1 做長老ê phoe寄hō͘所疼ê Ka-iû，就是我tī真理所疼ê。 2 所疼ê兄弟ah，我願你萬事會興通勇健，親像你ê靈魂興通一樣。 3 因為有兄弟來干證你所存ê真理，親像你tī真理teh行，我就真歡喜。 4 我聽見我ê kiáⁿ兒tī真理teh行，我ê歡喜無khah大tī chitê。 5 所疼ê兄弟ah，見若你所款待出外ê兄弟ê，是忠信ê所行。 6 In bat tī教會ê面前干證你ê疼痛；你若合tī上帝kā in送行，就是做好事。 7 因為in為tio̍h伊ê名出外，無tùi外邦人the̍h甚麼物。 8 所以hit號人，咱應該chih接in，hō͘咱為tio̍h真理做同tio̍h磨ê。 9 我已經有寫淡薄hō͘教會，獨獨in中間ài做頭ê Tiu-te̍k-hui無接納阮。 10 所以我若來，beh記得伊所行ê事，就是伊用pháiⁿ話lām-sám講阮；koh無掠chitê做夠額，本身m̄接納兄弟，有人ài接納，伊就阻擋，續激in出教會。 11 所疼ê兄弟ah，m̄-thang學pháiⁿ，tio̍h學好。行好ê是tùi上帝出；行pháiⁿ ê未bat看見上帝。 12 Tí-bí-tiu hō͘眾人所干證，真理也家己做伊ê干證；阮也做干證;你知阮ê干證是真。 13 我有chōe-chōe項ài寫hō͘你，但是m̄-ài用筆墨寫hō͘你； 14 是ǹg望緊緊見你，咱chiah beh當面講。 15 願你平安。Chiahê朋友kā你請安。請你隨一名kā hiahê朋友請安。
1 Chòe tiúⁿ-ló ê phoe kià hō͘ só͘ thiàⁿ ê Ka-iû, chiū-sī góa tī chin-lí só͘ thiàⁿ ê. 2 Só͘ thiàⁿ ê hiaⁿ-tī ah, góa goān lí bān sū ōe heng-thong ióng-kiāⁿ, chhin-chhiūⁿ lí ê lêng-hûn heng-thong chi̍t iūⁿ. 3 In-ūi ū hiaⁿ-tī lâi kan-chèng lí só͘ chûn ê chin-lí, chhin-chhiūⁿ lí tī chin-lí teh kiâⁿ, góa chiū chin hoaⁿ-hí. 4 Góa thiaⁿ-kìⁿ góa ê kiáⁿ-jî tī chin-lí teh kiâⁿ, góa ê hoaⁿ-hí bô khah tōa tī chit ê. 5 Só͘ thiàⁿ ê hiaⁿ-tī ah, kìⁿ-nā lí só͘ khoán-thāi chhut-gōa ê hiaⁿ-tī ê, sī tiong-sìn ê só͘ kiâⁿ. 6 In bat tī kàu-hōe ê bīn-chêng kan-chèng lí ê thiàⁿ-thàng; lí nā ha̍p tī Siōng-tè kā in sòng-hêng, chiū-sī chòe hó sū. 7 In-ūi in ūi-tio̍h I ê miâ chhut-gōa, bô tùi gōa-pang lâng the̍h sím-mi̍h mi̍h. 8 Só͘-í hit hō lâng, lán eng-kai chih-chiap in, hō͘ lán ūi-tio̍h chin-lí chòe tâng tio̍h-bôa ê. 9 Góa í-keng ū siá tām-po̍h hō͘ kàu-hōe; to̍k-to̍k in tiong-kan ài chòe thâu ê Tiu-te̍k-hui bô chiap-la̍p goán. 10 Só͘-í góa nā lâi, beh kì-tit i só͘ kiâⁿ ê sū, chiū-sī i ēng pháiⁿ ōe lām-sám kóng goán; koh bô lia̍h chit-ê chòe kàu-gia̍h, pún-sin m̄ chiap-la̍p hiaⁿ-tī, ū lâng ài chiap-la̍p, i chiū chó͘-tòng, sòa kek in chhut kàu-hōe. 11 Só͘ thiàⁿ ê hiaⁿ-tī ah, m̄ thang o̍h pháiⁿ, tio̍h o̍h hó. Kiâⁿ hó ê sī tùi Siōng-tè chhut; kiâⁿ pháiⁿ ê bē bat khòaⁿ-kìⁿ Siōng-tè. 12 Tí-bí-tiu hō͘ chèng lâng só͘ kan-chèng, chin-lí iā ka-kī chòe i ê kan-chèng; goán iā chòe kan-chèng; lí chai goán ê kan-chèng sī chin. 13 Góa ū chōe-chōe hāng ài siá hō͘ lí, nā-sī m̄ ài ēng pit ba̍k siá hō͘ lí; 14 sī ǹg-bāng kín-kín kìⁿ lí, lán chiah beh tng-bīn kóng. 15 Goān lí pêng-an. Chiah ê pêng-iú kā lí chhéng-an. Chhiáⁿ lí sûi chi̍t miâ kā hiah ê pêng-iú chhéng-an.