POJ Bible -- Exodus

=== 出埃及記 · 第 1 章 ===

¹ 以色列ê眾kiáⁿ ta̍k-ê帶伊ê家眷kap雅各到埃及，in ê名記tī下底。 ² Liû-piān、西門、利未、偤大； ³ Í-sat-ka、Se-pò͘-lûn、便雅憫； ⁴ Tàn、Ná-hut-tha-lī、Ka-tek、A-siat。 ⁵ Tùi雅各所生ê，共有七十人；約瑟已經tī埃及。 ⁶ 約瑟kap伊ê兄弟kap hit代ê人lóng死。 ⁷ 以色列人gâu生，gâu傳，加添chōe-chōe，koh興旺，極其強盛；充滿hitê地。 ⁸ 埃及有新ê王興起，m̄-bat約瑟ê。 ⁹ 伊對伊ê百姓講：看ah，chitê百姓，以色列人，比咱khah-chōe，khah強； ¹⁰ 來ah，咱tio̍h用計策來款待in，驚了in加添真chōe；後來若tú-tio̍h交戰ê事，in kap咱ê對敵連合，來攻擊咱，koh tùi chitê地上去。 ¹¹ Tùi án-ni，設立督工ê管轄in，用重擔苦楚in；in就kā法老起Pí-tong、Lân-sek兩個城做府庫。 ¹² 總是ná苦楚in，in ná chōe ná開闊。Tùi án-ni，就為tio̍h以色列人掛慮。 ¹³ 埃及人就督責以色列人做苦工； ¹⁴ hō͘ in做工tio̍h磨，生活艱苦，chhiau土做磚，kap作田裡hiahê工；tī一切所做ê工無m̄是真嚴。 ¹⁵ 有希伯來ê拾姐母，一个名Si-hut-la̍h，一个名Phó͘-a。 ¹⁶ 埃及王對in講：Lín kā希伯來ê婦人人拾kiáⁿ，看in臨盆ê時；若是ta-po͘ gín-á，tio̍h hō͘伊死；若是cha-bó͘ gín-á，thang hō͘伊活。 ¹⁷ 總是拾姐母敬畏上帝，無照埃及王ê命令來行，竟然留ta-po͘ gín-á ê活命。 ¹⁸ 埃及王就叫拾姐母來，對in講：Lín啥事án-ni做，留ta-po͘ gín-á ê活命？ ¹⁹ 拾姐母對法老講：希伯來ê婦人人kap埃及ê婦人人無同；in khah快便，拾姐母猶未到，in已經生了。 ²⁰ 上帝好款待拾姐母；百姓加添真chōe，極其強盛。 ²¹ 拾姐母因為敬畏上帝，上帝就hō͘ in成家。 ²² 法老吩咐伊ê眾百姓講：凡所生ê ta-po͘-kiáⁿ lín tio̍h kā伊hiat落河；一切ê cha-bó͘-gín-á，lín tio̍h 留伊ê性命。

=== 出埃及記 · 第 1 章 ===

¹ Í-sek-lia̍t ê chèng-kiáⁿ ta̍k-ê tòa i ê ke-koàn kap Ngá-kok kàu Ai-ki̍p, in ê miâ kì tī ē-tóe. ² Liû-piān, Se-biān, Lī-bī, Iû-tāi; ³ Í-sat-ka, Se-pò͘-lûn, Piān-ngá-bín; ⁴ Tàn, Ná-hut-tha-lī, Ka-tek, A-siat. ⁵ Tùi Ngá-kok só͘-siⁿ-ê, kiōng ū chhit-cha̍p lâng; Iok-sek í-keng tī Ai-ki̍p. ⁶ Iok-sek kap i ê hiaⁿ-tī kap hit-tāi ê lâng lóng sí. ⁷ Í-sek-lia̍t lâng gâu siⁿ, gâu thoân, ke-thiⁿ chōe-chōe, koh heng-ōng, ke̍k-kî kiông-sēng; chhiong-móa hit-ê tōe. ⁸ Ai-ki̍p ū sin ê ông heng-khí, m̄-bat Iok-sek ê. ⁹ I tùi i ê peh-sìⁿ kóng, Khòaⁿ ah, chit-ê peh-sìⁿ, Í-sek-lia̍t lâng, pí lán khah-chōe, khah-kiông; ¹⁰ lâi ah, lán tio̍h ēng kè-chhek lâi khoán-thāi in, kiaⁿ-liáu in ke-thiⁿ chin-chōe; āu-lâi nā tú-tio̍h kau-chiàn ê sū, in kap lán ê tùi-te̍k liân-ha̍p, lâi kong-kek lán, koh tùi chit-ê tōe chiūⁿ-khì. ¹¹ Tùi án-ni siat-li̍p tok-kang-ê koán-hat in, ēng tāng-tàⁿ khó͘-chhó͘ in; in chiū kā Hoat-ló khí Pí-tong Lân-sek nn̄g ê siâⁿ chòe hú-khò͘. ¹² Chóng-sī ná khó͘-chhó͘ in, in ná chōe ná khui-khoah. Tùi án-ni chiū ūi-tio̍h Í-sek-lia̍t lâng khòa-lū. ¹³ Ai-ki̍p lâng chiū tok-chek Í-sek-lia̍t lâng chòe khó͘-kang; ¹⁴ hō͘ in chòe-kang tio̍h-bôa, seng-hoa̍t kan-khó͘, chhiau-thô͘ chòe-chng, kap choh chhân-ni̍h hiah-ê kang; tī it-chhè só͘ chòe ê kang bô-m̄-sī chin-giâm. ¹⁵ Ū Hi-pek-lâi ê khioh-chiá-bú, chi̍t-ê miâ Si-hut-la̍h, chi̍t-ê miâ Phó͘-a. ¹⁶ Ai-ki̍p ông tùi in kóng, Lín kā Hi-pek-lâi ê hū-jîn-lâng khioh kiáⁿ, khòaⁿ in lîm-phûn ê sî; nā sī ta-po͘ gín-á, tio̍h hō͘ i sí; nā sī cha-bó͘ gín-á, thang hō͘ i oa̍h. ¹⁷ Chóng-sī khioh-chiá-bú kèng-ùi Siōng-tè, bô chiàu Ai-ki̍p ông ê bēng-lēng lâi kiâⁿ, kéng-jiân lâu ta-po͘ gín-á ê oa̍h-miā. ¹⁸ Ai-ki̍p ông chiū kiò khioh-chiá-bú lâi, tùi in kóng, Lín siáⁿ-sū án-ni chòe, lâu ta-po͘ gín-á ê oa̍h-miā? ¹⁹ Khioh-chiá-bú tùi Hoat-ló kóng, Hi-pek-lâi ê hū-jîn-lâng kap Ai-ki̍p ê hū-jîn-lâng bô tâng; in khah khoài-piān, khioh-chiá-bú iáu-bē kàu, in í-keng siⁿ-liáu. ²⁰ Siōng-tè hó khoán-thāi khioh-chiá-bú; peh-sìⁿ ke-thiⁿ chin-chōe, ke̍k-kî kiông-sēng. ²¹ Khioh-chiá-bú in-ūi kèng-ùi Siōng-tè, Siōng-tè chiū hō͘ in chiâⁿ-ke. ²² Hoat-ló hoan-hù i ê chèng peh-sìⁿ kóng, Hoān só͘ siⁿ ê ta-po͘-kiáⁿ lín tio̍h kā i hiat-lo̍h hô; it-chhè ê cha-bó͘-gín-á, lín tio̍h lâu i ê sìⁿ-miā.

=== 出埃及記 · 第 2 章 ===

¹ 有一个利未族ê人，去chhōa一个利未族ê cha-bó͘-gín-á。 ² Hit-ê婦人人懷孕，生一个kiáⁿ；看見伊是清秀ê gín-á，就khǹg伊三月日久。 ³ 後來看bōe koh khǹg得，就為tio̍h伊取蘆竹á ê箱，用石油kap瀝青糊伊；將gín-á hē tī hit內面，lok tī河邊，蘆葦ê中間。 ⁴ 伊ê大姊遠遠khiā-teh，ài知伊會tú-tio̍h怎樣。 ⁵ 法老ê cha-bó͘-kiáⁿ落來河裡，beh洗浴；伊hiahê女婢行遊tī河邊；伊看見蘆葦ê中間有箱，就差一个女婢giâ來。 ⁶ 掀開看見gín-á；看ah，gín-á teh哮。伊就憐憫伊，講：這就是希伯來人ê gín-á。 ⁷ 伊ê大姊kā法老ê cha-bó͘-kiáⁿ講：我去tī希伯來婦人人ê中間叫一个奶母，kā你io chitê gín-á，好mah？ ⁸ 法老ê cha-bó͘-kiáⁿ kā伊講：你thang去ah。 Cha-bó͘-kiáⁿ就去，叫gín-á ê老母。 ⁹ 法老ê cha-bó͘-kiáⁿ kā伊講：抱chitê gín-á去，kā我io伊，我beh hō͘你工錢。婦人人就抱gín-á去io伊。 ¹⁰ Gín-á漸漸大，婦人人就帶伊到法老ê cha-bó͘-kiáⁿ hia，做伊ê kiáⁿ。伊kā伊號名叫摩西，講：因為我tùi水裡救伊出來。 ¹¹ 後來摩西已經長成，伊出去到伊ê兄弟hia，看見in teh擔teh；看見一个埃及人phah一个希伯來人，就是伊ê兄弟。 ¹² 伊看左右，看無人tī-hia，就phah死埃及人，iám tī沙裡。 ¹³ 隔日koh出去，看見有兩個希伯來ê人相phah，就對hitê m̄-tio̍h-ê講：你啥事phah你ê同伴？ ¹⁴ Hit-ê人講：Chī-chūi設立你做首領kap審判官來管阮？你想beh phah死我，親像phah死hitê埃及人mah？摩西驚講：chitê tāi-chì真正露出。 ¹⁵ 法老聽見chitê tāi-chì，就想beh 刣摩西。總是摩西閃避法老，走去米甸地khiā起；坐tī井邊。 ¹⁶ 米甸ê祭司有七個cha-bó͘-kiáⁿ；in來chhiūⁿ水到滿槽，hō͘老父ê羊群lim。 ¹⁷ Hiah-ê顧羊ê到，趕in；摩西就起來幫贊in，hō͘ in ê羊群lim。 ¹⁸ In來到老父，Liû-jíⁿ，hia；伊講：今á日lín怎樣hiah緊tò來？ ¹⁹ In講：有一个埃及人救阮脫離顧羊ê人ê手，koh替阮出力chhiūⁿ水，hō͘羊群lim。 ²⁰ 伊對伊hiahê cha-bó͘-kiáⁿ講：Hit-ê人tī tah-lo̍h？Lín啥事放伊tī-hia？tio̍h請伊來食。 ²¹ 摩西願kap hit人tiàm；伊就將伊ê cha-bó͘-kiáⁿ Se-pho-la̍h，嫁hō͘摩西。 ²² 生一个kiáⁿ；摩西kā伊號名叫Kek-sūn；因為講：我寄腳tī外邦。 ²³ 歷過chōe-chōe年，埃及王死；以色列人，因為做苦工，就吐氣喉叫；in做苦工喉叫ê聲到hō͘上帝聽見。 ²⁴ 上帝聽見in ê hiⁿ-hiⁿ-chhan；上帝就記得伊kap亞伯拉罕、以撒、雅各所立ê約。 ²⁵ 上帝看顧以色列人，上帝也知in ê tāi-chì。

=== 出埃及記 · 第 2 章 ===

¹ Ū chi̍t ê Lī-bī cho̍k ê lâng, khì chhōa chi̍t ê Lī-bī cho̍k ê cha-bó͘-gín-á. ² Hit-ê hū-jîn-lâng hoâi-īn, siⁿ chi̍t ê kiáⁿ; khòaⁿ-kìⁿ i sī chheng-siù ê gín-á, chiū khǹg i saⁿ-ge̍h-ji̍t kú. ³ Āu-lâi khòaⁿ bōe koh khǹg-tit, chiū ūi-tio̍h i chhú lô͘-tek-á ê siuⁿ, ēng chio̍h-iû kap le̍k-chhiⁿ kô͘ i; chiong gín-á hē tī hit lāi-bīn, lok tī hô-piⁿ, lô͘-úi ê tiong-kan. ⁴ I ê tōa-chí hn̄g-hn̄g khiā-teh, ài chai i ōe tú-tio̍h cháiⁿ-iūⁿ. ⁵ Hoat-ló ê cha-bó͘-kiáⁿ lo̍h-lâi hô-ni̍h, beh sóe-e̍k; i hiah-ê lú-pī kiâⁿ-iû tī hô-piⁿ; i khòaⁿ-kìⁿ lô͘-úi ê tiong-kan ū siuⁿ, chiū chhe chi̍t ê lú-pī giâ-lâi. ⁶ Hian-khui khòaⁿ-kìⁿ gín-á; khòaⁿ ah, gín-á teh háu. I chiū lîn-bín i, kóng, Che chiū-sī Hi-pek-lâi lâng ê gín-á. ⁷ I ê tōa-chí kā Hoat-ló ê cha-bó͘-kiáⁿ kóng, Góa khì tī Hi-pek-lâi hū-jîn-lâng ê tiong-kan kiò chi̍t ê lin-bú, kā lí io chit-ê gín-á, hó mah? ⁸ Hoat-ló ê cha-bó͘-kiáⁿ kā i kóng, Lí thang khì ah. Cha-bó͘-kiáⁿ chiū khì, kiò gín-á ê lāu-bú. ⁹ Hoat-ló ê cha-bó͘-kiáⁿ kā i kóng, Phō chit-ê gín-á khì, kā góa io i, góa beh hō͘ lí kang-chîⁿ. Hū-jîn-lâng chiū phō gín-á khì io i. ¹⁰ Gín-á chiām-chiām tōa, hū-jîn-lâng chiū tòa i kàu Hoat-ló ê cha-bó͘-kiáⁿ hia, chòe i ê kiáⁿ. I kā i hō-miâ kiò Mô͘-se, kóng, In-ūi góa tùi chúi-ni̍h kiù i chhut-lâi. ¹¹ Āu-lâi Mô͘-se í-keng tióng-sêng, i chhut-khì kàu i ê hiaⁿ-tī hia, khòaⁿ-kìⁿ in teh taⁿ-teh; khòaⁿ-kìⁿ chi̍t ê Ai-ki̍p lâng phah chi̍t ê Hi-pek-lâi lâng, chiū-sī i ê hiaⁿ-tī. ¹² I khòaⁿ chó-iū, khòaⁿ bô lâng tī-hia, chiū phah-sí Ai-ki̍p lâng, iám tī soa-ni̍h. ¹³ Keh-ji̍t koh chhut-khì, khòaⁿ-kìⁿ ū nn̄g ê Hi-pek-lâi ê lâng saⁿ-phah, chiū tùi hit-ê m̄-tio̍h-ê kóng, Lí siáⁿ-sū phah lí ê tâng-phōaⁿ? ¹⁴ Hit-ê lâng kóng, Chī-chūi siat-li̍p lí chòe siú-léng kap sím-phòaⁿ-koaⁿ lâi koán goán? Lí siūⁿ beh phah-sí góa, chhin-chhiūⁿ phah-sí hit-ê Ai-ki̍p lâng mah? Mô͘-se kiaⁿ kóng, Chit-ê tāi-chì chin-chiàⁿ lō͘-chhut. ¹⁵ Hoat-ló thiaⁿ-kìⁿ chit-ê tāi-chì, chiū siūⁿ beh thâi Mô͘-se. Chóng-sī Mô͘-se siám-pī Hoat-ló, cháu-khì Bí-tiân tōe khiā-khí; chē tī chíⁿ-piⁿ. ¹⁶ Bí-tiân ê chè-si ū chhit-ê cha-bó͘-kiáⁿ; in lâi chhiūⁿ-chúi kàu móa chô, hō͘ lāu-pē ê iûⁿ-kûn lim. ¹⁷ Hiah-ê kò͘-iûⁿ-ê kàu, kóaⁿ in; Mô͘-se chiū khí-lâi pang-chān in, hō͘ in ê iûⁿ-kûn lim. ¹⁸ In lâi kàu lāu-pē, Liû-jíⁿ, hia; i kóng, Kin-á-ji̍t lín cháiⁿ-iūⁿ hiah-kín tò-lâi? ¹⁹ In kóng, Ū chi̍t ê Ai-ki̍p lâng kiù goán thoat-lī kò͘-iûⁿ ê lâng ê chhiú, koh thòe goán chhut-la̍t chhiūⁿ chúi, hō͘ iûⁿ-kûn lim. ²⁰ I tùi i hiah-ê cha-bó͘-kiáⁿ kóng, Hit-ê lâng tī tah-lo̍h? Lín siáⁿ-sū pàng i tī-hia? tio̍h chhiáⁿ i lâi chia̍h. ²¹ Mô͘-se goān kap hit-lâng tiàm; i chiū chiong i ê cha-bó͘-kiáⁿ Se-pho-la̍h, kè hō͘ Mô͘-se. ²² Siⁿ chi̍t ê kiáⁿ; Mô͘-se kā i hō miâ kiò Kek-sūn; in-ūi kóng, Góa kià-kha tī gōa-pang. ²³ Le̍k-kè chōe-chōe nî Ai-ki̍p ông sí; Í-sek-lia̍t lâng, in-ūi chòe khó͘-kang, chiū thó͘-khùi âu-kiò; in chòe khó͘-kang âu-kiò ê siaⁿ kàu hō͘ Siōng-tè thiaⁿ-kìⁿ. ²⁴ Siōng-tè thiaⁿ-kìⁿ in ê hiⁿ-hiⁿ-chhan; Siōng-tè chiū kì-tit I kap A-pek-la̍h-hán, Í-sat, Ngá-kok só͘ li̍p ê iok. ²⁵ Siōng-tè khòaⁿ-kò͘ Í-sek-lia̍t lâng, Siōng-tè iā chai in ê tāi-chì.

=== 出埃及記 · 第 3 章 ===

¹ 摩西顧伊ê丈人，米甸ê祭司，Ia̍p-thek-lô，ê羊群，趕羊去曠野ê後面，到上帝ê山，就是何烈山。 ² 耶和華ê使者tī刺phè內火燄中對伊出現，伊看見，看ah，刺phè hō͘火燒，刺phè也無to̍h去。 ³ 摩西講：我taⁿ beh oat過去，看chitê地ê景象，chitê刺phè怎樣無to̍h去ah。 ⁴ 耶和華看見伊oat去beh看，上帝就對刺phè內叫伊講：摩西，摩西。伊就講：我tī-chia。 ⁵ 伊就講：你莫得近óa來；tio̍h thǹg你腳裡ê鞋，因為你khiā ê所在是聖地。 ⁶ Koh講：我是你ê祖公ê上帝，亞伯拉罕ê上帝，以撒ê上帝，雅各ê上帝。摩西遮伊ê面；m̄敢看上帝。 ⁷ 耶和華講：我ê百姓khiā起tī埃及ê，in ê困苦我實在已經看見lah；in為tio̍h督工ê來喉叫，我已經聽見lah；我本知in ê痛苦。 ⁸ Taⁿ我落來beh救in脫離埃及人ê手，chhōa in出hitê地，到肥súi開闊ê地，到流奶kap蜜ê地，就是迦南、Hek、A-mô͘-lī、Pí-lī-sé、Hi-bī、Iâ-pò͘-su、hiahê族ê所在。 ⁹ Taⁿ以色列人喉叫ê聲到hō͘我聽見；我也看見埃及人苦楚in ê艱苦。 ¹⁰ Taⁿ你來，我beh差你去見法老，chhōa我ê百姓以色列人出埃及。 ¹¹ 摩西對上帝講：我是甚麼人thang去見法老，chhōa以色列人出埃及ah？ ¹² 伊講：我實在beh kap你tī-teh；你chhōa百姓出埃及了後，lín beh tī chitê山服事上帝；這beh做我差你ê證據。 ¹³ 摩西對上帝講：看ah，我到以色列人hia，對in講：Lín祖公ê上帝差我來lín chia；in若問我講：伊叫甚麼名？我beh kā in講甚麼ah？ ¹⁴ 上帝對摩西講：我是自然而然ê；koh講：你tio̍h kā以色列人án-ni講：自然ê差我到lín chia。 ¹⁵ 上帝koh對摩西講：你tio̍h對以色列人án-ni講：差我到lín chia ê，就是耶和華，lín祖公ê上帝，亞伯拉罕ê上帝，以撒ê上帝，雅各ê上帝；這是我永遠ê名，這是我ê記念到萬代。 ¹⁶ 你去招集以色列ê長老，kā in講：耶和華，lín祖公ê上帝，就是亞伯拉罕、以撒、雅各ê上帝，對我出現，講：我實在眷顧lín，人tī埃及所款待lín ê，我也有看見。 ¹⁷ 我也bat講：我beh chhōa lín出埃及ê艱苦，到迦南，Hek，A-mô͘-lī，Pí-lī-sé，Hi-bī，Iâ-pò͘-su，hiahê族ê地，到流奶kap蜜ê地。 ¹⁸ In beh聽你ê話；你kap以色列ê長老tio̍h去見埃及王，kā伊講：希伯來人ê上帝耶和華已經tú-tio̍h阮；taⁿ求你容允阮去曠野，行三日ê路站，beh祭祀耶和華，阮ê上帝。 ¹⁹ 我知雖然用大權能ê手，埃及王也m̄ hō͘ lín去。 ²⁰ 我beh伸我ê手，用我tī埃及中所beh行一切ê奇事來phah伊；然後伊chiah准lín去。 ²¹ 我beh hō͘ chitê百姓得tio̍h恩典tī埃及人ê面前，hō͘ lín出去ê時，無空手去； ²² chiahê婦人人ta̍k-ê beh對伊ê厝邊kap tòa tī伊ê家內ê婦人人討銀器、金器，kap衣服，thang hō͘你ê kiáⁿ cha-bó͘-kiáⁿ用；án-ni lín beh搶埃及人。

=== 出埃及記 · 第 3 章 ===

¹ Mô͘-se kò͘ i ê tiūⁿ-lâng, Bí-tiân ê chè-si, Ia̍p-thek-lô, ê iûⁿ-kûn, kóaⁿ iûⁿ khì khòng-iá ê āu-bīn, kàu Siōng-tè ê soaⁿ, chiū-sī Hô-lia̍t soaⁿ. ² Iâ-hô-hoa ê sù-chiá tī chhì-phè-lāi hé-iām-tiong tùi i chhut-hiān, i khòaⁿ-kìⁿ, khòaⁿ ah, chhì-phè hō͘ hé sio, chhì-phè iā bô to̍h-khì. ³ Mô͘-se kóng, Góa taⁿ beh oat-kè-khì, khòaⁿ chit-ê tōe ê kéng-siōng, chit-ê chhì-phè cháiⁿ-iūⁿ bô to̍h-khì ah. ⁴ Iâ-hô-hoa khòaⁿ-kìⁿ i oat-khì beh khòaⁿ, Siōng-tè chiū tùi chhì-phè-lāi kiò i kóng, Mô͘-se, Mô͘-se. I chiū kóng, Góa tī-chia. ⁵ I chiū kóng, Lí bo̍h-tit kūn-óa lâi; tio̍h thǹg lí kha-ni̍h ê ôe, in-ūi lí khiā ê só͘-chāi sī sèng-tōe. ⁶ Koh kóng, Góa sī lí ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè. Mô͘-se jia i ê bīn; m̄-káⁿ khòaⁿ Siōng-tè. ⁷ Iâ-hô-hoa kóng, Góa ê peh-sìⁿ khiā-khí tī Ai-ki̍p ê, in ê khùn-khó͘ Góa si̍t-chāi í-keng khòaⁿ-kìⁿ lah; in ūi-tio̍h tok-kang-ê lâi âu-kiò, Góa í-keng thiaⁿ-kìⁿ lah; Góa pún chai in ê thòng-khó͘. ⁸ Taⁿ Góa lo̍h-lâi beh kiù in thoat-lī Ai-ki̍p lâng ê chhiú, chhōa in chhut hit-ê tōe, kàu pûi-súi khui-khoah ê tōe, kàu lâu lin kap bi̍t ê tōe, chiū-sī Ka-lâm, Hek, A-mô͘-lī, Pí-lī-sé, Hi-bī, Iâ-pò͘-su, hiah-ê cho̍k ê só͘-chāi. ⁹ Taⁿ Í-sek-lia̍t lâng âu-kiò ê siaⁿ kàu hō͘ Góa thiaⁿ-kìⁿ; Góa iā khòaⁿ-kìⁿ Ai-ki̍p lâng khó͘-chhó͘ in ê kan-khó͘. ¹⁰ Taⁿ lí lâi, Góa beh chhe lí khì kìⁿ Hoat-ló, chhōa Góa ê peh-sìⁿ Í-sek-lia̍t lâng chhut Ai-ki̍p. ¹¹ Mô͘-se tùi Siōng-tè kóng, Góa sī sím-mi̍h lâng thang khì kìⁿ Hoat-ló, chhōa Í-sek-lia̍t lâng chhut Ai-ki̍p ah? ¹² I kóng, Góa si̍t-chāi beh kap lí tī-teh; lí chhōa peh-sìⁿ chhut Ai-ki̍p liáu-āu, lín beh tī chit-ê soaⁿ ho̍k-sāi Siōng-tè; che beh chòe Góa chhe lí ê chèng-kù. ¹³ Mô͘-se tùi Siōng-tè kóng, Khòaⁿ ah, góa kàu Í-sek-lia̍t lâng hia, tùi in kóng, Lín chó͘-kong ê Siōng-tè chhe góa lâi lín chia; in nā mn̄g góa kóng, I kiò sím-mi̍h miâ? góa beh kā in kóng sím-mi̍h ah? ¹⁴ Siōng-tè tùi Mô͘-se kóng, Góa sī Chū-jiân Jî-jiân-ê; koh kóng, Lí tio̍h kā Í-sek-lia̍t lâng án-ni kóng, Chū-jiân-ê chhe góa kàu lín chia. ¹⁵ Siōng-tè koh tùi Mô͘-se kóng, Lí tio̍h tùi Í-sek-lia̍t lâng án-ni kóng, Chhe góa kàu lín chia ê, chiū-sī Iâ-hô-hoa, lín chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè; che sī Góa éng-oán ê miâ, che sī Góa ê kì-liām kàu bān-tāi. ¹⁶ Lí khì chio-chi̍p Í-sek-lia̍t ê tiúⁿ-ló, kā in kóng, Iâ-hô-hoa, lín chó͘-kong ê Siōng-tè, chiū-sī A-pek-la̍h-hán, Í-sat, Ngá-kok ê Siōng-tè, tùi góa chhut-hiān, kóng, Góa si̍t-chāi koàn-kò͘ lín, lâng tī Ai-ki̍p só͘ khoán-thāi lín ê, Góa iā ū khòaⁿ-kìⁿ. ¹⁷ Góa iā bat kóng, Góa beh chhōa lín chhut Ai-ki̍p ê kan-khó͘, kàu Ka-lâm, Hek, A-mô͘-lī, Pí-lī-sé, Hi-bī, Iâ-pò͘-su, hiah-ê cho̍k ê tōe, kàu lâu lin kap bi̍t ê tōe. ¹⁸ In beh thiaⁿ lí ê ōe; lí kap Í-sek-lia̍t ê tiúⁿ-ló tio̍h khì kìⁿ Ai-ki̍p ông, kā i kóng, Hi-pek-lâi lâng ê Siōng-tè Iâ-hô-hoa í-keng tú-tio̍h goán; taⁿ kiû lí iông-ún goán khì khòng-iá, kiâⁿ saⁿ-ji̍t ê lō͘-chām, beh chè-sū Iâ-hô-hoa, goán ê Siōng-tè. ¹⁹ Góa chai sui-jiân ēng tōa koân-lêng ê chhiú, Ai-ki̍p ông iā m̄ hō͘ lín khì. ²⁰ Góa beh chhun Góa ê chhiú, ēng Góa tī Ai-ki̍p-tiong só͘ beh kiâⁿ it-chhè ê kî-sū lâi phah i; jiân-āu i chiah chún lín khì. ²¹ Góa beh hō͘ chit-ê peh-sìⁿ tit-tio̍h un-tián tī Ai-ki̍p lâng ê bīn-chêng, hō͘ lín chhut-khì ê sî, bô khang-chhiú khì; ²² chiah-ê hū-jîn-lâng ta̍k-ê beh tùi i ê chhù-piⁿ kap tòa tī i ê ke-lāi ê hū-jîn-lâng thó gûn-khì, kim-khì, kap i-ho̍k, thang hō͘ lí ê kiáⁿ cha-bó͘-kiáⁿ ēng; án-ni lín beh chhiúⁿ Ai-ki̍p lâng.

=== 出埃及記 · 第 4 章 ===

¹ 摩西應講，看ah，in beh m̄信我，也m̄聽我ê話；因為in beh講：耶和華bē-bat對你出現。 ² 耶和華對伊講，Tī你手裡是甚麼？伊講：是柺á。 ³ 講：Hiat tī地裡。伊一下hiat tī地裡，就變做蛇；摩西就走閃伊。 ⁴ 耶和華對摩西講：伸你ê手掠伊ê尾；(就伸手掠伊，tī手中猶原變做柺á；) ⁵ án-ni thang hō͘ in信耶和華，in ê祖公ê上帝，亞伯拉罕ê上帝，以撒ê上帝，雅各ê上帝，有對你出現。 ⁶ 耶和華koh對伊講，Hē你ê手tī你ê胸前。就下手tī胸前；抽出來ê時，看ah，手已經thái-ko，白親像雪。 ⁷ Koh講：Koh hē你ê手tī你ê胸前。(伊就hē tī伊ê胸前；抽出來ê時，看ah，已經照原，kap thong身軀ê肉無各樣。) ⁸ Koh講：設使in無beh信你，也無beh聽頭一个神蹟，就beh信第二個神蹟。 ⁹ Hit兩個神蹟in若lóng m̄信，也m̄聽你ê話，你tio̍h tùi河裡iúⁿ水，倒tī乾地；你tùi河裡所iúⁿ ê水beh tī乾地變做血。 ¹⁰ 摩西對耶和華講：主ah，我平素m̄是能講話ê人，對祢kā祢ê奴僕講話ê了後也是án-ni；我是嘴舌鈍ê人。 ¹¹ 耶和華對伊講，創造人ê嘴是是誰 ah？hō͘人啞口、臭耳人、目睭金、chhiⁿ-mî ê，是是誰 ah？kiám-m̄是我耶和華mah？ ¹² Taⁿ你去ah，我beh賞賜你口才，教示你所應該講ê。 ¹³ 伊講：主ah，你合意差是誰，就差伊去。 ¹⁴ 耶和華對摩西發出受氣，講：Kiám-m̄是有你ê兄，利未人，亞倫mah？我知伊是能講話ê人。Koh伊taⁿ出來迎接你；伊一下看見你心內就歡喜。 ¹⁵ 你tio̍h對伊講，用所應該講ê話傳hō͘伊；我也beh賞賜你kap伊有口才，koh beh教示lín所應該行ê事。 ¹⁶ 伊beh替你對百姓講話；伊beh對你準做嘴，你beh對伊準做上帝。 ¹⁷ 你ê手tio̍h kia̍h chit支柺á，用伊來行神蹟。 ¹⁸ Tùi án-ni，摩西就去，tò去伊ê丈人Ia̍p-thek-lô hia，kā伊講：求你容允我tò去，看我ê兄弟tī埃及ê，看in iáu tī-teh á無。Ia̍p-thek-lô kā摩西講：你thang安然去lah。 ¹⁹ 耶和華tī米甸對摩西講：你去tò去埃及，因為ài 害你ê性命ê人lóng死lah。 ²⁰ 摩西帶伊ê bó͘ kap兩個kiáⁿ，hō͘ in騎驢，tò去埃及地；摩西手裡kia̍h上帝ê柺á。 ²¹ 耶和華對摩西講：你tò去埃及ê時，tio̍h注意將我所交tī你ê手一切ê奇事行tī法老ê面前；總是我beh hō͘伊ê心硬，伊也無beh放chitê百姓去。 ²² 你tio̍h kā法老講：耶和華án-ni講：以色列是我ê kiáⁿ，就是我ê大kiáⁿ； ²³ 我bat對你講，Tio̍h tháu放我ê kiáⁿ去，thang服事我；你也m̄准伊去；看ah，我beh 刣死你ê kiáⁿ，就是你ê大kiáⁿ。 ²⁴ 摩西tī路裡，tī客店，耶和華tú-tio̍h伊，beh hō͘伊死。 ²⁵ Se-pho-la̍h就the̍h一塊利石，割伊ê kiáⁿ陽物ê皮，hiat tī伊ê腳前，講：你是我血ê丈夫。 ²⁶ 耶和華就放伊soah。婦人人講：你是血ê丈夫，因為割禮ê緣故。 ²⁷ 耶和華kā亞倫講：你去曠野迎接摩西。伊就去，tī上帝ê山tú-tio̍h伊，就kā伊chim。 ²⁸ 摩西將耶和華差伊講ê話，kap吩咐伊行ê神蹟，lóng kā亞倫講。 ²⁹ 摩西、亞倫就去招集以色列人眾長老； ³⁰ 亞倫將耶和華對摩西所講ê話lóng講伊，koh tī百姓ê面前行hiahê神蹟。 ³¹ 百姓就信；in聽見耶和華眷顧以色列人，koh看in ê艱苦，就àⁿ頭敬拜。

=== 出埃及記 · 第 4 章 ===

¹ Mô͘-se ìn kóng, Khòaⁿ ah, in beh m̄-sìn góa, iā m̄-thiaⁿ góa ê ōe; in-ūi in beh kóng, Iâ-hô-hoa bē-bat tùi lí chhut-hiān. ² Iâ-hô-hoa tùi i kóng, Tī lí chhiú-ni̍h sī sím-mi̍h? I kóng, Sī koáiⁿ-á. ³ Kóng, Hiat tī tōe-ni̍h. I chi̍t-ē hiat tī tōe-ni̍h, chiū pìⁿ-chòe chôa; Mô͘-se chiū cháu-siám i. ⁴ Iâ-hô-hoa tùi Mô͘-se kóng, Chhun lí ê chhiú lia̍h i ê bé; (chiū chhun-chhiú lia̍h i, tī chhiú-tiong iû-goân pìⁿ-chòe koáiⁿ-á;) ⁵ án-ni thang hō͘ in sìn Iâ-hô-hoa, in ê chó͘-kong ê Siōng-tè, A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè, ū tùi lí chhut-hiān. ⁶ Iâ-hô-hoa koh tùi i kóng, Hē lí ê chhiú tī lí ê heng-chêng. Chiū hē chhiú tī heng-chêng; thiu-chhut-lâi ê sî, khòaⁿ ah, chhiú í-keng thái-ko, pe̍h chhin-chhiūⁿ seh. ⁷ Koh kóng, Koh hē lí ê chhiú tī lí ê heng-chêng. (I chiū hē tī i ê heng-chêng; thiu-chhut-lâi ê sî, khòaⁿ ah, í-keng chiàu-goân, kap thong seng-khu ê bah bô koh-iūⁿ.) ⁸ Koh kóng, Siat-sú in bô beh sìn lí, iā bô beh thiaⁿ thâu-chi̍t ê sîn-jiah, chiū beh sìn tē-jī ê sîn-jiah. ⁹ Hit nn̄g ê sîn-jiah in nā lóng m̄-sìn, iā m̄-thiaⁿ lí ê ōe, lí tio̍h tùi hô-ni̍h iúⁿ chúi, tò tī ta-tōe; lí tùi hô-ni̍h só͘ iúⁿ ê chúi beh tī ta-tōe pìⁿ-chòe huih. ¹⁰ Mô͘-se tùi Iâ-hô-hoa kóng, Chú ah, góa pêng-sò͘ m̄-sī ōe kóng-ōe ê lâng, tùi Lí kā Lí ê lô͘-po̍k kóng-ōe ê liáu-āu iā sī án-ni; góa sī chhùi-chi̍h tun ê lâng. ¹¹ Iâ-hô-hoa tùi i kóng, Chhòng-chō lâng ê chhùi sī chī-chūi ah? hō͘ lâng é-káu, chhàu-hī-lâng, ba̍k-chiu kim, chhiⁿ-mî ê, sī chī-chūi ah? kiám-m̄-sī Góa Iâ-hô-hoa mah? ¹² Taⁿ lí khì ah, Góa beh siúⁿ-sù lí kháu-châi, kà-sī lí só͘ eng-kai kóng-ê. ¹³ I kóng, Chú ah, Lí ha̍p-ì chhe chī-chūi, chiū chhe i khì. ¹⁴ Iâ-hô-hoa tùi Mô͘-se hoat-chhut siū-khì, kóng, Kiám-m̄-sī ū lí ê hiaⁿ, Lī-bī-lâng, A-lûn mah? Góa chai i sī ōe kóng-ōe ê lâng. Koh i taⁿ chhut-lâi ngiâ-chih lí; i chi̍t-ē khòaⁿ-kìⁿ lí sim-lāi chiū hoaⁿ-hí. ¹⁵ Lí tio̍h tùi i kóng, ēng só͘ eng-kai kóng ê ōe thoân hō͘ i; Góa iā beh siúⁿ-sù lí kap i ū kháu-châi, koh beh kà-sī lín só͘ eng-kai kiâⁿ ê sū. ¹⁶ I beh thòe lí tùi peh-sìⁿ kóng-ōe; i beh tùi lí chún-chòe chhùi, lí beh tùi i chún-chòe Siōng-tè. ¹⁷ Lí ê chhiú tio̍h kia̍h chi̍t ki koáiⁿ-á, ēng i lâi kiâⁿ sîn-jiah. ¹⁸ Tùi án-ni Mô͘-se chiū khì, tò-khì i ê tiūⁿ-lâng Ia̍p-thek-lô hia, kā i kóng, Kiû lí iông-ún góa tò-khì, khòaⁿ góa ê hiaⁿ-tī tī Ai-ki̍p ê, khòaⁿ in iáu tī-teh á-bô. Ia̍p-thek-lô kā Mô͘-se kóng, Lí thang an-jiân khì lah. ¹⁹ Iâ-hô-hoa tī Bí-tiân tùi Mô͘-se kóng, Lí khì tò-khì Ai-ki̍p, in-ūi ài hāi lí ê sìⁿ-miā ê lâng lóng sí lah. ²⁰ Mô͘-se tòa i ê bó͘ kap nn̄g ê kiáⁿ, hō͘ in khiâ-lû, tò-khì Ai-ki̍p tōe; Mô͘-se chhiú-ni̍h kia̍h Siōng-tè ê koáiⁿ-á. ²¹ Iâ-hô-hoa tùi Mô͘-se kóng, Lí tò-khì Ai-ki̍p ê sî, tio̍h chù-ì chiong Góa só͘ kau tī lí ê chhiú it-chhè ê kî-sū kiâⁿ tī Hoat-ló ê bīn-chêng; chóng-sī Góa beh hō͘ i ê sim ngī, i iā bô beh pàng chit-ê peh-sìⁿ khì. ²² Lí tio̍h kā Hoat-ló kóng, Iâ-hô-hoa án-ni kóng, Í-sek-lia̍t sī Góa ê kiáⁿ, chiū-sī Góa ê tōa-kiáⁿ; ²³ Góa bat tùi lí kóng, Tio̍h tháu-pàng Góa ê kiáⁿ khì, thang ho̍k-sāi Góa; lí iā m̄-chún i khì; khòaⁿ ah, Góa beh thâi-sí lí ê kiáⁿ, chiū-sī lí ê tōa-kiáⁿ. ²⁴ Mô͘-se tī lō͘-ni̍h, tī kheh-tiàm, Iâ-hô-hoa tú-tio̍h i, beh hō͘ i sí. ²⁵ Se-pho-la̍h chiū the̍h chi̍t tè lāi-chio̍h, koah i ê kiáⁿ iông-bu̍t ê phê, hiat tī i ê kha-chêng, kóng, Lí sī góa huih ê tiōng-hu. ²⁶ Iâ-hô-hoa chiū pàng i soah. Hū-jîn-lâng kóng, Lí sī huih ê tiōng-hu, in-ūi kat-lé ê iân-kò͘. ²⁷ Iâ-hô-hoa kā A-lûn kóng, Lí khì khòng-iá ngiâ-chih Mô͘-se. I chiū khì, tī Siōng-tè ê soaⁿ tú-tio̍h i, chiū kā i chim. ²⁸ Mô͘-se chiong Iâ-hô-hoa chhe i kóng ê ōe, kap hoan-hù i kiâⁿ ê sîn-jiah, lóng kā A-lûn kóng. ²⁹ Mô͘-se, A-lûn chiū khì chio-chi̍p Í-sek-lia̍t lâng chèng tiúⁿ-ló; ³⁰ A-lûn chiong Iâ-hô-hoa tùi Mô͘-se só͘ kóng ê ōe lóng kóng i, koh tī peh-sìⁿ ê bīn-chêng kiâⁿ hiah-ê sîn-jiah. ³¹ Peh-sìⁿ chiū sìn; in thiaⁿ-kìⁿ Iâ-hô-hoa koàn-kò͘ Í-sek-lia̍t lâng, koh khòaⁿ in ê kan-khó͘, chiū àⁿ-thâu kèng-pài.

=== 出埃及記 · 第 5 章 ===

¹ 後來摩西、亞倫入去，kā法老講：以色列ê上帝耶和華án-ni講：准我ê百姓去，in thang tī曠野為我守節。 ² 法老講：耶和華是是誰 hō͘我tio̍h聽伊ê話，准以色列人去ah？我m̄-bat耶和華，也m̄准以色列人去。 ³ In講：希伯來人ê上帝tú-tio̍h阮；求你准阮去曠野行三日ê路，祭祀耶和華阮ê上帝，驚了伊用瘟疫、刀劍臨到阮。 ⁴ 埃及王對in講：摩西、亞倫，lín啥事hō͘百姓荒廢in ê工 ah？lín去擔lín ê擔lah。 ⁵ 法老講：看ah，chit所在ê百姓現在真chōe，lín竟然hō͘ in soah in ê擔擔。 ⁶ 當hit日法老吩咐百姓ê督工ê kap in ê頭目，講： ⁷ Lín m̄-thang照舊用草hō͘ chitê百姓做磚；hō͘ in去家己拾草。 ⁸ In前做磚ê數額，lín猶原hō͘ in án-ni做，m̄-thang小khóa減少；因為in pîn-tōaⁿ，所以喉叫講：准阮去祭祀阮ê上帝。 ⁹ Lín tio̍h用khah重ê工 hō͘ in做，hō͘ in tio̍h磨；無去聽無影話。 ¹⁰ 百姓ê督工ê kap in ê頭目出去kā百姓講：法老án-ni講：我m̄用草hō͘ lín。 ¹¹ Lín看tah-lo̍h有草，就家己去hia拾；總是lín ê工 lóng bōe少得。 ¹² Tùi án-ni，百姓四散遍埃及地，拾草á幼來做草。 ¹³ 督工ê逼in講：Lín日日tio̍h做完lín ê工 kap以前有草無各樣。 ¹⁴ 法老督工ê phah伊所派管理以色列人ê頭目，講：Lín昨日今á日怎樣無做完lín ê工，照從前ê數額做磚ah？ ¹⁵ 以色列人ê頭目來對法老求叫，講：啥事án-ni款待你ê奴僕？ ¹⁶ 無用草hō͘你ê奴僕，koh kā阮講：tio̍h做磚；看ah，你ê奴僕受phah；實在是你ê百姓ê過失。 ¹⁷ 伊講：Lín pîn-tōaⁿ，lín pîn-tōaⁿ；所以lín講：准阮去祭祀耶和華。 ¹⁸ Taⁿ lín去做工，草m̄ hō͘ lín，總是磚 tio̍h照額來交。 ¹⁹ 以色列人ê頭目聽見講：日日做磚 ê額bōe-thang減少，就知害 lah。 ²⁰ In離開法老出來，tú-tio̍h摩西、亞倫khiā tī in ê頭前，就對in講： ²¹ 願耶和華鑑察lín，審判lín；因為lín hō͘阮tī法老ê面前kap伊ê人臣ê面前有臭名，用刀hē tī in ê手來刣阮。 ²² 摩西倒tńg去耶和華hia，講：主ah，你啥事pháiⁿ款待chitê百姓？啥事差我？ ²³ 因為tùi我見法老，託你ê名來講ê時，伊就pháiⁿ款待chitê百姓；你也lóng無救你ê百姓。

=== 出埃及記 · 第 5 章 ===

¹ Āu-lâi Mô͘-se, A-lûn ji̍p-khì, kā Hoat-ló kóng, Í-sek-lia̍t ê Siōng-tè Iâ-hô-hoa án-ni kóng, Chún Góa ê peh-sìⁿ khì, in thang tī khòng-iá ūi Góa siú-choeh. ² Hoat-ló kóng, Iâ-hô-hoa sī chī-chūi hō͘ góa tio̍h thiaⁿ I ê ōe, chún Í-sek-lia̍t lâng khì ah? Góa m̄-bat Iâ-hô-hoa, iā m̄-chún Í-sek-lia̍t lâng khì. ³ In kóng, Hi-pek-lâi lâng ê Siōng-tè tú-tio̍h goán; kiû lí chún goán khì khòng-iá kiâⁿ saⁿ ji̍t ê lō͘, chè-sū Iâ-hô-hoa goán ê Siōng-tè, kiaⁿ-liáu I ēng un-e̍k to-kiàm lîm-kàu goán. ⁴ Ai-ki̍p ông tùi in kóng, Mô͘-se, A-lûn, lín siáⁿ-sū hō͘ peh-sìⁿ hong-hòe in ê kang ah? lín khì taⁿ lín ê tàⁿ lah. ⁵ Hoat-ló kóng, Khòaⁿ ah, chit só͘-chāi ê peh-sìⁿ hiān-chāi chin-chōe, lín kéng-jiân hō͘ in soah in ê taⁿ-tàⁿ. ⁶ Tng hit-ji̍t Hoat-ló hoan-hù peh-sìⁿ ê tok-kang-ê kap in ê thâu-ba̍k, kóng, ⁷ Lín m̄-thang chiàu-kū ēng chháu hō͘ chit-ê peh-sìⁿ chòe chng; hō͘ in khì ka-kī khioh chháu. ⁸ In chêng chòe chng ê siàu-gia̍h, lín iû-goân hō͘ in án-ni chòe, m̄-thang sió-khóa kiám-chió; in-ūi in pîn-tōaⁿ, só͘-í âu-kiò kóng, Chún goán khì chè-sū goán ê Siōng-tè. ⁹ Lín tio̍h ēng khah-tāng ê kang hō͘ in chòe, hō͘ in tio̍h-bôa; bô khì thiaⁿ bô-iáⁿ ōe. ¹⁰ Peh-sìⁿ ê tok-kang-ê kap in ê thâu-ba̍k chhut-khì kā peh-sìⁿ kóng, Hoat-ló án-ni kóng, Góa m̄ ēng chháu hō͘ lín. ¹¹ Lín khòaⁿ tah-lo̍h ū chháu, chiū ka-kī khì hia khioh; chóng-sī lín ê kang lóng bōe chió-tit. ¹² Tùi án-ni peh-sìⁿ sì-sòaⁿ piàn Ai-ki̍p tōe, khioh chháu-á-iù lâi chòe chháu. ¹³ Tok-kang-ê pek in kóng, Lín ji̍t-ji̍t tio̍h chòe-oân lín ê kang kap í-chêng ū chháu bô koh-iūⁿ. ¹⁴ Hoat-ló tok-kang-ê phah i só͘ phài koán-lí Í-sek-lia̍t lâng ê thâu-ba̍k, kóng, Lín chā-ji̍t kin-á-ji̍t cháiⁿ-iūⁿ bô chòe-oân lín ê kang, chiàu chiông-chêng ê siàu-gia̍h chòe chng ah? ¹⁵ Í-sek-lia̍t lâng ê thâu-ba̍k lâi tùi Hoat-ló kiû-kiò, kóng, Siáⁿ-sū án-ni khoán-thāi lí ê lô͘-po̍k? ¹⁶ Bô ēng chháu hō͘ lí ê lô͘-po̍k, koh kā goán kóng, Tio̍h chòe-chng; khòaⁿ ah, lí ê lô͘-po̍k siū-phah; si̍t-chāi sī lí ê peh-sìⁿ ê kè-sit. ¹⁷ I kóng, Lín pîn-tōaⁿ, lín pîn-tōaⁿ; só͘-í lín kóng, Chún goán khì chè-sū Iâ-hô-hoa. ¹⁸ Taⁿ lín khì chòe-kang, chháu m̄ hō͘ lín, chóng-sī chng tio̍h chiàu-gia̍h lâi kau. ¹⁹ Í-sek-lia̍t lâng ê thâu-ba̍k thiaⁿ-kìⁿ kóng, Ji̍t-ji̍t chòe chng ê gia̍h bōe thang kiám-chió, chiū chai hāi lah. ²⁰ In lī-khui Hoat-ló chhut-lâi, tú-tio̍h Mô͘-se, A-lûn khiā tī in ê thâu-chêng, chiū tùi in kóng, ²¹ Goān Iâ-hô-hoa kàm-chhat lín, sím-phòaⁿ lín; in-ūi lín hō͘ goán tī Hoat-ló ê bīn-chêng kap i ê jîn-sîn ê bīn-chêng ū chhàu-miâ, ēng to hē tī in ê chhiú lâi thâi goán. ²² Mô͘-se tò-tńg-khì Iâ-hô-hoa hia, kóng, Chú ah, Lí siáⁿ-sū pháiⁿ khoán-thāi chit-ê peh-sìⁿ? siáⁿ-sū chhe góa? ²³ In-ūi tùi góa kìⁿ Hoat-ló, thok Lí ê miâ lâi kóng ê sî, i chiū pháiⁿ khoán-thāi chit-ê peh-sìⁿ; Lí iā lóng bô kiù Lí ê peh-sìⁿ.

=== 出埃及記 · 第 6 章 ===

¹ 耶和華對摩西講：我所beh行tī法老ê，taⁿ你beh看見；因為用權能ê手，伊beh准in去，koh用權能ê手，伊beh趕in出伊ê地。 ² 上帝koh對摩西講：我就是耶和華； ³ 我名做全能ê上帝出現tī亞伯拉罕、以撒、雅各，總是我ê名做耶和華，我未有hō͘ in bat我。 ⁴ 我koh kap in立我堅固ê約，beh將in所出外ê迦南地賞賜in，就是in寄腳ê地。 ⁵ 我也聽見以色列人hiⁿ-hiⁿ-chhan，就是埃及人督in做苦工；我也記念我ê約。 ⁶ 所以你tio̍h kā以色列人講：我是耶和華；我beh tùi埃及人所hō͘ lín taⁿ ê重擔chhōa lín出來，koh beh救lín脫離in所hō͘ lín做ê苦工。我也beh用伸出ê手kap大ê審判救贖lín。 ⁷ 我也beh掠lín做我ê百姓，我也beh做lín ê上帝；lín beh知我是耶和華，lín ê上帝，是tùi埃及人所hō͘ lín擔ê重擔chhōa lín出來。 ⁸ 我chiù-chōa應允beh hō͘亞伯拉罕、以撒、雅各hitê地，我beh chhōa lín入去hia，將hitê地賞賜lín做業；我是耶和華。 ⁹ 摩西將chitê kā以色列人講；總是in為tio̍h心內憂悶，也做苦工，m̄肯聽摩西。 ¹⁰ 耶和華吩咐摩西講： ¹¹ 你入去kā埃及王法老講：tio̍h 准以色列人出伊ê地。 ¹² 摩西tī耶和華ê面前講：看ah，以色列人尚且m̄聽我，法老thái-thó beh聽我chitê嘴舌鈍ê人ah？ ¹³ 耶和華吩咐摩西、亞倫tio̍h傳命hō͘以色列人kap埃及王法老，thang chhōa以色列人出埃及地。 ¹⁴ 以色列chiahê房長ê名記tī下底；以色列大kiáⁿ Liû-piān ê kiáⁿ；Hap-lo̍k、Hoat-lō͘、Hi-su-lûn、Ka-bí；chiahê是Liû-piān hiahê家。 ¹⁵ 西門ê kiáⁿ；Iâ-bó͘-lī、Ngá-bín、O-hat、Ngá-kun、Só-hat，以及迦南地ê cha-bó͘-kiáⁿ所生ê掃羅；chiahê是西門hiahê家。 ¹⁶ 利未chiahê kiáⁿ ê名照in ê世系記tī下底；Kek-sūn、Ko-hat、Bí-la̍h-lī；利未享壽一百三十七歲。 ¹⁷ Kek-sūn ê kiáⁿ，照in ê家族；Li̍p-nî，Sī-múi。 ¹⁸ Ko-hat ê kiáⁿ；Àm-lân、Í-su-hap、Hi-pek-lûn、O͘-siat；Ko-hat享壽一百三十三歲。 ¹⁹ Bí-la̍h-lī ê kiáⁿ；Boa̍t-lī、Bó͘-sī。Chiahê是利未hiahê家，照in ê世系。 ²⁰ Àm-lân娶伊ê 姑，Iok-ki-piat，做bó͘；伊kā伊生亞倫kap摩西；Àm-lân享壽一百三十七歲。 ²¹ Í-su-hap ê kiáⁿ；Khó-la̍h、Nî-húi、Sè-ki-lī。 ²² O͘-siat ê kiáⁿ；Bí-sa-lī、Í-lī-sat-hoán、Se-thê-lī。 ²³ 亞倫娶A-bí-ná-ta̍t ê cha-bó͘-kiáⁿ，Ná-sūn ê小妹，以利沙巴做bó͘；伊kā伊生Ná-tap、A-pí-hō͘、Í-lī-a-sat、Í-tha-má。 ²⁴ Khó-la̍h ê kiáⁿ；A-sek、Í-lī-ka-ná、A-pí-a-sat；chiahê是Khó-la̍h hiahê家。 ²⁵ 亞倫ê kiáⁿ Í-lī-a-sat娶Phó͘-thiat一个cha-bó͘-kiáⁿ做bó͘；伊kā伊生Hui-nî-hap。 Chiahê是利未人ê房長，照in ê 家族。 ²⁶ Chitê亞倫、摩西就是耶和華對in講：Tio̍h chhōa以色列人照in ê軍隊出埃及地ê。 ²⁷ 對埃及王，法老，講beh chhōa以色列人出埃及ê，就是chitê摩西、亞倫。 ²⁸ 當耶和華tī埃及地對摩西講話ê日， ²⁹ 耶和華對摩西講：我就是耶和華；我對你所講一切ê話，你lóng tio̍h kā埃及王法老講。 ³⁰ 摩西tī耶和華ê面前講：看ah，我是嘴舌鈍ê人，法老thái-thó beh聽我ah？

=== 出埃及記 · 第 6 章 ===

¹ Iâ-hô-hoa tùi Mô͘-se kóng, Góa só͘ beh kiâⁿ tī Hoat-ló-ê, taⁿ lí beh khòaⁿ-kìⁿ; in-ūi ēng koân-lêng ê chhiú, i beh chún in khì, koh ēng koân-lêng ê chhiú, i beh kóaⁿ in chhut i ê tōe. ² Siōng-tè koh tùi Mô͘-se kóng, Góa chiū-sī Iâ-hô-hoa; ³ Góa miâ chòe choân-lêng ê Siōng-tè chhut-hiān tī A-pek-la̍h-hán, Í-sat, Ngá-kok, chóng-sī Góa ê miâ chòe Iâ-hô-hoa Góa bē ū hō͘ in bat Góa. ⁴ Góa koh kap in li̍p Góa kian-kò͘ ê iok, beh chiong in só͘ chhut-gōa ê Ka-lâm tōe siúⁿ-sù in, chiū-sī in kià-kha ê tōe. ⁵ Góa iā thiaⁿ-kìⁿ Í-sek-lia̍t lâng hiⁿ-hiⁿ-chhan, chiū-sī Ai-ki̍p lâng tok in chòe khó͘-kang; Góa iā kì-liām Góa ê iok. ⁶ Só͘-í lí tio̍h kā Í-sek-lia̍t lâng kóng, Góa sī Iâ-hô-hoa; Góa beh tùi Ai-ki̍p lâng só͘ hō͘ lín taⁿ ê tāng-tàⁿ chhōa lín chhut-lâi, koh beh kiù lín thoat-lī in só͘ hō͘ lín chòe ê khó͘-kang. Góa iā beh ēng chhun-chhut ê chhiú kap tōa ê sím-phòaⁿ kiù-sio̍k lín. ⁷ Góa iā beh lia̍h lín chòe Góa ê peh-sìⁿ, Góa iā beh chòe lín ê Siōng-tè; lín beh chai Góa sī Iâ-hô-hoa, lín ê Siōng-tè, sī tùi Ai-ki̍p lâng só͘ hō͘ lín taⁿ ê tāng-tàⁿ chhōa lín chhut-lâi. ⁸ Góa chiù-chōa èng-ún beh hō͘ A-pek-la̍h-hán, Í-sat, Ngá-kok hit-ê tōe, Góa beh chhōa lín ji̍p khì hia, chiong hit-ê tōe siúⁿ-sù lín chòe gia̍p; Góa sī Iâ-hô-hoa. ⁹ Mô͘-se chiong chit-ê kā Í-sek-lia̍t lâng kóng; chóng-sī in ūi-tio̍h sim-lāi iu-būn, iā chòe khó͘-kang, m̄-khéng thiaⁿ Mô͘-se. ¹⁰ Iâ-hô-hoa hoan-hù Mô͘-se kóng, ¹¹ Lí ji̍p-khì kā Ai-ki̍p ông Hoat-ló kóng, tio̍h chún Í-sek-lia̍t lâng chhut i ê tōe. ¹² Mô͘-se tī Iâ-hô-hoa ê bīn-chêng kóng, Khòaⁿ ah, Í-sek-lia̍t lâng siōng-chhiáⁿ m̄-thiaⁿ góa, Hoat-ló thái-thó beh thiaⁿ góa chit-ê chhùi-chi̍h tun ê lâng ah? ¹³ Iâ-hô-hoa hoan-hù Mô͘-se, A-lûn tio̍h thoân-bēng hō͘ Í-sek-lia̍t lâng kap Ai-ki̍p ông Hoat-ló, thang chhōa Í-sek-lia̍t lâng chhut Ai-ki̍p tōe. ¹⁴ Í-sek-lia̍t chiah-ê pâng-tiúⁿ ê miâ kì tī ē-tóe; Í-sek-lia̍t tōa-kiáⁿ Liû-piān ê kiáⁿ; Hap-lo̍k, Hoat-lō͘, Hi-su-lûn, Ka-bí; chiah-ê sī Liû-piān hiah-ê ke. ¹⁵ Se-biān ê kiáⁿ; Iâ-bó͘-lī, Ngá-bín, O-hat, Ngá-kun, Só-hat, í-ki̍p Ka-lâm tōe ê cha-bó͘-kiáⁿ só͘ siⁿ ê Sò-lô; chiah-ê sī Se-biān hiah-ê ke. ¹⁶ Lī-bī chiah-ê kiáⁿ ê miâ chiàu in ê sè-hē kì tī ē-tóe; Kek-sūn, Ko-hat, Bí-la̍h-lī; Lī-bī hióng-siū chi̍t-pah saⁿ-cha̍p-chhit hè. ¹⁷ Kek-sūn ê kiáⁿ, chiàu in ê ka-cho̍k; Li̍p-nî, Sī-múi. ¹⁸ Ko-hat ê kiáⁿ; Àm-lân, Í-su-hap, Hi-pek-lûn, O͘-siat; Ko-hat hióng-siū chi̍t-pah saⁿ-cha̍p-saⁿ hè. ¹⁹ Bí-la̍h-lī ê kiáⁿ; Boa̍t-lī, Bó͘-sī. Chiah-ê sī Lī-bī hiah-ê ke, chiàu in ê sè-hē. ²⁰ Àm-lân chhōa i ê ko͘, Iok-ki-pia̍t, chòe-bó͘; i kā i siⁿ A-lûn kap Mô͘-se; Àm-lân hióng-siū chi̍t-pah saⁿ-cha̍p-chhit hè. ²¹ Í-su-hap ê kiáⁿ; Khó-la̍h, Nî-húi, Sè-ki-lī. ²² O͘-siat ê kiáⁿ; Bí-sa-lī, Í-lī-sat-hoán, Se-thê-lī. ²³ A-lûn chhōa A-bí-ná-ta̍t ê cha-bó͘-kiáⁿ, Ná-sūn ê sió-bē, Í-lī-sa-pa chòe bó͘; i kā i siⁿ Ná-tap, A-pí-hō͘, Í-lī-a-sat, Í-tha-má. ²⁴ Khó-la̍h ê kiáⁿ; A-sek, Í-lī-ka-ná, A-pí-a-sat; chiah-ê sī Khó-la̍h hiah-ê ke. ²⁵ A-lûn ê kiáⁿ Í-lī-a-sat chhōa Phó͘-thiat chi̍t ê cha-bó͘-kiáⁿ chòe-bó͘; i kā i siⁿ Hui-nî-hap. Chiah-ê sī Lī-bī lâng ê pâng-tiúⁿ, chiàu in ê ka-cho̍k. ²⁶ Chit-ê A-lûn Mô͘-se chiū-sī Iâ-hô-hoa tùi in kóng, Tio̍h chhōa Í-sek-lia̍t lâng chiàu in ê kun-tūi chhut Ai-ki̍p tōe ê. ²⁷ Tùi Ai-ki̍p ông, Hoat-ló, kóng beh chhōa Í-sek-lia̍t lâng chhut Ai-ki̍p ê, chiū-sī chit-ê Mô͘-se, A-lûn. ²⁸ Tng Iâ-hô-hoa tī Ai-ki̍p tōe tùi Mô͘-se kóng-ōe ê ji̍t, ²⁹ Iâ-hô-hoa tùi Mô͘-se kóng, Góa chiū-sī Iâ-hô-hoa; Góa tùi lí só͘ kóng it-chhè ê ōe, lí lóng tio̍h kā Ai-ki̍p ông Hoat-ló kóng. ³⁰ Mô͘-se tī Iâ-hô-hoa ê bīn-chêng kóng, Khòaⁿ ah, góa sī chhùi-chi̍h tun ê lâng, Hoat-ló thái-thó beh thiaⁿ góa ah?

=== 出埃及記 · 第 7 章 ===

¹ 耶和華對摩西講：看ah，我hō͘你tùi-tī法老做上帝；你ê兄亞倫beh做你ê先知。 ² 見若我所吩咐你ê，你lóng tio̍h講伊；你ê兄亞倫tio̍h對法老講：hō͘伊准以色列人出伊ê地。 ³ 我beh hō͘法老ê心硬，也beh tī埃及地行我chōe-chōe ê神蹟奇事。 ⁴ 總是法老無beh聽lín；我beh伸我ê手tī埃及，用大ê審判chhōa我ê軍隊，我ê百姓以色列人，出埃及地。 ⁵ 我伸我ê手tī埃及，chhōa以色列人tùi in中間出來ê時，埃及人就知我是耶和華。 ⁶ 摩西、亞倫就án-ni行；耶和華怎樣吩咐in，in就照án-ni行。 ⁷ In kap法老講話ê時，摩西八十歲，亞倫八十三歲。 ⁸ 耶和華對摩西對亞倫講： ⁹ 法老若對lín講：Lín tio̍h行一件奇事來看māi leh；你tio̍h對亞倫講：Kia̍h你ê柺á來hiat tī法老ê面前，hō͘伊變做蛇。 ¹⁰ 摩西、亞倫入去見法老，就án-ni行，照耶和華所吩咐ê；亞倫將伊ê柺á hiat tī法老kap伊ê人臣ê面前，柺á就變做蛇。 ¹¹ 法老也召智慧ê人kap司公來，in是埃及ê博士，也用in ê邪術照án-ni行。 ¹² In ta̍k人hiat in ê柺á，lóng變做蛇；總是亞倫ê柺á吞in ê柺á。 ¹³ 法老ê心硬，無beh聽in，tú-tú照耶和華所講ê。 ¹⁴ 耶和華對摩西講：法老ê心固執，伊m̄准百姓去。 ¹⁵ 天光早你去見法老；看ah，伊出去水邊；你tio̍h khiā tī河邊等接伊；你ê手tio̍h kia̍h hit支變蛇ê柺á， ¹⁶ 對伊講，耶和華，希伯來人ê上帝，差我來見你，講：准我ê百姓去，thang tī曠野服事我；看ah，到taⁿ你猶未有聽。 ¹⁷ 耶和華án-ni講：你beh tùi chit一件知我是耶和華；看ah，我beh用我手裡ê柺á phah河中ê水，水就變做血。 ¹⁸ 河裡ê魚beh死，河也beh臭味；埃及人厭賤m̄-ài lim河ê水。 ¹⁹ 耶和華對摩西講：你tio̍h kā亞倫講：Kia̍h你ê柺á，伸你ê手tī埃及chiahê水ê頂面，就是tī in ê江、河、池，kap一切ê水窟ê頂面，hō͘ in lóng變做血；tī埃及遍地，無論柴ê器具，石ê器具，lóng beh有血。 ²⁰ 摩西、亞倫就án-ni行，照耶和華所吩咐；tī法老kap伊ê人臣ê面前kia̍h起柺á，phah河裡ê水；河裡ê水lóng變做血。 ²¹ 河裡ê魚lóng死；河也臭味；埃及人bōe能lim河裡ê水；埃及遍地lóng有血。 ²² 埃及ê博士也用in ê邪術照án-ni行；法老ê心硬，m̄聽in；tú-tú照耶和華所講ê。 ²³ 法老tò去伊ê宮內；chitê事伊也無掛心。 ²⁴ 埃及人tī河ê雙pêng掘地，ài得tio̍h水thang lim；因為河ê水in bōe lim得。 ²⁵ 耶和華phah河了後歷過七日。

=== 出埃及記 · 第 7 章 ===

¹ Iâ-hô-hoa tùi Mô͘-se kóng, Khòaⁿ ah, Góa hō͘ lí tùi-tī Hoat-ló chòe siōng-tè; lí ê hiaⁿ A-lûn beh chòe lí ê sian-ti. ² Kìⁿ-nā Góa só͘ hoan-hù lí-ê, lí lóng tio̍h kóng i; lí ê hiaⁿ A-lûn tio̍h tùi Hoat-ló kóng, hō͘ i chún Í-sek-lia̍t lâng chhut i ê tōe. ³ Góa beh hō͘ Hoat-ló ê sim ngī, iā beh tī Ai-ki̍p tōe kiâⁿ Góa chōe-chōe ê sîn-jiah kî-sū. ⁴ Chóng-sī Hoat-ló bô beh thiaⁿ lín; Góa beh chhun Góa ê chhiú tī Ai-ki̍p, ēng tōa ê sím-phòaⁿ chhōa Góa ê kun-tūi, Góa ê peh-sìⁿ Í-sek-lia̍t lâng, chhut Ai-ki̍p tōe. ⁵ Góa chhun Góa ê chhiú tī Ai-ki̍p, chhōa Í-sek-lia̍t lâng tùi in tiong-kan chhut-lâi ê sî, Ai-ki̍p lâng chiū chai Góa sī Iâ-hô-hoa. ⁶ Mô͘-se, A-lûn chiū án-ni kiâⁿ; Iâ-hô-hoa cháiⁿ-iūⁿ hoan-hù in, in chiū chiàu án-ni kiâⁿ. ⁷ In kap Hoat-ló kóng-ōe ê sî, Mô͘-se poeh-cha̍p hè, A-lûn poeh-cha̍p-saⁿ hè. ⁸ Iâ-hô-hoa tùi Mô͘-se tùi A-lûn kóng, ⁹ Hoat-ló nā tùi lín kóng, Lín tio̍h kiâⁿ chi̍t kiāⁿ kî-sū lâi khòaⁿ-māi leh; lí tio̍h tùi A-lûn kóng, Kia̍h lí ê koáiⁿ-á lâi hiat tī Hoat-ló ê bīn-chêng, hō͘ i pìⁿ-chòe chôa. ¹⁰ Mô͘-se, A-lûn ji̍p-khì kìⁿ Hoat-ló, chiū án-ni kiâⁿ, chiàu Iâ-hô-hoa só͘ hoan-hù-ê; A-lûn chiong i ê koáiⁿ-á hiat tī Hoat-ló kap i ê jîn-sîn ê bīn-chêng, koáiⁿ-á chiū pìⁿ-chòe chôa. ¹¹ Hoat-ló iā tiàu tì-hūi ê lâng kap sai-kong lâi, in sī Ai-ki̍p ê phok-sū, iā ēng in ê siâ-su̍t chiàu án-ni kiâⁿ. ¹² In ta̍k-lâng hiat in ê koáiⁿ-á, lóng pìⁿ-chòe chôa; chóng-sī A-lûn ê koáiⁿ-á thun in ê koáiⁿ-á. ¹³ Hoat-ló ê sim ngī, bô beh thiaⁿ in, tú-tú chiàu Iâ-hô-hoa só͘ kóng-ê. ¹⁴ Iâ-hô-hoa tùi Mô͘-se kóng, Hoat-ló ê sim kò͘-chip, i m̄-chún peh-sìⁿ khì. ¹⁵ Thiⁿ-kng-chá lí khì kìⁿ Hoat-ló; khòaⁿ ah, i chhut-khì chúi-piⁿ; lí tio̍h khiā tī hô-piⁿ tán-chih i; lí ê chhiú tio̍h kia̍h hit-ki pìⁿ-chôa ê koáiⁿ-á, ¹⁶ tùi i kóng, Iâ-hô-hoa , Hi-pek-lâi lâng ê Siōng-tè, chhe góa lâi kìⁿ lí, kóng, Chún Góa ê peh-sìⁿ khì, thang tī khòng-iá ho̍k-sāi Góa; khòaⁿ ah, kàu-taⁿ lí iáu-bē ū thiaⁿ. ¹⁷ Iâ-hô-hoa án-ni kóng, Lí beh tùi chit chi̍t-kiāⁿ chai Góa sī Iâ-hô-hoa; khòaⁿ ah, góa beh ēng góa chhiú-ni̍h ê koáiⁿ-á phah hô-tiong ê chúi, chúi chiū pìⁿ-chòe huih. ¹⁸ Hô-ni̍h ê hî beh sí, hô iā beh chhàu-bī; Ai-ki̍p lâng iàm-chiān m̄-ài lim hô ê chúi. ¹⁹ Iâ-hô-hoa tùi Mô͘-se kóng, Lí tio̍h kā A-lûn kóng, Kia̍h lí ê koáiⁿ-á, chhun lí ê chhiú tī Ai-ki̍p chiah-ê chúi ê téng-bīn, chiū-sī tī in ê kang, hô, tî, kap it-chhè ê chúi-khut ê téng-bīn, hō͘ in lóng pìⁿ-chòe huih; tī Ai-ki̍p piàn-tōe, bô-lūn chhâ ê khì-kū, chio̍h ê khì-kū, lóng beh ū huih. ²⁰ Mô͘-se, A-lûn chiū án-ni kiâⁿ, chiàu Iâ-hô-hoa só͘ hoan-hù; tī Hoat-ló kap i ê jîn-sîn ê bīn-chêng kia̍h-khí koáiⁿ-á, phah hô-ni̍h ê chúi; hô-ni̍h ê chúi lóng pìⁿ-chòe huih . ²¹ Hô-ni̍h ê hî lóng sí; hô iā chhàu-bī; Ai-ki̍p lâng bōe-ōe lim hô-ni̍h ê chúi; Ai-ki̍p piàn-tōe lóng ū huih. ²² Ai-ki̍p ê phok-sū iā ēng in ê siâ-su̍t chiàu án-ni kiâⁿ; Hoat-ló ê sim ngī, m̄-thiaⁿ in; tú-tú chiàu Iâ-hô-hoa só͘ kóng-ê. ²³ Hoat-ló tò-khì i ê kiong-lāi; chit-ê sū i iā bô khòa-sim. ²⁴ Ai-ki̍p lâng tī hô ê siang-pêng ku̍t tōe, ài tit-tio̍h chúi thang lim; in-ūi hô ê chúi in bōe lim-tit. ²⁵ Iâ-hô-hoa phah hô liáu-āu le̍k-kè chhit-ji̍t.

=== 出埃及記 · 第 8 章 ===

¹ 耶和華kā摩西講：你入去見法老，kā伊講：耶和華án-ni講：准我ê百姓去，thang服事我。 ² 你若m̄准in去，看ah，我beh hō͘田蛙á phah-pháiⁿ你ê境內。 ³ 河beh生湠田蛙á，in beh上來入你ê宮殿，你ê睏房，上你ê眠床，入你ê人臣ê厝，上你ê百姓ê身軀，入你ê灶孔，kap你chhiau麵ê器具。 ⁴ Koh beh上你，kap你ê百姓，以及你眾人臣ê身軀。 ⁵ 耶和華對摩西講：你kā亞倫講：你ê手kia̍h柺á，伸tī江、河、池ê頂面，hō͘田蛙á上來埃及地。 ⁶ 亞倫就伸伊ê手tī埃及chiahê水ê頂面；田蛙á就上來遮蓋thong埃及地。 ⁷ 博士用in ê邪術也án-ni行，hō͘田蛙á上來埃及地。 ⁸ 法老叫摩西、亞倫講：請lín求耶和華hō͘ chiahê田蛙á離開我kap我ê百姓；我就准chitê百姓去thang祭祀耶和華。 ⁹ 摩西對法老講：我遵chhûn你ê意思；我tio̍h為你，kap你ê人臣，以及你ê百姓，祈求tī甚麼時thang 除滅田蛙á離開你，kap你hiahê厝，只有留tī河裡ah？ ¹⁰ 伊講：明á日。講：Thang照你ê話；hō͘你知阮ê上帝耶和華無一个能比並得。 ¹¹ 田蛙á beh離開你kap你hiahê厝，kap你ê人臣，以及你ê百姓，只有留tī河裡。 ¹² 摩西、亞倫離開法老出去；摩西為tio̍h伊所差來害法老ê田蛙á求叫耶和華。 ¹³ 耶和華就照摩西ê話來行；見若tī厝內、院中、田裡ê田蛙á lóng死。 ¹⁴ 人拾in kui堆，遍地lóng臭味。 ¹⁵ 法老看見tāi-chì有khah寬，就硬伊ê心，m̄聽in；tú-tú照耶和華所講ê。 ¹⁶ 耶和華對摩西講：你kā亞倫講：伸出你ê柺á，phah地裡ê土粉，hō͘伊tī埃及遍地變做蝨母。 ¹⁷ In就án-ni行；亞倫kia̍h柺á，伸手phah地裡ê土粉，就tī人kap cheng-siⁿ ê身軀lóng有蝨母；地裡ê土粉tī埃及遍地lóng變做蝨母。 ¹⁸ 博士也用in ê邪術照án-ni做，ài生出蝨母，總是bōe能；án-ni tī人kap cheng-siⁿ ê身軀lóng有蝨母。 ¹⁹ 博士對法老講：這是上帝ê手段；法老ê心硬，m̄聽in；tú-tú照耶和華所講ê。 ²⁰ 耶和華kā摩西講：你清早起來；看ah，法老beh到水邊；你khiā tī伊ê面頭前，kā伊講：耶和華án-ni講：准我ê百姓去，thang服事我。 ²¹ 你若m̄准我ê百姓去，我beh差kui陣ê胡蠅到tī你，kap你ê人臣，以及你ê百姓，也beh入你hiahê厝；koh埃及人ê厝，kap in所khiā起ê所在，lóng beh有kui陣ê胡蠅滿滿。 ²² 當hit日，我beh分別我ê百姓所khiā起ê Ko-san地，tī-hia無beh有kui陣ê胡蠅；thang hō͘你知，我tī天下中做耶和華。 ²³ 我beh分別我ê百姓kap你ê百姓；明á載beh有chitê神蹟。 ²⁴ 耶和華án-ni行；就有胡蠅kui大陣來入法老ê宮殿kap伊ê人臣ê厝，kap埃及全地；地因為chitê kui陣ê胡蠅受敗壞。 ²⁵ 法老叫摩西、亞倫來，講：lín去，tī chitê地祭祀lín ê上帝。 ²⁶ 摩西講：Án-ni行無合宜；因為阮beh用埃及人所厭惡ê物祭祀耶和華，阮ê上帝；阮若tī埃及人ê目睭前，用in所厭惡ê物來獻祭，in kiám無beh用石頭tìm阮mah？ ²⁷ 阮beh去曠野，行三日ê路站，祭祀阮ê上帝耶和華，照伊所beh吩咐阮。 ²⁸ 法老講：我beh准lín去，tī曠野祭祀耶和華lín ê上帝；獨獨m̄-thang去遠；lín tio̍h替我祈禱。 ²⁹ 摩西講：我beh對你chia出去，也beh求耶和華hō͘ kui陣ê胡蠅明á日離開法老，kap伊ê人臣，以及伊ê百姓；總是法老m̄-thang koh詭詐，m̄准百姓去祭祀耶和華。 ³⁰ 摩西就tùi法老hia出去，祈禱耶和華。 ³¹ 耶和華就照摩西ê話行，hō͘ kui陣ê胡蠅離開法老，kap伊ê人臣，以及伊ê百姓；無留一隻。 ³² Chit-pái法老koh硬伊ê心，m̄准百姓去。

=== 出埃及記 · 第 8 章 ===

¹ Iâ-hô-hoa kā Mô͘-se kóng, Lí ji̍p-khì kìⁿ Hoat-ló, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa. ² Lí nā m̄-chún in khì, khòaⁿ ah, Góa beh hō͘ chhân-kap-á phah-pháiⁿ lí ê kéng-lāi. ³ Hô beh siⁿ-thòaⁿ chhân-kap-á, in beh chiūⁿ-lâi ji̍p lí ê kiong-tiān, lí ê khùn-pâng, chiūⁿ lí ê bîn-chhn̂g, ji̍p lí ê jîn-sîn ê chhù, chiūⁿ lí ê peh-sìⁿ ê seng-khu, ji̍p lí ê chàu-khang, kap lí chhiau-mī ê khì-kū. ⁴ Koh beh chiūⁿ lí, kap lí ê peh-sìⁿ, í-ki̍p lí chèng jîn-sîn ê seng-khu. ⁵ Iâ-hô-hoa tùi Mô͘-se kóng, Lí kā A-lûn kóng, Lí ê chhiú kia̍h koáiⁿ-á, chhun tī kang, hô, tî ê téng-bīn, hō͘ chhân-kap-á chiūⁿ-lâi Ai-ki̍p tōe. ⁶ A-lûn chiū chhun i ê chhiú tī Ai-ki̍p chiah-ê chúi ê téng-bīn; chhân-kap-á chiū chiūⁿ-lâi jia-khàm thong Ai-ki̍p tōe. ⁷ Phok-sū ēng in ê siâ-su̍t iā án-ni kiâⁿ, hō͘ chhân-kap-á chiūⁿ-lâi Ai-ki̍p tōe. ⁸ Hoat-ló kiò Mô͘-se, A-lûn kóng, Chhiáⁿ lín kiû Iâ-hô-hoa hō͘ chiah-ê chhân-kap-á lī-khui góa kap góa ê peh-sìⁿ; góa chiū chún chit-ê peh-sìⁿ khì thang chè-sū Iâ-hô-hoa. ⁹ Mô͘-se tùi Hoat-ló kóng, Góa chun-chhûn lí ê ì-sù; góa tio̍h ūi lí, kap lí ê jîn-sîn, í-ki̍p lí ê peh-sìⁿ, kî-kiû tī sím-mi̍h sî thang tû-bia̍t chhân-kap-á lī-khui lí, kap lí hiah-ê chhù, chí-ū lâu tī hô-ni̍h ah? ¹⁰ I kóng, Bîn-á-ji̍t. Kóng, Thang chiàu lí ê ōe; hō͘ lí chai goán ê Siōng-tè Iâ-hô-hoa bô chi̍t-ê ōe pí-phēng-tit. ¹¹ Chhân-kap-á beh lī-khui lí kap lí hiah-ê chhù, kap lí ê jîn-sîn, í-ki̍p lí ê peh-sìⁿ, chí-ū lâu tī hô-ni̍h. ¹² Mô͘-se, A-lûn lī-khui Hoat-ló chhut-khì; Mô͘-se ūi-tio̍h I só͘ chhe lâi hāi Hoat-ló ê chhân-kap-á kiû-kiò Iâ-hô-hoa. ¹³ Iâ-hô-hoa chiū chiàu Mô͘-se ê ōe lâi kiâⁿ; kìⁿ-nā tī chhù-lāi, īⁿ-tiong, chhân-ni̍h ê chhân-kap-á lóng sí. ¹⁴ Lâng khioh in kui-tui, piàn-tōe lóng chhàu-bī. ¹⁵ Hoat-ló khòaⁿ-kìⁿ tāi-chì ū khah-khoan, chiū ngī i ê sim, m̄-thiaⁿ in; tú-tú chiàu Iâ-hô-hoa só͘ kóng ê. ¹⁶ Iâ-hô-hoa tùi Mô͘-se kóng, Lí kā A-lûn kóng, Chhun-chhut lí ê koáiⁿ-á, phah tōe-ni̍h ê thô͘-hún, hō͘ i tī Ai-ki̍p piàn-tōe pìⁿ-chòe sat-bú. ¹⁷ In chiū án-ni kiâⁿ; A-lûn kia̍h koáiⁿ-á, chhun-chhiú phah tōe-ni̍h ê thô͘-hún, chiū tī lâng kap cheng-siⁿ ê seng-khu lóng ū sat-bú; tōe-ni̍h ê thô͘-hún tī Ai-ki̍p piàn-tōe lóng piàn-chòe sat-bú. ¹⁸ Phok-sū iā ēng in ê siâ-su̍t chiàu án-ni chòe, ài siⁿ-chhut sat-bú, chóng-sī bōe-ōe; án-ni tī lâng kap cheng-siⁿ ê seng-khu lóng ū sat-bú. ¹⁹ Phok-sū tùi Hoat-ló kóng, Che sī Siōng-tè ê chhiú-tōaⁿ; Hoat-ló ê sim ngī, m̄-thiaⁿ in; tú-tú chiàu Iâ-hô-hoa só͘ kóng ê. ²⁰ Iâ-hô-hoa kā Mô͘-se kóng, Lí chheng-chá khí-lâi; khòaⁿ ah, Hoat-ló beh kàu chúi-piⁿ; lí khiā tī i ê bīn-thâu-chêng, kā i kóng, Iâ-hô-hoa án-ni kóng, Chún Góa ê peh-sìⁿ khì, thang ho̍k-sāi Góa. ²¹ Lí nā m̄-chún Góa ê peh-sìⁿ khì, Góa beh chhe kui-tīn ê hô͘-sîn kàu tī lí, kap lí ê jîn-sîn, í-ki̍p lí ê peh-sìⁿ, iā beh ji̍p lí hiah-ê chhù; koh Ai-ki̍p lâng ê chhù, kap in só͘ khiā-khí ê só͘-chāi, lóng beh ū kui-tīn ê hô͘-sîn móa-móa. ²² Tng hit-ji̍t, Góa beh hun-piat Góa ê peh-sìⁿ só͘ khiā-khí ê Ko-san tōe, tī-hia bô beh ū kui-tīn ê hô͘-sîn; thang hō͘ lí chai Góa tī thiⁿ-ē-tiong chòe Iâ-hô-hoa. ²³ Góa beh hun-piat Góa ê peh-sìⁿ kap lí ê peh-sìⁿ; bîn-á-chài beh ū chit-ê sîn-jiah. ²⁴ Iâ-hô-hoa án-ni kiâⁿ; chiū ū hô͘-sîn kui tōa-tīn lâi ji̍p Hoat-ló ê kiong-tiān kap i ê jîn-sîn ê chhù, kap Ai-ki̍p choân-tōe; tōe in-ūi chit-ê kui-tīn ê hô͘-sîn siū pāi-hoāi. ²⁵ Hoat-ló kiò Mô͘-se, A-lûn lâi, kóng, Lín khì, tī chit-ê tōe chè-sū lín ê Siōng-tè. ²⁶ Mô͘-se kóng, Án-ni kiâⁿ bô ha̍p-gî; in-ūi goán beh ēng Ai-ki̍p lâng só͘ iàm-ò͘ⁿ ê mi̍h chè-sū Iâ-hô-hoa, goán ê Siōng-tè; goán nā tī Ai-ki̍p lâng ê ba̍k-chiu-chêng, ēng in só͘ iàm-ò͘ⁿ ê mi̍h lâi hiàn-chè, in kiám bô beh ēng chio̍h-thâu tìm goán mah? ²⁷ Goán beh khì khòng-iá, kiâⁿ saⁿ-ji̍t ê lō͘-chām, chè-sū goán ê Siōng-tè Iâ-hô-hoa, chiàu I só͘ beh hoan-hù goán. ²⁸ Hoat-ló kóng, Góa beh chún lín khì, tī khòng-iá chè-sū Iâ-hô-hoa lín ê Siōng-tè; to̍k-to̍k m̄-thang khì hn̄g; lín tio̍h thòe góa kî-tó. ²⁹ Mô͘-se kóng, Góa beh tùi lí chia chhut-khì iā beh kiû Iâ-hô-hoa hō͘ kui-tīn ê hô͘-sîn bîn-á-ji̍t lī-khui Hoat-ló, kap i ê jîn-sîn, í-ki̍p i ê peh-sìⁿ; chóng-sī Hoat-ló m̄-thang koh khúi-chà, m̄-chún peh-sìⁿ khì chè-sū Iâ-hô-hoa. ³⁰ Mô͘-se chiū tùi Hoat-ló hia chhut-khì, kî-tó Iâ-hô-hoa. ³¹ Iâ-hô-hoa chiū chiàu Mô͘-se ê ōe kiâⁿ, hō͘ kui-tīn ê hô͘-sîn lī-khui Hoat-ló, kap i ê jîn-sîn, í-ki̍p i ê peh-sìⁿ; bô lâu chi̍t-chiah. ³² Chit-pái Hoat-ló koh ngī i ê sim, m̄-chún peh-sìⁿ khì.

=== 出埃及記 · 第 9 章 ===

¹ 耶和華對摩西講：你入去見法老，kā伊講：耶和華，希伯來人ê上帝，án-ni講：Tio̍h准我ê百姓去，thang服事我。 ² 你若m̄肯hō͘ in去，猶原勉強留in， ³ 看ah，耶和華ê手beh伸tī你田裡ê cheng-siⁿ、馬、驢、駱駝、牛群、羊群；beh有重ê瘟疫。 ⁴ 耶和華beh分別以色列ê cheng-siⁿ kap埃及ê cheng-siⁿ；凡若屬以色列人ê，無死一隻。 ⁵ 耶和華就定tio̍h時期，講：明á日耶和華beh tī chitê地行chitê事。 ⁶ 隔日耶和華就行chitê事；埃及ê cheng-siⁿ lóng總死；總是以色列人ê cheng-siⁿ lóng無死一隻。 ⁷ 法老差人去，看ah，以色列人ê cheng-siⁿ，連一隻也無死。總是法老ê心固執，m̄准百姓去。 ⁸ 耶和華對摩西、亞倫講：Lín tio̍h put 幾nā phóng爐裡ê火灰，摩西tio̍h tī法老ê面前ǹg天掖(iā)去； ⁹ beh tī埃及全地變做塵埃；tī埃及全地，tī人kap cheng-siⁿ ê身軀，lóng生粒á，成做瘡。 ¹⁰ In就put爐裡ê火灰，khiā tī法老ê面前；摩西ǹg天掖去，就tī人kap cheng-siⁿ ê身軀生粒á，成做瘡。 ¹¹ 博士因為粒á tī摩西ê面前khiā-bōe-tiâu；因為博士kap一切埃及人ê身軀lóng有hit號粒á。 ¹² 耶和華hō͘法老ê心硬，致到m̄聽in；tú-tú照耶和華對摩西所講ê。 ¹³ 耶和華對摩西講：你清早起來，khiā tī法老ê面前kā伊講：耶和華，希伯來人ê上帝，án-ni講：Tio̍h准我ê百姓去，hō͘ in thang服事我。 ¹⁴ 因為chit一pái我beh hō͘我一切ê災禍到tī你ê心，kap你ê人臣，以及你ê百姓，hō͘你知tī普天下無一个ōe比並我。 ¹⁵ 我若伸手，用瘟疫攻擊你kap你ê百姓，你就已經滅tī地上； ¹⁶ 總是我hō͘你khiā在，是tiâu故意beh用你顯明我ê大權能，hō͘我ê名報揚tī遍地上。 ¹⁷ 你iáu-kú對我ê百姓自高，m̄准in去mah？ ¹⁸ 看ah，明á日將近chit時，我beh落大雹，tùi埃及開國以來bē-bat有án-ni。 ¹⁹ Taⁿ你tio̍h差人，將你ê cheng-siⁿ kap你田裡一切所有ê，逼in入來；凡若tī田裡，無收tò來家裡ê，無論人kap cheng-siⁿ，雹beh落tī in ê身上，in就beh死。 ²⁰ 法老人臣ê中間，驚畏耶和華ê話ê，就hō͘伊ê奴僕kap cheng-siⁿ走入厝內； ²¹ 總是hitê無掠耶和華ê會做要緊ê，就將伊ê奴僕kap cheng-siⁿ留tī田裡。 ²² 耶和華對摩西講：你ǹg天伸手，hō͘雹落tī埃及ê遍地，phah人kap cheng-siⁿ，以及田裡ê菜蔬，thong埃及地lóng án-ni。 ²³ 摩西ǹg天伸出伊ê柺á，耶和華就起雷落雹，有火行tī地面上；耶和華落雹tī埃及地。 ²⁴ Tùi án-ni，有雹，也有火chham tī雹ê內面，真厲害；tùi埃及開國以來遍地未bat有án-ni。 ²⁵ Tī埃及遍地，見若tī田裡ê，無論人á是cheng-siⁿ，lóng hō͘雹phah；雹也phah田裡一切ê菜蔬，koh phah折田裡一切ê樹木。 ²⁶ 獨獨tī以色列人所tiàm ê Ko-san地無落雹。 ²⁷ 法老差人叫摩西、亞倫來，kā in講：Chit一pái我有犯罪；耶和華是公義，我kap我ê百姓是pháiⁿ。 ²⁸ Taⁿ chiahê 脆雷kap雹已經夠額lah；求lín祈禱耶和華；我就准lín去，m̄免koh tiàm chia。 ²⁹ 摩西kā伊講：我一下出城就beh ǹg耶和華kia̍h起我雙支手；雷beh soah，雹也無koh落；hō͘你知全地lóng屬tī耶和華。 ³⁰ 總是論到你kap你ê人臣，我知lín iáu是無驚畏耶和華上帝。 ³¹ Hit時麻kap大麥受phah-pháiⁿ；因為大麥已經出穗，麻也開花。 ³² 獨獨小麥kap粗麥無受phah-pháiⁿ；因為猶未大叢。 ³³ 摩西離開法老出城，kia̍h起雙手ǹg耶和華，雷kap雹就soah，雨也無koh piàⁿ落地。 ³⁴ 法老看見雨、雹，kap雷lóng soah，就益發犯罪；伊kap伊ê人臣lóng硬心。 ³⁵ 法老心硬，m̄准以色列人去，tú-tú照耶和華託摩西所講ê。

=== 出埃及記 · 第 9 章 ===

¹ Iâ-hô-hoa tùi Mô͘-se kóng, Lí ji̍p-khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, thang ho̍k-sāi Góa. ² Lí nā m̄-khéng hō͘ in khì, iû-goân bián-kióng lâu in, ³ khòaⁿ ah, Iâ-hô-hoa ê chhiú beh chhun tī lí chhân-ni̍h ê cheng-siⁿ, bé, lû, lo̍k-tô, gû-kûn, iûⁿ-kûn; beh ū tāng ê un-e̍k. ⁴ Iâ-hô-hoa beh hun-piat Í-sek-lia̍t ê cheng-siⁿ kap Ai-ki̍p ê cheng-siⁿ; hoān-nā sio̍k Í-sek-lia̍t lâng ê, bô sí chi̍t-chiah. ⁵ Iâ-hô-hoa chiū tiāⁿ-tio̍h sî-kî, kóng, Bîn-á-ji̍t Iâ-hô-hoa beh tī chit-ê tōe kiâⁿ chit-ê sū. ⁶ Keh-ji̍t Iâ-hô-hoa chiū kiâⁿ chit-ê sū; Ai-ki̍p ê cheng-siⁿ lóng-chóng sí; chóng-sī Í-sek-lia̍t lâng ê cheng-siⁿ lóng bô sí chi̍t-chiah. ⁷ Hoat-ló chhe lâng khì, khòaⁿ ah, Í-sek-lia̍t lâng ê cheng-siⁿ, liân chi̍t-chiah iā bô sí. Chóng-sī Hoat-ló ê sim kò͘-chip, m̄-chún peh-sìⁿ khì. ⁸ Iâ-hô-hoa tùi Mô͘-se, A-lûn kóng, Lín tio̍h put kúi-nā phóng lô͘-ni̍h ê hé-hu, Mô͘-se tio̍h tī Hoat-ló ê bīn-chêng ǹg-thiⁿ iā-khì; ⁹ beh tī Ai-ki̍p choân-tōe pìⁿ-chòe tîn-ai; tī Ai-ki̍p choân-tōe, tī lâng kap cheng-siⁿ ê seng-khu, lóng siⁿ lia̍p-á, chiâⁿ-chòe chhng. ¹⁰ In chiū put lô͘-ni̍h ê hé-hu, khiā tī Hoat-ló ê bīn-chêng; Mô͘-se ǹg-thiⁿ iā-khì, chiū tī lâng kap cheng-siⁿ ê seng-khu siⁿ lia̍p-á, chiâⁿ-chòe chhng. ¹¹ Phok-sū in-ūi lia̍p-á tī Mô͘-se ê bīn-chêng khiā-bōe-tiâu; in-ūi phok-sū kap it-chhè Ai-ki̍p lâng ê seng-khu lóng ū hit-hō lia̍p-á. ¹² Iâ-hô-hoa hō͘ Hoat-ló ê sim ngī, tì-kàu m̄-thiaⁿ in; tú-tú chiàu Iâ-hô-hoa tùi Mô͘-se só͘ kóng ê. ¹³ Iâ-hô-hoa tùi Mô͘-se kóng, Lí chheng-chá khí-lâi, khiā tī Hoat-ló ê bīn-chêng kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Tio̍h chún Góa ê peh-sìⁿ khì, hō͘ in thang ho̍k-sāi Góa. ¹⁴ In-ūi chit-chi̍t-pái Góa beh hō͘ Góa it-chhè ê chai-ē kàu tī lí ê sim, kap lí ê jîn-sîn, í-ki̍p lí ê peh-sìⁿ, hō͘ lí chai tī phó͘-thiⁿ-ē bô chi̍t-ê ōe pí-phēng Góa. ¹⁵ Góa nā chhun-chhiú, ēng un-e̍k kong-kek lí kap lí ê peh-sìⁿ, lí chiū í-keng bia̍t tī tōe-chiūⁿ; ¹⁶ chóng-sī Góa hō͘ lí khiā-chāi, sī tiâu-kò͘-ì beh ēng lí hián-bêng Góa ê tōa koân-lêng, hō͘ Góa ê miâ pò-iông tī piàn-tōe-chiūⁿ. ¹⁷ Lí iáu-kú tùi Góa ê peh-sìⁿ chū-ko, m̄-chún in khì mah? ¹⁸ Khòaⁿ ah, bîn-á-ji̍t chiong-kūn chit-sî, Góa beh lo̍h tōa-pha̍uh, tùi Ai-ki̍p khai-kok í-lâi bē-bat ū án-ni. ¹⁹ Taⁿ lí tio̍h chhe lâng, chiong lí ê cheng-siⁿ kap lí chhân-ni̍h it-chhè só͘-ū-ê, pek in ji̍p-lâi; hoān-nā tī chhân-ni̍h, bô siu tò-lâi ke-ni̍h-ê, bô-lūn lâng kap cheng-siⁿ, pha̍uh beh lo̍h tī in ê sin-chiūⁿ, in chiū beh sí. ²⁰ Hoat-ló jîn-sîn ê tiong-kan, kiaⁿ-ùi Iâ-hô-hoa ê ōe ê, chiū hō͘ i ê lô͘-po̍k kap cheng-siⁿ cháu ji̍p chhù-lāi; ²¹ chóng-sī hit-ê bô lia̍h Iâ-hô-hoa ê ōe chòe iàu-kín ê, chiū chiong i ê lô͘-po̍k kap cheng-siⁿ lâu tī chhân-ni̍h. ²² Iâ-hô-hoa tùi Mô͘-se kóng, Lí ǹg-thiⁿ chhun-chhiú, hō͘ pha̍uh lo̍h tī Ai-ki̍p ê piàn-tōe, phah lâng kap cheng-siⁿ, í-ki̍p chhân-ni̍h ê chhài-soe, thong Ai-ki̍p tōe lóng án-ni. ²³ Mô͘-se ǹg-thiⁿ chhun-chhut i ê koáiⁿ-á, Iâ-hô-hoa chiū khí-lûi lo̍h-pha̍uh, ū hé kiâⁿ tī tōe-bīn-chiūⁿ; Iâ-hô-hoa lo̍h-pha̍uh tī Ai-ki̍p tōe. ²⁴ Tùi án-ni ū pha̍uh , iā ū hé chham tī pha̍uh ê lāi-bīn, chin lī-hāi; tùi Ai-ki̍p khai-kok í-lâi piàn-tōe bē bat ū án-ni. ²⁵ Tī Ai-ki̍p piàn-tōe, kìⁿ-nā tī chhân-ni̍h-ê, bô-lūn lâng á-sī cheng-siⁿ, lóng hō͘ pha̍uh phah; pha̍uh iā phah chhân-ni̍h it-chhè ê chhài-soe, koh phah-chi̍h chhân-ni̍h it-chhè ê chhiū-ba̍k. ²⁶ To̍k-to̍k tī Í-sek-lia̍t lâng só͘ tiàm ê Ko-san tōe bô lo̍h-pha̍uh. ²⁷ Hoat-ló chhe lâng kiò Mô͘-se, A-lûn lâi, kā in kóng, Chit-chi̍t-pái góa ū hoān-chōe; Iâ-hô-hoa sī kong-gī, góa kap góa ê peh-sìⁿ sī pháiⁿ. ²⁸ Taⁿ chiah-ê chhè-lûi kap pha̍uh í-keng kàu-gia̍h lah; kiû lín kî-tó Iâ-hô-hoa; góa chiū chún lín khì, m̄-bián koh tiàm chia. ²⁹ Mô͘-se kā i kóng, Góa chi̍t-ē chhut-siâⁿ chiū beh ǹg Iâ-hô-hoa kia̍h-khí góa siang ki chhiú; lûi beh soah, pha̍uh iā bô koh lo̍h; hō͘ lí chai choân-tōe lóng sio̍k tī Iâ-hô-hoa. ³⁰ Chóng-sī lūn-kàu lí kap lí ê jîn-sîn, góa chai lín iáu sī bô kiaⁿ-ùi Iâ-hô-hoa Siōng-tè. ³¹ Hit-sî môa kap tōa-be̍h siū phah-pháiⁿ; in-ūi tōa-be̍h í-keng chhut-sūi, môa iā khui-hoe. ³² To̍k-to̍k sió-be̍h kap chho͘-be̍h bô siū phah-pháiⁿ; in-ūi iáu-bē tōa-châng. ³³ Mô͘-se lī-khui Hoat-ló chhut-siâⁿ, kia̍h-khí siang-chhiú ǹg Iâ-hô-hoa, lûi kap pha̍uh chiū soah, hō͘ iā bô koh piàⁿ-lo̍h tōe. ³⁴ Hoat-ló khòaⁿ-kìⁿ hō͘, pha̍uh, kap lûi lóng soah, chiū it-hoat hoān-chōe; i kap i ê jîn-sîn lóng ngī-sim. ³⁵ Hoat-ló sim ngī, m̄-chún Í-sek-lia̍t lâng khì, tú-tú chiàu Iâ-hô-hoa thok Mô͘-se só͘ kóng ê.

=== 出埃及記 · 第 10 章 ===

¹ 耶和華對摩西講：你入去見法老；因為我已經hō͘伊ê心，kap伊ê人臣ê心，剛硬，thang hō͘我顯明我chiahê神蹟tī in中間； ² 也beh hō͘你將我所做tī埃及ê事，kap我tī in中間所行chiahê神蹟，傳hō͘你ê kiáⁿ kap你ê孫聽，thang hō͘ lín知我是耶和華。 ³ 摩西、亞倫就去見法老，kā伊講：耶和華，希伯來人ê上帝，án-ni講：你tī我ê面前m̄肯家己謙卑，beh到甚麼時ah？tio̍h准我ê百姓去，hō͘ in服事我。 ⁴ 你若m̄肯hō͘我ê百姓去，看ah，明á日我beh hō͘草蜢入你ê境內； ⁵ in beh遮蓋地面，致到bōe看見土；koh beh食hitê tùi災禍所chhun ê，就是雹所phah無了ê；也beh食田裡為lín所發一切ê樹木； ⁶ 草蜢beh充滿你ê厝，kap你ê眾人臣ê厝，以及一切埃及人ê厝，對你ê老父kap你ê祖公出世到taⁿ，bē-bat看見án-ni。摩西就oa̍t-tńg身，離開法老出去。 ⁷ 法老ê人臣對伊講，Chit人做咱ê羅網，beh到甚麼時ah？Tio̍h 准chiahê人去服事耶和華in ê上帝；埃及已經敗壞，你kiám m̄知mah？ ⁸ Tùi án-ni，摩西、亞倫受召倒tńg來見法老；法老kā in講：lín去服事耶和華lín ê上帝；獨獨hiahê beh去ê，是甚麼號人ah？ ⁹ 摩西講：阮beh kap阮ê少年人老人去，也beh tòa阮ê kiáⁿ cha-bó͘-kiáⁿ，kap阮ê羊群牛群做一下去；因為阮tio̍h守耶和華ê節。 ¹⁰ 法老對in講：好lah，我准lín kap lín ê gín-á去lah，願耶和華kap lín tī-teh；lín tio̍h謹慎，災禍tī lín目睭前lah； ¹¹ án-ni bōe做得；lín chiahê大人thang去服事耶和華，因為這是lín所求ê。就tùi法老ê面前趕in出去。 ¹² 耶和華kā摩西講：你伸手kí埃及地，hō͘草蜢上來埃及地，食地裡一切ê菜蔬，就是雹phah無了ê。 ¹³ 摩西就伸伊ê柺á，kí埃及地；耶和華就hō͘東風thong日thong暝吹tī地裡；到明á早起，東風就將草蜢吹來。 ¹⁴ 草蜢上來埃及遍地，歇tī埃及ê四境，厲害到極；從前無有án-ni ê草蜢，以後也無beh án-ni； ¹⁵ 因為in遮蓋全地，致到地lóng烏暗；koh食地上一切ê菜蔬，kap樹裡ê果子，雹所phah無了ê。埃及遍地，無論樹木，á是田裡ê菜蔬，無留一項青翠ê物。 ¹⁶ Tùi án-ni，法老趕緊叫摩西、亞倫來，講：我得罪lín ê上帝耶和華，也得罪lín。 ¹⁷ Taⁿ求你，kan-ta chit一pái赦免我ê罪，求lín ê上帝耶和華，hō͘我脫離chit一pái ê死無。 ¹⁸ 摩西就離開法老，去求耶和華。 ¹⁹ 耶和華就tńg真透ê西風將草蜢吹起來，趕入紅海；tī埃及ê四境無留一隻草蜢。 ²⁰ 總是耶和華hō͘法老ê心硬，m̄准以色列人去。 ²¹ 耶和華kā摩西講：你伸手ǹg天，hō͘埃及地烏暗，chitê烏暗到能摸得。 ²² 摩西就伸手ǹg天，埃及遍地就三日久烏烏暗暗； ²³ 三日久人bōe看見人，也無起來離開伊ê所在；獨獨以色列人ê厝lóng有光。 ²⁴ 法老就叫摩西來講：lín去服事耶和華，獨獨是lín ê羊群牛群tio̍h留teh，lín ê gín-á就thang kap lín相kap去。 ²⁵ 摩西講：你也tio̍h將牲禮kap燒祭ê物交阮ê手，hō͘阮thang祭祀耶和華阮ê上帝。 ²⁶ 阮ê cheng-siⁿ也tio̍h kap阮去，連一隻也m̄留teh；因為阮tio̍h tùi hit中間取伊，來服事耶和華阮ê上帝；koh阮猶未到hia m̄知tio̍h用甚麼服事耶和華。 ²⁷ 總是耶和華hō͘法老ê心硬，m̄肯hō͘ in去。 ²⁸ 法老kā摩西講：你tio̍h離開我去；你tio̍h謹慎家己，m̄-thang koh見我ê面；因為你見我ê面，hit日你會死。 ²⁹ 摩西講：你án-ni講：好；我無beh koh見你ê面lah。

=== 出埃及記 · 第 10 章 ===

¹ Iâ-hô-hoa tùi Mô͘-se kóng, Lí ji̍p-khì kìⁿ Hoat-ló; in-ūi Góa í-keng hō͘ i ê sim, kap i ê jîn-sîn ê sim, kong-ngī, thang hō͘ Góa hián-bêng Góa chiah-ê sîn-jiah tī in tiong-kan; ² iā beh hō͘ lí chiong Góa só͘ chòe tī Ai-ki̍p ê sū, kap Góa tī in tiong-kan só͘ kiâⁿ chiah-ê sîn-jiah, thoân hō͘ lí ê kiáⁿ kap lí ê sun thiaⁿ, thang hō͘ lín chai Góa sī Iâ-hô-hoa. ³ Mô͘-se, A-lûn chiū khì kìⁿ Hoat-ló, kā i kóng, Iâ-hô-hoa, Hi-pek-lâi lâng ê Siōng-tè, án-ni kóng, Lí tī Góa ê bīn-chêng m̄-khéng ka-kī khiam-pi, beh kàu sím-mi̍h sî ah? tio̍h chún Góa ê peh-sìⁿ khì, hō͘ in ho̍k-sāi Góa. ⁴ Lí nā m̄-khéng hō͘ Góa ê peh-sìⁿ khì, khòaⁿ ah, bîn-á-ji̍t Góa beh hō͘ chháu-meh ji̍p lí ê kéng-lāi; ⁵ in beh jia-khàm tōe-bīn, tì-kàu bōe khòaⁿ-kìⁿ thô͘; koh beh chia̍h hit-ê tùi chai-ē só͘-chhun-ê, chiū-sī pha̍uh só͘ phah bô liáu ê; iā beh chia̍h chhân-ni̍h ūi lín só͘ hoat it-chhè ê chhiū-ba̍k; ⁶ chháu-meh beh chhiong-móa lí ê chhù, kap lí ê chèng jîn-sîn ê chhù, í-ki̍p it-chhè Ai-ki̍p lâng ê chhù, tùi lí ê lāu-pē kap lí ê chó͘-kong chhut-sì kàu taⁿ, bē-bat khòaⁿ-kìⁿ án-ni. Mô͘-se chiū oa̍t-tńg-sin, lī-khui Hoat-ló chhut-khì. ⁷ Hoat-ló ê jîn-sîn tùi i kóng, Chit lâng chòe lán ê lô-bāng, beh kàu sím-mi̍h sî ah? tio̍h chún chiah-ê lâng khì ho̍k-sāi Iâ-hô-hoa in ê Siōng-tè; Ai-ki̍p í-keng pāi-hoāi, lí kiám m̄-chai mah? ⁸ Tùi án-ni, Mô͘-se, A-lûn siū tiàu tò-tńg-lâi kìⁿ Hoat-ló; Hoat-ló kā in kóng, Lín khì ho̍k-sāi Iâ-hô-hoa lín ê Siōng-tè; to̍k-to̍k hiah-ê beh-khì-ê, sī sím-mi̍h hō lâng ah? ⁹ Mô͘-se kóng, Goán beh kap goán ê siàu-liân lâng lāu-lâng khì, iā beh tòa goán ê kiáⁿ cha-bó͘-kiáⁿ, kap goán ê iûⁿ-kûn gû-kûn chòe chi̍t-ē khì; in-ūi goán tio̍h siú Iâ-hô-hoa ê choeh. ¹⁰ Hoat-ló tùi in kóng, Hó-lah, góa chún lín kap lín ê gín-á khì lah, goān Iâ-hô-hoa kap lín tī-teh; lín tio̍h kín-sīn, chai-ē tī lín ba̍k-chiu-chêng lah; ¹¹ án-ni bōe-chòe-tit; lín chiah-ê tōa-lâng thang khì ho̍k-sāi Iâ-hô-hoa, in-ūi che sī lín só͘ kiû ê. Chiū tùi Hoat-ló ê bīn-chêng kóaⁿ in chhut-khì. ¹² Iâ-hô-hoa kā Mô͘-se kóng, Lí chhun-chhiú kí Ai-ki̍p tōe, hō͘ chháu-meh chiūⁿ-lâi Ai-ki̍p tōe, chia̍h tōe-ni̍h it-chhè ê chhài-soe, chiū-sī pha̍uh phah bô liáu ê. ¹³ Mô͘-se chiū chhun i ê koáiⁿ-á, kí Ai-ki̍p tōe; Iâ-hô-hoa chiū hō͘ tang-hong thong-ji̍t thong-mî chhe tī tōe-ni̍h; kàu bîn-á-chá-khí, tang-hong chiū chiong chháu-meh chhe-lâi. ¹⁴ Chháu-meh chiūⁿ-lâi Ai-ki̍p piàn-tōe, hioh tī Ai-ki̍p ê sì-kéng, lī-hāi kàu-ke̍k; chiông-chêng bô ū án-ni ê chháu-meh, í-āu iā bô beh án-ni; ¹⁵ in-ūi in jia-khàm choân-tōe, tì-kàu tōe lóng o͘-àm; koh chia̍h tōe-chiūⁿ it-chhè ê chhài-soe, kap chhiū-ni̍h ê ké-chí, pha̍uh só͘ phah bô liáu ê. Ai-ki̍p piàn-tōe, bô-lūn chhiū-ba̍k, á-sī chhân-ni̍h ê chhài-soe, bô lâu chi̍t-hāng chhiⁿ-chhùi ê mi̍h. ¹⁶ Tùi án-ni Hoat-ló kóaⁿ-kín kiò Mô͘-se, A-lûn lâi, kóng, Góa tek-chōe lín ê Siōng-tè Iâ-hô-hoa, iā tek-chōe lín. ¹⁷ Taⁿ kiû lí, kan-ta chit-chi̍t-pái sià-bián góa ê chōe, kiû lín ê Siōng-tè Iâ-hô-hoa, hō͘ góa thoat-lī chit-chi̍t-pái ê sí-bô. ¹⁸ Mô͘-se chiū lī-khui Hoat-ló, khì kiû Iâ-hô-hoa. ¹⁹ Iâ-hô-hoa chiū tńg chin-thàu ê sai-hong chiong chháu-meh chhe-khí-lâi, kóaⁿ-ji̍p Âng-hái; tī Ai-ki̍p ê sì-kéng bô lâu chi̍t-chiah chháu-meh. ²⁰ Chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng khì. ²¹ Iâ-hô-hoa kā Mô͘-se kóng, Lí chhun-chhiú ǹg-thiⁿ, hō͘ Ai-ki̍p tōe o͘-àm, chit-ê o͘-àm kàu ōe-bong-tit. ²² Mô͘-se chiū chhun-chhiú ǹg thiⁿ, Ai-ki̍p piàn-tōe chiū saⁿ-ji̍t kú o͘-o͘ àm-àm; ²³ saⁿ-ji̍t kú lâng bōe khòaⁿ-kìⁿ lâng, iā bô khí-lâi lī-khui i ê só͘-chāi; to̍k-to̍k Í-sek-lia̍t lâng ê chhù lóng ū kng. ²⁴ Hoat-ló chiū kiò Mô͘-se lâi kóng, Lín khì ho̍k-sāi Iâ-hô-hoa, to̍k-to̍k sī lín ê iûⁿ-kûn gû-kûn tio̍h lâu-teh, lín ê gín-á chiū thang kap lín saⁿ-kap khì. ²⁵ Mô͘-se kóng, Lí iā tio̍h chiong seng-lé kap sio-chè ê mi̍h kau goán ê chhiú, hō͘ goán thang chè-sū Iâ-hô-hoa goán ê Siōng-tè. ²⁶ Goán ê cheng-siⁿ iā tio̍h kap goán khì, liân chi̍t-chiah iā m̄ lâu-teh; in-ūi goán tio̍h tùi hit tiong-kan chhú i, lâi ho̍k-sāi Iâ-hô-hoa goán ê Siōng-tè; koh goán iáu-bē kàu hia m̄-chai tio̍h ēng sím-mi̍h ho̍k-sāi Iâ-hô-hoa. ²⁷ Chóng-sī Iâ-hô-hoa hō͘ Hoat-ló ê sim ngī, m̄-khéng hō͘ in khì. ²⁸ Hoat-ló kā Mô͘-se kóng, Lí tio̍h lī-khui góa khì; lí tio̍h kín-sīn ka-kī, m̄-thang koh kìⁿ góa ê bīn; in-ūi lí kìⁿ góa ê bīn, hit-ji̍t lí ōe sí. ²⁹ Mô͘-se kóng, Lí án-ni kóng, hó; góa bô beh koh kìⁿ lí ê bīn lah.

=== 出埃及記 · 第 11 章 ===

¹ 耶和華kā摩西講：我beh koh hō͘一項災禍到tī法老kap埃及，然後伊beh 准lín離開chia；伊准lín去ê時beh趕lín lóng tùi chia出去。 ² 你tio̍h傳hō͘百姓聽，hō͘ in男女ta̍k人tùi in ê厝邊討金器、銀器。 ³ 耶和華hō͘百姓得tio̍h恩典tī埃及人ê面前；koh摩西chit人tī埃及地，tī法老人臣ê目睭中，kap百姓ê目睭中，看做尊大。 ⁴ 摩西講：耶和華án-ni講：約略半暝，我beh出去遍行埃及。 ⁵ 見若tī埃及地ê大kiáⁿ，tùi坐位ê法老ê大kiáⁿ，到tī挨磨(oe-bō)ê女婢ê大kiáⁿ，kap一切ê cheng-siⁿ頭水生ê，lóng beh死。 ⁶ 埃及遍地beh有大啼哭ê聲，從[將]前未bat有án-ni，後來也無koh án-ni。 ⁷ 論到以色列中，無論是人是cheng-siⁿ，連狗也m̄敢吠in；hō͘ lín知耶和華tī埃及人kap以色列人ê中間有分別in。 ⁸ 你hiahê人臣，lóng beh落來見我，仆(phak)tī我面前，講：求你kap跟tè你ê百姓lóng出去；然後我beh出去。Tùi án-ni，摩西大受氣，離開法老出去。 ⁹ 耶和華kā摩西講：法老無beh聽lín，hō͘我ê奇事tī埃及地加添ná chōe。 ¹⁰ 摩西、亞倫tī法老ê面前行這一切ê奇事；總是耶和華hō͘法老ê心硬，m̄准以色列人離開伊ê地。

=== 出埃及記 · 第 11 章 ===

¹ Iâ-hô-hoa kā Mô͘-se kóng, Góa beh koh hō͘ chi̍t-hāng chai-ē kàu tī Hoat-ló kap Ai-ki̍p, jiân-āu i beh chún lín lī-khui chia; i chún lín khì ê sî beh kóaⁿ lín lóng tùi chia chhut-khì. ² Lí tio̍h thoân hō͘ peh-sìⁿ thiaⁿ, hō͘ in lâm-lú ta̍k-lâng tùi in ê chhù-piⁿ thó kim-khì, gûn-khì. ³ Iâ-hô-hoa hō͘ peh-sìⁿ tit-tio̍h un-tián tī Ai-ki̍p lâng ê bīn-chêng; koh Mô͘-se chit-lâng tī Ai-ki̍p tōe, tī Hoat-ló jîn-sîn ê ba̍k-chiu-tiong, kap peh-sìⁿ ê ba̍k-chiu-tiong, khòaⁿ-chòe chun-tōa. ⁴ Mô͘-se kóng, Iâ-hô-hoa án-ni kóng, Iok-lio̍k pòaⁿ-mî, Góa beh chhut-khì piàn kiâⁿ Ai-ki̍p. ⁵ Kìⁿ-nā tī Ai-ki̍p tōe ê tōa-kiáⁿ, tùi chē-ūi ê Hoat-ló ê tōa-kiáⁿ, kàu tī oe-bō ê lú-pī ê tōa-kiáⁿ, kap it-chhè ê cheng-siⁿ thâu-chúi-siⁿ-ê, lóng beh sí. ⁶ Ai-ki̍p piàn-tōe beh ū tōa thî-khàu ê siaⁿ, chiông[chiong]-chêng bē bat ū án-ni, āu-lâi iā bô koh án-ni. ⁷ Lūn-kàu Í-sek-lia̍t-tiong, bô-lūn sī lâng sī cheng-siⁿ, liân káu iā m̄-káⁿ pūi in; hō͘ lín chai Iâ-hô-hoa tī Ai-ki̍p lâng kap Í-sek-lia̍t lâng ê tiong-kan ū hun-piat in. ⁸ Lí hiah-ê jîn-sîn, lóng beh lo̍h lâi kìⁿ góa, phak tī góa bīn-chêng, kóng, Kiû lí kap kun-tè lí ê peh-sìⁿ lóng chhut-khì; jiân-āu góa beh chhut-khì. Tùi án-ni Mô͘-se tōa siū-khì, lī-khui Hoat-ló chhut-khì. ⁹ Iâ-hô-hoa kā Mô͘-se kóng, Hoat-ló bô beh thiaⁿ lín, hō͘ Góa ê kî-sū tī Ai-ki̍p tōe ke-thiⁿ ná chōe. ¹⁰ Mô͘-se, A-lûn tī Hoat-ló ê bīn-chêng kiâⁿ che it-chhè ê kî-sū; chóng-sī Iâ-hô-hoa hō͘ Hoat-ló ê sim ngī, m̄-chún Í-sek-lia̍t lâng lī-khui i ê tōe.

=== 出埃及記 · 第 12 章 ===

¹ 耶和華tī埃及地對摩西、亞倫講： ² Chit月tio̍h做lín ê正月，做年年ê頭一月。 ³ Lín tio̍h對以色列ê全會講：本月初十日，ta̍k人tio̍h照老父ê家，取羊á，一家一隻。 ⁴ 若是一家 ê人siuⁿ少，一隻羊á食bōe了，伊tio̍h kap隔壁ê厝邊，照人額，相kap取一隻；lín備辦羊á，tio̍h按算ta̍k人所能食ê量。 ⁵ Lín ê羊á tio̍h無瑕疵ê，未滿年ê羊káng-á；lín tio̍h tùi綿羊中，á是山羊中，取伊，lóng thang； ⁶ lín tio̍h留到本月十四日，黃昏ê時，以色列全會ê眾人tio̍h 刣羊á。 ⁷ In tio̍h 取淡薄血，抹tī食羊á hit間厝，雙pêng ê門khiā kap門楣。 ⁸ Hit暝tio̍h食羊á ê肉，用火pek伊，kap無酵餅、苦菜chham-teh食。 ⁹ M̄-thang生(chhiⁿ) 生食，決斷m̄-thang用水煮，tio̍h用火 pek；頭、腳，kap五臟lóng tio̍h食。 ¹⁰ Lóng m̄-thang 留隔早起，若留到隔早起tio̍h用火燒。 ¹¹ Lín tio̍h án-ni食i；腰hâ帶，腳穿鞋，手kia̍h柺á，也tio̍h趕緊食；這是耶和華ê pôaⁿ過節。 ¹² 因為hit暝我beh遍行埃及地，phah死埃及地一切頭上生ê，無論人kap cheng-siⁿ；koh beh審判埃及一切ê上帝；我就是耶和華。 ¹³ Chitê血tī lín所khiā起ê厝，beh做lín ê記號；我一下看見chitê血，就tùi lín pôaⁿ過去；我phah埃及地ê時，災禍無到tī lín，來滅lín。 ¹⁴ Lín tio̍h用chit日做記念，守伊做耶和華ê節；lín tio̍h代代守chitê節，做永遠ê例。 ¹⁵ Lín tio̍h食無酵餅七日久；頭一日tio̍h tùi lín ta̍k間厝除去酵；因為tùi頭一日到第七日，凡若食有酵ê，beh tùi以色列中除去。 ¹⁶ 頭一日lín tio̍h有聖會，七日也tio̍h有聖會；chit兩日，除去備辦ta̍k人所tio̍h食ê以外，無論甚麼工 lóng m̄-thang做。 ¹⁷ Lín tio̍h守無酵節；因為我tú-tú tī hit日chhōa lín ê軍隊tùi埃及地出來；所以lín tio̍h守chit日，ta̍k世代做永遠ê例。 ¹⁸ Tùi正月十四ê-hng 到二一ê-hng，lín tio̍h食無酵餅。 ¹⁹ Tī lín ta̍k間厝，七日內m̄-thang有酵；因為見若食有酵ê物，無論是寄腳ê，á是本地ê，hit人tio̍h tùi以色列會中除去。 ²⁰ 有酵ê物，lín lóng m̄-thang食；tī lín一切khiā起ê所在，tio̍h食無酵餅。 ²¹ 摩西就叫以色列眾長老來，kā in講：Lín ta̍k人tio̍h照家口取羊á，刣伊做pôaⁿ過節。 ²² Lín tio̍h the̍h一把ê牛膝草，ùn盆內ê血，用盆內ê血抹門楣，kap雙pêng ê門khiā；lín無論甚麼人m̄-thang tùi伊ê厝出門，直到明á早起。 ²³ 因為耶和華beh遍行，phah死埃及人；伊看見血tī門楣，kap雙pêng ê門khiā，耶和華就beh pôaⁿ過hitê門，m̄准滅性命ê入lín ê厝，來phah死lín。 ²⁴ Chitê事，lín tio̍h守伊，做lín kap lín ê kiaⁿ孫永遠ê例。 ²⁵ 後來lín到耶和華照伊所應允賞賜lín hitê地，就tio̍h守chitê禮。 ²⁶ Lín ê kiáⁿ兒若問lín，為啥事行chitê禮？ ²⁷ lín就tio̍h講：這是耶和華pôaⁿ過節ê祭；當以色列人tī埃及ê時，伊phah死埃及人，pôaⁿ過以色列人ê厝，救咱ta̍k家。 Tùi án-ni，百姓àⁿ頭敬拜。 ²⁸ 以色列人就去án-ni行；耶和華所吩咐摩西、亞倫ê，in照án-ni行。 ²⁹ 到半暝耶和華將埃及地所有ê大kiáⁿ，就是tùi坐位ê法老ê大kiáⁿ 到監犯ê大kiáⁿ，以及頭水生ê cheng-siⁿ，一盡刣死。 ³⁰ 法老kap一切ê人臣，kap埃及ê眾人，暝時lóng起來；tī埃及有大啼哭ê聲，因為無一家無死人。 ³¹ 法老透暝召摩西、亞倫講：起來，kap以色列人tio̍h tùi我ê百姓中間出去，照lín所講ê，去服事耶和華； ³² 也照lín所講ê，連羊群牛群帶帶去；也tio̍h kā我祝福。 ³³ 埃及人逼百姓；kah in緊緊出in ê地，講：阮lóng死lah。 ³⁴ 百姓就the̍h無酵ê生麵，將chhiau麵ê器具包tī衫內，背tī肩頭頂。 ³⁵ 以色列人照摩西ê話行，tùi埃及討銀器、金器kap衣裳。 ³⁶ 耶和華hō͘百姓得tio̍h恩典tī埃及人ê面前，照in所討ê hō͘ in；Tùi án-ni， in搶埃及人。 ³⁷ 以色列人tùi Lân-sek去So͘-kat，除gín-á以外，步行ê大人約有六十萬。 ³⁸ Koh有chōe-chōe雜族ê人，也有羊群、牛群chōe-chōe cheng-siⁿ kap in上去。 ³⁹ In用埃及帶出來ê生麵pek做無酵餅；無發酵，是因為受逼出埃及，bōe會延chhiân得，也無為家己備辦甚麼食物。 ⁴⁰ 以色列人出外tī埃及四百三十年。 ⁴¹ 到四百三十年滿，tú-tú hit日，耶和華ê軍隊lóng tùi埃及地出來。 ⁴² Chit暝tio̍h為耶和華守伊，因為伊chhōa in出埃及地；這是耶和華ê暝，是以色列眾人代代所tio̍h守ê。 ⁴³ 耶和華對摩西、亞倫講：pôaⁿ過節ê例是án-ni； ⁴⁴ 外邦人lóng m̄-thang食伊；獨獨ta̍k人用銀買ê奴僕，已經kā伊行割禮，就thang食。 ⁴⁵ 寄腳ê kap倩工人lóng m̄-thang食。 ⁴⁶ Tio̍h tī一間厝食伊，一塊肉也m̄-thang帶出厝外；伊ê骨一支也m̄-thang phah折。 ⁴⁷ 以色列全會lóng tio̍h守伊。 ⁴⁸ 若有外族人出外tī lín中間，ài守pôaⁿ過節來服事耶和華，伊所有ê ta-po͘人tio̍h受割禮，然後伊thang來守，就kap本族ê人無各樣；總是無受割禮ê人，lóng m̄-thang食伊。 ⁴⁹ 本族ê人kap外族ê人出外tī lín中間，lóng同一樣ê例。 ⁵⁰ 以色列眾人就án-ni行，照耶和華所吩咐摩西、亞倫ê去做。 ⁵¹ 當hit日耶和華chhōa以色列人，照in ê軍隊，出埃及地。

=== 出埃及記 · 第 12 章 ===

¹ Iâ-hô-hoa tī Ai-ki̍p tōe tùi Mô͘-se, A-lûn kóng, ² Chit ge̍h tio̍h chòe lín ê chiaⁿ-ge̍h, chòe nî-nî ê thâu-chi̍t-ge̍h. ³ Lín tio̍h tùi Í-sek-lia̍t ê choân-hōe kóng, Pún-ge̍h chhoe-cha̍p ji̍t, ta̍k-lâng tio̍h chiàu lāu-pē ê ke, chhú iûⁿ-á, chi̍t-ke chi̍t-chiah. ⁴ Nā sī chi̍t-ke ê lâng siuⁿ-chió, chi̍t-chiah iûⁿ-á chia̍h-bōe-liáu, i tio̍h kap keh-piah ê chhù-piⁿ, chiàu lâng-gia̍h, saⁿ-kap chhú chi̍t-chiah; lín pī-pān iûⁿ-á, tio̍h àn-sǹg ta̍k-lâng só͘ ōe chia̍h ê liōng. ⁵ Lín ê iûⁿ-á tio̍h bô hâ-chhû ê, bē-móa-nî ê iûⁿ-káng-á; lín tio̍h tùi mî-iûⁿ-tiong, á-sī soaⁿ-iûⁿ-tiong, chhú i, lóng thang; ⁶ lín tio̍h lâu kàu pún-ge̍h cha̍p-sì ji̍t, hông-hun ê sî, Í-sek-lia̍t choân-hōe ê chèng-lâng tio̍h thâi iûⁿ-á. ⁷ In tio̍h chhú tām-po̍h huih, boah tī chia̍h iûⁿ-á hit keng chhù, siang-pêng ê mn̂g-khiā kap mn̂g-bâi. ⁸ Hit-mî tio̍h chia̍h iûⁿ-á ê bah, ēng hé pek i, kap bô-kàⁿ-piáⁿ khó͘-chhài chham-teh chia̍h. ⁹ M̄-thang chhiⁿ-chhiⁿ chia̍h, koat-toàn m̄-thang ēng chúi chú, tio̍h ēng hé pek; thâu, kha, kap ngó͘-chōng lóng tio̍h chia̍h. ¹⁰ Lóng m̄-thang lâu keh chá-khí, nā lâu kàu keh chá-khí tio̍h ēng hé sio. ¹¹ Lín tio̍h án-ni chia̍h i; io hâ-tòa, kha chhēng-ôe, chhiú kia̍h koáiⁿ-á, iā tio̍h kóaⁿ-kín chia̍h; che sī Iâ-hô-hoa ê pôaⁿ-kè-choeh. ¹² In-ūi hit-mî Góa beh piàn-kiâⁿ Ai-ki̍p tōe, phah-sí Ai-ki̍p tōe it-chhè thâu-chiūⁿ-siⁿ-ê, bô-lūn lâng kap cheng-siⁿ; koh beh sím-phòaⁿ Ai-ki̍p it-chhè ê siōng-tè; Góa chiū-sī Iâ-hô-hoa. ¹³ Chit-ê huih tī lín só͘ khiā-khí ê chhù, beh chòe lín ê kì-hō; Góa chi̍t-ē khòaⁿ-kìⁿ chit-ê huih, chiū tùi lín pôaⁿ-kè-khì; Góa phah Ai-ki̍p tōe ê sî, chai-ē bô kàu tī lín, lâi bia̍t lín. ¹⁴ Lín tio̍h ēng chit-ji̍t chòe kì-liām, siú i chòe Iâ-hô-hoa ê choeh; lín tio̍h tāi-tāi siú chit-ê choeh, chòe éng-oán ê lē. ¹⁵ Lín tio̍h chia̍h bô-kàⁿ-piáⁿ chhit-ji̍t kú; thâu-chi̍t-ji̍t tio̍h tùi lín ta̍k keng chhù tû-khì kàⁿ; in-ūi tùi thâu-chi̍t ji̍t kàu tē-chhit ji̍t, hoān-nā chia̍h ū kàⁿ ê, beh tùi Í-sek-lia̍t-tiong tû-khì. ¹⁶ Thâu-chi̍t ji̍t lín tio̍h ū sèng-hōe, chhit-ji̍t iā tio̍h ū sèng-hōe; chit nn̄g-ji̍t, tû-khì pī-pān ta̍k-lâng só͘ tio̍h chia̍h ê í-gōa, bô-lūn sím-mi̍h kang lóng m̄-thang chòe. ¹⁷ Lín tio̍h siú bô-kàⁿ-choeh; in-ūi Góa tú-tú tī hit-ji̍t chhōa lín ê kun-tūi tùi Ai-ki̍p tōe chhut-lâi; só͘-í lín tio̍h siú chit-ji̍t, ta̍k sè-tāi chòe éng-oán ê lē. ¹⁸ Tùi chiaⁿ-ge̍h cha̍p-sì ê-hng kàu jī-it ê-hng, lín tio̍h chia̍h bô-kàⁿ-piáⁿ. ¹⁹ Tī lín ta̍k keng chhù, chhit-ji̍t-lāi m̄-thang ū kàⁿ; in-ūi kìⁿ-nā chia̍h ū kàⁿ ê mi̍h, bô-lūn sī kià-kha-ê, á-sī pún-tōe-ê, hit-lâng tio̍h tùi Í-sek-lia̍t hōe-tiong tû-khì. ²⁰ Ū-kàⁿ ê mi̍h, lín lóng m̄-thang chia̍h; tī lín it-chhè khiā-khí ê só͘-chāi, tio̍h chia̍h bô-kàⁿ-piáⁿ. ²¹ Mô͘-se chiū kiò Í-sek-lia̍t chèng tiúⁿ-ló lâi, kā in kóng, Lín ta̍k-lâng tio̍h chiàu ke-kháu chhú iûⁿ-á, thâi i chòe pôaⁿ-kè-choeh. ²² Lín tio̍h the̍h chi̍t-pé ê gû-chhek-chháu, ùn phûn-lāi ê huih, ēng phûn-lāi ê huih boah mn̂g-bâi, kap siang-pêng ê mn̂g-khiā; lín bô-lūn sím-mi̍h lâng m̄-thang tùi i ê chhù chhut-mn̂g, ti̍t-kàu bîn-á-chá-khí. ²³ In-ūi Iâ-hô-hoa beh piàn-kiâⁿ, phah-sí Ai-ki̍p lâng; I khòaⁿ-kìⁿ huih tī mn̂g-bâi, kap siang-pêng ê mn̂g-khiā, Iâ-hô-hoa chiū beh pôaⁿ-kè hit-ê mn̂g, m̄-chún bia̍t sìⁿ-miā-ê ji̍p lín ê chhù, lâi phah-sí lín. ²⁴ Chit-ê sū, lín tio̍h siú i, chòe lín kap lín ê kiáⁿ-sun éng-oán ê lē. ²⁵ Āu-lâi lín kàu Iâ-hô-hoa chiàu I só͘ èng-ún siúⁿ-sù lín hit-ê tōe, chiū tio̍h siú chit-ê lé. ²⁶ Lín ê kiáⁿ-jî nā mn̄g lín, Ūi siáⁿ-sū kiâⁿ chit-ê lé? ²⁷ lín chiū tio̍h kóng, Che sī Iâ-hô-hoa pôaⁿ-kè-choeh ê chè; tng Í-sek-lia̍t lâng tī Ai-ki̍p ê sî, I phah-sí Ai-ki̍p lâng, pôaⁿ-kè Í-sek-lia̍t lâng ê chhù, kiù lán ta̍k-ke. Tùi án-ni peh-sìⁿ àⁿ-thâu kèng-pài. ²⁸ Í-sek-lia̍t lâng chiū khì án-ni kiâⁿ; Iâ-hô-hoa só͘ hoan-hù Mô͘-se, A-lûn-ê, in chiàu án-ni kiâⁿ. ²⁹ Kàu pòaⁿ-mî Iâ-hô-hoa chiong Ai-ki̍p tōe só͘ ū ê tōa-kiáⁿ, chiū-sī tùi chē-ūi ê Hoat-ló ê tōa-kiáⁿ kàu kaⁿ-hoān ê tōa-kiáⁿ, í-ki̍p thâu-chúi-siⁿ ê cheng-siⁿ, it-chīn thâi-sí. ³⁰ Hoat-ló kap it-chhè ê jîn-sîn, kap Ai-ki̍p ê chèng-lâng, mî-sî lóng khí-lâi; tī Ai-ki̍p ū tōa thî-khàu ê siaⁿ, in-ūi bô chi̍t-ke bô sí-lâng. ³¹ Hoat-ló thàu-mî tiàu Mô͘-se, A-lûn kóng, Khí-lâi, kap Í-sek-lia̍t lâng tio̍h tùi góa ê peh-sìⁿ tiong-kan chhut-khì, chiàu lín só͘ kóng ê, khì ho̍k-sāi Iâ-hô-hoa; ³² iā chiàu lín só͘ kóng ê, liân iûⁿ-kûn gû-kûn tòa-tòa khì; iā tio̍h kā góa chiok-hok. ³³ Ai-ki̍p lâng pek peh-sìⁿ; kah in kín-kín chhut in ê tōe, kóng, Goán lóng sí-lah. ³⁴ Peh-sìⁿ chiū the̍h bô-kàⁿ ê chhiⁿ-mī, chiong chhiau-mī ê khì-kū pau tī saⁿ-lāi, pē tī keng-thâu-téng. ³⁵ Í-sek-lia̍t lâng chiàu Mô͘-se ê ōe kiâⁿ, tùi Ai-ki̍p thó gûn-khì kim-khì kap i-chiûⁿ. ³⁶ Iâ-hô-hoa hō͘ peh-sìⁿ tit-tio̍h un-tián tī Ai-ki̍p lâng ê bīn-chêng, chiàu in só͘-thó-ê hō͘ in; tùi án-ni in chhiúⁿ Ai-ki̍p lâng. ³⁷ Í-sek-lia̍t lâng tùi Lân-sek khì So͘-kat, tû gín-á í-gōa, pō͘-kiâⁿ ê tōa-lâng iok ū la̍k-cha̍p-bān. ³⁸ Koh ū chōe-chōe cha̍p-cho̍k ê lâng, iā ū iûⁿ-kûn gû-kûn chōe-chōe cheng-siⁿ kap in chiūⁿ-khì. ³⁹ In ēng Ai-ki̍p tòa-chhut-lâi ê chhiⁿ-mī pek-chòe bô-kàⁿ-piáⁿ; bô hoat-kàⁿ, sī in-ūi siū-pek chhut Ai-ki̍p, bōe-ōe iân-chhiân-tit, iā bô ūi ka-kī pī-pān sím-mi̍h chia̍h-mi̍h. ⁴⁰ Í-sek-lia̍t lâng chhut-gōa tī Ai-ki̍p sì-pah saⁿ-cha̍p nî. ⁴¹ Kàu sì-pah saⁿ-cha̍p nî móa, tú-tú hit-ji̍t, Iâ-hô-hoa ê kun-tūi lóng tùi Ai-ki̍p tōe chhut-lâi. ⁴² Chit-mî tio̍h ūi Iâ-hô-hoa siú i, in-ūi I chhōa in chhut Ai-ki̍p tōe; che sī Iâ-hô-hoa ê mî, sī Í-sek-lia̍t chèng lâng tāi-tāi só͘ tio̍h siú-ê. ⁴³ Iâ-hô-hoa tùi Mô͘-se, A-lûn kóng, Pôaⁿ-kè-choeh ê lē sī án-ni; ⁴⁴ gōa-pang lâng lóng m̄-thang chia̍h i; to̍k-to̍k ta̍k-lâng ēng gûn bóe ê lô͘-po̍k, í-keng kā i kiâⁿ kat-lé, chiū thang chia̍h. ⁴⁵ Kià-kha-ê kap chhiàⁿ-kang lâng lóng m̄-thang chia̍h. ⁴⁶ Tio̍h tī chi̍t keng chhù chia̍h i, chi̍t tè bah iā m̄-thang tòa-chhut chhù-gōa; i ê kut chi̍t-ki iā m̄-thang phah-chi̍h. ⁴⁷ Í-sek-lia̍t choân-hōe lóng tio̍h siú i. ⁴⁸ Nā ū gōa-cho̍k lâng chhut-gōa tī lín tiong-kan, ài siú pôaⁿ-kè-choeh lâi ho̍k-sāi Iâ-hô-hoa, i só͘-ū ê ta-po͘-lâng tio̍h siū kat-lé, jiân-āu i thang lâi siú, chiū kap pún-cho̍k ê lâng bô koh-iūⁿ; chóng-sī bô siū kat-lé ê lâng, lóng m̄-thang chia̍h i. ⁴⁹ Pún-cho̍k ê lâng kap gōa-cho̍k ê lâng chhut-gōa tī lín tiong-kan, lóng tâng-chi̍t-iūⁿ ê lē. ⁵⁰ Í-sek-lia̍t chèng-lâng chiū án-ni kiâⁿ, chiàu Iâ-hô-hoa só͘ hoan-hù Mô͘-se, A-lûn ê khì chòe. ⁵¹ Tng hit-ji̍t Iâ-hô-hoa chhōa Í-sek-lia̍t lâng, chiàu in ê kun-tūi, chhut Ai-ki̍p tōe.

=== 出埃及記 · 第 13 章 ===

¹ 耶和華吩咐摩西講： ² 以色列中，無論人kap cheng-siⁿ，見若頭上 ê大kiáⁿ，lóng tio̍h分別做聖，歸tī我；因為本是我ê。 ³ 摩西kā百姓講：Lín tio̍h記念chit日，就是lín tùi埃及地，tùi做奴才ê家，出來；因為耶和華用大權能ê手chhōa lín tùi chia出；有酵ê餅lóng m̄-thang食。 ⁴ Tī A-pit月間，chit日是lín出來ê日。 ⁵ 將來耶和華chhōa lín入迦南、Hek、A-mô͘-lī、Hi-bī、Iâ-pò͘-su，hiahê族ê地，就是對你ê祖公chiù-chōa應允hō͘你，hitê流奶kap蜜ê地，hit時你tio̍h tī chit月間守chitê禮。 ⁶ 你tio̍h食無酵餅七日；到第七日就是耶和華ê節。 ⁷ Chit七日久tio̍h食無酵餅；tī你ê四境內，m̄-thang看見你有下(hē)酵ê餅，也m̄-thang看見你有酵母。 ⁸ 當hit日，你tio̍h kā你ê kiáⁿ講：這是因為耶和華，tī我出埃及ê時，所kā我行ê事。 ⁹ 這beh kā你做記號tī你ê手，做記念tī你ê頭額；hō͘耶和華ê律法常常tī你ê嘴；因為耶和華bat用大權能ê手chhōa你出埃及； ¹⁰ 所以ta̍k年到期你tio̍h守chitê例。 ¹¹ 將來耶和華beh照伊對你kap你ê祖公所chiù-chōa ê，chhōa你入迦南人ê地，將chitê地賞賜你； ¹² hit時你tio̍h將一切頭胎ê ta-po͘-kiáⁿ kap所有頭水公ê cheng-siⁿ，歸hō͘耶和華；chiahê lóng屬耶和華。 ¹³ 見若頭水生ê驢，tio̍h用羊á替贖；若無beh替贖，就tio̍h kŏng折伊ê頷頸；見若你頭上 ê ta-po͘-kiáⁿ lóng tio̍h替贖。 ¹⁴ 日後你ê kiáⁿ問你講，這是甚麼緣故？你tio̍h對伊講，耶和華用大權能ê手，chhōa阮tùi埃及，tùi做奴才ê家，出來。 ¹⁵ Hit時法老固執m̄准阮去，耶和華就將埃及地所有頭胎ê，無論是人ê大kiáⁿ，á是cheng-siⁿ ê頭水ê，lóng害死；因為án-ni，我將頭水ê公ê獻hō͘耶和華做祭；獨獨我ê大kiáⁿ lóng用替贖。 ¹⁶ 這beh做記號tī你ê手，做記念hâ tī你ê頭額；因為耶和華用大權能ê手，chhōa阮tùi埃及出來。 ¹⁷ 法老准百姓去ê時，腓利士地ê路雖然khah近，總是上帝無chhōa in tùi hia去；因為上帝講：驚了百姓tú-tio̍h交戰，就退悔，倒tńg去埃及。 ¹⁸ 所以上帝chhōa百姓彎tùi紅海曠野hit條路去；以色列人lóng排隊伍，tùi埃及地出去。 ¹⁹ 摩西帶約瑟ê骨頭kap伊去；因為約瑟bat切切kah以色列人chiù-chōa，對in講：上帝的確眷顧lín，lín tio̍h帶我ê骨頭tùi chia相kap去。 ²⁰ In tùi So͘-kat起身，紮營tī近曠野ê Í-thóng。 ²¹ 耶和華行tī in ê頭前，日時tī雲柱中chhōa in ê路，暝時tī火柱中光照in；hō͘ in日暝lóng thang行。 ²² 日時ê雲柱，暝時ê火柱，lóng無離開百姓ê頭前。

=== 出埃及記 · 第 13 章 ===

¹ Iâ-hô-hoa hoan-hù Mô͘-se kóng, ² Í-sek-lia̍t-tiong, bô-lūn lâng kap cheng-siⁿ, kìⁿ-nā thâu-chiūⁿ ê tōa-kiáⁿ, lóng tio̍h hun-piat chòe-sèng, kui tī Góa; in-ūi pún sī Góa ê. ³ Mô͘-se kā peh-sìⁿ kóng, Lín tio̍h kì-liām chit-ji̍t, chiū-sī lín tùi Ai-ki̍p tōe, tùi chòe lô͘-châi ê ke, chhut-lâi; in-ūi Iâ-hô-hoa ēng tōa koân-lêng ê chhiú chhōa lín tùi chia chhut; ū kàⁿ ê piáⁿ lóng m̄-thang chia̍h. ⁴ Tī A-pit ge̍h-kan, chit-ji̍t sī lín chhut-lâi ê ji̍t. ⁵ Chiong-lâi Iâ-hô-hoa chhōa lín ji̍p Ka-lâm, Hek, A-mô͘-lī, Hi-bī, Iâ-pò͘-su, hiah-ê cho̍k ê tōe, chiū-sī tùi lí ê chó͘-kong chiù-chōa èng-ún hō͘ lí, hit-ê lâu lin kap bi̍t ê tōe, hit-sî lí tio̍h tī chit-ge̍h-kan siú chit-ê lé. ⁶ Lí tio̍h chia̍h bô-kàⁿ-piáⁿ chhit-ji̍t; kàu tē-chhit ji̍t chiū-sī Iâ-hô-hoa ê choeh. ⁷ Chit chhit-ji̍t kú tio̍h chia̍h bô-kàⁿ-piáⁿ; tī lí ê sì-kéng lāi, m̄-thang khòaⁿ-kìⁿ lí ū hē-kàⁿ ê piáⁿ, iā m̄-thang khòaⁿ-kìⁿ lí ū kàⁿ-bú. ⁸ Tng hit-ji̍t, lí tio̍h kā lí ê kiáⁿ kóng, Che sī in-ūi Iâ-hô-hoa, tī góa chhut Ai-ki̍p ê sî, só͘ kā góa kiâⁿ ê sū. ⁹ Che beh kā lí chòe kì-hō tī lí ê chhiú, chòe kì-liām tī lí ê thâu-hia̍h; hō͘ Iâ-hô-hoa ê lu̍t-hoat siông-siông tī lí ê chhùi; in-ūi Iâ-hô-hoa bat ēng tōa koân-lêng ê chhiú chhōa lí chhut Ai-ki̍p; ¹⁰ só͘-í ta̍k-nî kàu-kî lí tio̍h siú chit-ê lē. ¹¹ Chiong-lâi Iâ-hô-hoa beh chiàu I tùi lí kap lí ê chó͘-kong só͘ chiù-chōa ê, chhōa lí ji̍p Ka-lâm lâng ê tōe, chiong chit-ê tōe siúⁿ-sù lí; ¹² hit-sî lí tio̍h chiong it-chhè thâu-thai ê ta-po͘-kiáⁿ kap só͘ ū thâu-chúi kang ê cheng-siⁿ, kui hō͘ Iâ-hô-hoa; chiah-ê lóng sio̍k Iâ-hô-hoa. ¹³ Kìⁿ-nā thâu-chúi-siⁿ ê lû, tio̍h ēng iûⁿ-á thòe-sio̍k; nā bô beh thòe-sio̍k, chiū tio̍h kòng-chi̍h i ê ām-kún; kìⁿ-nā lí thâu-chiūⁿ ê ta-po͘-kiáⁿ lóng tio̍h thòe-sio̍k. ¹⁴ Ji̍t-āu lí ê kiáⁿ mn̄g lí kóng, Che sī sím-mi̍h iân-kò͘? lí tio̍h tùi i kóng, Iâ-hô-hoa ēng tōa koân-lêng ê chhiú, chhōa goán tùi Ai-ki̍p, tùi chòe lô͘-châi ê ke, chhut-lâi. ¹⁵ Hit-sî Hoat-ló kò͘-chip m̄-chún goán khì, Iâ-hô-hoa chiū chiong Ai-ki̍p tōe só͘-ū thâu-thai-ê, bô-lūn sī lâng ê tōa-kiáⁿ, á-sī cheng-siⁿ ê thâu-chúi-ê, lóng hāi-sí; in-ūi án-ni, góa chiong thâu-chúi ê kang-ê hiàn hō͘ Iâ-hô-hoa chòe-chè; to̍k-to̍k góa ê tōa-kiáⁿ lóng ēng thòe-sio̍k. ¹⁶ Che beh chòe kì-hō tī lí ê chhiú, chòe kì-liām hâ tī lí ê thâu-hia̍h; in-ūi Iâ-hô-hoa ēng tōa koân-lêng ê chhiú, chhōa goán tùi Ai-ki̍p chhut-lâi. ¹⁷ Hoat-ló chún peh-sìⁿ khì ê sî, Hui-lī-sū tōe ê lō͘ sui-jiân khah-kūn, chóng-sī Siōng-tè bô chhōa in tùi hia khì; in-ūi Siōng-tè kóng, Kiaⁿ-liáu peh-sìⁿ tú-tio̍h kau-chiàn, chiū thè-hóe, tò-tńg-khì Ai-ki̍p. ¹⁸ Só͘-í Siōng-tè chhōa peh-sìⁿ oan tùi Âng-hái khòng-iá hit-tiâu lō͘ khì; Í-sek-lia̍t lâng lóng pâi tūi-ngó͘, tùi Ai-ki̍p tōe chhut-khì. ¹⁹ Mô͘-se tòa Iok-sek ê kut-thâu kap i khì; in-ūi Iok-sek bat chhiat-chhiat kah Í-sek-lia̍t lâng chiù-chōa, tùi in kóng, Siōng-tè tek-khak koàn-kò͘ lín, lín tio̍h tòa góa ê kut-thâu tùi chia saⁿ-kap khì. ²⁰ In tùi So͘-kat khí-sin, chat-iâⁿ tī kūn khòng-iá ê Í-thóng. ²¹ Iâ-hô-hoa kiâⁿ tī in ê thâu-chêng, ji̍t-sî tī hûn-thiāu-tiong chhōa in ê lō͘, mî-sî tī hé-thiāu-tiong kng-chiò in; hō͘ in ji̍t-mî lóng thang kiâⁿ. ²² Ji̍t-sî ê hûn-thiāu, mî-sî ê hé-thiāu, lóng bô lī-khui peh-sìⁿ ê thâu-chêng.

=== 出埃及記 · 第 14 章 ===

¹ 耶和華kā摩西講： ² 你吩咐以色列人oa̍t倒tńg，紮營tī Pí-hap-hi-lio̍k ê頭前，tī Bi̍t-toa̍t kap海ê中間，tī Pa-le̍k-sé-hun ê頭前，tī hit對面紮營tī海邊。 ³ 法老beh議論以色列人講：In tī地中se̍h無路，曠野kā in圍困teh。 ⁴ 我beh hō͘法老ê心硬，伊beh追jip in；我就tī法老kap伊ê全軍來得tio̍h榮光；埃及人就知我是耶和華。In就án-ni行。 ⁵ 有人報埃及王講：Hit-ê百姓走去；法老kap伊ê人臣對待hitê百姓ê心就變換，講：咱准以色列人去，無koh服事咱，這是甚麼緣故ah？ ⁶ 法老就備辦伊ê車，帶伊ê百姓相kap去。 ⁷ 也帶六百張特別車，kap埃及所有ê車，ta̍k張車lóng有兵頭teh管。 ⁸ 耶和華hō͘埃及王法老ê心硬；伊就追jip以色列人；但是以色列人靠大權能ê手出去。 ⁹ 埃及人追jip in，法老一切ê馬、車，kap伊ê馬兵，kap伊ê軍隊，就tī海邊óa近Pí-hap-hi-lio̍k，tī Pa-le̍k-sé-hun ê對面，tī in安營ê所在，jip-tio̍h in。 ¹⁰ 法老近óa ê時，以色列人kia̍h目看見埃及人jip-óa來，就真驚，喉叫耶和華。 ¹¹ In對摩西講：kiám是埃及無塚地，你chiah chhōa阮出來死tī曠野mah？你啥事án-ni款待阮，chhōa阮出埃及ah？ ¹² 阮tī埃及kiám無對你án-ni講：莫得chhap阮，chhut-chāi阮服事埃及人mah？因為服事埃及人，khah得死tī曠野。 ¹³ 摩西對百姓講：m̄免驚，做lín khiā-teh，看耶和華今á日為tio̍h lín所beh行ê拯救；因為lín今á日所看見ê埃及人，的確永遠無koh看見。 ¹⁴ 耶和華beh為lín交戰，做lín恬恬，莫做聲。 ¹⁵ 耶和華對摩西講：你啥事喉叫我ah？你tio̍h kah以色列人進前去。 ¹⁶ 你kia̍h柺á伸手kí海，來分開伊；以色列人beh tī海中行乾地； ¹⁷ 獨獨我，我beh hō͘埃及人ê心硬，in beh tè落去；我beh tī法老kap伊ê全軍，伊ê車，伊ê馬兵，來得tio̍h榮光。 ¹⁸ 我tī法老kap伊ê車，伊ê馬兵，得tio̍h榮光ê時，埃及人就知我是耶和華。 ¹⁹ 上帝ê使者，本行tī以色列ê營前ê，徙來行tī in ê後面；雲柱也tùi in ê頭前，徙來khiā tī in ê後面， ²⁰ tī埃及營kap以色列營ê中間；hit-pêng有雲有烏暗，chit-pêng暝時發出光；thong暝兩pêng bōe相近。 ²¹ 摩西就伸手kí海，耶和華thong暝hō͘東風大起，hō͘海退去，水就分開，海就成做乾地。 ²² 以色列人落海中行乾地，水tī in ê雙pêng成做牆壁。 ²³ 埃及人追jip in；法老一切ê馬、車，kap馬兵，lóng tè in到海中。 ²⁴ 到天beh光ê時，耶和華tùi雲kap火ê柱中àⁿ落，看埃及ê軍隊，phah亂in ê隊伍； ²⁵ koh hō͘ in ê車輪lak落，oh得行；致到埃及人講：咱tio̍h tùi以色列人ê面前逃走，因為耶和華為tio̍h in kap埃及人交戰。 ²⁶ 耶和華kā摩西講：你伸手kí海，hō͘水倒tńg來淹埃及人，kap in ê車，in ê馬兵。 ²⁷ 摩西就伸手kí海；到天一下光，海水koh照舊；埃及人逃走，水閘(cha̍h)tī in ê頭前；耶和華就將埃及人車倒tī海中。 ²⁸ 水就反流，淹密hiahê車kap馬兵；法老ê全軍tè以色列人落海ê，連一个也無留teh。 ²⁹ 總是以色列人tī海中行乾地，水tī in ê雙pêng成做in ê牆壁。 ³⁰ Hit日耶和華án-ni救以色列人脫離埃及人ê手；以色列人看見埃及人ê身屍tī海邊。 ³¹ 以色列人看見耶和華對埃及人所行ê大事，就敬畏耶和華；koh信服耶和華kap伊ê奴僕摩西。

=== 出埃及記 · 第 14 章 ===

¹ Iâ-hô-hoa kā Mô͘-se kóng, ² Lí hoan-hù Í-sek-lia̍t lâng oa̍t-tò-tńg, chat-iâⁿ tī Pí-hap-hi-lio̍k ê thâu-chêng, tī Bi̍t-toa̍t kap hái ê tiong-kan, tī Pa-le̍k-sé-hun ê thâu-chêng, tī hit tùi-bīn chat-iâⁿ tī hái-piⁿ. ³ Hoat-ló beh gī-lūn Í-sek-lia̍t lâng kóng, In tī tōe-tiong se̍h bô lō͘, khòng-iá kā in ûi-khùn teh. ⁴ Góa beh hō͘ Hoat-ló ê sim ngī, i beh tui-jip in; Góa chiū tī Hoat-ló kap i ê choân-kun lâi tit-tio̍h êng-kng; Ai-ki̍p lâng chiū chai Góa sī Iâ-hô-hoa. In chiū án-ni kiâⁿ. ⁵ Ū lâng pò Ai-ki̍p ông kóng, Hit-ê peh-sìⁿ cháu-khì; Hoat-ló kap i ê jîn-sîn tùi-thāi hit-ê peh-sìⁿ ê sim chiū piàn-ōaⁿ, kóng, Lán chún Í-sek-lia̍t lâng khì, bô koh ho̍k-sāi lán, che sī sím-mi̍h iân-kò͘ ah? ⁶ Hoat-ló chiū pī-pān i ê chhia, tòa i ê peh-sìⁿ saⁿ-kap khì. ⁷ Iā tòa la̍k-pah tiuⁿ te̍k-pia̍t chhia, kap Ai-ki̍p só͘ ū ê chhia, ta̍k tiuⁿ chhia lóng ū peng-thâu teh koán. ⁸ Iâ-hô-hoa hō͘ Ai-ki̍p ông Hoat-ló ê sim ngī; i chiū tui-jip Í-sek-lia̍t lâng; nā-sī Í-sek-lia̍t lâng khò tōa koân-lêng ê chhiú chhut-khì. ⁹ Ai-ki̍p lâng tui-jip in, Hoat-ló it-chhè ê bé, chhia, kap i ê bé-peng, kap i ê kun-tūi, chiū tī hái-piⁿ óa-kūn Pí-hap-hi-lio̍k, tī Pa-le̍k-sé-hun ê tùi-bīn, tī in an-iâⁿ ê só͘-chāi, jip-tio̍h in. ¹⁰ Hoat-ló kūn-óa ê sî, Í-sek-lia̍t lâng kia̍h-ba̍k khòaⁿ-kìⁿ Ai-ki̍p lâng jip-óa-lâi, chiū chin kiaⁿ, âu-kiò Iâ-hô-hoa. ¹¹ In tùi Mô͘-se kóng, Kiám sī Ai-ki̍p bô thióng-tōe, lí chiah chhōa goán chhut-lâi sí tī khòng-iá mah? lí siáⁿ-sū án-ni khoán-thāi goán, chhōa goán chhut Ai-ki̍p ah? ¹² Goán tī Ai-ki̍p kiám bô tùi lí án-ni kóng, Bo̍h-tit chhap goán, chhut-chāi goán ho̍k-sāi Ai-ki̍p lâng mah? In-ūi ho̍k-sāi Ai-ki̍p lâng, khah-tit sí tī khòng-iá. ¹³ Mô͘-se tùi peh-sìⁿ kóng, M̄-bián kiaⁿ, chòe lín khiā-teh, khòaⁿ Iâ-hô-hoa kin-á-ji̍t ūi-tio̍h lín só͘ beh kiâⁿ ê chín-kiù; in-ūi lín kin-á-ji̍t só͘ khòaⁿ-kìⁿ ê Ai-ki̍p lâng, tek-khak éng-oán bô koh khòaⁿ-kìⁿ. ¹⁴ Iâ-hô-hoa beh ūi lín kau-chiàn, chòe lín tiām-tiām, bo̍h chòe-siaⁿ. ¹⁵ Iâ-hô-hoa tùi Mô͘-se kóng, Lí siáⁿ-sū âu-kiò Góa ah? lí tio̍h kah Í-sek-lia̍t lâng chìn-chêng khì. ¹⁶ Lí kia̍h koáiⁿ-á chhun-chhiú kí hái, lâi pun-khui i; Í-sek-lia̍t lâng beh tī hái-tiong kiâⁿ ta-tōe; ¹⁷ to̍k-to̍k Góa, Góa beh hō͘ Ai-ki̍p lâng ê sim ngī, in beh tè-lo̍h-khì; Góa beh tī Hoat-ló kap i ê choân-kun, i ê chhia, i ê bé-peng, lâi tit-tio̍h êng-kng. ¹⁸ Góa tī Hoat-ló kap i ê chhia, i ê bé-peng, tit-tio̍h êng-kng ê sî, Ai-ki̍p lâng chiū chai Góa sī Iâ-hô-hoa. ¹⁹ Siōng-tè ê sù-chiá, pún kiâⁿ tī Í-sek-lia̍t ê iâⁿ-chêng-ê, sóa lâi kiâⁿ tī in ê āu-bīn; hûn-thiāu iā tùi in ê thâu-chêng, sóa lâi khiā tī in ê āu-bīn, ²⁰ tī Ai-ki̍p iâⁿ kap Í-sek-lia̍t iâⁿ ê tiong-kan; hit-pêng ū hûn ū o͘-àm, chit-pêng mî-sî hoat-chhut kng; thong-mî nn̄g pêng bōe saⁿ-kūn. ²¹ Mô͘-se chiū chhun-chhiú kí hái, Iâ-hô-hoa thong-mî hō͘ tang-hong tōa khí, hō͘ hái thè-khì, chúi chiū pun-khui, hái chiū chiâⁿ-chòe ta-tōe. ²² Í-sek-lia̍t lâng lo̍h hái-tiong kiâⁿ ta-tōe, chúi tī in ê siang-pêng chiâⁿ-chòe chhiûⁿ-piah. ²³ Ai-ki̍p lâng tui-jip-in; Hoat-ló it-chhè ê bé, chhia, kap bé-peng, lóng tè in kàu hái-tiong. ²⁴ Kàu thiⁿ beh kng ê sî, Iâ-hô-hoa tùi hûn kap hé ê thiāu-tiong àⁿ-lo̍h, khòaⁿ Ai-ki̍p ê kun-tūi, phah-loān in ê tūi-ngó͘; ²⁵ koh hō͘ in ê chhia-lûn lak-lo̍h, oh-tit kiâⁿ; tì-kàu Ai-ki̍p lâng kóng, Lán tio̍h tùi Í-sek-lia̍t lâng ê bīn-chêng tô-cháu, in-ūi Iâ-hô-hoa ūi-tio̍h in kap Ai-ki̍p lâng kau-chiàn. ²⁶ Iâ-hô-hoa kā Mô͘-se kóng, Lí chhun-chhiú kí hái, hō͘ chúi tò-tńg-lâi im Ai-ki̍p lâng, kap in ê chhia, in ê bé-peng. ²⁷ Mô͘-se chiū chhun-chhiú kí hái; kàu thiⁿ chi̍t-ē kng, hái-chúi koh chiàu-kū; Ai-ki̍p lâng tô-cháu, chúi cha̍h tī in ê thâu-chêng; Iâ-hô-hoa chiū chiong Ai-ki̍p lâng chhia-tó tī hái-tiong. ²⁸ Chúi chiū hoan-lâu, im-ba̍t hiah-ê chhia kap bé-peng; Hoat-ló ê choân-kun tè Í-sek-lia̍t lâng lo̍h hái-ê, liân chi̍t-ê iā bô lâu-teh. ²⁹ Chóng-sī Í-sek-lia̍t lâng tī hái-tiong kiâⁿ ta-tōe, chúi tī in ê siang-pêng chiâⁿ-chòe in ê chhiûⁿ-piah. ³⁰ Hit-ji̍t Iâ-hô-hoa án-ni kiù Í-sek-lia̍t lâng thoat-lī Ai-ki̍p lâng ê chhiú; Í-sek-lia̍t lâng khòaⁿ-kìⁿ Ai-ki̍p lâng ê sin-si tī hái-piⁿ. ³¹ Í-sek-lia̍t lâng khòaⁿ-kìⁿ Iâ-hô-hoa tùi Ai-ki̍p lâng só͘ kiâⁿ ê tōa-sū, chiū kèng-ùi Iâ-hô-hoa; koh sìn-ho̍k Iâ-hô-hoa kap I ê lô͘-po̍k Mô͘-se.

=== 出埃及記 · 第 15 章 ===

¹ hit時摩西kap以色列人唱chitê歌o-ló耶和華，講；我beh唱歌o-ló耶和華，因為伊至koân至大；將馬kap騎馬ê hiat tī海中。 ² 耶和華是我ê氣力，是我ê詩歌，也是做我拯救ê主；伊是我ê上帝，我beh o-ló伊，是我ê父ê上帝，我beh尊伊最大。 ³ 耶和華是戰士；伊ê名是耶和華。 ⁴ 法老ê車，kap伊ê軍兵，耶和華hiat伊tī海中；伊特別揀ê軍長，lóng沉tī紅海。 ⁵ 深淵蓋in；In親像石頭，墜到深ê所在。 ⁶ 耶和華ah，你ê chiàⁿ手展出能力，得tio̍h榮光；耶和華ah，你ê chiàⁿ手phah碎對敵。 ⁷ 你發出大威嚴，車倒hiahê起來攻擊你ê；你發出大受氣，燒毀in親像燒草。 ⁸ 你發出鼻中ê氣，水就ná-chhèng ná高，大水khiā起來親像kui堆；海中ê深水堅定。 ⁹ 對敵講：我beh追in，我beh jip-tio̍h in，我beh分所搶ê物；我beh tī in來足我ê心願；我beh拔刀，我ê手beh滅in。 ¹⁰ 你一下pûn風，海就蓋密in； In親像鉛(iân)，沉tī大水中。 ¹¹ 耶和華ah，chiahê上帝 ê中間，是誰能親像你？ Chī-chūi親像你，至聖thang榮光，威嚴thang o-ló，行出奇事？ ¹² 你伸出chiàⁿ手，地就吞滅in。 ¹³ 你用你ê慈愛，chhōa你所救贖ê百姓；你用你ê權能，chhōa in入你聖ê所在。 ¹⁴ 列邦聽見就ngia̍uh-ngia̍uh-chhoah； Khiā起tī腓利士地ê，tú-tio̍h痛苦。 ¹⁵ Hit時Í-tong ê族長gông-ngia̍h； Mô͘-ap英雄ê人致到ngia̍uh-ngia̍uh-chhoah，迦南地khiā起ê百姓，心lóng消熔。 ¹⁶ Gông-ngia̍h驚惶到tī in；耶和華ah，因為你ê手ê大權能，in定定親像石頭， Thèng候你ê百姓經過， Thèng候你所得tio̍h ê百姓過去。 ¹⁷ 你beh chhōa in入去，栽培in tī你ê產業ê山，耶和華ah，就是你為家己所備辦khiā起ê所在，主ah，就是你ê手所建立ê聖所。 ¹⁸ 耶和華beh做王，直到永遠。 ¹⁹ 因為法老ê馬，kap伊ê車，伊ê馬兵，到tī海中，耶和華hō͘海水反流淹密in；獨獨以色列人tī海中行乾地。 ²⁰ 亞倫ê大姊女先知Bí-lī-àm，手裡kia̍h lin-long鼓，眾婦女也tè伊出去，kia̍h lin-long鼓跳舞。 ²¹ Bí-lī-àm和所唱ê講： Lín tio̍h唱歌o-ló耶和華，因為伊至koân至大；將馬kap騎馬ê，hiat tī海中。 ²² 摩西chhōa以色列人tùi紅海進前行；in出去，到Su-jíⁿ ê曠野；tī曠野行三日，chhē無水。 ²³ 到Má-la̍h ê時，Má-la̍h ê水bōe lim得，因為水苦；所以名hitê地叫Má-la̍h。 ²⁴ 百姓就對摩西哀怨講：阮beh lim甚麼ah？ ²⁵ 摩西求叫耶和華；耶和華指示伊一叢樹，伊就hiat伊tī水裡，水就變甘。伊tī-hia，為in定律例法度，tī-hia試驗in。 ²⁶ Koh講：你若致意聽耶和華你ê上帝ê聲，koh行伊所看做合宜ê事，留心聽伊ê誡命，守伊一切ê律例，就我hō͘埃及人所tú-tio̍h ê破病，的確無hō͘你tú-tio̍h；因為我耶和華是醫治你ê。 ²⁷ In 到Í-lîm，tī-hia有十二個水泉，七十叢ê棗樹；in就tī-hia ê水邊紮營。

=== 出埃及記 · 第 15 章 ===

¹ Hit-sî Mô͘-se kap Í-sek-lia̍t lâng chhiùⁿ chit-ê koa o-ló Iâ-hô-hoa, kóng; Góa beh chhiùⁿ-koa o-ló Iâ-hô-hoa, in-ūi I chì-koâiⁿ chì-tōa; Chiong bé kap khiâ-bé-ê hiat tī hái-tiong. ² Iâ-hô-hoa sī góa ê khùi-la̍t, sī góa ê si-ko, Iā sī chòe góa chín-kiù ê Chú; I sī góa ê Siōng-tè, góa beh o-ló-I, Sī góa ê pē ê Siōng-tè, góa beh chun I chòe-tōa. ³ Iâ-hô-hoa sī chiàn-sū; I ê miâ sī Iâ-hô-hoa. ⁴ Hoat-ló ê chhia, kap i ê kun-peng, Iâ-hô-hoa hiat i tī hái-tiong; I te̍k-pia̍t kéng ê kun-tiúⁿ, lóng tîm tī Âng-hái. ⁵ Chhim-ian khàm-in; In chhin-chhiūⁿ chio̍h-thâu, tūi kàu chhim ê só͘-chāi. ⁶ Iâ-hô-hoa ah, Lí ê chiàⁿ-chhiú tián-chhut lêng-le̍k, tit-tio̍h êng-kng; Iâ-hô-hoa ah, Lí ê chiàⁿ-chhiú phah-chhùi tùi-te̍k. ⁷ Lí hoat-chhut tōa ui-giâm, chhia-tó hiah-ê khí-lâi kong-kek Lí-ê; Lí hoat-chhut tōa siū-khì, sio-húi in chhin-chhiūⁿ sio-chháu. ⁸ Lí hoat-chhut phīⁿ-tiong ê khì, chúi chiū ná-chhèng ná-koâiⁿ, Tōa-chúi khiā-khí-lâi chhin-chhiūⁿ kui-tui; Hái-tiong ê chhim-chúi kian-tēng. ⁹ Tùi-te̍k kóng, Góa beh tui in, góa beh jip-tio̍h in, góa beh pun só͘ chhiúⁿ ê mi̍h; Góa beh tī in lâi chiok góa ê sim-goān; Góa beh pu̍ih-to, góa ê chhiú beh bia̍t in. ¹⁰ Lí chi̍t-ē pûn-hong, hái chiū khàm-ba̍t-in; In chhin-chhiūⁿ iân, tîm tī tōa-chúi-tiong. ¹¹ Iâ-hô-hoa ah, chiah-ê siōng-tè ê tiong-kan, chī-chūi ōe chhin-chhiūⁿ Lí? Chī-chūi chhin-chhiūⁿ Lí, chì-sèng thang êng-kng, Ui-giâm thang o-ló, kiâⁿ-chhut kî-sū? ¹² Lí chhun-chhut chiàⁿ-chhiú, Tōe chiū thun-bia̍t-in. ¹³ Lí ēng Lí ê chû-ài, chhōa Lí só͘ kiù-sio̍k ê peh-sìⁿ; Lí ēng Lí ê koân-lêng, chhōa in ji̍p Lí sèng ê só͘-chāi. ¹⁴ Lia̍t-pang thiaⁿ-kìⁿ chiū ngia̍uh-ngia̍uh-chhoah; Khiā-khí tī Hui-lī-sū tōe ê, tú-tio̍h thòng-khó͘. ¹⁵ Hit-sî Í-tong ê cho̍k-tiúⁿ gông-ngia̍h; Mô͘-ap eng-hiông ê lâng tì-kàu ngia̍uh-ngia̍uh-chhoah, Ka-lâm tōe khiā-khí ê peh-sìⁿ, sim lóng siau-iûⁿ. ¹⁶ Gông-ngia̍h kiaⁿ-hiâⁿ kàu tī in; Iâ-hô-hoa ah, in-ūi Lí ê chhiú ê tōa koân-lêng, in tiāⁿ-tiāⁿ chhin-chhiūⁿ chio̍h-thâu, Thèng-hāu Lí ê peh-sìⁿ keng-kè, Thèng-hāu Lí só͘ tit-tio̍h ê peh-sìⁿ kè-khì. ¹⁷ Lí beh chhōa in ji̍p-khì, chai-pôe in tī Lí ê sán-gia̍p ê soaⁿ, Iâ-hô-hoa ah, chiū-sī Lí ūi ka-kī só͘ pī-pān khiā-khí ê só͘-chāi, Chú ah, chiū-sī Lí ê chhiú só͘ kiàn-li̍p ê sèng-só͘. ¹⁸ Iâ-hô-hoa beh chòe-ông, ti̍t-kàu éng-oán. ¹⁹ In-ūi Hoat-ló ê bé, kap i ê chhia, i ê bé-peng, kàu tī hái-tiong, Iâ-hô-hoa hō͘ hái-chúi hoan-lâu im-ba̍t-in; to̍k-to̍k Í-sek-lia̍t lâng tī hái-tiong kiâⁿ ta-tōe. ²⁰ A-lûn ê tōa-chí lú sian-ti Bí-lī-àm, chhiú-ni̍h kia̍h lin-long-kó͘, chèng hū-lú iā tè i chhut-khì, kia̍h lin-long-kó͘ thiàu-bú. ²¹ Bí-lī-àm hô só͘-chhiùⁿ-ê kóng, Lín tio̍h chhiùⁿ-koa o-ló Iâ-hô-hoa, in-ūi I chì-koâiⁿ chì-tōa; Chiong bé kap khiâ-bé-ê, hiat tī hái-tiong. ²² Mô͘-se chhōa Í-sek-lia̍t lâng tùi Âng-hái chìn-chêng kiâⁿ; in chhut-khì, kàu Su-jíⁿ ê khòng-iá; tī khòng-iá kiâⁿ saⁿ-ji̍t, chhē bô chúi. ²³ Kàu Má-la̍h ê sî, Má-la̍h ê chúi bōe lim-tit, in-ūi chúi khó͘; só͘-í miâ hit-ê tōe kiò Má-la̍h. ²⁴ Peh-sìⁿ chiū tùi Mô͘-se ai-oàn kóng, Goán beh lim sím-mi̍h ah? ²⁵ Mô͘-se kiû-kiò Iâ-hô-hoa; Iâ-hô-hoa chí-sī i chi̍t châng chhiū, i chiū hiat i tī chúi-ni̍h, chúi chiū piàn-kam. I tī-hia, ūi in tēng lu̍t-lē hoat-tō͘, tī-hia chhì-giām in. ²⁶ Koh kóng, Lí nā tì-ì thiaⁿ Iâ-hô-hoa lí ê Siōng-tè ê siaⁿ, koh kiâⁿ I só͘ khòaⁿ chòe ha̍p-gî ê sū, liû-sim thiaⁿ I ê kài-bēng, siú I it-chhè ê lu̍t-lē, chiū Góa hō͘ Ai-ki̍p lâng só͘ tú-tio̍h ê phòa-pīⁿ, tek-khak bô hō͘ lí tú-tio̍h; in-ūi Góa Iâ-hô-hoa sī i-tī lí-ê. ²⁷ In kàu Í-lîm, tī-hia ū cha̍p-jī ê chúi-chôaⁿ, chhit-cha̍p châng ê chó-chhiū; in chiū tī-hia ê chúi-piⁿ chat-iâⁿ.

=== 出埃及記 · 第 16 章 ===

¹ In tùi Í-lîm起身，tī出埃及地以後，第二月十五日，以色列人全會到Í-lîm kap Se-nái ê中間，Sìn ê曠野。 ² 以色列人全會tī曠野哀怨摩西、亞倫。 ³ 以色列人對in講：M̄值tio̍h阮tī埃及地死tī耶和華ê手。Hit時阮有肉滿鼎，有餅thang食到飽；lín chhōa阮出來到chitê曠野，是beh hō͘ chitê全會lóng餓死。 ⁴ 耶和華對摩西講：看ah，我beh tùi天落米糧hō͘ lín；百姓tio̍h出去，ta̍k日拾ta̍k日ê額；我thang試驗in，看in beh thàn我ê法度á m̄。 ⁵ 到第六日，in tio̍h將所拾入來ê，備辦好勢，比ta̍k日所拾ê重倍chōe。 ⁶ 摩西、亞倫對以色列眾人講：到ê-hng lín beh知，chhōa lín出埃及地ê是耶和華。 ⁷ 明á早起lín beh看見耶和華ê榮光；因為耶和華聽見lín哀怨伊；阮算甚麼，lín竟然哀怨阮？ ⁸ 摩西koh講：耶和華ê-hng時beh hō͘ lín食肉，早起時beh hō͘ lín食餅到飽；因為lín哀怨耶和華，伊lóng聽見；阮算甚麼？lín m̄是哀怨阮，是哀怨耶和華。 ⁹ 摩西對亞倫講：你tio̍h kā以色列人全會講：Lín tio̍h就近耶和華ê面前；因為伊已經聽見lín ê哀怨lah。 ¹⁰ 亞倫tú-tú對以色列人全會講話ê時，in ǹg曠野teh看，看ah，耶和華ê榮光tī雲中顯現。 ¹¹ 耶和華對摩西講： ¹² 我已經聽見以色列人ê哀怨；你tio̍h kā in講：到黃昏ê時，lín beh食肉，早起beh有餅thang食飽；lín就知我是耶和華lín ê上帝。 ¹³ 到ê-hng有鵪鶉飛來，遮蓋營盤；天光早tī營盤四圍ê地面，有一重(têng)ê露水。 ¹⁴ 露水乾ê時，看ah，曠野ê地面有細細圓圓ê物；細到親像霜。 ¹⁵ 以色列人看見，m̄知是甚麼，大家相kap講：這是甚麼ah？摩西kā in講：這就是耶和華hō͘ lín食ê餅。 ¹⁶ 耶和華所吩咐ê是án-ni；lín tio̍h照ta̍k人所能食ê量來拾，ta̍k人為伊布棚內ê人，照伊ê人額來拾，一人一gô-mûi-jíⁿ。 ¹⁷ 以色列人照án-ni行，有ê拾chōe，有ê拾少。 ¹⁸ 到用gô-mûi-jíⁿ量(niû)伊，拾chōe-ê無chhun，拾少ê也無欠；ta̍k人照in能食ê量來拾伊。 ¹⁹ 摩西kā in講：人m̄-thang將所chhun-ê留到隔早起。 ²⁰ 總是in無聽摩西ê話，有人留到隔早起，就生蟲臭味；摩西受氣in。 ²¹ In ta̍k早起，照ta̍k人ōe食ê量拾伊；日頭一下曝，就熔去。 ²² 到第六日，in拾重倍ê額，ta̍k人兩gô-mûi-jíⁿ；全會hiahê頭人來kā摩西講。 ²³ 摩西kā in講：耶和華án-ni講：明á日是重要ê安歇，就是服事耶和華聖ê安歇日；lín ài pek-ê就pek伊，ài煮ê就煮伊；所chhun-ê，tio̍h家己收teh，留到隔早起。 ²⁴ In就照摩西所吩咐收teh留到隔早起，也無臭味，內面也無蟲。 ²⁵ 摩西講：Lín今á日食chitê，因為今á日是服事耶和華ê安歇日；lín tī田野，今á日的確chhē無。 ²⁶ 六日間thang拾，第七日是安歇日，hit日就無。 ²⁷ 第七日百姓中有人出去拾，也chhē無。 ²⁸ 耶和華對摩西講：Lín m̄肯守我ê命令，我ê律法，beh到tī時ah？ ²⁹ Lín tio̍h看，耶和華已經將安歇日賞賜lín，所以第六日伊hō͘ lín兩日ê米糧，第七日ta̍k人tio̍h tiàm家己ê所在，lóng m̄-thang出去。 ³⁰ Tùi án-ni，百姓就tī第七日安歇。 ³¹ Chitê物，以色列家叫伊做má-ná；款式親像莞荽仁，色緻是白ê，滋味親像chham蜜ê餅。 ³² 摩西講：耶和華án-ni吩咐，tio̍h將一gô-mûi-jíⁿ tīⁿ-tīⁿ ê má-ná，留到lín ê後代，hō͘ in看我當日chhōa lín出埃及地，tī曠野所hō͘ lín食ê餅。 ³³ 摩西kā亞倫講：你the̍h一个器具，tóe一gô-mûi-jíⁿ tīⁿ-tīⁿ ê má-ná，khǹg tī耶和華ê面前，留到lín ê後代。 ³⁴ 亞倫照耶和華所吩咐摩西ê，將má-ná hē tī干證ê約櫃前留teh。 ³⁵ 以色列人食má-ná共四十年久，直到in到tī有人khiā起ê地。 In食má-ná，直到in到迦南ê境界。 ³⁶ 一gô-mûi-jíⁿ就是i-hoat ê十份一。

=== 出埃及記 · 第 16 章 ===

¹ In tùi Í-lîm khí-sin, tī chhut Ai-ki̍p tōe í-āu, tē-jī ge̍h cha̍p-gō͘ ji̍t, Í-sek-lia̍t lâng choân-hōe kàu Í-lîm kap Se-nái ê tiong-kan, Sìn ê khòng-iá. ² Í-sek-lia̍t lâng choân-hōe tī khòng-iá ai-oàn Mô͘-se, A-lûn. ³ Í-sek-lia̍t lâng tùi in kóng, M̄-ta̍t-tio̍h goán tī Ai-ki̍p tōe sí tī Iâ-hô-hoa ê chhiú. Hit-sî goán ū bah móa-tiáⁿ, ū piáⁿ thang chia̍h kàu-pá; lín chhōa goán chhut-lâi kàu chit-ê khòng-iá, sī beh hō͘ chit-ê choân-hōe lóng gō-sí. ⁴ Iâ-hô-hoa tùi Mô͘-se kóng, Khòaⁿ ah, Góa beh tùi thiⁿ lo̍h bí-niû hō͘ lín; peh-sìⁿ tio̍h chhut-khì, ta̍k-ji̍t khioh ta̍k-ji̍t ê gia̍h; Góa thang chhì-giām in, khòaⁿ in beh thàn Góa ê hoat-tō͘ á m̄. ⁵ Kàu tē-la̍k ji̍t, in tio̍h chiong só͘ khioh ji̍p-lâi-ê, pī-pān hó-sè, pí ta̍k-ji̍t só͘-khioh-ê têng-pē chōe. ⁶ Mô͘-se, A-lûn tùi Í-sek-lia̍t chèng-lâng kóng, Kàu ê-hng lín beh chai, chhōa lín chhut Ai-ki̍p tōe ê sī Iâ-hô-hoa. ⁷ Bîn-á-chá-khí lín beh khòaⁿ-kìⁿ Iâ-hô-hoa ê êng-kng; in-ūi Iâ-hô-hoa thiaⁿ-kìⁿ lín ai-oàn I; goán sǹg sím-mi̍h, lín kèng-jiân ai-oàn goán? ⁸ Mô͘-se koh kóng, Iâ-hô-hoa ê-hng-sî beh hō͘ lín chia̍h-bah, chá-khí-sî beh hō͘ lín chia̍h-piáⁿ kàu pá; in-ūi lín ai-oàn Iâ-hô-hoa, I lóng thiaⁿ-kìⁿ; goán sǹg sím-mi̍h? lín m̄-sī ai-oàn goán, sī ai-oàn Iâ-hô-hoa. ⁹ Mô͘-se tùi A-lûn kóng, Lí tio̍h kā Í-sek-lia̍t lâng choân-hōe kóng, Lín tio̍h chiū-kūn Iâ-hô-hoa ê bīn-chêng; in-ūi I í-keng thiaⁿ-kìⁿ lín ê ai-oàn lah. ¹⁰ A-lûn tú-tú tùi Í-sek-lia̍t lâng choân-hōe kóng-ōe ê sî, in ǹg khòng-iá teh khòaⁿ, khòaⁿ ah, Iâ-hô-hoa ê êng-kng tī hûn-tiong hián-hiān. ¹¹ Iâ-hô-hoa tùi Mô͘-se kóng, ¹² Góa í-keng thiaⁿ-kìⁿ Í-sek-lia̍t lâng ê ai-oàn; lí tio̍h kā in kóng, Kàu hông-hun ê sî, lín beh chia̍h-bah, chá-khí beh ū piáⁿ thang chia̍h-pá; lín chiū chai Góa sī Iâ-hô-hoa lín ê Siōng-tè. ¹³ Kàu ê-hng ū ian-chhun pe-lâi, jia-khàm iâⁿ-pôaⁿ; thiⁿ-kng-chá tī iâⁿ-pôaⁿ sì-ûi ê tōe-bīn, ū chi̍t-têng ê lō͘-chúi. ¹⁴ Lō͘-chúi ta ê sî, khòaⁿ ah, khòng-iá ê tōe-bīn ū sòe-sòe îⁿ-îⁿ ê mi̍h; sòe kàu chhin-chhiūⁿ sng. ¹⁵ Í-sek-lia̍t lâng khòaⁿ-kìⁿ, m̄-chai sī sím-mi̍h, tāi-ke saⁿ-kap kóng, Che sī sím-mi̍h ah? Mô͘-se kā in kóng, Che chiū-sī Iâ-hô-hoa hō͘ lín chia̍h ê piáⁿ. ¹⁶ Iâ-hô-hoa só͘ hoan-hù-ê sī án-ni; lín tio̍h chiàu ta̍k-lâng só͘ ōe chia̍h ê liōng lâi khioh, ta̍k-lâng ūi i pò͘-pîⁿ-lāi ê lâng, chiàu i ê lâng-gia̍h lâi khioh, chi̍t-lâng chi̍t gô-mûi-jíⁿ. ¹⁷ Í-sek-lia̍t lâng chiàu án-ni kiâⁿ, ū-ê khioh chōe, ū-ê khioh chió. ¹⁸ Kàu ēng gô-mûi-jíⁿ niû i, khioh chōe-ê bô chhun, khioh chió-ê iā bô khiàm; ta̍k-lâng chiàu in ōe chia̍h ê liōng lâi khioh i. ¹⁹ Mô͘-se kā in kóng, Lâng m̄-thang chiong só͘ chhun-ê lâu kàu keh chá-khí. ²⁰ Chóng-sī in bô thiaⁿ Mô͘-se ê ōe, ū lâng lâu kàu keh chá-khí, chiū siⁿ-thâng chhàu-bī; Mô͘-se siū-khì in. ²¹ In ta̍k chá-khí, chiàu ta̍k-lâng ōe chia̍h ê liōng khioh i; ji̍t-thâu chi̍t-ē pha̍k, chiū iûⁿ-khì. ²² Kàu tē-la̍k ji̍t, in khioh têng-pē ê gia̍h, ta̍k-lâng nn̄g gô-mûi-jíⁿ; choân-hōe hiah-ê thâu-lâng lâi kā Mô͘-se kóng. ²³ Mô͘-se kā in kóng, Iâ-hô-hoa án-ni kóng, bîn-á-ji̍t sī tiōng-iàu ê an-hioh, chiū-sī ho̍k-sāi Iâ-hô-hoa sèng ê an-hioh-ji̍t; lín ài pek-ê chiū pek i, ài chú-ê chiū chú i; só͘-chhun-ê, tio̍h ka-kī siu-teh, lâu kàu keh chá-khí. ²⁴ In chiū chiàu Mô͘-se só͘ hoan-hù siu-teh lâu kàu keh chá-khí, iā bô chhàu-bī, lāi-bīn iā bô thâng. ²⁵ Mô͘-se kóng, Lín kin-á-ji̍t chia̍h chit-ê, in-ūi kin-á-ji̍t sī ho̍k-sāi Iâ-hô-hoa ê an-hioh-ji̍t; lín tī chhân-iá, kin-á-ji̍t tek-khak chhē-bô. ²⁶ La̍k-ji̍t-kan thang khioh, tē-chhit ji̍t sī an-hioh-ji̍t, hit-ji̍t chiū bô. ²⁷ Tē-chhit-ji̍t peh-sìⁿ-tiong ū lâng chhut-khì khioh, iā chhē-bô. ²⁸ Iâ-hô-hoa tùi Mô͘-se kóng, Lín m̄-khéng siú Góa ê bēng-lēng, Góa ê lu̍t-hoat, beh kàu tī-sî ah? ²⁹ Lín tio̍h khòaⁿ, Iâ-hô-hoa í-keng chiong an-hioh-ji̍t siúⁿ-sù lín, só͘-í tē-la̍k ji̍t I hō͘ lín nn̄g-ji̍t ê bí-niû, tē-chhit ji̍t ta̍k-lâng tio̍h tiàm ka-kī ê só͘-chāi, lóng m̄-thang chhut-khì. ³⁰ Tùi án-ni peh-sìⁿ chiū tī tē-chhit ji̍t an-hioh. ³¹ Chit-ê mi̍h, Í-sek-lia̍t-ke kiò i chòe má-ná; khoán-sit chhin-chhiūⁿ oân-sui-jîn, sek-tì sī pe̍h-ê, chu-bī chhin-chhiūⁿ chham-bi̍t ê piáⁿ. ³² Mô͘-se kóng, Iâ-hô-hoa án-ni hoan-hù, tio̍h chiong chi̍t gô-mûi-jíⁿ tīⁿ-tīⁿ ê má-ná , lâu kàu lín ê āu-tāi, hō͘ in khòaⁿ Góa tng-ji̍t chhōa lín chhut Ai-ki̍p-tōe, tī khòng-iá só͘ hō͘ lín chia̍h ê piáⁿ. ³³ Mô͘-se kā A-lûn kóng, Lí the̍h chi̍t ê khì-kū, tóe chi̍t gô-mûi-jíⁿ tīⁿ-tīⁿ ê má-ná, khǹg tī Iâ-hô-hoa ê bīn-chêng, lâu kàu lín ê āu-tāi. ³⁴ A-lûn chiàu Iâ-hô-hoa só͘ hoan-hù Mô͘-se-ê, chiong má-ná hē tī kan-chèng ê iok-kūi chêng lâu-teh. ³⁵ Í-sek-lia̍t lâng chia̍h má-ná kiōng sì-cha̍p nî kú, ti̍t-kàu in kàu tī ū lâng khiā-khí ê tōe. In chia̍h má-ná, ti̍t-kàu in kàu Ka-lâm ê kéng-kài. ³⁶ Chi̍t gô-mûi-jíⁿ chiū-sī i-hoat ê cha̍p-hūn-chi̍t.

=== 出埃及記 · 第 17 章 ===

¹ 以色列人全會thàn耶和華ê命令，照路站，tùi Sìn ê曠野，進前行，tī Lī-hui-teng紮營，百姓無水thang lim。 ² 百姓就kap摩西計較講：Hō͘阮有水thang lim。摩西kā in講：Lín啥事kap我計較，啥事試耶和華ah？ ³ 百姓tī-hia真嘴乾，ài lim水；就哀怨摩西講：你啥事chhōa阮tùi埃及上來，hō͘阮kap阮ê kiáⁿ兒，阮ê cheng-siⁿ，lóng嘴乾死ah？ ⁴ 摩西就求叫耶和華講：我對 chitê百姓beh怎樣做ah？in差不多beh用石頭tìm我。 ⁵ 耶和華kā摩西講：你做百姓ê頭前行，chhōa以色列ê長老kúi-nā人kap你去，你ê手tio̍h kia̍h前日phah河水ê柺á。 ⁶ 看ah，我beh khiā tī你ê面前，tī Hô-lia̍t ê石磐頂；你phah hitê石磐，beh有水tùi hia流出hō͘百姓lim。摩西就tī以色列長老ê面前án-ni行。 ⁷ 伊名hitê所在叫Má-sat，koh叫做Bí-lī-pa；因為以色列人計較，koh因為in試耶和華，講：耶和華tī阮中間á無？ ⁸ Hit時A-má-le̍k人來到Lī-hui-teng，kap以色列人交戰。 ⁹ 摩西kā約書亞講：你替咱揀人出去kap A-má-le̍k人交戰；明á日我手裡beh kia̍h上帝ê柺á，khiā tī山頂。 ¹⁰ Tùi hit-tia̍p約書亞照摩西所kā伊講ê行；kap A-má-le̍k人交戰；摩西、亞倫kap Hō͘-jíⁿ lóng上山頂。 ¹¹ 摩西手kia̍h起ê時，以色列人就khah贏；手垂落去ê時，A-má-le̍k人就khah贏。 ¹² 總是摩西手酸；in就徙石，來hē tī伊ê下面；伊坐tī石頂，亞倫kap Hō͘-jíⁿ扶伊ê手，一个tī chit-pêng，一个tī hit-pêng；伊ê手就自在，直直到日落。 ¹³ 約書亞用刀刣 A-má-le̍k王kap伊ê百姓。 ¹⁴ 耶和華kā摩西講：我beh將A-má-le̍k ê名字tùi天下完全擦滅伊；你tio̍h用chitê寫tī冊裡做記念，koh講hō͘約書亞聽。 ¹⁵ 摩西起一座壇，號伊ê名叫耶和華尼西； ¹⁶ koh講：耶和華已經chiù-chōa，耶和華beh代代kap A-má-le̍k人交戰。

=== 出埃及記 · 第 17 章 ===

¹ Í-sek-lia̍t lâng choân-hōe thàn Iâ-hô-hoa ê bēng-lēng, chiàu lō͘-chām, tùi Sìn ê khòng-iá, chìn-chêng kiâⁿ, tī Lī-hui-tèng chat-iâⁿ, peh-sìⁿ bô chúi thang lim. ² Peh-sìⁿ chiū kap Mô͘-se kè-kàu kóng, Hō͘ goán ū chúi thang lim. Mô͘-se kā in kóng, Lín siáⁿ-sū kap góa kè-kàu, siáⁿ-sū chhì Iâ-hô-hoa ah? ³ Peh-sìⁿ tī-hia chin chhùi-ta, ài lim chúi; chiū ai-oàn Mô͘-se kóng, Lí siáⁿ-sū chhōa goán tùi Ai-ki̍p chiūⁿ-lâi, hō͘ goán kap goán ê kiáⁿ-jî, goán ê cheng-siⁿ, lóng chhùi-ta sí ah? ⁴ Mô͘-se chiū kiû-kiò Iâ-hô-hoa kóng, Góa tùi chit-ê peh-sìⁿ beh cháiⁿ-iūⁿ chòe ah? in chha-put-to beh ēng chio̍h-thâu tìm góa. ⁵ Iâ-hô-hoa kā Mô͘-se kóng, Lí chòe peh-sìⁿ ê thâu-chêng kiâⁿ, chhōa Í-sek-lia̍t ê tiúⁿ-ló kúi-nā lâng kap lí khì, lí ê chhiú tio̍h kia̍h chêng-ji̍t phah hô-chúi ê koáiⁿ-á. ⁶ Khòaⁿ ah, Góa beh khiā tī lí ê bīn-chêng, tī Hô-lia̍t ê chio̍h-pôaⁿ-téng; lí phah hit-ê chio̍h-pôaⁿ, beh ū chúi tùi hia lâu-chhut hō͘ peh-sìⁿ lim. Mô͘-se chiū tī Í-sek-lia̍t tiúⁿ-ló ê bīn-chêng án-ni kiâⁿ. ⁷ I miâ hit-ê só͘-chāi kiò Má-sat, koh kiò-chòe Bí-lī-pa; in-ūi Í-sek-lia̍t lâng kè-kàu, koh in-ūi in chhì Iâ-hô-hoa, kóng, Iâ-hô-hoa tī goán tiong-kan á-bô? ⁸ Hit-sî A-má-le̍k lâng lâi kàu Lī-hui-tèng, kap Í-sek-lia̍t lâng kau-chiàn. ⁹ Mô͘-se kā Iok-su-a kóng, Lí thòe lán kéng lâng chhut-khì kap A-má-le̍k lâng kau-chiàn; bîn-á-ji̍t góa chhiú-ni̍h beh kia̍h Siōng-tè ê koáiⁿ-á, khiā tī soaⁿ-téng. ¹⁰ Tùi hit-tia̍p Iok-su-a chiàu Mô͘-se só͘ kā i kóng-ê kiâⁿ; kap A-má-le̍k lâng kau-chiàn; Mô͘-se, A-lûn kap Hō͘-jíⁿ lóng chiūⁿ soaⁿ-téng. ¹¹ Mô͘-se chhiú kia̍h-khí ê sî, Í-sek-lia̍t lâng chiū khah-iâⁿ; chhiú sûi-lo̍h-khì ê sî, A-má-le̍k lâng chiū khah-iâⁿ. ¹² Chóng-sī Mô͘-se chhiú sng; in chiū sóa chio̍h, lâi hē tī i ê ē-bīn; i chē tī chio̍h-téng, A-lûn kap Hō͘-jíⁿ hû i ê chhiú, chi̍t-ê tī chit-pêng, chi̍t-ê tī hit-pêng; i ê chhiú chiū chū-chāi, ti̍t-ti̍t kàu ji̍t-lo̍h. ¹³ Iok-su-a ēng to thâi A-má-le̍k ông kap i ê peh-sìⁿ. ¹⁴ Iâ-hô-hoa kā Mô͘-se kóng, Góa beh chiong A-má-le̍k ê miâ-jī tùi thiⁿ-ē oân-choân chhat-bia̍t i; lí tio̍h ēng chit-ê siá tī chheh-ni̍h chòe kì-liām, koh kóng hō͘ Iok-su-a thiaⁿ. ¹⁵ Mô͘-se khí chi̍t chō tôaⁿ, hō i ê miâ kiò Iâ-hô-hoa-nî-se; ¹⁶ koh kóng, Iâ-hô-hoa í-keng chiù-chōa, Iâ-hô-hoa beh tāi-tāi kap A-má-le̍k lâng kau-chiàn.

=== 出埃及記 · 第 18 章 ===

¹ 摩西ê丈人，米甸ê祭司Ia̍p-thek-lô，聽見上帝ūi摩西kap伊ê百姓以色列所行一切ê事，就是耶和華chhōa以色列出埃及ê事。 ² 摩西ê丈人Ia̍p-thek-lô帶摩西ê婦人人Se-pho-la̍h來，就是摩西前差伊tò去ê； ³ koh帶伊兩個kiáⁿ，一个名叫Kek-sūn；因為摩西講：我寄腳tī外邦； ⁴ 一个名叫Í-lī-í-siā；因為伊講：我ê父ê上帝幫贊我，救我脫離法老ê刀。 ⁵ 摩西ê丈人，Ia̍p-thek-lô，帶摩西兩個kiáⁿ kap伊ê婦人人，來到上帝ê山，就是摩西tī曠野紮營ê所在； ⁶ kā摩西講：我是你ê丈人Ia̍p-thek-lô，帶你ê婦人人kap伊兩個kiáⁿ，來你chia。 ⁷ 摩西出去迎接伊ê丈人，對伊鞠躬，kap伊chim嘴，相kap問平安；就入布棚。 ⁸ 摩西將耶和華為以色列ê緣故對法老kap埃及人所行一切ê事，以及路裡所tú-tio̍h一切ê為難，kap耶和華怎樣拯救in，lóng排列hō͘伊ê丈人聽。 ⁹ Ia̍p-thek-lô因為耶和華款待以色列人一切ê好事，救in脫離埃及人ê手，就真歡喜。 ¹⁰ Ia̍p-thek-lô講：耶和華是應該o-ló ê，伊救lín脫離埃及人ê手，也脫離法老ê手，救chitê百姓出埃及人ê手下。 ¹¹ Taⁿ我知耶和華比chiahê上帝 khah大，就是對in hiahê埃及人驕傲款待chitê百姓ê事。 ¹² 摩西ê丈人，Ia̍p-thek-lô，將燒祭kap別號ê祭，獻hō͘上帝；亞倫kap以色列ê長老lóng來，kap摩西ê丈人相kap食tī上帝ê面前。 ¹³ 隔日摩西坐teh審判百姓；百姓tùi早起到ê-hng，lóng khiā-óa tī摩西ê身邊。 ¹⁴ 摩西ê丈人看見伊對百姓所做一切ê事，就講：你對百姓做ê是甚麼事ah？你啥事家己坐teh，眾百姓tùi早起到ê-hng lóng khiā tī你ê身邊ah？ ¹⁵ 摩西應伊ê丈人講：這是因為百姓到我chia，來問上帝。 ¹⁶ In有tāi-chì ê時，就來我chia，我就tī in雙pêng ê中間kā in判斷，hō͘ in知上帝ê律例kap法度。 ¹⁷ 摩西ê丈人對伊講，你án-ni做m̄好。 ¹⁸ 你kap你chiahê百姓會真損身；因為chitê事hō͘你siuⁿ重，你家己一人做bōe來。 ¹⁹ Taⁿ你tio̍h聽我ê話，我替你phah算，願上帝kap你tī-teh；你tio̍h替百姓到上帝面前，將案件請問上帝； ²⁰ koh tio̍h將律例kap法度教示in，指示in所tio̍h行ê路，所tio̍h做ê事。 ²¹ 也tio̍h tùi百姓ê中間，揀有才能ê人，就是敬畏上帝，誠實無lām-sám，怨恨不義ê錢，hit號人，設立in做百姓ê序大，有ê管一千人，有ê管一百人，有ê管五十人，有ê管十人； ²² hō͘ in照時審判百姓；大事tio̍h hō͘ in 到你chia，小事in thang家己審判；án-ni你就khah減輕，in也thang kap你相kap擔當。 ²³ 你若án-ni行，上帝也án-ni吩咐你，你就chih-chài ōe-tiâu，chiahê百姓也thang安然到伊ê所在。 ²⁴ Tùi án-ni，摩西聽thàn伊ê丈人ê話，lóng照伊所講ê去行。 ²⁵ 摩西tùi以色列人中間揀有才能ê人，設立in做百姓ê序大，有ê管一千人，有ê管一百人，有ê管五十人，有ê管十人； ²⁶ in照時審判百姓，有oh得ê案件就到摩西hia；若是ta̍k項小事，in就家己審判。 ²⁷ 後來摩西送伊ê丈人起身，伊就tò去本所在。

=== 出埃及記 · 第 18 章 ===

¹ Mô͘-se ê tiūⁿ-lâng, Bí-tiân ê chè-si Ia̍p-thek-lô, thiaⁿ-kìⁿ Siōng-tè ūi Mô͘-se kap I ê peh-sìⁿ Í-sek-lia̍t só͘-kiâⁿ it-chhè ê sū, chiū-sī Iâ-hô-hoa chhōa Í-sek-lia̍t chhut Ai-ki̍p ê sū. ² Mô͘-se ê tiūⁿ-lâng Ia̍p-thek-lô tòa Mô͘-se ê hū-jîn-lâng Se-pho-la̍h lâi, chiū-sī Mô͘-se chêng chhe i tò-khì ê; ³ koh tòa i nn̄g ê kiáⁿ, chi̍t-ê miâ-kiò Kek-sūn; in-ūi Mô͘-se kóng, Góa kià-kha tī gōa-pang; ⁴ chi̍t-ê miâ kiò Í-lī-í-siā; in-ūi i kóng, Góa ê pē ê Siōng-tè pang-chān góa, kiù góa thoat-lī Hoat-ló ê to. ⁵ Mô͘-se ê tiūⁿ-lâng, Ia̍p-thek-lô, tòa Mô͘-se nn̄g ê kiáⁿ kap i ê hū-jîn-lâng, lâi kàu Siōng-tè ê soaⁿ, chiū-sī Mô͘-se tī khòng-iá chat-iâⁿ ê só͘-chāi; ⁶ kā Mô͘-se kóng, Góa sī lí ê tiūⁿ-lâng Ia̍p-thek-lô, tòa lí ê hū-jîn-lâng kap i nn̄g ê kiáⁿ, lâi lí chia. ⁷ Mô͘-se chhut-khì ngiâ-chih i ê tiūⁿ-lâng, tùi i kiok-kiong, kap i chim-chhùi, saⁿ-kap mn̄g pêng-an; chiū ji̍p pò͘-pîⁿ. ⁸ Mô͘-se chiong Iâ-hô-hoa ūi Í-sek-lia̍t ê iân-kò͘ tùi Hoat-ló kap Ai-ki̍p lâng só͘ kiâⁿ it-chhè ê sū, í-ki̍p lō͘-ni̍h só͘ tú-tio̍h it-chhè ê ûi-lân, kap Iâ-hô-hoa cháiⁿ-iūⁿ chín-kiù in, lóng pâi-lia̍t hō͘ i ê tiūⁿ-lâng thiaⁿ. ⁹ Ia̍p-thek-lô in-ūi Iâ-hô-hoa khoán-thāi Í-sek-lia̍t lâng it-chhè ê hó-sū, kiù in thoat-lī Ai-ki̍p lâng ê chhiú, chiū chin hoaⁿ-hí. ¹⁰ Ia̍p-thek-lô kóng, Iâ-hô-hoa sī eng-kai o-ló-ê, I kiù lín thoat-lī Ai-ki̍p lâng ê chhiú, iā thoat-lī Hoat-ló ê chhiú, kiù chit-ê peh-sìⁿ chhut Ai-ki̍p lâng ê chhiú-ē. ¹¹ Taⁿ góa chai Iâ-hô-hoa pí chiah-ê siōng-tè khah-tōa, chiū-sī tùi in hiah-ê Ai-ki̍p lâng kiau-ngō͘ khoán-thāi chit-ê peh-sìⁿ ê sū. ¹² Mô͘-se ê tiūⁿ-lâng, Ia̍p-thek-lô, chiong sio-chè kap pa̍t-hō ê chè, hiàn hō͘ Siōng-tè; A-lûn kap Í-sek-lia̍t ê tiúⁿ-ló lóng lâi, kap Mô͘-se ê tiūⁿ-lâng saⁿ-kap chia̍h tī Siōng-tè ê bīn-chêng. ¹³ Keh-ji̍t Mô͘-se chē-teh sím-phòaⁿ peh-sìⁿ; peh-sìⁿ tùi chá-khí kàu ê-hng, lóng khiā-óa tī Mô͘-se ê sin-piⁿ. ¹⁴ Mô͘-se ê tiūⁿ-lâng khòaⁿ-kìⁿ i tùi peh-sìⁿ só͘ chòe it-chhè ê sū, chiū kóng, Lí tùi peh-sìⁿ chòe-ê sī sím-mi̍h sū ah? lí siáⁿ-sū ka-kī chē-teh, chèng peh-sìⁿ tùi chá-khí kàu ê-hng lóng khiā tī lí ê sin-piⁿ ah? ¹⁵ Mô͘-se ìn i ê tiūⁿ-lâng kóng, Che sī in-ūi peh-sìⁿ kàu góa chia, lâi mn̄g Siōng-tè. ¹⁶ In ū tāi-chì ê sî, chiū lâi góa chia, góa chiū tī in siang-pêng ê tiong-kan kā in phòaⁿ-toàn, hō͘ in chai Siōng-tè ê lu̍t-lē kap hoat-tō͘. ¹⁷ Mô͘-se ê tiūⁿ-lâng tùi i kóng, Lí án-ni chòe m̄-hó. ¹⁸ Lí kap lí chiah-ê peh-sìⁿ ōe chin sńg-sin; in-ūi chit-ê sū hō͘ lí siuⁿ tāng, lí ka-kī chi̍t-lâng chòe-bōe-lâi. ¹⁹ Taⁿ lí tio̍h thiaⁿ góa ê ōe, góa thòe lí phah-sǹg, goān Siōng-tè kap lí tī-teh; lí tio̍h thòe peh-sìⁿ kàu Siōng-tè bīn-chêng, chiong àn-kiāⁿ chhéng-mn̄g Siōng-tè; ²⁰ koh tio̍h chiong lu̍t-lē kap hoat-tō͘ kà-sī in, chí-sī in só͘ tio̍h kiâⁿ ê lō͘, só͘ tio̍h chòe ê sū. ²¹ Iā tio̍h tùi peh-sìⁿ ê tiong-kan, kéng ū châi-lêng ê lâng, chiū-sī kèng-ùi Siōng-tè, sêng-si̍t bô lām-sám, oàn-hūn put-gī ê chîⁿ, hit-hō lâng, siat-li̍p in chòe peh-sìⁿ ê sī-tōa, ū-ê koán chi̍t chheng lâng, ū-ê koán chi̍t-pah lâng, ū-ê koán gō͘-cha̍p lâng, ū-ê koán cha̍p-lâng; ²² hō͘ in chiàu-sî sím-phòaⁿ peh-sìⁿ; tōa-sū tio̍h hō͘ in kàu lí chia, sió-sū in thang ka-kī sím-phòaⁿ; án-ni lí chiū khah kiám-khin, in iā thang kap lí saⁿ-kap tam-tng. ²³ Lí nā án-ni kiâⁿ, Siōng-tè iā án-ni hoan-hù lí, lí chiū chih-chài ōe-tiâu, chiah-ê peh-sìⁿ iā thang an-jiân kàu i ê só͘-chāi. ²⁴ Tùi án-ni Mô͘-se thiaⁿ-thàn i ê tiūⁿ-lâng ê ōe, lóng chiàu i só͘ kóng-ê khì kiâⁿ. ²⁵ Mô͘-se tùi Í-sek-lia̍t lâng tiong-kan kéng ū châi-lêng ê lâng, siat-li̍p in chòe peh-sìⁿ ê sī-tōa, ū-ê koán chi̍t-chheng lâng, ū-ê koán chi̍t-pah lâng, ū-ê koán gō͘-cha̍p lâng, ū-ê koán cha̍p-lâng; ²⁶ in chiàu-sî sím-phòaⁿ peh-sìⁿ, ū oh-tit ê àn-kiāⁿ chiū kàu Mô͘-se hia; nā-sī ta̍k-hāng sió-sū, in chiū ka-kī sím-phòaⁿ. ²⁷ Āu-lâi Mô͘-se sàng i ê tiūⁿ-lâng khí-sin, i chiū tò-khì pún só͘-chāi.

=== 出埃及記 · 第 19 章 ===

¹ 以色列人出埃及地ê了後第三月，tú-tú hit日，in就到西奈ê曠野。 ² In離開Lī-hui-teng，來到西奈ê曠野，就tī曠野紮營；以色列人就tī hitê山ê頭前紮營。 ³ 摩西上到上帝hia；耶和華tùi山裡叫伊講：你tio̍h án-ni kā雅各家講：通知以色列人知； ⁴ 我對埃及人所行ê事，lín lóng看見；koh看見我怎樣親像鷹鳥ê翼背lín，帶lín來歸tī我。 ⁵ Taⁿ lín若實在聽thàn我ê話，遵守我ê約，就tī列國中lín beh做我家己ê寶貝；因為全地lóng是我ê； ⁶ lín beh歸tī我，做祭司ê國，做聖潔ê百姓。chiahê話是你所tio̍h kā以色列人講ê。 ⁷ 摩西來招集百姓中間ê長老，將耶和華所吩咐伊ê話，lóng排列tī in ê面前； ⁸ 百姓lóng同聲應講，見若耶和華所講ê阮lóng beh遵thàn。摩西就將百姓ê話回覆耶和華。 ⁹ 耶和華kā摩西講：看ah，我beh tī密雲ê中間臨到你，hō͘百姓聽見我kap你teh講：thang永遠信你。摩西就將百姓ê話kā耶和華講。 ¹⁰ 耶和華koh kā摩西講：你去百姓hia，今á日、明á日kā in分別做聖，in也tio̍h洗衫。 ¹¹ Tio̍h備辦便赴第三日；因為第三日，耶和華beh tī眾百姓ê面前，降臨tī西奈山。 ¹² 你tio̍h tī山ê四圍kā百姓設界限，講：Lín tio̍h謹慎，m̄-thang上山，也m̄-thang摸伊ê交界；見若摸chitê山ê，的確tio̍h hō͘伊死； ¹³ m̄-thang用手摸伊，tio̍h用石頭tìm伊，á是用箭射伊；無論是人á cheng-siⁿ，lóng bōe活。到哨角ê聲拖長ê時，in tio̍h上來山腳。 ¹⁴ 摩西落山到百姓hia，kā in分別做聖；in就家己洗衫。 ¹⁵ 伊對百姓講：Tio̍h備辦便赴第三日，m̄-thang親近婦人人。 ¹⁶ 到第三日天光早，tī山頂有雷tân，sih-nà kap密雲，koh哨角ê聲真大；營內ê百姓lóng ngia̍uh-ngia̍uh-chhoah。 ¹⁷ 摩西chhōa百姓出營盤，迎接上帝；in lóng khiā tī山腳。 ¹⁸ Thong西奈山lóng是火煙；因為耶和華tī火中降臨tī山頂；山ê火煙chhèng高，親像磁窯ê煙，遍山大振動。 ¹⁹ 哨角ê聲ná-tân ná大，摩西講話，上帝出聲應伊。 ²⁰ 耶和華降臨tī西奈山，tī山尾溜；耶和華召摩西上山尾溜；摩西就上去。 ²¹ 耶和華對摩西講：你落去禁戒百姓，驚了in竄過界，到耶和華chia來看，致到in chōe-chōe人死； ²² 連親近耶和華ê祭司，也tio̍h家己分別做聖，驚了耶和華忽然出來phah in。 ²³ 摩西對耶和華講：百姓bōe會上西奈山，因為你已經禁戒阮講：Tio̍h tī山ê四圍設界限，分別伊做聖。 ²⁴ 耶和華kā伊講：去ah，落去；你tio̍h kap亞倫上來；獨獨祭司kap百姓m̄-thang竄過界上到耶和華面前，驚了伊忽然出來phah in。 ²⁵ 摩西就落去，到百姓hia，kā in講。

=== 出埃及記 · 第 19 章 ===

¹ Í-sek-lia̍t lâng chhut Ai-ki̍p tōe ê liáu-āu tē-saⁿ ge̍h, tú-tú hit-ji̍t, in chiū kàu Se-nái ê khòng-iá. ² In lī-khui Lī-hui-tèng, lâi kàu Se-nái ê khòng-iá, chiū tī khòng-iá chat-iâⁿ; Í-sek-lia̍t lâng chiū tī hit-ê soaⁿ ê thâu-chêng chat-iâⁿ. ³ Mô͘-se chiūⁿ kàu Siōng-tè hia; Iâ-hô-hoa tùi soaⁿ-ni̍h kiò i kóng, Lí tio̍h án-ni kā Ngá-kok-ke kóng, thong-ti Í-sek-lia̍t lâng chai; ⁴ Góa tùi Ai-ki̍p lâng só͘ kiâⁿ ê sū, lín lóng khòaⁿ-kìⁿ; koh khòaⁿ-kìⁿ Góa cháiⁿ-iūⁿ chhin-chhiūⁿ eng-chiáu ê si̍t pē lín, tòa lín lâi kui tī Góa. ⁵ Taⁿ lín nā si̍t-chāi thiaⁿ-thàn Góa ê ōe, chun-siú Góa ê iok, chiū tī lia̍t-kok-tiong lín beh chòe Góa ka-kī ê pó-pòe; in-ūi choân-tōe lóng sī Góa-ê; ⁶ lín beh kui tī Góa, chòe chè-si ê kok, chòe sèng-kiat ê peh-sìⁿ. Chiah-ê ōe sī lí só͘ tio̍h kā Í-sek-lia̍t lâng kóng-ê. ⁷ Mô͘-se lâi chio-chi̍p peh-sìⁿ tiong-kan ê tiúⁿ-ló, chiong Iâ-hô-hoa só͘ hoan-hù i ê ōe, lóng pâi-lia̍t tī in ê bīn-chêng; ⁸ peh-sìⁿ lóng tâng-siaⁿ ìn kóng, Kìⁿ-nā Iâ-hô-hoa só͘ kóng-ê goán lóng beh chun-thàn. Mô͘-se chiū chiong peh-sìⁿ ê ōe hê-hok Iâ-hô-hoa. ⁹ Iâ-hô-hoa kā Mô͘-se kóng, Khòaⁿ ah, Góa beh tī ba̍t-hûn ê tiong-kan lîm-kàu lí, hō͘ peh-sìⁿ thiaⁿ-kìⁿ Góa kap lí teh kóng, thang éng-oán sìn lí. Mô͘-se chiū chiong peh-sìⁿ ê ōe kā Iâ-hô-hoa kóng. ¹⁰ Iâ-hô-hoa koh kā Mô͘-se kóng, Lí khì peh-sìⁿ hia, kin-á-ji̍t bîn-á-ji̍t kā in hun-piat chòe-sèng, in iā tio̍h sóe-saⁿ. ¹¹ Tio̍h pī-pān piān hù tē-saⁿ ji̍t; in-ūi tē-saⁿ ji̍t, Iâ-hô-hoa beh tī chèng peh-sìⁿ ê bīn-chêng, kàng-lîm tī Se-nái soaⁿ. ¹² Lí tio̍h tī soaⁿ ê sì-ûi kā peh-sìⁿ siat kài-hān, kóng, Lín tio̍h kín-sīn, m̄-thang chiūⁿ-soaⁿ, iā m̄-thang bong i ê kau-kài; kìⁿ-nā bong chit-ê soaⁿ ê, tek-khak tio̍h hō͘ i sí; ¹³ m̄-thang ēng chhiú bong-i, tio̍h ēng chio̍h-thâu tìm i, á-sī ēng chìⁿ siā-i; bô-lūn sī lâng á cheng-siⁿ, lóng bōe oa̍h. Kàu sàu-kak ê siaⁿ thoa-tn̂g ê sî, in tio̍h chiūⁿ-lâi soaⁿ-kha. ¹⁴ Mô͘-se lo̍h-soaⁿ kàu peh-sìⁿ hia, kā in hun-piat chòe-sèng; in chiū ka-kī sóe saⁿ. ¹⁵ I tùi peh-sìⁿ kóng, Tio̍h pī-pān piān hù tē-saⁿ ji̍t, m̄-thang chhin-kūn hū-jîn-lâng. ¹⁶ Kàu tē-saⁿ ji̍t thiⁿ-kng-chá, tī soaⁿ-téng ū lûi tân, sih-nà kap ba̍t-hûn, koh sàu-kak ê siaⁿ chin-tōa; iâⁿ-lāi ê peh-sìⁿ lóng ngia̍uh-ngia̍uh-chhoah. ¹⁷ Mô͘-se chhōa peh-sìⁿ chhut iâⁿ-pôaⁿ, ngiâ-chih Siōng-tè; in lóng khiā tī soaⁿ-kha. ¹⁸ Thong Se-nái soaⁿ lóng sī hé-ian; in-ūi Iâ-hô-hoa tī hé-tiong kàng-lîm tī soaⁿ-téng; soaⁿ ê hé-ian chhèng-koâiⁿ, chhin-chhiūⁿ hûi-iô ê ian, piàn-soaⁿ tōa tín-tāng. ¹⁹ Sàu-kak ê siaⁿ ná-tân ná-tōa, Mô͘-se kóng-ōe, Siōng-tè chhut-siaⁿ ìn i. ²⁰ Iâ-hô-hoa kàng-lîm tī Se-nái soaⁿ, tī soaⁿ-bé-liu; Iâ-hô-hoa tiàu Mô͘-se chiūⁿ soaⁿ-bé-liu; Mô͘-se chiū chiūⁿ-khì. ²¹ Iâ-hô-hoa tùi Mô͘-se kóng, Lí lo̍h-khì kìm-kài peh-sìⁿ, kiaⁿ-liáu in chhoàn-kè-kài, kàu Iâ-hô-hoa chia lâi khòaⁿ, tì-kàu in chōe-chōe lâng sí; ²² liân chhin-kūn Iâ-hô-hoa ê chè-si, iā tio̍h ka-kī hun-piat chòe-sèng, kiaⁿ-liáu Iâ-hô-hoa hut-jiân chhut-lâi phah in. ²³ Mô͘-se tùi Iâ-hô-hoa kóng, Peh-sìⁿ bōe-ōe chiūⁿ Se-nái soaⁿ, in-ūi Lí í-keng kìm-kài goán kóng, Tio̍h tī soaⁿ ê sì-ûi siat kài-hān, hun-piat i chòe-sèng. ²⁴ Iâ-hô-hoa kā i kóng, Khì ah, lo̍h-khì; lí tio̍h kap A-lûn chiūⁿ-lâi; to̍k-to̍k chè-si kap peh-sìⁿ m̄-thang chhoàn-kè-kài chiūⁿ kàu Iâ-hô-hoa bīn-chêng, kiaⁿ-liáu I hut-jiân chhut-lâi phah in. ²⁵ Mô͘-se chiū lo̍h-khì, kàu peh-sìⁿ hia, kā in kóng.

=== 出埃及記 · 第 20 章 ===

¹ 上帝吩咐chiahê一切ê話講： ² 我是耶和華，你ê上帝，bat chhōa你tùi埃及地，tùi做奴才ê家，出來ê。 ³ 我以外，你m̄-thang有別個上帝。 ⁴ M̄-thang為tio̍h家己雕刻偶像，不論天頂、地上，kap地下水內所有ê物，lóng m̄-thang做in ê像； ⁵ m̄-thang敬拜in，也m̄-thang服事in；因為我耶和華，你ê上帝，斷斷m̄容允用別個上帝匹配我；怨恨我ê，我歸咎伊ê罪，對父到kiáⁿ，到三四代； ⁶ 疼我，守我誡命ê，我施恩hō͘伊，直到千代。 ⁷ M̄-thang lām-sám稱耶和華你ê上帝ê名；因為lām-sám稱伊ê名ê人，耶和華的確無掠伊做無罪。 ⁸ Tio̍h記得安歇日，守伊做聖； ⁹ 六日內應該tio̍h磨，做你一切ê工； ¹⁰ 獨獨第七日，就是ǹg耶和華你ê上帝來守ê安歇；chit日你kap你ê kiáⁿ、cha-bó͘-kiáⁿ、奴僕、女婢、cheng-siⁿ，以及tiàm tī你中間ê出外人，一切ê工，lóng m̄-thang做； ¹¹ 因為六日內，耶和華創造天、地、海，kap hit中間萬物，第七日就歇；所以耶和華賜福tī安歇日，設立伊做聖。 ¹² Tio̍h孝敬你ê老父，你ê老母，hō͘你ê日子tī耶和華你ê上帝所賞賜你ê地，得tio̍h久長。 ¹³ M̄-thang 害死人。 ¹⁴ M̄-thang行姦淫。 ¹⁵ M̄-thang偷the̍h。 ¹⁶ M̄-thang做假ê干證，陷害你ê厝邊。 ¹⁷ M̄-thang貪你ê厝邊ê厝，也m̄-thang貪你ê厝邊ê bó͘、奴僕、女婢、牛、驢，以及你ê厝邊一切所有ê。 ¹⁸ 眾百姓看見雷tân、sih-nà、哨角ê聲，koh山頂出煙，百姓一下看見，就ngia̍uh-ngia̍uh-chhoah，遠遠khiā-teh； ¹⁹ 對摩西講：求你kap阮講：阮beh聽；m̄-thang上帝kap阮講：驚了阮會死。 ²⁰ 摩西對百姓講：m̄免驚；因為上帝降臨是beh試驗lín koh hō͘ lín時常敬畏伊，免得lín犯罪。 ²¹ Tùi án-ni，百姓遠遠khiā-teh；摩西就行近密雲，到上帝ê所在。 ²² 耶和華對摩西講：你tio̍h án-ni kā以色列人講：Lín已經家己看見我對天頂kap lín講話。 ²³ Lín m̄-thang做別個上帝匹配我；m̄-thang為家己做銀ê上帝，金ê上帝。 ²⁴ 你tio̍h kā我起土壇，tī hit頂面獻你ê燒祭，kap平安祭，kap你ê牛，你ê羊；見若我hō͘人記念我ê名ê所在，我beh到你hia賜福你。 ²⁵ 你若用石頭kā我起壇，m̄-thang用過phah ê石來起；因為若tī hit頂面動你ê ke-si，就phah lâ-sâm伊。 ²⁶ 也m̄-thang用崎á-chàn上我ê壇，免得露現你ê下體。

=== 出埃及記 · 第 20 章 ===

¹ Siōng-tè hoan-hù chiah-ê it-chhè ê ōe kóng, ² Góa sī Iâ-hô-hoa, lí ê Siōng-tè, bat chhōa lí tùi Ai-ki̍p tōe, tùi chòe lô͘-châi ê ke, chhut-lâi ê. ³ Góa í-gōa, lí m̄-thang ū pa̍t ê Siōng-tè. ⁴ M̄-thang ūi-tio̍h ka-kī tiau-khek ngó͘-siōng, put-lūn thiⁿ-téng, tōe-chiūⁿ, kap tōe-ē chúi-lāi só͘-ū ê mi̍h, lóng m̄-thang chòe in ê siōng; ⁵ m̄-thang kèng-pài in, iā m̄-thang ho̍k-sāi in; in-ūi Góa Iâ-hô-hoa, lí ê Siōng-tè, toàn-toàn m̄ iông-ún ēng pa̍t ê siōng-tè phit-phòe Góa; oàn-hūn Góa-ê, Góa kui-kiū i ê chōe, tùi pē kàu kiáⁿ kàu saⁿ-sì tāi; ⁶ thiàⁿ Góa, siú Góa kài-bēng-ê, Góa si-un hō͘ i, ti̍t-kàu chheng-tāi. ⁷ M̄-thang lām-sám chheng Iâ-hô-hoa lí ê Siōng-tè ê miâ; in-ūi lām-sám chheng I ê miâ ê lâng, Iâ-hô-hoa tek-khak bô lia̍h i chòe bô-chōe. ⁸ Tio̍h kì-tit an-hioh-ji̍t, siú i chòe-sèng; ⁹ la̍k-ji̍t-lāi eng-kai tio̍h-bôa, chòe lí it-chhè ê kang; ¹⁰ to̍k-to̍k tē-chhit-ji̍t, chiū-sī ǹg Iâ-hô-hoa lí ê Siōng-tè lâi siú ê an-hioh; chit-ji̍t lí kap lí ê kiáⁿ, cha-bó͘-kiáⁿ, lô͘-po̍k, lú-pī, cheng-siⁿ, í-ki̍p tiàm tī lí tiong-kan ê chhut-gōa lâng, it-chhè ê kang, lóng m̄-thang chòe; ¹¹ in-ūi la̍k-ji̍t-lāi, Iâ-hô-hoa chhòng-chō thiⁿ, tōe, hái, kap hit tiong-kan bān-mi̍h, tē-chhit ji̍t chiū hioh; só͘-í Iâ-hô-hoa sù-hok tī an-hioh-ji̍t, siat-li̍p i chòe-sèng. ¹² Tio̍h hàu-kèng lí ê lāu-pē, lí ê lāu-bú, hō͘ lí ê ji̍t-chí tī Iâ-hô-hoa lí ê Siōng-tè só͘ siúⁿ-sù lí ê tōe, tit-tio̍h kú-tn̂g. ¹³ M̄-thang hāi-sí lâng. ¹⁴ M̄-thang kiâⁿ kan-îm. ¹⁵ M̄-thang thau-the̍h. ¹⁶ M̄-thang chòe ké ê kan-chèng, hām-hāi lí ê chhù-piⁿ. ¹⁷ M̄-thang tham lí ê chhù-piⁿ ê chhù, iā m̄-thang tham lí ê chhù-piⁿ ê bó͘, lô͘-po̍k, lú-pī, gû, lû, í-ki̍p lí ê chhù-piⁿ it-chhè só͘-ū-ê. ¹⁸ Chèng peh-sìⁿ khòaⁿ-kìⁿ lûi-tân, sih-nà, sàu-kak ê siaⁿ, koh soaⁿ-téng chhut-ian, peh-sìⁿ chi̍t-ē khòaⁿ-kìⁿ, chiū ngia̍uh-ngia̍uh-chhoah, hn̄g-hn̄g khiā-teh; ¹⁹ tùi Mô͘-se kóng, Kiû lí kap goán kóng, goán beh thiaⁿ; m̄-thang Siōng-tè kap goán kóng, kiaⁿ-liáu goán ōe sí. ²⁰ Mô͘-se tùi peh-sìⁿ kóng, M̄-bián kiaⁿ; in-ūi Siōng-tè kàng-lîm sī beh chhì-giām lín koh hō͘ lín sî-siông kèng-ùi I, bián-tit lín hoān-chōe. ²¹ Tùi án-ni peh-sìⁿ hn̄g-hn̄g khiā-teh; Mô͘-se chiū kiâⁿ-kūn ba̍t-hûn, kàu Siōng-tè ê só͘-chāi. ²² Iâ-hô-hoa tùi Mô͘-se kóng, Lí tio̍h án-ni kā Í-sek-lia̍t lâng kóng, Lín í-keng ka-kī khòaⁿ-kìⁿ Góa tùi thiⁿ-téng kap lín kóng-ōe. ²³ Lín m̄-thang chòe pa̍t ê siōng-tè phit-phòe Góa; m̄-thang ūi ka-kī chòe gûn ê siōng-tè, kim ê siōng-tè. ²⁴ Lí tio̍h kā Góa khí thô͘-tôaⁿ, tī hit téng-bīn hiàn lí ê sio-chè, kap pêng-an-chè, kap lí ê gû, lí ê iûⁿ; kìⁿ-nā Góa hō͘ lâng kì-liām Góa ê miâ ê só͘-chāi, Góa beh kàu lí hia sù-hok lí. ²⁵ Lí nā ēng chio̍h-thâu kā Góa khí-tôaⁿ, m̄-thang ēng kè-phah ê chio̍h lâi khí; in-ūi nā tī hit téng-bīn tāng lí ê ke-si, chiū phah lâ-sâm--i. ²⁶ Iā m̄-thang ēng kiā-á-chàn chiūⁿ Góa ê tôaⁿ, bián-tit lō͘-hiān lí ê ē-thé.

=== 出埃及記 · 第 21 章 ===

¹ 你tī百姓ê面前所tio̍h立ê法度是án-ni。 ² 你若買希伯來人做奴僕，伊 beh服事你，六年久，第七年伊thang自由白白出去； ³ 伊若單身來，就單身出去；伊若有bó͘，伊ê bó͘就kap伊出去； ⁴ 伊ê主人若kā伊娶bó͘，bó͘ kā伊生kiáⁿ á是cha-bó͘-kiáⁿ，bó͘ kap kiáⁿ兒tio̍h歸主人；伊tio̍h單身出去。 ⁵ 設使奴僕明明講：我疼我ê主人，kap我ê bó͘，我ê kiáⁿ兒，m̄-ài出去自由； ⁶ 伊ê主人就tio̍h帶伊到官府hia，koh tio̍h chhōa伊óa近門，á是門khiā，主人tio̍h用鑽á鑽伊ê耳á；伊就永遠服事伊。 ⁷ 人若賣cha-bó͘-kiáⁿ做女婢，伊無thang親像奴僕án-ni出去。 ⁸ 主人若定tio̍h收伊，後來看無中意，就tio̍h 准伊贖身；主人已經騙伊，就無權thang 賣伊hō͘外邦人。 ⁹ 主人若定tio̍h伊hō͘家己ê kiáⁿ，就tio̍h款待伊親像cha-bó͘-kiáⁿ。 ¹⁰ 若有koh娶一个，就伊ê食、穿，kap配合ê事，猶原m̄-thang減少。 ¹¹ 若無對伊行chit三項，伊就thang白白出去，免用銀贖。 ¹² Phah死人ê的確tio̍h hō͘伊死。 ¹³ 人若m̄是埋伏teh 刣人，就是上帝交tī伊ê手，我就kā你設一个所在，伊thang走去hia。 ¹⁴ 人若自專攻擊伊ê厝邊，用詭譎ê計謀，就若tī我ê壇，亦tio̍h掠去hō͘伊死。 ¹⁵ Phah老父á是老母ê，的確tio̍h hō͘伊死。 ¹⁶ 柺人去賣ê，á是iáu tī伊ê手，的確tio̍h hō͘伊死。 ¹⁷ 咒詛老父á是老母ê，的確tio̍h hō͘伊死。 ¹⁸ 人若冤家，chitê用石頭á是拳頭母phah hitê，iáu無致到死，不過倒tī眠床； ¹⁹ 若會koh起來，óa柺á出去，hitê phah伊ê，thang算無罪；獨獨tio̍h賠伊bōe做工ê錢，也tio̍h kā伊醫到lóng好。 ²⁰ 人若用槌á phah伊ê奴僕，á是伊ê女婢，致到liâm-piⁿ死，伊的確tio̍h受刑罰； ²¹ 若隔一兩日chiah死，就thang免受刑罰，因為是伊ê銀買ê。 ²² 人若相phah，傷害有身孕ê婦人人，致到ka-la̍uh身，後來無別項ê害，hit人tio̍h罰銀，照婦人人ê丈夫所定ê；tī官府ê面前hō͘伊。 ²³ 若有別項ê傷害，就tio̍h用命賠命。 ²⁴ 目睭賠目睭，嘴齒賠嘴齒，手賠手， ²⁵ 腳賠腳，燒賠燒，傷賠傷，phah賠phah。 ²⁶ 人若phah-pháiⁿ伊ê奴僕，á是伊ê女婢，一蕊目睭，就tio̍h因為伊ê目睭放伊去自由。 ²⁷ 若phah-lak伊ê奴僕，á是伊ê女婢，一支嘴齒，就tio̍h因為伊ê嘴齒放伊去自由。 ²⁸ 牛若tak死一个ta-po͘人，á是一个婦人人，tio̍h用石頭tìm死hit隻牛，總是m̄-thang食伊ê肉；牛ê主人算無罪。 ²⁹ 設使hit隻牛平素會tak人，有人報伊ê主人知，伊竟然無將牛關teh，致到tak死ta-po͘人á是婦人人；就tio̍h用石頭tìm死hit隻牛，牛ê主人也tio̍h死。 ³⁰ 若是擬定用銀贖性命，就tio̍h照所擬定ê，來贖伊ê性命。 ³¹ 牛無論tak-tio̍h人ê kiáⁿ á是cha-bó͘-kiáⁿ，tio̍h照chitê例辦伊。 ³² 牛若tak-tio̍h奴僕á是女婢，tio̍h用銀三十sià-khek-le̍k hō͘ in ê主人；也tio̍h用石頭tìm死牛。 ³³ 人若掀開井，á是掘井，無蓋蓋(kòa)，有牛á是驢跋(poa̍h)tī hit內面， ³⁴ 井ê主人tio̍h賠，也tio̍h the̍h銀hō͘伊ê主；死ê cheng-siⁿ歸家己。 ³⁵ Chit人ê牛若tak-tio̍h hit人ê牛，致到死，in tio̍h賣活ê牛，價錢平分，死ê牛也tio̍h平分。 ³⁶ 人若知chit隻牛平素會tak人，主人竟然無將牛關teh，伊就tio̍h用牛賠牛，死ê牛歸家己。

=== 出埃及記 · 第 21 章 ===

¹ Lí tī peh-sìⁿ ê bīn-chêng só͘ tio̍h li̍p ê hoat-tō͘ sī án-ni. ² Lí nā bóe Hi-pek-lâi lâng chòe lô͘-po̍k, i beh ho̍k-sāi lí, la̍k-nî kú, tē-chhit nî i thang chū-iû pe̍h-pe̍h chhut-khì; ³ i nā toaⁿ-sin lâi, chiū toaⁿ-sin chhut-khì; i nā ū bó͘, i ê bó͘ chiū kap i chhut-khì; ⁴ i ê chú-lâng nā kā i chhōa-bó͘, bó͘ kā i siⁿ-kiáⁿ á sī cha-bó͘-kiáⁿ, bó͘ kap kiáⁿ-jî tio̍h kui chú-lâng; i tio̍h toaⁿ-sin chhut-khì. ⁵ Siat-sú lô͘-po̍k bêng-bêng kóng, Góa thiàⁿ góa ê chú-lâng, kap góa ê bó͘, góa ê kiáⁿ-jî, m̄-ài chhut-khì chū-iû; ⁶ i ê chú-lâng chiū tio̍h tòa i kàu koaⁿ-hú hia, koh tio̍h chhōa i óa-kūn mn̂g, á-sī mn̂g-khiā, chú-lâng tio̍h ēng chǹg-á chǹg i ê hī-á; i chiū éng-oán ho̍k-sāi-i. ⁷ Lâng nā bōe cha-bó͘-kiáⁿ chòe lú-pī, i bô thang chhin-chhiūⁿ lô͘-po̍k án-ni chhut-khì. ⁸ Chú-lâng nā tiāⁿ-tio̍h siu-i, āu-lâi khòaⁿ bô tiòng-ì, chiū tio̍h chún i sio̍k-sin; chú-lâng í-keng phiàn i, chiū bô koân thang bōe i hō͘ gōa-pang lâng. ⁹ Chú-lâng nā tiāⁿ-tio̍h i hō͘ ka-kī ê kiáⁿ, chiū tio̍h khoán-thāi i chhin-chhiūⁿ cha-bó͘-kiáⁿ. ¹⁰ Nā ū koh chhōa chi̍t-ê, chiū i ê chia̍h, chhēng, kap phòe-ha̍p ê sū, iû-goân m̄-thang kiám-chió. ¹¹ Nā bô tùi i kiâⁿ chit saⁿ-hāng, i chiū thang pe̍h-pe̍h chhut-khì, bián ēng gûn sio̍k. ¹² Phah-sí lâng-ê tek-khak tio̍h hō͘ i sí. ¹³ Lâng nā m̄-sī bâi-ho̍k-teh thâi-lâng, chiū-sī Siōng-tè kau tī i ê chhiú, Góa chiū kā lí siat chi̍t ê só͘-chāi, i thang cháu-khì hia. ¹⁴ Lâng nā chū-choan kong-kek i ê chhù-piⁿ, ēng khúi-khiat ê kè-bô͘, chiū nā tī Góa ê tôaⁿ, ia̍h tio̍h lia̍h-khì hō͘ i sí. ¹⁵ Phah lāu-pē á-sī lāu-bú-ê, tek-khak tio̍h hō͘ i sí. ¹⁶ Koái lâng khì bōe-ê, á-sī iáu tī i ê chhiú, tek-khak tio̍h hō͘ i sí. ¹⁷ Chiù-chó͘ lāu-pē á-sī lāu-bú-ê, tek-khak tio̍h hō͘ i sí. ¹⁸ Lâng nā oan-ke, chit-ê ēng chio̍h-thâu á-sī kûn-thâu-bú phah hit-ê, iáu bô tì-kàu sí, put-kò tó tī bîn-chhn̂g; ¹⁹ nā ōe koh khí-lâi, óa koáiⁿ-á chhut-khì, hit-ê phah i-ê, thang sǹg bô-chōe; to̍k-to̍k tio̍h pê i bōe chòe kang ê chîⁿ, iā tio̍h kā-i i kàu lóng hó. ²⁰ Lâng nā ēng thûi-á phah i ê lô͘-po̍k, á-sī i ê lú-pī, tì-kàu liâm-piⁿ sí, i tek-khak tio̍h siū hêng-hoa̍t; ²¹ nā kè chi̍t-nn̄g ji̍t chiah sí, chiū thang bián siū hêng-hoa̍t, in-ūi sī i ê gûn bóe-ê. ²² Lâng nā saⁿ-phah, siong-hāi ū sin-īn ê hū-jîn-lâng, tì-kàu ka-la̍uh-sin, āu-lâi bô pa̍t-hāng ê hāi, hit-lâng tio̍h hoa̍t-gûn, chiàu hū-jîn-lâng ê tiōng-hu só͘ tēng-ê; tī koaⁿ-hú ê bīn-chêng hō͘ i. ²³ Nā ū pa̍t-hāng ê siong-hāi, chiū tio̍h ēng miā pê miā. ²⁴ Ba̍k-chiu pê ba̍k-chiu, chhùi-khí pê chhùi-khí, chhiú pê chhiú, ²⁵ kha pê kha, sio pê sio, siong pê siong, phah pê phah. ²⁶ Lâng nā phah-pháiⁿ i ê lô͘-po̍k, á-sī i ê lú-pī, chi̍t-lúi ba̍k-chiu, chiū tio̍h in-ūi i ê ba̍k-chiu pàng i khì chū-iû. ²⁷ Nā phah-lak i ê lô͘-po̍k, á-sī i ê lú-pī, chi̍t ki chhùi-khí, chiū tio̍h in-ūi i ê chhùi-khí pàng i khì chū-iû. ²⁸ Gû nā tak-sí chi̍t ê ta-po͘-lâng, á-sī chi̍t ê hū-jîn-lâng, tio̍h ēng chio̍h-thâu tìm-sí hit chiah gû, chóng-sī m̄-thang chia̍h i ê bah; gû ê chú-lâng sǹg bô chōe. ²⁹ Siat-sú hit chiah gû pêng-sò͘ ōe tak-lâng, ū lâng pò i ê chú-lâng chai, i kèng-jiân bô chiong gû koaiⁿ-teh, tì-kàu tak-sí ta-po͘-lâng á-sī hū-jîn-lâng; chiū tio̍h ēng chio̍h-thâu tìm-sí hit chiah gû, gû ê chú-lâng iā tio̍h sí. ³⁰ Nā sī gí-tiāⁿ ēng gûn sio̍k sìⁿ-miā, chiū tio̍h chiàu só͘ gí-tiāⁿ-ê, lâi sio̍k i ê sìⁿ-miā. ³¹ Gû bô-lūn tak-tio̍h lâng ê kiáⁿ á-sī cha-bó͘-kiáⁿ, tio̍h chiàu chit-ê lē pān-i. ³² Gû nā tak-tio̍h lô͘-po̍k á-sī lú-pī, tio̍h ēng gûn saⁿ-cha̍p sià-khek-le̍k hō͘ in ê chú-lâng; iā tio̍h ēng chio̍h-thâu tìm-sí gû. ³³ Lâng nā hian-khui chíⁿ, á-sī ku̍t chíⁿ, bô khàm-kòa, ū gû á-sī lû poa̍h tī hit lāi-bīn, ³⁴ chíⁿ ê chú-lâng tio̍h pê, iā tio̍h the̍h gûn hō͘ i ê chú; sí ê cheng-siⁿ kui ka-kī. ³⁵ Chit-lâng ê gû nā tak-tio̍h hit lâng ê gû, tì-kàu sí, in tio̍h bōe oa̍h ê gû, kè-chîⁿ pîⁿ-pun, sí ê gû iā tio̍h pîⁿ-pun. ³⁶ Lâng nā chai chit chiah gû pêng-sò͘ ōe tak-lâng, chú-lâng kèng-jiân bô chiong gû koaiⁿ-teh, i chiū tio̍h ēng gû pê gû, sí ê gû kui ka-kī.

=== 出埃及記 · 第 22 章 ===

¹ 人若偷牽牛，á是羊，無論刣 á是賣，一隻牛tio̍h賠伊五隻，一隻羊 tio̍h 賠四隻。 ² 賊若iah孔，hō͘人tú-tio̍h，kā伊phah死，就無算伊有phah死人ê罪。 ³ 若日頭已經出，就算伊有phah死人ê罪。賊的確tio̍h賠；若無thang 賠，賊tio̍h賣身，來抵伊所偷ê。 ⁴ 若伊所偷ê，kiám-chhái牛，á是驢、羊，iáu活tī伊ê手，就tio̍h賠重(têng)倍。 ⁵ 人若tī田裡，á是葡萄園，放cheng-siⁿ，chhut-chāi伊食別人ê田，就tio̍h用家己ê田裡siōng好ê，kap葡萄園siōng好ê來賠伊。 ⁶ 若火燒刺phè，續燒tio̍h稻堆，á是猶未割ê稻，á是田園，就起火ê人的確tio̍h賠。 ⁷ 人若將銀á是物件，交帶厝邊顧守，chiahê物，若tùi hit人ê家tio̍h賊偷，賊若掠tio̍h，賊tio̍h賠重倍； ⁸ 賊若掠無tio̍h，hitê家主tio̍h 到官府面前，看伊有the̍h厝邊ê物件á無。 ⁹ 見若有過失，kiám-chhái是為tio̍h牛、驢、羊，á是為tio̍h衣裳á是甚麼失落ê物，有人認得是伊ê，雙pêng ê案件tio̍h 到官府ê面前；官府若斷定甚麼人有罪，hit人tio̍h賠伊ê厝邊重倍。 ¹⁰ 人若將驢，á是牛，á是羊，á是別號cheng-siⁿ，交帶厝邊顧守，cheng-siⁿ kiám-chhái死，á是受傷，á是hō͘人牽去，無人看見； ¹¹ 兩人ê中間，tio̍h kí耶和華chiù-chōa，m̄-bat the̍h厝邊ê物，原主就tio̍h soah，顧守ê人m̄免賠。 ¹² Cheng-siⁿ若tùi顧守ê人hia hō͘人偷去，伊就tio̍h賠原主。 ¹³ 若受野獸拆碎，顧守ê人tio̍h帶伊來做證據；所拆碎ê就m̄免賠。 ¹⁴ 人若tùi厝邊借甚麼物，所借ê kiám-chhái受傷á是死，原主無相kap tī-teh，伊的確tio̍h賠。 ¹⁵ 若原主相kap tī-teh，伊就m̄免賠；若是租ê，也m̄免賠，因為本有租錢。 ¹⁶ 人若引誘未受聘ê cha-bó͘-gín-ná kap伊同房，伊tio̍h聘伊做bó͘。 ¹⁷ 若伊ê老父決斷m̄肯將cha-bó͘-kiáⁿ配伊，伊就tio̍h照在室女ê聘禮，hō͘伊銀。 ¹⁸ 做紅姨ê，tio̍h hō͘伊死。 ¹⁹ 見若kap獸淫ê，的確tio̍h hō͘伊死。 ²⁰ 無專專祭祀耶和華，來祭祀別個上帝ê，tio̍h滅伊。 ²¹ M̄-thang欺負出外人，也m̄-thang壓制伊；因為lín tī埃及地也bat做出外人。 ²² M̄-thang pháiⁿ款待寡婦kap孤兒。 ²³ 若小khóa pháiⁿ款待in，in求叫我，我的確beh聽in ê求叫。 ²⁴ 也beh大受氣，用刀刣 lín；hō͘ lín ê bó͘做寡婦，lín ê kiáⁿ做孤兒。 ²⁵ 我ê百姓中有sòng-hiong人kap lín khiā起，你若借伊銀，你m̄-thang親像債主款待伊，也m̄-thang the̍h伊ê利息。 ²⁶ 你若the̍h厝邊ê衣裳做準當，日落就tio̍h還伊； ²⁷ 伊只有chit件thang kah，是伊遮身軀ê衫；若無，伊beh怎樣睏？伊求我，我beh聽，因為我是慈悲ê。 ²⁸ M̄-thang譭謗官府；也m̄-thang罵你ê百姓ê序大。 ²⁹ 你tio̍h tùi所收成ê五穀，kap酒窟內所流出ê酒，the̍h來獻，m̄-thang延chhiân。 ³⁰ 你tio̍h將頭上 ê kiáⁿ歸tī我；你ê牛，你ê羊，也tio̍h án-ni；七日thang塊伊ê母，tī八日tio̍h歸tī我。 ³¹ Lín tio̍h為tio̍h我做聖ê百姓；所以田裡野獸所拆裂ê肉，lín m̄-thang食，tio̍h hiat hō͘狗。

=== 出埃及記 · 第 22 章 ===

¹ Lâng nā thau-khan gû, á-sī iûⁿ, bô-lūn thâi á-sī bōe, chi̍t chiah gû tio̍h pê i gō͘ chiah, chi̍t chiah iûⁿ tio̍h pê sì-chiah. ² Chha̍t nā iah-khang, hō͘ lâng tú-tio̍h, kā i phah-sí, chiū bô sǹg i ū phah-sí lâng ê chōe. ³ Nā ji̍t-thâu í-keng chhut, chiū sǹg i ū phah-sí lâng ê chōe. Chha̍t tek-khak tio̍h pê; nā bô thang pê, chha̍t tio̍h bōe sin, lâi tí i só͘ thau-ê. ⁴ Nā i só͘ thau-ê, kiám-chhái gû, á-sī lû, iûⁿ, iáu oa̍h tī i ê chhiú, chiū tio̍h pê têng-pē. ⁵ Lâng nā tī chhân-ni̍h, á-sī phû-tô-hn̂g, pàng cheng-siⁿ, chhut-chāi i chia̍h pa̍t-lâng ê chhân, chiū tio̍h ēng ka-kī ê chhân-ni̍h siōng hó-ê, kap phû-tô-hn̂g siōng hó-ê lâi pê-i. ⁶ Nā hé sio chhì-phè, sòa sio-tio̍h tiū-tui, á-sī iáu-bē koah ê tiū, á-sī chhân-hn̂g, chiū khí-hé ê lâng tek-khak tio̍h pê. ⁷ Lâng nā chiong gûn á-sī mi̍h-kiāⁿ, kau-tài chhù-piⁿ kò͘-siú, chiah-ê mi̍h, nā tùi hit-lâng ê ke tio̍h chha̍t thau, chha̍t nā lia̍h-tio̍h, chha̍t tio̍h pê têng-pē; ⁸ chha̍t nā lia̍h-bô-tio̍h, hit-ê ke-chú tio̍h kàu koaⁿ-hú bīn-chêng, khòaⁿ i ū the̍h chhù-piⁿ ê mi̍h-kiāⁿ á-bô. ⁹ Kìⁿ-nā ū kè-sit, kiám-chhái sī ūi-tio̍h gû, lû, iûⁿ, á-sī ūi-tio̍h i-chiûⁿ á-sī sím-mi̍h sit-lo̍h ê mi̍h, ū lâng jīn-tit sī i-ê, siang-pêng ê àn-kiāⁿ tio̍h kàu koaⁿ-hú ê bīn-chêng; koaⁿ-hú nā toàn-tēng sím-mi̍h lâng ū chōe, hit-lâng tio̍h pê i ê chhù-piⁿ têng-pē. ¹⁰ Lâng nā chiong lû, á-sī gû, á-sī iûⁿ, á-sī pa̍t-hō cheng-siⁿ, kau-tài chhù-piⁿ kò͘-siú, cheng-siⁿ kiám-chhái sí, á-sī siū-siong, á-sī hō͘ lâng khan-khì, bô lâng khòaⁿ-kìⁿ; ¹¹ nn̄g-lâng ê tiong-kan, tio̍h kí Iâ-hô-hoa chiù-chōa, m̄-bat the̍h chhù-piⁿ ê mi̍h, goân-chú chiū tio̍h soah, kò͘-siú ê lâng m̄-bián pê. ¹² Cheng-siⁿ nā tùi kò͘-siú ê lâng hia hō͘ lâng thau-khì, i chiū tio̍h pê goân-chú. ¹³ Nā siū iá-siù thiah-chhùi, kò͘-siú ê lâng tio̍h tòa i lâi chòe chèng-kù; só͘ thiah-chhùi-ê chiū m̄-bián pê. ¹⁴ Lâng nā tùi chhù-piⁿ chioh sím-mi̍h mi̍h, só͘ chioh-ê kiám-chhái siū-siong á-sī sí, goân-chú bô saⁿ-kap tī-teh, i tek-khak tio̍h pê. ¹⁵ Nā goân-chú saⁿ-kap tī-teh, i chiū m̄-bián pê; nā sī cho͘-ê, iā m̄-bián pê, in-ūi pún ū cho͘-chîⁿ. ¹⁶ Lâng nā ín-iú bē siū phèng ê cha-bó͘-gín-ná kap i tâng-pâng, i tio̍h phèng i chòe-bó͘. ¹⁷ Nā i ê lāu-pē koat-toàn m̄-khéng chiong cha-bó͘-kiáⁿ phòe-i, i chiū tio̍h chiàu chāi-sek-lú ê phèng-lé, hō͘ i gûn. ¹⁸ Chòe ang-î-ê, tio̍h hō͘ i sí. ¹⁹ Kìⁿ-nā kap siù îm-ê, tek-khak tio̍h hō͘ i sí. ²⁰ Bô choan-choan chè-sū Iâ-hô-hoa, lâi chè-sū pa̍t ê siōng-tè-ê, tio̍h bia̍t-i. ²¹ M̄-thang khi-hū chhut-gōa lâng, iā m̄-thang ap-chè i; in-ūi lín tī Ai-ki̍p tōe iā bat chòe chhut-gōa lâng. ²² M̄-thang pháiⁿ khoán-thāi kóaⁿ-hū kap ko͘-jî. ²³ Nā sió-khóa pháiⁿ khoán-thāi-in, in kiû-kiò Góa, Góa tek-khak beh thiaⁿ in ê kiû-kiò. ²⁴ Iā beh tōa siū-khì, ēng to thâi-lín; hō͘ lín ê bó͘ chòe kóaⁿ-hū, lín ê kiáⁿ chòe ko͘-jî. ²⁵ Góa ê peh-sìⁿ-tiong ū sòng-hiong lâng kap lín khiā-khí, lí nā chioh i gûn, lí m̄-thang chhin-chhiūⁿ chè-chú khoán-thāi i, iā m̄-thang the̍h i ê lī-sek. ²⁶ Lí nā the̍h chhù-piⁿ ê i-chiûⁿ chòe chún-tǹg, ji̍t-lo̍h chiū tio̍h hêng-i; ²⁷ i chí-ū chit-kiāⁿ thang kah, sī i jia seng-khu ê saⁿ; nā bô, i beh cháiⁿ-iūⁿ khùn? i kiû-Góa, Góa beh thiaⁿ, in-ūi Góa sī chû-pi-ê. ²⁸ M̄-thang húi-pòng koaⁿ-hú; iā m̄-thang mē lí ê peh-sìⁿ ê sī-tōa. ²⁹ Lí tio̍h tùi só͘ siu-sêng ê gō͘-kak, kap chiú-khut-lāi só͘ lâu-chhut ê chiú, the̍h-lâi hiàn, m̄-thang iân-chhiân. ³⁰ Lí tio̍h chiong thâu-chiūⁿ ê kiáⁿ kui tī Góa; lí ê gû, lí ê iûⁿ, iā tio̍h án-ni; chhit-ji̍t thang tè i ê bú, tī poeh-ji̍t tio̍h kui tī Góa. ³¹ Lín tio̍h ūi-tio̍h Góa chòe sèng ê peh-sìⁿ; só͘-í chhân-ni̍h iá-siù só͘ thiah-li̍h ê bah, lín m̄-thang chia̍h, tio̍h hiat hō͘ káu.

=== 出埃及記 · 第 23 章 ===

¹ M̄-thang報揚謠言；m̄-thang kap pháiⁿ人聯合做lām-sám ê干證。 ² M̄-thang tè眾人行pháiⁿ；tī相告ê事，m̄-thang偏óa大pêng，講伊ê話，來冤枉正直。 ³ M̄-thang tī相告ê事，袒護sòng-hiong人。 ⁴ 若tú-tio̍h你ê對敵ê牛，á是驢，失迷路，的確tio̍h牽tò來交伊。 ⁵ 若看見怨恨你ê人ê驢背載teh倒，m̄-thang行開，tio̍h kap伊相kap放驢所載ê。 ⁶ Sòng-hiong人有相告，你m̄-thang偏斷。 ⁷ Tio̍h離開虛假ê事遠遠；m̄-thang 刣無罪kap義ê人；因為pháiⁿ人我的確無算伊做義。 ⁸ M̄-thang受pò͘賂，因為pò͘賂會hō͘目睭金 ê人變chhiⁿ-mî，koh會將義人ê話péng倒tńg。 ⁹ M̄-thang壓制出外人；因為lín bat出外tī埃及地，知出外人ê心。 ¹⁰ 六年內你tio̍h種作你ê田園，收成土產。 ¹¹ 獨獨第七年，tio̍h hō͘土地歇睏無種作，hō͘你ê百姓中ê sòng-hiong人有thang食；所chhun-ê thang hō͘野獸食；你ê葡萄園kap橄欖園，也tio̍h án-ni。 ¹² 六日內你tio̍h做你ê工，第七日tio̍h安歇，hō͘牛驢thang歇睏，也hō͘女婢ê kiáⁿ kap出外人lóng thang 養精力。 ¹³ 見若我對lín講ê話，lín tio̍h謹慎守；別個上帝 ê名，你m̄-thang提起，也m̄-thang講hō͘人聽。 ¹⁴ 一年三pái你tio̍h守節服事我。 ¹⁵ A-pit月，你出埃及，到定tio̍h ê期，tio̍h守除酵節；七日久食無酵餅，照我所吩咐ê；朝見我ê人m̄-thang空手。 ¹⁶ Koh有收割ê節，就是你tī田裡栽種，tùi tio̍h磨得tio̍h起頭熟ê土產。Koh有收khǹg ê節，就是年尾，lín收khǹg tùi田裡tio̍h磨所得tio̍h-ê。 ¹⁷ 一年三pái，你一切ê ta-po͘丁tio̍h 到主耶和華ê面前。 ¹⁸ 祭祀我ê牲禮，伊ê血m̄-thang chham有酵ê物來獻；也m̄-thang將我節期牲禮ê油留到隔早起。 ¹⁹ 地裡第一起頭熟ê物，tio̍h送到耶和華你上帝ê厝。煮山羊á m̄-thang用伊ê母ê奶。 ²⁰ 看ah，我差我ê使者tī你ê頭前，tī路裡保護你，chhōa你到我所備辦ê地。 ²¹ Lín tī伊ê面前tio̍h謹慎，聽thàn伊ê話，m̄-thang違逆伊；伊無beh赦免lín ê過失；因為伊奉我ê名。 ²² 你若實在聽thàn伊ê話，照我一切所講ê去行，我就做你ê仇讎ê仇讎，你ê對敵ê對敵。 ²³ 我ê使者beh行tī你ê頭前，chhōa你到A-mô͘-lī、Hek、Pí-lī-sé、迦南、Hi-bī、Iâ-pò͘-su hiahê族ê地；我beh剪除in。 ²⁴ In ê上帝你m̄-thang跪拜，也m̄-thang服事；m̄-thang學in ê所做，tio̍h一盡毀滅in，phah碎in雕刻ê柱。 ²⁵ Lín tio̍h服事耶和華lín ê上帝；伊的確賜福tī你ê米糧kap你ê水；koh我beh除去lín中間ê破病。 ²⁶ 也beh hō͘你ê境內，無有ka-la̍uh胎ê，無有bōe生ê；我beh hō͘你ê歲壽滿足。 ²⁷ 我beh做你ê頭前，來示威；你所到ê所在，hiahê百姓，我beh hō͘ in死無；koh beh hō͘你一切ê對敵oa̍t-tńg身逃走。 ²⁸ 我beh差大隻蜂tī你ê頭前，趕出Hi-bī人、迦南人、Hek人，離開你。 ²⁹ Tī一年內我無beh tùi你ê頭前一盡趕in出，驚了土地拋荒，野獸加添chōe-chōe來害lín。 ³⁰ 我beh漸漸tùi lín ê頭前趕in出，thèng候lín人額加添chōe-chōe，來承受hitê地做業。 ³¹ 我beh定tio̍h你ê境界，tùi紅海到腓利士ê海，koh tùi曠野到大河。因為我beh將hit所在khiā起ê百姓交tī lín ê手，hō͘你將in對你ê面前趕出。 ³² M̄-thang kap in，以及in ê上帝，立約。 ³³ M̄-thang hō͘ in khiā起你ê土地，驚了in hō͘你得罪我；你若服事in ê上帝，這beh做你ê羅網。

=== 出埃及記 · 第 23 章 ===

¹ M̄-thang pò-iông iâu-giân; m̄-thang kap pháiⁿ-lâng liân-ha̍p chòe lām-sám ê kan-chèng. ² M̄-thang tè chèng-lâng kiâⁿ-pháiⁿ; tī saⁿ-kò ê sū, m̄-thang phian-óa tōa-pêng, kóng i ê ōe, lâi oan-óng chèng-ti̍t. ³ M̄-thang tī saⁿ-kò ê sū, thán-hō͘ sòng-hiong lâng. ⁴ Nā tú-tio̍h lí ê tùi-te̍k ê gû, á-sī lû, sit-bê lō͘, tek-khak tio̍h khan tò-lâi kau-i. ⁵ Nā khòaⁿ-kìⁿ oàn-hūn lí ê lâng ê lû pē-chài teh-tó, m̄-thang kiâⁿ-khui, tio̍h kap i saⁿ-kap pàng lû só͘ chài-ê. ⁶ Sòng-hiong lâng ū saⁿ-kò, lí m̄-thang phian-toàn. ⁷ Tio̍h lī-khui hu-ké ê sū hn̄g-hn̄g; m̄-thang thâi bô-chōe kap gī ê lâng; in-ūi pháiⁿ-lâng Góa tek-khak bô sǹg i chòe gī. ⁸ M̄-thang siū pò͘-lō͘, in-ūi pò͘-lō͘ ōe hō͘ ba̍k-chiu kim ê lâng piàn chhiⁿ-mî, koh ōe chiong gī-lâng ê ōe péng-tò-tńg. ⁹ M̄-thang ap-chè chhut-gōa lâng; in-ūi lín bat chhut-gōa tī Ai-ki̍p tōe, chai chhut-gōa lâng ê sim. ¹⁰ La̍k-nî-lāi lí tio̍h chèng-choh lí ê chhân-hn̂g, siu-sêng thó͘-sán. ¹¹ To̍k-to̍k tē-chhit nî, tio̍h hō͘ thó͘-tōe hioh-khùn bô chèng-choh, hō͘ lí ê peh-sìⁿ-tiong ê sòng-hiong lâng ū thang chia̍h; só͘ chhun-ê thang hō͘ iá-siù chia̍h; lí ê phû-tô-hn̂g kap kaⁿ-ná-hn̂g, iā tio̍h án-ni. ¹² La̍k-ji̍t-lāi lí tio̍h chòe lí ê kang, tē-chhit ji̍t tio̍h an-hioh, hō͘ gû lû thang hioh-khùn, iā hō͘ lú-pī ê kiáⁿ kap chhut-gōa lâng lóng thang ióng cheng-le̍k. ¹³ Kìⁿ-nā Góa tùi lín kóng ê ōe, lín tio̍h kín-sīn siú; pa̍t ê siōng-tè ê miâ, lí m̄-thang thê-khí, iā m̄-thang kóng hō͘ lâng thiaⁿ. ¹⁴ Chi̍t-nî saⁿ-pái lí tio̍h siú-choeh ho̍k-sāi Góa. ¹⁵ A-pit ge̍h, lí chhut Ai-ki̍p, kàu tiāⁿ-tio̍h ê kî, tio̍h siú tû-kàⁿ-choeh; chhit-ji̍t kú chia̍h bô-kàⁿ-piáⁿ, chiàu Góa só͘ hoan-hù-ê; tiâu-kìⁿ Góa ê lâng m̄-thang khang-chhiú. ¹⁶ Koh ū siu-koah ê choeh, chiū-sī lí tī chhân-ni̍h chai-chèng, tùi tio̍h-bôa tit-tio̍h khí-thâu se̍k ê thó͘-sán. Koh ū siu-khǹg ê choeh, chiū-sī nî-bé, lín siu-khǹg tùi chhân-ni̍h tio̍h-bôa só͘ tit-tio̍h-ê. ¹⁷ Chi̍t-nî saⁿ-pái, lí it-chhè ê ta-po͘-teng tio̍h kàu Chú Iâ-hô-hoa ê bīn-chêng. ¹⁸ Chè-sū Góa ê seng-lé, i ê huih m̄-thang chham ū kàⁿ ê mi̍h lâi hiàn; iā m̄-thang chiong Góa choeh-kî seng-lé ê iû lâu kàu keh chá-khí. ¹⁹ Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí Siōng-tè ê chhù. Chú soaⁿ-iûⁿ-á m̄-thang ēng i ê bú ê lin. ²⁰ Khòaⁿ ah, Góa chhe Góa ê sù-chiá tī lí ê thâu-chêng, tī lō͘-ni̍h pó-hō͘ lí, chhōa lí kàu Góa só͘ pī-pān ê tōe. ²¹ Lín tī i ê bīn-chêng tio̍h kín-sīn, thiaⁿ-thàn i ê ōe, m̄-thang ûi-ke̍h i; i bô beh sià-bián lín ê kè-sit; in-ūi i hōng Góa ê miâ. ²² Lí nā si̍t-chāi thiaⁿ-thàn i ê ōe, chiàu Góa it-chhè só͘ kóng-ê khì kiâⁿ, Góa chiū chòe lí ê kiû-siû ê kiû-siû, lí ê tùi-te̍k ê tùi-te̍k. ²³ Góa ê sù-chiá beh kiâⁿ tī lí ê thâu-chêng, chhōa lí kàu A-mô͘-lī, Hek, Pí-lī-sé, Ka-lâm, Hi-bī, Iâ-pò͘-su hiah-ê cho̍k ê tōe; Góa beh chián-tû in. ²⁴ In ê siōng-tè lí m̄-thang kūi-pài, iā m̄-thang ho̍k-sāi; m̄-thang o̍h in ê só͘-chòe, tio̍h it-chīn húi-bia̍t in, phah-chhùi in tiau-khek ê thiāu. ²⁵ Lín tio̍h ho̍k-sāi Iâ-hô-hoa lín ê Siōng-tè; I tek-khak sù-hok tī lí ê bí-niû kap lí ê chúi; koh Góa beh tû-khì lín tiong-kan ê phòa-pīⁿ. ²⁶ Iā beh hō͘ lí ê kéng-lāi, bô ū ka-la̍uh-thai-ê, bô ū bōe siⁿ-ê; Góa beh hō͘ lí ê hè-siū móa-chiok. ²⁷ Góa beh chòe lí ê thâu-chêng, lâi sī-ui; lí só͘ kàu ê só͘-chāi, hiah-ê peh-sìⁿ, Góa beh hō͘ in sí-bô; koh beh hō͘ lí it-chhè ê tùi-te̍k oa̍t-tńg-sin tô-cháu. ²⁸ Góa beh chhe tōa-chiah-phang tī lí ê thâu-chêng, kóaⁿ-chhut Hi-bī lâng, Ka-lâm lâng, Hek lâng, lī-khui lí. ²⁹ Tī chi̍t-nî-lāi Góa bô beh tùi lí ê thâu-chêng it-chīn kóaⁿ in chhut, kiaⁿ-liáu thó͘-tōe pha-hng, iá-siù ke-thiⁿ chōe-chōe lâi hāi lín. ³⁰ Góa beh chiām-chiām tùi lín ê thâu-chêng kóaⁿ in chhut, thèng-hāu lín lâng-gia̍h ke-thiⁿ chōe-chōe, lâi sêng-siū hit-ê tōe chòe-gia̍p. ³¹ Góa beh tiāⁿ-tio̍h lí ê kéng-kài, tùi Âng-hái kàu Hui-lī-sū ê hái, koh tùi khòng-iá kàu Tōa-hô. In-ūi Góa beh chiong hit só͘-chāi khiā-khí ê peh-sìⁿ kau tī lín ê chhiú, hō͘ lí chiong in tùi lí ê bīn-chêng kóaⁿ-chhut. ³² M̄-thang kap in, í-ki̍p in ê siōng-tè, li̍p-iok. ³³ M̄-thang hō͘ in khiā-khí lí ê thó͘-tōe, kiaⁿ-liáu in hō͘ lí tek-chōe Góa; lí nā ho̍k-sāi in ê siōng-tè, che beh chòe lí ê lô-bāng.

=== 出埃及記 · 第 24 章 ===

¹ 耶和華kā摩西講：你kap亞倫、Ná-tap、A-pí-hō͘，kap以色列長老中七十人，lóng tio̍h上到耶和華chia，遠遠仆落去拜。 ² 獨獨摩西thang親近耶和華，其餘m̄-thang親近；百姓也m̄-thang kap伊上來。 ³ 摩西到，將耶和華一切ê話，一切ê法度，講hō͘百姓聽；眾百姓同聲應講，耶和華所講ê話，阮beh lóng遵thàn。 ⁴ 摩西將耶和華ê話，lóng寫起來；透早起來，tī山下起一座壇，照以色列十二支派，khiā十二支柱。 ⁵ Koh差以色列中ê少年人，去獻燒祭。也用牛做平安祭，獻hō͘耶和華。 ⁶ 摩西將血ê一半貯tī盆裡，一半hiù tī壇裡。 ⁷ Koh the̍h約ê冊，讀hō͘百姓聽；in講：耶和華所講ê，阮beh lóng遵thàn來行。 ⁸ 摩西將血hiù百姓，講：看ah，這是立約ê血，是耶和華照這一切ê話kap lín所立ê。 ⁹ 摩西、亞倫、Ná-tap、A-pí-hō͘，kap以色列長老中七十人，lóng上去。 ¹⁰ In看見以色列ê上帝，伊ê腳下有親像平鋪ê藍寶石，親像天原質ê光亮。 ¹¹ 伊無出手害以色列尊貴ê人；in看見上帝，in也食也lim。 ¹² 耶和華kā摩西講：你上山就近我，tiàm tī-chia，我beh將石碑kap律法，以及誡命，我所寫ê，賞賜你，thang教示in。 ¹³ 摩西kap跟隨伊ê約書亞起來；摩西chiūⁿ上帝ê山； ¹⁴ kā長老講：Lín tiàm chia等阮，thèng候阮倒tńg來lín chia；看ah，亞倫、Hō͘-jíⁿ kap lín tī-teh；人若有tāi-chì，thang來chhē in。 ¹⁵ 摩西上山，山有雲遮蓋。 ¹⁶ 耶和華ê榮光停tī西奈山，雲遮伊六日久；第七日伊tùi雲中叫摩西。 ¹⁷ 耶和華榮光ê款式，親像火燒tī山頂；以色列人親目看見。 ¹⁸ 摩西入雲中上山；摩西tī山頂四十日四十暝。

=== 出埃及記 · 第 24 章 ===

¹ Iâ-hô-hoa kā Mô͘-se kóng, Lí kap A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p lâng, lóng tio̍h chiūⁿ kàu Iâ-hô-hoa chia, hn̄g-hn̄g phak-lo̍h-khì pài. ² To̍k-to̍k Mô͘-se thang chhin-kūn Iâ-hô-hoa, kî-û m̄-thang chhin-kūn; peh-sìⁿ iā m̄-thang kap i chiūⁿ-lâi. ³ Mô͘-se kàu, chiong Iâ-hô-hoa it-chhè ê ōe, it-chhè ê hoat-tō͘, kóng hō͘ peh-sìⁿ thiaⁿ; chèng peh-sìⁿ tâng-siaⁿ ìn kóng, Iâ-hô-hoa só͘ kóng ê ōe, goán beh lóng chun-thàn. ⁴ Mô͘-se chiong Iâ-hô-hoa ê ōe, lóng siá-khí-lâi; thàu-chá khí-lâi, tī soaⁿ-ē khí chi̍t chō tôaⁿ, chiàu Í-sek-lia̍t cha̍p-jī chi-phài, khiā cha̍p-jī ki thiāu. ⁵ Koh chhe Í-sek-lia̍t-tiong ê siàu-liân lâng, khì hiàn sio-chè. Iā ēng gû chòe pêng-an-chè, hiàn hō͘ Iâ-hô-hoa. ⁶ Mô͘-se chiong huih ê chi̍t-pòaⁿ tóe tī phûn-ni̍h, chi̍t-pòaⁿ hiù tī tôaⁿ-ni̍h. ⁷ Koh the̍h iok ê chheh, tha̍k hō͘ peh-sìⁿ thiaⁿ; in kóng, Iâ-hô-hoa só͘ kóng-ê, goán beh lóng chun-thàn lâi kiâⁿ. ⁸ Mô͘-se chiong huih hiù peh-sìⁿ, kóng, Khòaⁿ ah, che sī li̍p-iok ê huih, sī Iâ-hô-hoa chiàu che it-chhè ê ōe kap lín só͘ li̍p-ê. ⁹ Mô͘-se, A-lûn, Ná-tap, A-pí-hō͘, kap Í-sek-lia̍t tiúⁿ-ló-tiong chhit-cha̍p-lâng, lóng chiūⁿ-khì. ¹⁰ In khòaⁿ-kìⁿ Í-sek-lia̍t ê Siōng-tè, I ê kha-ē ū chhin-chhiūⁿ pîⁿ-pho͘ ê lâm-pó-chio̍h, chhin-chhiūⁿ thiⁿ goân-chit-ê kng-liāng. ¹¹ I bô chhut-chhiú hāi Í-sek-lia̍t chun-kùi ê lâng; in khòaⁿ-kìⁿ Siōng-tè, in iā chia̍h iā lim. ¹² Iâ-hô-hoa kā Mô͘-se kóng, Lí chiūⁿ-soaⁿ chiū-kūn Góa, tiàm tī-chia, Góa beh chiong chio̍h-pi kap lu̍t-hoat, í-ki̍p kài-bēng, Góa só͘ siá-ê, siúⁿ-sù lí, thang kà-sī in. ¹³ Mô͘-se kap kun-sûi i ê Iok-su-a khí-lâi; Mô͘-se chiūⁿ Siōng-tè ê soaⁿ; ¹⁴ kā tiúⁿ-ló kóng, Lín tiàm chia tán goán, thèng-hāu goán tò-tńg-lâi lín chia; khòaⁿ ah, A-lûn Hō͘-jíⁿ kap lín tī-teh; lâng nā ū tāi-chì, thang lâi chhē in. ¹⁵ Mô͘-se chiūⁿ soaⁿ, soaⁿ ū hûn jia-khàm. ¹⁶ Iâ-hô-hoa ê êng-kng thêng tī Se-nái soaⁿ, hûn jia i la̍k-ji̍t kú; tē-chhit ji̍t I tùi hûn-tiong kiò Mô͘-se. ¹⁷ Iâ-hô-hoa êng-kng ê khoán-sit, chhin-chhiūⁿ hé sio tī soaⁿ-téng; Í-sek-lia̍t lâng chhin-ba̍k khòaⁿ-kìⁿ. ¹⁸ Mô͘-se ji̍p hûn-tiong chiūⁿ-soaⁿ; Mô͘-se tī soaⁿ-téng sì-cha̍p ji̍t sì-cha̍p-mî.

=== 出埃及記 · 第 25 章 ===

¹ 耶和華kā摩西講： ² 你kā以色列人講：Tio̍h獻禮物hō͘我；見若心所甘願ê，lín thang kā伊收來，做禮物hō͘我。 ³ 所tio̍h收ê禮物，就是金、銀、銅， ⁴ 藍色、紫色、朱紅色ê 料，幼苧、山羊毛， ⁵ 染紅ê公羊皮、海狗皮， ⁶ 皂莢柴、點燈ê油、芳芳ê品料，thang做膏油來抹，也做芳香， ⁷ 紅瑪瑙，kap別樣ê寶石，thang鑲í-hut-tek kap pó͘褂。 ⁸ In tio̍h kā我起聖ê所在，hō͘我thang tiàm tī in中間。 ⁹ 照我一切所指示你ê，就是會幕ê款式，kap內中器具款式，lín tio̍h照án-ni來造。 ¹⁰ In tio̍h用皂莢柴做一个櫃，長兩肘半，闊肘半，高肘半。 ¹¹ 你tio̍h用好金包，內外lóng tio̍h包；四圍tio̍h齒金線。 ¹² 你tio̍h kā伊鑄四個金環，安tī伊ê四腳，chit-pêng兩環，hit-pêng兩環。 ¹³ tio̍h用皂莢柴做兩支kǹg，用金包伊。 ¹⁴ Tio̍h將kǹg穿tī櫃邊ê環內，thang用來扛櫃； ¹⁵ chiahê kǹg tio̍h常常tī櫃ê環內，m̄-thang抽出來。 ¹⁶ tio̍h用我所beh賞賜你ê律法hē tī櫃內。 ¹⁷ tio̍h用好金做施恩所，長兩肘半，闊肘半。 ¹⁸ tio̍h用金做兩個ki-lō͘-peng，用phah ê法做伊，tī施恩所ê雙頭。 ¹⁹ Chit頭做一个ki-lō͘-peng，hit頭做一个ki-lō͘-peng；雙頭ê ki-lō͘-peng，kap施恩所，tio̍h kui塊，做相連。 ²⁰ 兩個 ki-lō͘-peng tio̍h高高thí開翼，用in ê翼遮施恩所；in ê面tio̍h相對；ki-lō͘-peng ê面tio̍h àⁿ施恩所。 ²¹ Tio̍h將施恩所安tī櫃頂，koh將我所beh賞賜你ê律法hē tī 櫃內。 ²² 我beh tī-hia kap你聚會，koh beh tùi施恩所頂，就是tùi法櫃頂，兩個ki-lō͘-peng ê中間，kap你講我所beh吩咐你傳hō͘以色列人一切ê事。 ²³ 你tio̍h用皂莢柴做一塊桌，長兩肘，闊一肘，高肘半。 ²⁴ tio̍h用好金包，四圍齒金線。 ²⁵ 桌ê四圍，各做一巴掌闊ê橫樑，橫樑頂四圍齒金線。 ²⁶ 你tio̍h做四個金環，安tī伊ê四腳ê四角。 ²⁷ 安環ê所在tio̍h óa近橫樑，thang 穿kǹg來扛桌。 ²⁸ tio̍h用皂莢柴做兩支kǹg用金包伊，thang用來扛桌。 ²⁹ tio̍h做盤、碗、杯、瓶，thang來灌奠，lóng tio̍h用好金做。 ³⁰ 桌頂常常hē排列ê餅tī我ê面前。 ³¹ 你tio̍h用好金做一个燈台；燈台ê座，kap中柱，伊ê杯，伊ê目，伊ê花，lóng用phah ê法，做kui座。 ³² Tī伊ê邊á tio̍h分出六支；燈台ê chit-pêng tio̍h有三支，燈台ê hit-pêng tio̍h有三支。 ³³ Chit-pêng每支有三個杯，款式親像杏花，有目有花；hit-pêng每支也有三個杯，款式親像杏花，有目有花；tùi燈台分出ê六支lóng是án-ni。 ³⁴ 燈台柱有四個杯，款式親像杏花，有伊ê目kap伊ê花。 ³⁵ 兩支ê下面有一目kap伊相連，koh兩支ê下面有一目kap伊相連，koh兩支ê下面有一目kap伊相連；燈台所出ê六支lóng是án-ni。 ³⁶ Hiah-ê目kap hiahê枝，lóng kap伊連做一个，lóng用好金，照phah ê法做。 ³⁷ Tio̍h kā伊做七個燈盞，tio̍h點hiahê燈，hō͘伊照光tī對面。 ³⁸ 燈台ê剪kap伊ê盤，lóng tio̍h用好金做伊。 ³⁹ 做燈台kap這一切ê器具，用好金一tha-liân-tek。 ⁴⁰ 你tio̍h謹慎做chiahê物件，lóng tio̍h照tī山頂指示你ê款式。

=== 出埃及記 · 第 25 章 ===

¹ Iâ-hô-hoa kā Mô͘-se kóng, ² Lí kā Í-sek-lia̍t lâng kóng, Tio̍h hiàn lé-mi̍h hō͘ Góa; kìⁿ-nā sim só͘ kam-goān-ê, lín thang kā i siu-lâi, chòe lé-mi̍h hō͘ Góa. ³ Só͘ tio̍h siu ê lé-mi̍h, chiū-sī kim, gûn, tâng, ⁴ lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g, ⁵ ní âng ê kang-iûⁿ-phê, hái-káu phê, ⁶ chō-kiap-chhâ, tiám teng ê iû, phang-phang ê phín-liāu, thang chòe ko-iû lâi boah, iā chòe phang-hiuⁿ, ⁷ âng-bé-ló, kap pa̍t-iūⁿ ê pó-chio̍h, thang siuⁿ í-hut-tek kap pó͘-kòa. ⁸ In tio̍h kā Góa khí sèng ê só͘-chāi, hō͘ Góa thang tiàm tī in tiong-kan. ⁹ Chiàu Góa it-chhè só͘ chí-sī lí ê, chiū-sī hōe-bō͘ ê khoán-sit, kap lāi-tiong khì-kū khoán-sit, lín tio̍h chiàu án-ni lâi chō. ¹⁰ In tio̍h ēng chō-kiap-chhâ chòe chi̍t ê kūi, tn̂g nn̄g-tiú-pòaⁿ, khoah tiú-pòaⁿ, koâiⁿ tiú-pòaⁿ. ¹¹ Lí tio̍h ēng hó-kim pau, lāi-gōa lóng tio̍h pau; sì-ûi tio̍h khí kim-sòaⁿ. ¹² Lí tio̍h kā i chù sì ê kim-khoân, an tī i ê sì-kha, chit-pêng nn̄g-khoân, hit-pêng nn̄g-khoân. ¹³ Tio̍h ēng chō-kiap-chhâ chòe nn̄g ki kǹg, ēng kim pau i. ¹⁴ Tio̍h chiong kǹg chhng tī kūi-piⁿ ê khoân-lāi, thang ēng lâi kng kūi; ¹⁵ chiah-ê kǹg tio̍h siông-siông tī kūi ê khoân-lāi, m̄-thang thiu-chhut-lâi. ¹⁶ Tio̍h ēng Góa só͘ beh siúⁿ-sù lí ê lu̍t-hoat hē tī kūi-lāi. ¹⁷ Tio̍h ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ. ¹⁸ Tio̍h ēng kim chòe nn̄g ê ki-lō͘-peng, ēng phah ê hoat chòe-i, tī si-un-só͘ ê siang-thâu. ¹⁹ Chit-thâu chòe chi̍t ê ki-lō͘-peng, hit-thâu chòe chi̍t ê ki-lō͘-peng; siang-thâu ê ki-lō͘-peng, kap si-un-só͘, tio̍h kui-tè, chòe saⁿ-liân. ²⁰ Nn̄g ê ki-lō͘-peng tio̍h koâiⁿ-koâiⁿ thí-khui si̍t, ēng in ê si̍t jia si-un-só͘; in ê bīn tio̍h saⁿ-tùi; ki-lō͘-peng ê bīn tio̍h àⁿ si-un-só͘. ²¹ Tio̍h chiong si-un-só͘ an tī kūi-téng, koh chiong Góa só͘ beh siúⁿ-sù lí ê lu̍t-hoat hē tī kūi-lāi. ²² Góa beh tī-hia kap lí chū-hōe, koh beh tùi si-un-só͘ téng, chiū-sī tùi hoat-kūi téng, nn̄g ê ki-lō͘-peng ê tiong-kan, kap lí kóng Góa só͘ beh hoan-hù lí thoân hō͘ Í-sek-lia̍t lâng it-chhè ê sū. ²³ Lí tio̍h ēng chō-kiap-chhâ chòe chi̍t tè toh, tn̂g nn̄g-tiú, khoah chi̍t-tiú, koâiⁿ tiú-pòaⁿ. ²⁴ Tio̍h ēng hó-kim pau, sì-ûi khí kim-sòaⁿ. ²⁵ Toh ê sì-ûi, kok chòe chi̍t pa-chiúⁿ khoah ê hoâiⁿ-niû, hoâiⁿ-niû-téng sì-ûi khí kim-sòaⁿ. ²⁶ Lí tio̍h chòe sì ê kim-khoân, an tī i ê sì-kha ê sì-kak. ²⁷ An khoân ê só͘-chāi tio̍h óa-kūn hoâiⁿ-niû, thang chhng-kǹg lâi kng toh. ²⁸ Tio̍h ēng chō-kiap-chhâ chòe nn̄g ki kǹg ēng kim pau-i, thang ēng lâi kng toh. ²⁹ Tio̍h chòe pôaⁿ, óaⁿ, poe, pân, thang lâi koàn-tiān, lóng tio̍h ēng hó-kim chòe. ³⁰ Toh-téng siông-siông hē pâi-lia̍t ê piáⁿ tī Góa ê bīn-chêng. ³¹ Lí tio̍h ēng hó-kim chòe chi̍t ê teng-tâi; teng-tâi ê chō, kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō. ³² Tī i ê piⁿ-á tio̍h pun-chhut la̍k-ki; teng-tâi ê chit-pêng tio̍h ū saⁿ-ki, teng-tâi ê hit-pêng tio̍h ū saⁿ-ki. ³³ Chit-pêng múi-ki ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni. ³⁴ Teng-tâi-thiāu ū sì ê poe, khoán-sit chhin-chhiūⁿ hēng-hoe, ū i ê ba̍k kap i ê hoe. ³⁵ Nn̄g-ki ê ē-bīn ū chi̍t ba̍k kap i saⁿ-liân, koh nn̄g-ki ê ē-bīn ū chi̍t ba̍k kap i saⁿ-liân, koh nn̄g-ki ê ē-bīn ū chi̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni. ³⁶ Hiah-ê ba̍k kap hiah-ê ki, lóng kap i liân chòe chi̍t-ê, lóng ēng hó-kim, chiàu phah ê hoat chòe. ³⁷ Tio̍h kā i chòe chhit-ê teng-chóaⁿ, tio̍h tiám hiah-ê teng, hō͘ i chiò-kng tī tùi-bīn. ³⁸ Teng-tâi ê chián kap i ê pôaⁿ, lóng tio̍h ēng hó-kim chòe-i. ³⁹ Chòe teng-tâi kap che it-chhè ê khì-kū, ēng hó-kim chi̍t tha-liân-tek. ⁴⁰ Lí tio̍h kín-sīn chòe chiah-ê mi̍h-kiāⁿ, lóng tio̍h chiàu tī soaⁿ-téng chí-sī lí ê khoán-sit.

=== 出埃及記 · 第 26 章 ===

¹ 你做會幕tio̍h用十幅ê帳；chiahê帳是用過紡ê幼苧，kap藍色、紫色、朱紅色ê料，也用奇巧ê工織成ki-lō͘-peng，來做ê。 ² 每幅帳tio̍h長二十八肘，闊四肘；帳lóng tio̍h一樣ê寸尺。 ³ Chit五幅帳tio̍h ta̍k幅相連；hit 五幅帳也tio̍h ta̍k幅相連。 ⁴ Tī chitê相連ê帳，路尾幅ê邊á，tio̍h做藍色ê 鈕phàn；tī hitê相連ê帳，路尾幅ê邊á，亦tio̍h án-ni做。 ⁵ 你tī chit領帳做五十個鈕phàn；koh tī第二領帳，相連ê邊á，也做五十ê鈕phàn；鈕phàn lóng tio̍h兩個兩個相對。 ⁶ Koh tio̍h做五十個金鉤來鉤，hō͘帳相連；就成做一个會幕。 ⁷ 你tio̍h用山羊毛織十一幅ê帳，做會幕頂ê布棚； ⁸ 每幅帳tio̍h長三十肘，闊四肘；十一幅帳lóng tio̍h一樣ê寸尺。 ⁹ Tio̍h將五幅帳連做一-幅，koh將六幅帳連做一幅，hitê第六幅ê一半，hō͘伊垂落tī布棚ê頭前。 ¹⁰ Tī chitê相連ê帳，路尾幅ê邊á，tio̍h做五十個鈕phàn，tī hitê相連，路尾幅ê邊á，也做五十個鈕phàn。 ¹¹ Koh tio̍h做五十個銅鉤，鉤tī鈕phàn，hō͘布棚連做一个。 ¹² 布棚ê帳所伸垂落來，就是所伸hitê半幅帳，tio̍h垂tī會幕後。 ¹³ 布棚ê帳所伸ê長，chit-pêng一肘，hit-pêng一肘，tio̍h垂tī會幕ê雙pêng來遮伊。 ¹⁴ Koh tio̍h用染紅公ê羊皮，做布棚ê蓋；koh用海狗皮做褂tī頂面。 ¹⁵ 你tio̍h用皂莢柴做會幕khiā ê板。 ¹⁶ Khiā ê板長十肘，闊一肘半。 ¹⁷ Ta̍k塊板tio̍h有兩個榫(sún)相排；會幕一切ê板lóng tio̍h照án-ni做。 ¹⁸ Tio̍h做會幕ê板，南pêng ê南勢二十塊板。 ¹⁹ Tī chiahê二十塊板ê下面，tio̍h做四十個銀臼；一塊板ê下面有兩個臼來穿伊兩支榫；koh一塊板ê下面也有兩個臼來穿伊兩支榫。 ²⁰ 會幕第二面，就是北面，也tio̍h做板二十塊，kap in ê銀臼四十個； ²¹ chitê板ê下面有兩個臼，hitê板ê下面也有兩個臼。 ²² 會幕ê後面，就是西面，tio̍h做六塊板。 ²³ 會幕後面ê兩個角頭，tio̍h做兩塊板。 ²⁴ 板ê下長，兩個相同，直到頂面第一个環，lóng是ka-nn̂g ê；兩塊lóng是án-ni，beh做角頭ê路用。 ²⁵ Tio̍h有八個板，kap十六個銀臼；chitê板ê下面有兩個臼，hitê板ê下面也有兩個臼。 ²⁶ 你tio̍h用皂莢柴做橫栱(kông)；為tio̍h會幕chit-pêng ê板做五支； ²⁷ 為tio̍h會幕hit-pêng ê板做五支，koh為會幕後ê西面做五支。 ²⁸ 板ê對中hit支橫栱，tio̍h tùi chit頭透到hit頭。 ²⁹ 板tio̍h用金包；koh tio̍h做板ê金環來套栱；栱也tio̍h用金包。 ³⁰ Tio̍h照tī山頂指示你ê款式起會幕。 ³¹ 你tio̍h用藍色、紫色、朱紅色ê料，kap過紡ê幼苧，織帳籬；chitê帳籬用奇巧ê工，織成ki-lō͘-peng，來做ê。 ³² 你tio̍h用皂莢柴做四支柱，用金包伊，來吊帳籬；柱ê鉤tio̍h金ê；柱tī四個銀臼頂。 ³³ 你吊帳籬tio̍h tī鉤ê下底ê所在，將法櫃扛入帳籬內，chitê帳籬是kā lin隔開聖所kap至聖所。 ³⁴ Koh tio̍h將施恩所安tī至聖所內ê法櫃頂。 ³⁵ 你tio̍h用桌hē tī帳籬外；也用燈台hē tī會幕ê南勢，kap桌相對；hitê桌tio̍h hē tī北勢。 ³⁶ 你tio̍h用藍色、紫色、朱紅色ê料，kap過紡ê幼苧，用繡花ê工，做布棚門ê門籬。 ³⁷ tio̍h用皂莢柴kā門籬做五支柱，用金包伊，柱ê鉤tio̍h金ê。 Koh tio̍h kā柱鑄五個銅臼。

=== 出埃及記 · 第 26 章 ===

¹ Lí chòe hōe-bō͘ tio̍h ēng cha̍p-pak ê tiùⁿ; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu, iā ēng kî-khiáu ê kang chit-chiâⁿ ki-lō͘-peng, lâi chòe-ê. ² Múi pak tiùⁿ tio̍h tn̂g jī-cha̍p poeh tiú, khoah sì-tiú; tiùⁿ lóng tio̍h chi̍t-iūⁿ ê chhùn-chhioh. ³ Chit gō͘ pak tiùⁿ tio̍h ta̍k-pak saⁿ-liân; hit gō͘ pak tiùⁿ iā tio̍h ta̍k-pak saⁿ-liân. ⁴ Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á, ia̍h tio̍h án-ni chòe. ⁵ Lí tī chit-niá tiùⁿ chòe gō͘-cha̍p ê liú-phàn; koh tī tē-jī niá tiùⁿ, saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng tio̍h nn̄g-ê nn̄g-ê saⁿ-tùi. ⁶ Koh tio̍h chòe gō͘-cha̍p ê kim-kau lâi kau, hō͘ tiùⁿ saⁿ-liân; chiū chiâⁿ-chòe chi̍t ê hōe-bō͘. ⁷ Lí tio̍h ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ; ⁸ múi pak tiùⁿ tio̍h tn̂g saⁿ-cha̍p tiú, khoah sì tiú; cha̍p-it pak tiùⁿ lóng tio̍h chi̍t-iūⁿ ê chhùn-chhioh. ⁹ Tio̍h chiong gō͘ pak tiùⁿ liân-chòe chi̍t-pak, koh chiong la̍k pak tiùⁿ liân-chòe chi̍t-pak, hit-ê tē-la̍k pak ê chi̍t-pòaⁿ, hō͘ i sûi-lo̍h tī pò͘-pîⁿ ê thâu-chêng. ¹⁰ Tī chit-ê saⁿ-liân ê tiùⁿ, lō͘-bé pak ê piⁿ-á, tio̍h chòe gō͘-cha̍p ê liú-phàn, tī hit-ê saⁿ-liân, lō͘-bé pak ê piⁿ-á, iā chòe gō͘-cha̍p ê liú-phàn. ¹¹ Koh tio̍h chòe gō͘-cha̍p ê tâng-kau, kau tī liú-phàn, hō͘ pò͘-pîⁿ liân chòe chi̍t-ê. ¹² Pò͘-pîⁿ ê tiùⁿ só͘ chhun sûi-lo̍h-lâi, chiū-sī só͘ chhun hit-ê pòaⁿ pak tiùⁿ, tio̍h sûi tī hōe-bō͘-āu. ¹³ Pò͘-pîⁿ ê tiùⁿ só͘ chhun ê tn̂g, chit-pêng chi̍t tiú, hit-pêng chi̍t tiú, tio̍h sûi tī hōe-bō͘ ê siang-pêng lâi jia-i. ¹⁴ Koh tio̍h ēng ní-âng kang ê iûⁿ-phê, chòe pò͘-pîⁿ ê kòa; koh ēng hái-káu-phê chòe kòa tī téng-bīn. ¹⁵ Lí tio̍h ēng chō-kiap-chhâ chòe hōe-bō͘ khiā ê pán. ¹⁶ Khiā ê pán tn̂g cha̍p-tiú, khoah chi̍t tiú pòaⁿ. ¹⁷ Ta̍k tè pán tio̍h ū nn̄g ê sún saⁿ-pâi; hōe-bō͘ it-chhè ê pán lóng tio̍h chiàu án-ni chòe. ¹⁸ Tio̍h chòe hōe-bō͘ ê pán, lâm-pêng ê lâm-sì jī-cha̍p tè pán. ¹⁹ Tī chiah-ê jī-cha̍p tè pán ê ē-bīn, tio̍h chòe sì-cha̍p ê gûn-khū; chi̍t tè pán ê ē-bīn ū nn̄g ê khū lâi chhēng i nn̄g ki sún; koh chi̍t tè pán ê ē-bīn iā ū nn̄g ê khū lâi chhēng i nn̄g ki sún. ²⁰ Hōe-bō͘ tē-jī-bīn, chiū-sī pak-bīn, iā tio̍h chòe pán jī-cha̍p tè, kap in ê gûn-khū sì-cha̍p-ê; ²¹ chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū. ²² Hōe-bō͘ ê āu-bīn, chiū-sī sai-bīn, tio̍h chòe la̍k tè pán. ²³ Hōe-bō͘ āu-bīn ê nn̄g ê kak-thâu, tio̍h chòe nn̄g tè pán. ²⁴ Pán ê ē-tn̂g, nn̄g-ê saⁿ-tâng, ti̍t-kàu téng-bīn tē-it ê khoân, lóng-sī ka-nn̂g ê; nn̄g-tè lóng sī án-ni, beh chòe kak-thâu ê lō͘-ēng. ²⁵ Tio̍h ū poeh ê pán, kap cha̍p-la̍k ê gûn-khū; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū. ²⁶ Lí tio̍h ēng chō-kiap-chhâ chòe hoâiⁿ-kông; ūi-tio̍h hōe-bō͘ chit-pêng ê pán chòe gō͘-ki; ²⁷ ūi-tio̍h hōe-bō͘ hit-pêng ê pán chòe gō͘-ki, koh ūi hōe-bō͘-āu ê sai-bīn chòe gō͘-ki. ²⁸ Pán ê tùi-tiong hit ki hoâiⁿ-kông, tio̍h tùi chit-thâu thàu kàu hit-thâu. ²⁹ Pán tio̍h ēng kim pau; koh tio̍h chòe pán ê kim-khoân lâi thò-kông; kông iā tio̍h ēng kim pau. ³⁰ Tio̍h chiàu tī soaⁿ-téng chí-sī lí ê khoán-sit khí hōe-bō͘. ³¹ Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, chit tiùⁿ-lî; chit-ê tiùⁿ-lî ēng kî-khiáu ê kang, chit-chiâⁿ ki-lō͘-peng, lâi chòe-ê. ³² Lí tio̍h ēng chō-kiap-chhâ chòe sì ki thiāu, ēng kim pau i, lâi tiàu tiùⁿ-lî; thiāu ê kau tio̍h kim-ê; thiāu tī sì ê gûn-khū téng. ³³ Lí tiàu tiùⁿ-lî tio̍h tī kau ê ē-tóe ê só͘-chāi, chiong hoat-kūi kng-ji̍p tiùⁿ-lî-lāi, chit-ê tiùⁿ-lî sī kā lín keh-khui sèng-só͘ kap chì-sèng-só͘. ³⁴ Koh tio̍h chiong si-un-só͘ an tī chì-sèng-só͘ lāi ê hoat-kūi-téng. ³⁵ Lí tio̍h ēng toh hē tī tiùⁿ-lî-gōa; iā ēng teng-tâi hē tī hōe-bō͘ ê lâm-sì, kap toh saⁿ-tùi; hit-ê toh tio̍h hē tī pak-sì. ³⁶ Lí tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang, chòe pò͘-pîⁿ mn̂g ê mn̂g-lî. ³⁷ Tio̍h ēng chō-kiap-chhâ kā mn̂g-lî chòe gō͘ ki thiāu, ēng kim pau-i, thiāu ê kau tio̍h kim-ê. Koh tio̍h kā thiāu chù gō͘ ê tâng-khū.

=== 出埃及記 · 第 27 章 ===

¹ 你tio̍h用皂莢柴做壇，長五肘闊五肘；chitê壇是四方ê，高三肘。 ² Tio̍h tī壇ê四角頭做四支角，kap壇相連做一个，用銅包伊。 ³ tio̍h做盆，來收伊ê灰，koh做伊ê托(thuh)á，伊ê盤，伊ê叉，伊ê火鼎，伊一切ê器具，lóng用銅做。 ⁴ Tio̍h用銅kā伊做一个網，tī網ê四角做四個銅環。 ⁵ 用網hē tī壇四面圍腰板ê下面，hō͘網透到壇ê半腰。 ⁶ Tio̍h用皂莢柴kā壇做kǹg，用銅包伊。 ⁷ Hiah-ê kǹg tio̍h穿tī環內，kǹg tio̍h tī壇ê雙pêng，來扛伊。 ⁸ Tio̍h用板做壇，中央空殼；lóng tio̍h照山頂指示你ê款式來做。 ⁹ 你tio̍h做會幕ê帳；帳ê南面ê南勢，tio̍h用過紡ê幼苧做帷tī一pêng，長一百肘。 ¹⁰ 伊ê柱二十支，銅臼二十個；柱ê鉤kap橫桿，lóng tio̍h用銀做伊。 ¹¹ 北面也tio̍h有帷，長一百肘；伊ê柱二十支，銅臼二十個；柱ê鉤kap橫桿，lóng tio̍h用銀做。 ¹² 帳ê西面tio̍h有帷，闊五十肘；帷ê柱十支，臼十個。 ¹³ 帳ê東面ê東勢闊五十肘。 ¹⁴ 門chit-pêng ê帷tio̍h十五肘，帷ê柱三支，臼三個。 ¹⁵ 門hit-pêng ê帷也tio̍h十五肘；帷ê柱三支, 臼三個。 ¹⁶ 帳ê門tio̍h有門籬，闊二十肘，tio̍h用藍色、紫色、朱紅色ê料，kap過紡ê幼苧，用繡花ê工做；柱四支，臼四個。 ¹⁷ 帳四圍一切ê柱，lóng tio̍h有銀ê橫桿，銀ê鉤，銅ê臼。 ¹⁸ 帳ê長一百肘，闊ta̍k面五十肘，高五肘；帷tio̍h用過紡ê幼苧做；伊ê臼lóng用銅做。 ¹⁹ 會幕所用ta̍k項ê器具，kap所釘ê釘，以及帳內所釘ê釘，lóng tio̍h用銅做。 ²⁰ 你tio̍h吩咐以色列人，將hitê為tio̍h beh照光所khoeh清ê橄欖油，the̍h來hō͘你，hō͘燈常常點teh。 ²¹ Tī會幕中法櫃前ê帳籬外，亞倫kap伊ê kiáⁿ，tùi ê-hng 到天光tio̍h tī耶和華面前料理伊；是做以色列人代代永遠ê例。

=== 出埃及記 · 第 27 章 ===

¹ Lí tio̍h ēng chō-kiap-chhâ chòe tôaⁿ, tn̂g gō͘ tiú khoah gō͘ tiú; chit-ê tôaⁿ sī sù-hong-ê, koâiⁿ saⁿ tiú. ² Tio̍h tī tôaⁿ ê sì-kak-thâu chòe sì ki kak, kap tôaⁿ saⁿ-liân chòe chi̍t-ê, ēng tâng pau i. ³ Tio̍h chòe phûn, lâi siu i ê hu, koh chòe i ê thuh-á, i ê pôaⁿ, i ê chhe, i ê hé-tiáⁿ, i it-chhè ê khì-kū, lóng ēng tâng chòe. ⁴ Tio̍h ēng tâng kā i chòe chi̍t ê bāng, tī bāng ê sì-kak chòe sì ê tâng khoân. ⁵ Ēng bāng hē tī tôaⁿ sì-bīn ûi-io-pán ê ē-bīn, hō͘ bāng thàu kàu tôaⁿ ê pòaⁿ-io. ⁶ Tio̍h ēng chō-kiap-chhâ kā tôaⁿ chòe kǹg, ēng tâng pau i. ⁷ Hiah-ê kǹg tio̍h chhng tī khoân-lāi, kǹg tio̍h tī tôaⁿ ê siang-pêng, lâi kng-i. ⁸ Tio̍h ēng pán chòe tôaⁿ, tiong-ng khang-khak; lóng tio̍h chiàu soaⁿ-téng chí-sī lí ê khoán-sit lâi chòe. ⁹ Lí tio̍h chòe hōe-bō͘ ê tiûⁿ; tiûⁿ ê lâm-bīn ê lâm-sì, tio̍h ēng kè-pháng ê iù-tōe chòe ûi tī chi̍t-pêng, tn̂g chi̍t-pah tiú. ¹⁰ I ê thiāu jī-cha̍p ki, tâng-khū jī-cha̍p ê; thiāu ê kau kap hoâiⁿ-koaiⁿ, lóng tio̍h ēng gûn chòe i. ¹¹ Pak-bīn iā tio̍h ū ûi, tn̂g chi̍t-pah tiú; i ê thiāu jī-cha̍p ki, tâng-khū jī-cha̍p-ê; thiāu ê kau kap hoâiⁿ-koaiⁿ, lóng tio̍h ēng gûn chòe. ¹² Tiûⁿ ê sai-bīn tio̍h ū ûi, khoah gō͘-cha̍p tiú; ûi ê thiāu cha̍p-ki, khū cha̍p-ê. ¹³ Tiûⁿ ê tang-bīn ê tang-sì khoah gō͘-cha̍p tiú. ¹⁴ Mn̂g chit-pêng ê ûi tio̍h cha̍p-gō͘ tiú, ûi ê thiāu saⁿ-ki, khū saⁿ-ê. ¹⁵ Mn̂g hit-pêng ê ûi iā tio̍h cha̍p-gō͘ tiú; ûi ê thiāu saⁿ-ki, khū saⁿ-ê. ¹⁶ Tiûⁿ ê mn̂g tio̍h ū mn̂g-lî, khoah jī-cha̍p tiú, tio̍h ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe; thiāu sì-ki, khū sì-ê. ¹⁷ Tiûⁿ sì-ûi it-chhè ê thiāu, lóng tio̍h ū gûn ê hoâiⁿ-koaiⁿ, gûn ê kau, tâng ê khū. ¹⁸ Tiûⁿ ê tn̂g chi̍t-pah tiú, khoah ta̍k-bīn gō͘-cha̍p tiú, koâiⁿ gō͘ tiú; ûi tio̍h ēng kè-pháng ê iù-tōe chòe; i ê khū lóng ēng tâng chòe. ¹⁹ Hōe-bō͘ só͘ ēng ta̍k-hāng ê khì-kū, kap só͘ tèng ê teng, í-ki̍p tiûⁿ-lāi só͘ tèng ê teng, lóng tio̍h ēng tâng chòe. ²⁰ Lí tio̍h hoan-hù Í-sek-lia̍t lâng, chiong hit-ê ūi-tio̍h beh chiò-kng só͘ khoeh-chheng ê kaⁿ-ná-iû, the̍h-lâi hō͘ lí, hō͘ teng siông-siông tiám-teh. ²¹ Tī hōe-bō͘-tiong hoat-kūi-chêng ê tiùⁿ-lî gōa, A-lûn kap i ê kiáⁿ, tùi ê-hng kàu thiⁿ-kng tio̍h tī Iâ-hô-hoa bīn-chêng liāu-lí-i; sī chòe Í-sek-lia̍t lâng tāi-tāi éng-oán ê lē.

=== 出埃及記 · 第 28 章 ===

¹ 你tio̍h tùi以色列人ê中間，hō͘你ê兄亞倫kap伊hiahê kiáⁿ，來你chia，thang做祭司，服事我，就是亞倫，kap亞倫ê kiáⁿ Ná-tap、A-pí-hō͘、Í-lī-a-sat、Í-tha-má。 ² 你tio̍h kā你ê兄亞倫做聖ê衫，hō͘伊榮光koh súi。 ³ Koh tio̍h吩咐一切心有智慧ê，就是我用智慧ê神所充滿ê人，kā亞倫做衫，分別伊做聖，thang做祭司服事我。 ⁴ In所tio̍h做ê衫，就是pó͘褂、í-hut-tek、外袍、有花ê內衫、帽、腰帶，in tio̍h kā你ê兄亞倫kap伊ê kiáⁿ做聖ê衫，hō͘伊做祭司來服事我。 ⁵ In tio̍h用金，kap藍色、紫色、朱紅色ê料，kap幼苧做伊。 ⁶ In tio̍h用金，kap藍色、紫色、朱紅色ê料，kap過紡ê幼苧，用奇巧ê工做í-hut-tek。 ⁷ Tio̍h有披肩兩塊，連tī雙pêng，hō͘伊相連。 ⁸ Í-hut-tek頂面奇巧ê工所chitê tòa，tio̍h kap伊同一樣ê做法；hō͘伊相連做一个；用金kap藍色、紫色、朱紅色ê料，以及過紡ê幼苧做ê。 ⁹ Tio̍h the̍h兩塊紅瑪瑙，tī頂面刻以色列chiahê kiáⁿ ê名； ¹⁰ 六個名tī chit塊寶石，其餘六個名tī hit塊寶石，lóng照in出世ê次序。 ¹¹ Tio̍h用刻寶石ê手工，親像刻印，照以色列chiahê kiáⁿ ê名，刻chit兩塊寶石，入tī金槽裡。 ¹² Tio̍h將chit兩塊寶石，安tī í-hut-tek ê披肩頂，為以色列人做記念石。亞倫tio̍h tī兩個肩頭背in ê名，tī耶和華ê面前，做記念。 ¹³ Tio̍h用金做兩塊槽。 ¹⁴ Koh用好金，親像phah索á，來做兩條鍊á，將chiahê phah成ê鍊á，安tī hiahê槽裡。 ¹⁵ 你tio̍h用奇巧ê工，做一个判斷ê pó͘褂；tio̍h kap í-hut-tek同一樣ê做法；用金kap藍色、紫色、朱紅色ê料以及過紡ê幼苧做伊。 ¹⁶ Pó͘褂tio̍h四方，拗(áu)雙重；長一掠，闊一掠。 ¹⁷ 你tio̍h入chiahê寶石tī伊ê頂面，有寶石四chōa；一chōa是紅寶石、黃玉、赤玉，這是第一chōa。 ¹⁸ 第二chōa是綠寶石、藍玉、金剛石。 ¹⁹ 第三chōa是紫色ê瑪瑙、白瑪瑙、紫色水晶。 ²⁰ 第四chōa是青玉、紅瑪瑙、碧玉；這lóng tio̍h入tī 金槽內。 ²¹ Chiahê寶石照以色列ê kiáⁿ ê名，共十二塊，親像刻印，每塊刻一个名，為tio̍h十二支派來做伊。 ²² Tio̍h用好金phah鍊á，親像索á，安tī pó͘褂。 ²³ Tī pó͘褂tio̍h做兩個金環，將chit兩個環安tī pó͘褂ê雙頭。 ²⁴ Tio̍h將所phah hit兩條金鍊á，連tī pó͘褂雙頭兩個環。 ²⁵ 用所phah兩條鍊á ê雙頭，連tī兩個槽，安tī í-hut-tek披肩ê頭前。 ²⁶ 你tio̍h做兩個金環，hē tī pó͘褂雙頭ê墘(kîⁿ)，近í-hut-tek ǹg內hit-pêng。 ²⁷ Koh tio̍h做兩個金環，安tī í-hut-tek披肩下面ê頭前，óa近相連ê所在，tī í-hut-tek奇巧ê工所織ê帶ê頂面。 ²⁸ In tio̍h用藍色ê幼帶，將pó͘褂ê環kap í-hut-tek ê環縛相連，hō͘伊liâm tī í-hut-tek奇巧ê工所chitê帶，hō͘ pó͘褂 kap í-hut-tek無離縫。 ²⁹ 亞倫入聖所ê時，tio̍h將判斷ê pó͘褂所刻以色列ê kiáⁿ ê名，帶tī伊ê胸前，tī耶和華ê面前，常常做記念。 ³⁰ 你tio̍h將O͘-lêng kap Thó͘-bêng，hē tī判斷ê pó͘褂內；亞倫到耶和華面前ê時，hiahê tio̍h tī伊ê胸前。亞倫tio̍h tī耶和華ê面前常常將以色列ê判斷掛tī胸前。 ³¹ 你tio̍h做í-hut-tek內面ê外袍，kui領是藍色ê。 ³² 袍頂面ê對中，tio̍h為tio̍h頭殼留一个領孔；孔ê周圍織領緣，親像戰甲ê領孔，免得破裂。 ³³ 袍周圍ê ē-kha-pô͘，tio̍h用藍色、紫色、朱紅色ê料，做石榴(sia̍h-liû)；tī袍周圍，石榴ê中間，tio̍h有金銜鈴。 ³⁴ 一粒金銜鈴，一粒石榴，tī袍周圍ê ē-kha-pô͘。 ³⁵ 亞倫服事ê時，tio̍h穿伊；伊入聖所到耶和華面前，以及出來ê時，有聲thang聽見，hō͘伊免死。 ³⁶ Tio̍h用好金做一个牌，照刻印ê法度，刻tī伊ê頂面講：做聖歸耶和華。 ³⁷ Tio̍h用一條藍色ê幼帶，將伊縛tī帽頂，就是tī帽ê頭前。 ³⁸ Chitê 牌tio̍h tī亞倫ê頭額，hō͘亞倫擔當聖物ê罪，就是以色列人，tī一切聖ê禮物，所分別做聖ê；chitê牌tio̍h常常tī伊ê頭額，hō͘ in tī耶和華面前得tio̍h接納。 ³⁹ Tio̍h用幼苧織有chōa ê內衫；tio̍h用幼苧布做帽；koh用繡花ê工，做腰帶。 ⁴⁰ 你tio̍h kā亞倫chiahê kiáⁿ做內衫，做腰帶，做包頭殼ê巾，hō͘ in榮光koh súi。 ⁴¹ Tio̍h將chiahê kā你ê兄亞倫kap伊ê kiáⁿ穿，koh用油抹in，行設立ê禮，分別in做聖，hō͘ in做祭司來服事我。 ⁴² Tio̍h kā in做幼苧布ê褲，遮in ê下體；褲tio̍h tùi腰到大腿； ⁴³ 亞倫kap伊ê kiáⁿ入會幕，á是就近壇，beh tī聖所服事ê時，tio̍h穿伊；免得in擔當罪來死；這是beh kā亞倫kap伊ê後裔做永遠ê例。

=== 出埃及記 · 第 28 章 ===

¹ Lí tio̍h tùi Í-sek-lia̍t lâng ê tiong-kan, hō͘ lí ê hiaⁿ A-lûn kap i hiah-ê kiáⁿ, lâi lí chia, thang chòe chè-si, ho̍k-sāi Góa, chiū-sī A-lûn, kap A-lûn ê kiáⁿ Ná-tap, A-pí-hō͘, Í-lī-a-sat, Í-tha-má. ² Lí tio̍h kā lí ê hiaⁿ A-lûn chòe sèng ê saⁿ, hō͘ i êng-kng koh súi. ³ Koh tio̍h hoan-hù it-chhè sim ū tì-hūi-ê, chiū-sī Góa ēng tì-hūi ê sîn só͘ chhiong-móa ê lâng, kā A-lûn chòe saⁿ, hun-piat i chòe-sèng, thang chòe chè-si ho̍k-sāi Góa. ⁴ In só͘ tio̍h chòe ê saⁿ, chiū-sī pó͘-kòa, í-hut-tek, gōa-phàu, ū-hoe ê lāi-saⁿ, bō, io-tòa. In tio̍h kā lí ê hiaⁿ A-lûn kap i ê kiáⁿ chòe sèng ê saⁿ, hō͘ i chòe chè-si lâi ho̍k-sāi Góa. ⁵ In tio̍h ēng kim, kap lâm-sek, chí-sek, chu-âng-sek ê liāu, kap iù-tōe chòe-i. ⁶ In tio̍h ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe, ēng kî-khiáu ê kang chòe í-hut-tek. ⁷ Tio̍h ū phi-kian nn̄g tè, liân tī siang-pêng, hō͘ i saⁿ-liân. ⁸ Í-hut-tek téng-bīn kî-khiáu ê kang só͘ chit-ê tòa, tio̍h kap i tâng chi̍t-iūⁿ ê chòe-hoat; hō͘ i saⁿ-liân chòe chi̍t-ê; ēng kim, kap lâm-sek, chí-sek, chu-âng-sek ê liāu, í-ki̍p kè-pháng ê iù-tōe chòe-ê. ⁹ Tio̍h the̍h nn̄g tè âng-bé-ló, tī téng-bīn khek Í-sek-lia̍t chiah-ê kiáⁿ ê miâ; ¹⁰ La̍k ê miâ tī chit-tè pó-chio̍h, kî-û la̍k ê miâ tī hit-tè pó-chio̍h, lóng chiàu in chhut-sì ê chhù-sū. ¹¹ Tio̍h ēng khek pó-chio̍h ê chhiú-kang, chhin-chhiūⁿ khek-ìn, chiàu Í-sek-lia̍t chiah-ê kiáⁿ ê miâ, khek chit nn̄g-tè pó-chio̍h, ji̍p tī kim-chô-ni̍h. ¹² Tio̍h chiong chit nn̄g-tè pó-chio̍h, an tī í-hut-tek ê phi-kian-téng, ūi Í-sek-lia̍t lâng chòe kì-liām-chio̍h. A-lûn tio̍h tī nn̄g ê keng-thâu pē in ê miâ, tī Iâ-hô-hoa ê bīn-chêng, chòe kì-liām. ¹³ Tio̍h ēng kim chòe nn̄g tè chô. ¹⁴ Koh ēng hó-kim, chhin-chhiūⁿ phah soh-á, lâi chòe nn̄g tiâu liān-á, chiong chiah-ê phah-chiâⁿ ê liān-á, an tī hiah-ê chô-ni̍h. ¹⁵ Lí tio̍h ēng kî-khiáu ê kang, chòe chi̍t-ê phòaⁿ-toàn ê pó͘-kòa; tio̍h kap í-hut-tek tâng chi̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu í-ki̍p kè-pháng ê iù-tōe chòe-i. ¹⁶ Pó͘-kòa tio̍h sù-hong, áu siang-têng; tn̂g chi̍t-lia̍h, khoah chi̍t-lia̍h. ¹⁷ Lí tio̍h ji̍p chiah-ê pó-chio̍h tī i ê téng-bīn, ū pó-chio̍h sì-chōa; chi̍t-chōa sī âng-pó-chio̍h, n̂g-ge̍k, chhiah-ge̍k, che sī tē-it-chōa. ¹⁸ Tē-jī-chōa sī le̍k-pó-chio̍h, lâm-ge̍k, kim-kong-chio̍h. ¹⁹ Tē-saⁿ-chōa sī chí-sek ê bé-ló, pe̍h-bé-ló, chí-sek chúi-chiⁿ. ²⁰ Tē-sì-chōa sī chhiⁿ-ge̍k, âng-bé-ló, phek-ge̍k; che lóng tio̍h ji̍p tī kim-chô-lāi. ²¹ Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek-ìn, múi-tè khek chi̍t ê miâ, ūi-tio̍h cha̍p-jī chi-phài lâi chòe-i. ²² Tio̍h ēng hó-kim phah liān-á, chhin-chhiūⁿ soh-á, an tī pó͘-kòa. ²³ Tī pó͘-kòa tio̍h chòe nn̄g ê kim-khoân, chiong chit nn̄g ê khoân an tī pó͘-kòa ê siang-thâu. ²⁴ Tio̍h chiong só͘ phah hit nn̄g tiâu kim liān-á, liân tī pó͘-kòa siang-thâu nn̄g ê khoân. ²⁵ Ēng só͘ phah nn̄g tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng. ²⁶ Lí tio̍h chòe nn̄g ê kim-khoân, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng. ²⁷ Koh tio̍h chòe nn̄g ê kim-khoân, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn. ²⁸ In tio̍h ēng lâm-sek ê iù-tòa, chiong pó͘-kòa ê khoân kap í-hut-tek ê khoân pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa, hō͘ pó͘-kòa kap í-hut-tek bô lī-phāng. ²⁹ A-lûn ji̍p sèng-só͘ ê sî, tio̍h chiong phòaⁿ-toàn ê pó͘-kòa só͘ khek Í-sek-lia̍t ê kiáⁿ ê miâ, tòa tī i ê heng-chêng, tī Iâ-hô-hoa ê bīn-chêng, siông-siông chòe kì-liām. ³⁰ Lí tio̍h chiong O͘-lêng kap Thó͘-bêng, hē tī phòaⁿ-toàn ê pó͘-kòa-lāi; A-lûn kàu Iâ-hô-hoa bīn-chêng ê sî, hiah-ê tio̍h tī i ê heng-chêng. A-lûn tio̍h tī Iâ-hô-hoa ê bīn-chêng siông-siông chiong Í-sek-lia̍t ê phòaⁿ-toàn kòa tī heng-chêng. ³¹ Lí tio̍h chòe í-hut-tek lāi-bīn ê gōa-phàu, kui-niá sī lâm-sek-ê. ³² Phàu téng-bīn ê tùi-tiong, tio̍h ūi-tio̍h thâu-khak lâu chi̍t ê niá-khang; khang ê chiu-ûi chit niá-iān, chhin-chhiūⁿ chiàn-kah ê niá-khang, bián-tit phòa li̍h. ³³ Phàu chiu-ûi ê ē-kha-pô͘, tio̍h ēng lâm-sek, chí-sek, chu-âng-sek ê liāu, chòe sia̍h-liû; tī phàu chiu-ûi, sia̍h-liû ê tiong-kan, tio̍h ū kim hâm-lêng. ³⁴ Chi̍t-lia̍p kim hâm-lêng, chi̍t-lia̍p sia̍h-liû, tī phàu chiu-ûi ê ē-kha-pô͘. ³⁵ A-lûn ho̍k-sāi ê sî, tio̍h chhēng-i; i ji̍p sèng-só͘ kàu Iâ-hô-hoa bīn-chêng, í-ki̍p chhut-lâi ê sî, ū siaⁿ thang thiaⁿ-kìⁿ, hō͘ i bián sí. ³⁶ Tio̍h ēng hó-kim chòe chi̍t ê pâi, chiàu khek-ìn ê hoat-tō͘, khek tī i ê téng-bīn kóng, CHÒE-SÈNG KUI IÂ-HÔ-HOA. ³⁷ Tio̍h ēng chi̍t-tiâu lâm-sek ê iù-tòa, chiong i pa̍k tī bō-téng, chiū-sī tī bō ê thâu-chêng. ³⁸ Chit-ê pâi tio̍h tī A-lûn ê thâu-hia̍h, hō͘ A-lûn tam-tng sèng-mi̍h ê chōe, chiū-sī Í-sek-lia̍t lâng, tī it-chhè sèng ê lé-mi̍h, só͘ hun-piat chòe-sèng-ê; chit-ê pâi tio̍h siông-siông tī i ê thâu-hia̍h, hō͘ in tī Iâ-hô-hoa bīn-chêng tit-tio̍h chiap-la̍p. ³⁹ Tio̍h ēng iù-tōe chit ū-chōa ê lāi-saⁿ; tio̍h ēng iù-tōe-pò͘ chòe-bō; koh ēng siù-hoe ê kang, chòe io-tòa. ⁴⁰ Lí tio̍h kā A-lûn chiah-ê kiáⁿ chòe lāi-saⁿ, chòe io-tòa, chòe pau thâu-khak ê kun, hō͘ in êng-kng koh súi. ⁴¹ Tio̍h chiong chiah-ê kā lí ê hiaⁿ A-lûn kap i ê kiáⁿ chhēng, koh ēng iû boah-in, kiâⁿ siat-li̍p ê lé, hun-piat in chòe-sèng, hō͘ in chòe chè-si lâi ho̍k-sāi Góa. ⁴² Tio̍h kā in chòe iù-tōe-pò͘ ê khò͘, jia in ê ē-thé; khò͘ tio̍h tùi io kàu tōa-thúi; ⁴³ A-lûn kap i ê kiáⁿ ji̍p hōe-bō͘, á-sī chiū-kūn tôaⁿ, beh tī sèng-só͘ ho̍k-sāi ê sî, tio̍h chhēng-i; bián-tit in tam-tng chōe lâi sí; che sī beh kā A-lûn kap i ê hō͘-è chòe éng-oán ê lē.

=== 出埃及記 · 第 29 章 ===

¹ 你分別in做聖，做祭司服事我，tio̍h án-ni行；取一隻公ê牛á，兩隻無瑕疵公ê綿羊， ² koh無酵餅，kap攪(kiáu)油ê無酵餅，kap抹油無酵ê薄餅，lóng tio̍h用好ê麵粉做ê。 ³ chiahê餅tio̍h hē tī一kha筐，貯tī筐裡帶來，koh牽hit隻公ê牛kap兩隻公ê綿羊來。 ⁴ Tio̍h hō͘亞倫kap伊hiahê kiáⁿ 到會幕ê門口用水洗in。 ⁵ Tio̍h the̍h hiahê衣服來，將內衫kap í-hut-tek內面ê外袍，kap í-hut-tek，連pó͘褂，kā亞倫穿；也用奇巧ê工所織í-hut-tek ê帶kā伊hâ； ⁶ 用帽戴tī伊ê頭殼，將聖ê冕旒tha̍h tī帽ê頂面。 ⁷ Tio̍h用抹ê油tò tī伊ê頭殼來抹伊。 ⁸ Tio̍h hō͘伊ê kiáⁿ來，kā in穿內衫。 ⁹ Koh用帶hâ亞倫kap伊hiahê kiáⁿ，kā in包頭殼ê巾；in照永遠ê例得tio̍h祭司ê職；koh tio̍h kā亞倫kap伊hiahê kiáⁿ行設立ê禮。 ¹⁰ 你tio̍h牽hit隻公ê牛到會幕前；亞倫kap伊hiahê kiáⁿ tio̍h按(hōaⁿ)手tī牛ê頭殼頂。 ¹¹ 你tio̍h tī耶和華ê面前，tī會幕ê門口，刣 hit隻牛； ¹² 取伊ê血淡薄，用指頭á抹tī壇ê四角；將血lóng piàⁿ tī壇腳裡。 ¹³ Tio̍h將一切五臟ê油，kap肝頂ê網紗，kap兩粒腰子，以及腰子ê油，lóng 燒 tī壇頂。 ¹⁴ 獨獨牛ê肉，kap伊ê皮，伊ê糞，lóng tio̍h用火燒tī營外；是做贖罪祭。 ¹⁵ 你tio̍h牽一隻公ê綿羊來；亞倫kap伊hiahê kiáⁿ tio̍h按手tī hit隻羊ê頭殼頂。 ¹⁶ Tio̍h 刣 hit隻羊，將伊ê血hiù tī壇ê四圍。 ¹⁷ Tio̍h將羊切一塊一塊，洗五臟kap腿，lok tī切kui塊ê肉kap頭ê頂面。 ¹⁸ Tio̍h將kui隻羊燒tī壇頂，是獻hō͘耶和華ê燒祭；是芳芳ê，用火燒hō͘耶和華ê祭。 ¹⁹ 你tio̍h將第二隻公ê綿羊牽來；亞倫kap伊hiahê kiáⁿ tio̍h按手tī 羊 ê頭殼頂。 ²⁰ 你tio̍h 刣 hit隻羊，取伊ê血淡薄，抹tī亞倫chiàⁿ-pêng ê耳á垂，kap伊chiahê kiáⁿ，chiàⁿ-pêng ê耳á垂，koh抹tī in chiàⁿ手ê大pō͘拇，kap chiàⁿ腳ê大pō͘拇；koh將血hiù tī壇ê四圍。 ²¹ 你tio̍h 取壇頂ê血淡薄kap抹ê油，hiù tī亞倫kap伊ê衫，koh hiù tī伊ê kiáⁿ kap伊ê kiáⁿ ê衫；伊kap伊ê衫，伊ê kiáⁿ kap伊ê kiáⁿ ê衫，lóng分別做聖。 ²² Koh tio̍h 取hit隻羊ê油，kap伊ê肥ê尾，kap蓋五臟ê油，kap肝頂 ê網紗，兩粒腰子，以及腰子ê油，kap chiàⁿ-pêng ê腿(這是成設立ê禮 ê羊) ； ²³ koh tùi hit-khia hē tī耶和華ê面前貯無酵餅ê筐á內，the̍h一塊餅，一塊攪油ê餅，一塊薄餅； ²⁴ lóng hē tī亞倫ê手kap伊ê kiáⁿ ê手，搖tī耶和華ê面前，做搖祭。 ²⁵ 你tio̍h tùi in ê手接來，燒tī壇頂燒祭ê頂面，做芳芳tī耶和華ê面前；是用火燒hō͘耶和華ê祭。 ²⁶ 亞倫受設立ê禮所獻公ê羊，你tio̍h取伊ê胸，搖tī耶和華ê面前，做搖祭；這是你ê份額。 ²⁷ 行設立ê禮所獻公ê羊，hitê搖祭ê胸kap舉祭ê腿，就是所搖ê，所舉起ê，你tio̍h分別伊做聖，就是屬tī亞倫kap伊hiahê kiáⁿ-ê。 ²⁸ 這tio̍h做亞倫kap伊ê kiaⁿ孫tùi以色列人所得tio̍h永遠ê份額；因為是舉祭；tio̍h tùi 以色列人平安祭 ê中間做舉祭；就是in獻hō͘耶和華ê舉祭。 ²⁹ 亞倫ê聖衫tio̍h留hō͘伊後代ê kiaⁿ孫，thang穿伊來受抹油，也穿伊來受設立。 ³⁰ 伊ê kiáⁿ，hitê續接伊當祭司ê，ta̍k-pái入會幕，tī聖所服事ê時，tio̍h穿七日久。 ³¹ 行設立ê禮所獻公ê羊ê肉，你tio̍h tī聖ê所在煮伊。 ³² 亞倫kap伊ê kiáⁿ tio̍h tī會幕ê門口食chit隻羊ê肉kap筐á內ê餅。 ³³ In tio̍h食所用來贖罪ê物，hō͘ in擔當職，也分別in做聖；獨獨外人m̄-thang食，因為這是聖物。 ³⁴ Hit-ê行設立ê禮所獻ê肉á是餅，若有留到隔早起ê，你tio̍h將所留ê用火燒伊；m̄-thang食伊，因為是聖ê物。 ³⁵ 你tio̍h照我一切所吩咐ê行tī亞倫kap伊ê kiáⁿ；行設立ê禮tio̍h七日久。 ³⁶ Ta̍k日tio̍h獻公ê牛一隻做贖罪祭；你為壇贖罪ê時就hō͘伊清氣；也tio̍h kā伊抹油，分別伊做聖。 ³⁷ 你tio̍h為壇贖罪七日久，hō͘伊成聖；壇就成做至聖；見若摸tio̍h伊ê lóng分別做聖。 ³⁸ 你所tio̍h獻tī壇裡ê是chiahê；就是未滿年ê羊á兩隻，ta̍k日tio̍h獻； ³⁹ 早起時tio̍h獻一隻；黃昏ê時tio̍h獻hit隻。 ⁴⁰ 你tio̍h用幼ê麵粉一i-hoat十份ê一，用khoeh好ê油一him四份ê一調和ê，kap一隻羊á相同獻；koh用酒一him四份ê一做灌奠。 ⁴¹ Iáu hit隻ê羊á tio̍h tī黃昏ê時來獻，tio̍h照早起時ê素祭kap灌奠ê禮料理伊，做芳芳，用火燒來獻hō͘耶和華ê祭。 ⁴² 這beh tī耶和華ê面前，tī會幕ê門口，做lín ta̍k世代常常獻ê燒祭；我beh tī-hia kap lín相會，kap你講話。 ⁴³ 我beh tī-hia kap以色列人相會，會幕就beh因為我ê榮光成做聖。 ⁴⁴ 我beh hō͘會幕kap壇做聖；也beh hō͘亞倫kap伊hiahê kiáⁿ做聖，做祭司來服事我。 ⁴⁵ 我beh tiàm tī以色列人ê中間，做in ê上帝。 ⁴⁶ In beh知我是耶和華in ê上帝，是chhōa in出埃及地；thang hō͘我tiàm tī in中間；我是耶和華in ê上帝。

=== 出埃及記 · 第 29 章 ===

¹ Lí hun-piat in chòe-sèng, chòe chè-si ho̍k-sāi Góa, tio̍h án-ni kiâⁿ; chhú chi̍t-chiah kang ê gû-á, nn̄g-chiah bô hâ-chhû kang ê mî-iûⁿ, ² koh bô-kàⁿ-piáⁿ, kap kiáu-iû ê bô-kàⁿ-piáⁿ, kap boah-iû bô-kàⁿ ê po̍h-piáⁿ, lóng tio̍h ēng hó ê mī-hún chòe-ê. ³ Chiah-ê piáⁿ tio̍h hē tī chi̍t kha kheng, tóe tī kheng-ni̍h tòa-lâi, koh khan hit chiah kang ê gû kap nn̄g chiah kang ê mî-iûⁿ lâi. ⁴ Tio̍h hō͘ A-lûn kap i hiah-ê kiáⁿ kàu hōe-bō͘ ê mn̂g-kháu ēng chúi sóe in. ⁵ Tio̍h the̍h hiah-ê i-ho̍k lâi, chiong lāi-saⁿ kap í-hut-tek lāi-bīn ê gōa-phàu, kap í-hut-tek, liân pó͘-kòa, kā A-lûn chhēng; iā ēng kî-khá ê kang só͘ chit í-hut-tek ê tòa kā i hâ; ⁶ ēng bō tì tī i ê thâu-khak, chiong sèng ê bián-liû tha̍h tī bō ê téng-bīn. ⁷ Tio̍h ēng boah ê iû tò tī i ê thâu-khak lâi boah i. ⁸ Tio̍h hō͘ i ê kiáⁿ lâi, kā in chhēng lāi-saⁿ. ⁹ Koh ēng tòa hâ A-lûn kap i hiah-ê kiáⁿ, kā in pau thâu-khak ê kun; in chiàu éng-oán ê lē tit-tio̍h chè-si ê chit; koh tio̍h kā A-lûn kap i hiah-ê kiáⁿ kiâⁿ siat-li̍p ê lé. ¹⁰ Lí tio̍h khan hit chiah kang ê gû kàu hōe-bō͘-chêng; A-lûn kap i hiah-ê kiáⁿ tio̍h hōaⁿ-chhiú tī gû ê thâu-khak-téng. ¹¹ Lí tio̍h tī Iâ-hô-hoa ê bīn-chêng, tī hōe-bō͘ ê mn̂g-kháu, thâi hit chiah gû; ¹² chhú i ê huih tām-po̍h, ēng chńg-thâu-á boah tī tôaⁿ ê sì-kak; chiong huih lóng piàⁿ tī tôaⁿ-kha-ni̍h. ¹³ Tio̍h chiong it-chhè ngó͘-chōng ê iû, kap koaⁿ-téng ê bāng-se, kap nn̄g lia̍p io-chí, í-ki̍p io-chí ê iû, lóng sio tī tôaⁿ-téng. ¹⁴ To̍k-to̍k gû ê bah, kap i ê phê, i ê pùn, lóng tio̍h ēng hé sio tī iâⁿ-gōa; sī chòe sio̍k-chōe-chè. ¹⁵ Lí tio̍h khan chi̍t chiah kang ê mî-iûⁿ lâi; A-lûn kap i hiah-ê kiáⁿ tio̍h hōaⁿ-chhiú tī hit chiah iûⁿ ê thâu-khak-téng. ¹⁶ Tio̍h thâi hit chiah iûⁿ, chiong i ê huih hiù tī tôaⁿ ê sì-ûi. ¹⁷ Tio̍h chiong iûⁿ chhiat chi̍t-tè chi̍t-tè, sóe ngó͘-chōng kap thúi, lok tī chhiat kui tè ê bah kap thâu ê téng-bīn. ¹⁸ Tio̍h chiong kui chiah iûⁿ sio tī tôaⁿ-téng, sī hiàn hō͘ Iâ-hô-hoa ê sio-chè; sī phang-phang-ê, ēng hé sio hō͘ Iâ-hô-hoa ê chè. ¹⁹ Lí tio̍h chiong tē-jī chiah kang ê mî-iûⁿ khan-lâi; A-lûn kap i hiah-ê kiáⁿ tio̍h hōaⁿ-chhiú tī iûⁿ ê thâu-khak-téng. ²⁰ Lí tio̍h thâi hit chiah iûⁿ, chhú i ê huih tām-po̍h, boah tī A-lûn chiàⁿ-pêng ê hī-á-sûi, kap i chiah-ê kiáⁿ, chiàⁿ-pêng ê hī-á-sûi, koh boah tī in chiàⁿ-chhiú ê tōa-pō͘-bú, kap chiàⁿ-kha ê tōa-pō͘-bú; koh chiong huih hiù tī tôaⁿ ê sì-ûi. ²¹ Lí tio̍h chhú tôaⁿ-téng ê huih tām-po̍h kap boah ê iû, hiù tī A-lûn kap i ê saⁿ, koh hiù tī i ê kiáⁿ kap i ê kiáⁿ ê saⁿ; i kap i ê saⁿ, i ê kiáⁿ kap i ê kiáⁿ ê saⁿ, lóng hun-piat chòe sèng. ²² Koh tio̍h chhú hit chiah iûⁿ ê iû, kap i ê pûi ê bé, kap khàm ngó͘-chōng ê iû, kap koaⁿ-téng ê bāng-se, nn̄g lia̍p io-chí, í-ki̍p io-chí ê iû, kap chiàⁿ-pêng ê thúi (che sī chiâⁿ siat-li̍p ê lé ê iûⁿ); ²³ koh tùi hit-khia hē tī Iâ-hô-hoa ê bīn-chêng tóe bô-kàⁿ-piáⁿ ê kheng-á-lāi, the̍h chi̍t tè piáⁿ, chi̍t tè kiáu-iû ê piáⁿ, chi̍t-tè po̍h-piáⁿ; ²⁴ lóng hē tī A-lûn ê chhiú kap i ê kiáⁿ ê chhiú, iô tī Iâ-hô-hoa ê bīn-chêng, chòe iô-chè. ²⁵ Lí tio̍h tùi in ê chhiú chih-lâi, sio tī tôaⁿ-téng sio-chè ê téng-bīn, chòe phang-phang tī Iâ-hô-hoa ê bīn-chêng; sī ēng hé sio hō͘ Iâ-hô-hoa ê chè. ²⁶ A-lûn siū siat-li̍p ê lé só͘ hiàn kang ê iûⁿ, lí tio̍h chhú i ê heng, iô tī Iâ-hô-hoa ê bīn-chêng, chòe iô-chè; che sī lí ê hūn-gia̍h. ²⁷ Kiâⁿ siat-li̍p ê lé só͘ hiàn kang ê iûⁿ, hit-ê iô-chè ê heng kap kú-chè ê thúi, chiū-sī só͘ iô-ê, só͘ kú-khí-ê, lí tio̍h hun-piat i chòe-sèng, chiū-sī sio̍k tī A-lûn kap i hiah-ê kiáⁿ-ê. ²⁸ Che tio̍h chòe A-lûn kap i ê kiáⁿ-sun tùi Í-sek-lia̍t lâng só͘ tit-tio̍h éng-oán ê hūn-gia̍h; in-ūi sī kú-chè; tio̍h tùi Í-sek-lia̍t lâng pêng-an-chè ê tiong-kan chòe kú-chè; chiū-sī in hiàn hō͘ Iâ-hô-hoa ê kú-chè. ²⁹ A-lûn ê sèng-saⁿ tio̍h lâu hō͘ i āu-tāi ê kiáⁿ-sun, thang chhēng i lâi siū boah-iû, iā chhēng i lâi siū siat-li̍p. ³⁰ I ê kiáⁿ, hit-ê sòa-chiap i tng chè-si ê, ta̍k-pái ji̍p hōe-bō͘, tī sèng-só͘ ho̍k-sāi ê sî, tio̍h chhēng chhit-ji̍t kú. ³¹ Kiâⁿ siat-li̍p ê lé só͘ hiàn kang ê iûⁿ ê bah, lí tio̍h tī sèng ê só͘-chāi chú i. ³² A-lûn kap i ê kiáⁿ tio̍h tī hōe-bō͘ ê mn̂g-kháu chia̍h chit chiah iûⁿ ê bah kap kheng-á-lāi ê piáⁿ. ³³ In tio̍h chia̍h só͘ ēng lâi sio̍k-chōe ê mi̍h, hō͘ in tam-tng chit, iā hun-piat in chòe-sèng; to̍k-to̍k gōa-lâng m̄-thang chia̍h, in-ūi che sī sèng-mi̍h. ³⁴ Hit-ê kiâⁿ siat-li̍p ê lé só͘ hiàn ê bah á-sī piáⁿ, nā ū lâu kàu keh chá-khí-ê, lí tio̍h chiong só͘ lâu-ê ēng hé sio i; m̄-thang chia̍h i, in-ūi sī sèng ê mi̍h. ³⁵ Lí tio̍h chiàu Góa it-chhè só͘ hoan-hù-ê kiâⁿ tī A-lûn kap i ê kiáⁿ; kiâⁿ siat-li̍p ê lé tio̍h chhit-ji̍t kú. ³⁶ Ta̍k-ji̍t tio̍h hiàn kang ê gû chi̍t-chiah chòe sio̍k-chōe-chè; lí ūi tôaⁿ sio̍k-chōe ê sî chiū hō͘ i chheng-khì; iā tio̍h kā i boah-iû, hun-piat i chòe-sèng. ³⁷ Lí tio̍h ūi tôaⁿ sio̍k-chōe chhit-ji̍t kú, hō͘ i chiâⁿ-sèng; tôaⁿ chiū chiâⁿ chòe chì-sèng; kìⁿ-nā bong-tio̍h i-ê lóng hun-piat chòe-sèng. ³⁸ Lí só͘ tio̍h hiàn tī tôaⁿ-ni̍h-ê sī chiah-ê; chiū-sī bē móa-nî ê iûⁿ-á nn̄g-chiah, ta̍k-ji̍t tio̍h hiàn; ³⁹ chá-khí-sî tio̍h hiàn chi̍t-chiah; hông-hun ê sî tio̍h hiàn hit-chiah. ⁴⁰ Lí tio̍h ēng iù ê mī-hún chi̍t i-hoat cha̍p-hūn ê chi̍t, ēng khoeh-hó ê iû chi̍t-him sì-hūn ê chi̍t tiau-hô-ê, kap chi̍t chiah iûⁿ-á saⁿ-tâng hiàn; koh ēng chiú chi̍t-him sì-hūn ê chi̍t chòe koàn-tiān. ⁴¹ Iáu hit chiah-ê iûⁿ-á tio̍h tī hông-hun ê sî lâi hiàn, tio̍h chiàu chá-khí-sî ê sò͘-chè kap koàn-tiān ê lé liāu-lí i, chòe phang-phang, ēng hé sio lâi hiàn hō͘ Iâ-hô-hoa ê chè. ⁴² Che beh tī Iâ-hô-hoa ê bīn-chêng, tī hōe-bō͘ ê mn̂g-kháu, chòe lín ta̍k sè-tāi siông-siông hiàn ê sio-chè; Góa beh tī-hia kap lín siong-hōe, kap lí kóng-ōe. ⁴³ Góa beh tī-hia kap Í-sek-lia̍t lâng siong-hōe, hōe-bō͘ chiū beh in-ūi Góa ê êng-kng chiâⁿ-chòe sèng. ⁴⁴ Góa beh hō͘ hōe-bō͘ kap tôaⁿ chòe-sèng; iā beh hō͘ A-lûn kap i hiah-ê kiáⁿ chòe-sèng, chòe chè-si lâi ho̍k-sāi Góa. ⁴⁵ Góa beh tiàm tī Í-sek-lia̍t lâng ê tiong-kan, chòe in ê Siōng-tè. ⁴⁶ In beh chai Góa sī Iâ-hô-hoa in ê Siōng-tè, sī chhōa in chhut Ai-ki̍p tōe; thang hō͘ Góa tiàm tī in tiong-kan; Góa sī Iâ-hô-hoa in ê Siōng-tè.

=== 出埃及記 · 第 30 章 ===

¹ 你tio̍h做一座壇，thang燒香；用皂莢柴做伊； ² 長一肘，闊一肘，款式四方ê；高兩肘；伊hiahê角tio̍h kap壇連做一塊。 ³ 壇kap伊ê頂面，kap伊ê四圍，kap伊hiahê角，lóng用好金包伊；也tio̍h tī伊ê四圍齒金線。 ⁴ 你tio̍h做兩個金環安tī齒線ê下面，tio̍h做tī壇ê雙pêng，兩支橫桿ê頂面，chiahê環tio̍h做穿kǹg ê路用，thang扛壇。 ⁵ Tio̍h用皂莢柴做kǹg，用金包in。 ⁶ 你tio̍h用壇hē tī óa近法櫃ê帳籬前，tī法櫃頂施恩所ê頭前，就是我beh kap你相會ê所在。 ⁷ 亞倫tī壇頂tio̍h燒芳料所做ê香；ta̍k早起伊整頓燈ê時tio̍h燒伊。 ⁸ 到黃昏亞倫點燈ê時，也tio̍h燒伊；是做lín ta̍k世代常常燒ê香tī耶和華ê面前。 ⁹ Tī chitê壇頂m̄-thang獻別號ê香；也m̄-thang獻燒祭kap素祭；也m̄-thang灌奠tī伊ê頂面。 ¹⁰ 亞倫tio̍h一年一pái tī壇頂ê角贖罪；伊一年一pái tio̍h用贖罪祭ê血tī壇頂贖罪；ta̍k世代tio̍h án-ni；chitê壇tī耶和華ê面前做至聖。 ¹¹ 耶和華吩咐摩西講： ¹² 你算以色列人ê人額，照in中間所上算ê，你算in ê時，in ta̍k人tio̍h為tio̍h家己ê性命用贖回ê價錢獻hō͘耶和華；免得你算in ê時，tī in中間有災禍。 ¹³ 見若過去，歸tī hiahê上算ê，ta̍k人tio̍h照聖所ê phêng the̍h出半sià-khek-le̍k ê銀；chit半sià-khek-le̍k是獻hō͘耶和華ê；一sià-khek-le̍k是二十個kùi-la̍h。 ¹⁴ 見若過去歸tī hiahê上算ê，tùi二十歲以上ê，tio̍h將chitê獻hō͘耶和華。 ¹⁵ 為tio̍h贖回lín ê性命將chitê獻hō͘耶和華ê時，好額人m̄-thang出khah-chōe，sòng-hiong人也m̄-thang出khah少；ta̍k人準準出半sià-khek-le̍k。 ¹⁶ 你tio̍h tùi以色列人收chitê贖回ê銀，做會幕ê路用；thang tī耶和華ê面前，為以色列人做記念，來贖回lín ê性命。 ¹⁷ 耶和華吩咐摩西講： ¹⁸ 你tio̍h用銅做洗盪ê盆，伊ê座也tio̍h用銅做，thang用伊洗盪；tio̍h hē伊tī會幕kap壇ê中間；內面tio̍h貯水。 ¹⁹ 亞倫kap伊ê kiáⁿ beh tī-hia洗in ê手，in ê腳。 ²⁰ In入會幕，á是就近壇前服事，用火燒祭服事耶和華ê時，tio̍h用水洗，免得死無。 ²¹ In tio̍h án-ni洗手洗腳，免得死無；這是做in定tio̍h ê例，就是做伊kap伊ê後裔ta̍k世代永遠ê例。 ²² 耶和華koh吩咐摩西講： ²³ 你tio̍h取上品ê香料，就是專ê沒藥，五百sià-khek-le̍k，芳ê肉桂一半，就是兩百五十，芳ê菖蒲(chhiong-pô͘)兩百五十， ²⁴ 沉香五百，lóng照聖所ê秤(phêng)，kap橄欖油一him。 ²⁵ 你tio̍h用伊做thang抹ê聖油，就是照做芳味ê法調和伊；是beh做thang抹ê聖油。 ²⁶ Tio̍h用chitê油抹會幕kap法櫃， ²⁷ 桌kap桌頂一切ê器具，燈台kap燈台ê器具，以及香壇， ²⁸ 燒祭ê壇kap伊一切ê器具，洗盪 ê盆kap伊ê 座。 ²⁹ 你tio̍h hō͘ in做聖，hō͘ in成做至聖；見若摸tio̍h伊ê lóng分別做聖。 ³⁰ 你tio̍h用油抹亞倫kap伊hiahê kiáⁿ，hō͘ in做聖，thang做祭司來服事我。 ³¹ 你tio̍h kā以色列人講：chitê油 beh做我ê聖油，做抹ê路用，到lín ta̍k世代。 ³² M̄-thang tò tī人ê身軀，也m̄-thang照chitê調和ê法做kap一个相親像ê；chitê油是聖，lín也tio̍h掠伊做聖。 ³³ 見若調和kap chitê相親像，á是用伊抹tī外人ê身軀ê，beh tùi伊ê百姓ê中間受剪除。 ³⁴ 耶和華對摩西講：你tio̍h取芳ê香料，就是ná-ta̍t、tí-hê-le̍k、hek-pī-ná；chiahê芳芳ê香料，kap清ê乳香，ta̍k樣秤(chhìn)平重； ³⁵ 你tio̍h用chiahê做香，照做芳味ê法來做芳料，用鹽調和，hō͘伊清氣koh聖； ³⁶ chitê香你tio̍h the̍h淡薄，舂hō͘伊真幼，hē tī會幕內法櫃前；我beh tī-hia kap你相會；lín tio̍h掠伊做至聖。 ³⁷ Lín所做ê香m̄-thang照chitê調和ê法，為tio̍h家己來做；lín tio̍h掠伊做聖，歸tī耶和華。 ³⁸ 見若做親像chit款ê香，ài beh phīⁿ芳ê，beh tùi伊ê百姓中受剪除。

=== 出埃及記 · 第 30 章 ===

¹ Lí tio̍h chòe chi̍t chō tôaⁿ, thang sio hiuⁿ; ēng chō-kiap-chhâ chòe i; ² tn̂g chi̍t tiú, khoah chi̍t tiú, khoán-sit sù-hong-ê; koâiⁿ nn̄g tiú; i hiah-ê kak tio̍h kap tôaⁿ liân chòe chi̍t-tè. ³ Tôaⁿ kap i ê téng-bīn, kap i ê sì-ûi, kap i hiah-ê kak, lóng ēng hó-kim pau-i; iā tio̍h tī i ê sì-ûi khí kim-sòaⁿ. ⁴ Lí tio̍h chòe nn̄g ê kim-khoân an tī khí-sòaⁿ ê ē-bīn, tio̍h chòe tī tôaⁿ ê siang-pêng, nn̄g ki hoâiⁿ-koaiⁿ ê téng-bīn, chiah-ê khoân tio̍h chòe chhng-kǹg ê lō͘-ēng, thang kng tôaⁿ. ⁵ Tio̍h ēng chō-kiap-chhâ chòe kǹg, ēng kim pau in. ⁶ Lí tio̍h ēng tôaⁿ hē tī óa-kūn hoat-kūi ê tiùⁿ-lî-chêng, tī hoat-kūi téng si-un-só͘ ê thâu-chêng, chiū-sī Góa beh kap lí siong-hōe ê só͘-chāi. ⁷ A-lûn tī tôaⁿ-téng tio̍h sio phang-liāu só͘ chòe ê hiuⁿ; ta̍k chá-khí i chéng-tùn teng ê sî tio̍h sio i. ⁸ Kàu hông-hun A-lûn tiám-teng ê sî, iā tio̍h sio i; sī chòe lín ta̍k sè-tāi siông-siông sio ê hiuⁿ tī Iâ-hô-hoa ê bīn-chêng. ⁹ Tī chit-ê tôaⁿ-téng m̄-thang hiàn pa̍t-hō ê hiuⁿ; iā m̄-thang hiàn sio-chè kap sò͘-chè; iā m̄-thang koàn-tiān tī i ê téng-bīn. ¹⁰ A-lûn tio̍h chi̍t-nî chi̍t-pái tī tôaⁿ-téng ê kak sio̍k-chōe; i chi̍t-nî chi̍t-pái tio̍h ēng sio̍k-chōe-chè ê huih tī tôaⁿ-téng sio̍k-chōe; ta̍k sè-tāi tio̍h án-ni; chit-ê tôaⁿ tī Iâ-hô-hoa ê bīn-chêng chòe chì-sèng. ¹¹ Iâ-hô-hoa hoan-hù Mô͘-se kóng, ¹² Lí sǹg Í-sek-lia̍t lâng ê lâng-gia̍h, chiàu in tiong-kan só͘ chiūⁿ-sǹg-ê, lí sǹg in ê sî, in ta̍k-lâng tio̍h ūi-tio̍h ka-kī ê sìⁿ-miā ēng sio̍k-hôe ê kè-chîⁿ hiàn hō͘ Iâ-hô-hoa; bián-tit lí sǹg in ê sî, tī in tiong-kan ū chai-ē. ¹³ Kìⁿ-nā kè-khì, kui tī hiah-ê chiūⁿ-sǹg-ê, ta̍k-lâng tio̍h chiàu sèng-só͘ ê phêng the̍h-chhut pòaⁿ sià-khek-le̍k ê gûn; chit pòaⁿ sià-khek-le̍k sī hiàn hō͘ Iâ-hô-hoa ê; chi̍t sià-khek-le̍k sī jī-cha̍p ê kùi-la̍h. ¹⁴ Kìⁿ-nā kè-khì kui tī hiah-ê chiūⁿ-sǹg-ê, tùi jī-cha̍p hè í-chiūⁿ ê, tio̍h chiong chit-ê hiàn hō͘ Iâ-hô-hoa. ¹⁵ Ūi-tio̍h sio̍k-hôe lín ê sìⁿ-miā chiong chit-ê hiàn hō͘ Iâ-hô-hoa ê sî, hó-gia̍h lâng m̄-thang chhut khah-chōe, sòng-hiong lâng iā m̄-thang chhut khah-chió; ta̍k-lâng chún-chún chhut pòaⁿ sià-khek-le̍k. ¹⁶ Lí tio̍h tùi Í-sek-lia̍t lâng siu chit-ê sio̍k-hôe ê gûn, chòe hōe-bō͘ ê lō͘-ēng; thang tī Iâ-hô-hoa ê bīn-chêng, ūi Í-sek-lia̍t lâng chòe kì-liām, lâi sio̍k-hôe lín ê sìⁿ-miā. ¹⁷ Iâ-hô-hoa hoan-hù Mô͘-se kóng, ¹⁸ Lí tio̍h ēng tâng chòe sóe-tn̄g ê phûn, i ê chō iā tio̍h ēng tâng chòe, thang ēng i sóe-tn̄g; tio̍h hē i tī hōe-bō͘ kap tôaⁿ ê tiong-kan; lāi-bīn tio̍h tóe chúi. ¹⁹ A-lûn kap i ê kiáⁿ beh tī-hia sóe in ê chhiú, in ê kha. ²⁰ In ji̍p hōe-bō͘, á-sī chiū-kūn tôaⁿ-chêng ho̍k-sāi, ēng hé sio-chè ho̍k-sāi Iâ-hô-hoa ê sî, tio̍h ēng chúi sóe, bián-tit sí-bô. ²¹ In tio̍h án-ni sóe-chhiú sóe-kha, bián-tit sí-bô; che sī chòe in tiāⁿ-tio̍h ê lē, chiū-sī chòe i kap i ê hō͘-è ta̍k sè-tāi éng-oán ê lē. ²² Iâ-hô-hoa koh hoan-hù Mô͘-se kóng, ²³ Lí tio̍h chhú siōng-phín ê hiuⁿ-liāu, chiū-sī choan ê bu̍t-io̍h, gō͘-pah sià-khek-le̍k, phang ê jio̍k-kùi chi̍t-pòaⁿ, chiū-sī nn̄g-pah gō͘-cha̍p, phang ê chhiong-pô͘ nn̄g-pah gō͘-cha̍p, ²⁴ tîm-hiuⁿ gō͘-pah, lóng chiàu sèng-só͘ ê phêng, kap kaⁿ-ná-iû chi̍t-him. ²⁵ Lí tio̍h ēng i chòe thang boah ê sèng-iû, chiū-sī chiàu chòe phang-bī ê hoat tiau-hô i; sī beh chòe thang boah ê sèng-iû. ²⁶ Tio̍h ēng chit-ê iû boah hōe-bō͘ kap hoat-kūi, ²⁷ toh kap toh-téng it-chhè ê khì-kū, teng-tâi kap teng-tâi ê khì-kū, í-ki̍p hiuⁿ-tôaⁿ, ²⁸ sio-chè ê tôaⁿ kap i it-chhè ê khì-kū, sóe-tn̄g ê phûn kap i ê chō. ²⁹ Lí tio̍h hō͘ in chòe-sèng, hō͘ in chiâⁿ-chòe chì-sèng; kìⁿ-nā bong-tio̍h i-ê lóng hun-piat chòe-sèng. ³⁰ Lí tio̍h ēng iû boah A-lûn kap i hiah-ê kiáⁿ, hō͘ in chòe-sèng, thang chòe chè-si lâi ho̍k-sāi Góa. ³¹ Lí tio̍h kā Í-sek-lia̍t lâng kóng, Chit-ê iû beh chòe Góa ê sèng-iû, chòe boah ê lō͘-ēng, kàu lín ta̍k sè-tāi. ³² M̄-thang tò tī lâng ê seng-khu, iā m̄-thang chiàu chit-ê tiau-hô ê hoat chòe kap chi̍t-ê saⁿ chhin-chhiūⁿ ê; chit-ê iû sī sèng, lín iā tio̍h lia̍h i chòe-sèng. ³³ Kìⁿ-nā tiau-hô kap chit-ê saⁿ chhin-chhiūⁿ, á-sī ēng i boah tī gōa-lâng ê seng-khu ê, beh tùi i ê peh-sìⁿ ê tiong-kan siū chián-tû. ³⁴ Iâ-hô-hoa tùi Mô͘-se kóng, Lí tio̍h chhú phang ê hiuⁿ-liāu, chiū-sī ná-ta̍t, tí-hê-le̍k, hek-pī-ná; chiah-ê phang-phang ê hiuⁿ-liāu, kap chheng ê jú-hiuⁿ, ta̍k-iūⁿ chhìn pîⁿ-tāng; ³⁵ lí tio̍h ēng chiah-ê chòe hiuⁿ, chiàu chòe phang-bī ê hoat lâi chòe phang-liāu, ēng iâm tiau-hô, hō͘ i chheng-khì koh sèng; ³⁶ chit-ê hiuⁿ lí tio̍h the̍h tām-po̍h, cheng hō͘ i chin iù, hē tī hōe-bō͘-lāi hoat-kūi chêng; Góa beh tī-hia kap lí siong-hōe; lín tio̍h lia̍h i chòe chì-sèng. ³⁷ Lín só͘ chòe ê hiuⁿ m̄-thang chiàu chit-ê tiau-hô ê hoat, ūi-tio̍h ka-kī lâi chòe; lín tio̍h lia̍h i chòe-sèng, kui tī Iâ-hô-hoa. ³⁸ Kìⁿ-nā chòe chhin-chhiūⁿ chit-khoán ê hiuⁿ, ài beh phīⁿ-phang ê, beh tùi i ê peh-sìⁿ-tiong siū chián-tû.

=== 出埃及記 · 第 31 章 ===

¹ 耶和華對摩西講： ² 看ah，偤大支派，Hō͘-jíⁿ ê孫，O͘-lī ê kiáⁿ、Pí-sat-lia̍t，我已經指名來召伊； ³ 我用上帝ê神充滿伊，hō͘伊有智慧，有聰明，有知識，能做ta̍k樣ê工； ⁴ 能想出奇巧ê工，來做金、銀、銅，hiahê物； ⁵ 也能刻寶石來入伊；也能刻柴，能做ta̍k樣奇巧ê工。 ⁶ 我也派Tàn ê支派，A-hi-sat-boat ê kiáⁿ，A-hô-lī-a-pek，kap伊相kap做；見若心內有智慧ê，我koh賞賜智慧tī in ê心，hō͘ in能做我一切所吩咐你ê； ⁷ 就是會幕、法櫃，kap hit頂面ê施恩所，以及布棚一切ê器具， ⁸ 桌kap桌頂ê器具，好金ê燈台kap伊一切ê器具， ⁹ 以及香壇，燒祭ê壇kap伊一切ê器具，以及洗盪 ê盆kap伊ê座； ¹⁰ 精工ê衣服，祭司亞倫ê聖衫kap伊ê kiáⁿ ê衫，hō͘ in做祭司來服事； ¹¹ thang抹ê油，以及聖所所用芳料ê香；照我一切所命令你ê，in tio̍h做。 ¹² 耶和華吩咐摩西講： ¹³ 你tio̍h吩咐以色列人講：Lín的確tio̍h守我hiahê安歇日；因為這是我kap lín ê中間ê證據，到tī lín ta̍k世代，hō͘ lín知我就是耶和華，hō͘ lín成聖ê。 ¹⁴ 所以lín tio̍h守安歇日，因為是lín ê聖日，見若犯tio̍h chit日ê，tio̍h hō͘伊死；凡若tī chit日做工ê，tio̍h tùi伊ê百姓中受剪除。 ¹⁵ 六日tio̍h做工，獨獨第七日是安歇ê大日，是耶和華ê聖日；凡若tī安歇日做工ê，的確tio̍h hō͘伊死。 ¹⁶ 所以以色列人tio̍h守安歇日，代代謹慎chitê安歇日，做永遠ê約。 ¹⁷ 這是我kap以色列人中間永遠ê證據；因為六日內耶和華創造天地，第七日就歇睏來清閒。 ¹⁸ 耶和華tī西奈山kap摩西講話明白，就將兩塊約碑hō͘伊，是上帝用指頭á寫ê石碑。

=== 出埃及記 · 第 31 章 ===

¹ Iâ-hô-hoa tùi Mô͘-se kóng, ² Khòaⁿ ah, Iû-tāi chi-phài, Hō͘-jíⁿ ê sun, O͘-lī ê kiáⁿ, Pí-sat-lia̍t, Góa í-keng chí-miâ lâi tiàu i; ³ Góa ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang; ⁴ ōe siūⁿ-chhut kî-khiáu ê kang, lâi chòe kim, gûn, tâng, hiah-ê mi̍h; ⁵ iā ōe khek pó-chio̍h lâi ji̍p i; iā ōe khek chhâ, ōe chòe ta̍k-iūⁿ kî-khiáu ê kang. ⁶ Góa iā phài Tàn ê chi-phài, A-hi-sat-boat ê kiáⁿ, A-hô-lī-a-pek, kap i saⁿ-kap chòe; kìⁿ-nā sim-lāi ū tì-hūi ê, Góa koh siúⁿ-sù tì-hūi tī in ê sim, hō͘ in ōe chòe Góa it-chhè só͘ hoan-hù lí ê; ⁷ chiū-sī hōe-bō͘, hoat-kūi, kap hit téng-bīn ê si-un-só͘, í-ki̍p pò͘-pîⁿ it-chhè ê khì-kū, ⁸ toh kap toh-téng ê khì-kū, hó-kim ê teng-tâi kap i it-chhè ê khì-kū, ⁹ í-ki̍p hiuⁿ-tôaⁿ, sio-chè ê tôaⁿ kap i it-chhè ê khì-kū, í-ki̍p sóe-tn̄g ê phûn kap i ê chō; ¹⁰ cheng-kong ê i-ho̍k, chè-si A-lûn ê sèng-saⁿ kap i ê kiáⁿ ê saⁿ, hō͘ in chòe chè-si lâi ho̍k-sāi; ¹¹ thang boah ê iû, í-ki̍p sèng-só͘ só͘ ēng phang-liāu ê hiuⁿ; chiàu Góa it-chhè só͘ bēng-lēng lí ê, in tio̍h chòe. ¹² Iâ-hô-hoa hoan-hù Mô͘-se kóng, ¹³ Lí tio̍h hoan-hù Í-sek-lia̍t lâng kóng, Lín tek-khak tio̍h siú Góa hiah-ê an-hioh-ji̍t; in-ūi che sī Góa kap lín ê tiong-kan ê chèng-kù, kàu tī lín ta̍k sè-tāi, hō͘ lín chai Góa chiū-sī Iâ-hô-hoa, hō͘ lín chiâⁿ-sèng ê. ¹⁴ Só͘-í lín tio̍h siú an-hioh-ji̍t, in-ūi sī lín ê sèng-ji̍t, kìⁿ-nā hoān-tio̍h chit-ji̍t-ê, tio̍h hō͘ i sí; hoān-nā tī chit-ji̍t chòe kang-ê, tio̍h tùi i ê peh-sìⁿ-tiong siū chián-tû. ¹⁵ La̍k-ji̍t tio̍h chòe-kang, to̍k-to̍k tē-chhit ji̍t sī an-hioh ê tōa-ji̍t, sī Iâ-hô-hoa ê sèng-ji̍t; hoān-nā tī an-hioh-ji̍t chòe-kang-ê, tek-khak tio̍h hō͘ i sí. ¹⁶ Só͘-í Í-sek-lia̍t lâng tio̍h siú an-hioh-ji̍t, tāi-tāi kín-sīn chit-ê an-hioh-ji̍t, chòe éng-oán ê iok. ¹⁷ Che sī Góa kap Í-sek-lia̍t lâng tiong-kan éng-oán ê chèng-kù; in-ūi la̍k-ji̍t-lāi Iâ-hô-hoa chhòng-chō thiⁿ tōe, tē-chhit ji̍t chiū hioh-khùn lâi chheng-êng. ¹⁸ Iâ-hô-hoa tī Se-nái soaⁿ kap Mô͘-se kóng-ōe bêng-pe̍k, chiū chiong nn̄g tè iok-pi hō͘-i, sī Siōng-tè ēng chńg-thâu-á siá ê chio̍h-pi.

=== 出埃及記 · 第 32 章 ===

¹ 百姓看見摩西延chhiân無落山，百姓就聚集到亞倫hia，對伊講，起來，kā阮妝上帝，thang行tī阮ê頭前；因為hitê摩西，就是chhōa阮tùi埃及地出來，hitê人，阮m̄知伊tú-tio̍h甚麼。 ² 亞倫對in講：Lín ê bó͘，lín ê kiáⁿ，cha-bó͘-kiáⁿ，耳á所掛ê金環，pak伊，the̍h來hō͘我。 ³ 百姓就lóng pak in耳á裡ê金環，the̍h來hō͘亞倫。 ⁴ 亞倫tùi in ê手接來，鑄一隻牛á，用chhiàm刀á雕刻伊；in就講：以色列ah，這是你ê上帝，chhōa你出埃及地ê。 ⁵ 亞倫看了，就tī牛á ê面前起壇；亞倫koh宣布講：明á日tio̍h守節服事耶和華。 ⁶ 隔日清早，in起來，獻燒祭kap平安祭；百姓就坐teh lim食，起來kún笑。 ⁷ 耶和華對摩西講：去ah，你落去；因為你ê百姓，就是tùi埃及地chhōa出來ê，已經敗壞家己。 ⁸ In緊緊離開我所吩咐in ê路，為家己鑄成一隻牛á，跪拜伊，獻祭伊，講：以色列ah，這就是chhōa你出埃及地ê上帝。 ⁹ 耶和華對摩西講：我看chitê百姓，看ah，是頷頸硬ê百姓。 ¹⁰ 你taⁿ chhut-chāi我，我beh大受氣in，滅無in；用你成做大國。 ¹¹ 摩西就對伊ê上帝耶和華求情講：耶和華ah，你啥事大受氣你ê百姓ah，是你用大氣力大權能ê手，tùi埃及地chhōa出來ê？ ¹² 啥事hō͘埃及人有話講：伊chhōa in出去，是beh害in，害死in tī山中，tùi地上除滅in？求你回心轉(tńg)意，soah你ê大受氣，無降災禍hō͘你ê百姓。 ¹³ 記念你ê奴僕亞伯拉罕、以撒、以色列，你bat kí家己對in chiù-chōa講：我beh hō͘ lín ê後裔親像天頂ê星hiah-chōe；koh我所講chitê全地，我beh賞賜lín ê後裔，beh做in永遠ê業。 ¹⁴ Tùi án-ni，耶和華退悔，無降落伊前所講ê災禍，hō͘伊ê百姓。 ¹⁵ 摩西oa̍t-tńg身落山，手the̍h兩塊約碑，chiahê碑兩面lóng有寫；chit面hit面lóng有寫字。 ¹⁶ 碑是上帝做ê，字是上帝寫ê，刻tī碑裡。 ¹⁷ 約書亞一下聽見百姓喊譁(hán-hōa)ê聲，就對摩西講：Tī營中有交戰ê聲。 ¹⁸ 伊講：我所聽見m̄是刣贏得勝ê聲，也m̄是刣輸喉叫ê聲，就是唱歌ê聲。 ¹⁹ 行近營盤，看見牛á，koh看見人teh跳舞，摩西就大受氣，tùi伊ê手hiat兩塊石碑，折tī山腳。 ²⁰ Koh將in所鑄ê牛á，用火燒，研做粉，掖tī水面，hō͘以色列人lim伊。 ²¹ 摩西對亞倫講：chitê百姓對你做甚麼，你chiah hō͘ in陷落重罪？ ²² 亞倫講：我ê主莫得大受氣；chiahê百姓決意做pháiⁿ，是你所知ê。 ²³ In對我講，你kā阮妝上帝，thang行tī阮ê頭前，因為hitê摩西，就是chhōa阮tùi埃及地出來，hitê人，阮m̄知伊tú-tio̍h甚麼。 ²⁴ 我對in講：見若有金ê，pak起來；in將金hō͘我，我hiat伊tī火裡，chit隻牛á就出來。 ²⁵ 摩西看見百姓放縱，因為亞倫放chhut-chāi in，hō͘ in tī對敵ê中間受譏刺， ²⁶ 摩西khiā tī營盤ê門，講：Chī-chūi óa耶和華ê，thang來我chia；利未人就lóng聚集tī伊hia。 ²⁷ 伊對in講：耶和華以色列ê上帝án-ni講：Lín ta̍k人tio̍h插刀tī大腿裡，往來tī營中，tùi chitê門到hitê門，ta̍k人刣死伊ê兄弟，kap伊ê同伴，以及伊ê厝邊。 ²⁸ 利未人照摩西ê話行；hit日百姓中死ê約略三千人。 ²⁹ 摩西講：Lín獻家己hō͘耶和華，ta̍k人攻擊伊ê kiáⁿ，伊ê兄弟，今á日得tio̍h伊賜福lín。 ³⁰ 隔日摩西對百姓講：Lín有犯重罪，我taⁿ beh上去耶和華hia，kiám-chhái thang kā lín贖罪。 ³¹ 摩西倒tńg 到耶和華hia講：Ai-ah，chitê百姓犯重罪，為家己做金ê上帝。 ³² Taⁿ你若beh赦免in ê罪；若m̄，求你tùi你所寫ê冊，擦去我ê名。 ³³ 耶和華對摩西講：甚麼人得罪我就tùi我ê冊擦伊ê名。 ³⁴ Taⁿ你去chhōa chitê百姓去我所kā你講ê所在；看ah，我ê使者beh行tī你ê頭前；獨獨到我辦罪ê日，我beh辦in ê罪。 ³⁵ 耶和華降災禍hō͘百姓，因為in造牛á，就是亞倫所造ê。

=== 出埃及記 · 第 32 章 ===

¹ Peh-sìⁿ khòaⁿ-kìⁿ Mô͘-se iân-chhiân bô lo̍h soaⁿ, peh-sìⁿ chiū chū-chi̍p kàu A-lûn hia, tùi i kóng, Khí-lâi, kā goán chng siōng-tè, thang kiâⁿ tī goán ê thâu-chêng; in-ūi hit-ê Mô͘-se, chiū-sī chhōa goán tùi Ai-ki̍p tōe chhut-lâi, hit-ê lâng, goán m̄-chai i tú-tio̍h sím-mi̍h. ² A-lûn tùi in kóng, Lín ê bó͘, lín ê kiáⁿ, cha-bó͘-kiáⁿ, hī-á só͘ kòa ê kim khoân, pak i, the̍h-lâi hō͘ góa. ³ Peh-sìⁿ chiū lóng pak in hī-á-ni̍h ê kim-khoân, the̍h lâi hō͘ A-lûn. ⁴ A-lûn tùi in ê chhiú chih-lâi, chù chi̍t chiah gû-á, ēng chhiàm-to-á tiau-khek-i; in chiū kóng, Í-sek-lia̍t ah, che sī lí ê siōng-tè, chhōa lí chhut Ai-ki̍p tōe ê. ⁵ A-lûn khòaⁿ-liáu, chiū tī gû-á ê bīn-chêng khí-tôaⁿ; A-lûn koh soan-pò͘ kóng, Bîn-á-ji̍t tio̍h siú-choeh ho̍k-sāi Iâ-hô-hoa. ⁶ Keh ji̍t chheng-chá, in khí-lâi, hiàn sio-chè kap pêng-an-chè; peh-sìⁿ chiū chē-teh lim-chia̍h, khí-lâi kún-chhiò. ⁷ Iâ-hô-hoa tùi Mô͘-se kóng, Khì ah, lí lo̍h-khì; in-ūi lí ê peh-sìⁿ, chiū-sī tùi Ai-ki̍p tōe chhōa chhut-lâi ê, í-keng pāi-hoāi ka-kī. ⁸ In kín-kín lī-khui Góa só͘ hoan-hù in ê lō͘, ūi ka-kī chù-chiâⁿ chi̍t chiah gû-á, kūi-pài-i, hiàn-chè-i, kóng, Í-sek-lia̍t ah, che chiū-sī chhōa lí chhut Ai-ki̍p tōe ê siōng-tè. ⁹ Iâ-hô-hoa tùi Mô͘-se kóng, Góa khòaⁿ chit-ê peh-sìⁿ, khòaⁿ ah, sī ām-kún ngī ê peh-sìⁿ. ¹⁰ Lí taⁿ chhut-chāi Góa, Góa beh tōa siū-khì in, bia̍t-bô in; ēng lí chiâⁿ-chòe tōa-kok. ¹¹ Mô͘-se chiū tùi i ê Siōng-tè Iâ-hô-hoa kiû-chêng kóng, Iâ-hô-hoa ah, Lí siáⁿ-sū tōa siū-khì Lí ê peh-sìⁿ ah, sī Lí ēng tōa khùi-la̍t tōa koân-lêng ê chhiú, tùi Ai-ki̍p tōe chhōa chhut-lâi-ê? ¹² Siáⁿ-sū hō͘ Ai-ki̍p lâng ū ōe kóng, I chhōa in chhut-khì, sī beh hāi-in, hāi-sí in tī soaⁿ-tiong, tùi tōe-chiūⁿ tû-bia̍t in? kiû Lí hê-sim tńg-ì, soah Lí ê tōa siū-khì, bô kàng chai-ē hō͘ Lí ê peh-sìⁿ. ¹³ Kì-liām Lí ê lô͘-po̍k A-pek-la̍h-hán, Í-sat, Í-sek-lia̍t, Lí bat kí ka-kī tùi in chiù-chōa kóng, Góa beh hō͘ lín ê hō͘-è chhin-chhiūⁿ thiⁿ-téng ê chhiⁿ hiah-chōe; koh Góa só͘ kóng chit-ê choân-tōe, Góa beh siúⁿ-sù lín ê hō͘-è, beh chòe in éng-oán ê gia̍p. ¹⁴ Tùi án-ni Iâ-hô-hoa thè-hóe, bô kàng-lo̍h I chêng só͘ kóng ê chai-ē, hō͘ I ê peh-sìⁿ. ¹⁵ Mô͘-se oa̍t-tńg-sin lo̍h soaⁿ, chhiú the̍h nn̄g tè iok-pi, chiah-ê pi nn̄g-bīn lóng ū siá; chit-bīn hit-bīn lóng ū siá-jī. ¹⁶ Pi sī Siōng-tè chòe-ê, jī sī Siōng-tè siá-ê, khek tī pi-ni̍h. ¹⁷ Iok-su-a chi̍t-ē thiaⁿ-kìⁿ peh-sìⁿ hán-hōa ê siaⁿ, chiū tùi Mô͘-se kóng, Tī iâⁿ-tiong ū kau-chiàn ê siaⁿ. ¹⁸ I kóng, Góa só͘ thiaⁿ-kìⁿ m̄-sī thâi-iâⁿ tek-sèng ê siaⁿ, iā m̄-sī thâi-su âu-kiò ê siaⁿ, chiū-sī chhiùⁿ-koa ê siaⁿ. ¹⁹ Kiâⁿ kūn iâⁿ-pôaⁿ, khòaⁿ-kìⁿ gû-á, koh khòaⁿ-kìⁿ lâng teh thiàu-bú, Mô͘-se chiū tōa siū-khì, tùi i ê chhiú hiat nn̄g tè chio̍h-pi, chi̍h tī soaⁿ-kha. ²⁰ Koh chiong in só͘ chù ê gû-á, ēng hé sio, géng chòe hún, iā tī chúi-bīn, hō͘ Í-sek-lia̍t lâng lim-i. ²¹ Mô͘-se tùi A-lûn kóng, Chit-ê peh-sìⁿ tùi lí chòe sím-mi̍h, lí chiah hō͘ in hām-lo̍h tāng-chōe? ²² A-lûn kóng, Góa ê chú bo̍h-tit tōa siū-khì; chiah-ê peh-sìⁿ koat-ì chòe pháiⁿ, sī lí só͘ chai-ê. ²³ In tùi góa kóng, Lí kā goán chng siōng-tè, thang kiâⁿ tī goán ê thâu-chêng, in-ūi hit-ê Mô͘-se, chiū-sī chhōa goán tùi Ai-ki̍p tōe chhut-lâi, hit-ê lâng, goán m̄ chai i tú-tio̍h sím-mi̍h. ²⁴ Góa tùi in kóng, Kìⁿ-nā ū kim-ê, pak-khí-lâi; in chiong kim hō͘ góa, góa hiat i tī hé-ni̍h, chit chiah gû-á chiū chhut-lâi. ²⁵ Mô͘-se khòaⁿ-kìⁿ peh-sìⁿ hòng-chhiòng, in-ūi A-lûn pàng chhut-chāi in, hō͘ in tī tùi-te̍k ê tiong-kan siū ki-chhì, ²⁶ Mô͘-se khiā tī iâⁿ-pôaⁿ ê mn̂g, kóng, Chī-chūi óa Iâ-hô-hoa-ê, thang lâi góa chia; Lī-bī lâng chiū lóng chū-chi̍p tī i hia. ²⁷ I tùi in kóng, Iâ-hô-hoa Í-sek-lia̍t ê Siōng-tè án-ni kóng, Lín ta̍k-lâng tio̍h chhah to tī tōa-thúi-ni̍h, óng-lâi tī iâⁿ-tiong, tùi chit-ê mn̂g kàu hit-ê mn̂g, ta̍k-lâng thâi-sí i ê hiaⁿ-tī, kap i ê tâng-phōaⁿ, í-ki̍p i ê chhù-piⁿ. ²⁸ Lī-bī lâng chiàu Mô͘-se ê ōe kiâⁿ; hit-ji̍t peh-sìⁿ-tiong sí-ê iok-lio̍k saⁿ-chheng lâng. ²⁹ Mô͘-se kóng, Lín hiàn ka-kī hō͘ Iâ-hô-hoa, ta̍k-lâng kong-kek i ê kiáⁿ, i ê hiaⁿ-tī , kin-á-ji̍t tit-tio̍h I sù-hok lín. ³⁰ Keh-ji̍t Mô͘-se tùi peh-sìⁿ kóng, Lín ū hoān tāng-chōe, góa taⁿ beh chiūⁿ-khì Iâ-hô-hoa hia, kiám-chhái thang kā lín sio̍k-chōe. ³¹ Mô͘-se tò-tńg kàu Iâ-hô-hoa hia kóng, Ai-ah, chit-ê peh-sìⁿ hoān tāng-chōe, ūi ka-kī chòe kim ê siōng-tè. ³² Taⁿ Lí nā beh sià-bián in ê chōe; nā m̄, kiû Lí tùi Lí só͘ siá ê chheh, chhat-khì góa ê miâ. ³³ Iâ-hô-hoa tùi Mô͘-se kóng, Sím-mi̍h lâng tek-chōe Góa chiū tùi Góa ê chheh chhat i ê miâ. ³⁴ Taⁿ lí khì chhōa chit-ê peh-sìⁿ khì Góa só͘ kā lí kóng ê só͘-chāi; khòaⁿ ah, Góa ê sù-chiá beh kiâⁿ tī lí ê thâu-chêng; to̍k-to̍k kàu Góa pān-chōe ê ji̍t, Góa beh pān in ê chōe. ³⁵ Iâ-hô-hoa kàng chai-ē hō͘ peh-sìⁿ, in-ūi in chō gû-á, chiū-sī A-lûn só͘ chō-ê.

=== 出埃及記 · 第 33 章 ===

¹ 耶和華對摩西講：我bat chiù-chōa應允亞伯拉罕、以撒、雅各，講：beh將土地賞賜你ê後裔；taⁿ你去ah，你kap你tùi埃及地所chhōa出來ê百姓，tio̍h tùi chia上去hitê地。 ² 我beh差使者tī你ê頭前；我beh趕出迦南、A-mô͘-lī、Hek、Pí-lī-sé、Hi-bī、Iâ-pò͘-su hiahê族， ³ chhōa你到流奶kap蜜ê地；因為我m̄ kap你上去，為tio̍h你是頷頸硬ê百姓；驚了我tī路裡滅無你。 ⁴ 百姓聽見chitê pháiⁿ消息就憂悶；無人裝飾。 ⁵ 耶和華對摩西講：你tio̍h kā以色列人講：Lín是頷頸硬ê百姓，我若一目nih久到lín中間，我的確剿滅lín；taⁿ tio̍h將lín身軀ê裝飾pak起來，我就知我beh怎樣款待lín。 ⁶ 以色列人tùi tī何烈山以後，就將身軀ê裝飾thǹg起來。 ⁷ 摩西將布棚搭tī營外，離開營有hiah遠；伊稱chitê布棚做會幕，凡若chhē求耶和華ê人，就到營外ê會幕hia。 ⁸ 當摩西出去到布棚ê時，眾百姓就lóng起來，ta̍k人khiā tī in ê布棚口，teh看摩西，到伊入布棚。 ⁹ 摩西入布棚ê時，雲柱就落來，khiā tī布棚ê門前；耶和華就kap摩西講話。 ¹⁰ 眾百姓看見雲柱khiā tī布棚ê門前，百姓就lóng起來，ta̍k人tī in ê布棚門口跪拜。 ¹¹ 耶和華kap摩西面對面講話，親像人kap朋友講話一般樣。摩西倒tńg來營內；獨獨跟隨伊ê少年人Lùn ê kiáⁿ約書亞無離開布棚。 ¹² 摩西對耶和華講：看ah，你對我講，將chitê百姓chhōa上去，總是無hō͘我知你beh差是誰 kap我相kap去。只有講：我用名揀召你，你tī我ê面前也得tio̍h恩典。 ¹³ 我taⁿ若tī你ê面前得tio̍h恩典，求你將你ê路指示我，hō͘我bat你，thang tī你ê面前得tio̍h恩典；你tio̍h siàu念chit族是你ê百姓。 ¹⁴ 耶和華講：我beh親身kap你去，hō͘你平安。 ¹⁵ 摩西對伊講，你若無親身kap我去，就m̄-thang chhōa阮tùi-chia上去。 ¹⁶ Tùi怎樣會知，我kap你ê百姓tī你ê面前得tio̍h恩典？kiám m̄是tùi你kap阮相kap去，hō͘我kap你ê百姓tī地上萬百姓有分別mah？ ¹⁷ 耶和華對摩西講：你所講chitê事，我也beh做伊；因為你tī我ê面前得tio̍h恩典，koh我用名揀召你。 ¹⁸ 伊講：求你hō͘我看見你ê榮光。 ¹⁹ 伊講：我beh hō͘我一切ê恩惠經過你ê面前，也宣布耶和華ê名tī你ê面前。我beh施恩tī我所施恩ê，我beh憐憫tī我所憐憫ê。 ²⁰ Koh講：你bōe能看我ê面，因為無人會看見我也能活。 ²¹ 耶和華講：看ah，近我chia有所在，你tio̍h khiā tī石磐頂； ²² 當我ê榮光經過ê時，我beh kā你hē tī石磐縫內，用我ê手遮你；thèng候我過去； ²³ 然後我beh kiu我ê手倒tńg，你就會看見我ê ka-chiah後；總是bōe得thang看見我ê面。

=== 出埃及記 · 第 33 章 ===

¹ Iâ-hô-hoa tùi Mô͘-se kóng, Góa bat chiù-chōa èng-ún A-pek-la̍h-hán, Í-sat, Ngá-kok, kóng, Beh chiong thó͘-tōe siúⁿ-sù lí ê hō͘-è; taⁿ lí khì ah, lí kap lí tùi Ai-ki̍p tōe só͘ chhōa chhut-lâi ê peh-sìⁿ, tio̍h tùi chia chiūⁿ-khì hit-ê tōe. ² Góa beh chhe sù-chiá tī lí ê thâu-chêng; Góa beh kóaⁿ-chhut Ka-lâm, A-mô͘-lī, Hek, Pí-lī-sé, Hi-bī, Iâ-pò͘-su hiah-ê cho̍k, ³ chhōa lí kàu lâu lin kap bi̍t ê tōe; in-ūi Góa m̄ kap lí chiūⁿ-khì, ūi-tio̍h lí sī ām-kún ngī ê peh-sìⁿ; kiaⁿ-liáu Góa tī lō͘-ni̍h bia̍t-bô lí. ⁴ Peh-sìⁿ thiaⁿ-kìⁿ chit-ê pháiⁿ siau-sit chiū iu-būn; bô lâng chng-thāⁿ. ⁵ Iâ-hô-hoa tùi Mô͘-se kóng, Lí tio̍h kā Í-sek-lia̍t lâng kóng, Lín sī ām-kún ngī ê peh-sìⁿ, Góa nā chi̍t-ba̍k-nih-kú kàu lín tiong-kan, Góa tek-khak châu-bia̍t lín; taⁿ tio̍h chiong lín seng-khu ê chng-thāⁿ pak-khí-lâi, Góa chiū chai Góa beh cháiⁿ-iūⁿ khoán-thāi lín. ⁶ Í-sek-lia̍t lâng tùi tī Hô-lia̍t soaⁿ í-āu, chiū chiong seng-khu ê chng-thāⁿ thǹg-khí-lâi. ⁷ Mô͘-se chiong pò͘-pîⁿ tah tī iâⁿ-gōa, lī-khui iâⁿ ū hiah-hn̄g; i chheng chit-ê pò͘-pîⁿ chòe hōe-bō͘, hoān-nā chhē-kiû Iâ-hô-hoa ê lâng, chiū kàu iâⁿ-gōa ê hōe-bō͘ hia. ⁸ Tng Mô͘-se chhut-khì kàu Pò͘-pîⁿ ê sî, chèng peh-sìⁿ chiū lóng khí-lâi, ta̍k-lâng khiā tī in ê pò͘-pîⁿ-kháu, teh khòaⁿ Mô͘-se, kàu i ji̍p Pò͘-pîⁿ. ⁹ Mô͘-se ji̍p Pò͘-pîⁿ ê sî, hûn-thiāu chiū lo̍h-lâi, khiā tī Pò͘-pîⁿ ê mn̂g-chêng; Iâ-hô-hoa chiū kap Mô͘-se kóng-ōe. ¹⁰ Chèng peh-sìⁿ khòaⁿ-kìⁿ hûn-thiāu khiā tī Pò͘-pîⁿ ê mn̂g-chêng, peh-sìⁿ chiū lóng khí-lâi, ta̍k-lâng tī in ê pò͘-pîⁿ mn̂g-kháu kūi-pài. ¹¹ Iâ-hô-hoa kap Mô͘-se bīn tùi bīn kóng-ōe, chhin-chhiūⁿ lâng kap pêng-iú kóng-ōe chi̍t-poaⁿ-iūⁿ. Mô͘-se tò-tńg-lâi iâⁿ-lāi; to̍k-to̍k kun-sûi i ê siàu-liân lâng Lùn ê kiáⁿ Iok-su-a bô lī-khui Pò͘-pîⁿ. ¹² Mô͘-se tùi Iâ-hô-hoa kóng, Khòaⁿ ah, Lí tùi góa kóng, Chiong chit-ê peh-sìⁿ chhōa chiūⁿ-khì, chóng-sī bô hō͘ góa chai Lí beh chhe chī-chūi kap góa saⁿ-kap khì. Chí-ū kóng, Góa ēng miâ kéng-tiàu lí, lí tī Góa ê bīn-chêng iā tit-tio̍h un-tián. ¹³ Góa taⁿ nā tī Lí ê bīn-chêng tit-tio̍h un-tián, kiû Lí chiong Lí ê lō͘ chí-sī góa, hō͘ góa bat Lí, thang tī Lí ê bīn-chêng tit-tio̍h un-tián; Lí tio̍h siàu-liām chit-cho̍k sī Lí ê peh-sìⁿ. ¹⁴ Iâ-hô-hoa kóng, Góa beh chhin-sin kap lí khì, hō͘ lí pêng-an. ¹⁵ Mô͘-se tùi I kóng, Lí nā bô chhin-sin kap góa khì, chiū m̄-thang chhōa goán tùi-chia chiūⁿ-khì. ¹⁶ Tùi cháiⁿ-iūⁿ ōe chai, góa kap Lí ê peh-sìⁿ tī Lí ê bīn-chêng tit-tio̍h un-tián? kiám m̄-sī tùi Lí kap goán saⁿ-kap khì, hō͘ góa kap Lí ê peh-sìⁿ tī tōe-chiūⁿ bān peh-sìⁿ ū hun-piat mah? ¹⁷ Iâ-hô-hoa tùi Mô͘-se kóng, Lí só͘ kóng chit-ê sū, Góa iā beh chòe-i; in-ūi lí tī Góa ê bīn-chêng tit-tio̍h un-tián, koh Góa ēng miâ kéng-tiàu lí. ¹⁸ I kóng, Kiû Lí hō͘ góa khòaⁿ-kìⁿ Lí ê êng-kng. ¹⁹ I kóng, Góa beh hō͘ Góa it-chhè ê un-hūi keng-kè lí ê bīn-chêng, iā soan-pò͘ Iâ-hô-hoa ê miâ tī lí ê bīn-chêng. Góa beh si-un tī Góa só͘ si-un-ê, Góa beh lîn-bín tī Góa só͘ lîn-bín-ê. ²⁰ Koh kóng, Lí bōe-ōe khòaⁿ Góa ê bīn, in-ūi bô lâng ōe khòaⁿ-kìⁿ Góa iā ōe oa̍h. ²¹ Iâ-hô-hoa kóng, Khòaⁿ-ah, kūn Góa chia ū só͘-chāi, lí tio̍h khiā tī chio̍h-pôaⁿ-téng; ²² tng Góa ê êng-kng keng-kè ê sî, Góa beh kā lí hē tī chio̍h-pôaⁿ phāng-lāi, ēng Góa ê chhiú jia-lí; thèng-hāu Góa kè-khì; ²³ jiân-āu Góa beh kiu Góa ê chhiú tò-tńg, lí chiū ōe khòaⁿ-kìⁿ Góa ê ka-chiah-āu; chóng-sī bōe-tit-thang khòaⁿ-kìⁿ Góa ê bīn.

=== 出埃及記 · 第 34 章 ===

¹ 耶和華對摩西講：你phah兩塊石碑，kap以前ê相同，你前所phah破hiahê 碑；hit頂面ê字，我beh寫tī chiahê碑。 ² 明á早起你tio̍h備辦便；透早你tio̍h 上西奈山；tī-hia，tī山尾溜，khiā tī我面前， ³ M̄-thang有人kap你上來；遍山lóng m̄-thang看見有人，tī山腳也m̄-thang hō͘牛群羊群食草。 ⁴ 伊就phah兩塊石碑，kap以前ê相同；摩西透早起來，照耶和華所吩咐伊ê，上去西奈山，手裡the̍h兩塊石碑。 ⁵ 耶和華坐雲臨到，kap伊khiā tī-hia，宣布耶和華ê名。 ⁶ 耶和華tùi伊ê面前經過，宣布講：耶和華，耶和華是有憐憫，有恩典ê上帝，無快受氣，koh有豐盛ê慈愛kap誠實； ⁷ 為千萬人存慈愛，赦免罪過、過失kap罪惡；決斷無掠有罪ê做無罪；beh歸咎(kiū)伊ê罪，tùi父到kiáⁿ，到孫，到三四代。 ⁸ 摩西緊緊àⁿ落地敬拜，講： ⁹ 主ah，我若得tio̍h恩典tī你ê面前，求主tī阮中間相kap行；因為這是頷頸硬ê百姓；koh求你赦免阮ê罪過，kap阮ê罪惡，掠阮做你ê產業。 ¹⁰ 耶和華講：看ah，我beh立約，beh tī你眾百姓ê面前行奇妙ê事，是天下萬國中所bē-bat行ê；tī你四圍ê眾百姓，就beh看見耶和華ê所做；因為我tùi你所行ê，是thang驚ê事。 ¹¹ 我今á日所吩咐你ê，你tio̍h執守；看ah，我beh對你ê面前趕出A-mô͘-lī、迦南、Hek、Pí-lī-sé、Hi-bī、Iâ-pò͘-su hiahê族。 ¹² 你家己謹慎，m̄-thang kap你所去hit所在khiā起ê百姓立約，驚了成做lín中間ê羅網。 ¹³ 就是tio̍h拆in ê祭壇，phah碎in雕刻ê柱，剉(chhò) in ê A-sià-la̍h。 ¹⁴ M̄-thang敬拜別個上帝；因為耶和華ê名稱做獨尊，伊是獨尊ê上帝； ¹⁵ 驚了你kap hit所在khiā起ê百姓立約，in塊 in ê上帝行邪淫，祭祀in ê上帝，有人叫你，你就食伊ê祭物； ¹⁶ koh驚了你kā你ê kiáⁿ chhōa in ê cha-bó͘-kiáⁿ做bó͘，in ê cha-bó͘-kiáⁿ塊 in ê上帝行邪淫，hō͘你ê kiáⁿ也tè in ê上帝行邪淫。 ¹⁷ 你m̄-thang為家己鑄造chiahê上帝。 ¹⁸ 你tio̍h守除酵節。照我所吩咐你ê，tī A-pit月內所定tio̍h ê日期，食無酵餅七日，因為你tī A-pit月內出埃及。 ¹⁹ 見若頭胎ê，lóng是我ê，一切ê cheng-siⁿ頭水ê，無論是牛，是羊，公ê lóng是我ê。 ²⁰ 頭水ê驢tio̍h用羊á替贖；若無替贖，就tio̍h kòng折伊ê頷頸。見若你頭上ê kiáⁿ，lóng tio̍h贖回。人來見我m̄-thang空手。 ²¹ 你六日tio̍h做工，第七日tio̍h安歇；tī栽種收割ê時也tio̍h安歇。 ²² 麥起頭熟，收割ê時，tio̍h守七七日節。 Koh tī年尾，tio̍h守收khǹg ê節。 ²³ Lín一切ê ta-po͘丁，tio̍h一年三pái來見主耶和華，以色列ê上帝。 ²⁴ 我beh對你ê面前趕出外邦人，開闊你ê境界；你一年三pái上去見耶和華，你ê上帝ê時，的確無人貪你ê土地。 ²⁵ 你m̄-thang將我ê牲禮ê血，chham有酵ê物來獻；pôaⁿ過節ê祭物也m̄-thang留到隔早起。 ²⁶ 地裡第一起頭熟 ê物，tio̍h送到耶和華你ê上帝ê厝。煮山羊á m̄-thang用伊ê母ê奶。 ²⁷ 耶和華對摩西講：你tio̍h寫chiahê話，因為我是照chiahê話kap你以及以色列立約。 ²⁸ 摩西kap耶和華tī-hia四十日四十暝，無食餅無lim水。伊將chitê約ê話，就是十條誡，寫tī兩塊碑。 ²⁹ 摩西落西奈山ê時，伊ê手the̍h兩塊約碑，伊落山ê時，伊ê面，因為耶和華kap伊講話，就射出光，摩西家己m̄知。 ³⁰ 亞倫kap以色列眾人看見摩西ê時，看ah，伊ê面射出光；in就驚，m̄敢óa近伊。 ³¹ 摩西叫in來，亞倫kap會中chiahê頭人就lóng 倒tńg到伊hia；摩西就kap in講話。 ³² 然後以色列眾人lóng進前來；伊就將耶和華tī西奈山kap伊所講一切ê話，lóng吩咐in。 ³³ 摩西kap in講話明白，就用帕罩面。 ³⁴ 總是摩西入去耶和華面前kap伊講話，帕就掀起來，到伊出來。伊出來ê時，就將耶和華所吩咐ê，kā以色列人講。 ³⁵ 以色列人看見摩西ê面，摩西ê面射出光，摩西koh用帕罩面，thèng候到伊入去kap耶和華講話帕就掀起來。

=== 出埃及記 · 第 34 章 ===

¹ Iâ-hô-hoa tùi Mô͘-se kóng, Lí phah nn̄g-tè chio̍h-pi, kap í-chêng-ê saⁿ-tâng, lí chêng só͘ phah-phòa hiah-ê pi; hit téng-bīn ê jī, Góa beh siá tī chiah-ê pi. ² Bîn-á-chá-khí lí tio̍h pī-pān piān; thàu-chá lí tio̍h chiūⁿ Se-nái soaⁿ; tī-hia, tī soaⁿ-bé-liu, khiā tī Góa bīn-chêng, ³ M̄-thang ū lâng kap lí chiūⁿ-lâi; piàn-soaⁿ lóng m̄-thang khòaⁿ-kìⁿ ū lâng, tī soaⁿ-kha iā m̄-thang hō͘ gû-kûn iûⁿ-kûn chia̍h-chháu. ⁴ I chiū phah nn̄g tè chio̍h-pi, kap í-chêng-ê saⁿ-tâng; Mô͘-se thàu-chá khí-lâi, chiàu Iâ-hô-hoa só͘ hoan-hù i ê, chiūⁿ-khì Se-nái soaⁿ, chhiú-ni̍h the̍h nn̄g tè chio̍h-pi. ⁵ Iâ-hô-hoa chē-hûn lîm-kàu, kap i khiā tī-hia, soan-pò͘ Iâ-hô-hoa ê miâ. ⁶ Iâ-hô-hoa tùi i ê bīn-chêng keng-kè, soan-pò͘ kóng, Iâ-hô-hoa, Iâ-hô-hoa sī ū lîn-bín, ū un-tián ê Siōng-tè, bô khoài siū-khì, koh ū hong-sēng ê chû-ài kap sêng-si̍t; ⁷ ūi chheng-bān lâng chûn chû-ài, sià-bián chōe-kòa, kè-sit kap chōe-ok; koat-toàn bô lia̍h ū-chōe-ê chòe bô chōe; beh kui-kiū i ê chōe, tùi pē kàu kiáⁿ, kàu sun, kàu saⁿ-sì-tāi. ⁸ Mô͘-se kín-kín àⁿ-lo̍h tōe kèng-pài, kóng, ⁹ Chú ah, góa nā tit-tio̍h un-tián tī Lí ê bīn-chêng, kiû Chú tī goán tiong-kan saⁿ-kap kiâⁿ; in-ūi che sī ām-kún ngī ê peh-sìⁿ; koh kiû Lí sià-bián goán ê chōe-kòa, kap goán ê chōe-ok, lia̍h goán chòe Lí ê sán-gia̍p. ¹⁰ Iâ-hô-hoa kóng, Khòaⁿ ah, Góa beh li̍p-iok, beh tī lí chèng peh-sìⁿ ê bīn-chêng kiâⁿ kî-biāu ê sū, sī thiⁿ-ē bān-kok-tiong só͘ bē-bat kiâⁿ-ê; tī lí sì-ûi ê chèng peh-sìⁿ, chiū beh khòaⁿ-kìⁿ Iâ-hô-hoa ê só͘-chòe; in-ūi Góa tùi lí só͘ kiâⁿ-ê, sī thang kiaⁿ ê sū. ¹¹ Góa kin-á-ji̍t só͘ hoan-hù lí-ê, lí tio̍h chip-siú; khòaⁿ ah, Góa beh tùi lí ê bīn-chêng kóaⁿ-chhut A-mô͘-lī, Ka-lâm, Hek, Pí-lī-sé, Hi-bī, Iâ-pò͘-su hiah-ê cho̍k. ¹² Lí ka-kī kín-sīn, m̄-thang kap lí só͘ khì hit só͘-chāi khiā-khí ê peh-sìⁿ li̍p-iok, kiaⁿ-liáu chiâⁿ-chòe lín tiong-kan ê lô-bāng. ¹³ Chiū-sī tio̍h thiah in ê chè-tôaⁿ, phah-chhùi in tiau-khek ê thiāu, chhò in ê A-sià-la̍h. ¹⁴ M̄-thang kèng-pài pa̍t ê Siōng-tè; in-ūi Iâ-hô-hoa ê miâ chheng-chòe To̍k-chun, i sī to̍k-chun ê Siōng-tè; ¹⁵ kiaⁿ-liáu lí kap hit só͘-chāi khiā-khí ê peh-sìⁿ li̍p-iok, in tè in ê siōng-tè kiâⁿ siâ-îm, chè-sū in ê siōng-tè, ū lâng kiò lí, lí chiū chia̍h i ê chè-mi̍h; ¹⁶ koh kiaⁿ-liáu lí kā lí ê kiáⁿ chhōa in ê cha-bó͘-kiáⁿ chòe-bó͘, in ê cha-bó͘-kiáⁿ tè in ê siōng-tè kiâⁿ siâ-îm, hō͘ lí ê kiáⁿ iā tè in ê siōng-tè kiâⁿ siâ-îm. ¹⁷ Lí m̄-thang ūi ka-kī chù-chō chiah-ê siōng-tè. ¹⁸ Lí tio̍h siú tû-kàⁿ-choeh. Chiàu Góa só͘ hoan-hù lí-ê, tī A-pit ge̍h-lāi só͘ tiāⁿ-tio̍h ê ji̍t-kî, chia̍h bô-kàⁿ-piáⁿ chhit-ji̍t, in-ūi lí tī A-pit ge̍h-lāi chhut Ai-ki̍p. ¹⁹ Kìⁿ-nā thâu-thai-ê, lóng sī Góa-ê, it-chhè ê cheng-siⁿ thâu-chúi-ê, bô-lūn sī gû, sī iûⁿ, kang-ê lóng sī Góa-ê. ²⁰ Thâu-chúi ê lû tio̍h ēng iûⁿ-á thòe-sio̍k; nā bô thòe-sio̍k, chiū tio̍h kòng-chi̍h i ê ām-kún. Kìⁿ-nā lí thâu-chiūⁿ ê kiáⁿ, lóng tio̍h sio̍k-hôe. Lâng lâi kìⁿ Góa m̄-thang khang-chhiú. ²¹ Lí la̍k-ji̍t tio̍h chòe kang, tē-chhit ji̍t tio̍h an-hioh; tī chai-chèng siu-koah ê sî iā tio̍h an-hioh. ²² Be̍h khí-thâu se̍k, siu-koah ê sî, tio̍h siú chhit-chhit-ji̍t choeh. Koh tī nî-bé, tio̍h siú siu-khǹg ê choeh. ²³ Lín it-chhè ê ta-po͘-teng, tio̍h chi̍t-nî saⁿ-pái lâi kìⁿ Chú Iâ-hô-hoa, Í-sek-lia̍t ê Siōng-tè. ²⁴ Góa beh tùi lí ê bīn-chêng kóaⁿ-chhut gōa-pang lâng, khui-khoah lí ê kéng-kài; lí chi̍t-nî saⁿ-pái chiūⁿ-khì kìⁿ Iâ-hô-hoa, lí ê Siōng-tè ê sî, tek-khak bô lâng tham lí ê thó͘-tōe. ²⁵ Lí m̄-thang chiong Góa ê seng-lé ê huih, chham ū kàⁿ ê mi̍h lâi hiàn; pôaⁿ-kè-choeh ê chè-mi̍h iā m̄-thang lâu kàu keh chá-khí. ²⁶ Tōe-ni̍h tē-it khí-thâu se̍k ê mi̍h, tio̍h sàng kàu Iâ-hô-hoa lí ê Siōng-tè ê chhù. Chú soaⁿ-iûⁿ-á m̄-thang ēng i ê bú ê lin. ²⁷ Iâ-hô-hoa tùi Mô͘-se kóng, Lí tio̍h siá chiah-ê ōe, in-ūi Góa sī chiàu chiah-ê ōe kap lí í-ki̍p Í-sek-lia̍t li̍p-iok. ²⁸ Mô͘-se kap Iâ-hô-hoa tī-hia sì-cha̍p ji̍t sì-cha̍p mî, bô chia̍h piáⁿ bô lim chúi. I chiong chit-ê iok ê ōe, chiū-sī cha̍p-tiâu-kài, siá tī nn̄g tè pi. ²⁹ Mô͘-se lo̍h Se-nái soaⁿ ê sî, i ê chhiú the̍h nn̄g tè iok-pi, i lo̍h-soaⁿ ê sî, i ê bīn, in-ūi Iâ-hô-hoa kap i kóng-ōe, chiū siā-chhut kng, Mô͘-se ka-kī m̄-chai. ³⁰ A-lûn kap Í-sek-lia̍t chèng-lâng khòaⁿ-kìⁿ Mô͘-se ê sî, khòaⁿ ah, i ê bīn siā-chhut kng; in chiū kiaⁿ, m̄-káⁿ óa-kūn i. ³¹ Mô͘-se kiò in lâi, A-lûn kap hōe-tiong chiah-ê thâu-lâng chiū lóng tò-tńg kàu i hia; Mô͘-se chiū kap in kóng-ōe. ³² Jiân-āu Í-sek-lia̍t chèng-lâng lóng chìn-chêng lâi; i chiū chiong Iâ-hô-hoa tī Se-nái soaⁿ kap i só͘ kóng it-chhè ê ōe, lóng hoan-hù in. ³³ Mô͘-se kap in kóng ōe bêng-pe̍k, chiū ēng phè tà-bīn. ³⁴ Chóng-sī Mô͘-se ji̍p-khì Iâ-hô-hoa bīn-chêng kap I kóng-ōe, phè chiū hian-khí-lâi, kàu i chhut-lâi. I chhut-lâi ê sî, chiū chiong Iâ-hô-hoa só͘ hoan-hù-ê, kā Í-sek-lia̍t lâng kóng. ³⁵ Í-sek-lia̍t lâng khòaⁿ-kìⁿ Mô͘-se ê bīn, Mô͘-se ê bīn siā-chhut kng, Mô͘-se koh ēng phè tà-bīn, thèng-hāu kàu i ji̍p-khì kap Iâ-hô-hoa kóng-ōe phè chiū hian-khí-lâi.

=== 出埃及記 · 第 35 章 ===

¹ 摩西招集以色列人全會，對in講：耶和華所吩咐ê話，kah lín tio̍h行ê，就是chiahê。 ² 六日tio̍h做工，第七日是lín ê聖日，是大ê安歇日，來服事耶和華；凡若tī chit日做工ê，tio̍h hō͘伊死。 ³ 當安歇日，tī lín ta̍k間厝內m̄-thang起火。 ⁴ 摩西對以色列人全會講：耶和華所吩咐ê話，是án-ni講： ⁵ Lín中間tio̍h the̍h禮物獻hō͘耶和華；見若心願ê，thang the̍h伊來，做獻hō͘耶和華ê禮物； ⁶ 就是金、銀、銅，藍色、紫色、朱紅色ê料，幼苧， ⁷ 山羊毛，染紅ê羊káng皮、海狗皮， ⁸ 皂莢柴、點燈ê油、芳ê料，thang做抹ê油 kap芳香， ⁹ 紅瑪瑙kap別樣ê寶石，thang鑲tī í-hut-tek kap pó͘褂。 ¹⁰ Lín中間見若心有智慧ê，lóng tio̍h來做耶和華一切所吩咐ê； ¹¹ 就是會幕，伊ê布棚，kap伊ê蓋(kòa)，伊ê鉤，伊ê板，伊ê橫kông，伊ê柱，伊ê臼； ¹² 櫃，kap伊ê kǹg，施恩所，kap 遮閘(jia-cha̍h)ê帳籬； ¹³ 桌kap伊ê kǹg，kap伊ê器具，kap排列ê餅； ¹⁴ 點光ê燈台kap伊ê器具，燈盞kap點光 ê油； ¹⁵ 香壇kap伊ê kǹg、抹ê油，kap芳香，以及會幕門ê門籬； ¹⁶ 燒祭ê壇kap伊銅ê網，kap伊ê kǹg，以及伊一切ê器具，洗盪 ê盆kap伊ê座； ¹⁷ 帳ê帳帷，kap伊ê柱，in ê臼，kap帳門ê門籬； ¹⁸ 會幕所釘ê釘，kap帳所釘ê釘，kap in ê索； ¹⁹ 精工ê衣服，tī聖所穿來服事ê，就是祭司亞倫ê聖衫kap伊ê kiáⁿ ê衫，穿來擔當祭司ê職。 ²⁰ 以色列人全會tùi摩西ê面前出去。 ²¹ 見若受感動，tùi心歡喜ê，lóng總來，the̍h禮物獻hō͘耶和華，用來做會幕ê工，kap一切ê路用，也用來做聖衫。 ²² 見若出tī心歡喜ê，ta-po͘婦人lóng來，ta̍k-ê將金器，就是胸前ê pín針、耳鉤，phah印ê手指，kap手環；這是ta̍k人將伊ê禮物獻hō͘耶和華。 ²³ 見若人有藍色、紫色、朱紅色ê料，幼苧、山羊毛、染紅ê羊káng皮、海狗皮，lóng the̍h來。 ²⁴ 見若獻銀kap銅，做禮物ê，lóng the̍h來獻hō͘耶和華；見若有皂莢柴thang做甚麼路用ê，也the̍h來。 ²⁵ 見若心內有智慧ê婦女，親手紡線，將所紡ê藍色、紫色、朱紅色ê料，kap幼苧lóng the̍h來。 ²⁶ 見有智慧ê心受感動ê婦女，就紡山羊毛。 ²⁷ Chiahê頭人將紅瑪瑙，kap別樣ê寶石，thang鑲tī í-hut-tek kap pó͘褂ê，lóng the̍h來。 ²⁸ Koh the̍h香料kap油，thang用伊來點燈，做抹ê油，做芳ê香。 ²⁹ 以色列人，無論男女，見若心歡喜獻禮物hō͘耶和華ê，lóng歡喜the̍h禮物來，做耶和華託重摩西所吩咐in做一切ê工。 ³⁰ 摩西對以色列人講：Lín看，偤大ê支派Hō͘-jíⁿ ê孫，O͘-lī ê kiáⁿ Pí-sat-lia̍t，耶和華已經指名召伊。 ³¹ Koh用上帝ê神充滿伊，hō͘伊有智慧，有聰明，有知識，能做ta̍k樣ê工； ³² 能想出奇巧ê工，來做金、銀、銅hiahê物， ³³ 也能刻寶石來入伊；也能刻柴，能做ta̍k樣奇巧ê工。 ³⁴ Koh hō͘伊kap Tàn ê支派，A-hi-sat-boat ê kiáⁿ A-hô-lī-a-pek，心有靈竅，能教示人。 ³⁵ chiahê人伊用智慧充滿in ê心；hō͘ in會做ta̍k樣ê工，無論雕刻ê工，奇巧ê工，用藍色、紫色、朱紅色ê料，kap幼苧，繡花ê，織布ê，ta̍k樣ê工 lóng能做，也能想出奇巧ê工。

=== 出埃及記 · 第 35 章 ===

¹ Mô͘-se chio-chi̍p Í-sek-lia̍t lâng choân-hōe, tùi in kóng, Iâ-hô-hoa só͘ hoan-hù ê ōe, kah lín tio̍h kiâⁿ-ê, chiū-sī chiah-ê. ² La̍k-ji̍t tio̍h chòe-kang, tē-chhit ji̍t sī lín ê sèng-ji̍t, sī tōa ê an-hioh-ji̍t, lâi ho̍k-sāi Iâ-hô-hoa; hoān-nā tī chit-ji̍t chòe-kang-ê, tio̍h hō͘ i sí. ³ Tng an-hioh-ji̍t, tī lín ta̍k keng chhù-lāi m̄-thang khí-hé. ⁴ Mô͘-se tùi Í-sek-lia̍t lâng choân-hōe kóng, Iâ-hô-hoa só͘ hoan-hù ê ōe, sī án-ni kóng, ⁵ Lín tiong-kan tio̍h the̍h lé-mi̍h hiàn hō͘ Iâ-hô-hoa; kìⁿ-nā sim goān-ê, thang the̍h i lâi, chòe hiàn hō͘ Iâ-hô-hoa ê lé-mi̍h; ⁶ chiū-sī kim, gûn, tâng, lâm-sek, chí-sek, chu-âng-sek ê liāu, iù-tōe, ⁷ soaⁿ-iûⁿ-mn̂g, ní-âng ê iûⁿ-káng-phê, hái-káu-phê, ⁸ chō-kiap-chhâ, tiám-teng ê iû, phang ê liāu, thang chòe boah ê iû kap phang-hiuⁿ, ⁹ âng-bé-ló kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa. ¹⁰ Lín tiong-kan kìⁿ-nā sim ū tì-hūi-ê, lóng tio̍h lâi chòe Iâ-hô-hoa it-chhè só͘ hoan-hù-ê; ¹¹ chiū-sī hōe-bō͘, i ê pò͘-pîⁿ, kap i ê kòa, i ê kau, i ê pán, i ê hoâiⁿ-kông, i ê thiāu, i ê khū; ¹² kūi, kap i ê kǹg, si-un-só͘, kap jia-cha̍h ê tiùⁿ-lî; ¹³ toh kap i ê kǹg, kap i ê khì-kū, kap pâi-lia̍t ê piáⁿ; ¹⁴ tiám-kng ê teng-tâi kap i ê khì-kū, teng-chóaⁿ kap tiám-kng ê iû; ¹⁵ hiuⁿ-tôaⁿ kap i ê kǹg, boah ê iû, kap phang-hiuⁿ, í-ki̍p hōe-bō͘ mn̂g ê mn̂g-lî; ¹⁶ sio-chè ê tôaⁿ kap i tâng ê bāng, kap i ê kǹg, í-ki̍p i it-chhè ê khì-kū, sóe-tn̄g ê phûn kap i ê chō; ¹⁷ tiûⁿ ê tiùⁿ-ûi, kap i ê thiāu, in ê khū, kap tiûⁿ-mn̂g ê mn̂g-lî; ¹⁸ hōe-bō͘ só͘ tèng ê teng, kap tiûⁿ só͘ tèng ê teng, kap in ê soh; ¹⁹ cheng-kong ê i-ho̍k, tī sèng-só͘ chhēng lâi ho̍k-sāi-ê, chiū-sī chè-si A-lûn ê sèng-saⁿ kap i ê kiáⁿ ê saⁿ, chhēng lâi tam-tng chè-si ê chit. ²⁰ Í-sek-lia̍t lâng choân-hōe tùi Mô͘-se ê bīn-chêng chhut-khì. ²¹ Kìⁿ-nā siū kám-tōng, tùi sim hoaⁿ-hí-ê, lóng-chóng lâi, the̍h lé-mi̍h hiàn hō͘ Iâ-hô-hoa, ēng lâi chòe hōe-bō͘ ê kang, kap it-chhè ê lō͘-ēng, iā ēng lâi chòe sèng-saⁿ. ²² Kìⁿ-nā chhut tī sim hoaⁿ-hí-ê, ta-po͘ hū-jîn lóng lâi, ta̍k-ê chiong kim-khì, chiū-sī heng-chêng ê pín-chiam, hī-kau, phah-ìn ê chhiú-chí, kap chhiú-khoân; che sī ta̍k-lâng chiong i ê lé-mi̍h hiàn hō͘ Iâ-hô-hoa. ²³ Kìⁿ-nā lâng ū lâm-sek, chí-sek, chu-âng-sek ê liāu, iù-tōe, soaⁿ-iûⁿ-mn̂g, ní-âng ê iûⁿ-káng-phê, hái-káu-phê, lóng the̍h-lâi. ²⁴ Kìⁿ-nā hiàn gûn kap tâng, chòe lé-mi̍h-ê, lóng the̍h-lâi hiàn hō͘ Iâ-hô-hoa; kìⁿ-nā ū chō-kiap-chhâ thang chòe sím-mi̍h lō͘-ēng-ê, iā the̍h-lâi. ²⁵ Kìⁿ-nā sim-lāi ū tì-hūi ê hū-lú, chhin-chhiú pháng sòaⁿ, chiong só͘ pháng ê lâm-sek, chí-sek, chu-âng-sek ê liāu, kap iù-tōe lóng the̍h-lâi. ²⁶ Kìⁿ-ū tì-hūi ê sim siū kám-tōng ê hū-lú, chiū pháng soaⁿ-iûⁿ-mn̂g. ²⁷ Chiah-ê thâu-lâng chiong âng-bé-ló, kap pa̍t-iūⁿ ê pó-chio̍h, thang siuⁿ tī í-hut-tek kap pó͘-kòa-ê, lóng the̍h-lâi. ²⁸ Koh the̍h hiuⁿ-liāu kap iû, thang ēng i lâi tiám teng, chòe boah ê iû, chòe phang ê hiuⁿ. ²⁹ Í-sek-lia̍t lâng, bô-lūn lâm-lú, kìⁿ-nā sim hoaⁿ-hí hiàn lé-mi̍h hō͘ Iâ-hô-hoa-ê, lóng hoaⁿ-hí the̍h lé-mi̍h lâi, chòe Iâ-hô-hoa thok-tiōng Mô͘-se só͘ hoan-hù in chòe it-chhè ê kang. ³⁰ Mô͘-se tùi Í-sek-lia̍t lâng kóng, Lín khòaⁿ, Iû-tāi ê chi-phài Hō͘-jíⁿ ê sun, O͘-lī ê kiáⁿ Pí-sat-lia̍t, Iâ-hô-hoa í-keng chí miâ tiàu i. ³¹ Koh ēng Siōng-tè ê sîn chhiong-móa i, hō͘ i ū tì-hūi, ū chhang-miâ, ū chai-bat, ōe chòe ta̍k-iūⁿ ê kang; ³² ōe siūⁿ-chhut kî-khiáu ê kang, lâi chòe kim, gûn, tâng hiah-ê mi̍h, ³³ iā ōe khek pó-chio̍h lâi ji̍p-i; iā ōe khek chhâ, ōe chòe ta̍k-iūⁿ kî-khiáu ê kang. ³⁴ Koh hō͘ i kap Tàn ê chi-phài, A-hi-sat-boat ê kiáⁿ A-hô-lī-a-pek, sim ū lêng-khiàu, ōe kà-sī lâng. ³⁵ Chiah-ê lâng I ēng tì-hūi chhiong-móa in ê sim; hō͘ in ōe chòe ta̍k-iūⁿ ê kang, bô-lūn tiau-khek ê kang, kî-khiáu ê kang, ēng lâm-sek, chí-sek, chu-âng-sek ê liāu, kap iù-tōe, siù hoe-ê, chit-pò͘-ê, ta̍k-iūⁿ ê kang lóng ōe chòe, iā ōe siūⁿ-chhut kî-khiáu ê kang.

=== 出埃及記 · 第 36 章 ===

¹ Pí-sat-lia̍t kap A-hô-lī-a-pek，kap lóng總心有智慧ê人，就是得tio̍h耶和華賞賜智慧聰明hō͘ in知做聖所ta̍k樣路用ê工ê，lóng tio̍h照耶和華所吩咐ê做工。 ² 摩西召Pí-sat-lia̍t，A-hô-lī-a-pek，kap見若心有智慧ê人來，就是耶和華用智慧賞賜in ê心，心受感動來做工ê。 ³ In tùi摩西the̍h一切ê禮物，就是以色列人為tio̍h做聖所kap內面所用ê物the̍h來ê。百姓ta̍k早起猶原用甘心獻ê禮物the̍h來hō͘伊。 ⁴ 見若做聖所ê工chiahê有智慧ê人，lóng 暫停in所做ê工； ⁵ 來對摩西講：百姓所the̍h來ê，比耶和華命令做ê工所tio̍h用ê料，過額有chhun。 ⁶ 摩西出命，in就宣布tī全營，講：無論男女莫得koh做甚麼來，獻hō͘聖所；Tùi án-ni，阻止百姓無koh the̍h來。 ⁷ 因為in所有ê材料，夠額thang做一切所tio̍h做chiahê工，soah有chhun。 ⁸ In中間見若心有智慧做工ê，用十幅ê帳做會幕；chiahê帳是用過紡ê幼苧，kap藍色、紫色、朱紅色ê料；也用奇巧ê工織成ki-lō͘-peng做伊。 ⁹ 每幅帳長二十八肘，闊四肘；帳lóng是一樣ê寸尺。 ¹⁰ Chit五幅帳，伊chhòng hō͘ in ta̍k幅相連；hit五幅帳也ta̍k幅相連。 ¹¹ Tī chitê相連ê帳，路尾幅ê邊á做藍色ê鈕phàn；tī hitê相連ê帳，路尾幅ê邊á也án-ni做。 ¹² 伊tī chit領帳做五十個鈕phàn，koh tī第二領帳相連ê邊á，也做五十個鈕phàn；鈕phàn lóng兩個兩個相對。 ¹³ Koh做五十個金鉤，用伊來鉤hō͘帳相連；就成做一个會幕。 ¹⁴ 伊koh用山羊毛織十一幅ê帳，做會幕頂ê布棚； ¹⁵ 每幅帳長三十肘，闊四肘；十一幅帳lóng一樣ê寸尺。 ¹⁶ 將五幅帳連做一幅，koh將六幅帳連做一幅。 ¹⁷ Tī chitê相連ê帳路尾幅ê邊á，伊做五十個鈕phàn，tī hitê相連路尾幅ê邊á也做五十個鈕phàn。 ¹⁸ 伊koh做五十個銅鉤，hō͘布棚連做一个。 ¹⁹ Koh用染紅ê羊皮做布棚ê 蓋；koh用海狗皮掛tī頂面。 ²⁰ 伊用皂莢柴做會幕khiā ê板。 ²¹ Khiā ê板長十肘，闊一肘半。 ²² Ta̍k塊板有兩個榫相排；會幕一切ê板lóng照án-ni做。 ²³ 伊做會幕ê板，南pêng ê南勢二十塊板； ²⁴ tī chiahê二十塊板ê下面做四十個銀臼；一塊板ê下面有兩個臼來穿伊兩支榫；koh一塊板ê下面也有兩個臼來穿伊兩支榫。 ²⁵ 會幕第二面，就是北面，也做板二十塊， ²⁶ kap in ê銀臼四十個；chitê板ê下面有兩個臼，hitê板ê下面也有兩個臼。 ²⁷ 會幕ê後面，就是西面，也做六塊板。 ²⁸ 會幕後面ê兩個角頭，做兩塊板。 ²⁹ 板ê下長，兩個相同，直到頂面第一个環lóng是ka-nn̂g-ê；兩個角頭ê板lóng是án-ni做。 ³⁰ 有八個板，kap十六個銀臼；ta̍k塊板ê下面有兩個臼。 ³¹ 伊用皂莢柴做橫kông；為tio̍h會幕chit-pêng ê板做五支， ³² 為tio̍h會幕hit-pêng ê板做五支；koh為tio̍h會幕後西面ê板做五支。 ³³ 板ê對中hit支橫kông：hō͘伊tùi chit頭到hit頭。 ³⁴ 板用金包；koh做板ê金環來套kông；kông也用金包。 ³⁵ Koh用藍色、紫色、朱紅色ê料，kap過紡ê幼苧織帳籬；chitê帳籬用奇巧ê工織成ki-lō͘-peng來做ê。 ³⁶ Koh用皂莢柴為tio̍h伊做四支柱，用金包伊；in ê鉤是金ê；koh為tio̍h in鑄四個銀臼。 ³⁷ 用藍色、紫色、朱紅色ê料，kap過紡ê幼苧，用繡花ê工做布棚門ê門籬， ³⁸ kap伊五支柱，kap in ê鉤；in ê柱斗kap橫桿用金包伊；hit五個臼是銅ê。

=== 出埃及記 · 第 36 章 ===

¹ Pí-sat-lia̍t kap A-hô-lī-a-pek, kap lóng-chóng sim ū tì-hūi ê lâng, chiū-sī tit-tio̍h Iâ-hô-hoa siúⁿ-sù tì-hūi chhang-miâ hō͘ in chai chòe sèng-só͘ ta̍k-iūⁿ lō͘-ēng ê kang-ê, lóng tio̍h chiàu Iâ-hô-hoa só͘ hoan-hù-ê chòe kang. ² Mô͘-se tiàu Pí-sat-lia̍t, A-hô-lī-a-pek, kap kìⁿ-nā sim ū tì-hūi ê lâng lâi, chiū-sī Iâ-hô-hoa ēng tì-hūi siúⁿ-sù in ê sim, sim siū kám-tōng lâi chòe-kang-ê. ³ In tùi Mô͘-se the̍h it-chhè ê lé-mi̍h, chiū-sī Í-sek-lia̍t lâng ūi-tio̍h chòe sèng-só͘ kap lāi-bīn só͘ ēng ê mi̍h the̍h-lâi-ê. Peh-sìⁿ ta̍k chá-khí iû-goân ēng kam-sim hiàn ê lé-mi̍h the̍h-lâi hō͘-i. ⁴ Kìⁿ-nā chòe sèng-só͘ ê kang chiah-ê ū tì-hūi ê lâng, lóng chiām-thêng in só͘ chòe ê kang; ⁵ lâi tùi Mô͘-se kóng, Peh-sìⁿ só͘ the̍h-lâi-ê, pí Iâ-hô-hoa bēng-lēng chòe ê kang só͘ tio̍h ēng ê liāu, kè-gia̍h ū chhun. ⁶ Mô͘-se chhut-bēng, in chiū soan-pò͘ tī choân-iâⁿ, kóng, Bô-lūn lâm-lú bo̍h-tit koh chòe sím-mi̍h lâi, hiàn hō͘ sèng-só͘; tùi án-ni chó͘-chí peh-sìⁿ bô koh the̍h-lâi. ⁷ In-ūi in só͘ ū ê chhâi-liāu, kàu-gia̍h thang chòe it-chhè só͘ tio̍h chòe chiah-ê kang, soah ū chhun. ⁸ In tiong-kan kìⁿ-nā sim ū tì-hūi chòe-kang-ê, ēng cha̍p-pak ê tiùⁿ chòe hōe-bō͘; chiah-ê tiùⁿ sī ēng kè-pháng ê iù-tōe, kap lâm-sek, chí-sek, chu-âng-sek ê liāu; iā ēng kî-khiáu ê kang chit-chiâⁿ ki-lō͘-peng chòe-i. ⁹ Múi pak tiùⁿ tn̂g jī-cha̍p-poeh tiú, khoah sì-tiú; tiùⁿ lóng sī chi̍t-iūⁿ ê chhùn-chhioh. ¹⁰ Chit gō͘ pak tiùⁿ, i chhòng hō͘ in ta̍k pak saⁿ-liân; hit gō͘ pak tiùⁿ iā ta̍k-pak saⁿ-liân. ¹¹ Tī chit-ê saⁿ-liân ê tiùⁿ, lō͘-bé pak ê piⁿ-á chòe lâm-sek ê liú-phàn; tī hit-ê saⁿ-liân ê tiùⁿ, lō͘-bé pak ê piⁿ-á iā án-ni chòe. ¹² I tī chit niá tiùⁿ chòe gō͘-cha̍p ê liú-phàn, koh tī tē-jī niá tiùⁿ saⁿ-liân ê piⁿ-á, iā chòe gō͘-cha̍p ê liú-phàn; liú-phàn lóng nn̄g-ê nn̄g-ê saⁿ-tùi. ¹³ Koh chòe gō͘-cha̍p ê kim-kau, ēng i lâi kau hō͘ tiùⁿ saⁿ-liân; chiū chiâⁿ-chòe chi̍t ê hōe-bō͘. ¹⁴ I koh ēng soaⁿ-iûⁿ-mn̂g chit cha̍p-it pak ê tiùⁿ, chòe hōe-bō͘-téng ê pò͘-pîⁿ; ¹⁵ múi-pak tiùⁿ tn̂g saⁿ-cha̍p tiú, khoah sì-tiú; cha̍p-it pak tiùⁿ lóng chi̍t-iūⁿ ê chhùn-chhioh. ¹⁶ Chiong gō͘ pak tiùⁿ liân-chòe chi̍t-pak, koh chiong la̍k pak tiùⁿ liân-chòe chi̍t-pak. ¹⁷ Tī chit-ê saⁿ-liân ê tiùⁿ lō͘-bé pak ê piⁿ-á, i chòe gō͘-cha̍p ê liú-phàn, tī hit-ê saⁿ-liân lō͘-bé pak ê piⁿ-á iā chòe gō͘-cha̍p ê liú-phàn. ¹⁸ I koh chòe gō͘-cha̍p ê tâng-kau, hō͘ pò͘-pîⁿ liân-chòe chi̍t-ê. ¹⁹ Koh ēng ní-âng ê iûⁿ-phê chòe pò͘-pîⁿ ê kòa; koh ēng hái-káu-phê kòa tī téng-bīn. ²⁰ I ēng chō-kiap-chhâ chòe hōe-bō͘ khiā ê pán. ²¹ Khiā ê pán tn̂g cha̍p-tiú, khoah chi̍t-tiú-pòaⁿ. ²² Ta̍k tè pán ū nn̄g ê sún saⁿ-pâi; hōe-bō͘ it-chhè ê pán lóng chiàu án-ni chòe. ²³ I chòe hōe-bō͘ ê pán, lâm-pêng ê lâm-sì jī-cha̍p tè pán; ²⁴ tī chiah-ê jī-cha̍p tè pán ê ē-bīn chòe sì-cha̍p ê gûn-khū; chi̍t tè pán ê ē-bīn ū nn̄g ê khū lâi chhēng i nn̄g ki sún; koh chi̍t tè pán ê ē-bīn iā ū nn̄g ê khū lâi chhēng i nn̄g ki sún. ²⁵ Hōe-bō͘ tē-jī bīn, chiū-sī pak-bīn, iā chòe pán jī-cha̍p-tè, ²⁶ kap in ê gûn-khū sì-cha̍p-ê; chit-ê pán ê ē-bīn ū nn̄g ê khū, hit-ê pán ê ē-bīn iā ū nn̄g ê khū. ²⁷ Hōe-bō͘ ê āu-bīn, chiū-sī sai-bīn, iā chòe la̍k tè pán. ²⁸ Hōe-bō͘ āu-bīn ê nn̄g ê kak-thâu, chòe nn̄g tè pán. ²⁹ Pán ê ē-tn̂g, nn̄g-ê saⁿ-tâng, ti̍t-kàu téng-bīn tē-it ê khoân lóng sī ka-nn̂g-ê; nn̄g ê kak-thâu ê pán lóng sī án-ni chòe. ³⁰ Ū poeh ê pán, kap cha̍p-la̍k ê gûn-khū; ta̍k tè pán ê ē-bīn ū nn̄g ê khū. ³¹ I ēng chō-kiap-chhâ chòe hoâiⁿ-kông; ūi-tio̍h hōe-bō͘ chit-pêng ê pán chòe gō͘-ki, ³² ūi-tio̍h hōe-bō͘ hit-pêng ê pán chòe gō͘-ki; koh ūi-tio̍h hōe-bō͘-āu sai-bīn ê pán chòe gō͘-ki. ³³ Pán ê tùi-tiong hit ki hoâiⁿ-kông, hō͘ i tùi chit-thâu kàu hit-thâu. ³⁴ Pán ēng kim pau; koh chòe pán ê kim-khoân lâi thò kông; kông iā ēng kim pau. ³⁵ Koh ēng lâm-sek, chí-sek, chu-âng-sek ê liāu, kap kè-pháng ê iù-tōe chit tiùⁿ-lî; chit-ê tiùⁿ-lî ēng kî-khiáu ê kang chit-chiâⁿ ki-lō͘-peng lâi chòe-ê. ³⁶ Koh ēng chō-kiap-chhâ ūi-tio̍h i chòe sì ki thiāu, ēng kim pau i; in ê kau sī kim-ê; koh ūi-tio̍h in chù sì ê gûn-khū. ³⁷ Ēng lâm-sek, chí-sek, chu-âng-sek ê liāu, kap kè-pháng ê iù-tōe, ēng siù-hoe ê kang chòe pò͘-pîⁿ mn̂g ê mn̂g-lî, ³⁸ kap i gō͘ ki thiāu, kap in ê kau; in ê thiāu-táu kap hoâiⁿ-koaiⁿ ēng kim pau i; hit gō͘ ê khū sī tâng-ê.

=== 出埃及記 · 第 37 章 ===

¹ Pí-sat-lia̍t用皂莢柴做櫃，長兩肘半，闊肘半，高肘半； ² 內外用好金包伊，四圍齒金線， ³ tī伊ê四腳kā伊鑄四個金環；chit-pêng兩環，hit-pêng兩環。 ⁴ 用皂莢柴做兩支kǹg，用金包伊。 ⁵ 將kǹg穿tī櫃邊ê環內，thang扛櫃。 ⁶ 用好金做施恩所，長兩肘半，闊肘半。 ⁷ 用金做兩個ki-lō͘-peng；用chhia ê法做伊，tī施恩所ê雙頭； ⁸ chit頭一个ki-lō͘-peng，hit頭一个ki-lō͘-peng；兩個ki-lō͘-peng tī施恩所ê雙頭kap伊連做一塊。 ⁹ 兩個 ki-lō͘-peng高高thí開翼，用in ê翼遮施恩所，in ê面相對；ki-lō͘-peng ê面àⁿ施恩所。 ¹⁰ 伊用皂莢柴做桌，長兩肘，闊一肘，高肘半； ¹¹ 用好金包伊，四圍kā伊齒金線。 ¹² 桌ê四圍各做一巴掌闊ê橫樑；橫樑頂四圍齒金線。 ¹³ Kā伊鑄四個金環，安tī伊ê四腳ê四角。 ¹⁴ 安環ê所在óa近橫樑，thang穿kǹg來扛桌。 ¹⁵ 用皂莢柴做兩支kǹg，用金包伊，thang扛桌。 ¹⁶ 也做桌頂ê器具，伊ê 盤、碗、瓶、杯，thang來灌奠，lóng用好金做。 ¹⁷ 伊用好金做燈台；燈台ê座kap中柱，伊ê杯，伊ê目，伊ê花，lóng用phah ê法，做kui座； ¹⁸ 伊ê邊á分出六支；燈台ê chit-pêng有三支，燈台ê hit-pêng有三支； ¹⁹ chit-pêng每支有三個杯，款式親像杏花，有目有花；hit-pêng每支也有三個杯，款式親像杏花，有目有花；tùi燈台分出ê六支lóng是án-ni。 ²⁰ 燈台柱有四個杯，款式親像杏花，有伊ê目，kap伊ê花。 ²¹ 兩支ê下面有一目kap伊相連；koh兩支ê下面有一目kap伊相連；koh兩支ê下面有一目kap伊相連；燈台所出ê六支lóng是án-ni。 ²² Hiah-ê目kap hiahê支lóng kap伊連做一个；lóng用好金，照phah ê法做。 ²³ 也kā伊做七個燈盞，kap伊ê chián，kap伊ê 盤，lóng用好金做ê。 ²⁴ 做燈台kap一切ê器具用好金一tha-liân-tek。 ²⁵ 伊用皂莢柴做香壇，長一肘，闊一肘，款式四方ê；高兩肘；伊hiahê角kap壇連做一塊。 ²⁶ 壇 kap伊ê頂面，kap伊ê四圍，kap伊hiahê角，lóng用好金包伊，也tī伊ê四圍齒金線。 ²⁷ Koh kā伊做兩個金環，安tī齒線ê下面，tī壇ê雙pêng兩支橫桿ê頂面；chiahê環是做穿kǹg ê路用，thang扛壇。 ²⁸ 用皂莢柴做kǹg，用金包in。 ²⁹ Koh照做芳味ê法做thang抹ê聖油，kap芳料清潔ê 香。

=== 出埃及記 · 第 37 章 ===

¹ Pí-sat-lia̍t ēng chō-kiap-chhâ chòe kūi, tn̂g nn̄g-tiú-pòaⁿ, khoah tiú-pòaⁿ, koâiⁿ tiú-pòaⁿ; ² lāi-gōa ēng hó-kim pau i, sì-ûi khí kim-sòaⁿ, ³ tī i ê sì-kha kā i chù sì ê kim-khoân; chit-pêng nn̄g khoân, hit-pêng nn̄g khoân. ⁴ Ēng chō-kiap-chhâ chòe nn̄g ki kǹg, ēng kim pau i. ⁵ Chiong kǹg chhng tī kūi-piⁿ ê khoân-lāi, thang kng kūi. ⁶ Ēng hó-kim chòe si-un-só͘, tn̂g nn̄g-tiú-pòaⁿ, khoah tiú-pòaⁿ. ⁷ Ēng kim chòe nn̄g ê ki-lō͘-peng; ēng chhia ê hoat chòe i, tī si-un-só͘ ê siang-thâu; ⁸ chit-thâu chi̍t ê ki-lō͘-peng, hit-thâu chi̍t ê ki-lō͘-peng; nn̄g ê ki-lō͘-peng tī si-un-só͘ ê siang-thâu kap i liân-chòe chi̍t-tè. ⁹ Nn̄g ê ki-lō͘-peng koâiⁿ-koâiⁿ thí-khui si̍t, ēng in ê si̍t jia si-un-só͘, in ê bīn saⁿ-tùi; ki-lō͘-peng ê bīn àⁿ si-un-só͘. ¹⁰ I ēng chō-kiap-chhâ chòe toh, tn̂g nn̄g-tiú, khoah chi̍t-tiú, koâiⁿ tiú-pòaⁿ; ¹¹ ēng hó-kim pau i, sì-ûi kā i khí kim-sòaⁿ. ¹² Toh ê sì-ûi kok chòe chi̍t pa-chiúⁿ khoah ê hoâiⁿ-niû; hoâiⁿ-niû-téng sì-ûi khí kim-sòaⁿ. ¹³ Kā i chù sì ê kim-khoân, an tī i ê sì-kha ê sì-kak. ¹⁴ An khoân ê só͘-chāi óa-kūn hoâiⁿ-niû, thang chhng-kǹg lâi kng toh. ¹⁵ Ēng chō-kiap-chhâ chòe nn̄g ki kǹg, ēng kim pau i, thang kng toh. ¹⁶ Iā chòe toh-téng ê khì-kū, i ê pôaⁿ, óaⁿ, pân, poe, thang lâi koàn-tiān, lóng ēng hó-kim chòe. ¹⁷ I ēng hó-kim chòe teng-tâi; teng-tâi ê chō kap tiong-thiāu, i ê poe, i ê ba̍k, i ê hoe, lóng ēng phah ê hoat, chòe kui-chō; ¹⁸ i ê piⁿ-á pun-chhut la̍k-ki; teng-tâi ê chit-pêng ū saⁿ-ki, teng-tâi ê hit-pêng ū saⁿ-ki; ¹⁹ chit-pêng múi-ki ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; hit-pêng múi-ki iā ū saⁿ ê poe, khoán-sit chhin-chhiūⁿ hēng-hoe, ū ba̍k ū hoe; tùi teng-tâi pun-chhut ê la̍k-ki lóng sī án-ni. ²⁰ Teng-tâi thiāu ū sì ê poe, khoán-sit chhin-chhiūⁿ hēng-hoe, ū i ê ba̍k, kap i ê hoe. ²¹ Nn̄g-ki ê ē-bīn ū chi̍t-ba̍k kap i saⁿ-liân; koh nn̄g-ki ê ē-bīn ū chi̍t-ba̍k kap i saⁿ-liân; koh nn̄g-ki ê ē-bīn ū chi̍t-ba̍k kap i saⁿ-liân; teng-tâi só͘ chhut ê la̍k-ki lóng sī án-ni. ²² Hiah-ê ba̍k kap hiah-ê ki lóng kap i liân-chòe chi̍t-ê; lóng ēng hó-kim, chiàu phah ê hoat chòe. ²³ Iā kā i chòe chhit-ê teng-chóaⁿ, kap i ê chián, kap i ê pôaⁿ, lóng ēng hó-kim chòe ê. ²⁴ Chòe teng-tâi kap it-chhè ê khì-kū ēng hó-kim chi̍t tha-liân-tek. ²⁵ I ēng chō-kiap-chhâ chòe hiuⁿ-tôaⁿ, tn̂g chi̍t-tiú, khoah chi̍t-tiú, khoán-sit sù-hong-ê; koâiⁿ nn̄g-tiú; i hiah-ê kak kap tôaⁿ liân-chòe chi̍t-tè. ²⁶ Tôaⁿ kap i ê téng-bīn, kap i ê sì-ûi, kap i hiah-ê kak, lóng ēng hó-kim pau i, iā tī i ê sì-ûi khí kim-sòaⁿ. ²⁷ Koh kā i chòe nn̄g ê kim-khoân, an tī khí-sòaⁿ ê ē-bīn, tī tôaⁿ ê siang-pêng nn̄g ki hoâiⁿ-koaiⁿ ê téng-bīn; chiah-ê khoân sī chòe chhng-kǹg ê lō͘-ēng, thang kng tôaⁿ. ²⁸ Ēng chō-kiap-chhâ chòe kǹg, ēng kim pau in. ²⁹ Koh chiàu chòe phang-bī ê hoat chòe thang boah ê sèng-iû, kap phang-liāu chheng-kiat ê hiuⁿ.

=== 出埃及記 · 第 38 章 ===

¹ 伊用皂莢柴做燒祭ê壇；長五肘，闊五肘，chitê壇是四方ê；高三肘。 ² Tī壇ê四角頭做四支角，kap壇相連做一个，用銅包伊。 ³ Koh做壇一切ê器具，伊ê盆、thuh-á、盤、叉、火鼎；一切ê器具lóng用銅做。 ⁴ Koh為tio̍h壇用銅網做一个層(chân)，安tī壇四面圍腰板ê下面，hō͘伊透到壇ê半腰。 ⁵ 為tio̍h銅ê層ê四角鑄四個環，做穿kǹg ê路用。 ⁶ 用皂莢柴做kǹg，用銅包in。 ⁷ 將kǹg穿tī壇雙pêng ê環內，用伊來扛壇；也用板做壇，壇是空殼。 ⁸ 伊用銅做洗盪 ê盆，kap銅座；是用會幕門前做工ê婦人人ê銅鏡做ê。 ⁹ 伊做會幕ê帳；hitê帳ê南勢，用過紡ê幼苧做帷，一百肘。 ¹⁰ 帷ê柱二十支，銅做ê臼二十個；柱ê鉤kap橫桿是用銀做ê。 ¹¹ 北面也一百肘，帷ê柱二十支，銅做ê 臼二十個；柱ê鉤kap橫桿是用銀做ê。 ¹² 西面有帷五十肘，帷ê柱十支，臼十個；柱ê鉤kap橫桿是用銀做ê。 ¹³ 東面ê東勢五十肘。 ¹⁴ 門chit-pêng ê帷十五肘，帷ê柱三支，有臼三個。 ¹⁵ Hit-pêng也是án-ni；帳門ê左右，kok有帷十五肘；帷ê柱三支，臼三個。 ¹⁶ 帳四面ê帳帷lóng是用過紡ê幼苧做。 ¹⁷ 柱ê 臼是銅ê，柱ê鉤kap橫桿是銀ê；柱斗是用銀包ê；帳lóng總ê柱是用銀ê橫桿穿相連ê。 ¹⁸ 帳門ê門籬是用繡花ê工，用藍色、紫色、朱紅色ê料 kap過紡ê幼苧做ê；長二十肘，高五肘，kap帳ê帷相配。 ¹⁹ In ê柱四支，銅ê臼四個，柱ê鉤是銀ê，柱斗是銀包ê，橫桿是銀ê。 ²⁰ 會幕以及帳內四圍所釘ê釘，lóng是銅ê。 ²¹ Chitê會幕是證據ê會幕；hit中間利未人所beh用物件ê總額，是照摩西所吩咐，經過祭司亞倫ê kiáⁿ，Í-tha-má ê手所算ê。 ²² 見若耶和華所吩咐摩西ê，偤大ê支派，Hō͘-jíⁿ ê孫、O͘-lī ê kiáⁿ、Pí-sat-lia̍t lóng做伊。 ²³ Kap伊相kap做ê，有Tàn ê支派，A-hi-sat-boat ê kiáⁿ，A-hô-lī-a-pek，伊是gâu雕刻，koh奇巧ê師傅，koh能用藍色、紫色、朱紅色ê料kap幼苧來繡花。 ²⁴ 做聖所一切ê工所用ê金，就是人所獻ê金，照聖所ê秤(phêng)，有二十九tha-liân-tek，koh七百三十sià-khek-le̍k。 ²⁵ 會中受算ê人所出ê銀，照聖所ê秤，有一百tha-liân-tek，koh一千七百七十五 sià-khek-le̍k。 ²⁶ 見若過去歸tī hiahê計算ê，tùi二十歲以上，有六十萬連三千五百五十人，照聖所ê秤，ta̍k人出銀半sià-khek-le̍k，就是一pí-ka。 ²⁷ 用hitê一百tha-liân-tek ê銀，鑄聖所ê臼，kap帳籬柱ê臼；一百tha-liân-tek做一百個臼，一个臼用一tha-liân-tek。 ²⁸ 用hitê一千七百七十五 sià-khek-le̍k ê銀，做柱ê鉤，也包柱斗，也做伊ê橫桿。 ²⁹ 所獻ê銅，有七十tha-lâin-tek，koh兩清四百sià-khek-le̍k。 ³⁰ 用chitê銅做會幕門ê臼，kap銅壇，kap伊ê銅網ê層，kap壇lóng總ê器具， ³¹ 以及帳四圍ê臼，kap帳門ê臼，kap會幕lóng總所釘ê釘，kap帳四圍所釘ê釘。

=== 出埃及記 · 第 38 章 ===

¹ I ēng chō-kiap-chhâ chòe sio-chè ê tôaⁿ; tn̂g gō͘-tiú, khoah gō͘-tiú, chit-ê tôaⁿ sī sù-hong-ê; koâiⁿ saⁿ-tiú. ² Tī tôaⁿ ê sì kak-thâu chòe sì ki kak, kap tôaⁿ saⁿ-liân chòe chi̍t-ê, ēng tâng pau i. ³ Koh chòe tôaⁿ it-chhè ê khì-kū, i ê phûn, thuh-á, pôaⁿ, chhe, hé-tiáⁿ; it-chhè ê khì-kū lóng ēng tâng chòe. ⁴ Koh ūi-tio̍h tôaⁿ ēng tâng-bāng chòe chi̍t ê chân, an tī tôaⁿ sì-bīn ûi-io-pán ê ē-bīn, hō͘ i thàu-kàu tôaⁿ ê pòaⁿ-io. ⁵ Ūi-tio̍h tâng ê chân ê sì-kak chù sì ê khoân, chòe chhng-kǹg ê lō͘-ēng. ⁶ Ēng chō-kiap-chhâ chòe kǹg, ēng tâng pau in. ⁷ Chiong kǹg chhng tī tôaⁿ siang-pêng ê khoân-lāi, ēng i lâi kng tôaⁿ; iā ēng pán chòe tôaⁿ, tôaⁿ sī khang-khak. ⁸ I ēng tâng chòe sóe-tn̄g ê phûn, kap tâng-chō; sī ēng hōe-bō͘ mn̂g-chêng chòe-kang ê hū-jîn-lâng ê tâng-kiàⁿ chòe-ê. ⁹ I chòe hōe-bō͘ ê tiûⁿ; hit-ê tiûⁿ ê lâm-sì, ēng kè-pháng ê iù-tōe chòe ûi, chi̍t-pah tiú. ¹⁰ Ûi ê thiāu jī-cha̍p ki, tâng-chòe ê khū jī-cha̍p-ê; thiāu ê kau kap hoâiⁿ-koaiⁿ sī ēng gûn chòe-ê. ¹¹ Pak-bīn iā chi̍t-pah tiú, ûi ê thiāu jī-cha̍p ki, tâng-chòe ê khū jī-cha̍p ê; thiāu ê kau kap hoâiⁿ-koaiⁿ sī ēng gûn chòe-ê. ¹² Sai-bīn ū ûi gō͘-cha̍p tiú, ûi ê thiāu cha̍p-ki, khū cha̍p-ê; thiāu ê kau kap hoâiⁿ-koaiⁿ sī ēng gûn chòe-ê. ¹³ Tang-bīn ê tang-sì gō͘-cha̍p tiú. ¹⁴ Mn̂g chit-pêng ê ûi cha̍p-gō͘ tiú, ûi ê thiāu saⁿ-ki, ū khū saⁿ-ê. ¹⁵ Hit-pêng iā sī án-ni; tiûⁿ-mn̂g ê chó-iū, kok ū ûi cha̍p-gō͘ tiú; ûi ê thiāu saⁿ-ki, khū saⁿ-ê. ¹⁶ Tiûⁿ sì-bīn ê tiùⁿ-ûi lóng sī ēng kè-pháng ê iù-tōe chòe. ¹⁷ Thiāu ê khū sī tâng-ê, thiāu ê kau kap hoâiⁿ-koaiⁿ sī gûn-ê; thiāu-táu sī ēng gûn pau-ê; tiûⁿ lóng chóng ê thiāu sī ēng gûn ê hoâiⁿ-koaiⁿ chhēng saⁿ-liân-ê. ¹⁸ Tiûⁿ-mn̂g ê mn̂g-lî sī ēng siù-hoe ê kang, ēng lâm-sek, chí-sek, chu-âng-sek ê liāu kap kè-pháng ê iù-tōe chòe-ê; tn̂g jī-cha̍p tiú, koâiⁿ gō͘ tiú, kap tiûⁿ ê ûi saⁿ-phòe. ¹⁹ In ê thiāu sì-ki, tâng ê khū sì-ê, thiāu ê kau sī gûn-ê, thiāu-táu sī gûn pau-ê, hoâiⁿ-koaiⁿ sī gûn-ê. ²⁰ Hōe-bō͘ í-ki̍p tiûⁿ-lāi sì-ûi só͘ tèng ê teng, lóng sī tâng-ê. ²¹ Chit-ê hōe-bō͘ sī chèng-kù ê hōe-bō͘; hit tiong-kan Lī-bī lâng só͘ beh ēng mi̍h-kiāⁿ ê chóng-gia̍h, sī chiàu Mô͘-se só͘ hoan-hù, keng-kè chè-si A-lûn ê kiáⁿ, Í-tha-má ê chhiú só͘ sǹg-ê. ²² Kìⁿ-nā Iâ-hô-hoa só͘ hoan-hù Mô͘-se-ê, Iû-tāi ê chi-phài, Hō͘-jíⁿ ê sun, O͘-lī ê kiáⁿ, Pí-sat-lia̍t lóng chòe-i. ²³ Kap i saⁿ-kap chòe-ê, ū Tàn ê chi-phài, A-hi-sat-boat ê kiáⁿ, A-hô-lī-a-pek, i sī gâu tiau-khek, koh kî-khiáu ê sai-hū, koh ōe ēng lâm-sek, chí-sek, chu-âng-sek ê liāu kap iù-tōe lâi siù-hoe. ²⁴ Chòe sèng-só͘ it-chhè ê kang só͘ ēng ê kim, chiū-sī lâng só͘ hiàn ê kim, chiàu sèng-só͘ ê phêng, ū jī-cha̍p-káu tha-liân-tek, koh chhit-pah saⁿ-cha̍p sià-khek-le̍k. ²⁵ Hōe-tiong siū sǹg ê lâng só͘ chhut ê gûn, chiàu sèng-só͘ ê phêng, ū chi̍t-pah tha-liân-tek, koh chi̍t-chheng chhit-pah chhit-cha̍p gō͘ sià-khek-le̍k. ²⁶ Kìⁿ-nā kè-khì kui tī hiah-ê kè-sǹg-ê, tùi jī-cha̍p hè í-chiūⁿ, ū la̍k-cha̍p-bān liân saⁿ-chheng gō͘-pah gō͘-cha̍p lâng, chiàu sèng-só͘ ê phêng, ta̍k-lâng chhut-gûn pòaⁿ sià-khek-le̍k, chiū-sī chi̍t pí-ka. ²⁷ Ēng hit-ê chi̍t-pah tha-liân-tek ê gûn, chù sèng-só͘ ê khū, kap tiùⁿ-lî-thiāu ê khū; chi̍t pah tha-liân-tek chòe chi̍t-pah ê khū, chi̍t ê khū ēng chi̍t tha-liân-tek. ²⁸ Ēng hit-ê chi̍t-chheng chhit-pah chhit-cha̍p-gō͘ sià-khek-le̍k ê gûn, chòe thiāu ê kau, iā pau thiāu-táu, iā chòe i ê hoâiⁿ-koaiⁿ. ²⁹ Só͘ hiàn ê tâng, ū chhit-cha̍p tha-liân-tek, koh nn̄g-chheng sì-pah sià-khek-le̍k. ³⁰ Ēng chit-ê tâng chòe hōe-bō͘ mn̂g ê khū, kap tâng-tôaⁿ, kap i ê tâng-bāng ê chân, kap tôaⁿ lóng-chóng ê khì-kū, ³¹ í-ki̍p tiûⁿ sì-ûi ê khū, kap tiûⁿ-mn̂g ê khū, kap hōe-bō͘ lóng-chóng só͘ tèng ê teng, kap tiûⁿ sì-ûi só͘ tèng ê teng.

=== 出埃及記 · 第 39 章 ===

¹ In用藍色、紫色、朱紅色ê料做精工ê衣服，tī聖所穿來服事，koh kā亞倫做聖衫，是照耶和華所吩咐摩西ê。 ² 伊用金kap藍色、紫色、朱紅色ê料，kap過紡ê幼苧，做í-hut-tek。 ³ In將金tûi做薄片，剪做線，chham tī藍色、紫色、朱紅色ê料，kap幼苧用奇巧ê工做ê。 ⁴ Koh kā伊做披肩來連伊，hō͘伊雙pêng相連。 ⁵ Hit頂面奇巧ê工織ê帶，所用來hâ-ê，kap í-hut-tek同一樣ê做法，kap伊連做一塊，用金kap藍色、紫色、朱紅色ê料，kap過紡ê幼苧做伊；照耶和華所吩咐摩西ê。 ⁶ Koh tok紅瑪瑙入tī金槽裡，照刻印ê法，刻以色列hiahê kiáⁿ ê名tī hit頂面； ⁷ 安tī í-hut-tek ê披肩，為以色列人做記念ê石；照耶和華所吩咐摩西ê。 ⁸ 伊用奇巧ê師傅ê手工做補褂，kap í-hut-tek同一樣ê做法；用金kap藍色、紫色、朱紅色ê料，kap過紡ê幼苧做ê。 ⁹ 補褂是四方ê；拗(áu)做雙重；長一掠，闊一掠，是雙重ê。 ¹⁰ 頂面入寶石四chōa，一chōa是紅寶石、黃玉、紅玉；這是第一chōa。 ¹¹ 第二chōa是綠寶石、藍寶石、金剛石。 ¹² 第三chōa是紫色ê瑪瑙，白色ê瑪瑙，紫色ê水晶。 ¹³ 第四chōa是綠玉、紅瑪瑙、碧玉；chiahê lóng入tī 金槽內。 ¹⁴ Chiahê寶石照以色列ê kiáⁿ ê名，共十二塊，親像刻印，每塊刻一个名，為tio̍h十二支派來做伊。 ¹⁵ In用好金phah鍊á，親像索á，安tī補褂。 ¹⁶ In koh做兩個金槽kap兩個金環，將chit兩個環安tī補褂 ê雙頭。 ¹⁷ 將所phah hit兩條金鍊á，連tī 雙頭兩個環。 ¹⁸ 用所phah兩條鍊á ê雙頭，連tī兩個槽，安tī í-hut-tek披肩ê頭前。 ¹⁹ 做兩個金環，hē tī補褂雙頭ê墘(kîⁿ)，近í-hut-tek ǹg內hit-pêng。 ²⁰ Koh做兩個金環，安tī í-hut-tek披肩下面ê頭前，óa近相連ê所在，tī í-hut-tek奇巧ê工所織ê帶ê頂面。 ²¹ In用藍色ê幼帶，將pó͘褂 ê環kap í-hut-tek ê環縛相連，hō͘伊連(liâm)tī í-hut-tek奇巧ê工所織ê帶；hō͘補褂 kap í-hut-tek無離縫；是照耶和華所吩咐摩西ê。 ²² 伊用織布ê工做í-hut-tek內面ê外袍，kui領是藍色。 ²³ 袍ê對中做一个領孔；孔ê周圍織領緣，親像戰甲ê領孔，免得破裂。 ²⁴ 袍ê下腳pô͘，用藍色、紫色、朱紅色ê料，kap過紡ê幼苧，做石榴。 ²⁵ Koh用好金做銜鈴，用銜鈴，kâⁿ石榴，hē tī袍四圍ê下腳pô͘，石榴ê中間； ²⁶ 一粒銜鈴，一粒石榴，一粒銜鈴，一粒石榴，tī袍四圍ê ē-kha-pô͘，thang穿來服事；是照耶和華所吩咐摩西ê。 ²⁷ In用織成ê幼苧布，kā亞倫kap伊hiahê kiáⁿ做內衫。 ²⁸ 也做幼苧布ê帽，kap幼苧布súi-súi包頭殼ê巾，用過紡ê幼苧布做褲。 ²⁹ Koh用過紡ê幼苧，kap藍色、紫色、朱紅色ê料，用繡花ê手工，做腰帶；是照耶和華所吩咐摩西ê。 ³⁰ In用好金做聖ê冕旒ê牌，照刻印ê法；刻字tī hit頂面，講：做聖歸耶和華。 ³¹ Koh用藍色ê帶，將牌縛tī帽頂；是照耶和華所吩咐摩西ê。 ³² Tùi án-ni，聚集ê會幕一切ê工lóng做明白，凡若耶和華所吩咐摩西ê，以色列人照án-ni做。 ³³ In送到摩西hia，就是會幕、布棚，kap lóng總ê器具，伊ê 鉤、板、kông、柱、臼； ³⁴ 染紅羊káng皮ê蓋，海狗皮ê蓋，kap遮閘ê帳籬， ³⁵ 法櫃kap伊ê kǹg，kap施恩所； ³⁶ 桌kap伊lóng總ê器具，kap排列ê餅； ³⁷ 好金ê燈台，kap伊ê燈盞，就是排列ê燈盞，kap伊lóng總ê器具，kap點光 ê油； ³⁸ 金壇，抹ê油，芳ê香料，布棚門ê門籬； ³⁹ 銅壇，kap伊ê銅ê層，伊ê kǹg，kap伊lóng總ê器具，洗盪 ê盆kap伊ê座， ⁴⁰ 帳ê帳帷 kap伊ê柱，伊ê臼，帳門ê門籬，用ê索，釘ê釘，kap布棚kap會幕內一概做路用ê器具； ⁴¹ 精工ê衣服，tī聖所穿來服事，kap祭司亞倫ê聖衫，以及伊ê kiáⁿ e衫，做祭司來服事。 ⁴² 以色列人照耶和華所吩咐摩西一切ê話，做一切ê工。 ⁴³ 摩西看見一切ê工，看ah，in已經做成，照耶和華所吩咐ê，in照án-ni做；摩西就kā in祝福。

=== 出埃及記 · 第 39 章 ===

¹ In ēng lâm-sek, chí-sek, chu-âng-sek ê liāu chòe cheng-kong ê i-ho̍k, tī sèng-só͘ chhēng lâi ho̍k-sāi, koh kā A-lûn chòe sèng-saⁿ, sī chiàu Iâ-hô-hoa só͘ hoan-hù Mô͘-se-ê. ² I ēng kim kap lâm-sek, chí-sek, chu-âng-sek ê liāu, kap kè-pháng ê iù-tōe, chòe í-hut-tek. ³ In chiong kim tûi chòe po̍h-phìⁿ, chián chòe sòaⁿ, chham tī lâm-sek, chí-sek, chu-âng-sek ê liāu, kap iù-tōe ēng kî-khiáu ê kang chòe-ê. ⁴ Koh kā i chòe phi-kian lâi liân-i, hō͘ i siang-pêng saⁿ-liân. ⁵ Hit téng-bīn kî-khiáu ê kang chit-ê tòa, só͘ ēng lâi hâ-ê, kap í-hut-tek tâng-chi̍t-iūⁿ ê chòe-hoat, kap i liân-chòe chi̍t-tè, ēng kim kap lâm-sek, chí-sek, chu-âng-sek ê liāu, kap kè-pháng ê iù-tōe chòe-i; chiàu Iâ-hô-hoa só͘ hoan-hù Mô͘-se-ê. ⁶ Koh tok âng-bé-ló ji̍p tī kim-chô-ni̍h, chiàu khek-ìn ê hoat, khek Í-sek-lia̍t hiah-ê kiáⁿ ê miâ tī hit téng-bīn; ⁷ an tī í-hut-tek ê phi-kian, ūi Í-sek-lia̍t lâng chòe kì-liām ê chio̍h; chiàu Iâ-hô-hoa só͘ hoan-hù Mô͘-se-ê. ⁸ I ēng kî-khiáu ê sai-hū ê chhiú-kang chòe pó͘-kòa, kap í-hut-tek tâng chi̍t-iūⁿ ê chòe-hoat; ēng kim, kap lâm-sek, chí-sek, chu-âng-sek ê liāu, kap kè-pháng ê iù-tōe chòe-ê. ⁹ Pó͘-kòa sī sù-hong-ê; áu chòe siang-têng; tn̂g chi̍t-lia̍h, khoah chi̍t-lia̍h, sī siang-têng-ê. ¹⁰ Téng-bīn ji̍p pó-chio̍h sì-chōa, chi̍t-chōa sī âng-pó-chio̍h, n̂g-ge̍k, âng-ge̍k; che sī tē-it chōa. ¹¹ Tē-jī chōa sī le̍k-pó-chio̍h, lâm-pó-chio̍h, kim-kong-chio̍h. ¹² Tē-saⁿ chōa sī chí-sek ê bé-ló, pe̍h-sek ê bé-ló, chí-sek ê chúi-chiⁿ. ¹³ Tē-sì chōa sī le̍k-ge̍k, âng-bé-ló, phek-ge̍k; chiah-ê lóng ji̍p tī kim-chô-lāi. ¹⁴ Chiah-ê pó-chio̍h chiàu Í-sek-lia̍t ê kiáⁿ ê miâ, kiōng cha̍p-jī tè, chhin-chhiūⁿ khek ìn, múi-tè khek chi̍t ê miâ, ūi-tio̍h cha̍p-jī chi-phài lâi chòe-i. ¹⁵ In ēng hó-kim phah liān-á, chhin-chhiūⁿ soh-á, an tī pó͘-kòa. ¹⁶ In koh chòe nn̄g ê kim-chô kap nn̄g ê kim-khoân, chiong chit nn̄g ê khoân an tī pó͘-kòa ê siang-thâu. ¹⁷ Chiong só͘ phah hit nn̄g tiâu kim-liān-á, liân tī siang-thâu nn̄g ê khoân. ¹⁸ Ēng só͘ phah nn̄g-tiâu liān-á ê siang-thâu, liân tī nn̄g ê chô, an tī í-hut-tek phi-kian ê thâu-chêng. ¹⁹ Chòe nn̄g ê kim-khoân, hē tī pó͘-kòa siang-thâu ê kîⁿ, kūn í-hut-tek ǹg-lāi hit-pêng. ²⁰ Koh chòe nn̄g ê kim-khoân, an tī í-hut-tek phi-kian ē-bīn ê thâu-chêng, óa-kūn saⁿ-liân ê só͘-chāi, tī í-hut-tek kî-khiáu ê kang só͘ chit-ê tòa ê téng-bīn. ²¹ In ēng lâm-sek ê iù-tòa, chiong pó͘-kòa ê khoân kap í-hut-tek ê khoân pa̍k saⁿ-liân, hō͘ i liâm tī í-hut-tek kî-khiáu ê kang só͘ chit-ê tòa; hō͘ pó͘-kòa kap í-hut-tek bô lī-phāng; sī chiàu Iâ-hô-hoa só͘ hoan-hù Mô͘-se-ê. ²² I ēng chit-pò͘ ê kang chòe í-hut-tek lāi-bīn ê gōa-phàu, kui-niá sī lâm-sek. ²³ Phàu ê tùi-tiong chòe chi̍t ê niá-khang; khang ê chiu-ûi chit niá-iân, chhin-chhiūⁿ chiàn-kah ê niá-khang, bián-tit phòa-li̍h. ²⁴ Phàu ê ē-kha-pô͘, ēng lâm-sek, chí-sek, chu-âng-sek ê liāu, kap kè-pháng ê iù-tōe, chòe sia̍h-liû. ²⁵ Koh ēng hó-kim chòe hâm-lêng, ēng hâm-lêng, kâⁿ sia̍h-liû, hē tī phàu sì-ûi ê ē-kha-pô͘, sia̍h-liû ê tiong-kan; ²⁶ chi̍t-lia̍p hâm-lêng, chi̍t-lia̍p sia̍h-liû, chi̍t-lia̍p hâm-lêng, chi̍t-lia̍p sia̍h-liû, tī phàu sì-ûi ê ē-kha-pô͘, thang chhēng lâi ho̍k-sāi; sī chiàu Iâ-hô-hoa só͘ hoan-hù Mô͘-se-ê. ²⁷ In ēng chit-chiâⁿ ê iù-tōe-pò͘, kā A-lûn kap i hiah-ê kiáⁿ chòe lāi-saⁿ. ²⁸ Iā chòe iù-tōe-pò͘ ê bō, kap iù-tōe-pò͘ súi-súi pau thâu-khak ê kun, ēng kè-pháng ê iù-tōe-pò͘ chòe-khò͘. ²⁹ Koh ēng kè-pháng ê iù-tōe, kap lâm-sek, chí-sek, chu-âng-sek ê liāu, ēng siù-hoe ê chhiú-kang, chòe io-tòa; sī chiàu Iâ-hô-hoa só͘ hoan-hù Mô͘-se ê. ³⁰ In ēng hó-kim chòe sèng ê bián-liû ê pâi, chiàu khek-ìn ê hoat; khek-jī tī hit téng-bīn, kóng, CHÒE SÈNG KUI IÂ-HÔ-HOA. ³¹ Koh ēng lâm-sek ê tòa, chiong pâi pa̍k tī bō-téng; sī chiàu Iâ-hô-hoa só͘ hoan-hù Mô͘-se-ê. ³² Tùi án-ni chū-chi̍p ê hōe-bō͘ it-chhè ê kang lóng chòe bêng-pe̍k, hoān-nā Iâ-hô-hoa só͘ hoan-hù Mô͘-se ê, Í-sek-lia̍t lâng chiàu án-ni chòe. ³³ In sàng kàu Mô͘-se hia, chiū-sī hōe-bō͘, pò͘-pîⁿ, kap lóng-chóng ê khì-kū, i ê kau, pán, kông, thiāu, khū; ³⁴ ní-âng iûⁿ-káng-phê ê kòa, hái-káu-phê ê kòa, kap jia-cha̍h ê tiùⁿ-lî, ³⁵ hoat-kūi kap i ê kǹg, kap si-un-só͘; ³⁶ toh kap i lóng-chóng ê khì-kū, kap pâi-lia̍t ê piáⁿ; ³⁷ hó-kim ê teng-tâi, kap i ê teng-chóaⁿ, chiū-sī pâi-lia̍t ê teng-chóaⁿ, kap i lóng-chóng ê khì-kū, kap tiám kng ê iû; ³⁸ kim-tôaⁿ, boah ê iû, phang ê hiuⁿ-liāu, pò͘-pîⁿ-mn̂g ê mn̂g-lî; ³⁹ tâng-tôaⁿ, kap i ê tâng ê chân, i ê kǹg, kap i lóng-chóng ê khì-kū, sóe-tn̄g ê phûn kap i ê chō, ⁴⁰ tiûⁿ ê tiùⁿ-ûi kap i ê thiāu, i ê khū, tiûⁿ-mn̂g ê mn̂g-lî, ēng ê soh, tèng ê teng, kap pò͘-pîⁿ kap hōe-bō͘-lāi it-khài chòe lō͘-ēng ê khì-kū; ⁴¹ cheng-kong ê i-ho̍k, tī sèng-só͘ chhēng lâi ho̍k-sāi, kap chè-si A-lûn ê sèng-saⁿ, í-ki̍p i ê kiáⁿ ê saⁿ, chòe chè-si lâi ho̍k-sāi. ⁴² Í-sek-lia̍t lâng chiàu Iâ-hô-hoa só͘ hoan-hù Mô͘-se it-chhè ê ōe, chòe it-chhè ê kang. ⁴³ Mô͘-se khòaⁿ-kìⁿ it-chhè ê kang, khòaⁿ ah, in í-keng chòe-chiâⁿ, chiàu Iâ-hô-hoa só͘ hoan-hù-ê, in chiàu án-ni chòe; Mô͘-se chiū kā in chiok-hok.

=== 出埃及記 · 第 40 章 ===

¹ 耶和華吩咐摩西講： ² 正月初一，你tio̍h起聚集ê會幕。 ³ 你tio̍h hē法櫃tī hit內面，用帳籬遮閘伊。 ⁴ 扛桌入去，排設頂面ê物；扛燈台入去，點伊ê燈。 ⁵ 扛燒香ê金壇，hē tī法櫃前，掛會幕門ê門籬。 ⁶ 將燒祭ê壇，hē tī聚集ê會幕門前。 ⁷ 將洗盪 ê盆，hē tī會幕kap壇ê中間，貯水tī盆內。 ⁸ Koh tī四圍khiā帳帷，掛帳門ê門籬。 ⁹ 用抹ê油抹會幕，kap其中凡所有ê，分別伊kap lóng總ê器具做聖；伊就做聖。 ¹⁰ Koh抹燒祭ê壇，kap伊lóng總ê器具，分別壇做聖；壇就做至聖。 ¹¹ 也tio̍h抹洗盪 ê盆，分別伊做聖。 ¹² Koh tio̍h chhōa亞倫kap伊hiahê kiáⁿ，到會幕門前，用水kā in洗。 ¹³ 也kā亞倫穿聖衫，koh用油抹伊，分別伊做聖，hō͘伊做祭司來服事我。 ¹⁴ Koh chhōa伊hiahê kiáⁿ來，kā in穿內袍。 ¹⁵ Tio̍h kā in抹油，親像抹in老父一樣，hō͘ in做祭司來服事我；in受抹油beh永遠做祭司，到ta̍k世代。 ¹⁶ 摩西án-ni行；lóng是照耶和華所吩咐伊ê來行。 ¹⁷ 第二年正月初一，會幕就khiā起來。 ¹⁸ 摩西khiā會幕hē hiahê臼，khiā hiahê板，穿hiahê橫kông，khiā hiahê柱。 ¹⁹ Tī會幕頂搭布棚，將布棚ê蓋，蓋(khàm)tī伊ê頂面，是照耶和華所吩咐摩西ê。 ²⁰ Koh用律法hē tī櫃內，用kǹg穿tī櫃裡，hē施恩所tī櫃頂。 ²¹ 扛櫃入會幕，掛jia遮ê帳籬，jia遮法櫃，是照耶和華所吩咐摩西ê。 ²² Koh將桌hē tī會幕內，tī會幕ê北勢，tī帳籬外； ²³ hit頂面用餅排tī耶和華ê面前；是照耶和華所吩咐摩西ê。 ²⁴ Koh hē燈台tī會幕內，kap桌相對，tī會幕ê南pêng。 ²⁵ Tī耶和華ê面前點燈；是照耶和華所吩咐摩西ê。 ²⁶ Koh hē金壇tī會幕內ê帳籬前； ²⁷ tī hit頂面燒芳料ê香；是照耶和華所吩咐摩西ê。 ²⁸ Koh掛會幕門ê門籬。 ²⁹ Tī聚集ê會幕門前，hē燒祭ê壇，將燒祭kap素祭獻tī hit頂面；是照耶和華所吩咐摩西ê。 ³⁰ Hē洗盪 ê盆tī會幕kap壇ê中間，盆內貯水，thang洗盪。 ³¹ 摩西kap亞倫kap伊hiahê kiáⁿ，tī-hia洗手洗腳。 ³² In入會幕ê時，á是就近壇 ê時，就洗；是照耶和華所吩咐摩西ê。 ³³ Tī會幕kap壇ê四圍，khiā帳帷，也掛帳帷門ê門籬；án-ni摩西就完工。 ³⁴ Hit時雲遮蓋會幕，耶和華ê榮光充滿會幕。 ³⁵ 摩西bōe能入會幕，因為雲停tī hit頂面；koh耶和華ê榮光充滿tī會幕。 ³⁶ 雲tùi會幕收上去ê時，以色列人就起身行in ê路站。 ³⁷ 雲若無收上去，in就無起身行，直直到雲收上去。 ³⁸ 日時耶和華ê雲tī會幕頂，暝時hit中間有火，tī以色列全家ê目睭前；tī in所行ê路站lóng是án-ni。

=== 出埃及記 · 第 40 章 ===

¹ Iâ-hô-hoa hoan-hù Mô͘-se kóng, ² Chiaⁿ-ge̍h chhoe-it, lí tio̍h khí chū-chi̍p ê hōe-bō͘. ³ Lí tio̍h hē hoat-kūi tī hit lāi-bīn, ēng tiùⁿ-lî jia-cha̍h-i. ⁴ Kng toh ji̍p-khì, pâi-siat téng-bīn ê mi̍h; kng teng-tâi ji̍p-khì, tiám i ê teng. ⁵ Kng sio-hiuⁿ ê kim-tôaⁿ, hē tī hoat-kūi-chêng, kòa hōe-bō͘ mn̂g ê mn̂g-lî. ⁶ Chiong sio-chè ê tôaⁿ, hē tī chū-chi̍p ê hōe-bō͘ mn̂g-chêng. ⁷ Chiong sóe-tn̄g ê phûn, hē tī hōe-bō͘ kap tôaⁿ ê tiong-kan, tóe chúi tī phûn-lāi. ⁸ Koh tī sì-ûi khiā tiûⁿ-ûi, kòa tiûⁿ-mn̂g ê mn̂g-lî. ⁹ Ēng boah ê iû boah hōe-bō͘, kap kî-tiong hoān só͘-ū-ê, hun-piat i kap lóng-chóng ê khì-kū chòe-sèng; i chiū chòe-sèng. ¹⁰ Koh boah sio-chè ê tôaⁿ, kap i lóng-chóng ê khì-kū, hun-piat tôaⁿ chòe-sèng; tôaⁿ chiū chòe chì-sèng. ¹¹ Iā tio̍h boah sóe-tn̄g ê phûn, hun-piat i chòe-sèng. ¹² Koh tio̍h chhōa A-lûn kap i hiah-ê kiáⁿ, kàu hōe-bō͘ mn̂g-chêng, ēng chúi kā in sóe. ¹³ Iā kā A-lûn chhēng sèng-saⁿ, koh ēng iû boah i, hun-piat i chòe-sèng, hō͘ i chòe chè-si lâi ho̍k-sāi Góa. ¹⁴ Koh chhōa i hiah-ê kiáⁿ lâi, kā in chhēng lāi-phàu. ¹⁵ Tio̍h kā in boah-iû, chhin-chhiūⁿ boah in lāu-pē chi̍t-iūⁿ, hō͘ in chòe chè-si lâi ho̍k-sāi Góa; in siū boah-iû beh éng-oán chòe chè-si, kàu ta̍k sè-tāi. ¹⁶ Mô͘-se án-ni kiâⁿ; lóng sī chiàu Iâ-hô-hoa só͘ hoan-hù i ê lâi kiâⁿ. ¹⁷ Tē-jī nî chiaⁿ-ge̍h chhoe-it, hōe-bō͘ chiū khiā-khí-lâi. ¹⁸ Mô͘-se khiā hōe-bō͘ hē hiah-ê khū, khiā hiah-ê pán, chhng hiah-ê hoâiⁿ-kông, khiā hiah-ê thiāu. ¹⁹ Tī hōe-bō͘ téng tah pò͘-pîⁿ, chiong pò͘-pîⁿ ê kòa, khàm tī i ê téng-bīn, sī chiàu Iâ-hô-hoa só͘ hoan-hù Mô͘-se-ê. ²⁰ Koh ēng lu̍t-hoat hē tī kūi-lāi, ēng kǹg chhng tī kūi-ni̍h, hē si-un-só͘ tī kūi-téng. ²¹ Kng kūi ji̍p hōe-bō͘, kòa jia-cha̍h ê tiùⁿ-lî, jia-cha̍h hoat-kūi, sī chiàu Iâ-hô-hoa só͘ hoan-hù Mô͘-se-ê. ²² Koh chiong toh hē tī hōe-bō͘-lāi, tī hōe-bō͘ ê pak-sì, tī tiùⁿ-lî gōa; ²³ hit téng-bīn ēng piáⁿ pâi tī Iâ-hô-hoa ê bīn-chêng; sī chiàu Iâ-hô-hoa só͘ hoan-hù Mô͘-se-ê. ²⁴ Koh hē teng-tâi tī hōe-bō͘-lāi, kap toh saⁿ-tùi, tī hōe-bō͘ ê lâm-pêng. ²⁵ Tī Iâ-hô-hoa ê bīn-chêng tiám-teng; sī chiàu Iâ-hô-hoa só͘ hoan-hù Mô͘-se-ê. ²⁶ Koh hē kim-tôaⁿ tī hōe-bō͘-lāi ê tiùⁿ-lî chêng; ²⁷ tī hit téng-bīn sio phang-liāu ê hiuⁿ; sī chiàu Iâ-hô-hoa só͘ hoan-hù Mô͘-se-ê. ²⁸ Koh kòa hōe-bō͘ mn̂g ê mn̂g-lî. ²⁹ Tī chū-chi̍p ê hōe-bō͘ mn̂g-chêng, hē sio-chè ê tôaⁿ, chiong sio-chè kap sò͘-chè hiàn tī hit téng-bīn; sī chiàu Iâ-hô-hoa só͘ hoan-hù Mô͘-se-ê. ³⁰ Hē sóe-tn̄g ê phûn tī hōe-bō͘ kap tôaⁿ ê tiong-kan, phûn-lāi tóe chúi, thang sóe-tn̄g. ³¹ Mô͘-se kap A-lûn kap i hiah-ê kiáⁿ, tī-hia sóe-chhiú sóe-kha. ³² In ji̍p hōe-bō͘ ê sî, á-sī chiū-kūn tôaⁿ ê sî, chiū sóe; sī chiàu Iâ-hô-hoa só͘ hoan-hù Mô͘-se-ê. ³³ Tī hōe-bō͘ kap tôaⁿ ê sì-ûi, khiā tiùⁿ-ûi, iā kòa tiùⁿ-ûi mn̂g ê mn̂g-lî; án-ni Mô͘-se chiū oân-kang. ³⁴ Hit-sî hûn jia-khàm hōe-bō͘, Iâ-hô-hoa ê êng-kng chhiong-móa hōe-bō͘. ³⁵ Mô͘-se bōe-ōe ji̍p hōe-bō͘, in-ūi hûn thêng tī hit téng-bīn; koh Iâ-hô-hoa ê êng-kng chhiong-móa tī hōe-bō͘. ³⁶ Hûn tùi hōe-bō͘ siu chiūⁿ-khì ê sî, Í-sek-lia̍t lâng chiū khí-sin kiâⁿ in ê lō͘-chām. ³⁷ Hûn nā bô siu chiūⁿ-khì, in chiū bô khí-sin kiâⁿ, ti̍t-ti̍t kàu hûn siu chiūⁿ-khì. ³⁸ Ji̍t-sî Iâ-hô-hoa ê hûn tī hōe-bō͘ téng, mî-sî hit tiong-kan ū hé, tī Í-sek-lia̍t choân-ke ê ba̍k-chiu-chêng; tī in só͘ kiâⁿ ê lō͘-chām lóng sī án-ni.