍h kiàn-li̍p. 18 Góa kám-siā Siōng-tè, góa kóng im-gú pí lín chèng lâng khah chōe. 19 Chóng-sī tī kàu-hōe tiong góa ài ēng sim-su kóng gō͘ kù thang kà-sī lâng ê ōe, iâⁿ-kè kóng bān kù ê im-gú. 20 Hiaⁿ-tī ah, lūn tì-hūi bo̍h-tit chòe gín-ná; lūn pháiⁿ tio̍h chòe eⁿ-á, lūn tì-hūi tio̍h chòe tōa lâng. 21 Tī lu̍t-hoat ū kì-chài, Chú kóng, Góa beh ēng pa̍t iūⁿ im-gú ê lâng, kap pa̍t iūⁿ lâng ê chhùi-tûn, kā chit kok ê peh-sìⁿ kóng; án-ni in iû-goân m̄ thiaⁿ góa. 22 Só͘-í im-gú chòe tiāu-thâu, m̄ sī ūi-tio̍h sìn ê lâng, sī ūi-tio̍h m̄ sìn ê lâng; chòe sian-ti lâi thoân-tō, m̄ sī ūi-tio̍h m̄ sìn ê lâng, sī ūi-tio̍h sìn ê lâng. 23 Siat-sú choân kàu-hōe chū-chi̍p tī chi̍t só͘-chāi, nā lóng kóng im-gú, ū pêng-siông lâng á-sī m̄ sìn ê ji̍p-lâi, kiám bô beh kóng lín teh siáu mah? 24 Siat-sú lóng chòe sian-ti lâi thoân-tō, ū chi̍t ê m̄ sìn ê á-sī pêng-siông lâng ji̍p-lâi, i chiū hō͘ chèng lâng kiò-chhíⁿ, hō͘ chèng lâng gí-toàn; 25 i sim-lāi só͘ ún-ba̍t ê lō͘-hiān; chiū phak-lo̍h-khì pài Siōng-tè, kóng Siōng-tè chin-chiàⁿ tī lín tiong-kan. 26 Hiaⁿ-tī ah, án-ni sī cháiⁿ-iūⁿ? Lín chū-chi̍p ê sî, ta̍k lâng ū si-koa ê, ū kà-sī ê, ū khé-sī ê, ū im-gú ê, ū hoan-e̍k ê. Ta̍k hāng sū tio̍h kiâⁿ lâi tì-kàu kiàn-li̍p. 27 Nā ū kóng im-gú ê, chí kham-tit nn̄g ê, siōng chōe saⁿ ê, iā tio̍h chiàu chhù-sū, koh tio̍h chi̍t lâng hoan-e̍k. 28 Nā bô lâng thang hoan-e̍k, chiū tī kàu-hōe tiong i tio̍h chēng-chēng; to̍k-to̍k tùi pún-sin kap tùi Siōng-tè kóng. 29 Chòe sian-ti lâi thoân-tō ê, iā chí kham nn̄g ê á saⁿ ê lâi kóng, kî-û ê tio̍h hun-piat i. 30 Nā piⁿ-thâu chē ê ū lâng tit-tio̍h khé-sī, hit ê tāi-seng kóng ê tio̍h chēng-chēng. 31 In-ūi lín chi̍t lâng chi̍t lâng lóng ōe thang chòe sian-ti lâi thoân-tō, hō͘ chèng lâng thang ha̍k-si̍p, hō͘ chèng lâng thang siū khó͘-khǹg. 32 Koh sian-ti ê sîn sī sūn-ho̍k tī sian-ti. 33 In-ūi Siōng-tè m̄ sī hun-loān ê, sī hô-pêng ê; chhin-chhiūⁿ tī sèng-tô͘ lóng-chóng ê kàu-hōe chi̍t iūⁿ. 34 Hū-jîn-lâng tī kàu-hōe tiong, tio̍h chēng-chēng; in-ūi m̄ chún in kóng; chiū-sī tio̍h sūn-ho̍k, chhin-chhiūⁿ lu̍t-hoat iā sī án-ni kóng. 35 In nā ài ha̍k-si̍p sím-mi̍h, tio̍h tī ke-lāi mn̄g ka-kī ê tiōng-hu; in-ūi hū-jîn-lâng tī kàu-hōe tiong lâi kóng sī kiàn-siàu, 36 Siōng-tè ê tō-lí kiám sī tùi lín chhut? á-sī kan-ta thoân hō͘ lín ah? 37 Nā ū lâng ka-kī lia̍h chòe sian-ti, á-sī chòe sio̍k tī sîn ê lâng, chiū tio̍h chai góa só͘ siá hō͘ lín ê sī Chú ê bēng-lēng. 38 Nā ū lâng m̄ chai, chiū kù-chāi i m̄ chai. 39 Só͘-í góa ê hiaⁿ-tī ah, tio̍h chhiat-chhiat him-bō͘ chòe sian-ti lâi thoân-tō, iā bo̍h-tit kìm-chí kóng im-gú. 40 Hoān sū tio̍h bûn-ngá iā chiàu kui-kú lâi kiâⁿ.
1 兄弟ah，我hō͘ lín知我前所傳hō͘ lín ê福音，lín所承受，所óa靠來khiā在ê； 2 lín若執守我所傳hō͘ lín福音ê道理，也m̄是空空信，就tùi chitê得救。 3 因為我所受來傳hō͘ lín ê，第一就是基督為tio̍h咱ê罪死，照聖經所記載； 4 koh有埋葬；第三日koh活，也照聖經所記載； 5 有出現hō͘磯法看見；koh出現hō͘十二個使徒看見； 6 koh一pái出現hō͘五百gōa ê兄弟同時看見，其中大半iáu tī-teh，但是有ê已經睏去。 7 Koh一pái出現hō͘雅各看見；又koh一pái出現hō͘ lóng總ê使徒看見； 8 siōng路尾也出現hō͘我看見，我是親像未夠月來生ê。 9 因為我是使徒ê至微細ê，bōe堪得稱做使徒，因為我bat khún-tio̍k上帝ê教會。 10 總是我taⁿ成做chit等號ê人，是tùi上帝ê恩chiah有；koh伊所賞賜我ê恩m̄是空空；但是我比in眾人khah tio̍h磨；其實m̄是我，是上帝ê恩kap我tī-teh ê。 11 Án-ni不論是我á是in，阮mī án-ni傳，lín mī án-ni信。 12 Taⁿ若傳基督tùi死人中koh活，怎樣lín中間有人講死人無koh活ah？ 13 死人若無koh活，就基督未bat koh活； 14 基督若未bat koh活，就阮所傳ê是空空，lín ê信也是空空。 15 死人若無koh活，就上帝未bat hō͘基督koh活；m̄-kú阮干證伊bat hō͘伊koh活，就顯明阮是做上帝白賊ê干證。 16 因為死人若無koh活，就基督未bat koh活。 17 基督若未bat koh活，就lín ê信無chhái-kang，lín iáu-kú tī lín ê罪中。 18 就hiahê tiàm-tī基督已經睏ê，也是沉淪。 19 咱若kan-ta在生有ǹg望tī基督，就tī眾人中咱是第一可憐ê。 20 總是taⁿ基督已經tùi死人中koh活，做chiahê teh睏ê頭一个koh活ê。 21 因為既然tùi一人chiah有死，也tùi一人chiah有死人ê koh活。 22 因為親像tī亞當眾人lóng死，也親像án-ni tī基督眾人beh得tio̍h koh活。 23 但是ta̍k-ê照伊ê次序；頭一个是基督，第二是hiahê屬基督ê，tī伊臨到ê時。 24 然後末期到，就是伊已經廢無lóng總ê政治，lóng總ê權柄kap才能，將國交hō͘父上帝ê時； 25 因為伊的確做王，到hē lóng總ê對敵tī伊ê腳下。 26 第一路尾受廢無ê對敵，就是死。 27 因為有講，伊hō͘萬項有降服tī伊ê腳下。已經講，萬項有降服伊，就hitê hō͘萬項有降服伊ê，無在內，是明。 28 萬項有已經降服伊，就Kiáⁿ也beh家己降服tī hō͘萬項有降服伊ê，hō͘上帝tī萬有中做萬有ê。 29 若m̄是án-ni，就為tio̍h死人受洗禮ê，beh啥事？死人若一概無koh活，為tio̍h in受洗禮甚麼緣故？ 30 Koh阮啥事時時冒險ah？ 31 兄弟ah，我tī咱ê主基督耶穌為tio̍h lín所有ê誇口，我kí伊來chiù-chōa，我日日phe死。 32 我若照人ê款，tī以弗所kap野獸相phah，我有甚麼利益？死人若無koh活，咱就做咱lim，做咱食，因為明á日beh死lah。 33 莫得受迷惑；lām-sám交陪是敗壞好德行。 34 Tio̍h醒悟來照義，莫得犯罪；因為有人m̄-bat上帝。我講án-ni，是beh hō͘ lín見笑。 35 有人beh講，死人怎樣koh活？用甚麼號ê身體來ah？ 36 戇人ah，你所掖ê，無事先死，就bōe活。 37 Koh你所掖ê m̄是hitê將來ê形體，或是麥，或是別樣ê五穀，不過是一粒子nā-tiāⁿ。 38 但是上帝照伊所定tio̍h ê，用形體hō͘伊；tī ta̍k號種子有伊家己ê形體。 39 見若肉體m̄是同一樣ê肉體；人ê一款，獸ê一款，鳥ê一款，魚ê一款。 40 有天裡ê形體，也有地裡ê形體；總是tī天裡ê ê榮光各樣tī地裡ê ê榮光。 41 日ê榮光是一款，月ê榮光koh一款，chiahê星ê榮光又koh一款；因為chit粒星kap hit粒星，榮光無相同。 42 死人koh活也是án-ni。所掖ê是會朽爛，koh活ê是bōe朽爛； 43 所掖ê是凌辱，koh活ê是榮光；所掖ê是軟chiáⁿ，koh活ê是勇健； 44 所掖ê是血氣ê形體，koh活ê是神靈ê形體；若有血氣ê形體，也有神靈ê形體。 45 所記載也是án-ni講，頭一个人，亞當，成做有血氣ê活人。 46 路尾ê亞當成做賞賜活ê神。總是神ê m̄是事先，是血氣ê事先；神ê tè後。 47 頭一个人出tī地裡，屬tī土ê類；第二ê人出tī天裡。 48 Hit-ê屬tī土類ê是怎樣，見若屬tī土類ê也是án-ni；也hitê屬tī天裡ê是怎樣，見若屬tī天裡ê也是án-ni。 49 咱既然穿屬tī土ê ê形狀，也beh穿屬tī天ê ê形狀。 50 兄弟ah，我講血氣ê肉體bōe會承接上帝ê國，會朽爛ê bōe會承接bōe朽爛ê。 51 Taⁿ我用奧妙kā lín講；咱無beh lóng睏，是beh lóng變化， 52 一時á久，目一nih，末期哨角tân ê時；因為哨角beh tân，死人就beh koh活，變做bōe朽爛ê，咱也beh變化。 53 因為chitê會朽爛ê的確tio̍h變做bōe朽爛，chitê會死ê變做bōe死。 54 但是chitê會朽爛ê已經變做bōe朽爛，也chitê會死ê已經變做bōe死，就所記載講，有廢無死來khah贏伊，chitê話hit時beh應驗。 55 死ah，你ê khah贏tī tá-lo̍h？死ah，你ê厲害tī tá-lo̍h？ 56 死ê厲害就是罪，罪ê權勢是律法。 57 總是感謝上帝，伊hō͘咱對咱ê主耶穌基督得tio̍h khah贏。 58 所以，我所疼ê兄弟ah，lín tio̍h堅固，無搖choah，常常盡力tī主ê工；因為知lín tio̍h磨tī主ê m̄是空空。
1 Hiaⁿ-tī ah, góa hō͘ lín chai góa chêng só͘ thoân hō͘ lín ê hok-im, lín só͘ sêng-siū, só͘ óa-khò lâi khiā-chāi ê; 2 lín nā chip-siú góa só͘ thoân hō͘ lín hok-im ê tō-lí, iā m̄ sī khang-khang sìn, chiū tùi chit-ê tit kiù. 3 In-ūi góa só͘ siū lâi thoân hō͘ lín ê, tē it chiū-sī Ki-tok ūi-tio̍h lán ê chōe sí, chiàu sèng-keng só͘ kì-chài; 4 koh ū bâi-chòng; tē saⁿ ji̍t koh-oa̍h, iā chiàu sèng-keng só͘ kì-chài; 5 ū chhut-hiān hō͘ Ki-hoat khòaⁿ-kìⁿ; koh chhut-hiān hō͘ cha̍p-jī ê sù-tô͘ khòaⁿ-kìⁿ; 6 koh chi̍t pái chhut-hiān hō͘ gō͘-pah gōa ê hiaⁿ-tī tâng sî khòaⁿ-kìⁿ, kî-tiong tōa pòaⁿ iáu tī-teh, nā-sī ū-ê í-keng khùn-khì. 7 Koh chi̍t pái chhut-hiān hō͘ Ngá-kok khòaⁿ-kìⁿ; iū-koh chi̍t pái chhut-hiān hō͘ lóng-chóng ê sù-tô͘ khòaⁿ-kìⁿ; 8 siōng lō͘-bé iā chhut-hiān hō͘ góa khòaⁿ-kìⁿ, góa sī chhin-chhiūⁿ bē kàu ge̍h lâi siⁿ ê. 9 In-ūi góa sī sù-tô͘ ê chì-bî-sòe ê, bōe kham-tit chheng chòe sù-tô͘, in-ūi góa bat khún-tio̍k Siōng-tè ê kàu-hōe. 10 Chóng-sī góa taⁿ chiâⁿ chòe chit téng-hō ê lâng, sī tùi Siōng-tè ê un chiah ū; koh I só͘ siúⁿ-sù góa ê un m̄ sī khang-khang; nā-sī góa pí in chèng lâng khah tio̍h-bôa; kî-si̍t m̄ sī góa, sī Siōng-tè ê un kap góa tī-teh ê. 11 Án-ni put-lūn sī góa á-sī in, goán mī án-ni thoân, lín mī án-ni sìn. 12 Taⁿ nā thoân Ki-tok tùi sí-lâng tiong koh-oa̍h, cháiⁿ-iūⁿ lín tiong-kan ū lâng kóng sí-lâng bô koh-oa̍h ah? 13 Sí-lâng nā bô koh-oa̍h, chiū Ki-tok bē bat koh-oa̍h; 14 Ki-tok nā bē bat koh-oa̍h, chiū goán só͘ thoân ê sī khang-khang, lín ê sìn iā sī khang-khang. 15 Sí-lâng nā bô koh-oa̍h, chiū Siōng-tè bē bat hō͘ Ki-tok koh-oa̍h; m̄ kú goán kan-chèng I bat hō͘ I koh-oa̍h, chiū hián-bêng goán sī chòe Siōng-tè pe̍h-chha̍t ê kan-chèng. 16 In-ūi sí-lâng nā bô koh-oa̍h, chiū Ki-tok bē bat koh-oa̍h. 17 Ki-tok nā bē bat koh-oa̍h, chiū lín ê sìn bô chhái-kang, lín iáu-kú tī lín ê chōe tiong. 18 Chiū hiah ê tiàm-tī Ki-tok í-keng khùn ê, iā sī tîm-lûn. 19 Lán nā kan-ta chāi-siⁿ ū ǹg-bāng tī Ki-tok, chiū tī chèng lâng tiong lán sī tē it khó-lîn ê. 20 Chóng-sī taⁿ Ki-tok í-keng tùi sí-lâng tiong koh-oa̍h, chòe chiah ê teh khùn ê thâu chi̍t ê koh-oa̍h ê. 21 In-ūi kì-jiân tùi chi̍t lâng chiah ū sí, iā tùi chi̍t lâng chiah ū sí-lâng ê koh-oa̍h. 22 In-ūi chhin-chhiūⁿ tī A-tong chèng lâng lóng sí, iā chhin-chhiūⁿ án-ni tī Ki-tok chèng lâng beh tit-tio̍h koh-oa̍h. 23 Nā-sī ta̍k ê chiàu i ê chhù-sū; thâu chi̍t ê sī Ki-tok, tē jī sī hiah ê sio̍k Ki-tok ê, tī I lîm-kàu ê sî. 24 Jiân-āu boa̍t-kî kàu, chiū-sī I í-keng hòe-bô lóng-chóng ê chèng-tī, lóng-chóng ê koân-pèng kap châi-lêng, chiong kok kau hō͘ Pē Siōng-tè ê sî; 25 in-ūi I tek-khak chòe ông, kàu hē lóng-chóng ê tùi-te̍k tī I ê kha-ē. 26 Tē it lō͘-bé siū hòe-bô ê tùi-te̍k, chiū-sī Sí. 27 In-ūi ū kóng, I hō͘ bān-hāng-ū hâng-ho̍k tī I ê kha-ē. Í-keng kóng, Bān-hāng-ū hâng-ho̍k I, chiū hit ê hō͘ bān-hāng-ū hâng-ho̍k I ê, bô chāi-lāi, sī bêng. 28 Bān-hāng-ū í-keng hâng-ho̍k I, chiū Kiáⁿ iā beh ka-kī hâng-ho̍k tī hō͘ bān-hāng-ū hâng-ho̍k I ê, hō͘ Siōng-tè tī bān-ū tiong chòe bān-ū ê. 29 Nā m̄ sī án-ni, chiū ūi-tio̍h sí-lâng siū sóe-lé ê, beh siáⁿ-sū? Sí-lâng nā it-khài bô koh-oa̍h, ūi-tio̍h in siū sóe-lé sím-mi̍h iân-kò͘? 30 Koh goán siáⁿ-sū sî-sî mō͘-hiám ah? 31 Hiaⁿ-tī ah, góa tī lán ê Chú Ki-tok Iâ-so͘ ūi-tio̍h lín só͘ ū ê khoa-kháu, góa kí i lâi chiù-chōa, góa ji̍t-ji̍t phe-sí. 32 Góa nā chiàu lâng ê khoán, tī Í-hut-só͘ kap iá-siù saⁿ-phah, góa ū sím-mi̍h lī-ek? Sí-lâng nā bô koh-oa̍h, lán chiū chòe lán lim, chòe lán chia̍h, in-ūi bîn-á-ji̍t beh sí lah. 33 Bo̍h-tit siū bê-he̍k; Lām-sám kau-pôe sī pāi-hoāi hó tek-hēng. 34 Tio̍h chhíⁿ-gō͘ lâi chiàu gī, bo̍h-tit hoān chōe; in-ūi ū lâng m̄ bat Siōng-tè. Góa kóng án-ni, sī beh hō͘ lín kiàn-siàu. 35 Ū lâng beh kóng, Sí-lâng cháiⁿ-iūⁿ koh-oa̍h? Ēng sím-mi̍h hō ê sin-thé lâi ah? 36 Gōng lâng ah, lí só͘ iā ê, bô tāi-seng sí, chiū bōe oa̍h. 37 Koh lí só͘ iā ê m̄ sī hit ê chiong-lâi ê hêng-thé, he̍k-sī be̍h, he̍k-sī pa̍t iūⁿ ê ngó͘-kok, put-kò sī chi̍t lia̍p chí nā-tiāⁿ. 38 Nā-sī Siōng-tè chiàu I só͘ tiāⁿ-tio̍h ê, ēng hêng-thé hō͘ i; tī ta̍k hō chéng-chí ū i ka-kī ê hêng-thé. 39 Kìⁿ-nā jio̍k-thé m̄ sī tâng chi̍t iūⁿ ê jio̍k-thé; lâng-ê chi̍t khoán, siù-ê chi̍t khoán, chiáu-ê chi̍t khoán, hî-ê chi̍t khoán. 40 Ū thiⁿ-ni̍h ê hêng-thé, iā ū tōe-ni̍h ê hêng-thé; chóng-sī tī thiⁿ-ni̍h ê ê êng-kng koh-iūⁿ tī tōe-ni̍h ê ê êng-kng. 41 Ji̍t ê êng-kng sī chi̍t khoán, ge̍h ê êng-kng koh chi̍t khoán, chiah ê chhiⁿ ê êng-kng iū-koh chi̍t khoán; in-ūi chit lia̍p chhiⁿ kap hit lia̍p chhiⁿ, êng-kng bô saⁿ-tâng. 42 Sí-lâng koh-oa̍h iā sī án-ni. Só͘ iā ê sī ōe hiú-nōa, koh-oa̍h ê sī bōe hiú-nōa; 43 só͘ iā ê sī lêng-jio̍k, koh-oa̍h ê sī êng-kng; só͘ iā ê sī nńg-chiáⁿ, koh-oa̍h ê sī ióng-kiāⁿ; 44 só͘ iā ê sī hiat-khì ê hêng-thé, koh-oa̍h ê sī sîn-lêng ê hêng-thé; nā ū hiat-khì ê hêng-thé, iā ū sîn-lêng ê hêng-thé. 45 Só͘ kì-chài iā sī án-ni kóng, Thâu chi̍t ê lâng, A-tong, chiâⁿ-chòe ū hiat-khì ê oa̍h lâng. 46 Lō͘-bé ê A-tong chiâⁿ-chòe siúⁿ-sù oa̍h ê sîn. Chóng-sī sîn ê m̄ sī tāi-seng, sī hiat-khì ê tāi-seng; sîn ê tè-āu. 47 Thâu chi̍t ê lâng chhut tī tōe-ni̍h, sio̍k tī thô͘ ê lūi; tē jī ê lâng chhut tī thiⁿ-ni̍h. 48 Hit ê sio̍k tī thô͘-lūi ê sī cháiⁿ-iūⁿ, kìⁿ-nā sio̍k tī thô͘-lūi ê iā sī án-ni; iā hit ê sio̍k tī thiⁿ-ni̍h ê sī cháiⁿ-iūⁿ, kìⁿ-nā sio̍k tī thiⁿ-ni̍h ê iā sī án-ni. 49 Lán kì-jiân chhēng sio̍k tī thô͘ ê ê hêng-chōng, iā beh chhēng sio̍k tī thiⁿ ê ê hêng-chōng. 50 Hiaⁿ-tī ah, góa kóng hiat-khì ê jio̍k-thé bōe-ōe sêng-chiap Siōng-tè ê kok, ōe hiú-nōa ê bōe-ōe sêng-chiap bōe hiú-nōa ê. 51 Taⁿ góa ēng ò-biāu kā lín kóng; lán bô beh lóng khùn, sī beh lóng piàn-hòa, 52 chi̍t sî-á kú, ba̍k chi̍t nih, boa̍t-kî sàu-kak tân ê sî; in-ūi sàu-kak beh tân, sí-lâng chiū beh koh-oa̍h, piàn-chòe bōe hiú-nōa ê, lán iā beh piàn-hòa. 53 In-ūi chit ê ōe hiú-nōa ê tek-khak tio̍h piàn-chòe bōe hiú-nōa, chit ê ōe sí ê piàn-chòe bōe sí. 54 Nā-sī chit ê ōe hiú-nōa ê í-keng piàn-chòe bōe hiú-nōa, iā chit ê ōe sí ê í-keng piàn-chòe bōe sí, chiū só͘ kì-chài kóng, Ū hòe-bô sí lâi khah-iâⁿ i, chit ê ōe hit sî beh èng-giām. 55 Sí ah, lí ê khah-iâⁿ tī tá-lo̍h? Sí ah, lí ê lī-hāi tī tá-lo̍h? 56 Sí ê lī-hāi chiū-sī chōe, chōe ê koân-sè sī lu̍t-hoat. 57 Chóng-sī kám-siā Siōng-tè, I hō͘ lán tùi lán ê Chú Iâ-so͘ Ki-tok tit-tio̍h khah-iâⁿ. 58 Só͘-í, góa só͘ thiàⁿ ê hiaⁿ-tī ah, lín tio̍h kian-kò͘, bô iô-choah, siông-siông chīn-la̍t tī Chú ê kang; in-ūi chai lín tio̍h-bôa tī Chú ê m̄ sī khang-khang.
1 論到tôe銀幫贊聖徒ê事，照我所bat吩咐加拉太chiahê教會ê，lín也tio̍h án-ni行。 2 每七日ê頭一日，lín ta̍k人照所得ê利，家己積下teh，免得我來ê時chiah捐tôe。 3 我若到，看lín用phoe舉薦甚麼人，我beh差in帶lín所送ê銀到耶路撒冷。 4 若應該tio̍h我去，in也thang kap我去。 5 我經過馬其頓了後，就beh到lín hia。 6 因為我tùi馬其頓經過；kiám-chhái beh kap lín且tòa，過冬天，也敢hō͘ lín送我tī所beh去ê。 7 是我m̄ ài chit-tia̍p tī路裡見tio̍h lín；因為主若准，我ǹg望kap lín tòa-teh khah久。 8 總是我iáu beh tòa tī以弗所，到五旬節。 9 因為主有kā我開一个闊大koh有功效ê門；但是對敵也chōe。 10 提摩太若到，lín tio̍h留心hō͘伊tī lín中間無驚惶；因為伊tio̍h磨tī主ê工，親像我一樣。 11 所以m̄-thang有人看輕伊；tio̍h送伊安然起身就近我，因為我teh thèng候伊kap chiahê兄弟來。 12 論到兄弟亞波羅，我再三勸伊kap chiahê兄弟就近lín。總是伊現今lóng無意思beh去；若有機會，伊就beh去。 13 Lín tio̍h警醒，khiā在tì信，做大丈夫，做勇健。 14 Lín凡事tio̍h tī仁愛來行。 15 兄弟ah，lín知Sū-thê-hoán-à ê家，是A-kai-a頭水ê果子，in掠服事聖徒做家己ê職份， 16 我勸lín降服chit等號ê人，以及見若同做工來tio̍h磨ê。 17 我歡喜Sū-thê-hoán-à、Hok-tô͘-lah、A-kai-kó͘來，因為in補lín ê無夠。 18 是in有安慰我kap lín ê心神。親像chit號ê人，lín tio̍h知thang敬重伊。 19 亞西亞chiahê教會請安lín。亞居拉、百基拉kap聚集tī in厝內ê教會，tiàm-tī主切切請安lín。 20 眾兄弟請安lín。Lín tio̍h用聖ê相chim來相請安。 21 我保羅親筆請安lín。 22 若有無疼主ê人，伊tio̍h受咒詛。咱ê主來ah。 23 願主耶穌基督ê恩kap lín tī-teh。 24 我ê疼tī基督耶穌kap lín眾人tī-teh。À-bēng。
1 Lūn-kàu tôe gûn pang-chān sèng-tô͘ ê sū, chiàu góa só͘ bat hoan-hù Ka-lia̍p-thài chiah ê kàu-hōe ê, lín iā tio̍h án-ni kiâⁿ. 2 Múi chhit-ji̍t ê thâu chi̍t ji̍t, lín ta̍k lâng chiàu só͘ tek ê lī, ka-kī chek-hē teh, bián-tit góa lâi ê sî chiah koan-tôe. 3 Góa nā kàu, khòaⁿ lín ēng phoe kú-chiàn sím-mi̍h lâng, góa beh chhe in tòa lín só͘ sàng ê gûn kàu Iâ-lō͘-sat-léng. 4 Nā eng-kai tio̍h góa khì, in iā thang kap góa khì. 5 Góa keng-kè Má-kî-tùn liáu-āu, chiū beh kàu lín hia. 6 In-ūi góa tùi Má-kî-tùn keng-kè; kiám-chhái beh kap lín chhiáⁿ tòa, kè tang-thiⁿ iā káⁿ, hō͘ lín sàng góa tī só͘ beh khì ê. 7 Sī góa m̄ ài chit tia̍p tī lō͘-ni̍h kìⁿ-tio̍h lín; in-ūi Chú nā chún, góa ǹg-bāng kap lín tòa-teh khah kú. 8 Chóng-sī góa iáu beh tòa tī Í-hut-só͘, kàu gō͘-sûn-choeh. 9 In-ūi Chú ū kā góa khui chi̍t ê khoah-tōa koh ū kong-hāu ê mn̂g; nā-sī tùi-te̍k iā chōe. 10 Thê-mô͘-thài nā kàu, lín tio̍h liû-sim hō͘ i tī lín tiong-kan bô kiaⁿ-hiâⁿ; in-ūi i tio̍h-bôa tī Chú ê kang, chhin-chhiūⁿ góa chi̍t iūⁿ. 11 Só͘-í m̄ thang ū lâng khòaⁿ-khin i; tio̍h sàng i an-jiân khí-sin chiū-kūn góa, in-ūi góa teh thèng-hāu i kap chiah ê hiaⁿ-tī lâi. 12 Lūn-kàu hiaⁿ-tī A-pho-lô, góa chài-saⁿ khǹg i kap chiah ê hiaⁿ-tī chiū-kūn lín. Chóng-sī i hiān-kim lóng bô ì-sù beh khì; nā ū ki-hōe, i chiū beh khì. 13 Lín tio̍h kéng-séng, khiā-chāi tì sìn, chòe tāi tiōng-hu, chòe ióng-kiāⁿ. 14 Lín hoān sū tio̍h tī jîn-ài lâi kiâⁿ. 15 Hiaⁿ-tī ah, lín chai Sū-thê-hoán-à ê ke, sī A-kai-a thâu-chúi ê ké-chí, in lia̍h ho̍k-sāi sèng-tô͘ chòe ka-kī ê chit-hūn, 16 góa khǹg lín hâng-ho̍k chit-téng-hō ê lâng, í-ki̍p kìⁿ-nā tâng chòe kang lâi tio̍h-bôa ê. 17 Góa hoaⁿ-hí Sū-thê-hoán-à, Hok-tô͘-lah, A-kai-kó͘ lâi, in-ūi in pó͘ lín ê bô kàu. 18 Sī in ū an-ùi góa kap lín ê sim-sîn. Chhin-chhiūⁿ chit hō ê lâng, lín tio̍h chai thang kèng-tiōng i. 19 A-se-a chiah ê kàu-hōe chhéng-an lín. A-ku-lah, Pek-ki-lah kap chū-chi̍p tī in chhù-lāi ê kàu-hōe, tiàm-tī Chú chhiat-chhiat chhéng-an lín. 20 Chèng hiaⁿ-tī chhéng-an lín. Lín tio̍h ēng sèng ê saⁿ-chim lâi saⁿ chhéng-an. 21 Góa Pó-lô chhin-pit chhéng-an lín. 22 Nā ū bô thiàⁿ Chú ê lâng, i tio̍h siū chiù-chó͘. Lán ê Chú lâi ah. 23 Goān Chú Iâ-so͘ Ki-tok ê un kap lín tī-teh. 24 Góa ê thiàⁿ tī Ki-tok Iâ-so͘ kap lín chèng lâng tī-teh. À-bēng.