1 O͘-su ê地bat有一人名叫約伯，hit人完全koh正直，敬畏上帝，離開chiahê pháiⁿ。 2 伊生七個kiáⁿ，三個cha-bó͘-kiáⁿ。 3 伊ê家業有羊七千，駱駝三千，牛五百對，驢母五百隻；也有chōe-chōe差用ê人；án-ni chit人tī東方眾人ê中間是最第一大。 4 伊hiahê kiáⁿ去設筵席tī ta̍k人ê厝，照伊ê日子；koh差人去請in三個姊妹來kap in lim食。 5 筵席ê日已經滿，約伯差人叫in來hō͘ in聖潔；koh透早起來，照in眾人ê數額獻燒祭；因為約伯講，kiám-chhái我ê kiáⁿ有犯罪，心內棄絕上帝。約伯常常án-ni行。 6 有一日，上帝ê眾kiáⁿ來，家己khiā tī耶和華ê面前，撒旦也來tī in中間。 7 耶和華對撒旦講，你tùi toh落來？撒旦就應耶和華講，我tī地上行來行去，遍行tī-hia，tùi hia來。 8 耶和華對撒旦講，你有留心tī我ê奴僕約伯mah？因為地上無人親像伊完全koh正直，敬畏上帝，離開chiahê pháiⁿ。 9 撒旦應耶和華講，約伯敬畏上帝，kiám無因端mah？ 10 你kiám m̄是用籬笆圍伊，koh圍伊ê家，kap圍伊四面一切所有ê mah？伊ê手所做ê，你賜福伊，伊ê家業也tī地裡加添chōe-chōe。 11 Taⁿ你若伸你ê手，磕tio̍h伊lóng總所有ê，伊的確當面棄絕你。 12 耶和華對撒旦講，看ah，伊一切所有ê lóng tī你ê手頭，獨獨m̄-thang下手tī伊ê身軀。撒旦就tùi耶和華ê面前出去。 13 有一日約伯ê kiáⁿ cha-bó͘-kiáⁿ tú-á tī in大兄ê家teh食，teh lim酒， 14 有使者來約伯hia，kā伊講，牛teh犁田，驢母tī邊á食草； 15 Sī-pa ê人忽然到，搶伊，用刀刣死hiahê奴僕；只有我一人走離來報你。 16 伊iáu teh講ê時，koh有一个來，講，上帝ê火tùi天降落，燒羊群，kap hiahê奴僕，來滅in；只有我一人走離來報你。 17 伊iáu teh講ê時，koh有一个來，講，Ka-le̍k-tí人分做三隊，忽然來，phah駱駝來搶伊，續用刀刣死hiahê奴僕；只有我一人走離來報你。 18 伊iáu teh講ê時，koh有一个來，講，你ê kiáⁿ，你ê cha-bó͘-kiáⁿ，tī in大兄 ê家teh食teh lim酒； 19 忽然有大風tùi曠野吹來，phah厝ê四角頭，厝倒teh tī少年人ê頂面，in就lóng死；只有我一人走離來報你。 20 約伯就起來，拆裂外衫，剃頭，仆tī地裡來拜； 21 講，我thǹg-theh出老母ê胎，也beh thǹg-theh tò去hia；耶和華賞賜，耶和華the̍h去，tio̍h o-ló耶和華ê名。 22 Tī這一切ê事，約伯並無犯罪，也無掠上帝做無合。
1 O͘-su ê tōe bat ū chi̍t-lâng miâ-kiò Iok-pek, hit-lâng oân-choân koh chèng-ti̍t, kèng-ùi Siōng-tè, lī-khui chiah ê pháiⁿ. 2 I siⁿ chhit ê kiáⁿ, saⁿ ê cha-bó͘-kiáⁿ. 3 I ê ke-gia̍p ū iûⁿ chhit-chheng, lo̍k-tô saⁿ-chheng, gû gō͘-pah tùi, lû-bú gō͘-pah chiah; iā ū chōe-chōe chhe-ēng ê lâng; án-ni chit-lâng tī tang-hng chèng-lâng ê tiong-kan sī chòe tē-it-tōa. 4 I hiah ê kiáⁿ khì siat iân-sia̍h tī ta̍k-lâng ê chhù, chiàu i ê ji̍t-chí; koh chhe lâng khì chhiáⁿ in saⁿ ê chí-bē lâi kap in lim-chia̍h. 5 Iân-sia̍h ê ji̍t í-keng móa, Iok-pek chhe lâng kiò in lâi hō͘ in sèng-kiat; koh thàu-chá khí-lâi, chiàu in chèng-lâng ê siàu-gia̍h hiàn sio-chè; in-ūi Iok-pek kóng, Kiám-chhái góa ê kiáⁿ ū hoān-chōe, sim-lāi khì-choa̍t Siōng-tè. Iok-pek siông-siông án-ni kiâⁿ. 6 Ū chi̍t-ji̍t, Siōng-tè ê chèng-kiáⁿ lâi, ka-kī khiā tī Iâ-hô-hoa ê bīn-chêng, Sat-tàn iā lâi tī in tiong-kan. 7 Iâ-hô-hoa tùi Sat-tàn kóng, Lí tùi toh-lo̍h lâi? Sat-tàn chiū ìn Iâ-hô-hoa kóng, Góa tī tōe-chiūⁿ kiâⁿ-lâi kiâⁿ-khì, piàn-kiâⁿ tī-hia, tùi hia lâi. 8 Iâ-hô-hoa tùi Sat-tàn kóng, Lí ū liû-sim tī Góa ê lô͘-po̍k Iok-pek mah? In-ūi tōe-chiūⁿ bô lâng chhin-chhiūⁿ i oân-choân koh chèng-ti̍t, kèng-ùi Siōng-tè, lī-khui chiah ê pháiⁿ. 9 Sat-tàn ìn Iâ-hô-hoa kóng, Iok-pek kèng-ùi Siōng-tè, kiám bô in-toaⁿ mah? 10 Lí kiám-m̄-sī ēng lî-pa ûi i, koh ûi i ê ke, kap ûi i sì-bīn it-chhè só͘-ū-ê mah? I ê chhiú só͘ chòe-ê, Lí sù-hok i, i ê ke-gia̍p iā tī tōe--nih ke-thiⁿ chōe-chōe. 11 Taⁿ Lí nā chhun Lí ê chhiú, kha̍p-tio̍h i lóng-chóng só͘-ū-ê, i tek-khak tng-bīn khì-choa̍t Lí. 12 Iâ-hô-hoa tùi Sat-tàn kóng, Khòaⁿ ah, i it-chhè só͘-ū-ê lóng tī lí ê chhiú-thâu, to̍k-to̍k m̄-thang hē chhiú tī i ê seng-khu. Sat-tàn chiū tùi Iâ-hô-hoa ê bīn-chêng chhut-khì. 13 Ū chi̍t-ji̍t Iok-pek ê kiáⁿ cha-bó͘-kiáⁿ tú-á tī in tōa-hiaⁿ ê ke teh chia̍h, teh lim-chiú, 14 ū sù-chiá lâi Iok-pek hia, kā i kóng, Gû teh lôe-chhân, lû-bú tī piⁿ-á chia̍h-chháu; 15 Sī-pa ê lâng hut-jiân kàu, chhiúⁿ i, ēng to thâi-sí hiah ê lô͘-po̍k; chí-ū góa chi̍t-lâng cháu-lī lâi pò lí. 16 I iáu teh kóng ê sî, koh ū chi̍t-ê lâi, kóng, Siōng-tè ê hé tùi thiⁿ kàng-lo̍h, sio iûⁿ-kûn, kap hiah ê lô͘-po̍k, lâi bia̍t--in; chí-ū góa chi̍t-lâng cháu-lī lâi pò lí. 17 I iáu teh kóng ê sî, koh ū chi̍t-ê lâi, kóng, Ka-le̍k-tí lâng pun-chòe saⁿ-tūi, hut-jiân lâi, phah lo̍k-tô lâi chhiúⁿ i, sòa ēng to thâi-sí hiah ê lô͘-po̍k; chí-ū góa chi̍t-lâng cháu-lī lâi pò lí. 18 I iáu teh kóng ê sî, koh ū chi̍t-ê lâi, kóng, Lí ê kiáⁿ, lí ê cha-bó͘-kiáⁿ, tī in tōa-hiaⁿ ê ke teh chia̍h teh lim-chiú; 19 hut-jiân ū tōa-hong tùi khòng-iá chhe--lâi, phah chhù ê sì-kak-thâu, chhù tó teh tī siàu-liân lâng ê téng-bīn, in chiū lóng sí; chí-ū góa chi̍t-lâng cháu-lī lâi pò lí. 20 Iok-pek chiū khí-lâi, thiah-li̍h gōa-saⁿ, thì-thâu, phak tī tōe--nih lâi pài; 21 kóng, Góa thǹg-theh chhut lāu-bú ê thai, iā beh thǹg-theh tò-khì hia; Iâ-hô-hoa siúⁿ-sù, Iâ-hô-hoa the̍h-khì, tio̍h o-ló Iâ-hô-hoa ê miâ. 22 Tī che it-chhè ê sū, Iok-pek pēng bô hoān-chōe, iā bô lia̍h Siōng-tè chòe bô-ha̍p.
1 Koh有一日，上帝hiahê kiáⁿ來，家己khiā tī耶和華ê面前，撒旦也來tī in中間，家己khiā tī耶和華ê面前。 2 耶和華對撒旦講，你tùi toh落來？撒旦應耶和華講，我tī地上行來行去，遍行tī-hia，tùi-hia來。 3 耶和華對撒旦講，你有留心tī我ê奴僕約伯mah？因為地上無人親像伊完全koh正直，敬畏上帝，離開chiahê pháiⁿ；你雖然激我攻擊伊，無因端毀壞伊，伊猶原執守伊ê純全。 4 撒旦應耶和華講，用皮換皮，人為tio̍h伊ê性命願了伊一切所有ê。 5 總是你伸你ê手磕tio̍h伊ê骨kap伊ê肉，就伊beh當面棄絕你。 6 耶和華對撒旦講，看ah，伊tī你ê手頭，獨獨tio̍h留伊ê性命。 7 撒旦就tùi耶和華ê面前出去，phah約伯，hō͘伊tùi腳底到頭殼頂生毒瘡。 8 伊就用hāu-phiaⁿ-phè來pê身軀，坐tī火灰中。 9 伊ê bó͘就對伊講，你iáu-kú執守你ê純全mah？Tio̍h棄絕上帝來死。 10 但是約伯對伊講，你講話是親像hiahê戇ê婦人人所teh講ê。怎樣nih？咱tùi上帝受福氣，kiám無tùi伊受災厄mah？Tī這一切ê事，約伯並無tùi伊ê嘴來犯罪。 11 Hit時約伯三個朋友聽見伊tú-tio̍h一切ê苦難，ta̍k-ê tùi in ê所在來；就是Thê-bān人Í-lī-hoat，Su-a人Pí-le̍k-ta̍t，Ná-má人Só-hoat；in相約相kap來悲傷，安慰伊。 12 In遠遠kia̍h目看，bōe認得伊，就大聲啼哭；ta̍k人拆裂外衫，ǹg天掖土粉tī家己ê頭殼。 13 In就kap伊坐tī土腳七日七暝，無kap伊講一句，因為in看見伊ê痛苦真大。
1 Koh ū chi̍t-ji̍t, Siōng-tè hiah ê kiáⁿ lâi, ka-kī khiā tī Iâ-hô-hoa ê bīn-chêng, Sat-tàn iā lâi tī in tiong-kan, ka-kī khiā tī Iâ-hô-hoa ê bīn-chêng. 2 Iâ-hô-hoa tùi Sat-tàn kóng, Lí tùi toh-lo̍h lâi? Sat-tàn ìn Iâ-hô-hoa kóng, Góa tī tōe-chiūⁿ kiâⁿ-lâi kiâⁿ-khì, piàn-kiâⁿ tī-hia, tùi-hia lâi. 3 Iâ-hô-hoa tùi Sat-tàn kóng, Lí ū liû-sim tī Góa ê lô͘-po̍k Iok-pek mah? In-ūi tōe-chiūⁿ bô lâng chhin-chhiūⁿ i oân-choân koh chèng-ti̍t, kèng-ùi Siōng-tè, lī-khui chiah ê pháiⁿ; lí sui-jiân kek Góa kong-kek i, bô in-toaⁿ húi-hoāi i, i iû-goân chip-siú i ê sûn-choân. 4 Sat-tàn ìn Iâ-hô-hoa kóng, Ēng phê ōaⁿ phê, lâng ūi-tio̍h i ê sìⁿ-miā goān liáu i it-chhè só͘-ū ê. 5 Chóng-sī Lí chhun Lí ê chhiú kha̍p-tio̍h i ê kut kap i ê bah, chiū i beh tng-bīn khì-choa̍t Lí. 6 Iâ-hô-hoa tùi Sat-tàn kóng, Khòaⁿ ah, i tī lí ê chhiú-thâu, to̍k-to̍k tio̍h lâu i ê sìⁿ-miā. 7 Sat-tàn chiū tùi Iâ-hô-hoa ê bīn-chêng chhut-khì, phah Iok-pek, hō͘ i tùi kha-tóe kàu thâu-khak-téng siⁿ to̍k-chhng. 8 I chiū ēng hāu-phiaⁿ-phè lâi pê seng-khu, chē tī hé-hu tiong. 9 I ê bó͘ chiū tùi i kóng, Lí iáu-kú chip-siú lí ê sûn-choân mah? Tio̍h khì-choa̍t Siōng-tè lâi sí. 10 Nā-sī Iok-pek tùi i kóng, Lí kóng-ōe sī chhin-chhiūⁿ hiah ê gōng ê hū-jîn-lâng só͘ teh kóng ê. Cháiⁿ-iūⁿ--nih? Lán tùi Siōng-tè siū hok-khì, kiám bô tùi I siū chai-ē mah? Tī che it-chhè ê sū, Iok-pek pēng-bô tùi i ê chhùi lâi hoān-chōe. 11 Hit-sî Iok-pek saⁿ ê pêng-iú thiaⁿ-kìⁿ i tú-tio̍h it-chhè ê khó͘-lān, ta̍k-ê tùi in ê só͘-chāi lâi; chiū-sī Thê-bān lâng Í-lī-hoat, Su-a lâng Pí-le̍k-ta̍t, Ná-má lâng Só-hoat; in siong-iok saⁿ-kap lâi pi-siong, an-ùi i. 12 In hn̄g-hn̄g kia̍h-ba̍k khòaⁿ, bōe jīn-tit i, chiū tōa-siaⁿ thî-khàu; ta̍k lâng thiah-li̍h gōa-saⁿ, ǹg thiⁿ iā thô͘-hún tī ka-kī ê thâu-khak. 13 In chiū kap i chē tī thô͘-kha chhit-ji̍t chhit-mî, bô kap i kóng chi̍t-kù, in-ūi in khòaⁿ-kìⁿ i ê thòng-khó͘ chin tōa.
1 後來約伯開嘴，咒詛伊ê日。 2 約伯開嘴講： 3 我出世ê日，願hitê日無去；講，有懷孕ta-po͘-kiáⁿ hit暝，願hitê暝也無去。 4 願hitê日變做烏暗；願上帝無tùi頂面看顧伊，光也無照伊。 5 願烏暗kap死蔭侵取伊；願密雲停tī伊ê頂面，願hō͘日變烏暗ê phah驚伊。 6 論到hit暝，願烏暗搶去；願伊無kap 年中hiahê日同歡喜；也無入tī hiahê月ê數額。 7 Ā！願hit暝無有生kiáⁿ；in中間無歡喜ê聲。 8 願hiahê咒詛日ê，咒詛伊；以及hiahê會激動龍ê，咒詛伊。 9 願hit暝天phú光ê星變烏暗；願伊ǹg望光也bōe得tio̍h；也無看見早起時天拆ha̍h； 10 因為無關密生我ê子宮，也無對我ê目睭遮蓋患難。 11 我啥事無tī胎裡就死？啥事出腹肚，無續斷氣？ 12 啥事有腳頭u接我？啥事有奶hō͘我suh？ 13 若無án-ni，我已經倒teh來安然，已經睏來靜靜； 14 Kap地上列王謀士相kap tī-teh，in bat為家己起造拋荒ê所在； 15 á是kap有金ê首領tī-teh；in bat用銀充滿in ê厝ê。 16 á是親像ka-la̍uh身來掩密ê，我就無去；親像bē見tio̍h光ê嬰á。 17 Tī-hia pháiⁿ人soah伊ê攪擾；tī-hia厭倦ê得tio̍h安歇。 18 Tī-hia受掠ê人相kap得tio̍h安然，無聽見督工ê ê聲。 19 序細序大lóng tī-hia；奴僕脫離伊ê主人。 20 受苦難ê人，啥事hō͘伊有光ah？心內憂苦ê人，啥事hō͘伊有活命？ 21 In ǹg望死，也bōe得tio̍h，chhē伊，比掘khǹg密ê寶貝khah出力。 22 In chhē-tio̍h墳墓就快樂；歡喜到bōe顧得。 23 人ê前途已經暗bong-bong，上帝四面圍困伊，啥事hō͘伊有光ah？ 24 因為我用吐氣替食物；我大聲哮，親像大水chhèng出。 25 因為我所真驚ê臨到我；我所驚惶ê到tī我。 26 我bōe得tio̍h安然，bōe得tio̍h平靜，bōe得tio̍h安歇，總是有患難來。
1 Āu-lâi Iok-pek khui-chhùi, chiù-chó͘ i ê ji̍t. 2 Iok-pek khui-chhùi kóng: 3 Góa chhut-sì ê ji̍t, goān hit ê ji̍t bô--khì; Kóng, ū hoâi-īn ta-po͘-kiáⁿ hit-mî, goān hit ê mî iā bô--khì. 4 Goān hit ê ji̍t pìⁿ-chòe o͘-àm; Goān Siōng-tè bô tùi téng-bīn khòaⁿ-kò͘ i, Kng iā bô chiò i. 5 Goān o͘-àm kap sí-ìm chhim-chhú i; Goān ba̍t-hûn thêng tī i ê téng-bīn, Goān hō͘ ji̍t piàn o͘-àm--ê phah-kiaⁿ i. 6 Lūn-kàu hit-mî, goān o͘-àm chhiúⁿ-khì; Goān i bô kap nî-tiong hiah ê ji̍t tâng hoaⁿ-hí; Iā bô ji̍p tī hiah ê ge̍h ê siàu-gia̍h. 7 Ā! Goān hit-mî bô ū siⁿ-kiáⁿ; In tiong-kan bô hoaⁿ-hí ê siaⁿ. 8 Goān hiah ê chiù-chó͘ ji̍t ê, chiù-chó͘ i; Í-ki̍p hiah-ê ōe kek-tōng lêng ê, chiù-chó͘ i. 9 Goān hit-mî thiⁿ-phú-kng ê chhiⁿ pìⁿ o͘-àm; Goān i ǹg-bāng kng iā bōe tit-tio̍h; Iā bô khòaⁿ-kìⁿ chá-khí-sî thiⁿ thiah-ha̍h; 10 In-ūi bô koaiⁿ-ba̍t siⁿ góa ê chú-kiong, Iā bô tùi góa ê ba̍k-chiu jia-khàm hoān-lān. 11 Góa siáⁿ-sū bô tī thai--nih chiū sí? Siáⁿ-sū chhut pak-tó͘, bô sòa tn̄g-khùi? 12 Siáⁿ-sū ū kha-thâu-u chih góa? Siáⁿ-sū ū ni hō͘ góa suh? 13 Nā-bô án-ni, góa í-keng tó-teh lâi an-jiân, Í-keng khùn lâi chēng-chēng; 14 Kap tōe-chiūⁿ lia̍t-ông bô͘-sū saⁿ-kap tī-teh, In bat ūi ka-kī khí-chō pha-hng ê só͘-chāi; 15 Á-sī kap ū kim ê siú-léng tī-teh; In bat ēng gûn chhiong-móa in ê chhù ê. 16 Á-sī chhin-chhiūⁿ ka-la̍uh sin lâi iám-ba̍t ê, góa chiū bô--khì; Chhin-chhiūⁿ bē kìⁿ-tio̍h kng ê eⁿ-á. 17 Tī-hia pháiⁿ-lâng soah i ê kiáu-jiáu; Tī-hia ià-siān-ê tit-tio̍h an-hioh. 18 Tī-hia siū-lia̍h ê lâng saⁿ-kap tit-tio̍h an-jiân, Bô thiaⁿ-kìⁿ tok-kang--ê ê siaⁿ. 19 Sī-sòe sī-tōa lóng tī-hia; Lô͘-po̍k thoat-lī i ê chú-lâng. 20 Siū khó͘-lān ê lâng, siáⁿ-sū hō͘ i ū kng ah? Sim-lāi iu-khó͘ ê lâng, siáⁿ-sū hō͘ i ū oa̍h-miā? 21 In ǹg-bāng sí, iā bōe tit-tio̍h, Chhē i, pí ku̍t khǹg-ba̍t ê pó-pòe khah chhut-la̍t. 22 In chhē-tio̍h hûn-bōng chiū khoài-lo̍k; Hoaⁿ-hí kàu bōe-kò͘--tit. 23 Lâng ê chiân-tô͘ í-keng àm-bong-bong, Siōng-tè sì-bīn ûi-khùn i, siáⁿ-sū hō͘ i ū kng ah? 24 In-ūi góa ēng thó͘-khùi thòe chia̍h-mi̍h; Góa tōa-siaⁿ háu, chhin-chhiūⁿ tōa-chúi chhèng-chhut. 25 In-ūi góa só͘ chin-kiaⁿ-ê lîm-kàu góa; Góa só͘ kiaⁿ-hiâⁿ-ê kàu tī góa. 26 Góa bōe tit-tio̍h an-jiân, bōe tit-tio̍h pêng-chēng, bōe tit-tio̍h an-hioh, Chóng-sī ū hoān-lān lâi.
1 Thê-bān人Í-lī-hoat應講， 2 人若beh kap你談論，你會嫌厭bōe？總是是誰能家己約束無講話ah？ 3 看ah，你bat教示chōe-chōe人，軟弱ê手你也hō͘伊giám硬。 4 Beh跋倒ê，你用話扶伊；腳頭u酸軟ê，你hō͘伊勇健。 5 總是taⁿ tāi-chì到tī你，你就昏迷；磕tio̍h你，你就驚惶。 6 你ê óa靠kiám m̄是在tī你ê敬畏mah？你ê ǹg望kiám m̄是在tī你所行ê純全mah？ 7 請你想看，無罪ê人是誰有死無？正直ê人tī甚麼所在受剪除？ 8 照我看，用罪過種作，用惡毒做種子來掖ê，所收成也是án-ni。 9 上帝pûn氣，in就死無；對伊大受氣ê風，in就消滅。 10 獅ê哮，猛獅ê聲，lóng soah；獅á-thûn ê嘴齒，lóng phah折。 11 老ê獅，因為無thang食就死；母ê獅，hiahê kiáⁿ也lóng四散。 12 有tāi-chì暗靜到tī我，我耳孔也聽見伊細細ê聲。 13 Tùi暝時異象ê思想，就是人睏重眠ê時， 14 驚惶ngia̍uh-ngia̍uh-chhoah臨到我，hō͘我ê百骨khe̍h-khe̍h-tiō。 15 有神tùi我面前經過；我身軀ê毛管chhàng起來。 16 伊停teh，總是我bōe看明伊ê形狀；有像tī我目睭前；靜chauh-chauh，我聽見有聲，講， 17 會死ê人對tī上帝kiám是義mah？人對tī創造伊ê，kiám是清氣mah？ 18 看ah，伊lóng無信用伊ê奴僕，也嫌伊ê使者做愚戇。 19 何況hiahê khiā起tī土厝，伊ê根基在tī土粉，比蛀蟲khah快死ê。 20 Tùi早起到ê-hng，就tú-tio̍h毀滅，永永無去，無人掛意。 21 伊布棚ê索kiám無tùi中央拔出來？伊ê死，lóng無智慧。
1 Thê-bān lâng Í-lī-hoat ìn kóng, 2 Lâng nā beh kap lí tâm-lūn, lí ōe hiâm-ià bōe? Chóng-sī chī-chūi ōe ka-kī iok-sok bô kóng-ōe ah? 3 Khòaⁿ ah, lí bat kà-sī chōe-chōe lâng, Loán-jio̍k ê chhiú lí iā hō͘ i giám-ngī. 4 Beh poa̍h-tó-ê, lí ēng ōe hû i; Kha-thâu-u sng-nńg ê, lí hō͘ i ióng-kiāⁿ. 5 Chóng-sī taⁿ tāi-chì kàu tī lí, lí chiū hun-bê; Kha̍p-tio̍h lí, lí chiū kiaⁿ-hiâⁿ. 6 Lí ê óa-khò kiám m̄-sī chāi-tī lí ê kèng-ùi mah? Lí ê ǹg-bāng kiám m̄-sī chāi-tī lí só͘ kiâⁿ ê sûn-choân mah? 7 Chhiáⁿ lí siūⁿ-khòaⁿ, bô-chōe ê lâng chī-chūi ū sí-bô? Chèng-ti̍t ê lâng tī sím-mi̍h só͘-chāi siū chián-tû? 8 Chiàu góa khòaⁿ, ēng chōe-kòa chèng-choh, Ēng ok-to̍k chòe chéng-chí lâi iā ê, só͘ siu-sêng iā sī án-ni. 9 Siōng-tè pûn-khùi, in chiū sí-bô; Tùi I tōa siū-khì ê hong, in chiū siau-bia̍t. 10 Sai ê háu, béng-sai ê siaⁿ, lóng soah; Sai-á-thûn ê chhùi-khí, lóng phah-chi̍h. 11 Lāu ê sai, in-ūi bô thang chia̍h chiū sí; Bú ê sai, hiah ê kiáⁿ iā lóng sì-sòaⁿ. 12 Ū tāi-chì àm-chīⁿ kàu tī góa, Góa hī-khang iā thiaⁿ-kìⁿ i sòe-sòe ê siaⁿ. 13 Tùi mî--sî īⁿ-siōng ê su-siúⁿ, Chiū-sī lâng khùn tāng-bîn ê sî, 14 Kiaⁿ-hiâⁿ ngia̍uh-ngia̍uh-chhoah lîm-kàu góa, Hō͘ góa ê pah-kut khe̍h-khe̍h-tiō. 15 Ū sîn tùi góa bīn-chêng keng-kè; Góa seng-khu ê mn̂g-kńg chhàng--khí-lâi. 16 I thêng-teh, chóng-sī góa bōe khòaⁿ-bêng i ê hêng-chōng; Ū siōng tī góa ba̍k-chiu chêng; Chēng chauh-chauh, góa thiaⁿ-kìⁿ ū siaⁿ, kóng, 17 Ōe-sí ê lâng tùi tī Siōng-tè kiám-sī gī mah? Lâng tùi tī chhòng-chō i ê, kiám sī chheng-khì mah? 18 Khòaⁿ ah, I lóng bô sìn-iōng I ê lô͘-po̍k, Iā hiâm I ê sù-chiá chòe gû-gōng. 19 Hô-hòng hiah ê khiā-khí tī thô͘-chhù, I ê kun-ki chāi-tī thô͘-hún, Pí chiù-thâng khah-khoài sí--ê. 20 Tùi chá-khí kàu ê-hng, chiū tú-tio̍h húi-bia̍t, Éng-éng bô--khì, bô lâng khòa-ì. 21 I pò͘-pîⁿ ê soh kiám bô tùi tiong-ng pu̍ih--chhut-lâi? I ê sí, lóng bô tì-hūi.
1 Taⁿ做你求叫，看有是誰應你ah？chiahê聖ê ê中間，你beh ǹg 是誰 ah？ 2 因為受氣ê心，會害死戇人；怨妒會刣死頇顢 ê人。 3 我bat看見戇人釘根，總是忽然間我咒詛伊khiā起ê所在。 4 伊ê kiáⁿ兒離開安穩遠遠；tī城門受壓迫，也無有拯救in ê。 5 Iau ê人食伊所收成ê，tī刺phè內也搶去，有活tauh開嘴吞伊ê財物。 6 因為災厄m̄是tùi土裡出來，患難也m̄是tùi地裡發生； 7 總是人出世定tio̍h有患難，親像火星飛上高。 8 換做我，我beh求叫上帝；將我ê事交帶上帝。 9 就是行tāi-chì大到bōe測度得ê，行奇事算bōe了ê。 10 伊落雨tī地面上，賞賜水tī田園裡。 11 Beh安置卑微ê tī高ê所在；beh舉起哀慘ê tī安穩ê地。 12 伊破壞káu-koài ê人ê計謀，致到in ê手所做ê bōe成功。 13 伊hō͘智慧ê人中家己ê詭計；hō͘詭譎ê人ê計謀緊緊敗。 14 In日時tú-tio̍h烏暗，日中晝四界bong，親像暝時。 15 伊救sòng-hiong人，脫離in ê嘴ê刀劍，以及強暴ê人ê手。 16 Tùi án-ni，軟chiáⁿ-ê有ǹg望，不義ê，嘴塞密。 17 看ah，上帝所警戒ê，hit人有福氣；所以m̄-thang看輕全能ê ê督責。 18 因為伊hō͘人痛疼，就kā伊包密；伊傷人，也伊ê手醫好伊。 19 伊beh救你，tī六pái ê患難；就若七pái，災害也無磕tio̍h你。 20 Tī飢荒ê時，伊beh救你脫離死；tī交戰ê時，伊beh救你脫離刀劍ê勢力。 21 你beh得tio̍h khǹg密，免受嘴舌ê攻擊；災厄到ê時，你也免驚。 22 災害kap飢荒，你beh笑伊，地上ê野獸，你也免驚。 23 因為你beh kap田園裡ê石結約；田野ê獸也beh kap你和好。 24 你beh知你ê布棚平安；你beh去看你ê羊椆lóng無欠缺。 25 你也beh知你ê kiáⁿ孫chōe-chōe，你ê後裔親像地上ê青草。 26 你beh歲壽滿足chiah歸墓，親像稻綑到時收khǹg。 27 看ah，這阮有查到徹底，實在是án-ni；你tio̍h聽，知是做你ê利益。
1 Taⁿ chòe lí kiû-kiò, khòaⁿ ū chī-chūi ìn lí ah? Chiah ê sèng--ê ê tiong-kan, lí beh ǹg chī-chūi ah? 2 In-ūi siū-khì ê sim, ōe hāi-sí gōng-lâng; Oàn-tò͘ ōe thâi-sí ham-bān ê lâng. 3 Góa bat khòaⁿ-kìⁿ gōng-lâng tèng-kun, Chóng-sī hut-jiân-kan góa chiù-chó͘ i khiā-khí ê só͘-chāi. 4 I ê kiáⁿ-jî lī-khui an-ún hn̄g-hn̄g; Tī siâⁿ-mn̂g siū ap-pek, iā bô ū chín-kiù in ê. 5 Iau ê lâng chia̍h i só͘ siu-sêng ê, Tī chhì-phè-lāi iā chhiúⁿ--khì, Ū oa̍h-tauh khui-chhùi thun i ê châi-bu̍t. 6 In-ūi chai-ē m̄-sī tùi thô͘--nih chhut-lâi, Hoān-lān iā m̄-sī tùi tōe--nih hoat-siⁿ; 7 Chóng-sī lâng chhut-sì tiāⁿ-tio̍h ū hoān-lān, Chhin-chhiūⁿ hé-chhiⁿ pe-chiūⁿ koâiⁿ. 8 Ōaⁿ-chòe góa, góa beh kiû-kiò Siōng-tè; Chiong góa ê sū kau-tài Siōng-tè. 9 Chiū-sī kiâⁿ tāi-chì tōa kàu bōe chhek-to̍k-tit ê, Kiâⁿ kî-sū sǹg-bōe-liáu-ê. 10 I lo̍h hō͘ tī tōe-bīn-chiūⁿ, Siúⁿ-sù chúi tī chhân-hn̂g--nih. 11 Beh an-tì pi-bî-ê tī koâiⁿ ê só͘-chāi; Beh kú-khí ai-chhám-ê tī an-ún ê tōe. 12 I phò-hoāi káu-koài ê lâng ê kè-bô͘, Tì-kàu in ê chhiú só͘ chòe ê bōe sêng-kong. 13 I hō͘ tì-hūi ê lâng tiòng ka-kī ê khúi-kè; Hō͘ khúi-khiat ê lâng ê kè-bô͘ kín-kín pāi. 14 In ji̍t--sî tú-tio̍h o͘-àm, Ji̍t tiong-tàu sì-kòe bong, chhin-chhiūⁿ mî--sî. 15 I kiù sòng-hiong lâng, thoat-lī in ê chhùi ê to-kiàm, Í-ki̍p kiông-pō ê lâng ê chhiú. 16 Tùi án-ni, nńg-chiáⁿ-ê ū ǹg-bāng, Put-gī-ê, chhùi that-ba̍t. 17 Khòaⁿ ah, Siōng-tè só͘ kéng-kài-ê, hit-lâng ū hok-khì; Só͘-í m̄-thang khòaⁿ-khin Choân-lêng--ê ê tok-chek. 18 In-ūi I hō͘ lâng thàng-thiàⁿ, chiū kā i pau-ba̍t; I siong lâng, iā I ê chhiú i-hó i. 19 I beh kiù lí, tī la̍k-pái ê hoān-lān; Chiū nā chhit-pái, chai-hāi iā bô kha̍p-tio̍h lí. 20 Tī ki-hng ê sî, I beh kiù lí thoat-lī sí; Tī kau-chiàn ê sî, I beh kiù lí thoat-lī to-kiàm ê sè-le̍k. 21 Lí beh tit-tio̍h khǹg-ba̍t, bián siū chhùi-chi̍h ê kong-kek; Chai-ē kàu ê sî, lí iā bián kiaⁿ. 22 Chai-hāi kap ki-hng, lí beh chhiò i, Tōe-chiūⁿ ê iá-siù, lí iā bián kiaⁿ. 23 In-ūi lí beh kap chhân-hn̂g--nih ê chio̍h kiat-iok; Chhân-iá ê siù iā beh kap lí hô-hó. 24 Lí beh chai lí ê pò͘-pîⁿ pêng-an; Lí beh khì khòaⁿ lí ê iûⁿ-tiâu lóng bô khiàm-kheh. 25 Lí iā beh chai lí ê kiáⁿ-sun chōe-chōe, Lí ê hō͘-è chhin-chhiūⁿ tōe-chiūⁿ ê chhiⁿ-chháu. 26 Lí beh hè-siū móa-chiok chiah kui bōng, Chhin-chhiūⁿ tiū-khún kàu-sî siu-khǹg. 27 Khòaⁿ ah, che goán ū chhâ kàu thiat-tí, si̍t-chāi sī án-ni; Lí tio̍h thiaⁿ, chai sī chòe lí ê lī-ek.
1 約伯應講。 2 願我ê憂悶過秤重，願我一切ê災害平平hē tī天秤； 3 的確比海沙khah重；所以我ê話亂亂講。 4 因為全能ê ê箭射tio̍h我；我ê心神lim-tio̍h伊ê毒。上帝hō͘我驚ê事排陣攻擊我。 5 野驢有草，kiám beh出聲？牛有草料，kiám beh哮mah？ 6 物chiáⁿ無chham鹽，kiám會食得mah？卵ê清kiám有滋味mah？ 7 我ê心厭賤，m̄-ài 磕tio̍h ê，in做我pháiⁿ味素ê食物。 8 願我得tio̍h所求ê；我所欣慕ê，願上帝賞賜我。 9 就是願上帝teh碎我，放伊ê手，來絕我ê性命。 10 若án-ni，我就得tio̍h安慰；tī痛苦無得tio̍h憐憫ê中間，iáu會快樂；因為我無違背至聖ê ê話。 11 我有甚麼氣力，hō͘我iáu teh ǹg望？我有甚麼結局，hō͘我iáu thang吞忍？ 12 我ê力kiám是石ê力？我ê肉kiám是銅ê mah？ 13 幫贊我ê，kiám m̄是lóng無去mah？我ê智慧，kiám m̄是離開我去mah？ 14 絕望ê人，就若無敬畏全能ê主，伊ê朋友也tio̍h用仁慈款待伊。 15 我ê兄弟誤我，親像溪，koh親像溪水流過ê地； 16 因為有冰塊就濁(lô)，有雪khǹg tī hiT內面； 17 燒lō ê時chūn，in就消無，熱ê時，就tùi in ê所在乾去。 18 沿溪kui陣teh行ê人彎來oat去，in上到拋荒ê所在就死。 19 Thê-má kui陣行ê人teh瞭望，Sī-pa kui群ê人teh thèng候。 20 In為tio̍h所ǹg望來見笑，到tè就漏氣。 21 Taⁿ lín真正無物；看見thang驚ê事就忍。 22 我kiám bat講，請lín hō͘我？á是，tùi lín ê財產用物送我？ 23 á是，救我脫離對敵ê手ah？á是，屬我脫離強暴ê人ê手ah？ 24 請lín教示我，我就靜靜；也hō͘我明白tī甚麼事有錯誤。 25 正直ê話，伊ê力大到怎樣！總是lín teh辯駁，是辯駁甚麼？ 26 Lín想beh辯駁人ê話mah？絕望ê人ê言論，是親像風。 27 Lín 拈鬮 ài得tio̍h無父ê kiáⁿ，用你ê朋友做買賣ê物。 28 Taⁿ請lín甘願看我；我決斷無當lín ê面來講白賊。 29 請lín oa̍t-tńg，m̄-thang有不義，koh oa̍t倒tńg，我ê公義iáu-kú tī-teh。 30 我ê舌有不義mah？我ê嘴bōe分別災害mah？
1 Iok-pek ìn kóng. 2 Goān góa ê iu-būn kè chhìn-tāng, Goān góa it-chhè ê chai-hāi pîⁿ-pîⁿ hē tī thian-phêng; 3 Tek-khak pí hái-soa khah-tāng; Só͘-í góa ê ōe loān-loān kóng. 4 In-ūi Choân-lêng--ê ê chìⁿ siā-tio̍h góa; Góa ê sim-sîn lim-tio̍h i ê to̍k. Siōng-tè hō͘ góa kiaⁿ ê sū pâi-tīn kong-kek góa. 5 Iá-lû ū chháu, kiám beh chhut-siaⁿ? Gû ū chháu-liāu, kiám beh háu mah? 6 Mi̍h chiáⁿ bô chham iâm, kiám ōe chia̍h-tit mah? Nn̄g ê chheng kiám ū chu-bī mah? 7 Góa ê sim iàm-chiān, m̄-ài kha̍p-tio̍h ê, In chòe góa pháiⁿ bī-sò͘ ê chia̍h-mi̍h. 8 Goān góa tit-tio̍h só͘-kiû-ê; Góa só͘ him-bō͘-ê goān Siōng-tè siúⁿ-sù góa. 9 Chiū-sī goān Siōng-tè teh-chhùi góa, Pàng I ê chhiú, lâi choa̍t góa ê sìⁿ-miā. 10 Nā án-ni, góa chiū tit-tio̍h an-ùi; Tī thòng-khó͘ bô tit-tio̍h lîn-bín ê tiong-kan, iáu ōe khoài-lo̍k; In-ūi góa bô ûi-pōe Chì-sèng--ê ê ōe. 11 Góa ū sím-mi̍h khùi-la̍t, hō͘ góa iáu teh ǹg-bāng? Góa ū sím-mi̍h kiat-kio̍k, hō͘ góa iáu thang thun-lún? 12 Góa ê la̍t kiám sī chio̍h ê la̍t? Góa ê bah kiám sī tâng-ê mah? 13 Pang-chān góa-ê, kiám-m̄-sī lóng bô--khì mah? Góa ê tì-hūi, kiám-m̄-sī lī-khui góa khì mah? 14 Choa̍t-bāng ê lâng, chiū nā bô kèng-ùi choân-lêng ê Chú, I ê pêng-iú iā tio̍h ēng jîn-chû khoán-thāi i. 15 Góa ê hiaⁿ-tī gō͘ góa, chhin-chhiūⁿ khoe, Koh chhin-chhiūⁿ khoe-chúi lâu-kè ê tōe; 16 In-ūi ū peng-tè chiū lô, Ū seh khǹg tī hí(**hit) lāi-bīn; 17 Sio-lō ê sî-chūn, in chiū siau-bô, Joa̍h ê sî, chiū tùi in ê só͘-chāi ta--khì. 18 Iân-khoe kui-tīn teh-kiâⁿ ê lâng oan-lâi oat-khì, In chiūⁿ kàu pha-hng ê só͘-chāi chiū sí. 19 Thê-má kui-tīn kiâⁿ ê lâng teh liâu-bāng, Sī-pa kui-kûn ê lâng teh thèng-hāu. 20 In ūi-tio̍h só͘ ǹg-bāng lâi kiàn-siàu, kàu-tè chiū làu-khùi. 21 Taⁿ lín chin-chiàⁿ bô mi̍h; Khòaⁿ-kìⁿ thang kiaⁿ ê sū chiū lún. 22 Góa kiám bat kóng, Chhiáⁿ lín hō͘ góa? Á-sī, Tùi lín ê châi-sán ēng mi̍h sàng góa? 23 Á-sī, Kiù góa thoat-lī tùi-te̍k ê chhiú ah? Á-sī, Sio̍k góa thoat-lī kiông-pō ê lâng ê chhiú ah? 24 Chhiáⁿ lín kà-sī góa, góa chiū chēng-chēng; Iā hō͘ góa bêng-pe̍k tī sím-mi̍h sū ū chhò-gō͘. 25 Chèng-ti̍t ê ōe, i ê la̍t tōa kàu cháiⁿ-iūⁿ! Chóng-sī lín teh piān-pok, sī piān-pok sím-mi̍h? 26 Lín siūⁿ beh piān-pok lâng ê ōe mah? Choa̍t-bāng ê lâng ê giân-lūn, sī chhin-chhiūⁿ hong. 27 Lín liam-khau ài tit-tio̍h bô-pē ê kiáⁿ, Ēng lí ê pêng-iú chòe bóe-bōe ê mi̍h. 28 Taⁿ chhiáⁿ lín kam-goān khòaⁿ góa; Góa koat-toàn bô tng lín ê bīn lâi kóng pe̍h-chha̍t. 29 Chhiáⁿ lín oa̍t-tńg, m̄-thang ū put-gī, Koh oa̍t-tò-tńg, góa ê kong-gī iáu-kú tī-teh. 30 Góa ê chi̍h ū put-gī mah? Góa ê chhùi bōe hun-piat chai-hāi mah?
1 人tī世間kiám m̄是勞苦ê時期mah？伊ê日子kiám m̄是親像chhiàⁿ工人ê日子mah？ 2 親像奴僕切切欣慕日落ê影，親像chhiàⁿ工人ǹg望工錢； 3 我也án-ni一定經過chōe-chōe空虛ê月，koh有厭倦ê暝kā我定tio̍h。 4 我倒teh ê時，就講，甚麼時thang起來？暝到hiah長。我翻來翻去直直到天光。 5 我kui身軀lóng是蟲kap kui塊ê土；我ê皮膚收嘴，就koh出膿。 6 我ê日子比梭khah緊，直直過去無所ǹg望。 7 Tio̍h記得我ê活命ná喘一个氣；我ê目睭bōe koh看見好景。 8 看我ê人，伊ê目睭beh無koh看見我；你ê目睭beh siòng我，總是我無tī-teh。 9 雲消散就過去，án-ni，人落陰間也bōe koh起來。 10 伊無koh tò來家己ê家，本所在也無koh認得伊。 11 所以我無beh約束我ê嘴；我ê神憂苦，我beh án-ni講出。我ê心苦痛，我beh án-ni分訴。 12 我kiám是大海，á是蛟龍mah？你竟然設一个監視我ê ah？ 13 我若講，我ê眠床beh安慰我，我ê床舖beh改我ê憂悶； 14 你就用眠夢hō͘我驚，用異象hō͘我忍。 15 致到我ài摧死；ài死無，khah贏chhun chiahê骨。 16 我厭恨性命，m̄-ài永遠活teh；願你chhut-chāi我；因為我ê日子lóng是空虛。 17 人是甚麼，致到你掠伊做大，致到你將伊khòa tī心裡， 18 致到你ta̍k早起鑑察伊，時刻試驗伊？ 19 你beh到tī時chiah oa̍t-tńg無看我，寬我tiap-á久，hō͘我吞nōa-cheh？ 20 鑑察人ê ah，我若有罪，礙tio̍h你甚麼？你啥事用我做你ê箭靶？致到我看家己做重擔。 21 你啥事m̄赦免我ê過失，除去我ê罪過？因為我taⁿ beh倒tī塵埃；你beh致意chhē我，總是我已經無tī-teh。
1 Lâng tī sè-kan kiám-m̄-sī lô-khó͘ ê sî-kî mah? I ê ji̍t-chí kiám m̄-sī chhin-chhiūⁿ chhiàⁿ-kang lâng ê ji̍t-chí mah? 2 Chhin-chhiūⁿ lô͘-po̍k chhiat-chhiat him-bō͘ ji̍t-lo̍h ê iáⁿ, Chhin-chhiūⁿ chhiàⁿ-kang lâng ǹg-bāng kang-chîⁿ; 3 Góa iā án-ni it-tēng keng-kè chōe-chōe khang-hu ê ge̍h, Koh ū ià-siān ê mî kā góa tiāⁿ-tio̍h. 4 Góa tó-teh ê sî, chiū kóng, Sím-mi̍h sî thang khí-lâi? mî kàu hiah tn̂g. Góa hoan-lâi hoan-khì ti̍t-ti̍t kàu thiⁿ-kng. 5 Góa kui seng-khu lóng sī thâng kap kui-tè ê thô͘; Góa ê phê-hu siu chhùi, chiū koh chhut-lâng. 6 Góa ê ji̍t-chí pí so khah-kín, Ti̍t-ti̍t kè-khì bô só͘ ǹg-bāng. 7 Tio̍h kì-tit góa ê oa̍h-miā ná chhoán chi̍t ê khùi; Góa ê ba̍k-chiu bōe koh khòaⁿ-kìⁿ hó-kéng. 8 Khòaⁿ góa ê lâng, i ê ba̍k-chiu beh bô koh khòaⁿ-kìⁿ góa; Lí ê ba̍k-chiu beh siòng góa, chóng-sī góa bô tī-teh. 9 Hûn siau-sòaⁿ chiū kè-khì, Án-ni, lâng lo̍h im-kan iā bōe koh khí-lâi. 10 I bô koh tò-lâi ka-kī ê ke, Pún só͘-chāi iā bô koh jīn-tit i. 11 Só͘-í góa bô beh iok-sok góa ê chhùi; Góa ê sîn iu-khó͘, góa beh án-ni kóng-chhut. Góa ê sim khó͘-thàng, góa beh án-ni hun-sò͘. 12 Góa kiám-sī tōa-hái, á-sī kau-lêng mah? Lí kéng-jiân siat chi̍t-ê kam(**kám)-sī góa ê ah? 13 Góa nā kóng, Góa ê bîn-chhn̂g beh an-ùi góa, Góa ê chhn̂g-pho͘ beh kóe góa ê iu-būn; 14 Lí chiū ēng bîn-bāng hō͘ góa kiaⁿ, Ēng īⁿ-siōng hō͘ góa lún. 15 Tì-kàu góa ài chhui-sí; Ài sí-bô, khah-iâⁿ chhun chiah ê kut. 16 Góa iàm-hūn sìⁿ-miā, m̄-ài éng-oán oa̍h-teh; Goān lí chhut-chāi góa; in-ūi góa ê ji̍t-chí lóng-sī khang-hu. 17 Lâng sī sím-mi̍h, tì-kàu Lí lia̍h i chòe-tōa, Tì-kàu Lí chiong i khòa tī sim--nih, 18 Tì-kàu Lí ta̍k chá-khí kàm-chhat i, Sî-khek chhì-giām i? 19 Lí beh kàu tī-sî chiah oa̍t-tńg bô khòaⁿ góa, Khoan góa tiap-á-kú, hō͘ góa thun-nōa-cheh? 20 Kàm-chhat lâng--ê ah, góa nā ū chōe, gāi-tio̍h Lí sím-mi̍h? Lí siáⁿ-sū ēng góa chòe Lí ê chìⁿ-pé? Tì-kàu góa khòaⁿ ka-kī chòe tāng-tàⁿ. 21 Lí siáⁿ-sū m̄ sià-bián góa ê kè-sit, tû-khì góa ê chōe-kòa? In-ūi góa taⁿ beh tó tī tîn-ai; Lí beh tì-ì chhē góa, chóng-sī góa í-keng bô tī-teh.
1 Su-a人Pí-le̍k-ta̍t應講， 2 Chiahê話你beh講到tī時？你嘴內ê話親像狂風beh到jōa久？ 3 上帝kiám有偏私來審判？全能ê kiám有偏私，無公義？ 4 你ê kiáⁿ兒若有得罪 伊，伊交付in tī in ê過失ê手頭。 5 你若致意chhē上帝，koh tùi全能ê求恩； 6 你若清氣正直，伊beh為tio̍h你醒起來，koh hō͘你公義ê厝興通。 7 你起頭雖然微細，到尾beh真發達。 8 請你查問前代，追念in ê列祖所查出ê； 9 因為咱不過是昨昏chiah有，m̄知半項；咱tī世間ê日子親像影； 10 In kiám無教示你，kā你講，講出伊心腹ê話？ 11 蘆葦無土糜，能發mah？蘆竹無水，能大叢mah？ 12 當伊青翠，iáu未割起來，比lóng總ê草事先枯焦。 13 見若bōe記得上帝ê人，伊ê路徑也是án-ni；無敬虔ê人，伊ê ǹg望beh無去。 14 伊所依óa-ê beh絕斷；伊所óa靠ê是蜘蛛網。 15 伊beh óa靠厝，總是厝beh倒；伊beh擒tiâu厝，總是厝bōe久長tī-teh。 16 伊受日照，就青翠。伊ê藤soan到滿園。 17 伊ê根khûn tī石堆，透到石ê所在。 18 伊若對伊ê所在除去，hit所在就m̄承認伊，講，我bē-bat看見你。 19 看ah，這就是伊ê路ê快樂，以後beh有別ê tùi地裡生出來。 20 看ah，上帝的確無棄sak完全ê人，也無扶助行pháiⁿ ê人。 21 伊iáu beh hō͘你滿嘴笑gī-gī，hō͘你ê嘴唇出歡喜ê聲。 22 怨恨你ê人beh滿身見笑，pháiⁿ人ê布棚beh歸tī無。
1 Su-a lâng Pí-le̍k-ta̍t ìn kóng, 2 Chiah ê ōe lí beh kóng kàu tī-sî? Lí chhùi-lāi ê ōe chhin-chhiūⁿ kông-hong beh kàu jōa-kú? 3 Siōng-tè kiám ū phian-su lâi sím-phòaⁿ? Choân-lêng--ê kiám ū phian-su, bô kong-gī? 4 Lí ê kiáⁿ-jî nā ū tek-chōe I, I kau-hù in tī in ê kè-sit ê chhiú-thâu. 5 Lí nā tì-ì chhē Siōng-tè, Koh tùi Choân-lêng--ê kiû un; 6 Lí nā chheng-khì chèng-ti̍t, I beh ūi-tio̍h lí chhíⁿ--khí-lâi, Koh hō͘ lí kong-gī ê chhù heng-thong. 7 Lí khí-thâu sui-jiân bî-sòe, Kàu-bé beh chin hoat-ta̍t. 8 Chhiáⁿ lí chhâ-mn̄g chêng-tāi, Tui-liām in ê lia̍t-chó͘ só͘ chhâ-chhut-ê; 9 In-ūi lán put-kò sī cha-hng chiah ū, m̄-chai pòaⁿ-hāng; Lán tī sè-kan ê ji̍t-chí chhin-chhiūⁿ iáⁿ; 10 In kiám bô kà-sī lí, kā lí kóng, Kóng-chhut i sim-pak ê ōe? 11 Lô͘-úi bô thô͘-bê, ōe hoat mah? Lô͘-tek bô chúi, ōe tōa châng mah? 12 Tng i chhiⁿ-chhùi, iáu-bē koah-khí-lâi, Pí lóng-chóng ê chháu tāi-seng ko͘-tâ. 13 Kìⁿ-nā bōe-kì-tit Siōng-tè ê lâng, i ê lō͘-kèng iā sī án-ni; Bô kèng-khiân ê lâng, i ê ǹg-bāng beh bô--khì. 14 I só͘ i-óa-ê beh choa̍t-tn̄g; I só͘ óa-khò-ê sī ti-tu-bāng. 15 I beh óa-khò chhù, chóng-sī chhù beh tó; I beh khîⁿ-tiâu chhù, chóng-sī chhù bōe kú-tn̂g tī-teh. 16 I siū ji̍t chiò, chiū chhiⁿ-chhùi. I ê tîn soan kàu móa-hn̂g. 17 I ê kun khûn tī chio̍h-tui, Thàu-kàu chio̍h ê só͘-chāi. 18 I nā tùi i ê só͘-chāi tû-khì, hit só͘-chāi chiū m̄ sêng-jīn i, Kóng, Góa bē-bat khòaⁿ-kìⁿ lí. 19 Khòaⁿ ah, che chiū-sī i ê lō͘ ê khoài-lo̍k, Í-āu beh ū pa̍t-ê tùi tōe--nih siⁿ--chhut-lâi. 20 Khòaⁿ ah, Siōng-tè tek-khak bô khì-sak oân-choân ê lâng, Iā bô hû-chō͘ kiâⁿ-pháiⁿ ê lâng. 21 I iáu beh hō͘ lí móa-chhùi chhiò-gī-gī, Hō͘ lí ê chhùi-tûn chhut hoaⁿ-hí ê siaⁿ. 22 Oàn-hūn lí ê lâng beh móa-sin kiàn-siàu, Pháiⁿ-lâng ê pò͘-pîⁿ beh kui tī bô.
1 約伯應講， 2 我真正知是án-ni；因為人tī上帝ê面前，thái能算做義ah？ 3 若beh kap伊辯論，千項也bōe應伊一項。 4 伊ê心是智慧，伊ê力是大；是誰抵抗伊，也得tio̍h安然？ 5 伊移徙山，山也m̄知；伊受氣中，hō͘山崩落去。 6 伊hō͘地振動，離開伊ê本位，地ê柱就搖choah。 7 伊命令日，日就無出；koh封密眾星。 8 伊家己thí開天；koh行踏tī海湧ê頂面。 9 伊創造北斗、參星、卯星，kap南方ê密宮。 10 伊行tāi-chí大到bōe測度得，行奇事算bōe了。 11 看ah，伊tùi我chia經過，我也無看見，伊行過去，我也m̄知。 12 看ah，伊搶去，是誰能阻擋伊？Chī-chūi敢問伊，你做甚麼？ 13 上帝的確無收回伊ê受氣，扶助La̍h-hap-pek ê，屈落tī伊ê下面。 14 何況我thái-thó敢應伊，á是揀甚麼話來kap伊辯論？ 15 我雖然是公義，也m̄敢應伊；獨獨對審判我ê求恩。 16 我若求叫伊，伊若應我，我也m̄信伊有聽我ê聲。 17 因為伊用大風phah我；無緣故加添我ê傷。 18 伊m̄容允我喘一个氣；獨獨用苦充滿我。 19 若論強猛，看ah，伊ê力tī-chia，若論審判，是誰能kā我定tio̍h期日？ 20 我雖然做義，我家己ê嘴beh定我ê罪；我雖然完全，伊beh顯明我ê橫逆。 21 我是完全ê，我無顧家己；我看輕我ê活命。 22 通通是一樣，所以我講，完全ê kap行pháiⁿ-ê，伊lóng剿滅。 23 災厄若忽然phah死人，伊就恥笑無罪ê人tú-tio̍h試煉。 24 世界交付tī pháiⁿ人ê手；伊遮蓋審判司ê面；若m̄是伊，是是誰 ah？ 25 我ê日子比走文書ê khah緊，緊緊過去，無看見甚麼福氣。 26 緊緊過去親像快船；koh親像鷹緊緊飛落去la̍k物。 27 我若講beh bōe記得我ê哀怨，beh改我ê憂容做歡喜； 28 我就驚我chiahê憂苦；因為我知你的確無掠我做無罪。 29 我beh受定罪，我啥事空空tio̍h磨ah？ 30 我若用雪ê水家己洗，用鹼(kiⁿ)清氣我ê手， 31 你beh hiat我tī溝á底，我ê衫也beh厭惡我。 32 因為伊m̄是世間人親像我，hō͘我thang應伊，也hō͘阮thang對訊。 33 阮中間無有判斷ê，Thang hō͘阮二彼(jī-pí)降服伊。 34 願伊徙伊ê柺á 離開我，無用伊ê威嚴hō͘我驚； 35 我就敢講，也無驚伊；總是我本m̄是hit款。
1 Iok-pek ìn kóng, 2 Góa chin-chiàⁿ chai sī án-ni; In-ūi lâng tī Siōng-tè ê bīn-chêng, thái ōe sǹg-chòe-gī ah? 3 Nā beh kap I piān-lūn, Chheng-hāng iā bōe ìn I chi̍t-hāng. 4 I ê sim sī tì-hūi, I ê la̍t sī tōa; Chī-chūi tí-khòng I, iā tit-tio̍h an-jiân? 5 I î-sóa soaⁿ, soaⁿ iā m̄-chai; I siū-khì tiong, hō͘ soaⁿ pang--lo̍h-khì. 6 I hō͘ tōe tín-tāng, lī-khui i ê pún-ūi, Tōe ê thiāu chiū iô-choah. 7 I bēng-lēng ji̍t, ji̍t chiū bô chhut; Koh hong-ba̍t chèng chhiⁿ. 8 I ka-kī thí-khui thiⁿ; Koh kiâⁿ-ta̍h tī hái-éng ê téng-bīn. 9 I chhòng-chō Pak-táu, Chham-chhiⁿ, Báu-chhiⁿ, kap lâm-hng ê bi̍t-kiong. 10 I kiâⁿ tāi-chì tōa kàu bōe chhek-to̍k-tit, Kiâⁿ kî-sū sǹg-bōe-liáu. 11 Khòaⁿ ah, I tùi góa chia keng-kè, góa iā bô khòaⁿ-kìⁿ, I kiâⁿ kè--khì, góa iā m̄-chai. 12 Khòaⁿ ah, I chhiúⁿ-khì, chī-chūi ōe chó͘-tòng I? Chī-chūi káⁿ mn̄g I, Lí chòe sím-mi̍h? 13 Siōng-tè tek-khak bô siu-hôe I ê siū-khì, Hû-chō͘ La̍h-hap-pek ê, khut-lo̍h tī I ê ē-bīn. 14 Hô-hòng góa thái-thó káⁿ ìn I, Á-sī kéng sím-mi̍h ōe lâi kap I piān-lūn? 15 Góa sui-jiân sī kong-gī, iā m̄-káⁿ ìn I; To̍k-to̍k tùi sím-phòaⁿ góa--ê kiû-un. 16 Góa nā kiû-kiò I, I nā ìn góa, Góa iā m̄-sìn I ū thiaⁿ góa ê siaⁿ. 17 In-ūi I ēng tōa-hong phah góa; Bô iân-kò͘ ke-thiⁿ góa ê siong. 18 I m̄ iông-ún góa chhoán chi̍t-ê khùi; To̍k-to̍k ēng khó͘ chhiong-móa góa. 19 Nā lūn kiông-béng, khòaⁿ ah, I ê la̍t tī-chia, Nā lūn sím-phòaⁿ, chī-chūi ōe kā góa tiāⁿ-tio̍h kî-ji̍t? 20 Góa sui-jiân chòe-gī, góa ka-kī ê chhùi beh tēng góa ê chōe; Góa sui-jiân oân-choân, i beh hián-bêng góa ê hêng-ge̍k. 21 Góa sī oân-choân-ê, góa bô kò͘ ka-kī; Góa khòaⁿ-khin góa ê oa̍h-miā. 22 Thong-thong sī chi̍t-iūⁿ, só͘-í góa kóng, Oân-choân--ê kap kiâⁿ-pháiⁿ-ê, I lóng châu-bia̍t. 23 Chai-ē nā hut-jiân phah-sí lâng, I chiū thí-chhiò bô-chōe ê lâng tú-tio̍h chhì-liān. 24 Sè-kài kau-hù tī pháiⁿ-lâng ê chhiú; I jia-khàm sím-phòaⁿ-si ê bīn; Nā m̄-sī I, sī chī-chūi ah? 25 Góa ê ji̍t-chí pí cháu-bûn-su--ê khah-kín, Kín-kín kè--khì, bô khòaⁿ-kìⁿ sím-mi̍h hok-khì. 26 Kín-kín kè-khì chhin-chhiūⁿ khoài-chûn; Koh chhin-chhiūⁿ eng kín-kín pe--lo̍h-khì la̍k-mi̍h. 27 Góa nā kóng beh bōe-kì-tit góa ê ai-oàn, Beh kóe góa ê iu-iông chòe hoaⁿ-hí; 28 Góa chiū kiaⁿ góa chiah ê iu-khó͘; In-ūi góa chai Lí tek-khak bô lia̍h góa chòe bô-chōe. 29 Góa beh siū tēng-chōe, Góa siáⁿ-sū khang-khang tio̍h-bôa ah? 30 Góa nā ēng seh ê chúi ka-kī sóe, Ēng kiⁿ chheng-khì góa ê chhiú, 31 Lí beh hiat góa tī kau-á-tóe, Góa ê saⁿ iā beh iàm-ò͘ⁿ góa. 32 In-ūi I m̄-sī sè-kan lâng chhin-chhiūⁿ góa, hō͘ góa thang ìn I, Iā hō͘ goán thang tùi-sìn. 33 Goán tiong-kan bô ū phòaⁿ-toàn--ê, Thang hō͘ goán jī-pí hâng-ho̍k i. 34 Goān I sóa I ê koáiⁿ-á lî-khui góa, Bô ēng I ê ui-giâm hō͘ góa kiaⁿ; 35 Góa chiū káⁿ kóng, iā bô kiaⁿ I; Chóng-sī góa pún m̄-sī hit-khoán.
1 我ê心m̄-ài活：我beh大膽講出我ê哀怨；我心內ê苦痛，我chiah beh講。 2 我beh對上帝講，莫得定我有罪，tio̍h指示我，你為甚麼因端kap我爭辯。 3 你行壓制，koh看輕你ê手所造ê，koh用光照pháiⁿ人ê計謀，你kiám掠chiahê做好mah？ 4 你ê目睭kiám是肉ê，á是你teh看親像人teh看mah？ 5 你ê日子kiám親像人ê日子？á是你ê年親像人ê年mah？ 6 你chiah究勘我ê罪孽，查察我ê罪過。 7 你是m̄知我無罪，也無一个能救我脫離你ê手mah？ 8 你ê手有創造我，雕琢我ê 四肢百體，你iáu-kú teh毀滅我。 9 求你記念，你bat製造我親像chhiau土一般；你beh hō͘我koh歸tī土粉mah？ 10 你kiám m̄是piàⁿ出我親像奶，hō͘我吉kui-thn̂g親像奶餅mah？ 11 你用皮kap肉hō͘我穿，koh用骨kap筋hō͘我連絡。 12 你用活命kap慈愛hō͘我，你ê眷顧保全我ê性命。 13 Chiahê事你lóng khǹg tī你ê心；我知你本有chitê意思。 14 我若犯罪，你就注意我；也無beh掠我做無罪。 15 我若行pháiⁿ，就有災厄，我若做義，也m̄敢kia̍h起頭；滿心見笑，親目看見我ê艱苦。 16 我若頭kia̍h高，你就jip beh掠我親像獅，koh顯出你ê奇異tī我。 17 你koh 設你ê干證攻擊我。加添你ê受氣tī我；軍兵一隊過一隊，攻擊我。 18 你啥事hō͘我出胎？m̄值tio̍h hit時斷氣，無hō͘人ê目睭看見我。 19 Án-ni我就有，ná親像無；一下出胎就送入墓。 20 我ê日子kiám m̄是真少mah？求你請停，放寬我， 21 Hō͘我tī去無倒tńg，就是去烏暗kap死蔭ê地ê事先，thang略á得tio̍h安慰。 22 Hit-ê地暗暗親像烏墨，是死蔭渾沌，伊ê光親像烏墨。
1 Góa ê sim m̄-ài oa̍h: Góa beh tōa-táⁿ kóng-chhut góa ê ai-oàn; Góa sim-lāi ê khó͘-thàng, góa chiah beh kóng. 2 Góa beh tùi Siōng-tè kóng, Bo̍h-tit tēng góa ū-chōe, Tio̍h chí-sī góa, Lí ūi sím-mi̍h in-toaⁿ kap góa cheng-piān. 3 Lí kiâⁿ ap-chè, koh khòaⁿ-khin Lí ê chhiú só͘-chō-ê, Koh ēng kng chiò pháiⁿ-lâng ê kè-bô͘, Lí kiám lia̍h chiah-ê chòe-hó mah? 4 Lí ê ba̍k-chiu kiám sī bah-ê, Á-sī Lí teh khòaⁿ chhin-chhiūⁿ lâng teh khòaⁿ mah? 5 Lí ê ji̍t-chí kiám chhin-chhiūⁿ lâng ê ji̍t-chí? Á-sī Lí ê nî chhin-chhiūⁿ lâng ê nî mah? 6 Lí chiah kiù-khàm góa ê chōe-gia̍t, Cha-chhat góa ê chōe-kòa. 7 Lí sī m̄-chai góa bô chōe, Iā bô chi̍t-ê ōe kiù góa thoat-lī Lí ê chhiú mah? 8 Lí ê chhiú ū chhòng-chō góa, tiau-tok góa ê sù-chi pah-thé, Lí iáu-kú teh húi-bia̍t góa. 9 Kiû Lí kì-liām, Lí bat chè-chō góa chhin-chhiūⁿ chhiau-thô͘ chi̍t-poaⁿ; Lí beh hō͘ góa koh kui tī thô͘-hún mah? 10 Lí kiám m̄-sī piàⁿ-chhut góa chhin-chhiūⁿ ni, Hō͘ góa kiat kui-thn̂g chhin-chhiūⁿ ni-piáⁿ mah? 11 Lí ēng phê kap bah hō͘ góa chhēng, Koh ēng kut kap kun hō͘ góa liân-lo̍k. 12 Lí ēng oa̍h-miā kap chû-ài hō͘ góa, Lí ê koàn-kò͘ pó-choân góa ê sìⁿ-miā. 13 Chiah ê sū Lí lóng khǹg tī Lí ê sim; Góa chai Lí pún ū chit ê ì-sù. 14 Góa nā hoān-chōe, Lí chiū chù-ì góa; Iā bô beh lia̍h góa chòe bô chōe. 15 Góa nā kiâⁿ-pháiⁿ, chiū ū chai-ē, Góa nā chòe-gī, iā m̄-káⁿ kia̍h-khí thâu; Móa-sim kiàn-siàu, Chhin-ba̍k khòaⁿ-kìⁿ góa ê kan-khó͘. 16 Góa nā thâu kia̍h-koâiⁿ, Lí chiū jip beh lia̍h góa chhin-chhiūⁿ sai, Koh hián-chhut Lí ê kî-īⁿ tī góa. 17 Lí koh siat Lí ê kan-chèng kong-kek góa. Ke-thiⁿ Lí ê siū-khì tī góa; Kun-peng chi̍t-tūi kè chi̍t-tūi, kong-kek góa. 18 Lí siáⁿ-sū hō͘ góa chhut-thai? m̄-ta̍t-tio̍h hit-sî tn̄g-khùi, Bô hō͘ lâng ê ba̍k-chiu khòaⁿ-kìⁿ góa. 19 Án-ni góa chiū ū, ná chhin-chhiūⁿ bô; Chi̍t-ē chhut-thai chiū sàng ji̍p bōng. 20 Góa ê ji̍t-chí kiám m̄-sī chin-chió mah? Kiû Lí chhiáⁿ-thêng, pàng-khoan góa, 21 Hō͘ góa tī khì, bô tò-tńg, chiū-sī khì o͘-àm kap sí-ìm ê tōe ê tāi-seng, Thang lio̍h-á tit-tio̍h an-ùi. 22 Hit ê tōe àm-àm chhin-chhiūⁿ o͘-ba̍k, Sī sí-ìm hūn-tūn, I ê kng chhin-chhiūⁿ o͘-ba̍k.
1 Ná-má人Só-hoat應講， 2 話hiah chōe，kiám m̄-tio̍h應mah？Kāu話ê人，kiám thang稱做義mah？ 3 你teh誇口，人kiám tio̍h靜靜mah？你teh恥笑ê時，無人hō͘你見笑mah？ 4 你講，我ê道理純全，我tī你ê目睭前清氣。 5 總是願上帝講話，koh開伊ê嘴辯駁你； 6 指示你智慧ê奧妙，這智慧有ta̍k般ê功效；你tio̍h知上帝無lóng總記得你ê罪過。 7 你kiám能測度上帝ê奧妙mah？你kiám能測度全能ê到徹底mah？ 8 伊高親像天，你iáu會做甚麼？比陰間khah深，你iáu會知甚麼？ 9 伊ê量(liōng)是比地khah長，比海khah闊。 10 伊若經過，來關禁人，召人審判，是誰能阻擋伊ah？ 11 因為伊知虛假ê人；雖然無注意，也lóng看見罪過。 12 空虛ê人lóng無心思，人出世親像野驢ê驢kiáⁿ。 13 你若端正你ê心，koh ǹg伊kia̍h起手； 14 你ê手內若有罪過，就tio̍h除去遠遠，也m̄-thang容允不義tiàm tī你ê布棚內。 15 Hit時你的確kia̍h起你無瑕疵ê面；你也beh khiā在，lóng無驚惶。 16 因為你beh bōe記得你ê艱苦；就若記得，也親像水流過去一樣。 17 你ê生活khah贏日中晝，雖然暗，猶原親像早起時。 18 你beh安穩，因為有所ǹg望；你beh四界巡看，就thang安心睏。 19 你beh倒teh，也無有phah驚你ê，koh有chōe-chōe人對你求恩。 20 總是pháiⁿ人ê目睭beh花；in無路thang逃走，in所ǹg望親像氣斷。
1 Ná-má lâng Só-hoat ìn kóng, 2 Ōe hiah chōe, kiám m̄-tio̍h ìn mah? Kāu-ōe ê lâng, kiám thang chheng-chòe-gī mah? 3 Lí teh khoa-kháu, lâng kiám tio̍h chēng-chēng mah? Lí teh thí-chhiò ê sî, bô lâng hō͘ lí kiàn-siàu mah? 4 Lí kóng, Góa ê tō-lí sûn-choân, Góa tī lí ê ba̍k-chiu-chêng chheng-khì. 5 Chóng-sī goān Siōng-tè kóng-ōe, Koh khui I ê chhùi piān-pok lí; 6 Chí-sī lí tì-hūi ê ò-biāu, Che tì-hūi ū ta̍k-poaⁿ ê kong-hāu; Lí tio̍h chai Siōng-tè bô lóng-chóng kì-tit lí ê chōe-kòa. 7 Lí kiám-ōe chhek-to̍k Siōng-tè ê ò-biāu mah? Lí kiám-ōe chhek-to̍k Choân-lêng-ê kàu thiat-tí mah? 8 I koâiⁿ chhin-chhiūⁿ thiⁿ, lí iáu ōe chòe sím-mi̍h? Pí im-kan khah-chhim, lí iáu ōe chai sím-mi̍h? 9 I ê liōng sī pí tōe khah-tn̂g, Pí hái khah-khoah. 10 I nā keng-kè, lâi koaiⁿ-kìm lâng, Tiàu lâng sím-phòaⁿ, chī-chūi ōe chó͘-tòng I ah? 11 In-ūi I chai hu-kè ê lâng; Sui-jiân bô chù-ì, iā lóng khòaⁿ-kìⁿ chōe-kòa. 12 Khang-hu ê lâng lóng bô sim-su, Lâng chhut-sì chhin-chhiūⁿ iá-lû ê lû-kiáⁿ. 13 Lí nā toan-chiàⁿ lí ê sim, Koh ǹg I kia̍h-khí chhiú; 14 Lí ê chhiú-lāi nā ū chōe-kòa, chiū tio̍h tû-khì hn̄g-hn̄g, Iā m̄-thang iông-ún put-gī tiàm tī lí ê pò͘-pîⁿ lāi. 15 Hit-sî lí tek-khak kia̍h-khí lí bô hâ-chhû ê bīn; Lí iā beh khiā-chāi, lóng bô kiaⁿ-hiâⁿ. 16 In-ūi lí beh bōe-kì-tit lí ê kan-khó͘; Chiū nā kì-tit, iā chhin-chhiūⁿ chúi lâu-kè--khì chi̍t-iūⁿ. 17 Lí ê seng-hoa̍t khah-iâⁿ ji̍t-tiong-tàu, Sui-jiân àm, iû-goân chhin-chhiūⁿ chá-khí-sî. 18 Lí beh an-ún, in-ūi ū só͘ ǹg-bāng; Lí beh sì-kòe sûn-khòaⁿ, chiū thang an-sim khùn. 19 Lí beh tó-teh, iā bô ū phah-kiaⁿ lí ê, Koh ū chōe-chōe lâng tùi lí kiû-un. 20 Chóng-sī pháiⁿ-lâng ê ba̍k-chiu beh hoe; In bô lō͘ thang tô-cháu, in só͘ ǹg-bāng chhin-chhiūⁿ khùi-tn̄g.
1 約伯應伊講， 2 Lín真正是百姓ah，lín死，智慧也kap lín死。 3 我也有心思，親像lín一樣；我無khah輸lín；chiahê tāi-chì甚麼人m̄知？ 4 我是求叫上帝，得tio̍h伊聽ê人，iáu-kú hō͘同伴譏刺；公義完全ê人，也hō͘人譏刺。 5 安然ê人心內看輕患難；這患難便便teh thèng候腳tio̍h-tak ê人。 6 強盜ê布棚興通，惹tio̍h上帝ê人得tio̍h安然。就是上帝大賞賜tī in ê手ê。 7 Taⁿ你去問走獸，in beh教示你；也去問空中ê鳥，in beh kā你講； 8 Á是kap地講，伊beh教示你；海中ê魚也beh kā你講明。 9 Tī chiahê一切，是誰 m̄知，是耶和華ê手做án-ni？ 10 一切動物ê性命，kap人類ê喘氣，lóng tī伊ê手。 11 耳孔kiám bōe試驗言語，親像上腔試滋味mah？ 12 年老ê有智慧，歲壽chōe-ê有見識。 13 智慧kap能力在tī上帝；伊有計畫kap見識。 14 看ah，伊拆毀ê，bōe會koh起造；伊關禁ê人，無thang koh tháu放。 15 看ah，伊禁止hiahê水，水就乾去；伊koh hō͘水流出，地就變遷。 16 權能kap效力在tī伊；受迷惑，kap迷惑人ê，lóng屬tī伊。 17 伊hō͘謀士tú-tio̍h搶掠；koh hō͘審判司變成戇人。 18 伊tháu放君王ê綑縛，koh用帶縛in ê腰。 19 伊hō͘祭司tú-tio̍h搶掠，koh chhia倒有權能ê人。 20 伊改chhoa̍h忠信ê人ê話，koh除去老人ê見識。 21 伊hō͘貴族受凌辱；koh tháu開有力ê人ê腰帶。 22 伊tùi烏暗中顯出深奧ê事；koh帶出死蔭到光明ê所在。 23 伊hō͘邦國興旺，也koh毀滅伊；伊hō͘邦國開闊，也koh遷徙in。 24 地上百姓ê頭人，伊除去in ê心思；hō͘ in漂流tī無路ê曠野。 25 In無光，tī烏暗中四界摸；koh hō͘ in顛來顛去，親像酒醉ê人一樣。
1 Iok-pek ìn i kóng, 2 Lín chin-chiàⁿ sī peh-sìⁿ ah, Lín sí, tì-hūi iā kap lín sí. 3 Góa iā ū sim-su, chhin-chhiūⁿ lín chi̍t-iūⁿ; Góa bô khah-su lín; Chiah ê tāi-chì sím-mi̍h lâng m̄-chai? 4 Góa sī kiû-kiò Siōng-tè, tit-tio̍h I thiaⁿ ê lâng, Iáu-kú hō͘ tâng-phōaⁿ ki-chhì; Kong-gī oân-choân ê lâng, iā hō͘ lâng ki-chhì. 5 An-jiân ê lâng sim-lāi khòaⁿ-khin hoān-lān; Che hoān-lān piān-piān teh thèng-hāu kha tio̍h-tak ê lâng. 6 Kiông-tō ê pò͘-pîⁿ heng-thong, Jiá-tio̍h Siōng-tè ê lâng tit-tio̍h an-jiân. Chiū-sī Siōng-tè tōa siúⁿ-sù tī in ê chhiú--ê. 7 Taⁿ lí khì mn̄g cháu-siù, in beh kà-sī lí; Iā khì mn̄g khong-tiong ê chiáu, in beh kā lí kóng; 8 Á-sī kap tōe kóng, i beh kà-sī lí; Hái-tiong ê hî iā beh kā lí kóng-bêng. 9 Tī chiah-ê it-chhè, chī-chūi m̄ chai, Sī Iâ-hô-hoa ê chhiú chòe án-ni? 10 It-chhè tōng-bu̍t ê sìⁿ-miā, kap jîn-lūi ê chhoán-khùi, Lóng tī I ê chhiú. 11 Hī-khang kiám bōe chhì-giām giân-gú, Chhin-chhiūⁿ chiūⁿ-khiuⁿ[kiuⁿ] chhì chu-bī mah? 12 Nî-lāu--ê ū tì-hūi, Hè-siū chōe-ê ū kiàn-sek. 13 Tì-hūi kap lêng-le̍k chāi-tī Siōng-tè; I ū kè-e̍k kap kiàn-sek. 14 Khòaⁿ ah, I thiah-húi-ê, bōe-ōe koh khí-chō; I koaiⁿ-kìm ê lâng, bô thang koh tháu-pàng. 15 Khòaⁿ ah, I kìm-chí hiah ê chúi, chúi chiū ta--khì; I koh hō͘ chúi lâu-chhut, tōe chiū piàn-chhian. 16 Koân-lêng kap hāu-le̍k chāi-tī I; Siū bê-he̍k, kap bê-he̍k lâng--ê, lóng sio̍k tī I. 17 I hō͘ bô͘-sū tú-tio̍h chhiúⁿ-lia̍h; Koh hō͘ sím-phòaⁿ-si pìⁿ-chiâⁿ gōng-lâng. 18 I tháu-pàng kun-ông ê khún-pa̍k, Koh ēng tòa pa̍k in ê io. 19 I hō͘ chè-si tú-tio̍h chhiúⁿ-lia̍h, Koh chhia-tó ū koân-lêng ê lâng. 20 I kóe-chhoa̍h tiong-sìn ê lâng ê ōe, Koh tû-khì lāu-lâng ê kiàn-sek. 21 I hō͘ kùi-cho̍k siū lêng-jio̍k; Koh tháu-khui ū la̍t ê lâng ê io-tòa. 22 I tùi o͘-àm-tiong hián-chhut chhim-ò ê sū; Koh tòa-chhut sí-ìm kàu kng-bêng ê só͘-chāi. 23 I hō͘ pang-kok heng-ōng, iā koh húi-bia̍t i; I hō͘ pang-kok khui-khoah, iā koh chhian-sóa in. 24 Tōe-chiūⁿ peh-sìⁿ ê thâu-lâng, I tû-khì in ê sim-su; Hō͘ in phiau-liû tī bô lō͘ ê khòng-iá. 25 In bô kng, tī o͘-àm-tiong sì-kòe bong; Koh hō͘ in tian-lâi tian-khì, chhin-chhiūⁿ chiú-chùi ê lâng chi̍t-iūⁿ.
1 看ah，這一切我ê目睭lóng看過，我ê耳孔lóng聽過，也明白。 2 Lín所知ê，我也知；我無khah輸lín。 3 我實在ài kap全能ê講話；我真ài kap上帝理論。 4 總是lín是捏造白賊話ê，lóng是無路用ê醫生。 5 願lín一概靜靜，Chiah算是lín ê智慧。 6 請lín聽我ê理論，致意聽我ê嘴ê分訴。 7 Lín beh為上帝來講不義ê話mah？為伊講詭詐ê話mah？ 8 Lín kiám beh偏袒伊mah？beh為上帝辯護mah？ 9 伊若查出lín，kiám有好mah？Lín能騙伊親像騙人mah？ 10 Lín若暗靜偏袒，伊的確beh責備lín。 11 伊ê威嚴kiám無hō͘你驚mah？伊ê thang驚畏，kiám無臨到lín mah？ 12 Lín所記念ê箴言是親像火灰；lín ê營寨是土糜ê營寨。 13 Lín靜靜，莫得chhap我，kù-chāi我講，就無論甚麼做伊來。 14 我啥事將我ê肉咬tī我ê嘴齒，將我ê性命hē tī我ê手ah？ 15 看ah，伊beh 刣死我，我無thang ǹg望；總是我beh tī伊ê面前表白我ê所行。 16 這beh成做拯救我ê；因為無虔誠ê人bōe得到伊ê面前。 17 Lín tio̍h細膩聽我ê話，hō͘我所辯論ê入lín ê耳孔。 18 看ah，我有排列我ê案件，我知我beh得tio̍h稱做義。 19 Chī-chūi能kap我辯論ah？有，我就靜靜來斷氣。 20 獨獨有兩項，莫得行tī我，我就無閃避離開你ê面。 21 就是你ê手kiu 倒tńg，離開我遠遠；koh無用你ê威嚴hō͘我驚； 22 Án-ni，你叫，我就應；á是hō͘我講，你應我。 23 我ê罪過kap過失有jōa-chōe ah？求你hō͘我知我ê過失，我ê罪過。 24 你啥事掩(ng)你ê面，掠我做你ê對敵ah？ 25 你kiám beh搖動hō͘風吹ê樹葉mah？追jip枯焦ê草mah？ 26 因為你記載艱苦ê事來辦我；koh hō͘我擔當少年ê時ê罪過。 27 你用腳銬銬我ê腳，致意看我一切ê路；你kā我ê腳底劃定界限。 28 我beh受敗壞，親像臭爛ê物，親像tio̍h蛀蟲ê衫。
1 Khòaⁿ ah, che it-chhè góa ê ba̍k-chiu lóng khòaⁿ-kè, Góa ê hī-khang lóng thiaⁿ-kè, iā bêng-pe̍k. 2 Lín só͘ chai-ê, góa iā chai; Góa bô khah-su lín. 3 Góa si̍t-chāi ài kap Choân-lêng-ê kóng-ōe; Góa chin ài kap Siōng-tè lí-lūn. 4 Chóng-sī lín sī liap-chō pe̍h-chha̍t-ōe ê, Lóng sī bô lō͘-ēng ê i-seng. 5 Goān lín it-khài chēng-chēng, Chiah sǹg sī lín ê tì-hūi. 6 Chhiáⁿ lín thiaⁿ góa ê lí-lūn, Tì-ì thiaⁿ góa ê chhùi ê hun-sò͘. 7 Lín beh ūi Siōng-tè lâi kóng put-gī ê ōe mah? Ūi I kóng khúi-chà ê ōe mah? 8 Lín kiám beh phian-thán I mah? Beh ūi Siōng-tè piān-hō͘ mah? 9 I nā chhâ-chhut lín, kiám ū hó mah? Lín ōe phiàn I chhin-chhiūⁿ phiàn lâng mah? 10 Lín nā àm-chīⁿ phian-thán, I tek-khak beh chek-pī lín. 11 I ê ui-giâm kiám bô hō͘ lí kiaⁿ mah? I ê thang kiaⁿ-ùi, kiám bô lîm-kàu lín mah? 12 Lín só͘ kì-liām ê chim-giân sī chhin-chhiūⁿ hé-hu; Lín ê iâⁿ-chē sī thô͘-bê ê iâⁿ-chē. 13 Lín chēng-chēng, bo̍h-tit chhap góa, kù-chāi góa kóng, Chiū bô-lūn sím-mi̍h chòe i lâi. 14 Góa siáⁿ-sū chiong góa ê bah kā tī góa ê chhùi-khí, Chiong góa ê sìⁿ-miā hē tī góa ê chhiú ah? 15 Khòaⁿ ah, I beh thâi-sí góa, góa bô thang ǹg-bāng; Chóng-sī góa beh tī I ê bīn-chêng piáu-pe̍k góa ê só͘ kiâⁿ. 16 Che beh chiâⁿ-chòe chín-kiù góa ê; In-ūi bô khiân-sêng ê lâng bōe tit kàu I ê bīn-chêng. 17 Lín tio̍h sòe-jī thiaⁿ góa ê ōe, Hō͘ góa só͘ piān-lūn-ê ji̍p lín ê hī-khang. 18 Khòaⁿ ah, góa ū pâi-lia̍t góa ê àn-kiāⁿ, Góa chai góa beh tit-tio̍h chheng-chòe-gī. 19 Chī-chūi ōe kap góa piān-lūn ah? Ū, góa chiū chēng-chēng lâi tn̄g-khùi. 20 To̍k-to̍k ū nn̄g-hāng, bo̍h-tit kiâⁿ tī góa, Góa chiū bô siám-pī lī-khui lí ê bīn. 21 Chiū-sī Lí ê chhiú kiu tò-tńg, lī-khui góa hn̄g-hn̄g; Koh bô ēng Lí ê ui-giâm hō͘ góa kiaⁿ; 22 Án-ni, Lí kiò, góa chiū ìn; Á-sī hō͘ góa kóng, Lí ìn góa. 23 Góa ê chōe-kòa kap kè-sit ū jōa-chōe ah? Kiû Lí hō͘ góa chai góa ê kè-sit, góa ê chōe-kòa. 24 Lí siáⁿ-sū ng Lí ê bīn, Lia̍h góa chòe Lí ê tùi-te̍k ah? 25 Lí kiám beh iô-tāng hō͘ hong chhe ê chhiū-hio̍h mah? Tui-jip ko͘-tâ ê chháu mah? 26 In-ūi Lí kì-chài kan-khó͘ ê sū lâi pān góa; Koh hō͘ góa tam-tng siàu-liân ê sî ê chōe-kòa. 27 Lí ēng kha-khàu khàu góa ê kha, tì-ì khòaⁿ góa it-chhè ê lō͘; Lí kā góa ê kha-tóe u̍ih-tiāⁿ kài-hān. 28 Góa beh siū pāi-hoāi, chhin-chhiūⁿ chhàu-nōa ê mi̍h, Chhin-chhiūⁿ tio̍h chiù-thâng ê saⁿ.
1 Tùi婦人人所生ê人日子短少，有chōe-chōe煩惱。 2 伊出親像花，續謝去，伊走去親像影，也無停teh。 3 親像chit號ê人，你kiám開你ê目睭看伊ah？Koh chhōa我受你ê審判？ 4 Chī-chūi能hō͘清氣ê tùi無清氣ê出來？無一个能。 5 伊ê日子既然受限定，伊ê月ê數額在tī你；你也設伊ê界限，hō͘伊bōe能pôaⁿ過； 6 就求你目睭oa̍t-tńg無看伊，hō͘伊能安得，親像chhiàⁿ工人做完伊ê工。 7 因為樹若剉起來，iáu-kú有ǹg望koh puh-íⁿ；軟ê枝發無soah。 8 雖然伊ê根tī地裡真老，伊ê叢也死tī土裡； 9 到得tio̍h水潤澤就會koh發íⁿ，也親像栽種ê物發枝。 10 總是人死，就倒直直，氣一下斷，人tī toh落？ 11 海中ê水beh絕斷，河水beh消無乾去； 12 人也是án-ni，倒落去bōe koh起來，到天無去，也bōe精神；長長睏叫bōe醒。 13 願你khǹg我tī陰間，收我tī隱密ê所在，thèng候你ê受氣soah，kā我定tio̍h日期，來記念我。 14 人死能koh活mah？我就吞忍我勞苦ê日，thèng候我替換ê日到。 15 你一下叫，我就應你；你會欣慕你ê手所做ê。 16 總是taⁿ你算我ê腳步；kiám無鑑察我ê罪過mah？ 17 我ê過失hō͘你封tī袋á內；我ê罪過你縛tiâu-tiâu。 18 山崩就散散去，石頭徙離伊ê本位。 19 水能磨了石頭；大水能沖無地上ê土；你也án-ni絕人ê ǹg望。 20 你永遠khah贏伊，伊就過去；你變換伊ê面貌，來差伊去。 21 伊ê kiáⁿ兒得tio̍h榮光，伊m̄知，in tú-tio̍h降低，伊也m̄知。 22 獨獨伊ê肉身家己teh痛疼，伊ê神魂家己teh憂悶。
1 Tùi hū-jîn-lâng só͘ siⁿ ê lâng ji̍t-chí té-chió, Ū chōe-chōe hoân-ló. 2 I chhut chhin-chhiūⁿ hoe, sòa siā-khì, I cháu-khì chhin-chhiūⁿ iáⁿ, iā bô thêng-teh. 3 Chhin-chhiūⁿ chit-hō ê lâng, Lí kiám khui Lí ê ba̍k-chiu khòaⁿ i ah? Koh chhōa góa siū Lí ê sím-phòaⁿ? 4 Chī-chūi ōe hō͘ chheng-khì-ê tùi bô chheng-khì-ê chhut-lâi? Bô chi̍t-ê ōe. 5 I ê ji̍t-chí kì-jiân siū hān-tiāⁿ, i ê ge̍h ê siàu-gia̍h chāi-tī Lí; Lí iā siat i ê kài-hān, hō͘ i bōe-ōe pôaⁿ-kè; 6 Chiū kiû Lí ba̍k-chiu oa̍t-tńg bô khòaⁿ i, hō͘ i ōe an-tit, Chhin-chhiūⁿ chhiàⁿ-kang lâng chòe-oân i ê kang. 7 In-ūi chhiū nā chhò--khí-lâi, iáu-kú ū ǹg-bāng koh puh-íⁿ; Nńg ê ki hoat bô soah. 8 Sui-jiân i ê kun tī tōe--nih chin lāu, I ê châng iā sí tī thô͘--nih; 9 Kàu tit-tio̍h chúi lūn-te̍k chiū ōe koh hoat-íⁿ, Iā chhin-chhiūⁿ chai-chèng ê mi̍h hoat-ki. 10 Chóng-sī lâng sí, chiū tó ti̍t-ti̍t, Khùi chi̍t-ē tn̄g, lâng tī toh-lo̍h? 11 Hái-tiong ê chúi beh choa̍t-tn̄g, Hô-chúi beh siau-bô ta--khì; 12 Lâng iā-sī án-ni, tó-lo̍h-khì bōe koh khí-lâi, Kàu thiⁿ bô--khì, iā bōe cheng-sîn; Tn̂g-tn̂g khùn kiò bōe chhíⁿ. 13 Goān Lí khǹg góa tī im-kan, Siu góa tī ún-ba̍t ê só͘-chāi, thèng-hāu Lí ê siū-khì soah, Kā góa tiāⁿ-tio̍h ji̍t-kî, lâi kì-liām góa. 14 Lâng sí ōe koh-oa̍h mah? Góa chiū thun-lún góa lô-khó͘ ê ji̍t, Thèng-hāu góa thòe-ōaⁿ ê ji̍t kàu. 15 Lí chi̍t-ē kiò, góa chiū ìn Lí; Lí ōe him-bō͘ Lí ê chhiú só͘-chòe-ê. 16 Chóng-sī taⁿ Lí sǹg góa ê kha-pō͘; Kiám bô kàm-chhat góa ê chōe-kòa mah? 17 Góa ê kè-sit hō͘ Lí hong tī tē-á-lāi; Góa ê chōe-kòa Lí pa̍k tiâu-tiâu. 18 Soaⁿ pang chiū sòaⁿ-sòaⁿ khì, Chio̍h-thâu sóa-lī i ê pún-ūi. 19 Chúi ōe bôa-liáu chio̍h-thâu; Tōa-chúi ōe chhiong-bô tōe-chiūⁿ ê thô͘; Lí iā án-ni choa̍t lâng ê ǹg-bāng. 20 Lí éng-oán khah-iâⁿ i, i chiū kè-khì; Lí piàn-ōaⁿ i ê bīn-māu, lâi chhe i khì. 21 I ê kiáⁿ-jî tit-tio̍h êng-kng, i m̄-chai, In tú-tio̍h kàng-kē, i iā m̄-chai. 22 To̍k-to̍k i ê jio̍k-sin ka-kī teh thàng-thiàⁿ, I ê sîn-hûn ka-kī teh iu-būn.
1 Thê-bān人Í-lī-hoat應講， 2 智慧ê人kiám beh用空虛ê知識來應，á是用東風充滿伊ê腹肚mah？ 3 伊kiám beh用無利益ê話，kap無路用ê話來辯論mah？ 4 你實在廢無敬畏，tī上帝ê面前阻擋敬虔ê心。 5 因為你ê罪過教示你ê嘴，你揀詭詐ê人ê舌。 6 定你ê罪-ê是你ê嘴，m̄是我；你ê嘴唇干證你ê m̄-tio̍h。 7 你是頭一个出世ê人mah？á是比 chiahê山khah事先受造mah？ 8 上帝秘密ê旨意，你bat聽見mah？智慧kiám是你獨得mah？ 9 有甚麼你知，阮m̄知mah？Á是你明白，阮無明白ah？ 10 阮中間有頭毛白ê，kap年老ê，比你ê老父iáu khah老。 11 上帝ê安慰，以及伊溫和勸你ê話，你看做小khóa mah？ 12 你ê心啥事掠你去？你ê目睭啥事teh gîn？ 13 Chiah hō͘你ê神反對上帝，也hō͘你ê嘴講hiahê話。 14 世間人是甚麼，能算做清氣ah？婦人人所生ê是甚麼，能算做公義mah？ 15 看ah，上帝無信任伊ê聖ê；chiahê天tī伊面前也無清氣。 16 何況可惡腐敗ê人，lim罪惡親像lim水ê ah？ 17 我beh指示你，你tio̍h聽我；我beh講起所看見ê。 18 (就是智慧ê人tùi列祖所傳來，也無隱密ê。 19 Chitê地獨獨賞賜in；也無外人tùi in中間經過。) 20 Pháiⁿ人一生ê日子是痛苦，就是為強暴ê人所定tio̍h ê年額。 21 Thang驚ê聲常常tī伊耳孔；tī平安ê時，毀滅ê beh到伊hia。 22 伊m̄信能tùi烏暗tńg來；伊hō͘刀劍thèng候伊。 23 伊四界liû討食，講，toh落有ah？伊知有烏暗ê日便便teh thèng候伊。 24 患難困苦hō͘伊驚惶，koh贏伊；親像君王備辦出陣一樣。 25 因為伊伸手攻擊上帝，用驕傲抗拒全能ê。 26 伊用硬ê頷頸，厚ê藤牌，走來抵敵全能ê。 27 因為伊ê面真肥，伊ê腰肥到有lâ。 28 伊khiā起tī荒廢ê城，無人khiā起ê厝，就是得beh變做土堆ê。 29 伊bōe得tio̍h好額，財物bōe長長tī-teh；in ê土產也bōe生湠tī地裡。 30 伊bōe脫離烏暗；火燄beh燒乾伊ê枝，伊beh tùi上帝嘴內ê氣來無去。 31 伊m̄-thang óa靠虛假，來家己騙；因為虛假beh成做伊ê報應。 32 伊ê日期未到ê事先，chitê tāi-chì beh成；伊ê枝bōe青翠。 33 伊beh親像葡萄樹，伊ê粒未熟就lak，koh親像橄欖樹lak伊ê花。 34 無虔誠ê類的確無生湠，pò͘賂ê ê布棚，beh hō͘火燒去。 35 In懷孕殘害，生出罪孽，腹內所備辦ê是詭詐。
1 Thê-bān lâng Í-lī-hoat ìn kóng, 2 Tì-hūi ê lâng kiám beh ēng khang-hu ê tì-sek lâi ìn, Á-sī ēng tang-hong chhiong-móa i ê pak-tó͘ mah? 3 I kiám beh ēng bô lī-ek ê ōe, Kap bô lō͘-ēng ê ōe lâi piān-lūn mah? 4 Lí si̍t-chāi hòe-bô kèng-ùi, Tī Siōng-tè ê bīn-chêng chó͘-tòng kèng-khiân ê sim. 5 In-ūi lí ê chōe-kòa kà-sī lí ê chhùi, Lí kéng khúi-chà ê lâng ê chi̍h. 6 Tēng lí ê chōe--ê sī lí ê chhùi, m̄-sī góa; Lí ê chhùi-tûn kan-chèng lí ê m̄-tio̍h. 7 Lí sī thâu-chi̍t-ê chhut-sì ê lâng mah? Á-sī pí chiah ê soaⁿ khah tāi-seng siū-chō mah? 8 Siōng-tè pì-ba̍t ê chí-ì, lí bat thiaⁿ-kìⁿ mah? Tì-hūi kiám sī lí to̍k tit mah? 9 Ū sím-mi̍h lí chai, goán m̄-chai mah? Á-sī lí bêng-pe̍k, goán bô bêng-pe̍k ah? 10 Goán tiong-kan ū thâu-mn̂g pe̍h ê, kap nî-lāu ê, Pí lí ê lāu-pē iáu khah lāu. 11 Siōng-tè ê an-ùi, í-ki̍p I un-hô khǹg lí ê ōe, Lí khòaⁿ-chòe sió-khóa mah? 12 Lí ê sim siáⁿ-sū lia̍h lí khì? Lí ê ba̍k-chiu siáⁿ-sū teh gîn? 13 Chiah hō͘ lí ê sîn hoán-tùi Siōng-tè, Iā hō͘ lí ê chhùi kóng hiah ê ōe. 14 Sè-kan lâng sī sím-mi̍h, ōe sǹg-chòe chheng-khì ah? Hū-jîn-lâng só͘-siⁿ-ê sī sím-mi̍h, ōe sǹg-chòe kong-gī mah? 15 Khòaⁿ ah, Siōng-tè bô sìn-jīm I ê sèng-ê; Chiah ê thiⁿ tī I bīn-chêng iā bô chheng-khì. 16 Hô-hòng khó-ò͘ⁿ hú-pāi ê lâng, Lim chōe-ok chhin-chhiūⁿ lim-chúi-ê ah? 17 Góa beh chí-sī lí, lí tio̍h thiaⁿ góa; Góa beh kóng-khí só͘ khòaⁿ-kìⁿ ê. 18 (Chiū-sī tì-hūi ê lâng tùi lia̍t-chó͘ só͘ thoân lâi, Iā bô ún-ba̍t ê. 19 Chit ê tōe to̍k-to̍k siúⁿ-sù in; Iā bô gōa-lâng tùi in tiong-kan keng-kè.) 20 Pháiⁿ-lâng it-seng ê ji̍t-chí sī thòng-khó͘, Chiū-sī ūi kiông-pō ê lâng só͘ tiāⁿ-tio̍h ê nî-gia̍h. 21 Thang kiaⁿ ê siaⁿ siông-siông tī i hī-khang; Tī pêng-an ê sî, húi-bia̍t--ê beh kàu i hia. 22 I m̄-sìn ōe tùi o͘-àm tńg--lâi; I hō͘ to-kiàm thèng-hāu i. 23 I sì-kòe liû thó chia̍h, kóng, Toh-lo̍h ū ah? I chai ū o͘-àm ê ji̍t piān-piān teh thèng-hāu i. 24 Hoān-lān khùn-khó͘ hō͘ i kiaⁿ-hiâⁿ, koh iâⁿ i; Chhin-chhiūⁿ kun-ông pī-pān chhut tīn chi̍t-iūⁿ. 25 In-ūi i chhun-chhiú kong-kek Siōng-tè, Ēng kiau-ngō͘ khòng-kū Choân-lêng--ê. 26 I ēng ngī ê ām-kún, kāu ê tîn-pâi, Cháu-lâi tí-te̍k Choân-lêng--ê. 27 In-ūi i ê bīn chin pûi, I ê io pûi kàu ū lâ. 28 I khiā-khí tī hong-hòe ê siâⁿ, Bô lâng khiā-khí ê chhù, Chiū-sī tit-beh piàn-chòe thô͘-tui ê. 29 I bōe tit-tio̍h hó-gia̍h, châi-bu̍t bōe tn̂g-tn̂g tī-teh; In ê thó͘-sán iā bōe siⁿ-thòaⁿ tī tōe--nih. 30 I bōe thoat-lī o͘-àm; Hé-iām beh sio-ta i ê ki, I beh tùi Siōng-tè chhùi-lāi ê khì lâi bô--khì. 31 I m̄-thang óa-khò hu-ké, lâi ka-kī phiàn; In-ūi hu-ké beh chiâⁿ-chòe i ê pò-èng. 32 I ê ji̍t-kî bē kàu ê tāi-seng, chit ê tāi-chì beh chiâⁿ; I ê ki bōe chhiⁿ-chhùi. 33 I beh chhin-chhiūⁿ phû-tô-chhiū, i ê lia̍p bē se̍k chiū lak, Koh chhin-chhiūⁿ kaⁿ-ná-chhiū lak i ê hoe. 34 Bô khiân-sêng ê lūi tek-khak bô siⁿ-thòaⁿ, Pò͘-lō͘--ê ê pò͘-pîⁿ, beh hō͘ hé sio--khì. 35 In hoâi-īn chân-hāi, siⁿ-chhut chōe-gia̍t, Pak-lāi só͘ pī-pān-ê sī khúi-chà.
1 約伯應講， 2 Chit號ê話，我有聽見chōe-chōe lah；lín ê安慰lóng是hō͘人倒艱苦。 3 Chit號荒唐ê話，有窮盡mah？有甚麼激動你來應mah？ 4 我也能講親像lín chit號ê話；lín若tiàm-tī我ê境遇，我也能tàu kui-kōaⁿ ê話來攻擊lín；koh能tùi lín搖我ê頭。 5 總是我會用嘴hō͘ lín堅固；用嘴唇ê安慰hō͘ lín減輕。 6 我若講話，我ê憂悶猶原無減輕；我若靜靜，就憂悶會離開我mah？ 7 總是taⁿ伊hō͘我困苦；你hō͘我ê同伴離開我。 8 你有掠tio̍h我，是thang做干證，我ê消瘦起來攻擊我；當我ê面前做干證。 9 伊受氣，拆裂我，窘迫我，伊對我咬齒；我ê對敵目睭金金gîn我。 10 In對我開in ê嘴，Siàn我ê嘴phóe來凌辱我；in聚集來攻擊我。 11 上帝將我交hō͘不義ê人，將我hiat tī pháiⁿ人ê手。 12 我安然ê時，伊kā我at折，Ni̍h我ê頷頸，kā我siak碎碎；koh chhāi我做伊ê箭靶。 13 伊ê箭四面圍我，破裂我ê臟腑；也無寬恕，將我ê膽piàⁿ tī地裡。 14 伊phah我，phah了koh phah；親像勇士走-來攻擊我。 15 我thīⁿ麻布tī我ê皮膚，將我ê角tàm落土。 16 我ê面因為流目屎就變紅；tī我ê目睭皮有死ê蔭影。 17 總是我ê手無暴虐；我ê祈禱也是清氣。 18 地ah，莫得遮蓋我ê血；願我ê喉叫無停歇ê所在。 19 看ah，taⁿ我ê干證tī天裡，我ê保認ê tī頂面。 20 我ê朋友譏刺我，總是我ê目睭ǹg上帝流目屎。 21 願伊ǹg上帝來替人辯明；也替人ê kiáⁿ tī伊ê厝邊辯明。 22 因為koh kè kúi-nā nî，我beh行hit tiâu去無koh 倒tńg ê路。
1 Iok-pek ìn kóng, 2 Chit-hō ê ōe, góa ū thiaⁿ-kìⁿ chōe-chōe lah; Lín ê an-ùi lóng sī hō͘ lâng tò kan-khó͘. 3 Chit-hō hong-tông ê ōe, ū kiông-chīn mah? Ū sím-mi̍h kek-tōng lí lâi ìn mah? 4 Góa iā ōe kóng chhin-chhiūⁿ lín chit-hō ê ōe; Lín nā tiàm-tī góa ê kéng-gū, góa iā ōe tàu kui-kōaⁿ ê ōe lâi kong-kek lín; Koh ōe tùi lín iô góa ê thâu. 5 Chóng-sī góa ōe ēng chhùi hō͘ lín kian-kò͘; Ēng chhùi-tûn ê an-ùi hō͘ lín kiám-khin. 6 Góa nā kóng-ōe, góa ê iu-būn iû-goân bô kiám-khin; Góa nā chēng-chēng, chiū iu-būn ōe lī-khui góa mah? 7 Chóng-sī taⁿ I hō͘ góa khùn-khó͘; Lí hō͘ góa ê tâng-phōaⁿ lī-khui góa. 8 Lí ū lia̍h-tio̍h góa, sī thang chòe kan-chèng, Góa ê siau-sán khí-lâi kong-kek góa; Tng góa ê bīn-chêng chòe kan-chèng. 9 I siū-khì, thiah-li̍h góa, khún-pek góa, I tùi góa kā-khí; Góa ê tùi-te̍k ba̍k-chiu kim-kim gîn góa. 10 In tùi góa khui in ê chhùi, Siàn góa ê chhùi-phóe lâi lêng-jio̍k góa; In chū-chi̍p lâi kong-kek góa. 11 Siōng-tè chiong góa kau-hō͘ put-gī ê lâng, Chiong góa hiat tī pháiⁿ-lâng ê chhiú. 12 Góa an-jiân ê sî, I kā góa at-chi̍h, Ni̍h góa ê ām-kún, kā góa siak chhùi-chhùi; Koh chhāi góa chòe I ê chìⁿ-pé. 13 I ê chìⁿ sì-bīn ûi góa, phòa-li̍h góa ê chōng-hú; Iā bô khoan-sù, chiong góa ê táⁿ piàⁿ tī tōe--nih. 14 I phah góa, phah-liáu koh phah; Chhin-chhiūⁿ ióng-sū cháu-lâi kong-kek góa. 15 Góa thīⁿ môa-pò͘ tī góa ê phê-hu, Chiong góa ê kak tàm-lo̍h thô͘. 16 Góa ê bīn in-ūi lâu ba̍k-sái chiū piàn âng; Tī góa ê ba̍k-chiu-phê ū sí ê ìm-ńg. 17 Chóng-sī góa ê chhiú bô pō-gio̍k; Góa ê kî-tó iā sī chheng-khì. 18 Tōe ah, bo̍h-tit jia-khàm góa ê huih; goān góa ê âu-kiò bô thêng-hioh ê só͘-chāi. 19 Khòaⁿ ah, taⁿ góa ê kan-chèng tī thiⁿ--nih, Góa ê pó-jīn-ê tī téng-bīn. 20 Góa ê pêng-iú ki-chhì góa, Chóng-sī góa ê ba̍k-chiu ǹg Siōng-tè lâu ba̍k-sái. 21 Goān I ǹg Siōng-tè lâi thòe lâng piān-bêng; Iā thòe lâng ê kiáⁿ tī i ê chhù-piⁿ piān-bêng. 22 In-ūi koh kè kúi-nā nî, Góa beh kiâⁿ hit tiâu khì bô koh tò-tńg ê lō͘.
1 我ê khùi絕lah，我ê日子滅盡lah；我ê墳墓便lah。 2 實在有譏刺我ê tī我chia；我ê目睭常常看見in 刺激我ê事。 3 願你用準當hō͘我，kā我做保認tī你ê面前，有是誰肯kap我頓手？ 4 因為你遮蓋in ê心，hō͘ in無明理，所以你無beh hō͘ in升高。 5 人交付伊ê朋友去hō͘人搶奪，伊ê kiáⁿ ê目睭beh失明。 6 我成做百姓中ê笑談；我hō͘人nōa phùi到面裡。 7 我ê目睭因為憂悶來煙暈(ian-n̄g)，我ê百體lóng親像影。 8 因為án-ni，正直ê人beh gông-ngia̍h，無罪ê人beh激勵家己來攻擊無敬虔ê人。 9 義ê人也beh堅守伊所行ê路，手清氣ê人beh ná加添伊ê氣力。 10 總是lín眾人請lín koh來，因為lín中間我chhē無一个智慧ê人。 11 我ê日子已經過身，我ê計畫，我ê心所想-ê，已經斷絕。 12 In掠暝做日，講，光近tī烏暗。 13 我若ǹg望陰間做我ê厝，我若鋪眠床tī烏暗中； 14 我若對朽爛講，你是我ê老父，對蟲講，你是我ê老母、我ê姊妹； 15 Án-ni我ê ǹg望tī toh落？我ê ǹg望是誰能看見ah？ 16 到做一下安歇tī土裡ê時，這ǹg望beh落到陰間ê門閂(chhòaⁿ)hia。
1 Góa ê khùi choa̍t lah, góa ê ji̍t-chí bia̍t-chīn lah; Góa ê hûn-bōng piān lah. 2 Si̍t-chāi ū ki-chhì góa-ê tī góa chia; Góa ê ba̍k-chiu siông-siông khòaⁿ-kìⁿ in chhì-kek góa ê sū. 3 Goān Lí ēng chún-tǹg hō͘ góa, kā góa chòe pó-jīn tī Lí ê bīn-chêng, Ū chī-chūi khéng kap góa tùn-chhiú? 4 In-ūi Lí jia-khàm in ê sim, hō͘ in bô bêng-lí, Só͘-í Lí bô beh hō͘ in seng-koâiⁿ. 5 Lâng kau-hù i ê pêng-iú khì hō͘ lâng chhiúⁿ-toa̍t, I ê kiáⁿ ê ba̍k-chiu beh sit-bêng. 6 Góa chiâⁿ-chòe peh-sìⁿ-tiong ê chhiàu-tâm; Góa hō͘ lâng nōa phùi kàu bīn--nih. 7 Góa ê ba̍k-chiu in-ūi iu-būn lâi ian-n̄g, Góa ê pah-thé lóng chhin-chhiūⁿ iáⁿ. 8 In-ūi án-ni chèng-ti̍t ê lâng beh gông-ngia̍h, Bô-chōe ê lâng beh kek-lē ka-kī lâi kong-kek bô kèng-khiân ê lâng. 9 Gī ê lâng iā beh kian-siú i só͘ kiâⁿ ê lō͘, Chhiú chheng-khì ê lâng beh ná ke-thiⁿ i ê khùi-la̍t. 10 Chóng-sī lín chèng-lâng chhiáⁿ lín koh lâi, In-ūi lín tiong-kan góa chhē bô chi̍t-ê tì-hūi ê lâng. 11 Góa ê ji̍t-chí í-keng kè-sin, góa ê kè-e̍k, Góa ê sim só͘-siūⁿ-ê, í-keng toān-choa̍t. 12 In lia̍h mî chòe ji̍t, kóng, Kng kūn tī o͘-àm. 13 Góa nā ǹg-bāng im-kan chòe góa ê chhù, Góa nā pho͘ bîn-chhn̂g tī o͘-àm tiong; 14 Góa nā tùi hiú-nōa kóng, Lí sī góa ê lāu-pē, Tùi thâng kóng, Lí sī góa ê lāu-bú góa ê chí-bē; 15 Án-ni góa ê ǹg-bāng tī toh-lo̍h? Góa ê ǹg-bāng chī-chūi ōe khòaⁿ-kìⁿ ah? 16 Kàu chòe-chi̍t-ē an-hioh tī thô͘--nih ê sî, Che ǹg-bāng beh lo̍h-kàu im-kan ê mn̂g-chhòaⁿ hia.
1 Su-a人Pí-le̍k-ta̍t應講， 2 你teh chhē話縫beh到甚麼時ah？你tio̍h 斟酌想，然後阮chiah講。 3 阮啥事hō͘你掠做cheng-siⁿ，hō͘你看做lāu-siông ah？ 4 你chitê大受氣拆裂家己ê，地kiám會為tio̍h你來受棄sak mah？石磐kiám會徙開原位mah？ 5 Pháiⁿ人ê光實在beh hoa，伊ê火燄beh無光。 6 伊布棚內ê光beh變做烏暗，伊頂面ê燈也beh hoa去。 7 伊giám硬ê腳步，beh tú-tio̍h阻礙，伊ê計謀beh絆(pòaⁿ)倒伊家己。 8 因為伊ê腳害伊家己入陷坑，伊行tī活tauh ê頂面。 9 環套beh纏tio̍h伊ê腳後tiⁿ，羅網beh掠tio̍h伊。 10 活銬為tio̍h伊埋 tī土裡，絆索為tio̍h伊張tī路裡。 11 四圍有驚惶，beh hō͘伊驚，koh追趕伊ê腳後tiⁿ。 12 伊ê氣力beh衰微，災厄便便tī伊ê身邊。 13 伊beh吞伊ê皮肉。Pháiⁿ症頭beh吞食伊ê肢體。 14 伊beh tī所óa靠ê布棚受拔出來，帶到thang驚ê王hia。 15 無屬伊ê beh khiā起tī伊ê布棚；beh有硫磺掖tī伊所khiā起ê所在。 16 Tī下底伊ê根頭beh枯焦，tī頂面伊ê枝beh剪除。 17 伊ê記念beh滅無tī地上，伊ê名字也無留tī街市裡。 18 伊beh tùi光明中受趕到烏暗；koh beh受趕出世界。 19 Tī伊ê百姓中beh無kiáⁿ無孫，tī伊寄腳ê所在，也無留一人tī-teh。 20 為tio̍h伊ê日子，後來ê人gông-ngia̍h，親像前ê人ê驚惶。 21 不義ê人ê家，實在是án-ni，這就是m̄-bat上帝ê人ê所在。
1 Su-a lâng Pí-le̍k-ta̍t ìn kóng, 2 Lí teh chhē ōe-phāng beh kàu sím-mi̍h sî ah? Lí tio̍h chim-chiok siūⁿ, jiân-āu goán chiah kóng. 3 Goán siáⁿ-sū hō͘ lí lia̍h-chòe cheng-siⁿ, Hō͘ lí khòaⁿ-chòe lāu-siông ah? 4 Lí chit-ê tōa siū-khì thiah-li̍h ka-kī ê, Tōe kiám ōe ūi-tio̍h lí lâi siū khì-sak mah? Chio̍h-pôaⁿ kiám ōe sóa-khui goân-ūi mah? 5 Pháiⁿ-lâng ê kng si̍t-chāi beh hoa, I ê hé-iām beh bô kng. 6 I pò͘-pîⁿ-lāi ê kng beh pìⁿ-chòe o͘-àm, I téng-bīn ê teng iā beh hoa--khì. 7 I giám-ngī ê kha-pō͘, beh tú-tio̍h chó͘-gāi, I ê kè-bô͘ beh pòaⁿ-tó i ka-kī. 8 In-ūi i ê kha hāi i ka-kī ji̍p hām-khiⁿ, I kiâⁿ tī oa̍h-tauh ê téng-bīn. 9 Khoân-thò beh tîⁿ-tio̍h i ê kha-āu-tiⁿ, Lô-bāng beh lia̍h-tio̍h i. 10 Oa̍h-khàu ūi-tio̍h i tâi tī thô͘--nih, Pòaⁿ-soh ūi-tio̍h i tiuⁿ tī lō͘-nih. 11 Sì-ûi ū kiaⁿ-hiâⁿ, beh hō͘ i kiaⁿ, Koh tui-kóaⁿ i ê kha-āu-tiⁿ. 12 I ê khùi-la̍t beh soe-bî, Chai-ē piān-piān tī i ê sin-piⁿ. 13 I beh thun i ê phê-bah. Pháiⁿ chèng-thâu beh thun-chia̍h i ê chi-thé. 14 I beh tī só͘ óa-khò ê pò͘-pîⁿ siū pu̍ih--chhut-lâi, Tòa kàu thang kiaⁿ ê ông hia. 15 Bô sio̍k-i--ê beh khiā-khí tī i ê pò͘-pîⁿ; Beh ū jiû-n̂g iā tī i só͘ khiā-khí ê só͘-chāi. 16 Tī ē-tóe i ê kun-thâu beh ko͘-tâ, Tī téng-bīn i ê ki beh chián-tû. 17 I ê kì-liām beh bia̍t-bô tī tōe-chiūⁿ, I ê miâ-jī iā bô lâu tī koe-chhī--nih. 18 I beh tùi kng-bêng-tiong siū kóaⁿ kàu o͘-àm; Koh beh siū kóaⁿ-chhut sè-kài. 19 Tī i ê peh-sìⁿ-tiong beh bô-kiáⁿ bô-sun, Tī i kià-kha ê só͘-chāi, iā bô lâu chi̍t-lâng tī-teh. 20 Ūi-tio̍h i ê ji̍t-chí, āu-lâi ê lâng gông-ngia̍h, Chhin-chhiūⁿ chêng ê lâng ê kiaⁿ-hiâⁿ. 21 Put-gī ê lâng ê ke, si̍t-chāi sī án-ni, Che chiū-sī m̄-bat Siōng-tè ê lâng ê só͘-chāi.
1 約伯應講， 2 Lín hō͘我ê心憂苦，用話傷害我，beh到tī時ah？ 3 Lín這十pái凌辱我，lín pháiⁿ款待我，也無家己見笑。 4 我若果然有過失，這過失是在tī我家己。 5 Lín果然beh對我誇口大，koh用我ê凌辱責備我； 6 就tio̍h知這是上帝枉屈我，用伊ê羅網圍我。 7 看ah，我因為冤枉來喉叫，也無得tio̍h聽，我哮救，也無得tio̍h公斷。 8 伊圍遮我ê路，hō͘我bōe得過去，koh hō͘我ê路徑烏暗。 9 伊thǹg去我ê榮光，liù去我ê頭殼頂ê冕旒。 10 伊tī四圍毀壞我，我就無去；我ê ǹg望拔起來，親像拔樹。 11 伊ê受氣烈烈攻擊我，伊掠我做伊ê對敵ê一个。 12 伊ê軍兵一齊來，造in ê路來攻擊我，紮營tī我ê布棚ê四圍。 13 伊hō͘我ê兄弟隔開遠遠，相識ê人kap我生疏。 14 我ê親人kap我斷絕，我親密ê朋友lóng bōe記得我。 15 寄腳tī我厝內ê人，以及我ê女婢，lóng看我做外人；in看我做外邦人。 16 我叫我ê奴僕，伊m̄應，我tio̍h親嘴求伊。 17 我嘴ê氣味hō͘我ê bó͘厭賤；kap我siâng腹ê也厭賤我ê臭味。 18 連gín-ná也看輕我；我若起來，in lóng譏刺我。 19 我親密ê朋友lóng厭賤我；我平日所疼ê人，對我變面。 20 我ê皮mo͘h tī我ê骨；我只有chhun嘴齒hōaⁿ。 21 我ê朋友ah，lín tio̍h可憐我，可憐我；因為上帝ê手摸tio̍h我。 22 Lín啥事親像上帝窘迫我，掠我ê肉做無thang飽足mah？ 23 Taⁿ願將我ê話寫起來，koh記tī冊裡； 24 用鐵鏨，用鉛刻tiâu tī石裡；hō͘伊永永tī-teh。 25 因為我知救贖我ê是活ê；日後伊beh khiā tī土ê頂面； 26 我chitê皮敗壞了後，我beh tī肉體ê外面得tio̍h見上帝。 27 我本身beh看見伊是為我ê，我親目看見伊m̄是外人；我ê心腸tī我ê內面到熔去。 28 Lín若講，阮beh怎樣窘迫伊！tāi-chì ê根本在tī我； 29 Lín tio̍h驚刀劍，因為受氣就有刀劍ê刑罰，hō͘ lín知有審判。
1 Iok-pek ìn kóng, 2 Lín hō͘ góa ê sim iu-khó͘, Ēng ōe siong-hāi góa, beh kàu tī-sî ah? 3 Lín che cha̍p-pái lêng-jio̍k góa, Lín pháiⁿ khoán-thāi góa, iā bô ka-kī kiàn-siàu. 4 Góa nā kó-jiân ū kè-sit, Che kè-sit sī chāi-tī góa ka-kī. 5 Lín kó-jiân beh tùi góa khoa-kháu tōa, Koh ēng góa ê lêng-jio̍k chek-pī góa; 6 Chiū tio̍h chai che sī Siōng-tè óng-khut góa, Ēng I ê lô-bāng ûi góa. 7 Khòaⁿ ah, góa in-ūi oan-óng lâi âu-kiò, iā bô tit-tio̍h thiaⁿ, Góa háu-kiù, iā bô tit-tio̍h kong-toàn. 8 I ûi-cha̍h góa ê lō͘, hō͘ góa bōe-tit kè-khì, Koh hō͘ góa ê lō͘-kèng o͘-àm. 9 I thǹg--khì góa ê êng-kng, Liù--khì góa ê thâu-khak-téng ê bián-liû. 10 I tī sì-ûi húi-hoāi góa, góa chiū bô--khì; Góa ê ǹg-bāng pu̍ih--khí-lâi, chhin-chhiūⁿ pu̍ih chhiū. 11 I ê siū-khì lia̍t-lia̍t kong-kek góa, I lia̍h góa chòe I ê tùi-te̍k ê chi̍t-ê. 12 I ê kun-peng chi̍t-chôe lâi, chō in ê lō͘ lâi kong-kek góa, Chat-iâⁿ tī góa ê pò͘-pîⁿ ê sì-ûi. 13 I hō͘ góa ê hiaⁿ-tī keh-khui hn̄g-hn̄g, Saⁿ-bat ê lâng kap góa chhiⁿ-so͘. 14 Góa ê chhin-lâng kap góa toān-choa̍t, Góa chhin-bi̍t ê pêng-iú lóng bōe kì-tit góa. 15 Kià-kha tī góa chhù-lāi ê lâng, í-ki̍p góa ê lú-pī, lóng khòaⁿ góa chòe gōa-lâng; In khòaⁿ góa chòe gōa-pang lâng. 16 Góa kiò góa ê lô͘-po̍k, i m̄ ìn, Góa tio̍h chhin-chhùi kiû i. 17 Góa chhùi ê khì-bī hō͘ góa ê bó͘ iàm-chiān; Kap góa siâng-pak-ê iā iàm-chiān góa ê chhàu-bī. 18 Liân gín-ná iā khòaⁿ-khin góa; góa nā khí-lâi, in lóng ki-chhì góa. 19 Góa chhin-bi̍t ê pêng-iú lóng iàm-chiān góa; Góa pêng-ji̍t só͘ thiàⁿ ê lâng, tùi góa pìⁿ-bīn. 20 Góa ê phê mo͘h tī góa ê kut; Góa chí-ū chhun chhùi-khí-hōaⁿ. 21 Góa ê pêng-iú ah, lín tio̍h khó-lîn góa, khó-lîn góa; In-ūi Siōng-tè ê chhiú bong--tio̍h góa. 22 Lín siáⁿ-sū chhin-chhiūⁿ Siōng-tè khún-pek góa, Lia̍h góa ê bah chòe bô thang pá-chiok mah? 23 Taⁿ goān chiong góa ê ōe siá--khí-lâi, Koh kì tī chheh--nih; 24 Ēng thih-chām ēng iân khek-tiâu tī chio̍h--nih; Hō͘ i éng-éng tī-teh. 25 In-ūi góa chai kiù-sio̍k góa--ê sī oa̍h-ê; Ji̍t-āu i beh khiā tī thô͘ ê téng-bīn; 26 Góa chit ê phê pāi-hoāi liáu-āu, Góa beh tī jio̍k-thé ê gōa-bīn tit-tio̍h kìⁿ Siōng-tè. 27 Góa pún-sin beh khòaⁿ-kìⁿ I sī ūi-góa--ê, Góa chhin-ba̍k khòaⁿ-kìⁿ I m̄-sī gōa-lâng; Góa ê sim-tn̂g tī góa ê lāi-bīn kàu iûⁿ--khì. 28 Lín nā kóng, Goán beh cháiⁿ-iūⁿ khún-pek i! Tāi-chì ê kun-pún chāi-tī góa;" 29 Lín tio̍h kiaⁿ to-kiàm, in-ūi siū-khì chiū ū to-kiàm ê hêng-hoa̍t, Hō͘ lín chai ū sím-phòaⁿ.
1 Ná-má人Só-hoat應講， 2 我ê心內著急，所以我ê心思逼我tio̍h應。 3 我聽見hitê凌辱我ê責備，我智慧ê心教我應。 4 你kiám m̄知tùi古早，tùi有人tī世間以來； 5 Pháiⁿ人ê大悅無久長，無敬虔ê人ê歡喜目nih久nā-tiāⁿ？ 6 伊ê高雖然抵天，伊ê頭殼雖然到雲裡； 7 伊到尾beh滅無，親像伊ê糞一樣；平素看見伊ê人beh講，伊tī toh落ah？ 8 伊beh親像眠夢飛去，無thang chhē-tio̍h；伊beh受趕走，親像暝時ê異象。 9 平素看見伊ê，伊ê目睭bōe koh看見伊；伊ê本所在也無koh看見伊。 10 伊ê kiáⁿ兒beh對sòng-hiong人求恩，伊ê手beh還貨財。 11 伊ê骨滿滿有少年ê力；總是beh kap伊相kap倒tī土裡。 12 罪惡tī伊ê嘴雖然甜，雖然伊khǹg tī伊ê舌下； 13 雖然保惜，m̄肯放sak，定定kâm tī伊ê嘴； 14 伊ê食物到伊ê腸á就變，成做毒蛇ê膽tī伊ê內面。 15 伊吞食財寶，beh koh吐出；上帝beh對伊ê腹肚jîm出來。 16 伊beh suh毒蛇ê毒；蛇ê舌也beh害死伊。 17 伊bōe得tio̍h看見江河，流蜜kap奶ê溪。 18 伊tio̍h磨所得tio̍h-ê，tio̍h 還人，無thang食落去，bōe會照所交易ê財物來歡喜。 19 因為伊壓制sòng-hiong人，koh棄sak伊；強佔人ê厝，也bōe會起造。 20 因為伊ê心內bē-bat安靜，伊所歡喜-ê lóng bōe保全。 21 無一件無hō͘伊吞落去，所以伊ê 福祿bōe久長。 22 當伊好額充足ê時，beh到狹toe̍h ê所在；艱苦ê人lóng beh出手phah伊。 23 伊ê腹肚beh飽ê時，上帝beh降猛烈ê受氣tī伊；伊teh食ê時，beh降受氣tī伊ê頂面。 24 伊閃離鐵ê器具，銅ê弓beh射透伊。 25 伊一下拔伊，就對伊ê身軀出來，光nà-nà ê箭尾beh對伊ê膽出；驚惶beh到tī伊。 26 一切ê烏暗收khǹg為tio̍h伊ê財寶，人所無pûn ê火beh燒滅伊；koh beh燒毀留tī伊ê布棚ê。 27 天beh顯明伊ê罪惡，地beh起來攻擊伊。 28 伊ê家伙beh無去，lóng beh消滅tī上帝受氣ê日。 29 這就是pháiⁿ人tùi上帝所得ê份額；是上帝kā伊定tio̍h ê產業。
1 Ná-má lâng Só-hoat ìn kóng, 2 Góa ê sim-lāi tio̍h-kip, Só͘-í góa ê sim-su pek góa tio̍h ìn. 3 Góa thiaⁿ-kìⁿ hit ê lêng-jio̍k Góa ê chek-pī, Góa tì-hūi ê sim kà góa ìn. 4 Lí kiám m̄-chai tùi kó͘-chá, Tùi ū lâng tī sè-kan í-lâi; 5 Pháiⁿ-lâng ê tāi-ia̍t bô kú-tn̂g, Bô kèng-khiân ê lâng ê hoaⁿ-hí ba̍k-nih-kú nā-tiāⁿ? 6 I ê koâiⁿ sui-jiân tú-thiⁿ, I ê thâu-khak sui-jiân kàu hûn--nih; 7 I kàu-bé beh bia̍t-bô, chhin-chhiūⁿ i ê pùn chi̍t-iūⁿ; Pêng-sò͘ khòaⁿ-kìⁿ i ê lâng beh kóng, I tī toh-lo̍h ah? 8 I beh chhin-chhiūⁿ bîn-bāng pe--khì, bô thang chhē-tio̍h; I beh siū kóaⁿ-cháu, chhin-chhiūⁿ mî--sî ê īⁿ-siōng. 9 Pêng-sò͘ khòaⁿ-kìⁿ i ê, i ê ba̍k-chiu bōe koh khòaⁿ-kìⁿ i; I ê pún só͘-chāi iā bô koh khòaⁿ-kìⁿ i. 10 I ê kiáⁿ-jî beh tùi sòng-hiong lâng kiû-un, I ê chhiú beh hêng hè-châi. 11 I ê kut móa-móa ū siàu-liân ê la̍t; Chóng-sī beh kap i saⁿ-kap tó tī thô͘--nih. 12 Chōe-ok tī i ê chhùi sui-jiân tiⁿ, Sui-jiân i khǹg tī i ê chi̍h-ē; 13 Sui-jiân pó-sioh, m̄-khéng pàng-sak, Tiāⁿ-tiāⁿ kâm tī i ê chhùi; 14 I ê chia̍h-mi̍h kàu i ê tn̂g-á chiū piàn, Chiâⁿ-chòe to̍k-chôa ê táⁿ tī i ê lāi-bīn. 15 I thun-chia̍h châi-pó, beh koh thò͘-chhut; Siōng-tè beh tùi i ê pak-tó͘ jîm--chhut-lâi. 16 I beh suh to̍k-chôa ê to̍k; Chôa ê chi̍h iā beh hāi-sí i. 17 I bōe tit-tio̍h khòaⁿ-kìⁿ kang-hô, Lâu bi̍t kap lin ê khoe. 18 I tio̍h-bôa só͘ tit-tio̍h--ê, tio̍h hêng lâng, bô thang chia̍h--lo̍h-khì, Bōe-ōe chiàu só͘ kau-e̍k ê châi-bu̍t lâi hoaⁿ-hí. 19 In-ūi i ap-chè sòng-hiong lâng, koh khì-sak i; Kiông-chiàm lâng ê chhù, iā bōe-ōe khí-chō. 20 In-ūi i ê sim-lāi bē-bat an-chēng, I só͘ hoaⁿ-hí-ê lóng bōe pó-choân. 21 Bô chi̍t-kiāⁿ bô hō͘ i thun--lo̍h-khì, Só͘-í i ê hok-lo̍k bōe kú-tn̂g. 22 Tng i hó-gia̍h chhiong-chiok ê sî, beh kàu oe̍h-toe̍h ê só͘-chāi; Kan-khó͘ ê lâng lóng beh chhut-chhiú phah i. 23 I ê pak-tó͘ beh pá ê sî, Siōng-tè beh kàng béng-lia̍t ê siū-khì tī i; I teh chia̍h ê sî, beh kàng siū-khì tī i ê téng-bīn. 24 I siám-lī thih ê khì-kū, Tâng ê keng beh siā-thàu i. 25 I chi̍t-ē pu̍ih i, chiū tùi i ê seng-khu chhut-lâi, Kng-nà-nà ê chìⁿ-bé beh tùi i ê táⁿ chhut; Kiaⁿ-hiâⁿ beh kàu tī i. 26 It-chhè ê o͘-àm siu-khǹg ūi-tio̍h i ê châi-pó, Lâng só͘ bô pûn ê hé beh sio-bia̍t i; Koh beh sio-húi lâu tī i ê pò͘-pîⁿ ê. 27 Thiⁿ beh hián-bêng i ê chōe-ok, Tōe beh khí-lâi kong-kek i. 28 I ê ke-hé beh bô--khì, Lóng beh siau-bia̍t tī Siōng-tè siū-khì ê ji̍t. 29 Che chiū-sī pháiⁿ-lâng tùi Siōng-tè só͘ tit ê hūn-gia̍h; Sī Siōng-tè kā i tiāⁿ-tio̍h ê sán-gia̍p.
1 約伯應講， 2 Lín tio̍h致意聽我ê話，用chitê做lín ê安慰。 3 請寬容我，我beh koh講，我講了，kù-chāi你譏刺。 4 論到我，我kiám是對人哀怨？我ê心神怎樣無著急ah？ 5 Lín tio̍h看我來gông-ngia̍h，用手掩嘴。 6 我若想tio̍h，就驚，thong身軀ngia̍uh-ngia̍uh-chhoah。 7 Pháiⁿ人啥事活teh，食長歲壽，勢力強盛ah？ 8 In看見kiáⁿ孫，kap in平平成立；in ê後裔tī in ê目睭前也是án-ni。 9 In ê家眷安然無驚；上帝ê柺也無phah in。 10 In ê牛káng生湠無斷，in ê牛母生kiáⁿ，也無墮胎。 11 In差gín-ná出去，親像羊群，in ê kiáⁿ兒四界tiô跳。 12 In tè lin-long鼓kap琴來唱歌，koh因為品簫ê聲來歡喜。 13 In度過日，事事興通；目nih久落陰間。 14 In對上帝講，tio̍h離開阮，阮m̄ ài bat你ê路。 15 全能ê是是誰，hō͘阮tio̍h服事伊ah？阮祈求伊，有甚麼利益ah？ 16 看ah，in ê福氣m̄是tī in ê手；願pháiⁿ人ê計謀離開我遠遠。 17 Pháiⁿ人ê燈beh hoa，災厄到tī in；上帝ê受氣hō͘ in tú-tio̍h艱苦，有jōa-chōe pái ah？ 18 In親像風前ê草á幼，親像狂風吹去ê粗糠有jōa-chōe pái ah？ 19 Lín講，上帝將伊ê罪惡kā伊ê kiáⁿ積聚teh；我講，m̄值tio̍h報應伊本身hō͘伊家己知； 20 Hō͘伊親目看見家己敗壞，本身lim全能ê ê受氣。 21 伊ê年月半中長絕斷，過世了，伊tī伊ê家有甚麼快樂ah？ 22 上帝審判hiahê tī高位ê，是誰能將知識教示伊ah？ 23 有人到死氣力齊備，滿滿得tio̍h平靜安然。 24 伊ê胸ha̍h真肥，伊ê骨髓潤澤。 25 有人到死，心痛苦，lóng bē-bat試tio̍h福氣。 26 In lóng一樣倒tī土裡，hō͘蟲蓋密。 27 看ah，我知lín ê意思，kap lín冤枉我ê計謀。 28 因為lín講，霸王ê厝tī toh落？pháiⁿ人平時khiā起ê厝tī toh落？ 29 Lín無問過路 ê人mah？Kiám bōe認得in ê證據mah？ 30 就是pháiⁿ人tī災厄ê日得tio̍h留teh，tī受氣ê日得tio̍h脫離。 31 伊所行ê，是誰當面講伊？伊所做ê，是誰報應伊？ 32 總是伊會hō͘人抬到塚山，koh有顧守ê tī伊ê墓。 33 山谷ê土丸伊掠做甜；beh有眾人tè tī伊ê後面，親像tī伊事先ê bōe算得。 34 Lín所應答ê話窮(khêng)真lóng是假，lín怎樣空空安慰我ah？
1 Iok-pek ìn kóng, 2 Lín tio̍h tì-ì thiaⁿ góa ê ōe, Ēng chit-ê chòe lín ê an-ùi. 3 Chhiáⁿ khoan-iông góa, góa beh koh kóng, Góa kóng-liáu, kù-chāi lí ki-chhì. 4 Lūn-kàu góa, góa kiám-sī tùi lâng ai-oàn? Góa ê sim-sîn cháiⁿ-iūⁿ bô tio̍h-kip ah? 5 Lín tio̍h khòaⁿ góa lâi gông-ngia̍h, Ēng chhiú ng-chhùi. 6 Góa nā siūⁿ-tio̍h, chiū kiaⁿ, Thong seng-khu ngia̍uh-ngia̍uh-chhoah. 7 Pháiⁿ-lâng siáⁿ-sū oa̍h-teh, chia̍h tn̂g hè-siū, Sè-le̍k kiông-sēng ah? 8 In khòaⁿ-kìⁿ kiáⁿ-sun, kap in pîⁿ-pîⁿ sêng-li̍p; In ê hō͘-è tī in ê ba̍k-chiu-chêng iā sī án-ni. 9 In ê ke-koàn an-jiân bô kiaⁿ; Siōng-tè ê koáiⁿ iā bô phah in. 10 In ê gû-káng siⁿ-thòaⁿ bô tn̄g, In ê gû-bú siⁿ-kiáⁿ, iā bô tūi-thai. 11 In chhe gín-ná chhut-khì, chhin-chhiūⁿ iûⁿ-kûn, In ê kiáⁿ-jî sì-kòe tiô-thiàu. 12 In tè lin-long-kó͘ kap khîm lâi chhiùⁿ-koa, Koh in-ūi phín-siau ê siaⁿ lâi hoaⁿ-hí. 13 In tō͘ kè ji̍t, sū-sū heng-thong; ba̍k-nih-kú lo̍h im-kan. 14 In tùi Siōng-tè kóng, Tio̍h lī-khui goán, Goán m̄ ài bat Lí ê lō͘. 15 Choân-lêng-ê sī chī-chūi, hō͘ goán tio̍h ho̍k-sāi I ah? Goán kî-kiû I, ū sím-mi̍h lī-ek ah? 16 Khòaⁿ ah, in ê hok-khì m̄-sī tī in ê chhiú; Goān pháiⁿ-lâng ê kè-bô͘ lī-khui góa hn̄g-hn̄g. 17 Pháiⁿ-lâng ê teng beh hoa, chai-ē kàu tī in; Siōng-tè ê siū-khì hō͘ in tú-tio̍h kan-khó͘, ū jōa-chōe pái ah? 18 In chhin-chhiūⁿ hong-chêng ê chháu-á-iù, Chhin-chhiūⁿ kông-hong chhe--khì ê chho͘-khng ū jōa-chōe pái ah? 19 Lín kóng, Siōng-tè chiong i ê chōe-ok kā i ê kiáⁿ chek-chū teh; Góa kóng, M̄-ta̍t-tio̍h pò-èng i pún-sin hō͘ i ka-kī chai; 20 Hō͘ i chhin-ba̍k khòaⁿ-kìⁿ ka-kī pāi-hoāi, Pún-sin lim Choân-lêng-ê ê siū-khì. 21 I ê nî-ge̍h pòaⁿ-tiong-tn̂g choa̍t-tn̄g, Kè-sì-liáu, i tī i ê ke ū sím-mi̍h khoài-lo̍k ah? 22 Siōng-tè sím-phòaⁿ hiah-ê tī koâiⁿ-ūi ê, Chī-chūi ōe chiong tì-sek kà-sī I ah? 23 Ū lâng kàu-sí khùi-la̍t chiâu-pī, Móa-móa tit-tio̍h pêng-chēng an-jiân. 24 I ê heng-ha̍h chin pûi, I ê kut-chhé lūn-te̍k. 25 Ū-lâng kàu-sí, sim thòng-khó͘, Lóng bē-bat chhì-tio̍h hok-khì. 26 In lóng chi̍t-iūⁿ tó tī thô͘--nih, Hō͘ thâng khàm-ba̍t. 27 Khòaⁿ ah, góa chai lín ê ì-sù, Kap lín oan-óng góa ê kè-bô͘. 28 In-ūi lín kóng, Pà-ông ê chhù tī toh-lo̍h? Pháiⁿ-lâng pêng-sî khiā-khí ê chhù tī toh-lo̍h? 29 Lín bô mn̄g kè-lō͘ ê lâng mah? Kiám bōe jīn-tit in ê chèng-kù mah? 30 Chiū-sī pháiⁿ-lâng tī chai-ē ê ji̍t tit-tio̍h lâu-teh, Tī siū-khì ê ji̍t tit-tio̍h thoat-lī. 31 I só͘-kiâⁿ-ê, chī-chūi tng-bīn kóng i? I só͘-chòe-ê, chī-chūi pò-èng i? 32 Chóng-sī i ōe hō͘ lâng kng kàu thióng-soaⁿ, Koh ū kò͘-siú--ê tī i ê bōng. 33 Soaⁿ-kok ê thô͘-oân i lia̍h-chòe tiⁿ; Beh ū chèng-lâng tè tī i ê āu-bīn, Chhin-chhiūⁿ tī i tāi-seng--ê bōe-sǹg-tit. 34 Lín só͘ ìn-tap ê ōe khêng-chin lóng sī ké, Lín cháiⁿ-iūⁿ khang-khang an-ùi góa ah?
1 Thê-bān人Í-lī-hoat應講， 2 人kiám能利益上帝mah？智慧ê人實在是利益家己。 3 你做人公義，kiám hō͘全能ê歡喜mah？你所行完全，kiám會hō͘伊得利mah？ 4 Kiám是因為你敬畏伊，來責備你，審判你mah？ 5 你ê罪惡kiám m̄是大mah？你ê罪過實在無窮盡。 6 你無因端the̍h兄弟ê tǹg-頭；koh thǹg無thang穿ê人ê衫。 7 厭倦ê人，你無用水hō͘ in lim，iau餓ê人，你對in收khǹg食物。 8 有能力ê人得tio̍h土地；體面ê人tiàm tī hit中間。 9 你hō͘寡婦空手tò去，無父ê kiáⁿ ê手骨受at折。 10 所以活tauh四面圍你；驚惶忽然到，攪擾你， 11 á是烏暗hō͘你無thang看見，chōe-chōe水淹密你。 12 上帝kiám m̄是tī天ê高mah？Tio̍h看星辰ê極頭，怎樣hiah高； 13 你就講，上帝知甚麼？伊kiám會看透烏暗來審判mah？ 14 密雲遮蓋伊，hō͘伊bōe看見；伊行tī穹蒼ê頂面。 15 你kiám ài thàn古早ê路，就是pháiⁿ人所行ê mah？ 16 In是未到時受滅去，in ê地基hō͘大水流去。 17 In對上帝講，tio̍h離開阮，koh講，全能ê能kā阮做甚麼ah？ 18 總是伊用好物充滿伊ê厝；願pháiⁿ人ê計謀離開我遠遠。 19 義人beh看見來歡喜；無罪ê人beh恥笑in； 20 講，hiahê起來攻擊阮ê，果然受剪除；in所chhun-ê lóng hō͘火燒去。 21 Taⁿ你tio̍h kap上帝親密，就會得tio̍h平安；án-ni福氣beh臨到你。 22 Taⁿ tio̍h承受伊嘴內ê教示；將伊ê話khǹg tī你ê心。 23 你若歸向全能ê，對你ê布棚內除去不義，你就得tio̍h興起。 24 你tio̍h hiat寶貝tī塵埃裡，hiat O-hui ê金tī溪河石頭ê中間； 25 全能ê就beh做你ê寶貝，做你ê紋銀。 26 你就beh掠全能ê做歡喜，面kia̍h高ǹg上帝。 27 你祈禱伊，伊就聽你，你也beh謝你ê願。 28 你定tio̍h beh做甚麼，hitê tāi-chì的確成；光也beh照你ê路。 29 In降低ê時，你猶原thang講，升高；謙卑ê人上帝beh拯救伊。 30 連有罪ê人上帝也beh救伊；因為你ê手清氣，伊beh得tio̍h救。
1 Thê-bān lâng Í-lī-hoat ìn kóng, 2 Lâng kiám-ōe lī-ek Siōng-tè mah? Tì-hūi ê lâng si̍t-chāi sī lī-ek ka-kī. 3 Lí chòe lâng kong-gī, kiám hō͘ Choân-lêng--ê hoaⁿ-hí mah? Lí só͘ kiâⁿ oân-choân, kiám ōe hō͘ I tek-lī mah? 4 Kiám-sī in-ūi lí kèng-ùi I, Lâi chek-pī lí, sím-phòaⁿ lí mah? 5 Lí ê chōe-ok kiám-m̄-sī tōa mah? Lí ê chōe-kòa si̍t-chāi bô kiông-chīn. 6 Lí bô in-toaⁿ the̍h hiaⁿ-tī ê tǹg-thâu; Koh thǹg bô thang chhēng ê lâng ê saⁿ. 7 Ià-siān ê lâng, lí bô ēng chúi hō͘ in lim, Iau-gō ê lâng, lí tùi in siu-khǹg chia̍h-mi̍h. 8 Ū lêng-le̍k ê lâng tit-tio̍h thó͘-tōe; Thé-biān ê lâng tiàm tī hit tiong-kan. 9 Lí hō͘ kóaⁿ-hū khang-chhiú tò-khì, Bô-pē ê kiáⁿ ê chhiú-kut siū at-chi̍h. 10 Só͘-í oa̍h-tauh sì-bīn ûi lí; Kiaⁿ-hiâⁿ hut-jiân kàu, kiáu-jiáu lí, 11 Á-sī o͘-àm hō͘ lí bô thang khòaⁿ-kìⁿ, Chōe-chōe chúi im-ba̍t lí. 12 Siōng-tè kiám-m̄-sī tī thiⁿ ê koâiⁿ mah? Tio̍h khòaⁿ chhiⁿ-sîn ê ke̍k-thâu, cháiⁿ-iūⁿ hiah-koâiⁿ; 13 Lí chiū kóng, Siōng-tè chai sím-mi̍h? I kiám ōe khòaⁿ-thàu o͘-àm lâi sím-phòaⁿ mah? 14 Ba̍t-hûn jia-khàm I, hō͘ I bōe khòaⁿ-kìⁿ; I kiâⁿ tī kiong-chhong ê téng-bīn. 15 Lí kiám ài thàn kó͘-chá ê lō͘, Chiū-sī pháiⁿ-lâng só͘ kiâⁿ-ê mah? 16 In sī bē kàu-sî siū bia̍t--khì, In ê tōe-ki hō͘ tōa-chúi lâu-khì. 17 In tùi Siōng-tè kóng, Tio̍h lī-khui goán, Koh kóng, Choân-lêng--ê ōe kā goán chòe sím-mi̍h ah? 18 Chóng-sī I ēng hó-mi̍h chhiong-móa i ê chhù; Goān pháiⁿ-lâng ê kè-bô͘ lī-khui góa hn̄g-hn̄g. 19 Gī-lâng beh khòaⁿ-kìⁿ lâi hoaⁿ-hí; Bô-chōe ê lâng beh thí-chhiò in; 20 Kóng, Hiah-ê khí-lâi kong-kek goán ê, kó-jiân siū chián-tû; In só͘ chhun-ê lóng hō͘ hé sio-khì. 21 Taⁿ lí tio̍h kap Siōng-tè chhin-bi̍t, chiū ōe tit-tio̍h pêng-an; Án-ni hok-khì beh lîm-kàu lí. 22 Taⁿ tio̍h sêng-siū I chhùi-lāi ê kà-sī; Chiong I ê ōe khǹg tī lí ê sim. 23 Lí nā kui-ǹg Choân-lêng--ê, tùi lí ê pò͘-pîⁿ-lāi tû-khì put-gī, Lí chiū tit-tio̍h heng-khí. 24 Lí tio̍h hiat pó-pòe tī tîn-ai--nih, Hiat O-hui ê kim tī khoe-hô chio̍h-thâu ê tiong-kan; 25 Choân-lêng--ê chiū beh chòe lí ê pó-pòe, chòe lí ê bûn-gûn. 26 Lí chiū beh lia̍h Choân-lêng--ê chòe hoaⁿ-hí, Bīn kia̍h-koâiⁿ ǹg Siōng-tè. 27 Lí kî-tó I, I chiū thiaⁿ lí, Lí iā beh siā lí ê goān. 28 Lí tiāⁿ-tio̍h beh chòe sím-mi̍h, hit ê tāi-chì tek-khak chiâⁿ; Kng iā beh chiò lí ê lō͘. 29 In kàng-kē ê sî, lí iû-goân thang kóng, Seng-koâiⁿ; Khiam-pi ê lâng Siōng-tè beh chín-kiù i. 30 Liân ū-chōe ê lâng Siōng-tè iā beh kiù i; In-ūi lí ê chhiú chheng-khì, i beh tit-tio̍h kiù.
1 約伯應講， 2 Taⁿ我ê哀怨算做悖逆；我所受ê責罰khah重tī我ê吐氣。 3 願我會知tùi怎樣chhē上帝，hō͘我thang到伊ê座位！ 4 我beh排列案件tī伊ê面前，我ê嘴夠額thang辯明。 5 我也得tio̍h知伊應我ê話，也明白伊對我所講ê。 6 伊kiám beh用大權能kap我計較mah？的確無án-ni；伊beh àⁿ落聽我。 7 Tī-hia正直ê會kap伊辯論，án-ni，我beh永遠脫離審判我ê。 8 看ah，我進前去，伊無tī-hia；我退後去，也無看見伊； 9 Tī tò-pêng伊teh行tāi-chì，我無看見伊；tī chiàⁿ-pêng伊tiàm密，我也無看見伊。 10 總是伊知我所行ê路；伊試煉我了後，我beh親像過鍛鍊ê金。 11 我ê腳tè伊ê腳步；我執守伊ê路，也無偏chhoa̍h。 12 伊嘴唇ê命令，我未bat違背；我對重伊嘴內ê話，贏過我所tio̍h用ê米糧。 13 伊有一定ê心志，是誰能kā伊oa̍t-tńg ah？伊ê心所ài-ê，就行伊。 14 所kā我定tio̍h-ê，伊beh成伊；chit號ê事伊iáu有chōe-chōe。 15 所以我tī伊ê面前gī-gī-chhoah；我想tio̍h就驚。 16 因為上帝hō͘我失膽，全能ê雨我gī-gī-chhoah； 17 因為我ê驚惶m̄是為tio̍h烏暗，也m̄是因為烏暗遮蓋我ê面。
1 Iok-pek ìn kóng, 2 Taⁿ góa ê ai-oàn sǹg-chòe pōe-ge̍k; Góa só͘ siū ê chek-hoa̍t khah-tāng tī góa ê thó͘-khùi. 3 Goān góa ōe chai tùi cháiⁿ-iūⁿ chhē Siōng-tè, Hō͘ góa thang kàu I ê chō-ūi! 4 Góa beh pâi-lia̍t àn-kiāⁿ tī I ê bīn-chêng, Góa ê chhùi kàu-gia̍h thang piān-bêng. 5 Góa iā tit-tio̍h chai I ìn góa ê ōe, Iā bêng-pe̍k I tùi góa só͘-kóng-ê. 6 I kiám beh ēng tōa koân-lêng kap góa kè-kàu mah? Tek-khak bô án-ni; I beh àⁿ-lo̍h thiaⁿ góa. 7 Tī-hia chèng-ti̍t--ê ōe kap I piān-lūn, Án-ni, góa beh éng-oán thoat-lī sím-phòaⁿ góa ê. 8 Khòaⁿ ah, góa chìn-chêng khì, I bô tī-hia; Góa thè-āu khì, iā bô khòaⁿ-kìⁿ I; 9 Tī tò-pêng I teh kiâⁿ tāi-chì, góa bô khòaⁿ-kìⁿ I; Tī chiàⁿ-pêng I tiàm-ba̍t, góa iā bô khòaⁿ-kìⁿ I. 10 Chóng-sī I chai góa só͘ kiâⁿ ê lō͘; I chhì-liān góa liáu-āu, góa beh chhin-chhiūⁿ kè thoàn-liān ê kim. 11 Góa ê kha tè I ê kha-pō͘; Góa chip-siú I ê lō͘, iā bô phian-chhoa̍h. 12 I chhùi-tûn ê bēng-lēng góa bē bat ûi-pōe; Góa tùi-tiōng I chhùi-lāi ê ōe, iâⁿ-kè góa só͘ tio̍h ēng ê bí-niû. 13 I ū it-tēng ê sim-chì, chī-chūi ōe kā I oa̍t-tńg ah? I ê sim só͘ ài-ê, chiū kiâⁿ i. 14 Só͘ kā góa tiāⁿ-tio̍h--ê, I beh chiâⁿ i; Chit hō ê sū I iáu ū chōe-chōe. 15 Só͘-í góa tī I ê bīn-chêng gī-gī-chhoah; Góa siūⁿ-tio̍h chiū kiaⁿ. 16 In-ūi Siōng-tè hō͘ góa sit-táⁿ, Choân-lêng--ê hō͘ góa gī-gī-chhoah; 17 In-ūi góa ê kiaⁿ-hiâⁿ m̄-sī ūi-tio̍h o͘-àm, Iā m̄-sī in-ūi o͘-àm jia-khàm góa ê bīn.
1 全能ê啥事無將時期收khǹg？Bat伊ê人啥事無看見伊ê日ah？ 2 有人移徙地界，搶奪kui群ê cheng-siⁿ，來飼伊。 3 In趕無父ê kiáⁿ ê驢，牽寡婦ê牛做準當。 4 In chhia sòng-hiong人離開路；地上ê艱苦人相kap去bih。 5 看ah，in親像野驢tī曠野，出去做工，勤勤chhē食；曠野kā in ê kiáⁿ出食物。 6 割田裡ê糧草，挽pháiⁿ人所chhun ê葡萄。 7 Thong暝thǹg-pak-theh無穿衫倒teh；寒冷無蓋被。 8 Tī山裡hō͘大雨ak-tâm；因為無jia遮就bih-óa tī石腳。 9 Tùi老母ê胸前搶無父ê kiáⁿ去；koh tùi sòng-hiong人the̍h準當； 10 致到人無衫，thǹg-theh來行；iau-iau teh擔稻把。 11 Tī hiahê人圍牆內，khoeh油，踏酒窟，家己iáu-kú嘴乾。 12 Tī chōe-chōe百姓ê城內有人ai-ai chhan，受傷ê人ê心悲哀；總是上帝無鑑察hitê不義。 13 也有人違背光明，m̄-bat伊ê路，也無tiàm tī伊ê路上。 14 Thâi人ê天phú光就起來，刣死艱苦ê kap sòng-hiong人，tī暝時親像賊。 15 姦淫ê人ê目睭thèng候到黃昏，講，無人目睭能看見我；koh遮蓋伊ê面。 16 In tī暝時iah厝孔，日時家己bih，也m̄知hitê光。 17 因為in看天光早做死蔭，因為in tī死蔭真慣勢。 18 伊tī水面真輕快，in ê份額tī地上受咒詛；伊無koh oa̍t-tńg來行葡萄園ê路。 19 炕旱kap燒熱消無雪水；陰間對tī犯罪ê人也是án-ni。 20 懷孕伊ê胎beh bōe記得伊；蟲食伊，beh掠做甜；伊無koh受記念；不義beh親像樹受at折。 21 伊欺負無懷孕無生kiáⁿ ê婦人人；無好款待守寡人。 22 Koh用伊ê權能保全強猛ê人；雖然伊ê活命絕望，iáu-kú能koh起來。 23 伊賞賜伊安然，伊就有所óa靠，伊ê目睭也看顧in ê路。 24 In升高，tiap-á久就無去；in降低，hō͘人收拾，親像眾人，koh親像麥穗受割起來。 25 若m̄是án-ni，是誰能證明我是白賊ê，也hō͘我ê話歸tī空空ah？
1 Choân-lêng-ê siáⁿ-sū bô chiong sî-kî siu-khǹg? Bat I ê lâng siáⁿ-sū bô khòaⁿ-kìⁿ I ê ji̍t ah? 2 Ū lâng î-sóa tōe-kài, Chhiúⁿ-toa̍t kui-kûn ê cheng-siⁿ, lâi chhī i. 3 In kóaⁿ bô-pē ê kiáⁿ ê lû, Khan kóaⁿ-hū ê gû chòe chún-tǹg. 4 In chhia sòng-hiong lâng lī-khui lō͘; Tōe-chiūⁿ ê kan-khó͘ lâng saⁿ-kap khì bih. 5 Khòaⁿ ah, in chhin-chhiūⁿ iá-lû tī khòng-iá, Chhut-khì chòe-kang, khûn-khûn chhē chia̍h; Khòng-iá kā in ê kiáⁿ chhut chia̍h-mi̍h. 6 Koah chhân--nih ê niû-chháu, Bán pháiⁿ-lâng só͘ chhun ê phû-tô. 7 Thong-mî thǹg-pak-theh bô chhēng-saⁿ tó-teh; Kôaⁿ-léng bô kah-phē. 8 Tī soaⁿ--nih hō͘ tōa-hō͘ ak-tâm; In-ūi bô jia-cha̍h chiū bih-óa tī chio̍h-kha. 9 Tùi lāu-bú ê heng-chêng chhiúⁿ bô-pē ê kiáⁿ khì; Koh tùi sòng-hiong lâng the̍h chún-tǹg; 10 Tì-kàu lâng bô-saⁿ, thǹg-theh lâi kiâⁿ; Iau-iau teh taⁿ tiū-pé. 11 Tī hiah ê lâng ûi-chhiûⁿ lāi, khoeh iû, ta̍h chiú-khut, Ka-kī iáu-kú chhùi-ta. 12 Tī chōe-chōe peh-sìⁿ ê siâⁿ-lāi ū lâng ai-ai chhan, Siū-siong ê lâng ê sim pi-ai; Chóng-sī Siōng-tè bô kàm-chhat hit ê put-gī. 13 Iā ū lâng ûi-pōe kng-bêng, M̄-bat i ê lō͘, Iā bô tiàm tī i ê lō͘-chiūⁿ. 14 Thâi-lâng--ê thiⁿ-phú-kng chiū khí-lâi, Thâi-sí kan-khó͘--ê kap sòng-hiong lâng, Tī mî--sî chhin-chhiūⁿ chha̍t. 15 Kan-îm ê lâng ê ba̍k-chiu thèng-hāu kàu hông-hun, Kóng, Bô lâng ba̍k-chiu ōe khòaⁿ-kìⁿ góa; Koh jia-khàm i ê bīn. 16 In tī mî--sî iah chhù-khang, ji̍t--sî ka-kī bih, Iā m̄-chai hit ê kng. 17 In-ūi in khòaⁿ thiⁿ-kng-chá chòe sí-ìm, In-ūi in tī sí-ìm chin koàiⁿ-sì. 18 I tī chúi-bīn chin khin-khoài, In ê hūn-gia̍h tī tōe-chiūⁿ siū chiù-chó͘; I bô koh oa̍t-tńg lâi kiâⁿ phû-tô-hn̂g ê lō͘. 19 Khòng-hān kap sio-joa̍h siau-bô seh-chúi; Im-kan tùi-tī hoān-chōe ê lâng iā sī án-ni. 20 Hoâi-īn i ê thai beh bōe-kì-tit i; thâng chia̍h i, beh lia̍h chòe tiⁿ; I bô koh siū kì-liām; Put-gī beh chhin-chhiūⁿ chhiū siū at-chi̍h. 21 I khi-hū bô hoâi-īn bô siⁿ-kiáⁿ ê hū-jîn-lâng; Bô hó khoán-thāi chiú-kóaⁿ-lâng. 22 Koh ēng I ê koân-lêng pó-choân kiông-béng ê lâng; Sui-jiân i ê oa̍h-miā choa̍t-bāng, iáu-kú ōe koh khí-lâi. 23 I siúⁿ-sù i an-jiân, i chiū ū só͘ óa-khò, I ê ba̍k-chiu iā khòaⁿ-kò͘ in ê lō͘. 24 In seng-koâiⁿ, tiap-á-kú chiū bô--khì; In kàng-kē, hō͘ lâng siu-si̍p, chhin-chhiūⁿ chèng-lâng, Koh chhin-chhiūⁿ be̍h-sūi siū koah--khí-lâi. 25 Nā m̄-sī án-ni, chī-chūi ōe chèng-bêng góa sī pe̍h-chha̍t--ê, Iā hō͘ góa ê ōe kui tī khang-khang ah?
1 Su-a人Pí-le̍k-ta̍t應講， 2 權能kap威嚴lóng是伊ê，伊tī高ê所在行和平。 3 伊ê軍兵，kiám會算得mah？伊ê光一下出，是誰無hō͘伊照tio̍h ah？ 4 Án-ni tī上帝ê面前人thái-thó能稱做義？婦人人所生ê，thái-thó能清氣？ 5 看ah，tī伊ê目睭前月無光，星也無清氣。 6 莫kioh人是蟲，世間人是杜蚓。
1 Su-a lâng Pí-le̍k-ta̍t ìn kóng, 2 Koân-lêng kap ui-giâm lóng sī I ê, I tī koâiⁿ ê só͘-chāi kiâⁿ hô-pêng. 3 I ê kun-peng, kiám ōe-sǹg-tit mah? I ê kng chi̍t-ē chhut, chī-chūi bô hō͘ i chiò-tio̍h ah? 4 Án-ni tī Siōng-tè ê bīn-chêng lâng thái-thó ōe chheng-chòe-gī? Hū-jîn-lâng só͘-siⁿ-ê, thái-thó ōe chheng-khì? 5 Khòaⁿ ah, tī I ê ba̍k-chiu-chêng ge̍h bô kng, Chhiⁿ iā bô chheng-khì. 6 Bo̍h-kioh lâng sī thâng, Sè-kan lâng sī tō͘-ún.
1 約伯應講， 2 無氣力ê，你有幫贊伊到怎樣！手骨軟ê，你有拯救伊到怎樣！ 3 你有怎樣教示無知ê人，koh大發明真實ê知識？ 4 你對是誰講話？Chī-chūi ê神對你出？ 5 陰魂ngia̍uh-ngia̍uh-chhoah，tī水下，以及tī-hia khiā起ê。 6 Tī伊ê面前陰間露現，a-pa-tùn也無蓋密。 7 伊thí開北方tī空中ê頂面，吊地tī無有物ê頂面。 8 用水包tī伊ê密雲內；雲tī水ê下面也bōe破裂。 9 伊jia遮伊ê座位，koh鋪伊ê雲tī hit頂面。 10 伊tī水面畫出界限，到光kap暗交界ê所在。 11 天ê柱振動，因為伊ê責備來gông-ngia̍h。 12 伊用能力激動大海，伊用知識phah破La̍h-hap-pek。 13 用伊ê氣hō͘ 天有清彩，伊ê手鑿透gâu走ê蛇。 14 看ah，chiahê不過是伊所做ê sió-khóa-ê；咱所對伊聽見ê聲細到怎樣？伊大權能ê雷，是誰能測度ah？
1 Iok-pek ìn kóng, 2 Bô khùi-la̍t--ê, lí ū pang-chān i kàu cháiⁿ-iūⁿ! Chhiú-kut nńg-ê, lí ū chín-kiù i kàu cháiⁿ-iūⁿ! 3 Lí ū cháiⁿ-iūⁿ kà-sī bû-ti ê lâng, Koh tōa hoat-bêng chin-si̍t ê tì-sek? 4 Lí tùi chī-chūi kóng-ōe? Chī-chūi ê sîn tùi lí chhut? 5 Im-hûn ngia̍uh-ngia̍uh-chhoah, Tī chúi-ē, í-ki̍p tī-hia khiā-khí--ê. 6 Tī I ê bīn-chêng im-kan lō͘-hiān, A-pa-tùn iā bô khàm-ba̍t. 7 I thí-khui pak-hng tī khong-tiong ê téng-bīn, Tiàu tōe tī bô ū mi̍h ê téng-bīn. 8 Ēng chúi pau tī I ê ba̍t-hûn-lāi; Hûn tī chúi ê ē-bīn iā bōe phòa-li̍h. 9 I jia-cha̍h I ê chō-ūi, Koh pho͘ I ê hûn tī hí(**hit) téng-bīn. 10 I tī chúi-bīn u̍ih-chhut kài-hān, Kàu kng kap àm kau-kài ê só͘-chāi. 11 Thiⁿ ê thiāu tín-tāng, In-ūi I ê chek-pī lâi gông-ngia̍h. 12 I ēng lêng-le̍k kek-tōng tōa-hái, I ēng tì-sek phah-phòa La̍h-hap-pek. 13 Ēng I ê khì hō͘ thiⁿ ū chheng-chhái, I ê chhiú chha̍k-thàu gâu-cháu ê chôa. 14 Khòaⁿ ah, chiah-ê put-kò sī I só͘-chòe ê sió-khóa-ê; Lán só͘ tùi I thiaⁿ-kìⁿ ê siaⁿ sòe kàu cháiⁿ-iūⁿ? I tōa koân-lêng ê lûi, chī-chūi ōe chhek-to̍k ah?
1 約伯koh續接提起伊ê言論講， 2 上帝奪我ê理由；全能ê苦楚我ê心神；我指伊ê永活來講； 3 (因為我ê活命iáu-kú完全tī我ê內面，上帝ê氣iáu-kú tī我ê鼻孔；) 4 我ê嘴唇決斷無講不義，我ê舌也無講詭詐。 5 我斷斷無稱lín做義，我到死，也m̄算我做無完全。 6 我執守我ê義，無beh放sak，我ê心一世人無責備我。 7 願我ê對敵親像pháiⁿ人，願hitê起來攻擊我ê，親像不義ê人。 8 無敬虔ê人，雖然搶tio̍h財利，上帝取伊ê活命ê時，iáu有甚麼ǹg望？ 9 患難臨到伊ê時，上帝kiám beh聽伊ê求叫？ 10 伊kiám會用全能ê做歡喜？伊時常求叫上帝mah？ 11 上帝所做ê，我beh教示你，全能ê所有ê，我也無隱瞞。 12 看ah，lín本身lóng有看見，啥事一盡虛假ah？ 13 Pháiⁿ人tùi上帝所受ê份額，強暴ê人tùi全能ê所得tio̍h ê產業，就是chitê。 14 伊ê kiáⁿ兒若加添chōe-chōe，是beh hō͘刀刣死；伊ê後裔無thang食夠額。 15 伊所chhun ê人beh tú-tio̍h瘟疫來埋葬，也伊ê寡婦無啼哭。 16 伊雖然積聚銀親像塵埃，koh備辦衣裳親像土； 17 伊做伊備辦，總是義人beh穿伊，無罪ê人beh分伊ê銀。 18 伊親像蛀蟲起厝，koh親像守更ê搭伊ê寮á。 19 伊好額倒teh，總是無得tio̍h收埋；伊thí開目睭，就無去。 20 驚惶beh親像大水jip-tio̍h伊；暝時ê大風beh掃伊去。 21 東風吹伊，伊就去；koh 趕伊離開本所在。 22 因為上帝射tio̍h伊，也無寬恕；伊苦bōe-thang脫離伊ê手。 23 人beh對伊phah pho̍k-á，也beh出口號，趕伊離開本所在。
1 Iok-pek koh sòa-chiap thê-khí i ê giân-lūn kóng, 2 Siōng-tè toa̍t góa ê lí-iû; Choân-lêng--ê khó͘-chhó͘ góa ê sim-sîn; Góa chí I ê éng-oa̍h lâi kóng; 3 (In-ūi góa ê oa̍h-miā iáu-kú oân-choân tī góa ê lāi-bīn, Siōng-tè ê khì iáu-kú tī góa ê phīⁿ-khang;) 4 Góa ê chhùi-tûn koat-toàn bô kóng put-gī, Góa ê chi̍h iā bô kóng khúi-chà. 5 Góa toàn-toàn bô chheng lín chòe gī, Góa kàu sí, iā m̄ sǹg góa chòe bô oân-choân. 6 Góa chip-siú góa ê gī, bô beh pàng-sak, Góa ê sim chi̍t-sì-lâng bô chek-pī góa. 7 Goān góa ê tùi-te̍k chhin-chhiūⁿ pháiⁿ-lâng, Goān hit ê khí-lâi kong-kek góa ê, chhin-chhiūⁿ put-gī ê lâng. 8 Bô kèng-khiân ê lâng, sui-jiân chhiúⁿ-tio̍h châi-lī, Siōng-tè chhú i ê oa̍h-miā ê sî, iáu ū sím-mi̍h ǹg-bāng? 9 Hoān-lān lîm-kàu i ê sî, Siōng-tè kiám beh thiaⁿ i ê kiû-kiò? 10 I kiám ōe ēng Choân-lêng--ê chòe hoaⁿ-hí? I sî-siông kiû-kiò Siōng-tè mah? 11 Siōng-tè só͘ chòe ê, góa beh kà-sī lí, Choân-lêng--ê só͘ ū-ê, góa iā bô ún-môa. 12 Khòaⁿ ah, lín pún-sin lóng ū khòaⁿ-kìⁿ, Siáⁿ-sū it-chīn hu-ké ah? 13 Pháiⁿ-lâng tùi Siōng-tè só͘ siū ê hūn-gia̍h, Kiông-pō ê lâng tùi Choân-lêng--ê só͘ tit-tio̍h ê sán-gia̍p, chiū-sī chit-ê. 14 I ê kiáⁿ-jî nā ke-thiⁿ chōe-chōe, sī beh hō͘ to thâi-sí; I ê hō͘-è bô thang chia̍h kàu gia̍h. 15 I só͘ chhun ê lâng beh tú-tio̍h un-e̍k lâi bâi-chòng, Iā i ê kóaⁿ-hū bô thî-khàu. 16 I sui-jiân chek-chū gûn chhin-chhiūⁿ tîn-ai, Koh pī-pān i-chiûⁿ chhin-chhiūⁿ thô͘; 17 I chòe i pī-pān, chóng-sī gī-lâng beh chhēng i, Bô-chōe ê lâng beh pun i ê gûn. 18 I chhin-chhiūⁿ chiù-thâng khí chhù, Koh chhin-chhiūⁿ chiú-kiⁿ-ê tah i ê liâu-á. 19 I hó-gia̍h tó-teh, chóng-sī bô tit-tio̍h siu-bâi; I thí-khui ba̍k-chiu, chiū bô--khì. 20 Kiaⁿ-hiâⁿ beh chhin-chhiūⁿ tōa-chúi jip-tio̍h i; Mî--sî ê tōa-hong beh sàu i khì. 21 Tang-hong chhe i, i chiū khì; Koh kóaⁿ i lī-khui pún só͘-chāi. 22 In-ūi Siōng-tè siā-tio̍h i, iā bô khoan-sù; I khó͘-bōe-thang thoat-lī I ê chhiú. 23 Lâng beh tùi i phah pho̍k-á, Iā beh chhut kháu-hō, kóaⁿ i lī-khui pún só͘-chāi.
1 出銀有伊ê礦，所鍛鍊ê金也有伊ê所在teh出。 2 鐵是tùi地裡取出來，銅是tùi石鎔出來。 3 人消無hitê烏暗，chhē到盡底；有烏暗kap死蔭中ê石。 4 伊離開人寄腳ê所在，khui hia̍t；行tī hit頂面ê人無想tio̍h伊；in離開人，墜tī穴中，hìⁿ來hiàⁿ去。 5 論到地，米糧tùi hia出；伊ê下底親像hō͘火kā伊péng起來。 6 伊ê石中有藍寶石，伊也有金沙。 7 Hit條路鷹鳥m̄-bat；小鷹ê目睭也無看見。 8 惡獸m̄-bat踏tio̍h伊，猛獅也m̄-bat tùi hia過。 9 伊伸手phah tēng石，tùi山ê根基kā伊péng起來。 10 伊tī石頭中開溝，親目看見ta̍k樣ê寶物。 11 伊塞密水hō͘伊bōe滴落來；koh the̍h出隱密ê物，hō͘伊見光。 12 總是智慧tùi toh落能chhē-tio̍h？聰明ê所在tī toh落？ 13 伊ê價錢無人知，tī活人ê地也無teh thang chhē。 14 深淵講，無tī我chia；大海講，無kap我tī-teh。 15 Bōe能用黃金來得tio̍h 伊；也bōe能秤(phêng)銀做伊ê價錢。 16 O-hui ê金bōe值tio̍h 伊；寶貴ê碧玉kap藍寶石也bōe。 17 黃金kap玻璃bōe比得伊；好金ê器具無夠額kap伊換。 18 珊瑚、水晶lóng無夠額thang講；因為得tio̍h智慧贏過珍珠。 19 Kó͘-si̍t ê黃玉bōe比得伊；足成ê金m̄值tio̍h 伊。 20 Án-ni智慧tùi toh落來？聰明ê所在tī toh落？ 21 既然對一切有活命ê ê目睭隱密；對空中ê飛鳥遮掩。 22 A-pa-tùn kap死失講，阮耳孔聽見伊ê風聲。 23 上帝明白智慧ê路，也知伊ê所在。 24 因為伊鑑察到地ê極頭，遍看普天下。 25 定tio̍h風ê輕重，koh量水ê chōe少。 26 伊kā雨水定tio̍h例，kā雷電定tio̍h伊ê路； 27 Hit時伊看見伊，來講明伊，伊造成伊，koh查察伊。 28 伊對人講，看ah，敬畏主就是智慧，離開pháiⁿ就是聰明。
1 Chhut-gûn ū i ê khòng, Só͘ thoàn-liān ê kim iā ū i ê só͘-chāi teh chhut. 2 Thih sī tùi tōe--nih chhú--chhut-lâi, Tâng sī tùi chio̍h iûⁿ--chhut-lâi. 3 Lâng siau-bô hit ê o͘-àm, Chhē kàu chīn tóe; Ū o͘-àm kap sí-ìm tiong ê chio̍h. 4 I lī-khui lâng kià-kha ê só͘-chāi, khui hia̍t; Kiâⁿ tī hí(**hit) téng-bīn ê lâng bô siūⁿ-tio̍h i; In lī-khui lâng, tūi tī hia̍t-tiong, hìⁿ-lâi hìⁿ-khì. 5 Lūn-kàu tōe, bí-niû tùi hia chhut; I ê ē-tóe chhin-chhiūⁿ hō͘ hé kā i péng--khí-lâi. 6 I ê chio̍h-tiong ū lâm-pó-chio̍h, I iā ū kim-soa. 7 Hit tiâu lō͘ eng-chiáu m̄-bat; Sió-eng ê ba̍k-chiu iā bô khòaⁿ-kìⁿ. 8 Ok-siù m̄-bat ta̍h-tio̍h i, Béng-sai iā m̄-bat tùi hia kè. 9 I chhun-chhiú phah tēng-chio̍h, Tùi soaⁿ ê kun-ki kā i péng--khí-lâi. 10 I tī chio̍h-thâu tiong khui-kau, Chhin-ba̍k khòaⁿ-kìⁿ ta̍k-iūⁿ ê pó-mi̍h. 11 I that-ba̍t chúi hō͘ i bōe tih--lo̍h-lâi; Koh the̍h-chhut ún-ba̍t ê mi̍h, hō͘ i kìⁿ kng. 12 Chóng-sī tì-hūi tùi toh-lo̍h ōe chhē-tio̍h? Chhong-bêng ê só͘-chāi tī toh-lo̍h? 13 I ê kè-chîⁿ bô lâng chai, Tī oa̍h-lâng ê tōe iā bô tè(**teh) thang chhē. 14 Chhim-ian kóng, Bô tī góa chia; Tōa-hái kóng, Bô kap góa tī-teh. 15 Bōe-ōe ēng n̂g-kim lâi tit-tio̍h i; Iā bōe-ōe phêng gûn chòe i ê kè-chîⁿ. 16 O-hui ê kim bōe ta̍t-tio̍h i; Pó-kùi ê phek-ge̍k kap lâm-pó-chio̍h iā bōe. 17 N̂g-kim kap po-lê bōe pí-tit i; Hó-kim ê khì-kū bô kàu-gia̍h kap i ōaⁿ. 18 Sian-hô chúi-chiⁿ lóng bô kàu-gia̍h thang kóng; In-ūi tit-tio̍h tì-hūi iâⁿ-kè chin-chu. 19 Kó͘-si̍t ê n̂g-ge̍k bōe pí-tit i; Chiok-siâⁿ ê kim m̄-ta̍t-tio̍h i. 20 Án-ni tì-hūi tùi toh-lo̍h lâi? Chhong-bêng ê só͘-chāi tī toh-lo̍h? 21 Kì-jiân tùi it-chhè ū oa̍h-miā-ê ê ba̍k-chiu ún-ba̍t; Tùi khong-tiong ê pe-chiáu jia-iám. 22 A-pa-tùn kap Sí-sit kóng, Goán hī-khang thiaⁿ-kìⁿ i ê hong-siaⁿ. 23 Siōng-tè bêng-pe̍k tì-hūi ê lō͘, Iā chai i ê só͘-chāi. 24 In-ūi I kàm-chhat kàu tōe ê ke̍k-thâu, Piàn-khòaⁿ phó͘-thiⁿ-ē. 25 Tiāⁿ-tio̍h hong ê khin-tāng, Koh niû chúi ê chōe-chió. 26 I kā hō͘-chúi tiāⁿ-tio̍h lē, Kā lûi-tiān tiāⁿ-tio̍h i ê lō͘; 27 Hit-sî I khòaⁿ-kìⁿ i, lâi kóng-bêng i, I chō-chiâⁿ i, koh cha-chhat i. 28 I tùi lâng kóng, Khòaⁿ ah, kèng-ùi Chú chiū-sī tì-hūi, Lī-khui pháiⁿ chiū-sī chhong-bêng.
1 約伯koh續接提起伊ê言論，講， 2 願我親像從前hiahê月，親像上帝保守我ê日。 3 Hit時伊ê燈照tī我ê頭殼，我靠伊ê光行過烏暗。 4 親像我tī秋天ê日，tī我ê布棚上帝kap我親密。 5 全能ê iáu-kú kap我tī-teh，我ê kiáⁿ兒tī我ê四圍。 6 用奶洗我ê腳，石磐kā我出油成溪。 7 我行到城門，tī街市設我ê座位。 8 少年人看見我就走去bih，老人也起來khiā。 9 首領就停止伊ê話，用手掩in ê嘴。 10 貴族無開聲，舌頭連tī上kiuⁿ。 11 因為耳孔聽見ê，就稱我做有福氣，目睭看見ê，就kā我做干證。 12 因為我拯救哀求ê艱苦人，kap無父ê kiáⁿ，無人幫贊ê。 13 得beh死無ê人kā我祝福，我也hō͘寡婦ê心歡喜來唱歌。 14 我穿公義，伊也用我做衫，用公平做袍，做帽。 15 我做chhiⁿ-mî人ê目睭，做跛腳ê人ê腳。 16 我做sòng-hiong人ê父，平素m̄-bat-ê ê案件我查察伊。 17 我phah折pháiⁿ人ê牙槽，搶伊ê嘴齒所咬ê。 18 我就講，我beh死tī我ê巢，我ê日子beh加添親像沙。 19 我ê根伸到水邊，露水kui暝落tī我ê枝。 20 我ê榮光tī我常常新，我ê弓tī我ê手koh再ân。 21 人聽見我，就thèng候，靜靜等我指教。 22 我講了，in就無koh講；我ê話親像雨滴tī in ê頂面。 23 In thèng候我親像thèng候雨水，大開in ê嘴，親像欣慕春天ê雨。 24 In失望，我安慰in；in bōe能改變我ê面ê光。 25 我kā in揀路，我坐頭位；我親像王tī軍隊中khiā起，koh親像安慰傷心ê人。
1 Iok-pek koh sòa-chiap thê-khí i ê giân-lūn, kóng, 2 Goān góa chhin-chhiūⁿ chiông-chêng hiah ê ge̍h, Chhin-chhiūⁿ Siōng-tè pó-siú góa ê ji̍t. 3 Hit-sî I ê teng chiò tī góa ê thâu-khak, Góa khò I ê kng kiâⁿ-kè o͘-àm. 4 Chhin-chhiūⁿ góa tī chhiu-thiⁿ ê ji̍t, Tī góa ê pò͘-pîⁿ Siōng-tè kap góa chhin-bi̍t. 5 Choân-lêng--ê iáu-kú kap góa tī-teh, Góa ê kiáⁿ-jî tī góa ê sì-ûi. 6 Ēng ni sóe góa ê kha, Chio̍h-pôaⁿ kā góa chhut-iû chiâⁿ-khoe. 7 Góa kiâⁿ kàu siâⁿ-mn̂g, Tī koe-chhī siat góa ê chō-ūi. 8 Siàu-liân lâng khòaⁿ-kìⁿ góa chiū cháu khì bih, Lāu-lâng iā khí-lâi khiā. 9 Siú-léng chiū thêng-chí i ê ōe, Ēng chhiú ng in ê chhùi. 10 Kùi-cho̍k bô khui siaⁿ, Chi̍h-thâu liâm tī chiūⁿ-kiuⁿ. 11 In-ūi hī-khang thiaⁿ-kìⁿ-ê, chiū chheng góa chòe ū hok-khì, Ba̍k-chiu khòaⁿ-kìⁿ-ê, chiū kā góa chòe kan-chèng. 12 In-ūi góa chín-kiù ai-kiû ê kan-khó͘ lâng, Kap bô-pē ê kiáⁿ, bô lâng pang-chān ê. 13 Tit-beh sí-bô ê lâng kā góa chiok-hok, Góa iā hō͘ kóaⁿ-hū ê sim hoaⁿ-hí lâi chhiùⁿ-koa. 14 Góa chhēng kong-gī, i iā ēng góa chòe saⁿ, Ēng kong-pêng chòe phàu, chòe bō. 15 Góa chòe chhiⁿ-mî lâng ê ba̍k-chiu, Chòe pái-kha ê lâng ê kha. 16 Góa chòe sòng-hiong lâng ê pē, Pêng-sò͘ m̄-bat--ê ê àn-kiāⁿ góa cha-chhat i. 17 Góa phah-chi̍h pháiⁿ-lâng ê gê-chô, Chhiúⁿ i ê chhùi-khí só͘ kā ê. 18 Góa chiū kóng, Góa beh sí tī góa ê siū, Góa ê ji̍t-chí beh ke-thiⁿ chhin-chhiūⁿ soa. 19 Góa ê kun chhun kàu chúi-piⁿ, Lō͘-chúi kui-mî lo̍h tī góa ê ki. 20 Góa ê êng-kng tī góa siông-siông sin, Góa ê keng tī góa ê chhiú koh-chài ân. 21 Lâng thiaⁿ-kìⁿ góa, chiū thèng-hāu, Chēng-chēng tán góa chí-kàu. 22 Góa kóng-liáu, in chiū bô koh kóng; Góa ê ōe chhin-chhiūⁿ hō͘ tih tī in ê téng-bīn. 23 In thèng-hāu góa chhin-chhiūⁿ thèng-hāu hō͘-chúi, Tōa khui in ê chhùi, chhin-chhiūⁿ him-bō͘ chhun-thiⁿ ê hō͘. 24 In sit-bāng, góa an-ùi in; In bōe-ōe kóe-piàn góa ê bīn ê kng. 25 Góa kā in kéng lō͘, góa chē thâu-ūi; Góa chhin-chhiūⁿ ông tī kun-tūi-tiong khiā-khí, Koh chhin-chhiūⁿ an-ùi siong-sim ê lâng.
1 總是現今比我khah少年ê人恥笑我，hit號人ê老父，我本看in，bōe khah輸我羊群ê狗。 2 In ê壯年已經衰退，in ê手ê力kap我甚麼干涉？ 3 In因為欠缺kap iau餓，身體消瘦，tī荒廢冷靜ê烏暗中khòe乾土。 4 Tī草苞中間挽lê-hok ê菜，金雀花ê根做in ê食物。 5 In tùi人ê中間受趕出；人hoah in親像hoah賊。 6 In續tio̍h tiàm tī山谷ê深坑，tī地穴kap石洞ê內面。 7 Tī樹林內親像驢哮；tī刺phè腳teh伸勻(chhun-ûn)。 8 In是戇人ê kiáⁿ兒，是下賤人ê kiáⁿ兒；受鞭phah趕出境外。 9 Taⁿ chiahê人掠我做in ê歌曲，做in ê話柄。 10 In厭惡我，離開我遠遠；見tio̍h我ê面就phùi-nōa。 11 因為伊放lēng伊ê索，來苦楚我，in就tī我ê面前無家己約束。 12 卑賤ê種類tī我ê chiàⁿ-pêng起來，sak開我ê腳，造陷害ê路來攻擊我。 13 In毀壞我ê路，加添我ê患難，就是無得tio̍h幫贊ê人。 14 In親像tùi闊大ê破隙來，tī毀壞ê中間直直kō來。 15 驚惶ê事oa̍t-tńg到tī我，in趕逐我ê榮光親像風；我ê 福祿親像雲過去。 16 Taⁿ我ê心神tī我ê內面極失志；患難ê日kā我擒tiâu-tiâu。 17 暝時我ê骨受刺鑿lut節；痛疼khòe我無soah。 18 因為chitê大ê力，我ê衣服m̄成樣；親像衫ê頷頸領kā我束ân-ân。 19 伊hiat我tī土糜；我就親像土粉kap火灰。 20 我求叫你，你m̄應我；我khiā起來，你kan-ta teh看。 21 你變殘忍來款待我，koh用你ê手ê大力窘迫我。 22 舉起我tī風ê頂面，hō͘我騎伊；koh消滅我tī真透ê風。 23 因為我知你beh hō͘我到死無，到hit間為tio̍h lóng總有活命ê所定tio̍h ê厝。 24 人跋倒ê時，kiám無伸手？Tú-tio̍h災厄，kiám無因為án-ni hoah救？ 25 人tú-tio̍h患難，我kiám無為tio̍h伊啼哭？人sòng-hiong，我ê心kiám無為tio̍h伊憂悶？ 26 我ǹg望得tio̍h福氣，災厄就到；我thèng候光明，烏暗就來。 27 我ê心腸滾絞無歇；苦難ê日臨到我。 28 我無日光就啼哭行去，我khiā tī會中，teh喉叫求幫贊。 29 我kap山狗做兄弟，kap鴕鳥做同伴。 30 我ê皮膚烏，就liù落去，我ê骨頭因為熱受燒。 31 所以我ê琴變做悲哀ê音，我ê簫變做啼哭ê ê聲。
1 Chóng-sī hiān-kim pí góa khah siàu-liân ê lâng thí-chhiò góa, Hit-hō lâng ê lāu-pē, góa pún khòaⁿ in, bōe khah-su góa iûⁿ-kûn ê káu. 2 In ê chòng-liân í-keng soe-thè, In ê chhiú ê la̍t kap góa sím-mi̍h kan-sia̍p? 3 In in-ūi khiàm-kheh kap iau-gō, sin-thé siau-sán, Tī hong-hòe léng-chēng ê o͘-àm-tiong khòe ta-thô͘. 4 Tī chháu-phō tiong-kan bán lê-hok ê chhài, Kim-chhiok-hoe ê kun chòe in ê chia̍h-mi̍h. 5 In tùi lâng ê tiong-kan siū kóaⁿ-chhut; Lâng hoah in chhin-chhiūⁿ hoah chha̍t. 6 In sòa tio̍h tiàm tī soaⁿ-kok ê chhim-khiⁿ, Tī tōe-hia̍t kap chio̍h-tōng ê lāi-bīn. 7 Tī chhiū-nâ-lāi chhin-chhiūⁿ lû háu; Tī chhì-phè-kha teh chhun-ûn. 8 In sī gōng-lâng ê kiáⁿ-jî, sī hā-chiān lâng ê kiáⁿ-jî; Siū piⁿ-phah kóaⁿ-chhut kéng-gōa. 9 Taⁿ chiah ê lâng lia̍h góa chòe in ê koa-khek, Chòe in ê ōe-pìⁿ. 10 In iàm-ò͘ⁿ góa, lī-khui góa hn̄g-hn̄g; Kìⁿ-tio̍h góa ê bīn chiū phùi-nōa. 11 In-ūi I pàng-lēng I ê soh, lâi khó͘-chhó͘ góa, In chiū tī góa ê bīn-chêng bô ka-kī iok-sok. 12 Pi-chiān ê chéng-lūi tī góa ê chiàⁿ-pêng khí-lâi, Sak-khui góa ê kha, chō hām-hāi ê lō͘ lâi kong-kek góa. 13 In húi-hoāi góa ê lō͘, Ke-thiⁿ góa ê hoān-lān, Chiū-sī bô tit-tio̍h pang-chān ê lâng. 14 In chhin-chhiūⁿ tùi khoah-tōa ê phòa-khiah lâi, Tī húi-hoāi ê tiong-kan ti̍t-ti̍t kō--lâi. 15 Kiaⁿ-hiâⁿ ê sū oa̍t-tńg kàu tī góa, In kóaⁿ-tio̍k góa ê êng-kng chhin-chhiūⁿ hong; Góa ê hok-lo̍k chhin-chhiūⁿ hûn kè--khì. 16 Taⁿ góa ê sim-sîn tī góa ê lāi-bīn ke̍k sit-chì; Hoān-lān ê ji̍t kā góa khîⁿ-tiâu-tiâu. 17 Mî--sî góa ê kut siū chhì-chha̍k lut-chat; Thàng-thiàⁿ khòe góa bô soah. 18 In-ūi chit-ê tōa ê la̍t, góa ê i-ho̍k m̄-chiâⁿ-iūⁿ; Chhin-chhiūⁿ saⁿ ê ām-kún-niá kā góa sok ân-ân. 19 I hiat góa tī thô͘-bê; Góa chiū chhin-chhiūⁿ thô͘-hún kap hé-hu. 20 Góa kiû-kiò Lí, Lí m̄ ìn góa; Góa khiā--khí-lâi, Lí kan-ta teh khòaⁿ. 21 Lí piàn chân-jím lâi khoán-thāi góa, Koh ēng Lí ê chhiú ê tōa-la̍t khún-pek góa. 22 Kú-khí góa tī hong ê téng-bīn, hō͘ góa khiâ i; Koh siau-bia̍t góa tī chin-thàu ê hong. 23 In-ūi góa chai Lí beh hō͘ góa kàu sí-bô, Kàu hit-keng ūi-tio̍h lóng-chóng ū oa̍h-miā--ê só͘ tiāⁿ-tio̍h ê chhù. 24 Lâng poa̍h-tó ê sî, kiám bô chhun-chhiú? Tú-tio̍h chai-ē kiám bô in-ūi án-ni hoah kiù? 25 Lâng tú-tio̍h hoān-lān, góa kiám bô ūi-tio̍h i thî-khàu? Lâng sòng-hiong, góa ê sim kiám bô ūi-tio̍h i iu-būn? 26 Góa ǹg-bāng tit-tio̍h hok-khì, chai-ē chiū kàu; Góa thèng-hāu kng-bêng, o͘-àm chiū lâi. 27 Góa ê sim-tn̂g kún-ká bô-hioh; Khó͘-lān ê ji̍t lîm-kàu góa. 28 Góa bô ji̍t-kng chiū thî-khàu kiâⁿ-khì, Góa khiā tī hōe-tiong, teh âu-kiò kiû pang-chān. 29 Góa kap soaⁿ-káu chòe hiaⁿ-tī, Kap tô-chiáu chòe tâng-phōaⁿ. 30 Góa ê phê-hu o͘, chiū liù--lo̍h-khì, Góa ê kut-thâu in-ūi jia̍t siū sio. 31 Só͘-í góa ê khîm pìⁿ-chòe pi-ai ê im, Góa ê siau pìⁿ-chòe thî-khàu--ê ê siaⁿ.
1 我kap我ê目睭立約，thái-thó會注意看在室女ah？ 2 因為上帝tùi頂面所定tio̍h ê份額，全能ê tùi頂面所派ê基業是甚麼ah？ 3 Kiám m̄是患難臨到不義ê，災害臨到作孽ê mah？ 4 伊kiám m̄是鑑察我ê路。點算我ê腳步mah？ 5 我若kap虛假相kap行，腳若趕緊tè詭詐； 6 (願我hō͘公道ê 天秤來秤，hō͘上帝知我ê純全；) 7 我ê腳步若偏離正路，我ê心若跟tè我ê目睭，若有lâ-sâm黏tī我ê手； 8 就願我所種ê，別人食伊，我所出產ê，伊ê根受拔出。 9 我ê心若hō͘婦女引誘去，á是我bih tī厝邊ê門teh等； 10 就願我ê婦人人kā人挨磨，別人也kap伊同房； 11 因為這是大pháiⁿ，是審判司應該辦ê罪； 12 這是火，燒到滅無，拔除我一切所出產ê ê根。 13 我ê奴僕女婢kap我辯論ê時，我若藐視in ê理由； 14 就上帝起來，我beh怎樣ah？伊審問，我beh怎樣應ah？ 15 造我tī胎裡ê，kiám m̄是也造伊mah？造成阮tī腹肚ê，kiám m̄是一个mah？ 16 我若禁止sòng-hiong人ê意願，á是hō͘寡婦ê目睭看到煙暈； 17 Á是我家己食淡薄物，無父ê kiáⁿ食無份ah？ 18 (Tùi我少年，伊kap我相kap大漢，親像kap老父一樣；我tùi出老母ê腹肚就牽成寡婦；) 19 我若看見人因為無衫來死，á是看見sòng-hiong人身軀無thang jia-kah； 20 伊ê腰若無kā我祝福，伊也無對我ê羊ê毛家己燒， 21 我若因為看見tī城門有幫贊我ê，就起手攻擊無父ê kiáⁿ； 22 願我ê手tùi肩胛lut落去，我ê手節tùi骨折去； 23 因為tùi上帝來ê災厄hō͘我驚惶；因為伊ê威嚴，我當bōe起。 24 我若用黃金做ǹg望，對好金講，你是我所óa靠ê； 25 我若因為財物豐盛，因為我ê手thàn chōe-chōe來歡喜； 26 我若看見日teh發光，月光光teh行； 27 我ê心tī暗中受引誘，á是我ê嘴kap我ê手相chim； 28 這也是審判司應該辦ê罪，因為我án-ni是悖謬tī頂面ê上帝。 29 我若掠怨恨我ê ê災厄做快樂，á是為tio̍h伊tú-tio̍h災厄來得意； 30 (其實我無容允我ê嘴犯罪，咒詛求hō͘ in死；) 31 若我布棚內ê人無講，是誰能chhē-tio̍h一个無食伊ê好物到飽ê？ 32 (出外人無歇tī街路，我kā行路ê人開門；) 33 我若親像亞當遮掩我ê過失，khǹg我ê罪孽tī我ê胸前； 34 為tio̍h驚大隊ê眾人，驚宗族ê藐視，致到靜靜m̄敢出門- 35 願有一个teh聽我！(看ah，有我所畫ê號，願全能ê應我；) 願得tio̍h我ê對敵所寫ê告狀！ 36 我的確beh背伊tī我ê肩頭，戴伊做冕旒。 37 我beh對伊講明我腳步ê數額，beh親像人君就近伊。 38 我ê田園若出聲告我，犁溝相kap啼哭； 39 我若食伊ê出產，無hō͘伊價錢，á是hō͘業主失落伊ê性命； 40 就願刺á發生替小麥，pháiⁿ草發生來替大麥。約伯ê話明白lah。
1 Góa kap góa ê ba̍k-chiu li̍p-iok, Thái-thó ōe chù-ì khòaⁿ chāi-sek-lú ah? 2 In-ūi Siōng-tè tùi téng-bīn só͘ tiāⁿ-tio̍h ê hūn-gia̍h, Choân-lêng--ê tùi téng-bīn só͘ phài ê ki-gia̍p sī sím-mi̍h ah? 3 Kiám m̄-sī hoān-lān lîm-kàu put-gī--ê, Chai-hāi lîm-kàu chok-gia̍t--ê mah? 4 I kiám m̄-sī kàm-chhat góa ê lō͘. Tiám-sǹg góa ê kha-pō͘ mah? 5 Góa nā kap hu-ké saⁿ-kap kiâⁿ, Kha nā kóaⁿ-kín tè khúi-chà; 6 (Goān góa hō͘ kong-tō ê thian-phêng lâi chhìn, Hō͘ Siōng-tè chai góa ê sûn-choân;) 7 Góa ê kha-pō͘ nā phian-lī chiàⁿ-lō͘, Góa ê sim nā kun-tè góa ê ba̍k-chiu, Nā ū lâ-sâm liâm tī góa ê chhiú; 8 Chiū goān góa só͘ chèng-ê, pa̍t-lâng chia̍h i, Góa só͘ chhut-sán--ê, i ê kun siū pu̍ih-chhut. 9 Góa ê sim nā hō͘ hū-lú ín-iú khì, Á-sī góa bih tī chhù-piⁿ ê mn̂g teh tán; 10 Chiū goān góa ê hū-jîn-lâng kā lâng oe-bō, Pa̍t-lâng iā kap i tâng-pâng; 11 In-ūi che sī tōa-pháiⁿ, Sī sím-phòaⁿ-si eng-kai pān ê chōe; 12 Che sī hé, sio kàu bia̍t-bô, Pu̍ih-tû góa it-chhè só͘ chhut-sán--ê ê kun. 13 Góa ê lô͘-po̍k lú-pī kap góa piān-lūn ê sî, Góa nā biáu-sī in ê lí-iû; 14 Chiū Siōng-tè khí-lâi, góa beh cháiⁿ-iūⁿ ah? I sím-mn̄g, góa beh cháiⁿ-iūⁿ ìn ah? 15 Chō góa tī the--ni̍h-ê, kiám-m̄-sī iā chō i mah? Chō-chiâⁿ goán tī pak-tó͘--ê, kiám m̄-sī chi̍t-ê mah? 16 Góa nā kìm-chí sòng-hiong lâng ê ì-goān, Á-sī hō͘ kóaⁿ-hū ê ba̍k-chiu khòaⁿ kàu ian-n̄g; 17 Á-sī góa ka-kī chia̍h tām-po̍h mi̍h, Bô-pē ê kiáⁿ chia̍h bô hūn ah? 18 (Tùi góa siàu-liân i kap góa saⁿ-kap tōa-hàn, chhin-chhiūⁿ kap lāu-pē chi̍t-iūⁿ; Góa tùi chhut lāu-bú ê pak-tó͘ chiū khan-sêng kóaⁿ-hū;) 19 Góa nā khòaⁿ-kìⁿ lâng in-ūi bô saⁿ lâi sí, Á-sī khòaⁿ-kìⁿ sòng-hiong lâng seng-khu bô thang jia-kah; 20 I ê io nā bô kā góa chiok-hok, I iā bô tùi góa ê iûⁿ ê mn̂g ka-kī sio, 21 Góa nā in-ūi khòaⁿ-kìⁿ tī siâⁿ-mn̂g ū pang-chān góa ê, Chiū khí-chhiú kong-kek bô-pē ê kiáⁿ; 22 Goān góa ê chhiú tùi keng-kah lut--lo̍h-khì, Góa ê chhiú-chat tùi kut chi̍h--khì; 23 In-ūi tùi Siōng-tè lâi ê chai-ē hō͘ góa kiaⁿ-hiâⁿ; In-ūi I ê ui-giâm, góa tng bōe khí. 24 Góa nā ēng n̂g-kim chòe ǹg-bāng, Tùi hó-kim kóng, Lí sī góa só͘ óa-khò ê; 25 Góa nā in-ūi châi-bu̍t hong-sēng, In-ūi Góa ê chhiú thàn chōe-chōe lâi hoaⁿ-hí; 26 Góa nā khòaⁿ-kìⁿ ji̍t teh hoat-kng, Ge̍h kng-kng teh kiâⁿ; 27 Góa ê sim tī àm-tiong siū ín-iú, Á-sī góa ê chhùi kap góa ê chhiú saⁿ-chim; 28 Che iā sī sím-phòaⁿ-si eng-kai pān ê chōe, In-ūi góa án-ni sī pōe-biū tī téng-bīn ê Siōng-tè. 29 Góa nā lia̍h oàn-hūn góa--ê ê chai-ē chòe khoài-lo̍k, Á-sī ūi-tio̍h i tú-tio̍h chai-ē lâi tek-ì; 30 (Kî-si̍t góa bô iông-ún góa ê chhùi hoān-chōe, Chiù-chó͘ kiû hō͘ in sí;) 31 Nā góa pò͘-pîⁿ-lāi ê lâng bô kóng, Chī-chūi ōe chhē-tio̍h chi̍t-ê bô chia̍h i ê hó-mi̍h kàu pá--ê? 32 (Chhut-gōa-lâng bô hioh tī ke-lō͘, Góa kā kiâⁿ-lō͘ ê lâng khui mn̂g;) 33 Góa nā chhin-chhiūⁿ A-tong jia-iám góa ê kè-si̍t, Khǹg góa ê chōe-gia̍t tī góa ê heng-chêng; 34 Ūi-tio̍h kiaⁿ tōa-tūi ê chèng-lâng, Kiaⁿ chong-cho̍k ê biáu-sī, Tì-kàu chēng-chēng m̄-káⁿ chhut-mn̂g-- 35 Goān ū chi̍t-ê teh thiaⁿ góa! (Khòaⁿ ah, ū góa só͘ ūi ê hō, goān Choân-lêng--ê ìn góa;) Goān tit-tio̍h góa ê tùi-te̍k só͘ siá ê kò-chn̄g! 36 Góa tek-khak beh pē i tī góa ê keng-thâu, Tì i chòe bián-liû. 37 Góa beh tùi I kóng-bêng góa kha-pō͘ ê siàu-gia̍h, Beh chhin-chhiūⁿ jîn-kun chiū-kūn I. 38 Góa ê chhân-hn̂g nā chhut-siaⁿ kò góa, Lôe-kau saⁿ-kap thî-khàu; 39 Góa nā chia̍h i ê chhut-sán, bô hō͘ i kè-chîⁿ, Á-sī hō͘ gia̍p-chú sit-lo̍h i ê sìⁿ-miā; 40 Chiū goān chhì-á hoat-siⁿ thòe sió-be̍h, Pháiⁿ-chháu hoat-siⁿ lâi thòe tōa-be̍h. Iok-pek ê ōe bêng-pe̍k lah.
1 Tùi án-ni，chit三個人就停soah，無koh應約伯，因為伊家己看做義。 2 Hit時有Pò͘-se人，屬tī Lân ê族，Pa-la̍h-ka ê kiáⁿ Í-lī-hō͘，真受氣；受氣約伯，因為伊掠家己比上帝khah有義。 3 也受氣伊三個朋友，因為in想無話thang應，iáu-kú擬約伯有罪。 4 Í-lī-hō͘ beh kap約伯講話，iáu teh thèng候；是因為in比伊khah-chōe歲。 5 Í-lī-hō͘看見chit三人嘴內無ōe thang應，就大受氣。 6 Pò͘-se人Pa-la̍h-ka ê kiáⁿ Í-lī-hō͘應講，我少年，lín年老；所以我退讓，m̄敢對lín排列我ê意見。 7 我講，日子chōe-ê tio̍h講，歲壽高ê tio̍h用智慧教示人。 8 若是人ê內面有心神，也全能ê ê氣hō͘人聰明。 9 Khah序大ê，無lóng有智慧，khah老年ê，無lóng會明白公平。 10 所以我講，lín tio̍h聽我；我也beh排列我ê意見。 11 看ah，我已經thèng候lín ê話，koh耳孔聽lín ê理論；thèng候lín chhē-tio̍h thang講ê話。 12 我留心聽lín。看ah，lín中間無一人辯倒約伯，也無一个應伊ê話。 13 Lín莫得講，阮tú-tio̍h智慧；上帝能贏伊，人bōe能。 14 伊無用話kap我辯論；我也無beh用lín ê話應伊。 15 In gāng-gāng無koh應，無話thang講。 16 In無講話，定定khiā-teh無koh應，我kiám tio̍h koh thèng候mah？ 17 我也beh盡我ê份額來應，排列我ê意見。 18 因為我有話滿滿；我內面ê神激動我。 19 看ah，我ê腹內親像封密密ê酒；也親像新ê皮袋teh-beh爆裂。 20 我beh講出，hō͘我tháu去；我beh開嘴來應。 21 我無beh看人ê身分；也無beh諂媚人。 22 因為我bōe曉得諂媚人；若有án-ni，就創造我ê beh緊緊除滅我。
1 Tùi án-ni chí(**chit) saⁿ ê lâng chiū thêng-soah, bô koh ìn Iok-pek, in-ūi i ka-kī khòaⁿ-chòe gī. 2 Hit-sî ū Pò͘-se lâng, sio̍k tī Lân ê cho̍k, Pa-la̍h-ka ê kiáⁿ Í-lī-hō͘, chin siū-khì; siū-khì Iok-pek, in-ūi i lia̍h ka-kī pí Siōng-tè khah ū gī. 3 Iā siū-khì i saⁿ ê pêng-iú, in-ūi in siūⁿ bô ōe thang ìn, iáu-kú gí Iok-pek ū chōe. 4 Í-lī-hō͘ beh kap Iok-pek kóng-ōe, iáu teh thèng-hāu; sī in-ūi in pí i khah-chōe hè. 5 Í-lī-hō͘ khòaⁿ-kìⁿ chí saⁿ lâng chhùi-lāi bô ōe thang ìn, chiū tōa siū-khì. 6 Pò͘-se lâng Pa-la̍h-ka ê kiáⁿ Í-lī-hō͘ ìn kóng, Góa siàu-liân, lín nî-lāu; Só͘-í góa thè-niū, m̄-káⁿ tùi lín pâi-lia̍t góa ê ì-kiàn. 7 Góa kóng, Ji̍t-chí chōe-ê tio̍h kóng, Hè-siū koâiⁿ-ê tio̍h ēng tì-hūi kà-sī lâng. 8 Nā-sī lâng ê lāi-bīn ū sim-sîn, Iā Choân-lêng--ê ê khì hō͘ lâng chhang-miâ. 9 Khah sī-tōa--ê, bô lóng ū tì-hūi, Khah ló-liân--ê, bô lóng ōe bêng-pe̍k kong-pêng. 10 Só͘-í góa kóng, Lín tio̍h thiaⁿ góa; Góa iā beh pâi-lia̍t góa ê ì-kiàn. 11 Khòaⁿ ah, góa í-keng thèng-hāu lín ê ōe, Koh hī-khang thiaⁿ lín ê lí-lūn; Thèng-hāu lín chhē-tio̍h thang kóng ê ōe. 12 Góa liû-sim thiaⁿ lín. Khòaⁿ ah, lín tiong-kan bô chi̍t-lâng piān-tó Iok-pek, Iā bô chi̍t-ê ìn i ê ōe. 13 Lín bo̍h-tit kóng, Goán tú-tio̍h tì-hūi; Siōng-tè ōe iâⁿ i, lâng bōe-ōe. 14 I bô ēng ōe kap góa piān-lūn; Góa iā bô beh ēng lín ê ōe ìn i. 15 In gāng-gāng bô koh ìn, Bô ōe thang kóng. 16 In bô kóng-ōe, tiāⁿ-tiāⁿ khiā-teh bô koh ìn, Góa kiám tio̍h koh thèng-hāu mah? 17 Góa iā beh chīn góa ê hūn-gia̍h lâi ìn, Pâi-lia̍t góa ê ì-kiàn. 18 In-ūi góa ū ōe móa-móa; Góa lāi-bīn ê sîn kek-tōng góa. 19 Khòaⁿ ah, góa ê pak-lāi chhin-chhiūⁿ hong-ba̍t-ba̍t ê chiú; Iā chhin-chhiūⁿ sin ê phê-tē teh-beh piak-li̍h. 20 Góa beh kóng-chhut, hō͘ góa tháu-khì; Góa beh khui-chhùi lâi ìn. 21 Góa bô beh khòaⁿ lâng ê sin-hūn; Iā bô beh thiám-mī lâng. 22 In-ūi góa bōe hiáu-tit thiám-mī lâng; Nā ū án-ni, chiū chhòng-chō góa--ê beh kín-kín tû-bia̍t góa.
1 約伯ah，taⁿ請你聽我ê話，留心聽我一切ê言語。 2 看ah，我taⁿ開我ê嘴，我ê舌tī嘴內teh講。 3 我ê話beh講出我心內ê正直，我ê嘴唇beh老實講出所知ê。 4 上帝ê神創造我；全能ê ê氣hō͘我得tio̍h活。 5 你若會，就tio̍h應我，起來khiā排列tī我ê面前。 6 看ah，我tī上帝ê面前kap你一樣，也是用土ni̍h成ê。 7 看ah，我無用威嚴hō͘你驚，也無用我ê勢力teh你。 8 你所講ê，我實在有聽見，也有聽見你ê話ê聲，講， 9 我是清氣，無過失，我是清白，tī我心內也無罪。 10 看ah，伊chhē空隙來攻擊我，掠我做伊ê對敵。 11 伊用腳銬哭我ê腳，致意看我一切ê路。 12 看ah，講到這，你是不義，我beh應你；因為上帝比人khah大。 13 你啥事kap伊相爭？因為伊ê事伊lóng無解明。 14 因為上帝講一pái，也兩pái，總是人無致意。 15 人倒tī眠床睏，到伊睏重眠ê時，tī眠夢中，暝時ê異象， 16 伊開in ê耳孔，蓋印tī in所受ê教示。 17 Beh hō͘人改換所計畫ê事，遏(at)止人ê驕傲。 18 阻止伊ê活命無落深坑，也伊ê性命無tùi刀劍來死。 19 人tī眠床裡受痛疼ê警戒；tī伊ê骨內親像交戰無soah。 20 致到伊ê活命厭賤食物，伊ê心神厭惡好味。 21 伊ê肉消瘦，無thang看見；平素無看見ê骨，taⁿ lóng thóng出。 22 伊ê性命近tī深坑；伊ê活命近tī hiahê滅無性命ê。 23 若有一个使者kap伊tī-teh，就是一千中ê一个，替伊講話ê，將人所tio̍h做ê指示伊； 24 伊就施恩hō͘伊，講，救伊免得落深坑，我已經chhē-tio̍h贖回伊ê。 25 伊ê肉比gín-ná ê肉khah幼軟；伊beh復到少年ê日子。 26 伊beh祈禱上帝，上帝歡喜伊；見tio̍h伊ê面來歡喜；伊koh算hit人做義。 27 伊tī人ê面前唱歌講，我有犯罪，顛倒是非，無利益我。 28 伊救贖我ê性命，免落深坑；我ê活命也beh看見光。 29 看ah，chiahê一切ê事上帝行tī人，兩pái，三pái。 30 為tio̍h beh tùi深坑救伊ê性命倒tńg，hō͘伊得tio̍h活命ê光照伊。 31 約伯ah，你tio̍h àⁿ耳孔聽我ê話，tio̍h靜靜，我就beh講。 32 你若有話thang講，就應我；做你講，因為我ài掠你做義。 33 若無，你tio̍h聽我講，你tio̍h靜靜，我beh教你智慧。
1 Iok-pek ah, taⁿ chhiáⁿ lí thiaⁿ góa ê ōe, Liû-sim thiaⁿ góa it-chhè ê giân-gú. 2 Khòaⁿ ah, góa taⁿ khui góa ê chhùi, Góa ê chi̍h tī chhùi-lāi teh kóng. 3 Góa ê ōe beh kóng-chhut góa sim-lāi ê chèng-ti̍t, Góa ê chhùi-tûn beh láu-si̍t kóng-chhut só͘ chai ê. 4 Siōng-tè ê Sîn chhòng-chō góa; Choân-lêng--ê ê khì hō͘ góa tit-tio̍h oa̍h. 5 Lí nā ōe, chiū tio̍h ìn góa, Khí-lâi khiā pâi-lia̍t tī góa ê bīn-chêng. 6 Khòaⁿ ah, góa tī Siōng-tè ê bīn-chêng kap lí chi̍t-iūⁿ, Iā sī ēng thô͘ ni̍h-chiâⁿ-ê. 7 Khòaⁿ ah, góa bô ēng ui-giâm hō͘ lí kiaⁿ, Iā bô ēng góa ê sè-le̍k teh--lí. 8 Lí só͘ kóng-ê, góa si̍t-chāi ū thiaⁿ-kìⁿ, Iā ū thiaⁿ-kìⁿ lí ê ōe ê siaⁿ, kóng, 9 Góa sī chheng-khì, bô kè-sit, Góa sī chheng-pe̍k, tī góa sim-lāi iā bô chōe. 10 Khòaⁿ ah, I chhē khàng-khiah lâi kong-kek góa, Lia̍h góa chòe I ê tùi-te̍k. 11 I ēng kha-khàu khàu góa ê kha, Tì-ì khòaⁿ góa it-chhè ê lō͘. 12 Khòaⁿ ah, kóng kàu che, lí sī put-gī, góa beh ìn lí; In-ūi Siōng-tè pí lâng khah-tōa. 13 Lí siáⁿ-sū kap I saⁿ-chiⁿ? In-ūi I ê sū I lóng bô kóe-bêng. 14 In-ūi Siōng-tè kóng chi̍t-pái, Iā nn̄g-pái, chóng-sī lâng bô tì-ì. 15 Lâng tó tī bîn-chhn̂g khùn, Kàu i khùn tāng-bîn ê sî, Tī bîn-bāng-tiong, mî--sî ê īⁿ-siōng, 16 I khui in ê hī-khang, Khàm-ìn tī in só͘ siū ê kà-sī. 17 Beh hō͘ lâng kóe-ōaⁿ só͘ kè-e̍k ê sū, At-chí lâng ê kiau-ngō͘. 18 Chó͘-chí i ê oa̍h-miā bô lo̍h chhim-khiⁿ, Iā i ê sìⁿ-miā bô tùi to-kiàm lâi sí. 19 Lâng tī bîn-chhn̂g--nih siū thàng-thiàⁿ ê kéng-kài; Tī i ê kut-lāi chhin-chhiūⁿ kau-chiàn bô soah. 20 Tì-kàu i ê oa̍h-miā iàm-chiān chia̍h-mi̍h, I ê sim-sîn iàm-ò͘ⁿ hó-bī. 21 I ê bah siau-sán, bô thang khòaⁿ-kìⁿ; Pêng-sò͘ bô khòaⁿ-kìⁿ ê kut, taⁿ lóng thóng-chhut. 22 I ê sìⁿ-miā kūn tī chhim-khiⁿ; I ê oa̍h-miā kūn tī hiah ê bia̍t-bô sìⁿ-miā ê. 23 Nā ū chi̍t ê sù-chiá kap i tī-teh, Chiū-sī chi̍t-chheng-tiong ê chi̍t-ê, thòe i kóng-ōe-ê, Chiong lâng só͘ tio̍h-chòe-ê chí-sī i; 24 I chiū si-un hō͘ i, kóng, Kiù i bián-tit lo̍h chhim-khiⁿ, Góa í-keng chhē-tio̍h sio̍k-hôe i ê. 25 I ê bah pí gín-ná ê bah khah iù-nńg; I beh ho̍k-tò siàu-liân ê ji̍t-chí. 26 I beh kî-tó Siōng-tè, Siōng-tè hoaⁿ-hí i; Kìⁿ-tio̍h I ê bīn lâi hoaⁿ-hí; I koh sǹg hit-lâng chòe-gī. 27 I tī lâng ê bīn-chêng chhiùⁿ-koa kóng, Góa ū hoān-chōe, tian-tò sī-hui, bô lī-ek góa. 28 I kiù-sio̍k góa ê sìⁿ-miā, bián-lo̍h chhim-khiⁿ; Góa ê oa̍h-miā iā beh khòaⁿ-kìⁿ kng. 29 Khòaⁿ ah, chiah ê it-chhè ê sū Siōng-tè kiâⁿ tī lâng, Nn̄g-pái, saⁿ-pái. 30 Ūi-tio̍h beh tùi chhim-khiⁿ kiù i ê sìⁿ-miā tò-tńg, Hō͘ i tit-tio̍h oa̍h-miā ê kng chiò i. 31 Iok-pek ah, lí tio̍h àⁿ hī-khang thiaⁿ góa ê ōe, Tio̍h chēng-chēng, góa chiū beh kóng. 32 Lí nā ū ōe thang kóng, chiū ìn góa; Chòe lí kóng, in-ūi góa ài lia̍h lí chòe gī. 33 Nā bô, lí tio̍h thiaⁿ góa kóng, lí tio̍h chēng-chēng, Góa beh kà lí tì-hūi.
1 Í-lī-hō͘ koh應講， 2 Lín有智慧ê人，tio̍h聽我ê話，有知識ê人tio̍h àⁿ耳孔聽我。 3 因為耳á試驗話，親像上kiuⁿ分別滋味。 4 咱tio̍h為家己揀hitê合宜ê，也tio̍h相kap知甚麼是好。 5 因為約伯有講，我是公義，上帝奪我ê正理； 6 我雖然有理，iáu算做講白賊ê；我雖然無過失，所受ê傷bōe醫得。 7 Chī-chūi親像約伯滿嘴侮慢，親像lim水ah？ 8 伊kap作孽ê做伴來往，kap pháiⁿ人相kap行。 9 因為伊bat講，人歡喜上帝，lóng是無利益。 10 所以lín明理ê人，tio̍h聽我ê話。上帝斷斷bōe行pháiⁿ，全能ê斷斷bōe行不義。 11 因為伊beh照人所做ê來報應伊，照人所行ê來hō͘伊tú-tio̍h。 12 上帝實在bōe做pháiⁿ；全能ê也無偏私來審判。 13 Chī-chūi用地託重伊ah？Chī-chūi安定全世界ah？ 14 伊若專心顧家己，將伊ê神kap氣收回歸家己， 15 見若有肉體ê beh做一下死，人猶原beh歸土。 16 你若明理，就tio̍h聽chitê，àⁿ耳孔聽我講話ê聲。 17 怨恨公平ê kiám會掌權mah？Hit-ê有公義ê，有權能ê，你kiám會定伊有罪mah？ 18 伊對君王講，你是無hē落-ê；對貴族講，你是邪惡-ê。 19 伊無偏私款待有爵位ê，也無欺貧重富，因為lóng是伊ê手所造ê。 20 Tiap-á久ê中間，半暝ê時，in就死無；百姓受搖choah，teh過去；勇猛ê受除滅m̄免用手。 21 因為伊ê目睭鑑察ta̍k人ê路，看明伊ê腳步。 22 無有烏暗，無有死蔭，thang hō͘行pháiⁿ ê人去bih。 23 因為伊無kā人定tio̍h時期，hō͘人thang到伊ê面前受審判。 24 伊phah碎強猛ê人，m̄免查問，設立別人來替in。 25 因為伊鑑察in ê所做；tī暝時chhia倒in，in就滅無。 26 Tī眾人teh看ê所在，伊phah in，親像phah做pháiⁿ ê人一樣。 27 因為in行偏斜(chhoa̍h)無tè伊，也lóng無致意伊ê路。 28 致到hō͘ sòng-hiong人喉叫ê聲透到伊面前，伊也聽見困苦ê人ê喉叫。 29 伊hō͘人安靜，是誰會嫌伊m̄-tio̍h ah？伊掩面，是誰看伊能tio̍h ah？伊款待一國á是一人lóng是án-ni； 30 免得無敬虔ê人做王，免得有人籠絡百姓。 31 Kiám有人bat對上帝講，我已經受責罰，無koh犯罪ah？ 32 我所無看見ê，求你指示我，我若bat做pháiⁿ，我無beh koh做伊。 33 Kiám是伊所報應，無照你ê意思，你chiah推辭m̄受mah？Taⁿ tio̍h揀ê，是你，m̄是我；你所知ê做你講。 34 明理ê人，kap聽我ê話ê智慧人，beh對我講； 35 約伯所講ê無知識，伊ê話無智慧。 36 願約伯受試驗到透底，因為伊ê應答親像pháiⁿ人。 37 因為伊tī伊ê罪koh加添悖逆；伊tī咱中間phah手；koh用chōe-chōe話反對上帝。
1 Í-lī-hō͘ koh ìn kóng, 2 Lín ū tì-hūi ê lâng, tio̍h thiaⁿ góa ê ōe, Ū tì-sek-ê lâng tio̍h àⁿ hī-khang thiaⁿ góa. 3 In-ūi hī-á chhì-giām ōe, Chhin-chhiūⁿ chiūⁿ-kiuⁿ hun-piat chu-bī. 4 Lán tio̍h ūi ka-kī kéng hit ê ha̍p-gî--ê, Iā tio̍h saⁿ-kap chai sím-mi̍h sī hó. 5 In-ūi Iok-pek ū kóng, Góa sī kong-gī, Siōng-tè toa̍t góa ê chèng-lí; 6 Góa sui-jiân ū lí, iáu sǹg chòe kóng pe̍h-chha̍t--ê; Góa sui-jiân bô kè-sit, só͘ siū ê siong bōe-i--tit. 7 Chī-chūi chhin-chhiūⁿ Iok-pek móa-chhùi bú-bān, Chhin-chhiūⁿ lim chúi ah? 8 I kap chok-gia̍t--ê chòe-phōaⁿ lâi-óng, Kap pháiⁿ-lâng saⁿ-kap kiâⁿ. 9 In-ūi i bat kóng, Lâng hoaⁿ-hí Siōng-tè, Lóng sī bô lī-ek. 10 Só͘-í lín bêng-lí ê lâng, tio̍h thiaⁿ góa ê ōe. Siōng-tè toàn-toàn bōe kiâⁿ pháiⁿ, Choân-lêng--ê toàn-toàn bōe kiâⁿ put-gī. 11 In-ūi I beh chiàu lâng só͘-chòe-ê lâi pò-èng i, Chiàu lâng só͘-kiâⁿ--ê lâi hō͘ i tú-tio̍h. 12 Siōng-tè si̍t-chāi bōe chòe pháiⁿ; Choân-lêng--ê iā bô phian-su lâi sím-phòaⁿ. 13 Chī-chūi ēng tōe thok-tiōng I ah? Chī-chūi an-tiāⁿ choân sè-kài ah? 14 I nā choan-sim kò͘ ka-kī, Chiong I ê sîn kap khì siu-hôe kui ka-kī, 15 Kìⁿ-nā ū jio̍k-thé--ê beh chòe chi̍t-ē sí, Lâng iû-goân beh kui thó͘. 16 Lí nā bêng-lí, chiū tio̍h thiaⁿ chit-ê, Àⁿ hī-khang thiaⁿ góa kóng-ōe ê siaⁿ. 17 Oàn-hūn kong-pêng--ê kiám ōe chiáng-koân mah? Hit-ê ū kong-gī--ê, ū koân-lêng--ê, lí kiám ōe tēng I ū-chōe mah? 18 I tùi kun-ông kóng, Lí sī bô hē-lo̍h--ê; Tùi kùi-cho̍k kóng, Lí sī siâ-ok--ê. 19 I bô phian-su khoán-thāi ū chiok-ūi-ê, Iā bô khi-pîn tiōng-hù, In-ūi lóng sī I ê chhiú só͘ chō ê. 20 Tiap-á-kú ê tiong-kan, pòaⁿ-mî ê sî, in chiū sí-bô; Peh-sìⁿ siū iô-choah, teh kè--khì; Ióng-béng--ê siū tû-bia̍t m̄-bián ēng chhiú. 21 In-ūi I ê ba̍k-chiu kàm-chhat ta̍k lâng ê lō͘, Khòaⁿ-bêng i ê kha-pō͘. 22 Bô ū o͘-àm, bô ū sí-ìm, Thang hō͘ kiâⁿ-pháiⁿ ê lâng khì bih. 23 In-ūi I bô kā lâng tiāⁿ-tio̍h sî-kî, Hō͘ lâng thang kàu I ê bīn-chêng siū sím-phòaⁿ. 24 I phah-chhùi kiông-béng ê lâng, m̄-bián chhâ-mn̄g, Siat-li̍p pa̍t-lâng lâi thòe in. 25 In-ūi I kàm-chhat in ê só͘-chòe; Tī mî--sî chhia-tó in, in chiū bia̍t-bô. 26 Tī chèng-lâng teh khòaⁿ ê só͘-chāi I phah in, Chhin-chhiūⁿ phah chòe-pháiⁿ ê lâng chi̍t-iūⁿ. 27 In-ūi in kiâⁿ phian-chhoa̍h bô tè I, Iā lóng bô tì-ì I ê lō͘. 28 Tì-kàu hō͘ sòng-hiong lâng âu-kiò ê siaⁿ thàu-kàu I bīn-chêng, I iā thiaⁿ-kìⁿ khùn-khó͘ ê lâng ê âu-kiò. 29 I hō͘ lâng an-chēng, chī-chūi ōe hiâm I m̄-tio̍h ah? I ng-bīn, chī-chūi khòaⁿ I ōe tio̍h ah? I khoán-thāi chi̍t-kok á-sī chi̍t-lâng lóng sī án-ni; 30 Bián-tit bô kèng-khiân ê lâng chòe ông, Bián-tit ū lâng lóng-lo̍k peh-sìⁿ. 31 Kiám ū lâng bat tùi Siōng-tè kóng, Góa í-keng siū chek-hoa̍t, bô koh hoān-chōe ah? 32 Góa só͘ bô khòaⁿ-kìⁿ--ê, kiû Lí chí-sī góa, Góa nā bat chòe pháiⁿ, góa bô beh koh chòe i. 33 Kiám sī I só͘ pò-èng, bô chiàu lí ê ì-sù, lí chiah the-sî m̄-siū mah? Taⁿ tio̍h kéng--ê, sī lí, m̄-sī góa; lí só͘ chai-ê chòe lí kóng. 34 Bêng-lí ê lâng, kap thiaⁿ góa ê ōe ê tì-hūi lâng, Beh tùi góa kóng; 35 Iok-pek só͘ kóng-ê bô tì-sek, I ê ōe bô tì-hūi. 36 Goān Iok-pek siū chhì-giām kàu thàu-tóe, In-ūi i ê ìn-tap chhin-chhiūⁿ pháiⁿ lâng. 37 In-ūi i tī i ê chōe koh ke-thiⁿ pōe-ge̍k; I tī lán tiong-kan phah-chhiú; Koh ēng chōe-chōe ōe hoán-tùi Siōng-tè.
1 Í-lī-hō͘ koh應講， 2 你掠chitê做有合理，你講，我ê義贏過上帝ê義ah， 3 你竟然講，這有甚麼利益你？又koh，我有甚麼利益khah贏我bat去犯罪？ 4 我beh應你，以及óa你ê同伴。 5 你tio̍h kia̍h目看天，看hitê穹蒼，是比你khah高。 6 你若犯罪，會害tio̍h伊甚麼？你ê過失若加添，會礙tio̍h伊甚麼ah？ 7 你若行義，有甚麼hō͘伊ah？á是伊對你ê手有得tio̍h甚麼ah？ 8 你ê pháiⁿ關係你同類ê人，你ê義也關係世間人。 9 人因為受chōe-chōe暴虐就喉叫，因為受強ê人ê壓制，就哮救。 10 總是無人講，創造我ê上帝tī toh落？伊是hō͘人暝時唱歌ê。 11 伊是教示咱贏過地上ê走獸，hō͘咱有智慧，贏過tī空中ê飛鳥ê。 12 In tī-hia喉叫，總是無有應答ê，因為pháiⁿ人驕傲ê緣故。 13 虛假ê，上帝無beh聽，全能ê也m̄看顧伊。 14 何況你講，你無看見伊；chitê案件tī伊ê面前，你tio̍h請thèng候伊 ah！ 15 總是taⁿ因為伊無受氣來責罰，也無不止注意侮慢； 16 所以約伯開嘴lóng虛假，講chōe-chōe無知ê話。
1 Í-lī-hō͘ koh ìn kóng, 2 Lí lia̍h chit-ê chòe ū ha̍p-lí, Lí kóng, Góa ê gī iâⁿ-kè Siōng-tè ê gī ah, 3 Lí kéng-jiân kóng, Che ū sím-mi̍h lī-ek lí? Iū-koh, Góa ū sím-mi̍h lī-ek khah-iâⁿ góa bat khì hoān-chōe? 4 Góa beh ìn lí, Í-ki̍p óa-lí ê tâng-phōaⁿ. 5 Lí tio̍h kia̍h-ba̍k khòaⁿ thiⁿ, Khòaⁿ hit ê kiong-chhong, sī pí lí khah-koâiⁿ. 6 Lí nā hoān-chōe, ōe hāi-tio̍h I sím-mi̍h? Lí ê kè-sit nā ke-thiⁿ, ōe gāi-tio̍h I sím-mi̍h ah? 7 Lí nā kiâⁿ-gī, ū sím-mi̍h hō͘ I ah? Á-sī I tùi lí ê chhiú ū tit-tio̍h sím-mi̍h ah? 8 Lí ê pháiⁿ koan-hē lí tâng-lūi ê lâng, Lí ê gī iā koan-hē sè-kan lâng. 9 Lâng in-ūi siū chōe-chōe pō-gio̍k chiū âu-kiò, In-ūi siū kiông ê lâng ê ap-chè, chiū háu-kiù. 10 Chóng-sī bô lâng kóng, Chhòng-chō góa ê Siōng-tè tī toh-lo̍h? I sī hō͘ lâng mî--sî chhiùⁿ-koa--ê. 11 I sī kà-sī lán iâⁿ-kè tōe-chiūⁿ ê cháu-siù, Hō͘ lán ū tì-hūi, iâⁿ-kè tī khong-tiong ê pe-chiáu ê. 12 In tī-hia âu-kiò, chóng-sī bô ū ìn-tap ê, In-ūi pháiⁿ-lâng kiau-ngō͘ ê iân-kò͘. 13 Hu-kè-ê, Siōng-tè bô beh thiaⁿ, Choân-lêng--ê iā m̄ khòaⁿ-kò͘ i. 14 Hô-hòng lí kóng, lí bô khòaⁿ-kìⁿ I; Chit ê àn-kiāⁿ tī I ê bīn-chêng, lí tio̍h chhiáⁿ thèng-hāu I ah! 15 Chóng-sī taⁿ in-ūi I bô siū-khì lâi chek-hoa̍t, Iā bô put-chí chù-ì bú-bān; 16 Só͘-í Iok-pek khui-chhùi lóng hu-ké, Kóng chōe-chōe bû-ti ê ōe.
1 Í-lī-hō͘ koh續接講， 2 你koh容允我tiap-á久，我就beh指示你，因為iáu有話beh為tio̍h上帝來講。 3 我beh tùi遠遠取我ê知識，用義歸hō͘創造我ê。 4 因為我ê話實在無白賊，有知識齊備ê kap你tī-teh。 5 看ah，上帝大權能lóng無藐視人；伊ê心思能力真大。 6 伊無保護pháiⁿ人ê性命，是hō͘苦難ê得tio̍h公平。 7 伊ê目睭無離開義人；hō͘ in kap君王相kap坐位到永遠；in就得tio̍h升高。 8 In若hō͘鎖鏈縛teh，hō͘苦難ê索liù-tio̍h； 9 伊就指示in知in ê所做，以及in所犯ê重罪。 10 伊也開in ê耳孔來受教示，吩咐in oa̍t-tńg來，離開罪惡。 11 In若聽thàn來服事，就beh興通過日，歷年安樂。 12 若m̄聽thàn，就beh hō͘刀劍刣，戇戇來死。 13 Hiah-ê心無敬虔ê人積聚受氣，伊綑縛in ê時，in也無哮救。 14 伊beh tī少年ê時死，in ê性命喪失親像pháiⁿ gín-ná一樣。 15 伊用困苦來救困苦ê人，用暴虐來開in ê耳孔。 16 伊引chhōa你出危急，入tī寬闊無狹toe̍h ê地；排tī你ê桌頂ê是有油膩(jī)滿滿ê。 17 你充滿pháiⁿ人ê擬議，就擬議kap判斷beh掠你。 18 M̄-thang容允受氣激動你，致到你侮慢；也m̄-thang因為贖回ê價錢大，來行偏。 19 你ê錢財，á是你一切ê勢力，kiám有效驗，hō͘你無tú-tio̍h患難mah？ 20 莫得欣慕hitê暗暝，就是百姓tī in ê所在tú-tio̍h除滅ê時。 21 你tio̍h謹慎，m̄-thang意向罪惡；因為你揀chitê，贏過苦難。 22 看ah，上帝用伊ê能力來行大事；是誰做教師親像伊ah？ 23 Chī-chūi能定tio̍h伊ê路？Chī-chūi會講，你有行不義？ 24 你tio̍h記得o-ló伊所行ê做大，就是人所唱歌ê。 25 人lóng看見伊；人tùi遠遠看見伊。 26 看ah，上帝至大，咱m̄-bat伊；伊ê年ê額bōe算得。 27 因為伊吸引一滴一滴ê水，就對伊ê濕氣變成雨； 28 就是天所落ê，來ak眾人。 29 Chī-chūi能明白雲怎樣thí開，kap伊行宮khū-khū哮ê聲？ 30 看ah，伊發出伊ê光tī hit頂面；伊koh遮蓋海ê底。 31 因為伊用chiahê審判百姓；koh賞賜豐盛ê米糧。 32 伊用電光遮手，命令伊phah-tio̍h對敵。 33 伊ê聲是表明伊；也用所beh起ê大風雨指示cheng-siⁿ。
1 Í-lī-hō͘ koh sòa-chiap kóng, 2 Lí koh iông-ún góa tiap-á-kú, góa chiū beh chí-sī lí, In-ūi iáu ū ōe beh ūi-tio̍h Siōng-tè lâi kóng. 3 Góa beh tùi hn̄g-hn̄g chhú góa ê tì-sek, Ēng gī kui hō͘ chhòng-chō góa--ê. 4 In-ūi góa ê ōe si̍t-chāi bô pe̍h-chha̍t, Ū tì-sek chiâu-pī--ê kap lí tī-teh. 5 Khòaⁿ ah, Siōng-tè tōa koân-lêng lóng bô biáu-sī lâng; I ê sim-su lêng-le̍k chin-tōa. 6 I bô pó-hō͘ pháiⁿ-lâng ê sìⁿ-miā, Sī hō͘ khó͘-lān--ê tit-tio̍h kong-pêng. 7 I ê ba̍k-chiu bô lī-khui gī-lâng; Hō͘ in kap kun-ông saⁿ-kap chē-ūi kàu éng-oán; In chiū tit-tio̍h seng-koâiⁿ. 8 In nā hō͘ só-liān pa̍k-teh, Hō͘ khó͘-lān ê soh liù-tio̍h; 9 I chiū chí-sī in chai in ê só͘-chòe, Í-ki̍p in só͘ hoān ê tāng-chōe. 10 I iā khui in ê hī-khang lâi siū kà-sī, Hoan-hù in oa̍t-tńg-lâi, lī-khui chōe-ok. 11 In nā thiaⁿ-thàn lâi ho̍k-sāi, Chiū beh heng-thong kè-ji̍t, Le̍k-nî an-lo̍k. 12 Nā m̄ thiaⁿ-thàn, chiū beh hō͘ to-kiàm thâi, Gōng-gōng lâi sí. 13 Hiah-ê sim bô kèng-khiân ê lâng chek-chū siū-khì, I khún-pa̍k in ê sî, in iā bô háu-kiù. 14 I beh tī siàu-liân ê sî sí, In ê sìⁿ-miā sòng-sit chhin-chhiūⁿ pháiⁿ gín-ná chi̍t-iūⁿ. 15 I ēng khùn-khó͘ lâi kiù khùn-khó͘ ê lâng, Ēng pō-gio̍k lâi khui in ê hī-khang. 16 I ín-chhōa lí chhut gûi-kip, Ji̍p tī khoan-khoah bô oe̍h-toe̍h ê tōe; Pâi tī lí ê toh-téng--ê sī ū iû-jī móa-móa ê. 17 Lí chhiong-móa pháiⁿ-lâng ê gí-gī, Chiū gí-gī kap phòaⁿ-toàn beh lia̍h lí. 18 M̄-thang iông-ún siū-khì kek-tōng lí, tì-kàu lí bú-bān; Iā m̄-thang in-ūi sio̍k-hôe ê kè-chîⁿ tōa, lâi kiâⁿ phian. 19 Lí ê chîⁿ-châi, á-sī lí it-chhè ê sè-le̍k, Kiám ū hāu-giām, hō͘ lí bô tú-tio̍h hoān-lān mah? 20 Bo̍h-tit him-bō͘ hit ê àm-mî, Chiū-sī peh-sìⁿ tī in ê só͘-chāi tú-tio̍h tû-bia̍t ê sî. 21 Lí tio̍h kín-sīn, m̄-thang ì-hiòng chōe-ok; In-ūi lí kéng chit-ê, iâⁿ-kè khó͘-lān. 22 Khòaⁿ ah, Siōng-tè ēng I ê lêng-le̍k lâi kiâⁿ tōa-sū; Chī-chūi chòe kàu-su chhin-chhiūⁿ I ah? 23 Chī-chūi ōe tiāⁿ-tio̍h I ê lō͘? Chī-chūi ōe kóng, Lí ū kiâⁿ put-gī? 24 Lí tio̍h kì-tit o-ló I só͘ kiâⁿ--ê chòe-tōa, Chiū-sī lâng só͘ chhiùⁿ-koa ê. 25 Lâng lóng khòaⁿ-kìⁿ i; Lâng tùi hn̄g-hn̄g khòaⁿ-kìⁿ i. 26 Khòaⁿ ah, Siōng-tè chì-tōa, lán m̄-bat I; I ê nî ê gia̍h bōe-sǹg-tit. 27 In-ūi I khip-ín chi̍t-tih chi̍t-tih ê chúi, Chiū tùi i ê sip-khì piàn-chiâⁿ hō͘; 28 Chiū-sī thiⁿ só͘ lo̍h ê, Lâi ak chèng-lâng. 29 Chī-chūi ōe bêng-pe̍k hûn cháiⁿ-iūⁿ thí-khui, Kap I hêng-kiong khū-khū-háu ê siaⁿ? 30 Khòaⁿ ah, I hoat-chhut I ê kng tī hit téng-bīn; I koh jia-khàm hái ê tóe. 31 In-ūi I ēng chiah-ê sím-phòaⁿ peh-sìⁿ; Koh siúⁿ-sù hong-sēng ê bí-niû. 32 I ēng tiān-kng jia-chhiú, Bēng-lēng i phah-tio̍h tùi-te̍k. 33 I ê siaⁿ sī piáu-bêng I; Iā ēng só͘ beh khí ê tōa hong-hō͘ chí-sī cheng-siⁿ.
1 因為án-ni我ê心pho̍k-pho̍k-chhéng ，搖動離開本位。 2 Tio̍h致意聽伊khū-khū ê聲，以及伊ê嘴所出旺ê聲。 3 伊ê聲發出到普天下，伊ê電sih到地極。 4 Tè後有聲khū-khū哮；伊用威嚴ê聲發雷；伊ê聲一下聽見，伊無停止in。 5 上帝發出雷ê聲真奇妙；伊行大事hō͘咱bōe測度得。 6 因為伊對雪講，tio̍h落tī地上；tùi kui-chūn ê雨，kap kui-chūn ê大雨，也是án-ni講。 7 伊禁止ta̍k人ê手；hō͘所造ê人lóng會知。 8 百獸入穴，lóng tòa tī in ê洞。 9 大風對伊ê府庫來，寒冷tùi北方出。 10 Tùi上帝ê pûn氣就kian冰，寬闊ê水就結tēng。 11 伊hō͘濕氣積滿tī密雲，展開電光ê雲； 12 Chitê是thàn伊ê指揮四界行轉旋(tńg-se̍h)；tī世界ê地面，行伊一切所吩咐in ê； 13 或是為tio̍h責罰，或是為tio̍h潤澤地，或是為tio̍h施行慈愛，chiah hō͘伊來。 14 約伯ah，你tio̍h留心來聽；tio̍h khiā-teh來想上帝奇妙ê事。 15 上帝怎樣吩咐chiahê？怎樣hō͘雲中ê電光照出，你知mah？ 16 雲怎樣鋪平tī空中；hitê知識齊備ê奇妙ê事，你知mah？ 17 土地因為南風靜靜ê時，你ê衣服怎樣燒lō，你知mah？ 18 你kiám會kap伊相kap鋪穹蒼mah？chitê穹蒼堅定，親像鑄成ê鏡。 19 阮因為愚戇bōe曉得排列阮ê話；你tio̍h教示阮應該對你講甚麼。 20 Kiám tio̍h報伊知，我beh講mah？人kiám ài受滅無mah？ 21 Taⁿ人無看見穹蒼內燦爛ê光；獨獨風tùi teh過，就hō͘伊清彩。 22 金ê光tùi北方出來；上帝有威嚴thang驚。 23 全能ê，咱bōe能測度伊；伊有大能力，有公平充滿公義，無beh苦楚人。 24 所以人敬畏伊；伊無看有智慧ê心ê。
1 In-ūi án-ni góa ê sim pho̍k-pho̍k-chhéng, Iô-tāng lī-khui pún-ūi. 2 Tio̍h tì-ì thiaⁿ I khū-khū ê siaⁿ, Í-ki̍p I ê chhùi só͘ chhut ōng ê siaⁿ. 3 I ê siaⁿ hoat-chhut kàu phó͘ thiⁿ-ē, I ê tiān sih kàu tōe-ke̍k. 4 Tè-āu ū siaⁿ khū-khū-háu; I ēng ui-giâm ê siaⁿ hoat lûi; I ê siaⁿ chi̍t-ē thiaⁿ-kìⁿ, I bô thêng-chí in. 5 Siōng-tè hoat-chhut lûi ê siaⁿ chin kî-biāu; I kiâⁿ tōa-sū hō͘ lán bōe chhek-to̍k--tit. 6 In-ūi I tùi seh kóng, Tio̍h lo̍h tī tōe-chiūⁿ; Tùi kui-chūn ê hō͘, Kap kui-chūn ê tōa-hō͘, iā sī án-ni kóng. 7 I kìm-chí ta̍k-lâng ê chhiú; Hō͘ só͘ chō ê lâng lóng ōe chai. 8 Pah-siù ji̍p hia̍t, Lóng tòa tī in ê tōng. 9 Tōa-hong tùi i ê hú-khò͘ lâi, Kôaⁿ-léng tùi pak-hng chhut. 10 Tùi Siōng-tè ê pûn-khùi chiū kian-peng, Khoan-khoah ê chúi chiū kiat-tēng. 11 I hō͘ sip-khì chek-móa tī ba̍t-hûn, Tián-khui tiān-kng ê hûn; 12 Chit-ê sī thàn I ê chí-hui sì-kòe kiâⁿ tńg-se̍h; Tī sè-kài ê tōe-bīn, Kiâⁿ I it-chhè só͘ hoan-hù in ê; 13 He̍k-sī ūi-tio̍h chek-hoa̍t, he̍k-sī ūi-tio̍h lūn-te̍k tōe, He̍k-sī ūi-tio̍h si-hêng chû-ài, chiah hō͘ i lâi. 14 Iok-pek ah, lí tio̍h liû-sim lâi thiaⁿ; Tio̍h khiā-teh lâi siūⁿ Siōng-tè kî-biāu ê sū. 15 Siōng-tè cháiⁿ-iūⁿ hoan-hù chiah-ê? Cháiⁿ-iūⁿ hō͘ hûn-tiong ê tiān-kng chiò-chhut, lí chai mah? 16 Hûn cháiⁿ-iūⁿ pho͘-pîⁿ tī khong-tiong; Hit ê tì-sek chiâu-pī--ê kî-biāu ê sū, lí chai mah? 17 Thó͘-tōe in-ūi lâm-hong chēng-chēng ê sî, Lí ê i-ho̍k cháiⁿ-iūⁿ sio-lō, lí chai mah? 18 Lí kiám ōe kap I saⁿ-kap pho͘ kiong-chhong mah? Chit ê kiong-chhong kian-tēng, chhin-chhiūⁿ chù-chiâⁿ ê kiàⁿ. 19 Goán in-ūi gû-gōng bōe hiáu tit pâi-lia̍t goán ê ōe; Lí tio̍h kà-sī goán eng-kai tùi lí kóng sím-mi̍h. 20 Kiám tio̍h pò I chai, góa beh kóng mah? Lâng kiám ài siū bia̍t-bô mah? 21 Taⁿ lâng bô khòaⁿ-kìⁿ kiong-chhong-lāi chhàn-lān ê kng; To̍k-to̍k hong tùi teh kè, chiū hō͘ i chheng-chhái. 22 Kim ê kng tùi pak-hng chhut-lâi; Siōng-tè ū ui-giâm thang kiaⁿ. 23 Choân-lêng--ê, lán bōe-ōe chhek-to̍k I; I ū tōa lêng-le̍k, ū kong-pêng chhiong-móa kong-gī, bô beh khó͘-chhó͘ lâng. 24 Só͘-í lâng kèng-ùi I; I bô khòaⁿ ū tì-hūi ê sim--ê.
1 Hit時耶和華tùi大風ê中間應約伯講， 2 Taⁿ一个用無知ê話，hō͘所議論ê無明，是是誰 ah？ 3 你tio̍h 縖腰親像大丈夫，我問你，你應我。 4 我hē地ê地基，hit時你tī toh落？你若知影就講伊。 5 Chī-chūi定tio̍h伊ê寸尺，是誰牽準索tī伊ê頂面，你知mah？ 6 伊ê地基chhāi tī甚麼ê頂面？á是伊角頭ê石，是誰安置ah？ 7 當hit時，天光早ê星相kap唱歌；上帝ê眾kiáⁿ也lóng出歡喜ê聲。 8 大海沖出，親像tùi胎裡出來，hit時是誰用門關伊？ 9 Hit時我用雲做伊ê衫，用烏暗做布包伊； 10 kā伊定tio̍h我所立ê界限，koh kā伊設門栱kap門。 11 講，你thang到chia，m̄-thang pôaⁿ過，你驕傲ê湧到chia為止。 12 Tùi你出世ê日以來，你bat命令早起時，hō͘天光早知伊ê所在； 13 hō͘伊khiú地ê四極，將pháiⁿ人pōaⁿ出去？ 14 伊就變換親像過印ê土，in出現親像衣服。 15 Pháiⁿ人所算做in ê光，taⁿ tùi in收倒tńg，kia̍h高ê手beh at折。 16 你bat入海ê水源mah？á是bat行tī深淵祕密ê所在mah？ 17 死無ê門有kā你開mah？死蔭ê門，你bat看見mah？ 18 地ê闊大，你有看透無？你若一盡知，做你講。 19 光明khiā起ê所在，hit條路tùi toh落去，koh烏暗ê所在tī toh落； 20 Thang hō͘你chhōa伊tò去伊ê境界？你能知影透到伊ê厝ê路mah？ 21 你知lah，因為hit時你已經出世，你年歲ê數額也chōe。 22 你bat入雪ê庫房，á是看見雹ê府庫， 23 就是我所收khǹg來thèng候患難ê期，thèng候相刣交戰ê日mah？ 24 光tùi甚麼路分開？東風tùi甚麼路四界吹tī地上？ 25 Chī-chūi kā大雨水開路；á是備辦雷電ê路； 26 來落雨tī無人ê地，tī無人khiā起ê曠野； 27 Hō͘拋荒荒廢ê地得tio̍h夠額，hō͘青草發生。 28 雨水有老父mah？露水一點一點，是誰 生ê ah？ 29 冰tùi甚麼ê胎出？天ê霜，是是誰 生ê ah？ 30 Chiahê水堅定親像石頭，深淵ê面結kui塊。 31 卯星kui簇(chhok)，是你縛ê mah？參星ê帶是你tháu-ê mah？ 32 你hō͘十二宮照伊ê時候出來？也chhōa北斗kap伊所屬ê星mah？ 33 你知天ê定例mah？á是設伊ê權管轄地mah？ 34 你能出聲叫雲，hō͘雨水chōe-chōe遮蓋你mah？ 35 你能發出sih-nà，in就去，對你講，阮tī-chia。 36 Chī-chūi用智慧hē tī內面？Chī-chūi賞賜聰明tī心內？ 37 Chī-chūi能用智慧算雲ê數額？Chī-chūi能piàⁿ天ê盆； 38 hit時塵埃成做土糜，土就結kui-thn̂g？ 39 你有kā母ê獅la̍k-tio̍h食物？hō͘獅á-thûn食飽mah？ 40 就是伊tī穴內撐腳，tī隱密ê所在bih-teh ê時。 41 烏鴉kiáⁿ ǹg上帝哀求；無thang食飛來飛去ê時，是誰為烏鴉備辦食物ah？
1 Hit-sî Iâ-hô-hoa tùi tōa-hong ê tiong-kan ìn Iok-pek kóng, 2 Taⁿ chi̍t-ê ēng bû-ti ê ōe, hō͘ só͘ gī-lūn-ê bô bêng, Sī chī-chūi ah? 3 Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí ìn Góa. 4 Góa hē tōe ê tōe-ki, hit-sî lí tī toh-lo̍h? Lí nā chai-iáⁿ chiū kóng i. 5 Chī-chūi tiāⁿ-tio̍h i ê chhùn-chhioh, Chī-chūi khan chîn-soh tī i ê téng-bīn, lí chai mah? 6 I ê tōe-ki chhāi tī sím-mi̍h ê téng-bīn? Á-sī i kak-thâu ê chio̍h, chī-chūi an-tì ah? 7 Tng hit-sî thiⁿ-kng-chá ê chhiⁿ saⁿ-kap chhiùⁿ-koa; Siōng-tè ê chèng-kiáⁿ iā lóng chhut hoaⁿ-hí ê siaⁿ. 8 Tōa-hái chhiong-chhut, chhin-chhiūⁿ tùi thai--nih chhut-lâi, Hit-sî chī-chūi ēng mn̂g koaiⁿ-i? 9 Hit-sî Góa ēng hûn chòe i ê saⁿ, Ēng o͘-àm chòe pò͘ pau i; 10 Kā i tiāⁿ-tio̍h Góa só͘ li̍p ê kài-hān, Koh kā i siat mn̂g-kông kap mn̂g. 11 Kóng, Lí thang kàu chia, m̄-thang pôaⁿ-kè, Lí kiau-ngō͘ ê éng kàu chia ûi-chí. 12 Tùi lí chhut-sì ê ji̍t í-lâi, lí bat bēng-lēng chá-khí sî, Hō͘ thiⁿ-kng-chá chai i ê só͘-chāi; 13 Hō͘ i khiú tōe ê sì-ke̍k, Chiong pháiⁿ-lâng pōaⁿ--chhut-khì? 14 I chiū piàn-ōaⁿ chhin-chhiūⁿ kè-ìn ê thô͘, In chhut-hiān chhin-chhiūⁿ i-ho̍k. 15 Pháiⁿ-lâng só͘ sǹg-chòe in ê kng, taⁿ tùi in siu tò-tńg, Kia̍h-koâiⁿ ê chhiú beh at-chi̍h. 16 Lí bat ji̍p hái ê chúi-goân mah? Á-sī bat kiâⁿ tī chhim-ian pì-bi̍t ê só͘-chāi mah? 17 Sí-bô ê mn̂g ū kā lí khui mah? Sí-ìm ê mn̂g, lí bat khòaⁿ-kìⁿ mah? 18 Tōe ê khoah-tōa, lí ū khòaⁿ-thàu bô? Lí nā it-chīn chai, chòe lí kóng. 19 Kng-bêng khiā-khí ê só͘-chāi, hit tiâu lō͘ tùi toh-lo̍h khì, Koh o͘-àm ê só͘-chāi tī toh-lo̍h; 20 Thang hō͘ lí chhōa i tò-khì i ê kéng-kài? Lí ōe chai-iáⁿ thàu kàu i ê chhù ê lō͘ mah? 21 Lí chai--lah, in-ūi hit-sî lí í-keng chhut-sì, Lí nî-hè ê siàu-gia̍h iā chōe. 22 Lí bat ji̍p seh ê khò͘-pâng, Á-sī khòaⁿ-kìⁿ pha̍uh ê hú-khò͘, 23 Chiū-sī Góa só͘ siu-khǹg lâi thèng-hāu hoān-lān ê kî, Thèng-hāu saⁿ-thâi kau-chiàn ê ji̍t mah? 24 Kng tùi sím-mi̍h lō͘ pun-khui? Tang-hong tùi sím-mi̍h lō͘ sì-kòe chhe tī tōe-chiūⁿ? 25 Chī-chūi kā tōa hō͘-chúi khui lō͘; Á-sī pī-pān lûi-tiān ê lō͘; 26 Lâi lo̍h-hō͘ tī bô lâng ê tōe, Tī bô lâng khiā-khí ê khòng-iá; 27 Hō͘ pha-hng hong-hòe ê tōe tit-tio̍h kàu-gia̍h, Hō͘ chhiⁿ-chháu hoat-siⁿ. 28 Hō͘-chúi ū lāu-pē mah? Lō͘-chúi chi̍t-tiám chi̍t-tiám, chī-chūi siⁿ-ê ah? 29 Peng tùi sím-mi̍h ê thai chhut? Thiⁿ ê sng, sī chī-chūi siⁿ-ê ah? 30 Chiah ê chúi kian-tēng chhin-chhiūⁿ chio̍h-thâu, Chhim-ian ê bīn kiat kui-tè. 31 Báu-chhiⁿ kui-chhok, sī lí pa̍k-ê mah? Chham-chhiⁿ ê tòa sī lí tháu-ê mah? 32 Lí hō͘ cha̍p-jī kiong chiàu i ê sî-hāu chhut lâi? Iā chhōa pak-táu kap i só͘ sio̍k ê chhiⁿ mah? 33 Lí chai thiⁿ ê tēng-lē mah? Á-sī siat i ê koân koán-hat tōe mah? 34 Lí ōe chhut-siaⁿ kiò hûn, Hō͘ hō͘-chúi chōe-chōe jia-khàm lí mah? 35 Lí ōe hoat-chhut sih-nà, in chiū khì, tùi lí kóng, Goán tī-chia. 36 Chī-chūi ēng tì-hūi hē tī lāi-bīn? Chī-chūi siúⁿ-sù chhang-miâ tī sim-lāi? 37 Chī-chūi ōe ēng tì-hūi sǹg hûn ê siàu-gia̍h? Chī-chūi ōe piàⁿ thiⁿ ê phûn; 38 Hit-sî tîn-ai chiâⁿ-chòe thô͘-bê, Thô͘ chiū kiat kui-thn̂g? 39 Lí ū kā bú ê sai la̍k-tio̍h chia̍h-mi̍h? Hō͘ sai-á-thûn chia̍h-pá mah? 40 Chiū-sī i tī hia̍t-lāi thìⁿ-kha, Tī ún-ba̍t ê só͘-chāi bih-teh ê sî. 41 O͘-a-kiáⁿ ǹg Siōng-tè ai-kiû; Bô thang chia̍h pe-lâi pe-khì ê sî, Chī-chūi ūi o͘-a pī-pān chia̍h-mi̍h ah?
1 山裡ê山羊tī時生，你知mah？鹿母生kiáⁿ，你看出mah？ 2 In掛kui tī時到月，你會算mah？In tī時生，你會曉得mah？ 3 In屈身生kiáⁿ，放出in ê勞苦。 4 In ê kiáⁿ漸漸肥phauh，tī山野長大；in出去，就無koh 倒tńg來。 5 Chī-chūi放野驢出去自由？Chī-chūi tháu山驢ê索？ 6 我用曠野做伊ê厝，用鹹ê地做伊khiā起ê所在。 7 伊恥笑城內ê喧嘩，趕 cheng-siⁿ-ê teh hoah，伊也m̄聽。 8 遍山是伊ê草場；伊也chhē ta̍k樣青翠ê物。 9 野牛kiám肯服事你？á是歇tī你ê槽邊？ 10 你會用索縛野牛tī犁溝mah？伊beh tè你耙(pē)山谷mah？ 11 Kiám thang因為伊力大，就óa靠伊？Kiám thang用你ê工交帶伊mah？ 12 你kiám thang信靠伊帶你ê種子tò來；koh收拾你ê五穀場mah？ 13 鴕鳥ê翼歡喜teh ia̍t；總是伊ê翼kap毛有慈愛無？ 14 因為伊放sak伊ê卵tī地裡，hō͘伊tī土沙得tio̍h燒lō； 15 無想tio̍h腳會lap-tio̍h，野獸會踏tio̍h。 16 伊無可憐伊ê kiáⁿ，親像m̄是伊ê；伊ê tio̍h磨空空，伊也無掛慮。 17 因為上帝hō͘伊無智慧，也無hō͘伊有靈竅。 18 伊挺身高高ê時，就藐視馬kap騎馬ê。 19 馬ê力是你hō͘伊mah？你用話chhàng起來ê鬃moa伊ê頷頸mah？ 20 你hō͘伊tiô跳親像草蜢mah？伊展威phǹg-phǹg哮真thang驚。 21 伊tī山谷中用蹄耙(pê)土，家己歡喜伊ê力；伊出去迎接兵器。 22 伊藐視thang驚ê事，也無忍；也無因為刀劍來oa̍t倒tńg。 23 箭袋kap光nà-nà ê鎗，以及手鏢，tī伊ê身上khiang-khiang哮有聲。 24 伊發性kap大受氣，將土吞落去；一下聽見哨角ê聲，就m̄定定khiā-teh。 25 見若哨角tân，伊就講，ā-hah，伊tùi遠遠鼻見交戰，kap軍長親像雷ê聲，以及hoah-hiàm ê聲。 26 Boa̍h-hio̍h teh飛，thí開伊ê翼，ǹg南去，kiám是靠你ê智慧mah？ 27 鷹鳥chhèng高tī高ê所在作巢，是thàn你ê命令mah？ 28 伊tiàm tī石phiâⁿ，khiā起tī山尖kap堅固ê所在。 29 Tùi-hia chhē食物，目睭金金看遠遠。 30 伊ê kiáⁿ suh血；受刣-ê tī toh落，伊也tī-hia。
1 Soaⁿ--nih ê soaⁿ-iûⁿ tī-sî siⁿ, lí chai mah? Lo̍k-bú siⁿ-kiáⁿ, lí khòaⁿ-chhut mah? 2 In kòa-kūi(**kui) tī-sî kàu-ge̍h, lí ōe sǹg mah? In tī-sî siⁿ, lí ōe hiáu-tit mah? 3 In khut-sin siⁿ-kiáⁿ, Pàng-chhut in ê lô-khó͘. 4 In ê kiáⁿ chiām-chiām pûi-phauh, tī soaⁿ-iá tióng-tōa; In chhut-khì, chiū bô koh tò-tńg lâi. 5 Chī-chūi pàng iá-lû chhut-khì chū-iû? Chī-chūi tháu soaⁿ-lû ê soh? 6 Góa ēng khòng-iá chòe i ê chhù, Ēng kiâm ê tōe chòe i khiā-khí ê só͘-chāi. 7 I thí-chhiò siâⁿ-lāi ê soan-hoa, Kóaⁿ cheng-siⁿ-ê teh hoah, i iā m̄-thiaⁿ. 8 Piàn-soaⁿ sī i ê chháu-tiûⁿ; I iā chhē ta̍k-iūⁿ chhiⁿ-chhùi ê mi̍h. 9 Iá-gû kiám khéng ho̍k-sāi lí? Á-sī hioh tī lí ê chô-piⁿ? 10 Lí ōe ēng soh pa̍k iá-gû tī lôe-kau mah? I beh tè lí pē soaⁿ-kok mah? 11 Kiám thang in-ūi i la̍t tōa, chiū óa-khò i? Kiám thang ēng lí ê kang kau-tài i mah? 12 Lí kiám thang sìn-khò i tòa lí ê chéng-chí tò-lâi; Koh siu-si̍p lí ê gō͘-kak-tiûⁿ mah? 13 Tô-chiáu ê si̍t hoaⁿ-hí teh ia̍t; Chóng-sī i ê si̍t kap mn̂g ū chû-ài bô? 14 In-ūi i pàng-sak i ê nn̄g tī tōe--nih, Hō͘ i tī thô͘-soa tit-tio̍h sio-lō; 15 Bô siūⁿ-tio̍h kha ōe lap-tio̍h, Iá-siù ōe ta̍h-tio̍h. 16 I bô khó-lîn i ê kiáⁿ, chhin-chhiūⁿ m̄-sī i-ê; I ê tio̍h-bôa khang-khang, i iā bô khòa-lū. 17 In-ūi Siōng-tè hō͘ i bô tì-hūi, Iā bô hō͘ i ū lêng-khiàu. 18 I théng-sin koâiⁿ-koâiⁿ ê sî, Chiū biáu-sī bé kap khiâ-bé--ê. 19 Bé ê la̍t sī lí hō͘ i mah? Lí ēng ōe chhàng--khí-lâi ê chang moa i ê ām-kún mah? 20 Lí hō͘ i tiô-thiàu chhin-chhiūⁿ chháu-meh mah? I tián-ui phǹg-phǹg-háu chin thang kiaⁿ. 21 I tī soaⁿ-kok-tiong ēng tôe pê thô͘, ka-kī hoaⁿ-hí i ê la̍t; I chhut-khì ngiâ-chih peng-khì. 22 I biáu-sī thang kiaⁿ ê sū, iā bô lún; Iā bô in-ūi to-kiàm lâi oa̍t-tò-tńg. 23 Chìⁿ-tē kap kng-nà-nà ê chhiuⁿ, í-ki̍p chhiú-pio, Tī i ê sin-chiūⁿ khiang-khiang-háu ū siaⁿ. 24 I hoat-sèng kap tōa siū-khì, chiong thô͘ thun--lo̍h-khì; Chi̍t-ē thiaⁿ-kìⁿ sàu-kak ê siaⁿ, chiū m̄ tiāⁿ-tiāⁿ khiā-teh. 25 Kìⁿ-nā sàu-kak tân, i chiū kóng, Ā-hah, I tùi hn̄g-hn̄g phīⁿ-kìⁿ kau-chiàn, Kap kun-tiúⁿ chhin-chhiūⁿ lûi ê siaⁿ, í-ki̍p hoah-hiàm ê siaⁿ. 26 Boa̍h-hio̍h teh pe, thí-khui i ê si̍t, ǹg-lâm khì, Kiám sī khò lí ê tì-hūi mah? 27 Eng-chiáu chhèng-koâiⁿ tī koâiⁿ ê só͘-chāi choh-siū, Sī thàn lí ê bēng-lēng mah? 28 I tiàm tī chio̍h-phiâⁿ, Khiā-khí tī soaⁿ-chiam kap kian-kò͘ ê só͘-chāi. 29 Tùi-hia chhē chia̍h-mi̍h, Ba̍k-chiu kim-kim khòaⁿ hn̄g-hn̄g. 30 I ê kiáⁿ suh huih; Siū-thâi-ê tī toh-lo̍h, i iā tī-hia.
1 耶和華koh應約伯講， 2 好辯ê，kiám thang kap全能ê辯論mah？辯駁上帝ê，taⁿ tio̍h應伊。 3 約伯就應耶和華講， 4 看ah，我是微細，我beh用甚麼應答你？我用手掩我ê嘴。 5 我已經講一pái，taⁿ無beh應；講兩pái，也無koh講。 6 耶和華就tùi大風ê中間應約伯講， 7 你tio̍h 縖腰親像大丈夫，我問你，你tio̍h應我。 8 你beh廢無我ê公平mah？你beh擬定我有罪，來顯明家己做義mah？ 9 你有親像上帝hit號ê手骨mah？你能出聲起雷，親像伊mah？ 10 Taⁿ你thang用尊貴威嚴做裝飾，用榮光美妙做衣服。 11 Tio̍h piàⁿ出你滿滿ê受氣；看一切驕傲ê人，hō͘伊降低。 12 看一切驕傲ê人，押chhi̍h hō͘伊低，踏pháiⁿ人tī in所khiā ê地。 13 Kā in做一下khǹg tī土粉；包密in ê面tī烏暗密ê所在。 14 Án-ni我就承認你；真正你ê chiàⁿ手能救你。 15 Taⁿ你看河馬，我造你，也造伊；伊食草親像牛。 16 看ah，伊ê氣力在tī伊ê腰，伊ê能力tī伊腹肚ê肌肉。 17 伊搖尾親像柏香樹；伊大腿ê筋相連絡； 18 伊ê骨頭親像銅管，伊ê肢體親像鐵條。 19 伊是上帝chiahê工ê第一；創造伊ê會用刀親近伊。 20 Chiahê山實在kā伊出食物，田野ê百獸也thit-thô tī-hia。 21 伊倒tī蓮花葉腳，睏tī kui苞蘆竹ê蔭影下，kap水窟內。 22 蓮花葉ê蔭影遮蓋伊；溪邊ê柳樹圍se̍h伊。 23 看ah，就若河水氾濫，伊也無驚；約旦河漲到伊ê嘴，伊也安然。 24 Chī-chūi能tī伊目睭金金ê時掠tio̍h伊，á是用活釦kǹg伊ê鼻ah？
1 Iâ-hô-hoa koh ìn Iok-pek kóng, 2 Hò͘ⁿ-piān-ê, kiám thang kap Choân-lêng--ê piān-lūn mah? Piān-pok Siōng-tè ê, taⁿ tio̍h ìn i. 3 Iok-pek chiū ìn Iâ-hô-hoa kóng, 4 Khòaⁿ ah, góa sī bî-sòe, góa beh ēng sím-mi̍h ìn-tap Lí? Góa ēng chhiú ng góa ê chhùi. 5 Góa í-keng kóng chi̍t-pái, taⁿ bô beh ìn; Kóng nn̄g-pái, iā bô koh kóng. 6 Iâ-hô-hoa chiū tùi tōa-hong ê tiong-kan ìn Iok-pek kóng, 7 Lí tio̍h hâ-io chhin-chhiūⁿ tāi-tiōng-hu, Góa mn̄g lí, lí tio̍h ìn Góa. 8 Lí beh hòe-bô Góa ê kong-pêng mah? Lí beh gí-tiāⁿ Góa ū chōe, lâi hián-bêng ka-kī chòe-gī mah? 9 Lí ū chhin-chhiūⁿ Siōng-tè hit-hō ê chhiú-kut mah? Lí ōe chhut-siaⁿ khí-lûi, chhin-chhiūⁿ I mah? 10 Taⁿ lí thang ēng chun-kùi ui-giâm chòe chng-thāⁿ, Ēng êng-kng bí-biāu chòe i-ho̍k. 11 Tio̍h piàⁿ-chhut lí móa-móa ê siū-khì; Khòaⁿ it-chhè kiau-ngō͘ ê lâng, hō͘ i kàng-kē. 12 Khòaⁿ it-chhè kiau-ngō͘ ê lâng, ah-chhi̍h hō͘ i kē, Ta̍h pháiⁿ-lâng tī in só͘ khiā ê tōe. 13 Kā in chòe chi̍t-ē khǹg tī thô͘-hún; Pau-ba̍t in ê bīn tī o͘-àm ba̍t ê só͘-chāi. 14 Án-ni Góa chiū sêng-jīn lí; Chin-chiàⁿ lí ê chiàⁿ-chhiú ōe kiù lí. 15 Taⁿ lí khòaⁿ hô-bé, Góa chō lí, iā chō i; I chia̍h-chháu chhin-chhiūⁿ gû. 16 Khòaⁿ ah, i ê khùi-la̍t chāi-tī i ê io, I ê lêng-le̍k tī i pak-tó͘ ê ki-bah. 17 I iô-bé chhin-chhiūⁿ pek-hiuⁿ-chhiū; I tōa-thúi ê kun saⁿ liân-lo̍k; 18 I ê kut-thâu chhin-chhiūⁿ tâng-kńg, I ê chi-thé chhin-chhiūⁿ thih-tiâu. 19 I sī Siōng-tè chiah ê kang ê tē-it; Chhòng-chō i--ê ōe ēng to chhin-kūn i. 20 Chiah ê soaⁿ si̍t-chāi kā i chhut chia̍h-mi̍h, Chhân-iá ê pah-siù iā thit-thô tī-hia. 21 I tó tī liân-hoe-hio̍h kha, Khùn tī kui-phō lô͘-tek ê ìm-ńg-ē, kap chúi-khut-lāi. 22 Liân-hoe-hio̍h ê ìm-ńg jia-khàm i; Khoe-piⁿ ê liú-chhiū ûi-se̍h i. 23 Khòaⁿ ah, chiū nā hô-chúi hoàn-lām, i iā bô kiaⁿ; Iok-tàn hô tiòng kàu i ê chhùi, i iā an-jiân. 24 Chī-chūi ōe tī i ba̍k-chiu kim-kim ê sî lia̍h-tio̍h i, Á-sī ēng oa̍h-khàu kǹg i ê phīⁿ ah?
1 你能用鉤拖鱷魚起來mah？能用索liù伊ê舌mah？ 2 你能用索kǹg伊ê鼻mah？能用刺鑿透伊ê牙槽mah？ 3 伊beh用chōe-chōe話求你mah？對你講溫柔ê話mah？ 4 伊kiám beh kap你立約，hō͘你永遠掠伊做奴僕mah？ 5 你kiám會kap伊thit-thô，親像鳥á mah？你能縛伊，hō͘你少年ê女子牽mah？ 6 Kui-pang ê討魚人，kiám thang用伊做買賣ê物？á是會kā伊分開hō͘ seng-lí人？ 7 你能用khau鐮遍鑿伊ê皮mah？能用魚叉遍差伊ê頭殼？ 8 你ê手hōaⁿ tī伊ê頂面；記得kap伊交戰ê事，就m̄敢koh án-ni做。 9 看ah，你siàu想伊是空空；一下看見伊，kiám bōe失膽mah？ 10 無一人hiah好膽敢惹tio̍h伊；án-ni，是誰能khiā tī我ê面前ah？ 11 Chī-chūi事先hō͘我，hō͘我tio̍h報答伊？Thong天下lóng是我ê。 12 論到鱷魚ê肢體，kap伊ê大力，以及伊súi ê骨格，我bōe會無講。 13 Chī-chūi能剝伊ê外衫？Chī-chūi能入伊頂下ham ê中間？ 14 Chī-chūi能開伊ê嘴？伊ê嘴齒四圍lóng是thang驚ê。 15 伊所誇口ê是伊勇ê鱗，合óa就親像封密密， 16 一个一个相連，到氣bōe能透入hit中間。 17 Lóng相連絡，連做一个，bōe相分開。 18 伊phah-ka-chhiùⁿ，就發出光；伊ê目睭親像早起時ê目睭皮。 19 對伊ê嘴發出to̍h ê火把，kap飛出來ê火星。 20 對伊ê鼻出煙，親像hiâⁿ蘆葦ê鼎teh滾。 21 伊ê氣hō͘火炭to̍h，有火燄對伊ê嘴出。 22 伊ê頷頸有氣力常常tī-hia，驚惶tī伊ê面前tiô跳。 23 伊頷kui ê肉相連絡，kha̍h-tiâu伊ê身軀，bōe會搖動。 24 伊ê心tēng親像石頭，親像下tún ê磨石hiah-tēng。 25 伊一下起來，勇士lóng驚惶，驚到失神。 26 人若用劍，用khau鐮，用鏢，用尖鎗，鑿伊lóng bōe入。 27 伊看鐵做乾草，看銅做po͘ ê柴。 28 弓箭bōe會hō͘伊逃走；用索hìⁿ石，伊準做稻草。 29 槌á伊算做稻草；人舞弄鎗，伊就恥笑。 30 伊ê腹肚下親像利ê厝瓦phè；伊親像鐵耙拖過土。 31 伊hō͘深淵滾親像鼎；hō͘海親像調和油ê缽(poah)。 32 伊hō͘伊後面ê路發光；hō͘人phah算深淵是白頭毛。 33 全地無一个能比得伊；伊受造做無驚惶ê。 34 見若高大ê伊看輕伊；伊tī一切驕傲ê族類做王。
1 Lí ōe ēng kau thoa go̍k-hî khí-lâi mah? Ōe ēng soh liù i ê chi̍h mah? 2 Lí ōe ēng soh kǹg i ê phīⁿ mah? Ōe ēng chhì chha̍k-thàu i ê gê-chô mah? 3 I beh ēng chōe-chōe ōe kiû lí mah? Tùi lí kóng un-jiû ê ōe mah? 4 I kiám beh kap lí li̍p-iok, Hō͘ lí éng-oán lia̍h i chòe lô͘-po̍k mah? 5 Lí kiám ōe kap i thit-thô, chhin-chhiūⁿ chiáu-á mah? Lí ōe pa̍k--i, hō͘ lí siàu-liân ê lú-chú khan mah? 6 Kui-pang ê thó-hî lâng, kiám thang ēng i chòe bóe-bōe ê mi̍h? Á-sī ōe kā i pun-khui hō͘ seng-lí lâng? 7 Lí ōe ēng khau-liâm piàn-chha̍k i ê phê mah? Ōe ēng hî-chhe piàn-chhe i ê thâu-khak? 8 Lí ê chhiú hōaⁿ tī i ê téng-bīn; Kì-tit kap i kau-chiàn ê sū, chiū m̄-káⁿ koh án-ni chòe. 9 Khòaⁿ ah, lí siàu-siūⁿ i sī khang-khang; Chi̍t-ē khòaⁿ-kìⁿ i, kiám bōe sit-táⁿ mah? 10 Bô chi̍t-lâng hiah hó-táⁿ káⁿ jiá-tio̍h i; Án-ni, chī-chūi ōe khiā tī Góa ê bīn-chêng ah? 11 Chī-chūi tāi-seng hō͘ Góa, hō͘ Góa tio̍h pò-tap i? Thong thiⁿ-ē lóng sī Góa-ê. 12 Lūn-kàu go̍k-hî ê chi-thé, kap i ê tōa-la̍t, Í-ki̍p i súi ê kut-keh, Góa bōe-ōe bô kóng. 13 Chī-chūi ōe pak i ê gōa-saⁿ? Chī-chūi ōe ji̍p i téng-ē ham ê tiong-kan? 14 Chī-chūi ōe khui i ê chhùi? I ê chhùi-khí sì-ûi lóng sī thang kiaⁿ ê. 15 I só͘ khoa-kháu--ê sī i ióng ê lân. Ha̍p-óa chiū chhin-chhiūⁿ hong ba̍t-ba̍t, 16 Chi̍t-ê chi̍t-ê saⁿ-liân, Kàu khì bōe-ōe thàu-ji̍p hí(**hit) tiong-kan. 17 Lóng saⁿ liân-lo̍k, Liâm chòe chi̍t-ê, bōe saⁿ pun-khui. 18 I phah-ka-chhiùⁿ, chiū hoat-chhut kng; I ê ba̍k-chiu chhin-chhiūⁿ chá-khí-sî ê ba̍k-chiu-phê. 19 Tùi i ê chhùi hoat-chhut to̍h ê hé-pé, Kap pe--chhut-lâi ê hé-chhiⁿ. 20 Tùi i ê phīⁿ chhut-ian, Chhin-chhiūⁿ hiâⁿ lô͘-úi ê tiáⁿ teh kún. 21 I ê khì hō͘ hé-thòaⁿ to̍h, Ū hé-iām tùi i ê chhùi chhut. 22 I ê ām-kún ū khùi-la̍t siông-siông tī-hia, Kiaⁿ-hiâⁿ tī i ê bīn-chêng tiô-thiàu. 23 I ām-kui ê bah saⁿ liân-lo̍k, Kha̍h-tiâu i ê seng-khu, bōe-ōe iô-tāng. 24 I ê sim tēng chhin-chhiūⁿ chio̍h-thâu, Chhin-chhiūⁿ ē-tún ê bō-chio̍h hiah-tēng. 25 I chi̍t-ē khí-lâi, ióng-sū lóng kiaⁿ-hiâⁿ, Kiaⁿ kàu sit-sîn. 26 Lâng nā ēng kiàm, ēng khau-liâm, ēng pio, ēng chiam-chhiuⁿ, Chha̍k i lóng bōe ji̍p. 27 I khòaⁿ thih chòe ta-chháu, Khòaⁿ tâng chòe po͘ ê chhâ. 28 Keng-chìⁿ bōe-ōe hō͘ i tô-cháu; Ēng soh hìⁿ chio̍h, i chún-chòe tiū-chháu. 29 Thûi-á i sǹg chòe tiū-chháu; Lâng bú-lāng chhiuⁿ, i chiū thí-chhiò. 30 I ê pak-tó͘-ē chhin-chhiūⁿ lāi ê chhù-hiā-phè; I chhin-chhiūⁿ thih-pē thoa-kè thô͘. 31 I hō͘ chhim-ian kún chhin-chhiūⁿ tiáⁿ; Hō͘ hái chhin-chhiūⁿ tiau-hô iû ê poah. 32 I hō͘ i āu-bīn ê lō͘ hoat-kng; Hō͘ lâng phah-sǹg chhim-ian sī pe̍h-thâu-mn̂g. 33 Choân-tōe bô chi̍t-ê ōe pí-tit i; I siū-chō chòe bô kiaⁿ-hiâⁿ-ê. 34 Kìⁿ-nā koâiⁿ-tōa--ê i khòaⁿ-khin i; I tī it-chhè kiau-ngō͘ ê cho̍k-lūi chòe-ông.
1 約伯應耶和華講， 2 我知你萬事lóng能，你ê旨意lóng bōe阻擋得。 3 Chitê無知來蓋密所議論ê，是是誰 ah？所以我有講出我所無明ê，就是我所想bōe出ê奇妙，我所m̄知。 4 求你聽，我beh講，我問你，你應我。 5 我前耳孔聽見你，taⁿ我ê目睭看見你； 6 所以我家己厭惡，tī塵埃kap火灰ê中間反悔。 7 耶和華對約伯講chiahê話以後，耶和華就對Thê-bān人Í-lī-hoat講，我ê受氣對你kap你兩個朋友發起來，因為lín議論我，無講合理ê話，親像我ê奴僕約伯所講ê。 8 Taⁿ lín tio̍h為本身取七隻牛káng，七隻羊káng，到我ê奴僕約伯hia，為本身獻燒祭；我ê奴僕約伯beh替lín祈禱；因為我beh接納伊，免得我照lín ê愚戇來款待lín；因為lín議論我，無講合理ê話，親像我ê奴僕約伯所講ê。 9 Tùi án-ni， Thê-bān人Í-lī-hoat，Su-a人Pí-le̍k-ta̍t，Ná-má人Só-hoat，照耶和華所命令in-ê去行；耶和華也接納約伯。 10 約伯替伊ê朋友祈禱ê時，耶和華就hō͘伊ê景況復原；koh耶和華賞賜約伯比以前所有ê加倍。 11 Hit時伊ê眾兄弟、姊妹，kap以前相識ê人lóng來見伊，tī伊ê厝相kap食，為tio̍h耶和華所降落tī伊一切ê災厄，lóng悲傷來安慰伊；ta̍k人送伊一塊銀，ta̍k人送伊一个金環。 12 Án-ni耶和華賜福約伯ê尾景贏過伊ê起頭；伊有羊一萬四千，駱駝六千，牛一千對，驢母一千。 13 伊也有七個kiáⁿ，三個cha-bó͘-kiáⁿ。 14 伊kā大cha-bó͘-kiáⁿ名叫Iâ-bí-má，第二個名叫Ki-sé-a，第三個名叫Ki-liân-hap-phok。 15 Thong hit所在ê婦女，chhē無親像約伯ê cha-bó͘-kiáⁿ hiah-nih súi；in ê老父hō͘ in tī兄弟中得tio̍h產業。 16 Chit-tia̍p以後，約伯koh食一百四十歲，得tio̍h看見伊ê kiáⁿ，伊ê孫，到四代。 17 Án-ni約伯年歲老，日子滿，就死。
1 Iok-pek ìn Iâ-hô-hoa kóng, 2 Góa chai Lí bān-sū lóng ōe, Lí ê chí-ì lóng bōe chó͘-tòng--tit. 3 Chit-ê bû-ti lâi khàm-ba̍t só͘ gī-lūn ê, sī chī-chūi ah? Só͘-í góa ū kóng-chhut góa só͘ bô bêng--ê, Chiū-sī góa só͘ siūⁿ-bōe-chhut ê kî-biāu, góa só͘ m̄-chai. 4 Kiû Lí thiaⁿ, góa beh kóng, Góa mn̄g Lí, Lí ìn góa. 5 Góa chêng hī-khang thiaⁿ-kìⁿ Lí, Taⁿ góa ê ba̍k-chiu khòaⁿ-kìⁿ Lí; 6 Só͘-í góa ka-kī iàm-ò͘ⁿ, Tī tîn-ai kap hé-hu ê tiong-kan hoán-hóe. 7 Iâ-hô-hoa tùi Iok-pek kóng chiah ê ōe í-āu, Iâ-hô-hoa chiū tùi Thê-bān lâng Í-lī-hoat kóng, Góa ê siū-khì tùi lí kap lí nn̄g ê pêng-iú hoat--khí-lâi, in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê. 8 Taⁿ lín tio̍h ūi pún-sin chhú chhit chiah gû-káng, chhit chiah iûⁿ-káng, kàu Góa ê lô͘-po̍k Iok-pek hia, ūi pún-sin hiàn sio-chè; Góa ê lô͘-po̍k Iok-pek beh thòe lín kî-tó; in-ūi Góa beh chiap-la̍p i, bián-tit Góa chiàu lín ê gû-gōng lâi khoán-thāi lín; in-ūi lín gī-lūn Góa, bô kóng ha̍p-lí ê ōe, chhin-chhiūⁿ Góa ê lô͘-po̍k Iok-pek só͘ kóng ê. 9 Tùi án-ni Thê-bān lâng Í-lī-hoat, Su-a lâng Pí-le̍k-ta̍t, Ná-má lâng Só-hoat, chiàu Iâ-hô-hoa só͘ bēng-lēng in ê khì-kiâⁿ; Iâ-hô-hoa iā chiap-la̍p Iok-pek. 10 Iok-pek thòe i ê pêng-iú kî-tó ê sî, Iâ-hô-hoa chiū hō͘ i ê kéng-hóng ho̍k-goân; koh Iâ-hô-hoa siúⁿ-sù Iok-pek pí í-chêng só͘-ū-ê ka-pē. 11 Hit-sî i ê chèng hiaⁿ-tī, chí-bē, kap í-chêng saⁿ-bat ê lâng lóng lâi kìⁿ i, tī i ê chhù saⁿ-kap chia̍h, ūi-tio̍h Iâ-hô-hoa só͘ kàng-lo̍h tī i it-chhè ê chai-ē, lóng pi-siong lâi an-ùi i; ta̍k-lâng sàng i chi̍t-tè gûn, ta̍k-lâng sàng i chi̍t-ê kim-khoân. 12 Án-ni Iâ-hô-hoa sù-hok Iok-pek ê bé-kéng iâⁿ-kè i ê khí-thâu; i ū iûⁿ chi̍t-bān sì-chheng, lo̍k-tô la̍k chheng, gû chi̍t-chheng tùi, lû-bú chi̍t-chheng. 13 I iā ū chhit ê kiáⁿ, saⁿ ê cha-bó͘-kiáⁿ. 14 I kā tōa cha-bó͘-kiáⁿ miâ-kiò Iâ-bí-má, tē-jī-ê miâ-kiò Ki-sé-a, tē-saⁿ-ê miâ-kiò Ki-liân-hap-phok. 15 Thong hit só͘-chāi ê hū-lú, chhē bô chhin-chhiūⁿ Iok-pek ê cha-bó͘-kiáⁿ hiah--nih súi; in ê lāu-pē hō͘ in tī hiaⁿ-tī tiong tit-tio̍h sán-gia̍p. 16 Chit-tia̍p í-āu Iok-pek koh chia̍h chi̍t-pah sì-cha̍p hè, tit-tio̍h khòaⁿ-kìⁿ i ê kiáⁿ, i ê sun, kàu sì-tāi. 17 Án-ni Iok-pek nî-hè lāu, ji̍t-chí móa, chiū sí.