1 源起頭上帝創造天kap地。 2 地是空空渾沌；深淵ê面上烏暗；上帝ê神運動tī水面。 3 上帝講，Tio̍h有光，就有光。 4 上帝看光，是好；上帝將光暗分開。 5 上帝叫hitê光做日，叫暗做暝。有ê-hng有早起，是頭一日。： 6 上帝講，Chiahê水ê中間tio̍h有穹蒼，將水kap水分開。 7 上帝就造穹蒼，來分開穹蒼下ê水kap穹蒼頂ê水；就有án-ni。 8 上帝叫穹蒼做天。有ê-hng有早起，是第二日。 9 上帝講，天下chiahê水tio̍h聚集到一所在，乾地tio̍h出現；就有án-ni。 10 上帝叫乾地做地；叫聚集ê水做海；上帝看伊是好。 11 上帝講，地tio̍h發草，以及結子ê菜蔬，kap照類生果子ê樹，hit內面有伊ê chí，tī地上；就有án-ni。 12 地就發草，kap照類結chí ê菜蔬，kap照類生果子ê樹，內面有伊ê chí；上帝看伊是好。 13 有ê-hng有早起，是第三日。 14 上帝講，天裡ê穹蒼tio̍h有發光ê體，來分別日暝；也thang做兆頭，四季，日，年； 15 亦hō͘ in做光體tī天ê穹蒼，照光tī地上；就有án-ni。 16 上帝就造大ê光體兩個；大ê光體來管日時，細ê光體來管暝時；也造星辰。 17 上帝hē in tī天裡ê穹蒼，hō͘ in照光tī地裡； 18 也beh管有日暝，分別光暗。上帝看伊是好。 19 有ê-hng有早起，是第四日。 20 上帝講，水tio̍h生湠chōe-chōe有活命ê動物；鳥飛tī地ê頂面，天裡ê穹蒼。 21 上帝就創造海裡ê大魚，以及水所生chōe-chōe有活命ê動物，各照伊ê類，koh創造ta̍k樣ê飛鳥，照伊ê類；上帝看伊是好。 22 上帝賜福in，講，Tio̍h生湠加添真chōe，充滿tī海裡ê水，也hō͘鳥隻生湠chōe-chōe tī地裡。 23 有ê-hng有早起，是第五日。 24 上帝講，地tio̍h生有活命ê動物，照伊ê類，cheng-siⁿ，蟲thōa，地上ê走獸，照伊ê類；就有án-ni。 25 上帝就造地上ê走獸照伊ê類，cheng-siⁿ照伊ê類，地上一切ê蟲thōa照伊ê類；上帝看伊是好。 26 上帝講，咱tio̍h造人親像咱ê像，照咱ê款；hō͘ in管理海裡ê魚，天裡ê鳥，kap cheng-siⁿ，kap全地，以及地上teh 趖 ê蟲thōa。 27 上帝就創造人親像伊家己ê像，照上帝ê像創造伊；創造in男ê女ê。 28 上帝賜福in；上帝koh對in講，Tio̍h生湠真chōe，充滿tī地上，來khah贏伊；也tio̍h治理海裡ê魚，天裡ê鳥，kap地上一切所振動ê活物。 29 上帝講，我有hō͘ lín遍地上一切結chí ê菜蔬，koh一切ê樹，其中有結子ê樹ê果子；lóng hō͘ lín做食物。 30 論到地上一切ê走獸，天中一切ê鳥，kap地上一切會振動有活命ê物，我將一切青草hō͘ in做食物；就有án-ni。 31 上帝看伊一切所造ê，看ah，真好。有ê-hng有早起，是第六日。
1 Goân-khí-thâu Siōng-tè chhòng-chō thiⁿ kap tōe. 2 Tōe sī khang-khang hūn-tūn; chhim-ian ê bīn-chiūⁿ o͘-àm; Siōng-tè ê Sîn ūn-tōng tī chúi-bīn. 3 Siōng-tè kóng, Tio̍h ū kng, chiū ū kng. 4 Siōng-tè khòaⁿ kng, sī hó; Siōng-tè chiong kng àm pun-khui. 5 Siōng-tè kiò hit ê kng chòe Ji̍t, kiò àm chòe Mî. Ū ê-hng ū chá-khí, sī thâu chi̍t-ji̍t. 6 Siōng-tè kóng, Chiah ê chúi ê tiong-kan tio̍h ū kiong-chhong, chiong chúi kap chúi pun-khui. 7 Siōng-tè chiū chō kiong-chhong, lâi hun-khui kiong-chhong-ē ê chúi kap kiong-chhong-téng ê chúi; chiū ū án-ni. 8 Siōng-tè kiò kiong-chhong chòe Thiⁿ. Ū ê-hng ū chá-khí, sī tē-jī ji̍t. 9 Siōng-tè kóng, Thiⁿ-ē chiah ê chúi tio̍h chū-chi̍p kàu chi̍t só͘-chāi, ta-tōe tio̍h chhut-hiān; chiū ū án-ni. 10 Siōng-tè kiò ta-tōe chòe Tōe; kiò chū-chi̍p ê chúi chòe Hái; Siōng-tè khòaⁿ-i sī hó. 11 Siōng-tè kóng, Tōe tio̍h hoat-chháu, í-ki̍p kiat-chí ê chhài-soe, kap chiàu-lūi siⁿ ké-chí ê chhiū, hit lāi-bīn ū i ê chí, tī tōe-chiūⁿ; chiū ū án-ni. 12 Tōe chiū hoat-chháu, kap chiàu-lūi kiat-chí ê chhài-soe, kap chiàu-lūi siⁿ ké-chí ê chhiū, lāi-bīn ū i ê chí; Siōng-tè khòaⁿ-i sī hó. 13 Ū ê-hng ū chá-khí, sī tē-saⁿ ji̍t. 14 Siōng-tè kóng, Thiⁿ-ni̍h ê kiong-chhong tio̍h ū hoat-kng ê thé, lâi hun-piat ji̍t-mî; iā thang chòe tiāu-thâu, sù-kùi, ji̍t, nî; 15 ia̍h hō͘ in chòe kng-thé tī thiⁿ ê kiong-chhong, chiò-kng tī tōe-chiūⁿ; chiū ū án-ni. 16 Siōng-tè chiū chō tōa ê kng-thé nn̄g-ê; tōa ê kng-thé lâi koán ji̍t-sî, sòe ê kng-thé lâi koán mî-sî; iā chō chhiⁿ-sîn. 17 Siōng-tè hē in tī thiⁿ-ni̍h ê kiong-chhong, hō͘ in chiò kng tī tōe-ni̍h; 18 iā beh koán ū ji̍t mî, hun-piat kng àm. Siōng-tè khòaⁿ-i sī hó. 19 Ū ê-hng ū chá-khí, sī tē-sì ji̍t. 20 Siōng-tè kóng, Chúi tio̍h siⁿ-thòaⁿ chōe-chōe ū oa̍h-miā ê tōng-bu̍t; chiáu pe tī tōe ê téng-bīn, thiⁿ-ni̍h ê kiong-chhong. 21 Siōng-tè chiū chhòng-chō hái-ni̍h ê tōa-hî, í-ki̍p chúi só͘ siⁿ chōe-chōe ū oa̍h-miā ê tōng-bu̍t, kok chiàu i ê lūi, koh chhòng-chō ta̍k-iūⁿ ê pe-chiáu, chiàu i ê lūi; Siōng-tè khòaⁿ-i sī hó. 22 Siōng-tè sù-hok in, kóng, Tio̍h siⁿ-thòaⁿ ke-thiⁿ chin-chōe, chhiong-móa tī hái-ni̍h ê chúi, iā hō͘ chiáu-chiah siⁿ-thòaⁿ chōe-chōe tī tōe-ni̍h. 23 Ū ê-hng ū chá-khí, sī tē-gō͘ ji̍t. 24 Siōng-tè kóng, Tōe tio̍h siⁿ ū oa̍h-miā ê tōng-bu̍t, chiàu i ê lūi, cheng-siⁿ, thâng-thōa, tōe-chiūⁿ ê cháu-siù, chiàu i ê lūi; chiū ū án-ni. 25 Siōng-tè chiū chō tōe-chiūⁿ ê cháu-siù chiàu i ê lūi, cheng-siⁿ chiàu i ê lūi, tōe-chiūⁿ it-chhè ê thâng-thōa chiàu i ê lūi; Siōng-tè khòaⁿ-i sī hó. 26 Siōng-tè kóng, Lán tio̍h chō lâng chhin-chhiūⁿ lán ê siōng, chiàu lán ê khoán; hō͘ in koán-lí hái-ni̍h ê hî, thiⁿ-ni̍h ê chiáu, kap cheng-siⁿ, kap choân-tōe, í-ki̍p tōe-chiūⁿ teh sô ê thâng-thōa. 27 Siōng-tè chiū chhòng-chō lâng chhin-chhiūⁿ I ka-kī ê siōng, chiàu Siōng-tè ê siōng chhòng-chō i; chhòng-chō in lâm-ê lú-ê. 28 Siōng-tè sù-hok in; Siōng-tè koh tùi in kóng, Tio̍h siⁿ-thòaⁿ chin-chōe, chhiong-móa tī tōe-chiūⁿ, lâi khah-iâⁿ i; iā tio̍h tī-lí hái-ni̍h ê hî, thiⁿ-ni̍h ê chiáu, kap tōe-chiūⁿ it-chhè só͘ tín-tāng ê oa̍h-mi̍h. 29 Siōng-tè kóng, Góa ū hō͘ lín piàn tōe-chiūⁿ it-chhè kiat-chí ê chhài-soe, koh it-chhè ê chhiū, kî-tiong ū kiat-chí ê chhiū ê ké-chí; lóng hō͘ lín chòe chia̍h-mi̍h. 30 Lūn-kàu tōe-chiūⁿ it-chhè ê cháu-siù, thiⁿ-tiong it-chhè ê chiáu, kap tōe-chiūⁿ it-chhè ōe tín-tāng ū oa̍h-miā ê mi̍h, Góa chiong it-chhè chhiⁿ-chháu hō͘ in chòe chia̍h-mi̍h; chiū ū án-ni. 31 Siōng-tè khòaⁿ I it-chhè só͘ chō-ê, khòaⁿ ah, chin-hó. Ū ê-hng ū chá-khí, sī tē-la̍k ji̍t.
1 天地kap祂一切所有ê已經做完。 2 Tī第七日，上帝完祂所造ê工；就tī第七日歇祂一切所造ê工。 3 上帝賜福tī第七日，定做聖日；因為tī chit日上帝停祂一切創造ê工，就安歇。 4 天地創造ê來歷，tī耶和華上帝造地kap天ê日，親像下底。 5 山野一切ê草木未有tī地裡；山野一切ê菜蔬未有發；因為耶和華上帝無落雨tī地裡，也無人thang種作hitê土地。 6 總是有霧tùi地起，潤澤遍地面。 7 耶和華上帝用地上ê土粉chhiau做人，pûn活ê氣入伊ê鼻孔；人就成做活ê靈魂。 8 耶和華上帝tī東方，tī伊甸，種一个園；將所造ê人hē tī-hia。 9 耶和華上帝hō͘ ta̍k樣ê樹tùi地裡發起來，好看也好食；tī園ê中間koh有活命ê樹，kap分別好pháiⁿ ê樹。 10 伊甸有河流出來灌ak hitê園；tùi-hia分開做四條。 11 頭一條名叫Pí-sùn；就是se̍h流tī Hap-hui-la̍h全地ê；tī-hia有出金； 12 hit位ê金是真好；亦出珍珠、碧玉。 13 第二條名叫Ki-hùn，就是se̍h流tī Kó͘-si̍t全地ê。 14 第三條名叫Hi-tí-kiat，就是流tī亞述ê東勢ê。第四條就是Pek-lat。 15 耶和華上帝將hitê人hē tī伊甸園，來種作顧守。 16 耶和華上帝吩咐hitê人講，園內ta̍k號樹ê果子，thang隨意來食。 17 總是分別好pháiⁿ ê樹，伊ê果子m̄-thang食；因為食ê日你的確死。 18 耶和華上帝講，人單身家己tòa m̄好；我beh kā伊造一个幫贊ê，來匹配伊。 19 耶和華上帝用土做山野ta̍k樣ê走獸，以及空中ta̍k樣ê飛鳥；chhōa到hit人ê面前，看伊beh稱in甚麼名；見若伊所稱ta̍k樣活物ê，就做hitê物ê名。 20 Hit-ê人就kā一切ê cheng-siⁿ，kap空中ê飛鳥，kap山野一切ê走獸lóng號名；總是chhē無一个thang做hit人ê幫贊，來匹配伊。 21 耶和華上帝hō͘ hitê人睏重眠，伊就睏；就the̍h伊ê hia̍p骨一支，包密伊ê肉。 22 耶和華上帝就將tùi hit人所the̍h出ê hia̍p骨，造成一个cha-bó͘人，chhōa來就近hit人。 23 Hit人講，Taⁿ chitê是我骨內ê骨，肉內ê肉；beh稱做cha-bó͘人，因為伊是tùi ta-po͘人the̍h出。 24 所以人beh離開伊ê父母，結聯伊ê bó͘，in就成做一體。 25 Ang-bó͘兩人平平thǹg-pak-theh，也無見笑。
1 Thiⁿ tōe kap I it-chhè só͘-ū-ê í-keng chòe-oân. 2 Tī tē-chhit ji̍t, Siōng-tè oân I só͘ chō ê kang; chiū tī tē-chhit ji̍t hioh I it-chhè só͘ chō ê kang. 3 Siōng-tè sù-hok tī tē-chhit ji̍t, tēng chòe sèng-ji̍t; in-ūi tī chit-ji̍t Siōng-tè thêng I it-chhè chhòng-chō ê kang, chiū an-hioh. 4 Thiⁿ tōe chhòng-chō ê lâi-le̍k, tī Iâ-hô-hoa Siōng-tè chō tōe kap thiⁿ ê ji̍t, chhin-chhiūⁿ ē-tóe. 5 Soaⁿ-iá it-chhè ê chháu-ba̍k bē ū tī tōe-ni̍h; soaⁿ-iá it-chhè ê chhài-soe bē ū hoat; in-ūi Iâ-hô-hoa Siōng-tè bô lo̍h-hō͘ tī tōe-ni̍h, iā bô lâng thang chèng-choh hit ê thó͘-tōe. 6 Chóng-sī ū bū tùi tōe khí, lūn-te̍k piàn tōe-bīn. 7 Iâ-hô-hoa Siōng-tè ēng tōe-chiūⁿ ê thô͘-hún chhiau chòe lâng, pûn oa̍h ê khì ji̍p i ê phīⁿ-khang; lâng chiū chiâⁿ-chòe oa̍h ê lêng-hûn. 8 Iâ-hô-hoa Siōng-tè tī tang-hng, tī Ai-tiân, chèng chi̍t ê hn̂g; chiong só͘ chō ê lâng hē tī-hia. 9 Iâ-hô-hoa Siōng-tè hō͘ ta̍k-iūⁿ ê chhiū tùi tōe-ni̍h hoat-khí-lâi, hó-khòaⁿ iā hó-chia̍h; tī hn̂g ê tiong-kan koh ū oa̍h-miā ê chhiū, kap hun-piat hó-pháiⁿ ê chhiū. 10 Ai-tiân ū hô lâu-chhut lâi koàn-ak hit ê hn̂g; tùi-hia hun-khui chòe sì-tiâu. 11 Thâu-chi̍t-tiâu miâ-kiò Pí-sùn; chiū-sī se̍h-lâu tī Hap-hui-la̍h choân-tōe-ê; tī-hia ū chhut kim; 12 hit-ūi ê kim sī chin-hó; ia̍h chhut chin-chu phek-ge̍k. 13 Tē-jī-tiâu miâ kiò Ki-hùn, chiū-sī se̍h-lâu tī Kó͘-si̍t choân-tōe-ê. 14 Tē-saⁿ-tiâu miâ-kiò Hi-tí-kiat, chiū-sī lâu tī A-su̍t ê tang-sì-ê. Tē-sì-tiâu chiū-sī Pek-lat. 15 Iâ-hô-hoa Siōng-tè chiong hit ê lâng hē tī Ai-tiân hn̂g, lâi chèng-choh kò͘-siú. 16 Iâ-hô-hoa Siōng-tè hoan-hù hit ê lâng kóng, Hn̂g-lāi ta̍k-hō chhiū ê ké-chí, thang sûi-ì lâi chia̍h. 17 Chóng-sī hun-piat hó-pháiⁿ ê chhiū, i ê ké-chí m̄-thang chia̍h; in-ūi chia̍h ê ji̍t lí tek-khak sí. 18 Iâ-hô-hoa Siōng-tè kóng, Lâng toaⁿ-sin ka-kī tòa m̄-hó; Góa beh kā i chō chi̍t ê pang-chān-ê, lâi phit-phòe i. 19 Iâ-hô-hoa Siōng-tè ēng thô͘ chòe soaⁿ-iá ta̍k-iūⁿ ê cháu-siù, í-ki̍p khong-tiong ta̍k-iūⁿ ê pe-chiáu; chhōa kàu hit-lâng ê bīn-chêng, khòaⁿ i beh chheng in sím-mi̍h miâ; kìⁿ-nā i só͘ chheng ta̍k-iūⁿ oa̍h-mi̍h-ê, chiū chòe hit ê mi̍h ê miâ. 20 Hit ê lâng chiū kā it-chhè ê cheng-siⁿ, kap khong-tiong ê pe-chiáu, kap soaⁿ-iá it-chhè ê cháu-siù lóng hō miâ; chóng-sī chhē bô chi̍t-ê thang chòe hit lâng ê pang-chān, lâi phit-phòe i. 21 Iâ-hô-hoa Siōng-tè hō͘ hit ê lâng khùn tāng-bîn, i chiū khùn; chiū the̍h i ê hia̍p-kut chi̍t-ki, pau-ba̍t i ê bah. 22 Iâ-hô-hoa Siōng-tè chiū chiong tùi hit-lâng só͘ the̍h-chhut ê hia̍p-kut, chō-chiâⁿ chi̍t ê cha-bó͘-lâng, chhōa lâi chiū-kūn hit-lâng. 23 Hit-lâng kóng, Taⁿ chit-ê sī góa kut-lāi ê kut, bah-lāi ê bah; beh chheng-chòe cha-bó͘-lâng, in-ūi i sī tùi ta-po͘-lâng the̍h-chhut. 24 Só͘-í lâng beh lī-khui i ê pē-bú, kiat-liân i ê bó͘, in chiū chiâⁿ-chòe chi̍t-thé. 25 Ang-bó͘ nn̄g-lâng pîⁿ-pîⁿ thǹg-pak-theh, iā bô kiàn-siàu.
1 耶和華上帝所造山野一切ê活物，蛇是比in khah狡譎。蛇tùi婦人人講，上帝kiám有影講，園內一切ê樹，lín lóng m̄-thang食mah？ 2 婦人人對蛇講，園內樹裡ê果子阮thang食； 3 只有園中央hit叢樹ê果子上帝bat講，Lín m̄-thang食伊，亦m̄-thang摸，驚了會死。 4 蛇對婦人人講，Lín無的確會死。 5 因為上帝知lín食ê日，lín ê目睭就會開，lín beh親像上帝，能分別好pháiⁿ。 6 婦人人看hit叢樹，好食亦合(kah)目；koh hit叢樹是thang欣慕，hō͘人有智慧；就挽伊ê果子食伊，續hō͘伊ê丈夫，伊亦食伊。 7 In兩人ê目睭就開，chiah知in是thǹg-pak-theh；就pín無花果葉，為家己做裙。 8 日涼冷 ê時，耶和華上帝行遊tī園內；in聽見伊ê聲，hit人kap伊ê婦人人就bih tī園內ê樹中，來閃避耶和華上帝ê面。 9 耶和華上帝叫hit人，對伊講，你tī tah-lo̍h？ 10 伊就講，我聽見你ê聲tī園內，我就驚，因為我thǹg-pak-theh；就家己bih。 11 講，Chī-chūi kā你講，你thǹg-pak-theh？我吩咐你m̄-thang食hit叢樹，你食伊mah？ 12 hit人講，你所hō͘我做伴ê婦人人，伊用hit叢樹ê果子hō͘我，我就食伊。 13 耶和華上帝對婦人人講，你所做是甚麼事？婦人人講，蛇引誘我，我就食。 14 耶和華上帝對蛇講，你已經做chitê，所以你受咒詛，比一切ê cheng-siⁿ，kap山野一切ê走獸，khah重；你beh用腹肚行，一生食土粉。 15 我beh hō͘你kap婦人人結冤仇，你ê後裔kap伊ê後裔亦結冤仇；伊beh傷你ê頭殼，你beh傷伊ê腳後tiⁿ。 16 Koh對婦人人講，我的確大大加添你懷孕ê艱苦；你beh艱苦生kiáⁿ；你beh戀慕你ê丈夫，伊beh管轄你。 17 也對亞當講，你已經聽thàn你ê婦人人ê話，來食我所吩咐你講，你m̄-thang食伊ê；所以土地因為你ê緣故受咒詛；你一世人勞苦，chiah tùi伊得tio̍h食。 18 土地beh為tio̍h你發刺phè kap蒺藜；你也beh食園裡ê菜蔬。 19 你beh汗流滿面chiah thang得tio̍h食，到你歸土；因為你是tùi土the̍h出來；你本是土粉，也beh歸tī土粉。 20 hit人kā伊ê bó͘號名，叫夏娃；因為伊做眾人ê老母。 21 耶和華上帝為tio̍h hit人kap伊ê bó͘用皮做衣服，hō͘ in穿。 22 耶和華上帝講，看ah，chit人已經kap咱相親像，能分別好pháiⁿ；taⁿ驚了伊伸手koh tùi活命樹挽，來食，就活到永遠； 23 所以耶和華上帝kah伊出伊甸園，來種作hitê土，就是伊所tùi伊出ê。 24 所以趕hitê人出；也tī伊甸園ê東勢安置Ki-lō͘兵kap四面轉旋發火燄ê劍，來防守活命樹ê路。
1 Iâ-hô-hoa Siōng-tè só͘ chō soaⁿ-iá it-chhè ê oa̍h-mi̍h, chôa sī pí in khah káu-khiat. Chôa tùi hū-jîn-lâng kóng, Siōng-tè kiám ū-iáⁿ kóng, Hn̂g-lāi it-chhè ê chhiū, lín lóng m̄-thang chia̍h mah? 2 Hū-jîn-lâng tùi chôa kóng, Hn̂g-lāi chhiū-ni̍h ê ké-chí goán thang chia̍h; 3 chí-ū hn̂g tiong-ng hit châng chhiū ê ké-chí Siōng-tè bat kóng, Lín m̄-thang chia̍h-i, ia̍h m̄-thang bong, kiaⁿ-liáu ōe sí. 4 Chôa tùi hū-jîn-lâng kóng, Lín bô tek-khak ōe sí. 5 In-ūi Siōng-tè chai lín chia̍h ê ji̍t, lín ê ba̍k-chiu chiū ōe khui, lín beh chhin-chhiūⁿ Siōng-tè, ōe hun-piat hó-pháiⁿ. 6 Hū-jîn-lâng khòaⁿ hit châng chhiū, hó-chia̍h ia̍h kah-ba̍k; koh hit châng chhiū sī thang him-bō͘, hō͘ lâng ū tì-hūi; chiū bán i ê ké-chí chia̍h i, sòa hō͘ i ê tiōng-hu, i ia̍h chia̍h i. 7 In nn̄g-lâng ê ba̍k-chiu chiū khui, chiah chai in sī thǹg-pak-theh; chiū pín bû-hoa-kó hio̍h, ūi ka-kī chòe kûn. 8 Ji̍t liâng-léng ê sî, Iâ-hô-hoa Siōng-tè kiâⁿ-iû tī hn̂g-lāi; in thiaⁿ-kìⁿ I ê siaⁿ, hit-lâng kap i ê hū-jîn-lâng chiū bih tī hn̂g-lāi ê chhiū-tiong, lâi siám-pī Iâ-hô-hoa Siōng-tè ê bīn. 9 Iâ-hô-hoa Siōng-tè kiò hit-lâng, tùi i kóng, Lí tī tah-lo̍h? 10 I chiū kóng, Góa thiaⁿ-kìⁿ Lí ê siaⁿ tī hn̂g-lāi, góa chiū kiaⁿ, in-ūi góa thǹg-pak-theh; chiū ka-kī bih. 11 Kóng, Chī-chūi kā lí kóng, lí thǹg-pak-theh? Góa hoan-hù lí m̄-thang chia̍h hit châng chhiū, lí chia̍h i mah? 12 Hit-lâng kóng, Lí só͘ hō͘ góa chòe-phōaⁿ ê hū-jîn-lâng, i ēng hit châng chhiū ê ké-chí hō͘ góa, góa chiū chia̍h i. 13 Iâ-hô-hoa Siōng-tè tùi hū-jîn-lâng kóng, Lí só͘ chòe sī sím-mi̍h sū? Hū-jîn-lâng kóng, Chôa ín-iú góa, góa chiū chia̍h. 14 Iâ-hô-hoa Siōng-tè tùi chôa kóng, Lí í-keng chòe chit-ê, só͘-í lí siū chiù-chó͘, pí it-chhè ê cheng-siⁿ, kap soaⁿ-iá it-chhè ê cháu-siù, khah-tāng; lí beh ēng pak-tó͘ kiâⁿ, it-seng chia̍h thô͘-hún. 15 Góa beh hō͘ lí kap hū-jîn-lâng kiat oan-siû, lí ê hō͘-è kap i ê hō͘-è ia̍h kiat oan-siû; i beh siong lí ê thâu-khak, lí beh siong i ê kha-āu-tiⁿ. 16 Koh tùi hū-jîn-lâng kóng, Góa tek-khak tōa-tōa ke-thiⁿ lí hoâi-īn ê kan-khó͘; lí beh kan-khó͘ siⁿ-kiáⁿ; lí beh loân-bō͘ lí ê tiōng-hu, i beh koán-hat lí. 17 Iā tùi A-tong kóng, Lí í-keng thiaⁿ-thàn lí ê hū-jîn-lâng ê ōe, lâi chia̍h Góa só͘ hoan-hù lí kóng, Lí m̄-thang chia̍h-i ê; só͘-í thó͘-tōe in-ūi lí ê iân-kò͘ siū chiù-chó͘; lí chi̍t-sì-lâng lô-khó͘, chiah tùi i tit-tio̍h chia̍h. 18 Thó͘-tōe beh ūi-tio̍h lí hoat chhì-phè kap che̍k-lê; lí iā beh chia̍h hn̂g-ni̍h ê chhài-soe. 19 Lí beh kōaⁿ-lâu móa-bīn chiah thang tit-tio̍h chia̍h, kàu lí kui thó͘; in-ūi lí sī tùi thô͘ the̍h-chhut-lâi; lí pún sī thô͘-hún, iā beh kui tī thô͘-hún. 20 Hit-lâng kā i ê bó͘ hō miâ, kiò Hā-oa; in-ūi i chòe chèng-lâng ê lāu-bú. 21 Iâ-hô-hoa Siōng-tè ūi-tio̍h hit-lâng kap i ê bó͘ ēng phê chòe i-ho̍k, hō͘ in chhēng. 22 Iâ-hô-hoa Siōng-tè kóng, Khòaⁿ ah, chit-lâng í-keng kap lán saⁿ chhin-chhiūⁿ, ōe hun-piat hó-pháiⁿ; taⁿ kiaⁿ-liáu i chhun-chhiú koh tùi oa̍h-miā chhiū bán, lâi chia̍h, chiū oa̍h kàu éng-oán; 23 só͘-í Iâ-hô-hoa Siōng-tè kah i chhut Ai-tiân hn̂g, lâi chèng-choh hit ê thô͘, chiū-sī i só͘ tùi i chhut ê. 24 Só͘-í kóaⁿ hit ê lâng chhut; iā tī Ai-tiân hn̂g ê tang-sì an-tì Ki-lō͘-peng kap sì-bīn tńg-se̍h hoat hé-iām ê kiàm, lâi hông-siú oa̍h-miā chhiū ê lō͘.
1 Hit人kap伊ê bó͘夏娃同房；夏娃就懷孕生該隱，講，我tùi耶和華庇佑得tio̍h kiáⁿ。 2 Koh生伊ê小弟亞伯。亞伯是顧羊ê，該隱是作田ê。 3 到日後，該隱將土產做禮物獻hō͘耶和華。 4 亞伯也將羊群中頭chiūⁿ生ê羊kap伊ê油the̍h來獻。耶和華眷顧亞伯kap伊ê禮物； 5 總是無眷顧該隱kap伊ê禮物。該隱就大受氣，變面。 6 耶和華對該隱講，你啥事受氣？你啥事變面？ 7 你若行好，kiám無得tio̍h鑒納？若無行好，罪孽埋伏tī門口；伊beh戀慕你，你beh管轄伊。 8 該隱kā伊ê小弟講。以後in tī山裡ê時，該隱攻擊伊ê小弟亞伯，kā伊刣死。 9 耶和華對該隱講，你ê小弟亞伯tī tah-lo̍h？伊講，m̄知；我kiám是顧守我ê小弟ê mah？ 10 伊講，你有做甚麼？Lín小弟ê血ê聲tùi地裡喉叫我。 11 地有開嘴對你ê手來接受lín小弟ê血，taⁿ你tùi chitê地受咒詛。 12 你種作，地無beh出土產hō͘你；你beh四界走，漂流地上。 13 該隱對耶和華講，我ê刑罰太重，過頭tī我所能當ê。 14 你今á日趕我離開chitê地面，無thang tòa tī你ê面前；我四界走漂流地上；見若tú-tio̍h我ê beh 刣死我。 15 耶和華對伊講，因為án-ni，見若刣死該隱ê，beh受七倍ê報應。耶和華就kā該隱立一个記號，免得tú-tio̍h伊ê 刣死伊。 16 該隱就離開耶和華ê面前，去tī伊甸ê東勢，羅得ê地，khiā起。 17 該隱kap伊ê bó͘同房；伊ê bó͘懷孕生以諾；該隱起城，就照伊ê kiáⁿ ê名稱hitê城ê名做以諾。 18 以諾生Í-ná；Í-ná生Bí-hō͘-ngá-lī；Bí-hō͘-ngá-lī生Má-thó͘-sat-lī；Má-thó͘-sat-lī生La̍h-be̍k。 19 La̍h-be̍k chhōa兩個bó͘；一个名A-tāi，一个名Sé-la̍h。 20 A-tāi生Ngá-pat；伊做khiā起布棚飼cheng-siⁿ ê人ê祖。 21 伊ê小弟名Iû-pat；伊是做一切彈琴pûn簫ê人ê祖。 22 Sé-la̍h也生Thó͘-pat-kai-ún；伊就是製造ta̍k樣銅鐵利器ê；Thó͘-pat-kai-ún ê姊妹就是Ná-má。 23 La̍h-be̍k對伊兩個bó͘講： A-tāi kap Sé-la̍h ah，tio̍h聽我ê聲， La̍h-be̍k ê bó͘ ah，tio̍h致意聽我ê話； 人傷我，我刣伊， 少年人害我，我刣伊。 24 該隱ê伸冤若是七倍， 就La̍h-be̍k ê伸冤的確七十七倍。 25 亞當koh kap伊ê bó͘同房；伊ê bó͘生kiáⁿ，表名叫Siat；是講，上帝koh kā我設立一个kiáⁿ來替亞伯，因為該隱kā伊刣死。 26 Siat也生kiáⁿ，表名Í-lô-sū；hit時人chiah起頭求叫耶和華ê名。
1 Hit-lâng kap i ê bó͘ Hā-oa tâng-pâng; Hā-oa chiū hoâi-īn siⁿ Kai-ún, kóng, Góa tùi Iâ-hô-hoa pì-iū tit-tio̍h kiáⁿ. 2 Koh siⁿ i ê sió-tī A-pek. A-pek sī kò͘-iûⁿ-ê, Kai-ún sī choh-chhân-ê. 3 Kàu ji̍t-āu, Kai-ún chiong thó͘-sán chòe lé-mi̍h hiàn hō͘ Iâ-hô-hoa. 4 A-pek iā chiong iûⁿ-kûn-tiong thâu-chiūⁿ-siⁿ ê iûⁿ kap i ê iû the̍h-lâi hiàn. Iâ-hô-hoa koàn-kò͘ A-pek kap i ê lé-mi̍h; 5 chóng-sī bô koàn-kò͘ Kai-ún kap i ê lé-mi̍h. Kai-ún chiū tōa siū-khì, pìⁿ-bīn. 6 Iâ-hô-hoa tùi Kai-ún kóng, Lí siáⁿ-sū siū-khì? lí siáⁿ-sū pìⁿ-bīn? 7 Lí nā kiâⁿ-hó, kiám bô tit-tio̍h kàm-la̍p? nā bô kiâⁿ-hó, chōe-gia̍t bâi-ho̍k tī mn̂g-kháu; i beh loân-bō͘ lí, lí beh koán-hat i. 8 Kai-ún kā i ê sió-tī kóng. Í-āu in tī soaⁿ-ni̍h ê sî, Kai-ún kong-kek i ê sió-tī A-pek, kā i thâi-sí. 9 Iâ-hô-hoa tùi Kai-ún kóng, Lí ê sió-tī A-pek tī tah-lo̍h? I kóng, M̄-chai; góa kiám-sī kò͘-siú góa ê sió-tī-ê mah? 10 I kóng, Lí ū chòe sím-mi̍h? Lín sió-tī ê huih ê siaⁿ tùi tōe-ni̍h âu-kiò Góa. 11 Tōe ū khui-chhùi tùi lí ê chhiú lâi chiap-siū lín sió-tī ê huih, taⁿ lí tùi chit ê tōe siū chiù-chó͘. 12 Lí chèng-choh, tōe bô beh chhut thó͘-sán hō͘ lí; lí beh sì-kòe cháu, phiau-liû tōe-chiūⁿ. 13 Kai-ún tùi Iâ-hô-hoa kóng, Góa ê hêng-hoa̍t thài-tāng, kè-thâu tī góa só͘ ōe-tng-ê. 14 Lí kin-á-ji̍t kóaⁿ góa lī-khui chit ê tōe-bīn, bô thang tòa tī Lí ê bīn-chêng; góa sì-kòe cháu phiau-liû tōe-chiūⁿ; kìⁿ-nā tú-tio̍h góa ê beh thâi-sí góa. 15 Iâ-hô-hoa tùi i kóng, In-ūi án-ni, kìⁿ-nā thâi-sí Kai-ún ê, beh siū chhit-pē ê pò-èng. Iâ-hô-hoa chiū kā Kai-ún li̍p chi̍t ê kì-hō, bián-tit tú-tio̍h i ê thâi-sí i. 16 Kai-ún chiū lī-khui Iâ-hô-hoa ê bīn-chêng, khì tī Ai-tiân ê tang-sì, Lô-tek ê tōe, khiā-khí. 17 Kai-ún kap i ê bó͘ tâng-pâng; i ê bó͘ hoâi-īn siⁿ Í-lo̍k; Kai-ún khí siâⁿ, chiū chiàu i ê kiáⁿ ê miâ chheng hit ê siâⁿ ê miâ chòe Í-lo̍k. 18 Í-lo̍k siⁿ Í-ná; Í-ná siⁿ Bí-hō͘-ngá-lī; Bí-hō͘-ngá-lī siⁿ Má-thó͘-sat-lī; Má-thó͘-sat-lī siⁿ La̍h-be̍k. 19 La̍h-be̍k chhōa nn̄g ê bó͘; chi̍t-ê miâ A-tāi, chi̍t-ê miâ Sé-la̍h. 20 A-tāi siⁿ Ngá-pat; i chòe khiā-khí pò͘-pîⁿ chhī cheng-siⁿ ê lâng ê chó͘. 21 I ê sió-tī miâ Iû-pat; i sī chòe it-chhè tôaⁿ-khîm pûn-siau ê lâng ê chó͘. 22 Sé-la̍h iā siⁿ Thó͘-pat-kai-ún; i chiū-sī chè-chō ta̍k-iūⁿ tâng thih lāi-khì ê; Thó͘-pat-kai-ún ê chí-bē chiū-sī Ná-má. 23 La̍h-be̍k tùi i nn̄g ê bó͘ kóng: A-tāi kap Sé-la̍h ah, tio̍h thiaⁿ góa ê siaⁿ, La̍h-be̍k ê bó͘ ah, tio̍h tì-ì thiaⁿ góa ê ōe; Lâng siong góa, góa thâi i, Siàu-liân lâng hāi góa, góa thâi i. 24 Kai-ún ê sin-oan nā sī chhit-pē, Chiū La̍h-be̍k ê sin-oan tek-khak chhit-cha̍p-chhit pē. 25 A-tong koh kap i ê bó͘ tâng-pâng; i ê bó͘ siⁿ-kiáⁿ, piáu-miâ kiò Siat; sī kóng, Siōng-tè koh kā góa siat-li̍p chi̍t ê kiáⁿ lâi thòe A-pek, in-ūi Kai-ún kā i thâi-sí. 26 Siat iā siⁿ-kiáⁿ, piáu-miâ Í-lô-sū; hit-sî lâng chiah khí-thâu kiû-kiò Iâ-hô-hoa ê miâ.
1 亞當ê世系記tī下底，當上帝創造人ê日，是照上帝ê款式來造伊； 2 創造in ta-po͘ kap cha-bó͘；tī in受創造ê日，賜in福氣，稱in ê名叫人。 3 亞當一百三十歲生kiáⁿ照伊ê款，親像伊ê像，表名叫Siat。 4 亞當生Siat了後koh歷過八百年；其中iáu有生kiáⁿ cha-bó͘-kiáⁿ。 5 亞當計共享壽九百三十歲，chiah死。 6 Siat一百連五歲，生Í-lô-sū。 7 Siat生Í-lô-sū ê了後iáu活八百連七年；其中有koh生kiáⁿ cha-bó͘-kiáⁿ。 8 Siat計共享壽九百一十二歲，chiah死。 9 Í-lô-sū九十歲，生Kai-lâm。 10 Í-lô-sū生Kai-lâm ê了後iáu活八百一十五年；其中有koh生kiáⁿ cha-bó͘-kiáⁿ。 11 Í-lô-sū計共享壽九百連五歲，chiah死。 12 Kai-lâm七十歲，生Má-le̍k-lia̍t。 13 Kai-lâm生Má-le̍k-lia̍t ê了後iáu活八百四十年；其中有koh生kiáⁿ cha-bó͘-kiáⁿ。 14 Kai-lâm計共享壽九百一十歲，chiah死。 15 Má-le̍k-lia̍t六十五歲，生Ngá-lia̍t。 16 Má-le̍k-lia̍t生Ngá-lia̍t ê了後iáu活八百三十年；其中有koh生kiáⁿ cha-bó͘-kiáⁿ。 17 Má-le̍k-lia̍t計共享壽八百九十五歲，chiah死。 18 Ngá-lia̍t一百六十二歲，生以諾。 19 Ngá-lia̍t生以諾ê了後iáu活八百年；其中有koh生kiáⁿ cha-bó͘-kiáⁿ。 20 Ngá-lia̍t計共享壽九百六十二歲，chiah死。 21 以諾六十五歲，生Má-thó͘-sat-la̍h。 22 以諾生Má-thó͘-sat-la̍h ê了後kap上帝相kap行三百年；其中有koh生kiáⁿ cha-bó͘-kiáⁿ。 23 以諾計共享壽三百六十五歲。 24 以諾kap上帝相kap行，上帝接伊去；伊就無tī-teh。 25 Má-thó͘-sat-la̍h一百八十七歲，生La̍h-be̍k。 26 Má-thó͘-sat-la̍h生La̍h-be̍k ê了後iáu活七百八十二年；其中有koh生kiáⁿ cha-bó͘-kiáⁿ。 27 Má-thó͘-sat-la̍h計共享壽九百六十九歲，chiah死。 28 La̍h-be̍k一百八十二歲，生一个kiáⁿ， 29 表名叫挪亞，講，耶和華bat咒詛地，hō͘咱做工勞苦；taⁿ chitê kiáⁿ beh安慰咱。 30 La̍h-be̍k生挪亞ê了後iáu活五百九十五年；其中有koh生kiáⁿ cha-bó͘-kiáⁿ。 31 La̍h-be̍k計共享壽七百七十七歲，chiah死。 32 挪亞五百歲；生閃，含，雅弗。
1 A-tong ê sè-hē kì tī ē-tóe. Tng Siōng-tè chhòng-chō lâng ê ji̍t, sī chiàu Siōng-tè ê khoán-sit lâi chō i; 2 chhòng-chō in ta-po͘ kap cha-bó͘; tī in siū chhòng-chō ê ji̍t, sù in hok-khì, chheng in ê miâ kiò Lâng. 3 A-tong chi̍t-pah saⁿ-cha̍p hè siⁿ-kiáⁿ chiàu i ê khoán, chhin-chhiūⁿ i ê siōng, piáu miâ kiò Siat. 4 A-tong siⁿ Siat liáu-āu koh le̍k-kè poeh-pah nî; kî-tiong iáu ū siⁿ kiáⁿ cha-bó͘-kiáⁿ. 5 A-tong kè-kiōng hióng-siū káu-pah saⁿ-cha̍p hè, chiah sí. 6 Siat chi̍t-pah liân gō͘ hè, siⁿ Í-lô-sū. 7 Siat siⁿ Í-lô-sū ê liáu-āu iáu oa̍h poeh-pah liân chhit nî; kî-tiong ū koh siⁿ kiáⁿ cha-bó͘-kiáⁿ. 8 Siat kè-kiōng hióng-siū káu-pah it-cha̍p-jī hè, chiah sí. 9 Í-lô-sū káu-cha̍p hè, siⁿ Kai-lâm. 10 Í-lô-sū siⁿ Kai-lâm ê liáu-āu iáu oa̍h poeh-pah it-cha̍p-gō͘ nî; kî-tiong ū koh siⁿ kiáⁿ cha-bó͘-kiáⁿ. 11 Í-lô-sū kè-kiōng hióng-siū káu-pah liân gō͘ hè, chiah sí. 12 Kai-lâm chhit-cha̍p hè, siⁿ Má-le̍k-lia̍t. 13 Kai-lâm siⁿ Má-le̍k-lia̍t ê liáu-āu iáu oa̍h poeh-pah sì-cha̍p nî; kî-tiong ū koh siⁿ kiáⁿ cha-bó͘-kiáⁿ. 14 Kai-lâm kè-kiōng hióng-siū káu-pah it-cha̍p hè, chiah sí. 15 Má-le̍k-lia̍t la̍k-cha̍p gō͘ hè, siⁿ Ngá-lia̍t. 16 Má-le̍k-lia̍t siⁿ Ngá-lia̍t ê liáu-āu iáu oa̍h poeh-pah saⁿ-cha̍p nî; kî-tiong ū koh siⁿ kiáⁿ cha-bó͘-kiáⁿ. 17 Má-le̍k-lia̍t kè-kiōng hióng-siū poeh-pah káu-cha̍p gō͘ hè, chiah sí. 18 Ngá-lia̍t chi̍t-pah la̍k-cha̍p jī hè, siⁿ Í-lo̍k. 19 Ngá-lia̍t siⁿ Í-lo̍k ê liáu-āu iáu oa̍h poeh-pah nî; kî-tiong ū koh siⁿ kiáⁿ cha-bó͘-kiáⁿ. 20 Ngá-lia̍t kè-kiōng hióng-siū káu-pah la̍k-cha̍p jī hè, chiah sí. 21 Í-lo̍k la̍k-cha̍p gō͘ hè, siⁿ Má-thó͘-sat-la̍h. 22 Í-lo̍k siⁿ Má-thó͘-sat-la̍h ê liáu-āu kap Siōng-tè saⁿ-kap kiâⁿ saⁿ-pah nî; kî-tiong ū koh siⁿ kiáⁿ cha-bó͘-kiáⁿ. 23 Í-lo̍k kè-kiōng hióng-siū saⁿ-pah la̍k-cha̍p gō͘ hè. 24 Í-lo̍k kap Siōng-tè saⁿ-kap kiâⁿ, Siōng-tè chiap i khì; i chiū bô tī-teh. 25 Má-thó͘-sat-la̍h chi̍t-pah poeh-cha̍p chhit hè, siⁿ La̍h-be̍k. 26 Má-thó͘-sat-la̍h siⁿ La̍h-be̍k ê liáu-āu iáu oa̍h chhit-pah poeh-cha̍p jī nî; kî-tiong ū koh siⁿ kiáⁿ cha-bó͘-kiáⁿ. 27 Má-thó͘-sat-la̍h kè-kiōng hióng-siū káu-pah la̍k-cha̍p káu hè, chiah sí. 28 La̍h-be̍k chi̍t-pah poeh-cha̍p jī hè, siⁿ chi̍t ê kiáⁿ, 29 piáu-miâ kiò Ná-a, kóng, Iâ-hô-hoa bat chiù-chó͘ tōe, hō͘ lán chòe kang lô-khó͘; taⁿ chit ê kiáⁿ beh an-ùi lán. 30 La̍h-be̍k siⁿ Ná-a ê liáu-āu iáu oa̍h gō͘-pah káu-cha̍p gō͘ nî; kî-tiong ū koh siⁿ kiáⁿ cha-bó͘-kiáⁿ. 31 La̍h-be̍k kè-kiōng hióng-siū chhit-pah chhit-cha̍p-chhit hè, chiah-sí. 32 Ná-a gō͘-pah hè; siⁿ Siám, Hâm, Ngá-hut.
1 人tī地上ná khah-chōe，也生cha-bó͘-kiáⁿ ê時， 2 上帝ê kiáⁿ看見人ê cha-bó͘-kiáⁿ súi，就照in所ài，娶in做bó͘。 3 耶和華講，人既然屬tī肉體，我ê神無beh永遠tiàm-tī in；但是in ê日子beh到一百二十年。 4 Tī hit時有大漢人tī地面上；後來上帝ê kiáⁿ kap人ê cha-bó͘-kiáⁿ同房，in就生kiáⁿ，就是tùi古早英雄有名聲ê人。 5 耶和華看見人tī地上，罪惡真大，心內所想ê念頭ta̍k日lóng是pháiⁿ。 6 耶和華退悔伊造人tī世間；心內憂悶。 7 耶和華講，我beh tùi地上剿滅我所創造ê人；將人kap走獸、蟲thōa、飛鳥，lóng剿滅；因為我造in了有退悔。 8 只有挪亞得tio̍h恩典tī耶和華ê面前。 9 挪亞ê世系記tī下底，挪亞是義人；tī hit世代ê中間是完全ê人；挪亞kap上帝相kap行。 10 挪亞生三個kiáⁿ，就是閃、含、雅弗。 11 世界敗壞tī上帝ê面前；世界充滿強暴。 12 上帝看世界lóng敗壞；因為見有肉體ê in tī世界ê行做lóng是敗壞。 13 上帝tùi挪亞講，見有肉體ê我看in ê末期已經到，因為in ê強暴充滿tī世界；你看，我beh將in kap地做一下毀滅。 14 你tio̍h用松柏柴做大船，船內tio̍h隔房間，內外用瀝青油kô͘伊。 15 大船ê造法是án-ni：長三百肘，闊五十肘，高三十肘。 16 船tio̍h做窗á，高一肘；門tio̍h hē tī船邊；船tio̍h做三層，分上、中、下。 17 你看，我，我beh hō͘大水氾濫tī地上，來毀滅天下見若有活氣ê肉體；見若tī地上ê lóng會死。 18 總是我beh kap你立我ê約。你kap你ê kiáⁿ，你ê bó͘，你ê新婦，lóng tio̍h入大船。 19 見若有活氣ê肉體，ta̍k樣一對，一隻公ê，一隻母ê，你tio̍h帶in入大船，kap你相kap保全活命。 20 飛鳥各照伊ê類，cheng-siⁿ各照伊ê類，地上ê蟲thōa各照伊ê類，ta̍k樣一對beh到你hia來保全in ê活命。 21 你tio̍h the̍h ta̍k樣ê食物積聚teh，thang做你kap in ê食物。 22 挪亞就án-ni行；照上帝lóng總所命令ê去行。
1 Lâng tī tōe-chiūⁿ ná khah-chōe, iā siⁿ cha-bó͘-kiáⁿ ê sî, 2 Siōng-tè ê kiáⁿ khòaⁿ-kìⁿ lâng ê cha-bó͘-kiáⁿ súi, chiū chiàu in só͘ ài, chhōa in chòe bó͘. 3 Iâ-hô-hoa kóng, Lâng kì-jiân sio̍k tī jio̍k-thé, Góa ê Sîn bô beh éng-oán tiàm tī in; nā-sī in ê ji̍t-chí beh kàu chi̍t-pah jī-cha̍p nî. 4 Tī hit-sî ū tōa-hàn lâng tī tōe-bīn-chiūⁿ; āu-lâi Siōng-tè ê kiáⁿ kap lâng ê cha-bó͘-kiáⁿ tâng-pâng, in chiū siⁿ kiáⁿ, chiū-sī tùi kó͘-chá eng-hiông ū miâ-siaⁿ ê lâng. 5 Iâ-hô-hoa khòaⁿ-kìⁿ lâng tī tōe-chiūⁿ, chōe-ok chin tōa, sim-lāi só͘ siūⁿ ê liām-thâu ta̍k-ji̍t lóng sī pháiⁿ. 6 Iâ-hô-hoa thè-hóe I chō lâng tī sè-kan; sim-lāi iu-būn. 7 Iâ-hô-hoa kóng, Góa beh tùi tōe-chiūⁿ châu-bia̍t Góa só͘ chhòng-chō ê lâng; chiong lâng kap cháu-siù, thâng-thōa, pe-chiáu, lóng châu-bia̍t; in-ūi Góa chō in liáu ū thè-hóe. 8 Chí-ū Ná-a tit-tio̍h un-tián tī Iâ-hô-hoa ê bīn-chêng. 9 Ná-a ê sè-hē kì tī ē-tóe. Ná-a sī gī-lâng; tī hit sè-tāi ê tiong-kan sī oân-choân ê lâng; Ná-a kap Siōng-tè saⁿ-kap kiâⁿ. 10 Ná-a siⁿ saⁿ ê kiáⁿ, chiū-sī Siám, Hâm, Ngá-hut. 11 Sè-kài pāi-hoāi tī Siōng-tè ê bīn-chêng; sè-kài chhiong-móa kiông-pō. 12 Siōng-tè khòaⁿ sè-kài lóng pāi-hoāi; in-ūi kìⁿ ū jio̍k-thé-ê in tī sè-kài ê kiâⁿ-chòe lóng sī pāi-hoāi. 13 Siōng-tè tùi Ná-a kóng, Kìⁿ ū jio̍k-thé-ê Góa khòaⁿ in ê boa̍t-kî í-keng kàu, in-ūi in ê kiông-pō chhiong-móa tī sè-kài; lí khòaⁿ, Góa beh chiong in kap tōe chòe chi̍t-ē húi-bia̍t. 14 Lí tio̍h ēng chhêng-peh-chhâ chòe tōa-chûn, chûn-lāi tio̍h keh pâng-keng, lāi-gōa ēng le̍k-chhiⁿ-iû kô͘ i. 15 Tōa-chûn ê chō-hoat sī án-ni: tn̂g saⁿ-pah tiú, khoah gō͘-cha̍p tiú, koâiⁿ saⁿ-cha̍p tiú. 16 Chûn tio̍h chòe thang-á, koâiⁿ chi̍t tiú; mn̂g tio̍h hē tī chûn-piⁿ; chûn tio̍h chòe saⁿ-chân, hun siōng, tiong, hā. 17 Lí khòaⁿ, Góa, Góa beh hō͘ tōa chúi hoàn-lām tī tōe-chiūⁿ, lâi húi-bia̍t thiⁿ-ē kìⁿ-nā ū oa̍h-khì ê jio̍k-thé; kìⁿ-nā tī tōe-chiūⁿ-ê lóng ōe sí. 18 Chóng-sī Góa beh kap lí li̍p Góa ê iok. Lí kap lí ê kiáⁿ, lí ê bó͘, lí ê sim-pū, lóng tio̍h ji̍p tōa-chûn. 19 Kìⁿ-nā ū oa̍h-khì ê jio̍k-thé, ta̍k-iūⁿ chi̍t-tùi, chi̍t-chiah kang-ê, chi̍t-chiah bú-ê, lí tio̍h tòa in ji̍p tōa-chûn, kap lí saⁿ-kap pó-choân oa̍h-miā. 20 Pe-chiáu kok chiàu i ê lūi, cheng-siⁿ kok chiàu i ê lūi, tōe-chiūⁿ ê thâng-thōa kok chiàu i ê lūi, ta̍k-iūⁿ chi̍t-tùi beh kàu lí hia lâi pó-choân in ê oa̍h-miā. 21 Lí tio̍h the̍h ta̍k-iūⁿ ê chia̍h-mi̍h chek-chū-teh, thang chòe lí kap in ê chia̍h-mi̍h. 22 Ná-a chiū án-ni kiâⁿ; chiàu Siōng-tè lóng-chóng só͘ bēng-lēng-ê khì kiâⁿ.
1 耶和華對挪亞講，你kap你全家lóng tio̍h入大船；因為tī chit世代ê中間我看見你tī我ê面前是義人。 2 見若清氣ê cheng-siⁿ，你tio̍h帶七隻公ê，七隻母ê；無清氣ê cheng-siⁿ，你tio̍h帶一隻公ê，一隻母ê。 3 天裡ê鳥也tio̍h帶，七隻公ê，七隻母ê，thang留in ê種活tī全地。 4 因為koh過七日，我beh落雨tī地上，四十日四十暝；將我所造ta̍k號ê活物lóng tùi地上剿滅。 5 挪亞就照耶和華所命令伊ê，一盡去行。 6 當大水氾濫tī地上ê時，挪亞六百歲。 7 挪亞就kap伊ê kiáⁿ，伊ê bó͘，伊ê新婦，lóng入大船，閃避大水。 8 清氣ê cheng-siⁿ，kap無清氣ê cheng-siⁿ，飛鳥，kap地上一切ê蟲thōa， 9 lóng一對一對，有公ê有母ê，到挪亞hia，進入大船，照上帝命令挪亞ê。 10 過hiahê七日大水氾濫tī地上。 11 當挪亞六百歲，二月十七日，hit日深淵ê水源lóng裂開，天也破隙。 12 四十日四十暝落雨tī地面上。 13 Tú-tú hit日，挪亞kap伊ê kiáⁿ，閃、含、雅弗，kap挪亞ê bó͘，kap伊三個新婦，lóng入大船； 14 in kap百獸各照伊ê類，一切ê cheng-siⁿ各照伊ê類，一切趖 tī地上ê蟲thōa各照伊ê類，一切有翼ê各照伊ê類，一切ê飛鳥各照伊ê類，lóng總進入大船。 15 見若肉體內面有活氣ê，lóng一對一對，到挪亞hia，入大船。 16 見若入大船ê，是有公有母ê肉體，照上帝所命令伊ê；耶和華就kā伊關teh。 17 水氾濫tī地上四十日；水漲ná高，hō͘大船chhèng浮，船就離地。 18 水勢真大，tī地上直直漲起來；船漂流tī水面。 19 水勢tī地上極其大；天下ê高山lóng hō͘伊淹密。 20 水勢比山加漲高十五肘；山lóng hō͘伊淹密。 21 見若tī地上有肉體ê動物，就是飛鳥、cheng-siⁿ、走獸，kap一切趖 tī地上ê蟲thōa，以及所有ê眾人，lóng死。 22 見若tī乾地有鼻孔喘氣ê生靈lóng死。 23 見若地上一切ê活物lóng剿滅；人kap cheng-siⁿ、蟲thōa，以及天中ê飛鳥，in lóng tùi地上受剿滅；只有挪亞chham hiahê kap伊tī船裡ê留teh。 24 水勢真大tī地上，歷過一百五十日。
1 Iâ-hô-hoa tùi Ná-a kóng, Lí kap lí choân-ke lóng tio̍h ji̍p tōa-chûn; in-ūi tī chit sè-tāi ê tiong-kan Góa khòaⁿ-kìⁿ lí tī Góa ê bīn-chêng sī gī-lâng. 2 Kìⁿ-nā chheng-khì ê cheng-siⁿ, lí tio̍h tòa chhit-chiah kang-ê, chhit-chiah bú-ê; bô chheng-khì ê cheng-siⁿ, lí tio̍h tòa chi̍t-chiah kang-ê, chi̍t-chiah bú-ê. 3 Thiⁿ-ni̍h ê chiáu iā tio̍h tòa, chhit-chiah kang-ê, chhit-chiah bú-ê, thang lâu in ê chéng oa̍h tī choân-tōe. 4 In-ūi koh kè chhit-ji̍t, Góa beh lo̍h-hō͘ tī tōe-chiūⁿ, sì-cha̍p ji̍t sì-cha̍p mî; chiong Góa só͘ chō ta̍k-hō ê oa̍h-mi̍h lóng tùi tōe-chiūⁿ châu-bia̍t. 5 Ná-a chiū chiàu Iâ-hô-hoa só͘ bēng-lēng i ê, it-chīn khì kiâⁿ. 6 Tng tōa-chúi hoàn-lām tī tōe chiūⁿ ê sî, Ná-a la̍k-pah hè. 7 Ná-a chiū kap i ê kiáⁿ, i ê bó͘, i ê sim-pū, lóng ji̍p tōa-chûn, siám-pī tōa-chúi. 8 Chheng-khì ê cheng-siⁿ, kap bô chheng-khì ê cheng-siⁿ, pe-chiáu, kap tōe-chiūⁿ it-chhè ê thâng-thōa, 9 lóng chi̍t-tùi chi̍t-tùi, ū kang-ê ū bú-ê, kàu Ná-a hia, chìn-ji̍p tōa-chûn, chiàu Siōng-tè bēng-lēng Ná-a ê. 10 Kè hiah ê chhit-ji̍t tōa-chúi hoàn-lām tī tōe-chiūⁿ. 11 Tng Ná-a la̍k-pah hè, jī-ge̍h cha̍p-chhit ji̍t, hit-ji̍t chhim-ian ê chúi-goân lóng li̍h-khui, thiⁿ iā phòa-khiah. 12 Sì-cha̍p ji̍t sì-cha̍p mî lo̍h-hō͘ tī tōe-bīn-chiūⁿ. 13 Tú-tú hit-ji̍t Ná-a kap i ê kiáⁿ, Siám, Hâm, Ngá-hut, kap Ná-a ê bó͘, kap i saⁿ ê sim-pū, lóng ji̍p tōa-chûn; 14 in kap pah-siù kok chiàu i ê lūi, it-chhè ê cheng-siⁿ kok chiàu i ê lūi, it-chhè sô tī tōe-chiūⁿ ê thâng-thōa kok chiàu i ê lūi, it-chhè ū-si̍t-ê kok chiàu i ê lūi, it-chhè ê pe-chiáu kok chiàu i ê lūi, lóng-chóng chìn-ji̍p tōa-chûn. 15 Kìⁿ-nā jio̍k-thé lāi-bīn ū oa̍h-khì-ê, lóng chi̍t-tùi chi̍t-tùi, kàu Ná-a hia, ji̍p tōa-chûn. 16 Kìⁿ-nā ji̍p tōa-chûn-ê, sī ū kang ū bú ê jio̍k-thé, chiàu Siōng-tè só͘ bēng-lēng i-ê; Iâ-hô-hoa chiū kā i koaiⁿ-teh. 17 Chúi hoàn-lām tī tōe-chiūⁿ sì-cha̍p-ji̍t; chúi tiòng ná koâiⁿ, hō͘ tōa-chûn chhèng-phû, chûn chiū lī tōe. 18 Chúi-sè chin-tōa, tī tōe-chiūⁿ ti̍t-ti̍t tiòng-khí-lâi; chûn phiau-liû tī chúi-bīn. 19 Chúi-sè tī tōe-chiūⁿ ke̍k-kî tōa; thiⁿ-ē ê koâiⁿ-soaⁿ lóng hō͘ i im-ba̍t. 20 Chúi-sè pí soaⁿ ke-tiòng koâiⁿ cha̍p-gō͘ tiú; soaⁿ lóng hō͘ i im-ba̍t. 21 Kìⁿ-nā tī tōe-chiūⁿ ū jio̍k-thé ê tōng-bu̍t, chiū-sī pe-chiáu, cheng-siⁿ, cháu-siù, kap it-chhè sô tī tōe-chiūⁿ ê thâng-thōa, í-ki̍p só͘ ū ê chèng-lâng, lóng sí. 22 Kìⁿ-nā tī ta-tōe ū phīⁿ-khang chhoán-khùi ê seng-lêng lóng sí. 23 Kìⁿ-nā tōe-chiūⁿ it-chhè ê oa̍h-mi̍h lóng châu-bia̍t; lâng kap cheng-siⁿ, thâng-thōa, í-ki̍p thiⁿ-tiong ê pe-chiáu, in lóng tùi tōe-chiūⁿ siū châu-bia̍t; chí-ū Ná-a chham hiah-ê kap i tī chûn-ni̍h-ê lâu-teh. 24 Chúi-sè chin-tōa tī tōe-chiūⁿ, le̍k-kè chi̍t-pah gō͘-cha̍p-ji̍t.
1 上帝記得挪亞，kap一切ê活物，以及kap伊tī大船一切ê cheng-siⁿ；上帝hō͘風吹地，水就漸漸消蝕。 2 深淵ê水源，kap天ê空隙，lóng關密；天裡ê雨亦soah。 3 水tùi地上直直退；一百五十日後，水就漸漸消。 4 七月十七日，船掛(khòa)tī A-la̍h-lia̍p ê山。 5 水koh漸漸消，直直到十月。十月初一日，山頭chiah出現。 6 過四十日，挪亞開伊所做大船ê窗á； 7 放一隻烏鴉出去；烏鴉飛來飛去，直直到地上ê水乾。 8 伊koh放一隻鴿á出去，beh看水tùi地上退á-bē。 9 總是鴿á chhē無歇腳ê所在，就倒tńg來大船挪亞hia；因為遍地面iáu有水；挪亞伸手接(chih)伊，掠入大船。 10 伊koh thèng候七日，koh放鴿á出大船。 11 到ê-hng鴿á tò來伊hia，嘴咬一葉新ê橄欖葉；挪亞chiah知水tùi地上退lah。 12 伊koh thèng候七日，放鴿á出去；鴿á lóng無koh tò來。 13 到挪亞六百連一歲，正月初一日，地上ê水lóng乾；挪亞就掀開大船ê蓋，來看；就看見地面已經乾。 14 二月二七日，土地lóng乾。 15 上帝對挪亞講， 16 你kap你ê bó͘，你ê kiáⁿ，你ê新婦，lóng tio̍h出大船。 17 Tī你hia見有肉體ê活物，就是飛鳥、cheng-siⁿ，kap一切趖 tī地上ê蟲thōa，lóng tio̍h帶in出；hō͘ in興旺tī地裡，生湠真chōe。 18 Tùi hit-tia̍p挪亞kap伊ê kiáⁿ，伊ê bó͘，伊ê新婦，lóng出來。 19 一切ê走獸，一切ê蟲thōa，一切ê飛鳥，見若地上所有ê動物，各照伊ê族類，亦lóng出大船。 20 挪亞為tio̍h耶和華起一座壇；tùi ta̍k樣清氣ê cheng-siⁿ，ta̍k樣清氣ê飛鳥，取來獻tī壇頂做燒祭。 21 耶和華phīⁿ伊ê芳味；耶和華心內就講，我無koh因為人ê緣故咒詛地，因為人tùi細漢ê時，心所想就pháiⁿ；我無beh照我所有行ê，koh滅各種ê活物。 22 地iáu tī-teh ê時，栽種收成，寒熱、冬天、夏天、日暝，lóng無歇。
1 Siōng-tè kì-tit Ná-a, kap it-chhè ê oa̍h-mi̍h, í-ki̍p kap i tī tōa-chûn it-chhè ê cheng-siⁿ; Siōng-tè hō͘ hong chhe tōe, chúi chiū chiām-chiām siau-si̍h. 2 Chhim-ian ê chúi-goân, kap thiⁿ ê khang-khiah, lóng koaiⁿ-ba̍t; thiⁿ-ni̍h ê hō͘ ia̍h soah. 3 Chúi tùi tōe-chiūⁿ ti̍t-ti̍t thè; chi̍t-pah gō͘-cha̍p ji̍t āu, chúi chiū chiām-chiām siau. 4 Chhit-ge̍h cha̍p chhit ji̍t, chûn khòa tī A-la̍h-lia̍p ê soaⁿ. 5 Chúi koh chiām-chiām siau, ti̍t-ti̍t kàu cha̍p-ge̍h. Cha̍p-ge̍h chhoe-it ji̍t, soaⁿ-thâu chiah chhut-hiān. 6 Kè sì-cha̍p ji̍t, Ná-a khui i só͘ chòe tōa-chûn ê thang-á; 7 pàng chi̍t chiah o͘-a chhut-khì; o͘-a pe-lâi pe-khì, ti̍t-ti̍t kàu tōe-chiūⁿ ê chúi ta. 8 I koh pàng chi̍t chiah chíⁿ-á chhut-khì, beh khòaⁿ chúi tùi tōe-chiūⁿ thè á-bē. 9 Chóng-sī chíⁿ-á chhē bô hioh-kha ê só͘-chāi, chiū tò-tńg lâi tōa-chûn Ná-a hia; in-ūi piàn-tōe-bīn iáu ū chúi; Ná-a chhun-chhiú chih i, lia̍h ji̍p tōa-chûn. 10 I koh thèng-hāu chhit-ji̍t, koh pàng chíⁿ-á chhut tōa-chûn. 11 Kàu ê-hng chíⁿ-á tò-lâi i hia, chhùi kā chi̍t-hio̍h sin ê kaⁿ-ná-hio̍h; Ná-a chiah chai chúi tùi tōe-chiūⁿ thè lah. 12 I koh thèng-hāu chhit-ji̍t, pàng chíⁿ-á chhut-khì; chíⁿ-á lóng bô koh tò-lâi. 13 Kàu Ná-a la̍k-pah liân chi̍t hè, chiaⁿ-ge̍h chhoe-it ji̍t, tōe-chiūⁿ ê chúi lóng ta; Ná-a chiū hian-khui tōa-chûn ê kòa, lâi khòaⁿ; chiū khòaⁿ-kìⁿ tōe-bīn í-keng ta. 14 Jī-ge̍h jī-chhit-ji̍t, thô͘-tōe lóng ta. 15 Siōng-tè tùi Ná-a kóng, 16 Lí kap lí ê bó͘, lí ê kiáⁿ, lí ê sim-pū, lóng tio̍h chhut tōa-chûn. 17 Tī lí hia kìⁿ-ū jio̍k-thé ê oa̍h-mi̍h, chiū-sī pe-chiáu, cheng-siⁿ, kap it-chhè sô tī tōe-chiūⁿ ê thâng-thōa, lóng tio̍h tòa in chhut; hō͘ in heng-ōng tī tōe-ni̍h, siⁿ-thòaⁿ chin-chōe. 18 Tùi hit-tia̍p Ná-a kap i ê kiáⁿ, i ê bó͘, i ê sim-pū, lóng chhut-lâi. 19 It-chhè ê cháu-siù, it-chhè ê thâng-thōa, it-chhè ê pe-chiáu, kìⁿ-nā tōe-chiūⁿ só͘ ū ê tōng-bu̍t, kok chiàu i ê cho̍k-lūi, ia̍h lóng chhut tōa-chûn. 20 Ná-a ūi-tio̍h Iâ-hô-hoa khí chi̍t chō tôaⁿ; tùi ta̍k-iūⁿ chheng-khì ê cheng-siⁿ, ta̍k-iūⁿ chheng-khì ê pe-chiáu, chhú lâi hiàn tī tôaⁿ-téng chòe sio-chè. 21 Iâ-hô-hoa phīⁿ i ê phang-bī; Iâ-hô-hoa sim-lāi chiū kóng, Góa bô koh in-ūi lâng ê iân-kò͘ chiù-chó͘ tōe, in-ūi lâng tùi sòe-hàn ê sî, sim só͘ siūⁿ chiū pháiⁿ; Góa bô beh chiàu Góa só͘ ū kiâⁿ-ê, koh bia̍t kok-chéng ê oa̍h-mi̍h. 22 Tōe iáu tī-teh ê sî, chai-chèng siu-sêng, kôaⁿ joa̍h, tang-thiⁿ, hē-thiⁿ, ji̍t mî, lóng bô hioh.
1 上帝賜福挪亞，kap伊ê kiáⁿ，亦對in講，Lín tio̍h生湠chōe-chōe，充滿地上。 2 見若地上ê走獸，kap天裡ê鳥，lóng beh驚lín畏lín；連地上一切ê蟲thōa，kap海裡一切ê魚，lóng交付lín ê手。 3 見若活ê動物lóng做lín ê食物；chiahê一切我lóng hō͘ lín，親像hō͘ lín菜蔬一樣。 4 獨獨有活命ê肉，就是有kâⁿ血ê，lín m̄-thang食。 5 流lín ê血，就是流lín活命ê血ê罪，我beh討伊；我beh對各樣走獸討，亦beh對人ê手，以及ta̍k人兄弟ê手，來討人ê活命。 6 見若hō͘人流血ê，人也beh hō͘伊流血；因為上帝造人，是親像伊家己ê像。 7 Lín tio̍h生湠chōe-chōe，tī地面上tio̍h興旺，加添真chōe。 8 上帝kā挪亞kap伊ê kiáⁿ講， 9 我，我kap lín以及lín ê後裔立我ê約； 10 亦kap hiahê kap lín tī-teh一切ê活物，就是kap lín tī-teh ê飛鳥、cheng-siⁿ，一切走獸；見若tùi大船出來地上一切ê走獸立約。 11 我kap lín立我ê約；見有肉體ê，無koh hō͘大水滅無，亦無koh有大水毀壞土地。 12 上帝講，我kap lín亦kap hiahê kap lín tī-teh ta̍k樣ê活物所立永世代ê約，是有記號。 13 我將我ê虹hē tī雲裡，thang做我kap地立約ê記號。 14 以後我hō͘雲起遮地ê時，beh有虹出現tī雲裡。 15 我就記念我kap lín以及ta̍k樣有肉體ê活物所立ê約，水無koh氾濫損壞一切有肉體ê物。 16 虹beh出現tī雲裡，我beh看伊，hō͘我記念上帝kap地上ta̍k樣有肉體ê活物所立永遠ê約。 17 上帝對挪亞講，這就是我kap地上一切有肉體ê物所立ê約ê記號。 18 挪亞ê kiáⁿ，出大船ê，就是閃，含，雅弗；含是迦南ê老父。 19 Chí三個是挪亞ê kiáⁿ；tùi in遍滿全地。 20 挪亞起手做農夫，栽種葡萄園； 21 lim hitê酒來醉，tī布棚內thǹg-pak-theh。 22 迦南ê老父，含，看in老父thǹg-theh，去外面kā in兩個兄弟講。 23 閃kap雅弗the̍h一領衫，掛tī in ê肩頭；倒退行來jia老父ê thǹg-theh；in ê面ǹg出，無看去老父ê thǹg-theh。 24 挪亞酒醉醒，chiah知第二kiáⁿ ê所做。 25 就講， 迦南tio̍h受咒詛； 伊beh做伊ê兄弟奴僕ê奴僕。Koh講， 26 Tio̍h o-ló耶和華，閃ê上帝； 迦南做閃ê奴僕。 27 願上帝hō͘雅弗發展， Hō͘伊tòa tī閃ê布棚； 迦南亦做伊ê奴僕。 28 大水了後挪亞iáu活三百五十年。 29 挪亞計共享壽九百五十歲，chiah死。
1 Siōng-tè sù-hok Ná-a, kap i ê kiáⁿ, ia̍h tùi in kóng, Lín tio̍h siⁿ-thòaⁿ chōe-chōe, chhiong-móa tōe-chiūⁿ. 2 Kìⁿ-nā tōe-chiūⁿ ê cháu-siù, kap thiⁿ-ni̍h ê chiáu, lóng beh kiaⁿ lín ùi lín; liân tōe-chiūⁿ it-chhè ê thâng-thōa, kap hái-ni̍h it-chhè ê hî, lóng kau-hù lín ê chhiú. 3 Kìⁿ-nā oa̍h ê tōng-bu̍t lóng chòe lín ê chia̍h-mi̍h; chiah-ê it-chhè Góa lóng hō͘ lín, chhin-chhiūⁿ hō͘ lín chhài-soe chi̍t-iūⁿ. 4 To̍k-to̍k ū oa̍h-miā ê bah, chiū-sī ū kâⁿ-huih-ê, lín m̄-thang chia̍h. 5 Lâu lín ê huih, chiū-sī lâu lín oa̍h-miā ê huih ê chōe, Góa beh thó-i; Góa beh tùi kok-iūⁿ cháu-siù thó, ia̍h beh tùi lâng ê chhiú, í-ki̍p ta̍k-lâng hiaⁿ-tī ê chhiú, lâi thó lâng ê oa̍h-miā. 6 Kìⁿ-nā hō͘ lâng lâu huih-ê, lâng iā beh hō͘ i lâu-huih; in-ūi Siōng-tè chō lâng, sī chhin-chhiūⁿ I ka-kī ê siōng. 7 Lín tio̍h siⁿ-thòaⁿ chōe-chōe, tī tōe-bīn-chiūⁿ tio̍h heng-ōng, ke-thiⁿ chin-chōe. 8 Siōng-tè kā Ná-a kap i ê kiáⁿ kóng, 9 Góa, Góa kap lín í-ki̍p lín ê hō͘-è li̍p Góa ê iok; 10 ia̍h kap hiah ê kap lín tī-teh it-chhè ê oa̍h-mi̍h, chiū-sī kap lín tī-teh ê pe-chiáu, cheng-siⁿ, it-chhè cháu-siù; kìⁿ-nā tùi tōa-chûn chhut-lâi tōe-chiūⁿ it-chhè ê cháu-siù li̍p-iok. 11 Góa kap lín li̍p Góa ê iok; kìⁿ ū jio̍k-thé ê, bô koh hō͘ tōa-chúi bia̍t-bô, ia̍h bô koh ū tōa-chúi húi-hoāi thó͘-tōe. 12 Siōng-tè kóng, Góa kap lín ia̍h kap hiah-ê kap lín tī-teh ta̍k-iūⁿ ê oa̍h-mi̍h só͘ li̍p éng sè-tāi ê iok, sī ū kì-hō. 13 Góa chiong Góa ê khēng hē tī hûn-ni̍h, thang chòe Góa kap tōe li̍p iok ê kì-hō. 14 Í-āu Góa hō͘ hûn khí jia tōe ê sî, beh ū khēng chhut-hiān tī hûn-ni̍h. 15 Góa chiū kì-liām Góa kap lín í-ki̍p ta̍k-iūⁿ ū jio̍k-thé ê oa̍h-mi̍h só͘ li̍p ê iok, chúi bô koh hoàn-lām sún-hoāi it-chhè ū jio̍k-thé ê mi̍h. 16 Khēng beh chhut-hiān tī hûn-ni̍h, Góa beh khòaⁿ-i, hō͘ Góa kì-liām Siōng-tè kap tōe-chiūⁿ ta̍k-iūⁿ ū jio̍k-thé ê oa̍h-mi̍h só͘ li̍p éng-oán ê iok. 17 Siōng-tè tùi Ná-a kóng, Che chiū-sī Góa kap tōe-chiūⁿ it-chhè ū jio̍k-thé ê mi̍h só͘ li̍p ê iok ê kì-hō. 18 Ná-a ê kiáⁿ, chhut tōa-chûn-ê, chiū-sī Siám, Hâm, Ngá-hut; Hâm sī Ka-lâm ê lāu-pē. 19 Chí saⁿ-ê sī Ná-a ê kiáⁿ; tùi in piàn-móa choân-tōe. 20 Ná-a khí-chhiú chòe lông-hu, chai-chèng phû-tô-hn̂g; 21 lim hit ê chiú lâi chùi, tī pò͘-pîⁿ-lāi thǹg-pak-theh. 22 Ka-lâm ê lāu-pē, Hâm, khòaⁿ in lāu-pē thǹg-theh, khì gōa-bīn kā in nn̄g ê hiaⁿ-tī kóng. 23 Siám kap Ngá-hut the̍h chi̍t niá saⁿ, khòa tī in ê keng-thâu; tò-thè kiâⁿ lâi jia lāu-pē ê thǹg-theh; in ê bīn ǹg-chhut, bô khòaⁿ-khì lāu-pē ê thǹg-theh. 24 Ná-a chiú-chùi chhíⁿ, chiah chai tē jī-kiáⁿ ê só͘-chòe. 25 Chiū kóng, Ka-lâm tio̍h siū chiù-chó͘; I beh chòe i ê hiaⁿ-tī lô͘-po̍k ê lô͘-po̍k. Koh kóng, 26 Tio̍h o-ló Iâ-hô-hoa, Siám ê Siōng-tè; Ka-lâm chòe Siám ê lô͘-po̍k. 27 Goān Siōng-tè hō͘ Ngá-hut hoat-tián, Hō͘ i tòa tī Siám ê pò͘-pîⁿ; Ka-lâm ia̍h chòe i ê lô͘-po̍k. 28 Tōa-chúi liáu-āu Ná-a iáu oa̍h saⁿ-pah gō͘-cha̍p nî. 29 Ná-a kè-kiōng hióng-siū káu-pah gō͘-cha̍p hè, chiah sí.
1 挪亞ê kiáⁿ閃、含、雅弗ê世系記tī下底：大水以後，in有生kiáⁿ。 2 雅弗ê kiáⁿ；Khó-bia̍t、Má-kok、Má-tāi、Ngá-oân、Thó͘-pat、Bí-siat、Thé-la̍h。 3 Khó-bia̍t ê kiáⁿ：A-si̍t-ki-ná、Lī-hoat、Tô-ka-má。 4 Ngá-oân ê kiáⁿ：Í-lī-sa、Tāi-sit、Ki-tí人、To-tan人。 5 Chiahê人ê後裔，將ta̍k國ê地土、海嶼，分開khiā起，各照伊ê腔口，照in ê宗族，照in ê邦國。 6 含ê kiáⁿ：Kó͘-si̍t，Be̍k-se-im，Hut、Ka-lâm。 7 Kó͘-si̍t ê kiáⁿ：Se-pa、Hap-hui-la̍h、Sat-hut-tha、La̍h-má、Sat-hut-thê-ka。La̍h-má ê kiáⁿ：Sī-pa、Tí-tàn。 8 Kó͘-si̍t亦生Lêng-lio̍k，伊做世上英雄ê起頭。 9 伊tī耶和華ê面前是一个英雄phah獵ê；所以人講，親像Lêng-lio̍k tī耶和華ê面前，是一个英雄phah獵ê。 10 伊ê國ê起頭，就是Pa-pia̍t、Í-le̍k、A-kah、Kah-nî，tī Sī-ná ê地。 11 伊tùi-hia出來，去亞述，起造尼尼微、Lí-hô-pek-i-ní、Ka-la̍h， 12 以及尼尼微Ka-la̍h中間ê Lī-sián；這就是hitê大城。 13 Be̍k-se人生Lō͘-teng人、A-ná-bí人、Lī-hap人、Ná-hut-thó͘人； 14 Phàⁿ-su-ló͘人、Ka-su-ló͘人(tùi in出腓利士人) 、Ka-hui-thok人。 15 迦南生大kiáⁿ Se-tùn kap Hek； 16 以及Iâ-pò͘-su人、A-mô͘-lī人、Kek-ka-sat人； 17 Hi-bí人、A-ki人、Se-nî人； 18 A-óa-tí人、Sé-má-lí人，Hap-boa̍t人；後來迦南chiahê族分散。 19 迦南ê境界是tùi Se-tùn ǹg Ki-la̍h-ní ê路，到Ka-sat；koh ǹg所多瑪、蛾摩拉、Ap-má、Sé-phian ê路，到La̍h-sa。 20 這就是含ê後裔，各照in ê宗族，in ê腔口，tī in ê地土，in ê邦國。 21 雅弗ê兄閃，做Hi-pek全族ê祖，亦生kiáⁿ。 22 閃ê kiáⁿ：Í-lân、A-su̍t、A-hoat-sat、Lō͘-tek、A-lân。 23 A-lân ê kiáⁿ：O͘-su、Hō͘-le̍k、Ki-thiap，Má-si。 24 A-hoat-sat生Sa-la̍h；Sa-la̍h生Hi-pek。 25 Hi-pek生兩個kiáⁿ；一个名叫Hoat-le̍k，因為tī伊hit時地就分界；Hoat-le̍k ê小弟名叫Iok-tan。 26 Iok-tan生A-mô͘-tap、Sa-lia̍t、Hap-sat-má-hui、Iâ-la̍h； 27 Hap-to-lân、O͘-sat、Tek-la̍h； 28 Gô-pa-lō͘、A-pí-má-lī、Sī-pa； 29 O-húi、Hap-hui-la̍h、Iok-pa；chiahê lóng是Iok-tan ê kiáⁿ。 30 In所khiā起ê地方是tùi Bí-sa到Se-hoat東勢ê山。 31 這就是閃ê kiaⁿ孫，各照in ê宗族，in ê腔口，tī in ê土地，照in ê邦國。 32 Chiahê lóng是挪亞ê kiáⁿ ê宗族，各照in ê世系，in ê邦國；大水以後，in tī地上分做邦國。
1 Ná-a ê kiáⁿ Siám, Hâm, Ngá-hut ê sè-hē kì tī ē-tóe. Tōa-chúi í-āu, in ū siⁿ kiáⁿ. 2 Ngá-hut ê kiáⁿ; Khó-bia̍t, Má-kok, Má-tāi, Ngá-oân, Thó͘-pat, Bí-siat, Thé-la̍h. 3 Khó-bia̍t ê kiáⁿ; A-si̍t-ki-ná, Lī-hoat, Tô-ka-má. 4 Ngá-oân ê kiáⁿ; Í-lī-sa, Tāi-sit, Ki-tí lâng, To-tan lâng. 5 Chiah ê lâng ê hō͘-è, chiong ta̍k-kok ê tōe-thó͘, hái-sū, pun-khui khiā-khí, kok chiàu i ê khiuⁿ-kháu, chiàu in ê chong-cho̍k, chiàu in ê pang-kok. 6 Hâm ê kiáⁿ; Kó͘-si̍t, Be̍k-se-im, Hut, Ka-lâm. 7 Kó͘-si̍t ê kiáⁿ; Se-pa, Hap-hui-la̍h, Sat-hut-tha, La̍h-má, Sat-hut-thê-ka. La̍h-má ê kiáⁿ; Sī-pa, Tí-tàn. 8 Kó͘-si̍t ia̍h siⁿ Lêng-lio̍k; i chòe sè-chiūⁿ eng-hiông ê khí-thâu. 9 I tī Iâ-hô-hoa ê bīn-chêng sī chi̍t ê eng-hiông phah-la̍h-ê; só͘-í lâng kóng, Chhin-chhiūⁿ Lêng-lio̍k tī Iâ-hô-hoa ê bīn-chêng, sī chi̍t ê eng-hiông phah-la̍h-ê. 10 I ê kok ê khí-thâu, chiū-sī Pa-pia̍t, Í-le̍k, A-kah, Kah-nî, tī Sī-ná ê tōe. 11 I tùi-hia chhut-lâi, khì A-su̍t, khí-chō Nî-nî-bî, Lí-hô-pek-i-ní, Ka-la̍h, 12 í-ki̍p Nî-nî-bî Ka-la̍h tiong-kan ê Lī-sián; che chiū-sī hit ê tōa-siâⁿ. 13 Be̍k-se lâng siⁿ Lō͘-teng lâng, A-ná-bí lâng, Lī-hap lâng, Ná-hut-thó͘ lâng; 14 Phàⁿ-su-ló͘ lâng, Ka-su-ló͘ lâng, (tùi in chhut Hui-lī-sū lâng), Ka-hui-thok lâng. 15 Ka-lâm siⁿ tōa-kiáⁿ Se-tùn kap Hek; 16 í-ki̍p Iâ-pò͘-su lâng, A-mô͘-lī lâng, Kek-ka-sat lâng; 17 Hi-bí lâng, A-ki lâng, Se-nî lâng; 18 A-óa-tí lâng, Sé-má-lí lâng, Hap-boa̍t lâng; āu-lâi Ka-lâm chiah ê cho̍k hun-sòaⁿ. 19 Ka-lâm ê kéng-kài sī tùi Se-tùn ǹg Ki-la̍h-ní ê lō͘, kàu Ka-sat; koh ǹg Só͘-to-má, Gô-mô͘-la̍h, Ap-má, Sé-phian ê lō͘, kàu La̍h-sa. 20 Che chiū-sī Hâm ê hō͘-è, kok chiàu in ê chong-cho̍k, in ê khiuⁿ-kháu, tī in ê tōe-thó͘, in ê pang-kok. 21 Ngá-hut ê hiaⁿ Siám, chòe Hi-pek choân-cho̍k ê chó͘, ia̍h siⁿ-kiáⁿ. 22 Siám ê kiáⁿ; Í-lân, A-su̍t, A-hoat-sat, Lō͘-tek, A-lân. 23 A-lân ê kiáⁿ; O͘-su, Hō͘-le̍k, Ki-thiap, Má-si. 24 A-hoat-sat siⁿ Sa-la̍h; Sa-la̍h siⁿ Hi-pek. 25 Hi-pek siⁿ nn̄g ê kiáⁿ; chi̍t-ê miâ-kiò Hoat-le̍k, in-ūi tī i hit-sî tōe chiū hun-kài; Hoat-le̍k ê sió-tī miâ-kiò Iok-tan. 26 Iok-tan siⁿ A-mô͘-tap, Sa-lia̍t, Hap-sat-má-hui, Iâ-la̍h; 27 Hap-to-lân, O͘-sat, Tek-la̍h; 28 Gô-pa-lō͘, A-pí-má-lī, Sī-pa; 29 O-húi, Hap-hui-la̍h, Iok-pa; chiah-ê lóng sī Iok-tan ê kiáⁿ. 30 In só͘ khiā-khí ê tōe-hng sī tùi Bí-sa kàu Se-hoat tang-sì ê soaⁿ. 31 Che chiū-sī Siám ê kiáⁿ-sun, kok chiàu in ê chong-cho̍k, in ê khiuⁿ-kháu, tī in ê thó͘-tōe, chiàu in ê pang-kok. 32 Chiah-ê lóng sī Ná-a ê kiáⁿ ê chong-cho̍k, kok chiàu in ê sè-hē, in ê pang-kok; tōa-chúi í-āu, in tī tōe-chiūⁿ pun-chòe pang-kok.
1 Hit時天下ê口音、言語，lóng一樣。 2 In徙去東勢ê時chūn，tī Sī-ná地tú-tio̍h一片ê平洋，就tòa tī-hia。 3 In大家參詳講，來ah，咱tio̍h做磚，燒hō͘伊熟。In有磚thang替石，koh有石油thang替灰土。 4 Koh講，來ah，咱tio̍h起城kap塔，塔頂抵天，為咱立一个名，免得咱四散tī全地。 5 耶和華降臨，beh看世間人所起ê城kap塔。 6 耶和華講，看ah，chiahê百姓lóng合一，言語亦一樣；現今已經起手做chitê事；以後in所beh做ê，無一項能禁止。 7 來ah，咱落來去，tī-hia phah亂in ê口音，hō͘ in ê言語大家bōe相通。 8 Tùi án-ni，耶和華hō͘ in tùi-hia四散tī全地；in就停工，無起hitê城。 9 所以hitê城名叫巴別，因為耶和華tī-hia phah亂天下ê言語；耶和華hō͘人tùi-hia四散tī全地上。 10 閃ê世系記tī下底：閃一百歲，大水以後兩年生A-hoat-sat。 11 閃生A-hoat-sat了後，iáu活五百年，koh有生kiáⁿ cha-bó͘-kiáⁿ。 12 A-hoat-sat三十五歲生Sa-la̍h。 13 A-hoat-sat生Sa-la̍h了後，iáu活四百連三年，koh有生kiáⁿ cha-bó͘-kiáⁿ。 14 Sa-la̍h三十歲生Hi-pek。 15 Sa-la̍h生Hi-pek了後，iáu活四百連三年，koh有生kiáⁿ cha-bó͘-kiáⁿ。 16 Hi-pek三十四歲生Hoat-le̍k。 17 Hi-pek生Hoat-le̍k了後，iáu活四百三十年，koh有生kiáⁿ cha-bó͘-kiáⁿ。 18 Hoat-le̍k三十歲生La̍h-ngô͘。 19 Hoat-le̍k生La̍h-ngô͘了後，iáu活兩百連九年，koh有生kiáⁿ cha-bó͘-kiáⁿ。 20 La̍h-ngô͘三十二歲生Se-lo̍k。 21 La̍h-ngô͘生Se-lo̍k了後，iáu活兩百連七年，koh有生kiáⁿ cha-bó͘-kiáⁿ。 22 Se-lo̍k三十歲生Ná-ho̍k。 23 Se-lo̍k生Ná-ho̍k了後，iáu活兩百年，koh有生kiáⁿ cha-bó͘-kiáⁿ。 24 Ná-ho̍k二十九歲生Tha-la̍h。 25 Ná-ho̍k生Tha-la̍h了後，iáu活一百十九年，koh有生kiáⁿ cha-bó͘-kiáⁿ。 26 Tha-la̍h七十歲生亞伯蘭、Ná-ho̍k、哈蘭。 27 Tha-la̍h ê世系記tī下底：Tha-la̍h生亞伯蘭、Ná-ho̍k、哈蘭；哈蘭生羅得。 28 哈蘭死tī伊ê老父Tha-la̍h ê面前，tī伊ê本地Ka-le̍k-tí ê Jíⁿ城。 29 亞伯蘭、Ná-ho̍k，各有娶bó͘。亞伯蘭ê bó͘名叫撒萊；Ná-ho̍k ê bó͘名叫Bi̍t-ka，是哈蘭ê cha-bó͘-kiáⁿ；哈蘭是Bi̍t-ka ê老父，亦是Í-sū-ka ê老父。 30 撒萊無懷孕，無kiáⁿ。 31 Tha-la̍h chhōa伊ê kiáⁿ亞伯蘭，kap伊ê孫羅得，就是哈蘭ê kiáⁿ，以及伊ê新婦撒萊，就是伊ê kiáⁿ亞伯蘭ê bó͘，in相kap出Ka-le̍k-tí ê Jíⁿ城；beh去迦南地；in到哈蘭就tòa tī-hia。 32 Tha-la̍h享壽兩百連五歲；Tha-la̍h死tī哈蘭。
1 Hit-sî thiⁿ-ē ê kháu-im, giân-gú, lóng chi̍t-iūⁿ. 2 In sóa-khì tang-sì ê sî-chūn, tī Sī-ná tōe tú-tio̍h chi̍t-phiàn ê pîⁿ-iûⁿ, chiū tòa tī-hia. 3 In tāi-ke chham-siông kóng, Lâi ah, lán tio̍h chòe chng, sio hō͘ i se̍k. In ū chng thang thòe chio̍h, koh ū chio̍h-iû thang thòe he-thô͘. 4 Koh kóng, Lâi ah, lán tio̍h khí siâⁿ kap thah, thah-téng tú-thiⁿ, ūi lán li̍p chi̍t ê miâ, bián-tit lán sì-sòaⁿ tī choân-tōe. 5 Iâ-hô-hoa kàng-lîm, beh khòaⁿ sè-kan lâng só͘ khí ê siâⁿ kap thah. 6 Iâ-hô-hoa kóng, Khòaⁿ ah, chiah ê peh-sìⁿ lóng ha̍p-it, giân-gú ia̍h chi̍t-iūⁿ; hiān-kim í-keng khí-chhiú chòe chit ê sū; í-āu in só͘ beh chòe ê, bô chi̍t-hāng ōe kìm-chí. 7 Lâi ah, lán lo̍h-lâi-khì, tī-hia phah-loān in ê kháu-im, hō͘ in ê giân-gú tāi-ke bōe siong-thong. 8 Tùi án-ni, Iâ-hô-hoa hō͘ in tùi-hia sì-sòaⁿ tī choân-tōe; in chiū thêng-kang, bô khí hit ê siâⁿ. 9 Só͘-í hit ê siâⁿ miâ-kiò Pa-pia̍t, in-ūi Iâ-hô-hoa tī-hia phah-loān thiⁿ-ē ê giân-gú; Iâ-hô-hoa hō͘ lâng tùi-hia sì-sòaⁿ tī choân-tōe-chiūⁿ. 10 Siám ê sè-hē kì tī ē-tóe. Siám chi̍t-pah hè, tōa-chúi í-āu nn̄g-nî siⁿ A-hoat-sat. 11 Siám siⁿ A-hoat-sat liáu-āu, iáu oa̍h gō͘-pah nî, koh ū siⁿ kiáⁿ cha-bó͘-kiáⁿ. 12 A-hoat-sat saⁿ-cha̍p gō͘ hè siⁿ Sa-la̍h. 13 A-hoat-sat siⁿ Sa-la̍h liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ. 14 Sa-la̍h saⁿ-cha̍p hè siⁿ Hi-pek. 15 Sa-la̍h siⁿ Hi-pek liáu-āu, iáu oa̍h sì-pah liân saⁿ nî, koh ū siⁿ kiáⁿ cha-bó͘-kiáⁿ. 16 Hi-pek saⁿ-cha̍p-sì hè siⁿ Hoat-le̍k . 17 Hi-pek siⁿ Hoat-le̍k liáu-āu, iáu oa̍h sì-pah saⁿ-cha̍p nî, koh ū siⁿ kiáⁿ cha-bó͘-kiáⁿ. 18 Hoat-le̍k saⁿ-cha̍p hè siⁿ La̍h-ngô͘. 19 Hoat-le̍k siⁿ La̍h-ngô͘ liáu-āu, iáu oa̍h nn̄g-pah liân káu nî, koh ū siⁿ kiáⁿ cha-bó͘-kiáⁿ. 20 La̍h-ngô͘ saⁿ-cha̍p jī hè siⁿ Se-lo̍k. 21 La̍h-ngô͘ siⁿ Se-lo̍k liáu-āu, iáu oa̍h nn̄g-pah liân chhit nî, koh ū siⁿ kiáⁿ cha-bó͘-kiáⁿ. 22 Se-lo̍k saⁿ-cha̍p hè siⁿ Ná-ho̍k. 23 Se-lo̍k siⁿ Ná-ho̍k liáu-āu, iáu oa̍h nn̄g-pah nî, koh ū siⁿ kiáⁿ cha-bó͘-kiáⁿ. 24 Ná-ho̍k jī-cha̍p káu hè siⁿ Tha-la̍h. 25 Ná-ho̍k siⁿ Tha-la̍h liáu-āu, iáu oa̍h chi̍t-pah cha̍p-káu nî, koh ū siⁿ kiáⁿ cha-bó͘-kiáⁿ. 26 Tha-la̍h chhit-cha̍p hè siⁿ A-pek-lân, Ná-ho̍k, Hap-lân. 27 Tha-la̍h ê sè-hē kì tī ē-tóe. Tha-la̍h siⁿ A-pek-lân, Ná-ho̍k, Hap-lân; Hap-lân siⁿ Lô-tek. 28 Hap-lân sí tī i ê lāu-pē Tha-la̍h ê bīn-chêng, tī i ê pún-tōe Ka-le̍k-tí ê Jíⁿ siâⁿ. 29 A-pek-lân, Ná-ho̍k, kok ū chhōa-bó͘. A-pek-lân ê bó͘ miâ kiò Sat-lāi; Ná-ho̍k ê bó͘ miâ-kiò Bi̍t-ka, sī Hap-lân ê cha-bó͘-kiáⁿ; Hap-lân sī Bi̍t-ka ê lāu-pē, ia̍h sī Í-sū-ka ê lāu-pē. 30 Sat-lāi bô hoâi-īn, bô kiáⁿ. 31 Tha-la̍h chhōa i ê kiáⁿ A-pek-lân, kap i ê sun Lô-tek, chiū-sī Hap-lân ê kiáⁿ, í-ki̍p i ê sim-pū Sat-lāi, chiū-sī i ê kiáⁿ A-pek-lân ê bó͘, in saⁿ-kap chhut Ka-le̍k-tí ê Jíⁿ siâⁿ; beh khì Ka-lâm tōe; in kàu Hap-lân chiū tòa tī-hia. 32 Tha-la̍h hióng-siū nn̄g-pah liân gō͘ hè; Tha-la̍h sí tī Hap-lân.
1 耶和華對亞伯蘭講，你tio̍h離開本地、本族，老父ê家，去我所beh指示你ê地。 2 我beh hō͘你成做大國，我beh賜福你，hō͘你ê名做大，你亦beh hō͘人得tio̍h福氣； 3 祝福你ê，我beh賜福hō͘ in；咒詛你ê，我beh責罰伊；地上萬族beh因為你得tio̍h福氣。 4 亞伯蘭照耶和華吩咐ê話，就去；羅得亦kap伊去。亞伯蘭出哈蘭ê時七十五歲。 5 亞伯蘭帶伊ê bó͘撒萊，kap伊ê姪á羅得；以及in tī哈蘭所積聚ê財物，所得tio̍h ê人額；in就出去，beh去迦南地；in就到迦南地。 6 亞伯蘭經過hitê地，到tī示劍ê所在，到Mô͘-lí ê橡樹；hit時迦南族iáu teh tòa。 7 耶和華對亞伯蘭出現講，我beh將chitê地方賞賜你ê後裔；伊就tī-hia為tio̍h tùi伊出現ê耶和華起一座壇。 8 Tùi hia伊徙到Pek-te̍k-lī東勢ê山，搭布棚；西勢是Pek-te̍k-lī，東勢是Ai；tī-hia為tio̍h耶和華起一座壇，求叫耶和華ê名。 9 亞伯蘭漸漸徙去南勢ê地。 10 Hit-ê地tú-tio̍h飢荒，亞伯蘭落去埃及，beh tī-hia暫時khiā起；因為hitê地飢荒真大。 11 將近入埃及，就對伊ê bó͘撒萊講，我知你是面貌好看ê婦人人； 12 埃及人看見你ê時beh講，Chitê是伊ê bó͘，in beh 刣死我，來留你活teh。 13 求你tio̍h講，你是我ê小妹，hō͘我因為你得tio̍h平安；我ê性命亦對你來得tio̍h活。 14 亞伯蘭到埃及ê時，埃及人看見hitê婦人人極其súi。 15 法老ê人臣看見伊，就對法老o-ló伊；hitê婦人人就hō͘人tòa伊入法老ê王宮。 16 法老因為chitê婦人人就好款待亞伯蘭；亞伯蘭就得tio̍h羊、牛、公ê驢、奴僕、女婢、母ê驢，以及駱駝。 17 耶和華因為亞伯蘭ê bó͘撒萊ê緣故，降大災禍tī法老kap伊全家。 18 法老就叫亞伯蘭來講，你對我所做ê是甚麼事？啥事無kā我講伊是你ê bó͘？ 19 啥事稱伊做小妹？致到我將伊娶來做我ê bó͘；taⁿ你ê bó͘ tī-chia，thang chhōa伊，做你去。 20 Tùi hit-tia̍p法老為tio̍h伊來吩咐人；in就將伊kap伊ê bó͘ kap伊所有ê，lóng送伊去。
1 Iâ-hô-hoa tùi A-pek-lân kóng, Lí tio̍h lī-khui pún-tōe, pún-cho̍k, lāu-pē ê ke, khì Góa só͘ beh chí-sī lí ê tōe. 2 Góa beh hō͘ lí chiâⁿ-chòe tōa-kok, Góa beh sù-hok lí, hō͘ lí ê miâ chòe tōa, lí ia̍h beh hō͘ lâng tit-tio̍h hok-khì; 3 chiok-hok lí-ê, Góa beh sù-hok hō͘ in; chiù-chó͘ lí-ê, Góa beh chek-hoa̍t i; tōe-chiūⁿ bān-cho̍k beh in-ūi lí tit-tio̍h hok-khì. 4 A-pek-lân chiàu Iâ-hô-hoa hoan-hù ê ōe, chiū khì; Lô-tek ia̍h kap i khì. A-pek-lân chhut Hap-lân ê sî chhit-cha̍p-gō͘ hè. 5 A-pek-lân tòa i ê bó͘ Sat-lāi, kap i ê ti̍t-á Lô-tek; í-ki̍p in tī Hap-lân só͘ chek-chū ê châi-bu̍t, só͘ tit-tio̍h ê lâng-gia̍h; in chiū chhut-khì, beh khì Ka-lâm tōe; in chiū kàu Ka-lâm tōe. 6 A-pek-lân keng-kè hit ê tōe, kàu tī Sī-kiàm ê só͘-chāi, kàu Mô͘-lí ê siōng-chhiū; hit-sî Ka-lâm cho̍k iáu teh tòa. 7 Iâ-hô-hoa tùi A-pek-lân chhut-hiān kóng, Góa beh chiong chit ê tōe-hng siúⁿ-sù lí ê hō͘-è; i chiū tī-hia ūi-tio̍h tùi i chhut-hiān ê Iâ-hô-hoa khí chi̍t chō tôaⁿ. 8 Tùi hia i sóa kàu Pek-te̍k-lī tang-sì ê soaⁿ, tah pò͘-pîⁿ; sai-sì sī Pek-te̍k-lī, tang-sì sī Ai; tī-hia ūi-tio̍h Iâ-hô-hoa khí chi̍t chō tôaⁿ, kiû-kiò Iâ-hô-hoa ê miâ. 9 A-pek-lân chiām-chiām sóa-khì lâm-sì ê tōe. 10 Hit ê tōe tú-tio̍h ki-hng, A-pek-lân lo̍h-khì Ai-ki̍p, beh tī-hia chiām-sî khiā-khí; in-ūi hit ê tōe ki-hng chin tōa. 11 Chiong-kūn ji̍p Ai-ki̍p, chiū tùi i ê bó͘ Sat-lāi kóng, Góa chai lí sī bīn-māu hó-khòaⁿ ê hū-jîn-lâng; 12 Ai-ki̍p lâng khòaⁿ-kìⁿ lí ê sî beh kóng, Chit-ê sī i ê bó͘, in beh thâi-sí góa, lâi lâu lí oa̍h-teh. 13 Kiû lí tio̍h kóng, lí sī góa ê sió-bē, hō͘ góa in-ūi lí tit-tio̍h pêng-an; góa ê sìⁿ-miā ia̍h tùi lí lâi tit-tio̍h oa̍h. 14 A-pek-lân kàu Ai-ki̍p ê sî, Ai-ki̍p lâng khòaⁿ-kìⁿ hit ê hū-jîn-lâng ke̍k-kî súi. 15 Hoat-ló ê jîn-sîn khòaⁿ-kìⁿ i, chiū tùi Hoat-ló o-ló i; hit ê hū-jîn-lâng chiū hō͘ lâng tòa i ji̍p Hoat-ló ê ông-kiong. 16 Hoat-ló in-ūi chit ê hū-jîn-lâng chiū hó khoán-thāi A-pek-lân; A-pek-lân chiū tit-tio̍h iûⁿ, gû, kang ê lû, lô͘-po̍k, lú-pī, bú ê lû, í-ki̍p lo̍k-tô. 17 Iâ-hô-hoa in-ūi A-pek-lân ê bó͘ Sat-lāi ê iân-kò͘, kàng tōa chai-ē tī Hoat-ló kap i choân-ke. 18 Hoat-ló chiū kiò A-pek-lân lâi kóng, Lí tùi góa só͘-chòe-ê sī sím-mi̍h sū? siáⁿ-sū bô kā góa kóng i sī lí ê bó͘? 19 Siáⁿ-sū chheng i chòe sió-bē? tì-kàu góa chiong i chhōa lâi chòe góa ê bó͘; taⁿ lí ê bó͘ tī-chia, thang chhōa i, chòe lí khì. 20 Tùi hit-tia̍p Hoat-ló ūi-tio̍h i lâi hoan-hù lâng; in chiū chiong i kap i ê bó͘ kap i só͘-ū-ê, lóng sàng i khì.
1 亞伯蘭tùi埃及上去，伊kap伊ê bó͘ kap伊所有ê，羅得，lóng去南地。 2 亞伯蘭ê牛、銀、金真chōe。 3 伊tùi南地漸漸去Pek-te̍k-lī，到Pek-te̍k-lī kap Ai ê中間，早前搭布棚ê所在； 4 到伊起頭起壇ê所在；亞伯蘭tī-hia求叫耶和華ê名。 5 Kap亞伯蘭同行ê羅得亦有羊群、牛群、布棚。 6 Hit-ê地就bōe容允得in相kap khiā；因為in ê財物chōe，in chiah bōe會相kap khiā。 7 亞伯蘭ê牧者kap羅得ê牧者相爭；當時迦南人kap Pí-lī-sé人tī hitê地khiā起。 8 亞伯蘭kā羅得講，你我m̄-thang冤家，你ê牧者kap我ê牧者亦m̄-thang冤家；因為咱是骨肉ê 親。 9 全地kiám無tī你ê目睭前mah？請你離開我；你tò-pêng，我就chiàⁿ-pêng；你chiàⁿ-pêng，我就tò-pêng。 10 羅得kia̍h目看約旦河一遍ê平洋，直到Só-jíⁿ ê路，lóng真潤澤；hitê地tī耶和華未滅所多瑪蛾摩拉以前，親像耶和華ê園，亦親像埃及ê地。 11 Tùi án-ni羅得揀約旦河一遍ê平洋，遷徙去東勢；in就大家分開。 12 亞伯蘭khiā起迦南地，羅得khiā起平洋chiahê城；徙伊ê布棚到所多瑪。 13 所多瑪人極pháiⁿ，大大得罪耶和華。 14 羅得離別了後，耶和華對亞伯蘭講，你kia̍h目，tùi你所tiàm ê所在，ǹg東西南北來看； 15 因為你所看見一切ê地，我lóng beh hō͘你，kap你ê後裔，直到永遠。 16 我亦beh hō͘你ê後裔親像地上ê土砂；人若能算地上ê土砂，chiah能算你ê後裔。 17 你起來遍行chitê地ê橫直，因為我beh將chitê地hō͘你。 18 亞伯蘭就搬徙布棚到Hi-pek-lûn，óa Bān-lī hiahê橡樹khiā起；tī-hia為耶和華起一座壇。
1 A-pek-lân tùi Ai-ki̍p chiūⁿ-khì, i kap i ê bó͘ kap i só͘-ū-ê, liân Lô-tek, lóng khì Lâm-tōe. 2 A-pek-lân ê gû, gûn, kim chin-chōe. 3 I tùi Lâm-tōe chiām-chiām khì Pek-te̍k-lī, kàu Pek-te̍k-lī kap Ai ê tiong-kan, chá-chêng tah pò͘-pîⁿ ê só͘-chāi; 4 kàu i khí-thâu khí tôaⁿ ê só͘-chāi; A-pek-lân tī-hia kiû-kiò Iâ-hô-hoa ê miâ. 5 Kap A-pek-lân tâng kiâⁿ ê Lô-tek ia̍h ū iûⁿ-kûn, gû-kûn, pò͘-pîⁿ. 6 Hit ê tōe chiū bōe iông-ún-tit in saⁿ-kap khiā; in-ūi in ê châi-bu̍t chōe, in chiah bōe-ōe saⁿ-kap khiā. 7 A-pek-lân ê bo̍k-chiá kap Lô-tek ê bo̍k-chiá saⁿ-chiⁿ; tng-sî Ka-lâm lâng kap Pí-lī-sé lâng tī hit ê tōe khiā-khí. 8 A-pek-lân kā Lô-tek kóng, Lí góa m̄-thang oan-ke, lí ê bo̍k-chiá kap góa ê bo̍k-chiá ia̍h m̄-thang oan-ke; in-ūi lán sī kut-jio̍k ê chhin. 9 Choân-tōe kiám bô tī lí ê ba̍k-chiu-chêng mah? chhiáⁿ lí lī-khui góa; lí tò-pêng, góa chiū chiàⁿ-pêng; lí chiàⁿ-pêng, góa chiū tò-pêng. 10 Lô-tek kia̍h-ba̍k khòaⁿ Iok-tàn hô it-phiàn ê Pîⁿ-iûⁿ, ti̍t-kàu Só-jíⁿ ê lō͘, lóng chin lūn-te̍k; hit ê tōe tī Iâ-hô-hoa bē bia̍t Só͘-to-má Gô-mô͘-la̍h í-chêng, chhin-chhiūⁿ Iâ-hô-hoa ê hn̂g, ia̍h chhin-chhiūⁿ Ai-ki̍p ê tōe. 11 Tùi án-ni Lô-tek kéng Iok-tàn hô it-phiàn ê Pîⁿ-iûⁿ, chhian-sóa khì tang-sì; in chiū tāi-ke pun-khui. 12 A-pek-lân khiā-khí Ka-lâm tōe, Lô-tek khiā-khí Pîⁿ-iûⁿ chiah ê siâⁿ; sóa i ê pò͘-pîⁿ kàu Só͘-to-má. 13 Só͘-to-má lâng ke̍k-pháiⁿ, tōa-tōa tek-chōe Iâ-hô-hoa. 14 Lô-tek lī-pia̍t liáu-āu, Iâ-hô-hoa tùi A-pek-lân kóng, Lí kia̍h-ba̍k, tùi lí só͘ tiàm ê só͘-chāi, ǹg tang sai lâm pak lâi khòaⁿ; 15 in-ūi lí só͘ khòaⁿ-kìⁿ it-chhè ê tōe, Góa lóng beh hō͘ lí, kap lí ê hō͘-è, ti̍t-kàu éng-oán. 16 Góa ia̍h beh hō͘ lí ê hō͘-è chhin-chhiūⁿ tōe-chiūⁿ ê thô͘-soa; lâng nā ōe sǹg tōe-chiūⁿ ê thô͘-soa, chiah ōe sǹg lí ê hō͘-è. 17 Lí khí-lâi piàn-kiâⁿ chit ê tōe ê hoâiⁿ-ti̍t, in-ūi Góa beh chiong chit ê tōe hō͘ lí. 18 A-pek-lân chiū poaⁿ-sóa pò͘-pîⁿ kàu Hi-pek-lûn, óa Bān-lī hiah ê siōng-chhiū khiā-khí; tī-hia ūi Iâ-hô-hoa khí chi̍t chō tôaⁿ.
1 當Àm-la̍h-hui做Sī-ná王，A-lio̍k做Í-la̍h-sat王，Ki-tāi-ló-má做Í-lân王，Thê-ta̍t做Ko-ìn王 ê時， 2 in來攻擊所多瑪王Pí-la̍h，蛾摩拉王Pí-sa，Ap-má王Sī-la̍p，Sé-phian王Sī-bí-pia̍t，以及Pí-la̍h王(Pí-la̍h就是Só-jíⁿ)。 3 In lóng聚會tī Se-têng ê山谷；Se-têng山谷就是鹽海。 4 In服事Ki-tāi-ló-má十二年久；到十三年背叛。 5 十四年，Ki-tāi-ló-má，kap同會盟chiahê王，lóng來，tī A-te̍k-lu̍t-ka-lêng 刣贏Lí-hoa̍t-im人，tī Hâm So͘-se人，tī Sa-bî-ki-lia̍t-têng Í-bí人， 6 tī Hô-lī人ê Se-jíⁿ山Hô-lī人，到近tī曠野ê Í-le̍k-pa-lân。 7 In 倒tńg到An-bi̍t-pa，就是Ka-te-su，攻擊A-má-le̍k全地，kap khiā起tī Hap-sé-sūn-tha-má ê A-mô͘-lī人。 8 Tùi hit-tia̍p所多瑪王、蛾摩拉王、Ap-má王、Sé-phian王、Pí-la̍h 王，(Pí-la̍h就是Só-jíⁿ) ，lóng出來tī Se-têng ê山谷排陣，kap in交戰； 9 就是kap Í-lân王 Ki-tāi-ló-má，Ko-ìn王 Thê-ta̍t，Sī-ná王Àm-la̍h-hui，Í-la̍h-sat王A-lio̍k交戰；四個王對敵五個王。 10 Se-têng山谷lóng是石油坑；所多瑪、蛾摩拉chiahê王逃走，跋(poa̍h) tī-hia；其餘ê走上山。 11 In就將所多瑪、蛾摩拉ê財物，以及in ê乾糧lóng搶，做in去。 12 Koh將亞伯蘭ê姪羅得，kap伊ê財物搶去；hit時羅得tòa tī所多瑪。 13 有一个逃走ê人來kā希伯來人亞伯蘭講；hit時亞伯蘭khiā起tī A-mô͘-lī人Bān-lī ê橡樹hit所在，Bān-lī kap Í-si̍t-kok kap A-nái lóng是兄弟，有kap亞伯蘭聯盟。 14 亞伯蘭聽見伊ê姪hō͘人掠去，就chhōa生養tī伊ê家裡精練ê壯丁，三百十八人，追jip到Tàn。 15 伊kap伊ê奴僕透暝分隊，攻擊in；tui到大馬色tò-pêng ê Hô-pa。 16 將一切ê財物搶倒tńg，連伊ê姪á羅得kap伊ê財物，以及婦女百姓，亦lóng搶倒tńg。 17 亞伯蘭刣贏Ki-tāi-ló-má，以及kap伊做陣chiahê王，tò來ê時，所多瑪王出來，到Sa-bí ê山谷，迎接伊；Sa-bí ê山谷就是王ê山谷。 18 亦有Sat-léng王 Be̍k-ki-sé-tek帶餅kap酒出來；伊是至koân 上帝ê祭司； 19 祝福伊講，願天地ê主，至koân ê上帝賜福亞伯蘭。 20 至koân ê上帝將對敵交tī你ê手，應該o-ló伊。亞伯蘭將lóng總所得tio̍h-ê，十份the̍h一份hō͘ 伊。 21 所多瑪王 kā亞伯蘭講，將人歸我；物lóng hō͘你。 22 亞伯蘭kā所多瑪王講，我有kí天地ê主至koân ê上帝耶和華來chiù-chōa， 23 凡若你ê物，就一條線、一條鞋帶，我lóng m̄-the̍h，免得你講，我hō͘亞伯蘭好額； 24 只有少年人所食ê，以及kap我同行ê人A-nái、Í-si̍t-kok、Bān-lī，所應得ê份額，thang chhut-chāi in the̍h。
1 Tng Àm-la̍h-hui chòe Sī-ná ông, A-lio̍k chòe Í-la̍h-sat ông, Ki-tāi-ló-má chòe Í-lân ông, Thê-ta̍t chòe Ko-ìn ông ê sî, 2 in lâi kong-kek Só͘-to-má ông Pí-la̍h, Gô-mô͘-la̍h ông Pí-sa, Ap-má ông Sī-la̍p, Sé-phian ông Sī-bí-pia̍t, í-ki̍p Pí-la̍h ông (Pí-la̍h chiū-sī Só-jíⁿ). 3 In lóng chū-hōe tī Se-têng ê soaⁿ-kok; Se-têng soaⁿ-kok chiū-sī Iâm-hái. 4 In ho̍k-sāi Ki-tāi-ló-má cha̍p-jī nî kú; kàu cha̍p-saⁿ-nî pōe-poān. 5 Cha̍p-sì-nî Ki-tāi-ló-má, kap tâng hōe-bêng chiah ê ông, lóng lâi, tī A-te̍k-lu̍t-ka-lêng thâi-iâⁿ Lí-hoa̍t-im lâng, tī Hâm So͘-se lâng, tī Sa-bî-ki-lia̍t-têng Í-bí lâng, 6 tī Hô-lī lâng ê Se-jíⁿ soaⁿ Hô-lī lâng, kàu kūn tī khòng-iá ê Í-le̍k-pa-lân. 7 In tò-tńg kàu An-bi̍t-pa, chiū-sī Ka-te-su, kong-kek A-má-le̍k choân-tōe, kap khiā-khí tī Hap-sé-sūn-tha-má ê A-mô͘-lī lâng. 8 Tùi hit-tia̍p Só͘-to-má ông, Gô-mô͘-la̍h ông, Ap-má ông, Sé-phian ông, Pí-la̍h ông, (Pí-la̍h chiū-sī Só-jíⁿ), lóng chhut-lâi tī Se-têng ê soaⁿ-kok pâi-tīn, kap in kau-chiàn; 9 chiū-sī kap Í-lân ông Ki-tāi-ló-má, Ko-ìn ông Thê-ta̍t, Sī-ná ông Àm-la̍h-hui, Í-la̍h-sat ông A-lio̍k kau-chiàn; sì ê ông tùi-te̍k gō͘ ê ông. 10 Se-têng soaⁿ-kok lóng sī chio̍h-iû khiⁿ; Só͘-to-má Gô-mô͘-la̍h chiah ê ông tô-cháu, poa̍h tī-hia; kî-û-ê cháu chiūⁿ-soaⁿ. 11 In chiū chiong Só͘-to-má Gô-mô͘-la̍h ê châi-bu̍t, í-ki̍p in ê kan-niû lóng chhiúⁿ, chòe in khì. 12 Koh chiong A-pek-lân ê ti̍t Lô-tek, kap i ê châi-bu̍t chhiúⁿ-khì; hit-sî Lô-tek tòa tī Só͘-to-má. 13 Ū chi̍t ê tô-cháu ê lâng lâi kā Hi-pek-lâi lâng A-pek-lân kóng; hit-sî A-pek-lân khiā-khí tī A-mô͘-lī lâng Bān-lī ê siōng-chhiū hit só͘-chāi, Bān-lī kap Í-si̍t-kok kap A-nái lóng sī hiaⁿ-tī, ū kap A-pek-lân liân-bêng. 14 A-pek-lân thiaⁿ-kìⁿ i ê ti̍t hō͘ lâng lia̍h-khì, chiū chhōa seng-ióng tī i ê ke-ni̍h cheng-liān ê chòng-teng, saⁿ-pah cha̍p-poeh lâng, tui-jip kàu Tàn. 15 I kap i ê lô͘-po̍k thàu-mî pun-tūi, kong-kek-in; tui kàu Tāi-má-sek tò-pêng ê Hô-pa. 16 Chiong it-chhè ê châi-bu̍t chhiúⁿ tò-tńg, liân i ê ti̍t-á Lô-tek kap i ê châi-bu̍t, í-ki̍p hū-lú peh-sìⁿ, ia̍h lóng chhiúⁿ tò-tńg. 17 A-pek-lân thâi-iâⁿ Ki-tāi-ló-má, í-ki̍p kap i chòe-tīn chiah ê ông, tò-lâi ê sî, Só͘-to-má ông chhut-lâi, kàu Sa-bí ê soaⁿ-kok, ngiâ-chih i; Sa-bí ê soaⁿ-kok chiū-sī Ông ê soaⁿ-kok. 18 Ia̍h ū Sat-léng ông Be̍k-ki-sé-tek tòa piáⁿ kap chiú chhut-lâi; i sī Chì-koâiⁿ Siōng-tè ê chè-si; 19 chiok-hok i kóng, Goān thiⁿ-tōe ê Chú, Chì-koâiⁿ ê Siōng-tè sù-hok A-pek-lân. 20 Chì-koâiⁿ ê Siōng-tè chiong tùi-te̍k kau tī lí ê chhiú, eng-kai o-ló I. A-pek-lân chiong lóng-chóng só͘ tit-tio̍h-ê, cha̍p-hūn the̍h chi̍t-hūn hō͘ i. 21 Só͘-to-má ông kā A-pek-lân kóng, Chiong lâng kui góa; mi̍h lóng hō͘ lí. 22 A-pek-lân kā Só͘-to-má ông kóng, Góa ū kí thiⁿ-tōe ê Chú Chì-koâiⁿ ê Siōng-tè Iâ-hô-hoa lâi chiù-chōa, 23 hoān-nā lí ê mi̍h, chiū chi̍t tiâu sòaⁿ chi̍t tiâu ôe-tòa, góa lóng m̄-the̍h, bián-tit lí kóng, Góa hō͘ A-pek-lân hó-gia̍h; 24 chí-ū siàu-liân lâng só͘ chia̍h ê, í-ki̍p kap góa tâng-kiâⁿ ê lâng A-nái, Í-si̍t-kok, Bān-lī, só͘ èng-tit ê hūn-gia̍h, thang chhut-chāi in the̍h.
1 Chiahê tāi-chì了後，耶和華ê話tī異象中臨到亞伯蘭，講，亞伯蘭ah，你m̄免驚，我是你ê藤牌，是你極大ê報賞。 2 亞伯蘭講，主耶和華ah，你beh hō͘我甚麼，我已經無kiáⁿ；承接我ê家業ê，就是大馬色人Í-lī-í-siā？ 3 亞伯蘭koh講，你無hō͘我有後裔，hitê生tī我家內ê是我ê後嗣。 4 耶和華koh臨到，kā伊講，Chit人m̄是beh做你ê後嗣；對你本身出ê，chiah是做你ê後嗣。 5 就chhōa伊出去外面講，你看天，算hiahê 星，你算能了á-bōe；koh對伊講，你ê後裔亦beh親像án-ni。 6 亞伯蘭信耶和華；伊就kā伊算做義。 7 Koh對伊講，我是耶和華，bat chhōa你出Ka-le̍k-tí ê Jíⁿ城，為tio̍h beh將chitê地hō͘你做業。 8 亞伯蘭講，主耶和華ah，我怎樣會知beh得tio̍h chitê地做業ah？ 9 伊kā伊講，你kā我取一隻三年母ê牛，一隻三年母ê山羊，一隻三年公ê綿羊，一隻ka-chui，一隻鴿á。 10 伊就取chiahê物來，ta̍k樣tùi中破開做兩pêng，chit-pêng kap hit-pêng排相對；只有鳥無破開。 11 有鷹鳥落來tī死ê cheng-siⁿ ê頂面；亞伯蘭就趕伊去。 12 日beh落ê時，亞伯蘭睏重眠；忽然有真烏暗ê大驚惶到tī伊。 13 耶和華對亞伯蘭講，你的確tio̍h知，你ê後裔beh出外tī別人ê地，koh服事hit位ê人；hit位ê人beh苦楚in四百年。 14 In所beh服事ê國，我beh辦in；後來in beh帶chōe-chōe財物tùi-hia出來。 15 你beh安然tò祖，食長歲壽，hō͘人埋葬。 16 到第四代，in beh tò來chia；因為A-mô͘-lī族ê罪iáu未貫滿。 17 日落天暗，有出煙ê爐，kap teh-to̍h ê火把，tùi hiahê破pêng ê肉經過。 18 當hit日，耶和華kap亞伯蘭立約，講，我有將chitê地，tùi埃及河到hitê大河，就是Pek-lat河，hō͘你ê後裔； 19 就是Ki-nî、Ki-nî-sé、Kah-mô͘-nî， 20 Hek、Pí-lī-sé、Lí-hoa̍t-im， 21 A-mô͘-lī、迦南、Kek-ka-sat、Iâ-pò͘-su，chiahê族ê地。
1 Chiah ê tāi-chì liáu-āu, Iâ-hô-hoa ê ōe tī īⁿ-siōng-tiong lîm-kàu A-pek-lân, kóng, A-pek-lân ah, lí m̄-bián kiaⁿ, Góa sī lí ê tîn-pâi, sī lí ke̍k-tōa ê pò-siúⁿ. 2 A-pek-lân kóng, Chú Iâ-hô-hoa ah, Lí beh hō͘ góa sím-mi̍h, góa í-keng bô kiáⁿ; sêng-chiap góa ê ke-gia̍p-ê, chiū-sī Tāi-má-sek lâng Í-lī-í-siā? 3 A-pek-lân koh kóng, Lí bô hō͘ góa ū hō͘-è, hit ê siⁿ tī góa ke-lāi-ê sī góa ê hō͘-sû. 4 Iâ-hô-hoa koh lîm-kàu, kā i kóng, Chit-lâng m̄-sī beh chòe lí ê hō͘-sû; tùi lí pún-sin chhut-ê, chiah sī chòe lí ê hō͘-sû. 5 Chiū chhōa i chhut-khì gōa-bīn kóng, Lí khòaⁿ thiⁿ, sǹg hiah ê chhiⁿ, lí sǹg ōe liáu á-bōe; koh tùi i kóng, Lí ê hō͘-è ia̍h beh chhin-chhiūⁿ án-ni. 6 A-pek-lân sìn Iâ-hô-hoa; I chiū kā i sǹg chòe gī. 7 Koh tùi i kóng, Góa sī Iâ-hô-hoa, bat chhōa lí chhut Ka-le̍k-tí ê Jíⁿ siâⁿ, ūi-tio̍h beh chiong chit ê tōe hō͘ lí chòe-gia̍p. 8 A-pek-lân kóng, Chú Iâ-hô-hoa ah, góa cháiⁿ-iūⁿ ōe chai beh tit-tio̍h chit ê tōe chòe-gia̍p ah? 9 I kā i kóng, Lí kā Góa chhú chi̍t-chiah saⁿ-nî bú ê gû, chi̍t-chiah saⁿ-nî bú ê soaⁿ-iûⁿ, chi̍t-chiah saⁿ-nî kang ê mî-iûⁿ, chi̍t-chiah ka-chui, chi̍t-chiah chíⁿ-á. 10 I chiū chhú chiah ê mi̍h lâi, ta̍k-iūⁿ tùi-tiong phòa-khui chòe nn̄g-pêng, chit-pêng kap hit-pêng pâi saⁿ-tùi; chí-ū chiáu bô phòa-khui. 11 Ū eng-chiáu lo̍h-lâi tī sí ê cheng-siⁿ ê téng-bīn; A-pek-lân chiū kóaⁿ i khì. 12 Ji̍t beh lo̍h ê sî, A-pek-lân khùn tāng-bîn; hut-jiân ū chin o͘-àm ê tōa kiaⁿ-hiâⁿ kàu tī i. 13 Iâ-hô-hoa tùi A-pek-lân kóng, Lí tek-khak tio̍h chai, lí ê hō͘-è beh chhut-gōa tī pa̍t-lâng ê tōe, koh ho̍k-sāi hit-ūi ê lâng; hit-ūi ê lâng beh khó͘-chhó͘ in sì-pah nî. 14 In só͘ beh ho̍k-sāi ê kok, Góa beh pān in; āu-lâi in beh tòa chōe-chōe châi-bu̍t tùi-hia chhut-lâi. 15 Lí beh an-jiân tò-chó͘, chia̍h tn̂g-hè-siū, hō͘ lâng bâi-chòng. 16 Kàu tē-sì tāi, in beh tò-lâi chia; in-ūi A-mô͘-lī cho̍k ê chōe iáu-bē koàn-boán. 17 Ji̍t-lo̍h thiⁿ-àm, ū chhut ian ê lô͘, kap teh-to̍h ê hé-pé, tùi hiah ê phòa-pêng ê bah keng-kè. 18 Tng hit-ji̍t Iâ-hô-hoa kap A-pek-lân li̍p-iok, kóng, Góa ū chiong chit ê tōe, tùi Ai-ki̍p hô kàu hit ê tōa-hô, chiū-sī Pek-lat hô, hō͘ lí ê hō͘-è; 19 chiū-sī Ki-nî, Ki-nî-sé, Kah-mô͘-nî, 20 Hek, Pí-lī-sé, Lí-hoa̍t-im, 21 A-mô͘-lī, Ka-lâm, Kek-ka-sat, Iâ-pò͘-su, chiah ê cho̍k ê tōe.
1 亞伯蘭ê bó͘撒萊無kā伊生kiáⁿ；伊有一个女婢名夏甲；是埃及人。 2 撒萊kā亞伯蘭講，耶和華禁我生kiáⁿ；請你kap我ê女婢同房；kiám-chhái我thang tùi伊得tio̍h gín-á。亞伯蘭聽thàn撒萊ê話。 3 Tùi hit-tia̍p，亞伯蘭ê bó͘撒萊將伊ê女婢埃及人夏甲hō͘伊丈夫亞伯蘭做bó͘；hit時亞伯蘭已經tòa迦南十年。 4 伊kap夏甲同房，夏甲就懷孕；伊知家己有身，就看輕主母。 5 撒萊kā亞伯蘭講，我ê冤枉歸tī你；我將我ê女婢hē tī你ê心懷中；伊看家己有娠，就看輕我；願耶和華tī你我ê中間判斷。 6 亞伯蘭對撒萊講，你ê女婢tī你ê手，你thang隨意款待伊。撒萊苦楚伊，伊就tùi撒萊ê面前逃走。 7 耶和華ê使者tú-tio̍h伊tī曠野ê水泉邊；hitê水泉tī Su-jíⁿ ê路上。 8 對伊講，撒萊ê女婢夏甲，你tùi tah-lo̍h來？beh tah-lo̍h去？伊講，我tùi我ê主母撒萊ê面前走出來。 9 耶和華ê使者對伊講，你tò去你ê主母hia，降服tī伊ê手下。 10 耶和華ê使者koh對伊講，我beh hō͘你ê後裔極其chōe，甚至bōe算得。 11 耶和華ê使者koh對伊講，你taⁿ懷孕，beh生一个kiáⁿ，tio̍h kā伊號名以實瑪利，因為耶和華聽見你ê苦情。 12 伊做人beh親像野驢，伊ê手beh攻擊眾人，眾人ê手beh攻擊伊；伊beh khiā起tī眾兄弟ê頭前。 13 夏甲就稱hitê對伊講話ê耶和華ê名講，你是看見ta̍k項ê上帝；因為講，連tī-chia我亦看見hitê看見我ê mah？ 14 所以chitê井名叫Pí-jíⁿ-la̍h-hái-lâi，就是Ka-te-su kap Pa-lia̍t ê中間。 15 後來夏甲kā亞伯蘭生一个kiáⁿ；亞伯蘭kā伊ê kiáⁿ號名叫以實瑪利，就是夏甲所生ê。 16 夏甲kā亞伯蘭生以實瑪利ê時，亞伯蘭八十六歲。
1 A-pek-lân ê bó͘ Sat-lāi bô kā i siⁿ-kiáⁿ; i ū chi̍t ê lú-pī miâ Hā-kah; sī Ai-ki̍p lâng. 2 Sat-lāi kā A-pek-lân kóng, Iâ-hô-hoa kìm góa siⁿ-kiáⁿ; chhiáⁿ lí kap góa ê lú-pī tâng-pâng; kiám-chhái góa thang tùi i tit-tio̍h gín-á. A-pek-lân thiaⁿ-thàn Sat-lāi ê ōe. 3 Tùi hit-tia̍p A-pek-lân ê bó͘ Sat-lāi chiong i ê lú-pī Ai-ki̍p lâng Hā-kah hō͘ i tiōng-hu A-pek-lân chòe-bó͘; hit-sî A-pek-lân í-keng tòa Ka-lâm cha̍p nî. 4 I kap Hā-kah tâng-pâng, Hā-kah chiū hoâi-īn; i chai ka-kī ū-sin, chiū khòaⁿ-khin chú-bú. 5 Sat-lāi kā A-pek-lân kóng, Góa ê oan-óng kui tī lí; góa chiong góa ê lú-pī hē tī lí ê sim-hoâi-tiong; i khòaⁿ ka-kī ū-sin, chiū khòaⁿ-khin góa; goān Iâ-hô-hoa tī lí góa ê tiong-kan phòaⁿ-toàn. 6 A-pek-lân tùi Sat-lāi kóng, Lí ê lú-pī tī lí ê chhiú, lí thang sûi-ì khoán-thāi i. Sat-lāi khó͘-chhó͘ i, i chiū tùi Sat-lāi ê bīn-chêng tô-cháu. 7 Iâ-hô-hoa ê sù-chiá tú-tio̍h i tī khòng-iá ê chúi-chôaⁿ-piⁿ; hit ê chúi-chôaⁿ tī Su-jíⁿ ê lō͘-chiūⁿ. 8 Tùi i kóng, Sat-lāi ê lú-pī Hā-kah, lí tùi tah-lo̍h lâi? beh tah-lo̍h khì? I kóng, Góa tùi góa ê chú-bú Sat-lāi ê bīn-chêng cháu-chhut-lâi. 9 Iâ-hô-hoa ê sù-chiá tùi i kóng, Lí tò-khì lí ê chú-bú hia, hâng-ho̍k tī i ê chhiú-ē. 10 Iâ-hô-hoa ê sù-chiá koh tùi i kóng, Góa beh hō͘ lí ê hō͘-è ke̍k-kî chōe, sīm-chì bōe-sǹg-tit. 11 Iâ-hô-hoa ê sù-chiá koh tùi i kóng, Lí taⁿ hoâi-īn, beh siⁿ chi̍t ê kiáⁿ, tio̍h kā i hō miâ Í-si̍t-má-lī, in-ūi Iâ-hô-hoa thiaⁿ-kìⁿ lí ê khó͘-chêng. 12 I chòe lâng beh chhin-chhiūⁿ iá-lû, i ê chhiú beh kong-kek chèng-lâng, chèng-lâng ê chhiú beh kong-kek i; i beh khiā-khí tī chèng hiaⁿ-tī ê thâu-chêng. 13 Hā-kah chiū chheng hit ê tùi i kóng ōe ê Iâ-hô-hoa ê miâ kóng, Lí sī khòaⁿ-kìⁿ ta̍k-hāng ê Siōng-tè; in-ūi kóng, Liân tī-chia góa ia̍h khòaⁿ-kìⁿ hit ê khòaⁿ-kìⁿ góa ê mah? 14 Só͘-í chit ê chíⁿ miâ-kiò Pí-jíⁿ-la̍h-hái-lâi, chiū-sī Ka-te-su kap Pa-lia̍t ê tiong-kan. 15 Āu-lâi Hā-kah kā A-pek-lân siⁿ chi̍t ê kiáⁿ; A-pek-lân kā i ê kiáⁿ hō miâ kiò Í-si̍t-má-lī, chiū-sī Hā-kah só͘ siⁿ-ê. 16 Hā-kah kā A-pek-lân siⁿ Í-si̍t-má-lī ê sî, A-pek-lân poeh-cha̍p-la̍k hè.
1 亞伯蘭九十九歲ê時，耶和華對亞伯蘭顯現，kā伊講，我是全能ê上帝，你tī我ê面前行做tio̍h完全。 2 我beh kap你立我ê約，hō͘你ê後裔極其chōe。 3 亞伯蘭就仆落tī地裡；上帝koh kap伊講話，講， 4 我kap你立我ê約，你beh做chōe-chōe國ê父。 5 Tùi taⁿ以後，你ê名無koh叫做亞伯蘭，是beh叫做亞伯拉罕，因為我已經立你做chōe-chōe 國ê父。 6 我beh hō͘你ê後裔極其chōe，國度tùi你來立，君王tùi你來出。 7 我beh kap你，以及你歷代ê後裔，設立我ê約做永遠ê約；是beh做你kap你ê後裔ê上帝。 8 我beh將你現在出外ê地，就是迦南全地，賞賜你kap你ê後裔，做永遠ê業；我亦beh做in ê上帝。 9 上帝koh對亞伯拉罕講，你kap你ê後裔tio̍h歷代遵守我ê約。 10 Lín中間所有ê ta-po͘-ê，lóng tio̍h受割禮；這就是我kap你以及你ê後裔所立ê約，是lín所tio̍h遵守ê。 11 Lín tio̍h割lín陽物ê皮；這是beh做我kap lín所立ê約ê記號。 12 Lín歷代ê ta-po͘-ê，無論家內生ê，á是你ê後裔以外，用銀tùi外面人買ê，已經出世八日，lóng tio̍h受割禮。 13 你家內生ê，kap你用銀買ê，lóng的確tio̍h受割禮；án-ni我ê約beh hē tī lín ê身上，做永遠ê約。 14 無受割禮ê ta-po͘-ê，伊身軀既然無受割禮，是背我ê約；的確tùi百姓ê中間除去。 15 上帝koh對亞伯拉罕講，你ê bó͘撒萊，m̄-thang koh叫伊ê名撒萊；伊ê名beh叫做撒拉。 16 我beh賜福伊，我亦beh hō͘你tùi伊得tio̍h一个kiáⁿ；我beh賜福伊，伊亦beh做列國ê老母；beh有邦國ê王 tùi伊出。 17 亞伯拉罕就仆teh笑，心內講，一百歲ê人iáu能生kiáⁿ mah？撒拉已經九十歲，iáu能生養mah？ 18 亞伯拉罕對上帝講，但願以實瑪利活tī你ê面前。 19 上帝講，m̄是lah，你ê bó͘撒拉beh kā你生一个kiáⁿ，你beh kā伊號名叫以撒；我beh kap伊設立我ê約，做伊ê後裔永遠ê約。 20 論到以實瑪利，我亦聽你求；你看，我已經賜福伊，beh hō͘伊興旺，加添極其chōe。伊beh生十二個族長，我亦beh hō͘伊成做大國。 21 到明年 chit時，撒拉beh kā你生以撒；我beh kap伊設立我ê約。 22 上帝kap亞伯拉罕講soah，就離開伊上去。 23 Tú-tú hit日，亞伯拉罕照上帝所kā伊講ê，kā伊ê kiáⁿ以實瑪利，kap亞伯拉罕家內一切ê ta-po͘人，無論tī 家裡生ê，á是用伊ê銀買ê，lóng行割禮。 24 亞伯拉罕受割禮ê時九十九歲； 25 伊ê kiáⁿ以實瑪利受割禮ê時十三歲。 26 Tú-tú hit日，亞伯拉罕kap伊ê kiáⁿ以實瑪利同受割禮。 27 家內所有ê人，無論tī 家裡生ê，á是用銀tùi外面人買ê，lóng kap伊同受割禮。
1 A-pek-lân káu-cha̍p-káu hè ê sî, Iâ-hô-hoa tùi A-pek-lân hián-hiān, kā i kóng, Góa sī choân-lêng ê Siōng-tè, lí tī Góa ê bīn-chêng kiâⁿ-chòe tio̍h oân-choân. 2 Góa beh kap lí li̍p Góa ê iok, hō͘ lí ê hō͘-è ke̍k-kî chōe. 3 A-pek-lân chiū phak-lo̍h tī tōe-ni̍h; Siōng-tè koh kap i kóng-ōe, kóng, 4 Góa kap lí li̍p Góa ê iok, lí beh chòe chōe-chōe kok ê pē. 5 Tùi taⁿ í-āu, lí ê miâ bô koh kiò-chòe A-pek-lân, sī beh kiò-chòe A-pek-la̍h-hán, in-ūi Góa í-keng li̍p lí chòe chōe-chōe kok ê pē. 6 Góa beh hō͘ lí ê hō͘-è ke̍k-kî chōe, kok-tō͘ tùi lí lâi li̍p, kun-ông tùi lí lâi chhut. 7 Góa beh kap lí, í-ki̍p lí le̍k-tāi ê hō͘-è, siat-li̍p Góa ê iok chòe éng-oán ê iok; sī beh chòe lí kap lí ê hō͘-è ê Siōng-tè. 8 Góa beh chiong lí hiān-chāi chhut-gōa ê tōe, chiū-sī Ka-lâm choân-tōe, siúⁿ-sù lí kap lí ê hō͘-è, chòe éng-oán ê gia̍p; Góa ia̍h beh chòe in ê Siōng-tè. 9 Siōng-tè koh tùi A-pek-la̍h-hán kóng, Lí kap lí ê hō͘-è tio̍h le̍k-tāi chun-siú Góa ê iok. 10 Lín tiong-kan só͘ ū ê ta-po͘-ê, lóng tio̍h siū kat-lé; che chiū-sī Góa kap lí í-ki̍p lí ê hō͘-è só͘ li̍p ê iok, sī lín só͘ tio̍h chun-siú-ê. 11 Lín tio̍h koah lín iông-bu̍t ê phê; che sī beh chòe Góa kap lín só͘ li̍p ê iok ê kì-hō. 12 Lín le̍k-tāi ê ta-po͘-ê, bô-lūn ke-lāi siⁿ-ê, á-sī lí ê hō͘-è í-gōa, ēng gûn tùi gōa-bīn lâng bóe-ê, í-keng chhut-sì poeh-ji̍t, lóng tio̍h siū kat-lé. 13 Lí ke-lāi siⁿ-ê, kap lí ēng gûn bóe-ê, lóng tek-khak tio̍h siū kat-lé; án-ni Góa ê iok beh hē tī lín ê sin-chiūⁿ, chòe éng-oán ê iok. 14 Bô siū kat-lé ê ta-po͘-ê, i sin-khu kì-jiân bô siū kat-lé, sī pōe Góa ê iok; tek-khak tùi peh-sìⁿ ê tiong-kan tû-khì. 15 Siōng-tè koh tùi A-pek-la̍h-hán kóng, Lí ê bó͘ Sat-lāi, m̄-thang koh kiò i ê miâ Sat-lāi; i ê miâ beh kiò-chòe Sat-la̍h. 16 Góa beh sù-hok i, Góa ia̍h beh hō͘ lí tùi i tit-tio̍h chi̍t ê kiáⁿ; Góa beh sù-hok i, i ia̍h beh chòe lia̍t-kok ê lāu-bú; beh ū pang-kok ê ông tùi i chhut. 17 A-pek-la̍h-hán chiū phak-teh chhiò, sim-lāi kóng, Chi̍t-pah hè ê lâng iáu ōe siⁿ-kiáⁿ mah? Sat-la̍h í-keng káu-cha̍p hè, iáu ōe seng-ióng mah? 18 A-pek-la̍h-hán tùi Siōng-tè kóng, Tān goān Í-si̍t-má-lī oa̍h tī Lí ê bīn-chêng. 19 Siōng-tè kóng, M̄-sī lah, lí ê bó͘ Sat-la̍h beh kā lí siⁿ chi̍t ê kiáⁿ, lí beh kā i hō-miâ kiò Í-sat; Góa beh kap i siat-li̍p Góa ê iok, chòe i ê hō͘-è éng-oán ê iok. 20 Lūn-kàu Í-si̍t-má-lī, Góa ia̍h thiaⁿ lí kiû; lí khòaⁿ, Góa í-keng sù-hok i, beh hō͘ i heng-ōng, ke-thiⁿ ke̍k-kî chōe. I beh siⁿ cha̍p-jī ê cho̍k-tiúⁿ, Góa ia̍h beh hō͘ i chiâⁿ-chòe tōa-kok. 21 Kàu mê-nî chit-sî, Sat-la̍h beh kā lí siⁿ Í-sat; Góa beh kap i siat-li̍p Góa ê iok. 22 Siōng-tè kap A-pek-la̍h-hán kóng soah, chiū lī-khui i chiūⁿ-khì. 23 Tú-tú hit-ji̍t, A-pek-la̍h-hán chiàu Siōng-tè só͘ kā i kóng-ê, kā i ê kiáⁿ Í-si̍t-má-lī, kap A-pek-la̍h-hán ke-lāi it-chhè ê ta-po͘-lâng, bô-lūn tī ke-ni̍h siⁿ-ê, á-sī ēng i ê gûn bóe-ê, lóng kiâⁿ kat-lé. 24 A-pek-la̍h-hán siū kat-lé ê sî káu-cha̍p-káu hè; 25 i ê kiáⁿ Í-si̍t-má-lī siū kat-lé ê sî cha̍p-saⁿ hè. 26 Tú-tú hit ji̍t A-pek-la̍h-hán kap i ê kiáⁿ Í-si̍t-má-lī tâng siū kat-lé. 27 Ke-lāi só͘-ū ê lâng, bô-lūn tī ke-ni̍h siⁿ-ê, á-sī ēng gûn tùi gōa-bīn lâng bóe-ê, lóng kap i tâng siū kat-lé.
1 耶和華tī Bān-lī ê橡樹hia，對亞伯拉罕出現；hit時日當熱；亞伯拉罕坐tī布棚門口； 2 kia̍h目起來看，看見三人tī對面teh khiā；伊一下看見，就tùi布棚門口，走去迎接in， 3 仆tī地裡，講，我ê主，我若tī你ê面前得tio̍h恩典，求你m̄-thang離開奴僕做你去； 4 容允the̍h淡薄水，hō͘ lín洗腳請歇睏tī樹腳； 5 我koh the̍h淡薄餅，hō͘ lín點心；然後進前去；因為lín是為tio̍h án-ni，chiah到lín ê奴僕chia。In講，Thang照你ê話去行。 6 亞伯拉罕趕緊入布棚，見撒拉講，你緊緊用三sè-a ê麵粉，nóa做餅。 7 亞伯拉罕koh走到牛群ê所在，牽一隻chíⁿ koh好ê牛á來；交hō͘奴僕，伊就趕緊去備辦。 8 亞伯拉罕koh the̍h奶油kap 奶，kap所備辦ê牛á來，排tī in ê面前；家己tī樹腳khiā tī in ê身邊；in就食。 9 In kā伊講，你ê bó͘撒拉tī tah-lo̍h？伊講，Tī布棚內。 10 In中間一个講，到期我的確beh koh來你chia；你ê bó͘撒拉beh生一个kiáⁿ。撒拉tī後面，布棚門口，teh聽。 11 亞伯拉罕kap撒拉年歲已經老；撒拉ê月經已經絕。 12 撒拉心內笑講，我已經衰lám，我ê主亦老lah；kiám iáu有chit號ê歡喜？ 13 耶和華對亞伯拉罕講，撒拉為啥事笑，講，我已經老，果真能生kiáⁿ mah？ 14 Kiám耶和華有做bōe來ê事mah？到期，明年 chit時，我beh koh來你chia，撒拉beh生一个kiáⁿ。 15 撒拉驚，m̄認，講，我無笑。hit人講，無影；你實在有笑。 16 Hiah-ê人就tùi hia起來，ǹg所多瑪去；亞伯拉罕也kap in相kap行，beh送in一站。 17 耶和華講，我所beh做ê事，kiám thang tùi亞伯拉罕隱khǹg mah？ 18 因為亞伯拉罕的確beh成做強大ê國，地上萬國beh因為伊來得tio̍h福氣。 19 我bat伊，是beh hō͘伊命令伊ê kiáⁿ kap伊ê家眷；hō͘ in長長守耶和華ê道理，秉公行義；致到耶和華指亞伯拉罕所講ê話，lóng歸hō͘ 伊。 20 耶和華講，所多瑪、蛾摩拉hoah-hiàm ê聲真大，in ê罪惡實在重。 21 我taⁿ beh落去，看in所行ê，果然一盡照我所聽ê聲á無；若無án-ni，我亦會知。 22 Hiah-ê人tùi-hia oa̍t-tńg身，ǹg所多瑪去；亞伯拉罕iáu khiā tī耶和華ê面前。 23 亞伯拉罕近前來講，好人kap pháiⁿ人，你lóng beh剿滅mah？ 24 設使城內有五十個好人，你猶原beh剿滅hit所在mah？無beh為tio̍h城內chí五十個好人，來赦免in mah？ 25 願你決斷無án-ni行，將好人kap pháiⁿ人做一下害死；致到好人kap pháiⁿ人相同；願你決斷無án-ni行；審判全地ê主kiám無行公義mah？ 26 耶和華講，我若tī所多瑪城內tú-tio̍h有五十個好人，我就為tio̍h in ê緣故寬容hit所在。 27 亞伯拉罕應講，我雖然是火灰土粉，iáu-kú敢對主講話； 28 設使chiahê五十個好人欠五個；你就因為欠五個，剿滅全城mah？伊講，我tī-hia若tú-tio̍h有四十五個，亦無beh剿滅。 29 亞伯拉罕koh對伊講，設使tī-hia tú-tio̍h四十個nih？伊講，為tio̍h chiahê四十個 ê緣故，我亦無beh做chitê事。 30 伊koh講，求主莫得受氣，我beh koh講；設使tī-hia若tú-tio̍h三十個nih？伊講，我tī-hia若tú-tio̍h有三十個，我亦無beh做chitê事。 31 伊講，我iáu-kú敢對主講；設使tī-hia tú-tio̍h有二十個nih？伊講，為tio̍h chiahê二十個 ê緣故，我亦無beh剿滅。 32 伊講，求主莫得受氣，我koh講chit一pái；設使tī-hia tú-tio̍h有十個nih？伊講，為tio̍h chiahê十個ê緣故，我亦無beh剿滅。 33 耶和華kap亞伯拉罕講明白，就上去。亞伯拉罕亦tò去伊ê所在。
1 Iâ-hô-hoa tī Bān-lī ê siōng-chhiū hia, tùi A-pek-la̍h-hán chhut-hiān; hit-sî ji̍t tng joa̍h; A-pek-la̍h-hán chē tī pò͘-pîⁿ mn̂g-kháu; 2 kia̍h-ba̍k khí-lâi khòaⁿ, khòaⁿ-kìⁿ saⁿ lâng tī tùi-bīn teh khiā; i chi̍t-ē khòaⁿ-kìⁿ, chiū tùi pò͘-pîⁿ mn̂g-kháu, cháu khì ngiâ-chih in, 3 phak tī tōe-ni̍h, kóng, góa ê chú, góa nā tī lí ê bīn-chêng tit-tio̍h un-tián, kiû lí m̄-thang lī-khui lô͘-po̍k chòe lí khì; 4 iông-ún the̍h tām-po̍h chúi, hō͘ lín sóe-kha; chhiáⁿ hioh-khùn tī chhiū-kha; 5 góa koh the̍h tām-po̍h piáⁿ, hō͘ lín tiám-sim; jiân-āu chìn-chêng khì; in-ūi lín sī ūi-tio̍h án-ni, chiah kàu lín ê lô͘-po̍k chia. In kóng, Thang chiàu lí ê ōe khì kiâⁿ. 6 A-pek-la̍h-hán kóaⁿ-kín ji̍p pò͘-pîⁿ, kìⁿ Sat-la̍h kóng, Lí kín-kín ēng saⁿ sè-a ê mī-hún, nóa chòe piáⁿ. 7 A-pek-la̍h-hán koh cháu kàu gû-kûn ê só͘-chāi, khan chi̍t chiah chíⁿ koh hó ê gû-á lâi; kau hō͘ lô͘-po̍k, i chiū kóaⁿ-kín khì pī-pān. 8 A-pek-la̍h-hán koh the̍h lin-iû kap lin, kap só͘ pī-pān ê gû-á lâi, pâi tī in ê bīn-chêng; ka-kī tī chhiū-kha khiā tī in ê sin-piⁿ; in chiū chia̍h. 9 In kā i kóng, Lí ê bó͘ Sat-la̍h tī tah-lo̍h? I kóng, Tī pò͘-pîⁿ-lāi. 10 In tiong-kan chi̍t-ê kóng, Kàu-kî Góa tek-khak beh koh lâi lí chia; lí ê bó͘ Sat-la̍h beh siⁿ chi̍t ê kiáⁿ. Sat-la̍h tī āu-bīn, pò͘-pîⁿ mn̂g-kháu, teh thiaⁿ. 11 A-pek-la̍h-hán kap Sat-la̍h nî-hè í-keng lāu; Sat-la̍h ê ge̍h-keng í-keng choa̍t. 12 Sat-la̍h sim-lāi chhiò kóng, Góa í-keng soe-lám, góa ê chú ia̍h lāu-lah; kiám iáu ū chit-hō ê hoaⁿ-hí? 13 Iâ-hô-hoa tùi A-pek-la̍h-hán kóng, Sat-la̍h ūi siáⁿ-sū chhiò, kóng, Góa í-keng lāu, kó-chin ōe siⁿ-kiáⁿ mah? 14 Kiám Iâ-hô-hoa ū chòe-bōe-lâi ê sū mah? Kàu-kî, mê-nî chit-sî, Góa beh koh lâi lí chia, Sat-la̍h beh siⁿ chi̍t ê kiáⁿ. 15 Sat-la̍h kiaⁿ, m̄-jīn, kóng, Góa bô chhiò. Hit-lâng kóng, Bô-iáⁿ; lí si̍t-chāi ū chhiò. 16 Hiah ê lâng chiū tùi hia khí-lâi, ǹg Só͘-to-má khì; A-pek-la̍h-hán iā kap in saⁿ-kap kiâⁿ, beh sàng in chi̍t-chām. 17 Iâ-hô-hoa kóng, Góa só͘ beh chòe ê sū, kiám thang tùi A-pek-la̍h-hán ún-khǹg mah? 18 In-ūi A-pek-la̍h-hán tek-khak beh chiâⁿ-chòe kiông-tōa ê kok, tōe-chiūⁿ bān-kok beh in-ūi i lâi tit-tio̍h hok-khì. 19 Góa bat i, sī beh hō͘ i bēng-lēng i ê kiáⁿ kap i ê ke-koàn; hō͘ in tn̂g-tn̂g siú Iâ-hô-hoa ê tō-lí, péng-kong kiâⁿ-gī; tì-kàu Iâ-hô-hoa chí A-pek-la̍h-hán só͘ kóng ê ōe, lóng kui hō͘ i. 20 Iâ-hô-hoa kóng, Só͘-to-má, Gô-mô͘-la̍h hoah-hiàm ê siaⁿ chin-tōa, in ê chōe-ok si̍t-chāi tāng. 21 Góa taⁿ beh lo̍h-khì, khòaⁿ in só͘ kiâⁿ-ê, kó-jiân it-chīn chiàu Góa só͘ thiaⁿ ê siaⁿ á bô; nā bô án-ni, Góa ia̍h ōe chai. 22 Hiah ê lâng tùi-hia oa̍t-tńg-sin, ǹg Só͘-to-má khì; A-pek-la̍h-hán iáu khiā tī Iâ-hô-hoa ê bīn-chêng. 23 A-pek-la̍h-hán kūn-chêng lâi kóng, Hó-lâng kap pháiⁿ-lâng, Lí lóng beh châu-bia̍t mah? 24 Siat-sú siâⁿ-lāi ū gō͘-cha̍p ê hó-lâng, Lí iû-goân beh châu-bia̍t hit só͘-chāi mah? bô-beh ūi-tio̍h siâⁿ-lāi chí gō͘-cha̍p ê hó-lâng, lâi sià-bián in mah? 25 Goān Lí koat-toàn bô án-ni kiâⁿ, chiong hó-lâng kap pháiⁿ-lâng chòe-chi̍t-ē hāi-sí; tì-kàu hó-lâng kap pháiⁿ-lâng saⁿ-tâng; goān Lí koat-toàn bô án-ni kiâⁿ; sím-phòaⁿ choân-tōe ê Chú kiám bô kiâⁿ kong-gī mah? 26 Iâ-hô-hoa kóng, Góa nā tī Só͘-to-má siâⁿ-lāi tú-tio̍h ū gō͘-cha̍p ê hó-lâng, Góa chiū ūi-tio̍h in ê iân-kò͘ khoan-iông hit só͘-chāi. 27 A-pek-la̍h-hán ìn kóng, Góa sui-jiân sī hé-hu thô͘-hún, iáu-kú káⁿ tùi Chú kóng-ōe; 28 siat-sú chiah ê gō͘-cha̍p ê hó-lâng khiàm gō͘-ê; Lí chiū in-ūi khiàm gō͘-ê, châu-bia̍t choân-siâⁿ mah? I kóng, Góa tī-hia nā tú-tio̍h ū sì-cha̍p-gō͘ ê, ia̍h bô beh châu-bia̍t. 29 A-pek-la̍h-hán koh tùi I kóng, Siat-sú tī-hia tú-tio̍h sì-cha̍p-ê nih? I kóng, Ūi-tio̍h chiah ê sì-cha̍p-ê ê iân-kò͘, Góa ia̍h bô beh chòe chit ê sū. 30 I koh kóng, Kiû Chú bo̍h-tit siū-khì, góa beh koh kóng; siat-sú tī-hia nā tú-tio̍h saⁿ-cha̍p-ê nih? I kóng, Góa tī-hia nā tú-tio̍h ū saⁿ-cha̍p-ê, Góa ia̍h bô beh chòe chit ê sū. 31 I kóng, Góa iáu-kú káⁿ tùi Chú kóng; siat-sú tī-hia tú-tio̍h ū jī-cha̍p-ê nih? I kóng, Ūi-tio̍h chiah ê jī-cha̍p-ê ê iân-kò͘, Góa ia̍h bô beh châu-bia̍t. 32 I kóng, Kiû Chú bo̍h-tit siū-khì, góa koh kóng chit chi̍t-pái; siat-sú tī-hia tú-tio̍h ū cha̍p-ê nih? I kóng, Ūi-tio̍h chiah ê cha̍p-ê ê iân-kò͘, Góa ia̍h bô beh châu-bia̍t. 33 Iâ-hô-hoa kap A-pek-la̍h-hán kóng bêng-pe̍k, chiū chiūⁿ-khì. A-pek-la̍h-hán ia̍h tò-khì i ê só͘-chāi.
1 日暗，hit兩個使者到所多瑪；羅得坐tī所多瑪城門裡；羅得看見in，就起來迎接in；鞠躬面ǹg地， 2 講，我ê主ah，請oa̍t來奴僕ê厝歇暝洗腳，明á早起起來，行lín ê路。In講，m̄免；阮beh tī大街面過暝。 3 羅得切切請in；in chiah oa̍t-tńg腳，oat入伊ê厝；羅得為in備辦筵席，pek無酵餅；in就食。 4 Iniáu未去睏，城內ê人，就是所多瑪人，tùi少年到老，四面來圍伊ê厝； 5 叫羅得講，今暗到你chia ê人tī tah-lo̍h？hō͘ in出來，照阮所ài做。 6 羅得出去到門外眾人hia，就將門關teh； 7 講，兄弟ah，請lín莫得做chit號pháiⁿ； 8 你看，我有兩個cha-bó͘-kiáⁿ，iáu是在室女；容允我chhōa出來，chhut-chāi lín所ài來行；獨獨chit兩人，已經到我ê厝，m̄-thang對in做甚麼。 9 眾人講，你退去。Koh講，Chit人寄居tī-chia，續beh管轄阮mah？taⁿ阮beh害你比害in khah傷重。就oe-khoeh羅得，進前beh攻破伊ê門。 10 總是hit兩人伸手，牽羅得入厝，將門關去。 11 Koh hō͘門外ê人，tùi細到大，目睭ian-n̄g，lóng bōe看見；chhē到倦chhē無門。 12 Hit兩人對羅得講，你tī-chia iáu有甚麼人？或是kiáⁿ婿，或是kiáⁿ，或是cha-bó͘-kiáⁿ，以及城內一切屬你ê人；你tio̍h hō͘ in lóng出chit所在。 13 因為阮beh剿滅chitê所在，是為tio̍h in hoah-hiàm ê聲tī耶和華ê面前真大；耶和華差阮來beh剿滅伊。 14 羅得出去，對娶伊ê cha-bó͘-kiáⁿ ê kiáⁿ婿講，Lín起來，離開chia；因為耶和華beh滅無chitê城；伊ê kiáⁿ婿掠做伊是講笑。 15 天光使者催逼羅得講，起來，chhōa你ê bó͘，以及你tī-chia兩個cha-bó͘-kiáⁿ去；驚了kap chitê城ê罪惡相kap受滅無。 16 羅得延chhiân；hit兩人，因為耶和華憐憫羅得，就牽伊ê手，kap伊ê bó͘ ê手，kap伊兩個cha-bó͘-kiáⁿ ê手，將伊chhōa出，安置tī城外。 17 Chhōa in出去了，講，你tio̍h逃命，m̄-thang oa̍t頭看，亦m̄-thang tòa tī平洋；tio̍h走去山裡，驚了受滅無。 18 羅得對in講，我ê主ah，m̄-thang án-ni。 19 你看，你ê奴僕已經得tio̍h恩典tī你ê面前，你亦對我顯出極大ê仁慈，救我ê性命；我bōe會走到山裡，驚了chitê災禍到tī我，我就死。 20 你看，chitê城近近thang逃走，亦是細；請容允我逃閃tī-hia，來保全我ê活命；chitê城kiám m̄是細ê mah？ 21 伊對伊講，Chitê tāi-chì，我亦允准你；你所講ê城，我無beh chhia倒。 22 你tio̍h緊緊走去hia；因為你iáu未到hia，我bōe會做甚麼。因為án-ni hitê城名叫Só-jíⁿ。 23 羅得到Só-jíⁿ，日已經出。 24 Hit時耶和華將硫磺kap火，tùi天頂，tùi耶和華hia，降落tī所多瑪kap蛾摩拉。 25 將hiahê城，以及全平洋，kap城內所有ê百姓，連地面上生長ê，lóng毀壞。 26 羅得ê bó͘ tī後面，一下oa̍t頭看，就變做一支鹽柱。 27 亞伯拉罕透早起來，到伊前日khiā tī耶和華面前hit位； 28 ǹg所多瑪、蛾摩拉，kap平洋ê全地來看；看見hit所在火煙chhèng高，親像火爐ê煙。 29 當上帝剿滅平洋chiahê城ê時，上帝siàu念亞伯拉罕；tú-tú tī chhia倒羅得所khiā起ê城ê時，就kah羅得tùi chhia倒ê中間出去。 30 羅得tiàm-tī Só-jíⁿ驚惶；就kap伊兩個cha-bó͘-kiáⁿ tùi Só-jíⁿ上去tiàm-tī山裡；伊kap兩個cha-bó͘-kiáⁿ tiàm-tī一个洞內。 31 大cha-bó͘-kiáⁿ 對細cha-bó͘-kiáⁿ講，咱ê老父老lah，地上koh無人kap咱做匹配，來照人道。 32 來lah，thang hō͘老父lim酒，kap伊相kap睏；án-ni咱好thang tùi伊留存後裔。 33 Hit暝in hō͘老父lim酒；大cha-bó͘-kiáⁿ就入去kap老父相kap睏；伊甚麼時去睏，甚麼時起來，老父lóng m̄知。 34 過日大cha-bó͘-kiáⁿ kā細cha-bó͘-kiáⁿ講，我昨暝kap老父相kap睏；今暗咱koh hō͘伊lim酒，你thang入去kap伊相kap睏。Án-ni，咱好thang tùi老父留存後裔。 35 Hit暝in koh hō͘老父lim酒，細cha-bó͘-kiáⁿ起來去kap伊睏；伊甚麼時去睏，甚麼時起來，老父亦lóng m̄知。 36 Án-ni羅得兩個cha-bó͘-kiáⁿ lóng tùi in老父來懷孕。 37 大ê生kiáⁿ，叫伊ê名Mô͘-ap，就是現今Mô͘-ap人ê祖。 38 細ê亦生kiáⁿ，叫伊ê名Piān-á-bí，就是現今A-bûn人ê祖。
1 Ji̍t-àm, hit nn̄g ê sù-chiá kàu Só͘-to-má; Lô-tek chē tī Só͘-to-má siâⁿ-mn̂g-ni̍h; Lô-tek khòaⁿ-kìⁿ in, chiū khí-lâi ngiâ-chih in; kiok-kiong bīn ǹg tōe, 2 kóng, Góa ê chú ah, chhiáⁿ oa̍t lâi lô͘-po̍k ê chhù hioh-mî, sóe-kha; bîn-á-chá-khí khí-lâi, kiâⁿ lín ê lō͘. In kóng, M̄-bián; goán beh tī tōa koe-bīn kè-mî. 3 Lô-tek chhiat-chhiat chhiáⁿ in; in chiah oa̍t-tńg-kha, oat-ji̍p i ê chhù; Lô-tek ūi in pī-pān iân-sia̍h, pek bû-kàⁿ-piáⁿ; in chiū chia̍h. 4 In iáu-bē khì khùn, siâⁿ-lāi ê lâng, chiū-sī Só͘-to-má lâng, tùi siàu-liân kàu lāu, sì-bīn lâi ûi i ê chhù; 5 kiò Lô-tek kóng, Kin-àm kàu lí chia ê lâng tī tah-lo̍h? hō͘ in chhut-lâi, chiàu goán só͘ ài chòe. 6 Lô-tek chhut-khì kàu mn̂g-gōa, chèng-lâng hia, chiū chiong mn̂g koaiⁿ-teh; 7 kóng, Hiaⁿ-tī ah, chhiáⁿ lín bo̍h-tit chòe chit-hō pháiⁿ; 8 lí khòaⁿ, góa ū nn̄g ê cha-bó͘-kiáⁿ, iáu sī chāi-sek-lú; iông-ún góa chhōa-chhut-lâi, chhut-chāi lín só͘ ài lâi kiâⁿ; to̍k-to̍k chit nn̄g-lâng, í-keng kàu góa ê chhù, m̄-thang tùi in chòe sím-mi̍h. 9 Chèng-lâng kóng, Lí thè-khì. Koh kóng, Chit-lâng kià-ku tī-chia, sòa beh koán-hat goán mah? taⁿ goán beh hāi lí pí hāi in khah siong-tiōng. Chiū oe-khoeh Lô-tek, chìn-chêng beh kong-phòa i ê mn̂g. 10 Chóng-sī hit nn̄g-lâng chhun-chhiú, khan Lô-tek ji̍p chhù, chiong mn̂g koaiⁿ-khì. 11 Koh hō͘ mn̂g-gōa ê lâng, tùi sòe kàu tōa, ba̍k-chiu ian-n̄g, lóng bōe khòaⁿ-kìⁿ; chhē kàu siān chhē bô mn̂g. 12 Hit nn̄g-lâng tùi Lô-tek kóng, Lí tī-chia iáu ū sím-mi̍h lâng? he̍k-sī kiáⁿ-sài, he̍k-sī kiáⁿ, he̍k-sī cha-bó͘-kiáⁿ, í-ki̍p siâⁿ-lāi it-chhè sio̍k lí ê lâng; lí tio̍h hō͘ in lóng chhut chit só͘-chāi. 13 In-ūi goán beh châu-bia̍t chit ê só͘-chāi, sī ūi-tio̍h in hoah-hiàm ê siaⁿ tī Iâ-hô-hoa ê bīn-chêng chin-tōa; Iâ-hô-hoa chhe goán lâi beh châu-bia̍t-i. 14 Lô-tek chhut-khì, tùi chhōa i ê cha-bó͘-kiáⁿ ê kiáⁿ-sài kóng, Lín khí-lâi, lī-khui chia; in-ūi Iâ-hô-hoa beh bia̍t-bô chit ê siâⁿ; i ê kiáⁿ-sài lia̍h-chòe i sī kóng-chhiò. 15 Thiⁿ-kng sù-chiá chhui-pek Lô-tek kóng, Khí-lâi, chhōa lí ê bó͘, í-ki̍p lí tī-chia nn̄g ê cha-bó͘-kiáⁿ khì; kiaⁿ-liáu kap chit ê siâⁿ ê chōe-ok saⁿ-kap siū bia̍t-bô. 16 Lô-tek iân-chhiân; hit nn̄g-lâng, in-ūi Iâ-hô-hoa lîn-bín Lô-tek, chiū khan i ê chhiú, kap i ê bó͘ ê chhiú, kap i nn̄g ê cha-bó͘-kiáⁿ ê chhiú, chiong i chhōa-chhut, an-tì tī siâⁿ-gōa. 17 Chhōa in chhut-khì liáu, kóng, Lí tio̍h tô-miā, m̄-thang oa̍t-thâu khòaⁿ, ia̍h m̄-thang tòa tī Pîⁿ-iûⁿ; tio̍h cháu-khì soaⁿ-ni̍h, kiaⁿ-liáu siū bia̍t-bô. 18 Lô-tek tùi in kóng, Góa ê Chú ah, m̄-thang án-ni. 19 Lí khòaⁿ, lí ê lô͘-po̍k í-keng tit-tio̍h un-tián tī lí ê bīn-chêng, lí ia̍h tùi góa hián-chhut ke̍k-tōa ê jîn-chû, kiù góa ê sìⁿ-miā; góa bōe-ōe cháu kàu soaⁿ-ni̍h, kiaⁿ-liáu chit ê chai-ē kàu tī góa, góa chiū sí. 20 Lí khòaⁿ, chit ê siâⁿ kūn-kūn thang tô-cháu, ia̍h sī sòe; chhiáⁿ iông-ún góa tô-siám tī-hia, lâi pó-choân góa ê oa̍h-miā; chit ê siâⁿ kiám m̄-sī sòe-ê mah? 21 I tùi i kóng, Chit ê tāi-chì, góa ia̍h ún-chún lí; lí só͘ kóng ê siâⁿ, góa bô beh chhia-tó. 22 Lí tio̍h kín-kín cháu-khì hia; in-ūi lí iáu-bē kàu hia, góa bōe-ōe chòe sím-mi̍h. In-ūi án-ni hit ê siâⁿ miâ-kiò Só-jíⁿ. 23 Lô-tek kàu Só-jíⁿ, ji̍t í-keng chhut. 24 Hit sî Iâ-hô-hoa chiong jiû-n̂g kap hé, tùi thiⁿ-téng, tùi Iâ-hô-hoa hia, kàng-lo̍h tī Só͘-to-má kap Gô-mô͘-la̍h. 25 Chiong hiah ê siâⁿ, í-ki̍p choân pîⁿ-iûⁿ, kap siâⁿ-lāi só͘-ū ê peh-sìⁿ, liân tōe-bīn-chiūⁿ seng-tióng-ê, lóng húi-hoāi. 26 Lô-tek ê bó͘ tī āu-bīn, chi̍t-ē oa̍t-thâu khòaⁿ, chiū pìⁿ-chòe chi̍t ki iâm-thiāu. 27 A-pek-la̍h-hán thàu-chá khí-lâi, kàu i chêng-ji̍t khiā tī Iâ-hô-hoa bīn-chêng hit-ūi; 28 ǹg Só͘-to-má Gô-mô͘-la̍h, kap Pîⁿ-iûⁿ ê choân-tōe lâi khòaⁿ; khòaⁿ-kìⁿ hit só͘-chāi hé-ian chhèng-koâiⁿ, chhin-chhiūⁿ hé-lô͘ ê ian. 29 Tng Siōng-tè châu-bia̍t Pîⁿ-iûⁿ chiah ê siâⁿ ê sî, Siōng-tè siàu-liām A-pek-la̍h-hán; tú-tú tī chhia-tó Lô-tek só͘ khiā-khí ê siâⁿ ê sî, chiū kah Lô-tek tùi chhia-tó ê tiong-kan chhut-khì. 30 Lô-tek tiàm tī Só-jíⁿ kiaⁿ-hiâⁿ; chiū kap i nn̄g ê cha-bó͘-kiáⁿ tùi Só-jíⁿ chiūⁿ-khì tiàm tī soaⁿ-ni̍h; i kap nn̄g ê cha-bó͘-kiáⁿ tiàm tī chi̍t ê tōng-lāi. 31 Tōa cha-bó͘-kiáⁿ tùi sòe cha-bó͘-kiáⁿ kóng, Lán ê lāu-pē lāu-lah, tōe-chiūⁿ koh bô lâng kap lán chòe phit-phòe, lâi chiàu jîn-tō. 32 Lâi-lah, thang hō͘ lāu-pē lim chiú, kap i saⁿ-kap khùn; án-ni lán hó thang tùi i liû-chûn hō͘-è. 33 Hit-mî in hō͘ lāu-pē lim chiú; tōa cha-bó͘-kiáⁿ chiū ji̍p-khì kap lāu-pē saⁿ-kap khùn; i sím-mi̍h sî khì khùn, sím-mi̍h sî khí-lâi, lāu-pē lóng m̄-chai. 34 Kè-ji̍t tōa cha-bó͘-kiáⁿ kā sòe cha-bó͘-kiáⁿ kóng, Góa chā-mî kap lāu-pē saⁿ-kap khùn; kin-àm lán koh hō͘ i lim chiú, lí thang ji̍p-khì kap i saⁿ-kap khùn. Án-ni, lán hó thang tùi lāu-pē liû-chûn hō͘-è. 35 Hit-mî in koh hō͘ lāu-pē lim chiú, sòe cha-bó͘-kiáⁿ khí-lâi khì kap i khùn; i sím-mi̍h sî khì khùn, sím-mi̍h sî khí-lâi, lāu-pē ia̍h lóng m̄-chai. 36 Án-ni Lô-tek nn̄g ê cha-bó͘-kiáⁿ lóng tùi in lāu-pē lâi hoâi-īn. 37 Tōa-ê siⁿ kiáⁿ, kiò i ê miâ Mô͘-ap, chiū-sī hiān-kim Mô͘-ap lâng ê chó͘. 38 Sòe-ê ia̍h siⁿ-kiáⁿ, kiò i ê miâ Piān-á-bí, chiū-sī hiān-kim A-bûn lâng ê chó͘.
1 亞伯拉罕tùi-hia暫暫ǹg南方徙去；tòa tī Ka-te-su kap Su-jíⁿ ê中間，寄居tī Ki-la̍h-jíⁿ。 2 亞伯拉罕講到伊ê bó͘撒拉，就講，是我ê小妹；Ki-la̍h-jíⁿ王A-pí-bí-le̍k差人將撒拉chhōa去。 3 暝時，眠夢中，上帝來kā A-pí-bí-le̍k講，你是該死ê人，因為你所chhōa hitê婦人人是人ê bó͘。 4 A-pí-bí-le̍k iáu未親近伊，就講，主ah，行義ê百姓，你亦beh滅伊mah？ 5 Hit人kiám m̄是本身對我講，伊是我ê小妹mah？就婦人人亦本身講，伊是我ê兄；我做chitê事，是心端正，手清氣。 6 上帝tī夢中對伊講，我本知你做chitê事，是心中端正；我chiah阻擋你，免得你得罪我；所以我無容允你摸tio̍h伊。 7 Taⁿ你tio̍h將chit人ê bó͘還伊，因為伊是先知；伊beh替你祈禱，你chiah會活；你若m̄還伊，你tio̍h知，你kap你所有ê人lóng得beh死。 8 A-pí-bí-le̍k透早起來，叫眾奴僕來，將chiahê tāi-chì lóng講hō͘ in聽；hiahê人lóng真驚。 9 A-pí-bí-le̍k叫亞伯拉罕來，對伊講，你對阮所行ê是甚麼事？我有甚麼得罪你，你竟然hō͘我kap我國內ê人陷落重罪？你對我行m̄應該行ê事。 10 A-pí-bí-le̍k koh對亞伯拉罕講，你看見甚麼，chiah做chitê事？ 11 亞伯拉罕講，我phah算chit所在ê人lóng無驚上帝；in beh為tio̍h我ê bó͘ ê緣故刣死我。 12 Koh伊亦實在是我ê小妹，siâng父koh母，後來做我ê bó͘。 13 當上帝kah我離開老父ê家，四界行ê時，我kā伊講，將來咱所到ê所在，請你稱我講，伊是我ê兄；這就是你款待我ê恩。 14 A-pí-bí-le̍k將羊、牛、奴僕、女婢，hō͘亞伯拉罕；koh將伊ê bó͘撒拉還伊。 15 A-pí-bí-le̍k koh講，你看，我ê地lóng tī你ê面前，你thang隨意khiā起。 16 Koh kā撒拉講，我hō͘你ê兄一千銀，kā你對全家做遮目睭ê；taⁿ你tī一切lóng無不是。 17 亞伯拉罕祈禱上帝；上帝就醫好A-pí-bí-le̍k kap伊ê bó͘ kap女婢，in就能生kiáⁿ。 18 因為耶和華為tio̍h亞伯拉罕ê bó͘撒拉ê緣故，已經hō͘ A-pí-bí-le̍k家內ê婦人人bōe會生kiáⁿ。
1 A-pek-la̍h-hán tùi-hia chām-chām ǹg lâm-hng sóa-khì; tòa tī Ka-te-su kap Su-jíⁿ ê tiong-kan, kià-ku tī Ki-la̍h-jíⁿ. 2 A-pek-la̍h-hán kóng kàu i ê bó͘ Sat-la̍h, chiū kóng, Sī góa ê sió-bē; Ki-la̍h-jíⁿ ông A-pí-bí-le̍k chhe lâng chiong Sat-la̍h chhōa-khì. 3 Mî-sî, bîn-bāng-tiong, Siōng-tè lâi kā A-pí-bí-le̍k kóng, Lí sī kai sí ê lâng, in-ūi lí só͘ chhōa hit ê hū-jîn-lâng sī lâng ê bó͘. 4 A-pí-bí-le̍k iáu-bē chhin-kūn i, chiū kóng, Chú ah, kiâⁿ-gī ê peh-sìⁿ, Lí ia̍h beh bia̍t i mah? 5 Hit-lâng kiám m̄-sī pún-sin tùi góa kóng, I sī góa ê sió-bē mah? Chiū hū-jîn-lâng ia̍h pún-sin kóng, I sī góa ê hiaⁿ; góa chòe chit ê sū, sī sim toan-chèng, chhiú chheng-khì. 6 Siōng-tè tī bāng-tiong tùi i kóng, Góa pún chai lí chòe chit ê sū, sī sim-tiong toan-chèng; Góa chiah chó͘-tòng lí, bián-tit lí tek-chōe Góa; só͘-í Góa bô iông-ún lí bong-tio̍h i. 7 Taⁿ lí tio̍h chiong chit lâng ê bó͘ hêng-i, in-ūi i sī sian-ti; i beh thòe lí kî-tó, lí chiah ōe oa̍h; lí nā m̄ hêng-i, lí tio̍h chai, lí kap lí só͘ ū ê lâng lóng tit-beh sí. 8 A-pí-bí-le̍k thàu-chá khí-lâi, kiò chèng lô͘-po̍k lâi, chiong chiah ê tāi-chì lóng kóng hō͘ in thiaⁿ; hiah ê lâng lóng chin kiaⁿ. 9 A-pí-bí-le̍k kiò A-pek-la̍h-hán lâi, tùi i kóng, Lí tùi goán só͘ kiâⁿ-ê sī sím-mi̍h sū? góa ū sím-mi̍h tek-chōe lí, lí kéng-jiân hō͘ góa kap góa kok-lāi ê lâng hām-lo̍h tāng-chōe? lí tùi góa kiâⁿ m̄ eng-kai kiâⁿ ê sū. 10 A-pí-bí-le̍k koh tùi A-pek-la̍h-hán kóng, Lí khòaⁿ-kìⁿ sím-mi̍h, chiah chòe chit ê sū? 11 A-pek-la̍h-hán kóng, Góa phah-sǹg chit só͘-chāi ê lâng lóng bô kiaⁿ Siōng-tè; in beh ūi-tio̍h góa ê bó͘ ê iân-kò͘ thâi-sí góa. 12 Koh i ia̍h si̍t-chāi sī góa ê sió-bē, siâng-pē koh-bú, āu-lâi chòe góa ê bó͘. 13 Tng Siōng-tè kah góa lī-khui lāu-pē ê ke, sì-kòe kiâⁿ ê sî, góa kā i kóng, chiong-lâi lán só͘ kàu ê só͘-chāi, chhiáⁿ lí chheng góa kóng, I sī góa ê hiaⁿ; che chiū-sī lí khoán-thāi góa ê un. 14 A-pí-bí-le̍k chiong iûⁿ, gû, lô͘-po̍k, lú-pī, hō͘ A-pek-la̍h-hán; koh chiong i ê bó͘ Sat-la̍h hêng-i. 15 A-pí-bí-le̍k koh kóng, Lí khòaⁿ, góa ê tōe lóng tī lí ê bīn-chêng, lí thang sûi-ì khiā-khí. 16 Koh kā Sat-la̍h kóng, Góa hō͘ lí ê hiaⁿ chi̍t chheng gûn, kā lí tùi choân-ke chòe jia ba̍k-chiu-ê; taⁿ lí tī it-chhè lóng bô put-sī. 17 A-pek-la̍h-hán kî-tó Siōng-tè; Siōng-tè chiū i-hó A-pí-bí-le̍k kap i ê bó͘ kap lú-pī, in chiū ōe siⁿ kiáⁿ. 18 In-ūi Iâ-hô-hoa ūi-tio̍h A-pek-la̍h-hán ê bó͘ Sat-la̍h ê iân-kò͘, í-keng hō͘ A-pí-bí-le̍k ke-lāi ê hū-jîn-lâng bōe-ōe siⁿ-kiáⁿ.
1 耶和華照伊前ê話眷顧撒拉；tùi án-ni耶和華照伊所講ê kā撒拉做成。 2 亞伯拉罕年老ê時，撒拉懷孕；到上帝對伊講ê日期，就kā伊生一个kiáⁿ。 3 亞伯拉罕kā撒拉所生ê kiáⁿ，號名叫以撒。 4 以撒出世八日，亞伯拉罕照上帝所吩咐ê，kā伊ê kiáⁿ行割禮。 5 伊ê kiáⁿ以撒出世ê時，亞伯拉罕一百歲。 6 撒拉講，上帝hō͘我歡喜笑；見若聽見ê，beh kap我同歡喜笑。 7 Koh講，Chī-chūi能事先kā亞伯拉罕講，撒拉beh hō͘嬰á suh奶？因為tī伊年老ê時，我kā伊生一个kiáⁿ。 8 Gín-á漸漸大，就斷奶；以撒斷奶ê日，亞伯拉罕排設大筵席。 9 當時埃及人夏甲kā亞伯拉罕所生ê kiáⁿ teh冷笑，hō͘撒拉看見； 10 就對亞伯拉罕講，Tio̍h趕出chitê女婢kap伊ê kiáⁿ；因為女婢ê kiáⁿ bōe-thang kap我ê kiáⁿ以撒同做後嗣。 11 亞伯拉罕因為伊ê kiáⁿ ê緣故不止憂悶。 12 上帝kā亞伯拉罕講，你m̄-thang為tio̍h chitê gín-á以及你ê女婢憂悶；見若撒拉對你講ê，你lóng tio̍h聽；因為tùi以撒生ê，chiah beh稱做你ê後裔。 13 論到女婢ê kiáⁿ，我亦beh hō͘伊成做一國，因為伊亦是你生ê。 14 亞伯拉罕早早起來，the̍h餅kap一皮袋ê水hō͘夏甲；hē tī伊ê肩頭頂；連gín-á續kah伊去；伊就去，到別是巴ê曠野就行無路。 15 皮袋內ê水用了，夏甲就將gín-á放tī細叢樹腳。 16 本身行開，約略射(cho̍h)一支箭ê遠，相對面teh坐；講，我不忍看gín-á死；就相對面坐，出聲大啼哭。 17 上帝聽見gín-á ê聲；上帝ê使者tùi天裡叫夏甲講，夏甲，你有甚麼tāi-chì？m̄免驚；上帝已經聽見gín-á tī-hia ê聲。 18 起來，亦hō͘ gín-á起來，牽tī你ê手；我beh hō͘伊成做大國。 19 上帝開伊ê目睭，伊就看見水井；就將皮袋去入水到滿滿，續hō͘ gín-á lim。 20 上帝kap gín-á tī-teh，伊就漸漸大；tiàm-tī曠野，成做射箭ê人。 21 伊khiā起tī Pa-lân ê曠野；伊ê老母tùi埃及地kā伊chhōa一个bó͘。 22 當hit時A-pí-bí-le̍k，kap伊ê軍長Hui-kok，對亞伯拉罕講，見若你所行ê事，上帝kap你tī-teh。 23 Taⁿ你tī-chia tio̍h kí上帝kap我chiù-chōa，m̄-thang欺負我，kap我ê kiáⁿ，以及我ê孫；我àn怎樣好款待你，你亦tio̍h照án-ni款待我，以及你所寄居ê地方。 24 亞伯拉罕講，我beh chiù-chōa。 25 前A-pí-bí-le̍k ê奴僕霸佔一口水井，亞伯拉罕為chitê事嫌A-pí-bí-le̍k。 26 A-pí-bí-le̍k講，Chī-chūi做chitê tāi-chì，我m̄知；你亦未有kā我講，到今á日我chiah聽見。 27 亞伯拉罕將羊kap牛hō͘ A-pí-bí-le̍k；兩人就相kap立約。 28 亞伯拉罕將七隻母ê羊羔另外放tī一所在。 29 A-pí-bí-le̍k問亞伯拉罕講，你將七隻母ê羊羔另外放tī一所在，是甚麼意思？ 30 應講，你tio̍h tùi我ê手收chit七隻母ê羊羔，做我開chit口井ê證據。 31 所以名hit所在叫別是巴，因為in兩人tī-hia有chiù-chōa。 32 In tī別是巴立約；A-pí-bí-le̍k就kap伊ê軍長Hui-kok起身tò去腓利士地。 33 亞伯拉罕tī別是巴栽一叢垂絲柳樹；koh tī-hia求叫耶和華永永tī-teh上帝ê名。 34 亞伯拉罕tī腓利士人ê地寄居chōe-chōe日。
1 Iâ-hô-hoa chiàu I chêng ê ōe koàn-kò͘ Sat-la̍h; tùi án-ni Iâ-hô-hoa chiàu I só͘ kóng-ê kā Sat-la̍h chòe-chiâⁿ. 2 A-pek-la̍h-hán nî-lāu ê sî, Sat-la̍h hoâi-īn; kàu Siōng-tè tùi i kóng ê ji̍t-kî, chiū kā i siⁿ chi̍t ê kiáⁿ. 3 A-pek-la̍h-hán kā Sat-la̍h só͘ siⁿ ê kiáⁿ, hō miâ kiò Í-sat. 4 Í-sat chhut-sì poeh-ji̍t, A-pek-la̍h-hán chiàu Siōng-tè só͘ hoan-hù-ê, kā i ê kiáⁿ kiâⁿ kat-lé. 5 I ê kiáⁿ Í-sat chhut-sì ê sî, A-pek-la̍h-hán chi̍t-pah hè. 6 Sat-la̍h kóng, Siōng-tè hō͘ góa hoaⁿ-hí chhiò; kìⁿ-nā thiaⁿ-kìⁿ-ê, beh kap góa tâng hoaⁿ-hí chhiò. 7 Koh kóng, Chī-chūi ōe tāi-seng kā A-pek-la̍h-hán kóng, Sat-la̍h beh hō͘ eⁿ-á suh-leng? in-ūi tī i nî-lāu ê sî, góa kā i siⁿ chi̍t ê kiáⁿ. 8 Gín-á chiām-chiām tōa, chiū tn̄g-leng; Í-sat tn̄g-leng ê ji̍t, A-pek-la̍h-hán pâi-siat tōa iân-sia̍h. 9 Tng-sî Ai-ki̍p lâng Hā-kah kā A-pek-la̍h-hán só͘ siⁿ ê kiáⁿ teh léng-chhiò, hō͘ Sat-la̍h khòaⁿ-kìⁿ; 10 chiū tùi A-pek-la̍h-hán kóng, Tio̍h kóaⁿ-chhut chit ê lú-pī kap i ê kiáⁿ; in-ūi lú-pī ê kiáⁿ bōe-thang kap góa ê kiáⁿ Í-sat tâng chòe hō͘-sû. 11 A-pek-la̍h-hán in-ūi i ê kiáⁿ ê iân-kò͘ put-chí iu-būn. 12 Siōng-tè kā A-pek-la̍h-hán kóng, Lí m̄-thang ūi-tio̍h chit ê gín-á í-ki̍p lí ê lú-pī iu-būn; kìⁿ-nā Sat-la̍h tùi lí kóng ê, lí lóng tio̍h thiaⁿ; in-ūi tùi Í-sat siⁿ-ê, chiah beh chheng-chòe lí ê hō͘-è. 13 Lūn-kàu lú-pī ê kiáⁿ, Góa ia̍h beh hō͘ i chiâⁿ-chòe chi̍t-kok, in-ūi i ia̍h sī lí siⁿ-ê. 14 A-pek-la̍h-hán chá-chá khí-lâi, the̍h piáⁿ kap chi̍t phê-tē ê chúi hō͘ Hā-kah; hē tī i ê keng-thâu-téng; liân gín-á sòa kah i khì; i chiū khì, kàu Pia̍t-sī-pa ê khòng-iá chiū kiâⁿ bô lō͘. 15 Phê-tē lāi ê chúi ēng-liáu, Hā-kah chiū chiong gín-á pàng tī sòe châng chhiū kha. 16 Pún-sin kiâⁿ-khui, iok-lio̍k cho̍h chi̍t ki chìⁿ ê hn̄g, saⁿ-tùi-bīn teh chē; kóng, Góa put-jím khòaⁿ gín-á sí; chiū saⁿ-tùi-bīn chē, chhut-siaⁿ tōa thî-khàu. 17 Siōng-tè thiaⁿ-kìⁿ gín-á ê siaⁿ; Siōng-tè ê sù-chiá tùi thiⁿ-ni̍h kiò Hā-kah kóng, Hā-kah, lí ū sím-mi̍h tāi-chì? m̄-bián kiaⁿ; Siōng-tè í-keng thiaⁿ-kìⁿ gín-á tī-hia ê siaⁿ. 18 Khí-lâi, ia̍h hō͘ gín-á khí-lâi, khan tī lí ê chhiú; Góa beh hō͘ i chiâⁿ-chòe tōa-kok. 19 Siōng-tè khui i ê ba̍k-chiu, i chiū khòaⁿ-kìⁿ chúi-chíⁿ; chiū chiong phê-tē khì ji̍p-chúi kàu móa-móa, sòa hō͘ gín-á lim. 20 Siōng-tè kap gín-á tī-teh, i chiū chiām-chiām tōa; tiàm tī khòng-iá, chiâⁿ-chòe siā-chìⁿ ê lâng. 21 I khiā-khí tī Pa-lân ê khòng-iá; i ê lāu-bú tùi Ai-ki̍p tōe kā i chhōa chi̍t ê bó͘. 22 Tng hit-sî A-pí-bí-le̍k, kap i ê kun-tiúⁿ Hui-kok, tùi A-pek-la̍h-hán kóng, Kìⁿ-nā lí só͘ kiâⁿ ê sū, Siōng-tè kap lí tī-teh. 23 Taⁿ lí tī-chia tio̍h kí Siōng-tè kap góa chiù-chōa, m̄-thang khi-hū góa, kap góa ê kiáⁿ, í-ki̍p góa ê sun; góa àn-cháiⁿ-iūⁿ hó khoán-thāi lí, lí ia̍h tio̍h chiàu án-ni khoán-thāi góa, í-ki̍p lí só͘ kià-ku ê tōe-hng. 24 A-pek-la̍h-hán kóng, Góa beh chiù-chōa. 25 Chêng A-pí-bí-le̍k ê lô͘-po̍k pà-chiàm chi̍t kháu chúi-chíⁿ, A-pek-la̍h-hán ūi chit ê sū hiâm A-pí-bí-le̍k. 26 A-pí-bí-le̍k kóng, Chī-chūi chòe chit ê tāi-chì, góa m̄-chai; lí ia̍h bē ū kā góa kóng, kàu kin-á-ji̍t góa chiah thiaⁿ-kìⁿ. 27 A-pek-la̍h-hán chiong iûⁿ kap gû hō͘ A-pí-bí-le̍k; nn̄g-lâng chiū saⁿ-kap li̍p-iok. 28 A-pek-la̍h-hán chiong chhit chiah bú ê iûⁿ-ko lēng-gōa pàng tī chi̍t só͘-chāi. 29 A-pí-bí-le̍k mn̄g A-pek-la̍h-hán kóng, Lí chiong chhit chiah bú ê iûⁿ-ko lēng-gōa pàng tī chi̍t só͘-chāi, sī sím-mi̍h ì-sù? 30 Ìn kóng, Lí tio̍h tùi góa ê chhiú siu chí chhit chiah bú ê iûⁿ-ko, chòe góa khui chit kháu chíⁿ ê chèng-kù. 31 Só͘-í miâ hit só͘-chāi kiò Pia̍t-sī-pa, in-ūi in nn̄g-lâng tī-hia ū chiù-chōa. 32 In tī Pia̍t-sī-pa li̍p-iok; A-pí-bí-le̍k chiū kap i ê kun-tiúⁿ Hui-kok khí-sin tò-khì Hui-lī-sū tōe. 33 A-pek-la̍h-hán tī Pia̍t-sī-pa chai chi̍t châng sûi-si-liú chhiū; koh tī-hia kiû-kiò Iâ-hô-hoa éng-éng tī-teh Siōng-tè ê miâ. 34 A-pek-la̍h-hán tī Hui-lī-sū lâng ê tōe kià-ku chōe-chōe ji̍t.
1 Chiahê tāi-chì以後，上帝試亞伯拉罕，叫伊講，亞伯拉罕；伊應講，我tī-chia。 2 上帝講，你帶你ê kiáⁿ，就是你獨生ê kiáⁿ，你所疼ê以撒，去Mô͘-lī-a ê地，我所beh指示你ê山；tī-hia將伊獻做燒祭。 3 亞伯拉罕透早起來，備辦驢，帶伊ê兩個少年人，kap伊ê kiáⁿ以撒；亦破燒祭ê柴；就起身去上帝所指示伊ê地。 4 到第三日，亞伯拉罕kia̍h目遠遠看hitê所在。 5 亞伯拉罕對伊ê少年人講，Lín kap驢tiàm chia thèng候，我kap gín-á去hia敬拜，就tò來lín chia。 6 亞伯拉罕將燒祭ê柴hē tī伊ê kiáⁿ以撒ê身上，家己ê手kia̍h火kap刀；tùi hit-tia̍p兩人相kap行。 7 以撒kā伊ê老父亞伯拉罕講，父ah；伊講，我ê kiáⁿ，我tī-chia。伊講，你看，火kap柴lóng有；總是燒祭ê羊á tī tah-lo̍h？ 8 亞伯拉罕講，我ê kiáⁿ，上帝beh家己備辦燒祭ê羊á；tùi hit-tia̍p兩人相kap行。 9 In到上帝指示伊ê所在；亞伯拉罕tī-hia起壇，將柴排好，縛伊ê kiáⁿ以撒，hē tī 壇裡ê柴頂。 10 亞伯拉罕就伸手kia̍h刀，beh 刣伊ê kiáⁿ。 11 耶和華ê使者對天叫伊講，亞伯拉罕，亞伯拉罕；伊應講，我tī-chia。 12 使者講，你m̄-thang tī chitê gín-á ê身上下手，亦m̄-thang對伊怎樣做；因為我taⁿ知你是敬畏上帝，亦無將你ê kiáⁿ，就是你獨生ê，留teh，m̄-hō͘我。 13 亞伯拉罕kia̍h目看，看見後面有一隻羊káng，角纏tī kui抱ê樹á；亞伯拉罕就去掠hit隻羊káng來，獻做燒祭，來替伊ê kiáⁿ。 14 亞伯拉罕名hitê所在叫耶和華以勒；到今á日人iáu teh講，Tī耶和華ê山beh備辦。 15 耶和華ê使者第二pái對天叫亞伯拉罕講， 16 耶和華講，你已經行chitê事，無留你ê kiáⁿ，就是你獨生ê kiáⁿ，我就kí家己chiù-chōa講， 17 我賜福beh賜福你，加添beh加添你ê後裔，親像天頂ê 星，海邊ê沙；你ê後裔beh得tio̍h chiahê對敵ê關隘。 18 Koh地上萬邦beh因為你ê後裔得tio̍h福氣；因為你聽thàn我ê話。 19 Tùi hit-tia̍p，亞伯拉罕tò來伊hiahê少年人hia；in就相kap起身去別是巴。亞伯拉罕就tiàm-tī別是巴。 20 Chiahê tāi-chì了後，有人kā亞伯拉罕講，Bi̍t-ka kā你ê小弟Ná-ho̍k生kiáⁿ； 21 大ê O͘-su，小弟Pò͘-su，kap A-lân ê老父，Ki-bó͘-lī； 22 kap Ki-siat、Hap-só、Pit-ta̍t、Ek-la̍h、Pí-thó͘-lī，(Pí-thó͘-lī生利百加)。 23 Chit八人lóng是Bi̍t-ka kā亞伯拉罕ê小弟Ná-ho̍k生ê。 24 Ná-ho̍k ê細姨，名Liû-má，生Thê-pat、Ka-hâm、Tha-hat、kap Má-ka。
1 Chiah ê tāi-chì í-āu, Siōng-tè chhì A-pek-la̍h-hán, kiò i kóng, A-pek-la̍h-hán; i ìn kóng, Góa tī-chia. 2 Siōng-tè kóng, Lí tòa lí ê kiáⁿ, chiū-sī lí to̍k-siⁿ ê kiáⁿ, lí só͘ thiàⁿ ê Í-sat, khì Mô͘-lī-a ê tōe, Góa só͘ beh chí-sī lí ê soaⁿ; tī-hia chiong i hiàn-chòe sio-chè. 3 A-pek-la̍h-hán thàu-chá khí-lâi, pī-pān lû, tòa i ê nn̄g ê siàu-liân lâng, kap i ê kiáⁿ Í-sat; ia̍h phòa sio-chè ê chhâ; chiū khí-sin khì Siōng-tè só͘ chí-sī i ê tōe. 4 Kàu tē-saⁿ ji̍t, A-pek-la̍h-hán kia̍h-ba̍k hn̄g-hn̄g khòaⁿ hit ê só͘-chāi. 5 A-pek-la̍h-hán tùi i ê siàu-liân lâng kóng, Lín kap lû tiàm chia thèng-hāu, góa kap gín-á khì hia kèng-pài, chiū tò-lâi lín chia. 6 A-pek-la̍h-hán chiong sio-chè ê chhâ hē tī i ê kiáⁿ Í-sat ê sin-chiūⁿ, ka-kī ê chhiú kia̍h hé kap to; tùi hit-tia̍p nn̄g-lâng saⁿ-kap kiâⁿ. 7 Í-sat kā i ê lāu-pē A-pek-la̍h-hán kóng, Pē ah; i kóng, Góa ê kiáⁿ, góa tī-chia. I kóng, Lí khòaⁿ, hé kap chhâ lóng ū; chóng-sī sio-chè ê iûⁿ-á tī tah-lo̍h? 8 A-pek-la̍h-hán kóng, Góa ê kiáⁿ, Siōng-tè beh ka-kī pī-pān sio-chè ê iûⁿ-á; tùi hit-tia̍p nn̄g-lâng saⁿ-kap kiâⁿ. 9 In kàu Siōng-tè chí-sī i ê só͘-chāi; A-pek-la̍h-hán tī-hia khí tôaⁿ, chiong chhâ pâi-hó, pa̍k i ê kiáⁿ Í-sat, hē tī tôaⁿ-ni̍h ê chhâ-téng. 10 A-pek-la̍h-hán chiū chhun-chhiú kia̍h-to, beh thâi i ê kiáⁿ. 11 Iâ-hô-hoa ê sù-chiá tùi thiⁿ kiò i kóng, A-pek-la̍h-hán, A-pek-la̍h-hán; i ìn kóng, Góa tī-chia. 12 Sù-chiá kóng, Lí m̄-thang tī chit ê gín-á ê sin-chiūⁿ hē-chhiú, ia̍h m̄-thang tùi i cháiⁿ-iūⁿ chòe; in-ūi góa taⁿ chai lí sī kèng-ùi Siōng-tè, ia̍h bô chiong lí ê kiáⁿ, chiū-sī lí to̍k-siⁿ-ê, lâu-teh, m̄-hō͘ góa. 13 A-pek-la̍h-hán kia̍h-ba̍k khòaⁿ, khòaⁿ-kìⁿ āu-bīn ū chi̍t chiah iûⁿ-káng, kak tîⁿ tī kui-phō ê chhiū-á; A-pek-la̍h-hán chiū khì lia̍h hit chiah iûⁿ-káng lâi, hiàn chòe sio-chè, lâi thòe i ê kiáⁿ. 14 A-pek-la̍h-hán miâ hit ê só͘-chāi kiò Iâ-hô-hoa-í-le̍k; kàu kin-á-ji̍t lâng iáu teh kóng, Tī Iâ-hô-hoa ê soaⁿ beh pī-pān. 15 Iâ-hô-hoa ê sù-chiá tē-jī pái tùi thiⁿ kiò A-pek-la̍h-hán kóng, 16 Iâ-hô-hoa kóng, Lí í-keng kiâⁿ chit ê sū, bô lâu lí ê kiáⁿ, chiū-sī lí to̍k-siⁿ ê kiáⁿ, Góa chiū kí ka-kī chiù-chōa kóng, 17 Góa sù-hok beh sù-hok lí, ke-thiⁿ beh ke-thiⁿ lí ê hō͘-è, chhin-chhiūⁿ thiⁿ-téng ê chhiⁿ, hái-piⁿ ê soa; lí ê hō͘-è beh tit-tio̍h chiah ê tùi-te̍k ê koan-ài. 18 Koh tōe-chiūⁿ bān-pang beh in-ūi lí ê hō͘-è tit-tio̍h hok-khì; in-ūi lí thiaⁿ-thàn Góa ê ōe. 19 Tùi hit-tia̍p A-pek-la̍h-hán tò-lâi i hiah ê siàu-liân lâng hia; in chiū saⁿ-kap khí-sin khì Pia̍t-sī-pa. A-pek-la̍h-hán chiū tiàm tī Pia̍t-sī-pa. 20 Chiah ê tāi-chì liáu-āu, ū lâng kā A-pek-la̍h-hán kóng, Bi̍t-ka kā lí ê sió-tī Ná-ho̍k siⁿ-kiáⁿ; 21 tōa-ê O͘-su, sió-tī Pò͘-su, kap A-lân ê lāu-pē, Ki-bó͘-lī; 22 kap Ki-siat, Hap-só, Pit-ta̍t, Ek-la̍h, Pí-thó͘-lī, (Pí-thó͘-lī siⁿ Lī-pek-ka). 23 Chí poeh-lâng lóng sī Bi̍t-ka kā A-pek-la̍h-hán ê sió-tī Ná-ho̍k siⁿ-ê. 24 Ná-ho̍k ê sòe-î, miâ Liû-má, siⁿ Thê-pat, Ka-hâm, Tha-hat, kap Má-ka.
1 撒拉享壽一百二十七歲；這是撒拉一生ê年歲。 2 撒拉死tī迦南地ê Ki-lia̍t-a-pa，就是Hi-pek-lûn；亞伯拉罕來，為tio̍h撒拉哀傷啼哭。 3 後來亞伯拉罕tùi死人ê面前起來，kā Hek人講， 4 我tī lín中間是寄居ê出外人；求lín tī-chia hō͘我一个所在做塚地，thang埋葬我ê死人，hō͘我無koh看見伊。 5 Hek人應亞伯拉罕，kā伊講， 6 我ê主，請聽；你tī阮中間做上帝ê bo̍k-pek；chhut-chāi你tī阮ê塚地內揀第一好ê，來埋葬你ê死人；阮無一人m̄容允你tī伊ê塚地lāi埋葬你ê死人。 7 亞伯拉罕起來，對hit所在ê人，就是Hek族，àⁿ腰。 8 對in講，Lín若有意思beh hō͘我埋葬我ê死人，hō͘我無koh看見伊，就請聽我，替我求Só-hat ê kiáⁿ Í-hut-lûn， 9 將伊ê田頭Be̍k-pí-la̍h ê穴hō͘我；伊thang照足額ê價數賣hō͘我；hō͘我tī lín中間有業thang做墓地。 10 當時Í-hut-lûn坐tī Hek人ê中間；tùi hit-tia̍p Hek人Í-hut-lûn tī一切入伊ê城門ê Hek人ê面前，應亞伯拉罕，講， 11 m̄免，我ê主聽我；我beh送你hit坵田，連hit內面ê穴亦hō͘你；tī我同族ê人ê面前，我hō͘你，thang埋葬你ê死人。 12 亞伯拉罕就tī hit所在ê百姓ê面前àⁿ腰； 13 tī hit所在百姓ê面前，對Í-hut-lûn講，你若肯，請聽我；我beh將田ê價錢hō͘你，你tio̍h收；hō͘我thang tī-hia埋葬我ê死人。 14 Í-hut-lûn應亞伯拉罕講， 15 我ê主，請聽我；田值得銀四百sià-khek-le̍k，tī你我ê中間，beh算甚麼？做你埋葬你ê死人。 16 亞伯拉罕聽Í-hut-lûn ê話，照伊tī Hek人ê面前所講ê，將買賣通用ê銀，秤(phêng)四百sià-khek-le̍k hō͘ Í-hut-lûn。 17 Tùi hit-tia̍p， Í-hut-lûn ê田，tī Be̍k-pí-la̍h，Bān-lī ê頭前；hit khu田kap hí內面ê穴，kap田內以及四圍一切ê樹木， 18 tī Hek族人kap一切入伊ê城門ê人ê面前，lóng定tio̍h歸hō͘亞伯拉罕做業。 19 後內亞伯拉罕將伊ê bó͘撒拉埋葬tī迦南地Bān-lī頭前ê be̍k-pí-la̍h 田裡ê穴；Bān-lī就是Hi-pek-lûn。 20 Tùi án-ni, hit坵田kap田裡ê穴，tùi Hek人定tio̍h歸hō͘亞伯拉罕做業，來做墓地。
1 Sat-la̍h hióng-siū chi̍t-pah jī-cha̍p-chhit hè; che sī Sat-la̍h it-seng ê nî-hè. 2 Sat-la̍h sí tī Ka-lâm tōe ê Ki-lia̍t-a-pa, chiū-sī Hi-pek-lûn; A-pek-la̍h-hán lâi, ūi-tio̍h Sat-la̍h ai-siong thî-khàu. 3 Āu-lâi A-pek-la̍h-hán tùi sí-lâng ê bīn-chêng khí-lâi, kā Hek-lâng kóng, 4 Góa tī lín tiong-kan sī kià-ku ê chhut-gōa lâng; kiû lín tī-chia hō͘ góa chi̍t ê só͘-chāi chòe thióng-tōe, thang bâi-chòng góa ê sí-lâng, hō͘ góa bô koh khòaⁿ-kìⁿ i. 5 Hek-lâng ìn A-pek-la̍h-hán, kā i kóng, 6 Góa ê chú, chhiáⁿ thiaⁿ; lí tī goán tiong-kan chòe Siōng-tè ê bo̍k-pek; chhut-chāi lí tī goán ê thióng-tōe-lāi kéng tē-it-hó-ê, lâi bâi-chòng lí ê sí-lâng; goán bô chi̍t-lâng m̄ iông-ún lí tī i ê thióng-tōe-lāi bâi-chòng lí ê sí-lâng. 7 A-pek-la̍h-hán khí-lâi, tùi hit só͘-chāi ê lâng, chiū-sī Hek-cho̍k, àⁿ-io. 8 Tùi in kóng, Lín nā ū ì-sù beh hō͘ góa bâi-chòng góa ê sí-lâng, hō͘ góa bô koh khòaⁿ-kìⁿ i, chiū chhiáⁿ thiaⁿ góa, thòe góa kiû Só-hat ê kiáⁿ Í-hut-lûn, 9 chiong i ê chhân-thâu Be̍k-pí-la̍h ê hia̍t hō͘ góa; i thang chiàu chiok-gia̍h ê kè-sò͘ bōe hō͘ góa; hō͘ góa tī lín tiong-kan ū gia̍p thang chòe bōng-tōe. 10 Tng-sî Í-hut-lûn chē tī Hek-lâng ê tiong-kan; tùi hit-tia̍p Hek-lâng Í-hut-lûn tī it-chhè ji̍p i ê siâⁿ-mn̂g ê Hek-lâng ê bīn-chêng, ìn A-pek-la̍h-hán, kóng, 11 M̄-bián, góa ê Chú thiaⁿ góa; góa beh sàng lí hit khu chhân, liân hit lāi-bīn ê hia̍t ia̍h hō͘ lí; tī góa tâng-cho̍k ê lâng ê bīn-chêng, góa hō͘ lí, thang bâi-chòng lí ê sí-lâng. 12 A-pek-la̍h-hán chiū tī hit só͘-chāi ê peh-sìⁿ ê bīn-chêng àⁿ-io; 13 tī hit só͘-chāi peh-sìⁿ ê bīn-chêng, tùi Í-hut-lûn kóng, Lí nā khéng, chhiáⁿ thiaⁿ góa; góa beh chiong chhân ê kè-chîⁿ hō͘ lí, lí tio̍h siu; hō͘ góa thang tī-hia bâi-chòng góa ê sí-lâng. 14 Í-hut-lûn ìn A-pek-la̍h-hán kóng, 15 Góa ê chú, chhiáⁿ thiaⁿ góa; chhân ta̍t-tit gûn sì-pah sià-khek-le̍k, tī lí góa ê tiong-kan, beh sǹg sím-mi̍h? chòe lí bâi-chòng lí ê sí-lâng. 16 A-pek-la̍h-hán thiaⁿ Í-hut-lûn ê ōe, chiàu i tī Hek-lâng ê bīn-chêng só͘ kóng-ê, chiong bóe-bōe thong-ēng ê gûn, phêng sì-pah sià-khek-le̍k hō͘ Í-hut-lûn. 17 Tùi hit-tia̍p Í-hut-lûn ê chhân, tī Be̍k-pí-la̍h, Bān-lī ê thâu-chêng; hit khu chhân kap hit lāi-bīn ê hia̍t, kap chhân-lāi í-ki̍p sì-ûi it-chhè ê chhiū-ba̍k, 18 tī Hek-cho̍k lâng kap it-chhè ji̍p i ê siâⁿ-mn̂g ê lâng ê bīn-chêng, lóng tiāⁿ-tio̍h kui hō͘ A-pek-la̍h-hán chòe gia̍p. 19 Āu-lâi A-pek-la̍h-hán chiong i ê bó͘ Sat-la̍h bâi-chòng tī Ka-lâm tōe Bān-lī thâu-chêng ê Be̍k-pí-la̍h chhân-ni̍h ê hia̍t; Bān-lī chiū-sī Hi-pek-lûn. 20 Tùi án-ni hit khu chhân kap chhân-ni̍h ê hia̍t, tùi Hek-lâng tiāⁿ-tio̍h kui hō͘ A-pek-la̍h-hán chòe gia̍p, lâi chòe bōng-tōe.
1 亞伯拉罕歲壽長，年老；耶和華tī一切ê事lóng賜福hō͘亞伯拉罕。 2 亞伯拉罕對伊家內管理全業ê老奴僕講，請將你ê手hē tī我ê大腿下， 3 我beh kah你kí耶和華，就是天ê上帝，地ê上帝，來chiù-chōa，我khiā起迦南人ê中間，你m̄-thang kā我ê kiáⁿ娶in ê cha-bó͘-kiáⁿ做bó͘。 4 你tio̍h去我ê本地本族，kā我ê kiáⁿ以撒娶一个bó͘。 5 奴僕應伊講，設使cha-bó͘-gín-á m̄肯tè我來chit所在，我就tio̍h將你ê kiáⁿ帶tò去你所tùi hia出來ê地mah？ 6 亞伯拉罕kā伊講，你tio̍h謹慎，m̄-thang chhōa我ê kiáⁿ tò去hia； 7 天ê上帝，耶和華，bat chhōa我離開老父ê家，kap本族ê地，對我講話，亦對我chiù-chōa講，我beh將chitê地賞賜你ê後裔；伊beh差伊ê使者tī你ê面前；你就thang tùi hia kā我ê kiáⁿ娶一个bó͘。 8 設使cha-bó͘-gín-á m̄肯tè你來，我kah你chiù ê chōa就kap你無干涉；獨獨m̄-thang帶我ê kiáⁿ tò去hia。 9 奴僕就將伊ê手hē tī主人亞伯拉罕ê大腿下；為tio̍h chitê事對伊chiù-chōa。 10 Hit-ê奴僕tùi伊主人ê駱駝中，取十隻駱駝，續帶伊主人ta̍k樣ê財寶；起身去Bí-só͘-pho-tāi-bí，到Ná-ho̍k ê城。 11 日beh暗，眾cha-bó͘-gín-á出來chhiūⁿ水；伊就hō͘駱駝跪tī城外ê井邊。 12 伊講，我ê主人亞伯拉罕ê上帝耶和華ah，求你施恩hō͘我ê主人亞伯拉罕，hō͘我今á日有好遭遇。 13 我taⁿ khiā tī井邊，城內人ê cha-bó͘-gín-á teh出來chhiūⁿ水； 14 我beh對一个cha-bó͘-gín-á講，請放落你ê水瓶，hō͘我lim水；伊若講，請lim，我亦beh hō͘你ê駱駝lim；願hitê cha-bó͘-gín-á是你所定tio̍h hō͘你ê奴僕以撒做bó͘；án-ni，我就知你施恩hō͘我ê主人。 15 話iáu講未soah，利百加肩頭背水瓶出來，伊是Pí-thó͘-lī生ê；Pí-thó͘-lī是亞伯拉罕ê小弟Ná-ho̍k ê bó͘ Bi̍t-ka ê kiáⁿ。 16 Hit-ê cha-bó͘-gín-á面貌極其súi，iáu是在室女，亦未bat有人親近伊；伊落去井邊，chhiūⁿ滿伊ê瓶就起來。 17 奴僕走進前迎接伊講，求你將瓶內ê水淡薄á我lim。 18 Cha-bó͘-gín-á講，我ê主，請lim；就趕緊放水瓶落來，掛tī手裡，hō͘伊lim。 19 Hō͘伊lim明白，koh講，我亦beh kā你ê駱駝chhiūⁿ水，hō͘ in lim夠額。 20 伊就趕緊將瓶內ê水piàⁿ tī槽裡；koh走到井裡chhiūⁿ水就kā伊所有ê駱駝chhiūⁿ。 21 Hit-ê人注目看伊，恬恬無講話，ài知耶和華賞賜伊順序ê路á無。 22 駱駝lim明白，hit人就the̍h一个金環，重半sià-khek-le̍k，兩個金手環，重十sià-khek-le̍k hō͘ hitê cha-bó͘-gín-á； 23 講，你是是誰 ê cha-bó͘-kiáⁿ？請kā我講；lín老父ê家，有所在thang hō͘阮歇á無？ 24 伊就kā伊講，我是Bi̍t-ka tùi Ná-ho̍k所生ê kiáⁿ，Pí-thó͘-lī ê cha-bó͘-kiáⁿ。 25 伊koh對伊講，阮有草料米糧充足；亦有所在thang歇。 26 Hit人就àⁿ頭敬拜耶和華，講， 27 Tio̍h o-ló我ê主亞伯拉罕ê上帝耶和華；伊用慈愛誠實款待我ê主人，lóng無停止；論到我，耶和華tī路上引chhōa我到我ê主人兄弟ê家。 28 Cha-bó͘-gín-á走tò去，照chiahê話kā in老母thong家ê人講。 29 利百加有一个兄，名叫拉班，伊出去井邊，就近hit-人。 30 伊看見hitê環，koh看見手環tī in小妹ê手，mā聽見in小妹利百加ê話，講hit人對我講án-ni，án-ni。伊就去hit人hia，看見hit人iáu khiā tī駱駝邊，óa近水井。 31 就kā伊講：你chitê得tio̍h耶和華賜福ê，請入來，啥事khiā tī外面？我已經備辦厝，kah駱駝ê所在。 32 Hit人就入伊ê厝，伊就tháu駱駝所載ê，koh用草料米糧飼駱駝，捧水hō͘ hit人以及跟tè ê人洗腳。 33 將食物排tī伊ê面前，hō͘伊食。總是伊講：「我無beh食，thèng候我講明我ê使命」。拉班講：「請你講。」 34 伊就講：「我是亞伯拉罕ê奴僕。 35 耶和華大大賜福tī我ê主人，hō͘伊興旺，koh hō͘伊羊、牛、銀、金、奴僕、女婢、駱駝kap驢。 36 我ê主人ê bó͘撒拉，年老ê時，kā我ê主人生一个kiáⁿ，我ê主人亦將一切所有ê hō͘ chitê kiáⁿ。 37 我ê主人kah我chiù-chōa講：我khiā起迦南人ê地，你m̄-thang kā我ê kiáⁿ娶in ê cha-bó͘-kiáⁿ做bó͘。 38 你tio̍h去我ê老父ê家，我本族hia，kā我ê kiáⁿ娶一个bó͘。 39 我對我ê主人講：驚了cha-bó͘-gín-á m̄肯tè我來。 40 伊就kā我講：我所服事ê耶和華beh差伊ê使者kap你相kap去，hō͘你順序ê路，你就thang tùi我ê宗族，我ê父ê家，kā我ê kiáⁿ娶一个bó͘。 41 獨獨ài你到我本族hia，我kap你所chiù ê chōa，就kah你無干涉；in若m̄ hō͘你，我kap你chiù ê chōa，mā kah你無干涉。 42 今á日我到井邊，講：我ê主人亞伯拉罕ê上帝耶和華ah，你若hō͘我所行ê路順序； 43 我taⁿ khiā tī水井邊，對一个出來chhiūⁿ水ê cha-bó͘-gín-á講，請你將你瓶裡ê水淡薄hō͘我lim； 44 伊若講，做你lim，我亦beh kā你ê駱駝chhiūⁿ水；願hitê cha-bó͘-gín-á做耶和華所定tio̍h hō͘我ê主人ê kiáⁿ做bó͘-ê。 45 我心內ê話iáu講未了，利百加就出來，肩頭頂背水瓶；落去井邊chhiūⁿ水；我就kā伊講，請你hō͘我lim。 46 伊就趕緊tùi肩頭頂放落水瓶，講，請lim，我亦hō͘你ê駱駝lim；我就lim，伊亦hō͘我ê駱駝lim。 47 我koh問伊講，你是是誰 ê cha-bó͘-kiáⁿ？伊應講，我是Bi̍t-ka tùi Ná-ho̍k所生ê kiáⁿ，Pí-thó͘-lī，ê cha-bó͘-kiáⁿ；我就將環掛tī伊ê鼻，手環掛tī伊ê手。 48 我就àⁿ頭拜耶和華，o-ló我ê主亞伯拉罕ê上帝耶和華；因為伊chhōa我行tú好ê路，hō͘我得tio̍h我ê主ê小弟ê cha-bó͘孫來hō͘伊ê kiáⁿ。 49 Taⁿ lín若beh用慈愛誠實款待我ê主人，就kā我講；若m̄，亦kā我講；hō͘我好thang ǹg左á是ǹg右。 50 拉班kap Pí-thó͘-lī應講，Tāi-chì出tī耶和華，阮bōe能對你講好á pháiⁿ。 51 你看，利百加tī你ê面前，thang將伊chhōa去，hō͘你ê主人ê kiáⁿ做bó͘，照耶和華所講。 52 亞伯拉罕ê奴僕聽見in chiahê話，就ǹg耶和華仆tī地裡。 53 Hit-tia̍p，奴僕the̍h出銀器金器kap衣服送利百加；koh將寶物送伊ê兄kap伊ê老母。 54 奴僕kap tè伊ê人lim食歇暝；透早起來，就講，請差我tò去我ê主人hia。 55 利百加ê兄kap伊ê老母講，容允cha-bó͘-gín-á kap阮tiàm幾日，siāng少十日，然後伊thang去。 56 伊對in講，M̄-thang阻擋我，耶和華已經hō͘我順序ê路；請差我去，hō͘我tò去我ê主人hia。 57 In講，阮叫cha-bó͘-gín-á來，探伊ê話意。 58 就叫利百加來，問伊講，你beh kap chit人去mah？伊講，我beh去。 59 In就差小妹利百加，kap伊ê奶母，kap亞伯拉罕ê奴僕，以及tè伊ê人去。 60 In就kā利百加祝福，對伊講，阮小妹ah，願你做千萬人ê老母，願你ê後裔得tio̍h對敵ê關隘。 61 利百加kap伊ê女婢起來騎駱駝，tè hitê人；奴僕就chhōa利百加去。 62 以撒khiā起tī南地，hit時tùi Pí-jíⁿ-la̍h-hái-lâi ê路來。 63 日beh暗，以撒出來tī田裡，靜靜teh想，kia̍h目一下看，看見駱駝來。 64 利百加看見以撒，就tùi駱駝落來。 65 問hitê奴僕講，Tī田裡行來迎接咱ê是是誰？奴僕講，是我ê主人。利百加就the̍h帕家己罩。 66 奴僕將所做一切ê事，kā以撒講。 67 以撒就牽利百加入伊ê老母撒拉ê布棚，娶伊做bó͘；koh真疼伊。以撒tùi老母死後，到chit-tia̍p chiah得tio̍h安慰。
1 A-pek-la̍h-hán hè-siū tn̂g, nî-lāu; Iâ-hô-hoa tī it-chhè ê sū lóng sù-hok hō͘ A-pek-la̍h-hán. 2 A-pek-la̍h-hán tùi i ke-lāi koán-lí choân-gia̍p ê lāu lô͘-po̍k kóng, Chhiáⁿ chiong lí ê chhiú hē tī góa ê tōa-thúi-ē, 3 góa beh kah lí kí Iâ-hô-hoa, chiū-sī thiⁿ ê Siōng-tè, tōe ê Siōng-tè, lâi chiù-chōa, góa khiā-khí Ka-lâm lâng ê tiong-kan, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘. 4 Lí tio̍h khì góa ê pún-tōe pún-cho̍k, kā góa ê kiáⁿ Í-sat chhōa chi̍t ê bó͘. 5 Lô͘-po̍k ìn i kóng, Siat-sú cha-bó͘-gín-á m̄-khéng tè góa lâi chit só͘-chāi, góa chiū tio̍h chiong lí ê kiáⁿ tòa tò-khì lí só͘ tùi hia chhut-lâi ê tōe mah? 6 A-pek-la̍h-hán kā i kóng, Lí tio̍h kín-sīn, m̄-thang chhōa góa ê kiáⁿ tò-khì hia; 7 thiⁿ ê Siōng-tè, Iâ-hô-hoa, bat chhōa góa lī-khui lāu-pē ê ke, kap pún-cho̍k ê tōe, tùi góa kóng-ōe, ia̍h tùi góa chiù-chōa kóng, Góa beh chiong chit ê tōe siúⁿ-sù lí ê hō͘-è; I beh chhe I ê sù-chiá tī lí ê bīn-chêng; lí chiū thang tùi hia kā góa ê kiáⁿ chhōa chi̍t ê bó͘. 8 Siat-sú cha-bó͘-gín-á m̄-khéng tè lí lâi, góa kah lí chiù ê chōa chiū kap lí bô kan-sia̍p; to̍k-to̍k m̄-thang tòa góa ê kiáⁿ tò-khì hia. 9 Lô͘-po̍k chiū chiong i ê chhiú hē tī chú-lâng A-pek-la̍h-hán ê tōa-thúi-ē; ūi-tio̍h chit ê sū tùi i chiù-chōa. 10 Hit ê lô͘-po̍k tùi i chú-lâng ê lo̍k-tô-tiong, chhú cha̍p-chiah lo̍k-tô, sòa tòa i chú-lâng ta̍k-iūⁿ ê châi-pó; khí-sin khì Bí-só͘-pho-tāi-bí, kàu Ná-ho̍k ê siâⁿ. 11 Ji̍t beh àm, chèng cha-bó͘-gín-á chhut-lâi chhiūⁿ chúi; i chiū hō͘ lo̍k-tô kūi tī siâⁿ-gōa ê chíⁿ-piⁿ. 12 I kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, kiû Lí si-un hō͘ góa ê chú-lâng A-pek-la̍h-hán, hō͘ góa kin-á-ji̍t ū hó cho-gū. 13 Góa taⁿ khiā tī chíⁿ-piⁿ, siâⁿ-lāi lâng ê cha-bó͘-gín-á teh chhut-lâi chhiūⁿ chúi; 14 góa beh tùi chi̍t ê cha-bó͘-gín-á kóng, Chhiáⁿ pàng-lo̍h lí ê chúi-pân, hō͘ góa lim chúi; i nā kóng, Chhiáⁿ lim, góa ia̍h beh hō͘ lí ê lo̍k-tô lim; goān hit ê cha-bó͘-gín-á sī Lí só͘ tiāⁿ-tio̍h hō͘ lí ê lô͘-po̍k Í-sat chòe-bó͘; án-ni, góa chiū chai Lí si-un hō͘ góa ê chú-lâng. 15 Ōe iáu kóng bē soah, Lī-pek-ka keng-thâu pē chúi-pân chhut-lâi, i sī Pí-thó͘-lī siⁿ-ê; Pí-thó͘-lī sī A-pek-la̍h-hán ê sió-tī Ná-ho̍k ê bó͘ Bi̍t-ka ê kiáⁿ. 16 Hit ê cha-bó͘-gín-á bīn-māu ke̍k-kî súi, iáu sī chāi-sek-lú, ia̍h bē-bat ū lâng chhin-kūn i; i lo̍h-khì chíⁿ-piⁿ, chhiūⁿ-móa i ê pân chiū khí-lâi. 17 Lô͘-po̍k cháu chìn-chêng ngiâ-chih i kóng, Kiû lí chiong pân-lāi ê chúi tām-po̍h-á góa lim. 18 Cha-bó͘-gín-á kóng, Góa ê chú, chhiáⁿ lim; chiū kóaⁿ-kín pàng chúi-pân lo̍h-lâi, khòa tī chhiú-ni̍h, hō͘ i lim. 19 Hō͘ i lim bêng-pe̍k, koh kóng, Góa ia̍h beh kā lí ê lo̍k-tô chhiūⁿ chúi, hō͘ in lim kàu-gia̍h. 20 I chiū kóaⁿ-kín chiong pân-lāi ê chúi piàⁿ tī chô-ni̍h; koh cháu kàu chíⁿ-ni̍h chhiūⁿ chúi chiū kā i só͘ ū ê lo̍k-tô chhiūⁿ. 21 Hit ê lâng chù-ba̍k khòaⁿ-i, tiām-tiām bô kóng-ōe, ài chai Iâ-hô-hoa siúⁿ-sù i sūn-sū ê lō͘ á-bô. 22 Lo̍k-tô lim bêng-pe̍k, hit-lâng chiū the̍h chi̍t ê kim-khoân, tāng pòaⁿ sià-khek-le̍k, nn̄g ê kim chhiú-khoân, tāng cha̍p sià-khek-le̍k hō͘ hit ê cha-bó͘-gín-á; 23 kóng, Lí sī chī-chūi ê cha-bó͘-kiáⁿ? chhiáⁿ kā góa kóng; lín lāu-pē ê ke, ū só͘-chāi thang hō͘ goán hioh á-bô? 24 I chiū kā i kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī ê cha-bó͘-kiáⁿ. 25 I koh tùi i kóng, Goán ū chháu-liāu bí-niû chhiong-chiok; ia̍h ū só͘-chāi thang hioh. 26 Hit-lâng chiū àⁿ-thâu kèng-pài Iâ-hô-hoa, kóng, 27 Tio̍h o-ló góa ê chú A-pek-la̍h-hán ê Siōng-tè Iâ-hô-hoa; I ēng chû-ài sêng-si̍t khoán-thāi góa ê chú-lâng, lóng bô thêng-chí; lūn-kàu góa, Iâ-hô-hoa tī lō͘-chiūⁿ ín-chhōa góa kàu góa ê chú-lâng hiaⁿ-tī ê ke. 28 Cha-bó͘-gín-á cháu tò-khì, chiàu chiah ê ōe kā in lāu-bú thong-ke ê lâng kóng. 29 Lī-pek-ka ū chi̍t ê hiaⁿ, miâ kiò La̍h-pan, i chhut-khì chíⁿ-piⁿ, chiū-kūn hit-lâng. 30 I khòaⁿ-kìⁿ hit ê khoân, koh khòaⁿ-kìⁿ chhiú-khoân tī in sió-bē ê chhiú; ia̍h thiaⁿ-kìⁿ in sió-bē Lī-pek-ka ê ōe, kóng, Hit-lâng tùi góa kóng án-ni, án-ni; i chiū khì hit-lâng hia, khòaⁿ-kìⁿ hit-lâng iáu khiā tī lo̍k-tô piⁿ, óa-kūn chúi-chíⁿ. 31 Chiū kā i kóng, Lí chit ê tit-tio̍h Iâ-hô-hoa sù-hok-ê, chhiáⁿ ji̍p-lâi, siáⁿ-sū khiā tī gōa-bīn? Góa í-keng pī-pān chhù, kap lo̍k-tô ê só͘-chāi. 32 Hit-lâng chiū ji̍p i ê chhù, i chiū tháu lo̍k-tô só͘ chài-ê, koh ēng chháu-liāu bí-niû chhī lo̍k-tô; phâng chúi hō͘ hit-lâng í-ki̍p kun-tè ê lâng sóe kha. 33 Chiong chia̍h-mi̍h pâi tī i ê bīn-chêng, hō͘ i chia̍h; chóng-sī i kóng, Góa bô beh chia̍h, thèng-hāu góa kóng-bêng góa ê sù-bēng. La̍h-pan kóng, Chhiáⁿ lí kóng. 34 I chiū kóng, Góa sī A-pek-la̍h-hán ê lô͘-po̍k. 35 Iâ-hô-hoa tōa-tōa sù-hok tī góa ê chú-lâng, hō͘ i heng-ōng, koh hō͘ i iûⁿ, gû, gûn, kim, lô͘-po̍k, lú-pī, lo̍k-tô kap lû. 36 Góa ê chú-lâng ê bó͘ Sat-la̍h, nî-lāu ê sî, kā góa ê chú-lâng siⁿ chi̍t ê kiáⁿ; góa ê chú-lâng ia̍h chiong it-chhè só͘-ū-ê hō͘ chit ê kiáⁿ. 37 Góa ê chú-lâng kah góa chiù-chōa kóng, Góa khiā-khí Ka-lâm lâng ê tōe, lí m̄-thang kā góa ê kiáⁿ chhōa in ê cha-bó͘-kiáⁿ chòe bó͘. 38 Lí tio̍h khì góa ê lāu-pē ê ke, góa pún-cho̍k hia, kā góa ê kiáⁿ chhōa chi̍t ê bó͘. 39 Góa tùi góa ê chú-lâng kóng, Kiaⁿ-liáu cha-bó͘-gín-á m̄-khéng tè góa lâi. 40 I chiū kā góa kóng, Góa só͘ ho̍k-sāi ê Iâ-hô-hoa beh chhe I ê sù-chiá kap lí saⁿ-kap khì, hō͘ lí sūn-sū ê lō͘, lí chiū thang tùi góa ê chong-cho̍k, góa ê pē ê ke, kā góa ê kiáⁿ chhōa chi̍t ê bó͘; 41 to̍k-to̍k ài lí kàu góa pún-cho̍k hia, góa kah lí só͘ chiù ê chōa, chiū kap lí bô kan-sia̍p; in nā m̄ hō͘ lí, góa kah lí chiù ê chōa, ia̍h kap lí bô kan-sia̍p. 42 Kin-á-ji̍t góa kàu chíⁿ-piⁿ, kóng, Góa ê chú-lâng A-pek-la̍h-hán ê Siōng-tè Iâ-hô-hoa ah, Lí nā hō͘ góa só͘ kiâⁿ ê lō͘ sūn-sū; 43 góa taⁿ khiā tī chúi-chíⁿ-piⁿ, tùi chi̍t ê chhut-lâi chhiūⁿ chúi ê cha-bó͘-gín-á kóng, Chhiáⁿ lí chiong lí pân-ni̍h ê chúi tām-po̍h hō͘ góa lim; 44 i nā kóng, Chòe lí lim, góa ia̍h beh kā lí ê lo̍k-tô chhiūⁿ chúi; goān hit ê cha-bó͘-gín-á chòe Iâ-hô-hoa só͘ tiāⁿ-tio̍h hō͘ góa ê chú-lâng ê kiáⁿ chòe bó͘-ê. 45 Góa sim-lāi ê ōe iáu kóng bē liáu, Lī-pek-ka chiū chhut-lâi, keng-thâu-téng pē chúi-pân; lo̍h-khì chíⁿ-piⁿ chhiūⁿ chúi; góa chiū kā i kóng, Chhiáⁿ lí hō͘ góa lim. 46 I chiū kóaⁿ-kín tùi keng-thâu-téng pàng-lo̍h chúi-pân, kóng, Chhiáⁿ lim, góa ia̍h hō͘ lí ê lo̍k-tô lim; góa chiū lim, i ia̍h hō͘ góa ê lo̍k-tô lim. 47 Góa koh mn̄g i kóng, Lí sī chī-chūi ê cha-bó͘-kiáⁿ? I ìn kóng, Góa sī Bi̍t-ka tùi Ná-ho̍k só͘ siⁿ ê kiáⁿ, Pí-thó͘-lī, ê cha-bó͘-kiáⁿ; góa chiū chiong khoân kòa tī i ê phīⁿ, chhiú-khoân kòa tī i ê chhiú. 48 Góa chiū àⁿ-thâu pài Iâ-hô-hoa, o-ló góa ê chú A-pek-la̍h-hán ê Siōng-tè Iâ-hô-hoa; in-ūi I chhōa góa kiâⁿ tú-hó ê lō͘, hō͘ góa tit-tio̍h góa ê chú ê sió-tī ê cha-bó͘-sun lâi hō͘ i ê kiáⁿ. 49 Taⁿ lín nā beh ēng chû-ài sêng-si̍t khoán-thāi góa ê chú-lâng, chiū kā góa kóng; nā m̄, ia̍h kā góa kóng; hō͘ góa hó thang ǹg-chó á-sī ǹg-iū. 50 La̍h-pan kap Pí-thó͘-lī ìn kóng, Tāi-chì chhut tī Iâ-hô-hoa, goán bōe-ōe tùi lí kóng hó á pháiⁿ. 51 Lí khòaⁿ, Lī-pek-ka tī lí ê bīn-chêng, thang chiong i chhōa-khì, hō͘ lí ê chú-lâng ê kiáⁿ chòe bó͘, chiàu Iâ-hô-hoa só͘ kóng. 52 A-pek-la̍h-hán ê lô͘-po̍k thiaⁿ-kìⁿ in chiah ê ōe, chiū ǹg Iâ-hô-hoa phak tī tōe-ni̍h. 53 Hit-tia̍p lô͘-po̍k the̍h-chhut gûn-khì kim-khì kap i-ho̍k sàng Lī-pek-ka; koh chiong pó-mi̍h sàng i ê hiaⁿ kap i ê lāu-bú. 54 Lô͘-po̍k kap tè i ê lâng lim-chia̍h hioh-mî; thàu-chá khí-lâi, chiū kóng, Chhiáⁿ chhe góa tò-khì góa ê chú-lâng hia. 55 Lī-pek-ka ê hiaⁿ kap i ê lāu-bú kóng, Iông-ún cha-bó͘-gín-á kap goán tiàm kúi-ji̍t, siāng-chió cha̍p-ji̍t, jiân-āu i thang khì. 56 I tùi in kóng, M̄-thang chó͘-tòng góa, Iâ-hô-hoa í-keng hō͘ góa sūn-sū ê lō͘; chhiáⁿ chhe góa khì, hō͘ góa tò-khì góa ê chú-lâng hia. 57 In kóng, Goán kiò cha-bó͘-gín-á lâi, thàm i ê ōe-ì. 58 Chiū kiò Lī-pek-ka lâi, mn̄g i kóng, Lí beh kap chit-lâng khì mah? i kóng, Góa beh khì. 59 In chiū chhe sió-bē Lī-pek-ka, kap i ê leng-bú, kap A-pek-la̍h-hán ê lô͘-po̍k, í-ki̍p tè i ê lâng khì. 60 In chiū kā Lī-pek-ka chiok-hok, tùi i kóng, Goán sió-bē ah, goān lí chòe chheng-bān lâng ê lāu-bú, goān lí ê hō͘-è tit-tio̍h tùi-te̍k ê koan-ài. 61 Lī-pek-ka kap i ê lú-pī khí-lâi khiâ lo̍k-tô, tè hit ê lâng; lô͘-po̍k chiū chhōa Lī-pek-ka khì. 62 Í-sat khiā-khí tī Lâm-tōe, hit-sî tùi Pí-jíⁿ-la̍h-hái-lâi ê lō͘ lâi. 63 Ji̍t beh àm, Í-sat chhut-lâi tī chhân-ni̍h, chēng-chēng teh siūⁿ, kia̍h-ba̍k chi̍t-ē khòaⁿ, khòaⁿ-kìⁿ lo̍k-tô lâi. 64 Lī-pek-ka khòaⁿ-kìⁿ Í-sat, chiū tùi lo̍k-tô lo̍h-lâi. 65 Mn̄g hit ê lô͘-po̍k kóng, Tī chhân-ni̍h kiâⁿ-lâi ngiâ-chih lán-ê sī chī-chūi? Lô͘-po̍k kóng, Sī góa ê chú-lâng. Lī-pek-ka chiū the̍h phè ka-kī tà. 66 Lô͘-po̍k chiong só͘ chòe it-chhè ê sū, kā Í-sat kóng. 67 Í-sat chiū khan Lī-pek-ka ji̍p i ê lāu-bú Sat-la̍h ê pò͘-pîⁿ, chhōa i chòe bó͘; koh chin thiàⁿ i. Í-sat tùi lāu-bú sí-āu, kàu chit-tia̍p chiah tit-tio̍h an-ùi.
1 亞伯拉罕koh娶一个bó͘，名叫Ki-thó͘-la̍h。 2 Ki-thó͘-la̍h kā伊生Sim-lân、Iok-san、Bí-tàn、米甸、I-si-pa、Su-a。 3 Iok-san生Sī-pa kap Tí-tàn。Tí-tàn ê kiaⁿ孫是A-su-lī族、Lī-to͘-sī族，kap Lī-o͘-bí族。 4 米甸ê kiáⁿ是Í-hoat、Í-hut、Hap-lo̍k、A-pí-tāi、Í-le̍k-tāi；chiahê lóng是Ki-thó͘-la̍h ê kiáⁿ。 5 亞伯拉罕將一切所有ê hō͘以撒。 6 亞伯拉罕將財物分hō͘伊chiahê細姨ê kiáⁿ；thàn伊本身iáu活ê時，差in離開伊ê kiáⁿ以撒去東勢，到東pêng ê地。 7 亞伯拉罕一生ê年日是一百七十五歲。 8 亞伯拉罕食長歲壽，成做老人，年歲滿足，斷氣死，tò祖。 9 伊ê kiáⁿ以撒、以實瑪利，將伊埋葬tī Be̍k-pí-la̍h ê穴；chitê穴tī Bān-lī ê頭前，Hek人Só-hat ê kiáⁿ Í-hut-lûn ê田中， 10 就是亞伯拉罕tùi Hek人所買hit坵田。亞伯拉罕kap伊ê bó͘撒拉lóng埋葬tī-hia。 11 亞伯拉罕死了後，上帝賜福hō͘伊ê kiáⁿ以撒；以撒óa近Pí-jíⁿ-la̍h-hái-lâi khiā起。 12 亞伯拉罕ê kiáⁿ以實瑪利ê世系，記tī下底：以實瑪利就是撒拉ê女婢埃及人夏甲tùi亞伯拉罕所生ê。 13 以實瑪利chiahê kiáⁿ ê名，照伊ê名字世系，親像下底：以實瑪利ê大kiáⁿ Nî-pâi-iok；koh有Ki-ta̍t、A-tek-pia̍t、Bí-pí-sam； 14 Bí-si-má、Tō͘-má、Má-sat； 15 Hap-tāi、Thê-má、I-tu̍t、Ná-hui-si、Ki-tí-má； 16 chiahê就是以實瑪利ê kiáⁿ ê名；照in ê鄉村營寨，做十二族ê族長。 17 以實瑪利一生歲壽，一百三十七；氣斷死就tò祖。 18 伊ê kiaⁿ孫tòa tī Hap-hui-la̍h到埃及頭前ê Su-jíⁿ，beh去亞述ê路；khiā起tī伊眾兄弟ê頭前。 19 亞伯拉罕ê kiáⁿ以撒ê世系，記tī下底：亞伯拉罕生以撒； 20 以撒娶利百加做bó͘ ê時，tú-á四十歲。伊是Pa-tàn-a-lân地ê A-lân人Pí-thó͘-lī ê cha-bó͘-kiáⁿ，A-lân人拉班ê小妹。 21 以撒因為伊ê bó͘無生kiáⁿ，替伊祈求耶和華；耶和華允准伊所求；伊ê bó͘利百加就懷孕。 22 Gín-á tī伊ê腹內相khoeh；伊就講，若是chit款，我mih-sái án-ni？就去問耶和華。 23 耶和華kā伊講，兩國tī你腹內，兩族beh對你ê身軀出；chit族beh khah強hit族；序大ê beh服事序細ê。 24 生產ê日期到，果然腹內是雙生ê。 25 頭一个出來ê，身體紅紅，thong身軀親像皮á衫；就kā伊號名做以掃。 26 tè後伊ê小弟koh出來，伊ê手擒以掃ê腳後tiⁿ；就kā伊號名叫雅各。兩個kiáⁿ出世ê時，以撒tú-á六十歲。 27 兩個gín-á漸漸大；以掃gâu phah獵，常常tī山野；雅各做人恬靜，常常tòa布棚內。 28 以撒疼以掃，因為常常食伊ê野味。利百加疼雅各。 29 有一日雅各煮湯，以掃tùi山野tò來，厭倦到極。 30 以掃對雅各講，我真厭倦，求你用chitê紅ê湯hō͘我食；因為án-ni以掃亦名叫以東。 31 雅各講，你今á日用大kiáⁿ ê名份賣hō͘我。 32 以掃講，我to beh死lah；chitê大kiáⁿ ê名份，對tī我有啥利益？ 33 雅各講，今á日你tio̍h對我chiù-chōa。伊就對伊chiù-chōa，將大kiáⁿ ê名份賣hō͘雅各。 34 雅各就將餅kap紅豆湯hō͘以掃；伊就lim食，起來做伊去；這就是以掃看輕大kiáⁿ ê名份。
1 A-pek-la̍h-hán koh chhōa chi̍t ê bó͘, miâ kiò Ki-thó͘-la̍h. 2 Ki-thó͘-la̍h kā i siⁿ Sim-lân, Iok-san, Bí-tàn, Bí-tiân, I-si-pa, Su-a. 3 Iok-san siⁿ Sī-pa kap Tí-tàn. Tí-tàn ê kiáⁿ-sun sī A-su-lī cho̍k, Lī-to͘-sī cho̍k, kap Lī-o͘-bí cho̍k. 4 Bí-tiân ê kiáⁿ sī Í-hoat, Í-hut, Hap-lo̍k, A-pí-tāi, Í-le̍k-tāi; chiah-ê lóng sī Ki-thó͘-la̍h ê kiáⁿ. 5 A-pek-la̍h-hán chiong it-chhè só͘-ū-ê hō͘ Í-sat. 6 A-pek-la̍h-hán chiong châi-bu̍t pun hō͘ i chiah ê sòe-î ê kiáⁿ; thàn i pún-sin iáu oa̍h ê sî, chhe in lī-khui i ê kiáⁿ Í-sat khì tang-sì, kàu tang-pêng ê tōe. 7 A-pek-la̍h-hán it-seng ê nî-ji̍t sī chi̍t-pah chhit-cha̍p gō͘ hè. 8 A-pek-la̍h-hán chia̍h tn̂g hè-siū, chiâⁿ-chòe lāu-lâng, nî-hè móa-chiok, tn̄g-khùi sí, tò-chó͘. 9 I ê kiáⁿ Í-sat, Í-si̍t-má-lī, chiong i bâi-chòng tī Be̍k-pí-la̍h ê hia̍t; chit ê hia̍t tī Bān-lī ê thâu-chêng, Hek-lâng Só-hat ê kiáⁿ Í-hut-lûn ê chhân-tiong, 10 chiū-sī A-pek-la̍h-hán tùi Hek-lâng só͘ bóe hit khu chhân. A-pek-la̍h-hán kap i ê bó͘ Sat-la̍h lóng bâi-chòng tī-hia. 11 A-pek-la̍h-hán sí liáu-āu, Siōng-tè sù-hok hō͘ i ê kiáⁿ Í-sat; Í-sat óa-kūn Pí-jíⁿ-la̍h-hái-lâi khiā-khí. 12 A-pek-la̍h-hán ê kiáⁿ Í-si̍t-má-lī ê sè-hē, kì tī ē-tóe: Í-si̍t-má-lī chiū-sī Sat-la̍h ê lú-pī Ai-ki̍p lâng Hā-kah tùi A-pek-la̍h-hán só͘ siⁿ-ê. 13 Í-si̍t-má-lī chiah ê kiáⁿ ê miâ, chiàu i ê miâ-jī sè-hē, chhin-chhiūⁿ ē-tóe: Í-si̍t-má-lī ê tōa-kiáⁿ Nî-pâi-iok; koh ū Ki-ta̍t, A-tek-pia̍t, Bí-pí-sam; 14 Bí-si-má, Tō͘-má, Má-sat; 15 Hap-tāi, Thê-má, I-tu̍t, Ná-hui-si, Ki-tí-má; 16 chiah-ê chiū-sī Í-si̍t-má-lī ê kiáⁿ ê miâ; chiàu in ê hiuⁿ-chhng iâⁿ-chē, chòe cha̍p-jī cho̍k ê cho̍k-tiúⁿ. 17 Í-si̍t-má-lī it-seng hè-siū, chi̍t-pah saⁿ-cha̍p chhit; khùi-tn̄g sí chiū tò-chó͘. 18 I ê kiáⁿ-sun tòa tī Hap-hui-la̍h kàu Ai-ki̍p thâu-chêng ê Su-jíⁿ, beh khì A-su̍t ê lō͘; khiā-khí tī i chèng hiaⁿ-tī ê thâu-chêng. 19 A-pek-la̍h-hán ê kiáⁿ Í-sat ê sè-hē, kì tī ē-tóe: A-pek-la̍h-hán siⁿ Í-sat; 20 Í-sat chhōa Lī-pek-ka chòe bó͘ ê sî, tú-á sì-cha̍p hè. I sī Pa-tàn-a-lân tōe ê A-lân lâng Pí-thó͘-lī ê cha-bó͘-kiáⁿ, A-lân lâng La̍h-pan ê sió-bē. 21 Í-sat in-ūi i ê bó͘ bô siⁿ-kiáⁿ, thòe i kî-kiû Iâ-hô-hoa; Iâ-hô-hoa ún-chún i só͘ kiû; i ê bó͘ Lī-pek-ka chiū hoâi-īn. 22 Gín-á tī i ê pak-lāi saⁿ-khoeh; i chiū kóng, Nā sī chit-khoán, góa mih-sái án-ni? Chiū khì mn̄g Iâ-hô-hoa. 23 Iâ-hô-hoa kā i kóng, Nn̄g-kok tī lí pak-lāi, nn̄g-cho̍k beh tùi lí ê sin-khu chhut; chit-cho̍k beh khah-kiông hit-cho̍k; sī-tōa-ê beh ho̍k-sāi sī-sòe-ê. 24 Seng-sán ê ji̍t-kî kàu, kó-jiân pak-lāi sī siang-siⁿ-ê. 25 Thâu-chi̍t-ê chhut-lâi-ê, sin-thé âng-âng, thong sin-khu chhin-chhiūⁿ phê-á-saⁿ; chiū kā i hō-miâ chòe Í-sò. 26 Tè-āu i ê sió-tī koh chhut-lâi, i ê chhiú khîⁿ Í-sò ê kha-āu-tiⁿ; chiū kā i hō-miâ kiò Ngá-kok. Nn̄g ê kiáⁿ chhut-sì ê sî, Í-sat tú-á la̍k-cha̍p hè. 27 Nn̄g ê gín-á chiām-chiām tōa; Í-sò gâu phah-la̍h, siông-siông tī soaⁿ-iá; Ngá-kok chòe-lâng thiâm-chēng, siông-siông tòa pò͘-pîⁿ-lāi. 28 Í-sat thiàⁿ Í-sò, in-ūi siông-siông chia̍h i ê iá-bī. Lī-pek-ka thiàⁿ Ngá-kok. 29 Ū chi̍t ji̍t Ngá-kok chú-thng, Í-sò tùi soaⁿ-iá tò-lâi, ià-siān kàu-ke̍k. 30 Í-sò tùi Ngá-kok kóng, Góa chin ià-siān, kiû lí ēng chit ê âng ê thng hō͘ góa chia̍h; in-ūi án-ni Í-sò ia̍h miâ kiò Í-tong. 31 Ngá-kok kóng, Lí kin-á-ji̍t ēng tōa-kiáⁿ ê bêng-hūn bōe hō͘ góa. 32 Í-sò kóng, Góa to beh sí lah; chit ê tōa-kiáⁿ ê bêng-hūn, tùi tī góa ū siáⁿ lī-ek? 33 Ngá-kok kóng, Kin-á-ji̍t lí tio̍h tùi góa chiù-chōa. I chiū tùi i chiù-chōa, chiong tōa-kiáⁿ ê bêng-hūn bōe hō͘ Ngá-kok. 34 Ngá-kok chiū chiong piáⁿ kap âng-tāu-thng hō͘ Í-sò; i chiū lim-chia̍h, khí-lâi chòe i khì; che chiū-sī Í-sò khòaⁿ-khin tōa-kiáⁿ ê bêng-hūn.
1 亞伯拉罕ê時，頭一pái飢荒以後，hit所在koh有飢荒。以撒就去Ki-la̍h-jíⁿ，到腓利士ê王A-pí-bí-le̍k hia。 2 耶和華對伊出現講，你m̄-thang落去埃及，tio̍h tòa tī我所指示你ê地。 3 你寄居tī chitê地，我beh kap你tī-teh，賜福你；因為我beh將chiahê地lóng hō͘你，kap你ê後裔；我beh堅固我對你ê父亞伯拉罕所chiù ê chōa。 4 我beh加添你ê後裔，親像天裡ê 星hiah-chōe；koh beh將chiahê地lóng hō͘你ê後裔；koh地上萬國beh因為你ê後裔得tio̍h福氣。 5 是因為亞伯拉罕聽我ê話，守我ê吩咐，我ê命令，我ê律例，我ê法度。 6 以撒khiā起Ki-la̍h-jíⁿ。 7 Hit所在ê人問到伊ê bó͘；伊就講，伊是我ê小妹；m̄敢講，是我ê bó͘；心內想，驚了hit所在ê人為tio̍h利百加ê緣故刣我；因為伊面貌真súi。 8 伊tī-hia已經久，腓利士王，A-pí-bí-le̍k，tùi窗á看；看見以撒kap伊ê bó͘利百加teh kún笑。 9 A-pí-bí-le̍k叫以撒來，kā伊講，伊實在是你ê bó͘；你啥事講，伊是我ê小妹？以撒講，我心內想，驚了我為tio̍h伊來死。 10 A-pí-bí-le̍k講，你對阮所做ê是甚麼事？百姓ê中間，險險有人kap你ê bó͘相kap睏；你就hō͘阮陷落罪。 11 Tùi hit-tia̍p，A-pí-bí-le̍k就吩咐眾百姓講，凡若磕tio̍h chit人kap伊ê bó͘-ê，定tio̍h beh hō͘伊死。 12 以撒tī hit所在種作，hit年得tio̍h百倍；耶和華賜伊福氣。 13 伊就成做大，ná久ná大，到成做大富戶。 14 伊有羊群牛群，亦有chōe-chōe奴僕；腓利士人就怨妒伊。 15 當伊ê老父亞伯拉罕tī-teh ê日，伊ê老父ê奴僕所開ê井，腓利士人lóng kā伊塞去，用土thūn滿。 16 A-pí-bí-le̍k kā以撒講，你tio̍h離開阮去，因為你比阮嶄然khah強盛。 17 以撒就離開hia，tī Ki-la̍h-jíⁿ ê山谷搭布棚，tiàm hia khiā起。 18 當伊ê老父亞伯拉罕tī-teh ê日，所開hiahê水井，到亞伯拉罕死後，hō͘腓利士人thūn去；以撒重再kā伊開；猶原照in老父所號ê名來名hiahê井。 19 以撒ê奴僕tī山谷teh掘，tú-tio̍h一个活水ê井。 20 Ki-la̍h-jíⁿ ê牧者kap以撒ê牧者相爭，講，Chitê水是阮ê。以撒就號hitê井ê名叫Ai-sek；因為in kap伊相爭。 21 In koh 開一个井，為chitê井koh相爭；就叫伊ê名Se-thê-ná。 22 離開hia koh 開一个井；in無為chitê井koh相爭；就kā伊號名Lī-hô-pek；是講，耶和華taⁿ hō͘阮開闊ê地；阮beh tī chitê地興旺。 23 以撒tùi hia上去別是巴。 24 Hit暝耶和華對伊出現講，我是你ê老父亞伯拉罕ê上帝，m̄免驚；因為我kap你tī-teh，beh賜福你，hō͘你ê後裔興旺，lóng是為tio̍h我ê奴僕亞伯拉罕ê緣故。 25 伊就tī-hia起一座壇，求叫耶和華ê名，tī-hia搭伊ê布棚。以撒ê奴僕就tī-hia開一个井。 26 A-pí-bí-le̍k kap伊ê朋友A-hō͘-sat以及伊ê軍長Hui-kok，tùi Ki-la̍h-jíⁿ來見伊。 27 以撒對in講，Lín既然怨恨我，kah我離開lín；taⁿ啥事來我chia？ 28 In講，阮明明看見耶和華kap你tī-teh，m̄值tio̍h咱中間你阮chiù-chōa，hō͘阮kap你立約； 29 你無害阮，親像阮未bat 磕tio̍h你，獨獨好款待你，送你安然tò去；taⁿ你是耶和華賜福ê。 30 以撒就為in設筵席，in就食就lim。 31 透早起來，大家chiù-chōa；以撒送in起身，in就安然離開伊去。 32 Siâng hit日，以撒ê奴僕來，將in開井ê事通知伊；講，阮得tio̍h水lah。 33 伊就叫hitê井ê名叫Sī-pa；所以到今á日hitê城ê名叫做別是巴。 34 以掃四十歲ê時，娶Hek人Pí-lī ê cha-bó͘-kiáⁿ Iû-tek，kap Hek人Í-lûn ê cha-bó͘-kiáⁿ Pa-si̍t-boat做bó͘。 35 Chit兩個婦人人常常hō͘以撒kap利百加心內大憂悶。
1 A-pek-la̍h-hán ê sî, thâu-chi̍t-pái ki-hng í-āu, hit só͘-chāi koh ū ki-hng. Í-sat chiū khì Ki-la̍h-jíⁿ, kàu Hui-lī-sū ê ông A-pí-bí-le̍k hia. 2 Iâ-hô-hoa tùi i chhut-hiān kóng, Lí m̄-thang lo̍h-khì Ai-ki̍p, tio̍h tòa tī Góa só͘ chí-sī lí ê tōe. 3 Lí kià-ku tī chit ê tōe, Góa beh kap lí tī-teh, sù-hok lí; in-ūi Góa beh chiong chiah ê tōe lóng hō͘ lí, kap lí ê hō͘-è; Góa beh kian-kò͘ Góa tùi lí ê pē A-pek-la̍h-hán só͘ chiù ê chōa. 4 Góa beh ke-thiⁿ lí ê hō͘-è, chhin-chhiūⁿ thiⁿ-ni̍h ê chhiⁿ hiah-chōe; koh beh chiong chiah ê tōe lóng hō͘ lí ê hō͘-è; koh tōe-chiūⁿ bān-kok beh in-ūi lí ê hō͘-è tit-tio̍h hok-khì. 5 Sī in-ūi A-pek-la̍h-hán thiaⁿ Góa ê ōe, siú Góa ê hoan-hù, Góa ê bēng-lēng, Góa ê lu̍t-lē, Góa ê hoat-tō͘. 6 Í-sat khiā-khí Ki-la̍h-jíⁿ . 7 Hit só͘-chāi ê lâng mn̄g kàu i ê bó͘; i chiū kóng, I sī góa ê sió-bē; m̄-káⁿ kóng, Sī góa ê bó͘; sim-lāi siūⁿ, Kiaⁿ-liáu hit só͘-chāi ê lâng ūi-tio̍h Lī-pek-ka ê iân-kò͘ thâi góa; in-ūi i bīn-māu chin súi. 8 I tī-hia í-keng kú, Hui-lī-sū ông, A-pí-bí-le̍k, tùi thang-á khòaⁿ; khòaⁿ-kìⁿ Í-sat kap i ê bó͘ Lī-pek-ka teh kún-chhiò. 9 A-pí-bí-le̍k kiò Í-sat lâi, kā i kóng, I si̍t-chāi sī lí ê bó͘; lí siáⁿ-sū kóng, I sī góa ê sió-bē? Í-sat kóng, Góa sim-lāi siūⁿ, kiaⁿ-liáu góa ūi-tio̍h i lâi sí. 10 A-pí-bí-le̍k kóng, Lí tùi goán só͘-chòe-ê sī sím-mi̍h sū? peh-sìⁿ ê tiong-kan, hiám-hiám ū lâng kap lí ê bó͘ saⁿ-kap khùn; lí chiū hō͘ goán hām-lo̍h chōe. 11 Tùi hit-tia̍p A-pí-bí-le̍k chiū hoan-hù chèng peh-sìⁿ kóng, Hoān-nā kha̍p-tio̍h chit-lâng kap i ê bó͘-ê, tiāⁿ-tio̍h beh hō͘ i sí. 12 Í-sat tī hit só͘-chāi chèng-choh, hit-nî tit-tio̍h pah-pē; Iâ-hô-hoa sù i hok-khì. 13 I chiū chiâⁿ-chòe tōa, ná-kú ná-tōa, kàu chiâⁿ-chòe tōa hù-hō͘. 14 I ū iûⁿ-kûn gû-kûn, ia̍h ū chōe-chōe lô͘-po̍k; Hui-lī-sū lâng chiū oàn-tò͘ i. 15 Tng i ê lāu-pē A-pek-la̍h-hán tī-teh ê ji̍t, i ê lāu-pē ê lô͘-po̍k só͘ khui ê chíⁿ, Hui-lī-sū lâng lóng kā i that-khì, ēng thô͘ thūn-móa. 16 A-pí-bí-le̍k kā Í-sat kóng, Lí tio̍h lī-khui goán khì, in-ūi lí pí goán chám-jiân khah kiông-sēng. 17 Í-sat chiū lī-khui hia, tī Ki-la̍h-jíⁿ ê soaⁿ-kok tah pò͘-pîⁿ, tiàm hia khiā-khí. 18 Tng i ê lāu-pē A-pek-la̍h-hán tī-teh ê ji̍t, só͘ khui hiah ê chúi-chíⁿ, kàu A-pek-la̍h-hán sí-āu, hō͘ Hui-lī-sū lâng thūn-khì; Í-sat têng-chài kā i khui; iû-goân chiàu in lāu-pē só͘ hō ê miâ lâi miâ hiah ê chíⁿ. 19 Í-sat ê lô͘-po̍k tī soaⁿ-kok teh ku̍t, tú-tio̍h chi̍t ê oa̍h-chúi ê chíⁿ. 20 Ki-la̍h-jíⁿ ê bo̍k-chiá kap Í-sat ê bo̍k-chiá saⁿ-chiⁿ, kóng, Chit ê chúi sī goán-ê. Í-sat chiū hō hit ê chíⁿ ê miâ kiò Ai-sek; in-ūi in kap i saⁿ-chiⁿ. 21 In koh khui chi̍t ê chíⁿ, ūi chit ê chíⁿ koh saⁿ-chiⁿ; chiū kiò i ê miâ Se-thê-ná. 22 Lī-khui hia koh khui chi̍t ê chíⁿ; in bô ūi chit ê chíⁿ koh saⁿ-chiⁿ; chiū kā i hō miâ Lī-hô-pek; sī kóng, Iâ-hô-hoa taⁿ hō͘ goán khui-khoah ê tōe; goán beh tī chit ê tōe heng-ōng. 23 Í-sat tùi hia chiūⁿ-khì Pia̍t-sī-pa. 24 Hit-mî Iâ-hô-hoa tùi i chhut-hiān kóng, Góa sī lí ê lāu-pē A-pek-la̍h-hán ê Siōng-tè, m̄-bián kiaⁿ; in-ūi Góa kap lí tī-teh, beh sù-hok lí, hō͘ lí ê hō͘-è heng-ōng, lóng sī ūi-tio̍h Góa ê lô͘-po̍k A-pek-la̍h-hán ê iân-kò͘. 25 I chiū tī-hia khí chi̍t chō tôaⁿ, kiû-kiò Iâ-hô-hoa ê miâ, tī-hia tah i ê pò͘-pîⁿ. Í-sat ê lô͘-po̍k chiū tī-hia khui chi̍t ê chíⁿ. 26 A-pí-bí-le̍k kap i ê pêng-iú A-hō͘-sat í-ki̍p i ê kun-tiúⁿ Hui-kok, tùi Ki-la̍h-jíⁿ lâi kìⁿ-i. 27 Í-sat tùi in kóng, Lín kì-jiân oàn-hūn góa, kah góa lī-khui lín; taⁿ siáⁿ-sū lâi góa chia? 28 In kóng, Goán bêng-bêng khòaⁿ-kìⁿ Iâ-hô-hoa kap lí tī-teh, m̄-ta̍t-tio̍h lán tiong-kan lí goán chiù-chōa, hō͘ goán kap lí li̍p-iok; 29 lí bô hāi goán, chhin-chhiūⁿ goán bē-bat kha̍p-tio̍h lí, to̍k-to̍k hó khoán-thāi lí, sàng lí an-jiân tò-khì; taⁿ lí sī Iâ-hô-hoa sù-hok-ê. 30 Í-sat chiū ūi in siat iân-sia̍h, in chiū chia̍h chiū lim. 31 Thàu-chá khí-lâi, tāi-ke chiù-chōa; Í-sat sàng in khí-sin, in chiū an-jiân lī-khui i khì. 32 Siâng hit-ji̍t, Í-sat ê lô͘-po̍k lâi, chiong in khui-chíⁿ ê sū thong-ti i; kóng, Goán tit-tio̍h chúi lah. 33 I chiū kiò hit ê chíⁿ ê miâ kiò Sī-pa; só͘-í kàu kin-á-ji̍t hit ê siâⁿ ê miâ kiò-chòe Pia̍t-sī-pa. 34 Í-sò sì-cha̍p hè ê sî, chhōa Hek-lâng Pí-lī ê cha-bó͘-kiáⁿ Iû-tek, kap Hek-lâng Í-lûn ê cha-bó͘-kiáⁿ Pa-si̍t-boat chòe bó͘. 35 Chit nn̄g ê hū-jîn-lâng siông-siông hō͘ Í-sat kap Lī-pek-ka sim-lāi tōa iu-būn.
1 以撒年老，目睭花bōe看見，就叫伊ê大kiáⁿ以掃來，kā伊講，我ê kiáⁿ ah；伊應講，我tī-chia。 2 講，我taⁿ老lah，m̄知tah-lo̍h一日beh死。 3 Taⁿ kia̍h你ê ke-si，就是箭袋kap弓，去山裡，kā我phah獵， 4 照我所合意ê，煮hō͘伊好滋味，捧來hō͘我，我thang食；hō͘我tī未死ê事先kā你祝福。 5 以撒kā伊ê kiáⁿ以掃講話ê時，利百加聽見。以掃去山裡beh phah獵，thang帶tò來。 6 利百加就對伊ê kiáⁿ雅各講，你看，我聽見lín老父kā你ê兄以掃講， 7 你將野獸kā我帶來，kā我煮hō͘伊好滋味，hō͘我食；我beh tī未死ê事先，tī耶和華ê面前kā你祝福。 8 Taⁿ我ê kiáⁿ，你tio̍h聽我ê話，照我所吩咐你ê。 9 你去羊群hia，kā我掠兩隻肥ê山羊á來；我beh kā你ê老父煮好ê味素，照伊所合意ê。 10 你捧去lín老父hia，hō͘伊食；hō͘伊tī未死ê事先kā你祝福。 11 雅各對伊ê老母利百加講，M̄-kú我ê兄以掃身軀有毛，我是光滑。 12 設使我ê老父摸tio̍h我，beh看我做欺騙人ê，我就招咒詛；無得tio̍h祝福。 13 伊ê老母講，我ê kiáⁿ ah，你招ê咒詛歸tī我；做你聽我ê話，去掠來hō͘我。 14 伊就去掠來hō͘伊ê老母；老母就煮好ê滋味，照老父所合意ê。 15 利百加koh hiaⁿh大kiáⁿ以掃收tī伊家內ê súi衫，kā伊ê細kiáⁿ雅各穿。 16 Koh用山羊á皮包雅各ê手，kap伊頷頸光滑ê位。 17 就將所煮ê好滋味kap餅，hē tī伊ê kiáⁿ雅各ê手。 18 雅各到in老父hia，講，我ê父ah；伊講，我tī-chia；我ê kiáⁿ，你是是誰？ 19 雅各對伊ê老父講，我是你ê大kiáⁿ以掃；我已經照你所吩咐我ê去行；請你起來坐，食我所phah-tio̍h-ê，好thang kā我祝福。 20 以撒對伊ê kiáⁿ講，我ê kiáⁿ，你怎樣chiah快得tio̍h？伊講，因為你ê上帝耶和華hō͘我好遭遇來得tio̍h。 21 以撒kā雅各講，我ê kiáⁿ ah，你近óa來，我beh摸你，看你真正是我ê kiáⁿ以掃，á m̄是。 22 雅各就óa近伊ê老父以撒；伊就摸伊講，聲，是雅各ê聲；手，是以掃ê手。 23 以撒分別bōe明，因為伊ê手有毛，親像伊ê兄以掃ê手；就kā伊祝福。 24 Koh講，你真正是我ê kiáⁿ以掃mah？伊講，我是。 25 以撒講，捧來hō͘我，我beh食我ê kiáⁿ所得tio̍h ê野味，好thang kā你祝福。就捧hō͘伊，伊就食；亦捧酒hō͘伊，伊就lim。 26 伊ê老父以撒對伊講，我ê kiáⁿ，進前來chim我。 27 伊就進前，chim伊ê老父；伊ê老父phīⁿ-tio̍h伊ê衫ê芳味，就kā伊祝福講： 我ê kiáⁿ ê芳味， 親像耶和華賜福ê田ê芳味； 28 願上帝賞賜你天頂ê甘露； 世上ê肥地， 五穀kap新ê酒真chōe； 29 眾百姓服事你， 列國跪拜你， 你做你兄弟ê主， 你ê老母ê kiáⁿ跪拜你； 咒詛你ê受咒詛， 祝福你ê得tio̍h福氣。 30 以撒kā雅各祝福明白，雅各tú-tú tùi伊ê老父以撒hia出來，伊ê兄以掃phah獵tò來。 31 伊亦煮好ê味素，捧來hō͘伊ê老父，講，我ê父ah，請起來食kiáⁿ所phah-tio̍h-ê，好thang kā我祝福。 32 伊ê老父以撒kā伊講，你是是誰？伊講，我是你ê kiáⁿ，就是你ê大kiáⁿ，以掃。 33 以撒大驚，ngia̍uh-ngia̍uh-chhoah，講，He是是誰，你未來ê事先，捧伊所phah-tio̍h-ê來hō͘我；我食伊，kā伊祝福？伊的確beh得tio̍h福氣。 34 以掃聽見老父ê話，開聲叫苦大哭；對伊ê老父講，我ê父ah，我，你亦tio̍h kā我祝福。 35 以撒講，你ê小弟用詭計來，搶你ê福份。 36 以掃講，伊名做雅各，kiám無真合mah？伊欺騙我兩pái；前搶我大kiáⁿ ê名份；你看，taⁿ伊koh搶我ê福份。Koh講，Kiám無留一个thang kā我祝福mah？ 37 以撒應以掃講，我已經立伊做你ê主，亦將伊ê眾兄弟hō͘伊做奴僕；亦用五穀新酒養飼伊；我ê kiáⁿ ah，taⁿ我iáu能kā你做甚麼？ 38 以掃kā伊ê老父講，父ah，你ê祝福kiám只有一pái mah？我ê父ah，我，你亦tio̍h kā我祝福。 39 以掃開聲啼哭。伊ê老父以撒應伊，講： 你所khiā起ê，beh有世上ê肥地， 亦有天頂ê甘露； 40 你beh óa靠刀劍度活，koh beh服事你ê小弟； 到你奮興ê時， Beh對你ê頷頸滾開伊ê牛擔。 41 以掃因為伊ê老父kā雅各祝福氣，就怨恨雅各；心內講，為老父丁憂ê時近lah；到hit時，我beh 刣死我ê小弟雅各。 42 有人將伊ê大kiáⁿ以掃ê話kā利百加講；伊就差人去叫伊ê細kiáⁿ雅各來，kā伊講，你ê兄以掃beh 刣你，來消伊ê恨氣。 43 Taⁿ我ê kiáⁿ，你tio̍h聽我ê話；起來，走去哈蘭，我ê兄拉班hia； 44 kap伊tiàm幾日，thèng候你ê兄受氣消。 45 到你ê兄受氣soah，bōe記得你對伊所做ê事，hit時我就差人chhōa你tùi hia tò來。我啥事一日失落lín兩人？ 46 利百加kā以撒講，我因為chiahê Hek人ê cha-bó͘-kiáⁿ，連性命都 m̄-ài。設使雅各也娶chit所在ê cha-bó͘-kiáⁿ做bó͘，親像Hek人ê cha-bó͘-kiáⁿ hit款，我活有啥路用？
1 Í-sat nî-lāu, ba̍k-chiu hoe bōe khòaⁿ-kìⁿ, chiū kiò i ê tōa-kiáⁿ Í-sò lâi, kā i kóng, Góa ê kiáⁿ ah; i ìn kóng, Góa tī-chia. 2 Kóng, Góa taⁿ lāu lah, m̄-chai tah-lo̍h chi̍t-ji̍t beh sí. 3 Taⁿ kia̍h lí ê ke-si, chiū-sī chìⁿ-tē kap keng, khì soaⁿ-ni̍h, kā góa phah-la̍h, 4 chiàu góa só͘ kah-ì ê, chú hō͘ i hó chu-bī, phâng-lâi hō͘ góa, góa thang chia̍h; hō͘ góa tī bē sí ê tāi-seng kā lí chiok-hok. 5 Í-sat kā i ê kiáⁿ Í-sò kóng-ōe ê sî, Lī-pek-ka thiaⁿ-kìⁿ. Í-sò khì soaⁿ-ni̍h beh phah-la̍h, thang tòa tò-lâi. 6 Lī-pek-ka chiū tùi i ê kiáⁿ Ngá-kok kóng, Lí khòaⁿ, góa thiaⁿ-kìⁿ lín lāu-pē kā lí ê hiaⁿ Í-sò kóng, 7 Lí chiong iá-siù kā góa tòa-lâi, kā góa chú hō͘ i hó chu-bī, hō͘ góa chia̍h; góa beh tī bē sí ê tāi-seng, tī Iâ-hô-hoa ê bīn-chêng kā lí chiok-hok. 8 Taⁿ góa ê kiáⁿ, lí tio̍h thiaⁿ góa ê ōe, chiàu góa só͘ hoan-hù lí-ê. 9 Lí khì iûⁿ-kûn hia, kā góa lia̍h nn̄g chiah pûi ê soaⁿ-iûⁿ-á lâi; góa beh kā lí ê lāu-pē chú hó ê bī-sò͘, chiàu i só͘ kah-ì-ê. 10 Lí phâng-khì lín lāu-pē hia, hō͘ i chia̍h; hō͘ i tī bē sí ê tāi-seng kā lí chiok-hok. 11 Ngá-kok tùi i ê lāu-bú Lī-pek-ka kóng, M̄-kú góa ê hiaⁿ Í-sò sin-khu ū mn̂g, góa sī kng-ku̍t. 12 Siat-sú góa ê lāu-pē bong-tio̍h góa, beh khòaⁿ góa chòe khi-phiàn lâng-ê, góa chiū chio chiù-chó͘; bô tit-tio̍h chiok-hok. 13 I ê lāu-bú kóng, Góa ê kiáⁿ ah, lí chio ê chiù-chó͘ kui tī góa; chòe lí thiaⁿ góa ê ōe, khì lia̍h lâi hō͘ góa. 14 I chiū khì lia̍h lâi hō͘ i ê lāu-bú; lāu-bú chiū chú hó ê chu-bī, chiàu lāu-pē só͘ kah-ì-ê. 15 Lī-pek-ka koh hiaⁿh tōa-kiáⁿ Í-sò siu tī i ke-lāi ê súi-saⁿ, kā i ê sòe-kiáⁿ Ngá-kok chhēng. 16 Koh ēng soaⁿ-iûⁿ-á phê pau Ngá-kok ê chhiú, kap i ām-kún kng-ku̍t ê ūi. 17 Chiū chiong só͘ chú ê hó chu-bī kap piáⁿ, hē tī i ê kiáⁿ Ngá-kok ê chhiú. 18 Ngá-kok kàu in lāu-pē hia, kóng, Góa ê pē ah; i kóng, Góa tī-chia; góa ê kiáⁿ, lí sī chī-chūi? 19 Ngá-kok tùi i ê lāu-pē kóng, Góa sī lí ê tōa-kiáⁿ Í-sò; góa í-keng chiàu lí só͘ hoan-hù góa-ê khì kiâⁿ; chhiáⁿ lí khí-lâi chē, chia̍h góa só͘ phah-tio̍h-ê, hó thang kā góa chiok-hok. 20 Í-sat tùi i ê kiáⁿ kóng, Góa ê kiáⁿ, lí cháiⁿ-iūⁿ chiah khoài tit-tio̍h? I kóng, In-ūi lí ê Siōng-tè Iâ-hô-hoa hō͘ góa hó cho-gū lâi tit-tio̍h. 21 Í-sat kā Ngá-kok kóng, Góa ê kiáⁿ ah, lí kūn-óa-lâi, góa beh bong lí, khòaⁿ lí chin-chiàⁿ sī góa ê kiáⁿ Í-sò, á m̄-sī. 22 Ngá-kok chiū óa-kūn i ê lāu-pē Í-sat; i chiū bong i kóng, Siaⁿ, sī Ngá-kok ê siaⁿ; chhiú, sī Í-sò ê chhiú. 23 Í-sat hun-piat bōe bêng, in-ūi i ê chhiú ū mn̂g, chhin-chhiūⁿ i ê hiaⁿ Í-sò ê chhiú; chiū kā i chiok-hok. 24 Koh kóng, Lí chin-chiàⁿ sī góa ê kiáⁿ Í-sò mah? I kóng, Góa sī. 25 Í-sat kóng, Phâng-lâi hō͘ góa, góa beh chia̍h góa ê kiáⁿ só͘ tit-tio̍h ê iá-bī, hó thang kā lí chiok-hok. Chiū phâng hō͘ i, i chiū chia̍h; ia̍h phâng chiú hō͘ i, i chiū lim. 26 I ê lāu-pē Í-sat tùi i kóng, Góa ê kiáⁿ, chìn-chêng lâi chim góa. 27 I chiū chìn-chêng, chim i ê lāu-pē; i ê lāu-pē phīⁿ-tio̍h i ê saⁿ ê phang-bī, chiū kā i chiok-hok kóng: Góa ê kiáⁿ ê phang-bī, Chhin-chhiūⁿ Iâ-hô-hoa sù-hok ê chhân ê phang-bī; 28 Goān Siōng-tè siúⁿ-sù lí thiⁿ-téng ê kam-lō͘; Sè-chiūⁿ ê pûi-tōe, Gō͘-kak kap sin ê chiú chin-chōe; 29 Chèng peh-sìⁿ ho̍k-sāi lí, Lia̍t-kok kūi-pài lí, Lí chòe lí hiaⁿ-tī ê chú, Lí ê lāu-bú ê kiáⁿ kūi-pài lí; Chiù-chó͘ lí-ê siū chiù-chó͘, Chiok-hok lí-ê tit-tio̍h hok-khì. 30 Í-sat kā Ngá-kok chiok-hok bêng-pe̍k, Ngá-kok tú-tú tùi i ê lāu-pē Í-sat hia chhut-lâi, i ê hiaⁿ Í-sò phah-la̍h tò-lâi. 31 I ia̍h chú hó ê bī-sò͘, phâng-lâi hō͘ i ê lāu-pē, kóng, Góa ê pē ah, chhiáⁿ khí-lâi chia̍h kiáⁿ só͘ phah-tio̍h-ê, hó thang kā góa chiok-hok. 32 I ê lāu-pē Í-sat kā i kóng, Lí sī chī-chūi? I kóng, Góa sī lí ê kiáⁿ, chiū-sī lí ê tōa-kiáⁿ, Í-sò. 33 Í-sat tōa-kiaⁿ, ngia̍uh-ngia̍uh-chhoah, kóng, He sī chī-chūi, lí bē lâi ê tāi-seng, phâng i só͘ phah-tio̍h-ê lâi hō͘ góa; góa chia̍h i, kā i chiok-hok? i tek-khak beh tit-tio̍h hok-khì. 34 Í-sò thiaⁿ-kìⁿ lāu-pē ê ōe, khui-siaⁿ kiò-khó͘ tōa-khàu; tùi i ê lāu-pē kóng, Góa ê pē ah, góa, lí ia̍h tio̍h kā góa chiok-hok. 35 Í-sat kóng, Lí ê sió-tī ēng khúi-kè lâi, chhiúⁿ lí ê hok-hūn. 36 Í-sò kóng, I miâ-chòe Ngá-kok, kiám bô chin ha̍p mah? i khi-phiàn góa nn̄g-pái; chêng chhiúⁿ góa tōa-kiáⁿ ê bêng-hūn; lí khòaⁿ, taⁿ i koh chhiúⁿ góa ê hok-hūn. Koh kóng, Kiám bô lâu chi̍t-ê thang kā góa chiok-hok mah? 37 Í-sat ìn Í-sò kóng, Góa í-keng li̍p i chòe lí ê chú, ia̍h chiong i ê chèng hiaⁿ-tī hō͘ i chòe lô͘-po̍k; ia̍h ēng gō͘-kak sin-chiú iúⁿ-chhī i; góa ê kiáⁿ ah, taⁿ góa iáu ōe kā lí chòe sím-mi̍h? 38 Í-sò kā i ê lāu-pē kóng, Pē ah, lí ê chiok-hok kiám chí-ū chi̍t-pái mah? Góa ê pē ah, góa, lí ia̍h tio̍h kā góa chiok-hok. 39 Í-sò khui-siaⁿ thî-khàu. I ê lāu-pē Í-sat ìn i, kóng: Lí só͘ khiā-khí-ê, beh ū sè-chiūⁿ ê pûi-tōe, Ia̍h ū thiⁿ-téng ê kam-lō͘; 40 Lí beh óa-khò to-kiàm tō͘-oa̍h, koh beh ho̍k-sāi lí ê sió-tī; Kàu lí hùn-heng ê sî, Beh tùi lí ê ām-kún kùn-khui i ê gû-taⁿ. 41 Í-sò in-ūi i ê lāu-pē kā Ngá-kok chiok hok-khì, chiū oàn-hūn Ngá-kok; sim-lāi kóng, Ūi lāu-pē teng-iu ê sî kūn-lah; kàu hit-sî, góa beh thâi-sí góa ê sió-tī Ngá-kok. 42 Ū lâng chiong i ê tōa-kiáⁿ Í-sò ê ōe kā Lī-pek-ka kóng; i chiū chhe lâng khì kiò i ê sòe-kiáⁿ Ngá-kok lâi, kā i kóng, Lí ê hiaⁿ Í-sò beh thâi lí, lâi siau i ê hūn-khì. 43 Taⁿ góa ê kiáⁿ, lí tio̍h thiaⁿ góa ê ōe; khí-lâi, cháu khì Hap-lân, góa ê hiaⁿ La̍h-pan hia; 44 kap i tiàm kúi-ji̍t, thèng-hāu lí ê hiaⁿ siū-khì siau. 45 Kàu lí ê hiaⁿ siū-khì soah, bōe kì-tit lí tùi i só͘ chòe ê sū, hit-sî góa chiū chhe lâng chhōa lí tùi hia tò-lâi. Góa siáⁿ-sū chi̍t-ji̍t sit-lo̍h lín nn̄g-lâng? 46 Lī-pek-ka kā Í-sat kóng, Góa in-ūi chiah ê Hek-lâng ê cha-bó͘-kiáⁿ, liân sìⁿ-miā to m̄-ài. Siat-sú Ngá-kok iā chhōa chit só͘-chāi ê cha-bó͘-kiáⁿ chòe bó͘, chhin-chhiūⁿ Hek-lâng ê cha-bó͘-kiáⁿ hit-khoán, góa oa̍h ū siáⁿ lō͘-ēng?
1 以撒叫雅各來，kā伊祝福，亦吩咐伊講，你m̄-thang娶迦南ê cha-bó͘-gín-á做bó͘。 2 你起來，去Pa-tàn-a-lân，到你ê外公Pí-thó͘-lī ê家；tī你ê母舅拉班cha-bó͘-kiáⁿ ê中間，娶一个做bó͘。 3 願全能ê上帝賜福你，hō͘你生湠真chōe，成做chōe-chōe族。 4 Koh將所應允亞伯拉罕ê福氣hō͘你，kap你ê後裔；hō͘你承接你所寄居ê地，就是上帝所hō͘亞伯拉罕ê。 5 以撒差雅各去；伊就去Pa-tàn-a-lân；到A-lân人Pí-thó͘-lī ê kiáⁿ拉班hia；伊是雅各以掃ê母舅。 6 以掃看見以撒kā雅各祝福，koh差伊去Pa-tàn-a-lân，beh tùi hia娶bó͘；亦看見祝福伊ê時，吩咐伊講，M̄-thang娶迦南ê cha-bó͘-gín-á做bó͘； 7 koh看見雅各聽父母ê話，去Pa-tàn-a-lân； 8 以掃就知迦南ê cha-bó͘-gín-á，伊ê老父以撒m̄中意； 9 以掃就去以實瑪利hia，tī伊hiahê bó͘以外，koh娶Má-hap-la̍h做bó͘；伊是亞伯拉罕ê kiáⁿ以實瑪利ê cha-bó͘-kiáⁿ，Nî-pâi-iok ê小妹。 10 雅各離開別是巴，ǹg哈蘭去。 11 到一所在，因為日落，就tī-hia歇暝；tùi hiahê石頭ê中間，the̍h一塊做枕頭，tī-hia睏。 12 夢見有梯khiā tī地裡，梯頂抵天；有上帝ê使者tī梯裡teh上落。 13 耶和華khiā tī梯頂，講，我是耶和華你ê祖亞伯拉罕ê上帝，亦是以撒ê上帝。我beh將你現在所睏ê地賞賜你，kap你ê後裔。 14 你ê後裔beh親像地上ê土沙；你beh tùi東西南北來發展；地上萬族beh因為你kap你ê後裔得tio̍h福氣。 15 我亦kap你tī-teh，你無論去tah-lo̍h，我beh保護你；亦beh chhōa你tò來chit所在，lóng無放sak你，到我成對你所講ê。 16 雅各睏醒講，耶和華真正tī-chia，我竟然m̄知。 17 就驚講，Chit所在到chiah thang 驚！m̄是別項，這是上帝ê厝，這是天ê門。 18 雅各早早起來，將伊做枕頭ê石khiā做柱；倒油tī頂面。 19 就名hit所在叫Pek-te̍k-lī，chitê城本名Lō͘-su。 20 雅各下願講，上帝若kap我tī-teh，tī我所行ê路保護我，koh hō͘我有物thang食，有衫thang穿， 21 hō͘我安然tò來我ê父ê厝，就耶和華的確做我ê上帝。 22 我所khiā做柱ê石beh做上帝ê厝；見若你所賞賜我ê，我beh將十份ê一份獻hō͘你。
1 Í-sat kiò Ngá-kok lâi, kā i chiok-hok, ia̍h hoan-hù i kóng, Lí m̄-thang chhōa Ka-lâm ê cha-bó͘-gín-á chòe bó͘. 2 Lí khí-lâi, khì Pa-tàn-a-lân, kàu lí ê gōa-kong Pí-thó͘-lī ê ke; tī lí ê bú-kū La̍h-pan cha-bó͘-kiáⁿ ê tiong-kan, chhōa chi̍t-ê chòe bó͘. 3 Goān choân-lêng ê Siōng-tè sù-hok lí, hō͘ lí siⁿ-thòaⁿ chin-chōe, chiâⁿ-chòe chōe-chōe cho̍k. 4 Koh chiong só͘ èng-ún A-pek-la̍h-hán ê hok-khì hō͘ lí, kap lí ê hō͘-è; hō͘ lí sêng-chiap lí só͘-kià-ku ê tōe, chiū-sī Siōng-tè só͘ hō͘ A-pek-la̍h-hán-ê. 5 Í-sat chhe Ngá-kok khì; i chiū khì Pa-tàn-a-lân; kàu A-lân lâng Pí-thó͘-lī ê kiáⁿ La̍h-pan hia; i sī Ngá-kok Í-sò ê bú-kū. 6 Í-sò khòaⁿ-kìⁿ Í-sat kā Ngá-kok chiok-hok, koh chhe i khì Pa-tàn-a-lân, beh tùi hia chhōa-bó͘; ia̍h khòaⁿ-kìⁿ chiok-hok i ê sî, hoan-hù i kóng, M̄-thang chhōa Ka-lâm ê cha-bó͘-gín-á chòe bó͘; 7 koh khòaⁿ-kìⁿ Ngá-kok thiaⁿ pē-bú ê ōe, khì Pa-tàn-a-lân; 8 Í-sò chiū chai Ka-lâm ê cha-bó͘-gín-á, i ê lāu-pē Í-sat m̄-tèng-ì; 9 Í-sò chiū khì Í-si̍t-má-lī hia, tī i hiah ê bó͘ í-gōa, koh chhōa Má-hap-la̍h chòe-bó͘; i sī A-pek-la̍h-hán ê kiáⁿ Í-si̍t-má-lī ê cha-bó͘-kiáⁿ, Nî-pâi-iok ê sió-bē. 10 Ngá-kok lī-khui Pia̍t-sī-pa, ǹg Hap-lân khì. 11 Kàu chi̍t só͘-chāi, in-ūi ji̍t lo̍h, chiū tī-hia hioh-mî; tùi hiah ê chio̍h-thâu ê tiong-kan, the̍h chi̍t-tè chòe chím-thâu, tī-hia khùn. 12 Bāng-kìⁿ ū thui khiā tī tōe-ni̍h, thui-téng tú-thiⁿ; ū Siōng-tè ê sù-chiá tī thui-ni̍h teh chiūⁿ-lo̍h. 13 Iâ-hô-hoa khiā tī thui-téng, kóng, Góa sī Iâ-hô-hoa lí ê chó͘ A-pek-la̍h-hán ê Siōng-tè, ia̍h sī Í-sat ê Siōng-tè. Góa beh chiong lí hiān-chāi só͘ khùn ê tōe siúⁿ-sù lí, kap lí ê hō͘-è. 14 Lí ê hō͘-è beh chhin-chhiūⁿ tōe-chiūⁿ ê thô͘-soa; lí beh tùi tang, sai, lâm, pak lâi hoat-tián; tōe-chiūⁿ bān-cho̍k beh in-ūi lí kap lí ê hō͘-è tit-tio̍h hok-khì. 15 Góa ia̍h kap lí tī-teh, lí bô-lūn khì tah-lo̍h, Góa beh pó-hō͘ lí; ia̍h beh chhōa lí tò-lâi chit só͘-chāi, lóng bô pàng-sak lí, kàu Góa chiâⁿ tùi lí só͘ kóng-ê. 16 Ngá-kok khùn-chhíⁿ kóng, Iâ-hô-hoa chin-chiàⁿ tī-chia, góa kéng-jiân m̄-chai. 17 Chiū kiaⁿ kóng, Chit só͘-chāi kàu chiah thang kiaⁿ! m̄-sī pa̍t-hāng, che sī Siōng-tè ê chhù, che sī thiⁿ ê mn̂g. 18 Ngá-kok chá-chá khí-lâi, chiong i chòe chím-thâu ê chio̍h khiā chòe thiāu; tò iû tī téng-bīn. 19 Chiū miâ hit só͘-chāi kiò Pek-te̍k-lī, chit ê siâⁿ pún miâ Lō͘-su. 20 Ngá-kok hē-goān kóng, Siōng-tè nā kap góa tī-teh, tī góa só͘ kiâⁿ ê lō͘ pó-hō͘ góa, koh hō͘ góa ū mi̍h thang chia̍h, ū saⁿ thang chhēng, 21 hō͘ góa an-jiân tò-lâi góa ê pē ê chhù, chiū Iâ-hô-hoa tek-khak chòe góa ê Siōng-tè. 22 Góa só͘ khiā chòe thiāu ê chio̍h beh chòe Siōng-tè ê chhù; kìⁿ-nā Lí só͘ siúⁿ-sù góa ê, góa beh chiong cha̍p-hūn ê chi̍t-hūn hiàn hō͘ Lí.
1 雅各起身，到東方ê人ê地； 2 看見田裡有一口井，有三陣羊倒tī井邊，因為人hō͘羊群lim，lóng是用hitê井ê水；井嘴用大石蓋。 3 平時羊群聚集tī-hia，人就將石頭徙離井嘴，hō͘羊lim水；chiah koh將石頭徙到原位。 4 雅各對in講，兄弟ah，tùi tah-lo̍h來？in講，阮tùi哈蘭來。 5 問in講，拿福ê孫拉班，lín bat伊mah？ 6 講，Bat伊。Koh對in講，伊平安mah？講，平安。你看，伊ê cha-bó͘-kiáⁿ拉結chhōa伊ê羊群teh來。 7 講，日iáu高，cheng-siⁿ聚集ê時未到，m̄值tio̍h hō͘羊lim水，koh去飼。 8 In講，阮bōe會，tio̍h thèng候chōe-chōe陣lóng聚集，人徙石離開井嘴，chiah thang hō͘羊lim。 9 雅各teh kap in講話ê時，拉結chhōa in老父ê羊來；因為是伊teh顧。 10 雅各看見母舅拉班ê cha-bó͘-kiáⁿ拉結，kap母舅拉班ê羊群，就進前將石徙離井嘴，hō͘ in母舅拉班ê羊群lim。 11 雅各kā拉結chim嘴，開聲哭。 12 雅各koh kā拉結講伊是in老父ê外甥，是利百加ê kiáⁿ；拉結就走去kā in老父講。 13 拉班聽見外甥雅各ê消息，就走去迎接伊，抱伊，kap伊chim嘴；chhōa伊到in tau；雅各將一切ê事情kā拉班講。 14 拉班kā雅各講，你實在是我ê骨肉。伊就kap伊tòa一月日。 15 拉班kā雅各講，你雖然是我ê親戚，kiám thang白白做我ê工；請kā我講，你beh甚麼工錢。 16 拉班有兩個cha-bó͘-kiáⁿ，大ê名叫利亞，細ê名叫拉結。 17 利亞目睭khah輸，拉結生做好看。 18 雅各疼拉結，就講，我願為tio̍h你細ê cha-bó͘-kiáⁿ拉結，kā你做工七年。 19 拉班講，將伊嫁hō͘你，khah好hō͘別人；你kap我tòa。 20 雅各就為tio̍h拉結kā伊做工七年；因為深疼伊，看做kúi-nā日。 21 雅各對拉班講，日期已經滿，求你將我ê bó͘ hō͘我，我thang kap伊同房。 22 拉班聚集hit所在ê眾人，辦筵席請in。 23 到日暗，拉班將伊ê cha-bó͘-kiáⁿ利亞，送來hō͘伊；雅各就kap伊同房。 24 拉班將伊ê女婢Sek-phàⁿ hō͘伊ê cha-bó͘-kiáⁿ利亞做女婢。 25 到天光，一下看見是利亞，就對拉班講，你kā我做ê，是甚麼？我kā你做工，kiám-m̄是為tio̍h拉結mah？你啥事騙我？ 26 拉班講，未嫁大ê事先嫁細ê，tī阮chia無人án-ni做。 27 你kap chitê tio̍h滿七日；阮就將hitê亦嫁hō͘你；你為tio̍h伊koh kā我做工七年。 28 雅各就照án-ni行；kap chitê滿七日；伊就將伊ê cha-bó͘-kiáⁿ，拉結，hō͘伊做bó͘。 29 拉班將伊ê女婢Phek-la̍h，hō͘伊ê cha-bó͘-kiáⁿ拉結做女婢。 30 雅各亦kap拉結同房，koh疼拉結贏過利亞；就koh kā拉班做工七年。 31 耶和華看利亞無得寵，就hō͘伊懷孕；獨獨拉結無。 32 利亞懷孕生kiáⁿ，就kā伊號名Liû-piān；因為講，耶和華看見我ê苦情；taⁿ我ê丈夫beh疼我。 33 伊koh懷孕生kiáⁿ；講，耶和華聽見我無得寵，所以koh hō͘我chitê kiáⁿ；就kā伊號名西緬。 34 Koh懷孕生kiáⁿ，講，我kā丈夫生三個kiáⁿ，伊beh kap我結聯；名叫利未。 35 Koh懷孕生kiáⁿ；講，Chit下我beh o-ló耶和華；所以叫伊ê名偤大；就停無koh生。
1 Ngá-kok khí-sin, kàu tang-hng ê lâng ê tōe; 2 khòaⁿ-kìⁿ chhân-ni̍h ū chi̍t kháu chíⁿ, ū saⁿ tīn iûⁿ tó tī chíⁿ-piⁿ, in-ūi lâng hō͘ iûⁿ-kûn lim, lóng sī ēng hit ê chíⁿ ê chúi; chíⁿ-chhùi ēng tōa chio̍h khàm. 3 Pêng-sî iûⁿ-kûn chū-chi̍p tī-hia, lâng chiū chiong chio̍h-thâu sóa lī chíⁿ-chhùi, hō͘ iûⁿ lim chúi; chiah koh chiong chio̍h-thâu sóa kàu goân-ūi. 4 Ngá-kok tùi in kóng, Hiaⁿ-tī ah, tùi tah-lo̍h lâi? in kóng, Goán tùi Hap-lân lâi. 5 Mn̄g in kóng, Ná-ho̍k ê sun La̍h-pan, lín bat i mah? 6 kóng, Bat-i. Koh tùi in kóng, I pêng-an mah? kóng, Pêng-an. Lí khòaⁿ, i ê cha-bó͘-kiáⁿ La̍h-kiat chhōa i ê iûⁿ-kûn teh lâi. 7 Kóng, Ji̍t iáu koâiⁿ, cheng-siⁿ chū-chi̍p ê sî bē kàu, m̄-ta̍t-tio̍h hō͘ iûⁿ lim chúi, koh khì chhī. 8 In kóng, Goán bōe-ōe, tio̍h thèng-hāu chōe-chōe tīn lóng chū-chi̍p, lâng sóa chio̍h lī-khui chíⁿ-chhùi, chiah thang hō͘ iûⁿ lim. 9 Ngá-kok teh kap in kóng-ōe ê sî, La̍h-kiat chhōa in lāu-pē ê iûⁿ lâi; in-ūi sī i teh kò͘. 10 Ngá-kok khòaⁿ-kìⁿ bú-kū La̍h-pan ê cha-bó͘-kiáⁿ La̍h-kiat, kap bú-kū La̍h-pan ê iûⁿ-kûn, chiū chìn-chêng chiong chio̍h sóa lī chíⁿ-chhùi, hō͘ in bú-kū La̍h-pan ê iûⁿ-kûn lim. 11 Ngá-kok kā La̍h-kiat chim-chhùi, khui-siaⁿ khàu. 12 Ngá-kok koh kā La̍h-kiat kóng i sī in lāu-pē ê gōe-seng, sī Lī-pek-ka ê kiáⁿ; La̍h-kiat chiū cháu-khì kā in lāu-pē kóng. 13 La̍h-pan thiaⁿ-kìⁿ gōe-seng Ngá-kok ê siau-sit, chiū cháu-khì ngiâ-chih-i, phō-i, kap i chim-chhùi; chhōa i kàu in tau; Ngá-kok chiong it-chhè ê sū-chêng kā La̍h-pan kóng. 14 La̍h-pan kā Ngá-kok kóng, Lí si̍t-chāi sī góa ê kut-jio̍k. I chiū kap i tòa chi̍t-ge̍h-ji̍t. 15 La̍h-pan kā Ngá-kok kóng, Lí sui-jiân sī góa ê chhin-chhek, kiám thang pe̍h-pe̍h chòe góa ê kang; chhiáⁿ kā góa kóng, lí beh sím-mi̍h kang-chîⁿ. 16 La̍h-pan ū nn̄g ê cha-bó͘-kiáⁿ, tōa-ê miâ-kiò Lī-a, sòe-ê miâ-kiò La̍h-kiat. 17 Lī-a ba̍k-chiu khah-su, La̍h-kiat siⁿ-chòe hó-khòaⁿ. 18 Ngá-kok thiàⁿ La̍h-kiat, chiū kóng, Góa goān ūi-tio̍h lí sòe ê cha-bó͘-kiáⁿ La̍h-kiat, kā lí chòe-kang chhit-nî. 19 La̍h-pan kóng, Chiong i kè hō͘ lí, khah-hó hō͘ pa̍t-lâng; lí kap góa tòa. 20 Ngá-kok chiū ūi-tio̍h La̍h-kiat kā i chòe kang chhit-nî; in-ūi chhim-thiàⁿ i, khòaⁿ-chòe kúi-nā ji̍t. 21 Ngá-kok tùi La̍h-pan kóng, Ji̍t-kî í-keng móa, kiû lí chiong góa ê bó͘ hō͘ góa, góa thang kap i tâng-pâng. 22 La̍h-pan chū-chi̍p hit só͘-chāi ê chèng-lâng, pān iân-sia̍h chhiáⁿ in. 23 Kàu ji̍t àm, La̍h-pan chiong i ê cha-bó͘-kiáⁿ Lī-a, sàng lâi hō͘ i; Ngá-kok chiū kap i tâng-pâng. 24 La̍h-pan chiong i ê lú-pī Sek-phàⁿ hō͘ i ê cha-bó͘-kiáⁿ Lī-a chòe lú-pī. 25 Kàu thiⁿ-kng, chi̍t-ē khòaⁿ-kìⁿ sī Lī-a, chiū tùi La̍h-pan kóng, Lí kā góa chòe-ê, sī sím-mi̍h? Góa kā lí chòe-kang, kiám-m̄-sī ūi-tio̍h La̍h-kiat mah? lí siáⁿ-sū phiàn góa? 26 La̍h-pan kóng, Bē kè tōa-ê tāi-seng kè sòe-ê, tī goán chia bô lâng án-ni chòe. 27 Lí kap chit-ê tio̍h móa chhit-ji̍t; goán chiū chiong hit-ê ia̍h kè hō͘ lí; lí ūi-tio̍h i koh kā góa chòe kang chhit-nî. 28 Ngá-kok chiū chiàu án-ni kiâⁿ; kap chit-ê móa chhit-ji̍t; i chiū chiong i ê cha-bó͘-kiáⁿ, La̍h-kiat, hō͘ i chòe-bó͘. 29 La̍h-pan chiong i ê lú-pī Phek-la̍h, hō͘ i ê cha-bó͘-kiáⁿ La̍h-kiat chòe lú-pī. 30 Ngá-kok ia̍h kap La̍h-kiat tâng-pâng, koh thiàⁿ La̍h-kiat iâⁿ-kè Lī-a; chiū koh kā La̍h-pan chòe-kang chhit-nî. 31 Iâ-hô-hoa khòaⁿ Lī-a bô tek-thióng, chiū hō͘ i hoâi-īn; to̍k-to̍k La̍h-kiat bô. 32 Lī-a hoâi-īn siⁿ-kiáⁿ, chiū kā i hō-miâ Liû-piān; in-ūi kóng, Iâ-hô-hoa khòaⁿ-kìⁿ góa ê khó͘-chêng; taⁿ góa ê tiōng-hu beh thiàⁿ góa. 33 I koh hoâi-īn siⁿ kiáⁿ; kóng, Iâ-hô-hoa thiaⁿ-kìⁿ góa bô tek-thióng, só͘-í koh hō͘ góa chit ê kiáⁿ; chiū kā i hō-miâ Se-biān. 34 Koh hoâi-īn siⁿ kiáⁿ, kóng, Góa kā tiōng-hu siⁿ saⁿ ê kiáⁿ, i beh kap góa kiat-liân; miâ kiò Lī-bī. 35 Koh hoâi-īn siⁿ kiáⁿ; kóng, Chit-ē góa beh o-ló Iâ-hô-hoa; só͘-í kiò i ê miâ Iû-tāi; chiū thêng bô koh siⁿ.
1 拉結看本身無kā雅各生kiáⁿ，就怨妒伊ê大姊；對雅各講，你tio̍h kiáⁿ hō͘我；若無，我beh死。 2 雅各受氣拉結；講，hō͘你無生ê，是上帝；我kiám是替伊mah？ 3 拉結講，你看我ê女婢Phek-la̍h tī-chia；你去kap伊同房，hō͘伊生kiáⁿ抱tī我ê腳頭u；我也就thang tùi伊得tio̍h kiáⁿ。 4 拉結就將伊ê女婢Phek-la̍h hō͘伊做bó͘；雅各就kap伊同房。 5 Phek-la̍h懷孕，kā雅各生一个kiáⁿ。 6 拉結講，上帝kā我判斷，亦聽我ê聲，hō͘我有kiáⁿ；所以叫伊ê名做Tàn。 7 拉結ê女婢Phek-la̍h koh懷孕，kā雅各生第二ê kiáⁿ； 8 拉結講，我kap我ê大姊非常ê相爭，亦得tio̍h khah贏；就叫伊ê名做Ná-hut-tha-lī。 9 利亞看本身停歇無生，就將伊ê女婢，Sek-phàⁿ，hō͘雅各做bó͘。 10 利亞ê女婢Sek-phàⁿ kā雅各生kiáⁿ。 11 利亞講，佳哉！就叫伊ê名做Ka-tek。 12 利亞ê女婢，Sek-phàⁿ，koh kā雅各生第二ê kiáⁿ。 13 利亞講，我有福氣！chiahê cha-bó͘-gín-á lóng beh稱我有福氣；就叫伊ê名做A-siat。 14 割麥ê時，Liû-piān去田裡，得tio̍h hong-ka，the̍h來hō͘伊ê老母利亞。拉結對利亞講，請將你ê kiáⁿ ê hong-ka hō͘我。 15 利亞對伊講，你搶奪我ê丈夫，kiám是小khóa事；你koh搶奪我ê kiáⁿ ê hong-ka mah？拉結講，為tio̍h你ê kiáⁿ ê hong-ka，所以今暝伊thang kap你相kap睏。 16 到暗，雅各tùi 田裡 tò來；利亞出去迎接伊，講，你tio̍h kap我相kap睏；因為我實在用我ê kiáⁿ ê hong-ka倩你。Hit暝伊就kap伊相kap睏。 17 上帝允准利亞，伊就懷孕，kā雅各生第五個kiáⁿ。 18 利亞講，上帝hō͘我工錢，因為我將女婢hō͘我ê丈夫；tùi án-ni kā伊號名Í-sat-ka。 19 利亞koh懷孕，kā雅各生第六ê kiáⁿ。 20 利亞講，上帝賞賜我好ê賞賜；我ê丈夫beh kap我tòa，因為我kā伊生六個kiáⁿ；tùi án-ni kā伊號名Se-pò͘-lûn。 21 後來生一个cha-bó͘-kiáⁿ，kā伊號名叫Tí-ná。 22 上帝siàu念拉結，上帝允准伊，hō͘伊能生kiáⁿ。 23 伊就懷孕生kiáⁿ；講，上帝除去我ê見笑； 24 就kā伊號名約瑟，講，願耶和華koh加添我一个kiáⁿ。 25 拉結生約瑟了後，雅各對拉班講，請差我去，hō͘我tò去我ê本所在，本地； 26 請你將我服事你所得tio̍h ê bó͘-kiáⁿ hō͘我，容允我去；我怎樣服事你，你lóng知。 27 拉班kā伊講，我若tī你ê面前得tio̍h恩典，請你kap我tòa；因為我深知耶和華賜我福氣，是為tio̍h你ê緣故。 28 Koh kā伊講，請你定tio̍h你ê工錢，我就hō͘你。 29 雅各kā伊講，我服事你怎樣，你ê cheng-siⁿ tī我ê手頭怎樣，是你所知。 30 我未來ê事先，你所有ê真少，taⁿ就大發達；耶和華用福氣tè我ê腳來hō͘你；taⁿ我beh甚麼時為我ê家建置產業？ 31 拉班講，我tio̍h hō͘你甚麼？雅各講，你亦m̄免hō͘我甚麼；有一項事，你若應承，就我猶原飼你ê羊群來顧守。 32 今á日我beh遍巡你ê羊群，將綿羊中見有點ê，有斑ê，kap烏色ê，以及山羊中見有斑ê，有點ê，lóng撥出；將來chit款ê做我ê工錢。 33 以後你來看我ê工錢，hit中間若山羊無點無斑ê，綿羊無烏色ê，就算是我偷ê；用án-ni來證明我ê公道。 34 拉班講，好，我願照你ê話行。 35 當hit日，就將有痕有斑ê山羊káng，有點有斑，間(kàiⁿ)白ê山羊母，以及烏色ê綿羊，lóng撥出來交hō͘伊hiahê kiáⁿ。 36 伊hō͘家己kap雅各相離有三日ê路站；雅各就顧拉班其餘ê羊。 37 雅各the̍h青ê楊樹、杏樹、楓樹，軟ê枝，將皮剝成白痕，hō͘枝內白ê露出。 38 將剝皮ê枝，插tī羊lim水ê水溝kap水槽，hō͘伊kap羊相對；羊來lim ê時，公母交合； 39 羊tī枝ê對面交合，就生有痕ê，有點ê，有斑ê。 40 雅各將羊á撥出，hō͘拉班ê羊kap chiahê有痕kap烏色ê羊相對；將家己ê羊另外放tī一所在，無hō͘伊kap拉班ê羊chham-chhap。 41 Tú-tio̍h羊群中勇壯ê交合ê時，雅各就用樹枝插tī水溝內；hō͘羊tī樹枝ê對面交合。 42 Tú-tio̍h羊群ê瘦ê，就無插樹枝；tùi án-ni瘦ê歸拉班，勇壯ê歸雅各。 43 Tùi án-ni伊大發達，得tio̍h chōe-chōe羊群、女婢、奴僕、駱駝kap驢。
1 La̍h-kiat khòaⁿ pún-sin bô kā Ngá-kok siⁿ kiáⁿ, chiū oàn-tò͘ i ê tōa-chí; tùi Ngá-kok kóng, Lí tio̍h kiáⁿ hō͘ góa; nā bô, góa beh sí. 2 Ngá-kok siū-khì La̍h-kiat; kóng, Hō͘ lí bô siⁿ-ê, sī Siōng-tè; góa kiám sī thòe I mah? 3 La̍h-kiat kóng, Lí khòaⁿ góa ê lú-pī Phek-la̍h tī-chia; lí khì kap i tâng-pâng, hō͘ i siⁿ kiáⁿ phō tī góa ê kha-thâu-u; góa iā chiū thang tùi i tit-tio̍h kiáⁿ. 4 La̍h-kiat chiū chiong i ê lú-pī Phek-la̍h hō͘ i chòe-bó͘; Ngá-kok chiū kap i tâng-pâng. 5 Phek-la̍h hoâi-īn, kā Ngá-kok siⁿ chi̍t ê kiáⁿ. 6 La̍h-kiat kóng, Siōng-tè kā góa phòaⁿ-toàn, ia̍h thiaⁿ góa ê siaⁿ, hō͘ góa ū kiáⁿ; só͘-í kiò i ê miâ chòe Tàn. 7 La̍h-kiat ê lú-pī Phek-la̍h koh hoâi-īn, kā Ngá-kok siⁿ tē-jī ê kiáⁿ; 8 La̍h-kiat kóng, Góa kap góa ê tōa-chí hui-siông ê saⁿ-chiⁿ, ia̍h tit-tio̍h khah-iâⁿ; chiū kiò i ê miâ chòe Ná-hut-tha-lī. 9 Lī-a khòaⁿ pún-sin thêng-hioh bô siⁿ, chiū chiong i ê lú-pī, Sek-phàⁿ, hō͘ Ngá-kok chòe bó͘. 10 Lī-a ê lú-pī Sek-phàⁿ kā Ngá-kok siⁿ kiáⁿ. 11 Lī-a kóng, Kai-chài! chiū kiò i ê miâ chòe Ka-tek. 12 Lī-a ê lú-pī, Sek-phàⁿ, koh kā Ngá-kok siⁿ tē-jī ê kiáⁿ. 13 Lī-a kóng, Góa ū hok-khì! chiah ê cha-bó͘-gín-á lóng beh chheng góa ū hok-khì; chiū kiò i ê miâ chòe A-siat. 14 Koah-be̍h ê sî, Liû-piān khì chhân-ni̍h, tit-tio̍h hong-ka, the̍h-lâi hō͘ i ê lāu-bú Lī-a. La̍h-kiat tùi Lī-a kóng, Chhiáⁿ chiong lí ê kiáⁿ ê hong-ka hō͘ góa. 15 Lī-a tùi i kóng, Lí chhiúⁿ-toa̍t góa ê tiōng-hu, kiám-sī sió-khóa sū; lí koh chhiúⁿ-toa̍t góa ê kiáⁿ ê hong-ka mah? La̍h-kiat kóng, Ūi-tio̍h lí ê kiáⁿ ê hong-ka, só͘-í kin-mî i thang kap lí saⁿ-kap khùn. 16 Kàu àm, Ngá-kok tùi chhân-ni̍h tò-lâi; Lī-a chhut-khì ngiâ-chih i, kóng, Lí tio̍h kap góa saⁿ-kap khùn; in-ūi góa si̍t-chāi ēng góa ê kiáⁿ ê hong-ka chhiàⁿ lí. Hit-mî i chiū kap i saⁿ-kap khùn. 17 Siōng-tè ún-chún Lī-a, i chiū hoâi-īn, kā Ngá-kok siⁿ tē-gō͘ ê kiáⁿ. 18 Lī-a kóng, Siōng-tè hō͘ góa kang-chîⁿ, in-ūi góa chiong lú-pī hō͘ góa ê tiōng-hu; tùi án-ni kā i hō-miâ Í-sat-ka. 19 Lī-a koh hoâi-īn, kā Ngá-kok siⁿ tē-la̍k ê kiáⁿ. 20 Lī-a kóng, Siōng-tè siúⁿ-sù góa hó ê siúⁿ-sù; góa ê tiōng-hu beh kap góa tòa, in-ūi góa kā i siⁿ la̍k ê kiáⁿ; tùi án-ni kā i hō-miâ Se-pò͘-lûn. 21 Āu-lâi siⁿ chi̍t ê cha-bó͘-kiáⁿ, kā i hō-miâ kiò Tí-ná. 22 Siōng-tè siàu-liām La̍h-kiat, Siōng-tè ún-chún i, hō͘ i ōe siⁿ kiáⁿ. 23 I chiū hoâi-īn siⁿ kiáⁿ; kóng, Siōng-tè tû-khì góa ê kiàn-siàu; 24 chiū kā i hō-miâ Iok-sek, kóng, Goān Iâ-hô-hoa koh ke-thiⁿ góa chi̍t ê kiáⁿ. 25 La̍h-kiat siⁿ Iok-sek liáu-āu, Ngá-kok tùi La̍h-pan kóng, Chhiáⁿ chhe góa khì, hō͘ góa tò-khì góa ê pún só͘-chāi, pún-tōe; 26 chhiáⁿ lí chiong góa ho̍k-sāi lí só͘ tit-tio̍h ê bó͘-kiáⁿ hō͘ góa, iông-ún góa khì; góa cháiⁿ-iūⁿ ho̍k-sāi lí, lí lóng chai. 27 La̍h-pan kā i kóng, Góa nā tī lí ê bīn-chêng tit-tio̍h un-tián, chhiáⁿ lí kap góa tòa; in-ūi góa chhim-chai Iâ-hô-hoa sù góa hok-khì, sī ūi-tio̍h lí ê iân-kò͘. 28 Koh kā i kóng, Chhiáⁿ lí tiāⁿ-tio̍h lí ê kang-chîⁿ, góa chiū hō͘ lí. 29 Ngá-kok kā i kóng, Góa ho̍k-sāi lí cháiⁿ-iūⁿ, lí ê cheng-siⁿ tī góa ê chhiú-thâu cháiⁿ-iūⁿ, sī lí só͘ chai. 30 Góa bē lâi ê tāi-seng, lí só͘-ū-ê chin-chió, taⁿ chiū tōa hoat-ta̍t; Iâ-hô-hoa ēng hok-khì tè góa ê kha lâi hō͘ lí; taⁿ góa beh sím-mi̍h sî ūi góa ê ke kiàn-tì sán-gia̍p? 31 La̍h-pan kóng, Góa tio̍h hō͘ lí sím-mi̍h? Ngá-kok kóng, Lí ia̍h m̄-bián hō͘ góa sím-mi̍h; ū chi̍t-hāng sū, lí nā èng-sêng, chiū góa iû-goân chhī lí ê iûⁿ-kûn lâi kò͘-siú. 32 Kin-á-ji̍t góa beh piàn-sûn lí ê iûⁿ-kûn, chiong mî-iûⁿ-tiong kìⁿ-ū tiám-ê, ū pan-ê, kap o͘-sek-ê, í-ki̍p soaⁿ-iûⁿ-tiong kìⁿ-ū pan-ê, ū tiám-ê, lóng poah-chhut; chiong-lâi chit-khoán-ê chòe góa ê kang-chîⁿ. 33 Í-āu lí lâi khòaⁿ góa ê kang-chîⁿ, hit tiong-kan nā soaⁿ-iûⁿ bô tiám bô pan-ê, mî-iûⁿ bô o͘-sek-ê, chiū sǹg sī góa thau-ê; ēng án-ni lâi chèng-bêng góa ê kong-tō. 34 La̍h-pan kóng, Hó, góa goān chiàu lí ê ōe kiâⁿ. 35 Tng hit-ji̍t, chiū chiong ū hûn ū pan ê soaⁿ-iûⁿ-káng, ū tiám ū pan, kàiⁿ pe̍h ê soaⁿ-iûⁿ-bú, í-ki̍p o͘-sek ê mî-iûⁿ, lóng poah-chhut lâi kau hō͘ i hiah ê kiáⁿ. 36 I hō͘ ka-kī kap Ngá-kok saⁿ-lī ū saⁿ-ji̍t ê lō͘-chām; Ngá-kok chiū kò͘ La̍h-pan kî-û ê iûⁿ. 37 Ngá-kok the̍h chhiⁿ ê iông-chhiū, hēng-chhiū, png-chhiū, nńg ê ki, chiong phê pak chiâⁿ pe̍h-hûn, hō͘ ki-lāi pe̍h-ê lō͘-chhut. 38 Chiong pak-phê ê ki, chhah tī iûⁿ lim-chúi ê chúi-kau kap chúi-chô, hō͘ i kap iûⁿ saⁿ-tùi; iûⁿ lâi lim ê sî, kang-bú kau-ha̍p; 39 iûⁿ tī ki ê tùi-bīn kau-ha̍p, chiū siⁿ ū-hûn-ê, ū-tiám-ê, ū-pan-ê. 40 Ngá-kok chiong iûⁿ-á poah-chhut, hō͘ La̍h-pan ê iûⁿ kap chiah ê ū-hûn kap o͘-sek ê iûⁿ saⁿ-tùi; chiong ka-kī ê iûⁿ lēng-gōa pàng tī chi̍t só͘-chāi, bô hō͘ i kap La̍h-pan ê iûⁿ chham-chhap. 41 Tú-tio̍h iûⁿ-kûn-tiong ióng-chòng-ê kau-ha̍p ê sî, Ngá-kok chiū ēng chhiū-ki chhah tī chúi-kau-lāi; hō͘ iûⁿ tī chhiū-ki ê tùi-bīn kau-ha̍p. 42 Tú-tio̍h iûⁿ-kûn ê sán-ê, chiū bô chhah chhiū-ki; tùi án-ni sán-ê kui La̍h-pan, ióng-chòng-ê kui Ngá-kok. 43 Tùi án-ni i tōa hoat-ta̍t, tit-tio̍h chōe-chōe iûⁿ-kûn, lú-pī, lô͘-po̍k, lo̍k-tô, kap lû.
1 雅各聽見拉班眾kiáⁿ有話講，咱老父所有ê，雅各lóng搶去，koh對咱ê老父得tio̍h chitê一切ê榮光。 2 雅各看見拉班見tio̍h伊，無親像從前ê面色。 3 耶和華對雅各講，你tio̍h tò去你ê父公ê地，到你ê親族hia；我beh kap你tī-teh。 4 雅各差人叫拉結kap利亞到山野，到羊群hia； 5 對in講，我看見lín老父見tio̍h我，無親像從前ê面色；總是我ê父ê上帝時常kap我tī-teh。 6 Lín亦知我盡我ê力做lín老父ê工。 7 Lín老父騙我，十pái改換我ê工錢；總是上帝無容允伊害我。 8 伊若講，有點ê歸你做工錢，就羊群所生ê lóng有點；伊若講，有痕ê歸你做工錢，就羊群所生ê lóng有痕。 9 Án-ni上帝將lín老父ê cheng-siⁿ搶來hō͘我。 10 羊交合ê時，我夢中kia̍h目一下看，看見phah羊母ê羊káng，lóng是有痕ê，有點ê，有花斑ê； 11 上帝ê使者tī hit夢中叫我講，雅各；我講，我tī chia。 12 伊講，你kia̍h目看，phah羊母ê羊káng，lóng是有痕ê，有點ê，有花斑ê；凡若拉班對你所做ê，我lóng看見。 13 我是Pek-te̍k-lī ê上帝，你tī-hia bat用油抹柱，對我下願。Taⁿ你tio̍h起來，離開chit所在，tò去本地。 14 拉結kap利亞應伊講，Tī阮老父ê家，kiám iáu有阮thang得ê家伙kap產業mah？ 15 阮kiám-m̄是hō͘伊看做外人mah？因為伊賣阮，吞食阮ê價錢； 16 上帝tùi阮老父搶出一切ê財物，hiahê就是阮kap阮kiáⁿ ê。Taⁿ見若上帝所對你講ê，做你去行。 17 雅各就起來，hō͘伊ê kiáⁿ kap bó͘ lóng騎駱駝。 18 Koh帶一切ê cheng-siⁿ，kap所積聚ê財物，所得tio̍h ê cheng-siⁿ，是tī Pa-tàn-a-lân所得tio̍h-ê；beh去迦南地，去伊ê老父以撒hia。 19 Hit時拉班去剪羊毛；拉結偷the̍h in老父家內ê偶像。 20 雅各背A-lân人拉班，偷走去，無kā伊講。 21 就帶一切所有ê逃走；伊起身過hitê河，ǹg Ki-lia̍t山去。 22 到第三日，有人kā拉班講，雅各走去lah。 23 伊就chhōa伊ê兄弟相kap去追jip；歷過七日ê路站，到Ki-lia̍t山 chiah jip-tio̍h。 24 暝時眠夢中，上帝到A-lân人拉班hia；kā伊講，你tio̍h小心，m̄-thang kap雅各講好講pháiⁿ。 25 拉班追tio̍h雅各，雅各tī hitê山已經搭布棚；拉班kap伊ê眾兄弟，亦tī Ki-lia̍t山搭布棚。 26 拉班kā雅各講，你所做是甚麼事，你啥事背我，將我chiahê cha-bó͘-kiáⁿ chhōa去，親像用刀劍搶掠一樣？ 27 你啥事暗靜走，偷走亦無kā我講；hō͘我thang用歡喜、唱歌、phah鼓、彈琴，送你tò去？ 28 Koh無容允我kap外孫，cha-bó͘-kiáⁿ chim嘴？你taⁿ所行是真戇。 29 我ê手本有力thang害lín；獨獨lín老父ê上帝昨暝kā我講，你tio̍h小心，m̄-thang kap雅各講好講pháiⁿ。 30 Taⁿ你雖然戀慕你ê老父ê家，不得不tio̍h去，啥事偷the̍h我ê神明？ 31 雅各應拉班講，因為我驚，心內想，講，驚了你將你ê cha-bó͘-kiáⁿ tùi我搶去。 32 論到你ê神明，你tùi甚麼人chhiau-tio̍h，伊就tio̍h死；當咱眾兄弟ê面前，你認看，tī我chia有甚麼物是你ê，thang the̍h去。因為雅各m̄知拉結有偷the̍h in。 33 拉班就入雅各ê布棚，利亞ê布棚，kap兩個女婢ê布棚，lóng chhiau無；就tùi利亞ê布棚出來，入拉結ê布棚。 34 拉結已經將偶像khǹg tī駱駝ê鞍下，來坐tī hit頂面。拉班tī伊ê布棚內四界摸，lóng chhiau無。 35 拉結對伊ê老父講，經期tú-á 到，bōe會起來tī你ê面前；求我ê主莫得受氣。拉班四界chhē偶像，chhiau lóng無。 36 雅各就受氣，kap拉班計較；對拉班講，我有犯tio̍h甚麼過失，有甚麼罪惡，你竟然jip我chiah緊？ 37 你遍摸我一切ê ke-si，有chhiau-tio̍h lín tau甚麼ke-si出來？thang hē tī你我ê兄弟ê面前；hō͘ in tī咱兩人ê中間判斷。 38 我kap你tòa chit二十年，你ê綿羊母、山羊母m̄-bat有落胎；你羊群中ê羊káng，我未bat食伊。 39 Hō͘野獸傷害ê，我無帶來hō͘你；我本身坐額；無論日時受偷，暝時受偷，你lóng對我討賠。 40 我日時hō͘日曝，暝時hō͘霜凍，lóng bōe顧得睏，我常常是án-ni。 41 我chit二十年tī你ê家，為tio̍h你兩個cha-bó͘-kiáⁿ，kā你做工十四年；為tio̍h你ê羊群六年；你十pái改換我ê工錢。 42 若m̄是有我ê父ê上帝，就是亞伯拉罕ê上帝，koh是以撒所驚畏ê，kap我tī-teh；你taⁿ穩當hō͘我空手去。上帝看見我ê苦情，kap我ê勞碌，chiah tī昨暝責備你。 43 拉班應雅各講，Chiahê cha-bó͘-kiáⁿ是我ê cha-bó͘-kiáⁿ；chiahê gín-á是我ê gín-á；chiahê羊群亦是我ê羊群；凡若你所看見ê，lóng是我ê；我ê cha-bó͘-kiáⁿ，kap in所生ê gín-á；今á日我會kā in做甚麼？ 44 Taⁿ來，咱兩人thang來立約，tī你我ê中間做證據。 45 雅各取石，khiā做柱。 46 雅各對chiahê兄弟講，Lín tio̍h拾石頭；in就將石頭拾來疊kui堆；大家就tī hit堆ê邊á食。 47 拉班名伊叫I-ka-ní-sat-khap-tō͘-tha；雅各名伊叫Ka-lūi-tek。 48 拉班講，今á日chitê石堆做你我中間ê證據。因為án-ni，名伊叫Ka-lūi-tek； 49 也叫做Bí-su-pa；就是講，咱大家離別以後，願耶和華tī你我ê中間鑑察。 50 你若苦楚我ê cha-bó͘-kiáⁿ，koh tī我ê cha-bó͘-kiáⁿ以外另外娶bó͘，雖然無人kap咱tī-teh，有上帝tī你我ê中間做干證。 51 拉班koh對雅各講，你看chit堆石，你看chit支柱；就是我所hē tī你我ê中間ê。 52 Chit堆石做干證，chit支柱做干證；我無beh 過 chit堆石去害你，你也m̄-thang過 chit堆石kap柱，來害我。 53 願亞伯拉罕ê上帝，Ná-ho̍k ê上帝，in老父ê上帝，tī你我ê中間判斷。雅各就kí in老父以撒所驚畏ê上帝來chiù-chōa。 54 雅各tī山裡獻祭，請伊hiahê兄弟來食；in食了，就tī山裡歇暝。 55 拉班透早起來，kap伊ê外孫，kap伊ê cha-bó͘-kiáⁿ chim嘴，kā in祝福；就起身tò去家己ê所在。
1 Ngá-kok thiaⁿ-kìⁿ La̍h-pan chèng-kiáⁿ ū ōe kóng, Lán lāu-pē só͘-ū-ê, Ngá-kok lóng chhiúⁿ-khì, koh tùi lán ê lāu-pē tit-tio̍h chit-ê it-chhè ê êng-kng. 2 Ngá-kok khòaⁿ-kìⁿ La̍h-pan kìⁿ-tio̍h i, bô chhin-chhiūⁿ chiông-chêng ê bīn-sek. 3 Iâ-hô-hoa tùi Ngá-kok kóng, Lí tio̍h tò-khì lí ê pē-kong ê tōe, kàu lí ê chhin-cho̍k hia; Góa beh kap lí tī-teh. 4 Ngá-kok chhe lâng kiò La̍h-kiat kap Lī-a kàu soaⁿ-iá, kàu iûⁿ-kûn hia; 5 tùi in kóng, Góa khòaⁿ-kìⁿ lín lāu-pē kìⁿ-tio̍h góa, bô chhin-chhiūⁿ chiông-chêng ê bīn-sek; chóng-sī góa ê pē ê Siōng-tè sî-siông kap góa tī-teh. 6 Lín ia̍h chai góa chīn góa ê la̍t chòe lín lāu-pē ê kang. 7 Lín lāu-pē phiàn góa, cha̍p-pái kóe-ōaⁿ góa ê kang-chîⁿ; chóng-sī Siōng-tè bô iông-ún i hāi góa. 8 I nā kóng, Ū-tiám-ê kui lí chòe kang-chîⁿ, chiū iûⁿ-kûn só͘ siⁿ-ê lóng ū-tiám; i nā kóng, Ū-hûn-ê kui lí chòe kang-chîⁿ, chiū iûⁿ-kûn só͘ siⁿ-ê lóng ū-hûn. 9 Án-ni Siōng-tè chiong lín lāu-pē ê cheng-siⁿ chhiúⁿ-lâi hō͘ góa. 10 Iûⁿ kau-ha̍p ê sî, góa bāng-tiong kia̍h-ba̍k chi̍t-ē khòaⁿ, khòaⁿ-kìⁿ phah iûⁿ-bú ê iûⁿ-káng, lóng sī ū-hûn-ê, ū-tiám-ê, ū hoe-pan-ê; 11 Siōng-tè ê sù-chiá tī hit bāng-tiong kiò góa kóng, Ngá-kok; góa kóng, Góa tī chia. 12 I kóng, Lí kia̍h-ba̍k khòaⁿ, phah iûⁿ-bú ê iûⁿ-káng, lóng sī ū-hûn-ê, ū-tiám-ê, ū hoe-pan-ê; hoān-nā La̍h-pan tùi lí só͘ chòe-ê, Góa lóng khòaⁿ-kìⁿ. 13 Góa sī Pek-te̍k-lī ê Siōng-tè, lí tī-hia bat ēng iû boah thiāu, tùi Góa hē-goān. Taⁿ lí tio̍h khí-lâi, lī-khui chit só͘-chāi, tò-khì pún-tōe. 14 La̍h-kiat kap Lī-a ìn i kóng, Tī goán lāu-pē ê ke, kiám iáu ū goán thang tit ê ke-hé kap sán-gia̍p mah? 15 Goán kiám-m̄-sī hō͘ i khòaⁿ-chòe gōa-lâng mah? in-ūi i bōe goán, thun-chia̍h goán ê kè-chîⁿ; 16 Siōng-tè tùi goán lāu-pē chhiúⁿ-chhut it-chhè ê châi-bu̍t, hiah-ê chiū-sī goán kap goán kiáⁿ ê. Taⁿ kìⁿ-nā Siōng-tè só͘ tùi lí kóng-ê, chòe lí khì kiâⁿ. 17 Ngá-kok chiū khí-lâi, hō͘ i ê kiáⁿ kap bó͘ lóng khiâ lo̍k-tô. 18 Koh tòa it-chhè ê cheng-siⁿ, kap só͘ chek-chū ê châi-bu̍t, só͘ tit-tio̍h ê cheng-siⁿ, sī tī Pa-tàn-a-lân só͘ tit-tio̍h-ê; beh khì Ka-lâm tōe, khì i ê lāu-pē Í-sat hia. 19 Hit-sî La̍h-pan khì chián iûⁿ-mn̂g; La̍h-kiat thau-the̍h in lāu-pē ke-lāi ê ngó͘-siōng. 20 Ngá-kok pōe A-lân lâng La̍h-pan, thau-cháu khì, bô kā i kóng. 21 Chiū tòa it-chhè só͘-ū-ê tô-cháu; i khí-sin kè hit ê Hô, ǹg Ki-lia̍t soaⁿ khì. 22 Kàu tē-saⁿ ji̍t, ū lâng kā La̍h-pan kóng, Ngá-kok cháu-khì lah. 23 I chiū chhōa i ê hiaⁿ-tī saⁿ-kap khì tui-jip; le̍k-kè chhit-ji̍t ê lō͘-chām, kàu Ki-lia̍t soaⁿ chiah jip-tio̍h. 24 Mî-sî bîn-bāng-tiong, Siōng-tè kàu A-lân lâng La̍h-pan hia; kā i kóng, Lí tio̍h sió-sim, m̄-thang kap Ngá-kok kóng-hó kóng-pháiⁿ. 25 La̍h-pan tui-tio̍h Ngá-kok, Ngá-kok tī hit ê soaⁿ í-keng tah pò͘-pîⁿ; La̍h-pan kap i ê chèng hiaⁿ-tī, ia̍h tī Ki-lia̍t soaⁿ tah pò͘-pîⁿ. 26 La̍h-pan kā Ngá-kok kóng, Lí só͘ chòe sī sím-mi̍h sū, lí siáⁿ-sū pōe góa, chiong góa chiah ê cha-bó͘-kiáⁿ chhōa-khì, chhin-chhiūⁿ ēng to-kiàm chhiúⁿ-lia̍h chi̍t-iūⁿ? 27 Lí siáⁿ-sū àm-chīⁿ cháu, thau-cháu ia̍h bô kā góa kóng; hō͘ góa thang ēng hoaⁿ-hí, chhiùⁿ-koa, phah-kó͘, tôaⁿ-khîm, sàng lí tò-khì? 28 Koh bô iông-ún góa kap gōa-sun, cha-bó͘-kiáⁿ chim-chhùi? lí taⁿ só͘ kiâⁿ sī chin gōng. 29 Góa ê chhiú pún ū la̍t thang hāi lín; to̍k-to̍k lín lāu-pē ê Siōng-tè chā-mî kā góa kóng, Lí tio̍h sió-sim, m̄-thang kap Ngá-kok kóng-hó kóng-pháiⁿ. 30 Taⁿ lí sui-jiân loân-bō͘ lí ê lāu-pē ê ke, put-tek-put tio̍h khì, siáⁿ-sū thau-the̍h góa ê sîn-bêng? 31 Ngá-kok ìn La̍h-pan kóng, In-ūi góa kiaⁿ, sim-lāi siūⁿ, kóng, Kiaⁿ-liáu lí chiong lí ê cha-bó͘-kiáⁿ tùi góa chhiúⁿ-khì. 32 Lūn-kàu lí ê sîn-bêng, lí tùi sím-mi̍h lâng chhiau-tio̍h, i chiū tio̍h sí; tng lán chèng hiaⁿ-tī ê bīn-chêng, lí jīn-khòaⁿ, tī góa chia ū sím-mi̍h mi̍h sī lí-ê, thang the̍h-khì. In-ūi Ngá-kok m̄-chai La̍h-kiat ū thau-the̍h-in. 33 La̍h-pan chiū ji̍p Ngá-kok ê pò͘-pîⁿ, Lī-a ê pò͘-pîⁿ, kap nn̄g ê lú-pī ê pò͘-pîⁿ, lóng chhiau-bô; chiū tùi Lī-a ê pò͘-pîⁿ chhut-lâi, ji̍p La̍h-kiat ê pò͘-pîⁿ. 34 La̍h-kiat í-keng chiong ngó͘-siōng khǹg tī lo̍k-tô ê oaⁿ-ē, lâi chē tī hit téng-bīn. La̍h-pan tī i ê pò͘-pîⁿ-lāi sì-kòe bong, lóng chhiau-bô. 35 La̍h-kiat tùi i ê lāu-pē kóng, Keng-kî tú-á kàu, bōe-ōe khí-lâi tī lí ê bīn-chêng; kiû góa ê chú bo̍h-tit siū-khì. La̍h-pan sì-kòe chhē ngó͘-siōng, chhiau lóng bô. 36 Ngá-kok chiū siū-khì, kap La̍h-pan kè-kàu; tùi La̍h-pan kóng, Góa ū hoān-tio̍h sím-mi̍h kè-sit, ū sím-mi̍h chōe-ok, lí kéng-jiân jip góa chiah-kín? 37 Lí piàn-bong góa it-chhè ê ke-si, ū chhiau-tio̍h lín tau sím-mi̍h ke-si chhut lâi? thang hē tī lí góa ê hiaⁿ-tī ê bīn-chêng; hō͘ in tī lán nn̄g-lâng ê tiong-kan phòaⁿ-toàn. 38 Góa kap lí tòa chit jī-cha̍p nî, lí ê mî-iûⁿ-bú, soaⁿ-iûⁿ-bú m̄-bat ū làu-the; lí iûⁿ-kûn-tiong ê iûⁿ-káng, góa bē-bat chia̍h-i. 39 Hō͘ iá-siù siong-hāi-ê, góa bô tòa-lâi hō͘ lí; góa pún-sin chē-gia̍h; bô lūn ji̍t-sî siū-thau, mî-sî siū-thau, lí lóng tùi góa thó-pê. 40 Góa ji̍t-sî hō͘ ji̍t pha̍k, mî-sî hō͘ sng tàng, lóng bōe-kò͘-tit khùn, góa siông-siông sī án-ni. 41 Góa chit jī-cha̍p-nî tī lí ê ke, ūi-tio̍h lí nn̄g ê cha-bó͘-kiáⁿ, kā lí chòe-kang cha̍p-sì nî; ūi-tio̍h lí ê iûⁿ-kûn la̍k nî; lí cha̍p-pái kóe-ōaⁿ góa ê kang-chîⁿ. 42 Nā m̄-sī ū góa ê pē ê Siōng-tè, chiū-sī A-pek-la̍h-hán ê Siōng-tè, koh sī Í-sat só͘ kiaⁿ-ùi-ê, kap góa tī-teh; lí taⁿ ún-tàng hō͘ góa khang-chhiú khì. Siōng-tè khòaⁿ-kìⁿ góa ê khó͘-chêng, kap góa ê lô-lo̍k, chiah tī chā-mî chek-pī lí. 43 La̍h-pan ìn Ngá-kok kóng, Chiah ê cha-bó͘-kiáⁿ sī góa ê cha-bó͘-kiáⁿ; chiah ê gín-á sī góa ê gín-á; chiah ê iûⁿ-kûn ia̍h sī góa ê iûⁿ-kûn; hoān-nā lí só͘ khòaⁿ-kìⁿ-ê, lóng sī góa ê; góa ê cha-bó͘-kiáⁿ, kap in só͘ siⁿ ê gín-á; kin-á-ji̍t góa ōe kā in chòe sím-mi̍h? 44 Taⁿ lâi, lán nn̄g-lâng thang lâi li̍p-iok, tī lí góa ê tiong-kan chòe chèng-kù. 45 Ngá-kok chhú chio̍h, khiā chòe thiāu. 46 Ngá-kok tùi chiah ê hiaⁿ-tī kóng, Lín tio̍h khioh chio̍h-thâu; in chiū chiong chio̍h-thâu khioh lâi thia̍p kui-tui; tāi-ke chiū tī hit tui ê piⁿ-á chia̍h. 47 La̍h-pan miâ i kiò I-ka-ní-sat-khap-tō͘-tha; Ngá-kok miâ i kiò Ka-lūi-tek. 48 La̍h-pan kóng, Kin-á-ji̍t chit ê chio̍h-tui chòe lí góa tiong-kan ê chèng-kù. In-ūi án-ni, miâ i kiò Ka-lūi-tek; 49 iā kiò-chòe Bí-su-pa; chiū-sī kóng, Lán tāi-ke lī-pia̍t í-āu, goān Iâ-hô-hoa tī lí góa ê tiong-kan kàm-chhat. 50 Lí nā khó͘-chhó͘ góa ê cha-bó͘-kiáⁿ, koh tī góa ê cha-bó͘-kiáⁿ í-gōa lēng-gōa chhōa-bó͘, sui-jiân bô lâng kap lán tī-teh, ū Siōng-tè tī lí góa ê tiong-kan chòe kan-chèng. 51 La̍h-pan koh tùi Ngá-kok kóng, Lí khòaⁿ chit tui chio̍h, lí khòaⁿ chit ki thiāu; chiū-sī góa só͘ hē tī lí góa ê tiong-kan-ê. 52 Chit tui chio̍h chòe kan-chèng, chit ki thiāu chòe kan-chèng; góa bô beh kè chit tui chio̍h khì hāi lí, lí iā m̄-thang kè chit tui chio̍h kap thiāu, lâi hāi góa. 53 Goān A-pek-la̍h-hán ê Siōng-tè, Ná-ho̍k ê Siōng-tè, in lāu-pē ê Siōng-tè, tī lí góa ê tiong-kan phòaⁿ-toàn. Ngá-kok chiū kí in lāu-pē Í-sat só͘ kiaⁿ-ùi ê Siōng-tè lâi chiù-chōa. 54 Ngá-kok tī soaⁿ-ni̍h hiàn-chè, chhiáⁿ i hiah ê hiaⁿ-tī lâi chia̍h; in chia̍h-liáu, chiū tī soaⁿ-ni̍h hioh-mî. 55 La̍h-pan thàu-chá khí-lâi, kap i ê gōa-sun, kap i ê cha-bó͘-kiáⁿ chim-chhùi, kā in chiok-hok; chiū khí-sin tò-khì ka-kī ê só͘-chāi.
1 雅各koh行伊ê路，上帝ê使者tú-tio̍h伊。 2 雅各看見in，就講，這是上帝ê軍隊；所以名hit所在叫Má-khap-liām。 3 雅各差人事先去Se-jíⁿ ê地，Í-tong ê田，見伊ê兄以掃。 4 吩咐in講，Lín kā我ê主以掃講，你ê奴僕雅各án-ni講，我tī拉班hia寄居，tòa到今á日。 5 我有牛、驢、羊群、奴僕、女婢；taⁿ差人來報我ê主，ài得tī你ê面前得tio̍h恩典。 6 所差ê人tò來雅各hia講，阮到你ê兄以掃hia，伊tú-tú teh來beh迎接你；koh有四百人kap伊來。 7 雅各大驚koh擘腹；將hiahê kap伊相kap tī-teh ê人，kap羊群、牛群、駱駝，分做兩隊； 8 講，以掃若來攻擊chit隊，chhun-ê hit隊iáu thang逃走。 9 雅各koh講，我ê祖，亞伯拉罕ê上帝，我ê父以撒ê上帝，耶和華ah，你bat對我講，tò去你ê本地本族，我beh好款待你。 10 你對你ê奴僕所施一切ê慈愛kap一切ê誠實，就至微細ê我也bōe堪得得tio̍h；我前kia̍h我ê柺á，過chitê約旦河；taⁿ我已經成做兩隊。 11 求你救我脫離我ê兄以掃ê手；因為我驚伊，驚了伊來刣死我kap in 母kiáⁿ。 12 你也bat講，我的確beh好款待你；hō͘你ê後裔親像海邊ê沙，chōe到bōe算得。 13 Hit暝雅各歇tī-hia；就tī伊所有ê物ê內面，揀出禮物，beh送伊ê兄以掃； 14 山羊母兩百隻，山羊公二十隻，綿羊母兩百隻，綿羊公二十隻； 15 駱駝母kap食奶ê kiáⁿ三十隻，牛母四十隻，牛káng十隻，驢母二十隻，驢kiáⁿ十隻。 16 各樣另外一群，交帶奴僕；kā奴僕講，Lín事先我去，hō͘ ta̍k群有相離。 17 Koh吩咐做頭ê，講，我ê兄以掃tú-tio̍h你ê時，若問你講，你是甚麼人ê？beh去tah-lo̍h？你頭前hiahê 是誰 ê？ 18 你tio̍h講，是你ê奴僕雅各ê；是beh送我ê主以掃ê禮物；現在伊本身亦tī阮ê後面。 19 Koh吩咐第二第三，kap一切趕kui群cheng-siⁿ ê人，講，Lín tú-tio̍h以掃ê時，亦tio̍h照án-ni kā伊講。 20 Koh lín亦tio̍h講，你ê奴僕雅各tī阮ê後面。因為雅各家己phah算講，我用tī我頭前去ê禮物來改伊ê恨；然後我見tio̍h伊ê面，kiám-chhái伊接納我。 21 Tùi án-ni，禮物先行；hit暝雅各歇tī隊中。 22 伊暝時起來，chhōa伊兩個bó͘，兩個女婢，kap十一个kiáⁿ，lóng 過Ngá-po̍k ê渡頭。 23 事先hō͘ in過溪；凡所有ê亦hō͘ in過。 24 只有chhun雅各家己tī-teh；有一人來kap伊相ián，到tī天phú光。 25 Hit人看bōe贏伊；就siàn雅各ê大腿臼；相ián ê時，雅各ê大腿臼choa̍h-tio̍h。 26 Hit人講，天beh光lah，tio̍h放我去。雅各講，你若無kā我祝福，m̄放你去。 27 Hit人講，你名做甚麼？伊講，我名做雅各。 28 Hit人講，你ê名無beh koh叫雅各，beh叫做以色列；因為你kap上帝kap人鬥輸贏，lóng得tio̍h khah贏。 29 雅各問伊講，請將你ê名kā我講。Hit人應講，Mih-sái問我ê名？就tī-hia kā伊祝福。 30 雅各名hit所在叫Piān-í-lī，因為講，我當頭對面見tio̍h上帝，我ê性命iáu得tio̍h保全。 31 日tú-á出，雅各經過Piān-í-lī；伊ê大腿已經pái。 32 所以chiahê以色列人無食大腿頭ê筋，到tī今á日；因為hit人siàn雅各腿臼ê大筋。
1 Ngá-kok koh kiâⁿ i ê lō͘, Siōng-tè ê sù-chiá tú-tio̍h i. 2 Ngá-kok khòaⁿ-kìⁿ in, chiū kóng, Che sī Siōng-tè ê kun-tūi; só͘-í miâ hit só͘-chāi kiò Má-khap-liām. 3 Ngá-kok chhe lâng tāi-seng khì Se-jíⁿ ê tōe, Í-tong ê chhân, kìⁿ i ê hiaⁿ Í-sò. 4 Hoan-hù in kóng, Lín kā góa ê chú Í-sò kóng, Lí ê lô͘-po̍k Ngá-kok án-ni kóng, Góa tī La̍h-pan hia kià-ku, tòa kàu kin-á-ji̍t. 5 Góa ū gû, lû, iûⁿ-kûn, lô͘-po̍k, lú-pī; taⁿ chhe lâng lâi pò góa ê chú, ài tit tī lí ê bīn-chêng tit-tio̍h un-tián. 6 Só͘ chhe ê lâng tò-lâi Ngá-kok hia kóng, Goán kàu lí ê hiaⁿ Í-sò hia, i tú-tú teh lâi beh ngiâ-chih lí; koh ū sì-pah lâng kap i lâi. 7 Ngá-kok tōa kiaⁿ koh peh-pak; chiong hiah-ê kap i saⁿ-kap tī-teh ê lâng, kap iûⁿ-kûn, gû-kûn, lo̍k-tô, pun chòe nn̄g tūi; 8 kóng, Í-sò nā lâi kong-kek chit-tūi, chhun-ê hit-tūi iáu thang tô-cháu. 9 Ngá-kok koh kóng, Góa ê chó͘, A-pek-la̍h-hán ê Siōng-tè, góa ê pē Í-sat ê Siōng-tè, Iâ-hô-hoa ah, Lí bat tùi góa kóng, Tò-khì lí ê pún-tōe pún-cho̍k, Góa beh hó khoán-thāi lí. 10 Lí tùi lí ê lô͘-po̍k só͘ si it-chhè ê chû-ài kap it-chhè ê sêng-si̍t, chiū chì-bî-sòe ê góa iā bōe kham-tit tit-tio̍h; góa chêng kia̍h góa ê koáiⁿ-á, kè chit ê Iok-tàn hô; taⁿ góa í-keng chiâⁿ-chòe nn̄g-tūi. 11 Kiû Lí kiù góa thoat-lī góa ê hiaⁿ Í-sò ê chhiú; in-ūi góa kiaⁿ i, kiaⁿ-liáu i lâi thâi-sí góa kap in bú-kiáⁿ. 12 Lí iā bat kóng, Góa tek-khak beh hó khoán-thāi lí; hō͘ lí ê hō͘-è chhin-chhiūⁿ hái-piⁿ ê soa, chōe kàu bōe-sǹg-tit. 13 Hit-mî Ngá-kok hioh tī-hia; chiū tī i só͘ ū ê mi̍h ê lāi-bīn, kéng-chhut lé-mi̍h, beh sàng i ê hiaⁿ Í-sò; 14 soaⁿ-iûⁿ-bú nn̄g-pah chiah, soaⁿ-iûⁿ-kang jī-cha̍p chiah, mî-iûⁿ-bú nn̄g-pah chiah, mî-iûⁿ-kang jī-cha̍p chiah; 15 lo̍k-tô-bú kap chia̍h-ni ê kiáⁿ saⁿ-cha̍p chiah, gû-bú sì-cha̍p chiah, gû-káng cha̍p chiah, lû-bú jī-cha̍p chiah, lû-kiáⁿ cha̍p-chiah. 16 Kok-iūⁿ lēng-gōa chi̍t-kûn, kau-tài lô͘-po̍k; kā lô͘-po̍k kóng, Lín tāi-seng góa khì, hō͘ ta̍k-kûn ū saⁿ-lī. 17 Koh hoan-hù chòe-thâu-ê, kóng, Góa ê hiaⁿ Í-sò tú-tio̍h lí ê sî, nā mn̄g lí kóng, Lí sī sím-mi̍h lâng ê? beh khì tah-lo̍h? lí thâu-chêng hiah-ê chī-chūi ê? 18 lí tio̍h kóng, Sī lí ê lô͘-po̍k Ngá-kok ê; sī beh sàng góa ê chú Í-sò ê lé-mi̍h; hiān-chāi i pún-sin ia̍h tī goán ê āu-bīn. 19 Koh hoan-hù tē-jī tē-saⁿ, kap it-chhè kóaⁿ kui-kûn cheng-siⁿ ê lâng, kóng, Lín tú-tio̍h Í-sò ê sî, ia̍h tio̍h chiàu án-ni kā i kóng. 20 Koh lín ia̍h tio̍h kóng, Lí ê lô͘-po̍k Ngá-kok tī goán ê āu-bīn. In-ūi Ngá-kok ka-kī phah-sǹg kóng, Góa ēng tī góa thâu-chêng khì ê lé-mi̍h lâi kóe i ê hūn; jiân-āu góa kìⁿ-tio̍h i ê bīn, kiám-chhái i chiap-la̍p góa. 21 Tùi án-ni, lé-mi̍h seng kiâⁿ; hit-mî Ngá-kok hioh tī tūi-tiong. 22 I mî-sî khí-lâi, chhōa i nn̄g ê bó͘, nn̄g ê lú-pī, kap cha̍p-it ê kiáⁿ, lóng kè Ngá-po̍k ê tō͘-thâu. 23 Tāi-seng hō͘ in kè-khoe; hoān só͘-ū-ê ia̍h hō͘ in kè. 24 Chí-ū chhun Ngá-kok ka-kī tī-teh; ū chi̍t-lâng lâi kap i saⁿ-ián, kàu tī thiⁿ-phú-kng. 25 Hit-lâng khòaⁿ bōe iâⁿ-i; chiū siàn Ngá-kok ê tōa-thúi-khū; saⁿ-ián ê sî, Ngá-kok ê tōa-thúi-khū choa̍h-tio̍h. 26 Hit-lâng kóng, Thiⁿ beh kng lah, tio̍h pàng góa khì. Ngá-kok kóng, Lí nā bô kā góa chiok-hok, m̄ pàng lí khì. 27 Hit-lâng kóng, Lí miâ chòe sím-mi̍h? i kóng, Góa miâ chòe Ngá-kok. 28 Hit-lâng kóng, Lí ê miâ bô beh koh kiò Ngá-kok, beh kiò-chòe Í-sek-lia̍t; in-ūi lí kap Siōng-tè kap lâng tàu su-iâⁿ, lóng tit-tio̍h khah-iâⁿ. 29 Ngá-kok mn̄g i kóng, Chhiáⁿ chiong lí ê miâ kā góa kóng. Hit lâng ìn kóng, Mih-sái mn̄g góa ê miâ? chiū tī-hia kā i chiok-hok. 30 Ngá-kok miâ Hit só͘-chāi kiò Piān-í-lī, in-ūi kóng, Góa tng-thâu tùi-bīn kìⁿ-tio̍h Siōng-tè, góa ê sìⁿ-miā iáu tit-tio̍h pó-choân. 31 Ji̍t tú-á chhut, Ngá-kok keng-kè Piān-í-lī; i ê tōa-thúi í-keng pái. 32 Só͘-í chiah ê Í-sek-lia̍t lâng bô chia̍h tōa-thúi-thâu ê kun, kàu tī kin-á-ji̍t; in-ūi hit-lâng siàn Ngá-kok thúi-khū ê tōa-kun.
1 雅各kia̍h目看，看見以掃來；koh有四百人kap伊來。伊就將hiahê gín-á分開，交hō͘利亞，交hō͘拉結，交hō͘兩個女婢。 2 將女婢kap in ê kiáⁿ排tī頭前，利亞kap伊ê kiáⁿ排tī後面，拉結kap約瑟排tī路尾。 3 伊本身tī in ê頭前過去，連連七pái仆tī地裡，chiah óa近伊ê兄。 4 以掃走來迎接伊，將伊抱teh，koh lám伊ê頷頸，chim伊；兩人就啼哭。 5 以掃kia̍h目看見婦人人kap gín-á，就講，Chiahê kap你同行ê是是誰？雅各講，Chiahê gín-á是上帝施恩hō͘你ê奴僕ê。 6 Tùi hit-tia̍p，兩個女婢，kap in ê gín-á，進前來拜。 7 利亞kap伊ê gín-á亦進前來拜；路尾約瑟kap拉結亦進前來拜。 8 以掃講，我所tú-tio̍h kui群 ê cheng-siⁿ，你是甚麼意思？雅各講，是beh tī我ê主ê面前得tio̍h恩典。 9 以掃講，小弟ah，我ê已經夠額，你ê猶原歸你。 10 雅各講，莫án-ni，我若tī你ê面前得tio̍h恩典，求你tùi我ê手收我ê禮物；因為我見tio̍h你ê面，親像見tio̍h上帝ê面，你亦接納我； 11 求你收我帶來hō͘你ê禮物；因為上帝恩典我，hō͘我充足；逼伊，然後收。 12 以掃講，咱起身來去，我做頭行。 13 雅各對伊講，我ê主知chiahê gín-á軟chiáⁿ，牛羊亦tú-á生；若做一日趕，kui群lóng beh死。 14 求我ê主tī奴僕ê頭前行，我beh照tī我面前kui群 cheng-siⁿ ê力量，亦照gín-á ê力量，慢慢進前，行到Se-jíⁿ，到我ê主hia。 15 以掃講，容允我將tè我ê人留幾個kap你做陣。雅各講，Mih-sái án-ni？Tī我ê主ê面前得tio̍h恩典就好。 16 Hit日以掃起身，照原路tò去Se-jíⁿ。 17 雅各行到Sò͘-kat，tī-hia為本身起厝，為cheng-siⁿ搭草寮；所以名hit所在做Sò͘-kat。 18 雅各tùi Pa-tàn-a-lân tò來ê時，平安到迦南地ê示劍城；tī城ê面前搭布棚。 19 用一百塊銀，tùi示劍ê老父Hap-boat ê kiaⁿ孫，買伊搭布棚hit塊地； 20 tī-hia起一座壇，kā伊號名叫I-lī I-lô-i以色列。
1 Ngá-kok kia̍h-ba̍k khòaⁿ, khòaⁿ-kìⁿ Í-sò lâi; koh ū sì-pah lâng kap i lâi. I chiū chiong hiah ê gín-á pun-khui, kau hō͘ Lī-a, kau hō͘ La̍h-kiat, kau hō͘ nn̄g ê lú-pī. 2 Chiong lú-pī kap in ê kiáⁿ pâi tī thâu-chêng, Lī-a kap i ê kiáⁿ pâi tī āu-bīn, La̍h-kiat kap Iok-sek pâi tī lō͘-bé. 3 I pún-sin tī in ê thâu-chêng kè-khì, liân-liân chhit-pái phak tī tōe-ni̍h, chiah óa-kūn i ê hiaⁿ. 4 Í-sò cháu-lâi ngiâ-chih i, chiong i phō-teh, koh lám i ê ām-kún, chim i; nn̄g-lâng chiū thî-khàu. 5 Í-sò kia̍h-ba̍k khòaⁿ-kìⁿ hū-jîn-lâng kap gín-á, chiū kóng, Chiah-ê kap lí tâng-kiâⁿ-ê sī chī-chūi? Ngá-kok kóng, Chiah ê gín-á sī Siōng-tè si-un hō͘ lí ê lô͘-po̍k-ê. 6 Tùi hit-tia̍p nn̄g ê lú-pī, kap in ê gín-á, chìn-chêng lâi pài. 7 Lī-a kap i ê gín-á ia̍h chìn-chêng lâi pài; lō͘-bé Iok-sek kap La̍h-kiat ia̍h chìn-chêng lâi pài. 8 Í-sò kóng, Góa só͘ tú-tio̍h kui-kûn ê cheng-siⁿ, lí sī sím-mi̍h ì-sù? Ngá-kok kóng, Sī beh tī góa ê chú ê bīn-chêng tit-tio̍h un-tián. 9 Í-sò kóng, Sió-tī ah, góa-ê í-keng kàu-gia̍h, lí-ê iû-goân kui lí. 10 Ngá-kok kóng, Bo̍h án-ni, góa nā tī lí ê bīn-chêng tit-tio̍h un-tián, kiû lí tùi góa ê chhiú siu góa ê lé-mi̍h; in-ūi góa kìⁿ-tio̍h lí ê bīn, chhin-chhiūⁿ kìⁿ-tio̍h Siōng-tè ê bīn, lí ia̍h chiap-la̍p góa; 11 kiû lí siu góa tòa-lâi hō͘ lí ê lé-mi̍h; in-ūi Siōng-tè un-tián góa, hō͘ góa chhiong-chiok; pek-i, jiân-āu siu. 12 Í-sò kóng, Lán khí-sin lâi khì, góa chòe-thâu kiâⁿ. 13 Ngá-kok tùi i kóng, góa ê chú chai chiah ê gín-á nńg-chiáⁿ, gû-iûⁿ ia̍h tú-á siⁿ; nā chòe chi̍t-ji̍t kóaⁿ, kui-kûn lóng beh sí. 14 Kiû góa ê chú tī lô͘-po̍k ê thâu-chêng kiâⁿ, góa beh chiàu tī góa bīn-chêng kui-kûn cheng-siⁿ ê le̍k-liōng, ia̍h chiàu gín-á ê le̍k-liōng, bān-bān chìn-chêng, kiâⁿ kàu Se-jíⁿ, kàu góa ê chú hia. 15 Í-sò kóng, Iông-ún góa chiong tè góa ê lâng lâu kúi-ê kap lí chòe-tīn. Ngá-kok kóng, Mih-sái án-ni? tī góa ê chú ê bīn-chêng tit-tio̍h un-tián chiū hó. 16 Hit-ji̍t Í-sò khí-sin, chiàu goân-lō͘ tò-khì Se-jíⁿ. 17 Ngá-kok kiâⁿ kàu Sò͘-kat, tī-hia ūi pún-sin khí-chhù, ūi cheng-siⁿ tah chháu-liâu; só͘-í miâ hit só͘-chāi chòe Sò͘-kat. 18 Ngá-kok tùi Pa-tàn-a-lân tò-lâi ê sî, pêng-an kàu Ka-lâm tōe ê Sī-kiàm siâⁿ; tī siâⁿ ê bīn-chêng tah pò͘-pîⁿ. 19 Ēng chi̍t-pah tè gûn, tùi Sī-kiàm ê lāu-pē Hap-boat ê kiáⁿ-sun, bóe i tah pò͘-pîⁿ hit tè tōe; 20 tī-hia khí chi̍t chō tôaⁿ, kā i hō miâ kiò I-lī I-lô-i Í-sek-lia̍t.
1 利亞kā雅各所生ê cha-bó͘-kiáⁿ，Tí-ná，出去beh見hit所在ê cha-bó͘-gín-á。 2 Hit所在ê bo̍k-pek Hi-bī人Hap-boat ê kiáⁿ示劍看見伊；就khiú伊，kap伊相kap睏，凌辱伊。 3 伊ê心戀慕雅各ê cha-bó͘-kiáⁿ Tí-ná；疼chitê cha-bó͘-kiáⁿ，用好話安慰伊。 4 示劍kā伊ê老父Hap-boat，講，求你kā我聘chitê cha-bó͘-gín-á做bó͘。 5 雅各聽見伊phah lâ-sâm伊ê cha-bó͘-kiáⁿ Tí-ná；hit時伊hiahê kiáⁿ kap伊ê cheng-siⁿ tī山裡；雅各靜靜無做聲，thèng候in tò來。 6 示劍ê老父，Hap-boat，出來見雅各，beh kap伊講話。 7 雅各hiahê kiáⁿ聽見chitê tāi-chì，就tùi山裡tò來，ta̍k-ê m̄甘願，十分受氣；因為示劍tī以色列做出見笑ê tāi-chì，kap雅各ê cha-bó͘-kiáⁿ相kap睏；這本是m̄應該做ê事。 8 Hap-boat kap in參詳講，我ê kiáⁿ示劍ê心欣慕lín ê cha-bó͘-gín-á；求lín將伊hō͘我ê kiáⁿ做bó͘。 9 Lín kap阮大家結親；lín thang將lín ê cha-bó͘-kiáⁿ hō͘阮，lín亦thang娶阮ê cha-bó͘-kiáⁿ。 10 Lín kap阮相kap khiā起；地tī lín ê面前，lín tòa chia khiā，做seng-lí，建置產業。 11 示劍對cha-bó͘-gín-á ê老父kap伊ê兄弟講，願tī你ê面前得tio̍h恩典；lín所對我講ê我beh hō͘ lín。 12 chhut-chāi lín beh tùi我討jōa-chōe聘金，kap禮物，我的確照lín所講ê hō͘ lín；只有ài lín用cha-bó͘-gín-á hō͘我做bó͘。 13 雅各hiahê kiáⁿ，因為示劍phah lâ-sâm in ê小妹Tí-ná，就用奸詐ê話來應示劍，kap伊ê老父，Hap-boat，對in講， 14 將阮ê小妹hō͘無受割禮ê人做bó͘，這ê tāi-chì阮bōe做得；因為he是阮ê見笑。 15 Lín所有ê ta-po͘人，若lóng受割禮親像阮一樣，有chí一項chiah thang應允lín； 16 阮就將阮ê cha-bó͘-kiáⁿ hō͘ lín，阮亦chhōa lín ê cha-bó͘-kiáⁿ；阮就kap lín相kap tòa，成做一个百姓。 17 設使lín m̄聽阮ê話來受割禮，阮就tòa阮ê小妹來去。 18 Hap-boat kap伊ê kiáⁿ示劍，歡喜in ê話。 19 Hit-ê少年人做chitê tāi-chì，lóng無延chhiân；因為伊疼雅各ê cha-bó͘-kiáⁿ；koh伊tī in老父ê家第一尊貴。 20 Hap-boat，kap伊ê kiáⁿ示劍，來到本城ê門口，kā本城ê人講， 21 Chiahê人kap咱和好；m̄值tio̍h chún in tī chitê地khiā起，做seng-lí；koh chitê地亦開闊，ōe容允得in；咱thang chhōa in ê cha-bó͘-kiáⁿ做bó͘，亦thang將咱ê cha-bó͘-kiáⁿ嫁hō͘ in。 22 獨獨tio̍h有一項，hiahê chiah beh允咱，kap咱khiā起，成做一个百姓；就是咱中間所有ê ta-po͘人lóng tio̍h受割禮，親像in受割禮一樣。 23 伊ê牛，羊，財產，kap一切ê cheng-siⁿ，kiám無lóng歸tī咱mah？只有tio̍h允in，in就beh kap咱tòa。 24 見若tùi城門出來ê人lóng聽thàn Hap-boat kap伊ê kiáⁿ示劍ê話；tùi án-ni見若tùi城門出來ê ta-po͘人lóng受割禮。 25 到第三日，眾人當teh痛疼ê時，雅各兩個kiáⁿ，就是Tí-ná ê兄西門kap利未，lóng kia̍h刀，thàn人無tiuⁿ-tî，來到城內，刣死lóng總ê ta-po͘人。 26 也用刀刣死Hap-boat kap伊ê kiáⁿ示劍；chhōa Tí-ná tùi示劍ê厝出來，就去。 27 雅各hiahê kiáⁿ，為tio̍h in小妹受phah lâ-sâm，就來到受刣 ê人hia，搶劫in ê城。 28 搶in ê羊群，牛群，kap驢；以及城內kap 田裡所有ê。 29 Koh將in一切ê貨物錢財，一切ê gín-á kap婦人人，以及ta̍k tè厝所有ê，lóng搶，掠就去。 30 雅各kā西門kap利未講，Lín連累我，hō͘我tī chit所在khiā起ê百姓ê中間，就是tī迦南人kap Pí-lī-sé人ê中間有臭名。Koh我ê人額少；in的確聚集來攻擊我，phah我；我kap全家ê人lóng會滅無。 31 In講，伊kiám thang款待阮小妹親像娼妓mah？
1 Lī-a kā Ngá-kok só͘ siⁿ ê cha-bó͘-kiáⁿ, Tí-ná, chhut-khì beh kìⁿ hit só͘-chāi ê cha-bó͘-gín-á. 2 Hit só͘-chāi ê bo̍k-pek Hi-bī lâng Hap-boat ê kiáⁿ Sī-kiàm khòaⁿ-kìⁿ i; chiū khiú-i, kap i saⁿ-kap khùn, lêng-jio̍k i. 3 I ê sim loân-bō͘ Ngá-kok ê cha-bó͘-kiáⁿ Tí-ná; thiàⁿ chit ê cha-bó͘-kiáⁿ, ēng hó-ōe an-ùi i. 4 Sī-kiàm kā i ê lāu-pē Hap-boat, kóng, Kiû lí kā góa phèng chit ê cha-bó͘-gín-á chòe-bó͘. 5 Ngá-kok thiaⁿ-kìⁿ i phah lâ-sâm i ê cha-bó͘-kiáⁿ Tí-ná; hit-sî i hiah ê kiáⁿ kap i ê cheng-siⁿ tī soaⁿ-ni̍h; Ngá-kok chēng-chēng bô chòe siaⁿ, thèng-hāu in tò-lâi. 6 Sī-kiàm ê lāu-pē, Hap-boat, chhut-lâi kìⁿ Ngá-kok, beh kap i kóng-ōe. 7 Ngá-kok hiah ê kiáⁿ thiaⁿ-kìⁿ chit ê tāi-chì, chiū tùi soaⁿ-ni̍h tò-lâi, ta̍k-ê m̄ kam-goān, cha̍p-hun siū-khì; in-ūi Sī-kiàm tī Í-sek-lia̍t chòe chhut kiàn-siàu ê tāi-chì, kap Ngá-kok ê cha-bó͘-kiáⁿ saⁿ-kap khùn; che pún sī m̄ eng-kai chòe ê sū. 8 Hap-boat kap in chham-siông kóng, Góa ê kiáⁿ Sī-kiàm ê sim him-bō͘ lín ê cha-bó͘-gín-á; kiû lín chiong i hō͘ góa ê kiáⁿ chòe-bó͘. 9 Lín kap goán tāi-ke kiat-chhin; lín thang chiong lín ê cha-bó͘-kiáⁿ hō͘ goán, lín ia̍h thang chhōa goán ê cha-bó͘-kiáⁿ. 10 Lín kap goán saⁿ-kap khiā-khí; tōe tī lín ê bīn-chêng, lín tòa chia khiā, chòe seng-lí, kiàn-tì sán-gia̍p. 11 Sī-kiàm tùi cha-bó͘-gín-á ê lāu-pē kap i ê hiaⁿ-tī kóng, Goān tī lí ê bīn-chêng tit-tio̍h un-tián; lín só͘ tùi góa kóng-ê góa beh hō͘ lín. 12 Chhut-chāi lín beh tùi góa thó jōa-chōe phèng-kim, kap lé-mi̍h, góa tek-khak chiàu lín só͘ kóng-ê hō͘ lín; chí-ū ài lín ēng cha-bó͘-gín-á hō͘ góa chòe-bó͘. 13 Ngá-kok hiah ê kiáⁿ, in-ūi Sī-kiàm phah lâ-sâm in ê sió-bē Tí-ná, chiū ēng kan-chà ê ōe lâi ìn Sī-kiàm, kap i ê lāu-pē, Hap-boat, tùi in kóng, 14 Chiong goán ê sió-bē hō͘ bô siū kat-lé ê lâng chòe-bó͘, che ê tāi-chì goán bōe-chòe-tit; in-ūi he sī goán ê kiàn-siàu. 15 Lín só͘ ū ê ta-po͘-lâng, nā lóng siū kat-lé chhin-chhiūⁿ goán chi̍t-iūⁿ, ū chí chi̍t-hāng chiah thang èng-ún lín; 16 goán chiū chiong goán ê cha-bó͘-kiáⁿ hō͘ lín, goán ia̍h chhōa lín ê cha-bó͘-kiáⁿ; goán chiū kap lín saⁿ-kap tòa, chiâⁿ-chòe chi̍t ê peh-sìⁿ. 17 Siat-sú lín m̄-thiaⁿ goán ê ōe lâi siū kat-lé, goán chiū tòa goán ê sió-bē lâi khì. 18 Hap-boat kap i ê kiáⁿ Sī-kiàm, hoaⁿ-hí in ê ōe. 19 Hit ê siàu-liân lâng chòe chit ê tāi-chì, lóng bô iân-chhiân; in-ūi i thiàⁿ Ngá-kok ê cha-bó͘-kiáⁿ; koh i tī in lāu-pē ê ke tē-it chun-kùi. 20 Hap-boat, kap i ê kiáⁿ Sī-kiàm, lâi kàu pún-siâⁿ ê mn̂g-kháu, kā pún-siâⁿ ê lâng kóng, 21 Chiah ê lâng kap lán hô-hó; m̄-ta̍t-tio̍h chún in tī chit ê tōe khiā-khí, chòe seng-lí; koh chit ê tōe ia̍h khui-khoah, ōe iông-ún-tit in; lán thang chhōa in ê cha-bó͘-kiáⁿ chòe-bó͘, ia̍h thang chiong lán ê cha-bó͘-kiáⁿ kè hō͘ in. 22 To̍k-to̍k tio̍h ū chi̍t-hāng, hiah-ê chiah beh ún lán, kap lán khiā-khí, chiâⁿ-chòe chi̍t ê peh-sìⁿ; chiū-sī lán tiong-kan só͘ ū ê ta-po͘-lâng lóng tio̍h siū kat-lé, chhin-chhiūⁿ in siū kat-lé chi̍t-iūⁿ. 23 I ê gû, iûⁿ, châi-sán, kap it-chhè ê cheng-siⁿ, kiám bô lóng kui tī lán mah? Chí-ū tio̍h ún-in, in chiū beh kap lán tòa. 24 Kìⁿ-nā tùi siâⁿ-mn̂g chhut-lâi ê lâng lóng thiaⁿ-thàn Hap-boat kap i ê kiáⁿ Sī-kiàm ê ōe; tùi án-ni kìⁿ-nā tùi siâⁿ-mn̂g chhut-lâi ê ta-po͘-lâng lóng siū kat-lé. 25 Kàu tē-saⁿ ji̍t, chèng-lâng tng teh thàng-thiàⁿ ê sî, Ngá-kok nn̄g ê kiáⁿ, chiū-sī Tí-ná ê hiaⁿ Se-biān kap Lī-bī, lóng kia̍h-to, thàn lâng bô tiuⁿ-tî, lâi kàu siâⁿ-lāi, thâi-sí lóng-chóng ê ta-po͘-lâng. 26 Iā ēng to thâi-sí Hap-boat kap i ê kiáⁿ Sī-kiàm; chhōa Tí-ná tùi Sī-kiàm ê chhù chhut-lâi, chiū khì. 27 Ngá-kok hiah ê kiáⁿ, ūi-tio̍h in sió-bē siū phah lâ-sâm, chiū lâi kàu siū-thâi ê lâng hia, chhiúⁿ-kiap in ê siâⁿ. 28 Chhiúⁿ in ê iûⁿ-kûn, gû-kûn, kap lû; í-ki̍p siâⁿ-lāi kap chhân-ni̍h só͘ ū ê. 29 Koh chiong in it-chhè ê hè-mi̍h chîⁿ-châi, it-chhè ê gín-á kap hū-jîn-lâng, í-ki̍p ta̍k tè chhù só͘-ū-ê, lóng chhiúⁿ, lia̍h chiū khì. 30 Ngá-kok kā Se-biān kap Lī-bī kóng, Lín liân-lūi góa, hō͘ góa tī chit só͘-chāi khiā-khí ê peh-sìⁿ ê tiong-kan, chiū-sī tī Ka-lâm lâng kap Pí-lī-sé lâng ê tiong-kan ū chhàu-miâ. Koh góa ê lâng-gia̍h chió; in tek-khak chū-chi̍p lâi kong-kek góa, phah góa; góa kap choân-ke ê lâng lóng ōe bia̍t-bô. 31 In kóng, I kiám thang khoán-thāi goán sió-bē chhin-chhiūⁿ chhiong-ki mah?
1 上帝kā雅各講，起ah，上去Pek-te̍k-lī，tòa tī-hia。Koh tio̍h tī-hia kā上帝起一座壇，就是你閃避你ê兄以掃ê面ê時，對你出現ê，hitê。 2 雅各就kā全家以及一切kap伊tī-teh ê人講，Lín tio̍h除去lín中間外邦ê上帝；亦tio̍h家己清氣，換 lín ê衣裳。 3 咱tio̍h起來，上去Pek-te̍k-lī；tī-hia我beh kā上帝起一座壇，就是tī我tú-tio̍h患難ê日，允准我ê祈禱，tī我所行ê路kap我tī-teh，hitê。 4 In就將in手內所有異邦ê神明，kap in ê耳鉤，lóng hō͘雅各；雅各將hiahê 埋 tī示劍hit位ê橡樹腳。 5 In就起身，上帝hō͘四周圍ê城ê人lóng真驚；in就無追jip雅各ê眾kiáⁿ。 6 雅各，以及一切kap伊做陣ê人，到迦南地ê Lō͘-su，就是Pek-te̍k-lī。 7 伊tī-hia起一座壇，就kā hit所在號名，叫I-le̍k-pek-te̍k-lī；因為伊閃避伊ê兄ê時，上帝tī-hia對伊出現。 8 利百加ê奶母Tí-phò-lat死；就埋葬tī Pek-te̍k-lī ê下面，橡樹腳；所以叫伊ê名A-lûn-pa-kó͘。 9 雅各tùi Pa-tàn-a-lân tò來，上帝koh對伊出現，賜福hō͘ 伊。 10 上帝koh kā伊講，你名是雅各；taⁿ以後你ê名無koh叫雅各，beh名叫以色列；就叫伊ê名以色列。 11 上帝koh kā伊講，我是全能ê上帝；你tio̍h生湠chōe-chōe；將來有一國，koh有chōe-chōe 國，tùi你來生，koh有君王tùi你生出。 12 我所hō͘亞伯拉罕kap以撒ê地，我beh hō͘你，亦beh將chitê地hō͘你ê後裔。 13 上帝就tùi kap伊講話ê所在上去。 14 雅各就tī上帝kap伊講話ê所在，khiā一支柱，就是石柱；tī hit頂面灌奠倒油。 15 雅各就稱上帝kap伊講話ê所在，名做Pek-te̍k-lī。 16 In tùi Pek-te̍k-lī起身；離開Í-hoat-tha iáu有一chām ê路；拉結得beh生臨產艱難。 17 當伊艱苦生ê時，拾者對伊講，m̄免驚，你taⁿ beh koh得tio̍h一个kiáⁿ。 18 伊氣beh斷，臨終ê時，就叫伊ê kiáⁿ ê名Piān-gô-nî；伊ê老父kā伊號名便雅憫。 19 拉結死，埋葬tī去Í-hoat-tha ê路；Í-hoat-tha就是伯利恆。 20 雅各khiā柱tī伊ê墓頂；chitê柱就是拉結ê墓牌；到今á日iáu tī-teh。 21 以色列koh起身去，tī Í-tek-tâi 搭布棚。 22 以色列tòa tī hit所在ê時，Liû-piān去kap伊ê老父ê細姨，Phek-la̍h，相kap睏；以色列亦聽。 23 雅各共有十二個kiáⁿ。利亞ê kiáⁿ，就是雅各ê大kiáⁿ Liû-piān，以及西門，利未，偤大，Í-sat-ka，Se-pò͘-lûn； 24 拉結ê kiáⁿ，就是約瑟，便雅憫； 25 拉結ê女婢Phek-la̍h所生ê kiáⁿ，就是Tàn kap Ná-hut-tha-lī； 26 利亞ê女婢Sek-phàⁿ所生ê kiáⁿ Ka-tek，A-siat；這是雅各tī Pa-tàn-a-lân所生ê kiáⁿ。 27 雅各來見伊ê老父以撒tī Bān-lī，到Ki-lia̍t-a-pa，就是Hi-pek-lûn，亞伯拉罕kap以撒bat寄居ê所在。 28 以撒享壽一百八十歲； 29 以撒年歲老，日子滿足，氣斷來死，tò去伊ê列祖hia；伊兩個kiáⁿ以掃，雅各，kā伊埋葬。
1 Siōng-tè kā Ngá-kok kóng, Khí-ah, chiūⁿ-khì Pek-te̍k-lī, tòa tī-hia. Koh tio̍h tī-hia kā Siōng-tè khí chi̍t chō tôaⁿ, chiū-sī lí siám-pī lí ê hiaⁿ Í-sò ê bīn ê sî, tùi lí chhut-hiān-ê, hit-ê. 2 Ngá-kok chiū kā choân-ke í-ki̍p it-chhè kap i tī-teh ê lâng kóng, Lín tio̍h tû-khì lín tiong-kan gōa-pang ê siōng-tè; ia̍h tio̍h ka-kī chheng-khì, ōaⁿ lín ê i-chiûⁿ. 3 Lán tio̍h khí-lâi, chiūⁿ-khì Pek-te̍k-lī; tī-hia góa beh kā Siōng-tè khí chi̍t chō tôaⁿ, chiū-sī tī góa tú-tio̍h hoān-lān ê ji̍t, ún-chún góa ê kî-tó, tī góa só͘ kiâⁿ ê lō͘ kap góa tī-teh, hit-ê. 4 In chiū chiong in chhiú-lāi só͘ ū īⁿ-pang ê sîn-bêng, kap in ê hī-kau, lóng hō͘ Ngá-kok; Ngá-kok chiong hiah-ê tâi tī Sī-kiàm hit-ūi ê siōng-chhiū-kha. 5 In chiū khí-sin, Siōng-tè hō͘ sì-chiu-ûi ê siâⁿ ê lâng lóng chin kiaⁿ; in chiū bô tui-jip Ngá-kok ê chèng-kiáⁿ. 6 Ngá-kok, í-ki̍p it-chhè kap i chòe-tīn ê lâng, kàu Ka-lâm tōe ê Lō͘-su, chiū-sī Pek-te̍k-lī. 7 I tī-hia khí chi̍t chō tôaⁿ, chiū kā hit só͘-chāi hō-miâ, kiò I-le̍k-pek-te̍k-lī; in-ūi i siám-pī i ê hiaⁿ ê sî, Siōng-tè tī-hia tùi i chhut-hiān. 8 Lī-pek-ka ê ni-bú Tí-phò-lat sí; chiū bâi-chòng tī Pek-te̍k-lī ê ē-bīn, siōng-chhiū-kha; só͘-í kiò i ê miâ A-lûn-pa-kó͘. 9 Ngá-kok tùi Pa-tàn-a-lân tò-lâi, Siōng-tè koh tùi i chhut-hiān, sù-hok hō͘ i. 10 Siōng-tè koh kā i kóng, Lí miâ sī Ngá-kok; taⁿ í-āu lí ê miâ bô koh kiò Ngá-kok, beh miâ kiò Í-sek-lia̍t; chiū kiò i ê miâ Í-sek-lia̍t. 11 Siōng-tè koh kā i kóng, Góa sī choân-lêng ê Siōng-tè; lí tio̍h siⁿ-thòaⁿ chōe-chōe; chiong-lâi ū chi̍t-kok, koh ū chōe-chōe kok, tùi lí lâi siⁿ, koh ū kun-ông tùi lí siⁿ-chhut. 12 Góa só͘ hō͘ A-pek-la̍h-hán kap Í-sat ê tōe, Góa beh hō͘ lí, ia̍h beh chiong chit ê tōe hō͘ lí ê hō͘-è. 13 Siōng-tè chiū tùi kap i kóng-ōe ê só͘-chāi chiūⁿ-khì. 14 Ngá-kok chiū tī Siōng-tè kap i kóng-ōe ê só͘-chāi, khiā chi̍t ki thiāu, chiū-sī chio̍h-thiāu; tī hit téng-bīn koàn-tiān tò-iû. 15 Ngá-kok chiū chheng Siōng-tè kap i kóng-ōe ê só͘-chāi, miâ chòe Pek-te̍k-lī. 16 In tùi Pek-te̍k-lī khí-sin; lī-khui Í-hoat-tha iáu ū chi̍t chām ê lō͘; La̍h-kiat tit-beh siⁿ lîm-sán kan-lân. 17 Tng i kan-khó͘ siⁿ ê sî, khioh-chiá tùi i kóng, M̄-bián kiaⁿ, lí taⁿ beh koh tit-tio̍h chi̍t ê kiáⁿ. 18 I khùi beh tn̄g, lîm-chiong ê sî, chiū kiò i ê kiáⁿ ê miâ Piān-gô-nî; i ê lāu-pē kā i hō-miâ Piān-ngá-bín. 19 La̍h-kiat sí, bâi-chòng tī khì Í-hoat-tha ê lō͘; Í-hoat-tha chiū-sī Pek-lī-hêng. 20 Ngá-kok khiā thiāu tī i ê bōng-téng; chit ê thiāu chiū-sī La̍h-kiat ê bōng-pâi; kàu kin-á-ji̍t iáu tī-teh. 21 Í-sek-lia̍t koh khí-sin khì, tī Í-tek-tâi tah pò͘-pîⁿ. 22 Í-sek-lia̍t tòa tī hit só͘-chāi ê sî, Liû-piān khì kap i ê lāu-pē ê sòe-î, Phek-la̍h, saⁿ-kap khùn; Í-sek-lia̍t ia̍h thiaⁿ. 23 Ngá-kok kiōng ū cha̍p-jī ê kiáⁿ. Lī-a ê kiáⁿ, chiū-sī Ngá-kok ê tōa-kiáⁿ Liû-piān, í-ki̍p Se-biān, Lī-bī, Iû-tāi, Í-sat-ka, Se-pò͘-lûn; 24 La̍h-kiat ê kiáⁿ, chiū-sī Iok-sek, Piān-ngá-bín; 25 La̍h-kiat ê lú-pī Phek-la̍h só͘ siⁿ ê kiáⁿ, chiū-sī Tàn kap Ná-hut-tha-lī; 26 Lī-a ê lú-pī Sek-phàⁿ só͘ siⁿ ê kiáⁿ Ka-tek, A-siat; che sī Ngá-kok tī Pa-tàn-a-lân só͘ siⁿ ê kiáⁿ. 27 Ngá-kok lâi kìⁿ i ê lāu-pē Í-sat tī Bān-lī, kàu Ki-lia̍t-a-pa, chiū-sī Hi-pek-lûn, A-pek-la̍h-hán kap Í-sat bat kià-ku ê só͘-chāi. 28 Í-sat hióng-siū chi̍t-pah poeh-cha̍p hè; 29 Í-sat nî-hè lāu, ji̍t-chí móa-chiok, khùi tn̄g lâi sí, tò-khì i ê lia̍t-chó͘ hia; i nn̄g ê kiáⁿ Í-sò, Ngá-kok, kā i bâi-chòng.
1 以掃就是Í-tong，伊ê世系記tī下底。 2 以掃chhōa迦南地ê cha-bó͘-gín-á做bó͘；就是Hek人Í-lûn ê cha-bó͘-kiáⁿ a-tāi，kap Hi-bī人Chè-piān ê cha-bó͘-sun，A-ná ê cha-bó͘-kiáⁿ，A-hô-lī-pa-má。 3 Koh chhōa以實瑪利ê cha-bó͘-kiáⁿ，Nî-pâi-iok ê姊妹，Pa-si̍t-boat。 4 A-tāi kā以掃生Í-lī-hoat；Pa-si̍t-boat生Liû-jíⁿ； 5 A-hô-lī-pa-má生Iâ-o͘-si，Ngá-lân，Khó-la̍h；這lóng是以掃ê kiáⁿ，tī迦南地生ê。 6 以掃帶伊ê bó͘，kiáⁿ，cha-bó͘-kiáⁿ，kap家內lóng總ê人，以及牛，羊，kap一切ê cheng-siⁿ，一切ê財物，就是伊tī迦南地所得tio̍h-ê，去別所在，離開伊ê小弟雅各。 7 因為兩人所有ê真chōe，bōe thang相kap khiā；koh因為in ê牛，羊chōe，所寄腳ê所在bōe容允得。 8 Tùi án-ni以掃tòa tī Se-jíⁿ 山。以掃就是Í-tong。 9 以掃ê世系記tī下底：以掃就是Se-jíⁿ 山Í-tong人ê祖； 10 以掃chiahê kiáⁿ ê名記tī下底，以掃ê bó͘ A-tāi ê kiáⁿ Í-lī-hoat，以掃ê bó͘ Pa-si̍t-boat ê kiáⁿ Liû-jíⁿ。 11 Í-lī-hoat ê kiáⁿ；Thê-bān，O-boat，Sé-pho，Ka-thán，Ki-la̍p-su； 12 Têng-la̍p是以掃ê kiáⁿ Í-lī-hoat ê細姨，伊kā Í-lī-hoat生A-má-le̍k；這是以掃ê bó͘ A-tāi ê kiaⁿ孫。 13 Liû-jíⁿ ê kiáⁿ是Ná-hap，謝拉，Sa-má，Bí-sat；chiahê是以掃ê bó͘ Pa-si̍t-boat ê kiaⁿ孫。 14 以掃ê bó͘ A-hô-lī-pa-má是Chè-piān ê cha-bó͘-sun，A-ná ê cha-bó͘-kiáⁿ；伊kā以掃生Iâ-o͘-si，Ngá-lân，Khó-la̍h。 15 以掃ê kiáⁿ所生做族長ê，記tī下底；以掃ê大kiáⁿ Í-lī-hoat ê kiáⁿ，有Thê-bān族長，O-boat族長，Sé-pho族長，Ki-la̍p-su族長， 16 Khó-la̍h族長，Ka-thán族長，A-má-le̍k族長；chiahê是tī Í-tong地，Í-lī-hoat所生ê族長，是A-tāi ê kiaⁿ孫。 17 以掃ê kiaⁿ孫Liû-jíⁿ ê kiáⁿ，有Ná-hap族長，謝拉族長，Sa-má族長，Bí-sat族長；這是tī Í-tong地，tùi Liû-jíⁿ所出ê族長，lóng是以掃ê bó͘ Pa-si̍t-boat ê kiaⁿ孫。 18 以掃ê bó͘ A-hô-lī-pa-má ê kiáⁿ，有Iâ-o͘-si族長，Ngá-lân族長，Khó-la̍h族長；這是tùi以掃ê bó͘，A-ná ê cha-bó͘-kiáⁿ a-hô-lī-pa-má，所出ê族長。 19 Chiahê是以掃ê kiaⁿ孫，koh chiahê是in ê族長；以掃就是Í-tong。 20 Hit所在ê本地人，就是河-lī人Se-jíⁿ ê kiaⁿ孫，記下底；就是Lô-tan，Sok-pa，Chè-piān，A-ná，Tí-sūn，Í-chhat，Tí-san； 21 chiahê是tùi Í-tong地ê Hô-lī人，Se-jíⁿ kiaⁿ孫中所出ê族長。 22 Lô-tan ê kiáⁿ是Hô-lī，Hi-bān；Lô-tan ê姊妹是Têng-la̍p。 23 Sok-pa ê kiáⁿ是A-le̍k-bûn，Má-ná-hat，Í-pa-lio̍k，Sī-pho，O-lâm。 24 Chè-piān ê kiáⁿ；A-ngá，A-ná；當時teh 飼 in老父Chè-piān ê驢，tī曠野chhē-tio̍h溫泉ê，就是chitê A-ná。 25 A-ná ê kiáⁿ是Tí-sūn；A-ná ê cha-bó͘-kiáⁿ是A-hô-lī-pa-má。 26 Tí-sūn ê kiáⁿ是Him-tàn，I-sī-pan，Ek-lân，Ki-lân。 27 Í-chhat ê kiáⁿ是Phek-hán，Sat-hoan，A-kan。 28 Tí-san ê kiáⁿ是O͘-su，A-lân。 29 Tùi Hô-lī人所出ê族長，記tī下底；就是Lô-tan族長，Sok-pa族長，Chè-piān族長，A-ná族長， 30 Tí-sūn族長，Í-chhat族長，Tí-san族長。Chiahê是tùi Hô-lī人所出ê族長，lóng tī Se-jíⁿ地做族長。 31 當以色列人未有君王治理ê事先，tī Í-tong地做王來治理ê 記tī下底。 32 Pí-jíⁿ ê kiáⁿ，Pí-la̍h，tī Í-tong做王；伊ê 京城名叫Têng-hap-pa。 33 Pí-la̍h死了，Pho-su-la̍h人謝拉 ê kiáⁿ，Iok-pa，續接伊做王。 34 Iok-pa死，Thê-bān地ê人Hō͘-san續接伊做王。 35 Hō͘-san死，Pí-ta̍t ê kiáⁿ，Hap-ta̍t，續接伊做王；伊就是tī Mô͘-ap地刣贏米甸人ê。伊ê京城名叫A-bī-tek。 36 Hap-ta̍t死，Má-sū-lī-ka人Song-la̍h續接伊做王。 37 Song-la̍h死了，河邊ê Lī-hô-pek人掃羅續接伊做王。 38 掃羅死，A-kek-pho ê kiáⁿ，Pa-le̍k-hap-lâm，續接伊做王。 39 A-kek-pho ê kiáⁿ Pa-le̍k-hap-lâm死，Hap-ta̍t續接伊做王；伊ê京城名叫Pa-o͘；伊ê bó͘名叫Bí-hi-tha-piat，是Bí-sat-hap ê cha-bó͘-sun，Má-tek-lia̍t ê cha-bó͘-kiáⁿ。 40 Tùi以掃所出ê族長，照in ê宗族，所在，名字，記tī下底；就是Têng-la̍p族長，A-le̍k-óa族長，Iâ-thiap族長； 41 A-hô-lī-pa-má族長，Í-la̍h族長，Pí-lùn族長； 42 Ki-la̍p-su族長，Thê-bān族長，Bí-pí-sat族長； 43 Má-ki-tia̍p族長，Í-lân族長；chiahê是Í-tong ê族長，照In khiā起ê所在，tī所得tio̍h做業ê地。Chitê是Í-tong人ê祖，就是以掃。
1 Í-sò chiū-sī Í-tong, i ê sè-hē kì tī ē-tóe. 2 Í-sò chhōa Ka-lâm tōe ê cha-bó͘-gín-á chòe-bó͘; chiū-sī Hek-lâng Í-lûn ê cha-bó͘-kiáⁿ A-tāi, kap Hi-bī lâng Chè-piān ê cha-bó͘-sun, A-ná ê cha-bó͘-kiáⁿ, A-hô-lī-pa-má. 3 Koh chhōa Í-si̍t-má-lī ê cha-bó͘-kiáⁿ, Nî-pâi-iok ê chí-bē, Pa-si̍t-boat. 4 A-tāi kā Í-sò siⁿ Í-lī-hoat; Pa-si̍t-boat siⁿ Liû-jíⁿ; 5 A-hô-lī-pa-má siⁿ Iâ-o͘-si, Ngá-lân, Khó-la̍h; che lóng sī Í-sò ê kiáⁿ, tī Ka-lâm tōe siⁿ-ê. 6 Í-sò tòa i ê bó͘, kiáⁿ, cha-bó͘-kiáⁿ, kap ke-lāi lóng-chóng ê lâng, í-ki̍p gû, iûⁿ, kap it-chhè ê cheng-siⁿ, it-chhè ê châi-bu̍t, chiū-sī i tī Ka-lâm tōe só͘ tit-tio̍h-ê, khì pa̍t só͘-chāi, lī-khui i ê sió-tī Ngá-kok. 7 In-ūi nn̄g-lâng só͘-ū-ê chin-chōe, bōe thang saⁿ-kap khiā; koh in-ūi in ê gû, iûⁿ chōe, só͘ kià-kha ê só͘-chāi bōe iông-ún-tit. 8 Tùi án-ni Í-sò tòa tī Se-jíⁿ soaⁿ. Í-sò chiū-sī Í-tong. 9 Í-sò ê sè-hē kì tī ē-tóe: Í-sò chiū-sī Se-jíⁿ soaⁿ Í-tong lâng ê chó͘; 10 Í-sò chiah ê kiáⁿ ê miâ kì tī ē-tóe, Í-sò ê bó͘ A-tāi ê kiáⁿ Í-lī-hoat, Í-sò ê bó͘ Pa-si̍t-boat ê kiáⁿ Liû-jíⁿ. 11 Í-lī-hoat ê kiáⁿ; Thê-bān, O-boat, Sé-pho, Ka-thán, Ki-la̍p-su; 12 Têng-la̍p sī Í-sò ê kiáⁿ Í-lī-hoat ê sòe-î, i kā Í-lī-hoat siⁿ A-má-le̍k; che sī Í-sò ê bó͘ A-tāi ê kiáⁿ-sun. 13 Liû-jíⁿ ê kiáⁿ sī Ná-hap, Siā-la̍h, Sa-má, Bí-sat; chiah-ê sī Í-sò ê bó͘ Pa-si̍t-boat ê kiáⁿ-sun. 14 Í-sò ê bó͘ A-hô-lī-pa-má sī Chè-piān ê cha-bó͘-sun, A-ná ê cha-bó͘-kiáⁿ; i kā Í-sò siⁿ Iâ-o͘-si, Ngá-lân, Khó-la̍h. 15 Í-sò ê kiáⁿ só͘ siⁿ chòe cho̍k-tiúⁿ-ê, kì tī ē-tóe; Í-sò ê tōa-kiáⁿ Í-lī-hoat ê kiáⁿ, ū Thê-bān cho̍k-tiúⁿ, O-boat cho̍k-tiúⁿ, Sé-pho cho̍k-tiúⁿ, Ki-la̍p-su cho̍k-tiúⁿ, 16 Khó-la̍h cho̍k-tiúⁿ, Ka-thán cho̍k-tiúⁿ, A-má-le̍k cho̍k-tiúⁿ; chiah-ê sī tī Í-tong tōe, Í-lī-hoat só͘ siⁿ ê cho̍k-tiúⁿ, sī A-tāi ê kiáⁿ-sun. 17 Í-sò ê kiáⁿ-sun Liû-jíⁿ ê kiáⁿ, ū Ná-hap cho̍k-tiúⁿ, Siā-la̍h cho̍k-tiúⁿ, Sa-má cho̍k-tiúⁿ, Bí-sat cho̍k-tiúⁿ; che sī tī Í-tong tōe, tùi Liû-jíⁿ só͘ chhut ê cho̍k-tiúⁿ, lóng sī Í-sò ê bó͘ Pa-si̍t-boat ê kiáⁿ-sun. 18 Í-sò ê bó͘ A-hô-lī-pa-má ê kiáⁿ, ū Iâ-o͘-si cho̍k-tiúⁿ, Ngá-lân cho̍k-tiúⁿ, Khó-la̍h cho̍k-tiúⁿ; che sī tùi Í-sò ê bó͘, A-ná ê cha-bó͘-kiáⁿ A-hô-lī-pa-má, só͘ chhut ê cho̍k-tiúⁿ. 19 Chiah-ê sī Í-sò ê kiáⁿ-sun, koh chiah-ê sī in ê cho̍k-tiúⁿ; Í-sò chiū-sī Í-tong. 20 Hit só͘-chāi ê pún-tōe lâng, chiū-sī Hô-lī lâng Se-jíⁿ ê kiáⁿ-sun, kì ē-tóe; chiū-sī Lô-tan, Sok-pa, Chè-piān, A-ná, Tí-sūn, Í-chhat, Tí-san; 21 chiah-ê sī tùi Í-tong tōe ê Hô-lī lâng, Se-jíⁿ kiáⁿ-sun-tiong só͘ chhut ê cho̍k-tiúⁿ. 22 Lô-tan ê kiáⁿ sī Hô-lī, Hi-bān; Lô-tan ê chí-bē sī Têng-la̍p. 23 Sok-pa ê kiáⁿ sī A-le̍k-bûn, Má-ná-hat, Í-pa-lio̍k, Sī-pho, O-lâm. 24 Chè-piān ê kiáⁿ; A-ngá, A-ná; tng-sî teh chhī in lāu-pē Chè-piān ê lû, tī khòng-iá chhē-tio̍h un-chôaⁿ-ê, chiū-sī chit ê A-ná. 25 A-ná ê kiáⁿ sī Tí-sūn; A-ná ê cha-bó͘-kiáⁿ sī A-hô-lī-pa-má. 26 Tí-sūn ê kiáⁿ sī Him-tàn, I-sī-pan, Ek-lân, Ki-lân. 27 Í-chhat ê kiáⁿ sī Phek-hán, Sat-hoan, A-kan. 28 Tí-san ê kiáⁿ sī O͘-su, A-lân. 29 Tùi Hô-lī lâng só͘ chhut ê cho̍k-tiúⁿ, kì tī ē-tóe; chiū-sī Lô-tan cho̍k-tiúⁿ, Sok-pa cho̍k-tiúⁿ, Chè-piān cho̍k-tiúⁿ, A-ná cho̍k-tiúⁿ, 30 Tí-sūn cho̍k-tiúⁿ, Í-chhat cho̍k-tiúⁿ, Tí-san cho̍k-tiúⁿ. Chiah-ê sī tùi Hô-lī lâng só͘ chhut ê cho̍k-tiúⁿ, lóng tī Se-jíⁿ tōe chòe cho̍k-tiúⁿ. 31 Tng Í-sek-lia̍t lâng bē ū kun-ông tī-lí ê tāi-seng, tī Í-tong tōe chòe ông lâi tī-lí-ê kì tī ē-tóe. 32 Pí-jíⁿ ê kiáⁿ, Pí-la̍h, tī Í-tong chòe ông; i ê kiaⁿ-siâⁿ miâ kiò Têng-hap-pa. 33 Pí-la̍h sí-liáu, Pho-su-la̍h lâng Siā-la̍h ê kiáⁿ, Iok-pa, sòa-chiap i chòe ông. 34 Iok-pa sí, Thê-bān tōe ê lâng Hō͘-san sòa-chiap i chòe ông. 35 Hō͘-san sí, Pí-ta̍t ê kiáⁿ, Hap-ta̍t, sòa-chiap i chòe ông; i chiū-sī tī Mô͘-ap tōe thâi-iâⁿ Bí-tiân lâng-ê. I ê kiaⁿ-siâⁿ miâ kiò A-bī-tek. 36 Hap-ta̍t sí, Má-sū-lī-ka lâng Song-la̍h sòa-chiap i chòe ông. 37 Song-la̍h sí-liáu, Hô-piⁿ ê Lī-hô-pek lâng Sò-lô sòa-chiap i chòe ông. 38 Sò-lô sí, A-kek-pho ê kiáⁿ, Pa-le̍k-hap-lâm, sòa-chiap i chòe ông. 39 A-kek-pho ê kiáⁿ Pa-le̍k-hap-lâm sí, Hap-ta̍t sòa-chiap i chòe ông; i ê kiaⁿ-siâⁿ miâ-kiò Pa-o͘; i ê bó͘ miâ-kiò Bí-hi-tha-piat, sī Bí-sat-ha̍p ê cha-bó͘-sun, Má-tek-lia̍t ê cha-bó͘-kiáⁿ. 40 Tùi Í-sò só͘ chhut ê cho̍k-tiúⁿ, chiàu in ê chong-cho̍k, só͘-chāi, miâ-jī, kì tī ē-tóe; chiū-sī Têng-la̍p cho̍k-tiúⁿ, A-le̍k-óa cho̍k-tiúⁿ, Iâ-thiap cho̍k-tiúⁿ; 41 A-hô-lī-pa-má cho̍k-tiúⁿ, Í-la̍h cho̍k-tiúⁿ, Pí-lùn cho̍k-tiúⁿ; 42 Ki-la̍p-su cho̍k-tiúⁿ, Thê-bān cho̍k-tiúⁿ, Bí-pí-sat cho̍k-tiúⁿ; 43 Má-ki-tia̍p cho̍k-tiúⁿ, Í-lân cho̍k-tiúⁿ; chiah-ê sī Í-tong ê cho̍k-tiúⁿ, chiàu in khiā-khí ê só͘-chāi, tī só͘ tit-tio̍h chòe-gia̍p ê tōe. Chit-ê sī Í-tong lâng ê chó͘, chiū-sī Í-sò.
1 雅各khiā起迦南地，就是伊ê老父寄腳ê所在。 2 雅各ê世系記tī下底。約瑟十七歲kap伊hiahê兄相kap 顧羊；伊是一个gín-á kap伊ê老父ê細姨Phek-la̍h ê kiáⁿ，Sek-phàⁿ ê kiáⁿ，常常做陣；約瑟將伊hiahê兄ê pháiⁿ品行kā in老父講。 3 Taⁿ以色列疼約瑟khah贏過 tī疼伊ê眾kiáⁿ，因為約瑟是伊年老生ê；伊kā伊做一領彩色ê衫。 4 約瑟hiahê兄看見老父疼約瑟，過頭tī疼in；就怨恨約瑟，bōe會kap伊講和睦ê話。 5 約瑟夢見一个夢，kā伊hiahê兄講；in就koh-khah怨恨伊。 6 約瑟對in講，請lín聽我所夢見ê夢。 7 咱tī園裡hâ五穀；我所hâ-ê起來khiā，lín所hâ-ê圍纍來拜我所hâ-ê。 8 伊ê兄應講，總無你真正beh做阮ê王mah？真正beh管轄阮mah？In就為tio̍h伊ê 夢，kap伊ê話，koh-khah怨恨伊。 9 後來伊koh夢見一个夢，亦kā伊ê兄講，你看，我又koh夢見一个夢；有日，月，kap十一粒星teh拜我。 10 約瑟kā伊ê老父kap伊ê兄講；in老父就責備伊，講，你所夢見chitê 夢是怎樣？總無我kap lín老母lín兄弟，lóng beh仆teh拜你mah？ 11 伊ê兄lóng怨妒伊；伊ê老父用chiahê話記tī心內。 12 約瑟ê兄去示劍，飼老父ê羊。 13 以色列tùi約瑟講，Lín hiaⁿ kiám m̄是tī示劍飼羊mah？你來，我beh差你去in hia。 14 伊應講，我tī-chia。伊kā伊講，你去看lín兄有平安á無，羊群有平安á無；tò來kā我講。就差伊出Hi-pek-lûn ê山谷；伊就去到示劍。 15 有人tn̄g-tio̍h伊tī山裡迷路；就問伊講，你teh chhē甚麼？ 16 伊講，我teh chhē我ê兄；請kā我講，in tī tah-lo̍h teh飼羊。 17 hit人講，In已經離開chia；因為我聽見in teh講，咱來去To-tan。約瑟就去jip伊ê兄，tú-tio̍h in tī To-tan。 18 In遠遠看見伊，伊iáu未行到in hia，in就相kap計謀beh害死伊。 19 大家相kap講，你看，做夢ê來lah。 20 Hò͘來，taⁿ咱kā伊刣死，hiat tī一个乾井；chiah來講有pháiⁿ-siù食伊；咱chiah看伊ê 夢將來怎樣。 21 Liû-piān聽見，就救伊脫離in ê手；講，咱m̄-thang害伊ê性命。 22 Liû-piān koh對in講，M̄-thang hō͘伊流血；thang kā伊hiat tī chitê曠野ê乾井，m̄-thang下手害伊；意思是beh救伊脫離in ê手，hō͘伊tò去伊ê老父hia。 23 約瑟到伊ê兄hia，hit-tia̍p in就thǹg約瑟ê外衫，就是伊身軀hit領彩色ê衫； 24 就掠伊，hiat落井，hitê井是乾ê，內面無水。 25 In坐teh食餅；kia̍h目看，看見一tīn以實瑪利人tùi Ki-lia̍t來；用駱駝背香料，乳香，沒藥，beh帶落去埃及。 26 偤大對chiahê兄弟講，咱刣死咱ê小弟，khǹg密伊ê血，有甚麼利益？ 27 咱來kā伊賣hō͘以實瑪利人；m̄-thang下手害伊；因為伊是咱ê小弟，咱ê骨肉。兄弟聽伊。 28 有hiahê米甸ê seng-lí人tùi hia過，伊ê兄就kā約瑟tùi井內拔起來，將伊賣hō͘以實瑪利人，得tio̍h二十個銀。Hiah-ê人就帶約瑟去埃及。 29 Liû-piān 倒tńg來井邊，看見約瑟無tī井內，就拆裂家己ê衫。 30 tò去小弟hia，講，Gín-á無去lah；也我nih，我beh tah-lo̍h去？ 31 In就刣一隻山羊káng，將約瑟hit領衫ùn血； 32 就差人the̍h hit領彩色ê衫去in老父hia，講，阮chhē-tio̍h chit領，請你認看是你ê kiáⁿ ê外衫á m̄是。 33 伊認得，就講，這是我ê kiáⁿ ê外衫，有pháiⁿ-siù kā-食伊；約瑟的確hō͘伊拆碎。 34 雅各就拆裂衫，腰hâ麻布，為伊ê kiáⁿ哀傷chōe-chōe日。 35 伊ê kiáⁿ kap伊ê cha-bó͘-kiáⁿ lóng起來安慰伊；伊m̄肯受安慰；講，我的確哀傷落陰府，到我ê kiáⁿ hia。伊ê老父為tio̍h伊啼哭。 36 米甸人帶約瑟到埃及，將伊賣hō͘法老ê人臣，侍衛長，Pho-thê-hoat。
1 Ngá-kok khiā-khí Ka-lâm tōe, chiū-sī i ê lāu-pē kià-kha ê só͘-chāi. 2 Ngá-kok ê sè-hē kì tī ē-tóe. Iok-sek cha̍p-chhit hè kap i hiah ê hiaⁿ saⁿ-kap kò͘ iûⁿ; i sī chi̍t ê gín-á kap i ê lāu-pē ê sòe-î Phek-la̍h ê kiáⁿ, Sek-phàⁿ ê kiáⁿ, siông-siông chòe-tīn; Iok-sek chiong i hiah ê hiaⁿ ê pháiⁿ phín-hēng kā in lāu-pē kóng. 3 Taⁿ Í-sek-lia̍t thiàⁿ Iok-sek khah iâⁿ-kè tī thiàⁿ i ê chèng-kiáⁿ, in-ūi Iok-sek sī i nî-lāu siⁿ-ê; i kā i chòe chi̍t niá chhái-sek ê saⁿ. 4 Iok-sek hiah ê hiaⁿ khòaⁿ-kìⁿ lāu-pē thiàⁿ Iok-sek, kè-thâu tī thiàⁿ in; chiū oàn-hūn Iok-sek, bōe-ōe kap i kóng hô-bo̍k ê ōe. 5 Iok-sek bāng-kìⁿ chi̍t ê bāng, kā i hiah ê hiaⁿ kóng; in chiū koh-khah oàn-hūn i. 6 Iok-sek tùi in kóng, Chhiáⁿ lín thiaⁿ góa só͘ bāng-kìⁿ ê bāng. 7 Lán tī hn̂g-ni̍h hâ gō͘-kak; góa só͘-hâ-ê khí-lâi khiā, lín só͘-hâ-ê ûi-lûi lâi pài góa só͘ hâ-ê. 8 I ê hiaⁿ ìn kóng, Chóng-bô lí chin-chiàⁿ beh chòe goán ê ông mah? chin-chiàⁿ beh koán-hat goán mah? In chiū ūi-tio̍h i ê bāng, kap i ê ōe, koh-khah oàn-hūn i. 9 Āu-lâi i koh bāng-kìⁿ chi̍t ê bāng, ia̍h kā i ê hiaⁿ kóng, Lí khòaⁿ, góa iū-koh bāng-kìⁿ chi̍t ê bāng; ū ji̍t, ge̍h, kap cha̍p-it lia̍p chhiⁿ teh pài góa. 10 Iok-sek kā i ê lāu-pē kap i ê hiaⁿ kóng; in lāu-pē chiū chek-pī i, kóng, Lí só͘ bāng-kìⁿ chit ê bāng sī cháiⁿ-iūⁿ? chóng-bô góa kap lín lāu-bú lín hiaⁿ-tī, lóng beh phak-teh pài lí mah? 11 I ê hiaⁿ lóng oàn-tò͘ i; i ê lāu-pē ēng chiah ê ōe kì tī sim-lāi. 12 Iok-sek ê hiaⁿ khì Sī-kiàm, chhī lāu-pē ê iûⁿ. 13 Í-sek-lia̍t tùi Iok-sek kóng, Lín hiaⁿ kiám m̄-sī tī Sī-kiàm chhī iûⁿ mah? Lí lâi, góa beh chhe lí khì in hia. 14 I ìn kóng, Góa tī-chia. I kā i kóng, Lí khì khòaⁿ lín hiaⁿ ū pêng-an á-bô, iûⁿ-kûn ū pêng-an á-bô; tò-lâi kā góa kóng. Chiū chhe i chhut Hi-pek-lûn ê soaⁿ-kok; i chiū khì kàu Sī-kiàm. 15 Ū lâng tn̄g-tio̍h i tī soaⁿ-ni̍h bê-lō͘; chiū mn̄g i kóng, Lí teh chhē sím-mi̍h? 16 I kóng, Góa teh chhē góa ê hiaⁿ; chhiáⁿ kā góa kóng, in tī tah-lo̍h teh chhī iûⁿ. 17 Hit-lâng kóng, In í-keng lī-khui chia; in-ūi góa thiaⁿ-kìⁿ in teh kóng, Lán lâi-khì To-tan. Iok-sek chiū khì jip i ê hiaⁿ, tú-tio̍h in tī To-tan. 18 In hn̄g-hn̄g khòaⁿ-kìⁿ i, i iáu-bē kiâⁿ kàu in hia, in chiū saⁿ-kap kè-bô͘ beh hāi-sí i. 19 Tāi-ke saⁿ-kap kóng, Lí khòaⁿ, chòe-bāng-ê lâi-lah. 20 Hò͘-lâi, taⁿ lán kā i thâi-sí, hiat tī chi̍t ê ta-chíⁿ; chiah lâi kóng ū pháiⁿ-siù chia̍h-i; lán chiah khòaⁿ i ê bāng chiong-lâi cháiⁿ-iūⁿ. 21 Liû-piān thiaⁿ-kìⁿ, chiū kiù i thoat-lī in ê chhiú; kóng, Lán m̄-thang hāi i ê sìⁿ-miā. 22 Liû-piān koh tùi in kóng, M̄-thang hō͘ i lâu-huih; thang kā i hiat tī chit ê khòng-iá ê ta-chíⁿ, m̄-thang hē chhiú hāi i; ì-sù sī beh kiù i thoat-lī in ê chhiú, hō͘ i tò-khì i ê lāu-pē hia. 23 Iok-sek kàu i ê hiaⁿ hia, hit-tia̍p in chiū thǹg Iok-sek ê gōa-saⁿ, chiū-sī i seng-khu hit-niá chhái-sek ê saⁿ; 24 chiū lia̍h i, hiat-lo̍h chíⁿ, hit ê chíⁿ sī ta-ê, lāi-bīn bô chúi. 25 In chē-teh chia̍h-piáⁿ; kia̍h-ba̍k khòaⁿ, khòaⁿ-kìⁿ chi̍t-tīn Í-si̍t-má-lī lâng tùi Ki-lia̍t lâi; ēng lo̍k-tô pē hiuⁿ-liāu, jú-hiuⁿ, bu̍t-io̍h, beh tòa lo̍h-khì Ai-ki̍p. 26 Iû-tāi tùi chiah ê hiaⁿ-tī kóng, Lán thâi-sí lán ê sió-tī, khǹg-ba̍t i ê huih, ū sím-mi̍h lī-ek? 27 Lán lâi kā i bōe hō͘ Í-si̍t-má-lī lâng; m̄-thang hē-chhiú hāi i; in-ūi i sī lán ê sió-tī, lán ê kut-jio̍k. Hiaⁿ-tī thiaⁿ-i. 28 Ū hiah ê Bí-tiân ê seng-lí lâng tùi hia kè, i ê hiaⁿ chiū kā Iok-sek tùi chíⁿ-lāi pu̍ih-khí-lâi, chiong i bōe hō͘ Í-si̍t-má-lī lâng, tit-tio̍h jī-cha̍p ê gûn. Hiah ê lâng chiū tòa Iok-sek khì Ai-ki̍p. 29 Liû-piān tò-tńg-lâi chíⁿ-piⁿ, khòaⁿ-kìⁿ Iok-sek bô tī chíⁿ-lāi, chiū thiah-li̍h ka-kī ê saⁿ. 30 Tò-khì sió-tī hia, kóng, Gín-á bô-khì lah; iā góa nih, góa beh tah-lo̍h khì? 31 In chiū thâi chi̍t chiah soaⁿ-iûⁿ-káng, chiong Iok-sek hit niá saⁿ ùn-huih; 32 chiū chhe lâng the̍h hit niá chhái-sek ê saⁿ khì in lāu-pē hia, kóng, Goán chhē-tio̍h chit-niá, chhiáⁿ lí jīn-khòaⁿ sī lí ê kiáⁿ ê gōa-saⁿ á m̄-sī. 33 I jīn-tit, chiū kóng, Che sī góa ê kiáⁿ ê gōa-saⁿ, ū pháiⁿ-siù kā-chia̍h-i; Iok-sek tek-khak hō͘ i thiah-chhùi. 34 Ngá-kok chiū thiah-li̍h saⁿ, io hâ môa-pò͘, ūi i ê kiáⁿ ai-siong chōe-chōe ji̍t. 35 I ê kiáⁿ kap i ê cha-bó͘-kiáⁿ lóng khí-lâi an-ùi i; i m̄-khéng siū an-ùi; kóng, Góa tek-khak ai-siong lo̍h im-hú, kàu góa ê kiáⁿ hia. I ê lāu-pē ūi-tio̍h i thî-khàu. 36 Bí-tiân lâng tòa Iok-sek kàu Ai-ki̍p, chiong i bōe hō͘ Hoat-ló ê jîn-sîn, sī-ōe-tiúⁿ, Pho-thê-hoat.
1 hit時偤大離開伊ê兄弟，落去到一个A-tō͘-lân人，名做Hi-la̍h ê家； 2 偤大tī-hia看見一个迦南人，名叫Su-âe cha-bó͘-kiáⁿ；就chhōa伊，kap伊同房。 3 伊就懷孕生kiáⁿ；偤大就kā伊號名做Jíⁿ。 4 伊koh懷孕生kiáⁿ；老母kā伊號名Gô-lâm。 5 伊又koh生kiáⁿ，kā伊號名Sī-la̍h；伊生Sī-la̍h ê時，偤大tú-á tī Ki-sek。 6 偤大kā伊ê大kiáⁿ Jíⁿ娶bó͘，名叫Tha-má。 7 偤大ê大kiáⁿ Jíⁿ行pháiⁿ tī耶和華ê面前；耶和華就hō͘伊死。 8 偤大kā Gô-lâm講，你tio̍h kap你ê兄嫂同房，對伊來盡你做小弟ê本份，kā你ê兄立後嗣。 9 Gô-lâm知所生ê kiáⁿ無歸tī伊家己；所以同房ê時，遺洩tī地裡，免得hō͘伊ê兄有後嗣。 10 伊ê所做，耶和華看做pháiⁿ；hō͘伊也死。 11 偤大心內講，驚了Sī-la̍h亦死，親像伊兩個兄一樣；就對伊ê新婦Tha-má講，你去tòa lín老父ê家守寡，thèng候我ê kiáⁿ Sī-la̍h長成。Tha-má就tò去，tòa tī in老父ê家。 12 過久久，偤大ê bó͘ Su-a ê cha-bó͘-kiáⁿ死；偤大受安慰；就kap伊ê朋友A-tō͘-lân人Hi-la̍h上去Têng-ná，到伊剪羊毛ê人hia。 13 有人kā Tha-má講，Lín ta-koaⁿ上去Têng-ná，剪伊ê羊ê毛。 14 Tha-má看見Sī-la̍h已經長成，iáu無chhōa伊做bó͘；就thǹg伊守寡ê衫，用帕罩面，koh moa身體；坐tī Têng-ná ê路，I-ná-ìn門口。 15 偤大看見伊，掠做是娼妓，因為伊有罩面。 16 就oa̍t去路邊就近伊；講，來，hō͘我kap你相kap睏；因為m̄知是伊ê新婦；應講，你beh kap我睏，beh用甚麼hō͘我？ 17 偤大講，我tùi羊群內掠一隻山羊á，寄來hō͘你。講，你beh用物hō͘我做準當，thèng候你寄來mah？ 18 偤大講，我tio̍h甚麼hō͘你做準當？伊就講，你ê印，你ê帶，kap你手裡ê柺á；就hō͘伊，kap伊睏；伊就tùi偤大懷孕。 19 Tha-má起來去；thǹg伊ê帕，猶原穿伊守寡ê衫。 20 偤大託伊ê朋友A-tō͘-lân人送一隻山羊á，beh tùi hitê婦人人ê手the̍h準當；chhē伊bōe tio̍h。 21 就問hit所在ê人講，I-ná-ìn路邊ê娼妓tī tah-lo̍h？in講，chit位無娼妓。 22 伊tò去見偤大講，我chhē伊無；hit位ê人亦講，Chit位無娼妓。 23 偤大講，Kù-chāi伊the̍h去，免得咱見笑；你看，我已經將chit隻山羊á送伊，你竟然chhē伊無。 24 約略過三月日，有人kā偤大講，你ê新婦Tha-má做娼妓；koh因為行淫，soah有身孕。偤大講，Kā伊拖出來燒。 25 Tha-má hō͘人拖出來ê時，就差人去見伊ê ta-koaⁿ講，Chiahê物是是誰 ê，我就是tùi伊來懷孕。 26 Koh講，請你認，看chitê印kap帶kap柺á是是誰 ê。偤大認得，就講，伊比我khah有義；因為我無將伊過hō͘我ê kiáⁿ Sī-la̍h；tùi hit-tia̍p偤大無koh親近伊。 27 Tha-má得beh生ê時，知伊腹肚內是雙個。 28 Teh生ê時，一个gín-á伸一支手出來；拾者the̍h紅線縛tī伊ê手講，Chitê是事先出ê。 29 後來伊ê手kiu入去；第二個出世；拾者講，你啥事chông出來？chitê爆破是為tio̍h你；所以kā伊號名做Hoat-le̍k-su。 30 後來hitê，手縛紅線ê，亦生出來；就號伊ê名做謝拉。
1 Hit-sî Iû-tāi lī-khui i ê hiaⁿ-tī, lo̍h-khì kàu chi̍t ê A-tō͘-lân lâng, miâ chòe Hi-la̍h ê ke; 2 Iû-tāi tī-hia khòaⁿ-kìⁿ chi̍t ê Ka-lâm lâng, miâ-kiò Su-a ê cha-bó͘-kiáⁿ; chiū chhōa i, kap i tâng-pâng. 3 I chiū hoâi-īn siⁿ-kiáⁿ; Iû-tāi chiū kā i hō miâ chòe Jíⁿ. 4 I koh hoâi-īn siⁿ-kiáⁿ; lāu-bú kā i hō miâ Gô-lâm. 5 I iū-koh siⁿ-kiáⁿ, kā i hō-miâ Sī-la̍h; i siⁿ Sī-la̍h ê sî, Iû-tāi tú-á tī Ki-sek. 6 Iû-tāi kā i ê tōa-kiáⁿ Jíⁿ chhōa-bó͘, miâ-kiò Tha-má. 7 Iû-tāi ê tōa-kiáⁿ Jíⁿ kiâⁿ-pháiⁿ tī Iâ-hô-hoa ê bīn-chêng; Iâ-hô-hoa chiū hō͘ i sí. 8 Iû-tāi kā Gô-lâm kóng, Lí tio̍h kap lí ê hiaⁿ-só tâng-pâng, tùi i lâi chīn lí chòe sió-tī ê pún-hūn, kā lí ê hiaⁿ li̍p hō͘-sû. 9 Gô-lâm chai só͘ siⁿ ê kiáⁿ bô kui tī i ka-kī; só͘-í tâng-pâng ê sî, ûi-siat tī tōe-ni̍h, bián-tit hō͘ i ê hiaⁿ ū hō͘-sû. 10 I ê só͘-chòe, Iâ-hô-hoa khòaⁿ chòe pháiⁿ; hō͘ i iā sí. 11 Iû-tāi sim-lāi kóng, Kiaⁿ-liáu Sī-la̍h ia̍h sí, chhin-chhiūⁿ i nn̄g ê hiaⁿ chi̍t-iūⁿ; chiū tùi i ê sim-pū Tha-má kóng, Lí khì tòa lín lāu-pē ê ke chiú-kóaⁿ, thèng-hāu góa ê kiáⁿ Sī-la̍h tióng-sêng. Tha-má chiū tò-khì, tòa tī in lāu-pē ê ke. 12 Kè kú-kú, Iû-tāi ê bó͘ Su-a ê cha-bó͘-kiáⁿ sí; Iû-tāi siū an-ùi; chiū kap i ê pêng-iú A-tō͘-lân lâng Hi-la̍h chiūⁿ-khì Têng-ná, kàu i chián iûⁿ-mn̂g ê lâng hia. 13 Ū lâng kā Tha-má kóng, Lín ta-koaⁿ chiūⁿ-khì Têng-ná, chián i ê iûⁿ ê mn̂g. 14 Tha-má khòaⁿ-kìⁿ Sī-la̍h í-keng tióng-sêng, iáu bô chhōa i chòe-bó͘; chiū thǹg i chiú-kóaⁿ ê saⁿ, ēng phè tà-bīn, koh moa sin-thé; chē tī Têng-ná ê lō͘, I-ná-ìn mn̂g-kháu. 15 Iû-tāi khòaⁿ-kìⁿ i, lia̍h-chòe sī chhiong-ki, in-ūi i ū tà-bīn. 16 Chiū oat-khì lō͘-piⁿ chiū-kūn i; kóng, Lâi, hō͘ góa kap lí saⁿ-kap khùn; in-ūi m̄-chai sī i ê sim-pū; ìn kóng, Lí beh kap góa khùn, beh ēng sím-mi̍h hō͘ góa? 17 Iû-tāi kóng, Góa tùi iûⁿ-kûn-lāi lia̍h chi̍t chiah soaⁿ-iûⁿ-á, kià-lâi hō͘ lí. Kóng, Lí beh ēng mi̍h hō͘ góa chòe chún-tǹg, thèng-hāu lí kià-lâi mah? 18 Iû-tāi kóng, Góa tio̍h sím-mi̍h hō͘ lí chòe chún-tǹg? I chiū kóng, Lí ê ìn, lí ê tòa, kap lí chhiú-ni̍h ê koáiⁿ-á; chiū hō͘ i, kap i khùn; i chiū tùi Iû-tāi hoâi-īn. 19 Tha-má khí-lâi khì; thǹg i ê phè, iû-goân chhēng i chiú-kóaⁿ ê saⁿ. 20 Iû-tāi thok i ê pêng-iú A-tō͘-lân lâng sàng chi̍t chiah soaⁿ-iûⁿ-á, beh tùi hit ê hū-jîn-lâng ê chhiú the̍h chún-tǹg; chhē i bōe tio̍h. 21 Chiū mn̄g hit só͘-chāi ê lâng kóng, I-ná-ìn lō͘-piⁿ ê chhiong-ki tī tah-lo̍h? in kóng, chit-ūi bô chhiong-ki. 22 I tò-khì kìⁿ Iû-tāi kóng, Góa chhē i bô; hit-ūi ê lâng ia̍h kóng, Chit-ūi bô chhiong-ki. 23 Iû-tāi kóng, Kù-chāi i the̍h-khì, bián-tit lán kiàn-siàu; lí khòaⁿ, góa í-keng chiong chit chiah soaⁿ-iûⁿ-á sàng i, lí kéng-jiân chhē i bô. 24 Iok-lio̍k kè saⁿ-ge̍h-ji̍t, ū lâng kā Iû-tāi kóng, Lí ê sim-pū Tha-má chòe chhiong-ki; koh in-ūi kiâⁿ-îm, sòa ū sin-īn. Iû-tāi kóng, Kā i thoa-chhut-lâi sio. 25 Tha-má hō͘ lâng thoa-chhut-lâi ê sî, chiū chhe lâng khì kìⁿ i ê ta-koaⁿ kóng, Chiah ê mi̍h sī chī-chūi ê, góa chiū-sī tùi i lâi hoâi-īn. 26 Koh kóng, Chhiáⁿ lí jīn, khòaⁿ chit ê ìn kap tòa kap koáiⁿ-á sī chī-chūi ê. Iû-tāi jīn-tit, chiū kóng, I pí góa khah ū-gī; in-ūi góa bô chiong i kè hō͘ góa ê kiáⁿ Sī-la̍h; tùi hit-tia̍p Iû-tāi bô koh chhin-kūn i. 27 Tha-má tit-beh siⁿ ê sî, chai i pak-tó͘-lāi sī siang-ê. 28 Teh siⁿ ê sî, chi̍t ê gín-á chhun chi̍t ki chhiú chhut-lâi; khioh-chiá the̍h âng-sòaⁿ pa̍k tī i ê chhiú kóng, Chit-ê sī tāi-seng chhut-ê. 29 Āu-lâi i ê chhiú kiu-ji̍p-khì; tē-jī-ê chhut-sì; khioh-chiá kóng, Lí siáⁿ-sū chông-chhut-lâi? chit ê piak-phòa sī ūi-tio̍h lí; só͘-í kā i hō-miâ chòe Hoat-le̍k-su. 30 Āu-lâi hit-ê, chhiú pa̍k âng-sòaⁿ-ê, ia̍h siⁿ-chhut-lâi; chiū hō i ê miâ chòe Siā-la̍h.
1 約瑟hō͘人帶落去埃及；有一个埃及人，是法老ê人臣侍衛長Pho-thê-hoat，tùi hiahê帶伊來ê以實瑪利人ê手買去。 2 耶和華kap伊相kap tī-teh，hō͘伊ta̍k項興通；tòa tī伊ê主人埃及人ê家。 3 伊ê主人看見耶和華kap伊相kap tī-teh；koh耶和華hō͘伊ê手所做ê lóng興通。 4 約瑟就tī主人ê面前得tio̍h恩典，來服事伊；主人設立伊管理伊ê家，將一切所有ê交伊ê手。 5 Tùi主人設立伊管理家事，kap伊一切所有ê，耶和華為tio̍h約瑟ê緣故，賜福tī hitê埃及人ê家；見若家內kap 田裡一切所有ê，lóng得tio̍h耶和華賜福。 6 伊將一切所有ê，lóng交約瑟ê手；除去伊所食ê物以外，別項所有ê，lóng m̄知。約瑟súi koh好生做。 7 Chiahê tāi-chì以後，約瑟ê主母注神看伊，講，來kap我睏。 8 約瑟m̄-thàn，對伊ê主母講，你看，家內有甚麼tī我ê手，我ê主人lóng m̄知；伊已經將所有ê交tī我ê手；tī chí家內無一个比我khah大； 9 你以外，伊無一項無交我，因為你是伊ê bó͘；我怎樣thang行chitê大pháiⁿ，來得罪上帝？ 10 後來伊ta̍k日kap約瑟講話；約瑟無聽伊ê話；無kap伊睏，亦無kap伊做堆。 11 有一日，約瑟入厝辦伊ê tāi-chì；家內ê人無一个tī厝內。 12 婦人人就khiú伊ê衫講，你來kap我睏；約瑟將衫放tī伊ê手，走出去外面。 13 婦人人看見約瑟將衫放tī伊手裡，koh走出外面； 14 就叫家內ê人來，對in講，Lín看teh，伊帶一个希伯來人入來咱ê家beh戲弄咱；伊來我chia，beh kap我睏，我就大聲hoah； 15 伊聽見我出聲hoah，就將伊ê衫放tī我chia，走出外面。 16 婦人人將約瑟ê衫收tī伊hia，thèng候伊ê主人tò來。 17 就對伊講起chiahê事；講，你所帶來咱chia，hitê希伯來ê奴僕，到我chia，beh戲弄我； 18 我出聲hoah，伊將伊ê衫放tī我chia，走出外面。 19 主人聽見伊ê bó͘對伊所講ê話，講，你ê奴僕親像án-ni款待我，伊就受氣。 20 約瑟ê主人將伊關落監，就是王ê罪犯受關ê所在；tùi án-ni，約瑟tī hitê監內。 21 總是耶和華kap約瑟tī-teh，施恩hō͘伊；hō͘伊tī 管監ê人ê面前得tio̍h恩典。 22 管監ê就將監內所有ê犯人lóng交約瑟ê手；in tī-hia所做ê tāi-chì，lóng是伊teh做。 23 見若約瑟手下ê tāi-chì，管監ê一概無chhap；因為耶和華kap約瑟tī-teh，koh伊所做ê，耶和華lóng hō͘伊興通。
1 Iok-sek hō͘ lâng tòa lo̍h-khì Ai-ki̍p; ū chi̍t ê Ai-ki̍p lâng, sī Hoat-ló ê jîn-sîn sī-ōe-tiúⁿ Pho-thê-hoat, tùi hiah-ê tòa i lâi ê Í-si̍t-má-lī lâng ê chhiú bóe-khì. 2 Iâ-hô-hoa kap i saⁿ-kap tī-teh, hō͘ i ta̍k-hāng heng-thong; tòa tī i ê chú-lâng Ai-ki̍p lâng ê ke. 3 I ê chú-lâng khòaⁿ-kìⁿ Iâ-hô-hoa kap i saⁿ-kap tī-teh; koh Iâ-hô-hoa hō͘ i ê chhiú só͘ chòe-ê lóng heng-thong. 4 Iok-sek chiū tī chú-lâng ê bīn-chêng tit-tio̍h un-tián, lâi ho̍k-sāi i; chú-lâng siat-li̍p i koán-lí i ê ke, chiong it-chhè só͘-ū-ê kau i ê chhiú. 5 Tùi chú-lâng siat-li̍p i koán-lí ke-sū, kap i it-chhè só͘-ū-ê, Iâ-hô-hoa ūi-tio̍h Iok-sek ê iân-kò͘, sù-hok tī hit ê Ai-ki̍p lâng ê ke; kìⁿ-nā ke-lāi kap chhân-ni̍h it-chhè só͘-ū-ê, lóng tit-tio̍h Iâ-hô-hoa sù-hok. 6 I chiong it-chhè só͘-ū-ê, lóng kau Iok-sek ê chhiú; tû-khì i só͘ chia̍h ê mi̍h í-gōa, pa̍t-hāng só͘-ū-ê, lóng m̄-chai. Iok-sek súi koh hó-siⁿ-chòe. 7 Chiah ê tāi-chì í-āu, Iok-sek ê chú-bú chù-sîn khòaⁿ-i, kóng, Lâi kap góa khùn. 8 Iok-sek m̄-thàn, tùi i ê chú-bú kóng, Lí khòaⁿ, ke-lāi ū sím-mi̍h tī góa ê chhiú, góa ê chú-lâng lóng m̄-chai; i í-keng chiong só͘-ū-ê kau tī góa ê chhiú; tī chí ke-lāi bô chi̍t-ê pí góa khah-tōa; 9 lí í-gōa, i bô chi̍t-hāng bô kau góa, in-ūi lí sī i ê bó͘; góa cháiⁿ-iūⁿ thang kiâⁿ chit ê tōa-pháiⁿ, lâi tek-chōe Siōng-tè? 10 Āu-lâi i ta̍k-ji̍t kap Iok-sek kóng-ōe; Iok-sek bô thiaⁿ i ê ōe; bô kap i khùn, ia̍h bô kap i chòe-tui. 11 Ū chi̍t-ji̍t, Iok-sek ji̍p chhù pān i ê tāi-chì; ke-lāi ê lâng bô chi̍t-ê tī chhù-lāi. 12 Hū-jîn-lâng chiū khiú i ê saⁿ kóng, Lí lâi kap góa khùn; Iok-sek chiong saⁿ pàng tī i ê chhiú, cháu chhut-khì gōa-bīn. 13 Hū-jîn-lâng khòaⁿ-kìⁿ Iok-sek chiong saⁿ pàng tī i chhiú-ni̍h, koh cháu-chhut gōa-bīn; 14 chiū kiò ke-lāi ê lâng lâi, tùi in kóng, Lín khòaⁿ-teh, i tòa chi̍t ê Hi-pek-lâi lâng ji̍p-lâi lán ê ke beh hì-lāng lán; i lâi góa chia, beh kap góa khùn, góa chiū tōa-siaⁿ hoah; 15 i thiaⁿ-kìⁿ góa chhut-siaⁿ hoah, chiū chiong i ê saⁿ pàng tī góa chia, cháu-chhut gōa-bīn. 16 Hū-jîn-lâng chiong Iok-sek ê saⁿ siu tī i hia, thèng-hāu i ê chú-lâng tò-lâi. 17 Chiū tùi i kóng-khí chiah ê sū; kóng, Lí só͘ tòa-lâi lán chia, hit ê Hi-pek-lâi ê lô͘-po̍k, kàu góa chia, beh hì-lāng góa; 18 góa chhut-siaⁿ hoah, i chiong i ê saⁿ pàng tī góa chia, cháu-chhut gōa-bīn. 19 Chú-lâng thiaⁿ-kìⁿ i ê bó͘ tùi i só͘ kóng ê ōe, kóng, Lí ê lô͘-po̍k chhin-chhiūⁿ án-ni khoán-thāi góa, i chiū siū-khì. 20 Iok-sek ê chú-lâng chiong i koaiⁿ-lo̍h kaⁿ, chiū-sī ông ê chōe-hoān siū koaiⁿ ê só͘-chāi; tùi án-ni Iok-sek tī hit ê kaⁿ-lāi. 21 Chóng-sī Iâ-hô-hoa kap Iok-sek tī-teh, si-un hō͘ i; hō͘ i tī koán-kaⁿ ê lâng ê bīn-chêng tit-tio̍h un-tián. 22 Koán-kaⁿ-ê chiū chiong kaⁿ-lāi só͘ ū ê hoān-lâng lóng kau Iok-sek ê chhiú; in tī-hia só͘ chòe ê tāi-chì, lóng sī i teh chòe. 23 Kìⁿ-nā Iok-sek chhiú-ē ê tāi-chì, koán-kaⁿ-ê it-khài bô chhap; in-ūi Iâ-hô-hoa kap Iok-sek tī-teh, koh i só͘ chòe-ê, Iâ-hô-hoa lóng hō͘ i heng-thong.
1 Chiahê tāi-chì以後，埃及王 ê酒政kap廚房得罪in ê主埃及王。 2 法老受氣伊兩個人臣，就是酒政長kap廚房長， 3 將in關tī侍衛長府內ê監，就是約瑟受關ê所在。 4 侍衛長將in交帶約瑟，伊就伺候in；in就tī監內有hiah久。 5 受關tī監ê，埃及王ê酒政kap廚房，兩人同一暝各夢見一个夢，lóng照ta̍k-ê夢ê意義來夢。 6 到天光，約瑟入去in hia，看見in有憂悶ê款式。 7 伊就問法老兩個人臣，就是kap伊平平關tī主人府內ê，講，今á日lín啥事面帶憂容？ 8 In kā伊講，阮ta̍k人夢見一个夢，無人thang圓。約瑟kā in講，圓夢 kiám m̄是在tī上帝mah？請lín kā我講。 9 酒政就對約瑟排列伊ê 夢，講，我夢中看見有一叢葡萄樹tī我ê面前； 10 樹頂有三支，親像有發芽開花；伊ê葩(pha)結成熟ê葡萄。 11 法老ê杯tī我ê手內，我就the̍h葡萄，ni̍h伊tī法老ê杯內，將杯捧交法老ê手。 12 約瑟kā伊講，你ê 夢是án-ni圓；三支就是三日； 13 koh三日，法老beh舉起你ê頭，復到你ê官職；法老ê酒杯beh猶原hē tī你ê手，親像前做伊ê酒政一樣。 14 你若得志ê時，tio̍h記念我，施恩hō͘我；tī法老ê面前替我講一聲；救我出chitê監。 15 我實在是tùi希伯來人ê地受賣來ê；我tī-chia亦無做出甚麼，hō͘ in kā我關落監。 16 廚房看見夢圓了好，就kā約瑟講，我亦tī我ê夢中看，tī我ê頭殼頂有三筐pek ê餅； 17 頂面hit筐有tóe法老所食ta̍k號pek ê物；有鳥來teh我頭殼頂筐內ê物。 18 約瑟應伊講，你ê夢是án-ni圓；三khia筐是三日； 19 koh三日，法老beh舉起你ê頭殼離開你，吊你tī柴裡；beh有飛鳥來teh你身軀ê肉。 20 到第三日，是法老ê生日，伊為眾人臣排設筵席；tī chiahê人臣ê中間，抬舉酒政kap廚房； 21 hō͘酒政長復到官職；伊猶原捧杯tī法老ê手； 22 總是將廚房頭召起來；tú-tú照約瑟所kā in圓ê。 23 但是酒政長無念tio̍h約瑟，竟然bōe記得伊。
1 Chiah ê tāi-chì í-āu, Ai-ki̍p ông ê chiú-chèng kap tû-pâng tek-chōe in ê chú Ai-ki̍p ông. 2 Hoat-ló siū-khì i nn̄g ê jîn-sîn, chiū-sī chiú-chèng-tiúⁿ kap tû-pâng-tiúⁿ, 3 chiong in koaiⁿ tī sī-ōe-tiúⁿ hú-lāi ê kaⁿ, chiū-sī Iok-sek siū koaiⁿ ê só͘-chāi. 4 Sī-ōe-tiúⁿ chiong in kau-tài Iok-sek, i chiū su-hāu in; in chiū tī kaⁿ-lāi ū hiah-kú. 5 Siū-koaiⁿ tī kaⁿ-ê, Ai-ki̍p ông ê chiú-chèng kap tû-pâng, nn̄g-lâng tâng chi̍t-mî kok bāng-kìⁿ chi̍t ê bāng, lóng chiàu ta̍k ê bāng ê ì-gī lâi bāng. 6 Kàu thiⁿ-kng, Iok-sek ji̍p-khì in hia, khòaⁿ-kìⁿ in ū iu-būn ê khoán-sit. 7 I chiū mn̄g Hoat-ló nn̄g ê jîn-sîn, chiū-sī kap i pîⁿ-pîⁿ koaiⁿ tī chú-lâng hú-lāi-ê, kóng, Kin-á-ji̍t lín siáⁿ-sū bīn tài-iu-iông? 8 In kā i kóng, Goán ta̍k-lâng bāng-kìⁿ chi̍t ê bāng, bô lâng thang oân. Iok-sek kā in kóng, Oân-bāng kiám-m̄-sī chāi tī Siōng-tè mah? chhiáⁿ lín kā góa kóng. 9 Chiú-chèng chiū tùi Iok-sek pâi-lia̍t i ê bāng, kóng, Góa bāng-tiong khòaⁿ-kìⁿ ū chi̍t châng phû-tô-chhiū tī góa ê bīn-chêng; 10 chhiū-téng ū saⁿ-ki, chhin-chhiūⁿ ū hoat-gê khui-hoe; i ê pha kiat-chiâⁿ se̍k ê phû-tô. 11 Hoat-ló ê poe tī góa ê chhiú-lāi, góa chiū the̍h phû-tô, ni̍h i tī Hoat-ló ê poe-lāi, chiong poe phâng kau Hoat-ló ê chhiú. 12 Iok-sek kā i kóng, Lí ê bāng sī án-ni oân; saⁿ-ki chiū-sī saⁿ-ji̍t; 13 koh saⁿ-ji̍t, Hoat-ló beh kú-khí lí ê thâu, ho̍k-tò lí ê koaⁿ-chit; Hoat-ló ê chiú-poe beh iû-goân hē tī lí ê chhiú, chhin-chhiūⁿ chêng chòe i ê chiú-chèng chi̍t-iūⁿ. 14 Lí nā tek-chì ê sî, tio̍h kì-liām góa, si-un hō͘ góa; tī Hoat-ló ê bīn-chêng thòe góa kóng chi̍t siaⁿ; kiù góa chhut chit ê kaⁿ. 15 Góa si̍t-chāi sī tùi Hi-pek-lâi lâng ê tōe siū-bōe-lâi-ê; góa tī-chia ia̍h bô chòe-chhut sím-mi̍h, hō͘ in kā góa koaiⁿ-lo̍h kaⁿ. 16 Tû-pâng khòaⁿ-kìⁿ bāng oân-liáu hó, chiū kā Iok-sek kóng, Góa ia̍h tī góa ê bāng-tiong khòaⁿ, tī góa ê thâu-khak-téng ū saⁿ-kheng pek ê piáⁿ; 17 téng-bīn hit-kheng ū tóe Hoat-ló só͘ chia̍h ta̍k-hō pek ê mi̍h; ū chiáu lâi teh góa thâu-khak-téng kheng-lāi ê mi̍h. 18 Iok-sek ìn i kóng, Lí ê bāng sī án-ni oân; saⁿ khia kheng sī saⁿ-ji̍t; 19 koh saⁿ-ji̍t, Hoat-ló beh kú-khí lí ê thâu-khak lī-khui lí, tiàu lí tī chhâ-ni̍h; beh ū pe-chiáu lâi teh lí sin-khu ê bah. 20 Kàu tē-saⁿ ji̍t, sī Hoat-ló ê siⁿ-ji̍t, i ūi chèng jîn-sîn pâi-siat iân-sia̍h; tī chiah ê jîn-sîn ê tiong-kan, thâi-kú chiú-chèng kap tû-pâng; 21 hō͘ chiú-chèng-tiúⁿ ho̍k-tò koaⁿ-chit; i iû-goân phâng-poe tī Hoat-ló ê chhiú; 22 chóng-sī chiong tû-pâng-thâu tiàu-khí-lâi; tú-tú chiàu Iok-sek só͘ kā in oân-ê. 23 Nā-sī chiú-chèng-tiúⁿ bô liām-tio̍h Iok-sek, kéng-jiân bōe-kì-tit i.
1 過兩年ka-nn̂g，法老眠夢；夢見伊khiā tī河邊， 2 看見七隻牛母tùi河裡起來，súi koh肥；tī蘆竹á內 teh食。 3 tè後koh有七隻牛母tùi河裡起來，khiap-sì koh瘦；kap前hiahê牛同khiā tī河邊。 4 Chiahê khiap-sì koh瘦ê牛母一盡食hit七隻súi koh肥ê牛。法老就醒。 5 伊koh睏，第二pái眠夢；夢見一叢麥出七穗，phauh koh好。 6 後來看見koh出七穗，冇冇，koh hō͘東風掃pháiⁿ。 7 Chiahê冇ê穗吞hit七穗phauh koh飽滿ê。法老醒，chiah知是夢見。 8 到天光，法老心無平安；就差人召埃及所有ê術士、博士來；法老就將伊所夢見ê kā in講；in無人會kā法老圓。 9 Hit時酒政長kā法老講，我今á日記得我ê罪。 10 前法老受氣人臣，將我kap廚房頭關tī侍衛長府內ê監。 11 我kap伊，兩人siâng hit暝有夢見，各照伊ê 夢ê意義來夢。 12 Tī-hia，kap阮tī-teh，有一个希伯來ê少年人，是侍衛長ê奴僕，阮kā伊講，伊就kā阮圓阮ê 夢；是照阮ta̍k人ê 夢來圓。 13 後來tú-tú照伊所kā阮圓ê來成；伊hō͘我復職，hit人受吊來死。 14 法老就差人去召約瑟，in就緊緊chhōa伊出監；伊就剪髮，換伊ê衫，來見法老。 15 法老kā約瑟講，我夢見一个夢，無人會圓伊；我聽見人講到你聽見夢就會圓。 16 約瑟應法老講，這m̄是在tī我；上帝beh將平安指示法老。 17 法老kā約瑟講，我夢見我khiā tī河邊， 18 有七隻牛母tùi河裡起來，肥koh súi；tī蘆竹á內teh食； 19 tè後koh有七隻牛母起來，nńg-chiáⁿ，真khiap-sì，koh真瘦；遍埃及地，我m̄-bat看見到chiah pháiⁿ。 20 Chiahê瘦koh khiap-sì ê牛母一盡食事先hit七隻肥ê牛母； 21 吞落腹，iáu未看出有吞落去；hitê khiap-sì ê款猶原kap事先無各樣；我就醒。 22 我tī夢中koh看見一叢麥，出七穗，飽滿koh好； 23 後來koh出七穗，枯焦(tâ)，冇冇，koh hō͘東風掃pháiⁿ； 24 chiahê冇冇ê穗吞hit七穗好ê。我講hō͘術士聽，也無人會kā我解明。 25 約瑟kā法老講，法老ê 夢就是一个；上帝所beh行ê事，有指示法老。 26 七隻好ê牛母是七年；七穗好ê，亦是七年；夢是一个。 27 Hiah-ê tè後起來ê七隻瘦koh khiap-sì ê牛母，是七年；hiahê 七穗空冇，koh hō͘東風掃pháiⁿ-ê，亦是七年；beh做七年ê飢荒。 28 上帝所beh做ê事，有顯明tī法老；這是我對法老所講ê。 29 你看，埃及遍地beh tú-tio̍h大好年冬七年； 30 tè後，koh beh tú-tio̍h飢荒七年；甚至tī埃及地lóng bōe記得以前ê好收；全地beh hō͘飢荒所滅； 31 因為以後ê飢荒太傷重，就m̄知以前地方ê好收。 32 論到法老兩pái ê眠夢，是因為上帝註定chitê tāi-chì，koh上帝beh緊緊成伊。 33 所以法老tio̍h揀一个有聰明，有智慧ê人，派伊治理埃及地。 34 法老tio̍h án-ni行，koh立官員管理chitê地；當七年好年冬ê時，埃及地所收ê，五份抽一份； 35 hō͘ in tī將來ê好年冬，積聚一切ê米糧；聚集五穀，收khǹg照顧；tī ta̍k-ê城做食物，歸tī法老ê手頭。 36 所積聚ê米糧，thang做埃及地將來七年飢荒ê路用；免得chitê地hō͘飢荒所滅。 37 法老kap伊一切ê人臣lóng掠chitê tāi-chì做好。 38 法老對伊ê人臣講，咱kiám會chhē-tio̍h一个親像伊chitê人，有上帝ê神tī伊ê內面mah？ 39 法老對約瑟講，上帝已經將chitê tāi-chì lóng指示你，可見無人親像你有chit號ê聰明智慧。 40 你thang管理我ê家；我ê百姓lóng tio̍h聽你ê話，hō͘你管理；獨獨tī寶座，我比你khah大。 41 法老kā約瑟講，我舉起你管轄埃及全地。 42 法老就剝伊手裡做印ê手指，掛tī約瑟ê指頭á；kā伊穿幼苧衫；將金鍊掛tī伊ê頷頸。 43 Koh hō͘約瑟坐伊ê第二pān車；開道ê叫講，跪；án-ni法老設立伊治理埃及全地。 44 法老對約瑟講，我是法老，若無你有聲，tī埃及全地，m̄准人動腳手。 45 法老欽賜約瑟ê名叫Sat-hoat-ná-thek Pa-lōe-a；koh將An城ê祭司Pho-thê-hui-la̍h ê cha-bó͘-kiáⁿ A-se-la̍p hō͘伊做bó͘。約瑟就出巡埃及地。 46 約瑟見埃及王法老ê時，hit年三十歲。約瑟tùi法老ê面前出去，遍行埃及全地。 47 七個好年冬ê內面，地ê出產極其豐盛。 48 約瑟聚集埃及地七個好年冬一切ê米糧；將米糧積聚tī ta̍k-ê城；周圍田地ê米糧，lóng積聚tī伊ê本城。 49 約瑟積聚五穀極chōe，親像海邊ê沙，到伊停止無算；因為算bōe了。 50 飢荒ê年未到以前，An城ê祭司Pho-thê-hui-la̍h ê cha-bó͘-kiáⁿ A-se-la̍p kā約瑟生兩個kiáⁿ。 51 約瑟kā大kiáⁿ號名叫Má-ná-se；因為伊講，上帝hō͘我bōe記得我一切ê困苦，kap我ê老父ê全家。 52 伊kā第二kiáⁿ號名Í-hoat-liân；因為伊講，上帝hō͘我tī我受苦ê地方興旺。 53 埃及地七年好年冬已經圓， 54 七年飢荒就來，tú-tú照約瑟所講ê；ta̍k國lóng有飢荒；獨獨埃及全地有米糧。 55 到埃及全地有飢荒，眾百姓對法老哀求米糧；法老對埃及ê眾人講，lín去chhē約瑟，凡若伊所講ê，lín lóng tio̍h做。 56 當時飢荒遍滿天下；約瑟開ta̍k所在ê粟倉，thiò米糧hō͘埃及人；tī埃及地飢荒真傷重。 57 ta̍k國ê人lóng去埃及，到約瑟hia tia̍h mí-niû；因為天下飢荒真傷重。
1 Kè nn̄g-nî ka-nn̂g, Hoat-ló bîn-bāng; bāng-kìⁿ i khiā tī hô-piⁿ, 2 khòaⁿ-kìⁿ chhit chiah gû-bú tùi hô-ni̍h khí-lâi, súi koh pûi; tī lô͘-tek-á-lāi teh chia̍h. 3 Tè-āu koh ū chhit chiah gû-bú tùi hô-ni̍h khí-lâi, khiap-sì koh sán; kap chêng hiah ê gû tâng-khiā tī hô-piⁿ. 4 Chiah ê khiap-sì koh sán ê gû-bú it-chīn chia̍h hit chhit-chiah súi koh pûi ê gû. Hoat-ló chiū chhíⁿ. 5 I koh khùn, tē-jī pái bîn-bāng; bāng-kìⁿ chi̍t châng be̍h chhut chhit-sūi, phauh koh hó. 6 Āu-lâi khòaⁿ-kìⁿ koh chhut chhit-sūi, phàⁿ-phàⁿ, koh hō͘ tang-hong sàu-pháiⁿ. 7 Chiah ê phàⁿ ê sūi thun hit chhit-sūi phauh koh pá-móa-ê. Hoat-ló chhíⁿ, chiah chai sī bāng-kìⁿ. 8 Kàu thiⁿ-kng, Hoat-ló sim bô pêng-an; chiū chhe lâng tiàu Ai-ki̍p só͘ ū ê su̍t-sū, phok-sū lâi; Hoat-ló chiū chiong i só͘ bāng-kìⁿ-ê kā in kóng; in bô lâng ōe kā Hoat-ló oân. 9 Hit-sî chiú-chèng-tiúⁿ kā Hoat-ló kóng, Góa kin-á-ji̍t kì-tit góa ê chōe. 10 Chêng Hoat-ló siū-khì jîn-sîn, chiong góa kap tû-pâng-thâu koaiⁿ tī sī-ōe-tiúⁿ hú-lāi ê kaⁿ. 11 Góa kap i, nn̄g-lâng siâng hit-mî ū bāng-kìⁿ, kok chiàu i ê bāng ê ì-gī lâi bāng. 12 Tī-hia, kap goán tī-teh, ū chi̍t ê Hi-pek-lâi ê siàu-liân lâng, sī sī-ōe-tiúⁿ ê lô͘-po̍k, goán kā i kóng, i chiū kā goán oân goán ê bāng; sī chiàu goán ta̍k-lâng ê bāng lâi oân. 13 Āu-lâi tú-tú chiàu i só͘ kā goán oân-ê lâi chiâⁿ; i hō͘ góa ho̍k-chit, hit-lâng siū tiàu lâi sí. 14 Hoat-ló chiū chhe lâng khì tiàu Iok-sek, in chiū kín-kín chhōa i chhut-kaⁿ; i chiū chián-hoat, ōaⁿ i ê saⁿ, lâi kìⁿ Hoat-ló. 15 Hoat-ló kā Iok-sek kóng, Góa bāng-kìⁿ chi̍t ê bāng, bô lâng ōe oân-i; góa thiaⁿ-kìⁿ lâng kóng kàu lí thiaⁿ-kìⁿ bāng chiū ōe oân. 16 Iok-sek ìn Hoat-ló kóng, Che m̄-sī chāi-tī góa; Siōng-tè beh chiong pêng-an chí-sī Hoat-ló. 17 Hoat-ló kā Iok-sek kóng, Góa bāng-kìⁿ góa khiā tī hô-piⁿ, 18 ū chhit chiah gû-bú tùi hô-ni̍h khí-lâi, pûi koh súi; tī lô͘-tek-á-lāi teh chia̍h; 19 tè-āu koh ū chhit chiah gû-bú khí-lâi, nńg-chiáⁿ, chin khiap-sì, koh chin sán; piàn Ai-ki̍p tōe, góa m̄-bat khòaⁿ-kìⁿ kàu chiah pháiⁿ. 20 Chiah ê sán koh khiap-sì ê gû-bú it-chīn chia̍h tāi-seng hit chhit chiah pûi ê gû-bú; 21 thun lo̍h pak, iáu-bōe khòaⁿ-chhut ū thun-lo̍h khì; hit ê khiap-sì ê khoán iû-goân kap tāi-seng bô koh-iūⁿ; góa chiū chhíⁿ. 22 Góa tī bāng-tiong koh khòaⁿ-kìⁿ chi̍t châng be̍h, chhut chhit-sūi, pá-móa koh hó; 23 āu-lâi koh chhut chhit-sūi, ko͘-tâ, phàⁿ-phàⁿ, koh hō͘ tang-hong sàu-pháiⁿ; 24 chiah ê phàⁿ-phàⁿ ê sūi thun hit chhit sūi hó-ê. Góa kóng hō͘ su̍t-sū thiaⁿ, iā bô lâng ōe kā góa kóe-bêng. 25 Iok-sek kā Hoat-ló kóng, Hoat-ló ê bāng chiū-sī chi̍t-ê; Siōng-tè só͘ beh kiâⁿ ê sū, ū chí-sī Hoat-ló. 26 Chhit-chiah hó ê gû-bú sī chhit-nî; chhit-sūi hó-ê, ia̍h sī chhit-nî; bāng sī chi̍t-ê. 27 Hiah ê tè-āu khí-lâi ê chhit chiah sán koh khiap-sì ê gû-bú, sī chhit-nî; hiah ê chhit sūi khang-phàⁿ, koh hō͘ tang-hong sàu-pháiⁿ-ê, ia̍h sī chhit nî; beh chòe chhit nî ê ki-hng. 28 Siōng-tè só͘ beh chòe ê sū, ū hián-bêng tī Hoat-ló; che sī góa tùi Hoat-ló só͘ kóng-ê. 29 Lí khòaⁿ, Ai-ki̍p piàn-tōe beh tú-tio̍h tōa hó-nî-tang chhit-nî; 30 tè-āu, koh beh tú-tio̍h ki-hng chhit-nî; sīm-chì tī Ai-ki̍p tōe lóng bōe kì-tit í-chêng ê hó-siu; choân-tōe beh hō͘ ki-hng só͘ bia̍t; 31 in-ūi í-āu ê ki-hng thài siong-tiōng, chiū m̄-chai í-chêng tōe-hng ê hó-siu. 32 Lūn-kàu Hoat-ló nn̄g pái ê bîn-bāng, sī in-ūi Siōng-tè chù-tiāⁿ chit ê tāi-chì, koh Siōng-tè beh kín-kín chiâⁿ-i. 33 Só͘-í Hoat-ló tio̍h kéng chi̍t ê ū chhang-miâ, ū tì-hūi ê lâng, phài i tī-lí Ai-ki̍p tōe. 34 Hoat-ló tio̍h án-ni kiâⁿ, koh li̍p koaⁿ-oân koán-lí chit ê tōe; tng chhit-nî hó-nî-tang ê sî, Ai-ki̍p tōe só͘-siu-ê, gō͘-hūn thiu chi̍t-hūn; 35 hō͘ in tī chiong-lâi ê hó-nî-tang, chek-chū it-chhè ê bí-niû; chū-chi̍p ngó͘-kok, siu-khǹg chiàu-kò͘; tī ta̍k ê siâⁿ chòe chia̍h-mi̍h, kui tī Hoat-ló ê chhiú-thâu. 36 Só͘ chek-chū ê bí-niû, thang chòe Ai-ki̍p tōe chiong-lâi chhit-nî ki-hng ê lō͘-ēng; bián-tit chit ê tōe hō͘ ki-hng só͘ bia̍t. 37 Hoat-ló kap i it-chhè ê jîn-sîn lóng lia̍h chit ê tāi-chì chòe-hó. 38 Hoat-ló tùi i ê jîn-sîn kóng, Lán kiám ōe chhē-tio̍h chi̍t-ê chhin-chhiūⁿ i chit ê lâng, ū Siōng-tè ê sîn tī i ê lāi-bīn mah? 39 Hoat-ló tùi Iok-sek kóng, Siōng-tè í-keng chiong chit ê tāi-chì lóng chí-sī lí, khó-kiàn bô lâng chhin-chhiūⁿ lí ū chit-hō ê chhang-miâ tì-hūi. 40 Lí thang koán-lí góa ê ke; góa ê peh-sìⁿ lóng tio̍h thiaⁿ lí ê ōe, hō͘ lí koán-lí; to̍k-to̍k tī pó-chō, góa pí lí khah tōa. 41 Hoat-ló kā Iok-sek kóng, Góa kú-khí lí koán-hat Ai-ki̍p choân-tōe. 42 Hoat-ló chiū pak i chhiú-ni̍h chòe ìn ê chhiú-chí, kòa tī Iok-sek ê chńg-thâu-á; kā i chhēng iù-tōe-saⁿ; chiong kim-liān kòa tī i ê ām-kún. 43 Koh hō͘ Iok-sek chē i ê tē-jī pān chhia; khui-tō-ê kiò kóng, Kūi; án-ni Hoat-ló siat-li̍p i tī-lí Ai-ki̍p choân-tōe. 44 Hoat-ló tùi Iok-sek kóng, Góa sī Hoat-ló, nā bô lí ū siaⁿ, tī Ai-ki̍p choân-tōe, m̄-chún lâng tāng kha-chhiú. 45 Hoat-ló khim-sù Iok-sek ê miâ kiò Sat-hoat-ná-thek Pa-lōe-a; koh chiong An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p hō͘ i chòe-bó͘. Iok-sek chiū chhut-sûn Ai-ki̍p tōe. 46 Iok-sek kìⁿ Ai-ki̍p ông Hoat-ló ê sî, hit-nî saⁿ-cha̍p hè. Iok-sek tùi Hoat-ló ê bīn-chêng chhut-khì, piàn kiâⁿ Ai-ki̍p choân-tōe. 47 Chhit-ê hó nî-tang ê lāi-bīn, tōe ê chhut-sán ke̍k-kî hong-sēng. 48 Iok-sek chū-chi̍p Ai-ki̍p tōe chhit ê hó nî-tang it-chhè ê bí-niû; chiong bí-niû chek-chū tī ta̍k ê siâⁿ; chiu-ûi chhân-tōe ê bí-niû, lóng chek-chū tī i ê pún-siâⁿ. 49 Iok-sek chek-chū gō͘-kak ke̍k-chōe, chhin-chhiūⁿ hái-piⁿ ê soa, kàu i thêng-chí bô sǹg; in-ūi sǹg-bōe-liáu. 50 Ki-hng ê nî bē-kàu í-chêng, An-siâⁿ ê chè-si Pho-thê-hui-la̍h ê cha-bó͘-kiáⁿ A-se-la̍p kā Iok-sek siⁿ nn̄g ê kiáⁿ. 51 Iok-sek kā tōa kiáⁿ hō miâ kiò Má-ná-se; in-ūi i kóng, Siōng-tè hō͘ góa bōe-kì-tit góa it-chhè ê khùn-khó͘, kap góa ê lāu-pē ê choân-ke. 52 I kā tē-jī kiáⁿ hō miâ Í-hoat-liân; in-ūi i kóng, Siōng-tè hō͘ góa tī góa siū-khó͘ ê tōe-hng heng-ōng. 53 Ai-ki̍p tōe chhit-nî hó nî-tang í-keng oân, 54 chhit-nî ki-hng chiū lâi, tú-tú chiàu Iok-sek só͘ kóng-ê; ta̍k-kok lóng ū ki-hng; to̍k-to̍k Ai-ki̍p choân-tōe ū bí-niû. 55 Kàu Ai-ki̍p choân-tōe ū ki-hng, chèng peh-sìⁿ tùi Hoat-ló ai-kiû bí-niû; Hoat-ló tùi Ai-ki̍p ê chèng-lâng kóng, Lín khì chhē Iok-sek, hoān-nā i só͘ kóng-ê, lín lóng tio̍h chòe. 56 Tng-sî ki-hng piàn-móa thiⁿ-ē; Iok-sek khui ta̍k só͘-chāi ê chhek-chhng, thiò bí-niû hō͘ Ai-ki̍p lâng; tī Ai-ki̍p tōe ki-hng chin siong-tiōng. 57 Ta̍k-kok ê lâng lóng khì Ai-ki̍p, kàu Iok-sek hia tia̍h bí-niû; in-ūi thiⁿ-ē ki-hng chin siong-tiōng.
1 雅各看見埃及有五穀，雅各就kā伊hiahê kiáⁿ講，Lín啥事teh相看。 2 Koh講，我聽見埃及有五穀，lín thang落去hia，為咱tia̍h淡薄，hō͘咱thang度活，免死。 3 Tùi án-ni，約瑟十個hiaⁿ lóng落埃及，去tia̍h米糧。 4 總是約瑟ê小弟便雅憫，雅各無差伊kap in兄相kap去；因為伊講，驚了伊tú-tio̍h害。 5 來tia̍h米糧ê人ê中間，以色列hiahê kiáⁿ亦有來，因為迦南地亦有飢荒。 6 當時治理埃及地ê是約瑟；thiò米糧hō͘ hit所在ê眾百姓ê，亦是伊；約瑟hiahê兄來，仆落地拜伊。 7 約瑟看見伊hiahê兄，能認得，假做生份人，對in講khah嚴ê話，問in講，Lín tùi tah-lo̍h來？in講，Tùi迦南地來tia̍h米糧。 8 約瑟能認得in兄，in bōe認得伊。 9 約瑟記得前所夢論到in-ê hiahê 夢，就對in講，Lín是偵探，來探聽chit所在ê虛實。 10 In對伊講，阮ê主ah，m̄是，你ê奴僕來beh tia̍h米糧。 11 阮lóng是一人ê kiáⁿ，阮是老實人，你ê奴僕m̄是偵探。 12 約瑟kā in講，m̄是án-ni，lín來是beh探聽chit所在ê虛實。 13 In講，你ê奴僕十二個兄弟，是迦南地一个人ê kiáⁿ；第一細ê，現今tī阮老父hia；有一个無去lah。 14 約瑟kā in講，我tú-á講lín是偵探，chitê話實在無錯。 15 我kí法老ê性命來chiù-chōa，若lín soah尾ê小弟無到chia，lín bōe得thang出chit所在；用án-ni來試驗lín ê虛實。 16 Tio̍h差lín中間一人去chhōa lín ê小弟來，lín chiahê lóng tio̍h關tī-chia，證明lín ê話，知lín誠實á無；若無，我kí法老ê性命來chiù-chōa，lín一定是偵探。 17 Tùi án-ni，約瑟將in lóng關tī 監裡三日。 18 到第三日約瑟對in講，我敬畏上帝；lín照我ê話行，就會活。 19 Lín若果然是老實人，lín兄弟中thang留一个縛tī lín hit監內；總是lín thang帶米糧tò去，救lín家內ê飢荒， 20 將lín soah尾小弟chhōa來我chia；án-ni lín ê話就有憑據，lín也m̄免死。In就照án-ni行。 21 In相kap講，咱對tī咱ê小弟實在有罪，伊哀求咱ê時，咱看見伊心內ê艱苦，也m̄肯聽伊；所以chit場ê苦難到tī咱。 22 Liû-piān應in講，我kiám m̄是對lín講，m̄-thang害hitê gín-á來取罪，獨獨lín m̄聽？所以流伊ê血ê罪，對咱chiahê討。 23 In m̄知約瑟聽能曉得；因為tī in中間有用翻譯官。 24 約瑟oa̍t-tńg身流目屎；koh oa̍t來kap in講話；就tī in中間取西門出來，tī in ê面前kā伊縛teh。 25 約瑟吩咐人將五穀入tī in ê器具到滿滿，也將in ta̍k人ê銀hē tī in ê布袋內，來還in，koh用路裡ê食物hō͘ in；人就照án-ni來kā in做。 26 In就將五穀hō͘ in ê驢載，就離開hia去。 27 到歇暝ê所在，in中間有一人tháu開伊ê布袋，beh the̍h hō͘驢食，chiah看見伊ê銀猶原tī-teh，hē tī布袋口。 28 就kā伊ê兄弟講，我ê銀還倒tńg，你看，猶原tī我ê布袋內；in就驚到無心肝，ngia̍uh-ngia̍uh-chhoah，相kap講，上帝án-ni款待咱是甚麼？ 29 In到迦南地，到in老父雅各hia，將所tú-tio̍h ê事lóng kā伊講，講， 30 Hit人，就是hit所在ê主，對阮講真嚴ê話，掠阮做hit所在ê偵探。 31 阮kā伊講，阮是老實人，阮m̄是偵探， 32 阮是十二個兄弟，是阮老父ê kiáⁿ；有一个無去，第一細ê現今kap阮老父tī迦南地。 33 Hit人，就是hit所在ê主，kā阮講，若ài hō͘我知lín是老實人，lín兄弟中thang留一个tī我chia，lín chiahê thang帶五穀tò去，救lín家內ê飢荒； 34 chhōa lín soah尾ê小弟來我chia，我就知lín m̄是偵探，是老實人；án-ni我就將lín ê兄弟交hō͘ lín，lín也thang tī chit所在買賣。 35 後來in piàⁿ in ê布袋，無phah算，in ta̍k人ê銀包lóng tī in ê布袋內；in kap in老父看見銀包就lóng驚惶。 36 In ê老父雅各kā in講，Lín hō͘我失落我ê kiáⁿ；約瑟無去，西門也無去，lín koh beh chhōa便雅憫去；chiahê tāi-chì lóng是害tio̍h我。 37 Liû-piān kā伊ê老父講，我若無chhōa伊tò來交你，你thang 刣我兩個kiáⁿ；做你thang將伊交帶我，我的確chhōa伊tò來交你。 38 雅各講，我ê kiáⁿ我無beh hō͘伊kap lín去；伊ê兄已經死，只有chhun伊；伊若tī lín所行ê路tú-tio̍h陷害，he！就是lín hō͘我白頭毛悽慘落陰府。
1 Ngá-kok khòaⁿ-kìⁿ Ai-ki̍p ū gō͘-kak, Ngá-kok chiū kā i hiah ê kiáⁿ kóng, Lín siáⁿ-sū teh saⁿ-khòaⁿ. 2 Koh kóng, Góa thiaⁿ-kìⁿ Ai-ki̍p ū gō͘-kak, lín thang lo̍h-khì hia, ūi lán tia̍h tām-po̍h, hō͘ lán thang tō͘-oa̍h, bián sí. 3 Tùi án-ni Iok-sek cha̍p ê hiaⁿ lóng lo̍h Ai-ki̍p, khì tia̍h bí-niû. 4 Chóng-sī Iok-sek ê sió-tī Piān-ngá-bín, Ngá-kok bô chhe i kap in hiaⁿ saⁿ-kap khì; in-ūi i kóng, Kiaⁿ-liáu i tú-tio̍h hāi. 5 Lâi tia̍h bí-niû ê lâng ê tiong-kan, Í-sek-lia̍t hiah ê kiáⁿ ia̍h ū lâi, in-ūi Ka-lâm tōe ia̍h ū ki-hng. 6 Tng-sî tī-lí Ai-ki̍p tōe ê sī Iok-sek; thiò bí-niû hō͘ hit só͘-chāi ê chèng peh-sìⁿ-ê, ia̍h sī i; Iok-sek hiah ê hiaⁿ lâi, phak-lo̍h tōe pài i. 7 Iok-sek khòaⁿ-kìⁿ i hiah ê hiaⁿ, ōe jīn-tit, ké-chòe siⁿ-hūn-lâng, tùi in kóng khah-giâm ê ōe, mn̄g in kóng, Lín tùi tah-lo̍h lâi? in kóng, Tùi Ka-lâm tōe lâi tia̍h bí-niû. 8 Iok-sek ōe jīn-tit in hiaⁿ, in bōe jīn-tit i. 9 Iok-sek kì-tit chêng só͘ bāng lūn-kàu in ê hiah ê bāng, chiū tùi in kóng, Lín sī cheng-thàm, lâi thàm-thiaⁿ chit só͘-chāi ê hu-si̍t. 10 In tùi i kóng, Goán ê chú ah, m̄-sī, lí ê lô͘-po̍k lâi beh tia̍h bí-niû. 11 Goán lóng sī chi̍t-lâng ê kiáⁿ, goán sī láu-si̍t lâng, lí ê lô͘-po̍k m̄-sī cheng-thàm. 12 Iok-sek kā in kóng, M̄-sī án-ni, lín lâi sī beh thàm-thiaⁿ chit só͘-chāi ê hu-si̍t. 13 In kóng, Lí ê lô͘-po̍k cha̍p-jī ê hiaⁿ-tī, sī Ka-lâm tōe chi̍t ê lâng ê kiáⁿ; tē-it-sòe-ê, hiān-kim tī goán lāu-pē hia; ū chi̍t-ê bô-khì lah. 14 Iok-sek kā in kóng, Góa tú-á kóng lín sī cheng-thàm, chit ê ōe si̍t-chāi bô chhò. 15 Góa kí Hoat-ló ê sìⁿ-miā lâi chiù-chōa, nā lín soah-bé ê sió-tī bô kàu chia, lín bōe-tit-thang chhut chit só͘-chāi; ēng án-ni lâi chhì-giām lín ê hu-si̍t. 16 Tio̍h chhe lín tiong-kan chi̍t-lâng khì chhōa lín ê sió-tī lâi, lín chiah-ê lóng tio̍h koaiⁿ tī-chia, chèng-bêng lín ê ōe, chai lín sêng-si̍t á-bô; nā bô, góa kí Hoat-ló ê sìⁿ-miā lâi chiù-chōa, lín it-tēng sī cheng-thàm. 17 Tùi án-ni Iok-sek chiong in lóng koaiⁿ tī Kaⁿ-ni̍h saⁿ-ji̍t. 18 Kàu tē-saⁿ ji̍t Iok-sek tùi in kóng, Góa kèng-ùi Siōng-tè; lín chiàu góa ê ōe kiâⁿ, chiū ōe oa̍h. 19 Lín nā kó-jiân sī láu-si̍t lâng, lín hiaⁿ-tī-tiong thang lâu chi̍t-ê pa̍k tī lín hit kaⁿ-lāi; chóng-sī lín thang tòa bí-niû tò-khì, kiù lín ke-lāi ê ki-hng, 20 chiong lín soah-bé sió-tī chhōa lâi góa chia; án-ni lín ê ōe chiū ū pîn-kù, lín iā m̄-bián sí. In chiū chiàu án-ni kiâⁿ. 21 In saⁿ-kap kóng, Lán tùi tī lán ê sió-tī si̍t-chāi ū chōe, i ai-kiû lán ê sî, lán khòaⁿ-kìⁿ i sim-lāi ê kan-khó͘, iā m̄-khéng thiaⁿ i; só͘-í chit-tiûⁿ ê khó͘-lān kàu tī lán. 22 Liû-piān ìn in kóng, Góa kiám m̄-sī tùi lín kóng, m̄-thang hāi hit ê gín-á lâi chhú-chōe, to̍k-to̍k lín m̄-thiaⁿ? só͘-í lâu i ê huih ê chōe, tùi lán chiah-ê thó. 23 In m̄-chai Iok-sek thiaⁿ ōe hiáu-tit; in-ūi tī in tiong-kan ū ēng hoan-e̍k-koaⁿ. 24 Iok-sek oa̍t-tńg-sin lâu ba̍k-sái; koh oa̍t-lâi kap in kóng-ōe; chiū tī in tiong-kan chhú Se-biān chhut-lâi, tī in ê bīn-chêng kā i pa̍k-teh. 25 Iok-sek hoan-hù lâng chiong gō͘-kak ji̍p tī in ê khì-kū kàu móa-móa, iā chiong in ta̍k-lâng ê gûn hē tī in ê pò͘-tē-lāi, lâi hêng in, koh ēng lō͘-ni̍h ê chia̍h-mi̍h hō͘ in; lâng chiū chiàu án-ni lâi kā in chòe. 26 In chiū chiong gō͘-kak hō͘ in ê lû chài, chiū lī-khui hia khì. 27 Kàu hioh-mî ê só͘-chāi, in tiong-kan ū chi̍t-lâng tháu-khui i ê pò͘-tē, beh the̍h hō͘ lû chia̍h, chiah khòaⁿ-kìⁿ i ê gûn iû-goân tī-teh, hē tī pò͘-tē-kháu. 28 Chiū kā i ê hiaⁿ-tī kóng, Góa ê gûn hêng tò-tńg, lí khòaⁿ, iû-goân tī góa ê pò͘-tē-lāi; in chiū kiaⁿ kàu bô sim-koaⁿ, ngia̍uh-ngia̍uh-chhoah, saⁿ-kap kóng, Siōng-tè án-ni khoán-thāi lán sī sím-mi̍h? 29 In kàu Ka-lâm tōe, kàu in lāu-pē Ngá-kok hia, chiong só͘ tú-tio̍h ê sū lóng kā i kóng, kóng, 30 Hit-lâng, chiū-sī hit só͘-chāi ê chú, tùi goán kóng chin giâm ê ōe, lia̍h goán chòe hit só͘-chāi ê cheng-thàm. 31 Goán kā i kóng, Goán sī láu-si̍t lâng, goán m̄-sī cheng-thàm, 32 goán sī cha̍p-jī ê hiaⁿ-tī, sī goán lāu-pē ê kiáⁿ; ū chi̍t-ê bô-khì, tē-it-sòe-ê hiān-kim kap goán lāu-pē tī Ka-lâm tōe. 33 Hit-lâng, chiū-sī hit só͘-chāi ê chú, kā goán kóng, Nā ài hō͘ góa chai lín sī láu-si̍t lâng, lín hiaⁿ-tī-tiong thang lâu chi̍t-ê tī góa chia, lín chiah-ê thang tòa gō͘-kak tò-khì, kiù lín ke-lāi ê ki-hng; 34 chhōa lín soah-bé ê sió-tī lâi góa chia, góa chiū chai lín m̄-sī cheng-thàm, sī láu-si̍t lâng; án-ni góa chiū chiong lín ê hiaⁿ-tī kau hō͘ lín, lín iā thang tī chit só͘-chāi bóe-bōe. 35 Āu-lâi in piàⁿ in ê pò͘-tē, bô phah-sǹg, in ta̍k-lâng ê gûn-pau lóng tī in ê pò͘-tē-lāi; in kap in lāu-pē khòaⁿ-kìⁿ gûn-pau chiū lóng kiaⁿ-hiâⁿ. 36 In ê lāu-pē Ngá-kok kā in kóng, Lín hō͘ góa sit-lo̍h góa ê kiáⁿ; Iok-sek bô-khì, Se-biān iā bô-khì, lín koh beh chhōa Piān-ngá-bín khì; chiah ê tāi-chì lóng sī hāi-tio̍h góa. 37 Liû-piān kā i ê lāu-pē kóng, Góa nā bô chhōa i tò-lâi kau lí, lí thang thâi góa nn̄g ê kiáⁿ; chòe lí thang chiong i kau-tài góa, góa tek-khak chhōa i tò-lâi kau lí. 38 Ngá-kok kóng, Góa ê kiáⁿ góa bô beh hō͘ i kap lín khì; i ê hiaⁿ í-keng sí, chí-ū chhun i; i nā tī lín só͘ kiâⁿ ê lō͘ tú-tio̍h hām-hāi, he! chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú.
1 Hit所在飢荒真大。 2 In tùi埃及帶來ê五穀已經食了，in老父kā in講，Lín koh去kā咱tia̍h淡薄米糧來。 3 偤大應伊講，Hit人切切吩咐阮講，Lín小弟若無kap lín相kap來，lín就bōe得tio̍h見我ê面。 4 你（Lín）若差阮小弟kap阮相kap去，阮就落去，kā你tia̍h米糧。 5 你若m̄差伊去，阮就m̄落去；因為hit人kā阮講，Lín小弟若無kap lín相kap來，lín就bōe得tio̍h見我ê面。 6 以色列講，Lín啥事án-ni害我，kā hit人講lín iáu有小弟ah？ 7 In應講，Hit人致意問阮kap阮親族ê tāi-chì講，Lín老父iáu tī-teh無？lín iáu有兄弟無？阮照伊所問ê kā伊講；阮thái-thó會知伊beh講，Tio̍h帶lín小弟落來？ 8 偤大koh kā伊ê老父以色列講，你差gín-á kap我去，阮就起身去，thang hō͘阮kap你，以及阮ê gín-á，得tio̍h活，免死。 9 我kā伊保，你thang對我討；我若無chhōa伊tò來，khiā tī你ê面前，我願一生擔當罪。 10 咱若m̄是有延chhiân，已經第二pái tò來lah。 11 In老父以色列對in講，若是án-ni，lín就tio̍h án-ni做；thang取chit所在第一好ê土產，乳香淡薄，蜂蜜淡薄，以及香料、沒藥、榧子、杏仁，lóng收tī器具內；帶去送hit人。 12 Koh tio̍h帶銀重倍，亦tio̍h將lín布袋口，伊還lín ê銀，帶倒tńg去hō͘伊；hitê kiám-chhái是失錯； 13 亦chhōa lín小弟起身，去koh見hit人。 14 獨獨願全能ê上帝hō͘ lín tī hit人ê面前得tio̍h憐憫；將lín hitê兄弟kap便雅憫交lín；我若失落我ê kiáⁿ，亦tio̍h hō͘伊失落就是。 15 Tùi hit-tia̍p，in帶hiahê禮物，亦帶銀重倍，koh chhōa便雅憫，起身落去埃及；khiā tī約瑟ê面前。 16 約瑟看見便雅憫kap in相kap來，就對管家ê講，Chhōa chiahê人去厝內，刣 cheng-siⁿ，備辦筵席；因為日晝，chiahê人beh kap我相kap食。 17 Hit人就照約瑟ê話去行；chhōa in hiahê人入約瑟ê厝。 18 Hiah-ê人，因為hō͘伊chhōa到約瑟ê厝，就驚惶；講，Chhōa咱到chia，的確是因為頭一pái還咱tī布袋內ê銀，beh chhē咱ê孔縫，下手害咱，強強掠咱做奴僕，搶咱ê驢。 19 In就óa近約瑟ê管家ê，tī厝門口kap伊講話， 20 講，我ê主ah，阮頭pái落來，實在是beh tia̍h米糧； 21 後來到歇暝ê所在，開阮ê布袋，無phah算，阮ta̍k人ê銀足數猶原tī ta̍k人ê布袋口；taⁿ阮有koh帶來；阮另外有koh帶銀beh來tia̍h米糧； 22 阮m̄知是誰將阮ê銀hē tī阮ê布袋內。 23 管家ê講，做lín安心，免驚；是lín ê上帝，kap lín老父ê上帝，賞賜lín財寶tī lín ê布袋內；lín ê銀我已經收了。就chhōa西門出來hō͘ in。 24 Hit人就chhōa hiahê人入約瑟ê厝，捧水hō͘ in，in就洗腳；koh the̍h草料飼in ê驢。 25 In就備辦hiahê禮物，thèng候約瑟日晝tò來；因為in聽見beh tī-hia食。 26 約瑟tò來到厝，in就將所帶來ê禮物the̍h入厝送伊；koh仆tī地裡拜伊。 27 約瑟問in平安；koh講，Lín ê老父，就是lín所講hitê老人，平安mah？伊iáu tī-teh mah？ 28 In應講，你ê奴僕，阮ê老父，平安，伊iáu tī-teh；in就àⁿ頭拜伊。 29 約瑟kia̍h目看見伊同母ê小弟，便雅憫；就講，你所kā我講soah尾小弟，是chitê mah？Koh講，細kiáⁿ，願上帝施恩hō͘你。 30 約瑟疼小弟ê情大受激動；就趕緊chhē一位thang啼哭；入伊ê房間啼哭； 31 後來洗面出來，勉強忍teh；吩咐開桌。 32 In就為約瑟另外排一塊桌，為hiahê人koh排一塊，亦為kap約瑟相kap食ê埃及人另外排一塊；因為埃及人bōe-thang kap希伯來人相kap食，這是埃及人所厭惡。 33 Hiah-ê人坐tī伊ê面前，大細照in年歲ê次序；hiahê人大家gông-ngia̍h。 34 約瑟將伊面前ê食物，分hō͘ in；獨獨便雅憫所得tio̍h-ê，比別人五倍chōe；in就lim酒，kap約瑟相kap宴樂。
1 Hit só͘-chāi ki-hng chin-tōa. 2 In tùi Ai-ki̍p tòa-lâi ê gō͘-kak í-keng chia̍h-liáu, in lāu-pē kā in kóng, Lín koh khì kā lán tia̍h tām-po̍h bí-niû lâi. 3 Iû-tāi ìn i kóng, Hit-lâng chhiat-chhiat hoan-hù goán kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn. 4 Lí(Lín) nā chhe goán sió-tī kap goán saⁿ-kap khì, goán chiū lo̍h-khì, kā lí tia̍h bí-niû. 5 Lí nā m̄ chhe i khì, goán chiū m̄ lo̍h-khì; in-ūi hit-lâng kā goán kóng, Lín sió-tī nā bô kap lín saⁿ-kap lâi, lín chiū bōe tit-tio̍h kìⁿ góa ê bīn. 6 Í-sek-lia̍t kóng, Lín siáⁿ-sū án-ni hāi góa, kā hit-lâng kóng lín iáu ū sió-tī ah? 7 In ìn kóng, Hit-lâng tì-ì mn̄g goán kap goán chhin-cho̍k ê tāi-chì kóng, Lín lāu-pē iáu tī-teh bô? lín iáu ū hiaⁿ-tī bô? goán chiàu i só͘ mn̄g-ê kā i kóng; goán thái-thó ōe chai i beh kóng, Tio̍h tòa lín sió-tī lo̍h-lâi? 8 Iû-tāi koh kā i ê lāu-pē Í-sek-lia̍t kóng, Lí chhe gín-á kap góa khì, goán chiū khí-sin khì, thang hō͘ goán kap lí, í-ki̍p goán ê gín-á, tit-tio̍h oa̍h, bián sí. 9 Góa kā i pó, lí thang tùi góa thó; góa nā bô chhōa i tò-lâi, khiā tī lí ê bīn-chêng, góa goān it-seng tam-tng chōe. 10 Lán nā m̄-sī ū iân-chhiân, í-keng tē-jī-pái tò-lâi lah. 11 In lāu-pē Í-sek-lia̍t tùi in kóng, Nā sī án-ni, lín chiū tio̍h án-ni chòe; thang chhú chit só͘-chāi tē-it hó ê thó͘-sán, jú-hiuⁿ tām-po̍h, phang-bi̍t tām-po̍h, í-ki̍p hiuⁿ-liāu, bu̍t-io̍h, húi-chí, hēng-jîn, lóng siu tī khì-kū lāi; tòa-khì sàng hit-lâng. 12 Koh tio̍h tòa gûn têng-pē, ia̍h tio̍h chiong lín pò͘-tē-kháu, i hêng lín ê gûn, tòa tò-tńg khì hō͘-i; hit-ê kiám-chhái sī sit-chhò; 13 ia̍h chhōa lín sió-tī khí-sin, khì koh kìⁿ hit-lâng. 14 To̍k-to̍k goān choân-lêng ê Siōng-tè hō͘ lín tī hit-lâng ê bīn-chêng tit-tio̍h lîn-bín; chiong lín hit ê hiaⁿ-tī kap Piān-ngá-bín kau lín; góa nā sit-lo̍h góa ê kiáⁿ, ia̍h tio̍h hō͘ i sit-lo̍h chiū-sī. 15 Tùi hit-tia̍p in tòa hiah ê lé-mi̍h, ia̍h tòa gûn têng-pē, koh chhōa Piān-ngá-bín, khí-sin lo̍h-khì Ai-ki̍p; khiā tī Iok-sek ê bīn-chêng. 16 Iok-sek khòaⁿ-kìⁿ Piān-ngá-bín kap in saⁿ-kap lâi, chiū tùi koán-ke-ê kóng, Chhōa chiah ê lâng khì chhù-lāi, thâi cheng-siⁿ, pī-pān iân-sia̍h; in-ūi ji̍t-tàu, chiah ê lâng beh kap góa saⁿ-kap chia̍h. 17 Hit-lâng chiū chiàu Iok-sek ê ōe khì kiâⁿ; chhōa in hiah ê lâng ji̍p Iok-sek ê chhù. 18 Hiah ê lâng, in-ūi hō͘ i chhōa kàu Iok-sek ê chhù, chiū kiaⁿ-hiâⁿ; kóng, Chhōa lán kàu chia, tek-khak sī in-ūi thâu-chi̍t-pái hêng lán tī pò͘-tē-lāi ê gûn, beh chhē lán ê khang-phāng, hē chhiú hāi lán, kiông-kiông lia̍h lán chòe lô͘-po̍k, chhiúⁿ lán ê lû. 19 In chiū óa-kūn Iok-sek ê koán-ke-ê, tī chhù-mn̂g-kháu kap i kóng-ōe, 20 kóng, Góa ê chú ah, goán thâu-pái lo̍h-lâi, si̍t-chāi sī beh tia̍h bí-niû; 21 āu-lâi kàu hioh-mî ê só͘-chāi, khui goán ê pò͘-tē, bô phah-sǹg, goán ta̍k-lâng ê gûn chiok-sò͘ iû-goân tī ta̍k-lâng ê pò͘-tē-kháu; taⁿ goán ū koh tòa-lâi; goán lēng-gōa ū koh tòa gûn beh lâi tia̍h bí-niû; 22 goán m̄-chai chī-chūi chiong goán ê gûn hē tī goán ê pò͘-tē-lāi. 23 Koán-ke-ê kóng, Chòe lín an-sim, bián kiaⁿ; sī lín ê Siōng-tè, kap lín lāu-pē ê Siōng-tè, siúⁿ-sù lín châi-pó tī lín ê pò͘-tē-lāi; lín ê gûn góa í-keng siu-liáu. Chiū chhōa Se-biān chhut-lâi hō͘ in. 24 Hit-lâng chiū chhōa hiah ê lâng ji̍p Iok-sek ê chhù, phâng chúi hō͘ in, in chiū sóe kha; koh the̍h chháu-liāu chhī in ê lû. 25 In chiū pī-pān hiah ê lé-mi̍h, thèng-hāu Iok-sek ji̍t-tàu tò-lâi; in-ūi in thiaⁿ-kìⁿ beh tī-hia chia̍h. 26 Iok-sek tò-lâi kàu chhù, in chiū chiong só͘ tòa-lâi ê lé-mi̍h the̍h ji̍p chhù sàng-i; koh phak tī tōe-ni̍h pài i. 27 Iok-sek mn̄g in pêng-an; koh kóng, Lín ê lāu-pē, chiū-sī lín só͘ kóng hit ê lāu-lâng, pêng-an mah? i iáu tī-teh mah? 28 In ìn kóng, Lí ê lô͘-po̍k, goán ê lāu-pē, pêng-an, i iáu tī-teh; in chiū àⁿ-thâu pài i. 29 Iok-sek kia̍h-ba̍k khòaⁿ-kìⁿ i tâng-bú ê sió-tī, Piān-ngá-bín; chiū kóng, Lí só͘ kā góa kóng soah-bé sió-tī, sī chit-ê mah? Koh kóng, Sòe-kiáⁿ, goān Siōng-tè si-un hō͘ lí. 30 Iok-sek thiàⁿ sió-tī ê chêng tōa siū kek-tōng; chiū kóaⁿ-kín chhē chi̍t-ūi thang thî-khàu; ji̍p i ê pâng-keng thî-khàu; 31 āu-lâi sóe-bīn chhut-lâi, bián-kióng lún-teh; hoan-hù khui-toh. 32 In chiū ūi Iok-sek lēng-gōa pâi chi̍t tè toh, ūi hiah ê lâng koh pâi chi̍t tè, ia̍h ūi kap Iok-sek saⁿ-kap chia̍h ê Ai-ki̍p lâng lēng-gōa pâi chi̍t-tè; in-ūi Ai-ki̍p lâng bōe thang kap Hi-pek-lâi lâng saⁿ-kap chia̍h, che sī Ai-ki̍p lâng só͘ iàm-ò͘ⁿ. 33 Hiah ê lâng chē tī i ê bīn-chêng, tōa-sòe chiàu in nî-hè ê chhù-sū; hiah ê lâng tāi-ke gông-ngia̍h. 34 Iok-sek chiong i bīn-chêng ê chia̍h-mi̍h, pun hō͘ in; to̍k-to̍k Piān-ngá-bín só͘ tit-tio̍h-ê, pí pa̍t-lâng gō͘-pē chōe; in chiū lim chiú, kap Iok-sek saⁿ-kap iàn-lo̍k.
1 約瑟吩咐管家ê講，將米糧入滿chiahê人ê布袋，盡in所能帶ê；koh將ta̍k人ê銀lok tī伊ê布袋口。 2 亦將我ê杯，就是hit塊銀杯，hē tī少年ê ê布袋口；伊tia̍h五穀ê銀亦續hē-teh。管家ê就照約瑟所講ê話去行。 3 天一下光，就差hiahê人kap in ê驢去。 4 In出城行無jōa遠，約瑟kā管家ê講，起來，去追jip hiahê人，追tio̍h，就kā in講，Lín啥事用pháiⁿ報好ah？ 5 這kiám m̄是我ê主人lim酒ê杯mah？Kiám m̄是伊占卜teh用ê mah？Lín án-ni做是pháiⁿ。 6 管家ê追tio̍h in，將chiahê話kā in講。 7 In應講，我ê主啥事講chit號話？你ê奴僕斷斷無做chit號事。 8 你看，阮前tī布袋口所看見ê銀，尚且tùi迦南地帶來還你；阮thái-thó會對你主人ê家偷the̍h金銀ah？ 9 你ê奴僕ê中間，無論tī甚麼人hia chhiau-tio̍h，就hō͘伊死，阮亦beh做我ê主人ê奴僕。 10 管家ê講，Taⁿ就照lín ê話行；tī甚麼人hia chhiau-tio̍h，hit人就做我ê奴僕；其餘ê lóng無罪。 11 Tùi hit-tia̍p，in ta̍k人趕緊將布袋卸tī土腳，ta̍k人tháu開in ê布袋。 12 管家ê就chhiau，tùi大ê 起，到細ê止；hitê杯竟然tī便雅憫ê布袋內chhiau-tio̍h。 13 In就拆裂in ê衫，ta̍k人將in ê物hō͘驢載，tò去城內。 14 偤大kap伊ê兄弟到約瑟ê厝，約瑟iáu tī-hia，in就tī伊ê面前仆落地。 15 約瑟kā in講，Lín所做ê是甚麼事？lín kiám m̄知，親像我chit號ê人會占卜mah？ 16 偤大講，阮對我ê主beh講甚麼？iáu有啥話thang講？阮thái會家己訴明ah？上帝已經查出你ê奴僕ê罪過，阮kap hitê tī伊ê手chhiau tio̍h杯ê，lóng是我ê主ê奴僕。 17 約瑟講，我斷斷無beh án-ni做；tī甚麼人ê手chhiau tio̍h杯，hit人就tio̍h做我ê奴僕；lín chiahê thang平安上去lín老父hia。 18 偤大óa近伊講，我ê主ah，求你容允你ê奴僕講一句話hō͘我ê主聽，莫得受氣你ê奴僕；因為你kap法老一樣。 19 我ê主bat問你chiahê奴僕講，Lín有老父，有兄弟無？ 20 阮kā我ê主講，阮有老父，已經年老；iáu有伊年老所生一个soah尾kiáⁿ；伊ê兄已經死，伊ê老母kan-ta放伊一个，koh伊ê老父真疼伊。 21 你kā你ê奴僕講，Chhōa伊落來我chia，hō͘我親目看見伊。 22 阮kā我ê主講，Gín-á bōe會離開伊ê老父；若離開伊ê老父，老父的確死。 23 你kā你ê奴僕講，Lín ê soah尾小弟若無kap lín相kap落來，lín就bōe得koh見我ê面。 24 阮上 到你ê奴僕，阮老父hia，就將我ê主ê話kā伊講。 25 阮ê老父講，Lín koh去kā咱tia̍h淡薄米糧來。 26 阮就講，阮bōe會落去；阮ê soah尾小弟若kap阮相kap去，阮就beh落去；因為soah尾小弟若無kap阮相kap去，阮的確bōe得見hit人ê面。 27 你ê奴僕，我ê老父，kā阮講，lín知我ê bó͘ kā我生兩個kiáⁿ； 28 一个離開我出去，我講伊的確是hō͘野獸拆碎；到taⁿ我iáu m̄-bat看見； 29 Taⁿ lín koh將chitê chhōa去，離開我；若伊tú-tio̍h陷害，就是lín hō͘我白頭毛悽慘落陰府。 30 阮老父ê性命kap chitê gín-á ê性命生相連；taⁿ我tò去你ê奴僕我ê老父hia；若gín-á無kap阮相kap tī-teh，阮ê老父看無gín-á，伊就的確死， 31 這就是阮hō͘你ê奴僕，阮ê老父，白頭毛悽慘落陰府。 32 因為你ê奴僕bat對我ê老父保chitê gín-á，講，我若無chhōa伊tò來交你，我願tī老父ê面前一生擔當罪。 33 Taⁿ求你容允你ê奴僕tiàm-teh，替chitê gín-á做我ê主ê奴僕；hō͘ gín-á kap伊hiahê兄相kap上去。 34 若gín-á無kap我相kap去，我thái-thó能上去見我ê老父ah？驚了我看見阮老父所tú-tio̍h ê災禍。
1 Iok-sek hoan-hù koán-ke-ê kóng, chiong bí-niû ji̍p móa chiah ê lâng ê pò͘-tē, chīn in só͘ ōe tòa-ê; koh chiong ta̍k-lâng ê gûn lok tī i ê pò͘-tē-kháu. 2 Ia̍h chiong góa ê poe, chiū-sī hit tè gûn-poe, hē tī siàu-liân-ê ê pò͘-tē-kháu; i tia̍h gō͘-kak ê gûn ia̍h sòa hē-teh. Koán-ke-ê chiū chiàu Iok-sek só͘ kóng ê ōe khì kiâⁿ. 3 Thiⁿ chi̍t-ē kng, chiū chhe hiah ê lâng kap in ê lû khì. 4 In chhut siâⁿ kiâⁿ bô jōa-hn̄g, Iok-sek kā koán-ke-ê kóng, Khí-lâi, khì tui-jip hiah ê lâng, tui-tio̍h, chiū kā in kóng, Lín siáⁿ-sū ēng pháiⁿ pò hó ah? 5 Che kiám m̄-sī góa ê chú-lâng lim-chiú ê poe mah? Kiám m̄-sī i chiam-pok teh ēng-ê mah? lín án-ni chòe sī pháiⁿ. 6 Koán-ke-ê tui-tio̍h in, chiong chiah ê ōe kā in kóng. 7 In ìn kóng, Góa ê chú siáⁿ-sū kóng chit hō ōe? lí ê lô͘-po̍k toàn-toàn bô chòe chit-hō sū. 8 Lí khòaⁿ, goán chêng tī pò͘-tē-kháu só͘ khòaⁿ-kìⁿ ê gûn, siōng-chhiáⁿ tùi Ka-lâm tōe tòa-lâi hêng lí; goán thái-thó ōe tùi lí chú-lâng ê ke thau-the̍h kim-gûn ah? 9 Lí ê lô͘-po̍k ê tiong-kan, bô-lūn tī sím-mi̍h lâng hia chhiau-tio̍h, chiū hō͘ i sí, goán ia̍h beh chòe góa ê chú-lâng ê lô͘-po̍k. 10 Koán-ke-ê kóng, Taⁿ chiū chiàu lín ê ōe kiâⁿ; tī sím-mi̍h lâng hia chhiau-tio̍h, hit-lâng chiū chòe góa ê lô͘-po̍k; kî-û-ê lóng bô chōe. 11 Tùi hit-tia̍p in ta̍k-lâng kóaⁿ-kín chiong pò͘-tē sià tī thô͘-kha, ta̍k-lâng tháu-khui in ê pò͘-tē. 12 Koán-ke-ê chiū chhiau, tùi tōa-ê khí, kàu sòe-ê chí; hit ê poe kéng-jiân tī Piān-ngá-bín ê pò͘-tē-lāi chhiau-tio̍h. 13 In chiū thiah-li̍h in ê saⁿ, ta̍k-lâng chiong in ê mi̍h hō͘ lû chài, tò-khì siâⁿ-lāi. 14 Iû-tāi kap i ê hiaⁿ-tī kàu Iok-sek ê chhù, Iok-sek iáu tī-hia, in chiū tī i ê bīn-chêng phak-lo̍h tōe. 15 Iok-sek kā in kóng, Lín só͘-chòe-ê sī sím-mi̍h sū? lín kiám m̄-chai, chhin-chhiūⁿ góa chit-hō ê lâng ōe chiam-pok mah? 16 Iû-tāi kóng, Goán tùi góa ê chú beh kóng sím-mi̍h? iáu ū siáⁿ ōe thang kóng? goán thái ōe ka-kī sò͘-bêng ah? Siōng-tè í-keng cha-chhut lí ê lô͘-po̍k ê chōe-kòa, goán kap hit-ê tī i ê chhiú chhiau tio̍h poe-ê, lóng sī góa ê chú ê lô͘-po̍k. 17 Iok-sek kóng, Góa toàn-toàn bô beh án-ni chòe; tī sím-mi̍h lâng ê chhiú chhiau tio̍h poe, hit-lâng chiū tio̍h chòe góa ê lô͘-po̍k; lín chiah-ê thang pêng-an chiūⁿ khì lín lāu-pē hia. 18 Iû-tāi óa-kūn i kóng, Góa ê chú ah, kiû lí iông-ún lí ê lô͘-po̍k kóng chi̍t-kù-ōe hō͘ góa ê chú thiaⁿ, bo̍h-tit siū-khì lí ê lô͘-po̍k; in-ūi lí kap Hoat-ló chi̍t-iūⁿ. 19 Góa ê chú bat mn̄g lí chiah ê lô͘-po̍k kóng, Lín ū lāu-pē, ū hiaⁿ-tī bô? 20 Goán kā góa ê chú kóng, Goán ū lāu-pē, í-keng nî-lāu; iáu ū i nî-lāu só͘ siⁿ chi̍t ê soah-bé kiáⁿ; i ê hiaⁿ í-keng sí, i ê lāu-bú kan-ta pàng i chi̍t-ê, koh i ê lāu-pē chin thiàⁿ-i. 21 Lí kā lí ê lô͘-po̍k kóng, Chhōa i lo̍h-lâi góa chia, hō͘ góa chhin-ba̍k khòaⁿ-kìⁿ i. 22 Goán kā góa ê chú kóng, Gín-á bōe-ōe lī-khui i ê lāu-pē; nā lī-khui i ê lāu-pē, lāu-pē tek-khak sí. 23 Lí kā lí ê lô͘-po̍k kóng, Lín ê soah-bé sió-tī nā bô kap lín saⁿ-kap lo̍h-lâi, lín chiū bōe-tit koh kìⁿ góa ê bīn. 24 Goán chiūⁿ kàu lí ê lô͘-po̍k, goán lāu-pē hia, chiū chiong góa ê chú ê ōe kā i kóng. 25 Goán ê lāu-pē kóng, Lín koh khì kā lán tia̍h tām-po̍h bí-niû lâi. 26 Goán chiū kóng, Goán bōe-ōe lo̍h-khì; goán ê soah-bé sió-tī nā kap goán saⁿ-kap khì, goán chiū beh lo̍h-khì; in-ūi soah-bé sió-tī nā bô kap goán saⁿ-kap khì, goán tek-khak bōe-tit kìⁿ hit-lâng ê bīn. 27 Lí ê lô͘-po̍k, góa ê lāu-pē, kā goán kóng, Lín chai góa ê bó͘ kā góa siⁿ nn̄g ê kiáⁿ; 28 chi̍t-ê lī-khui góa chhut-khì, góa kóng i tek-khak sī hō͘ iá-siù thiah-chhùi; kàu-taⁿ góa iáu m̄-bat khòaⁿ-kìⁿ; 29 taⁿ lín koh chiong chit-ê chhōa-khì, lī-khui góa; nā i tú-tio̍h hām-hāi, chiū-sī lín hō͘ góa pe̍h-thâu-mn̂g chhiⁿ-chhám lo̍h im-hú. 30 Goán lāu-pē ê sìⁿ-miā kap chit ê gín-á ê sìⁿ-miā siⁿ saⁿ-liân; taⁿ góa tò-khì lí ê lô͘-po̍k góa ê lāu-pē hia; nā gín-á bô kap goán saⁿ-kap tī-teh, goán ê lāu-pē khòaⁿ bô gín-á, i chiū tek-khak sí, 31 che chiū-sī goán hō͘ lí ê lô͘-po̍k, goán ê lāu-pē, pe̍h-thâu-mn̂g chhiⁿ-chhám lo̍h im-hú. 32 In-ūi lí ê lô͘-po̍k bat tùi góa ê lāu-pē pó chit ê gín-á, kóng, Góa nā bô chhōa i tò-lâi kau lí, góa goān tī lāu-pē ê bīn-chêng it-seng tam-tng chōe. 33 Taⁿ kiû lí iông-ún lí ê lô͘-po̍k tiàm-teh, thòe chit ê gín-á chòe góa ê chú ê lô͘-po̍k; hō͘ gín-á kap i hiah ê hiaⁿ saⁿ-kap chiūⁿ-khì. 34 Nā gín-á bô kap góa saⁿ-kap khì, góa thái-thó ōe chiūⁿ-khì kìⁿ góa ê lāu-pē ah? kiaⁿ-liáu góa khòaⁿ-kìⁿ goán lāu-pē só͘ tú-tio̍h ê chai-ē.
1 約瑟tī hiahê khiā伊身邊ê人ê面前忍bōe-tiâu；就hoah講，眾人tio̍h離開我出去。約瑟將伊本身hō͘兄弟認得ê時，無一人khiā tī伊ê面前。 2 伊就出聲大哭；埃及人聽見，法老ê家亦聽見。 3 約瑟kā伊ê兄弟講，我是約瑟，我ê老父iáu tī-teh mah？伊ê兄弟bōe能應，因為tī伊ê面前lóng驚惶。 4 約瑟koh kā伊ê兄弟講，請行óa來。In就óa來。伊講，我是lín ê小弟約瑟，就是lín所賣到埃及ê。 5 Taⁿ m̄免因為賣我到chia來憂悶，來家己怨恨；這是上帝差我事先lín來，因為beh保全性命。 6 Taⁿ tī chit所在ê飢荒已經兩年，iáu有五年，無thang種作，無thang收成。 7 上帝差我事先lín來，為tio̍h beh kā lín留chhun ê種族tī世上；koh beh行伊大ê拯救，保全lín ê活命。 8 Án-ni看起來，差我到chia ê，m̄是lín，就是上帝；伊koh hō͘我親像法老ê父，做伊全家ê主，kap管理埃及全地。 9 Lín tio̍h趕緊上去我ê老父hia，kā伊講，你ê kiáⁿ約瑟án-ni講，上帝hō͘我做全埃及ê主，請落來我chia，m̄-thang延chhiân。 10 你kap你ê kiáⁿ你ê孫，kap牛群羊群，以及一切所有ê，lóng thang來tiàm-tī Ko-san ê地，kap我相近。 11 我beh tī-hia奉承你；因為iáu有五年ê飢荒，免得你，kap你ê家眷，kap一切所有ê落薄。 12 何況lín ê目睭kap我ê小弟便雅憫ê目睭lóng看見我kap lín親嘴對lín講話。 13 Lín也tio̍h將我tī埃及一切ê榮光kap lín所看見ê事，lóng kā我ê老父講；koh tio̍h趕緊將我ê老父搬來我chia。 14 Tùi án-ni，約瑟仆tī伊ê小弟便雅憫ê頷頸啼哭；便雅憫也tī伊ê頷頸啼哭。 15 伊koh kap眾兄弟chim嘴，抱in啼哭；後來伊ê兄弟就kap伊講話。 16 Chitê風聲傳到法老ê宮內，講，約瑟ê兄弟來lah。法老kap伊ê人臣lóng歡喜。 17 法老kā約瑟講，你tio̍h kā你ê兄弟講，Lín tio̍h án-ni行；將物hō͘ cheng-siⁿ載；起身去迦南地； 18 將lín ê老父，kap lín ê家眷，lóng搬來我chia；我beh將埃及地ê好物hō͘ lín，lín亦thang食chit所在ê山珍海味。 19 Taⁿ我命令你，lín tio̍h án-ni做；tùi埃及地帶車去，將lín ê gín-á，kap bó͘，kap lín ê老父，lóng搬來。 20 M̄-thang看重lín家內ê物，因為埃及全地ê好物，lóng是lín ê。 21 以色列ê眾kiáⁿ就án-ni行。約瑟照法老ê命令hō͘ in車，kap路中tio̍h用ê食物； 22 koh hō͘ in一人一套衣服；獨獨hō͘便雅憫銀三百，衣服五套。 23 送in老父ê物，記tī下底；驢káng十隻，載埃及ê好物；驢母十隻，載五穀kap餅kap菜，hō͘ in老父路裡thang用。 24 約瑟就差伊ê兄弟tò去，in就起身；koh kā in講，Lín m̄-thang tī路裡冤家。 25 In tùi埃及上去，來到迦南地，in老父雅各hia。 26 Kā伊講，約瑟iáu tī-teh，koh管理埃及全地。雅各心暈去，因為m̄信in ê話。 27 In就將約瑟對in所講ê話，lóng kā伊講；伊koh看見約瑟所差來beh載伊ê車，in老父雅各ê心活起來。 28 以色列講，好lah；我ê kiáⁿ約瑟iáu tī-teh，thàn我iáu未死，我beh去看伊。
1 Iok-sek tī hiah-ê khiā i sin-piⁿ ê lâng ê bīn-chêng lún-bōe-tiâu; chiū hoah kóng, Chèng-lâng tio̍h lī-khui góa chhut-khì. Iok-sek chiong i pún-sin hō͘ hiaⁿ-tī jīn-tit ê sî, bô chi̍t-lâng khiā tī i ê bīn-chêng. 2 I chiū chhut-siaⁿ tōa-khàu; Ai-ki̍p lâng thiaⁿ-kìⁿ, Hoat-ló ê ke ia̍h thiaⁿ-kìⁿ. 3 Iok-sek kā i ê hiaⁿ-tī kóng, Góa sī Iok-sek, góa ê lāu-pē iáu tī-teh mah? I ê hiaⁿ-tī bōe-ōe ìn, in-ūi tī i ê bīn-chêng lóng kiaⁿ-hiâⁿ. 4 Iok-sek koh kā i ê hiaⁿ-tī kóng, Chhiáⁿ kiâⁿ-óa-lâi. In chiū óa-lâi. I kóng, Góa sī lín ê sió-tī Iok-sek, chiū-sī lín só͘ bōe kàu Ai-ki̍p-ê. 5 Taⁿ m̄-bián in-ūi bōe góa kàu chia lâi iu-būn, lâi ka-kī oàn-hūn; che sī Siōng-tè chhe góa tāi-seng lín lâi, in-ūi beh pó-choân sìⁿ-miā. 6 Taⁿ tī chit só͘-chāi ê ki-hng í-keng nn̄g-nî, iáu ū gō͘-nî, bô thang chèng-choh, bô thang siu-sêng. 7 Siōng-tè chhe góa tāi-seng lín lâi, ūi-tio̍h beh kā lín lâu chhun ê chéng-cho̍k tī sè-chiūⁿ; koh beh kiâⁿ I tōa ê chín-kiù, pó-choân lín ê oa̍h-miā. 8 Án-ni khòaⁿ-khí-lâi, chhe góa kàu chia ê, m̄-sī lín, chiū-sī Siōng-tè; I koh hō͘ góa chhin-chhiūⁿ Hoat-ló ê pē, chòe i choân-ke ê chú, kap koán-lí Ai-ki̍p choân-tōe. 9 Lín tio̍h kóaⁿ-kín chiūⁿ-khì góa ê lāu-pē hia, kā i kóng, Lí ê kiáⁿ Iok-sek án-ni kóng, Siōng-tè hō͘ góa chòe choân Ai-ki̍p ê chú, chhiáⁿ lo̍h-lâi góa chia, m̄-thang iân-chhiân. 10 Lí kap lí ê kiáⁿ lí ê sun, kap gû-kûn iûⁿ-kûn, í-ki̍p it-chhè só͘-ū-ê, lóng thang lâi tiàm tī Ko-san ê tōe, kap góa saⁿ-kūn. 11 Góa beh tī-hia hōng-sêng lí; in-ūi iáu ū gō͘ nî ê ki-hng, bián-tit lí, kap lí ê ke-koàn, kap it-chhè só͘-ū-ê lo̍h-po̍h. 12 Hô-hòng lín ê ba̍k-chiu kap góa ê sió-tī Piān-ngá-bín ê ba̍k-chiu lóng khòaⁿ-kìⁿ góa kap lín chhin-chhùi tùi lín kóng-ōe. 13 Lín iā tio̍h chiong góa tī Ai-ki̍p it-chhè ê êng-kng kap lín só͘ khòaⁿ-kìⁿ ê sū, lóng kā góa ê lāu-pē kóng; koh tio̍h kóaⁿ-kín chiong góa ê lāu-pē poaⁿ-lâi góa chia. 14 Tùi án-ni Iok-sek phak tī i ê sió-tī Piān-ngá-bín ê ām-kún thî-khàu; Piān-ngá-bín iā tī i ê ām-kún thî-khàu. 15 I koh kap chèng hiaⁿ-tī chim-chhùi, phō-in thî-khàu; āu-lâi i ê hiaⁿ-tī chiū kap i kóng-ōe. 16 Chit ê hong-siaⁿ thoân kàu Hoat-ló ê keng-lāi, kóng, Iok-sek ê hiaⁿ-tī lâi lah. Hoat-ló kap i ê jîn-sîn lóng hoaⁿ-hí. 17 Hoat-ló kā Iok-sek kóng, Lí tio̍h kā lí ê hiaⁿ-tī kóng, Lín tio̍h án-ni kiâⁿ; chiong mi̍h hō͘ cheng-siⁿ chài; khí-sin khì Ka-lâm tōe; 18 chiong lín ê lāu-pē, kap lín ê ke-koàn, lóng poaⁿ-lâi góa chia; góa beh chiong Ai-ki̍p tōe ê hó-mi̍h hō͘ lín, lín ia̍h thang chia̍h chit só͘-chāi ê san-tin hái-bī. 19 Taⁿ góa bēng-lēng lí, lín tio̍h án-ni chòe; tùi Ai-ki̍p tōe tòa chhia khì, chiong lín ê gín-á, kap bó͘, kap lín ê lāu-pē, lóng poaⁿ-lâi. 20 M̄-thang khòaⁿ-tāng lín ke-lāi ê mi̍h, in-ūi Ai-ki̍p choân-tōe ê hó-mi̍h, lóng sī lín ê. 21 Í-sek-lia̍t ê chèng-kiáⁿ chiū án-ni kiâⁿ. Iok-sek chiàu Hoat-ló ê bēng-lēng hō͘ in chhia, kap lō͘-tiong tio̍h ēng ê chia̍h-mi̍h; 22 koh hō͘ in chi̍t-lâng chi̍t-thò i-ho̍k; to̍k-to̍k hō͘ Piān-ngá-bín gûn saⁿ-pah, i-ho̍k gō͘-thò. 23 Sàng in lāu-pē ê mi̍h, kì tī ē-tóe; lû-káng cha̍p-chiah, chài Ai-ki̍p ê hó-mi̍h; lû-bú cha̍p-chiah, chài gō͘-kak kap piáⁿ kap chhài, hō͘ in lāu-pē lō͘-ni̍h thang ēng. 24 Iok-sek chiū chhe i ê hiaⁿ-tī tò-khì, in chiū khí-sin; koh kā in kóng, Lín m̄-thang tī lō͘-ni̍h oan-ke. 25 In tùi Ai-ki̍p chiūⁿ-khì, lâi kàu Ka-lâm tōe, in lāu-pē Ngá-kok hia. 26 Kā i kóng, Iok-sek iáu tī-teh, koh koán-lí Ai-ki̍p choân-tōe. Ngá-kok sim hūn-khì, in-ūi m̄ sìn in ê ōe. 27 In chiū chiong Iok-sek tùi in só͘ kóng ê ōe, lóng kā i kóng; i koh khòaⁿ-kìⁿ Iok-sek só͘ chhe-lâi beh chài i ê chhia, in lāu-pē Ngá-kok ê sim oa̍h-khí-lâi. 28 Í-sek-lia̍t kóng, Hó lah; góa ê kiáⁿ Iok-sek iáu tī-teh, thàn góa iáu-bē sí, góa beh khì khòaⁿ-i.
1 以色列帶一切所有ê，起身來到別是巴；就獻祭hō͘伊ê老父以撒ê上帝。 2 暝時上帝tī異象ê中間kā以色列講，雅各ah，雅各ah。伊講，我tī-chia。 3 上帝講，我是上帝，就是你ê老父ê上帝；你落去埃及m̄-sái驚；因為我beh hō͘你tī-hia成做大國。 4 我beh kap你相kap落去埃及，我亦的確chhōa你起來；約瑟beh手hōaⁿ你ê目睭，hō͘你khoeh。 5 雅各就tùi別是巴起身；以色列hiahê kiáⁿ，hō͘ in ê老父雅各，kap in ê kiáⁿ兒，in ê bó͘，lóng坐tī法老所差來beh載伊ê車。 6 雅各kap伊一切ê kiaⁿ孫，帶in ê cheng-siⁿ，以及tī迦南地所得tio̍h ê貨財，lóng到埃及。 7 雅各帶伊ê kiáⁿ、孫、cha-bó͘-kiáⁿ，cha-bó͘孫，kap伊一切ê後裔，lóng到埃及。 8 以色列人到埃及ê，雅各kap伊ê kiáⁿ，in ê名記tī下底。雅各ê大kiáⁿ Liû-piān。 9 Liû-piān ê kiáⁿ；Hap-lo̍k、Hoat-lō͘、Hi-su-lûn、Ka-bí。 10 西門ê kiáⁿ；Iâ-bó͘-lī、Ngá-bín、O-hat、Ngá-kun、Só-hat；iáu有迦南地ê婦人人ê kiáⁿ掃羅。 11 利未ê kiáⁿ；Kek-sūn、Kho-hat、Bí-la̍h-lī。 12 偤大ê kiáⁿ；Jíⁿ、Gô-lâm、Sī-la̍h、Hoat-le̍k-su、謝拉；獨獨Jíⁿ kap Gô-lâm死tī迦南地。Hoat-le̍k-su ê kiáⁿ；Hi-su-lûn、Hap-bó͘-le̍k。 13 Í-sat-ka ê kiáⁿ；Tô-la̍h、Phó͘-óa、約伯、Sin-lûn。 14 Se-pò͘-lûn ê kiáⁿ；Se-lia̍t、Í-lûn、Ngá-lī。 15 Chiahê是利亞tī Pa-tàn-a-lân kā雅各所生ê kiáⁿ；koh有伊ê cha-bó͘-kiáⁿ Tí-ná；kiaⁿ孫男女共三十三人。 16 Ka-tek ê kiáⁿ；Sé-hui-ûn、Hap-ki、Su-nî、Í-su-pún、Í-lī、A-lô-tí、A-lia̍t-lī。 17 A-siat ê kiáⁿ；Im-ná、Ek-si-óa、Ek-si-úi、Pí-lī-a；koh in ê小妹Se-la̍h。Pí-lī-a ê kiáⁿ；Hi-piat、Má-kiat。 18 這是拉班hō͘伊ê cha-bó͘-kiáⁿ利亞ê女婢Sek-phàⁿ所生ê kiaⁿ孫；就是伊kā雅各生ê；共十六人。 19 雅各ê bó͘拉結ê kiáⁿ；約瑟kap便雅憫。 20 約瑟tī埃及地生Má-ná-se kap Í-hoat-liân；就是An城ê祭司，Pho-thê-hui-la̍h ê cha-bó͘-kiáⁿ，A-se-la̍p，kā約瑟生ê。 21 便雅憫ê kiáⁿ；Pí-la̍h、Pí-kiat、A-si̍t-pia̍t、Ki-la̍h、Nái-bān、Í-hi、Lô-si̍t、Bó͘-pêng、Hō͘-pêng、A-le̍k； 22 這是拉結kā雅各所生ê kiaⁿ孫，共十四人。 23 Tàn ê kiáⁿ，Hō͘-sin。 24 Ná-hut-tha-lī ê kiáⁿ；Ngá-siat、Ko͘-nî、Iâ-sek，Sī-léng； 25 這是拉班hō͘伊ê cha-bó͘-kiáⁿ拉結ê女婢Phek-la̍h所生ê kiaⁿ孫，就是伊kā雅各所生ê；共七人。 26 Hiah-ê kap雅各相kap到埃及ê，除伊ê新婦以外，見若tùi伊身軀所出ê，共六十六人。 27 Koh有約瑟tī埃及所生ê kiáⁿ，兩個；雅各ê家來到埃及ê共七十人。 28 雅各差偤大做頭去見約瑟，thang chhōa in去Ko-san；in就到Ko-san ê地。 29 約瑟備辦伊ê車；去Ko-san，迎接伊ê老父以色列；到見tio̍h面，就仆tī老父ê頷頸，tī頷頸裡哭久久。 30 以色列kā約瑟講，我見tio̍h你ê面，知你iáu活teh，我taⁿ死亦甘心。 31 約瑟kā伊ê兄弟kap老父ê家講，我beh上去通知法老，kā伊講，我ê兄弟kap我ê老父ê家，前tī迦南地ê，Taⁿ lóng來到我chia。 32 In是牧者，因為in是飼cheng-sin ê人；in將羊群、牛群，kap一切所有ê lóng帶來。 33 法老召lín ê時，若問lín講，Lín做甚麼頭路？ 34 lín tio̍h講，你ê奴僕，tùi少年到taⁿ，阮連阮ê祖公lóng是teh飼cheng-siⁿ；án-ni lín thang來khiā tī Ko-san ê地；因為見若飼cheng-siⁿ ê，lóng是埃及人所厭賤。
1 Í-sek-lia̍t tòa it-chhè só͘-ū-ê, khí-sin lâi kàu Pia̍t-sī-pa; chiū hiàn-chè hō͘ i ê lāu-pē Í-sat ê Siōng-tè. 2 Mî-sî Siōng-tè tī īⁿ-siōng ê tiong-kan kā Í-sek-lia̍t kóng, Ngá-kok ah, Ngá-kok ah. I kóng, Góa tī-chia. 3 Siōng-tè kóng, Góa sī Siōng-tè, chiū-sī lí ê lāu-pē ê Siōng-tè; lí lo̍h-khì Ai-ki̍p m̄-sái kiaⁿ; in-ūi Góa beh hō͘ lí tī-hia chiâⁿ-chòe tōa-kok. 4 Góa beh kap lí saⁿ-kap lo̍h-khì Ai-ki̍p, Góa ia̍h tek-khak chhōa lí khí-lâi; Iok-sek beh chhiú hōaⁿ lí ê ba̍k-chiu, hō͘ lí khoeh. 5 Ngá-kok chiū tùi Pia̍t-sī-pa khí-sin; Í-sek-lia̍t hiah ê kiáⁿ, hō͘ in ê lāu-pē Ngá-kok, kap in ê kiáⁿ-jî, in ê bó͘, lóng chē tī Hoat-ló só͘ chhe-lâi beh chài i ê chhia. 6 Ngá-kok kap i it-chhè ê kiáⁿ-sun, tòa in ê cheng-siⁿ, í-ki̍p tī Ka-lâm tōe só͘ tit-tio̍h ê hè-châi, lóng kàu Ai-ki̍p. 7 Ngá-kok tòa i ê kiáⁿ, sun, cha-bó͘-kiáⁿ, cha-bó͘-sun, kap i it-chhè ê hō͘-è, lóng kàu Ai-ki̍p. 8 Í-sek-lia̍t lâng kàu Ai-ki̍p-ê, Ngá-kok kap i ê kiáⁿ, in ê miâ kì tī ē-tóe. Ngá-kok ê tōa-kiáⁿ Liû-piān. 9 Liû-piān ê kiáⁿ; Hap-lo̍k, Hoat-lō͘, Hi-su-lûn, Ka-bí. 10 Se-biān ê kiáⁿ; Iâ-bó͘-lī, Ngá-bín, O-hat, Ngá-kun, Só-hat; iáu ū Ka-lâm tōe ê hū-jîn-lâng ê kiáⁿ Sò-lô. 11 Lī-bī ê kiáⁿ; Kek-sūn, Kho-hat, Bí-la̍h-lī. 12 Iû-tāi ê kiáⁿ; Jíⁿ, Gô-lâm, Sī-la̍h, Hoat-le̍k-su, Siā-la̍h; to̍k-to̍k Jíⁿ kap Gô-lâm sí tī Ka-lâm tōe. Hoat-le̍k-su ê kiáⁿ; Hi-su-lûn, Hap-bó͘-le̍k. 13 Í-sat-ka ê kiáⁿ; Tô-la̍h, Phó͘-óa, Iok-pek, Sin-lûn. 14 Se-pò͘-lûn ê kiáⁿ; Se-lia̍t, Í-lûn, Ngá-lī. 15 Chiah-ê sī Lī-a tī Pa-tàn-a-lân kā Ngá-kok só͘ siⁿ ê kiáⁿ; koh ū i ê cha-bó͘-kiáⁿ Tí-ná; kiáⁿ-sun lâm-lú kiōng saⁿ-cha̍p-saⁿ lâng. 16 Ka-tek ê kiáⁿ; Sé-hui-ûn, Hap-ki, Su-nî, Í-su-pún, Í-lī, A-lô-tí, A-lia̍t-lī. 17 A-siat ê kiáⁿ; Im-ná, Ek-si-óa, Ek-si-úi, Pí-lī-a; koh in ê sió-bē Se-la̍h. Pí-lī-a ê kiáⁿ; Hi-piat, Má-kiat. 18 Che sī La̍h-pan hō͘ i ê cha-bó͘-kiáⁿ Lī-a ê lú-pī Sek-phàⁿ só͘ siⁿ ê kiáⁿ-sun; chiū-sī i kā Ngá-kok siⁿ-ê; kiōng cha̍p-la̍k lâng. 19 Ngá-kok ê bó͘ La̍h-kiat ê kiáⁿ; Iok-sek kap Piān-ngá-bín. 20 Iok-sek tī Ai-ki̍p tōe siⁿ Má-ná-se kap Í-hoat-liân; chiū-sī An-siâⁿ ê chè-si, Pho-thê-hui-la̍h ê cha-bó͘-kiáⁿ, A-se-la̍p, kā Iok-sek siⁿ-ê. 21 Piān-ngá-bín ê kiáⁿ; Pí-la̍h, Pí-kiat, A-si̍t-pia̍t, Ki-la̍h, Nái-bān, Í-hi, Lô-si̍t, Bó͘-pêng, Hō͘-pêng, A-le̍k; 22 che sī La̍h-kiat kā Ngá-kok só͘ siⁿ ê kiáⁿ-sun, kiōng cha̍p-sì lâng. 23 Tàn ê kiáⁿ, Hō͘-sin. 24 Ná-hut-tha-lī ê kiáⁿ; Ngá-siat, Ko͘-nî, Iâ-sek, Sī-léng; 25 che sī La̍h-pan hō͘ i ê cha-bó͘-kiáⁿ La̍h-kiat ê lú-pī Phek-la̍h só͘ siⁿ ê kiáⁿ-sun, chiū-sī i kā Ngá-kok só͘ siⁿ-ê; kiōng chhit lâng. 26 Hiah-ê kap Ngá-kok saⁿ-kap kàu Ai-ki̍p-ê, tû i ê sim-pū í-gōa, kìⁿ-nā tùi i sin-khu só͘ chhut-ê, kiōng la̍k-cha̍p-la̍k lâng. 27 Koh ū Iok-sek tī Ai-ki̍p só͘ siⁿ ê kiáⁿ, nn̄g-ê; Ngá-kok ê ke lâi kàu Ai-ki̍p-ê kiōng chhit-cha̍p lâng. 28 Ngá-kok chhe Iû-tāi chòe-thâu khì kìⁿ Iok-sek, thang chhōa in khì Ko-san; in chiū kàu Ko-san ê tōe. 29 Iok-sek pī-pān i ê chhia; khì Ko-san, ngiâ-chih i ê lāu-pē Í-sek-lia̍t; kàu kìⁿ-tio̍h bīn, chiū phak tī lāu-pē ê ām-kún, tī ām-kún-ni̍h khàu kú-kú. 30 Í-sek-lia̍t kā Iok-sek kóng, Góa kìⁿ-tio̍h lí ê bīn, chai lí iáu oa̍h-teh, góa taⁿ sí ia̍h kam-sim. 31 Iok-sek kā i ê hiaⁿ-tī kap lāu-pē ê ke kóng, Góa beh chiūⁿ-khì thong-ti Hoat-ló, kā i kóng, Góa ê hiaⁿ-tī kap góa ê lāu-pē ê ke, chêng tī Ka-lâm tōe-ê, taⁿ lóng lâi kàu góa chia. 32 In sī bo̍k-chiá, in-ūi in sī chhī cheng-siⁿ ê lâng; in chiong iûⁿ-kûn, gû-kûn, kap it-chhè só͘-ū-ê lóng tòa-lâi. 33 Hoat-ló tiàu lín ê sî, nā mn̄g lín kóng, Lín chòe sím-mi̍h thâu-lō͘? 34 lín tio̍h kóng, Lí ê lô͘-po̍k, tùi siàu-liân kàu-taⁿ, goán liân goán ê chó͘-kong lóng sī teh chhī cheng-siⁿ; án-ni lín thang lâi khiā tī Ko-san ê tōe; in-ūi kìⁿ-nā chhī cheng-siⁿ-ê, lóng sī Ai-ki̍p lâng só͘ iàm-chiān.
1 約瑟入去kā法老講，我ê老父kap我ê兄弟帶in ê羊群、牛群，kap一切所有ê，tùi迦南地來；taⁿ tī Ko-san ê地。 2 約瑟tùi伊ê兄弟ê中間揀五人，chhōa in去見法老。 3 法老問約瑟ê兄弟講，Lín做甚麼頭路？In kā法老講，你ê奴僕本身，kap阮ê祖公，lóng是顧羊ê人。 4 In koh kā法老講，迦南地飢荒真傷重，奴僕ê羊群無草thang食；所以阮來，是beh寄腳tī-chia；taⁿ求你容允你ê奴僕tiàm-tī Ko-san地。 5 法老kā約瑟講，你ê老父kap你ê兄弟來到你chia； 6 埃及地lóng tī你ê面前；hō͘你ê老父kap你ê兄弟tòa tī國內第一好ê地；in thang tòa tī Ko-san ê地；你若知in中間khah有本事ê人，就派in管顧我ê cheng-siⁿ。 7 約瑟chhōa伊ê老父雅各入去khiā tī法老ê面前；雅各就kā法老祝福。 8 法老問雅各講，你一生ê年日是jōa chōe ah？ 9 雅各kā法老講，我寄腳tī世間ê年日是一百三十歲。我一生ê年日亦少，亦艱苦，m̄值tio̍h我ê列祖寄腳tī世間ê年日。 10 雅各koh kā法老祝福；就tùi法老ê面前出去。 11 約瑟照法老ê命令，將埃及國第一好ê地，就是Lân-sek ê地，hō͘伊ê老父kap伊兄弟khiā起，做產業。 12 約瑟用米糧奉承伊ê老父，kap伊ê兄弟，kap伊ê老父全家；lóng照in ê人額來供給in。 13 飢荒真傷重，全地lóng無米糧；甚至埃及地kap迦南地ê人，因為飢荒ê緣故，餓到暈去。 14 約瑟聚集埃及地kap迦南地所有ê銀，就是in tia̍h米糧ê銀；約瑟就將hiahê銀帶到法老ê宮。 15 埃及地kap迦南地ê銀lóng用了；埃及眾人lóng來見約瑟講，阮ê銀lóng用了lah，求你hō͘阮米糧；阮啥事tio̍h死tī你ê面前？ 16 約瑟講，若是銀用了，lín ê cheng-siⁿ thang牽來；我為tio̍h lín ê cheng-siⁿ beh hō͘ lín米糧。 17 In就將cheng-siⁿ趕到約瑟hia；約瑟就用米糧換in ê馬、羊群、牛群，kap驢；hit年為tio̍h換in一切ê cheng-siⁿ，就用米糧養飼in。 18 Hit年已經過；第二年，in koh來見約瑟，kā伊講，阮bōe瞞得我ê主，阮ê銀lóng用了，cheng-siⁿ亦lóng歸tī我ê主，阮tī我ê主ê面前，除阮ê身體kap阮ê田地以外，無chhun一項。 19 阮啥事人死，地拋荒，tī你ê目睭前ah？求你用米糧買阮kap阮ê地；阮kap阮ê地做法老ê路用；koh用種子hō͘阮，hō͘阮得tio̍h活，免死，土地亦免拋荒。 20 Tùi án-ni，約瑟為法老買埃及所有ê地；埃及人因為hō͘飢荒所逼，ta̍k人lóng賣伊ê田地；hiahê地就lóng歸tī法老。 21 約瑟照chiahê城邑遷徙埃及ê百姓tùi埃及chit-pêng到tī hit-pêng。 22 獨獨祭司ê地法老無買伊；因為祭司有tùi法老得tio̍h定tio̍h ê糧；in食法老所hō͘ in ê糧；所以in無賣in ê地。 23 約瑟kā百姓講，我今á日為法老買lín kap lín ê地；看ah，tī-chia有種子hō͘ lín，lín thang去作田； 24 到收成ê時，lín tio̍h將五份一納hō͘法老；四份歸lín，做田裡ê種子，亦做lín kap lín家內人ê食物，以及lín ê gín-á ê食物。 25 In講，你有救阮ê性命；願阮tī我ê主ê面前得tio̍h恩典，阮beh做法老ê奴僕。 26 Án-ni約瑟為埃及ê地，設立定tio̍h ê例，到tī今á日；法老得tio̍h五份ê一份；獨獨祭司ê地無歸法老。 27 以色列人khiā起埃及國，Ko-san ê地，in tī-hia建置產業，koh生湠極其chōe。 28 雅各tiàm-tī埃及地十七年。雅各一生ê年日是一百四十七歲。 29 以色列死ê日近lah；伊就叫伊ê kiáⁿ約瑟來，kā伊講，我若tī你ê面前得tio̍h恩典，請你下手tī我ê大腿下，用慈愛kap誠實款待我；m̄-thang埋葬我tī埃及。 30 我kap我ê父公同睏ê時，你tio̍h將我帶出埃及，埋葬tī in埋葬ê地。約瑟講，我beh照你ê話來行。 31 雅各講，你tio̍h對我chiù-chōa；伊就對伊chiù-chōa。Tùi án-ni，以色列óa床頭敬拜上帝。
1 Iok-sek ji̍p-khì kā Hoat-ló kóng, Góa ê lāu-pē kap góa ê hiaⁿ-tī tòa in ê iûⁿ-kûn, gû-kûn, kap it-chhè só͘-ū-ê, tùi Ka-lâm tōe lâi; taⁿ tī Ko-san ê tōe. 2 Iok-sek tùi i ê hiaⁿ-tī ê tiong-kan kéng gō͘ lâng, chhōa in khì kìⁿ Hoat-ló. 3 Hoat-ló mn̄g Iok-sek ê hiaⁿ-tī kóng, Lín chòe sím-mi̍h thâu-lō͘? In kā Hoat-ló kóng, Lí ê lô͘-po̍k pún-sin, kap goán ê chó͘-kong, lóng sī kò͘-iûⁿ ê lâng. 4 In koh kā Hoat-ló kóng, Ka-lâm tōe ki-hng chin siong-tiōng, lô͘-po̍k ê iûⁿ-kûn bô chháu thang chia̍h; só͘-í goán lâi, sī beh kià-kha tī-chia; taⁿ kiû lí iông-ún lí ê lô͘-po̍k tiàm tī Ko-san tōe. 5 Hoat-ló kā Iok-sek kóng, Lí ê lāu-pē kap lí ê hiaⁿ-tī lâi kàu lí chia; 6 Ai-ki̍p tōe lóng tī lí ê bīn-chêng; hō͘ lí ê lāu-pē kap lí ê hiaⁿ-tī tòa tī kok-lāi tē it hó ê tōe; in thang tòa tī Ko-san ê tōe; lí nā chai in tiong-kan khah ū pún-sū ê lâng, chiū phài in koán-kò͘ góa ê cheng-siⁿ. 7 Iok-sek chhōa i ê lāu-pē Ngá-kok ji̍p-khì khiā tī Hoat-ló ê bīn-chêng; Ngá-kok chiū kā Hoat-ló chiok-hok. 8 Hoat-ló mn̄g Ngá-kok kóng, Lí it-seng ê nî-ji̍t sī jōa chōe ah? 9 Ngá-kok kā Hoat-ló kóng, góa kià-kha tī sè-kan ê nî-ji̍t sī chi̍t-pah saⁿ-cha̍p hè. Góa it-seng ê nî-ji̍t ia̍h chió, ia̍h kan-khó͘, m̄-ta̍t-tio̍h góa ê lia̍t-chó͘ kià-kha tī sè-kan ê nî-ji̍t. 10 Ngá-kok koh kā Hoat-ló chiok-hok; chiū tùi Hoat-ló ê bīn-chêng chhut-khì. 11 Iok-sek chiàu Hoat-ló ê bēng-lēng, chiong Ai-ki̍p kok tē-it hó ê tōe, chiū-sī Lân-sek ê tōe, hō͘ i ê lāu-pē kap i hiaⁿ-tī khiā-khí, chòe sán-gia̍p. 12 Iok-sek ēng bí-niû hōng-sêng i ê lāu-pē, kap i ê hiaⁿ-tī, kap i ê lāu-pē choân-ke; lóng chiàu in ê lâng-gia̍h lâi kiong-kip in. 13 Ki-hng chin siong-tiōng, choân-tōe lóng bô bí-niû; sīm-chì Ai-ki̍p tōe kap Ka-lâm tōe ê lâng, in-ūi ki-hng ê iân-kò͘, gō kàu hūn-khì. 14 Iok-sek chū-chi̍p Ai-ki̍p tōe kap Ka-lâm tōe só͘ ū ê gûn, chiū-sī in tia̍h bí-niû ê gûn; Iok-sek chiū chiong hiah ê gûn tòa kàu Hoat-ló ê keng. 15 Ai-ki̍p tōe kap Ka-lâm tōe ê gûn lóng ēng-liáu; Ai-ki̍p chèng-lâng lóng lâi kìⁿ Iok-sek kóng, Goán ê gûn lóng ēng-liáu lah, kiû lí hō͘ goán bí-niû; goán siáⁿ-sū tio̍h sí tī lí ê bīn-chêng? 16 Iok-sek kóng, Nā sī gûn ēng-liáu, lín ê cheng-siⁿ thang khan-lâi; góa ūi-tio̍h lín ê cheng-siⁿ beh hō͘ lín bí-niû. 17 In chiū chiong cheng-siⁿ kóaⁿ kàu Iok-sek hia; Iok-sek chiū ēng bí-niû ōaⁿ in ê bé, iûⁿ-kûn, gû-kûn, kap lû; hit-nî ūi-tio̍h ōaⁿ in it-chhè ê cheng-siⁿ, chiū ēng bí-niû iúⁿ-chhī in. 18 Hit-nî í-keng kè; tē-jī nî, in koh lâi kìⁿ Iok-sek, kā i kóng, Goán bōe môa-tit góa ê chú, goán ê gûn lóng ēng-liáu, cheng-siⁿ ia̍h lóng kui tī góa ê chú, goán tī góa ê chú ê bīn-chêng, tû goán ê sin-thé kap goán ê chhân-tōe í-gōa, bô chhun chi̍t-hāng. 19 Goán siáⁿ-sū lâng sí, tōe pha-hng, tī lí ê ba̍k-chiu-chêng ah? kiû lí ēng bí-niû bóe goán kap goán ê tōe; goán kap goán ê tōe chòe Hoat-ló ê lō͘-ēng; koh ēng chéng-chí hō͘ goán, hō͘ goán tit-tio̍h oa̍h, bián sí, thó͘-tōe ia̍h bián pha-hng. 20 Tùi án-ni Iok-sek ūi Hoat-ló bóe Ai-ki̍p só͘ ū ê tōe; Ai-ki̍p lâng in-ūi hō͘ ki-hng só͘ pek, ta̍k-lâng lóng bōe i ê chhân-tōe; hiah ê tōe chiū lóng kui tī Hoat-ló. 21 Iok-sek chiàu chiah ê siâⁿ-ip chhian-sóa Ai-ki̍p ê peh-sìⁿ tùi Ai-ki̍p chit-pêng kàu tī hit-pêng. 22 To̍k-to̍k chè-si ê tōe Hoat-ló bô bóe-i; in-ūi chè-si ū tùi Hoat-ló tit-tio̍h tiāⁿ-tio̍h ê niû; in chia̍h Hoat-ló só͘ hō͘ in ê niû; só͘-í in bô bōe in ê tōe. 23 Iok-sek kā peh-sìⁿ kóng, Góa kin-á-ji̍t ūi Hoat-ló bóe lín kap lín ê tōe; khòaⁿ ah, tī-chia ū chéng-chí hō͘ lín, lín thang khì choh-chhân; 24 kàu siu-sêng ê sî, lín tio̍h chiong gō͘-hūn-chi̍t la̍p hō͘ Hoat-ló; sì-hūn kui lín, chòe chhân-ni̍h ê chéng-chí, ia̍h chòe lín kap lín ke-lāi lâng ê chia̍h-mi̍h, í-ki̍p lín ê gín-á ê chia̍h-mi̍h. 25 In kóng, Lí ū kiù goán ê sìⁿ-miā; goān goán tī góa ê chú ê bīn-chêng tit-tio̍h un-tián, goán beh chòe Hoat-ló ê lô͘-po̍k. 26 Án-ni Iok-sek ūi Ai-ki̍p ê tōe, siat-li̍p tiāⁿ-tio̍h ê lē, kàu tī kin-á-ji̍t; Hoat-ló tit-tio̍h gō͘-hūn ê chi̍t-hūn; to̍k-to̍k chè-si ê tōe bô kui Hoat-ló. 27 Í-sek-lia̍t lâng khiā-khí Ai-ki̍p kok, Ko-san ê tōe, in tī-hia kiàn-tì sán-gia̍p, koh siⁿ-thòaⁿ ke̍k-kî chōe. 28 Ngá-kok tiàm tī Ai-ki̍p tōe cha̍p-chhit nî. Ngá-kok it-seng ê nî-ji̍t sī chi̍t-pah sì-cha̍p-chhit hè. 29 Í-sek-lia̍t sí ê ji̍t kūn lah; i chiū kiò i ê kiáⁿ Iok-sek lâi, kā i kóng, Góa nā tī lí ê bīn-chêng tit-tio̍h un-tián, chhiáⁿ lí hē chhiú tī góa ê tōa-thúi-ē, ēng chû-ài kap sêng-si̍t khoán-thāi góa; m̄-thang bâi-chòng góa tī Ai-ki̍p. 30 Góa kap góa ê pē-kong tâng-khùn ê sî, lí tio̍h chiong góa tòa chhut Ai-ki̍p, bâi-chòng tī in bâi-chòng ê tōe. Iok-sek kóng, Góa beh chiàu lí ê ōe lâi kiâⁿ. 31 Ngá-kok kóng, Lí tio̍h tùi góa chiù-chōa; i chiū tùi i chiù-chōa. Tùi án-ni Í-sek-lia̍t óa chhn̂g-thâu kèng-pài Siōng-tè.
1 Chiahê tāi-chì了後，有人kā約瑟講，Lín老父破病lah；伊就chhōa伊兩個kiáⁿ Má-ná-se、Í-hoat-liân，相kap去。 2 有人通知雅各講，你看，你ê kiáⁿ約瑟來beh chhē你；以色列就勉強起來，坐tī眠床。 3 雅各kā約瑟講，全能ê上帝bat tī迦南地ê Lō͘-su對我出現，賜福我； 4 kā我講，我beh hō͘你生湠chōe-chōe，成做chōe-chōe百姓；亦beh將chitê地賞賜你ê後裔，做永遠ê業。 5 我未到埃及你chia ê事先，你tī埃及地所生兩個kiáⁿ，Í-hoat-liân、Má-ná-se，是我ê，親像Liû-piān西門是我ê一樣。 6 Tī in以後，你所生ê kiáⁿ，就是你ê；in thang歸tī in兩個兄ê名下，得tio̍h業。 7 論到我，我tùi Pa-tàn來ê時，拉結死tī我ê目睭前，tī迦南地，tī路裡ê中間，離開Í-hoat-tha iáu有一站；我就kā伊埋葬tī Í-hoat-tha ê路。(Í-hoat-tha就是伯利恆)。 8 以色列看見約瑟兩個kiáⁿ，就講，這是是誰？ 9 約瑟kā in老父講，這是我ê kiáⁿ，上帝tī-chia賞賜我ê。講，請你chhōa in óa近我；我beh kā in祝福。 10 以色列年老，目睭花bōe看見；約瑟chhōa in近óa伊ê面前，伊就kā in chim嘴抱in。 11 以色列kā約瑟講，我無phah算會見tio̍h你ê面；taⁿ上帝koh hō͘我看tio̍h你ê kiáⁿ。 12 約瑟將兩個kiáⁿ tùi伊兩個腳頭u中chhōa出來；本身就仆落地拜。 13 後來約瑟koh牽in兩個，chiàⁿ手牽Í-hoat-liân ǹg以色列ê tò手，tò手牽Má-ná-se ǹg以色列ê chiàⁿ手，chhōa in近óa伊。 14 以色列伸chiàⁿ手hōaⁿ Í-hoat-liân ê頭殼，伊是第二個，koh phah叉用tò手hōaⁿ Má-ná-se ê頭殼，Má-ná-se本是大kiáⁿ。 15 伊就kā約瑟祝福講，願我ê祖亞伯拉罕，kap我ê父以撒，所行tī伊面前ê上帝，就是一生保養我到tī今á日ê上帝， 16 救贖我脫離一切ê患難，hitê使者，賜福hō͘ chit兩個gín-á；願in歸tī我ê名下，kap我祖亞伯拉罕，我ê父以撒，ê名下；koh願in tī世界中生湠真chōe。 17 約瑟看伊ê老父用chiàⁿ手hōaⁿ tī Í-hoat-liân ê頭殼，無歡喜；就tháⁿ伊ê老父ê手，beh tùi Í-hoat-liân ê頭殼徙到Má-ná-se ê頭殼。 18 約瑟kā伊ê老父講，我ê父ah，m̄是án-ni；chitê是大kiáⁿ，求你用chiàⁿ手hōaⁿ伊ê頭殼。 19 伊ê老父m̄-thàn講，我知，我ê kiáⁿ，我知；伊亦beh成做一族，亦beh闊大；總是伊ê小弟將來比伊khah大；伊ê小弟ê後裔beh成做chōe-chōe族。 20 當hit日就kā in祝福講，以色列人beh kí你來祝福人講，願上帝hō͘你親像Í-hoat-liân，親像Má-ná-se一樣；tùi án-ni立Í-hoat-liân tī Má-ná-se ê事先。 21 以色列koh kā約瑟講，我beh死lah；總是上帝beh kap你tī-teh，beh chhōa lín tò去lín列祖ê地。 22 我前用我ê弓，我ê刀，tùi A-mô͘-lī人ê手搶來hit塊地，我taⁿ hō͘你，比你ê兄弟得tio̍h khah加。
1 Chiah ê tāi-chì liáu-āu, ū lâng kā Iok-sek kóng, Lín lāu-pē phòa-pīⁿ lah; i chiū chhōa i nn̄g ê kiáⁿ Má-ná-se, Í-hoat-liân, saⁿ-kap khì. 2 Ū lâng thong-ti Ngá-kok kóng, Lí khòaⁿ, lí ê kiáⁿ Iok-sek lâi beh chhē lí; Í-sek-lia̍t chiū bián-kióng khí-lâi, chē tī bîn-chhn̂g. 3 Ngá-kok kā Iok-sek kóng, Choân-lêng ê Siōng-tè bat tī Ka-lâm tōe ê Lō͘-su tùi góa chhut-hiān, sù-hok góa; 4 kā góa kóng, Góa beh hō͘ lí siⁿ-thòaⁿ chōe-chōe, chiâⁿ-chòe chōe-chōe peh-sìⁿ; ia̍h beh chiong chit ê tōe siúⁿ-sù lí ê hō͘-è, chòe éng-oán ê gia̍p. 5 Góa bē kàu Ai-ki̍p lí chia ê tāi-seng, lí tī Ai-ki̍p tōe só͘ siⁿ nn̄g ê kiáⁿ, Í-hoat-liân Má-ná-se, sī góa-ê, chhin-chhiūⁿ Liû-piān Se-biān sī góa-ê chi̍t-iūⁿ. 6 Tī in í-āu, lí só͘ siⁿ ê kiáⁿ, chiū-sī lí ê; in thang kui tī in nn̄g ê hiaⁿ ê miâ-ē, tit-tio̍h gia̍p. 7 Lūn-kàu góa, góa tùi Pa-tàn lâi ê sî, La̍h-kiat sí tī góa ê ba̍k-chiu-chêng, tī Ka-lâm tōe, tī lō͘-ni̍h ê tiong-kan, lī-khui Í-hoat-tha iáu ū chi̍t-chām; góa chiū kā i bâi-chòng tī Í-hoat-tha ê lō͘. (Í-hoat-tha chiū-sī Pek-lī-hêng). 8 Í-sek-lia̍t khòaⁿ-kìⁿ Iok-sek nn̄g ê kiáⁿ, chiū kóng, Che sī chī-chūi? 9 Iok-sek kā in lāu-pē kóng, Che sī góa ê kiáⁿ, Siōng-tè tī-chia siúⁿ-sù góa-ê. Kóng, Chhiáⁿ lí chhōa in óa-kūn góa; góa beh kā in chiok-hok. 10 Í-sek-lia̍t nî-lāu, ba̍k-chiu hoe bōe khòaⁿ-kìⁿ; Iok-sek chhōa in kūn-óa i ê bīn-chêng, i chiū kā in chim-chhùi phō in. 11 Í-sek-lia̍t kā Iok-sek kóng, Góa bô phah-sǹg ōe kìⁿ-tio̍h lí ê bīn; taⁿ Siōng-tè koh hō͘ góa khòaⁿ-tio̍h lí ê kiáⁿ. 12 Iok-sek chiong nn̄g ê kiáⁿ tùi i nn̄g ê kha-thâu-u-tiong chhōa-chhut-lâi; pún-sin chiū phak-lo̍h tōe pài. 13 Āu-lâi Iok-sek koh khan in nn̄g-ê, chiàⁿ-chhiú khan Í-hoat-liân ǹg Í-sek-lia̍t ê tò-chhiú, tò-chhiú khan Má-ná-se ǹg Í-sek-lia̍t ê chiàⁿ-chhiú, chhōa in kūn-óa i. 14 Í-sek-lia̍t chhun chiàⁿ-chhiú hōaⁿ Í-hoat-liân ê thâu-khak, i sī tē-jī-ê, koh phah-chhe ēng tò-chhiú hōaⁿ Má-ná-se ê thâu-khak, Má-ná-se pún sī tōa-kiáⁿ. 15 I chiū kā Iok-sek chiok-hok kóng, Goān góa ê chó͘ A-pek-la̍h-hán, kap góa ê pē Í-sat, só͘ kiâⁿ tī I bīn-chêng ê Siōng-tè, chiū-sī it-seng pó-iúⁿ góa kàu tī kin-á-ji̍t ê Siōng-tè, 16 kiù-sio̍k góa thoat-lī it-chhè ê hoān-lān, hit ê Sù-chiá, sù-hok hō͘ chí nn̄g ê gín-á; goān in kui tī góa ê miâ-ē, kap góa chó͘ A-pek-la̍h-hán, góa ê pē Í-sat, ê miâ-ē; koh goān in tī sè-kài-tiong siⁿ-thòaⁿ chin-chōe. 17 Iok-sek khòaⁿ i ê lāu-pē ēng chiàⁿ-chhiú hōaⁿ tī Í-hoat-liân ê thâu-khak, bô hoaⁿ-hí; chiū tháⁿ i ê lāu-pē ê chhiú, beh tùi Í-hoat-liân ê thâu-khak sóa kàu Má-ná-se ê thâu-khak. 18 Iok-sek kā i ê lāu-pē kóng, Góa ê pē ah, m̄-sī án-ni; chit-ê sī tōa-kiáⁿ, kiû lí ēng chiàⁿ-chhiú hōaⁿ i ê thâu-khak. 19 I ê lāu-pē m̄-thàn kóng, Góa chai, góa ê kiáⁿ, góa chai; i ia̍h beh chiâⁿ-chòe chi̍t-cho̍k, ia̍h beh khoah-tōa; chóng-sī i ê sió-tī chiong-lâi pí i khah-tōa; i ê sió-tī ê hō͘-è beh chiâⁿ-chòe chōe-chōe cho̍k. 20 Tng hit-ji̍t chiū kā in chiok-hok kóng, Í-sek-lia̍t lâng beh kí lí lâi chiok-hok lâng kóng, Goān Siōng-tè hō͘ lí chhin-chhiūⁿ Í-hoat-liân, chhin-chhiūⁿ Má-ná-se chi̍t-iūⁿ; tùi án-ni li̍p Í-hoat-liân tī Má-ná-se ê tāi-seng. 21 Í-sek-lia̍t koh kā Iok-sek kóng, Góa beh sí lah; chóng-sī Siōng-tè beh kap lí tī-teh, beh chhōa lín tò-khì lín lia̍t-chó͘ ê tōe. 22 Góa chêng ēng góa ê keng, góa ê to, tùi A-mô͘-lī lâng ê chhiú chhiúⁿ-lâi hit tè-tōe, góa taⁿ hō͘ lí, pí lí ê hiaⁿ-tī tit-tio̍h khah-ke.
1 雅各叫伊hiahê kiáⁿ來講，Lín lóng聚集，我beh將lín日後所會tú-tio̍h ê事kā lín講。 2 雅各chiahê kiáⁿ，lín tio̍h聚集來聽， Tio̍h聽lín老父ê話。 3 Liû-piān ah，你是我ê大kiáⁿ，我ê權勢，我ê氣力ê起頭， 威嚴ê特色ê，權能ê特色ê。 4 總是你親像水teh-kún，的確bōe得tio̍h居頭位； 因為你peh上lín老父ê眠床； hit時你phah lâ-sâm伊；伊peh上我ê舖。 5 西門利未是兄弟； In ê刀劍是兇惡ê器具。 6 我ê心神ah，你m̄-thang kap in同計謀； 我ê神魂ah，你m̄-thang kap in ê會眾連絡。 因為in thèng起受氣，刣死人， In chhut-chāi 意思割斷牛腿ê大筋。 7 In ê受氣燥暴，thang咒詛；In ê恨氣殘忍，亦是thang咒詛； 我beh分開in tī雅各家， 四散in tī以色列族。 8 偤大ah，你ê兄弟beh o-ló你； 你ê手beh chhi̍h對敵ê頷頸； 你ê老父ê kiáⁿ beh仆拜tī你ê面前。 9 偤大是細隻獅； 我ê kiáⁿ ah，你tùi所jiàu-tio̍h ê物，就上去； 伊屈落，伊thìⁿ腳，親像獅； 亦親像母ê獅，是誰敢惹伊？ 10 權柄無離開偤大， 治理ê無離開伊兩支腳ê中間， 到Sī-lô來； 列邦lóng beh歸伊。 11 縛伊ê驢á tī葡萄樹， 縛伊ê驢á-kiáⁿ tī好ê葡萄樹； 用葡萄酒洗伊ê衣服， 用葡萄汁洗伊ê衣裳。 12 伊ê目睭因為酒來紅， 伊ê嘴齒因為奶來白。 13 Se-pò͘-lûn beh khiā起海口， Beh做拋船ê海口； 伊ê界beh到Se-tùn。 14 Í-sat-ka是勇ê驢， 倒tī羊椆ê中間； 15 伊看安靜做好，看土地做súi； Àⁿ肩頭擔teh，成做勞苦ê奴僕。 16 Tàn beh判斷伊ê百姓， 親像以色列支派ê一个。 17 Tàn beh做路裡ê蛇， 路中ê毒蛇； 咬傷馬蹄，騎ê人hiàⁿ tùi後面落去。 18 耶和華ah，我有thèng候你ê拯救。 19 Ka-tek beh hō͘軍隊追逼， 總是伊beh追逼in ê腳後tiⁿ。 20 A-siat beh出好ê米糧， Koh出王所食ê好物。 21 Ná-hut-tha-lī是tháu放ê鹿母， 出好聽ê話。 22 約瑟是gâu結果子ê樹枝； 伊ê樹枝伸出牆外。 23 射箭ê人大傷害伊，用箭射伊，窘迫伊； 24 總是伊ê弓猶原ân， 伊ê手也得tio̍h有力； 這是tùi雅各ê全能ê ê手， (Tùi這就有出牧者，以色列ê石磐) ， 25 亦對你ê父ê上帝，伊beh幫贊你； Koh對hitê全能ê，伊beh賜福你；Beh用天頂降落ê福氣，深淵所khǹg ê福氣，以及食奶生產ê福氣，lóng beh hō͘你。 26 你ê老父所祝ê福氣， 贏過我ê父公所祝ê福氣， 直到永世代ê山嶺極頭ê邊界； Chiahê福氣beh降落tī約瑟ê頭殼， 臨到hitê kap兄弟特別ê ê頭殼頂。 27 便雅憫是gâu peh拆ê豺狼； 早起時食伊所抓tio̍h ê， Ê-hng時分伊所搶tio̍h ê。 28 這一切是以色列ê十二支派；這亦是in ê老父對in所講ê話，kā in所祝福ê；lóng是照ta̍k人ê福份，kā in祝福。 29 伊koh吩咐in講，我beh tò去我ê列祖hia，lín tio̍h將我埋葬tī Hek人Í-hut-lûn 田裡ê穴，kap我ê父公siâng所在； 30 就是tī迦南地Bān-lī ê面前，Be̍k-pí-la̍h 田裡ê穴；hitê 穴kap田是亞伯拉罕tùi Hek人Í-hut-lûn買做業，來做墓地ê。 31 Tī-hia埋葬亞伯拉罕kap伊ê bó͘撒拉；koh tī-hia埋葬以撒kap伊ê bó͘利百加；我亦tī-hia埋葬利亞。 32 Hit坵田kap hit內面ê穴，是tùi Hek人買ê。 33 雅各吩咐伊hiahê kiáⁿ明白，腳kiu上床，就氣斷，tò去伊ê列祖hia。
1 Ngá-kok kiò i hiah ê kiáⁿ lâi kóng, Lín lóng chū-chi̍p, góa beh chiong lín ji̍t-āu só͘ ōe tú-tio̍h ê sū kā lín kóng. 2 Ngá-kok chiah ê kiáⁿ, lín tio̍h chū-chi̍p lâi thiaⁿ, Tio̍h thiaⁿ lín lāu-pē ê ōe. 3 Liû-piān ah, lí sī góa ê tōa-kiáⁿ, góa ê koân-sè, góa ê khùi-la̍t ê khí-thâu, Ui-giâm ê te̍k-sek-ê, koân-lêng ê te̍k-sek-ê. 4 Chóng-sī lí chhin-chhiūⁿ chúi teh-kún, tek-khak bōe tit-tio̍h ku thâu-ūi; In-ūi lí peh-chiūⁿ lín lāu-pē ê bîn-chhn̂g; Hit-sî lí phah lâ-sâm i; i peh-chiūⁿ góa ê pho͘. 5 Se-biān Lī-bī sī hiaⁿ-tī; In ê to-kiàm sī hiong-ok ê khì-kū. 6 Góa ê sim-sîn ah, lí m̄-thang kap in tâng kè-bô͘; Góa ê sîn-hûn ah, lí m̄-thang kap in ê hōe-chiòng liân-lo̍k. In-ūi in thèng-khí siū-khì, thâi-sí lâng, In chhut-chāi ì-sù koah-tn̄g gû-thúi ê tōa-kun. 7 In ê siū-khì sò-pō, thang chiù-chó͘; In ê hūn-khì chân-jím, ia̍h sī thang chiù-chó͘; Góa beh pun-khui in tī Ngá-kok ke, Sì-sòaⁿ in tī Í-sek-lia̍t cho̍k. 8 Iû-tāi ah, lí ê hiaⁿ-tī beh o-ló lí; Lí ê chhiú beh chhi̍h tùi-te̍k ê ām-kún; Lí ê lāu-pē ê kiáⁿ beh phak-pài tī lí ê bīn-chêng. 9 Iû-tāi sī sòe-chiah sai; Góa ê kiáⁿ ah, lí tùi só͘ jiàu-tio̍h ê mi̍h, chiū chiūⁿ-khì; I khut-lo̍h, i thìⁿ-kha, chhin-chhiūⁿ sai; Ia̍h chhin-chhiūⁿ bú ê sai, chī-chūi káⁿ jiá i? 10 Koân-pèng bô lī-khui Iû-tāi, Tī-lí-ê bô lī-khui i nn̄g ki kha ê tiong-kan, Kàu Sī-lô lâi; Lia̍t-pang lóng beh kui i. 11 Pa̍k i ê lû-á tī phû-tô-chhiū, Pa̍k i ê lû-á-kiáⁿ tī hó ê phû-tô-chhiū; Ēng phû-tô-chiú sóe i ê i-ho̍k, Ēng phû-tô-chiap sóe i ê i-chiûⁿ. 12 I ê ba̍k-chiu in-ūi chiú lâi âng, I ê chhùi-khí in-ūi leng lâi pe̍h. 13 Se-pò͘-lûn beh khiā-khí hái-kháu, Beh chòe pha-chûn ê hái-kháu; I ê kài beh kàu Se-tùn. 14 Í-sat-ka sī ióng ê lû, Tó tī iûⁿ-tiâu ê tiong-kan; 15 I khòaⁿ an-chēng chòe hó, khòaⁿ thó͘-tōe chòe súi; Àⁿ keng-thâu taⁿ-teh, chiâⁿ-chòe lô-khó͘ ê lô͘-po̍k. 16 Tàn beh phòaⁿ-toàn i ê peh-sìⁿ, Chhin-chhiūⁿ Í-sek-lia̍t chi-phài ê chi̍t-ê. 17 Tàn beh chòe lō͘-ni̍h ê chôa, Lō͘-tiong ê to̍k-chôa; Kā-siong bé-tôe, khiâ ê lâng hiàⁿ tùi āu-bīn lo̍h-khì. 18 Iâ-hô-hoa ah, góa ū thèng-hāu Lí ê chín-kiù. 19 Ka-tek beh hō͘ kun-tūi tui-pek, Chóng-sī i beh tui-pek in ê kha-āu-tiⁿ. 20 A-siat beh chhut hó ê bí-niû, Koh chhut ông só͘ chia̍h ê hó-mi̍h. 21 Ná-hut-tha-lī sī tháu-pàng ê lo̍k-bú, Chhut hó-thiaⁿ ê ōe. 22 Iok-sek sī gâu kiat ké-chí ê chhiū-ki; I ê chhiū-ki chhun-chhut chhiûⁿ-gōa. 23 Siā-chìⁿ ê lâng tōa siong-hāi i, Ēng chìⁿ siā i, khún-pek i; 24 Chóng-sī i ê keng iû-goân ân, I ê chhiú iā tit-tio̍h ū la̍t; Che sī tùi Ngá-kok ê Choân-lêng-ê ê chhiú, (Tùi che chiū ū chhut bo̍k-chiá, Í-sek-lia̍t ê chio̍h-pôaⁿ), 25 Ia̍h tùi lí ê pē ê Siōng-tè, I beh pang-chān lí; Koh tùi hit ê Choân-lêng-ê, I beh sù-hok lí; Beh ēng thiⁿ-téng kàng-lo̍h ê hok-khì, Chhim-ian só͘ khǹg ê hok-khì, Í-ki̍p chia̍h-leng seng-sán ê hok-khì, lóng beh hō͘ lí. 26 Lí ê lāu-pē só͘ chiok ê hok-khì, Iâⁿ-kè góa ê pē-kong só͘ chiok ê hok-khì, Ti̍t-kàu éng sè-tāi ê soaⁿ-niá ke̍k-thâu ê piⁿ-kài; Chiah ê hok-khì beh kàng-lo̍h tī Iok-sek ê thâu-khak, Lîm-kàu hit ê kap hiaⁿ-tī te̍k-pia̍t-ê ê thâu-khak-téng. 27 Piān-ngá-bín sī gâu peh-thiah ê chhâi-lông; Chá-khí-sî chia̍h i só͘ jiàu-tio̍h-ê, Ê-hng-sî pun i só͘ chhiúⁿ-tio̍h ê. 28 Che it-chhè sī Í-sek-lia̍t ê cha̍p-jī chi-phài; che ia̍h sī in ê lāu-pē tùi in só͘ kóng ê ōe, kā in só͘ chiok-hok-ê; lóng sī chiàu ta̍k-lâng ê hok-hūn, kā in chiok-hok. 29 I koh hoan-hù in kóng, Góa beh tò-khì góa ê lia̍t-chó͘ hia, lín tio̍h chiong góa bâi-chòng tī Hek-lâng Í-hut-lûn chhân-ni̍h ê hia̍t, kap góa ê pē-kong siâng só͘-chāi; 30 chiū-sī tī Ka-lâm tōe Bān-lī ê bīn-chêng, Be̍k-pí-la̍h chhân-ni̍h ê hia̍t; hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê. 31 Tī-hia bâi-chòng A-pek-la̍h-hán kap i ê bó͘ Sat-la̍h; koh tī-hia bâi-chòng Í-sat kap i ê bó͘ Lī-pek-ka; góa ia̍h tī-hia bâi-chòng Lī-a. 32 Hit khu chhân kap hit lāi-bīn ê hia̍t, sī tùi Hek-lâng bóe-ê. 33 Ngá-kok hoan-hù i hiah ê kiáⁿ bêng-pe̍k, kha kiu-chiūⁿ chhn̂g, chiū khùi tn̄g, tò-khì i ê lia̍t-chó͘ hia.
1 約瑟仆tī伊ê老父ê面，啼哭，chim伊。 2 約瑟吩咐伺候伊ê醫生，用香料灌伊ê老父；醫生就用香料灌以色列。 3 灌身屍定tio̍h ê例tio̍h四十日；hitê四十日滿，koh埃及人為伊啼哭七十日。 4 為tio̍h伊啼哭ê日已經過，約瑟tùi法老家內ê人講，我若tī lín ê面前得tio̍h恩典，請lín通知法老，kā伊講， 5 我ê老父kah我chiù-chōa講，我beh死lah，你tio̍h將我埋葬tī迦南地，tī我為本身所掘ê墓；taⁿ求你准我上去埋葬我ê老父，然後我beh 倒tńg來。 6 法老講，你thang上去埋葬你ê老父，照伊所kah你chiù ê chōa。 7 Tùi án-ni，約瑟上去埋葬伊ê老父；kap伊相kap上去ê，有法老ê眾人臣，kap法老家內ê長老，kap埃及國眾長老。 8 Koh有約瑟全家，kap伊hiahê兄弟，以及伊ê老父ê家眷；只有in ê gín-á，kap羊群、牛群，lóng留tī Ko-san地。 9 Koh有車kap騎馬ê，hit陣ê人不止chōe。 10 In到約旦河外，A-ta̍t ê五穀場，就tī-hia大啼哭，大哀傷；約瑟為tio̍h老父悲哀七日。 11 迦南地khiā起ê百姓看見A-ta̍t五穀場ê啼哭，就講，這是埃及人一場ê大啼哭；因為án-ni，hitê地名叫A-pek-be̍k-se，是tī約旦河外。 12 雅各hiahê kiáⁿ就照老父所吩咐ê kā伊做； 13 hiahê kiáⁿ將伊運到迦南地，埋葬tī Bān-lī ê頭前，Be̍k-pí-la̍h 田裡ê穴，hitê穴kap田是亞伯拉罕tùi Hek人Í-hut-lûn買做業，來做墓地ê。 14 約瑟埋葬in老父以後，就kap眾兄弟，以及一切kap伊上去埋葬in老父ê人，lóng 倒tńg埃及。 15 約瑟hiahê兄看in老父已經死，就講，Kiám-chhái約瑟beh怨恨咱，照咱前款待伊lóng總ê pháiⁿ，一盡報應咱。 16 In就託人去見約瑟講，你ê老父未死ê事先，吩咐講， 17 Lín tio̍h對約瑟án-ni講，前你chiahê兄pháiⁿ款待你，求你赦免in ê過失kap罪惡；taⁿ求你赦免你ê老父ê上帝ê奴僕ê過失。In對約瑟講chiahê話，約瑟就啼哭。 18 伊chiahê兄koh來仆tī伊面前講，阮是你ê奴僕。 19 約瑟kā in講，m̄免驚；我kiám替上帝mah？ 20 前lín ê意思是pháiⁿ，總是上帝ê意思是好；beh保全chōe-chōe人ê性命，親像今á日。 21 Taⁿ lín m̄免驚；我beh養飼lín，kap lín ê kiáⁿ兒。Tùi án-ni，約瑟用親愛ê話安慰in。 22 約瑟kap in老父ê家眷lóng tiàm埃及；約瑟食百一歲。 23 約瑟得tio̍h看見Í-hoat-liân第三代ê孫；Má-ná-se ê孫Má-kiat ê kiáⁿ，約瑟亦抱in tī腳頭u。 24 約瑟對伊ê兄弟講，我beh死lah；總是上帝的確看顧lín，chhōa lín tùi chit所在上去，到伊chiù-chōa應允hō͘亞伯拉罕、以撒、雅各ê地。 25 約瑟kah以色列ê kiaⁿ孫chiù-chōa講，上帝的確照顧lín，lín tio̍h將我ê骨頭運上去。約瑟死，tú-á百一歲；人用香料kā伊灌；將伊收落棺，停tī埃及。 26 【併tī頂節】
1 Iok-sek phak tī i ê lāu-pē ê bīn, thî-khàu, chim-i. 2 Iok-sek hoan-hù su-hāu i ê i-seng, ēng hiuⁿ-liāu koàn i ê lāu-pē; i-seng chiū ēng hiuⁿ-liāu koàn Í-sek-lia̍t. 3 Koàn sin-si tiāⁿ-tio̍h ê lē tio̍h sì-cha̍p ji̍t; hit ê sì-cha̍p ji̍t móa, koh Ai-ki̍p lâng ūi i thî-khàu chhit-cha̍p ji̍t. 4 Ūi-tio̍h i thî-khàu ê ji̍t í-keng kè, Iok-sek tùi Hoat-ló ke-lāi ê lâng kóng, Góa nā tī lín ê bīn-chêng tit-tio̍h un-tián, chhiáⁿ lín thong-ti Hoat-ló, kā i kóng, 5 Góa ê lāu-pē kah góa chiù-chōa kóng, Góa beh sí lah, lí tio̍h chiong góa bâi-chòng tī Ka-lâm tōe, tī góa ūi pún-sin só͘ ku̍t ê bōng; taⁿ kiû lí chún góa chiūⁿ-khì bâi-chòng góa ê lāu-pē, jiân-āu góa beh tò-tńg-lâi. 6 Hoat-ló kóng, Lí thang chiūⁿ-khì bâi-chòng lí ê lāu-pē, chiàu i só͘ kah lí chiù ê chōa. 7 Tùi án-ni Iok-sek chiūⁿ-khì bâi-chòng i ê lāu-pē; kap i saⁿ-kap chiūⁿ-khì ê, ū Hoat-ló ê chèng jîn-sîn, kap Hoat-ló ke-lāi ê tióng-ló, kap Ai-ki̍p kok chèng tióng-ló. 8 Koh ū Iok-sek choân-ke, kap i hiah ê hiaⁿ-tī, í-ki̍p i ê lāu-pē ê ke-koàn; chí-ū in ê gín-á, kap iûⁿ-kûn gû-kûn, lóng lâu tī Ko-san tōe. 9 Koh ū chhia kap khiâ-bé-ê, hit-tīn ê lâng put-chí chōe. 10 In kàu Iok-tàn hô gōa, A-ta̍t ê gō͘-kak-tiûⁿ, chiū tī-hia tōa thî-khàu, tōa ai-siong; Iok-sek ūi-tio̍h lāu-pē pi-ai chhit-ji̍t. 11 Ka-lâm tōe khiā-khí ê peh-sìⁿ khòaⁿ-kìⁿ A-ta̍t gō͘-kak-tiûⁿ ê thî-khàu, chiū kóng, Che sī Ai-ki̍p lâng chi̍t-tiûⁿ ê tōa thî-khàu; in-ūi án-ni, hit ê tōe miâ kiò A-pek-be̍k-se, sī tī Iok-tàn hô gōa. 12 Ngá-kok hiah ê kiáⁿ chiū chiàu lāu-pē só͘ hoan-hù-ê kā i chòe; 13 hiah ê kiáⁿ chiong i ūn kàu Ka-lâm tōe, bâi-chòng tī Bān-lī ê thâu-chêng, Be̍k-pí-la̍h chhân-ni̍h ê hia̍t, hit ê hia̍t kap chhân sī A-pek-la̍h-hán tùi Hek-lâng Í-hut-lûn bóe chòe gia̍p, lâi chòe bōng-tōe ê. 14 Iok-sek bâi-chòng in lāu-pē í-āu, chiū kap chèng hiaⁿ-tī, í-ki̍p it-chhè kap i chiūⁿ-khì bâi-chòng in lāu-pē ê lâng, lóng tò-tńg Ai-ki̍p. 15 Iok-sek hiah ê hiaⁿ khòaⁿ in lāu-pē í-keng sí, chiū kóng, Kiám-chhái Iok-sek beh oàn-hūn lán, chiàu lán chêng khoán-thāi i lóng-chóng ê pháiⁿ, it-chīn pò-èng lán. 16 In chiū thok lâng khì kìⁿ Iok-sek kóng, Lí ê lāu-pē bē sí ê tāi-seng, hoan-hù kóng, 17 Lín tio̍h tùi Iok-sek án-ni kóng, Chêng lí chiah ê hiaⁿ pháiⁿ khoán-thāi lí, kiû lí sià-bián in ê kè-sit kap chōe-ok; taⁿ kiû lí sià-bián lí ê lāu-pē ê Siōng-tè ê lô͘-po̍k ê kè-sit. In tùi Iok-sek kóng chiah ê ōe, Iok-sek chiū thî-khàu. 18 I chiah ê hiaⁿ koh lâi phak tī i bīn-chêng kóng, Goán sī lí ê lô͘-po̍k. 19 Iok-sek kā in kóng, M̄-bián kiaⁿ; góa kiám thòe Siōng-tè mah? 20 Chêng lín ê ì-sù sī pháiⁿ, chóng-sī Siōng-tè ê ì-sù sī hó; beh pó-choân chōe-chōe lâng ê sìⁿ-miā, chhin-chhiūⁿ kin-á-ji̍t. 21 Taⁿ lín m̄-bián kiaⁿ; góa beh iúⁿ-chhī lín, kap lín ê kiáⁿ-jî. Tùi án-ni Iok-sek ēng chhin-ài ê ōe an-ùi in. 22 Iok-sek kap in lāu-pē ê ke-koàn lóng tiàm Ai-ki̍p; Iok-sek chia̍h pah-it hè. 23 Iok-sek tit-tio̍h khòaⁿ-kìⁿ Í-hoat-liân tē-saⁿ tāi ê sun; Má-ná-se ê sun Má-kiat ê kiáⁿ, Iok-sek ia̍h phō in tī kha-thâu-u. 24 Iok-sek tùi i ê hiaⁿ-tī kóng, Góa beh sí lah; chóng-sī Siōng-tè tek-khak khòaⁿ-kò͘ lín, chhōa lín tùi chit só͘-chāi chiūⁿ-khì, kàu I chiù-chōa èng-ún hō͘ A-pek-la̍h-hán, Í-sat, Ngá-kok ê tōe. 25 Iok-sek kah Í-sek-lia̍t ê kiáⁿ-sun chiù-chōa kóng, Siōng-tè tek-khak chiàu-kò͘ lín, lín tio̍h chiong góa ê kut-thâu ūn-chiūⁿ-khì. Iok-sek sí, tú-á pah-it hè; lâng ēng hiuⁿ-liāu kā i koàn; chiong i siu-lo̍h koan, thêng tī Ai-ki̍p. 26 【pēng tī téng chat】