1 做長老ê phoe寄hō͘受揀選尊貴ê婦人人kap伊ê kiáⁿ兒，是我tī真理所疼ê；koh m̄-nā我，見若bat真理ê也lóng是án-ni； 2 疼lín是為tio̍h真理，chitê真理就是tiàm tī咱ê，也beh永遠kap咱tī-teh。 3 恩典、憐憫、平安，tùi父上帝，也tùi父ê Kiáⁿ，耶穌基督，tī真理kap疼痛，beh kap咱tī-teh。 4 我真歡喜，因為tù-tio̍h你ê kiáⁿ兒有tī真理來行ê，照咱tùi父領受ê命令。 5 尊貴ê婦人人ah，taⁿ我求你，m̄是親像寫新ê命令hō͘你，是咱tùi起頭所有ê，就是大家tio̍h相疼。 6 咱照伊ê命令來行，這就是疼。Lín thàn伊來行，照lín tùi起頭所聽見ê，這就是hitê命令。 7 因為有chōe-chōe迷惑人ê出來入世間，就是m̄認耶穌基督tī肉體來ê。Chitê就是hitê迷惑人ê，也是對敵基督ê。 8 Lín tio̍h謹慎家己，免得lín失落咱所tio̍h磨ê，thang得tio̍h滿足ê報賞。 9 見若進前，也無tiàm tī基督ê教示ê，無有上帝；tiàm tī hitê教示ê，就有父kap Kiáⁿ。 10 若有人到lín hia，也無傳chitê教示，就m̄-thang接納伊入厝，也m̄-thang kā伊請安； 11 因為kā伊請安ê，有份tī伊ê pháiⁿ所行。 12 我有chōe-chōe項beh寫hō͘ lín，m̄-ài用紙kap墨；是ǹg望到lín hia，當面saⁿ-kap講，hō͘ lín ê歡喜充滿。 13 你受揀ê姊妹ê kiáⁿ兒lóng kā你請安。
1 Chòe tiúⁿ-ló ê phoe kià hō͘ siū kéng-soán chun-kùi ê hū-jîn-lâng kap i ê kiáⁿ-jî, sī góa tī chin-lí só͘ thiàⁿ ê; koh m̄ nā góa, kìⁿ-nā bat chin-lí ê iā lóng sī án-ni; 2 thiàⁿ lín sī ūi-tio̍h chin-lí, chit ê chin-lí chiū-sī tiàm tī lán ê, iā beh éng-oán kap lán tī-teh. 3 Un-tián, lîn-bín, pêng-an, tùi Pē Siōng-tè, iā tùi Pē ê Kiáⁿ, Iâ-so͘ Ki-tok, tī chin-lí kap thiàⁿ-thàng, beh kap lán tī-teh. 4 Góa chin hoaⁿ-hí, in-ūi tù-tio̍h lí ê kiáⁿ-jî ū tī chin-lí lâi kiâⁿ ê, chiàu lán tùi Pē niá-siū ê bēng-lēng. 5 Chun-kùi ê hū-jîn-lâng ah, taⁿ góa kiû lí, m̄ sī chhin-chhiūⁿ siá sin ê bēng-lēng hō͘ lí, sī lán tùi khí-thâu só͘ ū ê, chiū-sī tāi-ke tio̍h saⁿ-thiàⁿ. 6 Lán chiàu I ê bēng-lēng lâi kiâⁿ, che chiū-sī thiàⁿ. Lín thàn i lâi kiâⁿ, chiàu lín tùi khí-thâu só͘ thiaⁿ-kìⁿ ê, che chiū-sī hit ê bēng-lēng. 7 In-ūi ū chōe-chōe bê-he̍k lâng ê chhut-lâi ji̍p sè-kan, chiū-sī m̄ jīn Iâ-so͘ Ki-tok tī jio̍k-thé lâi ê. Chit-ê chiū-sī hit ê bê-he̍k lâng ê, iā sī tùi-te̍k Ki-tok ê. 8 Lín tio̍h kín-sīn ka-kī, bián-tit lín sit-lo̍h lán só͘ tio̍h-bôa ê, thang tit-tio̍h móa-chiok ê pò-siúⁿ. 9 Kìⁿ-nā chìn-chêng, iā bô tiàm tī Ki-tok ê kà-sī ê, bô ū Siōng-tè; tiàm tī hit ê kà-sī ê, chiū ū Pē kap Kiáⁿ. 10 Nā ū lâng kàu lín hia, iā bô thoân chit ê kà-sī, chiū m̄ thang chiap-la̍p i ji̍p chhù, iā m̄ thang kā i chhéng-an; 11 in-ūi kā i chhéng-an ê, ū hūn tī i ê pháiⁿ só͘ kiâⁿ. 12 Góa ū chōe-chōe hāng beh siá hō͘ lín, m̄ ài ēng chóa kap ba̍k; sī ǹg-bāng kàu lín hia, tng-bīn saⁿ-kap kóng, hō͘ lín ê hoaⁿ-hí chhiong-móa. 13 Lí siū kéng ê chí-bē ê kiáⁿ-jî lóng kā lí chhéng-an.