1 摩西tī約旦外，tī曠野Só͘-hut對面ê A-la̍h-pa，就是tī Pa-lân、Tô-hut、拉班、Hap-sé-lio̍k、Tí-sat-hap ê中間，對以色列ê眾人所講ê話，記tī下底。 2 Tùi Hô-lia̍t經過Se-jíⁿ山ê路到Ka-te-su Pa-nî-a，有十一日ê路站。 3 Tī第四十年，十一月初一日，摩西照耶和華一切所命令伊ê，lóng kā以色列人講。 4 Hit時伊已經phah贏khiā起tī Hi-si̍t-pún ê A-mô͘-lī王Se-hông，kap khiā起tī Í-tek-lâi，A-su-tha-lio̍k ê Pa-san王Go̍k； 5 摩西tī約旦外ê Mô͘-ap地，起頭傳chitê律法講： 6 耶和華咱ê上帝tī Hô-lia̍t吩咐咱講：Lín khiā起chitê山已經久lah； 7 tio̍h起身oa̍t-tńg到A-mô͘-lī人ê山地，kap近óa hia ê ta̍k所在，tī A-la̍h-pa，tī山地，tī平洋，tī南方，沿海一帶，迦南人ê地，kap黎巴嫩，koh到大河，就是Pek-la̍h河。 8 Taⁿ我用chitê地排列tī lín ê面前，lín tio̍h入去得tio̍h伊來做業，就是耶和華對lín ê祖，亞伯拉罕、以撒、雅各，chiù-chōa beh賞賜in kap in ê後裔ê地。 9 Hit時我kā lín講：Lín ê責成，我家己一个擔當bōe起。 10 耶和華lín ê上帝hō͘ lín加添chōe-chōe，看ah，lín今á日親像天頂ê星hiah-chōe。 11 願耶和華lín列祖ê上帝，hō͘ lín比現今加千倍chōe，也照伊所應允lín ê賜福lín。 12 Lín ê重擔，lín ê責成，kap lín ê冤家，我家己一个thái-thó擔當能起ah？ 13 Lín tio̍h照ta̍k支派揀有智慧，有見識，有名望ê人，我設立in做lín ê首領。 14 Lín應我講：你所講ê是好，thang行伊。 15 我就將lín ta̍k支派ê首領，就是有智慧，有名望ê人，設立in做首領，就是千總、百總、五十夫長、十夫長，kap 有司，照lín ê支派，來管理lín。 16 當時我命令lín ê審判官講：Lín tī lín兄弟中審判，或是人kap伊ê兄弟，á是kap in中間ê出外人，有相告，tio̍h照公道判斷； 17 審判ê時，m̄-thang看人ê外貌，弱kap強平平tio̍h聽伊；m̄-thang驚畏人；因為審判屬tī上帝；lín oh解決ê事，hō͘伊到我chia，我就判斷伊。 18 Hit時我將lín所應該行ê事lóng命令lín。 19 咱照耶和華咱ê上帝所命令咱ê，tùi Hô-lia̍t起身，經過lín所看見hitê大koh thang驚ê曠野，路tùi A-mô͘-lī人ê山地；咱就到Ka-te-su Pa-nî-a。 20 我對lín講，Lín已經到耶和華咱ê上帝賞賜咱A-mô͘-lī人ê山地。 21 看ah，耶和華lín ê上帝，已經將hitê地排列tī你ê面前；你tio̍h照耶和華你ê列祖ê上帝所對你講ê，上去來得tio̍h伊做業；莫得驚，莫得懍。 22 Hit時lín lóng就近我來講：咱tio̍h差人事先去，kā咱偷看hitê地，回覆咱，看咱tio̍h tùi甚麼路上去，甚麼城入去。 23 這話我看做好；我就tùi lín中間揀十二人，每支派一人； 24 in就oa̍t-tńg身上山地去，到Í-si̍t-kok ê山谷，偷看伊。 25 In手裡the̍h hit所在ê果子，帶來到咱hia，回覆咱講：耶和華咱ê上帝所賞賜咱ê，是好ê土地。 26 總是lín m̄肯上去，背耶和華lín ê上帝ê命令； 27 koh tī lín ê布棚內哀怨講：因為耶和華怨恨咱，所以chhōa咱出埃及地，beh將咱交tī A-mô͘-lī人ê手，剿滅咱。 28 咱beh上去toh落ah？咱ê兄弟hō͘咱失志，講：Hia ê百姓比咱khah大khah lò，城闊大koh堅固，高到抵天；koh阮tī-hia看見A-la̍p族ê人。 29 我就對lín講，莫得懍，莫得驚in。 30 行tī lín ê面前ê耶和華lín ê上帝，beh替lín交戰，親像伊tī埃及為tio̍h lín來行tī lín目睭前一切ê事； 31 koh親像伊行tī曠野，tī-hia你看見耶和華你ê上帝tī你一切所行ê路有怎樣iāng你，親像人iāng伊ê kiáⁿ一樣，到lín到tī chitê所在。 32 總是lín tī chitê事m̄信耶和華lín ê上帝； 33 伊tī路裡，tī lín ê頭前teh行，kā lín chhē安營ê所在；暝時用火，日時用雲，指示lín所tio̍h行ê路。 34 耶和華聽見chiahê話ê聲，就受氣，chiù-chōa講： 35 Chitê pháiⁿ世代ê人決斷無一个能看見我chiù-chōa賞賜lín列祖ê好地； 36 只有Iâ-hu-nî ê kiáⁿ迦勒beh得tio̍h看見；koh我beh用伊所踏tio̍h ê地賞賜伊，kap伊ê kiáⁿ孫；因為伊專心tè耶和華。 37 耶和華為tio̍h lín ê緣故也受氣我，講：你也bōe得tio̍h入hitê所在； 38 跟隨你ê，Lùn ê kiáⁿ約書亞，伊beh入去hia；你tio̍h勇壯伊ê心志，因為伊beh hō͘以色列人承接hitê所在； 39 koh lín ê gín-ná，就是lín所講beh受掠ê，kap今á日lín hiahê bōe曉好pháiⁿ ê kiáⁿ兒，beh入去hia；我beh將hit所在hō͘ in，in beh得tio̍h做業； 40 論到lín，lín tio̍h oa̍t倒tńg起身，tùi紅海ê路去曠野。 41 Hit時lín應我講：阮得罪耶和華；taⁿ阮beh照耶和華阮ê上帝一切所命令ê，上去交戰。Tùi hit-tia̍p，lín ta̍k人帶軍器，隨便上去山地。 42 耶和華kā我講：你tio̍h kā in講：M̄-thang上去，也m̄-thang交戰；因為我無tī lín中間，驚了lín 刣輸對敵。 43 我就kā lín講；總是lín m̄聽thàn，悖逆耶和華ê命令，自專上去山地。 44 Tiàm tī山裡ê A-mô͘-lī人就出來攻擊lín，親像蜂追趕lín一般，tī Se-jíⁿ 刣贏lín，直到Hô-jíⁿ-má。 45 Lín就倒tńg來，tī耶和華ê面前啼哭；總是耶和華m̄聽lín ê聲，也m̄ àⁿ耳孔ǹg lín。 46 Lín就tiàm tī Ka-te-su chōe-chōe日，照lín tiàm tī-hia ê日。
1 Mô͘-se tī Iok-tàn gōa, tī khòng-iá Só͘-hut tùi-bīn ê A-la̍h-pa, chiū-sī tī Pa-lân, Tô-hut, La̍h-pan, Hap-sé-lio̍k, Tí-sat-hap ê tiong-kan, tùi Í-sek-lia̍t ê chèng-lâng só͘ kóng ê ōe, kì tī ē-tóe. 2 Tùi Hô-lia̍t keng-kè Se-jíⁿ soaⁿ ê lō͘ kàu Ka-te-su Pa-nî-a, ū cha̍p-it ji̍t ê lō͘-chām. 3 Tī tē sì-cha̍p nî, cha̍p-it ge̍h chhoe-it ji̍t, Mô͘-se chiàu Iâ-hô-hoa it-chhè só͘ bēng-lēng i ê, lóng kā Í-sek-lia̍t lâng kóng. 4 Hit-sî i í-keng phah-iâⁿ khiā-khí tī Hi-si̍t-pún ê A-mô͘-lī ông Se-hông, kap khiā-khí tī Í-tek-lâi, A-su-tha-lio̍k ê Pa-san ông Go̍k; 5 Mô͘-se tī Iok-tàn gōa ê Mô͘-ap tōe, khí-thâu thoân chit ê lu̍t-hoat kóng, 6 Iâ-hô-hoa lán ê Siōng-tè tī Hô-lia̍t hoan-hù lán kóng, Lín khiā-khí chit ê soaⁿ í-keng kú lah; 7 tio̍h khí-sin oa̍t-tńg kàu A-mô͘-lī lâng ê soaⁿ-tōe, kap kūn-óa hia ê ta̍k só͘-chāi, tī A-la̍h-pa, tī soaⁿ-tōe, tī pîⁿ-iûⁿ, tī lâm-hng, iân-hái it-tài, Ka-lâm lâng ê tōe, kap Lī-pa-lùn, koh kàu tōa-hô, chiū-sī Pek-la̍h hô. 8 Taⁿ Góa ēng chit ê tōe pâi-lia̍t tī lín ê bīn-chêng, lín tio̍h ji̍p-khì tit-tio̍h i lâi chòe gia̍p, chiū-sī Iâ-hô-hoa tùi lín ê chó͘, A-pek-la̍h-hán, Í-sat, Ngá-kok, chiù-chōa beh siúⁿ-sù in kap in ê hō͘-è ê tōe. 9 Hit-sî góa kā lín kóng, Lín ê chek-sêng, góa ka-kī chi̍t-ê tam-tng bōe khí. 10 Iâ-hô-hoa lín ê Siōng-tè hō͘ lín ke-thiⁿ chōe-chōe, khòaⁿ ah, lín kin-á-ji̍t chhin-chhiūⁿ thiⁿ-téng ê chhiⁿ hiah-chōe. 11 Goān Iâ-hô-hoa lín lia̍t-chó͘ ê Siōng-tè, hō͘ lín pí hiān-kim ke chheng-pē chōe, iā chiàu I só͘ èng-ún lín-ê sù-hok lín. 12 Lín ê tāng-tàⁿ, lín ê chek-sêng, kap lín ê oan-ke, góa ka-kī chi̍t-ê thái-thó tam-tng ōe khí ah? 13 Lín tio̍h chiàu ta̍k chi-phài kéng ū tì-hūi, ū kiàn-sek, ū bêng-bōng ê lâng, góa siat-li̍p in chòe lín ê siú-léng. 14 Lín ìn góa kóng, Lí só͘-kóng-ê sī hó, thang kiâⁿ-i. 15 Góa chiū chiong lín ta̍k chi-phài ê siú-léng, chiū-sī ū tì-hūi, ū bêng-bōng ê lâng, siat-li̍p in chòe siú-léng, chiū-sī chhian-chóng, peh-chóng, ngó͘-si̍p-hu-tióng, si̍p-hu-tióng, kap iú-si, chiàu lín ê chi-phài, lâi koán-lí lín. 16 Tng-sî góa bēng-lēng lín ê sím-phòaⁿ-koaⁿ kóng, Lín tī lín hiaⁿ-tī tiong sím-phòaⁿ, he̍k-sī lâng kap i ê hiaⁿ-tī, á-sī kap in tiong-kan ê chhut-gōa lâng, ū saⁿ-kò, tio̍h chiàu kong-tō phòaⁿ-toàn; 17 sím-phòaⁿ ê sî, m̄-thang khòaⁿ lâng ê gōa-māu, jio̍k kap kiông pîⁿ-pîⁿ tio̍h thiaⁿ i; m̄-thang kiaⁿ-ùi lâng; in-ūi sím-phòaⁿ sio̍k tī Siōng-tè; lín oh kái-koat ê sū, hō͘ i kàu góa chia, góa chiū phòaⁿ-toàn i. 18 Hit-sî góa chiong lín só͘ eng-kai kiâⁿ ê sū lóng bēng-lēng lín. 19 Lán chiàu Iâ-hô-hoa lán ê Siōng-tè só͘ bēng-lēng lán ê, tùi Hô-lia̍t khí-sin, keng-kè lín só͘ khòaⁿ-kìⁿ hit ê tōa koh thang kiaⁿ ê khòng-iá, lō͘ tùi A-mô͘-lī lâng ê soaⁿ-tōe; lán chiū kàu Ka-te-su Pa-nî-a. 20 Góa tùi lín kóng, Lín í-keng kàu Iâ-hô-hoa lán ê Siōng-tè siúⁿ-sù lán A-mô͘-lī lâng ê soaⁿ-tōe. 21 Khòaⁿ ah, Iâ-hô-hoa lín ê Siōng-tè, í-keng chiong hit ê tōe pâi-lia̍t tī lí ê bīn-chêng; lí tio̍h chiàu Iâ-hô-hoa lí ê lia̍t-chó͘ ê Siōng-tè só͘ tùi lí kóng ê, chiūⁿ-khì lâi tit-tio̍h i chòe-gia̍p; bo̍h-tit kiaⁿ, bo̍h-tit lún. 22 Hit-sî lín lóng chiū-kūn góa lâi kóng, Lán tio̍h chhe lâng tāi-seng khì, kā lán thau-khòaⁿ hit ê tōe, hê-hok lán, khòaⁿ lán tio̍h tùi sím-mi̍h lō͘ chiūⁿ-khì, sím-mi̍h siâⁿ ji̍p-khì. 23 Che ōe góa khòaⁿ chòe-hó; góa chiū tùi lín tiong-kan kéng cha̍p-jī lâng, múi chi-phài chi̍t lâng; 24 in chiū oa̍t-tńg-sin chiūⁿ soaⁿ-tōe khì, kàu Í-si̍t-kok ê soaⁿ-kok, thau-khòaⁿ i. 25 In chhiú-ni̍h the̍h hit só͘-chāi ê ké-chí, tòa lâi kàu lán hia, hê-hok lán kóng, Iâ-hô-hoa lán ê Siōng-tè só͘ siúⁿ-sù lán-ê, sī hó ê thó͘-tōe. 26 Chóng-sī lín m̄-khéng chiūⁿ-khì, pōe Iâ-hô-hoa lín ê Siōng-tè ê bēng-lēng; 27 koh tī lín ê pò͘-pîⁿ-lāi ai-oàn kóng, In-ūi Iâ-hô-hoa oàn-hūn lán, só͘-í chhōa lán chhut Ai-ki̍p tōe, beh chiong lán kau tī A-mô͘-lī lâng ê chhiú, châu-bia̍t lán. 28 Lán beh chiūⁿ-khì toh-lo̍h ah? Lán ê hiaⁿ-tī hō͘ lán sit-chì, kóng, Hia ê peh-sìⁿ pí lán khah tōa khah lò, siâⁿ khoah-tōa koh kian-kò͘, koâiⁿ kàu tú-thiⁿ; koh goán tī-hia khòaⁿ-kìⁿ A-la̍p cho̍k ê lâng. 29 Góa chiū tùi lín kóng, Bo̍h-tit lún, bo̍h-tit kiaⁿ in. 30 Kiâⁿ tī lín ê bīn-chêng ê Iâ-hô-hoa lín ê Siōng-tè, beh thòe lín kau-chiàn, chhin-chhiūⁿ I tī Ai-ki̍p ūi-tio̍h lín lâi kiâⁿ tī lín ba̍k-chiu-chêng it-chhè ê sū; 31 koh chhin-chhiūⁿ I kiâⁿ tī khòng-iá, tī-hia lí khòaⁿ-kìⁿ Iâ-hô-hoa lí ê Siōng-tè tī lí it-chhè só͘ kiâⁿ ê lō͘ ū cháiⁿ-iūⁿ iāng lí, chhin-chhiūⁿ lâng iāng i ê kiáⁿ chi̍t-iūⁿ, kàu lín kàu tī chit ê só͘-chāi. 32 Chóng-sī lín tī chit ê sū m̄-sìn Iâ-hô-hoa lín ê Siōng-tè; 33 I tī lō͘-ni̍h, tī lín ê thâu-chêng teh kiâⁿ, kā lín chhē an-iâⁿ ê só͘-chāi; mî-sî ēng hé, ji̍t-sî ēng hûn, chí-sī lín só͘ tio̍h kiâⁿ ê lō͘. 34 Iâ-hô-hoa thiaⁿ-kìⁿ chiah ê ōe ê siaⁿ, chiū siū-khì, chiù-chōa kóng, 35 Chit ê pháiⁿ sè-tāi ê lâng koat-toàn bô chi̍t-ê ōe khòaⁿ-kìⁿ Góa chiù-chōa siúⁿ-sù lín lia̍t-chó͘ ê hó-tōe; 36 chí-ū Iâ-hu-nî ê kiáⁿ Ka-le̍k beh tit-tio̍h khòaⁿ-kìⁿ; koh Góa beh ēng i só͘ ta̍h-tio̍h ê tōe siúⁿ-sù i, kap i ê kiáⁿ-sun; in-ūi i choan-sim tè Iâ-hô-hoa. 37 Iâ-hô-hoa ūi-tio̍h lín ê iân-kò͘ iā siū-khì góa, kóng, Lí iā bōe tit-tio̍h ji̍p hit ê só͘-chāi; 38 kun-sûi lí ê, Lùn ê kiáⁿ Iok-su-a, i beh ji̍p-khì hia; lí tio̍h ióng-chòng i ê sim-chì, in-ūi i beh hō͘ Í-sek-lia̍t lâng sêng-chiap hit ê só͘-chāi; 39 koh lín ê gín-ná, chiū-sī lín só͘ kóng beh siū-lia̍h-ê, kap kin-á-ji̍t lín hiah-ê bōe hiáu hó-pháiⁿ ê kiáⁿ-jî, beh ji̍p-khì hia; Góa beh chiong hit só͘-chāi hō͘ in, in beh tit-tio̍h chòe-gia̍p; 40 lūn-kàu lín, lín tio̍h oa̍t-tò-tńg khí-sin, tùi Âng-hái ê lō͘ khì khòng-iá. 41 Hit-sî lín ìn góa kóng, Goán tek-chōe Iâ-hô-hoa; taⁿ goán beh chiàu Iâ-hô-hoa goán ê Siōng-tè it-chhè só͘ bēng-lēng ê, chiūⁿ-khì kau-chiàn. Tùi hit-tia̍p lín ta̍k-lâng tòa kun-khì, sûi-piān chiūⁿ-khì soaⁿ-tōe. 42 Iâ-hô-hoa kā góa kóng, Lí tio̍h kā in kóng, M̄-thang chiūⁿ-khì, iā m̄-thang kau-chiàn; in-ūi Góa bô tī lín tiong-kan, kiaⁿ-liáu lín thâi-su tùi-te̍k. 43 Góa chiū kā lín kóng; chóng-sī lín m̄ thiaⁿ-thàn, pōe-ge̍k Iâ-hô-hoa ê bēng-lēng, chū-choan chiūⁿ-khì soaⁿ-tōe. 44 Tiàm tī soaⁿ-ni̍h ê A-mô͘-lī lâng chiū chhut-lâi kong-kek lín, chhin-chhiūⁿ phang tui-kóaⁿ lín chi̍t-poaⁿ, tī Se-jíⁿ thâi-iâⁿ lín, ti̍t-kàu Hô-jíⁿ-má. 45 Lín chiū tò-tńg lâi, tī Iâ-hô-hoa ê bīn-chêng thî-khàu; chóng-sī Iâ-hô-hoa m̄-thiaⁿ lín ê siaⁿ, iā m̄ àⁿ hī-khang ǹg lín. 46 Lín chiū tiàm tī Ka-te-su chōe-chōe ji̍t, chiàu lín tiàm tī-hia ê ji̍t.
1 Chit-tia̍p了後，咱oa̍t倒tńg起身，tùi紅海ê路去曠野；是照耶和華所對我講ê；咱se̍h Se-jíⁿ山chōe-chōe日。 2 耶和華吩咐我講： 3 Lín se̍h chitê山久lah；tio̍h oa̍t-tńg ǹg北勢去。 4 你tio̍h吩咐百姓講：以掃ê kiáⁿ孫lín ê兄弟tiàm tī Se-jíⁿ；lín beh經過in ê境界，in beh驚lín；所以lín tio̍h不止謹慎； 5 m̄-thang kap in爭戰in ê地，就若一腳跡位，我lóng無hō͘ lín，因為我已經將Se-jíⁿ山hō͘以掃做業。 6 Lín tio̍h用銀tùi in買米糧來食，也tio̍h用銀tùi in買水來lim； 7 因為耶和華你ê上帝，tī你ê手所做一切ê工，賜福你；你行chitê大ê曠野，伊lóng知；chit四十年，耶和華你ê上帝kap你tī-teh，你lóng無欠缺一項。 8 Tùi án-ni，咱離開咱ê兄弟以掃ê kiáⁿ孫，khiā起tī Se-jíⁿ ê；tùi A-la̍h-pa ê路經過Í-la̍h-tha、Í-sûn-ka-pia̍t。咱就oa̍t-tńg經過Mô͘-ap曠野ê路去。 9 耶和華對我講，M̄-thang攪擾Mô͘-ap人，也m̄-thang kap in交戰；in ê地我lóng無beh hō͘你做業；因為我已經將A-jíⁿ hō͘羅得ê kiáⁿ孫做業。 10 (早前有Í-bí人khiā起tī-hia，百姓chōe，大koh lò，親像A-la̍p人一樣。 11 In也hō͘人算in做Lī-hoa̍t-im人，親像A-la̍p人一樣；總是Mô͘-ap人稱伊做Í-bí人。 12 早前Hô-lī人也khiā起tī Se-jíⁿ；總是以掃ê kiáⁿ孫續接伊；in tī in ê面前剿滅in，來tòa tī in ê所在，親像以色列tī耶和華賞賜in做業ê地所行ê。) 13 Taⁿ lín tio̍h起來過Sat-lia̍t溪；Tùi án-ni，咱過Sat-lia̍t溪。 14 對咱離開Ka-te-su Pa-nî-a，到過Sat-lia̍t溪ê日，共三十八年；到hit代ê武士lóng死無tī軍營中，照耶和華對in所chiù-chōa-ê。 15 Koh耶和華ê手攻擊in，tùi軍營中剿滅in，到in lóng死無。 16 武士tùi百姓中lóng剿滅死無以後， 17 耶和華吩咐我講： 18 你今á日tio̍h tùi Mô͘-ap ê境界A-jíⁿ經過； 19 行近A-bûn人ê對面，m̄-thang攪擾in，也m̄-thang kap in爭戰；因為A-bûn人ê地我無hō͘ lín做業，因為我已經賞賜羅得ê kiáⁿ孫做業。 20 (hitê地也算做Lī-hoa̍t-im人ê地；早前Lī-hoa̍t-im人tiàm tī-hia，A-bûn人稱in做Sàn-sòng-bêng； 21 Hiah-ê百姓chōe，大koh lò，親像A-la̍p人一樣；總是耶和華tī A-bûn人ê面前剿滅in，in就得tio̍h in ê地，續接khiā起； 22 親像伊為以掃ê kiáⁿ孫，khiā起tī Se-jíⁿ ê，滅Hô-lī人tī in ê面前，in就續接khiā起in ê地到今á日； 23 koh有A-ōe人khiā起tī鄉社，續到Ka-sat ê；tùi Ka-húi-thok出來ê Ka-húi-thok人滅in，來khiā起tī in ê位。) 24 Taⁿ lín tio̍h起來，起身過A-lùn ê山谷；看ah，我已經將A-mô͘-lī人Hi-si̍t-pún王Se-hông，kap伊ê地，交tī你ê手頭；你tio̍h起手得tio̍h伊ê地，去kap伊交戰。 25 Tùi今á日起，我beh hō͘天下萬百姓，聽見你ê名聲ê，驚lín，忍lín；koh因為你ngia̍uh-ngia̍uh-chhoah，痛苦。 26 我就tùi Ki-tí-bo̍k ê曠野，差使者去見Hi-si̍t-pún王Se-hông，用和平ê話講： 27 求你容允我對你ê地經過；我beh行大路，無偏左，無偏右； 28 你the̍h我ê銀，賣米糧hō͘我食，the̍h我ê銀，用水賣我lim；獨獨准我步行過去； 29 親像tiàm tī Se-jíⁿ ê以掃ê kiáⁿ孫，kap tiàm tī A-jíⁿ ê Mô͘-ap人款待我一樣；thèng候我過約旦河，入耶和華阮ê上帝所賞賜阮ê地。 30 總是Hi-si̍t-pún王Se-hông m̄肯hō͘咱對伊hia經過，因為耶和華你ê上帝hō͘伊ê性情固執、心硬，為tio̍h beh將伊交付tī你ê手；親像今á日一樣。 31 耶和華kā我講：看ah，tùi chit-tia̍p起，我beh將Se-hông kap伊ê地，交付tī你ê面前，你taⁿ tio̍h得tio̍h伊ê地做業。 32 Hit時Se-hông kap伊ê眾百姓出來抵敵咱，交戰tī Ngá-cha̍p。 33 耶和華咱ê上帝將伊交付咱，咱就phah死伊，kap伊ê kiáⁿ，以及伊ê眾百姓。 34 當hit時咱取伊lóng總ê城，剿滅有人khiā起ê城，連婦人人kap gín-ná，無留一个； 35 獨獨cheng-siⁿ kap所搶ta̍k-ê城ê贓物，lóng取來做家己ê路用。 36 Tùi A-lùn山谷邊ê A-lô-jíⁿ，以及山谷中ê城，到tī Ki-lia̍t，無一个城堅固，hō͘咱取伊無tio̍h；因為耶和華咱ê上帝lóng交付咱； 37 只有A-bûn人ê地，Ngá-phok河邊ê地，kap山地chiahê城，kap耶和華咱ê上帝所禁咱去ê地，你lóng無óa近伊。
1 Chit-tia̍p liáu-āu, lán oa̍t-tò-tńg khí-sin, tùi Âng-hái ê lō͘ khì khòng-iá; sī chiàu Iâ-hô-hoa só͘ tùi góa kóng-ê; lán se̍h Se-jíⁿ soaⁿ chōe-chōe ji̍t. 2 Iâ-hô-hoa hoan-hù góa kóng, 3 Lín se̍h chit ê soaⁿ kú lah; tio̍h oa̍t-tńg ǹg pak-sì khì. 4 Lí tio̍h hoan-hù peh-sìⁿ kóng, Í-sò ê kiáⁿ-sun lín ê hiaⁿ-tī tiàm tī Se-jíⁿ; lín beh keng-kè in ê kéng-kài, in beh kiaⁿ lín; só͘-í lín tio̍h put-chí kín-sīn; 5 m̄-thang kap in cheng-chiàn in ê tōe, chiū nā chi̍t kha-jiah-ūi, Góa lóng bô hō͘ lín, in-ūi Góa í-keng chiong Se-jíⁿ soaⁿ hō͘ Í-sò chòe-gia̍p. 6 Lín tio̍h ēng gûn tùi in bóe bí-niû lâi chia̍h, iā tio̍h ēng gûn tùi in bóe chúi lâi lim; 7 in-ūi Iâ-hô-hoa lí ê Siōng-tè, tī lí ê chhiú só͘ chòe it-chhè ê kang, sù-hok lí; lí kiâⁿ chit ê tōa ê khòng-iá, I lóng chai; chit sì-cha̍p nî, Iâ-hô-hoa lí ê Siōng-tè kap lí tī-teh, lí lóng bô khiàm-kheh chi̍t-hāng. 8 Tùi án-ni, lán lī-khui lán ê hiaⁿ-tī Í-sò ê kiáⁿ-sun, khiā-khí tī Se-jíⁿ ê; tùi A-la̍h-pa ê lō͘ keng-kè Í-la̍h-tha, Í-sûn-ka-pia̍t. Lán chiū oa̍t-tńg keng-kè Mô͘-ap khòng-iá ê lō͘ khì. 9 Iâ-hô-hoa tùi góa kóng, M̄-thang kiáu-jiáu Mô͘-ap lâng, iā m̄-thang kap in kau-chiàn; in ê tōe Góa lóng bô beh hō͘ lí chòe-gia̍p; in-ūi Góa í-keng chiong A-jíⁿ hō͘ Lô-tek ê kiáⁿ-sun chòe-gia̍p. 10 (Chá-chêng ū Í-bí lâng khiā-khí tī-hia, peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ. 11 In iā hō͘ lâng sǹg in chòe Lī-hoa̍t-im lâng, chhin-chhiūⁿ A-la̍p lâng chi̍t-iūⁿ; chóng-sī Mô͘-ap lâng chheng i chòe Í-bí lâng. 12 Chá-chêng Hô-lī lâng iā khiā-khí tī Se-jíⁿ; chóng-sī Í-sò ê kiáⁿ-sun sòa-chiap i; in tī in ê bīn-chêng châu-bia̍t in, lâi tòa tī in ê só͘-chāi, chhin-chhiūⁿ Í-sek-lia̍t tī Iâ-hô-hoa siúⁿ-sù in chòe-gia̍p ê tōe só͘ kiâⁿ ê.) 13 Taⁿ lín tio̍h khí-lâi kè Sat-lia̍t khoe; tùi án-ni lán kè Sat-lia̍t khoe. 14 Tùi lán lī-khui Ka-te-su Pa-nî-a, kàu kè Sat-lia̍t khoe ê ji̍t, kiōng saⁿ-cha̍p-poeh nî; kàu hit-tāi ê bú-sū lóng sí-bô tī kun-iâⁿ-tiong, chiàu Iâ-hô-hoa tùi in só͘ chiù-chōa-ê. 15 Koh Iâ-hô-hoa ê chhiú kong-kek in, tùi kun-iâⁿ-tiong châu-bia̍t in, kàu in lóng sí-bô. 16 Bú-sū tùi peh-sìⁿ-tiong lóng châu-bia̍t sí-bô í-āu, 17 Iâ-hô-hoa hoan-hù góa kóng, 18 Lí kin-á-ji̍t tio̍h tùi Mô͘-ap ê kéng-kài A-jíⁿ keng-kè; 19 kiâⁿ kūn A-bûn lâng ê tùi-bīn, m̄-thang kiáu-jiáu in, iā m̄-thang kap in cheng-chiàn; in-ūi A-bûn lâng ê tōe Góa bô hō͘ lín chòe-gia̍p, in-ūi Góa í-keng siúⁿ-sù Lô-tek ê kiáⁿ-sun chòe-gia̍p. 20 (Hit ê tōe iā sǹg-chòe Lī-hoa̍t-im lâng ê tōe; chá-chêng Lī-hoa̍t-im lâng tiàm tī-hia, A-bûn lâng chheng in chòe Sàn-sòng-bêng; 21 hiah ê peh-sìⁿ chōe, tōa koh lò, chhin-chhiūⁿ A-la̍p lâng chi̍t-iūⁿ; chóng-sī Iâ-hô-hoa tī A-bûn lâng ê bīn-chêng châu-bia̍t in, in chiū tit-tio̍h in ê tōe, sòa-chiap khiā-khí; 22 chhin-chhiūⁿ I ūi Í-sò ê kiáⁿ-sun, khiā-khí tī Se-jíⁿ ê, bia̍t Hô-lī lâng tī in ê bīn-chêng, in chiū sòa-chiap khiā-khí in ê tōe kàu kin-á-ji̍t; 23 koh ū A-ōe lâng khiā-khí tī hiuⁿ-siā, sòa kàu Ka-sat ê; tùi Ka-húi-thok chhut-lâi ê Ka-húi-thok lâng bia̍t in, lâi khiā-khí tī in ê ūi.) 24 Taⁿ lín tio̍h khí-lâi, khí-sin kè A-lùn ê soaⁿ-kok; khòaⁿ ah, Góa í-keng chiong A-mô͘-lī lâng Hi-si̍t-pún ông Se-hông, kap i ê tōe, kau tī lí ê chhiú-thâu; lí tio̍h khí-chhiú tit-tio̍h i ê tōe, khì kap i kau-chiàn. 25 Tùi kin-á-ji̍t khí, Góa beh hō͘ thiⁿ-ē bān peh-sìⁿ, thiaⁿ-kìⁿ lí ê miâ-siaⁿ ê, kiaⁿ lín, lún lín; koh in-ūi lí ngia̍uh-ngia̍uh-chhoah, thòng-khó͘. 26 Góa chiū tùi Ki-tí-bo̍k ê khòng-iá, chhe sù-chiá khì kìⁿ Hi-si̍t-pún ông Se-hông, ēng hô-pêng ê ōe kóng, 27 Kiû lí iông-ún góa tùi lí ê tōe keng-kè; góa beh kiâⁿ tōa-lō͘, bô phian-chó, bô phian-iū; 28 lí the̍h góa ê gûn, bōe bí-niû hō͘ góa chia̍h, the̍h góa ê gûn, ēng chúi bōe góa lim; to̍k-to̍k chún góa pō͘-kiâⁿ kè-khì; 29 chhin-chhiūⁿ tiàm tī Se-jíⁿ ê Í-sò ê kiáⁿ-sun, kap tiàm tī A-jíⁿ ê Mô͘-ap lâng khoán-thāi góa chi̍t-iūⁿ; thèng-hāu góa kè Iok-tàn hô, ji̍p Iâ-hô-hoa goán ê Siōng-tè só͘ siúⁿ-sù goán ê tōe. 30 Chóng-sī Hi-si̍t-pún ông Se-hông m̄-khéng hō͘ lán tùi i hia keng-kè, in-ūi Iâ-hô-hoa lí ê Siōng-tè hō͘ i ê sèng-chêng kò͘-chip, sim ngī, ūi-tio̍h beh chiong i kau-hù tī lí ê chhiú; chhin-chhiūⁿ kin-á-ji̍t chi̍t-iūⁿ. 31 Iâ-hô-hoa kā góa kóng, Khòaⁿ ah, tùi chit-tia̍p khí, Góa beh chiong Se-hông kap i ê tōe, kau-hù tī lí ê bīn-chêng, lí taⁿ tio̍h tit-tio̍h i ê tōe chòe-gia̍p. 32 Hit-sî Se-hông kap i ê chèng peh-sìⁿ chhut-lâi tí-te̍k lán, kau-chiàn tī Ngá-cha̍p. 33 Iâ-hô-hoa lán ê Siōng-tè chiong i kau-hù lán, lán chiū phah-sí i, kap i ê kiáⁿ, í-ki̍p i ê chèng peh-sìⁿ. 34 Tng hit-sî lán chhú i lóng-chóng ê siâⁿ, châu-bia̍t ū lâng khiā-khí ê siâⁿ, liân hū-jîn-lâng kap gín-ná, bô lâu chi̍t-ê; 35 to̍k-to̍k cheng-siⁿ kap só͘ chhiúⁿ ta̍k ê siâⁿ ê chong-bu̍t, lóng chhú lâi chòe ka-kī ê lō͘-ēng. 36 Tùi A-lùn soaⁿ-kok-piⁿ ê A-lô-jíⁿ, í-ki̍p soaⁿ-kok tiong ê siâⁿ, kàu tī Ki-lia̍t, bô chi̍t ê siâⁿ kian-kò͘, hō͘ lán chhú i bô tio̍h; in-ūi Iâ-hô-hoa lán ê Siōng-tè lóng kau-hù lán; 37 chí-ū A-bûn lâng ê tōe, Ngá-phok hô-piⁿ ê tōe, kap soaⁿ-tōe chiah ê siâⁿ, kap Iâ-hô-hoa lán ê Siōng-tè só͘ kìm lán khì ê tōe, lí lóng bô óa-kūn i.
1 咱就oa̍t-tńg身上Pa-san ê路去；Pa-san王kap伊ê眾百姓lóng出來抵敵咱，就tī Í-tek-lâi交戰。 2 耶和華kā我講：莫得驚伊，因為我已經將伊kap伊ê眾百姓，kap伊ê地，lóng交tī你ê手；你tio̍h款待伊親像款待tiàm tī Hi-si̍t-pún ê A-mô͘-lī王Se-hông一樣。 3 Tùi hit-tia̍p，耶和華咱ê上帝也將Pa-san王Go̍k，kap伊ê眾百姓，lóng交tī咱ê手；咱就phah死in，無留一个。 4 Hit時咱取伊所有ê城，無一个城無hō͘咱取伊，共六十個城；這是A-jíⁿ-ko-pek ê全景，就是Go̍k ê國tī Pa-san ê。 5 Chiahê lóng是堅固ê城，有高ê牆，有門，有栱；chiahê以外iáu有chōe-chōe無城牆ê埠頭。 6 咱一盡滅in，親像前款待Hi-si̍t-pún王Se-hông一樣，滅有人khiā起ê城，連婦人人，kap gín-ná； 7 獨獨一切ê cheng-siⁿ，kap城中ê贓物，咱lóng取來做家己ê路用。 8 Hit時咱tùi約旦hit-pêng，兩個A-mô͘-lī王ê手，搶伊ê地，tùi A-lùn ê山谷到Hek-bûn山。 9 (chitê Hek-bûn，Se-tùn人稱伊做Se-liân；A-mô͘-lī人稱伊做Sī-nî-jíⁿ。) 10 咱搶平洋ta̍k-ê城，Ki-lia̍t全地，Pa-san全地，直到Sat-ka kap Í-tek-lâi，lóng是Pa-san王Go̍k國內ê城。 11 (Lī-hoa̍t-im人所留ê，只有chhun Pa-san王Go̍k；看ah，伊ê眠床是鐵ê眠床，長九肘，闊四肘，lóng是用人ê肘做pān；現今kiám-m̄是tī A-bûn人ê La̍h-pa mah？) 12 Hit時咱得tio̍h chitê地；tùi A-lùn山谷邊ê A-lô-jíⁿ起，以及Ki-lia̍t山地ê一半，kap其中ê城，我lóng hō͘ Liû-piān人kap Ka-tek人； 13 Ki-lia̍t其餘ê地，kap Pa-san全地，Go̍k ê國，我hō͘ Má-ná-se ê半支派；A-jíⁿ-ko-pek全地，Pa-san全地，這叫做Lī-hoa̍t-im人ê地。 14 Má-ná-se ê kiáⁿ Gâi-jíⁿ chiàm A-jíⁿ-ko-pek全景，直到Ki-su̍t人kap Má-ka人ê交界；就照家己ê名稱Pa-san地做Hap-úi-te̍k-gâi-jíⁿ，到今á日。 15 我koh將Ki-lia̍t hō͘ Má-kiat。 16 Tùi Ki-lia̍t到A-lùn ê山谷，用山谷做界，直到A-bûn人交界ê Ngá-phok河，我將這hō͘ Liû-piān人，kap Ka-tek人； 17 koh將A-la̍h-pa，kap óa近約旦河ê地，tùi Ki-nî-lia̍t直到A-la̍h-pa ê海，就是鹽海，以及Pí-su-ka山腳東邊ê地，lóng hō͘ in。 18 Hit時我吩咐lín講：耶和華lín ê上帝已經將chitê地hō͘ lín做業，lín中間能交戰ê，lóng tio̍h帶軍器，tī lín ê兄弟以色列人ê面前過去。 19 總是lín ê bó͘，lín ê gín-ná，lín ê cheng-siⁿ，(我知lín ê cheng-siⁿ真chōe，) thang tiàm tī我所hō͘ lín ta̍k-ê城， 20 到耶和華賞賜平安hō͘ lín ê兄弟，親像已經賞賜lín一樣，koh in也得tio̍h耶和華lín ê上帝，用約旦hit pêng ê地賞賜in，然後lín ta̍k人thang tò來我賞賜lín做業ê地。 21 Hit時我吩咐約書亞講：你親目看見耶和華你ê上帝tùi chit兩個王所行一切ê事，耶和華也beh tùi lín所beh過去ê ta̍k國án-ni行。 22 Lín莫得驚in；因為替lín交戰ê，是耶和華lín ê上帝。 23 Hit時我懇求耶和華講： 24 主耶和華ah，你已經起頭顯出你ê大威嚴，kap你ê大氣力tī你ê奴僕，因為tī天裡，tī地裡，iáu有甚麼上帝能行親像你所行ê，koh親像你ê大權能ah？ 25 求你容允我過去，看約旦河hit-pêng súi ê地，hitê súi ê山地，kap Lī-pa-lùn。 26 總是耶和華，因為lín ê緣故，受氣我，m̄聽我；耶和華對我講，Án-ni你夠額lah，你莫得koh對我提起chitê事。 27 你tio̍h上Pí-su-ka ê山頂，kia̍h目ǹg西，ǹg北，ǹg南，ǹg東，親目看；因為你決斷bōe能過chitê約旦河。 28 總是你tio̍h吩咐約書亞，hō͘伊壯膽堅固；因為伊beh tī chitê百姓ê面前過去，hō͘ in承接你所beh看見ê地。 29 Tùi án-ni，咱tiàm tī Pek-pí-jíⁿ對面ê山谷中。
1 Lán chiū oa̍t-tńg-sin chiūⁿ Pa-san ê lō͘ khì; Pa-san ông kap i ê chèng peh-sìⁿ lóng chhut-lâi tí-te̍k lán, chiū tī Í-tek-lâi kau-chiàn. 2 Iâ-hô-hoa kā góa kóng, Bo̍h-tit kiaⁿ i, in-ūi Góa í-keng chiong i kap i ê chèng peh-sìⁿ, kap i ê tōe, lóng kau tī lí ê chhiú; lí tio̍h khoán-thāi i chhin-chhiūⁿ khoán-thāi tiàm tī Hi-si̍t-pún ê A-mô͘-lī ông Se-hông chi̍t-iūⁿ. 3 Tùi hit-tia̍p Iâ-hô-hoa lán ê Siōng-tè iā chiong Pa-san ông Go̍k, kap i ê chèng peh-sìⁿ, lóng kau tī lán ê chhiú; lán chiū phah-sí in, bô lâu chi̍t-ê. 4 Hit-sî lán chhú i só͘ ū ê siâⁿ, bô chi̍t ê siâⁿ bô hō͘ lán chhú i, kiōng la̍k-cha̍p ê siâⁿ; che sī A-jíⁿ-ko-pek ê choân-kéng, chiū-sī Go̍k ê kok tī Pa-san ê. 5 Chiah-ê lóng sī kian-kò͘ ê siâⁿ, ū koâiⁿ ê chhiûⁿ, ū mn̂g, ū kông; chiah-ê í-gōa iáu-ū chōe-chōe bô siâⁿ-chhiûⁿ ê po͘-thâu. 6 Lán it-chīn bia̍t in, chhin-chhiūⁿ chêng khoán-thāi Hi-si̍t-pún ông Se-hông chi̍t-iūⁿ, bia̍t ū lâng khiā-khí ê siâⁿ, liân hū-jîn-lâng, kap gín-ná; 7 to̍k-to̍k it-chhè ê cheng-siⁿ, kap siâⁿ-tiong ê chong-bu̍t, lán lóng chhú lâi chòe ka-kī ê lō͘-ēng. 8 Hit-sî lán tùi Iok-tàn hit-pêng, nn̄g ê A-mô͘-lī ông ê chhiú, chhiúⁿ i ê tōe, tùi A-lùn ê soaⁿ-kok kàu Hek-bûn soaⁿ. 9 (Chit ê Hek-bûn, Se-tùn lâng chheng i chòe Se-liân; A-mô͘-lī lâng chheng i chòe Sī-nî-jíⁿ.) 10 Lán chhiúⁿ pîⁿ-iûⁿ ta̍k ê siâⁿ, Ki-lia̍t choân-tōe, Pa-san choân-tōe, ti̍t-kàu Sat-ka kap Í-tek-lâi, lóng sī Pa-san ông Go̍k kok-lāi ê siâⁿ. 11 (Lī-hoa̍t-im lâng só͘ lâu ê, chí-ū chhun Pa-san ông Go̍k; khòaⁿ ah, i ê bîn-chhn̂g sī thih ê bîn-chhn̂g, tn̂g káu-tiú, khoah sì-tiú, lóng sī ēng lâng ê tiú chòe-pān; hiān-kim kiám-m̄-sī tī A-bûn lâng ê La̍h-pa mah?) 12 Hit-sî lán tit-tio̍h chit ê tōe; tùi A-lùn soaⁿ-kok piⁿ ê A-lô-jíⁿ khí, í-ki̍p Ki-lia̍t soaⁿ-tōe ê chi̍t-pòaⁿ, kap kî-tiong ê siâⁿ, góa lóng hō͘ Liû-piān lâng kap Ka-tek lâng; 13 Ki-lia̍t kî-û ê tōe, kap Pa-san choân-tōe, Go̍k ê kok, góa hō͘ Má-ná-se ê pòaⁿ-chi-phài; A-jíⁿ-ko-pek choân-tōe, Pa-san choân-tōe, che kiò-chòe Lī-hoa̍t-im lâng ê tōe. 14 Má-ná-se ê kiáⁿ Gâi-jíⁿ chiàm A-jíⁿ-ko-pek choân-kéng, ti̍t-kàu Ki-su̍t lâng kap Má-ka lâng ê kau-kài; chiū chiàu ka-kī ê miâ chheng Pa-san tōe chòe Hap-úi-te̍k-gâi-jíⁿ, kàu kin-á-ji̍t. 15 Góa koh chiong Ki-lia̍t hō͘ Má-kiat. 16 Tùi Ki-lia̍t kàu A-lùn ê soaⁿ-kok, ēng soaⁿ-kok chòe kài, ti̍t-kàu A-bûn lâng kau-kài ê Ngá-phok hô, góa chiong che hō͘ Liû-piān lâng, kap Ka-tek lâng; 17 koh chiong A-la̍h-pa, kap óa-kūn Iok-tàn hô ê tōe, tùi Ki-nî-lia̍t ti̍t-kàu A-la̍h-pa ê hái, chiū-sī Iâm-hái, í-ki̍p Pí-su-ka soaⁿ-kha tang-piⁿ ê tōe, lóng hō͘ in. 18 Hit-sî góa hoan-hù lín kóng, Iâ-hô-hoa lín ê Siōng-tè í-keng chiong chit ê tōe hō͘ lín chòe-gia̍p, lín tiong-kan ōe kau-chiàn-ê, lóng tio̍h tòa kun-khì, tī lín ê hiaⁿ-tī Í-sek-lia̍t lâng ê bīn-chêng kè-khì. 19 Chóng-sī lín ê bó͘, lín ê gín-ná, lín ê cheng-siⁿ, (góa chai lín ê cheng-siⁿ chin chōe,) thang tiàm tī góa só͘ hō͘ lín ta̍k ê siâⁿ, 20 kàu Iâ-hô-hoa siúⁿ-sù pêng-an hō͘ lín ê hiaⁿ-tī, chhin-chhiūⁿ í-keng siúⁿ-sù lín chi̍t-iūⁿ, koh in iā tit-tio̍h Iâ-hô-hoa lín ê Siōng-tè, ēng Iok-tàn hit pêng ê tōe siúⁿ-sù in, jiân-āu lín ta̍k-lâng thang tò-lâi góa siúⁿ-sù lín chòe-gia̍p ê tōe. 21 Hit-sî góa hoan-hù Iok-su-a kóng, Lí chhin-ba̍k khòaⁿ-kìⁿ Iâ-hô-hoa lí ê Siōng-tè tùi chit nn̄g ê ông só͘ kiâⁿ it-chhè ê sū, Iâ-hô-hoa iā beh tùi lín só͘ beh kè-khì ê ta̍k-kok án-ni kiâⁿ. 22 Lín bo̍h-tit kiaⁿ in; in-ūi thòe lín kau-chiàn ê, sī Iâ-hô-hoa lín ê Siōng-tè. 23 Hit-sî góa khún-kiû Iâ-hô-hoa kóng, 24 Chú Iâ-hô-hoa ah, Lí í-keng khí-thâu hián-chhut Lí ê tōa ui-giâm, kap Lí ê tōa khùi-la̍t tī Lí ê lô͘-po̍k, in-ūi tī thiⁿ-ni̍h, tī tōe-ni̍h, iáu-ū sím-mi̍h siōng-tè ōe kiâⁿ chhin-chhiūⁿ Lí só͘ kiâⁿ-ê, koh chhin-chhiūⁿ Lí ê tōa koân-lêng ah? 25 Kiû Lí iông-ún góa kè-khì, khòaⁿ Iok-tàn hô hit-pêng súi ê tōe, hit-ê súi ê soaⁿ-tōe, kap Lī-pa-lùn. 26 Chóng-sī Iâ-hô-hoa, in-ūi lín ê iân-kò͘, siū-khì góa, m̄ thiaⁿ góa; Iâ-hô-hoa tùi góa kóng, Án-ni lí kàu-gia̍h lah, lí bo̍h-tit koh tùi Góa thê-khí chit ê sū. 27 Lí tio̍h chiūⁿ Pí-su-ka ê soaⁿ-téng, kia̍h-ba̍k ǹg-sai, ǹg-pak, ǹg-lâm, ǹg-tang, chhin-ba̍k khòaⁿ; in-ūi lí koat-toàn bōe-ōe kè chit ê Iok-tàn hô. 28 Chóng-sī lí tio̍h hoan-hù Iok-su-a, hō͘ i chòng-táⁿ kian-kò͘; in-ūi i beh tī chit ê peh-sìⁿ ê bīn-chêng kè-khì, hō͘ in sêng-chiap lí só͘ beh khòaⁿ-kìⁿ ê tōe. 29 Tùi án-ni lán tiàm tī Pek-pí-jíⁿ tùi-bīn ê soaⁿ-kok-tiong.
1 以色列ah，taⁿ我所教示lín ê律例法度，lín tio̍h聽來遵thàn，thang hō͘ lín活teh，入去來得tio̍h耶和華lín ê列祖ê上帝所賞賜lín ê地。 2 我所命令lín ê話，lín m̄-thang加添，也m̄-thang減少伊；thang hō͘ lín執守耶和華lín上帝ê命令，就是我所命令lín ê。 3 耶和華因為Pa-le̍k-pí-jíⁿ ê事所行ê，lín親目看見；因為見若thàn Pa-le̍k-pí-jíⁿ ê人，耶和華你ê上帝lóng tùi lín中間除滅in。 4 獨獨lín kap耶和華lín ê上帝結聯ê，今á日lóng活teh。 5 看ah，我也bat用律例kap法度教示lín，照耶和華我ê上帝所命令我ê，hō͘ lín遵thàn tī lín所beh入去承接ê地。 6 所以lín tio̍h執守來行伊；這就是lín ê智慧聰明tī列國ê面前；in一下聽見這一切ê律例，beh講：Chitê大國真正是有智慧聰明ê百姓。 7 Toh落一个大國有上帝kap伊親近，親像耶和華咱ê上帝，tī咱見若求叫祂ê時，kap咱親近ah？ 8 Koh有甚麼大國有律例kap法度親像我今á日tī lín ê面前所傳一切ê律法hiah-nih公義ah？ 9 所以tio̍h家己謹慎，也tio̍h謹慎守你ê心，免得你bōe記得親目所看見ê事；koh免得chiahê事tī你活teh ê時離開你ê心；也tio̍h用chitê教示lín hiahê kiáⁿ，hiahê 孫。 10 你tī何烈山khiā tī耶和華你ê上帝ê面前，hit日耶和華對我講，你kā我招集百姓，我beh hō͘ in聽見我ê話，hō͘ in活tī世間ê日，thang學習敬畏我；koh thang教示in ê kiáⁿ兒。 11 Hit時lín近óa，khiā tī山腳，山裡有火燄chhèng到天頂，也有密雲烏烏暗暗。 12 耶和華tùi火燄中kā lín講話；lín聽見講話ê聲，無看見甚麼像；只有聲nā-tiāⁿ。 13 伊將所命令lín tio̍h守ê約指示lín，就是十條誡；也寫伊tī兩塊石碑。 14 Hit時耶和華koh命令我，將律例法度教示lín，hō͘ lín tī所beh過去來得tio̍h做業ê地遵thàn行伊。 15 所以lín tio̍h特別家己謹慎，因為耶和華tī何烈山tùi火中kā lín講話hit日，lín無看見甚麼形象； 16 驚了lín敗壞家己，為家己雕刻偶像，仿甚麼形狀，無論是男á是女ê形象； 17 á是地上走獸ê像；á是空中飛鳥ê像； 18 á是地上teh 趖 ê物ê像；á是地下水中魚類 ê像。 19 Koh驚了你kia̍h目ǹg天看耶和華你ê上帝所分派hō͘天下萬國ê日、月、星，就是天頂ê萬象，你就受引誘，敬拜服事in。 20 總是耶和華帶lín出埃及，脫離鑄鐵ê爐，beh做伊家己產業ê百姓，親像今á日ê款。 21 耶和華koh因為lín ê緣故受氣我，chiù-chōa m̄ hō͘我過約旦河，也m̄ hō͘我入耶和華你上帝所賞賜你做業ê súi地； 22 我tio̍h死tī chitê地；我bōe能過約旦河；總是lín beh過去來得tio̍h hitê好ê地。 23 Lín tio̍h家己謹慎，驚了lín bōe記得耶和華lín ê上帝kap lín所立ê約，為家己雕刻偶像彷彿甚麼物，就是耶和華你ê上帝所禁你ê。 24 因為耶和華你ê上帝就是烈烈ê火，決斷m̄容允有別ê上帝。 25 後來lín久久khiā起tī hitê地生kiáⁿ傳孫，就雕刻偶像，仿甚麼物ê像，phah-pháiⁿ你ê心術，行耶和華你ê上帝目睭中看做pháiⁿ ê事，惹祂受氣； 26 我就kin-a日叫天叫地來干證，lín beh tī過約旦河得tio̍h做業ê地緊緊滅到盡；lín ê日子bōe能tī hit所在得tio̍h久長，beh一盡除滅。 27 耶和華beh hō͘ lín四散tī列邦；tī耶和華所chhōa lín到hiahê國，lín chhun ê人額少少。 28 Tī-hia lín beh服事人ê手所造ê上帝，就是柴ê、石ê，bōe能看見，bōe能聽，bōe能食，bōe能phīⁿ ê。 29 總是lín tī-hia若beh chhē耶和華你ê上帝，若用盡心盡性chhē祂，就beh tú-tio̍h。 30 日後lín tú-tio̍h苦難，所講chiahê事臨到你，你beh歸向耶和華，你ê上帝，來聽祂ê聲； 31 因為耶和華你ê上帝是憐憫ê上帝，伊無beh放sak你，無beh剿滅你，也無bōe記得伊kap你ê列祖所chiù-chōa ê約。 32 試問過身ê時，就是你以前ê時，tùi上帝創造人tī世間hit日以來，tùi天ê chit邊到天ê hit邊，有親像hit號ê大事mah？Bat聽見有án-ni mah？ 33 Bat有甚麼百姓聽見上帝tùi火中講話ê聲，親像你聽見，也iáu能活teh mah？ 34 á是bat有甚麼上帝試án-ni做，用試煉、神蹟、奇事、交戰、大權能ê手，伸出ê手骨，kap大thang驚ê事，為家己tùi別國中取一國，親像耶和華lín ê上帝tī埃及tī lín ê目睭前，為lín所行一切ê事ah？ 35 用這顯現tī你，hō͘你知耶和華伊是上帝，祂以外無有別ê。 36 祂tùi天hō͘你聽見祂ê聲，為tio̍h beh教示你，koh tī地面上hō͘你看見祂ê大火，koh你聽見祂ê話tùi火中出。 37 因為祂疼你ê列祖，所以揀選in ê後裔，用大權能親身帶你出埃及； 38 beh對你ê面前趕出比你khah大khah猛ê國民，beh chhōa你入去，用in ê地賞賜lín做業，親像今á日一樣。 39 所以今á日你tio̍h知，心也tio̍h想，天頂地下只有耶和華，祂是上帝，以外無別ê。 40 所以你tio̍h守祂ê律例誡命，就是我今á日所命令你，hō͘你kap你ê後裔thang得tio̍h福氣，koh加添你ê日子久長tī耶和華你ê上帝所賞賜你ê地到永遠。 41 Hit時摩西tī約旦外，ǹg日出ê所在分別三個城； 42 Hō͘ 刣死人ê人，就是平素無結怨，錯誤刣死伊ê厝邊ê，thang逃走tī-hia；已經走入chiahê城ê一个，就得tio̍h活； 43 就是曠野平洋ê Pí-sek，為tio̍h Liû-piān人設ê；Ki-lia̍t ê Lah-boa̍t，為tio̍h Ka-tek人設ê；Pa-san ê Ko-lân，為tio̍h Má-ná-se人設ê。 44 Chitê是摩西tī以色列人ê面前所排列ê律法； 45 Chiahê是摩西tī以色列人出埃及了後，所傳hō͘ in ê證據、律例、法度。 46 Tī約旦河外，Pek-pí-jíⁿ對面ê山谷中，tī Hi-si̍t-pún khiā起A-mô͘-lī王Se-hông ê地，就是摩西kap以色列人出埃及了後所phah ê。 47 In得tio̍h伊ê地，kap Pa-san王Go̍k ê地，就是兩個A-mô͘-lī王，tī約旦外，ǹg日出ê所在； 48 tùi A-lùn山谷邊ê A-lô-jíⁿ，直到Se-hûn山，就是Hek-bûn山； 49 以及約旦外，東勢A-la̍h-pa ê全地，直到A-la̍h-pa ê海，óa近Pí-su-ka ê山腳。
1 Í-sek-lia̍t ah, taⁿ góa só͘ kà-sī lín ê lu̍t-lē hoat-tō͘, lín tio̍h thiaⁿ lâi chun-thàn, thang hō͘ lín oa̍h-teh, ji̍p-khì lâi tit-tio̍h Iâ-hô-hoa lín ê lia̍t-chó͘ ê Siōng-tè só͘ siúⁿ-sù lín ê tōe. 2 Góa só͘ bēng-lēng lín ê ōe, lín m̄-thang ke-thiⁿ, iā m̄-thang kiám-chió i; thang hō͘ lín chip-siú Iâ-hô-hoa lín Siōng-tè ê bēng-lēng, chiū-sī góa só͘ bēng-lēng lín ê. 3 Iâ-hô-hoa in-ūi Pa-le̍k-pí-jíⁿ ê sū só͘ kiâⁿ ê, lín chhin-ba̍k khòaⁿ-kìⁿ; in-ūi kìⁿ-nā thàn Pa-le̍k-pí-jíⁿ ê lâng, Iâ-hô-hoa lí ê Siōng-tè lóng tùi lín tiong-kan tû-bia̍t in. 4 To̍k-to̍k lín kap Iâ-hô-hoa lín ê Siōng-tè kiat-liân ê, kin-á-ji̍t lóng oa̍h-teh. 5 Khòaⁿ ah, góa iā bat ēng lu̍t-lē kap hoat-tō͘ kà-sī lín, chiàu Iâ-hô-hoa góa ê Siōng-tè só͘ bēng-lēng góa ê, hō͘ lín chun-thàn tī lín só͘ beh ji̍p-khì sêng-chiap ê tōe. 6 Só͘-í lín tio̍h chip-siú lâi kiâⁿ-i; che chiū-sī lín ê tì-hūi chhang-miâ tī lia̍t-kok ê bīn-chêng; in chi̍t-ē thiaⁿ-kìⁿ che it-chhè ê lu̍t-lē, beh kóng, Chit ê tōa-kok chin-chiàⁿ sī ū tì-hūi chhang-miâ ê peh-sìⁿ. 7 Toh-lo̍h chi̍t ê tōa-kok ū siōng-tè kap i chhin-kūn, chhin-chhiūⁿ Iâ-hô-hoa lán ê Siōng-tè, tī lán kìⁿ-nā kiû-kiò I ê sî, kap lán chhin-kūn ah? 8 Koh ū sím-mi̍h tōa-kok ū lu̍t-lē kap hoat-tō͘ chhin-chhiūⁿ góa kin-á-ji̍t tī lín ê bīn-chêng só͘ thoân it-chhè ê lu̍t-hoat hiah-nih kong-gī ah? 9 Só͘-í tio̍h ka-kī kín-sīn, iā tio̍h kín-sīn siú lí ê sim, bián-tit lí bōe-kì-tit chhin-ba̍k só͘ khòaⁿ-kìⁿ ê sū; koh bián-tit chiah ê sū tī lí oa̍h-teh ê sî lī-khui lí ê sim; iā tio̍h ēng chit-ê kà-sī lín hiah ê kiáⁿ, hiah ê sun. 10 Lí tī Hô-lia̍t soaⁿ khiā tī Iâ-hô-hoa lí ê Siōng-tè ê bīn-chêng, hit-ji̍t Iâ-hô-hoa tùi góa kóng, Lí kā Góa chio-chi̍p peh-sìⁿ, Góa beh hō͘ in thiaⁿ-kìⁿ Góa ê ōe, hō͘ in oa̍h tī sè-kan ê ji̍t, thang ha̍k-si̍p kèng-ùi Góa; koh thang kà-sī in ê kiáⁿ-jî. 11 Hit-sî lín kūn-óa, khiā tī soaⁿ-kha, soaⁿ-ni̍h ū hé-iām chhèng-kàu thiⁿ-téng, iā ū ba̍t-hûn o͘-o͘ àm-àm. 12 Iâ-hô-hoa tùi hé-iām-tiong kā lín kóng-ōe; lín thiaⁿ-kìⁿ kóng-ōe ê siaⁿ, bô khòaⁿ-kìⁿ sím-mi̍h siōng; chí-ū siaⁿ nā-tiāⁿ. 13 I chiong só͘ bēng-lēng lín tio̍h siú ê iok chí-sī lín, chiū-sī cha̍p-tiâu-kài; iā siá i tī nn̄g tè chio̍h-pi. 14 Hit-sî Iâ-hô-hoa koh bēng-lēng góa, chiong lu̍t-lē hoat-tō͘ kà-sī lín, hō͘ lín tī só͘ beh kè-khì lâi tit-tio̍h chòe-gia̍p ê tōe chun-thàn kiâⁿ i. 15 Só͘-í lín tio̍h te̍k-pia̍t ka-kī kín-sīn, in-ūi Iâ-hô-hoa tī Hô-lia̍t soaⁿ tùi hé-tiong kā lín kóng-ōe hit-ji̍t, lín bô khòaⁿ-kìⁿ sím-mi̍h hêng-siōng; 16 kiaⁿ-liáu lín pāi-hoāi ka-kī, ūi ka-kī tiau-khek ngó͘-siōng, hóng sím-mi̍h hêng-chōng, bô-lūn sī lâm á-sī lú ê hêng-siōng; 17 á-sī tōe-chiūⁿ cháu-siù ê siōng; á-sī khong-tiong pe-chiáu ê siōng; 18 á-sī tōe-chiūⁿ teh sô ê mi̍h ê siōng; á-sī tōe-ē chúi-tiong hî-lūi ê siōng. 19 Koh kiaⁿ-liáu lí kia̍h-ba̍k ǹg-thiⁿ khòaⁿ Iâ-hô-hoa lí ê Siōng-tè só͘ hun-phài hō͘ thiⁿ-ē bān-kok ê ji̍t, ge̍h, chhiⁿ, chiū-sī thiⁿ-téng ê bān-siōng, lí chiū siū ín-iú, kèng-pài ho̍k-sāi in. 20 Chóng-sī Iâ-hô-hoa tòa lín chhut Ai-ki̍p, thoat-lī chù-thih ê lô͘, beh chòe I ka-kī sán-gia̍p ê peh-sìⁿ, chhin-chhiūⁿ kin-á-ji̍t ê khoán. 21 Iâ-hô-hoa koh in-ūi lín ê iân-kò͘ siū-khì góa, chiù-chōa m̄ hō͘ góa kè Iok-tàn hô, iā m̄ hō͘ góa ji̍p Iâ-hô-hoa lí Siōng-tè só͘ siúⁿ-sù lí chòe-gia̍p ê súi tōe; 22 góa tio̍h sí tī chit ê tōe; góa bōe-ōe kè Iok-tàn hô; chóng-sī lín beh kè-khì lâi tit-tio̍h hit ê hó ê tōe. 23 Lín tio̍h ka-kī kín-sīn, kiaⁿ-liáu lín bōe-kì-tit Iâ-hô-hoa lín ê Siōng-tè kap lín só͘ li̍p ê iok, ūi ka-kī tiau-khek ngó͘-siōng hóng-hut sím-mi̍h mi̍h, chiū-sī Iâ-hô-hoa lí ê Siōng-tè só͘ kìm lí ê. 24 In-ūi Iâ-hô-hoa lí ê Siōng-tè chiū-sī lia̍t-lia̍t ê hé, koat-toàn m̄ iông-ún ū pa̍t ê siōng-tè. 25 Āu-lâi lín kú-kú khiā-khí tī hit ê tōe siⁿ-kiáⁿ thoân-sun, chiū tiau-khek ngó͘-siōng, hóng sím-mi̍h mi̍h ê siōng, phah-pháiⁿ lí ê sim-su̍t, kiâⁿ Iâ-hô-hoa lí ê Siōng-tè ba̍k-chiu-tiong khòaⁿ-chòe pháiⁿ ê sū, jiá I siū-khì; 26 góa chiū kin-a-ji̍t kiò thiⁿ kiò tōe lâi kan-chèng, lín beh tī kè Iok-tàn hô tit-tio̍h chòe-gia̍p ê tōe kín-kín bia̍t kàu chīn; lín ê ji̍t-chí bōe-ōe tī hit só͘-chāi tit-tio̍h kú-tn̂g, beh it-chīn tû-bia̍t. 27 Iâ-hô-hoa beh hō͘ lín sì-sòaⁿ tī lia̍t-pang; tī Iâ-hô-hoa só͘ chhōa lín kàu hiah ê kok, lín chhun ê lâng-gia̍h chió-chió. 28 Tī-hia lín beh ho̍k-sāi lâng ê chhiú só͘ chō ê siōng-tè, chiū-sī chhâ-ê, chio̍h-ê, bōe-ōe khòaⁿ-kìⁿ, bōe-ōe thiaⁿ, bōe-ōe chia̍h, bōe-ōe phīⁿ ê. 29 Chóng-sī lín tī-hia nā beh chhē Iâ-hô-hoa lí ê Siōng-tè, nā ēng chīn-sim chīn-sèng chhē I, chiū beh tú-tio̍h. 30 Ji̍t-āu lín tú-tio̍h khó͘-lān, só͘ kóng chiah ê sū lîm-kàu lí, lí beh kui-ǹg Iâ-hô-hoa, lí ê Siōng-tè, lâi thiaⁿ I ê siaⁿ; 31 in-ūi Iâ-hô-hoa lí ê Siōng-tè sī lîn-bín ê Siōng-tè, I bô beh pàng-sak lí, bô beh châu-bia̍t lí, iā bô bōe-kì-tit I kap lí ê lia̍t-chó͘ só͘ chiù-chōa ê iok. 32 Chhì-mn̄g kè-sin ê sî, chiū-sī lí í-chêng ê sî, tùi Siōng-tè chhòng-chō lâng tī sè-kan hit-ji̍t í-lâi, tùi thiⁿ ê chit-piⁿ kàu thiⁿ ê hit-piⁿ, ū chhin-chhiūⁿ hit-hō ê tōa-sū mah? Bat thiaⁿ-kìⁿ ū án-ni mah? 33 Bat ū sím-mi̍h peh-sìⁿ thiaⁿ-kìⁿ Siōng-tè tùi hé-tiong kóng-ōe ê siaⁿ, chhin-chhiūⁿ lí thiaⁿ-kìⁿ, iā iáu ōe oa̍h-teh mah? 34 Á-sī bat ū sím-mi̍h siōng-tè chhì án-ni chòe, ēng chhì-liān, sîn-jiah, kî-sū, kau-chiàn, tōa koân-lêng ê chhiú, chhun-chhut ê chhiú-kut, kap tōa thang kiaⁿ ê sū, ūi ka-kī tùi pa̍t-kok tiong chhú chi̍t-kok, chhin-chhiūⁿ Iâ-hô-hoa lín ê Siōng-tè tī Ai-ki̍p tī lín ê ba̍k-chiu chêng, ūi lín só͘ kiâⁿ it-chhè ê sū ah? 35 Ēng che hián-hiān tī lí, hō͘ lí chai Iâ-hô-hoa I sī Siōng-tè, I í-gōa bô ū pa̍t-ê. 36 I tùi thiⁿ hō͘ lí thiaⁿ-kìⁿ I ê siaⁿ, ūi-tio̍h beh kà-sī lí, koh tī tōe-bīn-chiūⁿ hō͘ lí khòaⁿ-kìⁿ I ê tōa-hé, koh lí thiaⁿ-kìⁿ I ê ōe tùi hé-tiong chhut. 37 In-ūi I thiàⁿ lí ê lia̍t-chó͘, só͘-í kéng-soán in ê hō͘-è, ēng tōa koân-lêng chhin-sin tòa lí chhut Ai-ki̍p; 38 beh tùi lí ê bīn-chêng kóaⁿ-chhut pí lí khah-tōa khah-béng ê kok-bîn, beh chhōa lí ji̍p-khì, ēng in ê tōe siúⁿ-sù lín chòe-gia̍p, chhin-chhiūⁿ kin-á-ji̍t chi̍t-iūⁿ. 39 Só͘-í kin-á-ji̍t lí tio̍h chai, sim iā tio̍h siūⁿ, thiⁿ-téng tōe-ē chí-ū Iâ-hô-hoa, I sī Siōng-tè, í-gōa bô pa̍t-ê. 40 Só͘-í lí tio̍h siú I ê lu̍t-lē kài-bēng, chiū-sī góa kin-á-ji̍t só͘ bēng-lēng lí, hō͘ lí kap lí ê hō͘-è thang tit-tio̍h hok-khì, koh ke-thiⁿ lí ê ji̍t-chí kú-tn̂g tī Iâ-hô-hoa lí ê Siōng-tè só͘ siúⁿ-sù lí ê tōe kàu éng-oán. 41 Hit-sî Mô͘-se tī Iok-tàn gōa, ǹg ji̍t-chhut ê só͘-chāi hun-piat saⁿ ê siâⁿ; 42 hō͘ thâi-sí lâng ê lâng, chiū-sī pêng-sò͘ bô kiat-oàn, chhò-gō͘ thâi-sí i ê chhù-piⁿ ê, thang tô-cháu tī-hia; í-keng cháu-ji̍p chiah ê siâⁿ ê chi̍t-ê, chiū tit-tio̍h oa̍h; 43 chiū-sī khòng-iá pîⁿ-iûⁿ ê Pí-sek, ūi-tio̍h Liû-piān lâng siat-ê; Ki-lia̍t ê Lah-boa̍t, ūi-tio̍h Ka-tek lâng siat-ê; Pa-san ê Ko-lân, ūi-tio̍h Má-ná-se lâng siat-ê. 44 Chit-ê sī Mô͘-se tī Í-sek-lia̍t lâng ê bīn-chêng só͘ pâi-lia̍t ê lu̍t-hoat; 45 chiah-ê sī Mô͘-se tī Í-sek-lia̍t lâng chhut Ai-ki̍p liáu-āu, só͘ thoân hō͘ in ê chèng-kù, lu̍t-lē, hoat-tō͘. 46 Tī Iok-tàn hô-gōa, Pek-pí-jíⁿ tùi-bīn ê soaⁿ-kok-tiong, tī Hi-si̍t-pún khiā-khí A-mô͘-lī ông Se-hông ê tōe, chiū-sī Mô͘-se kap Í-sek-lia̍t lâng chhut Ai-ki̍p liáu-āu só͘ phah-ê. 47 In tit-tio̍h i ê tōe, kap Pa-san ông Go̍k ê tōe, chiū-sī nn̄g ê A-mô͘-lī ông, tī Iok-tàn gōa, ǹg ji̍t-chhut ê só͘-chāi; 48 tùi A-lùn soaⁿ-kok piⁿ ê A-lô-jíⁿ, ti̍t-kàu Se-hûn soaⁿ, chiū-sī Hek-bûn soaⁿ; 49 í-ki̍p Iok-tàn gōa, tang-sì A-la̍h-pa ê choân-tōe, ti̍t-kàu A-la̍h-pa ê hái, óa-kūn Pí-su-ka ê soaⁿ-kha.
1 摩西叫以色列眾人，對in講，以色列ah，lín tio̍h聽我今á日所傳hō͘ lín聽ê律例法度，hō͘ lín thang學習伊，執守來行in。 2 耶和華咱ê上帝tī Hô-lia̍t kap咱立約。 3 耶和華無kap咱ê列祖立chitê約，是kap咱chiahê，就是kap咱今á日一切活tī-chia ê人立ê。 4 耶和華tī山頂，tùi火中面對面，kap lín講話。 5 (hit時我khiā tī耶和華kap lín ê中間，beh將耶和華ê話傳hō͘ lín，因為lín為tio̍h hitê火來驚，無上山。) 6 主講：我是耶和華你ê上帝，bat chhōa你tùi埃及地，tùi做奴才ê家出來ê。 7 我以外你m̄-thang有別ê上帝。 8 M̄-thang為家己雕刻偶像，不論天頂、地下，kap地下水內所有ê物，lóng m̄-thang 妝in ê像； 9 m̄-thang跪拜in，也m̄-thang服事in；因為我耶和華你ê上帝，斷斷m̄容允用別ê上帝匹配我；怨恨我ê，我歸咎伊ê罪，tùi父到kiáⁿ，到三四代； 10 疼我，守我誡命ê，我施恩hō͘伊，直到千代。 11 M̄-thang lām-sám稱耶和華你上帝ê名；因為lām-sám稱祂ê名ê，耶和華的確無掠伊做無罪。 12 Tio̍h守安歇日，掠伊做聖，照耶和華你ê上帝所命令你ê； 13 六日內tio̍h tio̍h磨做你一切ê工； 14 獨獨第七日，就是ǹg耶和華你ê上帝來守ê安歇，chit日，你kap你ê kiáⁿ、cha-bó͘-kiáⁿ、奴僕、女婢、牛、驢、cheng-siⁿ，以及tiàm tī你中間ê出外人，一切ê工lóng m̄-thang做；hō͘你ê奴僕、女婢，thang親像你安歇。 15 你也tio̍h記得你前tī埃及地做奴僕，耶和華你ê上帝用大權能ê手，伸出來ê手骨，chhōa你tùi hia出來；因為án-ni，耶和華你ê上帝命令你守安歇日。 16 Tio̍h孝敬你ê老父，你ê老母，照耶和華你ê上帝所命令你ê，hō͘你tī耶和華你ê上帝所賞賜你ê地方，日子久長，來享受福氣。 17 M̄-thang 刣死人。 18 也m̄-thang行姦淫。 19 也m̄-thang偷the̍h。 20 也m̄-thang做假ê干證，陷害你ê厝邊。 21 也m̄-thang貪你ê厝邊ê bó͘，也m̄-thang貪你ê厝邊ê厝，kap伊ê田園，伊ê奴僕，伊ê女婢，伊ê牛，伊ê驢，kap你ê厝邊一切所有ê。 22 Chiahê話是耶和華tī山頂，tùi火中、雲中、烏暗中，大聲吩咐lín全會ê；也無koh加添。祂也寫in tī兩塊石碑，交帶我。 23 Hit-tia̍p火燄燒tī山裡，lín聽見hitê tùi 烏暗中出來ê聲，lín ê支派lóng總ê首領，kap lín ê長老來就近我。 24 Lín講：看ah，耶和華咱ê上帝顯明祂ê榮光，kap祂ê至大，hō͘阮看；阮koh聽見祂ê聲音tùi火中出；今á日阮也知上帝kap人講話，人iáu能活。 25 Taⁿ阮mih-sái tio̍h死ah？因為chitê大火 beh 燒滅阮；阮若koh聽見耶和華咱上帝ê聲，就會死。 26 因為見有肉體ê，是誰親像阮聽見永活上帝tùi火中講話ê聲，iáu能活teh ah？ 27 你tio̍h進前去，聽耶和華咱ê上帝所beh講一切ê話；將耶和華所對你講一切ê話，你tio̍h對阮講；阮beh聽也beh行伊。 28 Lín對我講話，耶和華聽見lín講話ê聲，耶和華對我講，我有聽見chitê百姓講話ê聲，就是in所對你講ê；in所講ê話lóng好。 29 願in存chit號心，來敬畏我，常常守我一切ê誡命，hō͘ in kap in ê kiáⁿ孫永遠得tio̍h福氣。 30 你去kā in講：Lín做lín tò去lín ê布棚。 31 論到你，你tio̍h khiā tī我chia，我beh將你所tio̍h教示in一切誡命、律例、法度，kā你講，hō͘ in tī我所賞賜in做業ê地行伊。 32 所以lín tio̍h照耶和華lín ê上帝所命令lín ê，tio̍h執守來行伊；m̄-thang 偏tī左，偏tī右。 33 耶和華lín ê上帝所命令lín ê路，lín lóng tio̍h行伊，hō͘ lín活teh，得tio̍h福氣；也hō͘ lín ê日子，tī lín所beh承接ê地，得tio̍h久長。
1 Mô͘-se kiò Í-sek-lia̍t chèng-lâng, tùi in kóng, Í-sek-lia̍t ah, lín tio̍h thiaⁿ góa kin-á-ji̍t só͘ thoân hō͘ lín thiaⁿ ê lu̍t-lē hoat-tō͘, hō͘ lín thang ha̍k-si̍p i, chip-siú lâi kiâⁿ in. 2 Iâ-hô-hoa lán ê Siōng-tè tī Hô-lia̍t kap lán li̍p-iok. 3 Iâ-hô-hoa bô kap lán ê lia̍t-chó͘ li̍p chit ê iok, sī kap lán chiah-ê, chiū-sī kap lán kin-á-ji̍t it-chhè oa̍h tī-chia ê lâng li̍p-ê. 4 Iâ-hô-hoa tī soaⁿ-téng, tùi hé-tiong bīn-tùi-bīn, kap lín kóng-ōe. 5 (Hit-sî góa khiā tī Iâ-hô-hoa kap lín ê tiong-kan, beh chiong Iâ-hô-hoa ê ōe thoân hō͘ lín, in-ūi lín ūi-tio̍h hit ê hé lâi kiaⁿ, bô chiūⁿ soaⁿ.) 6 Chú kóng, Góa sī Iâ-hô-hoa lí ê Siōng-tè, bat chhōa lí tùi Ai-ki̍p tōe, tùi chòe lô͘-châi ê ke chhut-lâi ê. 7 Góa í-gōa lí m̄-thang ū pa̍t ê siōng-tè. 8 M̄-thang ūi ka-kī tiau-khek ngó͘-siōng, put-lūn thiⁿ-téng, tōe-ē, kap tōe-ē chúi-lāi só͘-ū ê mi̍h, lóng m̄-thang chng in ê siōng; 9 m̄-thang kūi-pài in, iā m̄-thang ho̍k-sāi in; in-ūi Góa Iâ-hô-hoa lí ê Siōng-tè, toàn-toàn m̄ iông-ún ēng pa̍t ê siōng-tè phit-phòe Góa; oàn-hūn Góa ê, Góa kui-kiū i ê chōe, tùi pē kàu kiáⁿ, kàu saⁿ-sì tāi; 10 thiàⁿ Góa, siú Góa kài-bēng ê, Góa si-un hō͘ i, ti̍t-kàu chheng-tāi. 11 M̄-thang lām-sám chheng Iâ-hô-hoa lí Siōng-tè ê miâ; in-ūi lām-sám chheng I ê miâ ê, Iâ-hô-hoa tek-khak bô lia̍h i chòe bô-chōe. 12 Tio̍h siú an-hioh-ji̍t, lia̍h i chòe-sèng, chiàu Iâ-hô-hoa lí ê Siōng-tè só͘ bēng-lēng lí ê; 13 la̍k-ji̍t-lāi tio̍h tio̍h-bôa chòe lí it-chhè ê kang; 14 to̍k-to̍k tē-chhit ji̍t, chiū-sī ǹg Iâ-hô-hoa lí ê Siōng-tè lâi siú ê an-hioh, chit-ji̍t, lí kap lí ê kiáⁿ, cha-bó͘-kiáⁿ, lô͘-po̍k, lú-pī, gû, lû, cheng-siⁿ, í-ki̍p tiàm tī lí tiong-kan ê chhut-gōa lâng, it-chhè ê kang lóng m̄-thang chòe; hō͘ lí ê lô͘-po̍k, lú-pī, thang chhin-chhiūⁿ lí an-hioh. 15 Lí iā tio̍h kì-tit lí chêng tī Ai-ki̍p tōe chòe lô͘-po̍k, Iâ-hô-hoa lí ê Siōng-tè ēng tōa koân-lêng ê chhiú, chhun-chhut-lâi ê chhiú-kut, chhōa lí tùi hia chhut-lâi; in-ūi án-ni, Iâ-hô-hoa lí ê Siōng-tè bēng-lēng lí siú an-hioh-ji̍t. 16 Tio̍h hàu-kèng lí ê lāu-pē, lí ê lāu-bú, chiàu Iâ-hô-hoa lí ê Siōng-tè só͘ bēng-lēng lí ê, hō͘ lí tī Iâ-hô-hoa lí ê Siōng-tè só͘ siúⁿ-sù lí ê tōe-hng, ji̍t-chí kú-tn̂g, lâi hióng-siū hok-khì. 17 M̄-thang thâi-sí lâng. 18 Iā m̄-thang kiâⁿ kan-îm. 19 Iā m̄-thang thau-the̍h. 20 Iā m̄-thang chòe ké ê kan-chèng, hām-hāi lí ê chhù-piⁿ. 21 Iā m̄-thang tham lí ê chhù-piⁿ ê bó͘, iā m̄-thang tham lí ê chhù-piⁿ ê chhù, kap i ê chhân-hn̂g, i ê lô͘-po̍k, i ê lú-pī, i ê gû, i ê lû, kap lí ê chhù-piⁿ it-chhè só͘ ū ê. 22 Chiah ê ōe sī Iâ-hô-hoa tī soaⁿ-téng, tùi hé-tiong, hûn-tiong, o͘-àm-tiong, tōa-siaⁿ hoan-hù lín choân-hōe ê; iā bô koh ke-thiⁿ. I iā siá in tī nn̄g tè chio̍h-pi, kau-tài góa. 23 Hit-tia̍p hé-iām sio tī soaⁿ-ni̍h, lín thiaⁿ-kìⁿ hit ê tùi o͘-àm-tiong chhut-lâi ê siaⁿ, lín ê chi-phài lóng-chóng ê siú-léng, kap lín ê tiúⁿ-ló lâi chiū-kūn góa. 24 Lín kóng, Khòaⁿ ah, Iâ-hô-hoa lán ê Siōng-tè hián-bêng I ê êng-kng, kap I ê chì-tōa, hō͘ goán khòaⁿ; goán koh thiaⁿ-kìⁿ I ê siaⁿ-im tùi hé-tiong chhut; kin-á-ji̍t goán iā chai Siōng-tè kap lâng kóng-ōe, lâng iáu ōe oa̍h. 25 Taⁿ goán mih-sái tio̍h sí ah? In-ūi chit ê tōa-hé beh sio-bia̍t goán; goán nā koh thiaⁿ-kìⁿ Iâ-hô-hoa lán Siōng-tè ê siaⁿ, chiū ōe sí. 26 In-ūi kìⁿ-ū jio̍k-thé ê, chī-chūi chhin-chhiūⁿ goán thiaⁿ-kìⁿ éng-oa̍h Siōng-tè tùi hé-tiong kóng-ōe ê siaⁿ, iáu ōe oa̍h-teh ah? 27 Lí tio̍h chìn-chêng khì, thiaⁿ Iâ-hô-hoa lán ê Siōng-tè só͘ beh kóng it-chhè ê ōe; chiong Iâ-hô-hoa só͘ tùi lí kóng it-chhè ê ōe, lí tio̍h tùi goán kóng; goán beh thiaⁿ iā beh kiâⁿ i. 28 Lín tùi góa kóng-ōe, Iâ-hô-hoa thiaⁿ-kìⁿ lín kóng-ōe ê siaⁿ, Iâ-hô-hoa tùi góa kóng, Góa ū thiaⁿ-kìⁿ chit ê peh-sìⁿ kóng-ōe ê siaⁿ, chiū-sī in só͘ tùi lí kóng ê; in só͘ kóng ê ōe lóng hó. 29 Goān in chûn chit-hō sim, lâi kèng-ùi Góa, siông-siông siú Góa it-chhè ê kài-bēng, hō͘ in kap in ê kiáⁿ-sun éng-oán tit-tio̍h hok-khì. 30 Lí khì kā in kóng, Lín chòe lín tò-khì lín ê pò͘-pîⁿ. 31 Lūn-kàu lí, lí tio̍h khiā tī Góa chia, Góa beh chiong lí só͘ tio̍h kà-sī in it-chhè kài-bēng, lu̍t-lē, hoat-tō͘, kā lí kóng, hō͘ in tī Góa só͘ siúⁿ-sù in chòe-gia̍p ê tōe kiâⁿ i. 32 Só͘-í lín tio̍h chiàu Iâ-hô-hoa lín ê Siōng-tè só͘ bēng-lēng lín ê, tio̍h chip-siú lâi kiâⁿ i; m̄-thang phian tī chó, phian tī iū. 33 Iâ-hô-hoa lín ê Siōng-tè só͘ bēng-lēng lín ê lō͘, lín lóng tio̍h kiâⁿ i, hō͘ lín oa̍h-teh, tit-tio̍h hok-khì; iā hō͘ lín ê ji̍t-chí, tī lín só͘ beh sêng-chiap ê tōe, tit-tio̍h kú-tn̂g.
1 這是耶和華lín ê上帝所命令教示lín ê誡命、律例、法度，hō͘ lín tī lín所beh過去得tio̍h做業ê地來行伊； 2 thang hō͘你kap你ê kiáⁿ-kiáⁿ孫孫，一生敬畏耶和華你ê上帝，執守伊一切ê律例、誡命，就是我所命令你ê，hō͘你ê日子得tio̍h久長。 3 以色列ah，你tio̍h聽，tio̍h執守來行伊；hō͘你thang tī hitê流奶kap蜜ê地，得tio̍h享福，人額加添極其chōe；親像耶和華你列祖ê上帝所應允你ê。 4 以色列ah，你tio̍h聽；耶和華咱ê上帝，是獨一ê耶和華； 5 你tio̍h盡心，盡性，盡力，疼耶和華你ê上帝。 6 我今á日所命令你chiahê話，tio̍h記tī你ê心； 7 也tio̍h用這勤勤教示你ê kiáⁿ兒，無論你坐tī厝內行tī路裡，睏á是起來，lóng tio̍h講論； 8 也tio̍h縛tī你ê手做記號，戴tī你兩蕊目睭ê中央做記念； 9 koh tio̍h寫tī你ê厝ê門khiā，以及你ê門。 10 耶和華你ê上帝chhōa你入伊對你ê列祖，亞伯拉罕、以撒、雅各，chiù-chōa beh hō͘你ê地；tī-hia有城大koh súi，m̄是你所起造ê； 11 也有厝積聚滿滿ê好物，m̄是你所積聚ê；也有開便ê水井，m̄是你所開ê； 12 也有葡萄園、橄欖樹，m̄是你所栽種ê；你食到飽，hit時你tio̍h謹慎，免得你bōe記得耶和華，就是chhōa你tùi埃及地，做奴才ê家，出來ê。 13 你tio̍h敬畏耶和華你ê上帝，服事祂，指祂ê名chiù-chōa； 14 m̄-thang thàn別ê上帝，就是lín四圍百姓hiahê上帝。 15 因為tī lín中間ê耶和華你ê上帝，斷斷無容允用別ê上帝匹配祂；是驚了耶和華你ê上帝大受氣你，tùi地上除滅你。 16 Lín m̄-thang試耶和華lín ê上帝，親像lín tī Má-sat試祂一樣。 17 Tio̍h致意守耶和華lín上帝ê誡命，kap伊所命令lín ê證據、律例。 18 耶和華所看做正直，做好ê，你tio̍h行伊，hō͘你thang享福，koh thang入去得tio̍h耶和華對你ê列祖所chiù-chōa ê好地； 19 beh對你ê面前趕出你lóng總ê對敵，照耶和華所講ê。 20 將來你ê kiáⁿ問你講，耶和華咱ê上帝所命令lín chiahê證據、律例、法度，是甚麼意思ah？ 21 你tio̍h kā你ê kiáⁿ講：前阮tī埃及做法老ê奴才，耶和華用大權能ê手，chhōa阮出埃及。 22 耶和華tī阮ê目睭前，用大koh厲害ê神蹟奇事，行tī埃及kap法老，以及伊ê全家； 23 tùi hia chhōa阮出來，beh chhōa阮入去，將伊對咱列祖所chiù-chōa ê地賞賜咱。 24 耶和華命令咱行chiahê一切ê律例，來敬畏耶和華咱ê上帝，hō͘咱常常得tio̍h福氣，得tio̍h祂保全咱ê性命，親像今á日ê款。 25 咱若照耶和華咱ê上帝所命令ê，tī祂ê面前照祂一切ê誡命來行，這就是咱ê義。
1 Che sī Iâ-hô-hoa lín ê Siōng-tè só͘ bēng-lēng kà-sī lín ê kài-bēng, lu̍t-lē, hoat-tō͘, hō͘ lín tī lín só͘ beh kè-khì tit-tio̍h chòe-gia̍p ê tōe lâi kiâⁿ i; 2 thang hō͘ lí kap lí ê kiáⁿ-kiáⁿ sun-sun, it-seng kèng-ùi Iâ-hô-hoa lí ê Siōng-tè, chip-siú I it-chhè ê lu̍t-lē, kài-bēng, chiū-sī góa só͘ bēng-lēng lí ê, hō͘ lí ê ji̍t-chí tit-tio̍h kú-tn̂g. 3 Í-sek-lia̍t ah, lí tio̍h thiaⁿ, tio̍h chip-siú lâi kiâⁿ i; hō͘ lí thang tī hit-ê lâu lin kap bi̍t ê tōe, tit-tio̍h hióng-hok, lâng-gia̍h ke-thiⁿ ke̍k-kî chōe; chhin-chhiūⁿ Iâ-hô-hoa lí lia̍t-chó͘ ê Siōng-tè só͘ èng-ún lí ê. 4 Í-sek-lia̍t ah, lí tio̍h thiaⁿ; Iâ-hô-hoa lán ê Siōng-tè, sī to̍k-it ê Iâ-hô-hoa; 5 lí tio̍h chīn-sim, chīn-sèng, chīn-la̍t, thiàⁿ Iâ-hô-hoa lí ê Siōng-tè. 6 Góa kin-á-ji̍t só͘ bēng-lēng lí chiah ê ōe, tio̍h kì tī lí ê sim; 7 iā tio̍h ēng che khûn-khûn kà-sī lí ê kiáⁿ-jî, bô-lūn lí chē tī chhù-lāi kiâⁿ tī lō͘-ni̍h, khùn á-sī khí-lâi, lóng tio̍h káng-lūn; 8 iā tio̍h pa̍k tī lí ê chhiú chòe kì-hō, tì tī lí nn̄g lúi ba̍k-chiu ê tiong-ng chòe kì-liām; 9 koh tio̍h siá tī lí ê chhù ê mn̂g-khiā, í-ki̍p lí ê mn̂g. 10 Iâ-hô-hoa lí ê Siōng-tè chhōa lí ji̍p I tùi lí ê lia̍t-chó͘, A-pek-la̍h-hán, Í-sat, Ngá-kok, chiù-chōa beh hō͘ lí ê tōe; tī-hia ū siâⁿ tōa koh súi, m̄-sī lí só͘ khí-chō ê; 11 iā ū chhù chek-chū móa-móa ê hó-mi̍h, m̄-sī lí só͘ chek-chū ê; iā ū khui-piān ê chúi-chíⁿ, m̄-sī lí só͘ khui ê; 12 iā ū phû-tô-hn̂g, kaⁿ-ná-chhiū, m̄-sī lí só͘ chai-chèng ê; lí chia̍h kàu pá, hit-sî lí tio̍h kín-sīn, bián-tit lí bōe-kì-tit Iâ-hô-hoa, chiū-sī chhōa lí tùi Ai-ki̍p tōe, chòe lô͘-châi ê ke, chhut-lâi ê. 13 Lí tio̍h kèng-ùi Iâ-hô-hoa lí ê Siōng-tè, ho̍k-sāi I, chí I ê miâ chiù-chōa; 14 m̄-thang thàn pa̍t ê siōng-tè, chiū-sī lín sì-ûi peh-sìⁿ hiah ê siōng-tè. 15 In-ūi tī lín tiong-kan ê Iâ-hô-hoa lí ê Siōng-tè, toàn-toàn bô iông-ún ēng pa̍t ê siōng-tè phit-phòe I; sī kiaⁿ-liáu Iâ-hô-hoa lí ê Siōng-tè tōa siū-khì lí, tùi tōe-chiūⁿ tû-bia̍t lí. 16 Lín m̄-thang chhì Iâ-hô-hoa lín ê Siōng-tè, chhin-chhiūⁿ lín tī Má-sat chhì I chi̍t-iūⁿ. 17 Tio̍h tì-ì siú Iâ-hô-hoa lín Siōng-tè ê kài-bēng, kap I só͘ bēng-lēng lín ê chèng-kù, lu̍t-lē. 18 Iâ-hô-hoa só͘ khòaⁿ-chòe chèng-ti̍t, chòe hó ê, lí tio̍h kiâⁿ i, hō͘ lí thang hióng-hok, koh thang ji̍p-khì tit-tio̍h Iâ-hô-hoa tùi lí ê lia̍t-chó͘ só͘ chiù-chōa ê hó-tōe; 19 beh tùi lí ê bīn-chêng kóaⁿ-chhut lí lóng-chóng ê tùi-te̍k chiàu Iâ-hô-hoa só͘ kóng ê. 20 Chiong-lâi lí ê kiáⁿ mn̄g lí kóng, Iâ-hô-hoa lán ê Siōng-tè só͘ bēng-lēng lín chiah ê chèng-kù, lu̍t-lē, hoat-tō͘, sī sím-mi̍h ì-sù ah? 21 Lí tio̍h kā lí ê kiáⁿ kóng, Chêng goán tī Ai-ki̍p chòe Hoat-ló ê lô͘-châi, Iâ-hô-hoa ēng tōa koân-lêng ê chhiú, chhōa goán chhut Ai-ki̍p. 22 Iâ-hô-hoa tī goán ê ba̍k-chiu-chêng, ēng tōa koh lī-hāi ê sîn-jiah kî-sū, kiâⁿ tī Ai-ki̍p kap Hoat-ló, í-ki̍p i ê choân-ke; 23 tùi hia chhōa goán chhut-lâi, beh chhōa goán ji̍p-khì, chiong I tùi lán lia̍t-chó͘ só͘ chiù-chōa ê tōe siúⁿ-sù lán. 24 Iâ-hô-hoa bēng-lēng lán kiâⁿ chiah-ê it-chhè ê lu̍t-lē, lâi kèng-ùi Iâ-hô-hoa lán ê Siōng-tè, hō͘ lán siông-siông tit-tio̍h hok-khì, tit-tio̍h I pó-choân lán ê sìⁿ-miā, chhin-chhiūⁿ kin-á-ji̍t ê khoán. 25 Lán nā chiàu Iâ-hô-hoa lán ê Siōng-tè só͘ bēng-lēng-ê, tī I ê bīn-chêng chiàu I it-chhè ê kài-bēng lâi kiâⁿ, che chiū-sī lán ê gī.
1 耶和華你ê上帝chhōa你入你所beh去得tio̍h ê地，對你ê面前趕出chōe-chōe邦國，就是Hek人、Kek-ka-sat人、A-mô͘-lī人、迦南人、Pí-lī-sé人、Hi-bī人、Iâ-pò͘-su人，共七國，lóng比你khah大khah猛； 2 耶和華你ê上帝將in交付你，hō͘你phah贏伊，hit時你tio̍h一盡滅in，m̄-thang kap in立約，也m̄-thang憐憫in； 3 m̄-thang kap in結親，你ê cha-bó͘-kiáⁿ m̄-thang嫁hō͘伊ê kiáⁿ，也m̄-thang kā你ê kiáⁿ娶伊ê cha-bó͘-kiáⁿ。 4 因為伊beh hō͘你ê kiáⁿ oa̍t-tńg無tè我，去服事別ê上帝；致到耶和華大受氣lín，緊緊滅lín。 5 總是lín tio̍h án-ni款待in；拆毀in ê祭壇，phah碎in雕刻ê柱，剉in ê A-sài-lîm，用火燒in所妝ê偶像。 6 因為lín做聖潔ê百姓，歸tī耶和華你ê上帝。耶和華你ê上帝tùi地上萬百姓中揀你，特別做伊家己ê百姓。 7 耶和華疼lín，揀lín，m̄是因為lín ê人額比別國khah-chōe；因為lín ê人額是萬國中第一少ê； 8 是因為耶和華疼lín，koh因為beh行伊對lín列祖所chiù-chōa ê，耶和華chiah用大權能ê手chhōa lín出來，tùi做奴才ê家救贖lín，脫離埃及王法老ê手。 9 所以你tio̍h知耶和華你ê上帝，祂是上帝，是信實ê上帝，為tio̍h疼祂守祂誡命ê人，行祂ê約kap慈愛，直到千代。 10 見若怨恨祂ê人，祂beh當面報應來滅in；怨恨祂ê人，祂beh當面報應伊，無beh 延chhiân。 11 所以你tio̍h執守我今á日所命令你ê誡命、律例、法度，來行伊。 12 後來lín若聽chiahê法度，執守來行伊，耶和華你ê上帝因為án-ni beh kā你行祂對你ê列祖所chiù-chōa ê約kap慈愛。 13 伊beh疼你，賜福你，hō͘你興旺；也beh tī祂對你ê列祖chiù-chōa賞賜你ê地，賜福你ê胎所生ê，你ê地所出ê，kap你ê五穀，你ê酒，你ê油，以及你ê牛á，kap你ê羊á-kiáⁿ。 14 你beh得tio̍h賜福贏過萬百姓；lín中間ê男女無一个bōe生養；lín中間ê cheng-siⁿ無一隻bōe生湠。 15 耶和華beh hō͘一切ê病症離開你；你所知埃及ta̍k樣ê pháiⁿ症頭，祂無hō͘你tú-tio̍h一項；是beh hō͘一切怨恨你ê人tú-tio̍h。 16 耶和華你ê上帝所beh交付你ê百姓，你tio̍h lóng滅in；你ê目睭m̄-thang可憐in，你也m̄-thang服事in ê上帝；因為這beh做害你ê羅網。 17 你若心內想講：Chiahê國比我khah大，我thái-thó能趕逐in ah？ 18 你m̄免驚in；的確tio̍h記得耶和華你ê上帝ǹg法老kap埃及全地所行ê事； 19 就是你親目看見ê大試煉、神蹟、奇事，kap大權能ê手，kap伸出來ê手骨，lóng是耶和華你ê上帝所用來chhōa你出ê；耶和華你ê上帝也beh án-ni行tī你所驚一切ê百姓。 20 Koh耶和華你ê上帝beh差大隻蜂，飛到in中間，直到in所chhun來閃bih-ê，滅tī你ê面前。 21 你m̄免驚in；因為耶和華你ê上帝是大koh thang驚ê上帝，tī lín中間。 22 耶和華你ê上帝beh tī你ê面前漸漸除滅chiahê國；你m̄-thang緊緊滅伊到盡，驚了野獸加添chōe-chōe來害你。 23 耶和華你ê上帝beh將in交付你，hō͘ in大驚擾亂，直到in滅無； 24 koh beh用in hiahê王交tī你ê手，你beh除滅in ê名tī天下；的確無一人能khiā tī你ê面前，直到你滅無in。 25 In所雕刻in ê上帝ê像，lín tio̍h用火燒伊；伊ê身上ê金銀你m̄-thang貪，也m̄-thang the̍h伊做家己ê；驚了你ūi chitê陷落羅網；因為這是耶和華你ê上帝所厭惡ê。 26 見若thang厭惡ê物，你m̄-thang帶入你ê厝，驚了你也成做thang咒詛ê，kap hiahê物一樣；你tio̍h極其痛恨，極其厭惡；因為是thang咒詛ê。
1 Iâ-hô-hoa lí ê Siōng-tè chhōa lí ji̍p lí só͘ beh khì tit-tio̍h ê tōe, tùi lí ê bīn-chêng kóaⁿ-chhut chōe-chōe pang-kok, chiū-sī Hek lâng, Kek-ka-sat lâng, A-mô͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, kiōng chhit-kok, lóng pí lí khah-tōa khah-béng; 2 Iâ-hô-hoa lí ê Siōng-tè chiong in kau-hù lí, hō͘ lí phah-iâⁿ i, hit-sî lí tio̍h it-chīn bia̍t in, m̄-thang kap in li̍p-iok, iā m̄-thang lîn-bín in; 3 m̄-thang kap in kiat-chhin, lí ê cha-bó͘-kiáⁿ m̄-thang kè hō͘ i ê kiáⁿ, iā m̄-thang kā lí ê kiáⁿ chhōa i ê cha-bó͘-kiáⁿ. 4 In-ūi i beh hō͘ lí ê kiáⁿ oa̍t-tńg bô tè Góa, khì ho̍k-sāi pa̍t ê siōng-tè; tì-kàu Iâ-hô-hoa tōa siū-khì lín, kín-kín bia̍t lín. 5 Chóng-sī lín tio̍h án-ni khoán-thāi in; thiah-húi in ê chè-tôaⁿ, phah-chhùi in tiau-khek ê thiāu, chhò in ê A-sài-lîm, ēng hé sio in só͘ chng ê ngó͘-siōng. 6 In-ūi lín chòe sèng-kiat ê peh-sìⁿ, kui tī Iâ-hô-hoa lí ê Siōng-tè. Iâ-hô-hoa lí ê Siōng-tè tùi tōe-chiūⁿ bān peh-sìⁿ-tiong kéng lí, te̍k-pia̍t chòe I ka-kī ê peh-sìⁿ. 7 Iâ-hô-hoa thiàⁿ lín, kéng lín, m̄-sī in-ūi lín ê lâng-gia̍h pí pa̍t-kok khah-chōe; in-ūi lín ê lâng-gia̍h sī bān-kok-tiong tē-it chió-ê; 8 sī in-ūi Iâ-hô-hoa thiàⁿ lín, koh in-ūi beh kiâⁿ I tùi lín lia̍t-chó͘ só͘ chiù-chōa ê, Iâ-hô-hoa chiah ēng tōa koân-lêng ê chhiú chhōa lín chhut-lâi, tùi chòe lô͘-châi ê ke kiù-sio̍k lín, thoat-lī Ai-ki̍p ông Hoat-ló ê chhiú. 9 Só͘-í lí tio̍h chai Iâ-hô-hoa lí ê Siōng-tè, I sī Siōng-tè, sī sìn-si̍t ê Siōng-tè, ūi-tio̍h thiàⁿ I siú I kài-bēng ê lâng, kiâⁿ I ê iok kap chû-ài, ti̍t-kàu chheng-tāi. 10 Kìⁿ-nā oàn-hūn I ê lâng, I beh tng-bīn pò-èng lâi bia̍t in; oàn-hūn I ê lâng, I beh tng-bīn pò-èng i, bô beh iân-chhiân. 11 Só͘-í lí tio̍h chip-siú góa kin-á-ji̍t só͘ bēng-lēng lí ê kài-bēng, lu̍t-lē, hoat-tō͘, lâi kiâⁿ i. 12 Āu-lâi lín nā thiaⁿ chiah ê hoat-tō͘, chip-siú lâi kiâⁿ i, Iâ-hô-hoa lí ê Siōng-tè in-ūi án-ni beh kā lí kiâⁿ I tùi lí ê lia̍t-chó͘ só͘ chiù-chōa ê iok kap chû-ài. 13 I beh thiàⁿ lí, sù-hok lí, hō͘ lí heng-ōng; iā beh tī I tùi lí ê lia̍t-chó͘ chiù-chōa siúⁿ-sù lí ê tōe, sù-hok lí ê thai só͘-siⁿ-ê, lí ê tōe só͘-chhut-ê, kap lí ê ngó͘-kok, lí ê chiú, lí ê iû, í-ki̍p lí ê gû-á, kap lí ê iûⁿ-á-kiáⁿ. 14 Lí beh tit-tio̍h sù-hok iâⁿ-kè bān peh-sìⁿ; lín tiong-kan ê lâm-lú bô chi̍t-ê bōe seng-ióng; lín tiong-kan ê cheng-siⁿ bô chi̍t-chiah bōe siⁿ-thòaⁿ. 15 Iâ-hô-hoa beh hō͘ it-chhè ê pīⁿ-chèng lī-khui lí; lí só͘ chai Ai-ki̍p ta̍k-iūⁿ ê pháiⁿ chèng-thâu, I bô hō͘ lí tú-tio̍h chi̍t-hāng; sī beh hō͘ it-chhè oàn-hūn lí ê lâng tú-tio̍h. 16 Iâ-hô-hoa lí ê Siōng-tè só͘ beh kau-hù lí ê peh-sìⁿ, lí tio̍h lóng bia̍t in; lí ê ba̍k-chiu m̄-thang khó-lîn in, lí iā m̄-thang ho̍k-sāi in ê siōng-tè; in-ūi che beh chòe hāi lí ê lô-bāng. 17 Lí nā sim-lāi siūⁿ kóng, Chiah ê kok pí góa khah-tōa, góa thái-thó ōe kóaⁿ-tio̍k in ah? 18 Lí m̄-bián kiaⁿ in; tek-khak tio̍h kì-tit Iâ-hô-hoa lí ê Siōng-tè ǹg Hoat-ló kap Ai-ki̍p choân-tōe só͘ kiâⁿ ê sū; 19 chiū-sī lí chhin-ba̍k khòaⁿ-kìⁿ ê tōa chhì-liān, sîn-jiah, kî-sū, kap tōa koân-lêng ê chhiú, kap chhun-chhut-lâi ê chhiú-kut, lóng sī Iâ-hô-hoa lí ê Siōng-tè só͘ ēng lâi chhōa lí chhut-ê; Iâ-hô-hoa lí ê Siōng-tè iā beh án-ni kiâⁿ tī lí só͘ kiaⁿ it-chhè ê peh-sìⁿ. 20 Koh Iâ-hô-hoa lí ê Siōng-tè beh chhe tōa chiah phang, pe-kàu in tiong-kan, ti̍t-kàu in só͘ chhun lâi siám-bih-ê, bia̍t tī lí ê bīn-chêng. 21 Lí m̄-bián kiaⁿ in; in-ūi Iâ-hô-hoa lí ê Siōng-tè sī tōa koh thang kiaⁿ ê Siōng-tè, tī lín tiong-kan. 22 Iâ-hô-hoa lí ê Siōng-tè beh tī lí ê bīn-chêng chiām-chiām tû-bia̍t chiah ê kok; lí m̄-thang kín-kín bia̍t i kàu-chīn, kiaⁿ-liáu iá-siù ke-thiⁿ chōe-chōe lâi hāi lí. 23 Iâ-hô-hoa lí ê Siōng-tè beh chiong in kau-hù lí, hō͘ in tōa-kiaⁿ jiáu-loān, ti̍t-kàu in bia̍t-bô; 24 koh beh ēng in hiah ê ông kau tī lí ê chhiú, lí beh tû-bia̍t in ê miâ tī thiⁿ-ē; tek-khak bô chi̍t-lâng ōe khiā tī lí ê bīn-chêng, ti̍t-kàu lí bia̍t-bô in. 25 In só͘ tiau-khek in ê siōng-tè ê siōng, lín tio̍h ēng hé sio i; i ê sin-chiūⁿ ê kim-gûn lí m̄-thang tham, iā m̄-thang the̍h i chòe ka-kī-ê; kiaⁿ-liáu lí ūi chit-ê hām-lo̍h lô-bāng; in-ūi che sī Iâ-hô-hoa lí ê Siōng-tè só͘ iàm-ò͘ⁿ-ê . 26 Kìⁿ-nā thang iàm-ò͘ⁿ ê mi̍h, lí m̄-thang tòa-ji̍p lí ê chhù, kiaⁿ-liáu lí iā chiâⁿ-chòe thang chiù-chó͘-ê, kap hiah ê mi̍h chi̍t-iūⁿ; lí tio̍h ke̍k-kî thòng-hūn, ke̍k-kî iàm-ò͘ⁿ; in-ūi sī thang chiù-chó͘-ê.
1 我今á日所命令你一切ê誡命，lín tio̍h執守來行伊，hō͘ lín thang活，人額加添chōe-chōe，thang入去得tio̍h耶和華對lín ê列祖所chiù-chōa應允ê地。 2 你也tio̍h記得耶和華你ê上帝chit四十年chhōa你tī曠野ê路，是beh hō͘你謙卑來試驗你，beh知你ê心內怎樣，肯守伊ê誡命á無。 3 伊hō͘你謙卑，hō͘你iau餓，用你所m̄-bat，你ê列祖也m̄-bat，ê má-ná養飼你；hō͘你知人m̄是kan-ta óa靠餅來活，人是óa靠耶和華嘴所講一切ê話來活。 4 Chit四十年你ê衫褲無破，你ê腳也無phòng-phā。 5 你ê心tio̍h知，耶和華你ê上帝教督你，親像人教督伊ê kiáⁿ一樣； 6 koh你tio̍h執守耶和華你ê上帝ê誡命，來行伊ê道路，來敬畏伊。 7 因為耶和華你ê上帝chhōa你入hitê súi ê地；hitê地有溪，有水泉，有深淵，tùi山谷kap山流出來； 8 是出小麥、大麥、葡萄樹、無花果樹，石榴樹ê地，也出橄欖樹kap蜜ê地。 9 你tī hit所在食物充足，tī-hia你也無欠一項；hit所在ê石頭是鐵，tī伊ê山thang掘銅； 10 你beh食到飽，就為tio̍h伊所賞賜你ê súi地，來o-ló耶和華你ê上帝。 11 你tio̍h謹慎，免得你bōe記得耶和華─你ê上帝，無守伊ê誡命、法度、律例，就是我今á日所命令你ê； 12 驚了你已經食飽，已經起 súi ê厝來khiā起； 13 你ê牛羊加添，你ê金銀加添，你所有ê lóng加添， 14 Hit時你ê心自高，bōe記得耶和華─你ê上帝，就是chhōa你tùi埃及地，做奴才ê家，出來ê。 15 伊chhōa你經過hitê大koh thang驚ê曠野，hia有火蛇、蠍á蟲，乾燥無水ê地；伊bat為tio̍h你hō͘水tùi tēng ê石磐流出來。 16 Koh tī曠野，將你ê列祖所m̄-bat ê má-ná養飼你，是beh hō͘你謙卑，試驗你，hō͘你到尾得tio̍h福氣； 17 驚了你心內想講：得tio̍h chitê大ê基業是tùi我ê氣力，我ê手ê能力。 18 總是你tio̍h記得耶和華你ê上帝；因為你得tio̍h大基業ê氣力，是伊hō͘你，beh成伊所對你ê列祖chiù-chōa ê約，親像今á日ê款。 19 將來你若bōe記得耶和華你ê上帝thàn別ê上帝服事伊，敬拜伊，我今á日嚴嚴警誡lín，lín的確滅無。 20 耶和華tī lín ê面前所滅無hiahê國，lín也beh án-ni滅無；因為lín m̄聽thàn耶和華lín上帝ê話。
1 Góa kin-á-ji̍t só͘ bēng-lēng lí it-chhè ê kài-bēng, lín tio̍h chip-siú lâi kiâⁿ i, hō͘ lín thang oa̍h, lâng-gia̍h ke-thiⁿ chōe-chōe, thang ji̍p-khì tit-tio̍h Iâ-hô-hoa tùi lín ê lia̍t-chó͘ só͘ chiù-chōa èng-ún ê tōe. 2 Lí iā tio̍h kì-tit Iâ-hô-hoa lí ê Siōng-tè chit sì-cha̍p nî chhōa lí tī khòng-iá ê lō͘, sī beh hō͘ lí khiam-pi lâi chhì-giām lí, beh chai lí ê sim-lāi cháiⁿ-iūⁿ, khéng siú I ê kài-bēng á-bô. 3 I hō͘ lí khiam-pi, hō͘ lí iau-gō, ēng lí só͘ m̄-bat, lí ê lia̍t-chó͘ iā m̄-bat, ê má-ná iúⁿ-chhī lí; hō͘ lí chai lâng m̄-sī kan-ta óa-khò piáⁿ lâi oa̍h, lâng sī óa-khò Iâ-hô-hoa chhùi só͘ kóng it-chhè ê ōe lâi oa̍h. 4 Chit sì-cha̍p nî lí ê saⁿ-khò͘ bô phòa, lí ê kha iā bô phòng-phā. 5 Lí ê sim tio̍h chai, Iâ-hô-hoa lí ê Siōng-tè kàu-tok lí, chhin-chhiūⁿ lâng kàu-tok i ê kiáⁿ chi̍t-iūⁿ; 6 koh lí tio̍h chip-siú Iâ-hô-hoa lí ê Siōng-tè ê kài-bēng, lâi kiâⁿ I ê tō-lō͘, lâi kèng-ùi I. 7 In-ūi Iâ-hô-hoa lí ê Siōng-tè chhōa lí ji̍p hit ê súi ê tōe; hit ê tōe ū khoe, ū chúi-chôaⁿ, ū chhim-ian, tùi soaⁿ-kok kap soaⁿ lâu-chhut-lâi; 8 sī chhut sió-be̍h, tōa-be̍h, phû-tô-chhiū, bû-hoa-kó-chhiū, sia̍h-liû-chhiū ê tōe, iā chhut kaⁿ-ná-chhiū kap bi̍t ê tōe. 9 Lí tī hit só͘-chāi chia̍h mi̍h chhiong-chiok, tī-hia lí iā bô khiàm chi̍t-hāng; hit só͘-chāi ê chio̍h-thâu sī thih, tī i ê soaⁿ thang ku̍t tâng; 10 lí beh chia̍h kàu pá, chiū ūi-tio̍h I só͘ siúⁿ-sù lí ê súi tōe, lâi o-ló Iâ-hô-hoa lí ê Siōng-tè. 11 Lí tio̍h kín-sīn, bián-tit lí bōe-kì-tit Iâ-hô-hoa, lí ê Siōng-tè, bô siú I ê kài-bēng, hoat-tō͘, lu̍t-lē, chiū-sī góa kin-á-ji̍t só͘ bēng-lēng lí ê; 12 kiaⁿ-liáu lí í-keng chia̍h-pá, í-keng khí súi ê chhù lâi khiā-khí; 13 lí ê gû iûⁿ ke-thiⁿ, lí ê kim-gûn ke-thiⁿ, lí só͘-ū-ê lóng ke-thiⁿ, 14 hit-sî lí ê sim chū-ko, bōe-kì-tit Iâ-hô-hoa, lí ê Siōng-tè, chiū-sī chhōa lí tùi Ai-ki̍p tōe, chòe lô͘-châi ê ke, chhut-lâi ê. 15 I chhōa lí keng-kè hit ê tōa koh thang kiaⁿ ê khòng-iá, hia ū hé-chôa, giat-á-thâng, ta-sò bô chúi ê tōe; I bat ūi-tio̍h lí hō͘ chúi tùi tēng ê chio̍h-pôaⁿ lâu-chhut-lâi. 16 Koh tī khòng-iá, chiong lí ê lia̍t-chó͘ só͘ m̄-bat ê má-ná iúⁿ-chhī lí, sī beh hō͘ lí khiam-pi, chhì-giām lí, hō͘ lí kàu-bé tit-tio̍h hok-khì; 17 kiaⁿ-liáu lí sim-lāi siūⁿ kóng, Tit-tio̍h chit ê tōa ê ki-gia̍p sī tùi góa ê khùi-la̍t, góa ê chhiú ê lêng-le̍k. 18 Chóng-sī lí tio̍h kì-tit Iâ-hô-hoa lí ê Siōng-tè; in-ūi lí tit-tio̍h tōa ki-gia̍p ê khùi-la̍t, sī I hō͘ lí, beh chiâⁿ I só͘ tùi lí ê lia̍t-chó͘ chiù-chōa ê iok, chhin-chhiūⁿ kin-á-ji̍t ê khoán. 19 Chiong-lâi lí nā bōe-kì-tit Iâ-hô-hoa lí ê Siōng-tè thàn pa̍t ê siōng-tè ho̍k-sāi i, kèng-pài i, góa kin-á-ji̍t giâm-giâm kéng-kài lín, lín tek-khak bia̍t-bô. 20 Iâ-hô-hoa tī lín ê bīn-chêng só͘ bia̍t-bô hiah ê kok, lín iā beh án-ni bia̍t-bô; in-ūi lín m̄ thiaⁿ-thàn Iâ-hô-hoa lín Siōng-tè ê ōe.
1 以色列ah，tio̍h聽；你今á日beh過約旦，入去承接hiahê比你khah大，khah猛ê國，得tio̍h闊大koh堅固到抵天ê城； 2 Hit-ê百姓，大koh lò，是A-la̍p ê族，lín所知ê，也bat聽見有人指in講：Chī-chūi tī A-la̍p族ê面前khiā能tiâu ah？ 3 今á日你tio̍h知，耶和華你ê上帝做你ê頭前過去，親像烈烈ê火；伊beh滅無in，hō͘ in大大刣輸tī lín ê面前；lín tio̍h趕in出，hō͘ in緊緊滅無，照耶和華所對lín講ê。 4 耶和華你ê上帝對你ê面前趕出in了後，你心內m̄-thang想講：耶和華chhōa我入來承接chitê地是因為我ê義；其實耶和華是為tio̍h hiahê國ê pháiⁿ，chiah對你ê面前趕in出。 5 你入去承接in ê地，並m̄是因為你ê義，也m̄是因為你ê心正直；就是因為chiahê國ê pháiⁿ，耶和華你ê上帝chiah對你ê面前趕in出去；koh因為耶和華beh堅固伊對你ê列祖亞伯拉罕、以撒、雅各，所chiù-chōa ê話。 6 你tio̍h知，耶和華你ê上帝用súi ê地賞賜lín做業，m̄是因為你ê義，因為你是頷頸硬ê百姓。 7 你tio̍h記得，m̄-thang bōe記得，你tī曠野惹tio̍h耶和華你ê上帝ê受氣；tùi lín出埃及地hit日，到lín來到chitê所在，lín常常悖逆耶和華。 8 Lín tī何烈山koh惹耶和華受氣，致到耶和華受氣lín，beh滅無lín。 9 當時我上山，beh領受石碑，就是耶和華kap lín立約ê碑；hit時我tiàm tī山裡四十日四十暝，無食餅，無lim水。 10 耶和華用兩塊石碑交帶我，是上帝用指頭á寫ê；hit頂面所寫ê，是照耶和華tī大會ê日，tī山頂，tī火中，對lín所講一切ê話。 11 四十日四十暝了後，耶和華用hit兩塊石碑，就是約碑，交帶我。 12 耶和華對我講，你起來，緊緊tùi chia落去；因為你ê百姓，你tùi埃及chhōa出來ê，已經敗壞家己；in快快偏歪我所命令ê路；因為in為家己鑄一sian偶像。 13 耶和華koh吩咐我講：我看chitê百姓，看ah，是頷頸硬ê百姓。 14 你chhut-chāi我，我beh滅in，tùi天下擦滅in ê名；我beh hō͘你成做一國比in khah強khah大。 15 我就oa̍t-tńg身落山，山hō͘火燒to̍h，兩塊約碑tī我兩支手裡； 16 我一下看，lín已經得罪耶和華lín ê上帝，為家己鑄一隻牛á，緊緊歪chhoa̍h耶和華所命令lín ê路。 17 我用hit兩塊碑tùi我ê雙手hiat落去，phah折tī lín ê目睭前。 18 我仆tī耶和華ê面前，親像前ê款，四十日四十暝，無食餅，無lim水；因為lín所犯一切ê罪，行耶和華看做pháiⁿ ê事，惹伊ê受氣。 19 Hit時耶和華大m̄甘願，受氣lín，我就真驚，因為伊受氣beh滅lín；總是hit-pái耶和華koh聽我。 20 耶和華也受氣亞倫，beh滅伊，siâng hit時我也替亞倫祈禱。 21 Hit時我用lín犯罪ê物，就是lín所鑄ê牛á，用火燒伊，koh搥伊，研到幼幼，幼到親像土粉；我用chitê土粉也tī tùi山頂流落來ê溪。 22 Lín也tī Tha-pī-la̍h，tī Má-sat，tī Ki-phok-lô-hap-tha-óa，koh激起耶和華ê受氣。 23 耶和華差lín離開Ka-te-su Pa-nî-a講：Lín上去承接我所賞賜lín ê地；hit時lín違背耶和華lín上帝ê命令，m̄信伊，也m̄聽伊ê話。 24 Tùi我bat lín ê日，lín常常悖逆耶和華。 25 我因為耶和華講beh滅lín，就仆tī耶和華ê面前，仆teh四十日四十暝。 26 我祈禱耶和華講：主耶和華ah，求你莫得滅無你ê百姓，你ê產業，就是你用大氣力贖回ê，用大權能ê手chhōa出埃及ê； 27 求你tio̍h記得你ê奴僕亞伯拉罕、以撒、雅各；莫得記念chitê百姓ê硬心kap in ê pháiⁿ，in ê罪； 28 驚了你chhōa阮出來hit所在ê人講：耶和華因為bōe會chhōa in入伊所應允in ê地，koh怨恨in，所以chhōa in出去，beh滅in tī曠野。 29 M̄-kú in是你ê百姓，你ê產業，是你用你ê大權能，用你伸出來ê手，所chhōa出來ê。
1 Í-sek-lia̍t ah, tio̍h thiaⁿ; lí kin-á-ji̍t beh kè Iok-tàn, ji̍p-khì sêng-chiap hiah ê pí lí khah-tōa, khah-béng ê kok, tit-tio̍h khoah-tōa koh kian-kò͘ kàu tú-thiⁿ ê siâⁿ; 2 hit ê peh-sìⁿ, tōa koh lò, sī A-la̍p ê cho̍k, lín só͘ chai ê, iā bat thiaⁿ-kìⁿ ū lâng chí in kóng, Chī-chūi tī A-la̍p cho̍k ê bīn-chêng khiā-ōe-tiâu ah? 3 Kin-á-ji̍t lí tio̍h chai, Iâ-hô-hoa lí ê Siōng-tè chòe lí ê thâu-chêng kè-khì, chhin-chhiūⁿ lia̍t-lia̍t ê hé; I beh bia̍t-bô in, hō͘ in tōa-tōa thâi-su tī lín ê bīn-chêng; lín tio̍h kóaⁿ in chhut, hō͘ in kín-kín bia̍t-bô, chiàu Iâ-hô-hoa só͘ tùi lín kóng ê. 4 Iâ-hô-hoa lí ê Siōng-tè tùi lí ê bīn-chêng kóaⁿ-chhut in liáu-āu, lí sim-lāi m̄-thang siūⁿ kóng, Iâ-hô-hoa chhōa góa ji̍p-lâi sêng-chiap chit ê tōe sī in-ūi góa ê gī; kî-si̍t Iâ-hô-hoa sī ūi-tio̍h hiah ê kok ê pháiⁿ, chiah tùi lí ê bīn-chêng kóaⁿ in chhut. 5 Lí ji̍p-khì sêng-chiap in ê tōe, pēng m̄-sī in-ūi lí ê gī, iā m̄-sī in-ūi lí ê sim chèng-ti̍t; chiū-sī in-ūi chiah ê kok ê pháiⁿ, Iâ-hô-hoa lí ê Siōng-tè chiah tùi lí ê bīn-chêng kóaⁿ in chhut-khì; koh in-ūi Iâ-hô-hoa beh kian-kò͘ I tùi lí ê lia̍t-chó͘ A-pek-la̍h-hán, Í-sat, Ngá-kok, só͘ chiù-chōa ê ōe. 6 Lí tio̍h chai, Iâ-hô-hoa lí ê Siōng-tè ēng súi ê tōe siúⁿ-sù lín chòe-gia̍p, m̄-sī in-ūi lí ê gī, in-ūi lí sī ām-kún ngī ê peh-sìⁿ. 7 Lí tio̍h kì-tit, m̄-thang bōe-kì-tit, lí tī khòng-iá jiá-tio̍h Iâ-hô-hoa lí ê Siōng-tè ê siū-khì; tùi lín chhut Ai-ki̍p tōe hit-ji̍t, kàu lín lâi kàu chit ê só͘-chāi, lín siông-siông pōe-ge̍k Iâ-hô-hoa. 8 Lín tī Hô-lia̍t soaⁿ koh jiá Iâ-hô-hoa siū-khì, tì-kàu Iâ-hô-hoa siū-khì lín, beh bia̍t-bô lín. 9 Tng-sî góa chiūⁿ-soaⁿ, beh niá-siū chio̍h-pi, chiū-sī Iâ-hô-hoa kap lín li̍p-iok ê pi; hit-sî góa tiàm tī soaⁿ-ni̍h sì-cha̍p ji̍t sì-cha̍p mî, bô chia̍h-piáⁿ, bô lim-chúi. 10 Iâ-hô-hoa ēng nn̄g tè chio̍h-pi kau-tài góa, sī Siōng-tè ēng chńg-thâu-á siá ê; hit téng-bīn só͘ siá ê, sī chiàu Iâ-hô-hoa tī tōa-hōe ê ji̍t, tī soaⁿ-téng, tī hé-tiong, tùi lín só͘ kóng it-chhè ê ōe. 11 Sì-cha̍p ji̍t sì-cha̍p mî liáu-āu, Iâ-hô-hoa ēng hit nn̄g tè chio̍h-pi, chiū-sī iok-pi, kau-tài góa. 12 Iâ-hô-hoa tùi góa kóng, Lí khí-lâi, kín-kín tùi chia lo̍h-khì; in-ūi lí ê peh-sìⁿ, lí tùi Ai-ki̍p chhōa-chhut-lâi ê, í-keng pāi-hoāi ka-kī; in khoài-khoài phian-oai Góa só͘ bēng-lēng ê lō͘; in-ūi in ūi ka-kī chù chi̍t sian ngó͘-siōng. 13 Iâ-hô-hoa koh hoan-hù góa kóng, Góa khòaⁿ chit ê peh-sìⁿ, khòaⁿ ah, sī ām-kún ngī ê peh-sìⁿ. 14 Lí chhut-chāi Góa, Góa beh bia̍t in, tùi thiⁿ-ē chhat-bia̍t in ê miâ; Góa beh hō͘ lí chiâⁿ-chòe chi̍t-kok pí in khah-kiông khah-tōa. 15 Góa chiū oa̍t-tńg-sin lo̍h-soaⁿ, soaⁿ hō͘ hé sio-to̍h, nn̄g tè iok-pi tī góa nn̄g ki chhiú-ni̍h; 16 góa chi̍t-ē khòaⁿ, lín í-keng tek-chōe Iâ-hô-hoa lín ê Siōng-tè, ūi ka-kī chù chi̍t chiah gû-á, kín-kín oai-chhoa̍h Iâ-hô-hoa só͘ bēng-lēng lín ê lō͘. 17 Góa ēng hit nn̄g tè pi tùi góa ê siang-chhiú hiat-lo̍h-khì, phah-chi̍h tī lín ê ba̍k-chiu-chêng. 18 Góa phak tī Iâ-hô-hoa ê bīn-chêng, chhin-chhiūⁿ chêng ê khoán, sì-cha̍p ji̍t sì-cha̍p mî, bô chia̍h-piáⁿ, bô lim-chúi; in-ūi lín só͘ hoān it-chhè ê chōe, kiâⁿ Iâ-hô-hoa khòaⁿ-chòe pháiⁿ ê sū, jiá I ê siū-khì. 19 Hit-sî Iâ-hô-hoa tōa m̄ kam-goān, siū-khì lín, góa chiū chin kiaⁿ, in-ūi I siū-khì beh bia̍t lín; chóng-sī hit-pái Iâ-hô-hoa koh thiaⁿ góa. 20 Iâ-hô-hoa iā siū-khì A-lûn, beh bia̍t i, siâng hit-sî góa iā thòe A-lûn kî-tó. 21 Hit-sî góa ēng lín hoān-chōe ê mi̍h, chiū-sī lín só͘ chù ê gû-á, ēng hé sio i, koh tûi i, géng kàu iù-iù, iù kàu chhin-chhiūⁿ thô͘-hún; góa ēng chit ê thô͘-hún iā tī tùi soaⁿ-téng lâu-lo̍h-lâi ê khoe. 22 Lín iā tī Tha-pī-la̍h, tī Má-sat, tī Ki-phok-lô-hap-tha-óa, koh kek-khí Iâ-hô-hoa ê siū-khì. 23 Iâ-hô-hoa chhe lín lī-khui Ka-te-su Pa-nî-a kóng, Lín chiūⁿ-khì sêng-chiap Góa só͘ siúⁿ-sù lín ê tōe; hit-sî lín ûi-pōe Iâ-hô-hoa lín Siōng-tè ê bēng-lēng, m̄-sìn I, iā m̄ thiaⁿ I ê ōe. 24 Tùi góa bat lín ê ji̍t, lín siông-siông pōe-ge̍k Iâ-hô-hoa. 25 Góa in-ūi Iâ-hô-hoa kóng beh bia̍t lín, chiū phak tī Iâ-hô-hoa ê bīn-chêng, phak-teh sì-cha̍p ji̍t sì-cha̍p mî. 26 Góa kî-tó Iâ-hô-hoa kóng, Chú Iâ-hô-hoa ah, kiû Lí bo̍h-tit bia̍t-bô Lí ê peh-sìⁿ, Lí ê sán-gia̍p, chiū-sī Lí ēng tōa khùi-la̍t sio̍k-hôe ê, ēng tōa koân-lêng ê chhiú chhōa-chhut Ai-ki̍p ê; 27 kiû Lí tio̍h kì-tit Lí ê lô͘-po̍k A-pek-la̍h-hán, Í-sat, Ngá-kok; bo̍h-tit kì-liām chit ê peh-sìⁿ ê ngī-sim kap in ê pháiⁿ, in ê chōe; 28 kiaⁿ-liáu Lí chhōa goán chhut-lâi hit só͘-chāi ê lâng kóng, Iâ-hô-hoa in-ūi bōe-ōe chhōa in ji̍p I só͘ èng-ún in ê tōe, koh oàn-hūn in, só͘-í chhōa in chhut-khì, beh bia̍t in tī khòng-iá. 29 M̄-kú in sī Lí ê peh-sìⁿ, Lí ê sán-gia̍p, sī Lí ēng Lí ê tōa koân-lêng, ēng Lí chhun-chhut-lâi ê chhiú, só͘ chhōa-chhut-lâi ê.
1 Hit時耶和華kā我講：你tio̍h phah兩塊石碑，親像前ê款，上山來我chia；koh tio̍h做一个柴ê櫃。 2 你前所phah折hiahê碑，hit頂面ê話，我beh寫tī chiahê碑ê頂面；你tio̍h hē in tī櫃內。 3 我就用皂莢柴做一个櫃，koh phah兩塊石碑親像前ê款；我親手the̍h chit兩塊碑上山。 4 耶和華將伊tī大會 ê日，tī山頂，tùi火中kā你講ê十誡，照前所寫ê款，寫tī hiahê碑裡；耶和華就將hiahê交帶我。 5 我oa̍t-tńg身落山，將hiahê碑hē tī我所做ê櫃，照耶和華ê命令；到taⁿ iáu tī-hia。 6 (以色列人tùi Pí-lô-pí-nî-a-kan起身，到Mô͘-se-la̍h；亞倫死tī-hia，就埋葬tī-hia；伊ê kiáⁿ Í-li-a-sat續接伊擔當祭司ê職。 7 In tùi hia起身，到Kok-ko-tāi，koh tùi Kok-ko-tāi到Iok-pa-tha，就是有溪水ê地； 8 Hit時耶和華分別利未支派，扛耶和華ê約櫃，khiā tī耶和華ê面前來服事伊，奉伊ê名來祝福，到今á日； 9 所以利未tī伊ê兄弟中無份無業，耶和華是伊ê產業，照耶和華你ê上帝所對伊講ê。) 10 我koh親像頭pái tiàm tī山頂四十日四十暝；hit-pái耶和華也聽我，耶和華m̄-kam滅你。 11 耶和華kā我講：你起來做頭行tī百姓ê面前，hō͘ in入去承接我所對in ê列祖chiù-chōa beh hō͘ in ê地。 12 以色列ah，taⁿ耶和華你ê上帝ài你甚麼ah？Kiám-m̄是獨獨ài你敬畏耶和華你ê上帝，行伊一切ê道路，疼伊，盡心盡性服事耶和華你ê上帝； 13 守耶和華chiahê誡命，kap伊ê律例，就是我今á日所命令你ê，為tio̍h beh hō͘你得tio̍h福氣mah？ 14 看ah，天kap chiahê天ê天，地kap地上所有ê，lóng屬耶和華你ê上帝。 15 耶和華獨獨歡喜你ê列祖，疼in，揀in ê後裔tī萬百姓中，就是lín chiahê，親像今á日就是。 16 所以lín tio̍h kā lín ê心行割禮，m̄-thang硬lín ê頷頸。 17 因為耶和華lín ê上帝，伊是chiahê上帝ê上帝，chiahê主ê主。伊是至大ê上帝，有能力koh thang驚畏ê；無用外貌取人，也無受pò͘賂。 18 伊為tio̍h孤兒kap寡婦判斷；koh疼出外人，hō͘伊食穿； 19 所以lín tio̍h疼出外人，因為lín也bat出外tī埃及地。 20 你tio̍h敬畏耶和華你ê上帝，服事伊，結聯伊，kí伊ê名來chiù-chōa。 21 伊是你所o-ló ê，是你ê上帝，為tio̍h你做hitê大koh thang驚ê事，是你親目所看見ê。 22 你ê列祖七十人落埃及，taⁿ耶和華你ê上帝hō͘你親像天頂ê星hiah-ni̍h chōe。
1 Hit-sî Iâ-hô-hoa kā góa kóng, Lí tio̍h phah nn̄g tè chio̍h-pi, chhin-chhiūⁿ chêng ê khoán, chiūⁿ-soaⁿ lâi Góa chia; koh tio̍h chòe chi̍t ê chhâ ê kūi. 2 Lí chêng só͘ phah-chi̍h hiah ê pi, hit téng-bīn ê ōe, Góa beh siá tī chiah ê pi ê téng-bīn; lí tio̍h hē in tī kūi-lāi. 3 Góa chiū ēng chō-kiap-chhâ chòe chi̍t ê kūi, koh phah nn̄g-tè chio̍h-pi chhin-chhiūⁿ chêng ê khoán; góa chhin-chhiú the̍h chit nn̄g-tè pi chiūⁿ-soaⁿ. 4 Iâ-hô-hoa chiong I tī tōa-hōe ê ji̍t, tī soaⁿ-téng, tùi hé-tiong kā lí kóng ê cha̍p-kài, chiàu chêng só͘ siá ê khoán, siá tī hiah ê pi-ni̍h; Iâ-hô-hoa chiū chiong hiah-ê kau-tài góa. 5 Góa oa̍t-tńg-sin lo̍h-soaⁿ, chiong hiah ê pi hē tī góa só͘ chòe ê kūi, chiàu Iâ-hô-hoa ê bēng-lēng; kàu-taⁿ iáu tī-hia. 6 (Í-sek-lia̍t lâng tùi Pí-lô-pí-nî-a-kan khí-sin, kàu Mô͘-se-la̍h; A-lûn sí tī-hia, chiū bâi-chòng tī-hia; i ê kiáⁿ Í-lī-a-sat sòa-chiap i tam-tng chè-si ê chit. 7 In tùi hia khí-sin, kàu Kok-ko-tāi, koh tùi Kok-ko-tāi kàu Iok-pa-tha, chiū-sī ū khoe-chúi ê tōe; 8 hit-sî Iâ-hô-hoa hun-piat Lī-bī chi-phài, kng Iâ-hô-hoa ê iok-kūi, khiā tī Iâ-hô-hoa ê bīn-chêng lâi ho̍k-sāi I, hōng I ê miâ lâi chiok-hok, kàu kin-á-ji̍t; 9 só͘-í Lī-bī tī i ê hiaⁿ-tī-tiong bô-hūn bô-gia̍p, Iâ-hô-hoa sī i ê sán-gia̍p, chiàu Iâ-hô-hoa lí ê Siōng-tè só͘ tùi i kóng ê.) 10 Góa koh chhin-chhiūⁿ thâu-pái tiàm tī soaⁿ-téng sì-cha̍p ji̍t sì-cha̍p mî; hit-pái Iâ-hô-hoa iā thiaⁿ góa, Iâ-hô-hoa m̄-kam bia̍t lí. 11 Iâ-hô-hoa kā góa kóng, Lí khí-lâi chòe-thâu kiâⁿ tī peh-sìⁿ ê bīn-chêng, hō͘ in ji̍p-khì sêng-chiap Góa só͘ tùi in ê lia̍t-chó͘ chiù-chōa beh hō͘ in ê tōe. 12 Í-sek-lia̍t ah, taⁿ Iâ-hô-hoa lí ê Siōng-tè ài lí sím-mi̍h ah? Kiám-m̄-sī to̍k-to̍k ài lí kèng-ùi Iâ-hô-hoa lí ê Siōng-tè, kiâⁿ I it-chhè ê tō-lō͘, thiàⁿ I, chīn-sim chīn-sèng ho̍k-sāi Iâ-hô-hoa lí ê Siōng-tè; 13 siú Iâ-hô-hoa chiah ê kài-bēng, kap I ê lu̍t-lē, chiū-sī góa kin-á-ji̍t só͘ bēng-lēng lí ê, ūi-tio̍h beh hō͘ lí tit-tio̍h hok-khì mah? 14 Khòaⁿ ah, thiⁿ kap chiah ê thiⁿ ê thiⁿ, tōe kap tōe-chiūⁿ só͘-ū-ê, lóng sio̍k Iâ-hô-hoa lí ê Siōng-tè. 15 Iâ-hô-hoa to̍k-to̍k hoaⁿ-hí lí ê lia̍t-chó͘, thiàⁿ in, kéng in ê hō͘-è tī bān peh-sìⁿ tiong, chiū-sī lín chiah-ê, chhin-chhiūⁿ kin-á-ji̍t chiū-sī. 16 Só͘-í lín tio̍h kā lín ê sim kiâⁿ kat-lé, m̄-thang ngī lín ê ām-kún. 17 In-ūi Iâ-hô-hoa lín ê Siōng-tè, I sī chiah ê siōng-tè ê Siōng-tè, chiah ê chú ê Chú. I sī chì-tōa ê Siōng-tè, ū lêng-le̍k koh thang kiaⁿ-ùi-ê; bô ēng gōa-māu chhú-lâng, iā bô siū pò͘-lō͘. 18 I ūi-tio̍h ko͘-jî kap kóaⁿ-hū phòaⁿ-toàn; koh thiàⁿ chhut-gōa lâng, hō͘ i chia̍h-chhēng; 19 só͘-í lín tio̍h thiàⁿ chhut-gōa lâng, in-ūi lín iā bat chhut-gōa tī Ai-ki̍p tōe. 20 Lí tio̍h kèng-ùi Iâ-hô-hoa lí ê Siōng-tè, ho̍k-sāi I, kiat-liân I, kí I ê miâ lâi chiù-chōa. 21 I sī lí só͘ o-ló ê, sī lí ê Siōng-tè, ūi-tio̍h lí chòe hit ê tōa koh thang kiaⁿ ê sū, sī lí chhin-ba̍k só͘ khòaⁿ-kìⁿ-ê. 22 Lí ê lia̍t-chó͘ chhit-cha̍p lâng lo̍h Ai-ki̍p, taⁿ Iâ-hô-hoa lí ê Siōng-tè hō͘ lí chhin-chhiūⁿ thiⁿ-téng ê chhiⁿ hiah-nih chōe.
1 所以你tio̍h疼耶和華你ê上帝，常常守伊所吩咐你守ê，kap伊ê律例、法度、誡命。 2 Lín今á日tio̍h知，因為我m̄是kap lín ê kiáⁿ兒講：in m̄知，也無看見耶和華lín上帝ê教督、威嚴、大權能ê手，kap伸出ê手骨； 3 以及伊ê神蹟，伊ê所做，見若tī埃及中對埃及王法老，kap伊ê全地，所行ê； 4 也伊怎樣款待埃及ê軍兵，kap in ê馬，in ê車；in追jip lín ê時，耶和華怎樣hō͘紅海ê水淹in，滅無in到今á日； 5 koh伊tī曠野怎樣款待lín，到lín來chitê所在； 6 koh伊怎樣款待Liû-piān ê kiáⁿ孫Í-lī-ap ê kiáⁿ、Tāi-tan、A-pí-lân；地怎樣tī以色列人ê中間開嘴吞in，kap in ê家眷，以及in ê布棚，kap一切跟tè in ê活物； 7 只有lín親目看見耶和華所做一切ê大事。 8 所以lín tio̍h守我今á日所命令一切ê誡命，hō͘ lín壯膽，能入去承接lín所beh過去承接ê地； 9 也hō͘ lín ê日子久長tī耶和華所kap lín ê列祖chiù-chōa賞賜in kap in ê後裔ê地，就是hit號流奶kap蜜ê地。 10 因為你beh入去承接ê地，m̄是親像lín出來ê埃及地，你tī-hia掖種，用腳踏來灌ak，親像菜園； 11 獨獨lín所beh入去承接ê地，就是有山，有山谷，來承受天ê雨水ê地； 12 是耶和華你上帝所眷顧ê地，tùi年頭到年尾；耶和華你上帝ê目睭常常看伊。 13 Lín若留心聽thàn我ê誡命，就是我今á日所命令lín ê，疼耶和華lín ê上帝，盡心盡性服事伊， 14 就我beh照時落你ê地所欠用ê雨，就是前ê雨，後ê雨，hō͘你thang收成你ê五穀，你ê酒，你ê油； 15 也hō͘你ê田野發草，飼你ê cheng-siⁿ，你也beh得tio̍h飽足。 16 Lín tio̍h家己謹慎，免得lín ê心受迷，致到lín歪chhoa̍h，去服事別ê上帝，來敬拜伊； 17 致到耶和華大受氣lín，hō͘天關密無落雨，地也無出產；lín就tī耶和華所賞賜lín ê súi地緊緊滅無。 18 所以lín tio̍h用我chiahê話記tī lín ê心，lín ê腦；也tio̍h縛tī lín ê手做記號，戴tī lín兩蕊目睭ê中央做記念； 19 也tio̍h用這教示lín ê kiáⁿ兒，無論你坐tī厝內，行tī路裡，睏á是起來，lóng tio̍h講論； 20 koh tio̍h寫tī你ê厝ê門khiā，以及你ê門； 21 Hō͘ lín ê日子，kap lín ê kiáⁿ孫ê日子，tī耶和華對lín ê列祖chiù-chōa賞賜in ê地，得tio̍h加添chōe-chōe，親像天蓋地ê日hiah久。 22 Lín若注意執守我所命令lín一切ê誡命，來行伊，疼耶和華lín ê上帝，行伊一切ê路，結聯tī伊， 23 耶和華就beh tùi lín面前趕出這一切ê國，lín也beh得tio̍h比lín khah大khah強ê國。 24 見若lín ê腳掌所踏ê地，lóng beh歸hō͘ lín，tùi曠野kap Lī-pa-lùn，tùi hitê河，就是Pek-la̍h河，到西pêng ê海，lóng beh做lín ê境界； 25 beh無一人能khiā-tiâu tī lín ê面前；耶和華lín ê上帝beh hō͘ lín所踏ê全地lóng驚lín，忍lín，照伊所對lín講ê。 26 看ah，我今á日將祝福kap咒詛排tī lín ê面前； 27 lín若thàn耶和華lín上帝ê誡命，我今á日所命令lín ê，就是祝福； 28 lín若m̄-thàn耶和華lín上帝ê誡命，歪chhoa̍h我今á日所命令lín ê路，去thàn別ê上帝，lín平素所m̄-bat ê，就是咒詛。 29 將來耶和華你ê上帝chhōa你到你所beh入去承接ê地，你tio̍h hē hitê祝福tī Ki-lī-sim山，hē hitê咒詛tī Í-pa-lō͘山。 30 Chit兩個山kiám-m̄是tī約旦河hit-pêng，日落ê路ê後面，tī khiā起A-la̍h-pa ê迦南人ê地，kap Kiat-kah相對，óa近Mô͘-lī橡樹mah？ 31 因為lín beh過約旦河，入去承接耶和華lín上帝所賞賜lín做業ê地，lín beh tī-hia khiā起。 32 Lín tio̍h執守來行我今á日tī lín ê面前所排列一切ê律例法度。
1 Só͘-í lí tio̍h thiàⁿ Iâ-hô-hoa lí ê Siōng-tè, siông-siông siú I só͘ hoan-hù lí siú ê, kap I ê lu̍t-lē, hoat-tō͘, kài-bēng. 2 Lín kin-á-ji̍t tio̍h chai, in-ūi góa m̄-sī kap lín ê kiáⁿ-jî kóng, in m̄-chai, iā bô khòaⁿ-kìⁿ Iâ-hô-hoa lín Siōng-tè ê kàu-tok, ui-giâm, tōa koân-lêng ê chhiú, kap chhun-chhut ê chhiú-kut; 3 í-ki̍p I ê sîn-jiah, I ê só͘ chòe, kìⁿ-nā tī Ai-ki̍p tiong tùi Ai-ki̍p ông Hoat-ló, kap i ê choân-tōe, só͘ kiâⁿ ê; 4 iā I cháiⁿ-iūⁿ khoán-thāi Ai-ki̍p ê kun-peng, kap in ê bé, in ê chhia; in tui-jip lín ê sî, Iâ-hô-hoa cháiⁿ-iūⁿ hō͘ Âng-hái ê chúi im-in, bia̍t-bô in kàu kin-á-ji̍t; 5 koh I tī khòng-iá cháiⁿ-iūⁿ khoán-thāi lín, kàu lín lâi chit ê só͘-chāi; 6 koh I cháiⁿ-iūⁿ khoán-thāi Liû-piān ê kiáⁿ-sun Í-lī-ap ê kiáⁿ, Tāi-tan, A-pí-lân; tōe cháiⁿ-iūⁿ tī Í-sek-lia̍t lâng ê tiong-kan khui-chhùi thun in, kap in ê ke-koàn, í-ki̍p in ê pò͘-pîⁿ, kap it-chhè kun-tè in ê oa̍h-mi̍h; 7 chí-ū lín chhin-ba̍k khòaⁿ-kìⁿ Iâ-hô-hoa só͘ chòe it-chhè ê tōa-sū. 8 Só͘-í lín tio̍h siú góa kin-á-ji̍t só͘ bēng-lēng it-chhè ê kài-bēng, hō͘ lín chòng-táⁿ, ōe ji̍p-khì sêng-chiap lín só͘ beh kè-khì sêng-chiap ê tōe; 9 iā hō͘ lín ê ji̍t-chí kú-tn̂g tī Iâ-hô-hoa só͘ kap lín ê lia̍t-chó͘ chiù-chōa siúⁿ-sù in kap in ê hō͘-è ê tōe, chiū-sī hit-hō lâu lin kap bi̍t ê tōe. 10 In-ūi lí beh ji̍p-khì sêng-chiap ê tōe, m̄-sī chhin-chhiūⁿ lín chhut-lâi ê Ai-ki̍p tōe, lí tī-hia iā-chéng, ēng kha ta̍h lâi koàn-ak, chhin-chhiūⁿ chhài-hn̂g; 11 to̍k-to̍k lín só͘ beh ji̍p-khì sêng-chiap ê tōe, chiū-sī ū soaⁿ, ū soaⁿ-kok, lâi sêng-siū thiⁿ ê hō͘-chúi ê tōe; 12 sī Iâ-hô-hoa lí Siōng-tè só͘ koàn-kò͘ ê tōe, tùi nî-thâu kàu nî-bé; Iâ-hô-hoa lí Siōng-tè ê ba̍k-chiu siông-siông khòaⁿ i. 13 Lín nā liû-sim thiaⁿ-thàn góa ê kài-bēng, chiū-sī góa kin-á-ji̍t só͘ bēng-lēng lín ê, thiàⁿ Iâ-hô-hoa lín ê Siōng-tè, chīn-sim chīn-sèng ho̍k-sāi I, 14 chiū Góa beh chiàu-sî lo̍h lí ê tōe só͘ khiàm-ēng ê hō͘, chiū-sī chêng ê hō͘, āu ê hō͘, hō͘ lí thang siu-sêng lí ê gō͘-kak, lí ê chiú, lí ê iû; 15 iā hō͘ lí ê chhân-iá hoat-chháu, chhī lí ê cheng-siⁿ, lí iā beh tit-tio̍h pá-chiok. 16 Lín tio̍h ka-kī kín-sīn, bián-tit lín ê sim siū bê, tì-kàu lín oai-chhoa̍h, khì ho̍k-sāi pa̍t ê siōng-tè, lâi kèng-pài i; 17 tì-kàu Iâ-hô-hoa tōa siū-khì lín, hō͘ thiⁿ koaiⁿ-ba̍t bô lo̍h hō͘, tōe iā bô chhut-sán; lín chiū tī Iâ-hô-hoa só͘ siúⁿ-sù lín ê súi tōe kín-kín bia̍t-bô. 18 Só͘-í lín tio̍h ēng góa chiah ê ōe kì tī lín ê sim, lín ê náu; iā tio̍h pa̍k tī lín ê chhiú chòe kì-hō, tì tī lín nn̄g lúi ba̍k-chiu ê tiong-ng chòe kì-liām; 19 iā tio̍h ēng che kà-sī lín ê kiáⁿ-jî, bô-lūn lí chē tī chhù-lāi, kiâⁿ tī lō͘-ni̍h, khùn á-sī khí-lâi, lóng tio̍h káng-lūn; 20 koh tio̍h siá tī lí ê chhù ê mn̂g-khiā, í-ki̍p lí ê mn̂g; 21 hō͘ lín ê ji̍t-chí, kap lín ê kiáⁿ-sun ê ji̍t-chí, tī Iâ-hô-hoa tùi lín ê lia̍t-chó͘ chiù-chōa siúⁿ-sù in ê tōe, tit-tio̍h ke-thiⁿ chōe-chōe, chhin-chhiūⁿ thiⁿ khàm-tōe ê ji̍t hiah kú. 22 Lín nā chù-ì chip-siú góa só͘ bēng-lēng lín it-chhè ê kài-bēng, lâi kiâⁿ i, thiàⁿ Iâ-hô-hoa lín ê Siōng-tè, kiâⁿ I it-chhè ê lō͘, kiat-liân tī I, 23 Iâ-hô-hoa chiū beh tùi lín bīn-chêng kóaⁿ-chhut che it-chhè ê kok, lín iā beh tit-tio̍h pí lín khah-tōa khah-kiông ê kok. 24 Kìⁿ-nā lín ê kha-chiúⁿ só͘ ta̍h ê tōe, lóng beh kui hō͘ lín, tùi khòng-iá kap Lī-pa-lùn, tùi hit ê hô, chiū-sī Pek-la̍h hô, kàu sai-pêng ê hái, lóng beh chòe lín ê kéng-kài; 25 beh bô chi̍t-lâng ōe khiā-tiâu tī lín ê bīn-chêng; Iâ-hô-hoa lín ê Siōng-tè beh hō͘ lín só͘ ta̍h ê choân-tōe lóng kiaⁿ lín, lún lín, chiàu I só͘ tùi lín kóng ê. 26 Khòaⁿ ah, góa kin-á-ji̍t chiong chiok-hok kap chiù-chó͘ pâi tī lín ê bīn-chêng; 27 lín nā thàn Iâ-hô-hoa lín Siōng-tè ê kài-bēng, góa kin-á-ji̍t só͘ bēng-lēng lín ê, chiū-sī chiok-hok; 28 lín nā m̄-thàn Iâ-hô-hoa lín Siōng-tè ê kài-bēng, oai-chhoa̍h góa kin-á-ji̍t só͘ bēng-lēng lín ê lō͘, khì thàn pa̍t ê siōng-tè, lín pêng-sò͘ só͘ m̄-bat ê, chiū-sī chiù-chó͘. 29 Chiong-lâi Iâ-hô-hoa lí ê Siōng-tè chhōa lí kàu lí só͘ beh ji̍p-khì sêng-chiap ê tōe, lí tio̍h hē hit ê chiok-hok tī Ki-lī-sim soaⁿ, hē hit ê chiù-chó͘ tī Í-pa-lō͘ soaⁿ. 30 Chit nn̄g ê soaⁿ kiám-m̄-sī tī Iok-tàn hô hit-pêng, ji̍t-lo̍h ê lō͘ ê āu-bīn, tī khiā-khí A-la̍h-pa ê Ka-lâm lâng ê tōe, kap Kiat-kah saⁿ-tùi, óa-kūn Mô͘-lī siōng-chhiū mah? 31 In-ūi lín beh kè Iok-tàn hô, ji̍p-khì sêng-chiap Iâ-hô-hoa lín Siōng-tè só͘ siúⁿ-sù lín chòe-gia̍p ê tōe, lín beh tī-hia khiā-khí. 32 Lín tio̍h chip-siú lâi kiâⁿ góa kin-á-ji̍t tī lín ê bīn-chêng só͘ pâi-lia̍t it-chhè ê lu̍t-lē hoat-tō͘.
1 Lín tī世間一生ê日，tī耶和華lín列祖ê上帝所賞賜lín做業ê地，tio̍h執守來行ê律例法度，就是chiahê。 2 Lín所beh趕來承接ê列國，見若in服事in hiahê上帝ê所在，無論tī高山，tī小山，tī lóng總青翠ê樹腳，lóng tio̍h毀壞in； 3 lín也tio̍h拆毀in ê祭壇，phah碎in雕刻ê柱，用火燒in ê A-sià-lîm，剉in所雕刻ê上帝ê像，也tio̍h tùi hit所在除滅in ê名； 4 lín m̄-thang親像án-ni來服事耶和華lín ê上帝。 5 獨獨耶和華lín ê上帝將來tùi lín眾支派中所beh揀ê所在，thang tī-hia安置伊ê名，就是伊khiā起ê所在，lín tio̍h去hia chhē伊； 6 將lín ê燒祭kap別號ê祭，十份取一份ê物，kap手裡ê舉祭，以及謝願ê祭，甘心獻ê祭，以及牛群羊群中頭水生ê，lóng tio̍h帶到hia； 7 tī-hia lín tī耶和華lín上帝ê面前為tio̍h lín ê手所做一切ê事，得tio̍h耶和華lín上帝賜福ê，lín kap lín ê家眷lóng tio̍h lim食歡喜。 8 咱今á日tī-chia所行ê事，是ta̍k人行伊家己看做tio̍h-ê，lín將來m̄-thang án-ni行。 9 因為lín現今iáu未有夠耶和華你ê上帝所賞賜你ê安歇kap產業。 10 總是lín過約旦，得tio̍h khiā起tī耶和華lín上帝賞賜lín承接ê地，koh hō͘ lín脫離四圍lóng總ê對敵，得tio̍h安歇，來安穩khiā起； 11 就beh有一所在，是耶和華lín ê上帝所揀來安置伊ê名ê，見若我所命令lín ê，就是lín ê燒祭，kap別號ê祭，十份取一份ê物，kap手裡ê舉祭，以及你對耶和華所下願極好ê物，lóng tio̍h帶到hia。 12 Lín kap lín ê kiáⁿ、cha-bó͘-kiáⁿ、奴僕、女婢，lóng tio̍h歡喜tī耶和華lín上帝ê面前；利未人tiàm tī lín ê門內ê也是án-ni，因為in tī lín中間無份無業。 13 你tio̍h家己謹慎，m̄-thang tī你看合意ê所在獻lín ê燒祭； 14 獨獨tī你chiahê支派中ê一个，耶和華所beh揀ê所在，lín tī-hia tio̍h獻你ê燒祭；koh tī-hia行我一切所命令你ê。 15 總是你tī你ta̍k-ê門內，thang照耶和華你上帝所賞賜你ê福份，照你ê心所ài，刣 cheng-siⁿ食肉；無論清氣ê人，無清氣ê人，lóng thang食伊，親像食羚羊kap鹿一般。 16 總是血m̄-thang食，tio̍h piàⁿ tī地裡，親像piàⁿ水一樣。 17 你ê五穀、酒、油，十份ê一份，或是牛群羊群中頭水生ê，或是你下願獻ê，甘心獻ê，或是手裡ê舉祭，lóng m̄-thang tī你ê門內食伊； 18 獨獨tī耶和華你ê上帝ê面前食伊，就是tī耶和華你ê上帝所beh揀ê所在，你kap你ê kiáⁿ，你ê cha-bó͘-kiáⁿ、奴僕、女婢，以及tiàm tī你門內ê利未人，lóng tio̍h食伊；見若你ê手所做ê，tī耶和華你上帝ê面前，thang歡喜。 19 你tio̍h家己謹慎，tī你ê地方，一世人m̄-thang放sak利未人。 20 耶和華你ê上帝照伊所應允你ê，開闊你ê境界ê時，你ê心ài食肉，所以講：我beh食肉，就thang照你ê心所ài ê來食肉。 21 耶和華你ê上帝所揀beh安置伊ê名ê所在，若離開你真遠，就thang照我所命令你ê，將耶和華賞賜你ê牛、羊，取來刣伊，thang照心所ài ê，tī你ê門內食伊。 22 你食伊，親像食羚羊kap鹿一般；無清氣kap清氣ê人平平thang食； 23 獨獨你tio̍h決意，m̄-thang食血，因為血是活命；你m̄-thang食肉，續食伊ê活命； 24 m̄-thang食伊，tio̍h piàⁿ tī地裡，親像piàⁿ水一樣； 25 m̄-thang食伊；án-ni你行耶和華所看做tio̍h ê事，你kap你ê kiáⁿ孫就會得tio̍h福氣。 26 獨獨你所有ê聖物，kap你所下願ê，tio̍h帶到耶和華所beh揀ê所在。 27 你ê燒祭，肉kap血，tio̍h獻tī耶和華你上帝ê壇頂；你祭物ê血，tio̍h piàⁿ tī耶和華你上帝ê壇；hitê肉，你thang食。 28 你tio̍h執守，聽thàn我命令你一切ê話，行耶和華你上帝所看做好做tio̍h ê事；án-ni你kap你ê後裔就thang永遠得tio̍h福氣。 29 耶和華你ê上帝tùi你ê面前除滅你所beh去承接ê國，你承接伊，來khiā起伊ê地； 30 Hit時你tio̍h家己謹慎，m̄-thang tī in tùi lín ê面前除滅了後，陷落in ê羅網，來tè in；也m̄-thang探聽in ê上帝ê事，講：Chiahê國怎樣服事in ê上帝，我也beh án-ni行。 31 你m̄-thang對耶和華你ê上帝án-ni行；因為in對in ê上帝行耶和華一切所痛恨厭惡ê事；甚至用in ê kiáⁿ cha-bó͘-kiáⁿ用火燒，獻hō͘ in ê上帝。 32 見若我所命令lín ê，lín lóng tio̍h執守來行；你m̄-thang加添，也m̄-thang減少。
1 Lín tī sè-kan it-seng ê ji̍t, tī Iâ-hô-hoa lín lia̍t-chó͘ ê Siōng-tè só͘ siúⁿ-sù lín chòe-gia̍p ê tōe, tio̍h chip-siú lâi kiâⁿ ê lu̍t-lē hoat-tō͘, chiū-sī chiah-ê. 2 Lín só͘ beh kóaⁿ lâi sêng-chiap ê lia̍t-kok, kìⁿ-nā in ho̍k-sāi in hiah ê siōng-tè ê só͘-chāi, bô-lūn tī koâiⁿ-soaⁿ, tī sió-soaⁿ, tī lóng-chóng chhiⁿ-chhùi ê chhiū-kha, lóng tio̍h húi-hoāi in; 3 lín iā tio̍h thiah-húi in ê chè-tôaⁿ, phah-chhùi in tiau-khek ê thiāu, ēng hé sio in ê A-sià-lîm, chhò in só͘ tiau-khek ê siōng-tè ê siōng, iā tio̍h tùi hit só͘-chāi tû-bia̍t in ê miâ; 4 lín m̄-thang chhin-chhiūⁿ án-ni lâi ho̍k-sāi Iâ-hô-hoa lín ê Siōng-tè. 5 To̍k-to̍k Iâ-hô-hoa lín ê Siōng-tè chiong-lâi tùi lín chèng chi-phài tiong só͘ beh kéng ê só͘-chāi, thang tī-hia an-tì I ê miâ, chiū-sī I khiā-khí ê só͘-chāi, lín tio̍h khì hia chhē I; 6 chiong lín ê sio-chè kap pa̍t-hō ê chè, cha̍p-hūn chhú chi̍t-hūn ê mi̍h, kap chhiú-ni̍h ê kú-chè, í-ki̍p siā-goān ê chè, kam-sim hiàn ê chè, í-ki̍p gû-kûn iûⁿ-kûn tiong thâu-chúi-siⁿ-ê, lóng tio̍h tòa kàu hia; 7 tī-hia lín tī Iâ-hô-hoa lín Siōng-tè ê bīn-chêng ūi-tio̍h lín ê chhiú só͘ chòe it-chhè ê sū, tit-tio̍h Iâ-hô-hoa lín Siōng-tè sù-hok ê, lín kap lín ê ke-koàn lóng tio̍h lim-chia̍h hoaⁿ-hí. 8 Lán kin-á-ji̍t tī-chia só͘ kiâⁿ ê sū, sī ta̍k-lâng kiâⁿ i ka-kī khòaⁿ-chòe tio̍h-ê, lín chiong-lâi m̄-thang án-ni kiâⁿ. 9 In-ūi lín hiān-kim iáu-bē ū kàu Iâ-hô-hoa lí ê Siōng-tè só͘ siúⁿ-sù lí ê an-hioh kap sán-gia̍p. 10 Chóng-sī lín kè Iok-tàn, tit-tio̍h khiā-khí tī Iâ-hô-hoa lín Siōng-tè siúⁿ-sù lín sêng-chiap ê tōe, koh hō͘ lín thoat-lī sì-ûi lóng-chóng ê tùi-te̍k, tit-tio̍h an-hioh, lâi an-ún khiā-khí; 11 chiū beh ū chi̍t só͘-chāi, sī Iâ-hô-hoa lín ê Siōng-tè só͘ kéng lâi an-tì I ê miâ ê, kìⁿ-nā góa só͘ bēng-lēng lín ê, chiū-sī lín ê sio-chè, kap pa̍t-hō ê chè, cha̍p-hūn chhú chi̍t-hūn ê mi̍h, kap chhiú-ni̍h ê kú-chè, í-ki̍p lí tùi Iâ-hô-hoa só͘ hē-goān ke̍k-hó ê mi̍h, lóng tio̍h tòa kàu hia. 12 Lín kap lín ê kiáⁿ, cha-bó͘-kiáⁿ, lô͘-po̍k, lú-pī, lóng tio̍h hoaⁿ-hí tī Iâ-hô-hoa lín Siōng-tè ê bīn-chêng; Lī-bī lâng tiàm tī lín ê mn̂g-lāi-ê iā sī án-ni, in-ūi in tī lín tiong-kan bô-hūn bô-gia̍p. 13 Lí tio̍h ka-kī kín-sīn, m̄-thang tī lí khòaⁿ kah-ì ê só͘-chāi hiàn lín ê sio-chè; 14 to̍k-to̍k tī lí chiah ê chi-phài tiong ê chi̍t-ê, Iâ-hô-hoa só͘ beh kéng ê só͘-chāi, lín tī-hia tio̍h hiàn lí ê sio-chè; koh tī-hia kiâⁿ góa it-chhè só͘ bēng-lēng lí ê. 15 Chóng-sī lí tī lí ta̍k ê mn̂g-lāi, thang chiàu Iâ-hô-hoa lí Siōng-tè só͘ siúⁿ-sù lí ê hok-hūn, chiàu lí ê sim só͘ ài, thâi cheng-siⁿ chia̍h-bah; bô-lūn chheng-khì ê lâng, bô chheng-khì ê lâng, lóng thang chia̍h i, chhin-chhiūⁿ chia̍h lêng-iông kap lo̍k chi̍t-poaⁿ. 16 Chóng-sī huih m̄-thang chia̍h, tio̍h piàⁿ tī tōe-ni̍h, chhin-chhiūⁿ piàⁿ-chúi chi̍t-iūⁿ. 17 Lí ê ngó͘-kok, chiú, iû, cha̍p-hūn ê chi̍t-hūn, he̍k-sī gû-kûn iûⁿ-kûn tiong thâu-chúi siⁿ-ê, he̍k-sī lí hē-goān hiàn-ê, kam-sim hiàn-ê, he̍k-sī chhiú-ni̍h ê kú-chè, lóng m̄-thang tī lí ê mn̂g-lāi chia̍h i; 18 to̍k-to̍k tī Iâ-hô-hoa lí ê Siōng-tè ê bīn-chêng chia̍h i, chiū-sī tī Iâ-hô-hoa lí ê Siōng-tè só͘ beh kéng ê só͘-chāi, lí kap lí ê kiáⁿ, lí ê cha-bó͘-kiáⁿ, lô͘-po̍k, lú-pī, í-ki̍p tiàm tī lí mn̂g-lāi ê Lī-bī lâng, lóng tio̍h chia̍h i; kìⁿ-nā lí ê chhiú só͘ chòe ê, tī Iâ-hô-hoa lí Siōng-tè ê bīn-chêng, thang hoaⁿ-hí. 19 Lí tio̍h ka-kī kín-sīn, tī lí ê tōe-hng, chi̍t-sì-lâng m̄-thang pàng-sak Lī-bī lâng. 20 Iâ-hô-hoa lí ê Siōng-tè chiàu I só͘ èng-ún lí ê, khui-khoah lí ê kéng-kài ê sî, lí ê sim ài chia̍h-bah, só͘-í kóng, Góa beh chia̍h-bah, chiū thang chiàu lí ê sim só͘-ài ê lâi chia̍h-bah. 21 Iâ-hô-hoa lí ê Siōng-tè só͘ kéng beh an-tì I ê miâ ê só͘-chāi, nā lī-khui lí chin-hn̄g, chiū thang chiàu góa só͘ bēng-lēng lí ê, chiong Iâ-hô-hoa siúⁿ-sù lí ê gû, iûⁿ, chhú lâi thâi i, thang chiàu sim só͘-ài ê, tī lí ê mn̂g-lāi chia̍h i. 22 Lí chia̍h i, chhin-chhiūⁿ chia̍h lêng-iông kap lo̍k chi̍t-poaⁿ; bô chheng-khì kap chheng-khì ê lâng pîⁿ-pîⁿ thang chia̍h; 23 to̍k-to̍k lí tio̍h koat-ì, m̄-thang chia̍h huih, in-ūi huih sī oa̍h-miā; lí m̄-thang chia̍h bah, sòa chia̍h i ê oa̍h-miā; 24 m̄-thang chia̍h i, tio̍h piàⁿ tī tōe-ni̍h, chhin-chhiūⁿ piàⁿ chúi chi̍t-iūⁿ; 25 m̄-thang chia̍h i; án-ni lí kiâⁿ Iâ-hô-hoa só͘ khòaⁿ-chòe tio̍h ê sū, lí kap lí ê kiáⁿ-sun chiū ōe tit-tio̍h hok-khì. 26 To̍k-to̍k lí só͘ ū ê sèng-mi̍h, kap lí só͘ hē-goān ê, tio̍h tòa kàu Iâ-hô-hoa só͘ beh kéng ê só͘-chāi. 27 Lí ê sio-chè, bah kap huih, tio̍h hiàn tī Iâ-hô-hoa lí Siōng-tè ê tôaⁿ-téng; lí chè-mi̍h ê huih, tio̍h piàⁿ tī Iâ-hô-hoa lí Siōng-tè ê tôaⁿ; hit ê bah, lí thang chia̍h. 28 Lí tio̍h chip-siú, thiaⁿ-thàn góa bēng-lēng lí it-chhè ê ōe, kiâⁿ Iâ-hô-hoa lí Siōng-tè só͘ khòaⁿ-chòe hó chòe-tio̍h ê sū; án-ni lí kap lí ê hō͘-è chiū thang éng-oán tit-tio̍h hok-khì. 29 Iâ-hô-hoa lí ê Siōng-tè tùi lí ê bīn-chêng tû-bia̍t lí só͘ beh khì sêng-chiap ê kok, lí sêng-chiap i, lâi khiā-khí i ê tōe; 30 hit-sî lí tio̍h ka-kī kín-sīn, m̄-thang tī in tùi lín ê bīn-chêng tû-bia̍t liáu-āu, hām-lo̍h in ê lô-bāng, lâi tè in; iā m̄-thang thàm-thiaⁿ in ê siōng-tè ê sū, kóng, Chiah ê kok cháiⁿ-iūⁿ ho̍k-sāi in ê siōng-tè, góa iā beh án-ni kiâⁿ. 31 Lí m̄-thang tùi Iâ-hô-hoa lí ê Siōng-tè án-ni kiâⁿ; in-ūi in tùi in ê siōng-tè kiâⁿ Iâ-hô-hoa it-chhè só͘ thòng-hūn iàm-ò͘ⁿ ê sū; sīm-chì ēng in ê kiáⁿ cha-bó͘-kiáⁿ ēng hé sio, hiàn hō͘ in ê siōng-tè. 32 Kìⁿ-nā góa só͘ bēng-lēng lín ê, lín lóng tio̍h chip-siú lâi kiâⁿ; lí m̄-thang ke-thiⁿ, iā m̄-thang kiám-chió.
1 Lín中間若有先知，á是夢見夢ê起來，對lín顯出神蹟、奇事，就對lín講， 2 咱來去thàn你平素所m̄-bat ê別ê上帝，來服事in，伊所顯明ê神蹟奇事，就若應驗， 3 你也m̄-thang聽hitê先知，á是hitê夢見ê ê話；因為耶和華lín上帝teh試lín，ài知lín是盡心盡性疼耶和華lín ê上帝á無。 4 Lín tio̍h順thàn耶和華lín ê上帝，敬畏伊，守伊ê誡命，聽伊ê話，服事伊，結聯伊。 5 Hit-ê先知，á是hitê夢見夢ê，已經用話悖逆耶和華lín ê上帝，就是chhōa lín出埃及地，贖回lín脫離做奴才ê家ê，in án-ni beh拔lín離開耶和華你ê上帝所命令你行ê路，你就tio̍h hō͘伊死；án-nit ùi lín中間除去hitê pháiⁿ。 6 若是你同母ê兄弟，á是你ê kiáⁿ，你ê cha-bó͘-kiáⁿ，á是你心懷中ê bó͘，á是親像你性命ê朋友，暗靜引誘你，講：咱來去服事別ê上帝，就是你kap你ê列祖平素m̄-bat-ê； 7 是你四圍chiahê國ê上帝，離開lín近，á離開lín遠，tùi chitê地極到hitê地極ê， 8 你m̄-thang thàn伊，m̄-thang聽伊，目睭m̄-thang惜伊，你m̄-thang可憐伊，也m̄-thang khǹg密伊； 9 你的確tio̍h hō͘伊死；你tio̍h做頭下手beh hō͘伊死，然後眾百姓也下手； 10 你tio̍h用石頭tìm hō͘伊死；因為伊想beh拔你離開耶和華你ê上帝，就是chhōa你出埃及地，做奴才ê家ê。 11 就以色列眾人beh聽見來驚；無koh行chit號pháiⁿ-tāi tī lín中間。 12 Tī耶和華你上帝所賞賜你khiā起chiahê城ê一个，你若聽見講： 13 有匪類tùi lín中間出，拔khiā起in ê城ê人，講：咱來去服事別ê上帝，lín前所m̄-bat ê； 14 你就tio̍h探聽、查考、詳細問；看ah，果然是真，準準有chitê可惡ê事行tī lín中間； 15 你的確tio̍h用刀刣死khiā起hitê城ê百姓，將伊以及伊所有ê，伊ê cheng-siⁿ，一盡用刀滅伊； 16 你tio̍h用所搶hitê城ê物，疊tī街市裡，用火燒hitê城kap所搶一切ê物，hō͘耶和華你ê上帝；hitê城永永做土堆，無thang koh起。 17 Hit-ê應該毀滅ê物，lóng m̄-thang一點á tiâu tī你ê手；hō͘耶和華soah伊ê大受氣，恩典你，憐憫你，hō͘你加添人額，照伊對你ê列祖所chiù-chōa ê； 18 因為你聽耶和華你上帝ê話，守伊一切ê誡命，就是我今á日所命令你ê，來行耶和華你ê上帝所看做好ê。
1 Lín tiong-kan nā ū sian-ti, á-sī bāng-kìⁿ bāng-ê khí-lâi, tùi lín hián-chhut sîn-jiah, kî-sū, chiū tùi lín kóng, 2 Lán lâi-khì thàn lí pêng-sò͘ só͘ m̄-bat ê pa̍t ê siōng-tè, lâi ho̍k-sāi in, i só͘ hián-bêng ê sîn-jiah kî-sū, chiū nā èng-giām, 3 lí iā m̄-thang thiaⁿ hit ê sian-ti, á-sī hit ê bāng-kìⁿ-ê ê ōe; in-ūi Iâ-hô-hoa lín Siōng-tè teh chhì lín, ài chai lín sī chīn-sim chīn-sèng thiàⁿ Iâ-hô-hoa lín ê Siōng-tè á-bô. 4 Lín tio̍h sūn-thàn Iâ-hô-hoa lín ê Siōng-tè, kèng-ùi I, siú I ê kài-bēng, thiaⁿ I ê ōe, ho̍k-sāi I, kiat-liân I. 5 Hit ê sian-ti, á-sī hit ê bāng-kìⁿ bāng-ê, í-keng ēng ōe pōe-ge̍k Iâ-hô-hoa lín ê Siōng-tè, chiū-sī chhōa lín chhut Ai-ki̍p tōe, sio̍k-hôe lín thoat-lī chòe lô͘-châi ê ke ê, in án-ni beh pu̍ih lín lī-khui Iâ-hô-hoa lí ê Siōng-tè só͘ bēng-lēng lí kiâⁿ ê lō͘, lí chiū tio̍h hō͘ i sí; án-ni tùi lín tiong-kan tû-khì hit ê pháiⁿ. 6 Nā sī lí tâng-bú ê hiaⁿ-tī, á-sī lí ê kiáⁿ, lí ê cha-bó͘-kiáⁿ, á-sī lí sim-hoâi-tiong ê bó͘, á-sī chhin-chhiūⁿ lí sìⁿ-miā ê pêng-iú, àm-chīⁿ ín-iú lí, kóng, Lán lâi-khì ho̍k-sāi pa̍t ê siōng-tè, chiū-sī lí kap lí ê lia̍t-chó͘ pêng-sò͘ m̄-bat-ê; 7 sī lí sì-ûi chiah ê kok ê siōng-tè, lī-khui lín kūn, á lī-khui lín hn̄g, tùi chit ê tōe-ke̍k kàu hit ê tōe-ke̍k ê, 8 lí m̄-thang thàn i, m̄-thang thiaⁿ i, ba̍k-chiu m̄-thang sioh i, lí m̄-thang khó-lîn i, iā m̄-thang khǹg-ba̍t i; 9 lí tek-khak tio̍h hō͘ i sí; lí tio̍h chòe-thâu hē chhiú beh hō͘ i sí, jiân-āu chèng peh-sìⁿ iā hē chhiú; 10 lí tio̍h ēng chio̍h-thâu tìm hō͘ i sí; in-ūi i siūⁿ beh pu̍ih lí lī-khui Iâ-hô-hoa lí ê Siōng-tè, chiū-sī chhōa lí chhut Ai-ki̍p tōe, chòe lô͘-châi ê ke ê. 11 Chiū Í-sek-lia̍t chèng-lâng beh thiaⁿ-kìⁿ lâi kiaⁿ; bô koh kiâⁿ chit-hō pháiⁿ-tāi tī lín tiong-kan. 12 Tī Iâ-hô-hoa lí Siōng-tè só͘ siúⁿ-sù lí khiā-khí chiah ê siâⁿ ê chi̍t-ê, lí nā thiaⁿ-kìⁿ kóng, 13 Ū húi-lūi tùi lín tiong-kan chhut, pu̍ih khiā-khí in ê siâⁿ ê lâng, kóng, Lán lâi-khì ho̍k-sāi pa̍t ê siōng-tè, lín chêng só͘ m̄-bat ê; 14 lí chiū tio̍h thàm-thiaⁿ, chhâ-khó, siông-sè mn̄g; khòaⁿ ah, kó-jiân sī chin, chún-chún ū chit-ê khó-ò͘ⁿ ê sū kiâⁿ tī lín tiong-kan; 15 lí tek-khak tio̍h ēng to thâi-sí khiā-khí hit ê siâⁿ ê peh-sìⁿ, chiong i í-ki̍p i só͘-ū-ê, i ê cheng-siⁿ, it-chīn ēng to bia̍t i; 16 lí tio̍h ēng só͘ chhiúⁿ hit ê siâⁿ ê mi̍h, thia̍p tī koe-chhī-ni̍h, ēng hé sio hit ê siâⁿ kap só͘ chhiúⁿ it-chhè ê mi̍h, hō͘ Iâ-hô-hoa lí ê Siōng-tè; hit ê siâⁿ éng-éng chòe thô͘-tui, bô thang koh khí. 17 Hit ê eng-kai húi-bia̍t ê mi̍h, lóng m̄-thang chi̍t-tiám-á tiâu tī lí ê chhiú; hō͘ Iâ-hô-hoa soah I ê tōa siū-khì, un-tián lí, lîn-bín lí, hō͘ lí ke-thiⁿ lâng-gia̍h, chiàu I tùi lí ê lia̍t-chó͘ só͘ chiù-chōa ê; 18 in-ūi lí thiaⁿ Iâ-hô-hoa lí Siōng-tè ê ōe, siú I it-chhè ê kài-bēng, chiū-sī góa kin-á-ji̍t só͘ bēng-lēng lí ê, lâi kiâⁿ Iâ-hô-hoa lí ê Siōng-tè só͘ khòaⁿ-chòe hó-ê.
1 Lín是耶和華lín上帝ê kiáⁿ兒，m̄-thang為tio̍h死人割家己ê身軀，也m̄-thang tī你兩蕊目睭ê中央剃光光； 2 因為你做聖ê百姓，來屬tī耶和華你ê上帝；耶和華tùi地上萬百姓中，來揀你做伊特別ê百姓。 3 見若可惡ê物，你lóng m̄-thang食。 4 你所thang食ê cheng-siⁿ就是chiahê；牛、綿羊、山羊； 5 鹿、kap羚羊、小鹿、野山羊、麋鹿、赤羊、羌。 6 Cheng-siⁿ中，見若分蹄，蹄拆做兩pêng ê，翻草ê cheng-siⁿ，lín lóng thang食伊。 7 總是hiahê翻草ê，á是拆蹄ê，ê中間，lín m̄-thang食ê，就是chiahê；駱駝、兔、sa-hoan，因為伊是翻草，無分蹄，對tī lín是無清氣。 8 Ti，因為伊有分蹄也無翻草，對tī lín是無清氣；in ê肉lín m̄-thang食；死ê也m̄-thang摸。 9 Tī水中lín所thang食ê，是chiahê； 10 見有翅有鱗ê，lín lóng thang食；見無翅無鱗ê，lín lóng m̄-thang食；對tī lín就無清氣。 11 見清氣ê鳥，lín lóng thang食伊； 12 m̄-thang食ê就是鷹、梟、鵰； 13 鸇(chian) 、小鷹、鵪(ian)kap伊ê類； 14 一切ê烏鴉kap伊ê類， 15 鴕鳥、公ê鴕鳥、魚鷹、雀鷹 kap伊ê類； 16 暗光鳥、鴣黃、貓頭鷹， 17 鵜鶘(thê-ô͘)、臭頭鷹、lô͘-chî， 18 鶴、白鴒鷥kap伊ê類，戴髻鳥、蝙蝠。 19 見有翅能趖 ê物，對tī lín就無清氣，lín lóng m̄-thang食伊； 20 見會飛清氣ê物，lín lóng thang食。 21 見家己死ê物，lín lóng m̄-thang食；thang hō͘ lín門內寄腳ê人食，á是賣hō͘外國人食；因為你是聖ê百姓，屬tī耶和華你ê上帝。煮山羊á，m̄-thang用伊ê母ê奶。 22 你tio̍h將你掖種所出產ê，就是你ê田園ta̍k年所出ê，十份抽一份。 23 你ê五穀、酒、油，十份ê一份，kap牛羊頭水生ê，你tio̍h食伊tī耶和華你上帝ê面前，就是伊所beh揀來安置伊ê名ê所在；hō͘你學習常常敬畏耶和華你ê上帝。 24 當耶和華你ê上帝賜福你ê時，耶和華你ê上帝所beh揀安置伊ê名ê所在，若離開你太遠，hit條路太長，致到你bōe能帶chiahê物到hia； 25 你就thang換銀，將銀包起來，ni̍h tī你ê手內，去耶和華你ê上帝所beh揀ê所在； 26 你用chitê銀照心所ài買伊，或是牛，或是羊，或是酒，或是厚酒，見若你ê心所意愛ê；tī-hia你kap你ê家眷，tī耶和華你上帝ê面前，食來歡喜； 27 tiàm tī你門內ê利未人，你m̄-thang放sak伊，因為伊tī lín中間無份無業。 28 Ta̍k-pái到三年滿，你tio̍h將hit年ê土產十份抽一份，khǹg tī你ê門內； 29 因為利未人tī lín中間無份無業，伊kap出外人，以及孤兒、寡婦，tiàm tī lín門內ê，lóng thang來食到飽；致到耶和華你ê上帝tī你所做一切ê事，賜福你。
1 Lín sī Iâ-hô-hoa lín Siōng-tè ê kiáⁿ-jî, m̄-thang ūi-tio̍h sí-lâng koah ka-kī ê seng-khu, iā m̄-thang tī lí nn̄g-lúi ba̍k-chiu ê tiong-ng thì kng-kng; 2 in-ūi lí chòe sèng ê peh-sìⁿ, lâi sio̍k tī Iâ-hô-hoa lí ê Siōng-tè; Iâ-hô-hoa tùi tōe-chiūⁿ bān peh-sìⁿ tiong, lâi kéng lí chòe I te̍k-pia̍t ê peh-sìⁿ. 3 Kìⁿ-nā khó-ò͘ⁿ ê mi̍h, lí lóng m̄-thang chia̍h. 4 Lí só͘ thang chia̍h ê cheng-siⁿ chiū-sī chiah-ê; gû, mî-iûⁿ, soaⁿ-iûⁿ; 5 lo̍k, kap lêng-iông, sió-lo̍k, iá-soaⁿ-iûⁿ, bî-lo̍k, chhiah-iûⁿ, kiuⁿ. 6 Cheng-siⁿ tiong, kìⁿ-nā pun-tôe, tôe thiah chòe nn̄g-pêng ê, hoan-chháu ê cheng-siⁿ, lín lóng thang chia̍h i. 7 Chóng-sī hiah ê hoan-chháu ê, á-sī thiah-tôe ê, ê tiong-kan, lín m̄-thang chia̍h-ê, chiū-sī chiah-ê; lo̍k-tô, thò͘, sa-hoan, in-ūi i sī hoan-chháu, bô pun-tôe, tùi tī lín sī bô chheng-khì. 8 Ti, in-ūi i ū pun-tôe iā bô hoan-chháu, tùi tī lín sī bô chheng-khì; in ê bah lín m̄-thang chia̍h; sí-ê iā m̄-thang bong. 9 Tī chúi-tiong lín só͘ thang chia̍h-ê, sī chiah-ê; 10 kìⁿ ū-si̍t ū-lân ê, lín lóng thang chia̍h; kìⁿ bô-si̍t bô-lân ê, lín lóng m̄-thang chia̍h; tùi tī lín chiū bô chheng-khì. 11 Kìⁿ chheng-khì ê chiáu, lín lóng thang chia̍h i; 12 m̄-thang chia̍h-ê chiū-sī eng, hiau, tiau; 13 chian, sió-eng, ian kap i ê lūi; 14 it-chhè ê o͘-a kap i ê lūi, 15 tô-chiáu, kang ê tô-chiáu, hî-eng, chhiok-eng kap i ê lūi; 16 àm-kong-chiáu, ko͘-n̂g, niau-thâu-eng, 17 thê-ô͘, chhàu-thâu-eng, lô͘-chî, 18 ho̍h, pe̍h-lēng-si kap i ê lūi, tì-kè-chiáu, pián-hok. 19 Kìⁿ ū si̍t ōe sô ê mi̍h, tùi tī lín chiū bô chheng-khì, lín lóng m̄-thang chia̍h i; 20 kìⁿ ōe pe chheng-khì ê mi̍h, lín lóng thang chia̍h. 21 Kìⁿ ka-kī sí ê mi̍h, lín lóng m̄-thang chia̍h; thang hō͘ lín mn̂g-lāi kià-kha ê lâng chia̍h, á-sī bōe hō͘ gōa-kok lâng chia̍h; in-ūi lí sī sèng ê peh-sìⁿ, sio̍k tī Iâ-hô-hoa lí ê Siōng-tè. Chú soaⁿ-iûⁿ-á, m̄-thang ēng i ê bú ê lin. 22 Lí tio̍h chiong lí iā-chéng só͘ chhut-sán ê, chiū-sī lí ê chhân-hn̂g ta̍k-nî só͘ chhut ê, cha̍p-hūn thiu chi̍t-hūn. 23 Lí ê ngó͘-kok, chiú, iû, cha̍p-hūn ê chi̍t-hūn, kap gû iûⁿ thâu-chúi siⁿ-ê, lí tio̍h chia̍h i tī Iâ-hô-hoa lí Siōng-tè ê bīn-chêng, chiū-sī I só͘ beh kéng lâi an-tì I ê miâ ê só͘-chāi; hō͘ lí ha̍k-si̍p siông-siông kèng-ùi Iâ-hô-hoa lí ê Siōng-tè. 24 Tng Iâ-hô-hoa lí ê Siōng-tè sù-hok lí ê sî, Iâ-hô-hoa lí ê Siōng-tè só͘ beh kéng an-tì I ê miâ ê só͘-chāi, nā lī-khui lí thài-hn̄g, hit tiâu lō͘ thài-tn̂g, tì-kàu lí bōe-ōe tòa chiah ê mi̍h kàu hia; 25 lí chiū thang ōaⁿ gûn, chiong gûn pau-khí-lâi, ni̍h tī lí ê chhiú-lāi, khì Iâ-hô-hoa lí ê Siōng-tè só͘ beh kéng ê só͘-chāi; 26 lí ēng chit ê gûn chiàu sim só͘ ài bóe i, he̍k-sī gû, he̍k-sī iûⁿ, he̍k-sī chiú, he̍k-sī kāu-chiú, kìⁿ-nā lí ê sim só͘ ì-ài ê; tī-hia lí kap lí ê ke-koàn, tī Iâ-hô-hoa lí Siōng-tè ê bīn-chêng, chia̍h lâi hoaⁿ-hí; 27 tiàm tī lí mn̂g-lāi ê Lī-bī lâng lí m̄-thang pàng-sak i, in-ūi i tī lín tiong-kan bô hūn bô gia̍p. 28 Ta̍k-pái kàu saⁿ-nî móa, lí tio̍h chiong hit-nî ê thó͘-sán cha̍p-hūn thiu chi̍t-hūn, khǹg tī lí ê mn̂g-lāi; 29 in-ūi Lī-bī lâng tī lín tiong-kan bô hūn bô gia̍p, i kap chhut-gōa lâng, í-ki̍p ko͘-jî, kóaⁿ-hū, tiàm tī lín mn̂g-lāi ê, lóng thang lâi chia̍h kàu pá; tì-kàu Iâ-hô-hoa lí ê Siōng-tè tī lí só͘ chòe it-chhè ê sū, sù-hok lí.
1 Ta̍k-pái到七年ê路尾，你tio̍h行tháu放。 2 tháu放ê例，就是án-ni；凡若債主借厝邊ê，tio̍h tháu放；m̄-thang對你ê厝邊kap兄弟追討；因為耶和華ê tháu放已經宣布lah。 3 若是外國人你thang kā伊追討所欠ê；獨獨你ê物tī你ê兄弟ê，你ê手tio̍h tháu放伊。 4 你若留心聽耶和華你上帝ê話，執守來行我今á日所命令你這一切ê誡命，就beh tī lín中間無sòng-hiong人；因為tī耶和華你ê上帝所賞賜你做業ê地，耶和華beh大大賜福你。 5 6 因為耶和華你ê上帝beh照伊所應允賜福你；你beh借hō͘ chōe-chōe國，也你m̄免借；你beh管轄chōe-chōe國，也in bōe管轄你。 7 Tī耶和華你ê上帝所賞賜你ê地，若tī你一个城門內，你ê兄弟中，有一个sòng-hiong人kap你tī-teh，就m̄-thang對你sòng-hiong ê兄弟硬你ê心，kiu你ê手； 8 的確tio̍h對伊開你ê手，照伊所欠用ê借伊，補伊ê無夠。 9 你tio̍h家己謹慎，驚了你心內有pháiⁿ念頭，講：第七年，tháu放ê年，近lah，你就gîn你sòng-hiong ê兄弟，lóng m̄ hō͘伊，致到伊為tio̍h你求叫耶和華，你就有罪； 10 你的確tio̍h hō͘伊；hō͘伊ê時，心內m̄-thang煩惱；因為tùi chitê事，耶和華你ê上帝beh tī你一切所行ê，kap你ê手所做ê，賜福你。 11 因為tī hit所在，sòng-hiong人永bōe斷；所以我命令你講，Tī你ê境內，的確tio̍h對你ê兄弟，sòng-hiong ê，欠缺ê，來開你ê手。 12 你ê兄弟中，若有一个希伯來ê ta-po͘人，á是希伯來ê cha-bó͘人，賣hō͘你，服事你六年；到第七年，就tháu放伊去自由。 13 你tháu放伊去自由ê時，m̄-thang hō͘伊空手去； 14 tio̍h對你ê羊群、五穀場、酒窟中，chōe-chōe hō͘伊；照耶和華你上帝所賜福你ê，來hō͘伊。 15 Tio̍h記得你tī埃及地做奴才，耶和華你ê上帝救贖你；因為án-ni，我今á日命令你chitê事。 16 伊若對你講，我無beh離開你，因為伊疼你kap你ê家眷，koh因為tiàm你hia khiā真好； 17 你tio̍h用鑽á tùi門裡貫(kǹg)伊ê耳á，伊就永永做你ê奴僕。你款待你ê女婢也是án-ni。 18 你tháu放伊去自由ê時，m̄-thang掠做剋虧，因為伊服事你六年，比倩工ê重倍值；耶和華你ê上帝beh tī你所做一切ê事，賜福你。 19 見若牛群羊群，頭水生ê，公ê，你tio̍h分別做聖，歸hō͘耶和華你ê上帝；牛群頭水生ê，m̄-thang做工；羊群頭水生ê，m̄-thang剪伊ê毛。 20 你kap你ê家眷，ta̍k年tio̍h食伊tī耶和華你上帝ê面前，就是tī耶和華所beh揀ê所在。 21 若有破相ê，或是跛腳，或是chhiⁿ-mî，無論有甚麼pháiⁿ ê破相，lóng m̄-thang做祭獻hō͘耶和華你ê上帝； 22 thang tī你ê門內食伊；無清氣kap清氣ê人lóng thang，親像食羚羊kap鹿一樣； 23 獨獨m̄-thang食伊ê血；tio̍h piàⁿ tī地裡，親像piàⁿ水一樣。
1 Ta̍k-pái kàu chhit-nî ê lō͘-bé, lí tio̍h kiâⁿ tháu-pàng. 2 Tháu-pàng ê lē, chiū-sī án-ni; hoān-nā chè-chú chioh chhù-piⁿ-ê, tio̍h tháu-pàng; m̄-thang tùi lí ê chhù-piⁿ kap hiaⁿ-tī tui-thó; in-ūi Iâ-hô-hoa ê tháu-pàng í-keng soan-pò͘ lah. 3 Nā-sī gōa-kok lâng lí thang kā i tui-thó só͘ khiàm ê; to̍k-to̍k lí ê mi̍h tī lí ê hiaⁿ-tī ê, lí ê chhiú tio̍h tháu-pàng i. 4 Lí nā liû-sim thiaⁿ Iâ-hô-hoa lí Siōng-tè ê ōe, chip-siú lâi kiâⁿ góa kin-á-ji̍t só͘ bēng-lēng lí che it-chhè ê kài-bēng, chiū beh tī lín tiong-kan bô sòng-hiong lâng; in-ūi tī Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe, Iâ-hô-hoa beh tōa-tōa sù-hok lí. 5 6 In-ūi Iâ-hô-hoa lí ê Siōng-tè beh chiàu I só͘ èng-ún sù-hok lí; lí beh chioh hō͘ chōe-chōe kok, iā lí m̄-bián chioh; lí beh koán-hat chōe-chōe kok, iā in bōe koán-hat lí. 7 Tī Iâ-hô-hoa lí ê Siōng-tè só͘ siúⁿ-sù lí ê tōe, nā tī lí chi̍t ê siâⁿ-mn̂g-lāi, lí ê hiaⁿ-tī tiong, ū chi̍t ê sòng-hiong lâng kap lí tī-teh, chiū m̄-thang tùi lí sòng-hiong ê hiaⁿ-tī ngī lí ê sim, kiu lí ê chhiú; 8 tek-khak tio̍h tùi i khui lí ê chhiú, chiàu i só͘ khiàm-ēng ê chioh i, pó͘ i ê bô-kàu. 9 Lí tio̍h ka-kī kín-sīn, kiaⁿ-liáu lí sim-lāi ū pháiⁿ liām-thâu, kóng, Tē-chhit nî, tháu-pàng ê nî, kūn lah, lí chiū gîn lí sòng-hiong ê hiaⁿ-tī, lóng m̄ hō͘ i, tì-kàu i ūi-tio̍h lí kiû-kiò Iâ-hô-hoa, lí chiū ū-chōe; 10 lí tek-khak tio̍h hō͘ i; hō͘ i ê sî, sim-lāi m̄-thang hoân-ló; in-ūi tùi chit ê sū, Iâ-hô-hoa lí ê Siōng-tè beh tī lí it-chhè só͘ kiâⁿ ê, kap lí ê chhiú só͘ chòe ê, sù-hok lí. 11 In-ūi tī hit só͘-chāi, sòng-hiong lâng éng bōe tn̄g; só͘-í góa bēng-lēng lí kóng, Tī lí ê kéng-lāi, tek-khak tio̍h tùi lí ê hiaⁿ-tī, sòng-hiong ê, khiàm-kheh ê, lâi khui lí ê chhiú. 12 Lí ê hiaⁿ-tī tiong, nā ū chi̍t-ê Hi-pek-lâi ê ta-po͘-lâng, á-sī Hi-pek-lâi ê cha-bó͘-lâng, bōe hō͘ lí, ho̍k-sāi lí la̍k-nî; kàu tē-chhit nî, chiū tháu-pàng i khì chū-iû. 13 Lí tháu-pàng i khì chū-iû ê sî, m̄-thang hō͘ i khang-chhiú khì; 14 tio̍h tùi lí ê iûⁿ-kûn, gō͘-kak-tiûⁿ, chiú-khut tiong, chōe-chōe hō͘ i; chiàu Iâ-hô-hoa lí Siōng-tè só͘ sù-hok lí ê, lâi hō͘ i. 15 Tio̍h kì-tit lí tī Ai-ki̍p tōe chòe lô͘-châi, Iâ-hô-hoa lí ê Siōng-tè kiù-sio̍k lí; in-ūi án-ni, góa kin-á-ji̍t bēng-lēng lí chit ê sū. 16 I nā tùi lí kóng, Góa bô beh lī-khui lí, in-ūi i thiàⁿ lí kap lí ê ke-koàn, koh in-ūi tiàm lí hia khiā chin-hó; 17 lí tio̍h ēng chǹg-á tùi mn̂g-ni̍h kǹg i ê hī-á, i chiū éng-éng chòe lí ê lô͘-po̍k. Lí khoán-thāi lí ê lú-pī iā sī án-ni. 18 Lí tháu-pàng i khì chū-iû ê sî, m̄-thang lia̍h-chòe khek-khui, in-ūi i ho̍k-sāi lí la̍k-nî, pí chhiàⁿ-kang-ê têng-pē ta̍t; Iâ-hô-hoa lí ê Siōng-tè beh tī lí só͘ chòe it-chhè ê sū, sù-hok lí. 19 Kìⁿ-nā gû-kûn iûⁿ-kûn, thâu-chúi-siⁿ-ê, kang-ê, lí tio̍h hun-piat chòe-sèng, kui hō͘ Iâ-hô-hoa lí ê Siōng-tè; gû-kûn thâu-chúi-siⁿ-ê, m̄-thang chòe-kang; iûⁿ-kûn thâu-chúi-siⁿ-ê, m̄-thang chián i ê mn̂g. 20 Lí kap lí ê ke-koàn, ta̍k-nî tio̍h chia̍h i tī Iâ-hô-hoa lí Siōng-tè ê bīn-chêng, chiū-sī tī Iâ-hô-hoa só͘ beh kéng ê só͘-chāi. 21 Nā ū phòa-siùⁿ ê, he̍k-sī pái-kha, he̍k-sī chhiⁿ-mî, bô-lūn ū sím-mi̍h pháiⁿ ê phòa-siùⁿ, lóng m̄-thang chòe-chè hiàn hō͘ Iâ-hô-hoa lí ê Siōng-tè; 22 thang tī lí ê mn̂g-lāi chia̍h i; bô chheng-khì kap chheng-khì ê lâng lóng thang, chhin-chhiūⁿ chia̍h lêng-iông kap lo̍k chi̍t-iūⁿ; 23 to̍k-to̍k m̄-thang chia̍h i ê huih; tio̍h piàⁿ tī tōe-ni̍h, chhin-chhiūⁿ piàⁿ chúi chi̍t-iūⁿ.
1 你tio̍h注意A-pit月，來守耶和華你上帝ê pôaⁿ過節；因為耶和華你上帝tī A-pit月暝時chhōa你出埃及。 2 你tio̍h tī耶和華所beh揀來安置伊ê名ê所在，對你ê羊群牛群，用逾越節ê cheng-siⁿ，獻祭hō͘耶和華你ê上帝。 3 你m̄-thang用有酵ê餅chham teh食；七日久你tio̍h用無酵ê餅chham teh食，就是困苦ê餅；beh hō͘你一生ê日記得你出埃及地ê日；因為你出埃及地ê時真趕緊。 4 Tī你ê 四境內，七日久lóng m̄-thang看見酵；頭一日ê-hng所獻ê祭肉，m̄-thang留一點á到天光。 5 Tī耶和華你上帝所賞賜hiahê城門內，你m̄-thang獻pôaⁿ過節ê祭。 6 獨獨tio̍h tī耶和華你上帝所beh揀做安置伊ê名ê所在，到ê-hng日落ê時，就是你出埃及ê時，tio̍h獻pôaⁿ過節ê祭； 7 tio̍h tī耶和華你上帝所beh揀ê所在，pek來食伊；隔早起你oa̍t-tò去你ê布棚。 8 你tio̍h食無酵餅六日；第七日你tio̍h守耶和華你上帝ê嚴肅會；lóng m̄-thang做工。 9 你tio̍h為家己算七個七日；對你起頭用鐮á割五穀ê時，就算七個七日。 10 你tio̍h tī耶和華你上帝ê面前守七七日節；將你ê手ê禮物奉獻，是照你ê心所願ê，也照耶和華你ê上帝賜福你ê。 11 你kap你ê kiáⁿ、cha-bó͘-kiáⁿ、奴僕、女婢，kap tiàm tī你城門內ê利未人，以及tī lín中間寄腳ê，kap孤兒、寡婦，lóng tio̍h tī耶和華你ê上帝所beh揀安置伊ê名ê所在，tī耶和華你上帝ê面前歡喜。 12 你tio̍h記得你tī埃及bat做奴才；你tio̍h執守來行chiahê律例。 13 五穀場kap酒窟所出ê，你收khǹg了後，tio̍h守搭草寮á節七日； 14 守節 ê時，你kap你ê kiáⁿ、cha-bó͘-kiáⁿ、奴僕、女婢，kap tiàm tī你城門內ê利未人，以及寄腳ê，kap孤兒、寡婦，lóng tio̍h歡喜。 15 Tī耶和華所beh揀ê所在，你tio̍h守耶和華你ê上帝ê節七日；因為耶和華你ê上帝tī你一切ê物產，kap你ê手一切所做ê，beh賜福你，你就真大歡喜。 16 你一切ê ta-po͘丁，tio̍h tī除酵節，七七節，搭寮á節，一年三pái，lóng到耶和華你上帝ê面前，tī伊所beh揀ê所在；也m̄-thang空手到耶和華ê面前； 17 ta̍k人tio̍h照伊ê氣力來獻，就是照耶和華你上帝所賞賜你ê福份。 18 你tio̍h tī耶和華你ê上帝所賞賜ta̍k-ê城門內，照你hiahê支派，為家己設立審判官kap官長；in tio̍h照公義ê判斷，來審判百姓。 19 你ê審判m̄-thang冤枉，m̄-thang看人ê外貌，也m̄-thang受pò͘賂；因為pò͘賂會hō͘智慧ê人目睭chhiⁿ-mî，koh會 hō͘義人ê話péng倒tńg。 20 你tio̍h追jip至公至義，hō͘你能活，承接耶和華你上帝所賞賜你ê地。 21 你為家己所起耶和華你上帝ê壇，m̄-thang tī hit邊á栽甚麼樹木，做A-sià-la̍h； 22 也m̄-thang為家己chhāi雕刻ê柱；這是耶和華你ê上帝所怨恨ê。
1 Lí tio̍h chù-ì A-pit ge̍h, lâi siú Iâ-hô-hoa lí Siōng-tè ê pôaⁿ-kè-choeh; in-ūi Iâ-hô-hoa lí Siōng-tè tī A-pit ge̍h mî-sî chhōa lí chhut Ai-ki̍p. 2 Lí tio̍h tī Iâ-hô-hoa só͘ beh kéng lâi an-tì I ê miâ ê só͘-chāi, tùi lí ê iûⁿ-kûn gû-kûn, ēng jû-oa̍t-choeh ê cheng-siⁿ, hiàn-chè hō͘ Iâ-hô-hoa lí ê Siōng-tè. 3 Lí m̄-thang ēng ū-kàⁿ ê piáⁿ chham teh chia̍h; chhit-ji̍t kú lí tio̍h ēng bô-kàⁿ ê piáⁿ chham teh chia̍h, chiū-sī khùn-khó͘ ê piáⁿ; beh hō͘ lí it-seng ê ji̍t kì-tit lí chhut Ai-ki̍p tōe ê ji̍t; in-ūi lí chhut Ai-ki̍p tōe ê sî chin kóaⁿ-kín. 4 Tī lí ê sì-kéng-lāi, chhit-ji̍t kú lóng m̄-thang khòaⁿ-kìⁿ kàⁿ; thâu-chi̍t-ji̍t ê-hng só͘ hiàn ê chè-bah, m̄-thang lâu chi̍t-tiám-á kàu thiⁿ-kng. 5 Tī Iâ-hô-hoa lí Siōng-tè só͘ siúⁿ-sù hiah ê siâⁿ-mn̂g-lāi lí m̄-thang hiàn pôaⁿ-kè-choeh ê chè. 6 To̍k-to̍k tio̍h tī Iâ-hô-hoa lí Siōng-tè só͘ beh kéng chòe an-tì I ê miâ ê só͘-chāi, kàu ê-hng ji̍t-lo̍h ê sî, chiū-sī lí chhut Ai-ki̍p ê sî, tio̍h hiàn pôaⁿ-kè-choeh ê chè; 7 tio̍h tī Iâ-hô-hoa lí Siōng-tè só͘ beh kéng ê só͘-chāi, pek lâi chia̍h i; keh chá-khí lí oa̍t-tò-khì lí ê pò͘-pîⁿ. 8 Lí tio̍h chia̍h bô-kàⁿ-piáⁿ la̍k-ji̍t; tē-chhit ji̍t lí tio̍h siú Iâ-hô-hoa lí Siōng-tè ê giâm-siok-hōe; lóng m̄-thang chòe-kang. 9 Lí tio̍h ūi ka-kī sǹg chhit ê chhit-ji̍t; tùi lí khí-thâu ēng liâm-á koah ngó͘-kok ê sî, chiū sǹg chhit ê chhit-ji̍t. 10 Lí tio̍h tī Iâ-hô-hoa lí Siōng-tè ê bīn-chêng siú chhit-chhit-ji̍t-choeh; chiong lí ê chhiú ê lé-mi̍h hōng-hiàn, sī chiàu lí ê sim só͘ goān-ê, iā chiàu Iâ-hô-hoa lí ê Siōng-tè sù-hok lí ê. 11 Lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-ki̍p tī lín tiong-kan kià-kha-ê, kap ko͘-jî, kóaⁿ-hū, lóng tio̍h tī Iâ-hô-hoa lí ê Siōng-tè só͘ beh kéng an-tì I ê miâ ê só͘-chāi, tī Iâ-hô-hoa lí Siōng-tè ê bīn-chêng hoaⁿ-hí. 12 Lí tio̍h kì-tit lí tī Ai-ki̍p bat chòe lô͘-châi; lí tio̍h chip-siú lâi kiâⁿ chiah ê lu̍t-lē. 13 Gō͘-kak-tiûⁿ kap chiú-khut só͘ chhut ê, lí siu-khǹg liáu-āu, tio̍h siú tah chháu-liâu-á choeh chhit-ji̍t; 14 siú choeh ê sî, lí kap lí ê kiáⁿ, cha-bó͘-kiáⁿ, lô͘-po̍k, lú-pī, kap tiàm tī lí siâⁿ-mn̂g-lāi ê Lī-bī lâng, í-ki̍p kià-kha-ê, kap ko͘-jî, kóaⁿ-hū, lóng tio̍h hoaⁿ-hí. 15 Tī Iâ-hô-hoa só͘ beh kéng ê só͘-chāi, lí tio̍h siú Iâ-hô-hoa lí ê Siōng-tè ê choeh chhit-ji̍t; in-ūi Iâ-hô-hoa lí ê Siōng-tè tī lí it-chhè ê bu̍t-sán, kap lí ê chhiú it-chhè só͘ chòe ê, beh sù-hok lí, lí chiū chin tōa hoaⁿ-hí. 16 Lí it-chhè ê ta-po͘-teng, tio̍h tī tû-kàⁿ-choeh, chhit-chhit-choeh, tah-liâu-á choeh, chi̍t-nî saⁿ-pái, lóng kàu Iâ-hô-hoa lí Siōng-tè ê bīn-chêng, tī I só͘ beh kéng ê só͘-chāi; iā m̄-thang khang-chhiú kàu Iâ-hô-hoa ê bīn-chêng; 17 ta̍k-lâng tio̍h chiàu i ê khùi-la̍t lâi hiàn, chiū-sī chiàu Iâ-hô-hoa lí Siōng-tè só͘ siúⁿ-sù lí ê hok-hūn. 18 Lí tio̍h tī Iâ-hô-hoa lí ê Siōng-tè só͘ siúⁿ-sù ta̍k ê siâⁿ-mn̂g-lāi, chiàu lí hiah ê chi-phài, ūi ka-kī siat-li̍p sím-phòaⁿ-koaⁿ kap koaⁿ-tiúⁿ; in tio̍h chiàu kong-gī ê phòaⁿ-toàn, lâi sím-phòaⁿ peh-sìⁿ. 19 Lí ê sím-phòaⁿ m̄-thang oan-óng, m̄-thang khòaⁿ lâng ê gōa-māu, iā m̄-thang siū pò͘-lō͘; in-ūi pò͘-lō͘ ōe hō͘ tì-hūi ê lâng ba̍k-chiu chhiⁿ-mî, koh ōe hō͘ gī-lâng ê ōe péng-tò-tńg. 20 Lí tio̍h tui-jip chì-kong chì-gī, hō͘ lí ōe oa̍h, sêng-chiap Iâ-hô-hoa lí Siōng-tè só͘ siúⁿ-sù lí ê tōe. 21 Lí ūi ka-kī só͘ khí Iâ-hô-hoa lí Siōng-tè ê tôaⁿ, m̄-thang tī hit piⁿ-á chai sím-mi̍h chhiū-ba̍k, chòe A-sià-la̍h; 22 iā m̄-thang ūi ka-kī chhāi tiau-khek ê thiāu; che sī Iâ-hô-hoa lí ê Siōng-tè só͘ oàn-hūn ê.
1 見有破相，á是有甚麼pháiⁿ樣ê牛羊，你m̄-thang祭獻耶和華你ê上帝；因為這是耶和華你ê上帝所厭惡ê。 2 Tī lín中間，tī耶和華你上帝所賞賜你hiahê城ê中間，若tú-tio̍h有人，或是男，或是女，行耶和華你上帝所看做pháiⁿ-ê，違背伊ê約， 3 去服事別ê上帝來敬拜伊，或是日，或是月，á是天頂ê萬象，是我所bē-bat命令ê； 4 若有人kā你講，你也已經聽見，就tio̍h詳細探聽；看ah，果然有影，實在有chitê可惡ê事，行tī以色列中； 5 你tio̍h將行chitê pháiⁿ-tāi ê ta-po͘人，á是婦人人，拖到城門外，用石頭tìm hitê ta-po͘人，á是婦人人，hō͘伊死。 6 Tio̍h憑兩個干證，á是三個干證ê嘴，應該死ê tio̍h hō͘伊死；若憑一人ê嘴做干證，就m̄-thang hō͘伊死； 7 干證ê tio̍h做頭下手tìm伊，然後眾百姓也下手hō͘伊死；án-ni就tùi lín中間除去hitê pháiⁿ。 8 你城門內若有冤家ê事，或是因為流血，或是因為相告，或是因為相phah，是你所bōe曉得斷ê，你就tio̍h起來，去耶和華你上帝所beh揀ê所在； 9 見祭司利未人，kap當時ê審判官，來問in；in beh將判詞指示你； 10 in tī耶和華所beh揀ê所在指示你ê判詞，你tio̍h照án-ni行；見in所教示你ê，tio̍h執守來行伊； 11 tio̍h照in所beh教示你法度ê宗旨，也tio̍h照in所kā你講ê判斷來行；in所指示你ê判詞，你m̄-thang偏左偏右。 12 若有人自專行，m̄聽祭司，就是tī-hia khiā-teh來服事耶和華你ê上帝ê，á是m̄聽審判官，就tio̍h hō͘ hit人死；án-ni你就tùi以色列中除去hitê pháiⁿ； 13 百姓beh lóng聽見來驚，無koh自專行。 14 你到耶和華你上帝所賞賜你ê地，得tio̍h hit所在來khiā起ê時，若講，我beh設立王做我ê頭，親像我四圍ê列國一樣， 15 你的確tio̍h設立耶和華你上帝所揀ê人做王，做你ê頭；對你ê兄弟中設立一人做王，做你ê頭；外國人，m̄是你ê兄弟ê，你m̄-thang設立做你ê頭。 16 總是王m̄-thang為tio̍h家己加添chōe-chōe隻馬，也m̄-thang為tio̍h beh加添khah-chōe隻馬，hō͘百姓tò去埃及，因為耶和華bat命令lín講：Lín莫koh tùi hit條路tò去。 17 伊也m̄-thang為家己娶chōe-chōe后妃，驚了伊ê心悖謬；伊也m̄-thang為本身積聚chōe-chōe金銀。 18 伊坐伊ê國位ê時，tio̍h用一本冊抄寫chitê律法，tio̍h tùi hit本存tī祭司利未人ê面前ê來抄伊； 19 Hit本tio̍h hē tī伊hia，一世人tio̍h讀伊；thang學習敬畏耶和華伊ê上帝；tio̍h執守chitê律法一切ê話，kap chiahê律例來行伊； 20 免得伊自高來看輕兄弟；koh免得伊偏左偏右，來離開chitê誡命；thang hō͘伊kap伊ê kiáⁿ孫tī以色列中國位久長。
1 Kìⁿ-ū phòa-siùⁿ, á-sī ū sím-mi̍h pháiⁿ-iūⁿ ê gû iûⁿ, lí m̄-thang chè-hiàn Iâ-hô-hoa lí ê Siōng-tè; in-ūi che sī Iâ-hô-hoa lí ê Siōng-tè só͘ iàm-ò͘ⁿ ê. 2 Tī lín tiong-kan, tī Iâ-hô-hoa lí Siōng-tè só͘ siúⁿ-sù lí hiah ê siâⁿ ê tiong-kan, nā tú-tio̍h ū lâng, he̍k-sī lâm, he̍k-sī lú, kiâⁿ Iâ-hô-hoa lí Siōng-tè só͘ khòaⁿ-chòe pháiⁿ-ê, ûi-pōe I ê iok, 3 khì ho̍k-sāi pa̍t ê siōng-tè lâi kèng-pài i, he̍k-sī ji̍t, he̍k-sī ge̍h, á-sī thiⁿ-téng ê bān-siōng, sī góa só͘ bē-bat bēng-lēng-ê; 4 nā ū lâng kā lí kóng, lí iā í-keng thiaⁿ-kìⁿ, chiū tio̍h siông-sè thàm-thiaⁿ; khòaⁿ ah, kó-jiân ū-iáⁿ, si̍t-chāi ū chit-ê khó-ò͘ⁿ ê sū, kiâⁿ tī Í-sek-lia̍t tiong; 5 lí tio̍h chiong kiâⁿ chit ê pháiⁿ-tāi ê ta-po͘-lâng, á-sī hū-jîn-lâng, thoa kàu siâⁿ-mn̂g-gōa, ēng chio̍h-thâu tìm hit ê ta-po͘-lâng, á-sī hū-jîn-lâng, hō͘ i sí. 6 Tio̍h pîn nn̄g ê kan-chèng, á-sī saⁿ ê kan-chèng ê chhùi, eng-kai sí-ê tio̍h hō͘ i sí; nā pîn chi̍t-lâng ê chhùi chòe kan-chèng, chiū m̄-thang hō͘ i sí; 7 kan-chèng-ê tio̍h chòe-thâu hē chhiú tìm i, jiân-āu chèng peh-sìⁿ iā hē chhiú hō͘ i sí; án-ni chiū tùi lín tiong-kan tû-khì hit ê pháiⁿ. 8 Lí siâⁿ-mn̂g-lāi nā ū oan-ke ê sū, he̍k-sī in-ūi lâu-huih, he̍k-sī in-ūi saⁿ-kò, he̍k-sī in-ūi saⁿ-phah, sī lí só͘ bōe hiáu-tit toàn ê, lí chiū tio̍h khí-lâi, khì Iâ-hô-hoa lí Siōng-tè só͘ beh kéng ê só͘-chāi; 9 kìⁿ chè-si Lī-bī lâng, kap tng-sî ê sím-phòaⁿ-koaⁿ, lâi mn̄g in; in beh chiong phòaⁿ-sû chí-sī lí; 10 in tī Iâ-hô-hoa só͘ beh kéng ê só͘-chāi chí-sī lí ê phòaⁿ-sû, lí tio̍h chiàu án-ni kiâⁿ; kìⁿ in só͘ kà-sī lí ê, tio̍h chip-siú lâi kiâⁿ i; 11 tio̍h chiàu in só͘ beh kà-sī lí hoat-tō͘ ê chong-chí, iā tio̍h chiàu in só͘ kā lí kóng ê phòaⁿ-toàn lâi kiâⁿ; in só͘ chí-sī lí ê phòaⁿ-sû, lí m̄-thang phian-chó phian-iū. 12 Nā ū lâng chū-choan kiâⁿ, m̄-thiaⁿ chè-si, chiū-sī tī-hia khiā-teh lâi ho̍k-sāi Iâ-hô-hoa lí ê Siōng-tè ê, á-sī m̄-thiaⁿ sím-phòaⁿ-koaⁿ, chiū tio̍h hō͘ hit-lâng sí; án-ni lí chiū tùi Í-sek-lia̍t tiong tû-khì hit ê pháiⁿ; 13 peh-sìⁿ beh lóng thiaⁿ-kìⁿ lâi kiaⁿ, bô koh chū-choan kiâⁿ. 14 Lí kàu Iâ-hô-hoa lí Siōng-tè só͘ siúⁿ-sù lí ê tōe, tit-tio̍h hit só͘-chāi lâi khiā-khí ê sî, nā kóng, Góa beh siat-li̍p ông chòe góa ê thâu, chhin-chhiūⁿ góa sì-ûi ê lia̍t-kok chi̍t-iūⁿ, 15 lí tek-khak tio̍h siat-li̍p Iâ-hô-hoa lí Siōng-tè só͘ kéng ê lâng chòe-ông, chòe lí ê thâu; tùi lí ê hiaⁿ-tī tiong siat-li̍p chi̍t-lâng chòe-ông, chòe lí ê thâu; gōa-kok lâng, m̄-sī lí ê hiaⁿ-tī ê, lí m̄-thang siat-li̍p chòe lí ê thâu. 16 Chóng-sī ông m̄-thang ūi-tio̍h ka-kī ke-thiⁿ chōe-chōe chiah bé, iā m̄-thang ūi-tio̍h beh ke-thiⁿ khah-chōe chiah bé, hō͘ peh-sìⁿ tò-khì Ai-ki̍p, in-ūi Iâ-hô-hoa bat bēng-lēng lín kóng, Lín bo̍h koh tùi hit tiâu lō͘ tò-khì. 17 I iā m̄-thang ūi ka-kī chhōa chōe-chōe hō͘-hui, kiaⁿ-liáu i ê sim pōe-biū; i iā m̄-thang ūi pún-sin chek-chū chōe-chōe kim-gûn. 18 I chē i ê kok-ūi ê sî, tio̍h ēng chi̍t pún chheh chhau-siá chit ê lu̍t-hoat, tio̍h tùi hit-pún chûn tī chè-si Lī-bī lâng ê bīn-chêng ê lâi chhau i; 19 hit-pún tio̍h hē tī i hia, chi̍t-sì-lâng tio̍h tha̍k i; thang ha̍k-si̍p kèng-ùi Iâ-hô-hoa i ê Siōng-tè; tio̍h chip-siú chit ê lu̍t-hoat it-chhè ê ōe, kap chiah ê lu̍t-lē lâi kiâⁿ i; 20 bián-tit i chū-ko lâi khòaⁿ-khin hiaⁿ-tī; koh bián-tit i phian-chó phian-iū, lâi lī-khui chit ê kài-bēng; thang hō͘ i kap i ê kiáⁿ-sun tī Í-sek-lia̍t tiong kok-ūi kú-tn̂g.
1 祭司利未人，thong利未ê支派，in tī以色列中無份無業；in所beh食ê，就是耶和華ê火祭，kap伊ê業。 2 In tī in兄弟中無產業，耶和華做in ê產業，照所對in講ê。 3 祭司tùi百姓所應該得tio̍h ê份就是chiahê；見若獻牛á是羊做祭ê，tio̍h將前腿，kap兩個嘴phóe，kap肚，hō͘祭司。 4 你ê五穀，你ê酒，你ê油，起頭收成ê，kap起頭剪ê羊毛，lóng tio̍h hō͘伊。 5 因為耶和華你ê上帝對你眾支派揀伊，hō͘伊kap伊ê kiáⁿ孫，奉耶和華ê名，khiā-teh，服事伊到永遠。 6 若有利未人無論寄腳tī以色列中toh落一座城門內，tùi hia出來，專心意愛到耶和華所beh揀ê所在， 7 就伊beh奉耶和華伊上帝ê名服事，親像伊眾兄弟hiahê khiā tī耶和華面前ê利未人一樣； 8 tī伊賣祖公ê業以外，伊所得tio̍h食ê份額tio̍h kap in憑。 9 你若到耶和華你上帝所賞賜你ê地，你m̄-thang學hiahê國可惡ê事來行。 10 Lín中間m̄-thang有人hō͘ kiáⁿ cha-bó͘-kiáⁿ經過火，行邪術ê、占卜ê、看命ê、做司公ê； 11 畫符ê、做童乩 ê、行魔術ê、牽亡ê； 12 因為見若行hiahê事ê，lóng是耶和華所厭惡；也是為tio̍h chiahê可惡ê事，耶和華你ê上帝對你ê面前趕in出。 13 你對tī耶和華你ê上帝，tio̍h做完全ê人。 14 因為你所beh承接hiahê國，lóng聽thàn占卜ê，行邪術ê；論到你，就耶和華你ê上帝m̄准你án-ni行。 15 耶和華你ê上帝beh tùi lín中間，tùi lín ê兄弟，興起先知親像我，lín tio̍h聽thàn伊。 16 照你tī Hô-lia̍t聚會ê日，tùi耶和華你上帝一切所求ê，講：莫得hō͘我koh聽見耶和華我ê上帝ê聲；也莫得hō͘我koh看見chitê大火，免得我死無。 17 耶和華就對我講，In所講ê是好。 18 我beh tī in兄弟中，kā in興起一个先知親像你，我beh將我ê話hē tī伊ê嘴，伊beh將我一切所命令ê對in講。 19 伊託我ê名來傳我ê話，人若m̄聽，我beh辦伊。 20 總是先知自專託我ê名，講我所無命令伊講ê話，á是奉別ê上帝ê名來講：hitê先知tio̍h死。 21 你ê心若想講：耶和華所無講ê話，阮beh-thái會知ah？ 22 若有先知託耶和華ê名來講ê，hitê事若無成，也無應驗，這是耶和華所無講ê，是hitê先知自專來講ê，你莫得驚伊。
1 Chè-si Lī-bī lâng, thong Lī-bī ê chi-phài, in tī Í-sek-lia̍t tiong bô hūn bô gia̍p; in só͘ beh chia̍h-ê, chiū-sī Iâ-hô-hoa ê hé-chè, kap I ê gia̍p. 2 In tī in hiaⁿ-tī tiong bô sán-gia̍p, Iâ-hô-hoa chòe in ê sán-gia̍p, chiàu só͘ tùi in kóng ê. 3 Chè-si tùi peh-sìⁿ só͘ eng-kai tit-tio̍h ê hūn chiū-sī chiah-ê; kìⁿ-nā hiàn gû á-sī iûⁿ chòe chè ê, tio̍h chiong chêng thúi, kap nn̄g ê chhùi-phóe, kap tō͘, hō͘ chè-si. 4 Lí ê ngó͘-kok, lí ê chiú, lí ê iû, khí-thâu siu-sêng ê, kap khí-thâu chián ê iûⁿ-mn̂g, lóng tio̍h hō͘ i. 5 In-ūi Iâ-hô-hoa lí ê Siōng-tè tùi lí chèng chi-phài kéng i, hō͘ i kap i ê kiáⁿ-sun, hōng Iâ-hô-hoa ê miâ, khiā-teh, ho̍k-sāi I kàu éng-oán. 6 Nā ū Lī-bī lâng bô-lūn kià-kha tī Í-sek-lia̍t tiong toh-lo̍h chi̍t chō siâⁿ-mn̂g-lāi, tùi hia chhut-lâi, choan-sim ì-ài kàu Iâ-hô-hoa só͘ beh kéng ê só͘-chāi, 7 chiū i beh hōng Iâ-hô-hoa i Siōng-tè ê miâ ho̍k-sāi, chhin-chhiūⁿ i chèng hiaⁿ-tī hiah-ê khiā tī Iâ-hô-hoa bīn-chêng ê Lī-bī lâng chi̍t-iūⁿ; 8 tī i bōe chó͘-kong ê gia̍p í-gōa, i só͘ tit-tio̍h chia̍h ê hūn-gia̍h tio̍h kap in pîⁿ. 9 Lí nā kàu Iâ-hô-hoa lí Siōng-tè só͘ siúⁿ-sù lí ê tōe, lí m̄-thang o̍h hiah ê kok khó-ò͘ⁿ ê sū lâi kiâⁿ. 10 Lín tiong-kan m̄-thang ū lâng hō͘ kiáⁿ cha-bó͘-kiáⁿ keng-kè hé, kiâⁿ siâ-su̍t ê, chiam-pok ê, khòaⁿ-miā ê, chòe sai-kong ê; 11 ūi-hû ê, chòe tâng-ki ê, kiâⁿ mô͘-su̍t ê, khan-bông ê; 12 in-ūi kìⁿ-nā kiâⁿ hiah ê sū ê, lóng sī Iâ-hô-hoa só͘ iàm-ò͘ⁿ; iā sī ūi-tio̍h chiah ê khó-ò͘ⁿ ê sū, Iâ-hô-hoa lí ê Siōng-tè tùi lí ê bīn-chêng kóaⁿ in chhut. 13 Lí tùi tī Iâ-hô-hoa lí ê Siōng-tè, tio̍h chòe oân-choân ê lâng. 14 In-ūi lí só͘ beh sêng-chiap hiah ê kok, lóng thiaⁿ-thàn chiam-pok ê, kiâⁿ siâ-su̍t ê; lūn-kàu lí, chiū Iâ-hô-hoa lí ê Siōng-tè m̄-chún lí án-ni kiâⁿ. 15 Iâ-hô-hoa lí ê Siōng-tè beh tùi lín tiong-kan, tùi lín ê hiaⁿ-tī, heng-khí sian-ti chhin-chhiūⁿ góa, lín tio̍h thiaⁿ-thàn i. 16 Chiàu lí tī Hô-lia̍t chū-hōe ê ji̍t, tùi Iâ-hô-hoa lí Siōng-tè it-chhè só͘ kiû-ê, kóng, Bo̍h-tit hō͘ góa koh thiaⁿ-kìⁿ Iâ-hô-hoa góa ê Siōng-tè ê siaⁿ; iā bo̍h-tit hō͘ góa koh khòaⁿ-kìⁿ chit ê tōa-hé, bián-tit góa sí-bô. 17 Iâ-hô-hoa chiū tùi góa kóng, In só͘ kóng-ê sī hó. 18 Góa beh tī in hiaⁿ-tī tiong, kā in heng-khí chi̍t ê sian-ti chhin-chhiūⁿ lí, Góa beh chiong Góa ê ōe hē tī i ê chhùi, i beh chiong Góa it-chhè só͘ bēng-lēng-ê tùi in kóng. 19 I thok Góa ê miâ lâi thoân Góa ê ōe, lâng nā m̄-thiaⁿ, Góa beh pān i. 20 Chóng-sī sian-ti chū-choan thok Góa ê miâ, kóng Góa só͘ bô bēng-lēng i kóng ê ōe, á-sī hōng pa̍t ê siōng-tè ê miâ lâi kóng, hit ê sian-ti tio̍h sí. 21 Lí ê sim nā siūⁿ kóng, Iâ-hô-hoa só͘ bô kóng ê ōe, goán beh-thái ōe chai ah? 22 Nā ū sian-ti thok Iâ-hô-hoa ê miâ lâi kóng-ê, hit ê sū nā bô chiâⁿ, iā bô èng-giām, che sī Iâ-hô-hoa só͘ bô kóng-ê, sī hit ê sian-ti chū-choan lâi kóng-ê, lí bo̍h-tit kiaⁿ i.
1 耶和華你ê上帝將來剪除hiahê國，就是耶和華你ê上帝用in ê地賞賜你ê，你承接in，來khiā起in ê城，kap in ê厝； 2 Hit時你就tio̍h tī耶和華你上帝賞賜你做業ê地，kā伊分別三個城。 3 Tio̍h將耶和華你上帝所賞賜你承接界內ê地，分做三坵(khu)，koh kā伊開路，hō͘ hiahê 刣人ê lóng thang走去hia。 4 Thâi死人ê走去hia，就thang得tio̍h活，hitê例就是án-ni；見若平素無結怨錯誤來刣死伊ê厝邊； 5 就是親像人kap伊ê厝邊去樹林，beh剉樹木，手kia̍h斧頭一下剉，beh剉hitê樹，斧頭肉lut去，傷tio̍h伊ê厝邊致到死，chitê人tio̍h走到hiahê城ê一个，就thang活teh； 6 免得報人命ê，當伊心火to̍h ê時，追jip 刣人ê人，因為路真遠jip-tio̍h就刣死伊；其實伊m̄應該死，因為平時伊無怨恨伊。 7 所以我命令你講，Tio̍h kā伊分別三個城。 8 耶和華你ê上帝，若照伊對你ê列祖所chiù-chōa-ê，開闊你ê境界，將所應允賞賜你ê列祖ê全地hō͘你； 9 我今á日所命令你一切ê誡命，你若執守來行伊，疼耶和華你ê上帝，常常行伊hiahê道路，就tī chit三個城以外，tio̍h koh為家己加設三個城； 10 免得無罪ê血流tī耶和華你上帝所賞賜你做業ê地，致到流血ê罪歸tī你。 11 總是人若怨恨伊ê厝邊，bih teh起來phah伊，傷害伊到死，就走到hiahê城ê一个； 12 伊ê城ê長老就tio̍h差人，tùi hia帶伊出來，交tī報人命ê人ê手，hō͘伊死； 13 你ê目睭m̄-thang可憐伊；tī以色列中tio̍h除去無罪ê血，hō͘你thang得tio̍h福氣。 14 Tī耶和華你上帝所賞賜你承接ê地，m̄-thang移徙厝邊ê界址；hitê是前ê人所chhāi tī你續接ê業ê內面ê。 15 Kan-ta一人bōe-thang起來干證人甚麼pháiⁿ，甚麼罪，就是伊見所犯ê罪；的確tio̍h憑兩個干證ê人ê嘴，á是三個干證ê人ê嘴，chiah thang定伊ê案。 16 若有lām-sám干證ê起來攻擊某人，干證伊行pháiⁿ， 17 就chit兩個相chìⁿ ê人tio̍h khiā tī耶和華ê面前，kap當時ê祭司，kap審判官ê面前。 18 審判官tio̍h詳細查問；看ah，若做干證ê人，果然是假干證，用假干證beh害伊ê兄弟， 19 lín就tio̍h款待伊，親像伊想beh款待伊ê兄弟ê；án-ni tùi lín中間除去hitê pháiⁿ。 20 其餘ê人聽見lóng beh驚，就tī lín中間無koh行chit號pháiⁿ。 21 你ê目睭m̄-thang可憐伊，tio̍h用命賠命，目睭賠目睭，嘴齒賠嘴齒，手賠手，腳賠腳。
1 Iâ-hô-hoa lí ê Siōng-tè chiong-lâi chián-tû hiah ê kok, chiū-sī Iâ-hô-hoa lí ê Siōng-tè ēng in ê tōe siúⁿ-sù lí ê, lí sêng-chiap in, lâi khiā-khí in ê siâⁿ, kap in ê chhù; 2 hit-sî lí chiū tio̍h tī Iâ-hô-hoa lí Siōng-tè siúⁿ-sù lí chòe-gia̍p ê tōe, kā i hun-piat saⁿ ê siâⁿ. 3 Tio̍h chiong Iâ-hô-hoa lí Siōng-tè só͘ siúⁿ-sù lí sêng-chiap kài-lāi ê tōe, hun-chòe saⁿ-khu, koh kā i khui lō͘, hō͘ hiah ê thâi-lâng-ê lóng thang cháu-khì hia. 4 Thâi-sí-lâng-ê cháu-khì hia, chiū thang tit-tio̍h oa̍h, hit ê lē chiū-sī án-ni; kìⁿ-nā pêng-sò͘ bô kiat-oàn chhò-gō͘ lâi thâi-sí i ê chhù-piⁿ; 5 chiū-sī chhin-chhiūⁿ lâng kap i ê chhù-piⁿ khì chhiū-nâ, beh chhò chhiū-ba̍k, chhiú kia̍h pó͘-thâu chi̍t-ē chhò, beh chhò hit ê chhiū, pó͘-thâu-bah lut-khì, siong-tio̍h i ê chhù-piⁿ tì-kàu sí, chit ê lâng tio̍h cháu kàu hiah ê siâⁿ ê chi̍t-ê, chiū thang oa̍h-teh; 6 bián-tit pò-jîn-bēng-ê, tng i sim-hé to̍h ê sî, tui-jip thâi-lâng ê lâng, in-ūi lō͘ chin-hn̄g jip-tio̍h chiū thâi-sí i; kî-si̍t i m̄ eng-kai sí, in-ūi pêng-sî i bô oàn-hūn i. 7 Só͘-í góa bēng-lēng lí kóng, Tio̍h kā i hun-piat saⁿ ê siâⁿ. 8 Iâ-hô-hoa lí ê Siōng-tè, nā chiàu I tùi lí ê lia̍t-chó͘ só͘ chiù-chōa-ê, khui-khoah lí ê kéng-kài, chiong só͘ èng-ún siúⁿ-sù lí ê lia̍t-chó͘ ê choân-tōe hō͘ lí; 9 góa kin-á-ji̍t só͘ bēng-lēng lí it-chhè ê kài-bēng, lí nā chip-siú lâi kiâⁿ i, thiàⁿ Iâ-hô-hoa lí ê Siōng-tè, siông-siông kiâⁿ I hiah ê tō-lō͘, chiū tī chit saⁿ ê siâⁿ í-gōa, tio̍h koh ūi ka-kī ke-siat saⁿ ê siâⁿ; 10 bián-tit bô-chōe ê huih lâu tī Iâ-hô-hoa lí Siōng-tè só͘ siúⁿ-sù lí chòe-gia̍p ê tōe, tì-kàu lâu-huih ê chōe kui tī lí. 11 Chóng-sī lâng nā oàn-hūn i ê chhù-piⁿ, bih-teh khí-lâi phah i, siong-hāi i kàu sí, chiū cháu kàu hiah ê siâⁿ ê chi̍t-ê; 12 i ê siâⁿ ê tiúⁿ-ló chiū tio̍h chhe lâng, tùi hia tòa i chhut-lâi, kau tī pò-jîn-bēng ê lâng ê chhiú, hō͘ i sí; 13 lí ê ba̍k-chiu m̄-thang khó-lîn i; tī Í-sek-lia̍t tiong tio̍h tû-khì bô-chōe ê huih, hō͘ lí thang tit-tio̍h hok-khì. 14 Tī Iâ-hô-hoa lí Siōng-tè só͘ siúⁿ-sù lí sêng-chiap ê tōe, m̄-thang î-sóa chhù-piⁿ ê kài-chí; hit-ê sī chêng ê lâng só͘ chhāi tī lí sòa-chiap ê gia̍p ê lāi-bīn ê. 15 Kan-ta chi̍t-lâng bōe thang khí-lâi kan-chèng lâng sím-mi̍h pháiⁿ, sím-mi̍h chōe, chiū-sī i kìⁿ só͘ hoān ê chōe; tek-khak tio̍h pîn nn̄g ê kan-chèng ê lâng ê chhùi, á-sī saⁿ ê kan-chèng ê lâng ê chhùi, chiah thang tēng i ê àn. 16 Nā ū lām-sám kan-chèng ê khí-lâi kong-kek bó͘ lâng, kan-chèng i kiâⁿ-pháiⁿ, 17 chiū chit nn̄g-ê saⁿ-chìⁿ ê lâng tio̍h khiā tī Iâ-hô-hoa ê bīn-chêng, kap tng-sî ê chè-si, kap sím-phòaⁿ-koaⁿ ê bīn-chêng. 18 Sím-phòaⁿ-koaⁿ tio̍h siông-sè chhâ-mn̄g; khòaⁿ ah, nā chòe kan-chèng ê lâng, kó-jiân sī ké kan-chèng, ēng ké kan-chèng beh hāi i ê hiaⁿ-tī, 19 lín chiū tio̍h khoán-thāi i, chhin-chhiūⁿ i siūⁿ beh khoán-thāi i ê hiaⁿ-tī ê; án-ni tùi lín tiong-kan tû-khì hit ê pháiⁿ. 20 Kî-û ê lâng thiaⁿ-kìⁿ lóng beh kiaⁿ, chiū tī lín tiong-kan bô koh kiâⁿ chit hō pháiⁿ. 21 Lí ê ba̍k-chiu m̄-thang khó-lîn i, tio̍h ēng miā pê miā, ba̍k-chiu pê ba̍k-chiu, chhùi-khí pê chhùi-khí, chhiú pê chhiú, kha pê kha.
1 你出去kap對敵交戰ê時，看見馬、車，以及百姓比你khah-chōe-ê，m̄免驚in；因為chhōa你出埃及地ê耶和華你ê上帝kap你tī-teh。 2 Lín teh-beh臨陣交戰ê時，祭司tio̍h到百姓ê面前宣布； 3 對in講，以色列人ah，lín tio̍h聽；lín今á日beh kap百姓對敵交戰，m̄-thang失膽，m̄-thang驚，來ngia̍uh-ngia̍uh-chhoah，也m̄-thang因為in來忍neh； 4 因為耶和華lín ê上帝就是kap lín相kap去ê，beh替lín kap對敵交戰來拯救lín。 5 Hiah-ê官長也tio̍h對百姓宣布，講：Chī-chūi起新厝iáu未行落成ê禮 ah？伊tio̍h tò去in tau，驚了伊陣亡，別人行落成 ê禮。 6 Chī-chūi種葡萄園，iáu未有用tio̍h伊ê果子ah？伊也thang tò去in tau，驚了伊陣亡，別人去用伊。 7 Chī-chūi聘定bó͘，iáu未娶伊ah？伊也thang tò去in tau，驚了伊陣亡，別人娶伊。 8 Hiah-ê官長koh tio̍h對百姓宣布，講：Chī-chūi驚惶失膽ah？伊thang tò去in tau，驚了伊ê兄弟ê心消溶，親像伊ê心一樣。 9 Hiah-ê官長對百姓宣布明白，tio̍h設立hiahê軍長做頭來chhōa百姓。 10 你óa近一个城beh phah ê時，tio̍h事先對伊宣布和平ê話。 11 伊若用和平ê話答覆你，kā你開城門，hit中間所有ê百姓lóng beh做你ê差用，來服事你。 12 伊若m̄肯kap你和好，反tńg beh kap lín交戰，lín就tio̍h圍困伊。 13 耶和華你ê上帝用伊交付你，你就tio̍h用刀一盡刣死伊hiahê ta-po͘丁； 14 獨獨婦女、gín-ná、cheng-siⁿ，kap城內一切所搶ê物，你thang搶伊來做家己ê路用；你所搶你ê對敵ê物，就是耶和華你上帝所賞賜你ê，你thang食用。 15 離開你遠遠hiahê城，m̄是chiahê列國ê城，你tio̍h án-ni款待伊。 16 獨獨屬chiahê百姓ê城，耶和華你上帝已經賞賜你做業，其中見有喘氣ê，你m̄-thang hō͘伊活teh； 17 tio̍h照耶和華你上帝所命令你ê，將Hek人、A-mô͘-lī人、迦南人、Pí-lī-sé人、Hi-bī人、Iâ-pò͘-su人，一盡滅伊； 18 免得in教示lín學一切可惡ê事，就是in對tī in ê上帝所行ê，致到lín得罪耶和華lín ê上帝。 19 你若久久圍困一个城，攻擊beh取伊，就m̄-thang用斧頭phah-pháiⁿ樹木；因為你thang食伊ê果子，所以m̄-thang剉伊；田野ê樹木kiám是人，hō͘你圍困mah？ 20 獨獨你所bat m̄是thang做食物ê樹，thang剉來毀壞伊，用伊來做攻城ê器具，攻擊hitê kap你交戰ê城，到攻破伊。
1 Lí chhut-khì kap tùi-te̍k kau-chiàn ê sî, khòaⁿ-kìⁿ bé, chhia, í-ki̍p peh-sìⁿ pí lí khah-chōe-ê, m̄-bián kiaⁿ in; in-ūi chhōa lí chhut Ai-ki̍p tōe ê Iâ-hô-hoa lí ê Siōng-tè kap lí tī-teh. 2 Lín teh-beh lîm-tīn kau-chiàn ê sî, chè-si tio̍h kàu peh-sìⁿ ê bīn-chêng soan-pò͘; 3 tùi in kóng, Í-sek-lia̍t lâng ah, lín tio̍h thiaⁿ; lín kin-á-ji̍t beh kap peh-sìⁿ tùi-te̍k kau-chiàn, m̄-thang sit-táⁿ, m̄-thang kiaⁿ, lâi ngia̍uh-ngia̍uh-chhoah, iā m̄-thang in-ūi in lâi lún-neh; 4 in-ūi Iâ-hô-hoa lín ê Siōng-tè chiū-sī kap lín saⁿ-kap khì ê, beh thòe lín kap tùi-te̍k kau-chiàn lâi chín-kiù lín. 5 Hiah ê koaⁿ-tiúⁿ iā tio̍h tùi peh-sìⁿ soan-pò͘, kóng, Chī-chūi khí sin-chhù iáu-bē kiâⁿ lo̍k-sêng ê lé ah? i tio̍h tò-khì in tau, kiaⁿ-liáu i tīn-bông, pa̍t-lâng kiâⁿ lo̍k-sêng ê lé. 6 Chī-chūi chèng phû-tô-hn̂g, iáu-bē ū ēng-tio̍h i ê ké-chí ah? i iā thang tò-khì in tau, kiaⁿ-liáu i tīn-bông, pa̍t-lâng khì ēng i. 7 Chī-chūi phèng-tiāⁿ bó͘, iáu-bē chhōa i ah? i iā thang tò-khì in tau, kiaⁿ-liáu i tīn-bông, pa̍t-lâng chhōa i. 8 Hiah ê koaⁿ-tiúⁿ koh tio̍h tùi peh-sìⁿ soan-pò͘, kóng, Chī-chūi kiaⁿ-hiâⁿ sit-táⁿ ah? i thang tò-khì in tau, kiaⁿ-liáu i ê hiaⁿ-tī ê sim siau-iûⁿ, chhin-chhiūⁿ i ê sim chi̍t-iūⁿ. 9 Hiah ê koaⁿ-tiúⁿ tùi peh-sìⁿ soan-pò͘ bêng-pe̍k, tio̍h siat-li̍p hiah ê kun-tiúⁿ chòe-thâu lâi chhōa peh-sìⁿ. 10 Lí óa-kūn chi̍t ê siâⁿ beh phah ê sî, tio̍h tāi-seng tùi i soan-pò͘ hô-pêng ê ōe. 11 I nā ēng hô-pêng ê ōe tap-hok lí, kā lí khui siâⁿ-mn̂g, hit tiong-kan só͘ ū ê peh-sìⁿ lóng beh chòe lí ê chhe-ēng, lâi ho̍k-sāi lí. 12 I nā m̄-khéng kap lí hô-hó, hoán-tńg beh kap lín kau-chiàn, lín chiū tio̍h ûi-khùn i. 13 Iâ-hô-hoa lí ê Siōng-tè ēng i kau-hù lí, lí chiū tio̍h ēng to it-chīn thâi-sí i hiah ê ta-po͘-teng; 14 to̍k-to̍k hū-lú, gín-ná, cheng-siⁿ, kap siâⁿ-lāi it-chhè só͘ chhiúⁿ ê mi̍h, lí thang chhiúⁿ i lâi chòe ka-kī ê lō͘-ēng; lí só͘ chhiúⁿ lí ê tùi-te̍k ê mi̍h, chiū-sī Iâ-hô-hoa lí Siōng-tè só͘ siúⁿ-sù lí ê, lí thang chia̍h-ēng. 15 Lī-khui lí hn̄g-hn̄g hiah ê siâⁿ, m̄-sī chiah ê lia̍t-kok ê siâⁿ, lí tio̍h án-ni khoán-thāi i. 16 To̍k-to̍k sio̍k chiah ê peh-sìⁿ ê siâⁿ, Iâ-hô-hoa lí Siōng-tè í-keng siúⁿ-sù lí chòe-gia̍p, kî-tiong kìⁿ-ū chhoán-khùi ê, lí m̄-thang hō͘ i oa̍h-teh; 17 tio̍h chiàu Iâ-hô-hoa lí Siōng-tè só͘ bēng-lēng lí ê, chiong Hek lâng, A-mô͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, it-chīn bia̍t i; 18 bián-tit in kà-sī lín o̍h it-chhè khó-ò͘ⁿ ê sū, chiū-sī in tùi tī in ê siōng-tè só͘ kiâⁿ ê, tì-kàu lín tek-chōe Iâ-hô-hoa lín ê Siōng-tè. 19 Lí nā kú-kú ûi-khùn chi̍t ê siâⁿ, kong-kek beh chhú i, chiū m̄-thang ēng pó͘-thâu phah-pháiⁿ chhiū-ba̍k; in-ūi lí thang chia̍h i ê ké-chí, só͘-í m̄-thang chhò i; chhân-iá ê chhiū-ba̍k kiám-sī lâng, hō͘ lí ûi-khùn mah? 20 To̍k-to̍k lí só͘ bat m̄-sī thang chòe chia̍h-mi̍h ê chhiū, thang chhò lâi húi-hoāi i, ēng i lâi chòe kong-siâⁿ ê khì-kū, kong-kek hit-ê kap lí kau-chiàn ê siâⁿ, kàu kong-phòa i.
1 Tī耶和華你上帝所賞賜你做業ê地，若tú-tio̍h受刣 ê人倒tī田野，m̄知是是誰 刣死ê； 2 你ê長老kap審判官tio̍h出來量伊，tùi受刣 ê人hit-tah，直到四圍hiahê城， 3 看toh落一个城離開受刣 ê人第一近；就hitê城ê長老tio̍h tùi牛群中取一隻bē-bat用伊來做工，bē-bat掛擔ê牛種á； 4 Hit-ê城ê長老tio̍h牽牛種á到有長流水ê山谷，無種無作ê，tī hitê山谷kòng折牛種á ê頷頸。 5 祭司利未人ê kiáⁿ孫tio̍h近óa，因為耶和華你ê上帝揀in來服事伊，託耶和華ê名祝福；所有相告、相phah ê事，lóng tio̍h照in ê話來擬斷。 6 Hit-ê城ê眾長老，就是離開受刣 ê人第一近ê，tio̍h tī hitê山谷中，所kòng折頷頸ê牛種á ê頂面來洗手； 7 也beh應來講：阮ê手bē-bat流chitê血，阮ê目睭也bē-bat看見。 8 耶和華ah，求你赦免你ê百姓以色列，你所贖回ê，莫得hō͘無罪ê血歸tī你ê百姓以色列。 9 Án-ni流hitê血ê罪kap伊無干涉；án-ni就tùi lín中間除去流無罪ê血ê罪；是你有行耶和華看做好ê。 10 你出去kap你ê對敵交戰ê時，耶和華你ê上帝將in交tī你ê手，你也掠in去； 11 Hit時tī受掠ê人ê中間，若看見有美女，你也戀慕伊，beh娶伊做bó͘； 12 就thang娶到你ê家，伊就tio̍h剃頭毛，修指甲； 13 thǹg去伊受掠ê時所穿ê衫，tiàm tī你ê家哀哭父母一月日；然後你thang kap伊同房，你做伊ê丈夫，伊做你ê bó͘。 14 後來你若無歡喜伊，就tio̍h hō͘伊chhut-chāi伊ê意思出去，決斷m̄-thang賣錢，也m̄-thang當做女婢款待伊；因為你已經kap伊成親。 15 人若有兩個bó͘，一个是伊所疼ê，一个是伊所怨ê，lóng有kā伊生kiáⁿ，總是大kiáⁿ是所怨ê bó͘生ê； 16 到hō͘ kiáⁿ承接業ê日，m̄-thang立受疼ê bó͘生ê kiáⁿ做大kiáⁿ，pôaⁿ過真ê大kiáⁿ，就是受怨ê bó͘ ê kiáⁿ； 17 總是tio̍h認所怨ê bó͘ ê kiáⁿ做大kiáⁿ，將所有ê業hō͘伊雙份；因為伊是伊氣力ê起頭，大kiáⁿ ê名份是伊ê。 18 人若有頑皮忤逆ê kiáⁿ，m̄聽in老父ê話，á是老母ê話，in雖然警戒伊，伊猶原m̄聽in； 19 伊ê父kap伊ê母tio̍h掠伊，拖伊出，帶到本城ê長老hia，就是伊本所在ê城門； 20 kā hitê城ê長老講：阮chitê kiáⁿ頑皮忤逆，m̄聽阮ê話，lām-sám 開錢、貪食、好酒； 21 Hit-ê城ê眾人就tio̍h用石頭tìm hō͘伊死；án-ni，就tùi lín中間除去hitê pháiⁿ；以色列眾人lóng beh聽見來驚。 22 人若犯應該死ê罪，受辦罪死，你若吊伊tī柴裡， 23 伊ê身屍m̄-thang吊tī柴裡過暝，的確tio̍h tī hit日埋葬伊，免得phah lâ-sâm耶和華你上帝賞賜你做業ê地；因為受吊死ê人是受上帝所咒詛ê。
1 Tī Iâ-hô-hoa lí Siōng-tè só͘ siúⁿ-sù lí chòe-gia̍p ê tōe, nā tú-tio̍h siū-thâi ê lâng tó tī chhân-iá, m̄-chai sī chī-chūi thâi-sí ê; 2 lí ê tiúⁿ-ló kap sím-phòaⁿ-koaⁿ tio̍h chhut-lâi niû i, tùi siū-thâi ê lâng hit-tah, ti̍t-kàu sì-ûi hiah ê siâⁿ, 3 khòaⁿ toh-lo̍h chi̍t ê siâⁿ lī-khui siū-thâi ê lâng tē-it kūn; chiū hit ê siâⁿ ê tiúⁿ-ló tio̍h tùi gû-kûn tiong chhú chi̍t-chiah bē-bat ēng i lâi chòe-kang, bē-bat kòa-taⁿ ê gû-chéng-á; 4 hit ê siâⁿ ê tiúⁿ-ló tio̍h khan gû-chéng-á kàu ū tn̂g-lâu-chúi ê soaⁿ-kok, bô chèng bô choh-ê, tī hit ê soaⁿ-kok kòng-chi̍h gû-chéng-á ê ām-kún. 5 Chè-si Lī-bī lâng ê kiáⁿ-sun tio̍h kūn-óa, in-ūi Iâ-hô-hoa lí ê Siōng-tè kéng in lâi ho̍k-sāi I, thok Iâ-hô-hoa ê miâ chiok-hok; só͘ ū saⁿ-kò, saⁿ-phah ê sū, lóng tio̍h chiàu in ê ōe lâi gí-toàn. 6 Hit ê siâⁿ ê chèng tiúⁿ-ló, chiū-sī lī-khui siū-thâi ê lâng tē-it kūn-ê, tio̍h tī hit ê soaⁿ-kok tiong, só͘ kòng-chi̍h ām-kún ê gû-chéng-á ê téng-bīn lâi sóe chhiú; 7 iā beh ìn lâi kóng, Goán ê chhiú bē-bat lâu chit ê huih, goán ê ba̍k-chiu iā bē-bat khòaⁿ-kìⁿ. 8 Iâ-hô-hoa ah, kiû Lí sià-bián Lí ê peh-sìⁿ Í-sek-lia̍t, Lí só͘ sio̍k-hôe ê, bo̍h-tit hō͘ bô-chōe ê huih kui tī Lí ê peh-sìⁿ Í-sek-lia̍t. 9 Án-ni lâu hit ê huih ê chōe kap i bô kan-sia̍p; án-ni chiū tùi lín tiong-kan tû-khì lâu bô-chōe ê huih ê chōe; sī lí ū kiâⁿ Iâ-hô-hoa khòaⁿ-chòe hó-ê. 10 Lí chhut-khì kap lí ê tùi-te̍k kau-chiàn ê sî, Iâ-hô-hoa lí ê Siōng-tè chiong in kau tī lí ê chhiú, lí iā lia̍h in khì; 11 hit-sî tī siū-lia̍h ê lâng ê tiong-kan, nā khòaⁿ-kìⁿ ū bí-lú, lí iā loân-bō͘ i, beh chhōa i chòe-bó͘; 12 chiū thang chhōa kàu lí ê ke, i chiū tio̍h thì thâu-mn̂g, siu chńg-kah; 13 thǹg-khì i siū-lia̍h ê sî só͘ chhēng ê saⁿ, tiàm tī lí ê ke ai-khàu pē-bú chi̍t-ge̍h-ji̍t; jiân-āu lí thang kap i tâng-pâng, lí chòe i ê tiōng-hu, i chòe lí ê bó͘. 14 Āu-lâi lí nā bô hoaⁿ-hí i, chiū tio̍h hō͘ i chhut-chāi i ê ì-sù chhut-khì, koat-toàn m̄-thang bōe-chîⁿ, iā m̄-thang tàng-chòe lú-pī khoán-thāi i; in-ūi lí í-keng kap i sêng-chhin. 15 Lâng nā ū nn̄g ê bó͘, chi̍t-ê sī i só͘ thiàⁿ-ê, chi̍t-ê sī i só͘ oàn-ê, lóng ū kā i siⁿ-kiáⁿ, chóng-sī tōa-kiáⁿ sī só͘ oàn ê bó͘ siⁿ-ê; 16 kàu hō͘ kiáⁿ sêng-chiap gia̍p ê ji̍t, m̄-thang li̍p siū-thiàⁿ ê bó͘ siⁿ ê kiáⁿ chòe tōa-kiáⁿ, pôaⁿ-kè chin ê tōa-kiáⁿ, chiū-sī siū-oàn ê bó͘ ê kiáⁿ; 17 chóng-sī tio̍h jīn só͘ oàn ê bó͘ ê kiáⁿ chòe tōa-kiáⁿ, chiong só͘ ū ê gia̍p hō͘ i siang-hūn; in-ūi i sī i khùi-la̍t ê khí-thâu, tōa-kiáⁿ ê bêng-hūn sī i-ê. 18 Lâng nā ū bân-phê ngó͘-ge̍k ê kiáⁿ, m̄-thiaⁿ in lāu-pē ê ōe, á-sī lāu-bú ê ōe, in sui-jiân kéng-kài i, i iû-goân m̄-thiaⁿ in; 19 i ê pē kap i ê bú tio̍h lia̍h i, thoa i chhut, tòa-kàu pún-siâⁿ ê tiúⁿ-ló hia, chiū-sī i pún só͘-chāi ê siâⁿ-mn̂g; 20 kā hit ê siâⁿ ê tiúⁿ-ló kóng, Goán chit ê kiáⁿ bân-phê ngó͘-ge̍k, m̄-thiaⁿ goán ê ōe, lām-sám khai-chîⁿ, tham-chia̍h, hò͘ⁿ-chiú; 21 hit ê siâⁿ ê chèng-lâng chiū tio̍h ēng chio̍h-thâu tìm hō͘ i sí; án-ni, chiū tùi lín tiong-kan tû-khì hit ê pháiⁿ; Í-sek-lia̍t chèng-lâng lóng beh thiaⁿ-kìⁿ lâi kiaⁿ. 22 Lâng nā hoān eng-kai sí ê chōe, siū pān-chōe sí, lí nā tiàu i tī chhâ-ni̍h, 23 i ê sin-si m̄-thang tiàu tī chhâ-ni̍h kè-mî, tek-khak tio̍h tī hit-ji̍t bâi-chòng i, bián-tit phah lâ-sâm Iâ-hô-hoa lí Siōng-tè siúⁿ-sù lí chòe-gia̍p ê tōe; in-ūi siū tiàu-sí ê lâng sī siū Siōng-tè só͘ chiù-chó͘ ê.
1 你若看見你ê兄弟ê牛，á是羊，行迷路，你m̄-thang tìⁿ無看見，你的確tio̍h hō͘伊倒tńg來你ê兄弟hia。 2 你ê兄弟若離開你遠，á是你m̄-bat伊，就tio̍h牽到你ê厝，留tī你hia，thèng候你ê兄弟來chhē，你chiah還伊。 3 你ê兄弟ê驢，á是伊ê衫，無論伊失落甚麼，伊失落，你所拾tio̍h ê，lóng tio̍h án-ni行，m̄-thang tìⁿ做無看見。 4 你若看見你ê兄弟ê驢，á是牛，跋倒tī路裡，m̄-thang tìⁿ做無看見，的確tio̍h幫贊伊，扶伊起來。 5 婦人人m̄-thang穿ta-po͘人所穿ê，ta-po͘人也m̄-thang穿婦人人ê衫；因為見若án-ni行ê，是耶和華你上帝所厭惡ê。 6 你若tī路裡tú-tio̍h鳥siū，或是tī樹裡，或是tī地裡，內面有鳥á-kiáⁿ，á是鳥卵，鳥母àⁿ鳥kiáⁿ，á是孵卵，你m̄-thang掠鳥kiáⁿ續掠鳥母； 7 的確tio̍h放鳥母去，總是鳥á-kiáⁿ你thang掠去；án-ni你就thang享受福氣koh食長歲壽。 8 你若起新厝，tio̍h做欗杆tī厝頂，免得人tùi hia跋落來；流血ê罪就歸tī你ê厝。 9 M̄-thang用兩樣ê種子掖tī你ê葡萄園；驚了做一下無去，就是你所掖ê種子結實ê，kap你ê葡萄園結實ê，lóng無thang su-khia用。 10 M̄-thang用牛kap驢相kap犁田。 11 M̄-thang穿chham-chhap ê布料、羊毛kap幼苧合織ê。 12 你所moa ê衫tio̍h tī伊ê四圍做鬚。 13 人若娶bó͘，kap伊同房， 14 後來怨恨伊，譭謗伊pháiⁿ-tāi，phah-pháiⁿ伊ê名，講：我娶chitê cha-bó͘-kiáⁿ，kap伊同房，看伊無在室女ê憑據； 15 Cha-bó͘-kiáⁿ ê父母tio̍h the̍h cha-bó͘-kiáⁿ在室女ê憑據出來，帶到伊本城門ê長老hia； 16 Cha-bó͘-kiáⁿ ê老父tio̍h對長老講：我用我ê cha-bó͘-kiáⁿ hō͘ chitê人做bó͘，伊怨恨伊； 17 看ah，伊譭謗伊pháiⁿ-tāi，講：我看你ê cha-bó͘-kiáⁿ無在室女ê憑據；其實chitê是我ê cha-bó͘-kiáⁿ在室女ê憑據。父母就將hitê布排tī本城長老ê面前。 18 Hit-ê城ê長老tio̍h掠hitê人來責罰伊； 19 也tio̍h罰伊一百銀，hō͘ cha-bó͘-kiáⁿ ê老父；因為伊有加誣以色列在室女ê pháiⁿ名；cha-bó͘-kiáⁿ猶原做伊ê bó͘，一世人m̄-thang離出伊。 20 總是chitê事若是真ê，cha-bó͘-kiáⁿ無在室女ê憑據； 21 in tio̍h掠hitê cha-bó͘-kiáⁿ到伊ê老父ê厝ê門口，伊本城ê人tio̍h用石頭kā伊tìm死；因為伊tī以色列中行見笑ê事，tī伊ê老父ê家行淫亂；án-ni就tùi lín中間除去hitê pháiⁿ。 22 若tú-tio̍h有人kap嫁丈夫ê婦人人同房，姦夫kap hitê婦人人lóng tio̍h hō͘ in死；án-ni就tùi以色列ê中間除去hitê pháiⁿ。 23 若有cha-bó͘-kiáⁿ，是在室女ê，已經做人定tio̍h，有人tī城內tú-tio̍h伊，kap伊同房； 24 就lín tio̍h掠chit兩人出去到hitê城門，用石頭tìm死in；cha-bó͘-kiáⁿ，因為伊tī城內iáu-kú無哮救；ta-po͘人，因為伊凌辱伊ê厝邊ê bó͘；án-ni就tùi lín中間除去hitê pháiⁿ。 25 總是若有人tī田野tú-tio̍h已經聘定tio̍h ê cha-bó͘-kiáⁿ，hit人kā伊強姦；kan-ta hitê kā伊強姦ê人tio̍h死； 26 總是hitê cha-bó͘-kiáⁿ你m̄-thang怎樣辦伊；因為hitê cha-bó͘-kiáⁿ無應該死ê事；chitê tāi-chì是親像人起來攻擊伊ê厝邊，刣死伊一樣； 27 因為伊tī田野tú-tio̍h伊，hitê做人定tio̍h ê cha-bó͘-gín-ná哮救，也無人救伊。 28 若ta-po͘人tú-tio̍h 未配人ê在室女，擒伊kap伊私通，hō͘人看見， 29 就hitê kap伊私通ê人，tio̍h the̍h五十ê銀，hō͘ cha-bó͘-gín-ná ê老父，因為伊已經凌辱伊；就tio̍h娶伊做bó͘，一世人m̄-thang離伊。 30 人m̄-thang娶老父ê後bó͘做bó͘，m̄-thang掀開伊ê老父ê衫á裾。
1 Lí nā khòaⁿ-kìⁿ lí ê hiaⁿ-tī ê gû, á-sī iûⁿ, kiâⁿ bê-lō͘, lí m̄-thang tìⁿ bô khòaⁿ-kìⁿ, lí tek-khak tio̍h hō͘ i tò-tńg-lâi lí ê hiaⁿ-tī hia. 2 Lí ê hiaⁿ-tī nā lī-khui lí hn̄g, á-sī lí m̄-bat i, chiū tio̍h khan kàu lí ê chhù, lâu tī lí hia, thèng-hāu lí ê hiaⁿ-tī lâi chhē, lí chiah hêng i. 3 Lí ê hiaⁿ-tī ê lû, á-sī i ê saⁿ, bô-lūn i sit-lo̍h sím-mi̍h, i sit-lo̍h, lí só͘ khioh-tio̍h ê, lóng tio̍h án-ni kiâⁿ, m̄-thang tìⁿ-chòe bô khòaⁿ-kìⁿ. 4 Lí nā khòaⁿ-kìⁿ lí ê hiaⁿ-tī ê lû, á-sī gû, poa̍h-tó tī lō͘-ni̍h, m̄-thang tìⁿ-chòe bô khòaⁿ-kìⁿ, tek-khak tio̍h pang-chān i, hû i khí-lâi. 5 Hū-jîn-lâng m̄-thang chhēng ta-po͘-lâng só͘ chhēng ê, ta-po͘-lâng iā m̄-thang chhēng hū-jîn-lâng ê saⁿ; in-ūi kìⁿ-nā án-ni kiâⁿ ê, sī Iâ-hô-hoa lí Siōng-tè só͘ iàm-ò͘ⁿ ê. 6 Lí nā tī lō͘-ni̍h tú-tio̍h chiáu-siū, he̍k-sī tī chhiū-ni̍h, he̍k-sī tī tōe-ni̍h, lāi-bīn ū chiáu-á-kiáⁿ, á-sī chiáu-nn̄g, chiáu-bú àⁿ chiáu-kiáⁿ, á-sī pū-nn̄g, lí m̄-thang lia̍h chiáu-kiáⁿ sòa lia̍h chiáu-bú; 7 tek-khak tio̍h pàng chiáu-bú khì, chóng-sī chiáu-á-kiáⁿ lí thang lia̍h-khì; án-ni lí chiū thang hióng-siū hok-khì koh chia̍h tn̂g hè-siū. 8 Lí nā khí sin chhù, tio̍h chòe lân-kan tī chhù-téng, bián-tit lâng tùi hia poa̍h-lo̍h-lâi; lâu-huih ê chōe chiū kui tī lí ê chhù. 9 M̄-thang ēng nn̄g-iūⁿ ê chéng-chí iā tī lí ê phû-tô-hn̂g; kiaⁿ-liáu chòe chi̍t-ē bô-khì, chiū-sī lí só͘ iā ê chéng-chí kiat-si̍t-ê, kap lí ê phû-tô-hn̂g kiat-si̍t-ê, lóng bô thang su-khia ēng. 10 M̄-thang ēng gû kap lû saⁿ-kap lôe-chhân. 11 M̄-thang chhēng chham-chhap ê pò͘-liāu, iûⁿ-mn̂g kap iù-tōe ha̍p-chit-ê. 12 Lí só͘ moa ê saⁿ tio̍h tī i ê sì-ûi chòe chhiu. 13 Lâng nā chhōa-bó͘, kap i tâng-pâng, 14 āu-lâi oàn-hūn i, húi-pòng i pháiⁿ-tāi, phah-pháiⁿ i ê miâ, kóng, Góa chhōa chit ê cha-bó͘-kiáⁿ, kap i tâng-pâng, khòaⁿ i bô chāi-sek-lú ê pîn-kù; 15 cha-bó͘-kiáⁿ ê pē-bú tio̍h the̍h cha-bó͘-kiáⁿ chāi-sek-lú ê pîn-kù chhut-lâi, tòa kàu i pún siâⁿ-mn̂g ê tiúⁿ-ló hia; 16 cha-bó͘-kiáⁿ ê lāu-pē tio̍h tùi tiúⁿ-ló kóng, Góa ēng góa ê cha-bó͘-kiáⁿ hō͘ chit ê lâng chòe-bó͘, i oàn-hūn i; 17 khòaⁿ ah, i húi-pòng i pháiⁿ-tāi, kóng, Góa khòaⁿ lí ê cha-bó͘-kiáⁿ bô chāi-sek-lú ê pîn-kù; kî-si̍t chit-ê sī góa ê cha-bó͘-kiáⁿ chāi-sek-lú ê pîn-kù. Pē-bú chiū chiong hit-ê pò͘ pâi tī pún-siâⁿ tiúⁿ-ló ê bīn-chêng. 18 Hit ê siâⁿ ê tiúⁿ-ló tio̍h lia̍h hit ê lâng lâi chek-hoa̍t i; 19 iā tio̍h hoa̍t i chi̍t-pah gûn, hō͘ cha-bó͘-kiáⁿ ê lāu-pē; in-ūi i ū ka-bû Í-sek-lia̍t chāi-sek-lú ê pháiⁿ-miâ; cha-bó͘-kiáⁿ iû-goân chòe i ê bó͘, chi̍t-sì-lâng m̄-thang lî-chhut i. 20 Chóng-sī chit ê sū nā sī chin-ê, cha-bó͘-kiáⁿ bô chāi-sek-lú ê pîn-kù; 21 in tio̍h lia̍h hit ê cha-bó͘-kiáⁿ kàu i ê lāu-pē ê chhù ê mn̂g-kháu, i pún-siâⁿ ê lâng tio̍h ēng chio̍h-thâu kā i tìm-sí; in-ūi i tī Í-sek-lia̍t tiong kiâⁿ kiàn-siàu ê sū, tī i ê lāu-pē ê ke kiâⁿ îm-loān; án-ni chiū tùi lín tiong-kan tû-khì hit ê pháiⁿ. 22 Nā tú-tio̍h ū lâng kap kè tiōng-hu ê hū-jîn-lâng tâng-pâng, kan-hu kap hit ê hū-jîn-lâng lóng tio̍h hō͘ in sí; án-ni chiū tùi Í-sek-lia̍t ê tiong-kan tû-khì hit ê pháiⁿ. 23 Nā ū cha-bó͘-kiáⁿ, sī chāi-sek-lú ê, í-keng chòe lâng tiāⁿ-tio̍h, ū lâng tī siâⁿ-lāi tú-tio̍h i, kap i tâng-pâng; 24 chiū lín tio̍h lia̍h chit nn̄g-lâng chhut-khì kàu hit ê siâⁿ-mn̂g, ēng chio̍h-thâu tìm-sí in; cha-bó͘-kiáⁿ, in-ūi i tī siâⁿ-lāi iáu-kú bô háu-kiù; ta-po͘-lâng, in-ūi i lêng-jio̍k i ê chhù-piⁿ ê bó͘; án-ni chiū tùi lín tiong-kan tû-khì hit ê pháiⁿ. 25 Chóng-sī nā ū lâng tī chhân-iá tú-tio̍h í-keng phèng tiāⁿ-tio̍h ê cha-bó͘-kiáⁿ, hit-lâng kā i kiông-kan; kan-ta hit-ê kā i kiông-kan ê lâng tio̍h sí; 26 chóng-sī hit ê cha-bó͘-kiáⁿ lí m̄-thang cháiⁿ-iūⁿ pān i; in-ūi hit ê cha-bó͘-kiáⁿ bô eng-kai sí ê sū; chit ê tāi-chì sī chhin-chhiūⁿ lâng khí-lâi kong-kek i ê chhù-piⁿ, thâi-sí i chi̍t-iūⁿ; 27 in-ūi i tī chhân-iá tú-tio̍h i, hit-ê chòe-lâng tiāⁿ-tio̍h ê cha-bó͘-gín-ná háu-kiù, iā bô lâng kiù i. 28 Nā ta-po͘-lâng tú-tio̍h bē phòe lâng ê chāi-sek-lú, khîⁿ i kap i su-thong, hō͘ lâng khòaⁿ-kìⁿ, 29 chiū hit-ê kap i su-thong ê lâng, tio̍h the̍h gō͘-cha̍p ê gûn, hō͘ cha-bó͘-gín-ná ê lāu-pē, in-ūi i í-keng lêng-jio̍k i; chiū tio̍h chhōa i chòe bó͘, chi̍t-sì-lâng m̄-thang lî i. 30 Lâng m̄-thang chhōa lāu-pē ê āu-bó͘ chòe-bó͘, m̄-thang hian-khui i ê lāu-pē ê saⁿ-á-ku.
1 見若外腎受傷ê，á是受閹割ê，m̄-thang入耶和華ê會。 2 私通來生ê kiáⁿ m̄-thang入耶和華ê會；雖然到伊ê十代，也m̄-thang入耶和華ê會。 3 A-bûn人á是Mô͘-ap人，m̄-thang入耶和華ê會；雖然到in ê十代，永遠bōe-thang入耶和華ê會； 4 因為lín出埃及ê時，in無用食物kap水，tī路裡迎接lín；koh因為in對敵lín，倩Bí-só͘-pho-tāi-bí ê Pì-toa̍t人，Pí-jíⁿ ê kiáⁿ，Pa-lân來咒詛lín。 5 總是耶和華你ê上帝m̄聽Pa-lân；耶和華你ê上帝hō͘ hitê咒詛變做祝福你；因為耶和華你ê上帝疼你。 6 你一世人到永遠m̄-thang kā in圖謀平安kap福氣。 7 M̄-thang怨恨Í-tong人，因為伊是你ê兄弟；m̄-thang怨恨埃及人，因為lín bat出外tī-hia； 8 in所生ê kiáⁿ孫到第三代thang入耶和華ê會。 9 你ê軍隊出去攻擊你ê對敵，tī營盤tio̍h家己禁戒一切ê pháiⁿ事。 10 Lín中間若有人，tī暝時所tú-tio̍h-ê，來bak無清氣，伊就tio̍h出去到營外，m̄-thang入營內； 11 到beh暗ê時，伊tio̍h用水洗，到日落chiah thang入營。 12 你tī營外揀一位thang出去到外面ê所在； 13 tī你ê器具內tio̍h有托á；你tī外面出恭(*放屎)ê時，tio̍h用伊掘土，chiah oa̍t-tńg身，蓋你所放ê； 14 因為耶和華你ê上帝四界行tī你ê營內，beh拯救你，將你ê對敵交hō͘你；所以你ê營盤應該tio̍h有聖潔；免得伊看見你中間有污穢，就離開你。 15 若有奴僕脫離伊ê主人，走到你hia，你m̄-thang將伊交hō͘伊ê主人； 16 伊beh kap你tiàm，khiā你中間，tī伊所揀你一个城門內ê所在，就是伊所歡喜ê；你m̄-thang欺負伊。 17 以色列ê女子中m̄-thang有妓女。 以色列ê男子中m̄-thang有攣童。 18 娼妓所得tio̍h ê錢，á是狗類ê工錢，你m̄-thang 帶入耶和華你上帝ê殿來謝願；因為chit兩項lóng是耶和華你上帝所厭惡ê。 19 你ê兄弟或是對你借錢銀，á是借食物，借見若能生利息ê物，你lóng m̄-thang the̍h伊ê利息； 20 你借外族ê人，thang the̍h伊ê利息，總是借你ê兄弟就m̄-thang the̍h伊ê利息；thang hō͘耶和華你上帝tī你所去beh得tio̍h做業ê地，tī你ê手所做一切ê事，賜福你。 21 你對耶和華你ê上帝下願，謝伊m̄-thang 延chhiân；因為耶和華你ê上帝的確beh對你討；你若無謝，就有罪； 22 你若無下願，就無罪。 23 見若對你ê嘴所出ê，照你已經下願tī耶和華你上帝來甘心獻ê，就是你ê嘴所允，你tio̍h執守來行伊。 24 你入你ê厝邊ê葡萄園，thang chhut-chāi意思食葡萄到飽；總是m̄-thang貯tī你ê器具內。 25 你入你ê厝邊iáu未割ê五穀中，thang用手摘伊ê穗；總是m̄-thang用鐮á割你ê厝邊ê五穀。
1 Kìⁿ-nā gōa-sīn siū-siong-ê, á-sī siū iam-koah-ê, m̄-thang ji̍p Iâ-hô-hoa ê hōe. 2 Su-thong lâi siⁿ ê kiáⁿ m̄-thang ji̍p Iâ-hô-hoa ê hōe; sui-jiân kàu i ê cha̍p-tāi, iā m̄-thang ji̍p Iâ-hô-hoa ê hōe. 3 A-bûn lâng á-sī Mô͘-ap lâng, m̄-thang ji̍p Iâ-hô-hoa ê hōe; sui-jiân kàu in ê cha̍p-tāi, éng-oán bōe thang ji̍p Iâ-hô-hoa ê hōe; 4 in-ūi lín chhut Ai-ki̍p ê sî, in bô ēng chia̍h-mi̍h kap chúi, tī lō͘-ni̍h ngiâ-chih lín; koh in-ūi in tùi-te̍k lín, chhiàⁿ Bí-só͘-pho-tāi-bí ê Pì-toa̍t lâng, Pí-jíⁿ ê kiáⁿ, Pa-lân lâi chiù-chó͘ lín. 5 Chóng-sī Iâ-hô-hoa lí ê Siōng-tè m̄-thiaⁿ Pa-lân; Iâ-hô-hoa lí ê Siōng-tè hō͘ hit ê chiù-chó͘ piàn-chòe chiok-hok lí; in-ūi Iâ-hô-hoa lí ê Siōng-tè thiàⁿ lí. 6 Lí chi̍t-sì-lâng kàu éng-oán m̄-thang kā in tô͘-bô͘ pêng-an kap hok-khì. 7 M̄-thang oàn-hūn Í-tong lâng, in-ūi i sī lí ê hiaⁿ-tī; m̄-thang oàn-hūn Ai-ki̍p lâng, in-ūi lín bat chhut-gōa tī-hia; 8 in só͘ siⁿ ê kiáⁿ-sun kàu tē-saⁿ tāi thang ji̍p Iâ-hô-hoa ê hōe. 9 Lí ê kun-tūi chhut-khì kong-kek lí ê tùi-te̍k, tī iâⁿ-pôaⁿ tio̍h ka-kī kìm-kài it-chhè ê pháiⁿ-sū. 10 Lín tiong-kan nā ū lâng, tī mî-sî só͘ tú-tio̍h-ê, lâi bak bô chheng-khì, i chiū tio̍h chhut-khì kàu iâⁿ-gōa, m̄-thang ji̍p iâⁿ-lāi; 11 kàu beh àm ê sî, i tio̍h ēng chúi sóe, kàu ji̍t-lo̍h chiah thang ji̍p iâⁿ. 12 Lí tī iâⁿ-gōa kéng chi̍t-ūi thang chhut-khì kàu gōa-bīn ê só͘-chāi; 13 tī lí ê khì-kū-lāi tio̍h ū thuh-á; lí tī gōa-bīn chhut-kiong ê sî, tio̍h ēng i ku̍t thô͘, chiah oa̍t-tńg-sin, khàm lí só͘ pàng ê; 14 in-ūi Iâ-hô-hoa lí ê Siōng-tè sì-kòe kiâⁿ tī lí ê iâⁿ-lāi, beh chín-kiù lí, chiong lí ê tùi-te̍k kau hō͘ lí; só͘-í lí ê iâⁿ-pôaⁿ eng-kai tio̍h ū sèng-kiat; bián-tit I khòaⁿ-kìⁿ lí tiong-kan ū ù-òe, chiū lī-khui lí. 15 Nā ū lô͘-po̍k thoat-lī i ê chú-lâng, cháu kàu lí hia, lí m̄-thang chiong i kau hō͘ i ê chú-lâng; 16 i beh kap lí tiàm, khiā lí tiong-kan, tī i só͘ kéng lí chi̍t ê siâⁿ-mn̂g-lāi ê só͘-chāi, chiū-sī i só͘ hoaⁿ-hí ê; lí m̄-thang khi-hū i. 17 Í-sek-lia̍t ê lú-chú-tiong m̄-thang ū kī-lú. Í-sek-lia̍t ê lâm-chú-tiong m̄-thang ū loân-tông. 18 Chhiong-ki só͘ tit-tio̍h ê chîⁿ, á-sī káu-lūi ê kang-chîⁿ, lí m̄-thang tòa ji̍p Iâ-hô-hoa lí Siōng-tè ê tiān lâi siā-goān; in-ūi chit nn̄g-hāng lóng sī Iâ-hô-hoa lí Siōng-tè só͘ iàm-ò͘ⁿ ê. 19 Lí ê hiaⁿ-tī he̍k-sī tùi lí chioh chîⁿ-gûn, á-sī chioh chia̍h-mi̍h, chioh kìⁿ-nā ōe siⁿ lī-sek ê mi̍h, lí lóng m̄-thang the̍h i ê lī-sek; 20 lí chioh gōa-cho̍k ê lâng, thang the̍h i ê lī-sek, chóng-sī chioh lí ê hiaⁿ-tī chiū m̄-thang the̍h i ê lī-sek; thang hō͘ Iâ-hô-hoa lí Siōng-tè tī lí só͘ khì beh tit-tio̍h chòe-gia̍p ê tōe, tī lí ê chhiú só͘ chòe it-chhè ê sū, sù-hok lí. 21 Lí tùi Iâ-hô-hoa lí ê Siōng-tè hē-goān, siā i m̄-thang iân-chhiân; in-ūi Iâ-hô-hoa lí ê Siōng-tè tek-khak beh tùi lí thó; lí nā bô siā, chiū ū chōe; 22 lí nā bô hē-goān, chiū bô chōe. 23 Kìⁿ-nā tùi lí ê chhùi só͘ chhut ê, chiàu lí í-keng hē-goān tī Iâ-hô-hoa lí Siōng-tè lâi kam-sim hiàn ê, chiū-sī lí ê chhùi só͘ ín, lí tio̍h chip-siú lâi kiâⁿ i. 24 Lí ji̍p lí ê chhù-piⁿ ê phû-tô-hn̂g, thang chhut-chāi ì-sù chia̍h phû-tô kàu pá; chóng-sī m̄-thang tóe tī lí ê khì-kū-lāi. 25 Lí ji̍p lí ê chhù-piⁿ iáu-bē koah ê ngó͘-kok tiong, thang ēng chhiú tiah i ê sūi; chóng-sī m̄-thang ēng liâm-á koah lí ê chhù-piⁿ ê gō͘-kak.
1 人若娶bó͘，然後看伊ê bó͘ m̄中意(tèng-ì)，因為伊知伊有無合宜ê事，就thang寫離書hō͘伊，交伊ê手，差伊離開伊ê家。 2 婦人人離開伊ê家了後，thang去嫁別人。 3 若是後ê丈夫怨恨伊，也寫離書交伊ê手，kah伊離開伊ê家，á是伊後ê丈夫娶伊做bó͘就死； 4 就hitê前ê丈夫已經kah伊去ê，bōe得thang tī伊phah lâ-sâm以後，koh娶伊做bó͘；因為這是耶和華所厭惡ê；m̄-thang hō͘耶和華你ê上帝所賞賜你做業ê地來犯罪。 5 新娶bó͘ ê人m̄-thang去交戰，也m̄-thang交帶伊辨理甚麼事；thang hō͘伊tī家內清閒一年，thang hō͘伊所娶ê bó͘歡喜。 6 M̄-thang用人ê石磨，á是石磨ê頂楯(téng-tún)，做準當；因為這是用人ê性命做準當。 7 若tú-tio̍h人拐以色列中一个兄弟，款待伊做奴才，á是賣伊，hitê拐棍就tio̍h hō͘伊死；án-ni，就tùi lín中間除去hitê pháiⁿ。 8 Thái-ko ê pháiⁿ症頭，你tio̍h真細膩；祭司利未人一切所教示lín-ê，tio̍h照án-ni來行；我所命令in-ê，lín tio̍h執守來行； 9 早出埃及ê時，耶和華你上帝tī路裡對Bí-lī-àm所行ê，你tio̍h記得。 10 你無論用甚麼借厝邊，m̄-thang入伊ê家the̍h準當， 11 你tio̍h khiā tī外面，thèng候kā你借ê人the̍h準當出來hō͘你； 12 Hit人若是sòng-hiong，你m̄-thang留伊ê準當過暝； 13 日落ê時，的確tio̍h用hitê準當還伊，hō͘伊用伊ê衫kah teh睏；伊就kā你祝福；這tī耶和華你上帝ê面前，beh算做你ê義。 14 困苦sòng-hiong ê倩工人，無論是你ê兄弟，á是出外人tiàm tī你ê地，tī你ê城門內ê，你m̄-thang欺負伊； 15 伊ê工錢你hit日tio̍h hō͘伊，m̄-thang thèng候到日落了；因為伊sòng-hiong，掛心tī hitê；驚了伊因為你來對耶和華喉叫，你就有罪。 16 M̄-thang因為kiáⁿ來hō͘老父死，也m̄-thang因為老父來hō͘ kiáⁿ死；ta̍k人tio̍h為tio̍h家己ê罪來死。 17 你審判，m̄-thang冤枉出外人kap無父 ê kiáⁿ，也m̄-thang the̍h寡婦ê衣裳做準當； 18 你tio̍h記得你tī埃及bat做奴才，耶和華你ê上帝救贖你tùi hia出；所以我命令你tio̍h án-ni行。 19 你tī田裡收割五穀，若bōe記得一束tī田裡，m̄-thang koh oat去the̍h，tio̍h留 hō͘出外人kap孤兒、寡婦，致到耶和華你ê上帝beh tī你ê手所做一切ê事，賜福你。 20 你phah你ê橄欖樹以後m̄-thang koh巡hiahê樹枝；tio̍h留hō͘出外人kap孤兒、寡婦。 21 你挽你ê葡萄，所chhun-ê m̄-thang koh挽，tio̍h留hō͘出外人，kap孤兒、寡婦； 22 你也tio̍h記得你tī埃及地bat做奴才；所以我命令你tio̍h án-ni行。
1 Lâng nā chhōa-bó͘, jiân-āu khòaⁿ i ê bó͘ m̄ tèng-ì, in-ūi i chai i ū bô ha̍p-gî ê sū, chiū thang siá lî-su hō͘ i, kau i ê chhiú, chhe i lī-khui i ê ke. 2 Hū-jîn-lâng lī-khui i ê ke liáu-āu, thang khì kè pa̍t-lâng. 3 Nā sī āu ê tiōng-hu oàn-hūn i, iā siá lî-su kau i ê chhiú, kah i lī-khui i ê ke, á-sī i āu ê tiōng-hu chhōa i chòe-bó͘ chiū sí; 4 chiū hit-ê chêng ê tiōng-hu í-keng kah i khì-ê, bōe-tit-thang tī i phah lâ-sâm í-āu, koh chhōa i chòe-bó͘; in-ūi che sī Iâ-hô-hoa só͘ iàm-ò͘ⁿ-ê; m̄-thang hō͘ Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe lâi hoān-chōe. 5 Sin chhōa-bó͘ ê lâng m̄-thang khì kau-chiàn, iā m̄-thang kau-tài i pān-lí sím-mi̍h sū; thang hō͘ i tī ke-lāi chheng-hân chi̍t-nî, thang hō͘ i só͘ chhōa ê bó͘ hoaⁿ-hí. 6 M̄-thang ēng lâng ê chio̍h-bō, á-sī chio̍h-bō ê téng-tún, chòe chún-tǹg; in-ūi che sī ēng lâng ê sìⁿ-miā chòe chún-tǹg. 7 Nā tú-tio̍h lâng koái Í-sek-lia̍t-tiong chi̍t-ê hiaⁿ-tī, khoán-thāi i chòe lô͘-châi, á-sī bōe i, hit ê koái-kùn chiū tio̍h hō͘ i sí; án-ni, chiū tùi lín tiong-kan tû-khì hit ê pháiⁿ. 8 Thái-ko ê pháiⁿ chèng-thâu, lí tio̍h chin sòe-jī; chè-si Lī-bī lâng it-chhè só͘ kà-sī lín-ê, tio̍h chiàu án-ni lâi kiâⁿ; góa só͘ bēng-lēng in ê, lín tio̍h chip-siú lâi kiâⁿ; 9 chá chhut Ai-ki̍p ê sî, Iâ-hô-hoa lí Siōng-tè tī lō͘-ni̍h tùi Bí-lī-àm só͘-kiâⁿ-ê, lí tio̍h kì-tit. 10 Lí bô-lūn ēng sím-mi̍h chioh chhù-piⁿ, m̄-thang ji̍p i ê ke the̍h chún-tǹg, 11 lí tio̍h khiā tī gōa-bīn, thèng-hāu kā lí chioh ê lâng the̍h chún-tǹg chhut-lâi hō͘ lí; 12 hit lâng nā sī sòng-hiong, lí m̄-thang lâu i ê chún-tǹg kè-mî; 13 ji̍t-lo̍h ê sî, tek-khak tio̍h ēng hit ê chún-tǹg hêng i, hō͘ i ēng i ê saⁿ kah teh khùn; i chiū kā lí chiok-hok; che tī Iâ-hô-hoa lí Siōng-tè ê bīn-chêng, beh sǹg-chòe lí ê gī. 14 Khùn-khó͘ sòng-hiong ê chhiàⁿ-kang lâng, bô-lūn sī lí ê hiaⁿ-tī, á-sī chhut-gōa lâng tiàm tī lí ê tōe, tī lí ê siâⁿ-mn̂g-lāi ê, lí m̄-thang khi-hū i; 15 i ê kang-chîⁿ lí hit-ji̍t tio̍h hō͘ i, m̄-thang thèng-hāu kàu ji̍t-lo̍h-liáu; in-ūi i sòng-hiong, kòa-sim tī hit-ê; kiaⁿ-liáu i in-ūi lí lâi tùi Iâ-hô-hoa âu-kiò, lí chiū ū chōe. 16 M̄-thang in-ūi kiáⁿ lâi hō͘ lāu-pē sí, iā m̄-thang in-ūi lāu-pē lâi hō͘ kiáⁿ sí; ta̍k-lâng tio̍h ūi-tio̍h ka-kī ê chōe lâi sí. 17 Lí sím-phòaⁿ, m̄-thang oan-óng chhut-gōa lâng kap bô-pē ê kiáⁿ, iā m̄-thang the̍h kóaⁿ-hū ê i-chiûⁿ chòe chún-tǹg; 18 lí tio̍h kì-tit lí tī Ai-ki̍p bat chòe lô͘-châi, Iâ-hô-hoa lí ê Siōng-tè kiù-sio̍k lí tùi hia chhut; só͘-í góa bēng-lēng lí tio̍h án-ni kiâⁿ. 19 Lí tī chhân-ni̍h siu-koah gō͘-kak, nā bōe-kì-tit chi̍t-sok tī chhân-ni̍h, m̄-thang koh oat-khì the̍h, tio̍h lâu hō͘ chhut-gōa lâng kap ko͘-jî kóaⁿ-hū, tì-kàu Iâ-hô-hoa lí ê Siōng-tè beh tī lí ê chhiú só͘ chòe it-chhè ê sū, sù-hok lí. 20 Lí phah lí ê kaⁿ-ná-chhiū í-āu m̄-thang koh sûn hiah ê chhiū-ki; tio̍h lâu hō͘ chhut-gōa lâng kap ko͘-jî kóaⁿ-hū. 21 Lí bán lí ê phû-tô, só͘-chhun-ê m̄-thang koh bán, tio̍h lâu hō͘ chhut-gōa lâng, kap ko͘-jî, kóaⁿ-hū; 22 lí iā tio̍h kì-tit lí tī Ai-ki̍p tōe bat chòe lô͘-châi; só͘-í góa bēng-lēng lí tio̍h án-ni kiâⁿ.
1 人若有冤家來對訊，官府判斷伊，就tio̍h定義人做義，定pháiⁿ人做pháiⁿ。 2 Pháiⁿ人若應該受phah，審判官tio̍h hō͘伊仆tī地裡，tī伊ê面前，照伊ê罪，照數額phah伊； 3 獨獨thang phah伊四十下，m̄-thang過數額；若過數額，phah伊khah-chōe下，就你ê兄弟hō͘你看輕。 4 牛teh-lún五穀，m̄-thang láng伊ê嘴。 5 兄弟相kap khiā起，其中若一个死無kiáⁿ，死人ê bó͘ m̄-thang嫁外人，伊丈夫ê小弟tio̍h入去伊hia，娶伊做bó͘，來盡小叔ê本份； 6 伊所生ê大kiáⁿ，tio̍h續接死ê兄ê名份，免得伊ê名tī以色列中消滅。 7 Hit人若m̄願意娶伊ê兄嫂，伊ê兄嫂就tio̍h到城門ê長老hia講：我ê丈夫ê小弟m̄肯tī以色列中kā伊ê兄傳一个名字，無beh kā我盡小叔ê本份。 8 伊城內ê長老就tio̍h叫伊來，kā伊講；伊若執意講：我無beh娶伊； 9 伊ê兄嫂就tio̍h tī長老ê面前就近伊，thǹg hit人腳裡ê鞋，phùi-nōa tī伊ê面，講：見若無beh為tio̍h兄建立伊ê家ê，tio̍h án-ni款待伊； 10 tī以色列中，伊ê名beh稱做thǹg鞋ê ê家。 11 若有兩人相phah，其中一人ê bó͘近óa來，beh救伊ê丈夫脫離phah伊ê人ê手，伸手擒tiâu hit人ê下體； 12 就tio̍h斬斷婦人人ê手，目睭m̄-thang可憐伊。 13 你ê袋á內m̄-thang有兩樣ê秤子(phêng-chí)，有粒大，有粒細； 14 厝內m̄-thang有兩樣ê升(chin)、斗，有ê大，有ê 細； 15 tio̍h用準準公平ê秤子，準準公平ê升、斗；thang hō͘你tī耶和華你上帝所賞賜ê地食長歲壽； 16 因為見若行chiahê tāi-chì，kap行不義ê，lóng是耶和華你上帝所厭惡ê。 17 你tio̍h記得lín出埃及ê時，A-má-le̍k人tī路裡所款待你ê； 18 伊tī路裡tú-tio̍h你，當你困苦厭倦ê時，有怎樣phah你後隊，就是tī你後面ê軟弱ê；伊也無驚畏上帝。 19 所以到耶和華你上帝救你脫離四圍lóng總ê對敵，tī耶和華你上帝賞賜你做業ê地，得tio̍h平安，hit時你tio̍h將A-má-le̍k ê名字，tùi天下擦消，m̄-thang bōe記得。
1 Lâng nā ū oan-ke lâi tùi-sìn, koaⁿ-hú phòaⁿ-toàn i, chiū tio̍h tēng gī-lâng chòe-gī, tēng pháiⁿ-lâng chòe-pháiⁿ. 2 Pháiⁿ-lâng nā eng-kai siū-phah, sím-phòaⁿ-koaⁿ tio̍h hō͘ i phak tī tōe-ni̍h, tī i ê bīn-chêng, chiàu i ê chōe, chiàu siàu-gia̍h phah i; 3 to̍k-to̍k thang phah i sì-cha̍p-ē, m̄-thang kè siàu-gia̍h; nā kè siàu-gia̍h, phah i khah-chōe-ē, chiū lí ê hiaⁿ-tī hō͘ lí khòaⁿ-khin. 4 Gû teh lún gō͘-kak, m̄-thang láng i ê chhùi. 5 Hiaⁿ-tī saⁿ-kap khiā-khí, kî-tiong nā chi̍t-ê sí bô kiáⁿ, sí-lâng ê bó͘ m̄-thang kè gōa-lâng, i tiōng-hu ê sió-tī tio̍h ji̍p-khì i hia, chhōa i chòe-bó͘, lâi chīn sió-chek ê pún-hūn; 6 i só͘ siⁿ ê tōa-kiáⁿ, tio̍h sòa-chiap sí ê hiaⁿ ê bêng-hūn, bián-tit i ê miâ tī Í-sek-lia̍t-tiong siau-bia̍t. 7 Hit-lâng nā m̄ goān-ì chhōa i ê hiaⁿ-só, i ê hiaⁿ-só chiū tio̍h kàu siâⁿ-mn̂g ê tiúⁿ-ló hia kóng, Góa ê tiōng-hu ê sió-tī m̄-khéng tī Í-sek-lia̍t-tiong kā i ê hiaⁿ thoân chi̍t ê miâ-jī, bô beh kā góa chīn sió-chek ê pún-hūn. 8 I siâⁿ-lāi ê tiúⁿ-ló chiū tio̍h kiò i lâi, kā i kóng; i nā chip-ì kóng, Góa bô beh chhōa i; 9 i ê hiaⁿ-só chiū tio̍h tī tiúⁿ-ló ê bīn-chêng chiū-kūn i, thǹg hit-lâng kha-ni̍h ê ôe, phùi-nōa tī i ê bīn, kóng, Kìⁿ-nā bô beh ūi-tio̍h hiaⁿ kiàn-li̍p i ê ke ê, tio̍h án-ni khoán-thāi i; 10 tī Í-sek-lia̍t-tiong, i ê miâ beh chheng chòe thǹg-ôe-ê ê ke. 11 Nā ū nn̄g-lâng saⁿ-phah, kî-tiong chi̍t-lâng ê bó͘ kūn-óa lâi, beh kiù i ê tiōng-hu thoat-lī phah i ê lâng ê chhiú, chhun-chhiú khîⁿ-tiâu hit-lâng ê ē-thé; 12 chiū tio̍h chām-tn̄g hū-jîn-lâng ê chhiú, ba̍k-chiu m̄-thang khó-lîn i. 13 Lí ê tē-á-lāi m̄-thang ū nn̄g-iūⁿ ê phêng-chí, ū-lia̍p tōa, ū-lia̍p sòe; 14 chhù-lāi m̄-thang ū nn̄g-iūⁿ ê chin, táu, ū-ê tōa, ū-ê sòe; 15 tio̍h ēng chún-chún kong-pêng ê phêng-chí, chún-chún kong-pêng ê chin, táu; thang hō͘ lí tī Iâ-hô-hoa lí Siōng-tè só͘ siúⁿ-sù ê tōe chia̍h tn̂g hè-siū; 16 in-ūi kìⁿ-nā kiâⁿ chiah ê tāi-chì, kap kiâⁿ put-gī ê, lóng sī Iâ-hô-hoa lí Siōng-tè só͘ iàm-ò͘ⁿ-ê. 17 Lí tio̍h kì-tit lín chhut Ai-ki̍p ê sî, A-má-le̍k lâng tī lō͘-ni̍h só͘ khoán-thāi lí ê; 18 i tī lō͘-ni̍h tú-tio̍h lí, tng lí khùn-khó͘ ià-siān ê sî, ū cháiⁿ-iūⁿ phah lí āu-tūi, chiū-sī tī lí āu-bīn ê loán-jio̍k ê; i iā bô kiaⁿ-ùi Siōng-tè. 19 Só͘-í kàu Iâ-hô-hoa lí Siōng-tè kiù lí thoat-lī sì-ûi lóng-chóng ê tùi-te̍k, tī Iâ-hô-hoa lí Siōng-tè siúⁿ-sù lí chòe-gia̍p ê tōe, tit-tio̍h pêng-an, hit-sî lí tio̍h chiong A-má-le̍k ê miâ-jī, tùi thiⁿ-ē chhat-siau, m̄-thang bōe-kì-tit.
1 你已經到耶和華你ê上帝所賞賜你做業ê地，承接來khiā起伊， 2 就tio̍h tùi耶和華你ê上帝賞賜你ê地，將所收ta̍k項起頭熟ê土產，the̍h淡薄，hē tī筐裡，去耶和華你上帝所beh揀安置伊ê名ê所在； 3 tio̍h去見當時做祭司ê，kā伊講，我今á日對耶和華你ê上帝講明，我已經到耶和華對咱ê列祖chiù-chōa賞賜咱ê地。 4 祭司就tùi你ê手接hit筐，來hē tī耶和華你上帝ê壇前。 5 你tio̍h tī耶和華你上帝ê面前講：我ê祖是一个teh-beh死ê A-lân人，落去埃及寄腳tī-hia，人額少少；tī-hia成做一國大koh強，人額koh chōe。 6 埃及人pháiⁿ款待阮，苦楚阮，用苦工kah阮做； 7 Tùi hit-tia̍p，阮哀求耶和華阮列祖ê上帝，耶和華聽阮ê聲，看見阮ê苦楚，阮ê tio̍h磨，阮ê壓迫； 8 耶和華就用大權能ê手，kap伸出ê手骨，kap大thang驚ê事，kap神蹟、奇事，chhōa阮出埃及， 9 koh chhōa阮到chit所在，用chitê地賞賜阮，就是流奶kap蜜ê地。 10 看ah，chitê地起頭熟ê，耶和華ah，你所賞賜我ê，我taⁿ已經帶來。後來你tio̍h將伊hē tī耶和華你上帝ê面前，tī耶和華你上帝ê面前敬拜伊。 11 你kap利未人，以及lín中間ê出外人，tio̍h因為耶和華你上帝所賞賜你kap你ê家眷一切ê福份來歡喜。 12 Ta̍k-pái到第三年，就是十份抽一份ê年，你抽一切ê土產十份ê一份，分hō͘利未人，kap出外人，kap孤兒、寡婦，hō͘ in tī你ê城門，thang得tio̍h食飽。 13 你koh tio̍h對耶和華你上帝ê面前講：我已經tùi我ê家the̍h出聖物，續hō͘利未人kap出外人，kap孤兒、寡婦，是照你所命令我一切ê誡命；你ê誡命我lóng無犯tio̍h，也無bōe記得； 14 居喪ê時，我bē-bat食伊，無清氣ê時，我bē-bat the̍h起來，也無用伊做死人ê路用；我聽thàn耶和華我上帝ê話，lóng照你一切所命令我ê來行。 15 求你tùi天裡，tùi你khiā起ê聖所，àⁿ落看，賜福你ê百姓以色列，kap你所賞賜阮ê地，照你所對阮ê列祖chiù-chōa ê，就是流奶kap蜜ê地。 16 今á日耶和華你ê上帝命令你行chiahê律例法度；所以你tio̍h盡心盡性執守來行伊； 17 今á日你承認耶和華做你ê上帝，允beh行伊ê道路，守伊ê律例、誡命，法度，聽thàn伊ê話。 18 耶和華今á日也承認你做伊家己特別ê百姓，照伊所應允你ê，hō͘你守伊一切ê誡命； 19 koh hō͘你對tī榮光、名聲、尊貴，pôaⁿ過伊所創造萬國ê百姓；hō͘你歸tī耶和華你ê上帝，做聖潔ê百姓，照伊所講ê。
1 Lí í-keng kàu Iâ-hô-hoa lí ê Siōng-tè só͘ siúⁿ-sù lí chòe-gia̍p ê tōe, sêng-chiap lâi khiā-khí i, 2 chiū tio̍h tùi Iâ-hô-hoa lí ê Siōng-tè siúⁿ-sù lí ê tōe, chiong só͘ siu ta̍k-hāng khí-thâu-se̍k ê thó͘-sán, the̍h tām-po̍h, hē tī kheng-ni̍h, khì Iâ-hô-hoa lí Siōng-tè só͘ beh kéng an-tì I ê miâ ê só͘-chāi; 3 tio̍h khì kìⁿ tng-sî chòe chè-si-ê, kā i kóng, Góa kin-á-ji̍t tùi Iâ-hô-hoa lí ê Siōng-tè kóng-bêng góa í-keng kàu Iâ-hô-hoa tùi lán ê lia̍t-chó͘ chiù-chōa siúⁿ-sù lán ê tōe. 4 Chè-si chiū tùi lí ê chhiú chih hit-kheng, lâi hē tī Iâ-hô-hoa lí Siōng-tè ê tôaⁿ-chêng. 5 Lí tio̍h tī Iâ-hô-hoa lí Siōng-tè ê bīn-chêng kóng, góa ê chó͘ sī chi̍t-ê teh-beh sí ê A-lân lâng, lo̍h-khì Ai-ki̍p kià-kha tī-hia, lâng-gia̍h chió-chió; tī-hia chiâⁿ-chòe chi̍t-kok tōa koh kiông, lâng-gia̍h koh chōe. 6 Ai-ki̍p lâng pháiⁿ khoán-thāi goán, khó͘-chhó͘ goán, ēng khó͘-kang kah goán chòe; 7 tùi hit-tia̍p goán ai-kiû Iâ-hô-hoa goán lia̍t-chó͘ ê Siōng-tè, Iâ-hô-hoa thiaⁿ goán ê siaⁿ, khòaⁿ-kìⁿ goán ê khó͘-chhó͘, goán ê tio̍h-bôa, goán ê ap-pek; 8 Iâ-hô-hoa chiū ēng tōa koân-lêng ê chhiú, kap chhun-chhut ê chhiú-kut, kap tōa thang kiaⁿ ê sū, kap sîn-jiah, kî-sū, chhōa goán chhut Ai-ki̍p, 9 koh chhōa goán kàu chit só͘-chāi, ēng chit ê tōe siúⁿ-sù goán, chiū-sī lâu lin kap bi̍t ê tōe. 10 Khòaⁿ ah, chit ê tōe khí-thâu-se̍k ê, Iâ-hô-hoa ah, Lí só͘ siúⁿ-sù góa ê, góa taⁿ í-keng tòa-lâi. Āu-lâi lí tio̍h chiong i hē tī Iâ-hô-hoa lí Siōng-tè ê bīn-chêng, tī Iâ-hô-hoa lí Siōng-tè ê bīn-chêng kèng-pài I. 11 Lí kap Lī-bī lâng, í-ki̍p lín tiong-kan ê chhut-gōa lâng, tio̍h in-ūi Iâ-hô-hoa lí Siōng-tè só͘ siúⁿ-sù lí kap lí ê ke-koàn it-chhè ê hok-hūn lâi hoaⁿ-hí. 12 Ta̍k-pái kàu tē-saⁿ nî, chiū-sī cha̍p-hūn thiu chi̍t-hūn ê nî, lí thiu it-chhè ê thó͘-sán cha̍p-hūn ê chi̍t-hūn, pun hō͘ Lī-bī lâng, kap chhut-gōa lâng, kap ko͘-jî kóaⁿ-hū, hō͘ in tī lí ê siâⁿ-mn̂g, thang tit-tio̍h chia̍h-pá. 13 Lí koh tio̍h tùi Iâ-hô-hoa lí Siōng-tè ê bīn-chêng kóng, Góa í-keng tùi góa ê ke the̍h-chhut sèng-mi̍h, sòa hō͘ Lī-bī lâng kap chhut-gōa lâng, kap ko͘-jî kóaⁿ-hū, sī chiàu lí só͘ bēng-lēng góa it-chhè ê kài-bēng; Lí ê kài-bēng góa lóng bô hoān-tio̍h, iā bô bōe-kì-tit; 14 ku-song ê sî, góa bē-bat chia̍h i, bô chheng-khì ê sî, góa bē-bat the̍h-khí-lâi, iā bô ēng i chòe sí-lâng ê lō͘-ēng; góa thiaⁿ-thàn Iâ-hô-hoa góa Siōng-tè ê ōe, lóng chiàu Lí it-chhè só͘ bēng-lēng góa ê lâi kiâⁿ. 15 Kiû Lí tùi thiⁿ-ni̍h, tùi Lí khiā-khí ê sèng-só͘, àⁿ-lo̍h khòaⁿ, sù-hok Lí ê peh-sìⁿ Í-sek-lia̍t, kap Lí só͘ siúⁿ-sù goán ê tōe, chiàu Lí só͘ tùi goán ê lia̍t-chó͘ chiù-chōa ê, chiū-sī lâu lin kap bi̍t ê tōe. 16 Kin-á-ji̍t Iâ-hô-hoa lí ê Siōng-tè bēng-lēng lí kiâⁿ chiah ê lu̍t-lē hoat-tō͘; só͘-í lí tio̍h chīn-sim chīn-sèng chip-siú lâi kiâⁿ i; 17 kin-á-ji̍t lí sêng-jīn Iâ-hô-hoa chòe lí ê Siōng-tè, ún beh kiâⁿ I ê tō-lō͘, siú I ê lu̍t-lē, kài-bēng, hoat-tō͘, thiaⁿ-thàn I ê ōe. 18 Iâ-hô-hoa kin-á-ji̍t iā sêng-jīn lí chòe I ka-kī te̍k-pia̍t ê peh-sìⁿ, chiàu I só͘ èng-ún lí ê, hō͘ lí siú I it-chhè ê kài-bēng; 19 koh hō͘ lí tùi tī êng-kng, miâ-siaⁿ, chun-kùi, pôaⁿ-kè I só͘ chhòng-chō bān-kok ê peh-sìⁿ; hō͘ lí kui tī Iâ-hô-hoa lí ê Siōng-tè, chòe sèng-kiat ê peh-sìⁿ, chiàu I só͘ kóng ê.
1 摩西kap以色列chiahê長老命令百姓講：Lín tio̍h守我今á日所命令lín一切ê誡命。 2 Lín過約旦，到耶和華你上帝所賞賜你ê地，hit日tio̍h khiā幾塊大石，用灰抹伊； 3 你已經過去，tio̍h寫chitê律法一切ê話tī hit頂面，thang hō͘你入去耶和華你ê上帝所賞賜你ê地，就是流奶kap蜜ê地，照耶和華你列祖ê上帝所應允你ê。 4 Lín已經過約旦，就tio̍h tī Í-pa-lō͘山khiā我今á日所命令lín hiahê石，用灰抹伊。 5 Tī-hia tio̍h為耶和華你ê上帝起一座壇，就是石ê壇，tī hit頂面m̄-thang動tio̍h鐵器； 6 tio̍h用無過phah ê石起耶和華你上帝ê壇； 7 tī hit頂面tio̍h獻燒祭hō͘耶和華你ê上帝；koh tio̍h獻謝恩祭；也tī-hia食，tī耶和華你上帝ê面前歡喜。 8 你tio̍h將chitê律法一切ê話，寫明tī hiahê石裡。 9 摩西kap祭司利未人，吩咐以色列眾人講：以色列ah，tio̍h靜靜來聽；今á日你成做耶和華你上帝ê百姓； 10 所以tio̍h聽thàn耶和華你上帝ê話，行伊ê誡命律例，就是我今á日所命令你ê。 11 當hit日，摩西命令百姓講： 12 Lín過約旦了後，西門、利未、偤大、以撒迦、約瑟、便雅憫，chiahê支派，tio̍h khiā tī Ki-lī-sim山來祝福百姓； 13 Liû-piān、Ka-tek、A-siat、Se-pò͘-lûn、Tàn、Ná-hut-tha-lī，chiahê支派，tio̍h khiā tī Í-pa-lō͘山來宣布咒詛。 14 利未人tio̍h大聲對以色列眾人講； 15 見若人製造偶像，刻ê，á是鑄ê，耶和華所厭惡ê，就是師傅ê手所做ê，chhāi tī暗靜ê所在，hit人tio̍h受咒詛。百姓lóng tio̍h應講，A-bēng。 16 看輕老父á是老母ê，tio̍h受咒詛。百姓lóng tio̍h講：A-bēng。 17 移徙厝邊ê界址ê，tio̍h受咒詛。百姓lóng tio̍h講：A-bēng。 18 Hō͘ chhiⁿ-mî人行m̄-tio̍h路ê，tio̍h受咒詛。百姓lóng tio̍h講：A-bēng。 19 審判來冤枉出外人kap孤兒、寡婦ê，tio̍h受咒詛。百姓lóng tio̍h講：A-bēng。 20 Kap老父ê後bó͘同房ê tio̍h受咒詛，因為伊有掀開伊ê老父ê衫á裾。百姓lóng tio̍h講：A-bēng。 21 無論kap甚麼獸交合-ê tio̍h受咒詛。百姓lóng tio̍h講：A-bēng。 22 人kap siâng父ê姊妹，á是siâng母 ê姊妹，同房，hit人tio̍h受咒詛。百姓lóng tio̍h講：A-bēng。 23 Kap丈姆同房ê tio̍h受咒詛。百姓lóng tio̍h講：A-bēng。 24 暗靜phah死厝邊ê tio̍h受咒詛。百姓lóng tio̍h講：A-bēng。 25 受pò͘賂來害死無罪ê人ê tio̍h受咒詛。百姓lóng tio̍h講：A-bēng。 26 無堅守chiahê律法ê話來行ê tio̍h受咒詛。百姓lóng tio̍h講：A-bēng。
1 Mô͘-se kap Í-sek-lia̍t chiah ê tiúⁿ-ló bēng-lēng peh-sìⁿ kóng, Lín tio̍h siú góa kin-á-ji̍t só͘ bēng-lēng lín it-chhè ê kài-bēng. 2 Lín kè Iok-tàn, kàu Iâ-hô-hoa lí Siōng-tè só͘ siúⁿ-sù lí ê tōe, hit-ji̍t tio̍h khiā kúi-tè tōa-chio̍h, ēng he boah i; 3 lí í-keng kè-khì, tio̍h siá chit ê lu̍t-hoat it-chhè ê ōe tī hit téng-bīn, thang hō͘ lí ji̍p-khì Iâ-hô-hoa lí ê Siōng-tè só͘ siúⁿ-sù lí ê tōe, chiū-sī lâu lin kap bi̍t ê tōe, chiàu Iâ-hô-hoa lí lia̍t-chó͘ ê Siōng-tè só͘ èng-ún lí ê. 4 Lín í-keng kè Iok-tàn, chiū tio̍h tī Í-pa-lō͘ soaⁿ khiā góa kin-á-ji̍t só͘ bēng-lēng lín hiah ê chio̍h, ēng he boah i. 5 Tī-hia tio̍h ūi Iâ-hô-hoa lí ê Siōng-tè khí chi̍t chō tôaⁿ, chiū-sī chio̍h ê tôaⁿ, tī hit téng-bīn m̄-thang tāng-tio̍h thih-khì; 6 tio̍h ēng bô kè-phah ê chio̍h khí Iâ-hô-hoa lí Siōng-tè ê tôaⁿ; 7 tī hit téng-bīn tio̍h hiàn sio-chè hō͘ Iâ-hô-hoa lí ê Siōng-tè; koh tio̍h hiàn siā-un-chè; iā tī-hia chia̍h, tī Iâ-hô-hoa lí Siōng-tè ê bīn-chêng hoaⁿ-hí. 8 Lí tio̍h chiong chit ê lu̍t-hoat it-chhè ê ōe, siá-bêng tī hiah ê chio̍h-ni̍h. 9 Mô͘-se kap chè-si Lī-bī lâng, hoan-hù Í-sek-lia̍t chèng-lâng kóng, Í-sek-lia̍t ah, tio̍h chēng-chēng lâi thiaⁿ; kin-á-ji̍t lí chiâⁿ-chòe Iâ-hô-hoa lí Siōng-tè ê peh-sìⁿ; 10 só͘-í tio̍h thiaⁿ-thàn Iâ-hô-hoa lí Siōng-tè ê ōe, kiâⁿ I ê kài-bēng lu̍t-lē, chiū-sī góa kin-á-ji̍t só͘ bēng-lēng lí ê. 11 Tng hit-ji̍t Mô͘-se bēng-lēng peh-sìⁿ kóng, 12 Lín kè Iok-tàn liáu-āu, Se-biān, Lī-bī, Iû-tāi, Í-sat-ka, Iok-sek, Piān-ngá-bín, chiah ê chi-phài, tio̍h khiā tī Ki-lī-sim soaⁿ lâi chiok-hok peh-sìⁿ; 13 Liû-piān, Ka-tek, A-siat, Se-pò͘-lûn, Tàn, Ná-hut-tha-lī, chiah ê chi-phài, tio̍h khiā tī Í-pa-lō͘ soaⁿ lâi soan-pò͘ chiù-chó͘. 14 Lī-bī lâng tio̍h tōa-siaⁿ tùi Í-sek-lia̍t chèng-lâng kóng; 15 Kìⁿ-nā lâng chè-chō ngó͘-siōng, khek-ê, á-sī chù-ê, Iâ-hô-hoa só͘ iàm-ò͘ⁿ-ê, chiū-sī sai-hū ê chhiú só͘ chòe ê, chhāi tī àm-chīⁿ ê só͘-chāi, hit-lâng tio̍h siū chiù-chó͘. Peh-sìⁿ lóng tio̍h ìn kóng, A-bēng. 16 Khòaⁿ-khin lāu-pē á-sī lāu-bú ê, tio̍h siū chiù-chó͘. Peh-sìⁿ lóng tio̍h kóng, A-bēng. 17 Î-sóa chhù-piⁿ ê kài-chí ê, tio̍h siū chiù-chó͘. Peh-sìⁿ lóng tio̍h kóng, A-bēng. 18 Hō͘ chhiⁿ-mî lâng kiâⁿ m̄-tio̍h lō͘ ê, tio̍h siū chiù-chó͘. Peh-sìⁿ lóng tio̍h kóng, A-bēng. 19 Sím-phòaⁿ lâi oan-óng chhut-gōa lâng kap ko͘-jî kóaⁿ-hū ê, tio̍h siū chiù-chó͘. Peh-sìⁿ lóng tio̍h kóng, A-bēng. 20 Kap lāu-pē ê āu-bó͘ tâng-pâng ê tio̍h siū chiù-chó͘, in-ūi i ū hian-khui i ê lāu-pē ê saⁿ-á-ku. Peh-sìⁿ lóng tio̍h kóng, A-bēng. 21 Bô-lūn kap sím-mi̍h siù kau-ha̍p-ê tio̍h siū chiù-chó͘. Peh-sìⁿ lóng tio̍h kóng, A-bēng. 22 Lâng kap siâng-pē ê chí-bē, á-sī siâng-bú ê chí-bē, tâng-pâng, hit-lâng tio̍h siū chiù-chó͘. Peh-sìⁿ lóng tio̍h kóng, A-bēng. 23 Kap tiūⁿ-ḿ tâng-pâng-ê tio̍h siū chiù-chó͘. Peh-sìⁿ lóng tio̍h kóng, A-bēng. 24 Àm-chīⁿ phah-sí chhù-piⁿ ê tio̍h siū chiù-chó͘. Peh-sìⁿ lóng tio̍h kóng, A-bēng. 25 Siū pò͘-lō͘ lâi hāi-sí bô-chōe ê lâng ê tio̍h siū chiù-chó͘. Peh-sìⁿ lóng tio̍h kóng, A-bēng. 26 Bô kian-siú chiah ê lu̍t-hoat ê ōe lâi kiâⁿ-ê tio̍h siū chiù-chó͘. Peh-sìⁿ lóng tio̍h kóng, A-bēng.
1 你若致意聽耶和華你ê上帝ê話，守伊一切ê誡命來行伊，就是我今á日所命令你ê，耶和華你ê上帝beh hō͘你pôaⁿ過天下萬國； 2 你若聽耶和華你上帝ê話，就chiahê所祝福ê beh jip你，beh到tī你； 3 你tī城內beh得tio̍h福氣，tī田裡beh得tio̍h福氣； 4 你ê身軀所生ê，你ê土地所出ê，你ê cheng-siⁿ所出ê，以及牛ê牛á-kiáⁿ，羊 ê羊á-kiáⁿ，lóng beh得tio̍h福氣。 5 你ê筐á kap你chhiau麵ê器具，lóng beh得tio̍h福氣。 6 你入來beh得tio̍h福氣；出去也beh得tio̍h福氣。 7 你ê對敵起來攻擊你ê，耶和華beh hō͘ in 刣輸tī你ê面前；in tùi一條路出來攻擊你，beh tī你ê面前tùi七條路來走。 8 耶和華beh命令福氣hō͘你，tī你ê粟倉，kap你ê手所做一切ê事；也beh賜福你tī耶和華你上帝所賞賜你ê地。 9 你若守耶和華你上帝ê誡命，行伊ê道路，耶和華beh設立你做伊家己聖ê百姓，照伊所對你chiù-chōa ê； 10 天下萬百姓看見你屬tī耶和華ê名下，就beh驚畏你。 11 你tī耶和華對你ê列祖chiù-chōa賞賜你ê地，耶和華beh hō͘你ê身軀所生ê，cheng-siⁿ所出ê，土地所出ê，充足有chhun。 12 耶和華beh kā你開伊天裡寶貝ê庫房，落及時ê雨 tī你ê地，tī你ê手所做一切ê事賜福你；你beh借hō͘ chōe-chōe國，也你m̄免借。 13 你若聽thàn耶和華你ê上帝ê誡命，就是我今á日所命令你ê，執守來行伊，無偏左，無偏右，來歪chhoa̍h我今á日所命令你chiahê話，去thàn別ê上帝來服事伊，耶和華就beh hō͘你做頭，無最尾；你beh tiàm tī頂面，無tiàm tī下面。 14 (合併tī頂一節) 15 你若無聽thàn耶和華你上帝ê話，無執守來行伊一切ê誡命、律例，就是我今á日所命令你ê，chiahê咒詛就beh jip-tio̍h你，beh到tī你。 16 Tī城內你beh受咒詛；tī田裡你也beh受咒詛。 17 你ê筐á kap你chhiau麵ê器具，lóng beh受咒詛。 18 你ê身軀所生ê，你ê地所出ê，以及牛ê牛á-kiáⁿ，羊 ê羊á-kiáⁿ，lóng beh受咒詛。 19 你入來beh受咒詛；出去也beh受咒詛。 20 因為你所行ê pháiⁿ來棄sak我，耶和華beh tī你ê手所做一切ê事，hō͘咒詛、擾亂、責罰，到tī你，直到你受毀滅，緊緊滅無。 21 耶和華beh hō͘瘟疫纏你，到伊滅無你tī你所入去承接ê地。 22 耶和華beh用消瘦、熱病、發炎、毒熱、刀劍、枯焦、朽爛，攻擊你；chiahê lóng beh追jip你，到你滅無。 23 你頭殼頂ê天beh變做銅，腳下ê地beh變做鐵。 24 耶和華beh hō͘你地上ê雨變土粉，變沙；伊beh tùi天落tī你，到你滅無。 25 耶和華beh hō͘你刣輸tī你對敵ê面前；你tùi一條路出去抵敵in，beh tī in ê面前tùi七條路來逃走；你beh tī天下萬國中流落。 26 你ê身屍beh hō͘空中ê飛鳥kap地上ê走獸做食物，也無人趕伊。 27 耶和華beh用埃及ê癰(iong)、痔瘡、癬、疥，bōe醫ê，來phah你。 28 耶和華beh用顛狂、chhiⁿ-mî、心ê驚惶phah你； 29 你beh tī日中晝四界摸，親像chhiⁿ-mî ê暗摸sa；你ê路bōe興通，常常tú-tio̍h制壓、搶奪，無人拯救你。 30 你beh聘定bó͘，別人kap伊同房；你beh起厝，無thang khiā tī hit內面；你beh栽種葡萄園，也bōe得tio̍h食伊ê果子。 31 你ê牛刣 tī你ê目睭前，你無thang食tio̍h；你ê驢tī你ê目前受搶奪，m̄還你；你ê 羊 beh歸你ê對敵，無人替你救伊。 32 你ê kiáⁿ cha-bó͘-kiáⁿ beh交tī別國ê百姓，你ê目睭beh看，thong日瞭望伊，到失明；你ê手也無力thang做甚麼。 33 你ê土產，kap你tio̍h磨所得tio̍h ê，beh hō͘你所m̄-bat ê國民食了了；你kan-ta受欺負，受壓制； 34 你為tio̍h你ê目睭所看見ê事，beh致到顛狂。 35 耶和華beh用bōe醫得ê毒癰phah你，tī你ê腳頭u、腳腿，對你ê腳掌到頭殼頂。 36 耶和華beh遷徙你kap你所設立管轄你ê王，到你kap你ê列祖所m̄-bat ê國，tī-hia你beh服事別ê上帝，是柴ê，石ê； 37 你tī耶和華所beh chhōa你到ê列國中，beh hō͘人gông-ngia̍h，hō͘人做話柄，受譏刺； 38 你beh帶chōe-chōe種子到田裡，但是所收ê是真少；因為草蜢beh食伊。 39 你beh栽種葡萄園來修整伊，總是無thang lim酒，無thang挽果子；因為蟲beh食伊。 40 Thong境內你beh有橄欖樹，總是無伊ê油 thang抹你ê身軀；因為你ê橄欖樹bōe tiâu粒。 41 你beh生kiáⁿ cha-bó͘-kiáⁿ，無thang做你ê；因為in beh hō͘人掠去。 42 你ê樹木，kap你ê土產，草蜢beh一盡食伊。 43 你中間ê出外人beh ná升ná高，你beh ná降ná低； 44 伊beh借你，也你無thang借伊；伊beh做頭，你beh做尾。 45 Chiahê咒詛beh lóng到tī你，beh追你，beh jip-tio̍h你，到你滅無；因為你無聽thàn耶和華你上帝ê話，無守伊所命令你hiahê誡命律例； 46 Chiahê咒詛beh到tī你kap你ê後裔，做神蹟奇事，到永遠。 47 因為你無為tio̍h你ê好額，用歡喜ê心快樂ê意思，來服事耶和華你ê上帝； 48 所以你beh tú-tio̍h iau餓、嘴乾、thǹg-theh，無半項物，服事耶和華所差來攻擊你ê對敵；伊beh用鐵擔掛tī你ê頷頸，到滅無你。 49 耶和華beh tùi遠遠，tùi地極，chhōa一國親像鷹飛來攻擊你；hitê國ê話，你bōe曉聽； 50 Hit-ê國ê人面hiông-kài-kài，無體貼老人，也無憐憫gín-ná； 51 in beh食你ê cheng-siⁿ所生ê，kap你ê土產，到你滅無；你ê五穀、酒、油，以及牛ê牛á-kiáⁿ，羊ê羊á-kiáⁿ，lóng無kā你留teh，到in滅無你。 52 伊beh圍困你tī你ta̍k-ê城門內，到你所óa靠高koh堅固ê城牆lóng倒壞tī你ê全地；伊beh圍困你tī你ta̍k-ê城門內，tī耶和華你上帝所賞賜你ê全地。 53 你ê對敵圍困你，你tī窘迫困苦ê中間，beh食你ê身軀所生ê，就是耶和華你上帝所賞賜你ê kiáⁿ cha-bó͘-kiáⁿ ê肉。 54 Lín中間幼秀不止細膩ê人，目睭beh gîn伊ê兄弟，kap伊心懷中ê bó͘，以及其餘所chhun ê kiáⁿ兒； 55 致到伊無beh用伊所食kiáⁿ兒ê肉，分一點á hō͘ in中間ê一人；因為你tī ta̍k-ê城門內，受對敵圍困大大窘迫你ê時，伊無chhun半項。 56 Lín中間幼秀細膩ê婦人人，因為伊ê幼秀細膩平素m̄敢用腳掌踏地ê，beh gîn伊心懷中ê丈夫，kap伊ê kiáⁿ，伊ê cha-bó͘-kiáⁿ， 57 以及伊身軀所出ê衣(ui)，kap伊所生hiahê kiáⁿ；因為tī你受圍，hō͘對敵tī你chiahê城門內窘迫你困苦ê時，伊因為百項物欠缺，所以beh偷食伊。 58 若你無執守來行chit本冊所記律法一切ê話，無敬畏有榮光thang驚畏ê名，就是耶和華你ê上帝， 59 耶和華就beh用奇怪ê災厄，就是極大極久ê災厄，kap極重極久ê病，到tī你以及你ê後裔； 60 也beh hō͘你所驚埃及hiahê病症lóng臨到tī你，也beh纏tī你ê身軀； 61 連hiahê無記tī chit本律法ê冊ê災厄病症，耶和華beh hō͘伊lóng到tī你，到你滅無。 62 Lín前雖然親像天頂ê星hiah-chōe，總是因為你無聽thàn耶和華你上帝ê話，所以你所chhun ê數額就beh少少。 63 前耶和華掠賜福lín hō͘ lín興旺做歡喜，後來耶和華也beh掠毀滅lín，滅無lín，做歡喜；lín也beh tùi lín所入去承接ê地受拔起來。 64 耶和華beh hō͘ lín四散tī萬百姓中，tùi地chitê極頭到地hitê極頭；你beh tī-hia服事別ê上帝，是你kap你ê列祖所m̄-bat，柴ê，石ê。 65 Tī hiahê國內，你bōe得tio̍h安然，你ê腳也bōe得tio̍h歇睏；耶和華也beh hō͘你tī-hia心pho̍k-pho̍k-chhéng ，目睭失明，精神衰敗； 66 你ê性命tī你ê面前無tiāⁿ無tio̍h，你日暝驚惶，你ê性命無穩當。 67 你因為心內所驚惶ê，目睭所看見ê，早起beh講：苦bōe得chit時暗！暗時beh講：苦bōe得chit時天光！ 68 耶和華beh hō͘你坐船tò去埃及，tùi hit條路，就是我bat對你講你bōe koh看見ê；tī-hia你beh 賣本身hō͘對敵做奴僕女婢，總是無人買。
1 Lí nā tì-ì thiaⁿ Iâ-hô-hoa lí ê Siōng-tè ê ōe, siú I it-chhè ê kài-bēng lâi kiâⁿ i, chiū-sī góa kin-á-ji̍t só͘ bēng-lēng lí ê, Iâ-hô-hoa lí ê Siōng-tè beh hō͘ lí pôaⁿ-kè thiⁿ-ē bān-kok; 2 lí nā thiaⁿ Iâ-hô-hoa lí Siōng-tè ê ōe, chiū chiah-ê só͘ chiok-hok-ê beh jip lí, beh kàu tī lí; 3 lí tī siâⁿ-lāi beh tit-tio̍h hok-khì, tī chhân-ni̍h beh tit-tio̍h hok-khì; 4 lí ê sin-khu só͘-siⁿ-ê, lí ê thó͘-tōe só͘-chhut-ê, lí ê cheng-siⁿ só͘-chhut-ê, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng beh tit-tio̍h hok-khì. 5 Lí ê kheng-á kap lí chhiau-mī ê khì-kū, lóng beh tit-tio̍h hok-khì. 6 Lí ji̍p-lâi beh tit-tio̍h hok-khì; chhut-khì iā beh tit-tio̍h hok-khì. 7 Lí ê tùi-te̍k khí-lâi kong-kek lí ê, Iâ-hô-hoa beh hō͘ in thâi-su tī lí ê bīn-chêng; in tùi chi̍t tiâu lō͘ chhut-lâi kong-kek lí, beh tī lí ê bīn-chêng tùi chhit tiâu lō͘ lâi cháu. 8 Iâ-hô-hoa beh bēng-lēng hok-khì hō͘ lí, tī lí ê chhek-chhng, kap lí ê chhiú só͘ chòe it-chhè ê sū; iā beh sù-hok lí tī Iâ-hô-hoa lí Siōng-tè só͘ siúⁿ-sù lí ê tōe. 9 Lí nā siú Iâ-hô-hoa lí Siōng-tè ê kài-bēng, kiâⁿ I ê tō-lō͘, Iâ-hô-hoa beh siat-li̍p lí chòe I ka-kī sèng ê peh-sìⁿ, chiàu I só͘ tùi lí chiù-chōa ê; 10 thiⁿ-ē bān peh-sìⁿ khòaⁿ-kìⁿ lí sio̍k tī Iâ-hô-hoa ê miâ-ē, chiū beh kiaⁿ-ùi lí. 11 Lí tī Iâ-hô-hoa tùi lí ê lia̍t-chó͘ chiù-chōa siúⁿ-sù lí ê tōe, Iâ-hô-hoa beh hō͘ lí ê seng-khu só͘-siⁿ-ê, cheng-siⁿ só͘-chhut ê, thó͘-tōe só͘-chhut-ê, chhiong-chiok ū chhun. 12 Iâ-hô-hoa beh kā lí khui I thiⁿ-ni̍h pó-pòe ê khò͘-pâng, lo̍h ki̍p-sî ê hō͘ tī lí ê tōe, tī lí ê chhiú só͘ chòe it-chhè ê sū sù-hok lí; lí beh chioh hō͘ chōe-chōe kok, iā lí m̄-bián chioh. 13 Lí nā thiaⁿ-thàn Iâ-hô-hoa lí ê Siōng-tè ê kài-bēng, chiū-sī góa kin-á-ji̍t só͘ bēng-lēng lí ê, chip-siú lâi kiâⁿ i, bô phian-chó, bô phian-iū, lâi oai-chhoa̍h góa kin-á-ji̍t só͘ bēng-lēng lí chiah ê ōe, khì thàn pa̍t ê siōng-tè lâi ho̍k-sāi i, Iâ-hô-hoa chiū beh hō͘ lí chòe-thâu, bô chòe-bé; lí beh tiàm tī téng-bīn, bô tiàm tī ē-bīn. 14 (Ha̍p-pēng tī téng chi̍t chat) 15 Lí nā bô thiaⁿ-thàn Iâ-hô-hoa lí Siōng-tè ê ōe, bô chip-siú lâi kiâⁿ I it-chhè ê kài-bēng, lu̍t-lē, chiū-sī góa kin-á-ji̍t só͘ bēng-lēng lí ê, chiah ê chiù-chó͘ chiū beh jip-tio̍h lí, beh kàu tī lí. 16 Tī siâⁿ-lāi lí beh siū chiù-chó͘; tī chhân-ni̍h lí iā beh siū chiù-chó͘. 17 Lí ê kheng-á kap lí chhiau-mī ê khì-kū, lóng beh siū chiù-chó͘. 18 Lí ê seng-khu só͘ siⁿ-ê, lí ê tōe só͘-chhut-ê, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng beh siū chiù-chó͘. 19 Lí ji̍p-lâi beh siū chiù-chó͘; chhut-khì iā beh siū chiù-chó͘. 20 In-ūi lí só͘ kiâⁿ ê pháiⁿ lâi khì-sak góa, Iâ-hô-hoa beh tī lí ê chhiú só͘ chòe it-chhè ê sū, hō͘ chiù-chó͘, jiáu-loān, chek-hoa̍t, kàu tī lí, ti̍t-kàu lí siū húi-bia̍t, kín-kín bia̍t-bô. 21 Iâ-hô-hoa beh hō͘ un-e̍k tîⁿ lí, kàu I bia̍t-bô lí tī lí só͘ ji̍p-khì sêng-chiap ê tōe. 22 Iâ-hô-hoa beh ēng siau-sán, jia̍t-pīⁿ, hoat-iām, to̍k-jia̍t, to-kiàm, ko͘-tâ, hiú-nōa, kong-kek lí; chiah-ê lóng beh tui-jip lí, kàu lí bia̍t-bô. 23 Lí thâu-khak-téng ê thiⁿ beh pìⁿ-chòe tâng, kha-ē ê tōe beh pìⁿ-chòe thih. 24 Iâ-hô-hoa beh hō͘ lí tōe-chiūⁿ ê hō͘ pìⁿ thô͘-hún, pìⁿ soa; I beh tùi thiⁿ lo̍h tī lí, kàu lí bia̍t-bô. 25 Iâ-hô-hoa beh hō͘ lí thâi-su tī lí tùi-te̍k ê bīn-chêng; lí tùi chi̍t tiâu lō͘ chhut-khì tí-te̍k in, beh tī in ê bīn-chêng tùi chhit tiâu lō͘ lâi tô-cháu; lí beh tī thiⁿ-ē bān-kok-tiong liû-lo̍k. 26 Lí ê sin-si beh hō͘ khong-tiong ê pe-chiáu kap tōe-chiūⁿ ê cháu-siù chòe chia̍h-mi̍h, iā bô lâng kóaⁿ i. 27 Iâ-hô-hoa beh ēng Ai-ki̍p ê iong, tī-chhng, sián, kòe, bōe i-tit-ê, lâi phah lí. 28 Iâ-hô-hoa beh ēng tian-kông, chhiⁿ-mî, sim ê kiaⁿ-hiâⁿ phah lí; 29 lí beh tī ji̍t-tiong-tàu sì-kòe bong, chhin-chhiūⁿ chhiⁿ-mî ê àm-bong-sa; lí ê lō͘ bōe heng-thong, siông-siông tú-tio̍h chè-ap, chhiúⁿ-toa̍t, bô lâng chín-kiù lí. 30 Lí beh phèng-tiāⁿ bó͘, pa̍t-lâng kap i tâng-pâng; lí beh khí-chhù, bô thang khiā tī hit lāi-bīn; lí beh chai-chèng phû-tô-hn̂g, iā bōe tit-tio̍h chia̍h i ê ké-chí. 31 Lí ê gû thâi tī lí ê ba̍k-chiu chêng, lí bô thang chia̍h-tio̍h; lí ê lû tī lí ê ba̍k-chêng siū chhiúⁿ-toa̍t, m̄-hêng lí; lí ê iûⁿ beh kui lí ê tùi-te̍k, bô lâng thòe lí kiù i. 32 Lí ê kiáⁿ cha-bó͘-kiáⁿ beh kau tī pa̍t-kok ê peh-sìⁿ, lí ê ba̍k-chiu beh khòaⁿ, thong-ji̍t liâu-bāng i, kàu sit-bêng; lí ê chhiú iā bô la̍t thang chòe sím-mi̍h. 33 Lí ê thó͘-sán, kap lí tio̍h-bôa só͘ tit-tio̍h-ê, beh hō͘ lí só͘ m̄-bat ê kok-bîn chia̍h liáu-liáu; lí kan-ta siū khi-hū, siū ap-chè; 34 lí ūi-tio̍h lí ê ba̍k-chiu só͘ khòaⁿ-kìⁿ ê sū, beh tì-kàu tian-kông. 35 Iâ-hô-hoa beh ēng bōe i-tit ê to̍k-iong phah lí, tī lí ê kha-thâu-u, kha-thúi, tùi lí ê kha-chiúⁿ kàu thâu-khak-téng. 36 Iâ-hô-hoa beh chhian-sóa lí kap lí só͘ siat-li̍p koán-hat lí ê ông, kàu lí kap lí ê lia̍t-chó͘ só͘ m̄-bat ê kok, tī-hia lí beh ho̍k-sāi pa̍t ê siōng-tè, sī chhâ-ê, chio̍h-ê; 37 lí tī Iâ-hô-hoa só͘ beh chhōa lí kàu ê lia̍t-kok-tiong, beh hō͘ lâng gông-ngia̍h, hō͘ lâng chòe ōe-pìⁿ, siū ki-chhì; 38 lí beh tòa chōe-chōe chéng-chí kàu chhân-ni̍h, nā-sī só͘ siu-ê sī chin-chió; in-ūi chháu-meh beh chia̍h i. 39 Lí beh chai-chèng phû-tô-hn̂g lâi siu-chéng i, chóng-sī bô thang lim-chiú, bô thang bán ké-chí; in-ūi thâng beh chia̍h i. 40 Thong kéng-lāi lí beh ū kaⁿ-ná-chhiū, chóng-sī bô i ê iû thang boah lí ê seng-khu; in-ūi lí ê kaⁿ-ná-chhiū bōe tiâu-lia̍p. 41 Lí beh siⁿ-kiáⁿ cha-bó͘-kiáⁿ, bô thang chòe lí ê; in-ūi in beh hō͘ lâng lia̍h-khì. 42 Lí ê chhiū-ba̍k, kap lí ê thó͘-sán, chháu-meh beh it-chīn chia̍h i. 43 Lí tiong-kan ê chhut-gōa lâng beh ná-seng ná-koâiⁿ, lí beh ná-kàng ná-kē; 44 i beh chioh lí, iā lí bô thang chioh i; i beh chòe-thâu, lí beh chòe-bé. 45 Chiah ê chiù-chó͘ beh lóng kàu tī lí, beh tui lí, beh jip-tio̍h lí, kàu lí bia̍t-bô; in-ūi lí bô thiaⁿ-thàn Iâ-hô-hoa lí Siōng-tè ê ōe, bô siú I só͘ bēng-lēng lí hiah ê kài-bēng lu̍t-lē; 46 chiah ê chiù-chó͘ beh kàu tī lí kap lí ê hō͘-è, chòe sîn-jiah kî-sū, kàu éng-oán. 47 In-ūi lí bô ūi-tio̍h lí ê hó-gia̍h, ēng hoaⁿ-hí ê sim khoài-lo̍k ê ì-sù, lâi ho̍k-sāi Iâ-hô-hoa lí ê Siōng-tè; 48 só͘-í lí beh tú-tio̍h iau-gō, chhùi-ta, thǹg-theh, bô pòaⁿ-hāng mi̍h, ho̍k-sāi Iâ-hô-hoa só͘ chhe lâi kong-kek lí ê tùi-te̍k; i beh ēng thih-taⁿ kòa tī lí ê ām-kún, kàu bia̍t-bô lí. 49 Iâ-hô-hoa beh tùi hn̄g-hn̄g, tùi tōe-ke̍k, chhōa chi̍t-kok chhin-chhiūⁿ eng pe-lâi kong-kek lí; hit ê kok ê ōe, lí bōe hiáu thiaⁿ; 50 hit ê kok ê lâng bīn hiông-kài-kài, bô thé-thiap lāu-lâng, iā bô lîn-bín gín-ná; 51 in beh chia̍h lí ê cheng-siⁿ só͘-siⁿ-ê, kap lí ê thó͘-sán, kàu lí bia̍t-bô; lí ê ngó͘-kok, chiú, iû, í-ki̍p gû ê gû-á-kiáⁿ, iûⁿ ê iûⁿ-á-kiáⁿ, lóng bô kā lí lâu-teh, kàu in bia̍t-bô lí. 52 I beh ûi-khùn lí tī lí ta̍k ê siâⁿ-mn̂g-lāi, kàu lí só͘ óa-khò koâiⁿ koh kian-kò͘ ê siâⁿ-chhiûⁿ lóng tó-hoāi tī lí ê choân-tōe; i beh ûi-khùn lí tī lí ta̍k ê siâⁿ-mn̂g-lāi, tī Iâ-hô-hoa lí Siōng-tè só͘ siúⁿ-sù lí ê choân-tōe. 53 Lí ê tùi-te̍k ûi-khùn lí, lí tī khún-pek khùn-khó͘ ê tiong-kan, beh chia̍h lí ê seng-khu só͘-siⁿ-ê, chiū-sī Iâ-hô-hoa lí Siōng-tè só͘ siúⁿ-sù lí ê kiáⁿ cha-bó͘-kiáⁿ ê bah. 54 Lín tiong-kan iù-siù put-chí sòe-jī ê lâng, ba̍k-chiu beh gîn i ê hiaⁿ-tī, kap i sim-hoâi-tiong ê bó͘, í-ki̍p kî-û só͘ chhun ê kiáⁿ-jî; 55 tì-kàu i bô beh ēng i só͘ chia̍h kiáⁿ-jî ê bah, pun chi̍t tiám-á hō͘ in tiong-kan ê chi̍t-lâng; in-ūi lí tī ta̍k ê siâⁿ-mn̂g-lāi, siū tùi-te̍k ûi-khùn tōa-tōa khún-pek lí ê sî, i bô chhun pòaⁿ-hāng. 56 Lín tiong-kan iù-siù sòe-jī ê hū-jîn-lâng, in-ūi i ê iù-siù sòe-jī pêng-sò͘ m̄-káⁿ ēng kha-chiúⁿ ta̍h-tōe-ê, beh gîn i sim-hoâi-tiong ê tiōng-hu, kap i ê kiáⁿ, i ê cha-bó͘-kiáⁿ, 57 í-ki̍p i seng-khu só͘ chhut ê ui, kap i só͘ siⁿ hiah ê kiáⁿ; in-ūi tī lí siū ûi, hō͘ tùi-te̍k tī lí chiah ê siâⁿ-mn̂g-lāi khún-pek lí khùn-khó͘ ê sî, i in-ūi pah-hāng mi̍h khiàm-kheh, só͘-í beh thau-chia̍h-i. 58 Nā lí bô chip-siú lâi kiâⁿ chit pún chheh só͘ kì lu̍t-hoat it-chhè ê ōe, bô kèng-ùi ū êng-kng thang kiaⁿ-ùi ê miâ, chiū-sī Iâ-hô-hoa lí ê Siōng-tè, 59 Iâ-hô-hoa chiū beh ēng kî-koài ê chai-ē, chiū-sī ke̍k-tōa ke̍k-kú ê chai-ē, kap ke̍k-tāng ke̍k-kú ê pīⁿ, kàu tī lí í-ki̍p lí ê hō͘-è; 60 iā beh hō͘ lí só͘ kiaⁿ Ai-ki̍p hiah ê pīⁿ-chèng lóng lîm-kàu tī lí, iā beh tîⁿ tī lí ê seng-khu; 61 liân hiah-ê bô kì tī chit-pún lu̍t-hoat ê chheh ê chai-ē pīⁿ-chèng, Iâ-hô-hoa beh hō͘ i lóng kàu tī lí, kàu lí bia̍t-bô. 62 Lín chêng sui-jiân chhin-chhiūⁿ thiⁿ-téng ê chhiⁿ hiah-chōe, chóng-sī in-ūi lí bô thiaⁿ-thàn Iâ-hô-hoa lí Siōng-tè ê ōe, só͘-í lí só͘ chhun ê siàu-gia̍h chiū beh chió-chió. 63 Chêng Iâ-hô-hoa lia̍h sù-hok lín hō͘ lín heng-ōng chòe hoaⁿ-hí, āu-lâi Iâ-hô-hoa iā beh lia̍h húi-bia̍t lín, bia̍t-bô lín, chòe hoaⁿ-hí; lín iā beh tùi lín só͘ ji̍p-khì sêng-chiap ê tōe siū pu̍ih-khí-lâi. 64 Iâ-hô-hoa beh hō͘ lín sì-sòaⁿ tī bān peh-sìⁿ-tiong, tùi tōe chit ê ke̍k-thâu kàu tōe hit ê ke̍k-thâu; lí beh tī-hia ho̍k-sāi pa̍t ê siōng-tè, sī lí kap lí ê lia̍t-chó͘ só͘ m̄-bat, chhâ-ê, chio̍h-ê. 65 Tī hiah ê kok-lāi, lí bōe tit-tio̍h an-jiân, lí ê kha iā bōe tit-tio̍h hioh-khùn; Iâ-hô-hoa iā beh hō͘ lí tī-hia sim pho̍k-pho̍k-chhéng, ba̍k-chiu sit-bêng, cheng-sîn soe-pāi; 66 lí ê sìⁿ-miā tī lí ê bīn-chêng bô-tiāⁿ bô-tio̍h, lí ji̍t-mî kiaⁿ-hiâⁿ, lí ê sìⁿ-miā bô ún-tàng. 67 Lí in-ūi sim-lāi só͘ kiaⁿ-hiâⁿ ê, ba̍k-chiu só͘ khòaⁿ-kìⁿ ê, chá-khí beh kóng, khó͘ bōe-tit chit-sî àm! àm-sî beh kóng, khó͘ bōe-tit chit-sî thiⁿ-kng! 68 Iâ-hô-hoa beh hō͘ lí chē-chûn tò-khì Ai-ki̍p, tùi hit tiâu lō͘, chiū-sī góa bat tùi lí kóng lí bōe koh khòaⁿ-kìⁿ ê; tī-hia lí beh bōe pún-sin hō͘ tùi-te̍k chòe lô͘-po̍k lú-pī, chóng-sī bô lâng bóe.
1 Chiahê是耶和華，tī Mô͘-ap地，命令摩西kap以色列人立約ê話，是伊tī Hô-lia̍t kap in所立ê約以外ê。 2 摩西召以色列眾人來，kā in講：耶和華tī埃及地，tī lín ê目睭前tùi法老，kap伊ê眾人臣，以及伊全地，所行一切ê事lín lóng有看見， 3 就是你親目看見ê大試驗，kap神蹟，kap hiahê大奇事。 4 總是到今á日耶和華iáu無hō͘你能曉悟ê心，能看見ê目睭，能聽見ê耳孔。 5 我chhōa lín tī曠野四十年，lín身軀ê衫無破，腳裡ê鞋也無破； 6 lín無食餅，也無lim清酒、厚酒；這是beh hō͘ lín知[我就是]耶和華[就是]lín ê上帝。 7 Lín到chit所在，Hi-si̍t-pún王Se-hông，Pa-san王Go̍k，出來kap咱交戰； 8 咱就攻擊in，取in ê地，hō͘ Liû-piān ê支派，Ka-tek ê支派，kap Má-ná-se半支派做業； 9 所以lín tio̍h執守來行chitê約ê話，thang hō͘ lín tī一切所行ê事興通。 10 今á日lín眾人，lín ê首領，lín ê支派，lín ê長老，lín ê官長，以色列ê ta-po͘丁， 11 lín ê kiáⁿ兒，lín ê bó͘，kap你營內ê出外人，tùi lín ê破柴ê到lín ê chhiūⁿ水ê，lóng khiā tī耶和華lín ê上帝ê面前； 12 Hō͘你入tī耶和華你上帝ê約，也入tī耶和華你上帝今á日kap你所chiù-chōa ê； 13 Hō͘伊照伊所bat對你講ê，koh照伊對你ê列祖亞伯拉罕、以撒、雅各所chiù-chōa-ê，今á日設立你做伊ê百姓，伊做你ê上帝。 14 我m̄-nā kap lín立chitê約，kap chitê chiù-chōa， 15 也是kap hiahê今á日kap咱同khiā tī耶和華咱上帝ê面前ê，以及今á日無kap咱同tī-teh ê人立ê； 16 (因為咱有怎樣tiàm tī埃及地，也咱有怎樣經過lín所tùi-hia過ê列國，這是lín所知ê； 17 lín也看見in中間thang厭惡ê物，kap in hiahê柴、石、金、銀ê偶像；) 18 驚了lín中間，ta-po͘人，á是cha-bó͘人，或是家族，或是支派，in ê心今á日悖謬耶和華咱ê上帝，去服事hiahê國ê上帝；koh驚了lín中間有pháiⁿ根生出毒草kap茵蔯； 19 伊聽見chitê咒詛ê話，心內猶原家己安慰，講：我雖然行tāi-chì，心硬，將乾ê，tâm-ê lóng毀滅，我iáu-kú會平安； 20 耶和華無beh赦免伊，耶和華ê受氣kap妒忌，beh燒hit人，將chit本冊所記一切ê咒詛，lóng beh到tī伊ê身軀；耶和華koh beh tùi天下擦滅伊ê名； 21 耶和華也beh照chitê律法ê冊所記載ê約一切ê咒詛，tùi以色列眾支派ê中間分別伊，hō͘伊tú-tio̍h災厄。 22 就後代，lín後輩ê kiáⁿ孫，kap遠遠來ê外國人，看見hit所在ê災厄，以及耶和華所hō͘ in tú-tio̍h ê病症， 23 koh看見遍地有硫磺，有鹽，有火燒，無種作，無出產，連草也無發生tī-hia，親像所多瑪、蛾摩拉、Ap-má、Sé-phian ê毀壞，就是耶和華大受氣ê時所毀壞ê一樣， 24 Hiah-ê列國in lóng beh講：耶和華啥事對chitê地án-ni行ah？chitê受氣hiah猛烈是甚麼意思ah？ 25 人beh講：是因為in棄sak耶和華in列祖ê上帝ê約，是伊chhōa in出埃及地ê時所立ê； 26 in去thàn別ê上帝服事伊，是in平素所m̄-bat ê上帝，耶和華bē-bat分派hō͘ in ê； 27 所以耶和華發大受氣tī chitê地，將chitê冊所記一切ê咒詛，lóng降落tī伊； 28 耶和華tī受氣中大受氣，痛恨拔in出伊ê地，hiat in tī外邦，親像今á日一樣。 29 秘密ê事屬tī耶和華咱上帝ê；顯明ê事，是永遠屬tī咱kap咱ê kiáⁿ孫，beh hō͘咱行chitê律法一切ê話。
1 Chiah-ê sī Iâ-hô-hoa, tī Mô͘-ap tōe, bēng-lēng Mô͘-se kap Í-sek-lia̍t lâng li̍p-iok ê ōe, sī I tī Hô-lia̍t kap in só͘ li̍p ê iok í-gōa-ê. 2 Mô͘-se tiàu Í-sek-lia̍t chèng-lâng lâi, kā in kóng, Iâ-hô-hoa tī Ai-ki̍p tōe, tī lín ê ba̍k-chiu-chêng tùi Hoat-ló, kap i ê chèng jîn-sîn, í-ki̍p i choân-tōe, só͘ kiâⁿ it-chhè ê sū lín lóng ū khòaⁿ-kìⁿ, 3 chiū-sī lí chhin-ba̍k khòaⁿ-kìⁿ ê tōa chhì-giām, kap sîn-jiah, kap hiah ê tōa kî-sū. 4 Chóng-sī kàu kin-á-ji̍t Iâ-hô-hoa iáu bô hō͘ lí ōe hiáu-ngō͘ ê sim, ōe khòaⁿ-kìⁿ ê ba̍k-chiu, ōe thiaⁿ-kìⁿ ê hī-khang. 5 Góa chhōa lín tī khòng-iá sì-cha̍p nî, lín seng-khu ê saⁿ bô phòa, kha-ni̍h ê ôe iā bô phòa; 6 lín bô chia̍h piáⁿ, iā bô lim chheng-chiú, kāu-chiú; che sī beh hō͘ lín chai Góa chiū-sī Iâ-hô-hoa [chiū-sī] lín ê Siōng-tè. 7 Lín kàu chit só͘-chāi, Hi-si̍t-pún ông Se-hông, Pa-san ông Go̍k, chhut-lâi kap lán kau-chiàn; 8 lán chiū kong-kek in, chhú in ê tōe, hō͘ Liû-piān ê chi-phài, Ka-tek ê chi-phài, kap Má-ná-se pòaⁿ chi-phài chòe-gia̍p; 9 só͘-í lín tio̍h chip-siú lâi kiâⁿ chit ê iok ê ōe, thang hō͘ lín tī it-chhè só͘ kiâⁿ ê sū heng-thong. 10 Kin-á-ji̍t lín chèng-lâng, lín ê siú-léng , lín ê chi-phài, lín ê tiúⁿ-ló, lín ê koaⁿ-tiúⁿ, Í-sek-lia̍t ê ta-po͘-teng, 11 lín ê kiáⁿ-jî, lín ê bó͘, kap lí iâⁿ-lāi ê chhut-gōa lâng, tùi lín ê phòa-chhâ-ê kàu lín ê chhiūⁿ-chúi-ê, lóng khiā tī Iâ-hô-hoa lín ê Siōng-tè ê bīn-chêng; 12 hō͘ lí ji̍p tī Iâ-hô-hoa lí Siōng-tè ê iok, iā ji̍p tī Iâ-hô-hoa lí Siōng-tè kin-á-ji̍t kap lí só͘ chiù-chōa ê; 13 hō͘ I chiàu I só͘ bat tùi lí kóng-ê, koh chiàu I tùi lí ê lia̍t-chó͘ A-pek-la̍h-hán, Í-sat, Ngá-kok só͘ chiù-chōa-ê, kin-á-ji̍t siat-li̍p lí chòe I ê peh-sìⁿ, I chòe lí ê Siōng-tè. 14 Góa m̄-nā kap lín li̍p chit ê iok, kap chit ê chiù-chōa, 15 iā sī kap hiah-ê kin-á-ji̍t kap lán tâng-khiā tī Iâ-hô-hoa lán Siōng-tè ê bīn-chêng-ê, í-ki̍p kin-á-ji̍t bô kap lán tâng tī-teh ê lâng li̍p ê; 16 (in-ūi lán ū cháiⁿ-iūⁿ tiàm tī Ai-ki̍p tōe, iā lán ū cháiⁿ-iūⁿ keng-kè lín só͘ tùi-hia kè ê lia̍t-kok, che sī lín só͘ chai ê; 17 lín iā khòaⁿ-kìⁿ in tiong-kan thang iàm-ò͘ⁿ ê mi̍h, kap in hiah ê chhâ, chio̍h, kim, gûn ê ngó͘-siōng;) 18 kiaⁿ-liáu lín tiong-kan, ta-po͘ lâng, á-sī cha-bó͘ lâng, he̍k-sī ka-cho̍k, he̍k-sī chi-phài, in ê sim kin-á-ji̍t pōe-biū Iâ-hô-hoa lán ê Siōng-tè, khì ho̍k-sāi hiah ê kok ê siōng-tè; koh kiaⁿ-liáu lín tiong-kan ū pháiⁿ-kun siⁿ-chhut to̍k-chháu kap in-tîn; 19 i thiaⁿ-kìⁿ chit-ê chiù-chó͘ ê ōe, sim-lāi iû-goân ka-kī an-ùi, kóng, Góa sui-jiân kiâⁿ tāi-chì, sim ngī, chiong ta-ê, tâm-ê lóng húi-bia̍t, góa iáu-kú ōe pêng-an; 20 Iâ-hô-hoa bô beh sià-bián i, Iâ-hô-hoa ê siū-khì kap tò͘-khī, beh sio hit-lâng, chiong chit pún chheh só͘ kì it-chhè ê chiù-chó͘, lóng beh kàu tī i ê seng-khu; Iâ-hô-hoa koh beh tùi thiⁿ-ē chhat-bia̍t i ê miâ; 21 Iâ-hô-hoa iā beh chiàu chit ê lu̍t-hoat ê chheh só͘ kì-chài ê iok it-chhè ê chiù-chó͘, tùi Í-sek-lia̍t chèng chi-phài ê tiong-kan hun-piat i, hō͘ i tú-tio̍h chai-ē. 22 Chiū āu-tāi, lín hō͘-pòe ê kiáⁿ-sun, kap hn̄g-hn̄g lâi ê gōa-kok lâng, khòaⁿ-kìⁿ hit só͘-chāi ê chai-ē, í-ki̍p Iâ-hô-hoa só͘ hō͘ in tú-tio̍h ê pīⁿ-chèng, 23 koh khòaⁿ-kìⁿ piàn-tōe ū jiû-n̂g, ū iâm, ū hé-sio, bô chèng-choh, bô chhut-sán, liân chháu iā bô hoat-siⁿ tī-hia, chhin-chhiūⁿ Só͘-to-má, Gô-mô͘-la̍h, Ap-má, Sé-phian ê húi-hoāi, chiū-sī Iâ-hô-hoa tōa siū-khì ê sî só͘ húi-hoāi-ê chi̍t-iūⁿ, 24 hiah ê lia̍t-kok in lóng beh kóng, Iâ-hô-hoa siáⁿ-sū tùi chit ê tōe án-ni kiâⁿ ah? chit ê siū-khì hiah béng-lia̍t sī sím-mi̍h ì-sù ah? 25 Lâng beh kóng, Sī in-ūi in khì-sak Iâ-hô-hoa in lia̍t-chó͘ ê Siōng-tè ê iok, sī I chhōa in chhut Ai-ki̍p tōe ê sî só͘ li̍p ê; 26 in khì thàn pa̍t-ê siōng-tè ho̍k-sāi i, sī in pêng-sò͘ só͘ m̄-bat ê siōng-tè, Iâ-hô-hoa bē-bat hun-phài hō͘ in ê; 27 só͘-í Iâ-hô-hoa hoat tōa siū-khì tī chit ê tōe, chiong chit ê chheh só͘ kì it-chhè ê chiù-chó͘, lóng kàng-lo̍h tī i; 28 Iâ-hô-hoa tī siū-khì-tiong tōa siū-khì, thòng-hūn pu̍ih in chhut i ê tōe, hiat in tī gōa-pang, chhin-chhiūⁿ kin-á-ji̍t chi̍t-iūⁿ. 29 Pì-ba̍t ê sū sio̍k tī Iâ-hô-hoa lán Siōng-tè ê; hián-bêng ê sū, sī éng-oán sio̍k tī lán kap lán ê kiáⁿ-sun, beh hō͘ lán kiâⁿ chit ê lu̍t-hoat it-chhè ê ōe.
1 Chiahê tāi-chì，就是我所排列tī你ê面前ê祝福kap咒詛，將來到tī你，你tī耶和華你上帝所趕你到ê列國中， 2 你ê心記得伊，你kap你ê kiáⁿ孫若盡心盡性歸向耶和華你ê上帝，聽thàn伊ê話，照我今á日一切所命令你ê； 3 就耶和華你ê上帝beh hō͘你受掠ê人倒tńg來，beh憐憫你，beh 倒tńg來聚集你tùi耶和華你上帝所四散你到ê列國來。 4 你受趕逐ê，若有tī天邊ê，耶和華你ê上帝也beh tùi hia聚集你，帶你tùi hia tò來。 5 耶和華你ê上帝beh chhōa你入你ê列祖所承接ê地，你也承接伊；伊也beh好款待你，hō͘你ê人額加添比你ê列祖khah-chōe。 6 耶和華你ê上帝beh tī你ê心，kap你ê後裔ê心，行割禮，hō͘你盡心盡性疼耶和華你ê上帝，hō͘你thang得tio̍h活。 7 耶和華你ê上帝beh將這一切ê咒詛hē tī你ê對敵，kap怨恨你窘迫你ê人ê身上； 8 你beh 倒tńg聽thàn耶和華ê話，行伊一切ê誡命，就是我今á日所命令你ê。 9 你若聽thàn耶和華你上帝ê話，執守chitê律法所記ê誡命律例，koh盡心盡性歸向耶和華你ê上帝，耶和華你ê上帝beh hō͘你ê手所做一切ê事，kap你ê身軀所生ê，cheng-siⁿ所出ê，土地所出ê，充足有chhun；因為耶和華beh koh歡喜你，賜福你，親像前歡喜你ê列祖一樣。 10 (合併tī頂節） 11 因為我今á日所命令你ê誡命，m̄是你所做bōe到ê，也無tī遠遠。 12 m̄是tī天裡，致到你講，Chī-chūi為阮上天，帶來阮chia，hō͘阮聽來行伊ah？ 13 也m̄是tī海外，致到你講，Chī-chūi為阮過海帶來阮chia，hō͘阮聽來行伊ah？ 14 Chitê話kap你真近，就是tī你ê嘴tī你ê心，hō͘你thang來行伊。 15 看ah，我今á日有用活kap福氣，死kap災厄，排列tī你ê面前； 16 就是我今á日命令你疼耶和華你ê上帝，行伊ê道路，守伊ê誡命、律例、法度，hō͘你thang活teh，加添人額，耶和華你上帝就beh tī你所beh入去承接ê地賜福你。 17 設使你ê心悖謬m̄聽thàn，koh受誘惑，去敬拜別ê上帝服事伊； 18 我今á日就明明kā lín講：lín的確beh滅無；tī你過約旦入去承接ê地，你ê日子bōe會久長。 19 我今á日叫天叫地對lín做干證，我用生死，祝福咒詛，排列tī你ê面前；所以你tio̍h揀活命，hō͘你kap你ê後裔lóng會活teh； 20 來疼耶和華你ê上帝，聽伊ê話，結聯tī伊；因為伊是你ê活命，你ê日子久長也在tī伊；hō͘你thang khiā起tī耶和華對你ê列祖亞伯拉罕、以撒、雅各，chiù-chōa所beh賞賜in ê地。
1 Chiah ê tāi-chì, chiū-sī góa só͘ pâi-lia̍t tī lí ê bīn-chêng ê chiok-hok kap chiù-chó͘, chiong-lâi kàu tī lí, lí tī Iâ-hô-hoa lí Siōng-tè só͘ kóaⁿ lí kàu ê lia̍t-kok-tiong, 2 lí ê sim kì-tit i, lí kap lí ê kiáⁿ-sun nā chīn-sim chīn-sèng kui-ǹg Iâ-hô-hoa lí ê Siōng-tè, thiaⁿ-thàn I ê ōe, chiàu góa kin-á-ji̍t it-chhè só͘ bēng-lēng lí ê; 3 chiū Iâ-hô-hoa lí ê Siōng-tè beh hō͘ lí siū-lia̍h ê lâng tò-tńg-lâi, beh lîn-bín lí, beh tò-tńg-lâi chū-chi̍p lí tùi Iâ-hô-hoa lí Siōng-tè só͘ sì-sòaⁿ lí kàu ê lia̍t-kok lâi. 4 Lí siū kóaⁿ-tio̍k ê, nā ū tī thiⁿ-piⁿ ê, Iâ-hô-hoa lí ê Siōng-tè iā beh tùi hia chū-chi̍p lí, tòa lí tùi hia tò-lâi. 5 Iâ-hô-hoa lí ê Siōng-tè beh chhōa lí ji̍p lí ê lia̍t-chó͘ só͘ sêng-chiap ê tōe, lí iā sêng-chiap i; I iā beh hó khoán-thāi lí, hō͘ lí ê lâng-gia̍h ke-thiⁿ pí lí ê lia̍t-chó͘ khah-chōe. 6 Iâ-hô-hoa lí ê Siōng-tè beh tī lí ê sim, kap lí ê hō͘-è ê sim, kiâⁿ kat-lé, hō͘ lí chīn-sim chīn-sèng thiàⁿ Iâ-hô-hoa lí ê Siōng-tè, hō͘ lí thang tit-tio̍h oa̍h. 7 Iâ-hô-hoa lí ê Siōng-tè beh chiong che it-chhè ê chiù-chó͘ hē tī lí ê tùi-te̍k, kap oàn-hūn lí khún-pek lí ê lâng ê sin-chiūⁿ; 8 lí beh tò-tńg thiaⁿ-thàn Iâ-hô-hoa ê ōe, kiâⁿ I it-chhè ê kài-bēng, chiū-sī góa kin-á-ji̍t só͘ bēng-lēng lí ê. 9 Lí nā thiaⁿ-thàn Iâ-hô-hoa lí Siōng-tè ê ōe, chip-siú chit ê lu̍t-hoat só͘ kì ê kài-bēng lu̍t-lē, koh chīn-sim chīn-sèng kui-ǹg Iâ-hô-hoa lí ê Siōng-tè, Iâ-hô-hoa lí ê Siōng-tè beh hō͘ lí ê chhiú só͘ chòe it-chhè ê sū, kap lí ê seng-khu só͘-siⁿ-ê, cheng-siⁿ só͘-chhut-ê, thó͘-tōe só͘-chhut-ê, chhiong-chiok ū chhun; in-ūi Iâ-hô-hoa beh koh hoaⁿ-hí lí, sù-hok lí, chhin-chhiūⁿ chêng hoaⁿ-hí lí ê lia̍t-chó͘ chi̍t-iūⁿ. 10 (Ha̍p-pēng tī téng-chat) 11 In-ūi góa kin-á-ji̍t só͘ bēng-lēng lí ê kài-bēng, m̄-sī lí só͘ chòe-bōe-kàu-ê, iā bô tī hn̄g-hn̄g. 12 M̄-sī tī thiⁿ-ni̍h, tì-kàu lí kóng, Chī-chūi ūi goán chiūⁿ-thiⁿ, tòa-lâi goán chia, hō͘ goán thiaⁿ lâi kiâⁿ i ah? 13 Iā m̄-sī tī hái-gōa, tì-kàu lí kóng, Chī-chūi ūi goán kè-hái tòa-lâi goán chia, hō͘ goán thiaⁿ lâi kiâⁿ i ah? 14 Chit ê ōe kap lí chin kūn, chiū-sī tī lí ê chhùi tī lí ê sim, hō͘ lí thang lâi kiâⁿ i. 15 Khòaⁿ ah, góa kin-á-ji̍t ū ēng oa̍h kap hok-khì, sí kap chai-ē, pâi-lia̍t tī lí ê bīn-chêng; 16 chiū-sī góa kin-á-ji̍t bēng-lēng lí thiàⁿ Iâ-hô-hoa lí ê Siōng-tè, kiâⁿ I ê tō-lō͘, siú I ê kài-bēng, lu̍t-lē, hoat-tō͘, hō͘ lí thang oa̍h-teh, ke-thiⁿ lâng-gia̍h, Iâ-hô-hoa lí Siōng-tè chiū beh tī lí só͘ beh ji̍p-khì sêng-chiap ê tōe sù-hok lí. 17 Siat-sú lí ê sim pōe-biū m̄ thiaⁿ-thàn, koh siū iú-he̍k, khì kèng-pài pa̍t ê siōng-tè ho̍k-sāi i; 18 góa kin-á-ji̍t chiū bêng-bêng kā lín kóng, lín tek-khak beh bia̍t-bô; tī lí kè Iok-tàn ji̍p-khì sêng-chiap ê tōe, lí ê ji̍t-chí bōe-ōe kú-tn̂g. 19 Góa kin-á-ji̍t kiò thiⁿ kiò tōe tùi lín chòe kan-chèng, góa ēng siⁿ-sí, chiok-hok chiù-chó͘, pâi-lia̍t tī lí ê bīn-chêng; só͘-í lí tio̍h kéng oa̍h-miā, hō͘ lí kap lí ê hō͘-è lóng ōe oa̍h-teh; 20 lâi thiàⁿ Iâ-hô-hoa lí ê Siōng-tè, thiaⁿ I ê ōe, kiat-liân tī I; in-ūi I sī lí ê oa̍h-miā, lí ê ji̍t-chí kú-tn̂g iā chāi tī I; hō͘ lí thang khiā-khí tī Iâ-hô-hoa tùi lí ê lia̍t-chó͘ A-pek-la̍h-hán, Í-sat, Ngá-kok, chiù-chōa só͘ beh siúⁿ-sù in ê tōe.
1 摩西用chiahê話去kā以色列眾人講。 2 對in講，我今á日一百二十歲，bōe koh照常出入；耶和華也bat對我講，你bōe會過chitê約旦。 3 耶和華你ê上帝beh chhōa你過去，beh滅無chiahê國tī你ê面前，你beh承接in。約書亞beh chhōa你過去，親像耶和華所bat講ê。 4 耶和華beh款待in，親像前日款待伊所滅A-mô͘-lī人兩個王，Se-hông kap Go̍k，以及in ê地一樣。 5 耶和華beh用in交tī lín ê面前；lín tio̍h照我所吩咐lín一切ê命令款待in。 6 Lín tio̍h勇敢壯膽，莫得驚in，也莫得懍in；因為耶和華你ê上帝kap你去，伊無離開你，也無放sak你。 7 摩西叫約書亞來，tī以色列眾人ê面前對伊講，你tio̍h勇敢壯膽，因為你beh kap chitê百姓去，入耶和華對in列祖chiù-chōa beh hō͘ in ê地，你也beh hō͘ in得tio̍h伊做業。 8 耶和華beh行tī你ê面前；伊beh kap你tī-teh，伊無離開你，也無放sak你；莫得驚，也莫得懍。 9 摩西寫chitê律法，交hō͘扛耶和華約櫃ê祭司，利未ê kiáⁿ孫，kap以色列ê眾長老。 10 摩西命令in講：每七年ê路尾，就是tī tháu放ê年定tio̍h ê期，搭寮節ê時， 11 以色列眾人來到耶和華你上帝ê面前，tī伊所揀ê所在，hit時你tio̍h tī以色列眾人ê面前讀chitê律法hō͘ in聽。 12 你tio̍h聚集百姓，ta-po͘，cha-bó͘，gín-ná，以及你城門內ê出外人，hō͘ in聽，hō͘ in學習，thang敬畏耶和華lín ê上帝，執守來行chitê律法一切ê話； 13 也hō͘ in m̄-知影ê kiáⁿ兒得tio̍h聽見；就tī lín過約旦所承接ê地，照lín tiàm tī-hia一切ê日thang學習敬畏耶和華lín ê上帝。 14 耶和華對摩西講：看ah，你死ê期近lah；你召約書亞來，相kap khiā tī會幕中；我beh用職任命令伊，摩西就kap約書亞去相kap khiā tī會幕中。 15 耶和華tī會幕內，雲柱中，顯現；雲柱停tī會幕門ê頂面。 16 耶和華koh對摩西講：看ah，你beh kap你列祖相kap睏；chitê百姓beh起來，行邪淫來thàn伊所beh去tiàm hit所在外面ê上帝，離開我，背我kap伊所立ê約。 17 Hit時我beh對in發出受氣；我也beh離開in，掩面m̄看in；in beh受吞滅，tú-tio̍h chōe-chōe災厄患難；hit日in beh講：咱tú-tio̍h災厄患難，kiám-m̄是因為咱ê上帝無tī咱ê中間mah？ 18 Hit日因為in偏ǹg別ê上帝所行一切ê pháiⁿ，所以我決斷掩我ê面。 19 Taⁿ lín家己tio̍h寫chitê歌，用hitê教示以色列ê kiáⁿ孫，hō͘ in ê嘴念，hō͘ chitê歌kā我做干證tī以色列ê kiáⁿ孫。 20 因為我chhōa in入我對in ê列祖所chiù-chōa hitê流奶kap蜜ê地；in得tio̍h食koh飽足，身體肥，就beh偏ǹg別ê上帝服事in，看輕我，背我ê約。 21 到in tú-tio̍h chōe-chōe災厄患難ê時，chitê歌beh tī in ê面前做見證來干證in；因為in ê kiáⁿ孫ê嘴beh念，無bōe記得；因為現今我iáu未chhōa in到我所chiù-chōa ê地，in所存ê念頭，我已經知。 22 當hit日摩西就寫chitê歌，將伊來教示以色列ê kiáⁿ孫。 23 耶和華吩咐Lùn ê kiáⁿ約書亞講：你tio̍h勇敢壯膽，因為你beh chhōa以色列人入我所chiù-chōa hō͘ in ê地；我beh kap你相kap tī-teh。 24 摩西用chitê律法ê話寫tī冊裡，一盡寫明白； 25 摩西就吩咐扛耶和華約櫃ê利未人，講： 26 將chitê律法ê冊hē tī耶和華lín上帝ê約櫃邊，thang tī-hia做你ê干證。 27 因為我知你是悖逆ê，是頷頸硬ê；看ah，我今á日iáu活kap lín tī-teh，lín尚且悖逆耶和華，何況我死了後ah？ 28 Tio̍h聚集lín chiahê支派ê長老kap官長lóng來，我beh講chiahê話hō͘ in聽，也beh叫天叫地hō͘ in做干證。 29 因為我知我死了後，lín beh全然敗壞，歪chhoa̍h我所命令lín行ê道路；日後lín beh tú-tio̍h災厄，因為lín beh行耶和華所看做pháiⁿ ê事，用lín ê手所做惹伊ê受氣。 30 摩西將chitê歌ê話，頭到尾講hō͘以色列全會聽。
1 Mô͘-se ēng chiah ê ōe khì kā Í-sek-lia̍t chèng-lâng kóng. 2 Tùi in kóng, Góa kin-á-ji̍t chi̍t-pah jī-cha̍p hè, bōe koh chiàu-siông chhut-ji̍p; Iâ-hô-hoa iā bat tùi góa kóng, Lí bōe-ōe kè chit ê Iok-tàn. 3 Iâ-hô-hoa lí ê Siōng-tè beh chhōa lí kè-khì, beh bia̍t-bô chiah ê kok tī lí ê bīn-chêng, lí beh sêng-chiap in. Iok-su-a beh chhōa lí kè-khì, chhin-chhiūⁿ Iâ-hô-hoa só͘ bat kóng-ê. 4 Iâ-hô-hoa beh khoán-thāi in, chhin-chhiūⁿ chêng-ji̍t khoán-thāi I só͘ bia̍t A-mô͘-lī lâng nn̄g ê ông, Se-hông kap Go̍k, í-ki̍p in ê tōe chi̍t-iūⁿ. 5 Iâ-hô-hoa beh ēng in kau tī lín ê bīn-chêng; lín tio̍h chiàu góa só͘ hoan-hù lín it-chhè ê bēng-lēng khoán-thāi in. 6 Lín tio̍h ióng-kám chòng-táⁿ, bo̍h-tit kiaⁿ in, iā bo̍h-tit lún in; in-ūi Iâ-hô-hoa lí ê Siōng-tè kap lí khì, I bô lī-khui lí, iā bô pàng-sak lí. 7 Mô͘-se kiò Iok-su-a lâi, tī Í-sek-lia̍t chèng-lâng ê bīn-chêng tùi i kóng, Lí tio̍h ióng-kám chòng-táⁿ, in-ūi lí beh kap chit ê peh-sìⁿ khì, ji̍p Iâ-hô-hoa tùi in lia̍t-chó͘ chiù-chōa beh hō͘ in ê tōe, lí iā beh hō͘ in tit-tio̍h i chòe-gia̍p. 8 Iâ-hô-hoa beh kiâⁿ tī lí ê bīn-chêng; I beh kap lí tī-teh, I bô lī-khui lí, iā bô pàng-sak lí; bo̍h-tit kiaⁿ, iā bo̍h-tit lún. 9 Mô͘-se siá chit ê lu̍t-hoat, kau-hō͘ kng Iâ-hô-hoa iok-kūi ê chè-si, Lī-bī ê kiáⁿ-sun, kap Í-sek-lia̍t ê chèng tiúⁿ-ló. 10 Mô͘-se bēng-lēng in kóng, Múi chhit-nî ê lō͘-bé, chiū-sī tī tháu-pàng ê nî tiāⁿ-tio̍h ê kî, tah-liâu-choeh ê sî, 11 Í-sek-lia̍t chèng-lâng lâi-kàu Iâ-hô-hoa lí Siōng-tè ê bīn-chêng, tī I só͘ kéng ê só͘-chāi, hit-sî lí tio̍h tī Í-sek-lia̍t chèng-lâng ê bīn-chêng tha̍k chit ê lu̍t-hoat hō͘ in thiaⁿ. 12 Lí tio̍h chū-chi̍p peh-sìⁿ, ta-po͘, cha-bó͘, gín-ná, í-ki̍p lí siâⁿ-mn̂g-lāi ê chhut-gōa lâng, hō͘ in thiaⁿ, hō͘ in ha̍k-si̍p, thang kèng-ùi Iâ-hô-hoa lín ê Siōng-tè, chip-siú lâi kiâⁿ chit ê lu̍t-hoat it-chhè ê ōe; 13 iā hō͘ in m̄-chai-iáⁿ ê kiáⁿ-jî tit-tio̍h thiaⁿ-kìⁿ; chiū tī lín kè Iok-tàn só͘ sêng-chiap ê tōe, chiàu lín tiàm tī-hia it-chhè ê ji̍t thang ha̍k-si̍p kèng-ùi Iâ-hô-hoa lín ê Siōng-tè. 14 Iâ-hô-hoa tùi Mô͘-se kóng, Khòaⁿ ah, lí sí ê kî kūn lah; lí tiàu Iok-su-a lâi, saⁿ-kap khiā tī hōe-bō͘-tiong; Góa beh ēng chit-jīm bēng-lēng i, Mô͘-se chiū kap Iok-su-a khì saⁿ-kap khiā tī hōe-bō͘-tiong. 15 Iâ-hô-hoa tī hōe-bō͘-lāi, hûn-thiāu tiong, hián-hiān; hûn-thiāu thêng tī hōe-bō͘-mn̂g ê téng-bīn. 16 Iâ-hô-hoa koh tùi Mô͘-se kóng, Khòaⁿ ah, lí beh kap lí lia̍t-chó͘ saⁿ-kap khùn; chit ê peh-sìⁿ beh khí-lâi, kiâⁿ siâ-îm lâi thàn i só͘ beh khì tiàm hit só͘-chāi gōa-bīn ê siōng-tè, lī-khui Góa, pōe Góa kap i só͘ li̍p ê iok. 17 Hit-sî Góa beh tùi in hoat-chhut siū-khì; Góa iā beh lī-khui in, ng-bīn m̄-khòaⁿ in; in beh siū thun-bia̍t, tú-tio̍h chōe-chōe chai-ē hoān-lān; hit-ji̍t in beh kóng, Lán tú-tio̍h chai-ē hoān-lān, kiám-m̄-sī in-ūi lán ê Siōng-tè bô tī lán ê tiong-kan mah? 18 Hit-ji̍t in-ūi in phian-ǹg pa̍t ê siōng-tè só͘ kiâⁿ it-chhè ê pháiⁿ, só͘-í Góa koat-toàn ng Góa ê bīn. 19 Taⁿ lín ka-kī tio̍h siá chit ê koa, ēng hit-ê kà-sī Í-sek-lia̍t ê kiáⁿ-sun, hō͘ in ê chhùi liām, hō͘ chit ê koa kā Góa chòe kan-chèng tī Í-sek-lia̍t ê kiáⁿ-sun. 20 In-ūi Góa chhōa in ji̍p Góa tùi in ê lia̍t-chó͘ só͘ chiù-chōa hit ê lâu lin kap bi̍t ê tōe; in tit-tio̍h chia̍h koh pá-chiok, sin-thé pûi, chiū beh phian-ǹg pa̍t ê siōng-tè ho̍k-sāi in, khòaⁿ-khin Góa, pōe Góa ê iok. 21 Kàu in tú-tio̍h chōe-chōe chai-ē hoān-lān ê sî, chit ê koa beh tī in ê bīn-chêng chòe kiàn-chèng lâi kan-chèng in; in-ūi in ê kiáⁿ-sun ê chhùi beh liām, bô bōe-kì-tit; in-ūi hiān-kim Góa iáu-bē chhōa in kàu Góa só͘ chiù-chōa ê tōe, in só͘ chûn ê liām-thâu, Góa í-keng chai. 22 Tng hit-ji̍t Mô͘-se chiū siá chit ê koa, chiong i lâi kà-sī Í-sek-lia̍t ê kiáⁿ-sun. 23 Iâ-hô-hoa hoan-hù Lùn ê kiáⁿ Iok-su-a kóng, Lí tio̍h ióng-kám chòng-táⁿ, in-ūi lí beh chhōa Í-sek-lia̍t lâng ji̍p Góa só͘ chiù-chōa hō͘ in ê tōe; Góa beh kap lí saⁿ-kap tī-teh. 24 Mô͘-se ēng chit ê lu̍t-hoat ê ōe siá tī chheh-ni̍h, it-chīn siá bêng-pe̍k; 25 Mô͘-se chiū hoan-hù kng Iâ-hô-hoa iok-kūi ê Lī-bī lâng, kóng, 26 Chiong chit ê lu̍t-hoat ê chheh hē tī Iâ-hô-hoa lín Siōng-tè ê iok-kūi piⁿ, thang tī-hia chòe lí ê kan-chèng. 27 In-ūi góa chai lí sī pōe-ge̍k-ê, sī ām-kún ngī-ê; khòaⁿ ah, Góa kin-á-ji̍t iáu oa̍h kap lín tī-teh, lín siōng-chhiáⁿ pōe-ge̍k Iâ-hô-hoa, hô-hòng góa sí liáu-āu ah? 28 Tio̍h chū-chi̍p lín chiah ê chi-phài ê tiúⁿ-ló kap koaⁿ-tiúⁿ lóng lâi, góa beh kóng chiah ê ōe hō͘ in thiaⁿ, iā beh kiò-thiⁿ kiò-tōe hō͘ in chòe kan-chèng. 29 In-ūi góa chai góa sí liáu-āu, lín beh choân-jiân pāi-hoāi, oai-chhoa̍h góa só͘ bēng-lēng lín kiâⁿ ê tō-lō͘; ji̍t-āu lín beh tú-tio̍h chai-ē, in-ūi lín beh kiâⁿ Iâ-hô-hoa só͘ khòaⁿ-chòe pháiⁿ ê sū, ēng lín ê chhiú só͘ chòe jiá I ê siū-khì. 30 Mô͘-se chiong chit ê koa ê ōe, thâu kàu bé kóng hō͘ Í-sek-lia̍t choân-hōe thiaⁿ.
1 Chiahê天ah，tio̍h àⁿ耳孔，我beh講話；願地也tio̍h聽我ê嘴所講ê。 2 我ê教示beh親像雨降落，我ê話親像露水teh滴；親像mng-mng ê雨落tī幼幼 ê草，親像大雨落tī菜蔬。 3 因為我beh宣傳耶和華ê名；Lín tio̍h尊咱ê上帝做大。 4 做石磐ê，伊所做ê是完全，伊ê路lóng是公平；是真實ê上帝，lóng無不義；伊是公義，koh正直。 5 Chitê乖癖彎曲ê世代家己敗壞；m̄是伊ê kiáⁿ，是in ê弊病。 6 愚戇無知ê百姓ah，Lín án-ni報答耶和華mah？伊kiám-m̄是你ê老父，買你ê mah？伊有創造你，建立你。 7 Tio̍h記得古早ê日，siàu念歷代ê年；問你ê老父，伊beh指示你，問你ê老大，in beh kā你講。 8 至koân ê分業hō͘列邦。分開世間人ê時，就定tio̍h百姓ê界限，照以色列人ê數額。 9 耶和華ê份額是伊ê百姓；伊所得tio̍h ê產業是雅各。 10 伊tú-tio̍h伊tī拋荒ê地，tī荒廢野獸哮ê曠野，伊圍se̍h伊，看顧伊，保護伊親像目睭仁。 11 Koh親像鷹鳥lā伊ê巢，tī鷹á ê頂面ia̍t伊ê翼，thí開翼股來承(sîn)伊，載伊tī伊ê翼股。 12 只有耶和華chhōa伊，無別ê上帝kap伊tī-teh。 13 就hō͘伊khiā tī地上高ê所在，得tio̍h食田裡ê土產；Koh hō͘伊tùi石磐suh蜜，Tùi 火石suh油； 14 也食牛奶油，kap羊奶，肥ê羊á-kiáⁿ，Pa-san所出ê綿羊káng kap山羊，Kap siōng好ê小麥；也lim葡萄汁ê酒。 15 Iâ-su-lûn肥就鴨霸，你已經肥，koh大粒，肉真phauh；伊就離開創造伊ê上帝，看輕救伊ê石磐。 16 In用別ê上帝激伊妒忌，用可惡ê，惹伊ê受氣。 17 In祭獻邪鬼，m̄是真ê上帝，就是in平素所m̄-bat ê上帝，是新ê，近來chiah有ê，是你ê列祖所無驚畏ê。 18 生你ê石磐，你無siàu念伊，生你ê上帝，你bōe記得伊。 19 耶和華看見，就怨恨，因為伊ê kiáⁿ cha-bó͘-kiáⁿ激伊ê緣故。 20 就講：我beh對in掩我ê面，看in結局怎樣；in是乖癖ê族類，無信實ê kiáⁿ兒。 21 In用hitê m̄是上帝ê，激我ê妒忌，用in ê虛假ê物，惹我ê受氣；我就用m̄是做百姓ê，激in ê妒忌；用愚戇ê國民，惹in ê受氣。 22 因為tī我ê受氣中有火to̍h起來，燒到陰間極深ê所在，也燒地kap地ê出產，也起火燒chiahê山ê地基。 23 我beh積聚災厄tī in ê頂面，用我lóng總ê 箭來射in。 24 In beh因為iau餓來消瘦，受炎熱kap毒症吞滅；我beh hō͘ in tú-tio̍h野獸ê嘴齒，kap蛇ê毒。 25 外面有刀劍，內面有驚惶，hō͘人死無，hō͘少年ê ta-po͘人，kap在室女，食奶ê，kap白頭毛ê人，lóng滅無， 26 我講：我beh hō͘ in四散tī遠遠，tī人ê中間除in ê名字； 27 總是我驚對敵激我，驚了in ê對敵誤會，驚了in beh講：是阮ê手kia̍h高，m̄是耶和華行chiahê事。 28 因為in是bōe曉得想ê百姓，tī心內無聰明。 29 願in有智慧，能明白chitê，能想in ê結局。 30 若m̄是in ê石磐賣in，若m̄是耶和華將in交hō͘人，怎樣對敵一个能趕in一千？兩個能hō͘ in一萬逃走ah？ 31 In ê石磐無親像咱ê石磐，連咱ê對敵也án-ni評判。 32 In ê葡萄樹是tùi所多瑪ê葡萄樹傳ê，也tùi蛾摩拉ê園出ê，in ê葡萄是毒ê葡萄，kui葩lóng是苦ê； 33 In ê酒是龍ê毒，是惡蛇殘害ê毒。 34 這kiám-m̄是積聚tī我chia，封密tī我寶貝ê庫房mah？ 35 伸冤報應在tī我，tī in ê 腳踏顛ê時；因為in tú-tio̍h災厄ê日近lah，所beh tú-tio̍h ê事會緊緊到。 36 耶和華看見伊ê百姓氣力已經無去，hiahê拘束ê，自由ê，lóng無留一个，就beh替in伸冤，因為伊ê奴僕來退悔。 37 伊beh講：In ê上帝，in所óa靠ê石磐； 38 就是食in祭祀ê油，lim in灌奠ê酒ê，taⁿ tī toh落？Thang hō͘ in起來幫贊lín，保護lín。 39 Lín taⁿ tio̍h看，我，我就是伊，我以外無有上帝；我hō͘人死，我hō͘人活，我損傷伊，我醫治伊；無一个能tùi我ê手救出。 40 我kia̍h起手ǹg天講：我kí我ê永活來講； 41 我若磨我光nà-nà ê刀，我若執行審判，就beh刑罰我ê對敵，報應怨恨我ê人。 42 我beh hō͘我ê 箭lim血到醉，我ê刀beh食肉，就是受刣受掠ê人ê血，對敵首領ê頭ê肉。 43 列國ah，lóng tio̍h kap伊ê百姓相kap歡喜；因為伊beh為伊ê奴僕ê血伸冤，報應伊ê對敵，beh贖伊ê地kap伊ê百姓ê罪。 44 摩西來，用chitê歌一切ê話念hō͘百姓聽；Lùn ê kiáⁿ約書亞也kap伊tī-teh。 45 摩西對以色列ê眾人講chiahê一切ê話明白，就kā in講： 46 我今á日所對lín干證一切ê話，lín tio̍h khǹg tī心裡；也tio̍h吩咐lín ê kiáⁿ孫執守來行chitê律法一切ê話； 47 因為這對tī lín m̄是空空ê事；是lín ê活命，也beh因為chitê事lín ê日子得tio̍h久長，tī lín過約旦beh入去承接ê地。 48 當日，耶和華吩咐摩西講： 49 你上去A-pa-lîm山，Nî-pho ê山頭，kap耶利哥對面ê Mô͘-ap地，看我賞賜以色列人做業ê迦南地； 50 你beh死tī你所上去ê山，來tò祖，親像你ê hiaⁿ亞倫死tī Hô-jíⁿ山，來tò祖一樣； 51 因為lín tī Sîm ê曠野，Ka-te-su ê Bí-lī-pa ê水，tī以色列人中得罪我，因為tī以色列人中無尊我做聖。 52 你thang對面看hitê地，總是bōe得thang入去到我所賞賜以色列人ê地。
1 Chiah ê thiⁿ ah, tio̍h àⁿ hī-khang, góa beh kóng-ōe; Goān tōe iā tio̍h thiaⁿ góa ê chhùi só͘ kóng ê. 2 Góa ê kà-sī beh chhin-chhiūⁿ hō͘ kàng-lo̍h, Góa ê ōe chhin-chhiūⁿ lō͘-chúi teh tih; Chhin-chhiūⁿ mng-mng ê hō͘ lo̍h tī iù-iù ê chháu, Chhin-chhiūⁿ tōa-hō͘ lo̍h tī chhài-soe. 3 In-ūi góa beh soan-thoân Iâ-hô-hoa ê miâ; Lín tio̍h chun lán ê Siōng-tè chòe tōa. 4 Chòe Chio̍h-pôaⁿ-ê, I só͘-chòe-ê sī oân-choân, I ê lō͘ lóng sī kong-pêng; Sī chin-si̍t ê Siōng-tè, lóng bô put-gī; I sī kong-gī, koh chèng-ti̍t. 5 Chit ê koai-phiah oan-khiau ê sè-tāi ka-kī pāi-hoāi; M̄-sī I ê kiáⁿ, sī in ê pē-pēng. 6 Gû-gōng bû-ti ê peh-sìⁿ ah, Lín án-ni pò-tap Iâ-hô-hoa mah? I kiám-m̄-sī lí ê lāu-pē, bóe-lí-ê mah? I ū chhòng-chō lí, kiàn-li̍p lí. 7 Tio̍h kì-tit kó͘-chá ê ji̍t, Siàu-liām le̍k-tāi ê nî; Mn̄g lí ê lāu-pē, i beh chí-sī lí, Mn̄g lí ê lāu-tōa, in beh kā lí kóng. 8 Chì-koâiⁿ-ê pun-gia̍p hō͘ lia̍t-pang. Pun-khui sè-kan lâng ê sî, Chiū tiāⁿ-tio̍h peh-sìⁿ ê kài-hān, Chiàu Í-sek-lia̍t lâng ê siàu-gia̍h. 9 Iâ-hô-hoa ê hūn-gia̍h sī I ê peh-sìⁿ; I só͘ tit-tio̍h ê sán-gia̍p sī Ngá-kok. 10 I tú-tio̍h i tī pha-hng ê tōe, Tī hong-hòe iá-siù háu ê khòng-iá, I ûi-se̍h i, khòaⁿ-kò͘ i, Pó-hō͘ i chhin-chhiūⁿ ba̍k-chiu-jîn. 11 Koh chhin-chhiūⁿ eng-chiáu lā i ê siū, Tī eng-á ê téng-bīn ia̍t i ê si̍t, Thí-khui si̍t-kó͘ lâi sîn i, Chài i tī i ê si̍t-kó͘. 12 Chí-ū Iâ-hô-hoa chhōa i, Bô pa̍t ê siōng-tè kap i tī-teh. 13 Chiū hō͘ i khia tī tōe-chiūⁿ koâiⁿ ê só͘-chāi, Tit-tio̍h chia̍h chhân-ni̍h ê thó͘-sán; Koh hō͘ i tùi chio̍h-pôaⁿ suh-bi̍t, Tùi hé-chio̍h suh-iû; 14 Iā chia̍h gû-lin-iû, kap iûⁿ-lin, Pûi ê iûⁿ-á-kiáⁿ, Pa-san só͘ chhut ê mî-iûⁿ-káng kap soaⁿ-iûⁿ, Kap siōng-hó ê sió-be̍h; Iā lim phû-tô-chiap ê chiú. 15 Iâ-su-lûn pûi chiū à-pà, Lí í-keng pûi, koh tōa-lia̍p, bah chin-phauh; I chiū lī-khui chhòng-chō i ê Siōng-tè, Khòaⁿ-khin kiù i ê Chio̍h-pôaⁿ. 16 In ēng pa̍t ê siōng-tè kek I tò͘-khī, Ēng khó-ò͘ⁿ-ê, jiá I ê siū-khì. 17 In chè-hiàn siâ-kúi, m̄-sī chin ê Siōng-tè, Chiū-sī in pêng-sò͘ só͘ m̄-bat ê siōng-tè, Sī sin-ê, kūn-lâi chiah ū-ê, Sī lí ê lia̍t-chó͘ só͘ bô kiaⁿ-ùi ê. 18 Siⁿ lí ê Chio̍h-pôaⁿ, lí bô siàu-liām I, Siⁿ lí ê Siōng-tè, lí bōe-kì-tit I. 19 Iâ-hô-hoa khòaⁿ-kìⁿ, chiū oàn-hūn, In-ūi I ê kiáⁿ cha-bó͘-kiáⁿ kek I ê iân-kò͘. 20 Chiū kóng, Góa beh tùi in ng Góa ê bīn, Khòaⁿ in kiat-kio̍k cháiⁿ-iūⁿ; In sī koai-phiah ê cho̍k-lūi, Bô sìn-si̍t ê kiáⁿ-jî. 21 In ēng hit-ê m̄-sī Siōng-tè ê, kek Góa ê tò͘-khī, Ēng in ê hu-ké ê mi̍h, jiá Góa ê siū-khì; Góa chiū ēng m̄-sī chòe peh-sìⁿ ê, kek in ê tò͘-khī; Ēng gû-gōng ê kok-bîn, jiá in ê siū-khì. 22 In-ūi tī Góa ê siū-khì-tiong ū hé to̍h-khí-lâi, Sio kàu im-kan ke̍k-chhim ê só͘-chāi, Iā sio tōe kap tōe ê chhut-sán, Iā khí-hé sio chiah ê soaⁿ ê tōe-ki. 23 Góa beh chek-chū chai-ē tī in ê téng-bīn, Ēng Góa lóng-chóng ê chìⁿ lâi siā in. 24 In beh in-ūi iau-gō lâi siau-sán, Siū iām-jia̍t kap to̍k-chèng thun-bia̍t; Góa beh hō͘ in tú-tio̍h iá-siù ê chhùi-khí, Kap chôa ê to̍k. 25 Gōa-bīn ū to-kiàm, Lāi-bīn ū kiaⁿ-hiâⁿ, hō͘ lâng sí-bô, Hō͘ siàu-liân ê ta-po͘-lâng, kap chāi-sek-lú, Chia̍h-lin-ê, kap pe̍h thâu-mn̂g ê lâng, lóng bia̍t-bô, 26 Góa kóng, Góa beh hō͘ in sì-sòaⁿ tī hn̄g-hn̄g, Tī lâng ê tiong-kan tû in ê miâ-jī; 27 Chóng-sī Góa kiaⁿ tùi-te̍k kek Góa, Kiaⁿ-liáu in ê tùi-te̍k gō͘-hōe, Kiaⁿ-liáu in beh kóng, Sī goán ê chhiú kia̍h-koâiⁿ, M̄-sī Iâ-hô-hoa kiâⁿ chiah ê sū. 28 In-ūi in sī bōe hiáu-tit siūⁿ ê peh-sìⁿ, Tī sim-lāi bô chhang-miâ. 29 Goān in ū tì-hūi, ōe bêng-pe̍k chit-ê, Ōe siūⁿ in ê kiat-kio̍k. 30 Nā m̄-sī in ê Chio̍h-pôaⁿ bōe in, Nā m̄-sī Iâ-hô-hoa chiong in kau hō͘ lâng, Cháiⁿ-iūⁿ tùi-te̍k chi̍t-ê ōe kóaⁿ in chi̍t-chheng? Nn̄g-ê ōe hō͘ in chi̍t-bān tô-cháu ah? 31 In ê chio̍h-pôaⁿ bô chhin-chhiūⁿ lán ê Chio̍h-pôaⁿ, Liân lán ê tùi-te̍k iā án-ni phêng-phòaⁿ. 32 In ê phû-tô-chhiū sī tùi Só͘-to-má ê phû-tô-chhiū thoân-ê, Iā tùi Gô-mô͘-la̍h ê hn̂g chhut-ê, In ê phû-tô sī to̍k ê phû-tô, Kui-pha lóng sī khó͘-ê; 33 In ê chiú sī lêng ê to̍k, Sī ok-chôa chân-hāi ê to̍k. 34 Che kiám-m̄-sī chek-chū tī Góa chia, Hong-ba̍t tī Góa pó-pòe ê khò͘-pâng mah? 35 Sin-oan pò-èng chāi-tī Góa, Tī in ê kha ta̍h-tian ê sî; In-ūi in tú-tio̍h chai-ē ê ji̍t kūn lah, Só͘ beh tú-tio̍h ê sū ōe kín-kín kàu. 36 Iâ-hô-hoa khòaⁿ-kìⁿ I ê peh-sìⁿ khùi-la̍t í-keng bô-khì, Hiah-ê khu-sok-ê, chū-iû-ê, lóng bô lâu chi̍t-ê, Chiū beh thòe in sin-oan, In-ūi I ê lô͘-po̍k lâi thè-hóe. 37 I beh kóng, In ê siōng-tè, In só͘ óa-khò ê chio̍h-pôaⁿ; 38 Chiū-sī chia̍h in chè-sū ê iû, Lim in koàn-tiān ê chiú ê, taⁿ tī toh-lo̍h? Thang hō͘ in khí-lâi pang-chān lín, Pó-hō͘ lín. 39 Lín taⁿ tio̍h khòaⁿ, Góa , Góa chiū-sī I, Góa í-gōa bô ū Siōng-tè; Góa hō͘ lâng sí, Góa hō͘ lâng oa̍h, Góa sún-siong-i, Góa i-tī-i; Bô chi̍t-ê ōe tùi Góa ê chhiú kiù-chhut. 40 Góa kia̍h-khí chhiú ǹg thiⁿ kóng, Góa kí Góa ê éng-oa̍h lâi kóng; 41 Góa nā bôa Góa kng-nà-nà ê to, Góa nā chip-hêng sím-phòaⁿ, Chiū beh hêng-hoa̍t Góa ê tùi-te̍k, Pò-èng oàn-hūn Góa ê lâng. 42 Góa beh hō͘ Góa ê chìⁿ lim huih kàu chùi, Góa ê to beh chia̍h bah, Chiū-sī siū-thâi siū-lia̍h ê lâng ê huih, Tùi-te̍k siú-léng ê thâu ê bah. 43 Lia̍t-kok ah, lóng tio̍h kap I ê peh-sìⁿ saⁿ-kap hoaⁿ-hí; In-ūi I beh ūi I ê lô͘-po̍k ê huih sin-oan, Pò-èng I ê tùi-te̍k, Beh sio̍k I ê tōe kap I ê peh-sìⁿ ê chōe. 44 Mô͘-se lâi, ēng chit ê koa it-chhè ê ōe liām hō͘ peh-sìⁿ thiaⁿ; Lùn ê kiáⁿ Iok-su-a iā kap i tī-teh. 45 Mô͘-se tùi Í-sek-lia̍t ê chèng-lâng kóng chiah ê it-chhè ê ōe bêng-pe̍k, chiū kā in kóng, 46 Góa kin-á-ji̍t só͘ tùi lín kan-chèng it-chhè ê ōe, lín tio̍h khǹg tī sim-ni̍h; iā tio̍h hoan-hù lín ê kiáⁿ-sun chip-siú lâi kiâⁿ chit ê lu̍t-hoat it-chhè ê ōe; 47 in-ūi che tùi-tī lín m̄-sī khang-khang ê sū; sī lín ê oa̍h-miā, iā beh in-ūi chit ê sū lín ê ji̍t-chí tit-tio̍h kú-tn̂g, tī lín kè Iok-tàn beh ji̍p-khì sêng-chiap ê tōe. 48 Tng ji̍t Iâ-hô-hoa hoan-hù Mô͘-se kóng, 49 Lí chiūⁿ-khì A-pa-lîm soaⁿ, Nî-pho ê soaⁿ-thâu, kap Iâ-lī-ko tùi-bīn ê Mô͘-ap tōe, khòaⁿ Góa siúⁿ-sù Í-sek-lia̍t lâng chòe-gia̍p ê Ka-lâm tōe; 50 lí beh sí tī lí só͘ chiūⁿ-khì ê soaⁿ, lâi tò-chó͘, chhin-chhiūⁿ lí ê hiaⁿ A-lûn sí tī Hô-jíⁿ soaⁿ, lâi tò-chó͘ chi̍t-iūⁿ; 51 in-ūi lín tī Sîm ê khòng-iá, Ka-te-su ê Bí-lī-pa ê chúi, tī Í-sek-lia̍t lâng tiong tek-chōe Góa, in-ūi tī Í-sek-lia̍t lâng tiong bô chun Góa chòe sèng. 52 Lí thang tùi-bīn khòaⁿ hit ê tōe, chóng-sī bōe-tit-thang ji̍p-khì kàu Góa só͘ siúⁿ-sù Í-sek-lia̍t lâng ê tōe.
1 上帝ê奴僕摩西，tī伊iáu未死ê事先，kā以色列人祝福；所祝福ê話記tī下底。 2 伊講： 耶和華tùi西奈來，為tio̍h in tùi Se-jíⁿ起來；tùi Pa-lân ê山照出光，tùi萬萬聖ê hia來；tùi伊ê chiàⁿ手為tio̍h in發出烈火ê律法。 3 伊不止疼痛hiahê百姓，伊hiahê聖ê lóng tī你ê手；in坐tī你ê腳下，聽受你hiahê話。 4 摩西用律法傳hō͘咱，做雅各會眾ê產業。 5 百姓ê首領，以色列ê眾支派相kap聚會ê時，伊tī Iâ-su-lûn做王。 6 願Liû-piān活teh無死，願伊ê人額無少。 7 伊kā偤大祝福，án-ni講：求耶和華聽偤大ê聲，chhōa伊到伊ê百姓hia；伊bat用伊ê手為家己交戰；你beh幫贊伊抵擋伊ê對敵。 8 論利未講：你ê Thó͘-bêng kap你ê O͘-lêng，kap你聖潔ê人相kap tī-teh；你tī Má-sat bat試伊，tī Bí-lī-pa ê水bat kap伊相爭。 9 伊論到伊ê老父，伊ê老母，就講：我m̄-bat看見伊；也無承認伊ê兄弟；也無承認伊ê kiáⁿ兒；因為in行你ê話，守你ê約。 10 In beh用你ê法度教示雅各，用你ê律法教示以色列；in beh用香hē tī你ê面前，kap ka-nn̂g隻ê燒祭tī你ê壇頂。 11 願耶和華賜福伊ê產業，接納伊ê手所做ê工；hiahê起來攻擊伊kap怨恨伊ê人，願你phah折in ê腰，hō͘ in bōe koh起來， 12 論便雅憫就講：耶和華所疼ê beh kap伊安然khiā起；耶和華thong日保護伊，伊也beh tiàm tī伊ê肩頭中。 13 論約瑟就講：願伊ê地得tio̍h耶和華賜福，得tio̍h天頂ê寶物，kap露水，以及地下所khǹg ê水源； 14 得tio̍h日頭所生ê寶物，月所出ê寶物； 15 得tio̍h古早ê山ê至寶，kap永世代ê山嶺ê寶物； 16 得tio̍h地ê寶物kap其中所充滿ê，以及tiàm tī刺phè內ê ê恩惠；願hiahê lóng歸tī約瑟ê頭殼，歸tī hitê kap伊ê兄弟分開ê ê頭殼頂。 17 親像牛ê頭chiūⁿ生ê，榮光屬tī伊，伊ê角是野牛ê角；用in來tak萬百姓到tī地極；這是Í-hoat-liân ê萬萬，Má-ná-se ê千千。 18 論Se-pò͘-lûn就講：Se-pò͘-lûn ah，你出外thang歡喜；以撒迦ah，tī你ê布棚內thang快樂。 19 In beh召chiahê百姓到山裡，tī-hia beh獻公義ê祭；因為in beh吸收海裡ê豐盛，kap 沙裡所khǹg ê寶貝。 20 論Ka-tek就講：開闊Ka-tek-ê得tio̍h o-ló；i bih-teh親像母ê獅，伊拆裂手骨kap頭殼。 21 伊為家己備辦事先得tio̍h ê業，因為tī-hia有設律法ê ê份額留teh；伊kap百姓ê首領相kap來，行耶和華ê公義，kap以色列相kap行伊ê判斷。 22 論Tàn就講：Tàn是細隻獅，tùi Pa-san跳出。 23 論Ná-hut-tha-lī就講：Ná-hut-tha-lī ah，得tio̍h恩惠充足；也得tio̍h耶和華ê賜福滿滿ê，Beh得tio̍h西勢kap南勢做業。 24 論A-siat就講：願A-siat因為kiáⁿ chōe來得tio̍h福氣，得tio̍h in ê兄弟ê歡喜；thang用伊ê腳ùn tī油裡。 25 你ê門栱是鐵ê，銅ê；你ê日子怎樣，你ê氣力也beh án-ni。 26 Iâ-su-lûn ah，無有親像上帝ê，伊坐天來幫贊你，也坐穹蒼，顯明伊ê榮光。 27 永活ê上帝做你khiā起ê所在，永遠ê手tī你ê下面；伊tī你ê面前趕對敵，koh講：毀滅伊。 28 以色列安然khiā起，雅各ê後裔家己tòa tī五穀kap酒ê地；伊ê天也滴落露水。 29 以色列ah，你有福氣；是誰親像你chitê hō͘耶和華所拯救ê百姓ah？伊是你ê藤牌保護你，是你榮耀ê刀劍；你ê對敵beh投降你；你beh踏tī in高ê所在。
1 Siōng-tè ê lô͘-po̍k Mô͘-se, tī i iáu-bē sí ê tāi-seng, kā Í-sek-lia̍t lâng chiok-hok; só͘ chiok-hok ê ōe kì tī ē-tóe. 2 I kóng, Iâ-hô-hoa tùi Se-nái lâi, Ūi-tio̍h in tùi Se-jíⁿ khí-lâi; Tùi Pa-lân ê soaⁿ chiò-chhut kng, Tùi bān-bān sèng-ê hia lâi; Tùi I ê chiàⁿ-chhiú ūi-tio̍h in hoat-chhut lia̍t-hé ê lu̍t-hoat. 3 I put-chí thiàⁿ-thàng hiah ê peh-sìⁿ, I hiah ê sèng-ê lóng tī Lí ê chhiú; In chē tī Lí ê kha-ē, Thiaⁿ-siū Lí hiah ê ōe. 4 Mô͘-se ēng lu̍t-hoat thoân hō͘ lán, Chòe Ngá-kok hōe-chiòng ê sán-gia̍p. 5 Peh-sìⁿ ê siú-léng, Í-sek-lia̍t ê chèng chi-phài saⁿ-kap chū-hōe ê sî, I tī Iâ-su-lûn chòe-ông. 6 Goān Liû-piān oa̍h-teh bô sí, Goān i ê lâng-gia̍h bô chió. 7 I kā Iû-tāi chiok-hok, án-ni kóng, Kiû Iâ-hô-hoa thiaⁿ Iû-tāi ê siaⁿ, Chhōa i kàu i ê peh-sìⁿ hia; I bat ēng i ê chhiú ūi ka-kī kau-chiàn; Lí beh pang-chān i tí-tng i ê tùi-te̍k. 8 Lūn Lī-bī kóng, Lí ê Thó͘-bêng kap Lí ê O͘-lêng, kap Lí sèng-kiat ê lâng saⁿ-kap tī-teh; Lí tī Má-sat bat chhì i, Tī Bí-lī-pa ê chúi bat kap i saⁿ-chiⁿ. 9 I lūn-kàu i ê lāu-pē, i ê lāu-bú, chiū kóng, Góa m̄-bat khòaⁿ-kìⁿ i; Iā bô sêng-jīn i ê hiaⁿ-tī; Iā bô sêng-jīn i ê kiáⁿ-jî; In-ūi in kiâⁿ Lí ê ōe, Siú Lí ê iok. 10 In beh ēng Lí ê hoat-tō͘ kà-sī Ngá-kok, Ēng Lí ê lu̍t-hoat kà-sī Í-sek-lia̍t; In beh ēng hiuⁿ hē tī Lí ê bīn-chêng, Kap ka-nn̂g-chiah ê sio-chè tī Lí ê tôaⁿ-téng. 11 Goān Iâ-hô-hoa sù-hok i ê sán-gia̍p, Chiap-la̍p i ê chhiú só͘ chòe ê kang; Hiah ê khí-lâi kong-kek i kap oàn-hūn i ê lâng, Goān Lí phah-chi̍h in ê io, hō͘ in bōe koh khí-lâi, 12 Lūn Piān-ngá-bín chiū kóng, Iâ-hô-hoa só͘ thiàⁿ ê beh kap I an-jiân khiā-khí; Iâ-hô-hoa thong-ji̍t pó-hō͘ i, I iā beh tiàm tī i ê keng-thâu-tiong. 13 Lūn Iok-sek chiū kóng, Goān i ê tōe tit-tio̍h Iâ-hô-hoa sù-hok, Tit-tio̍h thiⁿ-téng ê pó-mi̍h, kap lō͘-chúi, Í-ki̍p tōe-ē só͘ khǹg ê chúi-goân; 14 Tit-tio̍h ji̍t-thâu só͘ siⁿ ê pó-mi̍h, Ge̍h só͘ chhut ê pó-mi̍h; 15 Tit-tio̍h kó͘-chá ê soaⁿ ê chì-pó, Kap éng sè-tāi ê soaⁿ-niá ê pó-mi̍h; 16 Tit-tio̍h tōe ê pó-mi̍h kap kî-tiong só͘ chhiong-móa-ê, Í-ki̍p tiàm tī chhì-phè-lāi-ê ê un-hūi; Goān hiah ê lóng kui tī Iok-sek ê thâu-khak, Kui tī hit-ê kap i ê hiaⁿ-tī pun-khui-ê ê thâu-khak-téng. 17 Chhin-chhiūⁿ gû ê thâu-chiūⁿ-siⁿ-ê, êng-kng sio̍k tī i, I ê kak sī iá-gû ê kak; Ēng in lâi tak bān peh-sìⁿ kàu tī tōe-ke̍k; Che sī Í-hoat-liân ê bān-bān, Má-ná-se ê chheng-chheng. 18 Lūn Se-pò͘-lûn chiū kóng, Se-pò͘-lûn ah, lí chhut-gōa thang hoaⁿ-hí; Í-sat-ka ah, tī lí ê pò͘-pîⁿ-lāi thang khoài-lo̍k. 19 In beh tiàu chiah ê peh-sìⁿ kàu soaⁿ-ni̍h, Tī-hia beh hiàn kong-gī ê chè; In-ūi in beh khip-siu hái-ni̍h ê hong-sēng, Kap soa-ni̍h só͘-khǹg ê pó-pòe. 20 Lūn Ka-tek chiū kóng, Khui-khoah Ka-tek-ê tit-tio̍h o-ló; I bih-teh chhin-chhiūⁿ bú ê sai, I thiah-li̍h chhiú-kut kap thâu-khak. 21 I ūi ka-kī pī-pān tāi-seng tit-tio̍h ê gia̍p, In-ūi tī-hia ū siat lu̍t-hoat-ê ê hūn-gia̍h lâu-teh; I kap peh-sìⁿ ê siú-léng saⁿ-kap lâi, Kiâⁿ Iâ-hô-hoa ê kong-gī, Kap Í-sek-lia̍t saⁿ-kap kiâⁿ I ê phòaⁿ-toàn. 22 Lūn Tàn chiū kóng, Tàn sī sòe chiah sai, Tùi Pa-san thiàu-chhut. 23 Lūn Ná-hut-tha-lī chiū kóng, Ná-hut-tha-lī ah, tit-tio̍h un-hūi chhiong-chiok; Iā tit-tio̍h Iâ-hô-hoa ê sù-hok móa-móa ê, Beh tit-tio̍h sai-sì kap lâm-sì chòe gia̍p. 24 Lūn A-siat chiū kóng, Goān A-siat in-ūi kiáⁿ chōe lâi tit-tio̍h hok-khì, Tit-tio̍h in ê hiaⁿ-tī ê hoaⁿ-hí; Thang ēng i ê kha ùn tī iû-ni̍h. 25 Lí ê mn̂g-kông sī thih-ê, tâng-ê; Lí ê ji̍t-chí cháiⁿ-iūⁿ, lí ê khùi-la̍t iā beh án-ni. 26 Iâ-su-lûn ah, bô ū chhin-chhiūⁿ Siōng-tè ê, I chē-thiⁿ lâi pang-chān lí, Iā chē kiong-chhong, hián-bêng I ê êng-kng. 27 Éng-oa̍h ê Siōng-tè chòe lí khiā-khí ê só͘-chāi, Éng-oán ê chhiú tī lí ê ē-bīn; I tī lí ê bīn-chêng kóaⁿ tùi-te̍k, Koh kóng, Húi-bia̍t i. 28 Í-sek-lia̍t an-jiân khiā-khí, Ngá-kok ê hō͘-è ka-kī tòa tī ngó͘-kok kap chiú ê tōe; I ê thiⁿ iā tih-lo̍h lō͘-chúi. 29 Í-sek-lia̍t ah, lí ū hok-khì; Chī-chūi chhin-chhiūⁿ lí chit-ê hō͘ Iâ-hô-hoa só͘ chín-kiù ê peh-sìⁿ ah? I sī lí ê tîn-pâi pó-hō͘ lí, Sī lí êng-iāu ê to-kiàm; Lí ê tùi-te̍k beh tâu-hâng lí; Lí beh ta̍h tī in koâiⁿ ê só͘-chāi.
1 摩西tùi Mô͘-ap平洋上Nî-pho山，上hitê kap耶利哥相對ê Pí-su-ka山頭。耶和華hō͘伊看Ki-lia̍t全地直到Tàn； 2 Ná-hut-tha-lī全地，Í-hoat-liân Má-ná-se ê地，偤大全地到西海； 3 南方kap叫做棗樹城ê耶利哥山谷ê平洋，到Só-jíⁿ。 4 耶和華對伊講，chitê地就是我對亞伯拉罕、以撒、雅各，chiù-chōa講：我beh賞賜你ê後裔ê，taⁿ我hō͘你親目看見；總是你bōe得tio̍h過去到hia。 5 耶和華ê奴僕摩西就死tī-hia，tī Mô͘-ap ê地，照耶和華所講ê。 6 耶和華埋葬伊tī Mô͘-ap地，Pek-pí-jíⁿ相對ê山谷；到今á日無人知伊ê墓。 7 摩西死ê時，一百二十歲，目睭無花，精力無衰退。 8 以色列人tī Mô͘-ap平洋為tio̍h摩西哀哭三十日；為tio̍h摩西憂悶哀哭ê日滿lah。 9 Lùn ê kiáⁿ約書亞得tio̍h智慧ê神充滿；因為摩西bat按手tī伊ê頂面；以色列人就聽thàn伊，照耶和華所命令摩西ê來行。 10 後來以色列中無koh興起先知親像摩西，伊是耶和華面對面所bat ê； 11 照耶和華差伊tī埃及地，tùi法老kap伊lóng總ê人臣，以及伊ê全地所行ta̍k樣ê神蹟奇事，也照大權能ê手，大thang驚ê事，就是摩西所行tī以色列眾人ê目睭前ê。 12
1 Mô͘-se tùi Mô͘-ap pîⁿ-iûⁿ chiūⁿ Nî-pho soaⁿ, chiūⁿ hit ê kap Iâ-lī-ko saⁿ-tùi ê Pí-su-ka soaⁿ-thâu. Iâ-hô-hoa hō͘ i khòaⁿ Ki-lia̍t choân-tōe ti̍t-kàu Tàn; 2 Ná-hut-tha-lī choân-tōe, Í-hoat-liân Má-ná-se ê tōe, Iû-tāi choân-tōe kàu sai-hái; 3 Lâm-hng kap kiò-chòe chó-chhiū-siâⁿ ê Iâ-lī-ko soaⁿ-kok ê pîⁿ-iûⁿ, kàu Só-jíⁿ. 4 Iâ-hô-hoa tùi i kóng, Chit ê tōe chiū-sī Góa tùi A-pek-la̍h-hán, Í-sat, Ngá-kok, chiù-chōa kóng, Góa beh siúⁿ-sù lí ê hō͘-è ê, taⁿ Góa hō͘ lí chhin-ba̍k khòaⁿ-kìⁿ; chóng-sī lí bōe tit-tio̍h kè-khì kàu hia. 5 Iâ-hô-hoa ê lô͘-po̍k Mô͘-se chiū sí tī-hia, tī Mô͘-ap ê tōe, chiàu Iâ-hô-hoa só͘ kóng ê. 6 Iâ-hô-hoa bâi-chòng i tī Mô͘-ap tōe, Pek-pí-jíⁿ saⁿ-tùi ê soaⁿ-kok; kàu kin-á-ji̍t bô lâng chai i ê bōng. 7 Mô͘-se sí ê sî, chi̍t-pah jī-cha̍p hè, ba̍k-chiu bô hoe, cheng-le̍k bô soe-thè. 8 Í-sek-lia̍t lâng tī Mô͘-ap pîⁿ-iûⁿ ūi-tio̍h Mô͘-se ai-khàu saⁿ-cha̍p ji̍t; ūi-tio̍h Mô͘-se iu-būn ai-khàu ê ji̍t móa lah. 9 Lùn ê kiáⁿ Iok-su-a tit-tio̍h tì-hūi ê sîn chhiong-móa; in-ūi Mô͘-se bat hōaⁿ-chhiú tī i ê téng-bīn; Í-sek-lia̍t lâng chiū thiaⁿ-thàn i, chiàu Iâ-hô-hoa só͘ bēng-lēng Mô͘-se ê lâi kiâⁿ. 10 Āu-lâi Í-sek-lia̍t-tiong bô koh heng-khí sian-ti chhin-chhiūⁿ Mô͘-se, i sī Iâ-hô-hoa bīn tùi bīn só͘ bat ê; 11 chiàu Iâ-hô-hoa chhe i tī Ai-ki̍p tōe, tùi Hoat-ló kap i lóng-chóng ê jîn-sîn, í-ki̍p i ê choân-tōe só͘ kiâⁿ ta̍k-iūⁿ ê sîn-jiah kî-sū, iā chiàu tōa koân-lêng ê chhiú, tōa thang kiaⁿ ê sū, chiū-sī Mô͘-se só͘ kiâⁿ tī Í-sek-lia̍t chèng-lâng ê ba̍k-chiu-chêng ê. 12