1 便雅憫地，A-ná-tu̍t城ê祭司中，Hi-le̍k-ka ê kiáⁿ，耶利米ê話記tī下底。 2 當偤大王A-bûn ê kiáⁿ約西亞坐位ê十三年，耶和華ê話臨到伊。 3 Koh tī偤大王約西亞ê kiáⁿ Iok-ngá-kèng坐位ê時，直到偤大王約西亞ê kiáⁿ Se-tí-ka十一年ê路尾；五月間，耶路撒冷人受掠ê時，耶和華ê話臨到伊。 4 耶和華ê話臨到我，講， 5 我未創造你tī腹肚內ê事先，我bat你；你未出胎ê事先，我分別你做聖；設立你做列國ê先知。 6 我就講，害ah！主耶和華ah，你看，我bōe曉講，因為我是gín-ná。 7 總是耶和華對我講，你m̄-thang講，我是gín-ná；因為我見有差你，你tio̍h去；我見有吩咐你，你tio̍h講。 8 你莫得驚in，因為我kap你tī-teh，beh救你；這是耶和華講ê。 9 耶和華就伸祂ê手摸我ê嘴。耶和華kā我講，你看，我有將我ê話，hē tī你ê嘴。 10 看ah，今á日我設立你tī列邦列國ê頂面；是為tio̍h beh拔出，beh拆毀，beh敗壞，beh chhia倒，beh建立，beh栽培。 11 耶和華ê話koh臨到我講，耶利米ah，你看見甚麼？我講，我看見杏樹ê一支。 12 耶和華就對我講，你所看是tio̍h；我teh關顧我ê話來成伊。 13 耶和華ê話第二pái臨到我講，你看見甚麼？我講，我看見一个鼎teh滾，伊ê面tùi北勢ǹg過來。 14 耶和華就對我講，Beh有災厄tùi北方發出，臨到chit所在一切khiā起ê百姓。 15 耶和華講，看ah，我beh召北方列國ê眾族；in beh來，ta̍k-ê安座位tī耶路撒冷chiahê城門口；周圍攻擊城牆，亦beh攻擊偤大一切ê城。 16 論到chitê百姓一切ê pháiⁿ，就是離開我，ǹg別ê上帝燒香；跪拜in ê手所做ê；我beh講起我ê判斷來攻擊in。 17 所以你tio̍h 縖腰，起來，將我所吩咐你一切ê話kā in講；莫得因為in來驚惶，驚了我hō͘你tī in ê面前來驚惶。 18 看ah，因為我今á日hō͘你成做堅固ê城，做鐵柱，做銅牆，來抵擋全地，以及偤大ê列王、貴族、祭司，kap chit所在ê眾百姓。 19 In beh攻擊你，總是bōe能贏你；因為我kap你tī-teh，beh拯救你；這是耶和華講ê。
1 Piān-ngá-bín tōe, A-ná-tu̍t siâⁿ ê chè-si tiong, Hi-le̍k-ka ê kiáⁿ, Iâ-lī-bí ê ōe kì tī ē-tóe. 2 Tng Iû-tāi ông A-bûn ê kiáⁿ Iok-se-a chē-ūi ê cha̍p-saⁿ--nî, Iâ-hô-hoa ê ōe lîm-kàu i. 3 Koh tī Iû-tāi ông Iok-se-a ê kiáⁿ Iok-ngá-kèng chē-ūi ê sî, ti̍t-kàu Iû-tāi ông Iok-se-a ê kiáⁿ Se-tí-ka cha̍p-it--nî ê lō͘-bé; gō͘-ge̍h kan, Iâ-lō͘-sat-léng lâng siū-lia̍h ê sî, Iâ-hô-hoa ê ōe lîm-kàu i. 4 Iâ-hô-hoa ê ōe lîm-kàu góa, kóng, 5 Góa bē chhòng-chō lí tī pak-tó͘-lāi ê tāi-seng, Góa bat lí; lí bē chhut-thai ê tāi-seng, Góa hun-piat lí chòe-sèng; siat-li̍p lí chòe lia̍t-kok ê sian-ti. 6 Góa chiū kóng, Hāi--ah! Chú Iâ-hô-hoa ah, lí khòaⁿ, góa bōe hiáu kóng, in-ūi góa sī gín-ná. 7 Chóng-sī Iâ-hô-hoa tùi góa kóng, Lí m̄-thang kóng, Góa sī gín-ná; in-ūi Góa kìⁿ-ū chhe lí, lí tio̍h khì; Góa kìⁿ-ū hoan-hù lí, lí tio̍h kóng. 8 Lí bo̍h-tit kiaⁿ--in, in-ūi Góa kap lí tī-teh, beh kiù lí; che sī Iâ-hô-hoa kóng ê. 9 Iâ-hô-hoa chiū chhun I ê chhiú bong góa ê chhùi. Iâ-hô-hoa kā góa kóng, Lí khòaⁿ, Góa ū chiong Góa ê ōe, hē tī lí ê chhùi. 10 Khòaⁿ ah, kin-á-ji̍t Góa siat-li̍p lí tī lia̍t-pang lia̍t-kok ê téng-bīn; sī ūi-tio̍h beh pu̍ih-chhut, beh thiah-húi, beh pāi-hoāi, beh chhia-tó, beh kiàn-li̍p, beh chai-pôe. 11 Iâ-hô-hoa ê ōe koh lîm-kàu góa kóng, Iâ-lī-bí ah, lí khòaⁿ-kìⁿ sím-mi̍h? Góa kóng, Góa khòaⁿ-kìⁿ hēng-chhiū ê chi̍t-ki. 12 Iâ-hô-hoa chiū tùi góa kóng, Lí só͘ khòaⁿ sī tio̍h; Góa teh koan-kò͘ Góa ê ōe lâi chiâⁿ--i. 13 Iâ-hô-hoa ê ōe tē-jī pái lîm-kàu góa kóng, Lí khòaⁿ-kìⁿ sím-mi̍h? Góa kóng, Góa khòaⁿ-kìⁿ chi̍t ê tiáⁿ teh kún, i ê bīn tùi pak--sì ǹg kè--lâi. 14 Iâ-hô-hoa chiū tùi góa kóng, Beh ū chai-ē tùi pak-hng hoat-chhut, lîm-kàu chit só͘-chāi it-chhè khiā-khí ê peh-sìⁿ. 15 Iâ-hô-hoa kóng, Khòaⁿ ah, Góa beh tiàu pak-hng lia̍t-kok ê chèng-cho̍k; in beh lâi, ta̍k-ê an chō-ūi tī Iâ-lō͘-sat-léng chiah ê siâⁿ-mn̂g-kháu; chiu-ûi kong-kek siâⁿ-chhiûⁿ, ia̍h beh kong-kek Iû-tāi it-chhè ê siâⁿ. 16 Lūn-kàu chit ê peh-sìⁿ it-chhè ê pháiⁿ, chiū-sī lī-khui Góa, ǹg pa̍t ê siōng-tè sio-hiuⁿ; kūi-pài in ê chhiú só͘ chòe--ê; Góa beh kóng-khí Góa ê phòaⁿ-toàn lâi kong-kek in. 17 Só͘-í lí tio̍h hâ-io, khí--lâi, chiong Góa só͘ hoan-hù lí it-chhè ê ōe kā in kóng; bo̍h-tit in-ūi in lâi kiaⁿ-hiâⁿ, kiaⁿ-liáu Góa hō͘ lí tī in ê bīn-chêng lâi kiaⁿ-hiâⁿ. 18 Khòaⁿ ah, in-ūi Góa kin-á-ji̍t hō͘ lí chiâⁿ-chòe kian-kò͘ ê siâⁿ, chòe thih-thiāu, chòe tâng-chhiûⁿ, lâi tí-tng choân-tōe, í-ki̍p Iû-tāi ê lia̍t-ông, kùi-cho̍k, chè-si, kap chit só͘-chāi ê chèng peh-sìⁿ. 19 In beh kong-kek lí, chóng-sī bōe-ōe iâⁿ lí; in-ūi Góa kap lí tī-teh, beh chín-kiù lí; che sī Iâ-hô-hoa kóng--ê.
1 耶和華ê話koh臨到我，講， 2 你去ǹg耶路撒冷人ê耳孔叫講，耶和華án-ni講，你少年ê恩愛，婚姻ê愛情，你怎á樣tī曠野，tī bē-bat種作ê地，跟tè我；我lóng kā你記得。 3 Hit時以色列做聖歸耶和華；做伊起頭熟ê土產；見若吞食伊ê，beh算做有罪；災厄beh臨到in；這是耶和華講ê。 4 雅各ê家ah，以色列家ê ta̍k房頭ah，lín tio̍h聽耶和華ê話。 5 耶和華án-ni講，Lín ê列祖看我有甚麼不義，竟然離開我遠遠，去thàn hiahê虛假ê，來做虛假ê ah？ 6 In亦無講，hitê chhōa咱出埃及地ê耶和華tī toh-lo̍h？伊是chhōa咱經過曠野、沙漠，kap深坑ê所在，炕旱死蔭ê地；無人經過，無人khiā起ê境界。 7 我chhōa lín入肥ê地，hō͘ lín食hit中間ê果子kap好物；總是lín入來了，就phah lâ-sâm我ê地；hō͘我ê產業成做可惡ê。 8 祭司lóng無講，耶和華tī toh-lo̍h leh？講解律法ê m̄-bat我，官長悖謬我，先知靠Pa-le̍k來讖語，koh thàn無利益ê事。 9 耶和華講，我因為án-ni beh kap lín爭辯；亦beh kap lín ê kiáⁿ-kiáⁿ孫孫爭辯。 10 Lín tio̍h過去Ki-thê chiahê海嶼來觀看，差人去Ki-ta̍t留心查考；看bat有chit號事á無。 11 Kiám有一國改換in ê上帝 mah？其實hiahê m̄是上帝；總是我ê百姓將in ê榮光來換hitê無利益ê。 12 Chiahê天ah，tio̍h因為chitê來gông-ngia̍h，極其驚惶，盡在冷靜；這是耶和華講ê。 13 因為我ê百姓做兩項pháiⁿ-tāi，就是我做活水ê源頭，in離開我；koh為家己開池，是破裂bōe貯水ê池。 14 以色列是奴僕mah？是家中生ê奴僕mah？為何成做受搶ê物ah？ 15 勇ê獅ǹg伊hm̄-hm̄哮，出大聲，hō͘伊ê地拋荒；城亦lóng燒毀，無人khiā起。 16 Lô-hut人kap Tap-pí-le̍k人亦phah碎你ê頭殼頂。 17 Chitê事kiám m̄是你家己取ê mah？因為你ê上帝耶和華chhōa你行路ê時，你有棄sak伊。 18 Taⁿ你啥事tī埃及ê路，是beh lim Se-hat ê水mah？你啥事tī亞述ê路，是beh lim大河ê水mah？ 19 你家己ê pháiⁿ beh警戒你；你悖逆ê事beh責備你；tùi án-ni thang知，thang看出你棄sak你ê上帝耶和華，無存敬畏我ê心，就是pháiⁿ koh艱苦ê事；這是主萬軍ê耶和華講ê。 20 我tī古早ê時，at折你ê擔，tháu開你ê索；你講，我m̄順服；因為你tī ta̍k ê高山頂，ta̍k叢青翠ê樹腳，屈落身軀行淫。 21 但是我bat栽種你，是上等ê葡萄樹，全然是真ê種子；你對tī我怎樣變做別款葡萄樹ê pháiⁿ枝ah？ 22 你雖bóng用鹼(kiⁿ)，用chōe-chōe雪文來洗，你ê罪惡ê痕跡猶原顯出tī我ê面前；這是主耶和華講ê。 23 你thái-thó會講，我無bak-tio̍h lâ-sâm，無tè chiahê Pa-le̍k ah？你看，你山谷中ê路，就知你所行ê怎樣；你是單陵gâu走ê駱駝，走來走去。 24 你是野驢，慣勢tī曠野；慾心發動，就吸風；瘋(siáu)ê時，是誰 能阻止伊ah？見若chhē伊ê，m̄免tio̍h磨；tī伊hit月，的確能chhē-tio̍h。 25 你tio̍h禁止你ê腳，免致無鞋；禁止你ê嚨喉，免致嘴乾；總是你講，這是無chhái-kang，m̄-ah；我已經戀慕別ê；我beh tè in。 26 賊hō͘人掠tio̍h，怎樣見笑，以色列家 kap in ê君王、貴族、祭司、先知，亦lóng án-ni見笑。 27 In對柴頭講，你是我ê父；對石頭講，你是生我ê。In用ka-chiah ǹg我，無用面ǹg我；到tú-tio̍h患難ê時，chiah講，起來，來救阮。 28 你為家己所造ê上帝 tī toh-lo̍h？伊若會救你，tī你tú-tio̍h患難ê時，就tio̍h起來救你；偤大ah，你ê上帝ê數額kap你ê城ê數額平平chōe。 29 耶和華講，Lín啥事kap我爭辯？lín lóng悖逆我。 30 我督責lín ê kiáⁿ兒，是空空；in無受警戒。Lín ê刀，親像猛獅，吞咬lín ê先知。 31 Chit世代ah，lín tio̍h明耶和華ê話；我對tī以色列kiám bat做親像曠野，á是bat做親像烏暗ê地ah？我ê百姓啥事講，阮脫離約束，m̄ koh歸向你lah？ 32 在室女kiám會bōe記得伊ê裝飾mah？新娘kiám會bōe記得伊ê súi衫？總是我ê百姓bōe記得我bōe算得日。 33 你怎樣修整你ê路，要求寵愛；連pháiⁿ婦人人，你亦用你ê路教示in。 34 Koh你ê衫á裾有無罪ê sòng-hiong人ê血；m̄是tī iah厝孔ê所在tú-tio̍h，是tī ta̍k所在lóng有。 35 你iáu-kú講，我無罪；耶和華ê受氣的確oa̍t-tńg離開我。看ah，我beh審問你，因為你家己講，我無犯罪。 36 你啥事走東走西，beh改換你ê路ah？你beh因為埃及來見笑，親像前因為亞述來見笑一樣。 37 你亦beh雙手抱頭殼，tùi hia出來；因為耶和華已經棄絕你所óa靠ê；你亦bōe tùi in得tio̍h興通。
1 Iâ-hô-hoa ê ōe koh lîm-kàu góa, kóng, 2 Lí khì ǹg Iâ-lō͘-sat-léng lâng ê hī-khang kiò kóng, Iâ-hô-hoa án-ni kóng, Lí siàu-liân ê un-ài, hun-in ê ài-chêng, lí cháiⁿ-á-iūⁿ tī khòng-iá, tī bē-bat chèng-choh ê tōe, kun-tè Góa; Góa lóng kā lí kì-tit. 3 Hit-sî Í-sek-lia̍t chòe-sèng kui Iâ-hô-hoa; chòe I khí-thâu se̍k ê thó͘-sán; kìⁿ-nā thun-chia̍h i--ê, beh sǹg chòe ū chōe; chai-ē beh lîm-kàu in; che sī Iâ-hô-hoa kóng--ê. 4 Ngá-kok ê ke ah, Í-sek-lia̍t ke ê ta̍k pâng-thâu ah, lín tio̍h thiaⁿ Iâ-hô-hoa ê ōe. 5 Iâ-hô-hoa án-ni kóng, Lín ê lia̍t-chó͘ khòaⁿ Góa ū sím-mi̍h put-gī, kéng-jiân lī-khui Góa hn̄g-hn̄g, khì thàn hiah ê hu-ké--ê, lâi chòe hu-ké--ê ah? 6 In ia̍h bô kóng, Hit ê chhōa lán chhut Ai-ki̍p tōe ê Iâ-hô-hoa tī toh-lo̍h? I sī chhōa lán keng-kè khòng-iá, soa-bô͘, kap chhim-khiⁿ ê só͘-chāi, khòng-hān sí-ìm ê tōe; bô lâng keng-kè, bô lâng khiā-khí ê kéng-kài. 7 Góa chhōa lín ji̍p pûi ê tōe, hō͘ lín chia̍h hit tiong-kan ê ké-chí kap hó-mi̍h; chóng-sī lín ji̍p-lâi-liáu, chiū phah lâ-sâm Góa ê tōe; hō͘ Góa ê sán-gia̍p chiâⁿ-chòe khó-ò͘ⁿ--ê. 8 Chè-si lóng bô kóng, Iâ-hô-hoa tī toh-lo̍h leh? káng-kái lu̍t-hoat--ê m̄-bat Góa, koaⁿ-tiúⁿ pōe-biū Góa, sian-ti khò Pa-le̍k lâi chhàm-gú, koh thàn bô lī-ek ê sū. 9 Iâ-hô-hoa kóng, Góa in-ūi án-ni beh kap lín cheng-piān; ia̍h beh kap lín ê kiáⁿ-kiáⁿ sun-sun cheng-piān. 10 Lín tio̍h kè-khì Ki-thê chiah ê hái-sū lâi koan-khòaⁿ, chhe lâng khì Ki-ta̍t liû-sim cha-khó; khòaⁿ bat ū chit-hō sū á-bô. 11 Kiám ū chi̍t-kok kóe-ōaⁿ in ê siōng-tè mah? kî-si̍t hiah-ê m̄-sī Siōng-tè; chóng-sī Góa ê peh-sìⁿ chiong in ê êng-kng lâi ōaⁿ hit-ê bô lī-ek--ê. 12 Chiah ê thiⁿ ah, tio̍h in-ūi chit-ê lâi gông-ngia̍h, ke̍k-kî kiaⁿ-hiâⁿ, chīn-chāi léng-chēng; che sī Iâ-hô-hoa kóng--ê. 13 In-ūi Góa ê peh-sìⁿ chòe nn̄g-hāng pháiⁿ-tāi, chiū-sī Góa chòe oa̍h-chúi ê goân-thâu, in lī-khui Góa; koh ūi ka-kī khui tî, sī phòa-li̍h bōe tóe chúi ê tî. 14 Í-sek-lia̍t sī lô͘-po̍k mah? Sī ke-tiong siⁿ ê lô͘-po̍k mah? Ūi-hô chiâⁿ-chòe siū chhiúⁿ ê mi̍h ah? 15 Ióng ê sai ǹg i hm̄-hm̄-háu, chhut tōa-siaⁿ, hō͘ i ê tōe pha-hng; siâⁿ ia̍h lóng sio-húi, bô lâng khiā-khí. 16 Lô-hut lâng kap Tap-pí-le̍k lâng ia̍h phah-chhùi lí ê thâu-khak-téng. 17 Chit ê sū kiám-m̄-sī lí ka-kī chhú--ê mah? in-ūi lí ê Siōng-tè Iâ-hô-hoa chhōa lí kiâⁿ-lō͘ ê sî, lí ū khì-sak I. 18 Taⁿ lí siáⁿ-sū tī Ai-ki̍p ê lō͘, sī beh lim Se-hat ê chúi mah? lí siáⁿ-sū tī A-su̍t ê lō͘, sī beh lim Tōa-hô ê chúi mah? 19 Lí ka-kī ê pháiⁿ beh kéng-kài lí; lí pōe-ge̍k ê sū beh chek-pī lí; tùi án-ni thang chai, thang khòaⁿ-chhut lí khì-sak lí ê Siōng-tè Iâ-hô-hoa, bô chûn kèng-ùi Góa ê sim, chiū-sī pháiⁿ koh kan-khó͘ ê sū; che sī Chú bān-kun ê Iâ-hô-hoa kóng--ê. 20 Góa tī kó͘-chá ê sî, at-chi̍h lí ê taⁿ, tháu-khui lí ê soh; lí kóng, Góa m̄ sūn-ho̍k; in-ūi lí tī ta̍k ê koâiⁿ-soaⁿ-téng, ta̍k châng chhiⁿ-chhùi ê chhiū-kha, khut-lo̍h sin-khu kiâⁿ-îm. 21 Nā-sī Góa bat chai-chèng lí, sī siōng-téng ê phû-tô-chhiū, choân-jiân sī chin ê chéng-chí; lí tùi-tī Góa cháiⁿ-iūⁿ pìⁿ-chòe pa̍t-khoán phû-tô-chhiū ê pháiⁿ-ki ah? 22 Lí sui-bóng ēng kiⁿ, ēng chōe-chōe soat-bûn lâi sóe, lí ê chōe-ok ê hûn-jiah iû-goân hián-chhut tī Góa ê bīn-chêng; che sī Chú Iâ-hô-hoa kóng--ê. 23 Lí thái-thó ōe kóng, Góa bô bak--tio̍h lâ-sâm, bô tè chiah ê Pa-le̍k ah? lí khòaⁿ, lí soaⁿ-kok-tiong ê lō͘, chiū chai lí só͘ kiâⁿ--ê cháiⁿ-iūⁿ; lí sī toaⁿ-niā gâu cháu ê lo̍k-tô, cháu-lâi cháu-khì. 24 Lí sī iá-lû, koàiⁿ-sì tī khòng-iá; io̍k-sim hoat-tōng, chiū khip-hong; siáu ê sî, chī-chūi ōe chó͘-chí i ah? kìⁿ-nā chhē i ê, m̄-bián tio̍h-bôa; tī i hit-ge̍h, tek-khak ōe chhē--tio̍h. 25 Lí tio̍h kìm-chí lí ê kha, bián-tì bô ôe; kìm-chí lí ê nâ-âu, bián-tì chhùi-ta; chóng-sī lí kóng, Che sī bô chhái-kang, m̄--ah; góa í-keng loân-bō͘ pa̍t-ê; góa beh tè in. 26 Chha̍t hō͘ lâng lia̍h--tio̍h, cháiⁿ-iūⁿ kiàn-siàu, Í-sek-lia̍t ke kap in ê kun-ông, kùi-cho̍k, chè-si, sian-ti, ia̍h lóng án-ni kiàn-siàu. 27 In tùi chhâ-thâu kóng, Lí sī góa ê pē; tùi chio̍h-thâu kóng, Lí sī siⁿ-góa-ê. In ēng ka-chiah ǹg Góa, bô ēng bīn ǹg Góa; kàu tú-tio̍h hoān-lān ê sî, chiah kóng, Khí--lâi, lâi kiù goán. 28 Lí ūi ka-kī só͘ chō ê siōng-tè tī toh-lo̍h? i nā ōe kiù lí, tī lí tú-tio̍h hoān-lān ê sî, chiū tio̍h khí-lâi kiù lí; Iû-tāi ah, lí ê siōng-tè ê siàu-gia̍h kap lí ê siâⁿ ê siàu-gia̍h pîⁿ-pîⁿ chōe. 29 Iâ-hô-hoa kóng, Lín siáⁿ-sū kap Góa cheng-piān? lín lóng pōe-ge̍k Góa. 30 Góa tok-chek lín ê kiáⁿ-jî, sī khang-khang; in bô siū kéng-kài. Lín ê to, chhin-chhiūⁿ béng sai, thun-kā lín ê sian-ti. 31 Chit sè-tāi ah, lín tio̍h bêng Iâ-hô-hoa ê ōe; Góa tùi-tī Í-sek-lia̍t kiám bat chòe chhin-chhiūⁿ khòng-iá, á-sī bat chòe chhin-chhiūⁿ o͘-àm ê tōe ah? Góa ê peh-sìⁿ siáⁿ-sū kóng, Goán thoat-lī iok-sok, m̄ koh kui-ǹg Lí lah? 32 Chāi-sek-lú kiám ōe bōe-kì-tit i ê chng-thāⁿ mah? sin-niû kiám ōe bōe-kì-tit i ê súi-saⁿ? chóng-sī Góa ê peh-sìⁿ bōe-kì-tit Góa bōe sǹg-tit ji̍t. 33 Lí cháiⁿ-iūⁿ siu-chéng lí ê lō͘, iau-kiû thióng-ài; liân pháiⁿ hū-jîn-lâng, lí ia̍h ēng lí ê lō͘ kà-sī in. 34 Koh lí ê saⁿ-á-ku ū bô-chōe ê sòng-hiong lâng ê huih; m̄-sī tī iah chhù-khang ê só͘-chāi tú-tio̍h, sī tī ta̍k só͘-chāi lóng ū. 35 Lí iáu-kú kóng, Góa bô chōe; Iâ-hô-hoa ê siū-khì tek-khak oa̍t-tńg lī-khui góa. Khòaⁿ ah, Góa beh sím-mn̄g lí, in-ūi lí ka-kī kóng, Góa bô hoān-chōe. 36 Lí siáⁿ-sū cháu-tang cháu-sai, beh kóe-ōaⁿ lí ê lō͘ ah? lí beh in-ūi Ai-ki̍p lâi kiàn-siàu, chhin-chhiūⁿ chêng in-ūi A-su̍t lâi kiàn-siàu chi̍t-iūⁿ. 37 Lí ia̍h beh siang-chhiú phō thâu-khak, tùi hia chhut-lâi; in-ūi Iâ-hô-hoa í-keng khì-choa̍t lí só͘ óa-khò--ê; lí ia̍h bōe tùi in tit-tio̍h heng-thong.
1 有teh講，人若離出伊ê bó͘，bó͘就離開伊，嫁別人；就伊前ê丈夫kiám thang koh親近伊mah？若án-ni，hitê地方kiám無bak-tio̍h lâ-sâm mah？獨獨你kap chōe-chōe親愛ê行淫，iáu-kú thang歸tī我；這是耶和華講ê。 2 你tio̍h kia̍h目看chiahê光khō-khō高ê所在；tī toh-lo̍h無有淫行ah？你坐tī路邊thèng候，親像阿拉伯人tī曠野一樣；koh用你ê淫行邪惡phah lâ-sâm全地。 3 因為án-ni，好ê雨水停止，春天ê雨無落；你iáu有娼妓ê面，m̄知見笑。 4 你kiám m̄ tùi chit時叫我講，我ê父ah，你是我少年ê時，引chhōa我ê？ 5 伊kiám永永khǹg受氣，留到路尾mah？看ah，你有án-ni講，iáu-kú盡你所能ê行pháiⁿ。 6 當約西亞王坐位ê時，耶和華koh對我講，悖逆ê以色列所做ê，你有看見無？伊上chiahê高山，tī lóng總青翠ê樹腳行淫亂。 7 伊行chiahê tāi-chì以後，我講，伊beh歸óa我，總是伊無，伊奸詐ê小妹偤大亦有看見。 8 悖逆ê以色列行淫亂，我為tio̍h chitê緣故hō͘伊離書，離出伊；我看見伊奸詐ê小妹偤大，猶原無驚，亦是去行淫。 9 伊隨便行伊ê淫亂，就phah lâ-sâm chitê地方；就kap石頭柴頭行淫。 10 雖然有chiahê一切ê事，伊奸詐ê小妹偤大猶原無專心歸向我，不過是假意nā-tiāⁿ；這是耶和華講ê。 11 耶和華對我講，悖逆ê以色列，比奸詐ê偤大，iáu khah有義。 12 你tio̍h去ǹg北方傳chiahê話，講，耶和華講，悖逆ê以色列ah，tio̍h tò來；我無beh用受氣ê目睭看lín；因為我是慈愛ê，我無beh永遠khǹg受氣；這是耶和華講ê。 13 獨獨tio̍h認你ê罪，就是你違背耶和華你ê上帝；tī lóng總青翠ê樹腳，走東走西，chhē別ê；無聽thàn我ê話；這是耶和華講ê。 14 耶和華講，悖逆ê kiáⁿ兒ah，tio̍h tò來；因為我做lín ê丈夫；koh我beh將lín tùi一个城取一人，tùi一族取兩人，帶到錫安。 15 我beh將合我ê心ê牧者賞賜lín；in beh用知識kap智慧養飼lín。 16 耶和華講，Lín tī國內生湠chōe-chōe；當hiahê日子，人無beh koh講起，耶和華ê約櫃；亦無beh記tī心裡；lóng bōe記得，lóng無去chhē，亦無koh做伊。 17 Hit時人beh稱耶路撒冷做耶和華ê寶座；萬國beh聚集到hia；就是因為耶和華ê名，來到耶路撒冷；in無koh照家己pháiⁿ心ê剛硬行tāi-chì。 18 當hiahê日子，偤大家beh kap以色列家同行；tùi北方ê地相kap來，到我賞賜lín ê列祖做業ê地。 19 總是我講，我怎樣ōe-thang排列lín tī chiahê kiáⁿ ê中間，將好ê地賞賜你，就是列國中siōng好ê業？我koh講，Lín tio̍h稱我講，我ê父ah；亦無koh倒tńg去，m̄-tè我。 20 以色列家ah，lín對我行奸詐，真正親像婦人行奸詐離開伊ê丈夫；這是耶和華講ê。 21 Tī光khō-khō高ê所在聽見聲，就是以色列人啼哭懇求ê聲；就是因為in行邪癖ê路，bōe記得in ê上帝耶和華。 22 Lín chiahê悖逆ê kiáⁿ兒ah，tio̍h tò來；我beh醫好lín ê悖逆。看ah，阮來到你chia；因為你是阮ê上帝耶和華。 23 Tùi小山á是大山ê鬧熱，ǹg望得tio̍h幫贊，實在是空空；以色列ê得tio̍h救，真正在tī阮ê上帝耶和華。 24 Tùi阮少年以來，hitê thang見笑ê事，將阮ê列祖所tio̍h磨來得tio̍h-ê，就是in ê羊群，牛群，kap in ê kiáⁿ，cha-bó͘-kiáⁿ，lóng吞食去。 25 阮倒tī阮ê見笑中，阮ê凌辱遮蓋阮；因為tùi少年到taⁿ，阮kap阮ê列祖常常得罪阮ê上帝耶和華；無聽thàn阮ê上帝耶和華ê聲。
1 Ū teh kóng, Lâng nā lî-chhut i ê bó͘, bó͘ chiū lī-khui i, kè pa̍t-lâng; chiū i chêng ê tiōng-hu kiám thang koh chhin-kūn i mah? nā án-ni, hit ê tōe-hng kiám bô bak-tio̍h lâ-sâm mah? to̍k-to̍k lí kap chōe-chōe chhin-ài--ê kiâⁿ-îm, iáu-kú thang kui tī Góa; che sī Iâ-hô-hoa kóng--ê. 2 Lí tio̍h kia̍h-ba̍k khòaⁿ chiah ê kng-khō-khō koâiⁿ ê só͘-chāi; tī toh-lo̍h bô ū îm-hēng ah? lí chē tī lō͘-piⁿ thèng-hāu, chhin-chhiūⁿ A-la̍h-pek lâng tī khòng-iá chi̍t-iūⁿ; koh ēng lí ê îm-hēng siâ-ok phah lâ-sâm choân-tōe. 3 In-ūi án-ni, hó ê hō͘-chúi thêng-chí, chhun-thiⁿ ê hō͘ bô lo̍h; lí iáu ū chhiong-ki ê bīn, m̄-chai kiàn-siàu. 4 Lí kiám m̄ tùi chit-sî kiò Góa kóng, Góa ê pē ah, Lí sī góa siàu-liân ê sî, ín-chhōa góa--ê? 5 I kiám éng-éng khǹg siū-khì, lâu kàu lō͘-bé mah? khòaⁿ ah, lí ū án-ni kóng, iáu-kú chīn lí só͘ ōe--ê kiâⁿ-pháiⁿ. 6 Tng Iok-se-a ông chē-ūi ê sî, Iâ-hô-hoa koh tùi góa kóng, Pōe-ge̍k ê Í-sek-lia̍t só͘ chòe--ê, lí ū khòaⁿ-kìⁿ bô? I chiūⁿ chiah ê koâiⁿ-soaⁿ, tī lóng-chóng chhiⁿ-chhùi ê chhiū-kha kiâⁿ îm-loān. 7 I kiâⁿ chiah ê tāi-chì í-āu, Góa kóng, I beh kui-óa Góa, chóng-sī i bô, i kan-chà ê sió-bē Iû-tāi ia̍h ū khòaⁿ-kìⁿ. 8 Pōe-ge̍k ê Í-sek-lia̍t kiâⁿ îm-loān, Góa ūi-tio̍h chit ê iân-kò͘ hō͘ i lî-su, lî-chhut i; Góa khòaⁿ-kìⁿ i kan-chà ê sió-bē Iû-tāi, iû-goân bô kiaⁿ, ia̍h sī khì kiâⁿ-îm. 9 I sûi-piān kiâⁿ i ê îm-loān, chiū phah lâ-sâm chit ê tōe-hng; chiū kap chio̍h-thâu chhâ-thâu kiâⁿ-îm. 10 Sui-jiân ū chiah-ê it-chhè ê sū, i kan-chà ê sió-bē Iû-tāi iû-goân bô choan-sim kui-ǹg Góa, put-kò sī ké-ì nā-tiāⁿ; che sī Iâ-hô-hoa kóng--ê. 11 Iâ-hô-hoa tùi góa kóng, Pōe-ge̍k ê Í-sek-lia̍t, pí kan-chà ê Iû-tāi, iáu khah ū gī. 12 Lí tio̍h khì ǹg pak-hng thoân chiah ê ōe, kóng, Iâ-hô-hoa kóng, Pōe-ge̍k ê Í-sek-lia̍t ah, tio̍h tò--lâi; Góa bô beh ēng siū-khì ê ba̍k-chiu khòaⁿ lín; in-ūi Góa sī chû-ài--ê, Góa bô beh éng-oán khǹg siū-khì; che sī Iâ-hô-hoa kóng--ê. 13 To̍k-to̍k tio̍h jīn lí ê chōe, chiū-sī lí ûi-pōe Iâ-hô-hoa lí ê Siōng-tè; tī lóng-chóng chhiⁿ-chhùi ê chhiū-kha, cháu-tang cháu-sai, chhē pa̍t-ê; bô thiaⁿ-thàn Góa ê ōe; che sī Iâ-hô-hoa kóng--ê. 14 Iâ-hô-hoa kóng, Pōe-ge̍k ê kiáⁿ-jî ah, tio̍h tò--lâi; in-ūi Góa chòe lín ê tiōng-hu; koh Góa beh chiong lín tùi chi̍t ê siâⁿ chhú chi̍t lâng, tùi chi̍t-cho̍k chhú nn̄g lâng, tòa kàu Sek-an. 15 Góa beh chiong ha̍p Góa ê sim ê bo̍k-chiá siúⁿ-sù lín; in beh ēng chai-bat kap tì-hūi iúⁿ-chhī lín. 16 Iâ-hô-hoa kóng, Lín tī kok-lāi siⁿ-thòaⁿ chōe-chōe; tng hiah ê ji̍t-chí, lâng bô beh koh kóng-khí, Iâ-hô-hoa ê iok-kūi; ia̍h bô beh kì tī sim--nih; lóng bōe-kì--tit, lóng bô khì chhē, ia̍h bô koh chòe--i. 17 Hit-sî lâng beh chheng Iâ-lō͘-sat-léng chòe Iâ-hô-hoa ê pó-chō; bān-kok beh chū-chi̍p kàu hia; chiū-sī in-ūi Iâ-hô-hoa ê miâ, lâi kàu Iâ-lō͘-sat-léng; in bô koh chiàu ka-kī pháiⁿ-sim ê kong-ngī kiâⁿ tāi-chì. 18 Tng hiah ê ji̍t-chí, Iû-tāi ke beh kap Í-sek-lia̍t ke tâng-kiâⁿ; tùi pak-hng ê tōe saⁿ-kap lâi, kàu Góa siúⁿ-sù lín ê lia̍t-chó͘ chòe-gia̍p ê tōe. 19 Chóng-sī góa kóng, Góa cháiⁿ-iūⁿ ōe thang pâi-lia̍t lín tī chiah ê kiáⁿ ê tiong-kan, chiong hó ê tōe siúⁿ-sù lí, chiū-sī lia̍t-kok-tiong siōng-hó ê gia̍p? Góa koh kóng, Lín tio̍h chheng Góa kóng, Góa ê pē ah; ia̍h bô koh tò-tńg khì, m̄-tè Góa. 20 Í-sek-lia̍t ke ah, lín tùi Góa kiâⁿ kan-chà, chin-chiàⁿ chhin-chhiūⁿ hū-jîn kiâⁿ kan-chà lī-khui i ê tiōng-hu; che sī Iâ-hô-hoa kóng--ê. 21 Tī kng-khō-khō koâiⁿ ê só͘-chāi thiaⁿ-kìⁿ siaⁿ, chiū-sī Í-sek-lia̍t lâng thî-khàu khún-kiû ê siaⁿ; chiū-sī in-ūi in kiâⁿ siâ-phiah ê lō͘, bōe-kì-tit in ê Siōng-tè Iâ-hô-hoa. 22 Lín chiah ê pōe-ge̍k ê kiáⁿ-jî ah, tio̍h tò--lâi; Góa beh i-hó lín ê pōe-ge̍k. Khòaⁿ ah, goán lâi kàu Lí chia; in-ūi Lí sī goán ê Siōng-tè Iâ-hô-hoa. 23 Tùi sió-soaⁿ á-sī tōa-soaⁿ ê lāu-jia̍t, ǹg-bāng tit-tio̍h pang-chān, si̍t-chāi sī khang-khang; Í-sek-lia̍t ê tit-tio̍h kiù, chin-chiàⁿ chāi-tī goán ê Siōng-tè Iâ-hô-hoa. 24 Tùi goán siàu-liân í-lâi, hit ê thang kiàn-siàu ê sū, chiong goán ê lia̍t-chó͘ só͘ tio̍h-bôa lâi tit-tio̍h--ê, chiū-sī in ê iûⁿ-kûn, gû-kûn, kap in ê kiáⁿ, cha-bó͘-kiáⁿ, lóng thun-chia̍h--khì. 25 Goán tó tī goán ê kiàn-siàu-tiong, goán ê lêng-jio̍k jia-khàm goán; in-ūi tùi siàu-liân kàu taⁿ, goán kap goán ê lia̍t-chó͘ siông-siông tek-chōe goán ê Siōng-tè Iâ-hô-hoa; bô thiaⁿ-thàn goán ê Siōng-tè Iâ-hô-hoa ê siaⁿ.
1 耶和華講，以色列ah，你若肯tò來，就tò來我chia；若tùi我ê面前除去你可惡ê事，亦無chhìn-chhái行； 2 亦照誠實、公平、公義，kí耶和華ê永活來chiù-chōa；就列國beh對祂來家己求福氣；亦beh因為祂來誇口。 3 耶和華對偤大人kap耶路撒冷án-ni講，Tio̍h開墾lín ê土地，莫得掖種tī刺phè內。 4 偤大人kap耶路撒冷khiā起ê百姓ah，lín tio̍h kā本身行割禮，歸tī耶和華；除去心內ê私慾；驚了我ê受氣，因為lín所行ê pháiⁿ，來發作；親像火to̍h起來，甚至無人能phah-hoa。 5 Lín tio̍h傳tī偤大，報tī耶路撒冷，講，Lín tio̍h tī國內pûn哨角，大聲叫講，Lín tio̍h聚集，咱thang進入堅固ê城。 6 應該ǹg錫安khiā大旗；tio̍h逃走，m̄-thang停腳；因為我beh hō͘災厄kap大ê毀壞tùi北方來。 7 有獅tùi ām ê樹林中上來，毀壞列國ê，伊已經起身，出伊ê本所在；beh hō͘你ê地拋荒，hō͘你ê城荒廢，無人khiā起。 8 為tio̍h án-ni，lín ê腰tio̍h hâ麻布，大聲啼哭；因為耶和華ê大受氣無對咱oa̍t倒tńg。 9 耶和華講，到hit日君王ê心，貴族ê心，lóng beh消滅；祭司lóng beh生驚，先知lóng beh gông-ngia̍h。 10 我講，Ai-ah，主耶和華ah，你真正是大大欺騙chitê百姓kap耶路撒冷；kā in講，Lín beh得tio̍h平安，其實刀劍害tio̍h in ê性命。 11 Hit時beh有話對chitê百姓kap耶路撒冷講，Beh有熱熱ê風，tùi曠野光khō-khō高ê所在，ǹg我ê眾百姓吹來；m̄是beh簸伊，亦m̄是beh hō͘伊清氣。 12 Beh有koh-khah大ê風，為tio̍h我吹來；taⁿ我koh beh發出判詞來攻擊in。 13 看ah，伊beh親像雲起來；伊ê戰車親像捲螺風，伊ê馬比鷹鳥khah緊；有災厄ah，因為咱敗無lah。 14 耶路撒冷ah，你tio̍h洗清你ê心，來除去pháiⁿ，hō͘你thang得tio̍h救；pháiⁿ念頭存tī你ê心內，beh到tī時ah？ 15 有聲tùi Tàn傳報，tùi Í-hoat-liân山報災厄。 16 Lín tio̍h傳hō͘列國，報告攻擊耶路撒冷ê tāi-chì，講，有圍困城ê，tùi遠遠ê所在來；出in ê聲，攻擊偤大chiahê城。 17 In周圍攻擊伊親像顧園ê人；因為伊背叛我；這是耶和華講ê。 18 你ê所行，你ê所做，致到你有chiahê事；這是你ê罪惡，實在是苦，是害到你ê心。 19 我ê臟腑ah，我ê臟腑ah，我ê心痛疼，我ê心tī我ê內面擘腹，我bōe會/能靜靜無講話；因為我已經聽見哨角ê聲，交戰ê hoah-hiàm。 20 人teh報毀壞，koh毀壞；因為全地敗壞，我ê布棚忽然敗壞，我ê帳帷tiap-á久破裂。 21 我看見大旗，聽見哨角ê聲；beh到jōa久ah？ 22 我ê百姓愚戇，m̄-bat我；in是愚戇無聰明ê kiáⁿ；行pháiⁿ就gâu，行好就頇顢。 23 先知講，我看地，看ah，地是空空渾沌；我看天，天亦無光。 24 我看hiahê大山，看ah，in lóng振動；小山亦lóng搖來搖去。 25 我koh看，看ah，lóng無人；空中ê飛鳥，亦lóng飛走。 26 我koh看伊，看ah，肥ê田變做拋荒ê地；一切ê城tī耶和華ê面前，因為祂ê大受氣，lóng總倒壞。 27 因為耶和華án-ni講，全地的確拋荒；總是我無beh毀滅到盡。 28 因為án-ni地beh憂悶，天頂也beh烏暗；我已經講伊，已經定tio̍h伊，的確無退悔，也無oa̍t-tńg意思，m̄做伊。 29 Ta̍k ê城ê人因為馬兵kap射箭ê人ê hōa-hōa哮，就lóng逃走，進入樹林，爬(pê)上石磐頂；ta̍k ê城tú-tio̍h棄sak，無人khiā起。 30 你衰敗ê時beh怎樣做？雖然穿朱紅ê衫，用金器裝飾，用色料畫你ê目睭，án-ni tián好看，是空空；戀愛你ê看輕你，續siàu想你ê性命。 31 因為我聽見聲親像生kiáⁿ ê婦人人，親像生頭chiūⁿ-kiáⁿ ê艱苦，就是錫安cha-bó͘-kiáⁿ ê聲，伊喘大氣，thí開手講，我有災厄ah，因為我ê神魂為tio̍h 刣人ê來暈去。
1 Iâ-hô-hoa kóng, Í-sek-lia̍t ah, Lí nā khéng tò--lâi, chiū tò--lâi Góa chia; nā tùi Góa ê bīn-chêng tû--khì lí khó-ò͘ⁿ ê sū, ia̍h bô chhìn-chhái kiâⁿ; 2 ia̍h chiàu sêng-si̍t, kong-pêng, kong-gī, kí Iâ-hô-hoa ê éng-oa̍h lâi chiù-chōa; chiū lia̍t-kok beh tùi I lâi ka-kī kiû hok-khì; ia̍h beh in-ūi I lâi khoa-kháu. 3 Iâ-hô-hoa tùi Iû-tāi lâng kap Iâ-lō͘-sat-léng án-ni kóng, Tio̍h khai-khún lín ê thó͘-tōe, bo̍h-tit iā-chéng tī chhì-phè-lāi. 4 Iû-tāi lâng kap Iâ-lō͘-sat-léng khiā-khí ê peh-sìⁿ ah, lín tio̍h kā pún-sin kiâⁿ kat-lé, kui tī Iâ-hô-hoa; tû--khì sim-lāi ê su-io̍k; kiaⁿ-liáu Góa ê siū-khì, in-ūi lín só͘-kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa. 5 Lín tio̍h thoân tī Iû-tāi, pò tī Iâ-lō͘-sat-léng, kóng, Lín tio̍h tī kok-lāi pûn sàu-kak, tōa-siaⁿ kiò kóng, Lín tio̍h chū-chi̍p, lán thang chìn-ji̍p kian-kò͘ ê siâⁿ. 6 Eng-kai ǹg Sek-an khiā tōa-kî; tio̍h tô-cháu, m̄-thang thêng-kha; in-ūi Góa beh hō͘ chai-ē kap tōa ê húi-hoāi tùi pak-hng lâi. 7 Ū sai tùi ām ê chhiū-nâ-tiong chiūⁿ--lâi, húi-hoāi lia̍t-kok--ê, i í-keng khí-sin, chhut i ê pún só͘-chāi; beh hō͘ lí ê tōe pha-hng, hō͘ lí ê siâⁿ hong-hòe, bô lâng khiā-khí. 8 Ūi-tio̍h án-ni, lín ê io tio̍h hâ môa-pò͘, tōa-siaⁿ thî-khàu; in-ūi Iâ-hô-hoa ê tōa siū-khì bô tùi lán oa̍t-tò-tńg. 9 Iâ-hô-hoa kóng, kàu hit-ji̍t kun-ông ê sim, kùi-cho̍k ê sim, lóng beh siau-bia̍t; chè-si lóng beh chhiⁿ-kiaⁿ, sian-ti lóng beh gông-ngia̍h. 10 Góa kóng, Ai--ah, Chú Iâ-hô-hoa ah, Lí chin-chiàⁿ sī tōa-tōa khi-phiàn chit ê peh-sìⁿ kap Iâ-lō͘-sat-léng; kā in kóng, Lín beh tit-tio̍h pêng-an, kî-si̍t to-kiàm hāi-tio̍h in ê sìⁿ-miā. 11 Hit-sî beh ū ōe tùi chit ê peh-sìⁿ kap Iâ-lō͘-sat-léng kóng, Beh ū jia̍t-jia̍t ê hong, tùi khòng-iá kng-khō-khō koâiⁿ ê só͘-chāi, ǹg Góa ê chèng peh-sìⁿ chhe--lâi; m̄-sī beh pòa--i, ia̍h m̄-sī beh hō͘ i chheng-khì. 12 Beh ū koh-khah tōa ê hong, ūi-tio̍h Góa chhe--lâi; taⁿ Góa koh beh hoat-chhut phòaⁿ-sû lâi kong-kek in. 13 Khòaⁿ ah, i beh chhin-chhiūⁿ hûn khí-lâi; i ê chiàn-chhia chhin-chhiūⁿ kńg-lê-hong, i ê bé pí eng-chiáu khah kín; ū chai-ē ah, in-ūi lán pāi-bô lah. 14 Iâ-lō͘-sat-léng ah, lí tio̍h sóe-chheng lí ê sim, lâi tû--khì pháiⁿ, hō͘ lí thang tit-tio̍h kiù; pháiⁿ liām-thâu chûn tī lí ê sim-lāi, beh kàu tī-sî ah? 15 Ū siaⁿ tùi Tàn thoân-pò, tùi Í-hoat-liân soaⁿ pò chai-ē. 16 Lín tio̍h thoân hō͘ lia̍t-kok, pò-kò kong-kek Iâ-lō͘-sat-léng ê tāi-chì, kóng, Ū ûi-khùn siâⁿ--ê, tùi hn̄g-hn̄g ê só͘-chāi lâi; chhut in ê siaⁿ, kong-kek Iû-tāi chiah ê siâⁿ. 17 In chiu-ûi kong-kek i chhin-chhiūⁿ kò͘-hn̂g ê lâng; in-ūi i pōe-poān Góa; che sī Iâ-hô-hoa kóng--ê. 18 Lí ê só͘-kiâⁿ, lí ê só͘-chòe, tì-kàu lí ū chiah ê sū; che sī lí ê chōe-ok, si̍t-chāi sī khó͘, sī hāi kàu lí ê sim. 19 Góa ê chōng-hú ah, góa ê chōng-hú ah, góa ê sim thàng-thiàⁿ, góa ê sim tī góa ê lāi-bīn peh-pak, góa bōe-ōe chēng-chēng bô kóng-ōe; in-ūi góa í-keng thiaⁿ-kìⁿ sàu-kak ê siaⁿ, kau-chiàn ê hoah-hiàm. 20 Lâng teh pò húi-hoāi, koh húi-hoāi; in-ūi choân-tōe pāi-hoāi, góa ê pò͘-pîⁿ hut-jiân pāi-hoāi, góa ê tiùⁿ-ûi tiap-á-kú phòa-li̍h. 21 Góa khòaⁿ-kìⁿ tōa-kî, thiaⁿ-kìⁿ sàu-kak ê siaⁿ; beh kàu jōa-kú ah? 22 Góa ê peh-sìⁿ gû-gōng, m̄-bat Góa; in sī gû-gōng bô chhang-miâ ê kiáⁿ; kiâⁿ-pháiⁿ chiū gâu, kiâⁿ-hó chiū ham-bān. 23 Sian-ti kóng, Góa khòaⁿ tōe, khòaⁿ ah, tōe sī khang-khang hūn-tūn; góa khòaⁿ thiⁿ, thiⁿ ia̍h bô kng. 24 Góa khòaⁿ hiah ê tōa-soaⁿ, khòaⁿ ah, in lóng tín-tāng; sió-soaⁿ ia̍h lóng iô-lâi iô-khì. 25 Góa koh khòaⁿ, khòaⁿ ah, lóng bô lâng; khong-tiong ê pe-chiáu, ia̍h lóng pe-cháu. 26 Góa koh khòaⁿ--i, khòaⁿ ah, pûi ê chhân pìⁿ-chòe pha-hng ê tōe; it-chhè ê siâⁿ tī Iâ-hô-hoa ê bīn-chêng, in-ūi I ê tōa siū-khì, lóng-chóng tó-hoāi. 27 In-ūi Iâ-hô-hoa án-ni kóng, Choân-tōe tek-khak pha-hng; chóng-sī Góa bô beh húi-bia̍t kàu-chīn. 28 In-ūi án-ni tōe beh iu-būn, thiⁿ-téng iā beh o͘-àm; Góa í-keng kóng--i, í-keng tiāⁿ-tio̍h--i, tek-khak bô thè-hóe, iā bô oa̍t-tńg ì-sù, m̄ chòe--i. 29 Ta̍k ê siâⁿ ê lâng in-ūi bé-peng kap siā-chìⁿ ê lâng ê hōa-hōa-háu, chiū lóng tô-cháu, chìn-ji̍p chhiū-nâ, pê-chiūⁿ chio̍h-pôaⁿ-téng; ta̍k ê siâⁿ tú-tio̍h khì-sak, bô lâng khiā-khí. 30 Lí soe-pāi ê sî beh cháiⁿ-iūⁿ chòe? Sui-jiân chhēng chu-âng ê saⁿ, ēng kim-khì chng-thāⁿ, ēng sek-liāu ūi lí ê ba̍k-chiu, án-ni tián hó-khòaⁿ, sī khang-khang; loân-ài lí--ê khòaⁿ-khin lí, sòa siàu-siūⁿ lí ê sìⁿ-miā. 31 In-ūi góa thiaⁿ-kìⁿ siaⁿ chhin-chhiūⁿ siⁿ-kiáⁿ ê hū-jîn-lâng, chhin-chhiūⁿ siⁿ thâu-chiūⁿ-kiáⁿ ê kan-khó͘, chiū-sī Sek-an cha-bó͘-kiáⁿ ê siaⁿ, i chhoán tōa-khùi, thí-khui chhiú kóng, Góa ū chai-ē ah, in-ūi góa ê sîn-hûn ūi-tio̍h thâi-lâng-ê lâi hūn-khì.
1 Lín tio̍h走來走去tī耶路撒冷ê街路來看來探聽，tī伊ê寬闊ê所在來chhē，看會tú-tio̍h一人，á是有人行公義，求誠實；我就beh赦免chitê城。 2 In雖然講，耶和華是活ê，in所chiù ê chōa實在是假。 3 耶和華ah，你ê目睭kiám m̄是ǹg誠實mah？你phah in，in也無憂傷；你毀滅in，in m̄肯受教督；in hō͘ in ê面比石khah-tēng，m̄肯回頭。 4 我就講，chiahê人實在是sòng-hiong，是愚戇，因為m̄-bat耶和華ê路，kap in ê上帝ê法度； 5 我beh去見in ê世家，kap in講話；因為in bat耶和華ê路，kap in ê上帝ê法度。但是in同心at折擔，phah斷縛伊ê索。 6 所以樹林ê獅beh出來咬死in；ê-hng時ê豺狼beh吞食in，豹beh tī chiahê城外當等in，見若出城ê的確hō͘ in拆碎，因為in ê罪過真chōe，悖逆ná傷重。 7 這我thái會赦免你ah？你ê kiáⁿ兒離開我，koh kí chiahê m̄是上帝ê來chiù-chōa；我hō͘ in飽足，in就行姦淫，kui陣聚集tī娼妓ê厝。 8 In親像飼飽ê馬四界跑；ta̍k-ê ǹg伊厝邊ê bó͘親像馬ki-ki哮。 9 耶和華講，我kiám無因為chiahê事來辦in mah？我ê心kiám無beh對chit號ê國民來報仇mah？ 10 Lín tio̍h 上伊ê葡萄園ê牆來毀壞伊，總是m̄-thang毀到了；tio̍h除去伊ê枝，因為in無屬tī耶和華。 11 因為以色列家kap偤大家大大行詭詐，攻擊我；這是耶和華講ê。 12 In m̄認耶和華，就講，這並m̄是伊；災厄無beh臨到阮；刀劍kap飢荒阮也bōe會tú-tio̍h。 13 先知ê話beh成做風，主ê話無tī in ê心；beh照án-ni hō͘ in tú-tio̍h。 14 所以萬軍ê上帝耶和華講，因為lín講chitê話；看ah，我beh hō͘我ê話tī你ê嘴做火，hō͘ chitê百姓做柴，chitê火beh燒滅in。 15 耶和華講，以色列ê家ah，你看，我beh hō͘一國tùi遠遠來攻擊lín，就是強ê國，tùi古早就有ê國，伊ê言語你bōe曉得，也bōe明白伊所講ê。 16 In ê箭袋是開開ê墓；in lóng是勇士。 17 In beh食了你ê五穀kap你ê米糧，就是你ê kiáⁿ cha-bó͘-kiáⁿ所tio̍h食ê；也beh食了你ê羊群，牛群；食了你ê葡萄kap無花果；koh beh用刀毀壞你所óa靠堅固ê城。 18 耶和華講，就若到hit時我也無beh一盡剿滅lín。 19 Hit時lín若講，耶和華阮ê上帝為tio̍h啥事對阮行這一切ê事ah？你tio̍h應伊講，親像lín已經放sak我，服事別號ê上帝 tī lín ê地方，án-ni lín也beh服事外邦人tī無屬lín ê地方。 20 Lín tio̍h傳tī雅各家，報tī偤大講， 21 戇戇無知ê百姓ah，lín有目睭bōe看，有耳孔bōe聽，taⁿ tio̍h聽chitê話； 22 耶和華講，Lín m̄驚我mah？無ngia̍uh-ngia̍uh-chhoah tī我ê面前mah？我設永遠ê例，用沙做海ê界限，伊bōe pôaⁿ過；伊ê湧雖然giâ高，也bōe能贏；雖然hōa-hōa哮，也bōe能pôaⁿ過。 23 獨獨chitê百姓有反叛悖逆ê心；in悖逆我做in去。 24 In心內也無講，Taⁿ咱tio̍h敬畏耶和華咱ê上帝，伊照時賞賜雨水，就是前ê雨；後ê雨；伊也有定chiahê收成ê時期，留teh hō͘咱。 25 Lín ê罪孽hō͘ chiahê事反tńg離開lín；lín ê罪惡hō͘ lín bōe能得tio̍h福氣。 26 因為tī我ê百姓中有chhē-tio̍h pháiⁿ人；in bih-teh，親像設活tauh ê人teh當等；in張羅網來掠人。 27 In ê厝有詭詐滿滿，是親像鳥籠內有鳥滿滿；所以in成做大koh好額。 28 In肥koh光生，做pháiⁿ過頭；無為tio̍h人申冤，就是無為tio̍h無父ê kiáⁿ申冤，hō͘伊興通；亦無因為sòng-hiong人判斷。 29 耶和華講，我kiám無因為chiahê事來辦in mah？我ê心kiám無beh對chit號ê國民來報仇mah？ 30 Chitê土地有奇異可惡ê事； 31 先知傳虛假，祭司óa靠in來霸權；我ê百姓亦ài伊án-ni；到結局，lín beh怎樣做？
1 Lín tio̍h cháu-lâi cháu-khì tī Iâ-lō͘-sat-léng ê ke-lō͘ lâi khòaⁿ lâi thàm-thiaⁿ, tī i ê khoan-khoah ê só͘-chāi lâi chhē, khòaⁿ ōe tú-tio̍h chi̍t-lâng, á-sī ū lâng kiâⁿ kong-gī, kiû sêng-si̍t; Góa chiū beh sià-bián chit ê siâⁿ. 2 In sui-jiân kóng, Iâ-hô-hoa sī oa̍h--ê, in só͘ chiù ê chōa si̍t-chāi sī ké. 3 Iâ-hô-hoa ah, Lí ê ba̍k-chiu kiám-m̄-sī ǹg sêng-si̍t mah? Lí phah in, in iā bô iu-siong; Lí húi-bia̍t in, in m̄-khéng siū kàu-tok; in hō͘ in ê bīn pí chio̍h khah-tēng, m̄-khéng hôe-thâu. 4 Góa chiū kóng, Chiah ê lâng si̍t-chāi sī sòng-hiong, sī gû-gōng, in-ūi m̄-bat Iâ-hô-hoa ê lō͘, kap in ê Siōng-tè ê hoat-tō͘; 5 góa beh khì kìⁿ in ê sè-ka, kap in kóng-ōe; in-ūi in bat Iâ-hô-hoa ê lō͘, kap in ê Siōng-tè ê hoat-tō͘. Nā-sī in tâng-sim at-chi̍h taⁿ, phah-tn̄g pa̍k i ê soh. 6 Só͘-í chhiū-nâ ê sai beh chhut-lâi kā-sí in; ê-hng-sî ê chhâi-lông beh thun-chia̍h in, pà beh tī chiah ê siâⁿ-gōa tng-tán in, kìⁿ-nā chhut-siâⁿ-ê tek-khak hō͘ in thiah-chhùi, in-ūi in ê chōe-kòa chin-chōe, pōe-ge̍k ná siong-tiōng. 7 Che Góa thái ōe sià-bián lí ah? lí ê kiáⁿ-jî lī-khui Góa, koh kí chiah ê m̄-sī Siōng-tè--ê lâi chiù-chōa; Góa hō͘ in pá-chiok, in chiū kiâⁿ kan-îm, kui-tīn chū-chi̍p tī chhiong-ki ê chhù. 8 In chhin-chhiūⁿ chhī-pá ê bé sì-kòe pháu; ta̍k-ê ǹg i chhù-piⁿ ê bó͘ chhin-chhiūⁿ bé ki-ki-háu. 9 Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah? 10 Lín tio̍h chiūⁿ i ê phû-tô-hn̂g ê chhiûⁿ lâi húi-hoāi i, chóng-sī m̄-thang húi kàu-liáu; tio̍h tû--khì i ê ki, in-ūi in bô sio̍k tī Iâ-hô-hoa. 11 In-ūi Í-sek-lia̍t ke kap Iû-tāi ke tōa-tōa kiâⁿ khúi-chà, kong-kek Góa; che sī Iâ-hô-hoa kóng ê. 12 In m̄-jīn Iâ-hô-hoa, chiū kóng, Che pēng m̄-sī I; chai-ē bô beh lîm-kàu goán; to-kiàm kap ki-hng goán iā bōe-ōe tú-tio̍h. 13 Sian-ti ê ōe beh chiâⁿ-chòe hong, Chú ê ōe bô tī in ê sim; beh chiàu án-ni hō͘ in tú-tio̍h. 14 Só͘-í bān-kun ê Siōng-tè Iâ-hô-hoa kóng, In-ūi lín kóng chit ê ōe; khòaⁿ ah, Góa beh hō͘ Góa ê ōe tī lí ê chhùi chòe hé, hō͘ chit ê peh-sìⁿ chòe chhâ, chit ê hé beh sio-bia̍t in. 15 Iâ-hô-hoa kóng, Í-sek-lia̍t ê ke ah, lí khòaⁿ, Góa beh hō͘ chi̍t-kok tùi hn̄g-hn̄g lâi kong-kek lín, chiū-sī kiông ê kok, tùi kó͘-chá chiū ū ê kok, i ê giân-gú lí bōe hiáu-tit, iā bōe bêng-pe̍k i só͘ kóng--ê. 16 In ê chìⁿ-tē sī khui-khui ê bōng; in lóng sī ióng-sū. 17 In beh chia̍h-liáu lí ê gō͘-kak kap lí ê bí-niû, chiū-sī lí ê kiáⁿ cha-bó͘-kiáⁿ só͘ tio̍h chia̍h ê; iā beh chia̍h-liáu lí ê iûⁿ-kûn, gû-kûn; chia̍h-liáu lí ê phû-tô kap bû-hoa-kó; koh beh ēng to húi-hoāi lí só͘ óa-khò kian-kò͘ ê siâⁿ. 18 Iâ-hô-hoa kóng, Chiū-nā kàu hit-sî Góa iā bô beh it-chīn châu-bia̍t lín. 19 Hit-sî lín nā kóng, Iâ-hô-hoa goán ê Siōng-tè ūi-tio̍h siáⁿ-sū tùi goán kiâⁿ che it-chhè ê sū ah? lí tio̍h ìn i kóng, Chhin-chhiūⁿ lín í-keng pàng-sak Góa, ho̍k-sāi pa̍t-hō ê siōng-tè tī lín ê tōe-hng, án-ni lín iā beh ho̍k-sāi gōa-pang lâng tī bô sio̍k lín ê tōe-hng. 20 Lín tio̍h thoân tī Ngá-kok ke, pò tī Iû-tāi kóng, 21 Gōng-gōng bû-ti ê peh-sìⁿ ah, lín ū ba̍k-chiu bōe khòaⁿ, ū hī-khang bōe thiaⁿ, taⁿ tio̍h thiaⁿ chit ê ōe; 22 Iâ-hô-hoa kóng, Lín m̄ kiaⁿ Góa mah? bô ngia̍uh-ngia̍uh-chhoah tī Góa ê bīn-chêng mah? Góa siat éng-oán ê lē, ēng soa chòe hái ê kài-hān, i bōe pôaⁿ-kè; i ê éng sui-jiân giâ koâiⁿ, iā bōe-ōe iâⁿ; sui-jiân hōa-hōa-háu, iā bōe-ōe pôaⁿ-kè. 23 To̍k-to̍k chit ê peh-sìⁿ ū hoán-poān pōe-ge̍k ê sim; in pōe-ge̍k Góa chòe in khì. 24 In sim-lāi iā bô kóng, Taⁿ lán tio̍h kèng-ùi Iâ-hô-hoa lán ê Siōng-tè, I chiàu-sî siúⁿ-sù hō͘-chúi, chiū-sī chêng ê hō͘; āu ê hō͘; I iā ū tēng chiah ê siu-sêng ê sî-kî, lâu-teh hō͘ lán. 25 Lín ê chōe-gia̍t hō͘ chiah ê sū hoán-tńg lī-khui lín; lín ê chōe-ok hō͘ lín bōe-ōe tit-tio̍h hok-khì. 26 In-ūi tī Góa ê peh-sìⁿ-tiong ū chhē-tio̍h pháiⁿ-lâng; in bih--teh, chhin-chhiūⁿ siat oa̍h-tauh ê lâng teh tng-tán; in tiuⁿ lô-bāng lâi lia̍h lâng. 27 In ê chhù ū khúi-chà móa-móa, sī chhin-chhiūⁿ chiáu-láng-lāi ū chiáu móa-móa; só͘-í in chiâⁿ-chòe tōa koh hó-gia̍h. 28 In pûi koh kng-siⁿ, chòe pháiⁿ kè-thâu; bô ūi-tio̍h lâng sin-oan, chiū-sī bô ūi-tio̍h bô-pē ê kiáⁿ sin-oan, hō͘ i heng-thong; ia̍h bô in-ūi sòng-hiong lâng phòaⁿ-toàn. 29 Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit-hō ê kok-bîn lâi pò-siû mah? 30 Chit ê thó͘-tōe ū kî-īⁿ khó-ò͘ⁿ ê sū; 31 sian-ti thoân hu-ké, chè-si óa-khò in lâi pà-koân; Góa ê peh-sìⁿ ia̍h ài i án-ni; kàu kiat-kio̍k, lín beh cháiⁿ-iūⁿ chòe?
1 便雅憫人ah，lín tio̍h走出耶路撒冷；tī Thê-ko-a pûn哨角；tī Pek-hap-ki-lîm放ian-tun；因為有災厄kap大ê毀滅tùi北方落來。 2 我beh剿滅錫安ê cha-bó͘-gín-ná，就是hitê súi koh幼秀ê。 3 牧者kap伊ê羊群beh到伊hia，tī伊ê周圍搭布棚；ta̍k-ê tī伊所佔ê地，hō͘羊食草。 4 Lín tio̍h備辦交戰攻擊伊；起來ah，咱tio̍h thàn中晝ê時上去；慘ah，日已經斜西，beh暗ê影已經拖長。 5 起來ah，咱tio̍h透暝上去，毀壞伊ê宮殿。 6 因為萬軍ê耶和華án-ni講，Lín tio̍h剉樹木，起土堆，攻擊耶路撒冷；這是hitê應該受刑罰ê城；in中間一盡是暴虐。 7 井怎樣chhèng出水，chitê城亦án-ni chhèng出pháiⁿ；tī in中間常常聽見有強暴毀滅ê事；病痛損傷亦常常tī我ê面前。 8 耶路撒冷ah，你tio̍h受教示；免得我ê心kap你生疏；免得我hō͘你拋荒，成做無人khiā起ê地。 9 萬軍ê耶和華án-ni講，In beh一盡掠以色列chhun ê百姓，親像摘葡萄一樣；你tio̍h親像摘葡萄ê，手koh tńg入樹枝。 10 Taⁿ我beh對是誰講話做干證，hō͘ in聽ah？看ah，in ê耳á未受割禮，bōe能聽；看ah，耶和華ê話，in掠做見笑，無歡喜伊。 11 因為án-ni，我hō͘耶和華ê受氣充滿，忍bōe-tiâu；我beh做一下piàⁿ tī街路ê gín-ná，kap聚會ê少年人；連丈夫kap伊ê bó͘，老人kap日子滿足ê，lóng beh受掠。 12 In ê厝宅、田園，kap bó͘，lóng beh變做別人ê；因為我beh伸手攻擊chit所在khiā起ê百姓；這是耶和華講ê。 13 因為in tùi第一細到第一大ê，lóng一味貪心；tùi先知到祭司，lóng行奸詐。 14 In chhìn-chhìn chhái-chhái醫治我ê百姓ê傷，講，平安lah，平安lah；其實無平安。 15 In行可惡ê事，知見笑mah？無，in lóng無見笑，亦bōe 紅面；因為án-ni，in beh跋倒tī跋倒ê人ê中間；我辦in ê時，in beh顛倒；這是耶和華講ê。 16 耶和華án-ni講，Lín tio̍h khiā tī路裡看；查問舊ê路，hit條好路tī toh-lo̍h，就tio̍h行伊；án-ni lín ê心beh得tio̍h安歇；總是in講，阮m̄行伊。 17 我kā lín設守望ê，講，Tio̍h聽哨角ê聲；總是in講，阮m̄聽。 18 列國ah，因為án-ni lín tio̍h聽；會眾ah，lín tio̍h知in中間有甚麼事。 19 地ah，tio̍h聽；看ah，我beh hō͘災厄到chitê百姓，就是in ê圖謀ê結果；因為in m̄聽thàn我ê話；我ê律法，in亦棄絕。 20 Tùi Sī-pa出ê乳香，tùi遠遠ê所在出ê菖蒲，帶來hō͘我，beh啥tāi？lín ê燒祭無得tio̍h接納；lín ê禮物，我亦無歡喜。 21 所以耶和華án-ni講，看ah，我beh hē窒礙ê石tī chitê百姓ê面前；父kap kiáⁿ beh做一下跋tī hit頂面；厝邊kap朋友亦lóng beh滅無。 22 耶和華án-ni講，看ah，有一種ê百姓tùi北方來；亦有一个大國興起，tùi地極來。 23 In kia̍h弓kap鎗；in殘忍無憐憫；in ê聲親像海hōa-hōa哮；錫安ê cha-bó͘-gín-ná ah，in lóng騎馬列陣，親像戰士beh攻擊你。 24 阮聽見in ê風聲，手就軟落去；痛苦擒tio̍h阮，痛疼親像生kiáⁿ ê婦人人一樣。 25 Lín m̄-thang出去田裡，亦m̄-thang行tī路裡；因為tī-hia有對敵ê刀劍，四圍有驚惶。 26 我ê百姓ah，tio̍h hâ麻布，kō tī火灰中；tio̍h悲傷，親像喪失獨生kiáⁿ，痛心啼哭；因為殘害ê beh忽然到tī咱。 27 我設立你tī我ê百姓中，做試驗ê kap衛所；hō͘你知來試驗in ê行做。 28 In lóng是大悖逆ê人；四界行譭謗；in是銅，是鐵；lóng是行毀壞ê。 29 風櫃燒tio̍h，鉛已經熔tī火內；in直直鍛鍊，到尾是空空；因為pháiⁿ-ê iáu未除去。 30 人beh稱 in做受棄sak ê銀，因為耶和華已經棄sak in。
1 Piān-ngá-bín lâng ah, lín tio̍h cháu-chhut Iâ-lō͘-sat-léng; tī Thê-ko-a pûn sàu-kak; tī Pek-hap-ki-lîm pàng ian-tun; in-ūi ū chai-ē kap tōa ê húi-bia̍t tùi pak-hng lo̍h--lâi. 2 Góa beh châu-bia̍t Sek-an ê cha-bó͘-gín-ná, chiū-sī hit ê súi koh iù-siù--ê. 3 Bo̍k-chiá kap i ê iûⁿ-kûn beh kàu i hia, tī i ê chiu-ûi tah pò͘-pîⁿ; ta̍k-ê tī i só͘ chiàm ê tōe, hō͘ iûⁿ chia̍h-chháu. 4 Lín tio̍h pī-pān kau-chiàn kong-kek i; khí-lâi ah, lán tio̍h thàn tiong-tàu ê sî chiūⁿ-khì; chhám--ah, ji̍t í-keng chhiâ-sai, beh àm ê iáⁿ í-keng thoa-tn̂g. 5 Khí-lâi ah, lán tio̍h thàu-mî chiūⁿ-khì, húi-hoāi i ê kiong-tiān. 6 In-ūi bān-kun ê Iâ-hô-hoa án-ni kóng, Lín tio̍h chhò chhiū-ba̍k, khí thô͘-tui, kong-kek Iâ-lō͘-sat-léng; che sī hit-ê eng-kai siū hêng-hoa̍t ê siâⁿ; in tiong-kan it-chīn sī pō-gio̍k. 7 Chíⁿ cháiⁿ-iūⁿ chhèng-chhut chúi, chit ê siâⁿ ia̍h án-ni chhèng-chhut pháiⁿ; tī in tiong-kan siông-siông thiaⁿ-kìⁿ ū kiông-pō húi-bia̍t ê sū; pīⁿ-thiàⁿ sún-siong ia̍h siông-siông tī Góa ê bīn-chêng. 8 Iâ-lō͘-sat-léng ah, lí tio̍h siū kà-sī; bián-tit Góa ê sim kap lí chhiⁿ-so͘; bián-tit Góa hō͘ lí pha-hng, chiâⁿ-chòe bô lâng khiā-khí ê tōe. 9 Bān-kun ê Iâ-hô-hoa án-ni kóng, In beh it-chīn lia̍h Í-sek-lia̍t chhun ê peh-sìⁿ, chhin-chhiūⁿ tiah phû-tô chi̍t-iūⁿ; lí tio̍h chhin-chhiūⁿ tiah phû-tô-ê, chhiú koh tńg-ji̍p chhiū-ki. 10 Taⁿ góa beh tùi chī-chūi kóng-ōe chòe kan-chèng, hō͘ in thiaⁿ ah? khòaⁿ ah, in ê hī-á bē siū kat-lé, bōe-ōe thiaⁿ; khòaⁿ ah, Iâ-hô-hoa ê ōe, in lia̍h-chòe kiàn-siàu, bô hoaⁿ-hí--i. 11 In-ūi án-ni, góa hō͘ Iâ-hô-hoa ê siū-khì chhiong-móa, lún-bōe-tiâu; góa beh chòe-chi̍t-ē piàⁿ tī ke-lō͘ ê gín-ná, kap chū-hōe ê siàu-liân lâng; liân tiōng-hu kap i ê bó͘, lāu-lâng kap ji̍t-chí móa-chiok--ê, lóng beh siū-lia̍h. 12 In ê chhù-the̍h, chhân-hn̂g, kap bó͘, lóng beh piàn-chòe pa̍t-lâng-ê; in-ūi Góa beh chhun-chhiú kong-kek chit só͘-chāi khiā-khí ê peh-sìⁿ; che sī Iâ-hô-hoa kóng--ê. 13 In-ūi in tùi tē-it sòe kàu tē-it tōa--ê, lóng it-bī tham-sim; tùi sian-ti kàu chè-si, lóng kiâⁿ kan-chà. 14 In chhìn-chhìn chhái-chhái i-tī Góa ê peh-sìⁿ ê siong, kóng, Pêng-an lah, pêng-an lah; kî-si̍t bô pêng-an. 15 In kiâⁿ khó-ò͘ⁿ ê sū, chai kiàn-siàu mah? bô, in lóng bô kiàn-siàu, ia̍h bōe âng-bīn; in-ūi án-ni, in beh poa̍h-tó tī poa̍h-tó ê lâng ê tiong-kan; Góa pān in ê sî, in beh tian-tó; che sī Iâ-hô-hoa kóng ê. 16 Iâ-hô-hoa án-ni kóng, Lín tio̍h khiā tī lō͘--nih khòaⁿ; chhâ-mn̄g kū ê lō͘, hit tiâu hó-lō͘ tī toh-lo̍h, chiū tio̍h kiâⁿ--i; án-ni lín ê sim beh tit-tio̍h an-hioh; chóng-sī in kóng, Goán m̄ kiâⁿ--i. 17 Góa kā lín siat siú-bāng--ê, kóng, Tio̍h thiaⁿ sàu-kak ê siaⁿ; chóng-sī in kóng, Goán m̄ thiaⁿ. 18 Lia̍t-kok ah, in-ūi án-ni lín tio̍h thiaⁿ; hōe-chiòng ah, lín tio̍h chai in tiong-kan ū sím-mi̍h sū. 19 Tōe ah, tio̍h thiaⁿ; khòaⁿ ah, Góa beh hō͘ chai-ē kàu chit ê peh-sìⁿ, chiū-sī in ê tô͘-bô͘ ê kiat-kó; in-ūi in m̄ thiaⁿ-thàn Góa ê ōe; Góa ê lu̍t-hoat, in ia̍h khì-choa̍t. 20 Tùi Sī-pa chhut ê jú-hiuⁿ, tùi hn̄g-hn̄g ê só͘-chāi chhut ê chhiong-pô͘, tòa lâi hō͘ Góa, beh siáⁿ-tāi? lín ê sio-chè bô tit-tio̍h chiap-la̍p; lín ê lé-mi̍h, Góa ia̍h bô hoaⁿ-hí. 21 Só͘-í Iâ-hô-hoa án-ni kóng, Khòaⁿ ah, Góa beh hē that-gāi ê chio̍h tī chit ê peh-sìⁿ ê bīn-chêng; pē kap kiáⁿ beh chòe-chi̍t-ē poa̍h tī hit téng-bīn; chhù-piⁿ kap pêng-iú ia̍h lóng beh bia̍t-bô. 22 Iâ-hô-hoa án-ni kóng, Khòaⁿ ah, ū chi̍t chióng ê peh-sìⁿ tùi pak-hng lâi; ia̍h ū chi̍t ê tōa-kok heng-khí, tùi tōe-ke̍k lâi. 23 In kia̍h keng kap chhiuⁿ; in chân-jím bô lîn-bín; in ê siaⁿ chhin-chhiūⁿ hái hōa-hōa-háu; Sek-an ê cha-bó͘-gín-ná ah, in lóng khiâ-bé lia̍t-tīn, chhin-chhiūⁿ chiàn-sū beh kong-kek lí. 24 Goán thiaⁿ-kìⁿ in ê hong-siaⁿ, chhiú chiū nńg--lo̍h-khì; thòng-khó͘ khîⁿ-tio̍h goán, thàng-thiàⁿ chhin-chhiūⁿ siⁿ-kiáⁿ ê hū-jîn-lâng chi̍t-iūⁿ. 25 Lín m̄-thang chhut-khì chhân--nih, ia̍h m̄-thang kiâⁿ tī lō͘-nih; in-ūi tī-hia ū tùi-te̍k ê to-kiàm, sì-ûi ū kiaⁿ-hiâⁿ. 26 Góa ê peh-sìⁿ ah, tio̍h hâ môa-pò͘, kō tī hé-hu-tiong; tio̍h pi-siong, chhin-chhiūⁿ sòng-sit to̍k-siⁿ kiáⁿ, thòng-sim thî-khàu; in-ūi chân-hāi--ê beh hut-jiân kàu tī lán. 27 Góa siat-li̍p lí tī Góa ê peh-sìⁿ-tiong, chòe chhì-giām--ê kap ōe-só͘; hō͘ lí chai lâi chhì-giām in ê kiâⁿ-chòe. 28 In lóng sī tōa pōe-ge̍k ê lâng; sì-kòe kiâⁿ húi-pòng; in sī tâng, sī thih; lóng sī kiâⁿ húi-hoāi--ê. 29 Hong-kūi sio--tio̍h, iân í-keng iûⁿ tī hé-lāi; in ti̍t-ti̍t thoàn-liān, kàu-bé sī khang-khang; in-ūi pháiⁿ--ê iáu-bē tû-khì. 30 Lâng beh chheng in chòe siū khì-sak ê gûn, in-ūi Iâ-hô-hoa í-keng khì-sak in.
1 有話tùi耶和華到耶利米，講， 2 你tio̍h khiā tī耶和華ê厝ê門，tī-hia宣傳chitê話，講，凡若屬偤大入chiahê門，敬拜耶和華ê，tio̍h聽耶和華ê話。 3 萬軍ê耶和華，以色列ê上帝，án-ni講，Lín tio̍h改正所行所做，我就hō͘ lín khiā起tī chitê地方。 4 Lín m̄-thang óa靠白賊ê話，講，Chiahê是耶和華ê殿，是耶和華ê殿，是耶和華ê殿。 5 Lín若一盡改正所行所做；tī人kap厝邊ê中間，真正有行公平； 6 無pháiⁿ款待出外人，以及孤兒寡婦；tī chitê地方無留無罪ê人ê血，亦無thàn別號ê上帝來陷害家己； 7 我就hō͘ lín khiā起tī chitê所在，就是我所賞賜lín ê列祖ê地，tùi永遠到永遠。 8 看ah，lín óa靠白賊無利益ê話。 9 Lín偷the̍h、刣人、姦淫，lām-sám chiù-chōa，ǹg Pa-le̍k燒香，亦thàn lín平素所m̄-bat別號ê上帝， 10 koh來khiā tī我ê面前，tī chit間用我ê名來稱呼ê厝，講，阮得tio̍h救lah；án-ni，是beh hō͘ lín去行chiahê可惡ê事mah？ 11 Chit間用我ê名來稱呼ê厝，lín看做賊siū mah？耶和華講，看ah，我，我已經看見lah。 12 Lín taⁿ tio̍h去我tī Sī-lô ê所在，就是我起頭設做求叫我ê名ê位，看我因為我ê百姓以色列ê罪惡，怎樣款待hit所在。 13 耶和華講，Taⁿ因為lín行chiahê一切ê事，我有對lín講，亦是早早起來講，但是lín m̄聽；我koh叫lín，但是lín m̄應； 14 所以我beh款待lín所óa靠chit間用我ê名稱呼ê厝，以及我所賞賜lín kap lín ê列祖ê地，親像我早款待Sī-lô一樣。 15 我也beh趕lín離開我ê面前，親像我bat趕lín ê眾兄弟，Í-hoat-liân一切ê後裔。 16 所以你莫得為tio̍h chitê百姓祈禱，莫得為tio̍h in出聲祈求，亦莫得替in求我；因為我無beh聽你。 17 In tī偤大chiahê城中，kap耶路撒冷ê街路所行ê，你無看見mah？ 18 kiáⁿ兒拾柴，老父hiâⁿ火，婦人人chhiau麵做餅，獻hō͘ 天后；koh tùi別號ê上帝灌奠；beh激我受氣。 19 耶和華講，In kiám是激我受氣？kiám m̄是激in家己，致到in ê面見笑mah？ 20 所以主耶和華án-ni講，看ah，我beh將我ê受氣，我ê痛恨，piàⁿ tī chit所在；就是piàⁿ tī人，kap cheng-siⁿ，以及田野ê樹木，kap土地ê出產；親像火to̍h bōe hoa。 21 萬軍ê耶和華以色列ê上帝án-ni講，Tio̍h將lín ê燒祭摻加tī lín chiahê祭，來食肉。 22 因為我chhōa lín ê列祖出埃及ê日，論到燒祭kap chiahê祭，我bē-bat對in講起來命令in。 23 我獨獨吩咐in chit一項，講，Lín tio̍h聽thàn我ê聲，我就beh做lín ê上帝，lín亦beh做我ê百姓；koh行我lóng總命令lín ê路，就thang得tio̍h福氣。 24 總是in m̄聽thàn，亦m̄俯耳孔；竟然照in ê計謀，kap剛硬ê pháiⁿ心，退後無進前。 25 Tùi lín ê列祖出埃及ê日到今á日，我差我ê眾奴僕先知到lín hia；koh ta̍k日早早起來差in。 26 In iáu-kú m̄聽我，亦m̄俯耳孔；反tńg硬in ê頷頸；in行pháiⁿ比in ê列祖khah傷重。 27 你tio̍h將chiahê一切ê話kā in講；總是in無beh聽你；你叫in，in亦無beh應你。 28 你tio̍h對in講，這就是m̄聽thàn耶和華in ê上帝ê聲，無受教督ê國民；誠實無去，tùi in ê嘴絕斷。 29 耶路撒冷ah，tio̍h剃你ê頭毛hiat-ka̍k；tī光khō-khō高ê所在唱哀傷ê歌；因為耶和華棄sak離開伊所受氣ê世代。 30 耶和華講，偤大ê百姓行我所看做pháiⁿ ê事；將可惡ê物chhāi tī用我ê名稱呼ê厝，phah lâ-sâm伊。 31 In tī Piān-him-lùn ê山谷，起Tô-hui-te̍k山頭ê壇；thang tī火中燒in ê kiáⁿ，cha-bó͘-kiáⁿ；這m̄是我所吩咐ê，亦m̄是我ê心所想ê。 32 耶和華講，因為日子beh到，chitê地方無koh稱做Tô-hui-te̍k，kap Piān-him-lùn ê山谷；是beh稱做刣人ê山谷；因為beh tī Tô-hui-te̍k埋葬死人，到無chhun所在。 33 Koh chitê百姓ê身屍，beh hō͘空中ê飛鳥，kap地上ê野獸，做食物；無人趕伊。 34 Hit時，tī偤大chiahê城kap耶路撒冷ê街市，我beh hō͘歡喜ê聲，快樂ê聲，新kiáⁿ婿ê聲，新娘ê聲，lóng總soah；因為chitê地lóng beh變做拋荒。
1 Ū ōe tùi Iâ-hô-hoa kàu Iâ-lī-bí, kóng, 2 Lí tio̍h khiā tī Iâ-hô-hoa ê chhù ê mn̂g, tī-hia soan-thoân chit ê ōe, kóng, Hoān-nā sio̍k Iû-tāi ji̍p chiah ê mn̂g, kèng-pài Iâ-hô-hoa--ê, tio̍h thiaⁿ Iâ-hô-hoa ê ōe. 3 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h kóe-chiàⁿ só͘-kiâⁿ só͘-chòe, Góa chiū hō͘ lín khiā-khí tī chit ê tōe-hng. 4 Lín m̄-thang óa-khò pe̍h-chha̍t ê ōe, kóng, Chiah-ê sī Iâ-hô-hoa ê tiān, sī Iâ-hô-hoa ê tiān, sī Iâ-hô-hoa ê tiān. 5 Lín nā it-chīn kóe-chiàⁿ só͘-kiâⁿ só͘-chòe; tī lâng kap chhù-piⁿ ê tiong-kan, chin-chiàⁿ ū kiâⁿ kong-pêng; 6 bô pháiⁿ khoán-thāi chhut-gōa lâng, í-ki̍p ko͘-jî kóaⁿ-hū; tī chit ê tōe-hng bô lâu bô-chōe ê lâng ê huih, ia̍h bô thàn pa̍t-hō ê siōng-tè lâi hām-hāi ka-kī; 7 Góa chiū hō͘ lín khiā-khí tī chit ê só͘-chāi, chiū-sī Góa só͘ siúⁿ-sù lín ê lia̍t-chó͘ ê tōe, tùi éng-oán kàu éng-oán. 8 Khòaⁿ ah, lín óa-khò pe̍h-chha̍t bô lī-ek ê ōe. 9 Lín thau-the̍h, thâi-lâng, kan-îm, lām-sám chiù-chōa, ǹg Pa-le̍k sio-hiuⁿ, ia̍h thàn lín pêng-sò͘ só͘ m̄-bat pa̍t-hō ê siōng-tè, 10 koh lâi khiā tī Góa ê bīn-chêng, tī chit-keng ēng Góa ê miâ lâi chheng-ho͘ ê chhù, kóng, Goán tit-tio̍h kiù lah; án-ni, sī beh hō͘ lín khì kiâⁿ chiah ê khó-ò͘ⁿ ê sū mah? 11 Chit-keng ēng Góa ê miâ lâi chheng-ho͘ ê chhù, lín khòaⁿ-chòe chha̍t-siū mah? Iâ-hô-hoa kóng, Khòaⁿ ah, Góa, Góa í-keng khòaⁿ-kìⁿ lah. 12 Lín taⁿ tio̍h khì Góa tī Sī-lô ê só͘-chāi, chiū-sī Góa khí-thâu siat-chòe kiû-kiò Góa ê miâ ê ūi, khòaⁿ Góa in-ūi Góa ê peh-sìⁿ Í-sek-lia̍t ê chōe-ok, cháiⁿ-iūⁿ khoán-thāi hit só͘-chāi. 13 Iâ-hô-hoa kóng, Taⁿ in-ūi lín kiâⁿ chiah ê it-chhè ê sū, Góa ū tùi lín kóng, ia̍h sī chá-chá khí--lâi kóng, nā-sī lín m̄ thiaⁿ; Góa koh kiò lín, nā-sī lín m̄ ìn; 14 só͘-í Góa beh khoán-thāi lín só͘ óa-khò chit-keng ēng Góa ê miâ chheng-ho͘ ê chhù, í-ki̍p Góa só͘ siúⁿ-sù lín kap lín ê lia̍t-chó͘ ê tōe, chhin-chhiūⁿ Góa chá khoán-thāi Sī-lô chi̍t-iūⁿ. 15 Góa iā beh kóaⁿ lín lī-khui Góa ê bīn-chêng, chhin-chhiūⁿ Góa bat kóaⁿ lín ê chèng hiaⁿ-tī, Í-hoat-liân it-chhè ê hō͘-è. 16 Só͘-í lí bo̍h-tit ūi-tio̍h chit ê peh-sìⁿ kî-tó, bo̍h-tit ūi-tio̍h in chhut-siaⁿ kî-kiû, ia̍h bo̍h-tit thòe in kiû Góa; in-ūi Góa bô beh thiaⁿ lí. 17 In tī Iû-tāi chiah ê siâⁿ-tiong, kap Iâ-lō͘-sat-léng ê ke-lō͘ só͘ kiâⁿ--ê, lí bô khòaⁿ-kìⁿ mah? 18 Kiáⁿ-jî khioh chhâ, lāu-pē hiâⁿ-hé, hū-jîn-lâng chhiau-mī chòe-piáⁿ, hiàn hō͘ Thian-hō͘; koh tùi pa̍t-hō ê siōng-tè koàn-tiān; beh kek Góa siū-khì. 19 Iâ-hô-hoa kóng, In kiám-sī kek Góa siū-khì? kiám m̄-sī kek in ka-kī, tì-kàu in ê bīn kiàn-siàu mah? 20 Só͘-í Chú Iâ-hô-hoa án-ni kóng, Khòaⁿ ah, Góa beh chiong Góa ê siū-khì, Góa ê thòng-hūn, piàⁿ tī chit só͘-chāi; chiū-sī piàⁿ tī lâng, kap cheng-siⁿ, í-ki̍p chhân-iá ê chhiū-ba̍k, kap thó͘-tōe ê chhut-sán; chhin-chhiūⁿ hé to̍h bōe hoa. 21 Bān-kun ê Iâ-hô-hoa Í-sek-lia̍t ê Siōng-tè án-ni kóng, Tio̍h chiong lín ê sio-chè chham-ka tī lín chiah ê chè, lâi chia̍h bah. 22 In-ūi Góa chhōa lín ê lia̍t-chó͘ chhut Ai-ki̍p ê ji̍t, lūn-kàu sio-chè kap chiah ê chè, Góa bē-bat tùi in kóng-khí lâi bēng-lēng in. 23 Góa to̍k-to̍k hoan-hù in chí chi̍t-hāng, kóng, Lín tio̍h thiaⁿ-thàn Góa ê siaⁿ, Góa chiū beh chòe lín ê Siōng-tè, lín ia̍h beh chòe Góa ê peh-sìⁿ; koh kiâⁿ Góa lóng-chóng bēng-lēng lín ê lō͘, chiū thang tit-tio̍h hok-khì. 24 Chóng-sī in m̄ thiaⁿ-thàn, ia̍h m̄ àⁿ hī-khang; kéng-jiân chiàu in ê kè-bô͘, kap kong-ngī ê pháiⁿ-sim, thè-āu bô chìn-chêng. 25 Tùi lín ê lia̍t-chó͘ chhut Ai-ki̍p ê ji̍t kàu kin-á-ji̍t, Góa chhe Góa ê chèng lô͘-po̍k sian-ti kàu lín hia; koh ta̍k-ji̍t chá-chá khí--lâi chhe in. 26 In iáu-kú m̄ thiaⁿ Góa, ia̍h m̄ àⁿ hī-khang; hoán-tńg ngī in ê ām-kún; in kiâⁿ pháiⁿ pí in ê lia̍t-chó͘ khah siong-tiōng. 27 Lí tio̍h chiong chiah-ê it-chhè ê ōe kā in kóng; chóng-sī in bô beh thiaⁿ lí; lí kiò--in, in ia̍h bô beh ìn--lí. 28 Lí tio̍h tùi in kóng, Che chiū-sī m̄ thiaⁿ-thàn Iâ-hô-hoa in ê Siōng-tè ê siaⁿ, bô siū kàu-tok ê kok-bîn; sêng-si̍t bô-khì, tùi in ê chhùi choa̍t-tn̄g. 29 Iâ-lō͘-sat-léng ah, tio̍h thì lí ê thâu-mn̂g hiat-ka̍k; tī kng-khō-khō koâiⁿ ê só͘-chāi chhiùⁿ ai-siong ê koa; in-ūi Iâ-hô-hoa khì-sak lī-khui I só͘ siū-khì ê sè-tāi. 30 Iâ-hô-hoa kóng, Iû-tāi ê peh-sìⁿ kiâⁿ Góa só͘ khòaⁿ-chòe pháiⁿ ê sū; chiong khó-ò͘ⁿ ê mi̍h chhāi tī ēng Góa ê miâ chheng-ho͘ ê chhù, phah lâ-sâm--i. 31 In tī Piān-him-lùn ê soaⁿ-kok, khí Tô-hui-te̍k soaⁿ-thâu ê tôaⁿ; thang tī hé-tiong sio in ê kiáⁿ, cha-bó͘-kiáⁿ; che m̄-sī Góa só͘ hoan-hù--ê, ia̍h m̄-sī Góa ê sim só͘ siūⁿ--ê. 32 Iâ-hô-hoa kóng, In-ūi ji̍t-chí beh kàu, chit ê tōe-hng bô koh chheng-chòe Tô-hui-te̍k, kap Piān-him-lùn ê soaⁿ-kok; sī beh chheng-chòe Thâi-lâng ê soaⁿ-kok; in-ūi beh tī Tô-hui-te̍k bâi-chòng sí-lâng, kàu bô chhun só͘-chāi. 33 Koh chit ê peh-sìⁿ ê sin-si, beh hō͘ khong-tiong ê pe-chiáu, kap tōe-chiūⁿ ê iá-siù, chòe chia̍h-mi̍h; bô lâng kóaⁿ--i. 34 Hit-sî, tī Iû-tāi chiah ê siâⁿ kap Iâ-lō͘-sat-léng ê koe-chhī, Góa beh hō͘ hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, lóng-chóng soah; in-ūi chit ê tōe lóng beh pìⁿ-chòe pha-hng.
1 耶和華講，當hit時，人beh將偤大列王ê骨骸，貴族ê骨骸，祭司ê骨骸，先知ê骨骸，耶路撒冷khiā起ê百姓ê骨骸，lóng tùi墓中the̍h出來， 2 排tī日、月，kap天象ê下面；就是in平素所意愛，所服事，所順thàn，所chhē求，所跪拜ê；chiahê骨骸無koh收拾，無koh埋葬；beh tī地面上成做糞埽。 3 Koh chitê pháiⁿ族所chhun-ê，就是tī我趕in到hia所chhun-ê，in lóng beh揀死，m̄揀活；這是萬軍ê耶和華講ê。 4 你tio̍h對in講，耶和華án-ni講，人跋倒，無koh peh起來mah？人oat去，無koh oat來mah？ 5 Án-ni chitê耶路撒冷ê百姓ê悖逆，啥事久長悖逆ah？in固執in ê詭詐，m̄肯回頭。 6 我留心聽，總是in無講正直ê話，無人反悔in pháiⁿ ê所行，講，我做ê是甚麼？in ta̍k人轉tńg行家己ê路，親像馬跑入戰場。 7 空中ê鶴知伊定tio̍h ê期；ka-chui燕á kap海雁，lóng守in來ê時；獨獨我ê百姓m̄知耶和華ê法律。 8 Lín怎樣講，阮是智慧ê人，耶和華ê律法tī阮中間？看ah，經學士舞弄筆墨，hō͘伊變做假。 9 智慧ê人見笑、驚惶、受掠；看ah，in放sak耶和華ê話，in ê心內iáu有甚麼智慧ah？ 10 所以我beh將in ê bó͘ hō͘別人，將in ê田園hō͘別人承接做業；因為in tùi第一細到第一大ê，lóng一味貪心；tùi先知到祭司lóng行奸詐。 11 In chhìn-chhìn chhái-chhái醫治我ê百姓ê傷，講，平安lah，平安lah；其實無平安。 12 In行可惡ê事，知見笑mah？無，in lóng無見笑，亦bōe 紅面；因為án-ni，in beh跋倒tī跋倒ê人ê中間；in受辦ê時beh顛倒；這是耶和華講ê。 13 耶和華講，我beh一盡滅in；葡萄樹beh無葡萄；無花果樹beh無無花果；葉亦beh枯焦；我所hō͘ in ê，lóng beh無去。 14 咱啥事靜靜坐ah？lín tio̍h聚集，就咱thang入chiahê堅固ê城；tī-hia恬恬；因為咱ê上帝耶和華hō͘咱恬恬；koh將苦ê水hō͘咱lim；lóng是因為咱得罪耶和華。 15 咱ǹg望平安，亦無有好處；ǹg望有醫好ê時期，反tńg有驚惶。 16 聽見tùi Tàn hia對敵ê馬phn̄g-phn̄g哮；in ê勇ê馬ki-ki哮，全地就lóng振動；因為in來吞滅chitê地，以及hit內面所有ê；吞滅chitê城，kap其中khiā起ê百姓。 17 Lín看，我beh差蛇，毒蛇，到lín中間，lín驅無法得ê，in beh咬lín；這是耶和華講ê。 18 我有憂悶，情願能得安慰；我ê心暈去。 19 看ah，我ê百姓哀傷ê聲，tùi遠遠ê所在來，講，耶和華無tī錫安mah？伊ê王無tī hit內面mah？In啥事用雕刻ê偶像，kap外邦虛假ê，來激我ê受氣ah？ 20 收成ê時已經過，夏天ê日已經盡；阮iáu無得tio̍h救。 21 因為我ê百姓ê毀傷，我亦受毀傷；我盡在哀傷，驚惶擒tiâu我。 22 Tī Ki-lia̍t kiám無乳香？tī-hia kiám無醫生？我ê百姓怎樣bōe得tio̍h醫好？
1 Iâ-hô-hoa kóng, Tng hit-sî lâng beh chiong Iû-tāi lia̍t-ông ê kut-hâi, kùi-cho̍k ê kut-hâi, chè-si ê kut-hâi, sian-ti ê kut-hâi, Iâ-lō͘-sat-léng khiā-khí ê peh-sìⁿ ê kut-hâi, lóng tùi bōng-tiong the̍h--chhut-lâi, 2 pâi tī ji̍t, ge̍h, kap thiⁿ-siōng ê ē-bīn; chiū-sī in pêng-sò͘ só͘ ì-ài, só͘ ho̍k-sāi, só͘ sūn-thàn, só͘ chhē-kiû, só͘ kūi-pài--ê; chiah ê kut-hâi bô koh siu-si̍p, bô koh bâi-chòng; beh tī tōe-bīn-chiūⁿ chiâⁿ-chòe pùn-sò. 3 Koh chit ê pháiⁿ-cho̍k só͘ chhun--ê, chiū-sī tī Góa kóaⁿ in kàu hia só͘ chhun--ê, in lóng beh kéng sí, m̄ kéng oa̍h; che sī bān-kun ê Iâ-hô-hoa kóng--ê. 4 Lí tio̍h tùi in kóng, Iâ-hô-hoa án-ni kóng, Lâng poa̍h-tó, bô koh peh--khí-lâi mah? lâng oat--khì, bô koh oat--lâi mah? 5 Án-ni chit ê Iâ-lō͘-sat-léng ê peh-sìⁿ ê pōe-ge̍k, siáⁿ-sū kú-tn̂g pōe-ge̍k ah? in kò͘-chip in ê khúi-chà, m̄-khéng hôe-thâu. 6 Góa liû-sim thiaⁿ, chóng-sī in bô kóng chèng-ti̍t ê ōe, bô lâng hoán-hóe in pháiⁿ ê só͘-kiâⁿ, kóng, Góa chòe--ê sī sím-mi̍h? in ta̍k-lâng choán-tńg kiâⁿ ka-kī ê lō͘, chhin-chhiūⁿ bé pháu-ji̍p chiàn-tiûⁿ. 7 Khong-tiong ê ho̍h chai i tiāⁿ-tio̍h ê kî; ka-chui ìⁿ-á kap hái-gān, lóng siú in lâi ê sî; to̍k-to̍k Góa ê peh-sìⁿ m̄-chai Iâ-hô-hoa ê hoat-lu̍t. 8 Lín cháiⁿ-iūⁿ kóng, Goán sī tì-hūi ê lâng, Iâ-hô-hoa ê lu̍t-hoat tī goán tiong-kan? Khòaⁿ ah, keng-ha̍k-sū bú-lāng pit-be̍k, hō͘ i pìⁿ-chòe ké. 9 Tì-hūi ê lâng kiàn-siàu, kiaⁿ-hiâⁿ, siū-lia̍h; khòaⁿ ah, in pàng-sak Iâ-hô-hoa ê ōe, in ê sim-lāi iáu ū sím-mi̍h tì-hūi ah? 10 Só͘-í Góa beh chiong in ê bó͘ hō͘ pa̍t-lâng, chiong in ê chhân-hn̂g hō͘ pa̍t-lâng sêng-chiap chòe-gia̍p; in-ūi in tùi tē-it sòe kàu tē-it tōa--ê, lóng it-bī tham-sim; tùi sian-ti kàu chè-si lóng kiâⁿ kan-chà. 11 In chhìn-chhìn chhái-chhái i-tī Góa ê peh-sìⁿ ê siong, kóng, Pêng-an lah, pêng-an lah; kî-si̍t bô pêng-an. 12 In kiâⁿ khó-ò͘ⁿ ê sū, chai kiàn-siàu mah? bô, in lóng bô kiàn-siàu, ia̍h bōe âng-bīn; in-ūi án-ni, in beh poa̍h-tó tī poa̍h-tó ê lâng ê tiong-kan; in siū pān ê sî beh tian-tó; che sī Iâ-hô-hoa kóng--ê. 13 Iâ-hô-hoa kóng, Góa beh it-chīn bia̍t--in; phû-tô-chhiū beh bô phû-tô; bû-hoa-kó chhiū beh bô bû-hoa-kó; hio̍h ia̍h beh ko͘-tâ; Góa só͘ hō͘ in--ê, lóng beh bô--khì. 14 Lán siáⁿ-sū chēng-chēng chē ah? lín tio̍h chū-chi̍p, chiū lán thang ji̍p chiah ê kian-kò͘ ê siâⁿ; tī-hia tiām-tiām; in-ūi lán ê Siōng-tè Iâ-hô-hoa hō͘ lán tiām-tiām; koh chiong khó͘ ê chúi hō͘ lán lim; lóng sī in-ūi lán tek-chōe Iâ-hô-hoa. 15 Lán ǹg-bāng pêng-an, ia̍h bô ū hó--chhù; ǹg-bāng ū i-hó ê sî-kî, hoán-tńg ū kiaⁿ-hiâⁿ. 16 Thiaⁿ-kìⁿ tùi Tàn hia tùi-te̍k ê bé phn̄g-phn̄g-háu; in ê ióng ê bé ki-ki-háu, choân-tōe chiū lóng tín-tāng; in-ūi in lâi thun-bia̍t chit ê tōe, í-ki̍p hit lāi-bīn só͘-ū--ê; thun-bia̍t chit ê siâⁿ, kap kî-tiong khiā-khí ê peh-sìⁿ. 17 Lín khòaⁿ, Góa beh chhe chôa, to̍k-chôa, kàu lín tiong-kan, lín khu bô hoat--tit-ê, in beh kā lín; che sī Iâ-hô-hoa kóng--ê. 18 Góa ū iu-būn, chêng-goān ōe-tit an-ùi; góa ê sim hūn-khì. 19 Khòaⁿ ah, góa ê peh-sìⁿ ai-siong ê siaⁿ, tùi hn̄g-hn̄g ê só͘-chāi lâi, kóng, Iâ-hô-hoa bô tī Sek-an mah? i ê ông bô tī hí(**hit) lāi-bīn mah? In siáⁿ-sū ēng tiau-khek ê ngó͘-siōng, kap gōa-pang hu-ké--ê, lâi kek Góa ê siū-khì ah? 20 Siu-sêng ê sî í-keng kè, hē-thiⁿ ê ji̍t í-keng chīn; goán iáu bô tit-tio̍h kiù. 21 In-ūi góa ê peh-sìⁿ ê húi-siong, góa ia̍h siū húi-siong; góa chīn-chāi ai-siong, kiaⁿ-hiâⁿ khîⁿ-tiâu góa. 22 Tī Ki-lia̍t kiám bô jú-hiuⁿ? tī-hia kiám bô i-seng? góa ê peh-sìⁿ cháiⁿ-iūⁿ bōe tit-tio̍h i-hó?
1 願我ê頭殼做水泉，我ê目睭做目屎ê源頭；我thang為我ê百姓中受刣 ê人，日暝啼哭。 2 願我tī曠野有出外人歇暝ê所在，我就thang棄sak我ê百姓來離開in；因為in lóng是行姦淫ê，是行詭詐ê黨類。 3 In捲彎in ê舌親像弓來講白賊；in tī國內加添勢力，m̄是為tio̍h真實；就是pháiⁿ了koh pháiⁿ，也m̄-bat我；這是耶和華講ê。 4 Lín ta̍k人tio̍h持防伊ê厝邊，lóng m̄-thang信靠兄弟；因為兄弟一盡相瞞騙；厝邊lóng四界行，譭謗人。 5 In ta̍k人欺騙厝邊；m̄願講真實；in教示in ê舌講白賊；tio̍h磨做pháiⁿ。 6 你khiā起tī詭詐中；in因為詭詐m̄肯認bat我；這是耶和華講ê。 7 所以萬軍ê耶和華án-ni講，看ah，我beh將in熔化來鍛鍊in；若無，我因為我ê百姓beh怎樣做ah？ 8 In ê舌是害死人ê箭；是講詭詐；人人對伊ê厝邊嘴講平安，心內teh siàu想伊。 9 耶和華講，我kiám無因為chiahê事來辦in mah？我ê心kiám無beh對chit號ê國民來報仇mah？ 10 我beh為tio̍h山嶺啼哭悲哀，為tio̍h曠野ê草場出聲哀哮；因為in已經燒lio去，甚至無人經過；人也無聽見cheng-siⁿ ê聲；空中ê飛鳥kap地上ê野獸lóng走了去。 11 我beh hō͘耶路撒冷變做土堆，做野狗 khiā起ê所在；也beh hō͘偤大chiahê城拋荒，無人khiā起。 12 Chī-chūi是智慧ê人thang明白chitê ah？耶和華ê嘴對是誰講，hō͘伊thang傳報ah？chitê地啥事滅無，燒毀親像曠野，甚至無人經過ah？ 13 耶和華講，因為in有棄sak我所設tī in ê面前ê律法，無聽我ê聲，也無行伊； 14 獨獨照in ê心ê剛硬來行，koh thàn chiahê Pa-le̍k，就是in ê列祖所教示ê； 15 所以萬軍ê耶和華，以色列ê上帝，án-ni講，看ah，我beh將茵蔯 hō͘ chitê百姓食，koh將苦ê水hō͘ in lim。 16 我也beh四散in tī列邦中，就是in kap in ê列祖m̄-bat ê邦國；也beh hō͘刀劍追jip in，到我一盡剿滅in。 17 萬軍ê耶和華án-ni講，Tio̍h致意想，叫hiahê替人哭ê婦人人來，也差人去chhē hiahê gâu ê婦人人，hō͘ in來； 18 in tio̍h緊緊來，為咱出聲哮，hō͘咱目屎直直流，hō͘咱ê目睭皮chhèng出水。 19 因為聽見哀傷ê聲tùi錫安出，講，咱怎樣衰敗！大大見笑，因為咱離開土地，因為人有拆毀咱ê厝宅。 20 Lín chiahê婦人人ah，tio̍h聽耶和華ê話，耳孔tio̍h聽受伊ê嘴所講ê話，tio̍h教示lín ê cha-bó͘-kiáⁿ啼哭，ta̍k-ê tio̍h教示in ê厝邊唱哀歌。 21 因為死無上來咱ê窗á門，入咱ê宮殿；tùi外面剿滅hiahê gín-ná，tùi街路剿滅hiahê少年人。 22 你tio̍h kā in講，耶和華án-ni講，人ê身屍beh親像糞埽，hiat tī郊野；koh親像收割ê人ka-chiah後所ka-la̍uh一把á ê稻á，無人拾伊。 23 耶和華án-ni講，智慧ê人，莫得因為伊ê智慧來誇口；勇猛ê人，莫得因為伊ê勇猛來誇口；好額ê人，莫得因為伊ê好額來誇口。 24 見若ài誇口ê，tio̍h因為chitê來誇口，就是伊bat我，知我是耶和華，行慈愛、公平、公義tī地裡ê；因為我掠chiahê做歡喜；這是耶和華講ê。 25 耶和華講，看ah，日子beh到，我beh刑罰一切受割禮ê，無受割禮ê； 26 就是埃及、偤大、Í-tong、A-bûn族、Mô͘-ap人；kap一切khiā起曠野剃鬢邊ê；因為列國lóng無受割禮；以色列人ê心亦無受割禮。
1 Goān góa ê thâu-khak chòe chúi-chôaⁿ, góa ê ba̍k-chiu chòe ba̍k-sái ê goân-thâu; góa thang ūi góa ê peh-sìⁿ-tiong siū-thâi ê lâng, ji̍t-mî thî-khàu. 2 Goān góa tī khòng-iá ū chhut-gōa lâng hioh-mî ê só͘-chāi, góa chiū thang khì-sak góa ê peh-sìⁿ lâi lī-khui in; in-ūi in lóng sī kiâⁿ kan-îm--ê, sī kiâⁿ khúi-chà ê tóng-lūi. 3 In kńg-oan in ê chi̍h chhin-chhiūⁿ keng lâi kóng pe̍h-chha̍t; in tī kok-lāi ke-thiⁿ sè-le̍k, m̄-sī ūi-tio̍h chin-si̍t; chiū-sī pháiⁿ-liáu koh pháiⁿ, iā m̄-bat Góa; che sī Iâ-hô-hoa kóng--ê. 4 Lín ta̍k-lâng tio̍h tî-hông i ê chhù-piⁿ, lóng m̄-thang sìn-khò hiaⁿ-tī; in-ūi hiaⁿ-tī it-chīn saⁿ môa-phiàn; chhù-piⁿ lóng sì-kòe kiâⁿ, húi-pòng lâng. 5 In ta̍k-lâng khi-phiàn chhù-piⁿ; m̄-goān kóng chin-si̍t; in kà-sī in ê chi̍h kóng pe̍h-chha̍t; tio̍h-bôa chòe-pháiⁿ. 6 Lí khiā-khí tī khúi-chà-tiong; in in-ūi khúi-chà m̄-khéng jīn-bat Góa; che sī Iâ-hô-hoa kóng--ê. 7 Só͘-í bān-kun ê Iâ-hô-hoa án-ni kóng, Khòaⁿ ah, Góa beh chiong in iûⁿ-hòa lâi thoàn-liān in; nā bô, Góa in-ūi Góa ê peh-sìⁿ beh cháiⁿ-iūⁿ chòe ah? 8 In ê chi̍h sī hāi-sí lâng ê chìⁿ; sī kóng khúi-chà; lâng-lâng tùi i ê chhù-piⁿ chhùi kóng pêng-an, sim-lāi teh siàu-siūⁿ i. 9 Iâ-hô-hoa kóng, Góa kiám bô in-ūi chiah ê sū lâi pān in mah? Góa ê sim kiám bô beh tùi chit hō ê kok-bîn lâi pò-siû mah? 10 Góa beh ūi-tio̍h soaⁿ-niá thî-khàu pi-ai, ūi-tio̍h khòng-iá ê chháu-tiûⁿ chhut-siaⁿ ai-háu; in-ūi in í-keng sio-lio--khì, sīm-chì bô lâng keng-kè; lâng iā bô thiaⁿ-kìⁿ cheng-siⁿ ê siaⁿ; khong-tiong ê pe-chiáu kap tōe-chiūⁿ ê iá-siù lóng cháu-láu-khì. 11 Góa beh hō͘ Iâ-lō͘-sat-léng piàn-chòe thô͘-tui, chòe iá-káu khiā-khí ê só͘-chāi; iā beh hō͘ Iû-tāi chiah ê siâⁿ pha-hng, bô lâng khiā-khí. 12 Chī-chūi sī tì-hūi ê lâng thang bêng-pe̍k chit-ê ah? Iâ-hô-hoa ê chhùi tùi chī-chūi kóng, hō͘ i thang thoân-pò ah? chit ê tōe siáⁿ-sū bia̍t-bô, sio-húi chhin-chhiūⁿ khòng-iá, sīm-chì bô lâng keng-kè ah? 13 Iâ-hô-hoa kóng, In-ūi in ū khì-sak Góa só͘ siat tī in ê bīn-chêng ê lu̍t-hoat, bô thiaⁿ Góa ê siaⁿ, iā bô kiâⁿ i; 14 to̍k-to̍k chiàu in ê sim ê kong-ngī lâi kiâⁿ, koh thàn chiah ê Pa-le̍k, chiū-sī in ê lia̍t-chó͘ só͘ kà-sī ê; 15 só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh chiong in-tîn hō͘ chit ê peh-sìⁿ chia̍h, koh chiong khó͘ ê chúi hō͘ in lim. 16 Góa iā beh sì-sòaⁿ in tī lia̍t-pang-tiong, chiū-sī in kap in ê lia̍t-chó͘ m̄-bat ê pang-kok; iā beh hō͘ to-kiàm tui-jip in, kàu Góa it-chīn châu-bia̍t in. 17 Bān-kun ê Iâ-hô-hoa án-ni kóng, Tio̍h tì-ì siūⁿ, kiò hiah ê thòe lâng khàu ê hū-jîn-lâng lâi, iā chhe lâng khì chhē hiah ê gâu ê hū-jîn-lâng, hō͘ in lâi; 18 in tio̍h kín-kín lâi, ūi lán chhut-siaⁿ háu, hō͘ lán ba̍k-sái ti̍t-ti̍t lâu, hō͘ lán ê ba̍k-chiu-phê chhèng-chhut chúi. 19 In-ūi thiaⁿ-kìⁿ ai-siong ê siaⁿ tùi Sek-an chhut, kóng, Lán cháiⁿ-iūⁿ soe-pāi! tōa-tōa kiàn-siàu, in-ūi lán lī-khui thó͘-tōe, in-ūi lâng ū thiah-húi lán ê chhù-the̍h. 20 Lín chiah ê hū-jîn-lâng ah, tio̍h thiaⁿ Iâ-hô-hoa ê ōe, hī-khang tio̍h thiaⁿ-siū I ê chhùi só͘ kóng ê ōe, tio̍h kà-sī lín ê cha-bó͘-kiáⁿ thî-khàu, ta̍k-ê tio̍h kà-sī in ê chhù-piⁿ chhiùⁿ ai-ko. 21 In-ūi sí-bô chiūⁿ-lâi lán ê thang-á-mn̂g, ji̍p lán ê kiong-tiān; tùi gōa-bīn châu-bia̍t hiah ê gín-ná, tùi ke-lō͘ châu-bia̍t hiah ê siàu-liân lâng. 22 Lí tio̍h kā in kóng, Iâ-hô-hoa án-ni kóng, Lâng ê sin-si beh chhin-chhiūⁿ pùn-sò, hiat tī kau-iá; koh chhin-chhiūⁿ siu-koah ê lâng ka-chiah-āu só͘ ka-la̍uh chi̍t-pé-á ê tiū-á, bô lâng khioh--i. 23 Iâ-hô-hoa án-ni kóng, Tì-hūi ê lâng, bo̍h-tit in-ūi i ê tì-hūi lâi khoa-kháu; ióng-béng ê lâng, bo̍h-tit in-ūi i ê ióng-béng lâi khoa-kháu; hó-gia̍h ê lâng, bo̍h-tit in-ūi i ê hó-gia̍h lâi khoa-kháu. 24 Kìⁿ-nā ài khoa-kháu--ê, tio̍h in-ūi chit-ê lâi khoa-kháu, chiū-sī i bat Góa, chai Góa sī Iâ-hô-hoa, kiâⁿ chû-ài, kong-pêng, kong-gī tī tōe--nih-ê; in-ūi Góa lia̍h chiah-ê chòe hoaⁿ-hí; che sī Iâ-hô-hoa kóng--ê. 25 Iâ-hô-hoa kóng, Khòaⁿ ah, ji̍t-chí beh kàu, Góa beh hêng-hoa̍t it-chhè siū kat-lé--ê, bô siū kat-lé--ê; 26 chiū-sī Ai-ki̍p, Iû-tāi, Í-tong, A-bûn-cho̍k, Mô͘-ap lâng; kap it-chhè khiā-khí khòng-iá thì pìn-piⁿ--ê; in-ūi lia̍t-kok lóng bô siū kat-lé; Í-sek-lia̍t lâng ê sim ia̍h bô siū kat-lé.
1 以色列家ah，tio̍h聽耶和華對lín所講ê話。 2 耶和華án-ni講，Lín m̄-thang學列國ê所行；亦m̄-thang為tio̍h天ê兆頭來驚惶；因為列國為tio̍h這來驚惶。 3 眾百姓ê風俗是空虛；in tī樹林內剉一叢樹，師傅ê手用斧頭造成ê。 4 In用金用銀鑲伊，用釘kap槌á釘tiâu，hō͘伊無搖動。 5 伊親像chhia圓ê柱，bōe講話；tio̍h人扛，因為伊bōe行；lín莫得驚伊；因為in bōe降災厄，亦無權thang降福氣。 6 耶和華ah，無甚麼能比並得你；獨獨你做大；你ê名大koh有能力。 7 萬百姓ê王ah，是誰 m̄-tio̍h驚畏你，這是合tī你；因為tī列國智慧ê人ê中間，雖然有高位ê，亦bōe比得你。 8 In lóng是愚蠢無知；偶像ê教示，不過是柴nā-tiāⁿ。 9 有銀phah kui片，tùi Tha-si帶來ê；亦有tùi O͘-hoat來ê金；lóng是師傅kap銀匠ê手做ê；koh有藍色紫色ê料做衫，lóng是奇巧ê師傅做ê。 10 獨獨耶和華是真ê上帝，伊是活ê上帝，是永遠ê王；伊一下受氣，地就振動；伊一下痛恨，列國lóng擋bōe-tiâu。 11 Lín tio̍h kā in án-ni講，Hiah-ê m̄是創造天地ê上帝 lóng beh tùi地上kap天下滅無去。 12 耶和華用能力創造地；用智慧建立世界；用聰明展開chiahê天。 13 伊一下出聲，空中就有chōe-chōe水激動；伊hō͘雲霧tùi地極chhèng起來；伊為tio̍h雨創造sih-nà；伊hō͘風tùi伊ê府庫出來。 14 Ta̍k人lóng愚蠢無智識；ta̍k ê銀匠lóng為tio̍h伊雕刻ê偶像來見笑；因為伊所鑄ê偶像是假ê，亦無活氣tī伊ê內面。 15 lóng是空空ê；是迷惑人ê所做；到辨理in ê時，的確受除滅。 16 雅各ê份額無親像chiahê；因為伊是創造萬物ê主；以色列亦是伊產業ê支派；萬軍ê耶和華是伊ê名。 17 你khiā起受圍ê城ê，tio̍h tùi地裡收拾你ê物件。 18 因為耶和華án-ni講，看ah，我chit時beh將chit所在khiā起ê百姓hìⁿ出去；koh beh困苦in，hō͘ in曉悟。 19 我有災厄ah，因為我受毀傷，我ê傷真傷重；總是我講，這是我ê痛苦，的確tio̍h忍受。 20 我ê布棚毀壞，我ê索lóng斷；我ê kiáⁿ兒離開我出去，taⁿ lóng無lah；無人koh搭我ê布棚，掛我ê帳幅。 21 因為牧者lóng愚蠢，無chhē求耶和華；所以bōe得tio̍h興通，in ê羊群亦lóng四散。 22 有風聲，看ah，來lah；有大擾亂tùi北方出來，beh hō͘偤大chiahê城拋荒，做野狗 khiā起ê所在。 23 耶和華ah，我知人ê路，m̄是tùi家己；行路ê人亦bōe主意家己ê腳步。 24 耶和華ah，你責備我，tio̍h從寬；m̄-thang tī你ê受氣中責備我；驚了hō͘我歸tī無去。 25 願你piàⁿ出你ê受氣tī m̄-bat你ê列國ê頂面，以及無求叫你ê名ê ta̍k族；因為in吞食雅各，吞伊，滅伊，hō͘伊khiā起ê所在拋荒。
1 Í-sek-lia̍t ke ah, tio̍h thiaⁿ Iâ-hô-hoa tùi lín só͘ kóng ê ōe. 2 Iâ-hô-hoa án-ni kóng, Lín m̄-thang o̍h lia̍t-kok ê só͘-kiâⁿ; ia̍h m̄-thang ūi-tio̍h thiⁿ ê tiāu-thâu lâi kiaⁿ-hiâⁿ; in-ūi lia̍t-kok ūi-tio̍h che lâi kiaⁿ-hiâⁿ. 3 Chèng peh-sìⁿ ê hong-sio̍k sī khang-hu; in tī chhiū-nâ-lāi chhò chi̍t châng chhiū, sai-hū ê chhiú ēng pó͘-thâu chō-chiâⁿ--ê. 4 In ēng kim ēng gûn siuⁿ--i, ēng teng kap thûi-á tèng-tiâu, hō͘ i bô iô-tāng. 5 I chhin-chhiūⁿ chhia-îⁿ ê thiāu, bōe kóng-ōe; tio̍h lâng kng, in-ūi i bōe kiâⁿ; lín bo̍h-tit kiaⁿ--i; in-ūi in bōe kàng chai-ē, ia̍h bô koân thang kàng hok-khì. 6 Iâ-hô-hoa ah, bô sím-mi̍h ōe pí-phēng-tit Lí; to̍k-to̍k Lí chòe tōa; Lí ê miâ tōa koh ū lêng-le̍k. 7 Bān peh-sìⁿ ê Ông ah, chī-chūi m̄-tio̍h kiaⁿ-ùi Lí, che sī ha̍p tī Lí; in-ūi tī lia̍t-kok tì-hūi ê lâng ê tiong-kan, sui-jiân ū koân-ūi--ê, ia̍h bōe pí-tit Lí. 8 In lóng sī gû-chhún bû-ti; ngó͘-siōng ê kà-sī, put-kò sī chhâ nā-tiāⁿ. 9 Ū gûn phah kui phìⁿ, tùi Tha-si tòa-lâi-ê; ia̍h ū tùi O͘-hoat lâi ê kim; lóng sī sai-hū kap gûn-chhiūⁿ ê chhiú chòe--ê; koh ū lâm-sek chí-sek ê liāu chòe-saⁿ, lóng sī kî-khiáu ê sai-hū chòe--ê. 10 To̍k-to̍k Iâ-hô-hoa sī chin ê Siōng-tè, I sī oa̍h ê Siōng-tè, sī éng-oán ê Ông; I chi̍t-ē siū-khì, tōe chiū tín-tāng; I chi̍t-ē thòng-hūn, lia̍t-kok lóng tòng-bōe-tiâu. 11 Lín tio̍h kā in án-ni kóng, Hiah-ê m̄-sī chhòng-chō thiⁿ-tōe ê siōng-tè lóng beh tùi tōe-chiūⁿ kap thiⁿ-ē bia̍t-bô--khì. 12 Iâ-hô-hoa ēng lêng-le̍k chhòng-chō tōe; ēng tì-hūi kiàn-li̍p sè-kài; ēng chhang-miâ tián-khui chiah ê thiⁿ. 13 I chi̍t-ē chhut siaⁿ, khong-tiong chiū ū chōe-chōe chúi kek-tōng; I hō͘ hûn-bū tùi tōe-ke̍k chhèng--khí-lâi; I ūi-tio̍h hō͘ chhòng-chō sih-nà; I hō͘ hong tùi I ê hú-khò͘ chhut--lâi. 14 Ta̍k-lâng lóng gû-chhún bô tì-sek; ta̍k ê gûn-chhiūⁿ lóng ūi-tio̍h i tiau-khek ê ngó͘-siōng lâi kiàn-siàu; in-ūi i só͘ chù ê ngó͘-siōng sī ké--ê, ia̍h bô oa̍h-khì tī i ê lāi-bīn. 15 Lóng sī khang-khang--ê; sī bê-he̍k lâng ê só͘ chòe; kàu pān-lí in ê sî, tek-khak siū tû-bia̍t. 16 Ngá-kok ê hūn-gia̍h bô chhin-chhiūⁿ chiah-ê; in-ūi I sī chhòng-chō bān-mi̍h ê Chú; Í-sek-lia̍t ia̍h sī I sán-gia̍p ê chi-phài; bān-kun ê Iâ-hô-hoa sī I ê miâ. 17 Lí khiā-khí siū-ûi ê siâⁿ--ê, tio̍h tùi tōe--nih siu-si̍p lí ê mi̍h-kiāⁿ. 18 In-ūi Iâ-hô-hoa án-ni kóng, Khòaⁿ ah, Góa chit-sî beh chiong chit só͘-chāi khiā-khí ê peh-sìⁿ hìⁿ--chhut-khì; koh beh khùn-khó͘ in, hō͘ in hiáu-ngō͘. 19 Góa ū chai-ē ah, in-ūi góa siū húi-siong, góa ê siong chin siong-tiōng; chóng-sī góa kóng, Che sī góa ê thòng-khó͘, tek-khak tio̍h jím-siū. 20 Góa ê pò͘-pîⁿ húi-hoāi, góa ê soh lóng tn̄g; góa ê kiáⁿ-jî lī-khui góa chhut-khì, taⁿ lóng bô--lah; bô lâng koh tah góa ê pò͘-pîⁿ, kòa góa ê tiùⁿ-pak. 21 In-ūi bo̍k-chiá lóng gû-chhún, bô chhē-kiû Iâ-hô-hoa; só͘-í bōe tit-tio̍h heng-thong, in ê iûⁿ-kûn ia̍h lóng sì-sòaⁿ. 22 Ū hong-siaⁿ, khòaⁿ ah, lâi--lah; ū tōa jiáu-loān tùi pak-hng chhut-lâi, beh hō͘ Iû-tāi chiah ê siâⁿ pha-hng, chòe iá-káu khiā-khí ê só͘-chāi. 23 Iâ-hô-hoa ah, góa chai lâng ê lō͘, m̄-sī tùi ka-kī; kiâⁿ-lō͘ ê lâng ia̍h bōe chú-ì ka-kī ê kha-pō͘. 24 Iâ-hô-hoa ah, Lí chek-pī góa, tio̍h chiông-khoan; m̄-thang tī Lí ê siū-khì-tiong chek-pī góa; kiaⁿ-liáu hō͘ góa kui tī bô--khì. 25 Goān Lí piàⁿ-chhut Lí ê siū-khì tī m̄-bat Lí ê lia̍t-kok ê téng-bīn, í-ki̍p bô kiû-kiò Lí ê miâ ê ta̍k-cho̍k; in-ūi in thun-chia̍h Ngá-kok, thun--i, bia̍t--i, hō͘ i khiā-khí ê só͘-chāi pha-hng.
1 有話tùi耶和華臨到耶利米，講， 2 Lín tio̍h聽chitê約ê話，kā偤大人kap耶路撒冷khiā起ê百姓講。 3 你對in講，耶和華以色列ê上帝án-ni講，無聽thàn chitê約ê話ê人，tio̍h受咒詛。 4 Chitê約是我chhōa lín ê列祖出埃及地，脫離鑄鐵ê爐，hit日所吩咐in-ê，講，Lín tio̍h聽thàn我ê話，照我一切所吩咐ê去行；án-ni lín就做我ê百姓，我亦做lín ê上帝。 5 Hō͘我thang堅固對lín ê列祖所chiù ê chōa；賞賜in流奶kap蜜ê地；tú-tú親像今á日一樣；我就應講，耶和華ah，A-bēng。 6 耶和華對我講，你tio̍h傳chiahê話tī偤大chiahê城，kap耶路撒冷ê街市，講，Lín tio̍h聽chitê約ê話，來行伊。 7 因為tùi我chhōa lín列祖出埃及hit一日，到今á日，我切切警戒in，就是早早起來警戒in，講，Lín tio̍h聽thàn我ê話。 8 總是in m̄聽thàn，m̄俯耳孔；竟然ta̍k-ê照家己pháiⁿ心ê剛硬去行；所以我hō͘ chitê約一切咒詛ê話臨到in ê身上；chitê約是我吩咐in tio̍h行ê，總是in無行。 9 耶和華對我講，Tī偤大人kap耶路撒冷人ê中間有謀叛ê事。 10 In oa̍t-tńg行in ê列祖ê pháiⁿ，in ê列祖m̄肯聽我ê話；in就thàn別號ê上帝來服事伊；以色列家kap偤大家違背我kap in ê列祖所立ê約。 11 所以耶和華án-ni講，看ah，我beh hō͘災厄臨到in，就是in所bōe逃脫ê；in beh對我哀求，我m̄聽in。 12 Hit時偤大chiahê城ê人，kap耶路撒冷khiā起ê百姓，beh去哀求in所燒香來服事hiahê上帝；總是tú-tio̍h患難ê時，chiahê上帝 lóng bōe能拯救in。 13 偤大ah，你ê上帝 ê數額，kap你ê城ê數額平平；你也為tio̍h thang見笑ê物來起壇，照耶路撒冷chiahê街路ê數額；hiahê壇就是燒香tī Pa-le̍k-ê。 14 所以你莫得為tio̍h chitê百姓祈禱，莫得為tio̍h in出聲祈求，因為in tú-tio̍h患難哀求我ê時，我無beh聽in。 15 我所疼ê，你已經行pháiⁿ，你tī我ê厝beh啥事？hē願，獻肉，kiám會除去你ê罪惡，hō͘你歡喜？ 16 耶和華bat稱你ê名做青翠ê橄欖樹，好看，亦結好果子；taⁿ伊用hōa-hōa嚷ê聲，起火tī伊ê頂面，枝椏亦受at折。 17 萬軍ê耶和華，早栽培你ê，taⁿ命令災厄攻擊你；是因為以色列kap偤大家行pháiⁿ，ǹg Pa-le̍k燒香，惹我ê受氣；家己做，家己受。 18 耶和華指點我，我chiah知；hit時你將in所行ê報我看。 19 總是我親像純良ê羊á，牽到受刣 ê地；我並m̄知in設計謀beh害我，講，咱將樹kap果子lóng kā伊滅去，將伊tùi活人ê地剪除去；hō͘伊ê名無koh hō͘人記念。 20 萬軍ê耶和華ah，你是照公義判斷，鑑察人ê心腹腎腸ê；求你hō͘我看你tùi in報仇，因為我將我ê案件稟明tī你。 21 所以耶和華論到siàu想你ê性命ê A-ná-tu̍t人án-ni講，In講，你莫得奉耶和華ê名來讖語；免得你死tī阮ê手頭。 22 所以萬軍ê耶和華án-ni講，看ah，我beh刑罰in；少年人beh hō͘刀刣死；in ê kiáⁿ cha-bó͘-kiáⁿ beh因為飢荒來死；hō͘ in無chhun一个； 23 因為辨理in ê年，我beh降災厄tī A-ná-tu̍t人。
1 Ū ōe tùi Iâ-hô-hoa lîm-kàu Iâ-lī-bí, kóng, 2 Lín tio̍h thiaⁿ chit ê iok ê ōe, kā Iû-tāi lâng kap Iâ-lō͘-sat-léng khiā-khí ê peh-sìⁿ kóng. 3 Lí tùi in kóng, Iâ-hô-hoa Í-sek-lia̍t ê Siōng-tè án-ni kóng, Bô thiaⁿ-thàn chit ê iok ê ōe ê lâng, tio̍h siū chiù-chó͘. 4 Chit ê iok sī Góa chhōa lín ê lia̍t-chó͘ chhut Ai-ki̍p tōe, thoat-lī chù-thih ê lô͘, hit-ji̍t só͘ hoan-hù in--ê, kóng, Lín tio̍h thiaⁿ-thàn Góa ê ōe, chiàu Góa it-chhè só͘ hoan-hù--ê khì kiâⁿ; án-ni lín chiū chòe Góa ê peh-sìⁿ, Góa ia̍h chòe lín ê Siōng-tè. 5 Hō͘ Góa thang kian-kò͘ tùi lín ê lia̍t-chó͘ só͘ chiù ê chōa; siúⁿ-sù in lâu ni kap bi̍t ê tōe; tú-tú chhin-chhiūⁿ kin-á-ji̍t chi̍t-iūⁿ; góa chiū ìn kóng, Iâ-hô-hoa ah, A-bēng. 6 Iâ-hô-hoa tùi góa kóng, Lí tio̍h thoân chiah ê ōe tī Iû-tāi chiah ê siâⁿ, kap Iâ-lō͘-sat-léng ê koe-chhī, kóng, Lín tio̍h thiaⁿ chit ê iok ê ōe, lâi kiâⁿ--i. 7 In-ūi tùi Góa chhōa lín lia̍t-chó͘ chhut Ai-ki̍p hit chi̍t ji̍t, kàu kin-á-ji̍t, Góa chhiat-chhiat kéng-kài in, chiū-sī chá-chá khí-lâi kéng-kài in, kóng, Lín tio̍h thiaⁿ-thàn Góa ê ōe. 8 Chóng-sī in m̄ thiaⁿ-thàn, m̄ àⁿ hī-khang; kéng-jiân ta̍k-ê chiàu ka-kī pháiⁿ-sim ê kong-ngī khì kiâⁿ; só͘-í Góa hō͘ chit ê iok it-chhè chiù-chó͘ ê ōe lîm-kàu in ê sin-chiūⁿ; chit ê iok sī Góa hoan-hù in tio̍h kiâⁿ--ê, chóng-sī in bô kiâⁿ. 9 Iâ-hô-hoa tùi góa kóng, Tī Iû-tāi lâng kap Iâ-lō͘-sat-léng lâng ê tiong-kan ū bô͘-poān ê sū. 10 In oa̍t-tńg kiâⁿ in ê lia̍t-chó͘ ê pháiⁿ, in ê lia̍t-chó͘ m̄-khéng thiaⁿ Góa ê ōe; in chiū thàn pa̍t-hō ê siōng-tè lâi ho̍k-sāi i; Í-sek-lia̍t ke kap Iû-tāi ke ûi-pōe Góa kap in ê lia̍t-chó͘ só͘ li̍p ê iok. 11 Só͘-í Iâ-hô-hoa án-ni kóng, Khòaⁿ ah, Góa beh hō͘ chai-ē lîm-kàu in, chiū-sī in só͘ bōe tô-thoat--ê; in beh tùi Góa ai-kiû, Góa m̄ thiaⁿ in. 12 Hit-sî Iû-tāi chiah ê siâⁿ ê lâng, kap Iâ-lō͘-sat-léng khiā-khí ê peh-sìⁿ, beh khì ai-kiû in só͘ sio-hiuⁿ lâi ho̍k-sāi hiah ê siōng-tè; chóng-sī tú-tio̍h hoān-lān ê sî, chiah ê siōng-tè lóng bōe-ōe chín-kiù in. 13 Iû-tāi ah, lí ê siōng-tè ê siàu-gia̍h, kap lí ê siâⁿ ê siàu-gia̍h pîⁿ-pîⁿ; lí iā ūi-tio̍h thang kiàn-siàu ê mi̍h lâi khí tôaⁿ, chiàu Iâ-lō͘-sat-léng chiah ê ke-lō͘ ê siàu-gia̍h; hiah ê tôaⁿ chiū-sī sio-hiuⁿ tī Pa-le̍k--ê. 14 Só͘-í lí bo̍h-tit ūi-tio̍h chit ê peh-sìⁿ kî-tó, bo̍h-tit ūi-tio̍h in chhut-siaⁿ kî-kiû, in-ūi in tú-tio̍h hoān-lān ai-kiû Góa ê sî, Góa bô beh thiaⁿ in. 15 Góa só͘ thiàⁿ--ê, lí í-keng kiâⁿ pháiⁿ, lí tī Góa ê chhù beh siáⁿ-sū? hē goān, hiàn bah, kiám ōe tû-khì lí ê chōe-ok, hō͘ lí hoaⁿ-hí? 16 Iâ-hô-hoa bat chheng lí ê miâ chòe chhiⁿ-chhùi ê kaⁿ-ná-chhiū, hó-khòaⁿ, ia̍h kiat hó ké-chí; taⁿ I ēng hōa-hōa-jióng ê siaⁿ, khí hé tī i ê téng-bīn, ki-oāiⁿ ia̍h siū at-chi̍h. 17 Bān-kun ê Iâ-hô-hoa, chá chai-pôe lí--ê, taⁿ bēng-lēng chai-ē kong-kek lí; sī in-ūi Í-sek-lia̍t kap Iû-tāi ke kiâⁿ-pháiⁿ, ǹg Pa-le̍k sio-hiuⁿ, jiá Góa ê siū-khì; ka-kī chòe, ka-kī siū. 18 Iâ-hô-hoa chí-tiám góa, góa chiah chai; hit-sî Lí chiong in só͘ kiâⁿ--ê pò góa khòaⁿ. 19 Chóng-sī góa chhin-chhiūⁿ sûn-liông ê iûⁿ-á, khan kàu siū thâi ê tōe; góa pēng m̄-chai in siat kè-bô͘ beh hāi góa, kóng, Lán chiong chhiū kap ké-chí lóng kā i bia̍t--khì, chiong i tùi oa̍h-lâng ê tōe chián-tû--khì; hō͘ i ê miâ bô koh hō͘ lâng kì-liām. 20 Bān-kun ê Iâ-hô-hoa ah, Lí sī chiàu kong-gī phòaⁿ-toàn, kàm-chhat lâng ê sim-pak sīn-tn̂g--ê; kiû Lí hō͘ góa khòaⁿ Lí tùi in pò-siû, in-ūi góa chiong góa ê àn-kiāⁿ pín-bêng tī Lí. 21 Só͘-í Iâ-hô-hoa lūn-kàu siàu-siūⁿ lí ê sìⁿ-miā ê A-ná-tu̍t lâng án-ni kóng, In kóng, Lí bo̍h-tit hōng Iâ-hô-hoa ê miâ lâi chhàm-gú; bián-tit lí sí tī goán ê chhiú-thâu. 22 Só͘-í bān-kun ê Iâ-hô-hoa án-ni kóng, Khòaⁿ ah, Góa beh hêng-hoa̍t in; siàu-liân lâng beh hō͘ to thâi-sí; in ê kiáⁿ cha-bó͘-kiáⁿ beh in-ūi ki-hng lâi sí; hō͘ in bô chhun chi̍t-ê; 23 in-ūi pān-lí in ê nî, Góa beh kàng chai-ē tī A-ná-tu̍t lâng.
1 耶和華ah，我kap你辯論ê時，你是公義；總是我iáu ài kap你理論；pháiⁿ人ê路為何興通？大行詭詐ê為何得tio̍h平安？ 2 你栽培in，in亦釘根，大叢koh結果子；照in ê嘴講，你是近；照in ê心想，你是遠。 3 耶和華ah，你知我，你看見我，試驗我ǹg你ê心；求你將in拖出來，親像beh 刣 ê羊；分別伊來thèng候刣 ê日。 4 Chitê地悲哀，thong國ê草菜枯焦，beh到tī時ah？為tio̍h khiā起hia ê百姓ê pháiⁿ，cheng-siⁿ飛鳥lóng滅無；因為in講，伊無看見阮ê結局。 5 耶和華講，你kap步行ê人相kap走，尚且厭倦；thái-ōe kap馬鬥跑ah？你tī平安ê地，雖然安穩，tī約旦河邊ê樹林beh àn怎樣？ 6 因為連你ê兄弟，連你ê老父ê家，lóng用奸詐款待你；in亦tī你ê後面大聲叫；雖然對你講好話，你亦莫得信in。 7 我離開我ê厝，放sak我ê產業；將我ê心所疼ê，交tī伊ê對敵ê手。 8 我ê產業tùi我親像樹林內ê獅；伊出聲攻擊我，因為án-ni我怨恨伊。 9 我ê產業對我kiám親像斑點ê鷹鳥mah？hiahê鷹鳥kiám tī伊ê四圍攻擊伊mah？lín tio̍h去聚集田野ê百獸，hō͘伊來吞食伊。 10 Chōe-chōe牧者毀壞我ê葡萄園，thún踏我ê份額；hō͘我好好ê份額變做拋荒ê曠野。 11 In hō͘地拋荒，地已經拋荒，就對我悲哀；全地拋荒，因為無人掛意。 12 殘害ê到曠野中一切光khō-khō高ê所在；耶和華ê刀，tùi地ê chit-pêng到地ê hit-pêng，一盡剿滅；見有血氣ê，lóng無平安。 13 In種麥，收成刺phè；勞苦亦lóng無利益；因為耶和華ê大受氣，in beh為tio̍h in ê土產來見笑。 14 論到一切pháiⁿ厝邊，就是害tio̍h我所hō͘我ê百姓以色列承接ê產業ê，耶和華有án-ni講，看ah，我beh將in拔出in ê地；koh beh將偤大家tùi in中間拔出來。 15 我拔出in以後，我beh 倒tńg來憐憫in；chhōa in倒來，ta̍k人歸伊ê本業，ta̍k人歸伊ê本所在。 16 In若肯慇勤學習我ê百姓ê道路，kí我ê名chiù-chōa，講，耶和華是活ê，親像in前教示我ê百姓kí Pa-le̍k來chiù-chōa一樣，in就beh得tio̍h建立tī我ê百姓ê中間。 17 In若m̄聽，就我beh拔出chit國，拔出來滅伊；這是耶和華講ê。
1 Iâ-hô-hoa ah, góa kap Lí piān-lūn ê sî, Lí sī kong-gī; chóng-sī góa iáu ài kap Lí lí-lūn; pháiⁿ-lâng ê lō͘ ūi-hô heng-thong? tōa kiâⁿ khúi-chà--ê ūi-hô tit-tio̍h pêng-an? 2 Lí chai-pôe in, in ia̍h tèng kun, tōa-châng koh kiat ké-chí; chiàu in ê chhùi kóng, Lí sī kūn; chiàu in ê sim siūⁿ, Lí sī hn̄g. 3 Iâ-hô-hoa ah, Lí chai góa, Lí khòaⁿ-kìⁿ góa, chhì-giām góa ǹg Lí ê sim; kiû Lí chiong in thoa--chhut-lâi, chhin-chhiūⁿ beh thâi ê iûⁿ; hun-piat--i lâi thèng-hāu thâi ê ji̍t. 4 Chit ê tōe pi-ai, thong-kok ê chháu-chhài ko͘-tâ, beh kàu tī-sî ah? ūi-tio̍h khiā-khí hia ê peh-sìⁿ ê pháiⁿ, cheng-siⁿ pe-chiáu lóng bia̍t-bô; in-ūi in kóng, I bô khòaⁿ-kìⁿ goán ê kiat-kio̍k. 5 Iâ-hô-hoa kóng, Lí kap pō͘-kiâⁿ ê lâng saⁿ-kap cháu, siōng-chhiáⁿ ià-siān; thái-ōe kap bé tàu-pháu ah? lí tī pêng-an ê tōe, sui-jiân an-ún, tī Iok-tàn hô-piⁿ ê chhiū-nâ beh àn-cháiⁿ-iūⁿ? 6 In-ūi liân lí ê hiaⁿ-tī, liân lí ê lāu-pē ê ke, lóng ēng kan-chà khoán-thāi lí; in ia̍h tī lí ê āu-bīn tōa-siaⁿ kiò; sui-jiân tùi lí kóng hó-ōe, lí ia̍h bo̍h-tit sìn--in. 7 Góa lī-khui Góa ê chhù, pàng-sak Góa ê sán-gia̍p; chiong Góa ê sim só͘ thiàⁿ--ê, kau tī i ê tùi-te̍k ê chhiú. 8 Góa ê sán-gia̍p tùi Góa chhin-chhiūⁿ chhiū-nâ-lāi ê sai; i chhut-siaⁿ kong-kek Góa, in-ūi án-ni Góa oàn-hūn i. 9 Góa ê sán-gia̍p tùi Góa kiám chhin-chhiūⁿ pan-tiám ê eng-chiáu mah? hiah ê eng-chiáu kiám tī i ê sì-ûi kong-kek i mah? lín tio̍h khì chū-chi̍p chhân-iá ê pah siù, hō͘ i lâi thun-chia̍h--i. 10 Chōe-chōe bo̍k-chiá húi-hoāi Góa ê phû-tô-hn̂g, thún-ta̍h Góa ê hūn-gia̍h; hō͘ Góa hó-hó ê hūn-gia̍h pìⁿ-chòe pha-hng ê khòng-iá. 11 In hō͘ tōe pha-hng, tōe í-keng pha-hng, chiū tùi Góa pi-ai; choân-tōe pha-hng, in-ūi bô lâng khòa-ì. 12 Chân-hāi--ê kàu khòng-iá-tiong it-chhè kng-khō-khō koâiⁿ ê só͘-chāi; Iâ-hô-hoa ê to, tùi tōe ê chit-pêng kàu tōe ê hit-pêng, it-chīn châu-bia̍t; kìⁿ-ū hiat-khì--ê, lóng bô pêng-an. 13 In chèng be̍h, siu-sêng chhì-phè; lô-khó͘ ia̍h lóng bô lī-ek; in-ūi Iâ-hô-hoa ê tōa siū-khì, in beh ūi-tio̍h in ê thó͘-sán lâi kiàn-siàu. 14 Lūn-kàu it-chhè pháiⁿ chhù-piⁿ, chiū-sī hāi-tio̍h Góa só͘ hō͘ Góa ê peh-sìⁿ Í-sek-lia̍t sêng-chiap ê sán-gia̍p--ê, Iâ-hô-hoa ū án-ni kóng, Khòaⁿ ah, Góa beh chiong in pu̍ih-chhut in ê tōe; koh beh chiong Iû-tāi ke tùi in tiong-kan pu̍ih-chhut--lâi. 15 Góa pu̍ih-chhut in í-āu, Góa beh tò-tńg lâi lîn-bín in; chhōa in tò--lâi, ta̍k-lâng kui i ê pún-gia̍p, ta̍k-lâng kui i ê pún só͘-chāi. 16 In nā khéng un-khûn ha̍k-si̍p Góa ê peh-sìⁿ ê tō-lō͘, kí Góa ê miâ chiù-chōa, kóng, Iâ-hô-hoa sī oa̍h--ê, chhin-chhiūⁿ in chêng kà-sī Góa ê peh-sìⁿ kí Pa-le̍k lâi chiù-chōa chi̍t-iūⁿ, in chiū beh tit-tio̍h kiàn-li̍p tī Góa ê peh-sìⁿ ê tiong-kan. 17 In nā m̄ thiaⁿ, chiū Góa beh pu̍ih-chhut chit-kok, pu̍ih-chhut lâi bia̍t--i; che sī Iâ-hô-hoa kóng--ê.
1 耶和華對我án-ni講，你tio̍h去買一條麻布ê帶來縖腰；m̄-thang hē tī水裡。 2 我就照耶和華ê話，買一條帶縖腰。 3 耶和華ê話第二pái臨到我講， 4 Tio̍h the̍h你所買ê帶，就是你腰裡ê帶，起來去Pek-la̍h，tī-hia khǹg伊tī石磐孔。 5 我就去，khǹg伊tī Pek-la̍h，照耶和華所吩咐我ê。 6 過chōe-chōe日，耶和華對我講，你起來，去Pek-la̍h，將我吩咐你khǹg tī-hia ê腰帶the̍h來。 7 我就去Pek-la̍h來掘，tùi我所khǹg ê所在the̍h hit條帶；看ah，hit條帶已經pháiⁿ去，lóng無路用。 8 耶和華ê話臨到我講， 9 耶和華án-ni講，我beh照án-ni敗壞偤大ê驕傲，kap耶路撒冷ê大驕傲。 10 Chitê pháiⁿ ê百姓m̄肯聽我ê話，照in ê心ê剛硬去行；koh thàn別號ê上帝，服事伊，跪拜伊；in beh親像chit條無路用ê帶。 11 耶和華講，腰帶怎樣連tī人ê腰，我有hō͘以色列全家，kap偤大全家，連tī我，亦是án-ni；beh hō͘ in做我ê百姓，做我ê名聲，做我ê o-ló，做我ê榮光；總是in m̄肯聽。 12 你tio̍h koh對in講chitê話，以色列ê上帝耶和華án-ni講，Ta̍k ê甕beh貯酒滿滿；in beh對你講，阮kiám m̄知ta̍k ê甕beh貯酒滿滿mah？ 13 你就tio̍h對in講，耶和華án-ni講，看ah，我beh hō͘ chit所在一切khiā起ê百姓，就是坐大衛寶座ê列王，kap祭司、先知，以及耶路撒冷一切khiā起ê百姓，lóng大大酒醉。 14 耶和華講，我beh hō͘ in大家相磕；就是父kap kiáⁿ相磕；我無beh可憐，無beh疼惜，無beh憐憫，來m̄滅伊。 15 Lín tio̍h聽，tio̍h俯耳孔；莫得驕傲，因為耶和華已經講伊。 16 烏暗未到，lín ê腳未tio̍h-tak tī烏暗ê山，所ǹg望ê光iáu未變做死無ê蔭影，烏烏暗暗ê事先，lín tio̍h歸榮光lín ê上帝耶和華。 17 Lín若m̄聽chitê話，就我ê心beh因為lín ê驕傲，tī隱密ê所在啼哭；我ê目睭beh目屎chhē-chhē倒；因為耶和華ê羊群受掠。 18 你tio̍h tùi君王kap太后講，Lín tio̍h謙卑，坐tī下面；因為lín榮光ê冕旒tùi lín ê頭殼lak落去。 19 南方chiahê城lóng關，無人開；偤大全族受掠；koh掠到了了。 20 Lín tio̍h kia̍h目看，tùi北方來ê人；前所hō͘你ê羊群，就是你súi ê羊群，taⁿ tī toh-lo̍h ah？ 21 你平素所親密ê朋友，設使伊設立in做頭來管轄你，你iáu有甚麼話thang講？痛苦kiám無擒tiâu你，親像生kiáⁿ ê婦人人？ 22 你若心內講，這一切ê事為何到tī我leh？是因為你ê罪過真重，所以你露體赤腳。 23 Kó͘-si̍t ê人會變換皮膚，豹會變換斑點mah？若會，就lín chiahê慣練行pháiⁿ-ê，會行好。 24 所以我beh phah散in，親像草幼hō͘曠野ê風吹去一樣。 25 耶和華講，這是你所應該tú-tio̍h-ê；是我量hō͘你ê份額；因為你bōe記得我，去óa靠虛假。 26 所以我beh掀起你ê裙，罩tī你ê面；你ê見笑就露出。 27 你hiahê可惡ê事，就是tī山裡田裡行姦淫，出ki-ki哮ê聲，娼妓款ê淫亂，我lóng看見lah。耶路撒冷ah，你有災厄；你m̄肯清氣，beh到tī時ah？
1 Iâ-hô-hoa tùi góa án-ni kóng, Lí tio̍h khì bóe chi̍t-tiâu môa-pò͘ ê tòa lâi hâ-io; m̄-thang hē tī chúi--nih. 2 Góa chiū chiàu Iâ-hô-hoa ê ōe, bóe chi̍t tiâu tòa hâ-io. 3 Iâ-hô-hoa ê ōe tē-jī pái lîm-kàu góa kóng, 4 Tio̍h the̍h lí só͘ bóe ê tòa, chiū-sī lí io--nih ê tòa, khí--lâi khì Pek-la̍h, tī-hia khǹg--i tī chio̍h-pôaⁿ khang. 5 Góa chiū khì, khǹg i tī Pek-la̍h, chiàu Iâ-hô-hoa só͘ hoan-hù góa--ê. 6 Kè chōe-chōe ji̍t, Iâ-hô-hoa tùi góa kóng, Lí khí--lâi, khì Pek-la̍h, chiong Góa hoan-hù lí khǹg tī-hia ê io-tòa the̍h--lâi. 7 Góa chiū khì Pek-la̍h lâi ku̍t, tùi góa só͘ khǹg ê só͘-chāi the̍h hit tiâu tòa; khòaⁿ ah, hit tiâu tòa í-keng pháiⁿ--khì, lóng bô lō͘-ēng. 8 Iâ-hô-hoa ê ōe lîm-kàu góa kóng, 9 Iâ-hô-hoa án-ni kóng, Góa beh chiàu án-ni pāi-hoāi Iû-tāi ê kiau-ngō͘, kap Iâ-lō͘-sat-léng ê tōa kiau-ngō͘. 10 Chit-ê pháiⁿ ê peh-sìⁿ m̄-khéng thiaⁿ Góa ê ōe, chiàu in ê sim ê kong-ngī khì kiâⁿ; koh thàn pa̍t-hō ê siōng-tè, ho̍k-sāi i, kūi-pài i; in beh chhin-chhiūⁿ chit-tiâu bô lō͘-ēng ê tòa. 11 Iâ-hô-hoa kóng, Io-tòa cháiⁿ-iūⁿ liân tī lâng ê io, Góa ū hō͘ Í-sek-lia̍t choân-ke, kap Iû-tāi choân-ke, liân tī Góa, ia̍h sī án-ni; beh hō͘ in chòe Góa ê peh-sìⁿ, chòe Góa ê miâ-siaⁿ, chòe Góa ê o-ló, chòe Góa ê êng-kng; chóng-sī in m̄-khéng thiaⁿ. 12 Lí tio̍h koh tùi in kóng chit ê ōe, Í-sek-lia̍t ê Siōng-tè Iâ-hô-hoa án-ni kóng, Ta̍k ê àng beh tóe chiú móa-móa; in beh tùi lí kóng, Goán kiám m̄-chai ta̍k ê àng beh tóe chiú móa-móa mah? 13 Lí chiū tio̍h tùi in kóng, Iâ-hô-hoa án-ni kóng, Khòaⁿ ah, Góa beh hō͘ chit só͘-chāi it-chhè khiā-khí ê peh-sìⁿ, chiū-sī chē Tāi-pi̍t pó-chō ê lia̍t-ông, kap chè-si, sian-ti, í-ki̍p Iâ-lō͘-sat-léng it-chhè khiā-khí ê peh-sìⁿ, lóng tōa-tōa chiú-chùi. 14 Iâ-hô-hoa kóng, Góa beh hō͘ in tāi-ke saⁿ-kha̍p; chiū-sī pē kap kiáⁿ saⁿ-kha̍p; Góa bô beh khó-lîn, bô beh thiàⁿ-sioh, bô beh lîn-bín, lâi m̄-bia̍t--i. 15 Lín tio̍h thiaⁿ, tio̍h àⁿ hī-khang; bo̍h-tit kiau-ngō͘, in-ūi Iâ-hô-hoa í-keng kóng--i. 16 O͘-àm bē kàu, lín ê kha bē tio̍h-tak tī o͘-àm ê soaⁿ, só͘ ǹg-bāng ê kng iáu-bē piàn-chòe sí-bô ê ìm-ńg, o͘-o͘ àm-àm ê tāi-seng, lín tio̍h kui êng-kng lín ê Siōng-tè Iâ-hô-hoa. 17 Lín nā m̄ thiaⁿ chit ê ōe, chiū góa ê sim beh in-ūi lín ê kiau-ngō͘, tī ún-ba̍t ê só͘-chāi thî-khàu; góa ê ba̍k-chiu beh ba̍k-sái chhē-chhē-tò; in-ūi Iâ-hô-hoa ê iûⁿ-kûn siū-lia̍h. 18 Lí tio̍h tùi kun-ông kap thài-hō͘ kóng, Lín tio̍h khiam-pi, chē tī ē-bīn; in-ūi lín êng-kng ê bián-liû tùi lín ê thâu-khak lak--lo̍h-khì. 19 Lâm-hng chiah ê siâⁿ lóng koaiⁿ, bô lâng khui; Iû-tāi choân-cho̍k siū-lia̍h; koh lia̍h kàu liáu-liáu. 20 Lín tio̍h kia̍h-ba̍k khòaⁿ, tùi pak-hng lâi ê lâng; chêng só͘ hō͘ lí ê iûⁿ-kûn, chiū-sī lí súi ê iûⁿ-kûn, taⁿ tī toh-lo̍h ah? 21 Lí pêng-sò͘ só͘ chhin-bi̍t ê pêng-iú, siat-sú I siat-li̍p in chòe-thâu lâi koán-hat lí, lí iáu ū sím-mi̍h ōe thang kóng? thòng-khó͘ kiám bô khîⁿ-tiâu lí, chhin-chhiūⁿ siⁿ-kiáⁿ ê hū-jîn-lâng? 22 Lí nā sim-lāi kóng, Che it-chhè ê sū ūi-hô kàu tī góa leh? sī in-ūi lí ê chōe-kòa chin-tāng, só͘-í lí lō͘-thé chhiah-kha. 23 Kó͘-si̍t ê lâng ōe piàn-ōaⁿ phê-hu, pà ōe piàn-ōaⁿ pan-tiám mah? Nā ōe, chiū lín chiah-ê koàn-liān kiâⁿ pháiⁿ--ê, ōe kiâⁿ hó. 24 Só͘-í Góa beh phah-sòaⁿ in, chhin-chhiūⁿ chháu-iù hō͘ khòng-iá ê hong chhe--khì chi̍t-iūⁿ. 25 Iâ-hô-hoa kóng, Che sī lí só͘ eng-kai tú-tio̍h--ê; sī Góa niû hō͘ lí ê hūn-gia̍h; in-ūi lí bōe-kì-tit Góa, khì óa-khò hu-ké. 26 Só͘-í Góa beh hian-khí lí ê kûn, tà tī lí ê bīn; lí ê kiàn-siàu chiū lō͘-chhut. 27 Lí hiah-ê khó-ò͘ⁿ ê sū, chiū-sī tī soaⁿ--nih chhân--nih kiâⁿ kan-îm, chhut ki--ki-háu ê siaⁿ, chhiong-ki khoán ê îm-loān, Góa lóng khòaⁿ-kìⁿ lah. Iâ-lō͘-sat-léng ah, lí ū chai-ē; lí m̄-khéng chheng-khì, beh kàu tī-sî ah?
1 論到炕旱ê事，耶和華ê話臨到耶利米。 2 偤大悲哀，城門衰敗，人穿烏衫坐tī土腳；耶路撒冷悲哀ê聲透到頂面。 3 In ê 世家差gín-ná工去chhiūⁿ水；in到井裡，chhē無水；就帶空ê器具tò來；見笑，漏氣，罩頭殼。 4 作田人見笑，罩頭殼；是因為無落雨，土地pit裂。 5 田野ê鹿母生kiáⁿ，就放hiat-ka̍k；因為無草。 6 野驢khiā tī光khō-khō高ê所在，喘氣親像野狗；因為無草，目睭失明。 7 耶和華ah，阮ê罪過雖然做干證告阮；iáu-kú求你為tio̍h你ê名來做tāi-chì；阮ta̍uh-ta̍uh悖逆，得罪你。 8 以色列所ǹg望ê，tī患難中做救主ê ah，你啥事tī chit所在親像寄腳ê，koh親像過路人oa̍t來歇過暝ah？ 9 你啥事親像gông-ngia̍h ê人，親像bōe能救人ê勇士ah？耶和華ah，你猶原tī阮中間；阮亦稱做屬你ê名ê人；m̄-thang放sak阮。 10 耶和華對chitê百姓án-ni講，In ài放蕩，無約束in ê腳；所以耶和華m̄接納in，taⁿ beh記得in ê罪過，辦in ê罪惡。 11 耶和華koh對我講，莫得為tio̍h chitê百姓祈禱，求福氣。 12 In禁食ê時，我m̄聽in ê求叫；in獻燒祭kap禮物，我亦m̄接納。我反tńg beh用刀劍，用飢荒，用瘟疫來滅in。 13 我就講，害ah，主耶和華ah，看ah，hiahê先知對in講，Lín bōe看見刀劍，亦bōe tú-tio̍h飢荒；耶和華beh tī chitê地方賞賜lín久長ê平安。 14 耶和華對我講，hiahê先知託我ê名傳白賊；我無差in，無吩咐in，亦無對in講；in傳hō͘ lín-ê，是虛假ê啟示，kap占卜，kap無影ê事，以及in ê心ê詭詐。 15 所以耶和華án-ni講，論到託我ê名來傳播ê hiahê先知，我並無差in，in iáu-kú講，chitê地bōe會tú-tio̍h刀劍，飢荒；其實hiahê先知beh tùi刀劍飢荒來滅無。 16 Koh聽in傳播ê百姓，beh因為飢荒刀劍受hiat-ka̍k tī耶路撒冷ê街路；in kap bó͘ kap kiáⁿ cha-bó͘-kiáⁿ，lóng無人埋葬；我beh將in ê pháiⁿ piàⁿ tī in ê身上。 17 你tio̍h將chitê話kā in講，願我ê目屎日暝流無soah；因為我ê百姓tú-tio̍h大毀傷，phah到真thiám。 18 我若出去田裡，就看見有hō͘刀刣-ê；我若入城，就看見有tùi飢荒來破病ê；先知kap祭司tī國內四界行，亦lóng bōe曉得。 19 你一盡棄sak偤大mah？你ê心厭惡錫安mah？啥事phah阮，亦無thang得tio̍h醫好？阮ǹg望平安，亦無有福氣；ǹg望醫治ê機會，無phah算tú-tio̍h驚惶。 20 耶和華ah，阮認家己ê罪惡，kap阮ê列祖ê罪過；因為阮得罪你。 21 求你因為你ê名ê緣故，莫得厭惡阮；莫得凌辱你榮光ê寶座；求你追念，莫得背你kap阮所立ê約。 22 外邦無影跡ê神明，有一个會落雨mah？天會家己落大雨mah？耶和華阮ê上帝ah，會án-ni-ê，kiám m̄是你mah？所以阮猶原beh thèng候你；因為這lóng是你所做ê。
1 Lūn-kàu khòng-hān ê sū, Iâ-hô-hoa ê ōe lîm-kàu Iâ-lī-bí. 2 Iû-tāi pi-ai, siâⁿ-mn̂g soe-pāi, lâng chhēng o͘-saⁿ chē tī thô͘-kha; Iâ-lō͘-sat-léng pi-ai ê siaⁿ thàu kàu téng-bīn. 3 In ê sè-ka chhe gín-ná-kang khì chhiūⁿ-chúi; in kàu chíⁿ--nih, chhē bô chúi; chiū tòa khang ê khì-kū tò--lâi; kiàn-siàu, làu-khùi, tà thâu-khak. 4 Choh-chhân lâng kiàn-siàu, tà thâu-khak; sī in-ūi bô lo̍h hō͘, thô͘(**thó͘)-tōe pit-li̍h. 5 Chhân-iá ê lo̍k-bú siⁿ-kiáⁿ, chiū pàng hiat-ka̍k; in-ūi bô chháu. 6 Iá-lû khiā tī kng-khō-khō koâiⁿ ê só͘-chāi, chhoán-khùi chhin-chhiūⁿ iá-káu; in-ūi bô chháu, ba̍k-chiu sit-bêng. 7 Iâ-hô-hoa ah, goán ê chōe-kòa sui-jiân chòe kan-chèng kò goán; iáu-kú kiû Lí ūi-tio̍h Lí ê miâ lâi chòe tāi-chì; goán ta̍uh-ta̍uh pōe-ge̍k, tek-chōe Lí. 8 Í-sek-lia̍t só͘ ǹg-bāng--ê, tī hoān-lān-tiong chòe Kiù-chú--ê ah, Lí siáⁿ-sū tī chit só͘-chāi chhin-chhiūⁿ kià-kha--ê, koh chhin-chhiūⁿ kè-lō͘ lâng oa̍t--lâi hioh kè-mî ah? 9 Lí siáⁿ-sū chhin-chhiūⁿ gông-ngia̍h ê lâng, chhin-chhiūⁿ bōe-ōe kiù lâng ê ióng-sū ah? Iâ-hô-hoa ah, Lí iû-goân tī goán tiong-kan; goán ia̍h chheng-chòe sio̍k Lí ê miâ ê lâng; m̄-thang pàng-sak goán. 10 Iâ-hô-hoa tùi chit ê peh-sìⁿ án-ni kóng, In ài hòng-tōng, bô iok-sok in ê kha; só͘-í Iâ-hô-hoa m̄ chiap-la̍p in, taⁿ beh kì-tit in ê chōe-kòa, pān in ê chōe-ok. 11 Iâ-hô-hoa koh tùi góa kóng, Bo̍h-tit ūi-tio̍h chit ê peh-sìⁿ kî-tó, kiû hok-khì. 12 In kìm-chia̍h ê sî, Góa m̄-thiaⁿ in ê kiû-kiò; in hiàn sio-chè kap lé-mi̍h, Góa ia̍h m̄ chiap-la̍p. Góa hoán-tńg beh ēng to-kiàm, ēng ki-hng, ēng un-e̍k lâi bia̍t in. 13 Góa chiū kóng, Hāi--ah, Chú Iâ-hô-hoa ah, khòaⁿ ah, hiah ê sian-ti tùi in kóng, Lín bōe khòaⁿ-kìⁿ to-kiàm, ia̍h bōe tú-tio̍h ki-hng; Iâ-hô-hoa beh tī chit ê tōe-hng siúⁿ-sù lín kú-tn̂g ê pêng-an. 14 Iâ-hô-hoa tùi góa kóng, Hiah ê sian-ti thok Góa ê miâ thoân pe̍h-chha̍t; Góa bô chhe in, bô hoan-hù in, ia̍h bô tùi in kóng; in thoân hō͘ lín--ê, sī hu-ké ê khé-sī, kap chiam-pok, kap bô-iáⁿ ê sū, í-ki̍p in ê sim ê khúi-chà. 15 Só͘-í Iâ-hô-hoa án-ni kóng, Lūn-kàu thok Góa ê miâ lâi thoân-pò͘ ê hiah ê sian-ti, Góa pēng-bô chhe in, in iáu-kú kóng, Chit ê tōe bōe-ōe tú-tio̍h to-kiàm, ki-hng; kî-si̍t hiah ê sian-ti beh tùi to-kiàm ki-hng lâi bia̍t-bô. 16 Koh thiaⁿ in thoân-pò͘ ê peh-sìⁿ, beh in-ūi ki-hng to-kiàm siū hiat-ka̍k tī Iâ-lō͘-sat-léng ê ke-lō͘; in kap bó͘ kap kiáⁿ cha-bó͘-kiáⁿ, lóng bô lâng bâi-chòng; Góa beh chiong in ê pháiⁿ piàⁿ tī in ê sin-chiūⁿ. 17 Lí tio̍h chiong chit ê ōe kā in kóng, Goān góa ê ba̍k-sái ji̍t-mî lâu bô soah; in-ūi góa ê peh-sìⁿ tú-tio̍h tōa húi-siong, phah kàu chin-thiám. 18 Góa nā chhut-khì chhân--nih, chiū khòaⁿ-kìⁿ ū hō͘ to thâi--ê; góa nā ji̍p siâⁿ, chiū khòaⁿ-kìⁿ ū tùi ki-hng lâi phòa-pīⁿ--ê; sian-ti kap chè-si tī kok-lāi sì-kòe kiâⁿ, ia̍h lóng bōe hiáu-tit. 19 Lí it-chīn khì-sak Iû-tāi mah? Lí ê sim iàm-ò͘ⁿ Sek-an mah? siáⁿ-sū phah goán, ia̍h bô thang tit-tio̍h i-hó? Goán ǹg-bāng pêng-an, ia̍h bô ū hok-khì; ǹg-bāng i-tī ê ki-hōe, bô phah-sǹg tú-tio̍h kiaⁿ-hiâⁿ. 20 Iâ-hô-hoa ah, goán jīn ka-kī ê chōe-ok, kap goán ê lia̍t-chó͘ ê chōe-kòa; in-ūi goán tek-chōe Lí. 21 Kiû Lí in-ūi Lí ê miâ ê iân-kò͘, bo̍h-tit iàm-ò͘ⁿ goán; bo̍h-tit lêng-jio̍k Lí êng-kng ê pó-chō; kiû Lí tui-liām, bo̍h-tit pōe Lí kap goán só͘ li̍p ê iok. 22 Gōa-pang bô-iáⁿ-chiah ê sîn-bêng, ū chi̍t-ê ōe lo̍h-hō͘ mah? thiⁿ ōe ka-kī lo̍h tōa-hō͘ mah? Iâ-hô-hoa goán ê Siōng-tè ah, ōe án-ni--ê, kiám m̄-sī Lí mah? só͘-í goán iû-goân beh thèng-hāu Lí; in-ūi che lóng sī Lí só͘ chòe--ê.
1 耶和華對我講，雖然有摩西kap撒母耳khiā tī我ê面前，替in求，我ê心亦無眷顧chitê百姓；tio̍h趕in離開我ê面前，hō͘ in出去。 2 In若對你講，阮tio̍h出去toh-lo̍h？你tio̍h kā in講，耶和華án-ni講，該死ê tio̍h死；該hō͘刀刣-ê，tio̍h hō͘刀刣；該tú-tio̍h飢荒ê，tio̍h tú-tio̍h飢荒；該hō͘人掠ê，tio̍h hō͘人掠。 3 耶和華koh講，我tiau-chhoân四項來辦in；就是刀來刣-in，狗來拖in，空中ê鳥，地上ê野獸，食來滅in。 4 Koh beh hō͘ in 流落tī天下萬國中；lóng是因為偤大王Hi-se-ka ê kiáⁿ Má-ná-se tī耶路撒冷所行ê事。 5 耶路撒冷ah，是誰可憐你ah？是誰為你悲傷ah？是誰 oa̍t-tńg身問你平安無？ 6 耶和華講，你棄絕我，oa̍t-tńg身退後；因為án-ni，我伸手攻擊你，毀壞你；我憐憫你到厭。 7 我tī境內ta̍k ê城門口，用簸箕簸in；我絕in ê後嗣，我滅我ê百姓，in猶原無oa̍t-tńg離開in ê路。 8 In ê寡婦加添tī我ê面前，比海沙khah-chōe；我hō͘殘害ê中晝來，攻擊少年人ê老母；hō͘痛苦驚惶忽然到伊ê身上。 9 生七個kiáⁿ ê婦人人，衰lám氣斷；當頭白日，伊ê日頭忽然落，伊漏氣見笑；所chhun ê百姓，我beh tī in ê對敵ê面前，交hō͘刀劍；這是耶和華講ê。 10 我ê老母ah，我有災厄；因為你生我做一个kap全地相爭辯計較ê人；我平素無用銀借人，來the̍h利息；人亦無用銀借我，來the̍h利息；總是人lóng咒詛我。 11 耶和華講，我真正beh堅固你，hō͘你得tio̍h福氣；災厄苦難臨到ê時，我真正beh hō͘對敵求你。 12 鐵，就是北方ê鐵，kap銅，人kiám會at折伊mah？ 13 因為你ê罪惡，我beh tī你ê 四境內hō͘你ê貨財寶物白白hō͘人搶去。 14 我亦beh hō͘對敵帶in到你所m̄-bat ê地；因為我tī受氣中有發出火，beh kā lín燒lio去。 15 耶和華ah，你知，求你記念我，眷顧我，kā我報冤仇tī hiahê窘迫我ê；你寬容ê時，m̄-thang掠我去；tio̍h知我為tio̍h你ê緣故受凌辱。 16 萬軍ê上帝耶和華ah，我得tio̍h你ê話就食伊；你ê話tī我是做我心內ê歡喜快樂；因為我是稱做屬你ê名ê。 17 我無坐tī宴樂ê人ê會中，來快樂；我因為你ê感動，家己靜靜坐；因為你用受氣充滿我。 18 我ê痛苦怎樣久長無soah？我ê傷怎樣bōe醫得，醫bōe好ah？你款待我kiám beh親像欺騙ê溪，靠bōe住ê水ah？ 19 所以耶和華án-ni講，你若倒tńg來，我就beh hō͘你倒tńg來khiā tī我ê面前；你若tùi下賤ê中間揀寶貴ê出來，你就beh做親像我ê嘴；in的確beh歸向你，總是你m̄-thang歸ǹg in。 20 我beh hō͘你對tī chitê百姓成做堅固ê銅牆；in beh攻擊你，總是bōe 贏你，因為我kap你tī-teh，beh拯救你，牽救你；這是耶和華講ê。 21 我beh牽救你脫離pháiⁿ人ê手，救贖你脫離強暴ê人ê手頭。
1 Iâ-hô-hoa tùi góa kóng, Sui-jiân ū Mô͘-se kap Sat-bó͘-jíⁿ khiā tī Góa ê bīn-chêng, thòe in kiû, Góa ê sim ia̍h bô koàn-kò͘ chit ê peh-sìⁿ; tio̍h kóaⁿ in lī-khui Góa ê bīn-chêng, hō͘ in chhut--khì. 2 In nā tùi lí kóng, Goán tio̍h chhut-khì toh-lo̍h? lí tio̍h kā in kóng, Iâ-hô-hoa án-ni kóng, Kai sí--ê tio̍h sí; kai hō͘ to thâi--ê, tio̍h hō͘ to thâi; kai tú-tio̍h ki-hng--ê, tio̍h tú-tio̍h ki-hng; kai hō͘ lâng lia̍h--ê, tio̍h hō͘ lâng lia̍h. 3 Iâ-hô-hoa koh kóng, Góa tiau-chhoân sì-hāng lâi pān--in; chiū-sī to lâi thâi--in, káu lâi thoa--in, khong-tiong ê chiáu, tōe-chiūⁿ ê iá-siù, chia̍h lâi bia̍t in. 4 Koh beh hō͘ in liû-lo̍h tī thiⁿ-ē bān-kok tiong; lóng sī in-ūi Iû-tāi ông Hi-se-ka ê kiáⁿ Má-ná-se tī Iâ-lō͘-sat-léng só͘ kiâⁿ ê sū. 5 Iâ-lō͘-sat-léng ah, chī-chūi khó-lîn lí ah? chī-chūi ūi lí pi-siong ah? chī-chūi oa̍t-tńg-sin mn̄g lí pêng-an--bô? 6 Iâ-hô-hoa kóng, Lí khì-choa̍t Góa, oa̍t-tńg-sin thè-āu; in-ūi án-ni, Góa chhun-chhiú kong-kek lí, húi-hoāi lí; Góa lîn-bín lí kàu ià. 7 Góa tī kéng-lāi ta̍k ê siâⁿ mn̂g-kháu, ēng pòa-ki pòa--in; Góa choa̍t in ê hō͘-sû, Góa bia̍t Góa ê peh-sìⁿ, in iû-goân bô oa̍t-tńg lī-khui in ê lō͘. 8 In ê kóaⁿ-hū ke-thiⁿ tī Góa ê bīn-chêng, pí hái-soa khah-chōe; Góa hō͘ chân-hāi--ê tiong-tàu lâi, kong-kek siàu-liân lâng ê lāu-bú; hō͘ thòng-khó͘ kiaⁿ-hiâⁿ hut-jiân kàu i ê sin-chiūⁿ. 9 Siⁿ chhit ê kiáⁿ ê hū-jîn-lâng, soe-lám khùi-tn̄g; tng-thâu pe̍h-ji̍t, i ê ji̍t-thâu hut-jiân lo̍h, i làu-khùi kiàn-siàu; só͘ chhun ê peh-sìⁿ, Góa beh tī in ê tùi-te̍k ê bīn-chêng, kau hō͘ to-kiàm; che sī Iâ-hô-hoa kóng--ê. 10 Góa ê lāu-bú ah, góa ū chai-ē; in-ūi lí siⁿ góa chòe chi̍t-ê kap choân-tōe saⁿ cheng-piān kè-kàu ê lâng; góa pêng-sò͘ bô ēng gûn chioh lâng, lâi the̍h lī-sek; lâng ia̍h bô ēng gûn chioh góa, lâi the̍h lī-sek; chóng-sī lâng lóng chiù-chó͘ góa. 11 Iâ-hô-hoa kóng, Góa chin-chiàⁿ beh kian-kò͘ lí, hō͘ lí tit-tio̍h hok-khì; chai-ē khó͘-lān lîm-kàu ê sî, Góa chin-chiàⁿ beh hō͘ tùi-te̍k kiû lí. 12 Thih, chiū-sī pak-hng ê thih, kap tâng, lâng kiám ōe at-chi̍h--i mah? 13 In-ūi lí ê chōe-ok, Góa beh tī lí ê sì-kéng-lāi hō͘ lí ê hè-châi pó-mi̍h pe̍h-pe̍h hō͘ lâng chhiúⁿ--khì. 14 Góa ia̍h beh hō͘ tùi-te̍k tòa in kàu lí só͘ m̄-bat ê tōe; in-ūi Góa tī siū-khì-tiong ū hoat-chhut hé, beh kā lín sio-lio--khì. 15 Iâ-hô-hoa ah, Lí chai, kiû Lí kì-liām góa, koàn-kò͘ góa, kā góa pò oan-siû tī hiah ê khún-pek góa ê; Lí khoan-iông ê sî, m̄-thang lia̍h góa khì; tio̍h chai góa ūi-tio̍h Lí ê iân-kò͘ siū lêng-jio̍k. 16 Bān-kun ê Siōng-tè Iâ-hô-hoa ah, góa tit-tio̍h Lí ê ōe chiū chia̍h--i; Lí ê ōe tī góa sī chòe góa sim-lāi ê hoaⁿ-hí khoài-lo̍k; in-ūi góa sī chheng-chòe sio̍k Lí ê miâ--ê. 17 Góa bô chē-tī iàn-lo̍k ê lâng ê hōe-tiong, lâi khoài-lo̍k; góa in-ūi Lí ê kám-tōng, ka-kī chēng-chēng chē; in-ūi Lí ēng siū-khì chhiong-móa góa. 18 Góa ê thòng-khó͘ cháiⁿ-iūⁿ kú-tn̂g bô soah? góa ê siong cháiⁿ-iūⁿ bōe-i--tit, i-bōe-hó ah? Lí khoán-thāi góa kiám beh chhin-chhiūⁿ khi-phiàn ê khoe, khò-bōe-chū ê chúi ah? 19 Só͘-í Iâ-hô-hoa án-ni kóng, Lí nā tò-tńg--lâi, Góa chiū beh hō͘ lí tò-tńg--lâi khiā tī Góa ê bīn-chêng; lí nā tùi hā-chiān ê tiong-kan kéng pó-kùi--ê chhut-lâi, lí chiū beh chòe chhin-chhiūⁿ Góa ê chhùi; in tek-khak beh kui-ǹg lí, chóng-sī lí m̄-thang kui-ǹg in. 20 Góa beh hō͘ lí tùi tī chit ê peh-sìⁿ chiâⁿ-chòe kian-kò͘ ê tâng chhiûⁿ; in beh kong-kek lí, chóng-sī bōe iâⁿ lí, in-ūi Góa kap lí tī-teh, beh chín-kiù lí, khan-kiù lí; che sī Iâ-hô-hoa kóng--ê. 21 Góa beh khan-kiù lí thoat-lī pháiⁿ-lâng ê chhiú, kiù-sio̍k lí thoat-lī kiông-pō ê lâng ê chhiú-thâu.
1 耶和華ê話koh臨到我講， 2 你tī chit所在m̄-thang娶bó͘，生kiáⁿ cha-bó͘-kiáⁿ。 3 因為論到chit所在所生ê kiáⁿ cha-bó͘-kiáⁿ，koh論到chitê國內生in ê父母，耶和華án-ni講： 4 In beh tú-tio̍h重病來死；無人啼哭；bōe得tio̍h埋葬；beh tī地上親像糞埽；koh beh tùi刀劍，tùi飢荒來滅無；in ê身屍beh hō͘空中ê飛鳥，kap地上ê野獸做食物。 5 耶和華án-ni講，莫得入喪事ê家，莫得去kā伊啼哭，亦莫得為in悲傷；因為我將我ê平安，就是恩典kap憐憫，tùi chitê百姓搶去；這是耶和華講ê。 6 Tùi大到細，beh死tī chitê地方；bōe得tio̍h埋葬；無人為in啼哭，亦無人為in割肉，剃光頭。 7 In tú-tio̍h喪事，無人為in peh餅，因為死人來安慰in；in死父死母，亦無人用安慰ê杯hō͘ in lim。 8 你亦m̄-thang入宴樂ê家，kap in坐teh lim食。 9 因為萬軍ê耶和華，以色列ê上帝，án-ni講，Lín iáu活teh ê日，tī lín ê目前，我beh hō͘歡喜ê聲，快樂ê聲，新kiáⁿ婿ê聲，新娘ê聲tī chit所在lóng soah。 10 你將chiahê一切ê話指示chitê百姓；in對你講，耶和華啥事講，Beh降落chitê大災厄攻擊阮ah？阮有甚麼罪過？阮有甚麼罪過，得罪阮ê上帝耶和華ah？ 11 你tio̍h kā in講，耶和華講，因為lín ê列祖放sak我，去thàn別號ê上帝，服事in，跪拜in； 12 koh放sak我，無守我ê律法；koh lín行pháiⁿ，比lín ê列祖khah-pháiⁿ；看ah，lín ta̍k人thàn pháiⁿ心ê剛硬去行；甚至無聽thàn我。 13 所以我beh趕lín出chit所在，到lín以及lín ê列祖所m̄-bat ê地；tī-hia lín beh日暝服事別號ê上帝；tī-hia我無beh施恩hō͘ lín。 14 耶和華講，看ah，日子beh到，人kí耶和華ê永活來chiù-chōa，無beh講，祂是chhōa以色列ê後裔tùi埃及地上來ê； 15 in kí耶和華ê永活來chiù-chōa，是beh講，祂chhōa以色列ê後裔tùi北方ê地，亦tùi見若祂所趕in到ê地上來；koh我beh chhōa in tò來in ê地，就是我前所賞賜in ê列祖ê。 16 耶和華講，看ah，我beh召chōe-chōe掠魚ê來掠in；然後我beh召chōe-chōe phah獵ê，tùi chiahê山，chiahê山頭，chiahê石孔，來phah in。 17 因為我ê目睭teh看in一切ê行做；in無遮蓋tī我ê面前；in ê罪過亦無khǹg密tī我ê目睭前。 18 我beh事先家己報應in ê罪過kap罪惡；因為in用thang厭賤ê ê身屍phah lâ-sâm我ê土地；koh用in可惡ê物充滿我ê產業。 19 耶和華ah，你是我ê氣力，是我ê衛所；tī苦難ê日，是我逃閃ê所在；列國ê人beh tùi地極來你chia，講，有影ah，阮ê列祖所承接ê不過是虛假，其中無有利益ê。 20 人kiám thang為家己造上帝mah？in實在m̄是上帝。 21 看ah，我將只chit-pái hō͘ in知；我beh hō͘ in知我ê手段kap我ê能力；in就beh知我ê名是耶和華。
1 Iâ-hô-hoa ê ōe koh lîm-kàu góa kóng, 2 Lí tī chit só͘-chāi m̄-thang chhōa-bó͘, siⁿ kiáⁿ cha-bó͘-kiáⁿ. 3 In-ūi lūn-kàu chit só͘-chāi só͘ siⁿ ê kiáⁿ cha-bó͘-kiáⁿ, koh lūn-kàu chit ê kok-lāi siⁿ--in ê pē-bú, Iâ-hô-hoa án-ni kóng: 4 In beh tú-tio̍h tāng-pīⁿ lâi sí; bô lâng thî-khàu; bōe tit-tio̍h bâi-chòng; beh tī tōe-chiūⁿ chhin-chhiūⁿ pùn-sò; koh beh tùi to-kiàm, tùi ki-hng lâi bia̍t-bô; in ê sin-si beh hō͘ khong-tiong ê pe-chiáu, kap tōe-chiūⁿ ê iá-siù chòe chia̍h-mi̍h. 5 Iâ-hô-hoa án-ni kóng, Bo̍h-tit ji̍p song-sū ê ke, bo̍h-tit khì kā i thî-khàu, ia̍h bo̍h-tit ūi in pi-siong; in-ūi Góa chiong Góa ê pêng-an, chiū-sī un-tián kap lîn-bín, tùi chit ê peh-sìⁿ chhiúⁿ--khì; che sī Iâ-hô-hoa kóng--ê. 6 Tùi tōa kàu sòe, beh sí tī chit ê tōe-hng; bōe tit-tio̍h bâi-chòng; bô lâng ūi in thî-khàu, ia̍h bô lâng ūi in koah-bah, thì kng thâu. 7 In tú-tio̍h song-sū, bô lâng ūi in peh-piáⁿ, in-ūi sí-lâng lâi an-ùi in; in sí-pē sí-bú, ia̍h bô lâng ēng an-ùi ê poe hō͘ in lim. 8 Lí ia̍h m̄-thang ji̍p iàn-lo̍k ê ke, kap in chē-teh lim-chia̍h. 9 In-ūi bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín iáu oa̍h-teh ê ji̍t, tī lín ê ba̍k-chêng, Góa beh hō͘ hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ tī chit só͘-chāi lóng soah. 10 Lí chiong chiah ê it-chhè ê ōe chí-sī chit ê peh-sìⁿ; in tùi lí kóng, Iâ-hô-hoa siáⁿ-sū kóng, Beh kàng-lo̍h chit ê tōa chai-ē kong-kek goán ah? goán ū sím-mi̍h chōe-kòa? goán ū sím-mi̍h chōe-kòa, tek-chōe goán ê Siōng-tè Iâ-hô-hoa ah? 11 Lí tio̍h kā in kóng, Iâ-hô-hoa kóng, In-ūi lín ê lia̍t-chó͘ pàng-sak Góa, khì thàn pa̍t-hō ê siōng-tè, ho̍k-sāi in, kūi-pài in; 12 koh pàng-sak Góa, bô siú Góa ê lu̍t-hoat; koh lín kiâⁿ-pháiⁿ, pí lín ê lia̍t-chó͘ khah-pháiⁿ; khòaⁿ ah, lín ta̍k-lâng thàn pháiⁿ-sim ê kong-ngī khì kiâⁿ; sīm-chì bô thiaⁿ-thàn Góa. 13 Só͘-í Góa beh kóaⁿ lín chhut chit só͘-chāi, kàu lín í-ki̍p lín ê lia̍t-chó͘ só͘ m̄-bat ê tōe; tī-hia lín beh ji̍t-mî ho̍k-sāi pa̍t-hō ê siōng-tè; tī-hia Góa bô beh si-un hō͘ lín. 14 Iâ-hô-hoa kóng, Khòaⁿ ah, ji̍t-chí beh kàu, lâng kí Iâ-hô-hoa ê éng-oa̍h lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-ki̍p tōe chiūⁿ--lâi-ê; 15 in kí Iâ-hô-hoa ê éng-oa̍h lâi chiù-chōa, sī beh kóng, I chhōa Í-sek-lia̍t ê hō͘-è tùi pak-hng ê tōe, ia̍h tùi kìⁿ-nā I só͘ kóaⁿ in kàu ê tōe chiūⁿ--lâi; koh Góa beh chhōa in tò-lâi in ê tōe, chiū-sī Góa chêng só͘ siúⁿ-sù in ê lia̍t-chó͘--ê. 16 Iâ-hô-hoa kóng, Khòaⁿ ah, Góa beh tiàu chōe-chōe lia̍h-hî--ê lâi lia̍h in; jiân-āu Góa beh tiàu chōe-chōe phah-la̍h--ê, tùi chiah ê soaⁿ, chiah ê soaⁿ-thâu, chiah ê chio̍h-khang, lâi phah in. 17 In-ūi Góa ê ba̍k-chiu teh khòaⁿ in it-chhè ê kiâⁿ-chòe; in bô jia-khàm tī Góa ê bīn-chêng; in ê chōe-kòa ia̍h bô khǹg-ba̍t tī Góa ê ba̍k-chiu-chêng. 18 Góa beh tāi-seng ka-kī pò-èng in ê chōe-kòa kap chōe-ok; in-ūi in ēng thang iàm-chiān--ê ê sin-si phah lâ-sâm Góa ê thó͘-tōe; koh ēng in khó-ò͘ⁿ ê mi̍h chhiong-móa Góa ê sán-gia̍p. 19 Iâ-hô-hoa ah, Lí sī Góa ê khùi-la̍t, sī Góa ê ōe-só͘; tī khó͘-lān ê ji̍t, sī góa tô-siám ê só͘-chāi; lia̍t-kok ê lâng beh tùi tōe-ke̍k lâi lí chia, kóng, Ū-iáⁿ ah, goán ê lia̍t-chó͘ só͘ sêng-chiap-ê put-kò sī hu-ké, kî-tiong bô ū lī-ek--ê. 20 Lâng kiám thang ūi ka-kī chō siōng-tè mah? in si̍t-chāi m̄-sī Siōng-tè. 21 Khòaⁿ ah, Góa chiong chí-chit-pái hō͘ in chai; Góa beh hō͘ in chai Góa ê chhiú-tōaⁿ kap Góa ê lêng-le̍k; in chiū beh chai Góa ê miâ sī Iâ-hô-hoa.
1 偤大ê罪是用鐵筆，用鑽石筆尾記ê；就是刻tī in ê心ê碑，壇ê角。 2 In ê kiáⁿ記念in高山頂，青翠樹邊ê壇，kap偶像。 3 我田裡ê山ah，我beh因為你tī四境內所犯ê罪，將你ê貨物，財寶kap山頭ê壇，lóng hō͘人搶去。 4 Koh你為tio̍h本身，beh將我所賞賜ê產業放hē-teh；我亦beh hō͘你tī所m̄-bat ê地服事你ê對敵；因為lín激我受氣ê火，直直to̍h到永遠。 5 耶和華án-ni講，見若óa靠人，用肉體做伊ê手，伊ê心離開耶和華ê，hit號人受咒詛。 6 因為伊beh親像曠野ê杜松；福氣到ê時，伊看bōe-tio̍h；beh tiàm tī沙漠乾燥ê所在，無人khiā起ê鹹地。 7 Óa靠耶和華，掠耶和華做伊所óa靠ê hit號人有福氣。 8 伊beh親像水邊所栽ê樹，soan伊ê根tī河邊；炎熱到亦無驚；葉猶原beh青翠；tī乾燥ê年，lóng無掛慮；koh結果子無soah。 9 人ê心比萬物khah詭譎，pháiⁿ到極頭；是誰會知伊ah？ 10 我耶和華是鑑察人ê心；試驗人ê臟腑ê；beh照ta̍k人所行ê，kap伊做tāi-chì ê結果，來報應伊。 11 人無照正道得tio̍h錢，親像鷓鴣孵m̄是伊生ê卵；到中年，hitê錢lóng beh離開伊，伊ê結局成做愚戇。 12 阮ê聖所是榮光ê寶座；tùi起頭安置tī高ê所在。 13 以色列所ǹg望ê耶和華ah，見若棄sak你ê，lóng beh見笑；見若離開你ê，in ê名beh記tī土裡；因為in棄sak耶和華，活水ê源頭。 14 耶和華ah，求你醫治我，我就得tio̍h醫好；拯救我，我就得tio̍h救；因為你是我所o-ló-ê。 15 看ah，人對我講，耶和華ê話tī toh-lo̍h？taⁿ tio̍h hō͘伊來。 16 論到我，我無緊緊棄sak牧者ê職，m̄ tè你；災厄到ê日，m̄是我所ài；這是你所知，我ê嘴所講ê，lóng tī你ê面前。 17 莫得做hō͘我驚惶ê；當患難ê日。你做我逃閃ê所在。 18 Hō͘ hiahê窘迫我ê見笑，莫得hō͘我見笑；hō͘ in驚惶，莫得hō͘我驚惶；hō͘災厄ê日臨到in，用加倍ê毀壞來毀壞in。 19 耶和華對我án-ni講，你去khiā tī眾百姓ê門，就是偤大列王tùi-hia入，tùi-hia出ê；koh khiā tī耶路撒冷chiahê門。 20 對in講，Lín chiahê偤大王，kap偤大眾人，kap耶路撒冷一切khiā起ê百姓，凡若tùi chiahê門入ê，lóng tio̍h聽耶和華ê話。 21 耶和華án-ni講，Lín tio̍h家己謹慎，莫得tī安歇日擔擔，也莫得運入耶路撒冷chiahê城門。 22 亦莫得tī安歇日tùi家內擔擔出去，無論甚麼工lóng m̄-thang做；獨獨tio̍h掠安歇日做聖日，照我平素吩咐lín ê列祖ê。 23 總是in m̄聽thàn，m̄俯耳孔；就是硬in ê頷頸，致到bōe聽，bōe受教示。 24 耶和華講，Lín若留心聽thàn我，tī安歇日無擔甚麼擔入chitê城chiahê門；獨獨掠安歇日做聖日，tī hit日lóng無做甚麼工； 25 就有君王、王親，坐大衛ê寶座ê，in kap in ê王親kap偤大人kap耶路撒冷khiā起ê百姓，或是坐車，或是騎馬，入chitê城chiahê門；koh chitê城beh留到永遠。 26 亦beh有人tùi偤大chiahê城。Kap耶路撒冷四圍ê所在，tùi便雅憫地，平洋、山地，kap南方ê地來；lóng帶燒祭，ta̍k樣ê祭，素祭，kap乳香，kap謝恩祭，到耶和華ê厝。 27 Lín若m̄聽thàn我，m̄掠安歇日做聖日；猶原tī安歇日擔擔入耶路撒冷ta̍k ê門；我beh tī ta̍k ê門起火；chitê火亦beh燒毀耶路撒冷ê宮殿，bōe會phah-hoa。
1 Iû-tāi ê chōe sī ēng thih-pit, ēng soān-chio̍h pit-bé kì--ê; chiū-sī khek tī in ê sim ê pi, tôaⁿ ê kak. 2 In ê kiáⁿ kì-liām in koâiⁿ-soaⁿ-téng, chhiⁿ-chhùi chhiū-piⁿ ê tôaⁿ, kap ngó͘-siōng. 3 Góa chhân--nih ê soaⁿ ah, Góa beh in-ūi lí tī sì-kéng-lāi só͘ hoān ê chōe, chiong lí ê hè-mi̍h, châi-pó kap soaⁿ-thâu ê tôaⁿ, lóng hō͘ lâng chhiúⁿ-khì. 4 Koh lí ūi-tio̍h pún-sin, beh chiong Góa só͘ siúⁿ-sù ê sán-gia̍p pàng hē-teh; Góa ia̍h beh hō͘ lí tī só͘ m̄-bat ê tōe ho̍k-sāi lí ê tùi-te̍k; in-ūi lín kek Góa siū-khì ê hé, ti̍t-ti̍t to̍h kàu éng-oán. 5 Iâ-hô-hoa án-ni kóng, Kìⁿ-nā óa-khò lâng, ēng jio̍k-thé chòe i ê chhiú, i ê sim lī-khui Iâ-hô-hoa--ê, hit-hō lâng siū chiù-chó͘. 6 In-ūi i beh chhin-chhiūⁿ khòng-iá ê tō͘-siông; hok-khì kàu ê sî, i khòaⁿ-bōe-tio̍h; beh tiàm tī soa-bô͘ ta-sò ê só͘-chāi, bô lâng khiā-khí ê kiâm-tōe. 7 Óa-khò Iâ-hô-hoa, lia̍h Iâ-hô-hoa chòe i só͘ óa-khò--ê hit-hō lâng ū hok-khì. 8 I beh chhin-chhiūⁿ chúi-piⁿ só͘ chai ê chhiū, soan i ê kun tī hô-piⁿ; iām-jia̍t kàu ia̍h bô kiaⁿ; hio̍h iû-goân beh chhiⁿ-chhùi; tī ta-sò ê nî, lóng bô khòa-lū; koh kiat ké-chí bô soah. 9 Lâng ê sim pí bān-mi̍h khah khúi-khiat, pháiⁿ kàu ke̍k-thâu; chī-chūi ōe chai i ah? 10 Góa Iâ-hô-hoa sī kàm-chhat lâng ê sim; chhì-giām lâng ê chōng-hú--ê; beh chiàu ta̍k-lâng só͘ kiâⁿ--ê, kap i chòe tāi-chì ê kiat-kó, lâi pò-èng i. 11 Lâng bô chiàu chèng-tō tit-tio̍h chîⁿ, chhin-chhiūⁿ chià-ko͘ pū m̄-sī i siⁿ ê nn̄g; kàu tiong-liân, hit ê chîⁿ lóng beh lī-khui i, i ê kiat-kio̍k chiâⁿ-chòe gû-gōng. 12 Goán ê sèng-só͘ sī êng-kng ê pó-chō; tùi khí-thâu an-tì tī koâiⁿ ê só͘-chāi. 13 Í-sek-lia̍t só͘ ǹg-bāng ê Iâ-hô-hoa ah, kìⁿ-nā khì-sak Lí--ê, lóng beh kiàn-siàu; kìⁿ-nā lī-khui Lí--ê, in ê miâ beh kì tī thô͘--nih; in-ūi in khì-sak Iâ-hô-hoa, oa̍h-chúi ê goân-thâu. 14 Iâ-hô-hoa ah, kiû Lí i-tī góa, góa chiū tit-tio̍h i-hó; chín-kiù góa, góa chiū tit-tio̍h kiù; in-ūi Lí sī góa só͘ o-ló--ê. 15 Khòaⁿ ah, lâng tùi góa kóng, Iâ-hô-hoa ê ōe tī toh-lo̍h? taⁿ tio̍h hō͘ i lâi. 16 Lūn-kàu góa, góa bô kín-kín khì-sak bo̍k-chiá ê chit, m̄ tè--Lí; chai-ē kàu ê ji̍t, m̄-sī góa só͘ ài; che sī Lí só͘ chai, góa ê chhùi só͘ kóng--ê, lóng tī Lí ê bīn-chêng. 17 Bo̍h-tit chòe hō͘ góa kiaⁿ-hiâⁿ-ê; tng hoān-lān ê ji̍t. Lí chòe góa tô-siám ê só͘-chāi. 18 Hō͘ hiah ê khún-pek góa--ê kiàn-siàu, bo̍h-tit hō͘ góa kiàn-siàu; hō͘ in kiaⁿ-hiâⁿ, bo̍h-tit hō͘ góa kiaⁿ-hiâⁿ; hō͘ chai-ē ê ji̍t lîm-kàu in, ēng ka-pē ê húi-hoāi lâi húi-hoāi in. 19 Iâ-hô-hoa tùi góa án-ni kóng, Lí khì khiā tī chèng peh-sìⁿ ê mn̂g, chiū-sī Iû-tāi lia̍t-ông tùi-hia ji̍p, tùi-hia chhut--ê; koh khiā tī Iâ-lō͘-sat-léng chiah ê mn̂g. 20 Tùi in kóng, Lín chiah ê Iû-tāi ông, kap Iû-tāi chèng-lâng, kap Iâ-lō͘-sat-léng it-chhè khiā-khí ê peh-sìⁿ, hoān-nā tùi chiah ê mn̂g ji̍p--ê, lóng tio̍h thiaⁿ Iâ-hô-hoa ê ōe. 21 Iâ-hô-hoa án-ni kóng, Lín tio̍h ka-kī kín-sīn, bo̍h-tit tī an-hioh-ji̍t taⁿ-tàⁿ, iā bo̍h-tit ūn ji̍p Iâ-lō͘-sat-léng chiah ê siâⁿ-mn̂g. 22 Ia̍h bo̍h-tit tī an-hioh-ji̍t tùi ke-lāi taⁿ-tàⁿ chhut-khì, bô-lūn sím-mi̍h kang lóng m̄-thang chòe; to̍k-to̍k tio̍h lia̍h an-hioh-ji̍t chòe sèng-ji̍t, chiàu Góa pêng-sò͘ hoan-hù lín ê lia̍t-chó͘--ê. 23 Chóng-sī in m̄ thiaⁿ-thàn, m̄ àⁿ hī-khang; chiū-sī ngī in ê ām-kún, tì-kàu bōe thiaⁿ, bōe siū kà-sī. 24 Iâ-hô-hoa kóng, Lín nā liû-sim thiaⁿ-thàn Góa, tī an-hioh-ji̍t bô taⁿ sím-mi̍h tàⁿ ji̍p chit ê siâⁿ chiah ê mn̂g; to̍k-to̍k lia̍h an-hioh-ji̍t chòe sèng-ji̍t, tī hit-ji̍t lóng bô chòe sím-mi̍h kang; 25 chiū ū kun-ông, ông-chhin, chē Tāi-pi̍t ê pó-chō--ê, in kap in ê ông-chhin kap Iû-tāi lâng kap Iâ-lō͘-sat-léng khiā-khí ê peh-sìⁿ, he̍k-sī chē-chhia, he̍k-sī khiâ-bé, ji̍p chit ê siâⁿ chiah ê mn̂g; koh chit ê siâⁿ beh lâu kàu éng-oán. 26 Ia̍h beh ū lâng tùi Iû-tāi chiah ê siâⁿ. kap Iâ-lō͘-sat-léng sì-ûi ê só͘-chāi, tùi Piān-ngá-bín tōe, pîⁿ-iûⁿ, soaⁿ-tōe, kap lâm-hng ê tōe lâi; lóng tòa sio-chè, ta̍k-iūⁿ ê chè, sò͘-chè, kap jú-hiuⁿ, kap siā-un chè, kàu Iâ-hô-hoa ê chhù. 27 Lín nā m̄ thiaⁿ-thàn Góa, m̄ lia̍h an-hioh-ji̍t chòe sèng-ji̍t; iû-goân tī an-hioh-ji̍t taⁿ-tàⁿ ji̍p Iâ-lō͘-sat-léng ta̍k ê mn̂g; Góa beh tī ta̍k ê mn̂g khí hé; chit ê hé ia̍h beh sio-húi Iâ-lō͘-sat-léng ê kiong-tiān, bōe-ōe phah-hoa.
1 耶和華ê話臨到耶利米講， 2 你起來，落去燒磁人ê厝；我tī-hia beh hō͘你聽我ê話。 3 我就落去燒磁人ê厝；tú-tn̄g伊用輪(lûn)teh tńg，做伊ê工。 4 燒磁人用土做ê器具，tī伊ê手若pháiⁿ去，伊就用hit塊土另外做別號ê器具；照燒磁人所看做好ê來做伊。 5 耶和華ê話就臨到我講， 6 耶和華講，以色列家ah，我款待lín kiám bōe能親像chitê燒磁人ê所做mah？以色列家ah，土tī燒磁人ê手中怎樣，lín tī我ê手中亦是án-ni。 7 我甚麼時論到一族á是一國講，我beh kā伊拔起來，kā伊拆毀，kā伊毀壞； 8 我所講ê hit一族，若反悔離開伊ê pháiⁿ，我就beh退悔所想beh降hō͘ in ê災厄。 9 我甚麼時論到一族á是一國，講beh建立，beh栽種； 10 in若行我看做pháiⁿ ê事，m̄聽thàn我ê話，我就beh退悔我所講beh hō͘ in ê福氣。 11 Taⁿ你tio̍h kā偤大人kap khiā起耶路撒冷ê百姓講，耶和華án-ni講，我備辦災厄攻擊lín，亦設計謀攻擊lín；lín ta̍k人tio̍h oa̍t頭，離開伊ê pháiⁿ路，改正 lín ê所行lín ê所做。 12 總是in講，無ǹg望；阮beh照家己ê計謀來行，ta̍k人照伊pháiⁿ心ê剛硬來做。 13 所以耶和華án-ni講，Lín tio̍h去ta̍k國查問看是誰聽見chit號事；以色列ê百姓有行極thang厭惡ê事。 14 黎巴嫩ê雪tùi田野ê石磐kiám會絕斷mah？tùi遠遠ê所在流落ê冷水kiám會乾去mah？ 15 因為我ê百姓bōe記得我，ǹg虛假ê神燒香；in hō͘ in tī所行ê路，tī舊ê路觸tio̍h，hō͘ in行偏路，無thūn高ê； 16 致到in ê地做thang gông-ngia̍h，長長hō͘人恥笑；見若tùi-hia過ê beh gông-ngia̍h搖頭。 17 我beh親像用東風tī對敵ê面前趕散in；in tú-tio̍h患難ê日，我beh用ka-chiah ǹg in，無beh用面。 18 In就講，來ah，咱來設計謀攻擊耶利米；因為祭司有律法，智慧ê人有計畫，先知有讖語ê話，lóng bōe絕斷。來ah，咱tio̍h用舌抵觸伊，伊ê話lóng m̄免聽伊。 19 耶和華ah，求你致意我，也聽hiahê kap我爭辯ê人ê話。 20 Kiám thang用pháiⁿ報好mah？因為in開陷坑beh害我ê性命。求你記得我tī你ê面前替in求福氣，hō͘你ê大受氣tùi in oa̍t倒tńg。 21 願你將in ê kiáⁿ兒交hō͘飢荒，將in交hō͘刀劍；hō͘ in ê bó͘無kiáⁿ，做寡婦；hō͘ in ê ta-po͘人hō͘死無所滅，in ê少年人tī戰陣hō͘刀刣死。 22 你hō͘軍隊忽然臨到in ê時，願tùi in ê厝聽見啼哭ê聲；因為in ku̍t陷坑beh掠我，設羅網beh絆我ê腳。 23 耶和華ah，in beh害我hiahê計謀，你lóng知；莫得赦免in ê罪過；亦莫得tùi你ê面前擦消in ê罪惡；tio̍h hō͘ in tī你ê面前跋倒；你受氣ê時，tio̍h辦in。
1 Iâ-hô-hoa ê ōe lîm-kàu Iâ-lī-bí kóng, 2 Lí khí--lâi, lo̍h--khì sio-hûi lâng ê chhù; Góa tī-hia beh hō͘ lí thiaⁿ Góa ê ōe. 3 Góa chiū lo̍h---khì sio-hûi lâng ê chhù; tú-tn̄g i ēng lûn teh tńg, chòe i ê kang. 4 Sio-hûi lâng ēng thô͘ chòe ê khì-kū, tī i ê chhiú nā pháiⁿ-khì, i chiū ēng hit tè thô͘ lēng-gōa chòe pa̍t-hō ê khì-kū; chiàu sio-hûi lâng só͘ khòaⁿ-chòe hó--ê lâi chòe--i. 5 Iâ-hô-hoa ê ōe chiū lîm-kàu góa kóng, 6 Iâ-hô-hoa kóng, Í-sek-lia̍t ke ah, Góa khoán-thāi lín kiám bōe-ōe chhin-chhiūⁿ chit ê sio-hûi lâng ê só͘-chòe mah? Í-sek-lia̍t ke ah, thô͘ tī sio-hûi lâng ê chhiú-tiong cháiⁿ-iūⁿ, lín tī Góa ê chhiú-tiong ia̍h sī án-ni. 7 Góa sím-mi̍h sî lūn-kàu chi̍t-cho̍k á-sī chi̍t-kok kóng, Góa beh kā i pu̍ih--khí-lâi, kā i thiah-húi, kā i húi-hoāi; 8 Góa só͘ kóng ê hit-chi̍t-cho̍k, nā hoán-hóe lī-khui i ê pháiⁿ, Góa chiū beh thè-hóe só͘ siūⁿ beh kàng hō͘ in ê chai-ē. 9 Góa sím-mi̍h sî lūn-kàu chi̍t-cho̍k á-sī chi̍t-kok, kóng beh kiàn-li̍p, beh chai-chèng; 10 in nā kiâⁿ Góa khòaⁿ-chòe pháiⁿ ê sū, m̄ thiaⁿ-thàn Góa ê ōe, Góa chiū beh thè-hóe Góa só͘ kóng beh hō͘ in ê hok-khì. 11 Taⁿ lí tio̍h kā Iû-tāi lâng kap khiā-khí Iâ-lō͘-sat-léng ê peh-sìⁿ kóng, Iâ-hô-hoa án-ni kóng, Góa pī-pān chai-ē kong-kek lín, ia̍h siat kè-bô͘ kong-kek lín; lín ta̍k-lâng tio̍h oa̍t-thâu, lī-khui i ê pháiⁿ-lō͘, kóe-chiàⁿ lín ê só͘-kiâⁿ lín ê só͘-chòe. 12 Chóng-sī in kóng, Bô ǹg-bāng; goán beh chiàu ka-kī ê kè-bô͘ lâi kiâⁿ, ta̍k-lâng chiàu i pháiⁿ-sim ê kong-ngī lâi chòe. 13 Só͘-í Iâ-hô-hoa án-ni kóng, Lín tio̍h khì ta̍k-kok chhâ-mn̄g khòaⁿ chī-chūi thiaⁿ-kìⁿ chit-hō sū; Í-sek-lia̍t ê peh-sìⁿ ū kiâⁿ ke̍k thang iàm-ò͘ⁿ ê sū. 14 Lī-pa-lùn ê seh tùi chhân-iá ê chio̍h-pôaⁿ kiám ōe choa̍t-tn̄g mah? tùi hn̄g-hn̄g ê só͘-chāi lâu-lo̍h ê léng-chúi kiám ōe ta--khì mah? 15 In-ūi Góa ê peh-sìⁿ bōe-kì--tit Góa, ǹg hu-ké ê sîn sio-hiuⁿ; in hō͘ in tī só͘ kiâⁿ ê lō͘, tī kū ê lō͘ tak--tio̍h, hō͘ in kiâⁿ phian-lō͘, bô thūn-koâiⁿ-ê; 16 tì-kàu in ê tōe chòe thang gông-ngia̍h, tn̂g-tn̂g hō͘ lâng thí-chhiò; kìⁿ-nā tùi-hia kè--ê beh gông-ngia̍h iô thâu. 17 Góa beh chhin-chhiūⁿ ēng tang-hong tī tùi-te̍k ê bīn-chêng kóaⁿ-sòaⁿ in; in tú-tio̍h hoān-lān ê ji̍t, Góa beh ēng ka-chiah ǹg in, bô beh ēng bīn. 18 In chiū kóng, Lâi--ah, lán lâi siat kè-bô͘ kong-kek Iâ-lī-bí; in-ūi chè-si ū lu̍t-hoat, tì-hūi ê lâng ū kè-e̍k, sian-ti ū chhàm-gú ê ōe, lóng bōe choa̍t-tn̄g. Lâi--ah, lán tio̍h ēng chi̍h tú-tak i, i ê ōe lóng m̄-bián thiaⁿ i. 19 Iâ-hô-hoa ah, kiû Lí tì-ì góa, iā thiaⁿ hiah ê kap góa cheng-piān ê lâng ê ōe. 20 Kiám thang ēng pháiⁿ pò hó mah? in-ūi in khui hām-khiⁿ beh hāi góa ê sìⁿ-miā. Kiû Lí kì--tit góa tī Lí ê bīn-chêng thòe in kiû hok-khì, hō͘ Lí ê tōa siū-khì tùi in oa̍t-tò-tńg. 21 Goān Lí chiong in ê kiáⁿ-jî kau hō͘ ki-hng, chiong in kau hō͘ to-kiàm; hō͘ in ê bó͘ bô kiáⁿ, chòe kóaⁿ-hū; hō͘ in ê ta-po͘-lâng hō͘ sí-bô só͘ bia̍t, in ê siàu-liân lâng tī chiàn-tīn hō͘ to thâi-sí. 22 Lí hō͘ kun-tūi hut-jiân lîm-kàu in ê sî, goān tùi in ê chhù thiaⁿ-kìⁿ thî-khàu ê siaⁿ; in-ūi in ku̍t hām-khiⁿ beh lia̍h góa, siat lô-bāng beh pòaⁿ góa ê kha. 23 Iâ-hô-hoa ah, in beh hāi góa hiah ê kè-bô͘, Lí lóng chai; bo̍h-tit sià-bián in ê chōe-kòa; ia̍h bo̍h-tit tùi Lí ê bīn-chêng chhat-siau in ê chōe-ok; tio̍h hō͘ in tī Lí ê bīn-chêng poa̍h-tó; Lí siū-khì ê sî, tio̍h pān--in.
1 耶和華án-ni講，你去買燒磁人ê磁瓶，koh chhōa百姓ê老大， 2 kap祭司中ê老大，出去Piān-him-lùn ê山谷，Hap-jíⁿ-se ê門口hia，宣佈我所吩咐你ê話， 3 講，偤大ê列王kap耶路撒冷khiā起ê百姓ah，tio̍h聽耶和華ê話；萬軍ê耶和華，以色列ê上帝，án-ni講，看ah，我beh hō͘災厄臨到chitê地方，凡若聽ê人，in ê耳孔的確抖(tiō)。 4 因為in棄sak我，看chitê所在親像外邦；koh tī-chia燒香hō͘別ê上帝，就是in前所m̄-bat-ê；in ê列祖，以及偤大列王，也是án-ni；koh hō͘無罪ê人ê血遍滿chitê地方。 5 Koh為Pa-le̍k khí山頭ê壇，thang tī火中燒in ê kiáⁿ，做燒祭來獻hō͘ Pa-le̍k。這m̄是我所命令ê，m̄是我所提起ê，亦m̄是我ê心所想ê。 6 耶和華講，因為án-ni，日子beh到，chitê地方無koh稱做Tô-hui-te̍k kap Piān-him-lùn ê山谷；反tńg稱做殺戮ê山谷。 7 我beh tī chitê地方hō͘偤大kap耶路撒冷ê計謀歸tī空空；亦beh hō͘ in tī對敵ê面前倒tī刀下，kap siàu想in ê性命ê人ê手頭；in ê身屍，我beh hō͘空中ê飛鳥，kap地上ê野獸做食物。 8 我beh hō͘ chitê城做thang gông-ngia̍h thang恥笑ê；凡若經過ê人beh因為chitê城所tú-tio̍h ê災厄，來gông-ngia̍h恥笑。 9 我beh hō͘ in tī圍困窘迫ê中間，就是對敵kap siàu想in ê性命ê人窘迫in ê時，ta̍k人食in ê kiáⁿ ê肉，cha-bó͘-kiáⁿ ê肉，kap朋友ê肉。 10 講soah，你tio̍h siak破hitê 磁瓶，hō͘同行ê人親目看見， 11 續kā in講，萬軍ê耶和華án-ni講，我beh án-ni phah破chitê城，kap chitê百姓，親像人siak破燒磁人ê磁器，bōe koh補得。Koh人beh tī Tô-hui-te̍k埋葬死人，到無chhun所在。 12 耶和華講，我beh án-ni款待chitê所在，kap其中khiā起ê百姓；hō͘ chitê城親像Tô-hui-te̍k一樣。 13 耶路撒冷ê厝，kap偤大列王ê厝，已經phah lâ-sâm-ê，lóng beh親像Tô-hui-te̍k，因為tī hiahê厝頂，人ǹg天頂ê萬象燒香，ǹg別號ê上帝灌奠。 14 耶利米tùi Tô-hui-te̍k，就是耶和華差伊去傳命令ê地方，tò來；khiā tī耶和華ê厝ê院內，對眾人講， 15 萬軍ê耶和華，以色列ê上帝，án-ni講，看ah，我beh hō͘我所講一切刑罰in ê災厄到chitê城，kap lóng總屬伊ê城；因為in硬in ê頷頸，m̄肯聽我ê話。
1 Iâ-hô-hoa án-ni kóng, Lí khì bóe sio-hûi lâng ê hûi-pân, koh chhōa peh-sìⁿ ê lāu-tōa, 2 kap chè-si tiong ê lāu-tōa, chhut-khì Piān-him-lùn ê soaⁿ-kok, Hap-jíⁿ-se ê mn̂g-kháu hia, soan-pò͘ Góa só͘ hoan-hù lí ê ōe, 3 kóng, Iû-tāi ê lia̍t-ông kap Iâ-lō͘-sat-léng khiā-khí ê peh-sìⁿ ah, tio̍h thiaⁿ Iâ-hô-hoa ê ōe; bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh hō͘ chai-ē lîm-kàu chit ê tōe-hng, hoān-nā thiaⁿ ê lâng, in ê hī-khang tek-khak tiō. 4 In-ūi in khì-sak Góa, khòaⁿ chit ê só͘-chāi chhin-chhiūⁿ gōa-pang; koh tī-chia sio-hiuⁿ hō͘ pa̍t ê siōng-tè, chiū-sī in chêng só͘ m̄-bat-ê; in ê lia̍t-chó͘, í-ki̍p Iû-tāi lia̍t-ông, iā sī án-ni; koh hō͘ bô-chōe ê lâng ê huih piàn-móa chit ê tōe-hng. 5 Koh ūi Pa-le̍k khí soaⁿ-thâu ê tôaⁿ, thang tī hé-tiong sio in ê kiáⁿ, chòe sio-chè lâi hiàn hō͘ Pa-le̍k. Che m̄-sī Góa só͘ bēng-lēng--ê, m̄-sī Góa só͘ thê-khí--ê, ia̍h m̄-sī Góa ê sim só͘-siūⁿ--ê. 6 Iâ-hô-hoa kóng, In-ūi án-ni, ji̍t-chí beh kàu, chit ê tōe-hng bô koh chheng-chòe Tô-hui-te̍k kap Piān-him-lùn ê soaⁿ-kok; hoán-tńg chheng-chòe Sat-lio̍k ê soaⁿ-kok. 7 Góa beh tī chit ê tōe-hng hō͘ Iû-tāi kap Iâ-lō͘-sat-léng ê kè-bô͘ kui tī khang-khang; ia̍h beh hō͘ in tī tùi-te̍k ê bīn-chêng tó tī to-ē, kap siàu-siūⁿ in ê sìⁿ-miā ê lâng ê chhiú-thâu; in ê sin-si, Góa beh hō͘ khong-tiong ê pe-chiáu, kap tōe-chiūⁿ ê iá-siù chòe chia̍h-mi̍h. 8 Góa beh hō͘ chit ê siâⁿ chòe thang gông-ngia̍h thang thí-chhiò--ê; hoān-nā keng-kè ê lâng beh in-ūi chit ê siâⁿ só͘ tú-tio̍h ê chai-ē, lâi gông-ngia̍h thí-chhiò. 9 Góa beh hō͘ in tī ûi-khùn khún-pek ê tiong-kan, chiū-sī tùi-te̍k kap siàu-siūⁿ in ê sìⁿ-miā ê lâng khún-pek in ê sî, ta̍k-lâng chia̍h in ê kiáⁿ ê bah, cha-bó͘-kiáⁿ ê bah, kap pêng-iú ê bah. 10 Kóng soah, lí tio̍h siak-phòa hit ê hûi-pân, hō͘ tâng-kiâⁿ ê lâng chhin-ba̍k khòaⁿ-kìⁿ, 11 sòa kā in kóng, Bān-kun ê Iâ-hô-hoa án-ni kóng, Góa beh án-ni phah-phòa chit ê siâⁿ, kap chit ê peh-sìⁿ, chhin-chhiūⁿ lâng siak--phòa sio-hûi-lâng ê hûi-khì, bōe koh pó͘--tit. Koh lâng beh tī Tô-hui-te̍k bâi-chòng sí-lâng, kàu bô chhun só͘-chāi. 12 Iâ-hô-hoa kóng, Góa beh án-ni khoán-thāi chit ê só͘-chāi, kap kî-tiong khiā-khí ê peh-sìⁿ; hō͘ chit ê siâⁿ chhin-chhiūⁿ Tô-hui-te̍k chi̍t-iūⁿ. 13 Iâ-lō͘-sat-léng ê chhù, kap Iû-tāi lia̍t-ông ê chhù, í-keng phah lâ-sâm--ê, lóng beh chhin-chhiūⁿ Tô-hui-te̍k, in-ūi tī hiah ê chhù-téng, lâng ǹg thiⁿ-téng ê bān-siōng sio-hiuⁿ, ǹg pa̍t-hō ê siōng-tè koàn-tiān. 14 Iâ-lī-bí tùi Tô-hui-te̍k, chiū-sī Iâ-hô-hoa chhe i khì thoân bēng-lēng ê tōe-hng, tò--lâi; khiā tī Iâ-hô-hoa ê chhù ê īⁿ-lāi, tùi chèng-lâng kóng, 15 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh hō͘ Góa só͘ kóng it-chhè hêng-hoa̍t in ê chai-ē kàu chit ê siâⁿ, kap lóng-chóng sio̍k i ê siâⁿ; in-ūi in ngī in ê ām-kún, m̄-khéng thiaⁿ Góa ê ōe.
1 祭司Im-be̍k ê kiáⁿ Pa-si-hō͘-jíⁿ，做管耶和華ê厝ê頭人， 2 聽見耶利米傳chiahê話；Pa-si-hō͘-jíⁿ就phah先知耶利米，用柴枷kā伊枷tī便雅憫頂ê門；chitê門tī耶和華ê殿內。 3 過日Pa-si-hō͘-jíⁿ開柴枷，tháu放耶利米；耶利米就對伊講，耶和華m̄是叫你ê名做Pa-si-hō͘-jíⁿ；就是叫你Má-ko-jíⁿ-bí-sat-pit。 4 因為耶和華án-ni講，看ah，我beh hō͘你做你本身，kap你眾朋友，驚惶ê原因；in beh倒tī對敵ê刀下，你beh親目看見；我beh將偤大人lóng交tī巴比倫王ê手，伊beh掠in到巴比倫，用刀刣-in。 5 Koh我beh將chitê城lóng總ê貨財，kap tio̍h磨所得tio̍h-ê，kap一切ê寶貝，以及偤大hiahê王ê寶物，lóng交tī in ê對敵ê手；對敵beh搶in，beh掠in；帶到巴比倫。 6 你chitê Pa-si-hō͘-jíⁿ ah，你kap一切tiàm你家內ê人，lóng beh hō͘人掠去；你kap你ê眾朋友，就是你對in傳假話ê，lóng beh到巴比倫，死tī-hia，埋葬tī-hia。 7 耶和華ah，你bat勉強我，我也hō͘你勉強；你比我khah有力，來贏我；我thong日成做笑話，人lóng戲弄我。 8 我ta̍k-pái講ê時，就出哀傷ê聲；我叫講，強暴、搶劫；因為耶和華ê話，thong日成做我ê凌辱、譏刺。 9 我若講，我無beh koh提起耶和華，亦無beh koh託伊ê名來講；就tī我ê心內有親像to̍h ê火，關密tī我ê骨內；我就忍bōe-tiâu，bōe能家己禁止。 10 我聽見chōe-chōe人ê譭謗；四圍lóng是驚惶。我知己ê朋友，就是teh當等我跋倒ê，講，Tio̍h告伊，阮亦beh告伊；kiám-chhái伊受引誘，咱就會贏伊，對伊報仇。 11 總是耶和華kap我tī-teh；親像真thang驚ê勇士；所以窘迫我ê beh跋倒，bōe能贏；in beh大大見笑就是受永無bōe記得ê漏氣；因為in行tāi-chì無智慧。 12 萬軍ê耶和華ah，祢是試驗義人，鑑察人ê心腹腎腸ê；求祢hō͘我看見祢對in報仇；因為我將我ê案件稟明tī祢。 13 Lín tio̍h ǹg耶和華唱歌，o-ló耶和華；因為伊救sòng-hiong人ê性命，脫離pháiⁿ人ê手。 14 我出世ê日，願hitê日子受咒詛；我ê老母生我ê日，願hitê日子無得tio̍h福氣。 15 人報我ê老父講，你有生ta-po͘-kiáⁿ，hō͘伊真歡喜ê；願hitê人受咒詛。 16 願hit人親像耶和華所chhia倒hiahê城，也無退悔ê；願伊早起時聽見哀慘ê聲，日中晝聽見hoah-hiàm ê聲。 17 因為祂無tùi胎裡hō͘我死；hō͘我ê老母做我ê墓，伊ê胎常常大ê。 18 我啥事出胎，來tú-tio̍h tio̍h磨憂苦；hō͘我ê年日因為見笑來消滅ah？
1 Chè-si Im-be̍k ê kiáⁿ Pa-si-hō͘-jíⁿ, chòe koán Iâ-hô-hoa ê chhù ê thâu-lâng, 2 thiaⁿ-kìⁿ Iâ-lī-bí thoân chiah ê ōe; Pa-si-hō͘-jíⁿ chiū phah sian-ti Iâ-lī-bí, ēng chhâ-kê kā i kê tī Piān-ngá-bín téng ê mn̂g; chit ê mn̂g tī Iâ-hô-hoa ê tiān-lāi. 3 Kè-ji̍t Pa-si-hō͘-jíⁿ khui chhâ-kê, tháu-pàng Iâ-lī-bí; Iâ-lī-bí chiū tùi i kóng, Iâ-hô-hoa m̄-sī kiò lí ê miâ chòe Pa-si-hō͘-jíⁿ; chiū-sī kiò lí Má-ko-jíⁿ-bí-sat-pit. 4 In-ūi Iâ-hô-hoa án-ni kóng, Khòaⁿ ah, Góa beh hō͘ lí chòe lí pún-sin, kap lí chèng pêng-iú, kiaⁿ-hiâⁿ ê goân-in; in beh tó tī tùi-te̍k ê to-ē, lí beh chhin-ba̍k khòaⁿ-kìⁿ; Góa beh chiong Iû-tāi lâng lóng kau tī Pa-pí-lûn ông ê chhiú, i beh lia̍h in kàu Pa-pí-lûn, ēng to thâi--in. 5 Koh Góa beh chiong chit ê siâⁿ lóng-chóng ê hè-châi, kap tio̍h-bôa só͘ tit-tio̍h--ê, kap it-chhè ê pó-pòe, í-ki̍p Iû-tāi hiah ê ông ê pó-mi̍h, lóng kau tī in ê tùi-te̍k ê chhiú; tùi-te̍k beh chhiúⁿ--in, beh lia̍h in; tòa kàu Pa-pí-lûn. 6 Lí chit ê Pa-si-hō͘-jíⁿ ah, lí kap it-chhè tiàm lí ke-lāi ê lâng, lóng beh hō͘ lâng lia̍h-khì; lí kap lí ê chèng pêng-iú, chiū-sī lí tùi in thoân ké-ōe--ê, lóng beh kàu Pa-pí-lûn, sí tī-hia, bâi-chòng tī-hia. 7 Iâ-hô-hoa ah, Lí bat bián-kióng góa, góa iā hō͘ lí bián-kióng; Lí pí góa khah ū la̍t, lâi iâⁿ góa; góa thong-ji̍t chiâⁿ-chòe chhiò-ōe, lâng lóng hì-lāng góa. 8 Góa ta̍k-pái kóng ê sî, chiū chhut ai-siong ê siaⁿ; góa kiò kóng, Kiông-pō, chhiúⁿ-kiap; in-ūi Iâ-hô-hoa ê ōe, thong-ji̍t chiâⁿ-chòe Góa ê lêng-jio̍k, ki-chhì. 9 Góa nā kóng, Góa bô beh koh thê-khí Iâ-hô-hoa, ia̍h bô beh koh thok I ê miâ lâi kóng; chiū tī Góa ê sim-lāi ū chhin-chhiūⁿ to̍h ê hé, koaiⁿ-ba̍t tī Góa ê kut-lāi; Góa chiū lún-bōe-tiâu, bōe-ōe ka-kī kìm-chí. 10 Góa thiaⁿ-kìⁿ chōe-chōe lâng ê húi-pòng; sì-ûi lóng sī kiaⁿ-hiâⁿ. Góa ti-kí ê pêng-iú, chiū-sī teh tng-tán góa poa̍h-tó--ê, kóng, Tio̍h kò--i, goán ia̍h beh kò--i; kiám-chhái i siū ín-iú, lán chiū ōe iâⁿ--i, tùi i pò-siû. 11 Chóng-sī Iâ-hô-hoa kap góa tī-teh; chhin-chhiūⁿ chin thang kiaⁿ ê ióng-sū; só͘-í khún-pek góa--ê beh poa̍h-tó, bōe-ōe iâⁿ; in beh tōa-tōa kiàn-siàu chiū-sī siū éng bô bōe-kì-tit ê làu-khùi; in-ūi in kiâⁿ tāi-chì bô tì-hūi. 12 Bān-kun ê Iâ-hô-hoa ah, Lí sī chhì-giām gī-lâng, kàm-chhat lâng ê sim-pak sīn-tn̂g--ê; kiû Lí hō͘ góa khòaⁿ-kìⁿ Lí tùi in pò-siû; in-ūi góa chiong góa ê àn-kiāⁿ pín-bêng tī Lí. 13 Lín tio̍h ǹg Iâ-hô-hoa chhiùⁿ-koa, o-ló Iâ-hô-hoa; in-ūi I kiù sòng-hiong-lâng ê sìⁿ-miā, thoat-lī pháiⁿ-lâng ê chhiú. 14 Góa chhut-sì ê ji̍t, goān hit ê ji̍t-chí siū chiù-chó͘; góa ê lāu-bú siⁿ góa ê ji̍t, goān hit ê ji̍t-chí bô tit-tio̍h hok-khì. 15 Lâng pò góa ê lāu-pē kóng, Lí ū siⁿ ta-po͘-kiáⁿ, hō͘ i chin hoaⁿ-hí--ê; goān hit ê lâng siū chiù-chó͘. 16 Goān hit-lâng chhin-chhiūⁿ Iâ-hô-hoa só͘ chhia-tó hiah ê siâⁿ, iā bô thè-hóe--ê; goān i chá-khí-sî thiaⁿ-kìⁿ ai-chhám ê siaⁿ, ji̍t tiong-tàu thiaⁿ-kìⁿ hoah-hiàm ê siaⁿ. 17 In-ūi I bô tùi thai--nih hō͘ góa sí; hō͘ góa ê lāu-bú chòe góa ê bōng, i ê thai siông-siông tōa--ê. 18 Góa siáⁿ-sū chhut-thai, lâi tú-tio̍h tio̍h-bôa iu-khó͘; hō͘ góa ê nî-ji̍t in-ūi kiàn-siàu lâi siau-bia̍t ah?
1 Se-tí-ka王差Má-ki-ngá ê kiáⁿ Pa-si-hō͘-jíⁿ，kap祭司Má-se-ngá ê kiáⁿ Se-hoan-ngá，去見耶利米講， 2 巴比倫王Nî-pò͘-kah-nî-sat beh kap咱交戰；求你替阮問耶和華；kiám-chhái耶和華照祂奇妙ê所做款待咱；hō͘伊離開咱上去。hit時耶和華ê話臨到耶利米。 3 耶利米對in講，Lín tio̍h án-ni kā Se-tí-ka講， 4 耶和華以色列ê上帝án-ni講，看ah，我beh hō͘ lín所kia̍h ê軍器，就是lín tī城外kap巴比倫王，以及圍困lín ê Ka-le̍k-tí人，交戰ê軍器倒tńg來；koh beh hō͘ chiahê lóng聚集tī chitê城內。 5 Koh我tī懊惱、受氣、大痛恨ê中間，用伸出ê手，kap大權能ê手骨，親身攻擊lín。 6 Koh beh phah chitê城khiā起ê百姓，無論人kap cheng-siⁿ；in beh tú-tio̍h大瘟疫來死。 7 以後我beh將偤大王Se-tí-ka，kap伊ê人臣百姓，就是tī chitê城內，tùi瘟疫、刀劍、飢荒所chhun-ê，lóng交tī巴比倫王Nî-pò͘-kah-nî-sat ê手，kap in ê對敵ê手，以及siàu想in ê性命ê人ê手；伊beh用刀刣死in；無保惜，無可憐，無寬容；這是耶和華講ê。 8 你tio̍h對chitê百姓講，耶和華án-ni講，看ah，我將活路死路排tī lín ê面前。 9 Tiàm tī chitê城內ê，beh tùi刀劍，tùi飢荒，tùi瘟疫，來死；獨獨出去投降圍困lín ê Ka-le̍k-tí人ê，beh得tio̍h活，來拾tio̍h伊ê性命。 10 耶和華講，我ê面定定ǹg chitê城，beh降災厄，m̄降福氣；chitê城beh交巴比倫王ê手；伊beh用火燒伊。 11 論到偤大王ê家，lín tio̍h聽耶和華ê話。 12 大衛ê家ah，耶和華án-ni講，Lín ta̍k早起tio̍h行公平；拯救受搶劫ê脫離強暴ê人ê手；驚了我ê受氣，因為lín所行ê pháiⁿ，來發作；親像火to̍h起來，甚至無人能phah-hoa。 13 耶和華講，khiā起tī山谷，平洋，石磐頂ê百姓，lín講，Chī-chūi會落來攻擊阮？Chī-chūi會入阮khiā起ê所在ah？看ah，我kap lín做對敵。 14 耶和華koh講，我beh照lín做tāi-chì ê結果刑罰lín；我亦beh hō͘火to̍h tī伊ê樹林內，燒毀伊ê四圍。
1 Se-tí-ka ông chhe Má-ki-ngá ê kiáⁿ Pa-si-hō͘-jíⁿ, kap chè-si Má-se-ngá ê kiáⁿ Se-hoan-ngá, khì kìⁿ Iâ-lī-bí kóng, 2 Pa-pí-lûn ông Nî-pò͘-kah-nî-sat beh kap lán kau-chiàn; kiû lí thòe goán mn̄g Iâ-hô-hoa; kiám-chhái Iâ-hô-hoa chiàu I kî-biāu ê só͘ chòe khoán-thāi lán; hō͘ i lī-khui lán chiūⁿ--khì. Hit-sî Iâ-hô-hoa ê ōe lîm-kàu Iâ-lī-bí. 3 Iâ-lī-bí tùi in kóng, Lín tio̍h án-ni kā Se-tí-ka kóng, 4 Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh hō͘ lín só͘ kia̍h ê kun-khì, chiū-sī lín tī siâⁿ-gōa kap Pa-pí-lûn ông, í-ki̍p ûi-khùn lín ê Ka-le̍k-tí lâng, kau-chiàn ê kun-khì tò-tńg--lâi; koh beh hō͘ chiah-ê lóng chū-chi̍p tī chit ê siâⁿ-lāi. 5 Koh Góa tī àu-náu, siū-khì, tōa thòng-hūn ê tiong-kan, ēng chhun-chhut ê chhiú, kap tōa koân-lêng ê chhiú-kut, chhin-sin kong-kek lín. 6 Koh beh phah chit ê siâⁿ khiā-khí ê peh-sìⁿ, bô-lūn lâng kap cheng-siⁿ; in beh tú-tio̍h tōa un-e̍k lâi sí. 7 Í-āu Góa beh chiong Iû-tāi ông Se-tí-ka, kap i ê jîn-sîn peh-sìⁿ, chiū-sī tī chit ê siâⁿ-lāi, tùi un-e̍k, to-kiàm, ki-hng só͘ chhun--ê, lóng kau tī Pa-pí-lûn ông Nî-pò͘-kah-nî-sat ê chhiú, kap in ê tùi-te̍k ê chhiú, í-ki̍p siàu-siūⁿ in ê sìⁿ-miā ê lâng ê chhiú; i beh ēng to thâi-sí in; bô pó-sioh, bô khó-lîn, bô khoan-iông; che sī Iâ-hô-hoa kóng--ê. 8 Lí tio̍h tùi chit ê peh-sìⁿ kóng, Iâ-hô-hoa án-ni kóng, Khòaⁿ ah, Góa chiong oa̍h-lō͘ sí-lō͘ pâi tī lín ê bīn-chêng. 9 Tiàm tī chit ê siâⁿ-lāi--ê, beh tùi to-kiàm, tùi ki-hng, tùi un-e̍k, lâi sí; to̍k-to̍k chhut-khì tâu-hâng ûi-khùn lín ê Ka-le̍k-tí lâng--ê, beh tit-tio̍h oa̍h, lâi khioh-tio̍h i ê sìⁿ-miā. 10 Iâ-hô-hoa kóng, Góa ê bīn tiāⁿ-tiāⁿ ǹg chit ê siâⁿ, beh kàng chai-ē, m̄ kàng hok-khì; chit ê siâⁿ beh kau Pa-pí-lûn ông ê chhiú; i beh ēng hé sio--i. 11 Lūn-kàu Iû-tāi ông ê ke, lín tio̍h thiaⁿ Iâ-hô-hoa ê ōe. 12 Tāi-pi̍t ê ke ah, Iâ-hô-hoa án-ni kóng, Lín ta̍k chá-khí tio̍h kiâⁿ kong-pêng; chín-kiù siū chhiúⁿ-kiap--ê thoat-lī kiông-pō ê lâng ê chhiú; kiaⁿ-liáu Góa ê siū-khì, in-ūi lín só͘ kiâⁿ ê pháiⁿ, lâi hoat-choh; chhin-chhiūⁿ hé to̍h--khí-lâi, sīm-chì bô lâng ōe phah-hoa. 13 Iâ-hô-hoa kóng, Khiā-khí tī soaⁿ-kok, pîⁿ-iûⁿ, chio̍h-pôaⁿ-téng ê peh-sìⁿ, lín kóng, Chī-chūi ōe lo̍h--lâi kong-kek goán? Chī-chūi ōe ji̍p goán khiā-khí ê só͘-chāi ah? Khòaⁿ ah, Góa kap lín chòe tùi-te̍k. 14 Iâ-hô-hoa koh kóng, Góa beh chiàu lín chòe tāi-chì ê kiat-kó hêng-hoa̍t lín; Góa ia̍h beh hō͘ hé to̍h tī i ê chhiū-nâ-lāi, sio-húi i ê sì-ûi.
1 耶和華án-ni講，你落去偤大王ê宮內；tī-hia講chitê話，講， 2 坐大衛寶座ê偤大王ah，你kap你ê人臣以及入chiahê門ê百姓，lóng tio̍h聽耶和華ê話。 3 耶和華án-ni講，Lín tio̍h行公平kap公義，拯救受搶奪ê脫離壓制人ê ê手；m̄-thang用強暴欺負出外人，kap孤兒寡婦；tī chitê所在亦m̄-thang 流無罪ê人ê血。 4 Lín若認真行chitê tāi-chì，就beh有坐大衛寶座ê王，伊kap伊ê人臣百姓，或是坐車，或是騎馬，入chitê厝ê門。 5 Lín若m̄聽chiahê話，耶和華講，我kí本身來chiù-chōa，chit間厝beh變做拋荒。 6 耶和華論到偤大王ê家án-ni講，我看你親像Ki-lia̍t，親像黎巴嫩ê尾溜；總是我的確hō͘你變做曠野，做無人khiā起ê城。 7 我beh備辦行毀滅ê人，ta̍k-ê kia̍h ke-si攻擊你；in beh剉你siōng好ê柏香樹，hiat落火。 8 Chōe-chōe國ê人beh經過chitê城，ta̍k-ê相kap講，耶和華啥事án-ni款待chitê大城ah？ 9 In beh應講，是因為in棄sak耶和華in ê上帝ê約，服事敬拜別ê上帝。 10 莫得為tio̍h死人啼哭，莫得為tio̍h伊悲傷；tio̍h因為受遷徙ê人大大啼哭；因為伊bōe koh tò來，亦bōe koh見tio̍h伊ê本國。 11 因為論到偤大王約西亞ê kiáⁿ Sa-liông，續接伊ê老父約西亞做王，後來離開chitê所在ê，耶和華有án-ni講， 12 伊的確無koh tò來chia；就是beh死tī hō͘人掠去ê地方，無koh看見chitê地方。 13 Hit-ê用不義來起厝，用無公道來起樓；白白kah人做伊ê工，無hō͘人工錢；hit人有災厄ah。 14 伊講，我beh為本身起大厝，kap通風ê樓；為家己開大窗，用柏香柴做天羅板；用銀朱來油。 15 你熱心tī柏香柴ê工作，就會做王mah？你ê老父kiám m̄是亦食，亦lim，亦行公平kap公義mah？hit時伊得tio̍h福氣。 16 伊辨理困苦kap sòng-hiong人ê案件，伊就得tio̍h福氣；án-ni kiám m̄是bat我mah？這是耶和華講ê。 17 獨獨你ê目睭，你ê心，注意貪心，流無罪ê人ê血，行壓制kap強暴。 18 所以耶和華論到偤大王約西亞ê kiáⁿ，Iok-ngá-kèng，án-ni講，人無beh為tio̍h伊哀傷，講，Ai-ah，我ê兄！á是，Ai-ah，我ê大姊！亦無因為伊哀傷，講，Ai-ah，我ê主！á是，Ai-ah，伊ê榮光！ 19 伊beh hō͘人埋，親像埋驢一樣；beh拖出去，hiat tī耶路撒冷ê城外。 20 你tio̍h 上黎巴嫩哀哭，tī Pa-san出聲，對A-pa-lîm哀哭；因為你所親愛ê lóng毀滅lah。 21 當你興通ê時，我就對你講；你講，我m̄聽；你tùi少年以來，lóng是chit款，m̄聽thàn我ê話。 22 你ê牧者beh hō͘風吹去；你所親愛ê beh hō͘人掠去；hit時你的確因為你一切ê pháiⁿ來漏氣見笑。 23 你khiā起黎巴嫩，作巢tī柏香樹ê，痛苦臨到你，痛疼親像beh生kiáⁿ ê婦人人；hit時你ê可憐到怎樣！ 24 耶和華講，我kí我ê永活來chiù-chōa，雖然偤大王，Iok-ngá-kèng ê kiáⁿ Ko-nî-ngá，是我chiàⁿ手蓋印ê手指，亦beh kā你剝(pak)起來。 25 Koh我beh將你交hō͘ siàu想你ê性命ê人ê手；kap你所m̄敢見伊ê面ê人ê手，就是巴比倫王Nî-pò͘-kah-nî-sat ê手，kap Ka-le̍k-tí人ê手。 26 我亦beh趕你，kap生你ê老母，到別國，m̄是lín出世ê所在；lín beh死tī-hia。 27 總是in ê心真ài tò去ê所在bōe得thang tò去。 28 Ko-nî-ngá chit人是受看輕，已經破ê磁器mah？是無thang歡喜ê器具mah？伊kap伊ê後裔，啥事受趕，hiat tī in所m̄ bat ê地ah？ 29 地ah，地ah，地ah，tio̍h聽耶和華ê話； 30 耶和華án-ni講，Tio̍h kí chit人無kiáⁿ，一生bōe得tio̍h興通ê；因為伊ê後裔ê中間，無koh有一人得tio̍h興通，能坐tī大衛ê寶座，來治理偤大。
1 Iâ-hô-hoa án-ni kóng, Lí lo̍h-khì Iû-tāi ông ê kiong-lāi; tī-hia kóng chit ê ōe, kóng, 2 Chē Tāi-pi̍t pó-chō ê Iû-tāi ông ah, lí kap lí ê jîn-sîn í-ki̍p ji̍p chiah ê mn̂g ê peh-sìⁿ, lóng tio̍h thiaⁿ Iâ-hô-hoa ê ōe. 3 Iâ-hô-hoa án-ni kóng, Lín tio̍h kiâⁿ kong-pêng kap kong-gī, chín-kiù siū chhiúⁿ-toa̍t--ê thoat-lī ap-chè lâng--ê ê chhiú; m̄-thang ēng kiông-pō khi-hū chhut-gōa lâng, kap ko͘-jî kóaⁿ-hū; tī chit ê só͘-chāi ia̍h m̄-thang lâu bô-chōe ê lâng ê huih. 4 Lín nā jīn-chin kiâⁿ chit ê tāi-chì, chiū beh ū chē Tāi-pi̍t pó-chō ê ông, i kap i ê jîn-sîn peh-sìⁿ, he̍k-sī chē-chhia, he̍k-sī khiâ-bé, ji̍p chit ê chhù ê mn̂g. 5 Lín nā m̄-thiaⁿ chiah ê ōe, Iâ-hô-hoa kóng, Góa kí pún-sin lâi chiù-chōa, chit keng chhù beh pìⁿ-chòe pha-hng. 6 Iâ-hô-hoa lūn-kàu Iû-tāi ông ê ke án-ni kóng, Góa khòaⁿ lí chhin-chhiūⁿ Ki-lia̍t, chhin-chhiūⁿ Lī-pa-lùn ê bé-liu; chóng-sī Góa tek-khak hō͘ lí pìⁿ-chòe khòng-iá, chòe bô lâng khiā-khí ê siâⁿ. 7 Góa beh pī-pān kiâⁿ húi-bia̍t ê lâng, ta̍k-ê kia̍h ke-si kong-kek lí; in beh chhò lí siōng-hó ê pek-hiuⁿ-chhiū, hiat-lo̍h hé. 8 Chōe-chōe kok ê lâng beh keng-kè chit ê siâⁿ, ta̍k-ê saⁿ-kap kóng, Iâ-hô-hoa siáⁿ-sū án-ni khoán-thāi chit ê tōa siâⁿ ah? 9 In beh ìn kóng, Sī in-ūi in khì-sak Iâ-hô-hoa in ê Siōng-tè ê iok, ho̍k-sāi kèng-pài pa̍t ê siōng-tè. 10 Bo̍h-tit ūi-tio̍h sí-lâng thî-khàu, bo̍h-tit ūi-tio̍h i pi-siong; tio̍h in-ūi siū chhian-sóa ê lâng tōa-tōa thî-khàu; in-ūi i bōe koh tò--lâi, ia̍h bōe koh kìⁿ-tio̍h i ê pún-kok. 11 In-ūi lūn-kàu Iû-tāi ông Iok-se-a ê kiáⁿ Sa-liông, sòa-chiap i ê lāu-pē Iok-se-a chòe ông, āu-lâi lī-khui chit ê só͘-chāi--ê, Iâ-hô-hoa ū án-ni kóng, 12 I tek-khak bô koh tò--lâi chia; chiū-sī beh sí tī hō͘ lâng lia̍h-khì ê tōe-hng, bô koh khòaⁿ-kìⁿ chit ê tōe-hng. 13 Hit ê ēng put-gī lâi khí chhù, ēng bô kong-tō lâi khí lâu; pe̍h-pe̍h kah lâng chòe i ê kang, bô hō͘ lâng kang-chîⁿ; hit lâng ū chai-ē ah. 14 I kóng, Góa beh ūi pún-sin khí tōa-chhù, kap thong-hong ê lâu; ūi ka-kī khui tōa thang, ēng pek-hiuⁿ-chhâ chòe thian-lô-pán; ēng gûn-chu lâi iû. 15 Lí jia̍t-sim tī pek-hiuⁿ-chhâ ê kong-chok, chiū ōe chòe ông mah? Lí ê lāu-pē kiám m̄-sī ia̍h chia̍h, ia̍h lim, ia̍h kiâⁿ kong-pêng kap kong-gī mah? Hit-sî i tit-tio̍h hok-khì. 16 I pān-lí khùn-khó͘ kap sòng-hiong lâng ê àn-kiāⁿ, i chiū tit-tio̍h hok-khì; án-ni kiám m̄-sī bat Góa mah? che sī Iâ-hô-hoa kóng--ê. 17 To̍k-to̍k lí ê ba̍k-chiu, lí ê sim, chù-ì tham-sim, lâu bô-chōe ê lâng ê huih, kiâⁿ ap-chè kap kiông-pō. 18 Só͘-í Iâ-hô-hoa lūn-kàu Iû-tāi ông Iok-se-a ê kiáⁿ, Iok-ngá-kèng, án-ni kóng, Lâng bô beh ūi-tio̍h i ai-siong, kóng, Ai-ah, góa ê hiaⁿ! á-sī, Ai--ah, góa ê tōa-chí! ia̍h bô in-ūi i ai-siong, kóng, Ai--ah, góa ê chú! á-sī, Ai--ah, i ê êng-kng! 19 I beh hō͘ lâng tâi, chhin-chhiūⁿ tâi lû chi̍t-iūⁿ; beh thoa--chhut-khì, hiat tī Iâ-lō͘-sat-léng ê siâⁿ-gōa. 20 Lí tio̍h chiūⁿ Lī-pa-lùn ai-khàu, tī Pa-san chhut-siaⁿ, tùi A-pa-lîm ai-khàu; in-ūi lí só͘ chhin-ài--ê lóng húi-bia̍t lah. 21 Tng lí heng-thong ê sî, Góa chiū tùi lí kóng; lí kóng, Góa m̄ thiaⁿ; lí tùi siàu-liân í-lâi, lóng sī chit-khoán, m̄ thiaⁿ-thàn Góa ê ōe. 22 Lí ê bo̍k-chiá beh hō͘ hong chhe--khì; lí só͘ chhin-ài--ê beh hō͘ lâng lia̍h--khì; hit-sî lí tek-khak in-ūi lí it-chhè ê pháiⁿ lâi làu-khùi kiàn-siàu. 23 Lí khiā-khí Lī-pa-lùn, choh siū tī pek-hiuⁿ-chhiū--ê, thòng-khó͘ lîm-kàu lí, thàng-thiàⁿ chhin-chhiūⁿ beh siⁿ-kiáⁿ ê hū-jîn-lâng; hit-sî lí ê khó-lîn kàu cháiⁿ-iūⁿ! 24 Iâ-hô-hoa kóng, Góa kí Góa ê éng-oa̍h lâi chiù-chōa, sui-jiân Iû-tāi ông, Iok-ngá-kèng ê kiáⁿ Ko-nî-ngá, sī Góa chiàⁿ-chhiú kài-ìn ê chhiú-chí, ia̍h beh kā lí pak--khí-lâi. 25 Koh Góa beh chiong lí kau hō͘ siàu-siūⁿ lí ê sìⁿ-miā ê lâng ê chhiú; kap lí só͘ m̄-káⁿ kìⁿ i ê bīn ê lâng ê chhiú, chiū-sī Pa-pí-lûn ông Nî-pò͘-kah-nî-sat ê chhiú, kap Ka-le̍k-tí lâng ê chhiú. 26 Góa ia̍h beh kóaⁿ lí, kap siⁿ lí ê lāu-bú, kàu pa̍t-kok, m̄-sī lín chhut-sì ê só͘-chāi; lín beh sí tī-hia. 27 Chóng-sī in ê sim chin ài tò--khì ê só͘-chāi bōe-tit-thang tò--khì. 28 Ko-nî-ngá chit-lâng sī siū khòaⁿ-khin, í-keng phòa ê hûi-khì mah? sī bô thang hoaⁿ-hí ê khì-kū mah? i kap i ê hō͘-è, siáⁿ-sū siū kóaⁿ, hiat tī in só͘ m̄ bat ê tōe ah? 29 Tōe ah, tōe ah, tōe ah, tio̍h thiaⁿ Iâ-hô-hoa ê ōe; 30 Iâ-hô-hoa án-ni kóng, Tio̍h kí chit-lâng bô kiáⁿ, it-seng bōe tit-tio̍h heng-thong--ê; in-ūi i ê hō͘-è ê tiong-kan, bô koh ū chi̍t-lâng tit-tio̍h heng-thong, ōe chē tī Tāi-pi̍t ê pó-chō, lâi tī-lí Iû-tāi.
1 耶和華講，牧者殘害我ê草場ê羊，hō͘伊四散；in有災厄ah。 2 所以以色列ê上帝耶和華責備hiahê養飼我ê百姓ê牧者，án-ni講，Lín phah散我ê羊群，來趕in去，無看顧in；看ah，我beh照lín所行ê pháiⁿ來辦lín；這是耶和華講ê。 3 我beh聚集我ê羊群所chhun-ê，tùi我所趕in到ê ta̍k國；chhōa in koh tò來in ê椆，hō͘ in生湠chōe-chōe。 4 我beh設立牧者治理in，養飼in；hō͘ in無koh驚惶gông-ngia̍h，亦無減少；這是耶和華講ê。 5 耶和華講，日子beh到，我beh kā大衛興起義ê枝；伊beh做王來治理；行tāi-chì有智慧，tī地上行公平kap公義。 6 當祂ê日，偤大beh得tio̍h救；以色列beh安然khiā起；祂ê名beh稱做耶和華咱ê義。 7 耶和華講，看ah，日子beh到，人kí耶和華ê永活來chiù-chōa，無beh講，祂是chhōa以色列ê後裔tùi埃及地上來ê。 8 In kí耶和華ê永活來chiù-chōa，是beh講，祂帶以色列ê後裔chhōa in tùi北方ê地，亦tùi見若我所趕in到ê地上來；in beh khiā起tī本所在。 9 論到hiahê先知，我ê心tī我ê內面憂傷；我ê骨lóng gī-gī-chhoah；為tio̍h耶和華kap伊聖ê話，我親像酒醉ê人，親像hō͘酒所khah贏ê人。 10 因為地方滿滿行淫亂ê人；koh因為tú-tio̍h咒詛，地就悲哀；曠野ê草場lóng枯焦；in所行ê路，就是pháiⁿ；in ê勢力無正直。 11 連先知kap祭司，都是褻瀆ê；就tī我ê厝內，我亦看見in ê pháiⁿ；這是耶和華講ê。 12 因為án-ni，in ê路beh親像烏暗中滑滑ê地；in beh tú-tio̍h趕逐，tī-hia跋倒；當辨理in ê年，我beh hō͘災厄到tī in；這是耶和華講ê。 13 Tī撒馬利亞ê先知，我已經看見in ê愚戇；in託Pa-le̍k來讖語，hō͘我ê百姓以色列行叉路。 14 Tī耶路撒冷ê先知，我已經看見可惡ê事；in行姦淫，做事白賊；koh助pháiⁿ人ê手ná有力；致到無人回頭離開伊ê pháiⁿ；in tī我ê面前，lóng親像所多瑪；khiā起tī-hia ê百姓lóng親像蛾摩拉。 15 所以萬軍ê耶和華論到chiahê先知，有án-ni講；看ah，我beh用茵蔯hō͘ in食，koh用苦ê水hō͘ in lim；因為褻瀆ê事出tī耶路撒冷ê先知，流行遍地。 16 萬軍ê耶和華án-ni講，chiahê先知對lín讖語ê，lín莫得聽in ê話；in用虛假教示lín；所講ê異象是出tī in ê心；m̄是出tī耶和華ê嘴。 17 In常常對藐視我ê人講，耶和華講lín beh享受平安；koh對一切照in心ê剛硬來行ê人講，的確無有災厄臨到lín。 18 Chī-chūi kap耶和華契合，得tio̍h聽伊ê話來曉悟ah？ 19 Chī-chūi注意聽祂ê話ah？看ah，耶和華ê受氣親像大風發出；就是真透ê捲螺風，beh轉旋來攻擊pháiⁿ人ê頭殼。 20 耶和華ê心所擬定ê，iáu未做，iáu未成；祂ê受氣的確無倒tńg，日後lín beh明白透徹。 21 Hiah-ê先知，我無差in，in家己走；我無對in講，in家己宣傳。 22 In若kap我契合，就的確hō͘我ê百姓聽我ê話；hō͘ in回頭離開in ê pháiⁿ路，kap in所行ê pháiⁿ。 23 耶和華講，我kiám做近ê上帝，無做遠ê上帝mah？ 24 耶和華講，人kiám會bih tī隱密ê所在，hō͘我看伊bōe tio̍h mah？耶和華講，我kiám無充滿tī天地mah？ 25 我已經聽見hiahê先知所講ê，就是託我ê名宣傳白賊；in講，我有夢見，我有夢見。 26 宣傳白賊ê先知，就是宣傳in ê心ê詭詐；in存chit號ê心，beh到tī時ah？ 27 In ta̍k人將所夢ê相kap講起；想beh hō͘我ê百姓bōe記得我ê名；親像in ê列祖因為Pa-le̍k，來bōe記得我ê名一樣。 28 先知若有夢見thang講起伊ê夢；得tio̍h我ê話ê，tio̍h用誠實傳我ê話；粗糠kap麥thái能比得？這是耶和華講ê。 29 耶和華講，我ê話kiám m̄是親像火，koh親像能phah破石磐ê大槌mah？ 30 耶和華講，看ah，hiahê先知對伊ê同伴偷the̍h我ê話ê，我攻擊in。 31 耶和華講，hiahê先知用嘴舌講，這是耶和華講ê；我攻擊in。 32 耶和華講，看ah，hiahê用假ê夢來做先知ê；in講起in ê夢；亦用in ê白賊，kap in ê風hàm，hō͘我ê百姓行叉路；我攻擊in；因為我無差in，亦無命令in，in lóng無利益chitê百姓；這是耶和華講ê。 33 若chitê百姓，á是先知，á是祭司，問你講，耶和華有甚麼重擔ê默示？你就tio̍h kā in講，甚麼重擔ê默示ah！耶和華講，我beh棄sak lín，就是。 34 見若先知，á是祭司，á是百姓，講，耶和華重擔ê默示ê；hit號人，我beh刑罰伊kap伊ê家。 35 Lín ta̍k人對伊ê厝邊，ta̍k人對伊ê兄弟，tio̍h án-ni講，耶和華有應甚麼？耶和華有講甚麼？ 36 耶和華重擔ê默示，chit句lín m̄-thang koh講；因為ta̍k人所講ê話，beh做in本身ê重擔；因為lín將永活ê上帝，萬軍ê耶和華，咱ê上帝ê話解hō͘伊chhoa̍h去。 37 你tio̍h對先知án-ni講，耶和華應你甚麼？耶和華講甚麼？ 38 Lín若講，耶和華重擔ê默示，耶和華就án-ni講，我差人到lín hia，kā lín講，M̄-thang講耶和華重擔ê默示；lín iáu teh講chit句耶和華重擔ê默示； 39 所以我beh全然bōe記得lín，將lín kap我所賞賜lín，以及lín ê列祖ê城，tùi我ê面前棄sak。 40 Koh beh hō͘永遠ê凌辱，kap久長ê見笑，臨到lín；久長無bōe記得。
1 Iâ-hô-hoa kóng, Bo̍k-chiá chân-hāi Góa ê chháu-tiûⁿ ê iûⁿ, hō͘ i sì-sòaⁿ; in ū chai-ē ah. 2 Só͘-í Í-sek-lia̍t ê Siōng-tè Iâ-hô-hoa chek-pī hiah-ê iúⁿ-chhī Góa ê peh-sìⁿ ê bo̍k-chiá, án-ni kóng, Lín phah-sòaⁿ Góa ê iûⁿ-kûn, lâi kóaⁿ in khì, bô khòaⁿ-kò͘ in; khòaⁿ ah, Góa beh chiàu lín só͘ kiâⁿ ê pháiⁿ lâi pān lín; che sī Iâ-hô-hoa kóng--ê. 3 Góa beh chū-chi̍p Góa ê iûⁿ-kûn só͘ chhun--ê, tùi Góa só͘ kóaⁿ in kàu ê ta̍k-kok; chhōa in koh tò-lâi in ê tiâu, hō͘ in siⁿ-thòaⁿ chōe-chōe. 4 Góa beh siat-li̍p bo̍k-chiá tī-lí in, iúⁿ-chhī in; hō͘ in bô koh kiaⁿ-hiâⁿ gông-ngia̍h, ia̍h bô kiám-chió; che sī Iâ-hô-hoa kóng--ê. 5 Iâ-hô-hoa kóng, Ji̍t-chí beh kàu, Góa beh kā Tāi-pi̍t heng-khí gī ê Ki; I beh chòe ông lâi tī-lí; kiâⁿ tāi-chì ū tì-hūi, tī tōe-chiūⁿ kiâⁿ kong-pêng kap kong-gī. 6 Tng I ê ji̍t, Iû-tāi beh tit-tio̍h kiù; Í-sek-lia̍t beh an-jiân khiā-khí; I ê miâ beh chheng-chòe Iâ-hô-hoa lán ê gī. 7 Iâ-hô-hoa kóng, Khòaⁿ ah, ji̍t-chí beh kàu, lâng kí Iâ-hô-hoa ê éng-oa̍h lâi chiù-chōa, bô beh kóng, I sī chhōa Í-sek-lia̍t ê hō͘-è tùi Ai-ki̍p tōe chiūⁿ-lâi--ê. 8 In kí Iâ-hô-hoa ê éng-oa̍h lâi chiù-chōa, sī beh kóng, I tòa Í-sek-lia̍t ê hō͘-è chhōa in tùi pak-hng ê tōe, ia̍h tùi kìⁿ-nā Góa só͘ kóaⁿ in kàu ê tōe chiūⁿ--lâi; in beh khiā-khí tī pún só͘-chāi. 9 Lūn-kàu hiah ê sian-ti. Góa ê sim tī góa ê lāi-bīn iu-siong; góa ê kut lóng gī-gī-chhoah; ūi-tio̍h Iâ-hô-hoa kap I sèng ê ōe, góa chhin-chhiūⁿ chiú-chùi ê lâng, chhin-chhiūⁿ hō͘ chiú só͘ khah-iâⁿ ê lâng. 10 In-ūi tōe-hng móa-móa kiâⁿ îm-loān ê lâng; koh in-ūi tú-tio̍h chiù-chó͘, tōe chiū pi-ai; khòng-iá ê chháu-tiûⁿ lóng ko͘-tâ; in só͘ kiâⁿ ê lō͘, chiū-sī pháiⁿ; in ê sè-le̍k bô chèng-ti̍t. 11 Liân sian-ti kap chè-si, to sī siat-to̍k--ê; chiū tī Góa ê chhù-lāi, Góa ia̍h khòaⁿ-kìⁿ in ê pháiⁿ; che sī Iâ-hô-hoa kóng--ê. 12 In-ūi án-ni, in ê lō͘ beh chhin-chhiūⁿ o͘-àm-tiong ku̍t-ku̍t ê tōe; in beh tú-tio̍h kóaⁿ-tio̍k, tī-hia poa̍h-tó; tng pān-lí in ê nî, Góa beh hō͘ chai-ē kàu tī in; che sī Iâ-hô-hoa kóng--ê. 13 Tī Sat-má-lī-a ê sian-ti, Góa í-keng khòaⁿ-kìⁿ in ê gû-gōng; in thok Pa-le̍k lâi chhàm-gú, hō͘ Góa ê peh-sìⁿ Í-sek-lia̍t kiâⁿ chha-lō͘. 14 Tī Iâ-lō͘-sat-léng ê sian-ti, Góa í-keng khòaⁿ-kìⁿ khó-ò͘ⁿ ê sū; in kiâⁿ kan-îm, chòe sū pe̍h-chha̍t; koh chō͘ pháiⁿ lâng ê chhiú ná ū la̍t; tì-kàu bô lâng hôe-thâu lī-khui i ê pháiⁿ; in tī Góa ê bīn-chêng, lóng chhin-chhiūⁿ Só͘-to-má; khiā-khí tī-hia ê peh-sìⁿ lóng chhin-chhiūⁿ Gô-mô͘-la̍h. 15 Só͘-í bān-kun ê Iâ-hô-hoa lūn-kàu chiah ê sian-ti, ū án-ni kóng; Khòaⁿ ah, Góa beh ēng in-tîn hō͘ in chia̍h, koh ēng khó͘ ê chúi hō͘ in lim; in-ūi siat-to̍k ê sū chhut tī Iâ-lō͘-sat-léng ê sian-ti, liû-hêng piàn-tōe. 16 Bān-kun ê Iâ-hô-hoa án-ni kóng, Chiah ê sian-ti tùi lín chhàm-gú--ê, lín bo̍h-tit thiaⁿ in ê ōe; in ēng hu-ké kà-sī lín; só͘ kóng ê īⁿ-siōng sī chhut tī in ê sim; m̄-sī chhut tī Iâ-hô-hoa ê chhùi. 17 In siông-siông tùi biáu-sī Góa ê lâng kóng, Iâ-hô-hoa kóng lín beh hióng-siū pêng-an; koh tùi it-chhè chiàu in sim ê kong-ngī lâi kiâⁿ ê lâng kóng, Tek-khak bô ū chai-ē lîm-kàu lín. 18 Chī-chūi kap Iâ-hô-hoa khè-ha̍p, tit-tio̍h thiaⁿ I ê ōe lâi hiáu-ngō͘ ah? 19 Chī-chūi chù-ì thiaⁿ I ê ōe ah? Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī chin thàu ê kńg-lê-hong, beh tńg-se̍h lâi kong-kek pháiⁿ-lâng ê thâu-khak. 20 Iâ-hô-hoa ê sim só͘ gí-tiāⁿ--ê, iáu-bē chòe, iáu-bē chiâⁿ; I ê siū-khì tek-khak bô tò-tńg, ji̍t-āu lín beh bêng-pe̍k thàu-thiat. 21 Hiah ê sian-ti, Góa bô chhe in, in ka-kī cháu; Góa bô tùi in kóng, in ka-kī soan-thoân. 22 In nā kap Góa khè-ha̍p, chiū tek-khak hō͘ Góa ê peh-sìⁿ thiaⁿ Góa ê ōe; hō͘ in hôe-thâu lī-khui in ê pháiⁿ-lō͘, kap in só͘ kiâⁿ ê pháiⁿ. 23 Iâ-hô-hoa kóng, Góa kiám chòe kūn ê Siōng-tè, bô chòe hn̄g ê Siōng-tè mah? 24 Iâ-hô-hoa kóng, Lâng kiám ōe bih tī ún-ba̍t ê só͘-chāi, hō͘ Góa khòaⁿ i bōe tio̍h mah? Iâ-hô-hoa kóng, Góa kiám bô chhiong-móa tī thiⁿ-tōe mah? 25 Góa í-keng thiaⁿ-kìⁿ hiah ê sian-ti só͘ kóng-ê, chiū-sī thok Góa ê miâ soan-thoân pe̍h-chha̍t; in kóng, Góa ū bāng-kìⁿ, góa ū bāng-kìⁿ. 26 Soan-thoân pe̍h-chha̍t ê sian-ti, chiū-sī soan-thoân in ê sim ê khúi-chà; in chûn chit-hō ê sim, beh kàu tī-sî ah? 27 In ta̍k-lâng chiong só͘ bāng--ê saⁿ-kap kóng-khí; siūⁿ beh hō͘ Góa ê peh-sìⁿ bōe-kì-tit Góa ê miâ; chhin-chhiūⁿ in ê lia̍t-chó͘ in-ūi Pa-le̍k, lâi bōe-kì-tit Góa ê miâ chi̍t-iūⁿ. 28 Sian-ti nā ū bāng-kìⁿ thang kóng-khí i ê bāng; tit-tio̍h Góa ê ōe--ê, tio̍h ēng sêng-si̍t thoân Góa ê ōe; chho͘-khng kap be̍h thái ōe pí-tit? Che sī Iâ-hô-hoa kóng--ê. 29 Iâ-hô-hoa kóng, Góa ê ōe kiám m̄-sī chhin-chhiūⁿ hé, koh chhin-chhiūⁿ ōe phah-phòa chio̍h-pôaⁿ ê tōa-thûi mah? 30 Iâ-hô-hoa kóng, Khòaⁿ ah, hiah ê sian-ti tùi i ê tâng-phōaⁿ thau-the̍h Góa ê ōe--ê, Góa kong-kek--in. 31 Iâ-hô-hoa kóng, Hiah ê sian-ti ēng chhùi-chi̍h kóng, Che sī Iâ-hô-hoa kóng--ê; Góa kong-kek in. 32 Iâ-hô-hoa kóng, Khòaⁿ ah, hiah-ê ēng ké ê bāng lâi chòe sian-ti--ê; in kóng-khí in ê bāng; ia̍h ēng in ê pe̍h-chha̍t, kap in ê hong-hàm, hō͘ Góa ê peh-sìⁿ kiâⁿ chha-lō͘; Góa kong-kek in; in-ūi Góa bô chhe in, ia̍h bô bēng-lēng in, in lóng bô lī-ek chit ê peh-sìⁿ; che sī Iâ-hô-hoa kóng--ê. 33 Nā chit ê peh-sìⁿ, á-sī sian-ti, á-sī chè-si, mn̄g lí kóng, Iâ-hô-hoa ū sím-mi̍h tāng-tàⁿ ê be̍k-sī? lí chiū tio̍h kā in kóng, Sím-mi̍h tāng-tàⁿ ê be̍k-sī ah! Iâ-hô-hoa kóng, Góa beh khì-sak lín, chiū-sī. 34 Kìⁿ-nā sian-ti, á-sī chè-si, á-sī peh-sìⁿ, kóng, Iâ-hô-hoa tāng-tàⁿ ê be̍k-sī--ê; hit-hō lâng, Góa beh hêng-hoa̍t i kap i ê ke. 35 Lín ta̍k-lâng tùi i ê chhù-piⁿ, ta̍k-lâng tùi i ê hiaⁿ-tī, tio̍h án-ni kóng, Iâ-hô-hoa ū ìn sím-mi̍h? Iâ-hô-hoa ū kóng sím-mi̍h? 36 Iâ-hô-hoa tāng-tàⁿ ê be̍k-sī, chit-kù lín m̄-thang koh kóng; in-ūi ta̍k-lâng só͘ kóng ê ōe, beh chòe in pún-sin ê tāng-tàⁿ; in-ūi lín chiong éng-oa̍h ê Siōng-tè, bān-kun ê Iâ-hô-hoa, lán ê Siōng-tè ê ōe kóe hō͘ i chhoa̍h--khì. 37 Lí tio̍h tùi sian-ti án-ni kóng, Iâ-hô-hoa ìn lí sím-mi̍h? Iâ-hô-hoa kóng sím-mi̍h? 38 Lín nā kóng, Iâ-hô-hoa tāng-tàⁿ ê be̍k-sī, Iâ-hô-hoa chiū án-ni kóng, Góa chhe lâng kàu lín hia, kā lín kóng, M̄-thang kóng Iâ-hô-hoa tāng-tàⁿ ê be̍k-sī; lín iáu teh kóng chit-kù Iâ-hô-hoa tāng-tàⁿ ê be̍k-sī; 39 só͘-í Góa beh choân-jiân bōe-kì-tit lín, chiong lín kap Góa só͘ siúⁿ-sù lín, í-ki̍p lín ê lia̍t-chó͘ ê siâⁿ, tùi Góa ê bīn-chêng khì-sak. 40 Koh beh hō͘ éng-oán ê lêng-jio̍k, kap kú-tn̂g ê kiàn-siàu, lîm-kàu lín; kú-tn̂g bô bōe-kì--tit.
1 巴比倫王Nî-pò͘-kah-nî-sat將偤大王Iok-ngá-kèng ê kiáⁿ Iâ-Ko-nî-ngá，kap偤大ê貴族，以及工匠、鐵匠，tùi耶路撒冷掠去帶到巴比倫。Chitê事了後，耶和華kí hō͘我看；有兩筐ê無花果，hē tī耶和華ê殿前。 2 一khia筐貯siōng好ê無花果，親像起頭熟ê無花果；一khia筐貯真pháiⁿ ê無花果，bōe食得，因為真pháiⁿ。 3 耶和華就kā我講，耶利米ah，你看見甚麼？我應講，無花果；好ê真好，pháiⁿ-ê真pháiⁿ，bōe食得，因為真pháiⁿ。 4 耶和華ê話koh臨到我講， 5 耶和華以色列ê上帝án-ni講，受掠去ê偤大人，就是我差in離開chit所在到Ka-le̍k-tí人ê地ê；我beh看in親像chiahê好ê無花果；hō͘ in得tio̍h福氣。 6 我beh眷顧in，hō͘ in得tio̍h福氣；chhōa in tò來chit所在；我亦beh建立in，無koh毀壞in；栽培in，無kā伊拔起來。 7 我beh hō͘ in有hit號心，能bat我；知我是耶和華；in beh做我ê百姓，我beh做in ê上帝；因為in beh一心歸向我。 8 耶和華án-ni講，偤大王Se-tí-ka，kap伊chiahê貴族，kap耶路撒冷所chhun，iáu留tī chit所在ê百姓，以及khiā起tī埃及地ê；我看in親像chiahê pháiⁿ ê無花果，bōe食得，因為真pháiⁿ。 9 我beh將in交出，hō͘ in 流落tī天下萬國，tú-tio̍h艱苦；亦tī我趕in到ê ta̍k所在，成做凌辱，做話柄，做譏刺，做咒詛。 10 我beh用刀劍，用飢荒，用瘟疫，到in中間；直到in受滅tī我所賞賜in kap in列祖ê地。
1 Pa-pí-lûn ông Nî-pò͘-kah-nî-sat chiong Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi ê kùi-cho̍k, í-ki̍p kang-chhiūⁿ, thih-chhiūⁿ, tùi Iâ-lō͘-sat-léng lia̍h--khì tòa kàu Pa-pí-lûn. Chit ê sū liáu-āu, Iâ-hô-hoa kí hō͘ góa khòaⁿ; ū nn̄g kheng ê bû-hoa-kó, hē tī Iâ-hô-hoa ê tiān-chêng. 2 Chi̍t khia kheng tóe siōng-hó ê bû-hoa-kó, chhin-chhiūⁿ khí-thâu se̍k ê bû-hoa-kó; chi̍t khia kheng tóe chin-pháiⁿ ê bû-hoa-kó, bōe-chia̍h--tit, in-ūi chin-pháiⁿ. 3 Iâ-hô-hoa chiū kā góa kóng, Iâ-lī-bí ah, lí khòaⁿ-kìⁿ sím-mi̍h? Góa ìn kóng, Bû-hoa-kó; hó--ê chin-hó, pháiⁿ--ê chin-pháiⁿ, bōe-chia̍h--tit, in-ūi chin-pháiⁿ. 4 Iâ-hô-hoa ê ōe koh lîm-kàu góa kóng, 5 Iâ-hô-hoa Í-sek-lia̍t ê Siōng-tè án-ni kóng, Siū lia̍h--khì ê Iû-tāi lâng, chiū-sī Góa chhe in lī-khui chit só͘-chāi kàu Ka-le̍k-tí lâng ê tōe--ê; Góa beh khòaⁿ in chhin-chhiūⁿ chiah ê hó ê bû-hoa-kó; hō͘ in tit-tio̍h hok-khì. 6 Góa beh koàn-kò͘ in, hō͘ in tit-tio̍h hok-khì; chhōa in tò-lâi chit só͘-chāi; Góa ia̍h beh kiàn-li̍p in, bô koh húi-hoāi in; chai-pôe in, bô kā i pu̍ih--khí-lâi. 7 Góa beh hō͘ in ū hit-hō sim, ōe bat Góa; chai Góa sī Iâ-hô-hoa; in beh chòe Góa ê peh-sìⁿ, Góa beh chòe in ê Siōng-tè; in-ūi in beh chi̍t-sim kui-ǹg Góa. 8 Iâ-hô-hoa án-ni kóng, Iû-tāi ông Se-tí-ka, kap i chiah ê kùi-cho̍k, kap Iâ-lō͘-sat-léng só͘ chhun, iáu lâu tī chit só͘-chāi ê peh-sìⁿ, í-ki̍p khiā-khí tī Ai-ki̍p tōe--ê; Góa khòaⁿ in chhin-chhiūⁿ chiah ê pháiⁿ ê bû-hoa-kó, bōe-chia̍h--tit, in-ūi chin pháiⁿ. 9 Góa beh chiong in kau-chhut, hō͘ in liû-lo̍h tī thiⁿ-ē bān-kok, tú-tio̍h kan-khó͘; ia̍h tī Góa kóaⁿ in kàu ê ta̍k só͘-chāi, chiâⁿ-chòe lêng-jio̍k, chòe ōe-pìⁿ, chòe ki-chhì, chòe chiù-chó͘. 10 Góa beh ēng to-kiàm, ēng ki-hng, ēng un-e̍k, kàu in tiong-kan; ti̍t-kàu in siū bia̍t tī Góa só͘ siúⁿ-sù in kap in lia̍t-chó͘ ê tōe.
1 當偤大王約西亞ê kiáⁿ Iok-ngá-kèng ê四年，就是巴比倫王Nî-pò͘-kah-nî-sat元年，有論起偤大百姓ê話臨到耶利米。 2 先知耶利米就將chitê話對偤大眾百姓，以及一切khiā起耶路撒冷ê人講： 3 Tùi偤大王A-bûn ê kiáⁿ約西亞十三年，到taⁿ，二十三年久，有耶和華ê話臨到我；我已經對lín講；koh早早起來講；獨獨lín m̄聽。 4 耶和華也早早起來，差祂ê奴僕眾先知到lín chia；但是lín無聽thàn，亦無俯耳孔來聽。 5 伊講，Lín ta̍k人tio̍h oa̍t頭離開伊ê pháiⁿ路，kap lín所做ê pháiⁿ；就thang khiā起耶和華所賞賜lín，kap lín ê列祖ê地，tùi古早到永遠。 6 M̄-thang thàn別號ê上帝，服事跪拜in；m̄-thang用lín ê手所做ê，來惹我ê受氣；án-ni我就無降災厄hō͘ lín。 7 總是lín無聽thàn我，竟然用手所做ê，惹我ê受氣，陷害家己；這是耶和華講ê。 8 所以萬軍ê耶和華án-ni講，因為lín無聽thàn我ê話， 9 看ah，我beh召北方chiahê族，kap我ê奴僕巴比倫王Nî-pò͘-kah-nî-sat，來攻擊chit所在，kap chit所在khiā起ê百姓，以及四圍ê列邦，我beh一盡剿滅in，hō͘ in做thang gông-ngia̍h，thang譏刺，永遠拋荒ê所在；這是耶和華講ê。 10 Koh in中間歡喜ê聲，快樂ê聲，新kiáⁿ婿ê聲，新娘ê聲，挨磨ê聲，kap燈ê光，我beh hō͘ in lóng soah。 11 全地的確拋荒，hō͘人gông-ngia̍h；chiahê列邦beh服事巴比倫王七十年。 12 七十年已經滿，我beh刑罰巴比倫王，kap伊ê國ê罪，koh hō͘ Ka-le̍k-tí人ê地永遠拋荒；這是耶和華講ê。 13 我beh用我所講攻擊hitê地ê事，lóng到tī in；就是見若記tī chit本冊，耶利米所論起chiahê國所讖語ê。 14 因為有chōe-chōe國，kap大ê君王，beh用in Ka-le̍k-tí人做奴僕；我亦beh照in ê所行，kap in ê手所做ê，報應in。 15 耶和華，以色列ê上帝，對我án-ni講，你tùi我ê手接chit杯受氣ê酒，hō͘我所差你去ê列國lim。 16 In lim了就顛顛倒倒，亦beh發狂；因為我hō͘刀劍到in中間。 17 我就tùi耶和華ê手接chitê杯；hō͘耶和華所差我去ê列國lim伊。 18 就是耶路撒冷kap偤大chiahê城，以及in ê列王貴族；hō͘ in拋荒；做thang gông-ngia̍h，thang譏刺，thang咒詛ê，親像今á日一樣。 19 Koh埃及王法老，kap伊ê人臣、貴族、眾百姓； 20 kap相chham-chhap ê百姓，O͘-su地chiahê王，腓利士地chiahê王，A-si̍t-ki-lûn、Ka-sat、Í-kek-lûn，以及A-si̍t-tu̍t所chhun ê人； 21 koh Í-tong、Mô͘-ap、kap A-bûn ê後裔； 22 Chhui-lô列王、Se-tùn列王、海外ê海嶼ê列王； 23 Tí-tàn、Thê-má、Pò͘-su，kap一切剃鬢邊ê； 24 A-lat-pek ê列王，tiàm tī曠野相chham-chhap ê百姓ê列王； 25 Sim-lī ê列王、Í-lân ê列王、Bí-thài ê列王； 26 北方遠近ê列王，chitê hitê，以及天下萬國lim伊；以後Si-sa-khek王亦beh lim伊。 27 你tio̍h kā in講，萬軍ê耶和華，以色列ê上帝，án-ni講，Lín tio̍h lim，來醉，來吐，來跋倒；無koh起來；因為我hō͘刀劍到lín中間。 28 In若m̄肯對你ê手接chitê杯去lim，你就tio̍h kā in講，萬軍ê耶和華án-ni講，Lín決斷tio̍h lim。 29 因為我降災厄tùi hitê用我ê名來稱ê城起手，lín能一盡免刑罰mah？的確bōe免得；因為我beh命令刀劍臨到地上lóng總ê百姓；這是萬軍ê耶和華講ê。 30 所以你tio̍h對in宣傳這一切ê話，來攻擊in，講，耶和華beh對頂面喉叫，對伊khiā起ê聖所出聲，對伊ê羊群大聲喉叫；伊beh對地上lóng總ê百姓hoah-hiàm，親像踏葡萄ê一樣。 31 Beh有hoah ê聲聽到地極；因為耶和華beh kap列國計較；見有血氣ê，祂beh kap in爭辯；論到pháiⁿ人，祂beh將in交hō͘刀劍；這是耶和華講ê。 32 萬軍ê耶和華án-ni講，看ah，beh有災厄tùi chit國發到hit國；koh有大報頭風tùi地極起。 33 當hit日，耶和華所刣-ê，tùi地ê chit-pêng到地ê hit-pêng lóng有；無人啼哭，無人kā伊收拾，無人kā伊埋葬；beh成做地上ê糞埽。 34 牧者ah，lín tio̍h哀哭喉叫；羊群ê頭目ah，lín tio̍h kō tī火灰中；因為lín受刣 kap分散ê日期已經到；lín beh倒落去親像人所歡喜ê器具ka-la̍uh。 35 牧者無路thang逃走，羊群ê頭目亦無路thang脫離。 36 有牧者喉叫ê聲，有羊群ê頭目teh哀哭；因為耶和華hō͘ in ê草場拋荒。 37 耶和華發出猛烈ê受氣；平安ê羊椆成做冷靜。 38 祂親像獅離開伊ê穴；因為欺壓ê猛烈koh因為祂受氣ê猛烈；in ê地lóng成做thang gông-ngia̍h-ê。
1 Tng Iû-tāi ông Iok-se-a ê kiáⁿ Iok-ngá-kèng ê sì--nî, chiū-sī Pa-pí-lûn ông Nî-pò͘-kah-nî-sat goân--nî, ū lūn-khí Iû-tāi peh-sìⁿ ê ōe lîm-kàu Iâ-lī-bí. 2 Sian-ti Iâ-lī-bí chiū chiong chit ê ōe tùi Iû-tāi chèng peh-sìⁿ, í-ki̍p it-chhè khiā-khí Iâ-lō͘-sat-léng ê lâng kóng: 3 Tùi Iû-tāi ông A-bûn ê kiáⁿ Iok-se-a cha̍p-saⁿ--nî, kàu taⁿ, jī-cha̍p-saⁿ nî kú, ū Iâ-hô-hoa ê ōe lîm-kàu góa; góa í-keng tùi lín kóng; koh chá-chá khí-lâi kóng; to̍k-to̍k lín m̄-thiaⁿ. 4 Iâ-hô-hoa iā chá-chá khí--lâi, chhe I ê lô͘-po̍k chèng sian-ti kàu lín chia; nā-sī lín bô thiaⁿ-thàn, ia̍h bô àⁿ hī-khang lâi thiaⁿ. 5 I kóng, Lín ta̍k-lâng tio̍h oa̍t-thâu lī-khui i ê pháiⁿ-lō͘, kap lín só͘ chòe ê pháiⁿ; chiū thang khiā-khí Iâ-hô-hoa só͘ siúⁿ-sù lín, kap lín ê lia̍t-chó͘ ê tōe, tùi kó͘-chá kàu éng-oán. 6 M̄-thang thàn pa̍t-hō ê siōng-tè, ho̍k-sāi kūi-pài in; m̄-thang ēng lín ê chhiú só͘ chòe--ê, lâi jiá Góa ê siū-khì; án-ni Góa chiū bô kàng chai-ē hō͘ lín. 7 Chóng-sī lín bô thiaⁿ-thàn Góa, kèng-jiân ēng chhiú só͘ chòe--ê, jiá Góa ê siū-khì, hām-hāi ka-kī; che sī Iâ-hô-hoa kóng--ê. 8 Só͘-í bān-kun ê Iâ-hô-hoa án-ni kóng, In-ūi lín bô thiaⁿ-thàn Góa ê ōe, 9 khòaⁿ ah, Góa beh tiàu pak-hng chiah ê cho̍k, kap Góa ê lô͘-po̍k Pa-pí-lûn ông Nî-pò͘-kah-nî-sat, lâi kong-kek chit só͘-chāi, kap chit só͘-chāi khiā-khí ê peh-sìⁿ, í-ki̍p sì-ûi ê lia̍t-pang, Góa beh it-chīn châu-bia̍t in, hō͘ in chòe thang gông-ngia̍h, thang ki-chhì, éng-oán pha-hng ê só͘-chāi; che sī Iâ-hô-hoa kóng--ê. 10 Koh in tiong-kan hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ, oe-bō ê siaⁿ, kap teng ê kng, Góa beh hō͘ in lóng soah. 11 Choân-tōe tek-khak pha-hng, hō͘ lâng gông-ngia̍h; chiah ê lia̍t-pang beh ho̍k-sāi Pa-pí-lûn ông chhit-cha̍p-nî. 12 Chhit-cha̍p-nî í-keng móa, Góa beh hêng-hoa̍t Pa-pí-lûn ông, kap i ê kok ê chōe, koh hō͘ Ka-le̍k-tí lâng ê tōe éng-oán pha-hng; che sī Iâ-hô-hoa kóng--ê. 13 Góa beh ēng Góa só͘ kóng kong-kek hit-ê tōe ê sū, lóng kàu tī in; chiū-sī kìⁿ-nā kì tī chit pún chheh, Iâ-lī-bí só͘ lūn-khí chiah ê kok só͘ chhàm-gú--ê. 14 In-ūi ū chōe-chōe kok, kap tōa ê kun-ông, beh ēng in Ka-le̍k-tí lâng chòe lô͘-po̍k; Góa ia̍h beh chiàu in ê só͘ kiâⁿ, kap in ê chhiú só͘ chòe--ê, pò-èng in. 15 Iâ-hô-hoa, Í-sek-lia̍t ê Siōng-tè, tùi góa án-ni kóng, Lí tùi Góa ê chhiú chih chit poe siū-khì ê chiú, hō͘ Góa só͘ chhe lí khì ê lia̍t-kok lim. 16 In lim-liáu chiū tian-tian tó-tó, ia̍h beh hoat-kông; in-ūi Góa hō͘ to-kiàm kàu in tiong-kan. 17 Góa chiū tùi Iâ-hô-hoa ê chhiú chih chit ê poe; hō͘ Iâ-hô-hoa só͘ chhe góa khì ê lia̍t-kok lim--i. 18 Chiū-sī Iâ-lō͘-sat-léng kap Iû-tāi chiah ê siâⁿ, í-ki̍p in ê lia̍t-ông kùi-cho̍k; hō͘ in pha-hng; chòe thang gông-ngia̍h, thang ki-chhì, thang chiù-chó͘--ê, chhin-chhiūⁿ kin-á-ji̍t chi̍t-iūⁿ. 19 Koh Ai-ki̍p ông Hoat-ló, kap i ê jîn-sîn, kùi-cho̍k, chèng peh-sìⁿ; 20 kap saⁿ-chham-chhap ê peh-sìⁿ, O͘-su tōe chiah ê ông, Hui-lī-sū tōe chiah ê ông, A-si̍t-ki-lûn, Ka-sat, Í-kek-lûn, í-ki̍p A-si̍t-tu̍t só͘ chhun ê lâng; 21 koh Í-tong, Mô͘-ap, kap A-bûn ê hō͘-è; 22 Chhui-lô lia̍t-ông, Se-tùn lia̍t-ông, hái-gōa ê hái-sū ê lia̍t-ông; 23 Tí-tàn, Thê-má, Pò͘-su, kap it-chhè thì pìn-piⁿ--ê; 24 A-lat-pek ê lia̍t-ông, tiàm tī khòng-iá saⁿ-chham-chhap ê peh-sìⁿ ê lia̍t-ông; 25 Sim-lī ê lia̍t-ông, Í-lân ê lia̍t-ông, Bí-thài ê lia̍t-ông; 26 pak-hng hn̄g-kūn ê lia̍t-ông, chit-ê hit-ê, í-ki̍p thiⁿ-ē bān-kok lim--i; í-āu Si-sa-khek ông ia̍h beh lim--i. 27 Lí tio̍h kā in kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lín tio̍h lim, lâi chùi, lâi thò͘, lâi poa̍h-tó; bô koh khí--lâi; in-ūi Góa hō͘ to-kiàm kàu lín tiong-kan. 28 In nā m̄-khéng tùi lí ê chhiú chih chit ê poe khì lim, lí chiū tio̍h kā in kóng, Bān-kun ê Iâ-hô-hoa án-ni kóng, Lín koat-toàn tio̍h lim. 29 In-ūi Góa kàng chai-ē tùi hit ê ēng Góa ê miâ lâi chheng ê siâⁿ khí-chhiú, lín ōe it-chīn bián hêng-hoa̍t mah? tek-khak bōe bián-tit; in-ūi Góa beh bēng-lēng to-kiàm lîm-kàu tōe-chiūⁿ lóng-chóng ê peh-sìⁿ; che sī bān-kun ê Iâ-hô-hoa kóng--ê. 30 Só͘-í lí tio̍h tùi in soan-thoân che it-chhè ê ōe, lâi kong-kek in, kóng, Iâ-hô-hoa beh tùi téng-bīn âu-kiò, tùi I khiā-khí ê sèng-só͘ chhut-siaⁿ, tùi I ê iûⁿ-kûn tōa-siaⁿ âu-kiò; I beh tùi tōe-chiūⁿ lóng-chóng ê peh-sìⁿ hoah-hiàm, chhin-chhiūⁿ ta̍h phû-tô--ê chi̍t-iūⁿ. 31 Beh ū hoah ê siaⁿ thiaⁿ kàu tōe-ke̍k; in-ūi Iâ-hô-hoa beh kap lia̍t-kok kè-kàu; kìⁿ ū hiat-khì--ê, I beh kap in cheng-piān; lūn-kàu pháiⁿ-lâng, I beh chiong in kau hō͘ to-kiàm; che sī Iâ-hô-hoa kóng--ê. 32 Bān-kun ê Iâ-hô-hoa án-ni kóng, Khòaⁿ ah, beh ū chai-ē tùi chit-kok hoat kàu hit-kok; koh ū tōa pò-thâu-hong tùi tōe-ke̍k khí. 33 Tng hit-ji̍t, Iâ-hô-hoa só͘ thâi--ê, tùi tōe ê chit-pêng kàu tōe ê hit-pêng lóng ū; bô lâng thî-khàu, bô lâng kā i siu-si̍p, bô lâng kā i bâi-chòng; beh chiâⁿ-chòe tōe-chiūⁿ ê pùn-sò. 34 Bo̍k-chiá ah, lín tio̍h ai-khàu âu-kiò; iûⁿ-kûn ê thâu-ba̍k ah, lín tio̍h kō tī hé-hu-tiong; in-ūi lín siū-thâi kap hun-sòaⁿ ê ji̍t-kî í-keng kàu; lín beh tó--lo̍h-khì chhin-chhiūⁿ lâng só͘ hoaⁿ-hí ê khì-kū ka-la̍uh. 35 Bo̍k-chiá bô lō͘ thang tô-cháu, iûⁿ-kûn ê thâu-ba̍k ia̍h bô lō͘ thang thoat-lī. 36 Ū bo̍k-chiá âu-kiò ê siaⁿ, ū iûⁿ-kûn ê thâu-ba̍k teh ai-khàu; in-ūi Iâ-hô-hoa hō͘ in ê chháu-tiûⁿ pha-hng. 37 Iâ-hô-hoa hoat-chhut béng-lia̍t ê siū-khì; pêng-an ê iûⁿ-tiâu chiâⁿ-chòe léng-chēng. 38 I chhin-chhiūⁿ sai lī-khui i ê hia̍t; in-ūi khi-ap ê béng-lia̍t koh in-ūi I siū-khì ê béng-lia̍t; in ê tōe lóng chiâⁿ-chòe thang gông-ngia̍h--ê.
1 偤大王約西亞ê kiáⁿ Iok-ngá-kèng起頭坐位ê時，有chitê話tùi耶和華來，講，耶和華án-ni講， 2 你tio̍h khiā tī耶和華ê厝ê院內；有偤大chiahê城來耶和華ê厝敬拜ê；你tio̍h用我lóng總命令你對in講ê話，kā in講；m̄-thang少一句。 3 Kiám-chhái in肯聽thàn，ta̍k人回頭離開in ê pháiⁿ路；就我為tio̍h in所行ê pháiⁿ，想beh降hō͘ in ê災厄，thang退悔。 4 你tio̍h kā in講，耶和華án-ni講，Lín若m̄肯聽我，來行我所設tī lín面前ê律法； 5 來聽thàn我所差到lín hia我chiahê奴僕，眾先知ê話；就是我早早起來所差ê，(總是lín無聽) ； 6 就我beh hō͘ chit間厝親像Sī-lô；hō͘ chitê城做地上萬國咒詛ê話柄。 7 耶利米tī耶和華ê厝內講chiahê話；祭司、先知，kap眾百姓lóng有聽見。 8 耶利米將耶和華吩咐伊對眾百姓講ê話，一盡講了；祭司，先知，kap眾百姓lóng來掠伊，講，你的確tio̍h死。 9 你啥事託耶和華ê名來讖語，講，chit間厝beh親像Sī-lô，chitê城beh拋荒，無人khiā起ah？Tùi án-ni，眾百姓lóng tī耶和華ê厝聚集到耶利米hia。 10 偤大ê貴族聽見chiahê tāi-chì，就tùi王宮上到耶和華ê厝；坐tī耶和華ê厝新門ê門口。 11 祭司、先知，對貴族kap眾百姓講，Chit人tio̍h擬伊死罪；因為伊有讖語攻擊chitê城；tú-tú親像lín親耳所聽ê。 12 耶利米就對chiahê貴族kap眾百姓講，耶和華差我讖語，攻擊chit間厝，kap chitê城；講起lín所有聽見chiahê一切ê話。 13 所以lín taⁿ tio̍h改lín ê路，kap lín ê所做；聽thàn lín ê上帝耶和華ê聲；耶和華就beh退悔祂所beh降hō͘ lín ê災厄。 14 論到我，看ah，我tī lín ê手頭；lín看做好，看做應該ê，就照án-ni款待我。 15 總是lín tio̍h確實知；若害死我，就beh hō͘無罪ê血歸tī lín，kap chitê城，kap其中khiā起ê百姓；因為耶和華實在有差我到lín chia，將chiahê一切ê話，傳到lín ê耳孔。 16 貴族kap眾百姓就kā祭司先知講，Chit人m̄應該gí伊死罪；因為伊是託耶和華，咱ê上帝ê名，來對咱講。 17 國內ê老大就有kúi-nā人起來，對聚會ê眾百姓講， 18 當偤大王Hi-se-ka ê日，有Mô͘-lī-sa人，Bí-ka，對偤大ê眾人讖語，講，萬軍ê耶和華án-ni講，錫安beh hō͘人lôe親像田園；耶路撒冷beh變做土堆；chit間殿ê山beh親像樹林高ê所在。 19 偤大王Hi-se-ka kap眾偤大人，kiám有hō͘伊死mah？Hi-se-ka kiám m̄是敬畏耶和華，懇求耶和華ê恩；耶和華就退悔伊所講beh降hō͘ in ê災厄mah？Taⁿ若害死chit人，咱就是做大pháiⁿ，害家己ê性命。 20 Koh有一人託耶和華ê名來宣傳；是Ki-lia̍t-iâ-lîm人Sī-má-ngá ê kiáⁿ O͘-lī-a；伊照耶利米一切ê話來宣傳，攻擊chitê城kap chitê地。 21 Iok-ngá-kèng王kap伊ê眾勇士貴族聽見伊ê話，王就想beh hō͘伊死；O͘-lī-a聽見就驚，走去埃及。 22 Iok-ngá-kèng王差人去埃及，就是A-kek-pho ê kiáⁿ Í-lī-ná-tan kap kúi-nā人到埃及。 23 In就tùi埃及掠O͘-lī-a出來，送到Iok-ngá-kèng王hia；王用刀刣伊，hiat伊ê身屍tī平常人ê墓。 24 總是Sa-hoan ê kiáⁿ A-hi-kam保護耶利米，chiah無交tī百姓ê手，hō͘伊死。
1 Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chit ê ōe tùi Iâ-hô-hoa lâi, kóng, Iâ-hô-hoa án-ni kóng, 2 Lí tio̍h khiā tī Iâ-hô-hoa ê chhù ê īⁿ-lāi; ū Iû-tāi chiah ê siâⁿ lâi Iâ-hô-hoa ê chhù kèng-pài--ê; lí tio̍h ēng Góa lóng-chóng bēng-lēng lí tùi in kóng ê ōe, kā in kóng; m̄-thang chió chi̍t-kù. 3 Kiám-chhái in khéng thiaⁿ-thàn, ta̍k-lâng hôe-thâu lī-khui in ê pháiⁿ-lō͘; chiū Góa ūi-tio̍h in só͘ kiâⁿ ê pháiⁿ, siūⁿ beh kàng hō͘ in ê chai-ē, thang thè-hóe. 4 Lí tio̍h kā in kóng, Iâ-hô-hoa án-ni kóng, Lín nā m̄-khéng thiaⁿ Góa, lâi kiâⁿ Góa só͘ siat tī lín bīn-chêng ê lu̍t-hoat; 5 lâi thiaⁿ-thàn Góa só͘ chhe kàu lín hia Góa chiah ê lô͘-po̍k, chèng sian-ti ê ōe; chiū-sī Góa chá-chá khí--lâi só͘ chhe--ê, (chóng-sī lín bô thiaⁿ); 6 chiū Góa beh hō͘ chit keng chhù chhin-chhiūⁿ Sī-lô; hō͘ chit ê siâⁿ chòe tōe-chiūⁿ bān-kok chiù-chó͘ ê ōe-pìⁿ. 7 Iâ-lī-bí tī Iâ-hô-hoa ê chhù-lāi kóng chiah-ê ōe; chè-si, sian-ti, kap chèng peh-sìⁿ lóng ū thiaⁿ-kìⁿ. 8 Iâ-lī-bí chiong Iâ-hô-hoa hoan-hù i tùi chèng peh-sìⁿ kóng ê ōe, it-chīn kóng-liáu; chè-si, sian-ti, kap chèng peh-sìⁿ lóng lâi lia̍h--i, kóng, Lí tek-khak tio̍h sí. 9 Lí siáⁿ-sū thok Iâ-hô-hoa ê miâ lâi chhàm-gú, kóng, Chit keng chhù beh chhin-chhiūⁿ Sī-lô, chit ê siâⁿ beh pha-hng, bô lâng khiā-khí ah? Tùi án-ni chèng peh-sìⁿ lóng tī Iâ-hô-hoa ê chhù chū-chi̍p kàu Iâ-lī-bí hia. 10 Iû-tāi ê kùi-cho̍k thiaⁿ-kìⁿ chiah ê tāi-chì, chiū tùi ông-kiong chiūⁿ-kàu Iâ-hô-hoa ê chhù; chē tī Iâ-hô-hoa ê chhù sin-mn̂g ê mn̂g-kháu. 11 Chè-si, sian-ti, tùi kùi-cho̍k kap chèng peh-sìⁿ kóng, Chit lâng tio̍h gí i sí-chōe; in-ūi i ū chhàm-gú kong-kek chit ê siâⁿ; tú-tú chhin-chhiūⁿ lín chhin-hī só͘ thiaⁿ--ê. 12 Iâ-lī-bí chiū tùi chiah ê kùi-cho̍k kap chèng peh-sìⁿ kóng, Iâ-hô-hoa chhe góa chhàm-gú, kong-kek chit keng chhù, kap chit ê siâⁿ; kóng-khí lín só͘ ū thiaⁿ-kìⁿ chiah-ê it-chhè ê ōe. 13 Só͘-í lín taⁿ tio̍h kóe lín ê lō͘, kap lín ê só͘ chòe; thiaⁿ-thàn lín ê Siōng-tè Iâ-hô-hoa ê siaⁿ; Iâ-hô-hoa chiū beh thè-hóe I só͘ beh kàng hō͘ lín ê chai-ē. 14 Lūn-kàu góa, khòaⁿ ah, góa tī lín ê chhiú-thâu; lín khòaⁿ chòe hó, khòaⁿ chòe eng-kai--ê, chiū chiàu án-ni khoán-thāi góa. 15 Chóng-sī lín tio̍h khak-si̍t chai; nā hāi-sí góa, chiū beh hō͘ bô-chōe ê huih kui tī lín, kap chit ê siâⁿ, kap kî-tiong khiā-khí ê peh-sìⁿ; in-ūi Iâ-hô-hoa si̍t-chāi ū chhe góa kàu lín chia, chiong chiah-ê it-chhè ê ōe, thoân kàu lín ê hī-khang. 16 Kùi-cho̍k kap chèng peh-sìⁿ chiū kā chè-si sian-ti kóng, Chit-lâng m̄ eng-kai gí i sí-chōe; in-ūi i sī thok Iâ-hô-hoa, lán ê Siōng-tè ê miâ, lâi tùi lán kóng. 17 Kok-lāi ê lāu-tōa chiū ū kúi-nā lâng khí--lâi, tùi chū-hōe ê chèng peh-sìⁿ kóng, 18 Tng Iû-tāi ông Hi-se-ka ê ji̍t, ū Mô͘-lī-sa lâng, Bí-ka, tùi Iû-tāi ê chèng-lâng chhàm-gú, kóng, Bān-kun ê Iâ-hô-hoa án-ni kóng, Sek-an beh hō͘ lâng lôe chhin-chhiūⁿ chhân-hn̂g; Iâ-lō͘-sat-léng beh pìⁿ-chòe thô͘-tui; chit keng tiān ê soaⁿ beh chhin-chhiūⁿ chhiū-nâ koâiⁿ ê só͘-chāi. 19 Iû-tāi ông Hi-se-ka kap chèng Iû-tāi lâng, kiám ū hō͘ i sí mah? Hi-se-ka kiám m̄-sī kèng-ùi Iâ-hô-hoa, khún-kiû Iâ-hô-hoa ê un; Iâ-hô-hoa chiū thè-hóe I só͘ kóng beh kàng hō͘ in ê chai-ē mah? Taⁿ nā hāi-sí chit-lâng, lán chiū-sī chòe tōa pháiⁿ, hāi ka-kī ê sìⁿ-miā. 20 Koh ū chi̍t-lâng thok Iâ-hô-hoa ê miâ lâi soan-thoân; sī Ki-lia̍t-iâ-lîm lâng Sī-má-ngá ê kiáⁿ O͘-lī-a; i chiàu Iâ-lī-bí it-chhè ê ōe lâi soan-thoân, kong-kek chit ê siâⁿ kap chit ê tōe. 21 Iok-ngá-kèng ông kap i ê chèng ióng-sū kùi-cho̍k thiaⁿ-kìⁿ i ê ōe, ông chiū siūⁿ beh hō͘ i sí; O͘-lī-a thiaⁿ-kìⁿ chiū kiaⁿ, cháu-khì Ai-ki̍p. 22 Iok-ngá-kèng ông chhe lâng khì Ai-ki̍p, chiū-sī A-kek-pho ê kiáⁿ Í-lī-ná-tan kap kúi-nā lâng kàu Ai-ki̍p. 23 In chiū tùi Ai-ki̍p lia̍h O͘-lī-a chhut--lâi, sàng kàu Iok-ngá-kèng ông hia; ông ēng to thâi i, hiat i ê sin-si tī pêng-siông lâng ê bōng. 24 Chóng-sī Sa-hoan ê kiáⁿ A-hi-kam pó-hō͘ Iâ-lī-bí, chiah bô kau tī peh-sìⁿ ê chhiú, hō͘ i sí.
1 偤大王約西亞ê kiáⁿ Iok-ngá-kèng起頭坐位ê時，有一个話對耶和華臨到耶利米講， 2 耶和華對我án-ni講，你為家己做索kap擔，hē tī你ê頷頸； 3 託重來耶路撒冷見偤大王Se-tí-ka hiahê使者ê手；hō͘ in帶hiahê物到Í-tong王、Mô͘-ap王、A-bûn族ê王、Chhui-lô王、Se-tùn王hia。 4 Koh命令使者對in ê主講，萬軍ê耶和華，以色列ê上帝án-ni講，Lín tio̍h對lín ê主án-ni講， 5 我用我ê大權能，kap我伸出ê手，創造地kap地上ê人，以及cheng-siⁿ；將伊賞賜我所看做合宜ê。 6 Taⁿ我將chiahê地lóng交hō͘我ê奴僕巴比倫王，Nî-pò͘-kah-nî-sat ê手；我亦將田野ê走獸hō͘伊，做伊ê差用。 7 列國lóng beh服事伊，以及伊ê kiáⁿ，伊ê孫；直到伊本國tú-tio̍h報應ê日到；hit時chōe-chōe國kap大君王beh用伊做奴僕。 8 若有甚麼百姓，甚麼國，m̄肯服事chitê巴比倫王Nî-pò͘-kah-nî-sat，亦m̄肯將頷頸掛巴比倫王ê擔ê；我beh用刀劍，用飢荒，用瘟疫刑罰hitê百姓，直到我借伊ê手來一盡滅in；這是耶和華講ê。 9 總是lín，lín m̄-thang聽lín ê先知，lín ê卜卦ê，lín ê圓夢ê，lín ê行邪術ê，lín ê司公；in kā lín講，Lín bōe致到服事巴比倫王。 10 In對lín讖語白賊，beh hō͘ lín遷徙離開本所在遠遠；致到我趕lín出，hō͘ lín滅無。 11 獨獨若有甚麼百姓肯將頷頸掛巴比倫王ê擔，來服事伊ê，我beh hō͘伊猶原tòa tī本所在，thang種作，thang khiā起；這是耶和華講ê。 12 我就照chiahê一切ê話，對偤大王Se-tí-ka講，Tio̍h將lín ê頷頸掛巴比倫王ê擔，來服事伊kap伊ê百姓，chiah會得tio̍h活。 13 你kap你ê百姓啥事beh因為刀劍，因為飢荒，因為瘟疫來死，照耶和華論起m̄肯服事巴比倫王hit號國 ê話ah？ 14 Hiah-ê先知kā lín講，Lín bōe致到服事巴比倫王，莫得聽in；因為in對lín所宣傳ê是白賊。 15 耶和華講，我無差in，總是in託我ê名宣傳白賊；致到我將lín kap hiahê對lín宣傳ê先知，lóng趕出，相kap滅無。 16 我koh對chiahê祭司kap chit 國 ê眾百姓講，耶和華án-ni講，Lín m̄-thang聽hiahê先知對lín所讖語ê；in講，看ah，耶和華ê厝ê器具無jōa久beh tùi巴比倫tòa tò來；其實in對lín所宣傳ê，是白賊。 17 莫得聽in，tio̍h服事巴比倫王，來得tio̍h活；mih-sái hō͘ chitê城變做拋荒？ 18 In若果然是先知，有耶和華ê話到tī in，in就tio̍h求萬軍ê耶和華，hō͘ hiahê tī耶和華ê厝，kap偤大ê王宮，kap耶路撒冷chhun ê器具，無搬去巴比倫。 19 因為萬軍ê耶和華án-ni講，論到chiahê銅柱、銅海、盆座，kap留tī chitê城所chhun ê器具； 20 就是巴比倫王Nî-pò͘-kah-nî-sat掠偤大王Iok-ngá-kèng ê kiáⁿ Iâ-Ko-nî-ngá，kap偤大耶路撒冷chiahê尊貴ê人，tùi耶路撒冷到巴比倫ê時，所無搶去ê； 21 實在萬軍ê耶和華以色列ê上帝án-ni講，論到lâu tī耶和華ê厝，kap偤大王宮，kap耶路撒冷ê器具， 22 Hiah-ê beh搬到巴比倫留tī-hia；到我眷顧in ê日，就我beh帶in上來，koh歸chitê所在；這是耶和華講ê。
1 Iû-tāi ông Iok-se-a ê kiáⁿ Iok-ngá-kèng khí-thâu chē-ūi ê sî, ū chi̍t ê ōe tùi Iâ-hô-hoa lîm-kàu Iâ-lī-bí kóng, 2 Iâ-hô-hoa tùi góa án-ni kóng, Lí ūi ka-kī chòe soh kap taⁿ, hē tī lí ê ām-kún; 3 thok-tiōng lâi Iâ-lō͘-sat-léng kìⁿ Iû-tāi ông Se-tí-ka hiah ê sù-chiá ê chhiú; hō͘ in tòa hiah ê mi̍h kàu Í-tong ông, Mô͘-ap ông, A-bûn cho̍k ê ông, Chhui-lô ông, Se-tùn ông hia. 4 Koh bēng-lēng sù-chiá tùi in ê chú kóng, Bān-kun ê Iâ-hô-hoa, Í-sek-lia̍t ê Siōng-tè án-ni kóng, Lín tio̍h tùi lín ê chú án-ni kóng, 5 Góa ēng Góa ê tōa koân-lêng, kap Góa chhun-chhut ê chhiú, chhòng-chō tōe kap tōe-chiūⁿ ê lâng, í-ki̍p cheng-siⁿ; chiong i siúⁿ-sù Góa só͘ khòaⁿ-chòe ha̍p-gî--ê. 6 Taⁿ Góa chiong chiah ê tōe lóng kau hō͘ Góa ê lô͘-po̍k Pa-pí-lûn ông, Nî-pò͘-kah-nî-sat ê chhiú; Góa ia̍h chiong chhân-iá ê cháu-siù hō͘ i, chòe i ê chhe-ēng. 7 Lia̍t-kok lóng beh ho̍k-sāi i, í-ki̍p i ê kiáⁿ, i ê sun; ti̍t-kàu i pún-kok tú-tio̍h pò-èng ê ji̍t kàu; hit-sî chōe-chōe kok kap tōa kun-ông beh ēng i chòe lô͘-po̍k. 8 Nā ū sím-mi̍h peh-sìⁿ, sím-mi̍h kok, m̄-khéng ho̍k-sāi chit ê Pa-pí-lûn ông Nî-pò͘-kah-nî-sat, ia̍h m̄-khéng chiong ām-kún kòa Pa-pí-lûn ông ê taⁿ--ê; Góa beh ēng to-kiàm, ēng ki-hng, ēng un-e̍k hêng-hoa̍t hit ê peh-sìⁿ, ti̍t-kàu Góa chioh i ê chhiú lâi it-chīn bia̍t in; che sī Iâ-hô-hoa kóng--ê. 9 Chóng-sī lín, lín m̄-thang thiaⁿ lín ê sian-ti, lín ê pok-kòa--ê, lín ê oân-bāng--ê, lín ê kiâⁿ siâ-su̍t ê, lín ê sai-kong; in kā lín kóng, Lín bōe tì-kàu ho̍k-sāi Pa-pí-lûn ông. 10 In tùi lín chhàm-gú pe̍h-chha̍t, beh hō͘ lín chhian-sóa lī-khui pún só͘-chāi hn̄g-hn̄g; tì-kàu Góa kóaⁿ lín chhut, hō͘ lín bia̍t-bô. 11 To̍k-to̍k nā ū sím-mi̍h peh-sìⁿ khéng chiong ām-kún kòa Pa-pí-lûn ông ê taⁿ, lâi ho̍k-sāi i--ê, Góa beh hō͘ i iû-goân tòa tī pún só͘-chāi, thang chèng-choh, thang khiā-khí; che sī Iâ-hô-hoa kóng--ê. 12 Góa chiū chiàu chiah-ê it-chhè ê ōe, tùi Iû-tāi ông Se-tí-ka kóng, Tio̍h chiong lín ê ām-kún kòa Pa-pí-lûn ông ê taⁿ, lâi ho̍k-sāi i kap i ê peh-sìⁿ, chiah ōe tit-tio̍h oa̍h. 13 Lí kap lí ê peh-sìⁿ siáⁿ-sū beh in-ūi to-kiàm, in-ūi ki-hng, in-ūi un-e̍k lâi sí, chiàu Iâ-hô-hoa lūn-khí m̄-khéng ho̍k-sāi Pa-pí-lûn ông hit-hō kok ê ōe ah? 14 Hiah ê sian-ti kā lín kóng, Lín bōe tì-kàu ho̍k-sāi Pa-pí-lûn ông, bo̍h-tit thiaⁿ--in; in-ūi in tùi lín só͘ soan-thoân--ê sī pe̍h-chha̍t. 15 Iâ-hô-hoa kóng, Góa bô chhe in, chóng-sī in thok Góa ê miâ soan-thoân pe̍h-chha̍t; tì-kàu Góa chiong lín kap hiah ê tùi lín soan-thoân ê sian-ti, lóng kóaⁿ chhut, saⁿ-kap bia̍t-bô. 16 Góa koh tùi chiah ê chè-si kap chit kok ê chèng peh-sìⁿ kóng, Iâ-hô-hoa án-ni kóng, Lín m̄-thang thiaⁿ hiah ê sian-ti tùi lín só͘ chhàm-gú--ê; in kóng, Khòaⁿ ah, Iâ-hô-hoa ê chhù ê khì-kū bô jōa-kú beh tùi Pa-pí-lûn tòa tò-lâi; kî-si̍t in tùi lín só͘ soan-thoân--ê, sī pe̍h-chha̍t. 17 Bo̍h-tit thiaⁿ--in, tio̍h ho̍k-sāi Pa-pí-lûn ông, lâi tit-tio̍h oa̍h; mih-sái hō͘ chit ê siâⁿ pìⁿ-chòe pha-hng? 18 In nā kó-jiân sī sian-ti, ū Iâ-hô-hoa ê ōe kàu tī in, in chiū tio̍h kiû bān-kun ê Iâ-hô-hoa, hō͘ hiah-ê tī Iâ-hô-hoa ê chhù, kap Iû-tāi ê ông-kiong, kap Iâ-lō͘-sat-léng chhun ê khì-kū, bô poaⁿ khì Pa-pí-lûn. 19 In-ūi bān-kun ê Iâ-hô-hoa án-ni kóng, Lūn-kàu chiah ê tâng thiāu, tâng hái, phûn-chō, kap lâu tī chit ê siâⁿ só͘ chhun ê khì-kū; 20 chiū-sī Pa-pí-lûn ông Nî-pò͘-kah-nî-sat lia̍h Iû-tāi ông Iok-ngá-kèng ê kiáⁿ Iâ-ko-nî-ngá, kap Iû-tāi Iâ-lō͘-sat-léng chiah ê chun-kùi ê lâng, tùi Iâ-lō͘-sat-léng kàu Pa-pí-lûn ê sî, só͘ bô chhiúⁿ--khì-ê; 21 si̍t-chāi bān-kun ê Iâ-hô-hoa Í-sek-lia̍t ê Siōng-tè án-ni kóng, Lūn-kàu lâu tī Iâ-hô-hoa ê chhù, kap Iû-tāi ông-kiong, kap Iâ-lō͘-sat-léng ê khì-kū, 22 hiah-ê beh poaⁿ kàu Pa-pí-lûn lâu tī-hia; kàu Góa koàn-kò͘ in ê ji̍t, chiū Góa beh tòa in chiūⁿ-lâi, koh kui chit ê só͘-chāi; che sī Iâ-hô-hoa kóng--ê.
1 當hit年，偤大王Se-tí-ka起頭坐位ê第四年五月，Ki-piàn人Ap-sok ê kiáⁿ，先知Hap-ná-nî-ngá，tī耶和華ê厝，當chiahê祭司kap眾百姓ê面前，對我講， 2 萬軍ê耶和華以色列ê上帝 án-ni講，我已經at折巴比倫王ê擔。 3 兩年內，我beh將巴比倫王Nî-pò͘-kah-nî-sat tùi chit所在搶去到巴比倫，就是耶和華ê厝一切ê器具；lóng beh hō͘伊倒tńg來chit所在。 4 我koh beh將偤大王Iok-ngá-kèng ê kiáⁿ Iâ-Ko-nî-ngá kap受掠到巴比倫hiahê偤大人，hō͘ in 倒tńg來chit所在，因為我beh at折巴比倫王ê擔；這是耶和華講ê。 5 Hit時先知耶利米當chiahê祭司ê面前，kap khiā tī耶和華ê厝眾百姓ê面前，對先知Hap-ná-nî-ngá講， 6 先知耶利米講，A-bēng，願耶和華án-ni行；願耶和華成你所讖語chiahê話；將耶和華厝內ê器具，kap一切受掠去ê人，tùi巴比倫tò來chit所在。 7 總是我對你kap眾百姓所講ê話，你tio̍h聽。 8 Tùi古早以來，你我以前hiahê先知，tùi chōe-chōe所在，kap大國，讖語交戰、災厄、瘟疫。 9 先知讖語平安，hitê先知ê話得tio̍h應驗，就知hitê先知真正是耶和華所差ê。 10 Tùi án-ni，先知Hap-ná-nî-ngá將先知耶利米頷頸ê擔the̍h起來，kā伊at折。 11 Hap-ná-nî-ngá koh當眾百姓ê面前講，耶和華án-ni講，兩年內，我beh照án-ni tùi列國ê頷頸at折巴比倫王Nî-pò͘-kah-nî-sat ê擔。先知耶利米就做伊去。 12 先知Hap-ná-nî-ngá將先知耶利米頷頸ê擔at折了後，耶和華ê話臨到耶利米講， 13 你tio̍h去kā Hap-ná-nî-ngá講，耶和華án-ni講，你at折柴ê擔，beh做鐵ê擔來替in。 14 因為萬軍ê耶和華以色列ê上帝án-ni講，我將鐵ê擔掛tī列邦ê頷頸，hō͘ in服事巴比倫王Nî-pò͘-kah-nî-sat；in lóng beh服事伊；我亦將田野ê走獸hō͘伊。 15 先知耶利米就對先知Hap-ná-nî-ngá講，Hap-ná-nî-ngá ah，你tio̍h聽；耶和華並無差你，你竟然hō͘ chitê百姓óa靠白賊。 16 所以耶和華án-ni講，你看，我beh hō͘你離開世間；你今年的確死，因為你講悖逆耶和華ê話。 17 Hit年七月，先知Hap-ná-nî-ngá就死。
1 Tng hit-nî, Iû-tāi ông Se-tí-ka khí-thâu chē-ūi ê tē sì-nî gō͘ ge̍h, Ki-piàn lâng Ap-sok ê kiáⁿ, sian-ti Hap-ná-nî-ngá, tī Iâ-hô-hoa ê chhù, tng chiah ê chè-si kap chèng peh-sìⁿ ê bīn-chêng, tùi góa kóng, 2 Bān-kun ê Iâ-hô-hoa Í-sek-lia̍t ê siōng-tè án-ni kóng, Góa í-keng at-chi̍h Pa-pí-lûn ông ê taⁿ. 3 Nn̄g-nî-lāi Góa beh chiong Pa-pí-lûn ông Nî-pò͘-kah-nî-sat tùi chit só͘-chāi chhiúⁿ--khì kàu Pa-pí-lûn, chiū-sī Iâ-hô-hoa ê chhù it-chhè ê khì-kū; lóng beh hō͘ i tò-tńg--lâi chit só͘-chāi. 4 Góa koh beh chiong Iû-tāi ông Iok-ngá-kèng ê kiáⁿ Iâ-ko-nî-ngá kap siū-lia̍h kàu Pa-pí-lûn hiah ê Iû-tāi lâng, hō͘ in tò-tńg lâi chit só͘-chāi, in-ūi Góa beh at-chi̍h Pa-pí-lûn ông ê taⁿ; che sī Iâ-hô-hoa kóng--ê. 5 Hit-sî sian-ti Iâ-lī-bí tng chiah ê chè-si ê bīn-chêng, kap khiā tī Iâ-hô-hoa ê chhù chèng peh-sìⁿ ê bīn-chêng, tùi sian-ti Hap-ná-nî-ngá kóng, 6 sian-ti Iâ-lī-bí kóng, A-bēng, goān Iâ-hô-hoa án-ni kiâⁿ; goān Iâ-hô-hoa chiâⁿ lí só͘ chhàm-gú chiah ê ōe; chiong Iâ-hô-hoa chhù-lāi ê khì-kū, kap it-chhè siū-lia̍h--khì ê lâng, tùi Pa-pí-lûn tò-lâi chit só͘-chāi. 7 Chóng-sī góa tùi lí kap chèng peh-sìⁿ só͘ kóng ê ōe, lí tio̍h thiaⁿ. 8 Tùi kó͘-chá í-lâi, lí góa í-chêng hiah ê sian-ti, tùi chōe-chōe só͘-chāi, kap tōa-kok, chhàm-gú kau-chiàn, chai-ē, un-e̍k. 9 Sian-ti chhàm-gú pêng-an, hit ê sian-ti ê ōe tit-tio̍h èng-giām, chiū chai hit ê sian-ti chin-chiàⁿ sī Iâ-hô-hoa só͘ chhe--ê. 10 Tùi án-ni, sian-ti Hap-ná-nî-ngá chiong sian-ti Iâ-lī-bí ām-kún ê taⁿ the̍h--khí-lâi, kā i at-chi̍h. 11 Hap-ná-nî-ngá koh tng chèng peh-sìⁿ ê bīn-chêng kóng, Iâ-hô-hoa án-ni kóng, Nn̄g-nî-lāi, Góa beh chiàu án-ni tùi lia̍t-kok ê ām-kún at-chi̍h Pa-pí-lûn ông Nî-pò͘-kah-nî-sat ê taⁿ. Sian-ti Iâ-lī-bí chiū chòe i khì. 12 Sian-ti Hap-ná-nî-ngá chiong sian-ti Iâ-lī-bí ām-kún ê taⁿ at-chi̍h liáu-āu, Iâ-hô-hoa ê ōe lîm-kàu Iâ-lī-bí kóng, 13 Lí tio̍h khì kā Hap-ná-nî-ngá kóng, Iâ-hô-hoa án-ni kóng, Lí at-chi̍h chhâ ê taⁿ, beh chòe thih ê taⁿ lâi thòe--in. 14 In-ūi bān-kun ê Iâ-hô-hoa Í-sek-lia̍t ê Siōng-tè án-ni kóng, Góa chiong thih ê taⁿ kòa tī lia̍t-pang ê ām-kún, hō͘ in ho̍k-sāi Pa-pí-lûn ông Nî-pò͘-kah-nî-sat; in lóng beh ho̍k-sāi i; Góa ia̍h chiong chhân-iá ê cháu-siù hō͘ i. 15 Sian-ti Iâ-lī-bí chiū tùi sian-ti Hap-ná-nî-ngá kóng, Hap-ná-nî-ngá ah, lí tio̍h thiaⁿ; Iâ-hô-hoa pēng-bô chhe lí, lí kéng-jiân hō͘ chit ê peh-sìⁿ óa-khò pe̍h-chha̍t. 16 Só͘-í Iâ-hô-hoa án-ni kóng, Lí khòaⁿ, Góa beh hō͘ lí lī-khui sè-kan; lí kin-nî tek-khak sí, in-ūi lí kóng pōe-ge̍k Iâ-hô-hoa ê ōe. 17 Hit-nî chhit-ge̍h, sian-ti Hap-ná-nî-ngá chiū sí.
1 先知耶利米tùi耶路撒冷寄phoe hō͘受掠iáu tī-teh-ê ê老大，kap chiahê祭司、先知、眾百姓，就是Nî-pò͘-kah-nî-sat tùi耶路撒冷掠到巴比倫ê。 2 (這是tī Iâ-ko-nî-ngá王kap太后、太監，kap偤大耶路撒冷ê貴族，以及工匠、鐵匠，lóng離開耶路撒冷ê了後。) 3 Hit張phoe託重Sa-hoan ê kiáⁿ Í-lī-a-sat，kap Hi-le̍k-ka ê kiáⁿ Ki-má-lī，帶去；chit兩人就是偤大王Se-tí-ka差去巴比倫，見巴比倫王Nî-pò͘-kah-nî-sat-ê。 4 phoe內講：萬軍ê耶和華，以色列ê上帝，tùi一切受掠去ê，就是我hō͘ in tùi耶路撒冷受掠到巴比倫ê人，án-ni講， 5 Lín tio̍h起厝來khiā起；作園來食伊ê果子； 6 娶bó͘來生kiáⁿ，cha-bó͘-kiáⁿ；kā lín ê kiáⁿ娶bó͘；hō͘ lín ê cha-bó͘-kiáⁿ出嫁；hō͘ in生kiáⁿ，cha-bó͘-kiáⁿ；thang tī-hia加添chōe-chōe，無減少。 7 我所hō͘ lín受掠去hitê城，lín tio̍h圖謀伊ê平安，替伊祈禱耶和華；因為伊得tio̍h平安，lín亦tè伊平安。 8 萬軍ê耶和華，以色列ê上帝，án-ni講，莫得hō͘ lín中間ê先知kap卜卦ê引誘；亦莫得信lín ê 夢，就是lín所夢見ê。 9 因為in託我ê名對lín宣傳白賊話；我並無差in；這是耶和華講ê。 10 因為耶和華án-ni講，巴比倫七十年ê期限已經滿，我beh臨到lín，成我tùi lín所講ê好話；hō͘ lín tò來chitê所在。 11 耶和華講，我知我tùi lín所存ê意思，是賞賜平安ê意思，m̄是降災厄；beh hō͘ lín尾景有ǹg望。 12 Hit時lín beh求叫我，beh去祈禱我，我beh聽lín。 13 Lín beh chhē我，來tú-tio̍h；因為lín beh專心chhē我。 14 耶和華講：我beh hō͘ lín chhē-tio̍h；我亦beh hō͘ lín受掠ê人倒tńg來；beh tùi我所趕lín到ê ta̍k國ta̍k所在聚集lín；亦beh hō͘ lín tò來本所在，就是我所hō͘ lín tùi hia受掠ê；這是耶和華講ê。 15 因為lín講，耶和華tī巴比倫kā阮興起先知。 16 Taⁿ耶和華論到坐大衛寶座ê王，亦論到tiàm tī chitê城ê眾百姓，就是無kap lín相kap受掠ê兄弟； 17 萬軍ê耶和華án-ni講，看ah，我beh用刀劍，用飢荒用瘟疫，到tī in；hō͘ in親像極pháiⁿ ê無花果，pháiⁿ到bōe食得。 18 我beh用刀劍，用飢荒，用瘟疫追jip in；hō͘ in 流落tī天下萬國；tī我趕in到ê ta̍k國，做thang咒詛，thang gông-ngia̍h thang譏刺，thang凌辱ê。 19 耶和華講，這是因為in無聽thàn我ê話，就是我差我chiahê奴僕眾先知kā in講ê話；是早早起來差in；總是lín無聽；這是耶和華講ê。 20 所以lín一切受掠去ê，就是我tùi耶路撒冷差到巴比倫ê，lín lóng tio̍h聽耶和華ê話。 21 萬軍ê耶和華，以色列ê上帝，án-ni講，論到Ko-nāi-ngá ê kiáⁿ A-hap，kap Má-se-ngá ê kiáⁿ Se-tí-ka，in託我ê名對lín宣傳白賊：看ah，我beh將in交tī巴比倫王Nî-pò͘-kah-nî-sat ê手；伊beh tī lín ê面前刣 in。 22 偤大受掠ê眾人tī巴比倫ê，beh用chit兩人做話柄咒詛人，講，願耶和華hō͘你親像Se-tí-ka A-hap，hō͘巴比倫王用火燒伊。 23 In tī以色列中做出見笑ê事；淫in厝邊ê bó͘；koh託我ê名宣傳白賊，我所無命令in-ê；知ê是我，做干證ê亦是我；這是耶和華講ê。 24 論Nî-hi-lân人Sī-má-ngá，你tio̍h講， 25 萬軍ê耶和華，以色列ê上帝，án-ni講，你bat用家己ê名寄phoe hō͘耶路撒冷ê眾百姓，kap祭司Má-se-ngá ê kiáⁿ Se-hoan-ngá，kap眾祭司講， 26 耶和華有設立你做祭司，來替祭司Iâ-hô-iâ-tāi，hō͘ lín監督耶和華ê厝，thang將一切khong-khám家己稱做先知ê人，用柴枷kā伊枷，用鎖kā伊鎖。 27 現今A-ná-tu̍t人耶利米對lín家己稱做先知，lín啥事無責備伊ah？ 28 因為伊寄phoe到巴比倫，kā阮講，受掠ê時beh久長；lín tio̍h起厝來khiā起；作園來食果子。 29 祭司Se-hoan-ngá就將chit張phoe讀hō͘先知耶利米聽。 30 Tùi án-ni，耶和華ê話臨到耶利米講， 31 你tio̍h寄phoe hō͘一切受掠ê人講，耶和華論到Nî-hi-lân人Sī-má-ngá講，因為Sī-má-ngá對lín宣傳ê；我無差伊，伊hō͘ lín óa靠白賊； 32 所以耶和華án-ni講，我beh刑罰Nî-hi-lân人Sī-má-ngá，kap伊ê後裔；伊的確無留一人khiā起tī chitê百姓ê中間；亦無thang看見我所beh賞賜我ê百姓ê福氣；因為伊講悖逆耶和華ê話；這是耶和華講ê。
1 Sian-ti Iâ-lī-bí tùi Iâ-lō͘-sat-léng kià-phoe hō͘ siū-lia̍h iáu tī-teh--ê ê lāu-tōa, kap chiah ê chè-si, sian-ti, chèng peh-sìⁿ, chiū-sī Nî-pò͘-kah-nî-sat tùi Iâ-lō͘-sat-léng lia̍h kàu Pa-pí-lûn--ê. 2 (Che sī tī Iâ-ko-nî-ngá ông kap thài-hō͘, thài-kàm, kap Iû-tāi Iâ-lō͘-sat-léng ê kùi-cho̍k, í-ki̍p kang-chhiūⁿ, thih-chhiūⁿ, lóng lī-khui Iâ-lō͘-sat-léng ê liáu-āu.) 3 Hit-tiuⁿ phoe thok-tiōng Sa-hoan ê kiáⁿ Í-lī-a-sat, kap Hi-le̍k-ka ê kiáⁿ Ki-má-lī, tòa--khì; chí(**chit) nn̄g lâng chiū-sī Iû-tāi ông Se-tí-ka chhe--khì Pa-pí-lûn, kìⁿ Pa-pí-lûn ông Nî-pò͘-kah-nî-sat--ê. 4 Phoe-lāi kóng: Bān-kun ê Iâ-hô-hoa, Í-sek-lia̍t ê Siōng-tè, tùi it-chhè siū-lia̍h-khì--ê, chiū-sī Góa hō͘ in tùi Iâ-lō͘-sat-léng siū-lia̍h kàu Pa-pí-lûn ê lâng, án-ni kóng, 5 Lín tio̍h khí-chhù lâi khiā-khí; choh-hn̂g lâi chia̍h i ê ké-chí; 6 chhōa-bó͘ lâi siⁿ-kiáⁿ, cha-bó͘-kiáⁿ; kā lín ê kiáⁿ chhōa-bó͘; hō͘ lín ê cha-bó͘-kiáⁿ chhut-kè; hō͘ in siⁿ-kiáⁿ, cha-bó͘-kiáⁿ; thang tī-hia ke-thiⁿ chōe-chōe, bô kiám-chió. 7 Góa só͘ hō͘ lín siū-lia̍h--khì hit ê siâⁿ, lín tio̍h tô͘-bô͘ i ê pêng-an, thòe i kî-tó Iâ-hô-hoa; in-ūi i tit-tio̍h pêng-an, lín ia̍h tè i pêng-an. 8 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Bo̍h-tit hō͘ lín tiong-kan ê sian-ti kap pok-kòa--ê ín-iú; ia̍h bo̍h-tit sìn lín ê bāng, chiū-sī lín só͘ bāng-kìⁿ--ê. 9 In-ūi in thok Góa ê miâ tùi lín soan-thoân pe̍h-chha̍t-ōe; Góa pēng-bô chhe in; che sī Iâ-hô-hoa kóng--ê. 10 In-ūi Iâ-hô-hoa án-ni kóng, Pa-pí-lûn chhit-cha̍p nî ê kî-hān í-keng móa, Góa beh lîm-kàu lín, chiâⁿ Góa tùi lín só͘ kóng ê hó-ōe; hō͘ lín tò-lâi chit ê só͘-chāi. 11 Iâ-hô-hoa kóng, Góa chai Góa tùi lín só͘ chûn ê ì-sù, sī siúⁿ-sù pêng-an ê ì-sù, m̄-sī kàng chai-ē; beh hō͘ lín bé-kéng ū ǹg-bāng. 12 Hit-sî lín beh kiû-kiò Góa, beh khì kî-tó Góa, Góa beh thiaⁿ lín. 13 Lín beh chhē Góa, lâi tú-tio̍h; in-ūi lín beh choan-sim chhē Góa. 14 Iâ-hô-hoa kóng: Góa beh hō͘ lín chhē-tio̍h; Góa ia̍h beh hō͘ lín siū-lia̍h ê lâng tò-tńg--lâi; beh tùi Góa só͘ kóaⁿ lín kàu ê ta̍k-kok ta̍k só͘-chāi chū-chi̍p lín; ia̍h beh hō͘ lín tò-lâi pún só͘-chāi, chiū-sī Góa só͘ hō͘ lín tùi hia siū-lia̍h--ê; che sī Iâ-hô-hoa kóng--ê. 15 In-ūi lín kóng, Iâ-hô-hoa tī Pa-pí-lûn kā goán heng-khí sian-ti. 16 Taⁿ Iâ-hô-hoa lūn-kàu chē Tāi-pi̍t pó-chō ê ông, ia̍h lūn-kàu tiàm tī chit ê siâⁿ ê chèng peh-sìⁿ, chiū-sī bô kap lín saⁿ-kap siū-lia̍h ê hiaⁿ-tī; 17 bān-kun ê Iâ-hô-hoa án-ni kóng, Khòaⁿ ah, Góa beh ēng to-kiàm, ēng ki-hng ēng un-e̍k, kàu tī in; hō͘ in chhin-chhiūⁿ ke̍k-pháiⁿ ê bû-hoa-kó, pháiⁿ kàu bōe-chia̍h-tit. 18 Góa beh ēng to-kiàm, ēng ki-hng, ēng un-e̍k tui-jip in; hō͘ in liû-lo̍h tī thiⁿ-ē bān-kok; tī Góa kóaⁿ in kàu ê ta̍k-kok, chòe thang chiù-chó͘, thang gông-ngia̍h thang ki-chhì, thang lêng-jio̍k--ê. 19 Iâ-hô-hoa kóng, Che sī in-ūi in bô thiaⁿ-thàn Góa ê ōe, chiū-sī Góa chhe Góa chiah ê lô͘-po̍k chèng sian-ti kā in kóng ê ōe; sī chá-chá khí-lâi chhe in; chóng-sī lín bô thiaⁿ; che sī Iâ-hô-hoa kóng--ê. 20 Só͘-í lín it-chhè siū-lia̍h--khì ê, chiū-sī Góa tùi Iâ-lō͘-sat-léng chhe kàu Pa-pí-lûn--ê, lín lóng tio̍h thiaⁿ Iâ-hô-hoa ê ōe. 21 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, lūn-kàu Ko-nāi-ngá ê kiáⁿ A-hap, kap Má-se-ngá ê kiáⁿ Se-tí-ka, in thok Góa ê miâ tùi lín soan-thoân pe̍h-chha̍t: Khòaⁿ ah, Góa beh chiong in kau tī Pa-pí-lûn ông Nî-pò͘-kah-nî-sat ê chhiú; i beh tī lín ê bīn-chêng thâi in. 22 Iû-tāi siū-lia̍h ê chèng-lâng tī Pa-pí-lûn--ê, beh ēng chí(**chit) nn̄g lâng chòe ōe-pìⁿ chiù-chó͘ lâng, kóng, Goān Iâ-hô-hoa hō͘ lí chhin-chhiūⁿ Se-tí-ka A-hap, hō͘ Pa-pí-lûn ông ēng hé sio--i. 23 In tī Í-sek-lia̍t-tiong chòe-chhut kiàn-siàu ê sū; îm in chhù-piⁿ ê bó͘; koh thok Góa ê miâ soan-thoân pe̍h-chha̍t, Góa só͘ bô bēng-lēng in--ê; chai--ê sī Góa, chòe kan-chèng--ê ia̍h sī Góa; che sī Iâ-hô-hoa kóng--ê. 24 Lūn Nî-hi-lân lâng Sī-má-ngá, lí tio̍h kóng, 25 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lí bat ēng ka-kī ê miâ kià phoe hō͘ Iâ-lō͘-sat-léng ê chèng peh-sìⁿ, kap chè-si Má-se-ngá ê kiáⁿ Se-hoan-ngá, kap chèng chè-si kóng, 26 Iâ-hô-hoa ū siat-li̍p lí chòe chè-si, lâi thòe chè-si Iâ-hô-iâ-tāi, hō͘ lín kam(**kàm)-tok Iâ-hô-hoa ê chhù, thang chiong it-chhè khong-khám ka-kī chheng chòe sian-ti ê lâng, ēng chhâ-kê kā i kê, ēng só kā i só. 27 Hiān-kim A-ná-tu̍t lâng Iâ-lī-bí tùi lín ka-kī chheng chòe sian-ti, lín siáⁿ-sū bô chek-pī i ah? 28 In-ūi i kià-phoe kàu Pa-pí-lûn, kā goán kóng, Siū-lia̍h ê sî beh kú-tn̂g; lín tio̍h khí chhù lâi khiā-khí; choh-hn̂g lâi chia̍h ké-chí. 29 Chè-si Se-hoan-ngá chiū chiong chit tiuⁿ phoe tha̍k hō͘ sian-ti Iâ-lī-bí thiaⁿ. 30 Tùi án-ni, Iâ-hô-hoa ê ōe lîm-kàu Iâ-lī-bí kóng, 31 Lí tio̍h kià phoe hō͘ it-chhè siū-lia̍h ê lâng kóng, Iâ-hô-hoa lūn-kàu Nî-hi-lân lâng Sī-má-ngá kóng, In-ūi Sī-má-ngá tùi lín soan-thoân--ê; Góa bô chhe i, i hō͘ lín óa-khò pe̍h-chha̍t; 32 só͘-í Iâ-hô-hoa án-ni kóng, Góa beh hêng-hoa̍t Nî-hi-lân lâng Sī-má-ngá, kap i ê hō͘-è; i tek-khak bô lâu chi̍t lâng khiā-khí tī chit ê peh-sìⁿ ê tiong-kan; ia̍h bô thang khòaⁿ-kìⁿ Góa só͘ beh siúⁿ-sù Góa ê peh-sìⁿ ê hok-khì; in-ūi i kóng pōe-ge̍k Iâ-hô-hoa ê ōe; che sī Iâ-hô-hoa kóng--ê.
1 耶和華ê話臨到耶利米講， 2 以色列ê上帝耶和華án-ni講，見若我所bat kā你講ê話，lóng tio̍h寫tī冊裡。 3 耶和華講，看ah，日子beh到，我beh hō͘我ê百姓以色列kap偤大受掠ê人倒tńg來；我亦beh hō͘ in tò來我所賞賜in ê列祖ê地；in就得tio̍h chitê地做業；這是耶和華講ê。 4 耶和華論到以色列kap偤大ê話，記tī下底。 5 耶和華án-ni講，阮有聽見ngia̍uh-ngia̍uh-chhoah，驚惶，無平安ê聲。 6 Taⁿ lín tio̍h去問看有ta-po͘人生kiáⁿ無；怎樣我看見人人用手ji̍h腰，親像beh生kiáⁿ ê婦人人，面lóng變青？ 7 慘ah，hitê日是大，無thang比並；是雅各tú-tio̍h患難ê期日；總是伊beh得tio̍h救來脫出。 8 萬軍ê耶和華án-ni講，到hit日，我beh對你ê頷頸at折伊ê擔，chhoah斷縛你ê索；外邦人無koh用伊做差用。 9 In是beh服事in ê上帝耶和華，kap in ê王大衛，就是我beh kā in興起ê。 10 耶和華講，我ê奴僕雅各ah，án-ni你莫得驚；以色列ah，莫得驚惶；因為我beh tùi遠ê所在拯救你；亦beh tùi受掠去ê地拯救你ê後裔；雅各beh tò來得tio̍h安靜、平安；無人hō͘伊驚。 11 因為我kap你tī-teh，來拯救你；亦beh將我所趕你到hiahê國一盡剿滅；總是無一盡剿滅你；beh照所合宜ê責備你；斷斷bōe會無刑罰你；這是耶和華講ê。 12 耶和華án-ni講，你ê傷bōe醫得，你ê傷痕真傷重。 13 無人替你辯護，hō͘你ê傷痕得tio̍h包；你無醫治ê好藥。 14 疼你ê人lóng bōe記得你，無來探你；因為你ê罪過真重，罪惡真chōe；我用對敵hit款ê phah來phah你；亦用殘忍ê ê警戒，來警戒你。 15 你啥事因為你ê傷來喉叫ah？你ê痛苦bōe醫得；因為你ê罪過真重，罪惡真chōe；我所以用chiahê款待你。 16 所以見若吞食你ê，beh受吞食；你ê對敵，一个一个lóng hō͘人掠去；搶你ê，beh hō͘人搶，劫你ê，我beh hō͘伊受劫。 17 耶和華講，我beh hō͘你ê身體復原，醫好你ê傷痕；因為人lóng 稱你做受趕逐ê，講，這是錫安，無人chhē見ê。 18 耶和華án-ni講，看ah，我beh hō͘雅各受遷徙ê布棚倒tńg來，亦beh可憐伊khiā起ê所在；城beh起tī原舊ê牆基，王宮亦照舊有人khiā起。 19 Beh有感謝kap快樂ê ê聲tùi in中間出來；我也beh hō͘ in加添chōe-chōe，不致減少；hō͘ in尊貴，不致卑微。 20 In ê kiáⁿ兒beh親像早日；in ê會眾beh khiā在tī我ê面前；凡若壓制in-ê，我beh辦伊。 21 In ê君王的確是屬tī in ê；掌管in-ê，beh tùi in中間出；我beh hō͘伊近óa，伊亦beh親近我；若m̄是án-ni，是誰敢好膽親近我；這是耶和華講ê。 22 Lín beh做我ê百姓，我beh做lín ê上帝。 23 看ah，耶和華ê受氣親像大風發出；就是掃滅ê大風，beh tńg旋攻擊pháiⁿ人ê頭殼。 24 耶和華ê心所擬定ê iáu未做，iáu未成ê事先，祂ê大受氣的確無收倒tńg；日後lín beh明白。
1 Iâ-hô-hoa ê ōe lîm-kàu Iâ-lī-bí kóng, 2 Í-sek-lia̍t ê Siōng-tè Iâ-hô-hoa án-ni kóng, Kìⁿ-nā Góa só͘ bat kā lí kóng ê ōe, lóng tio̍h siá tī chheh--nih. 3 Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ Góa ê peh-sìⁿ Í-sek-lia̍t kap Iû-tāi siū-lia̍h ê lâng tò-tńg--lâi; Góa ia̍h beh hō͘ in tò--lâi Góa só͘ siúⁿ-sù in ê lia̍t-chó͘ ê tōe; in chiū tit-tio̍h chit ê tōe chòe-gia̍p; che sī Iâ-hô-hoa kóng--ê. 4 Iâ-hô-hoa lūn-kàu Í-sek-lia̍t kap Iû-tāi ê ōe, kì tī ē-tóe. 5 Iâ-hô-hoa án-ni kóng, Goán ū thiaⁿ-kìⁿ ngia̍uh-ngia̍uh-chhoah, kiaⁿ-hiâⁿ, bô pêng-an ê siaⁿ. 6 Taⁿ lín tio̍h khì mn̄g-khòaⁿ ū ta-po͘-lâng siⁿ kiáⁿ bô; cháiⁿ-iūⁿ Góa khòaⁿ-kìⁿ lâng-lâng ēng chhiú ji̍h io, chhin-chhiūⁿ beh siⁿ-kiáⁿ ê hū-jîn-lâng, bīn lóng piàn chhiⁿ? 7 Chhám--ah, hit ê ji̍t sī tōa, bô thang pí-phēng; sī Ngá-kok tú-tio̍h hoān-lān ê kî-ji̍t; chóng-sī i beh tit-tio̍h kiù lâi thoat-chhut. 8 Bān-kun ê Iâ-hô-hoa án-ni kóng, Kàu hit-ji̍t, Góa beh tùi lí ê ām-kún at-chi̍h i ê taⁿ, chhoah-tn̄g pa̍k lí ê soh; gōa-pang lâng bô koh ēng i chòe chhe-ēng. 9 In sī beh ho̍k-sāi in ê Siōng-tè Iâ-hô-hoa, kap in ê ông Tāi-pi̍t, chiū-sī Góa beh kā in heng-khí--ê. 10 Iâ-hô-hoa kóng, Góa ê lô͘-po̍k Ngá-kok ah, án-ni lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; in-ūi Góa beh tùi hn̄g ê só͘-chāi chín-kiù lí; ia̍h beh tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi tit-tio̍h an-chēng, pêng-an; bô lâng hō͘ i kiaⁿ. 11 In-ūi Góa kap lí tī-teh, lâi chín-kiù lí; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê chek-pī lí; toàn-toàn bōe-ōe bô hêng-hoa̍t lí; che sī Iâ-hô-hoa kóng--ê. 12 Iâ-hô-hoa án-ni kóng, Lí ê siong bōe i--tit, lí ê siong-hûn chin siong-tiōng. 13 Bô lâng thòe lí piān-hō͘, hō͘ lí ê siong-hûn tit-tio̍h pau; lí bô i-tī ê hó-io̍h. 14 Thiàⁿ lí ê lâng lóng bōe-kì-tit lí, bô lâi thàm lí; in-ūi lí ê chōe-kòa chin-tāng, chōe-ok chin-chōe; Góa ēng tùi-te̍k hit-khoán ê phah lâi phah lí; ia̍h ēng chân-jím--ê ê kéng-kài, lâi kéng-kài lí. 15 Lí siáⁿ-sū in-ūi lí ê siong lâi âu-kiò ah? lí ê thòng-khó͘ bōe i--tit; in-ūi lí ê chōe-kòa chin-tāng, chōe-ok chin-chōe; Góa só͘-í ēng chiah-ê khoán-thāi lí. 16 Só͘-í kìⁿ-nā thun-chia̍h lí ê, beh siū thun-chia̍h; lí ê tùi-te̍k, chi̍t-ê chi̍t-ê lóng hō͘ lâng lia̍h-khì; chhiúⁿ lí--ê, beh hō͘ lâng chhiúⁿ, kiap lí--ê, Góa beh hō͘ i siū kiap. 17 Iâ-hô-hoa kóng, Góa beh hō͘ lí ê sin-thé ho̍k-goân, i-hó lí ê siong-hûn; in-ūi lâng lóng chheng lí chòe siū kóaⁿ-tio̍k--ê, kóng, Che sī Sek-an, bô lâng chhē-kìⁿ--ê. 18 Iâ-hô-hoa án-ni kóng, Khòaⁿ ah, Góa beh hō͘ Ngá-kok siū chhian-sóa ê pò͘-pîⁿ tò-tńg--lâi, ia̍h beh khó-lîn i khiā-khí ê só͘-chāi; siâⁿ beh khí tī goân-kū ê chhiûⁿ-ki, ông-kiong ia̍h chiàu-kū ū lâng khiā-khí. 19 Beh ū kám-siā kap khoài-lo̍k--ê ê siaⁿ tùi in tiong-kan chhut--lâi; Góa iā beh hō͘ in ke-thiⁿ chōe-chōe, put-tì kiám-chió; hō͘ in chun-kùi, put-tì pi-bî. 20 In ê kiáⁿ-jî beh chhin-chhiūⁿ chá-ji̍t; in ê hōe-chiòng beh khiā-chāi tī Góa ê bīn-chêng; hoān-nā ap-chè in--ê, Góa beh pān i. 21 In ê kun-ông tek-khak sī sio̍k tī in--ê; chiáng-koán in--ê, beh tùi in tiong-kan chhut; Góa beh hō͘ i kūn-óa, i ia̍h beh chhin-kūn Góa; nā m̄-sī án-ni, chī-chūi káⁿ hó-táⁿ chhin-kūn Góa; che sī Iâ-hô-hoa kóng--ê. 22 Lín beh chòe Góa ê peh-sìⁿ, Góa beh chòe lín ê Siōng-tè. 23 Khòaⁿ ah, Iâ-hô-hoa ê siū-khì chhin-chhiūⁿ tōa hong hoat-chhut; chiū-sī sàu-bia̍t ê tōa-hong, beh tńg-se̍h kong-kek pháiⁿ-lâng ê thâu-khak. 24 Iâ-hô-hoa ê sim só͘ gí-tiāⁿ--ê iáu-bē chòe, iáu-bē chiâⁿ ê tāi-seng, I ê tōa siū-khì tek-khak bô siu tò-tńg; ji̍t-āu lín beh bêng-pe̍k.
1 耶和華講，hit時我beh做以色列ta̍k房頭ê上帝；in beh做我ê百姓。 2 耶和華án-ni講，以色列hō͘刀刣無了ê百姓，tī曠野得tio̍h恩典；我去hō͘ in得tio̍h安歇。 3 早時耶和華對我顯現，講，我用永遠ê疼，疼你；因為án-ni，我用慈愛牽你。 4 以色列ê在室女ah，我beh koh建立你，你就得tio̍h建立；你beh koh用lin-long鼓做裝飾，kap快樂ê人做陣跳舞出去。 5 你beh koh栽種葡萄園tī撒馬利亞chiahê山栽種ê beh栽種伊，來享受伊ê果子。 6 因為beh有一日，Í-hoat-liân山守望ê人beh叫講，起來，咱上來去錫安，到耶和華咱ê上帝hia。 7 耶和華án-ni講，Lín tio̍h為雅各唱歡喜ê歌，為萬國中做頭ê國出大聲，傳播o-ló講，耶和華ah，救你ê百姓以色列所chhun ê人。 8 看ah，我beh chhōa in tùi北方來，聚集in tùi地極來；kap in來ê，有chhiⁿ-mî-ê、跛腳ê、帶娠(sin)ê、beh生kiáⁿ-ê，kui大陣相kap來。 9 In beh啼哭來，我beh tī祈禱chhōa in；我beh tī正直bōe跋倒ê路chhōa in到河邊；因為我是以色列ê父，Í-hoat-liân做我ê大kiáⁿ。 10 列國ah，tio̍h聽耶和華ê話，傳報tī遠ê海嶼，講，趕散以色列ê beh聚集伊，koh顧守伊，親像牧者顧守伊ê羊群。 11 因為耶和華已經救贖雅各，贖回伊脫離比伊khah強ê ê手。 12 In beh到錫安高ê所在唱歌；koh beh親像河水流，到耶和華恩典ê地，得tio̍h五穀、酒、油、羊群、牛群ê細隻ê；in ê心beh親像灌ak ê園，lóng無koh憂苦。 13 Hit時在室女beh跳舞來歡喜，少年人老人亦beh相kap歡喜；因為我beh hō͘ in ê悲哀變做歡喜，亦beh安慰in，hō͘ in tī憂悶了後來快樂。 14 我beh用油膩hō͘祭司ê心滿足；我ê百姓亦beh因為我ê恩惠滿意；這是耶和華講ê。 15 耶和華án-ni講，Tī La̍h-má聽見聲，啼哭koh大傷悲，拉結哭伊ê kiáⁿ兒，m̄願受安慰，因為伊ê kiáⁿ無去。 16 耶和華án-ni講，Tio̍h禁止你ê聲，莫得啼哭；禁止你ê目睭，莫得流目屎；因為你做工，beh有報賞；in beh tùi對敵ê國tò來；這是耶和華講ê。 17 耶和華講，你ê尾景有ǹg望，你ê kiáⁿ兒beh tò來家己ê境內。 18 我實在有聽見Í-hoat-liân家己痛恨，講，你督責我，我就受督責；我親像教bē上chōa ê牛á，求你hō͘我oa̍t倒tńg，我就oa̍t倒tńg；因為你是我ê上帝耶和華。 19 我oa̍t倒tńg以後就反悔；受教示以後，就phah腳腿；我就見笑漏氣，因為我擔當少年ê時ê凌辱。 20 耶和華講，Í-hoat-liân是我疼ê kiáⁿ mah？是thang歡喜ê gín-ná mah？我見若責備伊，iáu-kú深深siàu念伊；所以我ê心腸為tio̍h伊bōe平安，我的確beh憐憫伊。 21 以色列ê百姓ah，你tio̍h為家己立指路牌，khiā引路柱；你tio̍h留心ǹg大路，就是你所去ê原路；你tio̍h tò來，tò來tī你chiahê城。 22 悖謬ê cha-bó͘-gín-ná ah，你四界流無定tio̍h，beh到tī時ah？耶和華tī地上chhòng一項新ê事，就是cha-bó͘人beh保護ta-po͘人。 23 萬軍ê耶和華，以色列ê上帝，án-ni講，我hō͘受掠ê人tò來ê時，tī偤大地kap伊hiahê城，人beh koh用chitê話講，公義ê厝，聖ê山ah，願耶和華賜福你。 24 偤大kap hiahê城ê人以及作穡人，四界飼羊ê人，lóng beh相kap khiā起tī-hia。 25 因為心神厭倦ê人，我已經hō͘伊滿足；心神憂悶ê人，我已經hō͘伊知足。 26 先知講，我睏醒teh想，我ê睏真歡喜。 27 耶和華講，看ah，日子beh到，我beh hō͘以色列家kap偤大家，人kap cheng-siⁿ，lóng傳種。 28 我早前怎樣專心將in拔出、拆毀、chhia倒、滅無、困苦；亦beh照án-ni專心將in建立、栽種；這是耶和華講ê。 29 當hiahê日，人無koh講，老父食酸ê葡萄，kiáⁿ ê嘴齒酸軟。 30 ta̍k人beh 因為家己ê罪來死；見若食酸ê葡萄ê，in ê嘴齒beh軟。 31 耶和華講，看ah，日子beh到，我beh kap以色列家，偤大家，立新ê約： 32 m̄是照我kap in ê列祖所立ê約，tī我牽in ê手，chhōa in出埃及地ê時所立ê；我雖bóng做in ê丈夫，in猶原背我ê約；這是耶和華講ê。 33 耶和華講，hiahê日了後，我kap以色列家所beh立ê約是chitê；就是我beh用我ê律法hē tī in ê心內，刻tī in ê心；我beh做in ê上帝，in beh做我ê百姓。 34 In無koh ta̍k人教示in ê厝邊，kap in ta̍k人ê兄弟，講，Lín tio̍h bat耶和華；因為in tùi大到細，lóng beh bat我；因為我beh赦免in ê罪過，無koh記得in ê罪；這是耶和華講ê。 35 耶和華設太陽做日時ê光，設月kap星ê定例做暝時ê光；搖動大海，hō͘伊ê湧hōa-hōa哮；萬軍ê耶和華就是祂ê名； 36 祂有án-ni講，chiahê定例若會tī我ê面前廢無，以色列ê後裔chiah會tī我ê面前絕斷，永遠bōe成做國；這是耶和華講ê。 37 耶和華án-ni講，若tī頂面ê天能量得，tī下面ê地chiahê根基能測度得，就我的確因為以色列ê後裔一切ê所行來棄sak伊；這是耶和華講ê。 38 耶和華講，看ah，日子beh到，chitê城beh kā耶和華起造，tùi Hap-lâm-gia̍p ê樓，到角頭ê門。 39 量ê索koh牽出去，直到Ka-li̍p山；oa̍t-tńg到Ko-a。 40 Hiat身屍kap piàⁿ火灰ka-nn̂g ê山谷，kap一切ê田園，直到Khip-lûn溪，koh直到東勢馬ê門ê角頭，lóng beh做聖，歸tī耶和華，無koh拔出，無koh chhia倒，直到永遠。
1 Iâ-hô-hoa kóng, Hit-sî Góa beh chòe Í-sek-lia̍t ta̍k pâng-thâu ê Siōng-tè; in beh chòe Góa ê peh-sìⁿ. 2 Iâ-hô-hoa án-ni kóng, Í-sek-lia̍t hō͘ to thâi-bô-liáu ê peh-sìⁿ, tī khòng-iá tit-tio̍h un-tián; Góa khì hō͘ in tit-tio̍h an-hioh. 3 Chá-sî Iâ-hô-hoa tùi góa hián-hiān, kóng, Góa ēng éng-oán ê thiàⁿ, thiàⁿ lí; in-ūi án-ni, Góa ēng chû-ài khan lí. 4 Í-sek-lia̍t ê chāi-sek-lú ah, Góa beh koh kiàn-li̍p lí, lí chiū tit-tio̍h kiàn-li̍p; lí beh koh ēng lin-long-kó͘ chòe chng-thāⁿ, kap khoài-lo̍k ê lâng chòe-tīn thiàu-bú chhut-khì. 5 Lí beh koh chai-chèng phû-tô-hn̂g tī Sat-má-lī-a chiah ê soaⁿ chai-chèng--ê beh chai-chèng i, lâi hióng-siū i ê ké-chí. 6 In-ūi beh ū chi̍t-ji̍t, Í-hoat-liân soaⁿ siú-bāng ê lâng beh kiò kóng, Khí-lâi, lán chiūⁿ-lâi khì Sek-an, kàu Iâ-hô-hoa lán ê Siōng-tè hia. 7 Iâ-hô-hoa án-ni kóng, Lín tio̍h ūi Ngá-kok chhiùⁿ hoaⁿ-hí ê koa, ūi bān-kok-tiong chòe-thâu ê kok chhut tōa-siaⁿ, thoân-pò͘ o-ló kóng, Iâ-hô-hoa ah, kiù Lí ê peh-sìⁿ Í-sek-lia̍t só͘ chhun ê lâng. 8 Khòaⁿ ah, Góa beh chhōa in tùi pak-hng lâi, chū-chi̍p in tùi tōe-ke̍k lâi; kap in lâi--ê, ū chhiⁿ-mî--ê, pái-kha--ê, tòa-sin--ê, beh siⁿ-kiáⁿ--ê, kui tōa-tīn saⁿ-kap lâi. 9 In beh thî-khàu lâi, Góa beh tī kî-tó chhōa in; Góa beh tī chèng-ti̍t bōe poa̍h-tó ê lō͘ chhōa in kàu hô-piⁿ; in-ūi Góa sī Í-sek-lia̍t ê pē, Í-hoat-liân chòe Góa ê tōa kiáⁿ. 10 Lia̍t-kok ah, tio̍h thiaⁿ Iâ-hô-hoa ê ōe, thoân-pò tī hn̄g ê hái-sū, kóng, Kóaⁿ-sòaⁿ Í-sek-lia̍t--ê beh chū-chi̍p i, koh kò͘-siú i, chhin-chhiūⁿ bo̍k-chiá kò͘-siú i ê iûⁿ-kûn. 11 In-ūi Iâ-hô-hoa í-keng kiù-sio̍k Ngá-kok, sio̍k-hôe i thoat-lī pí i khah kiông--ê ê chhiú. 12 In beh kàu Sek-an koâiⁿ ê só͘-chāi chhiùⁿ-koa; koh beh chhin-chhiūⁿ hô-chúi lâu, kàu Iâ-hô-hoa un-tián ê tōe, tit-tio̍h gō͘-kak, chiú, iû, iûⁿ-kûn, gû-kûn ê sòe-chiah--ê; in ê sim beh chhin-chhiūⁿ koàn-ak ê hn̂g, lóng bô koh iu-khó͘. 13 Hit-sî chāi-sek-lú beh thiàu-bú lâi hoaⁿ-hí, siàu-liân-lâng lāu-lâng ia̍h beh saⁿ-kap hoaⁿ-hí; in-ūi Góa beh hō͘ in ê pi-ai pìⁿ-chòe hoaⁿ-hí, ia̍h beh an-ùi in, hō͘ in tī iu-būn liáu-āu lâi khoài-lo̍k. 14 Góa beh ēng iû-jī hō͘ chè-si ê sim móa-chiok; Góa ê peh-sìⁿ ia̍h beh in-ūi Góa ê un-hūi móa-ì; che sī Iâ-hô-hoa kóng--ê. 15 Iâ-hô-hoa án-ni kóng, Tī La̍h-má thiaⁿ-kìⁿ siaⁿ, thî-khàu koh tōa siong-pi, La̍h-kiat khàu i ê kiáⁿ-jî, m̄-goān siū an-ùi, in-ūi i ê kiáⁿ bô--khì. 16 Iâ-hô-hoa án-ni kóng, Tio̍h kìm-chí lí ê siaⁿ, bo̍h-tit thî-khàu; kìm-chí lí ê ba̍k-chiu, bo̍h-tit lâu ba̍k-sái; in-ūi lí chòe-kang, beh ū pò-siúⁿ; in beh tùi tùi-te̍k ê kok tò-lâi; che sī Iâ-hô-hoa kóng--ê. 17 Iâ-hô-hoa kóng, Lí ê bé-kéng ū ǹg-bāng, lí ê kiáⁿ-jî beh tò--lâi ka-kī ê kéng-lāi. 18 Góa si̍t-chāi ū thiaⁿ-kìⁿ Í-hoat-liân ka-kī thòng-hūn, kóng, Lí tok-chek góa, góa chiū siū tok-chek; góa chhin-chhiūⁿ kà bē-chiūⁿ-chōa ê gû-á, kiû Lí hō͘ góa oa̍t-tò-tńg, góa chiū oa̍t-tò-tńg; in-ūi Lí sī góa ê Siōng-tè Iâ-hô-hoa. 19 Góa oa̍t-tò-tńg í-āu chiū hoán-hóe; siū kà-sī í-āu, chiū phah kha-thúi; góa chiū kiàn-siàu làu-khùi, in-ūi góa tam-tng siàu-liân ê sî ê lêng-jio̍k. 20 Iâ-hô-hoa kóng, Í-hoat-liân sī Góa thiàⁿ ê kiáⁿ mah? sī thang hoaⁿ-hí ê gín-ná mah? Góa kìⁿ-nā chek-pī i, iáu-kú chhim-chhim siàu-liām i; só͘-í Góa ê sim-tn̂g ūi-tio̍h i bōe pêng-an, Góa tek-khak beh lîn-bín i. 21 Í-sek-lia̍t ê peh-sìⁿ ah, lí tio̍h ūi ka-kī li̍p chí-lō͘-pâi, khiā ín-lō͘-thiāu; lí tio̍h liû-sim ǹg tōa-lō͘, chiū-sī lí só͘ khì ê goân-lō͘; lí tio̍h tò--lâi, tò-lâi tī lí chiah ê siâⁿ. 22 Pōe-biū ê cha-bó͘-gín-ná ah, lí sì-kòe liû bô tiāⁿ-tio̍h, beh kàu tī-sî ah? Iâ-hô-hoa tī tōe-chiūⁿ chhòng chi̍t-hāng sin ê sū, chiū-sī cha-bó͘-lâng beh pó-hō͘ ta-po͘-lâng. 23 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Góa hō͘ siū-lia̍h ê lâng tò--lâi ê sî, tī Iû-tāi tōe kap i hiah ê siâⁿ, lâng beh koh ēng chit ê ōe kóng, Kong-gī ê chhù, sèng ê soaⁿ ah, goān Iâ-hô-hoa sù-hok lí. 24 Iû-tāi kap hiah ê siâⁿ ê lâng í-ki̍p choh-sit lâng, sì-kòe chhī-iûⁿ ê lâng, lóng beh saⁿ-kap khiā-khí tī-hia. 25 In-ūi sim-sîn ià-siān ê lâng, Góa í-keng hō͘ i móa-chiok; sim-sîn iu-būn ê lâng, Góa í-keng hō͘ i ti-chiok. 26 Sian-ti kóng, Góa khùn-chhíⁿ teh siūⁿ, góa ê khùn chin hoaⁿ-hí. 27 Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ Í-sek-lia̍t ke kap Iû-tāi ke, lâng kap cheng-siⁿ, lóng thoân-chéng. 28 Góa chá-chêng cháiⁿ-iūⁿ choan-sim chiong in pu̍ih-chhut, thiah-húi, chhia-tó, bia̍t-bô, khùn-khó͘; ia̍h beh chiàu án-ni choan-sim chiong in kiàn-li̍p, chai-chèng; che sī Iâ-hô-hoa kóng-ê. 29 Tng hiah ê ji̍t, lâng bô koh kóng, Lāu-pē chia̍h sng ê phû-tô, kiáⁿ ê chhùi-khí sng-nńg. 30 Ta̍k-lâng beh in-ūi ka-kī ê chōe lâi sí; kìⁿ-nā chia̍h sng ê phû-tô--ê, in ê chhùi-khí beh nńg. 31 Iâ-hô-hoa kóng, Khòaⁿ ah, ji̍t-chí beh kàu, Góa beh kap Í-sek-lia̍t ke, Iû-tāi ke, li̍p sin ê iok: 32 m̄-sī chiàu Góa kap in ê lia̍t-chó͘ só͘ li̍p ê iok, tī Góa khan in ê chhiú, chhōa in chhut Ai-ki̍p tōe ê sî só͘ li̍p--ê; Góa sui-bóng chòe in ê tiōng-hu, in iû-goân pōe Góa ê iok; che sī Iâ-hô-hoa kóng--ê. 33 Iâ-hô-hoa kóng, Hiah ê ji̍t liáu-āu, Góa kap Í-sek-lia̍t ke só͘ beh li̍p ê iok sī chit-ê; chiū-sī Góa beh ēng Góa ê lu̍t-hoat hē tī in ê sim-lāi, khek tī in ê sim; Góa beh chòe in ê Siōng-tè, in beh chòe Góa ê peh-sìⁿ. 34 In bô koh ta̍k-lâng kà-sī in ê chhù-piⁿ, kap in ta̍k-lâng ê hiaⁿ-tī, kóng, Lín tio̍h bat Iâ-hô-hoa; in-ūi in tùi tōa kàu sòe, lóng beh bat Góa; in-ūi Góa beh sià-bián in ê chōe-kòa, bô koh kì-tit in ê chōe; che sī Iâ-hô-hoa kóng--ê. 35 Iâ-hô-hoa siat thài-iông chòe ji̍t--sî ê kng, siat ge̍h kap chhiⁿ ê tēng-lē chòe mî--sî ê kng; iô-tāng tōa-hái, hō͘ i ê éng hōa-hōa-háu; bān-kun ê Iâ-hô-hoa chiū-sī I ê miâ; 36 I ū án-ni kóng, Chiah ê tēng-lē nā ōe tī Góa ê bīn-chêng hòe-bô, Í-sek-lia̍t ê hō͘-è chiah ōe tī Góa ê bīn-chêng choa̍t-tn̄g, éng-oán bōe chiâⁿ-chòe kok; che sī Iâ-hô-hoa kóng--ê. 37 Iâ-hô-hoa án-ni kóng, Nā tī téng-bīn ê thiⁿ ōe niû--tit, tī ē-bīn ê tōe chiah ê kun-ki ōe chhek-to̍k--tit, chiū Góa tek-khak in-ūi Í-sek-lia̍t ê hō͘-è it-chhè ê só͘-kiâⁿ lâi khì-sak--i; che sī Iâ-hô-hoa kóng--ê. 38 Iâ-hô-hoa kóng, Khòaⁿ ah, ji̍t-chí beh kàu, chit ê siâⁿ beh kā Iâ-hô-hoa khí-chō, tùi Hap-lâm-gia̍p ê lâu, kàu kak-thâu ê mn̂g. 39 Niû ê soh koh khan chhut--khì, ti̍t-kàu Ka-li̍p soaⁿ; oa̍t-tńg kàu Ko-a. 40 Hiat sin-si kap piàⁿ hé-hu ka-nn̂g ê soaⁿ-kok, kap it-chhè ê chhân-hn̂g, ti̍t-kàu Khip-lûn khoe, koh ti̍t-kàu tang--sì Bé ê mn̂g ê kak-thâu, lóng beh chòe-sèng, kui tī Iâ-hô-hoa, bô koh pu̍ih-chhut, bô koh chhia-tó, ti̍t-kàu éng-oán.
1 偤大王Se-tí-ka第十年，就是Nî-pò͘-kah-nî-sat十八年，有耶和華ê話臨到耶利米。 2 Hit時，巴比倫王ê軍隊圍困耶路撒冷，先知耶利米關tī拘留所ê院，tī偤大王ê厝。 3 因為偤大王Se-tí-ka已經將伊關禁，講，你啥事讖語講，耶和華án-ni講，看ah，我beh將chitê城交tī巴比倫王ê手，伊beh取伊； 4 偤大王Se-tí-ka的確bōe脫離Ka-le̍k-tí人ê手，定tio̍h beh交tī巴比倫王ê手，亦beh kap伊講話，嘴對嘴，伊ê目睭亦beh看伊ê目睭， 5 Se-tí-ka beh hō͘伊帶到巴比倫，tòa tī-hia，到我眷顧伊ê時；lín雖然kap Ka-le̍k-tí人交戰，亦無利益？這是耶和華講ê。 6 耶利米講，耶和華ê話臨到我講， 7 看ah，你ê叔Sa-liông ê kiáⁿ Hap-ná-bia̍t beh來見你，講，我tī A-ná-tu̍t hit坵田，請你買伊；因為贖回ê權在tī你，你thang買。 8 我ê叔ê kiáⁿ Hap-ná-bia̍t果然照耶和華ê話來拘留所ê院chhē我，對我講，我tī便雅憫ê境內，A-ná-tu̍t hit坵田，請你買；因為承接kap贖回ê權在tī你，你tio̍h買做你ê；我就知這是耶和華ê話。 9 我就tùi我ê叔ê kiáⁿ，Hap-ná-bia̍t，買A-ná-tu̍t hit坵田，秤(phêng)hitê價銀hō͘伊，共十七sià-khek-le̍k。 10 我tī契面簽名，將契封密；koh請人來做知見，亦用天秤秤銀hō͘伊。 11 我就the̍h照規例所立ê買契，就是封密ê hit張，kap無封ê hit張； 12 當我ê叔ê kiáⁿ Hap-ná-bia̍t，kap簽名tī契面chiahê知見，以及坐tī拘留所院內一切偤大人ê面前，將買賣ê契交hō͘ Má-se-ngá ê孫，Nî-lī-a ê kiáⁿ，Pa-lio̍k。 13 當in面前，我吩咐Pa-lio̍k講， 14 萬軍ê耶和華，以色列ê上帝，án-ni講，Tio̍h將封密ê kap無封ê，chit兩張契，收tī磁器ê內面，thang留存chōe-chōe日。 15 因為萬軍ê耶和華，以色列ê上帝，án-ni講，將來tī chit所在人beh koh買厝宅、田園，kap葡萄園。 16 我將買契交hō͘ Nî-lī-a ê kiáⁿ Pa-lio̍k以後，就祈禱耶和華講， 17 主耶和華ah，你bat用大權能kap伸出ê手，創造天地；在tī你無一項oh成ê事； 18 你施慈愛hō͘千萬人，koh將老父ê罪過報應tī伊後裔ê身上；至大全能ê上帝，萬軍ê耶和華，是祂ê名。 19 你ê計畫有大本事，行tāi-chì有大權能，注目看世間人一切ê行做，照ta̍k人ê所行，kap in ê所做ê效果，來報應伊。 20 Tī埃及地顯出神跡奇事，直到今á日；tī以色列kap別人ê中間，亦是án-ni；hō͘你得tio̍h名聲，親像今á日一樣； 21 用神跡奇事，kap大權能ê手，kap伸出ê手骨，kap大thang驚ê事，chhōa你ê百姓以色列出埃及地； 22 將chitê流奶kap蜜ê地賞賜in，就是祢對in ê列祖chiù-chōa beh hō͘ in ê。 23 In入來得tio̍h伊做業；總是無thàn祢ê話，無行祢ê律法；祢一切命令in行ê，in無行一項；所以祢hō͘ lóng總ê災厄到tī in。 24 看ah，有高ê土堆，in已經逼óa chitê城，beh取伊；城亦因為刀劍、飢荒、瘟疫，交hō͘攻擊伊ê Ka-le̍k-tí人ê手，祢所講ê已經成，祢亦親目看見。 25 主耶和華ah，祢kā我講，tio̍h為家己用銀買田，koh請人做知見；taⁿ chitê城已經交tī Ka-le̍k-tí人ê手lah。 26 耶和華ê話臨到耶利米講， 27 看ah，我是耶和華，是見有血氣ê ê上帝，在tī我kiám有一項oh成ê事？ 28 所以耶和華án-ni講，看ah，我beh將chitê城交hō͘ Ka-le̍k-tí人ê手，kap巴比倫王Nî-pò͘-kah-nî-sat ê手，伊beh取伊。 29 攻城ê Ka-le̍k-tí人beh來，放火燒chitê城，以及厝宅；tī chiahê厝頂，人bat ǹg Pa-le̍k燒香，ǹg別ê上帝灌奠，惹我ê受氣。 30 以色列人kap偤大人，tùi少年以來，專專行我目睭中看做pháiⁿ ê事；以色列人一盡用手所做ê，惹我ê受氣；這是耶和華講ê。 31 Chitê城tùi起造ê日到今á日，常常惹我ê受氣，hō͘我懊惱；致到我kā伊除去離開我ê面前。 32 是因為以色列人kap偤大人一切ê邪惡；就是in kap in ê君王、貴族、祭司、先知，kap偤大ê眾人，以及耶路撒冷khiā起ê百姓，所行ê，惹我ê受氣。 33 In用ka-chiah ǹg我，無用面；我雖然教示in，是早早起來教示in；總是in無聽thàn，來受教示。 34 In竟然用in可惡ê物，hē tī用我ê名所稱ê厝，來phah lâ-sâm伊。 35 In tī Piān-him-lùn ê山谷起Pa-le̍k ê高台，beh hō͘ in ê kiáⁿ cha-bó͘-kiáⁿ經過火歸Mô͘-lo̍k；in行這可惡ê事，hō͘偤大陷落罪；這m̄是我所命令ê，亦m̄是我ê心所想ê。 36 Taⁿ論到chitê城，是lín所講已經因為刀劍、飢荒、瘟疫，交tī巴比倫王ê手ê；以色列ê上帝耶和華án-ni講： 37 看ah，我tī受氣、懊惱、大受氣ê中間，將in趕到ta̍k國，後來我beh tùi-hia招集in出來，chhōa in tò來chit所在，hō͘ in安然khiā起。 38 In beh做我ê百姓，我beh做in ê上帝。 39 我beh hō͘ in一心一路，hō͘ in常常敬畏我，hō͘ in kap in ê kiáⁿ孫得tio̍h福氣。 40 我beh kap in立永遠ê約，就是無oa̍t-tńg離開in，是beh賜福hō͘ in；koh hō͘ in存心敬畏我，無oa̍t-tńg離開我。 41 我beh歡喜in，賜福hō͘ in，我實在beh盡心盡意，栽培in tī chitê所在。 42 因為耶和華án-ni講，我怎樣hō͘ chitê一切大ê災厄臨到chitê百姓，我亦beh án-ni hō͘我所應允in一切ê福氣臨到in。 43 Lín講，chitê所在是拋荒，無人，無cheng-siⁿ；是交hō͘ Ka-le̍k-tí人ê手ê；將來人beh koh tī chit所在買田園。 44 Tī便雅憫地，tī耶路撒冷ê四圍，tī偤大chiahê城，tī山地chiahê城，tī平洋chiahê城，kap tī南方chiahê城，人beh用銀買田，tī 契面簽名，將契封密，請人做知見；因為我beh hō͘受掠ê人tò來；這是耶和華講ê。
1 Iû-tāi ông Se-tí-ka tē cha̍p--nî, chiū-sī Nî-pò͘-kah-nî-sat cha̍p-poeh nî, ū Iâ-hô-hoa ê ōe lîm-kàu Iâ-lī-bí. 2 Hit-sî Pa-pí-lûn ông ê kun-tūi ûi-khùn Iâ-lō͘-sat-léng, sian-ti Iâ-lī-bí koaiⁿ tī khu-liû-só͘ ê īⁿ, tī Iû-tāi ông ê chhù. 3 In-ūi Iû-tāi ông Se-tí-ka í-keng chiong i koaiⁿ-kìm, kóng, Lí siáⁿ-sū chhàm-gú kóng, Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau tī Pa-pí-lûn ông ê chhiú, i beh chhú--i; 4 Iû-tāi ông Se-tí-ka tek-khak bōe thoat-lī Ka-le̍k-tí lâng ê chhiú, tiāⁿ-tio̍h beh kau tī Pa-pí-lûn ông ê chhiú, ia̍h beh kap i kóng ōe, chhùi tùi chhùi, i ê ba̍k-chiu ia̍h beh khòaⁿ i ê ba̍k-chiu, 5 Se-tí-ka beh hō͘ i tòa kàu Pa-pí-lûn, tòa tī-hia, kàu Góa koàn-kò͘ i ê sî; lín sui-jiân kap Ka-le̍k-tí lâng kau-chiàn, ia̍h bô lī-ek? che sī Iâ-hô-hoa kóng--ê. 6 Iâ-lī-bí kóng, Iâ-hô-hoa ê ōe lîm-kàu góa kóng, 7 Khòaⁿ ah, lí ê chek Sa-liông ê kiáⁿ Hap-ná-bia̍t beh lâi kìⁿ lí, kóng, Góa tī A-ná-tu̍t hit khu chhân, chhiáⁿ lí bóe--i; in-ūi sio̍k-hôe ê koân chāi-tī lí, lí thang bóe. 8 Góa ê chek ê kiáⁿ Hap-ná-bia̍t kó-jiân chiàu Iâ-hô-hoa ê ōe lâi khu-liû-só͘ ê īⁿ chhē góa, tùi góa kóng, Góa tī Piān-ngá-bín ê kéng-lāi, A-ná-tu̍t hit khu chhân, chhiáⁿ lí bóe; in-ūi sêng-chiap kap sio̍k-hôe ê koân chāi-tī lí, lí tio̍h bóe chòe lí-ê; góa chiū chai che sī Iâ-hô-hoa ê ōe. 9 Góa chiū tùi góa ê chek ê kiáⁿ, Hap-ná-bia̍t, bóe A-ná-tu̍t hit khu chhân, phêng hit ê kè-gûn hō͘ i, kiōng cha̍p-chhit sià-khek-le̍k. 10 Góa tī khòe-bīn chhiam miâ, chiong khòe hong-ba̍t; koh chhiáⁿ lâng lâi chòe ti-kìⁿ, ia̍h ēng thian-phêng phêng gûn hō͘ i. 11 Góa chiū the̍h chiàu kui-lē só͘ li̍p ê bóe-khòe, chiū-sī hong-ba̍t--ê hit-tiuⁿ, kap bô hong--ê hit-tiuⁿ; 12 tng góa ê chek ê kiáⁿ Hap-ná-bia̍t, kap chhiam-miâ tī khòe-bīn chiah ê ti-kìⁿ, í-ki̍p chē tī khu-liû-só͘ īⁿ-lāi it-chhè Iû-tāi lâng ê bīn-chêng, chiong bóe-bōe ê khòe kau hō͘ Má-se-ngá ê sun, Nî-lī-a ê kiáⁿ, Pa-lio̍k. 13 Tng in bīn-chêng, góa hoan-hù Pa-lio̍k kóng, 14 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Tio̍h chiong hong-ba̍t--ê kap bô hong--ê, chí(**chit) nn̄g tiuⁿ khòe, siu tī hûi-khì ê lāi-bīn, thang liû-chûn chōe-chōe ji̍t. 15 In-ūi bān-kun ê Iâ-hô-hoa, Í-sek-lia̍t ê Siōng-tè, án-ni kóng, Chiong-lâi tī chit só͘-chāi lâng beh koh bóe chhù-the̍h, chhân-hn̂g, kap phû-tô-hn̂g. 16 Góa chiong bóe-khòe kau hō͘ Nî-lī-a ê kiáⁿ Pa-lio̍k í-āu, chiū kî-tó Iâ-hô-hoa kóng, 17 Chú Iâ-hô-hoa ah, Lí bat ēng tōa koân-lêng kap chhun-chhut ê chhiú, chhòng-chō thiⁿ tōe; chāi-tī Lí bô chi̍t-hāng oh-chiâⁿ ê sū; 18 Lí si chû-ài hō͘ chheng-bān lâng, koh chiong lāu-pē ê chōe-kòa pò-èng tī i hō͘-è ê sin-chiūⁿ; chì-tōa choân-lêng ê Siōng-tè, bān-kun ê Iâ-hô-hoa, sī I ê miâ. 19 Lí ê kè-e̍k ū tōa pún-sū, kiâⁿ tāi-chì ū tōa koân-lêng, chù-ba̍k khòaⁿ sè-kan lâng it-chhè ê kiâⁿ-chòe, chiàu ta̍k-lâng ê só͘-kiâⁿ, kap in ê só͘-chòe ê hāu-kó, lâi pò-èng i. 20 Tī Ai-ki̍p tōe hián-chhut sîn-jiah kî-sū, ti̍t-kàu kin-á-ji̍t; tī Í-sek-lia̍t kap pa̍t-lâng ê tiong-kan, ia̍h sī án-ni; hō͘ Lí tit-tio̍h miâ-siaⁿ, chhin-chhiūⁿ kin-á-ji̍t chi̍t-iūⁿ; 21 ēng sîn-jiah kî-sū, kap tōa koân-lêng ê chhiú, kap chhun-chhut ê chhiú-kut, kap tōa thang kiaⁿ ê sū, chhōa Lí ê peh-sìⁿ Í-sek-lia̍t chhut Ai-ki̍p tōe; 22 chiong chit ê lâu ni kap bi̍t ê tōe siúⁿ-sù in, chiū-sī Lí tùi in ê lia̍t-chó͘ chiù-chōa beh hō͘ in ê. 23 In ji̍p--lâi tit-tio̍h i chòe-gia̍p; chóng-sī bô thàn Lí ê ōe, bô kiâⁿ Lí ê lu̍t-hoat; Lí it-chhè bēng-lēng in kiâⁿ--ê, in bô kiâⁿ chi̍t-hāng; só͘-í Lí hō͘ lóng-chóng ê chai-ē kàu tī in. 24 Khòaⁿ ah, ū koâiⁿ ê thô͘-tui, in í-keng pek-óa chit ê siâⁿ, beh chhú--i; siâⁿ ia̍h in-ūi to-kiàm, ki-hng, un-e̍k, kau hō͘ kong-kek i ê Ka-le̍k-tí lâng ê chhiú, Lí só͘ kóng--ê í-keng chiâⁿ, Lí ia̍h chhin-ba̍k khòaⁿ-kìⁿ. 25 Chú Iâ-hô-hoa ah, Lí kā góa kóng, tio̍h ūi ka-kī ēng gûn bóe chhân, koh chhiáⁿ lâng chòe ti-kìⁿ; taⁿ chit ê siâⁿ í-keng kau tī Ka-le̍k-tí lâng ê chhiú lah. 26 Iâ-hô-hoa ê ōe lîm-kàu Iâ-lī-bí kóng, 27 Khòaⁿ ah, Góa sī Iâ-hô-hoa, sī kìⁿ-ū hiat-khì--ê ê Siōng-tè, chāi-tī Góa kiám ū chi̍t-hāng oh-chiâⁿ ê sū? 28 Só͘-í Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau hō͘ Ka-le̍k-tí lâng ê chhiú, kap Pa-pí-lûn ông Nî-pò͘-kah-nî-sat ê chhiú, i beh chhú--i. 29 Kong siâⁿ ê Ka-le̍k-tí lâng beh lâi, pàng hé sio chit ê siâⁿ, í-ki̍p chhù-the̍h; tī chiah ê chhù-téng, lâng bat ǹg Pa-le̍k sio-hiuⁿ, ǹg pa̍t ê siōng-tè koàn-tiān, jiá Góa ê siū-khì. 30 Í-sek-lia̍t lâng kap Iû-tāi lâng, tùi siàu-liân í-lâi, choan-choan kiâⁿ Góa ba̍k-chiu-tiong khòaⁿ-chòe pháiⁿ ê sū; Í-sek-lia̍t lâng it-chīn ēng chhiú só͘ chòe--ê, jiá Góa ê siū-khì; che sī Iâ-hô-hoa kóng--ê. 31 Chit ê siâⁿ tùi khí-chō ê ji̍t kàu kin-á-ji̍t, siông-siông jiá Góa ê siū-khì, hō͘ Góa àu-náu; tì-kàu Góa kā i tû--khì lī-khui Góa ê bīn-chêng. 32 Sī in-ūi Í-sek-lia̍t lâng kap Iû-tāi lâng it-chhè ê siâ-ok; chiū-sī in kap in ê kun-ông, kùi-cho̍k, chè-si, sian-ti, kap Iû-tāi ê chèng-lâng, í-ki̍p Iâ-lō͘-sat-léng khiā-khí ê peh-sìⁿ, só͘ kiâⁿ--ê, jiá Góa ê siū-khì. 33 In ēng ka-chiah ǹg Góa, bô ēng bīn; Góa sui-jiân kà-sī in, sī chá-chá khí-lâi kà-sī in; chóng-sī in bô thiaⁿ-thàn, lâi siū kà-sī. 34 In kéng-jiân ēng in khó-ò͘ⁿ ê mi̍h, hē tī ēng Góa ê miâ só͘ chheng ê chhù, lâi phah lâ-sâm--i. 35 In tī Piān-him-lùn ê soaⁿ-kok khí Pa-le̍k ê koâiⁿ-tâi, beh hō͘ in ê kiáⁿ cha-bó͘-kiáⁿ keng-kè hé kui Mô͘-lo̍k; in kiâⁿ che khó-ò͘ⁿ ê sū, hō͘ Iû-tāi hām-lo̍h chōe; che m̄-sī Góa só͘ bēng-lēng--ê, ia̍h m̄-sī Góa ê sim só͘ siūⁿ--ê. 36 Taⁿ lūn-kàu chit ê siâⁿ, sī lín só͘ kóng í-keng in-ūi to-kiàm, ki-hng, un-e̍k, kau tī Pa-pí-lûn ông ê chhiú--ê; Í-sek-lia̍t ê Siōng-tè Iâ-hô-hoa án-ni kóng: 37 Khòaⁿ ah, Góa tī siū-khì, àu-náu, tōa siū-khì ê tiong-kan, chiong in kóaⁿ kàu ta̍k-kok, āu-lâi Góa beh tùi-hia chio-chi̍p in chhut--lâi, chhōa in tò-lâi chit só͘-chāi, hō͘ in an-jiân khiā-khí. 38 In beh chòe Góa ê peh-sìⁿ, Góa beh chòe in ê Siōng-tè. 39 Góa beh hō͘ in it-sim it-lō͘, hō͘ in siông-siông kèng-ùi Góa, hō͘ in kap in ê kiáⁿ-sun tit-tio̍h hok-khì. 40 Góa beh kap in li̍p éng-oán ê iok, chiū-sī bô oa̍t-tńg lī-khui in, sī beh sù-hok hō͘ in; koh hō͘ in chûn-sim kèng-ùi Góa, bô oa̍t-tńg lī-khui Góa. 41 Góa beh hoaⁿ-hí in, sù-hok hō͘ in, Góa si̍t-chāi beh chīn-sim chīn-ì, chai-pôe in tī chit ê só͘-chāi. 42 In-ūi Iâ-hô-hoa án-ni kóng, Góa cháiⁿ-iūⁿ hō͘ chit-ê it-chhè tōa ê chai-ē lîm-kàu chit ê peh-sìⁿ, Góa ia̍h beh án-ni hō͘ Góa só͘ èng-ún in it-chhè ê hok-khì lîm-kàu in. 43 Lín kóng, Chit ê só͘-chāi sī pha-hng, bô lâng, bô cheng-siⁿ; sī kau hō͘ Ka-le̍k-tí lâng ê chhiú--ê; chiong-lâi lâng beh koh tī chit só͘-chāi bóe chhân-hn̂g. 44 Tī Piān-ngá-bín tōe, tī Iâ-lō͘-sat-léng ê sì-ûi, tī Iû-tāi chiah ê siâⁿ, tī soaⁿ-tōe chiah ê siâⁿ, tī pîⁿ-iûⁿ chiah ê siâⁿ, kap tī lâm-hng chiah ê siâⁿ, lâng beh ēng gûn bóe-chhân, tī khòe-bīn chhiam-miâ, chiong khòe hong-ba̍t, chhiáⁿ lâng chòe ti-kìⁿ; in-ūi Góa beh hō͘ siū-lia̍h ê lâng tò--lâi; che sī Iâ-hô-hoa kóng--ê.
1 耶利米iáu-kú關tī拘留所ê院內，耶和華ê話第二pái臨到伊講， 2 行伊ê ê耶和華，計畫來建立伊ê ê耶和華是祂ê名，祂án-ni講， 3 你求我，我就應你，亦將你所m̄知，大koh oh得ê事，指示你。 4 論到chitê城內ê厝，kap偤大王ê厝，就是拆毀來抵擋對敵ê土堆，kap抵擋刀劍ê； 5 以色列ê上帝耶和華án-ni講，人beh來kap Ka-le̍k-tí人交戰，不過是hō͘身屍充滿chiahê厝，就是我tī受氣kap大受氣ê中間所刣死ê人，因為in一切ê pháiⁿ，我就掩我ê面，m̄看chitê城。 6 看ah，我beh hō͘伊ê傷復原，koh用好藥醫好伊；koh將豐盛ê平安kap誠實顯明tī in。 7 我亦beh hō͘偤大受掠ê，kap以色列受掠ê，倒tńg來；koh建立in親像起頭。 8 我beh洗除in一切干犯我ê罪；我亦beh赦免in一切干犯我，背叛我chiahê罪。 9 Chitê城beh tī萬國kā我做歡喜ê名，做o-ló，做榮光；因為萬國聽見我所賞賜tī in一切ê福氣，也為tio̍h我所賞賜一切ê福氣kap平安，beh驚惶ngia̍uh-ngia̍uh-chhoah。 10 耶和華án-ni講，Lín論到chitê地方有講，是拋荒，無人，無cheng-siⁿ ê地方；總是tī chit所在以及拋荒，無人，無人煙，無cheng-siⁿ ê偤大chiahê城，kap耶路撒冷ê街市， 11 beh koh聽見有歡喜ê聲，快樂ê聲，新kiáⁿ婿ê聲，新娘ê聲；亦有人ê聲，就是hiahê帶謝恩ê祭到耶和華ê厝ê，teh講，Tio̍h感謝萬軍ê耶和華，因為耶和華是好，伊ê慈愛永遠tī-teh；因為我beh hō͘ chit所在受掠ê人倒tńg來，親像起頭一樣；這是耶和華講ê。 12 萬軍ê耶和華án-ni講，Tī chitê拋荒，無人，無cheng-siⁿ ê地方，kap其中所有ê城，beh koh有牧者khiā起，hō͘ in ê羊群倒tī-hia。 13 Tī山地chiahê城，平洋chiahê城，南方chiahê城，便雅憫、耶路撒冷ê周圍，kap偤大chiahê城，beh koh有羊群經過算ê人ê手；這是耶和華講ê。 14 耶和華講，看ah，日子beh到，我應允以色列家kap偤大家ê好話，我beh hō͘伊成。 15 當hit日hit時，我beh kā大衛發生義ê枝，伊beh tī地上行公平kap公義。 16 Tī hit日偤大beh得tio̍h救，耶路撒冷beh安然khiā起；伊ê名beh稱做，耶和華咱ê義。 17 因為耶和華án-ni講，大衛beh永遠有人坐以色列ê寶座。 18 祭司，利未人，亦永遠有人獻燒祭禮物；常常辦理獻祭ê事tī我ê面前。 19 耶和華ê話臨到耶利米講， 20 耶和華án-ni講，Lín若會廢無我所立日時ê約，暝時ê約，hō͘日暝無照in ê時； 21 就會廢無我kap我ê奴僕大衛所立ê約，hō͘伊無有kiáⁿ tī伊ê寶座做王；亦會廢無我kap服事我ê祭司利未人所立ê約。 22 天ê象bōe算得，海ê沙bōe量得，我beh照án-ni hō͘我ê奴僕大衛ê後裔，kap服事我ê利未人，加添chōe-chōe。 23 耶和華ê話koh臨到耶利米講， 24 Chiahê百姓所講ê話，你無聽見mah？in講，耶和華所揀ê兩族，祂已經棄絕伊，in án-ni看輕我ê百姓，掠做bōe koh成國 tī in ê面前。 25 耶和華án-ni講，我所立日時暝時ê約若會無去，我若無設天地ê定例； 26 我就會棄sak雅各kap我ê奴僕大衛ê後裔致到無對伊ê後裔取人治理亞伯拉罕，以撒，雅各ê後裔。因為我beh hō͘ in受掠ê人tò來，亦beh憐憫in。
1 Iâ-lī-bí iáu-kú koaiⁿ tī khu-liû-só͘ ê īⁿ-lāi, Iâ-hô-hoa ê ōe tē-jī-pái lîm-kàu i kóng, 2 Kiâⁿ i--ê ê Iâ-hô-hoa, kè-e̍k lâi kiàn-li̍p i--ê ê Iâ-hô-hoa sī I ê miâ, I án-ni kóng, 3 Lí kiû Góa, Góa chiū ìn lí, ia̍h chiong lí só͘ m̄-chai, tōa koh oh-tit ê sū, chí-sī lí. 4 Lūn-kàu chit ê siâⁿ-lāi ê chhù, kap Iû-tāi ông ê chhù, chiū-sī thiah-húi lâi tí-tng tùi-te̍k ê thô͘-tui, kap tí-tng to-kiàm--ê; 5 Í-sek-lia̍t ê Siōng-tè Iâ-hô-hoa án-ni kóng, Lâng beh lâi kap Ka-le̍k-tí lâng kau-chiàn, put-kò sī hō͘ sin-si chhiong-móa chiah ê chhù, chiū-sī Góa tī siū-khì kap tōa siū-khì ê tiong-kan só͘ thâi-sí ê lâng, in-ūi in it-chhè ê pháiⁿ, Góa chiū ng Góa ê bīn, m̄-khòaⁿ chit ê siâⁿ. 6 Khòaⁿ ah, Góa beh hō͘ i ê siong ho̍k-goân, koh ēng hó-io̍h i-hó--i; koh chiong hong-sēng ê pêng-an kap sêng-si̍t hián-bêng tī in. 7 Góa ia̍h beh hō͘ Iû-tāi siū-lia̍h--ê, kap Í-sek-lia̍t siū-lia̍h--ê, tò-tńg lâi; koh kiàn-li̍p in chhin-chhiūⁿ khí-thâu. 8 Góa beh sóe-tû in it-chhè kan-hoān Góa ê chōe; Góa ia̍h beh sià-bián in it-chhè kan-hoān Góa, pōe-poān Góa chiah ê chōe. 9 Chit ê siâⁿ beh tī bān-kok kā Góa chòe hoaⁿ-hí ê miâ, chòe o-ló, chòe êng-kng; in-ūi bān-kok thiaⁿ-kìⁿ Góa só͘ siúⁿ-sù tī in it-chhè ê hok-khì, iā ūi-tio̍h Góa só͘ siúⁿ-sù it-chhè ê hok-khì kap pêng-an, beh kiaⁿ-hiâⁿ ngia̍uh-ngia̍uh-chhoah. 10 Iâ-hô-hoa án-ni kóng, Lín lūn-kàu chit ê tōe-hng ū kóng, Sī pha-hng, bô lâng, bô cheng-siⁿ ê tōe-hng; chóng-sī tī chit só͘-chāi í-ki̍p pha-hng, bô lâng, bô jîn-ian, bô cheng-siⁿ ê Iû-tāi chiah ê siâⁿ, kap Iâ-lō͘-sat-léng ê koe-chhī, 11 beh koh thiaⁿ-kìⁿ ū hoaⁿ-hí ê siaⁿ, khoài-lo̍k ê siaⁿ, sin-kiáⁿ-sài ê siaⁿ, sin-niû ê siaⁿ; ia̍h ū lâng ê siaⁿ, chiū-sī hiah ê tòa siā-un ê chè kàu Iâ-hô-hoa ê chhù--ê, teh kóng, Tio̍h kám-siā bān-kun ê Iâ-hô-hoa, in-ūi Iâ-hô-hoa sī hó, I ê chû-ài éng-oán tī-teh; in-ūi Góa beh hō͘ chit só͘-chāi siū-lia̍h ê lâng tò-tńg--lâi, chhin-chhiūⁿ khí-thâu chi̍t-iūⁿ; che sī Iâ-hô-hoa kóng--ê. 12 Bān-kun ê Iâ-hô-hoa án-ni kóng, Tī chit ê pha-hng, bô lâng, bô cheng-siⁿ ê tōe-hng, kap kî-tiong só͘ ū ê siâⁿ, beh koh ū bo̍k-chiá khiā-khí, hō͘ in ê iûⁿ-kûn tó tī-hia. 13 Tī soaⁿ-tōe chiah ê siâⁿ, pîⁿ-iûⁿ chiah ê siâⁿ, lâm-hng chiah ê siâⁿ, Piān-ngá-bín, Iâ-lō͘-sat-léng ê chiu-ûi, kap Iû-tāi chiah ê siâⁿ, beh koh ū iûⁿ-kûn keng-kè sǹg ê lâng ê chhiú; che sī Iâ-hô-hoa kóng--ê. 14 Iâ-hô-hoa kóng, Khòaⁿ ah, ji̍t-chí beh kàu, Góa èng-ún Í-sek-lia̍t-ke kap Iû-tāi-ke ê hó-ōe, Góa beh hō͘ i chiâⁿ. 15 Tng hit-ji̍t hit-sî Góa beh kā Tāi-pi̍t hoat-siⁿ gī ê Ki, I beh tī tōe-chiūⁿ kiâⁿ kong-pêng kap kong-gī. 16 Tī hit-ji̍t Iû-tāi beh tit-tio̍h kiù, Iâ-lō͘-sat-léng beh an-jiân khiā-khí; i ê miâ beh chheng-chòe, Iâ-hô-hoa lán ê gī. 17 In-ūi Iâ-hô-hoa án-ni kóng, Tāi-pi̍t beh éng-oán ū lâng chē Í-sek-lia̍t ê pó-chō. 18 Chè-si, Lī-bī lâng, ia̍h éng-oán ū lâng hiàn sio-chè lé-mi̍h; siông-siông pān-lí hiàn-chè ê sū tī Góa ê bīn-chêng. 19 Iâ-hô-hoa ê ōe lîm-kàu Iâ-lī-bí kóng, 20 Iâ-hô-hoa án-ni kóng, Lín nā ōe hòe-bô Góa só͘ li̍p ji̍t--sî ê iok, mî--sî ê iok, hō͘ ji̍t-mî bô chiàu in ê sî; 21 chiū ōe hòe-bô Góa kap Góa ê lô͘-po̍k Tāi-pi̍t só͘ li̍p ê iok, hō͘ i bô ū kiáⁿ tī i ê pó-chō chòe ông; ia̍h ōe hòe-bô Góa kap ho̍k-sāi Góa ê chè-si Lī-bī lâng só͘ li̍p ê iok. 22 Thiⁿ ê siōng bōe sǹg--tit, hái ê soa bōe niû--tit, Góa beh chiàu án-ni hō͘ Góa ê lô͘-po̍k Tāi-pi̍t ê hō͘-è, kap ho̍k-sāi Góa ê Lī-bī lâng, ke-thiⁿ chōe-chōe. 23 Iâ-hô-hoa ê ōe koh lîm-kàu Iâ-lī-bí kóng, 24 Chiah ê peh-sìⁿ só͘ kóng ê ōe, lí bô thiaⁿ-kìⁿ mah? in kóng, Iâ-hô-hoa só͘ kéng ê nn̄g-cho̍k, I í-keng khì-choa̍t--i, in án-ni khòaⁿ-khin Góa ê peh-sìⁿ, lia̍h-chòe bōe koh chiâⁿ kok tī in ê bīn-chêng. 25 Iâ-hô-hoa án-ni kóng, Góa só͘ li̍p ji̍t--sî mî--sî ê iok nā ōe bô--khì, Góa nā bô siat thiⁿ-tōe ê tēng-lē; 26 Góa chiū ōe khì-sak Ngá-kok kap Góa ê lô͘-po̍k Tāi-pi̍t ê hō͘-è tì-kàu bô tùi i ê hō͘-è chhú lâng tī-lí A-pek-la̍h-hán, Í-sat, Ngá-kok ê hō͘-è. In-ūi Góa beh hō͘ in siū-lia̍h ê lâng tò-lâi, ia̍h beh lîn-bín in.
1 巴比倫王Nî-pò͘-kah-nî-sat chhōa伊lóng總ê軍兵，kap伊所管地上ê萬國ta̍k族，來攻擊耶路撒冷，以及hiahê屬伊ê城；hit時耶和華ê話臨到耶利米講， 2 耶和華以色列ê上帝án-ni講，你tio̍h去kā偤大王Se-tí-ka講，耶和華án-ni講，看ah，我beh將chitê城交tī巴比倫王ê手，伊beh用火燒伊。 3 你bōe能脫離伊ê手，的確受掠，交tī伊ê手頭，你ê目睭beh看巴比倫王ê目睭，伊beh kap你嘴對嘴講話，你亦beh到巴比倫。 4 偤大王Se-tí-ka ah，你iáu-kú tio̍h聽耶和華ê話。耶和華論到你án-ni講，你的確無hō͘刀劍刣死；你beh平安過世； 5 人beh為你燒芳ê物，親像為tio̍h你ê列祖，就是你以前ê先王所燒ê一樣。人beh為tio̍h你哀傷，講，慘ah，我ê主ah。耶和華講，chitê話我已經講伊lah。 6 Tùi án-ni，先知耶利米tī耶路撒冷將這一切ê話kā偤大王Se-tí-ka講。 7 Hit時巴比倫王ê軍兵teh攻擊耶路撒冷，koh攻擊偤大所chhun ê城，就是拉結kap A-se-ka；因為偤大堅固ê城，只有chhun chiahê。 8 耶和華ê話koh臨到耶利米。 9 是因為Se-tí-ka王kap耶路撒冷ê眾百姓立約，kā in宣佈tháu放；就是ta̍k人tio̍h tháu放伊ê奴僕女婢，凡若希伯來ê男女，hō͘ in自由，無人thang koh用伊ê兄弟偤大人做奴僕。 10 有份chitê約ê貴族kap眾百姓，聽見ta̍k人tio̍h tháu放伊ê奴僕女婢，hō͘伊自由，無koh用伊做差用，in就遵thàn來tháu放。 11 後來就退悔，hō͘ in所tháu放自由ê奴僕女婢tò來，勉強in猶原做奴僕女婢。 12 因為án-ni，耶和華ê話tùi耶和華臨到耶利米，講， 13 耶和華以色列ê上帝án-ni講，我chhōa lín ê列祖tùi埃及地做奴才ê家出來ê日，kap in立約，講， 14 到第七年，lín tio̍h ta̍k人tháu放伊ê兄弟希伯來人，賣hō͘你ê；伊已經服事你六年，你tio̍h tháu放伊，離開你來自由；總是lín ê列祖m̄聽我，亦無俯耳孔。 15 Taⁿ lín已經改變，行我所看做正直ê事；ta̍k人tùi厝邊宣佈tháu放，koh tī用我ê名來稱 ê厝，tī我ê面前立約。 16 總是lín又koh退悔，褻瀆我ê名，ta̍k人hō͘所tháu放得tio̍h自由ê奴僕女婢倒tńg，勉強in猶原做lín ê奴僕女婢。 17 所以耶和華án-ni講，Lín無聽thàn我，ta̍k人對伊ê兄弟，對伊ê厝邊宣傳tháu放，看ah，我對lín宣傳tháu放hō͘刀劍、瘟疫、飢荒，koh hō͘ lín流落tī天下萬國中；這是耶和華講ê。 18 見若背我ê約，無thàn hitê約ê話，就是破開牛á來經過hit中間ê時，tī我ê面前所立ê； 19 就是偤大ê貴族，耶路撒冷ê貴族，以及太監、祭司，境內眾百姓，見若tùi破開ê牛á ê中間經過ê； 20 我beh將in交tī in ê對敵ê手，kap siàu想in ê性命ê人ê手；in ê身屍beh hō͘空中ê飛鳥kap地上ê野獸做食物。 21 Koh我beh將偤大王Se-tí-ka kap伊ê貴族交tī in ê對敵ê手，kap siàu想伊ê性命ê人ê手；亦交tī巴比倫王軍兵ê手，就是離開lín去ê。 22 耶和華講，我beh命令in，hō͘ in koh來chitê城；in beh攻擊伊，取伊，用火燒伊；我亦beh hō͘偤大chiahê城拋荒，無人khiā起。
1 Pa-pí-lûn ông Nî-pò͘-kah-nî-sat chhōa i lóng-chóng ê kun-peng, kap i só͘ koán tōe-chiūⁿ ê bān-kok ta̍k-cho̍k, lâi kong-kek Iâ-lō͘-sat-léng, í-ki̍p hiah-ê sio̍k--i ê siâⁿ; hit-sî Iâ-hô-hoa ê ōe lîm-kàu Iâ-lī-bí kóng, 2 Iâ-hô-hoa Í-sek-lia̍t ê Siōng-tè án-ni kóng, Lí tio̍h khì kā Iû-tāi ông Se-tí-ka kóng, Iâ-hô-hoa án-ni kóng, Khòaⁿ ah, Góa beh chiong chit ê siâⁿ kau tī Pa-pí-lûn ông ê chhiú, i beh ēng hé sio--i. 3 Lí bōe-ōe thoat-lī i ê chhiú, tek-khak siū lia̍h, kau tī i ê chhiú-thâu, lí ê ba̍k-chiu beh khòaⁿ Pa-pí-lûn ông ê ba̍k-chiu, i beh kap lí chhùi tùi chhùi kóng-ōe, lí ia̍h beh kàu Pa-pí-lûn. 4 Iû-tāi ông Se-tí-ka ah, Lí iáu-kú tio̍h thiaⁿ Iâ-hô-hoa ê ōe. Iâ-hô-hoa lūn-kàu lí án-ni kóng, Lí tek-khak bô hō͘ to-kiàm thâi-sí; lí beh pêng-an kè-sì; 5 lâng beh ūi lí sio phang ê mi̍h, chhin-chhiūⁿ ūi-tio̍h lí ê lia̍t-chó͘, chiū-sī lí í-chêng ê sian-ông só͘ sio--ê chi̍t-iūⁿ. Lâng beh ūi-tio̍h lí ai-siong, kóng, Chhám ah, góa ê chú ah. Iâ-hô-hoa kóng, Chit ê ōe Góa í-keng kóng--i lah. 6 Tùi án-ni, sian-ti Iâ-lī-bí tī Iâ-lō͘-sat-léng chiong che it-chhè ê ōe kā Iû-tāi ông Se-tí-ka kóng. 7 Hit-sî Pa-pí-lûn ông ê kun-peng teh kong-kek Iâ-lō͘-sat-léng, koh kong-kek Iû-tāi só͘ chhun ê siâⁿ, chiū-sī La̍h-kiat kap A-se-ka; in-ūi Iû-tāi kian-kò͘ ê siâⁿ, chí ū chhun chiah-ê. 8 Iâ-hô-hoa ê ōe koh lîm-kàu Iâ-lī-bí. 9 Sī in-ūi Se-tí-ka ông kap Iâ-lō͘-sat-léng ê chèng peh-sìⁿ li̍p-iok, kā in soan-pò͘ tháu-pàng; chiū-sī ta̍k-lâng tio̍h tháu-pàng i ê lô͘-po̍k lú-pī, hoān-nā Hi-pek-lâi ê lâm-lú, hō͘ in chū-iû, bô lâng thang koh ēng i ê hiaⁿ-tī Iû-tāi lâng chòe lô͘-po̍k. 10 Ū hūn chit ê iok ê kùi-cho̍k kap chèng peh-sìⁿ, thiaⁿ-kìⁿ ta̍k-lâng tio̍h tháu-pàng i ê lô͘-po̍k lú-pī, hō͘ i chū-iû, bô koh ēng i chòe chhe-ēng, in chiū chun-thàn lâi tháu-pàng. 11 Āu-lâi chiū thè-hóe, hō͘ in só͘ tháu-pàng chū-iû ê lô͘-po̍k lú-pī tò--lâi, bián-kióng in iû-goân chòe lô͘-po̍k lú-pī. 12 In-ūi án-ni, Iâ-hô-hoa ê ōe tùi Iâ-hô-hoa lîm-kàu Iâ-lī-bí, kóng, 13 Iâ-hô-hoa Í-sek-lia̍t ê Siōng-tè án-ni kóng, Góa chhōa lín ê lia̍t-chó͘ tùi Ai-ki̍p tōe chòe lô͘-châi ê ke chhut-lâi ê ji̍t, kap in li̍p-iok, kóng, 14 Kàu tē chhit nî, lín tio̍h ta̍k-lâng tháu-pàng i ê hiaⁿ-tī Hi-pek-lâi lâng, bōe hō͘ lí--ê; i í-keng ho̍k-sāi lí la̍k-nî, lí tio̍h tháu-pàng--i, lī-khui lí lâi chū-iû; chóng-sī lín ê lia̍t-chó͘ m̄-thiaⁿ Góa, ia̍h bô àⁿ hī-khang. 15 Taⁿ lín í-keng kóe-pìⁿ, kiâⁿ Góa só͘ khòaⁿ chòe chèng-ti̍t ê sū; ta̍k-lâng tùi chhù-piⁿ soan-pò͘ tháu-pàng, koh tī ēng Góa ê miâ lâi chheng ê chhù, tī Góa ê bīn-chêng li̍p-iok. 16 Chóng-sī lín iū-koh thè-hóe, siat-to̍k Góa ê miâ, ta̍k-lâng hō͘ só͘ tháu-pàng tit-tio̍h chū-iû ê lô͘-po̍k lú-pī tò-tńg, bián-kióng in iû-goân chòe lín ê lô͘-po̍k lú-pī. 17 Só͘-í Iâ-hô-hoa án-ni kóng, Lín bô thiaⁿ-thàn Góa, ta̍k-lâng tùi i ê hiaⁿ-tī, tùi i ê chhù-piⁿ soan-thoân tháu-pàng, khòaⁿ ah, Góa tùi lín soan-thoân tháu-pàng hō͘ to-kiàm, un-e̍k, ki-hng, koh hō͘ lín liû-lo̍h tī thiⁿ-ē bān-kok tiong; che sī Iâ-hô-hoa kóng-ê. 18 Kìⁿ-nā pōe Góa ê iok, bô thàn hit ê iok ê ōe, chiū-sī phòa-khui gû-á lâi keng-kè hit tiong-kan ê sî, tī Góa ê bīn-chêng só͘ li̍p--ê; 19 chiū-sī Iû-tāi ê kùi-cho̍k, Iâ-lō͘-sat-léng ê kùi-cho̍k, í-ki̍p thài-kàm, chè-si, kéng-lāi chèng peh-sìⁿ, kìⁿ-nā tùi phòa-khui ê gû-á ê tiong-kan keng-kè--ê; 20 Góa beh chiong in kau tī in ê tùi-te̍k ê chhiú, kap siàu-siūⁿ in ê sìⁿ-miā ê lâng ê chhiú; in ê sin-si beh hō͘ khong-tiong ê pe-chiáu kap tōe-chiūⁿ ê iá-siù chòe chia̍h-mi̍h. 21 Koh Góa beh chiong Iû-tāi ông Se-tí-ka kap i ê kùi-cho̍k kau tī in ê tùi-te̍k ê chhiú, kap siàu-siūⁿ i ê sìⁿ-miā ê lâng ê chhiú; ia̍h kau tī Pa-pí-lûn ông kun-peng ê chhiú, chiū-sī lī-khui lín khì--ê. 22 Iâ-hô-hoa kóng, Góa beh bēng-lēng in, hō͘ in koh lâi chit ê siâⁿ; in beh kong-kek--i, chhú--i, ēng hé sio--i; Góa ia̍h beh hō͘ Iû-tāi chiah ê siâⁿ pha-hng, bô lâng khiā-khí.
1 當偤大王約西亞ê kiáⁿ Iok-ngá-kèng坐位ê時，耶和華ê話臨到耶利米講， 2 你tio̍h去Lī-kah族ê厝，kap in講話；chhōa in到耶和華ê厝，入一間房，用酒hō͘ in lim。 3 我就將Hap-pa-sé-nî-ngá ê孫，Ngá-lī-bí-ngá ê kiáⁿ，Ngá-sat-nî-a，kap伊ê兄弟，kap伊ê眾kiáⁿ，以及Lī-kah全族ê人， 4 Chhōa in到耶和華ê厝，入上帝ê奴僕I-ki-tāi-lī ê kiáⁿ哈蘭眾kiáⁿ ê房；hit間房tī貴族ê房ê隔壁，貴族ê房就是tī Sa-liông ê kiáⁿ Pé-mn̂g-ê Má-se-ngá ê房ê頂面。 5 我就用碗用杯貯酒滿滿，排tī Lī-kah族人ê面前；kā in講，請lín lim酒。 6 In就講，阮m̄-lim酒，因為阮ê先祖，Lī-kah ê kiáⁿ Iok-ná-ta̍t，bat吩咐阮講，Lín kap lín ê kiáⁿ孫永永m̄-thang lim酒。 7 亦m̄-thang起厝，m̄-thang掖種，m̄-thang栽種葡萄園，m̄-thang有chiahê；一世人tio̍h tòa tī布棚，hō͘ lín長歲壽tī lín寄腳ê地方。 8 見若阮先祖Lī-kah ê kiáⁿ Iok-ná-ta̍t吩咐阮ê話，阮lóng聽thàn；阮kap阮ê bó͘，阮ê kiáⁿ，阮ê cha-bó͘-kiáⁿ，一世人lóng無lim酒。 9 亦無起厝來家己khiā起，亦無有葡萄園，無有田園，無有種子。 10 獨獨khiā起布棚，lóng遵thàn阮ê先祖，Iok-ná-ta̍t所命令ê來行。 11 獨獨巴比倫王Nî-pò͘-kah-nî-sat上來chitê地ê時，阮就講：『來ah，咱tio̍h chiūⁿ耶路撒冷，來閃避Ka-le̍k-tí人ê兵，kap A-lân ê兵』；因為án-ni，阮chiah khiā起耶路撒冷。」 12 耶和華ê話臨到耶利米講， 13 萬軍ê耶和華，以色列ê上帝，án-ni講，你tio̍h去kā偤大人kap耶路撒冷khiā起ê百姓講，耶和華講，Lín m̄受教示，m̄聽thàn我ê話mah？ 14 Lī-kah ê kiáⁿ Iok-ná-ta̍t所吩咐伊ê kiáⁿ孫m̄-thang lim酒ê話，in lóng遵守，到今á日亦無lim；因為in聽thàn先祖ê命令；總是我有對lín講，早早起來講；但是lín m̄聽我。 15 我亦差我ê眾奴僕chiahê先知就近lín，早早起來差in，講，Lín tio̍h oa̍t頭，ta̍k人離開伊ê pháiⁿ路，改換lín ê所做；無thàn別號ê上帝來服事in，lín就thang khiā起我所賞賜lín kap lín列祖ê地；總是lín m̄俯耳孔，亦m̄聽我。 16 因為Lī-kah ê kiáⁿ Iok-ná-ta̍t ê kiáⁿ孫有遵守in ê先祖所吩咐in ê命令，獨獨chitê百姓無有聽thàn我； 17 所以耶和華，萬軍ê上帝，以色列ê上帝án-ni講，看ah，我beh hō͘我所講攻擊in一切ê災厄臨到偤大人kap耶路撒冷一切khiā起ê百姓；因為我對in講，in無有聽thàn；我叫in，in無應。 18 耶利米對Lī-kah族ê人講，萬軍ê耶和華，以色列ê上帝，án-ni講，因為lín聽thàn lín ê先祖Iok-ná-ta̍t ê命令，守伊一切ê誡命，行伊lóng總所命令lín-ê； 19 所以萬軍ê耶和華，以色列ê上帝，án-ni講，Lī-kah ê kiáⁿ Iok-ná-ta̍t的確永遠有人khiā tī我ê面前。
1 Tng Iû-tāi ông Iok-se-a ê kiáⁿ Iok-ngá-kèng chē-ūi ê sî, Iâ-hô-hoa ê ōe lîm-kàu Iâ-lī-bí kóng, 2 Lí tio̍h khì Lī-kah cho̍k ê chhù, kap in kóng-ōe; chhōa in kàu Iâ-hô-hoa ê chhù, ji̍p chi̍t keng pâng, ēng chiú hō͘ in lim. 3 Góa chiū chiong Hap-pa-sé-nî-ngá ê sun, Ngá-lī-bí-ngá ê kiáⁿ, Ngá-sat-nî-a, kap i ê hiaⁿ-tī, kap i ê chèng-kiáⁿ, í-ki̍p Lī-kah choân-cho̍k ê lâng, 4 chhōa in kàu Iâ-hô-hoa ê chhù, ji̍p Siōng-tè ê lô͘-po̍k I-ki-tāi-lī ê kiáⁿ Hap-lân chèng-kiáⁿ ê pâng; hit keng pâng tī kùi-cho̍k ê pâng ê keh-piah, kùi-cho̍k ê pâng chiū-sī tī Sa-liông ê kiáⁿ pé-mn̂g--ê Má-se-ngá ê pâng ê téng-bīn. 5 Góa chiū ēng óaⁿ ēng poe tóe chiú móa-móa, pâi tī Lī-kah cho̍k lâng ê bīn-chêng; kā in kóng, Chhiáⁿ lín lim chiú. 6 In chiū kóng, Goán m̄-lim chiú, in-ūi goán ê sian-chó͘, Lī-kah ê kiáⁿ Iok-ná-ta̍t, bat hoan-hù goán kóng, Lín kap lín ê kiáⁿ-sun éng-éng m̄-thang lim chiú. 7 Ia̍h m̄-thang khí chhù, m̄-thang iā-chéng, m̄-thang chai-chèng phû-tô-hn̂g, m̄-thang ū chiah-ê; chi̍t-sì-lâng tio̍h tòa tī pò͘-pîⁿ, hō͘ lín tn̂g hè-siū tī lín kià-kha ê tōe-hng. 8 Kìⁿ-nā goán sian-chó͘ Lī-kah ê kiáⁿ Iok-ná-ta̍t hoan-hù goán ê ōe, goán lóng thiaⁿ-thàn; goán kap goán ê bó͘, goán ê kiáⁿ, goán ê cha-bó͘-kiáⁿ, chi̍t-sì-lâng lóng bô lim-chiú. 9 Ia̍h bô khí-chhù lâi ka-kī khiā-khí, ia̍h bô ū phû-tô-hn̂g, bô ū chhân-hn̂g, bô ū chéng-chí. 10 To̍k-to̍k khiā-khí pò͘-pîⁿ, lóng chun-thàn goán ê sian-chó͘, Iok-ná-ta̍t só͘ bēng-lēng--ê lâi kiâⁿ. 11 To̍k-to̍k Pa-pí-lûn ông Nî-pò͘-kah-nî-sat chiūⁿ-lâi chit ê tōe ê sî, goán chiū kóng, 'Lâi ah, lán tio̍h chiūⁿ Iâ-lō͘-sat-léng, lâi siám-pī Ka-le̍k-tí lâng ê peng, kap A-lân ê peng'; in-ūi án-ni, goán chiah khiā-khí Iâ-lō͘-sat-léng.」 12 Iâ-hô-hoa ê ōe lîm-kàu Iâ-lī-bí kóng, 13 Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lí tio̍h khì kā Iû-tāi lâng kap Iâ-lō͘-sat-léng khiā-khí ê peh-sìⁿ kóng, Iâ-hô-hoa kóng, Lín m̄-siū kà-sī, m̄ thiaⁿ-thàn Góa ê ōe mah? 14 Lī-kah ê kiáⁿ Iok-ná-ta̍t só͘ hoan-hù i ê kiáⁿ-sun m̄-thang lim chiú ê ōe, in lóng chun-siú, kàu kin-á-ji̍t ia̍h bô lim; in-ūi in thiaⁿ-thàn sian-chó͘ ê bēng-lēng; chóng-sī Góa ū tùi lín kóng, chá-chá khí-lâi kóng; nā-sī lín m̄-thiaⁿ Góa. 15 Góa ia̍h chhe Góa ê chèng lô͘-po̍k chiah ê sian-ti chiū-kūn lín, chá-chá khí-lâi chhe in, kóng, Lín tio̍h oa̍t-thâu, ta̍k-lâng lī-khui i ê pháiⁿ-lō͘, kóe-ōaⁿ lín ê só͘-chòe; bô thàn pa̍t-hō ê siōng-tè lâi ho̍k-sāi in, lín chiū thang khiā-khí Góa só͘ siúⁿ-sù lín kap lín lia̍t-chó͘ ê tōe; chóng-sī lín m̄ àⁿ hī-khang, ia̍h m̄-thiaⁿ Góa. 16 In-ūi Lī-kah ê kiáⁿ Iok-ná-ta̍t ê kiáⁿ-sun ū chun-siú in ê sian-chó͘ só͘ hoan-hù in ê bēng-lēng, to̍k-to̍k chit ê peh-sìⁿ bô ū thiaⁿ-thàn Góa; 17 só͘-í Iâ-hô-hoa, bān-kun ê Siōng-tè, Í-sek-lia̍t ê Siōng-tè án-ni kóng, Khòaⁿ ah, Góa beh hō͘ Góa só͘ kóng kong-kek in it-chhè ê chai-ē lîm-kàu Iû-tāi lâng kap Iâ-lō͘-sat-léng it-chhè khiā-khí ê peh-sìⁿ; in-ūi Góa tùi in kóng, in bô ū thiaⁿ-thàn; Góa kiò--in, in bô ìn. 18 Iâ-lī-bí tùi Lī-kah cho̍k ê lâng kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, In-ūi lín thiaⁿ-thàn lín ê sian-chó͘ Iok-ná-ta̍t ê bēng-lēng, siú i it-chhè ê kài-bēng, kiâⁿ i lóng-chóng só͘ bēng-lēng lín--ê; 19 só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Lī-kah ê kiáⁿ Iok-ná-ta̍t tek-khak éng-oán ū lâng khiā tī Góa ê bīn-chêng.
1 偤大王約西亞ê kiáⁿ Iok-ngá-kèng第四年，有話tùi耶和華臨到耶利米講， 2 你tio̍h the̍h一本冊，將我所對你講beh攻擊以色列kap偤大，kap ta̍k國，一切ê話；tùi我kā你講話ê hit日，就是tùi約西亞hiahê日起，到tī今á日；lóng寫tī hit內面。 3 Kiám-chhái偤大家beh聽我所按算beh降hō͘ in一切ê災厄；致到in beh oa̍t頭，ta̍k人離開伊ê pháiⁿ路；我就thang赦免in ê罪過kap罪惡。 4 耶利米就叫Nî-lī-a ê kiáⁿ Pa-lio̍k來；Pa-lio̍k就將耶利米所傳耶和華對伊講一切ê話，lóng記tī冊。 5 耶利米吩咐Pa-lio̍k講，我受阻礙，bōe能入耶和華ê厝。 6 你tio̍h去，將我所傳，你所寫tī冊裡耶和華ê話，tī耶和華ê厝，tī禁食ê日讀hō͘百姓聽；亦讀hō͘ tùi chiahê城來ê偤大人聽。 7 Kiám-chhái in beh tī耶和華ê面前謙卑祈禱；in beh回頭，ta̍k人離開伊ê pháiⁿ路；因為耶和華對chitê百姓所講beh發出ê受氣，hit ê受氣真大。 8 Nî-lī-a ê kiáⁿ Pa-lio̍k就照先知耶利米一切所吩咐ê去行；tī耶和華ê厝，讀冊內所記耶和華ê話。 9 偤大王約西亞ê kiáⁿ Iok-ngá-kèng五年，九月，耶路撒冷ê眾百姓，kap hiahê tùi偤大城來到耶路撒冷ê眾百姓；宣佈禁食tī耶和華ê面前。 10 Hit時tī耶和華ê厝，書記Sa-hoan ê kiáⁿ Ki-má-lī-ngá ê房，tī頂院，近耶和華ê厝，新門ê門口，Pa-lio̍k tùi hit本冊讀耶利米ê話，hō͘眾百姓親耳聽。 11 Sa-hoan ê孫，Ki-má-lī-ngá ê kiáⁿ，Bí-kai-a聽見冊內耶和華一切ê話， 12 伊就落去王宮，入書記ê房；看ah，眾貴族lóng坐tī-hia，就是書記Í-lī-sa-má，Sī-má-ngá ê kiáⁿ Tē-lâi-ngá，A-kek-pho ê kiáⁿ Í-lī-ná-tan，Sa-hoan ê kiáⁿ Ki-má-lī-ngá，Hap-ná-nî-ngá ê kiáⁿ Se-tí-ka，kap lóng總ê貴族。 13 Tùi án-ni，Bí-kai-a對in講起伊所聽見一切ê話，就是Pa-lio̍k tùi百姓讀hit本冊ê時伊所聽見ê。 14 因為án-ni chiahê貴族就差Kó͘-sī ê曾孫，Sī-lī-bí-ngá ê孫，Nî-thàm-ngá ê kiáⁿ Iû-tí到Pa-lio̍k hia，對伊講，你將所讀hō͘百姓聽ê冊親手the̍h來。Nî-lī-a ê kiáⁿ Pa-lio̍k就親手the̍h hit本冊來in hia。 15 In對伊講，請坐，讀hō͘阮聽；Pa-lio̍k就讀hō͘ in聽。 16 In聽這一切ê話，就大家驚惶相看；kā Pa-lio̍k講，阮決斷beh將chiahê話lóng kā王講。 17 In koh問Pa-lio̍k講，請你kā阮講，你用啥款來寫伊所傳一切ê話？ 18 Pa-lio̍k應講，伊親嘴對我講chiahê話，我就用筆墨寫tī冊裡。 19 Hiah-ê貴族tùi Pa-lio̍k講，你kap耶利米tio̍h去bih-teh，m̄-thang hō͘人知lín tī toh-lo̍h。 20 Hiah-ê貴族將hit本hē tī書記Í-lī-sa-má ê房，chiah入院見王，將chiahê話lóng講起hō͘王聽。 21 王差Iû-tí去the̍h hit本來，伊就tùi書記Í-lī-sa-má ê房the̍h來。Iû-tí讀hō͘王聽，亦hō͘ khiā tī王左右chiahê貴族聽。 22 Hit時是九月，王坐tī過冬天ê厝，面頭前有火爐teh to̍h。 23 Iû-tí 見讀三篇á四篇，王就用書記ê刀kā伊割起來，hiat tī火爐，到全本lóng燒tī爐中ê火。 24 王kap聽見chiahê話ê人臣，in lóng無驚亦無拆裂in ê衫。 25 Í-lī-ná-tan kap Tē-lâi-ngá，Ki-má-lī-ngá，求王莫得燒hit本；總是伊m̄聽。 26 王就命令Hap-bí-le̍k ê kiáⁿ Iâ-la̍h-bia̍t，kap A-su-lia̍t ê kiáⁿ Se-lâi-ngá，kap A-pek-tia̍p ê kiáⁿ Sī-lī-bí-ngá；去掠書記Pa-lio̍k kap先知耶利米；總是耶和華kā in khǹg密。 27 王將hit本，就是Pa-lio̍k所寫耶利米所傳ê話，燒去了後，耶和華ê話臨到耶利米講， 28 你koh the̍h一本，將偤大王Iok-ngá-kèng所燒從前hit本hiahê話lóng寫tī hit內面。 29 論到偤大王Iok-ngá-kèng，你tio̍h講，耶和華án-ni講，你燒hit本，講，你啥事tī hit內面寫講，巴比倫王決斷beh來毀滅chitê土地，hō͘ chit所在ê人kap cheng-siⁿ lóng無去ah？ 30 所以耶和華論偤大王Iok-ngá-kèng講，伊beh無人thang坐大衛ê寶座，伊ê身屍beh hiat-ka̍k tī外面，日時hō͘日曝，暝時hō͘霜凍。 31 我beh因為伊kap伊ê後裔，kap伊ê人臣ê罪過，刑罰in；我bēh hō͘我所講一切ê災厄臨到in，以及耶路撒冷ê百姓，kap偤大人；總是in m̄聽。 32 Tùi án-ni，耶利米koh the̍h一本，交hō͘ Nî-lī-a ê kiáⁿ書記Pa-lio̍k；伊就將耶利米所傳ê話寫tī hit內面；就是偤大王Iok-ngá-kèng所燒去hit本一切ê話；另外koh添chōe-chōe相親像ê話。
1 Iû-tāi ông Iok-se-a ê kiáⁿ Iok-ngá-kèng tē sì--nî, ū ōe tùi Iâ-hô-hoa lîm-kàu Iâ-lī-bí kóng, 2 Lí tio̍h the̍h chi̍t pún chheh, chiong Góa só͘ tùi lí kóng beh kong-kek Í-sek-lia̍t kap Iû-tāi, kap ta̍k-kok, it-chhè ê ōe; tùi Góa kā lí kóng-ōe ê hit-ji̍t, chiū-sī tùi Iok-se-a hiah ê ji̍t khí, kàu tī kin-á-ji̍t; lóng siá tī hí(**hit) lāi-bīn. 3 Kiám-chhái Iû-tāi ke beh thiaⁿ Góa só͘ àn-sǹg beh kàng hō͘ in it-chhè ê chai-ē; tì-kàu in beh oa̍t-thâu, ta̍k-lâng lī-khui i ê pháiⁿ-lō͘; Góa chiū thang sià-bián in ê chōe-kòa kap chōe-ok. 4 Iâ-lī-bí chiū kiò Nî-lī-a ê kiáⁿ Pa-lio̍k lâi; Pa-lio̍k chiū chiong Iâ-lī-bí só͘ thoân Iâ-hô-hoa tùi i kóng it-chhè ê ōe, lóng kì tī chheh. 5 Iâ-lī-bí hoan-hù Pa-lio̍k kóng, Góa siū chó͘-gāi, bōe-ōe ji̍p Iâ-hô-hoa ê chhù. 6 Lí tio̍h khì, chiong góa só͘ thoân, lí só͘ siá tī chheh--nih Iâ-hô-hoa ê ōe, tī Iâ-hô-hoa ê chhù, tī kìm-chia̍h ê ji̍t tha̍k hō͘ peh-sìⁿ thiaⁿ; ia̍h tha̍k hō͘ tùi chiah ê siâⁿ lâi ê Iû-tāi lâng thiaⁿ. 7 Kiám-chhái in beh tī Iâ-hô-hoa ê bīn-chêng khiam-pi kî-tó; in beh hôe-thâu, ta̍k-lâng lī-khui i ê pháiⁿ-lō͘; in-ūi Iâ-hô-hoa tùi chit ê peh-sìⁿ só͘ kóng beh hoat-chhut ê siū-khì, hit ê siū-khì chin tōa. 8 Nî-lī-a ê kiáⁿ Pa-lio̍k chiū chiàu sian-ti Iâ-lī-bí it-chhè só͘ hoan-hù--ê khì kiâⁿ; tī Iâ-hô-hoa ê chhù, tha̍k chheh-lāi só͘ kì Iâ-hô-hoa ê ōe. 9 Iû-tāi ông Iok-se-a ê kiáⁿ Iok-ngá-kèng gō͘--nî, káu ge̍h, Iâ-lō͘-sat-léng ê chèng peh-sìⁿ, kap hiah-ê tùi Iû-tāi siâⁿ lâi kàu Iâ-lō͘-sat-léng ê chèng peh-sìⁿ; soan-pò͘ kìm-chia̍h tī Iâ-hô-hoa ê bīn-chêng. 10 Hit-sî tī Iâ-hô-hoa ê chhù, su-kì Sa-hoan ê kiáⁿ Ki-má-lī-ngá ê pâng, tī téng-īⁿ, kūn Iâ-hô-hoa ê chhù, sin-mn̂g ê mn̂g-kháu, Pa-lio̍k tùi hit pún chheh tha̍k Iâ-lī-bí ê ōe, hō͘ chèng peh-sìⁿ chhin-hī thiaⁿ. 11 Sa-hoan ê sun, Ki-má-lī-ngá ê kiáⁿ, Bí-kai-a thiaⁿ-kìⁿ chheh-lāi Iâ-hô-hoa it-chhè ê ōe, 12 i chiū lo̍h-khì ông-kiong, ji̍p su-kì ê pâng; khòaⁿ ah, chèng kùi-cho̍k lóng chē tī-hia, chiū-sī su-kì Í-lī-sa-má, Sī-má-ngá ê kiáⁿ Tē-lâi-ngá, A-kek-pho ê kiáⁿ Í-lī-ná-tan, Sa-hoan ê kiáⁿ Ki-má-lī-ngá, Hap-ná-nî-ngá ê kiáⁿ Se-tí-ka, kap lóng-chóng ê kùi-cho̍k. 13 Tùi án-ni Bí-kai-a tùi in kóng-khí i só͘ thiaⁿ-kìⁿ it-chhè ê ōe, chiū-sī Pa-lio̍k tùi peh-sìⁿ tha̍k hit pún chheh ê sî i só͘ thiaⁿ-kìⁿ ê. 14 In-ūi án-ni chiah ê kùi-cho̍k chiū chhe Kó͘-sī ê cheng-sun, Sī-lī-bí-ngá ê sun, Nî-thàm-ngá ê kiáⁿ Iû-tí kàu Pa-lio̍k hia, tùi i kóng, Lí chiong só͘ tha̍k hō͘ peh-sìⁿ thiaⁿ ê chheh chhin-chhiú the̍h--lâi. Nî-lī-a ê kiáⁿ Pa-lio̍k chiū chhin-chhiú the̍h hit pún chheh lâi in hia. 15 In tùi i kóng, Chhiáⁿ chē, tha̍k hō͘ goán thiaⁿ; Pa-lio̍k chiū tha̍k hō͘ in thiaⁿ. 16 In thiaⁿ che it-chhè ê ōe, chiū tāi-ke kiaⁿ-hiâⁿ saⁿ-khòaⁿ; kā Pa-lio̍k kóng, Goán koat-toàn beh chiong chiah ê ōe lóng kā ông kóng. 17 In koh mn̄g Pa-lio̍k kóng, Chhiáⁿ lí kā goán kóng, lí ēng siáⁿ khoán lâi siá i só͘ thoân it-chhè ê ōe? 18 Pa-lio̍k ìn kóng, I chhin-chhùi tùi góa kóng chiah ê ōe, góa chiū ēng pit-ba̍k siá tī chheh--nih. 19 Hiah ê kùi-cho̍k tùi Pa-lio̍k kóng, Lí kap Iâ-lī-bí tio̍h khì bih--teh, m̄-thang hō͘ lâng chai lín tī toh-lo̍h. 20 Hiah ê kùi-cho̍k chiong hit pún hē tī su-kì Í-lī-sa-má ê pâng, chiah ji̍p īⁿ kìⁿ ông, chiong chiah ê ōe lóng kóng-khí hō͘ ông thiaⁿ. 21 Ông chhe Iû-tí khì the̍h hit-pún lâi, i chiū tùi su-kì Í-lī-sa-má ê pâng the̍h--lâi. Iû-tí tha̍k hō͘ ông thiaⁿ, ia̍h hō͘ khiā tī ông chó-iū chiah ê kùi-cho̍k thiaⁿ. 22 Hit-sî sī káu--ge̍h, ông chē tī kè tang-thiⁿ ê chhù, bīn-thâu-chêng ū hé-lô͘ teh to̍h. 23 Iû-tí kiàn tha̍k saⁿ-phiⁿ á sì-phiⁿ, ông chiū ēng su-kì ê to kā i koah-khí--lâi, hiat tī hé-lô͘, kàu choân-pún lóng sio tī lô͘-tiong ê hé. 24 Ông kap thiaⁿ-kìⁿ chiah ê ōe ê jîn-sîn, in lóng bô kiaⁿ ia̍h bô thiah-li̍h in ê saⁿ. 25 Í-lī-ná-tan kap Tē-lâi-ngá, Ki-má-lī-ngá, kiû ông bo̍h-tit sio hit-pún; chóng-sī i m̄ thiaⁿ. 26 Ông chiū bēng-lēng Hap-bí-le̍k ê kiáⁿ Iâ-la̍h-bia̍t, kap A-su-lia̍t ê kiáⁿ Se-lâi-ngá, kap A-pek-tia̍p ê kiáⁿ Sī-lī-bí-ngá; khì lia̍h su-kì Pa-lio̍k kap sian-ti Iâ-lī-bí; chóng-sī Iâ-hô-hoa kā in khǹg-ba̍t. 27 Ông chiong hit-pún, chiū-sī Pa-lio̍k só͘ siá Iâ-lī-bí só͘ thoân ê ōe, sio--khì liáu-āu, Iâ-hô-hoa ê ōe lîm-kàu Iâ-lī-bí kóng, 28 Lí koh the̍h chi̍t-pún, chiong Iû-tāi ông Iok-ngá-kèng só͘ sio chiông-chêng hit-pún hiah ê ōe lóng siá tī hit lāi-bīn. 29 Lūn-kàu Iû-tāi ông Iok-ngá-kèng, lí tio̍h kóng, Iâ-hô-hoa án-ni kóng, Lí sio hit pún, kóng, Lí siáⁿ-sū tī hit lāi-bīn siá kóng, Pa-pí-lûn ông koat-toàn beh lâi húi-bia̍t chit ê thó͘-tōe, hō͘ chit só͘-chāi ê lâng kap cheng-siⁿ lóng bô--khì ah? 30 Só͘-í Iâ-hô-hoa lūn Iû-tāi ông Iok-ngá-kèng kóng, I beh bô lâng thang chē Tāi-pi̍t ê pó-chō, i ê sin-si beh hiat-ka̍k tī gōa-bīn, ji̍t--sî hō͘ ji̍t pha̍k, mî--sî hō͘ sng tàng. 31 Góa beh in-ūi i kap i ê hō͘-è, kap i ê jîn-sîn ê chē-kòa, hêng-hoa̍t in; Góa bēh hō͘ Góa só͘ kóng it-chhè ê chai-ē lîm-kàu in, í-ki̍p Iâ-lō͘-sat-léng ê peh-sìⁿ, kap Iû-tāi lâng; chóng-sī in m̄ thiaⁿ. 32 Tùi án-ni Iâ-lī-bí koh the̍h chi̍t-pún, kau hō͘ Nî-lī-a ê kiáⁿ su-kì Pa-lio̍k; i chiū chiong Iâ-lī-bí só͘ thoân ê ōe siá tī hit lāi-bīn; chiū-sī Iû-tāi ông Iok-ngá-kèng só͘ sio--khì hit-pún it-chhè ê ōe; lēng-gōa koh thiⁿ chōe-chōe saⁿ-chhin-chhiūⁿ ê ōe.
1 約西亞ê kiáⁿ Se-tí-ka王替Iok-ngá-kèng ê kiáⁿ Ko-nî-ngá做王；巴比倫王Nî-pò͘-kah-nî-sat bat設立伊做王tī偤大地。 2 總是伊kap伊ê人臣，kap國內ê百姓，lóng m̄聽耶和華ê話，就是伊託先知耶利米所講ê。 3 Se-tí-ka王差Sī-lī-bí-ngá ê kiáⁿ Iû-kah，kap祭司Má-se-ngá ê kiáⁿ Se-hoan-ngá，去見先知耶利米；講，求你替阮祈禱耶和華咱ê上帝。 4 Hit時耶利米出入tī百姓ê中間；因為in iáu未kā伊關落監。 5 法老ê軍兵已經tùi埃及出來，hiahê圍困耶路撒冷ê Ka-le̍k-tí人聽見in ê風聲，就撤營離開耶路撒冷。 6 耶和華ê話臨到先知耶利米講： 7 耶和華以色列ê上帝án-ni講，偤大王差lín來我chia問我，lín tio̍h án-ni kā伊講，看ah，法老ê軍兵hiahê出來beh幫贊lín-ê，beh tò去埃及本國。 8 Ka-le̍k-tí人beh koh來，攻擊chitê城，beh取伊，亦beh用火燒伊。 9 耶和華án-ni講，Lín m̄-thang家己騙，講，Ka-le̍k-tí人的確beh離開阮，因為in無beh離開。 10 Lín就若phah敗攻擊lín ê Ka-le̍k-tí ê全軍，in中間只chhun受傷ê人，in ta̍k人亦beh對伊ê布棚內起來，用火燒chitê城。 11 Ka-le̍k-tí ê軍兵，因為驚法老ê軍兵，就撤營離開耶路撒冷； 12 Hit時耶利米出耶路撒冷，beh去便雅憫ê地；ài得tio̍h伊ê份額tī百姓ê中間。 13 伊到便雅憫門hia，有顧門ê官，名叫I-lī-ngá，是Hap-ná-nî-a ê孫，Sī-lī-bí-ngá ê kiáⁿ；伊就掠先知耶利米，講，你是teh投降Ka-le̍k-tí人o͘h。 14 耶利米講，無影，我m̄是投降Ka-le̍k-tí人；I-lī-ngá m̄聽伊，就掠耶利米，送伊到貴族hia。 15 Chiahê貴族受氣耶利米，就phah伊，關伊tī監裡，tī書記約拿單ê厝，因為in用hit間做監牢。 16 耶利米已經到地陷ê穴內，耶利米tòa hia chōe-chōe日。 17 Se-tí-ka王差人帶伊來，王tī伊ê宮內暗靜問伊講，有甚麼話tùi耶和華來無？耶利米講，有；koh講，你beh交tī巴比倫王ê手。 18 耶利米koh對Se-tí-ka王講，我有甚麼得罪你，á是得罪你ê人臣kap chitê百姓，chiah hō͘你kā我關監？ 19 你chiahê先知對lín讖語，講，巴比倫王的確無來攻擊lín kap chitê所在；taⁿ in tī toh-lo̍h？ 20 Taⁿ我ê主我ê王ah，請你聽我，准我所求，m̄-thang hō͘我倒tńg去書記約拿單ê厝，免得我死tī-hia。 21 Se-tí-ka王就命令關耶利米tī拘留所ê院；ta̍k日tùi做餅ê街the̍h一粒麵包hō͘伊；直到城內無麵包chiah soah；án-ni耶利米猶原tòa tī拘留所ê院內。
1 Iok-se-a ê kiáⁿ Se-tí-ka ông thòe Iok-ngá-kèng ê kiáⁿ Ko-nî-ngá chòe ông; Pa-pí-lûn ông Nî-pò͘-kah-nî-sat bat siat-li̍p i chòe ông tī Iû-tāi tōe. 2 Chóng-sī i kap i ê jîn-sîn, kap kok-lāi ê peh-sìⁿ, lóng m̄-thiaⁿ Iâ-hô-hoa ê ōe, chiū-sī i thok sian-ti Iâ-lī-bí só͘ kóng--ê. 3 Se-tí-ka ông chhe Sī-lī-bí-ngá ê kiáⁿ Iû-kah, kap chè-si Má-se-ngá ê kiáⁿ Se-hoan-ngá, khì kìⁿ sian-ti Iâ-lī-bí; kóng, Kiû lí thòe goán kî-tó Iâ-hô-hoa lán ê Siōng-tè. 4 Hit-sî Iâ-lī-bí chhut-ji̍p tī peh-sìⁿ ê tiong-kan; in-ūi in iáu-bē kā i koaiⁿ-lo̍h kaⁿ. 5 Hoat-ló ê kun-peng í-keng tùi Ai-ki̍p chhut-lâi, hiah-ê ûi-khùn Iâ-lō͘-sat-léng ê Ka-le̍k-tí lâng thiaⁿ-kìⁿ in ê hong-siaⁿ, chiū thiat-iâⁿ lī-khui Iâ-lō͘-sat-léng. 6 Iâ-hô-hoa ê ōe lîm-kàu sian-ti Iâ-lī-bí kóng: 7 Iâ-hô-hoa Í-sek-lia̍t ê Siōng-tè án-ni kóng, Iû-tāi ông chhe lín lâi góa chia mn̄g góa, lín tio̍h án-ni kā i kóng, Khòaⁿ ah, Hoat-ló ê kun-peng hiah ê chhut-lâi beh pang-chān lín--ê, beh tò--khì Ai-ki̍p pún-kok. 8 Ka-le̍k-tí lâng beh koh lâi, kong-kek chit ê siâⁿ, beh chhú--i, ia̍h beh ēng hé sio--i. 9 Iâ-hô-hoa án-ni kóng, Lín m̄-thang ka-kī phiàn, kóng, Ka-le̍k-tí lâng tek-khak beh lī-khui goán, in-ūi in bô beh lī-khui. 10 Lín chiū nā phah-pāi kong-kek lín ê Ka-le̍k-tí ê choân-kun, in tiong-kan chí chhun siū-siong ê lâng, in ta̍k-lâng ia̍h beh tùi i ê pò͘-pîⁿ-lāi khí-lâi, ēng hé sio chit ê siâⁿ. 11 Ka-le̍k-tí ê kun-peng, in-ūi kiaⁿ Hoat-ló ê kun-peng, chiū thiat-iâⁿ lī-khui Iâ-lō͘-sat-léng; 12 hit-sî Iâ-lī-bí chhut Iâ-lō͘-sat-léng, beh khì Piān-ngá-bín ê tōe; ài tit-tio̍h i ê hūn-gia̍h tī peh-sìⁿ ê tiong-kan. 13 I kàu Piān-ngá-bín mn̂g hia, ū kò͘-mn̂g ê koaⁿ, miâ kiò I-lī-ngá, sī Hap-ná-nî-a ê sun, Sī-lī-bí-ngá ê kiáⁿ; i chiū lia̍h sian-ti Iâ-lī-bí, kóng, Lí sī teh tâu-hâng Ka-le̍k-tí lâng o͘h. 14 Iâ-lī-bí kóng, Bô-iáⁿ, góa m̄-sī tâu-hâng Ka-le̍k-tí lâng; I-lī-ngá m̄-thiaⁿ i, chiū lia̍h Iâ-lī-bí, sàng i kàu kùi-cho̍k hia. 15 Chiah ê kùi-cho̍k siū-khì Iâ-lī-bí, chiū phah i, koaiⁿ i tī kaⁿ--nih, tī su-kì Iok-ná-tan ê chhù, in-ūi in ēng hit-keng chòe kaⁿ-lô. 16 Iâ-lī-bí í-keng kàu tōe-hām ê hia̍t-lāi, Iâ-lī-bí tòa hia chōe-chōe ji̍t. 17 Se-tí-ka ông chhe lâng tòa i lâi, ông tī i ê kiong-lāi àm-chīⁿ mn̄g i kóng, Ū sím-mi̍h ōe tùi Iâ-hô-hoa lâi bô? Iâ-lī-bí kóng, Ū; koh kóng, Lí beh kau tī Pa-pí-lûn ông ê chhiú. 18 Iâ-lī-bí koh tùi Se-tí-ka ông kóng, Góa ū sím-mi̍h tek-chōe lí, á-sī tek-chōe lí ê jîn-sîn kap chit ê peh-sìⁿ, chiah hō͘ lí kā góa koaiⁿ-kaⁿ? 19 Lí chiah ê sian-ti tùi lín chhàm-gú, kóng, Pa-pí-lûn ông tek-khak bô lâi kong-kek lín kap chit ê só͘-chāi; taⁿ in tī toh-lo̍h? 20 Taⁿ góa ê chú góa ê ông ah, chhiáⁿ lí thiaⁿ góa, chún góa só͘ kiû, m̄-thang hō͘ góa tò-tńg--khì su-kì Iok-ná-tan ê chhù, bián-tit góa sí tī-hia. 21 Se-tí-ka ông chiū bēng-lēng koaiⁿ Iâ-lī-bí tī khu-liû-só͘ ê īⁿ; ta̍k-ji̍t tùi chòe-piáⁿ ê koe the̍h chi̍t-lia̍p mī-pau hō͘ i; ti̍t-kàu siâⁿ-lāi bô mī-pau chiah soah; án-ni Iâ-lī-bí iû-goân tòa tī khu-liû-só͘ ê īⁿ-lāi.
1 Má-thán ê kiáⁿ Sī-hoat-thê-ngá，Pa-si-hō͘-jíⁿ ê kiáⁿ Ki-tāi-lī，Sī-lī-bí-ngá ê kiáⁿ Iû-kah，Má-ki-ngá ê kiáⁿ Pa-si-hō͘-jíⁿ，聽見耶利米對眾人所講ê話，講， 2 耶和華án-ni講，見若tòa tī chitê城內ê beh tùi刀劍，tùi飢荒，tùi瘟疫來死；獨獨出去歸Ka-le̍k-tí人ê能得tio̍h活，beh拾tio̍h伊ê性命來活teh。 3 耶和華án-ni講，chitê城決斷beh交tī巴比倫王軍兵ê手；伊beh取伊。 4 Tùi án-ni，貴族kā王講，求你hō͘ chit人死；因為伊對城內chhun ê兵丁，kap眾百姓，講chit號ê話，hō͘ in ê手軟；chitê人m̄是求hō͘百姓平安，是hō͘ in tú-tio̍h災厄。 5 Se-tí-ka王講，看ah，伊tī lín ê手頭，王bōe會干涉lín甚麼tāi-chì。 6 In就掠耶利米，hiat伊tī Hap-bí-le̍k ê kiáⁿ Má-ki-ngá ê井；hitê井tī拘留所ê院內；in用索將耶利米墜落去；井內無水，只有土糜；耶利米就陷tī土糜。 7 Tī王宮內ê太監，Kó͘-si̍t人Í-pek-bí-le̍k，聽見in將耶利米墜落井；hit時王坐tī便雅憫門口。 8 Í-pek-bí-le̍k就出王宮，對王講， 9 我ê主，我ê王ah，chiahê人款待先知耶利米ê，lóng是pháiⁿ；有kā伊hiat落井，伊會餓死tī-hia；因為城內無米糧。 10 王就吩咐Kó͘-si̍t人Í-pek-bí-le̍k講，你tùi chia帶三十人，thàn先知耶利米iáu未死，救伊出井。 11 Tùi án-ni，Í-pek-bí-le̍k chhōa chiahê人相kap去，入王宮，到庫房下，tùi-hia the̍h破布舊衫，用索墜落井，到耶利米hia。 12 Kó͘-si̍t人Í-pek-bí-le̍k kā耶利米講，你用chiahê破布kap舊衫，chū tī胳下孔。hē tī索頂；耶利米就照án-ni行。 13 Án-ni，in就用索拔耶利米出井；耶利米猶原tòa tī拘留所ê院。 14 Se-tí-ka王差人帶先知耶利米入耶和華ê厝第三ê門，到伊hia；王就對耶利米講，我問你一項事，你lóng m̄-thang隱密tī我。 15 耶利米應Se-tí-ka講，我若kā你講，你kiám無beh 刣死我mah？我若指點你，你無beh聽。 16 Se-tí-ka王暗靜對耶利米chiù-chōa講，Hit-ê創造咱ê活命ê耶和華是活ê，我指伊來chiù-chōa，我的確無刣你，亦m̄將你交hō͘ chiahê siàu想你ê性命ê人ê手。 17 耶利米對 Se-tí-ka講，耶和華萬軍ê上帝，以色列ê上帝，án-ni講，你若出去投降巴比倫王ê貴族，你ê性命就會活teh，chitê城不致hō͘火燒；你kap你ê全家lóng會活。 18 你若m̄出去投降巴比倫王ê貴族，就chitê城beh交tī Ka-le̍k-tí人ê手；in beh用火燒伊；你亦bōe脫離in ê手。 19 Se-tí-ka王對耶利米講，我驚hiahê投降Ka-le̍k-tí ê偤大人，驚見Ka-le̍k-tí人將我交tī in ê手，in會凌辱我。 20 耶利米講，Bōe-lah。求你聽我對你所講耶和華ê話，án-ni你就得tio̍h利益，你ê性命也會活teh。 21 你若m̄肯出去，耶和華指示我ê話就是這： 22 看ah，偤大王宮所chhun ê婦人人beh帶到巴比倫王ê貴族hia，chiahê婦人人beh講，你知己ê朋友使唆你，khah贏你；你ê腳lok落土糜，in就oa̍t-tńg身退去。 23 人beh將你chiahê bó͘ kap你chiahê kiáⁿ，帶到Ka-le̍k-tí人hia，你亦bōe能脫離in ê手；beh hō͘巴比倫王ê手掠tio̍h；你也beh連累chitê城受火燒。 24 Se-tí-ka對耶利米講，莫得hō͘人知chiahê話，你就bōe死。 25 貴族若聽見我有kap你講話，in就來chhē你，問你講，你kā王講甚麼，m̄-thang 對阮隱密，阮就無hō͘你死；王對你講甚麼，亦lóng tio̍h kā阮講； 26 你就tio̍h kā in講，我tī王ê面前懇求伊莫得hō͘我koh入約拿單ê厝，來死tī-hia。 27 後來眾貴族來chhē耶利米，問伊；伊就照王所吩咐一切ê話來應in。In就soah，無koh kap伊講話；因為事情無露出。 28 Tùi án-ni，耶利米猶原tòa tī拘留所ê院內；直到耶路撒冷受取ê日。
1 Má-thán ê kiáⁿ Sī-hoat-thê-ngá, Pa-si-hō͘-jíⁿ ê kiáⁿ Ki-tāi-lī, Sī-lī-bí-ngá ê kiáⁿ Iû-kah, Má-ki-ngá ê kiáⁿ Pa-si-hō͘-jíⁿ, thiaⁿ-kìⁿ Iâ-lī-bí tùi chèng-lâng só͘ kóng ê ōe, kóng, 2 Iâ-hô-hoa án-ni kóng, Kìⁿ-nā tòa tī chit ê siâⁿ-lāi--ê beh tùi to-kiàm, tùi ki-hng, tùi un-e̍k lâi sí; to̍k-to̍k chhut-khì kui Ka-le̍k-tí lâng--ê ōe tit-tio̍h oa̍h, beh khioh-tio̍h i ê sìⁿ-miā lâi oa̍h--teh. 3 Iâ-hô-hoa án-ni kóng, Chit ê siâⁿ koat-toàn beh kau tī Pa-pí-lûn ông kun-peng ê chhiú; i beh chhú--i. 4 Tùi án-ni, kùi-cho̍k kā ông kóng, Kiû lí hō͘ chit lâng sí; in-ūi i tùi siâⁿ-lāi chhun ê peng-teng, kap chèng peh-sìⁿ, kóng chit-hō ê ōe, hō͘ in ê chhiú nńg; chit ê lâng m̄-sī kiû hō͘ peh-sìⁿ pêng-an, sī hō͘ in tú-tio̍h chai-ē. 5 Se-tí-ka ông kóng, Khòaⁿ ah, i tī lín ê chhiú-thâu, ông bōe-ōe kan-sia̍p lín sím-mi̍h tāi-chì. 6 In chiū lia̍h Iâ-lī-bí, hiat i tī Hap-bí-le̍k ê kiáⁿ Má-ki-ngá ê chíⁿ; hit ê chíⁿ tī khu-liû-só͘ ê īⁿ-lāi; in ēng soh chiong Iâ-lī-bí tūi--lo̍h-khì; chíⁿ-lāi bô chúi, chí-ū thô͘-bê; Iâ-lī-bí chiū hām tī thô͘-bê. 7 Tī ông-kiong-lāi ê thài-kàm, Kó͘-si̍t lâng Í-pek-bí-le̍k, thiaⁿ-kìⁿ in chiong Iâ-lī-bí tūi-lo̍h chíⁿ; hit-sî ông chē tī Piān-ngá-bín mn̂g-kháu. 8 Í-pek-bí-le̍k chiū chhut ông-kiong, tùi ông kóng, 9 Góa ê chú, góa ê ông ah, chiah ê lâng khoán-thāi sian-ti Iâ-lī-bí--ê, lóng sī pháiⁿ; ū kā i hiat-lo̍h chíⁿ, i ōe gō-sí tī-hia; in-ūi siâⁿ-lāi bô bí-niû. 10 Ông chiū hoan-hù Kó͘-si̍t lâng Í-pek-bí-le̍k kóng, Lí tùi chia tòa saⁿ-cha̍p lâng, thàn sian-ti Iâ-lī-bí iáu-bē sí, kiù i chhut chíⁿ. 11 Tùi án-ni, Í-pek-bí-le̍k chhōa chiah ê lâng saⁿ-kap khì, ji̍p ông-kiong, kàu khò͘-pâng ē, tùi-hia the̍h phòa-pò͘ kū-saⁿ, ēng soh tūi-lo̍h chíⁿ, kàu Iâ-lī-bí hia. 12 Kó͘-si̍t lâng Í-pek-bí-le̍k kā Iâ-lī-bí kóng, Lí ēng chiah ê phòa-pò͘ kap kū-saⁿ, chū tī koh-ē-khang, hē tī soh-téng; Iâ-lī-bí chiū chiàu án-ni kiâⁿ. 13 Án-ni, in chiū ēng soh pu̍ih Iâ-lī-bí chhut chíⁿ; Iâ-lī-bí iû-goân tòa tī khu-liû-só͘ ê īⁿ. 14 Se-tí-ka ông chhe lâng tòa sian-ti Iâ-lī-bí ji̍p Iâ-hô-hoa ê chhù tē saⁿ ê mn̂g, kàu i hia; ông chiū tùi Iâ-lī-bí kóng, Góa mn̄g lí chi̍t-hāng-sū, lí lóng m̄-thang ún-ba̍t tī góa. 15 Iâ-lī-bí ìn Se-tí-ka kóng, Góa nā kā lí kóng, lí kiám bô beh thâi-sí góa mah? góa nā chí-tiám lí, lí bô beh thiaⁿ. 16 Se-tí-ka ông àm-chīⁿ tùi Iâ-lī-bí chiù-chōa kóng, Hit-ê chhòng-chō lán ê oa̍h-miā ê Iâ-hô-hoa sī oa̍h--ê, góa chí I lâi chiù-chōa, góa tek-khak bô thâi lí, ia̍h m̄ chiong lí kau hō͘ chiah-ê siàu-siūⁿ lí ê sìⁿ-miā ê lâng ê chhiú. 17 Iâ-lī-bí tùi Se-tí-ka kóng, Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lí nā chhut-khì tâu-hâng Pa-pí-lûn ông ê kùi-cho̍k, lí ê sìⁿ-miā chiū ōe oa̍h-teh, chit ê siâⁿ put-tì hō͘ hé sio; lí kap lí ê choân-ke lóng ōe oa̍h. 18 Lí nā m̄ chhut--khì tâu-hâng Pa-pí-lûn ông ê kùi-cho̍k, chiū chit ê siâⁿ beh kau tī Ka-le̍k-tí lâng ê chhiú; in beh ēng hé sio--i; lí ia̍h bōe thoat-lī in ê chhiú. 19 Se-tí-ka ông tùi Iâ-lī-bí kóng, Góa kiaⁿ hiah-ê tâu-hâng Ka-le̍k-tí ê Iû-tāi lâng, kiaⁿ-kìⁿ Ka-le̍k-tí lâng chiong góa kau tī in ê chhiú, in ōe lêng-jio̍k góa. 20 Iâ-lī-bí kóng, Bōe--lah. Kiû lí thiaⁿ góa tùi lí só͘ kóng Iâ-hô-hoa ê ōe, án-ni lí chiū tit-tio̍h lī-ek, lí ê sìⁿ-miā iā ōe oa̍h--teh. 21 Lí nā m̄-khéng chhut--khì, Iâ-hô-hoa chí-sī góa ê ōe chiū-sī che: 22 Khòaⁿ ah, Iû-tāi ông-kiong só͘ chhun ê hū-jîn-lâng beh tòa kàu Pa-pí-lûn ông ê kùi-cho̍k hia, chiah ê hū-jîn-lâng beh kóng, Lí ti-kí ê pêng-iú sái-sō lí, khah-iâⁿ lí; lí ê kha lok--lo̍h thô͘-bê, in chiū oa̍t-tńg-sin thè--khì. 23 Lâng beh chiong lí chiah ê bó͘ kap lí chiah ê kiáⁿ, tòa kàu Ka-le̍k-tí lâng hia, lí ia̍h bōe-ōe thoat-lī in ê chhiú; beh hō͘ Pa-pí-lûn ông ê chhiú lia̍h-tio̍h; lí iā beh liân-lūi chit ê siâⁿ siū hé sio. 24 Se-tí-ka tùi Iâ-lī-bí kóng, Bo̍h-tit hō͘ lâng chai chiah ê ōe, lí chiū bōe sí. 25 Kùi-cho̍k nā thiaⁿ-kìⁿ góa ū kap lí kóng-ōe, in chiū lâi chhē lí, mn̄g lí kóng, Lí kā ông kóng sím-mi̍h, m̄-thang tùi goán ún-ba̍t, goán chiū bô hō͘ lí sí; ông tùi lí kóng sím-mi̍h, ia̍h lóng tio̍h kā goán kóng; 26 lí chiū tio̍h kā in kóng, Góa tī ông ê bīn-chêng khún-kiû i bo̍h-tit hō͘ góa koh ji̍p Iok-ná-tan ê chhù, lâi sí tī-hia. 27 Āu-lâi chèng kùi-cho̍k lâi chhē Iâ-lī-bí, mn̄g i; i chiū chiàu ông só͘ hoan-hù it-chhè ê ōe lâi ìn in. In chiū soah, bô koh kap i kóng-ōe; in-ūi sū-chêng bô lō͘-chhut. 28 Tùi án-ni, Iâ-lī-bí iû-goân tòa tī khu-liû-só͘ ê īⁿ-lāi; ti̍t-kàu Iâ-lō͘-sat-léng siū-chhú ê ji̍t.
1 偤大王Se-tí-ka九年十月，巴比倫王，Nî-pò͘-kah-nî-sat，chhōa伊lóng總ê軍兵來圍困耶路撒冷。 2 Se-tí-ka十一年，四月，初九日，城就破。 3 耶路撒冷受取ê時，巴比倫王ê貴族Nî-kah-sa-lī-siat、Sam-kah-nî-pho、太監頭Sat-se-kim，博士長 Nî-kah-sat-lī-siat，kap巴比倫王其餘一切ê貴族，lóng來坐tī中門。 4 偤大王Se-tí-ka kap一切ê戰士，看見in，就走；透暝tùi王ê園ê路，兩個城牆中間ê門，出城，ǹg平洋走去。 5 Ka-le̍k-tí ê軍兵追jip in，tī耶利哥ê平洋jip-tio̍h Se-tí-ka；掠伊，就帶到Hap-má地ê Lī-pí-la̍h，巴比倫王Nî-pò͘-kah-nî-sat hia；伊就審判伊。 6 巴比倫王tī Lī-pí-la̍h 刣 Se-tí-ka chiahê kiáⁿ，hō͘伊親目看見；巴比倫王koh 刣偤大一切尊貴ê人。 7 亦koh iah Se-tí-ka ê目睭，用鐵鏈鏈伊，beh帶伊到巴比倫。 8 Ka-le̍k-tí人用火燒王宮kap百姓ê厝；koh拆毀耶路撒冷ê城牆。 9 Hit時侍衛長Nî-pò͘-sat-la̍h-tàn將城內所chhun ê百姓，kap投降歸服伊ê，以及其餘所chhun ê百姓，lóng掠去巴比倫。 10 侍衛長Nî-pò͘-sat-la̍h-tàn就將百姓中sòng到無半項ê人留tī偤大地；當時亦hō͘ in葡萄園kap田。 11 巴比倫王Nî-pò͘-kah-nî-sat論到耶利米，就吩咐侍衛長Nî-pò͘-sat-la̍h-tàn，講， 12 將伊交帶你，tio̍h好款待伊，m̄-thang害伊；伊對你講甚麼，你就照án-ni kā伊做。 13 侍衛長Nî-pò͘-sat-la̍h-tàn，太監頭Nî-pò͘-sa-su-pan，博士長Nî-pò͘-sa-lí-siat，kap巴比倫王chiahê官長， 14 差人chhōa耶利米出拘留所ê院，交帶Sa-hoan ê孫，A-hi-kam ê kiáⁿ，Ki-tāi-lī，chhōa伊tò去in tau；tùi án-ni伊就khiā起百姓ê中間。 15 耶利米iáu關tī拘留所院內ê時，耶和華ê話臨到伊講， 16 你tio̍h去kā Kó͘-si̍t人Í-pek-bí-le̍k講，萬軍ê耶和華，以色列ê上帝，án-ni講，看ah，我講降災厄，無降福氣ê話，的確到chitê城；到hit日beh成tī你ê面前。 17 耶和華講，到hit日我beh拯救你；你的確不致交付tī你所驚hiahê人ê手。 18 我定tio̍h beh拯救你，你不致倒tī刀下；你beh拾tio̍h你ê性命；因為你óa靠我；這是耶和華講ê。
1 Iû-tāi ông Se-tí-ka káu-nî cha̍p-ge̍h, Pa-pí-lûn ông, Nî-pò͘-kah-nî-sat, chhōa i lóng-chóng ê kun-peng lâi ûi-khùn Iâ-lō͘-sat-léng. 2 Se-tí-ka cha̍p-it--nî, sì ge̍h, chhoe káu-ji̍t, siâⁿ chiū phòa. 3 Iâ-lō͘-sat-léng siū chhú ê sî, Pa-pí-lûn ông ê kùi-cho̍k Nî-kah-sa-lī-siat, Sam-kah-nî-pho, thài-kàm-thâu Sat-se-kim, phok-sū-tiúⁿ Nî-kah-sat-lī-siat, kap Pa-pí-lûn ông kî-û it-chhè ê kùi-cho̍k, lóng lâi chē tī tiong-mn̂g. 4 Iû-tāi ông Se-tí-ka kap it-chhè ê chiàn-sū, khòaⁿ-kìⁿ in, chiū cháu; thàu-mî tùi ông ê hn̂g ê lō͘, nn̄g ê siâⁿ-chhiûⁿ tiong-kan ê mn̂g, chhut-siâⁿ, ǹg Pîⁿ-iûⁿ cháu-khì. 5 Ka-le̍k-tí ê kun-peng tui-jip in, tī Iâ-lī-ko ê pîⁿ-iûⁿ jip--tio̍h Se-tí-ka; lia̍h--i, chiū tòa kàu Hap-má tōe ê Lī-pí-la̍h, Pa-pí-lûn ông Nî-pò͘-kah-nî-sat hia; i chiū sím-phòaⁿ--i. 6 Pa-pí-lûn ông tī Lī-pí-la̍h thâi Se-tí-ka chiah ê kiáⁿ, hō͘ i chhin-ba̍k khòaⁿ-kìⁿ; Pa-pí-lûn ông koh thâi Iû-tāi it-chhè chun-kùi ê lâng. 7 Ia̍h koh iah Se-tí-ka ê ba̍k-chiu, ēng thih-liān liān--i, beh tòa i kàu Pa-pí-lûn. 8 Ka-le̍k-tí lâng ēng hé sio ông-kiong kap peh-sìⁿ ê chhù; koh thiah-húi Iâ-lō͘-sat-léng ê siâⁿ-chhiûⁿ. 9 Hit-sî Sī-ōe-tiúⁿ Nî-pò͘-sat-la̍h-tàn chiong siâⁿ-lāi só͘ chhun ê peh-sìⁿ, kap tâu-hâng kui-ho̍k i--ê, í-ki̍p kî-û só͘ chhun ê peh-sìⁿ, lóng lia̍h-khì Pa-pí-lûn. 10 Sī-ōe-tiúⁿ Nî-pò͘-sat-la̍h-tàn chiū chiong peh-sìⁿ-tiong sòng kàu bô pòaⁿ-hāng ê lâng lâu tī Iû-tāi tōe; tng-sî ia̍h hō͘ in phû-tô-hn̂g kap chhân. 11 Pa-pí-lûn ông Nî-pò͘-kah-nî-sat lūn-kàu Iâ-lī-bí, chiū hoan-hù Sī-ōe-tiúⁿ Nî-pò͘-sat-la̍h-tàn, kóng, 12 Chiong i kau-tài lí, tio̍h hó khoán-thāi i, m̄-thang hāi i; i tùi lí kóng sím-mi̍h, lí chiū chiàu án-ni kā i chòe. 13 Sī-ōe-tiúⁿ Nî-pò͘-sat-la̍h-tàn, thài-kàm-thâu Nî-pò͘-sa-su-pan, phok-sū-tiúⁿ Nî-pò͘-sa-lí-siat, kap Pa-pí-lûn ông chiah ê koaⁿ-tiúⁿ, 14 chhe lâng chhōa Iâ-lī-bí chhut khu-liû-só͘ ê īⁿ, kau-tài Sa-hoan ê sun, A-hi-kam ê kiáⁿ, Ki-tāi-lī, chhōa i tò-khì in tau; tùi án-ni i chiū khiā-khí peh-sìⁿ ê tiong-kan. 15 Iâ-lī-bí iáu koaiⁿ tī khu-liû-só͘ īⁿ-lāi ê sî, Iâ-hô-hoa ê ōe lîm-kàu i kóng, 16 Lí tio̍h khì kā Kó͘-si̍t lâng Í-pek-bí-le̍k kóng, Bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa kóng kàng chai-ē, bô kàng hok-khì ê ōe, tek-khak kàu chit ê siâⁿ; kàu hit-ji̍t beh chiâⁿ tī lí ê bīn-chêng. 17 Iâ-hô-hoa kóng, Kàu hit-ji̍t Góa beh chín-kiù lí; lí tek-khak put-tì kau-hù tī lí só͘ kiaⁿ hiah-ê lâng ê chhiú. 18 Góa tiāⁿ-tio̍h beh chín-kiù lí, lí put-tì tó tī to-ē; lí beh khioh-tio̍h lí ê sìⁿ-miā; in-ūi lí óa-khò Góa; che sī Iâ-hô-hoa kóng--ê.
1 耶路撒冷人，kap偤大人，受掠去巴比倫；其中耶利米亦hō͘侍衛長掠去，用鐵鏈縛伊；後來tùi La̍h-má放伊去；然後耶和華ê話臨到耶利米。 2 侍衛長叫耶利米來，kā伊講，耶和華你ê上帝bat講，beh降chitê災厄hō͘ chitê所在。 3 Taⁿ耶和華hō͘伊到，照伊所講ê來行。因為lín得罪耶和華，無聽thàn伊ê話，所以chitê tāi-chì到tī lín。 4 看ah，我今á日tháu開你手裡ê鐵鏈；你若看kap我去巴比倫是好，就thang來去，我beh好款待你；你若看kap我去巴比倫m̄好，就莫用去。看ah，全地tī你ê面前，你看toh-lo̍h是好，是合宜，做你thang去。 5 伊iáu未tò去，侍衛長koh kā伊講，你thang tò去Sa-hoan ê孫，A-hi-kam ê kiáⁿ，Ki-tāi-lī hia；現今巴比倫王設立伊管轄偤大chiahê城；你thang kap伊khiā起tī百姓中，á是你所看做合宜ê所在，就thang去。Tùi án-ni，侍衛長送伊米糧kap禮物，hō͘伊去。 6 耶利米就到Bí-su-pa，見A-hi-kam ê kiáⁿ Ki-tāi-lī；kap伊khiā起tī境內chhun ê百姓ê中間。 7 Tī田野一切ê軍長，kap屬in ê人，聽見巴比倫王設立A-hi-kam ê kiáⁿ Ki-tāi-lī管轄chit所在；亦將無掠去巴比倫ê ta-po͘人、婦人人、gín-á，kap境內極sòng-hiong ê人，lóng總交伊； 8 in就來Bí-su-pa Ki-tāi-lī hia；就是Nî-thàm-ngá ê kiáⁿ以實瑪利，Ka-lī-a兩個kiáⁿ Iok-hap-lân kap約拿單，Tan-hō͘-bia̍t ê kiáⁿ Se-lâi-ngá，kap Nî-tô-hoat人Í-húi ê眾kiáⁿ，Má-ka人ê kiáⁿ Iâ-sat-nî-a，kap屬in ê人。 9 Sa-hoan ê孫，A-hi-kam ê kiáⁿ，Ki-tāi-lī tùi in kap屬in ê人chiù-chōa，講，莫得驚服事Ka-le̍k-tí人；做lín khiā起chia，服事巴比倫王，lín就會得tio̍h福氣。 10 論到我，我beh tiàm tī Bí-su-pa，伺候hiahê能來咱chia ê Ka-le̍k-tí人；但是lín chiahê，lín tio̍h積聚酒，夏天ê果子，kap油，收tī器具內，khiā起tī lín所佔 ê城。 11 Koh有tī Mô͘-ap，kap A-bûn族ê中間，tī Í-tong，kap列國中間一切ê偤大人，聽見巴比倫王有留所chhun ê偤大人，koh設立Sa-hoan ê孫，A-hi-kam ê kiáⁿ，Ki-tāi-lī管轄in； 12 Chiahê一切ê偤大人tùi in hō͘人趕去ê ta̍k所在tò來，到偤大地ê Bí-su-pa、Ki-tāi-lī hia，續積聚chōe-chōe酒kap夏天ê果子。 13 Ka-lī-a ê kiáⁿ，Iok-hap-lân，kap tī田野一切ê軍長來Bí-su-pa見Ki-tāi-lī，對伊講， 14 A-bûn族ê王，Pa-lī-su，有差Nî-thàm-ngá ê kiáⁿ以實瑪利來beh取你ê性命，你知mah？總是A-hi-kam ê kiáⁿ Ki-tāi-lī m̄信in。 15 Ka-lī-a ê kiáⁿ，Iok-hap-lân tī Bí-su-pa暗靜對Ki-tāi-lī講，求你准我去，我beh 刣 Nî-thàm-ngá ê kiáⁿ以實瑪利，的確無人知；kiám thang hō͘伊取你ê性命，致到歸óa你ê偤大人四散，hō͘偤大所chhun ê人lóng滅無ah？ 16 A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân講，你m̄-thang做chitê事；你所講以實瑪利ê事是無影。
1 Iâ-lō͘-sat-léng lâng, kap Iû-tāi lâng, siū-lia̍h khì Pa-pí-lûn; kî-tiong Iâ-lī-bí ia̍h hō͘ Sī-ōe-tiúⁿ lia̍h--khì, ēng thih-liān pa̍k--i; āu-lâi tùi La̍h-má pàng i khì; jiân-āu Iâ-hô-hoa ê ōe lîm-kàu Iâ-lī-bí. 2 Sī-ōe-tiúⁿ kiò Iâ-lī-bí lâi, kā i kóng, Iâ-hô-hoa lí ê Siōng-tè bat kóng, beh kàng chit ê chai-ē hō͘ chit ê só͘-chāi. 3 Taⁿ Iâ-hô-hoa hō͘ i kàu, chiàu I só͘ kóng--ê lâi kiâⁿ. In-ūi lín tek-chōe Iâ-hô-hoa, bô thiaⁿ-thàn I ê ōe, só͘-í chit ê tāi-chì kàu tī lín. 4 Khòaⁿ ah, góa kin-á-ji̍t tháu-khui lí chhiú--nih ê thih-liān; lí nā khòaⁿ kap góa khì Pa-pí-lûn sī hó, chiū thang lâi khì, góa beh hó khoán-thāi lí; lí nā khòaⁿ kap góa khì Pa-pí-lûn m̄-hó, chiū bo̍h-ēng khì. Khòaⁿ ah, choân-tōe tī lí ê bīn-chêng, lí khòaⁿ toh-lo̍h sī hó, sī ha̍p-gî, chòe lí thang khì. 5 I iáu-bē tò-khì, Sī-ōe-tiúⁿ koh kā i kóng, Lí thang tò--khì Sa-hoan ê sun, A-hi-kam ê kiáⁿ, Ki-tāi-lī hia; hiān-kim Pa-pí-lûn ông siat-li̍p i koán-hat Iû-tāi chiah ê siâⁿ; lí thang kap i khiā-khí tī peh-sìⁿ-tiong, á-sī lí só͘ khòaⁿ-chòe ha̍p-gî ê só͘-chāi, chiū thang khì. Tùi án-ni, Sī-ōe-tiúⁿ sàng i bí-niû kap lé-mi̍h, hō͘ i khì. 6 Iâ-lī-bí chiū kàu Bí-su-pa, kìⁿ A-hi-kam ê kiáⁿ Ki-tāi-lī; kap i khiā-khí tī kéng-lāi chhun ê peh-sìⁿ ê tiong-kan. 7 Tī chhân-iá it-chhè ê kun-tiúⁿ, kap sio̍k in ê lâng, thiaⁿ-kìⁿ Pa-pí-lûn ông siat-li̍p A-hi-kam ê kiáⁿ Ki-tāi-lī koán-hat chit só͘-chāi; ia̍h chiong bô lia̍h-khì Pa-pí-lûn ê ta-po͘-lâng, hū-jîn-lâng, gín-á, kap kéng-lāi ke̍k sòng-hiong ê lâng, lóng-chóng kau i; 8 in chiū lâi Bí-su-pa Ki-tāi-lī hia; chiū-sī Nî-thàm-ngá ê kiáⁿ Í-si̍t-má-lī, Ka-lī-a nn̄g ê kiáⁿ Iok-hap-lân kap Iok-ná-tan, Tan-hō͘-bia̍t ê kiáⁿ Se-lâi-ngá, kap Nî-tô-hoat lâng Í-húi ê chèng-kiáⁿ, Má-ka lâng ê kiáⁿ Iâ-sat-nî-a, kap sio̍k in ê lâng. 9 Sa-hoan ê sun, A-hi-kam ê kiáⁿ, Ki-tāi-lī tùi in kap sio̍k in ê lâng chiù-chōa, kóng, Bo̍h-tit kiaⁿ ho̍k-sāi Ka-le̍k-tí lâng; chòe lín khiā-khí chia, ho̍k-sāi Pa-pí-lûn ông, lín chiū ōe tit-tio̍h hok-khì. 10 Lūn-kàu góa, góa beh tiàm tī Bí-su-pa, su-hāu hiah ê ōe lâi lán chia ê Ka-le̍k-tí lâng; nā-sī lín chiah-ê, lín tio̍h chek-chū chiú, hē-thiⁿ ê ké-chí, kap iû, siu tī khì-kū lāi, khiā-khí tī lín só͘ chiàm ê siâⁿ. 11 Koh ū tī Mô͘-ap, kap A-bûn cho̍k ê tiong-kan, tī Í-tong, kap lia̍t-kok tiong-kan it-chhè ê Iû-tāi lâng, thiaⁿ-kìⁿ Pa-pí-lûn ông ū lâu só͘ chhun ê Iû-tāi lâng, koh siat-li̍p Sa-hoan ê sun, A-hi-kam ê kiáⁿ, Ki-tāi-lī koán-hat in; 12 chiah ê it-chhè ê Iû-tāi lâng tùi in hō͘ lâng kóaⁿ-khì ê ta̍k só͘-chāi tò--lâi, kàu Iû-tāi tōe ê Bí-su-pa, Ki-tāi-lī hia, sòa chek-chū chōe-chōe chiú kap hē-thiⁿ ê ké-chí. 13 Ka-lī-a ê kiáⁿ, Iok-hap-lân, kap tī chhân-iá it-chhè ê kun-tiúⁿ lâi Bí-su-pa kìⁿ Ki-tāi-lī, tùi i kóng, 14 A-bûn-cho̍k ê ông, Pa-lī-su, ū chhe Nî-thàm-ngá ê kiáⁿ Í-si̍t-má-lī lâi beh chhú lí ê sìⁿ-miā, lí chai mah? chóng-sī A-hi-kam ê kiáⁿ Ki-tāi-lī m̄-sìn in. 15 Ka-lī-a ê kiáⁿ, Iok-hap-lân tī Bí-su-pa àm-chīⁿ tùi Ki-tāi-lī kóng, Kiû lí chún góa khì, góa beh thâi Nî-thàm-ngá ê kiáⁿ Í-si̍t-má-lī, tek-khak bô lâng chai; kiám thang hō͘ i chhú lí ê sìⁿ-miā, tì-kàu kui-óa lí ê Iû-tāi lâng sì-sòaⁿ, hō͘ Iû-tāi só͘-chhun ê lâng lóng bia̍t-bô ah? 16 A-hi-kam ê kiáⁿ Ki-tāi-lī kā Ka-lí-a ê kiáⁿ Iok-hap-lân kóng, Lí m̄-thang chòe chit ê sū; lí só͘ kóng Í-si̍t-má-lī ê sū sī bô-iáⁿ.
1 七月間，Í-lī-sa-má ê孫，Nî-thàm-ngá ê kiáⁿ，以實瑪利，伊是王親，亦是王ê大臣，chhōa十人來Bí-su-pa，見A-hi-kam ê kiáⁿ Ki-tāi-lī；in tī Bí-su-pa相kap食。 2 Nî-thàm-ngá ê kiáⁿ以實瑪利，以及kap伊來ê hit十人，起來，用刀刣死Sa-hoan ê孫，A-hi-kam ê kiáⁿ，Ki-tāi-lī，就是巴比倫王所立來管轄chitê地ê。 3 以實瑪利koh 刣死tī Bí-su-pa歸óa Ki-tāi-lī lóng總ê偤大人；以及tī-hia所tú-tio̍h Ka-le̍k-tí ê軍兵。 4 伊刣死Ki-tāi-lī了後，第二日iáu無人知； 5 Hit-tia̍p有八十人tùi示劍，tùi Sī-lô，tùi撒馬利亞來；剃嘴鬚，拆裂衫，家己割身軀，手the̍h禮物kap乳香，beh帶伊到耶和華ê厝。 6 Nî-thàm-ngá ê kiáⁿ，以實瑪利，tùi Bí-su-pa出來迎接in；ná行ná哭；到tú-tio̍h in，就kā in講，Lín來去見A-hi-kam ê kiáⁿ Ki-tāi-lī。 7 In到城中，Nî-thàm-ngá ê kiáⁿ以實瑪利，kap tè伊ê人，就刣死in，hiat in tī乾井。 8 In中間有十人對以實瑪利講，莫得刣死阮；因為阮有chōe-chōe小麥、大麥、油、蜜，khǹg tī田裡；伊就停手，無刣 in tī in ê兄弟中。 9 以實瑪利刣 chiahê人，óa近Ki-tāi-lī hia，將in ê身屍hiat tī井裡；chitê井是從前A-sat王因為驚以色列王Pa-sa ê緣故所開ê；Nî-thàm-ngá ê kiáⁿ以實瑪利將所刣 ê身屍thūn滿伊。 10 以實瑪利掠Bí-su-pa所chhun ê百姓，就是王ê眾cha-bó͘-kiáⁿ，以及iáu tòa tī Bí-su-pa ê百姓，就是侍衛長Nî-pò͘-sat-la̍h-tàn所交帶A-hi-kam ê kiáⁿ Ki-tāi-lī-ê。Nî-thàm-ngá ê kiáⁿ以實瑪利掠伊去，beh過去A-bûn族hia。 11 Ka-lī-a ê kiáⁿ Iok-hap-lân，以及kap伊tī-teh ê眾軍長，聽見Nî-thàm-ngá ê kiáⁿ以實瑪利所行一切ê pháiⁿ， 12 就chhōa眾人進前去，beh kap Nî-thàm-ngá ê kiáⁿ以實瑪利交戰；tī Ki-piàn ê大水邊chhē-tio̍h-ê。 13 以實瑪利所帶去hiahê百姓看去Ka-lī-a ê kiáⁿ Iok-hap-lân，以及kap伊來ê眾軍長，就lóng歡喜。 14 Tùi án-ni， 以實瑪利tùi Bí-su-pa所掠去ê眾百姓lóng oa̍t-tńg來歸Ka-lī-a ê kiáⁿ Iok-hap-lân。 15 Nî-thàm-ngá ê kiáⁿ以實瑪利，kap八個人脫離Iok-hap-lân ê手，走去A-bûn族hia。 16 後來Ka-lī-a ê kiáⁿ Iok-hap-lân，kap tè伊ê眾軍長，將所chhun ê百姓，就是Nî-thàm-ngá ê kiáⁿ以實瑪利phah死A-hi-kam ê kiáⁿ Ki-tāi-lī以後，tùi Bí-su-pa所帶去ê ta-po͘人、勇士、婦女、gín-á、太監，koh是伊tùi Ki-piàn帶來ê。 17 In就起身到伯利恆邊á Kim-hán ê客店停歇，想beh去埃及。 18 這是因為Ka-le̍k-tí人ê緣故；因為Nî-thàm-ngá ê kiáⁿ以實瑪利有刣死A-hi-kam ê kiáⁿ Ki-tāi-lī，就是巴比倫王所立來管轄chitê土地ê，所以in驚。
1 Chhit-ge̍h-kan, Í-lī-sa-má ê sun, Nî-thàm-ngá ê kiáⁿ, Í-si̍t-má-lī, i sī ông-chhin, ia̍h sī ông ê tāi-sîn, chhōa cha̍p-lâng lâi Bí-su-pa, kìⁿ A-hi-kam ê kiáⁿ Ki-tāi-lī; in tī Bí-su-pa saⁿ-kap chia̍h. 2 Nî-thàm-ngá ê kiáⁿ Í-si̍t-má-lī, í-ki̍p kap i lâi ê hit cha̍p-lâng, khí-lâi, ēng to thâi-sí Sa-hoan ê sun, A-hi-kam ê kiáⁿ, Ki-tāi-lī, chiū-sī Pa-pí-lûn-ông só͘ li̍p lâi koán-hat chit ê tōe--ê. 3 Í-si̍t-má-lī koh thâi-sí tī Bí-su-pa kui-óa Ki-tāi-lī lóng-chóng ê Iû-tāi lâng; í-ki̍p tī-hia só͘ tú-tio̍h Ka-le̍k-tí ê kun-peng. 4 I thâi-sí Ki-tāi-lī liáu-āu, tē-jī-ji̍t iáu bô lâng chai; 5 hit-tia̍p ū poeh-cha̍p lâng tùi Sī-kiàm, tùi Sī-lô, tùi Sat-má-lī-a lâi; thì chhùi-chhiu, thiah-li̍h saⁿ, ka-kī koah sin-khu, chhiú the̍h lé-mi̍h kap jú-hiuⁿ, beh tòa i kàu Iâ-hô-hoa ê chhù. 6 Nî-thàm-ngá ê kiáⁿ, Í-si̍t-má-lī, tùi Bí-su-pa chhut-lâi ngiâ-chih in; ná-kiâⁿ ná-khàu; kàu tú-tio̍h in, chiū kā in kóng, Lín lâi khì kìⁿ A-hi-kam ê kiáⁿ Ki-tāi-lī. 7 In kàu siâⁿ-tiong, Nî-thàm-ngá ê kiáⁿ Í-si̍t-má-lī, kap tè i ê lâng, chiū thâi-sí in, hiat in tī ta-chíⁿ. 8 In tiong-kan ū cha̍p-lâng tùi Í-si̍t-má-lī kóng, Bo̍h-tit thâi-sí goán; in-ūi goán ū chōe-chōe sió-be̍h, tōa-be̍h, iû, bi̍t, khǹg tī chhân--nih; i chiū thêng-chhiú, bô thâi in tī in ê hiaⁿ-tī-tiong. 9 Í-si̍t-má-lī thâi chiah ê lâng, óa-kūn Ki-tāi-lī hia, chiong in ê sin-si hiat tī chíⁿ--nih; chit ê chíⁿ sī chiông-chêng A-sat ông in-ūi kiaⁿ Í-sek-lia̍t ông Pa-sa ê iân-kò͘ só͘ khui--ê; Nî-thàm-ngá ê kiáⁿ Í-si̍t-má-lī chiong só͘ thâi ê sin-si thūn-móa--i. 10 Í-si̍t-má-lī lia̍h Bí-su-pa só͘ chhun ê peh-sìⁿ, chiū-sī ông ê chèng cha-bó͘-kiáⁿ, í-ki̍p iáu tòa tī Bí-su-pa ê peh-sìⁿ, chiū-sī sī-ōe-tiúⁿ Nî-pò͘-sat-la̍h-tàn só͘ kau-tài A-hi-kam ê kiáⁿ Ki-tāi-lī--ê. Nî-thàm-ngá ê kiáⁿ Í-si̍t-má-lī lia̍h i khì, beh kè--khì A-bûn cho̍k hia. 11 Ka-lī-a ê kiáⁿ Iok-hap-lân, í-ki̍p kap i tī-teh ê chèng kun-tiúⁿ, thiaⁿ-kìⁿ Nî-thàm-ngá ê kiáⁿ Í-si̍t-má-lī só͘ kiâⁿ it-chhè ê pháiⁿ, 12 chiū chhōa chèng-lâng chìn-chêng khì, beh kap Nî-thàm-ngá ê kiáⁿ Í-si̍t-má-lī kau-chiàn; tī Ki-piàn ê tōa-chúi-piⁿ chhē--tio̍h-ê. 13 Í-si̍t-má-lī só͘ tòa--khì hiah ê peh-sìⁿ khòaⁿ-khì Ka-lī-a ê kiáⁿ Iok-hap-lân, í-ki̍p kap i lâi ê chèng kun-tiúⁿ, chiū lóng hoaⁿ-hí. 14 Tùi án-ni Í-si̍t-má-lī tùi Bí-su-pa só͘ lia̍h-khì ê chèng-peh-sìⁿ lóng oa̍t-tńg lâi kui Ka-lī-a ê kiáⁿ Iok-hap-lân. 15 Nî-thàm-ngá ê kiáⁿ Í-si̍t-má-lī, kap poeh ê lâng thoat-lī Iok-hap-lân ê chhiú, cháu-khì A-bûn cho̍k hia. 16 Āu-lâi Ka-lī-a ê kiáⁿ Iok-hap-lân, kap tè--i ê chèng kun-tiúⁿ, chiong só͘ chhun ê peh-sìⁿ, chiū-sī Nî-thàm-ngá ê kiáⁿ Í-si̍t-má-lī phah-sí A-hi-kam ê kiáⁿ Ki-tāi-lī í-āu, tùi Bí-su-pa só͘ tòa--khì ê ta-po͘-lâng, ióng-sū, hū-lú, gín-á, thài-kàm, koh sī i tùi Ki-piàn tòa--lâi-ê. 17 In chiū khí-sin kàu Pek-lī-hêng piⁿ-á Kim-hán ê kheh-tiàm thêng-hioh, siūⁿ beh khì Ai-ki̍p. 18 Che sī in-ūi Ka-le̍k-tí lâng ê iân-kò͘; in-ūi Nî-thàm-ngá ê kiáⁿ Í-si̍t-má-lī ū thâi-sí A-hi-kam ê kiáⁿ Ki-tāi-lī, chiū-sī Pa-pí-lûn ông só͘ li̍p lâi koán-hat chit ê thó͘-tōe--ê, só͘-í in kiaⁿ.
1 眾軍長kap Ka-lī-a ê kiáⁿ Iok-hap-lân，kap Hô-sa-ngá ê kiáⁿ Iâ-sat-nî-a，以及眾百姓，tùi細到大，lóng進前來。 2 對先知耶利米講，求你准阮tī你ê面前所求，替阮chiahê chhun ê人祈禱耶和華你ê上帝；阮本然真chōe，taⁿ所chhun-ê真少，這是你親目看見ê。 3 願耶和華你ê上帝指示阮所tio̍h行ê路，所tio̍h做ê事。 4 先知耶利米kā in講，我已經聽見；好，我beh照lín ê話，祈禱耶和華lín ê上帝；無論耶和華ìn lín甚麼，我的確lóng beh kā lín講，無對lín khǹg密一句。 5 Tùi án-ni， in kā耶利米講，阮若無照耶和華你ê上帝差你來講一切ê話去行，就願耶和華tī你阮ê中間做真實忠信ê干證。 6 阮chit時請你到耶和華阮ê上帝ê面前；祂所講ê，無論是好是pháiⁿ，阮lóng beh聽thàn祂ê話；阮聽thàn耶和華阮ê上帝ê話，就thang得tio̍h興通。 7 過十日，有耶和華ê話臨到耶利米。 8 伊就將Ka-lī-a ê kiáⁿ Iok-hap-lân，以及kap伊相kap tī-teh ê眾軍長，kap眾百姓，tùi細到大，lóng叫in來； 9 對in講，耶和華以色列ê上帝，就是lín差我到伊ê面前來獻lín所求ê，伊án-ni講， 10 Lín若猶原beh tiàm tī chit所在，我就beh建造lín，無毀壞lín；beh栽培lín，無拔出lín；因為我有退悔我所降hō͘ lín ê災厄。 11 莫得驚lín所驚ê巴比倫王；耶和華講，莫得驚伊；因為我kap lín tī-teh，beh拯救lín，hō͘ lín脫離伊ê手。 12 我beh憐憫lín，hō͘ in亦憐憫lín；hō͘ lín tò來本所在。 13 設使lín講，阮m̄ tiàm chit所在，án-ni就是lín m̄聽thàn耶和華lín ê上帝ê話。 14 若講，M̄-ah，阮beh入去埃及地；tī-hia無看見交戰，無聽見哨角ê聲，亦不致無thang食來iau餓；阮beh tòa hia khiā起。 15 Taⁿ lín偤大所chhun ê百姓ah，tio̍h聽耶和華ê話；萬軍ê耶和華以色列ê上帝án-ni講，Lín若竟然硬鼻beh去埃及，tòa hia寄腳， 16 就lín所驚ê刀劍beh tī-hia jip-tio̍h lín tī埃及地；koh lín所驚ê飢荒，beh tī埃及地kā lín tè-tiâu-tiâu；lín beh死tī-hia。 17 見若硬鼻beh去埃及，寄腳tī-hia ê人，lóng beh án-ni；in beh tùi刀劍，tùi飢荒，tùi瘟疫來死；其中無一个留teh，亦無一个脫離我所降hō͘ in ê災厄。 18 因為萬軍ê耶和華以色列ê上帝，án-ni講，我有怎樣將我ê受氣kap大受氣piàⁿ tī耶路撒冷khiā起ê百姓；lín去埃及ê時，我亦beh照án-ni將我ê大受氣piàⁿ tī lín ê身上；hō͘ lín成做thang咒詛，thang gông-ngia̍h，thang詈罵，thang凌辱；lín亦無koh看見chitê所在。 19 Lín偤大所chhun ê百姓ah，耶和華論到lín有講，莫得去埃及；lín tio̍h確實知，我今á日有證明勸解lín lah。 20 Lín行差謬連累家己；因為lín差我到耶和華lín ê上帝hia，講，求你替阮祈禱耶和華，咱ê上帝；照耶和華咱ê上帝一切所講ê，kā阮講；阮beh行伊。 21 我今á日有kā lín講lah；但是lín ê上帝耶和華ê聲，kap伊差我一切指示lín-ê，lín lóng無遵thàn。 22 Taⁿ lín tio̍h確實知，lín tī所beh去寄腳ê地，beh tùi刀劍，tùi飢荒，tùi瘟疫來死。
1 Chèng kun-tiúⁿ kap Ka-lī-a ê kiáⁿ Iok-hap-lân, kap Hô-sa-ngá ê kiáⁿ Iâ-sat-nî-a, í-ki̍p chèng peh-sìⁿ, tùi sòe kàu tōa, lóng chìn-chêng lâi. 2 Tùi sian-ti Iâ-lī-bí kóng, Kiû lí chún goán tī lí ê bīn-chêng só͘ kiû, thòe goán chiah ê chhun ê lâng kî-tó Iâ-hô-hoa lí ê Siōng-tè; goán pún-jiân chin-chōe, taⁿ só͘-chhun-ê chin-chió, che sī lí chhin-ba̍k khòaⁿ-kìⁿ--ê. 3 Goān Iâ-hô-hoa lí ê Siōng-tè chí-sī goán só͘ tio̍h kiâⁿ ê lō͘, só͘ tio̍h chòe ê sū. 4 Sian-ti Iâ-lī-bí kā in kóng, Góa í-keng thiaⁿ-kìⁿ; hó, góa beh chiàu lín ê ōe, kî-tó Iâ-hô-hoa lín ê Siōng-tè; bô-lūn Iâ-hô-hoa ìn lín sím-mi̍h, góa tek-khak lóng beh kā lín kóng, bô tùi lín khǹg-ba̍t chi̍t-kù. 5 Tùi án-ni in kā Iâ-lī-bí kóng, Goán nā bô chiàu Iâ-hô-hoa lí ê Siōng-tè chhe lí lâi kóng it-chhè ê ōe khì kiâⁿ, chiū goān Iâ-hô-hoa tī lí goán ê tiong-kan chòe chin-si̍t tiong-sìn ê kan-chèng. 6 Goán chit-sî chhiáⁿ lí kàu Iâ-hô-hoa goán ê Siōng-tè ê bīn-chêng; I só͘ kóng--ê, bô lūn sī hó sī pháiⁿ, goán lóng beh thiaⁿ-thàn I ê ōe; goán thiaⁿ-thàn Iâ-hô-hoa goán ê Siōng-tè ê ōe, chiū thang tit-tio̍h heng-thong. 7 Kè cha̍p-ji̍t, ū Iâ-hô-hoa ê ōe lîm-kàu Iâ-lī-bí. 8 I chiū chiong Ka-lī-a ê kiáⁿ Iok-hap-lân, í-ki̍p kap i saⁿ-kap tī-teh ê chèng kun-tiúⁿ, kap chèng peh-sìⁿ, tùi sòe kàu tōa, lóng kiò in lâi; 9 tùi in kóng, Iâ-hô-hoa Í-sek-lia̍t ê Siōng-tè, chiū-sī lín chhe góa kàu I ê bīn-chêng lâi hiàn lín só͘ kiû--ê, I án-ni kóng, 10 Lín nā iû-goân beh tiàm tī chit só͘-chāi, Góa chiū beh kiàn-chō lín, bô húi-hoāi lín; beh chai-pôe lín, bô pu̍ih-chhut lín; in-ūi Góa ū thè-hóe Góa só͘ kàng hō͘ lín ê chai-ē. 11 Bo̍h-tit kiaⁿ lín só͘ kiaⁿ ê Pa-pí-lûn ông; Iâ-hô-hoa kóng, Bo̍h-tit kiaⁿ--i; in-ūi Góa kap lín tī-teh, beh chín-kiù lín, hō͘ lín thoat-lī i ê chhiú. 12 Góa beh lîn-bín lín, hō͘ in ia̍h lîn-bín lín; hō͘ lín tò-lâi pún só͘-chāi. 13 Siat-sú lín kóng, Goán m̄ tiàm chit só͘-chāi, án-ni chiū-sī lín m̄ thiaⁿ-thàn Iâ-hô-hoa lín ê Siōng-tè ê ōe. 14 Nā kóng, M̄--ah, goán beh ji̍p--khì Ai-ki̍p tōe; tī-hia bô khòaⁿ-kìⁿ kau-chiàn, bô thiaⁿ-kìⁿ sàu-kak ê siaⁿ, ia̍h put-tì bô thang chia̍h lâi iau-gō; goán beh tòa hia khiā-khí. 15 Taⁿ lín Iû-tāi só͘ chhun ê peh-sìⁿ ah, tio̍h thiaⁿ Iâ-hô-hoa ê ōe; bān-kun ê Iâ-hô-hoa Í-sek-lia̍t ê Siōng-tè án-ni kóng, Lín nā kèng-jiân ngī-phīⁿ beh khì Ai-ki̍p, tòa hia kià-kha, 16 chiū lín só͘ kiaⁿ ê to-kiàm beh tī-hia jip-tio̍h lín tī Ai-ki̍p tōe; koh lín só͘ kiaⁿ ê ki-hng, beh tī Ai-ki̍p tōe kā lín tè-tiâu-tiâu; lín beh sí tī-hia. 17 Kìⁿ-nā ngī-phīⁿ beh khì Ai-ki̍p, kià-kha tī-hia ê lâng, lóng beh án-ni; in beh tùi to-kiàm, tùi ki-hng, tùi un-e̍k lâi sí; kî-tiong bô chi̍t-ê lâu--teh, ia̍h bô chi̍t-ê thoat-lī Góa só͘ kàng hō͘ in ê chai-ē. 18 In-ūi bān-kun ê Iâ-hô-hoa Í-sek-lia̍t ê Siōng-tè, án-ni kóng, Góa ū cháiⁿ-iūⁿ chiong Góa ê siū-khì kap tōa siū-khì piàⁿ tī Iâ-lō͘-sat-léng khiā-khí ê peh-sìⁿ; lín khì Ai-ki̍p ê sî, Góa ia̍h beh chiàu án-ni chiong Góa ê tōa siū-khì piàⁿ tī lín ê sin-chiūⁿ; hō͘ lín chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k; lín ia̍h bô koh khòaⁿ-kìⁿ chit ê só͘-chāi. 19 Lín Iû-tāi só͘ chhun ê peh-sìⁿ ah, Iâ-hô-hoa lūn-kàu lín ū kóng, Bo̍h-tit khì Ai-ki̍p; lín tio̍h khak-si̍t chai, góa kin-á-ji̍t ū chèng-bêng khoàn-kài lín lah. 20 Lín kiâⁿ chha-biū liân-lūi ka-kī; in-ūi lín chhe góa kàu Iâ-hô-hoa lín ê Siōng-tè hia, kóng, Kiû lí thòe goán kî-tó Iâ-hô-hoa, lán ê Siōng-tè; chiàu Iâ-hô-hoa lán ê Siōng-tè it-chhè só͘ kóng--ê, kā goán kóng; goán beh kiâⁿ--i. 21 Góa kin-á-ji̍t ū kā lín kóng lah; nā-sī lín ê Siōng-tè Iâ-hô-hoa ê siaⁿ, kap I chhe góa it-chhè chí-sī lín--ê, lín lóng bô chun-thàn. 22 Taⁿ lín tio̍h khak-si̍t chai, lín tī só͘ beh khì kià-kha ê tōe, beh tùi to-kiàm, tùi ki-hng, tùi un-e̍k lâi sí.
1 耶利米對眾百姓講明白耶和華in ê上帝一切ê話，就是耶和華in ê上帝差伊所講一切ê話。 2 Hô-sa-ngá ê kiáⁿ A-sat-lī-ngá，kap Ka-lī-a ê kiáⁿ Iok-hap-lân，kap一切驕傲ê人，就對耶利米講，你講無影話，耶和華咱ê上帝並無差你來講，Lín m̄-thang去埃及，來寄腳tī-hia； 3 這是Nî-lī-a ê kiáⁿ Pa-lio̍k教唆你害阮，beh將阮交tī Ka-le̍k-tí人ê手，hō͘ in 刣死阮，á是掠阮到巴比倫。 4 Tùi án-ni，Ka-lī-a ê kiáⁿ Iok-hap-lân，kap一切軍長，kap眾百姓，m̄聽thàn耶和華ê話，來tiàm tī偤大地。 5 Ka-lī-a ê kiáⁿ Iok-hap-lân，kap一切ê軍長，就將chhun ê偤大人，就是tùi in受趕去hiahê國tò來，beh寄腳tī偤大地ê， 6 不論ta-po͘人，婦人人，gín-á kap王hiahê cha-bó͘-kiáⁿ，kap侍衛長Nî-pò͘-sat-la̍h-tàn所留來交帶Sa-hoan ê孫，A-hi-kam ê kiáⁿ，Ki-tāi-lī ê眾人，kap先知耶利米，以及Nî-lī-a ê kiáⁿ Pa-lio̍k，lóng帶去埃及地，到Tap-pí-le̍k。 7 這是因為in m̄聽thàn耶和華ê話。 8 Tī Tap-pí-le̍k，耶和華ê話臨到耶利米講， 9 你tio̍h用手the̍h幾塊大粒石，tī偤大人ê面前，khǹg tī疊磚ê灰土內，就是tī Tap-pí-le̍k法老ê王宮門hia； 10 kā in講，萬軍ê耶和華以色列ê上帝án-ni講，看ah，我beh召我ê奴僕巴比倫王Nî-pò͘-kah-nî-sat來；tī所khǹg ê石頭頂，我beh安置伊ê寶座，伊beh tī hit石頂搭súi ê布棚。 11 伊beh來攻擊埃及地，應該死ê就死，應該掠ê就受掠，應該hō͘刀刣-ê就hō͘刀刣。 12 我也beh起火tī埃及hiahê神明ê廟；伊beh燒伊，掠in去；伊beh得tio̍h埃及地親像牧者穿伊ê衫；tùi hia安然出去。 13 伊的確phah碎埃及地Pek-sī-be̍k雕刻ê柱，用火燒埃及chiahê神明ê廟。
1 Iâ-lī-bí tùi chèng peh-sìⁿ kóng bêng-pe̍k Iâ-hô-hoa in ê Siōng-tè it-chhè ê ōe, chiū-sī Iâ-hô-hoa in ê Siōng-tè chhe--i só͘ kóng it-chhè ê ōe. 2 Hô-sa-ngá ê kiáⁿ A-sat-lī-ngá, kap Ka-lī-a ê kiáⁿ Iok-hap-lân, kap it-chhè kiau-ngō͘ ê lâng, chiū tùi Iâ-lī-bí kóng, Lí kóng bô-iáⁿ ōe, Iâ-hô-hoa lán ê Siōng-tè pēng-bô chhe lí lâi kóng, Lín m̄-thang khì Ai-ki̍p, lâi kià-kha tī-hia; 3 che sī Nî-lī-a ê kiáⁿ Pa-lio̍k kiau(**kàu)-so lí hāi goán, beh chiong goán kau tī Ka-le̍k-tí lâng ê chhiú, hō͘ in thâi-sí goán, á-sī lia̍h goán kàu Pa-pí-lûn. 4 Tùi án-ni, Ka-lī-a ê kiáⁿ Iok-hap-lân, kap it-chhè kun-tiúⁿ, kap chèng peh-sìⁿ, m̄ thiaⁿ-thàn Iâ-hô-hoa ê ōe, lâi tiàm tī Iû-tāi tōe. 5 Ka-lī-a ê kiáⁿ Iok-hap-lân, kap it-chhè ê kun-tiúⁿ, chiū chiong chhun ê Iû-tāi lâng, chiū-sī tùi in siū kóaⁿ--khì hiah ê kok tò-lâi, beh kià-kha tī Iû-tāi tōe--ê, 6 put-lūn ta-po͘-lâng, hū-jîn-lâng, gín-á kap ông hiah ê cha-bó͘-kiáⁿ, kap sī-ōe-tiúⁿ Nî-pò͘-sat-la̍h-tàn só͘ lâu lâi kau-tài Sa-hoan ê sun, A-hi-kam ê kiáⁿ, Ki-tāi-lī ê chèng-lâng, kap sian-ti Iâ-lī-bí, í-ki̍p Nî-lī-a ê kiáⁿ Pa-lio̍k, lóng tòa khì Ai-ki̍p tōe, kàu Tap-pí-le̍k. 7 Che sī in-ūi in m̄ thiaⁿ-thàn Iâ-hô-hoa ê ōe. 8 Tī Tap-pí-le̍k, Iâ-hô-hoa ê ōe lîm-kàu Iâ-lī-bí kóng, 9 Lí tio̍h ēng chhiú the̍h kúi-tè tōa lia̍p chio̍h, tī Iû-tāi lâng ê bīn-chêng, khǹg tī thia̍p-chng ê he-thô͘-lāi, chiū-sī tī Tap-pí-le̍k Hoat-ló ê ông-kiong-mn̂g hia; 10 kā in kóng, Bān-kun ê Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh tiàu Góa ê lô͘-po̍k Pa-pí-lûn ông Nî-pò͘-kah-nî-sat lâi; tī só͘ khǹg ê chio̍h-thâu-téng, Góa beh an-tì i ê pó-chō, i beh tī hí(**hit) chio̍h-téng tah súi ê pò͘-pîⁿ. 11 I beh lâi kong-kek Ai-ki̍p tōe, eng-kai sí-ê chiū sí, eng-kai lia̍h-ê chiū siū-lia̍h, eng-kai hō͘ to thâi-ê chiū hō͘ to thâi. 12 Góa iā beh khí hé tī Ai-ki̍p hiah ê sîn-bêng ê biō; i beh sio i, lia̍h in khì; i beh tit-tio̍h Ai-ki̍p tōe chhin-chhiūⁿ bo̍k-chiá chhēng i ê saⁿ; tùi hia an-jiân chhut-khì. 13 I tek-khak phah-chhùi Ai-ki̍p tōe Pek-sī-be̍k tiau-khek ê thiāu, ēng hé sio Ai-ki̍p chiah ê sîn-bêng ê biō.
1 有話臨到耶利米，論到一切khiā起tī埃及地ê偤大人；就是khiā起tī Bi̍t-toat、Tap-pí-le̍k、Lô-hut、Pa-thek-lô境內ê偤大人，講， 2 萬軍ê耶和華以色列ê上帝án-ni講：我所降落tī耶路撒冷，kap偤大chiahê城一切ê災厄，lín lóng看見；看ah，taⁿ in lóng拋荒，無人khiā起。 3 這是因為in所行ê pháiⁿ，in去燒香服事別ê上帝，就是in kap lín以及lín ê列祖所m̄-bat-ê；án-ni惹我ê受氣。 4 總是我bat差我ê眾奴僕先知就近lín；是早早起來差伊，講，切切願lín m̄-thang行chitê可惡ê事，我所怨恨ê。 5 獨獨in無聽，亦無俯耳孔，無oa̍t-tńg離開in ê pháiⁿ；猶原燒香tī別號ê上帝。 6 因為án-ni，我ê大受氣kap我ê受氣piàⁿ出tī偤大chiahê城，kap耶路撒冷ê街市，親像火to̍h起來；致到in拋荒冷靜；親像今á日án-ni。 7 Taⁿ耶和華萬軍ê上帝，以色列ê上帝，án-ni講，Lín啥事行chitê大pháiⁿ，害lín家己；hō͘ lín ê ta-po͘人、婦人人、gín-á，kap食奶ê嬰á，lóng tùi偤大中kā lín除去，無留一个？是因為lín用lín ê手所做ê激我ê受氣； 8 tī所去寄腳ê埃及地，燒香tī別號ê上帝，致到lín tú-tio̍h剿滅，tī天下萬國中，成做thang咒詛，thang凌辱ê。 9 你ê列祖ê pháiⁿ，偤大列王ê pháiⁿ，in ê后妃ê pháiⁿ，lín家己ê pháiⁿ，lín ê bó͘ ê pháiⁿ，就是tī偤大地，耶路撒冷街市所行ê，lín bōe記得mah？ 10 In到taⁿ iáu無家己謙卑，無驚惶，無遵thàn我tī lín ê面前，kap lín ê列祖ê面前，所設我ê法度，我ê律例。 11 所以萬軍ê耶和華以色列ê上帝án-ni講，看ah，我beh ǹg lín變面，降災厄致到剿滅偤大ê眾人。 12 偤大所chhun ê百姓，硬鼻去埃及地，beh tī-hia寄腳ê，我beh取來滅in；in beh倒tī埃及地，in beh tùi刀劍，tùi飢荒，來滅無，tùi細到大，lóng beh tùi刀劍，tùi飢荒，來死；in beh成做thang咒詛，thang gông-ngia̍h，thang詈罵，thang凌辱ê。 13 因為我beh用刀劍，用飢荒，用瘟疫，刑罰khiā起埃及地ê；親像我已經刑罰耶路撒冷一樣； 14 Hō͘ hiahê去埃及地所chhun ê偤大人，lóng bōe得脫離，á是留teh，thang tò來偤大地，就是in ê心真欣慕tò來khiā起ê所在；因為得tio̍h脫離ê ê以外，無一个thang tò來。 15 Hiah-ê tòa tī埃及地Pa-thek-lô ê人，見若知in ê bó͘ bat對別ê上帝燒香ê，kap tī邊頭teh-khiā ê眾婦人，聚集kui大陣，應耶利米講， 16 你奉耶和華ê名對阮所講ê話，阮m̄聽你。 17 阮決斷beh成阮ê嘴所講一切ê話，ǹg天后燒香、灌奠，照阮kap阮ê列祖，阮ê君王，阮ê貴族，tī偤大chiahê城，kap耶路撒冷ê街市，平素所行ê一樣；因為hit時阮ê食物充足，享受平安；並無看見災厄。 18 總是tùi阮停止無燒香，無灌奠tī天后，阮反tńg欠缺一切；koh tùi刀劍，tùi飢荒來滅無。 19 阮對天后燒香灌奠ê時，阮做餅來服事伊，對伊灌奠，阮丈夫kiám無份mah？ 20 耶利米就應hiahê百姓，就是對hiahê ta-po͘婦人用chitê話應伊ê百姓，講， 21 Lín kap lín ê列祖，lín ê君王，lín ê貴族，kap國內ê百姓，tī偤大chiahê城，kap耶路撒冷街市所燒 ê香，耶和華kiám無記得in，心內kiám無想mah？ 22 耶和華因為lín所做ê pháiⁿ，所行可惡ê事，bōe koh忍得；所以lín ê地拋荒，成做thang gông-ngia̍h，thang咒詛，無人khiā起，親像今á日chit款。 23 因為lín燒香，亦因為lín得罪耶和華，亦無聽耶和華ê話，無thàn祂ê律法，祂ê條例，祂ê干證ê話，所以lín tú-tio̍h chitê災厄，親像今á日chit款。 24 耶利米koh對眾百姓kap眾婦人人講，Lín tī埃及地一切ê偤大人，tio̍h聽耶和華ê話。 25 萬軍ê耶和華以色列ê上帝án-ni講，Lín kap lín ê bó͘ bat用嘴講，用手成伊，講，阮所hē ê願，決斷beh行伊，就是beh對天后燒香，亦beh對伊灌奠；taⁿ做你堅固你ê願，來行你ê願。 26 所以lín tòa埃及地一切ê偤大人，tio̍h聽耶和華ê話；耶和華講，看ah，我kí我ê大名來chiù-chōa，tī埃及全地，我ê名無koh hō͘偤大族一人ê嘴所稱呼，講，主耶和華是永活。 27 看ah，我beh致意tī in，beh降災厄，無降福氣，tī埃及地一切ê偤大人beh tùi刀劍，tùi飢荒來滅無，到lóng了。 28 脫離刀劍，beh tùi埃及地tò來偤大地ê，in ê人額真少；hiahê所chhun ê偤大人去埃及地，beh tī-hia寄腳ê，beh知是誰 ê話得tio̍h應驗，是我ê á是in-ê。 29 耶和華講，我tī chitê所在beh刑罰lín，beh有chitê兆頭，hō͘ lín知我所講降災厄hō͘ lín hiahê話的確應驗。 30 耶和華án-ni講，看ah，我beh將埃及王法老Ha̍p-hut-la̍h交tī伊ê對敵ê手，kap siàu想伊ê性命ê人ê手；親像我有將偤大王Se-tí-ka交tī伊ê對敵，就是siàu想伊ê性命ê巴比倫王Nî-pò͘-kah-nî-sat ê手。
1 Ū ōe lîm-kàu Iâ-lī-bí, lūn-kàu it-chhè khiā-khí tī Ai-ki̍p tōe ê Iû-tāi lâng; chiū-sī khiā-khí tī Bi̍t-toa̍t, Tap-pí-le̍k, Lô-hut, Pa-thek-lô kéng-lāi ê Iû-tāi lâng, kóng, 2 Bān-kun ê Iâ-hô-hoa Í-sek-lia̍t ê Siōng-tè án-ni kóng: Góa só͘ kàng-lo̍h tī Iâ-lō͘-sat-léng, kap Iû-tāi chiah ê siâⁿ it-chhè ê chai-ē, lín lóng khòaⁿ-kìⁿ; khòaⁿ ah, taⁿ in lóng pha-hng, bô lâng khiā-khí. 3 Che sī in-ūi in só͘ kiâⁿ ê pháiⁿ, in khì sio-hiuⁿ ho̍k-sāi pa̍t ê siōng-tè, chiū-sī in kap lín í-ki̍p lín ê lia̍t-chó͘ só͘ m̄-bat--ê; án-ni jiá Góa ê siū-khì. 4 Chóng-sī Góa bat chhe Góa ê chèng lô͘-po̍k sian-ti chiū-kūn lín; sī chá-chá khí-lâi chhe i, kóng, Chhiat-chhiat goān lín m̄-thang kiâⁿ chit ê khó-ò͘ⁿ ê sū, Góa só͘ oàn-hūn--ê. 5 To̍k-to̍k in bô thiaⁿ, ia̍h bô àⁿ hī-khang, bô oa̍t-tńg lī-khui in ê pháiⁿ; iû-goân sio-hiuⁿ tī pa̍t-hō ê siōng-tè. 6 In-ūi án-ni, Góa ê tōa siū-khì kap Góa ê siū-khì piàⁿ-chhut tī Iû-tāi chiah ê siâⁿ, kap Iâ-lō͘-sat-léng ê koe-chhī, chhin-chhiūⁿ hé to̍h--khí-lâi; tì-kàu in pha-hng léng-chēng; chhin-chhiūⁿ kin-á-ji̍t án-ni. 7 Taⁿ Iâ-hô-hoa bān-kun ê Siōng-tè, Í-sek-lia̍t ê Siōng-tè, án-ni kóng, Lín siáⁿ-sū kiâⁿ chit ê tōa pháiⁿ, hāi lín ka-kī; hō͘ lín ê ta-po͘-lâng, hū-jîn-lâng, gín-á, kap chia̍h-ni ê eⁿ-á, lóng tùi Iû-tāi tiong kā lín tû-khì, bô lâu chi̍t-ê? Sī in-ūi lín ēng lín ê chhiú só͘ chòe--ê kek Góa ê siū-khì; 8 tī só͘ khì kià-kha ê Ai-ki̍p tōe, sio-hiuⁿ tī pa̍t-hō ê siōng-tè, tì-kàu lín tú-tio̍h châu-bia̍t, tī thiⁿ-ē bān-kok tiong, chiâⁿ-chòe thang chiù-chó͘, thang lêng-jio̍k--ê. 9 Lí ê lia̍t-chó͘ ê pháiⁿ, Iû-tāi lia̍t-ông ê pháiⁿ, in ê hō͘-hui ê pháiⁿ, lín ka-kī ê pháiⁿ, lín ê bó͘ ê pháiⁿ, chiū-sī tī Iû-tāi tōe, Iâ-lō͘-sat-léng koe-chhī só͘ kiâⁿ--ê, lín bōe kì-tit mah? 10 In kàu-taⁿ iáu bô ka-kī khiam-pi, bô kiaⁿ-hiâⁿ, bô chun-thàn Góa tī lín ê bīn-chêng, kap lín ê lia̍t-chó͘ ê bīn-chêng, só͘ siat Góa ê hoat-tō͘, Góa ê lu̍t-lē. 11 Só͘-í bān-kun ê Iâ-hô-hoa Í-sek-lia̍t ê Siōng-tè án-ni kóng, Khòaⁿ ah, Góa beh ǹg lín pìⁿ-bīn, kàng chai-ē tì-kàu châu-bia̍t Iû-tāi ê chèng-lâng. 12 Iû-tāi só͘ chhun ê peh-sìⁿ, ngī-phīⁿ khì Ai-ki̍p tōe, beh tī-hia kià-kha--ê, Góa beh chhú lâi bia̍t--in; in beh tó tī Ai-ki̍p tōe, in beh tùi to-kiàm, tùi ki-hng, lâi bia̍t-bô, tùi sòe kàu tōa, lóng beh tùi to-kiàm, tùi ki-hng, lâi sí; in beh chiâⁿ-chòe thang chiù-chó͘, thang gông-ngia̍h, thang lóe-mē, thang lêng-jio̍k--ê. 13 In-ūi Góa beh ēng to-kiàm, ēng ki-hng, ēng un-e̍k, hêng-hoa̍t khiā-khí Ai-ki̍p tōe--ê; chhin-chhiūⁿ Góa í-keng hêng-hoa̍t Iâ-lō͘-sat-léng chi̍t-iūⁿ; 14 hō͘ hiah-ê khì Ai-ki̍p tōe só͘ chhun ê Iû-tāi lâng, lóng bōe-tit thoat-lī, á-sī lâu-teh, thang tò-lâi Iû-tāi tōe, chiū-sī in ê sim chin him-bō͘ tò-lâi khiā-khí ê só͘-chāi; in-ūi tit-tio̍h thoat-lī--ê ê í-gōa, bô chi̍t-ê thang tò-lâi. 15 Hiah-ê tòa tī Ai-ki̍p tōe Pa-thek-lô ê lâng, kìⁿ-nā chai in ê bó͘ bat tùi pa̍t ê siōng-tè sio-hiuⁿ--ê, kap tī piⁿ--thâu teh-khiā ê chèng hū-jîn, chū-chi̍p kui tōa-tīn, ìn Iâ-lī-bí kóng, 16 Lí hōng Iâ-hô-hoa ê miâ tùi goán só͘ kóng ê ōe, goán m̄ thiaⁿ--lí. 17 Goán koat-toàn beh chiâⁿ goán ê chhùi só͘ kóng it-chhè ê ōe, ǹg Thian-hō͘ sio-hiuⁿ, koàn-tiān, chiàu goán kap goán ê lia̍t-chó͘, goán ê kun-ông, goán ê kùi-cho̍k, tī Iû-tāi chiah ê siâⁿ, kap Iâ-lō͘-sat-léng ê koe-chhī, pêng-sò͘ só͘ kiâⁿ--ê chi̍t-iūⁿ; in-ūi hit-sî goán ê si̍t-bu̍t chhiong-chiok, hióng-siū pêng-an; pēng-bô khòaⁿ-kìⁿ chai-ē. 18 Chóng-sī tùi goán thêng-chí bô sio-hiuⁿ, bô koàn-tiān tī Thian-hō͘, goán hoán-tńg khiàm-kheh it-chhè; koh tùi to-kiàm, tùi ki-hng lâi bia̍t-bô. 19 Goán tùi Thian-hō͘ sio-hiuⁿ koàn-tiān ê sî, goán chòe-piáⁿ lâi ho̍k-sāi i, tùi i koàn-tiān, goán tiōng-hu kiám bô hūn mah? 20 Iâ-lī-bí chiū ìn hiah ê peh-sìⁿ, chiū-sī tùi hiah ê ta-po͘ hū-jîn ēng chit ê ōe ìn--i ê peh-sìⁿ, kóng, 21 Lín kap lín ê lia̍t-chó͘, lín ê kun-ông, lín ê kùi-cho̍k, kap kok-lāi ê peh-sìⁿ, tī Iû-tāi chiah ê siâⁿ, kap Iâ-lō͘-sat-léng koe-chhī só͘ sio ê hiuⁿ, Iâ-hô-hoa kiám bô kì-tit--in, sim-lāi kiám bô siūⁿ mah? 22 Iâ-hô-hoa in-ūi lín só͘ chòe ê pháiⁿ, só͘ kiâⁿ khó-ò͘ⁿ ê sū, bōe koh lún--tit; só͘-í lín ê tōe pha-hng, chiâⁿ-chòe thang gông-ngia̍h, thang chiù-chó͘, bô lâng khiā-khí, chhin-chhiūⁿ kin-á-ji̍t chit-khoán. 23 In-ūi lín sio-hiuⁿ, ia̍h in-ūi lín tek-chōe Iâ-hô-hoa, ia̍h bô thiaⁿ Iâ-hô-hoa ê ōe, bô thàn I ê lu̍t-hoat, I ê tiâu-lē, I ê kan-chèng ê ōe, só͘-í lín tú-tio̍h chit ê chai-ē, chhin-chhiūⁿ kin-á-ji̍t chit-khoán. 24 Iâ-lī-bí koh tùi chèng peh-sìⁿ kap chèng hū-jîn-lâng kóng, Lín tī Ai-ki̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe. 25 Bān-kun ê Iâ-hô-hoa Í-sek-lia̍t ê Siōng-tè án-ni kóng, Lín kap lín ê bó͘ bat ēng chhùi kóng, ēng chhiú chiâⁿ--i, kóng, Goán só͘ hē ê goān, koat-toàn beh kiâⁿ--i, chiū-sī beh tùi Thian-hō͘ sio-hiuⁿ, ia̍h beh tùi i koàn-tiān; taⁿ chòe lí kian-kò͘ lí ê goān, lâi kiâⁿ lí ê goān. 26 Só͘-í lín tòa Ai-ki̍p tōe it-chhè ê Iû-tāi lâng, tio̍h thiaⁿ Iâ-hô-hoa ê ōe; Iâ-hô-hoa kóng, Khòaⁿ ah, Góa kí Góa ê tōa-miâ lâi chiù-chōa, tī Ai-ki̍p choân-tōe, Góa ê miâ bô koh hō͘ Iû-tāi cho̍k chi̍t-lâng ê chhùi só͘ chheng-ho͘, kóng, Chú Iâ-hô-hoa sī éng-oa̍h. 27 Khòaⁿ ah, Góa beh tì-ì tī in, beh kàng chai-ē, bô kàng hok-khì, tī Ai-ki̍p tōe it-chhè ê Iû-tāi lâng beh tùi to-kiàm, tùi ki-hng lâi bia̍t-bô, kàu lóng liáu. 28 Thoat-lī to-kiàm, beh tùi Ai-ki̍p tōe tò-lâi Iû-tāi tōe--ê, in ê lâng-gia̍h chin-chió; hiah-ê só͘ chhun ê Iû-tāi lâng khì Ai-ki̍p tōe, beh tī-hia kià-kha-ê, beh chai chī-chūi ê ōe tit-tio̍h èng-giām, sī Góa-ê á-sī in ê. 29 Iâ-hô-hoa kóng, Góa tī chit ê só͘-chāi beh hêng-hoa̍t lín, beh ū chit ê tiāu-thâu, hō͘ lín chai Góa só͘ kóng kàng chai-ē hō͘ lín hiah ê ōe tek-khak èng-giām. 30 Iâ-hô-hoa án-ni kóng, Khòaⁿ ah, Góa beh chiong Ai-ki̍p ông Hoat-ló Ha̍p-hut-la̍h kau tī i ê tùi-te̍k ê chhiú, kap siàu-siūⁿ i ê sìⁿ-miā ê lâng ê chhiú; chhin-chhiūⁿ Góa ū chiong Iû-tāi ông Se-tí-ka kau tī i ê tùi-te̍k, chiū-sī siàu-siūⁿ i ê sìⁿ-miā ê Pa-pí-lûn ông Nî-pò͘-kah-nî-sat ê chhiú.
1 偤大王約西亞ê kiáⁿ Iok-ngá-kèng四年，Nî-lī-a ê kiáⁿ，Pa-lio̍k，將先知耶利米所傳hiahê話記tī冊裡； 2 Hit時耶利米對伊講，Pa-lio̍k ah，耶和華以色列ê上帝論到你有án-ni講： 3 你bat講，我有災厄ah；耶和華tī我痛苦ê頂面加添憂愁；我吐氣到厭倦，bōe得tio̍h平安。 4 Taⁿ你tio̍h án-ni kā伊講，耶和華án-ni講，看ah，我所建立ê，我beh拆毀，我所栽種ê，我beh拔起來；全地lóng án-ni。 5 你為家己圖謀大tāi-chì mah？莫得圖謀。看ah，因為我beh hō͘災厄降落tī見有血氣ê。總是你無論去toh-lo̍h，我beh hō͘你拾tio̍h家己ê性命；這是耶和華講ê。
1 Iû-tāi ông Iok-se-a ê kiáⁿ Iok-ngá-kèng sì--nî, Nî-lī-a ê kiáⁿ, Pa-lio̍k, chiong sian-ti Iâ-lī-bí só͘ thoân hiah ê ōe kì tī chheh--nih; 2 hit-sî Iâ-lī-bí tùi i kóng, Pa-lio̍k ah, Iâ-hô-hoa Í-sek-lia̍t ê Siōng-tè lūn-kàu lí ū án-ni kóng: 3 Lí bat kóng, Góa ū chai-ē ah; Iâ-hô-hoa tī góa thòng-khó͘ ê téng-bīn ke-thiⁿ iu-chhiû; góa thó͘-khùi kàu ià-siān, bōe tit-tio̍h pêng-an. 4 Taⁿ lí tio̍h án-ni kā i kóng, Iâ-hô-hoa án-ni kóng, Khòaⁿ ah, Góa só͘ kiàn-li̍p--ê, Góa beh thiah-húi, Góa só͘ chai-chèng--ê, Góa beh pu̍ih--khí-lâi; choân-tōe lóng án-ni. 5 Lí ūi ka-kī tô͘-bô͘ tōa tāi-chì mah? bo̍h-tit tô͘-bô͘. Khòaⁿ ah, in-ūi Góa beh hō͘ chai-ē kàng-lo̍h tī kìⁿ ū hiat-khì--ê. Chóng-sī lí bô-lūn khì toh-lo̍h, Góa beh hō͘ lí khioh--tio̍h ka-kī ê sìⁿ-miā; che sī Iâ-hô-hoa kóng--ê.
1 耶和華ê話臨到先知耶利米，論起列國ê事。 2 論埃及：是論埃及王法老Nî-ko ê軍兵，紮營tī Pek-le̍k河邊ê Ka-ki-bí-si，當偤大王約西亞ê kiáⁿ Iok-ngá-kèng四年hō͘巴比倫王Nî-pò͘-kah-nî-sat所phah敗ê。 3 Lín tio̍h備辦大小ê藤牌，去交戰。 4 Lín tio̍h套馬、騎馬、戴盔khiā起來；磨鎗、穿戰甲。 5 我啥事看見án-ni？in驚惶退後；in ê勇士刣輸，緊緊走，無oa̍t頭；四周圍有驚惶；這是耶和華講ê。 6 gâu走ê走bōe-lī，勇士bōe能脫離；tī北方，Pek-le̍k河邊，in lóng tio̍h-tak跋倒。 7 Chitê親像尼羅河漲滿，親像江河ê水giâ湧ê，是是誰 ah？ 8 埃及親像尼羅河漲滿，伊ê水親像江河giâ湧；伊ê話講，我beh chhèng高，我beh遮蓋遍地；我beh毀壞城kap其中khiā起ê百姓。 9 馬tio̍h 緊上來；車tio̍h亂亂走；勇士tio̍h出來；Kó͘-si̍t kap Hut ê人lóng giâ藤牌；路得ê人gâu開弓。 10 因為hit日是主，萬軍ê耶和華ê日，報仇ê日，thang對祂ê對敵報仇；刀劍beh吞食到飽，lim血到醉；因為主，萬軍ê耶和華，tī北方Pek-le̍k河邊有獻祭ê事。 11 埃及ê百姓ah，tio̍h上去Ki-lia̍t，來取乳香；你用chōe-chōe藥是空空；你bōe得tio̍h醫好。 12 列邦聽見你ê凌辱；遍地lóng是你哀哭ê聲；因為勇士kap勇士相磕，做一下跋倒。 13 耶和華對先知耶利米所講ê話，論到巴比倫王Nî-pò͘-kah-nî-sat beh到，來攻擊埃及地。 14 Lín tio̍h報揚tī埃及，宣佈tī Bi̍t-toat，宣佈tī Lô-hut kap Tap-pí-le̍k，講，Tio̍h 排隊，家己備辦，因為刀劍tī你ê四圍teh吞滅。 15 你ê大力ê怎樣跋倒？in khiā bōe在，因為耶和華趕in。 16 伊hō͘ chōe-chōe人跋倒；大家tó相tha̍h；in就講，起來，咱tò來去本族，到咱本所在，來閃避壓制咱ê刀劍。 17 In tī-hia叫講，埃及王法老不過是一个聲，伊有phah-sńg伊ê機會。 18 大君王，伊ê名萬軍ê耶和華，講，我kí我ê活命來chiù-chōa，伊beh來親像山中ê Tha-po̍k，親像海邊ê Ka-bi̍t。 19 Khiā起tī埃及ê百姓ah，你tio̍h備辦受掠應用ê物件，因為Lô-hut beh拋荒燒毀，無人khiā起。 20 埃及是súi ê牛種á，獨獨tùi北方出ê毀滅來lah，來lah。 21 其中雇chhiàⁿ ê兵，親像稠內肥ê牛á，in oa̍t-tńg身做一下走，khiā-bōe-tiâu；因為in tú-tio̍h患難ê日，受刑罰ê時已經到lah。 22 伊ê聲親像蛇，teh行；對敵beh kui陣來，in beh kia̍h斧頭來攻擊伊，親像剉樹ê人一樣。 23 耶和華講，伊ê樹林雖然真密，in亦beh剉伊；因為in比草蜢khah chōe，bōe能算得。 24 埃及ê百姓beh見笑，beh交tī北方ê百姓ê手。 25 萬軍ê耶和華，以色列ê上帝，講：看ah，我beh刑罰屬tī Lô ê A-bûn，kap法老，kap埃及，kap伊ê神明，kap伊ê君王；亦beh刑罰法老，以及óa靠伊ê人。 26 我beh將in交tī siàu想in ê性命ê人ê手，kap巴比倫王Nî-pò͘-kah-nî-sat ê手，kap伊ê人臣ê手；以後埃及的確koh有人khiā起，kap早前一樣；這是耶和華講ê。 27 我ê奴僕雅各ah，你莫得驚；以色列ah，莫得驚惶；看ah，我beh tùi遠遠ê所在拯救你；tùi受掠去ê地拯救你ê後裔；雅各beh tò來，得tio̍h安靜、平安，無人hō͘伊驚惶。 28 我ê奴僕雅各ah，莫得驚惶，因為我kap你tī-teh；亦beh將我所趕你到hiahê國一盡剿滅；總是無一盡剿滅你；beh照所合宜ê，責備你，斷斷bōe會無刑罰你；這是耶和華講ê。
1 Iâ-hô-hoa ê ōe lîm-kàu sian-ti Iâ-lī-bí, lūn-khí lia̍t-kok ê sū. 2 Lūn Ai-ki̍p: sī lūn Ai-ki̍p ông Hoat-ló-nî-ko ê kun-peng, chat-iâⁿ tī Pek-la̍t hô-piⁿ ê Ka-ki-bí-si, tng Iû-tāi ông Iok-se-a ê kiáⁿ Iok-ngá-kèng sì--nî hō͘ Pa-pí-lûn ông Nî-pò͘-kah-nî-sat só͘ phah-pāi--ê. 3 Lín tio̍h pī-pān tōa-sió ê tîn-pâi, khì kau-chiàn. 4 Lín tio̍h thò bé, khiâ bé, tì khoe khiā--khí-lâi; bôa chhiuⁿ, chhēng chiàn-kah. 5 Góa siáⁿ-sū khòaⁿ-kìⁿ án-ni? in kiaⁿ-hiâⁿ thè-āu; in ê ióng-sū thâi-su, kín-kín cháu, bô oa̍t-thâu; sì-chiu-ûi ū kiaⁿ-hiâⁿ; che sī Iâ-hô-hoa kóng--ê. 6 Gâu-cháu-ê cháu-bōe-lī, ióng-sū bōe-ōe thoat-lī; tī pak-hng, Pek-la̍t hô-piⁿ, in lóng tio̍h-tak poa̍h-tó. 7 Chit-ê chhin-chhiūⁿ Nî-lô hô tiòng-móa, chhin-chhiūⁿ kang-hô ê chúi giâ-éng--ê, sī chī-chūi ah? 8 Ai-ki̍p chhin-chhiūⁿ Nî-lô hô tiòng-móa, i ê chúi chhin-chhiūⁿ kang-hô giâ-éng; i ê ōe kóng, Góa beh chhèng-koâiⁿ, góa beh jia-khàm piàn-tōe; góa beh húi-hoāi siâⁿ kap kî-tiong khiā-khí ê peh-sìⁿ. 9 Bé tio̍h kín chiūⁿ--lâi; chhia tio̍h loān-loān cháu; ióng-sū tio̍h chhut--lâi; Kó͘-si̍t kap Hut ê lâng lóng giâ tîn-pâi; Lō͘-tek ê lâng gâu khui-keng. 10 In-ūi hit-ji̍t sī Chú, bān-kun ê Iâ-hô-hoa ê ji̍t, pò-siû ê ji̍t, thang tùi I ê tùi-te̍k pò-siû; to-kiàm beh thun-chia̍h kàu-pá, lim huih kàu-chùi; in-ūi Chú, bān-kun ê Iâ-hô-hoa, tī pak-hng Pek-la̍t hô-piⁿ ū hiàn-chè ê sū. 11 Ai-ki̍p ê peh-sìⁿ ah, tio̍h chiūⁿ--khì Ki-lia̍t, lâi chhú jú-hiuⁿ; lí ēng chōe-chōe io̍h sī khang-khang; lí bōe tit-tio̍h i-hó. 12 Lia̍t-pang thiaⁿ-kìⁿ lí ê lêng-jio̍k; piàn-tōe lóng sī lí ai-khàu ê siaⁿ; in-ūi ióng-sū kap ióng-sū saⁿ-kha̍p, chòe chi̍t-ē poa̍h-tó. 13 Iâ-hô-hoa tùi sian-ti Iâ-lī-bí só͘ kóng ê ōe, lūn-kàu Pa-pí-lûn ông Nî-pò͘-kah-nî-sat beh kàu, lâi kong-kek Ai-ki̍p tōe. 14 Lín tio̍h pò-iông tī Ai-ki̍p, soan-pò͘ tī Bi̍t-toa̍t, soan-pò͘ tī Lô-hut kap Tap-pí-le̍k, kóng, Tio̍h pâi-tūi, ka-kī pī-pān, in-ūi to-kiàm tī lí ê sì-ûi teh thun-bia̍t. 15 Lí ê tōa-la̍t--ê cháiⁿ-iūⁿ poa̍h-tó? in khiā bōe chāi, in-ūi Iâ-hô-hoa kóaⁿ in. 16 I hō͘ chōe-chōe lâng poa̍h-tó; tāi-ke tó saⁿ-tha̍h; in chiū kóng, Khí--lâi, lán tò--lâi khì pún-cho̍k, kàu lán pún só͘-chāi, lâi siám-pī ap-chè lán ê to-kiàm. 17 In tī-hia kiò kóng, Ai-ki̍p ông Hoat-ló put-kò sī chi̍t ê siaⁿ, i ū phah-sńg i ê ki-hōe. 18 Tōa kun-ông, I ê miâ bān-kun ê Iâ-hô-hoa, kóng, Góa kí Góa ê oa̍h-miā lâi chiù-chōa, i beh lâi chhin-chhiūⁿ soaⁿ-tiong ê Tha-po̍k, chhin-chhiūⁿ hái-piⁿ ê Ka-bi̍t. 19 Khiā-khí tī Ai-ki̍p ê peh-sìⁿ ah, lí tio̍h pī-pān siū-lia̍h èng-iōng ê mi̍h-kiāⁿ, in-ūi Lô-hut beh pha-hng sio-húi, bô lâng khiā-khí. 20 Ai-ki̍p sī súi ê gû-chéng-á, to̍k-to̍k tùi pak-hng chhut ê húi-bia̍t lâi lah, lâi lah. 21 Kî-tiong kò͘-chhiàⁿ ê peng, chhin-chhiūⁿ tiâu-lāi pûi ê gû-á, in oa̍t-tńg-sin chòe chi̍t-ē cháu, khiā-bōe-tiâu; in-ūi in tú-tio̍h hoān-lān ê ji̍t, siū hêng-hoa̍t ê sî í-keng kàu lah. 22 I ê siaⁿ chhin-chhiūⁿ chôa, teh kiâⁿ; tùi-te̍k beh kui-tīn lâi, in beh kia̍h pó͘-thâu lâi kong-kek--i, chhin-chhiūⁿ chhò-chhiū ê lâng chi̍t-iūⁿ. 23 Iâ-hô-hoa kóng, I ê chhiū-nâ sui-jiân chin-ba̍t, in ia̍h beh chhò i; in-ūi in pí chháu-meh khah chōe, bōe-ōe sǹg--tit. 24 Ai-ki̍p ê peh-sìⁿ beh kiàn-siàu, beh kau tī pak-hng ê peh-sìⁿ ê chhiú. 25 Bān-kun ê Iâ-hô-hoa, Í-sek-lia̍t ê Siōng-tè, kóng: Khòaⁿ ah, Góa beh hêng-hoa̍t sio̍k tī Lô ê A-bûn, kap Hoat-ló, kap Ai-ki̍p, kap i ê sîn-bêng, kap i ê kun-ông; ia̍h beh hêng-hoa̍t Hoat-ló, í-ki̍p óa-khò i ê lâng. 26 Góa beh chiong in kau tī siàu-siūⁿ in ê sìⁿ-miā ê lâng ê chhiú, kap Pa-pí-lûn ông Nî-pò͘-kah-nî-sat ê chhiú, kap i ê jîn-sîn ê chhiú; í-āu Ai-ki̍p tek-khak koh ū lâng khiā-khí, kap chá-chêng chi̍t-iūⁿ; che sī Iâ-hô-hoa kóng--ê. 27 Góa ê lô͘-po̍k Ngá-kok ah, lí bo̍h-tit kiaⁿ; Í-sek-lia̍t ah, bo̍h-tit kiaⁿ-hiâⁿ; khòaⁿ ah, Góa beh tùi hn̄g-hn̄g ê só͘-chāi chín-kiù lí; tùi siū-lia̍h--khì ê tōe chín-kiù lí ê hō͘-è; Ngá-kok beh tò--lâi, tit-tio̍h an-chēng, pêng-an, bô lâng hō͘ i kiaⁿ-hiâⁿ. 28 Góa ê lô͘-po̍k Ngá-kok ah, bo̍h-tit kiaⁿ-hiâⁿ, in-ūi Góa kap lí tī-teh; ia̍h beh chiong Góa só͘ kóaⁿ lí kàu hiah ê kok it-chīn châu-bia̍t; chóng-sī bô it-chīn châu-bia̍t lí; beh chiàu só͘ ha̍p-gî--ê, chek-pī lí, toàn-toàn bōe-ōe bô hêng-hoa̍t lí; che sī Iâ-hô-hoa kóng--ê.
1 法老攻擊Ka-sat ê事先，有耶和華論腓利士人ê話臨到先知耶利米。 2 耶和華án-ni講，看ah，有水tùi北方chhèng起來，成做漲滿ê河，beh漲滿chitê地，kap其中所有ê，kap城kap其中所khiā起ê；人beh喉叫，境內khiā起ê百姓beh啼哭。 3 為tio̍h對敵勇ê馬，伊ê蹄 kho̍k-kho̍k哮ê聲，也為tio̍h伊hiahê戰車緊緊走，伊ê車輪hū-hū哮，就chiahê做老父ê手軟，無oa̍t頭看伊ê kiáⁿ。 4 因為時日到lah，beh毀滅一切ê腓利士人，beh tùi Chhui-lô Se-tùn剪除所chhun幫贊in-ê；因為耶和華beh毀滅腓利士人，Ka-hui-thok海嶼所chhun ê百姓。 5 Ka-sat已經無半支頭毛；A-si̍t-ki-lûn歸tī無；山谷所chhun-ê，你家己割肉，beh到jōa久ah？ 6 耶和華ê刀劍ah，你beh到tī時chiah soah？tio̍h kiu入你ê刀鞘，安靜無振動。 7 耶和華已經命令你攻擊A-si̍t-ki-lûn，攻擊海邊ê地；祂已經派你定tio̍h，你thái-thó能停止ah？
1 Hoat-ló kong-kek Ka-sat ê tāi-seng, ū Iâ-hô-hoa lūn Hui-lī-sū lâng ê ōe lîm-kàu sian-ti Iâ-lī-bí. 2 Iâ-hô-hoa án-ni kóng, Khòaⁿ ah, ū chúi tùi pak-hng chhèng--khí-lâi, chiâⁿ-chòe tiòng-móa ê hô, beh tiòng-móa chit ê tōe, kap kî-tiong só͘ ū-ê, kap siâⁿ kap kî-tiong só͘ khiā-khí--ê; lâng beh âu-kiò, kéng-lāi khiā-khí ê peh-sìⁿ beh thî-khàu. 3 Ūi-tio̍h tùi-te̍k ióng ê bé, i ê tôe kho̍k-kho̍k-háu ê siaⁿ, iā ūi-tio̍h i hiah ê chiàn-chhia kín-kín cháu, i ê chhia-lûn hū-hū-háu, chiū chiah-ê chòe lāu-pē--ê chhiú nńg, bô oa̍t-thâu khòaⁿ i ê kiáⁿ. 4 In-ūi sî-ji̍t kàu lah, beh húi-bia̍t it-chhè ê Hui-lī-sū lâng, beh tùi Chhui-lô Se-tùn chián-tû só͘ chhun pang-chān in--ê; in-ūi Iâ-hô-hoa beh húi-bia̍t Hui-lī-sū lâng, Ka-hui-thok hái-sū só͘ chhun ê peh-sìⁿ. 5 Ka-sat í-keng bô pòaⁿ-ki thâu-mn̂g; A-si̍t-ki-lûn kui tī bô; soaⁿ-kok só͘ chhun--ê, lí ka-kī koah-bah, beh kàu jōa-kú ah? 6 Iâ-hô-hoa ê to-kiàm ah, lí beh kàu tī-sî chiah soah? tio̍h kiu ji̍p lí ê to-siù, an-chēng bô tín-tāng. 7 Iâ-hô-hoa í-keng bēng-lēng lí kong-kek A-si̍t-ki-lûn, kong-kek hái-piⁿ ê tōe; I í-keng phài lí tiāⁿ-tio̍h, lí thái-thó ōe thêng-chí ah?
1 論Mô͘-ap。萬軍ê耶和華以色列ê上帝án-ni講，Nî-pho有災厄ah，因為受毀壞；Ki-lia̍t-têng tú-tio̍h見笑，受取；Bí-su-ka tú-tio̍h見笑，受敗壞。 2 Mô͘-ap無koh受o-ló，有人tī Hi-si̍t-pún設計謀beh害伊；講，來lah，咱kā伊剪除，hō͘伊無koh成做國。Má-tek-biân ah，你亦tio̍h靜靜，莫做聲；刀劍beh追趕你。 3 Tùi Hô-lô-liām有喉叫ê聲，有搶劫kap大ê毀滅。 4 Mô͘-ap tú-tio̍h毀滅，伊ê gín-á哮ê聲hō͘人聽見。 5 因為人爬上Ló͘-hi ê山坪，ná行ná哭；落Hô-lô-liām ê山坪，聽見毀滅哀哭ê聲。 6 Lín tio̍h逃走，家己救性命；親像曠野ê杜松。 7 你因為óa靠家己ê所做，kap家己ê財寶，亦beh受掠。Ki-boat kap屬伊ê祭司貴族，亦beh做一下受遷移。 8 行毀滅ê，beh到ta̍k ê城；無一个城能免得；山谷beh致到敗落，平洋beh受毀壞，照耶和華所講ê。 9 Tio̍h用翼hō͘ Mô͘-ap，hō͘伊飛走；伊chiahê城beh致到拋荒，無人khiā起。 10 Chhìn-chhìn chhái-chhái做耶和華ê工(kong)ê，tio̍h受咒詛；禁止伊ê刀bak-tio̍h血ê，tio̍h受咒詛。 11 Mô͘-ap tùi少年以來，常常享受平安；親像坐清ê酒，無tùi chitê器具piàⁿ tī別ê器具；亦未bat受掠；因為án-ni伊ê原味 iáu tī-teh，氣味bē變。 12 耶和華講，看ah，日子beh到，我beh差piàⁿ酒ê去伊hia，kā伊piàⁿ出來；piàⁿ空伊ê器具，phah破伊ê酒甕。 13 Mô͘-ap beh為tio̍h Ki-boat來見笑，親像以色列家為tio̍h in所óa靠ê Pek-te̍k-lī來見笑一樣。 14 你怎樣講，阮是勇士，是有力thang交戰ê人？ 15 Mô͘-ap變做拋荒，對敵上去，入伊hiahê城；所揀選ê少年人落去tú-tio̍h 刣死；這是君王，名做萬軍ê耶和華，講ê。 16 Mô͘-ap ê災厄近lah，伊ê患難緊緊到。 17 見若tī伊ê周圍，bat伊ê名ê，lín lóng tio̍h為伊悲傷；講，hitê勇ê槌，súi ê柺á，thái會折(chi̍h)到án-ni？ 18 Tòa tī Tí-pún ê百姓ah，tio̍h tùi你榮光ê位落來，坐tī乾燥ê地；因為毀滅Mô͘-ap-ê上來攻擊你，毀壞你hiahê衛所。 19 Tòa tī A-lô-jíⁿ-ê ah，tio̍h khiā tī路邊觀看，問逃走ê ta-po͘人，kap脫離ê婦人人，講，是甚麼tāi-chì ah？ 20 Mô͘-ap因為毀壞來見笑，lín tio̍h啼哭喉叫；tio̍h tī A-lùn報告，講，Mô͘-ap變做拋荒。 21 刑罰已經到tī平洋ê地，tī Hô-lûn，tī Ngá-cha̍p，tī Bí-hoat-ap； 22 tī Tí-pún，tī Nî-pho，tī Pek-te-pí-la̍h-thài-im； 23 tī Ki-lia̍t-têng，tī Pek-ka-boa̍t，tī Pek-bí-un； 24 tī加略，tī Pho-su-la̍h，kap Mô͘-ap地遠近所有ê城。 25 Mô͘-ap ê角剉斷lah，伊ê手骨at折lah；這是耶和華講ê。 26 Lín tio̍h hō͘ Mô͘-ap酒醉；因為伊自高，悖逆耶和華；伊beh tī伊所吐ê中間kō來kō去；koh beh hō͘人恥笑。 27 以色列kiám m̄-bat hō͘你恥笑mah？伊kiám是tī賊ê中間hō͘人查出mah？因為你ta̍k-pái講起伊ê時，就搖頭拌(pōaⁿ)耳。 28 Khiā起tī Mô͘-ap-ê ah，lín tio̍h離開chiahê城，khiā起tī石磐；親像ka-chui作巢 tī孔口ê邊。 29 阮有聽見Mô͘-ap ê驕傲，伊ê驕傲到極；伊ê自高，伊ê驕傲，伊ê侮慢，存心家己掠做大。 30 耶和華講，我知伊ê受氣，kap伊空空ê誇口，所行是空空。 31 因為án-ni，我beh為tio̍h Mô͘-ap啼哭，我beh為tio̍h Mô͘-ap全地喉叫；in beh為tio̍h Kiat-jíⁿ-hap-lia̍t-siat ê人吐氣。 32 Se-pí-má ê葡萄樹ah，我為tio̍h你啼哭，比Ngá-siā人ê啼哭khah傷重；你ê枝thòaⁿ過海，直直伸到Ngá-siā ê海；hitê行毀滅ê已經臨到你beh收成ê果子，kap你ê葡萄。 33 肥ê田kap Mô͘-ap地，伊ê歡喜快樂lóng無去。我hō͘酒窟ê酒無去；無人踏酒，出歡喜ê聲，hitê聲m̄是歡喜ê聲。 34 因為Hi-si̍t-pún哀傷ê聲thàng到Í-lī-a-lī，直直到Ngá-cha̍p，koh tùi Só-jíⁿ到Hô-lô-liām，直到I-ki-la̍h Si-lī-si-a，因為Lêng-lîm ê水的確枯焦。 35 耶和華講，我beh tī Mô͘-ap地，hō͘ hitê獻祭tī山頭壇ê kap hitê燒香tī伊hiahê神明ê，lóng soah。 36 因為án-ni，我ê心為tio̍h Mô͘-ap親像品簫teh tân；我ê心為tio̍h Kiat-jíⁿ-hap-lia̍t-siat人親像品簫teh tân；因為in所積聚ê財物lóng無去。 37 頭殼ta̍k-ê光khō-khō，嘴鬚ta̍k-ê剪短短，手骨ta̍k-ê割傷，腰hâ麻布。 38 Tī Mô͘-ap ta̍k間ê厝頂，kap伊hiahê街市，ta̍k所在有啼哭；因為我攻破Mô͘-ap，親像kòng破m̄中意ê器具。這是耶和華講ê。 39 伊毀壞到án-ni！in啼哭到án-ni！Mô͘-ap見笑oa̍t倒tńg到án-ni！親像án-ni，Mô͘-ap beh hō͘四圍ê人恥笑gông-ngia̍h。 40 因為耶和華án-ni講，看ah，伊beh親像鷹鳥飛來，thí開伊ê翼tī Mô͘-ap。 41 加略hō͘人取去，hiahê衛所hō͘人佔去；到hit日，Mô͘-ap chiahê勇士ê心親像beh生kiáⁿ ê婦人人ê心。 42 Mô͘-ap beh tú-tio̍h毀滅，無koh成做國；因為in自高，悖逆耶和華。 43 耶和華講，Mô͘-ap khiā起ê百姓ah，驚惶、陷坑、活tauh，lóng到tī你。 44 走避驚惶ê，beh跋落陷坑；tùi陷坑peh起來ê，beh hō͘活tauh tauh-tio̍h；因為我beh hō͘刑罰ê年臨到Mô͘-ap；這是耶和華講ê。 45 Hiah-ê逃走ê氣力盡，khiā tī Hi-si̍t-pún蔭影下；總是火tùi Hi-si̍t-pún出，火燄tùi Se-hông 發，一盡燒Mô͘-ap ê邊界，kap作亂ê人頭殼ê頂面。 46 Mô͘-ap ah，你有災厄；Ki-boat ê百姓滅無lah，你ê眾kiáⁿ hō͘人掠去，你ê眾cha-bó͘-kiáⁿ做受掠ê。 47 耶和華講，總是到日後，我beh hō͘ Mô͘-ap受掠ê人倒tńg。論Mô͘-ap受審判ê話，到chia為止。
1 Lūn Mô͘-ap. Bān-kun ê Iâ-hô-hoa Í-sek-lia̍t ê Siōng-tè án-ni kóng, Nî-pho ū chai-ē ah, in-ūi siū húi-hoāi; Ki-lia̍t-têng tú-tio̍h kiàn-siàu, siū-chhú; Bí-su-ka tú-tio̍h kiàn-siàu, siū pāi-hoāi. 2 Mô͘-ap bô koh siū o-ló, ū lâng tī Hi-si̍t-pún siat kè-bô͘ beh hāi i; kóng, Lâi lah, lán kā i chián-tû, hō͘ i bô koh chiâⁿ-chòe kok. Má-tek-biân ah, lí ia̍h tio̍h chēng-chēng, bo̍h chòe siaⁿ; to-kiàm beh tui-kóaⁿ lí. 3 Tùi Hô-lô-liām ū âu-kiò ê siaⁿ, ū chhiúⁿ-kiap kap tōa ê húi-bia̍t. 4 Mô͘-ap tú-tio̍h húi-bia̍t, i ê gín-á háu ê siaⁿ hō͘ lâng thiaⁿ-kìⁿ. 5 In-ūi lâng peh-chiūⁿ Ló͘-hi ê soaⁿ-phiâⁿ, ná-kiâⁿ ná-khàu; lo̍h Hô-lô-liām ê soaⁿ-phiâⁿ, thiaⁿ-kìⁿ húi-bia̍t ai-khàu ê siaⁿ. 6 Lín tio̍h tô-cháu, ka-kī kiù sìⁿ-miā; chhin-chhiūⁿ khòng-iá ê tō͘-siông. 7 Lí in-ūi óa-khò ka-kī ê só͘-chòe, kap ka-kī ê châi-pó, ia̍h beh siū-lia̍h. Ki-boat kap sio̍k i ê chè-si kùi-cho̍k, ia̍h beh chòe-chi̍t-ē siū chhian-î. 8 Kiâⁿ húi-bia̍t--ê, beh kàu ta̍k ê siâⁿ; bô chi̍t ê siâⁿ ōe bián-tit; soaⁿ-kok beh tì-kàu pāi-lo̍h, pîⁿ-iûⁿ beh siū húi-hoāi, chiàu Iâ-hô-hoa só͘ kóng--ê. 9 Tio̍h ēng si̍t hō͘ Mô͘-ap, hō͘ i pe-cháu; i chiah ê siâⁿ beh tì-kàu pha-hng, bô lâng khiā-khí. 10 Chhìn-chhìn chhái-chhái chòe Iâ-hô-hoa ê kang--ê, tio̍h siū chiù-chó͘; kìm-chí i ê to bak-tio̍h huih--ê, tio̍h siū chiù-chó͘. 11 Mô͘-ap tùi siàu-liân í-lâi, siông-siông hióng-siū pêng-an; chhin-chhiūⁿ chē-chheng ê chiú, bô tùi chit ê khì-kū piàⁿ tī pa̍t ê khì-kū; ia̍h bē bat siū-lia̍h; in-ūi án-ni i ê goân-bī iáu tī-teh, khì-bī bē piàn. 12 Iâ-hô-hoa kóng, Khòaⁿ ah, ji̍t-chí beh kàu, Góa beh chhe piàⁿ-chiú--ê khì i hia, kā i piàⁿ-chhut--lâi; piàⁿ-khang i ê khì-kū, phah-phòa i ê chiú-àng. 13 Mô͘-ap beh ūi-tio̍h Ki-boat lâi kiàn-siàu, chhin-chhiūⁿ Í-sek-lia̍t-ke ūi-tio̍h in só͘ óa-khò ê Pek-te̍k-lī lâi kiàn-siàu chi̍t-iūⁿ. 14 Lí cháiⁿ-iūⁿ kóng, Goán sī ióng-sū, sī ū la̍t thang kau-chiàn ê lâng? 15 Mô͘-ap pìⁿ-chòe pha-hng, tùi-te̍k chiūⁿ-khì, ji̍p i hiah ê siâⁿ; só͘ kéng-soán ê siàu-liân lâng lo̍h-khì tú-tio̍h thâi-sí; che sī Kun-ông, miâ chòe bān-kun ê Iâ-hô-hoa, kóng--ê. 16 Mô͘-ap ê chai-ē kūn lah, i ê hoān-lān kín-kín kàu. 17 Kìⁿ-nā tī i ê chiu-ûi, bat i ê miâ--ê, lín lóng tio̍h ūi i pi-siong; kóng, Hit ê ióng ê thûi, súi ê koáiⁿ-á, thái ōe chi̍h kàu án-ni? 18 Tòa tī Tí-pún ê peh-sìⁿ ah, tio̍h tùi lí êng-kng ê ūi lo̍h-lâi, chē tī ta-sò ê tōe; in-ūi húi-bia̍t Mô͘-ap--ê chiūⁿ-lâi kong-kek lí, húi-hoāi lí hiah ê ōe-só͘. 19 Tòa tī A-lô-jíⁿ--ê ah, tio̍h khiā tī lō͘-piⁿ koan-khòaⁿ, mn̄g tô-cháu ê ta-po͘-lâng, kap thoat-lī ê hū-jîn-lâng, kóng, Sī sím-mi̍h tāi-chì ah? 20 Mô͘-ap in-ūi húi-hoāi lâi kiàn-siàu, lín tio̍h thî-khàu âu-kiò; tio̍h tī A-lùn pò-kò, kóng, Mô͘-ap pìⁿ-chòe pha-hng. 21 Hêng-hoa̍t í-keng kàu tī pîⁿ-iûⁿ ê tōe, tī Hô-lûn, tī Ngá-cha̍p, tī Bí-hoat-ap; 22 tī Tí-pún, tī Nî-pho, tī Pek-te-pí-la̍h-thài-im; 23 tī Ki-lia̍t-têng, tī Pek-ka-boa̍t, tī Pek-bí-un; 24 tī Ka-lio̍k, tī Pho-su-la̍h, kap Mô͘-ap tōe hn̄g-kūn só͘ ū ê siâⁿ. 25 Mô͘-ap ê kak chhò-tn̄g lah, i ê chhiú-kut at-chi̍h lah; che sī Iâ-hô-hoa kóng--ê. 26 Lín tio̍h hō͘ Mô͘-ap chiú-chùi; in-ūi i chū-ko, pōe-ge̍k Iâ-hô-hoa; i beh tī i só͘ thò͘ ê tiong-kan kō-lâi kō-khì; koh beh hō͘ lâng thí-chhiò. 27 Í-sek-lia̍t kiám m̄-bat hō͘ lí thí-chhiò mah? i kiám sī tī chha̍t ê tiong-kan hō͘ lâng chhâ-chhut mah? in-ūi lí ta̍k-pái kóng-khí i ê sî, chiū iô-thâu pōaⁿ-hī. 28 Khiā-khí tī Mô͘-ap--ê ah, lín tio̍h lī-khui chiah ê siâⁿ, khiā-khí tī chio̍h-pôaⁿ; chhin-chhiūⁿ ka-chui choh-siū tī khang-kháu ê piⁿ. 29 Goán ū thiaⁿ-kìⁿ Mô͘-ap ê kiau-ngō͘, i ê kiau-ngō͘ kàu-ke̍k; i ê chū-ko, i ê kiau-ngō͘, i ê bú-bān, chûn-sim ka-kī lia̍h chòe-tōa. 30 Iâ-hô-hoa kóng, Góa chai i ê siū-khì, kap i khang-khang ê khoa-kháu, só͘-kiâⁿ sī khang-khang. 31 In-ūi án-ni, góa beh ūi-tio̍h Mô͘-ap thî-khàu, góa beh ūi-tio̍h Mô͘-ap choân-tōe âu-kiò; in beh ūi-tio̍h Kiat-jíⁿ-hap-lia̍t-siat ê lâng thó͘-khùi. 32 Se-pí-má ê phû-tô-chhiū ah, góa ūi-tio̍h lí thî-khàu, pí Ngá-siā lâng ê thî-khàu khah siong-tiōng; lí ê ki thòaⁿ-kè hái, ti̍t-ti̍t chhun kàu Ngá-siā ê hái; hit ê kiâⁿ húi-bia̍t--ê í-keng lîm-kàu lí beh siu-sêng ê ké-chí, kap lí ê phû-tô. 33 Pûi ê chhân kap Mô͘-ap tōe, i ê hoaⁿ-hí khoài-lo̍k lóng bô--khì. Góa hō͘ chiú-khut ê chiú bô--khì; bô lâng ta̍h chiú, chhut hoaⁿ-hí ê siaⁿ, hit ê siaⁿ m̄-sī hoaⁿ-hí ê siaⁿ. 34 In-ūi Hi-si̍t-pún ai-siong ê siaⁿ thàng-kàu Í-lī-a-lī, ti̍t-ti̍t kàu Ngá-cha̍p, koh tùi Só-jíⁿ kàu Hô-lô-liām, ti̍t-kàu I-ki-la̍h Si-lī-si-a, in-ūi Lêng-lîm ê chúi tek-khak ko͘-tâ. 35 Iâ-hô-hoa kóng, Góa beh tī Mô͘-ap tōe, hō͘ hit ê hiàn-chè tī soaⁿ-thâu-tôaⁿ--ê kap hit ê sio-hiuⁿ tī i hiah ê sîn-bêng--ê, lóng soah. 36 In-ūi án-ni, góa ê sim ūi-tio̍h Mô͘-ap chhin-chhiūⁿ phín-siau teh tân; góa ê sim ūi-tio̍h Kiat-jíⁿ-hap-lia̍t-siat lâng chhin-chhiūⁿ phín-siau teh tân; in-ūi in só͘ chek-chū ê châi-bu̍t lóng bô--khì. 37 Thâu-khak ta̍k-ê kng-khō-khō, chhùi-chhiu ta̍k-ê chián té-té, chhiú-kut ta̍k-ê koah-siong, io hâ môa-pò͘. 38 Tī Mô͘-ap ta̍k-keng ê chhù-téng, kap i hiah ê koe-chhī, ta̍k só͘-chāi ū thî-khàu; in-ūi Góa kong-phòa Mô͘-ap, chhin-chhiūⁿ kòng-phòa m̄-tèng-ì ê khì-kū. Che sī Iâ-hô-hoa kóng--ê. 39 I húi-hoāi kàu án-ni! in thî-khàu kàu án-ni! Mô͘-ap kiàn-siàu oa̍t-tò-tńg kàu án-ni! chhin-chhiūⁿ án-ni, Mô͘-ap beh hō͘ sì-ûi ê lâng thí-chhiò gông-ngia̍h. 40 In-ūi Iâ-hô-hoa án-ni kóng, Khòaⁿ ah, i beh chhin-chhiūⁿ eng-chiáu pe--lâi, thí-khui i ê si̍t tī Mô͘-ap. 41 Ka-lio̍k hō͘ lâng chhú--khì, hiah ê ōe-só͘ hō͘ lâng chiàm--khì; kàu hit-ji̍t, Mô͘-ap chiah ê ióng-sū ê sim chhin-chhiūⁿ beh siⁿ-kiáⁿ ê hū-jîn-lâng ê sim. 42 Mô͘-ap beh tú-tio̍h húi-bia̍t, bô koh chiâⁿ-chòe kok; in-ūi in chū-ko, pōe-ge̍k Iâ-hô-hoa. 43 Iâ-hô-hoa kóng, Mô͘-ap khiā-khí ê peh-sìⁿ ah, kiaⁿ-hiâⁿ, hām-khiⁿ, oa̍h-tauh, lóng kàu tī lí. 44 Cháu-pī kiaⁿ-hiâⁿ-ê, beh poa̍h-lo̍h hām-khiⁿ; tùi hām-khiⁿ peh--khí-lâi ê, beh hō͘ oa̍h-tauh tauh-tio̍h; in-ūi Góa beh hō͘ hêng-hoa̍t ê nî lîm-kàu Mô͘-ap; che sī Iâ-hô-hoa kóng--ê. 45 Hiah ê tô-cháu--ê khùi-la̍t chīn, khiā tī Hi-si̍t-pún ìm-ńg-ē; chóng-sī hé tùi Hi-si̍t-pún chhut, hé-iām tùi Se-hông hoat, it-chīn sio Mô͘-ap ê pian-kài, kap chok-loān ê lâng thâu-khak ê téng-bīn. 46 Mô͘-ap ah, lí ū chai-ē; Ki-boat ê peh-sìⁿ bia̍t-bô lah, lí ê chèng-kiáⁿ hō͘ lâng lia̍h--khì, lí ê chèng cha-bó͘-kiáⁿ chòe siū-lia̍h--ê. 47 Iâ-hô-hoa kóng, Chóng-sī kàu ji̍t-āu, Góa beh hō͘ Mô͘-ap siū-lia̍h ê lâng tò-tńg. Lūn Mô͘-ap siū sím-phòaⁿ ê ōe, kàu chia ûi-chí.
1 論A-bûn。耶和華án-ni講，以色列無kiáⁿ mah？無後嗣mah？Má-le̍k-kham怎樣得tio̍h Ka-tek ê地做業，伊ê百姓怎樣khiā起伊中間hiahê城？ 2 耶和華講，看ah，日子beh到，我beh hō͘交戰ê聲聽tī A-bûn族ê La̍h-pa，伊beh成做拋荒ê土堆；伊chiahê城beh hō͘火燒；前佔以色列ê，taⁿ beh hō͘以色列佔倒tńg；這是耶和華講ê。 3 Hi-si̍t-pún ah，你tio̍h哀哭，因為Gāi ê城變做拋荒；La̍h-pa ê百姓ah，tio̍h喉叫，用麻布縖腰；tio̍h啼哭，行來行去tī籬笆中；因為Má-le̍k-kham kap伊ê祭司貴族beh做一下hō͘人掠去。 4 悖逆ê百姓ah，lín啥事因為hiahê山谷，就是水潤澤ê山谷，來誇口ah？你óa靠財寶，講，Chī-chūi會來到阮chia。 5 主萬軍ê耶和華án-ni講，看ah，我beh hō͘驚惶tùi四圍臨到lín；lín beh受趕出，ta̍k人直直去；走無路ê，無人thang聚集。 6 總是後來我beh hō͘ A-bûn族受掠ê人倒tńg；這是耶和華講ê。 7 論Í-tong，萬軍ê耶和華án-ni講，Tī Thê-bān無koh有智慧mah？聰明ê人無koh有計畫mah？in ê智慧無去mah？ 8 Tí-tàn ê百姓ah，退去ah，逃走ah，bih去密ah；因為我刑罰以掃ê時，beh hō͘伊ê災厄到tī伊。 9 挽葡萄ê若到你hia挽，kiám無iáu留幾粒á mah？賊若暝時來，kiám m̄是損斷到滿意nā-tiāⁿ？ 10 總是我hō͘以掃光溜溜，露現伊khǹg密ê所在，致到無tè thang bih；伊ê後裔，伊ê兄弟，伊ê厝邊lóng失敗；伊亦歸tī無。 11 Tio̍h將你無父ê kiáⁿ放下teh，我beh保全in活；你chiahê寡婦，亦tio̍h óa靠我。 12 因為耶和華án-ni講，看ah，本m̄應該lim hitê杯ê，的確beh lim伊，莫kioh你，你kiám會一盡免刑罰mah？你的確bōe免得刑罰，你的確tio̍h lim伊。 13 耶和華講，我kí家己來chiù-chōa，Pho-su-la̍h beh成做thang gông-ngia̍h，thang凌辱，thang咒詛，koh荒廢；伊lóng總ê城beh永遠變做拋荒。 14 我tùi耶和華hia聽見消息，亦有使者奉差去列國，講，Lín tio̍h聚集來攻擊伊，tio̍h起來交戰。 15 因為我hō͘你tī列國中做微細，hō͘人看輕。 16 Khiā起石洞內，把守山頂ê ah，你ê威風，你心內ê驕傲家己騙；你雖然親像鷹鳥，作你ê巢 tī高ê所在，我beh tùi hia kā你取落來；這是耶和華講ê。 17 Í-tong beh成做thang gông-ngia̍h-ê，見若tùi hia過ê，的確beh奇怪，因為伊所tú-tio̍h一切ê災厄，來恥笑伊。 18 耶和華講，的確無人khiā起tī-hia，亦無人寄腳tī-hia；是beh親像所多瑪、蛾摩拉，kap附近ê城倒壞一樣。 19 看ah，伊beh親像獅，tùi約旦河邊ê樹林起來，攻擊堅固khiā起ê所在；目nih久我beh hō͘ in逃走，離開chitê所在。Chī-chūi受揀選，我就派伊治理chitê地；是誰能比得我？是誰能kā我定一个期ah？有甚麼牧者能khiā tī我ê面前ah？ 20 所以lín tio̍h聽耶和華所計畫攻擊Í-tong ê計策；以及祂所註定攻擊Thê-bān khiā起ê百姓ê旨意；in定tio̍h beh將hiahê羊群ê細ê拖去；祂亦beh hō͘ in khiā起ê所在荒廢。 21 因為in倒壞ê聲，地就振動；in喉叫ê聲，聽到紅海。 22 看ah，伊beh起來，親像鷹鳥飛來，thí開伊ê翼tī Pho-su-la̍h；到hit日，Í-tong chiahê勇士ê心親像beh生kiáⁿ ê婦人人ê心。 23 論大馬色。Hap-má kap A-jíⁿ-poa̍t見笑，因為in聽見pháiⁿ消息，就失膽；海面有憂愁，bōe平靜。 24 大馬色衰弱，oa̍t-tńg身beh逃走，ngia̍uh-ngia̍uh-chhoah，將伊掠tiâu-tiâu；痛苦憂愁將伊khiú-tiâu-tiâu，親像beh生kiáⁿ ê婦人人一樣。 25 Thang o-ló ê城，就是我所歡喜ê城，怎樣受放sak到án-ni？ 26 伊ê少年人beh tī伊ê街市倒落去；當hit日伊一切ê兵丁beh滅無；這是萬軍ê耶和華講ê。 27 我亦beh hō͘火to̍h tī大馬色ê城牆，燒滅Piān-hap-ta̍t ê宮殿。 28 論Ki-ta̍t kap Hā-só chiahê國，就是巴比倫王Nî-pò͘-kah-nî-sat所phah-ê，耶和華án-ni講：你起來，上去Ki-ta̍t，剿滅東方ê人。 29 In ê布棚kap羊群，人beh搶去；將帳幅kap一切ê器具，kap駱駝，搶做家己ê；人對in hoah講，四圍lóng有驚惶。 30 耶和華講，Hā-só khiā起ê百姓ah，tio̍h逃走，走去遠，bih去密；因為巴比倫王Nî-pò͘-kah-nî-sat設計beh害lín，定tio̍h意思beh攻擊lín。 31 耶和華講，起來，上去攻擊安然khiā起無掛慮ê族，in無門戶，無門閂，是家己khiā起ê。 32 In ê駱駝beh hō͘人搶去；in chōe-chōe cheng-siⁿ beh hō͘人劫去；見若剃鬢邊ê，beh趕散in tī四方；hō͘災厄tùi四圍到tī in；這是耶和華講ê。 33 Hā-só beh成做野狗 tiàm ê所在，永遠悽凊，無人tī-hia khiā起，亦無人tī-hia寄腳。 34 偤大王Se-tí-ka起頭坐位ê時，耶和華論Í-lân ê話臨到先知耶利米講， 35 萬軍ê耶和華án-ni講，看ah，我beh at折Í-lân人ê弓，就是in上等ê氣力。 36 我beh hō͘四面ê風tùi天ê四面吹來，臨到Í-lân人，將in趕散tī四方；Í-lân受趕散ê人無一國無到。 37 耶和華講，我beh hō͘ Í-lân人tī對敵ê面前kap siàu想in ê性命ê人ê面前來驚惶；我也beh hō͘災厄，就是我ê大受氣，臨到in；koh beh hō͘刀劍追jip in，到一盡滅in。 38 我beh設立我ê寶座tī Í-lân，tùi-hia除去君王kap貴族；這是耶和華講ê。 39 總是到日後，我beh hō͘ Í-lân受掠ê人tò來；這是耶和華講ê。
1 Lūn A-bûn. Iâ-hô-hoa án-ni kóng, Í-sek-lia̍t bô kiáⁿ mah? bô hō͘-sû mah? Má-le̍k-kham cháiⁿ-iūⁿ tit-tio̍h Ka-tek ê tōe chòe gia̍p, i ê peh-sìⁿ cháiⁿ-iūⁿ khiā-khí i tiong-kan hiah ê siâⁿ? 2 Iâ-hô-hoa kóng, Khòaⁿ ah, ji̍t-chí beh kàu, Góa beh hō͘ kau-chiàn ê siaⁿ thiaⁿ tī A-bûn cho̍k ê La̍h-pa, i beh chiâⁿ-chòe pha-hng ê thô͘-tui; i chiah ê siâⁿ beh hō͘ hé sio; chêng chiàm Í-sek-lia̍t--ê, taⁿ beh hō͘ Í-sek-lia̍t chiàm tò-tńg; che sī Iâ-hô-hoa kóng--ê. 3 Hi-si̍t-pún ah, lí tio̍h ai-khàu, in-ūi Gāi ê siâⁿ pìⁿ-chòe pha-hng; La̍h-pa ê peh-sìⁿ ah, tio̍h âu-kiò, ēng môa-pò͘ hâ-io; tio̍h thî-khàu, kiâⁿ-lâi kiâⁿ-khì tī lî-pa-tiong; in-ūi Má-le̍k-kham kap i ê chè-si kùi-cho̍k beh chòe chi̍t-ē hō͘ lâng lia̍h-khì. 4 Pōe-ge̍k ê peh-sìⁿ ah, lín siáⁿ-sū in-ūi hiah ê soaⁿ-kok, chiū-sī chúi lūn-te̍k ê soaⁿ-kok, lâi khoa-kháu ah? lí óa-khò châi-pó, kóng, Chī-chūi ōe lâi kàu goán chia. 5 Chú bān-kun ê Iâ-hô-hoa án-ni kóng, Khòaⁿ ah, Góa beh hō͘ kiaⁿ-hiâⁿ tùi sì-ûi lîm-kàu lín; lín beh siū kóaⁿ-chhut, ta̍k-lâng ti̍t-ti̍t khì; cháu bô lō͘--ê, bô lâng thang chū-chi̍p. 6 Chóng-sī āu-lâi Góa beh hō͘ A-bûn cho̍k siū-lia̍h ê lâng tò-tńg; che sī Iâ-hô-hoa kóng--ê. 7 Lūn Í-tong. Bān-kun ê Iâ-hô-hoa án-ni kóng, Tī Thê-bān bô koh ū tì-hūi mah? Chhang-miâ ê lâng bô koh ū kè-e̍k mah? in ê tì-hūi bô--khì mah? 8 Tí-tàn ê peh-sìⁿ ah, thè--khì ah, tô-cháu ah, bih khì ba̍t ah; in-ūi Góa hêng-hoa̍t Í-sò ê sî, beh hō͘ i ê chai-ē kàu tī i. 9 Bán phû-tô--ê nā kàu lí hia bán, kiám bô iáu lâu kúi-lia̍p-á mah? chha̍t nā mî--sî lâi, kiám m̄-sī sńg-tn̄g kàu móa-ì nā-tiāⁿ? 10 Chóng-sī Góa hō͘ Í-sò kng-liu-liu, lō͘-hiān i khǹg-ba̍t ê só͘-chāi, tì-kàu bô tè thang bih; i ê hō͘-è, i ê hiaⁿ-tī, i ê chhù-piⁿ lóng sit-pāi; i ia̍h kui tī bô. 11 Tio̍h chiong lí bô-pē ê kiáⁿ pàng-hē-teh, Góa beh pó-choân in oa̍h; lí chiah ê kóaⁿ-hū, ia̍h tio̍h óa-khò góa. 12 In-ūi Iâ-hô-hoa án-ni kóng, Khòaⁿ ah, pún m̄ eng-kai lim hit ê poe--ê, tek-khak beh lim--i, bo̍h-kioh lí, lí kiám ōe it-chīn bián hêng-hoa̍t mah? lí tek-khak bōe bián-tit hêng-hoa̍t, lí tek-khak tio̍h lim--i. 13 Iâ-hô-hoa kóng, Góa kí ka-kī lâi chiù-chōa, Pho-su-la̍h beh chiâⁿ-chòe thang gông-ngia̍h, thang lêng-jio̍k, thang chiù-chó͘, koh hong-hòe; i lóng-chóng ê siâⁿ beh éng-oán pìⁿ-chòe pha-hng. 14 Góa tùi Iâ-hô-hoa hia thiaⁿ-kìⁿ siau-sit, ia̍h ū sù-chiá hōng-chhe khì lia̍t-kok, kóng, Lín tio̍h chū-chi̍p lâi kong-kek i, tio̍h khí-lâi kau-chiàn. 15 In-ūi Góa hō͘ lí tī lia̍t-kok-tiong chòe bî-sòe, hō͘ lâng khòaⁿ-khin. 16 Khiā-khí chio̍h-tōng-lāi, pé-siú soaⁿ-téng--ê ah, lí ê ui-hong, lí sim-lāi ê kiau-ngō͘ ka-kī phiàn; lí sui-jiân chhin-chhiūⁿ eng-chiáu, choh lí ê siū tī koâiⁿ ê só͘-chāi, Góa beh tùi hia kā lí chhú-lo̍h-lâi; che sī Iâ-hô-hoa kóng--ê. 17 Í-tong beh chiâⁿ-chòe thang gông-ngia̍h--ê, kìⁿ-nā tùi hia kè--ê, tek-khak beh kî-koài, in-ūi i só͘ tú-tio̍h it-chhè ê chai-ē, lâi thí-chhiò i. 18 Iâ-hô-hoa kóng, Tek-khak bô lâng khiā-khí tī-hia, ia̍h bô lâng kià-kha tī-hia; sī beh chhin-chhiūⁿ Só͘-to-má, Gô-mô͘-la̍h, kap hū-kūn ê siâⁿ tó-hoāi chi̍t-iūⁿ. 19 Khòaⁿ ah, i beh chhin-chhiūⁿ sai, tùi Iok-tàn hô-piⁿ ê chhiū-nâ khí--lâi, kong-kek kian-kò͘ khiā-khí ê só͘-chāi; ba̍k-nih-kú Góa beh hō͘ in tô-cháu, lī-khui chit ê só͘-chāi. Chī-chūi siū kéng-soán, Góa chiū phài i tī-lí chit ê tōe; chī-chūi ōe pí--tit Góa? chī-chūi ōe kā Góa tēng chi̍t ê kî ah? ū sím-mi̍h bo̍k-chiá ōe khiā tī Góa ê bīn-chêng ah? 20 Só͘-í lín tio̍h thiaⁿ Iâ-hô-hoa só͘ kè-e̍k kong-kek Í-tong ê kè-chhek; í-ki̍p I só͘ chù-tiāⁿ kong-kek Thê-bān khiā-khí ê peh-sìⁿ ê chí-ì; in tiāⁿ-tio̍h beh chiong hiah ê iûⁿ-kûn ê sòe--ê thoa--khì; I ia̍h beh hō͘ in khiā-khí ê só͘-chāi hong-hòe. 21 In-ūi in tó-hoāi ê siaⁿ, tōe chiū tín-tāng; in âu-kiò ê siaⁿ, thiaⁿ kàu Âng-hái. 22 Khòaⁿ ah, i beh khí--lâi, chhin-chhiūⁿ eng-chiáu pe--lâi, thí-khui i ê si̍t tī Pho-su-la̍h; kàu hit-ji̍t, Í-tong chiah ê ióng-sū ê sim chhin-chhiūⁿ beh siⁿ-kiáⁿ ê hū-jîn-lâng ê sim. 23 Lūn Tāi-má-sek. Hap-má kap A-jíⁿ-poa̍t kiàn-siàu, in-ūi in thiaⁿ-kìⁿ pháiⁿ siau-sit, chiū sit-táⁿ; hái-bīn ū iu-chhiû, bōe pêng-chēng. 24 Tāi-má-sek soe-jio̍k, oa̍t-tńg-sin beh tô-cháu, ngia̍uh-ngia̍uh-chhoah, chiong i lia̍h-tiâu-tiâu; thòng-khó͘ iu-chhiû chiong i khiú-tiâu-tiâu, chhin-chhiūⁿ beh siⁿ-kiáⁿ ê hū-jîn-lâng chi̍t-iūⁿ. 25 Thang o-ló ê siâⁿ, chiū-sī Góa só͘ hoaⁿ-hí ê siâⁿ, cháiⁿ-iūⁿ siū pàng-sak kàu án-ni? 26 I ê siàu-liân lâng beh tī i ê koe-chhī tó--lo̍h-khì; tng hit-ji̍t i it-chhè ê peng-teng beh bia̍t-bô; che sī bān-kun ê Iâ-hô-hoa kóng--ê. 27 Góa ia̍h beh hō͘ hé to̍h tī Tāi-má-sek ê siâⁿ-chhiûⁿ, sio-bia̍t Piān-hap-ta̍t ê kiong-tiān. 28 Lūn Ki-ta̍t kap Hā-só chiah ê kok, chiū-sī Pa-pí-lûn ông Nî-pò͘-kah-nî-sat só͘ phah--ê, Iâ-hô-hoa án-ni kóng: Lí khí-lâi, chiūⁿ--khì Ki-ta̍t, châu-bia̍t tang-hng ê lâng. 29 In ê pò͘-pîⁿ kap iûⁿ-kûn, lâng beh chhiúⁿ--khì; chiong tiùⁿ-pak kap it-chhè ê khì-kū, kap lo̍k-tô, chhiúⁿ chòe ka-kī ê; lâng tùi in hoah kóng, Sì-ûi lóng ū kiaⁿ-hiâⁿ. 30 Iâ-hô-hoa kóng, Hā-só khiā-khí ê peh-sìⁿ ah, tio̍h tô-cháu, cháu-khì-hn̄g, bih-khì-ba̍t; in-ūi Pa-pí-lûn ông Nî-pò͘-kah-nî-sat siat-kè beh hāi lín, tiāⁿ-tio̍h ì-sù beh kong-kek lín. 31 Iâ-hô-hoa kóng, Khí--lâi, chiūⁿ--khì kong-kek an-jiân khiā-khí bô khòa-lū ê cho̍k, in bô mn̂g-hō͘, bô mn̂g-chhòaⁿ, sī ka-kī khiā-khí--ê. 32 In ê lo̍k-tô beh hō͘ lâng chhiúⁿ--khì; in chōe-chōe cheng-siⁿ beh hō͘ lâng kiap--khì; kìⁿ-nā thì pìn-piⁿ--ê, beh kóaⁿ-sòaⁿ in tī sì-hng; hō͘ chai-ē tùi sì-ûi kàu tī in; che sī Iâ-hô-hoa kóng--ê. 33 Hā-só beh chiâⁿ-chòe iá-káu tiàm ê só͘-chāi, éng-oán chhiⁿ-chhìn, bô lâng tī-hia khiā-khí, ia̍h bô lâng tī-hia kià-kha. 34 Iû-tāi ông Se-tí-ka khí-thâu chē-ūi ê sî, Iâ-hô-hoa lūn Í-lân ê ōe lîm-kàu sian-ti Iâ-lī-bí kóng, 35 Bān-kun ê Iâ-hô-hoa án-ni kóng, Khòaⁿ ah, Góa beh at-chi̍h Í-lân lâng ê keng, chiū-sī in siōng-téng ê khùi-la̍t. 36 Góa beh hō͘ sì-bīn ê hong tùi thiⁿ ê sì-bīn chhe--lâi, lîm-kàu Í-lân lâng, chiong in kóaⁿ-sòaⁿ tī sì-hng; Í-lân siū kóaⁿ-sòaⁿ ê lâng bô chi̍t-kok bô kàu. 37 Iâ-hô-hoa kóng, Góa beh hō͘ Í-lân lâng tī tùi-te̍k ê bīn-chêng kap siàu-siūⁿ in ê sìⁿ-miā ê lâng ê bīn-chêng lâi kiaⁿ-hiâⁿ; Góa iā beh hō͘ chai-ē, chiū-sī Góa ê tōa siū-khì, lîm-kàu in; koh beh hō͘ to-kiàm tui-jip in, kàu it-chīn bia̍t in. 38 Góa beh siat-li̍p Góa ê pó-chō tī Í-lân, tùi-hia tû--khì kun-ông kap kùi-cho̍k; che sī Iâ-hô-hoa kóng--ê. 39 Chóng-sī kàu ji̍t-āu, Góa beh hō͘ Í-lân siū-lia̍h ê lâng tò--lâi; che sī Iâ-hô-hoa kóng--ê.
1 耶和華託先知耶利米論巴比倫，論Ka-le̍k-tí人ê地，所講ê話。 2 Lín tio̍h傳播tī列邦中hō͘ in聽見，tio̍h khiā大旗；tio̍h hō͘ in聽見，m̄-thang隱瞞；講，巴比倫受攻破，Pí-le̍k見笑，Bí-lô-ta̍t phah-pháiⁿ，伊ê佛lóng見笑，伊ê偶像lóng phah-pháiⁿ。 3 因為有一國tùi北方起來攻擊伊，beh hō͘伊ê地拋荒，無人khiā起；人kap cheng-siⁿ lóng走去。 4 耶和華講，hit日hit時以色列人beh來，in beh kap偤大人相kap來，in beh行路，ná行ná哮，來chhē in ê上帝耶和華。 5 In問錫安ê事，面ǹg-hia，講，來lah，lín tio̍h結永遠無bōe記得ê約，來kap耶和華連合。 6 我ê百姓做迷路ê羊；in ê牧者hō͘ in行叉路；hō͘ in oat去山裡；in tùi大山行到小山，bōe記得in安歇ê所在。 7 見若tú-tio̍h in ê beh吞食in；in chiahê對敵講，阮無罪，因為in得罪耶和華，就是公義khiā起ê所在，也是in ê列祖所ǹg望ê耶和華。 8 Lín tio̍h tùi巴比倫中逃走，tùi Ka-le̍k-tí人ê地出去；tio̍h親像公ê山羊tī羊群ê頭前。 9 我beh激動chōe-chōe大國tùi北方相kap來攻擊巴比倫；in beh排陣攻擊伊；伊beh tùi-hia受攻破；in ê箭beh親像gâu射ê勇士ê箭，lóng無空空倒tńg來。 10 Ka-le̍k-tí beh hō͘人搶去；見若搶伊ê lóng beh滿意；這是耶和華講ê。 11 搶我ê業ê ah，因為lín歡喜快樂；因為lín跳來跳去親像踏五穀ê牛母，也teh哮親像勇ê馬； 12 lín ê老母beh見笑到極，生你ê的確漏氣；看ah，伊beh列tī chiahê國ê路尾，成做曠野，做乾燥ê地，做沙漠。 13 因為耶和華ê大受氣，的確無人khiā起，beh全然拋荒；見若經過巴比倫ê beh gông-ngia̍h，也因為伊所tú-tio̍h chiahê災厄來恥笑伊。 14 開弓ê人ah，lín tio̍h tī巴比倫四圍排陣；tio̍h射箭攻擊伊，莫得保惜lín ê箭；因為伊有得罪耶和華。 15 Lín tio̍h tī伊ê四圍hoah-hiàm；伊已經投降；伊ê營寨倒壞lah，城牆拆毀lah；因為這是耶和華報仇ê事，lín tio̍h ǹg伊報仇；伊怎樣款待人，也tio̍h án-ni款待伊。 16 Lín tio̍h tùi巴比倫剪除掖種ê kap收割ê時kia̍h鐮á ê；因為驚壓制ê刀劍ta̍k人beh tò去本族，ta̍k人beh走到本所在。 17 以色列是四散ê羊，是hō͘獅趕走ê；事先是亞述王吞伊，路尾chitê巴比倫王，Nî-pò͘-kah-nî-sat，at折伊ê骨頭。 18 所以萬軍ê耶和華，以色列ê上帝，án-ni講，看ah，我beh刑罰巴比倫王kap伊ê地，親像我bat刑罰亞述王一樣。 19 我beh koh chhōa以色列tò來伊ê草場，伊beh tī Ka-bi̍t kap Pa-san食草；koh tī Í-hoat-liân山kap Ki-lia̍t地，伊ê心得tio̍h飽足。 20 耶和華講，hit日hit時beh查以色列ê罪過，也lóng總無；beh chhē偤大ê罪惡，也chhē無；因為我所留teh ê百姓我beh赦免in。 21 耶和華講，Tio̍h上去攻擊Bí-la̍h-tāi-ong ê地kap Pí-kat khiā起ê百姓；tio̍h追jip一盡刣 in，照我一切所吩咐你ê去行。 22 境內有交戰ê聲kap大毀滅。 23 Phah全地ê大支槌怎樣phah折毀壞ah！巴比倫tī列國中怎樣拋荒ah！ 24 巴比倫ah，我為你設活tauh，你hō͘伊tauh-tio̍h也m̄知；你hō͘人chhē-tio̍h，掠tio̍h，因為你kap耶和華做對敵。 25 耶和華已經開祂ê軍裝局，kia̍h出伊大受氣ê器械；因為主，萬軍ê耶和華，有tāi-chì tī Ka-le̍k-tí人ê地。 26 Lín tio̍h tùi極遠ê邊界來攻擊伊；開伊ê粟倉；hiat伊成土堆，一盡滅伊，無留半項。 27 Tio̍h 刣伊一切ê牛káng；hō͘ in落去受刣；in有災厄ah！因為辦in ê日，hitê期已經到。 28 有tùi巴比倫地逃走出來ê ê聲，tī錫安報告耶和華咱ê上帝報仇，就是祂為tio̍h祂ê殿來報仇。 29 Tio̍h招集射箭ê兵，就是一切開弓ê，來攻擊巴比倫；tī伊ê四圍紮營來phah伊；m̄-thang hō͘伊走一个；照伊所做ê報應伊；伊怎樣款待人，tio̍h照án-ni款待伊；因為伊驕傲悖逆耶和華，以色列ê聖ê。 30 因為án-ni伊ê少年人beh tī伊ê街市倒落去，當hit日伊一切ê兵丁beh滅無；這是耶和華講ê。 31 主，萬軍ê耶和華講，看ah，驕傲ê ah，我做你ê對敵；因為我辦你ê日，hitê期已經到。 32 驕傲ê tio̍h-tak跋倒，無人扶伊起來；我beh hō͘火tī伊hiahê城to̍h去來，將伊四圍所有ê一盡燒lio去。 33 萬軍ê耶和華án-ni講，以色列人kap偤大人平平受壓制；凡若掠in-ê，lóng kā伊顧tiâu-tiâu，m̄肯放伊去。 34 救贖in-ê有大氣力；祂ê名是萬軍ê耶和華，祂beh申in ê冤，hō͘全地得tio̍h平安，亦hō͘巴比倫khiā起ê百姓ngia̍uh-ngia̍uh-chhoah。 35 耶和華講，有刀劍臨到Ka-le̍k-tí人，kap巴比倫khiā起ê百姓，kap in ê貴族，kap in ê博士。 36 有刀劍臨到誇口ê人，in就成做戇；有刀劍臨到伊ê勇士，in就驚惶。 37 有刀劍臨到伊ê馬，伊ê車，kap其中ê雜色人；in beh親像婦人人一樣；有刀劍臨到伊ê寶物，就受搶奪。 38 有炕旱臨到伊lóng總ê水，就beh乾乾去；因為這是雕刻偶像ê地，人因為神佛來顛狂。 39 所以曠野ê走獸kap豺狼beh tiàm tī-hia；刀劍亦beh tiàm tī hit中間；永永無人煙，代代無人khiā。 40 耶和華講，的確無人khiā起tī-hia，亦無人寄腳tī in中間；beh親像我上帝chhia倒所多瑪、蛾摩拉，kap附近ê城一樣。 41 看ah，有百姓tùi北方來；亦有大國kap chōe-chōe君王受激動，tùi地極來。 42 In kia̍h弓 kap鎗，殘忍無憐憫；in ê聲親像海湧hōa-hōa哮；in騎馬排隊，親像上陣ê人；巴比倫ê城ah，in beh攻擊你。 43 巴比倫王聽見in ê風聲，手就軟落去；痛苦kā伊擒tiâu，痛疼親像beh生kiáⁿ ê婦人人。 44 看ah，伊beh親像獅tùi約旦河邊ê樹林起來，攻擊堅固khiā起ê所在；目nih久，我beh hō͘ in逃走，離開chitê所在；是誰受揀選，我就派伊治理chitê地；是誰能比得我？是誰能kā我定一个期 ah？有甚麼牧者能khiā tī我ê面前ah？ 45 所以lín tio̍h聽耶和華所計畫攻擊巴比倫ê計策；以及祂所註定攻擊Ka-le̍k-tí ê旨意。In定tio̍h beh將hiahê羊群ê細ê拖去。祂也beh hō͘ in khiā起ê所在荒廢。 46 因為巴比倫倒壞ê聲，地就振動；in喉叫ê聲聽tī列邦中。
1 Iâ-hô-hoa thok sian-ti Iâ-lī-bí lūn Pa-pí-lûn, lūn Ka-le̍k-tí lâng ê tōe, só͘ kóng ê ōe. 2 Lín tio̍h thoân-pò͘ tī lia̍t-pang-tiong hō͘ in thiaⁿ-kìⁿ, tio̍h khiā tōa-kî; tio̍h hō͘ in thiaⁿ-kìⁿ, m̄-thang ún-môa; kóng, Pa-pí-lûn siū kong-phòa, Pí-le̍k kiàn-siàu, Bí-lô-ta̍t phah-pháiⁿ, i ê pu̍t lóng kiàn-siàu, i ê ngó͘-siōng lóng phah-pháiⁿ. 3 In-ūi ū chi̍t-kok tùi pak-hng khí-lâi kong-kek i, beh hō͘ i ê tōe pha-hng, bô lâng khiā-khí; lâng kap cheng-siⁿ lóng cháu--khì. 4 Iâ-hô-hoa kóng, Hit-ji̍t hit-sî Í-sek-lia̍t lâng beh lâi, in beh kap Iû-tāi lâng saⁿ-kap lâi, in beh kiâⁿ-lō͘, ná-kiâⁿ ná-háu, lâi chhē in ê Siōng-tè Iâ-hô-hoa. 5 In mn̄g Sek-an ê sū, bīn ǹg-hia, kóng, Lâi--lah, lín tio̍h kiat éng-oán bô bōe-kì-tit ê iok, lâi kap Iâ-hô-hoa liân-ha̍p. 6 Góa ê peh-sìⁿ chòe bê-lō͘ ê iûⁿ; in ê bo̍k-chiá hō͘ in kiâⁿ chha-lō͘; hō͘ in oat--khì soaⁿ--nih; in tùi tōa-soaⁿ kiâⁿ kàu sió-soaⁿ, bōe-kì-tit in an-hioh ê só͘-chāi. 7 Kìⁿ-nā tú-tio̍h in ê beh thun-chia̍h in; in chiah ê tùi-te̍k kóng, Goán bô chōe, in-ūi in tek-chōe Iâ-hô-hoa, chiū-sī kong-gī khiā-khí ê só͘-chāi, iā sī in ê lia̍t-chó͘ só͘ ǹg-bāng ê Iâ-hô-hoa. 8 Lín tio̍h tùi Pa-pí-lûn tiong tô-cháu, tùi Ka-le̍k-tí lâng ê tōe chhut--khì; tio̍h chhin-chhiūⁿ kang ê soaⁿ-iûⁿ tī iûⁿ-kûn ê thâu-chêng. 9 Góa beh kek-tōng chōe-chōe tōa-kok tùi pak-hng saⁿ-kap lâi kong-kek Pa-pí-lûn; in beh pâi-tīn kong-kek i; i beh tùi-hia siū kong-phòa; in ê chìⁿ beh chhin-chhiūⁿ gâu siā ê ióng-sū ê chìⁿ, lóng bô khang-khang tò-tńg-lâi. 10 Ka-le̍k-tí beh hō͘ lâng chhiúⁿ--khì; kìⁿ-nā chhiúⁿ-i--ê lóng beh móa-ì; che sī Iâ-hô-hoa kóng--ê. 11 Chhiúⁿ Góa ê gia̍p--ê ah, in-ūi lín hoaⁿ-hí khoài-lo̍k; in-ūi lín thiàu-lâi thiàu-khì chhin-chhiūⁿ ta̍h gō͘-kak ê gû-bú, iā teh háu chhin-chhiūⁿ ióng ê bé; 12 lín ê lāu-bú beh kiàn-siàu kàu-ke̍k, siⁿ--lí-ê tek-khak làu-khùi; khòaⁿ ah, i beh lia̍t tī chiah ê kok ê lō͘-bé, chiâⁿ-chòe khòng-iá, chòe ta-sò ê tōe, chòe soa-bô͘. 13 In-ūi Iâ-hô-hoa ê tōa siū-khì, tek-khak bô lâng khiā-khí, beh choân-jiân pha-hng; kìⁿ-nā keng-kè Pa-pí-lûn--ê beh gông-ngia̍h, iā in-ūi i só͘ tú-tio̍h chiah ê chai-ē lâi thí-chhiò i. 14 Khui-keng ê lâng ah, lín tio̍h tī Pa-pí-lûn sì-ûi pâi-tīn; tio̍h siā-chìⁿ kong-kek i, bo̍h-tit pó-sioh lín ê chìⁿ; in-ūi i ū tek-chōe Iâ-hô-hoa. 15 Lín tio̍h tī i ê sì-ûi hoah-hiàm; i í-keng tâu-hâng; i ê iâⁿ-chē tó-hoāi lah, siâⁿ-chhiûⁿ thiah-húi lah; in-ūi che sī Iâ-hô-hoa pò-siû ê sū, lín tio̍h ǹg i pò-siû; i cháiⁿ-iūⁿ khoán-thāi lâng, iā tio̍h án-ni khoán-thāi i. 16 Lín tio̍h tùi Pa-pí-lûn chián-tû iā-chéng-ê kap siu-koah ê sî kia̍h liâm-á ê; in-ūi kiaⁿ ap-chè ê to-kiàm ta̍k-lâng beh tò--khì pún-cho̍k, ta̍k-lâng beh cháu kàu pún só͘-chāi. 17 Í-sek-lia̍t sī sì-sòaⁿ ê iûⁿ, sī hō͘ sai kóaⁿ-cháu--ê; tāi-seng sī A-su̍t ông thun i, lō͘-bé chit ê Pa-pí-lûn ông, Nî-pò͘-kah-nî-sat, at-chi̍h i ê kut-thâu. 18 Só͘-í bān-kun ê Iâ-hô-hoa, Í-sek-lia̍t ê Siōng-tè, án-ni kóng, Khòaⁿ ah, Góa beh hêng-hoa̍t Pa-pí-lûn ông kap i ê tōe, chhin-chhiūⁿ Góa bat hêng-hoa̍t A-su̍t ông chi̍t-iūⁿ. 19 Góa beh koh chhōa Í-sek-lia̍t tò-lâi i ê chháu-tiûⁿ, i beh tī Ka-bi̍t kap Pa-san chia̍h chháu; koh tī Í-hoat-liân soaⁿ kap Ki-lia̍t tōe, i ê sim tit-tio̍h pá-chiok. 20 Iâ-hô-hoa kóng, Hit-ji̍t hit-sî beh chhâ Í-sek-lia̍t ê chōe-kòa, iā lóng-chóng bô; beh chhē Iû-tāi ê chōe-ok, iā chhē-bô; in-ūi Góa só͘ lâu-teh ê peh-sìⁿ Góa beh sià-bián in. 21 Iâ-hô-hoa kóng, Tio̍h chiūⁿ-khì kong-kek Bí-la̍h-tāi-ong ê tōe kap Pí-kat khiā-khí ê peh-sìⁿ; tio̍h tui-jip it-chīn thâi in, chiàu Góa it-chhè só͘ hoan-hù lí-ê khì kiâⁿ. 22 Kéng-lāi ū kau-chiàn ê siaⁿ kap tōa húi-bia̍t. 23 Phah choân-tōe ê tōa ki thûi cháiⁿ-iūⁿ phah-chi̍h húi-hoāi ah! Pa-pí-lûn tī lia̍t-kok tiong cháiⁿ-iūⁿ pha-hng ah! 24 Pa-pí-lûn ah, Góa ūi lí siat oa̍h-tauh, lí hō͘ i tauh-tio̍h iā m̄-chai; lí hō͘ lâng chhē-tio̍h, lia̍h-tio̍h, in-ūi lí kap Iâ-hô-hoa chòe tùi-te̍k. 25 Iâ-hô-hoa í-keng khui I ê kun-chong-ke̍k, kia̍h-chhut I tōa siū-khì ê khì-hâi; in-ūi Chú, bān-kun ê Iâ-hô-hoa, ū tāi-chì tī Ka-le̍k-tí lâng ê tōe. 26 Lín tio̍h tùi ke̍k-hn̄g ê piⁿ-kài lâi kong-kek i; khui i ê chhek-chhng; hiat i chiâⁿ thô͘-tui, it-chīn bia̍t i, bô lâu pòaⁿ-hāng. 27 Tio̍h thâi i it-chhè ê gû-káng; hō͘ in lo̍h--khì siū-thâi; in ū chai-ē ah! in-ūi pān in ê ji̍t, hit ê kî í-keng kàu. 28 Ū tùi Pa-pí-lûn tōe tô-cháu chhut-lâi-ê ê siaⁿ, tī Sek-an pò-kò Iâ-hô-hoa lán ê Siōng-tè pò-siû, chiū-sī I ūi-tio̍h I ê tiān lâi pò-siû. 29 Tio̍h chio-chi̍p siā-chìⁿ ê peng, chiū-sī it-chhè khui-keng--ê, lâi kong-kek Pa-pí-lûn; tī i ê sì-ûi chat-iâⁿ lâi phah i; m̄-thang hō͘ i cháu chi̍t-ê; chiàu i só͘ chòe--ê pò-èng i; i cháiⁿ-iūⁿ khoán-thāi lâng, tio̍h chiàu án-ni khoán-thāi i; in-ūi i kiau-ngō͘ pōe-ge̍k Iâ-hô-hoa, Í-sek-lia̍t ê Sèng--ê. 30 In-ūi án-ni i ê siàu-liân lâng beh tī i ê koe-chhī tó--lo̍h-khì, tng hit-ji̍t i it-chhè ê peng-teng beh bia̍t-bô; che sī Iâ-hô-hoa kóng--ê. 31 Chú, bān-kun ê Iâ-hô-hoa kóng, Khòaⁿ ah, kiau-ngō͘--ê ah, Góa chòe lí ê tùi-te̍k; in-ūi Góa pān lí ê ji̍t, hit ê kî í-keng kàu. 32 Kiau-ngō͘--ê tio̍h-tak poa̍h-tó, bô lâng hû i khí--lâi; Góa beh hō͘ hé tī i hiah ê siâⁿ to̍h--khì-lâi, chiong i sì-ûi só͘-ū-ê it-chīn sio-lio-khì. 33 Bān-kun ê Iâ-hô-hoa án-ni kóng, Í-sek-lia̍t lâng kap Iû-tāi lâng pîⁿ-pîⁿ siū ap-chè; hoān-nā lia̍h-in--ê, lóng kā i kò͘-tiâu-tiâu, m̄-khéng pàng i khì. 34 Kiù-sio̍k in--ê ū tōa khùi-la̍t; I ê miâ sī bān-kun ê Iâ-hô-hoa, I beh sin in ê oan, hō͘ choân-tōe tit-tio̍h pêng-an, ia̍h hō͘ Pa-pí-lûn khiā-khí ê peh-sìⁿ ngia̍uh-ngia̍uh-chhoah. 35 Iâ-hô-hoa kóng, Ū to-kiàm lîm-kàu Ka-le̍k-tí lâng, kap Pa-pí-lûn khiā-khí ê peh-sìⁿ, kap in ê kùi-cho̍k, kap in ê phok-sū. 36 Ū to-kiàm lîm-kàu khoa-kháu ê lâng, in chiū chiâⁿ-chòe gōng; ū to-kiàm lîm-kàu i ê ióng-sū, in chiū kiaⁿ-hiâⁿ. 37 Ū to-kiàm lîm-kàu i ê bé, i ê chhia, kap kî-tiong ê cha̍p-sek lâng; in beh chhin-chhiūⁿ hū-jîn-lâng chi̍t-iūⁿ; ū to-kiàm lîm-kàu i ê pó-mi̍h, chiū siū chhiúⁿ-toa̍t. 38 Ū khòng-hān lîm-kàu i lóng-chóng ê chúi, chiū beh ta-la--khì; in-ūi che sī tiau-khek ngó͘-siōng ê tōe, lâng in-ūi sîn-pu̍t lâi tian-kông. 39 Só͘-í khòng-iá ê cháu-siù kap chhâi-lông beh tiàm tī-hia; to-kiàm ia̍h beh tiàm tī hit tiong-kan; éng-éng bô jîn-ian, tāi-tāi bô lâng khiā. 40 Iâ-hô-hoa kóng, Tek-khak bô lâng khiā-khí tī-hia, ia̍h bô lâng kià-kha tī in tiong-kan; beh chhin-chhiūⁿ Góa Siōng-tè chhia-tó Só͘-to-má, Gô-mô͘-la̍h, kap hū-kūn ê siâⁿ chi̍t-iūⁿ. 41 Khòaⁿ ah, ū peh-sìⁿ tùi pak-hng lâi; ia̍h ū tōa-kok kap chōe-chōe kun-ông siū kek-tōng, tùi tōe-ke̍k lâi. 42 In kia̍h keng kap chhiuⁿ, chân-jím bô lîn-bín; in ê siaⁿ chhin-chhiūⁿ hái-éng hōa-hōa-háu; in khiâ-bé pâi-tūi, chhin-chhiūⁿ chiūⁿ-tīn ê lâng; Pa-pí-lûn ê siâⁿ ah, in beh kong-kek lí. 43 Pa-pí-lûn ông thiaⁿ-kìⁿ in ê hong-siaⁿ, chhiú chiū nńg--lo̍h-khì; thòng-khó͘ kā i khîⁿ-tiâu, thàng-thiàⁿ chhin-chhiūⁿ beh siⁿ-kiáⁿ ê hū-jîn-lâng. 44 Khòaⁿ ah, i beh chhin-chhiūⁿ sai tùi Iok-tàn hô-piⁿ ê chhiū-nâ khí--lâi, kong-kek kian-kò͘ khiā-khí ê só͘-chāi; ba̍k-nih-kú, Góa beh hō͘ in tô-cháu, lī-khui chit ê só͘-chāi; chī-chūi siū kéng-soán, Góa chiū phài i tī-lí chit ê tōe; chī-chūi ōe pí--tit Góa? chī-chūi ōe kā Góa tēng chi̍t ê kî ah? ū sím-mi̍h bo̍k-chiá ōe khiā tī Góa ê bīn-chêng ah? 45 Só͘-í lín tio̍h thiaⁿ Iâ-hô-hoa só͘ kè-e̍k kong-kek Pa-pí-lûn ê kè-chhek; í-ki̍p I só͘ chù-tiāⁿ kong-kek Ka-le̍k-tí ê chí-ì. In tiāⁿ-tio̍h beh chiong hiah ê iûⁿ-kûn ê sòe--ê thoa--khì. I iā beh hō͘ in khiā-khí ê só͘-chāi hong-hòe. 46 In-ūi Pa-pí-lûn tó-hoāi ê siaⁿ, tōe chiū tín-tāng; in âu-kiò ê siaⁿ thiaⁿ tī lia̍t-pang tiong.
1 耶和華án-ni講，看ah，我beh起毀滅ê風，攻擊巴比倫，kap tiàm tī Li̍p-ka-bí ê人。 2 我beh差外邦人來到巴比倫，來簸in；hō͘ in ê地空虛；tī伊tú-tio̍h患難ê日，in beh周圍攻擊伊。 3 開弓ê tio̍h ǹg開弓ê來開弓，ǹg穿甲挺身ê來開弓；莫得惜伊ê少年人，tio̍h一盡滅伊ê全軍。 4 受刣-ê beh倒tī Ka-le̍k-tí人ê地；受刺ê beh倒tī伊ê街路。 5 雖bóng以色列kap偤大，in ê地方滿滿得罪以色列ê聖ê，iáu-kú in無hō͘萬軍ê耶和華伊ê上帝棄sak in。 6 Lín tio̍h tùi巴比倫中走出，ta̍k人救家己ê性命；莫得tī in ê罪中來滅無；因為這是耶和華報仇ê期，祂beh hō͘ in tú-tio̍h應該受ê報應。 7 巴比倫平素是耶和華手內ê金杯，hō͘全地ê人醉；列邦bat lim伊ê酒，所以列邦發狂。 8 巴比倫忽然chhia倒，毀壞；tio̍h為伊啼哭，the̍h乳香來止伊ê痛疼，kiám-chhái iáu能醫得。 9 咱想beh醫治巴比倫，但是伊無得tio̍h；咱tio̍h離開伊，ta̍k人tò來去本國；因為伊ê罪案抵天，透到穹蒼。 10 耶和華已經顯明咱ê公義；來ah，咱thang tī錫安報告咱ê上帝耶和華ê所做。 11 Lín tio̍h磨光lín ê箭，giâ-tiâu lín ê藤牌，耶和華定tio̍h意思攻擊巴比倫，來毀滅伊；所以激動馬大君王ê心；因為這是耶和華報仇，就是祂為tio̍h祂ê殿來報仇。 12 Tio̍h khiā大旗攻擊巴比倫ê城牆；tio̍h堅固瞭望ê台，派守望ê，設埋伏；因為耶和華所講論巴比倫khiā起ê百姓，伊有計畫伊，亦有成伊。 13 Khiā起tī chōe-chōe水ê頂面，大發財ê ah，你ê結局到lah，貪心ê量滿lah。 14 萬軍ê耶和華kí家己chiù-chōa講，我beh hō͘人充滿lín中間，親像草蜢一樣，in beh hoah-hiàm攻擊你。 15 耶和華用能力創造地，用智慧建立世界；用聰明展開chiahê天。 16 祂一下出聲，空中就有chōe-chōe水激動；祂hō͘雲霧tùi地極chhèng起來；祂為tio̍h雨，創造sih-nà；祂hō͘風tùi祂ê府庫出來。 17 Ta̍k人lóng愚蠢無智識；ta̍k ê銀匠lóng為tio̍h伊雕刻ê偶像來見笑；因為伊所鑄 ê偶像是假ê，也無活氣tī伊ê內面。 18 lóng是空空ê；是迷惑人ê所做；到辨理in ê時，的確受除滅。 19 雅各ê份額無親像chiahê；因為伊是創造萬物ê主；以色列也是祂產業ê支派；萬軍ê耶和華是祂ê名。 20 你是我ê斧頭，交戰ê ke-si；我beh用你phah碎列邦，用你毀滅列國； 21 用你phah碎馬kap騎馬ê； 22 用你phah碎戰車，kap坐tī hit頂面ê；用你phah碎ta-po͘人kap婦人人；用你phah碎老人kap gín-á； 23 用你phah碎少年人kap在室女；用你phah碎牧者kap伊ê羊群；用你phah碎作田人，kap伊ê一對牛；用你phah碎總督kap官員。 24 耶和華講，早巴比倫kap Ka-le̍k-tí khiā起ê百姓，tī錫安所行一切ê pháiⁿ，我beh報應in，hō͘ lín親目看見。 25 耶和華講，你chitê行毀滅ê山ah，看ah，我對敵你；你毀滅全地，我beh伸我ê手tī你ê頂面，tùi山巖chhia你落去；hō͘你成做燒毀ê山。 26 人的確無對你hia取一塊石做厝角，亦無一塊石做地基；你beh永遠拋荒；這是耶和華講ê。 27 Tio̍h tī境內khiā大旗，tī ta̍k國中pûn哨角；tiau-tî備辦列國來攻擊伊；招集A-la̍h-la̍t、Bí-nî、A-si̍t-ki-ná chiahê國來攻擊伊；koh派軍長來攻擊伊；hō͘馬兵上來親像粗毛ê草蜢。 28 Tiau-tî備辦列國kap馬代ê列王，伊ê總督，伊ê官員，kap伊所管全地ê人，來攻擊伊。 29 地振動koh悽慘；因為耶和華攻擊巴比倫ê旨意已經定tio̍h；beh hō͘巴比倫ê地拋荒，無人khiā起。 30 巴比倫ê勇士m̄-ài交戰，tòa tī營盤內；伊ê力已經無，成做親像婦人人，in ê厝宅受燒，in ê門栱phah折。 31 走文書ê走去tú-tio̍h走文書ê；報消息ê tú-tio̍h報消息ê；報告巴比倫王知，伊ê城四面hō͘人取去； 32 路頭hō͘人佔去，蘆竹受火燒，交戰ê人亦驚惶。 33 萬軍ê耶和華，以色列ê上帝，án-ni講：巴比倫親像粟埕，已經踏到平平；koh無jōa久，收成ê時就到。 34 巴比倫王Nî-pò͘-kah-nî-sat吞食我，teh碎我；hō͘我成做空ê器具；伊親像大魚吞我；用我ê寶物充滿伊ê腹肚，koh將我吐出。 35 錫安khiā起ê百姓beh講，巴比倫用暴虐款待我，kap我ê身體；願chitê罪歸tī伊。耶路撒冷人beh講，願流阮ê血ê罪歸tī Ka-le̍k-tí khiā起ê百姓。 36 所以耶和華án-ni講，看ah，我beh替你申冤，亦beh替你報仇；我beh hō͘伊ê海乾去，hō͘伊ê水泉無水。 37 巴比倫beh成做土堆，做野狗tòa ê所在；做thang gông-ngia̍h，thang恥笑ê，亦無人khiā起。 38 In beh親像勇ê獅hm̄-hm̄哮，親像細隻獅哮叫。 39 當in熱ê時，我beh為in辦酒桌，hō͘伊酒醉，hō͘伊快樂，長睏，永無精神；這是耶和華講ê。 40 我beh帶in落去，親像羊á，親像公ê綿羊，公ê山羊，到受刣 ê地。 41 Sī-sa-khek怎樣受攻破！天下所o-ló-ê，怎樣受霸佔！巴比倫tī列國中，怎樣變做拋荒！ 42 海水漲起來，淹過巴比倫；伊hō͘ chōe-chōe湧蓋密。 43 伊ê城變做拋荒，乾燥ê地，沙漠，無人khiā起，無人經過ê所在。 44 我beh刑罰Pí-le̍k tī巴比倫，我beh挖出伊ê嘴所吞ê；萬百姓無koh歸óa伊；巴比倫ê城牆亦倒壞。 45 我ê百姓ah，lín tio̍h對伊ê中間出去；ta̍k人救家己，閃避耶和華ê大受氣。 46 Lín ê心m̄-thang失膽，亦m̄-thang因為境內所聽見ê風聲來驚惶；因為今年有風聲傳來，暝時亦有風聲；境內有強暴ê事，官長攻擊官長。 47 看ah，日子beh到，我beh辦巴比倫雕刻ê偶像，hō͘ in全地見笑；伊hiah ê受刣 ê人beh倒tī in中間。 48 Hit時天地kap其中所有ê，beh因為巴比倫失敗來歡喜；因為行毀滅ê beh tùi北方來到伊hia；這是耶和華講ê。 49 巴比倫àn怎樣hō͘以色列受刣 ê人倒落去，親像án-ni，伊全地受刣 ê人亦beh tī巴比倫倒落去。 50 閃避刀劍ê tio̍h緊走，m̄-thang khiā-teh；tio̍h tī遠遠ê所在記念耶和華，心內追想耶路撒冷。 51 阮因為聽詈罵漏氣，滿面見笑；因為異邦人入耶和華ê厝hiahê聖ê所在。 52 所以耶和華講，看ah，日子beh到，我辦巴比倫雕刻ê偶像；thong國受傷ê人beh hiⁿ-hiⁿ-chhan。 53 巴比倫雖然上到天，雖然hō͘伊堅固高ê所在koh-khah堅固；iáu-kú有行毀滅ê beh tùi我chia到伊hia；這是耶和華講ê。 54 Tùi巴比倫有哀哭ê聲，tùi Ka-le̍k-tí人ê地有大毀滅ê聲。 55 因為耶和華毀滅巴比倫，hō͘ in中間ê大聲soah去，in ê湧hōa-hōa哮，親像chōe-chōe ê水；伊響ê聲亦發出。 56 因為毀滅ê來攻擊巴比倫；伊ê勇士受掠，in ê弓tú-tio̍h at折；因為耶和華是行報應ê上帝，祂決斷beh報仇。 57 君王，名做萬軍ê耶和華ê，講，我beh hō͘伊ê貴族、博士、總督、官員，以及勇士，lóng酒醉，永永睏，無精神。 58 萬軍ê耶和華án-ni講：巴比倫闊大ê城牆beh一盡倒壞；伊高大ê城門beh hō͘火燒lio去；眾百姓所tio̍h磨ê beh歸tī空空；列國所tio̍h磨ê歸tī火；in lóng beh厭倦。 59 偤大王Se-tí-ka坐位ê第四年上去巴比倫ê時，Má-se-ngá ê孫，Nî-lī-a ê kiáⁿ Se-lâi-ngá，kap王相kap去。 60 (Se-lâi-ngá是王ê內侍) 先知耶利米有話吩咐伊。耶利米將一切beh臨到巴比倫ê災厄，就是論到巴比倫所寫一切ê話，來記上冊。 61 耶利米對Se-lâi-ngá講，你到巴比倫ê時，要緊tio̍h讀chitê冊裡ê話。 62 Koh tio̍h講，耶和華ah，祢論到chit所在bat講beh滅伊，甚至無人khiā起，連cheng-siⁿ亦無，的確永遠拋荒。 63 你chitê冊讀了，就tio̍h縛tī一塊石頭，hiat落tī Pek-lat河中， 64 講，巴比倫為tio̍h耶和華所beh降hō͘伊ê災厄的確親像án-ni沉落去，bōe koh起來；in lóng beh厭倦。 耶利米ê話，到chia為止。
1 Iâ-hô-hoa án-ni kóng, Khòaⁿ ah, Góa beh khí húi-bia̍t ê hong, kong-kek Pa-pí-lûn, kap tiàm tī Li̍p-ka-bí ê lâng. 2 Góa beh chhe gōa-pang lâng lâi kàu Pa-pí-lûn, lâi pòa--in; hō͘ in ê tōe khang-hu; tī i tú-tio̍h hoān-lān ê ji̍t, in beh chiu-ûi kong-kek i. 3 Khui-keng--ê tio̍h ǹg khui-keng--ê lâi khui-keng, ǹg chhēng-kah théng-sin--ê lâi khui-keng; bo̍h-tit sioh i ê siàu-liân lâng, tio̍h it-chīn bia̍t i ê choân-kun. 4 Siū-thâi--ê beh tó tī Ka-le̍k-tí lâng ê tōe; siū-chhì--ê beh tó tī i ê ke-lō͘. 5 Sui-bóng Í-sek-lia̍t kap Iû-tāi, in ê tōe-hng móa-móa tek-chōe Í-sek-lia̍t ê Sèng--ê, iáu-kú in bô hō͘ bān-kun ê Iâ-hô-hoa i ê Siōng-tè khì-sak in. 6 Lín tio̍h tùi Pa-pí-lûn tiong cháu-chhut, ta̍k-lâng kiù ka-kī ê sìⁿ-miā; bo̍h-tit tī in ê chōe-tiong lâi bia̍t-bô; in-ūi che sī Iâ-hô-hoa pò-siû ê kî, I beh hō͘ in tú-tio̍h eng-kai siū ê pò-èng. 7 Pa-pí-lûn pêng-sò͘ sī Iâ-hô-hoa chhiú-lāi ê kim poe, hō͘ choân-tōe ê lâng chùi; lia̍t-pang bat lim i ê chiú, só͘-í lia̍t-pang hoat-kông. 8 Pa-pí-lûn hut-jiân chhia-tó, húi-hoāi; tio̍h ūi i thî-khàu, the̍h jú-hiuⁿ lâi chí i ê thàng-thiàⁿ, kiám-chhái iáu ōe-i-tit. 9 Lán siūⁿ beh i-tī Pa-pí-lûn, nā-sī i bô tit-tio̍h; lán tio̍h lī-khui i, ta̍k-lâng tò-lâi khì pún-kok; in-ūi i ê chōe-àn tú-thiⁿ, thàu kàu kiong-chhong. 10 Iâ-hô-hoa í-keng hián-bêng lán ê kong-gī; lâi ah, lán thang tī Sek-an pò-kò lán ê Siōng-tè Iâ-hô-hoa ê só͘-chòe. 11 Lín tio̍h bôa-kng lín ê chìⁿ, giâ-tiâu lín ê tîn-pâi, Iâ-hô-hoa tiāⁿ-tio̍h ì-sù kong-kek Pa-pí-lûn, lâi húi-bia̍t--i; só͘-í kek-tōng Má-tāi kun-ông ê sim; in-ūi che sī Iâ-hô-hoa pò-siû, chiū-sī I ūi-tio̍h I ê tiān lâi pò-siû. 12 Tio̍h khiā tōa-kî kong-kek Pa-pí-lûn ê siâⁿ-chhiûⁿ; tio̍h kian-kò͘ liâu-bāng ê tâi, phài siú-bāng-ê, siat bâi-ho̍k; in-ūi Iâ-hô-hoa só͘ kóng lūn Pa-pí-lûn khiā-khí ê peh-sìⁿ, I ū kè-e̍k i, ia̍h ū chiâⁿ--i. 13 Khiā-khí tī chōe-chōe chúi ê téng-bīn, tōa hoat-châi--ê ah, lí ê kiat-kio̍k kàu lah, tham-sim ê liōng móa lah. 14 Bān-kun ê Iâ-hô-hoa kí ka-kī chiù-chōa kóng, Góa beh hō͘ lâng chhiong-móa lín tiong-kan, chhin-chhiūⁿ chháu-meh chi̍t-iūⁿ, in beh hoah-hiàm kong-kek lí. 15 Iâ-hô-hoa ēng lêng-le̍k chhòng-chō tōe, ēng tì-hūi kiàn-li̍p sè-kài; ēng chhang-miâ tián-khui chiah ê thiⁿ. 16 I chi̍t-ē chhut-siaⁿ, khong-tiong chiū ū chōe-chōe chúi kek-tōng; I hō͘ hûn-bū tùi tōe-ke̍k chhèng--khí-lâi; I ūi-tio̍h hō͘, chhòng-chō sih-nà; I hō͘ hong tùi I ê hú-khò͘ chhut-lâi. 17 Ta̍k-lâng lóng gû-chhún bô tì-sek; ta̍k ê gûn-chhiūⁿ lóng ūi-tio̍h i tiau-khek ê ngó͘-siōng lâi kiàn-siàu; in-ūi i só͘ chù ê ngó͘-siōng sī ké--ê, iā bô oa̍h-khì tī i ê lāi-bīn. 18 Lóng sī khang-khang--ê; sī bê-he̍k lâng ê só͘-chòe; kàu pān-lí in ê sî, tek-khak siū tû-bia̍t. 19 Ngá-kok ê hūn-gia̍h bô chhin-chhiūⁿ chiah-ê; in-ūi I sī chhòng-chō bān-mi̍h ê Chú; Í-sek-lia̍t iā sī I sán-gia̍p ê chi-phài; bān-kun ê Iâ-hô-hoa sī I ê miâ. 20 Lí sī Góa ê pó͘-thâu, kau-chiàn ê ke-si; Góa beh ēng lí phah-chhùi lia̍t-pang, ēng lí húi-bia̍t lia̍t-kok; 21 ēng lí phah-chhùi bé kap khiâ-bé-ê; 22 ēng lí phah-chhùi chiàn-chhia, kap chē tī hí(**hit) téng-bīn--ê; ēng lí phah-chhùi ta-po͘-lâng kap hū-jîn-lâng; ēng lí phah-chhùi lāu-lâng kap gín-á; 23 ēng lí phah-chhùi siàu-liân lâng kap chāi-sek-lú; ēng lí phah-chhùi bo̍k-chiá kap i ê iûⁿ-kûn; ēng lí phah-chhùi choh-chhân lâng, kap i ê chi̍t-tùi gû; ēng lí phah-chhùi chóng-tok kap koaⁿ-oân. 24 Iâ-hô-hoa kóng, Chá Pa-pí-lûn kap Ka-le̍k-tí khiā-khí ê peh-sìⁿ, tī Sek-an só͘ kiâⁿ it-chhè ê pháiⁿ, Góa beh pò-èng in, hō͘ lín chhin-ba̍k khòaⁿ-kìⁿ. 25 Iâ-hô-hoa kóng, Lí chit ê kiâⁿ húi-bia̍t ê soaⁿ ah, khòaⁿ ah, Góa tùi-te̍k lí; lí húi-bia̍t choân-tōe, Góa beh chhun Góa ê chhiú tī lí ê téng-bīn, tùi soaⁿ-giâm chhia lí lo̍h--khì; hō͘ lí chiâⁿ-chòe sio-húi ê soaⁿ. 26 Lâng tek-khak bô tùi lí hia chhú chi̍t tè chio̍h chòe chhù-kak, ia̍h bô chi̍t tè chio̍h chòe tōe-ki; lí beh éng-oán pha-hng; che sī Iâ-hô-hoa kóng--ê. 27 Tio̍h tī kéng-lāi khiā tōa-kî, tī ta̍k-kok-tiong pûn sàu-kak; tiau-tî pī-pān lia̍t-kok lâi kong-kek i; chio-chi̍p A-la̍h-la̍t, Bí-nî, A-si̍t-ki-ná chiah ê kok lâi kong-kek i; koh phài kun-tiúⁿ lâi kong-kek i; hō͘ bé-peng chiūⁿ-lâi chhin-chhiūⁿ chho͘-mn̂g ê chháu-meh. 28 Tiau-tî pī-pān lia̍t-kok kap Má-tāi ê lia̍t-ông, i ê chóng-tok, i ê koaⁿ-oân, kap i só͘ koán choân-tōe ê lâng, lâi kong-kek i. 29 Tōe tín-tāng koh chhiⁿ-chhám; in-ūi Iâ-hô-hoa kong-kek Pa-pí-lûn ê chí-ì í-keng tiāⁿ-tio̍h; beh hō͘ Pa-pí-lûn ê tōe pha-hng, bô lâng khiā-khí. 30 Pa-pí-lûn ê ióng-sū m̄-ài kau-chiàn, tòa tī iâⁿ-pôaⁿ-lāi; i ê la̍t í-keng bô, chiâⁿ-chòe chhin-chhiūⁿ hū-jîn-lâng, in ê chhù-the̍h siū-sio, in ê mn̂g-kông phah-chi̍h. 31 Cháu-bûn-su--ê cháu-khì tú-tio̍h cháu bûn-su--ê; pò siau-sit--ê tú-tio̍h pò siau-sit--ê; pò-kò Pa-pí-lûn ông chai, i ê siâⁿ sì-bīn hō͘ lâng chhú-khì; 32 lō͘ thâu hō͘ lâng chiàm-khì, lô͘-tek siū hé sio, kau-chiàn ê lâng ia̍h kiaⁿ-hiâⁿ. 33 Bān-kun ê Iâ-hô-hoa, Í-sek-lia̍t ê Siōng-tè, án-ni kóng: Pa-pí-lûn chhin-chhiūⁿ chhek-tiâⁿ, í-keng ta̍h kàu pîⁿ-pîⁿ; koh bô jōa-kú, siu-sêng ê sî chiū kàu. 34 Pa-pí-lûn ông Nî-pò͘-kah-nî-sat thun-chia̍h góa, teh-chhùi góa; hō͘ góa chiâⁿ-chòe khang ê khì-kū; i chhin-chhiūⁿ tōa-hî thun góa; ēng góa ê pó-mi̍h chhiong-móa i ê pak-tó͘, koh chiong góa thò͘-chhut. 35 Sek-an khiā-khí ê peh-sìⁿ beh kóng, Pa-pí-lûn ēng pō-gio̍k khoán-thāi góa, kap góa ê sin-thé; goān chit ê chōe kui tī i. Iâ-lō͘-sat-léng lâng beh kóng, Goān lâu goán ê huih ê chōe kui tī Ka-le̍k-tí khiā-khí ê peh-sìⁿ. 36 Só͘-í Iâ-hô-hoa án-ni kóng, Khòaⁿ ah, Góa beh thòe lí sin-oan, ia̍h beh thòe lí pò-siû; Góa beh hō͘ i ê hái ta--khì, hō͘ i ê chúi-chôaⁿ bô chúi. 37 Pa-pí-lûn beh chiâⁿ-chòe thô͘-tui, chòe iá-káu tòa ê só͘-chāi; chòe thang gông-ngia̍h, thang thí-chhiò--ê, ia̍h bô lâng khiā-khí. 38 In beh chhin-chhiūⁿ ióng ê sai hm̄-hm̄-háu, chhin-chhiūⁿ sòe-chiah sai háu-kiò. 39 Tng in jia̍t ê sî, Góa beh ūi in pān chiú-toh, hō͘ i chiú-chùi, hō͘ i khoài-lo̍k, tn̂g khùn, éng bô cheng-sîn; che sī Iâ-hô-hoa kóng--ê. 40 Góa beh tòa in lo̍h--khì, chhin-chhiūⁿ iûⁿ-á, chhin-chhiūⁿ kang ê mî-iûⁿ, kang ê soaⁿ-iûⁿ, kàu siū-thâi ê tōe. 41 Sī-sa-khek cháiⁿ-iūⁿ siū kong-phòa! thiⁿ-ē só͘ o-ló--ê, cháiⁿ-iūⁿ siū pà-chiàm! Pa-pí-lûn tī lia̍t-kok-tiong, cháiⁿ-iūⁿ pìⁿ-chòe pha-hng! 42 Hái-chúi tiòng--khí-lâi, im-kè Pa-pí-lûn; i hō͘ chōe-chōe éng khàm-ba̍t. 43 I ê siâⁿ pìⁿ-chòe pha-hng, ta-sò ê tōe, soa-bô͘, bô lâng khiā-khí, bô lâng keng-kè ê só͘-chāi. 44 Góa beh hêng-hoa̍t Pí-le̍k tī Pa-pí-lûn, Góa beh ó͘-chhut i ê chhùi só͘ thun ê; bān peh-sìⁿ bô koh kui-óa i; Pa-pí-lûn ê siâⁿ-chhiûⁿ ia̍h tó-hoāi. 45 Góa ê peh-sìⁿ ah, lín tio̍h tùi i ê tiong-kan chhut-khì; ta̍k-lâng kiù ka-kī, siám-pī Iâ-hô-hoa ê tōa siū-khì. 46 Lín ê sim m̄-thang sit-táⁿ, ia̍h m̄-thang in-ūi kéng-lāi só͘ thiaⁿ-kìⁿ ê hong-siaⁿ lâi kiaⁿ-hiâⁿ; in-ūi kin-nî ū hong-siaⁿ thoân-lâi, mî--sî ia̍h ū hong-siaⁿ; kéng-lāi ū kiông-pō ê sū, koaⁿ-tiúⁿ kong-kek koaⁿ-tiúⁿ. 47 Khòaⁿ ah, ji̍t-chí beh kàu, Góa beh pān Pa-pí-lûn tiau-khek ê ngó͘-siōng, hō͘ in choân-tōe kiàn-siàu; i hiah ê siū-thâi ê lâng beh tó tī in tiong-kan. 48 Hit-sî thiⁿ-tōe kap kî-tiong só͘ ū--ê, beh in-ūi Pa-pí-lûn sit-pāi lâi hoaⁿ-hí; in-ūi kiâⁿ húi-bia̍t--ê beh tùi pak-hng lâi kàu i hia; che sī Iâ-hô-hoa kóng--ê. 49 Pa-pí-lûn àn-cháiⁿ-iūⁿ hō͘ Í-sek-lia̍t siū-thâi ê lâng tó--lo̍h-khì, chhin-chhiūⁿ án-ni, i choân-tōe siū-thâi ê lâng ia̍h beh tī Pa-pí-lûn tó--lo̍h-khì. 50 Siám-pī to-kiàm--ê tio̍h kín cháu, m̄-thang khiā--teh; tio̍h tī hn̄g-hn̄g ê só͘-chāi kì-liām Iâ-hô-hoa, sim-lāi tui-siūⁿ Iâ-lō͘-sat-léng. 51 Goán in-ūi thiaⁿ lóe-mē làu-khùi, móa-bīn kiàn-siàu; in-ūi īⁿ-pang lâng ji̍p Iâ-hô-hoa ê chhù hiah ê sèng ê só͘-chāi. 52 Só͘-í Iâ-hô-hoa kóng, Khòaⁿ ah, ji̍t-chí beh kàu, Góa pān Pa-pí-lûn tiau-khek ê ngó͘-siōng; thong-kok siū-siong ê lâng beh hiⁿ-hiⁿ-chhan. 53 Pa-pí-lûn sui-jiân chiūⁿ kàu thiⁿ, sui-jiân hō͘ i kian-kò͘ koâiⁿ ê só͘-chāi koh-khah kian-kò͘; iáu-kú ū kiâⁿ húi-bia̍t--ê beh tùi Góa chia kàu i hia; che sī Iâ-hô-hoa kóng--ê. 54 Tùi Pa-pí-lûn ū ai-khàu ê siaⁿ, tùi Ka-le̍k-tí lâng ê tōe ū tōa húi-bia̍t ê siaⁿ. 55 In-ūi Iâ-hô-hoa húi-bia̍t Pa-pí-lûn, hō͘ in tiong-kan ê tōa-siaⁿ soah--khì, in ê éng hōa-hōa-háu, chhin-chhiūⁿ chōe-chōe ê chúi; i hiáng ê siaⁿ ia̍h hoat-chhut. 56 In-ūi húi-bia̍t--ê lâi kong-kek Pa-pí-lûn; i ê ióng-sū siū-lia̍h, in ê keng tú-tio̍h at-chi̍h; in-ūi Iâ-hô-hoa sī kiâⁿ pò-èng ê Siōng-tè, I koat-toàn beh pò-siû. 57 Kun-ông, miâ chòe bān-kun ê Iâ-hô-hoa--ê, kóng, Góa beh hō͘ i ê kùi-cho̍k, phok-sū, chóng-tok, koaⁿ-oân, í-ki̍p ióng-sū, lóng chiú-chùi, éng-éng khùn, bô cheng-sîn. 58 Bān-kun ê Iâ-hô-hoa án-ni kóng: Pa-pí-lûn khoah-tōa ê siâⁿ-chhiûⁿ beh it-chīn tó-hoāi; i koâiⁿ-tōa ê siâⁿ-mn̂g beh hō͘ hé sio-lio--khì; chèng peh-sìⁿ só͘ tio̍h-bôa--ê beh kui tī khang-khang; lia̍t-kok só͘ tio̍h-bôa--ê kui tī hé; in lóng beh ià-siān. 59 Iû-tāi ông Se-tí-ka chē-ūi ê tē-sì-nî chiūⁿ-khì Pa-pí-lûn ê sî, Má-se-ngá ê sun, Nî-lī-a ê kiáⁿ Se-lâi-ngá, kap ông saⁿ-kap khì. 60 (Se-lâi-ngá sī ông ê lōe-sī) sian-ti Iâ-lī-bí ū ōe hoan-hù i. Iâ-lī-bí chiong it-chhè beh lîm-kàu Pa-pí-lûn ê chai-ē, chiū-sī lūn-kàu Pa-pí-lûn só͘ siá it-chhè ê ōe, lâi kì-chiūⁿ-chheh. 61 Iâ-lī-bí tùi Se-lâi-ngá kóng, Lí kàu Pa-pí-lûn ê sî, iáu-kín tio̍h tha̍k chit ê chheh--nih ê ōe. 62 Koh tio̍h kóng, Iâ-hô-hoa ah, Lí lūn-kàu chit só͘-chāi bat kóng beh bia̍t--i, sīm-chì bô lâng khiā-khí, liân cheng-siⁿ ia̍h bô, tek-khak éng-oán pha-hng. 63 Lí chit ê chheh tha̍k-liáu, chiū tio̍h pa̍k tī chi̍t tè chio̍h-thâu, hiat-lo̍h tī Pek-lat hô tiong, 64 kóng, Pa-pí-lûn ūi-tio̍h Iâ-hô-hoa só͘ beh kàng hō͘ i ê chai-ē tek-khak chhin-chhiūⁿ án-ni tîm--lo̍h-khì, bōe koh khí-lâi; in lóng beh ià-siān. Iâ-lī-bí ê ōe, kàu chia ûi-chí.
1 Se-tí-ka坐位ê時，二十一歲；tī耶路撒冷做王十一年。伊ê老母名Hap-bō͘-tha；是Li̍p-ná人耶利米ê cha-bó͘-kiáⁿ。 2 伊行耶和華所看做pháiⁿ ê事；照Iok-ngá-kèng一切所行ê。 3 耶路撒冷kap偤大tú-tio̍h chiahê事，是因為耶和華發出受氣；beh tùi伊ê面前趕出in；hit時Se-tí-ka背叛巴比倫王。 4 當Se-tí-ka坐位第九年，十月初十，巴比倫王Nî-pò͘-kah-nî-sat chhōa伊全軍來攻擊耶路撒冷，tī城ê對面紮營，koh tī四圍作土堆攻擊城。 5 Tùi án-ni，城受圍困，直到Se-tí-ka十一年。 6 四月初九日，城內飢荒真傷重，致到hit所在ê百姓lóng無糧。 7 城受攻破，一切ê兵丁透暝tùi óa近王ê園，兩個城牆中ê門，hit條路走出城。Ka-le̍k-tí人tú-tú tī四圍攻擊城，in就tùi A-la̍h-pa ê路逃走。 8 Ka-le̍k-tí ê軍兵追jip王，tī耶利哥ê平洋追tio̍h Se-tí-ka；伊ê全軍lóng離開伊四散。 9 In掠tio̍h王，帶到Hap-má地ê Lī-pí-la̍h，巴比倫王hia；巴比倫王就審判伊。 10 巴比倫王tī Se-tí-ka ê目睭前，刣死伊hiahê kiáⁿ，koh tī Lī-pí-la̍h 刣偤大一切ê貴族。 11 Koh iah Se-tí-ka兩蕊目睭，巴比倫王用鐵鏈鏈伊，帶到巴比倫，關伊tī監裡，直到伊死ê日。 12 巴比倫王Nî-pò͘-kah-nî-sat王十九年，五月初十日，跟隨巴比倫王ê侍衛長Nî-pò͘-sat-la̍h-tàn入耶路撒冷。 13 用火燒耶和華ê殿，kap王宮；koh用火燒耶路撒冷一切ê厝，就是富貴家ê厝。 14 跟tè侍衛長Ka-le̍k-tí ê全軍就拆毀耶路撒冷四圍ê城牆。 15 Hit時侍衛長Nî-pò͘-sat-la̍h-tàn將民間sòng-hiong-ê，kap留tī城內所chhun ê百姓，kap hiahê投降巴比倫王ê，以及眾人中所chhun-ê，lóng掠去。 16 獨獨侍衛長Nî-pò͘-sat-la̍h-tàn留hitê地方第一sòng-hiong-ê，hō͘ in治理葡萄園，kap種作。 17 耶和華殿內ê銅柱，kap耶和華殿內ê盆座，以及銅海，Ka-le̍k-tí人lóng phah破，將hiahê銅運到巴比倫。 18 Koh帶去鼎、托á、剪刀、盤、碗，kap所用一切ê銅器。 19 杯、火爐、盤、鼎、燈台、碗、au，一切金器ê金，銀器ê銀，侍衛長lóng帶去。 20 Koh帶所羅門為耶和華ê殿所chhòng兩支柱，一个銅海kap座下十二隻銅牛，chiahê器具ê銅bōe能秤(chhìn)伊ê輕重。 21 一支柱高十八肘，圓環十二肘，厚四指，中央空殼。 22 柱ê頂面有銅ê柱斗，高五肘；柱斗ê周圍有網á kap石榴，lóng是銅做ê；第二支柱siâng一款，亦有石榴。 23 四面有九十六粒ê石榴；tī網á ê周圍共有一百粒石榴。 24 侍衛長掠祭司頭Se-lâi-ngá，kap第二級ê祭司Se-hoan-a，kap三個顧門ê； 25 koh tùi城內掠一个管兵ê官，kap tī城內所tú-tio̍h常常見王ê面ê七人，kap軍長ê書記，點算百姓ê，以及城中所tú-tio̍h ê國民六十人。 26 侍衛長Nî-pò͘-sat-la̍h-tàn將chiahê人帶到Lī-pí-la̍h，巴比倫王hia。 27 巴比倫王phah-in，tī Hap-má地ê Lī-pí-la̍h 刣死in；án-ni偤大百姓受掠，離開本地。 28 Nî-pò͘-kah-nî-sat所掠ê人數，記tī下底；Tī第七年，掠偤大人三千連二十三人。 29 Nî-pò͘-kah-nî-sat十八年，tùi耶路撒冷掠去八百三十二人。 30 Nî-pò͘-kah-nî-sat二十三年，侍衛長Nî-pò͘-sat-la̍h-tàn掠去偤大人七百四十五名；共有四千六百人。 31 偤大王Iok-ngá-kun受掠了後，第三十七年，巴比倫王Í-bī-bí-lô-ta̍t元年，十二月二五日，舉起偤大王Iok-ngá-kun，放伊出監。 32 亦用好話安慰伊，hō͘伊ê位khah高其餘chiahê王ê位，就是kap伊同tī巴比倫ê。 33 Thǹg去伊監內所穿ê衫，一世人kap巴比倫王相kap食。 34 巴比倫王賞賜伊所欠用ê食物，日日hō͘伊一份；kui世人是án-ni，直到伊死ê日。
1 Se-tí-ka chē-ūi ê sî, jī-cha̍p-it hè; tī Iâ-lō͘-sat-léng chòe ông cha̍p-it nî. I ê lāu-bú miâ Hap-bō͘-tha; sī Li̍p-ná lâng Iâ-lī-bí ê cha-bó͘-kiáⁿ. 2 I kiâⁿ Iâ-hô-hoa só͘ khòaⁿ-chòe pháiⁿ ê sū; chiàu Iok-ngá-kèng it-chhè só͘ kiâⁿ--ê. 3 Iâ-lō͘-sat-léng kap Iû-tāi tú-tio̍h chiah ê sū, sī in-ūi Iâ-hô-hoa hoat-chhut siū-khì; beh tùi I ê bīn-chêng kóaⁿ-chhut in; hit-sî Se-tí-ka pōe-poān Pa-pí-lûn ông. 4 Tng Se-tí-ka chē-ūi tē-káu nî, cha̍p-ge̍h chhoe-cha̍p, Pa-pí-lûn ông Nî-pò͘-kah-nî-sat chhōa i choân-kun lâi kong-kek Iâ-lō͘-sat-léng, tī siâⁿ ê tùi-bīn chat-iâⁿ, koh tī sì-ûi choh thô͘-tui kong-kek siâⁿ. 5 Tùi án-ni siâⁿ siū ûi-khùn, ti̍t-kàu Se-tí-ka cha̍p-it nî. 6 Sì-ge̍h chhoe-káu ji̍t, siâⁿ-lāi ki-hng chin siong-tiōng, tì-kàu hit só͘-chāi ê peh-sìⁿ lóng bô niû. 7 Siâⁿ siū kong-phòa, it-chhè ê peng-teng thàu-mî tùi óa-kūn ông ê hn̂g, nn̄g ê siâⁿ-chhiûⁿ tiong ê mn̂g, hit tiâu lō͘ cháu chhut siâⁿ. Ka-le̍k-tí lâng tú-tú tī sì-ûi kong-kek siâⁿ, in chiū tùi A-la̍h-pa ê lō͘ tô-cháu. 8 Ka-le̍k-tí ê kun-peng tui-jip ông, tī Iâ-lī-ko ê pîⁿ-iûⁿ tui--tio̍h Se-tí-ka; i ê choân-kun lóng lī-khui i sì-sòaⁿ. 9 In lia̍h-tio̍h ông, tòa kàu Hap-má tōe ê Lī-pí-la̍h, Pa-pí-lûn ông hia; Pa-pí-lûn ông chiū sím-phòaⁿ i. 10 Pa-pí-lûn ông tī Se-tí-ka ê ba̍k-chiu-chêng, thâi-sí i hiah ê kiáⁿ, koh tī Lī-pí-la̍h thâi Iû-tāi it-chhè ê kùi-cho̍k. 11 Koh iah Se-tí-ka nn̄g-lúi ba̍k-chiu, Pa-pí-lûn ông ēng thih-liān liān--i, tòa kàu Pa-pí-lûn, koaiⁿ i tī kaⁿ--nih, ti̍t-kàu i sí ê ji̍t. 12 Pa-pí-lûn ông Nî-pò͘-kah-nî-sat ông cha̍p-káu nî, gō͘-ge̍h chhoe-cha̍p ji̍t, kun-sûi Pa-pí-lûn ông ê sī-ōe-tiúⁿ Nî-pò͘-sat-la̍h-tàn ji̍p Iâ-lō͘-sat-léng. 13 Ēng hé sio Iâ-hô-hoa ê tiān, kap ông-kiong; koh ēng hé sio Iâ-lō͘-sat-léng it-chhè ê chhù, chiū-sī hù-kùi-ke ê chhù. 14 Kun-tè sī-ōe-tiúⁿ Ka-le̍k-tí ê choân-kun chiū thiah-húi Iâ-lō͘-sat-léng sì-ûi ê siâⁿ-chhiûⁿ. 15 Hit-sî sī-ōe-tiúⁿ Nî-pò͘-sat-la̍h-tàn chiong bîn-kan sòng-hiong--ê, kap lâu tī siâⁿ-lāi só͘ chhun ê peh-sìⁿ, kap hiah ê tâu-hâng Pa-pí-lûn ông--ê, í-ki̍p chèng-lâng-tiong só͘ chhun--ê, lóng lia̍h-khì. 16 To̍k-to̍k sī-ōe-tiúⁿ Nî-pò͘-sat-la̍h-tàn lâu hit ê tōe-hng tē-it sòng-hiong--ê, hō͘ in tī-lí phû-tô-hn̂g, kap chèng-choh. 17 Iâ-hô-hoa tiān-lāi ê tâng-thiāu, kap Iâ-hô-hoa tiān-lāi ê phûn-chō, í-ki̍p tâng-hái, Ka-le̍k-tí lâng lóng phah-phòa, chiong hiah ê tâng ūn kàu Pa-pí-lûn. 18 Koh tòa-khì tiáⁿ, thuh-á, chián-to, pôaⁿ, óaⁿ, kap só͘ ēng it-chhè ê tâng-khì. 19 Poe, hé-lô͘, pôaⁿ, tiáⁿ, teng-tâi, óaⁿ, au, it-chhè kim-khì ê kim, gûn-khì ê gûn, sī-ōe-tiúⁿ lóng tòa-khì. 20 Koh tòa Só͘-lô-bûn ūi Iâ-hô-hoa ê tiān só͘ chhòng nn̄g ki thiāu, chi̍t ê tâng-hái kap chō-ē cha̍p-jī chiah tâng-gû, chiah ê khì-kū ê tâng bōe-ōe chhìn i ê khin-tāng. 21 Chi̍t-ki thiāu koâiⁿ cha̍p-poeh tiú, îⁿ-khoân cha̍p-jī tiú, kāu sì-cháiⁿ, tiong-ng khang-khak. 22 Thiāu ê téng-bīn ū tâng ê thiāu-táu, koâiⁿ gō͘ tiú; thiāu-táu ê chiu-ûi ū bāng-á kap sia̍h-liû, lóng sī tâng chòe--ê; tē-jī ki thiāu siâng chi̍t-khoán, ia̍h ū sia̍h-liû. 23 Sì-bīn ū káu-cha̍p-la̍k lia̍p ê sia̍h-liû; tī bāng-á ê chiu-ûi kiōng ū chi̍t-pah lia̍p sia̍h-liû. 24 Sī-ōe-tiúⁿ lia̍h chè-si-thâu Se-lâi-ngá, kap tē-jī-kip ê chè-si Se-hoan-a, kap saⁿ ê kò͘-mn̂g--ê; 25 koh tùi siâⁿ-lāi lia̍h chi̍t ê koán-peng ê koaⁿ, kap tī siâⁿ-lāi só͘ tú-tio̍h siông-siông kìⁿ ông ê bīn--ê chhit-lâng, kap kun-tiúⁿ ê su-kì, tiám-sǹg peh-sìⁿ--ê, í-ki̍p siâⁿ-tiong só͘ tú-tio̍h ê kok-bîn la̍k-cha̍p lâng. 26 Sī-ōe-tiúⁿ Nî-pò͘-sat-la̍h-tàn chiong chiah ê lâng tòa kàu Lī-pí-la̍h, Pa-pí-lûn ông hia. 27 Pa-pí-lûn ông phah--in, tī Hap-má tōe ê Lī-pí-la̍h thâi-sí in; án-ni Iû-tāi peh-sìⁿ siū-lia̍h, lī-khui pún-tōe. 28 Nî-pò͘-kah-nî-sat só͘ lia̍h ê jîn-sò͘, kì tī ē-tóe; tī tē chhit nî, lia̍h Iû-tāi lâng saⁿ-chheng liân-jī-cha̍p-saⁿ lâng. 29 Nî-pò͘-kah-nî-sat cha̍p-poeh nî, tùi Iâ-lō͘-sat-léng lia̍h-khì poeh-pah saⁿ-cha̍p-jī lâng. 30 Nî-pò͘-kah-nî-sat jī-cha̍p-saⁿ-nî, sī-ōe-tiúⁿ Nî-pò͘-sat-la̍h-tàn lia̍h--khì Iû-tāi lâng chhit-pah sì-cha̍p-gō͘ miâ; kiōng ū sì-chheng la̍k-pah lâng. 31 Iû-tāi ông Iok-ngá-kun siū-lia̍h liáu-āu, tē saⁿ-cha̍p-chhit--nî, Pa-pí-lûn ông Í-bī-bí-lô-ta̍t goân--nî, cha̍p-jī-ge̍h jī-gō͘ ji̍t, kú-khí Iû-tāi ông Iok-ngá-kun, pàng i chhut-kaⁿ. 32 Ia̍h ēng hó-ōe an-ùi i, hō͘ i ê ūi khah-koâiⁿ kî-û chiah ê ông ê ūi, chiū-sī kap i tâng tī Pa-pí-lûn--ê. 33 Thǹg--khì i kaⁿ-lāi só͘ chhēng ê saⁿ, chi̍t-sì-lâng kap Pa-pí-lûn ông saⁿ-kap chia̍h. 34 Pa-pí-lûn ông siúⁿ-sù i só͘ khiàm-ēng ê si̍t-bu̍t, ji̍t-ji̍t hō͘ i chi̍t-hūn; kui-sì-lâng sī án-ni, ti̍t-kàu i sí ê ji̍t.