1 Tùi上帝ê旨意做基督耶穌ê使徒保羅，kap兄弟提摩太，phoe寄hō͘上帝ê教會tī哥林多ê，以及遍A-kai-a lóng總ê聖徒； 2 願lín對咱ê父上帝kap主耶穌基督得tio̍h恩典平安。 3 願咱ê主耶穌基督ê上帝，也是伊ê父，就是憐憫ê父，賞賜ta̍k樣安慰ê上帝，得tio̍h o-ló。 4 阮tī ta̍k樣患難中，伊安慰阮，beh hō͘阮tùi上帝所安慰阮ê安慰，來安慰ta̍k樣患難中ê人。 5 因為親像基督ê艱苦滿出來到tī阮，阮ê安慰也tùi基督滿滿。 6 阮或是受患難，是beh做lín受安慰kap得救ê路用；或是受安慰，是beh做lín受安慰ê路用，chitê安慰hō͘ lín 能吞忍艱苦，照阮所tú-tio̍h ê一樣。 7 Koh阮所替lín ǹg望ê是堅固，因為知lín既然有份tī chiahê艱苦，就有份tī安慰，也是án-ni。 8 兄弟ah，論到阮tī亞西亞所tú-tio̍h ê患難，阮m̄ ài lín m̄知；是受teh重真thiám到當bōe起，連活也無ǹg望； 9 阮家己心內也按算會死；beh hō͘阮無óa靠家己，獨獨óa靠hō͘死人koh活ê上帝； 10 伊已經救阮脫離hiah大ê死無，koh beh救阮；阮也ǹg望伊iáu beh救阮； 11 lín也用祈禱來幫贊阮，beh hō͘ chōe-chōe人因為阮來感謝，就是為tio̍h阮tùi chōe-chōe人祈禱所得tio̍h ê恩。 12 因為阮所誇口ê，阮ê良心也做阮ê干證，就是阮照上帝ê聖潔kap誠實，m̄是用肉體ê智慧，是用上帝ê恩，往來tī世間，tùi lín koh-khah是án-ni。 13 因為阮所寫hō͘ lín ê無別項，獨獨lín所讀所認ê，我也ǹg望lín到尾beh認伊； 14 親像lín中間有人認阮，tī咱ê主耶穌ê日，掠阮做lín ê誇口，親像阮也掠lín做阮ê誇口。 15 我因為信án-ni，本議定beh事先就近lín，hō͘ lín重再得tio̍h利益； 16 也ài tùi lín hia經過去馬其頓，koh tùi馬其頓去lín hia，hō͘ lín送我去偤太。 17 我已經議定án-ni，kiám有用浮漂mah？á是我所議定ê是照肉體來議定，致到我有hitê是，是，亦有hitê m̄是，m̄是mah？ 18 上帝是信實，án-ni阮所tùi lín講ê話也無有是kap m̄是。 19 因為tùi阮chiahê，就是tùi我kap 西拉提摩太，tī lín中間所傳上帝ê Kiáⁿ耶穌基督無有是kap m̄是，在tī伊只有是nā-tiāⁿ。 20 因為上帝所應允ê，無論jōa-chōe，在tī伊lóng有是；所以À-bēng也是tùi伊，hō͘上帝對咱得tio̍h榮光。 21 Taⁿ堅固阮kap lín tī基督，koh用油抹咱ê，是上帝； 22 伊也kā咱蓋印，koh賞賜神tī咱ê心做定。 23 我kí我ê活命求上帝做干證，我無koh到哥林多是因為寬容lín。 24 m̄是阮管轄lín ê信，是幫贊lín ê歡喜；因為lín tùi信來khiā在。
1 Tùi Siōng-tè ê chí-ì chòe Ki-tok Iâ-so͘ ê sù-tô͘ Pó-lô, kap hiaⁿ-tī Thê-mô͘-thài, phoe kià hō͘ Siōng-tè ê kàu-hōe tī Ko-lîm-to ê, í-ki̍p piàn A-kai-a lóng-chóng ê sèng-tô͘; 2 goān lín tùi lán ê Pē Siōng-tè kap Chú Iâ-so͘ Ki-tok tit-tio̍h un-tián pêng-an. 3 Goān lán ê Chú Iâ-so͘ Ki-tok ê Siōng-tè, iā sī I ê Pē, chiū-sī lîn-bín ê Pē, siúⁿ-sù ta̍k iūⁿ an-ùi ê Siōng-tè, tit-tio̍h o-ló. 4 Goán tī ta̍k iūⁿ hoān-lān tiong, I an-ùi goán, beh hō͘ goán tùi Siōng-tè só͘ an-ùi goán ê an-ùi, lâi an-ùi ta̍k iūⁿ hoān-lān tiong ê lâng. 5 In-ūi chhin-chhiūⁿ Ki-tok ê kan-khó͘ móa-chhut-lâi kàu tī goán, goán ê an-ùi iā tùi Ki-tok móa-móa. 6 Goán he̍k-sī siū hoān-lān, sī beh chòe lín siū an-ùi kap tit kiù ê lō͘-ēng; he̍k-sī siū an-ùi, sī beh chòe lín siū an-ùi ê lō͘-ēng, chit ê an-ùi hō͘ lín ōe thun-lún kan-khó͘, chiàu goán só͘ tú-tio̍h ê chi̍t iūⁿ. 7 Koh goán só͘ thòe lín ǹg-bāng ê sī kian-kò͘, in-ūi chai lín kì-jiân ū hūn tī chiah ê kan-khó͘, chiū ū hūn tī an-ùi, iā sī án-ni. 8 Hiaⁿ-tī ah, lūn-kàu goán tī A-se-a só͘ tú-tio̍h ê hoān-lān, goán m̄ ài lín m̄ chai; sī siū teh-tāng chin thiám kàu tng bōe khí, liân oa̍h iā bô ǹg-bāng; 9 goán ka-kī sim-lāi iā àn-sǹg ōe sí; beh hō͘ goán bô óa-khò ka-kī, to̍k-to̍k óa-khò hō͘ sí-lâng koh-oa̍h ê Siōng-tè; 10 I í-keng kiù goán thoat-lī hiah tōa ê sí-bô, koh beh kiù goán; goán iā ǹg-bāng I iáu beh kiù goán; 11 lín iā ēng kî-tó lâi pang-chān goán, beh hō͘ chōe-chōe lâng in-ūi goán lâi kám-siā, chiū-sī ūi-tio̍h goán tùi chōe-chōe lâng kî-tó só͘ tit-tio̍h ê un. 12 In-ūi goán só͘ khoa-kháu ê, goán ê liông-sim iā chòe goán ê kan-chèng, chiū-sī goán chiàu Siōng-tè ê sèng-kiat kap sêng-si̍t, m̄ sī ēng jio̍k-thé ê tì-hūi, sī ēng Siōng-tè ê un, óng-lâi tī sè-kan, tùi lín koh khah sī án-ni. 13 In-ūi goán só͘ siá hō͘ lín ê bô pa̍t hāng, to̍k-to̍k lín só͘ tha̍k só͘ jīn ê, góa iā ǹg-bāng lín kàu bé beh jīn i; 14 chhin-chhiūⁿ lín tiong-kan ū lâng jīn goán, tī lán ê Chú Iâ-so͘ ê ji̍t, lia̍h goán chòe lín ê khoa-kháu, chhin-chhiūⁿ goán iā lia̍h lín chòe goán ê khoa-kháu. 15 Góa in-ūi sìn án-ni, pún gī-tiāⁿ beh tāi-seng chiū-kūn lín, hō͘ lín têng-chài tit-tio̍h lī-ek; 16 iā ài tùi lín hia keng-kè khì Má-kî-tùn, koh tùi Má-kî-tùn khì lín hia, hō͘ lín sàng góa khì Iû-thài. 17 Góa í-keng gī-tiāⁿ án-ni, kiám ū ēng phû-phiò mah? á-sī góa só͘ gī-tiāⁿ ê sī chiàu jio̍k-thé lâi gī-tiāⁿ, tì-kàu góa ū hit ê Sī, sī, ia̍h ū hit ê M̄ sī, m̄ sī mah? 18 Siōng-tè sī sìn-si̍t, án-ni goán só͘ tùi lín kóng ê ōe iā bô ū Sī kap M̄ sī. 19 In-ūi tùi goán chiah-ê, chiū-sī tùi góa kap Se-lah Thê-mô͘-thài, tī lín tiong-kan só͘ thoân Siōng-tè ê Kiáⁿ Iâ-so͘ Ki-tok bô ū Sī kap M̄ sī, chāi-tī I chí ū Sī nā-tiāⁿ. 20 In-ūi Siōng-tè só͘ èng-ún ê, bô lūn jōa chōe, chāi-tī I lóng ū Sī; só͘-í À-bēng iā sī tùi I, hō͘ Siōng-tè tùi lán tit-tio̍h êng-kng. 21 Taⁿ kian-kò͘ goán kap lín tī Ki-tok, koh ēng iû boah lán ê, sī Siōng-tè; 22 I iā kā lán khàm-ìn, koh siúⁿ-sù Sîn tī lán ê sim chòe tiāⁿ. 23 Góa kí góa ê oa̍h-miā kiû Siōng-tè chòe kan-chèng, góa bô koh kàu Ko-lîm-to sī in-ūi khoan-iông lín. 24 M̄ sī goán koán-hat lín ê sìn, sī pang-chān lín ê hoaⁿ-hí; in-ūi lín tùi sìn lâi khiā-chāi.
1 我bat家己決斷無koh用憂悶就近lín。 2 因為我若hō͘ lín憂悶，就我所hō͘伊憂悶ê以外，是誰 hō͘我歡喜ah？ 3 前我寫hitê hō͘ lín，免得我來ê時，所應該hō͘我歡喜ê反tńg hō͘我憂悶；因為我深信lín眾人lóng掠我ê歡喜做lín眾人ê。 4 前我心內苦痛迫切，流chōe-chōe目屎寫phoe hō͘ lín，m̄是beh hō͘ lín憂悶，是beh hō͘ lín知我ê疼lín是真大。 5 若有hō͘人憂悶ê，伊m̄是hō͘我憂悶nā-tiāⁿ，也大略是hō͘ lín眾人憂悶，免得我責備siuⁿ重。 6 親像chit號人tùi hiah-chōe人所受ê責罰已經夠額。 7 所以反tńg m̄達tio̍h赦免伊，安慰伊；驚了hit號人憂悶過頭致到絕望。 8 所以我勸lín，用實實ê憑據對伊顯明lín ê仁愛。 9 因為án-ni我也bat寫phoe來試驗lín，看lín凡事順thàn á無。 10 Lín赦免人甚麼，我也赦免伊；因為我所有赦免ê，若有赦免甚麼，是為tio̍h lín tī基督ê面前來赦免ê； 11 免得咱hō͘撒旦khah偏頭去；因為咱m̄是m̄知伊ê計謀。 12 前我為tio̍h基督ê福音到Te̍k-lô-a，主也kā我開門； 13 但是無tú-tio̍h我ê兄弟提多，所以我ê心神無平安；就離別in去馬其頓。 14 Taⁿ感謝上帝，常常tī基督得勝，來做頭chhōa阮，也用阮tī ta̍k所在顯明hitê tùi bat基督chiah有ê氣味。 15 因為tùi tī上帝，阮tī得救ê人ê中間，以及沉淪ê人ê中間，做基督ê芳味。 16 對chiahê人是做tùi死致到死ê味；對hiahê是做活致到活ê味。Chiahê事是誰能堪得當？ 17 因為阮無親像chōe-chōe人混雜上帝ê道理；就是用誠實對上帝，tī上帝ê面前tiàm-tī基督來講。
1 Góa bat ka-kī koat-toàn bô koh ēng iu-būn chiū-kūn lín. 2 In-ūi góa nā hō͘ lín iu-būn, chiū góa só͘ hō͘ i iu-būn ê í-gōa, chī-chūi hō͘ góa hoaⁿ-hí ah? 3 Chêng góa siá hit-ê hō͘ lín, bián-tit góa lâi ê sî, só͘ eng-kai hō͘ góa hoaⁿ-hí ê hoán-tńg hō͘ góa iu-būn; in-ūi góa chhim sìn lín chèng lâng lóng lia̍h góa ê hoaⁿ-hí chòe lín chèng lâng ê. 4 Chêng góa sim-lāi khó͘-thàng pek-chhiat, lâu chōe-chōe ba̍k-sái siá phoe hō͘ lín, m̄ sī beh hō͘ lín iu-būn, sī beh hō͘ lín chai góa ê thiàⁿ lín sī chin tōa. 5 Nā ū hō͘ lâng iu-būn ê, i m̄ sī hō͘ góa iu-būn nā-tiāⁿ, iā tāi-lio̍k sī hō͘ lín chèng lâng iu-būn, bián-tit góa chek-pī siuⁿ tāng. 6 Chhin-chhiūⁿ chit hō lâng tùi hiah chōe lâng só͘ siū ê chek-hoa̍t í-keng kàu-gia̍h. 7 Só͘-í hoán-tńg m̄ ta̍t-tio̍h sià-bián i, an-ùi i; kiaⁿ-liáu hit hō lâng iu-būn kè-thâu tì-kàu choa̍t-bāng. 8 Só͘-í góa khǹg lín, ēng si̍t-si̍t ê pîn-kù tùi i hián-bêng lín ê jîn-ài. 9 In-ūi án-ni góa iā bat siá phoe lâi chhì-giām lín, khòaⁿ lín hoān sū sūn-thàn á bô. 10 Lín sià-bián lâng sím-mi̍h, góa iā sià-bián i; in-ūi góa só͘ ū sià-bián ê, nā ū sià-bián sím-mi̍h, sī ūi-tio̍h lín tī Ki-tok ê bīn-chêng lâi sià-bián ê; 11 bián-tit lán hō͘ Sat-tàn khah phiⁿ-thâu khì; in-ūi lán m̄ sī m̄ chai i ê kè-bô͘. 12 Chêng góa ūi-tio̍h Ki-tok ê hok-im kàu Te̍k-lô-a, Chú iā kā góa khui mn̂g; 13 nā-sī bô tú-tio̍h góa ê hiaⁿ-tī Thê-to, só͘-í góa ê sim-sîn bô pêng-an; chiū lī-pia̍t in khì Má-kî-tùn. 14 Taⁿ kám-siā Siōng-tè, siông-siông tī Ki-tok tek-sèng, lâi chòe-thâu chhōa goán, iā ēng goán tī ta̍k só͘-chāi hián-bêng hit ê tùi bat Ki-tok chiah ū ê khì-bī. 15 In-ūi tùi tī Siōng-tè goán tī tit kiù ê lâng ê tiong-kan í-ki̍p tîm-lûn ê lâng ê tiong-kan, chòe Ki-tok ê phang-bī. 16 Tùi chiah ê lâng sī chòe tùi sí tì-kàu sí ê bī; tùi hiah-ê sī chòe oa̍h tì-kàu oa̍h ê bī. Chiah ê sū chī-chūi ōe kham-tit tng? 17 In-ūi goán bô chhin-chhiūⁿ chōe-chōe lâng hūn-cha̍p Siōng-tè ê tō-lí; chiū-sī ēng sêng-si̍t tùi Siōng-tè, tī Siōng-tè ê bīn-chêng tiàm-tī Ki-tok lâi kóng.
1 阮kiám是chit-tia̍p chiah koh家己舉薦mah？á是阮親像別人欠用人ê薦phoe hō͘ lín，á是欠用lín ê 薦phoe hō͘別人ah？ 2 Lín就是阮ê phoe寫tī阮ê心，hō͘眾人所知所讀ê。 3 Lín明明是基督ê phoe，tùi阮ê工來成ê，m̄是用墨寫ê，就是用真活上帝ê神；m̄是tī石碑，就是tī肉體ê心碑。 4 阮óa靠基督ǹg上帝有chit號ê信； 5 m̄是講阮家己能堪得tùi家己來想出甚麼，阮所以能堪得是對上帝； 6 伊也hō͘阮能堪得擔當新約ê差用，m̄是文字ê，是神靈ê；因為文字致到死，神靈致到活。 7 Taⁿ致到死ê職份，用字刻tī石裡ê，尚且有榮光，致到以色列人bōe會注目看摩西ê面，是為tio̍h伊ê面ê榮光，這榮光是漸漸衰退ê， 8 何況神靈ê職份kiám無koh-khah有榮光mah？ 9 因為定罪ê職份既然榮光，就致到義ê職份，伊ê榮光koh-khah充滿。 10 因為前所受榮光ê，為tio̍h chitê khah大ê榮光，就無榮光。 11 因為衰退ê若有榮光，就hitê久長tī-teh ê koh-khah有榮光。 12 阮既然有chit號ê ǹg望，所以真好膽來講， 13 無親像摩西用帕罩伊ê面，hō͘以色列人bōe得thang注目看到hitê teh衰退ê ê結局。 14 但是in ê心變做硬；到tī今á日，in讀舊約ê時，hitê 帕猶原tī-teh，無掀開；chitê帕tùi基督就廢棄。 15 但是到今á日，不論甚麼時in讀摩西ê冊，帕iáu-kú 罩tī in ê心。 16 獨獨不論甚麼時in歸ǹg主，帕就除去。 17 Taⁿ主就是hitê神；主ê神tī hit位，hit位就自由。 18 咱眾人ê面無罩帕，親像鏡倒照主ê榮光，lóng變化做伊ê像，tùi榮光到榮光，親像tùi主，就是神，án-ni。
1 Goán kiám sī chit tia̍p chiah koh ka-kī kú-chiàn mah? Á-sī goán chhin-chhiūⁿ pa̍t lâng khiàm-ēng lâng ê chiàn phoe hō͘ lín, á-sī khiàm-ēng lín ê chiàn phoe hō͘ pa̍t lâng ah? 2 Lín chiū-sī goán ê phoe siá tī goán ê sim, hō͘ chèng lâng só͘ chai só͘ tha̍k ê. 3 Lín bêng-bêng sī Ki-tok ê phoe, tùi goán ê kang lâi chiâⁿ ê, m̄ sī ēng ba̍k siá ê, chiū-sī ēng chin-oa̍h Siōng-tè ê Sîn; m̄ sī tī chio̍h-pi, chiū sī tī jio̍k-thé ê sim-pi. 4 Goán óa-khò Ki-tok ǹg Siōng-tè ū chit hō ê sìn; 5 m̄ sī kóng goán ka-kī ōe kham-tit tùi ka-kī lâi siūⁿ-chhut sím-mi̍h, goán só͘-í ōe kham-tit sī tùi Siōng-tè; 6 I iā hō͘ goán ōe kham-tit tam-tng sin iok ê chhe-ēng, m̄ sī bûn-jī ê, sī sîn-lêng ê; in-ūi bûn-jī tì-kàu sí, sîn-lêng tì-kàu oa̍h. 7 Taⁿ tì-kàu sí ê chit-hūn, ēng jī khek tī chio̍h-ni̍h ê, siōng-chhiáⁿ ū êng-kng, tì-kàu Í-sek-lia̍t lâng bōe-ōe chù-ba̍k khòaⁿ Mô͘-se ê bīn, sī ūi-tio̍h i ê bīn ê êng-kng, che êng-kng sī chiām-chiām soe-thè ê, 8 hô-hòng sîn-lêng ê chit-hūn kiám bô koh khah ū êng-kng mah? 9 In-ūi tēng-chōe ê chit-hūn kì-jiân êng-kng, chiū tì-kàu gī ê chit-hūn i ê êng-kng koh khah chhiong-móa. 10 In-ūi chêng só͘ siū êng-kng ê, ūi-tio̍h chit ê khah tōa ê êng-kng, chiū bô êng-kng. 11 In-ūi soe-thè ê nā ū êng-kng, chiū hit ê kú-tn̂g tī-teh ê koh khah ū êng-kng. 12 Goán kì-jiân ū chit hō ê ǹg-bāng, só͘-í chin hó-táⁿ lâi kóng, 13 bô chhin-chhiūⁿ Mô͘-se ēng phè tà i ê bīn, hō͘ Í-sek-lia̍t lâng bōe tit thang chù-ba̍k khòaⁿ kàu hit ê teh soe-thè ê ê kiat-kio̍k. 14 Nā-sī in ê sim pìⁿ chòe ngī; kàu tī kin-á-ji̍t, in tha̍k kū iok ê sî, hit ê phè iû-goân tī-teh, bô hian-khui; chit ê phè tùi Ki-tok chiū hòe-khì. 15 Nā-sī kàu kin-á-ji̍t, put-lūn sím-mi̍h sî in tha̍k Mô͘-se ê chheh, phè iáu-kú tà tī in ê sim. 16 To̍k-to̍k put-lūn sím-mi̍h sî in kui ǹg Chú, phè chiū tû-khì. 17 Taⁿ Chú chiū-sī hit ê Sîn; Chú ê Sîn tī hit ūi, hit ūi chiū chū-iû. 18 Lán chèng lâng ê bīn bô tà phè, chhin-chhiūⁿ kiàⁿ tò-chiò Chú ê êng-kng, lóng piàn-hòa chòe I ê siōng, tùi êng-kng kàu êng-kng, chhin-chhiūⁿ tùi Chú, chiū-sī Sîn, án-ni.
1 所以阮既然有chitê職份，照所得tio̍h ê憐憫，就無餒志。 2 是有棄sak見笑ê暗事，無行tī詭譎，無混雜上帝ê道理，就是顯明真理，tī上帝ê面前，將家己證明tī ta̍k人ê良心。 3 若阮ê福音有所遮蓋，就是遮蓋tī沉淪ê人。 4 Tī in中間，chit世界ê上帝hō͘ m̄信ê人ê心chhiⁿ-mî，免得基督榮顯ê福音ê光照in；基督就是上帝ê像。 5 因為阮無傳家己，是傳基督耶穌做主，也本身為tio̍h耶穌做lín ê奴僕。 6 因為上帝bat講，光tio̍h tùi暗裡出來ê，伊也有照tī阮ê心，hō͘阮tùi bat上帝ê榮顯，就是tùi耶穌基督顯明ê，來得tio̍h光。 7 但是阮有chit號寶貝khǹg-tī土ê器具，是beh hō͘極大ê權能做上帝ê，m̄是出tī阮。 8 阮凡事受患難，但是無困迫；為難，也無失望； 9 tú-tio̍h khún-tio̍k，也無受放sak；受phah倒，也無死無； 10 身軀常常帶耶穌ê死，hō͘耶穌ê活也會顯明tī阮ê身軀。 11 因為阮chiahê活ê，ta̍uh-ta̍uh為tio̍h耶穌來交付tī死，hō͘耶穌ê活也會顯明tī阮會死ê肉體。 12 Án-ni就死ê力teh行tī阮，活ê力teh行tī lín。 13 總是阮已經有chitê信ê神，tú-tú照所記載講，我有信，所以有講；阮也信，所以也講。 14 家己知hō͘主耶穌koh活ê也beh hō͘阮kap耶穌koh活，koh beh引進阮kap lín saⁿ-kap khiā tī伊ê面前。 15 因為萬項事lóng是為tio̍h lín；beh hō͘恩典對人ná chōe來ná加添，就hō͘感謝益發充滿，致到上帝得tio̍h榮光。 16 所以阮無餒志；阮ê外體雖然敗壞，但是阮ê內心日日換新。 17 因為阮目nih久，輕輕ê艱苦是kā阮成上等上永遠ê大榮光； 18 因為阮m̄是看tī所能看見ê，是看tī所bōe看見ê；因為所能看見ê是暫時，所bōe看見ê是永遠。
1 Só͘-í goán kì-jiân ū chit ê chit-hūn, chiàu só͘ tit-tio̍h ê lîn-bín, chiū bô lóe-chì. 2 Sī ū khì-sak kiàn-siàu ê àm-sū, bô kiâⁿ tī khúi-khiat, bô hūn-cha̍p Siōng-tè ê tō-lí, chiū-sī hián-bêng chin-lí, tī Siōng-tè ê bīn-chêng, chiong ka-kī chèng-bêng tī ta̍k lâng ê liông-sim. 3 Nā goán ê hok-im ū só͘ jia-khàm, chiū-sī jia-khàm tī tîm-lûn ê lâng. 4 Tī in tiong-kan chit sè-kài ê siōng-tè hō͘ m̄ sìn ê lâng ê sim chhiⁿ-mî, bián-tit Ki-tok êng-hián ê hok-im ê kng chiò in; Ki-tok chiū-sī Siōng-tè ê siōng. 5 In-ūi goán bô thoân ka-kī, sī thoân Ki-tok Iâ-so͘ chòe Chú, iā pún-sin ūi-tio̍h Iâ-so͘ chòe lín ê lô͘-po̍k. 6 In-ūi Siōng-tè bat kóng, Kng tio̍h tùi àm-ni̍h chhut-lâi ê, I iā ū chiò tī goán ê sim, hō͘ goán tùi bat Siōng-tè ê êng-hián, chiū-sī tùi Iâ-so͘ Ki-tok hián-bêng ê, lâi tit-tio̍h kng. 7 Nā-sī goán ū chit hō pó-pòe khǹg tī thô͘ ê khì-kū, sī beh hō͘ ke̍k tōa ê koân-lêng chòe Siōng-tè ê, m̄ sī chhut tī goán. 8 Goán hoān sū siū hoān-lān, nā-sī bô khùn-pek; ûi-lân, iā bô sit-bāng; 9 tú-tio̍h khún-tio̍k, iā bô siū pàng-sak; siū phah-tó, iā bô sí-bô; 10 seng-khu siông-siông tòa Iâ-so͘ ê sí, hō͘ Iâ-so͘ ê oa̍h iā ōe hián-bêng tī goán ê seng-khu. 11 In-ūi goán chiah ê oa̍h ê ta̍uh-ta̍uh ūi-tio̍h Iâ-so͘ lâi kau-hù tī sí, hō͘ Iâ-so͘ ê oa̍h iā ōe hián-bêng tī goán ōe sí ê jio̍k-thé. 12 Án-ni chiū sí ê la̍t teh kiâⁿ tī goán, oa̍h ê la̍t teh kiâⁿ tī lín. 13 Chóng-sī goán í-keng ū chit ê sìn ê sîn, tú-tú chiàu só͘ kì-chài kóng, Góa ū sìn, só͘-í ū kóng; goán iā sìn, só͘-í iā kóng. 14 Ka-kī chai hō͘ Chú Iâ-so͘ koh-oa̍h ê iā beh hō͘ goán kap Iâ-so͘ koh-oa̍h, koh beh ín-chìn goán kap lín saⁿ-kap khiā tī I ê bīn-chêng. 15 In-ūi bān hāng sū lóng sī ūi-tio̍h lín; beh hō͘ un-tián tùi lâng ná chōe lâi ná ke-thiⁿ, chiū hō͘ kám-siā it-hoat chhiong-móa, tì-kàu Siōng-tè tit-tio̍h êng-kng. 16 Só͘-í goán bô lóe-chì; goán ê gōa-thé sui-jiân pāi-hoāi, nā-sī goán ê lāi-sim ji̍t-ji̍t ōaⁿ sin. 17 In-ūi goán ba̍k-nih-kú khin-khin ê kan-khó͘ sī kā goán chiâⁿ siōng-téng-siōng éng-oán ê tōa êng-kng; 18 in-ūi goán m̄ sī khòaⁿ tī só͘ ōe khòaⁿ-kìⁿ ê, sī khòaⁿ tī só͘ bōe khòaⁿ-kìⁿ ê; in-ūi só͘ ōe khòaⁿ-kìⁿ ê sī chiām-sî, só͘ bōe khòaⁿ-kìⁿ ê sī éng-oán.
1 因為阮知阮tī地裡布棚ê厝若毀壞，就有tùi上帝所起造，m̄是人ê手所造ê厝，是永遠tī天裡ê。 2 因為阮tiàm-tī chitê布棚teh吐氣，不止欣慕阮tùi天裡ê厝，親像衫穿tha̍h落去。 3 若得tio̍h穿，就免thǹg-pak-theh。 4 因為阮tiàm-tī chitê布棚ê teh拖磨吐氣，m̄是ài thǹg起來，是ài穿tha̍h落去，致到hitê會死ê hō͘活吞落去。 5 Taⁿ備辦阮得tio̍h chitê ê，就是上帝。伊也用伊ê神做定hō͘咱。 6 所以阮常常好膽，知阮tiàm-tī身軀就是kap主相離， 7 (因為阮teh行，是tùi信m̄是tùi所看)； 8 án-ni阮好膽，也koh-khah歡喜離開身軀，kap主saⁿ-kap tiàm。 9 所以無論tiàm-tī身軀á是離開身軀，阮所致意ê，是hō͘伊歡喜。 10 因為咱眾人的確tio̍h顯明tī基督ê公座前，hō͘ ta̍k人照伊tùi身軀所行ê tāi-chì，或是好，或是pháiⁿ，來受報應。 11 所以阮既然知主ê thang驚畏，就苦勸人；但是阮已經顯明tī上帝，我也ǹg望有顯明tī lín ê良心。 12 阮m̄是koh家己tùi lín證明，就是hō͘ lín為tio̍h阮有thang誇口ê所在，thang應hiahê照外貌無照內心誇口ê人。 13 因為阮若狂，是為tio̍h上帝；若自在，是為tio̍h lín。 14 因為基督ê疼痛催逼阮，是阮想一人替眾人死，就是眾人死； 15 koh伊替眾人死，是beh hō͘ chiahê活ê人以後無為tio̍h家己來活，是為tio̍h替in死來koh活ê。 16 所以阮tùi taⁿ以後，無照肉體bat人；雖然bat照肉體bat基督，taⁿ以後無koh án-ni bat伊。 17 所以人若tiàm-tī基督，就是做新創造ê，舊ê tāi-chì已經過去，taⁿ lóng變成新ê。 18 Koh萬項事lóng是出tī上帝，伊tùi基督hō͘咱kap伊koh和，也將chitê勸人kap上帝koh和ê職份hō͘阮； 19 就是上帝tiàm-tī基督，hō͘世間kap伊koh和，無將in ê罪過歸tī in；也將koh和ê道理交託阮。 20 Án-ni阮為tio̍h基督做欽差，親像上帝用阮勸lín；阮為tio̍h基督求lín kap上帝koh和； 21 上帝hō͘ hitê無罪ê替咱成做罪，是beh hō͘咱tiàm-tī伊來成做上帝ê義。
1 In-ūi goán chai goán tī tōe-ni̍h pò͘-pîⁿ ê chhù nā húi-hoāi, chiū ū tùi Siōng-tè só͘ khí-chō, m̄ sī lâng ê chhiú só͘ chō ê chhù, sī éng-oán tī thiⁿ-ni̍h ê. 2 In-ūi goán tiàm-tī chit ê pò͘-pîⁿ teh thó͘-khùi, put-chí him-bō͘ goán tùi thiⁿ-ni̍h ê chhù, chhin-chhiūⁿ saⁿ chhēng tha̍h-lo̍h-khì. 3 Nā tit-tio̍h chhēng, chiū bián thǹg-pak-theh. 4 In-ūi goán tiàm-tī chit ê pò͘-pîⁿ ê teh thoa-bôa thó͘-khùi, m̄ sī ài thǹg-khí-lâi, sī ài chhēng tha̍h-lo̍h-khì, tì-kàu hit ê ōe sí ê hō͘ oa̍h thun-lo̍h-khì. 5 Taⁿ pī-pān goán tit-tio̍h chit-ê ê, chiū-sī Siōng-tè. I iā ēng I ê Sîn chòe tiāⁿ hō͘ lán. 6 Só͘-í goán siông-siông hó-táⁿ, chai goán tiàm-tī seng-khu chiū-sī kap Chú saⁿ-lī, 7 (in-ūi goán teh kiâⁿ, sī tùi sìn m̄ sī tùi só͘ khòaⁿ); 8 án-ni goán hó-táⁿ, iā koh khah hoaⁿ-hí lī-khui seng-khu, kap Chú saⁿ-kap tiàm. 9 Só͘-í bô lūn tiàm-tī seng-khu á-sī lī-khui seng-khu, goán só͘ tì-ì ê, sī hō͘ I hoaⁿ-hí. 10 In-ūi lán chèng lâng tek-khak tio̍h hián-bêng tī Ki-tok ê kong-chō chêng, hō͘ ta̍k lâng chiàu i tùi seng-khu só͘ kiâⁿ ê tāi-chì, he̍k-sī hó, he̍k-sī pháiⁿ, lâi siū pò-èng. 11 Só͘-í goán kì-jiân chai Chú ê thang kiaⁿ-ùi, chiū khó͘-khǹg lâng; nā-sī goán í-keng hián-bêng tī Siōng-tè, góa iā ǹg-bāng ū hián-bêng tī lín ê liông-sim. 12 Goán m̄ sī koh ka-kī tùi lín chèng-bêng, chiū-sī hō͘ lín ūi-tio̍h goán ū thang khoa-kháu ê só͘-chāi, thang ìn hiah ê chiàu gōa-māu bô chiàu lāi-sim khoa-kháu ê lâng. 13 In-ūi goán nā kông, sī ūi-tio̍h Siōng-tè; nā chū-chāi, sī ūi-tio̍h lín. 14 In-ūi Ki-tok ê thiàⁿ-thàng chhui-pek goán, sī goán siūⁿ chi̍t lâng thòe chèng lâng sí, chiū-sī chèng lâng sí; 15 koh I thòe chèng lâng sí, sī beh hō͘ chiah ê oa̍h ê lâng í-āu bô ūi-tio̍h ka-kī lâi oa̍h, sī ūi-tio̍h thòe in sí lâi koh-oa̍h ê. 16 Só͘-í goán tùi taⁿ í-āu bô chiàu jio̍k-thé bat lâng; sui-jiân bat chiàu jio̍k-thé bat Ki-tok, taⁿ í-āu bô koh án-ni bat I. 17 Só͘-í lâng nā tiàm-tī Ki-tok, chiū-sī chòe sin chhòng-chō ê, kū ê tāi-chì í-keng kè-khì, taⁿ lóng pìⁿ-chiâⁿ sin ê. 18 Koh bān hāng sū lóng sī chhut tī Siōng-tè, I tùi Ki-tok hō͘ lán kap I koh hô, iā chiong chit ê khǹg lâng kap Siōng-tè koh hô ê chit-hūn hō͘ goán; 19 chiū-sī Siōng-tè tiàm-tī Ki-tok hō͘ sè-kan kap I koh hô, bô chiong in ê chōe-kòa kui tī in; iā chiong koh hô ê tō-lí kau-thok goán. 20 Án-ni goán ūi-tio̍h Ki-tok chòe khim-chhe, chhin-chhiūⁿ Siōng-tè ēng goán khǹg lín; goán ūi-tio̍h Ki-tok kiû lín kap Siōng-tè koh hô; 21 Siōng-tè hō͘ hit ê bô chōe ê thòe lán chiâⁿ-chòe chōe, sī beh hō͘ lán tiàm-tī I lâi chiâⁿ-chòe Siōng-tè ê gī.
1 阮kap主同tio̍h磨ê亦勸lín m̄-thang空空受上帝ê恩。 2 (因為伊講， Tī得tio̍h接納ê時，我有聽你， Tī拯救ê日我有幫贊你；你看，chit-tia̍p是受接納ê時，你看，chit-tia̍p是拯救ê日。) 3 阮一概無塞礙人，免得chitê職份犯嫌； 4 就是凡事證明本身合tī做上帝ê差用，是tī chōe-chōe吞忍、患難、 5 欠缺、困迫、受phah、關監、擾亂、tio̍h磨、無睏、無食、 6 廉潔、知識、寬容、仁慈、聖神ê感化、無假ê疼、 7 真理ê道、上帝ê權能，用義ê 戰器tī左右， 8 無論榮光凌辱，pháiⁿ名聲好名聲；親像騙人ê，其實是誠實ê； 9 親像人m̄知，其實chōe-chōe人知；親像beh死，其實是活；親像受責罰，其實無致到死； 10 親像煩惱，其實常常快樂；親像sòng-hiong，其實hō͘ chōe-chōe人富；親像無有，其實是無m̄有。 11 哥林多人ah，阮ǹg lín嘴開開，心闊闊。 12 m̄是tùi阮hō͘ lín 狹toe̍h，是tī lín ê心家己狹toe̍h。 13 Taⁿ lín tio̍h學chitê款，家己開闊來報答阮；我講án-ni，是親像對家己ê細kiáⁿ來講。 14 莫得kap m̄信ê人做伴，因為義kap不義有甚麼相通？光kap暗有甚麼交陪？ 15 基督kap Pí-lia̍t有甚麼和合？信kap m̄信有甚麼干涉？ 16 上帝ê殿kap偶像有甚麼相同？因為咱是真活上帝ê殿；親像上帝有講，我beh khiā起tī in中間，行遊tī in中間；我beh做in ê上帝，in也beh做我ê百姓。 17 所以照主所講ê， Lín tio̍h tùi in中間出來，家己分別， 莫得摸無清氣ê物； 我就接納lín， 18 我beh做lín ê父， Lín beh做我ê kiáⁿ、cha-bó͘-kiáⁿ。這是全能ê主講ê。
1 Goán kap Chú tâng tio̍h-bôa ê ia̍h khǹg lín m̄ thang khang-khang siū Siōng-tè ê un. 2 (In-ūi I kóng, Tī tit-tio̍h chiap-la̍p ê sî góa ū thiaⁿ lí, Tī chín-kiù ê ji̍t góa ū pang-chān lí; lí khòaⁿ, chit tia̍p sī siū chiap-la̍p ê sî, lí khòaⁿ, chit tia̍p sī chín-kiù ê ji̍t.) 3 Goán it-khài bô that-gāi lâng, bián-tit chit ê chit-hūn hoān hiâm; 4 chiū-sī hoān sū chèng-bêng pún-sin ha̍p tī chòe Siōng-tè ê chhe-ēng, sī tī chōe-chōe thun-lún, hoān-lān, 5 khiàm-kheh, khùn-pek, siū-phah, koaiⁿ-kaⁿ, jiáu-loān, tio̍h-bôa, bô khùn, bô chia̍h, 6 liâm-kiat, tì-sek, khoan-iông, jîn-chû, Sèng Sîn ê kám-hòa, bô ké ê thiàⁿ, 7 chin-lí ê tō, Siōng-tè ê koân-lêng, ēng gī ê chiàn-khì tī chó-iū, 8 bô lūn êng-kng lêng-jio̍k, pháiⁿ miâ-siaⁿ hó miâ-siaⁿ; chhin-chhiūⁿ phiàn lâng ê, kî-si̍t sī sêng-si̍t ê; 9 chhin-chhiūⁿ lâng m̄ chai, kî-si̍t chōe-chōe lâng chai; chhin-chhiūⁿ beh sí, kî-si̍t sī oa̍h; chhin-chhiūⁿ siū chek-hoa̍t, kî-si̍t bô tì-kàu sí; 10 chhin-chhiūⁿ hoân-ló, kî-si̍t siông-siông khoài-lo̍k; chhin-chhiūⁿ sòng-hiong, kî-si̍t hō͘ chōe-chōe lâng pù; chhin-chhiūⁿ bô ū, kî-si̍t sī bô m̄ ū. 11 Ko-lîm-to lâng ah, goán ǹg lín chhùi khui-khui, sim khoah-khoah. 12 M̄ sī tùi goán hō͘ lín oe̍h-toe̍h, sī tī lín ê sim ka-kī oe̍h-toe̍h. 13 Taⁿ lín tio̍h o̍h chit ê khoán, ka-kī khui-khoah lâi pò-tap goán; góa kóng án-ni, sī chhin-chhiūⁿ tùi ka-kī ê sòe-kiáⁿ lâi kóng. 14 Bo̍h-tit kap m̄ sìn ê lâng chòe phōaⁿ, in-ūi gī kap put-gī ū sím-mi̍h siong-thong? kng kap àm ū sím-mi̍h kau-pôe? 15 Ki-tok kap Pí-lia̍t ū sím-mi̍h hô-ha̍p? sìn kap m̄ sìn ū sím-mi̍h kan-sia̍p? 16 Siōng-tè ê tiān kap ngó͘-siōng ū sím-mi̍h saⁿ-tâng? In-ūi lán sī chin-oa̍h Siōng-tè ê tiān; chhin-chhiūⁿ Siōng-tè ū kóng, Góa beh khiā-khí tī in tiong-kan, kiâⁿ-iû tī in tiong-kan; góa beh chòe in ê Siōng-tè, in iā beh chòe góa ê peh-sìⁿ. 17 Só͘-í chiàu Chú só͘ kóng ê, Lín tio̍h tùi in tiong-kan chhut-lâi, ka-kī hun-piat, Bo̍h-tit bong bô chheng-khì ê mi̍h; Góa chiū chiap-la̍p lín, 18 Góa beh chòe lín ê Pē, Lín beh chòe góa ê kiáⁿ cha-bó͘-kiáⁿ. Che sī choân-lêng ê Chú kóng ê.
1 所疼ê兄弟ah，既然有chiahê應允，咱tio̍h清氣本身，除去一切肉體kap神ê lâ-sâm，驚畏上帝，來完全成聖。 2 Tio̍h開闊lín ê心，來接納阮。阮未bat剋虧人，未bat損壞人，未bat phiⁿ人。 3 我講án-ni m̄是beh責罪lín；因為我已經有講，lín tī阮ê心頭，同死同活。 4 我ǹg tī lín大好膽，我為tio̍h lín大誇口。我滿心得tio̍h安慰；tī阮一切患難中，我有格外ê歡喜。 5 因為阮來到馬其頓ê時，阮ê肉體lóng無平安，凡事tú-tio̍h患難，外面有相爭，內面有驚。 6 總是安慰卑微ê人ê，就是上帝，用提多到來安慰阮。 7 M̄-nā用伊到，也是用伊tùi lín所受ê安慰來安慰阮，因為伊將lín ê戀慕，lín ê哀傷，lín ǹg tī我ê熱心，kā阮講，致到我益發歡喜。 8 我bat用phoe hō͘ lín煩惱，前雖然有m̄過心，taⁿ就無lah；因為我看hit張phoe hō͘ lín煩惱ê，不過是暫時。 9 Taⁿ我歡喜，m̄是因為lín煩惱，是因為lín有tùi煩惱致到反悔。因為lín煩惱是順上帝，hō͘ lín無一項tùi阮受剋虧。 10 因為順上帝ê煩惱生出反悔，致到得tio̍h救，無有後來ê退悔；但是世間ê煩惱是致到死。 11 因為lín看，lín chitê順上帝ê煩惱，tī lín有生出jōa大ê慇勤，怎樣ê家己分訴，怎樣ê怨慼，怎樣ê驚惶，怎樣ê戀慕，怎樣ê熱心，怎樣ê責罰。Lín tī chit層事已經ta̍k項表明家己是清氣。 12 我前sui-bóng寫phoe hó͘ lín，m̄是為tio̍h hitê剋虧人ê，也m̄是為tio̍h hitê受剋虧ê，是beh hō͘ lín為tio̍h阮ê慇勤，tī上帝ê面前，對lín顯明。 13 所以阮已經受安慰；koh tī安慰中，因為提多ê歡喜，就阮ê歡喜益發充滿，因為伊ê心tùi lín眾人來得tio̍h安歇。 14 我若bat對伊誇口lín甚麼tāi-chì，也就無見笑。因為阮tùi提多所誇口lín ê話是真實，親像阮對lín所講ê話也lóng是真實。 15 Koh伊記念lín lóng順服，用驚惶ngia̍uh-ngia̍uh-chhoah接納伊，就伊ê心益發ǹg tī lín。 16 Taⁿ我歡喜，因為論到lín，我凡事能放心得。
1 Só͘ thiàⁿ ê hiaⁿ-tī ah, kì-jiân ū chiah ê èng-ún, lán tio̍h chheng-khì pún-sin, tû-khì it-chhè jio̍k-thé kap sîn ê lâ-sâm, kiaⁿ-ùi Siōng-tè, lâi oân-choân chiâⁿ-sèng. 2 Tio̍h khui-khoah lín ê sim, lâi chiap-la̍p goán. Goán bē bat khek-khui lâng, bē bat sún-hoāi lâng, bē bat phiⁿ lâng. 3 Góa kóng án-ni m̄ sī beh chek-chōe lín; in-ūi góa í-keng ū kóng, lín tī goán ê sim-thâu, tâng sí tâng oa̍h. 4 Góa ǹg tī lín tōa hó-táⁿ, góa ūi-tio̍h lín tōa khoa-kháu. Góa móa-sim tit-tio̍h an-ùi; tī goán it-chhè hoān-lān tiong, góa ū kek-gōe ê hoaⁿ-hí. 5 In-ūi goán lâi kàu Má-kî-tùn ê sî, goán ê jio̍k-thé lóng bô pêng-an, hoān sū tú-tio̍h hoān-lān, gōa-bīn ū saⁿ-chiⁿ, lāi-bīn ū kiaⁿ. 6 Chóng-sī an-ùi pi-bî ê lâng ê, chiū-sī Siōng-tè, ēng Thê-to kàu lâi an-ùi goán. 7 M̄ nā ēng i kàu, iā sī ēng i tùi lín só͘ siū ê an-ùi lâi an-ùi goán, in-ūi i chiong lín ê loân-bō͘, lín ê ai-siong, lín ǹg tī góa ê jia̍t-sim, kā goán kóng, tì-kàu góa it-hoat hoaⁿ-hí. 8 Góa bat ēng phoe hō͘ lín hoân-ló, chêng sui-jiân ū m̄ kè-sim, taⁿ chiū bô lah; in-ūi góa khòaⁿ hit tiuⁿ phoe hō͘ lín hoân-ló ê, put-kò sī chiām-sî. 9 Taⁿ góa hoaⁿ-hí, m̄ sī in-ūi lín hoân-ló, sī in-ūi lín ū tùi hoân-ló tì-kàu hoán-hóe. In-ūi lín hoân-ló sī sūn Siōng-tè, hō͘ lín bô chi̍t hāng tùi goán siū khek-khui. 10 In-ūi sūn Siōng-tè ê hoân-ló siⁿ-chhut hoán-hóe, tì-kàu tit-tio̍h kiù, bô ū āu-lâi ê thè-hóe; nā-sī sè-kan ê hoân-ló sī tì-kàu sí. 11 In-ūi lín khòaⁿ, lín chit ê sūn Siōng-tè ê hoân-ló, tī lín ū siⁿ-chhut jōa tōa ê un-khûn, cháiⁿ-iūⁿ ê ka-kī hun-sò͘, cháiⁿ-iūⁿ ê oàn-chhoeh, cháiⁿ-iūⁿ ê kiaⁿ-hiâⁿ, cháiⁿ-iūⁿ ê loân-bō͘, cháiⁿ-iūⁿ ê jia̍t-sim, cháiⁿ-iūⁿ ê chek-hoa̍t. Lín tī chit chân sū í-keng ta̍k hāng piáu-bêng ka-kī sī chheng-khì. 12 Góa chêng sui-bóng siá phoe hó͘ lín, m̄ sī ūi-tio̍h hit ê khek-khui lâng ê, iā m̄ sī ūi-tio̍h hit ê siū khek-khui ê, sī beh hō͘ lín ūi-tio̍h goán ê un-khûn, tī Siōng-tè ê bīn-chêng, tùi lín hián-bêng. 13 Só͘-í goán í-keng siū an-ùi; koh tī an-ùi tiong, in-ūi Thê-to ê hoaⁿ-hí chiū goán ê hoaⁿ-hí it-hoat chhiong-móa, in-ūi i ê sim tùi lín chèng lâng lâi tit-tio̍h an-hioh. 14 Góa nā bat tùi i khoa-kháu lín sím-mi̍h tāi-chì, iā chiū bô kiàn-siàu. In-ūi goán tùi Thê-to só͘ khoa-kháu lín ê ōe sī chin-si̍t, chhin-chhiūⁿ goán tùi lín só͘ kóng ê ōe iā lóng sī chin-si̍t. 15 Koh i kì-liām lín lóng sūn-ho̍k, ēng kiaⁿ-hiâⁿ ngia̍uh-ngia̍uh-chhoah chiap-la̍p i, chiū i ê sim it-hoat ǹg tī lín. 16 Taⁿ góa hoaⁿ-hí, in-ūi lūn-kàu lín, góa hoān sū ōe pàng-sim tit.
1 兄弟ah，阮將上帝所賞賜tī馬其頓chiahê教會ê恩報lín知， 2 就是tī患難中受大試煉ê時，in ê大歡喜，kap in ê極sòng-hiong，有格外成in大大ê好心。 3 因為我干證in家己甘願照in ê力量，koh過頭tī in ê力量， 4 懇切求阮hō͘ in得tio̍h chitê恩，來saⁿ-kap有份tī服事聖徒。 5 Koh m̄-nā照阮所ǹg望，就是事先將本身獻hō͘主，也tùi上帝ê旨意獻hō͘阮。 6 所以阮勸提多，伊既然有提倡chitê恩惠tī lín中間，就tio̍h照án-ni hō͘伊成。 7 Taⁿ lín tī凡事，親像信心、口才、知識，lóng總ê熱心，以及lín ê疼阮，chiahê事既然充滿，就tī chitê恩惠也tio̍h充滿。 8 我講án-ni，m̄是命令lín；是tùi別人ê慇勤來試驗lín仁愛ê實在。 9 因為lín知咱ê主耶穌基督ê恩；伊本好額，為tio̍h lín成做sòng-hiong，beh hō͘ lín tùi伊ê sòng-hiong來成做好額。 10 我tī chit層事將我ê意見hō͘ lín知；因為這是lín ê利益；是lín tùi舊年已經提倡chitê事，m̄-nā做前行，也做前甘願。 11 Taⁿ tio̍h做成chitê事；致到lín既然有熱心ê甘願，也照所有ê來成伊。 12 因為已經有chit號熱心，就得tio̍h接納，是照人所有ê，m̄是照人所無ê。 13 卻m̄是ài別人liāu-lēng，lín 乏ta̍t，是ài得平平； 14 現時將lín有chhun ê補in ê無夠，thang將in有chhun ê補lín ê無夠，án-ni chiah會平； 15 照所記載講，拾chōe ê無chhun，拾少ê無欠。 16 感謝上帝hō͘提多ê心平平為tio̍h lín慇勤； 17 伊卻也是受阮ê苦勸；總是伊本然真慇勤，家己甘願去chhē lín。 18 我也差一个兄弟kap伊去，就是tī福音有hō͘眾教會o-ló ê； 19 m̄-nā án-ni，也是chiahê教會所揀選kap阮出門tàu料理阮所teh辦ê恩惠，來表明主ê榮光kap阮ê甘願； 20 是持防人，為tio̍h阮所料理ê chōe-chōe銀，來嫌阮； 21 因為阮圖謀好事，m̄-nā tī主ê面前，也是tī人ê面前。 22 Koh差阮ê兄弟一人kap in去，阮tī chōe-chōe事bat chōe-chōe pái試驗伊，知伊ê慇勤，taⁿ因為深信lín，就koh-khah慇勤。 23 論到提多，伊是我ê同伴，為tio̍h lín來saⁿ-kap tio̍h磨ê，á是阮chiahê兄弟，in是chiahê教會ê使者，也是基督ê榮光。 24 所以tī chiahê教會ê面前，lín tio̍h對in顯明lín ê仁愛ê憑據，也顯明阮為tio̍h lín所誇口ê是實在。
1 Hiaⁿ-tī ah, goán chiong Siōng-tè só͘ siúⁿ-sù tī Má-kî-tùn chiah ê kàu-hōe ê un pò lín chai, 2 chiū-sī tī hoān-lān tiong siū tōa chhì-liān ê sî, in ê tōa hoaⁿ-hí, kap in ê ke̍k sòng-hiong, ū kek-gōe chiâⁿ in tōa-tōa ê hó-sim. 3 In-ūi góa kan-chèng in ka-kī kam-goān chiàu in ê le̍k-liōng, koh kè-thâu tī in ê le̍k-liōng, 4 khún-chhiat kiû goán hō͘ in tit-tio̍h chit ê un, lâi saⁿ-kap ū hūn tī ho̍k-sāi sèng-tô͘. 5 Koh m̄ nā chiàu goán só͘ ǹg-bāng, chiū-sī tāi-seng chiong pún-sin hiàn hō͘ Chú, iā tùi Siōng-tè ê chí-ì hiàn hō͘ goán. 6 Só͘-í goán khǹg Thê-to, i kì-jiân ū thê-chhiòng chit ê un-hūi tī lín tiong-kan, chiū tio̍h chiàu án-ni hō͘ i chiâⁿ. 7 Taⁿ lín tī hoān sū, chhin-chhiūⁿ sìn-sim, kháu-châi, tì-sek, lóng-chóng ê jia̍t-sim, í-ki̍p lín ê thiàⁿ goán, chiah ê sū kì-jiân chhiong-móa, chiū tī chit ê un-hūi iā tio̍h chhiong-móa. 8 Góa kóng án-ni, m̄ sī bēng-lēng lín; sī tùi pa̍t lâng ê un-khûn lâi chhì-giām lín jîn-ài ê si̍t-chāi. 9 In-ūi lín chai lán ê Chú Iâ-so͘ Ki-tok ê un; I pún hó-gia̍h, ūi-tio̍h lín chiâⁿ-chòe sòng-hiong, beh hō͘ lín tùi I ê sòng-hiong lâi chiâⁿ-chòe hó-gia̍h. 10 Góa tī chit chân sū chiong góa ê ì-kiàn hō͘ lín chai; in-ūi che sī lín ê lī-ek; sī lín tùi kū-nî í-keng thê-chhiòng chit ê sū, m̄ nā chòe-chêng kiâⁿ, iā chòe-chêng kam-goān. 11 Taⁿ tio̍h chòe-chiâⁿ chit ê sū; tì-kàu lín kì-jiân ū jia̍t-sim ê kam-goān, iā chiàu só͘ ū ê lâi chiâⁿ i. 12 In-ūi í-keng ū chit hō jia̍t-sim, chiū tit-tio̍h chiap-la̍p, sī chiàu lâng só͘ ū ê, m̄ sī chiàu lâng só͘ bô ê. 13 Khiok m̄ sī ài pa̍t lâng liāu-lēng, lín ha̍t-ta̍t, sī ài tit pîⁿ-pîⁿ; 14 hiān-sî chiong lín ū chhun ê pó͘ in ê bô kàu, thang chiong in ū chhun ê pó͘ lín ê bô kàu, án-ni chiah ōe pîⁿ; 15 chiàu só͘ kì-chài kóng, khioh chōe ê bô chhun, khioh chió ê bô khiàm. 16 Kám-siā Siōng-tè hō͘ Thê-to ê sim pîⁿ-pîⁿ ūi-tio̍h lín un-khûn; 17 i khiok iā sī siū goán ê khó͘-khǹg; chóng-sī i pún-jiân chin un-khûn, ka-kī kam-goān khì chhē lín. 18 Góa iā chhe chi̍t ê hiaⁿ-tī kap i khì, chiū-sī tī hok-im ū hō͘ chèng kàu-hōe o-ló ê; 19 m̄ nā án-ni, iā sī chiah ê kàu-hōe só͘ kéng-soán kap goán chhut-mn̂g tàu liāu-lí goán só͘ teh pān ê un-hūi, lâi piáu-bêng Chú ê êng-kng kap goán ê kam-goān; 20 sī tî-hông lâng, ūi-tio̍h goán só͘ liāu-lí ê chōe-chōe gûn lâi hiâm goán; 21 in-ūi goán tô͘-bô͘ hó-sū, m̄ nā tī Chú ê bīn-chêng, iā sī tī lâng ê bīn-chêng. 22 Koh chhe goán ê hiaⁿ-tī chi̍t lâng kap in khì, goán tī chōe-chōe sū bat chōe-chōe pái chhì-giām i, chai i ê un-khûn, taⁿ in-ūi chhim sìn lín, chiū koh khah un-khûn. 23 Lūn-kàu Thê-to, i sī góa ê tâng-phōaⁿ, ūi-tio̍h lín lâi saⁿ-kap tio̍h-bôa ê. Á-sī goán chiah ê hiaⁿ-tī, in sī chiah ê kàu-hōe ê sù-chiá, iā sī Ki-tok ê êng-kng. 24 Só͘-í tī chiah ê kàu-hōe ê bīn-chêng, lín tio̍h tùi in hián-bêng lín ê jîn-ài ê pîn-kù, iā hián-bêng goán ūi-tio̍h lín só͘ khoa-kháu ê sī si̍t-chāi.
1 論到服事聖徒ê事，我寫phoe hō͘ lín算是加工。 2 因為我知lín ê熱心，chiah將chitê tùi馬其頓人為tio̍h lín誇口，講，A-kai-a tùi舊年已經便；koh lín ê熱心有感激chōe-chōe人。 3 總是我差chiahê兄弟，hō͘ lín先備辦，照我所講； 4 免得阮tī chitê事所為tio̍h lín誇口ê歸tī空空；驚了有馬其頓人kap我來，看見lín未有便，阮就為tio̍h深信lín致到見笑；lín ê，我免講。 5 所以我想的確tio̍h勸chiahê兄弟量早去lín hia，來事先khêng lín前所允ê恩惠；thang顯明lín ê備辦便是tùi恩惠，m̄是tùi勉強。 6 但是我講，少種ê，少收；chōe種ê，chōe收。 7 Ta̍k人照伊心內所有定tio̍h ê，莫得煩惱，莫得勉強；因為歡喜the̍h出ê，上帝疼伊。 8 Koh上帝會hō͘ ta̍k項ê恩典充滿到tī lín，hō͘ lín凡事常常充足，thang行ta̍k項ê好事有夠滿滿； 9 照所記載講， 伊有大捨施，伊有賑濟sòng-hiong人， 伊ê義永永tī-teh。 10 Koh賞賜種子hō͘掖ê，也賞賜米糧hō͘人食ê上帝，伊beh賞賜lín thang掖ê種子chōe-chōe，也beh加添lín行義ê果子， 11 hō͘ lín凡事充足，到有ta̍k樣ê好心，chitê好心就是託重阮來致到人感謝上帝ê。 12 因為chitê服事ê工m̄是補足聖徒ê欠缺nā-tiāⁿ，koh續能hō͘ chōe-chōe人感謝上帝。 13 In tùi chitê工ê經驗來歸榮光上帝，是因為lín承認基督ê福音來順服，koh因為lín好心款待in kap眾人； 14 koh in為tio̍h上帝所賞賜lín極大ê恩，替lín祈禱，來戀慕lín。 15 感謝上帝為tio̍h伊講bōe盡ê恩賜。
1 Lūn-kàu ho̍k-sāi sèng-tô͘ ê sū, góa siá phoe hō͘ lín sǹg sī ke kang. 2 In-ūi góa chai lín ê jia̍t-sim, chiah chiong chit-ê tùi Má-kî-tùn lâng ūi-tio̍h lín khoa-kháu, kóng, A-kai-a tùi kū-nî í-keng piān; koh lín ê jia̍t-sim ū kám-kek chōe-chōe lâng. 3 Chóng-sī góa chhe chiah ê hiaⁿ-tī, hō͘ lín seng pī-pān, chiàu góa só͘ kóng; 4 bián-tit goán tī chit ê sū só͘ ūi-tio̍h lín khoa-kháu ê kui tī khang-khang; kiaⁿ-liáu ū Má-kî-tùn lâng kap góa lâi, khòaⁿ-kìⁿ lín bē ū piān, goán chiū ūi-tio̍h chhim sìn lín tì-kàu kiàn-siàu; lín ê, góa bián kóng. 5 Só͘-í góa siūⁿ tek-khak tio̍h khǹg chiah ê hiaⁿ-tī liōng-chá khì lín hia, lâi tāi-seng khêng lín chêng só͘ ún ê un-hūi; thang hián-bêng lín ê pī-pān piān sī tùi un-hūi, m̄ sī tùi bián-kióng. 6 Nā-sī góa kóng, Chió chèng ê, chió siu; chōe chèng ê, chōe siu. 7 Ta̍k lâng chiàu i sim-lāi só͘ ū tiāⁿ-tio̍h ê, bo̍h-tit hoân-ló, bo̍h-tit bián-kióng; in-ūi hoaⁿ-hí the̍h-chhut ê, Siōng-tè thiàⁿ i. 8 Koh Siōng-tè ōe hō͘ ta̍k hāng ê un-tián chhiong-móa kàu tī lín, hō͘ lín hoān sū siông-siông chhiong-chiok, thang kiâⁿ ta̍k hāng ê hó sū ū kàu móa-móa; 9 chiàu só͘ kì-chài kóng, I ū tōa siá-si, i ū chín-chè sòng-hiong lâng, I ê gī éng-éng tī-teh. 10 Koh siúⁿ-sù chéng-chí hō͘ iā ê, iā siúⁿ-sù bí-niû hō͘ lâng chia̍h ê Siōng-tè, I beh siúⁿ-sù lín thang iā ê chéng-chí chōe-chōe, iā beh ke-thiⁿ lín kiâⁿ gī ê ké-chí, 11 hō͘ lín hoān sū chhiong-chiok, kàu ū ta̍k iūⁿ ê hó-sim, chit ê hó-sim chiū-sī thok-tiōng goán lâi tì-kàu lâng kám-siā Siōng-tè ê. 12 In-ūi chit ê ho̍k-sāi ê kang m̄ sī pó͘-chiok sèng-tô͘ ê khiàm-kheh nā-tiāⁿ, koh sòa ōe hō͘ chōe-chōe lâng kám-siā Siōng-tè. 13 In tùi chit ê kang ê keng-giām lâi kui êng-kng Siōng-tè, sī in-ūi lín sêng-jīn Ki-tok ê hok-im lâi sūn-ho̍k, koh in-ūi lín hó-sim khoán-thāi in kap chèng lâng; 14 koh in ūi-tio̍h Siōng-tè só͘ siúⁿ-sù lín ke̍k tōa ê un, thòe lín kî-tó, lâi loân-bō͘ lín. 15 Kám-siā Siōng-tè ūi-tio̍h I kóng bōe chīn ê un-sù.
1 我保羅，saⁿ見面ê時就tī lín中間做卑微，saⁿ離開ê時就ǹg lín做好膽ê，taⁿ用基督ê溫柔純良家己勸lín； 2 有人phah算阮是照肉體來行，我phah算決意tio̍h用好膽來辦in；求lín莫得hō͘我tī saⁿ對面ê時有chit號決意ê好膽。 3 因為阮雖然tī肉體來行，m̄是照肉體來交戰， 4 (因為阮交戰ê器具m̄是屬tī肉體，是tī上帝ê面前有氣力夠額thang來攻破chiahê堅固ê營寨)， 5 凡若chiahê計謀，以及lóng總高高ê物，所舉起來阻擋人bat上帝ê，阮lóng毀壞伊，將lóng總ê念頭掠來hō͘伊順服基督； 6 koh已經備辦便，thèng候lín完全順服，chiah來責罰lóng總ê無順服ê。 7 Lín看目前ah，若有人靠家己是屬基督ê，伊tio̍h koh家己想，看伊怎樣屬基督，阮也是án-ni。 8 主所賞賜阮ê權是beh建立lín，m̄是beh敗壞lín，阮就若為tio̍h chitê權略á過頭誇口，也不致見笑； 9 免得我親像用phoe hō͘ lín驚。 10 因為有人講，伊ê phoe tēng-tiōng，koh有力；但是saⁿ對面ê時，身軀軟chiáⁿ，講話俗俗。 11 Hit號人tio̍h想，阮saⁿ離開ê時，phoe裡講話是甚麼款，saⁿ對面ê時做事也是án-ni。 12 有人家己o-ló，阮m̄敢kap in掠平，kap in比並；但是in用家己批評家己，也用家己比並家己，是無知識。 13 但是阮無beh誇口過份ê事，就是照上帝所派hō͘阮限定ê份額；chitê份額lín也在內。 14 因為阮m̄是pôaⁿ過份，ná親像m̄應該到tī lín ê；是阮傳基督ê福音也bat到tī lín。 15 阮m̄是過份來誇口別人ê tio̍h磨；就是ǹg望lín信ná深，就阮tī lín中間照我ê份額，會開闊到滿出去， 16 來傳福音到tī lín界外ê地；無用別人份內已經做便ê事來誇口。 17 誇口ê人tio̍h用主來誇口。 18 因為m̄是家己o-ló ê人上取，就是主所o-ló ê上取。
1 Góa Pó-lô, saⁿ kìⁿ-bīn ê sî chiū tī lín tiong-kan chòe pi-bî, saⁿ lī-khui ê sî chiū ǹg lín chòe hó-táⁿ ê, taⁿ ēng Ki-tok ê un-jiû sûn-liông ka-kī khǹg lín; 2 ū lâng phah-sǹg goán sī chiàu jio̍k-thé lâi kiâⁿ, góa phah-sǹg koat-ì tio̍h ēng hó-táⁿ lâi pān in; kiû lín bo̍h-tit hō͘ góa tī saⁿ tùi-bīn ê sî ū chit hō koat-ì ê hó-táⁿ. 3 In-ūi goán sui-jiân tī jio̍k-thé lâi kiâⁿ, m̄ sī chiàu jio̍k-thé lâi kau-chiàn, 4 (in-ūi goán kau-chiàn ê khì-kū m̄ sī sio̍k tī jio̍k-thé, sī tī Siōng-tè ê bīn-chêng ū khùi-la̍t kàu-gia̍h thang lâi kong-phòa chiah ê kian-kò͘ ê iâⁿ-chē), 5 hoān-nā chiah ê kè-bô͘, í-ki̍p lóng-chóng koâiⁿ-koâiⁿ ê mi̍h, só͘ kú-khí lâi chó͘-tòng lâng bat Siōng-tè ê, goán lóng húi-hoāi i, chiong lóng-chóng ê liām-thâu lia̍h lâi hō͘ i sūn-ho̍k Ki-tok; 6 koh í-keng pī-pān piān, thèng-hāu lín oân-choân sūn-ho̍k, chiah lâi chek-hoa̍t lóng-chóng ê bô sūn-ho̍k ê. 7 Lín khòaⁿ ba̍k-chêng ah. Nā ū lâng khò ka-kī sī sio̍k Ki-tok ê, i tio̍h koh ka-kī siūⁿ, khòaⁿ i cháiⁿ-iūⁿ sio̍k Ki-tok, goán iā sī án-ni. 8 Chú só͘ siúⁿ-sù goán ê koân sī beh kiàn-li̍p lín, m̄ sī beh pāi-hoāi lín, goán chiū nā ūi-tio̍h chit ê koân lio̍h-á kè-thâu khoa-kháu, iā put-tì kiàn-siàu; 9 bián-tit góa chhin-chhiūⁿ ēng phoe hō͘ lín kiaⁿ. 10 In-ūi ū lâng kóng, I ê phoe tēng-tiōng, koh ū la̍t; nā-sī saⁿ tùi-bīn ê sî, seng-khu nńg-chiáⁿ, kóng ōe sio̍h-sio̍h. 11 Hit hō lâng tio̍h siūⁿ, goán saⁿ lī-khui ê sî, phoe-ni̍h kóng ōe sī sím-mi̍h khoán, saⁿ tùi-bīn ê sî chòe sū iā sī án-ni. 12 Ū lâng ka-kī o-ló, goán m̄ káⁿ kap in lia̍h pîⁿ, kap in pí-phēng; nā-sī in ēng ka-kī phoe-phêng ka-kī, iā ēng ka-kī pí-phēng ka-kī, sī bô tì-sek. 13 Nā-sī goán bô beh khoa-kháu kè-hūn ê sū, chiū-sī chiàu Siōng-tè só͘ phài hō͘ goán hān-tiāⁿ ê hūn-gia̍h; chit ê hūn-gia̍h lín iā chāi-lāi. 14 In-ūi goán m̄ sī pôaⁿ-kè hūn, ná chhin-chhiūⁿ m̄ eng-kai kàu tī lín ê; sī goán thoân Ki-tok ê hok-im iā bat kàu tī lín. 15 Goán m̄ sī kè-hūn lâi khoa-kháu pa̍t lâng ê tio̍h-bôa; chiū-sī ǹg-bāng lín sìn ná chhim, chiū goán tī lín tiong-kan chiàu góa ê hūn-gia̍h, ōe khui-khoah kàu móa-chhut-khì, 16 lâi thoân hok-im kàu tī lín kài-gōa ê tōe; bô ēng pa̍t lâng hūn-lāi í-keng chòe piān ê sū lâi khoa-kháu. 17 Khoa-kháu ê lâng tio̍h ēng Chú lâi khoa-kháu. 18 In-ūi m̄ sī ka-kī o-ló ê lâng chiūⁿ chhú, chiū-sī Chú só͘ o-ló ê chiūⁿ chhú.
1 願lín容允我小khóa ê戇；其實lín無m̄容允我。 2 因為我將上帝ê熱心，為tio̍h lín來熱心；因為我bat聘定lín hō͘一个丈夫，beh將lín做貞節ê在室女，獻hō͘基督。 3 總是我驚了lín ê心思敗壞，無純全清潔來ǹg基督，親像蛇用伊ê詭譎引誘夏娃一樣。 4 若有人來傳別個耶穌，阮所未bat傳ê，á是lín受tio̍h各樣ê神，前所未bat受tio̍h ê，á是各樣ê福音，前所未bat承受ê，lín容允伊，好。 5 因為我phah算我lóng無khah輸tī hiahê上等ê使徒。 6 我講話雖然俗俗，但是知識kú m̄是án-ni；因為阮凡事有tùi lín顯明chitê tī眾人中。 7 Á是我家己屈低，hō͘ lín升高，無the̍h所費，白白傳上帝ê福音hō͘ lín，這kiám是犯罪mah？ 8 我搶別個教會，the̍h in ê束脩，來服事lín。 9 我kap lín tī-teh ê時用無夠，未bat連累tio̍h lín一人；因為tùi馬其頓來ê兄弟補足我ê欠缺；我凡事家己守，無拖thūi lín；後來也beh家己守。 10 基督ê真實既然tī我就tī A-kai-a chiahê地方，無人會阻止我chit號ê誇口。 11 是甚麼緣故？是我無疼lín mah？上帝知lah。 12 總是我所行ê猶原beh行伊，beh絕斷hiahê chhē機會ê人ê機會，hō͘ in tī in所誇口ê，究竟kap阮無各樣。 13 因為hit號人是假使徒，行tāi-chì奸詐，家己裝做基督ê使徒。 14 這也無奇怪；因為撒旦也家己裝做光明ê天使。 15 所以伊ê差用家己裝親像義ê差用，這也m̄是大事。In ê結局beh照in ê所行。 16 我koh講，人m̄-thang看我做戇；總是若án-ni，就tio̍h猶原接納我親像戇，hō͘我也thang略略á誇口。 17 我taⁿ所講ê m̄是照主來講；是親像戇，大膽來誇口。 18 既然有chōe-chōe人照肉體來誇口，就我也beh誇口。 19 Lín既然是知識ê人，就歡喜容允戇ê人。 20 設使有人款待lín做奴僕，吞咬lín，掠lín，自高，siàn lín ê面，lín就容允伊。 21 我講án-ni是無體面，ná親像阮前是軟chiáⁿ。總是人tī甚麼tāi-chì好膽，我也好膽；我講chit句是戇話。 22 In是希伯來人mah？我也是。In是以色列人mah？我也是。In是亞伯拉罕ê後裔mah？我也是。 23 In是基督ê差用mah？我koh-khah是；(我親像狂teh講。) 我tio̍h磨iáu khah-chōe，關落監也khah-chōe，受phah到bōe算得，chōe-chōe pái險險死。 24 我hō͘偤太人phah五pái，每pái四十下減一下。 25 三pái受柺á phah，一pái受tio̍h石頭tìm，三pái tú-tio̍h船破，一日一暝tī深海； 26 常常le̍k路，tú-tio̍h 江河ê危險，賊馬ê危險，本族ê危險，外邦ê危險，城內ê危險，曠野ê危險，海面ê危險，假兄弟ê危險； 27 受勞碌kap艱苦ta̍uh-ta̍uh無睏，iau kòa嘴乾，ta̍uh-ta̍uh無食，寒kòa thǹg-pak-theh。 28 除去chiahê外事，iáu有一項ta̍k日teh我，就是替眾教會掛慮。 29 Chī-chūi軟弱，也我無續軟弱ah？Chī-chūi tio̍h-tak，也我ê心無親像火to̍h ah？ 30 我若不得不tio̍h誇口，就beh誇口關係我軟弱ê事。 31 主耶穌ê上帝，也是伊ê父，永遠thang o-ló ê，知我無白賊。 32 Tī大馬色A-lí-ta̍t王所設ê地方官把守大馬色人ê城beh掠我； 33 但是我tùi窗á，用筐tùi城牆hō͘人lūi落去，脫離伊ê手。
1 Goān lín iông-ún góa sió-khóa ê gōng; kî-si̍t lín bô m̄ iông-ún góa. 2 In-ūi góa chiong Siōng-tè ê jia̍t-sim, ūi-tio̍h lín lâi jia̍t-sim; in-ūi góa bat phèng-tiāⁿ lín hō͘ chi̍t ê tiōng-hu, beh chiong lín chòe cheng-chiat ê chāi-sek-lú, hiàn hō͘ Ki-tok. 3 Chóng-sī góa kiaⁿ-liáu lín ê sim-su pāi-hoāi, bô sûn-choân chheng-kiat lâi ǹg Ki-tok, chhin-chhiūⁿ chôa ēng i ê khúi-khiat ín-iú Hā-oa chi̍t iūⁿ. 4 Nā ū lâng lâi thoân pa̍t ê Iâ-so͘, goán só͘ bē bat thoân ê, á-sī lín siū-tio̍h koh-iūⁿ ê sîn, chêng só͘ bē bat siū-tio̍h ê, á-sī koh-iūⁿ ê hok-im, chêng só͘ bē bat sêng-siū ê, lín iông-ún i, hó. 5 In-ūi góa phah-sǹg góa lóng bô khah su tī hiah ê siōng-téng ê sù-tô͘. 6 Góa kóng-ōe sui-jiân sio̍h-sio̍h, nā sī tì-sek kú m̄ sī án-ni; in-ūi goán hoān sū ū tùi lín hián-bêng chit-ê tī chèng lâng tiong. 7 Á-sī góa ka-kī khut-kē, hō͘ lín seng koâiⁿ, bô the̍h só͘-hùi, pe̍h-pe̍h thoân Siōng-tè ê hok-im hō͘ lín, che kiám sī hoān-chōe mah? 8 Góa chhiúⁿ pa̍t ê kàu-hōe, the̍h in ê sok-siu, lâi ho̍k-sāi lín. 9 Góa kap lín tī-teh ê sî ēng bô kàu, bē bat liân-lūi-tio̍h lín chi̍t lâng; in-ūi tùi Má-kî-tùn lâi ê hiaⁿ-tī pó͘-chiok góa ê khiàm-kheh; góa hoān sū ka-kī siú, bô thoa-thūi lín; āu-lâi iā beh ka-kī siú. 10 Ki-tok ê chin-si̍t kì-jiân tī góa chiū tī A-kai-a chiah ê tōe-hng, bô lâng ōe chó͘-chí góa chit hō ê khoa-kháu. 11 Sī sím-mi̍h iân-kò͘? sī góa bô thiàⁿ lín mah? Siōng-tè chai lah. 12 Chóng-sī góa só͘ kiâⁿ ê iû-goân beh kiâⁿ i, beh choa̍t-tn̄g hiah ê chhē ki-hōe ê lâng ê ki-hōe, hō͘ in tī in só͘ khoa-kháu ê, kiù-kèng kap goán bô koh-iūⁿ. 13 In-ūi hit hō lâng sī ké sù-tô͘, kiâⁿ tāi-chì kan-chà, ka-kī chng-chòe Ki-tok ê sù-tô͘. 14 Che iā bô kî-koài; in-ūi Sat-tàn iā ka-kī chng-chòe kng-bêng ê thiⁿ-sài. 15 Só͘-í i ê chhe-ēng ka-kī chng chhin-chhiūⁿ gī ê chhe-ēng, che iā m̄ sī tōa sū. In ê kiat-kio̍k beh chiàu in ê só͘ kiâⁿ. 16 Góa koh kóng, lâng m̄ thang khòaⁿ góa chòe gōng; chóng-sī nā án-ni, chiū tio̍h iû-goân chiap-la̍p góa chhin-chhiūⁿ gōng, hō͘ góa iā thang lio̍h-lio̍h-á khoa-kháu. 17 Góa taⁿ só͘ kóng ê m̄ sī chiàu Chú lâi kóng; sī chhin-chhiūⁿ gōng, tōa táⁿ lâi khoa-kháu. 18 Kì-jiân ū chōe-chōe lâng chiàu jio̍k-thé lâi khoa-kháu, chiū góa iā beh khoa-kháu. 19 Lín kì-jiân sī tì-sek ê lâng, chiū hoaⁿ-hí iông-ún gōng ê lâng. 20 Siat-sú ū lâng khoán-thāi lín chòe lô͘-po̍k, thun-kā lín, lia̍h lín, chū-ko, siàn lín ê bīn, lín chiū iông-ún i. 21 Góa kóng án-ni sī bô thé-biān, ná chhin-chhiūⁿ goán chêng sī nńg-chiáⁿ. Chóng-sī lâng tī sím-mi̍h tāi-chì hó-táⁿ, góa iā hó-táⁿ; góa kóng chit kù sī gōng ōe. 22 In sī Hi-pek-lâi lâng mah? góa iā sī. In sī Í-sek-lia̍t lâng mah? góa iā sī. In sī A-pek-la̍h-hán ê hō͘-è mah? góa iā sī. 23 In sī Ki-tok ê chhe-ēng mah? Góa koh khah sī; (góa chhin-chhiūⁿ kông teh kóng.) Góa tio̍h-bôa iáu khah chōe, koaiⁿ-lo̍h kaⁿ iā khah chōe, siū phah kàu bōe sǹg tit, chōe-chōe pái hiám-hiám sí. 24 Góa hō͘ Iû-thài lâng phah gō͘ pái, múi pái sì-cha̍p ē kiám chi̍t ē. 25 Saⁿ pái siū koáiⁿ-á phah, chi̍t pái siū-tio̍h chio̍h-thâu tìm, saⁿ pái tú-tio̍h chûn-phòa, chi̍t ji̍t chi̍t mî tī chhim hái; 26 siông-siông le̍k-lō͘, tú-tio̍h kang-hô ê gûi-hiám, chha̍t-bé ê gûi-hiám, pún-cho̍k ê gûi-hiám, gōa-pang ê gûi-hiám, siâⁿ-lāi ê gûi-hiám, khòng-iá ê gûi-hiám, hái-bīn ê gûi-hiám, ké hiaⁿ-tī ê gûi-hiám; 27 siū lô-lo̍k kap kan-khó͘ ta̍uh-ta̍uh bô khùn, iau kòa chhùi-ta, ta̍uh-ta̍uh bô chia̍h, kôaⁿ kòa thǹg-pak-theh. 28 Tû-khì chiah ê gōa-sū, iáu ū chi̍t hāng ta̍k ji̍t teh góa, chiū-sī thòe chèng kàu-hōe khòa-lū. 29 Chī-chūi loán-jio̍k, iā góa bô sòa loán-jio̍k ah? Chī-chūi tio̍h-tak, iā góa ê sim bô chhin-chhiūⁿ hé to̍h ah? 30 Góa nā put-tek-put tio̍h khoa-kháu, chiū beh khoa-kháu koan-hē góa loán-jio̍k ê sū. 31 Chú Iâ-so͘ ê Siōng-tè iā sī I ê Pē, éng-oán thang o-ló ê, chai góa bô pe̍h-chha̍t. 32 Tī Tāi-má-sek A-lí-ta̍t ông só͘ siat ê tōe-hng koaⁿ pé-siú Tāi-má-sek lâng ê siâⁿ beh lia̍h góa; 33 nā-sī góa tùi thang-á, ēng kheng tùi siâⁿ-chhiûⁿ hō͘ lâng lūi-lo̍h-khì, thoat-lī i ê chhiú.
1 雖然無利益，我不得不tio̍h誇口；我beh講起主ê異象kap啟示。 2 我bat一人tiàm-tī基督ê，十四年前受帶到第三層天；或是tiàm-tī身軀，我m̄知；或是無tiàm-tī身軀，我也m̄知；上帝知。 3 我bat一个親像chit號ê人，或是tiàm-tī身軀，或是無tī身軀，我m̄知，上帝知； 4 伊受帶到樂園，聽見bōe得thang講ê話，就是人所m̄-thang講ê。 5 我beh為tio̍h chit號人誇口；但是為tio̍h家己，除我ê軟弱以外，我無beh誇口。 6 我若ài beh誇口，也m̄是戇，因為我beh講真實；總是我家己約束，驚了人ê評論我khah過頭tī伊所看見我，á是伊tùi我所聽見ê。 7 Koh因為chiahê啟示ê極大，免得我過頭自高，所以hō͘我肉體內有刺，就是撒旦ê使者來phah我，免得我過頭自高。 8 為tio̍h án-ni，我三pái求主，hō͘ hitê離開我。 9 伊kā我講，有我ê恩，你就夠額；因為我ê氣力是tī人ê軟弱來成。所以我真歡喜，khah ài誇口我chiahê軟弱，hō͘基督ê氣力tòa tī我。 10 所以我為tio̍h基督掠chiahê軟弱、欠缺、khún-tio̍k、困迫做歡喜；因為我軟弱ê時，反tńg有氣力。 11 我成做戇，是lín逼tio̍h我；因為我合該tio̍h hō͘ lín o-ló；我雖然無甚麼tī-teh，實在無khah輸hiahê上等 ê使徒。 12 使徒ê證據，我果然用百般ê吞忍來行tī lín中間，就是chiahê兆頭、神蹟、權能。 13 除去chit項，我無連累lín，以外，lín iáu有甚麼事m̄值tio̍h其餘ê教會？Chitê無公道ê所在，請lín寬恕我。 14 Taⁿ chitê是我第三pái備辦便beh去lín hia，也無beh連累lín；我所憶tio̍h ê就是lín，m̄是lín ê物；因為kiáⁿ兒m̄應該kā父母粒積，是父母kā kiáⁿ兒粒積。 15 我真歡喜為tio̍h lín ê靈魂來開費，也費盡家己ê性命；總無我jú疼lín，jú少得tio̍h lín ê疼mah？ 16 有人講我無拖thūi lín，是我奇巧，用詭譎ê部數來the̍h lín。 17 我所差去lín hia ê人，其中我有bat用甚麼人lut lín ah？ 18 我勸提多，也差一个兄弟kap伊去。提多bat lutl ín mah？阮所行kiám m̄是同一个神？同一樣ê腳步mah？ 19 Lín到taⁿ掠做阮對lín teh分訴，阮tiàm-tī基督，講話tī上帝ê面前。所疼ê兄弟ah，一切ê事lóng是為tio̍h建立lín。 20 因為我teh驚，驚了我來ê時kiám-chhái tú-tio̍h lín無照我所ài，也lín tú-tio̍h我照lín所m̄ ài；驚了有相爭、怨妒、受氣、結黨、譭謗、講ka-chiah後話、phín-phóng、紛亂，chiahê事； 21 也驚了我koh來ê時，我ê上帝hō͘我tī lín ê面前卑微，我也為tio̍h chōe-chōe從前犯罪，也無反悔in所行ê污穢、姦淫、放蕩ê人來憂悶。
1 Sui-jiân bô lī-ek, góa put-tek-put tio̍h khoa-kháu; góa beh kóng-khí Chú ê īⁿ-siōng kap khé-sī. 2 Góa bat chi̍t lâng tiàm-tī Ki-tok ê, cha̍p-sì nî chêng siū tòa kàu tē saⁿ chàn thiⁿ; he̍k-sī tiàm-tī seng-khu, góa m̄ chai; he̍k-sī bô tiàm-tī seng-khu, góa iā m̄ chai; Siōng-tè chai. 3 Góa bat chi̍t-ê chhin-chhiūⁿ chit hō ê lâng, he̍k-sī tiàm-tī seng-khu, he̍k-sī bô tī seng-khu, góa m̄ chai, Siōng-tè chai; 4 i siū tòa kàu Lo̍k-hn̂g, thiaⁿ-kìⁿ bōe tit thang kóng ê ōe, chiū-sī lâng só͘ m̄ thang kóng ê. 5 Góa beh ūi-tio̍h chit hō lâng khoa-kháu; nā-sī ūi-tio̍h ka-kī, tû góa ê loán-jio̍k í-gōa, góa bô beh khoa-kháu. 6 Góa nā ài beh khoa-kháu, iā m̄ sī gōng, in-ūi góa beh kóng chin-si̍t; chóng-sī góa ka-kī iok-sok, kiaⁿ-liáu lâng ê phêng-lūn góa khah kè-thâu tī i só͘ khòaⁿ-kìⁿ góa, á-sī i tùi góa só͘ thiaⁿ-kìⁿ ê. 7 Koh in-ūi chiah ê khé-sī ê ke̍k tōa, bián-tit góa kè-thâu chū-ko, só͘-í hō͘ góa jio̍k-thé lāi ū chhì, chiū-sī Sat-tàn ê sù-chiá lâi phah góa, bián-tit góa kè-thâu chū-ko. 8 Ūi-tio̍h án-ni, góa saⁿ pái kiû Chú, hō͘ hit-ê lī-khui góa. 9 I kā góa kóng, Ū góa ê un, lí chiū kàu-gia̍h; in-ūi góa ê khùi-la̍t sī tī lâng ê loán-jio̍k lâi chiâⁿ. Só͘-í góa chin hoaⁿ-hí, khah ài khoa-kháu góa chiah ê loán-jio̍k, hō͘ Ki-tok ê khùi-la̍t tòa tī góa. 10 Só͘-í góa ūi-tio̍h Ki-tok lia̍h chiah ê loán-jio̍k, khiàm-kheh, khún-tio̍k, khùn-pek chòe hoaⁿ-hí; in-ūi góa loán-jio̍k ê sî, hoán-tńg ū khùi-la̍t. 11 Góa chiâⁿ-chòe gōng, sī lín pek-tio̍h góa; in-ūi góa ha̍p-kai tio̍h hō͘ lín o-ló; góa sui-jiân bô sím-mi̍h tī-teh si̍t-chāi bô khah-su hiah ê siōng-téng ê sù-tô͘. 12 Sù-tô͘ ê chèng-kù, góa kó-jiân ēng pah-poaⁿ ê thun-lún lâi kiâⁿ tī lín tiong-kan, chiū-sī chiah ê tiāu-thâu, sîn-jiah, koân-lêng. 13 Tû-khì chit hāng, góa bô liân-lūi lín, í-gōa, lín iáu ū sím-mi̍h sū m̄ ta̍t-tio̍h kî-û ê kàu-hōe? Chit ê bô kong-tō ê só͘-chāi, chhiáⁿ lín khoan-sù góa. 14 Taⁿ chit-ê sī góa tē saⁿ pái pī-pān piān beh khì lín hia, iā bô beh liân-lūi lín; góa só͘ it-tio̍h ê chiū-sī lín, m̄ sī lín ê mi̍h; in-ūi kiáⁿ-jî m̄ eng-kai kā pē-bú lia̍p-chek, sī pē-bú kā kiáⁿ-jî lia̍p-chek. 15 Góa chin hoaⁿ-hí ūi-tio̍h lín ê lêng-hûn lâi khai-hùi, iā hùi-chīn ka-kī ê sìⁿ-miā; chóng-bô góa jú thiàⁿ lín, jú chió tit-tio̍h lín ê thiàⁿ mah? 16 Ū lâng kóng góa bô thoa-thūi lín, sī góa kî-khiáu, ēng khúi-khiat ê pō͘-sò͘ lâi the̍h lín. 17 Góa só͘ chhe khì lín hia ê lâng, kî-tiong góa ū bat ēng sím-mi̍h lâng lut lín ah? 18 Góa khǹg Thê-to, iā chhe chi̍t ê hiaⁿ-tī kap i khì. Thê-to bat lut lín mah? Goán só͘ kiâⁿ kiám m̄ sī tâng chi̍t ê Sîn? tâng chi̍t iūⁿ ê kha-pō͘ mah? 19 Lín kàu taⁿ lia̍h-chòe goán tùi lín teh hun-sò͘. Goán tiàm-tī Ki-tok kóng ōe tī Siōng-tè ê bīn-chêng. Só͘ thiàⁿ ê hiaⁿ-tī ah, it-chhè ê sū lóng sī ūi-tio̍h kiàn-li̍p lín. 20 In-ūi góa teh kiaⁿ, kiaⁿ-liáu góa lâi ê sî kiám-chhái tú-tio̍h lín bô chiàu góa só͘ ài, iā lín tú-tio̍h góa chiàu lín só͘ m̄ ài; kiaⁿ-liáu ū saⁿ-chiⁿ, oàn-tò͘, siū-khì, kiat-tóng, húi-pòng, kóng ka-chiah-āu ōe, phín-phóng, hun-loān, chiah ê sū; 21 iā kiaⁿ-liáu góa koh lâi ê sî, góa ê Siōng-tè hō͘ góa tī lín ê bīn-chêng pi-bî, góa iā ūi-tio̍h chōe-chōe chiông-chiân hoān-chōe, iā bô hoán-hóe in só͘ kiâⁿ ê ù-òe, kan-îm, hòng-tōng ê lâng lâi iu-būn.
1 Chitê是第三pái我beh到lín hia，用兩三ê干證ê人ê嘴，ta̍k句lóng有憑準。 2 我bat事先講ê，taⁿ koh事先講伊，親像第二pái saⁿ-kap tī-teh，也現今saⁿ離開，kā chiahê從前犯罪ê，以及其餘ê眾人講，我若koh來，無beh寬恕； 3 因為lín ài得tio̍h基督tiàm-tī我來講話ê憑據；伊ǹg lín m̄是軟弱，就是有權能tī lín中間。 4 伊tùi軟弱來受釘十字架；總是tùi上帝ê權能來活。親像án-ni，阮tiàm-tī伊也軟弱，總是tùi上帝ǹg lín所顯明ê權能beh kap伊saⁿ-kap活。 5 Lín tio̍h試看本身有tiàm-tī信á無；tio̍h家己驗看。á是m̄知，lín若m̄是thang棄sak ê，就有耶穌基督tiàm-tī lín？ 6 阮也ǹg望lín會知阮m̄是thang棄sak ê。 7 Taⁿ阮求上帝hō͘ lín所行無一項pháiⁿ，m̄是beh顯明阮做thang接納ê，是beh hō͘ lín ê行做lóng好，阮雖然做親像thang棄sak ê，也thang。 8 因為阮bōe會做甚麼來逆真理，就是幫贊真理。 9 阮軟弱，lín勇壯，阮就歡喜；阮所祈求ê就是hō͘ lín能完全。 10 因為án-ni，我saⁿ離開ê時，寫chiahê hō͘ lín，thang tī saⁿ見面ê時，免照主所hō͘我ê權，來用嚴法；chitê權是beh起造，m̄是beh chhia倒。 11 兄弟ah，結尾來講，tio̍h歡喜，tio̍h完全，tio̍h受安慰，tio̍h同心，tio̍h和睦；就賞賜仁愛kap平安ê上帝beh kap lín tī-teh。 12 tio̍h用聖ê saⁿ-chim來saⁿ請安。 13 Chiahê聖徒lóng請安lín。 14 願主耶穌基督ê恩典，上帝ê疼痛，聖神ê相通，kap lín眾人tī-teh。
1 Chit-ê sī tē saⁿ pái góa beh kàu lín hia. Ēng nn̄g saⁿ ê kan-chèng ê lâng ê chhùi, ta̍k kù lóng ū pîn-chún. 2 Góa bat tāi-seng kóng ê, taⁿ koh tāi-seng kóng i, chhin-chhiūⁿ tē jī pái saⁿ-kap tī-teh iā hiān-kim saⁿ lī-khui, kā chiah ê chiông-chiân hoān-chōe ê, í-ki̍p kî-û ê chèng lâng kóng, góa nā koh lâi, bô beh khoan-sù; 3 in-ūi lín ài tit-tio̍h Ki-tok tiàm-tī góa lâi kóng ōe ê pîn-kù; I ǹg lín m̄ sī loán-jio̍k, chiū-sī ū koân-lêng tī lín tiong-kan. 4 I tùi loán-jio̍k lâi siū tèng si̍p-jī-kè; chóng-sī tùi Siōng-tè ê koân-lêng lâi oa̍h. Chhin-chhiūⁿ án-ni goán tiàm-tī I iā loán-jio̍k, chóng-sī tùi Siōng-tè ǹg lín só͘ hián-bêng ê koân-lêng beh kap I saⁿ-kap oa̍h. 5 Lín tio̍h chhì-khòaⁿ pún-sin ū tiàm-tī sìn á bô; tio̍h ka-kī giām-khòaⁿ. Á-sī m̄ chai, lín nā m̄ sī thang khì-sak ê, chiū ū Iâ-so͘ Ki-tok tiàm-tī lín? 6 Goán iā ǹg-bāng lín ōe chai goán m̄ sī thang khì-sak ê. 7 Taⁿ goán kiû Siōng-tè hō͘ lín só͘ kiâⁿ bô chi̍t hāng pháiⁿ, m̄ sī beh hián-bêng goán chòe thang chiap-la̍p ê, sī beh hō͘ lín ê kiâⁿ-chòe lóng hó, goán sui-jiân chòe chhin-chhiūⁿ thang khì-sak ê, iā thang. 8 In-ūi goán bōe-ōe chòe sím-mi̍h lâi ke̍h chin-lí, chiū-sī pang-chān chin-lí. 9 Goán loán-jio̍k, lín ióng-chòng, goán chiū hoaⁿ-hí; goán só͘ kî-kiû ê chiū-sī hō͘ lín ōe oân-choân. 10 In-ūi án-ni, góa saⁿ lī-khui ê sî siá chiah-ê hō͘ lín, thang tī saⁿ kìⁿ-bīn ê sî, bián chiàu Chú só͘ hō͘ góa ê koân, lâi ēng giâm hoat; chit ê koân sī beh khí-chō, m̄ sī beh chhia-tó. 11 Hiaⁿ-tī ah, kiat-bé lâi kóng, tio̍h hoaⁿ-hí. Tio̍h oân-choân, tio̍h siū an-ùi, tio̍h tâng sim, tio̍h hô-bo̍k; chiū siúⁿ-sù jîn-ài kap pêng-an ê Siōng-tè beh kap lín tī-teh. 12 Tio̍h ēng sèng ê saⁿ-chim lâi saⁿ chhéng-an. 13 Chiah ê sèng-tô͘ lóng chhéng-an lín. 14 Goān Chú Iâ-so͘ Ki-tok ê un-tián, Siōng-tè ê thiàⁿ-thàng, Sèng Sîn ê siong-thong, kap lín chèng lâng tī-teh.