1 上帝tī在早已經託hiahê先知，用chōe-chōe段，chōe-chōe方法，kā列祖講； 2 taⁿ tī hiahê日ê路尾，託伊ê Kiáⁿ kā咱講；就是伊所設立做承接萬物ê後嗣，亦bat tùi伊來創造chiahê世界。 3 伊是上帝ê榮耀所發出ê光，是上帝本質ê真象，伊用伊權能ê話teh扶載萬物，已經成清潔罪ê事，就坐tī極高ê天頂，大威嚴ê ê大pêng； 4 成做比chiahê天使khah大，合tī伊所承接ê名，比in khah尊貴。 5 因為上帝kiám bat tùi甚麼天使講: 你就是我ê Kiáⁿ，我今á日生你？koh講， 我beh做伊ê父，伊beh做我ê Kiáⁿ。 6 到伊koh chhōa大Kiáⁿ入世間ê時，就講，上帝chiahê天使lóng tio̍h拜伊。 7 論到天使就講: Hō͘伊ê天使做風，伊ê差用做火燄: 8 但是論到Kiáⁿ就講， 上帝ah，你ê座位代代tī-teh， 你ê 國權柄是正直ê權柄。 9 你ài公義，怨恨不法； 所以上帝，你ê上帝，用歡喜ê油抹你， 贏過你chiahê同伴。 10 Koh講， 主ah，起頭ê時，你hē地ê地基， Chiahê天亦是你ê手所造ê: 11 In beh滅無；獨獨你久長tī-teh: In lóng beh親像衣服漸漸舊； 12 你beh將in捲起來，親像外衫， 親像衣服，in就beh變換: 獨獨你原在是án-ni，你ê歲壽無窮盡。 13 上帝bat tùi tá-lo̍h一个天使講， 坐我ê大pêng， thèng候我hē你ê對敵做你ê腳踏椅？ 14 In kiám m̄是lóng做差用ê神，奉差來服事teh-beh得救ê人mah？
1 Siōng-tè tī chāi-chá í-keng thok hiah ê sian-ti, ēng chōe-chōe tōaⁿ, chōe-chōe hong-hoat, kā lia̍t-chó͘ kóng; 2 taⁿ tī hiah ê ji̍t ê lō͘-bé, thok I ê Kiáⁿ kā lán kóng; chiū-sī I só͘ siat-li̍p chòe sêng-chiap bān mi̍h ê hō͘-sû, ia̍h bat tùi I lâi chhòng-chō chiah ê sè-kài. 3 I sī Siōng-tè ê êng-iāu só͘ hoat-chhut ê kng, sī Siōng-tè pún-chit ê chin siōng, I ēng I koân-lêng ê ōe teh hû-chài bān mi̍h, í-keng chiâⁿ chheng-kiat chōe ê sū, chiū chē tī ke̍k koâiⁿ ê thiⁿ-téng, tōa ui-giâm ê ê tōa pêng; 4 chiâⁿ-chòe pí chiah ê thiⁿ-sài khah tōa, ha̍p tī I só͘ sêng-chiap ê miâ, pí in khah chun-kùi. 5 In-ūi Siōng-tè kiám bat tùi sím-mi̍h thiⁿ-sài kóng: Lí chiū-sī góa ê Kiáⁿ, Góa kin-á-ji̍t siⁿ lí? koh kóng, Góa beh chòe I ê Pē, I beh chòe Góa ê Kiáⁿ. 6 Kàu I koh chhōa tōa Kiáⁿ ji̍p sè-kan ê sî, chiū kóng, Siōng-tè chiah ê thiⁿ-sài lóng tio̍h pài I. 7 Lūn-kàu thiⁿ-sài chiū kóng: Hō͘ I ê thiⁿ-sài chòe hong, I ê chhe-ēng chòe hé-iām: 8 nā-sī lūn-kàu Kiáⁿ chiū kóng, Siōng-tè ah, lí ê chō-ūi tāi-tāi tī-teh, Lí ê kok koân-pèng sī chèng-ti̍t ê koân-pèng. 9 Lí ài kong-gī, oàn-hūn put-hoat; Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ. 10 Koh kóng, Chú ah, khí-thâu ê sî, lí hē tōe ê tōe-ki, Chiah ê thiⁿ ia̍h sī lí ê chhiú só͘ chō ê: 11 In beh bia̍t-bô; to̍k-to̍k lí kú-tn̂g tī-teh: In lóng beh chhin-chhiūⁿ i-ho̍k chiām-chiām kū; 12 Lí beh chiong in kńg-khí-lâi, chhin-chhiūⁿ gōa-saⁿ, Chhin-chhiūⁿ i-ho̍k, in chiū beh piàn-ōaⁿ: To̍k-to̍k lí goân-chāi sī án-ni, lí ê hè-siū bô kiông-chīn. 13 Siōng-tè bat tùi tá-lo̍h chi̍t ê thiⁿ-sài kóng, Chē góa ê tōa pêng, Thèng-hāu góa hē lí ê tùi-te̍k chòe lí ê kha-ta̍h-í? 14 In kiám m̄ sī lóng chòe chhe-ēng ê sîn, hōng-chhe lâi ho̍k-sāi teh-beh tit kiù ê lâng mah?
1 所以咱tio̍h益發致意所聽見ê，驚了咱會致到溜去。 2 因為tùi天使所傳ê道理，尚且是堅固，也見若干犯違逆ê tāi-chì lóng tú-tio̍h應該受ê報應； 3 咱若忽略chiah-nih大ê拯救kiám會逃閃mah？Chitê拯救既然是主起頭講ê，聽見ê人干證到實實hō͘咱； 4 koh上帝用chiahê神蹟、奇事、ta̍k項ê權能kap聖神ê賞賜，lóng照家己ê旨意，kap in saⁿ-kap干證。 5 因為阮所講teh來ê世界，上帝未bat hō͘伊降服tī天使。 6 獨獨有干證tī某所在ê，講， 人是甚麼，hō͘你siàu念伊？ 人ê Kiáⁿ是甚麼，hō͘你看顧伊？ 7 你hō͘伊略á khah輸天使， Koh用榮光尊貴，hō͘伊做冕旒， Koh設立伊tī你ê手所造ê ê頂面； 8 Hō͘萬物lóng降服tī伊ê腳下。 已經hō͘萬物lóng降服伊，就無chhun一項物無降服伊。總是到taⁿ咱猶未看見萬物lóng降服伊。 9 獨獨看見hitê略á khah輸天使ê耶穌，為tio̍h受死ê艱苦得tio̍h榮光尊貴做冕旒，thang tùi上帝ê恩，為tio̍h眾人受死。 10 因為萬物所為tio̍h伊，萬物所tùi伊ê，teh chhōa chōe-chōe kiáⁿ到tī榮光，就hō͘救in ê首領tùi苦難來成完全，本是合宜。 11 因為hitê hō͘人成聖ê，kap hiahê得tio̍h成聖ê，lóng tùi一个出；所以伊稱in做兄弟無掠做見笑； 12 講， 我beh報揚你ê名tī我ê兄弟， O-ló你tī會中。 13 Koh講， 我beh óa靠伊。Koh講， 看ah！我kap上帝所hō͘我ê kiáⁿ兒。 14 Taⁿ chiahê kiáⁿ兒既然相同有血肉ê體，伊本身亦平平有；beh用死來廢無有死ê權勢ê，就是魔鬼； 15 亦beh hō͘一生驚畏死到親像做奴才ê，lóng得tio̍h tháu放。 16 因為伊無牽救天使，是牽救亞伯拉罕ê後裔。 17 所以凡事伊tio̍h kap兄弟相同，thang tī上帝ê事做憐憫忠信ê祭司頭，因為百姓ê罪獻挽回ê祭。 18 因為伊已經受苦來tú-tio̍h試，就會幫贊chiahê受試ê人。
1 Só͘-í lán tio̍h it-hoat tì-ì só͘ thiaⁿ-kìⁿ ê, kiaⁿ-liáu lán ōe tì-kàu liu-khì. 2 In-ūi tùi thiⁿ-sài só͘ thoân ê tō-lí, siōng-chhiáⁿ sī kian-kò͘, iā kìⁿ-nā kan-hoān ûi-ke̍h ê tāi-chì lóng tú-tio̍h eng-kai siū ê pò-èng; 3 lán nā hut-lio̍k chiah-ni̍h tōa ê chín-kiù kiám ōe tô-siám mah? Chit ê chín-kiù kì-jiân sī Chú khí-thâu kóng ê, thiaⁿ-kìⁿ ê lâng kan-chèng kàu si̍t-si̍t hō͘ lán; 4 koh Siōng-tè ēng chiah ê sîn-jiah, kî-sū, ta̍k hāng ê koân-lêng kap Sèng Sîn ê siúⁿ-sù, lóng chiàu ka-kī ê chí-ì, kap in saⁿ-kap kan-chèng. 5 In-ūi goán só͘ kóng teh lâi ê sè-kài Siōng-tè bē bat hō͘ i hâng-ho̍k tī thiⁿ-sài. 6 To̍k-to̍k ū kan-chèng tī bó͘ só͘-chāi ê, kóng, Lâng sī sím-mi̍h, hō͘ lí siàu-liām i? Lâng ê kiáⁿ sī sím-mi̍h, hō͘ lí khòaⁿ-kò͘ i? 7 Lí hō͘ i lio̍h-á khah-su thiⁿ-sài, Koh ēng êng-kng chun-kùi, hō͘ i chòe bián-liû, Koh siat-li̍p i tī lí ê chhiú só͘ chō ê ê téng-bīn; 8 Hō͘ bān mi̍h lóng hâng-ho̍k tī i ê kha-ē. Í-keng hō͘ bān mi̍h lóng hâng-ho̍k i, chiū bô chhun chi̍t hāng mi̍h bô hâng-ho̍k i. Chóng-sī kàu taⁿ lán iáu-bē khòaⁿ-kìⁿ bān mi̍h lóng hâng-ho̍k i. 9 To̍k-to̍k khòaⁿ-kìⁿ hit ê lio̍h-á khah-su thiⁿ-sài ê Iâ-so͘, ūi-tio̍h siū sí ê kan-khó͘ tit-tio̍h êng-kng chun-kùi chòe bián-liû, thang tùi Siōng-tè ê un, ūi-tio̍h chèng lâng siū sí. 10 In-ūi bān mi̍h só͘ ūi-tio̍h I, bān mi̍h só͘ tùi I ê, teh chhōa chōe-chōe kiáⁿ kàu tī êng-kng, chiū hō͘ kiù in ê siú-léng tùi khó͘-lān lâi chiâⁿ oân-choân, pún sī ha̍p-gî. 11 In-ūi hit ê hō͘ lâng chiâⁿ sèng ê, kap hiah ê tit-tio̍h chiâⁿ sèng ê, lóng tùi chi̍t-ê chhut; só͘-í I chheng in chòe hiaⁿ-tī bô lia̍h chòe kiàn-siàu; 12 kóng, Góa beh pò-iông lí ê miâ tī góa ê hiaⁿ-tī, O-ló lí tī hōe-tiong. 13 Koh kóng, Góa beh óa-khò I. Koh kóng, Khòaⁿ ah! góa kap Siōng-tè só͘ hō͘ góa ê kiáⁿ-jî. 14 Taⁿ chiah ê kiáⁿ-jî kì-jiân saⁿ-tâng ū huih bah ê thé, I pún-sin ia̍h pîⁿ-pîⁿ ū; beh ēng sí lâi hòe-bô ū sí ê koân-sè ê, chiū-sī Mô͘-kúi; 15 ia̍h beh hō͘ it-seng kiaⁿ-ùi sí kàu chhin-chhiūⁿ chòe lô͘-châi ê, lóng tit-tio̍h tháu-pàng. 16 In-ūi I bô khan-kiù thiⁿ-sài, sī khan-kiù A-pek-la̍h-hán ê hō͘-è. 17 Só͘-í hoān sū I tio̍h kap hiaⁿ-tī saⁿ-tâng, thang tī Siōng-tè ê sū chòe lîn-bín tiong-sìn ê chè-si-thâu, in-ūi peh-sìⁿ ê chōe hiàn bán-hôe ê chè. 18 In-ūi I í-keng siū khó͘ lâi tú-tio̍h chhì, chiū ōe pang-chān chiah ê siū chhì ê lâng.
1 所以lín chiahê聖ê兄弟，同得tio̍h天召ê，tio̍h深想咱所承認做使者，做祭司頭ê耶穌； 2 伊盡忠tī設立伊ê，親像摩西tī上帝ê全家一樣。 3 因為伊算是能堪得受榮光贏過摩西親像建立家ê，比家khah尊貴。 4 因為家lóng有人建立伊，獨獨建立萬物ê就是上帝。 5 Koh摩西做奴僕，果然盡忠tī上帝ê全家，來干證將來beh傳ê事； 6 獨獨基督做Kiáⁿ，治理伊ê家；咱若執守tùi ǹg望所有ê好膽kap誇口，堅固到尾，就做伊ê家。 7 所以，親像聖神講:今á日lín若聽見伊ê聲， 8 就m̄-thang剛硬lín ê心，親像tī激我受氣ê時，Tī曠野試探我ê日。 9 Tī hia lín ê列祖驗來試我， Koh歷過四十年看見我ê所行。 10 所以我無歡喜hit代ê人， 講，In ê心常常失迷， M̄-bat我chiahê路； 11 我就tī受氣中chiù-chōa，講， In斷斷bōe得thang入我ê安歇。 12 兄弟ah，lín tio̍h謹慎，驚了lín中間kiám-chhái有人KHǸG m̄信ê pháiⁿ心，離開真活ê上帝； 13 所以lín tio̍h thàn iáu有thang叫做今á日ê，日日相勸勉；驚了lín中間有ê hō͘罪迷去，來硬心: 14 因為咱若持守起頭ê深信，堅固到路尾，就有份tī基督: 15 當iáu teh講， 今á日lín若聽見伊ê聲， 就m̄-thang剛硬lín ê心，親像tī激我受氣ê時。 16 因為聽來激受氣ê，是是誰 ah？kiám m̄是tè摩西出埃及ê眾人mah？ 17 上帝四十年久所無歡喜ê是是誰 ah？kiám m̄是犯罪，身屍倒tī曠野ê人mah？ 18 上帝chiù-chōa m̄准入伊ê安歇ê，若m̄是m̄信thàn ê人，是是誰 ah？ 19 Tùi án-ni看，in bōe能入，就是因為m̄信。
1 Só͘-í lín chiah ê sèng ê hiaⁿ-tī, tâng tit-tio̍h thiⁿ tiàu ê, tio̍h chhim siūⁿ lán só͘ sêng-jīn chòe Sù-chiá, chòe Chè-si-thâu ê Iâ-so͘; 2 I chīn-tiong tī siat-li̍p I ê, chhin-chhiūⁿ Mô͘-se tī Siōng-tè ê choân ke chi̍t iūⁿ. 3 In-ūi I sǹg sī ōe kham-tit siū êng-kng iâⁿ-kè Mô͘-se chhin-chhiūⁿ kiàn-li̍p ke ê, pí ke khah chun-kùi. 4 In-ūi ke lóng ū lâng kiàn-li̍p i, to̍k-to̍k kiàn-li̍p bān mi̍h ê chiū-sī Siōng-tè. 5 Koh Mô͘-se chòe lô͘-po̍k, kó-jiân chīn-tiong tī Siōng-tè ê choân ke, lâi kan-chèng chiong-lâi beh thoân ê sū; 6 to̍k-to̍k Ki-tok chòe Kiáⁿ, tī-lí I ê ke; lán nā chip-siú tùi ǹg-bāng só͘ ū ê hó-táⁿ kap khoa-kháu, kian-kò͘ kàu bé, chiū chòe I ê ke. 7 Só͘-í, chhin-chhiūⁿ Sèng Sîn kóng: Kin-á-ji̍t lín nā thiaⁿ-kìⁿ I ê siaⁿ, 8 Chiū m̄-thang kong-ngī lín ê sim, chhin-chhiūⁿ tī kek góa siū-khì ê sî, Tī khòng-iá chhì-thàm góa ê ji̍t. 9 Tī hia lín ê lia̍t-chó͘ giām lâi chhì góa, Koh le̍k-kè sì-cha̍p nî khòaⁿ-kìⁿ góa ê só͘ kiâⁿ. 10 Só͘-í góa bô hoaⁿ-hí hit tāi ê lâng, Kóng, In ê sim siông-siông sit-bê, M̄ bat góa chiah ê lō͘; 11 Góa chiū tī siū-khì tiong chiù-chōa, kóng, In toàn-toàn bōe tit thang ji̍p góa ê an-hioh. 12 Hiaⁿ-tī ah, lín tio̍h kín-sīn, kiaⁿ-liáu lín tiong-kan kiám-chhái ū lâng khǹg m̄ sìn ê pháiⁿ sim, lī-khui chin oa̍h ê Siōng-tè; 13 só͘-í lín tio̍h thàn iáu ū thang kiò chòe kin-á-ji̍t ê, ji̍t-ji̍t saⁿ khoàn-bián; kiaⁿ-liáu lín tiong-kan ū-ê hō͘ chōe bê--khì, lâi ngī-sim: 14 in-ūi lán nā chhî-siú khí-thâu ê chhim sìn, kian-kò͘ kàu lō͘-bé, chiū ū hūn tī Ki-tok: 15 tng iáu teh kóng, Kin-á-ji̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim, chhin-chhiūⁿ tī kek góa siū-khì ê sî. 16 In-ūi thiaⁿ lâi kek siū-khì ê, sī chī-chūi ah? kiám m̄ sī tè Mô͘-se chhut Ai-ki̍p ê chèng lâng mah? 17 Siōng-tè sì-cha̍p nî kú só͘ bô hoaⁿ-hí ê sī chī-chūi ah? kiám m̄ sī hoān-chōe, sin-si tó tī khòng-iá ê lâng mah? 18 Siōng-tè chiù-chōa m̄ chún ji̍p I ê an-hioh ê, nā m̄ sī m̄ sìn-thàn ê lâng, sī chī-chūi ah? 19 Tùi án-ni khòaⁿ, in bōe ōe ji̍p, chiū-sī in-ūi m̄ sìn.
1 所以有入伊ê安歇ê應允留teh hō͘咱，就tio̍h驚惶，驚見lín中間kiám-chhái有人親像得無tio̍h。 2 因為福音有傳hō͘咱，親像傳hō͘ in，總是所聽ê話無利益in，因為聽ê人無用信kap道理相合。 3 因為咱已經信ê，是入chitê安歇；照伊所講， 我就tī受氣中chiù-chōa講， In斷斷bōe得thang入我ê安歇；其實chiahê工，tùi創世間以來，已經成lah。 4 因為論到第七日，tī某所在有án-ni講，上帝tī第七日明白伊lóng總ê工來安歇； 5 亦tī chit所在koh講， In斷斷bōe得thang入我ê安歇。 6 所以chitê安歇iáu teh thèng候有人入，但是hiahê事先得tio̍h福音ê，因為m̄信thàn，chiah無入； 7 歷過chōe-chōe年，tī大衛ê冊內，伊koh定一日，講，今á日，親像頂面所講， 今á日lín若聽見伊ê聲， 就m̄-thang剛硬lín ê心。 8 因為約書亞若bat用安歇賞賜百姓，就後來的確無講起別日。 9 Tùi án-ni看，iáu有安歇kā上帝ê百姓留teh。 10 因為入伊ê安歇ê是明白伊lóng總ê工來安歇， 11 親像上帝明白伊ê工來安歇。所以咱tio̍h盡力來入chitê安歇，免得有人跋倒tī siāng hit樣ê m̄信。 12 因為上帝ê道是活ê，是有功效ê，比一切雙面ê劍khah利，凡若魂kap神，骨節kap骨髓，無m̄刺入破開，心內chiahê念頭kap主意亦無m̄鑑察。 13 Koh所創造ê，tī伊ê面前無一項蓋密:就是萬物掀開露出tī審判咱ê ê目前。 14 所以咱已經有大ê祭司頭，上帝ê Kiáⁿ耶穌，經過hiahê天，就tio̍h執守所承認ê。 15 因為咱所有ê祭司頭m̄是bōe會體貼咱lóng總ê軟弱；就是凡事平平有受試，但是無罪。 16 所以咱tio̍h好膽就近恩典ê座位，thang受憐憫，也得tio̍h恩典，做及時ê幫贊。
1 Só͘-í ū ji̍p I ê an-hioh ê èng-ún lâu-teh hō͘ lán, chiū tio̍h kiaⁿ-hiâⁿ, kiaⁿ-kìⁿ lín tiong-kan kiám-chhái ū lâng chhin-chhiūⁿ tit bô tio̍h. 2 In-ūi hok-im ū thoân hō͘ lán, chhin-chhiūⁿ thoân hō͘ in, chóng-sī só͘ thiaⁿ ê ōe bô lī-ek in, in-ūi thiaⁿ ê lâng bô ēng sìn kap tō-lí saⁿ-ha̍p. 3 In-ūi lán í-keng sìn ê, sī ji̍p chit ê an-hioh; chiàu I só͘ kóng, Góa chiū tī siū-khì tiong chiù-chōa kóng, In toàn-toàn bōe tit thang ji̍p góa ê an-hioh; kî-si̍t chiah ê kang, tùi chhòng-sè-kan í-lâi, í-keng chiâⁿ lah. 4 In-ūi lūn-kàu tē chhit ji̍t, tī bó͘ só͘-chāi ū án-ni kóng, Siōng-tè tī tē chhit ji̍t bêng-pe̍k I lóng-chóng ê kang lâi an-hioh; 5 ia̍h tī chit só͘-chāi koh kóng, In toàn-toàn bōe tit-thang ji̍p góa ê an-hioh. 6 Só͘-í chit ê an-hioh iáu teh thèng-hāu ū lâng ji̍p, nā-sī hiah ê tāi-seng tit-tio̍h hok-im ê, in-ūi m̄ sìn-thàn, chiah bô ji̍p; 7 le̍k-kè chōe-chōe nî, tī Tāi-pi̍t ê chheh-lāi, I koh tēng chi̍t ji̍t, kóng, Kin-á-ji̍t, chhin-chhiūⁿ téng-bīn só͘ kóng, Kin-á-ji̍t lín nā thiaⁿ-kìⁿ I ê siaⁿ, Chiū m̄ thang kong-ngī lín ê sim. 8 In-ūi Iok-su-a nā bat ēng an-hioh siúⁿ-sù peh-sìⁿ, chiū āu-lâi tek-khak bô kóng-khí pa̍t ji̍t. 9 Tùi án-ni khòaⁿ, iáu ū an-hioh kā Siōng-tè ê peh-sìⁿ lâu-teh. 10 In-ūi ji̍p i ê an-hioh ê sī bêng-pe̍k i lóng-chóng ê kang lâi an-hioh, 11 chhin-chhiūⁿ Siōng-tè bêng-pe̍k I ê kang lâi an-hioh. Só͘-í lán tio̍h chīn-la̍t lâi ji̍p chit ê an-hioh, bián-tit ū lâng poa̍h-tó tī siāng hit iūⁿ ê m̄ sìn. 12 In-ūi Siōng-tè ê tō sī oa̍h ê, sī ū kong-hāu ê, pí it-chhè siang-bīn ê kiàm khah lāi, hoān-nā hûn kap sîn, kut-chat kap kut-chhé, bô m̄ chhì-ji̍p phòa-khui, sim-lāi chiah ê liām-thâu kap chú-ì ia̍h bô m̄ kàm-chhat. 13 Koh só͘ chhòng-chō ê, tī I ê bīn-chêng bô chi̍t hāng khàm-ba̍t: chiū-sī bān mi̍h hian-khui lō͘-chhut tī sím-phòaⁿ lán ê ê ba̍k-chêng. 14 Só͘-í lán í-keng ū tōa ê chè-si-thâu, Siōng-tè ê Kiáⁿ Iâ-so͘, keng-kè hiah ê thiⁿ, chiū tio̍h chip-siú só͘ sêng-jīn ê. 15 In-ūi lán só͘ ū ê chè-si-thâu m̄ sī bōe-ōe thé-thiap lán lóng-chóng ê loán-jio̍k; chiū-sī hoān sū pîⁿ-pîⁿ ū siū chhì, nā-sī bô chōe. 16 Só͘-í lán tio̍h hó-táⁿ chiū-kūn un-tián ê chō-ūi, thang siū lîn-bín, iā tit-tio̍h un-tián, chòe ki̍p-sî ê pang-chān.
1 因為tùi人ê中間所揀ê祭司頭lóng是為tio̍h人，tī關係上帝ê事，來設立，thang為tio̍h罪過獻禮物kap祭祀。 2 伊既然hō͘軟chiáⁿ所圍困，chiah會體諒m̄知影kap失迷ê人； 3 所以伊應該因為本身，親像因為百姓，為tio̍h罪來獻祭。 4 Koh chitê尊貴，m̄是人家己取，只有hō͘上帝召ê，親像亞倫一樣。 5 親像án-ni，基督亦m̄是家己尊做祭司頭，就是hitê對伊講， 你就是我ê Kiáⁿ，我今á日生lín ê。 6 Tī別位亦講， 你永遠做祭司， 照Be̍k-ki-sé-tek ê班列。 7 基督tī伊tiàm肉體ê日，用出力喉叫，koh流目屎，獻祈禱懇求hō͘ hitê話救伊出死ê，koh因為伊ê敬虔得tio̍h聽見， 8 雖然做Kiáⁿ，亦tùi所受chiahê苦難來學順服； 9 已經成做完全，就做凡若順服伊ê人永遠拯救ê根源； 10 hō͘上帝chheng伊做祭司頭，照Be̍k-ki-sé-tek ê班列。 11 論到chitê，阮有chōe-chōe話ài講，m̄-kú oh得解明，因為lín耳孔鈍ê緣故。 12 因為論到時ê久，lín tio̍h家己做先生，但是iáu欠用人將上帝ê話chiahê小學ê起頭教lín；koh成做欠用奶，無欠用五穀。 13 凡若食奶ê，無老練義ê道理；因為伊是嬰á。 14 獨獨長成ê人食五穀，in ê心竅tùi練習來練達，到會分別好pháiⁿ。
1 In-ūi tùi lâng ê tiong-kan só͘ kéng ê chè-si-thâu lóng sī ūi-tio̍h lâng, tī koan-hē Siōng-tè ê sū, lâi siat-li̍p, thang ūi-tio̍h chōe-kòa hiàn lé-mi̍h kap chè-sū. 2 I kì-jiân hō͘ nńg-chiáⁿ só͘ ûi-khùn, chiah ōe thé-liōng m̄ chai-iáⁿ kap sit-bê ê lâng; 3 só͘-í i eng-kai in-ūi pún-sin, chhin-chhiūⁿ in-ūi peh-sìⁿ, ūi-tio̍h chōe lâi hiàn-chè. 4 Koh chit ê chun-kùi, m̄ sī lâng ka-kī chhú, chí ū hō͘ Siōng-tè tiàu ê, chhin-chhiūⁿ A-lûn chi̍t iūⁿ. 5 Chhin-chhiūⁿ án-ni, Ki-tok ia̍h m̄ sī ka-kī chun chòe chè-si-thâu, chiū-sī hit-ê tùi I kóng, Lí chiū-sī góa ê Kiáⁿ, Góa kin-á-ji̍t siⁿ lín ê. 6 Tī pa̍t ūi ia̍h kóng, Lí éng-oán chòe chè-si, Chiàu Be̍k-ki-sé-tek ê pan-lia̍t. 7 Ki-tok tī I tiàm jio̍k-thé ê ji̍t, ēng chhut-la̍t âu-kiò, koh lâu ba̍k-sái, hiàn kî-tó khún-kiû hō͘ hit ê ōe kiù I chhut sí ê, koh in-ūi I ê kèng-khiân tit-tio̍h thiaⁿ-kìⁿ, 8 sui-jiân chòe Kiáⁿ, ia̍h tùi só͘ siū chiah ê khó͘-lān lâi o̍h sūn-ho̍k; 9 í-keng chiâⁿ-chòe oân-choân, chiū chòe hoān-nā sūn-ho̍k I ê lâng éng-oán chín-kiù ê kun-goân; 10 hō͘ Siōng-tè chheng I chòe chè-si-thâu, chiàu Be̍k-ki-sé-tek ê pan-lia̍t. 11 Lūn-kàu chit-ê, goán ū chōe-chōe ōe ài kóng, m̄ kú oh-tit kóe-bêng, in-ūi lín hī-khang tūn ê iân-kò͘. 12 In-ūi lūn-kàu sî ê kú, lín tio̍h ka-kī chòe sian-siⁿ, nā-sī iáu khiàm-ēng lâng chiong Siōng-tè ê ōe chiah ê siáu-ha̍k ê khí-thâu kà lín; koh chiâⁿ-chòe khiàm-ēng lin, bô khiàm-ēng ngó͘-kok. 13 Hoān-nā chia̍h lin ê, bô láu-liān gī ê tō-lí; in-ūi i sī eⁿ-á. 14 To̍k-to̍k tióng-sêng ê lâng chia̍h ngó͘-kok, in ê sim-khiàu tùi liān-si̍p lâi liān-ta̍t, kàu ōe hun-piat hó pháiⁿ.
1 所以基督道理ê初學，咱請放下teh，來致意進步到完全；免koh hē地基，就是反悔來脫離chiahê死死ê所行，kap信上帝， 2 chiahê洗ê禮數以及按手，死人koh活，kap永遠ê審判，chiahê教訓。 3 上帝若准，阮就beh án-ni行。 4 因為人已經bat得tio̍h光照，受tio̍h天裡ê恩賜，有份tī聖神， 5 koh受tio̍h上帝ê好話，kap teh來ê世界chiahê權能， 6 後來背叛，就bōe會hō͘ in koh換新來反悔；因為in家己koh釘上帝ê Kiáⁿ tī十字架，來顯明凌辱伊。 7 因為土地食tio̍h ta̍uh-ta̍uh落ê雨水，來生菜蔬，合作穡人ê路用，就得tio̍h上帝賜福； 8 但是生草刺kapc蒺藜，就受棄sak，近tī受咒詛，伊ê結局就是燒lio去。 9 所疼ê兄弟ah！阮sui-bóng án-ni講，但是深信lín ta̍k項khah贏這，koh屬tī得救； 10 因為上帝m̄是無公道，來bōe記得lín ê工，kap lín為tio̍h伊ê名所顯明ê仁愛，因為lín平素服事chiahê聖徒，到taⁿ亦服事in。 11 我ài lín ta̍k人猶原顯出chit號ê慇勤，hō͘ lín ê ǹg望滿足到路尾: 12 hō͘ lín無致到pîn-tōaⁿ，就是學hiahê tùi信kap吞忍來承接chiahê應允ê人。 13 Taⁿ上帝應允亞伯拉罕ê時，因為無khah大ê thang kí來chiù-chōa，就kí本身來chiù-chōa講， 14 我賜福beh賜福你，加添beh加添你ê後裔。 15 親像án-ni，亞伯拉罕gâu吞忍，就得tio̍h所應允ê。 16 因為人是kí khah大ê來chiù-chōa；亦用chiù-chōa做相爭ê結尾，來決定伊。 17 Án-ni，上帝ài beh格外顯明伊ê旨意bōe移易，hō͘ hiahê承接應允ê人知，chiah用chiù-chōa來做證見: 18 beh tùi兩項bōe移易ê事，上帝所bōe會白賊ê，hō͘咱有大大ê安慰，就是咱已經逃避來擒所hē tī頭前ê ǹg望； 19 咱為chitê ǹg望，親像靈魂ê碇，拋tī帳籬內，堅固無移徙； 20 耶穌做先鋒，已經為tio̍h咱入去hia，成做永遠ê祭司長，照Be̍k-ki-sé-tek ê班列。
1 Só͘-í Ki-tok tō-lí ê chho͘-ha̍k, lán chhiáⁿ pàng-hē teh, lâi tì-ì chìn-pō͘ kàu oân-choân; bián koh hē tōe-ki, chiū-sī hoán-hóe lâi thoat-lī chiah ê sí-sí ê só͘ kiâⁿ, kap sìn Siōng-tè, 2 chiah ê sóe ê lé-sò͘, í-ki̍p hōaⁿ chhiú, sí lâng koh-oa̍h, kap éng-oán ê sím-phòaⁿ, chiah ê kàu-hùn. 3 Siōng-tè nā chún, goán chiū beh án-ni kiâⁿ. 4 In-ūi lâng í-keng bat tit-tio̍h kng chiò, siū-tio̍h thiⁿ-ni̍h ê un-sù, ū hūn tī Sèng Sîn, 5 koh siū-tio̍h Siōng-tè ê hó ōe, kap teh lâi ê sè-kài chiah ê koân-lêng, 6 āu-lâi pōe-poān, chiū bōe-ōe hō͘ in koh ōaⁿ-sin lâi hoán-hóe; in-ūi in ka-kī koh tèng Siōng-tè ê Kiáⁿ tī si̍p-jī-kè, lâi hián-bêng lêng-jio̍k I. 7 In-ūi thó͘-tōe chia̍h-tio̍h ta̍uh-ta̍uh lo̍h ê hō͘-chúi, lâi siⁿ chhài-soe, ha̍p choh-sit lâng ê lō͘-ēng, chiū tit-tio̍h Siōng-tè sù hok; 8 nā-sī siⁿ chháu-chhì kap chi̍t-lê, chiū siū khì-sak, kūn tī siū chiù-chó͘, i ê kiat-kio̍k chiū-sī sio-lio-khì. 9 Só͘ thiàⁿ ê hiaⁿ-tī ah! goán sui-bóng án-ni kóng, nā-sī chhim sìn lín ta̍k hāng khah-iâⁿ che, koh sio̍k tī tit kiù; 10 in-ūi Siōng-tè m̄ sī bô kong-tō, lâi bōe kì-tit lín ê kang, kap lín ūi-tio̍h I ê miâ só͘ hián-bêng ê jîn-ài, in-ūi lín pêng-sò͘ ho̍k-sāi chiah ê sèng-tô͘, kàu taⁿ ia̍h ho̍k-sāi in. 11 Góa ài lín ta̍k lâng iû-goân hián-chhut chit hō ê un-khûn, hō͘ lín ê ǹg-bāng móa-chiok kàu lō͘-bé: 12 hō͘ lín bô tì-kàu pîn-tōaⁿ, chiū-sī o̍h hiah ê tùi sìn kap thun-lún lâi sêng-chiap chiah ê èng-ún ê lâng. 13 Taⁿ Siōng-tè èng-ún A-pek-la̍h-hán ê sî, in-ūi bô khah tōa ê thang kí lâi chiù-chōa, chiū kí pún-sin lâi chiù-chōa kóng, 14 Góa sù-hok beh sù-hok lí, ke-thiⁿ beh ke-thiⁿ lí ê hō͘-è. 15 Chhin-chhiūⁿ án-ni, A-pek-la̍h-hán gâu thun-lún, chiū tit-tio̍h só͘ èng-ún ê. 16 In-ūi lâng sī kí khah tōa ê lâi chiù-chōa; ia̍h ēng chiù-chōa chòe saⁿ-chiⁿ ê kiat-bé, lâi koat-tiāⁿ i. 17 Án-ni, Siōng-tè ài beh kek-gōa hián-bêng I ê chí-ì bōe î-e̍k, hō͘ hiah ê sêng-chiap èng-ún ê lâng chai, chiah ēng chiù-chōa lâi chòe chèng-kìⁿ: 18 beh tùi nn̄g hāng bōe î-e̍k ê sū, Siōng-tè só͘ bōe-ōe pe̍h-chha̍t ê, hō͘ lán ū tōa-tōa ê an-ùi, chiū-sī lán í-keng tô-pī lâi khîⁿ só͘ hē tī thâu-chêng ê ǹg-bāng; 19 lán ūi chit ê ǹg-bāng, chhin-chhiūⁿ lêng-hûn ê tiàⁿ, pha tī tiùⁿ-lî lāi, kian-kò͘ bô î-sóa; 20 Iâ-so͘ chòe sian-hong, í-keng ūi-tio̍h lán ji̍p khì hia, chiâⁿ-chòe éng-oán ê Chè-si-tiúⁿ, chiàu Be̍k-ki-sé-tek ê pan-lia̍t.
1 因為chitê Be̍k-ki-sé-tek，就是Sat-léng王，也是至koân上帝ê祭司，早tú-tio̍h亞伯拉罕刣贏chiahê王tò來ê時，kā伊祝福ê， 2 亞伯拉罕亦將一切所得tio̍h ê，抽十份一hō͘伊(伊ê名翻譯就是義ê王，koh是Sat-léng王，就是平安王； 3 伊無父無母，無世系，無時日ê起頭，無活命ê路尾，是親像上帝ê Kiáⁿ)久長teh做祭司。 4 試想先祖亞伯拉罕將所得tio̍h上等ê物，抽十份一hō͘伊，就hit人尊貴到怎樣， 5 Taⁿ利未ê kiaⁿ孫擔當祭司ê chitê，雖然kap百姓lóng是亞伯拉罕ê後裔，平平是兄弟，iáu-kú奉命令，照律法tùi百姓the̍h十份一； 6 總是hitê無屬利未ê世系ê，bat tùi亞伯拉罕the̍h十份一，koh kā得tio̍h chiahê應允ê祝福。 7 獨獨序細hō͘序大祝福，這是無thang辯駁。 8 Taⁿ tī chia the̍h十份一ê，lóng是會死ê人；但是tī hia是hitê有受干證講，伊是活ê。 9 Koh也會講得，連the̍h十份一ê利未也bat在tī亞伯拉罕來納十份一； 10 因為Be̍k-ki-sé-tek tú-tio̍h亞伯拉罕ê時，利未iáu-kú tī in祖ê身軀。 11 早百姓受律法，是tī利未族祭司ê職任下；若tùi伊能得tio̍h完全，就mih-sái另外koh興起一个祭司，照Be̍k-ki-sé-tek ê班列，無講照亞倫ê班列ah？ 12 因為祭司ê職已經改換，就律法亦的確tio̍h改換。 13 因為chiahê話所指ê，是屬tī別個支派，in中間未bat有人跟隨tī祭壇。 14 是咱ê主明明tùi偤大出；論chitê支派，摩西未bat提起祭司ê職。 15 Koh若照Be̍k-ki-sé-tek ê款式，有興起別個祭司； 16 m̄是照肉體誡命ê法來設立，是照bōe毀壞ê活命ê權能，就頂面所講ê理嶄然khah明。 17 因為有干證伊講， 你永永做祭司， 照Be̍k-ki-sé-tek ê班列。 18 因為前ê誡命廢無，是為tio̍h伊ê軟弱kap無利益， 19 (因為律法無做一項到完全)chiah設立koh-khah好ê ǹg望，就是咱所tùi伊來親近上帝ê。 20 Koh因為伊m̄是無tùi chiù-chōa來設立； 21 (in hiahê立做祭司無tùi chiù-chōa；獨獨chitê就tùi chiù-chōa，因為設立伊ê有kā伊講， 主chiù-chōa，無退悔， 你永永做祭司:) 22 親像án-ni，耶穌做koh-khah好ê約ê保認。 23 Hiah-ê做祭司ê，因為hō͘死阻隔，bōe會久長，所以tio̍h真chōe人； 24 獨獨chitê，因為永永tī-teh，有bōe改換ê祭司職。 25 所以凡若tùi伊就近上帝ê人，伊能救in到完全，因為伊長長活，來替in祈求。 26 因為chit號ê祭司頭合咱ê欠用；伊是聖，無pháiⁿ，無lâ-sâm，離開罪人，成做khah高chiahê天； 27 伊m̄免親像hiahê祭司頭，tio̍h日日事先為tio̍h家己ê罪，後來為tio̍h百姓ê罪，來獻祭；因為伊獻本身，就做一下成chitê事。 28 因為律法設立軟chiáⁿ ê人做祭司頭；獨獨律法後chiù-chōa ê話設立Kiáⁿ，永遠做完全ê祭司頭。
1 In-ūi chit ê Be̍k-ki-sé-tek, chiū-sī Sat-léng ông, iā sī chì-koâiⁿ Siōng-tè ê chè-si, chá tú-tio̍h A-pek-la̍h-hán thâi-iâⁿ chiah ê ông tò-lâi ê sî, kā i chiok-hok ê, 2 A-pek-la̍h-hán ia̍h chiong it-chhè só͘ tit-tio̍h ê, thiu cha̍p hūn chi̍t hō͘ i (i ê miâ hoan-e̍k chiū-sī gī ê Ông, koh sī Sat-léng Ông, chiū-sī pêng-an Ông; 3 i bô pē bô bú, bô sè-hē, bô sî-ji̍t ê khí-thâu, bô oa̍h-miā ê lō͘-bé, sī chhin-chhiūⁿ Siōng-tè ê Kiáⁿ) kú-tn̂g teh chòe chè-si. 4 Chhì-siūⁿ sian-chó͘ A-pek-la̍h-hán chiong só͘ tit-tio̍h siōng-téng ê mi̍h, thiu cha̍p hūn chi̍t hō͘ i, chiū hit lâng chun-kùi kàu cháiⁿ-iūⁿ, 5 Taⁿ Lī-bī ê kiáⁿ-sun tam-tng chè-si ê chit ê, sui-jiân kap peh-sìⁿ lóng sī A-pek-la̍h-hán ê hō͘-è, pîⁿ-pîⁿ sī hiaⁿ-tī, iáu-kú hōng bēng-lēng, chiàu lu̍t-hoat tùi peh-sìⁿ the̍h cha̍p hūn chi̍t; 6 chóng-sī hit ê bô sio̍k Lī-bī ê sè-hē ê, bat tùi A-pek-la̍h-hán the̍h cha̍p hūn chi̍t, koh kā tit-tio̍h chiah ê èng-ún ê chiok-hok. 7 To̍k-to̍k sī-sòe hō͘ sī-tōa chiok-hok, che sī bô thang piān-pok. 8 Taⁿ tī chia the̍h cha̍p hūn chi̍t ê, lóng sī ōe sí ê lâng; nā-sī tī hia sī hit-ê ū siū kan-chèng kóng, i sī oa̍h ê. 9 Koh iā ōe kóng-tit, liân the̍h cha̍p hūn chi̍t ê Lī-bī iā bat chāi-tī A-pek-la̍h-hán lâi la̍p cha̍p hūn chi̍t; 10 in-ūi Be̍k-ki-sé-tek tú-tio̍h A-pek-la̍h-hán ê sî, Lī-bī iáu-kú tī in chó͘ ê sin-khu. 11 Chá peh-sìⁿ siū lu̍t-hoat, sī tī Lī-bī cho̍k chè-si ê chit-jīm ē; nā tùi i ōe tit-tio̍h oân-choân, chiū mih-sái lēng-gōa koh heng-khí chi̍t ê chè-si, chiàu Be̍k-ki-sé-tek ê pan-lia̍t, bô kóng chiàu A-lûn ê pan-lia̍t ah? 12 In-ūi chè-si ê chit í-keng kóe-ōaⁿ, chiū lu̍t-hoat ia̍h tek-khak tio̍h kóe-ōaⁿ. 13 In-ūi chiah ê ōe só͘ chí ê, sī sio̍k tī pa̍t ê chi-phài, in tiong-kan bē bat ū lâng kun-sûi tī chè-tôaⁿ. 14 Sī lán ê Chú bêng-bêng tùi Iû-tāi chhut; lūn chit ê chi-phài, Mô͘-se bē bat thê-khí chè-si ê chit. 15 Koh nā chiàu Be̍k-ki-sé-tek ê khoán-sit, ū heng-khí pa̍t ê chè-si; 16 m̄ sī chiàu jio̍k-thé kài-bēng ê hoat lâi siat-li̍p, sī chiàu bōe húi-hoāi ê oa̍h-miā ê koân-lêng, chiū téng-bīn só͘ kóng ê lí chám-jiân khah bêng. 17 In-ūi ū kan-chèng I kóng, Lí éng-éng chòe chè-si, Chiàu Be̍k-ki-sé-tek ê pan-lia̍t. 18 In-ūi chêng ê kài-bēng hòe-bô, sī ūi-tio̍h i ê loán-jio̍k kap bô lī-ek, 19 (in-ūi lu̍t-hoat bô chòe chi̍t hāng kàu oân-choân) chiah siat-li̍p koh khah hó ê ǹg-bāng, chiū-sī lán só͘ tùi i lâi chhin-kūn Siōng-tè ê. 20 Koh in-ūi I m̄ sī bô tùi chiù-chōa lâi siat-li̍p; 21 (in hiah-ê li̍p chòe chè-si bô tùi chiù-chōa; to̍k-to̍k chit-ê chiū tùi chiù-chōa, in-ūi siat-li̍p I ê ū kā I kóng, Chú chiù-chōa, bô thè-hóe, Lí éng-éng chòe chè-si:) 22 Chhin-chhiūⁿ án-ni, Iâ-so͘ chòe koh khah hó ê iok ê pó-jīn. 23 Hiah ê chòe chè-si ê, in-ūi hō͘ sí chó͘-keh, bōe-ōe kú-tn̂g, só͘-í tio̍h chin chōe lâng; 24 to̍k-to̍k chit-ê, in-ūi éng-éng tī-teh, ū bōe kóe-ōaⁿ ê chè-si chit. 25 Só͘-í hoān-nā tùi I chiū-kūn Siōng-tè ê lâng, I ōe kiù in kàu oân-choân, in-ūi I tn̂g-tn̂g oa̍h, lâi thòe in kî-kiû. 26 In-ūi chit hō ê chè-si-thâu ha̍p lán ê khiàm-ēng; I sī sèng, bô pháiⁿ, bô lâ-sâm, lī-khui chōe-jîn, chiâⁿ-chòe khah koâiⁿ chiah ê thiⁿ; 27 I m̄ bián chhin-chhiūⁿ hiah ê chè-si-thâu, tio̍h ji̍t-ji̍t tāi-seng ūi-tio̍h ka-kī ê chōe, āu-lâi ūi-tio̍h peh-sìⁿ ê chōe, lâi hiàn-chè; in-ūi I hiàn pún-sin, chiū chòe chi̍t-ē chiâⁿ chit ê sū. 28 In-ūi lu̍t-hoat siat-li̍p nńg-chiáⁿ ê lâng chòe chè-si-thâu; to̍k-to̍k lu̍t-hoat āu chiù-chōa ê ōe siat-li̍p Kiáⁿ, éng-oán chòe oân-choân ê chè-si-thâu.
1 Taⁿ阮所講其中第一要緊ê，就是咱有親像chit號ê祭司頭，已經坐tī天頂大威嚴ê寶座ê大pêng， 2 伊做聖所kap真ê會幕ê差用，chitê會幕是主所設ê，m̄是人所設ê。 3 凡若祭司頭lóng為tio̍h獻禮物kap祭祀來設立:所以chitê祭司頭亦的確tio̍h有所獻。 4 設使伊tī地裡，就無做祭司，因為已經有照律法teh獻禮物ê； 5 in所用來服事ê，就是天裡ê物ê像kap影；親像摩西beh造會幕ê時，受tio̍h命令，講，你tio̍h謹慎，照tī山頂所指示你ê款式，來造ta̍k項物。 6 Taⁿ耶穌已經得tio̍h khah尊貴ê職，是伊做koh-khah好ê約ê中保，就是用koh-khah好ê應允來設立ê。 7 因為頭一个約若無thang嫌，就無想beh立第二ê約。 8 因為有嫌in，就講， 主講，你看，時日beh到， 我beh kap以色列家，以及偤大家，成立新ê約； 9 m̄是照我kap in列祖所立ê約， 就是tī牽in ê手，chhōa in出埃及地ê時，所立ê； 因為in無常常守我ê約， 我也無看顧in： 這是主所講ê。 10 主koh講，Chiahê日了後， 我kap以色列家所beh立ê約是chitê， 就是我beh將我ê律法hē tī in ê頭腦， 刻tī in ê心：我beh做in ê上帝， In beh做我ê百姓: 11 In ta̍k人將來無教示in本城ê百姓， Kap in ta̍k人ê兄弟，講，你tio̍h bat主: 因為tùi細到大，in lóng beh bat我。 12 因為我beh憐憫in ê不義， 無koh記念in ê罪惡。 13 既然有講新ê，就是hō͘前ê約做舊。凡若舊來衰退ê就是將近無去。
1 Taⁿ goán só͘ kóng kî-tiong tē it iàu-kín ê, chiū-sī lán ū chhin-chhiūⁿ chit hō ê chè-si-thâu, í-keng chē tī thiⁿ-téng tōa ui-giâm ê pó-chō ê tōa pêng, 2 I chòe sèng-só͘ kap chin ê hōe-bō͘ ê chhe-ēng, chit ê hōe-bō͘ sī Chú só͘ siat ê, m̄ sī lâng só͘ siat ê. 3 Hoān-nā chè-si-thâu lóng ūi-tio̍h hiàn lé-mi̍h kap chè-sū lâi siat-li̍p: só͘-í chit ê chè-si-thâu ia̍h tek-khak tio̍h ū só͘ hiàn. 4 Siat-sú I tī tōe-ni̍h, chiū bô chòe chè-si, in-ūi í-keng ū chiàu lu̍t-hoat teh hiàn lé-mi̍h ê; 5 in só͘ ēng lâi ho̍k-sāi ê, chiū-sī thiⁿ-ni̍h ê mi̍h ê siōng kap iáⁿ; chhin-chhiūⁿ Mô͘-se beh chō hōe-bō͘ ê sî, siū-tio̍h bēng-lēng, kóng, Lí tio̍h kín-sīn, chiàu tī soaⁿ-téng só͘ chí-sī lí ê khoán-sit, lâi chō ta̍k hāng mi̍h. 6 Taⁿ Iâ-so͘ í-keng tit-tio̍h khah chun-kùi ê chit, sī I chòe koh khah hó ê iok ê tiong-pó, chiū-sī ēng koh khah hó ê èng-ún lâi siat-li̍p ê. 7 In-ūi thâu chi̍t ê iok nā bô thang hiâm, chiū bô siūⁿ beh li̍p tē jī ê iok. 8 In-ūi ū hiâm in, chiū kóng, Chú kóng, Lí khòaⁿ, sî-ji̍t beh kàu, Góa beh kap Í-sek-lia̍t ke, í-ki̍p Iû-tāi ke, sêng-li̍p sin ê iok; 9 M̄ sī chiàu góa kap in lia̍t-chó͘ só͘ li̍p ê iok, Chiū-sī tī khan in ê chhiú, chhōa in chhut Ai-ki̍p tōe ê sî, só͘ li̍p ê; In-ūi in bô siông-siông siú góa ê iok, Góa iā bô khòaⁿ-kò͘ in: che sī Chú só͘ kóng ê. 10 Chú koh kóng, Chiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê, Chiū-sī góa beh chiong góa ê lu̍t-hoat hē tī in ê thâu-náu, Khek tī in ê sim: Góa beh chòe in ê Siōng-tè, In beh chòe góa ê peh-sìⁿ: 11 In ta̍k lâng chiong-lâi bô kà-sī in pún siâⁿ ê peh-sìⁿ, Kap in ta̍k lâng ê hiaⁿ-tī, kóng, Lí tio̍h bat Chú: In-ūi tùi sòe kàu tōa, in lóng beh bat góa. 12 In-ūi góa beh lîn-bín in ê put-gī, Bô koh kì-liām in ê chōe-ok. 13 Kì-jiân ū kóng sin-ê, chiū-sī hō͘ chêng ê iok chòe kū. Hoān-nā kū lâi soe-thè ê chiū-sī chiong-kūn bô-khì.
1 Taⁿ hitê前ê約亦有服事ê禮儀，kap屬世間ê聖殿。 2 因為有備辦會幕，頭前間叫做聖所；hit內面有燈台，kap几桌，kap排列ê餅。 3 第二ê帳籬後koh有會幕，叫做至聖所； 4 hia有金香壇，kap ka-nn̂g ê包金ê約櫃，內面有khǹg má-ná ê金壺，亞倫puh芽ê柺á，kap約ê石碑兩塊； 5 櫃頂有榮光ê Ki-lō͘-peng，遮蓋施恩所；chit幾項taⁿ請免詳細講。 6 Chiahê物已經齊備，祭司常常入頭前間ê會幕，盡chiahê服事ê事； 7 但是第二間，只有祭司頭ta̍k年一pái家己入去，無一pái無帶血，為tio̍h本身kap百姓ê錯誤來獻； 8 聖神án-ni指明，前ê會幕iáu tī-teh ê時，入chiahê聖所ê路猶未顯明； 9 這是beh做現今ê譬喻；照án-ni有teh獻禮物祭祀，就是bōe會hō͘服事ê人照良心來得tio̍h完全ê； 10 因為hiahê(以及lim食kap ta̍k等號ê洗)不過是做肉體ê禮儀，設立來thèng候改正ê時。 11 Taⁿ基督已經到，做將來chiahê好事ê祭司頭，經過khah大khah齊全ê會幕，m̄是人ê手所起造，就是無屬tī chit世間ê， 12 伊亦m̄是用羊kap牛á ê血，就是用家己ê血，入聖所一pái就夠額，得tio̍h永遠ê贖回。 13 因為牛羊ê血，kap牛種á ê灰，hiù tī無清氣ê人，尚且能hō͘ in成聖到tī肉體清氣； 14 何況基督tùi永遠ê神，獻家己無瑕疵hō͘上帝，伊ê血kiám無koh-khah能清氣lín ê良心，脫離chiahê死ê所行，來服事真活ê上帝ah？ 15 因為án-ni，伊做新約ê中保，用死來贖前約ê時所犯ê罪過，是beh hō͘受召ê人得tio̍h永遠ê業ê應允。 16 凡若有遺命，的確tio̍h有遺命ê人死ê憑據。 17 因為已經死，就遺命堅固；遺命ê人iáu活tī-teh，就遺命beh-thái有力？ 18 所以前ê約亦m̄是無用血來設立。 19 因為摩西已經照律法將lóng總ê誡命傳hō͘眾百姓，就捧牛á kap羊ê血，以及水kap朱紅色ê綿kap牛膝草，來hiù hit本冊kap眾百姓，講， 20 Chitê就是上帝所吩咐lín ê約ê血。 21 Koh亦照án-ni，用血hiù會幕kap所用來服事ê器具。 22 Koh照律法，ta̍k項物差不多lóng是用血hō͘伊清氣，若無流血，就無赦免。 23 照天頂ê樣所做chiahê物，的確tio̍h用chiahê hō͘伊清氣；就tī天頂ê原物，tio̍h用比這khah好ê祭hō͘伊清氣。 24 因為基督m̄是入人ê手所造ê聖所，做真聖所ê影像ê；就是入tī真ê天，taⁿ為tio̍h咱chiahê顯現tī上帝ê面前； 25 伊亦免用家己ta̍uh-ta̍uh獻，親像hiahê祭司頭，ta̍k年用牛、羊ê血，入chiahê聖所； 26 若án-ni，就基督tùi創造世間以來，tio̍h ta̍uh-ta̍uh受苦：獨獨taⁿ tī chiahê世代ê路尾，伊一pái出現，獻本身做祭，來除去罪。 27 Koh照所註定ê，人有一pái死，以後有審判； 28 án-ni，基督已經一pái tú-tio̍h獻，來擔當chōe-chōe人ê罪過，beh第二pái，tùi ǹg望伊ê人出現，來救in；hit時出現kap罪無干涉。
1 Taⁿ hit ê chêng ê iok ia̍h ū ho̍k-sāi ê lé-gî, kap sio̍k sè-kan ê sèng-tiān. 2 In-ūi ū pī-pān hōe-bō͘, thâu-chêng keng kiò-chòe Sèng-só͘; hit lāi-bīn ū teng-tâi, kap kí-toh, kap pâi-lia̍t ê piáⁿ. 3 Tē jī ê tiùⁿ-lî āu koh ū hōe-bō͘, kiò chòe Chì-sèng-só͘; 4 hia ū kim hiuⁿ-tôaⁿ, kap ka-nn̂g ê pau-kim ê iok-kūi, lāi-bīn ū khǹg má-ná ê kim-ô͘, A-lûn puh-gê ê koáiⁿ-á, kap iok ê chio̍h-pi nn̄g tè; 5 kūi-téng ū êng-kng ê ki-lō͘-peng, jia-khàm si-un-só͘; chit kúi hāng taⁿ chhiáⁿ bián siông-sè kóng. 6 Chiah ê mi̍h í-keng chiâu-pī, chè-si siông-siông ji̍p thâu-chêng keng ê hōe-bō͘, chīn chiah ê ho̍k-sāi ê sū; 7 nā-sī tē jī keng, chí ū chè-si-thâu ta̍k nî chi̍t pái ka-kī ji̍p khì, bô chi̍t pái bô tòa huih, ūi-tio̍h pún-sin kap peh-sìⁿ ê chhò-gō͘ lâi hiàn; 8 Sèng Sîn án-ni chí-bêng, chêng ê hōe-bō͘ iáu tī-teh ê sî, ji̍p chiah ê sèng-só͘ ê lō͘ iáu-bē hián-bêng; 9 che sī beh chòe hiān-kim ê phì-jū; chiàu án-ni ū teh hiàn lé-mi̍h chè-sū, chiū-sī bōe-ōe hō͘ ho̍k-sāi ê lâng chiàu liông-sim lâi tit-tio̍h oân-choân ê; 10 in-ūi hiah-ê (í-ki̍p lim-chia̍h kap ta̍k téng-hō ê sóe) put-kò sī chòe jio̍k-thé ê lé-gî, siat-li̍p lâi thèng-hāu kái-chèng ê sî. 11 Taⁿ Ki-tok í-keng kàu, chòe chiong-lâi chiah ê hó sū ê chè-si-thâu, keng-kè khah tōa khah chiâu-chn̂g ê hōe-bō͘, m̄ sī lâng ê chhiú só͘ khí-chō, chiū-sī bô sio̍k tī chit sè-kan ê, 12 I ia̍h m̄ sī ēng iûⁿ kap gû-á ê huih, chiū-sī ēng ka-kī ê huih, ji̍p sèng-só͘ chi̍t pái chiū kàu-gia̍h, tit-tio̍h éng-oán ê sio̍k-hôe. 13 In-ūi gû iûⁿ ê huih, kap gû-chéng-á ê hu, hiù tī bô chheng-khì ê lâng, siōng-chhiáⁿ ōe hō͘ in chiâⁿ sèng kàu tī jio̍k-thé chheng-khì; 14 hô-hòng Ki-tok tùi éng-oán ê Sîn, hiàn ka-kī bô hâ-chhû hō͘ Siōng-tè, I ê huih kiám bô koh khah ōe chheng-khì lín ê liông-sim, thoat-lī chiah ê sí ê só͘ kiâⁿ, lâi ho̍k-sāi chin-oa̍h ê Siōng-tè ah? 15 In-ūi án-ni, I chòe sin iok ê tiong-pó, ēng sí lâi sio̍k chêng iok ê sî só͘ hoān ê chōe-kòa, sī beh hō͘ siū tiàu ê lâng tit-tio̍h éng-oán ê gia̍p ê èng-ún. 16 Hoān-nā ū ûi-bēng, tek-khak tio̍h ū ûi-bēng ê lâng sí ê pîn-kù. 17 In-ūi í-keng sí, chiū ûi-bēng kian-kò͘; ûi-bēng ê lâng iáu oa̍h tī-teh, chiū ûi-bēng beh-thái ū la̍t? 18 Só͘-í chêng ê iok ia̍h m̄ sī bô ēng huih lâi siat-li̍p. 19 In-ūi Mô͘-se í-keng chiàu lu̍t-hoat chiong lóng-chóng ê kài-bēng thoân hō͘ chèng peh-sìⁿ, chiū phâng gû-á kap iûⁿ ê huih, í-ki̍p chúi kap chu-âng sek ê mî kap gû-chhek-chháu, lâi hiù hit pún chheh kap chèng peh-sìⁿ, kóng, 20 Chit-ê chiū-sī Siōng-tè só͘ hoan-hù lín ê iok ê huih. 21 Koh ia̍h chiàu án-ni, ēng huih hiù hōe-bō͘ kap só͘ ēng lâi ho̍k-sāi ê khì-kū. 22 Koh chiàu lu̍t-hoat, ta̍k hāng mi̍h chha-put-to lóng sī ēng huih hō͘ i chheng-khì, nā bô lâu huih, chiū bô sià-bián. 23 Chiàu thiⁿ-téng ê iūⁿ só͘ chòe chiah ê mi̍h, tek-khak tio̍h ēng chiah-ê hō͘ i chheng-khì; chiū tī thiⁿ-téng ê goân mi̍h, tio̍h ēng pí che khah hó ê chè hō͘ i chheng-khì. 24 In-ūi Ki-tok m̄ sī ji̍p lâng ê chhiú só͘ chō ê sèng-só͘, chòe chin sèng-só͘ ê iáⁿ-siōng ê; chiū-sī ji̍p tī chin ê thiⁿ, taⁿ ūi-tio̍h lán chiah-ê hián-hiān tī Siōng-tè ê bīn-chêng; 25 I ia̍h bián ēng ka-kī ta̍uh-ta̍uh hiàn, chhin-chhiūⁿ hiah ê chè-si-thâu, ta̍k nî ēng gû iûⁿ ê huih, ji̍p chiah ê sèng-só͘; 26 nā án-ni, chiū Ki-tok tùi chhòng-chō sè-kan í-lâi, tio̍h ta̍uh-ta̍uh siū khó͘: to̍k-to̍k taⁿ tī chiah ê sè-tāi ê lō͘-bé, I chi̍t pái chhut-hiān, hiàn pún-sin chòe chè, lâi tû-khì chōe. 27 Koh chiàu só͘ chù-tiāⁿ ê, lâng ū chi̍t pái sí, í-āu ū sím-phòaⁿ; 28 án-ni, Ki-tok í-keng chi̍t pái tú-tio̍h hiàn, lâi tam-tng chōe-chōe lâng ê chōe-kòa, beh tē jī pái, tùi ǹg-bāng I ê lâng chhut-hiān, lâi kiù in; hit sî chhut-hiān kap chōe bô kan-sia̍p.
1 因為律法既然有將來好事ê影，無hiahê物ê真形；永永bōe會用ta̍k年常常teh獻相同ê祭，hō͘親近ê人得tio̍h完全。 2 若是能，就獻祭ê事kiám無停soah mah？因為服事ê人一下清氣，就良心無koh知有罪。 3 但是tùi chiahê祭物是hō͘人ta̍k年記得罪。 4 因為牛、羊ê血bōe會除去罪。 5 所以伊來入世間，就講， 祭祀禮物你m̄-ài， 你bat kā我備辦身軀； 6 燒祭kap贖罪祭，你無歡喜； 7 Hit時我講，你看，我來lah， 我ê事記載tī冊裡， 上帝，我來是beh行你ê旨意。 8 頂面已經講，祭祀kap禮物，燒祭kap贖罪祭，你m̄-ài，亦無歡喜，(chiahê是照律法來獻ê)， 9 後來講，你看，我來是beh行你ê旨意。伊是除去事先ê，beh設立tè後ê。 10 Tī chitê旨意，tùi耶穌基督一pái獻身軀，咱得tio̍h成聖。 11 Koh見若祭司ta̍k日khiā-teh來服事，ta̍uh-ta̍uh獻hiahê相同ê祭，就是永永bōe會除去罪ê； 12 獨獨基督，既然獻一个祭到tī永遠，就坐tī上帝ê大pêng； 13 以後thèng候伊chiahê對敵hē做伊ê腳踏椅。 14 因為伊用一pái獻祭，hō͘ chiahê成聖ê人永遠做完全。 15 聖神kā咱做干證：因為伊已經有講， 16 主講，Chiahê日了後， 我kap in所beh立ê約是chitê， 我beh將我ê律法hē tī in ê心， 刻tī in ê頭腦； 17 後來就講：「In ê罪惡，in ê不法，決斷無koh記念。」 18 Chiahê既然赦免，就無koh為tio̍h 罪獻祭。 19 所以兄弟ah，咱tī耶穌ê血既然得tio̍h好膽入聖所， 20 tùi伊所kā咱開新kap活ê路，àn帳籬經過ê，chitê帳籬就是伊ê身體； 21 koh既然有大祭司治理上帝ê家； 22 咱tio̍h用真實ê心，充滿ê信，心已經受hiù，免hō͘良心責備，身軀亦已經受清水洗，來親近上帝。 23 咱所ǹg望ê，已經有承認，taⁿ tio̍h堅固chitê承認無搖動；因為hitê應允咱ê是信實； 24 koh tio̍h大家相眷顧，來激起仁愛kap行好； 25 m̄-thang放soah lín ê聚會，親像有人慣勢án-ni，就是tio̍h相勸勉；既然看見hit日近，koh-khah tio̍h án-ni。 26 因為咱已經得tio̍h真知真理，後來若甘心teh犯罪，就無koh有贖罪ê祭， 27 獨獨驚惶來thèng候審判，kap beh吞滅對敵ê熱火。 28 棄絕摩西ê律法ê，有兩三人做干證，就hō͘伊死無憐憫: 29 何況thún踏上帝ê Kiáⁿ，將hō͘本身成聖ê約ê血做贖物，koh侮慢施恩ê聖神，lín想hit號人應該受ê刑罰tio̍h加jōa重ah？ 30 因為咱知是誰有講，伸冤在我，我beh報應。 31 Koh講，主beh審判伊ê百姓。陷落tī真活上帝ê手，真thang驚ah！ 32 Lín tio̍h記得前得tio̍h光照了後，忍受患難ê大交戰hiahê日； 33 或是受詈罵艱苦，hō͘人變弄做戲齣；á是人受chit號ê艱苦，lín亦kap伊有份。 34 因為人tī鎖鏈ê中間，lín bat體貼伊；人搶lín ê業，lín歡喜忍受，知家己有koh-khah好久長tī-teh ê業。 35 所以莫得棄sak lín好膽ê心，因為這有大報賞。 36 Lín要緊tio̍h吞忍，hō͘ lín，已經行上帝ê旨意，後來thang受所應允ê。 37 因為koh tiap-á久nā-tiāⁿ， Hit-ê teh來ê beh到，伊無beh 延chhiân。 38 但是我ê義人beh tùi信來活: 設使伊kiu-koe̍h，我ê心無歡喜伊。 39 總是咱m̄是kiu-koe̍h，致到沉淪ê；是有信，致到靈魂得救ê。
1 In-ūi lu̍t-hoat kì-jiân ū chiong-lâi hó sū ê iáⁿ, bô hiah ê mi̍h ê chin hêng; éng-éng bōe-ōe ēng ta̍k nî siông-siông teh hiàn saⁿ-tâng ê chè, hō͘ chhin-kūn ê lâng tit-tio̍h oân-choân. 2 Nā sī ōe, chiū hiàn-chè ê sū kiám bô thêng-soah mah? in-ūi ho̍k-sāi ê lâng chi̍t-ē chheng-khì, chiū liông-sim bô koh chai ū chōe. 3 Nā-sī tùi chiah ê chè-mi̍h sī hō͘ lâng ta̍k nî kì-tit chōe. 4 In-ūi gû iûⁿ ê huih bōe-ōe tû-khì chōe. 5 Só͘-í I lâi ji̍p sè-kan, chiū kóng, Chè-sū lé-mi̍h lí m̄ ài, Lí bat kā góa pī-pān sin-khu; 6 Sio-chè kap sio̍k-chōe chè, lí bô hoaⁿ-hí; 7 Hit sî góa kóng, Lí khòaⁿ, góa lâi lah, Góa ê sū kì-chài tī chheh-ni̍h, Siōng-tè, góa lâi sī beh kiâⁿ lí ê chí-ì. 8 Téng-bīn í-keng kóng, Chè-sū kap lé-mi̍h, sio-chè kap sio̍k-chōe chè, lí m̄ ài, ia̍h bô hoaⁿ-hí, (chiah-ê sī chiàu lu̍t-hoat lâi hiàn ê), 9 āu-lâi kóng, Lí khòaⁿ, góa lâi sī beh kiâⁿ lí ê chí-ì. I sī tû-khì tāi-seng ê, beh siat-li̍p tè-āu ê. 10 Tī chit ê chí-ì, tùi Iâ-so͘ Ki-tok chi̍t pái hiàn seng-khu, lán tit-tio̍h chiâⁿ sèng. 11 Koh kìⁿ-nā chè-si ta̍k ji̍t khiā-teh lâi ho̍k-sāi, ta̍uh-ta̍uh hiàn hiah ê saⁿ-tâng ê chè, chiū-sī éng-éng bōe-ōe tû-khì chōe ê; 12 to̍k-to̍k Ki-tok, kì-jiân hiàn chi̍t ê chè kàu tī éng-oán, chiū chē tī Siōng-tè ê tōa pêng; 13 í-āu thèng-hāu I chiah ê tùi-te̍k hē chòe I ê kha-ta̍h-í. 14 In-ūi I ēng chi̍t pái hiàn-chè, hō͘ chiah ê chiâⁿ-sèng ê lâng éng-oán chòe oân-choân. 15 Sèng Sîn kā lán chòe kan-chèng: in-ūi I í-keng ū kóng, 16 Chú kóng, Chiah ê ji̍t liáu-āu, Góa kap in só͘ beh li̍p ê iok sī chit-ê, Góa beh chiong góa ê lu̍t-hoat hē tī in ê sim, Khek tī in ê thâu-náu; 17 āu-lâi chiū kóng, "In ê chōe-ok, in ê put-hoat, koat-toàn bô koh kì-liām." 18 Chiah-ê kì-jiân sià-bián, chiū bô koh ūi-tio̍h chōe hiàn-chè. 19 Só͘-í hiaⁿ-tī ah, lán tī Iâ-so͘ ê huih kì-jiân tit-tio̍h hó-táⁿ ji̍p sèng-só͘, 20 tùi I só͘ kā lán khui sin kap oa̍h ê lō͘, àn tiùⁿ-lî keng-kè ê, chit ê tiùⁿ-lî chiū-sī I ê sin-thé; 21 koh kì-jiân ū tōa chè-si tī-lí Siōng-tè ê ke; 22 lán tio̍h ēng chin-si̍t ê sim, chhiong-móa ê sìn, sim í-keng siū hiù bián hō͘ liông-sim chek-pī, seng-khu ia̍h í-keng siū chheng-chúi sóe, lâi chhin-kūn Siōng-tè. 23 Lán só͘ ǹg-bāng ê, í-keng ū sêng-jīn, taⁿ tio̍h kian-kò͘ chit ê sêng-jīn bô iô-tāng; in-ūi hit ê èng-ún lán ê sī sìn-si̍t; 24 koh tio̍h tāi-ke saⁿ koàn-kò͘, lâi kek-khí jîn-ài kap kiâⁿ hó; 25 m̄ thang pàng-soah lín ê chū-hōe, chhin-chhiūⁿ ū lâng koàiⁿ-sì án-ni, chiū-sī tio̍h saⁿ khoàn-bián; kì-jiân khòaⁿ-kìⁿ hit ji̍t kūn, koh khah tio̍h án-ni. 26 In-ūi lán í-keng tit-tio̍h chin-chai chin-lí, āu-lâi nā kam-sim teh hoān-chōe, chiū bô koh ū sio̍k-chōe ê chè, 27 to̍k-to̍k kiaⁿ-hiâⁿ lâi thèng-hāu sím-phòaⁿ, kap beh thun-bia̍t tùi-te̍k ê jia̍t hé. 28 Khì-choa̍t Mô͘-se ê lu̍t-hoat ê, ū nn̄g saⁿ lâng chòe kan-chèng, chiū hō͘ i sí bô lîn-bín: 29 hô-hòng thún-ta̍h Siōng-tè ê Kiáⁿ, chiong hō͘ pún-sin chiâⁿ sèng ê iok ê huih chòe sio̍k mi̍h, koh bú-bān si un ê Sèng Sîn, lín siūⁿ hit hō lâng eng-kai siū ê hêng-hoa̍t tio̍h ke jōa tāng ah? 30 In-ūi lán chai chī-chūi ū kóng, Sin-oan chāi góa, góa beh pò-èng. 31 Koh kóng, Chú beh sím-phòaⁿ I ê peh-sìⁿ. Hām-lo̍h tī chin-oa̍h Siōng-tè ê chhiú, chin thang kiaⁿ ah! 32 Lín tio̍h kì-tit chêng tit-tio̍h kng chiò liáu-āu, jím-siū hoān-lān ê tōa kau-chiàn hiah ê ji̍t; 33 he̍k-sī siū lóe-mē kan-khó͘, hō͘ lâng pìⁿ-lāng chòe hì-chhut; á-sī lâng siū chit hō ê kan-khó͘, lín ia̍h kap i ū hūn. 34 In-ūi lâng tī só-liān ê tiong-kan, lín bat thé-thiap i; lâng chhiúⁿ lín ê gia̍p, lín hoaⁿ-hí jím-siū, chai ka-kī ū koh khah hó kú-tn̂g tī-teh ê gia̍p. 35 Só͘-í bo̍h-tit khì-sak lín hó-táⁿ ê sim, in-ūi che ū tōa pò-siúⁿ. 36 Lín iàu-kín tio̍h thun-lún, hō͘ lín, í-keng kiâⁿ Siōng-tè ê chí-ì, āu-lâi thang siū só͘ èng-ún ê. 37 In-ūi koh tiap-á-kú nā-tiāⁿ, Hit ê teh-lâi-ê beh kàu, I bô beh iân-chhiân. 38 Nā-sī góa ê gī lâng beh tùi sìn lâi oa̍h: Siat-sú i kiu-koe̍h, góa ê sim bô hoaⁿ-hí i. 39 Chóng-sī lán m̄ sī kiu-koe̍h, tì-kàu tîm-lûn ê; sī ū sìn, tì-kàu lêng-hûn tit kiù ê.
1 信就是所ǹg望ê ê實在，kap 未看見ê事ê憑準。 2 因為tī chitê，就古早人有得tio̍h干證。 3 Tùi信，咱知chiahê世界是tùi上帝ê話來造成；án-ni所看見ê m̄是tùi能看見ê來成。 4 Tùi信，亞伯獻祭hō͘上帝，比該隱khah好；tùi án-ni得tio̍h干證伊是義，就是上帝看伊ê禮物來做干證；koh tùi chitê信，伊死了iáu teh講話。 5 Tùi信，以諾受遷徙，致到無見tio̍h死；人chhē伊bōe tio̍h，因為上帝遷徙伊；是未遷徙ê事先，有得tio̍h干證伊hō͘上帝歡喜。 6 設使無信，就bōe會hō͘上帝歡喜；因為親近上帝ê，的確tio̍h信伊有，也是報賞hiahê求伊ê人。 7 Tùi信，挪亞tī 未看見ê事，已經得tio̍h默示，就敬畏，來備辦大船，救伊ê家眷；tùi án-ni來定世間ê罪，koh得tio̍h承接照信ê義。 8 Tùi信，亞伯拉罕受召ê時，就順命令出去，到將來beh得tio̍h做業ê地；伊出去，m̄知beh去tá-lo̍h。 9 Tùi信就出外tī所應允ê地，親像tī m̄是家己ê地，khiā起tī布棚，kap以撒、雅各，就是saⁿ-kap承接同一樣ê應允ê； 10 因為伊ǹg望有地基ê城，是上帝所經營起造ê。 11 Tùi信，撒拉，sui-bóng過生產ê年歲，iáu得tio̍h能懷孕，因為伊掠應允伊ê做信實； 12 所以tùi一人，koh是親像已經死ê，生湠親像天星ê chōe，親像海沙ê bōe算得。 13 Chiahê lóng是照信來死，未bat得tio̍h所應允ê，獨獨遠遠看，歡喜來等接，koh家己認tī地上做人客，做出外ê。 14 因為án-ni講ê，是表明in teh chhē一个祖家。 15 In若siàu念所tùi hia出來ê地，就有thang tò去ê機會。 16 總是taⁿ in欣慕koh-khah好ê，就是tī天裡ê；所以上帝稱做in ê上帝，無掠做見笑；因為已經替in備辦一个城。 17 Tùi信，亞伯拉罕受試ê時，獻以撒；就是hitê承受chiahê應允ê獻伊獨生ê kiáⁿ； 18 bat有kā伊講，Tùi以撒生ê beh稱做你ê後裔: 19 因為伊掠做上帝tùi死人中能hō͘伊koh活；所以thang譬喻講得tio̍h伊tùi死倒tńg來。 20 Tùi信，以撒論將來ê事祝福雅各、以掃。 21 Tùi信，雅各臨終ê時，kā約瑟兩個kiáⁿ祝福；òa柺á來敬拜。 22 Tùi信，約瑟臨終ê時，念tio̍h以色列ê後裔beh出埃及；koh為tio̍h伊ê骨骸來吩咐。 23 Tùi信，就摩西出世ê時，伊ê父母，因為看見kiáⁿ清秀，khǹg密伊三月日；亦m̄驚王ê命令。 24 Tùi信，摩西已經長成，m̄承認做法老cha-bó͘-kiáⁿ ê kiáⁿ； 25 khah-ài kap上帝ê百姓saⁿ-kap受苦難，m̄-ài暫時享受罪惡ê快樂； 26 掠做有份基督ê凌辱，比埃及ê財寶khah貴氣：是ǹg望報賞ê緣故。 27 Tùi信，伊離開埃及，無驚王ê受氣；堅心忍耐，親像看見所bōe看見ê主。 28 Tùi信，來設pôaⁿ過節，kap抹血ê禮，免得剿滅大kiáⁿ ê 磕tio̍h in。 29 Tùi信，in 過紅海，親像行乾地：埃及人試行伊，就沉落去。 30 Tùi信，se̍h耶利哥城歷過七日，城就倒壞。 31 Tùi信，娼妓Lat-ha̍p用和平接納細作，所以無kap m̄順thàn ê人saⁿ-kap滅無。 32 我beh koh講甚麼ah？beh講基甸、Pa-le̍k、參孫、Iâ-hut-tha；kap大衛、撒母耳，以及chiahê先知，就時無夠額。 33 Hiah-ê人，tùi信，刣贏chiahê國，行公義，得tio̍h應允，ni̍h獅ê嘴， 34 phah-hoa火燄，閃避利刀，弱成做強，交戰勇猛，攻破外邦ê戰陣。 35 有婦人人得tio̍h in ê親人tùi死koh活；亦有人受酷毒 ê刑罰，m̄願受贖；是ài得tio̍h khah好ê koh活: 36 koh有人受戲弄、鞭phah，以及鎖鏈、關監，chiahê試： 37 koh有人受石頭tìm，鋸á鋸，受誘惑ê試，hō͘刀刣死：穿綿羊、山羊ê皮，奔波ta̍k所在，tú-tio̍h sòng-hiong、患難、暴虐； 38 有ê tī曠野，tī山嶺，tī石洞，tī地穴，四界漂流；chiahê人是世間bōe堪得有ê。 39 In lóng已經tùi信得tio̍h干證，但是未bat得tio̍h所應允ê； 40 因為上帝kā咱事先備辦koh-khah好ê事，是beh hō͘ in，若無咱，就bōe得tio̍h完全。
1 Sìn chiū-sī só͘ ǹg-bāng ê ê si̍t-chāi, kap bē khòaⁿ-kìⁿ ê sū ê pîn-chún. 2 In-ūi tī chit-ê, chiū kó͘-chá lâng ū tit-tio̍h kan-chèng. 3 Tùi sìn, lán chai chiah ê sè-kài sī tùi Siōng-tè ê ōe lâi chō-chiâⁿ; án-ni só͘ khòaⁿ-kìⁿ ê m̄ sī tùi ōe khòaⁿ-kìⁿ ê lâi chiâⁿ. 4 Tùi sìn, A-pek hiàn-chè hō͘ Siōng-tè, pí Kai-ún khah hó; tùi án-ni tit-tio̍h kan-chèng i sī gī, chiū-sī Siōng-tè khòaⁿ i ê lé-mi̍h lâi chòe kan-chèng; koh tùi chit ê sìn, i sí-liáu iáu teh kóng ōe. 5 Tùi sìn, Í-lo̍k siū chhian-sóa, tì-kàu bô kìⁿ-tio̍h sí; lâng chhē i bōe tio̍h, in-ūi Siōng-tè chhian-sóa i; sī bē chhian-sóa ê tāi-seng, ū tit-tio̍h kan-chèng i hō͘ Siōng-tè hoaⁿ-hí. 6 Siat-sú bô sìn, chiū bōe-ōe hō͘ Siōng-tè hoaⁿ-hí; in-ūi chhin-kūn Siōng-tè ê, tek-khak tio̍h sìn I ū, iā sī pò-siúⁿ hiah ê kiû I ê lâng. 7 Tùi sìn, Ná-a tī bē khòaⁿ-kìⁿ ê sū, í-keng tit-tio̍h be̍k-sī, chiū kèng-ùi, lâi pī-pān tōa chûn, kiù i ê ke-koàn; tùi án-ni lâi tēng sè-kan ê chōe, koh tit-tio̍h sêng-chiap chiàu sìn ê gī. 8 Tùi sìn, A-pek-la̍h-hán siū tiàu ê sî, chiū sūn bēng-lēng chhut-khì, kàu chiong-lâi beh tit-tio̍h chòe gia̍p ê tōe; i chhut-khì, m̄ chai beh khì tá-lo̍h. 9 Tùi sìn chiū chhut-gōa tī só͘ èng-ún ê tōe, chhin-chhiūⁿ tī m̄ sī ka-kī ê tōe, khiā-khí tī pò͘-pîⁿ, kap Í-sat, Ngá-kok, chiū-sī saⁿ-kap sêng-chiap tâng chi̍t iūⁿ ê èng-ún ê; 10 in-ūi i ǹg-bāng ū tōe-ki ê siâⁿ, sī Siōng-tè só͘ keng-êng khí-chō ê. 11 Tùi sìn, Sat-la̍h, sui-bóng kè seng-sán ê nî-hè, iáu tit-tio̍h ōe hoâi-īn, in-ūi i lia̍h èng-ún i ê chòe sìn-si̍t; 12 só͘-í tùi chi̍t lâng, koh sī chhin-chhiūⁿ í-keng sí ê, siⁿ-thòaⁿ chhin-chhiūⁿ thiⁿ chhiⁿ ê chōe, chhin-chhiūⁿ hái-soa ê bōe sǹg-tit. 13 Chiah-ê lóng sī chiàu sìn lâi sí, bē bat tit-tio̍h só͘ èng-ún ê, to̍k-to̍k hn̄g-hn̄g khòaⁿ, hoaⁿ-hí lâi tán-chih, koh ka-kī jīn tī tōe-chiūⁿ chòe lâng-kheh, chòe chhut-gōa ê. 14 In-ūi án-ni kóng ê, sī piáu-bêng in teh chhē chi̍t ê chó͘-ke. 15 In nā siàu-liām só͘ tùi hia chhut-lâi ê tōe, chiū ū thang tò-khì ê ki-hōe. 16 Chóng-sī taⁿ in him-bō͘ koh khah hó ê, chiū-sī tī thiⁿ-ni̍h ê; só͘-í Siōng-tè chheng-chòe in ê Siōng-tè, bô lia̍h-chòe kiàn-siàu; in-ūi í-keng thòe in pī-pān chi̍t ê siâⁿ. 17 Tùi sìn, A-pek-la̍h-hán siū chhì ê sî, hiàn Í-sat; chiū-sī hit ê sêng-siū chiah ê èng-ún ê hiàn i to̍k-siⁿ ê kiáⁿ; 18 bat ū kā i kóng, Tùi Í-sat siⁿ ê beh chheng-chòe lí ê hō͘-è: 19 in-ūi i lia̍h-chòe Siōng-tè tùi sí-lâng tiong ōe hō͘ i koh-oa̍h; só͘-í thang phì-jū kóng tit-tio̍h i tùi sí tò-tńg-lâi. 20 Tùi sìn, Í-sat lūn chiong-lâi ê sū chiok-hok Ngá-kok, Í-sò. 21 Tùi sìn, Ngá-kok lîm-chiong ê sî, kā Iok-sek nn̄g ê kiáⁿ chiok-hok; òa koáiⁿ-á lâi kèng-pài. 22 Tùi-sìn, Iok-sek lîm-chiong ê sî, liām-tio̍h Í-sek-lia̍t ê hō͘-è beh chhut Ai-ki̍p; koh ūi-tio̍h i ê kut-hâi lâi hoan-hù. 23 Tùi sìn, chiū Mô͘-se chhut-sì ê sî, i ê pē-bú, in-ūi khòaⁿ-kìⁿ kiáⁿ chheng-siù, khǹg-ba̍t i saⁿ ge̍h ji̍t; ia̍h m̄ kiaⁿ ông ê bēng-lēng. 24 Tùi sìn, Mô͘-se í-keng tióng-sêng, m̄ sêng-jīn chòe Hoat-ló cha-bó͘-kiáⁿ ê kiáⁿ; 25 khah ài kap Siōng-tè ê peh-sìⁿ saⁿ-kap siū khó͘-lān, m̄ ài chiām-sî hióng-siū chōe-ok ê khoài-lo̍k; 26 lia̍h-chòe ū hūn Ki-tok ê lêng-jio̍k, pí Ai-ki̍p ê châi-pó khah kùi-khì: sī ǹg-bāng pò-siúⁿ ê iân-kò͘. 27 Tùi sìn, i lī-khui Ai-ki̍p, bô kiaⁿ ông ê siū-khì; kian-sim jím-nāi, chhin-chhiūⁿ khòaⁿ-kìⁿ só͘ bōe khòaⁿ-kìⁿ ê Chú. 28 Tùi sìn, lâi siat pôaⁿ-kè-choeh, kap boah huih ê lé, bián-tit châu-bia̍t tōa kiáⁿ ê kha̍p-tio̍h in. 29 Tùi sìn, in kè Âng-hái, chhin-chhiūⁿ kiâⁿ ta tōe: Ai-ki̍p lâng chhì kiâⁿ i, chiū tîm-lo̍h-khì. 30 Tùi sìn, se̍h Iâ-lī-ko siâⁿ le̍k-kè chhit ji̍t, siâⁿ chiū tó-hoāi. 31 Tùi sìn, chhiong-ki Lat-ha̍p ēng hô-pêng chiap-la̍p sòe-choh, só͘-í bô kap m̄ sūn-thàn ê lâng saⁿ-kap bia̍t-bô. 32 Góa beh koh kóng sím-mi̍h ah? beh kóng Ki-tiân, Pa-le̍k, Chham-sun, Iâ-hut-tha; kap Tāi-pi̍t, Sat-bó͘-ní, í-ki̍p chiah ê sian-ti, chiū sî bô kàu-gia̍h. 33 Hiah ê lâng, tùi sìn, thâi-iâⁿ chiah ê kok, kiâⁿ kong-gī, tit-tio̍h èng-ún, ni̍h sai ê chhùi, 34 phah-hoa hé-iām, siám-pī lāi to, jio̍k chiâⁿ-chòe kiông, kau-chiàn ióng-béng, kong-phòa gōa-pang ê chiàn-tīn. 35 Ū hū-jîn-lâng tit-tio̍h in ê chhin-lâng tùi sí koh-oa̍h; ia̍h ū lâng siū khok-to̍k ê hêng-hoa̍t, m̄ goān siū sio̍k; sī ài tit-tio̍h khah hó ê koh-oa̍h: 36 koh ū lâng siū hì-lāng, piⁿ-phah, í-ki̍p só-liān, koaiⁿ-kaⁿ, chiah ê chhì: 37 koh ū lâng siū chio̍h-thâu tìm, kù-á kù, siū iú-he̍k ê chhì, hō͘ to thâi-sí: chhēng mî-iûⁿ soaⁿ-iûⁿ ê phê, phun-pho ta̍k só͘-chāi, tú-tio̍h sòng-hiong, hoān-lān, pō-gio̍k; 38 ū-ê tī khòng-iá, tī soaⁿ-niá, tī chio̍h-tōng, tī tōe-hia̍t, sì-kè phiau-liû; chiah ê lâng sī sè-kan bōe kham-tit ū ê. 39 In lóng í-keng tùi sìn tit-tio̍h kan-chèng, nā-sī bē bat tit-tio̍h só͘ èng-ún ê; 40 in-ūi Siōng-tè kā lán tāi-seng pī-pān koh khah hó ê sū, sī beh hō͘ in, nā bô lán, chiū bōe tit-tio̍h oân-choân.
1 已經有做干證ê到hiah-chōe，親像雲圍咱，就tio̍h放下ta̍k號ê重擔，kap快快纏絆咱ê罪，用吞忍來走所安排tī咱頭前ê路站， 2 tio̍h注神看耶穌，就是做信ê源頭kap chhiâⁿ尾ê。伊為tio̍h所安排tī伊頭前ê快樂，就無要緊凌辱，忍受十字架，taⁿ坐tī上帝寶座ê大pêng。 3 伊吞忍pháiⁿ人親像án-ni橫逆伊，lín tio̍h想伊，免得lín ê心失志來厭倦。 4 Lín kap罪惡相對敵，猶未bat抵擋到流血； 5 koh lín bōe記得hitê用理氣勸lín親像勸kiáⁿ ê話，講， 我ê kiáⁿ ah，主ê警戒莫得看輕， Hō͘伊責備，莫得失志； 6 因為主所疼ê，就警戒伊； Koh凡所接納ê kiáⁿ，就用鞭phah伊。" 7 Lín teh吞忍，是做警戒ê路用；上帝款待lín親像kiáⁿ；thái-thó有kiáⁿ無hō͘老父警戒ah？ 8 眾kiáⁿ所有份ê警戒，lín若無受tio̍h；就是偷生ê，m̄是kiáⁿ。 9 Koh咱bat有肉體ê父警戒咱，咱尚且敬畏伊；何況咱ê神ê父，kiám m̄ koh-khah tio̍h降服伊，來得tio̍h活mah？ 10 因為hiahê是暫時chhut-chāi家己ê意思來警戒咱；獨獨chitê是為tio̍h咱ê利益，hō͘咱有份tī伊ê聖潔。 11 見若警戒ê事，tī當時照看m̄是歡喜，是憂悶；但是後來，就tī hiahê tùi警戒來練達ê人，結平安ê果子，就是義ê果子。 12 所以腳酸手軟ê，lín tio̍h hō͘伊勇健； 13 為tio̍h lín ê腳備辦直直ê路，免得跛腳ê人歪chhoa̍h，反tńg hō͘伊得tio̍h醫好。 14 Tio̍h致意kap眾人和睦，以及成聖，因為若m̄是聖無人會見tio̍h主； 15 亦tio̍h謹慎，驚了有人失落上帝ê恩；驚了有苦ê根發生來攪擾lín，致到chōe-chōe人bak lâ-sâm； 16 驚了有淫亂ê，á是沉溺世情ê，親像以掃；伊因為一頓食賣大kiáⁿ ê業。 17 因為lín知，伊後來ài承接祝福ê時，有tú-tio̍h棄sak，因為伊chhē無反悔ê地步，雖然流目屎迫切求，亦bōe得tio̍h。 18 Taⁿ lín所到ê m̄是能摸得有火燄ê山，kap密雲、烏暗、大風， 19 號頭ê音，言語ê聲；聽見ê人求莫得koh kap in講； 20 因為所命令ê，in當bōe-tiâu，是講，就若走獸óa-tio̍h山，也tio̍h用石頭tìm死； 21 koh所看見極其thang驚，致到摩西講，我不止驚到ngia̍uh-ngia̍uh-chhoah； 22 獨獨lín所到ê就是郇山，真活上帝ê城，天頂ê耶路撒冷，萬萬ê天使， 23 hiahê有名記tī天裡ê大kiáⁿ ê聚會kap公會，審判眾人ê上帝，得tio̍h齊全ê義人ê靈魂， 24 新約ê中保耶穌，kap所hiù ê血，chitê血所講ê比A-pek khah好。 25 謹慎莫得拒絕tùi lín講ê。因為tī地裡來傳命令ê，若拒絕伊，尚且bōe會逃閃，何況咱違背tùi天傳命令ê ah？ 26 當時伊ê聲hō͘地振動；但是taⁿ有應允講，iáu有一pái我m̄-nā hō͘地搖choah，亦beh hō͘天搖choah。 27 所講，iáu有一pái，是指明受振動ê物，就是受造ê物，beh tú-tio̍h遷徙，hō͘ hiahê無受振動ê長長tī-teh。 28 所以咱得tio̍h bōe會振動ê 國，tio̍h有恩惠，thang用虔誠敬畏來服事hō͘上帝歡喜； 29 因為咱ê上帝就是燄燄ê 火。
1 Í-keng ū chòe kan-chèng ê kàu hiah chōe, chhin-chhiūⁿ hûn ûi lán, chiū tio̍h pàng-hē ta̍k hō ê tāng tàⁿ, kap khoài-khoài tîⁿ-pòaⁿ lán ê chōe, ēng thun-lún lâi cháu só͘ an-pâi tī lán thâu-chêng ê lō͘-chām, 2 tio̍h chù-sîn khòaⁿ Iâ-so͘, chiū-sī chòe sìn ê goân-thâu kap chhiâⁿ-bé ê. I ūi-tio̍h só͘ an-pâi tī I thâu-chêng ê khoài-lo̍k, chiū bô iàu-kín lêng-jio̍k, jím-siū si̍p-jī-kè, taⁿ chē tī Siōng-tè pó-chō ê tōa pêng. 3 I thun-lún pháiⁿ lâng chhin-chhiūⁿ án-ni hêng-ge̍k I, lín tio̍h siūⁿ I, bián-tit lín ê sim sit-chì lâi ià-siān. 4 Lín kap chōe-ok saⁿ tùi-te̍k, iáu-bē bat tí-tng kàu lâu huih; 5 koh lín bōe kì-tit hit-ê ēng lí-khì khǹg lín chhin-chhiūⁿ khǹg kiáⁿ ê ōe, kóng, Góa ê kiáⁿ ah, Chú ê kéng-kài bo̍h-tit khòaⁿ-khin, Hō͘ I chek-pī, bo̍h-tit sit-chì; 6 In-ūi Chú só͘ thiàⁿ ê, chiū kéng-kài i; Koh hoān só͘ chiap-la̍p ê kiáⁿ, chiū ēng piⁿ phah i. " 7 Lín teh thun-lún, sī chòe kéng-kài ê lō͘-ēng; Siōng-tè khoán-thāi lín chhin-chhiūⁿ kiáⁿ; thái-thó ū kiáⁿ bô hō͘ lāu-pē kéng-kài ah? 8 Chèng kiáⁿ só͘ ū hūn ê kéng-kài lín nā bô siū-tio̍h; chiū-sī thau-siⁿ-ê, m̄ sī kiáⁿ. 9 Koh lán bat ū jio̍k-thé ê pē kéng-kài lán, lán siōng-chhiáⁿ kèng-ùi i; hô-hòng lán ê sîn ê Pē, kiám m̄ koh khah tio̍h hâng-ho̍k I, lâi tit-tio̍h oa̍h mah? 10 In-ūi hiah-ê sī chiām-sî chhut-chāi ka-kī ê ì-sù lâi kéng-kài lán; to̍k-to̍k chit-ê sī ūi-tio̍h lán ê lī-ek, hō͘ lán ū hūn tī I ê sèng-kiat. 11 Kìⁿ-nā kéng-kài ê sū, tī tng-sî chiàu-khòaⁿ m̄ sī hoaⁿ-hí, sī iu-būn; nā-sī āu-lâi, chiū tī hiah-ê tùi kéng-kài lâi liān-ta̍t ê lâng, kiat pêng-an ê ké-chí, chiū-sī gī ê ké-chí. 12 Só͘-í kha sng chhiú nńg ê, lín tio̍h hō͘ i ióng-kiāⁿ; 13 ūi-tio̍h lín ê kha pī-pān ti̍t-ti̍t ê lō͘, bián-tit pái-kha ê lâng oai-chhoa̍h, hoán-tńg hō͘ i tit-tio̍h i-hó. 14 Tio̍h tì-ì kap chèng lâng hô-bo̍k, í-ki̍p chiâⁿ-sèng, in-ūi nā m̄ sī sèng bô lâng ōe kìⁿ-tio̍h Chú; 15 ia̍h tio̍h kín-sīn, kiaⁿ-liáu ū lâng sit-lo̍h Siōng-tè ê un; kiaⁿ-liáu ū khó͘ ê kun hoat-siⁿ lâi kiáu-jiáu lín, tì-kàu chōe-chōe lâng bak lâ-sâm; 16 kiaⁿ-liáu ū îm-loān ê, á-sī tîm-le̍k sè-chêng ê, chhin-chhiūⁿ Í-sò; i in-ūi chi̍t tǹg chia̍h bōe tōa kiáⁿ ê gia̍p. 17 In-ūi lín chai, i āu-lâi ài sêng-chiap chiok-hok ê sî, ū tú-tio̍h khì-sak, in-ūi i chhē bô hoán-hóe ê tōe-pō͘, sui-jiân lâu ba̍k-sái pek-chhiat kiû, ia̍h bōe tit-tio̍h. 18 Taⁿ lín só͘ kàu ê m̄ sī ōe bong-tit ū hé-iām ê soaⁿ, kap ba̍t hûn, o͘-àm, tōa hong, 19 hō-thâu ê im, giân-gú ê siaⁿ; thiaⁿ-kìⁿ ê lâng kiû bo̍h-tit koh kap in kóng; 20 in-ūi só͘ bēng-lēng ê, in tng bōe tiâu, sī kóng, Chiū nā cháu-siù óa-tio̍h soaⁿ, iā tio̍h ēng chio̍h-thâu tìm sí; 21 koh só͘ khòaⁿ-kìⁿ ke̍k-kî thang kiaⁿ, tì-kàu Mô͘-se kóng, Góa put-chí kiaⁿ kàu ngia̍uh-ngia̍uh-chhoah; 22 to̍k-to̍k lín só͘ kàu ê chiū-sī Sûn-soaⁿ, chin-oa̍h Siōng-tè ê siâⁿ, thiⁿ-téng ê Iâ-lō͘-sat-léng, bān-bān ê thiⁿ-sài, 23 hiah ê ū miâ kì tī thiⁿ-ni̍h ê tōa kiáⁿ ê chū-hōe kap kong-hōe, sím-phòaⁿ chèng lâng ê Siōng-tè, tit-tio̍h chiâu-chn̂g ê gī lâng ê lêng-hûn, 24 sin-iok ê tiong-pó Iâ-so͘, kap só͘ hiù ê huih, chit ê huih só͘ kóng ê pí A-pek khah hó. 25 Kín-sīn bo̍h-tit kū-choa̍t tùi lín kóng ê. In-ūi tī tōe-ni̍h lâi thoân bēng-lēng ê, nā kū-choa̍t i, siōng-chhiáⁿ bōe-ōe tô-siám, hô-hòng lán ûi-pōe tùi thiⁿ thoân bēng-lēng ê ah? 26 Tong-sî I ê siaⁿ hō͘ tōe tín-tāng; nā-sī taⁿ ū èng-ún kóng, Iáu ū chi̍t pái góa m̄ nā hō͘ tōe iô-choah, ia̍h beh hō͘ thiⁿ iô-choah. 27 Só͘ kóng, Iáu ū chi̍t pái, sī chí-bêng siū tín-tāng ê mi̍h, chiū-sī siū-chō ê mi̍h, beh tú-tio̍h chhian-sóa, hō͘ hiah ê bô siū tín-tāng ê tn̂g-tn̂g tī-teh. 28 Só͘-í lán tit-tio̍h bōe-ōe tín-tāng ê kok, tio̍h ū un-hūi, thang ēng khiân-sêng kèng-ùi lâi ho̍k-sāi hō͘ Siōng-tè hoaⁿ-hí; 29 in-ūi lán ê Siōng-tè chiū-sī iām-iām ê hé.
1 兄弟ê相疼tio̍h久長。 2 莫得bōe記得接待人客；因為tùi án-ni，bat有接待tio̍h天使，亦m̄知ê。 3 Tio̍h siàu念chiahê受關ê，親像kap in相同關；siàu念受暴虐 ê，是lín亦有身軀。 4 婚姻人人tio̍h尊重，床無lâ-sâm；因為私通行淫ê人，上帝beh審判伊。 5 心志m̄-thang貪財；掠所有ê做夠額；因為上帝有講，我決斷無放sak你，決斷無離開你。 6 所以咱thang好膽講， 主就是幫贊我ê，我無beh驚惶， 人beh啥法得我ta-ôa？" 7 前引chhōa lín，用上帝ê道理傳hō͘ lín ê人，lín tio̍h siàu念in；看in行做ê結局，來學in ê信。 8 耶穌基督昨日、今á日同一樣，直到代代。 9 Lín莫得hō͘ chhap雜各樣ê教所遷徙；因為心tùi恩典來堅固chiah是好；m̄是tùi hiahê食物；因為用工tī hiahê物ê，無利益。 10 咱有祭壇，服事tī會幕ê無權thang食伊。 11 因為cheng-siⁿ ê血hō͘祭司頭帶入聖所來贖罪，hiahê cheng-siⁿ ê身體就燒tī營外。 12 所以耶穌因為beh用家己ê血hō͘百姓成聖，亦受苦tī城門外。 13 Án-ni咱亦tio̍h出營外來就近伊，受伊所受ê凌辱。 14 因為tī chia咱無久長tī-teh ê城，是chhē hitê將來ê。 15 所以tio̍h對耶穌常常用o-ló做祭，獻hō͘上帝；這就是承認主名ê嘴唇所結ê果子。 16 獨獨行好，kap相供給，lín m̄-thang bōe記得，因為chit號ê祭是上帝所歡喜ê。 17 引chhōa lín ê，lín tio̍h聽thàn順服in；因為in為tio̍h lín ê靈魂警醒，是將來tio̍h家己排列ê；lín tio̍h hō͘ in用歡喜來做，無用吐氣；因為chitê無利益lín。 18 Lín tio̍h替阮祈禱；阮信家己有照良心，凡事ài照正直來行。 19 我益發勸lín行án-ni，hō͘我thang khah緊koh就近lín。 20 Taⁿ願平安ê上帝，就是bat tī永遠ê約ê血，tùi死人中chhōa羊群ê大牧者，咱ê主耶穌，koh起來， 21 hō͘ lín tī ta̍k項好事完全，來行伊ê旨意，koh對耶穌基督，tī咱ê心內，行tāi-chì，得tio̍h歡喜tī伊ê面前；願榮光歸tī伊，代代無soah。À-bēng。 22 兄弟ah，我寫短短ê phoe hō͘ lín；勸lín接納我勸勉ê話。 23 Lín tio̍h知咱ê兄弟提摩太已經得tio̍h tháu放；伊若緊緊來，我beh kap伊去見lín。 24 請lín請安chiahê引chhōa lín ê人kap眾聖徒。有意大利ê人請安lín。 25 願恩典kap lín眾人tī-teh。À-bēng。
1 Hiaⁿ-tī ê saⁿ-thiàⁿ tio̍h kú-tn̂g. 2 Bo̍h-tit bōe kì-tit chiap-thāi lâng-kheh; in-ūi tùi án-ni, bat ū chiap-thāi-tio̍h thiⁿ-sài, ia̍h m̄ chai ê. 3 Tio̍h siàu-liām chiah ê siū koaiⁿ ê, chhin-chhiūⁿ kap in saⁿ-tâng koaiⁿ; siàu-liām siū pō-gio̍k ê, sī lín ia̍h ū seng-khu. 4 Hun-in lâng-lâng tio̍h chun-tiōng, chhn̂g bô lâ-sâm; in-ūi su-thong kiâⁿ-îm ê lâng, Siōng-tè beh sím-phòaⁿ i. 5 Sim-chì m̄ thang tham châi; lia̍h só͘ ū ê chòe kàu-gia̍h; in-ūi Siōng-tè ū kóng, Góa koat-toàn bô pàng-sak lí, koat-toàn bô lī-khui lí. 6 Só͘-í lán thang hó-táⁿ kóng, Chú chiū-sī pang-chān góa ê, góa bô beh kiaⁿ-hiâⁿ, Lâng beh siáⁿ hoat-tit góa ta-ôa?" 7 Chêng ín-chhōa lín, ēng Siōng-tè ê tō-lí thoân hō͘ lín ê lâng, lín tio̍h siàu-liām in; khòaⁿ in kiâⁿ-chòe ê kiat-kio̍k, lâi o̍h in ê sìn. 8 Iâ-so͘ Ki-tok chā-ji̍t kin-á-ji̍t tâng chi̍t iūⁿ, ti̍t kàu tāi-tāi. 9 Lín bo̍h-tit hō͘ chhap-cha̍p koh-iūⁿ ê kàu só͘ chhian-sóa; in-ūi sim tùi un-tián lâi kian-kò͘ chiah sī hó; m̄ sī tùi hiah ê chia̍h-mi̍h; in-ūi ēng kang tī hiah ê mi̍h ê, bô lī-ek. 10 Lán ū chè-tôaⁿ, ho̍k-sāi tī hōe-bō͘ ê bô koân thang chia̍h i. 11 In-ūi cheng-siⁿ ê huih hō͘ chè-si-thâu tòa ji̍p sèng-só͘ lâi sio̍k chōe, hiah ê cheng-siⁿ ê sin-thé chiū sio tī iâⁿ-gōa. 12 Só͘-í Iâ-so͘ in-ūi beh ēng ka-kī ê huih hō͘ peh-sìⁿ chiâⁿ-sèng, ia̍h siū khó͘ tī siâⁿ mn̂g gōa. 13 Án-ni lán ia̍h tio̍h chhut iâⁿ gōa lâi chiū-kūn I, siū I só͘ siū ê lêng-jio̍k. 14 In-ūi tī chia lán bô kú-tn̂g tī-teh ê siâⁿ, sī chhē hit ê chiong-lâi ê. 15 Só͘-í tio̍h tùi Iâ-so͘ siông-siông ēng o-ló chòe chè, hiàn hō͘ Siōng-tè; che chiū-sī sêng-jīn Chú miâ ê chhùi-tûn só͘ kiat ê ké-chí. 16 To̍k-to̍k kiâⁿ hó, kap saⁿ kiong-kip, lín m̄ thang bōe kì-tit, in-ūi chit hō ê chè sī Siōng-tè só͘ hoaⁿ-hí ê. 17 Ín-chhōa lín ê, lín tio̍h thiaⁿ-thàn sūn-ho̍k in; in-ūi in ūi-tio̍h lín ê lêng-hûn kéng-séng, sī chiong-lâi tio̍h ka-kī pâi-lia̍t ê; lín tio̍h hō͘ in ēng hoaⁿ-hí lâi chòe, bô ēng thó͘-khùi; in-ūi chit-ê bô lī-ek lín. 18 Lín tio̍h thòe goán kî-tó; goán sìn ka-kī ū chiàu liông-sim, hoān sū ài chiàu chèng-ti̍t lâi kiâⁿ. 19 Góa it-hoat khǹg lín kiâⁿ án-ni, hō͘ góa thang khah kín koh chiū-kūn lín. 20 Taⁿ goān pêng-an ê Siōng-tè, chiū-sī bat tī éng-oán ê iok ê huih tùi sí-lâng tiong chhōa iûⁿ-kûn ê tōa bo̍k-chiá, lán ê Chú Iâ-so͘, koh khí-lâi, 21 hō͘ lín tī ta̍k hāng hó sū oân-choân, lâi kiâⁿ I ê chí-ì, koh tùi Iâ-so͘ Ki-tok, tī lán ê sim-lāi, kiâⁿ tāi-chì, tit-tio̍h hoaⁿ-hí tī I ê bīn-chêng; goān êng-kng kui tī I, tāi-tāi bô soah. À-bēng. 22 Hiaⁿ-tī ah, góa siá té-té ê phoe hō͘ lín; khǹg lín chiap-la̍p góa khoàn-bián ê ōe. 23 Lín tio̍h chai lán ê hiaⁿ-tī Thê-mô͘-thài í-keng tit-tio̍h tháu-pàng; i nā kín-kín lâi, góa beh kap i khì kìⁿ lín. 24 Chhiáⁿ lín chhéng-an chiah ê ín-chhōa lín ê lâng kap chèng sèng-tô͘. Ū Í-tāi-lī ê lâng chhéng-an lín. 25 Goān un-tián kap lín chèng-lâng tī-teh. À-bēng.