1 Tī起頭有道，道kap上帝saⁿ-kap tī-teh，道就是上帝。 2 Chitê道tī起頭kap上帝saⁿ-kap tī-teh。 3 萬物tùi道來創造；見若受創造ê，無一項m̄是對伊來創造。 4 活命tī伊ê內面；chitê活命是人ê光。 5 光照tī烏暗；烏暗無接納伊。 6 有一人tùi上帝差來，名叫約翰。 7 Chitê人來做干證，是beh為tio̍h光做干證，hō͘眾人對伊來信。 8 伊m̄是hitê光，是beh為tio̍h光做干證nā-tiāⁿ。 9 有真ê光來入世間，teh照萬人。 10 伊tī世間，世間對伊來創造，也世間m̄-bat伊。 11 伊到家己ê所在，也家己ê人m̄接納伊。 12 見若接納伊ê，就是信伊ê名ê人，伊就賞賜in有權，成做上帝ê kiáⁿ兒； 13 in m̄是tùi血氣，亦m̄是tùi肉體ê意思，亦m̄是tùi人ê意思生ê，就是tùi上帝。 14 道成肉體，khiā起tī咱中間，有恩典kap真理滿滿；koh阮bat看見伊ê榮光，親像獨生ê kiáⁿ tùi父所得ê榮光。 15 約翰為tio̍h伊做干證，叫講，Chitê就是我所講，tè尾我來ê，成做我ê事先；因為伊本事先我tī-teh。 16 因為tùi伊ê充滿咱lóng有所受，就恩典續接恩典。 17 因為律法是tùi摩西來傳；恩典kap真理是tùi耶穌基督chiah有。 18 Bē bat有人看見上帝；只有tī父心懷中獨生ê kiáⁿ有表明伊。 19 約翰ê干證記tī下底： 偤太人tùi耶路撒冷差祭司kap利未人就近伊來問講，你是是誰？ 20 Hit時約翰承認無隱瞞；伊承認講，我m̄是基督。 21 Koh問伊，這是怎樣？你是以利亞mah？伊講，m̄是。你是hitê先知mah？應講，m̄是。 22 就kā伊講，你是是誰？hō͘阮thang回覆差阮ê。你tio̍h講家己是怎樣？ 23 講，我就是teh叫tī曠野ê ê聲，講，修直主ê路，親像先知以賽亞所講ê。 24 Hiah-ê人就是法利賽人所差ê。 25 In koh問伊講，你若m̄是基督，亦m̄是以利亞，亦m̄是hitê先知，怎樣行洗禮ah？ 26 約翰應伊，講，我是用水行洗禮；有khiā tī lín中間ê，lín m̄-bat伊。 27 伊就是tè尾我來ê，就tháu伊ê鞋帶，我亦bōe堪得。 28 Chiahê事行tī約旦外ê伯大尼，就是約翰行洗禮ê所在。 29 隔日，約翰看見耶穌就近伊，就講，你看，上帝ê羊羔，就是擔當世間ê罪ê。 30 Chitê就是我所bat講，有一人tè尾我來，成做我ê事先，因為伊本事先我tī-teh。 31 我本m̄-bat伊；獨獨beh hō͘伊顯明tī以色列人，所以我來用水行洗禮。 32 約翰koh干證講，我bat看見聖神親像鴿á tùi天降落，歇tī伊頂面。 33 我平素m̄-bat伊；獨獨差我用水行洗禮ê，kā我講，你看聖神降臨，歇tī伊頂面，伊就是用聖神行洗禮ê。 34 我bat看見，來干證chitê是上帝ê kiáⁿ。 35 Koh隔日，約翰kap伊兩個學生teh khiā； 36 看見耶穌teh行，就講，你看，上帝ê羊羔。 37 Hit兩個學生聽伊所講，就tè耶穌。 38 耶穌oa̍t-tńg身，看in teh tè伊，就kā in講，Lín teh chhē甚麼？In kā伊講，拉比，你tiàm-tī tá-lo̍h？(拉比，翻譯就是先生) 39 耶穌kā in講，Lín來就會看見。In就去，看伊所tòa ê所在；hit日kap伊saⁿ-kap tòa；hit時約略四點鐘。 40 聽約翰ê話來tè耶穌ê兩人，其中一个是西門彼得ê兄弟，安得烈。 41 伊事先tú-tio̍h in兄弟西門，kā伊講，阮已經tú-tio̍h彌賽亞(翻譯就是基督)。 42 就chhōa伊就近耶穌。耶穌看伊講，你就是約翰ê kiáⁿ西門；你beh稱做磯法(翻譯就是彼得)。 43 Koh隔日，耶穌beh去加利利，tú-tio̍h腓力；就kā伊講，Tè我。 44 腓力是伯賽大ê人，kap安得烈彼得同城。 45 腓力tú-tio̍h那但業，就kā伊講，摩西記tī律法kap chiahê先知所記ê，阮已經tú-tio̍h伊，就是約瑟ê kiáⁿ，拿撒勒人，耶穌。 46 那但業kā伊講，拿撒勒kiám會出甚麼好物mah？腓力講，來看。 47 耶穌看見那但業就近伊，就chí伊，講，你看，真正是以色列人，sim無詭譎ê。 48 那但業kā伊講，Tùi tá-lo̍h bat我？耶穌講，腓力iáu-bē叫你，你tī無花果樹腳，我已經看見你lah。 49 那但業應伊講，拉比，你就是上帝ê kiáⁿ；你就是以色列ê王。 50 耶穌應伊講，因為我kā你講，我已經看見你tī無花果樹腳，你就信mah？你beh看見tāi-chì比chiahê khah大ê。 51 Koh kā伊講，我實實kā lín講，Lín beh看見天開，上帝ê天使上落tī人子ê頂面。
1 Tī khí-thâu ū Tō, Tō kap Siōng-tè saⁿ-kap tī-teh, Tō chiū-sī Siōng-tè. 2 Chit ê Tō tī khí-thâu kap Siōng-tè saⁿ-kap tī-teh. 3 Bān mi̍h tùi Tō lâi chhòng-chō; kìⁿ-nā siū chhòng-chō ê, bô chi̍t hāng m̄ sī tùi I lâi chhòng-chō. 4 Oa̍h-miā tī I ê lāi-bīn; chit ê oa̍h-miā sī lâng ê kng. 5 Kng chiò tī o͘-àm; o͘-àm bô chiap-la̍p i. 6 Ū chi̍t lâng tùi Siōng-tè chhe lâi, miâ kiò Iok-hān. 7 Chit ê lâng lâi chòe kan-chèng, sī beh ūi-tio̍h kng chòe kan-chèng, hō͘ chèng lâng tùi I lâi sìn. 8 I m̄ sī hit ê kng, sī beh ūi-tio̍h kng chòe kan-chèng nā-tiāⁿ. 9 Ū chin ê kng lâi ji̍p sè-kan, teh chiò bān lâng. 10 I tī sè-kan, sè-kan tùi I lâi chhòng-chō, iā sè-kan m̄ bat I. 11 I kàu ka-kī ê só͘-chāi, iā ka-kī ê lâng m̄ chiap-la̍p I. 12 Kìⁿ-nā chiap-la̍p I ê, chiū-sī sìn I ê miâ ê lâng, I chiū siúⁿ-sù in ū koân, chiâⁿ-chòe Siōng-tè ê kiáⁿ-jî; 13 in m̄ sī tùi hiat-khì, ia̍h m̄ sī tùi jio̍k-thé ê ì-sù, ia̍h m̄ sī tùi lâng ê ì-sù siⁿ ê, chiū-sī tùi Siōng-tè. 14 Tō chiâⁿ jio̍k-thé, khiā-khí tī lán tiong-kan, ū un-tián kap chin-lí móa-móa; koh goán bat khòaⁿ-kìⁿ I ê êng-kng, chhin-chhiūⁿ to̍k siⁿ ê Kiáⁿ tùi Pē só͘ tit ê êng-kng. 15 Iok-hān ūi-tio̍h I chòe kan-chèng, kiò kóng, Chit-ê chiū-sī góa só͘ kóng, tè-bé góa lâi ê, chiâⁿ-chòe góa ê tāi-seng; in-ūi I pún tāi-seng góa tī-teh. 16 In-ūi tùi I ê chhiong-móa lán lóng ū só͘ siū, chiū un-tián sòa-chiap un-tián. 17 In-ūi lu̍t-hoat sī tùi Mô͘-se lâi thoân; un-tián kap chin-lí sī tùi Iâ-so͘ Ki-tok chiah ū. 18 Bē bat ū lâng khòaⁿ-kìⁿ Siōng-tè; chí-ū tī Pē sim-hoâi tiong to̍k-siⁿ ê Kiáⁿ ū piáu-bêng I. 19 Iok-hān ê kan-chèng kì tī ē-tóe: Iû-thài lâng tùi Iâ-lō͘-sat-léng chhe chè-si kap Lī-bī lâng chiū-kūn i lâi mn̄g kóng, Lí sī chī-chūi? 20 Hit sî Iok-hān sêng-jīn bô ún-môa; i sêng-jīn kóng, Góa m̄ sī Ki-tok. 21 Koh mn̄g i, Che sī cháiⁿ-iūⁿ? Lí sī Í-lī-a mah? I kóng, M̄ sī. Lí sī hit ê sian-ti mah? Ìn kóng, M̄ sī. 22 Chiū kā i kóng, Lí sī chī-chūi? hō͘ goán thang hê-hok chhe goán ê. Lí tio̍h kóng ka-kī sī cháiⁿ-iūⁿ? 23 Kóng, Góa chiū-sī teh kiò tī khòng-iá ê ê siaⁿ, kóng, Siu ti̍t Chú ê lō͘, chhin-chhiūⁿ sian-ti Í-sài-a só͘ kóng ê. 24 Hiah ê lâng chiū-sī Hoat-lī-sài lâng só͘ chhe ê. 25 In koh mn̄g i kóng, Lí nā m̄ sī Ki-tok, ia̍h m̄ sī Í-lī-a, ia̍h m̄ sī hit ê sian-ti, cháiⁿ-iūⁿ kiâⁿ sóe-lé ah? 26 Iok-hān ìn i, kóng, Góa sī ēng chúi kiâⁿ sóe-lé; ū khiā tī lín tiong-kan ê, lín m̄ bat I. 27 I chiū-sī tè-bé góa lâi ê, chiū tháu I ê ôe-tòa, góa ia̍h bōe kham-tit. 28 Chiah ê sū kiâⁿ tī Iok-tàn gōa ê Pek-tāi-nî, chiū-sī Iok-hān kiâⁿ sóe-lé ê só͘-chāi. 29 Keh ji̍t, Iok-hān khòaⁿ-kìⁿ Iâ-so͘ chiū-kūn i, chiū kóng, Lí khòaⁿ, Siōng-tè ê Iûⁿ-ko, chiū-sī tam-tng sè-kan ê chōe ê. 30 Chit-ê chiū-sī góa só͘ bat kóng, Ū chi̍t lâng tè-bé góa lâi, chiâⁿ-chòe góa ê tāi-seng, in-ūi I pún tāi-seng góa tī-teh. 31 Góa pún m̄ bat I; to̍k-to̍k beh hō͘ I hián-bêng tī Í-sek-lia̍t lâng, só͘-í góa lâi ēng chúi kiâⁿ sóe-lé. 32 Iok-hān koh kan-chèng kóng, Góa bat khòaⁿ-kìⁿ Sèng Sîn chhin-chhiūⁿ chíⁿ-á tùi thiⁿ kàng-lo̍h, hioh tī I téng-bīn. 33 Góa pêng-sò͘ m̄ bat I; to̍k-to̍k chhe góa ēng chúi kiâⁿ sóe-lé ê, kā góa kóng, Lí khòaⁿ Sèng Sîn kàng-lîm, hioh tī I téng-bīn, I chiū-sī ēng Sèng Sîn kiâⁿ sóe-lé ê. 34 Góa bat khòaⁿ-kìⁿ, lâi kan-chèng chit-ê sī Siōng-tè ê Kiáⁿ. 35 Koh keh ji̍t, Iok-hān kap i nn̄g ê ha̍k-seng teh khiā; 36 khòaⁿ-kìⁿ Iâ-so͘ teh kiâⁿ, chiū kóng, Lí khòaⁿ, Siōng-tè ê Iûⁿ-ko. 37 Hit nn̄g ê ha̍k-seng thiaⁿ i só͘ kóng, chiū tè Iâ-so͘. 38 Iâ-so͘ oa̍t-tńg-sin, khòaⁿ in teh tè I, chiū kā in kóng, Lín teh chhē sím-mi̍h? In kā I kóng, Lia̍p-pí, lí tiàm tī tá-lo̍h? (Lia̍p-pí, hoan-e̍k chiū-sī Sian-siⁿ). 39 Iâ-so͘ kā in kóng, Lín lâi chiū ōe khòaⁿ-kìⁿ. In chiū khì, khòaⁿ I só͘ tòa ê só͘-chāi; hit ji̍t kap I saⁿ-kap tòa; hit sî iok-lio̍k sì tiám cheng. 40 Thiaⁿ Iok-hān ê ōe lâi tè Iâ-so͘ ê nn̄g lâng, kî-tiong chi̍t-ê sī Se-bûn Pí-tek ê hiaⁿ-tī, An-tek-lia̍t. 41 I tāi-seng tú-tio̍h in hiaⁿ-tī Se-bûn, kā i kóng, Goán í-keng tú-tio̍h Bí-sài-a (hoan-e̍k chiū-sī Ki-tok). 42 Chiū chhōa i chiū-kūn Iâ-so͘. Iâ-so͘ khòaⁿ i kóng, Lí chiū-sī Iok-hān ê kiáⁿ Se-bûn; lí beh chheng chòe Ki-hoat (hoan-e̍k chiū-sī Pí-tek). 43 Koh keh ji̍t, Iâ-so͘ beh khì Ka-lī-lī, tú-tio̍h Hui-le̍k; chiū kā i kóng, Tè góa. 44 Hui-le̍k sī Pek-sài-tāi ê lâng , kap An-tek-lia̍t Pí-tek tâng siâⁿ. 45 Hui-le̍k tú-tio̍h Ná-tàn-gia̍p, chiū kā i kóng, Mô͘-se kì tī lu̍t-hoat kap chiah ê sian-ti só͘ kì ê, goán í-keng tú-tio̍h I, chiū-sī Iok-sek ê kiáⁿ, Ná-sat-le̍k lâng, Iâ-so͘. 46 Ná-tàn-gia̍p kā i kóng, Ná-sat-le̍k kiám ōe chhut sím-mi̍h hó mi̍h mah? Hui-le̍k kóng, Lâi khòaⁿ. 47 Iâ-so͘ khòaⁿ-kìⁿ Ná-tàn-gia̍p chiū-kūn I, chiū chí i, kóng, Lí khòaⁿ, chin-chiàⁿ sī Í-sek-lia̍t lâng, sim bô khúi-khiat ê. 48 Ná-tàn-gia̍p kā i kóng, Tùi tá-lo̍h bat góa? Iâ-so͘ kóng, Hui-le̍k iáu-bē kiò lí, lí tī bû-hoa-kó chhiū kha, góa í-keng khòaⁿ-kìⁿ lí lah. 49 Ná-tàn-gia̍p ìn I kóng, Lia̍p-pí, lí chiū-sī Siōng-tè ê Kiáⁿ; lí chiū-sī Í-sek-lia̍t ê Ông. 50 Iâ-so͘ ìn i kóng, In-ūi góa kā lí kóng, Góa í-keng khòaⁿ-kìⁿ lí tī bû-hoa-kó chhiū kha, lí chiū sìn mah? Lí beh khòaⁿ-kìⁿ tāi-chì pí chiah-ê khah tōa ê. 51 Koh kā i kóng, Góa si̍t-si̍t kā lín kóng, Lín beh khòaⁿ-kìⁿ thiⁿ khui, Siōng-tè ê thiⁿ-sài chiūⁿ-lo̍h tī Jîn-chú ê téng-bīn.
1 第三日tī加利利ê Ka-ná有婚姻ê筵席；耶穌ê老母tī hia； 2 耶穌kap伊ê學生也hō͘ in請去赴筵席。 3 酒用了，耶穌ê老母就對伊講，In無酒lah。 4 耶穌kā伊講，老母ah，我kap你甚麼干涉？我ê時iáu-bē到。 5 伊ê老母kā chiahê差用ê人講，凡若伊kā lín講ê，lín tio̍h行伊。 6 照偤太人洗清氣ê例，tī hia有排六個石甕，ta̍k-ê能tóe得兩三桶水。 7 耶穌kā差用ê人講，用水hō͘伊滿甕。就hō͘伊滿到甕口。 8 Koh kā in講，Taⁿ tio̍h iúⁿ伊，捧hō͘掌理筵桌ê人。就捧hō͘伊。 9 水變做酒，掌理筵桌ê試lim伊，m̄知tùi tá-lo̍h來，(獨獨iúⁿ水ê差用知) ；掌理筵桌ê就叫新kiáⁿ婿來， 10 kā伊講，人lóng是事先排好酒；到人lim chōe-chōe，chiah用khah次ê；獨獨你留好酒到chit-tia̍p。 11 Chitê頭一pái ê神蹟，耶穌行tī加利利ê Ka-ná，來顯出伊ê榮光；伊ê學生就信伊。 12 Chitê事以後，伊kap伊ê老母，kap兄弟，以及伊ê學生落去迦百農；tiàm hia無幾日。 13 偤太人ê pôaⁿ過節近lah，耶穌上耶路撒冷。 14 Tī殿裡tú-tio̍h有賣牛、羊、鴿á，亦有換錢ê teh坐。 15 耶穌用索做鞭，趕in kap羊牛lóng出殿；koh chhia-tó換錢ê人ê錢，péng-lìn-tńg in ê桌； 16 koh kā賣鴿á ê講，帶chiahê物去；m̄ thang用我ê父ê厝做買賣ê厝。 17 伊ê學生記得聖經有記，講，我為tio̍h你ê厝心內親像火to̍h。 18 偤太人就應伊講，你做chiahê tāi-chì，用甚麼神蹟hō͘阮看？ 19 耶穌應講，Lín毀壞chitê殿，我三日beh koh起伊。 20 偤太人就講，Chitê殿歷過四十六年chiah起好，亦你三日beh koh起伊mah？ 21 但是伊án-ni講是teh論伊ê身軀ê殿。 22 到伊tùi死人中koh活，伊ê學生chiah記得伊bat án-ni講；就信聖經kap耶穌所講ê話。 23 當pôaⁿ過節耶穌tī耶路撒冷；tī節期中chōe-chōe人看見伊所行ê神蹟，就信伊ê名。 24 但是耶穌無用本身交託in，因為伊知眾人， 25 也無欠用人對伊證明人是怎樣；因為伊家己知人心內所khǹg ê。
1 Tē saⁿ ji̍t tī Ka-lī-lī ê Ka-ná ū hun-in ê iân-sia̍h; Iâ-so͘ ê lāu-bú tī hia; 2 Iâ-so͘ kap I ê ha̍k-seng iā hō͘ in chhiáⁿ khì hù iân-sia̍h. 3 Chiú ēng liáu, Iâ-so͘ ê lāu-bú chiū tùi I kóng, In bô chiú lah. 4 Iâ-so͘ kā i kóng, lāu-bú ah, góa kap lí sím-mi̍h kan-sia̍p? góa ê sî iáu-bē kàu. 5 I ê lāu-bú kā chiah ê chhe-ēng ê lâng kóng, Hoān-nā I kā lín kóng ê, lín tio̍h kiâⁿ i. 6 Chiàu Iû-thài lâng sóe chheng-khì ê lē, tī hia ū pâi la̍k ê chio̍h àng, ta̍k-ê ōe tóe-tit nn̄g saⁿ tháng chúi. 7 Iâ-so͘ kā chhe-ēng ê lâng kóng, Ēng chúi hō͘ i móa àng. Chiū hō͘ i móa kàu àng-kháu. 8 Koh kā in kóng, Taⁿ tio̍h iúⁿ i, phâng hō͘ chiáng-lí iân-toh ê lâng. Chiū phâng hō͘ i. 9 Chúi piàn chòe chiú, chiáng-lí iân-toh ê chhì-lim i, m̄ chai tùi tá-lo̍h lâi, (to̍k-to̍k iúⁿ chúi ê chhe-ēng chai); chiáng-lí iân-toh ê chiū kiò sin-kiáⁿ-sài lâi, 10 kā i kóng, Lâng lóng sī tāi-seng pâi hó chiú; kàu lâng lim chōe-chōe, chiah ēng khah chhù ê; to̍k-to̍k lí lâu hó chiú kàu chit tia̍p. 11 Chit-ê thâu chi̍t pái ê sîn-jiah, Iâ-so͘ kiâⁿ tī Ka-lī-lī ê Ka-ná, lâi hián-chhut I ê êng-kng; I ê ha̍k-seng chiū sìn I. 12 Chit ê sū í-āu, I kap I ê lāu-bú, kap hiaⁿ-tī, í-ki̍p I ê ha̍k-seng lo̍h-khì Ka-pek-lông; tiàm hia bô kúi ji̍t. 13 Iû-thài lâng ê pôaⁿ-kè-choeh kūn lah, Iâ-so͘ chiūⁿ Iâ-lō͘-sat-léng. 14 Tī tiān-ni̍h tú-tio̍h ū bōe gû, iûⁿ, chíⁿ-á, ia̍h ū ōaⁿ chîⁿ ê teh chē. 15 Iâ-so͘ ēng soh chòe piⁿ, kóaⁿ in kap iûⁿ gû lóng chhut tiān; koh chhia-tó ōaⁿ chîⁿ ê lâng ê chîⁿ, péng-lìn-tńg in ê toh; 16 koh kā bōe chíⁿ-á ê kóng, Tòa chiah ê mi̍h khì; m̄-thang ēng góa ê Pē ê chhù chòe bóe-bōe ê chhù. 17 I ê ha̍k-seng kì-tit sèng-keng ū kì, kóng, Góa ūi-tio̍h lí ê chhù sim-lāi chhin-chhiūⁿ hé to̍h. 18 Iû-thài lâng chiū ìn I kóng, Lí chòe chiah ê tāi-chì, ēng sím-mi̍h sîn-jiah hō͘ goán khòaⁿ? 19 Iâ-so͘ ìn kóng, Lín húi-hoāi chit ê tiān, góa saⁿ ji̍t beh koh khí i. 20 Iû-thài lâng chiū kóng, Chit ê tiān le̍k-kè sì-cha̍p-la̍k nî chiah khí hó, ia̍h lí saⁿ ji̍t beh koh khí i mah? 21 Nā-sī I án-ni kóng sī teh lūn I ê sin-khu ê tiān. 22 Kàu I tùi sí-lâng tiong koh-oa̍h, I ê ha̍k-seng chiah kì-tit I bat án-ni kóng; chiū sìn sèng-keng kap Iâ-so͘ só͘ kóng ê ōe. 23 Tng pôaⁿ-kè-choeh Iâ-so͘ tī Iâ-lō͘-sat-léng; tī choeh-kî tiong chōe-chōe lâng khòaⁿ-kìⁿ I só͘ kiâⁿ ê sîn-jiah, chiū sìn I ê miâ. 24 Nā-sī Iâ-so͘ bô ēng pún-sin kau-thok in, in-ūi I chai chèng lâng, 25 iā bô khiàm-ēng lâng tùi I chèng-bêng lâng sī cháiⁿ-iūⁿ; in-ūi I ka-kī chai lâng sim-lāi só͘ khǹg ê.
1
1 Ū chi̍t ê Hoat-lī-sài lâng, miâ Nî-ko-tí-bó͘, sī Iû-thài lâng ê koaⁿ; 2 mî-sî lâi chiū-kūn Iâ-so͘, tùi I kóng, Lia̍p-pí, goán chai lí chòe sian-siⁿ, sī tùi Siōng-tè lâi ê; in-ūi nā m̄ sī Siōng-tè kap i tī-teh, chiū bô lâng ōe kiâⁿ lí só͘ kiâⁿ chiah ê sîn-jiah. 3 Iâ-so͘ ìn i, kóng, Góa si̍t-si̍t kā lí kóng, Lâng nā bô têng-thâu siⁿ, chiū bōe-ōe khòaⁿ-kìⁿ Siōng-tè ê kok. 4 Nî-ko-tí-bó͘ tùi I kóng, Lâng í-keng lāu, cháiⁿ-iūⁿ ōe têng-thâu siⁿ? kiám ōe koh ji̍p lāu-bú ê pak-tó͘ lâi siⁿ mah? 5 Iâ-so͘ ìn kóng, Góa si̍t-si̍t kā lí kóng, Lâng nā bô tùi chúi tùi Sèng Sîn lâi siⁿ, chiū bōe-ōe ji̍p Siōng-tè ê kok. 6 Tùi jio̍k-thé siⁿ ê sī jio̍k-thé; tùi Sîn siⁿ ê sī sîn. 7 Góa kóng, Lín tek-khak tio̍h têng-thâu siⁿ, lí bo̍h-tit lia̍h chòe kî-koài. 8 Hong chhut-chāi ì-sù lâi chhe, lí thiaⁿ-kìⁿ i ê siaⁿ, m̄ chai i tùi tá-lo̍h lâi, tá-lo̍h khì; kìⁿ-nā tùi Sîn siⁿ ê ia̍h sī án-ni. 9 Nî-ko-tí-bó͘ ìn I kóng, Cháiⁿ-iūⁿ ōe án-ni ah? 10 Iâ-so͘ ìn i kóng, Lí chòe Í-sek-lia̍t ê sian-siⁿ, iā m̄ chai che mah? 11 Góa si̍t-si̍t kā lí kóng, Goán sī kóng goán só͘ chai ê, kan-chèng goán só͘ khòaⁿ-kìⁿ ê; nā-sī lín m̄ chiap-la̍p goán ê kan-chèng. 12 Góa kā lín kóng tōe-chiūⁿ ê sū, lín siōng-chhiáⁿ m̄ sìn; nā kā lín kóng thiⁿ-téng ê sū, lín thái beh sìn? 13 Bô lâng bat chiūⁿ thiⁿ; chí ū tī thiⁿ-ni̍h ê Jîn-chú, tùi thiⁿ kàng-lo̍h ê nā-tiāⁿ. 14 Koh chhin-chhiūⁿ Mô͘-se kú-khí chôa tī khòng-iá, Jîn-chú ia̍h tek-khak tio̍h án-ni siū kú-khí; 15 hō͘ kìⁿ-nā sìn ê lâng tiàm tī I ū éng-oa̍h. 16 In-ūi Siōng-tè chiong to̍k-siⁿ ê Kiáⁿ siúⁿ-sù sè-kan, hō͘ kìⁿ-nā sìn I ê lâng bōe tîm-lûn, ōe tit-tio̍h éng-oa̍h; I thiàⁿ sè-kan kàu án-ni. 17 In-ūi Siōng-tè chhe Kiáⁿ ji̍p sè-kan, m̄ sī beh sím-phòaⁿ sè-kan; sī beh hō͘ sè-kan tùi I tit-tio̍h kiù. 18 Sìn I ê lâng bô siū sím-phòaⁿ; m̄ sìn ê lâng í-keng siū sím-phòaⁿ, in-ūi i m̄ sìn Siōng-tè to̍k-siⁿ Kiáⁿ ê miâ. 19 Só͘ sím-phòaⁿ ê, chiū-sī kng ji̍p sè-kan, ia̍h lâng ài àm khah kè-thâu tī kng, in-ūi i só͘ kiâⁿ sī pháiⁿ. 20 Kìⁿ-nā chòe pháiⁿ ê, oàn-hūn kng ia̍h m̄ chiū-kūn kng, kiaⁿ-liáu i ê só͘ kiâⁿ siū chek-pī. 21 To̍k-to̍k kiâⁿ chin-lí ê lâng chiū-kūn kng, lâi hián-bêng i ê só͘ kiâⁿ sī tī Siōng-tè lâi kiâⁿ. 22 Chiah ê tāi-chì í-āu, Iâ-so͘ kap I ê ha̍k-seng kàu Iû-thài tōe; kap in tòa hia lâi kiâⁿ sóe-lé. 23 Iok-hān ia̍h teh kiâⁿ sóe-lé tī kūn Sat-léng ê Ai-loán; in-ūi tī hia ū chōe-chōe chúi; lâng kàu hia lâi siū sóe-lé. 24 In-ūi Iok-hān iáu-bē koaiⁿ lo̍h kaⁿ. 25 Tùi án-ni ū Iok-hān ê ha̍k-seng kap chi̍t ê Iû-thài lâng cheng-piān chheng-khì ê sū. 26 In lâi chiū-kūn Iok-hān, kā i kóng, Lia̍p-pí ah, chiông-chêng kap lí tī Iok-tàn gōa; lí só͘ kan-chèng ê, lí khòaⁿ, i teh kiâⁿ sóe-lé, chèng lâng lóng chiū-kūn I. 27 Iok-hān ìn kóng, Nā m̄ sī tùi thiⁿ hō͘ i, chiū lâng bōe tit-tio̍h sím-mi̍h. 28 Lín ka-kī ūi-tio̍h góa chòe kan-chèng, góa bat kóng, Góa m̄ sī Ki-tok, chiū-sī hōng-chhe tī I ê thâu-chêng nā-tiāⁿ. 29 Ū sin-niû ê sī sin-kiáⁿ-sài; sin-kiáⁿ-sài ê pêng-iú khiā teh thiaⁿ i, ūi-tio̍h sin-kiáⁿ-sài ê siaⁿ, chiū hoaⁿ-hí kàu-ke̍k; só͘-í góa chit ê hoaⁿ-hí chhiong-móa lah. 30 I tek-khak heng-ōng, góa tek-khak soe-bî. 31 Tùi téng-bīn lâi ê, sī tī bān lūi ê téng-bīn; hit ê tùi tōe-ni̍h ê, sī tùi tōe chiah ū, ia̍h tùi tōe lâi kóng; tùi thiⁿ lâi ê sī tī bān lūi ê téng-bīn. 32 I chiong só͘ thiaⁿ-kìⁿ ê lâi kan-chèng, ia̍h bô lâng chiap-la̍p I ê kan-chèng. 33 Chiap-la̍p I ê kan-chèng ê, í-keng khàm-ìn lâi kan-chèng Siōng-tè sī chin-si̍t. 34 In-ūi Siōng-tè só͘ chhe ê kóng Siōng-tè ê ōe; sī Siōng-tè siúⁿ-sù Sèng Sîn bô hān-liōng. 35 Pē thiàⁿ Kiáⁿ, í-keng chiong bān mi̍h kau-hù I ê chhiú. 36 Sìn Kiáⁿ ê lâng ū éng-oa̍h; m̄ sūn Kiáⁿ ê lâng bōe khòaⁿ-kìⁿ oa̍h, Siōng-tè ê siū-khì tiàm tī i ê téng-bīn.
1 主已經知法利賽人聽見耶穌招tio̍h學生，亦kā in行洗禮，比約翰khah chōe， 2 (其實耶穌家己無行洗禮，是伊ê學生行伊) ， 3 就離開偤太，koh去加利利。 4 Tio̍h tùi撒馬利亞經過。 5 Tùi án-ni到撒馬利亞一个城，名叫Sū-ka，近雅各hō͘伊ê kiáⁿ約瑟ê地；tī hia有雅各ê水井。 6 耶穌行路倦，就án-ni坐tī井邊。Hit時約略日中晝。 7 有一个撒馬利亞ê婦人人來chhiūⁿ水；耶穌kā伊講，請hō͘我lim。 8 因為伊ê學生已經入城，去買物 thang來食。 9 撒馬利亞ê婦人人kā伊講，你是偤太人，怎樣tùi我撒馬利亞ê婦人人討水lim ah？是偤太人kap撒馬利亞人無往來。 10 耶穌應伊講，設使你bat上帝ê恩賜，kap 對你講，hō͘我lim ê，是是誰；你的確求伊，伊就用活水hō͘你。 11 婦人人講，主ah，你無chhiūⁿ水ê器具，井koh深；tùi tá-lo̍h有hitê活水ah？ 12 阮祖雅各留chitê井hō͘阮，伊家己kap kiáⁿ兒kap cheng-siⁿ lóng lim chitê井ê水，你kiám pí伊khah大mah？ 13 耶穌應伊講，Lim chitê水ê，lóng beh koh嘴乾；獨獨見若lim我所beh hō͘伊ê水ê永遠bōe嘴乾； 14 因為我所hō͘伊ê水beh tī伊ê內面成做水泉，直直chhèng起來到永遠活。 15 婦人人對伊講，主ah，用chitê水hō͘我，hō͘我bōe嘴乾，亦免來chiah遠chhiūⁿ。 16 耶穌kā伊講，去叫你ê丈夫chiah koh來。 17 婦人人應伊講，我無丈夫。耶穌kā伊講，你講，無丈夫，是tio̍h； 18 因為你bat有五個丈夫；taⁿ所有ê m̄是你ê丈夫；你ê話真正tio̍h。 19 婦人人kā伊講，主ah，我看你是先知。 20 阮祖 bat tī chitê山敬拜；但是lín講敬拜ê所在應該tī耶路撒冷。 21 耶穌kā伊講，婦人人ah，tio̍h信我，時beh到lah，lín敬拜父亦無tī chitê山，亦無tī耶路撒冷。 22 Lín敬拜lín所m̄知ê；阮敬拜阮所知ê；因為拯救是tùi偤太人出。 23 但是時beh到，現今就是，真實敬拜ê beh用神用真實敬拜父；因為父是ài chit號人敬拜伊。 24 上帝是神；敬拜伊ê人，tio̍h用神用真實來敬拜。 25 婦人人kā伊講，我知彌賽亞teh-beh到；伊若到beh用一切ê事kā阮講。(彌賽亞翻譯就是基督) 26 耶穌kā伊講，我chitê teh kap你講話ê，就是。 27 Hit時伊ê學生到；奇怪伊kap婦人人講話；獨獨無人講，你beh甚麼tāi-chì？á是講，你啥事kap婦人人講話？ 28 婦人人隨時放下伊ê水瓶，入城，kā人講， 29 來看一人，我平素行ê事，伊lóng kā我講；chitê總無是基督ah？ 30 In就出城，來就近耶穌。 31 當時學生求伊講，拉比來食。 32 但是伊kā in講，我有米糧thang食，lín所m̄知ê。 33 學生就saⁿ-kap講，Kiám有人hō͘伊食mah？ 34 耶穌kā in講，行差我ê ê旨意，來明白伊ê工，就是我ê米糧。 35 Lín kiám無講，iáu有四月日，就收割ê時到mah？我kā lín講，kia̍h目看園，已經熟，thang割lah。 36 收割ê人得tio̍h工錢，積聚五穀到永活；hō͘掖種ê，收割ê，saⁿ-kap歡喜。 37 因為俗語所講，Chitê掖種，hitê收割，tùi án-ni真正有影。 38 我差lín收割lín所無tio̍h磨ê；別人已經tio̍h磨，lín享受in所tio̍h磨ê。 39 Hit-ê城有撒馬利亞人chōe-chōe信伊，是因為婦人人干證，講，我平素行ê事，伊lóng kā我講。 40 Tùi án-ni，撒馬利亞人就近耶穌ê時，求伊kap in tòa；伊就tòa hia兩日。 41 因為伊ê話來信ê人koh-khah chōe； 42 kā婦人人講，阮taⁿ m̄是對你ê話來信；是親身聽見，知伊真正是世間ê救主。 43 過兩日，耶穌離開hia，去加利利。 44 因為耶穌家己干證，講，先知人tī本所在無尊貴。 45 到加利利ê時，加利利人接納伊，因為bat看伊tī耶路撒冷當節期中所行一切ê tāi-chì；因為in本身亦有去赴節期。 46 耶穌koh到加利利ê Ka-ná，就是伊用水變酒ê所在。有王ê人臣，伊ê kiáⁿ破病tī迦百農。 47 聽見耶穌tùi偤太到加利利，就去就近伊，求伊落去醫治伊ê kiáⁿ；因為teh-beh死lah。 48 耶穌對伊講，若無看見神蹟奇事，lín的確m̄信。 49 王ê人臣對伊講，主ah，趁我ê細kiáⁿ iáu-bē死，落來去。 50 耶穌kā伊講，去ah，你ê kiáⁿ活lah。Hit人信耶穌kā伊講ê話，就去。 51 Tú-tú落去ê時，伊ê奴僕kúi-nā人tú-tio̍h伊，kā伊講伊ê kiáⁿ活lah。 52 就問in，甚麼時chiah khah好？In就kā伊講，昨日晝一點鐘，熱退。 53 老父知hit時tú-tú是耶穌講，你ê kiáⁿ活lah，ê時；伊家己kap全家就lóng信。 54 Chitê第二pái ê神蹟，是耶穌tùi偤太到加利利以後所行ê。
1 Chú í-keng chai Hoat-lī-sài lâng thiaⁿ-kìⁿ Iâ-so͘ chio-tio̍h ha̍k-seng, ia̍h kā in kiâⁿ sóe-lé, pí Iok-hān khah chōe, 2 (kî-si̍t Iâ-so͘ ka-kī bô kiâⁿ sóe-lé, sī I ê ha̍k-seng kiâⁿ i), 3 chiū lī-khui Iû-thài, koh khì Ka-lī-lī. 4 Tio̍h tùi Sat-má-lī-a keng-kè. 5 Tùi án-ni kàu Sat-má-lī-a chi̍t ê siâⁿ, miâ kiò Sū-ka, kūn Ngá-kok hō͘ i ê kiáⁿ Iok-sek ê tōe; tī hia ū Ngá-kok ê chúi-chíⁿ. 6 Iâ-so͘ kiâⁿ lō͘ siān, chiū án-ni chē tī chíⁿ-piⁿ. Hit sî iok-lio̍k ji̍t tiong-tàu. 7 Ū chi̍t ê Sat-má-lī-a ê hū-jîn-lâng lâi chhiūⁿ chúi; Iâ-so͘ kā i kóng, Chhiáⁿ hō͘ góa lim. 8 In-ūi I ê ha̍k-seng í-keng ji̍p siâⁿ, khì bóe mi̍h thang lâi chia̍h. 9 Sat-má-lī-a ê hū-jîn-lâng kā I kóng, Lí sī Iû-thài lâng, cháiⁿ-iūⁿ tùi góa Sat-má-lī-a ê hū-jîn-lâng thó chúi lim ah? Sī Iû-thài lâng kap Sat-má-lī-a lâng bô óng-lâi. 10 Iâ-so͘ ìn i kóng, Siat-sú lí bat Siōng-tè ê un-sù, kap tùi lí kóng, Hō͘ góa lim ê, sī chī-chūi; lí tek-khak kiû I, I chiū ēng oa̍h chúi hō͘ lí. 11 Hū-jîn-lâng kóng, Chú ah, lí bô chhiūⁿ chúi ê khì-kū, chíⁿ koh chhim; tùi tá-lo̍h ū hit ê oa̍h chúi ah? 12 Goán chó͘ Ngá-kok lâu chit ê chíⁿ hō͘ goán, i ka-kī kap kiáⁿ-jî kap cheng-siⁿ lóng lim chit ê chíⁿ ê chúi, lí kiám pí i khah tōa mah? 13 Iâ-so͘ ìn i kóng, Lim chit ê chúi ê, lóng beh koh chhùi-ta; to̍k-to̍k kìⁿ-nā lim góa só͘ beh hō͘ i ê chúi ê éng-oán bōe chhùi-ta; 14 in-ūi góa só͘ hō͘ i ê chúi beh tī i ê lāi-bīn chiâⁿ-chòe chúi-chôaⁿ, ti̍t-ti̍t chhèng-khí-lâi kàu éng-oán oa̍h. 15 Hū-jîn-lâng tùi I kóng, Chú ah, ēng chit ê chúi hō͘ góa, hō͘ góa bōe chhùi-ta, ia̍h bián lâi chiah hn̄g chhiūⁿ. 16 Iâ-so͘ kā i kóng, Khì kiò lí ê tiōng-hu chiah koh lâi. 17 Hū-jîn-lâng ìn I kóng, Góa bô tiōng-hu. Iâ-so͘ kā i kóng, Lí kóng, Bô tiōng-hu, sī tio̍h; 18 in-ūi lí bat ū gō͘ ê tiōng-hu; taⁿ só͘ ū ê m̄ sī lí ê tiōng-hu; lí ê ōe chin-chiàⁿ tio̍h. 19 Hū-jîn-lâng kā i kóng, Chú ah, góa khòaⁿ lí sī sian-ti. 20 Goán chó͘ bat tī chit ê soaⁿ kèng-pài; nā-sī lín kóng kèng-pài ê só͘-chāi eng-kai tī Iâ-lō͘-sat-léng. 21 Iâ-so͘ kā i kóng, Hū-jîn-lâng ah, tio̍h sìn góa, sî beh kàu lah, lín kèng-pài Pē ia̍h bô tī chit ê soaⁿ, ia̍h bô tī Iâ-lō͘-sat-léng. 22 Lín kèng-pài lín só͘ m̄ chai ê; goán kèng-pài goán só͘ chai ê; in-ūi chín-kiù sī tùi Iû-thài lâng chhut. 23 Nā-sī sî beh kàu, hiān-kim chiū-sī, chin-si̍t kèng-pài ê beh ēng sîn ēng chin-si̍t kèng-pài Pē; in-ūi Pē sī ài chit hō lâng kèng-pài I. 24 Siōng-tè sī Sîn; kèng-pài I ê lâng, tio̍h ēng sîn ēng chin-si̍t lâi kèng-pài. 25 Hū-jîn-lâng kā I kóng, Góa chai Bí-sài-a teh-beh kàu; I nā kàu beh ēng it-chhè ê sū kā goán kóng. (Bí-sài-a hoan-e̍k chiū-sī Ki-tok). 26 Iâ-so͘ kā i kóng, Góa chit ê teh kap lí kóng ōe ê, chiū-sī. 27 Hit-sî I ê ha̍k-seng kàu; kî-koài I kap hū-jîn-lâng kóng ōe; to̍k-to̍k bô lâng kóng, Lí beh sím-mi̍h tāi-chì? á-sī kóng, Lí siáⁿ-sū kap hū-jîn-lâng kóng ōe? 28 Hū-jîn-lâng sûi-sî pàng-hē i ê chúi-pân, ji̍p siâⁿ, kā lâng kóng, 29 Lâi khòaⁿ chi̍t lâng, góa pêng-sò͘ kiâⁿ ê sū, I lóng kā góa kóng; chit-ê chóng bô sī Ki-tok ah? 30 In chiū chhut siâⁿ, lâi chiū-kūn Iâ-so͘. 31 Tng sî ha̍k-seng kiû I kóng, Lia̍p-pí lâi chia̍h. 32 Nā-sī I kā in kóng, Góa ū bí-niû thang chia̍h, lín só͘ m̄ chai ê. 33 Ha̍k-seng chiū saⁿ-kap kóng, Kiám ū lâng hō͘ I chia̍h mah? 34 Iâ-so͘ kā in kóng, Kiâⁿ chhe góa ê ê chí-ì, lâi bêng-pe̍k I ê kang, chiū-sī góa ê bí-niû. 35 Lín kiám bô kóng, Iáu ū sì ge̍h ji̍t, chiū siu-koah ê sî kàu mah? Góa kā lín kóng, Kia̍h ba̍k khòaⁿ hn̂g, í-keng se̍k, thang koah lah. 36 Siu-koah ê lâng tit-tio̍h kang-chîⁿ, chek-chū gō͘-kak kàu éng-oa̍h; hō͘ iā-chéng ê, siu-koah ê, saⁿ-kap hoaⁿ-hí. 37 In-ūi sio̍k-gú só͘ kóng, Chit-ê iā-chéng, hit-ê siu-koah, tùi án-ni chin-chiàⁿ ū iáⁿ. 38 Góa chhe lín siu-koah lín só͘ bô tio̍h-bôa ê; pa̍t lâng í-keng tio̍h-bôa, lín hióng-siū in só͘ tio̍h-bôa ê. 39 Hit ê siâⁿ ū Sat-má-lī-a lâng chōe-chōe sìn I, sī in-ūi hū-jîn-lâng kan-chèng, kóng, Góa pêng-sò͘ kiâⁿ ê sū, I lóng kā góa kóng. 40 Tùi án-ni, Sat-má-lī-a lâng chiū-kūn Iâ-so͘ ê sî, kiû I kap in tòa; I chiū tòa hia nn̄g ji̍t. 41 In-ūi I ê ōe lâi sìn ê lâng koh khah chōe; 42 kā hū-jîn-lâng kóng, Goán taⁿ m̄ sī tùi lí ê ōe lâi sìn; sī chhin-sin thiaⁿ-kìⁿ, chai I chin-chiàⁿ sī sè-kan ê Kiù-chú. 43 Kè nn̄g ji̍t, Iâ-so͘ lī-khui hia, khì Ka-lī-lī. 44 In-ūi Iâ-so͘ ka-kī kan-chèng, kóng, Sian-ti lâng tī pún só͘-chāi bô chun-kùi. 45 Kàu Ka-lī-lī ê sî, Ka-lī-lī lâng chiap-la̍p I, in-ūi bat khòaⁿ I tī Iâ-lō͘-sat-léng tng choeh-kî tiong só͘ kiâⁿ it-chhè ê tāi-chì; in-ūi in pún-sin ia̍h ū khì hù choeh-kî. 46 Iâ-so͘ koh kàu Ka-lī-lī ê Ka-ná, chiū-sī I ēng chúi piàn chiú ê só͘-chāi. Ū ông ê jîn-sîn, i ê kiáⁿ phòa-pīⁿ tī Ka-pek-lông. 47 Thiaⁿ-kìⁿ Iâ-so͘ tùi Iû-thài kàu Ka-lī-lī, chiū khì chiū-kūn I, kiû I lo̍h-khì i-tī i ê kiáⁿ; in-ūi teh-beh sí lah. 48 Iâ-so͘ tùi i kóng, Nā bô khòaⁿ-kìⁿ sîn-jiah kî-sū, lín tek-khak m̄ sìn. 49 Ông ê jîn-sîn tùi I kóng, Chú ah, thàn góa ê sòe-kiáⁿ iáu-bē sí, lo̍h-lâi-khì. 50 Iâ-so͘ kā i kóng, Khì ah, lí ê kiáⁿ oa̍h lah. Hit lâng sìn Iâ-so͘ kā i kóng ê ōe, chiū khì. 51 Tú-tú lo̍h-khì ê sî, i ê lô͘-po̍k kúi-nā lâng tú-tio̍h i, kā i kóng i ê kiáⁿ oa̍h lah. 52 Chiū mn̄g in, Sím-mi̍h sî chiah khah hó? In chiū kā i kóng, Chā-ji̍t-tàu chi̍t tiám cheng jia̍t thè. 53 Lāu-pē chai hit sî tú-tú sī Iâ-so͘ kóng, Lí ê kiáⁿ oa̍h lah, ê sî; i ka-kī kap choân-ke chiū lóng sìn. 54 Chit ê tē jī pái ê sîn-jiah, sī Iâ-so͘ tùi Iû-thài kàu Ka-lī-lī í-āu só͘ kiâⁿ ê.
1 Chiahê事以後，有偤太人ê節期；耶穌上耶路撒冷。 2 Tī耶路撒冷，近羊門，有池，希伯來ê腔口叫做Pit-sū-tāi，有五個léng廊。 3 Hit內面有chhiⁿ-mî ê，跛腳ê，血枯焦ê，chōe-chōe病人倒teh。 4 5 Tī hia有一人，破病三十八年。 6 耶穌看見伊倒teh，知伊ê病已經久，kā伊講，你ài得tio̍h好mah？ 7 破病ê人應伊講，主ah，水振動ê時，無人thang扶我落池；到我來ê時，別人事先我落去lah。 8 耶穌kā伊講，起來，giâ你ê舖á去行。 9 Hit人即時好，就giâ伊ê舖á去行。 10 Hit日是安歇日，偤太人就kā得tio̍h醫好ê人講，今á日是安歇日，你giâ舖á是m̄合宜。 11 但是伊應講，Hit-ê醫好我ê kā我講，Giâ你ê舖á來行。 12 In問伊，講，Kā你講，Giâ舖á來行ê，是甚麼人？ 13 得tio̍h好ê人m̄知伊是是誰；因為耶穌已經去別位，是hit所在ê人chōe。 14 後來耶穌tī殿裡tú-tio̍h伊，就kā伊講，你已經得tio̍h好；莫得koh犯罪，驚了你tú-tio̍h koh-khah慘。 15 Hit人就去kā偤太人講，醫好伊ê就是耶穌。 16 所以偤太人khún-tio̍k耶穌，因為伊tī安歇日做chiahê tāi-chì。 17 耶穌應講，我ê父行tāi-chì到taⁿ，我亦行tāi-chì。 18 所以偤太人益發beh 刣伊，因為伊m̄若犯tio̍h安歇日，koh講上帝做伊ê父，將本身算做kap上帝平。 19 耶穌就應講，我實實kā lín講，Kiáⁿ若m̄是看見父行ê，就家己bōe行甚麼；因為見若父所行ê，Kiáⁿ亦照án-ni行。 20 因為父疼Kiáⁿ，將本身所行ê lóng總hō͘伊看；亦beh將比chiahê khah大ê所行hō͘伊看，致到lín奇怪。 21 因為親像父hō͘死人起來，koh hō͘ in活，Kiáⁿ亦是án-ni hō͘伊所ài ê人koh活。 22 因為父亦無審判人，獨獨用審判ê事lóng交帶Kiáⁿ；beh hō͘眾人lóng尊敬Kiáⁿ，親像尊敬父。 23 無尊敬Kiáⁿ ê人，就是無尊敬差伊ê父。 24 我實實kā lín講，聽我ê話，亦信差我ê，就有永活，bōe到受審判，是已經出死入活lah。 25 我實實kā lín講，時beh到，現在就是lah，死人teh-beh聽見上帝ê kiáⁿ ê聲，也聽見ê人teh-beh活。 26 因為親像父tī本身有活命，伊亦是án-ni hō͘ Kiáⁿ tī本身有活命； 27 koh hō͘伊有權thang審判，因為伊是做人子。 28 莫得掠chitê做奇怪；因為時beh到，見若tī墓內ê beh聽伊ê聲，chiah出來； 29 行好ê koh起來，得tio̍h活；行pháiⁿ ê koh起來，受審判。 30 我家己bōe做甚麼；我照所聽見來審判；我ê審判亦是公義；因為我無求家己ê意思，就是求差我ê ê意思。 31 我若為tio̍h家己做干證，我ê干證就無真。 32 iáu有為tio̍h我做干證ê；我知伊所為tio̍h我做干證ê是真。 33 Lín bat差人就近約翰，伊有為tio̍h真理做干證。 34 但是我所受ê干證，m̄是tùi人；獨獨我講chiahê，是beh hō͘ lín得tio̍h救。 35 約翰就是燈，點to̍h koh光；lín情願暫時歡喜伊ê光。 36 總是我有干證，比約翰ê khah大；因為父所交帶我來成ê事，就是我所行chiahê事，干證我是父所差ê。 37 差我ê父，伊ia̍h bat為tio̍h我做干證。Lín從來m̄-bat聽見伊ê聲，亦m̄-bat看見伊ê形象。 38 Koh lín無伊ê道理存tī lín，因為伊所差ê，lín m̄信伊。 39 Lín講究chiahê聖經，因為phah算hit中間lín有永活；亦為tio̍h我做干證ê，就是chiahê聖經； 40 lín又無beh就近我來得tio̍h活。 41 我無tùi人受榮光。 42 總是我知lín無有上帝ê疼tī lín ê心。 43 我tī我ê父ê名來，lín m̄接納我；若有別人tī家己ê名來，lín beh接納伊。 44 Lín大家相仝求榮光，m̄求tùi獨一ê上帝來ê榮光；怎樣會信？ 45 莫得phah算我beh tùi父告lín；有teh告lín ê，就是lín所óa靠ê摩西。 46 Lín若信摩西，亦beh信我，因為伊所寫ê有論我。 47 Lín若m̄信伊ê冊，thài ōe信我ê話ah？
1 Chiah ê sū í-āu, ū Iû-thài lâng ê choeh-kî; Iâ-so͘ chiūⁿ Iâ-lō͘-sat-léng. 2 Tī Iâ-lō͘-sat-léng, kūn Iûⁿ-mn̂g, ū tî, Hi-pek-lâi ê khiuⁿ-kháu kiò chòe Pit-sū-tāi, ū gō͘ ê léng-lông. 3 Hit lāi-bīn ū chhiⁿ-mî ê, pái-kha ê, huih ko͘-tâ ê, chōe-chōe pīⁿ lâng tó-teh. 4 5 Tī hia ū chi̍t lâng, phòa-pīⁿ saⁿ-cha̍p-poeh nî. 6 Iâ-so͘ khòaⁿ-kìⁿ i tó-teh, chai i ê pīⁿ í-keng kú, kā i kóng, Lí ài tit-tio̍h hó mah? 7 Phòa-pīⁿ ê lâng ìn I kóng, Chú ah, chúi tín-tāng ê sî, bô lâng thang hû góa lo̍h tî; kàu góa lâi ê sî, pa̍t lâng tāi-seng góa lo̍h-khì lah. 8 Iâ-so͘ kā i kóng, Khí-lâi, giâ lí ê pho͘-á khì kiâⁿ. 9 Hit lâng chek-sî hó, chiū giâ i ê pho͘-á khì kiâⁿ. 10 Hit ji̍t sī an-hioh-ji̍t, Iû-thài lâng chiū kā tit-tio̍h i-hó ê lâng kóng, kin-á-ji̍t sī an-hioh-ji̍t, lí giâ pho͘-á sī m̄ ha̍p-gî. 11 Nā-sī i ìn kóng, Hit-ê i-hó góa ê kā góa kóng, Giâ lí ê pho͘-á lâi kiâⁿ. 12 In mn̄g i, kóng, Kā lí kóng, Giâ pho͘-á lâi kiâⁿ ê, sī sím-mi̍h lâng? 13 Tit-tio̍h hó ê lâng m̄ chai I sī chī-chūi; in-ūi Iâ-so͘ í-keng khì pa̍t ūi, sī hit só͘-chāi ê lâng chōe. 14 Āu-lâi Iâ-so͘ tī tiān-ni̍h tú-tio̍h i, chiū kā i kóng, Lí í-keng tit-tio̍h hó; bo̍h-tit koh hoān-chōe, kiaⁿ-liáu lí tú-tio̍h koh khah chhám. 15 Hit lâng chiū khì kā Iû-thài lâng kóng, i-hó i ê chiū-sī Iâ-so͘. 16 Só͘-í Iû-thài lâng khún-tio̍k Iâ-so͘, in-ūi I tī an-hioh-ji̍t chòe chiah ê tāi-chì. 17 Iâ-so͘ ìn kóng, Góa ê Pē kiâⁿ tāi-chì kàu taⁿ, góa ia̍h kiâⁿ tāi-chì. 18 Só͘-í Iû-thài lâng it-hoat beh thâi I, in-ūi I m̄ nā hoān-tio̍h an-hioh-ji̍t, koh kóng Siōng-tè chòe I ê Pē, chiong pún-sin sǹg chòe kap Siōng-tè pîⁿ. 19 Iâ-so͘ chiū ìn kóng, Góa si̍t-si̍t kā lín kóng, Kiáⁿ nā m̄ sī khòaⁿ-kìⁿ Pē kiâⁿ ê, chiū ka-kī bōe kiâⁿ sím-mi̍h; in-ūi kìⁿ-nā Pē só͘ kiâⁿ ê, Kiáⁿ ia̍h chiàu án-ni kiâⁿ. 20 In-ūi Pē thiàⁿ Kiáⁿ, chiong pún-sin só͘ kiâⁿ ê lóng-chóng hō͘ I khòaⁿ; ia̍h beh chiong pí chiah-ê khah tōa ê só͘ kiâⁿ hō͘ I khòaⁿ, tì-kàu lín kî-koài. 21 In-ūi chhin-chhiūⁿ Pē hō͘ sí-lâng khí-lâi, koh hō͘ in oa̍h, Kiáⁿ ia̍h sī án-ni hō͘ I só͘ ài ê lâng koh oa̍h. 22 In-ūi Pē ia̍h bô sím-phòaⁿ lâng, to̍k-to̍k ēng sím-phòaⁿ ê sū lóng kau-tāi Kiáⁿ; beh hō͘ chèng lâng lóng chun-kèng Kiáⁿ, chhin-chhiūⁿ chun-kèng Pē. 23 Bô chun-kèng Kiáⁿ ê lâng, chiū-sī bô chun-kèng chhe I ê Pē. 24 Góa si̍t-si̍t kā lín kóng, Thiaⁿ góa ê ōe, ia̍h sìn chhe góa ê, chiū ū éng-oa̍h, bōe kàu siū sím-phòaⁿ, sī í-keng chhut sí ji̍p oa̍h lah. 25 Góa si̍t-si̍t kā lín kóng, Sî beh kàu, hiān-chāi chiū-sī lah, sí-lâng teh-beh thiaⁿ-kìⁿ Siōng-tè ê Kiáⁿ ê siaⁿ, iā thiaⁿ-kìⁿ ê lâng teh-beh oa̍h. 26 In-ūi chhin-chhiūⁿ Pē tī pún-sin ū oa̍h-miā, I ia̍h sī án-ni hō͘ Kiáⁿ tī pún-sin ū oa̍h-miā; 27 koh hō͘ I ū koân thang sím-phòaⁿ, in-ūi I sī chòe Jîn-chú. 28 Bo̍h-tit lia̍h chit-ê chòe kî-koài; in-ūi sî beh kàu, kìⁿ-nā tī bōng-lāi ê beh thiaⁿ I ê siaⁿ, chiah chhut-lâi; 29 kiâⁿ hó ê koh khí-lâi, tit-tio̍h oa̍h; kiâⁿ pháiⁿ ê koh khí-lâi, siū sím-phòaⁿ. 30 Góa ka-kī bōe chòe sím-mi̍h; góa chiàu só͘ thiaⁿ-kìⁿ lâi sím-phòaⁿ; góa ê sím-phòaⁿ ia̍h sī kong-gī; in-ūi góa bô kiû ka-kī ê ì-sù, chiū-sī kiû chhe góa ê ê ì-sù. 31 Góa nā ūi-tio̍h ka-kī chòe kan-chèng, góa ê kan-chèng chiū bô chin. 32 Iáu ū ūi-tio̍h góa chòe kan-chèng ê; góa chai I só͘ ūi-tio̍h góa chòe kan-chèng ê sī chin. 33 Lín bat chhe lâng chiū-kūn Iok-hān, i ū ūi-tio̍h chin-lí chòe kan-chèng. 34 Nā-sī góa só͘ siū ê kan-chèng, m̄ sī tùi lâng; to̍k-to̍k góa kóng chiah-ê, sī beh hō͘ lín tit-tio̍h kiù. 35 Iok-hān chiū-sī teng, tiám to̍h koh kng; lín chêng-goān chiām-sî hoaⁿ-hí i ê kng. 36 Chóng-sī góa ū kan-chèng, pí Iok-hān ê khah tōa; in-ūi Pē só͘ kau-tāi góa lâi chiâⁿ ê sū, chiū-sī góa só͘ kiâⁿ chiah ê sū, kan-chèng góa sī Pē só͘ chhe ê. 37 Chhe góa ê Pē, I ia̍h bat ūi-tio̍h góa chòe kan-chèng. Lín chiông-lâi m̄ bat thiaⁿ-kìⁿ I ê siaⁿ, ia̍h m̄ bat khòaⁿ-kìⁿ I ê hêng-siōng. 38 Koh lín bô I ê tō-lí chûn tī lín, in-ūi I só͘ chhe ê, lín m̄ sìn I. 39 Lín káng-kiù chiah ê sèng-keng, in-ūi phah-sǹg hit tiong-kan lín ū éng-oa̍h; ia̍h ūi-tio̍h góa chòe kan-chèng ê, chiū-sī chiah ê sèng-keng; 40 lín iū bô beh chiū-kūn góa lâi tit-tio̍h oa̍h. 41 Góa bô tùi lâng siū êng-kng. 42 Chóng-sī góa chai lín bô ū Siōng-tè ê thiàⁿ tī lín ê sim. 43 Góa tī góa ê Pē ê miâ lâi, lín m̄ chiap-la̍p góa; nā ū pa̍t lâng tī ka-kī ê miâ lâi, lín beh chiap-la̍p i. 44 Lín tāi-ke saⁿ-kāng kiû êng-kng, m̄ kiû tùi to̍k-it ê Siōng-tè lâi ê êng-kng; cháiⁿ-iūⁿ ōe sìn? 45 Bo̍h-tit phah-sǹg góa beh tùi Pē kò lín; ū teh kò lín ê, chiū-sī lín só͘ óa-khò ê Mô͘-se. 46 Lín nā sìn Mô͘-se, ia̍h beh sìn góa, in-ūi i só͘ siá ê ū lūn góa. 47 Lín nā m̄ sìn i ê chheh, thái ōe sìn góa ê ōe ah?
1 Chiahê事以後，耶穌過去加利利海hit-pêng，就是Thê-pì-lí-a海。 2 有chōe-chōe人tè伊，是因為看見伊所行tī病人ê神蹟。 3 耶穌上山，kap伊ê學生坐tī hia。 4 Pôaⁿ過節，就是偤太人ê節，近lah。 5 耶穌kia̍h目看見chōe-chōe人就近伊，就kā腓力講，咱beh tùi tá-lo̍h買餅來hō͘ chiahê人食ah？ 6 伊講chitê是teh試伊；因為伊家己知所beh行ê。 7 腓力應伊講，用兩百ê銀á來買餅，亦無夠額hō͘ in ta̍k人得tio̍h淡薄。 8 伊ê學生中一人，就是西門彼得ê兄弟，安得烈，kā伊講， 9 Tī chia一个gín-ná有五個大麥餅、兩尾魚；總是將chiahê hō͘ hiah chōe人，有夠tá-lo̍h？ 10 耶穌講，Lín kah hiahê人坐teh。Hit所在chōe-chōe草。人就lóng坐，數額約略五千。 11 耶穌the̍h hiahê餅；祝謝了後，就分hō͘坐ê人；魚亦是án-ni，lóng照in所ài。 12 In已經食飽，耶穌kā伊ê學生講，拾所食chhun ê屑á，免得有phah-sńg。」 13 就將所食chhun五個大麥餅ê餅碎，拾滿十二筐。 14 Hiah-ê人看見伊所行ê神蹟，就講，Chitê真正是所beh來世間ê先知。 15 耶穌知眾人beh來，ài硬掠伊，hō͘伊做王，就koh退去入山，只有伊家己tī hia。 16 黃昏暗，伊ê學生落去到海邊； 17 上船，beh過海去迦百農。已經暗，耶穌iáu-bē到。 18 因為風真thàu，海湧就ná大。 19 Tùi án-ni學生kò船，約略行八里，á十里，看見耶穌行海面，ná óa近船，就驚。 20 但是耶穌對in講，是我，免驚。 21 學生就歡喜chih接伊上船；船liâm-piⁿ到in所beh去ê所在。 22 隔日，khiā tī海hit-pêng岸ê眾人，看見hit位無別隻船á，只有一隻nā-tiāⁿ，koh耶穌無kap伊ê學生搭hit隻船，只有學生家己去； 23 (總是有幾隻船á tùi Thê-pì-lí-a來，到近tī主祝謝了後眾人食餅ê所在) ； 24 眾人看見耶穌kap伊ê學生lóng無tī hia，就搭hit幾隻船á，到迦百農chhē耶穌。 25 已經tú-tio̍h伊tī海ê hit-pêng岸，就kā伊講，拉比，你甚麼時到chia？ 26 耶穌應講，我實實kā lín講，Lín chiahê chhē我，m̄是因為看見神蹟，是因為食餅到飽nā-tiāⁿ。 27 莫得為tio̍h會敗壞ê米糧來tio̍h磨，tio̍h為tio̍h長長tī-teh永活ê米糧來tio̍h磨，就是人子所beh hō͘ lín ê；因為伊是父上帝所蓋印ê。 28 In就對伊講，阮tio̍h怎樣行，來做上帝ê工？ 29 耶穌應講，信伊所差ê，chitê就是上帝ê工。 30 In kā伊講，你行甚麼神蹟，hō͘阮看，來信你ah？你行甚麼ah？ 31 阮ê祖tī曠野食má-ná；照所記載講，用tùi天來ê餅hō͘ in食。 32 耶穌kā in講，我實實kā lín講，m̄是摩西用tùi天來ê餅hō͘ lín，就是我ê父用tùi天來ê真餅hō͘ lín。 33 因為上帝ê餅，就是hitê tùi天落來，也用活命賞賜世間ê。 34 In就對伊講，主ah，常常用chit號餅hō͘阮。 35 耶穌kā in講，我就是活命ê餅；就近我ê人決斷bōe iau，信我ê人永永bōe嘴乾。 36 但是我bat kā lín講，Lín已經看見我，亦猶原m̄信。 37 見若父所hō͘我ê，beh lóng就近我；就近我ê人，我決斷無棄sak伊。 38 因為我tùi天降落m̄是行家己ê旨意，就是行差我ê ê旨意。 39 Taⁿ差我ê ê旨意，就是見若伊所hō͘我ê，我無失落一个，是tī末日hō͘伊koh活。 40 因為我ê父ê旨意就是見若看見Kiáⁿ來信伊ê人，lóng有永活；也我tī末日hō͘伊koh活。 41 偤太人因為耶穌講，我是tùi天降落ê餅，就nga̍uh-nga̍uh念伊，講， 42 Chitê kiám m̄是約瑟ê kiáⁿ耶穌mah？伊ê父母是咱所bat ê。Taⁿ怎樣講，我是tùi天降落ah？ 43 耶穌應講，Lín莫得án-ni nga̍uh-nga̍uh念。 44 若m̄是差我ê父引chhōa伊，就無人會就近我；就近我ê，我tī末日beh hō͘伊koh活。 45 Tī chiahê先知有記載講，Iⁿ lóng beh hō͘上帝教in。見若tùi父聽見來學ê人，就就近我。 46 這m̄是講有人bat看見父，只有tùi上帝來ê，伊bat看見父。 47 我實實kā lín講，信ê人有永活。 48 我是活命ê餅。 49 Lín ê祖tī曠野食má-ná，in亦死。 50 Chitê就是tùi天降落ê餅，hō͘人食ê，也bōe死。 51 我是活ê餅，tùi天降落ê；人若食chitê餅，就活到永世代；koh我所beh hō͘人ê餅，就是我ê肉為tio̍h世間ê活命chiah賞賜ê。 52 Tùi án-ni偤太人相爭，講，Chit人thài會用伊ê肉hō͘咱食？ 53 耶穌就kā in講，我實實kā lín講，Lín若無食人子ê肉，無lim伊ê血，就lín ê內面無活。 54 食我ê肉，lim我ê血ê人有永活；末日我beh hō͘伊koh活。 55 我ê肉是真ê食物，我ê血是真實thang lim ê。 56 食我ê肉，lim我ê血ê人，伊tiàm-tī我，我亦tiàm-tī伊。 57 親像活ê父差我，koh我tùi父來活；食我ê，beh tùi我來活，亦是án-ni。 58 這就是tùi天降落ê餅；m̄是親像列祖ê食má-ná，也死去；食chitê餅ê人，beh活到永世代。 59 Chiahê話是耶穌tiàm-tī迦百農會堂來教示人ê時所講ê。 60 伊ê學生中chōe-chōe人聽了就講，Chitê話真oh；是誰會聽伊？ 61 耶穌心內知伊ê學生因為chitê nga̍uh-nga̍uh念，就kā in講，chitê是塞礙tio̍h lín mah？ 62 設使lín看見人子上到伊原本ê所在裡？ 63 hō͘人活ê就是神：肉體就無利益；我所kā lín講ê話是神，是活命。 64 但是lín中間有m̄信ê人lah。因為耶穌tùi起頭就知是誰 m̄信伊，是誰 beh賣伊。 65 Koh講，因為án-ni，我bat kā lín講，若m̄是tùi父hō͘伊，無人會就近我。 66 Tùi án-ni伊ê學生chōe-chōe退去，無koh kap伊行。 67 耶穌就kā十二個學生講，Lín亦beh去mah？ 68 西門彼得應伊講，主ah，你有永活ê話，阮beh去chhē 是誰 ah？ 69 阮已經信，koh知你是上帝ê聖ê。 70 耶穌應講，我kiám m̄是揀lín十二人，亦lín中間一个是魔鬼ah？ 71 伊講án-ni是指加略人西門ê kiáⁿ偤大，因為伊是十二學生ê一个teh-beh賣伊ê。
1 Chiah ê sū í-āu, Iâ-so͘ kè-khì Ka-lī-lī hái hit pêng, chiū-sī Thê-pì-lí-a hái. 2 Ū chōe-chōe lâng tè I, sī in-ūi khòaⁿ-kìⁿ I só͘ kiâⁿ tī pīⁿ lâng ê sîn-jiah. 3 Iâ-so͘ chiūⁿ soaⁿ, kap I ê ha̍k-seng chē tī hia. 4 Pôaⁿ-kè-choeh, chiū-sī Iû-thài lâng ê choeh, kūn lah. 5 Iâ-so͘ kia̍h ba̍k khòaⁿ-kìⁿ chōe-chōe lâng chiū-kūn I, chiū kā Hui-le̍k kóng, Lán beh tùi tá-lo̍h bóe piáⁿ lâi hō͘ chiah ê lâng chia̍h ah? 6 I kóng chit-ê sī teh chhì i; in-ūi I ka-kī chai só͘ beh kiâⁿ ê. 7 Hui-le̍k ìn I kóng, Ēng nn̄g pah ê gûn-á lâi bóe piáⁿ, ia̍h bô kàu-gia̍h hō͘ in ta̍k lâng tit-tio̍h tām-po̍h. 8 I ê ha̍k-seng tiong chi̍t lâng, chiū-sī Se-bûn Pí-tek ê hiaⁿ-tī, An-tek-lia̍t, kā I kóng, 9 Tī chia chi̍t ê gín-ná ū gō͘ ê tōa-be̍h piáⁿ, nn̄g bé hî; chóng-sī chiong chiah-ê hō͘ hiah chōe lâng, ū kàu tá-lo̍h? 10 Iâ-so͘ kóng, Lín kah hiah ê lâng chē-teh. Hit só͘-chāi chōe-chōe chháu. Lâng chiū lóng chē, siàu-gia̍h iok-lio̍k gō͘ chheng. 11 Iâ-so͘ the̍h hiah ê piáⁿ; chiok-siā liáu-āu, chiū pun hō͘ chē ê lâng; hî ia̍h sī án-ni, lóng chiàu in só͘ ài. 12 In í-keng chia̍h pá, Iâ-so͘ kā I ê ha̍k-seng kóng, Khioh só͘ chia̍h chhun ê sut-á, bián-tit ū phah-sńg. 13 Chiū chiong só͘ chia̍h chhun gō͘ ê tōa-be̍h piáⁿ ê piáⁿ-chhùi, khioh móa cha̍p-jī kheng. 14 Hiah ê lâng khòaⁿ-kìⁿ I só͘ kiâⁿ ê sîn-jiah, chiū kóng, Chit-ê chin-chiàⁿ sī só͘ beh lâi sè-kan ê sian-ti. 15 Iâ-so͘ chai chèng lâng beh lâi, ài ngī-lia̍h I, hō͘ I chòe ông, chiū koh thè-khì ji̍p soaⁿ, chí-ū I ka-kī tī hia. 16 Hông-hun àm, I ê ha̍k-seng lo̍h-khì kàu hái-piⁿ; 17 chiūⁿ chûn, beh kè hái khì Ka-pek-lông. Í-keng àm, Iâ-so͘ iáu-bē kàu. 18 In-ūi hong chin thàu, hái-éng chiū ná tōa. 19 Tùi án-ni ha̍k-seng kò chûn, iok-lio̍k kiâⁿ poeh lí, á cha̍p lí, khòaⁿ-kìⁿ Iâ-so͘ kiâⁿ hái-bīn, ná óa-kūn chûn, chiū kiaⁿ. 20 Nā-sī Iâ-so͘ tùi in kóng, Sī góa, bián kiaⁿ. 21 Ha̍k-seng chiū hoaⁿ-hí chih-chiap I chiūⁿ chûn; chûn liâm-piⁿ kàu in só͘ beh khì ê só͘-chāi. 22 Keh ji̍t, khiā tī hái hit pêng hōaⁿ ê chèng lâng, khòaⁿ-kìⁿ hit ūi bô pa̍t chiah chûn-á, chí-ū chi̍t chiah nā-tiāⁿ, koh Iâ-so͘ bô kap I ê ha̍k-seng tah hit chiah chûn, chí-ū ha̍k-seng ka-kī khì; 23 (chóng-sī ū kúi chiah chûn-á tùi Thê-pì-lí-a lâi, kàu kūn tī Chú chiok-siā liáu-āu chèng lâng chia̍h piáⁿ ê só͘-chāi); 24 chèng lâng khòaⁿ-kìⁿ Iâ-so͘ kap I ê ha̍k-seng lóng bô tī hia, chiū tah hit kúi chiah chûn-á, kàu Ka-pek-lông chhē Iâ-so͘. 25 Í-keng tú-tio̍h I tī hái ê hit pêng hōaⁿ, chiū kā I kóng, Lia̍p-pí, lí sím-mi̍h sî kàu chia? 26 Iâ-so͘ ìn kóng, Góa si̍t-si̍t kā lín kóng, Lín chiah-ê chhē góa, m̄ sī in-ūi khòaⁿ-kìⁿ sîn-jiah, sī in-ūi chia̍h piáⁿ kàu pá nā-tiāⁿ. 27 Bo̍h-tit ūi-tio̍h ōe pāi-hoāi ê bí-niû lâi tio̍h-bôa, tio̍h ūi-tio̍h tn̂g-tn̂g tī-teh éng-oa̍h ê bí-niû lâi tio̍h-bôa, chiū-sī Jîn-chú só͘ beh hō͘ lín ê; in-ūi I sī Pē Siōng-tè só͘ khàm-ìn ê. 28 In chiū tùi I kóng, Goán tio̍h cháiⁿ-iūⁿ kiâⁿ, lâi chòe Siōng-tè ê kang? 29 Iâ-so͘ ìn kóng, Sìn I só͘ chhe ê, chit-ê chiū-sī Siōng-tè ê kang. 30 In kā I kóng, Lí kiâⁿ sím-mi̍h sîn-jiah, hō͘ goán khòaⁿ, lâi sìn lí ah? Lí kiâⁿ sím-mi̍h ah? 31 Goán ê chó͘ tī khòng-iá chia̍h má-ná; chiàu só͘ kì-chài kóng, Ēng tùi thiⁿ lâi ê piáⁿ hō͘ in chia̍h. 32 Iâ-so͘ kā in kóng, Góa si̍t-si̍t kā lín kóng, M̄ sī Mô͘-se ēng tùi thiⁿ lâi ê piáⁿ hō͘ lín, chiū-sī góa ê Pē ēng tùi thiⁿ lâi ê chin piáⁿ hō͘ lín. 33 In-ūi Siōng-tè ê piáⁿ, chiū-sī hit ê tùi thiⁿ lo̍h-lâi, iā ēng oa̍h-miā siúⁿ-sù sè-kan ê. 34 In chiū tùi I kóng, Chú ah, siông-siông ēng chit hō piáⁿ hō͘ goán. 35 Iâ-so͘ kā in kóng, Góa chiū-sī oa̍h-miā ê piáⁿ; chiū-kūn góa ê lâng koat-toàn bōe iau, sìn góa ê lâng éng-éng bōe chhùi-ta. 36 Nā-sī góa bat kā lín kóng, Lín í-keng khòaⁿ-kìⁿ góa, ia̍h iû-goân m̄ sìn. 37 Kìⁿ-nā Pē só͘ hō͘ góa ê, beh lóng chiū-kūn góa; chiū-kūn góa ê lâng, góa koat-toàn bô khì-sak i. 38 In-ūi góa tùi thiⁿ kàng-lo̍h m̄ sī kiâⁿ ka-kī ê chí-ì, chiū-sī kiâⁿ chhe góa ê ê chí-ì. 39 Taⁿ chhe góa ê ê chí-ì, chiū-sī kìⁿ-nā I só͘ hō͘ góa ê, góa bô sit-lo̍h chi̍t-ê, sī tī boa̍t-ji̍t hō͘ i koh-oa̍h. 40 In-ūi góa ê Pē ê chí-ì chiū-sī kìⁿ-nā khòaⁿ-kìⁿ Kiáⁿ lâi sìn I ê lâng, lóng ū éng-oa̍h; iā góa tī boa̍t-ji̍t hō͘ i koh-oa̍h. 41 Iû-thài lâng in-ūi Iâ-so͘ kóng, Góa sī tùi thiⁿ kàng-lo̍h ê piáⁿ, chiū nga̍uh-nga̍uh-liām I, kóng, 42 Chit-ê kiám m̄ sī Iok-sek ê kiáⁿ Iâ-so͘ mah? I ê pē-bú sī lán só͘ bat ê. Taⁿ cháiⁿ-iūⁿ kóng, Góa sī tùi thiⁿ kàng-lo̍h ah? 43 Iâ-so͘ ìn kóng, Lín bo̍h-tit án-ni nga̍uh-nga̍uh-liām. 44 Nā m̄ sī chhe góa ê Pē ín-chhōa i, chiū bô lâng ōe chiū-kūn góa; chiū-kūn góa ê, góa tī boa̍t-ji̍t beh hō͘ i koh-oa̍h. 45 Tī chiah ê sian-ti ū kì-chài kóng, In lóng beh hō͘ Siōng-tè kà in. Kìⁿ-nā tùi Pē thiaⁿ-kìⁿ lâi o̍h ê lâng, chiū chiū-kūn góa. 46 Che m̄ sī kóng ū lâng bat khòaⁿ-kìⁿ Pē, chí ū tùi Siōng-tè lâi ê, I bat khòaⁿ-kìⁿ Pē. 47 Góa si̍t-si̍t kā lín kóng, Sìn ê lâng ū éng-oa̍h. 48 Góa sī oa̍h-miā ê piáⁿ. 49 Lín ê chó͘ tī khòng-iá chia̍h má-ná, in ia̍h sí. 50 Chit-ê chiū-sī tùi thiⁿ kàng-lo̍h ê piáⁿ, hō͘ lâng chia̍h ê, iā bōe sí. 51 Góa sī oa̍h ê piáⁿ, tùi thiⁿ kàng-lo̍h ê; lâng nā chia̍h chit ê piáⁿ, chiū oa̍h kàu éng sè-tāi; koh góa só͘ beh hō͘ lâng ê piáⁿ, chiū-sī góa ê bah ūi-tio̍h sè-kan ê oa̍h-miā chiah siúⁿ-sù ê. 52 Tùi án-ni Iû-thài lâng saⁿ-chiⁿ, kóng, Chit lâng thái ōe ēng I ê bah hō͘ lán chia̍h? 53 Iâ-so͘ chiū kā in kóng, Góa si̍t-si̍t kā lín kóng, Lín nā bô chia̍h Jîn-chú ê bah, bô lim I ê huih, chiū lín ê lāi-bīn bô oa̍h. 54 Chia̍h góa ê bah, lim góa ê huih ê lâng ū éng-oa̍h; boa̍t-ji̍t góa beh hō͘ i koh-oa̍h. 55 Góa ê bah sī chin ê chia̍h-mi̍h, góa ê huih sī chin-si̍t thang lim ê. 56 Chia̍h góa ê bah, lim góa ê huih ê lâng, i tiàm-tī góa, góa ia̍h tiàm-tī i. 57 Chhin-chhiūⁿ oa̍h ê Pē chhe góa, koh góa tùi Pē lâi oa̍h; chia̍h góa ê, beh tùi góa lâi oa̍h, ia̍h sī án-ni. 58 Che chiū-sī tùi thiⁿ kàng-lo̍h ê piáⁿ; m̄ sī chhin-chhiūⁿ lia̍t-chó͘ ê chia̍h má-ná, iā sí-khì; chia̍h chit ê piáⁿ ê lâng, beh oa̍h kàu éng sè-tāi. 59 Chiah ê ōe sī Iâ-so͘ tiàm tī Ka-pek-lông hōe-tn̂g lâi kà-sī lâng ê sî só͘ kóng ê. 60 I ê ha̍k-seng tiong chōe-chōe lâng thiaⁿ-liáu chiū kóng, Chit ê ōe chin oh; chī-chūi ōe thiaⁿ i? 61 Iâ-so͘ sim-lāi chai I ê ha̍k-seng in-ūi chit-ê nga̍uh-nga̍uh-liām, chiū kā in kóng, Chit-ê sī that-gāi-tio̍h lín mah? 62 Siat-sú lín khòaⁿ-kìⁿ Jîn-chú chiūⁿ kàu i goân-pún ê só͘-chāi ni̍h? 63 Hō͘ lâng oa̍h ê chiū-sī Sîn: jio̍k-thé chiū bô lī-ek; góa só͘ kā lín kóng ê ōe sī sîn, sī oa̍h-miā. 64 Nā-sī lín tiong-kan ū m̄ sìn ê lâng lah. In-ūi Iâ-so͘ tùi khí-thâu chiū chai chī-chūi m̄ sìn I, chī-chūi beh bōe I. 65 Koh kóng, In-ūi án-ni, góa bat kā lín kóng, nā m̄ sī tùi Pē hō͘ i, bô lâng ōe chiū-kūn góa. 66 Tùi án-ni I ê ha̍k-seng chōe-chōe thè-khì, bô koh kap I kiâⁿ. 67 Iâ-so͘ chiū kā cha̍p-jī ê ha̍k-seng kóng, Lín ia̍h beh khì mah? 68 Se-bûn Pí-tek ìn I kóng, Chú ah, lí ū éng-oa̍h ê ōe, goán beh khì chhē chī-chūi ah? 69 Goán í-keng sìn, koh chai lí sī Siōng-tè ê Sèng-ê. 70 Iâ-so͘ ìn kóng, Góa kiám m̄ sī kéng lín cha̍p-jī lâng, ia̍h lín tiong-kan chi̍t-ê sī mô͘-kúi ah? 71 I kóng án-ni sī chí Ka-lio̍k lâng Se-bûn ê kiáⁿ Iû-tāi, in-ūi i sī cha̍p-jī ha̍k-seng ê chi̍t-ê teh-beh bōe I ê.
1 Chiahê事以後，耶穌四界行tī加利利，m̄-ài行tī偤太，因為偤太人ài beh 刣伊。 2 Hit時偤太人ê節，就是搭寮節，近lah。 3 伊ê兄弟就對伊講，你tio̍h離開chia，去偤太，hō͘你ê學生亦thang看見你所行ê事。 4 人ài出名，就無tī暗靜ê所在做tāi-chì。你若行chiahê事，就tio̍h將家己顯明tī世間。 5 因為伊ê兄弟亦無信伊。 6 耶穌就kā in講，我ê時iáu-bē到；但是lín ê時常常便。 7 世間bōe會怨恨lín；是怨恨我，因為我干證伊ê所行是pháiⁿ。 8 Lín上去赴節；我iáu-bē thang上去赴 chitê節；因為我ê時iáu-bē滿。 9 已經kā in講án-ni，就猶原tiàm加利利。 10 伊ê兄弟已經上去赴節，伊本身亦上去，m̄是顯然，是親像暗靜。 11 偤太人tī節期中chhē耶穌，講，伊tī tá-lo̍h？ 12 眾人為tio̍h伊chōe-chōe chī-bú chī-chū；有ê講，是好人；有ê講，m̄是，是迷惑眾人nā-tiāⁿ。 13 獨獨無人顯然講伊ê事，因為驚偤太人ê緣故。 14 當節期ê中站耶穌上殿教示。 15 偤太人就奇怪，講，Chitê人bē有入學，tùi tá-lo̍h bat冊？ 16 耶穌就應講，我ê教示m̄是屬tī家己，是屬tī差我ê。 17 人若願行伊ê旨意，就會知chitê教示是tùi上帝出，á是我tùi家己來講ê。 18 Tùi家己來講ê，是求家己ê榮光；獨獨求差伊ê ê榮光，hitê人就是真，亦伊ê內面無不義。 19 摩西kiám無用律法傳hō͘ lín mah？但是lín中間無一人行律法。Lín啥事ài beh 刣我？ 20 眾人應講，你犯tio̍h鬼，是誰 ài beh 刣你？ 21 耶穌應講，我bat行一項事，lín lóng掠做奇怪。 22 因為án-ni摩西用割禮傳hō͘ lín，(其實m̄是tùi摩西，是tùi列祖) ；亦lín tī安歇日kā人行割禮。 23 人若tī安歇日受割禮，免得違逆摩西ê律法；就我tī安歇日hō͘一人全體lóng好，lín因為án-ni受氣我mah？ 24 莫得照外貌來擬斷，tio̍h thàn公義來擬斷。 25 Tùi án-ni耶路撒冷ê人，有ê講，Chitê kiám m̄是in所ài 刣 ê mah？ 26 你看，伊好膽teh講，亦無人對伊講甚麼。kiám是chiahê官府真正知chitê是基督mah？ 27 但是咱bat chitê人tùi tá-lo̍h來；m̄-kú基督來ê時無人知伊tùi tá-lo̍h來。 28 Tùi án-ni耶穌tī殿裡教示，叫講，Lín bat我，亦知我tùi tá-lo̍h來；我m̄是自專來，差我來ê是真實，lín m̄-bat伊。 29 我bat伊；因為我對伊來，亦伊差我。 30 In就ài beh掠伊；總是無人下手，因為伊ê時iáu-bē到。 31 眾人中chōe-chōe人信伊，講，基督來ê時，kiám beh行神蹟比chit人所行ê khah chōe mah？ 32 法利賽人聽見眾人án-ni chī-bú chī-chū teh講伊，就chiahê祭司頭kap法利賽人差衙役beh掠伊。 33 耶穌就講，我iáu有tiap-á久kap lín tī-teh，後來beh tò去就近差我ê。 34 Lín beh chhē我，亦chhē bōe tio̍h；我所tòa ê所在，lín bōe能到。 35 偤太人就saⁿ-kap講，伊beh tá-lo̍h去，致到咱chhē伊bōe tio̍h？kiám beh就近希利尼中四散khiā起ê偤太人，來教示希利尼人mah？ 36 伊所講，Lín beh chhē我bōe tio̍h；我所tòa ê所在，lín bōe會到；這是甚麼話ah？ 37 當節期ê尾日，就是siōng大ê日，耶穌khiā-teh，叫講，若有嘴乾ê人，tio̍h就近我來lim。 38 信我ê人，親像聖經所講，有活水ê溪，beh對伊ê腹內流出。 39 伊講án-ni是指信伊ê人所beh受ê聖神；hit時bē有賞賜聖神；因為耶穌bē有得tio̍h榮光。 40 眾人中有ê聽見chiahê話來講，Chit人真正是hitê先知。 41 有ê講，Chit人就是基督。若是有ê講，基督kiám tùi加利利出mah？ 42 聖經kiám無講，基督是大衛ê後裔，tùi大衛ê本鄉伯利恆出mah？ 43 Tùi án-ni眾人因為伊來分pêng。 44 其中有人ài掠伊；總是無人下手。 45 衙役就來見chiahê祭司頭kap法利賽人；in就tùi衙役講，啥事無帶伊來？ 46 衙役應講，從來bē有人講話親像伊án-ni。 47 法利賽人應講，Lín亦受迷惑mah？ 48 Chiahê官府á是法利賽人，kiám有人信伊？ 49 獨獨chiahê m̄-bat律法ê百姓，是受咒詛ê。 50 In中間有尼哥底某，就是前就近耶穌ê，kā in講， 51 無事先聽人ê話，來知伊ê所行；咱ê律法kiám有定伊ê罪mah？ 52 In就應伊講，你亦是tùi加利利出mah？你去查考，就知加利利無出先知。
1 Chiah ê sū í-āu, Iâ-so͘ sì-kè kiâⁿ tī Ka-lī-lī, m̄ ài kiâⁿ tī Iû-thài, in-ūi Iû-thài lâng ài beh thâi I. 2 Hit sî Iû-thài lâng ê choeh, chiū-sī tah-liâu-choeh, kūn lah. 3 I ê hiaⁿ-tī chiū tùi I kóng, Lí tio̍h lī-khui chia, khì Iû-thài, hō͘ lí ê ha̍k-seng ia̍h thang khòaⁿ-kìⁿ lí só͘ kiâⁿ ê sū. 4 Lâng ài chhut-miâ, chiū bô tī àm-chīⁿ ê só͘-chāi chòe tāi-chì. Lí nā kiâⁿ chiah ê sū, chiū tio̍h chiong ka-kī hián-bêng tī sè-kan. 5 In-ūi I ê hiaⁿ-tī ia̍h bô sìn I. 6 Iâ-so͘ chiū kā in kóng, Góa ê sî iáu-bē kàu; nā-sī lín ê sî siông-siông piān. 7 Sè-kan bōe-ōe oàn-hūn lín; sī oàn-hūn góa, in-ūi góa kan-chèng i ê só͘ kiâⁿ sī pháiⁿ. 8 Lín chiūⁿ-khì hù choeh; góa iáu-bē thang chiūⁿ-khì hù chit ê choeh; in-ūi góa ê sî iáu-bē móa. 9 Í-keng kā in kóng án-ni, chiū iû-goân tiàm Ka-lī-lī. 10 I ê hiaⁿ-tī í-keng chiūⁿ-khì hù choeh, I pún-sin ia̍h chiūⁿ-khì, m̄ sī hián-jiân, sī chhin-chhiūⁿ àm-chīⁿ. 11 Iû-thài lâng tī choeh-kî tiong chhē Iâ-so͘, kóng, I tī tá-lo̍h? 12 Chèng lâng ūi-tio̍h I chōe-chōe chī-bú chī-chū; ū-ê kóng, sī hó lâng; ū-ê kóng, M̄ sī, sī bê-he̍k chèng lâng nā-tiāⁿ. 13 To̍k-to̍k bô lâng hián-jiân kóng I ê sū, in-ūi kiaⁿ Iû-thài lâng ê iân-kò͘. 14 Tng choeh-kî ê tiong-chām Iâ-so͘ chiūⁿ tiān kà-sī. 15 Iû-thài lâng chiū kî-koài, kóng, Chit ê lâng bē ū ji̍p o̍h, tùi tá-lo̍h bat chheh? 16 Iâ-so͘ chiū ìn kóng, Góa ê kà-sī m̄ sī sio̍k tī ka-kī, sī sio̍k tī chhe góa ê. 17 Lâng nā goān kiâⁿ I ê chí-ì, chiū ōe chai chit ê kà-sī sī tùi Siōng-tè chhut, á-sī góa tùi ka-kī lâi kóng ê. 18 Tùi ka-kī lâi kóng ê, sī kiû ka-kī ê êng-kng; to̍k-to̍k kiû chhe i ê ê êng-kng, hit ê lâng chiū-sī chin, ia̍h i ê lāi-bīn bô put-gī. 19 Mô͘-se kiám bô ēng lu̍t-hoat thoân hō͘ lín mah? Nā-sī lín tiong-kan bô chi̍t lâng kiâⁿ lu̍t-hoat. Lín siáⁿ-sū ài beh thâi góa? 20 Chèng lâng ìn kóng, Lí hoān-tio̍h kúi, chī-chūi ài beh thâi lí? 21 Iâ-so͘ ìn kóng, Góa bat kiâⁿ chi̍t hāng sū, lín lóng lia̍h chòe kî-koài. 22 In-ūi án-ni Mô͘-se ēng kat-lé thoân hō͘ lín, (kî-si̍t m̄ sī tùi Mô͘-se, sī tùi lia̍t-chó͘); ia̍h lín tī an-hioh-ji̍t kā lâng kiâⁿ kat-lé. 23 Lâng nā tī an-hioh-ji̍t siū kat-lé, bián-tit ûi-ke̍h Mô͘-se ê lu̍t-hoat; chiū góa tī an-hioh-ji̍t hō͘ chi̍t lâng choân-thé lóng hó, lín in-ūi án-ni siū-khì góa mah? 24 Bo̍h-tit chiàu gōa-māu lâi gí-toàn, tio̍h thàn kong-gī lâi gí-toàn. 25 Tùi án-ni Iâ-lō͘-sat-léng ê lâng, ū-ê kóng, Chit-ê kiám m̄ sī in só͘ ài thâi ê mah? 26 Lí khòaⁿ, I hó-táⁿ teh kóng, ia̍h bô lâng tùi I kóng sím-mi̍h. Kiám sī chiah ê koaⁿ-hú chin-chiàⁿ chai chit-ê sī Ki-tok mah? 27 Nā-sī lán bat chit ê lâng tùi tá-lo̍h lâi; m̄ kú Ki-tok lâi ê sî bô lâng chai I tùi tá-lo̍h lâi. 28 Tùi án-ni Iâ-so͘ tī tiān-ni̍h kà-sī, kiò kóng, Lín bat góa, ia̍h chai góa tùi tá-lo̍h lâi; góa m̄ sī chū-choan lâi, chhe góa lâi ê sī chin-si̍t, lín m̄ bat I. 29 Góa bat I; in-ūi góa tùi I lâi, ia̍h I chhe góa. 30 In chiū ài beh lia̍h I; chóng-sī bô lâng hē chhiú, in-ūi I ê sî iáu-bē kàu. 31 Chèng lâng tiong chōe-chōe lâng sìn I, kóng, Ki-tok lâi ê sî, kiám beh kiâⁿ sîn-jiah pí chit lâng só͘ kiâⁿ ê khah chōe mah? 32 Hoat-lī-sài lâng thiaⁿ-kìⁿ chèng lâng án-ni chī-bú chī-chū teh kóng I, chiū chiah ê chè-si-thâu kap Hoat-lī-sài lâng chhe gê-ia̍h beh lia̍h I. 33 Iâ-so͘ chiū kóng, Góa iáu ū tiap-á kú kap lín tī-teh, āu-lâi beh tò-khì chiū-kūn chhe góa ê. 34 Lín beh chhē góa, ia̍h chhē bōe tio̍h; góa só͘ tòa ê só͘-chāi, lín bōe-ōe kàu. 35 Iû-thài lâng chiū saⁿ-kap kóng, I beh tá-lo̍h khì, tì-kàu lán chhē I bōe tio̍h? kiám beh chiū-kūn Hi-lī-nî tiong sì-sòaⁿ khiā-khí ê Iû-thài lâng, lâi kà-sī Hi-lī-nî lâng mah? 36 I só͘ kóng, Lín beh chhē góa bōe tio̍h; góa só͘ tòa ê só͘-chāi, lín bōe-ōe kàu; che sī sím-mi̍h ōe ah? 37 Tng choeh-kî ê bé ji̍t, chiū-sī siōng tōa ê ji̍t, Iâ-so͘ khiā-teh, kiò kóng, Nā ū chhùi-ta ê lâng, tio̍h chiū-kūn góa lâi lim. 38 Sìn góa ê lâng, chhin-chhiūⁿ sèng-keng só͘ kóng, ū oa̍h chúi ê khoe, beh tùi i ê pak-lāi lâu-chhut. 39 I kóng án-ni sī chí sìn I ê lâng só͘ beh siū ê Sèng Sîn; hit sî bē ū siúⁿ-sù Sèng Sîn; in-ūi Iâ-so͘ bē ū tit-tio̍h êng-kng. 40 Chèng lâng tiong ū-ê thiaⁿ-kìⁿ chiah ê ōe lâi kóng, Chit lâng chin-chiàⁿ sī hit ê sian-ti. 41 Ū-ê kóng, Chit lâng chiū-sī Ki-tok. Nā-sī ū-ê kóng, Ki-tok kiám tùi Ka-lī-lī chhut mah? 42 Sèng-keng kiám bô kóng, Ki-tok sī Tāi-pi̍t ê hō͘-è, tùi Tāi-pi̍t ê pún-hiuⁿ Pek-lī-hêng chhut mah? 43 Tùi án-ni chèng lâng in-ūi I lâi hun-pêng. 44 Kî-tiong ū lâng ài lia̍h I; chóng-sī bô lâng hē chhiú. 45 Gê-ia̍h chiū lâi kìⁿ chiah ê chè-si-thâu kap Hoat-lī-sài lâng; in chiū tùi gê-ia̍h kóng, Siáⁿ-sū bô tòa I lâi? 46 Gê-ia̍h ìn kóng, Chiông-lâi bē ū lâng kóng ōe chhin-chhiūⁿ I án-ni. 47 Hoat-lī-sài lâng ìn kóng, Lín ia̍h siū bê-he̍k mah? 48 Chiah ê koaⁿ-hú á-sī Hoat-lī-sài lâng, kiám ū lâng sìn I? 49 To̍k-to̍k chiah-ê m̄ bat lu̍t-hoat ê peh-sìⁿ, sī siū chiù-chó͘ ê. 50 In tiong-kan ū Nî-ko-tí-bó͘, chiū-sī chêng chiū-kūn Iâ-so͘ ê, kā in kóng, 51 Bô tāi-seng thiaⁿ lâng ê ōe, lâi chai i ê só͘ kiâⁿ; lán ê lu̍t-hoat kiám ū tēng i ê chōe mah? 52 In chiū ìn i kóng, Lí ia̍h sī tùi Ka-lī-lī chhut mah? Lí khì chhâ-khó, chiū chai Ka-lī-lī bô chhut sian-ti.
1 Ta̍k人就tò去in tau；耶穌去橄欖山。 2 透早koh到tī殿裡，百姓lóng就近伊；伊就坐teh來教示in。 3 經學士kap法利賽人帶一个婦人人來，是tī行姦淫ê時hō͘人掠tio̍h ê； 4 已經hō͘伊khiā tī中央，in就tùi耶穌講，先生，chitê婦人人是tú-tú行姦淫ê時hō͘人掠tio̍h。 5 摩西tī律法命令阮用石頭tìm死chit號ê婦人人，taⁿ你講怎樣？ 6 In講án-ni是beh試耶穌，ài得tio̍h有縫thang告伊。耶穌就àⁿ腰，用指頭á寫字tī土腳。 7 In猶原問伊無soah。耶穌就挺身起來，對in講，Lín中間無罪ê人thang事先用石頭tìm伊。 8 就koh àⁿ腰，用指頭á寫字tī土腳。 9 In聽了，tùi老到少年，一个一个lóng出去；只有耶穌家己tī-teh，婦人人猶原khiā tī中央。 10 耶穌挺身起來kā伊講，婦人人ah，in tī tá-lo̍h？無人定你ê罪mah？ 11 伊講，主ah，無。耶穌講，我亦無定你ê罪；去ah；taⁿ以後莫得koh犯罪。 12 耶穌koh kā眾人講，我是世間ê光；tè我ê人無行tī暗，反tńg beh有活命ê光。 13 法利賽人就kā伊講，你為tio̍h本身做干證；你ê干證m̄是真。 14 耶穌應講，我sui-bóng為tio̍h本身做干證，我ê干證亦是真；因為我知本身tùi tá-lo̍h來，tùi tá-lo̍h去；lín m̄知我tùi tá-lo̍h來，tùi tá-lo̍h去。 15 Lín照肉體擬斷人；我無擬斷人。 16 我就若擬斷，我ê擬斷是真；因為我m̄是家己tī-teh，是我kap差我ê父saⁿ-kap tī-teh。 17 Koh tī lín ê律法有記載，兩人ê干證就是真。 18 我是為tio̍h家己做干證，差我ê父亦為tio̍h我干證。 19 In就kā伊講，你ê父tī tá-lo̍h？耶穌應講，Lín m̄-bat我，亦m̄-bat我ê父；lín若bat我，就亦bat我ê父。 20 耶穌tī殿裡教示人，tī庫房內講chiahê話；亦無人掠伊，因為伊ê時iáu-bē到。 21 耶穌koh kā in講，我beh去lah，lín beh chhē我，亦beh死tī lín ê罪；我去ê所在，lín bōe能到。 22 偤太人就講，伊講，我去ê所在，lín bōe能到，kiám是beh自盡mah？ 23 耶穌kā in講，Lín是tùi下面，我是tùi頂面；lín是tùi chit世間；我m̄是tùi chit世間。 24 所以我有kā lín講，lín beh死tī lín ê罪；因為lín若m̄信我是伊，就lín beh死tī lín ê罪。 25 In就kā伊講，你是是誰？耶穌kā in講，就是我tùi起頭所kā lín講ê。 26 我有chōe-chōe項beh議論lín，beh判斷lín；獨獨差我ê是真；我所對伊聽見ê，就傳hō͘世間。 27 In m̄知伊所對in講ê是指父。 28 耶穌就講，Lín舉起人子ê時，就知我是伊，亦我所行ê無一項tùi家己；是照父所教示我ê，來講chiahê。 29 差我ê kap我tī-teh；伊無放我家己tī-teh；因為我常常行伊所歡喜ê。 30 當耶穌講chiahê話ê時，chōe-chōe人信伊。 31 耶穌就對信伊ê偤太人講，Lín若常常tiàm-tī我ê道理，就真正是我ê學生； 32 Lín beh bat真理，亦真理beh hō͘ lín自由。 33 In應伊講，阮chiahê是亞伯拉罕ê後裔，從來bē bat做人ê奴才；你怎樣講，Lín beh得tio̍h自由ah？ 34 耶穌應講，我實實kā lín講，見若犯罪ê，就是罪ê奴才。 35 奴才無永永tòa tī家內；kiáⁿ就永永tòa。 36 所以Kiáⁿ若hō͘ lín自由，lín就真正自由。 37 我知lín是亞伯拉罕ê後裔；獨獨lín ài beh 刣我，因為我ê道理無存tī lín ê心。 38 我tùi我ê父看見ê，我就講伊；lín tùi lín ê父聽見ê，lín就行伊。 39 In應伊講，阮ê父就是亞伯拉罕。耶穌kā in講，Lín若是亞伯拉罕ê kiáⁿ，就beh行亞伯拉罕ê所行。 40 Taⁿ我是將我tùi上帝所聽ê真理來kā lín講ê人，亦lín ài beh 刣我；這m̄是亞伯拉罕ê所行。 41 Lín是行lín ê父ê所行。In kā伊講，阮m̄是tùi姦淫來生；阮有一个父，就是上帝。 42 耶穌kā in講，若是上帝做lín ê父，lín就疼我；因為我是tùi上帝出；亦來到chia，m̄是自專來，是伊差我。 43 Lín無明我ê話是怎樣？是因為lín bōe會聽我ê道理。 44 Lín所對伊出ê父，就是魔鬼；lín ê父ê私慾，lín ài beh行伊。伊tùi起頭做刣人ê，無khiā-tiâu tī真理，因為伊內面無真理。伊講白賊ê時，就是對家己所有ê來講；因為伊是白賊ê，亦做白賊ê父。 45 因為我講真理，lín m̄信我。 46 Lín中間是誰擬我有罪？我若講真理，lín啥事m̄信我？ 47 Tùi上帝出ê聽上帝ê話；lín所以m̄聽，因為lín m̄是tùi上帝出。 48 偤太人應伊講，阮講你是撒馬利亞人，koh犯tio̍h鬼，kiám無真tio̍h？ 49 耶穌應講，我m̄是犯tio̍h鬼；我是尊敬我ê父，但是lín侮慢我。 50 我無求家己ê榮光；有一个teh替我求koh審判ê。 51 我實實kā lín講，人若守我ê道理，就永遠無見tio̍h死。 52 偤太人kā伊講，Taⁿ阮知你是犯tio̍h鬼。亞伯拉罕死，chiahê先知亦死，但是你講，人若守我ê道理，就永遠無死。 53 你kiám比阮ê祖亞伯拉罕khah大mah？伊已經死，chiahê先知亦死，你家己算做甚麼人ah？ 54 耶穌應講，我若榮光家己，我ê榮光就m̄上算；榮光我ê是我ê父；就是lín所講做lín ê上帝ê。 55 Lín m̄-bat伊；獨獨我bat伊；我若講，M̄-bat伊，就我是白賊親像lín；獨獨我bat伊，亦守伊ê道理。 56 Lín ê祖亞伯拉罕極歡喜，是beh看見我ê日子；看見，就歡喜。 57 偤太人就對伊講，你bē上五十歲，kiám bat看見亞伯拉罕mah？ 58 耶穌kā in講，我實實kā lín講，Bē有亞伯拉罕，我就tī-teh。 59 In就the̍h石頭beh tìm伊；但是耶穌家己隱密，tùi殿堂出去。
1 Ta̍k lâng chiū tò-khì in tau; Iâ-so͘ khì Kaⁿ-ná soaⁿ. 2 Thàu-chá koh kàu tī tiān-ni̍h, peh-sìⁿ lóng chiū-kūn I; I chiū chē-teh lâi kà-sī in. 3 Keng-ha̍k-sū kap Hoat-lī-sài lâng tòa chi̍t ê hū-jîn-lâng lâi, sī tī kiâⁿ kan-îm ê sî hō͘ lâng lia̍h-tio̍h-ê; 4 í-keng hō͘ i khiā tī tiong-ng, in chiū tùi Iâ-so͘ kóng, Sian-siⁿ, chit ê hū-jîn-lâng sī tú-tú kiâⁿ kan-îm ê sî hō͘ lâng lia̍h-tio̍h. 5 Mô͘-se tī lu̍t-hoat bēng-lēng goán ēng chio̍h-thâu tìm-sí chit hō ê hū-jîn-lâng, taⁿ lí kóng cháiⁿ-iūⁿ? 6 In kóng án-ni sī beh chhì Iâ-so͘, ài tit-tio̍h ū phāng thang kò I. Iâ-so͘ chiū àⁿ io, ēng chńg-thâu-á siá-jī tī thô͘-kha. 7 In iû-goân mn̄g I bô soah. Iâ-so͘ chiū thêng sin khí-lâi, tùi in kóng, Lín tiong-kan bô chōe ê lâng thang tāi-seng ēng chio̍h-thâu tìm i. 8 Chiū koh àⁿ io, ēng chńg-thâu-á siá-jī tī thô͘-kha. 9 In thiaⁿ-liáu, tùi lāu kàu siàu-liân, chi̍t-ê chi̍t-ê lóng chhut-khì; chí-ū Iâ-so͘ ka-kī tī-teh, hū-jîn-lâng iû-goân khiā tī tiong-ng. 10 Iâ-so͘ thêng sin khí-lâi kā i kóng, Hū-jîn-lâng ah, in tī tá-lo̍h? Bô lâng tēng lí ê chōe mah? 11 I kóng, Chú ah, bô. Iâ-so͘ kóng, Góa ia̍h bô tēng lí ê chōe; khì ah; taⁿ í-āu bo̍h-tit koh hoān-chōe. 12 Iâ-so͘ koh kā chèng lâng kóng, Góa sī sè-kan ê kng; tè góa ê lâng bô kiâⁿ tī àm, hoán-tńg beh ū oa̍h-miā ê kng. 13 Hoat-lī-sài lâng chiū kā I kóng, Lí ūi-tio̍h pún-sin chòe kan-chèng; lí ê kan-chèng m̄ sī chin. 14 Iâ-so͘ ìn kóng, Góa sui-bóng ūi-tio̍h pún-sin chòe kan-chèng, góa ê kan-chèng ia̍h sī chin; in-ūi góa chai pún-sin tùi tá-lo̍h lâi, tùi tá-lo̍h khì; lín m̄ chai góa tùi tá-lo̍h lâi, tùi tá-lo̍h khì. 15 Lín chiàu jio̍k-thé gí-toàn lâng; góa bô gí-toàn lâng. 16 Góa chiū nā gí-toàn, góa ê gí-toàn sī chin; in-ūi góa m̄ sī ka-kī tī-teh, sī góa kap chhe góa ê Pē saⁿ-kap tī-teh. 17 Koh tī lín ê lu̍t-hoat ū kì-chài, Nn̄g lâng ê kan-chèng chiū-sī chin. 18 Góa sī ūi-tio̍h ka-kī chòe kan-chèng, chhe góa ê Pē ia̍h ūi-tio̍h góa kan-chèng. 19 In chiū kā i kóng, Lí ê Pē tī tá-lo̍h? Iâ-so͘ ìn kóng, Lín m̄ bat góa, ia̍h m̄ bat góa ê Pē; lín nā bat góa, chiū ia̍h bat góa ê Pē. 20 Iâ-so͘ tī tiān-ni̍h kà-sī lâng, tī khò͘-pâng lāi kóng chiah ê ōe; ia̍h bô lâng lia̍h I, in-ūi I ê sî iáu-bē kàu. 21 Iâ-so͘ koh kā in kóng, Góa beh khì lah, lín beh chhē góa, ia̍h beh sí tī lín ê chōe; góa khì ê só͘-chāi, lín bōe-ōe kàu. 22 Iû-thài lâng chiū kóng, I kóng, Góa khì ê só͘-chāi, lín bōe-ōe kàu, kiám sī beh chū-chīn mah? 23 Iâ-so͘ kā in kóng, Lín sī tùi ē-bīn, góa sī tùi téng-bīn; lín sī tùi chit sè-kan; góa m̄ sī tùi chit sè-kan. 24 Só͘-í góa ū kā lín kóng, lín beh sí tī lín ê chōe; in-ūi lín nā m̄ sìn góa sī I, chiū lín beh sí tī lín ê chōe. 25 In chiū kā I kóng, Lí sī chī-chūi? Iâ-so͘ kā in kóng, Chiū-sī góa tùi khí-thâu só͘ kā lín kóng ê. 26 Góa ū chōe-chōe hāng beh gī-lūn lín, beh phòaⁿ-toàn lín; to̍k-to̍k chhe góa ê sī chin; góa só͘ tùi I thiaⁿ-kìⁿ ê, chiū thoân hō͘ sè-kan. 27 In m̄ chai I só͘ tùi in kóng ê sī chí Pē. 28 Iâ-so͘ chiū kóng, Lín kú-khí Jîn-chú ê sî, chiū chai góa sī I, ia̍h góa só͘ kiâⁿ ê bô chi̍t hāng tùi ka-kī; sī chiàu Pē só͘ kà-sī góa ê, lâi kóng chiah-ê. 29 Chhe góa ê kap góa tī-teh; I bô pàng góa ka-kī tī-teh; in-ūi góa siông-siông kiâⁿ I só͘ hoaⁿ-hí ê. 30 Tng Iâ-so͘ kóng chiah ê ōe ê sî, chōe-chōe lâng sìn I. 31 Iâ-so͘ chiū tùi sìn I ê Iû-thài lâng kóng, Lín nā siông-siông tiàm tī góa ê tō-lí, chiū chin-chiàⁿ sī góa ê ha̍k-seng; 32 Lín beh bat chin-lí, ia̍h chin-lí beh hō͘ lín chū-iû. 33 In ìn I kóng, Goán chiah-ê sī A-pek-la̍h-hán ê hō͘-è, chiông-lâi bē bat chòe lâng ê lô͘-châi; lí cháiⁿ-iūⁿ kóng, Lín beh tit-tio̍h chū-iû ah? 34 Iâ-so͘ ìn kóng, Góa si̍t-si̍t kā lín kóng, Kìⁿ-nā hoān chōe ê, chiū-sī chōe ê lô͘-châi. 35 Lô͘-châi bô éng-éng tòa tī ke-lāi; kiáⁿ chiū éng-éng tòa. 36 Só͘-í Kiáⁿ nā hō͘ lín chū-iû, lín chiū chin-chiàⁿ chū-iû. 37 Góa chai lín sī A-pek-la̍h-hán ê hō͘-è; to̍k-to̍k lín ài beh thâi góa, in-ūi góa ê tō-lí bô chûn tī lín ê sim. 38 Góa tùi góa ê Pē khòaⁿ-kìⁿ ê, góa chiū kóng i; lín tùi lín ê pē thiaⁿ-kìⁿ ê, lín chiū kiâⁿ i. 39 In ìn I kóng, Goán ê pē chiū-sī A-pek-la̍h-hán. Iâ-so͘ kā in kóng, Lín nā sī A-pek-la̍h-hán ê kiáⁿ, chiū beh kiâⁿ A-pek-la̍h-hán ê só͘ kiâⁿ. 40 Taⁿ góa sī chiong góa tùi Siōng-tè só͘ thiaⁿ ê chin-lí lâi kā lín kóng ê lâng, ia̍h lín ài beh thâi góa; che m̄ sī A-pek-la̍h-hán ê só͘ kiâⁿ. 41 Lín sī kiâⁿ lín ê pē ê só͘ kiâⁿ. In kā I kóng, Goán m̄ sī tùi kan-îm lâi siⁿ; goán ū chi̍t ê Pē, chiū-sī Siōng-tè. 42 Iâ-so͘ kā in kóng, Nā sī Siōng-tè chòe lín ê Pē, lín chiū thiàⁿ góa; in-ūi góa sī tùi Siōng-tè chhut; ia̍h lâi kàu chia, m̄ sī chū-choan lâi, sī I chhe góa. 43 Lín bô bêng góa ê ōe sī cháiⁿ-iūⁿ? Sī in-ūi lín bōe-ōe thiaⁿ góa ê tō-lí. 44 Lín só͘ tùi i chhut ê pē, chiū-sī Mô͘-kúi; lín ê pē ê su-io̍k, lín ài beh kiâⁿ i. I tùi khí-thâu chòe thâi-lâng ê, bô khiā-tiâu tī chin-lí, in-ūi i lāi-bīn bô chin-lí. I kóng pe̍h-chha̍t ê sî, chiū-sī tùi ka-kī só͘ ū ê lâi kóng; in-ūi i sī pe̍h-chha̍t ê, ia̍h chòe pe̍h-chha̍t ê pē. 45 In-ūi góa kóng chin-lí, lín m̄ sìn góa. 46 Lín tiong-kan chī-chūi gí góa ū chōe? Góa nā kóng chin-lí, lín siáⁿ-sū m̄ sìn góa? 47 Tùi Siōng-tè chhut-ê thiaⁿ Siōng-tè ê ōe; lín só͘-í m̄ thiaⁿ, in-ūi lín m̄ sī tùi Siōng-tè chhut. 48 Iû-thài lâng ìn I kóng, Goán kóng lí sī Sat-má-lī-a lâng, koh hoān-tio̍h kúi, kiám bô chin tio̍h? 49 Iâ-so͘ ìn kóng, Góa m̄ sī hoān-tio̍h kúi; góa sī chun-kèng góa ê Pē, nā-sī lín bú-bān góa. 50 Góa bô kiû ka-kī ê êng-kng; ū chi̍t-ê teh thòe góa kiû koh sím-phòaⁿ ê. 51 Góa si̍t-si̍t kā lín kóng, Lâng nā siú góa ê tō-lí, chiū éng-oán bô kìⁿ-tio̍h sí. 52 Iû-thài lâng kā I kóng, Taⁿ goán chai lí sī hoān-tio̍h kúi. A-pek-la̍h-hán sí, chiah ê sian-ti ia̍h sí, nā-sī lí kóng, Lâng nā siú góa ê tō-lí, chiū éng-oán bô sí. 53 Lí kiám pí goán ê chó͘ A-pek-la̍h-hán khah tōa mah? i í-keng sí, chiah ê sian-ti ia̍h sí, lí ka-kī sǹg chòe sím-mi̍h lâng ah? 54 Iâ-so͘ ìn kóng, Góa nā êng-kng ka-kī, góa ê êng-kng chiū m̄ chiūⁿ-sǹg; êng-kng góa ê sī góa ê Pē; chiū-sī lín só͘ kóng chòe lín ê Siōng-tè ê. 55 Lín m̄ bat I; to̍k-to̍k góa bat I; góa nā kóng, M̄ bat I, chiū góa sī pe̍h-chha̍t chhin-chhiūⁿ lín; to̍k-to̍k góa bat I, ia̍h siú I ê tō-lí. 56 Lín ê chó͘ A-pek-la̍h-hán ke̍k hoaⁿ-hí, sī beh khòaⁿ-kìⁿ góa ê ji̍t-chí; khòaⁿ-kìⁿ, chiū hoaⁿ-hí. 57 Iû-thài lâng chiū tùi I kóng, Lí bē chiūⁿ gō͘-cha̍p hè, kiám bat khòaⁿ-kìⁿ A-pek-la̍h-hán mah? 58 Iâ-so͘ kā in kóng, Góa si̍t-si̍t kā lín kóng, Bē ū A-pek-la̍h-hán, góa chiū tī-teh. 59 In chiū the̍h chio̍h-thâu beh tìm I; nā-sī Iâ-so͘ ka-kī ún-ba̍t, tùi tiān-tn̂g chhut-khì.
1 耶穌行過ê時，看見一人出世就chhiⁿ-mî。 2 伊ê學生問伊講，拉比，chit人出世就chhiⁿ-mî，tùi 是誰犯罪，是伊本身，á是伊ê父母ah？ 3 耶穌應講，Chit人無犯罪，伊ê父母亦無；獨獨beh用伊來顯明上帝ê所做。 4 時iáu是日時，咱tio̍h做差我ê ê工；暝時beh到，hit-tia̍p就無人會做工。 5 我tī世間ê時，是世間ê光。 6 Chiahê話講了，就phùi nōa tī土腳，用nōa攪土，用土kô͘ chhiⁿ-mî人ê目睭，kā伊講，去洗tī西羅亞ê池。(西羅亞，翻譯就是奉差) 7 伊就去洗，倒tńg來已經能看見。 8 伊ê厝邊kap平素看見伊做乞食ê，講，chit人kiám m̄是坐teh來求乞ê mah？ 9 有人講，就是伊；有人講，m̄是，是親像伊nā-tiāⁿ。伊家己講，我就是。 10 In就kā伊講，你ê目睭怎樣得tio̍h開？ 11 伊應講，Hit-ê名叫耶穌ê攪土糊我ê目睭，kā我講，去西羅亞洗；我隨時去洗，就得tio̍h看見。 12 In就kā伊講，Hit人tī tá-lo̍h？伊講，我m̄知。 13 In chhōa hitê平素chhiⁿ-mî ê去見法利賽人。 14 耶穌攪土來開伊ê目睭ê日是安歇日。 15 所以法利賽人亦問伊是怎樣得tio̍h看見。伊就kā in講，伊將土糜hē tī我ê目睭，我去洗，就看見。 16 法利賽人中有ê講，Chit人無守安歇日，m̄是tùi上帝來。有ê講，有罪ê人thài能行chit號神蹟ah？In tùi án-ni分pêng。 17 In koh kā chhiⁿ-mî人講，伊已經開你ê目睭，你講伊是甚麼號人？伊講，是先知人。 18 偤太人m̄信伊平素chhiⁿ-mî，能koh看見；到叫得tio̍h看見ê ê父母來， 19 就問in講，chitê是lín ê kiáⁿ，就是lín所講出世chhiⁿ-mî ê mah？taⁿ伊怎樣能看見？ 20 伊ê父母應講，伊是阮ê kiáⁿ，出世chhiⁿ-mî，阮知；taⁿ伊怎樣得tio̍h看見，阮m̄知； 21 是誰開伊ê目睭，阮亦m̄知；伊大漢lah；問伊，伊beh家己講。 22 伊ê父母講án-ni，是因為驚偤太人；因為偤太人已經有定約，若有認耶穌做基督ê，tio̍h kek出會堂。 23 所以伊ê父母講，伊大漢lah；thang問伊。 24 In就koh叫平素chhiⁿ-mî ê，kā伊講，Tio̍h歸榮光上帝；阮知chit人是有罪ê人。 25 伊就應講，伊是有罪ê人á m̄是，我m̄知；只有知一項，就是我前chhiⁿ-mî，現今能看見。 26 In就kā伊講，伊kā你做甚麼？àn怎樣開你ê目睭？ 27 應講，我已經kā lín講，lín m̄聽；啥事ài koh聽？kiám是lín亦ài做伊ê學生mah？ 28 In就罵伊，講，你就是伊ê學生；阮是摩西ê學生。 29 上帝有tùi摩西講話，是阮所知；獨獨chit人，阮m̄知伊tùi tá-lo̍h來。 30 Hit人應講，這就奇lah，伊開我ê目睭，亦lín m̄知伊tùi tá-lo̍h來。 31 咱知上帝無聽有罪ê人；獨獨人若敬拜上帝來行伊ê旨意，伊就聽伊。 32 Tùi古早以來，bē bat聽見出世chhiⁿ-mî ê，有人開伊ê目睭。 33 Chit人若m̄是tùi上帝來，就無所能做。 34 In就應伊，講，你全然出世tī罪惡中，反tńg教示阮mah？就kek伊出。 35 耶穌聽見in kek伊出；後來chhē-tio̍h伊，就講，你信上帝ê kiáⁿ mah？ 36 伊應講，主ah，伊是是誰，hō͘我信伊？ 37 耶穌kā伊講，你bat看見伊，現在kap你講話ê，就是。 38 伊就講，主ah，我信。就拜伊。 39 耶穌講，我因為審判臨到chit世間，hō͘ bōe看見ê人看見；也看見ê人變做chhiⁿ-mî。 40 Kap伊saⁿ-kap tī-teh ê法利賽人聽見chiahê話，就kā伊講，總無阮亦chhiⁿ-mî mah？ 41 耶穌kā in講，Lín若chhiⁿ-mî，就無罪；taⁿ lín講，阮看見；就lín ê罪定定tī-teh。
1 Iâ-so͘ kiâⁿ kè ê sî, khòaⁿ-kìⁿ chi̍t lâng chhut-sì chiū chhiⁿ-mî. 2 I ê ha̍k-seng mn̄g I kóng, Lia̍p-pí, chit lâng chhut-sì chiū chhiⁿ-mî, tùi chī-chūi hoān-chōe, sī i pún-sin, á-sī i ê pē-bú ah? 3 Iâ-so͘ ìn kóng, Chit lâng bô hoān-chōe, i ê pē-bú ia̍h bô; to̍k-to̍k beh ēng i lâi hián-bêng Siōng-tè ê só͘ chòe. 4 Sî iáu sī ji̍t-sî, lán tio̍h chòe chhe góa ê ê kang; mî-sî beh kàu, hit tia̍p chiū bô lâng ōe chòe kang. 5 Góa tī sè-kan ê sî, sī sè-kan ê kng. 6 Chiah ê ōe kóng-liáu, chiū phùi nōa tī thô͘-kha, ēng nōa kiáu thô͘, ēng thô͘ kô͘ chhiⁿ-mî lâng ê ba̍k-chiu, kā i kóng, Khì sóe tī Se-lô-a ê tî. (Se-lô-a, hoan-e̍k chiū-sī Hōng-chhe). 7 I chiū khì sóe, tò-tńg-lâi í-keng ōe khòaⁿ-kìⁿ. 8 I ê chhù-piⁿ kap pêng-sò͘ khòaⁿ-kìⁿ i chòe khit-chia̍h ê, kóng, chit lâng kiám m̄ sī chē-teh lâi kiû-khit ê mah? 9 Ū lâng kóng, Chiū-sī i; ū lâng kóng, M̄ sī, sī chhin-chhiūⁿ i nā-tiāⁿ. I ka-kī kóng, Góa chiū-sī. 10 In chiū kā i kóng, Lí ê ba̍k-chiu cháiⁿ-iūⁿ tit-tio̍h khui? 11 I ìn kóng, Hit ê miâ kiò Iâ-so͘ ê kiáu thô͘ kô͘ góa ê ba̍k-chiu, kā góa kóng, Khì Se-lô-a sóe; góa sûi-sî khì sóe, chiū tit-tio̍h khòaⁿ-kìⁿ. 12 In chiū kā i kóng, Hit lâng tī tá-lo̍h? I kóng, Góa m̄ chai. 13 In chhōa hit-ê pêng-sò͘ chhiⁿ-mî ê khì kìⁿ Hoat-lī-sài lâng. 14 Iâ-so͘ kiáu thô͘ lâi khui i ê ba̍k-chiu ê ji̍t sī an-hioh-ji̍t. 15 Só͘-í Hoat-lī-sài lâng ia̍h mn̄g i sī cháiⁿ-iūⁿ tit-tio̍h khòaⁿ-kìⁿ. I chiū kā in kóng, I chiong thô͘-bê hē tī góa ê ba̍k-chiu, góa khì sóe, chiū khòaⁿ-kìⁿ. 16 Hoat-lī-sài lâng tiong ū-ê kóng, Chit lâng bô siú an-hioh-ji̍t, m̄ sī tùi Siōng-tè lâi. Ū-ê kóng, Ū chōe ê lâng thái ōe kiâⁿ chit hō sîn-jiah ah? In tùi án-ni hun-pêng. 17 In koh kā chhiⁿ-mî lâng kóng, I í-keng khui lí ê ba̍k-chiu, lí kóng I sī sím-mi̍h hō lâng? I kóng, Sī sian-ti lâng. 18 Iû-thài lâng m̄ sìn i pêng-sò͘ chhiⁿ-mî, ōe koh khòaⁿ-kìⁿ; kàu kiò tit-tio̍h khòaⁿ-kìⁿ ê ê pē-bú lâi, 19 chiū mn̄g in kóng, Chit-ê sī lín ê kiáⁿ, chiū-sī lín só͘ kóng chhut-sì chhiⁿ-mî ê mah? taⁿ i cháiⁿ-iūⁿ ōe khòaⁿ-kìⁿ? 20 I ê pē-bú ìn kóng, I sī goán ê kiáⁿ, chhut-sì chhiⁿ-mî, goán chai; taⁿ i cháiⁿ-iūⁿ tit-tio̍h khòaⁿ-kìⁿ, goán m̄ chai; 21 chī-chūi khui i ê ba̍k-chiu, goán ia̍h m̄ chai; i tōa-hàn lah; mn̄g i, i beh ka-kī kóng. 22 I ê pē-bú kóng án-ni, sī in-ūi kiaⁿ Iû-thài lâng; in-ūi Iû-thài lâng í-keng ū tēng iok, nā ū jīn Iâ-so͘ chòe Ki-tok ê, tio̍h kek-chhut hōe-tn̂g. 23 Só͘-í i ê pē-bú kóng, I tōa-hàn lah; thang mn̄g i. 24 In chiū koh kiò pêng-sò͘ chhiⁿ-mî ê, kā i kóng, Tio̍h kui êng-kng Siōng-tè; goán chai chit lâng sī ū chōe ê lâng. 25 I chiū ìn kóng, I sī ū chōe ê lâng á m̄ sī, góa m̄ chai; chí-ū chai chi̍t hāng, chiū-sī góa chêng chhiⁿ-mî, hiān-kim ōe khòaⁿ-kìⁿ. 26 In chiū kā i kóng, I kā lí chòe sím-mi̍h? àn-cháiⁿ-iūⁿ khui lí ê ba̍k-chiu? 27 Ìn kóng, Góa í-keng kā lín kóng, lín m̄ thiaⁿ; siáⁿ-sū ài koh thiaⁿ? kiám sī lín ia̍h ài chòe I ê ha̍k-seng mah? 28 In chiū mē i, kóng, Lí chiū-sī I ê ha̍k-seng; goán sī Mô͘-se ê ha̍k-seng. 29 Siōng-tè ū tùi Mô͘-se kóng ōe, sī goán só͘ chai; to̍k-to̍k chit lâng, goán m̄ chai I tùi tá-lo̍h lâi. 30 Hit lâng ìn kóng, Che chiū kî lah, I khui góa ê ba̍k-chiu, ia̍h lín m̄ chai I tùi tá-lo̍h lâi. 31 Lán chai Siōng-tè bô thiaⁿ ū chōe ê lâng; to̍k-to̍k lâng nā kèng-pài Siōng-tè lâi kiâⁿ I ê chí-ì, I chiū thiaⁿ i. 32 Tùi kó͘-chá í-lâi, bē bat thiaⁿ-kìⁿ chhut-sì chhiⁿ-mî ê, ū lâng khui i ê ba̍k-chiu. 33 Chit lâng nā m̄ sī tùi Siōng-tè lâi, chiū bô só͘ ōe chòe. 34 In chiū ìn i, kóng, Lí choân-jiân chhut-sì tī chōe-ok tiong, hoán-tńg kà-sī goán mah? Chiū kek i chhut. 35 Iâ-so͘ thiaⁿ-kìⁿ in kek i chhut; āu-lâi chhē-tio̍h i, chiū kóng, Lí sìn Siōng-tè ê Kiáⁿ mah? 36 I ìn kóng, Chú ah, I sī chī-chūi, hō͘ góa sìn I? 37 Iâ-so͘ kā i kóng, Lí bat khòaⁿ-kìⁿ I, hiān-chāi kap lí kóng ōe ê, chiū-sī. 38 I chiū kóng, Chú ah, góa sìn. Chiū pài I. 39 Iâ-so͘ kóng, Góa in-ūi sím-phòaⁿ lîm-kàu chit sè-kan, hō͘ bōe khòaⁿ-kìⁿ ê lâng khòaⁿ-kìⁿ; iā khòaⁿ-kìⁿ ê lâng pìⁿ-chòe chhiⁿ-mî. 40 Kap I saⁿ-kap tī-teh ê Hoat-lī-sài lâng thiaⁿ-kìⁿ chiah ê ōe, chiū kā I kóng, Chóng bô goán ia̍h chhiⁿ-mî mah? 41 Iâ-so͘ kā in kóng, Lín nā chhiⁿ-mî, chiū bô chōe; taⁿ lín kóng, Goán khòaⁿ-kìⁿ; chiū lín ê chōe tiāⁿ-tiāⁿ tī-teh.
1 我實實kā lín講，入羊椆，無tùi hitê門，來tùi別所在pôaⁿ過ê，是賊，是強盜。 2 Tùi門入ê，是羊ê牧者。 3 顧門ê kā伊開；羊聽伊ê聲；就隨名叫家己ê羊，chhōa in出。 4 已經將家己ê羊lóng放伊出去，就做頭行，羊亦tè伊；因為認得伊ê聲。 5 決斷無tè生份人，就是閃避伊；因為bōe認得生份人ê聲。 6 耶穌用chitê譬喻kā in講；in m̄知伊所kā in講ê是甚麼。 7 所以耶穌koh kā in講，我實實kā lín講，我就是羊椆ê門。 8 見若事先我來ê是賊，是強盜；但是羊無聽in。 9 我就是門；若有tùi我入ê，beh得tio̍h救，koh beh出入，亦beh得tio̍h草料。 10 賊來，無m̄是ài偷，ài 刣，ài滅無；我來是beh hō͘ in有活，koh有豐盛。 11 我就是好ê牧者；好ê牧者為tio̍h羊放sak性命。 12 做倩工ê，m̄是做牧者，羊也m̄是伊家己ê羊；看見豺狼來，放sak羊就逃走，豺狼咬in，趕散in； 13 這是因為伊做倩工，無關心tī羊。 14 我是好ê牧者；我bat hiahê屬我ê，屬我ê亦bat我。 15 親像父bat我，我bat父一樣；koh我為tio̍h羊放sak性命。 16 我iáu有羊，m̄是屬chit-tiâu ê；我的確tio̍h chhōa in來，in亦beh聽我ê聲；koh beh成做一群，歸一个牧者。 17 所以父疼我，因為我放sak我ê性命，thang koh復到伊。 18 無人tùi我取伊，是我家己放sak伊。我有權thang放sak，亦有權thang復到。這是我tùi我ê父所受ê命令。 19 因為chiahê話偤太人ê中間koh有分pêng。 20 其中chōe-chōe人講，伊犯tio̍h鬼，teh發狂；mih-sái聽伊ah？ 21 Koh有人講，這m̄是犯tio̍h鬼ê人ê話。鬼kiám能開chhiⁿ-mî人ê目睭mah？ 22 Tī耶路撒冷，有獻殿節，是冬天時； 23 耶穌tī殿裡，行tī所羅門ê léng廊。 24 偤太人圍纍，來kā伊講，你hō͘阮ê心躊躇，beh到甚麼時ah？ 25 你若是基督，tio̍h明明kā阮講。耶穌應講，我bat kā lín講，但是lín m̄信；我tī我ê父ê名所行ê事，chiahê是做我ê干證。 26 但是lín m̄信，因為lín m̄是我ê羊。 27 我ê羊聽我ê聲，我bat in，in亦tè我； 28 koh我hō͘ in有永活；in決斷永遠bōe沉淪；無一个能tùi我ê手搶in 去。 29 我ê父，就是用羊hō͘我ê，khah大萬項有；無一个能tùi父ê手搶去。 30 我kap父是一个。 31 偤太人koh the̍h石頭ài tìm伊。 32 耶穌應講，我tùi父用chōe-chōe好事hō͘ lín看；其中為tio̍h tá-lo̍h一項，用石頭tìm我？ 33 偤太人應伊講，阮用石tìm你，m̄是為tio̍h好事，就是為tio̍h褻瀆；因為你是人，亦家己掠做上帝。 34 耶穌應講，Lín ê律法kiám無記載，講，我講lín是上帝mah？ 35 既然講奉上帝ê話ê做上帝，(亦聖經bōe會廢無) ， 36 taⁿ論父所分別做聖，差伊入世間ê，lín就講，你teh褻瀆mah？因為我講，我是上帝ê kiáⁿ。 37 我若無行我ê父ê事，就莫得信我。 38 我若行伊，sui-bóng m̄信我，tio̍h信hiahê事；hō͘ lín也知也明白父tiàm-tī我，我tiàm-tī父。 39 In koh再beh掠耶穌，伊就脫離in ê手去。 40 koh去約旦外，到約翰起頭行洗禮ê所在，tòa hia khiā起。 41 人chōe-chōe就近伊；koh講，約翰lóng無行神蹟，獨獨約翰所講chí chit人ê，lóng是真。 42 Tī hia人chōe-chōe信伊。
1 Góa si̍t-si̍t kā lín kóng, Ji̍p iûⁿ-tiâu, bô tùi hit ê mn̂g, lâi tùi pa̍t só͘-chāi pôaⁿ-kè ê, sī chha̍t, sī kiông-tō. 2 Tùi mn̂g ji̍p ê, sī iûⁿ ê bo̍k-chiá. 3 Kò͘ mn̂g ê kā i khui; iûⁿ thiaⁿ i ê siaⁿ; chiū sûi miâ kiò ka-kī ê iûⁿ, chhōa in chhut. 4 Í-keng chiong ka-kī ê iûⁿ lóng pàng i chhut-khì, chiū chòe-thâu kiâⁿ, iûⁿ ia̍h tè i; in-ūi jīn-tit i ê siaⁿ. 5 Koat-toàn bô tè siⁿ-hūn lâng, chiū-sī siám-pī i; in-ūi bōe jīn-tit siⁿ-hūn lâng ê siaⁿ. 6 Iâ-so͘ ēng chit ê phì-jū kā in kóng; in m̄ chai I só͘ kā in kóng ê sī sím-mi̍h. 7 Só͘-í Iâ-so͘ koh kā in kóng, Góa si̍t-si̍t kā lín kóng, Góa chiū-sī iûⁿ-tiâu ê mn̂g. 8 Kìⁿ-nā tāi-seng góa lâi ê sī chha̍t, sī kiông-tō; nā-sī iûⁿ bô thiaⁿ in. 9 Góa chiū-sī mn̂g; nā ū tùi góa ji̍p ê, beh tit-tio̍h kiù, koh beh chhut ji̍p, ia̍h beh tit-tio̍h chháu-liāu. 10 Chha̍t lâi, bô m̄ sī ài thau, ài thâi, ài bia̍t-bô; góa lâi sī beh hō͘ in ū oa̍h, koh ū hong-sēng. 11 Góa chiū-sī hó ê bo̍k-chiá; hó ê bo̍k-chiá ūi-tio̍h iûⁿ pàng-sak sìⁿ-miā. 12 Chòe chhiàⁿ-kang ê, m̄ sī chòe bo̍k-chiá, iûⁿ iā m̄ sī i ka-kī ê iûⁿ; khòaⁿ-kìⁿ chhâi-lông lâi, pàng-sak iûⁿ chiū tô-cháu, chhâi-lông kā in, kóaⁿ-sòaⁿ in; 13 che sī in-ūi i chòe chhiàⁿ-kang, bô koan-sim tī iûⁿ. 14 Góa sī hó ê bo̍k-chiá; góa bat hiah ê sio̍k góa ê, sio̍k góa ê ia̍h bat góa. 15 Chhin-chhiūⁿ Pē bat góa, góa bat Pē chi̍t iūⁿ; koh góa ūi-tio̍h iûⁿ pàng-sak sìⁿ-miā. 16 Góa iáu ū iûⁿ, m̄ sī sio̍k chit tiâu ê; góa tek-khak tio̍h chhōa in lâi, in ia̍h beh thiaⁿ góa ê siaⁿ; koh beh chiâⁿ chòe chi̍t kûn, kui chi̍t ê bo̍k-chiá. 17 Só͘-í Pē thiàⁿ góa, in-ūi góa pàng-sak góa ê sìⁿ-miā, thang koh ho̍k-tò i. 18 Bô lâng tùi góa chhú i, sī góa ka-kī pàng-sak i. Góa ū koân thang pàng-sak ia̍h ū koân thang ho̍k-tò. Che sī góa tùi góa ê Pē só͘ siū ê bēng-lēng. 19 In-ūi chiah ê ōe Iû-thài lâng ê tiong-kan koh ū hun-pêng. 20 Kî-tiong chōe-chōe lâng kóng, I hoān-tio̍h kúi, teh hoat-kông; mih-sái thiaⁿ I ah? 21 Koh ū lâng kóng, Che m̄ sī hoān-tio̍h kúi ê lâng ê ōe. Kúi kiám ōe khui chhiⁿ-mî lâng ê ba̍k-chiu mah? 22 Tī Iâ-lō͘-sat-léng, ū hiàn-tiān choeh, sī tang-thiⁿ sî; 23 Iâ-so͘ tī tiān-ni̍h, kiâⁿ tī Só͘-lô-bûn ê léng-lông. 24 Iû-thài lâng ûi-lûi, lâi kā I kóng, Lí hō͘ goán ê sim tiû-tû, beh kàu sím-mi̍h sî ah? 25 Lí nā sī Ki-tok, tio̍h bêng-bêng kā goán kóng. Iâ-so͘ ìn kóng, Góa bat kā lín kóng, nā-sī lín m̄ sìn; góa tī góa ê Pē ê miâ só͘ kiâⁿ ê sū, chiah-ê sī chòe góa ê kan-chèng. 26 Nā-sī lín m̄ sìn, in-ūi lín m̄ sī góa ê iûⁿ. 27 Góa ê iûⁿ thiaⁿ góa ê siaⁿ, góa bat in, in ia̍h tè góa; 28 koh góa hō͘ in ū éng-oa̍h; in koat-toàn éng-oán bōe tîm-lûn; bô chi̍t-ê ōe tùi góa ê chhiú chhiúⁿ in khì. 29 Góa ê Pē, chiū-sī ēng iûⁿ hō͘ góa ê, khah tōa bān-hāng-ū; bô chi̍t-ê ōe tùi Pē ê chhiú chhiúⁿ-khì. 30 Góa kap Pē sī chi̍t-ê. 31 Iû-thài lâng koh the̍h chio̍h-thâu ài tìm I. 32 Iâ-so͘ ìn kóng, Góa tùi Pē ēng chōe-chōe hó sū hō͘ lín khòaⁿ; kî-tiong ūi-tio̍h tá-lo̍h chi̍t hāng, ēng chio̍h-thâu tìm góa? 33 Iû-thài lâng ìn I kóng, Goán ēng chio̍h tìm lí, m̄ sī ūi-tio̍h hó sū, chiū-sī ūi-tio̍h siat-to̍k; in-ūi lí sī lâng, ia̍h ka-kī lia̍h chòe Siōng-tè. 34 Iâ-so͘ ìn kóng, Lín ê lu̍t-hoat kiám bô kì-chài, kóng, Góa kóng lín sī Siōng-tè mah? 35 Kì-jiân kóng hōng Siōng-tè ê ōe ê chòe Siōng-tè, (ia̍h sèng-keng bōe-ōe hòe-bô), 36 taⁿ lūn Pē só͘ hun-piat chòe sèng, chhe I ji̍p sè-kan ê, lín chiū kóng, Lí teh siat-to̍k mah? in-ūi góa kóng, Góa sī Siōng-tè ê Kiáⁿ. 37 Góa nā bô kiâⁿ góa ê Pē ê sū, chiū bo̍h-tit sìn góa. 38 Góa nā kiâⁿ i, sui-bóng m̄ sìn góa, tio̍h sìn hiah ê sū; hō͘ lín iā chai iā bêng-pe̍k Pē tiàm-tī góa, góa tiàm-tī Pē. 39 In koh-chài beh lia̍h Iâ-so͘, I chiū thoat-lī in ê chhiú khì. 40 Koh khì Iok-tàn gōa, kàu Iok-hān khí-thâu kiâⁿ sóe-lé ê só͘-chāi, tòa hia khiā-khí. 41 Lâng chōe-chōe chiū-kūn I; koh kóng, Iok-hān lóng bô kiâⁿ sîn-jiah, to̍k-to̍k Iok-hān só͘ kóng chí chit lâng ê, lóng sī chin. 42 Tī hia lâng chōe-chōe sìn I.
1 有一人，名拉撒路，破病；伊khiā tī伯大尼，就是馬利亞kap伊ê姊妹馬大ê鄉社。 2 Chitê馬利亞就是bat用香油抹主，用伊ê頭毛拭主ê腳ê，伊ê兄弟拉撒路破病。 3 In兩個姊妹就差人去chhē耶穌，講，主ah，你所疼ê人破病lah。 4 耶穌聽見就講，Chitê病不致到死，就是為tio̍h上帝ê榮光，hō͘上帝ê kiáⁿ tùi chitê得tio̍h榮光。 5 Taⁿ馬大，kap伊ê姊妹，kap拉撒路，lóng是耶穌所疼ê人。 6 既然聽見伊破病，就tī所tòa ê所在猶原tòa兩日。 7 後來就kā學生講，咱koh來去偤太。 8 學生kā伊講，拉比，近來偤太人ài beh用石頭tìm你；你iáu beh koh去hia mah？ 9 耶穌應講，一日kiám無六時mah？人若日時行，就bōe tak-tio̍h，因為看見chit世間ê光。 10 總是人若暝時行，就tak-tio̍h，因為內中無光。 11 講soah，koh kā in講，咱ê朋友拉撒路teh睏；我去是beh叫伊醒。 12 學生講，主ah，伊若teh睏，就會好。 13 耶穌所講是指伊死；但是in掠chún是指伊安眠teh睏。 14 所以耶穌明明kā in講，拉撒路死lah。 15 我亦為tio̍h Lín歡喜，因為我無tī hia，是beh hō͘ lín信；總是咱來去就近伊。 16 多馬，chheng Té-thó͘-má ê，就kā同做學生ê人講，咱chiahê亦來去，kap伊相同死。 17 耶穌到ê時，拉撒路tī墓裡已經四日lah。 18 伯大尼近耶路撒冷，相離約量五里； 19 有偤太chōe-chōe人已經就近馬大馬利亞，beh為tio̍h in ê兄弟來安慰in。 20 馬大聽見耶穌來，就去接伊；馬利亞猶原坐tī厝內。 21 馬大tùi耶穌講，主ah，你若tī chia，我ê兄弟就bōe死。 22 我taⁿ亦知見若你tùi上帝求ê，上帝beh hō͘你。 23 耶穌kā伊講，你ê兄弟beh koh活。 24 馬大kā伊講，我知boa̍t-jīt，koh活ê時，伊beh koh活。 25 耶穌kā伊講，koh活kap活命是在tī我；信我ê人sui-bóng死，iáu-kú beh活； 26 見若活來信我ê人永永bōe死。你信chitê mah？ 27 伊kā伊講，主ah，是lah，我已經信你是基督，上帝ê Kiáⁿ，就是來入世間ê。 28 講soah，就tò去，暗靜叫伊ê姊妹馬利亞，講，先生來lah，teh叫你。 29 馬利亞聽見，緊緊起來，去就近伊。 30 Hit-tia̍p耶穌iáu-bē入鄉社，iáu tī馬大接伊ê所在。 31 Hiah-ê kap馬利亞tī厝內teh安慰伊ê偤太人，看見伊緊緊起來出去，就tè伊，phah算伊beh去墓裡啼哭。 32 馬利亞到耶穌所tī-teh ê所在，看見伊，就仆tī伊ê腳下，kā伊講，主ah，你若tī chia，我ê兄弟就bōe死。 33 耶穌看見伊啼哭，koh kap伊saⁿ-kap來ê偤太人亦啼哭，就真慼心，koh大jû亂， 34 講，Lín hē伊tī甚麼所在？In就kā伊講，主ah，來去看。 35 耶穌流目屎。 36 偤太人就講，你看，伊疼chit人到án-ni！ 37 其中有ê講，伊bat開chhiⁿ-mî人ê目睭，kiám bōe hō͘ chit人無死mah？ 38 耶穌koh慼心到墓裡。Hit-ê墓是石洞，有一塊石塞hē-teh。 39 耶穌講，徙開hit塊石。死人ê姊妹馬大kā伊講，主ah，taⁿ臭lah；已經死四日lah。 40 耶穌kā伊講，我kiám無kā你講，你若信，能看見上帝ê榮光mah？ 41 In就徙開hit塊石。耶穌kia̍h目ǹg天，講，父ah，我感謝你，因為你已經聽我。 42 我知你常常聽我；獨獨我講án-ni，是為tio̍h周圍teh khiā ê眾人，hō͘ in信你差我。 43 講soah，就大聲喉叫，講，拉撒路，出來。 44 死人就出來，手腳紮布，面包巾。耶穌kā in講，tháu開，hō͘伊行。 45 就近馬利亞ê偤太人，看見耶穌所行ê tāi-chì ê，chōe-chōe信伊。 46 獨獨其中有ê去chhē法利賽人，將耶穌所行ê tāi-chì kā in講。 47 Tùi án-ni， chiahê祭司頭kap法利賽人聚集公會，講，咱teh chhòng甚麼？因為chit人行chōe-chōe神蹟。 48 咱若容允伊án-ni，眾人beh信伊；亦羅馬人beh來，收拾咱ê地方kap百姓。 49 其中一人，就是Kai-a-hoat，hit年做祭司頭ê，kā in講，Lín m̄知半項，亦無想， 50 一人替百姓死，hō͘ thong國免滅無，是lín ê利益。 51 伊講chitê話，m̄是tùi家己；是因為hit年伊做祭司頭，讖語耶穌beh為tio̍h chitê百姓死； 52 koh m̄-nā為tio̍h chitê百姓；亦是beh聚集上帝四散ê kiáⁿ兒合做一个。 53 所以tùi hit日，in計謀beh 刣伊。 54 Tùi án-ni，耶穌無koh顯然行tī偤太人ê中間，就離開hia，去近曠野ê地，到一个城，名Í-hoat-liân；kap學生tòa hia。 55 偤太人pôaⁿ過節近lah；節期前，chōe-chōe人tùi鄉社上耶路撒冷，beh家己清氣。 56 In就chhē耶穌，koh khiā tī殿內，saⁿ-kap講，Lín phah算怎樣？伊無beh來赴節mah？ 57 Chiahê祭司頭kap法利賽人已經出命令，若有人知伊tī tá-lo̍h，就tio̍h來報，hō͘ in thang去掠伊。
1 Ū chi̍t lâng, miâ Lia̍p-sat-lō͘, phòa-pīⁿ; i khiā tī Pek-tāi-nî, chiū-sī Má-lī-a kap i ê chí-bē Má-tāi ê hiuⁿ-siā. 2 Chit ê Má-lī-a chiū-sī bat ēng hiuⁿ-iû boah Chú, ēng i ê thâu-mn̂g chhit Chú ê kha ê, i ê hiaⁿ-tī Lia̍p-sat-lō͘ phòa-pīⁿ. 3 In nn̄g ê chí-bē chiū chhe lâng khì chhē Iâ-so͘, kóng, Chú ah, lí só͘ thiàⁿ ê lâng phòa-pīⁿ lah. 4 Iâ-so͘ thiaⁿ-kìⁿ chiū kóng, Chit ê pīⁿ put-tì kàu sí, chiū-sī ūi-tio̍h Siōng-tè ê êng-kng, hō͘ Siōng-tè ê Kiáⁿ tùi chit-ê tit-tio̍h êng-kng. 5 Taⁿ Má-tāi, kap i ê chí-bē, kap Lia̍p-sat-lō͘, lóng sī Iâ-so͘ só͘ thiàⁿ ê lâng. 6 Kì-jiân thiaⁿ-kìⁿ i phòa-pīⁿ, chiū tī só͘ tòa ê só͘-chāi iû-goân tòa nn̄g ji̍t. 7 Āu-lâi chiū kā ha̍k-seng kóng, Lán koh lâi khì Iû-thài. 8 Ha̍k-seng kā I kóng, Lia̍p-pí, kūn-lâi Iû-thài lâng ài beh ēng chio̍h-thâu tìm lí; lí iáu beh koh khì hia mah? 9 Iâ-so͘ ìn kóng, Chi̍t ji̍t kiám bô la̍k sî mah? Lâng nā ji̍t-sî kiâⁿ, chiū bōe tak-tio̍h, in-ūi khòaⁿ-kìⁿ chit sè-kan ê kng. 10 Chóng-sī lâng nā mî-sî kiâⁿ, chiū tak-tio̍h, in-ūi lāi-tiong bô kng. 11 Kóng soah, koh kā in kóng, Lán ê pêng-iú Lia̍p-sat-lō͘ teh khùn; góa khì sī beh kiò i chhíⁿ. 12 Ha̍k-seng kóng, Chú ah, i nā teh khùn, chiū ōe hó. 13 Iâ-so͘ só͘ kóng sī chí i sí; nā-sī in lia̍h-chún sī chí i an-bîn teh khùn. 14 Só͘-í Iâ-so͘ bêng-bêng kā in kóng, Lia̍p-sat-lō͘ sí lah. 15 Góa ia̍h ūi-tio̍h lín hoaⁿ-hí, in-ūi góa bô tī hia, sī beh hō͘ lín sìn; chóng-sī lán lâi khì chiū-kūn i. 16 To-má, chheng Té-thó͘-má ê, chiū kā tâng chòe ha̍k-seng ê lâng kóng, Lán chiah-ê ia̍h lâi khì, kap I saⁿ-tâng sí. 17 Iâ-so͘ kàu ê sî, Lia̍p-sat-lō͘ tī bōng-ni̍h í-keng sì ji̍t lah. 18 Pek-tāi-nî kūn Iâ-lō͘-sat-léng, saⁿ-lī iok-liōng gō͘ lí; 19 ū Iû-thài chōe-chōe lâng í-keng chiū-kūn Má-tāi Má-lī-a, beh ūi-tio̍h in ê hiaⁿ-tī lâi an-ùi in. 20 Má-tāi thiaⁿ-kìⁿ Iâ-so͘ lâi, chiū khì chih I; Má-lī-a iû-goân chē tī chhù-lāi. 21 Má-tāi tùi Iâ-so͘ kóng, Chú ah, lí nā tī chia, góa ê hiaⁿ-tī chiū bōe sí. 22 Góa taⁿ ia̍h chai kìⁿ-nā lí tùi Siōng-tè kiû ê, Siōng-tè beh hō͘ lí. 23 Iâ-so͘ kā i kóng, Lí ê hiaⁿ-tī beh koh-oa̍h. 24 Má-tāi kā I kóng, Góa chai boa̍t-jīt, koh-oa̍h ê sî, i beh koh-oa̍h. 25 Iâ-so͘ kā i kóng, Koh-oa̍h kap oa̍h-miā sī chāi-tī góa; sìn góa ê lâng sui-bóng sí, iáu-kú beh oa̍h; 26 kìⁿ-nā oa̍h lâi sìn góa ê lâng éng-éng bōe sí. Lí sìn chit-ê mah? 27 I kā I kóng, Chú ah, sī lah, góa í-keng sìn lí sī Ki-tok, Siōng-tè ê Kiáⁿ, chiū-sī lâi ji̍p sè-kan ê. 28 Kóng soah, chiū tò-khì, àm-chīⁿ kiò i ê chí-bē Má-lī-a, kóng, Sian-siⁿ lâi lah, teh kiò lí. 29 Má-lī-a thiaⁿ-kìⁿ, kín-kín khí-lâi, khì chiū-kūn I. 30 Hit tia̍p Iâ-so͘ iáu-bē ji̍p hiuⁿ-siā, iáu tī Má-tāi chih I ê só͘-chāi. 31 Hiah-ê kap Má-lī-a tī chhù-lāi teh an-ùi i ê Iû-thài lâng, khòaⁿ-kìⁿ i kín-kín khí-lâi chhut-khì, chiū tè i, phah-sǹg i beh khì bōng-ni̍h thî-khàu. 32 Má-lī-a kàu Iâ-so͘ só͘ tī-teh ê só͘-chāi, khòaⁿ-kìⁿ I, chiū phak tī I ê kha-ē, kā I kóng, Chú ah, lí nā tī chia, góa ê hiaⁿ-tī chiū bōe sí. 33 Iâ-so͘ khòaⁿ-kìⁿ i thî-khàu, koh kap i saⁿ-kap lâi ê Iû-thài lâng ia̍h thî-khàu, chiū chin chhoeh-sim, koh tōa jû-loān, 34 kóng, Lín hē i tī sím-mi̍h só͘-chāi? In chiū kā I kóng, Chú ah, lâi khì khòaⁿ. 35 Iâ-so͘ lâu ba̍k-sái. 36 Iû-thài lâng chiū kóng, Lí khòaⁿ, I thiàⁿ chit lâng kàu án-ni! 37 Kî-tiong ū-ê kóng, I bat khui chhiⁿ-mî lâng ê ba̍k-chiu, kiám bōe hō͘ chit lâng bô sí mah? 38 Iâ-so͘ koh chhoeh-sim kàu bōng-ni̍h. Hit ê bōng sī chio̍h-tōng, ū chi̍t tè chio̍h that hē-teh. 39 Iâ-so͘ kóng, Sóa-khui hit tè chio̍h. Sí lâng ê chí-bē Má-tāi kā I kóng, Chú ah, taⁿ chhàu lah; í-keng sí sì ji̍t lah. 40 Iâ-so͘ kā i kóng, Góa kiám bô kā lí kóng, lí nā sìn, ōe khòaⁿ-kìⁿ Siōng-tè ê êng-kng mah? 41 In chiū sóa-khui hit tè chio̍h. Iâ-so͘ kia̍h ba̍k ǹg thiⁿ, kóng, Pē ah, Góa kám-siā lí, in-ūi lí í-keng thiaⁿ góa. 42 Góa chai lí siông-siông thiaⁿ góa; to̍k-to̍k góa kóng án-ni, sī ūi-tio̍h chiu-ûi teh khiā ê chèng lâng, hō͘ in sìn lí chhe góa. 43 Kóng soah, chiū tōa siaⁿ âu-kiò, kóng, Lia̍p-sat-lō͘, chhut-lâi. 44 Sí lâng chiū chhut-lâi, chhiú kha chat pò͘, bīn pau kun. Iâ-so͘ kā in kóng, Tháu-khui, hō͘ i kiâⁿ. 45 Chiū-kūn Má-lī-a ê Iû-thài lâng, khòaⁿ-kìⁿ Iâ-so͘ só͘ kiâⁿ ê tāi-chì ê, chōe-chōe sìn I. 46 To̍k-to̍k kî-tiong ū-ê khì chhē Hoat-lī-sài lâng, chiong Iâ-so͘ só͘ kiâⁿ ê tāi-chì kā in kóng. 47 Tùi án-ni chiah ê chè-si-thâu kap Hoat-lī-sài lâng chū-chi̍p kong-hōe, kóng, Lán teh chhòng sím-mi̍h? in-ūi chit lâng kiâⁿ chōe-chōe sîn-jiah. 48 Lán nā iông-ún I án-ni, chèng lâng beh sìn I; ia̍h Lô-má lâng beh lâi, siu-si̍p lán ê tōe-hng kap peh-sìⁿ. 49 Kî-tiong chi̍t lâng, chiū-sī Kai-a-hoat, hit nî chòe chè-si-thâu ê, kā in kóng, Lín m̄ chai pòaⁿ-hāng, ia̍h bô siūⁿ, 50 chi̍t lâng thòe peh-sìⁿ sí, hō͘ thong kok bián bia̍t-bô, sī lín ê lī-ek. 51 I kóng chit ê ōe, m̄ sī tùi ka-kī; sī in-ūi hit nî i chòe chè-si-thâu, chhàm-gú Iâ-so͘ beh ūi-tio̍h chit ê peh-sìⁿ sí; 52 koh m̄ nā ūi-tio̍h chit ê peh-sìⁿ; ia̍h sī beh chū-chi̍p Siōng-tè sì-sòaⁿ ê kiáⁿ-jî ha̍p chòe chi̍t-ê. 53 Só͘-í tùi hit ji̍t, in kè-bô͘ beh thâi I. 54 Tùi án-ni Iâ-so͘ bô koh hián-jiân kiâⁿ tī Iû-thài lâng ê tiong-kan, chiū lī-khui hia, khì kūn khòng-iá ê tōe, kàu chi̍t ê siâⁿ, miâ Í-hoat-liân; kap ha̍k-seng tòa hia. 55 Iû-thài lâng pôaⁿ-kè-choeh kūn lah; choeh-kî chêng, chōe-chōe lâng tùi hiuⁿ-siā chiūⁿ Iâ-lō͘-sat-léng, beh ka-kī chheng-khì. 56 In chiū chhē Iâ-so͘, koh khiā tī tiān-lāi, saⁿ-kap kóng, Lín phah-sǹg cháiⁿ-iūⁿ? I bô beh lâi hù choeh mah? 57 Chiah ê chè-si-thâu kap Hoat-lī-sài lâng í-keng chhut bēng-lēng, nā ū lâng chai I tī tá-lo̍h, chiū tio̍h lâi pò, hō͘ in thang khì lia̍h I.
1 所以耶穌tī pôaⁿ過節前六日到伯大尼，就是拉撒路所tòa ê所在；伊是耶穌tùi死人中hō͘伊koh活ê。 2 In就tī hia為tio̍h耶穌備辦ê-hng頓；馬大teh伺候；拉撒路亦是同桌ê一个。 3 馬利亞就the̍h一斤極貴氣真ê ná-ta̍t香油，抹耶穌ê腳，koh用家己ê頭毛拭伊ê腳，香油ê芳滿厝。 4 有伊ê學生一个，beh賣伊ê，就是加略人偤大，講， 5 啥事m̄將chitê膏油賣銀á三百個，來hō͘ sòng-hiong人ah？ 6 伊講án-ni，m̄是因為伊關心tī sòng-hiong人；是因為伊是賊，koh管錢袋偷the̍h所hē ê nā-tiāⁿ。 7 耶穌就講，chhut-chāi伊將chitê留teh，到我埋葬ê日。 8 因為常常有sòng-hiong人kap lín tī-teh；但是我無常常kap lín tī-teh。 9 偤太ê百姓chōe-chōe知耶穌tī hia；就來，m̄-nā因為耶穌ê緣故，亦ài beh看伊所hō͘伊tùi死人中koh活ê拉撒路。 10 獨獨chiahê祭司頭計謀beh續刣死拉撒路； 11 因為偤太人chōe-chōe為tio̍h伊ê緣故，去信耶穌。 12 隔日，有chōe-chōe赴節ê人，已經聽見耶穌beh到耶路撒冷， 13 就kia̍h棕樹枝，出去迎接伊，叫講，和散那，奉主ê名來ê，就是以色列ê王，願伊得tio̍h o-ló。 14 耶穌得tio̍h一隻細隻驢，騎伊；親像聖經所記，郇城ê cha-bó͘-kiáⁿ ah，莫得驚； 15 你ê王來lah，khiā驢á-kiáⁿ。 16 學生起頭bōe 明chiahê事；到耶穌已經得tio̍h榮光ê時，chiah記得有記載chiahê事指伊，亦人果然對伊行chiahê事。 17 當耶穌叫拉撒路出墓，hō͘伊tùi死人中koh活ê時，kap伊tī-teh ê眾人做干證。 18 Tùi án-ni，眾人去迎接伊，因為聽見伊有行chitê神蹟。 19 法利賽人saⁿ-kap講，可見lín lóng無chhái-kang；lín看，thong世間lóng去tè伊lah。 20 當節期上來敬拜ê，中間有kúi-nā個希利尼人； 21 in就近加利利ê伯賽大人腓力，求伊講，先生ah，阮ài見耶穌。 22 腓力來kā安得烈講；安得烈kap腓力來kā耶穌講。 23 耶穌應講，人子得tio̍h榮光ê時到lah。 24 我實實kā lín講，一粒麥無落tī地裡來死，就猶原一粒nā-tiāⁿ；死，就結實chōe-chōe。 25 疼家己ê性命ê，就喪失伊；怨恨家己ê性命tī chit世間ê，的確保伊到永活。 26 人若服事我，就tio̍h tè我；我所tī-teh ê所在，服事我ê人亦beh tī hia；人若服事我，我ê父beh對重伊。 27 Taⁿ我ê心大擘腹；beh怎樣講？父ah，救我出chitê時。總是我為tio̍h chitê，chiah到tī chit時。 28 父ah，願你榮顯你ê名。就tùi天有聲講，我已經榮顯，beh koh再榮顯伊。 29 Khiā tī邊á ê眾人聽見就講，是雷tân；有人講，是天使kā伊講話。 30 耶穌應講，Chitê聲來，m̄是為tio̍h我，就是為tio̍h lín。 31 Tī chit-tia̍p chit世間受審判；tī chit-tia̍p chit世間ê人君beh受趕逐。 32 我若受舉起離開地，就beh引chhōa眾人就近我。 33 伊講chitê話，是指伊beh甚麼款來死。 34 眾人就應伊講，阮聽見律法有講，基督永永tī-teh；你怎樣講，人子tio̍h受舉起？chitê人子是是誰 ah？ 35 耶穌就kā in講，光tī lín ê中間iáu有tiap-á久ê時。Lín有光ê時，就tio̍h行，免得暗到tī lín；hitê行tī暗ê，伊m̄知行到tá-lo̍h。 36 Lín有光ê時，就tio̍h信光，hō͘ lín成做光明ê人。 耶穌講chiahê話，就離開in，家己隱密。 37 雖然tī in ê面前行chiah chōe神蹟，in猶原m̄信伊； 38 這是beh應驗先知以賽亞ê話，講， 主ah，阮所傳hō͘人聽，是誰信ah？ 主手骨ê力，tùi 是誰顯明ah？ 39 所以in bōe信；因為以賽亞koh有講， 主hō͘ in ê目睭chhiⁿ-mî，心硬； 免得in用目睭看見，用心曉悟， Oa̍t倒tńg， 就我醫好in。 40 41 以賽亞講chiahê，因為看見伊ê榮光，來論到伊。 42 雖然án-ni，in ê序大卻有chōe-chōe信伊；為tio̍h法利賽人chiah無認伊，免得kek出會堂； 43 因為in意愛tùi人來ê榮光，khah過頭tùi上帝來ê榮光。 44 耶穌叫講，信我ê人m̄是信我，就是信差我ê。 45 看見我ê，就是看見差我ê。 46 我就是光來入世間，hō͘見若信我ê人無khiā起tī暗。 47 人若聽我ê話亦m̄守，我無審判伊；因為我來，m̄是beh審判世間，是beh救世間。 48 棄sak我，亦m̄接納我ê話ê人，就有審判伊ê，就是我所講ê道理，beh tī末日審判伊。 49 因為我所講m̄是出tī家己；就是差我ê父，伊有命令我，tio̍h傳甚麼，講甚麼。 50 我知伊ê命令是永活；所以我所講ê，是照父所傳hō͘我ê，來講伊。
1 Só͘-í Iâ-so͘ tī pôaⁿ-kè-choeh chêng la̍k ji̍t kàu Pek-tāi-nî, chiū-sī Lia̍p-sat-lō͘ só͘ tòa ê só͘-chāi; i sī Iâ-so͘ tùi sí-lâng tiong hō͘ i koh-oa̍h ê. 2 In chiū tī hia ūi-tio̍h Iâ-so͘ pī-pān ê-hng tǹg; Má-tāi teh su-hāu; Lia̍p-sat-lō͘ ia̍h sī tâng toh ê chi̍t-ê. 3 Má-lī-a chiū the̍h chi̍t kun ke̍k kùi-khì chin ê ná-ta̍t hiuⁿ-iû, boah Iâ-so͘ ê kha, koh ēng ka-kī ê thâu-mn̂g chhit I ê kha, hiuⁿ-iû ê phang móa chhù. 4 Ū I ê ha̍k-seng chi̍t ê, beh bōe I ê, chiū-sī Ka-lio̍k lâng Iû-tāi, kóng, 5 Siáⁿ-sū m̄ chiong chit ê ko-iû bōe gûn-á saⁿ-pah ê, lâi hō͘ sòng-hiong lâng ah? 6 I kóng án-ni, m̄ sī in-ūi i koan-sim tī sòng-hiong lâng; sī in-ūi i sī chha̍t, koh koán chîⁿ-tē thau-the̍h só͘ hē ê nā-tiāⁿ. 7 Iâ-so͘ chiū kóng, Chhut-chāi i chiong chit-ê lâu-teh, kàu góa bâi-chòng ê ji̍t. 8 In-ūi siông-siông ū sòng-hiong lâng kap lín tī-teh; nā-sī góa bô siông-siông kap lín tī-teh. 9 Iû-thài ê peh-sìⁿ chōe-chōe chai Iâ-so͘ tī hia; chiū lâi, m̄ nā in-ūi Iâ-so͘ ê iân-kò͘, ia̍h ài beh khòaⁿ I só͘ hō͘ i tùi sí-lâng tiong koh-oa̍h ê Lia̍p-sat-lō͘. 10 To̍k-to̍k chiah ê chè-si-thâu kè-bô͘ beh sòa thâi-sí Lia̍p-sat-lō͘; 11 in-ūi Iû-thài lâng chōe-chōe ūi-tio̍h i ê iân-kò͘, khì sìn Iâ-so͘. 12 Keh ji̍t, ū chōe-chōe hù choeh ê lâng, í-keng thiaⁿ-kìⁿ Iâ-so͘ beh kàu Iâ-lō͘-sat-léng, 13 chiū kia̍h chang-chhiū ki, chhut-khì ngiâ-chih I, kiò kóng, Hô-sàn-ná, hōng Chú ê miâ lâi ê, chiū-sī Í-sek-lia̍t ê ông, goān I tit-tio̍h o-ló. 14 Iâ-so͘ tit-tio̍h chi̍t chiah sòe chiah lû, khiâ i; chhin-chhiūⁿ sèng-keng só͘ kì, Sûn-siâⁿ ê cha-bó͘-kiáⁿ ah, bo̍h-tit kiaⁿ; 15 lí ê Ông lâi lah, khiā lû-á-kiáⁿ. 16 Ha̍k-seng khí-thâu bōe bêng chiah ê sū; kàu Iâ-so͘ í-keng tit-tio̍h êng-kng ê sî, chiah kì-tit ū kì-chài chiah ê sū chí I, ia̍h lâng kó-jiân tùi I kiâⁿ chiah ê sū. 17 Tng Iâ-so͘ kiò Lia̍p-sat-lō͘ chhut bōng, hō͘ i tùi sí-lâng tiong koh-oa̍h ê sî, kap I tī-teh ê chèng lâng chòe kan-chèng. 18 Tùi án-ni chèng lâng khì ngiâ-chih I, in-ūi thiaⁿ-kìⁿ I ū kiâⁿ chit ê sîn-jiah. 19 Hoat-lī-sài lâng saⁿ-kap kóng, Khó-kiàn lín lóng bô chhái-kang; lín khòaⁿ, thong sè-kan lóng khì tè I lah. 20 Tng choeh-kî chiūⁿ lâi kèng-pài ê, tiong-kan ū kúi-nā ê Hi-lī-nî lâng; 21 in chiū-kūn Ka-lī-lī ê Pek-sài-tāi lâng Hui-le̍k, kiû i kóng, Sian-siⁿ ah, goán ài kìⁿ Iâ-so͘. 22 Hui-le̍k lâi kā An-tek-lia̍t kóng; An-tek-lia̍t kap Hui-le̍k lâi kā Iâ-so͘ kóng. 23 Iâ-so͘ ìn kóng, Jîn-chú tit-tio̍h êng-kng ê sî kàu lah. 24 Góa si̍t-si̍t kā lín kóng, Chi̍t lia̍p be̍h bô lo̍h tī tōe-ni̍h lâi sí, chiū iû-goân chi̍t lia̍p nā-tiāⁿ; sí, chiū kiat-si̍t chōe-chōe. 25 Thiàⁿ ka-kī ê sìⁿ-miā ê, chiū sòng-sit i; oàn-hūn ka-kī ê sìⁿ-miā tī chit sè-kan ê, tek-khak pó i kàu éng-oa̍h. 26 Lâng nā ho̍k-sāi góa, chiū tio̍h tè góa; góa só͘ tī-teh ê só͘-chāi, ho̍k-sāi góa ê lâng ia̍h beh tī hia; lâng nā ho̍k-sāi góa, góa ê Pē beh tùi-tiōng i. 27 Taⁿ góa ê sim tōa peh-pak; beh cháiⁿ-iūⁿ kóng? Pē ah, kiù góa chhut chit ê sî. Chóng-sī góa ūi-tio̍h chit-ê, chiah kàu tī chit sî. 28 Pē ah, goān lí êng-hián lí ê miâ. Chiū tùi thiⁿ ū siaⁿ kóng, Góa í-keng êng-hián, beh koh-chài êng-hián i. 29 Khiā tī piⁿ-á ê chèng lâng thiaⁿ-kìⁿ chiū kóng, Sī lûi tân; ū lâng kóng, sī thiⁿ-sài kā I kóng ōe. 30 Iâ-so͘ ìn kóng, Chit ê siaⁿ lâi, m̄ sī ūi-tio̍h góa, chiū-sī ūi-tio̍h lín. 31 Tī chit tia̍p chit sè-kan siū sím-phòaⁿ; tī chit tia̍p chit sè-kan ê jîn-kun beh siū kóaⁿ-tio̍k. 32 Góa nā siū kú-khí lī-khui tōe, chiū beh ín-chhōa chèng lâng chiū-kūn góa. 33 I kóng chit ê ōe, sī chí I beh sím-mi̍h khoán lâi sí. 34 Chèng lâng chiū ìn I kóng, Goán thiaⁿ-kìⁿ lu̍t-hoat ū kóng, Ki-tok éng-éng tī-teh; lí cháiⁿ-iūⁿ kóng, Jîn-chú tio̍h siū kú-khí? chit ê Jîn-chú sī chī-chūi ah? 35 Iâ-so͘ chiū kā in kóng, Kng tī lín ê tiong-kan iáu ū tiap-á kú ê sî. Lín ū kng ê sî, chiū tio̍h kiâⁿ, bián-tit àm kàu tī lín; hit-ê kiâⁿ tī àm ê, i m̄ chai kiâⁿ kàu tá-lo̍h. 36 Lín ū kng ê sî, chiū tio̍h sìn kng, hō͘ lín chiâⁿ-chòe kng-bêng ê lâng. Iâ-so͘ kóng chiah ê ōe, chiū lī-khui in, ka-kī ún-ba̍t. 37 Sui-jiân tī in ê bīn-chêng kiâⁿ chiah chōe sîn-jiah, in iû-goân m̄ sìn I; 38 che sī beh èng-giām sian-ti Í-sài-a ê ōe, kóng, Chú ah, goán só͘ thoân hō͘ lâng thiaⁿ, chī-chūi sìn ah? Chú chhiú-kut ê la̍t, tùi chī-chūi hián-bêng ah? 39 Só͘-í in bōe sìn; in-ūi Í-sài-a koh ū kóng, Chú hō͘ in ê ba̍k-chiu chhiⁿ-mî, sim ngī; Bián-tit in ēng ba̍k-chiu khòaⁿ-kìⁿ, ēng sim hiáu-ngō͘, Oa̍t-tò-tńg, Chiū góa i-hó in. 40 41 Í-sài-a kóng chiah-ê, in-ūi khòaⁿ-kìⁿ I ê êng-kng, lâi lūn-kàu I. 42 Sui-jiân án-ni, in ê sī-tōa khiok ū chōe-chōe sìn I; ūi-tio̍h Hoat-lī-sài lâng chiah bô jīn I, bián-tit kek-chhut hōe-tn̂g; 43 in-ūi in ì-ài tùi lâng lâi ê êng-kng, khah kè-thâu tùi Siōng-tè lâi ê êng-kng. 44 Iâ-so͘ kiò kóng, Sìn góa ê lâng m̄ sī sìn góa, chiū-sī sìn chhe góa ê. 45 Khòaⁿ-kìⁿ góa ê, chiū-sī khòaⁿ-kìⁿ chhe góa ê. 46 Góa chiū-sī kng lâi ji̍p sè-kan, hō͘ kìⁿ-nā sìn góa ê lâng bô khiā-khí tī àm. 47 Lâng nā thiaⁿ góa ê ōe ia̍h m̄ siú, góa bô sím-phòaⁿ i; in-ūi góa lâi, m̄ sī beh sím-phòaⁿ sè-kan, sī beh kiù sè-kan. 48 Khì-sak góa, ia̍h m̄ chiap-la̍p góa ê ōe ê lâng, chiū ū sím-phòaⁿ i ê, chiū-sī góa só͘ kóng ê tō-lí, beh tī boa̍t-ji̍t sím-phòaⁿ i. 49 In-ūi góa só͘ kóng m̄ sī chhut tī ka-kī; chiū-sī chhe góa ê Pē, I ū bēng-lēng góa, tio̍h thoân sím-mi̍h, kóng sím-mi̍h. 50 Góa chai I ê bēng-lēng sī éng-oa̍h; só͘-í góa só͘ kóng ê, sī chiàu Pē só͘ thoân hō͘ góa ê, lâi kóng i.
1 pôaⁿ過節前，耶穌知伊離開chit世間歸tī父ê時到，已經疼tī世間屬伊ê人，到尾亦疼in。 2 食ê-hng頓ê時，魔鬼已經將賣耶穌ê意思hē tī 加略人西門ê kiáⁿ偤大ê心； 3 耶穌知父已經將萬物交tī伊ê手，koh知伊tùi上帝出，亦beh歸tī上帝， 4 就離開桌，thǹg衫；the̍h巾家己hâ。 5 倒水tī盤裡，洗學生ê腳，將所hâ ê巾kā in拭。 6 洗到西門彼得，彼得kā伊講，主ah，你洗我ê腳mah？ 7 耶穌應伊講，我所做ê，你現今m̄知，後來就會曉得。 8 彼得講，你永遠無thang洗我ê腳。耶穌應伊講，我無kā你洗，你就kap我無干涉。 9 西門彼得kā伊講，主ah，m̄-nā我ê腳，連手kap頭殼亦tio̍h。 10 耶穌kā伊講，人洗浴了，只有tio̍h洗腳，就齊全清氣；lín chiahê是清氣，但是無ta̍k-ê án-ni。 11 因為耶穌知賣伊ê人是是誰；所以講，Lín無ta̍k-ê清氣。 12 已經洗in ê腳，穿衫koh坐，就kā in講，我對lín所有行ê，lín知mah？ 13 Lín稱呼我先生ah，主ah；lín ê話tio̍h；我實在是。 14 我做主，做先生，尚且kā lín洗腳，lín亦tio̍h相仝洗腳。 15 因為我已經用模樣hō͘ lín，hō͘ lín照我所對lín行ê來行。 16 我實實kā lín講，奴僕無khah大伊ê主人；奉差ê無khah大差伊ê。 17 Lín既然知chiahê事，若去行伊，就有福氣。 18 我m̄是指lín眾人來講；我所揀ê，我知in；獨獨beh hō͘聖經應驗，食我ê餅ê人kia̍h起腳後tiⁿ踢我。 19 Taⁿ tāi-chì iáu-bē成，我先kā lín講；到tāi-chì成，hō͘ lín信我就是伊。 20 我實實kā lín講，接納我所差ê，就是接納我，接納我，就是接納差我ê。 21 耶穌講án-ni，心內大擘腹，就干證講，我實實kā lín講，lín中間一人beh賣我。 22 學生相看，想m̄出伊是講甚麼人。 23 有一个學生，就是耶穌所疼ê，撐近耶穌ê胸前。 24 西門彼得tìm頭kā伊講，請kā阮講，伊所講ê是甚麼人。 25 伊就hiàⁿ身óa耶穌ê胸坎，kā伊講，主ah，是是誰？ 26 耶穌就應講，我ùn一塊á物hō͘伊，hitê人就是。隨時ùn一塊á，the̍h hō͘ 加略人西門ê kiáⁿ偤大。 27 伊受物了後，撒旦就入伊ê心。耶穌就kā伊講，你所做ê，緊緊去做。 28 同桌ê人，無人知為tio̍h怎樣對伊講chitê。 29 因為偤大管錢袋，有人phah算，敢是耶穌kā伊講，你去買咱守節所欠用ê；á是kah伊去賑濟sòng-hiong人。 30 偤大接tio̍h hitê物，liâm-piⁿ出去；hit時暝時。 31 已經出去，耶穌講，Taⁿ人子得tio̍h榮光，上帝亦tī伊得tio̍h榮光； 32 koh上帝beh tī本身榮光人子，亦beh liâm-piⁿ榮光伊。 33 細kiáⁿ ah，我iáu有tiap-á久kap lín tī-teh。Lín beh chhē我；我所去ê所在，lín bōe能到；我bat kā偤太人講，taⁿ亦án-ni kā lín講。 34 我用新ê誡命hō͘ lín，就是lín tio̍h相疼；親像我bat疼lín，lín亦tio̍h án-ni相疼。 35 Lín若相疼，眾人beh tùi án-ni知lín是我ê學生。 36 西門彼得kā伊講，主ah，beh tá-lo̍h去？耶穌應伊講，我所去ê所在，你現時bōe tè我；後來beh tè我。 37 彼得kā伊講，主ah，我現時怎樣bōe tè你ah？我beh為tio̍h你放sak性命。 38 耶穌應講，你beh為tio̍h我放sak你ê性命mah？我實實kā你講，雞iáu-bē啼，你beh三pái m̄認我。
1 Pôaⁿ-kè-choeh chêng, Iâ-so͘ chai I lī-khui chit sè-kan kui tī Pē ê sî kàu, í-keng thiàⁿ tī sè-kan sio̍k I ê lâng, kàu bé ia̍h thiàⁿ in. 2 Chia̍h ê-hng tǹg ê sî, Mô͘-kúi í-keng chiong bōe Iâ-so͘ ê ì-sù hē tī Ka-lio̍k lâng Se-bûn ê kiáⁿ Iû-tāi ê sim; 3 Iâ-so͘ chai Pē í-keng chiong bān mi̍h kau tī I ê chhiú, koh chai I tùi Siōng-tè chhut, ia̍h beh kui tī Siōng-tè, 4 chiū lī-khui toh, thǹg saⁿ; the̍h kun ka-kī hâ. 5 Tò chúi tī pôaⁿ-ni̍h, sóe ha̍k-seng ê kha, chiong só͘ hâ ê kun kā in chhit. 6 Sóe kàu Se-bûn Pí-tek. Pí-tek kā I kóng, Chú ah, lí sóe góa ê kha mah? 7 Iâ-so͘ ìn i kóng, Góa só͘ chòe ê, lí hiān-kim m̄ chai, āu-lâi chiū ōe hiáu-tit. 8 Pí-tek kóng, Lí éng-oán bô thang sóe góa ê kha. Iâ-so͘ ìn i kóng, Góa bô kā lí sóe, lí chiū kap góa bô kan-sia̍p. 9 Se-bûn Pí-tek kā I kóng, Chú ah, m̄ nā góa ê kha, liân chhiú kap thâu-khak ia̍h tio̍h. 10 Iâ-so͘ kā i kóng, Lâng sóe-e̍k liáu, chí-ū tio̍h sóe kha, chiū chiâu-chn̂g chheng-khì; lín chiah-ê sī chheng-khì, nā-sī bô ta̍k-ê án-ni. 11 In-ūi Iâ-so͘ chai bōe I ê lâng sī chī-chūi; só͘-í kóng, Lín bô ta̍k-ê chheng-khì. 12 Í-keng sóe in ê kha, chhēng saⁿ koh chē, chiū kā in kóng, Góa tùi lín só͘ ū kiâⁿ ê, lín chai mah? 13 Lín chheng-ho͘ góa Sian-siⁿ ah, Chú ah; lín ê ōe tio̍h; góa si̍t-chāi sī. 14 Góa chòe Chú, chòe Sian-siⁿ, siōng-chhiáⁿ kā lín sóe kha, lín ia̍h tio̍h saⁿ-kāng sóe kha. 15 In-ūi góa í-keng ēng bô͘-iūⁿ hō͘ lín, hō͘ lín chiàu góa só͘ tùi lín kiâⁿ ê lâi kiâⁿ. 16 Góa si̍t-si̍t kā lín kóng, Lô͘-po̍k bô khah tōa i ê chú-lâng; hōng chhe ê bô khah tōa chhe i ê. 17 Lín kì-jiân chai chiah ê sū, nā khì kiâⁿ i, chiū ū hok-khì. 18 Góa m̄ sī chí lín chèng lâng lâi kóng; góa só͘ kéng ê, góa chai in; to̍k-to̍k beh hō͘ sèng-keng èng-giām, Chia̍h góa ê piáⁿ ê lâng kia̍h-khí kha-āu-tiⁿ that góa. 19 Taⁿ tāi-chì iáu-bē chiâⁿ, góa seng kā lín kóng; kàu tāi-chì chiâⁿ, hō͘ lín sìn góa chiū-sī I. 20 Góa si̍t-si̍t kā lín kóng, Chiap-la̍p góa só͘ chhe ê, chiū-sī chiap-la̍p góa, chiap-la̍p góa, chiū-sī chiap-la̍p chhe góa ê. 21 Iâ-so͘ kóng án-ni, sim-lāi tōa peh-pak, chiū kan-chèng kóng, Góa si̍t-si̍t kā lín kóng, lín tiong-kan chi̍t lâng beh bōe góa. 22 Ha̍k-seng saⁿ-khòaⁿ, siūⁿ m̄ chhut I sī kóng sím-mi̍h lâng. 23 Ū chi̍t ê ha̍k-seng, chiū-sī Iâ-so͘ só͘ thiàⁿ ê, the kūn Iâ-so͘ ê heng-chêng. 24 Se-bûn Pí-tek tìm thâu kā i kóng, Chhiáⁿ kā goán kóng, I só͘ kóng ê sī sím-mi̍h lâng. 25 I chiū hiàⁿ sin óa Iâ-so͘ ê heng-khám, kā I kóng, Chú ah, sī chī-chūi? 26 Iâ-so͘ chiū ìn kóng, Góa ùn chi̍t tè-á mi̍h hō͘ i, hit ê lâng chiū-sī. Sûi-sî ùn chi̍t tè-á, the̍h hō͘ Ka-lio̍k lâng Se-bûn ê kiáⁿ Iû-tāi. 27 I siū mi̍h liáu-āu, Sat-tàn chiū ji̍p i ê sim. Iâ-so͘ chiū kā i kóng, Lí só͘ chòe ê, kín-kín khì chòe. 28 Tâng toh ê lâng, bô lâng chai ūi-tio̍h cháiⁿ-iūⁿ tùi i kóng chit-ê. 29 In-ūi Iû-tāi koán chîⁿ-tē, ū lâng phah-sǹg, káⁿ sī Iâ-so͘ kā i kóng, Lí khì bóe lán siú choeh só͘ khiàm-ēng ê; á-sī kah i khì chín-chè sòng-hiong lâng. 30 Iû-tāi chih-tio̍h hit ê mi̍h, liâm-piⁿ chhut-khì; hit sî mî-sî. 31 Í-keng chhut-khì, Iâ-so͘ kóng, Taⁿ Jîn-chú tit-tio̍h êng-kng, Siōng-tè ia̍h tī I tit-tio̍h êng-kng; 32 koh Siōng-tè beh tī pún-sin êng-kng Jîn-chú, ia̍h beh liâm-piⁿ êng-kng I. 33 Sòe-kiáⁿ ah, góa iáu ū tiap-á-kú kap lín tī-teh. Lín beh chhē góa; góa só͘ khì ê só͘-chāi, lín bōe-ōe kàu; góa bat kā Iû-thài lâng kóng, taⁿ ia̍h án-ni kā lín kóng. 34 Góa ēng sin ê kài-bēng hō͘ lín, chiū-sī lín tio̍h saⁿ-thiàⁿ; chhin-chhiūⁿ góa bat thiàⁿ lín, lín ia̍h tio̍h án-ni saⁿ-thiàⁿ. 35 Lín nā saⁿ-thiàⁿ, chèng lâng beh tùi án-ni chai lín sī góa ê ha̍k-seng. 36 Se-bûn Pí-tek kā I kóng, Chú ah, beh tá-lo̍h khì? Iâ-so͘ ìn i kóng, Góa só͘ khì ê só͘-chāi, lí hiān-sî bōe tè góa; āu-lâi beh tè góa. 37 Pí-tek kā I kóng, Chú ah, góa hiān-sî cháiⁿ-iūⁿ bōe tè lí ah? Góa beh ūi-tio̍h lí pàng-sak sìⁿ-miā. 38 Iâ-so͘ ìn kóng, Lí beh ūi-tio̍h góa pàng-sak lí ê sìⁿ-miā mah? Góa si̍t-si̍t kā lí kóng, Koe iáu-bē thî, lí beh saⁿ pái m̄ jīn góa.
1 Lín ê心莫得擘腹；lín tio̍h信上帝，亦tio̍h信我。 2 Tī我ê父ê家，有chōe-chōe厝宅；若無，就我已經kā lín講lah；因為我去，是kā lín備辦所在。 3 若去kā lín備辦所在，就beh koh來，接納lín歸tī我；hō͘我所tī-teh ê，lín亦tī hia。 4 我所去ê所在，lín bat hit條路。 5 多馬kā伊講，主ah，你去ê所在，阮都m̄知；thài會知hit條路ah？ 6 耶穌kā伊講，我就是路，是真理，是活命；若無tùi我，就無人就近父。 7 Lín若已經bat我，就亦bat我ê父；taⁿ了後lín bat伊，亦bat看見伊。 8 腓力kā伊講，主ah，用父hō͘阮看，就夠額。 9 耶穌kā伊講，腓力，我kap lín tiàm到chiah久，你iáu m̄-bat我mah？已經看見我ê，就是看見父；你怎樣講，用父hō͘阮看ah？ 10 我tiàm-tī父，父亦tiàm-tī我，你m̄信mah？我所kā lín講ê話，m̄是出tī家己來講；就是父tòa tī我來行伊ê tāi-chì。 11 我tiàm-tī父，父tiàm-tī我，lín tio̍h信我；若無，就tio̍h因為所行ê事來信我。 12 我實實kā lín講，信我ê人，我所行ê，伊beh行伊；就比chiahê事khah大ê，亦beh行伊；因為我歸tī父。 13 Lín tī我ê名，凡所求ê，我beh行伊；hō͘父tī Kiáⁿ得tio̍h榮光。 14 Lín若tī我ê名有所求我ê，我beh行伊。 15 Lín若疼我，就beh守我ê命令。 16 我亦beh對父求，就伊beh用koh一个保惠師hō͘ lín，hō͘伊永遠kap lín tòa； 17 就是真理ê神；世間所bōe接納ê，因為無看見伊，koh m̄-bat伊；獨獨lín bat伊；因為伊kap lín saⁿ-kap tòa，koh beh tiàm-tī lín。 18 我無beh放lín做無父ê kiáⁿ；我來就近lín。 19 Iáu tiap-á久，世間無koh看見我；獨獨lín看見我；因為我活，lín亦活。 20 Hit日lín beh知我tiàm-tī我ê父，lín tiàm-tī我，我tiàm-tī lín。 21 有我ê命令，koh守伊ê人，chitê就是疼我；疼我ê人，beh得tio̍h我ê父疼伊，我亦beh疼伊，koh將本身顯明tī伊。 22 有偤大(m̄是加略人ê) ，kā伊講，主ah，有甚麼事你beh將本身顯明tī阮，無顯明tī世間ah？ 23 耶穌應伊講，人若疼我，伊beh守我ê道理，我ê父beh疼伊，阮亦beh就近伊，koh kap伊同khiā起。 24 無疼我ê人，就無守我chiahê話；koh lín所聽ê道理，m̄是我ê，就是差我ê父ê。 25 我iáu kap lín tòa ê時，有將chiahê話kā lín講。 26 但是保惠師，就是聖神，父tī我ê名所beh差ê，伊beh將一切ê事教示lín，koh beh hō͘ lín記得我一切所kā lín講ê。 27 我用平安留teh hō͘ lín；我將我ê平安賞賜lín；我teh hō͘ lín，m̄是親像世間teh hō͘人ê款。Lín ê心莫得擘腹，亦莫得驚惶。 28 Lín已經聽見我有kā lín講，我去，koh來就近lín。Lín若疼我，就因為我歸tī父lín會歡喜；因為父比我khah大。 29 Taⁿ事iáu-bē成，我已經kā lín講，hō͘ lín tī事成ê時thang信。 30 以後我無kap lín講chōe-chōe話，因為世間ê人君teh來lah；伊tī我無所有； 31 獨獨beh hō͘世間知我疼父，亦照父所命令我ê，我án-ni來行。起來，咱tùi chia來去。
1 Lín ê sim bo̍h-tit peh-pak; lín tio̍h sìn Siōng-tè, ia̍h tio̍h sìn góa. 2 Tī góa ê Pē ê ke, ū chōe-chōe chhù-the̍h; nā bô, chiū góa í-keng kā lín kóng lah; in-ūi góa khì, sī kā lín pī-pān só͘-chāi. 3 Nā khì kā lín pī-pān só͘-chāi, chiū beh koh lâi, chiap-la̍p lín kui tī góa; hō͘ góa só͘ tī-teh ê, lín ia̍h tī hia. 4 Góa só͘ khì ê só͘-chāi, lín bat hit tiâu lō͘. 5 To-má kā I kóng, Chú ah, lí khì ê só͘-chāi, goán to m̄ chai; thái ōe chai hit tiâu lō͘ ah? 6 Iâ-so͘ kā i kóng, Góa chiū-sī lō͘, sī chin-lí, sī oa̍h-miā; nā bô tùi góa, chiū bô lâng chiū-kūn Pē. 7 Lín nā í-keng bat góa, chiū ia̍h bat góa ê Pē; taⁿ liáu-āu lín bat I, ia̍h bat khòaⁿ-kìⁿ I. 8 Hui-le̍k kā I kóng, Chú ah, ēng Pē hō͘ goán khòaⁿ, chiū kàu-gia̍h. 9 Iâ-so͘ kā i kóng, Hui-le̍k, góa kap lín tiàm kàu chiah kú, lí iáu m̄ bat góa mah? í-keng khòaⁿ-kìⁿ góa ê, chiū-sī khòaⁿ-kìⁿ Pē; lí cháiⁿ-iūⁿ kóng, Ēng Pē hō͘ goán khòaⁿ ah? 10 Góa tiàm-tī Pē, Pē ia̍h tiàm-tī góa, lí m̄ sìn mah? Góa só͘ kā lín kóng ê ōe, m̄ sī chhut tī ka-kī lâi kóng; chiū-sī Pē tòa tī góa lâi kiâⁿ I ê tāi-chì. 11 Góa tiàm-tī Pē, Pē tiàm-tī góa, lín tio̍h sìn góa; nā bô, chiū tio̍h in-ūi só͘ kiâⁿ ê sū lâi sìn góa. 12 Góa si̍t-si̍t kā lín kóng, Sìn góa ê lâng, góa só͘ kiâⁿ ê, i beh kiâⁿ i; chiū pí chiah ê sū khah tōa ê, ia̍h beh kiâⁿ i; in-ūi góa kui tī Pē. 13 Lín tī góa ê miâ, hoān só͘ kiû ê, góa beh kiâⁿ i; hō͘ Pē tī Kiáⁿ tit-tio̍h êng-kng. 14 Lín nā tī góa ê miâ ū só͘ kiû góa ê, góa beh kiâⁿ i. 15 Lín nā thiàⁿ góa, chiū beh siú góa ê bēng-lēng. 16 Góa ia̍h beh tùi Pē kiû, chiū I beh ēng koh chi̍t ê Pó-hūi-su hō͘ lín, hō͘ I éng-oán kap lín tòa; 17 chiū-sī chin-lí ê Sîn; sè-kan só͘ bōe chiap-la̍p ê, in-ūi bô khòaⁿ-kìⁿ I, koh m̄ bat I; to̍k-to̍k lín bat I; in-ūi I kap lín saⁿ-kap tòa, koh beh tiàm-tī lín. 18 Góa bô beh pàng lín chòe bô pē ê kiáⁿ; góa lâi chiū-kūn lín. 19 Iáu tiap-á-kú, sè-kan bô koh khòaⁿ-kìⁿ góa; to̍k-to̍k lín khòaⁿ-kìⁿ góa; in-ūi góa oa̍h, lín ia̍h oa̍h. 20 Hit ji̍t lín beh chai góa tiàm-tī góa ê Pē, lín tiàm-tī góa, góa tiàm-tī lín. 21 Ū góa ê bēng-lēng, koh siú i ê lâng, chit-ê chiū-sī thiàⁿ góa; thiàⁿ góa ê lâng, beh tit-tio̍h góa ê Pē thiàⁿ i, góa ia̍h beh thiàⁿ i, koh chiong pún-sin hián-bêng tī i. 22 Ū Iû-tāi, (m̄ sī Ka-lio̍k lâng ê), kā I kóng, Chú ah, ū sím-mi̍h sū lí beh chiong pún-sin hián-bêng tī goán, bô hián-bêng tī sè-kan ah? 23 Iâ-so͘ ìn i kóng, lâng nā thiàⁿ góa, i beh siú góa ê tō-lí, góa ê Pē beh thiàⁿ i, goán ia̍h beh chiū-kūn i, koh kap i tâng khiā-khí. 24 Bô thiàⁿ góa ê lâng, chiū bô siú góa chiah ê ōe; koh lín só͘ thiaⁿ ê tō-lí, m̄ sī góa ê, chiū-sī chhe góa ê Pē ê. 25 Góa iáu kap lín tòa ê sî, ū chiong chiah ê ōe kā lín kóng. 26 Nā-sī Pó-hūi-su, chiū-sī Sèng Sîn, Pē tī góa ê miâ só͘ beh chhe ê, I beh chiong it-chhè ê sū kà-sī lín, koh beh hō͘ lín kì-tit góa it-chhè só͘ kā lín kóng ê. 27 Góa ēng pêng-an lâu-teh hō͘ lín; góa chiong góa ê pêng-an siúⁿ-sù lín; góa teh hō͘ lín, m̄ sī chhin-chhiūⁿ sè-kan teh hō͘ lâng ê khoán. Lín ê sim bo̍h-tit peh-pak, ia̍h bo̍h-tit kiaⁿ-hiâⁿ. 28 Lín í-keng thiaⁿ-kìⁿ góa ū kā lín kóng, Góa khì, koh lâi chiū-kūn lín. Lín nā thiàⁿ góa, chiū in-ūi góa kui tī Pē lín ōe hoaⁿ-hí; in-ūi Pē pí góa khah tōa. 29 Taⁿ sū iáu-bē chiâⁿ, góa í-keng kā lín kóng, hō͘ lín tī sū chiâⁿ ê sî thang sìn. 30 Í-āu góa bô kap lín kóng chōe-chōe ōe, in-ūi sè-kan ê jîn-kun teh lâi lah; i tī góa bô só͘ ū; 31 to̍k-to̍k beh hō͘ sè-kan chai góa thiàⁿ Pē, ia̍h chiàu Pē só͘ bēng-lēng góa ê, góa án-ni lâi kiâⁿ. Khí-lâi, lán tùi chia lâi khì.
1 我是真ê葡萄樹，我ê父是作園ê人。 2 見若連tī我ê 枝無結果子ê，伊就刪起來；見若結果子ê，伊就修hō͘伊清氣，hō͘伊結果子koh-khah chōe。 3 Taⁿ lín因為我所kā lín講ê道理已經清氣lah。 4 Lín tio̍h tiàm-tī我，我亦tiàm-tī lín；設使枝無連tī葡萄樹，就bōe能家己結果子；lín若無tiàm-tī我，亦是án-ni。 5 我就是葡萄樹，lín就是枝；tiàm-tī我，也我tiàm-tī伊ê，就結果子chōe-chōe；因為kap我相離，lín就bōe做甚麼。 6 人若無tiàm-tī我，就受棄sak tī外面，親像枝，續枯焦；人拾in hiat落火，就燒去。 7 Lín若tiàm-tī我，我ê話tiàm-tī lín，凡若所ài ê lín tio̍h求，就beh kā lín成。 8 Lín結果子chōe-chōe，tùi án-ni，我ê父得tio̍h榮光；亦lín beh成做我ê學生。 9 我有疼lín，親像父有疼我；lín tio̍h tiàm-tī我ê疼。 10 Lín若守我ê誡命就beh tiàm-tī我ê疼，親像我有守我ê父ê誡命，tiàm-tī伊ê疼。 11 我已經用chiahê kā lín講，beh hō͘我ê歡喜tiàm-tī lín，亦hō͘ lín ê歡喜滿滿。 12 Lín tio̍h相疼，親像我有疼lín；這是我ê命令。 13 人為tio̍h朋友獻性命，疼無有比chitê khah大ê。 14 Lín若行我所命令lín ê，就是我ê朋友。 15 Taⁿ了後，我無叫lín做奴僕；因為奴僕m̄知伊ê主人ê所行；但是我已經叫lín做朋友；因為我tùi父所聽見ê，lóng有kā lín講。 16 m̄是lín揀我，是我揀lín，koh設立lín，hō͘ lín去結果子，koh hō͘ lín ê果子久長tī-teh；hō͘ lín tī我ê名，無論對父求甚麼，伊就hō͘ lín。 17 我用chiahê命令lín，是beh hō͘ lín相疼。 18 世間若怨恨lín，lín知伊iáu-bē怨恨lín，已經事先怨恨我。 19 Lín若屬世間，世間就疼伊家己ê；獨獨因為lín m̄是屬世間，就是我揀lín出世間，所以世間怨恨lín。 20 Lín tio̍h記得我所kā lín講ê話，講，奴僕無khah大伊ê主人。人若有khún-tio̍k我，亦beh khún-tio̍k lín；若有守我ê話亦beh守lín ê話。 21 但是in beh因為我ê名用chiahê一切ê事款待lín，是因為m̄-bat差我ê。 22 我若無來kā in講，in就無罪；taⁿ in ê罪無thang推辭lah。 23 怨恨我ê人，亦怨恨我ê父。 24 我若tī in中間m̄-bat行別人所bē bat行ê，in就無罪；但是taⁿ我kap我ê父，in亦有看見，亦有怨恨。 25 這是beh應驗in ê律法所記載ê話講，In無緣故怨恨我。 26 但是保惠師，就是真理ê神，tùi父出ê，我tùi父beh差伊就近lín；伊若到，beh為tio̍h我做干證；lín亦beh做干證， 27 因為lín tùi起頭kap我tī-teh。
1 Góa sī chin ê phû-tô chhiū, góa ê Pē sī choh-hn̂g ê lâng. 2 Kìⁿ-nā liân tī góa ê ki bô kiat ké-chí ê, I chiū san-khí-lâi; kìⁿ-nā kiat ké-chí ê, I chiū siu hō͘ i chheng-khì, hō͘ i kiat ké-chí koh khah chōe. 3 Taⁿ lín in-ūi góa só͘ kā lín kóng ê tō-lí í-keng chheng-khì lah. 4 Lín tio̍h tiàm-tī góa, góa ia̍h tiàm-tī lín; Siat-sú ki bô liân tī phû-tô chhiū, chiū bōe-ōe ka-kī kiat ké-chí; lín nā bô tiàm-tī góa, ia̍h sī án-ni. 5 Góa chiū-sī phû-tô chhiū, lín chiū-sī ki; tiàm tī góa, iā góa tiàm tī i ê, chiū kiat ké-chí chōe-chōe; in-ūi kap góa saⁿ-lī, lín chiū bōe chòe sím-mi̍h. 6 Lâng nā bô tiàm tī góa, chiū siū khì-sak tī gōa-bīn, chhin-chhiūⁿ ki, sòa ko͘-tâ; lâng khioh in hiat-lo̍h hé, chiū sio-khì. 7 Lín nā tiàm tī góa, góa ê ōe tiàm tī lín, hoān-nā só͘ ài ê lín tio̍h kiû, chiū beh kā lín chiâⁿ. 8 Lín kiat ké-chí chōe-chōe, tùi án-ni góa ê Pē tit-tio̍h êng-kng; ia̍h lín beh chiâⁿ-chòe góa ê ha̍k-seng. 9 Góa ū thiàⁿ lín, chhin-chhiūⁿ Pē ū thiàⁿ góa; lín tio̍h tiàm tī góa ê thiàⁿ. 10 Lín nā siú góa ê kài-bēng chiū beh tiàm tī góa ê thiàⁿ, chhin-chhiūⁿ góa ū siú góa ê Pē ê kài-bēng, tiàm tī I ê thiàⁿ. 11 Góa í-keng ēng chiah-ê kā lín kóng, beh hō͘ góa ê hoaⁿ-hí tiàm tī lín, ia̍h hō͘ lín ê hoaⁿ-hí móa-móa. 12 Lín tio̍h saⁿ-thiàⁿ, chhin-chhiūⁿ góa ū thiàⁿ lín; che sī góa ê bēng-lēng. 13 Lâng ūi-tio̍h pêng-iú hiàn sìⁿ-miā, thiàⁿ bô ū pí chit-ê khah tōa ê. 14 Lín nā kiâⁿ góa só͘ bēng-lēng lín ê, chiū-sī góa ê pêng-iú. 15 Taⁿ liáu-āu, góa bô kiò lín chòe lô͘-po̍k; in-ūi lô͘-po̍k m̄ chai i ê chú-lâng ê só͘ kiâⁿ; nā-sī góa í-keng kiò lín chòe pêng-iú; in-ūi góa tùi Pē só͘ thiaⁿ-kìⁿ ê, lóng ū kā lín kóng. 16 M̄ sī lín kéng góa, sī góa kéng lín, koh siat-li̍p lín, hō͘ lín khì kiat ké-chí, koh hō͘ lín ê ké-chí kú-tn̂g tī-teh; hō͘ lín tī góa ê miâ bô lūn tùi Pē kiû sím-mi̍h, I chiū hō͘ lín. 17 Góa ēng chiah-ê bēng-lēng lín, sī beh hō͘ lín saⁿ-thiàⁿ. 18 Sè-kan nā oàn-hūn lín, lín chai i iáu-bē oàn-hūn lín, í-keng tāi-seng oàn-hūn góa. 19 Lín nā sio̍k sè-kan, sè-kan chiū thiàⁿ i ka-kī ê; to̍k-to̍k in-ūi lín m̄ sī sio̍k sè-kan, chiū-sī góa kéng lín chhut sè-kan, só͘-í sè-kan oàn-hūn lín. 20 Lín tio̍h kì-tit góa só͘ kā lín kóng ê ōe, kóng, Lô͘-po̍k bô khah tōa i ê chú-lâng. Lâng nā ū khún-tio̍k góa, ia̍h beh khún-tio̍k lín; nā ū siú góa ê ōe ia̍h beh siú lín ê ōe. 21 Nā-sī in beh in-ūi góa ê miâ ēng chiah ê it-chhè ê sū khoán-thāi lín, sī in-ūi m̄ bat chhe góa ê. 22 Góa nā bô lâi kā in kóng, in chiū bô chōe; taⁿ in ê chōe bô thang the-sî lah. 23 Oàn-hūn góa ê lâng, ia̍h oàn-hūn góa ê Pē. 24 Góa nā tī in tiong-kan m̄ bat kiâⁿ pa̍t lâng só͘ bē bat kiâⁿ ê, in chiū bô chōe; nā-sī taⁿ góa kap góa ê Pē, in ia̍h ū khòaⁿ-kìⁿ, ia̍h ū oàn-hūn. 25 Che sī beh èng-giām in ê lu̍t-hoat só͘ kì-chài ê ōe kóng, In bô iân-kò͘ oàn-hūn góa. 26 Nā-sī Pó-hūi-su, chiū-sī chin-lí ê Sîn, tùi Pē chhut ê, góa tùi Pē beh chhe I chiū-kūn lín; I nā kàu, beh ūi-tio̍h góa chòe kan-chèng; lín ia̍h beh chòe kan-chèng, 27 in-ūi lín tùi khí-thâu kap góa tī-teh.
1 Chiahê事我已經kā lín講，hō͘ lín免致tio̍h-tak。 2 人beh kek lín出會堂；koh時到，凡若刣 lín ê人，亦beh掠這做服事上帝。 3 In beh行án-ni，因為m̄-bat父kap我。 4 獨獨我有kā lín講chiahê，是hō͘ lín到時thang記得我bat kā lín講。我tùi起頭無kā lín講chiahê，是因為我kap lín tī-teh。 5 Taⁿ我去歸tī差我ê；lín中間無人問我，講，你beh tá-lo̍h去？ 6 Kan-ta為tio̍h我有kā lín講chiahê，lín已經滿心憂悶lah。 7 但是我將實情kā lín講；我去，是做lín ê利益；我無去，保惠師無來就近lín；若去，就beh差伊就近lín。 8 伊到，的確用罪，用義，用審判，來指正世間； 9 用罪，因為in m̄信靠我； 10 用義，因為我歸tī父，lín無koh看見我； 11 用審判，因為chit世間ê人君已經受審判。 12 我iáu有chōe-chōe項beh kā lín講，獨獨lín現今當bōe起。 13 到真理ê神來，伊beh chhōa lín入tī一切ê真理；因為伊m̄是beh憑家己來講；是將伊所beh聽見ê來講；koh beh用teh-beh來ê事報lín。 14 伊beh榮光我；因為伊beh tùi我所有ê領受，來報lín。 15 凡若父所有ê lóng是我ê；所以我講，伊beh tùi我所有ê領受，來報lín。 16 Tiap-á久lín無看見我；koh tiap-á久，lín就beh看見我。 17 Tùi án-ni，伊ê學生，有ê saⁿ-kap講，伊對咱講，Tiap-á久lín無看見我；koh tiap-á久lín beh看見我；koh講，因為我歸tī父，這甚麼意思？ 18 所以in講，伊所講ê tiap-á久，是甚麼意思？咱m̄知伊teh講甚麼。 19 耶穌知in ài問伊，就kā in講，我講，Tiap-á久lín無看見我，koh tiap-á久lín beh看見我，lín因為chitê問來問去mah？ 20 我實實kā lín講，Lín beh啼哭哀傷，世間beh歡喜；lín beh憂悶，但是lín ê憂悶beh變做歡喜。 21 婦人人beh生kiáⁿ就憂悶，因為伊ê時到lah；嬰á已經出世，無koh記得伊ê苦痛，因為歡喜有人出世tī世間。 22 親像án-ni，lín現今亦有憂悶；總是我beh koh見tio̍h lín，就lín ê心beh歡喜，koh lín ê歡喜無人kā lín搶去。 23 當hit日lín無beh問我甚麼。我實實kā lín講，Lín見若對父求ê，伊就tī我ê名beh hō͘ lín。 24 Lín到taⁿ bē bat tī我ê名求甚麼；lín tio̍h求就會得tio̍h，hō͘ lín ê歡喜滿滿。 25 Chiahê事我有用譬喻kā lín講；時到，我無beh koh用譬喻kā lín講，就是用父明明指示lín。 26 當hit時lín beh tī我ê名求；我無kā lín講，我beh為tio̍h lín求父； 27 因為父家己疼lín，是為tio̍h lín有疼我，koh信我tùi父出來。 28 我tùi父出來，亦入世間；koh離開世間來歸tī父。 29 伊ê學生講，Taⁿ你明明講，m̄是用譬喻。 30 Taⁿ阮知你無所m̄知，m̄免人問你；阮因為án-ni信你tùi上帝出。 31 耶穌應講，Taⁿ lín信mah？ 32 時beh到，亦已經到lah，lín chiahê四散，ta̍k人歸伊本身ê所在，留我家己tī-teh；總是我m̄是家己tī-teh，因為父kap我tī-teh。 33 我已經將chiahê kā lín講，hō͘ lín tiàm-tī我有平安。Tī世間lín有苦難；獨獨lín thang放心；我已經khah贏世間。
1 Chiah ê sū góa í-keng kā lín kóng, hō͘ lín bián-tì tio̍h-tak. 2 Lâng beh kek lín chhut hōe-tn̂g; koh sî kàu, hoān-nā thâi lín ê lâng, ia̍h beh lia̍h che chòe ho̍k-sāi Siōng-tè. 3 In beh kiâⁿ án-ni, in-ūi m̄ bat Pē kap góa. 4 To̍k-to̍k góa ū kā lín kóng chiah-ê, sī hō͘ lín kàu sî thang kì-tit góa bat kā lín kóng. Góa tùi khí-thâu bô kā lín kóng chiah-ê, sī in-ūi góa kap lín tī-teh. 5 Taⁿ góa khì kui tī chhe góa ê; lín tiong-kan bô lâng mn̄g góa, kóng, Lí beh tá-lo̍h khì? 6 Kan-ta ūi-tio̍h góa ū kā lín kóng chiah-ê, lín í-keng móa-sim iu-būn lah. 7 Nā-sī góa chiong si̍t-chêng kā lín kóng; Góa khì, sī chòe lín ê lī-ek; góa bô khì, Pó-hūi-su bô lâi chiū-kūn lín; nā khì, chiū beh chhe I chiū-kūn lín. 8 I kàu, tek-khak ēng chōe, ēng gī, ēng sím-phòaⁿ, lâi chí-chèng sè-kan; 9 ēng chōe, in-ūi in m̄ sìn-khò góa; 10 ēng gī, in-ūi góa kui tī Pē, lín bô koh khòaⁿ-kìⁿ góa; 11 ēng sím-phòaⁿ, in-ūi chit sè-kan ê jîn-kun í-keng siū sím-phòaⁿ. 12 Góa iáu ū chōe-chōe hāng beh kā lín kóng, to̍k-to̍k lín hiān-kim tng bōe khí. 13 Kàu chin-lí ê Sîn lâi, I beh chhōa lín ji̍p tī it-chhè ê chin-lí; in-ūi I m̄ sī beh pîn ka-kī lâi kóng; sī chiong I só͘ beh thiaⁿ-kìⁿ ê lâi kóng; koh beh ēng teh-beh lâi ê sū pò lín. 14 I beh êng-kng góa; in-ūi I beh tùi góa só͘ ū ê niá-siū, lâi pò lín. 15 Hoān-nā Pē só͘ ū ê lóng sī góa ê; só͘-í góa kóng, I beh tùi góa só͘ ū ê niá-siū, lâi pò lín. 16 Tiap-á kú lín bô khòaⁿ-kìⁿ góa; koh tiap-á kú, lín chiū beh khòaⁿ-kìⁿ góa. 17 Tùi án-ni I ê ha̍k-seng, ū-ê saⁿ-kap kóng, I tùi lán kóng, Tiap-á kú lín bô khòaⁿ-kìⁿ góa; koh tiap-á kú lín beh khòaⁿ-kìⁿ góa; koh kóng, In-ūi góa kui tī Pē, che sím-mi̍h ì-sù? 18 Só͘-í in kóng, I só͘ kóng ê tiap-á kú, sī sím-mi̍h ì-sù? Lán m̄ chai I teh kóng sím-mi̍h. 19 Iâ-so͘ chai in ài mn̄g I, chiū kā in kóng, Góa kóng, Tiap-á kú lín bô khòaⁿ-kìⁿ góa, koh tiap-á kú lín beh khòaⁿ-kìⁿ góa, lín in-ūi chit-ê mn̄g-lâi mn̄g-khì mah? 20 Góa si̍t-si̍t kā lín kóng, Lín beh thî-khàu ai-siong, sè-kan beh hoaⁿ-hí; lín beh iu-būn, nā-sī lín ê iu-būn beh pìⁿ-chòe hoaⁿ-hí. 21 Hū-jîn-lâng beh siⁿ kiáⁿ chiū iu-būn, in-ūi i ê sî kàu lah; eⁿ-á í-keng chhut-sì, bô koh kì-tit i ê khó͘-thàng, in-ūi hoaⁿ-hí ū lâng chhut-sì tī sè-kan. 22 Chhin-chhiūⁿ án-ni, lín hiān-kim ia̍h ū iu-būn; chóng-sī góa beh koh kìⁿ-tio̍h lín, chiū lín ê sim beh hoaⁿ-hí, koh lín ê hoaⁿ-hí bô lâng kā lín chhiúⁿ-khì. 23 Tng hit ji̍t lín bô beh mn̄g góa sím-mi̍h. Góa si̍t-si̍t kā lín kóng, Lín kìⁿ-nā tùi Pē kiû ê, I chiū tī góa ê miâ beh hō͘ lín. 24 Lín kàu taⁿ bē bat tī góa ê miâ kiû sím-mi̍h; lín tio̍h kiû chiū ōe tit-tio̍h, hō͘ lín ê hoaⁿ-hí móa-móa. 25 Chiah ê sū góa ū ēng phì-jū kā lín kóng; sî kàu, góa bô beh koh ēng phì-jū kā lín kóng, chiū-sī ēng Pē bêng-bêng chí-sī lín. 26 Tng hit sî lín beh tī góa ê miâ kiû; góa bô kā lín kóng, Góa beh ūi-tio̍h lín kiû Pē; 27 in-ūi Pē ka-kī thiàⁿ lín, sī ūi-tio̍h lín ū thiàⁿ góa, koh sìn góa tùi Pē chhut-lâi. 28 Góa tùi Pē chhut-lâi, ia̍h ji̍p sè-kan; koh lī-khui sè-kan lâi kui tī Pē. 29 I ê ha̍k-seng kóng, Taⁿ lí bêng-bêng kóng, m̄ sī ēng phì-jū. 30 Taⁿ goán chai lí bô só͘ m̄ chai, m̄-bián lâng mn̄g lí; goán in-ūi án-ni sìn lí tùi Siōng-tè chhut. 31 Iâ-so͘ ìn kóng, Taⁿ lín sìn mah? 32 Sî beh kàu, ia̍h í-keng kàu lah, lín chiah-ê sì-sòaⁿ, ta̍k lâng kui i pún-sin ê só͘-chāi, lâu góa ka-kī tī-teh; chóng-sī góa m̄ sī ka-kī tī-teh, in-ūi Pē kap góa tī-teh. 33 Góa í-keng chiong chiah-ê kā lín kóng, hō͘ lín tiàm-tī góa ū pêng-an. Tī sè-kan lín ū khó͘-lān; to̍k-to̍k lín thang pàng-sim; góa í-keng khah-iâⁿ sè-kan.
1 耶穌講chiahê，就kia̍h目ǹg天，講，父ah，時到lah；願你榮光你ê Kiáⁿ，thang hō͘ Kiáⁿ榮光你； 2 親像你bat hō͘ Kiáⁿ有權治理見有肉體ê，beh hō͘伊將永活賞賜見若你所hō͘伊ê人。 3 Chitê永活，就是bat你獨一真ê上帝，kap你所差ê耶穌基督。 4 我已經榮光你tī地上；就是你所交帶我行ê工，我已經成伊。 5 父ah，taⁿ tio̍h hō͘我kap你saⁿ-kap有榮光，就是bē有世間以前我kap你saⁿ-kap有ê榮光。 6 你所賞賜我出tī世間ê人，我已經用你ê名對in顯明；in本是你ê，你用in賞賜我；in亦已經守你ê道理。 7 Taⁿ in知見若你所hō͘我ê，lóng是tùi你來； 8 因為你所hō͘我ê話，我已經hō͘ in；in承受伊，亦確實知我對你出，koh信你差我。 9 我為tio̍h in求；m̄是為tio̍h世間求，就是為tio̍h你所hō͘我ê人；因為in是你ê。 10 見若我ê，就是你ê；你ê，就是我ê；koh我tī in有得tio̍h榮光。 11 Taⁿ了後，我無tī世間；in tī世間，我歸tī你。聖ê父ah，願你tī你ê名，就是你所hō͘我ê，來保守in，hō͘ in做一个，親像咱一樣。 12 我kap in tī-teh ê時，bat tī你ê名，就是你所hō͘我ê，來保守in；我亦有照顧in，其中無一个沉淪；只有hitê沉淪ê人nā-tiāⁿ，hō͘聖經得tio̍h應驗。 13 Taⁿ我就近你；我iáu tiàm世間講chiahê話，beh hō͘ in有我ê歡喜滿滿tī in ê心內。 14 我已經將你ê道理hō͘ in；世間怨恨in，因為in無屬世間，親像我無屬世間。 15 我m̄是求你hō͘ in出世間，就是保守in脫離pháiⁿ-ê。 16 In無屬世間，親像我無屬世間。 17 願你用真理hō͘ in成聖；你ê道理就是真理。 18 親像你差我入世間，我亦有差in入世間。 19 我為tio̍h in來做聖，hō͘ in亦tùi真理來成聖。 20 我m̄-nā為tio̍h chiahê人求，亦為tio̍h對in ê話來信我ê人求； 21 hō͘ in lóng做一个；親像父，你tiàm-tī我，我tiàm-tī你，hō͘ in亦án-ni tiàm-tī咱；就hō͘世間信你差我。 22 你所hō͘我ê榮光，我已經hō͘ in；hō͘ in做一个，親像咱ê做一个； 23 我tiàm-tī in，你tiàm-tī我，hō͘ in能完全來做一个；hō͘世間知你差我，亦知你疼in親像疼我一樣。 24 父ah，你所hō͘我ê，我ài in tī我所tī-teh ê所在，亦kap我saⁿ-kap tī hia；hō͘ in看見你所賞賜我ê榮光；因為創造世間以前你已經疼我。 25 義ê父ah，世間bē bat你；獨獨我有bat你；chiahê人亦bat你有差我； 26 我bat用你ê 名指示in，koh beh指示in；hō͘你疼我ê疼痛tiàm-tī in，我亦tiàm-tī in。
1 Iâ-so͘ kóng chiah-ê, chiū kia̍h ba̍k ǹg thiⁿ, kóng, Pē ah, sî kàu lah; goān lí êng-kng lí ê Kiáⁿ, thang hō͘ Kiáⁿ êng-kng lí; 2 chhin-chhiūⁿ lí bat hō͘ Kiáⁿ ū koân tī-lí kìⁿ ū jio̍k-thé ê, beh hō͘ I chiong éng-oa̍h siúⁿ-sù kìⁿ-nā lí só͘ hō͘ I ê lâng. 3 Chit ê éng-oa̍h, chiū-sī bat lí to̍k-it chin ê Siōng-tè, kap lí só͘ chhe ê Iâ-so͘ Ki-tok. 4 Góa í-keng êng-kng lí tī tōe-chiūⁿ; chiū-sī lí só͘ kau-tāi góa kiâⁿ ê kang, góa í-keng chiâⁿ i. 5 Pē ah, taⁿ tio̍h hō͘ góa kap lí saⁿ-kap ū êng-kng, chiū-sī bē ū sè-kan í-chêng góa kap lí saⁿ-kap ū ê êng-kng. 6 Lí só͘ siúⁿ-sù góa chhut tī sè-kan ê lâng, góa í-keng ēng lí ê miâ tùi in hián-bêng; in pún sī lí ê, lí ēng in siúⁿ-sù góa; in ia̍h í-keng siú lí ê tō-lí. 7 Taⁿ in chai kìⁿ-nā lí só͘ hō͘ góa ê, lóng sī tùi lí lâi; 8 in-ūi lí só͘ hō͘ góa ê ōe, góa í-keng hō͘ in; in sêng-siū i, ia̍h khak-si̍t chai góa tùi lí chhut, koh sìn lí chhe góa. 9 Góa ūi-tio̍h in kiû; m̄ sī ūi-tio̍h sè-kan kiû, chiū-sī ūi-tio̍h lí só͘ hō͘ góa ê lâng; in-ūi in sī lí ê. 10 Kìⁿ-nā góa ê, chiū-sī lí ê; lí ê, chiū-sī góa ê; koh góa tī in ū tit-tio̍h êng-kng. 11 Taⁿ liáu-āu góa bô tī sè-kan; in tī sè-kan, góa kui tī lí. Sèng ê Pē ah, goān lí tī lí ê miâ, chiū-sī lí só͘ hō͘ góa ê, lâi pó-siú in, hō͘ in chòe chi̍t-ê, chhin-chhiūⁿ lán chi̍t iūⁿ. 12 Góa kap in tī-teh ê sî, bat tī lí ê miâ, chiū-sī lí só͘ hō͘ góa ê, lâi pó-siú in; góa ia̍h ū chiàu-kò͘ in, kî-tiong bô chi̍t-ê tîm-lûn; chí ū hit ê tîm-lûn ê lâng nā-tiāⁿ, hō͘ sèng-keng tit-tio̍h èng-giām. 13 Taⁿ góa chiū-kūn lí; góa iáu tiàm sè-kan kóng chiah ê ōe, beh hō͘ in ū góa ê hoaⁿ-hí móa-móa tī in ê sim-lāi. 14 Góa í-keng chiong lí ê tō-lí hō͘ in; sè-kan oàn-hūn in, in-ūi in bô sio̍k sè-kan, chhin-chhiūⁿ góa bô sio̍k sè-kan. 15 Góa m̄ sī kiû lí hō͘ in chhut sè-kan, chiū-sī pó-siú in thoat-lī pháiⁿ-ê. 16 In bô sio̍k sè-kan, chhin-chhiūⁿ góa bô sio̍k sè-kan. 17 Goān lí ēng chin-lí hō͘ in chiâⁿ-sèng; lí ê tō-lí chiū-sī chin-lí. 18 Chhin-chhiūⁿ lí chhe góa ji̍p sè-kan, góa ia̍h ū chhe in ji̍p sè-kan. 19 Góa ūi-tio̍h in lâi chòe sèng, hō͘ in ia̍h tùi chin-lí lâi chiâⁿ-sèng. 20 Góa m̄ nā ūi-tio̍h chiah ê lâng kiû, ia̍h ūi-tio̍h tùi in ê ōe lâi sìn góa ê lâng kiû; 21 hō͘ in lóng chòe chi̍t-ê; chhin-chhiūⁿ Pē, lí tiàm-tī góa, góa tiàm-tī lí, hō͘ in ia̍h án-ni tiàm-tī lán; chiū hō͘ sè-kan sìn lí chhe góa. 22 Lí só͘ hō͘ góa ê êng-kng, góa í-keng hō͘ in; hō͘ in chòe chi̍t-ê, chhin-chhiūⁿ lán ê chòe chi̍t-ê; 23 góa tiàm-tī in, lí tiàm-tī góa, hō͘ in ōe oân-choân lâi chòe chi̍t-ê; hō͘ sè-kan chai lí chhe góa, ia̍h chai lí thiàⁿ in chhin-chhiūⁿ thiàⁿ góa chi̍t iūⁿ. 24 Pē ah, lí só͘ hō͘ góa ê, góa ài in tī góa só͘ tī-teh ê só͘-chāi, ia̍h kap góa saⁿ-kap tī hia; hō͘ in khòaⁿ-kìⁿ lí só͘ siúⁿ-sù góa ê êng-kng; in-ūi chhòng-chō sè-kan í-chêng lí í-keng thiàⁿ góa. 25 Gī ê Pē ah, sè-kan bē bat lí; to̍k-to̍k góa ū bat lí; chiah ê lâng ia̍h bat lí ū chhe góa; 26 góa bat ēng lí ê miâ chí-sī in, koh beh chí-sī in; hō͘ lí thiàⁿ góa ê thiàⁿ-thàng tiàm-tī in, góa ia̍h tiàm-tī in.
1 Chiahê話講了，耶穌kap學生出去過Khip-lûn溪；tī hia有園，耶穌kap伊ê學生入去。 2 賣伊ê偤大亦bat hitê所在；因為耶穌kap伊ê學生ta̍uh-ta̍uh聚集tī hia。 3 偤大已經領一隊兵，kap chiahê祭司頭以及法利賽人ê差役，kia̍h 燈，kap火把，kap ke-si，來到hia。 4 耶穌知伊所beh tú-tio̍h一切ê事，就出去kā in講，Lín chhē 是誰？ 5 應講，拿撒勒人耶穌。耶穌kā in講，我就是。賣伊ê偤大亦kap in saⁿ-kap teh khiā。 6 耶穌一下kā in講，我就是，in就倒退，跋倒tī地裡。 7 所以koh問in，Lín chhē 是誰？應講，拿撒勒人耶穌。 8 耶穌應講，我已經kā lín講，我就是；lín若chhē我，tio̍h容允chiahê人去； 9 這是hō͘伊前所講ê話應驗，講，你所hō͘我ê人，我無失落一个。 10 西門彼得有刀，拔起來phut祭司頭ê奴僕，削去伊ê chiàⁿ耳。奴僕ê名叫Má-le̍k-kó͘。 11 耶穌就kā彼得講，收你ê刀入鞘；父所hō͘我ê杯，我kiám無beh lim mah？ 12 Tùi án-ni，兵隊kap千總，以及偤太人ê差役，掠耶穌縛伊； 13 事先帶伊去見A-ná，因為伊是hit年ê祭司頭Kai-a-hoat ê丈人。 14 前替偤太人打算講，一人為tio̍h百姓死是有利益ê，就是chitê Kai-a-hoat。 15 西門彼得tè耶穌，koh有一个學生tè伊。Chitê學生是祭司頭所bat ê，就kap耶穌入祭司頭ê院。 16 但是彼得khiā tī門外。所以hitê學生，就是祭司頭所bat ê，出去kap顧門ê cha-bó͘人講，就chhōa彼得入去。 17 顧門ê女婢kā彼得講，你亦敢是chit人ê學生hò͘ⁿ？伊講，m̄是。 18 Chiahê奴僕kap差役，因為寒，將炭起火，khiā teh烘燒；彼得亦kap in khiā teh烘。 19 祭司頭就問耶穌論伊ê學生，kap伊ê教示。 20 耶穌應講，我是顯然對世間人講；我常常tī會堂kap殿裡教示，就是偤太人lóng聚集ê所在；tī隱密ê所在我bē bat講甚麼。 21 啥事問我？thang問聽ê人，看我kap in講怎樣；in知我所講。 22 講soah，邊á teh khiā一个差役siàn耶穌，講，你應祭司頭án-ni mah？ 23 耶穌應伊講，我若講m̄ tio̍h，thang指正hitê m̄ tio̍h；若tio̍h，啥事phah我？ 24 耶穌猶原受縛，A-ná差伊到祭司頭Kai-a-hoat ê所在。 25 Hit時西門彼得khiā-teh烘火，就有人kā伊講，你亦敢是伊ê學生hò͘ⁿ？伊m̄認，講，m̄是。 26 有一个祭司頭ê奴僕，是hō͘彼得siah耳á ê ê親人，講，我kiám無看見你kap伊tī園內mah？ 27 彼得koh無認；雞隨時啼。 28 In就帶耶穌tùi Kkai-a-hoat ê所在到公堂：hit-tia̍p天phú光；in家己無入公堂，免得bak-tio̍h lâ-sâm，chiah thang食pôaⁿ過節。 29 所以彼拉多出來外面就近in講，Lín告chit人甚麼案件？ 30 應講，Chit人若m̄是pháiⁿ人，阮就無將伊交hō͘你。 31 彼拉多就kā in講，Lín家己帶去，照lín ê律法去辦伊。偤太人kā伊講， 32 阮無刣人ê koân；這是beh應驗耶穌前所講ê話，指明伊beh甚麼款來死。 33 彼拉多koh入公堂，tiàu耶穌來，kā伊講，你是偤太人ê王mah？ 34 耶穌應講，你講chitê話是對你家己，á是別人將我ê事kā你講ah？ 35 彼拉多應講，我kiám是偤太人mah？你本國ê人kap chiahê祭司頭將你交hō͘我；你果然怎樣做ah？ 36 耶穌應講，我ê國m̄是屬chit世間；我ê國若屬chit世間，就我ê差用的確爭戰，免得我交hō͘偤太人；但是taⁿ我ê國m̄是tùi chia出。 37 彼拉多就kā伊講，Án-ni，你是王mah？耶穌應講，你講我是王。我為tio̍h án-ni出世，為tio̍h án-ni臨到世間，beh替真理做干證。凡若屬真理ê人，聽我ê聲。 38 彼拉多講，真理是甚麼？ 講soah，koh出去就近偤太人，kā in講，我看伊無罪。 39 總是lín有例，到pôaⁿ過節，我tio̍h放一个監犯hō͘ lín；lín ài我放偤太人ê王hō͘ lín mah？ 40 In koh大聲喉叫講，M̄-thang chitê，是tio̍h 巴拉巴。Chitê 巴拉巴是土匪。
1 Chiah ê ōe kóng liáu, Iâ-so͘ kap ha̍k-seng chhut-khì kè Khip-lûn khoe; tī hia ū hn̂g, Iâ-so͘ kap I ê ha̍k-seng ji̍p-khì. 2 Bōe I ê Iû-tāi ia̍h bat hit ê só͘-chāi; in-ūi Iâ-so͘ kap I ê ha̍k-seng ta̍uh-ta̍uh chū-chi̍p tī hia. 3 Iû-tāi í-keng niá chi̍t tūi peng, kap chiah ê chè-si-thâu í-ki̍p Hoat-lī-sài lâng ê chhe-ia̍h, kia̍h teng, kap hé-pé, kap ke-si, lâi kàu hia. 4 Iâ-so͘ chai I só͘ beh tú-tio̍h it-chhè ê sū, chiū chhut-khì kā in kóng, Lín chhē chī-chūi? 5 Ìn kóng, Ná-sat-le̍k lâng Iâ-so͘. Iâ-so͘ kā in kóng, Góa chiū-sī. Bōe I ê Iû-tāi ia̍h kap in saⁿ-kap teh khiā. 6 Iâ-so͘ chi̍t-ē kā in kóng, Góa chiū-sī, in chiū tò-thè, poa̍h-tó tī tōe-ni̍h. 7 Só͘-í koh mn̄g in, Lín chhē chī-chūi? Ìn kóng, Ná-sat-le̍k lâng Iâ-so͘. 8 Iâ-so͘ ìn kóng, Góa í-keng kā lín kóng, góa chiū-sī; lín nā chhē góa, tio̍h iông-ún chiah ê lâng khì; 9 che sī hō͘ I chêng só͘ kóng ê ōe èng-giām, kóng, Lí só͘ hō͘ góa ê lâng, góa bô sit-lo̍h chi̍t-ê. 10 Se-bûn Pí-tek ū to, pu̍ih-khí-lâi phut chè-si-thâu ê lô͘-po̍k, siah-khì i ê chiàⁿ hī. Lô͘-po̍k ê miâ kiò Má-le̍k-kó͘. 11 Iâ-so͘ chiū kā Pí-tek kóng, Siu lí ê to ji̍p siù; Pē só͘ hō͘ góa ê poe, góa kiám bô beh lim mah? 12 Tùi án-ni peng-tūi kap chhian-chóng, í-ki̍p Iû-thài lâng ê chhe-ia̍h, lia̍h Iâ-so͘ pa̍k I; 13 tāi-seng tòa I khì kìⁿ A-ná, in-ūi i sī hit nî ê chè-si-thâu Kai-a-hoat ê tiūⁿ-lâng. 14 Chêng thòe Iû-thài lâng táⁿ-sǹg kóng, chi̍t lâng ūi-tio̍h peh-sìⁿ sí sī ū lī-ek ê, chiū-sī chit ê Kai-a-hoat. 15 Se-bûn Pí-tek tè Iâ-so͘, koh ū chi̍t ê ha̍k-seng tè I. Chit ê ha̍k-seng sī chè-si-thâu só͘ bat ê, chiū kap Iâ-so͘ ji̍p chè-si-thâu ê īⁿ. 16 Nā-sī Pí-tek khiā tī mn̂g-gōa. Só͘-í hit ê ha̍k-seng, chiū-sī chè-si-thâu só͘ bat ê, chhut-khì kap kò͘-mn̂g ê cha-bó͘-lâng kóng, chiū chhōa Pí-tek ji̍p-khì. 17 Kò͘-mn̂g ê lú-pī kā Pí-tek kóng, Lí ia̍h káⁿ sī chit lâng ê ha̍k-seng hò͘ⁿ? I kóng, M̄ sī. 18 Chiah ê lô͘-po̍k kap chhe-ia̍h, in-ūi kôaⁿ, chiong thòaⁿ khí hé, khiā teh hang sio; Pí-tek ia̍h kap in khiā teh hang. 19 Chè-si-thâu chiū mn̄g Iâ-so͘ lūn I ê ha̍k-seng, kap I ê kà-sī. 20 Iâ-so͘ ìn kóng, Góa sī hián-jiân tùi sè-kan lâng kóng; góa siông-siông tī hōe-tn̂g kap tiān-ni̍h kà-sī, chiū-sī Iû-thài lâng lóng chū-chi̍p ê só͘-chāi; tī ún-ba̍t ê só͘-chāi góa bē bat kóng sím-mi̍h. 21 Siáⁿ-sū mn̄g góa? thang mn̄g thiaⁿ ê lâng, khòaⁿ góa kap in kóng cháiⁿ-iūⁿ; in chai góa só͘ kóng. 22 Kóng soah, piⁿ-á teh khiā chi̍t ê chhe-ia̍h siàn Iâ-so͘, kóng, Lí ìn chè-si-thâu án-ni mah? 23 Iâ-so͘ ìn i kóng, Góa nā kóng m̄ tio̍h, thang chí-chèng hit ê m̄ tio̍h; nā tio̍h, siáⁿ-sū phah góa? 24 Iâ-so͘ iû-goân siū pa̍k, A-ná chhe I kàu chè-si-thâu Kai-a-hoat ê só͘-chāi. 25 Hit sî Se-bûn Pí-tek khiā-teh hang hé. Chiū ū lâng kā i kóng, Lí ia̍h káⁿ sī I ê ha̍k-seng hò͘ⁿ? I m̄ jīn, kóng, M̄ sī. 26 Ū chi̍t ê chè-si-thâu ê lô͘-po̍k, sī hō͘ Pí-tek siah hī-á ê ê chhin-lâng, kóng, Góa kiám bô khòaⁿ-kìⁿ lí kap I tī hn̂g-lāi mah? 27 Pí-tek koh bô jīn; koe sûi-sî thî. 28 In chiū tòa Iâ-so͘ tùi Kai-a-hoat ê só͘-chāi kàu kong-tn̂g: hit tia̍p thiⁿ phú-kng; in ka-kī bô ji̍p kong-tn̂g, bián-tit bak-tio̍h lâ-sâm, chiah thang chia̍h pôaⁿ-kè-choeh. 29 Só͘-í Pí-lia̍p-to chhut-lâi gōa-bīn chiū-kūn in kóng, Lín kò chit lâng sím-mi̍h àn-kiāⁿ? 30 Ìn kóng, Chit lâng nā m̄ sī pháiⁿ lâng, goán chiū bô chiong I kau hō͘ lí. 31 Pí-lia̍p-to chiū kā in kóng, Lín ka-kī tòa-khì, chiàu lín ê lu̍t-hoat khì pān I. Iû-thài lâng kā i kóng, 32 Goán bô thâi lâng ê koân; che sī beh èng-giām Iâ-so͘ chêng só͘ kóng ê ōe, chí-bêng I beh sím-mi̍h khoán lâi sí. 33 Pí-lia̍p-to koh ji̍p kong-tn̂g, tiàu Iâ-so͘ lâi, kā I kóng, Lí sī Iû-thài lâng ê ông mah? 34 Iâ-so͘ ìn kóng, Lí kóng chit ê ōe sī tùi lí ka-kī, á-sī pa̍t lâng chiong góa ê sū kā lí kóng ah? 35 Pí-lia̍p-to ìn kóng, Góa kiám sī Iû-thài lâng mah? Lí pún-kok ê lâng kap chiah ê chè-si-thâu chiong lí kau hō͘ góa; lí kó-jiân cháiⁿ-iūⁿ chòe ah? 36 Iâ-so͘ ìn kóng, Góa ê kok m̄ sī sio̍k chit sè-kan; góa ê kok nā sio̍k chit sè-kan, chiū góa ê chhe-ēng tek-khak cheng-chiàn, bián-tit góa kau hō͘ Iû-thài lâng; nā-sī taⁿ góa ê kok m̄ sī tùi chia chhut. 37 Pí-lia̍p-to chiū kā I kóng, Án-ni, lí sī ông mah? Iâ-so͘ ìn kóng, Lí kóng góa sī ông. Góa ūi-tio̍h án-ni chhut-sì, ūi-tio̍h án-ni lîm-kàu sè-kan, beh thòe chin-lí chòe kan-chèng. Hoān-nā sio̍k chin-lí ê lâng, thiaⁿ góa ê siaⁿ. 38 Pí-lia̍p-to kóng, Chin-lí sī sím-mi̍h? Kóng soah, koh chhut-khì chiū-kūn Iû-thài lâng, kā in kóng, Góa khòaⁿ I bô chōe. 39 Chóng-sī lín ū lē, kàu pôaⁿ-kè-choeh, góa tio̍h pàng chi̍t ê kaⁿ-hoān hō͘ lín; lín ài góa pàng Iû-thài lâng ê ông hō͘ lín mah? 40 In koh tōa siaⁿ âu-kiò kóng, M̄-thang chit-ê, sī tio̍h Pa-lia̍p-pa. Chit ê Pa-lia̍p-pa sī thó͘-húi.
1 Tùi án-ni，彼拉多用鞭phah耶穌。 2 兵丁用刺á編做冕旒，戴tī伊ê頭殼，koh用紫色ê袍kā伊穿； 3 就近伊，講，偤太人ê王，平安ah。就siàn伊。 4 彼拉多koh出去外面kā in講，你看，我chhōa伊出來hō͘ lín，hō͘ lín知我查了看伊無罪。 5 耶穌戴刺á ê冕旒，穿紫色ê袍，出來外面；彼拉多koh kā in講，你看，chitê人！ 6 Chiahê祭司頭kap差役看見伊，就大聲喉叫講，釘伊十字架，釘伊十字架。彼拉多kā in講，Lín家己掠去釘；因為我看伊無罪。 7 偤太人應伊講，阮有律法，也照chitê律法伊應該死，因為伊掠本身做上帝ê Kiáⁿ。 8 彼拉多聽見chitê話，就益發驚； 9 koh入公堂，kā耶穌講，你tùi tá-lo̍h來？但是耶穌無應伊。 10 彼拉多就kā伊講，你m̄ kap我講mah？Kiám m̄知我有權thang放你，亦有權thang釘你tī十字架mah？ 11 耶穌應伊講，若m̄是tùi頂面hō͘你，就你無權thang辦我；所以將我交hō͘你ê人，伊ê罪koh-khah重。 12 Tùi án-ni， 彼拉多ài beh放伊；偤太人大聲喉叫，講，你若放chitê人，就m̄是該撒ê朋友；因為凡若掠家己做王ê，是背叛該撒。 13 彼拉多聽見chiahê話，就chhōa耶穌出來；也家己坐tī公座，tī一个名叫鋪石ê所在，希伯來ê話叫做Lek-pa-tāi。 14 Hit日就是備辦pôaⁿ過節ê日；約略日中晝。就kā偤太人講，你看，lín ê王！ 15 In大聲喉叫，講，除去，除去，釘伊tī十字架。彼拉多kā in講，我將lín ê王釘十字架mah？Chiahê祭司頭應講，該撒以外，阮無王。 16 Tùi án-ni，就將耶穌交hō͘ in去釘十字架。 17 In就收伊；耶穌家己giâ伊ê十字架出去，到一个名叫頭殼碗ê所在，希伯來ê話叫做各各他； 18 tī hia釘伊十字架，koh有兩人kap伊同釘，一pêng一个，耶穌tī中央。 19 彼拉多亦寫斬條，hē tī十字架，寫講，偤太人ê王，拿撒勒人耶穌。 20 偤太人chōe-chōe讀chitê斬條；因為耶穌受釘ê所在近城；koh所寫ê，是用希伯來、羅馬、希利尼ê文字。 21 所以偤太人chiahê祭司頭kā彼拉多講，莫得寫，偤太人ê王；tio̍h寫，伊家己講，我是偤太人ê王。 22 彼拉多應講，我所寫ê，已經寫了lah。 23 兵丁已經釘耶穌tī十字架，就the̍h伊ê衫，分做四份，ta̍k ê兵得tio̍h一份；koh the̍h伊ê內衫；chit領內衫無kap-chōa，是頂下透織ê。 24 所以saⁿ-kap講，莫得拆裂，tio̍h來拈鬮，看是誰得tio̍h；這是beh應驗聖經所講， In saⁿ-kap分我ê衫， Liam-khau我ê衣服。 25 兵丁果然做chiahê事。Khiā tī耶穌十字架邊，有伊ê老母，kap伊ê老母ê姊妹，Kek-liû-pa ê bó͘馬利亞，kap Boa̍t-tāi-lia̍p ê馬利亞。 26 耶穌看見老母kap所疼ê學生khiā tī邊頭，就tùi老母講，老母ah，看，你ê kiáⁿ！ 27 Koh 對學生講，看，你ê老母！Tùi hit時，hitê學生chih接伊到家己ê家。 28 Chitê tāi-chì以後，耶穌知眾項事已經明白，因為beh hō͘聖經ê話應驗，就講，我嘴乾。 29 Tī hia有一个器具tóe醋滿滿；in就the̍h海絨浸醋，hâ牛膝草，thuh到伊ê嘴。 30 耶穌已經受醋；就講，事明白lah；就àⁿ頭氣斷。 31 Hit時是備辦節ê日，偤太人ài免得tī安歇日留身屍tī十字架，因為chitê安歇日是大ê日；所以求彼拉多kah人kòng折in ê腳骨，來收in。 32 兵丁到，kòng折頭一个ê腳骨，以及hitê kap伊同釘ê ê腳骨； 33 到tī耶穌，看見伊已經死就無kòng折伊ê腳骨； 34 獨獨有一个兵，用鎗鑿伊ê hia̍p下，血kap水liâm-piⁿ流出。 35 看見ê人做干證，伊ê干證是真；家己知所講是實，hō͘ lín亦會信。 36 因為chiahê tāi-chì成，是beh應驗聖經所講，伊ê骨無一支beh受phah碎。 37 Koh聖經有一句講，人beh看in所鑿ê。 38 Chiahê tāi-chì以後，有A-lī-má-thài ê約瑟，是耶穌ê學生，獨獨驚偤太人，chiah暗靜做學生，伊來求彼拉多，准伊去收耶穌ê身屍；彼拉多允准。就來，收伊ê身屍去。 39 Koh有尼哥底某，起頭bat暝時就近耶穌ê，亦來，帶沒藥chhiau沉香，約略一百斤。 40 In就收耶穌ê身屍，用幼苧布kap香料包伊，照偤太人埋葬ê例。 41 釘十字架ê所在有園；園內有新ê墓，lóng bē bat有人葬 ê。 42 Hit日是偤太人備辦節ê日，koh因為hitê墓近，所以安置耶穌tī hia。
1 Tùi án-ni, Pí-lia̍p-to ēng piⁿ phah Iâ-so͘. 2 Peng-teng ēng chhì-á piⁿ chòe bián-liû, tì tī I ê thâu-khak, koh ēng chí-sek ê phàu kā I chhēng; 3 chiū-kūn I, kóng, Iû-thài lâng ê ông, Pêng-an ah. Chiū siàn I. 4 Pí-lia̍p-to koh chhut-khì gōa-bīn kā in kóng, Lí khòaⁿ, góa chhōa I chhut-lâi hō͘ lín, hō͘ lín chai góa chhâ-liáu khòaⁿ I bô chōe. 5 Iâ-so͘ tì chhì-á ê bián-liû, chhēng chí-sek ê phàu, chhut-lâi gōa-bīn; Pí-lia̍t-to koh kā in kóng, Lí khòaⁿ, chit ê lâng! 6 Chiah ê chè-si-thâu kap chhe-ia̍h khòaⁿ-kìⁿ I, chiū tōa siaⁿ âu-kiò kóng, Tèng I si̍p-jī-kè, tèng I si̍p-jī-kè. Pí-lia̍p-to kā in kóng, Lín ka-kī lia̍h-khì tèng; in-ūi góa khòaⁿ I bô chōe. 7 Iû-thài lâng ìn i kóng, Goán ū lu̍t-hoat, iā chiàu chit ê lu̍t-hoat I eng-kai sí, in-ūi I lia̍h pún-sin chòe Siōng-tè ê Kiáⁿ. 8 Pí-lia̍p-to thiaⁿ-kìⁿ chit ê ōe, chiū it-hoat kiaⁿ; 9 koh ji̍p kong-tn̂g, kā Iâ-so͘ kóng, Lí tùi tá-lo̍h lâi? Nā-sī Iâ-so͘ bô ìn i. 10 Pí-lia̍p-to chiū kā I kóng, Lí m̄ kap góa kóng mah? Kiám m̄ chai góa ū koân thang pàng lí, ia̍h ū koân thang tèng lí tī si̍p-jī-kè mah? 11 Iâ-so͘ ìn i kóng, Nā m̄ sī tùi téng-bīn hō͘ lí, chiū lí bô koân thang pān góa; só͘-í chiong góa kau hō͘ lí ê lâng, i ê chōe koh khah tāng. 12 Tùi án-ni Pí-lia̍p-to ài beh pàng I; Iû-thài lâng tōa siaⁿ âu-kiò, kóng, Lí nā pàng chit ê lâng, chiū m̄ sī Kai-sat ê pêng-iú; in-ūi hoān-nā lia̍h ka-kī chòe ông ê, sī pōe-poān Kai-sat. 13 Pí-lia̍p-to thiaⁿ-kìⁿ chiah ê ōe, chiū chhōa Iâ-so͘ chhut-lâi; iā ka-kī chē tī kong-chō, tī chi̍t-ê miâ kiò Pho͘-chio̍h ê só͘-chāi, Hi-pek-lâi ê ōe kiò chòe Lek-pa-tāi. 14 Hit ji̍t chiū-sī pī-pān pôaⁿ-kè-choeh ê ji̍t; iok-lio̍k ji̍t tiong-tàu. Chiū kā Iû-thài lâng kóng, Lí khòaⁿ, lín ê ông! 15 In tōa siaⁿ âu-kiò, kóng, Tû-khì, tû-khì, tèng I tī si̍p-jī-kè. Pí-lia̍p-to kā in kóng, Góa chiong lín ê ông tèng si̍p-jī-kè mah? Chiah ê chè-si-thâu ìn kóng, Kai-sat í-gōa, goán bô ông. 16 Tùi án-ni, chiū chiong Iâ-so͘ kau hō͘ in khì tèng si̍p-jī-kè. 17 In chiū siu I; Iâ-so͘ ka-kī giâ i ê si̍p-jī-kè chhut-khì, kàu chi̍t-ê miâ kiò Thâu-khak-óaⁿ ê só͘-chāi, Hi-pek-lâi ê ōe kiò chòe Kok-kok-thaⁿ; 18 tī hia tèng I si̍p-jī-kè, koh ū nn̄g lâng kap I tâng tèng, chi̍t pêng chi̍t-ê, Iâ-so͘ tī tiong-ng. 19 Pí-lia̍p-to ia̍h siá chám-tiâu, hē tī si̍p-jī-kè, siá kóng, Iû-thài lâng ê ông, Ná-sat-le̍k lâng Iâ-so͘. 20 Iû-thài lâng chōe-chōe tha̍k chit ê chám-tiâu; in-ūi Iâ-so͘ siū tèng ê só͘-chāi kūn siâⁿ; koh só͘ siá ê, sī ēng Hi-pek-lâi, Lô-má, Hi-lī-nî ê bûn-jī. 21 Só͘-í Iû-thài lâng chiah ê chè-si-thâu kā Pí-lia̍p-to kóng, Bo̍h-tit siá, Iû-thài lâng ê ông; tio̍h siá, I ka-kī kóng, Góa sī Iû-thài lâng ê ông. 22 Pí-lia̍p-to ìn kóng, góa só͘ siá ê, í-keng siá-liáu lah. 23 Peng-teng í-keng tèng Iâ-so͘ tī si̍p-jī-kè, chiū the̍h I ê saⁿ, pun chòe sì hūn, ta̍k ê peng tit-tio̍h chi̍t hūn; koh the̍h I ê lāi-saⁿ; chit niá lāi-saⁿ bô kap-chōa, sī téng-ē thàu-chit ê. 24 Só͘-í saⁿ-kap kóng, Bo̍h-tit thiah-li̍h, tio̍h lâi liam-khau, khòaⁿ chī-chūi tit-tio̍h; che sī beh èng-giām sèng-keng só͘ kóng, In saⁿ-kap pun góa ê saⁿ, Liam-khau góa ê i-ho̍k. 25 Peng-teng kó-jiân chòe chiah ê sū. Khiā tī Iâ-so͘ si̍p-jī-kè piⁿ, ū I ê lāu-bú, kap I ê lāu-bú ê chí-bē, Kek-liû-pa ê bó͘ Má-lī-a, kap Boa̍t-tāi-lia̍p ê Má-lī-a. 26 Iâ-so͘ khòaⁿ-kìⁿ lāu-bú kap só͘ thiàⁿ ê ha̍k-seng khiā tī piⁿ-thâu, chiū tùi lāu-bú kóng, Lāu-bú ah, khòaⁿ, lí ê kiáⁿ! 27 Koh tùi ha̍k-seng kóng, Khòaⁿ, lí ê lāu-bú! Tùi hit sî, hit ê ha̍k-seng chih-chiap i kàu ka-kī ê ke. 28 Chit ê tāi-chì í-āu, Iâ-so͘ chai chèng hāng sū í-keng bêng-pe̍k, in-ūi beh hō͘ sèng-keng ê ōe èng-giām, chiū kóng, Góa chhùi-ta. 29 Tī hia ū chi̍t ê khì-kū tóe chhò͘ móa-móa; in chiū the̍h hái-jiông chìm chhò͘, hâ gû-chhek-chháu, thuh kàu I ê chhùi. 30 Iâ-so͘ í-keng siū chhò͘; chiū kóng, Sū bêng-pe̍k lah; chiū àⁿ thâu khùi tn̄g. 31 Hit sî sī pī-pān choeh ê ji̍t, Iû-thài lâng ài bián-tit tī an-hioh-ji̍t lâu sin-si tī si̍p-jī-kè, in-ūi chit ê an-hioh-ji̍t sī tōa ê ji̍t; só͘-í kiû Pí-lia̍p-to kah lâng kòng-chi̍h in ê kha-kut, lâi siu in. 32 Peng-teng kàu, kòng-chi̍h thâu chi̍t ê ê kha-kut, í-ki̍p hit ê kap i tâng tèng ê ê kha-kut; 33 kàu tī Iâ-so͘, khòaⁿ-kìⁿ I í-keng sí chiū bô kòng-chi̍h I ê kha-kut; 34 to̍k-to̍k ū chi̍t ê peng, ēng chhiuⁿ chha̍k I ê hia̍p-ē, huih kap chúi liâm-piⁿ lâu-chhut. 35 Khòaⁿ-kìⁿ ê lâng chòe kan-chèng, i ê kan-chèng sī chin; ka-kī chai só͘ kóng sī si̍t, hō͘ lín ia̍h ōe sìn. 36 In-ūi chiah ê tāi-chì chiâⁿ, sī beh èng-giām sèng-keng só͘ kóng, I ê kut bô chi̍t ki beh siū phah-chhùi. 37 Koh sèng-keng ū chi̍t kù kóng, Lâng beh khòaⁿ in só͘ chha̍k ê. 38 Chiah ê tāi-chì í-āu, ū A-lī-má-thài ê Iok-sek, sī Iâ-so͘ ê ha̍k-seng, to̍k-to̍k kiaⁿ Iû-thài lâng, chiah àm-chīⁿ chòe ha̍k-seng, i lâi kiû Pí-lia̍p-to, chún i khì siu Iâ-so͘ ê sin-si; Pí-lia̍p-to ún-chún. Chiū lâi, siu I ê sin-si khì. 39 Koh ū Nî-ko-tí-bó͘, khí-thâu bat mî-sî chiū-kūn Iâ-so͘ ê, ia̍h lâi, tòa bu̍t-io̍h chhiau tîm-hiuⁿ, iok-lio̍k chi̍t pah kun. 40 In chiū siu Iâ-so͘ ê sin-si, ēng iù-tōe pò͘ kap hiuⁿ-liāu pau I, chiàu Iû-thài lâng bâi-chòng ê lē. 41 Tèng si̍p-jī-kè ê só͘-chāi ū hn̂g; hn̂g-lāi ū sin ê bōng, lóng bē bat ū lâng chòng ê. 42 Hit ji̍t sī Iû-thài lâng pī-pān choeh ê ji̍t, koh in-ūi hit ê bōng kūn, só͘-í an-tì Iâ-so͘ tī hia.
1 七日ê頭一日，清早，天iáu-bē光，Boa̍t-tāi-lia̍p ê馬利亞到墓，看見石已經tùi墓徙開。 2 就走去就近西門彼得，kap別個學生，就是耶穌所疼hitê，kā in講，有人將主移出墓，阮m̄知hē tī tá-lo̍h。 3 所以彼得kap hitê別個學生出去到墓。 4 兩人平平走；hitê別個學生走做頭，比彼得khah緊，事先到墓； 5 àⁿ落看墓內，看見幼苧布hē-teh；獨獨無入去。 6 西門彼得tè後到，入墓；看見幼苧布hē-teh， 7 koh看見包頭殼ê巾，無kap幼苧布做一位，是另外tī一所在捲teh。 8 Hit時hitê事先到墓ê學生亦入去，看見就信。 9 因為in iáu-bē明白聖經ê話，講伊的確tio̍h tùi死人中koh活。 10 Tùi án-ni，兩個學生tò去家己ê家。 11 獨獨馬利亞khiā tī墓外teh啼哭；哭ê時，àⁿ落看墓內； 12 看見兩個天使穿白衫，坐tī耶穌ê身屍所bat安置ê所在，一个tī頭，一个tī腳。 13 In就kā伊講，婦人人ah，啥事哭？應伊講，因為人將我ê主移去，我m̄知hē伊tī甚麼所在。 14 已經講chiahê話，就翻身ǹg後面，看見耶穌teh khiā，也m̄知伊是耶穌。 15 耶穌kā伊講，婦人人ah，啥事啼哭？你chhē 是誰？馬利亞phah算伊是顧園ê，就kā伊講，頭家ah，你若有扛伊去，請kā我講hē伊tī甚麼所在，我就去收伊。 16 耶穌kā伊講，馬利亞ah。伊就oa̍t-tńg身，用希伯來ê話kā伊講，Lia̍p-pho-nî；意思就是，先生。 17 耶穌kā伊講，莫得摸我；因為我iáu-bē上去見父；你tio̍h去chhē我ê兄弟kā in講，我上去見我ê父，亦是lín ê父；見我ê上帝，亦是lín ê上帝。 18 抹大拉ê馬利亞就去kā學生講，我已經看見主；koh講，主用chiahê話kā伊講。 19 Hit日就是七日ê頭一日，已經暗，學生因為驚偤太人，就tī in所tòa ê所在關門；耶穌到，khiā tī中間，kā in講，願lín平安。 20 已經講chitê話，就用手kap hia̍p下hō͘ in看。學生看見主，就歡喜。 21 耶穌koh kā in講，願lín平安；我差lín，親像父有差我。 22 已經講chitê話，就對in pûn氣講，Lín受聖神； 23 lín赦甚麼人ê罪，就赦去；留甚麼人ê罪，就留teh。 24 有多馬稱做Té-thó͘-má ê，是十二學生ê一个，耶穌到ê時，伊無saⁿ-kap tī-teh。 25 其餘ê學生就kā伊講，阮chiahê已經看見主lah。但是多馬kā in講，我若無看見伊手中釘ê跡，無用我ê指頭á探伊釘ê跡，無用我ê手探伊ê hia̍p下，我決斷m̄信。 26 過八日，伊ê學生koh再tī厝內，多馬亦tī-teh。門已經關，耶穌到，khiā tī中央，講，願lín平安。 27 就kā多馬講，伸你ê指頭á來看我ê手；伸你ê手探我ê hia̍p下；莫得做m̄信ê，tio̍h做信ê。 28 多馬應講，我ê主ah，我ê上帝ah。 29 耶穌kā伊講，你因為看見我chiah信；hiahê無看見來信ê人，有福氣。 30 耶穌tī學生ê面前，koh有行chōe-chōe神蹟，無記tī chit本冊ê； 31 獨獨記chiahê，hō͘ lín信耶穌是基督，是上帝ê Kiáⁿ；信，就tī伊ê名得tio̍h活。
1 Chhit ji̍t ê thâu chi̍t ji̍t, chheng chá, thiⁿ iáu-bē kng, Boa̍t-tāi-lia̍p ê Má-lī-a kàu bōng, khòaⁿ-kìⁿ chio̍h í-keng tùi bōng sóa khui. 2 Chiū cháu-khì chiū-kūn Se-bûn Pí-tek, kap pa̍t ê ha̍k-seng, chiū-sī Iâ-so͘ só͘ thiàⁿ hit ê, kā in kóng, Ū lâng chiong Chú î chhut bōng, goán m̄ chai hē tī tá-lo̍h. 3 Só͘-í Pí-tek kap hit ê pa̍t ê ha̍k-seng chhut-khì kàu bōng. 4 Nn̄g lâng pîⁿ-pîⁿ cháu; hit ê pa̍t ê ha̍k-seng cháu chòe thâu, pí Pí-tek khah kín, tāi-seng kàu bōng; 5 àⁿ-lo̍h khòaⁿ bōng lāi, khòaⁿ-kìⁿ iù-tōe pò͘ hē-teh; to̍k-to̍k bô ji̍p-khì. 6 Se-bûn Pí-tek tè-āu kàu, ji̍p bōng; khòaⁿ-kìⁿ iù-tōe pò͘ hē-teh, 7 koh khòaⁿ-kìⁿ pau thâu-khak ê kun, bô kap iù-tōe pò͘ chòe chi̍t ūi, sī lēng-gōa tī chi̍t só͘-chāi kńg teh. 8 Hit sî hit ê tāi-seng kàu bōng ê ha̍k-seng ia̍h ji̍p-khì, khòaⁿ-kìⁿ chiū sìn. 9 In-ūi in iáu-bē bêng-pe̍k sèng-keng ê ōe, kóng I tek-khak tio̍h tùi sí-lâng tiong koh-oa̍h. 10 Tùi án-ni nn̄g ê ha̍k-seng tò-khì ka-kī ê ke. 11 To̍k-to̍k Má-lī-a khiā tī bōng gōa teh thî-khàu; khàu ê sî, àⁿ-lo̍h khòaⁿ bōng lāi; 12 khòaⁿ-kìⁿ nn̄g ê thiⁿ-sài chhēng pe̍h saⁿ, chē tī Iâ-so͘ ê sin-si só͘ bat an-tì ê só͘-chāi, chi̍t-ê tī thâu, chi̍t-ê tī kha. 13 In chiū kā i kóng, Hū-jîn-lâng ah, Siáⁿ-sū khàu? ìn i kóng, In-ūi lâng chiong góa ê Chú î khì, góa m̄ chai hē I tī sím-mi̍h só͘-chāi. 14 Í-keng kóng chiah ê ōe, chiū hoan-sin ǹg āu-bīn, khòaⁿ-kìⁿ Iâ-so͘ teh khiā, iā m̄ chai I sī Iâ-so͘. 15 Iâ-so͘ kā i kóng, Hū-jîn-lâng ah, siáⁿ-sū thî-khàu? lí chhē chī-chūi? Má-lī-a phah-sǹg I sī kò͘ hn̂g ê, chiū kā I kóng, Thâu-ke ah, lí nā ū kng I khì, chhiáⁿ kā góa kóng hē I tī sím-mi̍h só͘-chāi, góa chiū khì siu I. 16 Iâ-so͘ kā i kóng, Má-lī-a ah. I chiū oa̍t-tńg-sin, ēng Hi-pek-lâi ê ōe kā I kóng, Lia̍p-pho-nî; ì-sù chiū-sī, Sian-siⁿ. 17 Iâ-so͘ kā i kóng, Bo̍h-tit bong góa; in-ūi góa iáu-bē chiūⁿ-khì kìⁿ Pē; lí tio̍h khì chhē góa ê hiaⁿ-tī kā in kóng, Góa chiūⁿ-khì kìⁿ góa ê Pē, ia̍h sī lín ê Pē; kìⁿ góa ê Siōng-tè, ia̍h sī lín ê Siōng-tè. 18 Boa̍t-tāi-lia̍p ê Má-lī-a chiū khì kā ha̍k-seng kóng, Góa í-keng khòaⁿ-kìⁿ Chú; koh kóng, Chú ēng chiah ê ōe kā i kóng. 19 Hit ji̍t chiū-sī chhit ji̍t ê thâu chi̍t ji̍t, í-keng àm, ha̍k-seng in-ūi kiaⁿ Iû-thài lâng, chiū tī in só͘ tòa ê só͘-chāi koaiⁿ mn̂g; Iâ-so͘ kàu, khiā tī tiong-kan, kā in kóng, Goān lín pêng-an. 20 Í-keng kóng chit ê ōe, chiū ēng chhiú kap hia̍p-ē hō͘ in khòaⁿ. Ha̍k-seng khòaⁿ-kìⁿ Chú, chiū hoaⁿ-hí. 21 Iâ-so͘ koh kā in kóng, Goān lín pêng-an; góa chhe lín, chhin-chhiūⁿ Pē ū chhe góa. 22 Í-keng kóng chit ê ōe, chiū tùi in pûn khùi kóng, Lín siū Sèng Sîn; 23 lín sià sím-mi̍h lâng ê chōe, chiū sià-khì; lâu sím-mi̍h lâng ê chōe, chiū lâu-teh. 24 Ū To-má chheng chòe Té-thó͘-má ê, sī cha̍p-jī ha̍k-seng ê chi̍t-ê, Iâ-so͘ kàu ê sî, i bô saⁿ-kap tī-teh. 25 Kî-û ê ha̍k-seng chiū kā i kóng, Goán chiah-ê í-keng khòaⁿ-kìⁿ Chú lah. Nā-sī To-má kā in kóng, Góa nā bô khòaⁿ-kìⁿ I chhiú-tiong teng ê jiah, bô ēng góa ê chńg-thâu-á thàm I teng ê jiah, bô ēng góa ê chhiú thàm I ê hia̍p-ē, góa koat-toàn m̄ sìn. 26 Kè poeh ji̍t, I ê ha̍k-seng koh-chài tī chhù-lāi, To-má ia̍h tī-teh. Mn̂g í-keng koaiⁿ, Iâ-so͘ kàu, khiā tī tiong-ng, kóng, Goān lín pêng-an. 27 Chiū kā To-má kóng, Chhun lí ê chńg-thâu-á lâi khòaⁿ góa ê chhiú; chhun lí ê chhiú thàm góa ê hia̍p-ē; bo̍h-tit chòe m̄ sìn ê, tio̍h chòe sìn ê. 28 To-má ìn kóng, Góa ê Chú ah, góa ê Siōng-tè ah. 29 Iâ-so͘ kā i kóng, Lí in-ūi khòaⁿ-kìⁿ góa chiah sìn; hiah ê bô khòaⁿ-kìⁿ lâi sìn ê lâng, ū hok-khì. 30 Iâ-so͘ tī ha̍k-seng ê bīn-chêng, koh ū kiâⁿ chōe-chōe sîn-jiah, bô kì tī chit pún chheh ê; 31 to̍k-to̍k kì chiah-ê, hō͘ lín sìn Iâ-so͘ sī Ki-tok, sī Siōng-tè ê Kiáⁿ; sìn, chiū tī I ê miâ tit-tio̍h oa̍h.
1 Chiahê tāi-chì以後，耶穌tī Thê-pí-lī-a ê海邊，koh顯明家己hō͘學生看；伊ê出現記tī下底。 2 有西門彼得、多馬，稱Té-thó͘-má，加利利ê Ka-ná人那但業，Se-pí-thài ê kiáⁿ，iáu有學生兩個lóng saⁿ-kap tī-teh。 3 西門彼得kā in講，我beh去討魚。In kā伊講，阮亦beh kap你去。就出去，上船；hit暝無掠tio̍h甚麼。 4 天phú光，耶穌khiā tī海坪，但是學生m̄知伊是耶穌。 5 耶穌就kā in講，細kiáⁿ ah，lín有物配無？In講，無。 6 伊就kā in講，拋網tī船ê chiàⁿ-pêng，就會得tio̍h。In拋落去，就網拖bōe起來，是因為魚chōe ê緣故。 7 Tùi án-ni，耶穌所疼hitê學生kā彼得講，是主lah。西門彼得一下聽見是主，因為thǹg-pak-theh就用外衫來hâ，跳落海。 8 其餘ê學生，(因為離坪無遠，約略三十丈) ，用細隻船來拖hit網ê魚。 9 到上坪，看見有teh to̍h ê炭，頂面有魚，koh有餅。 10 耶穌kā in講，Tú-á拋tio̍h ê魚，掠幾尾來。 11 西門彼得就起去，拖網上坪，有大尾魚滿滿，共一百五十三尾；魚雖然hiah chōe，網亦無裂。 12 耶穌kā in講，來食早頓。學生無人敢問伊，你是是誰？因為知伊是主。 13 耶穌到，the̍h餅hō͘ in，魚亦是án-ni。 14 耶穌tùi死人中koh活了後，出現hō͘伊ê學生看見，這是第三pái。 15 已經食早頓，耶穌kā西門彼得講，約翰ê kiáⁿ西門，你疼我khah贏chiahê mah？應講，主ah，是；你知我疼你。耶穌kā伊講，飼我ê羊á-kiáⁿ。 16 第二pái，koh kā伊講，約翰ê kiáⁿ西門，你疼我mah？講，主ah，是；你知我疼你。耶穌kā伊講，照顧我ê羊。 17 第三pái，kā伊講，約翰ê kiáⁿ，西門，你疼我mah？彼得因為伊第三pái kā伊講，你疼我mah？就憂悶，kā伊講，主，你無所m̄知；你知我疼你。耶穌kā伊講，飼我ê羊á。 18 我實實kā你講，你少年ê時用帶家己縛，照所ài來行遊；獨獨到老，你beh伸手，別人就縛你，拖你到m̄-ài去ê所在。 19 耶穌講這話，是指彼得beh怎樣死，來榮光上帝。已經講án-ni，就kā伊講，Tè我。 20 彼得oa̍t-tńg身，看見耶穌所疼ê學生tè in，就是前tī晚餐ê時，hiàⁿ óa耶穌ê胸坎講，主ah，賣你ê人是是誰？ 21 彼得看見，就kā耶穌講，主ah，chit人怎樣？ 22 耶穌kā伊講，我若ài伊tī-teh到我來，kap你甚麼干涉？你tio̍h tè我。 23 Tùi án-ni，chitê話遍傳tī兄弟ê中間，講，Chitê學生bōe死；但是耶穌m̄是kā伊講伊bōe死，獨獨講，我若ài伊長長tī-teh到我來，kap你甚麼干涉？ 24 為tio̍h chiahê事做干證來寫伊ê人，就是chitê學生；koh咱知伊ê干證是真。 25 耶穌所行iáu有chōe-chōe項，若隨一項來寫，我phah算所記ê冊，世間tóe bōe了。
1 Chiah ê tāi-chì í-āu, Iâ-so͘ tī Thê-pí-lī-a ê hái-piⁿ, koh hián-bêng ka-kī hō͘ ha̍k-seng khòaⁿ; I ê chhut-hiān kì tī ē-tóe. 2 Ū Se-bûn Pí-tek, To-má, chheng Té-thó͘-má, Ka-lī-lī ê Ka-ná lâng Ná-tàn-gia̍p, Se-pí-thài ê kiáⁿ, iáu ū ha̍k-seng nn̄g ê lóng saⁿ-kap tī-teh. 3 Se-bûn Pí-tek kā in kóng, Góa beh khì thó-hî. In kā i kóng, Goán ia̍h beh kap lí khì. Chiū chhut-khì, chiūⁿ chûn; hit mî bô lia̍h-tio̍h sím-mi̍h. 4 Thiⁿ phú-kng, Iâ-so͘ khiā tī hái-phiâⁿ, nā-sī ha̍k-seng m̄ chai I sī Iâ-so͘. 5 Iâ-so͘ chiū kā in kóng, Sòe-kiáⁿ ah, lín ū mi̍h-phè bô? In kóng, Bô. 6 I chiū kā in kóng, Pha bāng tī chûn ê chiàⁿ pêng, chiū ōe tit-tio̍h. In pha-lo̍h-khì, chiū bāng thoa bōe khí-lâi, sī in-ūi hî chōe ê iân-kò͘. 7 Tùi án-ni, Iâ-so͘ só͘ thiàⁿ hit ê ha̍k-seng kā Pí-tek kóng, Sī Chú lah. Se-bûn Pí-tek chi̍t-ē thiaⁿ-kìⁿ sī Chú, in-ūi thǹg-pak-theh chiū ēng gōa-saⁿ lâi hâ, thiàu-lo̍h hái. 8 Kî-û ê ha̍k-seng, (in-ūi lī phiâⁿ bô hn̄g, iok-lio̍k saⁿ-cha̍p tn̄g), ēng sòe chiah chûn lâi thoa hit bāng ê hî. 9 Kàu chiūⁿ phiâⁿ, khòaⁿ-kìⁿ ū teh to̍h ê thòaⁿ, téng-bīn ū hî, koh ū piáⁿ. 10 Iâ-so͘ kā in kóng, Tú-á pha-tio̍h ê hî, lia̍h kúi bé lâi. 11 Se-bûn Pí-tek chiū khí-khì, thoa bāng chiūⁿ phiâⁿ, ū tōa bé hî móa-móa, kiōng chi̍t-pah gō͘-cha̍p-saⁿ bé; hî sui-jiân hiah chōe, bāng ia̍h bô li̍h. 12 Iâ-so͘ kā in kóng, Lâi chia̍h chá tǹg. Ha̍k-seng bô lâng káⁿ mn̄g I, Lí sī chī-chūi? in-ūi chai I sī Chú. 13 Iâ-so͘ kàu, the̍h piáⁿ hō͘ in, hî ia̍h sī án-ni. 14 Iâ-so͘ tùi sí-lâng tiong koh-oa̍h liáu-āu, chhut-hiān hō͘ I ê ha̍k-seng khòaⁿ-kìⁿ, che sī tē saⁿ pái. 15 Í-keng chia̍h chá tǹg, Iâ-so͘ kā Se-bûn Pí-tek kóng, Iok-hān ê kiáⁿ Se-bûn, lí thiàⁿ góa khah-iâⁿ chiah-ê mah? Ìn kóng, Chú ah, Sī; lí chai góa thiàⁿ lí. Iâ-so͘ kā i kóng, Chhī góa ê iûⁿ-á-kiáⁿ. 16 Tē jī pái, koh kā i kóng, Iok-hān ê kiáⁿ Se-bûn, lí thiàⁿ góa mah? Kóng, Chú ah, sī; lí chai góa thiàⁿ lí. Iâ-so͘ kā i kóng, Chiàu-kò͘ góa ê iûⁿ. 17 Tē saⁿ pái, kā i kóng, Iok-hān ê kiáⁿ, Se-bûn, lí thiàⁿ góa mah? Pí-tek in-ūi I tē saⁿ pái kā i kóng, Lí thiàⁿ góa mah? chiū iu-būn, kā i kóng, Chú, lí bô só͘ m̄ chai; lí chai góa thiàⁿ lí. Iâ-so͘ kā i kóng, Chhī góa ê iûⁿ-á. 18 Góa si̍t-si̍t kā lí kóng, Lí siàu-liân ê sî ēng tòa ka-kī pa̍k, chiàu só͘ ài lâi kiâⁿ-iû; to̍k-to̍k kàu lāu, lí beh chhun chhiú, pa̍t lâng chiū pa̍k lí, thoa lí kàu m̄ ài khì ê só͘-chāi. 19 Iâ-so͘ kóng che ōe, sī chí Pí-tek beh cháiⁿ-iūⁿ sí, lâi êng-kng Siōng-tè. Í-keng kóng án-ni, chiū kā i kóng, Tè góa. 20 Pí-tek oa̍t-tńg-sin, khòaⁿ-kìⁿ Iâ-so͘ só͘ thiàⁿ ê ha̍k-seng tè in, chiū-sī chêng tī boán-chhan ê sî, hiàⁿ óa Iâ-so͘ ê heng-khám kóng, Chú ah, bōe lí ê lâng sī chī-chūi? 21 Pí-tek khòaⁿ-kìⁿ, chiū kā Iâ-so͘ kóng, Chú ah, chit lâng cháiⁿ-iūⁿ? 22 Iâ-so͘ kā i kóng, Góa nā ài i tī-teh kàu góa lâi, kap lí sím-mi̍h kan-sia̍p? lí tio̍h tè góa. 23 Tùi án-ni, chit ê ōe piàn thoân tī hiaⁿ-tī ê tiong-kan, kóng, Chit ê ha̍k-seng bōe sí; nā-sī Iâ-so͘ m̄ sī kā i kóng i bōe sí, to̍k-to̍k kóng, Góa nā ài i tn̂g-tn̂g tī-teh kàu góa lâi, kap lí sím-mi̍h kan-sia̍p? 24 Ūi-tio̍h chiah ê sū chòe kan-chèng lâi siá i ê lâng, chiū-sī chit ê ha̍k-seng; koh lán chai i ê kan-chèng sī chin. 25 Iâ-so͘ só͘ kiâⁿ iáu ū chōe-chōe hāng, nā sûi chi̍t hāng lâi siá, góa phah-sǹg só͘ kì ê chheh, sè-kan tóe bōe liáu.