1 當三十年，四月初五，我tī Ka-pa-ló͘ ê河邊，受掠ê人ê中間；hit時天開，我看見上帝ê異象。 2 Tī hit月ê初五，就是Iok-ngá-kun王受掠ê第五年， 3 Tī Ka-le̍k-tí人ê地，Ka-pa-ló͘ ê河邊，耶和華ê話tiâu-tî臨到Pò͘-se ê kiáⁿ，祭司以西結；tī-hia耶和華ê手hē tī伊ê身上。 4 我看見，你看，有狂風tùi北方來，有大片雲，有燄燄sih ê火，伊ê周圍有光，tùi hit中間ê火內發出親像琥珀ê色緻。 5 Koh tùi hit中間出現四個活物ê形象。In ê款式是án-ni；有人ê形象。 6 Ta̍k-ê有四個面，ta̍k-ê有四支翼。 7 In ê腳是直直，腳跡底親像牛á ê腳蹄；lóng燦爛親像磨光ê銅ê刺(chhiah) 目。 8 Tī in四面ê翼下koh有人ê手，chitê四個活物ê面kap 翼就是án-ni； 9 in ê翼lóng相連接；行ê時，身軀m̄免oa̍t，lóng直直進前去。 10 論到in ê面ê形象，in有人ê面；in四個tī chiàⁿ-pêng有獅ê面，in四個tī tò-pêng有牛ê面；in四個也有鷹鳥ê面。 11 In ê面是án-ni；in ê翼tùi頂面thí開；chitê hitê兩個翼相連，koh有兩個翼蓋身軀。 12 In ta̍k-ê直直行進前；神beh去toh-lo̍h，in就去hia；行ê時，身軀m̄免oa̍t。 13 論到活物ê款式，in ê形象親像to̍h ê火炭，koh親像火把ê形象，起起落落tī活物ê中間；火真光，tùi火中發出sih-nà。 14 Hiah-ê活物走去走來，親像sih-nà teh sih。 15 我teh看活物ê時，看ah，有車輪tī地上，tī活物ê邊á，照伊ê四面。 16 車輪kap in ê做法ê款式親像黃ê玉ê色緻；四個輪(lûn)ê形象siāng一款；in ê款式kap做法是親像輪中有輪。 17 輪行ê時，四面lóng能行得；行ê時m̄免oa̍t。 18 論到車輪ê環是真高thang驚；四個輪ê環有目睭滿滿。 19 活物行ê時，輪也tī in ê身邊teh行；活物舉起離開地ê時，輪也舉起。 20 神所beh去ê所在，in也去；神若去tī-hia，輪也tī in ê身邊舉起；因為活物ê神tī輪ê內面。 21 Hiah-ê若行，chiahê也行，hiahê若停，chiahê也停；hiahê若舉起離開地ê時，輪也tī in ê身邊舉起；因為活物ê神tī輪ê內面。 22 活物ê頭殼ê頂面有穹蒼ê形象，看了親像thang驚ê水晶ê色緻，鋪tī in ê頭殼ê頂面。 23 Tī穹蒼ê下面in ê翼thí直直，大家相對；koh有兩支翼蓋伊ê身軀ê chit-pêng，也koh有兩支翼蓋伊ê身軀ê hit-pêng。 24 In行ê時，我聽見in ê翼ê聲，親像chōe-chōe水ê聲，親像全能ê ê聲，有hōa-hōa嚷ê聲，親像軍隊ê聲；in停ê時，翼就放落來。 25 Tī in頭殼頂穹蒼ê頂面有聲；in停ê時，翼就放落來。 26 Tī in頭殼頂穹蒼ê頂面有寶座ê形象，親像藍色ê寶石；tī寶座形象ê頂面有形象親像人ê款式。 27 我看tùi對伊ê腰ê形象ê頂面有琥珀 ê色緻，tī伊ê內面周圍有火ê形象；也看見tùi伊ê腰ê形象ê下面有親像火ê形象周圍真光。 28 Tī落雨ê日雲中虹ê形象怎樣，周圍ê光ê形象也是án-ni。我一下看見，就仆tī地裡；koh聽見一位講話ê ê聲。
1 Tng saⁿ-cha̍p--nî, sì-ge̍h chhoe-gō͘, góa tī Ka-pa-ló͘ ê hô-piⁿ, siū-lia̍h ê lâng ê tiong-kan; hit-sî thiⁿ khui, góa khòaⁿ-kìⁿ Siōng-tè ê īⁿ-siōng. 2 Tī hit-ge̍h ê chhoe-gō͘, chiū-sī Iok-ngá-kun ông siū-lia̍h ê tē-gō͘ nî, 3 tī Ka-le̍k-tí lâng ê tōe, Ka-pa-ló͘ ê hô-piⁿ, Iâ-hô-hoa ê ōe tiâu-tî lîm-kàu Pò͘-se ê kiáⁿ, chè-si Í-se-kiat; tī-hia Iâ-hô-hoa ê chhiú hē tī i ê sin-chiūⁿ. 4 Góa khòaⁿ-kìⁿ, lí khòaⁿ, ū kông-hong tùi pak-hng lâi, ū tōa phiàn hûn, ū iām-iām-sih ê hé, i ê chiu-ûi ū kng, tùi hit tiong-kan ê hé-lāi hoat-chhut chhin-chhiūⁿ hó͘-phek ê sek-tì. 5 Koh tùi hit tiong-kan chhut-hiān sì ê oa̍h-mi̍h ê hêng-siōng. In ê khoán-sit sī án-ni; ū lâng ê hêng-siōng. 6 Ta̍k-ê ū sì ê bīn, ta̍k-ê ū sì ki si̍t. 7 In ê kha sī ti̍t-ti̍t, kha-jiah-tóe chhin-chhiūⁿ gû-á ê kha-tôe; lóng chhàn-lān chhin-chhiūⁿ bôa-kng ê tâng ê chhiah-ba̍k. 8 Tī in sì-bīn ê si̍t-ē koh ū lâng ê chhiú, chit ê sì ê oa̍h-mi̍h-ê bīn kap si̍t chiū-sī án-ni; 9 in ê si̍t lóng saⁿ-liân-chiap; kiâⁿ ê sî, seng-khu m̄-bián oa̍t, lóng ti̍t-ti̍t chìn-chêng khì. 10 Lūn-kàu in ê bīn ê hêng-siōng, in ū lâng ê bīn; in sì-ê tī chiàⁿ-pêng ū sai ê bīn, in sì-ê tī tò-pêng ū gû ê bīn; in sì-ê iā ū eng-chiáu ê bīn. 11 In ê bīn sī án-ni; in ê si̍t tùi téng-bīn thí-khui; chit-ê hit-ê nn̄g ê si̍t saⁿ-liân, koh ū nn̄g ê si̍t khàm seng-khu. 12 In ta̍k-ê ti̍t-ti̍t kiâⁿ chìn-chêng; sîn beh khì toh-lo̍h, in chiū khì hia; kiâⁿ ê sî, seng-khu m̄-bián oa̍t. 13 Lūn-kàu oa̍h-mi̍h ê khoán-sit, in ê hêng-siōng chhin-chhiūⁿ to̍h ê hé-thòaⁿ, koh chhin-chhiūⁿ hé-pé ê hêng-siōng, khí-khí lo̍h-lo̍h tī oa̍h-mi̍h ê tiong-kan; hé chin kng, tùi hé-tiong hoat-chhut sih-nà. 14 Hiah ê oa̍h-mi̍h cháu-khì cháu-lâi, chhin-chhiūⁿ sih-nà teh sih. 15 Góa teh khòaⁿ oa̍h-mi̍h ê sî, khòaⁿ ah, ū chhia-lûn tī tōe-chiūⁿ, tī oa̍h-mi̍h ê piⁿ-á, chiàu i ê sì-bīn. 16 Chhia-lûn kap in ê chòe-hoat ê khoán-sit chhin-chhiūⁿ n̂g ê ge̍k ê sek-tì; sì ê lûn ê hêng-siōng siāng chi̍t-khoán; in ê khoán-sit kap chòe-hoat sī chhin-chhiūⁿ lûn-tiong ū lûn. 17 Lûn kiâⁿ ê sî, sì-bīn lóng ōe kiâⁿ--tit; kiâⁿ ê sî m̄-bián oa̍t. 18 Lūn-kàu chhia-lûn ê khoân sī chin-koâiⁿ thang kiaⁿ; sì ê lûn ê khoân ū ba̍k-chiu móa-móa. 19 Oa̍h-mi̍h kiâⁿ ê sî, lûn iā tī in ê sin-piⁿ teh kiâⁿ; oa̍h-mi̍h kú-khí lī-khui tōe ê sî, lûn iā kú-khí. 20 Sîn só͘ beh khì ê só͘-chāi, in iā khì; sîn nā khì tī-hia, lûn iā tī in ê sin-piⁿ kú-khí; in-ūi oa̍h-mi̍h ê sîn tī lûn ê lāi-bīn. 21 Hiah-ê nā kiâⁿ, chiah-ê iā kiâⁿ, hiah-ê nā thêng, chiah-ê iā thêng; hiah-ê nā kú-khí lī-khui tōe ê sî, lûn iā tī in ê sin-piⁿ kú-khí; in-ūi oa̍h-mi̍h ê sîn tī lûn ê lāi-bīn. 22 Oa̍h-mi̍h ê thâu-khak ê téng-bīn ū kiong-chhong ê hêng-siōng, khòaⁿ-liáu chhin-chhiūⁿ thang-kiaⁿ ê chúi-chiⁿ ê sek-tì, pho͘ tī in ê thâu-khak ê téng-bīn. 23 Tī kiong-chhong ê ē-bīn in ê si̍t thí ti̍t-ti̍t, tāi-ke saⁿ-tùi; koh ū nn̄g ki si̍t khàm i ê seng-khu ê chit-pêng, iā koh ū nn̄g ki si̍t khàm i ê seng-khu ê hit-pêng. 24 In kiâⁿ ê sî, góa thiaⁿ-kìⁿ in ê si̍t ê siaⁿ, chhin-chhiūⁿ chōe-chōe chúi ê siaⁿ, chhin-chhiūⁿ Choân-lêng--ê ê siaⁿ, ū hōa-hōa-jióng ê siaⁿ, chhin-chhiūⁿ kun-tūi ê siaⁿ; in thêng ê sî, si̍t chiū pàng--lo̍h-lâi. 25 Tī in thâu-khak-téng kiong-chhong ê téng-bīn ū siaⁿ; in thêng ê sî, si̍t chiū pàng--lo̍h-lâi. 26 Tī in thâu-khak-téng kiong-chhong ê téng-bīn ū pó-chō ê hêng-siōng, chhin-chhiūⁿ lâm-sek ê pó-chio̍h; tī pó-chō hêng-siōng ê téng-bīn ū hêng-siōng chhin-chhiūⁿ lâng ê khoán-sit. 27 Góa khòaⁿ-kìⁿ tùi i ê io ê hêng-siōng ê téng-bīn ū hó͘-phek ê sek-tì, tī i ê lāi-bīn chiu-ûi ū hé ê hêng-siōng; iā khòaⁿ-kìⁿ tùi i ê io ê hêng-siōng ê ē-bīn ū chhin-chhiūⁿ hé ê hêng-siōng chiū-ûi chin-kng. 28 Tī lo̍h-hō͘ ê ji̍t hûn-tiong khēng ê hêng-siōng cháiⁿ-iūⁿ, chiu-ûi ê kng ê hêng-siōng iā sī án-ni. Góa chi̍t-ē khòaⁿ-kìⁿ, chiū phak tī tōe--nih; koh thiaⁿ-kìⁿ chi̍t-ūi kóng-ōe--ê ê siaⁿ.
1 伊對我講，人子ah，你起來khiā，我beh kap你講話。 2 伊對我講話ê時，神就入我ê內面，hō͘我khiā起來；我就聽見hit位對我講話ê ê聲。 3 伊對我講，人子ah，我差你去到以色列族，到悖逆ê邦國，in是悖逆我ê；in kap in ê列祖違逆我，直到今á日。 4 Chiahê kiáⁿ面皮厚，心硬；我差你去in hia；你tio̍h對in講，主耶和華án-ni講。 5 In kiám-chhái聽，kiám-chhái m̄聽，(因為in是悖逆ê家) ，beh知tī in中間的確bat有先知。 6 人子ah，雖然有草刺蒺藜tī你hia，koh你tiàm tī蠍á蟲ê中間，lóng莫得驚in，也莫得驚in ê話；in雖然是悖逆ê家，iáu-kú莫得驚in ê話，也莫得因為in ê面貌來驚惶。 7 In kiám-chhái聽，kiám-chhái m̄聽，你做你將我ê話kā in講；因為in是極其悖逆ê。 8 人子ah，你tio̍h聽我對你所講ê話；你m̄-thang悖逆，親像hitê悖逆ê家；你tio̍h開嘴，食我所hō͘你ê。 9 Hit時我看，看ah，有一支手伸ǹg我chia來；看ah，手內有一卷冊； 10 伊將hit本掀開tī我ê面前；內外lóng有寫字；hit頂面所寫ê有哀傷，吐氣，災厄ê話。
1 I tùi góa kóng, Jîn-chú ah, lí khí-lâi khiā, Góa beh kap lí kóng-ōe. 2 I tùi góa kóng-ōe ê sî, sîn chiū ji̍p góa ê lāi-bīn, hō͘ góa khiā--khí-lâi; góa chiū thiaⁿ-kìⁿ hit-ūi tùi góa kóng-ōe--ê ê siaⁿ. 3 I tùi góa kóng, Jîn-chú ah, Góa chhe lí khì kàu Í-sek-lia̍t cho̍k, kàu pōe-ge̍k ê pang-kok, in sī pōe-ge̍k Góa ê; in kap in ê lia̍t-chó͘ ûi-ke̍h Góa, ti̍t-kàu kin-á-ji̍t. 4 Chiah ê kiáⁿ bīn-phê kāu, sim ngī; Góa chhe lí khì in hia; lí tio̍h tùi in kóng, Chú Iâ-hô-hoa án-ni kóng. 5 In kiám-chhái thiaⁿ, kiám-chhái m̄-thiaⁿ, (in-ūi in sī pōe-ge̍k ê ke), beh chai tī in tiong-kan tek-khak bat ū sian-ti. 6 Jîn-chú ah, sui-jiân ū chháu-chhì chi̍t-lê tī lí hia, koh lí tiàm tī giat-á-thâng ê tiong-kan, lóng bo̍h-tit kiaⁿ in, iā bo̍h-tit kiaⁿ in ê ōe; in sui-jiân sī pōe-ge̍k ê ke, iáu-kú bo̍h-tit kiaⁿ in ê ōe, iā bo̍h-tit in-ūi in ê bīn-māu lâi kiaⁿ-hiâⁿ. 7 In kiám-chhái thiaⁿ, kiám-chhái m̄-thiaⁿ, lí chòe lí chiong Góa ê ōe kā in kóng; in-ūi in sī ke̍k-kî pōe-ge̍k ê. 8 Jîn-chú ah, lí tio̍h thiaⁿ Góa tùi lí só͘ kóng ê ōe; lí m̄-thang pōe-ge̍k, chhin-chhiūⁿ hit ê pōe-ge̍k ê ke; lí tio̍h khui-chhùi, chia̍h Góa só͘ hō͘ lí ê. 9 Hit-sî góa khòaⁿ, khòaⁿ ah, ū chi̍t ki chhiú chhun ǹg góa chia lâi; khòaⁿ ah, chhiú-lāi ū chi̍t kńg chheh; 10 I chiong hit pún hian-khui tī góa ê bīn-chêng; lāi-gōa lóng ū siá-jī; hí téng-bīn só͘ siá-ê ū ai-siong, thó͘-khùi, chai-ē ê ōe.
1 伊就對我講，人子ah，tio̍h食你所得tio̍h ê；tio̍h食hit卷冊，也tio̍h去對以色列家講話。 2 Tùi án-ni，我開嘴，伊就hō͘我食hit卷。 3 Koh對我講，人子ah，將chit卷，我所hō͘你ê，tio̍h食tī你ê腹肚，充滿你ê腸。我就食伊；嘴內知伊ê甜親像蜜。 4 伊對我講，人子ah，起來就近以色列ê家，也用我ê話kā in講。 5 因為你奉差m̄是去hitê講話深奧，言語oh得聽ê百姓hia，就是去以色列家； 6 m̄是去hiahê講話深奧，言語oh得聽ê chōe-chōe國，in ê話你bōe曉得聽。 7 我若差你去in hia，in的確聽你。總是以色列家m̄肯聽你，因為m̄肯聽我；因為以色列全家是頭額tēng，心硬ê人。 8 看ah，我hō͘你ê面硬，抵敵in ê面；hō͘你ê頭額tēng，抵敵in ê頭額。 9 我hō͘你ê頭額親像鑽石，比火石khah-tēng；in雖然是悖逆ê家，你莫得驚in，也莫得因為in ê面貌來驚惶。 10 伊koh對我講，人子ah，我對你所講一切ê話，你tio̍h用心承受，用耳孔聽。 11 你tio̍h去就近本國受掠ê百姓hia；in kiám-chhái聽，kiám-chhái m̄聽；你tio̍h對in講話，kā in講，這是主耶和華án-ni講。 12 Hit時神舉起我，我就聽見tī我ê ka-chiah後有大振動hū-hū哮ê聲，講，耶和華ê榮光tùi伊ê所在顯出，應該得tio̍h o-ló。 13 我也聽見hiahê活物ê翼相磕tio̍h ê聲，kap in ê身邊輪ê聲，就是大振動hū-hū哮ê聲。 14 Tùi án-ni，神舉起我，帶我去；我去真艱苦，心神激烈；耶和華ê手tī我身上真有力。 15 我就到The-le̍k-a-pit，tiàm tī Ka-pa-ló͘河邊受掠ê人hit位，到in所khiā起ê所在；tī in中間坐七日久，tiàm hia真gông-ngia̍h。 16 過七日耶和華ê話臨到我，講， 17 人子ah，我設立你做以色列家守望ê人；所以你tio̍h聽我ê嘴所講ê，替我警戒in。 18 我對pháiⁿ人講，你的確會死；若你無警戒伊，無用話警戒pháiⁿ人hō͘伊離開伊ê pháiⁿ路，來救伊ê性命；就hitê pháiⁿ人beh死tī伊ê罪；總是我beh對你ê手討伊ê性命。 19 設使你警戒pháiⁿ人，也伊無oa̍t-tńg離開伊ê pháiⁿ所行kap伊ê pháiⁿ路，就伊beh死tī伊ê罪；總是你有救你家己ê性命。 20 Koh設使有義人oa̍t-tńg離開伊ê義來犯罪，我也hē窒礙tī伊ê面前，就伊beh死；因為你無警戒伊，就伊beh死tī伊ê罪，koh伊所有行ê義無koh得tio̍h記念；總是我beh對你ê手討伊ê性命。 21 總是你若警戒義人，hō͘義人無犯罪，伊若真正無犯罪，就的確得tio̍h活，因為伊有受警戒；你亦救家己ê性命。 22 耶和華ê手tī-hia hē tī我ê身上；伊對我講，你起來，去平洋，我beh tī-hia kap你講話。 23 Tùi án-ni，我起來，出去到平洋；看ah，耶和華ê榮光khiā tī-hia，親像我tī Ka-pa-ló͘河邊所看見ê榮光一樣；我就仆tī地裡。 24 神就入我ê內面，hō͘我khiā起來；伊kap我講話；對我講，去ah，你tio̍h家己關tī厝內。 25 人子ah，人beh用索hē tī你ê身軀，kā你綑縛；致到你bōe出去來行tī in中間。 26 我beh hō͘你ê舌連tī你ê chiūⁿ-kiuⁿ，致到你啞口，bōe會做責備in ê人；因為in是悖逆ê家。 27 獨獨到我kap你講話ê時，我beh開你ê嘴，你就對in講，主耶和華án-ni講，Ài聽ê聽，m̄聽ê kù伊m̄聽；因為in是悖逆ê家。
1 I chiū tùi góa kóng, Jîn-chú ah, tio̍h chia̍h lí só͘ tit-tio̍h ê; tio̍h chia̍h hit kńg chheh, iā tio̍h khì tùi Í-sek-lia̍t ke kóng-ōe. 2 Tùi án-ni góa khui-chhùi, I chiū hō͘ góa chia̍h hit-kńg. 3 Koh tùi góa kóng, Jîn-chú ah, chiong chit-kńg, Góa só͘ hō͘ lí ê, tio̍h chia̍h tī lí ê pak-tó͘, chhiong-móa lí ê tn̂g. Góa chiū chia̍h i; chhùi-lāi chai i ê tiⁿ chhin-chhiūⁿ bi̍t. 4 I tùi góa kóng, Jîn-chú ah, khí-lâi chiū-kūn Í-sek-lia̍t ê ke, iā ēng Góa ê ōe kā in kóng. 5 In-ūi lí hōng-chhe m̄-sī khì hit ê kóng-ōe chhim-ò, giân-gú oh--tit thiaⁿ ê peh-sìⁿ hia, chiū-sī khì Í-sek-lia̍t ke; 6 m̄-sī khì hiah ê kóng-ōe chhim-ò, giân-gú oh--tit thiaⁿ ê chōe-chōe kok, in ê ōe lí bōe hiáu-tit thiaⁿ. 7 Góa nā chhe lí khì in hia, in tek-khak thiaⁿ lí. Chóng-sī Í-sek-lia̍t ke m̄-khéng thiaⁿ lí, in-ūi m̄-khéng thiaⁿ Góa; in-ūi Í-sek-lia̍t choân-ke sī thâu-hia̍h tēng, sim ngī ê lâng. 8 Khòaⁿ ah, Góa hō͘ lí ê bīn ngī, tí-te̍k in ê bīn; hō͘ lí ê thâu-hia̍h tēng, tí-te̍k in ê thâu-hia̍h. 9 Góa hō͘ lí ê thâu-hia̍h chhin-chhiūⁿ soān-chio̍h, pí hé-chio̍h khah-tēng; in sui-jiân sī pōe-ge̍k ê ke, lí bo̍h-tit kiaⁿ in, iā bo̍h-tit in-ūi in ê bīn-māu lâi kiaⁿ-hiâⁿ. 10 I koh tùi góa kóng, Jîn-chú ah, Góa tùi lí só͘ kóng it-chhè ê ōe, lí tio̍h ēng sim sêng-siū, ēng hī-khang thiaⁿ. 11 Lí tio̍h khì chiū-kūn pún-kok siū-lia̍h ê peh-sìⁿ hia; in kiám-chhái thiaⁿ, kiám-chhái m̄-thiaⁿ; lí tio̍h tùi in kóng-ōe, kā in kóng, Che sī Chú Iâ-hô-hoa án-ni kóng. 12 Hit-sî sîn kú-khí góa, góa chiū thiaⁿ-kìⁿ tī góa ê ka-chiah-āu ū tōa tín-tāng hū-hū-háu ê siaⁿ, kóng, Iâ-hô-hoa ê êng-kng tùi I ê só͘-chāi hián-chhut, eng-kai tit-tio̍h o-ló. 13 Góa iā thiaⁿ-kìⁿ hiah ê oa̍h-mi̍h ê si̍t saⁿ-kha̍p-tio̍h ê siaⁿ, kap in ê sin-piⁿ lûn ê siaⁿ, chiū-sī tōa tín-tāng hū-hū-háu ê siaⁿ. 14 Tùi án-ni sîn kú-khí góa, tòa góa khì; góa khì chin kan-khó͘, sim-sîn kek-lia̍t; Iâ-hô-hoa ê chhiú tī góa sin-chiūⁿ chin ū la̍t. 15 Góa chiū kàu The-le̍k-a-pit, tiàm tī Ka-pa-ló͘ hô-piⁿ siū-lia̍h ê lâng hit-ūi, kàu in só͘ khiā-khí ê só͘-chāi; tī in tiong-kan chē chhit-ji̍t kú, tiàm hia chin gông-ngia̍h. 16 Kè chhit-ji̍t Iâ-hô-hoa ê ōe lîm-kàu góa, kóng, 17 Jîn-chú ah, Góa siat-li̍p lí chòe Í-sek-lia̍t ke siú-bāng ê lâng; só͘-í lí tio̍h thiaⁿ Góa ê chhùi só͘-kóng--ê, thòe Góa kéng-kài in. 18 Góa tùi pháiⁿ-lâng kóng, Lí tek-khak ōe sí; nā lí bô kéng-kài i, bô ēng ōe kéng-kài pháiⁿ-lâng hō͘ i lī-khui i ê pháiⁿ-lō͘, lâi kiù i ê sìⁿ-miā; chiū hit ê pháiⁿ-lâng beh sí tī i ê chōe; chóng-sī Góa beh tùi lí ê chhiú thó i ê sìⁿ-miā. 19 Siat-sú lí kéng-kài pháiⁿ-lâng, iā i bô oa̍t-tńg lī-khui i ê pháiⁿ só͘-kiâⁿ kap i ê pháiⁿ-lō͘, chiū i beh sí tī i ê chōe; chóng-sī lí ū kiù lí ka-kī ê sìⁿ-miā. 20 Koh siat-sú ū gī-lâng oa̍t-tńg lī-khui i ê gī lâi hoān-chōe, Góa iā hē that-gāi tī i ê bīn-chêng, chiū i beh sí; in-ūi lí bô kéng-kài i, chiū i beh sí tī i ê chōe, koh i só͘ ū kiâⁿ ê gī bô koh tit-tio̍h kì-liām; chóng-sī Góa beh tùi lí ê chhiú thó i ê sìⁿ-miā. 21 Chóng-sī lí nā kéng-kài gī-lâng, hō͘ gī-lâng bô hoān-chōe, i nā chin-chiàⁿ bô hoān-chōe, chiū tek-khak tit-tio̍h oa̍h, in-ūi i ū siū kéng-kài; lí ia̍h kiù ka-kī ê sìⁿ-miā. 22 Iâ-hô-hoa ê chhiú tī-hia hē tī góa ê sin-chiūⁿ; I tùi góa kóng, Lí khí-lâi, khì pîⁿ-iûⁿ, Góa beh tī-hia kap lí kóng-ōe. 23 Tùi án-ni, góa khí-lâi, chhut-khì kàu pîⁿ-iûⁿ; khòaⁿ ah, Iâ-hô-hoa ê êng-kng khiā tī-hia, chhin-chhiūⁿ góa tī Ka-pa-ló͘ hô-piⁿ só͘ khòaⁿ-kìⁿ ê êng-kng chi̍t-iūⁿ; góa chiū phak tī tōe--nih. 24 Sîn chiū ji̍p góa ê lāi-bīn, hō͘ góa khiā--khí-lâi; I kap góa kóng-ōe; tùi góa kóng, Khì ah, lí tio̍h ka-kī koaiⁿ tī chhù-lāi. 25 Jîn-chú ah, lâng beh ēng soh hē tī lí ê sin-khu, kā lí khún-pa̍k; tì-kàu lí bōe chhut-khì lâi kiâⁿ tī in tiong-kan. 26 Góa beh hō͘ lí ê chi̍h liâm tī lí ê chiūⁿ-kiuⁿ, tì-kàu lí é-káu, bōe ōe chòe chek-pī in ê lâng; in-ūi in sī pōe-ge̍k ê ke. 27 To̍k-to̍k kàu Góa kap lí kóng-ōe ê sî, Góa beh khui lí ê chhùi, lí chiū tùi in kóng, Chú Iâ-hô-hoa án-ni kóng, Ài thiaⁿ--ê thiaⁿ, m̄ thiaⁿ--ê kù i m̄-thiaⁿ; in-ūi in sī pōe-ge̍k ê ke.
1 人子ah，你tio̍h the̍h一塊磚，hē tī你ê面前；畫耶路撒冷城tī hit頂面。 2 Koh圍困攻擊伊，起土堆攻擊伊，tī四圍安設大槌攻擊伊。 3 Koh tio̍h the̍h鐵板，hē tī你kap城ê中間，準做鐵牆；你ê面定定ǹg伊，就城受圍困，你beh圍困伊。這thang做兆頭tī以色列家。 4 你tio̍h khi tò-pêng倒teh，擔當以色列家ê罪；照你khi tò-pêng倒teh ê日jōa-chōe，你擔當in ê罪也是án-ni。 5 我將in犯罪ê年hō͘你用日ê數額來抵伊，就是三百九十日；你照án-ni擔當以色列家ê罪過。 6 你已經滿chiahê日，tio̍h koh khi chiàⁿ-pêng倒teh，擔當偤大家ê罪過，我kā你限四十日，一日抵一年。 7 所以你ê面tio̍h定定ǹg受圍困ê耶路撒冷，手骨le̍k theh-theh，宣傳來攻擊伊。 8 看ah，我beh用索hē tī你ê身上；致到你bōe能翻過pêng，到你圍困城ê日滿。 9 你tio̍h the̍h小麥、大麥、豆á、紅豆、黍á，kap粗麥，貯tī一个器具內；為tio̍h本身用伊來做餅，照你倒thán-khi ê日ê數額，就是三百九十日，你tio̍h食伊。 10 你所食ê食物，tio̍h照秤重，ta̍k日食二十sià-khek-le̍k，照時來食。 11 你lim水亦tio̍h照量，ta̍k日一him ê 六份一；照時來lim。 12 你食chitê餅，親像食大麥餅一樣；tio̍h用人所放ê糞，pek伊tī眾人ê目睭前。 13 耶和華講，以色列人tī我所趕in到ê列國中，亦的確án-ni食無清氣ê餅。 14 我講，Ai ah，主耶和華ah，我平素bē-bat bak-tio̍h lâ-sâm，tùi細漢到taⁿ，bē-bat食家己死ê，á是hō͘野獸拆裂ê；hitê可惡ê肉，亦bē-bat入我ê嘴。 15 Tùi án-ni，祂對我講，看ah，我hō͘你用牛屎來替人ê糞；你tio̍h將你ê餅pek tī hit頂面。 16 祂koh對我講，人子ah，看ah，我beh tī耶路撒冷斷絕in所óa靠ê米糧；in食餅tio̍h照秤，撙節來食；lim水亦tio̍h照量，gông-ngia̍h來lim。 17 Hō͘ in欠缺餅kap水，相kap gông-ngia̍h，koh tī in ê罪過來消滅。
1 Jîn-chú ah, lí tio̍h the̍h chi̍t tè chng, hē tī lí ê bīn-chêng; ūi Iâ-lō͘-sat-léng siâⁿ tī hí téng-bīn. 2 Koh ûi-khùn kong-kek--i, khí thô͘-tui kong-kek--i, tī sì-ûi an-siat tōa-thûi kong-kek--i. 3 Koh tio̍h the̍h thih-pán, hē tī lí kap siâⁿ ê tiong-kan, chún-chòe thih-chhiûⁿ; lí ê bīn tiāⁿ-tiāⁿ ǹg--i, chiū siâⁿ siū ûi-khùn, lí beh ûi-khùn i. Che thang chòe tiāu-thâu tī Í-sek-lia̍t ke. 4 Lí tio̍h khi tò-pêng tó-teh, tam-tng Í-sek-lia̍t ke ê chōe; chiàu lí khi tò-pêng tó--teh ê ji̍t jōa-chōe, lí tam-tng in ê chōe iā sī án-ni. 5 Góa chiong in hoān-chōe ê nî hō͘ lí ēng ji̍t ê siàu-gia̍h lâi tí--i, chiū-sī saⁿ-pah káu-cha̍p ji̍t; lí chiàu án-ni tam-tng Í-sek-lia̍t ke ê chōe-kòa. 6 Lí í-keng móa chiah ê ji̍t, tio̍h koh khi chiàⁿ-pêng tó-teh, tam-tng Iû-tāi ke ê chōe-kòa, Góa kā lí hān sì-cha̍p ji̍t, chi̍t-ji̍t tí chi̍t-nî. 7 Só͘-í lí ê bīn tio̍h tiāⁿ-tiāⁿ ǹg siū ûi-khùn ê Iâ-lō͘-sat-léng, chhiú-kut le̍k theh-theh, soan-thoân lâi kong-kek--i. 8 Khòaⁿ ah, Góa beh ēng soh hē tī lí ê sin-chiūⁿ; tì-kàu lí bōe-ōe hoan kè-pêng, kàu lí ûi-khùn siâⁿ ê ji̍t móa. 9 Lí tio̍h the̍h sió-be̍h, tōa-be̍h, tāu-á, âng-tāu, sóe-á, kap chho͘-be̍h, tóe tī chi̍t ê khì-kū-lāi; ūi-tio̍h pún-sin ēng--i lâi chòe-piáⁿ, chiàu lí tó thán-khi ê ji̍t ê siàu-gia̍h, chiū-sī saⁿ-pah káu-cha̍p ji̍t, lí tio̍h chia̍h--i. 10 Lí só͘ chia̍h ê si̍t-bu̍t, tio̍h chiàu chhìn-tāng, ta̍k-ji̍t chia̍h jī-cha̍p sià-khek-le̍k, chiàu-sî lâi chia̍h. 11 Lí lim chúi ia̍h tio̍h chiàu niû, ta̍k-ji̍t chi̍t-him ê la̍k-hūn-chi̍t; chiàu-sî lâi lim. 12 Lí chia̍h chit ê piáⁿ, chhin-chhiūⁿ chia̍h tōa-be̍h-piáⁿ chi̍t-iūⁿ; tio̍h ēng lâng só͘ pàng ê pùn, pek--i tī chèng-lâng ê ba̍k-chiu-chêng. 13 Iâ-hô-hoa kóng, Í-sek-lia̍t lâng tī Góa só͘ kóaⁿ in kàu ê lia̍t-kok-tiong, ia̍h tek-khak án-ni chia̍h bô chheng-khì ê piáⁿ. 14 Góa kóng, Ai ah, Chú Iâ-hô-hoa ah, góa pêng-sò͘ bē-bat bak-tio̍h lâ-sâm, tùi sòe-hàn kàu-taⁿ, bē-bat chia̍h ka-kī sí--ê, á-sī hō͘ iá-siù thiah-li̍h--ê; hit ê khó-ò͘ⁿ ê bah, ia̍h bē-bat ji̍p góa ê chhùi. 15 Tùi án-ni I tùi góa kóng, Khòaⁿ ah, Góa hō͘ lí ēng gû-sái lâi thòe lâng ê pùn; lí tio̍h chiong lí ê piáⁿ pek tī hit téng-bīn. 16 I koh tùi góa kóng, Jîn-chú ah, khòaⁿ ah, Góa beh tī Iâ-lō͘-sat-léng toān-choa̍t in só͘ óa-khò ê bí-niû; in chia̍h-piáⁿ tio̍h chiàu chhìn, chún-chat lâi chia̍h; lim chúi ia̍h tio̍h chiàu niû, gông-ngia̍h lâi lim. 17 Hō͘ in khiàm-kheh piáⁿ kap chúi, saⁿ-kap gông-ngia̍h, koh tī in ê chōe-kòa lâi siau-bia̍t.
1 人子ah，你tio̍h kia̍h一支利劍，做你ê剃頭刀，來剃你ê頭毛kap你ê嘴鬚；然後用厘戥戥伊ê 重輕，來分伊。 2 圍困城ê日已經滿，你tio̍h將三份ê一份tī城內用火燒伊；將三份ê一份tī伊ê四圍用刀phah伊；將三份ê一份掖散hō͘風吹去；我亦beh拔刀追jip伊。 3 你tio̍h tùi hit中間the̍h kúi-nā支，縛tī你ê衫á裾。 4 Koh tùi hit中間the̍h淡薄á，hiat tī火中，用火燒伊；tùi hia beh有火出，到tī以色列全家。 5 主耶和華án-ni講，這是耶路撒冷；我beh安置伊tī列邦中，列國tī伊ê四圍。 6 伊行pháiⁿ違逆我ê法度，比列邦khah傷重；干犯我ê律例比四圍ê列國khah慘；因為伊棄sak我ê法度，我ê律例in亦無遵thàn。 7 所以主耶和華án-ni講： 因為lín擾亂比lín四圍ê列邦khah傷重，無遵thàn我ê律例，無執守我ê法度，亦m̄-thàn lín四圍列國ê法度。 8 所以主耶和華án-ni講：看ah，我beh攻擊你，我beh tī lín中間審判lín，hō͘列國親目看見。 9 Koh因為一切可惡ê事，我beh tī你中間行我所bē-bat行，以後亦無koh án-ni行ê。 10 因為án-ni，tī你ê中間，老父beh 刣 kiáⁿ來食，kiáⁿ亦beh 刣老父來食；我beh tī lín中間審判lín。我beh將你所chhun ê眾人，lóng四散in tī四方。 11 因為án-ni，主耶和華講，我kí我ê永活來chiù-chōa，為tio̍h你用一切可惡ê物，thang厭賤ê事，phah lâ-sâm我ê聖所，我也beh減少你ê人額；我ê目睭無beh疼惜你，我亦無beh憐憫你。 12 你三份ê一份beh tùi瘟疫來死，亦tùi飢荒來消滅tī lín中間；三份ê一份beh tī你ê四圍倒tī刀下；三份ê一份我beh四散in tī hiahê風；亦beh拔刀追jip in。 13 親像án-ni，我ê受氣得tio̍h成，我大受氣in ê beh soah，我就受安慰；koh我大受氣in-ê已經成，就in thang知我耶和華是熱心來講ê。 14 我beh hō͘你做冷靜，做凌辱，tī你四圍ê列邦中；hō͘經過ê人親目看見。 15 Án-ni，我beh用受氣，kap大受氣，kap嚴嚴ê責備，tī你ê中間審判你；hit時你就tī四圍ê列邦中，成做thang凌辱，thang譏刺，thang鑑戒，thang gông-ngia̍h；這是我耶和華講ê。 16 Hit時我用飢荒能剿滅人ê pháiⁿ箭射in；就是我所射來剿滅lín-ê；我亦beh加添lín ê飢荒，斷絕lín所óa靠ê米糧。 17 Koh beh飢荒惡獸到lín hia，in beh hō͘ lín ê kiáⁿ死了了；koh瘟疫kap 刣人ê事亦beh流行tī lín hia；我亦beh hō͘刀劍臨到lín；這是我耶和華講ê。
1 Jîn-chú ah, lí tio̍h kia̍h chi̍t ki lāi-kiàm, chòe lí ê thì-thâu-to, lâi thì lí ê thâu-mn̂g kap lí ê chhùi-chhiu; jiân-āu ēng lî-téng téng i ê tāng-khin, lâi pun i. 2 Ûi-khùn siâⁿ ê ji̍t í-keng móa, lí tio̍h chiong saⁿ-hūn ê chi̍t-hūn tī siâⁿ-lāi ēng hé sio--i; chiong saⁿ-hūn ê chi̍t-hūn tī i ê sì-ûi ēng to phah--i; chiong saⁿ-hūn ê chi̍t-hūn iā-sòaⁿ hō͘ hong chhe--khì; Góa ia̍h beh pu̍ih to tui-jip--i. 3 Lí tio̍h tùi hí tiong-kan the̍h kúi-nā ki, pa̍k tī lí ê saⁿ-á-ku. 4 Koh tùi hí tiong-kan the̍h tām-po̍h-á, hiat tī hé-tiong, ēng hé sio--i; tùi hia beh ū hé chhut, kàu tī Í-sek-lia̍t choân-ke. 5 Chú Iâ-hô-hoa án-ni kóng, Che sī Iâ-lō͘-sat-léng; Góa beh an-tì i tī lia̍t-pang-tiong, lia̍t-kok tī i ê sì-ûi. 6 I kiâⁿ pháiⁿ ûi-ke̍h Góa ê hoat-tō͘, pí lia̍t-pang khah siong-tiōng; kan-hoān Góa ê lu̍t-lē pí sì-ûi ê lia̍t-kok khah-chhám; in-ūi i khì-sak Góa ê hoat-tō͘, Góa ê lu̍t-lē in ia̍h bô chun-thàn. 7 Só͘-í Chú Iâ-hô-hoa án-ni kóng: In-ūi lín jiáu-loān pí lín sì-ûi ê lia̍t-pang khah siong-tiōng, bô chun-thàn Góa ê lu̍t-lē, bô chip-siú Góa ê hoat-tō͘, ia̍h m̄-thàn lín sì-ûi lia̍t-kok ê hoat-tō͘. 8 Só͘-í Chú Iâ-hô-hoa án-ni kóng: Khòaⁿ ah, Góa beh kong-kek lí, Góa beh tī lín tiong-kan sím-phòaⁿ lín, hō͘ lia̍t-kok chhin-ba̍k khòaⁿ-kìⁿ. 9 Koh in-ūi it-chhè khó-ò͘ⁿ ê sū, Góa beh tī lí tiong-kan kiâⁿ Góa só͘ bē-bat kiâⁿ, í-āu ia̍h bô koh án-ni kiâⁿ--ê. 10 In-ūi án-ni, tī lí ê tiong-kan, lāu-pē beh thâi kiáⁿ lâi chia̍h, kiáⁿ ia̍h beh thâi lāu-pē lâi chia̍h; Góa beh tī lín tiong-kan sím-phòaⁿ lín. Góa beh chiong lí só͘ chhun ê chèng-lâng, lóng sì-sòaⁿ in tī sì-hng. 11 In-ūi án-ni, Chú Iâ-hô-hoa kóng, Góa kí Góa ê éng-oa̍h lâi chiù-chōa, ūi-tio̍h lí ēng it-chhè khó-ò͘ⁿ ê mi̍h, thang iàm-chiān ê sū, phah lâ-sâm Góa ê sèng-só͘, Góa iā beh kiám-chió lí ê lâng-gia̍h; Góa ê ba̍k-chiu bô beh thiàⁿ-sioh lí, Góa ia̍h bô beh lîn-bín lí. 12 Lí saⁿ-hūn ê chi̍t-hūn beh tùi un-e̍k lâi sí, ia̍h tùi ki-hng lâi siau-bia̍t tī lín tiong-kan; saⁿ-hūn ê chi̍t-hūn beh tī lí ê sì-ûi tó tī to-ē; saⁿ-hūn ê chi̍t-hūn Góa beh sì-sòaⁿ in tī hiah ê hong; ia̍h beh pu̍ih-to tui-jip in. 13 Chhin-chhiūⁿ án-ni, Góa ê siū-khì tit-tio̍h chiâⁿ, Góa tōa siū-khì in ê beh soah, Góa chiū siū an-ùi; koh Góa tōa siū-khì in ê í-keng chiâⁿ, chiū in thang chai Góa Iâ-hô-hoa sī jia̍t-sim lâi kóng--ê. 14 Góa beh hō͘ lí chòe léng-chēng, chòe lêng-jio̍k, tī lí sì-ûi ê lia̍t-pang-tiong; hō͘ keng-kè ê lâng chhin-ba̍k khòaⁿ-kìⁿ. 15 Án-ni, Góa beh ēng siū-khì, kap tōa siū-khì, kap giâm-giâm ê chek-pī, tī lí ê tiong-kan sím-phòaⁿ lí; hit-sî lí chiū tī sì-ûi ê lia̍t-pang-tiong, chiâⁿ-chòe thang lêng-jio̍k, thang ki-chhì, thang kàm-kài, thang gông-ngia̍h; che sī Góa Iâ-hô-hoa kóng--ê. 16 Hit-sî Góa ēng ki-hng ōe châu-bia̍t lâng ê pháiⁿ-chìⁿ siā in; chiū-sī Góa só͘ siā lâi châu-bia̍t lín--ê; Góa ia̍h beh ke-thiⁿ lín ê ki-hng, toān-choa̍t lín só͘ óa-khò ê bí-niû. 17 Koh beh ki-hng ok-siù kàu lín hia, in beh hō͘ lín ê kiáⁿ sí-liáu-liáu; koh un-e̍k kap thâi lâng ê sū ia̍h beh liû-hêng tī lín hia; Góa ia̍h beh hō͘ to-kiàm lîm-kàu lín; che sī Góa Iâ-hô-hoa kóng--ê.
1 耶和華ê話臨到我講， 2 人子ah，你tio̍h面ǹg以色列chiahê山，來對伊宣傳，講，以色列chiahê山ah，tio̍h聽主耶和華ê話； 3 主耶和華tùi大山、小山、水溝、山谷，án-ni講，看ah，我，我beh用刀劍臨到lín，亦beh毀滅lín ê山頭壇。 4 Lín ê祭壇的確荒廢，lín ê日頭ê柱beh tú-tio̍h phah碎；我beh hō͘ lín受刣 ê人倒tī lín偶像ê面前。 5 我亦beh將以色列族ê身屍hē tī in ê偶像ê面前；將lín ê骨頭四界hiat tī lín ê壇ê四圍。 6 Tī lín一切khiā起ê所在，城beh拋荒，山頭壇beh荒廢；hō͘ lín ê祭壇拋荒荒廢，lín ê偶像phah碎滅無，lín ê日頭ê柱beh剉落，lín ê所做lóng廢無。 7 受刣 ê人beh倒tī lín中間；就lín beh知我是耶和華。 8 Lín四散tī列國ê時，我beh tī列邦中所chhun ê人hō͘伊脫離刀劍。 9 Lín中間得tio̍h脫離ê人，beh tī in受掠去ê列國中記念我；因為我beh毀壞in淫亂離開我ê心，以及in戀愛偶像ê目睭；in beh為tio̍h所行ê pháiⁿ可惡ê事，來家己怨恨。 10 In beh知我是耶和華；我講beh降災厄hō͘ in，m̄是空空ê話。 11 主耶和華án-ni講，你tio̍h phah手頓腳，講，慘ah，以色列家行這一切可惡ê pháiⁿ-tāi；in beh tùi刀劍，tùi飢荒，tùi瘟疫來死。 12 Tiàm tī遠ê人beh tùi瘟疫來死；tiàm tī近ê人beh tùi刀劍來死；留teh受圍困ê人beh tùi飢荒來死；án-ni我beh一盡成我ê受氣tī in。 13 In受刣 ê人倒tī in祭壇四圍ê偶像中，就是ta̍k-ê高山，ta̍k-ê山頂，ta̍k-ê青樹ê樹腳，ta̍k-ê ām-ām ê橡樹腳，就是in獻芳芳ê祭祀hō͘一切偶像ê地方；hit時lín就知我是耶和華。 14 我beh伸我ê手攻擊in，hō͘ in khiā起ê所在拋荒冷靜，tùi曠野到Tē-pek-la̍h-tha；in就知我是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h bīn ǹg Í-sek-lia̍t chiah ê soaⁿ, lâi tùi i soan-thoân, kóng, Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe; 3 Chú Iâ-hô-hoa tùi tōa-soaⁿ, sió-soaⁿ, chúi-kau, soaⁿ-kok, án-ni kóng, Khòaⁿ ah, Góa, Góa beh ēng to-kiàm lîm-kàu lín, ia̍h beh húi-bia̍t lín ê soaⁿ-thâu-tôaⁿ. 4 Lín ê chè-tôaⁿ tek-khak hong-hòe, lín ê ji̍t-thâu ê thiāu beh tú-tio̍h phah-chhùi; Góa beh hō͘ lín siū-thâi ê lâng tó tī lín ngó͘-siōng ê bīn-chêng. 5 Góa ia̍h beh chiong Í-sek-lia̍t cho̍k ê sin-si hē tī in ê ngó͘-siōng ê bīn-chêng; chiong lín ê kut-thâu sì-kòe hiat tī lín ê tôaⁿ ê sì-ûi. 6 Tī lín it-chhè khiā-khí ê só͘-chāi, siâⁿ beh pha-hng, soaⁿ-thâu-tôaⁿ beh hong-hòe; hō͘ lín ê chè-tôaⁿ pha-hng hong-hòe, lín ê ngó͘-siōng phah-chhùi bia̍t-bô, lín ê ji̍t-thâu ê thiāu beh chhò-lo̍h, lín ê só͘-chòe lóng hòe-bô. 7 Siū-thâi ê lâng beh tó tī lín tiong-kan; chiū lín beh chai Góa sī Iâ-hô-hoa. 8 Lín sì-sòaⁿ tī lia̍t-kok ê sî, Góa beh tī lia̍t-pang-tiong só͘ chhun ê lâng hō͘ i thoat-lī to-kiàm. 9 Lín tiong-kan tit-tio̍h thoat-lī ê lâng, beh tī in siū lia̍h-khì ê lia̍t-kok-tiong kì-liām Góa; in-ūi Góa beh húi-hoāi in îm-loān lī-khui Góa ê sim, í-ki̍p in loân-ài ngó͘-siōng ê ba̍k-chiu; in beh ūi-tio̍h só͘ kiâⁿ ê pháiⁿ khó-ò͘ⁿ ê sū, lâi ka-kī oàn-hūn. 10 In beh chai Góa sī Iâ-hô-hoa; Góa kóng beh kàng chai-ē hō͘ in, m̄-sī khang-khang ê ōe. 11 Chú Iâ-hô-hoa án-ni kóng, Lí tio̍h phah-chhiú tǹg-kha, kóng, Chhám ah, Í-sek-lia̍t-ke kiâⁿ che it-chhè khó-ò͘ⁿ ê pháiⁿ-tāi; in beh tùi to-kiàm, tùi ki-hng, tùi un-e̍k lâi sí. 12 Tiàm tī hn̄g ê lâng beh tùi un-e̍k lâi sí; tiàm tī kūn ê lâng beh tùi to-kiàm lâi sí; lâu--teh siū ûi-khùn ê lâng beh tùi ki-hng lâi sí; án-ni Góa beh it-chīn chiâⁿ Góa ê siū-khì tī in. 13 In siū-thâi ê lâng tó tī in chè-tôaⁿ sì-ûi ê ngó͘-siōng-tiong, chiū-sī ta̍k ê koâiⁿ-soaⁿ, ta̍k ê soaⁿ-téng, ta̍k ê chhiⁿ-chhiū ê chhiū-kha, ta̍k ê ām-ām ê siōng-chhiū-kha, chiū-sī in hiàn phang-phang ê chè-sū hō͘ it-chhè ngó͘-siōng ê tōe-hng; hit-sî lín chiū chai Góa sī Iâ-hô-hoa. 14 Góa beh chhun Góa ê chhiú kong-kek in, hō͘ in khiā-khí ê só͘-chāi pha-hng léng-chēng, tùi khòng-iá kàu Tē-pek-la̍h-tha; in chiū chai Góa sī Iâ-hô-hoa.
1 耶和華ê話koh臨到我講， 2 人子ah，主耶和華對以色列地án-ni講，結局到lah！chitê地ê四境，結局到lah。 3 Taⁿ你ê結局已經到lah，我beh hō͘我ê受氣到tī你，亦beh照你ê所行審判你；照你一切可惡ê事報應你； 4 我ê目睭無beh保惜你，我亦無beh可憐你；是beh照你ê所行報應你，你可惡ê事beh歸tī你中間；lín就知我是耶和華。 5 主耶和華án-ni講：有災厄，非常ê災厄；看ah，beh到lah。 6 結局到lah，結局到lah，起來攻擊你；看ah，到lah。 7 境內khiā起ê百姓ah，所定tio̍h ê災厄beh臨到你；時期到lah，日子近lah，就是hōa-hōa嚷，m̄是山頂歡喜ê聲ê日。 8 我beh緊緊piàⁿ出我ê大受氣tī你；koh一盡成我ê受氣tī你，照你ê所行審判你，照你一切可惡ê事報應你。 9 我ê目睭無beh保惜你，我亦無beh可憐你，beh照你ê所行報應你，你可惡ê事beh歸tī你中間；lín就知phah-lín-ê是我耶和華。 10 看ah，看ah，日子已經到lah；所定tio̍h ê災厄已經發出；柺á已經開花，驕傲已經puh芽。 11 強暴興起，成做刑罰pháiⁿ ê柺á；in無去，in眾人亦無去，in ê財寶也無去；in中間無人得tio̍h尊貴。 12 時期到lah，日子近lah；買ê人莫得歡喜，賣ê人莫得煩惱；因為大受氣已經到tī in眾人。 13 賣ê in雖然iáu活teh，也bōe倒tńg到伊所賣ê；因為chitê異象關係in眾人，lóng bōe倒tńg來；亦無人會對伊ê pháiⁿ所行來堅固伊ê活命。 14 In已經pûn哨角，備辦齊備；總是無人出去交戰；因為我ê大受氣臨到in眾人。 15 Tī外面有刀劍，tī內面有瘟疫，有飢荒；tī田野ê beh tùi刀劍來死，tī城內ê，飢荒kap瘟疫beh吞滅伊。 16 其中脫離ê beh脫離；ta̍k人因為伊ê罪過，tī山裡出悲哀ê聲，親像山谷中ê ka-chui。 17 手lóng酸，腳頭u軟親像水。 18 Beh用麻布縖腰，驚惶beh遮蓋伊，ta̍k人面見笑，頭殼無半支毛。 19 In beh hiat in ê銀tī街路，看金親像污穢ê物；當耶和華受氣ê日，in ê金銀bōe能救in，bōe能hō͘ in ê心知足，亦bōe能hō͘ in ê腹肚飽；因為這有絆倒in tī罪惡中。 20 論到伊裝飾ê súi，是伊hō͘伊得tio̍h威風；in就用伊來裝thang怨恨ê物，thang厭賤ê偶像；所以我hō͘ in看親像污穢ê物。 21 我beh將伊交tī外邦人ê手，做伊所搶ê物；交付地上ê pháiⁿ人，做賊贓；in亦beh phah lâ-sâm伊。 22 我beh oa̍t-tńg我ê面無看in；in beh phah lâ-sâm我機密ê所在；強猛ê賊也beh入去phah lâ-sâm。 23 Tio̍h造鐵鏈，因為chit所在滿滿流血ê罪，城內充滿強暴ê事。 24 我beh hō͘外邦第一pháiⁿ-ê來霸佔in ê厝宅；我beh hō͘強暴ê人ê驕傲soah；in ê聖所phah lâ-sâm。 25 毀滅近lah；in beh求平安，亦bōe得tio̍h。 26 Beh有災厄加添災厄，風聲續接風聲；in beh tùi先知求異象；總是祭司ê律法，長老ê計畫，lóng beh斷絕。 27 國王beh悲哀，王親beh冷靜，百姓ê手ngia̍uh-ngia̍uh-chhoah。我beh照in ê所行款待in，照in應該受ê審判，來審判in；in就知我是耶和華。
1 Iâ-hô-hoa ê ōe koh lîm-kàu góa kóng, 2 Jîn-chú ah, Chú Iâ-hô-hoa tùi Í-sek-lia̍t tōe án-ni kóng, Kiat-kio̍k kàu lah! chit ê tōe ê sì-kéng, kiat-kio̍k kàu lah. 3 Taⁿ lí ê kiat-kio̍k í-keng kàu lah, Góa beh hō͘ Góa ê siū-khì kàu tī lí, ia̍h beh chiàu lí ê só͘-kiâⁿ sím-phòaⁿ lí; chiàu lí it-chhè khó-ò͘ⁿ ê sū pò-èng lí; 4 Góa ê ba̍k-chiu bô beh pó-sioh lí, Góa ia̍h bô beh khó-lîn lí; sī beh chiàu lí ê só͘-kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai Góa sī Iâ-hô-hoa. 5 Chú Iâ-hô-hoa án-ni kóng: Ū chai-ē, hui-siông ê chai-ē; khòaⁿ ah, beh kàu lah. 6 Kiat-kio̍k kàu lah, kiat-kio̍k kàu lah, khí-lâi kong-kek lí; khòaⁿ ah, kàu lah. 7 Kéng-lāi khiā-khí ê peh-sìⁿ ah, só͘ tiāⁿ-tio̍h ê chai-ē beh lîm-kàu lí; sî-kî kàu lah, ji̍t-chí kūn lah, chiū-sī hōa-hōa-jióng, m̄-sī soaⁿ-téng hoaⁿ-hí ê siaⁿ ê ji̍t. 8 Góa beh kín-kín piàⁿ-chhut Góa ê tōa siū-khì tī lí; koh it-chīn chiâⁿ Góa ê siū-khì tī lí, chiàu lí ê só͘-kiâⁿ sím-phòaⁿ lí, chiàu lí it-chhè khó-ò͘ⁿ ê sū pò-èng lí. 9 Góa ê ba̍k-chiu bô beh pó-sioh lí, Góa ia̍h bô beh khó-lîn lí, beh chiàu lí ê só͘ kiâⁿ pò-èng lí, lí khó-ò͘ⁿ ê sū beh kui tī lí tiong-kan; lín chiū chai phah-lín--ê sī Góa Iâ-hô-hoa. 10 Khòaⁿ ah, khòaⁿ ah, ji̍t-chí í-keng kàu lah; só͘ tiāⁿ-tio̍h ê chai-ē í-keng hoat-chhut; koáiⁿ-á í-keng khui-hoe, kiau-ngō͘ í-keng puh-gê. 11 Kiông-pō heng-khí, chiâⁿ-chòe hêng-hoa̍t pháiⁿ ê koáiⁿ-á; in bô--khì, in chèng-lâng ia̍h bô--khì, in ê châi-pó iā bô--khì; in tiong-kan bô lâng tit-tio̍h chun-kùi. 12 Sî-kî kàu lah, ji̍t-chí kūn lah; bóe ê lâng bo̍h-tit hoaⁿ-hí, bōe ê lâng bo̍h-tit hoân-ló; in-ūi tōa siū-khì í-keng kàu tī in chèng-lâng. 13 Bōe--ê in sui-jiân iáu oa̍h--teh, iā bōe tò-tńg kàu i só͘ bōe--ê; in-ūi chit ê īⁿ-siōng koan-hē in chèng-lâng, lóng bōe tò-tńg-lâi; ia̍h bô lâng ōe tùi i ê pháiⁿ só͘-kiâⁿ lâi kian-kò͘ i ê oa̍h-miā. 14 In í-keng pûn sàu-kak, pī-pān chiâu-pī; chóng-sī bô lâng chhut-khì kau-chiàn; in-ūi Góa ê tōa siū-khì lîm-kàu in chèng-lâng. 15 Tī gōa-bīn ū to-kiàm, tī lāi-bīn ū un-e̍k, ū ki-hng; tī chhân-iá--ê beh tùi to-kiàm lâi sí, tī siâⁿ-lāi--ê, ki-hng kap un-e̍k beh thun-bia̍t--i. 16 Kî-tiong thoat-lī--ê beh thoat-lī; ta̍k-lâng in-ūi i ê chōe-kòa, tī soaⁿ--nih chhut pi-ai ê siaⁿ, chhin-chhiūⁿ soaⁿ-kok-tiong ê ka-chui. 17 Chhiú lóng sng, kha-thâu-u nńg chhin-chhiūⁿ chúi. 18 Beh ēng môa-pò͘ hâ-io, kiaⁿ-hiâⁿ beh jia-khàm i, ta̍k-lâng bīn kiàn-siàu, thâu-khak bô pòaⁿ-ki mn̂g. 19 In beh hiat in ê gûn tī ke-lō͘, khòaⁿ kim chhin-chhiūⁿ ù-òe ê mi̍h; tng Iâ-hô-hoa siū-khì ê ji̍t, in ê kim-gûn bōe-ōe kiù in, bōe-ōe hō͘ in ê sim ti-chiok, ia̍h bōe-ōe hō͘ in ê pak-tó͘ pá; in-ūi che ū pòaⁿ-tó in tī chōe-ok tiong. 20 Lūn-kàu i chng-thāⁿ ê súi, sī I hō͘ i tit-tio̍h ui-hong; in chiū ēng--i lâi chng thang oàn-hūn ê mi̍h, thang iàm-chiān ê ngó͘-siōng; só͘-í Góa hō͘ in khòaⁿ chhin-chhiūⁿ ù-òe ê mi̍h. 21 Góa beh chiong i kau tī gōa-pang lâng ê chhiú, chòe i só͘ chhiúⁿ ê mi̍h; kau-hù tōe-chiūⁿ ê pháiⁿ-lâng, chòe chha̍t-chng; in ia̍h beh phah lâ-sâm i. 22 Góa beh oa̍t-tńg Góa ê bīn bô khòaⁿ--in; in beh phah lâ-sâm Góa ki-bi̍t ê só͘-chāi; kiông-béng ê chha̍t iā beh ji̍p-khì phah lâ-sâm. 23 Tio̍h chō thih-liān, in-ūi chit só͘-chāi móa-móa lâu-huih ê chōe, siâⁿ-lāi chhiong-móa kiông-pō ê sū. 24 Góa beh hō͘ gōa-pang tē-it pháiⁿ--ê lâi pà-chiàm in ê chhù-the̍h; Góa beh hō͘ kiông-pō ê lâng ê kiau-ngō͘ soah; in ê sèng-só͘ phah lâ-sâm. 25 Húi-bia̍t kūn lah; in beh kiû pêng-an, ia̍h bōe tit-tio̍h. 26 Beh ū chai-ē ke-thiⁿ chai-ē, hong-siaⁿ sòa-chiap hong-siaⁿ; in beh tùi sian-ti kiû īⁿ-siōng; chóng-sī chè-si ê lu̍t-hoat, tióng-ló ê kè-e̍k, lóng beh toān-choa̍t. 27 Kok-ông beh pi-ai, ông-chhin beh léng-chēng, peh-sìⁿ ê chhiú ngia̍uh-ngia̍uh-chhoah. Góa beh chiàu in ê só͘-kiâⁿ khoán-thāi in, chiàu in eng-kai siū ê sím-phòaⁿ, lâi sím-phòaⁿ in; in chiū chai Góa sī Iâ-hô-hoa.
1 第六年六月初五，我坐tī我ê厝內，偤大chiahê長老坐tī我ê面前；tī-hia主耶和華ê手到tī我ê身上。 2 我觀看，看見有形象親像火ê款式；tùi祂ê腰以下ê款式有火，tùi祂ê腰以上ê光光ê款式，親像琥珀 ê色緻。 3 祂伸出親像一支手ê款，khiú-tiâu我一股ê頭毛；神就將我舉起到天kap地ê中間，tī上帝ê異象中帶我到耶路撒冷，ǹg北內院ê門口；tī-hia有妒忌ê偶像ê座位，就是激動妒忌ê。 4 看ah，tī-hia有以色列上帝ê榮光，款式kap我tī平洋所看見ê一樣。 5 伊對我講，人子ah，你kia̍h目ǹg北方ê路觀看；我就kia̍h目ǹg北方ê路觀看；看ah，tī祭壇門ê北勢，tī門口有一个激動妒忌ê偶像。 6 祂koh對我講，人子ah，你看見in所做ê mah？就是以色列家tī-chia所行大可惡ê事，hō͘我離開我ê聖所遠遠？總是你beh koh看，iáu有koh-khah大可惡ê事。 7 祂chhōa我到院ê門；我觀看，看見牆壁有一孔。 8 祂對我講，人子ah，你tio̍h搤牆；我一下搤牆，看見有一个門。 9 祂kā我講，你入去，看in tī chit內面所行可惡ê pháiⁿ-tāi。 10 我就入去看；看ah，tī四面ê牆壁，畫ta̍k號會趖ê物，kap可惡ê走獸，kap以色列家一切ê偶像。 11 Tī chiahê像ê面前，有以色列家七十個長老khiā-teh，Sa-hoan ê kiáⁿ Ngá-sat-nî-a也khiā tī in中間；ta̍k人手the̍h香爐，香煙ê芳味chhèng上高。 12 祂對我講，人子ah，以色列家ê長老，tī暗中，tī in ta̍k人畫像ê房á內所行ê，你看見無？因為in講，耶和華無看見阮，耶和華已經離開chitê地。 13 祂koh對我講，你beh koh看見in所行，iáu有koh-khah大可惡ê事。 14 祂chhōa我到耶和華ê厝，ǹg北ê門口；看ah，tī-hia有婦女坐teh，為tio̍h Tah-bô͘-su啼哭。 15 祂對我講，人子ah，你看見無？你iáu beh看見比這koh-khah可惡ê事。 16 祂koh chhōa我到耶和華厝ê內院；看ah，tī耶和華ê殿門，léng廊kap祭壇ê中間，約略有二十五人，ka-chiah ǹg耶和華ê殿，面ǹg東；in也ǹg東拜日頭。 17 伊對我講，人子ah，你有看見無？偤大家tī-chia行chitê可惡ê事，iáu算做小khóa mah？in tī chitê所在遍行強暴，再三激我ê受氣；看ah，in kia̍h樹枝hē tī伊ê鼻前。 18 因為án-ni，我亦beh行我ê大受氣；我ê目睭無beh疼惜in，我也無beh可憐in；in雖然ǹg我ê耳孔中大聲求叫，我猶原m̄聽。
1 Tē la̍k-nî la̍k-ge̍h chhoe-gō͘, góa chē tī góa ê chhù-lāi, Iû-tāi chiah ê tióng-ló chē tī góa ê bīn-chêng; tī-hia Chú Iâ-hô-hoa ê chhiú kàu tī góa ê sin-chiūⁿ. 2 Góa koan-khòaⁿ, khòaⁿ-kìⁿ ū hêng-siōng chhin-chhiūⁿ hé ê khoán-sit; tùi i ê io í-ē ê khoán-sit ū hé, tùi i ê io í-chiūⁿ ê kng-kng ê khoán-sit, chhin-chhiūⁿ hó͘-phek ê sek-tì. 3 I chhun chhut chhin-chhiūⁿ chi̍t ki chhiú ê khoán, khiú-tiâu góa chi̍t-kó͘ ê thâu-mn̂g; sîn chiū chiong góa kú-khí kàu thiⁿ kap tōe ê tiong-kan, tī Siōng-tè ê īⁿ-siōng-tiong tòa góa kàu Iâ-lō͘-sat-léng, ǹg pak lāi-īⁿ ê mn̂g-kháu; tī-hia ū tò͘-khī ê ngó͘-siōng ê chō-ūi, chiū-sī kek-tōng tò͘-khī-ê. 4 Khòaⁿ ah, tī-hia ū Í-sek-lia̍t Siōng-tè ê êng-kng, khoán-sit kap góa tī pîⁿ-iûⁿ só͘ khòaⁿ-kìⁿ--ê chi̍t-iūⁿ. 5 I tùi góa kóng, Jîn-chú ah, lí kia̍h-ba̍k ǹg pak-hng ê lō͘ koan-khòaⁿ; góa chiū kia̍h-ba̍k ǹg pak-hng ê lō͘ koan-khòaⁿ; khòaⁿ ah, tī chè-tôaⁿ mn̂g ê pak--sì, tī mn̂g-kháu ū chi̍t-ê kek-tōng tò͘-khī ê ngó͘-siōng. 6 I koh tùi góa kóng, Jîn-chú ah, lí khòaⁿ-kìⁿ in só͘ chòe--ê mah? chiū-sī Í-sek-lia̍t ke tī-chia só͘ kiâⁿ tōa khó-ò͘ⁿ ê sū, hō͘ Góa lī-khui Góa ê sèng-só͘ hn̄g-hn̄g? chóng-sī lí beh koh khòaⁿ, iáu ū koh-khah tōa khó-ò͘ⁿ ê sū. 7 I chhōa góa kàu īⁿ ê mn̂g; góa koan-khòaⁿ, khòaⁿ-kìⁿ chhiûⁿ-piah ū chi̍t-khang. 8 I tùi góa kóng, Jîn-chú ah, lí tio̍h iah chhiûⁿ; góa chi̍t-ē iah chhiûⁿ, khòaⁿ-kìⁿ ū chi̍t ê mn̂g. 9 I kā góa kóng, Lí ji̍p-khì, khòaⁿ in tī chí lāi-bīn só͘ kiâⁿ khó-ò͘ⁿ ê pháiⁿ-tāi. 10 Góa chiū ji̍p-khì khòaⁿ; khòaⁿ ah, tī sì-bīn ê chhiûⁿ-piah, ūi ta̍k-hō ōe sô ê mi̍h, kap khó-ò͘ⁿ ê cháu-siù, kap Í-sek-lia̍t ke it-chhè ê ngó͘-siōng. 11 Tī chiah ê siōng ê bīn-chêng, ū Í-sek-lia̍t ke chhit-cha̍p ê tióng-ló khiā-teh, Sa-hoan ê kiáⁿ Ngá-sat-nî-a iā khiā tī in tiong-kan; ta̍k-lâng chhiú the̍h hiuⁿ-lô͘, hiuⁿ-ian ê phang-bī chhèng chiūⁿ-koâiⁿ. 12 I tùi góa kóng, Jîn-chú ah, Í-sek-lia̍t ke ê tióng-ló, tī àm-tiong, tī in ta̍k-lâng ūi-siōng ê pâng-á-lāi só͘ kiâⁿ--ê, lí khòaⁿ-kìⁿ bô? in-ūi in kóng, Iâ-hô-hoa bô khòaⁿ-kìⁿ goán, Iâ-hô-hoa í-keng lī-khui chit ê tōe. 13 I koh tùi góa kóng, Lí beh koh khòaⁿ-kìⁿ in só͘ kiâⁿ, iáu ū koh-khah tōa khó-ò͘ⁿ ê sū. 14 I chhōa góa kàu Iâ-hô-hoa ê chhù, ǹg pak ê mn̂g-kháu; khòaⁿ ah, tī-hia ū hū-lú chē--teh, ūi-tio̍h Tah-bô͘-su thî-khàu. 15 I tùi góa kóng, Jîn-chú ah, lí khòaⁿ-kìⁿ bô? lí iáu beh khòaⁿ-kìⁿ pí che koh-khah khó-ò͘ⁿ ê sū. 16 I koh chhōa góa kàu Iâ-hô-hoa chhù ê lāi-īⁿ; khòaⁿ ah, tī Iâ-hô-hoa ê tiān-mn̂g, léng-lông kap chè-tôaⁿ ê tiong-kan, iok-lio̍k ū jī-cha̍p-gō͘ lâng, ka-chiah ǹg Iâ-hô-hoa ê tiān, bīn ǹg-tang; in iā ǹg-tang pài ji̍t-thâu. 17 I tùi góa kóng, Jîn-chú ah, lí ū khòaⁿ-kìⁿ bô? Iû-tāi ke tī-chia kiâⁿ chit ê khó-ò͘ⁿ ê sū, iáu sǹg-chòe sió-khóa mah? in tī chit ê só͘-chāi piàn-kiâⁿ kiông-pō, chài-saⁿ kek Góa ê siū-khì; khòaⁿ ah, in kia̍h chhiū-ki hē tī i ê phīⁿ-chêng. 18 In-ūi án-ni, Góa ia̍h beh kiâⁿ Góa ê tōa siū-khì; Góa ê ba̍k-chiu bô beh thiàⁿ-sioh in, Góa iā bô beh khó-lîn in; in sui-jiân ǹg Góa ê hī-khang-tiong tōa-siaⁿ kiû-kiò, Góa iû-goân m̄-thiaⁿ.
1 祂ǹg我ê耳孔中，大聲叫講，Tio̍h叫hiahê管chitê城ê人來，ta̍k人ê手tio̍h kia̍h滅性命ê ke-si。 2 忽然有六個人tùi ǹg北頂ê門hit條路來，ta̍k人手kia̍h 刣人ê ke-si；內中有一人穿幼苧衫，腰裡掛(kùi)墨壺；in入去，khiā tī銅壇ê邊頭。 3 以色列上帝ê榮光，本tī ki-lō͘-peng ê頂面；taⁿ tùi hia上去，徙到殿ê戶碇，祂叫hitê穿幼苧衫，腰裡kùi 墨壺 ê人來。 4 耶和華對伊講，遍行tī城內，就是遍行耶路撒冷ê中間；見若為tio̍h城內所行一切可惡ê事，來吐氣pûn-hāiⁿ ê人，就做記號tī伊ê頭額。 5 我ê耳孔中聽見祂對其餘ê人講，Tio̍h tè伊遍行thong城，來刣死人；lín ê目睭莫得疼惜，lín亦莫得可憐in。 6 Tio̍h一盡刣死老人、少年人、在室女、嬰á、婦人人；亦tio̍h tùi我ê聖所刣起；獨獨見若有記號ê，莫得近óa伊。Tùi án-ni，in就tùi殿前ê長老刣起。 7 伊對in講，Tio̍h phah lâ-sâm chit間殿，hō͘院內充滿受刣 ê人；lín tio̍h出去。In就出去，tī城內刣死人。 8 In去刣人ê時，chhun我tī-hia；我就仆tī地裡，叫講，Hāiⁿ ah，主耶和華ah，你將大受氣piàⁿ tī耶路撒冷，kiám是beh將以色列人一盡滅無mah？ 9 祂就對我講，以色列家kap偤大家ê罪過極其重；遍地有流血ê事，滿城有冤枉；因為in講，耶和華已經離開chitê地，耶和華無teh看。 10 所以我ê目睭無beh疼惜，我亦無beh可憐in；beh照in所行ê，報應tī in ê頭殼頂。 11 看ah，hitê穿幼苧衫，腰裡掛墨壺 ê人，將chitê事回覆講，我已經照祢所吩咐ê行lah。
1 I ǹg góa ê hī-khang-tiong, tōa-siaⁿ kiò kóng, Tio̍h kiò hiah ê koán chit ê siâⁿ ê lâng lâi, ta̍k-lâng ê chhiú tio̍h kia̍h bia̍t sìⁿ-miā ê ke-si. 2 Hut-jiân ū la̍k ê lâng tùi ǹg-pak téng ê mn̂g hit tiâu lō͘ lâi, ta̍k-lâng chhiú kia̍h thâi-lâng ê ke-si; lāi-tiong ū chi̍t-lâng chhēng iù-tōe-saⁿ, io--nih kùi ba̍k-ô͘; in ji̍p-khì, khiā tī tâng-tôaⁿ ê piⁿ-thâu. 3 Í-sek-lia̍t Siōng-tè ê êng-kng, pún tī ki-lō͘-peng ê téng-bīn; taⁿ tùi hia chiūⁿ--khì, sóa kàu tiān ê hō͘-tēng, I kiò hit ê chhēng iù-tōe-saⁿ, io--nih kùi ba̍k-ô͘ ê lâng lâi. 4 Iâ-hô-hoa tùi i kóng, Piàn-kiâⁿ tī siâⁿ-lāi, chiū-sī piàn-kiâⁿ Iâ-lō͘-sat-léng ê tiong-kan; kìⁿ-nā ūi-tio̍h siâⁿ-lāi só͘ kiâⁿ it-chhè khó-ò͘ⁿ ê sū, lâi thó͘-khùi pûn-hāiⁿ ê lâng, chiū chòe kì-hō tī i ê thâu-hia̍h. 5 Góa ê hī-khang-tiong thiaⁿ-kìⁿ I tùi kî-û ê lâng kóng, Tio̍h tè i piàn-kiâⁿ thong-siâⁿ, lâi thâi-sí lâng; lín ê ba̍k-chiu bo̍h-tit thiàⁿ-sioh, lín ia̍h bo̍h-tit khó-lîn in. 6 Tio̍h it-chīn thâi-sí lāu-lâng, siàu-liân lâng, chāi-sek-lú, eⁿ-á, hū-jîn-lâng; ia̍h tio̍h tùi Góa ê sèng-só͘ thâi-khí; to̍k-to̍k kìⁿ-nā ū kì-hō--ê, bo̍h-tit kūn-óa i. Tùi án-ni, in chiū tùi tiān-chêng ê tióng-ló thâi-khí. 7 I tùi in kóng, Tio̍h phah lâ-sâm chit keng tiān, hō͘ īⁿ-lāi chhiong-móa siū-thâi ê lâng; lín tio̍h chhut-khì. In chiū chhut-khì, tī siâⁿ-lāi thâi-sí lâng. 8 In khì thâi lâng ê sî, chhun góa tī-hia; góa chiū phak tī tōe--nih, kiò kóng, Hāiⁿ ah, Chú Iâ-hô-hoa ah, Lí chiong tōa siū-khì piàⁿ tī Iâ-lō͘-sat-léng, kiám sī beh chiong Í-sek-lia̍t lâng it-chīn bia̍t-bô mah? 9 I chiū tùi góa kóng, Í-sek-lia̍t-ke kap Iû-tāi-ke ê chōe-kòa ke̍k-kî tāng; piàn-tōe ū lâu-huih ê sū, móa-siâⁿ ū oan-óng; in-ūi in kóng, Iâ-hô-hoa í-keng lī-khui chit ê tōe, Iâ-hô-hoa bô teh khòaⁿ. 10 Só͘-í Góa ê bâk-chiu bô beh thiàⁿ-sioh, Góa ia̍h bô beh khó-lîn in; beh chiàu in só͘ kiâⁿ--ê, pò-èng tī in ê thâu-khak-téng. 11 Khòaⁿ ah, hit ê chhēng iù-tōe-saⁿ, io--nih kùi ba̍k-ô͘ ê lâng, chiong chit ê sū hê-hok kóng, Góa í-keng chiàu Lí só͘ hoan-hù--ê kiâⁿ lah.
1 我觀看，看見ki-lō͘-peng頭殼頂穹蒼ê中間，親像藍色ê寶石，親像寶座ê形象ê款式。 2 伊tùi hitê穿幼苧衫ê人講，你入去，tī轉旋ê輪ê中間，ki-lō͘-peng以下，tùi ki-lō͘-peng ê中間the̍h to̍h ê火炭，滿兩手，掖tī城頂。我就親目看見伊入去。 3 Hit人入去ê時，ki-lō͘-peng khiā tī殿ê chiàⁿ-pêng，雲充滿內院。 4 耶和華ê榮光tùi ki-lō͘-peng hia上去，停tī殿ê戶碇ê頂面；殿有雲滿滿；hitê院亦hō͘耶和華榮光ê燦爛充滿。 5 Ki-lō͘兵ê翼ê聲聽到外院，親像全能ê上帝講話ê聲。 6 伊吩咐hitê穿幼苧衫ê人講，Tio̍h tùi轉旋ê輪ê中間，ki-lō͘-peng ê中間，取火；hit時伊就入去，khiā tī一个輪ê邊頭。 7 有一个ki-lō͘-peng tùi ki-lō͘-peng中伸伊ê手，到ki-lō͘-peng中間ê火，the̍h kóa起來，hē tī穿幼苧衫ê人ê兩支手；hit人kā伊the̍h來，就出去。 8 Tī ki-lō͘-peng ê翼下，有顯出人ê手ê款。 9 我koh觀看，看見ki-lō͘-peng ê邊頭四個輪；chitê ki-lō͘-peng ê邊頭有一个輪，hitê ki-lō͘-peng ê邊頭也有一个輪；輪 ê款式親像黃ê玉ê色緻。 10 論到in ê款式，四個lóng siâng一樣ê形狀，親像輪中有輪。 11 行ê時，四面lóng會行得，行ê時m̄免oa̍t，頭ǹg甚麼所在，in就tè伊行；行ê時m̄免oa̍t。 12 In thong身軀，in ê ka-chiah，in ê手，in ê翼，kap輪，四圍有目睭滿滿；就是in四個所有ê輪。 13 論到chiahê輪，我耳孔中聽見講，轉旋ê。 14 Tāk-ê有四個面，頭一个面是ki-lō͘-peng ê面，第二ê面是人ê面，第三ê面是獅ê面，第四ê面是鷹ê面。 15 Ki-lō͘兵lóng上去；這是我tī Ka-pa-ló͘河邊所bat看見ê活物。 16 Ki-lō͘兵行，輪亦tī邊頭行；ki-lō͘-peng thí開翼 tùi地上去，輪也無oa̍t-tńg離開in ê身邊。 17 Hiah-ê停，chiahê也停；hiahê上去，chiahê亦相kap上去；因為活物ê神tī in ê內面。 18 耶和華ê榮光tùi殿ê戶碇頂出去，停tī ki-lō͘-peng ê頂面。 19 Ki-lō͘兵出去ê時就thí開翼，tī我ê目睭前tùi地上去，輪亦tī in ê身邊；停tī耶和華ê厝東門ê門口，tī in ê頂面，有以色列上帝ê榮光。 20 這是我前tī Ka-pa-ló͘河邊所看見以色列上帝ê下面ê活物；我知in是ki-lō͘-peng。 21 Ta̍k-ê有四個面，ta̍k-ê有四個翼；in ê翼下有人ê手ê形象。 22 論到in ê面ê形象，就是我前tī Ka-pa-ló͘河邊所看見ê面；in ê款式，in ê身體，lóng án-ni；lóng ta̍k-ê直直行去。
1 Góa koan-khòaⁿ, khòaⁿ-kìⁿ ki-lō͘-peng thâu-khak-téng kiong-chhong ê tiong-kan, chhin-chhiūⁿ lâm-sek ê pó-chio̍h, chhin-chhiūⁿ pó-chō ê hêng-siōng ê khoán-sit. 2 I tùi hit ê chhēng iù-tōe-saⁿ ê lâng kóng, Lí ji̍p-khì, tī tńg-se̍h ê lûn ê tiong-kan, ki-lō͘-peng í-ē, tùi ki-lō͘-peng ê tiong-kan the̍h to̍h ê hé-thòaⁿ, móa nn̄g chhiú, iā tī siâⁿ-téng. Góa chiū chhin-ba̍k khòaⁿ-kìⁿ i ji̍p-khì. 3 Hit-lâng ji̍p-khì ê sî, ki-lō͘-peng khiā tī tiān ê chiàⁿ-pêng, hûn chhiong-móa lāi-īⁿ. 4 Iâ-hô-hoa ê êng-kng tùi ki-lō͘-peng hia chiūⁿ--khì, thêng tī tiān ê hō͘-tēng ê téng-bīn; tiān ū hûn móa-móa; hit ê īⁿ ia̍h hō͘ Iâ-hô-hoa êng-kng ê chhàn-lān chhiong-móa. 5 Ki-lō͘-peng ê si̍t ê siaⁿ thiaⁿ kàu gōa-īⁿ, chhin-chhiūⁿ choân-lêng ê Siōng-tè kóng-ōe ê siaⁿ. 6 I hoan-hù hit ê chhēng iù-tōe-saⁿ ê lâng kóng, Tio̍h tùi tńg-se̍h ê lûn ê tiong-kan, ki-lō͘-peng ê tiong-kan, chhú hé; hit-sî i chiū ji̍p-khì, khiā tī chi̍t ê lûn ê piⁿ-thâu. 7 Ū chi̍t ê ki-lō͘-peng tùi ki-lō͘-peng tiong chhun i ê chhiú, kàu ki-lō͘-peng tiong-kan ê hé, the̍h kóa khí-lâi, hē tī chhēng iù-tōe-saⁿ ê lâng ê nn̄g ki chhiú; hit-lâng kā i the̍h--lâi, chiū chhut-khì. 8 Tī ki-lō͘-peng ê si̍t-ē, ū hián-chhut lâng ê chhiú ê khoán. 9 Góa koh koan-khòaⁿ, khòaⁿ-kìⁿ ki-lō͘-peng ê piⁿ--thâu sì ê lûn; chit ê ki-lō͘-peng ê piⁿ--thâu ū chi̍t ê lûn, hit ê ki-lō͘-peng ê piⁿ--thâu iā ū chi̍t ê lûn; lûn ê khoán-sit chhin-chhiūⁿ n̂g ê ge̍k ê sek-tì. 10 Lūn-kàu in ê khoán-sit, sì-ê lóng siâng chi̍t-iūⁿ ê hêng-chōng, chhin-chhiūⁿ lûn-tiong ū lûn. 11 Kiâⁿ ê sî, sì-bīn lóng ōe kiâⁿ--tit, kiâⁿ ê sî m̄-bián oa̍t, thâu ǹg sím-mi̍h só͘-chāi, in chiū tè i kiâⁿ; kiâⁿ ê sî m̄-bián oa̍t. 12 In thong sin-khu, in ê ka-chiah, in ê chhiú, in ê si̍t, kap lûn, sì-ûi ū ba̍k-chiu móa-móa; chiū-sī in sì-ê só͘ ū ê lûn. 13 Lūn-kàu chiah ê lûn, góa hī-khang-tiong thiaⁿ-kìⁿ kóng, Tńg-se̍h--ê. 14 Tāk-ê ū sì ê bīn, thâu chi̍t ê bīn sī ki-lō͘-peng ê bīn, tē-jī ê bīn sī lâng ê bīn, tē-saⁿ ê bīn sī sai ê bīn, tē-sì ê bīn sī eng ê bīn. 15 Ki-lō͘-peng lóng chiūⁿ--khì; che sī góa tī Ka-pa-ló͘ hô-piⁿ só͘ bat khòaⁿ-kìⁿ ê oa̍h-mi̍h. 16 Ki-lō͘-peng kiâⁿ, lûn ia̍h tī piⁿ--thâu kiâⁿ; ki-lō͘-peng thí-khui si̍t tùi tōe chiūⁿ--khì, lûn iā bô oa̍t-tńg lī-khui in ê sin-piⁿ. 17 Hiah-ê thêng, chiah-ê iā thêng; hiah-ê chiūⁿ--khì, chiah-ê ia̍h saⁿ-kap chiūⁿ--khì; in-ūi oa̍h-mi̍h ê sîn tī in ê lāi-bīn. 18 Iâ-hô-hoa ê êng-kng tùi tiān ê hō͘-tēng-téng chhut-khì, thêng tī ki-lō͘-peng ê téng-bīn. 19 Ki-lō͘-peng chhut-khì ê sî chiū thí-khui si̍t, tī góa ê ba̍k-chiu-chêng tùi tōe chiūⁿ--khì, lûn ia̍h tī in ê sin-piⁿ; thêng tī Iâ-hô-hoa ê chhù tang-mn̂g ê mn̂g-kháu, tī in ê téng-bīn, ū Í-sek-lia̍t Siōng-tè ê êng-kng. 20 Che sī góa chêng tī Ka-pa-ló͘ hô-piⁿ só͘ khòaⁿ-kìⁿ Í-sek-lia̍t Siōng-tè ê ē-bīn ê oa̍h-mi̍h; góa chai in sī ki-lō͘-peng. 21 Ta̍k-ê ū sì ê bīn, ta̍k-ê ū sì ê si̍t; in ê si̍t-ē ū lâng ê chhiú ê hêng-siōng. 22 Lūn-kàu in ê bīn ê hêng-siōng, chiū-sī góa chêng tī Ka-pa-ló͘ hô-piⁿ só͘ khòaⁿ-kìⁿ ê bīn; in ê khoán-sit, in ê sin-thé, lóng án-ni; lóng ta̍k-ê ti̍t-ti̍t kiâⁿ--khì.
1 神就舉起我，帶我到耶和華ê厝，ǹg東ê東門；看ah，tī門ê門口，有二十五人；我看見in中間有百姓ê貴族，Ap-sok ê kiáⁿ Ngá-sat-nî，kap Pí-ná-ngá ê kiáⁿ Pí-la̍h-thê。 2 伊kā我講，人子ah，這就是圖謀罪惡ê人，提倡pháiⁿ-tāi tī chitê城內。 3 In講，起厝ê期iáu未到，chitê城是鼎，阮是hit內面ê肉。 4 人子ah，因為án-ni，你tio̍h宣傳；tio̍h宣傳來攻擊in。 5 耶和華ê神臨到我，對我講，你tio̍h講，耶和華án-ni講，以色列家ah，lín講án-ni，lín ê心所想，我知lah。 6 Lín tī chitê城內刣死chōe-chōe人，hō͘身屍滿街路。 7 所以主耶和華án-ni講，Lín所hē tī chitê城內ê死人就是肉；chitê城就是鼎；總是lín beh tùi hit中間受帶出去。 8 Lín驚刀劍，我beh hō͘刀劍臨到lín；這是主耶和華講ê。 9 我beh tùi hit中間chhōa lín出去，交tī外邦人ê手；koh beh tī lín中間行審判。 10 Lín beh倒tī刀下，我beh tī以色列ê交界審判lín；lín就知我是耶和華。 11 Chitê城無beh做lín ê鼎，lín亦無beh做hit中間ê肉；我beh tī以色列ê交界審判lín。 12 Lín就知我是耶和華，因為lín無行我ê律例，亦無順thàn我ê法度；就是thàn lín四圍列國ê法度。 13 我tú-á teh宣傳ê時，Pí-ná-ngá ê kiáⁿ Pí-la̍h-thê死去。我就仆tī地裡，大聲叫講，Hāiⁿ ah！主耶和華ah，祢beh將以色列ê人一盡剿滅mah？ 14 耶和華ê話臨到我講， 15 人子ah，耶路撒冷khiā起ê百姓，對你ê兄弟，就是你ê兄弟，你ê親人，kap以色列全家，就是對眾人講，Lín tio̍h離開耶和華，因為chitê地是hō͘阮做業ê。 16 所以你tio̍h講，主耶和華án-ni講，我雖然遷徙in遠遠，tī列邦中，四散in tī列國中，我iáu beh tī in所到ê國，暫時做in ê聖所。 17 所以你tio̍h講，主耶和華án-ni講，我beh tùi chiahê百姓中招集lín，亦beh tùi lín四散到ê列國中聚集lín，koh beh將以色列地賞賜lín。 18 In beh到hia，亦beh tùi in中間除去一切可惡thang怨恨ê物。 19 我beh hō͘ in專一ê心，亦beh將新ê神hē tī lín ê內面；koh beh tùi in ê肉體中除去hit號親像石ê心，賞賜in hit號親像肉ê心。 20 Hō͘ in順thàn我ê律例，遵守我ê法度來行伊；in做我ê百姓，我亦beh做in ê上帝。 21 總是心thàn可惡thang厭賤ê ê心hit號人，我beh照in所行ê報應tī in ê頭殼頂；這是主耶和華講ê。 22 Hit時ki-lō͘-peng thí開in ê翼，hiahê輪亦tī in ê邊頭；tī in ê頂面有以色列上帝ê榮光。 23 耶和華ê榮光tùi城中上去，歇tī城外東勢ê山。 24 神舉起我，tī異象中tùi上帝ê神帶我到Ka-le̍k-tí受掠ê人hia；我所看見ê異象，就離開我上去。 25 我就將耶和華所指示我一切ê事，lóng講hō͘受掠ê人聽。
1 Sîn chiū kú-khí góa, tòa góa kàu Iâ-hô-hoa ê chhù, ǹg-tang ê tang-mn̂g; khòaⁿ ah, tī mn̂g ê mn̂g-kháu, ū jī-cha̍p-gō͘ lâng; góa khòaⁿ-kìⁿ in tiong-kan ū peh-sìⁿ ê kùi-cho̍k, Ap-sok ê kiáⁿ Ngá-sat-nî, kap Pí-ná-ngá ê kiáⁿ Pí-la̍h-thê. 2 I kā góa kóng, Jîn-chú ah, che chiū-sī tô͘-bô͘ chōe-ok ê lâng, thê-chhiòng pháiⁿ-tāi tī chit ê siâⁿ-lāi. 3 In kóng, Khí-chhù ê kî iáu-bē kàu, chit ê siâⁿ sī tiáⁿ, goán sī hit lāi-bīn ê bah. 4 Jîn-chú ah, in-ūi án-ni, lí tio̍h soan-thoân; tio̍h soan-thoân lâi kong-kek in. 5 Iâ-hô-hoa ê sîn lîm-kàu góa, tùi góa kóng, Lí tio̍h kóng, Iâ-hô-hoa án-ni kóng, Í-sek-lia̍t-ke ah, lín kóng án-ni, lín ê sim só͘ siūⁿ, Góa chai lah. 6 Lín tī chit ê siâⁿ-lāi thâi-sí chōe-chōe lâng, hō͘ sin-si móa ke-lō͘. 7 Só͘-í Chú Iâ-hô-hoa án-ni kóng, Lín só͘ hē tī chit ê siâⁿ-lāi ê sí-lâng chiū-sī bah; chit ê siâⁿ chiū-sī tiáⁿ; chóng-sī lín beh tùi hit tiong-kan siū tòa-chhut--khì. 8 Lín kiaⁿ to-kiàm, Góa beh hō͘ to-kiàm lîm-kàu lín; che sī Chú Iâ-hô-hoa kóng--ê. 9 Góa beh tùi hit tiong-kan chhōa lín chhut-khì, kau tī gōa-pang lâng ê chhiú; koh beh tī lín tiong-kan kiâⁿ sím-phòaⁿ. 10 Lín beh tó tī to-ē, Góa beh tī Í-sek-lia̍t ê kau-kài sím-phòaⁿ lín; lín chiū chai Góa sī Iâ-hô-hoa. 11 Chit ê siâⁿ bô beh chòe lín ê tiáⁿ, lín ia̍h bô beh chòe hit tiong-kan ê bah; Góa beh tī Í-sek-lia̍t ê kau-kài sím-phòaⁿ lín. 12 Lín chiū chai Góa sī Iâ-hô-hoa, in-ūi lín bô kiâⁿ Góa ê lu̍t-lē, ia̍h bô sūn-thàn Góa ê hoat-tō͘; chiū-sī thàn lín sì-ûi lia̍t-kok ê hoat-tō͘. 13 Góa tú-á teh soan-thoân ê sî, Pí-ná-ngá ê kiáⁿ Pí-la̍h-thê sí--khì. Góa chiū phak tī tōe--nih, tōa-siaⁿ kiò kóng, Hāiⁿ ah! Chú Iâ-hô-hoa ah, Lí beh chiong Í-sek-lia̍t ê lâng it-chīn châu-bia̍t mah? 14 Iâ-hô-hoa ê ōe lîm-kàu góa kóng, 15 Jîn-chú ah, Iâ-lō͘-sat-léng khiā-khí ê peh-sìⁿ, tùi lí ê hiaⁿ-tī, chiū-sī lí ê hiaⁿ-tī, lí ê chhin-lâng, kap Í-sek-lia̍t choân-ke, chiū-sī tùi chèng-lâng kóng, Lín tio̍h lī-khui Iâ-hô-hoa, in-ūi chit ê tōe sī hō͘ goán chòe-gia̍p--ê. 16 Só͘-í lí tio̍h kóng, Chú Iâ-hô-hoa án-ni kóng, Góa sui-jiân chhian-sóa in hn̄g-hn̄g, tī lia̍t-pang-tiong, sì-sòaⁿ in tī lia̍t-kok-tiong, Góa iáu beh tī in só͘ kàu ê kok, chiām-sî chòe in ê sèng-só͘. 17 Só͘-í lí tio̍h kóng, Chú Iâ-hô-hoa án-ni kóng, Góa beh tùi chiah ê peh-sìⁿ-tiong chio-chi̍p lín, ia̍h beh tùi lín sì-sòaⁿ kàu ê lia̍t-kok-tiong chū-chi̍p lín, koh beh chiong Í-sek-lia̍t tōe siúⁿ-sù lín. 18 In beh kàu hia, ia̍h beh tùi in tiong-kan tû-khì it-chhè khó-ò͘ⁿ thang oàn-hūn ê mi̍h. 19 Góa beh hō͘ in choan-it ê sim, ia̍h beh chiong sin ê sîn hē tī lín ê lāi-bīn; koh beh tùi in ê jio̍k-thé-tiong tû-khì hit-hō chhin-chhiūⁿ chio̍h ê sim, siúⁿ-sù in hit-hō chhin-chhiūⁿ bah ê sim. 20 Hō͘ in sūn-thàn Góa ê lu̍t-lē, chun-siú Góa ê hoat-tō͘ lâi kiâⁿ--i; in chòe Góa ê peh-sìⁿ, Góa ia̍h beh chòe in ê Siōng-tè. 21 Chóng-sī sim thàn khó-ò͘ⁿ thang iàm-chiān--ê ê sim hit-hō lâng, Góa beh chiàu in só͘ kiâⁿ--ê pò-èng tī in ê thâu-khak-téng; che sī Chú Iâ-hô-hoa kóng--ê. 22 Hit-sî ki-lō͘-peng thí-khui in ê si̍t, hiah ê lûn ia̍h tī in ê piⁿ-thâu; tī in ê téng-bīn ū Í-sek-lia̍t Siōng-tè ê êng-kng. 23 Iâ-hô-hoa ê êng-kng tùi siâⁿ-tiong chiūⁿ--khì, hioh tī siâⁿ-gōa tang--sì ê soaⁿ. 24 Sîn kú-khí góa, tī īⁿ-siōng-tiong tùi Siōng-tè ê sîn tòa góa kàu Ka-le̍k-tí siū-lia̍h ê lâng hia; góa só͘ khòaⁿ-kìⁿ ê īⁿ-siōng, chiū lī-khui góa chiūⁿ--khì. 25 Góa chiū chiong Iâ-hô-hoa só͘ chí-sī góa it-chhè ê sū, lóng kóng hō͘ siū-lia̍h ê lâng thiaⁿ.
1 耶和華ê話koh臨到我講， 2 人子ah，你khiā起tī悖逆ê家中；in有目睭thang看，亦m̄看；有耳孔thang聽，亦m̄聽；因為in是悖逆ê家。 3 所以，人子ah，你tio̍h為家己備辦受遷徙應用ê物件；當頭白日tī in ê目睭前來遷徙；koh tio̍h對你ê所在當in ê目睭前遷徙到別位；in雖bóng是悖逆ê家，kiám-chhái tùi án-ni，會想。 4 你tio̍h當頭白日，tī in ê目睭前，帶你ê物出去；親像帶受遷徙應用ê物一樣；到ê-hng，你tio̍h tī in ê目睭前家己出去，親像受掠ê人出去一樣。 5 你tio̍h tī in ê面前，tùi牆壁iah孔，tùi hit孔帶物出去。 6 到日暗，你tio̍h tī in ê目睭前，背tī肩頭出去；亦tio̍h罩你ê面，到無看見地；因為我用你做以色列家ê兆頭。 7 我就照所吩咐ê去行，當頭白日帶我ê物件出去，親像帶受遷徙應用ê物件；日beh暗，我用手tùi牆iah孔；日已經暗，就當in ê目睭前背tī肩頭帶出去。 8 隔早起，耶和華ê話臨到我講， 9 人子ah，以色列家，就是悖逆ê家，kiám m̄-bat問你講，你做甚麼ah？ 10 你tio̍h應in講，主耶和華án-ni講，chitê啟示，關係耶路撒冷ê君王，以及in中間以色列ê全家。 11 你tio̍h講，我做lín ê兆頭；我怎樣行，in所tú-tio̍h-ê也beh án-ni；in beh受掠受遷徙。 12 In中間ê君王也beh tī日暗ê時，背物tī肩頭帶出去；in beh tùi牆iah孔，tùi hit孔帶物出去；伊beh蓋伊ê面，因為目睭無看見地。 13 我beh張我ê羅網tī伊ê頂面，伊beh hō͘我ê活tauh tauh-tio̍h；我beh帶伊到巴比倫，Ka-le̍k-tí人ê地；伊雖然死tī-hia，也bōe看見hitê地。 14 周圍一切保護伊ê，kap伊所有ê軍隊，我beh四散in tī四方；也beh拔刀追jip in。 15 我分散in tī列邦，四散in tī列國ê時，in就知我是耶和華。 16 總是我beh留in kúi-nā人，脫離刀劍、飢荒、瘟疫，hō͘ in tī所到ê ta̍k國中，講起in可惡ê事；in就知我是耶和華。 17 耶和華ê話koh臨到講， 18 人子ah，你tio̍h ngia̍uh-ngia̍uh-chhoah來食你ê餅，tio̍h驚惶撙節來lim你ê水。 19 你tio̍h對chitê地方ê百姓講，主耶和華論耶路撒冷，kap以色列地khiā起ê百姓，án-ni講，In食餅tio̍h撙節，lim水tio̍h gông-ngia̍h，因為in中間khiā起ê眾人所行強暴ê事，chitê地beh荒廢失落伊所有ê。 20 有人khiā起ê城beh拋荒；地也beh荒廢；lín就知我是耶和華。 21 耶和華ê話koh臨到我講， 22 人子ah，tī lín以色列地，怎樣有chit號俗語講，時日延chhiân，異象lóng無應驗ah？ 23 所以你tio̍h kā in講，主耶和華án-ni講，我beh hō͘ chitê俗語soah，以色列中無koh用chitê做俗語；總是你tio̍h kā in講，時日近lah，ta̍k-ê異象ê應驗也是án-ni。 24 以後tī以色列家ê中間，的確無koh有虛假ê異象，順人意ê卜卦。 25 因為我就是耶和華，我beh講，koh我所講ê話，beh應驗，無koh延chhiân；lín chitê悖逆ê家ah，我beh tī lín活teh ê日來講，來成伊；這是主耶和華講ê。 26 耶和華ê話koh臨到我講， 27 人子ah，看ah，以色列家ê人講，伊所看見ê異象，是屬tī chōe-chōe日後ê事，所講ê讖語，是指極遠ê時期。 28 所以你tio̍h對in講，主耶和華án-ni講，我ê話無一句有koh 延chhiân，我所講ê話，的確成伊；這是主耶和華講ê。
1 Iâ-hô-hoa ê ōe koh lîm-kàu góa kóng, 2 Jîn-chú ah, lí khiā-khí tī pōe-ge̍k ê ke-tiong; in ū ba̍k-chiu thang khòaⁿ, ia̍h m̄-khòaⁿ; ū hī-khang thang thiaⁿ, ia̍h m̄-thiaⁿ; in-ūi in sī pōe-ge̍k ê ke. 3 Só͘-í, jîn-chú ah, lí tio̍h ūi ka-kī pī-pān siū chhian-sóa èng-iōng ê mi̍h-kiāⁿ; tng-thâu pe̍h-ji̍t tī in ê ba̍k-chiu-chêng lâi chhian-sóa; koh tio̍h tùi lí ê só͘-chāi tng in ê ba̍k-chiu-chêng chhian-sóa kàu pa̍t-ūi; in sui-bóng sī pōe-ge̍k ê ke, kiám-chhái tùi án-ni ōe siūⁿ. 4 Lí tio̍h tng-thâu pe̍h-ji̍t, tī in ê ba̍k-chiū-chêng, tòa lí ê mi̍h chhut-khì; chhin-chhiūⁿ tòa siū chhian-sóa èng-iōng ê mi̍h chi̍t-iūⁿ; kàu ê-hng, lí tio̍h tī in ê ba̍k-chiu-chêng ka-kī chhut-khì, chhin-chhiūⁿ siū-lia̍h ê lâng chhut-khì chi̍t-iūⁿ. 5 Lí tio̍h tī in ê bīn-chêng, tùi chhiûⁿ-piah iah-khang, tùi hit khang tòa mi̍h chhut-khì. 6 Kàu ji̍t àm, lí tio̍h tī in ê ba̍k-chiu-chêng, pē tī keng-thâu chhut-khì; ia̍h tio̍h tà lí ê bīn, kàu bô khòaⁿ-kìⁿ tōe; in-ūi Góa ēng lí chòe Í-sek-lia̍t-ke ê tiāu-thâu. 7 Góa chiū chiàu só͘ hoan-hù--ê khì kiâⁿ, tng-thâu pe̍h-ji̍t tòa góa ê mi̍h-kiāⁿ chhut-khì, chhin-chhiūⁿ tòa siū chhian-sóa èng-iōng ê mi̍h-kiāⁿ; ji̍t beh àm, góa ēng chhiú tùi chhiûⁿ iah khang; ji̍t í-keng àm, chiū tng in ê ba̍k-chiu-chêng pē tī keng-thâu tòa chhut-khì. 8 Kè chá-khí, Iâ-hô-hoa ê ōe lîm-kàu góa kóng, 9 Jîn-chú ah, Í-sek-lia̍t-ke, chiū-sī pōe-ge̍k ê ke, kiám m̄-bat mn̄g lí kóng, Lí chòe sím-mi̍h ah? 10 Lí tio̍h ìn in kóng, Chú Iâ-hô-hoa án-ni kóng, Chit ê khé-sī, koan-hē Iâ-lō͘-sat-léng ê kun-ông, í-ki̍p in tiong-kan Í-sek-lia̍t ê choân-ke. 11 Lí tio̍h kóng, Góa chòe lín ê tiāu-thâu; góa cháiⁿ-iūⁿ kiâⁿ, in só͘ tú-tio̍h--ê iā beh án-ni; in beh siū-lia̍h siū chhian-sóa. 12 In tiong-kan ê kun-ông iā beh tī ji̍t àm ê sî, pē mi̍h tī keng-thâu tòa chhut--khì; in beh tùi chhiûⁿ iah khang, tùi hit khang tòa mi̍h chhut--khì; i beh khàm i ê bīn, in-ūi ba̍k-chiu bô khòaⁿ-kìⁿ tōe. 13 Góa beh tiuⁿ Góa ê lô-bāng tī i ê téng-bīn, i beh hō͘ Góa ê oa̍h-tauh tauh--tio̍h; Góa beh tòa i kàu Pa-pí-lûn, Ka-le̍k-tí lâng ê tōe; i sui-jiân sí tī-hia, iā bōe khòaⁿ-kìⁿ hit ê tōe. 14 Chiu-ûi it-chhè pó-hō͘ i ê, kap i só͘ ū ê kun-tūi, Góa beh sì-sòaⁿ in tī sì-hng; iā beh pu̍ih-to tui-jip in. 15 Góa hun-sòaⁿ in tī lia̍t-pang, sì-sòaⁿ in tī lia̍t-kok ê sî, in chiū chai Góa sī Iâ-hô-hoa. 16 Chóng-sī Góa beh lâu in kúi-nā lâng, thoat-lī to-kiàm, ki-hng, un-e̍k, hō͘ in tī só͘ kàu ê ta̍k-kok-tiong, kóng-khí in khó-ò͘ⁿ ê sū; in chiū chai Góa sī Iâ-hô-hoa. 17 Iâ-hô-hoa ê ōe koh lîm-kàu kóng, 18 Jîn-chú ah, lí tio̍h ngia̍uh-ngia̍uh-chhoah lâi chia̍h lí ê piáⁿ, tio̍h kiaⁿ-hiâⁿ chún-chat lâi lim lí ê chúi. 19 Lí tio̍h tùi chit ê tōe-hng ê peh-sìⁿ kóng, Chú Iâ-hô-hoa lūn Iâ-lō͘-sat-léng, kap Í-sek-lia̍t tōe khiā-khí ê peh-sìⁿ, án-ni kóng, In chia̍h piáⁿ tio̍h chún-chat, lim chúi tio̍h gông-ngia̍h, in-ūi in tiong-kan khiā-khí ê chèng-lâng só͘ kiâⁿ kiông-pō ê sū, chit ê tōe beh hong-hòe sit-lo̍h i só͘-ū-ê. 20 Ū lâng khiā-khí ê siâⁿ beh pha-hng; tōe iā beh hong-hòe; lín chiū chai Góa sī Iâ-hô-hoa. 21 Iâ-hô-hoa ê ōe koh lîm-kàu góa kóng, 22 Jîn-chú ah, tī lín Í-sek-lia̍t tōe, cháiⁿ-iūⁿ ū chit-hō sio̍k-gú kóng, Sî-ji̍t iân-chhiân, īⁿ-siōng lóng bô èng-giām ah? 23 Só͘-í lí tio̍h kā in kóng, Chú Iâ-hô-hoa án-ni kóng, Góa beh hō͘ chit ê sio̍k-gú soah, Í-sek-lia̍t tiong bô koh ēng chit-ê chòe sio̍k-gú; chóng-sī lí tio̍h kā in kóng, Sî-ji̍t kūn--lah, ta̍k ê īⁿ-siōng ê èng-giām iā-sī án-ni. 24 Í-āu tī Í-sek-lia̍t-ke ê tiong-kan, tek-khak bô koh ū hu-ké ê īⁿ-siōng, sūn jîn-ì ê pok-kòa. 25 In-ūi Góa chiū-sī Iâ-hô-hoa, Góa beh kóng, koh Góa só͘ kóng ê ōe, beh èng-giām, bô koh iân-chhiân; lín chit ê pōe-ge̍k ê ke ah, Góa beh tī lín oa̍h-teh ê ji̍t lâi kóng, lâi chiâⁿ--i; che sī Chú Iâ-hô-hoa kóng--ê. 26 Iâ-hô-hoa ê ōe koh lîm-kàu góa kóng, 27 Jîn-chú ah, khòaⁿ ah, Í-sek-lia̍t-ke ê lâng kóng, I só͘ khòaⁿ-kìⁿ ê īⁿ-siōng, sī sio̍k tī chōe-chōe ji̍t-āu ê sū, só͘ kóng ê chhàm-gú, sī chí ke̍k-hn̄g ê sî-kî. 28 Só͘-í lí tio̍h tùi in kóng, Chú Iâ-hô-hoa án-ni kóng, Góa ê ōe bô chi̍t-kù ū koh iân-chhiân, Góa só͘ kóng ê ōe, tek-khak chiâⁿ--i; che sī Chú Iâ-hô-hoa kóng--ê.
1 耶和華ê話臨到我講， 2 人子ah，你tio̍h宣傳來攻擊以色列中hiahê teh宣傳ê先知，kā hiahê照伊家己ê心意來宣傳ê講，Lín tio̍h聽耶和華ê話。 3 主耶和華án-ni講，Hiah-ê戇ê先知，in有災厄ah，in thàn家己ê心神來行，並無看見一項。 4 以色列ah，你ê先知親像拋荒ê所在ê狐狸。 5 Lín bē-bat上到破隙ê所在，亦bē-bat為tio̍h以色列家圍一个牆；thang tī耶和華ê日，戰陣khiā-ōe-tiâu。 6 In所看見ê是虛假，是白賊ê占卜；in講，這是耶和華講ê，其實耶和華無影差in，in iáu teh ǹg望hitê話會應驗。 7 Lín kiám m̄是看見虛假ê異象mah？kiám m̄是講白賊ê占卜mah？lín講，這是耶和華講ê，其實我無差in講。 8 所以主耶和華án-ni講，因為lín所講ê是虛假，所看ê是白賊；看ah，因為án-ni我kap lín反對；這是主耶和華講ê。 9 我ê手beh攻擊hiahê看見虛假，用白賊占卜ê先知；in的確無屬tī我ê百姓ê會中，無記tī以色列家ê人名簿；亦bōe-thang進入以色列地；lín就知我是主耶和華。 10 因為in誘惑我ê百姓講，平安，其實無有平安；就是親像人起牆壁，in kā伊筅(chhéng)灰水。 11 所以你tio̍h對hiahê筅灰水ê人講，牆beh倒壞，beh有漲水ê大雨；大雹ah，lín tio̍h落來，koh beh有大風吹裂伊。 12 看ah，牆倒了後，人kiám無beh對lín講，Lín所筅 ê 灰水，taⁿ tī toh-lo̍h？ 13 所以主耶和華án-ni講，我beh tī我ê大受氣，用狂風拆裂伊，tī我ê受氣beh有漲水ê大雨，也tī我ê大受氣beh落大雹來毀滅伊。 14 我beh án-ni拆毀lín筅灰水ê牆，拆到平地；致到牆基露現，牆beh倒壞；lín亦beh滅無tī hit中間；lín就知我是耶和華。 15 我beh án-ni成我ê大受氣tī hitê牆，kap筅灰水ê人；亦beh對lín講，牆無去lah，筅灰水ê人亦無去lah。 16 這就是以色列ê先知，in kí耶路撒冷來宣傳；為tio̍h伊看見平安ê異象，其實無有平安；這是主耶和華講ê。 17 人子ah，你tio̍h面直直ǹg你ê百姓ê婦女，就是照伊ê心意來宣傳ê； 18 你tio̍h宣傳來攻擊伊，講，主耶和華án-ni講，Chiahê婦女有災厄ah，in kā眾人ê手khiau縫(pâng)靠墊，kā ta̍k等號身裁ê人做罩頭殼ê帕，來搶人ê神魂！總無lín beh搶我ê百姓ê神魂，為利益家己救活神魂mah？ 19 Lín為tio̍h kúi-nā把大麥，kúi-nā塊餅，tī我ê百姓中褻瀆我，對我hiahê ài聽白賊話ê百姓，來講白賊，害死hiahê m̄應該死ê神魂，亦hō͘ m̄應該活ê神魂活。 20 所以主耶和華án-ni講，看ah，我反對lín ê靠墊，就是lín所用來搶神魂hō͘伊飛去ê；我beh tùi lín ê手拆起來；我beh tháu放hiahê神魂，就是lín所搶ê神魂，來hō͘ in飛去ê。 21 我亦beh拆裂lín hiahê帕，救我ê百姓脫離lín ê手，無koh受搶tī lín ê手內；lín就知我是耶和華。 22 因為hit號義人，我無hō͘伊傷心，lín用白賊話hō͘伊傷心；koh lín堅固pháiⁿ人ê手，hō͘伊無oa̍t頭離開伊ê pháiⁿ路，來得tio̍h活。 23 所以lín bōe-thang koh看見虛假，亦bōe-thang koh占卜。我beh救我ê百姓脫離lín ê手；lín就知我是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h soan-thoân lâi kong-kek Í-sek-lia̍t-tiong hiah-ê teh soan-thoân ê sian-ti, kā hiah-ê chiàu i ka-kī ê sim-ì lâi soan-thoân--ê kóng, Lín tio̍h thiaⁿ Iâ-hô-hoa ê ōe. 3 Chú Iâ-hô-hoa án-ni kóng, Hiah-ê gōng ê sian-ti, in ū chai-ē ah, in thàn ka-kī ê sim-sîn lâi kiâⁿ, pēng-bô khòaⁿ-kìⁿ chi̍t-hāng. 4 Í-sek-lia̍t ah, lí ê sian-ti chhin-chhiūⁿ pha-hng ê só͘-chāi ê hô͘-lî. 5 Lín bē-bat chiūⁿ-kàu phòa-khiah ê só͘-chāi, ia̍h bē-bat ūi-tio̍h Í-sek-lia̍t-ke ûi chi̍t ê chhiûⁿ; thang tī Iâ-hô-hoa ê ji̍t, chiàn-tīn khiā-ōe-tiâu. 6 In só͘ khòaⁿ-kìⁿ--ê sī hu-ké, sī pe̍h-chha̍t ê chiam-pok; in kóng, Che sī Iâ-hô-hoa kóng--ê, kî-si̍t Iâ-hô-hoa bô-iáⁿ chhe--in, in iáu teh ǹg-bāng hit ê ōe ōe èng-giām. 7 Lín kiám-m̄-sī khòaⁿ-kìⁿ hu-ké ê īⁿ-siōng mah? kiám-m̄-sī kóng pe̍h-chha̍t ê chiam-pok mah? lín kóng, Che sī Iâ-hô-hoa kóng--ê, kî-si̍t Góa bô chhe in kóng. 8 Só͘-í Chú Iâ-hô-hoa án-ni kóng, In-ūi lín só͘ kóng-ê sī hu-ké, só͘ khòaⁿ--ê sī pe̍h-chha̍t; khòaⁿ ah, in-ūi án-ni Góa kap lín hoán-tùi; che sī Chú Iâ-hô-hoa kóng--ê. 9 Góa ê chhiú beh kong-kek hiah ê khòaⁿ-kìⁿ hu-ké, ēng pe̍h-chha̍t chiam-pok ê sian-ti; in tek-khak bô sio̍k tī Góa ê peh-sìⁿ ê hōe-tiong, bô kì tī Í-sek-lia̍t ke ê lâng-miâ-phō͘; ia̍h bōe thang chìn-ji̍p Í-sek-lia̍t tōe; lín chiū chai Góa sī Chú Iâ-hô-hoa. 10 In-ūi in iú-he̍k Góa ê peh-sìⁿ kóng, Pêng-an, kî-si̍t bô-ū pêng-an; chiū-sī chhin-chhiūⁿ lâng khí chhiûⁿ-piah, in kā i chhéng he-chúi. 11 Só͘-í lí tio̍h tùi hiah-ê chhéng he-chúi ê lâng kóng, Chhiûⁿ beh tó-hoāi, beh ū tiòng-chúi ê tōa-hō͘; tōa-pha̍uh ah, lín tio̍h lo̍h--lâi, koh beh ū tōa-hong chhe-li̍h--i. 12 Khòaⁿ ah, chhiûⁿ tó liáu-āu, lâng kiám bô beh tùi lín kóng, Lín só͘ chhéng ê he-chúi, taⁿ tī toh-lo̍h? 13 Só͘-í Chú Iâ-hô-hoa án-ni kóng, Góa beh tī Góa ê tōa siū-khì, ēng kông-hong thiah-li̍h--i, tī Góa ê siū-khì beh ū tiòng-chúi ê tōa-hō͘, iā tī Góa ê tōa siū-khì beh lo̍h tōa-pha̍uh lâi húi-bia̍t--i. 14 Góa beh án-ni thiah-húi lín chhéng he-chúi ê chhiûⁿ, thiah kàu pîⁿ-tōe; tì-kàu chhiûⁿ-ki lō͘-hiān, chhiûⁿ beh tó-hoāi; lín ia̍h beh bia̍t-bô tī hit tiong-kan; lín chiū chai Góa sī Iâ-hô-hoa. 15 Góa beh án-ni chiâⁿ Góa ê tōa siū-khì tī hit ê chhiûⁿ, kap chhéng he-chúi ê lâng; ia̍h beh tùi lín kóng, Chhiûⁿ bô--khì lah, chhéng he-chúi ê lâng ia̍h bô--khì lah. 16 Che chiū-sī Í-sek-lia̍t ê sian-ti, in kí Iâ-lō͘-sat-léng lâi soan-thoân; ūi-tio̍h i khòaⁿ-kìⁿ pêng-an ê īⁿ-siōng, kî-si̍t bô-ū pêng-an; che sī Chú Iâ-hô-hoa kóng--ê. 17 Jîn-chú ah, lí tio̍h bīn ti̍t-ti̍t ǹg lí ê peh-sìⁿ ê hū-lú, chiū-sī chiàu i ê sim-ì lâi soan-thoân--ê; 18 lí tio̍h soan-thoân lâi kong-kek--i, kóng, Chú Iâ-hô-hoa án-ni kóng, Chiah ê hū-lú ū chai-ē ah, in kā chèng-lâng ê chhiú-khiau pâng khò-tiām, kā ta̍k téng-hō sin-chhâi ê lâng chòe tà thâu-khak ê phè, lâi chhiúⁿ lâng ê sîn-hûn! chóng-bô lín beh chhiúⁿ Góa ê peh-sìⁿ ê sîn-hûn, ūi lī-ek ka-kī kiù oa̍h sîn-hûn mah? 19 Lín ūi-tio̍h kúi-nā pé tōa-be̍h, kúi-nā tè piáⁿ, tī Góa ê peh-sìⁿ-tiong siat-to̍k Góa, tùi Góa hiah ê ài thiaⁿ pe̍h-chha̍t-ōe ê peh-sìⁿ, lâi kóng pe̍h-chha̍t, hāi-sí hiah-ê m̄ eng-kai sí ê sîn-hûn, ia̍h hō͘ m̄-eng-kai oa̍h ê sîn-hûn oa̍h. 20 Só͘-í Chú Iâ-hô-hoa án-ni kóng, Khòaⁿ ah, Góa hoán-tùi lín ê khò-tiām, chiū-sī lín só͘ ēng lâi chhiúⁿ sîn-hûn hō͘ i pe--khì-ê; Góa beh tùi lín ê chhiú thiah--khí-lâi; Góa beh tháu-pàng hiah ê sîn-hûn, chiū-sī lín só͘ chhiúⁿ ê sîn-hûn, lâi hō͘ in pe--khì ê. 21 Góa ia̍h beh thiah-li̍h lín hiah ê phè, kiù Góa ê peh-sìⁿ thoat-lī lín ê chhiú, bô koh siū chhiúⁿ tī lín ê chhiú-lāi; lín chiū chai Góa sī Iâ-hô-hoa. 22 In-ūi hit hō gī-lâng, Góa bô hō͘ i siong-sim, lín ēng pe̍h-chha̍t ōe hō͘ i siong-sim; koh lín kian-kò͘ pháiⁿ lâng ê chhiú, hō͘ i bô oa̍t-thâu lī-khui i ê pháiⁿ-lō͘, lâi tit-tio̍h oa̍h. 23 Só͘-í lín bōe thang koh khòaⁿ-kìⁿ hu-ké, ia̍h bōe thang koh chiam-pok. Góa beh kiù Góa ê peh-sìⁿ thoat-lī lín ê chhiú; lín chiū chai Góa sī Iâ-hô-hoa.
1 有kúi-nā ê以色列ê長老來我chia，坐tī我ê面前。 2 耶和華ê話就臨到我講， 3 人子ah，chiahê人已經將in ê偶像接納tī in ê心，koh hē致到犯罪ê窒礙tī家己ê面前。我kiám beh hō͘伊問mah？ 4 所以你tio̍h對in講，主耶和華án-ni講，以色列家ê中間見若接納伊ê偶像tī伊ê心內ê人，koh hē致到犯罪窒礙tī伊家己ê面前，koh來就近先知-ê，我耶和華tī伊所求ê事，beh照伊ê chōe-chōe偶像來應答伊； 5 致到我thang hō͘以色列家心內家己責備，因為in lóng為tio̍h in ê偶像kap我生疏。 6 所以你tio̍h kā以色列家講，主耶和華án-ni講，Tio̍h回頭，oa̍t-tńg離開lín ê偶像，oa̍t-tńg面，莫得thàn lín一切可惡ê事。 7 因為以色列家ê人，á是tī以色列中寄腳ê出外人，見若kap我隔斷，接納伊ê偶像tī伊ê心內，koh hē致到犯罪ê窒礙tī伊家己ê面前，koh來就近先知，beh為家己ê事來問我ê，我耶和華beh本身應答伊。 8 我beh ǹg hit號人變面，hō͘伊做人ê鑑戒，做話柄，hō͘人gông-ngia̍h；亦beh tùi我ê百姓中剪除伊；lín就知我是耶和華。 9 先知若迷惑來講一句話，就是我耶和華迷惑hitê先知；我亦beh伸手攻擊伊；將伊tùi我ê百姓以色列中除滅。 10 In beh擔當家己ê罪過，先知ê罪過，kap求-問伊ê人ê罪過，lóng是一樣。 11 Thang hō͘以色列家無koh行迷路離開我，無koh因為ta̍k樣ê罪過phah lâ-sâm家己；獨獨beh做我ê百姓，我做in ê上帝；這是主耶和華講ê。 12 耶和華ê話臨到我講， 13 人子ah，若有國tùi in ê悖逆來得罪我，我亦伸手攻擊伊，斷絕伊所óa靠ê米糧，hō͘飢荒臨到伊，tùi in中間剪除人kap cheng-siⁿ， 14 其中雖然有挪亞、但以理、約伯，chit三人；in只有會因為in ê義來救家己ê性命nā-tiāⁿ；這是主耶和華講ê。 15 我若hō͘惡獸經過hitê地來損壞，hō͘ hit所在荒廢；因為chiahê獸ê緣故，致到無人tùi hia經過， 16 雖然有chit三人tī in中間，主耶和華講，我kí我ê永活來chiù-chōa，in bōe救in ê kiáⁿ cha-bó͘-kiáⁿ，只有in本身得tio̍h救nā-tiāⁿ，地方猶原荒廢。 17 Á是我hō͘刀劍臨到hitê地方講，刀劍ah，你tio̍h經過hitê地方，致到我tùi in中間剪除人kap cheng-siⁿ， 18 雖然有chit三人tī in中間，主耶和華講，我kí我ê永活來chiù-chōa，in bōe救in ê kiáⁿ cha-bó͘-kiáⁿ，只有in本身得tio̍h救nā-tiāⁿ。 19 Á是我hō͘瘟疫流行hitê地方，hō͘我piàⁿ出滅命ê大受氣tī in ê頂面，thang tùi in中間剪除人kap cheng-siⁿ， 20 雖然有挪亞、但以理、約伯tī in中間，主耶和華講，我指我ê永活來chiù-chōa，in bōe救in ê kiáⁿ cha-bó͘-kiáⁿ，只有會因為in ê義來救家己ê性命nā-tiāⁿ。 21 主耶和華án-ni講，何況我將我四項ê大災厄，就是刀劍、飢荒、惡獸、瘟疫，降落tī耶路撒冷，tùi hit中間剪除人kap cheng-siⁿ，kiám m̄是koh-khah bōe救得mah？ 22 看ah，beh有所chhun ê人留teh，就是受掠出來ê kiáⁿ cha-bó͘-kiáⁿ，看ah，in beh出來到lín chia，lín beh看in ê所行所做，就lín論到我所降落tī耶路撒冷ê災厄，就是我一切降落tī in頂面ê，beh得tio̍h安慰。 23 Lín看in所行所做ê，beh受安慰；就知我tī耶路撒冷所行ê，m̄是無緣故；這是主耶和華講ê。
1 Ū kúi-nā ê Í-sek-lia̍t ê tióng-ló lâi góa chia, chē tī góa ê bīn-chêng. 2 Iâ-hô-hoa ê ōe chiū lîm-kàu góa kóng, 3 Jîn-chú ah, chiah ê lâng í-keng chiong in ê ngó͘-siōng chiap-la̍p tī in ê sim, koh hē tì-kàu hoān-chōe ê that-gāi tī ka-kī ê bīn-chêng. Góa kiám beh hō͘ i mn̄g mah? 4 Só͘-í lí tio̍h tùi in kóng, Chú Iâ-hô-hoa án-ni kóng, Í-sek-lia̍t-ke ê tiong-kan kìⁿ-nā chiap-la̍p i ê ngó͘-siōng tī i ê sim-lāi ê lâng, koh hē tì-kàu hoān-chōe that-gāi tī i ka-kī ê bīn-chêng, koh lâi chiū-kūn sian-ti--ê, Góa Iâ-hô-hoa tī i só͘ kiû ê sū, beh chiàu i ê chōe-chōe ngó͘-siōng lâi ìn-tap i; 5 tì-kàu Góa thang hō͘ Í-sek-lia̍t-ke sim-lāi ka-kī chek-pī, in-ūi in lóng ūi-tio̍h in ê ngó͘-siōng kap Góa chhiⁿ-so͘. 6 Só͘-í lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Tio̍h hôe-thâu, oa̍t-tńg lī-khui lín ê ngó͘-siōng, oa̍t-tńg bīn, bo̍h-tit thàn lín it chhè khó-ò͘ⁿ ê sū. 7 In-ūi Í-sek-lia̍t-ke ê lâng, á-sī tī Í-sek-lia̍t tiong kià-kha ê chhut-gōa lâng, kìⁿ-nā kap Góa keh-tn̄g, chiap-la̍p i ê ngó͘-siōng tī i ê sim-lāi, koh hē tì-kàu hoān-chōe ê that-gāi tī i ka-kī ê bīn-chêng, koh lâi chiū-kūn sian-ti, beh ūi ka-kī ê sū lâi mn̄g Góa--ê, Góa Iâ-hô-hoa beh pún-sin ìn-tap i. 8 Góa beh ǹg hit-hō lâng pìⁿ-bīn, hō͘ i chòe lâng ê kàm-kài, chòe ōe-pìⁿ, hō͘ lâng gông-ngia̍h; ia̍h beh tùi Góa ê peh-sìⁿ-tiong chián-tû i; lín chiū chai Góa sī Iâ-hô-hoa. 9 Sian-ti nā bê-he̍k lâi kóng chi̍t kù ōe, chiū-sī Góa Iâ-hô-hoa bê-he̍k hit ê sian-ti; Góa ia̍h beh chhun-chhiú kong-kek i; chiong i tùi Góa ê peh-sìⁿ Í-sek-lia̍t-tiong tû-bia̍t. 10 In beh tam-tng ka-kī ê chōe-kòa, sian-ti ê chōe-kòa, kap kiû-mn̄g i ê lâng ê chōe-kòa, lóng sī chi̍t-iūⁿ. 11 Thang hō͘ Í-sek-lia̍t-ke bô koh kiâⁿ bê-lō͘ lī-khui Góa, bô koh in-ūi ta̍k-iūⁿ ê chōe-kòa phah lâ-sâm ka-kī; to̍k-to̍k beh chòe Góa ê peh-sìⁿ, Góa chòe in ê Siōng-tè; che sī Chú Iâ-hô-hoa kóng--ê. 12 Iâ-hô-hoa ê ōe lîm-kàu góa kóng, 13 Jîn-chú ah, nā ū kok tùi in ê pōe-ge̍k lâi tek-chōe Góa, Góa ia̍h chhun-chhiú kong-kek i, toān-choa̍t i só͘ óa-khò ê bí-niû, hō͘ ki-hng lîm-kàu i, tùi in tiong-kan chián-tû lâng kap cheng-siⁿ, 14 kî-tiong sui-jiân ū Ná-a, Tān-í-lí, Iok-pek, chí saⁿ-lâng; in chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ; che sī Chú Iâ-hô-hoa kóng--ê. 15 Góa nā hō͘ ok-siù keng-kè hit ê tōe lâi sún-hoāi, hō͘ hit só͘-chāi hong-hòe; in-ūi chiah ê siù ê iân-kò͘, tì-kàu bô lâng tùi hia keng-kè, 16 sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ, tōe-hng iû-goân hong-hòe. 17 Á-sī Góa hō͘ to-kiàm lîm-kàu hit ê tōe-hng kóng, To-kiàm ah, lí tio̍h keng-kè hit ê tōe-hng, tì-kàu Góa tùi in tiong-kan chián-tû lâng kap cheng-siⁿ, 18 sui-jiân ū chí saⁿ-lâng tī in tiong-kan, Chú Iâ-hô-hoa kóng, Góa kí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū in pún-sin tit-tio̍h kiù nā-tiāⁿ. 19 Á-sī Góa hō͘ un-e̍k liû-hêng hit ê tōe-hng, hō͘ Góa piàⁿ-chhut bia̍t miā ê tōa siū-khì tī in ê téng-bīn, thang tùi in tiong-kan chián-tû lâng kap cheng-siⁿ, 20 sui-jiân ū Ná-a, Tān-í-lí, Iok-pek tī in tiong-kan, Chú Iâ-hô-hoa kóng, Góa chí Góa ê éng-oa̍h lâi chiù-chōa, in bōe kiù in ê kiáⁿ cha-bó͘-kiáⁿ, chí-ū ōe in-ūi in ê gī lâi kiù ka-kī ê sìⁿ-miā nā-tiāⁿ. 21 Chú Iâ-hô-hoa án-ni kóng, Hô-hòng Góa chiong Góa sì-hāng ê tōa chai-ē, chiū-sī to-kiàm, ki-hng, ok-siù, un-e̍k, kàng-lo̍h tī Iâ-lō͘-sat-léng, tùi hit tiong-kan chián-tû lâng kap cheng-siⁿ, kiám-m̄-sī koh-khah bōe kiù--tit mah? 22 Khòaⁿ ah, beh ū só͘ chhun ê lâng lâu-teh, chiū-sī siū lia̍h--chhut-lâi ê kiáⁿ cha-bó͘-kiáⁿ, khòaⁿ ah, in beh chhut-lâi kàu lín chia, lín beh khòaⁿ in ê só͘ kiâⁿ só͘ chòe, chiū lín lūn-kàu Góa só͘ kàng-lo̍h tī Iâ-lō͘-sat-léng ê chai-ē, chiū-sī Góa it-chhè kàng-lo̍h tī in téng-bīn ê, beh tit-tio̍h an-ùi. 23 Lín khòaⁿ in só͘ kiâⁿ só͘ chòe--ê, beh siū an-ùi; chiū chai Góa tī Iâ-lō͘-sat-léng só͘ kiâⁿ--ê, m̄-sī bô iân-kò͘; che sī Chú Iâ-hô-hoa kóng--ê.
1 耶和華ê話臨到我講， 2 人子ah，葡萄樹就是樹林內樹木中ê一支，伊比ta̍k號樹有甚麼khah贏？ 3 Kiám會thang對伊取柴料做甚麼路用？á是thang用伊做杙á來吊甚麼器具mah？ 4 看ah，是hiat tī火裡做火柴，雙頭已經hō͘火燒了，中央亦受燒，iáu有甚麼路用ah？ 5 看ah，好好ê時，尚且m̄合甚麼路用，何況hō͘火燒，已經pháiⁿ去，iáu能合甚麼路用ah？ 6 所以主耶和華án-ni講，親像樹林內chiahê樹中ê葡萄，我所交付tī火中做火柴ê，我亦beh照án-ni款待耶路撒冷khiā起ê百姓。 7 我beh對in變面；in tùi火中出來，總是火beh燒滅in。我對in變面ê時，lín就知我是耶和華。 8 我beh hō͘ chit所在荒廢，因為in行tāi-chì來犯罪；這是主耶和華講ê。
1 Iâ-hô-hoa ê ōe lîm-kàu góa kóng, 2 Jîn-chú ah, phû-tô-chhiū chiū-sī chhiū-nâ-lāi chhiū-ba̍k-tiong ê chi̍t-ki, i pí ta̍k-hō chhiū ū sím-mi̍h khah-iâⁿ? 3 Kiám ōe thang tùi i chhú chhâ-liāu chòe sím-mi̍h lō͘-ēng? á-sī thang ēng i chòe khi̍t-á lâi tiàu sím-mi̍h khì-kū mah? 4 Khòaⁿ ah, sī hiat tī hé--nih chòe hé-chhâ, siang-thâu í-keng hō͘ hé sio-liáu, tiong-ng ia̍h siū-sio, iáu ū sím-mi̍h lō͘-ēng ah? 5 Khòaⁿ ah, hó-hó ê sî, siōng-chhiáⁿ m̄-ha̍p sím-mi̍h lō͘-ēng, hô-hòng hō͘ hé sio, í-keng pháiⁿ--khì, iáu ōe ha̍p sím-mi̍h lō͘-ēng ah? 6 Só͘-í Chú Iâ-hô-hoa án-ni kóng, Chhin-chhiūⁿ chhiū-nâ-lāi chiah ê chhiū-tiong ê phû-tô, Góa só͘ kau-hù tī hé-tiong chòe hé-chhâ--ê, Góa ia̍h beh chiàu án-ni khoán-thāi Iâ-lō͘-sat-léng khiā-khí ê peh-sìⁿ. 7 Góa beh tùi in pìⁿ-bīn; in tùi hé-tiong chhut-lâi, chóng-sī hé beh sio-bia̍t in. Góa tùi in pìⁿ-bīn ê sî, lín chiū chai Góa sī Iâ-hô-hoa. 8 Góa beh hō͘ chit só͘-chāi hong-hòe, in-ūi in kiâⁿ tāi-chì lâi hoān-chōe; che sī Chú Iâ-hô-hoa kóng--ê.
1 耶和華ê話koh臨到我講， 2 人子ah，你tio̍h hō͘耶路撒冷知伊hiahê可惡ê事， 3 講，主耶和華對耶路撒冷án-ni講，你ê本源，你ê出世，是tī迦南地；A-mô͘-lī人是你ê老父，你ê老母是Hek人。 4 論到你出世ê景況，當你出世ê日無kā你tńg臍；也無用水kā你洗hō͘你清氣；lóng無kā你sám鹽，亦無用布kā你包。 5 無人看顧你，kā你做chiahê事，憐憫你；你出世ê日hiat tī田野，是因為你hō͘人厭惡。 6 我tùi你hia過，看見你kō tī你ê血內，就對你講，你雖然tī你ê血中，iáu-kú thang活；我實在對你講，你雖然tī你ê血中，iáu-kú thang活。 7 我hō͘你長成，親像田裡所發生ê，koh你漸漸成做大人，面貌清秀，奶胖(phòng)，頭毛長；總是你猶原赤身露體。 8 我tùi你hia過，看見你；看ah，hit時是你興起愛情ê時；我就用衫á裾蓋你，遮你ê thǹg-theh-theh；koh對你chiù-chōa，kap你結約；你就屬tī我；這是主耶和華講ê。 9 Hit時我用水洗你，洗清氣你身體ê血，koh用油抹你。 10 我hō͘你穿繡花ê衫，亦hō͘你穿海狗皮ê鞋，亦用幼苧布hō͘你縖腰；koh用綢緞做衫hō͘你moa。 11 我用裝飾ê物裝飾你；用手環掛tī你ê手，用金鍊á掛tī你ê頷頸。 12 我亦用鐶khòa tī你ê鼻；用耳鉤掛tī你ê耳á，用súi ê帽戴tī你ê頭殼。 13 Án-ni，你就有金銀ê裝飾；所穿ê是幼苧布，kap 綢緞，kap繡花ê衫；所食ê是幼幼ê麵，蜂ê蜜，kap油；你亦極其súi，發達到王后ê尊貴。 14 你súi ê名聲傳tī列國中；是對你ê súi完全，因為我有用我ê榮光hō͘你；這是主耶和華講ê。 15 獨獨你óa靠家己ê súi，koh因為你ê名聲，就行淫亂；你放縱淫慾，hō͘過路人chhut-chāi伊ê意思來行。 16 Koh用你ê衫，裝飾高ê所在，五色lóng齊備；tī hit頂面行淫亂；chit號事無beh來，亦無koh有。 17 你亦取我所hō͘你金銀súi ê寶器；為tio̍h家己做人ê像，kap伊行淫。 18 Koh用你繡花ê衫kā伊moa，亦用我ê膏油，我ê香料，排tī伊ê面前。 19 Koh我所賞賜你ê食物、幼麵，kap油kap蜜，我所用來養飼你ê，你就用伊，排tī in ê面前，來做芳味，實在有án-ni；這是主耶和華講ê。 20 Koh你用你ê kiáⁿ，你ê cha-bó͘-kiáⁿ，就是你所kā我生ê，來獻hō͘ in食；你行chiahê淫亂，kiám是小khóa事？ 21 你竟然koh 刣死我chiahê kiáⁿ來交付伊，hō͘ in經過火來歸tī伊？ 22 你行chiahê一切可惡kap淫亂ê事lóng無想tio̍h你細漢赤身露體，kō tī你血中ê日。 23 主耶和華講，你有災厄ah，有災厄ah； 24 你行這一切pháiⁿ-tāi以後，koh為家己起花樓，tī ta̍k條街路起高台。 25 你tī一切街路口起高台，hō͘你ê súi變做可惡ê；koh kap一切過路ê chōe-chōe行淫亂。 26 你亦kap你隔壁國，放縱情慾ê埃及人行淫，加添你ê淫亂，惹我受氣。 27 看ah，我伸出我ê手攻擊你；減少你應用ê物；koh將你交hō͘怨恨你ê腓利士hiahê cha-bó͘-gín-á，hō͘ in chhut-chāi意思款待你；in看見你行pháiⁿ，來見笑。 28 你因為好色不知足，koh kap亞述人行淫；kap in行淫了後，猶原無滿意。 29 你koh tī迦南地到Ka-le̍k-tí行chōe-chōe淫亂，iáu-kú無滿意。 30 主耶和華講，你行這一切ê事，是霸性淫婦ê所行，可見你ê心是jōa軟弱。 31 因為你tī一切街路口起花樓，tī ta̍k條街路起高台；因為你無親像別ê娼妓，m̄-ti̍h錢。 32 Gōa！你chitê行淫ê bó͘ ah，beh ti̍h別人來替丈夫！ 33 人是用物送娼妓，你反tńg用物送你相好ê人，請in tùi四圍來kap你行淫。 34 你ê行淫kap別ê婦人人對反；因為m̄是人chhē你行淫，是你用物送人，m̄是人送你；所以你kap別ê婦人人對反。 35 因為án-ni，你chitê娼妓ah，tio̍h聽耶和華ê話； 36 主耶和華án-ni講，因為你piàⁿ出你ê污穢；你kap你所相好ê thǹg-theh-theh行淫；koh因為你所拜一切可惡ê偶像，koh為tio̍h所流你chiahê kiáⁿ ê血，就是你所獻hō͘ in ê； 37 看ah，因為án-ni，我beh聚集你一切相好ê，就是你bat kap伊宴樂ê，kap你一切所疼ê，你一切所怨恨ê，我beh tùi四圍聚集來攻擊你，亦beh tùi in露出你ê thǹg-theh，hō͘ in看你ê thǹg-theh。 38 我亦beh審判你，親像審判行淫kap 刣人ê婦人人一樣；我beh用大受氣妒忌，hō͘你流血。 39 我koh beh將你交tī in ê手，in beh拆毀你ê 花樓，毀壞你ê高台，thǹg你ê衫，搶你súi ê寶器；留你赤身露體。 40 In也beh chhōa chōe-chōe人起來攻擊你，用石頭tìm死你，用刀劍鑿透你。 41 用火燒你ê厝宅，tī chōe-chōe婦人人ê面前審判你；我的確hō͘你無koh行淫，亦無koh送人物。 42 Án-ni，我ǹg你ê大受氣beh soah，我ê妒忌亦beh離開你；我beh安靜無koh受氣。 43 因為你bōe記得你細漢ê日，tī這一切ê事來激我；所以我beh照你所行ê，報應tī你ê頭殼頂；hō͘你無koh行淫，加添tī你一切可惡ê事；這是主耶和華講ê。 44 看ah，見若講俗語ê，beh用俗語體thak你，講，老母án-ni，cha-bó͘-kiáⁿ也是án-ni。 45 你真正是lín老母ê cha-bó͘-kiáⁿ，厭賤伊ê丈夫kap kiáⁿ兒；你真正是lín姊妹ê姊妹，厭賤in ê丈夫kap kiáⁿ兒；lín老母是Hek人，lín老父是A-mô͘-lī人。 46 你ê大姊是撒馬利亞，伊kap伊ê眾cha-bó͘-kiáⁿ tiàm tī你ê tò-pêng；你ê小妹是所多瑪，伊kap伊ê眾cha-bó͘-kiáⁿ tiàm tī你ê chiàⁿ-pêng。 47 你無學in ê所行，亦無照in可惡ê事去做；你掠做小khóa事，你一切所行ê，比in khah臭。 48 主耶和華講，我kí我ê永活來chiù-chōa；你ê小妹所多瑪，kap伊眾cha-bó͘-kiáⁿ，未有行你kap你眾cha-bó͘-kiáⁿ所行ê事。 49 看ah，你ê小妹所多瑪ê罪是chit款；伊kap伊ê眾cha-bó͘-kiáⁿ，心志驕傲，米糧飽足，享受安逸；lóng無扶助困苦kap sòng-hiong人ê手。 50 In自高，tī我ê面前行可惡ê事，我看了就將in除去。 51 撒馬利亞所犯ê罪無你ê一半；你加添可惡ê事比in khah-chōe，koh tùi你所行一切可惡ê事，hō͘你ê姊妹顯明是義。 52 你既然斷定你ê姊妹做義，就tio̍h擔當你家己ê凌辱；因為你所犯ê罪比in khah可惡，in就比你khah義；你已經hō͘你ê姊妹顯明是義，你就tio̍h見笑，擔當家己ê凌辱。 53 我beh hō͘ in受掠ê倒tńg來；就是hō͘所多瑪kap伊ê眾cha-bó͘-kiáⁿ受掠ê，撒馬利亞kap伊ê眾cha-bó͘-kiáⁿ受掠ê，以及in中間lín受掠ê，lóng倒tńg來。 54 Thang hō͘你擔當家己ê凌辱，koh對你一切所行hō͘ in得tio̍h安慰ê，來見笑。 55 你ê姊妹所多瑪，kap伊ê眾cha-bó͘-kiáⁿ，beh tò來原位；撒馬利亞，kap伊ê眾cha-bó͘-kiáⁿ，beh tò來原位；你，kap你ê眾cha-bó͘-kiáⁿ ，亦beh tò來原位。 56 當你驕傲ê日，你ê嘴無講起你ê小妹所多瑪， 57 Hit時你ê pháiⁿ iáu未發現，A-lân chiahê cha-bó͘-kiáⁿ，連伊四圍ê人，iáu未凌辱你；腓利士chiah ê cha-bó͘-kiáⁿ，平素tī四圍藐視你ê，伊也未有凌辱你。 58 耶和華講，你好淫kap可惡ê事，你已經擔當lah。 59 因為主耶和華án-ni講，你背約看輕chiù-chōa，我beh照你所行來款待你。 60 總是我beh追念我tī你少年ê時，kap你所立ê約；亦beh kap你設立永遠ê約。 61 當你接納你ê姊妹，就是你ê大姊kap你ê小妹ê時，你beh記得你所行ê來見笑；我亦beh將in hō͘你做cha-bó͘-kiáⁿ，獨獨m̄是對你ê約。 62 我beh kap你設立我ê約，你就知我是耶和華； 63 到我赦免你一切所做ê時，你記得就見笑；koh因為你ê凌辱，就無koh開嘴；這是主耶和華講ê。
1 Iâ-hô-hoa ê ōe koh lîm-kàu góa kóng, 2 Jîn-chú ah, lí tio̍h hō͘ Iâ-lō͘-sat-léng chai i hiah ê khó-ò͘ⁿ ê sū, 3 kóng, Chú Iâ-hô-hoa tùi Iâ-lō͘-sat-léng án-ni kóng, Lí ê pún-goân, lí ê chhut-sì, sī tī Ka-lâm tōe; A-mô͘-lī lâng sī lí ê lāu-pē, lí ê lāu-bú sī Hek-lâng. 4 Lūn-kàu lí chhut-sì ê kéng-hóng, tng lí chhut-sì ê ji̍t bô kā lí tńg-châi; iā bô ēng chúi kā lí sóe hō͘ lí chheng-khì; lóng bô kā lí sám iâm, ia̍h bô ēng pò͘ kā lí pau. 5 Bô lâng khòaⁿ-kò͘ lí, kā lí chòe chiah ê sū, lîn-bín lí; lí chhut-sì ê ji̍t hiat tī chhân-iá, sī in-ūi lí hō͘ lâng iàm-ò͘ⁿ. 6 Góa tùi lí hia kè, khòaⁿ-kìⁿ lí kō tī lí ê huih-lāi, chiū tùi lí kóng, Lí sui-jiân tī lí ê huih-tiong, iáu-kú thang oa̍h; Góa si̍t-chāi tùi lí kóng, Lí sui-jiân tī lí ê huih-tiong, iáu-kú thang oa̍h. 7 Góa hō͘ lí tióng-sêng, chhin-chhiūⁿ chhân--nih só͘ hoat-siⁿ--ê, koh lí chiām-chiām chiâⁿ-chòe tōa-lâng, bīn-māu chheng-siù, lin phòng, thâu-mn̂g tn̂g; chóng-sī lí iû-goân chhiah-sin lō͘-thé. 8 Góa tùi lí hia kè, khòaⁿ-kìⁿ lí; khòaⁿ ah, hit-sî sī lí heng-khí ài-chêng ê sî; Góa chiū ēng saⁿ-á-ku khàm lí, jia lí ê thǹg-theh-theh; koh tùi lí chiù-chōa, kap lí kiat-iok; lí chiū sio̍k tī Góa; che sī Chú Iâ-hô-hoa kóng--ê. 9 Hit-sî Góa ēng chúi sóe lí, sóe chheng-khì lí sin-thé ê huih, koh ēng iû boah lí. 10 Góa hō͘ lí chhēng siù-hoe ê saⁿ, ia̍h hō͘ lí chhēng hái-káu phê ê ôe, ia̍h ēng iù-tōe-pò͘ hō͘ lí hâ-io; koh ēng tiû-toān chòe-saⁿ hō͘ lí moa. 11 Góa ēng chng-thāⁿ ê mi̍h chng-thāⁿ lí; ēng chhiú-khoân kòa tī lí ê chhiú, ēng kim-liān-á kòa tī lí ê ām-kún. 12 Góa ia̍h ēng khoân khòa tī lí ê phīⁿ; ēng hī-kau kòa tī lí ê hī-á, ēng súi ê bō tì tī lí ê thâu-khak. 13 Án-ni, lí chiū ū kim-gûn ê chng-thāⁿ; só͘ chhēng--ê sī iù-tōe-pò͘, kap tiû-toān, kap siù-hoe ê saⁿ; só͘ chia̍h-ê sī iù-iù ê mī, phang ê bi̍t, kap iû; lí ia̍h ke̍k-kî súi, hoat-ta̍t kàu ông-hō͘ ê chun-kùi. 14 Lí súi ê miâ-siaⁿ thoân tī lia̍t-kok-tiong; sī tùi lí ê súi oân-choân, in-ūi Góa ū ēng Góa ê êng-kng hō͘ lí; che sī Chú Iâ-hô-hoa kóng--ê. 15 To̍k-to̍k lí óa-khò ka-kī ê súi, koh in-ūi lí ê miâ-siaⁿ, chiū kiâⁿ îm-loān; lí hòng-chhiòng îm-io̍k, hō͘ kè-lō͘ lâng chhut-chāi i ê ì-sù lâi kiâⁿ. 16 Koh ēng lí ê saⁿ, chng-thāⁿ koâiⁿ ê só͘-chāi, ngó͘-sek lóng chiâu-pī; tī hit téng-bīn kiâⁿ îm-loān; chit hō sū bô beh lâi, ia̍h bô koh ū. 17 Lí ia̍h chhú Góa só͘ hō͘ lí kim-gûn súi ê pó-khì; ūi-tio̍h ka-kī chòe lâng ê siōng, kap i kiâⁿ-îm. 18 Koh ēng lí siù-hoe ê saⁿ kā i moa, ia̍h ēng Góa ê ko-iû, Góa ê hiuⁿ-liāu, pâi tī i ê bīn-chêng. 19 Koh Góa só͘ siúⁿ-sù lí ê chia̍h-mi̍h, iù-mī, kap iû kap bi̍t, Góa só͘ ēng lâi iúⁿ-chhī lí--ê, lí chiū ēng--i, pâi tī in ê bīn-chêng, lâi chòe phang-bī, si̍t-chāi ū án-ni; che sī Chú Iâ-hô-hoa kóng--ê. 20 Koh lí ēng lí ê kiáⁿ , lí ê cha-bó͘-kiáⁿ, chiū-sī lí só͘ kā Góa siⁿ--ê, lâi hiàn hō͘ in chia̍h; lí kiâⁿ chiah ê îm-loān, kiám sī sió-khóa sū? 21 lí kéng-jiân koh thâi-sí Góa chiah ê kiáⁿ lâi kau-hù i, hō͘ in keng-kè hé lâi kui tī i? 22 Lí kiâⁿ chiah-ê it-chhè khó-ò͘ⁿ kap îm-loān ê sū lóng bô siūⁿ-tio̍h lí sòe-hàn chhiah-sin lō͘-thé, kō tī lí huih-tiong ê ji̍t. 23 Chú Iâ-hô-hoa kóng, Lí ū chai-ē ah, ū chai-ē ah; 24 lí kiâⁿ che it-chhè pháiⁿ-tāi í-āu, koh ūi ka-kī khí hoe-lâu, tī ta̍k tiâu ke-lō͘ khí koâiⁿ-tâi. 25 Lí tī it-chhè ke-lō͘-kháu khí koâiⁿ-tâi, hō͘ lí ê súi piàn chòe khó-ò͘ⁿ--ê; koh kap it-chhè kè-lō͘--ê chōe-chōe kiâⁿ îm-loān. 26 Lí ia̍h kap lí keh-piah kok, hòng-chhiòng chêng-io̍k ê Ai-ki̍p lâng kiâⁿ-îm, ke-thiⁿ lí ê îm-loān, jiá Góa siū-khì. 27 Khòaⁿ ah, Góa chhun-chhut Góa ê chhiú kong-kek lí; kiám-chió lí èng-iōng ê mi̍h; koh chiong lí kau hō͘ oàn-hūn lí ê Hui-lī-sū hiah ê cha-bó͘-gín-á, hō͘ in chhut-chāi ì-sù khoán-thāi lí; in khòaⁿ-kìⁿ lí kiâⁿ pháiⁿ, lâi kiàn-siàu. 28 Lí in-ūi hò͘ⁿ-sek put-ti-chiok, koh kap A-su̍t lâng kiâⁿ-îm; kap in kiâⁿ-îm liáu-āu, iû-goân bô móa-ì. 29 Lí koh tī Ka-lâm tōe kàu Ka-le̍k-tí kiâⁿ chōe-chōe îm-loān, iáu-kú bô móa-ì. 30 Chú Iâ-hô-hoa kóng, Lí kiâⁿ che it-chhè ê sū, sī pà-sèng îm-hū ê só͘ kiâⁿ, khó-kiàn lí ê sim sī jōa loán-jio̍k. 31 In-ūi lí tī it-chhè ke-lō͘-kháu khí hoe-lâu, tī ta̍k tiâu ke-lō͘ khí koâiⁿ-tâi; in-ūi lí bô chhin-chhiūⁿ pa̍t ê chhiong-ki, m̄-ti̍h chîⁿ. 32 Gōa! Lí chit ê kiâⁿ-îm ê bó͘ ah, beh ti̍h pa̍t-lâng lâi thòe tiōng-hu! 33 Lâng sī ēng mi̍h sàng chhiong-ki, lí hoán-tńg ēng mi̍h sàng lí siong-hó ê lâng, chhiáⁿ in tùi sì-ûi lâi kap lí kiâⁿ-îm. 34 Lí ê kiâⁿ-îm kap pa̍t ê hū-jîn-lâng tùi-hoán; in-ūi m̄-sī lâng chhē lí kiâⁿ-îm, sī lí ēng mi̍h sàng lâng, m̄-sī lâng sàng lí; só͘-í lí kap pa̍t-ê hū-jîn-lâng tùi-hoán. 35 In-ūi án-ni, lí chit ê chhiong-ki ah, tio̍h thiaⁿ Iâ-hô-hoa ê ōe; 36 Chú Iâ-hô-hoa án-ni kóng, In-ūi lí piàⁿ-chhut lí ê ù-òe; lí kap lí só͘ siong-hó--ê thǹg-theh-theh kiâⁿ-îm; koh in-ūi lí só͘ pài it-chhè khó-ò͘ⁿ ê ngó͘-siōng, koh ūi-tio̍h só͘ lâu lí chiah ê kiáⁿ ê huih, chiū-sī lí só͘ hiàn hō͘ in--ê; 37 khòaⁿ ah, in-ūi án-ni, Góa beh chū-chi̍p lí it-chhè siong-hó--ê, chiū-sī lí bat kap i iàn-lo̍k--ê, kap lí it-chhè só͘ thiàⁿ--ê, lí it-chhè só͘ oàn-hūn-ê, Góa beh tùi sì-ûi chū-chi̍p lâi kong-kek lí, ia̍h beh tùi in lō͘-chhut lí ê thǹg-theh, hō͘ in khòaⁿ lí ê thǹg-theh. 38 Góa ia̍h beh sím-phòaⁿ lí, chhin-chhiūⁿ sím-phòaⁿ kiâⁿ-îm kap thâi-lâng ê hū-jîn-lâng chi̍t-iūⁿ; Góa beh ēng tōa siū-khì tò͘-khī, hō͘ lí lâu-huih. 39 Góa koh beh chiong lí kau tī in ê chhiú, in beh thiah-húi lí ê hoe-lâu, húi-hoāi lí ê koâiⁿ-tâi, thǹg lí ê saⁿ, chhiúⁿ lí súi ê pó-khì; lâu lí chhiah-sin lō͘-thé. 40 In iā beh chhōa chōe-chōe lâng khí--lâi kong-kek lí, ēng chio̍h-thâu tìm-sí lí, ēng to-kiàm chha̍k-thàu lí. 41 Ēng hé sio lí ê chhù-the̍h, tī chōe-chōe hū-jîn-lâng ê bīn-chêng sím-phòaⁿ lí; Góa tek-khak hō͘ lí bô koh kiâⁿ-îm, ia̍h bô koh sàng lâng mi̍h. 42 Án-ni, Góa ǹg lí ê tōa siū-khì beh soah, Góa ê tò͘-khī ia̍h beh lī-khui lí; Góa beh an-chēng bô koh siū-khì. 43 In-ūi lí bōe-kì-tit lí sòe-hàn ê ji̍t, tī che it-chhè ê sū lâi kek Góa; só͘-í Góa beh chiàu lí só͘ kiâⁿ--ê, pò-èng tī lí ê thâu-khak-téng; hō͘ lí bô koh kiâⁿ-îm, ke-thiⁿ tī lí it-chhè khó-ò͘ⁿ ê sū; che sī Chú Iâ-hô-hoa kóng--ê. 44 Khòaⁿ ah, kìⁿ-nā kóng sio̍k-gú--ê, beh ēng sio̍k-gú thóe-thak lí, kóng, Lāu-bú án-ni, cha-bó͘-kiáⁿ iā sī án-ni. 45 Lí chin-chiàⁿ sī lín lāu-bú ê cha-bó͘-kiáⁿ, iàm-chiān i ê tiōng-hu kap kiáⁿ-jî; lí chin-chiàⁿ sī lín chí-bē ê chí-bē, iàm-chiān in ê tiōng-hu kap kiáⁿ-jî; lín lāu-bú sī Hek lâng, lín lāu-pē sī A-mô͘-lī lâng. 46 Lí ê tōa-chí sī Sat-má-lī-a, i kap i ê chèng cha-bó͘-kiáⁿ tiàm tī lí ê tò-pêng; lí ê sió-bē sī Só͘-to-má, i kap i ê chèng cha-bó͘-kiáⁿ tiàm tī lí ê chiàⁿ-pêng. 47 Lí bô o̍h in ê só͘-kiâⁿ, ia̍h bô chiàu in khó-ò͘ⁿ ê sū khì chòe; lí lia̍h chòe sió-khóa sū, lí it-chhè só͘-kiâⁿ-ê, pí in khah-chhàu. 48 Chú Iâ-hô-hoa kóng, Góa kí Góa ê éng-oa̍h lâi chiù-chōa; lí ê sió-bē Só͘-to-má, kap i chèng cha-bó͘-kiáⁿ, bē ū kiâⁿ lí kap lí chèng cha-bó͘-kiáⁿ só͘ kiâⁿ ê sū. 49 Khòaⁿ ah, lí ê sió-bē Só͘-to-má ê chōe sī chit-khoán; i kap i ê chèng cha-bó͘-kiáⁿ, sim-chì kiau-ngō͘, bí-niû pá-chiok, hióng-siū an-ia̍t; lóng bô hû-chō͘ khùn-khó͘ kap sòng-hiong lâng ê chhiú. 50 In chū-ko, tī Góa ê bīn-chêng kiâⁿ khó-ò͘ⁿ ê sū, Góa khòaⁿ-liáu chiū chiong in tû--khì. 51 Sat-má-lī-a só͘ hoān ê chōe bô lí ê chi̍t-pòaⁿ; lí ke-thiⁿ khó-ò͘ⁿ ê sū pí in khah-chōe, koh tùi lí só͘ kiâⁿ it-chhè khó-ò͘ⁿ ê sū, hō͘ lí ê chí-bē hián-bêng sī gī. 52 Lí kì-jiân toàn-tēng lí ê chí-bē chòe-gī, chiū tio̍h tam-tng lí ka-kī ê lêng-jio̍k; in-ūi lí só͘ hoān ê chōe pí in khah khó-ò͘ⁿ, in chiū pí lí khah gī; lí í-keng hō͘ lí ê chí-bē hián-bêng sī gī, lí chiū tio̍h kiàn-siàu, tam-tng ka-kī ê lêng-jio̍k. 53 Góa beh hō͘ in siū-lia̍h-ê tò-tńg--lâi; chiū-sī hō͘ Só͘-to-má kap i ê chèng cha-bó͘-kiáⁿ siū-lia̍h-ê, Sat-má-lī-a kap i ê chèng cha-bó͘-kiáⁿ siū-lia̍h--ê, í-ki̍p in tiong-kan lín siū-lia̍h--ê, lóng tò-tńg--lâi. 54 Thang hō͘ lí tam-tng ka-kī ê lêng-jio̍k, koh tùi lí it-chhè só͘ kiâⁿ hō͘ in tit-tio̍h an-ùi--ê, lâi kiàn-siàu. 55 Lí ê chí-bē Só͘-to-má, kap i ê chèng cha-bó͘-kiáⁿ, beh tò-lâi goân-ūi; Sat-má-lī-a, kap i ê chèng chá-bó͘-kiáⁿ, beh tò-lâi goân-ūi; lí, kap lí ê chèng cha-bó͘-kiáⁿ , ia̍h beh tò-lâi goân-ūi. 56 Tng lí kiau-ngō͘ ê ji̍t, lí ê chhùi bô kóng-khí lí ê sió-bē Só͘-to-má, 57 hit-sî lí ê pháiⁿ iáu-bē hoat-hiān, A-lân chiah ê cha-bó͘-kiáⁿ, liân i sì-ûi ê lâng, iáu-bē lêng-jio̍k lí; Hui-lī-sū chiah ê cha-bó͘-kiáⁿ, pêng-sò͘ tī sì-ûi biáu-sī lí--ê, i iā bē ū lêng-jio̍k lí. 58 Iâ-hô-hoa kóng, Lí hò͘ⁿ-îm kap khó-ò͘ⁿ ê sū, lí í-keng tam-tng lah. 59 In-ūi Chú Iâ-hô-hoa án-ni kóng, Lí pōe-iok khòaⁿ-khin chiù-chōa, Góa beh chiàu lí só͘ kiâⁿ lâi khoán-thāi lí. 60 Chóng-sī Góa beh tui-liām Góa tī lí siàu-liân ê sî, kap lí só͘ li̍p ê iok; ia̍h beh kap lí siat-li̍p éng-oán ê iok. 61 Tng lí chiap-la̍p lí ê chí-bē, chiū-sī lí ê tōa-chí kap lí ê sió-bē ê sî, lí beh kì-tit lí só͘ kiâⁿ--ê lâi kiàn-siàu; Góa ia̍h beh chiong in hō͘ lí chòe cha-bó͘-kiáⁿ, to̍k-to̍k m̄-sī tùi lí ê iok. 62 Góa beh kap lí siat-li̍p Góa ê iok, lí chiū chai Góa sī Iâ-hô-hoa; 63 kàu Góa sià-bián lí it-chhè só͘ chòe ê sî, lí kì-tit chiū kiàn-siàu; koh in-ūi lí ê lêng-jio̍k, chiū bô koh khui-chhùi; che sī Chú Iâ-hô-hoa kóng--ê.
1 耶和華ê話臨到我講， 2 人子ah，你tio̍h對以色列家出猜，設譬喻； 3 講，主耶和華án-ni講，有一隻大鷹，翼股大，翼尾長，毛草cha̍t，有五彩色，飛到黎巴嫩，取柏香樹中枝ê枝尾。 4 At折伊盡尾溜chíⁿ ê枝，kâⁿ到seng-lí場，hē tī買賣ê人ê城。 5 Koh取hit所在ê種，栽tī肥地，插tī chōe-chōe水ê邊頭，親像栽柳樹。 6 就漸漸大叢，成做拋藤低低ê葡萄樹；伊ê枝轉ǹg hit隻鷹，根tī伊ê下面；Tùi án-ni，成做葡萄樹，生枝發藤。 7 Koh有一隻大鷹，翼大，毛cha̍t，看ah，chitê葡萄樹tùi栽種ê所在彎伊ê根ǹg伊，發伊ê枝ǹg伊，ǹg望伊灌ak。 8 伊栽tī肥地，chōe-chōe水ê邊頭，thang發枝結果子，成做好ê葡萄樹。 9 你tio̍h講，主耶和華án-ni講，chitê葡萄樹kiám會發ām？鷹kiám bōe拔伊ê根，除伊ê果子，hō͘伊枯焦mah？hō͘伊幼ê葉lóng枯焦，也m̄免用大力kap chōe-chōe人拔出伊ê根。 10 伊已經栽種，kiám會發ām mah？東風一下吹伊，kiám bōe lóng枯焦mah？beh tī伊發生ê所在枯焦。 11 耶和華ê話koh臨到我講， 12 你tio̍h kā hitê悖逆ê家講，Lín kiám m̄知chiahê是甚麼意思mah？你tio̍h kā in講，巴比倫王到耶路撒冷，掠伊ê君王kap貴族，帶到伊巴比倫hia。 13 Tùi王親ê中間，揀一人，kap伊立約，kah伊chiù-chōa；koh掠國內有勢力ê人； 14 Beh hō͘國卑微bōe能自強，獨獨守盟約，就得tio̍h保存。 15 總是伊背叛；差使者去埃及，ài in hō͘伊馬kap chōe-chōe兵；伊kiám會興通mah？行chit號事ê人，kiám會逃脫mah？kiám有背約，iáu走能lī mah？ 16 主耶和華講，我kí家己ê永活來chiù-chōa，巴比倫王設立伊做王，伊竟然藐視chiù-chōa ê話，背所立ê約；因為án-ni，伊的確死tī巴比倫王所tiàm ê所在。 17 當in 起土堆，造台，beh滅無chōe-chōe人ê時，法老chhōa大隊兵，kap chōe-chōe人來；也bōe tī交戰中幫贊伊。 18 伊背約來藐視chiù-chōa，看ah，伊已經投降，iáu-kú做出chiahê一切ê事，伊的確bōe能逃脫。 19 所以主耶和華án-ni講，我kí我ê永活來chiù-chōa，伊已經看輕指我所chiù ê chōa，悖謬指我所立ê約；我beh將chitê罪歸tī伊ê頭殼。 20 我beh用我ê網拋tī伊ê身上，伊beh hō͘我ê活tauh tauh-tio̍h；我beh帶伊到巴比倫，亦beh tī-hia審問伊干犯我ê罪。 21 伊ê軍隊中逃走ê，lóng beh倒tī刀下；所chhun-ê，亦beh四散tī四方；lín就知講chitê話ê，是我耶和華。 22 主耶和華án-ni講，我亦beh取柏香樹中枝高ê尾溜，來栽伊；亦beh對伊chíⁿ ê枝 ê尾溜，at折伊軟ê枝；栽tī高高ê山。 23 我beh栽伊tī以色列高地ê山，伊就開枝結子，成做好ê柏香樹；各樣ê飛鳥beh歇tī伊ê下面，歇tī伊ê枝ê蔭影下。 24 田野ê樹木lóng beh知我耶和華hō͘高ê樹降低，低ê樹升高，青翠ê樹枯焦，枯焦ê樹茂盛；我耶和華án-ni講伊，也成伊。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h tùi Í-sek-lia̍t ke chhut-chhai, siat phì-jū; 3 kóng, Chú Iâ-hô-hoa án-ni kóng, Ū chi̍t chiah tōa eng, si̍t-kó͘ tōa, si̍t-bé tn̂g, mn̂g-chháu cha̍t, ū ngó͘-chhái-sek, pe kàu Lī-pa-lùn, chhú pek-hiuⁿ-chhiū tiong-ki ê ki-bé. 4 At-chi̍h i chīn bé-liu chíⁿ ê ki, kâⁿ kàu seng-lí-tiûⁿ, hē tī bóe-bōe ê lâng ê siâⁿ. 5 Koh chhú hit só͘-chāi ê chéng, chai tī pûi-tōe, chhah tī chōe-chōe chúi ê piⁿ-thâu, chhin-chhiūⁿ chai liú-chhiū. 6 Chiū chiām-chiām tōa-châng, chiâⁿ-chòe pha-tîn kē-kē ê phû-tô-chhiū; i ê ki choán ǹg hit chiah eng, kun tī i ê ē-bīn; tùi án-ni chiâⁿ-chòe phû-tô-chhiū, siⁿ ki hoat tîn. 7 Koh ū chi̍t chiah tōa eng, si̍t tōa, mn̂g cha̍t, khòaⁿ ah, chit ê phû-tô-chhiū tùi chai-chèng ê só͘-chāi oan i ê kun ǹg i, hoat i ê ki ǹg i, ǹg-bāng i koàn-ak. 8 I chai tī pûi-tōe, chōe-chōe chúi ê piⁿ-thâu, thang hoat-ki kiat ké-chí, chiâⁿ-chòe hó ê phû-tô-chhiū. 9 Lí tio̍h kóng, Chú Iâ-hô-hoa án-ni kóng, Chit ê phû-tô-chhiū kiám ōe hoat-ām? eng kiám bōe pu̍ih i ê kun, tû i ê ké-chí, hō͘ i ko͘-tâ mah? hō͘ i iù ê hio̍h lóng ko͘-tâ, iā m̄-bián ēng tōa-la̍t kap chōe-chōe lâng pu̍ih-chhut i ê kun. 10 I í-keng chai-chèng, kiám ōe hoat-ām mah? tang-hong chi̍t-ē chhe--i, kiám bōe lóng ko͘-tâ mah? beh tī i hoat-siⁿ ê só͘-chāi ko͘-tâ. 11 Iâ-hô-hoa ê ōe koh lîm-kàu góa kóng, 12 Lí tio̍h kā hit ê pōe-ge̍k ê ke kóng, Lín kiám m̄-chai chiah-ê sī sím-mi̍h ì-sù mah? Lí tio̍h kā in kóng, Pa-pí-lûn ông kàu Iâ-lō͘-sat-léng, lia̍h i ê kun-ông kap kùi-cho̍k, tòa kàu i Pa-pí-lûn hia. 13 Tùi ông-chhin ê tiong-kan, kéng chi̍t-lâng, kap i li̍p-iok, kah i chiù-chōa; koh lia̍h kok-lāi ū sè-le̍k ê lâng; 14 beh hō͘ kok pi-bî bōe-ōe chū-kiông, to̍k-to̍k siú bêng-iok, chiū tit-tio̍h pó-chûn. 15 Chóng-sī i pōe-poān; chhe sù-chiá khì Ai-ki̍p, ài in hō͘ i bé kap chōe-chōe peng; i kiám ōe heng-thong mah? kiâⁿ chit hō sū ê lâng, kiám ōe tô-thoat mah? kiám ū pōe-iok, iáu cháu ōe lī mah? 16 Chú Iâ-hô-hoa kóng, Góa kí ka-kī ê éng-oa̍h lâi chiù-chōa, Pa-pí-lûn ông siat-li̍p i chòe-ông, i kéng-jiân biáu-sī chiù-chōa ê ōe, pōe só͘ li̍p ê iok; in-ūi án-ni, i tek-khak sí tī Pa-pí-lûn ông só͘ tiàm ê só͘-chāi. 17 Tng in khí thô͘-tui, chō tâi, beh bia̍t-bô chōe-chōe lâng ê sî, Hoat-ló chhōa tōa tūi peng, kap chōe-chōe lâng lâi; iā bōe tī kau-chiàn-tiong pang-chān i. 18 I pōe-iok lâi biáu-sī chiù-chōa, khòaⁿ ah, i í-keng tâu-hâng, iáu-kú chòe-chhut chiah-ê it-chhè ê sū, i tek-khak bōe-ōe tô-thoat. 19 Só͘-í Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa, i í-keng khòaⁿ-khin chí Góa só͘ chiù ê chōa, pōe-biū chí Góa só͘ li̍p ê iok; Góa beh chiong chit ê chōe kui tī i ê thâu-khak. 20 Góa beh ēng Góa ê bāng pha tī i ê sin-chiūⁿ, i beh hō͘ Góa ê oa̍h-tauh tauh--tio̍h; Góa beh tòa i kàu Pa-pí-lûn, ia̍h beh tī-hia sím-mn̄g i kan-hoān Góa ê chōe. 21 I ê kun-tūi-tiong tô-cháu--ê, lóng beh tó tī to-ē; só͘ chhun--ê, ia̍h beh sì-sòaⁿ tī sì-hng; lín chiū chai kóng chit ê ōe--ê, sī Góa Iâ-hô-hoa. 22 Chú Iâ-hô-hoa án-ni kóng, Góa ia̍h beh chhú pek-hiuⁿ-chhiū tiong-ki koâiⁿ ê bé-liu, lâi chai--i; ia̍h beh tùi i chíⁿ ê ki ê bé-liu, at-chi̍h i nńg ê ki; chai tī koâiⁿ-koâiⁿ ê soaⁿ. 23 Góa beh chai i tī Í-sek-lia̍t koâiⁿ-tōe ê soaⁿ, i chiū khui-ki kiat-chí, chiâⁿ-chòe hó ê pek-hiuⁿ-chhiū; kok-iūⁿ ê pe-chiáu beh hioh tī i ê ē-bīn, hioh tī i ê ki ê ìm-ńg-ē. 24 Chhân-iá ê chhiū-ba̍k lóng beh chai Góa Iâ-hô-hoa hō͘ koâiⁿ ê chhiū kàng-kē, kē ê chhiū seng koâiⁿ, chhiⁿ-chhùi ê chhiū ko͘-tâ, ko͘-tâ ê chhiū bō͘-sēng; Góa Iâ-hô-hoa án-ni kóng i, iā chiâⁿ i.
1 耶和華ê話koh臨到我講， 2 Lín tī以色列地啥事用chitê俗語講，老父食酸ê葡萄，kiáⁿ ê嘴齒酸軟？ 3 主耶和華講，我kí我ê永活chiù-chōa講，Lín tī以色列中無因由thang koh用chitê俗語。 4 看ah，lóng總ê神魂是屬tī我；親像老父ê神魂屬tī我，kiáⁿ ê神魂也是án-ni；犯罪ê神魂，伊beh死。 5 人若公義，行公平kap義理， 6 Bē-bat上山頂食祭物，bē-bat仰望以色列家ê偶像，bē-bat phah lâ-sâm厝邊ê bó͘，bē-bat親近經期內ê婦人人； 7 Bē-bat虧負人，是將欠債ê人ê當頭還伊，bē-bat強搶人ê物，是用食物hō͘ iau ê人食，用衣裳hō͘ thǹg-theh ê人穿， 8 Bē-bat kā借錢ê人討利息，也無the̍h利錢，kiu手無做pháiⁿ，tī兩pêng ê人ê中間照公道判決， 9 順thàn我ê律例，執守我ê法度，照誠實行tāi-chì，這是義人，的確得tio̍h活；這是主耶和華講ê。 10 設使伊生一个kiáⁿ，做強盜，做刣人ê，á是行hiahê pháiⁿ ê一項，無行頂面所講ê好， 11 反tńg上山頂食祭物，koh phah lâ-sâm厝邊ê bó͘， 12 虧負困苦kap sòng-hiong ê人，強搶人ê物，bē-bat用當頭還人，仰望偶像，行可惡ê事， 13 Kā借錢ê人討利息，the̍h利錢；chitê人kiám會活mah？伊的確bōe活；伊行hiahê一切可惡ê事的確tio̍h死；伊ê罪beh歸tī伊。 14 看ah，設使伊生一个kiáⁿ，看見老父所行一切ê罪，就驚惶，無án-ni去行； 15 Bē-bat上山食祭物，bē-bat仰望以色列家ê偶像，bē-bat phah lâ-sâm厝邊ê bó͘； 16 Bē-bat虧負人，bē-bat the̍h人ê 當頭，bē-bat 強搶人ê物，是用食物hō͘ iau ê人食，用衣裳hō͘ thǹg-theh ê人穿， 17 Kiu手無害sòng-hiong人，無討利錢，無the̍h利息，伊順thàn我ê法度，執守我ê律例，伊就無因為老父ê罪過來死無，的確能活。 18 論到伊ê老父，因為伊欺負人真傷重，強搶兄弟，tī本族中行m̄好；看ah，伊beh 因為家己ê罪來死。 19 Lín iáu teh講，Kiáⁿ怎樣無擔當老父ê罪？Kiáⁿ若行正直，kap合理ê事，守我一切ê律例來行伊；伊的確會活。 20 犯罪ê神魂，伊beh死；kiáⁿ的確無擔當老父ê罪，老父也無擔當kiáⁿ ê罪；義人ê義beh歸tī伊家己；pháiⁿ人ê pháiⁿ，也beh歸tī伊家己。 21 Pháiⁿ人若回頭離開所做一切ê罪惡，執守我一切ê律例，行正直kap合理ê事，伊的確會活，bōe死。 22 伊所犯一切ê罪過無koh kā伊記得；tī所行ê義，伊beh活。 23 主耶和華講，pháiⁿ人死無，kiám是我所歡喜mah？我kiám m̄是歡喜伊回頭，離開伊所行ê路，來得tio̍h活mah？ 24 總是義人若oa̍t頭，離開伊ê義，來犯罪，照pháiⁿ人所行一切可惡ê事，來行；伊kiám會活mah？伊所行一切ê義，lóng無koh受記念，伊beh tī所犯ê罪，所行ê pháiⁿ，死tī hit中間。 25 Lín iáu teh講，主ê路無公平；以色列家ah，lín tio̍h聽；我ê路kiám無公平mah？kiám m̄是lín ê路無公平mah？ 26 義人若oa̍t頭離開伊ê義，來行罪惡，致到為tio̍h án-ni來死；伊就因為所行ê罪惡來死。 27 Koh pháiⁿ人若回頭，離開伊所行ê pháiⁿ，來行正直kap合理ê事；伊beh hō͘伊ê神魂得tio̍h活。 28 因為伊有想，回頭離開伊所犯一切ê罪過；伊的確活無死。 29 以色列家iáu teh講，主ê路無公平；以色列家ah，我ê路kiám無公平mah？kiám m̄是lín ê路無公平mah？ 30 所以主耶和華講，以色列家ah，我beh照lín ta̍k人所行ê審判lín；lín tio̍h回頭，離開所犯一切ê罪過；án-ni，罪過bōe會hō͘ lín敗無。 31 Lín tio̍h將所犯一切ê罪過hiat-ka̍k離開lín；為家己成一个新ê心，kap新ê神；以色列家ah，lín mih-sái tio̍h死？ 32 主耶和華講，人ê死，我無歡喜伊ê死；所以lín tio̍h回頭，來得tio̍h活。
1 Iâ-hô-hoa ê ōe koh lîm-kàu góa kóng, 2 Lín tī Í-sek-lia̍t tōe siáⁿ-sū ēng chit ê sio̍k-gú kóng, Lāu-pē chia̍h sng ê phû-tô, kiáⁿ ê chhùi-khí sng-nńg? 3 Chú Iâ-hô-hoa kóng, Góa kí Góa ê éng-oa̍h chiù-chōa kóng, Lín tī Í-sek-lia̍t-tiong bô in-iû thang koh ēng chit ê sio̍k-gú. 4 Khòaⁿ ah, lóng-chóng ê sîn-hûn sī sio̍k tī Góa; chhin-chhiūⁿ lāu-pē ê sîn-hûn sio̍k tī Góa, kiáⁿ ê sîn-hûn iā sī án-ni; hoān-chōe ê sîn-hûn, i beh sí. 5 Lâng nā kong-gī, kiâⁿ kong-pêng kap gī-lí, 6 bē-bat chiūⁿ soaⁿ-téng chia̍h chè-mi̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘, bē-bat chhin-kūn keng-kî-lāi ê hū-jîn-lâng; 7 bē-bat khui-hū lâng, sī chiong khiàm-chè ê lâng ê tǹg-thâu hêng i, bē-bat kiông-chhiúⁿ lâng ê mi̍h, sī ēng chia̍h-mi̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng, 8 bē-bat kā chioh-chîⁿ ê lâng thó lī-sek, iā bô the̍h lāi-chîⁿ, kiu-chhiú bô chòe-pháiⁿ, tī lióng-pêng ê lâng ê tiong-kan chiàu kong-tō phòaⁿ-koat, 9 sūn-thàn Góa ê lu̍t-lē, chip-siú Góa ê hoat-tō͘, chiàu sêng-si̍t kiâⁿ tāi-chì, che sī gī-lâng, tek-khak tit-tio̍h oa̍h; che sī Chú Iâ-hô-hoa kóng--ê. 10 Siat-sú i siⁿ chi̍t ê kiáⁿ, chòe kiông-tō, chòe thâi-lâng-ê, á-sī kiâⁿ hiah ê pháiⁿ ê chi̍t-hāng, bô kiâⁿ téng-bīn só͘ kóng ê hó, 11 hoán-tńg chiūⁿ soaⁿ-téng chia̍h chè-mi̍h, koh phah lâ-sâm chhù-piⁿ ê bó͘, 12 khui-hū khùn-khó͘ kap sòng-hiong ê lâng, kiông-chhiúⁿ lâng ê mi̍h, bē-bat ēng tǹg-thâu hêng--lâng, gióng-bōng ngó͘-siōng, kiâⁿ khó-ò͘ⁿ ê sū, 13 kā chioh-chîⁿ ê lâng thó lī-sek, the̍h lāi-chîⁿ; chit ê lâng kiám ōe oa̍h mah? i tek-khak bōe oa̍h; i kiâⁿ hiah ê it-chhè khó-ò͘ⁿ ê sū tek-khak tio̍h sí; i ê chōe beh kui tī i. 14 Khòaⁿ ah, siat-sú i siⁿ chi̍t ê kiáⁿ, khòaⁿ-kìⁿ lāu-pē só͘ kiâⁿ it-chhè ê chōe, chiū kiaⁿ-hiâⁿ, bô án-ni khì kiâⁿ; 15 bē-bat chiūⁿ-soaⁿ chia̍h chè-mi̍h, bē-bat gióng-bōng Í-sek-lia̍t-ke ê ngó͘-siōng, bē-bat phah lâ-sâm chhù-piⁿ ê bó͘; 16 bē-bat khui-hū lâng, bē-bat the̍h lâng ê tǹg-thâu, bē-bat kiông-chhiúⁿ lâng ê mi̍h, sī ēng chia̍h-mi̍h hō͘ iau ê lâng chia̍h, ēng i-chiûⁿ hō͘ thǹg-theh ê lâng chhēng, 17 kiu-chhiú bô hāi sòng-hiong lâng, bô thó lāi-chîⁿ, bô the̍h lī-sek, i sūn-thàn Góa ê hoat-tō͘, chip-siú Góa ê lu̍t-lē, i chiū bô in-ūi lāu-pē ê chōe-kòa lâi sí-bô, tek-khak ōe oa̍h. 18 Lūn-kàu i ê lāu-pē, in-ūi i khi-hū lâng chin siong-tiōng, kiông-chhiúⁿ hiaⁿ-tī, tī pún-cho̍k-tiong kiâⁿ m̄-hó; khòaⁿ ah, i beh in-ūi ka-kī ê chōe lâi sí. 19 Lín iáu teh kóng, Kiáⁿ cháiⁿ-iūⁿ bô tam-tng lāu-pē ê chōe? Kiáⁿ nā kiâⁿ chèng-ti̍t, kap ha̍p-lí ê sū, siú Góa it-chhè ê lu̍t-lē lâi kiâⁿ--i; i tek-khak ōe oa̍h. 20 Hoān-chōe ê sîn-hûn, i beh sí; kiáⁿ tek-khak bô tam-tng lāu-pē ê chōe, lāu-pē iā bô tam-tng kiáⁿ ê chōe; gī-lâng ê gī beh kui tī i ka-kī; pháiⁿ-lâng ê pháiⁿ, iā beh kui tī i ka-kī. 21 Pháiⁿ-lâng nā hôe-thâu lī-khui só͘ chòe it-chhè ê chōe-ok, chip-siú Góa it-chhè ê lu̍t-lē, kiâⁿ chèng-ti̍t kap ha̍p-lí ê sū, i tek-khak ōe oa̍h, bōe sí. 22 I só͘ hoān it-chhè ê chōe-kòa bô koh kā i kì-tit; tī só͘ kiâⁿ ê gī, i beh oa̍h. 23 Chú Iâ-hô-hoa kóng, Pháiⁿ-lâng sí-bô, kiám sī Góa só͘ hoaⁿ-hí mah? Góa kiám-m̄-sī hoaⁿ-hí i hôe-thâu, lī-khui i só͘ kiâⁿ ê lō͘, lâi tit-tio̍h oa̍h mah? 24 Chóng-sī gī-lâng nā oa̍t-thâu, lī-khui i ê gī, lâi hoān-chōe, chiàu pháiⁿ-lâng só͘ kiâⁿ it-chhè khó-ò͘ⁿ ê sū, lâi kiâⁿ; i kiám ōe oa̍h mah? i só͘ kiâⁿ it-chhè ê gī, lóng bô koh siū kì-liām, i beh tī só͘ hoān ê chōe, só͘ kiâⁿ ê pháiⁿ, sí tī hit tiong-kan. 25 Lín iáu teh kóng, Chú ê lō͘ bô kong-pêng; Í-sek-lia̍t-ke ah, lín tio̍h thiaⁿ; Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah? 26 Gī-lâng nā oa̍t-thâu lī-khui i ê gī, lâi kiâⁿ chōe-ok, tì-kàu ūi-tio̍h án-ni lâi sí; i chiū in-ūi só͘ kiâⁿ ê chōe-ok lâi sí. 27 Koh pháiⁿ-lâng nā hôe-thâu, lī-khui i só͘ kiâⁿ ê pháiⁿ, lâi kiâⁿ chèng-ti̍t kap ha̍p-lí ê sū; i beh hō͘ i ê sîn-hûn tit-tio̍h oa̍h. 28 In-ūi i ū siūⁿ, hôe-thâu lī-khui i só͘ hoān it-chhè ê chōe-kòa; i tek-khak oa̍h bô sí. 29 Í-sek-lia̍t-ke iáu teh kóng, Chú ê lō͘ bô kong-pêng; Í-sek-lia̍t-ke ah, Góa ê lō͘ kiám bô kong-pêng mah? kiám-m̄-sī lín ê lō͘ bô kong-pêng mah? 30 Só͘-í Chú Iâ-hô-hoa kóng, Í-sek-lia̍t-ke ah, Góa beh chiàu lín ta̍k-lâng só͘ kiâⁿ--ê sím-phòaⁿ lín; lín tio̍h hôe-thâu, lī-khui só͘ hoān it-chhè ê chōe-kòa; án-ni, chōe-kòa bōe-ōe hō͘ lín pāi-bô. 31 Lín tio̍h chiong só͘ hoān it-chhè ê chōe-kòa hiat-ka̍k lī-khui lín; ūi ka-kī chiâⁿ chi̍t ê sin ê sim, kap sin ê sîn; Í-sek-lia̍t-ke ah, lín mih-sái tio̍h sí? 32 Chú Iâ-hô-hoa kóng, Lâng ê sí, Góa bô hoaⁿ-hí i ê sí; só͘-í lín tio̍h hôe-thâu, lâi tit-tio̍h oa̍h.
1 你tio̍h為以色列ê王親做哀歌， 2 講，Lín老母是甚麼？是母ê獅，仆tī chiahê獅ê中間；tī細隻獅ê中間，養飼伊ê kiáⁿ。 3 Tī伊ê kiáⁿ ê中間，飼一隻到大，學習咬物來食人。 4 列國聽見，就tī in ê陷坑掠tio̍h，用鏈拖伊到埃及地。 5 母ê獅看本身thèng候到失望；就對伊細隻獅ê中間koh取一隻，養飼到大。 6 伊tī chiahê 獅ê中間走來走去，成做勇ê獅，學習咬物來食人。 7 伊知in ê宮殿，koh hō͘ in ê城變做拋荒，因為伊hm̄-hm̄哮ê聲，遍地kap其中所有ê就荒廢。 8 Tùi án-ni，四圍ê邦國tùi ta̍k省來攻擊伊，用網拋tī伊ê頂面；伊受掠tī in ê陷坑。 9 In kā伊鏈tī櫥裡，帶到巴比倫王hia；關伊tī堅固ê所在；hō͘伊ê聲tī以色列山無koh聽見。 10 Lín老母前親像葡萄樹，極其茂盛，栽tī水邊，因為水chōe，就結 chōe-chōe果子，發chōe-chōe枝。 11 生出giám硬ê枝椏，thang做掌權ê ê柺；伊tī ām-ām ê枝椏中做極高ê；因為高，就伊ê椏ê中枝挺起hō͘人看見。 12 總是chit叢葡萄樹，因為大受氣，tú-tio̍h拔起來，hiat tī地裡；東風吹乾伊ê果子，giám硬ê枝椏 at折枯焦，hō͘火燒lio去。 13 Taⁿ栽tī曠野乾燥無水ê地。 14 Koh對伊枝椏ê高，有火發出，燒伊ê果子；致到伊無giám硬ê枝椏，thang做掌權ê ê柺；這是thang哀傷ê，thang做哀歌。
1 Lí tio̍h ūi Í-sek-lia̍t ê ông-chhin chòe ai-ko, 2 kóng, Lín lāu-bú sī sím-mi̍h? sī bú ê sai, phak tī chiah ê sai ê tiong-kan; tī sòe chiah sai ê tiong-kan, iúⁿ-chhī i ê kiáⁿ. 3 Tī i ê kiáⁿ ê tiong-kan, chhī chi̍t-chiah kàu tōa, ha̍k-si̍p kā-mi̍h lâi chia̍h-lâng. 4 Lia̍t-kok thiaⁿ-kìⁿ, chiū tī in ê hām-khiⁿ lia̍h-tio̍h, ēng liān thoa i kàu Ai-ki̍p tōe. 5 Bú ê sai khòaⁿ pún-sin thèng-hāu kàu sit-bāng; chiū tùi i sòe-chiah sai ê tiong-kan koh chhú chi̍t-chiah, iúⁿ-chhī kàu tōa. 6 I tī chiah ê sai ê tiong-kan cháu-lâi cháu-khì, chiâⁿ-chòe ióng ê sai, ha̍k-si̍p kā-mi̍h lâi chia̍h-lâng. 7 I chai in ê kiong-tiān, koh hō͘ in ê siâⁿ pìⁿ-chòe pha-hng, in-ūi i hm̄-hm̄-háu ê siaⁿ, piàn-tōe kap kî-tiong só͘-ū--ê chiū hong-hòe. 8 Tùi án-ni sì-ûi ê pang-kok tùi ta̍k-séng lâi kong-kek i, ēng bāng pha tī i ê téng-bīn; i siū-lia̍h tī in ê hām-khiⁿ. 9 In kā i liān tī tû--nih, tòa kàu Pa-pí-lûn ông hia; koaiⁿ--i tī kian-kò͘ ê só͘-chāi; hō͘ i ê siaⁿ tī Í-sek-lia̍t soaⁿ bô koh thiaⁿ-kìⁿ. 10 Lín lāu-bú chêng chhin-chhiūⁿ phû-tô-chhiū, ke̍k-kî bō͘-sēng, chai tī chúi-piⁿ, in-ūi chúi chōe, chiū kiat chōe-chōe ké-chí, hoat chōe-chōe ki. 11 Siⁿ-chhut giám-ngī ê ki-oāiⁿ, thang chòe chiáng-koân--ê ê koáiⁿ; i tī ām-ām ê ki-oāiⁿ-tiong chòe ke̍k koâiⁿ--ê; in-ūi koâiⁿ, chiū i ê oāiⁿ ê tiong-ki théng-khí hō͘ lâng khòaⁿ-kìⁿ. 12 Chóng-sī chit-châng phû-tô-chhiū, in-ūi tōa siū-khì, tú-tio̍h pu̍ih--khí-lâi, hiat tī tōe--nih; tang-hong chhe-ta i ê ké-chí, giám-ngī ê ki-oāiⁿ at-chi̍t ko͘-tâ, hō͘ hé sio-lio--khì. 13 Taⁿ chai tī khòng-iá ta-sò bô chúi ê tōe. 14 Koh tùi i ki-oāiⁿ ê koâiⁿ, ū hé hoat-chhut, sio i ê ké-chí; tì-kàu i bô giám-ngī ê ki-oāiⁿ, thang chòe chiáng-koân--ê ê koáiⁿ; che sī thang ai-siong--ê, thang chòe ai-ko.
1 第七年，五月初十，有以色列ê長老kúi-nā人，來beh問耶和華，坐tī我ê面前。 2 耶和華ê話臨到我講， 3 人子ah，你tio̍h對以色列ê長老講，kā伊講，主耶和華án-ni講，Lín來是beh問我mah？主耶和華講，我指我ê永活來chiù-chōa，我m̄ hō͘你問。 4 人子ah，你beh審問in，審問in mah？你tio̍h hō͘ in知in ê列祖hiahê可惡ê事； 5 對in講，主耶和華án-ni講，當我揀以色列ê日，ǹg雅各家ê後裔，kia̍h起我ê手，tī埃及地hō͘ in bat我，tùi in kia̍h起我ê手，講，我是耶和華，lín ê上帝。 6 Hit日我對in kia̍h起手，beh chhōa in出埃及地，到我為tio̍h in所講，流奶kap蜜ê地；hitê地tī萬國中是khah有榮光ê。 7 我對in講，Lín ta̍k人tio̍h棄sak目睭所歡喜hiahê可惡ê tāi；m̄-thang因為埃及ê偶像phah lâ-sâm家己；我是耶和華，lín ê上帝。 8 總是in悖逆我，m̄肯聽我，m̄放sak in ta̍k人目睭所歡喜hiahê可惡ê tāi，m̄離開埃及ê偶像；我就講，我beh將我ê大受氣piàⁿ tī in ê頂面，tī埃及地對in一盡成我ê受氣。 9 獨獨我因為我ê名ê緣故行tāi-chì，免得我ê名tī in所khiā起列邦中ê面前受褻瀆；我chhōa in出埃及地，tī列邦中ê目睭前hō͘ in bat我。 10 Án-ni，我就hō͘ in出埃及地，chhōa in到曠野。 11 將我ê律例賞賜in，將我ê法度指示in；就是人若行伊beh對伊來得tio̍h活ê。 12 Koh我用我ê安歇日賞賜in，thang tī我kap in ê中間做證據；hō͘ in知我耶和華是hō͘ in成做聖ê。 13 總是以色列家tī曠野悖逆我，無順thàn我ê律例，棄sak我ê法度，(就是人若行伊，beh對伊來得tio̍h活ê) ，大大犯tio̍h我ê安歇日：我就講，beh tī曠野將我ê大受氣piàⁿ tī in ê頂面，滅無in。 14 獨獨我因為我ê名ê緣故行tāi-chì，免得我ê名受褻瀆tī列邦人ê目睭前，就是hiahê看見我chhōa in出埃及ê列邦。 15 Koh我tī曠野對in kia̍h起我ê手，講，我無beh chhōa in入我所賞賜in 流奶 kap蜜ê地，hitê地tī萬國中khah有榮光ê。 16 因為in厭賤我ê法度，無順thàn我ê律例，犯tio̍h我ê安歇日，in ê心意向in ê偶像。 17 雖然án-ni，我ê目睭iáu-kú是惜in，無毀滅in，無tī曠野kā in滅了了。 18 我tī曠野對in ê kiáⁿ兒講，莫得thàn lín老父ê律例，莫得守in ê法度，亦莫得因為in ê偶像phah lâ-sām家己。 19 我是耶和華lín ê上帝，lín tio̍h順thàn我ê律例，守我ê法度來行伊。 20 Koh用我chiahê安歇日做聖；chiahê日tī我kap lín ê中間做證據，hō͘ lín知我是耶和華lín ê上帝。 21 獨獨in ê kiáⁿ兒悖逆我，無順thàn我ê律例，亦無守我ê法度來行伊，(就是人若行伊，beh對伊來得tio̍h活ê) ；in犯tio̍h我ê安歇日；我就講，我beh將我ê大受氣piàⁿ tī in ê頂面，tī曠野一盡成我ê受氣攻擊伊。 22 雖然án-ni，我iáu-kú kiu我ê手，為tio̍h我ê名ê緣故行tāi-chì，免得我ê名受褻瀆tī列邦人ê目睭前，就是hiahê看見我chhōa in出埃及ê列邦。 23 Koh我tī曠野，對in kia̍h起我ê手，講beh分散in tī列國，四散in tī列邦。 24 因為in無thàn我ê法度，厭賤我ê律例，犯tio̍h我ê安歇日，目睭意向in老父ê偶像。 25 Koh我用m̄好ê律例，kap bōe能對伊來得tio̍h活ê法度，hō͘-in。 26 In用一切ê頭chiūⁿ-kiáⁿ經過火；我就tī in ê祭祀kā in phah lâ-sâm，hō͘ in荒廢；hō͘ in知我是耶和華。 27 人子ah，你tio̍h對以色列家講話，kā in講，主耶和華án-ni講，Lín ê列祖得罪我，用án-ni褻瀆我。 28 因為我chhōa in到我kia̍h起手beh賞賜in ê地；in看見ta̍k-ê高山，ta̍k叢ām ê樹；就tī-hia獻in hiahê祭祀，獻激我受氣ê禮物，亦tī-hia燒芳芳ê牲禮，kap灌奠。 29 我就對in講，Lín所上hitê高位是甚麼？伊ê名叫做Pa-bâ，直到今á日。 30 所以你tio̍h對以色列家講，主耶和華án-ni講，Lín猶原照lín列祖所行ê，phah lâ-sâm家己mah？猶原thàn in可惡ê事行淫mah？ 31 Lín獻禮物，hō͘ lín ê kiáⁿ經過火ê時，猶原將一切ê偶像phah lâ-sâm家己，到今á日mah？以色列家ah，我kiám beh hō͘ lín問mah？主耶和華講，我kí我ê永活來chiù-chōa，我的確m̄ hō͘你問。 32 Lín講，阮beh親像外邦人，親像列國ê宗族，去服事柴ê，石ê；lín發起chit號心意，斷斷bōe成。 33 主耶和華講，我kí我ê永活來chiù-chōa，我beh用大權能ê手，kap伸出ê手骨，kap piàⁿ出ê大受氣做lín ê王。 34 我beh用大權能ê手，kap伸出ê手骨，kap piàⁿ出ê大受氣tùi列邦中chhōa lín出，亦tùi lín四散去hiahê國聚集lín。 35 我beh chhōa lín到外邦人ê曠野，tī-hia當面審問lín。 36 我àn怎樣tī埃及地ê曠野審問lín ê列祖，亦beh án-ni審問lín；這是主耶和華講ê。 37 我beh hō͘ lín經過柺á下，亦beh hō͘ lín受約ê拘束。 38 我beh tùi lín中間一盡除hiahê悖逆kap得罪我ê人；chhōa in出in寄腳ê地方，總是in bōe得入以色列地；lín就知我是耶和華。 39 以色列家ah，論到lín，主耶和華án-ni講，去ah，ta̍k人服事伊ê偶像，獨獨後來的確beh聽我，無koh用禮物kap偶像褻瀆我ê聖名。 40 主耶和華講，Tī我ê聖山，就是以色列高ê山，tī-hia以色列全家ê眾人，beh tī hitê地服事我，tī-hia我beh接納lín，tī-hia我beh kā lín討禮物，kap lín起頭熟ê土產，以及lín一切ê聖物。 41 我tùi chiahê百姓中chhōa lín出，tùi lín四散去ê列國中聚集lín；hit時我beh接納lín親像芳香；我beh tī lín得tio̍h顯明做聖，hō͘外邦人看見。 42 我chhōa lín入以色列地，就是我kia̍h起我ê手，講beh賞賜lín列祖ê地，hit時lín就知我是耶和華。 43 Tī-hia lín beh記得lín ê所行所做，就是lín tùi hiahê來phah lâ-sâm lín家己ê；koh beh 因為lín所行一切ê pháiⁿ，來家己厭惡。 44 主耶和華講，以色列家ah，我為tio̍h我ê名ê緣故，無照lín ê pháiⁿ所行，kap lín ê腐敗ê所做款待lín；lín就知我是耶和華。 45 耶和華ê話臨到我講， 46 人子ah，你ê面tio̍h ǹg南方，ǹg南方piàⁿ出話，攻擊南方田野ê樹林來宣傳。 47 Tùi南方ê樹林講，Tio̍h聽耶和華ê話；主耶和華án-ni講，看ah，我beh tī你中間起火，燒你中間一切青翠ê樹，kap枯焦ê樹；猛烈ê火燄，的確無熄；tùi南到北，ta̍k面lóng受燒。 48 凡若有血氣ê，lóng beh知起火ê，是我耶和華。 49 Tùi án-ni，我講，Hāiⁿ ah，主耶和華ah，人lóng議論我講，伊kiám m̄是teh講譬喻？
1 Tē chhit--nî, gō͘-ge̍h chhoe-cha̍p, ū Í-sek-lia̍t ê tióng-ló kúi-nā lâng, lâi beh mn̄g Iâ-hô-hoa, chē tī góa ê bīn-chêng. 2 Iâ-hô-hoa ê ōe lîm-kàu góa kóng, 3 Jîn-chú ah, lí tio̍h tùi Í-sek-lia̍t ê tióng-ló kóng, kā i kóng, Chú Iâ-hô-hoa án-ni kóng, Lín lâi sī beh mn̄g Góa mah? Chú Iâ-hô-hoa kóng, Góa chí Góa ê éng-oa̍h lâi chiù-chōa, Góa m̄ hō͘ lí mn̄g. 4 Jîn-chú ah, lí beh sím-mn̄g in, sím-mn̄g in mah? lí tio̍h hō͘ in chai in ê lia̍t-chó͘ hiah ê khó-ò͘ⁿ ê sū; 5 tùi in kóng, Chú Iâ-hô-hoa án-ni kóng, Tng Góa kéng Í-sek-lia̍t ê ji̍t, ǹg Ngá-kok ke ê hō͘-è, kia̍h-khí Góa ê chhiú, tī Ai-ki̍p tōe hō͘ in bat Góa, tùi in kia̍h-khí Góa ê chhiú, kóng, Góa sī Iâ-hô-hoa, lín ê Siōng-tè. 6 Hit-ji̍t Góa tùi in kia̍h-khí chhiú, beh chhōa in chhut Ai-ki̍p tōe, kàu Góa ūi-tio̍h in só͘ kóng, lâu ni kap bi̍t ê tōe; hit ê tōe tī bān-kok-tiong sī khah ū êng-kng--ê. 7 Góa tùi in kóng, Lín ta̍k-lâng tio̍h khì-sak ba̍k-chiu só͘ hoaⁿ-hí hiah ê khó-ò͘ⁿ ê tāi; m̄-thang in-ūi Ai-ki̍p ê ngó͘-siōng phah lâ-sâm ka-kī; Góa sī Iâ-hô-hoa, lín ê Siōng-tè. 8 Chóng-sī in pōe-ge̍k Góa, m̄-khéng thiaⁿ Góa, m̄ pàng-sak in ta̍k-lâng ba̍k-chiu só͘ hoaⁿ-hí hiah ê khó-ò͘ⁿ ê tāi, m̄ lī-khui Ai-ki̍p ê ngó͘-siōng; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī Ai-ki̍p tōe tùi in it-chīn chiâⁿ Góa ê siū-khì. 9 To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ tī in só͘ khiā-khí lia̍t-pang-tiong ê bīn-chêng siū siat-to̍k; Góa chhōa in chhut Ai-ki̍p tōe, tī lia̍t-pang-tiong ê ba̍k-chiu-chêng hō͘ in bat Góa. 10 Án-ni, Góa chiū hō͘ in chhut Ai-ki̍p tōe, chhōa in kàu khòng-iá. 11 Chiong Góa ê lu̍t-lē siúⁿ-sù in, chiong Góa ê hoat-tō͘ chí-sī in; chiū-sī lâng nā kiâⁿ--i beh tùi i lâi tit-tio̍h oa̍h--ê. 12 Koh Góa ēng Góa ê an-hioh-ji̍t siúⁿ-sù in, thang tī Góa kap in ê tiong-kan chòe chèng-kù; hō͘ in chai Góa Iâ-hô-hoa sī hō͘ in chiâⁿ-chòe sèng--ê. 13 Chóng-sī Í-sek-lia̍t-ke tī khòng-iá pōe-ge̍k Góa, bô sūn-thàn Góa ê lu̍t-lē, khì-sak Góa ê hoat-tō͘, (chiū-sī lâng nā kiâⁿ--i, beh tùi i lâi tit-tio̍h oa̍h--ê), tōa-tōa hoān-tio̍h Góa ê an-hioh-ji̍t: Góa chiū kóng, beh tī khòng-iá chiong Góa ê tōa siū-khì piàⁿ tī in ê téng-bīn, bia̍t-bô in. 14 To̍k-to̍k Góa in-ūi Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-ki̍p ê lia̍t-pang. 15 Koh Góa tī khòng-iá tùi in kia̍h-khí Góa ê chhiú, kóng, Góa bô beh chhōa in ji̍p Góa só͘ siúⁿ-sù in lâu ni kap bi̍t ê tōe, hit ê tōe tī bān-kok-tiong khah ū êng-kng--ê. 16 In-ūi in iàm-chiān Góa ê hoat-tō͘, bô sūn-thàn Góa ê lu̍t-lē, hoān-tio̍h Góa ê an-hioh-ji̍t, in ê sim ì-hiòng in ê ngó͘-siōng. 17 Sui-jiân án-ni, Góa ê ba̍k-chiū iáu-kú sī sioh in, bô húi-bia̍t in, bô tī khòng-iá kā in bia̍t liáu-liáu. 18 Góa tī khòng-iá tùi in ê kiáⁿ-jî kóng, Bo̍h-tit thàn lín lāu-pē ê lu̍t-lē, bo̍h-tit siú in ê hoat-tō͘, ia̍h bo̍h-tit in-ūi in ê ngó͘-siōng phah lâ-sām ka-kī. 19 Góa sī Iâ-hô-hoa lín ê Siōng-tè, lín tio̍h sūn-thàn Góa ê lu̍t-lē, siú Góa ê hoat-tō͘ lâi kiâⁿ--i. 20 Koh ēng Góa chiah ê an-hioh-ji̍t chòe-sèng; chiah ê ji̍t tī Góa kap lín ê tiong-kan chòe chèng-kù, hō͘ lín chai Góa sī Iâ-hô-hoa lín ê Siōng-tè. 21 To̍k-to̍k in ê kiáⁿ-jî pōe-ge̍k Góa, bô sūn-thàn Góa ê lu̍t-lē, ia̍h bô siú Góa ê hoat-tō͘ lâi kiâⁿ--i, (chiū-sī lâng nā kiâⁿ--i, beh tùi i lâi tit-tio̍h oa̍h--ê); in hoān-tio̍h Góa ê an-hioh-ji̍t; Góa chiū kóng, Góa beh chiong Góa ê tōa siū-khì piàⁿ tī in ê téng-bīn, tī khòng-iá it-chīn chiâⁿ Góa ê siū-khì kong-kek i. 22 Sui-jiân án-ni, Góa iáu-kú kiu Góa ê chhiú, ūi-tio̍h Góa ê miâ ê iân-kò͘ kiâⁿ tāi-chì, bián-tit Góa ê miâ siū siat-to̍k tī lia̍t-pang lâng ê ba̍k-chiu-chêng, chiū-sī hiah ê khòaⁿ-kìⁿ Góa chhōa in chhut Ai-ki̍p ê lia̍t-pang. 23 Koh Góa tī khoàn-iá, tùi in kia̍h-khí Góa ê chhiú, kóng beh hun-sòaⁿ in tī lia̍t-kok, sì-sòaⁿ in tī lia̍t-pang. 24 In-ūi in bô thàn Góa ê hoat-tō͘, iàm-chiān Góa ê lu̍t-lē, hoān-tio̍h Góa ê an-hioh-ji̍t, ba̍k-chiu ì-hiòng in lāu-pē ê ngó͘-siōng. 25 Koh Góa ēng m̄-hó ê lu̍t-lē, kap bōe-ōe tùi i lâi tit-tio̍h oa̍h ê hoat-tō͘, hō͘--in. 26 In ēng it-chhè ê thâu-chiūⁿ-kiáⁿ keng-kè hé; Góa chiū tī in ê chè-sū kā in phah lâ-sâm, hō͘ in hong-hòe; hō͘ in chai Góa sī Iâ-hô-hoa. 27 Jîn-chú ah, lí tio̍h tùi Í-sek-lia̍t-ke kóng ōe, kā in kóng, Chú Iâ-hô-hoa án-ni kóng, Lín ê lia̍t-chó͘ tek-chōe Góa, ēng án-ni siat-to̍k Góa. 28 In-ūi Góa chhōa in kàu Góa kia̍h-khí chhiú beh siúⁿ-sù in ê tōe; in khòaⁿ-kìⁿ ta̍k ê koâiⁿ-soaⁿ, ta̍k-châng ām ê chhiū; chiū tī-hia hiàn in hiah ê chè-sū, hiàn kek Góa siū-khì ê lé-mi̍h, ia̍h tī-hia sio phang-phang ê seng-lé, kap koàn-tiān. 29 Góa chiū tùi in kóng, Lín só͘ chiūⁿ hit ê koâiⁿ-ūi sī sím-mi̍h? i ê miâ kiò-chòe Pa-bâ, ti̍t-kàu kin-á-ji̍t. 30 Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Lín iû-goân chiàu lín lia̍t-chó͘ só͘ kiâⁿ-ê, phah lâ-sâm ka-kī mah? iû-goân thàn in khó-ò͘ⁿ ê sū kiâⁿ-îm mah? 31 Lín hiàn lé-mi̍h, hō͘ lín ê kiáⁿ keng-kè hé ê sî, iû-goân chiong it-chhè ê ngó͘-siōng phah lâ-sâm ka-kī, kàu kin-á-ji̍t mah? Í-sek-lia̍t-ke ah, Góa kiám beh hō͘ lín mn̄g mah? Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa tek-khak m̄ hō͘ lí mn̄g. 32 Lín kóng, Goán beh chhin-chhiūⁿ gōa-pang lâng, chhin-chhiūⁿ lia̍t-kok ê chong-cho̍k, khì ho̍k-sāi chhâ-ê, chio̍h-ê; lín hoat-khí chit-hō sim-ì, toàn-toàn bōe chiâⁿ. 33 Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa beh ēng tōa koân-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì chòe lín ê ông. 34 Góa beh ēng tōa koân-lêng ê chhiú, kap chhun-chhut ê chhiú-kut, kap piàⁿ-chhut ê tōa siū-khì tùi lia̍t-pang-tiong chhōa lín chhut, ia̍h tùi lín sì-sòaⁿ-khì hiah ê kok chū-chi̍p lín. 35 Góa beh chhōa lín kàu gōa-pang lâng ê khòng-iá, tī-hia tng-bīn sím-mn̄g lín. 36 Góa àn-cháiⁿ-iūⁿ tī Ai-ki̍p tōe ê khòng-iá sím-mn̄g lín ê lia̍t-chó͘, ia̍h beh án-ni sím-mn̄g lín; che sī Chú Iâ-hô-hoa kóng--ê. 37 Góa beh hō͘ lín keng-kè koáiⁿ-á-ē, ia̍h beh hō͘ lín siū iok ê khu-sok. 38 Góa beh tùi lín tiong-kan it-chīn tû hiah ê pōe-ge̍k kap tek-chōe Góa ê lâng; chhōa in chhut in kià-kha ê tōe-hng, chóng-sī in bōe-tit ji̍p Í-sek-lia̍t tōe; lín chiū chai Góa sī Iâ-hô-hoa. 39 Í-sek-lia̍t-ke ah, lūn-kàu lín, Chú Iâ-hô-hoa án-ni kóng, Khì ah, ta̍k-lâng ho̍k-sāi i ê ngó͘-siōng, to̍k-to̍k āu-lâi tek-khak beh thiaⁿ Góa, bô koh ēng lé-mi̍h kap ngó͘-siōng siat-to̍k Góa ê sèng-miâ. 40 Chú Iâ-hô-hoa kóng, Tī Góa ê sèng-soaⁿ, chiū-sī Í-sek-lia̍t koâiⁿ ê soaⁿ, tī-hia Í-sek-lia̍t choân-ke ê chèng-lâng, beh tī hit ê tōe ho̍k-sāi Góa, tī-hia Góa beh chiap-la̍p lín, tī-hia Góa beh kā lín thó lé-mi̍h, kap lín khí-thâu-se̍k ê thó͘-sán, í-ki̍p lín it-chhè ê sèng-mi̍h. 41 Góa tùi chiah ê peh-sìⁿ-tiong chhōa lín chhut, tùi lín sì-sòaⁿ--khì ê lia̍t-kok-tiong chū-chi̍p lín; hit-sî Góa beh chiap-la̍p lín chhin-chhiūⁿ phang-hiuⁿ; Góa beh tī lín tit-tio̍h hián-bêng chòe-sèng, hō͘ gōa-pang lâng khòaⁿ-kìⁿ. 42 Góa chhōa lín ji̍p Í-sek-lia̍t tōe, chiū-sī Góa kia̍h-khí Góa ê chhiú, kóng beh siúⁿ-sù lín lia̍t-chó͘ ê tōe, hit-sî lín chiū chai Góa sī Iâ-hô-hoa. 43 Tī-hia lín beh kì-tit lín ê só͘-kiâⁿ só͘ chòe, chiū-sī lín tùi hiah-ê lâi phah lâ-sâm lín ka-kī--ê; koh beh in-ūi lín só͘ kiâⁿ it-chhè ê pháiⁿ, lâi ka-kī iàm-ò͘ⁿ. 44 Chú Iâ-hô-hoa kóng, Í-sek-lia̍t-ke ah, Góa ūi-tio̍h Góa ê miâ ê iân-kò͘, bô chiàu lín ê pháiⁿ só͘-kiâⁿ, kap lín ê hú-pāi ê só͘-chòe khoán-thāi lín; lín chiū chai Góa sī Iâ-hô-hoa. 45 Iâ-hô-hoa ê ōe lîm-kàu Góa kóng, 46 Jîn-chú ah, lí ê bīn tio̍h ǹg lâm-hng, ǹg lâm-hng piàⁿ-chhut ōe, kong-kek lâm-hng chhân-iá ê chhiū-nâ lâi soan-thoân. 47 Tùi lâm-hng ê chhiū-nâ kóng, Tio̍h thiaⁿ Iâ-hô-hoa ê ōe; Chú Iâ-hô-hoa án-ni kóng, Khòaⁿ ah, Góa beh tī lí tiong kan khí hé, sio lí tiong-kan it-chhè chhiⁿ-chhùi ê chhiū, kap ko͘-tâ ê chhiū; béng-lia̍t ê hé-iām, tek-khak bô sit; tùi lâm kàu pak, ta̍k-bīn lóng siū sio. 48 Hoān-nā ū hiat-khì--ê, lóng beh chai khí-hé--ê, sī Góa Iâ-hô-hoa. 49 Tùi án-ni góa kóng, Hāiⁿ ah, Chú Iâ-hô-hoa ah, lâng lóng gī-lūn góa kóng, I kiám m̄-sī teh kóng phì-jū?
1 耶和華ê話臨到我講， 2 人子ah，你tio̍h面ǹg耶路撒冷，ǹg hiahê聖所piàⁿ出話攻擊以色列地來宣傳。 3 對以色列地講，耶和華án-ni講，看ah，我beh抵敵你，亦beh拔我ê刀出伊ê鞘；tùi你ê中間剪除義人pháiⁿ人。 4 我既然beh對你中間剪除義人kap pháiⁿ人，所以我ê刀beh出伊ê鞘，tùi南到北，攻擊一切有血氣ê。 5 一切有血氣ê就知我耶和華已經拔刀出伊ê鞘，的確無koh收入。 6 人子ah，你tio̍h吐氣，腰骨折，痛苦；吐氣tī in ê面前。 7 In問你講，你啥事吐氣？你就tio̍h講，因為有風聲tāi-chì beh來，人ê心lóng beh消溶，手lóng酸軟，精神衰敗，腳頭u軟弱親像水；看ah，chitê事teh來，的確會成；這是主耶和華講ê。 8 耶和華ê話臨到我講， 9 人子ah，你tio̍h宣傳講，耶和華án-ni講，你tio̍h講，有刀，有刀，是磨利鑢光 ê。 10 磨利是beh 刣人，鑢光是beh親像sih-nà；咱kiám thang歡喜mah？我ê kiáⁿ ê柺á藐視眾樹木。 11 Chit支刀已經交hō͘人鑢光，thang hō͘人ê手kia̍h伊；伊已經磨利鑢光，thang交tī 刣人ê ê手。 12 人子ah，你tio̍h hoah，喉叫；因為chitê臨到我ê百姓，kap以色列一切ê貴族；in kap我ê百姓lóng交tī刀下，所以你tio̍h搭大腿。 13 有試驗ê事；若hitê藐視ê柺á歸tī無，beh àn怎樣ah？這是主耶和華講ê。 14 人子ah，你tio̍h tah手宣傳，chit支刀tio̍h三pái加倍，就是hō͘人tio̍h重傷ê刀，亦是hō͘大人tio̍h重傷ê刀，入tī密房ê。 15 我備辦hō͘人驚ê刀，攻擊in一切ê城門；hō͘ in ê心消溶，加添in跋倒ê事；hāiⁿ ah，chit支刀chhòng到親像sih-nà，磨到真利，beh 刣死人。 16 你tio̍h合óa，ǹg chiàⁿ-pêng；排陣，ǹg tò-pêng；chhut-chāi你ê面ǹg toh-lo̍h，就ǹg hia。 17 我亦beh搭手，亦beh hō͘我ê大受氣soah；這是我耶和華講ê。 18 耶和華ê話koh臨到我講， 19 人子ah，你tio̍h為tio̍h本身設兩條路，thang hō͘巴比倫王ê刀劍tùi hia來；chit兩條路tio̍h tùi一所在分出；koh tio̍h畫一支手，畫tī透到城ê路頭。 20 你tio̍h設一條路，hō͘刀來到A-bûn人ê La̍h-pa，也thang到偤大堅固ê城耶路撒冷。 21 因為巴比倫王khiā tī 雙叉路hia，tī兩條路頭beh占卜，伊ê搖箭；問偶像，驗牲禮ê肝。 22 Tī伊ê chiàⁿ手，有占卜去耶路撒冷ê箭；設羊頭錘，開嘴hoah 刣，大聲喉叫，設羊頭錘，攻擊城門，起土堆，造台。 23 Hiah-ê bat對in chiù-chōa ê人看伊做假ê占卜；總是伊beh hō͘人記得in ê pháiⁿ，致到in眾人受掠。 24 所以主耶和華án-ni講，因為lín ê過失露現，hō͘ lín ê罪過tú-tio̍h記得，致到lín ê罪惡tī lín ê行做lóng顯出；koh 因為lín受記得，beh hō͘人ê手所掠。 25 你chit ê受重傷行pháiⁿ ê以色列王ah，你ê罪惡灌滿，你ê日子到lah。 26 主耶和華án-ni講，Tio̍h除去王帽，liù冕旒，無koh有chit號景況；taⁿ beh hō͘低ê 升高，高ê降低。 27 我beh chhia倒，chhia倒，chhia倒伊；無koh有chitê，thèng候應該得tio̍h-ê到，我就hō͘伊。 28 人子ah，你tio̍h宣傳講，主耶和華論到A-bûn人，kap in ê侮慢，有án-ni講；你tio̍h講，有刀，有拔出ê刀，已經鑢光，beh 刣死人；hō͘伊親像sih-nà beh吞滅人。 29 人為tio̍h你看虛假ê異象，行白賊ê占卜；將你hē tī受重傷pháiⁿ人ê頷頸；in ê罪惡灌滿，in ê日子到lah。 30 Hō͘刀入鞘，我beh tī你受造ê位，生長ê地，審判你。 31 我beh將我ê痛恨piàⁿ tī你ê身上，將我大受氣ê火pûn tī你；交你tī殘忍gâu 刣人ê ê手。 32 你beh做hiâⁿ火ê柴，你ê血beh流tī chitê地方，你無koh得tio̍h記念；因為這是我耶和華講ê。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h bīn ǹg Iâ-lō͘-sat-léng, ǹg hiah ê sèng-só͘ piàⁿ-chhut ōe kong-kek Í-sek-lia̍t tōe lâi soan-thoân. 3 Tùi Í-sek-lia̍t tōe kóng, Iâ-hô-hoa án-ni kóng, Khòaⁿ ah, Góa beh tí-te̍k lí, ia̍h beh pu̍ih Góa ê to chhut i ê siù; tùi lí ê tiong-kan chián-tû gī-lâng pháiⁿ-lâng. 4 Góa kì-jiân beh tùi lí tiong-kan chián-tû gī-lâng kap pháiⁿ-lâng, só͘-í Góa ê to beh chhut i ê siù, tùi lâm kàu pak, kong-kek it-chhè ū hiat-khì-ê. 5 It-chhè ū hiat-khì-ê chiū chai Góa Iâ-hô-hoa í-keng pu̍ih to chhut i ê siù, tek-khak bô koh siu-ji̍p. 6 Jîn-chú ah, lí tio̍h thó͘-khùi, io-kut chi̍h, thòng-khó͘; thó͘-khùi tī in ê bīn-chêng. 7 In mn̄g lí kóng, Lí siáⁿ-sū thó͘-khùi? lí chiū tio̍h kóng, In-ūi ū hong-siaⁿ tāi-chì beh lâi, lâng ê sim lóng beh siau-iûⁿ, chhiú lóng sng-nńg, cheng-sîn soe-pāi, kha-thâu-u loán-jio̍k chhin-chhiūⁿ chúi; khòaⁿ ah, chit ê sū teh lâi, tek-khak ōe chiâⁿ; che sī Chú Iâ-hô-hoa kóng--ê. 8 Iâ-hô-hoa ê ōe lîm-kàu góa kóng, 9 Jîn-chú ah, lí tio̍h soan-thoân kóng, Iâ-hô-hoa án-ni kóng, Lí tio̍h kóng, Ū to, ū to, sī bôa-lāi lù-kng ê. 10 Bôa-lāi sī beh thâi lâng, lù-kng sī beh chhin-chhiūⁿ sih-nà; lán kiám thang hoaⁿ-hí mah? Góa ê kiáⁿ ê koáiⁿ-á biáu-sī chèng chhiū-ba̍k. 11 Chit ki to í-keng kau hō͘ lâng lù-kng, thang hō͘ lâng ê chhiú kia̍h--i; i í-keng bôa-lāi lù-kng, thang kau tī thâi-lâng--ê ê chhiú. 12 Jîn-chú ah, lí tio̍h hoah, âu-kiò; in-ūi chit ê lîm-kàu Góa ê peh-sìⁿ, kap Í-sek-lia̍t it-chhè ê kùi-cho̍k; in kap Góa ê peh-sìⁿ lóng kau tī to-ē, só͘-í lí tio̍h tah tōa-thúi. 13 Ū chhì-giām ê sū; nā hit ê biáu-sī ê koáiⁿ-á kui tī bô, beh àn-cháiⁿ-iūⁿ ah? che sī Chú Iâ-hô-hoa kóng--ê. 14 Jîn-chú ah, lí tio̍h tah chhiú soan-thoân, chit ki to tio̍h saⁿ-pái ka-pē, chiū-sī hō͘ lâng tio̍h tāng-siong ê to, ia̍h sī hō͘ tāi-jîn tio̍h tāng-siong ê to, ji̍p tī ba̍t-pâng--ê. 15 Góa pī-pān hō͘ lâng kiaⁿ ê to, kong-kek in it-chhè ê siâⁿ-mn̂g; hō͘ in ê sim siau-iûⁿ, ke-thiⁿ in poa̍h-tó ê sū; hāiⁿ ah, chit ki to chhòng kàu chhin-chhiūⁿ sih-nà, bôa kàu chin-lāi, beh thâi-sí lâng. 16 Lí tio̍h ha̍p-óa, ǹg chiàⁿ-pêng; pâi-tīn, ǹg tò-pêng; chhut-chāi lí ê bīn ǹg toh-lo̍h, chiū ǹg hia. 17 Góa ia̍h beh tah-chhiú, ia̍h beh hō͘ Góa ê tōa siū-khì soah; che sī Góa Iâ-hô-hoa kóng--ê. 18 Iâ-hô-hoa ê ōe koh lîm-kàu góa kóng, 19 Jîn-chú ah, lí tio̍h ūi-tio̍h pún-sin siat nn̄g tiâu lō͘, thang hō͘ Pa-pí-lûn ông ê to-kiàm tùi hia lâi; chí nn̄g tiâu lō͘ tio̍h tùi chi̍t só͘-chāi pun-chhut; koh tio̍h ūi chi̍t ki chhiú, ūi tī thàu-kàu siâⁿ ê lō͘-thâu. 20 Lí tio̍h siat chi̍t tiâu lō͘, hō͘ to lâi kàu A-bûn lâng ê La̍h-pa, iā thang kàu Iû-tāi kian-kò͘ ê siâⁿ Iâ-lō͘-sat-léng. 21 In-ūi Pa-pí-lûn ông khiā tī siang-chhe lō͘ hia, tī nn̄g tiâu lō͘-thâu beh chiam-pok, i ê iô chìⁿ; mn̄g ngó͘-siōng, giām seng-lé ê koaⁿ. 22 Tī i ê chiàⁿ-chhiú, ū chiam-pok khì Iâ-lō͘-sat-léng ê chìⁿ; siat iûⁿ-thâu-thûi, khui-chhùi hoah thâi, tōa-siaⁿ âu-kiò, siat iûⁿ-thâu-thûi, kong-kek siâⁿ-mn̂g, khí thô͘-tui, chō-tâi. 23 Hiah ê bat tùi in chiù-chōa ê lâng khòaⁿ i chòe ké ê chiam-pok; chóng-sī i beh hō͘ lâng kì-tit in ê pháiⁿ, tì-kàu in chèng-lâng siū-lia̍h. 24 Só͘-í Chú Iâ-hô-hoa án-ni kóng, In-ūi lín ê kè-sit lō͘-hiān, hō͘ lín ê chōe-kòa tú-tio̍h kì-tit, tì-kàu lín ê chōe-ok tī lín ê kiâⁿ-chòe lóng hián-chhut; koh in-ūi lín siū kì-tit, beh hō͘ lâng ê chhiú só͘ lia̍h. 25 Lí chit ê siū tāng-siong kiâⁿ-pháiⁿ ê Í-sek-lia̍t ông ah, lí ê chōe-ok koàn-móa, lí ê ji̍t-chí kàu lah. 26 Chú Iâ-hô-hoa án-ni kóng, Tio̍h tû-khì ông-bō, liù bián-liû, bô koh ū chit hō kéng-hóng; taⁿ beh hō͘ kē--ê seng koâiⁿ, koâiⁿ-ê kàng-kē. 27 Góa beh chhia-tó, chhia-tó, chhia-tó--i; bô koh ū chit-ê, thèng-hāu eng-kai tit-tio̍h--ê kàu, Góa chiū hō͘--i. 28 Jîn-chú ah, lí tio̍h soan-thoân kóng, Chú Iâ-hô-hoa lūn-kàu A-bûn lâng, kap in ê bú-bān, ū án-ni kóng; lí tio̍h kóng, Ū to, ū pu̍ih-chhut ê to, í-keng lù-kng, beh thâi-sí lâng; hō͘ i chhin-chhiūⁿ sih-nà beh thun-bia̍t lâng. 29 Lâng ūi-tio̍h lí khòaⁿ hu-ké ê īⁿ-siōng, kiâⁿ pe̍h-chha̍t ê chiam-pok; chiong lí hē tī siū tāng-siong pháiⁿ-lâng ê ām-kún; in ê chōe-ok koàn-móa, in ê ji̍t-chí kàu lah. 30 Hō͘ to ji̍p siù, Góa beh tī lí siū-chō ê ūi, seng-tióng ê tōe, sím-phòaⁿ lí. 31 Góa beh chiong Góa ê thòng-hūn piàⁿ tī lí ê sin-chiūⁿ, chiong Góa tōa siū-khì ê hé pûn tī lí; kau lí tī chân-jím gâu thâi-lâng--ê ê chhiú. 32 Lí beh chòe hiâⁿ-hé ê chhâ, lí ê huih beh lâu tī chit ê tōe-hng, lí bô koh tit-tio̍h kì-liām; in-ūi che sī Góa Iâ-hô-hoa kóng--ê.
1 耶和華ê話koh臨到我講， 2 人子ah，你beh審問，審問hō͘人流血ê城mah？tio̍h hō͘伊知伊一切可惡ê事。 3 你tio̍h講，主耶和華án-ni講，chitê城，有流人ê血tī hit內面，hō͘伊ê日子到；koh妝偶像phah lâ-sâm家己，陷害家己。 4 因為你hō͘人流血，就有罪；你妝偶像是phah lâ-sâm家己；就你hō͘你ê日近，你已經到你ê年；所以我hō͘你受列國ê凌辱，列邦ê恥笑。 5 你chitê臭名chōe-chōe擾亂ê城ah！hiahê離開你近，離開你遠ê，lóng beh恥笑你。 6 看ah，以色列ê首領，ta̍k-ê逞伊氣力，tī你中間流人ê血。 7 Tī你中間有侮慢父母；tī你中間有壓制出外人；tī你中間有虧負孤兒寡婦ê。 8 你看輕我ê聖物，犯tio̍h我ê安歇日。 9 Tī lín中間有譭謗人，beh hō͘人流血ê；tī lín中間有tī山頂食祭物，tī lín中間有行淫亂。 10 Tī lín中間有露現老父ê下體；tī lín中間有凌辱月經無清氣ê婦人人ê。 11 有人kap厝邊ê bó͘行可惡ê事；也有人淫伊ê新婦來phah lâ-sâm伊；tī lín中間亦有人凌辱伊ê姊妹，就是伊ê老父ê cha-bó͘-kiáⁿ。 12 Tī lín中間有受pò͘賂，來流人ê血，你亦有the̍h利錢，討利息；你因為貪心，勒索厝邊，得tio̍h財利；竟然bōe記得我；這是主耶和華講ê。 13 看ah，我因為你所得不義ê錢，kap你中間所流ê血，我就phah手。 14 到我辦你ê日，你ê心iáu ōe忍受mah？你ê手iáu ōe有力mah？我耶和華講chitê話，就beh照án-ni行。 15 我beh分散你tī列國，四散你tī列邦；我beh除你中間ê污穢。 16 你beh tī列國人ê面前，因為家己所行ê，受褻瀆；你就知我是耶和華。 17 耶和華ê話臨到我講， 18 人子ah，以色列家在我看是渣滓；in lóng是火爐中ê銅，錫，鐵，鉛；是銀ê渣滓。 19 所以主耶和華án-ni講，因為lín lóng成做渣滓；看ah，我beh聚集lín tī耶路撒冷ê中間。 20 人怎樣將銀，銅，鐵，鉛，錫，聚集tī火爐中；牽火hō͘伊熔；án-ni我亦beh用我ê受氣，kap大受氣，聚集lín，hē lín tī-hia，來熔化lín。 21 我beh聚集lín，用我大受氣ê火pûn lín，lín就tī hit中間熔化。 22 銀怎樣熔tī火爐中，lín亦beh án-ni熔tī hit中間；lín就知我耶和華piàⁿ出我ê大受氣tī lín ê頂面。 23 耶和華ê話臨到我講， 24 人子ah，你tio̍h對chitê地講，你是bē得tio̍h清氣ê地，tī大受氣ê日，亦無落雨tī你hia。 25 伊中間ê先知lóng結黨，親像hm̄-hm̄哮ê獅，抓tio̍h所搶ê物，in吞食人ê神魂，搶人ê貨財寶物；hō͘ in ê中間ê守寡人koh khah-chōe。 26 伊ê祭司解斜我ê律法，褻瀆我ê聖所，無分別聖ê kap粗俗ê，亦無hō͘人分別無清氣ê，kap清氣ê；koh掩目睭m̄看我chiahê安歇日，我亦tī in中間受褻瀆。 27 伊ê貴族親像豺狼，抓tio̍h所搶ê物，刣人流血，傷害人ê性命，ài得tio̍h不義ê錢。 28 伊ê先知親像用灰水kā in筅白，看虛假ê異象，用白賊kā in占卜，講，主耶和華án-ni講，其實耶和華無影講。 29 國內ê百姓一味行壓制慣練搶人；虧負sòng-hiong困苦ê，無情理欺壓出外人。 30 我tī in中間chhē看有一人thang來圍牆，tī我ê面前為tio̍h chitê國khiā tī破隙ê所在，hō͘我無剿滅伊；總是chhē無一个。 31 所以我用我ê痛恨piàⁿ tī in ê頂面，用我大受氣ê火滅in；照in所行ê，報應tī in ê頭殼頂；這是主耶和華講ê。
1 Iâ-hô-hoa ê ōe koh lîm-kàu góa kóng, 2 Jîn-chú ah, lí beh sím-mn̄g, sím-mn̄g hō͘ lâng lâu huih ê siâⁿ mah? tio̍h hō͘ i chai i it-chhè khó-ò͘ⁿ ê sū. 3 Lí tio̍h kóng, Chú Iâ-hô-hoa án-ni kóng, Chit ê siâⁿ, ū lâu lâng ê huih tī hit lāi-bīn, hō͘ i ê ji̍t-chí kàu; koh chng ngó͘-siōng phah lâ-sâm ka-kī, hām-hāi ka-kī. 4 In-ūi lí hō͘ lâng lâu huih, chiū ū chōe; lí chng ngó͘-siōng sī phah lâ-sâm ka-kī; chiū lí hō͘ lí ê ji̍t kūn, lí í-keng kàu lí ê nî; só͘-í Góa hō͘ lí siū lia̍t-kok ê lêng-jio̍k, lia̍t-pang ê thí-chhiò. 5 Lí chit-ê chhàu-miâ chōe-chōe jiáu-loān ê siâⁿ ah! hiah-ê lī-khui lí kūn, lī-khui lí hn̄g--ê, lóng beh thí-chhiò lí. 6 Khòaⁿ ah, Í-sek-lia̍t ê siú-léng, ta̍k-ê théng i khùi-la̍t, tī lí tiong-kan lâu lâng ê huih. 7 Tī lí tiong-kan ū bú-bān pē-bú; tī lí tiong-kan ū ap-chè chhut-gōa lâng; tī lí tiong-kan ū khui-hū ko͘-jî kóaⁿ-hū--ê. 8 Lí khòaⁿ-khin Góa ê sèng-mi̍h, hoān-tio̍h Góa ê an-hioh-ji̍t. 9 Tī lín tiong-kan ū húi-pòng lâng, beh hō͘ lâng lâu huih--ê; tī lín tiong-kan ū tī soaⁿ-téng chia̍h chè-mi̍h, tī lín tiong-kan ū kiâⁿ îm-loān. 10 Tī lín tiong-kan ū lō͘-hiān lāu-pē ê ē-thé; tī lín tiong-kan ū lêng-jio̍k ge̍h-keng bô chheng-khì ê hū-jîn-lâng--ê. 11 Ū lâng kap chhù-piⁿ ê bó͘ kiâⁿ khó-ò͘ⁿ ê sū; iā ū lâng îm i ê sim-pū lâi phah lâ-sâm--i; tī lín tiong-kan ia̍h ū lâng lêng-jio̍k i ê chí-bē, chiū-sī i ê lāu-pē ê cha-bó͘-kiáⁿ. 12 Tī lín tiong-kan ū siū pò͘-lō͘, lâi lâu lâng ê huih, lí ia̍h ū the̍h lāi-chîⁿ, thó lī-sek; lí in-ūi tham-sim, le̍k-sek chhù-piⁿ, tit-tio̍h châi-lī; kéng-jiân bōe-kì-tit Góa; che sī Chú Iâ-hô-hoa kóng--ê. 13 Khòaⁿ ah, Góa in-ūi lí só͘ tit put-gī ê chîⁿ, kap lí tiong-kan só͘ lâu ê huih, Góa chiū phah-chhiú. 14 Kàu Góa pān lí ê ji̍t, lí ê sim iáu ōe jím-siū mah? lí ê chhiú iáu ōe ū la̍t mah? Góa Iâ-hô-hoa kóng chit ê ōe, chiū beh chiàu án-ni kiâⁿ. 15 Góa beh hun-sòaⁿ lí tī lia̍t-kok, sì-sòaⁿ lí tī lia̍t-pang; Góa beh tû lí tiong-kan ê ù-òe. 16 Lí beh tī lia̍t-kok lâng ê bīn-chêng, in-ūi ka-kī só͘ kiâⁿ--ê, siū siat-to̍k; lí chiū chai Góa sī Iâ-hô-hoa. 17 Iâ-hô-hoa ê ōe lîm-kàu góa kóng, 18 Jîn-chú ah, Í-sek-lia̍t-ke chāi Góa khòaⁿ sī che-tái; in lóng sī hé-lô͘-tiong ê tâng, siah, thih, iân; sī gûn ê che-tái. 19 Só͘-í Chú Iâ-hô-hoa án-ni kóng, In-ūi lín lóng chiâⁿ-chòe che-tái; khòaⁿ ah, Góa beh chū-chi̍p lín tī Iâ-lō͘-sat-léng ê tiong-kan. 20 Lâng cháiⁿ-iūⁿ chiong gûn, tâng, thih, iân, siah, chū-chi̍p tī hé-lô͘-tiong; khan-hé hō͘ i iûⁿ; án-ni Góa ia̍h beh ēng Góa ê siū-khì, kap tōa siū-khì, chū-chi̍p lín, hē lín tī-hia, lâi iûⁿ-hòa lín. 21 Góa beh chū-chi̍p lín, ēng Góa tōa siū-khì ê hé pûn lín, lín chiū tī hit tiong-kan iûⁿ-hòa. 22 Gûn cháiⁿ-iūⁿ iûⁿ tī hé-lô͘-tiong, lín ia̍h beh án-ni iûⁿ tī hit tiong-kan; lín chiū chai Góa Iâ-hô-hoa piàⁿ-chhut Góa ê tōa siū-khì tī lín ê téng-bīn. 23 Iâ-hô-hoa ê ōe lîm-kàu góa kóng, 24 Jîn-chú ah, lí tio̍h tùi chit ê tōe kóng, Lí sī bē tit-tio̍h chheng-khì ê tōe, tī tōa siū-khì ê ji̍t, ia̍h bô lo̍h-hō͘ tī lí hia. 25 I tiong-kan ê sian-ti lóng kiat-tóng, chhin-chhiūⁿ hm̄-hm̄-háu ê sai, jiàu-tio̍h só͘ chhiúⁿ ê mi̍h, in thun-chia̍h lâng ê sîn-hûn, chhiúⁿ lâng ê hè-châi pó-mi̍h; hō͘ in ê tiong-kan ê chiú-kóaⁿ-lâng koh khah-chōe. 26 I ê chè-si kóe-chhoa̍h Góa ê lu̍t-hoat, siat-to̍k Góa ê sèng-só͘, bô hun-piat sèng-ê kap chho͘-sio̍k-ê, ia̍h bô hō͘ lâng hun-piat bô chheng-khì--ê, kap chheng-khì--ê; koh ng ba̍k-chiu m̄ khòaⁿ Góa chiah ê an-hioh-ji̍t, Góa ia̍h tī in tiong-kan siū siat-to̍k. 27 I ê kùi-cho̍k chhin-chhiūⁿ chhâi-lông, jiàu-tio̍h só͘ chhiúⁿ ê mi̍h, thâi lâng lâu huih, siong-hāi lâng ê sìⁿ-miā, ài tit-tio̍h put-gī ê chîⁿ. 28 I ê sian-ti chhin-chhiūⁿ ēng he-chúi kā in chhéng-pe̍h, khòaⁿ hu-ké ê īⁿ-siōng, ēng pe̍h-chha̍t kā in chiam-pok, kóng, Chú Iâ-hô-hoa án-ni kóng, kî-si̍t Iâ-hô-hoa bô-iáⁿ kóng. 29 Kok-lāi ê peh-sìⁿ it-bī kiâⁿ ap-chè koàn-liān chhiúⁿ lâng; khui-hū sòng-hiong khùn-khó͘--ê, bô chêng-lí khi-ap chhut-gōa lâng. 30 Góa tī in tiong-kan chhē-khòaⁿ ū chi̍t-lâng thang lâi ûi-chhiûⁿ, tī Góa ê bīn-chêng ūi-tio̍h chit ê kok khiā tī phòa-khiah ê só͘-chāi, hō͘ góa bô châu-bia̍t i; chóng-sī chhē bô chi̍t-ê. 31 Só͘-í Góa ēng Góa ê thòng-hūn piàⁿ tī in ê téng-bīn, ēng Góa tōa siū-khì ê hé bia̍t--in; chiàu in só͘ kiâⁿ--ê, pò-èng tī in ê thâu-khak-téng; che sī Chú Iâ-hô-hoa kóng--ê.
1 耶和華ê話koh臨到我講， 2 人子ah，有兩個婦人人，是siâng一个老母生ê。 3 In tī埃及行淫，就是tī少年ê時行淫；tī-hia in ê奶hō͘人teh，koh tī-hia人ni̍h伊在室女ê奶頭。 4 In ê名，大姊名A-hô-la̍h，小妹名A-hô-lī-pa；in lóng嫁hō͘我，生kiáⁿ cha-bó͘-kiáⁿ；論到in ê名，A-hô-la̍h就是撒馬利亞，A-hô-lī-pa就是耶路撒冷。 5 A-hô-la̍h嫁hō͘我了後，就行淫亂，戀愛伊 相好ê人，就是伊ê隔壁國亞述人。 6 In穿藍色ê衫，做省長，做官員，lóng是可愛ê少年人，騎馬ê勇士。 7 伊就kap in行淫，就是kap伊所中意ê亞述人；見若伊所戀愛ê，就用in一切ê偶像來phah lâ-sâm家己。 8 伊亦無放sak伊tī埃及慣練行ê淫亂；因為伊iáu少年ê時，就有人kap伊相kap睏；ni̍h伊在室女ê奶，koh流出伊淫亂ê事tī-hia。 9 因為án-ni，我將伊交tī伊相好ê人ê手，就是伊所戀愛ê亞述人ê手。 10 In就露現伊ê下體，用刀刣伊，掠伊ê kiáⁿ cha-bó͘-kiáⁿ，hō͘伊tī婦人人中留臭名；因為in對伊行審判。 11 伊ê小妹A-hô-lī-pa看見án-ni，就比伊koh khah放縱淫慾；行淫亂，比伊ê大姊khah傷重。 12 伊戀愛隔壁國ê亞述人，就是穿極súi ê衣服，做省長，做官員；騎馬ê勇士，lóng是可愛ê少年人。 13 我看見伊受phah lâ-sâm，姊妹á兩個行siâng路。 14 伊亦加添伊ê淫行，因為伊看見人ê像位tī壁裡，就是用朱紅色所畫Ka-le̍k-tí人ê像。 15 腰hâ帶，頭殼包彩色ê巾垂落來；看了親像軍長，照巴比倫人ê形象；in ê本所在就是Ka-le̍k-tí。 16 伊一下看見，就戀愛in；差使者去Ka-le̍k-tí hia，見in。 17 巴比倫人就來，kap伊上愛情ê眠床，行淫，phah lâ-sâm伊。伊受phah lâ-sâm以後，心就kap in冷淡。 18 Án-ni，伊露現伊ê淫行，koh露現伊ê下體，我ê心就kap伊冷淡，親像前kap伊ê大姊冷淡一樣。 19 伊iáu-kú koh-khah淫行，記得伊少年tī埃及地，行淫亂ê日； 20 戀愛伊相好ê人，身體勇，精足，親像驢，親像馬。 21 Án-ni你就記得你少年ê時ê淫行；hit時埃及人teh你ê奶，憶tio̍h你少年ê奶。 22 A-hô-lī-pa ah，主耶和華所以án-ni講，看ah，我beh激動你chiahê相好ê，來攻擊你，就是你ê心所冷淡ê，我beh hō͘伊四圍來攻擊你。 23 就是巴比倫人，Ka-le̍k-tí眾人，kap Pí-kat，Su-a，Ko-a，chiahê族。亞述ê眾人kap in來，省長，官員，軍長，有名聲ê，騎馬ê，lóng是可愛ê少年人。 24 In beh帶軍器、戰車、運糧ê車，chhōa大隊ê眾人來攻擊你；in giâ大牌小牌、頭盔、排陣tī你ê四圍攻擊你；我beh將審判ê事交帶in，in beh用in ê律法審判你。 25 我beh用我ê妒忌攻擊你；in beh用大受氣辦你；in beh割你ê鼻kap耳á；你所chhun ê人，beh倒tī刀下；in beh掠你ê kiáⁿ cha-bó͘-kiáⁿ；koh你所留ê beh hō͘火燒lio去。 26 In beh剝你ê衣服，搶你súi ê寶物。 27 Án-ni，我beh hō͘你ê淫行，kap你tī埃及地慣練行ê淫亂lóng soah；hō͘你無koh kia̍h目看in，亦無koh記念埃及。 28 因為主耶和華án-ni講，看ah，我beh將你交tī你所怨恨ê人ê手，就是你ê心kap in冷淡ê人ê手。 29 In beh怨恨來辨你，搶the̍h你一切勞碌來得tio̍h-ê；chhun你一个赤身露體；你淫亂ê下體，連你ê淫行，kap你ê淫亂，lóng beh露現。 30 你會tú-tio̍h hiahê tāi-chì，因為你tè外邦人來行淫；koh因為你tùi in chiahê偶像來bak lâ-sâm。 31 你有行你ê大姊ê路，所以我beh將伊ê杯交tī你ê手。 32 主耶和華án-ni講，你beh lim你ê大姊所lim ê杯；hitê杯深koh闊，tóe真chōe；你就beh hō͘人恥笑譏刺。 33 你beh大酒醉，大憂苦；lim lín大姊撒馬利亞ê杯；就是hō͘人gông-ngia̍h悽慘ê杯。 34 你beh lim chitê杯，lim到乾乾；koh kā破杯ê帕，拆裂家己ê奶；因為chitê事我bat講伊；這是主耶和華講ê。 35 所以主耶和華án-ni講，因為你bōe記得我，將我hiat tī你ê ka-chiah後，taⁿ你tio̍h擔當你ê淫亂kap你放縱私慾ê罪。 36 耶和華koh對我講，人子ah，你beh審問A-hô-la̍h kap A-hô-lī-pa mah？tio̍h指出in所行可惡ê事。 37 In行淫，亦有血tī伊ê手，koh kap偶像行淫，亦hō͘ in tùi我所生ê kiáⁿ經過火，hō͘ in吞食。 38 Chitê以外in iáu有對我án-ni行，就是siâng日phah lâ-sâm我ê聖所，干犯我chiahê安歇日。 39 In 刣 kiáⁿ獻hō͘偶像，當hit日koh入我ê聖所，來phah lâ-sâm伊；看ah，in tī我ê厝內án-ni行。 40 Koh lín差使者去請遠遠ê人；使者到in hia ê時，看ah，in就來；你為tio̍h in洗身軀，畫目眉，用首飾家己裝飾； 41 坐tī súi ê眠床，床前chhāi一塊桌，將我ê香料，我ê香油排tī hit頂面。 42 Kap伊tī-hia-ê，有kui陣ê人，安逸歡喜ê聲，亦有粗俗人kap酒漢，tùi曠野相kap來，將手環掛tī in兩個ê手，將súi帽戴tī in ê頭殼。 43 我論到chitê老ê淫婦，有講，現在人iáu beh kap伊行淫，伊亦beh kap人行淫。 44 人入去就近伊，親像就近娼妓；án-ni in就近兩個淫婦，A-hô-la̍h kap A-hô-lī-pa。 45 Beh有義人照審判淫婦ê例，kap流人ê血ê婦人人ê例，來審判in；因為in是淫婦，亦有血tī伊ê手。 46 主耶和華án-ni講，我beh chhōa chōe-chōe人來攻擊in，hō͘ in受hiat來hiat去，tú-tio̍h搶奪。 47 Hiah-ê人beh用石頭tìm死in，用刀劍刣死in；koh 刣死in ê kiáⁿ cha-bó͘-kiáⁿ，用火燒in ê厝宅。 48 Án-ni，我beh hō͘境內無koh有淫行，thang hō͘一切ê婦人人受警戒，無學lín ê淫行。 49 人beh照lín ê淫行報應lín；lín也beh擔當chiahê拜偶像ê罪；lín就會知我是耶和華。
1 Iâ-hô-hoa ê ōe koh lîm-kàu góa kóng, 2 Jîn-chú ah, ū nn̄g ê hū-jîn-lâng, sī siâng chi̍t ê lāu-bú siⁿ--ê. 3 In tī Ai-ki̍p kiâⁿ-îm, chiū-sī tī siàu-liân ê sî kiâⁿ-îm; tī-hia in ê ni hō͘ lâng teh, koh tī-hia lâng ni̍h i chāi-sek-lú ê ni-thâu. 4 In ê miâ, tōa-chí miâ A-hô-la̍h, sió-bē miâ A-hô-lī-pa; in lóng kè hō͘ Góa, siⁿ kiáⁿ cha-bó͘-kiáⁿ; lūn-kàu in ê miâ, A-hô-la̍h chiū-sī Sat-má-lī-a, A-hô-lī-pa chiū-sī Iâ-lō͘-sat-léng. 5 A-hô-la̍h kè hō͘ Góa liáu-āu, chiū kiâⁿ îm-loān, loân-ài i siong-hó ê lâng, chiū-sī i ê keh-piah kok A-su̍t lâng. 6 In chhēng lâm-sek ê saⁿ, chòe séng-tiúⁿ, chòe koaⁿ-oân, lóng sī khó-ài ê siàu-liân lâng, khiâ-bé ê ióng-sū. 7 I chiū kap in kiâⁿ-îm, chiū-sī kap i só͘ tèng-ì ê A-su̍t lâng; kìⁿ-nā i só͘ loân-ài--ê, chiū ēng in it-chhè ê ngó͘-siōng lâi phah lâ-sâm ka-kī. 8 I ia̍h bô pàng-sak i tī Ai-ki̍p koàn-liān kiâⁿ ê îm-loān; in-ūi i iáu siàu-liân ê sî, chiū ū lâng kap i saⁿ-kap khùn; ni̍h i chāi-sek-lú ê ni, koh lâu-chhut i îm-loān ê sū tī-hia. 9 In-ūi án-ni, Góa chiong i kau tī i siong-hó ê lâng ê chhiú, chiū-sī i só͘ loân-ài ê A-su̍t lâng ê chhiú. 10 In chiū lō͘-hiān i ê ē-thé, ēng to thâi--i, lia̍h i ê kiáⁿ cha-bó͘-kiáⁿ, hō͘ i tī hū-jîn-lâng tiong lâu chhàu miâ; in-ūi in tùi i kiâⁿ sím-phòaⁿ. 11 I ê sió-bē A-hô-lī-pa khòaⁿ-kìⁿ án-ni, chiū pí i koh khah hòng-chhiòng îm-io̍k; kiâⁿ îm-loān, pí i ê tōa-chí khah siong-tiōng. 12 I loân-ài keh-piah kok ê A-su̍t lâng, chiū-sī chhēng ke̍k-súi ê i-ho̍k, chòe séng-tiúⁿ, chòe koaⁿ-oân; khiâ-bé ê ióng-sū, lóng sī khó-ài ê siàu-liân lâng. 13 Góa khòaⁿ-kìⁿ i siū phah lâ-sâm, chí-bē-á nn̄g-ê kiâⁿ siâng-lō͘. 14 I ia̍h ke-thiⁿ i ê îm-hēng, in-ūi i khòaⁿ-kìⁿ lâng ê siōng ūi tī piah--nih, chiū-sī ēng chu-âng-sek só͘ ūi Ka-le̍k-tí lâng ê siōng. 15 Io hâ tòa, thâu-khak pau chhái-sek ê kun sûi-lo̍h--lâi; khòaⁿ-liáu chhin-chhiūⁿ kun-tiúⁿ, chiàu Pa-pí-lûn lâng ê hêng-siōng; in ê pún só͘-chāi chiū-sī Ka-le̍k-tí. 16 I chi̍t-ē khòaⁿ-kìⁿ, chiū loân-ài in; chhe sù-chiá khì Ka-le̍k-tí hia, kìⁿ in. 17 Pa-pí-lûn lâng chiū lâi, kap i chiūⁿ ài-chêng ê bîn-chhn̂g, kiâⁿ îm, phah lâ-sâm i. I siū phah lâ-sâm í-āu, sim chiū kap in léng-tām. 18 Án-ni, i lō͘-hiān i ê îm-hēng, koh lō͘-hiān i ê ē-thé, Góa ê sim chiū kap i léng-tām, chhin-chhiūⁿ chêng kap i ê tōa-chí léng-tām chi̍t-iūⁿ. 19 I iáu-kú koh-khah îm-hēng, kì-tit i siàu-liân tī Ai-ki̍p tōe, kiâⁿ îm-loān ê ji̍t; 20 loân-ài i siong-hó ê lâng, sin-thé ióng, cheng chiok, chhin-chhiūⁿ lû, chhin-chhiūⁿ bé. 21 Án-ni lí chiū kì-tit lí siàu-liân ê sî ê îm-hēng; hit-sî Ai-ki̍p lâng teh lí ê ni, it-tio̍h lí siàu-liân ê ni. 22 A-hô-lī-pa ah, Chú Iâ-hô-hoa só͘-í án-ni kóng, Khòaⁿ ah, Góa beh kek-tōng lí chiah ê siong-hó-ê, lâi kong-kek lí, chiū-sī lí ê sim só͘ léng-tām--ê, Góa beh hō͘ i sì-ûi lâi kong-kek lí. 23 Chiū-sī Pa-pí-lûn lâng, Ka-le̍k-tí chèng lâng, kap Pí-kat, Su-a, Ko-a, chiah ê cho̍k. A-su̍t ê chèng-lâng kap in lâi, séng-tiúⁿ, koaⁿ-oân, kun-tiúⁿ, ū miâ-siaⁿ--ê, khiâ-bé ê, lóng sī khó-ài ê siàu-liân lâng. 24 In beh tòa kun-khì, chiàn-chhia, ūn-niû ê chhia, chhōa tōa-tūi ê chèng-lâng lâi kong-kek lí; in giâ tōa-pâi sió-pâi, thâu-khoe, pâi-tīn tī lí ê sì-ûi kong-kek lí; Góa beh chiong sím-phòaⁿ ê sū kau-tài in, in beh ēng in ê lu̍t-hoat sím-phòaⁿ lí. 25 Góa beh ēng Góa ê tò͘-khī kong-kek lí; in beh ēng tōa siū-khì pān lí; in beh koah lí ê phīⁿ kap hī-á; lí só͘ chhun ê lâng, beh tó tī to-ē; in beh lia̍h lí ê kiáⁿ cha-bó͘-kiáⁿ; koh lí só͘-lâu--ê beh hō͘ hé sio-lio--khì. 26 In beh pak lí ê i-ho̍k, chhiúⁿ lí súi ê pó-mi̍h. 27 Án-ni, Góa beh hō͘ lí ê îm-hēng, kap lí tī Ai-ki̍p tōe koàn-liān kiâⁿ ê îm-loān lóng soah; hō͘ lí bô koh kia̍h-ba̍k khòaⁿ--in, ia̍h bô koh kì-liām Ai-ki̍p. 28 In-ūi Chú Iâ-hô-hoa án-ni kóng, Khòaⁿ ah, Góa beh chiong lí kau tī lí só͘ oàn-hūn ê lâng ê chhiú, chiū-sī lí ê sim kap in léng-tām ê lâng ê chhiú. 29 In beh oàn-hūn lâi pān--lí, chhiúⁿ-the̍h lí it-chhè lô-lo̍k lâi tit-tio̍h--ê; chhun lí chi̍t-ê chhiah-sin lō͘-thé; lí îm-loān ê ē-thé, liân lí ê îm-hēng, kap lí ê îm-loān, lóng beh lō͘-hiān. 30 Lí ōe tú-tio̍h hiah ê tāi-chì, in-ūi lí tè gōa-pang lâng lâi kiâⁿ-îm; koh in-ūi lí tùi in chiah ê ngó͘-siōng lâi bak lâ-sâm. 31 Lí ū kiâⁿ lí ê tōa-chí ê lō͘, só͘-í Góa beh chiong i ê poe kau tī lí ê chhiú. 32 Chú Iâ-hô-hoa án-ni kóng, Lí beh lim lí ê tōa-chí só͘ lim ê poe; hit ê poe chhim koh khoah, tóe chin-chōe; lí chiū beh hō͘ lâng thí-chhiò ki-chhì. 33 Lí beh tōa chiú-chùi, tōa iu-khó͘; lim lín tōa-chí Sat-má-lī-a ê poe; chiū-sī hō͘ lâng gông-ngia̍h chhiⁿ-chhám ê poe. 34 Lí beh lim chit ê poe, lim kàu ta-ta; koh kā phòa-poe ê phè, thiah-li̍h ka-kī ê ni; in-ūi chit ê sū Góa bat kóng--i; che sī Chú Iâ-hô-hoa kóng--ê. 35 Só͘-í Chú Iâ-hô-hoa án-ni kóng, In-ūi lí bōe-kì-tit Góa, chiong Góa hiat tī lí ê ka-chiah-āu, taⁿ lí tio̍h tam-tng lí ê îm-loān kap lí hòng-chhiòng su-io̍k ê chōe. 36 Iâ-hô-hoa koh tùi góa kóng, Jîn-chú ah, lí beh sím-mn̄g A-hô-la̍h kap A-hô-lī-pa mah? tio̍h chí-chhut in só͘ kiâⁿ khó-ò͘ⁿ ê sū. 37 In kiâⁿ-îm, ia̍h ū huih tī i ê chhiú, koh kap ngó͘-siōng kiâⁿ-îm, ia̍h hō͘ in tùi Góa só͘ siⁿ ê kiáⁿ keng-kè hé, hō͘ in thun-chia̍h. 38 Chit ê í-gōa in iáu ū tùi Góa án-ni kiâⁿ, chiū-sī siâng-ji̍t phah lâ-sâm Góa ê sèng-só͘, kan-hoān Góa chiah ê an-hioh-ji̍t. 39 In thâi kiáⁿ hiàn hō͘ ngó͘-siōng, tng hit-ji̍t koh ji̍p Góa ê sèng-só͘, lâi phah lâ-sâm--i; khòaⁿ ah, in tī Góa ê chhù-lāi án-ni kiâⁿ. 40 Koh lín chhe sù-chiá khì chhiáⁿ hn̄g-hn̄g ê lâng; sù-chiá kàu in hia ê sî, khòaⁿ ah, in chiū lâi; lí ūi-tio̍h in sóe sin-khu, ūi ba̍k-bâi, ēng chhiú-sek ka-kī chng-thāⁿ; 41 chē tī súi ê bîn-chhn̂g, chhn̂g-chêng chhāi chi̍t tè toh, chiong Góa ê hiuⁿ-liāu, Góa ê hiuⁿ-iû pâi tī hit téng-bīn. 42 Kap i tī-hia--ê, ū kui-tīn ê lâng, an-ia̍t hoaⁿ-hí ê siaⁿ, ia̍h ū chho͘-sio̍k lâng kap chiú-hàn, tùi khòng-iá saⁿ-kap lâi, chiong chhiú-khoân kòa tī in nn̄g-ê ê chhiú, chiong súi bō tì tī in ê thâu-khak. 43 Góa lūn-kàu chit ê lāu ê îm-hū, ū kóng, Hiān-chāi lâng iáu beh kap i kiâⁿ îm, i ia̍h beh kap lâng kiâⁿ-îm. 44 Lâng ji̍p-khì chiū-kūn i, chhin-chhiūⁿ chiū-kūn chhiong-ki; án-ni in chiū-kūn nn̄g ê îm-hū, A-hô-la̍h kap A-hô-lī-pa. 45 Beh ū gī-lâng chiàu sím-phòaⁿ îm-hū ê lē, kap lâu lâng ê huih ê hū-jîn-lâng ê lē, lâi sím-phòaⁿ in; in-ūi in sī îm-hū, ia̍h ū huih tī i ê chhiú. 46 Chú Iâ-hô-hoa án-ni kóng, Góa beh chhōa chōe-chōe lâng lâi kong-kek in, hō͘ in siū hiat-lâi hiat-khì, tú-tio̍h chhiúⁿ-toa̍t. 47 Hiah ê lâng beh ēng chio̍h-thâu tìm-sí in, ēng to-kiàm thâi-sí in; koh thâi-sí in ê kiáⁿ cha-bó͘-kiáⁿ, ēng hé sio in ê chhù-the̍h. 48 Án-ni, Góa beh hō͘ kéng-lāi bô koh ū îm-hēng, thang hō͘ it-chhè ê hū-jîn-lâng siū kéng-kài, bô o̍h lín ê îm-hēng. 49 Lâng beh chiàu lín ê îm-hēng pò-èng lín; lín iā beh tam-tng chiah-ê pài ngó͘-siōng ê chōe; lín chiū ōe chai Góa sī Iâ-hô-hoa.
1 第九年十月初十日，耶和華ê話koh臨到我，講， 2 人子ah，今á日tú-tú是巴比倫王就近耶路撒冷ê日，你tio̍h將今á日記伊ê名。 3 Tio̍h對chitê悖逆ê家設譬喻，講，主耶和華án-ni講，將鼎chhāi tī火裡；已經chhāi好，就piàⁿ水tī內面， 4 將肉塊，就是一切肥súi ê肉塊，前腿後腿，lóng拾hē tī內面；揀好ê骨疊hō͘伊滿。 5 取羊群中第一好ê，將柴疊tī鼎下，hō͘鼎滾chhiāng-chhiāng[chhiâng-chhiâng]，thang將骨kûn tī hit內面。 6 主耶和華án-ni講，有災厄ah，chitê hō͘人流血ê城，就是生sian ê鼎，伊ê sian iáu未除去，tio̍h將肉塊tùi hit中間一塊一塊the̍h出來；無kā伊拈鬮。 7 城中有受刣 ê人ê血，piàⁿ tī光光ê石磐頂，無piàⁿ tī地裡，thang用土蓋。 8 Chitê城內所流ê血，piàⁿ tī光光ê石磐頂，無thang遮蓋，是我hō͘伊án-ni；為tio̍h beh激大受氣，行報應。 9 所以主耶和華án-ni講，有災厄ah，chitê hō͘人流血ê城，我亦beh疊大堆ê火柴。 10 添柴hō͘火真燄，將肉kûn爛，將湯熬khó，hō͘骨hu-lu去。 11 將鼎，piàⁿ空，chhāi tī teh to̍h ê炭頂，hō͘鼎pek熱，hō͘銅燒紅，熔其中ê污穢，除hit頂面ê sian。 12 伊tio̍h磨厭倦，總是所生大大ê sian，猶原無lak；伊ê sian就爁tī火裡，亦bōe除去。 13 Tī你ê污穢中有淫行，我bat清氣你，你iáu-kú無清氣；所以你ê污穢bōe koh得tio̍h清氣，到我對你發出ê大受氣soah。 14 我耶和華bat講伊；hitê事的確成，我也beh行伊，的確無反覆，的確無憐憫，亦無退悔；人beh照你ê舉動，照你ê行做審判你；這是主耶和華講ê。 15 耶和華ê話koh臨到我講， 16 人子ah，看ah，我beh將你ê目睭所意愛ê忽然取去；總是你m̄-thang悲哀啼哭，亦m̄-thang流目屎。 17 獨獨thang暗靜吐氣，m̄-thang出聲，m̄-thang辨理喪事，頭殼猶原tio̍h包頭巾，腳猶原tio̍h穿鞋，m̄-thang掩你ê嘴唇，也m̄-thang食弔喪ê餅。 18 Tùi án-ni，我將chitê事早起時kā百姓講；ê-hng我ê bó͘就死；隔早起，我就thàn命令來行。 19 百姓問我講，你án-ni做，kap阮有甚麼干涉？你thái-thó無kā阮講？ 20 我應in講，耶和華ê話臨到我講， 21 你tio̍h kā以色列家講，主耶和華án-ni講，看ah，我beh phah lâ-sâm我ê聖所，就是lín ê勢力所誇口，lín ê目睭所意愛，lín ê心所疼惜ê；koh lín所留tī-hia ê kiáⁿ cha-bó͘-kiáⁿ beh倒tī刀下。 22 Hit時，lín beh照我所行ê來行，無掩lín ê嘴唇，亦無食弔喪ê餅。 23 Lín ê頭殼猶原包頭巾，腳beh穿鞋，無悲哀，無啼哭；lín beh tī lín ê罪惡中消滅，相對面吐氣。 24 以西結beh án-ni做lín ê兆頭，凡若伊所行ê，lín亦beh án-ni行，chitê tāi-chì若到，lín就知我是耶和華。 25 人子ah，當我除去in所óa靠ê，kap in所歡喜ê榮光，in ê目睭所意愛ê，in ê心所疼惜ê，就是in ê kiáⁿ兒， 26 Hit日得tio̍h脫離ê人kiám無來你chia，hō͘你親耳聽見chitê事mah？ 27 當hit日，你ê嘴就開，你就kap得tio̍h脫離ê人講話，無koh啞口；你beh án-ni做in ê兆頭；in就知我是耶和華。
1 Tē káu-nî cha̍p-ge̍h chhoe-cha̍p ji̍t, Iâ-hô-hoa ê ōe koh lîm-kàu góa, kóng, 2 Jîn-chú ah, kin-á-ji̍t tú-tú sī Pa-pí-lûn ông chiū-kūn Iâ-lō͘-sat-léng ê ji̍t, lí tio̍h chiong kin-á-ji̍t kì i ê miâ. 3 Tio̍h tùi chit ê pōe-ge̍k ê ke siat phì-jū, kóng, Chú Iâ-hô-hoa án-ni kóng, Chiong tiáⁿ chhāi tī hé--nih; í-keng chhāi hó, chiū piàⁿ chúi tī lāi-bīn, 4 chiong bah-tè, chiū-sī it-chhè pûi-súi ê bah-tè, chêng-thúi āu-thúi, lóng khioh hē tī lāi-bīn; kéng hó ê kut thia̍p hō͘ i móa. 5 Chhú iûⁿ-kûn-tiong tē-it hó--ê, chiong chhâ thia̍p tī tiáⁿ-ē, hō͘ tiáⁿ kún chhiāng-chhiāng[chhiâng-chhiâng], thang chiong kut kûn tī hí lāi-bīn. 6 Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, chiū-sī siⁿ sian ê tiáⁿ, i ê sian iáu-bē tû--khì, tio̍h chiong bah-tè tùi hit tiong-kan chi̍t-tè chi̍t-tè the̍h-chhut-lâi; bô kā i liam-khau. 7 Siâⁿ-tiong ū siū-thâi ê lâng ê huih, piàⁿ tī kng-kng ê chio̍h-pôaⁿ-téng, bô piàⁿ tī tōe--nih, thang ēng thô͘ khàm. 8 Chit ê siâⁿ-lāi só͘ lâu ê huih, piàⁿ tī kng-kng ê chio̍h-pôaⁿ-téng, bô thang jia-khàm, sī Góa hō͘ i án-ni; ūi-tio̍h beh kek tōa siū-khì, kiâⁿ pò-èng. 9 Só͘-í Chú Iâ-hô-hoa án-ni kóng, Ū chai-ē ah, chit ê hō͘ lâng lâu-huih ê siâⁿ, Góa ia̍h beh thia̍p tōa-tui ê hé-chhâ. 10 Thiⁿ-chhâ hō͘ hé chin iām, chiong bah kûn nōa, chiong thng ngâu khó, hō͘ kut hu-lu--khì. 11 Chiong tiáⁿ, piàⁿ khang, chhāi tī teh to̍h ê thòaⁿ-téng, hō͘ tiáⁿ pek-jia̍t, hō͘ tâng sio âng, iûⁿ kî-tiong ê ù-òe, tû hit téng-bīn ê sian. 12 I tio̍h-bôa ià-siān, chóng-sī só͘ siⁿ tōa-tōa ê sian, iû-goân bô lak; i ê sian chiū nā tī hé--nih, ia̍h bōe tû-khì. 13 Tī lí ê ù-òe tiong ū îm-hēng, Góa bat chheng-khì lí, lí iáu-kú bô chheng-khì; só͘-í lí ê ù-òe bōe koh tit-tio̍h chheng-khì, kàu Góa tùi lí hoat-chhut ê tōa siū-khì soah. 14 Góa Iâ-hô-hoa bat kóng--i; hit ê sū tek-khak chiâⁿ, Góa iā beh kiâⁿ--i, tek-khak bô hoán-hok, tek-khak bô lîn-bín, ia̍h bô thè-hóe; lâng beh chiàu lí ê kú-tōng, chiàu lí ê kiâⁿ-chòe sím-phòaⁿ lí; che sī Chú Iâ-hô-hoa kóng--ê. 15 Iâ-hô-hoa ê ōe koh lîm-kàu góa kóng, 16 Jîn-chú ah, khòaⁿ ah, Góa beh chiong lí ê ba̍k-chiu só͘ ì-ài--ê hut-jiân chhú--khì; chóng-sī lí m̄-thang pi-ai thî-khàu, ia̍h m̄-thang lâu ba̍k-sái. 17 To̍k-to̍k thang àm-chīⁿ thó͘-khùi, m̄-thang chhut-siaⁿ, m̄-thang pān-lí song-sū, thâu-khak iû-goân tio̍h pau thâu-kun, kha iû-goân tio̍h chhēng-ôe, m̄-thang ng lí ê chhùi-tûn, iā m̄-thang chia̍h tiàu-song ê piáⁿ. 18 Tùi án-ni, góa chiong chit ê sū chá-khí-sî kā peh-sìⁿ kóng; ê-hng góa ê bó͘ chiū sí; keh chá-khí, góa chiū thàn bēng-lēng lâi kiâⁿ. 19 Peh-sìⁿ mn̄g góa kóng, Lí án-ni chòe, kap goán ū sím-mi̍h kan-sia̍p? lí thái-thó bô kā goán kóng? 20 Góa ìn in kóng, Iâ-hô-hoa ê ōe lîm-kàu góa kóng, 21 Lí tio̍h kā Í-sek-lia̍t-ke kóng, Chú Iâ-hô-hoa án-ni kóng, Khòaⁿ ah, Góa beh phah lâ-sâm Góa ê sèng-só͘, chiū-sī lín ê sè-le̍k só͘ khoa-kháu, lín ê ba̍k-chiu só͘ ì-ài, lín ê sim só͘ thiàⁿ-sioh--ê; koh lín só͘ lâu tī-hia ê kiáⁿ cha-bó͘-kiáⁿ beh tó tī to-ē. 22 Hit-sî, lín beh chiàu góa só͘ kiâⁿ--ê lâi kiâⁿ, bô ng lín ê chhùi-tûn, ia̍h bô chia̍h tiàu-song ê piáⁿ. 23 Lín ê thâu-khak iû-goân pau thâu-kun, kha beh chhēng ôe, bô pi-ai, bô thî-khàu; lín beh tī lín ê chōe-ok tiong siau-bia̍t, saⁿ tùi-bīn thó͘-khùi. 24 Í-se-kiat beh án-ni chòe lín ê tiāu-thâu, hoān-nā i só͘ kiâⁿ--ê, lín ia̍h beh án-ni kiâⁿ, chit ê tāi-chì nā kàu, lín chiū chai Góa sī Iâ-hô-hoa. 25 Jîn-chú ah, tng Góa tû-khì in só͘ óa-khò ê, kap in só͘ hoaⁿ-hí ê êng-kng, in ê ba̍k-chiu só͘ ì-ài--ê, in ê sim só͘ thiàⁿ-sioh--ê, chiū-sī in ê kiáⁿ-jî, 26 hit-ji̍t tit-tio̍h thoat-lī ê lâng kiám bô lâi lí chia, hō͘ lí chhin-hī thiaⁿ-kìⁿ chit ê sū mah? 27 Tng hit-ji̍t, lí ê chhùi chiū khui, lí chiū kap tit-tio̍h thoat-lī ê lâng kóng-ōe, bô koh é-káu; lí beh án-ni chòe in ê tiāu-thâu; in chiū chai Góa sī Iâ-hô-hoa.
1 耶和華ê話臨到我講， 2 人子ah，你tio̍h面ǹg A-bûn族，宣傳攻擊in，講，Lín tio̍h聽主耶和華ê話； 3 主耶和華án-ni講，我ê聖所受phah lâ-sâm，以色列地tú-tio̍h拋荒，偤大家hō͘人掠；hit時你因為chiahê事，用話攻擊in講，呼哉！ 4 看ah，所以我beh將你交hō͘東方ê人做業；in beh tī你ê所在紮營khiā起，食你ê果子，lim你ê leng。 5 我beh hō͘ La̍h-pa做駱駝ê寮，hō͘ A-bûn族ê地做羊群倒ê所在；lín就知我是耶和華。 6 主耶和華án-ni講，因為你搭手頓腳，滿心藐視，ǹg以色列地歡喜； 7 看ah，所以我伸我ê手攻擊你，將你交hō͘列國搶去；我beh tùi列邦中剪除你，hō͘你tī萬國中敗無；我beh除滅你；你就知我是耶和華。 8 主耶和華án-ni講，因為Mô͘-ap kap Se-jíⁿ有teh講，看ah，偤大家kap眾國無各樣； 9 看ah，因為án-ni，我beh開 Mô͘-ap ê邊界tùi chiahê城，tùi伊邊界chiahê城，做伊本國ê榮光ê，就是Pek-iâ-se-boa̍t，Pa-le̍k-bián，Ki-lia̍t-têng， 10 Hō͘伊kap A-bûn族lóng交tī東方ê百姓做業，hō͘ A-bûn族無koh受記念tī列邦中。 11 我也beh審判Mô͘-ap；in就知我是耶和華。 12 主耶和華án-ni講，因為Í-tong ê所行，就是攻擊偤大家來報仇，tùi in ê報仇來犯重罪； 13 所以主耶和華án-ni講，我beh伸我ê手攻擊Í-tong，剪除in hia ê人kap cheng-siⁿ；hō͘伊拋荒tùi Thê-bān；到Tí-tàn人lóng死tī刀下。 14 Koh我beh用我ê百姓以色列ê手，來報我ê仇讎tī Í-tong；in beh照我ê受氣，照我ê大受氣，來行tī Í-tong；就in beh知我ê報仇；這是主耶和華講ê。 15 主耶和華án-ni講，因為腓利士人行報仇，存心藐視來報仇，結死怨 beh剿滅in； 16 所以主耶和華án-ni講，看ah，我beh伸我ê手攻擊腓利士人；我beh剪除Ki-thê人，滅無沿海所chhun ê百姓。 17 我beh用大受氣ê責罰，tùi in行大ê報仇；我tùi in報仇ê時，in就知我是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h bīn ǹg A-bûn cho̍k, soan-thoân kong-kek in, kóng, Lín tio̍h thiaⁿ Chú Iâ-hô-hoa ê ōe; 3 Chú Iâ-hô-hoa án-ni kóng, Góa ê sèng-só͘ siū phah lâ-sâm, Í-sek-lia̍t tōe tú-tio̍h pha-hng, Iû-tāi-ke hō͘ lâng lia̍h; hit-sî lí in-ūi chiah ê sū, ēng ōe kong-kek in kóng, Hō͘--chāi! 4 Khòaⁿ ah, só͘-í Góa beh chiong lí kau hō͘ tang-hng ê lâng chòe-gia̍p; in beh tī lí ê só͘-chāi chat-iâⁿ khiā-khí, chia̍h lí ê ké-chí, lim lí ê leng. 5 Góa beh hō͘ La̍h-pa chòe lo̍k-tô ê tiâu, hō͘ A-bûn cho̍k ê tōe chòe iûⁿ-kûn tó ê só͘-chāi; lín chiū chai Góa sī Iâ-hô-hoa. 6 Chú Iâ-hô-hoa án-ni kóng, In-ūi lí tah-chhiú tǹg-kha, móa-sim biáu-sī, ǹg Í-sek-lia̍t tōe hoaⁿ-hí; 7 khòaⁿ ah, só͘-í Góa chhun Góa ê chhiú kong-kek lí, chiong lí kau hō͘ lia̍t-kok chhiúⁿ--khì; Góa beh tùi lia̍t-pang-tiong chián-tû lí, hō͘ lí tī bān-kok-tiong pāi-bô; Góa beh tû-bia̍t lí; lí chiū chai Góa sī Iâ-hô-hoa. 8 Chú Iâ-hô-hoa án-ni kóng, In-ūi Mô͘-ap kap Se-jíⁿ ū teh kóng, Khòaⁿ ah, Iû-tāi-ke kap chèng-kok bô koh-iūⁿ; 9 khòaⁿ ah, in-ūi án-ni, Góa beh khui Mô͘-ap ê pian-kài tùi chiah ê siâⁿ, tùi i pian-kài chiah ê siâⁿ, chòe i pún-kok ê êng-kng--ê, chiū-sī Pek-iâ-se-boa̍t, Pa-le̍k-bián, Ki-lia̍t-têng, 10 hō͘ i kap A-bûn cho̍k lóng kau tī tang-hng ê peh-sìⁿ chòe-gia̍p, hō͘ A-bûn cho̍k bô koh siū kì-liām tī lia̍t-pang-tiong. 11 Góa iā beh sím-phòaⁿ Mô͘-ap; in chiū chai Góa sī Iâ-hô-hoa. 12 Chú Iâ-hô-hoa án-ni kóng, In-ūi Í-tong ê só͘-kiâⁿ, chiū-sī kong-kek Iû-tāi-ke lâi pò-siû, tùi in ê pò-siû lâi hoān tāng-chōe; 13 só͘-í Chú Iâ-hô-hoa án-ni kóng, Góa beh chhun Góa ê chhiú kong-kek Í-tong, chián-tû in hia ê lâng kap cheng-siⁿ; hō͘ i pha-hng tùi Thê-bān; kàu Tí-tàn lâng lóng sí tī to-ē. 14 Koh Góa beh ēng Góa ê peh-sìⁿ Í-sek-lia̍t ê chhiú, lâi pò Góa ê kiû-siû tī Í-tong; in beh chiàu Góa ê siū-khì, chiàu Góa ê tōa siū-khì, lâi kiâⁿ tī Í-tong; chiū in beh chai Góa ê pò-siû; che sī Chú Iâ-hô-hoa kóng--ê. 15 Chú Iâ-hô-hoa án-ni kóng, In-ūi Hui-lī-sū lâng kiâⁿ pò-siû, chûn-sim biáu-sī lâi pò-siû, kiat sí-oàn beh châu-bia̍t--in; 16 só͘-í Chú Iâ-hô-hoa án-ni kóng, Khòaⁿ ah, Góa beh chhun Góa ê chhiú kong-kek Hui-lī-sū lâng; Góa beh chián-tû Ki-thê lâng, bia̍t-bô iân-hái só͘ chhun ê peh-sìⁿ. 17 Góa beh ēng tōa siū-khì ê chek-hoa̍t, tùi in kiâⁿ tōa ê pò-siû; Góa tùi in pò-siû ê sî, in chiū chai Góa sī Iâ-hô-hoa.
1 第十一年，月ê初一，耶和華ê話臨到我講， 2 人子ah，因為Chhui-lô ǹg耶路撒冷講，呼哉！hitê做列邦ê門ê，已經破，taⁿ歸向我；伊已經拋荒，我beh豐盛。 3 所以主耶和華án-ni講，Chhui-lô ah，看ah，我kap你做對敵，我亦beh hō͘ chōe-chōe國起來攻擊你，親像海hō͘伊ê湧giâ起來一樣。 4 In beh毀壞Chhui-lô ê城牆，拆伊ê守更樓；我亦beh khau伊ê土粉，hō͘伊成做光kō-kō ê石磐。 5 伊beh tī海中做曝網ê所在，亦beh成做列國所搶ê物；因為我有講伊；這是主耶和華講ê。 6 屬tī Chhui-lô hiahê城ê百姓，beh hō͘刀劍刣死；in就知我是耶和華。 7 因為主耶和華án-ni講，看ah，我beh hō͘列王ê王，就是巴比倫王Nî-pò͘-kah-nî-sat，tùi北方chhōa馬、車、馬兵、軍隊，kap chōe-chōe百姓，來攻擊Chhui-lô。 8 伊beh用刀劍刣死屬tī你hiahê城ê百姓，亦beh紮營攻擊你，起土堆攻擊你，kōaⁿ籐攻擊你。 9 伊beh 安設摃城ê鎚，攻破你ê城牆，用斧頭拆毀你ê守更樓。 10 因為伊ê馬真chōe，土粉遮蓋你；伊入你ê城門，親像人入有破隙ê城，hit時因為騎馬ê，kap運糧車，戰車ê聲，你ê城beh振動。 11 伊ê馬蹄beh thún踏你一切ê街路；伊beh用刀刣死你ê百姓，你堅固ê柱beh倒tī土腳。 12 伊beh搶你ê財寶，kap你ê貨物，毀你ê城牆，拆你súi ê厝，koh將你chiahê石，chiahê柴，chiahê土，lóng hiat tī水中。 13 我beh hō͘你唱歌ê聲lóng soah，你彈琴ê聲無koh聽見。 14 我beh hō͘你成做光kō-kō ê石磐，做曝網ê所在；你無koh受起造，因為我耶和華講伊。這是主耶和華講ê。 15 主耶和華對Chhui-lô án-ni講，Tī你中間有大大刣人ê事，受傷ê人哀哀chhan ê時，因為你倒壞ê聲，海嶼kiám無lóng振動mah？ 16 Hit時海邊hiahê君王，beh對伊ê王位落來，除去伊ê禮服，thǹg去súi衫，穿ngia̍uh-ngia̍uh-chhoah，坐tī土腳，時時刻刻teh tiō，為tio̍h你gông-ngia̍h。 17 In beh為你做哀歌，對你講，你chitê有名聲ê城，平素是行船ê人所khiā起，tī海面做堅固ê；平日伊kap khiā起ê百姓，hō͘一切tiàm tī-hia ê人無m̄驚惶，taⁿ怎樣滅無ah！ 18 Taⁿ tī你chitê倒壞ê日，眾海嶼beh ngia̍uh-ngia̍uh-chhoah；海中chiahê海嶼看見你無去，就lóng驚惶。 19 因為主耶和華án-ni講，我hō͘你做拋荒ê城，親像hō͘ hiahê無人khiā起ê城；koh hō͘深淵pôaⁿ過你，大水蓋密你。 20 Hit時我hō͘你kap hiahê落陰府ê相kap落去，到古早人hia；hō͘你tiàm tī地下深ê所在，tùi古早拋荒ê所在，kap hiahê落陰府ê人tī-teh，無koh有人khiā起tī-hia，tī活人ê地無koh有榮光。 21 我beh hō͘你做thang驚ê，無koh留tī世間；雖然人chhē你，亦永永chhē-bōe-tio̍h；這是主耶和華講ê。
1 Tē cha̍p-it nî, ge̍h ê chhoe-it, Iâ-hô-hoa ê ōe lîm-kàu góa kóng, 2 Jîn-chú ah, in-ūi Chhui-lô ǹg Iâ-lō͘-sat-léng kóng, Hō͘--chāi! hit-ê chòe lia̍t-pang ê mn̂g--ê, í-keng phòa, taⁿ kui-ǹg góa; i í-keng pha-hng, góa beh hong-sēng. 3 Só͘-í Chú Iâ-hô-hoa án-ni kóng, Chhui-lô ah, khòaⁿ ah, Góa kap lí chòe tùi-te̍k, Góa ia̍h beh hō͘ chōe-chōe kok khí-lâi kong-kek lí, chhin-chhiūⁿ hái hō͘ i ê éng giâ--khí-lâi chi̍t-iūⁿ. 4 In beh húi-hoāi Chhui-lô ê siâⁿ-chhiûⁿ, thiah i ê chiú-kiⁿ-lâu; Góa ia̍h beh khau i ê thô͘-hún, hō͘ i chiâⁿ-chòe kng-kō-kō ê chio̍h-pôaⁿ. 5 I beh tī hái-tiong chòe pha̍k-bāng ê só͘-chāi, ia̍h beh chiâⁿ-chòe lia̍t-kok só͘ chhiúⁿ ê mi̍h; in-ūi Góa ū kóng--i; che sī Chú Iâ-hô-hoa kóng--ê. 6 Sio̍k tī Chhui-lô hiah ê siâⁿ ê peh-sìⁿ, beh hō͘ to-kiàm thâi-sí; in chiū chai Góa sī Iâ-hô-hoa. 7 In-ūi Chú Iâ-hô-hoa án-ni kóng, Khòaⁿ ah, Góa beh hō͘ lia̍t-ông ê ông, chiū-sī Pa-pí-lûn ông Nî-pò͘-kah-nî-sat, tùi pak-hng chhōa bé, chhia, bé-peng, kun-tūi, kap chōe-chōe peh-sìⁿ, lâi kong-kek Chhui-lô. 8 I beh ēng to-kiàm thâi-sí sio̍k tī lí hiah ê siâⁿ ê peh-sìⁿ, ia̍h beh chat-iâⁿ kong-kek lí, khí thô͘-tui kong-kek lí, kōaⁿ-tîn kong-kek lí. 9 I beh an-siat kòng-siâⁿ ê thûi, kong-phòa lí ê siâⁿ-chhiûⁿ, ēng pó͘-thâu thiah-húi lí ê chiú-kiⁿ-lâu. 10 In-ūi i ê bé chin-chōe, thô͘-hún jia-khàm lí; i ji̍p lí ê siâⁿ-mn̂g, chhin-chhiūⁿ lâng ji̍p ū phòa-khiah ê siâⁿ, hit-sî in-ūi khiâ-bé--ê, kap ūn-niû-chhia, chiàn-chhia ê siaⁿ, lí ê siâⁿ beh tín-tāng. 11 I ê bé-tôe beh thún-ta̍h lí it-chhè ê ke-lō͘; i beh ēng to thâi-sí lí ê peh-sìⁿ, lí kian-kò͘ ê thiāu beh tó tī thô͘-kha. 12 I beh chhiúⁿ lí ê châi-pó, kap lí ê hè-mi̍h, húi lí ê siâⁿ-chhiûⁿ, thiah lí súi ê chhù, koh chiong lí chiah ê chio̍h, chiah ê chhâ, chiah ê thô͘, lóng hiat tī chúi-tiong. 13 Góa beh hō͘ lí chhiùⁿ-koa ê siaⁿ lóng soah, lí tôaⁿ-khîm ê siaⁿ bô koh thiaⁿ-kìⁿ. 14 Góa beh hō͘ lí chiaⁿ-chòe kng-kō-kō ê chio̍h-pôaⁿ, chòe pha̍k-bāng ê só͘-chāi; lí bô koh siū khí-chō, in-ūi Góa Iâ-hô-hoa kóng--i. Che sī Chú Iâ-hô-hoa kóng--ê. 15 Chú Iâ-hô-hoa tùi Chhui-lô án-ni kóng, Tī lí tiong-kan ū tōa-tōa thâi-lâng ê sū, siū-siong ê lâng ai-ai-chhan ê sî, in-ūi lí tó-hoāi ê siaⁿ, hái-sū kiám bô lóng tín-tāng mah? 16 Hit-sî hái-piⁿ hiah ê kun-ông, beh tùi i ê ông-ūi lo̍h--lâi, tû-khì i ê lé-ho̍k, thǹg--khì súi saⁿ, chhēng ngia̍uh-ngia̍uh-chhoah, chē tī thô͘-kha, sî-sî khek-khek teh tiō, ūi-tio̍h lí gông-ngia̍h. 17 In beh ūi lí chòe ai-ko, tùi lí kóng, Lí chit ê ū miâ-siaⁿ ê siâⁿ, pêng-sò͘ sī kiâⁿ-chûn ê lâng só͘ khiā-khí, tī hái-bīn chòe kian-kò͘--ê; pêng-ji̍t i kap khiā-khí ê peh-sìⁿ, hō͘ it-chhè tiàm tī-hia ê lâng bô m̄ kiaⁿ-hiâⁿ, taⁿ cháiⁿ-iūⁿ bia̍t-bô ah! 18 Taⁿ tī lí chit ê tó-hoāi ê ji̍t, chèng hái-sū beh ngia̍uh-ngia̍uh-chhoah; hái-tiong chiah ê hái-sū khòaⁿ-kìⁿ lí bô--khì, chiū lóng kiaⁿ-hiâⁿ. 19 In-ūi Chú Iâ-hô-hoa án-ni kóng, Góa hō͘ lí chòe pha-hng ê siâⁿ, chhin-chhiūⁿ hō͘ hiah ê bô lâng khiā-khí ê siâⁿ; koh hō͘ chhim-ian pôaⁿ-kè lí, tōa-chúi khàm-ba̍t lí. 20 Hit-sî Góa hō͘ lí kap hiah ê lo̍h im-hú--ê saⁿ-kap lo̍h--khì, kàu kó͘-chá lâng hia; hō͘ lí tiàm tī tōe-ē chhim ê só͘-chāi, tùi kó͘-chá pha-hng ê só͘-chāi, kap hiah ê lo̍h im-hú ê lâng tī-teh, bô koh ū lâng khiā-khí tī-hia, tī oa̍h-lâng ê tōe bô koh ū êng-kng. 21 Góa beh hō͘ lí chòe thang kiaⁿ--ê, bô koh lâu tī sè-kan; sui-jiân lâng chhē lí, ia̍h éng-éng chhē-bōe-tio̍h; che sī Chú Iâ-hô-hoa kóng--ê.
1 耶和華ê話koh臨到我講， 2 人子ah，tio̍h為 Chhui-lô做哀歌， 3 Kā Chhui-lô講，你khiā起海口，kap列國眾海嶼買賣做seng-lí；主耶和華án-ni講： Chhui-lô ah，你bat講，我是完全súi-ê。 4 你ê境界tī海中；起造你ê，hō͘你ê súi完全。 5 In用Sī-nî-jíⁿ ê松樹做你一切ê枋，用黎巴嫩ê柏香樹做你ê船桅。 6 用Pa-san ê橡樹做你ê槳，用Ki-thê海嶼ê黃楊柴，入象牙做你坐ê枋。 7 用埃及繡花ê幼苧布做你ê帆，做你ê旗；用以利沙海嶼藍色紫色ê 布，做你ê涼棚。 8 Se-tùn kap A-hoat khiā起ê百姓，做你ê划槳ê；你中間gâu ê人做你ê hōaⁿ舵ê。 9 Ka-pa-le̍k老練ê kap gâu ê人，lóng tī lín中間做補船孔ê；一切過海ê船隻，kap in ê水手，lóng tī你中間經營seng-lí ê事。 10 波斯、路得、Hut ê人，tī你軍營中做戰士；in tī你ê中間掛藤牌kap頭盔，顯明你ê súi。 11 A-hoat人kap你ê軍隊，lóng tī你四圍ê牆頂；你ê守更樓亦有勇士，in掛in ê藤牌tī你四圍ê牆壁，成全你ê súi。 12 Tha-si人因為ta̍k樣ê財物充足，就做你ê客商；帶銀、鐵、錫、鉛，來換你ê貨物。 13 Ngá-oân人、Thó͘-pa人、Bí-siat人，lóng kap你kau-koan；in用人口kap銅器，來換你ê貨物。 14 To-ka-má族用馬，kap戰馬，kap騾，來換你ê貨物。 15 Tí-tàn人kap你kau-koan；chōe-chōe海嶼做你ê 下盤seng-lí；in帶象牙、烏木柴，kap你交換。 16 A-lân人因為你ê製造充足，就做你ê客商；in用綠寶石、紫色ê 布、繡花ê物、幼苧布、珊瑚、紅寶石，來換你ê貨物。 17 偤大kap以色列地ê人，lóng kap你kau-koan；in用Bí-le̍k ê麥、餅、蜜、油、乳香，來換你ê貨物。 18 大馬色人因為你ê製造充足，koh因為ta̍k樣ê財物充足；就帶Hek-pún ê酒，kap白羊毛，kap你kau-koan。 19 Ui-tàn人kap Ngá-oân人，帶線kap光ê鐵、肉桂、菖蒲，tī你ê街市，換你ê貨物。 20 Tí-tàn人用súi ê馬鞍敷kap你kau-koan。 21 阿拉伯人kap Ki-ta̍t一切ê領袖，lóng做你ê下盤seng-lí；用羊羔、公ê綿羊、山羊，kap你kau-koan。 22 Sī-pa kap La̍h-má ê seng-lí人kap你kau-koan；in用ta̍k類siōng好ê香料，ta̍k類ê寶石kap黃金來換你ê貨物。 23 哈蘭、Kan-nî、I-tiân人、Sī-pa ê seng-lí人，亞述人，Ki-boat人kap你kau-koan。 24 Chiahê seng-lí人用真好ê貨物，藍色繡花ê布，裝kui包；koh有súi ê衣服，裝tī柏香柴ê箱á內，用索縛伊，kap你kau-koan。 25 Tha-si ê船隻tàu kui-pang，kā你載貨；你就tī海中富有，極其榮光。 26 你ê划槳ê，已經划你到大水ê所在；東風tī海中kā你摃破。 27 你ê錢財，你ê物件，你ê貨品，你ê水手，你ê hōaⁿ舵ê，你ê塞船孔ê，你ê經營seng-lí-ê，以及你中間ê戰士，kap你中間ê眾人，tī你敗壞ê日，lóng beh沉tī海中。 28 你hōaⁿ舵ê喉叫ê聲一下hoah，郊野lóng beh振動。 29 見若划槳ê，kap水手，kap一切過海hōaⁿ舵ê，lóng beh離開船上岸。 30 In beh為你開聲大哭，sám土粉tī頭殼，kō tī火灰中。 31 Koh為tio̍h你來剃光頭，用麻布縖腰，痛心啼哭，極其悲哀。 32 In哀傷ê時，為tio̍h你做哀歌，啼哭你；講，有甚麼城親像Chhui-lô，親像伊tī海中成做靜悽悽ê ah？ 33 你ê貨物tùi海面上山，就hō͘ chōe-chōe百姓充足；你用chōe-chōe錢財貨物，hō͘地上ê君王好額。 34 你tī深水中hō͘海湧挵破ê時，你ê貨物，kap你中間一切ê眾人，就lóng沉落去。 35 海嶼khiā起ê百姓，為tio̍h你gông-ngia̍h；in ê君王lóng真驚，面帶憂容。 36 列國ê seng-lí人，lóng beh出譏刺ê聲；你hō͘人thang驚，你無thang koh tī-teh直到永遠。
1 Iâ-hô-hoa ê ōe koh lîm-kàu góa kóng, 2 Jîn-chú ah, tio̍h ūi Chhui-lô chòe ai-ko, 3 kā Chhui-lô kóng, Lí khiā-khí hái-kháu, kap lia̍t-kok chèng hái-sū bóe-bōe chòe seng-lí; Chú Iâ-hô-hoa án-ni kóng: Chhui-lô ah, lí bat kóng, Góa sī oân-choân súi--ê. 4 Lí ê kéng-kài tī hái-tiong; khí-chō lí ê, hō͘ lí ê súi oân-choân. 5 In ēng Sī-nî-jíⁿ ê chhêng-chhiū chòe lí it-chhè ê pang, ēng Lī-pa-lùn ê pek-hiuⁿ-chhiū chòe lí ê chûn-ûi. 6 Ēng Pa-san ê siōng-chhiū chòe lí ê chiúⁿ, ēng Ki-thê hái-sū ê n̂g-iông-chhâ, ji̍p chhiūⁿ-gê chòe lí chē ê pang. 7 Ēng Ai-ki̍p siù-hoe ê iù-tōe-pò͘ chòe lí ê phâng, chòe lí ê kî; ēng Í-lī-sa hái-sū lâm-sek chí-sek ê pò͘, chòe lí ê liâng-pîⁿ. 8 Se-tùn kap A-hoat khiā-khí ê peh-sìⁿ, chòe lí ê kò-chiúⁿ--ê; lí tiong-kan gâu ê lâng chòe lí ê hōaⁿ-tōa--ê. 9 Ka-pa-le̍k láu-liān--ê kap gâu ê lâng, lóng tī lín tiong-kan chòe pó͘ chûn-khang--ê; it-chhè kè-hái ê chûn-chiah, kap in ê chúi-siú, lóng tī lí tiong-kan keng-êng seng-lí ê sū. 10 Pho-su, Lō͘-tek, Hut ê lâng, tī lí kun-iâⁿ-tiong chòe chiàn-sū; in tī lí ê tiong-kan kùi tîn-pâi kap thâu-khoe, hián-bêng lí ê súi. 11 A-hoat lâng kap lí ê kun-tūi, lóng tī lí sì-ûi ê chhiûⁿ-téng; lí ê chiú-kiⁿ-lâu ia̍h ū ióng-sū, in kùi in ê tîn-pâi tī lí sì-ûi ê chhiûⁿ-piah, sêng-choân lí ê súi. 12 Tha-si lâng in-ūi ta̍k-iūⁿ ê châi-bu̍t chhiong-chiok, chiū chòe lí ê kheh-siong; tòa gûn, thih, siah, iân, lâi ōaⁿ lí ê hè-mi̍h. 13 Ngá-oân lâng, Thó͘-pa lâng, Bí-siat lâng, lóng kap lí kau-koan; in ēng jîn-kháu kap tâng-khì, lâi ōaⁿ lí ê hè-mi̍h. 14 To-ka-má cho̍k ēng bé, kap chiàn-bé, kap lô, lâi ōaⁿ lí ê hè-mi̍h. 15 Tí-tàn lâng kap lí kau-koan; chōe-chōe hái-sū chòe lí ê ē-pôaⁿ seng-lí; in tòa chhiūⁿ-gê, o͘-ba̍k-chhâ, kap lí kau-ōaⁿ. 16 A-lân lâng in-ūi lí ê chè-chō chhiong-chiok, chiū chòe lí ê kheh-siong; in ēng le̍k-pó-chio̍h, chí-sek ê pò͘, siù-hoe ê mi̍h, iù-tōe-pò͘, sian-hô, âng-pó-chio̍h, lâi ōaⁿ lí ê hè-mi̍h. 17 Iû-tāi kap Í-sek-lia̍t tōe ê lâng, lóng kap lí kau-koan; in ēng Bí-le̍k ê be̍h, piáⁿ, bi̍t, iû, jú-hiuⁿ, lâi ōaⁿ lí ê hè-mi̍h. 18 Tāi-má-sek lâng in-ūi lí ê chè-chō chhiong-chiok, koh in-ūi ta̍k-iūⁿ ê châi-bu̍t chhiong-chiok; chiū tòa Hek-pún ê chiú, kap pe̍h iûⁿ-mn̂g, kap lí kau-koan. 19 Ui-tàn lâng kap Ngá-oân lâng, tòa sòaⁿ kap kng ê thih, jio̍k-kùi, chhiong-pô͘, tī lí ê koe-chhī, ōaⁿ lí ê hè-mi̍h. 20 Tí-tàn lâng ēng súi ê bé-oaⁿ-chū kap lí kau-koan. 21 A-la̍h-pek lâng kap Ki-ta̍t it-chhè ê léng-siù, lóng chòe lí ê ē-pôaⁿ seng-lí; ēng iûⁿ-ko, kang ê mî-iûⁿ, soaⁿ-iûⁿ, kap lí kau-koan. 22 Sī-pa kap La̍h-má ê seng-lí lâng kap lí kau-koan; in ēng ta̍k-lūi siōng-hó ê hiuⁿ-liāu, ta̍k-lūi ê pó-chio̍h kap n̂g-kim lâi ōaⁿ lí ê hè-mi̍h. 23 Hap-lân, Kan-nî, I-tiân lâng, Sī-pa ê seng-lí lâng, A-su̍t lâng, Ki-boat lâng kap lí kau-koan. 24 Chiah ê seng-lí lâng ēng chin-hó ê hè-mi̍h, lâm-sek siù-hoe ê pò͘, chng kui-pau; koh ū súi ê i-ho̍k, chng tī pek-hiuⁿ-chhâ ê siuⁿ-á-lāi, ēng soh pa̍k-i, kap lí kau-koan. 25 Tha-si ê chûn-chiah tàu kui-pang, kā lí chài-hè; lí chiū tī hái-tiong pù-ū, ke̍k-kî êng-kng. 26 Lí ê kò-chiúⁿ--ê, í-keng kò lí kàu tōa-chúi ê só͘-chāi; tang-hong tī hái-tiong kā lí kòng-phòa. 27 Lí ê chîⁿ-châi, lí ê mi̍h-kiāⁿ, lí ê hè-phín, lí ê chúi-siú, lí ê hōaⁿ-tōa--ê, lí ê that chûn-khang--ê, lí ê keng-êng seng-lí--ê, í-ki̍p lí tiong-kan ê chiàn-sū, kap lí tiong-kan ê chèng-lâng, tī lí pāi-hoāi ê ji̍t, lóng beh tîm tī hái-tiong. 28 Lí hōaⁿ-tōa--ê âu-kiò ê siaⁿ chi̍t-ē hoah, kau-iá lóng beh tín-tāng. 29 Kìⁿ-nā kò-chiúⁿ-ê, kap chúi-siú, kap it-chhè kè-hái hōaⁿ-tōa--ê, lóng beh lī-khui chûn chiūⁿ-hōaⁿ. 30 In beh ūi lí khui-siaⁿ tōa-khàu, sám thô͘-hún tī thâu-khak, kō tī hé-hu-tiong. 31 Koh ūi-tio̍h lí lâi thì kng-thâu, ēng môa-pò͘ hâ-io, thòng-sim thî-khàu, ke̍k-kî pi-ai. 32 In ai-siong ê sî, ūi-tio̍h lí chòe ai-ko, thî-khàu lí; kóng, Ū sím-mi̍h siâⁿ chhin-chhiūⁿ Chhui-lô, chhin-chhiūⁿ i tī hái-tiong chiâⁿ-chòe chēng chhiⁿ-chhiⁿ--ê ah? 33 Lí ê hè-mi̍h tùi hái-bīn chiūⁿ-soaⁿ, chiū hō͘ chōe-chōe peh-sìⁿ chhiong-chiok; lí ēng chōe-chōe chîⁿ-châi hè-mi̍h, hō͘ tōe-chiūⁿ ê kun-ông hó-gia̍h. 34 Lí tī chhim-chúi-tiong hō͘ hái-éng lòng-phòa ê sî, lí ê hè-mi̍h, kap lí tiong-kan it-chhè ê chèng-lâng, chiū lóng tîm--lo̍h-khì. 35 Hái-sū khiā-khí ê peh-sìⁿ, ūi-tio̍h lí gông-ngia̍h; in ê kun-ông lóng chin kiaⁿ, bīn tài-iu-iông. 36 Lia̍t-kok ê seng-lí lâng, lóng beh chhut ki-chhì ê siaⁿ; lí hō͘ lâng thang kiaⁿ, lí bô thang koh tī-teh ti̍t-kàu éng-oán.
1 耶和華ê話koh臨到我講， 2 人子ah，你tio̍h對Chhui-lô ê君王講，主耶和華án-ni講：因為你心內驕傲，你亦講，我是一个上帝，我tī海中坐上帝ê位；你雖然存心家己掠做是上帝，其實你是人，m̄是上帝。 3 看ah，你比但以理khah有智慧，無一項祕密ê事對你隱密。 4 你óa靠家己ê智慧聰明，得tio̍h財寶，得tio̍h金銀，收tī你ê庫房。 5 你óa靠家己ê大智慧kap seng-lí，加添你ê好額；亦你ê心為tio̍h你ê好額來驕傲。 6 所以主耶和華án-ni講，因為你存心，家己掠做是上帝， 7 看ah，所以我beh帶外邦人，就是列國中強暴ê人，來你chia；in beh拔刀攻擊你tùi智慧所得tio̍h ê好物；phah lâ-sâm你ê榮光。 8 In beh hō͘你落深坑；你beh死tī海中，親像受刣 ê人ê死一樣。 9 Tī 刣你ê人ê面前，你iáu未講，我是上帝mah？其實你tī 刣死你ê人ê手，不過是人，m̄是上帝。 10 你beh死，tī外國人ê手中，親像bē受割禮ê人ê死一樣，因為我有講伊；這是主耶和華所講ê。 11 耶和華ê話臨到我講， 12 人子ah，你tio̍h kā Chhui-lô王做哀歌，對伊講，主耶和華án-ni講，你無所m̄齊備，智慧充足，完全súi。 13 你bat tī伊甸上帝ê園內，用ta̍k樣ê寶石做你ê裝飾，就是紅寶石、黃玉，kap金剛石，青玉、紅瑪瑙，kap碧玉，藍玉、綠寶石，kap赤玉，kap黃金；koh你鼓kap簫，tī你hia製造，當你受造ê日，就lóng齊備。 14 你是hit ê受抹油遮蓋ê ki-lō͘-peng；我安置你tī上帝ê聖山；你往來tī出火ê石ê中間。 15 你tùi受造ê日所行lóng完全，直到chhē-tio̍h不義tī你ê中間。 16 因為你seng-lí真大，人就用強暴充滿tī你ê中間，致到你犯罪；因為án-ni，我看你親像污穢，就tùi上帝ê山趕逐你；遮蓋ê ki-lō͘-peng ah，我已經將你tùi出火ê石ê中間除滅。 17 你因為súi，心中驕傲；koh因為你ê榮光敗壞你ê智慧；我已經chhia倒你tī地裡，hō͘你倒tī君王ê面前，hō͘ in看見。 18 你因為罪過真chōe，做seng-lí無公道；你phah lâ-sâm你hiahê聖所；所以我hō͘火對你中間出，來燒滅你；hō͘你tī所有看見ê人ê目睭前，變做地上ê火灰。 19 眾百姓ê中間，見若bat你ê人，lóng beh為tio̍h你來gông-ngia̍h；你hō͘人thang驚，永遠無thang koh tī-teh。 20 耶和華ê話臨到我講， 21 人子ah，你ê面tio̍h ǹg Se-tùn，對伊宣傳，講， 22 主耶和華án-ni講，Se-tùn ah，看ah，我kap你做對敵，我的確tī你中間得tio̍h榮光；我tī伊中間行審判，顯明我做聖ê時，in就知我是耶和華。 23 我亦beh hō͘瘟疫kap流血ê事入伊ê街路，tio̍h傷ê倒tī伊ê中間，四圍有刀劍攻擊伊；in就知我是耶和華。 24 四圍平素看輕以色列家ê人，以後無koh ǹg in做鑿人ê刺，hō͘人艱苦ê草刺；in就知我是主耶和華。 25 主耶和華án-ni講，我聚集以色列家，tùi所四散去ê百姓中，對in顯明我做聖，tī列國人ê目睭前；hit時in beh khiā起tī本所在，就是我所賞賜我ê奴僕雅各ê地。 26 In beh安然khiā起tī hí中間；我已經行審判tī四圍看輕in ê人，hit時in beh起厝，栽種葡萄園，安然khiā起；in就知我是耶和華，in ê上帝。
1 Iâ-hô-hoa ê ōe koh lîm-kàu góa kóng, 2 Jîn-chú ah, lí tio̍h tùi Chhui-lô ê kun-ông kóng, Chú Iâ-hô-hoa án-ni kóng: In-ūi lí sim-lāi kiau-ngō͘, lí ia̍h kóng, Góa sī chi̍t ê siōng-tè, góa tī hái-tiong chē Siōng-tè ê ūi; lí sui-jiân chûn-sim ka-kī lia̍h-chòe sī Siōng-tè, kî-si̍t lí sī lâng, m̄-sī Siōng-tè. 3 Khòaⁿ ah, lí pí Tān-í-lí khah ū tì-hūi, bô chi̍t-hāng pì-bi̍t ê sū tùi lí ún-ba̍t. 4 Lí óa-khò ka-kī ê tì-hūi chhang-miâ, tit-tio̍h châi-pó, tit-tio̍h kim-gûn, siu tī lí ê khò͘-pâng. 5 Lí óa-khò ka-kī ê tōa tì-hūi kap seng-lí, ke-thiⁿ lí ê hó-gia̍h; ia̍h lí ê sim ūi-tio̍h lí ê hó-gia̍h lâi kiau-ngō͘. 6 Só͘-í Chú Iâ-hô-hoa án-ni kóng, In-ūi lí chûn-sim, ka-kī lia̍h-chòe sī Siōng-tè, 7 khòaⁿ ah, só͘-í Góa beh tòa gōa-pang lâng, chiū-sī lia̍t-kok-tiong kiông-pō ê lâng, lâi lí chia; in beh pu̍ih-to kong-kek lí tùi tì-hūi só͘ tit-tio̍h ê hó-mi̍h; phah lâ-sâm lí ê êng-kng. 8 In beh hō͘ lí lo̍h chhim-khiⁿ; lí beh sí tī hái-tiong, chhin-chhiūⁿ siū-thâi ê lâng ê sí chi̍t-iūⁿ. 9 Tī thâi lí ê lâng ê bīn-chêng, lí iáu-bē kóng, Góa sī Siōng-tè mah? kî-si̍t lí tī thâi-sí lí ê lâng ê chhiú, put-kò sī lâng, m̄-sī Siōng-tè. 10 Lí beh sí, tī gōa-kok lâng ê chhiú-tiong, chhin-chhiūⁿ bē siū kat-lé ê lâng ê sí chi̍t-iūⁿ, in-ūi Góa ū kóng i; che sī Chú Iâ-hô-hoa só͘ kóng-ê. 11 Iâ-hô-hoa ê ōe lîm-kàu góa kóng, 12 Jîn-chú ah, lí tio̍h kā Chhui-lô ông chòe ai-ko, tùi i kóng, Chú Iâ-hô-hoa án-ni kóng, Lí bô só͘ m̄ chiâu-pī, tì-hūi chhiong-chiok, oân-choân súi. 13 Lí bat tī Ai-tiân Siōng-tè ê hn̂g-lāi, ēng ta̍k-iūⁿ ê pó-chio̍h chòe lí ê chng-thāⁿ, chiū-sī âng-pó-chio̍h, n̂g-ge̍k, kap kim-kong-chio̍h, chhiⁿ-ge̍k, âng-bé-ló, kap phek-ge̍k, lâm-ge̍k, le̍k-pó-chio̍h, kap chhiah-ge̍k, kap n̂g-kim; koh lí kó͘ kap siau, tī lí hia chè-chō, tng lí siū-chō ê ji̍t, chiū lóng chiâu-pī. 14 Lí sī hit ê siū boah-iû jia-khàm ê ki-lō͘-peng; Góa an-tì lí tī Siōng-tè ê sèng-soaⁿ; lí óng-lâi tī chhut-hé ê chio̍h ê tiong-kan. 15 Lí tùi siū-chō ê ji̍t só͘ kiâⁿ lóng oân-choân, ti̍t-kàu chhē-tio̍h put-gī tī lí ê tiong-kan. 16 In-ūi lí seng-lí chin-tōa, lâng chiū ēng kiông-pō chhiong-móa tī lí ê tiong-kan, tì-kàu lí hoān-chōe; in-ūi án-ni, Góa khòaⁿ lí chhin-chhiūⁿ ù-òe, chiū tùi Siōng-tè ê soaⁿ kóaⁿ-tio̍k lí; jia-khàm ê ki-lō͘-peng ah, Góa í-keng chiong lí tùi chhut-hé ê chio̍h ê tiong-kan tû-bia̍t. 17 Lí in-ūi súi, sim-tiong kiau-ngō͘; koh in-ūi lí ê êng-kng pāi-hoāi lí ê tì-hūi; Góa í-keng chhia-tó lí tī tōe--nih, hō͘ lí tó tī kun-ông ê bīn-chêng, hō͘ in khòaⁿ-kìⁿ. 18 Lí in-ūi chōe-kòa chin-chōe, chòe seng-lí bô kong-tō; lí phah lâ-sâm lí hiah ê sèng-só͘; só͘-í Góa hō͘ hé tùi lí tiong-kan chhut, lâi sio-bia̍t lí; hō͘ lí tī só͘ ū khòaⁿ-kìⁿ ê lâng ê ba̍k-chiu-chêng, piàn-chòe tōe-chiūⁿ ê hé-hu. 19 Chèng peh-sìⁿ ê tiong-kan, kìⁿ-nā bat lí ê lâng, lóng beh ūi-tio̍h lí lâi gông-ngia̍h; lí hō͘ lâng thang kiaⁿ, éng-oán bô thang koh tī-teh. 20 Iâ-hô-hoa ê ōe lîm-kàu góa kóng, 21 Jîn-chú ah, lí ê bīn tio̍h ǹg Se-tùn, tùi i soan-thoân, kóng, 22 Chú Iâ-hô-hoa án-ni kóng, Se-tùn ah, khòaⁿ ah, Góa kap lí chòe tùi-te̍k, Góa tek-khak tī lí tiong-kan tit-tio̍h êng-kng; Góa tī i tiong-kan kiâⁿ sím-phòaⁿ, hián-bêng Góa chòe-sèng ê sî, in chiū chai Góa sī Iâ-hô-hoa. 23 Góa ia̍h beh hō͘ un-e̍k kap lâu-huih ê sū ji̍p i ê ke-lō͘, tio̍h-siong--ê tó tī i ê tiong-kan, sì-ûi ū to-kiàm kong-kek i; in chiū chai Góa sī Iâ-hô-hoa. 24 Sì-ûi pêng-sò͘ khòaⁿ-khin Í-sek-lia̍t-ke ê lâng, í-āu bô koh ǹg in chòe chha̍k lâng ê chhì, hō͘ lâng kan-khó͘ ê chháu-chhì; in chiū chai Góa sī Chú Iâ-hô-hoa. 25 Chú Iâ-hô-hoa án-ni kóng, Góa chū-chi̍p Í-sek-lia̍t-ke, tùi só͘ sì-sòaⁿ--khì ê peh-sìⁿ-tiong, tùi in hián-bêng Góa chòe-sèng, tī lia̍t-kok lâng ê ba̍k-chiu-chêng; hit-sî in beh khiā-khí tī pún só͘-chāi, chiū-sī Góa só͘ siúⁿ-sù Góa ê lô͘-po̍k Ngá-kok ê tōe. 26 In beh an-jiân khiā-khí tī hí tiong-kan; Góa í-keng kiâⁿ sím-phòaⁿ tī sì-ûi khòaⁿ-khin in ê lâng, hit-sî in beh khí chhù, chai-chèng phû-tô-hn̂g, an-jiân khiā-khí; in chiū chai Góa sī Iâ-hô-hoa, in ê Siōng-tè.
1 第十年，十月十二，耶和華ê話臨到我講， 2 人子ah，你ê面tio̍h ǹg埃及王法老，宣傳來攻擊伊，以及埃及全地。 3 你tio̍h傳講，主耶和華án-ni講，看ah，埃及王法老ah，我做你ê對敵；你就是大鱷魚，倒tī家己ê江河中；你bat講，我ê河是我ê，我為家己來造ê。 4 我beh用勾勾tiâu你ê牙槽；koh hō͘你江河中ê魚kha̍h-tiâu tī你ê鱗；我beh將你kap所kha̍h-tiâu tī你ê鱗ê魚，tùi江河中拖出來。 5 我beh將你kap你江河中ê魚lóng hiat tī曠野；你beh倒tī田裡，無拾做堆，無收拾；我將你hō͘地上ê野獸，空中ê飛鳥做食物。 6 埃及khiā起ê百姓lóng beh知我就是耶和華，因為in tùi以色列家，bat做蘆葦ê柺á。 7 In用手kia̍h你，你pit-khui，傷tio̍h in ê肩頭，in óa你，你折去，閃tio̍h in ê腰。 8 所以主耶和華án-ni講，看ah，我beh hō͘刀劍臨到你；tùi lín中間剪除人kap cheng-siⁿ。 9 埃及地beh荒廢，冷靜；in就知我是耶和華；因為伊家己講，chitê河是我ê，是我造ê。 10 看ah，我kap你以及你ê江河做對敵；hō͘埃及地tùi Sek-hut-nî ê塔，直到Kó͘-si̍t ê交界全然荒廢冷靜。 11 人ê腳無tùi hia過，獸ê腳也無tùi hia過；歷過四十年久，無人khiā起。 12 我beh hō͘埃及地tī冷靜ê地成做冷靜；伊ê城tī荒廢ê城中變做荒廢，歷過四十年，我也beh將埃及人分散tī列國，四散tī列邦。 13 主耶和華án-ni講，滿四十年，我beh招集埃及人，tùi in所四散去ê列國來； 14 我beh hō͘埃及受掠ê tò來，hō͘ in tò來in ê本地Pa-thek-lô；tī-hia beh成做微細ê國。 15 Beh做列國中第一微細ê，亦無koh自高tī列國ê頂面；我beh減少in，致到in無管轄列國。 16 伊的確無koh做以色列家所óa靠ê，所oa̍t頭來仰望ê，免得我記得in ê罪；in就知我是主耶和華。 17 二十七年，正月初一，耶和華ê話臨到我講， 18 人子ah，巴比倫王，Nî-pò͘-kah-nî-sat，hō͘伊ê軍兵大大tio̍h磨，攻擊Chhui-lô；致到ta̍k-ê頭殼無毛，肩頭liù皮；總是伊kap伊ê軍兵，對tī Chhui-lô，lóng無得tio̍h工錢，來報答伊大大tio̍h磨ê攻擊。 19 所以主耶和華án-ni講，看ah，我beh將埃及地賞賜巴比倫王Nî-pò͘-kah-nî-sat，伊beh掠伊ê眾百姓，搶伊所搶ê物，劫伊所劫ê物，這就thang做伊ê軍兵ê工錢。 20 我將埃及地hō͘伊，報答伊所tio̍h磨ê；因為in替我做工；這是主耶和華講ê。 21 當hit日，我beh hō͘一支角，為tio̍h以色列家發出；koh beh hō͘你開嘴tī in中間；in就知我是耶和華。
1 Tē cha̍p--nî, cha̍p-ge̍h cha̍p-jī, Iâ-hô-hoa ê ōe lîm-kàu góa kóng, 2 Jîn-chú ah, lí ê bīn tio̍h ǹg Ai-ki̍p ông Hoat-ló, soan-thoân lâi kong-kek i, í-ki̍p Ai-ki̍p choân-tōe. 3 Lí tio̍h thoân kóng, Chú Iâ-hô-hoa án-ni kóng, Khòaⁿ ah, Ai-ki̍p ông Hoat-ló ah, Góa chòe lí ê tùi-te̍k; lí chiū-sī tōa go̍k-hî, tó tī ka-kī ê kang-hô tiong; lí bat kóng, Góa ê hô sī góa-ê, góa ūi ka-kī lâi chō--ê. 4 Góa beh ēng kau kau-tiâu lí ê gê-chô; koh hō͘ lí kang-hô-tiong ê hî kha̍h-tiâu tī lí ê lân; Góa beh chiong lí kap só͘ kha̍h-tiâu tī lí ê lân ê hî, tùi kang-hô tiong thoa chhut-lâi. 5 Góa beh chiong lí kap lí kang-hô-tiong ê hî lóng hiat tī khòng-iá; lí beh tó tī chhân--nih, bô khioh chòe-tui, bô siu-si̍p; Góa chiong lí hō͘ tōe-chiūⁿ ê iá-siù, khong-tiong ê pe-chiáu chòe chia̍h-mi̍h. 6 Ai-ki̍p khiā-khí ê peh-sìⁿ lóng beh chai Góa chiū-sī Iâ-hô-hoa, in-ūi in tùi Í-sek-lia̍t-ke, bat chòe lô͘-úi ê koáiⁿ-á. 7 In ēng chhiú kia̍h lí, lí pit-khui, siong-tio̍h in ê keng-thâu, in óa--lí, lí chi̍h-khì, siám-tio̍h in ê io. 8 Só͘-í Chú Iâ-hô-hoa án-ni kóng, Khòaⁿ ah, Góa beh hō͘ to-kiàm lîm-kàu lí; tùi lín tiong-kan chián-tû lâng kap cheng-siⁿ. 9 Ai-ki̍p tōe beh hong-hòe, léng-chēng; in chiū chai Góa sī Iâ-hô-hoa; in-ūi i ka-kī kóng, Chit ê hô sī góa-ê, sī góa chō--ê. 10 Khòaⁿ ah, Góa kap lí í-ki̍p lí ê kang-hô chòe tùi-te̍k; hō͘ Ai-ki̍p tōe tùi Sek-hut-nî ê thah, ti̍t-kàu Kó͘-si̍t ê kau-kài choân-jiân hong-hòe léng-chēng. 11 Lâng ê kha bô tùi hia kè, siù ê kha iā bô tùi hia kè; le̍k-kè sì-cha̍p-nî kú, bô lâng khiā-khí. 12 Góa beh hō͘ Ai-ki̍p tōe tī léng-chēng ê tōe chiâⁿ-chòe léng-chēng; i ê siâⁿ tī hong-hòe ê siâⁿ tiong pìⁿ-chòe hong-hòe, le̍k-kè sì-cha̍p-nî, Góa iā beh chiong Ai-ki̍p lâng hun-sòaⁿ tī lia̍t-kok, sì-sòaⁿ tī lia̍t-pang. 13 Chú Iâ-hô-hoa án-ni kóng, Móa sì-cha̍p-nî, Góa beh chio-chi̍p Ai-ki̍p lâng, tùi in só͘ sì-sòaⁿ--khì ê lia̍t-kok lâi; 14 Góa beh hō͘ Ai-ki̍p siū-lia̍h--ê tò-lâi, hō͘ in tò-lâi in ê pún-tōe Pa-thek-lô; tī-hia beh chiâⁿ-chòe bî-sòe ê kok. 15 Beh chòe lia̍t-kok-tiong tē-it bî-sòe--ê, ia̍h bô koh chū-ko tī lia̍t-kok ê téng-bīn; Góa beh kiám-chió in, tì-kàu in bô koán-hat lia̍t-kok. 16 I tek-khak bô koh chòe Í-sek-lia̍t-ke só͘ óa-khò--ê, só͘ oa̍t-thâu lâi gióng-bōng-ê, bián-tit Góa kì-tit in ê chōe; in chiū chai Góa sī Chú Iâ-hô-hoa. 17 Jī-cha̍p-chhit nî, chiaⁿ-ge̍h chhoe-it, Iâ-hô-hoa ê ōe lîm-kàu góa kóng, 18 Jîn-chú ah, Pa-pí-lûn ông, Nî-pò͘-kah-nî-sat, hō͘ i ê kun-peng tōa-tōa tio̍h-bôa, kong-kek Chhui-lô; tì-kàu ta̍k-ê thâu-khak bô mn̂g, keng-thâu liù-phê; chóng-sī i kap i ê kun-peng, tùi tī Chhui-lô, lóng bô tit-tio̍h kang-chîⁿ, lâi pò-tap i tōa-tōa tio̍h-bôa ê kong-kek. 19 Só͘-í Chú Iâ-hô-hoa án-ni kóng, Khòaⁿ ah, Góa beh chiong Ai-ki̍p tōe siúⁿ-sù Pa-pí-lûn ông Nî-pò͘-kah-nî-sat, i beh lia̍h i ê chèng peh-sìⁿ, chhiúⁿ i só͘ chhiúⁿ ê mi̍h, kiap i só͘ kiap ê mi̍h, che chiū thang chòe i ê kun-peng ê kang-chîⁿ. 20 Góa chiong Ai-ki̍p tōe hō͘ i, pò-tap i só͘ tio̍h-bôa--ê; in-ūi in thòe Góa chòe-kang; che sī Chú Iâ-hô-hoa kóng-ê. 21 Tng hit-ji̍t, Góa beh hō͘ chi̍t ki kak, ūi-tio̍h Í-sek-lia̍t ke hoat-chhut; koh beh hō͘ lí khui-chhùi tī in tiong-kan; in chiū chai Góa sī Iâ-hô-hoa.
1 耶和華ê話臨到我講， 2 人子ah，你tio̍h宣傳講，主耶和華án-ni講，慘ah chit日，lín tio̍h啼哭。 3 因為日近lah，就是耶和華ê日近la̍h，就是密雲ê日，beh做列國ê時期。 4 Beh有刀劍臨到埃及，tī埃及受刣 ê人倒落去ê時，Kó͘-si̍t人就有痛苦；in beh掠伊ê眾人，拆毀伊ê地基。 5 Kó͘-si̍t、Hut、路得，參插ê百姓，kap Kó͘-pa，以及同盟ê國ê百姓，lóng beh kap in相kap倒tī刀下。 6 耶和華án-ni講，扶助埃及ê亦beh倒；伊勢力ê驕傲beh降低；tùi Sek-hut-nî ê塔起，in lóng beh tī-hia倒tī刀下；這是主耶和華講ê。 7 In beh tī冷靜ê地ê中間，來做冷靜；伊chiahê城亦beh列tī chiahê荒廢ê城ê中間。 8 當我放火tī埃及，見若幫贊伊ê，lóng受滅無；hit時，in就知我是耶和華。 9 到hit日beh有使者tùi我ê面前搭船出去；hō͘安然khiā起ê Kó͘-si̍t人驚惶；beh有痛苦臨到in，親像埃及ê日一樣；看ah，tāi-chì來lah。 10 主耶和華án-ni講，我beh用巴比倫王Nî-pò͘-kah-nî-sat ê手，滅埃及ê眾人。 11 伊kap tè伊ê人，就是列國中強暴ê，beh來毀滅chitê地；in beh拔刀攻擊埃及，hō͘遍地有受刣 ê人。 12 我beh hō͘ hiahê江河乾，亦beh用hitê地賣hō͘ pháiⁿ人ê手；我beh用外邦ê手hō͘ hitê地kap其中所有ê，變做冷靜；這是我耶和華講ê。 13 主耶和華án-ni講，我beh毀滅hiahê偶像，tùi Lô-hut除滅神佛；的確無koh有君王tùi埃及地出；我beh降落驚惶tī埃及地。 14 我beh hō͘ Pa-thek-lô冷靜；放火tī Só-an ê中間；行審判ê事tī Lô ê地方。 15 我beh piàⁿ出我ê大受氣tī Sìn，就是埃及ê衛所；亦beh滅Lô ê眾人。 16 我beh放火tī埃及，Sìn beh tú-tio̍h大痛苦；Lô beh tú-tio̍h攻破，Lô-hut當頭白日tú-tio̍h對敵。 17 A-bûn kap Pí-pek-si̍t ê少年人，beh倒tī刀下；in beh hō͘人掠去。 18 我tī Tap-pí-le̍k at折埃及chiahê擔，hō͘伊因為勢力ê驕傲，soah tī伊ê中間；hit時tī-hia日烏暗；論到chitê城，beh有密雲遮蓋；伊中間ê cha-bó͘-kiáⁿ beh hō͘人掠去。 19 我beh án-ni審判埃及；in就知我是耶和華。 20 十一-年，正月初七，耶和華ê話臨到我講， 21 人子ah，我已經at折埃及王法老ê手骨；無包伊ê傷，無糊藥，無紮布條，thang hō͘伊有力kia̍h刀。 22 所以主耶和華án-ni講，看ah，我kap埃及王法老做對敵，beh將伊兩支手骨，ióng-ê，受at折-ê，beh做一下at折；hō͘ to對伊ê手ka-la̍uh。 23 我beh將埃及人分散tī列國，四散tī列邦。 24 我beh hō͘巴比倫王ê手骨有力，將我ê刀交tī伊ê手；我beh at折法老ê手骨，伊beh tī伊ê面前hiⁿ-hiⁿ-chhan，親像受死siong ê人hiⁿ-hiⁿ-chhan。 25 我beh hû巴比倫王ê手骨；法老ê手骨beh sê落去；我將我ê刀交tī巴比倫王ê手；伊beh伸出hit支to tī埃及地；hit時in就知我是耶和華。 26 我beh將埃及人分散tī列國，四散tī列邦；in就知我是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h soan-thoân kóng, Chú Iâ-hô-hoa án-ni kóng, Chhám ah chit-ji̍t, lín tio̍h thî-khàu. 3 In-ūi ji̍t kūn--lah, chiū-sī Iâ-hô-hoa ê ji̍t kūn--la̍h, chiū-sī ba̍t-hûn ê ji̍t, beh chòe lia̍t-kok ê sî-kî. 4 Beh ū to-kiàm lîm-kàu Ai-ki̍p, tī Ai-ki̍p siū-thâi ê lâng tó--lo̍h-khì ê sî, Kó͘-si̍t lâng chiū ū thòng-khó͘; in beh lia̍h i ê chèng-lâng, thiah-húi i ê tōe-ki. 5 Kó͘-si̍t, Hut, Lō͘-tek, chham-chhap ê peh-sìⁿ, kap Kó͘-pa, í-ki̍p tông-bêng ê kok ê peh-sìⁿ, lóng beh kap in saⁿ-kap tó tī to-ē. 6 Iâ-hô-hoa án-ni kóng, Hû-chō͘ Ai-ki̍p--ê ia̍h beh tó; i sè-le̍k ê kiau-ngō͘ beh kàng-kē; tùi Sek-hut-nî ê thah khí, in lóng beh tī-hia tó tī to-ē; che sī Chú Iâ-hô-hoa kóng--ê. 7 In beh tī léng-chēng ê tōe ê tiong-kan, lâi chòe léng-chēng; i chiah ê siâⁿ ia̍h beh lia̍t tī chiah ê hong-hòe ê siâⁿ ê tiong-kan. 8 Tng Góa pàng-hé tī Ai-ki̍p, kìⁿ-nā pang-chān i--ê, lóng siū bia̍t-bô; hit-sî, in chiū chai Góa sī Iâ-hô-hoa. 9 Kàu hit-ji̍t beh ū sù-chiá tùi Góa ê bīn-chêng tah-chûn chhut-khì; hō͘ an-jiân khiā-khí ê Kó͘-si̍t lâng kiaⁿ-hiâⁿ; beh ū thòng-khó͘ lîm-kàu in, chhin-chhiūⁿ Ai-ki̍p ê ji̍t chi̍t-iūⁿ; khòaⁿ ah, tāi-chì lâi--lah. 10 Chú Iâ-hô-hoa án-ni kóng, Góa beh ēng Pa-pí-lûn ông Nî-pò͘-kah-nî-sat ê chhiú, bia̍t Ai-ki̍p ê chèng-lâng. 11 I kap tè i ê lâng, chiū-sī lia̍t-kok-tiong kiông-pō-ê, beh lâi húi-bia̍t chit ê tōe; in beh pu̍ih-to kong-kek Ai-ki̍p, hō͘ piàn-tōe ū siū-thâi ê lâng. 12 Góa beh hō͘ hiah ê kang-hô ta, ia̍h beh ēng hit ê tōe bōe hō͘ pháiⁿ-lâng ê chhiú; Góa beh ēng gōa-pang ê chhiú hō͘ hit ê tōe kap kî-tiong só͘ ū--ê, pìⁿ-chòe léng-chēng; che sī Góa Iâ-hô-hoa kóng--ê. 13 Chú Iâ-hô-hoa án-ni kóng, Góa beh húi-bia̍t hiah ê ngó͘-siōng, tùi Lô-hut tû-bia̍t sîn-pu̍t; tek-khak bô koh ū kun-ông tùi Ai-ki̍p tōe chhut; Góa beh kàng-lo̍h kiaⁿ-hiâⁿ tī Ai-ki̍p tōe. 14 Góa beh hō͘ Pa-thek-lô léng-chēng; pàng-hé tī Só-an ê tiong-kan; kiâⁿ sím-phòaⁿ ê sū tī Lô ê tōe-hng. 15 Góa beh piàⁿ-chhut Góa ê tōa siū-khì tī Sìn, chiū-sī Ai-ki̍p ê ōe-só͘; ia̍h beh bia̍t Lô ê chèng-lâng. 16 Góa beh pàng-hé tī Ai-ki̍p, Sìn beh tú-tio̍h tōa thòng-khó͘; Lô beh tú-tio̍h kong-phòa, Lô-hut tng-thâu pe̍h-ji̍t tú-tio̍h tùi-te̍k. 17 A-bûn kap Pí-pek-si̍t ê siàu-liân lâng, beh tó tī to-ē; in beh hō͘ lâng lia̍h-khì. 18 Góa tī Tap-pí-le̍k at-chi̍h Ai-ki̍p chiah ê taⁿ, hō͘ i in-ūi sè-le̍k ê kiau-ngō͘, soah tī i ê tiong-kan; hit-sî tī-hia ji̍t o͘-àm; lūn-kàu chit ê siâⁿ, beh ū ba̍t-hûn jia-khàm; i tiong-kan ê cha-bó͘-kiáⁿ beh hō͘ lâng lia̍h--khì. 19 Góa beh án-ni sím-phòaⁿ Ai-ki̍p; in chiū chai Góa sī Iâ-hô-hoa. 20 Cha̍p-it-nî, chiaⁿ-ge̍h chhoe-chhit, Iâ-hô-hoa ê ōe lîm-kàu góa kóng, 21 Jîn-chú ah, Góa í-keng at-chi̍h Ai-ki̍p ông Hoat-ló ê chhiú-kut; bô pau i ê siong, bô kô͘-io̍h, bô chat pò͘-liâu, thang hō͘ i ū la̍t kia̍h-to. 22 Só͘-í Chú Iâ-hô-hoa án-ni kóng, Khòaⁿ ah, Góa kap Ai-ki̍p ông Hoat-ló chòe tùi-te̍k, beh chiong i nn̄g ki chhiú-kut, ióng--ê, siū at-chi̍h--ê, beh chòe chi̍t-ē at-chi̍h; hō͘ to tùi i ê chhiú ka-la̍uh. 23 Góa beh chiong Ai-ki̍p lâng hun-sòaⁿ tī lia̍t-kok, sì-sòaⁿ tī lia̍t-pang. 24 Góa beh hō͘ Pa-pí-lûn ông ê chhiú-kut ū la̍t, chiong Góa ê to kau tī i ê chhiú; Góa beh at-chi̍h Hoat-ló ê chhiú-kut, i beh tī i ê bīn-chêng hiⁿ-hiⁿ-chhan, chhin-chhiūⁿ siū sí-siong ê lâng hiⁿ-hiⁿ-chhan. 25 Góa beh hû Pa-pí-lûn ông ê chhiú-kut; Hoat-ló ê chhiú-kut beh sê-lo̍h-khì; Góa chiong Góa ê to kau tī Pa-pí-lûn ông ê chhiú; i beh chhun-chhut hit ki to tī Ai-ki̍p tōe; hit-sî in chiū chai Góa sī Iâ-hô-hoa. 26 Góa beh chiong Ai-ki̍p lâng hun-sòaⁿ tī lia̍t-kok, sì-sòaⁿ tī lia̍t-pang; in chiū chai Góa sī Iâ-hô-hoa.
1 十一-年，三月初一，耶和華ê話臨到我講： 2 人子ah，你tio̍h對埃及王法老，以及伊ê眾人講，你hiah大塊，是親像是誰？ 3 看ah，亞述bat做黎巴嫩ê柏香樹，枝椏真súi，蔭影親像樹林，樹身高大，枝尾伸入雲中。 4 Hiah-ê水養伊大叢，深淵hō͘伊發真高，伊hiahê江河se̍h流tī栽種伊ê所在；拆叉ê水，流到田園ê樹木。 5 所以伊高大pôaⁿ過田裡ê眾樹；伊ê枝真ām；伊ê椏真長；因為tī伊發生ê時有水chōe-chōe。 6 空中ê飛鳥，lóng tī枝頂作巢；田野ê走獸lóng tī枝下生kiáⁿ；chōe-chōe大國lóng tiàm tī伊ê蔭下。 7 樹大，枝長，成做真súi；因為根soan tī大水邊。 8 上帝園內ê柏香樹遮伊bōe-tio̍h；松樹不及伊ê枝，楓樹不及伊ê椏，上帝園內chiahê樹lóng bōe比得伊ê súi。 9 我hō͘伊ê枝椏茂盛，成做súi；致到上帝園內伊甸一切ê樹，lóng怨妒伊。 10 所以主耶和華án-ni講，因為你高大，枝尾伸入雲中，伊ê心因為伊ê高大來自高， 11 án-ni，我beh將伊交tī列國中有大勢力ê；伊的確beh辦伊，因為伊ê罪惡，我趕逐伊。 12 外邦人，就是列邦中強暴ê，將伊剉斷，hiat-ka̍k，伊ê椏ka-la̍uh tī山裡kap一切ê山谷中；伊ê枝折tī hit所在ê河邊；地上ê眾百姓已經落去，離開伊ê蔭影。 13 空中ê飛鳥，lóng beh歇tī chitê衰敗ê樹頂；田野ê走獸lóng beh tòa tī伊ê樹枝； 14 Thang hō͘水邊chiahê樹，無因為高大來自高；亦無將枝尾伸入雲中；koh hiahê得tio̍h水潤澤有勢力ê，亦bōe得tio̍h高大來khiā起來；因為in tī世間人ê中間，kap落陰間ê人，lóng交hō͘死無，到深深ê地下。 15 主耶和華án-ni講，伊落陰間ê hit日，我hō͘人悲哀；我為tio̍h伊遮蓋深淵，約束江河，hō͘大水停流；我亦hō͘黎巴嫩為tio̍h伊悽慘；田野chiahê樹lóng因為伊暈去。 16 我將伊hiat落陰間，kap落坑ê人相kap落去；hit時列國聽見伊墮落ê聲，就lóng振動；伊甸一切ê樹，黎巴嫩得tio̍h水潤澤，第一好第一súi ê，lóng tī地下深ê所在，受安慰。 17 In亦kap伊相kap落陰間，到受刀刣 ê人hia；in bat做伊ê手骨，tī列國中khiā起伊ê蔭影下。 18 Tī chiahê榮光高大，tī伊甸chiahê樹中，你親像是誰？總是你beh kap伊甸chiahê樹相kap落去地下深ê所在；你beh kap受刀刣 ê人，倒tī無受割禮ê人ê中間。這就是法老kap伊ê眾百姓；這是主耶和華講ê。
1 Cha̍p-it--nî, saⁿ-ge̍h chhoe-it, Iâ-hô-hoa ê ōe lîm-kàu góa kóng: 2 Jîn-chú ah, lí tio̍h tùi Ai-ki̍p ông Hoat-ló, í-ki̍p i ê chèng-lâng kóng, Lí hiah tōa-tè, sī chhin-chhiūⁿ chī-chūi? 3 Khòaⁿ ah, A-su̍t bat chòe Lī-pa-lùn ê pek-hiuⁿ-chhiū, ki-oāiⁿ chin súi, ìm-ńg chhin-chhiūⁿ chhiū-nâ, chhiū-sin koâiⁿ-tōa, ki-bé chhun ji̍p hûn-tiong. 4 Hiah ê chúi iúⁿ i tōa-châng, chhim-ian hō͘ i hoat chin-koâiⁿ, i hiah ê kang-hô se̍h-lâu tī chai-chèng i ê só͘-chāi; thiah-chhe ê chúi, lâu kàu chhân-hn̂g ê chhiū-ba̍k. 5 Só͘-í i koâiⁿ-tōa pôaⁿ-kè chhân--nih ê chèng-chhiū; i ê ki chin-ām; i ê oāiⁿ chin-tn̂g; in-ūi tī i hoat-siⁿ ê sî ū chúi chōe-chōe. 6 Khong-tiong ê pe-chiáu, lóng tī ki-téng choh-siū; chhân-iá ê cháu-siù lóng tī ki-ē siⁿ-kiáⁿ; chōe-chōe tōa-kok lóng tiàm tī i ê ìm-ē. 7 Chhiū tōa, ki tn̂g, chiâⁿ-chòe chin súi; in-ūi kun soan tī tōa chúi-piⁿ. 8 Siōng-tè hn̂g-lāi ê pek-hiuⁿ-chhiū jia i bōe-tio̍h; chhêng-chhiū put-ki̍p i ê ki, png-chhiū put-ki̍p i ê oāiⁿ, Siōng-tè hn̂g-lāi chiah ê chhiū lóng bōe pí-tit i ê súi. 9 Góa hō͘ i ê ki-oāiⁿ bō͘-sēng, chiâⁿ-chòe súi; tì-kàu Siōng-tè hn̂g-lāi Ai-tiân it-chhè ê chhiū, lóng oàn-tò͘ i. 10 Só͘-í Chú Iâ-hô-hoa án-ni kóng, In-ūi lí koâiⁿ-tōa, ki-bé chhun ji̍p hûn-tiong, i ê sim in-ūi i ê koâiⁿ-tōa lâi chū-ko, 11 án-ni, Góa beh chiong i kau tī lia̍t-kok tiong ū tōa sè-le̍k--ê; i tek-khak beh pān--i, in-ūi i ê chōe-ok, Góa kóaⁿ-tio̍k i. 12 Gōa-pang-lâng, chiū-sī lia̍t-pang-tiong kiông-pō--ê, chiong i chhò-tn̄g, hiat-ka̍k, i ê oāiⁿ ka-la̍uh tī soaⁿ--nih kap it-chhè ê soaⁿ-kok-tiong; i ê ki chi̍h tī hit só͘-chāi ê hô-piⁿ; tōe-chiūⁿ ê chèng peh-sìⁿ í-keng lo̍h-khì, lī-khui i ê ìm-ńg. 13 Khong-tiong ê pe-chiáu, lóng beh hioh tī chit ê soe-pāi ê chhiū-téng; chhân-iá ê cháu-siù lóng beh tòa tī i ê chhiū-ki; 14 thang hō͘ chúi-piⁿ chiah ê chhiū, bô in-ūi koâiⁿ tōa lâi chū-ko; ia̍h bô chiong ki-bé chhun-ji̍p hûn-tiong; koh hiah ê tit-tio̍h chúi lūn-te̍k ū sè-le̍k ê, ia̍h bōe tit-tio̍h koâiⁿ-tōa lâi khiā--khí-lâi; in-ūi in tī sè-kan lâng ê tiong-kan, kap lo̍h im-kan ê lâng, lóng kau hō͘ sí-bô, kàu chhim-chhim ê tōe-ē. 15 Chú Iâ-hô-hoa án-ni kóng, I lo̍h im-kan ê hit-ji̍t, Góa hō͘ lâng pi-ai; Góa ūi-tio̍h i jia-khàm chhim-ian, iok-sok kang-hô, hō͘ tōa-chúi thêng-lâu; Góa ia̍h hō͘ Lī-pa-lùn ūi-tio̍h i chhiⁿ-chhám; chhân-iá chiah ê chhiū lóng in-ūi i hūn-khì. 16 Góa chiong i hiat-lo̍h im-kan, kap lo̍h-khiⁿ ê lâng saⁿ-kap lo̍h--khì; hit-sî lia̍t-kok thiaⁿ-kìⁿ i tūi-lo̍h ê siaⁿ, chiū lóng tín-tāng; Ai-tiân it-chhè ê chhiū, Lī-pa-lùn tit-tio̍h chúi lūn-te̍k, tē-it hó tē-it súi ê, lóng tī tōe-ē chhim ê só͘-chāi, siū an-ùi. 17 In ia̍h kap i saⁿ-kap lo̍h im-kan, kàu siū to thâi ê lâng hia; in bat chòe i ê chhiú-kut, tī lia̍t-kok-tiong khiā-khí i ê ìm-ńg-ē. 18 Tī chiah-ê êng-kng koâiⁿ-tōa, tī Ai-tiân chiah ê chhiū-tiong, lí chhin-chhiūⁿ chī-chūi? chóng-sī lí beh kap Ai-tiân chiah ê chhiū saⁿ-kap lo̍h-khì tōe-ē chhim ê só͘-chāi; lí beh kap siū to thâi ê lâng, tó tī bô siū kat-lé ê lâng ê tiong-kan. Che chiū-sī Hoat-ló kap i ê chèng peh-sìⁿ; che sī Chú Iâ-hô-hoa kóng--ê.
1 十二年，十二月，初一，耶和華ê話臨到我講， 2 人子ah，你tio̍h為埃及王法老做哀歌，kā伊講，從前你tī列國中，親像勇ê獅；taⁿ你是親像海中ê鱷魚；你chông出你ê江河，用腳振動chiahê水，致到江河ê水變濁。 3 主耶和華án-ni講，我beh用chōe-chōe國 ê百姓，將我ê 網拋tī你ê頂面，in beh用我ê網，kā你拖出來。 4 我beh hiat你tī地裡，放下tī田野，hō͘空中ê飛鳥lóng歇tī你ê頂面；hō͘遍地ê野獸食你到飽。 5 我beh將你ê肉hiat tī山裡，用你高大ê身屍thūn滿山谷。 6 我koh beh用你ê血，灌ak你所泅ê地；淹到chiahê山；河溝beh對你來充滿。 7 我phah滅你ê時，beh遮蓋chiahê天，hō͘眾星烏暗；用密雲遮掩日頭，月亦無發出光。 8 我beh hō͘天ê光tī你ê頂面lóng烏暗；koh hō͘你ê地烏暗；這是主耶和華講ê。 9 我hō͘你敗無ê風聲到你所m̄-bat ê ta̍k國，hit時我beh hō͘ chōe-chōe百姓ê心煩惱。 10 我tī in ê面前舞我ê劍ê時，我beh hō͘ chōe-chōe國 ê百姓為tio̍h你gông-ngia̍h，君王亦beh為tio̍h你大驚惶；tī你tó落去ê日，in ta̍k人為家己ê性命ngia̍uh-ngia̍uh-chhoah。 11 因為主耶和華án-ni講，巴比倫王ê刀beh臨到你。 12 我beh用勇士ê刀hō͘你ê chōe-chōe人倒落去。chiahê勇士lóng是列國中強暴ê；in beh hō͘埃及ê驕傲歸tī無，埃及ê眾百姓beh受剿滅。 13 我beh tùi埃及chōe-chōe水邊除滅所有ê走獸，人ê腳無koh phah濁chitê水，獸ê蹄亦無koh踏伊。 14 Hit時我beh hō͘ in ê水坐清，hō͘ in ê河流親像油；這是主耶和華講ê。 15 我hō͘埃及地荒廢冷靜，chitê地絕無從前所充滿ê；koh我攻擊其中一切khiā起ê百姓；hit時in就知我是耶和華。 16 Chitê是哀歌，人beh用chitê來哀哭；列國chiahê cha-bó͘-gín-á beh用án-ni來哀哭；in為tio̍h埃及kap伊ê眾百姓，亦beh用chitê來哀哭；這是主耶和華講ê。 17 十二年，十二月十五，耶和華ê話臨到我講， 18 人子ah，你tio̍h因為埃及ê眾人哀哭；koh tio̍h將埃及kap有名聲ê國chiahê cha-bó͘-gín-á，kap落坑ê人，做一下hiat落地下深ê所在。 19 你ê súi贏過是誰 ah？你tio̍h落去，kap無受割禮ê人相kap倒teh。 20 In beh倒tī hō͘刀刣 ê人ê中間，伊受交付tī刀劍，tio̍h將伊kap伊ê眾人拖去。 21 強猛ê勇士beh tī陰間對伊kap幫贊伊ê講話；in是無受割禮，受刀刣 ê人；已經落去，倒teh無振動。 22 亞述kap伊ê眾百姓，lóng tī-hia；伊ê墓tī伊ê四圍；in lóng是受刣，倒tī刀下ê。 23 In ê墓tī坑中極深ê所在，伊ê眾百姓tī伊ê墓ê四周圍，lóng是受刣倒tī刀下ê；in bat tī活人ê地hō͘人驚惶。 24 Í-lân亦tī-hia，伊ê眾百姓tī伊ê墓ê四圍，lóng是受刣，倒tī刀下，無受割禮落去地下深ê所在ê；in bat tī活人ê地hō͘人驚惶，koh kap落坑ê人相kap擔當凌辱。 25 In kā伊kap伊ê眾百姓，tī受刣 ê人ê中間，安眠床；in ê墓tī伊ê四周圍；in lóng是無受割禮，受刀刣-ê；in bat tī活人ê地hō͘人驚惶，koh kap落坑ê人相kap擔當凌辱；伊已經hē tī受刣 ê人ê中間。 26 Bí-siat、Thó͘-pa，kap伊ê眾百姓，lóng tī-hia；伊ê墓lóng tī伊ê四圍，in lóng是無受割禮，hō͘刀刣-ê；in bat tī活人ê地，hō͘人驚惶。 27 In bōe得tio̍h kap hiahê無受割禮倒teh ê勇士，相kap倒teh；chiahê勇士帶ke-si落陰間；頭殼睏tī刀劍，骨頭頂有in ê罪惡；in bat tī活人ê地hō͘勇士驚惶。 28 你beh敗壞tī無受割禮ê人ê中間，kap hiahê受刀刣 ê人相kap倒teh。 29 Í-tong亦tī-hia，伊hiahê國王kap一切ê首領，雖然有勢力，猶原hē tī受刣 ê人ê中間；in beh kap無受割禮ê，以及落坑ê人相kap倒teh。 30 Tī-hia有北方眾王ê kiáⁿ，kap一切Se-tùn人，lóng kap受刣 ê人落去；in雖然有勢力，hō͘人驚惶，猶原受見笑；in無受割禮，kap受刀刣-ê相kap倒teh，kap落坑ê人相kap擔當凌辱。 31 法老kap伊ê軍兵lóng hō͘刀刣死；法老看見，為tio̍h伊hiahê眾人就受安慰；這是主耶和華講ê。 32 我hō͘伊tī活人ê地，做thang驚惶；法老kap伊ê眾人，beh kap受刀刣 ê人相kap hē tī無受割禮ê人ê中間；這是主耶和華講ê。
1 Cha̍p-jī--nî, cha̍p-jī-ge̍h, chhoe-it, Iâ-hô-hoa ê ōe lîm-kàu góa kóng, 2 Jîn-chú ah, lí tio̍h ūi Ai-ki̍p ông Hoat-ló chòe ai-ko, kā i kóng, Chiông-chêng lí tī lia̍t-kok-tiong, chhin-chhiūⁿ ióng ê sai; taⁿ lí sī chhin-chhiūⁿ hái-tiong ê go̍k-hî; lí chông-chhut lí ê kang-hô, ēng kha tín-tāng chiah ê chúi, tì-kàu kang-hô ê chúi pìⁿ-lô. 3 Chú Iâ-hô-hoa án-ni kóng, Góa beh ēng chōe-chōe kok ê peh-sìⁿ, chiong Góa ê bāng pha tī lí ê téng-bīn, in beh ēng Góa ê bāng, kā lí thoa--chhut-lâi. 4 Góa beh hiat lí tī tōe--nih, pàng-hē tī chhân-iá, hō͘ khong-tiong ê pe-chiáu lóng hioh tī lí ê téng-bīn; hō͘ piàn-tōe ê iá-siù chia̍h lí kàu pá. 5 Góa beh chiong lí ê bah hiat tī soaⁿ-nih, ēng lí koâiⁿ-tōa ê sin-si thūn-móa soaⁿ-kok. 6 Góa koh beh ēng lí ê huih, koàn-ak lí só͘ siû ê tōe; im-kàu chiah ê soaⁿ; hô-kau beh tùi lí lâi chhiong-móa. 7 Góa phah-bia̍t lí ê sî, beh jia-khàm chiah ê thiⁿ, hō͘ chèng chhiⁿ o͘-àm; ēng ba̍t-hûn jia-iám ji̍t-thâu, ge̍h ia̍h bô hoat-chhut kng. 8 Góa beh hō͘ thiⁿ ê kng tī lí ê téng-bīn lóng o͘-àm; koh hō͘ lí ê tōe o͘-àm; che sī Chú Iâ-hô-hoa kóng--ê. 9 Góa hō͘ lí pāi-bô ê hong-siaⁿ kàu lí só͘ m̄-bat ê ta̍k-kok, hit-sî Góa beh hō͘ chōe-chōe peh-sìⁿ ê sim hoân-ló. 10 Góa tī in ê bīn-chêng bú Góa ê kiàm ê sî, Góa beh hō͘ chōe-chōe kok ê peh-sìⁿ ūi-tio̍h lí gông-ngia̍h, kun-ông ia̍h beh ūi-tio̍h lí tōa kiaⁿ-hiâⁿ; tī lí tó--lo̍h-khì ê ji̍t, in ta̍k-lâng ūi ka-kī ê sìⁿ-miā ngia̍uh-ngia̍uh-chhoah. 11 In-ūi Chú Iâ-hô-hoa án-ni kóng, Pa-pí-lûn ông ê to beh lîm-kàu lí. 12 Góa beh ēng ióng-sū ê to hō͘ lí ê chōe-chōe lâng tó--lo̍h-khì. Chiah ê ióng-sū lóng sī lia̍t-kok-tiong kiông-pō--ê; in beh hō͘ Ai-ki̍p ê kiau-ngō͘ kui tī bô, Ai-ki̍p ê chèng peh-sìⁿ beh siū châu-bia̍t. 13 Góa beh tùi Ai-ki̍p chōe-chōe chúi-piⁿ tû-bia̍t só͘ ū ê cháu-siù, lâng ê kha bô koh phah-lô chit ê chúi, siù ê tôe ia̍h bô koh ta̍h--i. 14 Hit-sî Góa beh hō͘ in ê chúi chē-chheng, hō͘ in ê hô lâu chhin-chhiūⁿ iû; che sī Chú Iâ-hô-hoa kóng--ê. 15 Góa hō͘ Ai-ki̍p tōe hong-hòe léng-chēng, chit ê tōe choa̍t-bô chiông-chêng só͘ chhiong-móa--ê; koh Góa kong-kek kî-tiong it-chhè khiā-khí ê peh-sìⁿ; hit-sî in chiū chai Góa sī Iâ-hô-hoa. 16 Chit-ê sī ai-ko, lâng beh ēng chit-ê lâi ai-khàu; lia̍t-kok chiah ê cha-bó͘-gín-á beh ēng án-ni lâi ai-khàu; in ūi-tio̍h Ai-ki̍p kap i ê chèng peh-sìⁿ, ia̍h beh ēng chit-ê lâi ai-khàu; che sī Chú Iâ-hô-hoa kóng--ê. 17 Cha̍p-jī--nî, cha̍p-jī ge̍h cha̍p-gō͘, Iâ-hô-hoa ê ōe lîm-kàu góa kóng, 18 Jîn-chú ah, lí tio̍h in-ūi Ai-ki̍p ê chèng-lâng ai-khàu; koh tio̍h chiong Ai-ki̍p kap ū miâ-siaⁿ ê kok chiah ê cha-bó͘-gín-á, kap lo̍h-khiⁿ ê lâng, chòe chi̍t-ē hiat-lo̍h tōe-ē chhim ê só͘-chāi. 19 Lí ê súi iâⁿ-kè chī-chūi ah? lí tio̍h lo̍h-khì, kap bô siū kat-lé ê lâng saⁿ-kap tó--teh. 20 In beh tó tī hō͘ to thâi ê lâng ê tiong-kan, i siū kau-hù tī to-kiàm, tio̍h chiong i kap i ê chèng-lâng thoa--khì. 21 Kiông-béng ê ióng-sū beh tī im-kan tùi i kap pang-chān i--ê kóng-ōe; in sī bô siū kat-lé, siū to thâi ê lâng; í-keng lo̍h--khì, tó-teh bô tín-tāng. 22 A-su̍t kap i ê chèng peh-sìⁿ, lóng tī-hia; i ê bōng tī i ê sì-ûi; in lóng sī siū-thâi, tó tī to-ē--ê. 23 In ê bōng tī khiⁿ-tiong ke̍k-chhim ê só͘-chāi, i ê chèng peh-sìⁿ tī i ê bōng ê sì-chiu-ûi, lóng sī siū-thâi tó tī to-ē--ê; in bat tī oa̍h-lâng ê tōe hō͘ lâng kiaⁿ-hiâⁿ. 24 Í-lân ia̍h tī-hia, i ê chèng peh-sìⁿ tī i ê bōng ê sì-ûi, lóng-sī siū-thâi, tó tī to-ē, bô siū kat-lé lo̍h-khì tōe-ē chhim ê só͘-chāi--ê; in bat tī oa̍h-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k. 25 In kā i kap i ê chèng peh-sìⁿ, tī siū-thâi ê lâng ê tiong-kan, an bîn-chhn̂g; in ê bōng tī i ê sì-chiu-ûi; in lóng sī bô siū kat-lé, siū to thâi--ê; in bat tī oa̍h-lâng ê tōe hō͘ lâng kiaⁿ-hiâⁿ, koh kap lo̍h-khiⁿ ê lâng saⁿ-kap tam-tng lêng-jio̍k; i í-keng hē tī siū-thâi ê lâng ê tiong-kan. 26 Bí-siat, Thó͘-pa, kap i ê chèng peh-sìⁿ, lóng tī-hia; i ê bōng lóng tī i ê sì-ûi, in lóng sī bô siū kat-lé, hō͘ to thâi--ê; in bat tī oa̍h-lâng ê tōe, hō͘ lâng kiaⁿ-hiâⁿ. 27 In bōe tit-tio̍h kap hiah ê bô siū kat-lé tó-teh ê ióng-sū, saⁿ-kap tó-teh; chiah ê ióng-sū tòa ke-si lo̍h im-kan; thâu-khak khùn tī to-kiàm, kut-thâu-téng ū in ê chōe-ok; in bat tī oa̍h-lâng ê tōe hō͘ ióng-sū kiaⁿ-hiâⁿ. 28 Lí beh pāi-hoāi tī bô siū kat-lé ê lâng ê tiong-kan, kap hiah-ê siū to thâi ê lâng saⁿ-kap tó-teh. 29 Í-tong ia̍h tī-hia, i hiah ê kok-ông kap it-chhè ê siú-léng, sui-jiân ū sè-le̍k, iû-goân hē tī siū-thâi ê lâng ê tiong-kan; in beh kap bô siū kat-lé--ê, í-ki̍p lo̍h-khiⁿ ê lâng saⁿ-kap tó-teh. 30 Tī-hia ū pak-hng chèng-ông ê kiáⁿ, kap it-chhè Se-tùn lâng, lóng kap siū-thâi ê lâng lo̍h-khì; in sui-jiân ū sè-le̍k, hō͘ lâng kiaⁿ-hiâⁿ, iû-goân siū kiàn-siàu; in bô siū kat-lé, kap siū to thâi--ê saⁿ-kap tó-teh, kap lo̍h-khiⁿ ê lâng saⁿ-kap tam-tng lêng-jio̍k. 31 Hoat-ló kap i ê kun-peng lóng hō͘ to thâi--sí; Hoat-ló khòaⁿ-kìⁿ, ūi-tio̍h i hiah ê chèng-lâng chiū siū an-ùi; che sī Chú Iâ-hô-hoa kóng--ê. 32 Góa hō͘ i tī oa̍h-lâng ê tōe, chòe thang kiaⁿ-hiâⁿ; Hoat-ló kap i ê chèng-lâng, beh kap siū to thâi ê lâng saⁿ-kap hē tī bô siū kat-lé ê lâng ê tiong-kan; che sī Chú Iâ-hô-hoa kóng--ê.
1 耶和華ê話臨到我講， 2 人子ah，你tio̍h對本國ê百姓講話，kā in講，我hō͘刀劍臨到一國ê時，hí一國ê百姓tùi in中間揀一人，設立伊做守望ê； 3 伊看見刀劍臨到hit所在，若pûn哨角警戒眾百姓； 4 見若聽見哨角ê聲，無受警戒ê，刀劍若來剿滅伊，伊ê罪beh歸tī伊ê頭殼頂。 5 伊聽見哨角ê聲，無受警戒，伊ê罪beh歸tī伊本身；伊若受警戒，就會救家己ê性命。 6 設使守望ê人看見刀劍到，無pûn哨角，致到百姓無受警戒，刀劍來刣死in中間ê一人，hitê人雖然死tī伊ê罪，總是我beh tùi守望ê人討伊失落性命ê罪。 7 人子ah，我án-ni設立你做以色列家守望ê人，所以你tio̍h聽我嘴內所講ê話，替我警戒in。 8 我對pháiⁿ人講，pháiⁿ人ah，你的確會死；你若無開嘴警戒pháiⁿ人，hō͘伊離開所行ê路；chitê pháiⁿ人beh死tī伊ê罪，總是我beh對你討伊失落性命ê罪。 9 設使你警戒pháiⁿ人oa̍t-tńg離開所行ê路；伊猶原m̄ oa̍t-tńg離開，伊beh死tī伊ê罪，你就會救你ê活命。 10 人子ah，你tio̍h對以色列家講，Lín常常án-ni講，阮ê過失阮ê罪惡，tī阮ê身上；阮是因為án-ni漸漸消無，thái-thó ōe活ah？ 11 你tio̍h對in講，主耶和華講，我kí我ê永活來chiù-chōa，我斷斷無歡喜pháiⁿ人死無，獨獨歡喜pháiⁿ人oa̍t-tńg離開所行ê路來活；以色列家ah，lín tio̍h oa̍t倒tńg，離開pháiⁿ路，lín啥事beh處死ah？ 12 人子ah，你tio̍h對你ê百姓講，義人ê義，tī伊犯罪ê日bōe能救伊；論到pháiⁿ人ê pháiⁿ，tī伊oa̍t-tńg離開伊ê pháiⁿ所行ê日，亦bōe會hō͘伊跋倒；義人tī犯罪ê日，也bōe能因為伊ê義來得tio̍h活。 13 我對義人講，伊的確活；伊若óa靠伊ê義來行pháiⁿ，就伊所行ê義，lóng無得tio̍h記念；伊beh因為所行ê pháiⁿ來死。 14 Koh，我對pháiⁿ人講，你的確死，伊若oa̍t-tńg離開伊ê罪，行正直kap合理ê事； 15 Koh還人ê 當頭kap所搶人ê物，遵thàn活命ê律例，無koh做pháiⁿ，伊的確活，無致到死。 16 伊所犯一切ê罪，無koh kā伊記得；伊行正直kap合理ê事，的確ōe活。 17 你ê百姓iáu teh講，主ê路無公平，其實是in ê路無公平。 18 義人oa̍t-tńg離開伊ê義，來行pháiⁿ；就beh因為án-ni來死。 19 Pháiⁿ人oa̍t-tńg離開伊ê pháiⁿ，行正直kap合理ê事；就beh因為án-ni來活。 20 Lín iáu teh講，主ê路無公平；以色列家ah，我beh照lín ta̍k人所行ê，審判lín。 21 阮受掠ê了後十二年，十月初五，有一人tùi耶路撒冷逃走到我chia；講，城已經攻破。 22 逃走ê人iáu未到，前一日ê ê-hng，耶和華ê手hē tī我ê身上；開我ê嘴；到隔早起，hit人來到我chia；我ê嘴就開，無koh啞口。 23 耶和華ê話臨到我講， 24 人子ah，tiàm tī以色列荒廢ê地ê人teh講，亞伯拉罕獨獨一人，有得tio̍h chitê地做業；咱人額真chōe，chitê地是hō͘咱做業ê。 25 所以你tio̍h kā in講，主耶和華án-ni講，Lín食iáu有血ê肉，koh kia̍h起lín ê目睭，仰望lín ê偶像；koh 刣人流血，lín iáu ōe得tio̍h chitê地做業mah？ 26 Lín óa靠lín ê刀劍，行可惡ê事；人人phah lâ-sâm厝邊ê bó͘；lín iáu ōe得tio̍h chitê地做業mah？ 27 你tio̍h對in án-ni講，主耶和華án-ni講，我kí我ê永活來chiù-chōa；tī拋荒ê所在-ê，beh倒tī刀下，tī田野ê中間-ê，我beh交in hō͘野獸吞食；tī衛所kap洞內ê，beh死tī瘟疫。 28 我beh hō͘ chitê地冷靜，hō͘人gông-ngia̍h；伊因為勢力ê驕傲也beh soah；以色列chiahê山lóng beh冷靜，無人經過。 29 我因為in所行一切可惡ê事，hō͘地拋荒；致到人gông-ngia̍h；hit時in就知我是耶和華。 30 人子ah，你ê百姓tī厝邊，tī厝門口，談論你；兄弟對兄弟相kap講，來ah，來聽，聽看耶和華ê話是講甚麼。 31 In來你chia，親像百姓來聚會；坐tī你ê面前，親像是我ê百姓；in聽你ê話，亦無去行；因為in ê嘴顯出chōe-chōe親愛，總是心是teh jip錢。 32 看ah，in看你親像gâu作樂，好聲音ê人所唱ê雅歌；in聽你ê話也無去行。 33 看ah，所講ê話緊緊beh成；到成ê時，in就知bat有先知tī in中間。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h tùi pún-kok ê peh-sìⁿ kóng-ōe, kā in kóng, Góa hō͘ to-kiàm lîm-kàu chi̍t-kok ê sî, hí chi̍t-kok ê peh-sìⁿ tùi in tiong-kan kéng chi̍t-lâng, siat-li̍p i chòe siú-bāng ê; 3 i khòaⁿ-kìⁿ to-kiàm lîm-kàu hit só͘-chāi, nā pûn sàu-kak kéng-kài chèng peh-sìⁿ; 4 kìⁿ-nā thiaⁿ-kìⁿ sàu-kak ê siaⁿ, bô siū kéng-kài--ê, to-kiàm nā lâi châu-bia̍t i, i ê chōe beh kui tī i ê thâu-khak-téng. 5 I thiaⁿ-kìⁿ sàu-kak ê siaⁿ, bô siū kéng-kài, i ê chōe beh kui tī i pún-sin; i nā siū kéng-kài, chiū ōe kiù ka-kī ê sìⁿ-miā. 6 Siat-sú siú-bāng ê lâng khòaⁿ-kìⁿ to-kiàm kàu, bô pûn sàu-kak, tì-kàu peh-sìⁿ bô siū kéng-kài, to-kiàm lâi thâi-sí in tiong-kan ê chi̍t-lâng, hit ê lâng sui-jiân sí tī i ê chōe, chóng-sī Góa beh tùi siú-bāng ê lâng thó i sit-lo̍h sìⁿ-miā ê chōe. 7 Jîn-chú ah, Góa án-ni siat-li̍p lí chòe Í-sek-lia̍t-ke siú-bāng ê lâng, só͘-í lí tio̍h thiaⁿ Góa chhùi-lāi só͘ kóng ê ōe, thòe Góa kéng-kài in. 8 Góa tùi pháiⁿ-lâng kóng, Pháiⁿ-lâng ah, lí tek-khak ōe sí; lí nā bô khui-chhùi kéng-kài pháiⁿ-lâng, hō͘ i lī-khui só͘ kiâⁿ ê lō͘; chit ê pháiⁿ-lâng beh sí tī i ê chōe, chóng-sī Góa beh tùi lí thó i sit-lo̍h sìⁿ-miā ê chōe. 9 Siat-sú lí kéng-kài pháiⁿ-lâng oa̍t-tńg lī-khui só͘ kiâⁿ ê lō͘; i iû-goân m̄ oa̍t-tńg lī-khui, i beh sí tī i ê chōe, lí chiū ōe kiù lí ê oa̍h-miā. 10 Jîn-chú ah, lí tio̍h tùi Í-sek-lia̍t-ke kóng, Lín siông-siông án-ni kóng, Goán ê kè-sit goán ê chōe-ok, tī goán ê sin-chiūⁿ; goán sī in-ūi án-ni chiām-chiām siau-bô, thái-thó ōe oa̍h ah? 11 Lí tio̍h tùi in kóng, Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa toàn-toàn bô hoaⁿ-hí pháiⁿ-lâng sí-bô, to̍k-to̍k hoaⁿ-hí pháiⁿ-lâng oa̍t-tńg lī-khui só͘ kiâⁿ ê lō͘ lâi oa̍h; Í-sek-lia̍t-ke ah, lín tio̍h oa̍t-tò-tńg, lī-khui pháiⁿ-lō͘, lín siáⁿ-sū beh chhú-sí ah? 12 Jîn-chú ah, lí tio̍h tùi lí ê peh-sìⁿ kóng, Gī-lâng ê gī, tī i hoān-chōe ê ji̍t bōe-ōe kiù i; lūn-kàu pháiⁿ-lâng ê pháiⁿ, tī i oa̍t-tńg lī-khui i ê pháiⁿ só͘ kiâⁿ ê ji̍t, ia̍h bōe-ōe hō͘ i poa̍h-tó; gī-lâng tī hoān-chōe ê ji̍t, iā bōe-ōe in-ūi i ê gī lâi tit-tio̍h oa̍h. 13 Góa tùi gī-lâng kóng, i tek-khak oa̍h; i nā óa-khò i ê gī lâi kiâⁿ-pháiⁿ, chiū i só͘-kiâⁿ ê gī, lóng bô tit-tio̍h kì-liām; i beh in-ūi só͘ kiâⁿ ê pháiⁿ lâi sí. 14 Koh, Góa tùi pháiⁿ-lâng kóng, Lí tek-khak sí, i nā oa̍t-tńg lī-khui i ê chōe, kiâⁿ chèng-ti̍t kap ha̍p-lí ê sū; 15 koh hêng lâng ê tǹg-thâu kap só͘ chhiúⁿ lâng ê mi̍h, chun-thàn oa̍h-miā ê lu̍t-lē, bô koh chòe pháiⁿ, i tek-khak oa̍h, bô tì-kàu sí. 16 I só͘ hoān it-chhè ê chōe, bô koh kā i kì-tit; i kiâⁿ chèng-ti̍t kap ha̍p-lí ê sū, tek-khak ōe oa̍h. 17 Lí ê peh-sìⁿ iáu teh kóng, Chú ê lō͘ bô kong-pêng, kî-si̍t sī in ê lō͘ bô kong-pêng. 18 Gī-lâng oa̍t-tńg lī-khui i ê gī, lâi kiâⁿ-pháiⁿ; chiū beh in-ūi án-ni lâi sí. 19 Pháiⁿ-lâng oa̍t-tńg lī-khui i ê pháiⁿ, kiâⁿ chèng-ti̍t kap ha̍p-lí ê sū; chiū beh in-ūi án-ni lâi oa̍h. 20 Lín iáu teh kóng, Chú ê lō͘ bô kong-pêng; Í-sek-lia̍t-ke ah, Góa beh chiàu lín ta̍k-lâng só͘-kiâⁿ--ê, sím-phòaⁿ lín. 21 Goán siū lia̍h ê liáu-āu cha̍p-jī-nî, cha̍p-ge̍h chhoe-gō͘, ū chi̍t-lâng tùi Iâ-lō͘-sat-léng tô-cháu kàu góa chia; kóng, Siâⁿ í-keng kong-phòa. 22 Tô-cháu ê lâng iáu-bē kàu, chêng chi̍t-ji̍t ê ê-hng, Iâ-hô-hoa ê chhiú hē tī góa ê sin-chiūⁿ; khui góa ê chhùi; kàu keh chá-khí, hit lâng lâi kàu góa chia; góa ê chhùi chiū khui, bô koh é-káu. 23 Iâ-hô-hoa ê ōe lîm-kàu góa kóng, 24 Jîn-chú ah, tiàm tī Í-sek-lia̍t hong-hòe ê tōe ê lâng teh kóng, A-pek-la̍h-hán to̍k-to̍k chi̍t-lâng, ū tit-tio̍h chit ê tōe chòe-gia̍p; lán lâng-gia̍h chin-chōe, chit ê tōe sī hō͘ lán chòe-gia̍p--ê. 25 Só͘-í lí tio̍h kā in kóng, Chú Iâ-hô-hoa án-ni kóng, Lín chia̍h iáu ū huih ê bah, koh kia̍h-khí lín ê ba̍k-chiu, gióng-bōng lín ê ngó͘-siōng; koh thâi-lâng lâu-huih, lín iáu ōe tit-tio̍h chit ê tōe chòe-gia̍p mah? 26 Lín óa-khò lín ê to-kiàm, kiâⁿ khó-ò͘ⁿ ê sū; lâng-lâng phah lâ-sâm chhù-piⁿ ê bó͘; lín iáu ōe tit-tio̍h chit ê tōe chòe-gia̍p mah? 27 Lí tio̍h tùi in án-ni kóng, Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa; tī pha-hng ê só͘-chāi--ê, beh tó tī to-ē, tī chhân-iá ê tiong-kan--ê, Góa beh kau in hō͘ iá-siù thun-chia̍h; tī ōe-só͘ kap tōng-lāi--ê, beh sí tī un-e̍k. 28 Góa beh hō͘ chit ê tōe léng-chēng, hō͘ lâng gông-ngia̍h; i in-ūi sè-le̍k ê kiau-ngō͘ iā beh soah; Í-sek-lia̍t chiah ê soaⁿ lóng beh léng-chēng, bô lâng keng-kè. 29 Góa in-ūi in só͘ kiâⁿ it-chhè khó-ò͘ⁿ ê sū, hō͘ tōe pha-hng; tì-kàu lâng gông-ngia̍h; hit-sî in chiū chai Góa sī Iâ-hô-hoa. 30 Jîn-chú ah, Lí ê peh-sìⁿ tī chhù-piⁿ, tī chhù mn̂g-kháu, tâm-lūn lí; hiaⁿ-tī tùi hiaⁿ-tī saⁿ-kap kóng, Lâi ah, lâi thiaⁿ, thiaⁿ-khòaⁿ Iâ-hô-hoa ê ōe sī kóng sím-mi̍h. 31 In lâi lí chia, chhin-chhiūⁿ peh-sìⁿ lâi chū-hōe; chē tī lí ê bīn-chêng, chhin-chhiūⁿ sī Góa ê peh-sìⁿ; in thiaⁿ lí ê ōe, ia̍h bô khì-kiâⁿ; in-ūi in ê chhùi hián-chhut chōe-chōe chhin-ài, chóng-sī sim sī teh jip chîⁿ. 32 Khòaⁿ ah, in khòaⁿ lí chhin-chhiūⁿ gâu chok-ga̍k, hó siaⁿ-im ê lâng só͘ chhiùⁿ ê ngá-ko; in thiaⁿ lí ê ōe iā bô khì kiâⁿ. 33 Khòaⁿ ah, só͘ kóng ê ōe kín-kín beh chiâⁿ; kàu chiâⁿ ê sî, in chiū chai bat ū sian-ti tī in tiong-kan.
1 耶和華ê話臨到我講， 2 人子ah，你tio̍h宣傳攻擊以色列chiahê牧者；你tio̍h宣傳來對in講，主耶和華對chiahê牧者án-ni講，災厄ah，以色列chiahê牧者，因為in養飼家己；牧者kiám m̄應該養飼羊群mah？ 3 Lín食伊ê油，穿伊ê毛，刣伊ê肥ê，也無養飼羊群。 4 軟弱ê，lín無顧hō͘伊勇；破病ê，lín無kā伊醫治；受傷ê，lín無kā伊包；受趕逐ê，lín無chhōa伊tò來，失落ê，lín無chhē伊；獨獨用強暴，嚴嚴ê管轄。 5 因為無牧者，羊就四散；已經四散，就做一切野獸ê食物。 6 我ê羊四界行tī chiahê山裡，tī ta̍k-ê高ê山頂，四散tī全地，無人去追，無人去chhē。 7 所以lín chiahê牧者tio̍h聽耶和華ê話。 8 主耶和華講，我kí我ê永活來chiù-chōa，我ê羊因為無牧者，就成做受搶ê物，羊也做一切野獸ê食物；也我ê牧者無chhē我ê羊；chiahê牧者因為in養飼家己，無養飼我ê羊； 9 所以lín chiahê牧者tio̍h聽耶和華ê話； 10 主耶和華án-ni講，我kap牧者做對敵，beh tùi in ê手追討我ê羊，hō͘ in無koh養飼羊群；牧者也無koh養飼家己；我beh救我ê羊脫離in ê嘴，無koh做in ê食物。 11 因為主耶和華án-ni講，看ah，我beh本身chhē我ê羊，來chhē-tio̍h伊。 12 牧者tī羊群四散ê日，怎樣chhē伊ê羊，我也beh親像án-ni chhē我ê羊；chiahê羊tī密雲烏暗ê日，四散到ta̍k所在，我beh tùi-hia救in tò來。 13 我beh tùi列國中chhōa in出，tùi ta̍k國ê內面聚集in，chhōa in tò來in ê本所在；也beh tī以色列山chiahê溪邊，境內一切thang khiā起ê所在，來養飼in。 14 我beh tī好好ê草場養飼in，in ê羊椆beh tī以色列高位ê山；in beh tī好好ê羊椆內倒teh睏，也tī以色列山肥súi ê草場食草。 15 主耶和華講，我beh本身養飼我ê羊，hō͘ in倒teh睏。 16 失落ê我beh chhē伊；受趕逐ê，我beh chhōa伊tò來；受傷ê我beh包伊；破病ê，我beh醫治伊；獨獨肥ê，勇ê，我beh除滅伊，也beh秉公養飼in。 17 我ê羊群ah，論到lín，主耶和華án-ni講，我beh tī羊kap羊ê中間，公ê綿羊kap公ê山羊ê中間，行判斷。 18 你tī好好ê草場食草，iáu掠做小khóa事mah？chhun ê草lín竟然用腳thún踏伊？lín lim清ê水；chhun-ê lín竟然用腳phah濁伊？ 19 論到我ê羊是食lín用腳踏ê，lim lín用腳phah濁ê。 20 所以主耶和華對in án-ni講，看ah，我本身tī肥ê羊kap瘦ê羊ê中間，行判斷。 21 因為lín用身軀，用肩頭khoeh-in，用lín ê角觸破病ê，致到hō͘ in四散tī外面。 22 所以我beh拯救我ê羊群，無koh做受搶ê物；我亦beh tī羊kap羊ê中間行判斷。 23 我beh設立一个牧者，照顧in，伊beh養飼in；就是我ê奴僕大衛；伊beh養飼in，做in ê牧者。 24 我耶和華beh做in ê上帝；我ê奴僕大衛beh tī in ê中間做首領；這是我耶和華講ê。 25 我beh kap in立平安ê約，hō͘惡獸tùi境內斷絕；in就beh安然khiā起tī曠野，睏tī樹林內。 26 我beh hō͘ in kap我ê山四圍ê所在成做福氣ê源頭；我亦beh照時落雨，beh有施福氣ê大雨。 27 田野ê樹beh結果子；地也beh出產；in beh安然khiā起tī本所在；我at折in所背ê擔，救in脫離hitê掠in做奴才ê人ê手；hit時in就知我是耶和華。 28 In無koh做外邦人所搶ê物，地上ê野獸也無koh吞食in；是beh安然khiā起，無人hō͘ in驚惶。 29 我beh kā in興起一个出名栽種ê所在；in tī境內，無koh hō͘飢荒所滅；也無koh受tio̍h外邦人ê凌辱。 30 In beh知我耶和華in ê上帝，是kap in tī-teh；也知in以色列家是我ê百姓；這是主耶和華講ê。 31 Lín是我ê羊，是我草場ê羊；lín是人；我也是lín ê上帝；這是主耶和華講ê。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h soan-thoân kong-kek Í-sek-lia̍t chiah ê bo̍k-chiá; lí tio̍h soan-thoân lâi tùi in kóng, Chú Iâ-hô-hoa tùi chiah ê bo̍k-chiá án-ni kóng, Chai-ē ah, Í-sek-lia̍t chiah ê bo̍k-chiá, in-ūi in iúⁿ-chhī ka-kī; bo̍k-chiá kiám m̄ eng-kai iúⁿ-chhī iûⁿ-kûn mah? 3 Lín chia̍h i ê iû, chhēng i ê mn̂g, thâi i ê pûi--ê, iā bô iúⁿ-chhī iûⁿ-kûn. 4 Loán-jio̍k--ê, lín bô kò͘ hō͘ i ióng; phòa-pīⁿ--ê, lín bô kā i i-tī; siū-siong--ê, lín bô kā i pau; siū kóaⁿ-tio̍k--ê, lín bô chhōa i tò--lâi, sit-lo̍h--ê, lín bô chhē--i; to̍k-to̍k ēng kiông-pō, giâm-giâm ê koán-hat. 5 In-ūi bô bo̍k-chiá, iûⁿ chiū sì-sòaⁿ; í-keng sì-sòaⁿ, chiū chòe it-chhè iá-siù ê chia̍h-mi̍h. 6 Góa ê iûⁿ sì-kòe kiâⁿ tī chiah ê soaⁿ--nih, tī ta̍k-ê koâiⁿ ê soaⁿ-téng, sì-sòaⁿ tī choân-tōe, bô lâng khì tui, bô lâng khì chhē. 7 Só͘-í lín chiah ê bo̍k-chiá tio̍h thiaⁿ Iâ-hô-hoa ê ōe. 8 Chú Iâ-hô-hoa kóng, Góa kí Góa ê éng-oa̍h lâi chiù-chōa, Góa ê iûⁿ in-ūi bô bo̍k-chiá, chiū chiâⁿ-chòe siū-chhiúⁿ ê mi̍h, iûⁿ iā chòe it-chhè iá-siù ê chia̍h-mi̍h; iā Góa ê bo̍k-chiá bô chhē Góa ê iûⁿ; chiah ê bo̍k-chiá in-ūi in iúⁿ-chhī ka-kī, bô iúⁿ-chhī Góa ê iûⁿ; 9 só͘-í lín chiah ê bo̍k-chiá tio̍h thiaⁿ Iâ-hô-hoa ê ōe; 10 Chú Iâ-hô-hoa án-ni kóng, Góa kap bo̍k-chiá chòe tùi-te̍k, beh tùi in ê chhiú tui-thó Góa ê iûⁿ, hō͘ in bô koh iúⁿ-chhī iûⁿ-kûn; bo̍k-chiá iā bô koh iúⁿ-chhī ka-kī; Góa beh kiù Góa ê iûⁿ thoat-lī in ê chhùi, bô koh chòe in ê chia̍h-mi̍h. 11 In-ūi Chú Iâ-hô-hoa án-ni kóng, Khòaⁿ ah, Góa beh pún-sin chhē Góa ê iûⁿ, lâi chhē-tio̍h--i. 12 Bo̍k-chiá tī iûⁿ-kûn sì-sòaⁿ ê ji̍t, cháiⁿ-iūⁿ chhē i ê iûⁿ, Góa iā beh chhin-chhiūⁿ án-ni chhē Góa ê iûⁿ; chiah ê iûⁿ tī ba̍t-hûn o͘-àm ê ji̍t, sì-sòaⁿ kàu ta̍k só͘-chāi, Góa beh tùi-hia kiù in tò--lâi. 13 Góa beh tùi lia̍t-kok-tiong chhōa in chhut, tùi ta̍k-kok ê lāi-bīn chū-chi̍p in, chhōa in tò-lâi in ê pún só͘-chāi; iā beh tī Í-sek-lia̍t soaⁿ chiah ê khoe-piⁿ, kéng-lāi it-chhè thang khiā-khí ê só͘-chāi, lâi iúⁿ-chhī in. 14 Góa beh tī hó-hó ê chháu-tiûⁿ iúⁿ-chhī in, in ê iûⁿ-tiâu beh tī Í-sek-lia̍t koâiⁿ-ūi ê soaⁿ; in beh tī hó-hó ê iûⁿ-tiâu-lāi tó-teh-khùn, iā tī Í-sek-lia̍t soaⁿ pûi-súi ê chháu-tiûⁿ chia̍h-chháu. 15 Chú Iâ-hô-hoa kóng, Góa beh pún-sin iúⁿ-chhī Góa ê iûⁿ, hō͘ in tó-teh-khùn. 16 Sit-lo̍h--ê Góa beh chhē i; siū kóaⁿ-tio̍k--ê, Góa beh chhōa i tò-lâi; siū-siong--ê Góa beh pau--i; phòa-pīⁿ--ê, Góa beh i-tī i; to̍k-to̍k pûi--ê, ióng--ê, Góa beh tû-bia̍t--i, iā beh péng-kong iúⁿ-chhī in. 17 Góa ê iûⁿ-kûn ah, lūn-kàu lín, Chú Iâ-hô-hoa án-ni kóng, Góa beh tī iûⁿ kap iûⁿ ê tiong-kan, kang ê mî-iûⁿ kap kang ê soaⁿ-iûⁿ ê tiong-kan, kiâⁿ phòaⁿ-toàn. 18 Lí tī hó-hó ê chháu-tiûⁿ chia̍h-chháu, iáu lia̍h-chòe sió-khóa sū mah? chhun ê chháu lín kéng-jiân ēng kha thún-ta̍h--i? lín lim chheng ê chúi; chhun--ê lín kéng-jiân ēng kha phah-lô--i? 19 Lūn-kàu Góa ê iûⁿ sī chia̍h lín ēng kha ta̍h--ê, lim lín ēng kha phah-lô--ê. 20 Só͘-í Chú Iâ-hô-hoa tùi in án-ni kóng, Khòaⁿ ah, Góa pún-sin tī pûi ê iûⁿ kap sán ê iûⁿ ê tiong-kan, kiâⁿ phòaⁿ-toàn. 21 In-ūi lín ēng sin-khu, ēng keng-thâu khoeh--in, ēng lín ê kak tak phòa-pīⁿ--ê, tì-kàu hō͘ in sì-sòaⁿ tī gōa-bīn. 22 Só͘-í Góa beh chín-kiù Góa ê iûⁿ-kûn, bô koh chòe siū chhiúⁿ ê mi̍h; Góa ia̍h beh tī iûⁿ kap iûⁿ ê tiong-kan kiâⁿ phòaⁿ-toàn. 23 Góa beh siat-li̍p chi̍t ê bo̍k-chiá, chiàu-kò͘ in, i beh iúⁿ-chhī in; chiū-sī Góa ê lô͘-po̍k Tāi-pi̍t; i beh iúⁿ-chhī in, chòe in ê bo̍k-chiá. 24 Góa Iâ-hô-hoa beh chòe in ê Siōng-tè; Góa ê lô͘-po̍k Tāi-pi̍t beh tī in ê tiong-kan chòe siú-léng; che sī Góa Iâ-hô-hoa kóng--ê. 25 Góa beh kap in li̍p pêng-an ê iok, hō͘ ok-siù tùi kéng-lāi toān-choa̍t; in chiū beh an-jiân khiā-khí tī khòng-iá, khùn tī chhiū-nâ-lāi. 26 Góa beh hō͘ in kap Góa ê soaⁿ sì-ûi ê só͘-chāi chiâⁿ-chòe hok-khì ê goân-thâu; Góa ia̍h beh chiàu-sî lo̍h-hō͘, beh ū si hok-khì ê tōa-hō͘. 27 Chhân-iá ê chhiū beh kiat ké-chí; tōe iā beh chhut-sán; in beh an-jiân khiā-khí tī pún só͘-chāi; Góa at-chi̍h in só͘ pē ê taⁿ, kiù in thoat-lī hit ê lia̍h in chòe lô͘-châi ê lâng ê chhiú; hit-sî in chiū chai Góa sī Iâ-hô-hoa. 28 In bô koh chòe gōa-pang lâng só͘ chhiúⁿ ê mi̍h, tōe-chiūⁿ ê iá-siù iā bô koh thun-chia̍h in; sī beh an-jiân khiā-khí, bô lâng hō͘ in kiaⁿ-hiâⁿ. 29 Góa beh kā in heng-khí chi̍t ê chhut-miâ chai-chèng ê só͘-chāi; in tī kéng-lāi, bô koh hō͘ ki-hng só͘ bia̍t; iā bô koh siū-tio̍h gōa-pang-lâng ê lêng-jio̍k. 30 In beh chai Góa Iâ-hô-hoa in ê Siōng-tè, sī kap in tī-teh; iā chai in Í-sek-lia̍t-ke sī Góa ê peh-sìⁿ; che sī Chú Iâ-hô-hoa kóng--ê. 31 Lín sī Góa ê iûⁿ, sī Góa chháu-tiûⁿ ê iûⁿ; lín sī lâng; Góa iā sī lín ê Siōng-tè; che sī Chú Iâ-hô-hoa kóng--ê.
1 耶和華ê話臨到我講， 2 人子ah，你tio̍h面ǹg Se-jíⁿ山，宣傳來攻擊伊。 3 對伊講，主耶和華án-ni講，看ah，Se-jíⁿ山ah，我kap你做對敵，我beh伸手攻擊你；hō͘你冷靜，thang hō͘人gông-ngia̍h。 4 我beh hō͘你chiahê城變做拋荒，hō͘你冷靜；你就知我是耶和華。 5 因為你khǹg永遠ê怨恨；tī以色列族tú-tio̍h災厄，罪過結局ê時，你將in交hō͘刀劍ê勢力。 6 所以主耶和華án-ni講，我指我ê永活來chiù-chōa，我的確hō͘你tú-tio̍h流血ê報應；罪的確追趕你；你已經無怨恨刣人流血，所以chitê罪的確追jip你。 7 我beh hō͘ Se-jíⁿ山拋荒冷靜；tùi-hia往來ê人我beh剪除伊。 8 我beh hō͘伊hiahê山，受刣 ê人滿滿；hō͘刀劍刣死ê beh倒tī你ê小山，kap山谷，kap一切ê坑溝。 9 我beh hō͘你永遠拋荒，你chiahê城的確無人khiā起；就lín的確知我是耶和華。 10 因為lín講，Chit兩國兩個地方，lóng beh歸我，阮beh得tio̍h；其實耶和華tī-hia。 11 所以主耶和華án-ni講，我kí我ê永活來chiù-chōa；我beh照你ê受氣，kap照你為tio̍h怨恨來行tī in ê怨妒，款待你；就我審判你ê時beh顯明家己tī in中間。 12 你就知我耶和華已經聽見你攻擊以色列chiahê山所講ê謗瀆，是講，拋荒lah，in已經交tī阮，hō͘阮thang吞伊。 13 Koh lín用嘴ǹg我來家己誇口；加添lín chiahê話來攻擊我；我聽見lah。 14 主耶和華án-ni講，當全地歡喜ê時，我beh hō͘你拋荒。 15 你因為以色列家ê基業拋荒，來歡喜；我也beh án-ni款待你；Se-jíⁿ山ah，你beh拋荒，以及Í-tong全地也án-ni；in就知我是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h bīn ǹg Se-jíⁿ soaⁿ, soan-thoân lâi kong-kek i. 3 Tùi i kóng, Chú Iâ-hô-hoa án-ni kóng, Khòaⁿ ah, Se-jíⁿ soaⁿ ah, Góa kap lí chòe tùi-te̍k, Góa beh chhun-chhiú kong-kek lí; hō͘ lí léng-chēng, thang hō͘ lâng gông-ngia̍h. 4 Góa beh hō͘ lí chiah ê siâⁿ pìⁿ-chòe pha-hng, hō͘ lí léng-chēng; lí chiū chai Góa sī Iâ-hô-hoa. 5 In-ūi lí khǹg éng-oán ê oàn-hūn; tī Í-sek-lia̍t cho̍k tú-tio̍h chai-ē, chōe-kòa kiat-kio̍k ê sî, lí chiong in kau hō͘ to-kiàm ê sè-le̍k. 6 Só͘-í Chú Iâ-hô-hoa án-ni kóng, Góa chí Góa ê éng-oa̍h lâi chiù-chōa, Góa tek-khak hō͘ lí tú-tio̍h lâu-huih ê pò-èng; chōe tek-khak tui-kóaⁿ lí; lí í-keng bô oàn-hūn thâi lâng lâu huih, só͘-í chit ê chōe tek-khak tui-jip lí. 7 Góa beh hō͘ Se-jíⁿ-soaⁿ pha-hng léng-chēng; tùi-hia óng-lâi ê lâng Góa beh chián-tû i. 8 Góa beh hō͘ i hiah ê soaⁿ, siū thâi ê lâng móa-móa; hō͘ to-kiàm thâi-sí--ê beh tó tī lí ê sió-soaⁿ, kap soaⁿ-kok, kap it-chhè ê khiⁿ-kau. 9 Góa beh hō͘ lí éng-oán pha-hng, lí chiah ê siâⁿ tek-khak bô lâng khiā-khí; chiū lín tek-khak chai Góa sī Iâ-hô-hoa. 10 In-ūi lín kóng, Chí nn̄g-kok nn̄g ê tōe-hng, lóng beh kui góa, goán beh tit-tio̍h; kî-si̍t Iâ-hô-hoa tī-hia. 11 Só͘-í Chú Iâ-hô-hoa án-ni kóng, Góa kí Góa ê éng-oa̍h lâi chiù-chōa; Góa beh chiàu lí ê siū-khì, kap chiàu lí ūi-tio̍h oàn-hūn lâi kiâⁿ tī in ê oàn-tò͘, khoán-thāi lí; chiū Góa sím-phòaⁿ lí ê sî beh hián-bêng ka-kī tī in tiong-kan. 12 Lí chiū chai Góa Iâ-hô-hoa í-keng thiaⁿ-kìⁿ lí kong-kek Í-sek-lia̍t chiah ê soaⁿ só͘ kóng ê pòng-to̍k, sī kóng, Pha-hng lah, in í-keng kau tī goán, hō͘ goán thang thun i. 13 Koh lín ēng chhùi ǹg Góa lâi ka-kī khoa-kháu; ke-thiⁿ lín chiah ê ōe lâi kong-kek Góa; Góa thiaⁿ-kìⁿ lah. 14 Chú Iâ-hô-hoa án-ni kóng, Tng choân-tōe hoaⁿ-hí ê sî, Góa beh hō͘ lí pha-hng. 15 Lí in-ūi Í-sek-lia̍t-ke ê ki-gia̍p pha-hng, lâi hoaⁿ-hí; Góa iā beh án-ni khoán-thāi lí; Se-jíⁿ soaⁿ ah, lí beh pha-hng, í-ki̍p Í-tong choân-tōe iā án-ni; in chiū chai Góa sī Iâ-hô-hoa.
1 人子ah，你tio̍h對以色列chiahê山來宣傳，講，以色列chiahê山ah，tio̍h聽耶和華ê話。 2 主耶和華án-ni講，因為對敵攻擊你講，Hō͘-chāi，古早高ê所在lóng hō͘阮做業lah。 3 所以你tio̍h宣傳講，主耶和華án-ni講，因為in hō͘你拋荒，tī四圍吞咬你；beh hō͘你歸tī所chhun ê外邦人做業；也hō͘厚口舌ê人議論你，hō͘眾百姓譭謗你； 4 所以以色列chiahê山ah，tio̍h聽主耶和華ê話：主耶和華tùi chiahê山，chiahê嶺，chiahê坑溝，chiahê山谷，chiahê拋荒ê所在，受棄sak ê城，hō͘四圍所chhun ê外邦人搶劫譏刺ê，án-ni講； 5 所以主耶和華án-ni講，我實在tī熱熱ê怨妒，用話責備列邦所chhun-ê以及Í-tong ê全地；因為in分派我ê地做家己ê業；滿心歡喜，神魂藐視；ài趕逐伊ê百姓，來搶劫伊。 6 所以你tio̍h論以色列地來宣傳；tùi伊chiahê山，chiahê嶺，chiahê坑溝，chiahê山谷講，主耶和華án-ni講，看ah，我tī我ê怨妒，kap我ê大受氣來講，因為你已經受異邦人ê凌辱； 7 所以主耶和華án-ni講，我舉起我ê手，講，Tī lín四圍ê異邦人，in實在beh受in ê凌辱。 8 獨獨lín以色列chiahê山ah，lín的確發出lín ê枝椏，koh beh結果子hō͘我ê百姓以色列；因為in近近beh到lah。 9 看ah，我是為lín ê，我beh oa̍t-tńg ǹg lín，就lín beh hō͘人種作。 10 我koh beh加添人tī lín ê頂面，就是以色列家家戶戶，一切lóng án-ni；就伊chiahê城beh有人khiā起；拋荒ê所在得tio̍h起造。 11 我也beh加添人kap cheng-siⁿ tī lín ê頂面；in beh生湠真chōe；我beh hō͘ lín照舊有人khiā起；koh beh好款待lín，贏過起頭ê時；lín就知我是耶和華。 12 我beh hō͘人行tī lín ê頂面，就是我ê百姓以色列；in beh得tio̍h你，你beh做in ê業；你也無koh hō͘ in絕嗣。 13 主耶和華án-ni講，因為人對lín講，你是吞食人ê，koh hō͘百姓絕嗣； 14 所以主耶和華án-ni講，你無beh koh吞食人，亦無beh koh hō͘你ê國民絕嗣。 15 我無beh hō͘你koh聽見外邦人ê凌辱，你也無koh受萬百姓ê譭謗，你也無koh hō͘你ê國民tio̍h-tak；這是主耶和華講ê。 16 耶和華ê話koh臨到我講， 17 人子ah，以色列家，khiā起tī本所在ê時，用in ê所行所做，phah lâ-sâm伊；in ê所行tī我ê面前是親像婦人人經期到ê lâ-sâm。 18 因為in tī hitê所在流人ê血，koh因為in用偶像phah lâ-sâm伊；所以我piàⁿ出我ê受氣tī伊ê頂面。 19 我分散in tī列國，in就四散tī列邦中；我就照in ê所行，in ê所做來審判in。 20 In去到in所到ê外邦人hia，褻瀆我ê聖名；因為人指in來講，這是耶和華ê百姓，tùi伊ê地出來ê。 21 總是我保惜我ê聖名；就是以色列家，tī in所到ê列國中，所褻瀆ê。 22 所以你tio̍h對以色列家講，主耶和華án-ni講，以色列家ah，我行chitê，m̄是為tio̍h lín ê緣故，就是為tio̍h我ê聖名ê緣故；就是lín行到ê列國中所褻瀆ê。 23 我ê大名受褻瀆tī異邦中，就是lín所褻瀆tī in中間ê；我beh hō͘伊做聖；koh我對lín顯明家己做聖tī in ê目睭前；就異邦人beh知我是耶和華；這是主耶和華所講ê。 24 我beh帶lín出列邦，tùi列國中聚集lín，chhōa lín入lín ê本所在。 25 我也beh用清ê水hiù lín，lín就清氣；我beh洗清lín，除去lín一切ê lâ-sâm，kap lín一切ê偶像。 26 我beh用新ê心賞賜lín；也beh用新ê神hē tī lín ê內面；koh beh tùi lín ê肉體中除去親像石ê心，賞賜lín親像肉ê心。 27 我beh將我ê神hē tī lín ê內面，hō͘ lín順thàn我ê律例，守我ê法度來行伊。 28 Lín beh khiā起tī我所賞賜lín ê列祖ê地；lín beh做我ê百姓，我beh做lín ê上帝。 29 我beh救lín脫離lín一切ê污穢；也beh叫五穀hō͘伊豐盛，無hō͘ lín tú-tio̍h飢荒。 30 我beh加添樹木ê果子，以及田園ê土產；hō͘ lín無koh因為飢荒受外邦人ê凌辱。 31 Hit時lín beh記得lín ê pháiⁿ所行，kap lín m̄好ê所做；就因為lín ê罪過，kap可惡ê事，tī家己ê面前來厭賤家己。 32 主耶和華講，Lín tio̍h知我án-ni行m̄是為tio̍h lín ê緣故；以色列家ah，lín tio̍h為家己ê所行，來漏氣見笑。 33 主耶和華án-ni講，我洗清lín，除去lín一切罪過ê日，beh hō͘ lín ê城有人khiā起，拋荒ê所在得tio̍h起造。 34 前過路ê人看做荒廢ê地，taⁿ chitê荒廢ê地koh有人種作。 35 人beh講，前做荒廢ê地，taⁿ親像伊甸ê園；chitê荒廢，冷靜，毀壞ê城，taⁿ 起真堅固，有人khiā起。 36 Hit時tī lín四圍所chhun ê外邦人，beh知我耶和華起造hiahê倒壞ê所在，栽培荒廢ê地；我耶和華已經講伊，的確成伊。 37 主耶和華án-ni講，我beh hō͘以色列家為tio̍h chitê事求我，致到我kā in成；我beh加添in ê人額，親像羊群。 38 親像獻祭ê羊群，就是親像耶路撒冷守節ê時ê羊群；án-ni，chiahê拋荒ê城，的確有kui群人滿滿；in就知我是耶和華。
1 Jîn-chú ah, lí tio̍h tùi Í-sek-lia̍t chiah ê soaⁿ lâi soan-thoân, kóng, Í-sek-lia̍t chiah ê soaⁿ ah, tio̍h thiaⁿ Iâ-hô-hoa ê ōe. 2 Chú Iâ-hô-hoa án-ni kóng, In-ūi tùi-te̍k kong-kek lí kóng, Hō͘--chāi, kó͘-chá koâiⁿ ê só͘-chāi lóng hō͘ goán chòe-gia̍p lah. 3 Só͘-í lí tio̍h soan-thoân kóng, Chú Iâ-hô-hoa án-ni kóng, In-ūi in hō͘ lí pha-hng, tī sì-ûi thun-kā lí; beh hō͘ lí kui tī só͘ chhun ê gōa-pang-lâng chòe gia̍p; iā hō͘ kāu-kháu-sia̍t ê lâng gī-lūn lí, hō͘ chèng peh-sìⁿ húi-pòng lí; 4 só͘-í Í-sek-lia̍t chiah ê soaⁿ ah, tio̍h thiaⁿ Chú Iâ-hô-hoa ê ōe: Chú Iâ-hô-hoa tùi chiah ê soaⁿ, chiah ê niá, chiah ê khiⁿ-kau, chiah ê soaⁿ-kok, chiah ê pha-hng ê só͘-chāi, siū khì-sak ê siâⁿ, hō͘ sì-ûi só͘ chhun ê gōa-pang-lâng chhiúⁿ-kiap ki-chhì--ê, án-ni kóng; 5 só͘-í Chú Iâ-hô-hoa án-ni kóng, Góa si̍t-chāi tī jia̍t-jia̍t ê oàn-tò͘, ēng ōe chek-pī lia̍t-pang só͘ chhun--ê í-ki̍p Í-tong ê choân-tōe; in-ūi in hun-phài Góa ê tōe chòe ka-kī ê gia̍p; móa-sim hoaⁿ-hí, sîn-hûn biáu-sī; ài kóaⁿ-tio̍k i ê peh-sìⁿ, lâi chhiúⁿ-kiap--i. 6 Só͘-í lí tio̍h lūn Í-sek-lia̍t tōe lâi soan-thoân; tùi i chiah ê soaⁿ, chiah ê niá, chiah ê khiⁿ-kau, chiah ê soaⁿ-kok kóng, Chú Iâ-hô-hoa án-ni kóng, Khòaⁿ ah, Góa tī góa ê oàn-tò͘, kap Góa ê tōa siū-khì lâi kóng, in-ūi lí í-keng siū īⁿ-pang lâng ê lêng-jio̍k; 7 só͘-í Chú Iâ-hô-hoa án-ni kóng, Góa kú-khí Góa ê chhiú, kóng, Tī lín sì-ûi ê īⁿ-pang lâng, in si̍t-chāi beh siū in ê lêng-jio̍k. 8 To̍k-to̍k lín Í-sek-lia̍t chiah ê soaⁿ ah, lín tek-khak hoat-chhut lín ê ki-oāiⁿ, koh beh kiat ké-chí hō͘ Góa ê peh-sìⁿ Í-sek-lia̍t; in-ūi in kūn-kūn beh kàu lah. 9 Khòaⁿ ah, Góa sī ūi lín ê, Góa beh oa̍t-tńg ǹg lín, chiū lín beh hō͘ lâng chèng-choh. 10 Góa koh beh ke-thiⁿ lâng tī lín ê téng-bīn, chiū-sī Í-sek-lia̍t ke-ke hō͘-hō͘, it-chhè lóng án-ni; chiū i chiah ê siâⁿ beh ū lâng khiā-khí; pha-hng ê só͘-chāi tit-tio̍h khí-chō. 11 Góa iā beh ke-thiⁿ lâng kap cheng-siⁿ tī lín ê téng-bīn; in beh siⁿ-thòaⁿ chin-chōe; Góa beh hō͘ lín chiàu-kū ū lâng khiā-khí; koh beh hó khoán-thāi lín, iâⁿ-kè khí-thâu ê sî; lín chiū chai Góa sī Iâ-hô-hoa. 12 Góa beh hō͘ lâng kiâⁿ tī lín ê téng-bīn, chiū-sī Góa ê peh-sìⁿ Í-sek-lia̍t; in beh tit-tio̍h lí, lí beh chòe in ê gia̍p; lí iā bô koh hō͘ in choa̍t-sû. 13 Chú Iâ-hô-hoa án-ni kóng, In-ūi lâng tùi lín kóng, Lí sī thun-chia̍h lâng--ê, koh hō͘ peh-sìⁿ choa̍t-sû; 14 só͘-í Chú Iâ-hô-hoa án-ni kóng, Lí bô beh koh thun-chia̍h lâng, ia̍h bô beh koh hō͘ lí ê kok-bîn choa̍t-sû. 15 Góa bô beh hō͘ lí koh thiaⁿ-kìⁿ gōa-pang lâng ê lêng-jio̍k, lí iā bô koh siū bān peh-sìⁿ ê húi-pòng, lí iā bô koh hō͘ lí ê kok-bîn tio̍h-tak; che sī Chú Iâ-hô-hoa kóng--ê. 16 Iâ-hô-hoa ê ōe koh lîm-kàu góa kóng, 17 Jîn-chú ah, Í-sek-lia̍t-ke, khiā-khí tī pún só͘-chāi ê sî, ēng in ê só͘-kiâⁿ só͘-chòe, phah lâ-sâm--i; in ê só͘-kiâⁿ tī Góa ê bīn-chêng sī chhin-chhiūⁿ hū-jîn-lâng keng-kî kàu ê lâ-sâm. 18 In-ūi in tī hit ê só͘-chāi lâu lâng ê huih, koh in-ūi in ēng ngó͘-siōng phah lâ-sâm--i; só͘-í Góa piàⁿ-chhut Góa ê siū-khì tī i ê téng-bīn. 19 Góa hun-sòaⁿ in tī lia̍t-kok, in chiū sì-sòaⁿ tī lia̍t-pang-tiong; Góa chiū chiàu in ê só͘-kiâⁿ, in ê só͘-chòe lâi sím-phòaⁿ--in. 20 In khì kàu in só͘ kàu ê gōa-pang lâng hia, siat-to̍k Góa ê sèng-miâ; in-ūi lâng chí in lâi kóng, Che sī Iâ-hô-hoa ê peh-sìⁿ, tùi I ê tōe chhut-lâi--ê. 21 Chóng-sī Góa pó-sioh Góa ê sèng-miâ; chiū-sī Í-sek-lia̍t-ke, tī in só͘ kàu ê lia̍t-kok-tiong, só͘ siat-to̍k--ê. 22 Só͘-í lí tio̍h tùi Í-sek-lia̍t-ke kóng, Chú Iâ-hô-hoa án-ni kóng, Í-sek-lia̍t-ke ah, Góa kiâⁿ chit-ê, m̄-sī ūi-tio̍h lín ê iân-kò͘, chiū-sī ūi-tio̍h Góa ê sèng-miâ ê iân-kò͘; chiū-sī lín kiâⁿ-kàu ê lia̍t-kok-tiong só͘ siat-to̍k--ê. 23 Góa ê tōa-miâ siū siat-to̍k tī īⁿ-pang-tiong, chiū-sī lín só͘ siat-to̍k tī in tiong-kan--ê; Góa beh hō͘ i chòe-sèng; koh Góa tùi lín hián-bêng ka-kī chòe-sèng tī in ê ba̍k-chiu-chêng; chiū īⁿ-pang-lâng beh chai Góa sī Iâ-hô-hoa; che sī Chú Iâ-hô-hoa só͘ kóng--ê. 24 Góa beh tòa lín chhut lia̍t-pang, tùi lia̍t-kok-tiong chū-chi̍p lín, chhōa lín ji̍p lín ê pún só͘-chāi. 25 Góa iā beh ēng chheng ê chúi hiù lín, lín chiū chheng-khì; Góa beh sóe-chheng lín, tû-khì lín it-chhè ê lâ-sâm, kap lín it-chhè ê ngó͘-siōng. 26 Góa beh ēng sin ê sim siúⁿ-sù lín; iā beh ēng sin ê sîn hē tī lín ê lāi-bīn; koh beh tùi lín ê jio̍k-thé-tiong tû-khì chhin-chhiūⁿ chio̍h ê sim, siúⁿ-sù lín chhin-chhiūⁿ bah ê sim. 27 Góa beh chiong Góa ê sîn hē tī lín ê lāi-bīn, hō͘ lín sūn-thàn Góa ê lu̍t-lē, siú Góa ê hoat-tō͘ lâi kiâⁿ--i. 28 Lín beh khiā-khí tī Góa só͘ siúⁿ-sù lín ê lia̍t-chó͘ ê tōe; lín beh chòe Góa ê peh-sìⁿ, Góa beh chòe lín ê Siōng-tè. 29 Góa beh kiù lín thoat-lī lín it-chhè ê ù-òe; iā beh kiò ngó͘-kok hō͘ i hong-sēng, bô hō͘ lín tú-tio̍h ki-hng. 30 Góa beh ke-thiⁿ chhiū-ba̍k ê ké-chí, í-ki̍p chhân-hn̂g ê thó͘-sán; hō͘ lín bô koh in-ūi ki-hng siū gōa-pang-lâng ê lêng-jio̍k. 31 Hit-sî lín beh kì-tit lín ê pháiⁿ só͘-kiâⁿ, kap lín m̄-hó ê só͘-chòe; chiū in-ūi lín ê chōe-kòa, kap khó-ò͘ⁿ ê sū, tī ka-kī ê bīn-chêng lâi iàm-chiān ka-kī. 32 Chú Iâ-hô-hoa kóng, Lín tio̍h chai Góa án-ni kiâⁿ m̄-sī ūi-tio̍h lín ê iân-kò͘; Í-sek-lia̍t-ke ah, lín tio̍h ūi ka-kī ê só͘-kiâⁿ, lâi làu-khùi kiàn-siàu. 33 Chú Iâ-hô-hoa án-ni kóng, Góa sóe-chheng lín, tû-khì lín it-chhè chōe-kòa ê ji̍t, beh hō͘ lín ê siâⁿ ū lâng khiā-khí, pha-hng ê só͘-chāi tit-tio̍h khí-chō. 34 Chêng kè-lō͘ ê lâng khòaⁿ-chòe hong-hòe ê tōe, taⁿ chit ê hong-hòe ê tōe koh ū lâng chèng-choh. 35 Lâng beh kóng, Chêng chòe hong-hòe ê tōe, taⁿ chhin-chhiūⁿ Ai-tiân ê hn̂g; chit ê hong-hòe, léng-chēng, húi-hoāi ê siâⁿ, taⁿ khí chin kian-kò͘, ū lâng khiā-khí. 36 Hit-sî tī lín sì-ûi só͘ chhun ê gōa-pang-lâng, beh chai Góa Iâ-hô-hoa khí-chō hiah ê tó-hoāi ê só͘-chāi, chai-pôe hong-hòe ê tōe; Góa Iâ-hô-hoa í-keng kóng--i, tek-khak chiâⁿ--i. 37 Chú Iâ-hô-hoa án-ni kóng, Góa beh hō͘ Í-sek-lia̍t-ke ūi-tio̍h chit ê sū kiû Góa, tì-kàu Góa kā in chiâⁿ; Góa beh ke-thiⁿ in ê lâng-gia̍h, chhin-chhiūⁿ iûⁿ-kûn. 38 Chhin-chhiūⁿ hiàn-chè ê iûⁿ-kûn, chiū-sī chhin-chhiūⁿ Iâ-lō͘-sat-léng siú-choeh ê sî ê iûⁿ-kûn; án-ni, chiah ê pha-hng ê siâⁿ, tek-khak ū kui-kûn lâng móa-móa; in chiū chai Góa sī Iâ-hô-hoa.
1 耶和華ê手hē tī我ê身上，耶和華用祂ê神chhōa我出去，hē我tī山谷中；hitê山谷有骨頭滿滿。 2 祂hō͘我tùi骨頭ê四圍經過；看ah，tī山谷ê面上有骨頭真chōe，看ah，in真枯焦。 3 祂對我講，人子ah，chiahê骨ōe活bōe？我應講，主耶和華ah，祢知伊。 4 祂koh對我講，你tio̍h tùi chiahê骨宣傳，來kā in講，Lín枯焦ê骨ah，tio̍h聽耶和華ê話。 5 主耶和華kā chiahê骨án-ni講，看ah，我beh hō͘活氣入lín ê內面，lín就beh活。 6 我beh hō͘ lín ê頂面有筋，koh hō͘ lín有肉，koh用皮kā lín包，用活氣入tī lín，lín就會活；lín就知我是耶和華。 7 Tùi án-ni，我thàn命令來宣傳；當我teh宣傳ê時，有聲，忽然地動，chiahê骨相連合，ta̍k支歸伊ê本位。 8 我看伊，看見骨ê頂面有筋，也有肉，koh有皮包tī伊ê頂面；總是內面無活氣。 9 伊就對我講，你tio̍h ǹg風來宣傳；人子ah，tio̍h宣傳，來對風講，主耶和華án-ni講，活氣ah，tùi hiahê風來，pûn tī chiah ê 受刣-ê，hō͘ in能活。 10 Tùi án-ni，我照伊所命令我ê來宣傳；活氣就來，入tī in；in就活，起來khiā，成做極大ê軍隊。 11 祂就kā我講，人子ah，chiahê骨就是以色列ê全家；看ah，in講，阮ê骨lóng枯焦，阮ê ǹg望lóng失落；阮一盡剿滅。 12 所以你tio̍h宣傳，來對in講，主耶和華án-ni講，我ê百姓ah，看ah，我beh開 lín ê墓，hō͘ lín tùi lín ê墓起來，chhōa lín入以色列地。 13 我ê百姓ah，我開lín ê墓，hō͘ lín tùi lín ê墓起來，lín就知我是耶和華。 14 我beh將我ê神hē tī lín ê內面，lín就beh活；我安置lín tī本所在，lín就知我耶和華án-ni講，也án-ni成；這是耶和華講ê。 15 耶和華ê話koh臨到我講， 16 人子ah，你tio̍h the̍h一塊柴板，tī伊ê頂面寫，為偤大kap伊ê同伴以色列族；koh the̍h一塊柴板，tī伊ê頂面寫，為tio̍h約瑟、Í-hoat-liân，kap伊ê同伴以色列全家ê柴板。 17 你tio̍h hō͘ in相óa，連做一塊柴板；就tī你ê手中beh成做一塊。 18 設使你ê百姓問你講，你做chitê甚麼意思，你m̄指示阮mah？ 19 你就tio̍h對in講，主耶和華án-ni講，看ah，我beh the̍h Í-hoat-liân ê手所kia̍h約瑟ê柴板，kap伊ê同伴以色列chiahê支派；我beh hē伊 óa tī偤大ê柴板，hō͘伊成做一塊ê柴板，就伊beh成做一塊tī我ê手。 20 你所寫hí兩塊柴板，tio̍h tī in ê目睭前，kia̍h tī你ê手。 21 你tio̍h對in講，主耶和華án-ni講，看ah，我beh取以色列族tùi in所到ê ta̍k國出來；koh tùi四圍聚集in，chhōa in tò來本所在。 22 我beh hō͘ in tī hitê地，tī以色列ê山，合-做一百姓；有一个王做in眾人ê王；in無koh做兩pêng ê百姓，也無koh分做兩-國。 23 也無koh因為偶像，kap可惡ê物，以及一切ê罪過，phah lâ-sâm本身；我beh救in出in一切khiā起ê所在，就是in犯罪hia；我beh清氣in；án-ni，in beh做我ê百姓；我beh做in ê上帝。 24 我ê奴僕大衛beh做in ê王；in lóng beh歸tī一个牧者；in beh順thàn我ê法度，守我ê律例來行。 25 In beh khiā起tī我賞賜我ê奴僕雅各ê地；就是lín ê列祖所khiā起ê；in kap in ê kiáⁿ孫，以及kiáⁿ-kiáⁿ孫孫，lóng永遠khiā起tī-hia。我ê奴僕大衛beh做in ê人君，直到永遠。 26 Koh我beh kap in立平安ê約，kap in做永遠ê約；我也beh 建設in，hō͘ in ê人額加添，koh tī in ê中間設立我ê聖所直到永遠。 27 我khiā起ê所在beh tī in中間；我beh做in ê上帝，in beh做我ê百姓。 28 我ê聖所tī in中間，直到永遠；外邦人就beh知我是耶和華，hō͘以色列成做聖ê。
1 Iâ-hô-hoa ê chhiú hē tī góa ê sin-chiūⁿ, Iâ-hô-hoa ēng I ê sîn chhōa góa chhut-khì, hē góa tī soaⁿ-kok-tiong; hit ê soaⁿ-kok ū kut-thâu móa-móa. 2 I hō͘ góa tùi kut-thâu ê sì-ûi keng-kè; khòaⁿ ah, tī soaⁿ-kok ê bīn-chiūⁿ ū kut-thâu chin-chōe, khòaⁿ ah, in chin ko͘-tâ. 3 I tùi góa kóng, Jîn-chú ah, chiah ê kut ōe oa̍h bōe? Góa ìn kóng, Chú Iâ-hô-hoa ah, Lí chai--i. 4 I koh tùi góa kóng, Lí tio̍h tùi chiah ê kut soan-thoân, lâi kā in kóng, Lín ko͘-tâ ê kut ah, tio̍h thiaⁿ Iâ-hô-hoa ê ōe. 5 Chú Iâ-hô-hoa kā chiah ê kut án-ni kóng, Khòaⁿ ah, Góa beh hō͘ oa̍h-khì ji̍p lín ê lāi-bīn, lín chiū beh oa̍h. 6 Góa beh hō͘ lín ê téng-bīn ū kun, koh hō͘ lín ū bah, koh ēng phê kā lín pau, ēng oa̍h-khì ji̍p tī lín, lín chiū ōe oa̍h; lín chiū chai Góa sī Iâ-hô-hoa. 7 Tùi án-ni, góa thàn bēng-lēng lâi soan-thoân; tng góa teh soan-thoân ê sî, ū siaⁿ, hut-jiân tōe-tāng, chiah ê kut saⁿ liân-ha̍p, ta̍k-ki kui i ê pún-ūi. 8 Góa khòaⁿ i, khòaⁿ-kìⁿ kut ê téng-bīn ū kun, iā ū bah, koh ū phê pau tī i ê téng-bīn; chóng-sī lāi-bīn bô oa̍h-khì. 9 I chiū tùi góa kóng, Lí tio̍h ǹg hong lâi soan-thoân; jîn-chú ah, tio̍h soan-thoân, lâi tùi hong kóng, Chú Iâ-hô-hoa án-ni kóng, Oa̍h-khì ah, tùi hiah ê hong lâi, pûn tī chiah ê siū-thâi--ê, hō͘ in ōe oa̍h. 10 Tùi án-ni, góa chiàu I só͘ bēng-lēng góa--ê lâi soan-thoân; oa̍h-khì chiū lâi, ji̍p tī in; in chiū oa̍h, khí--lâi khiā, chiâⁿ-chòe ke̍k-tōa ê kun-tūi. 11 I chiū kā góa kóng, Jîn-chú ah, chiah ê kut chiū-sī Í-sek-lia̍t ê choân-ke; khòaⁿ ah, in kóng, Goán ê kut lóng ko͘-tâ, goán ê ǹg-bāng lóng sit-lo̍h; goán it-chīn châu-bia̍t. 12 Só͘-í lí tio̍h soan-thoân, lâi tùi in kóng, Chú Iâ-hô-hoa án-ni kóng, Góa ê peh-sìⁿ ah, khòaⁿ ah, Góa beh khui lín ê bōng, hō͘ lín tùi lín ê bōng khí--lâi, chhōa lín ji̍p Í-sek-lia̍t tōe. 13 Góa ê peh-sìⁿ ah, Góa khui lín ê bōng, hō͘ lín tùi lín ê bōng khí--lâi, lín chiū chai Góa sī Iâ-hô-hoa. 14 Góa beh chiong Góa ê sîn hē tī lín ê lāi-bīn, lín chiū beh oa̍h; Góa an-tì lín tī pún só͘-chāi, lín chiū chai Góa Iâ-hô-hoa án-ni kóng, iā án-ni chiâⁿ; che sī Iâ-hô-hoa kóng--ê. 15 Iâ-hô-hoa ê ōe koh lîm-kàu góa kóng, 16 Jîn-chú ah, lí tio̍h the̍h chi̍t-tè chhâ-pán, tī i ê téng-bīn siá, Ūi Iû-tāi kap i ê tâng-phōaⁿ Í-sek-lia̍t cho̍k; koh the̍h chi̍t tè chhâ-pán, tī i ê téng-bīn siá, Ūi-tio̍h Iok-sek, Í-hoat-liân, kap i ê tâng-phōaⁿ Í-sek-lia̍t choân-ke ê chhâ-pán. 17 Lí tio̍h hō͘ in saⁿ-óa, liân chòe chi̍t-tè chhâ-pán; chiū tī lí ê chhiú-tiong beh chiâⁿ-chòe chi̍t-tè. 18 Siat-sú lí ê peh-sìⁿ mn̄g lí kóng, Lí chòe chit-ê sím-mi̍h ì-sù, lí m̄ chí-sī goán mah? 19 lí chiū tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh the̍h Í-hoat-liân ê chhiú só͘ kia̍h Iok-sek ê chhâ-pán, kap i ê tâng-phōaⁿ Í-sek-lia̍t chiah ê chi-phài; Góa beh hē--i óa tī Iû-tāi ê chhâ-pán, hō͘ i chiâⁿ-chòe chi̍t-tè ê chhâ-pán, chiū i beh chiâⁿ-chòe chi̍t-tè tī Góa ê chhiú. 20 Lí só͘ siá hí nn̄g tè chhâ-pán, tio̍h tī in ê ba̍k-chiu-chêng, kia̍h tī lí ê chhiú. 21 Lí tio̍h tùi in kóng, Chú Iâ-hô-hoa án-ni kóng, Khòaⁿ ah, Góa beh chhú Í-sek-lia̍t cho̍k tùi in só͘ kàu ê ta̍k-kok chhut--lâi; koh tùi sì-ûi chū-chi̍p in, chhōa in tò-lâi pún só͘-chāi. 22 Góa beh hō͘ in tī hit ê tōe, tī Í-sek-lia̍t ê soaⁿ, ha̍p-chòe chi̍t peh-sìⁿ; ū chi̍t ê ông chòe in chèng-lâng ê ông; in bô koh chòe nn̄g-pêng ê peh-sìⁿ, iā bô koh pun-chòe nn̄g-kok. 23 Iā bô koh in-ūi ngó͘-siōng, kap khó-ò͘ⁿ ê mi̍h, í-ki̍p it-chhè ê chōe-kòa, phah lâ-sâm pún-sin; Góa beh kiù in chhut in it-chhè khiā-khí ê só͘-chāi, chiū-sī in hoān-chōe hia; Góa beh chheng-khì in; án-ni, in beh chòe Góa ê peh-sìⁿ; Góa beh chòe in ê Siōng-tè. 24 Góa ê lô͘-po̍k Tāi-pi̍t beh chòe in ê ông; in lóng beh kui tī chi̍t ê bo̍k-chiá; in beh sūn-thàn Góa ê hoat-tō͘, siú Góa ê lu̍t-lē lâi kiâⁿ. 25 In beh khiā-khí tī Góa siúⁿ-sù Góa ê lô͘-po̍k Ngá-kok ê tōe; chiū-sī lín ê lia̍t-chó͘ só͘ khiā-khí--ê; in kap in ê kiáⁿ-sun, í-ki̍p kiáⁿ-kiáⁿ sun-sun, lóng éng-oán khiā-khí tī-hia. Góa ê lô͘-po̍k Tāi-pi̍t beh chòe in ê jîn-kun, ti̍t-kàu éng-oán. 26 Koh Góa beh kap in li̍p pêng-an ê iok, kap in chòe éng-oán ê iok; Góa iā beh kiàn-siat in, hō͘ in ê lâng-gia̍h ke-thiⁿ, koh tī in ê tiong-kan siat-li̍p Góa ê sèng-só͘ ti̍t-kàu éng-oán. 27 Góa khiā-khí ê só͘-chāi beh tī in tiong-kan; Góa beh chòe in ê Siōng-tè, in beh chòe Góa ê peh-sìⁿ. 28 Góa ê sèng-só͘ tī in tiong-kan, ti̍t-kàu éng-oán; gōa-pang-lâng chiū beh chai Góa sī Iâ-hô-hoa, hō͘ Í-sek-lia̍t chiâⁿ-chòe sèng-ê.
1 耶和華ê話臨到我講， 2 人子ah，你tio̍h面ǹg Má-kok地ê Ko-kek，就是Lô-si，Bí-siat，Thó͘-pa ê人君，宣傳來攻擊伊，講， 3 主耶和華án-ni講，Lô-si，Bí-siat，Thó͘-pa ê人君，Ko-kek ah，看ah，我做你ê對敵； 4 我beh hō͘你oa̍t-tńg，用鉤鉤你ê牙槽，將你kap你ê軍兵，馬匹，馬兵，tòa出來，lóng穿真súi ê戰甲，成做大ê軍隊，giâ大小ê藤牌，ta̍k-ê kia̍h刀劍； 5 波斯人，Kó͘-si̍t人kap Hut人kap in來，ta̍k-ê giâ藤牌戴頭盔； 6 Ko-bia̍t kap伊ê軍隊；北方極頭ê Tô-ka-má族kap伊ê軍隊；koh有chōe-chōe百姓kap你做陣。 7 你tio̍h家己備辦，你kap聚集tī你hia ê軍隊lóng tio̍h備辦，你tio̍h做in ê 元帥。 8 Chōe-chōe日後你beh受辨理；到路尾ê年你beh來到脫離刀劍，tùi列國收回ê地，到以色列久久拋荒ê山；總是伊已經tùi列國中帶出，in lóng beh安然khiā起。 9 你kap你ê軍隊，以及kap你相kap來chōe-chōe國 ê百姓，lóng beh上來親像狂風來，你beh親像雲遮蓋地。 10 主耶和華án-ni講，到hit日beh有意思興起tī你ê心，你beh圖謀pháiⁿ ê計謀； 11 講，我beh上到鄉社ê地，到靜靜安然khiā起ê百姓hia，in所khiā起ê lóng無城牆，也無門無閂； 12 Thang搶所beh搶-ê，kiap所beh劫ê，oa̍t-tńg你ê手，攻擊hiahê前拋荒taⁿ有人khiā起ê地，以及hitê khiā起世界ê中心-點，tùi列國聚集，得tio̍h cheng-siⁿ貨財ê百姓。 13 Si-pa人，Tí-tàn人，Tha-si ê seng-lí人，kap in中間勇ê獅，lóng beh對你講，你來是beh搶所搶-ê mah？你聚集你ê軍隊是beh kiap所kiap-ê mah？beh the̍h金銀，tòa cheng-siⁿ貨財去mah？Beh大大搶所搶-ê mah？ 14 人子ah，你tio̍h因為án-ni宣傳，tùi Ko-kek講，主耶和華án-ni講，當我ê百姓以色列安然khiā起ê日，你kiám無得tio̍h知mah？ 15 你beh對你ê本所在，tùi北方ê極頭來，你kap chōe-chōe國 ê百姓相kap來，lóng是騎馬，最大-陣，chōe-chōe ê軍隊。 16 你beh上來攻擊我ê百姓以色列，親像密雲遮蓋地；tī路尾ê日我beh chhōa你來攻擊我ê地，Ko-kek ah，到我tī列邦ê面前，tī你ê身上顯明做聖ê時，thang hō͘ in bat我。 17 主耶和華án-ni講，我tī早時，用我ê奴僕，以色列ê先知，所講ê，就是你mah？當hiahê日in歷年讖語我beh chhōa你來攻擊in。 18 主耶和華講，Ko-kek上來攻擊以色列地ê日，我ê受氣beh tùi我ê鼻孔出。 19 因為我怨妒kap大受氣親像火，就講，hit日tī以色列地的確有大振動； 20 甚至海中ê魚，空中ê飛鳥，田野ê獸，以及地上一切teh 趖 ê蟲thōa，kap地面上ê眾人，tī我ê面前lóng beh振動，山嶺beh崩裂，山崁beh倒壞，牆壁lóng beh倒落去。 21 主耶和華講，我beh命令我chiahê山發出刀劍來攻擊Ko-kek；ta̍k人beh用伊ê刀劍刣伊ê兄弟。 22 我beh用瘟疫kap流血來辦伊；我也beh用大雨，大雹，kap火，kap硫磺，降落hō͘伊kap伊ê軍隊，以及kap伊ê眾百姓。 23 我beh顯明家己最大，顯明家己做聖，也beh顯現tī chōe-chōe國人ê面前；in就知我就是耶和華。
1 Iâ-hô-hoa ê ōe lîm-kàu góa kóng, 2 Jîn-chú ah, lí tio̍h bīn ǹg Má-kok tōe ê Ko-kek, chiū-sī Lô-si, Bí-siat, Thó͘-pa ê jîn-kun, soan-thoân lâi kong-kek i, kóng, 3 Chú Iâ-hô-hoa án-ni kóng, Lô-si, Bí-siat, Thó͘-pa ê jîn-kun, Ko-kek ah, khòaⁿ ah, Góa chòe lí ê tùi-te̍k; 4 Góa beh hō͘ lí oa̍t-tńg, ēng kau kau lí ê gê-chô, chiong lí kap lí ê kun-peng, bé-phit, bé-peng, tòa--chhut-lâi, lóng chhēng chin súi ê chiàn-kah, chiâⁿ-chòe tōa ê kun-tūi, giâ tōa-sió ê tîn-pâi, ta̍k-ê kia̍h to-kiàm; 5 Pho-su-lâng, Kó͘-si̍t-lâng kap Hut-lâng kap in lâi, ta̍k-ê giâ tîn-pâi tì thâu-khoe; 6 Ko-bia̍t kap i ê kun-tūi; pak-hng ke̍k-thâu ê Tô-ka-má-cho̍k kap i ê kun-tūi; koh ū chōe-chōe peh-sìⁿ kap lí chòe-tīn. 7 Lí tio̍h ka-kī pī-pān, lí kap chū-chi̍p tī lí hia ê kun-tūi lóng tio̍h pī-pān, lí tio̍h chòe in ê goân-sòe. 8 Chōe-chōe ji̍t āu lí beh siū pān-lí; kàu lō͘-bé ê nî lí beh lâi kàu thoat-lī to-kiàm, tùi lia̍t-kok siu-hôe ê tōe, kàu Í-sek-lia̍t kú-kú pha-hng ê soaⁿ; chóng-sī i í-keng tùi lia̍t-kok-tiong tòa-chhut, in lóng beh an-jiân khiā-khí. 9 Lí kap lí ê kun-tūi, í-ki̍p kap lí saⁿ-kap lâi chōe-chōe kok ê peh-sìⁿ, lóng beh chiūⁿ-lâi chhin-chhiūⁿ kông-hong lâi, lí beh chhin-chhiūⁿ hûn jia-khàm tōe. 10 Chú Iâ-hô-hoa án-ni kóng, Kàu hit-ji̍t beh ū ì-sù heng-khí tī lí ê sim, lí beh tô͘-bô͘ pháiⁿ ê kè-bô͘; 11 kóng, Góa beh chiūⁿ-kàu hiuⁿ-siā ê tōe, kàu chēng-chēng an-jiân khiā-khí ê peh-sìⁿ hia, in só͘ khiā-khí-ê lóng bô siâⁿ-chhiûⁿ, iā bô mn̂g bô chhòaⁿ; 12 thang chhiúⁿ só͘ beh chhiúⁿ--ê, kiap só͘ beh kiap--ê, oa̍t-tńg lí ê chhiú, kong-kek hiah ê chêng pha-hng taⁿ ū lâng khiā-khí ê tōe, í-ki̍p hit ê khiā-khí sè-kài ê tiong-sim-tiám, tùi lia̍t-kok chū-chi̍p, tit-tio̍h cheng-siⁿ hè-châi ê peh-sìⁿ. 13 Si-pa lâng, Tí-tàn lâng, Tha-si ê seng-lí lâng, kap in tiong-kan ióng ê sai, lóng beh tùi lí kóng, Lí lâi sī beh chhiúⁿ só͘-chhiúⁿ--ê mah? lí chū-chi̍p lí ê kun-tūi sī beh kiap só͘ kiap--ê mah? beh the̍h kim-gûn, tòa cheng-siⁿ hè-châi khì mah? Beh tōa-tōa chhiúⁿ só͘ chhiúⁿ-ê mah? 14 Jîn-chú ah, lí tio̍h in-ūi án-ni soan-thoân, tùi Ko-kek kóng, Chú Iâ-hô-hoa án-ni kóng, Tng Góa ê peh-sìⁿ Í-sek-lia̍t an-jiân khiā-khí ê ji̍t, lí kiám bô tit-tio̍h chai mah? 15 Lí beh tùi lí ê pún só͘-chāi, tùi pak-hng ê ke̍k-thâu lâi, lí kap chōe-chōe kok ê peh-sìⁿ saⁿ-kap lâi, lóng sī khiâ-bé, chòe tōa-tīn, chōe-chōe ê kun-tūi. 16 Lí beh chiūⁿ-lâi kong-kek Góa ê peh-sìⁿ Í-sek-lia̍t, chhin-chhiūⁿ ba̍t-hûn jia-khàm tōe; tī lō͘-bé ê ji̍t Góa beh chhōa lí lâi kong-kek Góa ê tōe, Ko-kek ah, kàu Góa tī lia̍t-pang ê bīn-chêng, tī lí ê sin-chiūⁿ hián-bêng chòe-sèng ê sî, thang hō͘ in bat Góa. 17 Chú Iâ-hô-hoa án-ni kóng, Góa tī chá-sî, ēng Góa ê lô͘-po̍k, Í-sek-lia̍t ê sian-ti, só͘ kóng--ê, chiū-sī lí mah? tng hiah ê ji̍t in le̍k-nî chhàm-gú Góa beh chhōa lí lâi kong-kek in. 18 Chú Iâ-hô-hoa kóng, Ko-kek chiūⁿ--lâi kong-kek Í-sek-lia̍t tōe ê ji̍t, Góa ê siū-khì beh tùi Góa ê phīⁿ-khang chhut. 19 In-ūi Góa oàn-tò͘ kap tōa siū-khì chhin-chhiūⁿ hé, chiū kóng, Hit-ji̍t tī Í-sek-lia̍t tōe tek-khak ū tōa tín-tāng; 20 sīm-chì hái-tiong ê hî, khong-tiong ê pe-chiáu, chhân-iá ê siù, í-ki̍p tōe-chiūⁿ it-chhè teh sô ê thâng-thōa, kap tōe-bīn-chiūⁿ ê chèng-lâng, tī Góa ê bīn-chêng lóng beh tín-tāng, soaⁿ-niá beh pang-li̍h, soaⁿ-khàm beh tó-hoāi, chhiûⁿ-piah lóng beh tó--lo̍h-khì. 21 Chú Iâ-hô-hoa kóng, Góa beh bēng-lēng Góa chiah ê soaⁿ hoat-chhut to-kiàm lâi kong-kek Ko-kek; ta̍k-lâng beh ēng i ê to-kiàm thâi i ê hiaⁿ-tī. 22 Góa beh ēng un-e̍k kap lâu-huih lâi pān i; Góa iā beh ēng tōa-hō͘, tōa-pha̍uh, kap hé, kap jiû-n̂g, kàng-lo̍h hō͘ i kap i ê kun-tūi, í-ki̍p kap i ê chèng peh-sìⁿ. 23 Góa beh hián-bêng ka-kī chòe tōa, hián-bêng ka-kī chòe-sèng, iā beh hián-hiān tī chōe-chōe kok lâng ê bīn-chêng; in chiū chai Góa chiū-sī Iâ-hô-hoa.
1 人子ah，你tio̍h ǹg Ko-kek來宣傳攻擊伊講，主耶和華án-ni講，Lô-si、Bí-siat、Thó͘-pa ê人君，Ko-kek ah，我kap你做對敵； 2 我beh hō͘你oa̍t-tńg，beh chhōa你進前，hō͘你tùi北方ê極頭來，帶你到以色列ê山； 3 我beh對你ê tò手phah ka-la̍uh你ê弓，對你ê chiàⁿ手phah-lak你ê箭。 4 你kap你ê軍隊以及kap你來ê列國人beh倒tī以色列ê山；我beh將你hō͘ ta̍k樣ê鷹鳥kap田野ê野獸做食物。 5 你beh倒tī田野；因為我bat講伊；這是主耶和華講ê。 6 我也beh降落火tī Má-kok kap海嶼安然khiā起ê人ê身上；in就知我就是耶和華。 7 我beh tī我ê百姓以色列中顯出我ê聖名，也無容允我ê聖名koh受褻瀆；列國人就知我就是耶和華，以色列中ê聖ê。 8 主耶和華講，看ah，tāi-chì來-lah也beh成伊；這是我所講ê日。 9 Khiā起以色列城ê人beh出去，起火燒伊ê ke-si，就是大細ê藤牌、弓箭、槌á kap鎗，lóng beh用in來hiâⁿ火歷過七年久； 10 甚至in無beh tùi田野拾柴，也無beh tùi樹林剉樹；因為in beh用ke-si hiâⁿ火；koh beh搶hiahê搶in ê人，劫hiahê劫in ê人；這就是主耶和華講ê。 11 當hit日我beh將以色列地，海ê東勢，人所經過ê山谷，賞賜Ko-kek做塚地阻擋經過ê人ê路；tī-hia人beh埋葬Ko-kek kap伊ê眾人；beh稱hit所在做Hap-bûn-ko-kek ê山谷。 12 以色列家beh埋葬in歷過七月日ê久，hō͘ hitê地清氣。 13 Thong國ê百姓beh埋葬in；當我得tio̍h榮光ê日，chitê事beh hō͘ in得tio̍h名聲；這是主耶和華講ê。 14 In beh派人常常巡查遍地；kap經過ê人相kap葬hiahê chhun tī地裡ê身屍，thang清氣hitê地方；到七月日滿，in beh koh四界chhē。 15 巡查遍地ê人beh經過；若有人看見人ê骨骸，就tī-hia立一个記號，thèng候埋葬ê人埋葬伊tī Hap-bûn-ko-kek ê山谷。 16 也beh有一个城，名叫Hap-bûn-ná。In beh án-ni清氣hitê地。 17 人子ah，主耶和華án-ni講，你tio̍h對ta̍k樣ê飛鳥以及田野ê野獸講，Lín tio̍h聚集做陣來；tio̍h tùi四方聚集到我為tio̍h lín所獻ê祭，就是以色列山ê大祭，hō͘ lín thang食肉lim血。 18 Lín beh食勇士ê肉，lim地上首領ê血，公ê綿羊，羊á，公ê山羊，公ê牛，lóng是Pa-san肥ê cheng-siⁿ。 19 Lín食我為tio̍h lín所獻ê祭，beh食iû到飽，lim血到醉。 20 Lín beh tī我ê桌食馬匹kap坐車ê，kap勇士kap一切ê戰士到飽飽；這是主耶和華講ê。 21 我beh顯明我ê榮光tī列國中，列國也beh看見我所行ê審判，kap我所hē tī in身上ê手。 22 Án-ni tùi hit日以後以色列家beh知我是耶和華in ê上帝。 23 列國也beh知以色列家受掠是因為in ê罪過；in得罪我，我對in掩我ê面；將in交tī in ê對敵ê手；in就lóng倒tī刀下。 24 我照in ê污穢照in ê過失款待in；對in掩我ê面。 25 所以主耶和華án-ni講，我beh hō͘雅各受掠ê人tò來；也beh憐憫以色列全家； 26 也beh為tio̍h我ê聖名熱心。 27 In tī本所在安然khiā起，無人hō͘ in驚，tī我將in tùi列國中chhōa tò來，tùi對敵ê地聚集來，我tī列國ê面前，tī in身上顯明做聖ê時，in beh擔當in ê見笑kap in干犯我一切ê罪。 28 我hō͘ in受掠tī列邦，koh聚集in tò來本所在，無留一人tī-hia，in就知我是in ê上帝耶和華。 29 我也無koh對in掩我ê面；因為我已經將我ê神降落tī以色列家；這是主耶和華講ê。
1 Jîn-chú ah, lí tio̍h ǹg Ko-kek lâi soan-thoân kong-kek i kóng, Chú Iâ-hô-hoa án-ni kóng, Lô-si, Bí-siat, Thó͘-pa ê jîn-kun, Ko-kek ah, Góa kap lí chòe tùi-te̍k; 2 Góa beh hō͘ lí oa̍t-tńg, beh chhōa lí chìn-chêng, hō͘ lí tùi pak-hng ê ke̍k-thâu lâi, tòa lí kàu Í-sek-lia̍t ê soaⁿ; 3 Góa beh tùi lí ê tò-chhiú phah ka-la̍uh lí ê keng, tùi lí ê chiàⁿ-chhiú phah-lak lí ê chìⁿ. 4 Lí kap lí ê kun-tūi í-ki̍p kap lí lâi ê lia̍t-kok lâng beh tó tī Í-sek-lia̍t ê soaⁿ; Góa beh chiong lí hō͘ ta̍k-iūⁿ ê eng-chiáu kap chhân-iá ê iá-siù chòe chia̍h-mi̍h. 5 Lí beh tó tī chhân-iá; in-ūi Góa bat kóng--i; che sī Chú Iâ-hô-hoa kóng--ê. 6 Góa iā beh kàng-lo̍h hé tī Má-kok kap hái-sū an-jiân khiā-khí ê lâng ê sin-chiūⁿ; in chiū chai Góa chiū-sī Iâ-hô-hoa. 7 Góa beh tī Góa ê peh-sìⁿ Í-sek-lia̍t tiong hián-chhut Góa ê sèng-miâ, iā bô iông-ún Góa ê sèng-miâ koh siū siat-to̍k; lia̍t-kok lâng chiū chai Góa chiū-sī Iâ-hô-hoa, Í-sek-lia̍t tiong ê Sèng--ê. 8 Chú Iâ-hô-hoa kóng, Khòaⁿ ah, tāi-chì lâi--lah iā beh chiâⁿ i; che sī Góa só͘ kóng ê ji̍t. 9 Khiā-khí Í-sek-lia̍t siâⁿ ê lâng beh chhut--khì, khí-hé sio i ê ke-si, chiū-sī tōa-sòe ê tîn-pâi, keng-chìⁿ, thûi-á kap chhiuⁿ, lóng beh ēng in lâi hiâⁿ-hé le̍k-kè chhit-nî kú; 10 sīm-chì in bô beh tùi chhân-iá khioh-chhâ, iā bô beh tùi chhiū-nâ chhò-chhiū; in-ūi in beh ēng ke-si hiâⁿ-hé; koh beh chhiúⁿ hiah ê chhiúⁿ in ê lâng, kiap hiah ê kiap in ê lâng; che chiū-sī Chú Iâ-hô-hoa kóng--ê. 11 Tng hit-ji̍t Góa beh chiong Í-sek-lia̍t tōe, hái ê tang--sì, lâng só͘ keng-kè ê soaⁿ-kok, siúⁿ-sù Ko-kek chòe thióng-tōe chó͘-tòng keng-kè ê lâng ê lō͘; tī-hia lâng beh bâi-chòng Ko-kek kap i ê chèng-lâng; beh chheng hit só͘-chāi chòe Hap-bûn-ko-kek ê soaⁿ-kok. 12 Í-sek-lia̍t-ke beh bâi-chòng in le̍k-kè chhit-ge̍h ji̍t ê kú, hō͘ hit ê tōe chheng-khì. 13 Thong-kok ê peh-sìⁿ beh bâi-chòng in; tng Góa tit-tio̍h êng-kng ê ji̍t, chit ê sū beh hō͘ in tit-tio̍h miâ-siaⁿ; che sī Chú Iâ-hô-hoa kóng--ê. 14 In beh phài lâng siông-siông sûn-cha piàn-tōe; kap keng-kè ê lâng saⁿ-kap chòng hiah ê chhun tī tōe--nih ê sin-si, thang chheng-khì hit ê tōe-hng; kàu chhit-ge̍h ji̍t móa, in beh koh sì-kòe chhē. 15 Sûn-cha piàn tōe ê lâng beh keng-kè; nā ū lâng khòaⁿ-kìⁿ lâng ê kut-hâi, chiū tī-hia li̍p chi̍t ê kì-hō, thèng-hāu bâi-chòng ê lâng bâi-chòng i tī Hap-bûn-ko-kek ê soaⁿ-kok. 16 Iā beh ū chi̍t ê siâⁿ, miâ kiò Hap-bûn-ná. In beh án-ni chheng-khì hit ê tōe. 17 Jîn-chú ah, Chú Iâ-hô-hoa án-ni kóng, Lí tio̍h tùi ta̍k-iūⁿ ê pe-chiáu í-ki̍p chhân-iá ê iá-siù kóng, Lín tio̍h chū-chi̍p chòe-tīn lâi; tio̍h tùi sì-hng chū-chi̍p kàu Góa ūi-tio̍h lín só͘ hiàn ê chè, chiū-sī Í-sek-lia̍t soaⁿ ê tōa-chè, hō͘ lín thang chia̍h-bah lim-huih. 18 Lín beh chia̍h ióng-sū ê bah, lim tōe-chiūⁿ siú-léng ê huih, kang ê mî-iûⁿ, iûⁿ-á, kang ê soaⁿ-iûⁿ, kang ê gû, lóng sī Pa-san pûi ê cheng-siⁿ. 19 Lín chia̍h Góa ūi-tio̍h lín só͘ hiàn ê chè, beh chia̍h iû kàu pá, lim-huih kàu chùi. 20 Lín beh tī Góa ê toh chia̍h bé-phit kap chē-chhia-ê, kap ióng-sū kap it-chhè ê chiàn-sū kàu pá-pá; che sī Chú Iâ-hô-hoa kóng--ê. 21 Góa beh hián-bêng Góa ê êng-kng tī lia̍t-kok-tiong, lia̍t-kok iā beh khòaⁿ-kìⁿ Góa só͘ kiâⁿ ê sím-phòaⁿ, kap Góa só͘ hē tī in sin-chiūⁿ ê chhiú. 22 Án-ni tùi hit-ji̍t í-āu Í-sek-lia̍t-ke beh chai Góa sī Iâ-hô-hoa in ê Siōng-tè. 23 Lia̍t-kok iā beh chai Í-sek-lia̍t-ke siū-lia̍h sī in-ūi in ê chōe-kòa; in tek-chōe Góa, Góa tùi in ng Góa ê bīn; chiong in kau tī in ê tùi-te̍k ê chhiú; in chiū lóng tó tī to-ē. 24 Góa chiàu in ê ù-òe chiàu in ê kè-sit khoán-thāi in; tùi in ng Góa ê bīn. 25 Só͘-í Chú Iâ-hô-hoa án-ni kóng, Góa beh hō͘ Ngá-kok siū-lia̍h ê lâng tò--lâi; iā beh lîn-bín Í-sek-lia̍t choân-ke; 26 iā beh ūi-tio̍h Góa ê sèng-miâ jia̍t-sim. 27 In tī pún só͘-chāi an-jiân khiā-khí, bô lâng hō͘ in kiaⁿ, tī Góa chiong in tùi lia̍t-kok-tiong chhōa tò--lâi, tùi tùi-te̍k ê tōe chū-chi̍p lâi, Góa tī lia̍t-kok ê bīn-chêng, tī in sin-chiūⁿ hián-bêng chòe-sèng ê sî, in beh tam-tng in ê kiàn-siàu kap in kan-hoān Góa it-chhè ê chōe. 28 Góa hō͘ in siū-lia̍h tī lia̍t-pang, koh chū-chi̍p in tò--lâi pún só͘-chāi, bô lâu chi̍t-lâng tī-hia, in chiū chai Góa sī in ê Siōng-tè Iâ-hô-hoa. 29 Góa iā bô koh tùi in ng Góa ê bīn; in-ūi Góa í-keng chiong Góa ê sîn kàng-lo̍h tī Í-sek-lia̍t-ke; che sī Chú Iâ-hô-hoa kóng--ê.
1 阮受掠ê二十五年，tī年頭，月ê初十日城破了後第十四年，tú-tú hit日耶和華ê手hē tī我ê身上，chhōa我到hia。 2 Tī上帝異象中帶我到以色列地，安置我tī真高ê山，山頂ê南pêng有親像起造ê城。 3 伊chhōa我到hia；看ah，有一人，款式親像銅ê款式，手the̍h 麻索，kap測量ê篙尺，khiā tī門口。 4 Hit-ê人對我講，人子ah，見我所hō͘你看ê，你tio̍h用你ê目睭看，用你ê耳孔聽，也tio̍h用你ê心記tiâu；因為你受帶來chia tiâu-tî為tio̍h beh hō͘你看chiahê事；見你所看見ê，你lóng tio̍h kā以色列家講。 5 看ah，厝ê外面四圍有牆，hit人ê手the̍h測量ê篙尺，長六肘，每-肘是一肘koh一巴掌；伊就量牆厚一篙尺，高一篙尺。 6 伊就到ǹg東ê門，上伊ê崎á；量門ê戶碇，闊一篙尺；koh一个戶碇，闊也一篙尺。 7 Koh侍衛房，ta̍k間長一篙尺，闊一篙尺；相離五肘；門ê戶碇，就是óa近ǹg厝ê門ê léng廊，闊一篙尺。 8 伊也量ǹg厝ê門ê léng廊，闊一篙尺。 9 Koh量門ê廊，闊八肘；伊ê柱兩肘；hitê門ê léng廊是ǹg-厝。 10 東勢ê門有侍衛房，chit-pâng三間，hit-pâng三間，lóng同一樣ê寸尺；chit-pêng ê柱kap hit pêng ê柱也是一樣ê寸尺。 11 伊量門口，闊十肘，門ê長十三肘。 12 侍衛房頭前ê界，chit-pêng一肘，hit-pêng也有界，一肘；侍衛房chit-pêng六肘，hit-pêng六肘。 13 Koh量門tùi chitê侍衛房ê厝頂到hitê侍衛房ê厝頂，闊二十五肘；門kap門相對。 14 Koh做hiahê柱六十肘；有院用柱做界，tī門ê四圍。 15 Tùi入門ê頭前到內面門ê léng廊ê頭前，共五十肘。 16 Chiahê侍衛房kap門內四圍ê柱，以及in ê léng廊，lóng有關密ê窗；koh四圍有窗ǹg內面；ta̍k支柱ê頂面有棕樹。 17 伊chhōa我入外院；看ah，有房間，koh tī院ê四圍有舖石ê地；舖石地ê頂面有房三十間。 18 舖石ê地是tī hiahê門ê身邊，kap hiahê門平長；這是下面舖石ê地。 19 伊tùi下面門ê頭前量到內院頭前ê外面，闊一百肘；東面北面lóng是án-ni。 20 外院ǹg北ê門，伊量伊ê長闊。 21 伊ê侍衛房chit-pêng三間，hit-pêng三間；伊ê柱，伊ê léng廊，lóng照頭一个門ê辦；長五十肘，闊二十五肘。 22 伊ê窗伊ê léng廊kap伊ê棕樹，lóng是照ǹg東ê門；人tùi七層ê崎á上到hia；頭前有hiahê廊。 23 內院有門kap東勢ê門北勢ê門相對；伊tùi門到門量伊，一百肘。 24 伊chhōa我ǹg南勢去；看ah，有門ǹg南；koh照前ê寸尺量伊ê柱kap伊ê léng廊。 25 伊ê內面kap伊ê léng廊四圍lóng有窗，kap前所量ê窗同一樣；長五十肘，闊二十五肘。 26 有七層崎á thang上到hia；頭前有hiahê léng廊；柱頂有棕樹，chit-pêng一叢，hit-pêng一叢。 27 內院有門ǹg南；tùi門到門伊ǹg南量伊一百肘。 28 伊chhōa我tùi南門到內院；就照前ê寸尺量南門； 29 伊ê房，伊ê柱，伊ê léng廊，lóng照前ê寸尺；伊ê內面kap伊léng廊四圍lóng有窗；長五十肘，闊二十五肘。 30 周圍有léng廊，長二十五肘，闊五肘。 31 伊ê廊ǹg外院，柱頂有棕樹，chiūⁿ八chàn崎á到hia。 32 伊chhōa我到內院，ǹg東；伊量hitê門，照前ê寸尺。 33 伊ê房，伊ê柱，伊ê léng廊，lóng照前ê寸尺；伊ê內面，kap伊léng廊四圍lóng有窗，長五十肘，闊二十五肘。 34 伊ê廊ǹg外院，柱頂tī chit-pêng， hit-pêng有棕樹；上八層崎á到hia。 35 伊koh chhōa我到北門，量伊照前ê寸尺。 36 Koh量伊ê房，伊ê柱，伊ê léng廊；內面四圍lóng有窗，伊ê長五十肘，闊二十五肘。 37 伊ê柱ǹg外院，柱頂tī chit-pêng，hit-pêng有棕樹；上八層崎á到hia。 38 門ê柱邊有房，kap伊ê門；tī-hia洗燒祭ê牲禮； 39 Tī門廊ê內面，chit-pêng有兩塊桌，hit pêng有兩塊桌；tī hit頂面thang來刣燒祭，贖罪祭，補過失ê祭ê牲禮。 40 上到ǹg北ê門口，chit-pêng ê外面有兩塊桌，門廊hit pêng也有兩塊桌。 41 Tī門邊chit-pêng有四塊桌，hit-pêng有四塊桌，共八塊；tī hit頂面刣牲禮。 42 為tio̍h燒祭ê路用ê四塊桌，是石phah-ê，長肘半，闊肘-半，高一-肘；刣燒祭kap chiahê祭，所用ê器具hē tī hit頂面。 43 有鉤，闊一巴掌，釘tiâu tī內面ê四圍；桌頂有祭肉。 44 內門ê外面，北門邊ê內院，有房間；為tio̍h唱歌ê人來設；hiahê房間ǹg南，東門-邊也有一間ǹg北。 45 伊kā我講，Chit間ǹg南ê房是hō͘擔當顧厝ê祭司用。 46 Hit間ǹg北ê房是hō͘擔當顧壇ê祭司用；chiahê是利未族中Sat-tok ê kiáⁿ孫，就近耶和華來服事ê。 47 伊koh量hitê院，長一百肘，闊一百肘；是四方ê；壇是tī厝前。 48 伊chhōa我到厝前ê léng廊，niû léng廊ê ta̍k支柱，chit-pêng五肘，hit-pêng五肘。門ê闊，chit-pêng三肘，hit-pêng三肘。 49 Léng廊長二十肘，闊十一肘；有人peh上ê崎á；hiahê柱邊，koh有細支柱；chit-pêng一支，hit-pêng一支。
1 Goán siū-lia̍h ê jī-cha̍p-gō͘ nî, tī nî-thâu, ge̍h ê chhoe-cha̍p ji̍t siâⁿ phòa liáu-āu tē cha̍p-sì nî, tú-tú hit-ji̍t Iâ-hô-hoa ê chhiú hē tī góa ê sin-chiūⁿ, chhōa góa kàu hia. 2 Tī Siōng-tè īⁿ-siōng-tiong tòa góa kàu Í-sek-lia̍t tōe, an-tì góa tī chin-koâiⁿ ê soaⁿ, soaⁿ-téng ê lâm-pêng ū chhin-chhiūⁿ khí-chō ê siâⁿ. 3 I chhōa góa kàu hia; khòaⁿ ah, ū chi̍t-lâng, khoán-sit chhin-chhiūⁿ tâng ê khoán-sit, chhiú the̍h môa-soh, kap chhek-liông ê ko-chhioh, khiā tī mn̂g-kháu. 4 Hit ê lâng tùi góa kóng, Jîn-chú ah, kìⁿ góa só͘ hō͘ lí khòaⁿ--ê, lí tio̍h ēng lí ê ba̍k-chiu khòaⁿ, ēng lí ê hī-khang thiaⁿ, iā tio̍h ēng lí ê sim kì-tiâu; in-ūi lí siū tòa lâi chia tiâu-tî ūi-tio̍h beh hō͘ lí khòaⁿ chiah ê sū; kìⁿ lí só͘ khòaⁿ-kìⁿ--ê, lí lóng tio̍h kā Í-sek-lia̍t-ke kóng. 5 Khòaⁿ ah, chhù ê gōa-bīn sì-ûi ū chhiûⁿ, hit lâng ê chhiú the̍h chhek-liông ê ko-chhioh, tn̂g la̍k tiú, múi-tiú sī chi̍t-tiú koh chi̍t pa-chiúⁿ; i chiū niû chhiûⁿ kāu chi̍t ko-chhioh, koâiⁿ chi̍t ko-chhioh. 6 I chiū kàu ǹg tang ê mn̂g, chiūⁿ i ê kiā-á; niû mn̂g ê hō͘-tēng, khoah chi̍t ko-chhioh; koh chi̍t ê hō͘-tēng, khoah iā chi̍t ko-chhioh. 7 Koh sī-ōe-pâng, ta̍k-keng tn̂g chi̍t ko-chhioh, khoah chi̍t ko-chhioh; saⁿ-lī gō͘ tiú; mn̂g ê hō͘-tēng, chiū-sī óa-kūn ǹg-chhù ê mn̂g ê léng-lông, khoah chi̍t ko-chhioh. 8 I iā niû ǹg chhù ê mn̂g ê léng-lông, khoah chi̍t ko-chhioh. 9 Koh niû mn̂g ê lông, khoah poeh-tiú; i ê thiāu nn̄g tiú; hit ê mn̂g ê léng-lông sī ǹg-chhù. 10 Tang--sì ê mn̂g ū sī-ōe-pâng, chit-pêng saⁿ-keng, hit-pêng saⁿ-keng, lóng tâng-chi̍t-iūⁿ ê chhùn-chhioh; chit-pêng ê thiāu kap hit pêng ê thiāu iā sī chi̍t-iūⁿ ê chhùn-chhioh. 11 I niû mn̂g-kháu, khoah cha̍p tiú, mn̂g ê tn̂g cha̍p-saⁿ tiú. 12 Sī-ōe-pâng thâu-chêng ê kài, chit-pêng chi̍t-tiú, hit-pêng iā ū kài, chi̍t-tiú; sī-ōe-pâng chit-pêng la̍k-tiú, hit-pêng la̍k-tiú. 13 Koh niû mn̂g tùi chit ê sī-ōe-pâng ê chhù-téng kàu hit ê sī-ōe-pâng ê chhù-téng, khoah jī-cha̍p-gō͘ tiú; mn̂g kap mn̂g saⁿ-tùi. 14 Koh chòe hiah ê thiāu la̍k-cha̍p tiú; ū īⁿ ēng thiāu chòe-kài, tī mn̂g ê sì-ûi. 15 Tùi ji̍p-mn̂g ê thâu-chêng kàu lāi-bīn mn̂g ê léng-lông ê thâu-chêng, kiōng gō͘-cha̍p tiú. 16 Chiah ê sī-ōe-pâng kap mn̂g-lāi sì-ûi ê thiāu, í-ki̍p in ê léng-lông, lóng ū koaiⁿ-ba̍t ê thang; koh sì-ûi ū thang ǹg lāi-bīn; ta̍k ki thiāu ê téng-bīn ū chang-chhiū. 17 I chhōa góa ji̍p gōa-īⁿ; khòaⁿ ah, ū pâng-keng, koh tī īⁿ ê sì-ûi ū pho͘-chio̍h ê tōe; pho͘-chio̍h tōe ê téng-bīn ū pâng saⁿ-cha̍p keng. 18 Pho͘-chio̍h ê tōe sī tī hiah ê mn̂g ê sin-piⁿ, kap hiah ê mn̂g pîⁿ-tn̂g; che sī ē-bīn pho͘-chio̍h ê tōe. 19 I tùi ē-bīn mn̂g ê thâu-chêng niû kàu lāi-īⁿ thâu-chêng ê gōa-bīn, khoah chi̍t-pah tiú; tang-bīn pak-bīn lóng sī án-ni. 20 Gōa-īⁿ ǹg pak ê mn̂g, i niû i ê tn̂g khoah. 21 I ê sī-ōe-pâng chit-pêng saⁿ-keng, hit-pêng saⁿ-keng; i ê thiāu, i ê léng-lông, lóng chiàu thâu chi̍t ê mn̂g ê pān; tn̂g gō͘-cha̍p tiú, khoah jī-cha̍p-gō͘ tiú. 22 I ê thang i ê léng-lông kap i ê chang-chhiū, lóng sī chiàu ǹg-tang ê mn̂g; lâng tùi chhit-chàn ê kiā-á chiūⁿ kàu hia; thâu-chêng ū hiah ê lông. 23 Lāi-īⁿ ū mn̂g kap tang--sì ê mn̂g pak--sì ê mn̂g saⁿ-tùi; i tùi mn̂g kàu mn̂g niû--i, chi̍t-pah tiú. 24 I chhōa góa ǹg lâm--sì khì; khòaⁿ ah, ū mn̂g ǹg-lâm; koh chiàu chêng ê chhùn-chhioh niû i ê thiāu kap i ê léng-lông. 25 I ê lāi-bīn kap i ê léng-lông sì-ûi lóng ū thang, kap chêng só͘ niû ê thang tâng chi̍t-iūⁿ; tn̂g gō͘-cha̍p tiú, khoah jī-cha̍p-gō͘ tiú. 26 Ū chhit-chàn kiā-á thang chiūⁿ kàu hia; thâu-chêng ū hiah ê léng-lông; thiāu-téng ū chang-chhiū, chit-pêng chi̍t-châng, hit-pêng chi̍t-châng. 27 Lāi-īⁿ ū mn̂g ǹg-lâm; tùi mn̂g kàu mn̂g i ǹg-lâm niû-i chi̍t-pah tiú. 28 I chhōa góa tùi lâm-mn̂g kàu lāi-īⁿ; chiū chiàu chêng ê chhùn-chhioh niû lâm-mn̂g; 29 i ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn kap i léng-lông sì-ûi lóng ū thang; tn̂g gō͘-cha̍p tiú, khoah jī-cha̍p-gō͘ tiú. 30 Chiu-ûi ū léng-lông, tn̂g jī-cha̍p-gō͘ tiú, khoah gō͘-tiú. 31 I ê lông ǹg gōa-īⁿ, thiāu-téng ū chang-chhiū, chiūⁿ poeh-chàn kiā-á kàu hia. 32 I chhōa góa kàu lāi-īⁿ, ǹg tang; i niû hit ê mn̂g, chiàu chêng ê chhùn-chhioh. 33 I ê pâng, i ê thiāu, i ê léng-lông, lóng chiàu chêng ê chhùn-chhioh; i ê lāi-bīn, kap i léng-lông sì-ûi lóng ū thang, tn̂g gō͘-cha̍p tiú, khoah jī-cha̍p-gō͘ tiú. 34 I ê lông ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia. 35 I koh chhōa góa kàu pak-mn̂g, niû--i chiàu chêng ê chhùn-chhioh. 36 Koh niû i ê pâng, i ê thiāu, i ê léng-lông; lāi-bīn sì-ûi lóng ū thang, i ê tn̂g gō͘-cha̍p tiú, khoah jī-cha̍p-gō͘ tiú. 37 I ê thiāu ǹg gōa-īⁿ, thiāu-téng tī chit-pêng hit-pêng ū chang-chhiū; chiūⁿ poeh chàn kiā-á kàu hia. 38 Mn̂g ê thiāu-piⁿ ū pâng, kap i ê mn̂g; tī-hia sóe sio-chè ê seng-lé; 39 tī mn̂g-lông ê lāi-bīn, chit-pêng ū nn̄g tè toh, hit pêng ū nn̄g tè toh; tī hit téng-bīn thang lâi thâi sio-chè, sio̍k-chōe chè, pó͘-kè-sit ê chè ê seng-lé. 40 Chiūⁿ kàu ǹg pak ê mn̂g-kháu, chit-pêng ê gōa-bīn ū nn̄g tè toh, mn̂g-lông hit pêng iā ū nn̄g tè toh. 41 Tī mn̂g-piⁿ chit-pêng ū sì-tè toh, hit-pêng ū sì-tè toh, kiōng poeh tè; tī hit téng-bīn thâi seng-lé. 42 Ūi-tio̍h sio-chè ê lō͘-ēng ê sì tè toh, sī chio̍h phah--ê, tn̂g tiú-pòaⁿ, khoah tiú-pòaⁿ, koâiⁿ chi̍t-tiú; thâi sio-chè kap chiah ê chè, só͘ ēng ê khì-kū hē tī hit téng-bīn. 43 Ū kau, khoah chi̍t pa-chiúⁿ, tèng-tiâu tī lāi-bīn ê sì-ûi; toh-téng ū chè-bah. 44 Lāi-mn̂g ê gōa-bīn, pak-mn̂g-piⁿ ê lāi-īⁿ, ū pâng-keng; ūi-tio̍h chhiùⁿ-koa ê lâng lâi siat; hiah ê pâng-keng ǹg-lâm, tang-mn̂g-piⁿ iā ū chi̍t-keng ǹg-pak. 45 I kā góa kóng, Chit-keng ǹg-lâm ê pâng sī hō͘ tam-tng kò͘-chhù ê chè-si ēng. 46 Hit-keng ǹg-pak ê pâng sī hō͘ tam-tng kò͘-tôaⁿ ê chè-si ēng; chiah-ê sī Lī-bī cho̍k-tiong Sat-tok ê kiáⁿ-sun, chiū-kūn Iâ-hô-hoa lâi ho̍k-sāi--ê. 47 I koh niû hit ê īⁿ, tn̂g chi̍t-pah tiú, khoah chi̍t-pah tiú; sī sù-hong--ê; tôaⁿ sī tī chhù-chêng. 48 I chhōa góa kàu chhù-chêng ê léng-lông, niû léng-lông ê ta̍k ki thiāu, chit-pêng gō͘ tiú, hit-pêng gō͘ tiú. Mn̂g ê khoah, chit-pêng saⁿ tiú, hit-pêng saⁿ tiú. 49 Léng-lông tn̂g jī-cha̍p tiú, khoah cha̍p-it tiú; ū lâng peh-chiūⁿ ê kiā-á; hiah ê thiāu-piⁿ, koh ū sòe-ki thiāu; chit-pêng chi̍t ki, hit-pêng chi̍t-ki.
1 伊koh chhōa我到殿 hia，量hiahê柱；chit面闊六肘，hit面闊六肘；闊狹kap布棚相同。 2 門口闊十肘；門ê雙pêng邊，chit-pêng五肘，hit-pêng五肘，伊量伊ê長四十肘，闊二十肘。 3 伊到內面，量門口ê柱，兩肘；門口六肘，門口ê闊七肘。 4 伊量伊ê長二十肘，闊二十肘，tī殿ê前面；伊對我講，這是至聖所。 5 伊量厝ê牆六肘，厝四周圍ê邊房，各闊四肘。 6 邊房有三層，chit層疊tī hit層ê頂面，ta̍k層有三十間；chitê厝另外有一片牆，做四圍邊房ê路用，hō͘伊ê楹á thang 掛tī-hia，免得掛tī厝ê牆。 7 Chiahê四圍ê邊房，ná高ná闊；因為厝ê圍tī厝ê四面ná高，所以厝ê闊直直到頂面；tùi下層到頂層，tio̍h tùi中層上去。 8 我koh看見厝ê四圍有高ê砛；邊房ê地基，高足足一篙尺，就是六大肘。 9 邊房外面ê牆，厚五肘；所chhun ê地就是厝ê邊房ê所在。 10 四面圍厝hiahê房間，相離二十肘ê闊。 11 邊房ê門lóng ǹg所chhun ê地；一个門ǹg北，一个門ǹg南；四圍所chhun ê地，lóng闊五肘。 12 Tī西pêng另外隔開ê地頭前ê厝宅闊七十肘；伊ê牆四圍厚五肘；長九十肘。 13 Án-ni，伊量厝，長一百肘；也量隔開ê所在，kap所起造ê，kap伊ê牆，共長一百肘。 14 厝ê前面，kap ǹg東隔開ê地，闊一百肘。 15 伊量後面隔開ê地頭前ê厝宅，以及chit-pêng hit-pêng樓ê廊，長一百肘；koh量內殿，kap院ê廊。 16 伊ê戶碇，伊ê關密ê窗á，伊ê四圍三層ê樓ê廊；tī戶碇ê對面，四圍ê牆lóng áⁿ柴板；tùi土腳到窗á，(窗á lóng有遮蓋) ， 17 直到門ê頂面，就是到內面ê厝kap外面，內外四圍ê牆壁，lóng照寸尺。 18 有刻ki-lō͘-peng kap棕樹，兩個ki-lō͘-peng ê中間有一叢ê棕樹；ki-lō͘-peng ta̍k-ê有兩個面； 19 Chit-pêng有人ê面，ǹg棕樹，hit-pêng有獅ê面，ǹg棕樹；厝內四圍lóng是án-ni。 20 Tùi土腳到門頂，lóng有刻ki-lō͘-peng kap棕樹；殿ê牆lóng是án-ni。 21 殿ê門khiā是四方ê；至聖所ê前面，款式親像殿ê款式。 22 壇是柴做ê，高三肘，長兩肘，伊ê角，伊ê座，kap伊ê四邊lóng是柴做ê；伊對我講，這是耶和華面前ê桌。 23 殿kap至聖所有兩個門。 24 Ta̍k-ê門有兩扇，chitê兩扇是ōe拗得ê；chitê門兩扇，hitê門也兩扇。 25 殿ê門頂有刻ki-lō͘-peng kap棕樹，kap刻tī牆頂ê一樣；tī外面廊ê頭前有厚ê柴板。 26 廊ê邊頭，chit-pêng hit-pêng，lóng有關密ê窗á kap棕樹；厝ê邊房，kap厚ê柴板，lóng是án-ni。
1 I koh chhōa góa kàu tiān hia, niû hiah ê thiāu; chit-bīn khoah la̍k-tiú, hit-bīn khoah la̍k-tiú; khoah oe̍h kap pò͘-pîⁿ saⁿ-tâng. 2 Mn̂g-kháu khoah cha̍p tiú; mn̂g ê siang-pêng-piⁿ, chit-pêng gō͘ tiú, hit-pêng gō͘ tiú, i niû i ê tn̂g sì-cha̍p tiú, khoah jī-cha̍p tiú. 3 I kàu lāi-bīn, niû mn̂g-kháu ê thiāu, nn̄g tiú; mn̂g-kháu la̍k-tiú, mn̂g-kháu ê khoah chhit tiú. 4 I niû i ê tn̂g jī-cha̍p tiú, khoah jī-cha̍p tiú, tī tiān ê chêng-bīn; i tùi góa kóng, Che sī chì-sèng-só͘. 5 I niû chhù ê chhiûⁿ la̍k tiú, chhù sì-chiu-ûi ê piⁿ-pâng, kok khoah sì tiú. 6 Piⁿ-pâng ū saⁿ-chàn, chit-chàn tha̍h tī hit-chàn ê téng-bīn, ta̍k-chàn ū saⁿ-cha̍p keng; chit ê chhù lēng-gōa ū chi̍t phìⁿ chhiûⁿ, chòe sì-ûi piⁿ-pâng ê lō͘-ēng, hō͘ i ê îⁿ-á thang khòa tī-hia, bián-tit khòa tī chhù ê chhiûⁿ. 7 Chiah ê sì-ûi ê piⁿ-pâng, ná-koâiⁿ ná-khoah; in-ūi chhù ê ûi tī chhù ê sì-bīn ná-koâiⁿ, só͘-í chhù ê khoah ti̍t-ti̍t kàu téng-bīn; tùi ē-chàn kàu téng-chàn, tio̍h tùi tiong-chàn chiūⁿ--khì. 8 Góa koh khòaⁿ-kìⁿ chhù ê sì-ûi ū koâiⁿ ê gîm; piⁿ-pâng ê tōe-ki, koâiⁿ chiok-chiok chi̍t ko-chhioh, chiū-sī la̍k tōa-tiú. 9 Piⁿ-pâng gōa-bīn ê chhiûⁿ, kāu gō͘ tiú; só͘ chhun ê tōe chiū-sī chhù ê piⁿ-pâng ê só͘-chāi. 10 Sì-bīn ûi chhù hiah ê pâng-keng, saⁿ-lī jī-cha̍p tiú ê khoah. 11 Piⁿ-pâng ê mn̂g lóng ǹg só͘ chhun ê tōe; chi̍t ê mn̂g ǹg-pak, chi̍t ê mn̂g ǹg-lâm; sì-ûi só͘ chhun ê tōe, lóng khoah gō͘ tiú. 12 Tī sai-pêng lēng-gōa keh-khui ê tōe thâu-chêng ê chhù-the̍h khoah chhit-cha̍p tiú; i ê chhiûⁿ sì-ûi kāu gō͘ tiú; tn̂g káu-cha̍p tiú. 13 Án-ni, i niû chhù, tn̂g chi̍t-pah tiú; iā niû keh-khui ê só͘-chāi, kap só͘ khí-chō--ê, kap i ê chhiûⁿ, kiōng tn̂g chi̍t-pah tiú. 14 Chhù ê chêng-bīn, kap ǹg-tang keh-khui ê tōe, khoah chi̍t-pah-tiú. 15 I niû āu-bīn keh-khui ê tōe thâu-chêng ê chhù-the̍h, í-ki̍p chit-pêng hit-pêng lâu ê lông, tn̂g chi̍t-pah tiú; koh niû lāi-tiān, kap īⁿ ê lông. 16 I ê hō͘-tēng, i ê koaiⁿ-ba̍t ê thang-á, i ê sì-ûi saⁿ-chàn ê lâu ê lông; tī hō͘-tēng ê tùi-bīn, sì-ûi ê chhiûⁿ lóng áⁿ chhâ-pán; tùi thô͘-kha kàu thang-á, (thang-á lóng ū jia-khàm), 17 ti̍t-kàu mn̂g ê téng-bīn, chiū-sī kàu lāi-bīn ê chhù kap gōa-bīn, lāi-gōa sì-ûi ê chhiûⁿ-piah, lóng chiàu chhùn-chhioh. 18 Ū khek ki-lō͘-peng kap chang-chhiū, nn̄g ê ki-lō͘-peng ê tiong-kan ū chi̍t-châng ê chang-chhiū; ki-lō͘-peng ta̍k-ê ū nn̄g ê bīn; 19 chit-pêng ū lâng ê bīn, ǹg chang-chhiū, hit-pêng ū sai ê bīn, ǹg chang-chhiū; chhù-lāi sì-ûi lóng sī án-ni. 20 Tùi thô͘-kha kàu mn̂g-téng, lóng ū khek ki-lō͘-peng kap chang-chhiū; tiān ê chhiûⁿ lóng sī án-ni. 21 Tiān ê mn̂g-khiā sī sù-hong--ê; chì-sèng-só͘ ê chêng-bīn, khoán-sit chhin-chhiūⁿ tiān ê khoán-sit. 22 Tôaⁿ sī chhâ-chòe--ê, koâiⁿ saⁿ tiú, tn̂g nn̄g tiú, i ê kak, i ê chō, kap i ê sì-piⁿ lóng sī chhâ-chòe--ê; i tùi góa kóng, Che sī Iâ-hô-hoa bīn-chêng ê toh. 23 Tiān kap chì-sèng-só͘ ū nn̄g ê mn̂g. 24 Ta̍k ê mn̂g ū nn̄g-sìⁿ, chit ê nn̄g-sìⁿ sī ōe áu-tit--ê; chit ê mn̂g nn̄g-sìⁿ, hit ê mn̂g iā nn̄g-sìⁿ. 25 Tiān ê mn̂g-téng ū khek ki-lō͘-peng kap chang-chhiū, kap khek tī chhiûⁿ-téng--ê chi̍t-iūⁿ; tī gōa-bīn lông ê thâu-chêng ū kāu ê chhâ-pán. 26 Lông ê piⁿ-thâu, chit-pêng hit-pêng, lóng ū koaiⁿ-ba̍t ê thang-á kap chang-chhiū; chhù ê piⁿ-pâng, kap kāu ê chhâ-pán, lóng sī án-ni.
1 伊chhōa我出來到外院；koh chhōa我入另外隔開ê地相對面ê房；hit間房ǹg北，tī厝宅ê對面。 2 Tī一百肘長，五十肘闊ê頭前，有北門。 3 屬內院二十肘ê對面，koh屬外院舖石地ê對面，有樓ê廊對樓ê廊，三層。 4 Tī hiahê房ê頭前有一條路，闊十肘，ǹg內面一百肘ê路；in ê門lóng ǹg北。 5 頂層ê房khah狹，因為hō͘樓ê廊佔伊ê地；比中層，下層，佔khah-chōe。 6 因為伊有三層，總是無柱，親像hiahê院ê柱；所以伊ê頂層比地平ê下層、中層khah狹。 7 Koh tī外面ê房ê邊頭，ǹg hitê房ê頭前ê外院，長五十肘。 8 因為外院chiahê房，長五十肘；看ah，殿 ê頭前有一百肘。 9 Tī房ê下面，tùi東pêng有入去ê所在；就是人tùi外院ōe入去hia。 10 Ǹg南tī院ê牆ê闊，tī隔開ê所在對面，也tī厝宅ê對面，有hiahê房； 11 伊ê頭前有路，in親像ǹg北ê房ê款式；長闊lóng相同；出入ê所在，lóng照in ê款式，也照in ê門。 12 照ǹg南hiahê房ê門，tī路ê頭有門，就是東勢ê牆面前ê路，tī入去ê所在。 13 伊kā我講，隔開ê所在ê頭前，chiahê北勢ê房，南勢ê房，lóng是聖ê房；親近耶和華ê祭司beh tī-hia食至聖ê物；也用至聖ê物，就是素祭、贖罪祭、補過失ê祭，hē tī hit所在，因為chit所在是聖。 14 祭司入去ê時，就m̄-thang tùi聖所出來到外院；tio̍h tī-hia放下in行職份ê時所穿ê衫；因為he是聖；tio̍h換in ê衫，chiah thang到屬tī百姓ê。 15 伊量內厝明白，就chhōa我出ǹg東ê門，量伊ê四圍。 16 伊用篙尺量東方，就是用篙尺量伊ê四圍，五百篙尺。 17 伊用篙尺量北方，量伊ê四圍，五百篙尺。 18 伊用篙尺量南方五百篙尺。 19 伊oa̍t到西方用篙尺量伊，五百篙尺。 20 伊量伊ê四方，四圍有牆，長五百，闊五百，來分別聖ê kap平常-ê。
1 I chhōa góa chhut-lâi kàu gōa-īⁿ; koh chhōa góa ji̍p lēng-gōa keh-khui ê tōe saⁿ-tùi-bīn ê pâng; hit keng pâng ǹg-pak, tī chhù-the̍h ê tùi-bīn. 2 Tī chi̍t-pah tiú tn̂g, gō͘-cha̍p tiú khoah ê thâu-chêng, ū pak-mn̂g. 3 Sio̍k lāi-īⁿ jī-cha̍p tiú ê tùi-bīn, koh sio̍k gōa-īⁿ pho͘-chio̍h-tōe ê tùi-bīn, ū lâu ê lông tùi lâu ê lông, saⁿ-chàn. 4 Tī hiah ê pâng ê thâu-chêng ū chi̍t-tiâu lō͘, khoah cha̍p tiú, ǹg lāi-bīn chi̍t-pah tiú ê lō͘; in ê mn̂g lóng ǹg-pak. 5 Téng-chàn ê pâng khah oe̍h, in-ūi hō͘ lâu ê lông chiàm i ê tōe; pí tiong-chàn, ē-chàn, chiàm khah-chōe. 6 In-ūi i ū saⁿ-chàn, chóng-sī bô thiāu, chhin-chhiūⁿ hiah ê īⁿ ê thiāu; só͘-í i ê téng-chàn pí tōe-pîⁿ ê ē-chàn tiong-chàn khah oe̍h. 7 Koh tī gōa-bīn ê pâng ê piⁿ-thâu, ǹg hit ê pâng ê thâu-chêng ê gōa-īⁿ, tn̂g gō͘-cha̍p tiú. 8 In-ūi gōa-īⁿ chiah ê pâng, tn̂g gō͘-cha̍p tiú; khòaⁿ ah, tiān ê thâu-chêng ū chi̍t-pah tiú. 9 Tī pâng ê ē-bīn, tùi tang-pêng ū ji̍p-khì ê só͘-chāi; chiū-sī lâng tùi gōa-īⁿ ōe ji̍p-khì hia. 10 Ǹg-lâm tī īⁿ ê chhiûⁿ ê khoah, tī keh-khui ê só͘-chāi tùi-bīn, iā tī chhù-the̍h ê tùi-bīn, ū hiah ê pâng; 11 i ê thâu-chêng ū lō͘, in chhin-chhiūⁿ ǹg-pak ê pâng ê khoán-sit; tn̂g khoah lóng saⁿ-tâng; chhut-ji̍p ê só͘-chāi, lóng chiàu in ê khoán-sit, iā chiàu in ê mn̂g. 12 Chiàu ǹg-lâm hiah ê pâng ê mn̂g, tī lō͘ ê thâu ū mn̂g, chiū-sī tang--sì ê chhiûⁿ bīn-chêng ê lō͘, tī ji̍p-khì ê só͘-chāi. 13 I kā góa kóng, Keh-khui ê só͘-chāi ê thâu-chêng, chiah ê pak--sì ê pâng, lâm--sì ê pâng, lóng sī sèng ê pâng; chhin-kūn Iâ-hô-hoa ê chè-si beh tī-hia chia̍h chì-sèng ê mi̍h; iā ēng chì-sèng ê mi̍h, chiū-sī sò͘-chè, sio̍k-chōe-chè, pó͘-kè-sit ê chè, hē tī hit só͘-chāi, in-ūi chit só͘-chāi sī sèng. 14 Chè-si ji̍p-khì ê sî, chiū m̄-thang tùi sèng-só͘ chhut-lâi kàu gōa-īⁿ; tio̍h tī-hia pàng-hē in kiâⁿ chit-hūn ê sî só͘ chhēng ê saⁿ; in-ūi he sī sèng; tio̍h ōaⁿ in ê saⁿ, chiah thang kàu sio̍k tī peh-sìⁿ--ê. 15 I niû lāi-chhù bêng-pe̍k, chiū chhōa góa chhut ǹg-tang ê mn̂g, niû i ê sì-ûi. 16 I ēng ko-chhioh niû tang-hng, chiū-sī ēng ko-chhioh niû i ê sì-ûi, gō͘-pah ko-chhioh. 17 I ēng ko-chhioh niû pak-hng, niû i ê sì-ûi, gō͘-pah ko-chhioh. 18 I ēng ko-chhioh niû lâm-hng gō͘-pah ko-chhioh. 19 I oa̍t kàu sai-hng ēng ko-chhioh niû--i, gō͘-pah ko-chhioh. 20 I niû i ê sì-hng, sì-ûi ū chhiûⁿ, tn̂g gō͘-pah, khoah gō͘-pah, lâi hun-piat sèng--ê kap pêng-siông--ê.
1 後來伊chhōa我到一个門，就是ǹg東ê門。 2 看ah，以色列上帝ê榮光tùi東勢來；伊ê聲親像chōe-chōe水ê聲；地就因為伊ê榮耀來發出光。 3 伊ê款式是親像我所看見ê款式，就是我前來beh滅城ê時所看見ê款式；hitê異象也親像我tī Ka-pa-ló͘河邊所看見ê異象；我就仆落地。 4 耶和華ê榮光tùi ǹg東ê門入tī殿內。 5 Tùi án-ni，神就舉起我，帶我入內院；看ah，耶和華ê榮光充滿殿內。 6 我聽見有一位tùi殿內ǹg我講話；有一人khiā tī我ê身邊。 7 伊對我講，人子ah，這是我寶座ê所在，是我腳掌所踏ê地，我beh tī-chia tiàm tī以色列人ê中間到永遠。以色列家kap in ê君王無beh koh用in ê淫行以及in ê君王ê身屍tī高ê所在來phah lâ-sâm我ê聖名； 8 in hē in ê門碇近óa我ê門碇，in ê門khiā近óa我ê門khiā；in kap我ê中間不過隔一chōa牆；koh用in所行可惡ê事phah lâ-sâm我ê聖名；所以我受氣來滅in。 9 Taⁿ in tio̍h tùi我ê面前除去in ê淫行kap君王ê身屍離開遠遠，我就tiàm tī in ê中間到永遠。 10 人子ah，你tio̍h將chitê殿指示以色列家，hō͘ in 因為家己ê罪過來見笑；in也tio̍h量殿ê規模。 11 In若為tio̍h家己一切所行ê事來見笑，你tio̍h指示in chitê殿ê模kap伊ê款式，伊出ê所在，伊入ê所在，kap伊一切ê規模，伊一切ê禮儀，伊一切ê規模，伊一切ê法度，lóng寫tī in ê目睭前；hō͘ in守一切ê規模，一切ê禮儀來行伊。 12 殿ê法度就是án-ni，tī山頂四圍ê界內lóng做至聖。看ah，這就是殿 ê法度。 13 以下是壇ê量數，是用肘量伊；(一个肘是一肘koh加一巴掌) ；壇底一肘，闊一肘，四圍ê墘有掾，高一巴掌；這就是壇ê座。 14 Tùi óa土腳ê底座到下層ê khat，高兩肘，闊一肘，tùi 細khat到大khat高四肘，闊一肘。 15 頂面ê壇有四肘；壇ê頂面有thóng四支角。 16 壇長十二肘，闊十二肘，款式四方。 17 四面ê khat，長十四肘，闊十四肘；四圍ê掾有半肘；伊ê底座四圍一肘；伊ê崎層ǹg東。 18 伊對我講，人子ah，主耶和華án-ni講：起造祭壇為tio̍h beh tī hit頂面獻燒祭，hiù血；到造成ê時伊ê例親像下底。 19 主耶和華講，你tio̍h將一隻公ê牛á，做贖罪ê祭，交hō͘祭司利未人，Sat-tok ê後裔，就是hiahê親近我服事我ê。 20 你tio̍h取牛á ê血，抹tī壇ê四角，kap khat-á ê四角；kap四圍ê掾；án-ni來hō͘伊清氣，koh為tio̍h伊贖罪。 21 你也tio̍h將hit隻做贖罪祭ê牛á，燒tī聖所ê外面，厝內定tio̍h ê所在。 22 第二-日tio̍h將無瑕疵ê山羊káng獻做贖罪ê祭；in beh清氣hitê壇親像bat用公ê牛á清氣伊一樣。 23 你已經清氣伊，tio̍h獻一隻無瑕疵公ê牛kap羊群中一隻無瑕疵公ê綿羊。 24 你tio̍h將chiahê物獻tī耶和華ê面前，祭司tio̍h用鹽sám tī in頂面，獻hō͘耶和華做燒祭。 25 七日內每日你tio̍h備辦一隻公ê山羊做贖罪ê祭；in也tio̍h備辦一隻公ê牛á kap羊群中一隻公ê綿羊，lóng無瑕疵ê。 26 歷過七日in beh為壇贖罪，hō͘伊清氣；án-ni分別伊做聖。 27 Hiah-ê日已經滿，tùi第八日以後祭司beh tī壇頂獻lín ê燒祭kap平安ê祭；我beh接納lín；這是主耶和華講ê。
1 Āu-lâi i chhōa góa kàu chi̍t ê mn̂g, chiū-sī ǹg-tang ê mn̂g. 2 Khòaⁿ ah, Í-sek-lia̍t Siōng-tè ê êng-kng tùi tang--sì lâi; I ê siaⁿ chhin-chhiūⁿ chōe-chōe chúi ê siaⁿ; tōe chiū in-ūi I ê êng-iāu lâi hoat-chhut kng. 3 I ê khoán-sit sī chhin-chhiūⁿ góa só͘ khòaⁿ-kìⁿ ê khoán-sit, chiū-sī góa chêng lâi beh bia̍t siâⁿ ê sî só͘ khòaⁿ-kìⁿ ê khoán-sit; hit ê īⁿ-siōng iā chhin-chhiūⁿ góa tī Ka-pa-ló͘ hô-piⁿ só͘ khoaⁿ-kìⁿ ê īⁿ-siōng; góa chiū phak-lo̍h tōe. 4 Iâ-hô-hoa ê êng-kng tùi ǹg-tang ê mn̂g ji̍p tī tiān-lāi. 5 Tùi án-ni sîn chiū kú-khí góa, tòa góa ji̍p lāi-īⁿ; khòaⁿ ah, Iâ-hô-hoa ê êng-kng chhiong-móa tiān-lāi. 6 Góa thiaⁿ-kìⁿ ū chi̍t-ūi tùi tiān-lāi ǹg góa kóng-ōe; ū chi̍t-lâng khiā tī góa ê sin-piⁿ. 7 I tùi góa kóng, Jîn-chú ah, che sī Góa pó-chō ê só͘-chāi, sī Góa kha-chiúⁿ só͘ ta̍h ê tōe, Góa beh tī-chia tiàm tī Í-sek-lia̍t lâng ê tiong-kan kàu éng-oán. Í-sek-lia̍t-ke kap in ê kun-ông bô beh koh ēng in ê îm-hēng í-ki̍p in ê kun-ông ê sin-si tī koâiⁿ ê só͘-chāi lâi phah lâ-sâm Góa ê sèng-miâ; 8 in hē in ê mn̂g-tēng kūn-óa Góa ê mn̂g-tēng, in ê mn̂g-khiā kūn-óa Góa ê mn̂g-khiā; in kap Góa ê tiong-kan put-kò keh chi̍t-chōa chhiûⁿ; koh ēng in só͘ kiâⁿ khó-ò͘ⁿ ê sū phah lâ-sâm Góa ê sèng-miâ; só͘-í Góa siū-khì lâi bia̍t in. 9 Taⁿ in tio̍h tùi Góa ê bīn-chêng tû--khì in ê îm-hēng kap kun-ông ê sin-si lī-khui hn̄g-hn̄g, Góa chiū tiàm tī in ê tiong-kan kàu éng-oán. 10 Jîn-chú ah, lí tio̍h chiong chit ê tiān chí-sī Í-sek-lia̍t-ke, hō͘ in in-ūi ka-kī ê chōe-kòa lâi kiàn-siàu; in iā tio̍h niû tiān ê kui-bô͘. 11 In nā ūi-tio̍h ka-kī it-chhè só͘-kiâⁿ ê sū lâi kiàn-siàu, lí tio̍h chí-sī in chit ê tiān ê bô͘ kap i ê khoán-sit, i chhut ê só͘-chāi, i ji̍p ê só͘-chāi, kap i it-chhè ê kui-bô͘, i it-chhè ê lé-gî, i it-chhè ê kui-bô͘, i it-chhè ê hoat-tō͘, lóng siá tī in ê ba̍k-chiu-chêng; hō͘ in siú it-chhè ê kui-bô͘, it-chhè ê lé-gî lâi kiâⁿ i. 12 Tiān ê hoat-tō͘ chiū-sī án-ni, tī soaⁿ-téng sì-ûi ê kài-lāi lóng chòe chì-sèng. Khòaⁿ ah, che chiū-sī tiān ê hoat-tō͘. 13 Í-hā sī tôaⁿ ê niû-sò͘, sī ēng tiú niû i; (chi̍t ê tiú sī chi̍t tiú koh ke chi̍t pa-chiúⁿ); tôaⁿ-tóe chi̍t-tiú, khoah chi̍t-tiú, sì-ûi ê kîⁿ ū iān, koâiⁿ chi̍t pa-chiúⁿ; che chiū-sī tôaⁿ ê chō. 14 Tùi óa thô͘-kha ê tóe-chō kàu ē-chàn ê khat, koâiⁿ nn̄g tiú, khoah chi̍t tiú, tùi sòe-khat kàu tōa-khat koâiⁿ sì tiú, khoah chi̍t-tiú. 15 Téng-bīn ê tôaⁿ ū sì tiú; tôaⁿ ê téng-bīn ū thóng sì ki kak. 16 Tôaⁿ tn̂g cha̍p-jī tiú, khoah cha̍p-jī tiú, khoán-sit sù-hong. 17 Sì-bīn ê khat, tn̂g cha̍p-sì tiú, khoah cha̍p-sì tiú; sì-ûi ê iān ū pòaⁿ-tiú; i ê tóe-chō sì-ûi chi̍t-tiú; i ê kiā-chàn ǹg tang. 18 I tùi góa kóng, Jîn-chú ah, Chú Iâ-hô-hoa án-ni kóng: Khí-chō chè-tôaⁿ ūi-tio̍h beh tī hí téng-bīn hiàn sio-chè, hiù-huih; kàu chō-chiâⁿ ê sî i ê lē chhin-chhiūⁿ ē-tóe. 19 Chú Iâ-hô-hoa kóng, Lí tio̍h chiong chi̍t chiah kang ê gû-á, chòe sio̍k-chōe ê chè, kau hō͘ chè-si Lī-bī-lâng, Sat-tok ê hō͘-è, chiū-sī hiah ê chhin-kūn Góa ho̍k-sāi Góa ê. 20 Lí tio̍h chhú gû-á ê huih, boah tī tôaⁿ ê sì-kak, kap khat-á ê sì-kak; kap sì-ûi ê iān; án-ni lâi hō͘ i chheng-khì, koh ūi-tio̍h i sio̍k-chōe. 21 Lí iā tio̍h chiong hit chiah chòe sio̍k-chōe-chè ê gû-á, sio tī sèng-só͘ ê gōa-bīn, chhù-lāi tiāⁿ-tio̍h ê só͘-chāi. 22 Tē-jī-ji̍t tio̍h chiong bô hâ-chhû ê soaⁿ-iûⁿ-kóng hiàn chòe sio̍k-chōe ê chè; in beh chheng-khì hit ê tôaⁿ chhin-chhiūⁿ bat ēng kang ê gû-á chheng-khì i chi̍t-iūⁿ. 23 Lí í-keng chheng-khì i, tio̍h hiàn chi̍t-chiah bô hâ-chhû kang ê gû kap iûⁿ-kûn tiong chi̍t-chiah bô hâ-chhû kang ê mî-iûⁿ. 24 Lí tio̍h chiong chiah ê mi̍h hiàn tī Iâ-hô-hoa ê bīn-chêng, chè-si tio̍h ēng iâm sám tī in téng-bīn, hiàn hō͘ Iâ-hô-hoa chòe sio-chè. 25 Chhit-ji̍t-lāi múi-ji̍t lí tio̍h pī-pān chi̍t-chiah kang ê soaⁿ-iûⁿ chòe sio̍k-chōe ê chè; in iā tio̍h pī-pān chi̍t-chiah kang ê gû-á kap iûⁿ-kûn-tiong chi̍t-chiah kang ê mî-iûⁿ, lóng bô hâ-chhû--ê. 26 Le̍k-kè chhit-ji̍t in beh ūi tôaⁿ sio̍k-chōe, hō͘ i chheng-khì; án-ni hun-piat i chòe sèng. 27 Hiah ê ji̍t í-keng móa, tùi tē poeh-ji̍t í-āu chè-si beh tī tôaⁿ-téng hiàn lín ê sio-chè kap pêng-an ê chè; Góa beh chiap-la̍p lín; che sī Chú Iâ-hô-hoa kóng--ê.
1 伊koh帶我倒tńg到聖所ê外面ǹg東ê門；hitê門關teh。 2 耶和華kā我講，chitê門，的確tio̍h關，m̄-thang開；無論甚麼人m̄-thang tùi hia入，因為耶和華，以色列ê上帝，已經tùi hia入；所以tio̍h長長關teh。 3 論到人君，因為伊是人君，thang坐tī hit內面，tī耶和華ê面前食餅；伊tio̍h tùi chitê門ê廊入，也tio̍h tùi hia出。 4 伊koh帶我tùi北門到殿 ê頭前；我就看，看見耶和華ê榮光充滿耶和華ê殿；我就仆落地。 5 耶和華kā我講，人子ah，我對你所講起耶和華殿內一切ê禮儀法度你tio̍h注意，用目睭看，用耳孔聽，也tio̍h注意殿堂入ê所在，kap聖所一切出去ê所在。 6 你也tio̍h對hiahê悖逆ê，對以色列家，講，主耶和華án-ni講，以色列家ah，lín行一切可惡ê事tio̍h掠做夠額； 7 lín獻我ê餅kap油kap血ê時，lín chhōa hiahê心無受割禮，身軀也無受割禮ê外邦人入我ê聖所，來phah lâ-sâm我ê殿，koh背我ê約，加添lín一切可惡ê事。 8 Lín也無盡忠tī顧守我聖物ê職份；是為tio̍h lín本身派別人tī我ê聖所顧守我交帶lín ê職份。 9 主耶和華án-ni講，以色列族中ê外邦人，就是心無受割禮，身軀無受割禮ê外邦人，lóng m̄-thang入我ê聖所。 10 當以色列行迷路ê時，有利未人離開我遠遠，就是行迷路離開我去tè in ê偶像；in tio̍h擔當in ê罪過。 11 總是in beh tī我ê聖所做差用，管理殿堂ê門，tī殿內做差用；為tio̍h百姓刣燒祭kap祭祀ê cheng-siⁿ，beh khiā tī in ê面前來服事in。 12 既然tī in ê偶像ê面前做百姓ê差用，koh做窒礙hō͘以色列家陷落罪過；所以我kia̍h起手攻擊in，in beh擔當in ê罪過；這是主耶和華講ê。 13 In bōe-thang親近我，tùi我行祭司ê職份，也m̄-thang親近我一件聖物，就是至聖ê物；in beh擔當in ê見笑kap in所行可惡ê事。 14 總是我beh hō͘ in擔當顧守殿 ê職份，辨理其中一切ê事，kap hit內面所tio̍h做ê工。 15 以色列族行迷路離開我ê時，祭司利未人，Sat-tok ê kiáⁿ孫，猶原顧守我ê聖所，in beh親近我，服事我，koh khiā tī我ê面前，用油kap血獻hō͘我；這是主耶和華講ê。 16 In beh入我ê聖所，就近我ê桌，服事我，守我所交帶in做ê。 17 In入內院ê門ê時tio̍h穿幼苧衫；in tī內院ê門kap tī殿內行職份ê時，lóng m̄-thang穿羊毛ê衣服。 18 In ê頭殼頂tio̍h tì幼苧布ê帽，腳腿tio̍h穿幼苧布ê 褲；hitê會流汗ê lóng m̄-thang穿。 19 In出去到外院，就是到外院ê百姓hia，tio̍h thǹg行職份ê衣服hē tī聖ê房間，穿別號ê衣服，免得用in ê衫hō͘百姓成聖。 20 In m̄-thang剃頭，也m̄-thang hō͘頭毛hoat長長；獨獨tio̍h剪頭毛。 21 祭司入內院ê時lóng m̄-thang lim酒。 22 也m̄-thang娶寡婦kap受離出ê婦人人做bó͘；獨獨tio̍h 娶以色列族中ê在室女á是祭司ê寡婦。 23 In tio̍h hō͘我ê百姓知聖ê kap平常-ê ê cheng差,koh hō͘ in分別無清氣ê kap清氣ê。 24 有相告ê事in tio̍h khiā-teh判斷，tio̍h照我ê判斷來判斷；tī我一切ê節期tio̍h守我chiahê法度律例；也tio̍h守我chiahê安歇日做聖。 25 In m̄-thang近óa死人，phah lâ-sâm家己；獨獨thang為tio̍h老父、老母、kiáⁿ、cha-bó͘-kiáⁿ、兄弟，kap iáu未出嫁ê姊妹phah lâ-sâm家己。 26 伊已經清氣了後，tio̍h kā伊koh算七日。 27 當伊入聖所到內院ê日，beh tī聖所服事，tio̍h為本身獻贖罪祭；這是主耶和華講ê。 28 In的確有產業，我是in ê產業；m̄-thang tī以色列中hō͘ in基業，我是in ê基業。 29 素祭、贖罪祭、補過失祭，in lóng thang食伊；以色列中所獻一切ê物lóng歸tī in。 30 見若起頭熟 ê物ê第一ê，kap一切禮物中ê禮物，lóng歸tī祭司；lín也tio̍h用起頭出ê麥粉hō͘祭司，thang hō͘福氣臨到你ê家。 31 無論鳥á是獸，見若家己死ê，á是受擘拆ê，祭司lóng m̄-thang食。
1 I koh tòa góa tò-tńg kàu sèng-só͘ ê gōa-bīn ǹg-tang ê mn̂g; hit ê mn̂g koaiⁿ--teh. 2 Iâ-hô-hoa kā góa kóng, Chit ê mn̂g, tek-khak tio̍h koaiⁿ, m̄-thang khui; bô-lūn sím-mi̍h lâng m̄-thang tùi hia ji̍p, in-ūi Iâ-hô-hoa, Í-sek-lia̍t ê Siōng-tè, í-keng tùi hia ji̍p; só͘-í tio̍h tn̂g-tn̂g koaiⁿ--teh. 3 Lūn-kàu jîn-kun, in-ūi i sī jîn-kun, thang chē tī hit lāi-bīn, tī Iâ-hô-hoa ê bīn-chêng chia̍h piáⁿ; i tio̍h tùi chit ê mn̂g ê lông ji̍p, iā tio̍h tùi-hia chhut. 4 I koh tòa góa tùi pak-mn̂g kàu tiān ê thâu-chêng; góa chiū khòaⁿ, khòaⁿ-kìⁿ Iâ-hô-hoa ê êng-kng chhiong-móa Iâ-hô-hoa ê tiān; góa chiū phak-lo̍h tōe. 5 Iâ-hô-hoa kā góa kóng, Jîn-chú ah, Góa tùi lí só͘ kóng-khí Iâ-hô-hoa tiān-lāi it-chhè ê lé-gî hoat-tō͘ lí tio̍h chù-ì, ēng ba̍k-chiu khòaⁿ, ēng hī-khang thiaⁿ, iā tio̍h chù-ì tiān-tn̂g ji̍p ê só͘-chāi, kap sèng-só͘ it-chhè chhut-khì ê só͘-chāi. 6 Lí iā tio̍h tùi hiah ê pōe-ge̍k-ê, tùi Í-sek-lia̍t-ke, kóng, Chú Iâ-hô-hoa án-ni kóng, Í-sek-lia̍t-ke ah, lín kiâⁿ it-chhè khó-ò͘ⁿ ê sū tio̍h lia̍h-chòe kàu-gia̍h; 7 lín hiàn Góa ê piáⁿ kap iû kap huih ê sî, lín chhōa hiah ê sim bô siū kat-lé, seng-khu iā bô siū kat-lé ê gōa-pang lâng ji̍p Góa ê sèng-só͘, lâi phah lâ-sâm Góa ê tiān, koh pōe Góa ê iok, ke-thiⁿ lín it-chhè khó-ò͘ⁿ ê sū. 8 Lín iā bô chīn-tiong tī kò͘-siú Góa sèng-mi̍h ê chit-hūn; sī ūi-tio̍h lín pún-sin phài pa̍t-lâng tī Góa ê sèng-só͘ kò͘-siú Góa kau-tài lín ê chit-hūn. 9 Chú Iâ-hô-hoa án-ni kóng, Í-sek-lia̍t cho̍k-tiong ê gōa-pang lâng, chiū-sī sim bô siū kat-lé, seng-khu bô siū kat-lé ê gōa-pang lâng, lóng m̄-thang ji̍p Góa ê sèng-só͘. 10 Tng Í-sek-lia̍t kiâⁿ bê-lō͘ ê sî, ū Lī-bī lâng lī-khui Góa hn̄g-hn̄g, chiū-sī kiâⁿ bê-lō͘ lī-khui Góa khì tè in ê ngó͘-siōng; in tio̍h tam-tng in ê chōe-kòa. 11 Chóng-sī in beh tī Góa ê sèng-só͘ chòe chhe-ēng, koán-lí tiān-tn̂g ê mn̂g, tī tiān-lāi chòe chhe-ēng; ūi-tio̍h peh-sìⁿ thâi sio-chè kap chè-sū ê cheng-siⁿ, beh khiā tī in ê bīn-chêng lâi ho̍k-sāi in. 12 Kì-jiân tī in ê ngó͘-siōng ê bīn-chêng chòe peh-sìⁿ ê chhe-ēng, koh chòe that-gāi hō͘ Í-sek-lia̍t-ke hām-lo̍h chōe-kòa; só͘-í Góa kia̍h-khí chhiú kong-kek in, in beh tam-tng in ê chōe-kòa; che sī Chú Iâ-hô-hoa kóng--ê. 13 In bōe thang chhin-kūn Góa, tùi Góa kiâⁿ chè-si ê chit-hūn, iā m̄-thang chhin-kūn Góa chi̍t-kiāⁿ sèng-mi̍h, chiū-sī chì-sèng ê mi̍h; in beh tam-tng in ê kiàn-siàu kap in só͘ kiâⁿ khó-ò͘ⁿ ê sū. 14 Chóng-sī Góa beh hō͘ in tam-tng kò͘-siú tiān ê chit-hūn, pān-lí kî-tiong it-chhè ê sū, kap hit lāi-bīn só͘ tio̍h chòe ê kang. 15 Í-sek-lia̍t cho̍k kiâⁿ bê-lō͘ lī-khui Góa ê sî, chè-si Lī-bī lâng, Sat-tok ê kiáⁿ-sun, iû-goân kò͘-siú Góa ê sèng-só͘, in beh chhin-kūn Góa, ho̍k-sāi Góa, koh khiā tī Góa ê bīn-chêng, ēng iû kap huih hiàn hō͘ Góa; che sī Chú Iâ-hô-hoa kóng--ê. 16 In beh ji̍p Góa ê sèng-só͘, chiū-kūn Góa ê toh, ho̍k-sāi Góa, siú Góa só͘ kau-tài in chòe--ê. 17 In ji̍p lāi-īⁿ ê mn̂g ê sî tio̍h chhēng iù-tōe-saⁿ; in tī lāi-īⁿ ê mn̂g kap tī tiān-lāi kiâⁿ chit-hūn ê sî, lóng m̄-thang chhēng iûⁿ-mn̂g ê i-ho̍k. 18 In ê thâu-khak-téng tio̍h tì iù-tōe-pò͘ ê bō, kha-thúi tio̍h chhēng iù-tōe-pò͘ ê khò͘; hit ê ōe lâu-kōaⁿ-ê lóng m̄-thang chhēng. 19 In chhut-khì kàu gōa-īⁿ, chiū-sī kàu gōa-īⁿ ê peh-sìⁿ hia, tio̍h thǹg kiâⁿ chit-hūn ê i-ho̍k hē tī sèng ê pâng-keng, chhēng pa̍t-hō ê i-ho̍k, bián-tit ēng in ê saⁿ hō͘ peh-sìⁿ chiâⁿ-sèng. 20 In m̄-thang thì-thâu, iā m̄-thang hō͘ thâu-mn̂g hoat tn̂g-tn̂g; to̍k-to̍k tio̍h chián thâu-mn̂g. 21 Chè-si ji̍p lāi-īⁿ ê sî lóng m̄-thang lim-chiú. 22 Iā m̄-thang chhōa kóaⁿ-hū kap siū lî-chhut ê hū-jîn-lâng chòe-bó͘; to̍k-to̍k tio̍h chhōa Í-sek-lia̍t cho̍k-tiong ê chāi-sek-lú á-sī chè-si ê kóaⁿ-hū. 23 In tio̍h hō͘ Góa ê peh-sìⁿ chai sèng-ê kap pêng-siông-ê ê cheng-chha; koh hō͘ in hun-piat bô chheng-khì-ê kap chheng-khì-ê. 24 Ū saⁿ-kò ê sū in tio̍h khiā-teh phòaⁿ-toàn, tio̍h chiàu Góa ê phòaⁿ-toàn lâi phòaⁿ-toàn; tī Góa it-chhè ê choeh-kî tio̍h siú Góa chiah ê hoat-tō͘ lu̍t-lē; iā tio̍h siú Góa chiah ê an-hioh-ji̍t chòe-sèng. 25 In m̄-thang kūn-óa sí-lâng, phah lâ-sâm ka-kī; to̍k-to̍k thang ūi-tio̍h lāu-pē, lâu-bú, kiáⁿ, cha-bó͘-kiáⁿ, hiaⁿ-tī, kap iáu-bē chhut-kè ê chì-bē phah lâ-sâm ka-kī. 26 I í-keng chheng-khì liáu-āu, tio̍h kā i koh sǹg chhit-ji̍t. 27 Tng i ji̍p sèng-só͘ kàu lāi-īⁿ ê ji̍t, beh tī sèng-só͘ ho̍k-sāi, tio̍h ūi pún-sin hiàn sio̍k-chōe-chè; che sī Chú Iâ-hô-hoa kóng--ê. 28 In tek-khak ū sán-gia̍p, Góa sī in ê sán-gia̍p; m̄-thang tī Í-sek-lia̍t-tiong hō͘ in ki-gia̍p, Góa sī in ê ki-gia̍p. 29 Sò͘-chè, sio̍k-chōe-chè, pó͘-kè-sit-chè, in lóng thang chia̍h i; Í-sek-lia̍t tiong só͘ hiàn it-chhè ê mi̍h lóng kui tī in. 30 Kìⁿ-nā khí-thâu-se̍k ê mi̍h ê tē-it ê, kap it-chhè lé-mi̍h-tiong ê lé-mi̍h, lóng kui tī chè-si; lín iā tio̍h ēng khí-thâu chhut ê be̍h-hún hō͘ chè-si, thang hō͘ hok-khì lîm-kàu lí ê ke. 31 Bô-lūn chiáu á-sī siù, kìⁿ-nā ka-kī sí--ê, á-sī siū peh-thiah--ê, chè-si lóng m̄-thang chia̍h.
1 Lín 拈鬮分地做業，tio̍h獻一份hō͘耶和華來做聖，長兩萬五千篙尺，闊一萬篙尺；伊ê界ê四圍lóng做聖。 2 其中分別一段做聖所，長五百，闊五百，伊ê款式四方；四圍koh五十肘做郊野ê地。 3 Tī所量ê ê中間你tio̍h量，長兩萬五千，闊一萬；hit中間有聖所，就是至聖ê。 4 這是全地一份ê聖地；tio̍h歸tī祭司，就是做聖所ê差用，近óa來服事耶和華ê；chitê地thang做in起厝ê所在，kap聖所ê聖地。 5 又koh一份，長兩萬五千，闊一萬，tio̍h歸tī殿內做差用ê利未人，做in ê業，二十間房。 6 Lín tio̍h分派做城ê業，闊五千，長兩萬五千，kap所獻ê聖地相排；這是beh做以色列全家ê路用。 7 見若歸tī人君ê是tī所獻ê聖地以及城ê業chit-pêng hit-pêng，tī所獻聖地ê頭前kap城ê業ê頭前，tùi西方ǹg西，tùi東方ǹg東；伊ê長tio̍h kap in ê一支派ê份額相同，tùi西界到東界。 8 Tī以色列ê境內人君beh得tio̍h chitê做基業；後來我chiahê人君無koh欺壓我ê百姓；beh用地hō͘以色列家照in ê支派。 9 主耶和華án-ni講：以色列chiahê人君ah，lín taⁿ夠額lah；tio̍h除去強暴kap搶劫ê事，秉公行義；無koh霸佔百姓ê業；這是主耶和華講ê。 10 Lín tio̍h用公道ê天秤，公道ê i-hoat，公道ê pà-tek。 11 I-hoat kap pà-tek tio̍h平大，hō͘ pà-tek thang tóe hō-mûi-ní十份ê一份，i-hoat也thang tóe hō-mûi-ní十份ê一份；lóng用hō-mûi-ní做標準。 12 Sià-khek-le̍k tio̍h做二十kùi-la̍h；二十ê sià-khek-le̍k，二十五ê sià-khek-le̍k，十五ê sià-khek-le̍k是做lín ê bí-ná。 13 Lín所應該獻ê禮物tio̍h án-ni；小麥一hō-mûi-ní tio̍h獻i-hoat六份ê一份，大麥一hō-mûi-ní tio̍h獻i-hoat六份ê一份； 14 論到油ê定例，tùi油ê pà-tek，就是tùi一kho-ní，就是十個pà-tek，koh是一hō-mûi-ní，獻一pà-tek十份ê一份；因為十pà-tek，就是一hō-mûi-ní； 15 Tùi以色列肥ê草場tī羊群中每兩百隻羊tio̍h獻一隻羊羔，做素祭、燒祭、謝恩祭，替in贖罪；這就是主耶和華講ê。 16 境內ê眾百姓lóng tio̍h用chitê禮物獻hō͘以色列ê人君。 17 人君ê本份tī節期，ta̍k月ê初一，ta̍k-pái安歇日kap以色列家中所定tio̍h ê節期tio̍h獻燒祭、素祭、灌奠祭；伊tio̍h備辦贖罪祭、素祭、燒祭，kap平安祭，為tio̍h以色列家贖罪。 18 主耶和華án-ni講，Tī正月初一lín tio̍h取無瑕疵ê牛káng，來清氣聖所。 19 祭司tio̍h將贖罪祭ê血抹tī殿ê門khiā，kap壇khat ê四角，kap內院ê門khiā。 20 Hit月ê初七也tio̍h án-ni做為tio̍h錯誤犯罪ê，kap愚戇來犯tio̍h-ê，來為tio̍h殿贖罪。 21 正月十四，lín tio̍h守pôaⁿ過節，守chitê節七日；tio̍h食無酵ê餅。 22 Hit日人君tio̍h為tio̍h家己kap國內ê眾百姓備辦一隻公ê牛做贖罪祭。 23 當節期ê七日伊tio̍h備辦燒祭獻hō͘耶和華，連連七日，ta̍k日tio̍h用七隻牛káng kap七隻綿羊káng，lóng無瑕疵ê；ta̍k日也tio̍h備辦一隻山羊káng做贖罪祭。 24 伊也tio̍h備辦素祭，一隻牛káng一个i-hoat，一隻綿羊káng一个i-hoat，每i-hoat tio̍h油一him。 25 七月十五；守節ê時七日久伊tio̍h án-ni做；照贖罪祭，照燒祭，照素祭，也tio̍h照油。
1 Lín liam-khau pun tōe chòe-gia̍p, tio̍h hiàn chi̍t-hūn hō͘ Iâ-hô-hoa lâi chòe-sèng, tn̂g nn̄g-bān gō͘-chheng ko-chhioh, khoah chi̍t-bān ko-chhioh; i ê kài ê sì-ûi lóng chòe-sèng. 2 Kî-tiong hun-piat chi̍t-tōaⁿ chòe sèng-só͘, tn̂g gō͘-pah, khoah gō͘-pah, i ê khoán-sit sù-hong; sì-ûi koh gō͘-cha̍p tiú chòe kau-iá ê tōe. 3 Tī só͘ niû-ê ê tiong-kan lí tio̍h niû, tn̂g nn̄g-bān gō͘-chheng, khoah chi̍t-bān; hit tiong-kan ū sèng-só͘, chiū-sī chì-sèng--ê. 4 Che sī choân-tōe chi̍t-hūn ê sèng-tōe; tio̍h kui tī chè-si, chiū-sī chòe sèng-só͘ ê chhe-ēng, kūn-óa lâi ho̍k-sāi Iâ-hô-hoa ê; chit ê tōe thang chòe in khí-chhù ê só͘-chāi, kap sèng-só͘ ê sèng-tōe. 5 Iū-koh chi̍t-hūn, tn̂g nn̄g-bān gō͘-chheng, khoah chi̍t-bān, tio̍h kui tī tiān-lāi chòe chhe-ēng ê Lī-bī lâng, chòe in ê gia̍p, jī-cha̍p keng pâng. 6 Lín tio̍h hun-phài chòe siâⁿ ê gia̍p, khoah gō͘-chheng, tn̂g nn̄g-bān gō͘-chheng, kap só͘ hiàn ê sèng-tōe saⁿ-pâi; che sī beh chòe Í-sek-lia̍t choân-ke ê lō͘-ēng. 7 Kìⁿ-nā kui tī jîn-kun--ê sī tī só͘ hiàn ê sèng-tōe í-ki̍p siâⁿ ê gia̍p chit-pêng hit-pêng, tī só͘ hiàn sèng-tōe ê thâu-chêng kap siâⁿ ê gia̍p ê thâu-chêng, tùi sai-hng ǹg-sai, tùi tang-hng ǹg-tang; i ê tn̂g tio̍h kap in ê chi̍t chi-phài ê hūn-gia̍h saⁿ-tâng, tùi sai-kài kàu tang-kài. 8 Tī Í-sek-lia̍t ê kéng-lāi jîn-kun beh tit-tio̍h chit-ê chòe ki-gia̍p; āu-lâi Góa chiah ê jîn-kun bô koh khi-ap Góa ê peh-sìⁿ; beh ēng tōe hō͘ Í-sek-lia̍t-ke chiàu in ê chi-phài. 9 Chú Iâ-hô-hoa án-ni kóng: Í-sek-lia̍t chiah ê jîn-kun ah, lín taⁿ kàu-gia̍h--lah; tio̍h tû--khì kiông-pō kap chhiúⁿ-kiap ê sū, péng-kong kiâⁿ-gī; bô koh pà-chiàm peh-sìⁿ ê gia̍p; che sī Chú Iâ-hô-hoa kóng--ê. 10 Lín tio̍h ēng kong-tō ê thian-phêng, kong-tō ê i-hoat, kong-tō ê pà-tek. 11 I-hoat kap pà-tek tio̍h pîⁿ-tōa, hō͘ pà-tek thang tóe hō-mûi-ní cha̍p-hūn ê chi̍t-hūn, i-hoat iā thang tóe hō-mûi-ní cha̍p-hūn ê chi̍t-hūn; lóng ēng hō-mûi-ní chòe phiau-chún. 12 Sià-khek-le̍k tio̍h chòe jī-cha̍p kùi-la̍h; jī-cha̍p ê sià-khek-le̍k, jī-cha̍p-gō͘ ê sià-khek-le̍k, cha̍p-gō͘ ê sià-khek-le̍k sī chòe lín ê bí-ná. 13 Lín só͘ eng-kai hiàn ê lé-mi̍h tio̍h án-ni; sió-be̍h chi̍t hō-mûi-ní tio̍h hiàn i-hoat la̍k-hūn ê chi̍t-hūn, tōa-be̍h chi̍t hō-mûi-ní tio̍h hiàn i-hoat la̍k-hūn ê chi̍t-hūn; 14 lūn-kàu iû ê tēng-lē, tùi iû ê pà-tek, chiū-sī tùi chi̍t kho-ní, chiū-sī cha̍p ê pà-tek, koh sī chi̍t hō-mûi-ní, hiàn chi̍t pà-tek cha̍p-hūn ê chi̍t-hūn; in-ūi cha̍p pà-tek, chiū-sī chi̍t hō-mûi-ní; 15 tùi Í-sek-lia̍t pûi ê chháu-tiûⁿ tī iûⁿ-kûn-tiong múi nn̄g-pah chiah iûⁿ tio̍h hiàn chi̍t chiah iûⁿ-ko, chòe sò͘-chè, sio-chè, siā-un-chè, thòe in sio̍k-chōe; che chiū-sī Chú Iâ-hô-hoa kóng--ê. 16 Kéng-lāi ê chèng peh-sìⁿ lóng tio̍h ēng chit ê lé-mi̍h hiàn hō͘ Í-sek-lia̍t ê jîn-kun. 17 Jîn-kun ê pún-hūn tī choeh-kî, ta̍k-ge̍h ê chhoe-it, ta̍k-pái an-hioh-ji̍t kap Í-sek-lia̍t ke-tiong só͘ tiāⁿ-tio̍h ê choeh-kî tio̍h hiàn sio-chè, sò͘-chè, koàn-tiān-chè; i tio̍h pī-pān sio̍k-chōe-chè, sò͘-chè, sio-chè, kap pêng-an-chè, ūi-tio̍h Í-sek-lia̍t-ke sio̍k-chōe. 18 Chú Iâ-hô-hoa án-ni kóng, Tī chiaⁿ-ge̍h chhoe-it lín tio̍h chhú bô hâ-chhû ê gû-káng, lâi chheng-khì sèng-só͘. 19 Chè-si tio̍h chiong sio̍k-chōe-chè ê huih boah tī tiān ê mn̂g-khiā, kap tôaⁿ-khat ê sì-kak, kap lāi-īⁿ ê mn̂g-khiā. 20 Hit-ge̍h ê chhoe chhit iā tio̍h án-ni chòe ūi-tio̍h chhò-gō͘ hoān-chōe-ê, kap gû-gōng lâi hoān-tio̍h--ê, lâi ūi-tio̍h tiān sio̍k-chōe. 21 Chiaⁿ-ge̍h cha̍p-sì, lín tio̍h siú pôaⁿ-kè-choeh, siú chit ê choeh chhit-ji̍t; tio̍h chia̍h bô-kàⁿ ê piáⁿ. 22 Hit-ji̍t jîn-kun tio̍h ūi-tio̍h ka-kī kap kok-lāi ê chèng peh-sìⁿ pī-pān chi̍t chiah kang ê gû chòe sio̍k-chōe-chè. 23 Tng choeh-kî ê chhit-ji̍t i tio̍h pī-pān sio-chè hiàn hō͘ Iâ-hô-hoa, liân-liân chhit-ji̍t, ta̍k-ji̍t tio̍h ēng chhit-chiah gû-káng kap chhit chiah mî-iûⁿ-káng, lóng bô hâ-chhû--ê; ta̍k-ji̍t iā tio̍h pī-pān chi̍t chiah soaⁿ-iûⁿ-káng chòe sio̍k-chōe-chè. 24 I iā tio̍h pī-pān sò͘-chè, chi̍t chiah gû-káng chi̍t ê i-hoat, chi̍t chiah mî-iûⁿ-káng chi̍t ê i-hoat, múi i-hoat tio̍h iû chi̍t-him. 25 Chhit-ge̍h cha̍p-gō͘; siú choeh ê sî chhit-ji̍t kú i tio̍h án-ni chòe; chiàu sio̍k-chōe-chè, chiàu sio-chè, chiàu sò͘-chè, iā tio̍h chiàu iû.
1 主耶和華án-ni講：內院ǹg東ê門tī做工ê六日內的確tio̍h關；獨獨tī安歇日tio̍h開，月ê初一也tio̍h開。 2 人君tio̍h tùi chitê門ê廊tùi外面入，khiā tī門khiā邊；祭司tio̍h備辦伊ê燒祭kap伊ê謝恩祭，伊tio̍h tī門碇hit tah敬拜；然後出去，chitê門到ê-hng時m̄-thang關。 3 Tī chiahê安歇日，kap月ê初一，國內ê百姓tio̍h tī chitê門口敬拜tī耶和華ê面前。 4 人君tī安歇日所tio̍h獻hō͘耶和華ê燒祭，tio̍h無瑕疵ê羊羔六隻，無瑕疵ê綿羊káng一隻； 5 伊ê素祭為tio̍h hit隻綿羊káng tio̍h一个i-hoat，為tio̍h hiahê羊羔ê素祭是照伊ê力量一个i-hoat配油一him。 6 當月ê初一tio̍h獻無瑕疵ê牛káng一隻，羊羔六隻，綿羊káng一隻；lóng tio̍h無瑕疵ê。 7 伊也tio̍h備辦素祭，為tio̍h牛káng獻一个i-hoat，為tio̍h綿羊káng獻一个i-hoat，為tio̍h hiahê羊羔就照伊ê力量一个i-hoat配油一him。 8 人君入來ê時，tio̍h tùi chitê門ê廊入，也tio̍h tùi chitê路出。 9 Tī ta̍k-ê節期，國內ê百姓朝見耶和華ê時，tùi北門入來敬拜-ê tio̍h tùi南門出去；tùi南門入來ê tio̍h tùi北門出去；m̄-thang tùi所入ê門oa̍t倒tńg，tio̍h直直進前出去。 10 百姓入去ê時，人君也tio̍h tī in ê中間入去；百姓出去，人君也tio̍h kap in出去。 11 Tī節期kap tāi-hōe ê時，素祭tio̍h為tio̍h一隻牛káng獻一个i-hoat，為tio̍h一隻綿羊káng獻一个i-hoat，為tio̍h hiahê羊羔就照伊ê力量，一个i-hoat配油一him。 12 人君若備辦甘心ê祭，燒祭á是謝恩祭做甘心ê祭，獻hō͘耶和華，tio̍h有人kā伊開ǹg東ê門，伊tio̍h備辦伊ê燒祭kap伊ê謝恩祭親像tī安歇日所做一樣；然後伊tio̍h出去；出去了tio̍h有人kā伊關門。 13 Ta̍k日你tio̍h備辦無瑕疵，bē滿年ê羊羔一隻，做燒祭獻hō͘耶和華；ta̍k早起tio̍h備辦伊。 14 Ta̍k早起也tio̍h備辦相kap獻ê素祭，一i-hoat六份ê一份，kap一him油三份ê一份chhiau和麵粉；chitê素祭tio̍h常常獻hō͘耶和華，做永遠定tio̍h ê例。 15 Ta̍k早起in tio̍h án-ni備辦羊羔，素祭，kap油，做常常獻ê燒祭。 16 主耶和華án-ni講：人君若將產業hō͘伊ê kiáⁿ ê一个，就是做伊ê業，歸tī伊hiahê kiáⁿ，是in承接做業ê。 17 總是伊若將伊ê產業ê一份hō͘伊ê人臣ê一个，是做人臣ê到自由ê年，hit時猶原歸tī人君；論到伊ê產業tio̍h留hō͘伊hiahê kiáⁿ。 18 人君m̄-thang搶奪百姓ê產業，來趕in離開in所承接ê；伊tio̍h tùi家己ê業中將產業hō͘伊ê kiáⁿ；免得我ê百姓四散，ta̍k人離開伊所承接ê。 19 伊就chhōa我tùi門邊ê路入來到祭司ǹg北hiahê聖ê房間；看ah，後面西勢有一所在。 20 伊就kā我講，這是祭司煮補過失祭kap贖罪祭，以及pek素祭ê所在；免得帶到外院，hō͘百姓成做聖。 21 伊koh chhōa我出去到外院，hō͘我經過院四個角頭；看ah，tī hitê院ta̍k-ê角頭各有一个院。 22 Tī院ê四角頭有院，四面有牆圍teh；ta̍k-ê院，長四十肘，闊三十；四個角頭ê院，in ê寸尺lóng一樣。 23 四個院ê周圍有起一列，伊ê下面lóng有煮物ê所在。 24 伊kā我講，Chiahê就是煮物ê灶kha；殿內chiahê做差用ê tī-chia煮百姓ê祭祀。
1 Chú Iâ-hô-hoa án-ni kóng: Lāi-īⁿ ǹg-tang ê mn̂g tī chòe-kang ê la̍k-ji̍t-lāi tek-khak tio̍h koaiⁿ; to̍k-to̍k tī an-hioh-ji̍t tio̍h khui, ge̍h ê chhoe-it iā tio̍h khui. 2 Jîn-kun tio̍h tùi chit ê mn̂g ê lông tùi gōa-bīn ji̍p, khiā tī mn̂g-khiā-piⁿ; chè-si tio̍h pī-pān i ê sio-chè kap i ê siā-un-chè, i tio̍h tī mn̂g-tēng hit tah kèng-pài; jiân-āu chhut-khì, chit ê mn̂g kàu ê-hng-sî m̄-thang koaiⁿ. 3 Tī chiah ê an-hioh-ji̍t, kap ge̍h ê chhoe-it, kok-lāi ê peh-sìⁿ tio̍h tī chit ê mn̂g-kháu kèng-pài tī Iâ-hô-hoa ê bīn-chêng. 4 Jîn-kun tī an-hioh-ji̍t só͘ tio̍h hiàn hō͘ Iâ-hô-hoa ê sio-chè, tio̍h bô hâ-chhû ê iûⁿ-ko la̍k-chiah, bô hâ-chhû ê mî-iûⁿ-káng chi̍t-chiah; 5 i ê sò͘-chè ūi-tio̍h hit chiah mî-iûⁿ-káng tio̍h chi̍t ê i-hoat, ūi-tio̍h hiah ê iûⁿ-ko ê sò͘-chè sī chiàu i ê le̍k-liōng chi̍t ê i-hoat phòe iû chi̍t him. 6 Tng ge̍h ê chhoe-it tio̍h hiàn bô hâ-chhû ê gû-káng chi̍t-chiah, iûⁿ-ko la̍k-chiah, mî-iûⁿ-káng chi̍t-chiah; lóng tio̍h bô hâ-chhû--ê. 7 I iā tio̍h pī-pān sò͘-chè, ūi-tio̍h gû-káng hiàn chi̍t ê i-hoat, ūi-tio̍h mî-iûⁿ-káng hiàn chi̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng chi̍t ê i-hoat phòe iû chi̍t-him. 8 Jîn-kun ji̍p-lâi ê sî, tio̍h tùi chit ê mn̂g ê lông ji̍p, iā tio̍h tùi chit ê lō͘ chhut. 9 Tī ta̍k ê choeh-kî, kok-lāi ê peh-sìⁿ tiâu-kìⁿ Iâ-hô-hoa ê sî, tùi pak-mn̂g ji̍p-lâi kèng-pài-ê tio̍h tùi lâm-mn̂g chhut-khì; tùi lâm-mn̂g ji̍p-lâi-ê tio̍h tùi pak-mn̂g chhut-khì; m̄-thang tùi só͘ ji̍p ê mn̂g oa̍t-tò-tńg, tio̍h ti̍t-ti̍t chìn-chêng chhut-khì. 10 Peh-sìⁿ ji̍p-khì ê sî, jîn-kun iā tio̍h tī in ê tiong-kan ji̍p-khì; peh-sìⁿ chhut-khì, jîn-kun iā tio̍h kap in chhut-khì. 11 Tī choeh-kî kap tāi-hōe ê sî, sò͘-chè tio̍h ūi-tio̍h chi̍t-chiah gû-káng hiàn chi̍t ê i-hoat, ūi-tio̍h chi̍t-chiah mî-iûⁿ-káng hiàn chi̍t ê i-hoat, ūi-tio̍h hiah ê iûⁿ-ko chiū chiàu i ê le̍k-liōng, chi̍t ê i-hoat phòe iû chi̍t-him. 12 Jîn-kun nā pī-pān kam-sim ê chè, sio-chè á-sī siā-un-chè chòe kam-sim ê chè, hiàn hō͘ Iâ-hô-hoa, tio̍h ū lâng kā i khui ǹg-tang ê mn̂g, i tio̍h pī-pān i ê sio-chè kap i ê siā-un-chè chhin-chhiūⁿ tī an-hioh-ji̍t só͘ chòe chi̍t-iūⁿ; jiân-āu i tio̍h chhut-khì; chhut-khì-liáu tio̍h ū lâng kā i koaiⁿ-mn̂g. 13 Ta̍k-ji̍t lí tio̍h pī-pān bô hâ-chhû, bē móa-nî ê iûⁿ-ko chi̍t-chiah, chòe sio-chè hiàn hō͘ Iâ-hô-hoa; ta̍k chá-khí tio̍h pī-pān i. 14 Ta̍k chá-khí iā tio̍h pī-pān saⁿ-kap hiàn ê sò͘-chè, chi̍t i-hoat la̍k-hūn ê chi̍t-hūn, kap chi̍t him iû saⁿ-hūn ê chi̍t-hūn chhiau-hô mī-hún; chit ê sò͘-chè tio̍h siông-siông hiàn hō͘ Iâ-hô-hoa, chòe éng-oán tiāⁿ-tio̍h ê lē. 15 Ta̍k chá-khí in tio̍h án-ni pī-pān iûⁿ-ko, sò͘-chè, kap iû, chòe siông-siông hiàn ê sio-chè. 16 Chú Iâ-hô-hoa án-ni kóng: Jîn-kun nā chiong sán-gia̍p hō͘ i ê kiáⁿ ê chi̍t-ê, chiū-sī chòe i ê gia̍p, kui tī i hiah ê kiáⁿ, sī in sêng-chiap chòe gia̍p--ê. 17 Chóng-sī i nā chiong i ê sán-gia̍p ê chi̍t-hūn hō͘ i ê jîn-sîn ê chi̍t-ê, sī chòe jîn-sîn-ê kàu chū-iû ê nî, hit-sî iû-goân kui tī jîn-kun; lūn-kàu i ê sán-gia̍p tio̍h lâu hō͘ i hiah ê kiáⁿ. 18 Jîn-kun m̄-thang chhiúⁿ-toa̍t peh-sìⁿ ê sán-gia̍p, lâi kóaⁿ in lī-khui in só͘ sêng-chiap-ê; i tio̍h tùi ka-kī ê gia̍p-tiong chiong sán-gia̍p hō͘ i ê kiáⁿ; bián-tit Góa ê peh-sìⁿ sì-sòaⁿ, ta̍k-lâng lī-khui i só͘ sêng-chiap--ê. 19 I chiū chhōa góa tùi mn̂g-piⁿ ê lō͘ ji̍p-lâi kàu chè-si ǹg pak hiah ê sèng ê pâng-keng; khòaⁿ ah, āu-bīn sai-sì ū chi̍t só͘-chāi. 20 I chiū kā góa kóng, Che sī chè-si chú pó͘-kè-sit-chè kap sio̍k-chōe-chè, í-ki̍p pek sò͘-chè ê só͘-chāi; bián-tit tòa-kàu gōa-īⁿ, hō͘ peh-sìⁿ chiâⁿ-chòe sèng. 21 I koh chhōa góa chhut-khì kàu gōa-īⁿ, hō͘ góa keng-kè īⁿ sì ê kak-thâu; khòaⁿ ah, tī hit ê īⁿ ta̍k ê kak-thâu kok ū chi̍t ê īⁿ. 22 Tī īⁿ ê sì kak-thâu ū īⁿ, sì-bīn ū chhiûⁿ ûi-teh; ta̍k ê īⁿ, tn̂g sì-cha̍p tiú, khoah saⁿ-cha̍p; sì ê kak-thâu ê īⁿ, in ê chhùn-chhioh lóng chi̍t-iūⁿ. 23 Sì ê īⁿ ê chiu-ûi ū khí chi̍t-lia̍t, i ê ē-bīn lóng ū chú-mi̍h ê só͘-chāi. 24 I kā góa kóng, Chiah-ê chiū-sī chú-mi̍h ê chàu-kha; tiān-lāi chiah-ê chòe chhe-ēng--ê tī-chia chú peh-sìⁿ ê chè-sū.
1 伊chhōa我倒tńg到殿門，看ah，有水tùi殿ê門碇下ǹg東流出；因為殿 ê頭前ǹg東；chiahê水tùi下面tùi殿ê chiàⁿ-pêng，祭壇ê南pêng，流落。 2 伊就chhōa我tùi北門出去，chhōa我tùi外面彎到外門，tùi ǹg東pêng ê門ê路；看ah，水tùi chiàⁿ-pêng爆出來。 3 Hit人手the̍h繩索，ǹg東行出去ê時，伊就量一千肘，kah我tùi水過去，水淹腳目。 4 伊koh量一千，kah我tùi水潦過去，水淹腳頭u。koh量一千，kah我潦過去，水淹到腰。 5 Koh量一千；水就成做河，我bōe能潦過去；因為水漲tīⁿ，成做能泅得ê水，bōe潦得ê河。 6 伊就對我講，人子ah，你有看見chitê mah？伊就chhōa我，hō͘我oa̍t-tńg到河邊。 7 我倒tńg去ê時，看ah，tī河邊雙pêng有樹木真chōe。 8 伊kā我講，chiahê水ǹg東流去，beh落到A-la̍h-pa，直直流到海；所發出ê水beh流入鹽海，海裡ê水就變好。 9 河水所到ê所在，ta̍k樣生湠ê動物lóng beh得tio̍h活，也beh有魚真chōe；因為水流到hia，海裡ê水變好；hitê河所流到ê所在，所有ê物lóng beh得tio̍h活。 10 將來beh有討魚人khiā tī岸邊；tùi Ún-ki-tí到Ún-í-kek-liân lóng做拋網ê所在，hiahê魚各照伊ê類，親像大海ê魚真chōe。 11 總是爛土ê地kap水te̍h ê所在bōe得tio̍h醫好，留teh出鹽。 12 Tī河ê雙pêng邊beh發生ta̍k類ê樹木，thang做食物，葉bōe枯焦，果子出無斷；ta̍k月日beh結新ê果子，因為chiahê水是tùi聖所流出ê；樹頂ê果子beh做食物，葉有醫治ê功用。 13 主耶和華án-ni講： Lín分chitê地做業照以色列十二支派；伊ê地界tio̍h親像下底；約瑟beh得tio̍h兩份。 14 Lín承接chitê地做業tio̍h相kap平分；因為我bat kia̍h起手應允，將chitê地hō͘ lín ê列祖；chitê地beh歸tī lín做業。 15 地ê界限就是án-ni；北pêng ê界tùi大海，去Hi-te̍k-lûn ê路，直直到Se-ta̍t-ta̍t出入ê所在； 16 到Hap-má、Pí-lô-tha、Se-pek-liân，就是tī大馬色ê境界kap Hap-má ê境界ê中間；到Hô-lân邊界ê Hap-sat-hap-thê-kan。 17 Tùi海ê境界就是Hap-sat-í-lân近tī大馬色ê境界，koh tī北pêng ǹg北是Ha̍p-boat ê境界；這是北pêng ê界。 18 東pêng ê界tī Hô-lân、大馬色、Ki-lia̍t kap以色列地ê中間就是約旦河；lín tio̍h tùi北pêng ê界量到東海；這就是東勢ê界。 19 南pêng ǹg南ê界是tùi Tha-má到Bí-lī-pa-ka-te-su ê水，續到埃及ê溪，thàng到大海；這是南pêng ǹg南ê界。 20 西pêng ê界就是大海，tùi南pêng ê境界，直到Hap-má出入對面ê所在；這就是西pêng ê界。 21 Án-ni lín tio̍h照以色列ê支派為家己分chitê地。 22 Lín tio̍h 拈鬮分chitê地做業歸tī lín本身kap tī lín中間寄腳ê出外人，就是tī lín中間生kiáⁿ cha-bó͘-kiáⁿ ê；lín tio̍h看in親像以色列家ê中間所生ê一樣；in tī以色列支派ê中間kap lín相kap得tio̍h地做業。 23 外面人khiā起tī hitê支派ê中間，lín就tī-hia分地hō͘伊做業；這就是主耶和華講ê。
1 I chhōa góa tò-tńg kàu tiān-mn̂g, khòaⁿ ah, ū chúi tùi tiān ê mn̂g-tēng-ē ǹg-tang lâu chhut; in-ūi tiān ê thâu-chêng ǹg-tang; chiah ê chúi tùi ē-bīn tùi tiān ê chiàⁿ-pêng, chè-tôaⁿ ê lâm-pêng, lâu-lo̍h. 2 I chiū chhōa góa tùi pak-mn̂g chhut-khì, chhōa góa tùi gōa-bīn oan kàu gōa-mn̂g, tùi ǹg tang-pêng ê mn̂g ê lō͘; khòaⁿ ah, chúi tùi chiàⁿ-pêng piak-chhut-lâi. 3 Hit-lâng chhiú the̍h chîn-soh, ǹg-tang kiâⁿ chhut-khì ê sî, i chiū niû chi̍t-chheng tiú, kah góa tùi chúi kè--khì, chúi im kha-ba̍k. 4 I koh niû chi̍t-chheng, kah góa tùi chúi liâu--kè khì, chúi im kha-thâu-u. Koh niû chi̍t-chheng, kah góa liâu--kè-khì, chúi im kàu io. 5 Koh niû chi̍t-chheng; chúi chiū chiâⁿ-chòe hô, góa bōe-ōe liâu--kè-khì; in-ūi chúi tiòng-tīⁿ, chiâⁿ-chòe ōe siû--tit ê chúi, bōe liâu-tit ê hô. 6 I chiū tùi góa kóng, Jîn-chú ah, lí ū khòaⁿ-kìⁿ chit-ê mah? I chiū chhōa góa, hō͘ góa oa̍t-tńg kàu hô-piⁿ. 7 Góa tò-tńg-khì ê sî, khòaⁿ ah, tī hô-piⁿ siang-pêng ū chhiū-ba̍k chin-chōe. 8 I kā góa kóng, Chiah ê chúi ǹg-tang lâu-khì, beh lo̍h kàu A-la̍h-pa, ti̍t-ti̍t lâu kàu hái; só͘ hoat-chhut ê chúi beh lâu ji̍p iâm-hái, hái--nih ê chúi chiū piàn-hó. 9 Hô-chúi só͘ kàu ê só͘-chāi, ta̍k-iūⁿ siⁿ-thòaⁿ ê tōng-bu̍t lóng beh tit-tio̍h oa̍h, iā beh ū hî chin-chōe; in-ūi chúi lâu kàu hia, hái--nih ê chúi piàn-hó; hit ê hô só͘ lâu kàu ê só͘-chāi, só͘ ū ê mi̍h lóng beh tit-tio̍h oa̍h. 10 Chiong-lâi beh ū thó-hî lâng khiā tī hōaⁿ-piⁿ; tùi Ún-ki-tí kàu Ún-í-kek-liân lóng chòe pha-bāng ê só͘-chāi, hiah ê hî kok chiàu i ê lūi, chhin-chhiūⁿ tōa-hái ê hî chin-chōe. 11 Chóng-sī nōa-thô͘ ê tōe kap chúi-te̍h ê só͘-chāi bōe tit-tio̍h i-hó, lâu--teh chhut iâm. 12 Tī hô ê siang-pêng-piⁿ beh hoat-siⁿ ta̍k-lūi ê chhiū-ba̍k, thang chòe chia̍h-mi̍h, hio̍h bōe ko͘-tâ, ké-chí chhut bô tn̄g; ta̍k ge̍h-ji̍t beh kiat sin ê ké-chí, in-ūi chiah ê chúi sī tùi sèng-só͘ lâu-chhut-ê; chhiū-téng ê ké-chí beh chòe chia̍h-mi̍h, hio̍h ū i-tī ê kong-iōng. 13 Chú Iâ-hô-hoa án-ni kóng: Lín pun chit ê tōe chòe gia̍p chiàu Í-sek-lia̍t cha̍p-jī chi-phài; i ê tōe-kài tio̍h chhin-chhiūⁿ ē-tóe; Iok-sek beh tit-tio̍h nn̄g hūn. 14 Lín sêng-chiap chit ê tōe chòe-gia̍p tio̍h saⁿ-kap pîⁿ-pun; in-ūi Góa bat kia̍h-khí chhiú èng-ún, chiong chit ê tōe hō͘ lín ê lia̍t-chó͘; chit ê tōe beh kui tī lín chòe-gia̍p. 15 Tōe ê kài-hān chiū-sī án-ni; pak-pêng ê kài tùi tōa-hái, khì Hi-te̍k-lûn ê lō͘, ti̍t-ti̍t kàu Se-ta̍t-ta̍t chhut-ji̍p ê só͘-chāi; 16 kàu Hap-má, Pí-lô-tha, Se-pek-liân, chiū-sī tī Tāi-má-sek ê kéng-kài kap Hap-má ê kèng-kài ê tiong-kan; kàu Hô-lân piⁿ-kài ê Hap-sat-hap-thê-kan. 17 Tùi hái ê kéng-kài chiū-sī Hap-sat-í-lân kūn tī Tāi-má-sek ê kéng-kài, koh tī pak-pêng ǹg-pak sī Ha̍p-boat ê kéng-kài; che sī pak-pêng ê kài. 18 Tang-pêng ê kài tī Hô-lân, Tāi-má-sek, Ki-lia̍t kap Í-sek-lia̍t tōe ê tiong-kan chiū-sī Iok-tàn-hô; lín tio̍h tùi pak-pêng ê kài niû kàu tang-hái; che chiū-sī tang--sì ê kài. 19 Lâm-pêng ǹg-lâm ê kài sī tùi Tha-má kàu Bí-lī-pa-ka-te-su ê chúi, sòa kàu Ai-ki̍p ê khoe, thàng-kàu tōa-hái; che sī lâm-pêng ǹg-lâm ê kài. 20 Sai-pêng ê kài chiū-sī tōa hái, tùi lâm-pêng ê kéng-kài, ti̍t-kàu Hap-má chhut-ji̍p tùi-bīn ê só͘-chāi; che chiū-sī sai-pêng ê kài. 21 Án-ni lín tio̍h chiàu Í-sek-lia̍t ê chi-phài ūi ka-kī pun chit ê tōe. 22 Lín tio̍h liam-khau pun chit ê tōe chòe-gia̍p kui tī lín pún-sin kap tī lín tiong-kan kià-kha ê chhut-gōa lâng, chiū-sī tī lín tiong-kan siⁿ kiáⁿ cha-bó͘-kiáⁿ ê; lín tio̍h khòaⁿ in chhin-chhiūⁿ Í-sek-lia̍t ke ê tiong-kan só͘ siⁿ--ê chi̍t-iūⁿ; in tī Í-sek-lia̍t chi-phài ê tiong-kan kap lín saⁿ-kap tit-tio̍h tōe chòe-gia̍p. 23 Gōa-bīn lâng khiā-khí tī hit ê chi-phài ê tiong-kan, lín chiū tī-hia pun tōe hō͘ i chòe-gia̍p; che chiū-sī Chú Iâ-hô-hoa kóng--ê.
1 支派ê名照下底所記ê；tùi極北ê界tùi Hi-te̍k-lûn ê路，到Hap-má出入ê所在，tī大馬色警戒Hap-sat-í-lân ǹg北近óa Hap-má ê地，tùi東到西；Tàn，一份。 2 Óa近Tàn ê地界，tùi東到西；A-siat，一份。 3 Óa近A-siat ê地界，tùi東到西；Ná-hut-tha-lī，一份。 4 Óa近Ná-hut-tha-lī ê地界，tùi東到西；Má-ná-se，一份。 5 Óa近Má-ná-se ê地界，tùi東到西；Í-hoat-liân，一份。 6 Óa近Í-hoat-liân ê地界，tùi東到西；Liû-piān，一份。 7 Óa近Liû-piān ê地界，tùi東到西；偤大，一份。 8 Óa近偤大ê地界，tùi東到西，是lín所獻ê地，闊兩萬五千篙尺，tùi東到西，長kap hiahê份ê一个相同，聖所tī hit中間。 9 Lín所獻hō͘耶和華ê地tio̍h長兩萬五千篙尺，闊一萬。 10 所獻ê聖地tio̍h歸hō͘祭司；北勢長兩萬五千，西勢闊一萬，東勢闊一萬，南勢長兩萬五千；耶和華ê聖所tī hit中央。 11 Tio̍h歸hō͘ Sat-tok ê kiáⁿ孫中成做聖ê祭司，就是顧守我所交帶ê；當以色列人行迷路ê時，in無行迷路親像利未人行迷路。 12 Chitê tio̍h歸hō͘ in，就是tùi所獻ê全地中獻hō͘ in做至聖ê，óa近利未人ê地界。 13 利未人所得tio̍h ê地tio̍h長兩萬五千，闊一萬，kap祭司ê地界相同；lóng總長兩萬五千，闊一萬。 14 Chitê地m̄-thang賣，m̄-thang對換，起頭熟 ê物m̄-thang歸hō͘別人；因為是歸tī耶和華做聖ê。 15 所chhun五千闊ê地，是tī hitê兩萬五千ê頭前，tio̍h做平常ê路用，thang起城，起厝，做郊野ê地；城tio̍h tī中央。 16 伊ê寸尺就是án-ni；北面四千五百，南面四千五百，東面四千五百，西面四千五百。 17 城tio̍h郊野；ǹg北兩百五十，ǹg南兩百五十，ǹg東兩百五十，ǹg西兩百五十。 18 以外所chhun ê長kap所獻ê聖地相同，ǹg東一萬，ǹg西一萬；koh kap所獻ê聖地相同；其中所出產beh hō͘城內做工ê人做食物。 19 Tùi以色列眾支派ê中間tī城內做工ê beh tī-hia種作。 20 Lín所獻ê全地，長兩萬五千，闊兩萬五千；lín所獻ê聖地kap屬tī城ê地是四方ê。 21 所獻ê聖地以及屬tī城ê地，雙pêng chhun ê地tio̍h歸tī 人君，所獻ê地tī hit兩萬五千ê頭前到東勢ê界，koh ǹg西tī hit兩萬五千ê頭前到西勢ê界，kap hiahê份ê地相同，lóng歸tī人君；所獻ê聖地kap殿ê聖地lóng tī hit內面。 22 Koh tùi利未人ê業，tùi屬tī城ê業，是屬人君ê ê中間，tī偤大ê界kap便雅憫ê界ê中間，lóng歸人君ê。 23 論到其餘ê支派；tùi東到西；便雅憫，一份。 24 Óa近便雅憫ê地界tùi東到西；西門一份。 25 Óa近西門ê地界tùi東到西；Í-sat-ka，一份。 26 Óa近Í-sat-ka ê地界tùi東到西；Se-pò͘-lûn，一份。 27 Óa近Se-pò͘-lûn ê地界，tùi東到西；Ka-tek，一份。 28 Óa近Ka-tek ê地界，南pêng ǹg南，hitê地界tùi Tha-má到Bí-lī-pa Ka-tē-su ê水，到埃及ê溪thàng到大海。 29 這是lín tio̍h 拈鬮分hō͘以色列ê支派做業ê地，in ta̍k-ê所得tio̍h ê業就是án-ni；這是主耶和華所講ê。 30 Tùi城出去ê路是照下面所記ê；tī北面照所量ê，四千五百篙尺。 31 城hiahê門tio̍h照以色列支派ê名；北面有三個門；Liû-piān ê門，一个；偤大ê門，一个；利未ê門，一个。 32 東面四千五百，有三個門；約瑟ê門，一个；便雅憫ê門，一个；Tàn ê門，一个。 33 南面四千五百，有三個門；西門ê門，一个；Í-sat-ka ê門，一个；Se-pò͘-lûn ê門，一个。 34 西面四千五百，有三個門；Ka-tek ê門，一个；A-siat ê門，一个；Nà-hut-tha-lī ê門，一个。 35 城四圍共一萬八千；tùi hit日以後城ê名叫做，耶和華tī-hia。
1 Chi-phài ê miâ chiàu ē-tóe só͘ kì--ê; tùi ke̍k-pak ê kài tùi Hi-te̍k-lûn ê lō͘, kàu Hap-má chhut-ji̍p ê só͘-chāi, tī Tāi-má-sek kéng-kài Hap-sat-í-lân ǹg-pak kūn-óa Hap-má ê tōe, tùi-tang kàu sai; Tàn, chi̍t-hūn. 2 Óa-kūn Tàn ê tōe-kài, tùi-tang kàu sai; A-siat, chi̍t-hūn. 3 Óa-kūn A-siat ê tōe-kài, tùi tang kàu sai; Ná-hut-tha-lī, chi̍t-hūn. 4 Óa-kūn Ná-hut-tha-lī ê tōe-kài, tùi-tang kàu-sai; Má-ná-se, chi̍t-hūn. 5 Óa-kūn Má-ná-se ê tōe-kài, tùi-tang kàu-sai; Í-hoat-liân, chi̍t-hūn. 6 Óa-kūn Í-hoat-liân ê tōe-kài, tùi-tang kàu sai; Liû-piān, chi̍t-hūn. 7 Óa-kūn Liû-piān ê tōe-kài, tùi-tang kàu sai; Iû-tāi, chi̍t-hūn. 8 Óa-kūn Iû-tāi ê tōe-kài, tùi-tang kàu sai, sī lín só͘ hiàn ê tōe, khoah nn̄g-bān gō͘-chheng ko-chhioh, tùi-tang kàu-sai, tn̂g kap hiah ê hūn ê chi̍t-ê saⁿ-tâng, sèng-só͘ tī hit tiong-kan. 9 Lín só͘ hiàn hō͘ Iâ-hô-hoa ê tōe tio̍h tn̂g nn̄g-bān gō͘-chheng ko-chhioh, khoah chi̍t-bān. 10 Só͘ hiàn ê sèng-tōe tio̍h kui hō͘ chè-si; pak--sì tn̂g nn̄g-bān gō͘-chheng, sai--sì khoah chi̍t-bān, tang--sì khoah chi̍t-bān, lâm--sì tn̂g nn̄g-bān gō͘-chheng; Iâ-hô-hoa ê sèng-só͘ tī hit tiong-ng. 11 Tio̍h kui hō͘ Sat-tok ê kiáⁿ-sun-tiong chiâⁿ-chòe sèng ê chè-si, chiū-sī kò͘-siú Góa só͘ kau-tài--ê; tng Í-sek-lia̍t lâng kiâⁿ bê-lō͘ ê sî, in bô kiâⁿ bê-lō͘ chhin-chhiūⁿ Lī-bī lâng kiâⁿ bê-lō͘. 12 Chit-ê tio̍h kui hō͘ in, chiū-sī tùi só͘ hiàn ê choân-tōe-tiong hiàn hō͘ in chòe chì-sèng--ê, óa-kūn Lī-bī lâng ê tōe-kài. 13 Lī-bī lâng só͘ tit-tio̍h ê tōe tio̍h tn̂g nn̄g-bān gō͘-chheng, khoah chi̍t-bān, kap chè-si ê tōe-kài saⁿ-tâng; lóng-chóng tn̂g nn̄g-bān gō͘-chheng, khoah chi̍t-bān. 14 Chit ê tōe m̄-thang bōe, m̄-thang tùi-ōaⁿ, khí-thâu-se̍k ê mi̍h m̄-thang kui hō͘ pa̍t-lâng; in-ūi sī kui tī Iâ-hô-hoa chòe-sèng--ê. 15 Só͘-chhun gō͘-chheng khoah ê tōe, sī tī hit ê nn̄g-bān gō͘-chheng ê thâu-chêng, tio̍h chòe pêng-siông ê lō͘-ēng, thang khí siâⁿ, khí chhù, chòe kau-iá ê tōe; siâⁿ tio̍h tī tiong-ng. 16 I ê chhùn-chhioh chiū-sī án-ni; pak-bīn sì-chheng gō͘-pah, lâm-bīn sì-chheng gō͘-pah, tang-bīn sì-chheng gō͘-pah, sai-bīn sì-chheng gō͘-pah. 17 Siâⁿ tio̍h kau-iá; ǹg-pak nn̄g-pah gō͘-cha̍p, ǹg-lâm nn̄g-pah gō͘-cha̍p, ǹg-tang nn̄g-pah gō͘-cha̍p, ǹg-sai nn̄g-pah gō͘-cha̍p. 18 Í-gōa só͘ chhun ê tn̂g kap só͘ hiàn ê sèng-tōe saⁿ-tâng, ǹg-tang chi̍t-bān, ǹg-sai chi̍t-bān; koh kap só͘ hiàn ê sèng-tōe saⁿ-tâng; kî-tiong só͘ chhut-sán beh hō͘ siâⁿ-lāi chòe-kang ê lâng chòe chia̍h-mi̍h. 19 Tùi Í-sek-lia̍t chèng chi-phài ê tiong-kan tī siâⁿ-lāi chòe-kang--ê beh tī-hia chèng-choh. 20 Lín só͘ hiàn ê choân-tōe, tn̂g nn̄g-bān gō͘-chheng, khoah nn̄g-bān gō͘-chheng; lín só͘ hiàn ê sèng-tōe kap sio̍k tī siâⁿ ê tōe sī sù-hong--ê. 21 Só͘ hiàn ê sèng-tōe í-ki̍p sio̍k tī siâⁿ ê tōe, siang-pêng chhun ê tōe tio̍h kui tī jîn-kun, só͘ hiàn ê tōe tī hit nn̄g-bān gō͘-chheng ê thâu-chêng kàu tang--sì ê kài, koh ǹg-sai tī hit nn̄g-bān gō͘-chheng ê thâu-chêng kàu sai--sì ê kài, kap hiah ê hūn ê tōe saⁿ-tâng, lóng kui tī jîn-kun; só͘ hiàn ê sèng-tōe kap tiān ê sèng-tōe lóng tī hit lāi-bīn. 22 Koh tùi Lī-bī lâng ê gia̍p, tùi sio̍k tī siâⁿ ê gia̍p, sī sio̍k jîn-kun-ê ê tiong-kan, tī Iû-tāi ê kài kap Piān-ngá-bín ê kài ê tiong-kan, lóng kui jîn-kun ê. 23 Lūn-kàu kî-û ê chi-phài; tùi-tang kàu-sai; Piān-ngá-bín, chi̍t-hūn. 24 Óa-kūn Piān-ngá-bín ê tōe-kài tùi-tang kàu-sai; Se-biān chi̍t-hūn. 25 Óa-kūn Se-biān ê tōe-kài tùi-tang kàu-sai; Í-sat-ka, chi̍t-hūn. 26 Óa-kūn Í-sat-ka ê tōe-kài tùi-tang kàu-sai; Se-pò͘-lûn, chi̍t-hūn. 27 Óa-kūn Se-pò͘-lûn ê tōe-kài tùi-tang kàu-sai; Ka-tek, chi̍t-hūn. 28 Óa-kūn Ka-tek ê tōe-kài, lâm-pêng ǹg-lâm, hit ê tōe-kài tùi Tha-má kàu Bí-lī-pa Ka-tē-su ê chúi, kàu Ai-ki̍p ê khoe thàng-kàu tōa-hái. 29 Che sī lín tio̍h liam-khau pun hō͘ Í-sek-lia̍t ê chi-phài chòe-gia̍p ê tōe, in ta̍k-ê só͘ tit-tio̍h ê gia̍p chiū-sī án-ni; che sī Chú Iâ-hô-hoa só͘ kóng--ê. 30 Tùi siâⁿ chhut--khì ê lō͘ sī chiàu ē-bīn só͘ kì ê; tī pak-bīn chiàu só͘ niû--ê, sì-chheng gō͘-pah ko-chhioh. 31 Siâⁿ hiah ê mn̂g tio̍h chiàu Í-sek-lia̍t chi-phài ê miâ; pak-bīn ū saⁿ ê mn̂g; Liû-piān ê mn̂g, chi̍t-ê; Iû-tāi ê mn̂g, chi̍t-ê; Lī-bī ê mn̂g, chi̍t-ê. 32 Tang-bīn sì-chheng gō͘-pah, ū saⁿ ê mn̂g; Iok-sek ê mn̂g, chi̍t-ê; Piān-ngá-bín ê mn̂g, chi̍t-ê; Tàn ê mn̂g, chi̍t-ê. 33 Lâm-bīn sì-chheng gō͘-pah, ū saⁿ ê mn̂g; Se-biān ê mn̂g, chi̍t-ê; Í-sat-ka ê mn̂g, chi̍t-ê; Se-pò͘-lûn ê mn̂g, chi̍t-ê. 34 Sai-bīn sì-chheng gō͘-pah, ū saⁿ ê mn̂g; Ka-tek ê mn̂g, chi̍t-ê; A-siat ê mn̂g, chi̍t-ê; Nà-hut-tha-lī ê mn̂g, chi̍t-ê. 35 Siâⁿ sì-ûi kiōng chi̍t-bān poeh-chheng; tùi hit-ji̍t í-āu siâⁿ ê miâ kiò-chòe, Iâ-hô-hoa tī-hia.