1 耶和華ê奴僕摩西死了後，耶和華吩咐Lùn ê kiáⁿ約書亞，就是跟隨摩西ê，講： 2 我ê奴僕摩西死了lah；taⁿ你tio̍h起來，kap眾百姓過chitê約旦，去我所賞賜以色列人ê地。 3 見若lín ê腳掌所踏ê地，我lóng賞賜lín，照我對摩西所講ê； 4 tùi曠野kap chitê Lī-pa-lùn到大河，就是Pek-lat河，Hek人ê全地，koh到大海，ǹg日落ê所在，lóng beh做lín ê境界。 5 你一世人的確無一人ōe khiā-tiâu tī你ê面前；我怎樣kap摩西tī-teh，也beh án-ni kap你tī-teh；我的確無離開你，也無放sak你。 6 你tio̍h勇敢壯膽，因為你beh hō͘ chitê百姓得tio̍h hitê地做業，就是我對in ê列祖所chiù-chōa beh hō͘ in ê。 7 獨獨你tio̍h勇敢大大壯膽，執守我ê奴僕摩西所命令你一切ê律法，來行伊；m̄-thang離開來偏左偏右，hō͘你無論toh落去，lóng得tio̍h興通。 8 Chitê律法ê冊m̄-thang離開你ê嘴，的確tio̍h暝日想伊， hō͘你執守來行chitê冊內所記載一切ê話；án-ni就會hō͘你ê路平坦，你也得tio̍h大興通。 9 我kiám無命令你mah？你tio̍h勇敢壯膽，莫得驚，也莫得懍；因為你無論toh落去，耶和華你ê上帝kap你tī-teh。 10 Tùi án-ni，約書亞命令百姓ê官長講： 11 Lín tio̍h遍行營中，命令百姓，講：Lín tio̍h備辦食物，因為三日內，lín beh過chitê約旦，入去得tio̍h耶和華lín上帝所beh hō͘ lín得tio̍h ê地。 12 約書亞吩咐Liû-piān人、Ka-tek人，kap Má-ná-se半支派，講： 13 Lín tio̍h記得耶和華ê奴僕摩西所命令lín ê話，講：耶和華lín上帝已經hō͘ lín平安，也beh將chitê地賞賜lín。 14 Lín ê bó͘，lín ê gín-ná，lín ê cheng-siⁿ，lóng tio̍h tòa tī約旦chit-pêng，摩西所hō͘ lín ê地；獨獨lín中間一切大氣力ê勇士，lóng tio̍h帶軍器，tī lín兄弟ê頭前過去，幫贊in； 15 到耶和華hō͘ lín ê兄弟得tio̍h平安，親像lín一樣，到in也得tio̍h耶和華lín上帝所賞賜in ê地，hit時lín chiah thang tò去lín所得tio̍h ê地，承接伊來做業，就是耶和華ê奴僕摩西tī約旦chit-pêng，ǹg日出ê所在，所hō͘ lín ê。 16 In應約書亞講：見你所命令阮ê，阮beh行，你所差阮ê，阮lóng beh去； 17 阮前tī一切ê事怎樣聽thàn摩西，taⁿ也beh án-ni聽thàn你；獨獨願耶和華你ê上帝kap你tī-teh，親像伊前kap摩西tī-teh一樣。 18 無論甚麼人違背你ê命令，m̄聽你ê話，照你一切所命令ê，就beh hō͘伊死；獨獨你tio̍h勇敢壯膽。
1 Iâ-hô-hoa ê lô͘-po̍k Mô͘-se sí liáu-āu, Iâ-hô-hoa hoan-hù Lùn ê kiáⁿ Iok-su-a, chiū-sī kun-sûi Mô͘-se ê, kóng, 2 Góa ê lô͘-po̍k Mô͘-se sí-liáu lah; taⁿ lí tio̍h khí-lâi, kap chèng peh-sìⁿ kè chit ê Iok-tàn, khì Góa só͘ siúⁿ-sù Í-sek-lia̍t lâng ê tōe. 3 Kìⁿ-nā lín ê kha-chiúⁿ só͘ ta̍h ê tōe, Góa lóng siúⁿ-sù lín, chiàu Góa tùi Mô͘-se só͘ kóng ê; 4 tùi khòng-iá kap chit ê Lī-pa-lùn kàu tōa-hô, chiū-sī Pek-lat hô, Hek-lâng ê choân-tōe, koh kàu tōa-hái, ǹg ji̍t-lo̍h ê só͘-chāi, lóng beh chòe lín ê kéng-kài. 5 Lí chi̍t-sì-lâng tek-khak bô chi̍t-lâng ōe khiā-tiâu tī lí ê bīn-chêng; Góa cháiⁿ-iūⁿ kap Mô͘-se tī-teh, iā beh án-ni kap lí tī-teh; Góa tek-khak bô lī-khui lí, iā bô pàng-sak lí. 6 Lí tio̍h ióng-kám chòng-táⁿ, in-ūi lí beh hō͘ chit ê peh-sìⁿ tit-tio̍h hit ê tōe chòe gia̍p, chiū-sī Góa tùi in ê lia̍t-chó͘ só͘ chiù-chōa beh hō͘ in ê. 7 To̍k-to̍k lí tio̍h ióng-kám tōa-tōa chòng-táⁿ, chip-siú Góa ê lô͘-po̍k Mô͘-se só͘ bēng-lēng lí it-chhè ê lu̍t-hoat, lâi kiâⁿ i; m̄-thang lī-khui lâi phian-chó phian-iū, hō͘ lí bô-lūn toh-lo̍h khì, lóng tit-tio̍h heng-thong. 8 Chit ê lu̍t-hoat ê chheh m̄-thang lī-khui lí ê chhùi, tek-khak tio̍h mî-ji̍t siūⁿ i, hō͘ lí chip-siú lâi kiâⁿ chit ê chheh-lāi só͘ kì-chài it-chhè ê ōe; án-ni chiū ōe hō͘ lí ê lō͘ pîⁿ-tháⁿ, lí iā tit-tio̍h tōa heng-thong. 9 Góa kiám bô bēng-lēng lí mah? Lí tio̍h ióng-kám chòng-táⁿ, bo̍h-tit kiaⁿ, iā bo̍h-tit lún; in-ūi lí bô-lūn toh-lo̍h khì, Iâ-hô-hoa lí ê Siōng-tè kap lí tī-teh. 10 Tùi án-ni Iok-su-a bēng-lēng peh-sìⁿ ê koaⁿ-tiúⁿ kóng, 11 Lín tio̍h piàn-kiâⁿ iâⁿ-tiong, bēng-lēng peh-sìⁿ, kóng, Lín tio̍h pī-pān chia̍h-mi̍h, in-ūi saⁿ-ji̍t-lāi, lín beh kè chit ê Iok-tàn, ji̍p-khì tit-tio̍h Iâ-hô-hoa lín Siōng-tè só͘ beh hō͘ lín tit-tio̍h ê tōe. 12 Iok-su-a hoan-hù Liû-piān lâng, Ka-tek lâng, kap Má-ná-se pòaⁿ-chi-phài, kóng, 13 Lín tio̍h kì-tit Iâ-hô-hoa ê lô͘-po̍k Mô͘-se só͘ bēng-lēng lín ê ōe, kóng, Iâ-hô-hoa lín Siōng-tè í-keng hō͘ lín pêng-an, iā beh chiong chit ê tōe siúⁿ-sù lín. 14 Lín ê bó͘, lín ê gín-ná, lín ê cheng-siⁿ, lóng tio̍h tòa tī Iok-tàn chit-pêng, Mô͘-se só͘ hō͘ lín ê tōe; to̍k-to̍k lín tiong-kan it-chhè tōa khùi-la̍t ê ióng-sū, lóng tio̍h tòa kun-khì, tī lín hiaⁿ-tī ê thâu-chêng kè-khì, pang-chān in; 15 kàu Iâ-hô-hoa hō͘ lín ê hiaⁿ-tī tit-tio̍h pêng-an, chhin-chhiūⁿ lín chi̍t-iūⁿ, kàu in iā tit-tio̍h Iâ-hô-hoa lín Siōng-tè só͘ siúⁿ-sù in ê tōe, hit-sî lín chiah thang tò-khì lín só͘ tit-tio̍h ê tōe, sêng-chiap i lâi chòe-gia̍p, chiū-sī Iâ-hô-hoa ê lô͘-po̍k Mô͘-se tī Iok-tàn chit-pêng, ǹg ji̍t-chhut ê só͘-chāi, só͘ hō͘ lín ê. 16 In ìn Iok-su-a kóng, Kìⁿ lí só͘ bēng-lēng goán ê, goán beh kiâⁿ, lí só͘ chhe goán ê, goán lóng beh khì; 17 goán chêng tī it-chhè ê sū cháiⁿ-iūⁿ thiaⁿ-thàn Mô͘-se, taⁿ iā beh án-ni thiaⁿ-thàn lí; to̍k-to̍k goān Iâ-hô-hoa lí ê Siōng-tè kap lí tī-teh, chhin-chhiūⁿ I chêng kap Mô͘-se tī-teh chi̍t-iūⁿ. 18 Bô-lūn sím-mi̍h lâng ûi-pōe lí ê bēng-lēng, m̄-thiaⁿ lí ê ōe, chiàu lí it-chhè só͘ bēng-lēng ê, chiū beh hō͘ i sí; to̍k-to̍k lí tio̍h ióng-kám chòng-táⁿ.
1 Lùn ê kiáⁿ約書亞tùi Si̍p-têng暗靜差兩人做偵探，吩咐in講：lín去看hitê地，kap耶利哥。In就去，到一个娼妓Lat-ha̍p ê厝，就歇tī-hia。 2 有人報耶利哥王講：看ah，今暗有以色列人來chia偷看chitê地。 3 耶利哥王差人去Lat-ha̍p hia講：Hiah-ê來你chia，入你ê厝ê人，你tio̍h chhōa in出來；因為in來，是beh偷看chitê全地。 4 婦人人將hit兩人khǹg密，就應講，真正有人來我chia；總是in tùi toh落來，我m̄知； 5 日暗，beh關城門ê時，hiahê人出去；in去toh落我m̄知，lín緊緊去jip，就會jip-tio̍h。 6 (總是婦人人已經chhōa in上厝頂，將所排tī厝頂ê麻稿(môa-kó)來蓋in。) 7 Hiah-ê人就àn約旦hit條路jip伊，到路頭；jip in ê人一下出去，城門就關。 8 兩人iáu未去睏，婦人人就上厝頂到in hia； 9 對in講，我知耶和華已經將chitê地賞賜lín，koh因為lín ê緣故阮lóng驚，chit所在一切khiā起ê百姓，tī lín ê面前lóng失膽。 10 因為阮有聽見lín出埃及ê時，耶和華怎樣tī lín ê頭前hō͘紅海ê水乾去；koh lín怎樣款待約旦hit-pêng兩個A-mô͘-lī王，Se-hông kap Go̍k，就是lín所毀滅ê。 11 阮一下聽見chiahê事，就失膽，因為lín ê緣故ta̍k-ê神不附體；因為耶和華lín ê上帝，tī天頂地下做上帝。 12 Taⁿ我已經好款待lín，請lín kí耶和華對我chiù-chōa，beh好款待我老父ê家，續hō͘我一个實在ê記號； 13 beh救活我ê老父、老母，我ê兄弟、姊妹，kap一切屬in所有ê，拯救阮ê性命免死。 14 兩人應伊講：你若無漏洩(設)阮chitê事，阮甘願用阮ê性命替lín，到耶和華將chitê地賞賜阮ê時，阮beh用慈愛誠實款待你。 15 Tùi án-ni，伊用索tùi窗á kā in 墜落去；因為伊ê厝起tī城牆，伊也khiā起tī牆頂。 16 伊對in講，Lín tio̍h上去山裡，驚了追jip ê人tú-tio̍h lín；tio̍h tī-hia bih三日，thèng候追jip ê人tò來；然後chiah thang行lín ê路。 17 兩人對伊講，你kah阮所chiù-chōa ê，阮的確無為tio̍h hitê來犯罪； 18 阮若到chit所在ê時，你tio̍h將chit條朱紅ê索縛tī墜阮落去ê窗á裡；也tio̍h聚集你ê老父、老母、兄弟，kap你ê老父全家lóng tiàm你ê厝內； 19 見若出你ê家ê門去街路ê，伊ê死是自取ê，無阮ê罪；見若kap你tī厝內ê，若有人下手害伊，就伊ê死是阮ê罪； 20 總是你若漏洩阮chitê事，就你所kah阮chiù-chōa-ê，kap阮無干涉。 21 伊講：Thang照lín ê話來行。Tùi án-ni，伊差in去；in就去；伊用朱紅ê索縛tī窗á。 22 兩人去到山裡，tiàm hia三日，thèng候追jip ê人tò去，追jip ê人沿路chhē in，也chhē無tio̍h。 23 兩人就落山tò來，過河到Lùn ê kiáⁿ約書亞hia；對伊講起in所tú-tio̍h一切ê事。 24 Koh對約書亞講：耶和華果然用hitê全地交tī咱ê手；hit所在一切khiā起ê百姓，tī咱ê面前lóng失膽。
1 Lùn ê kiáⁿ Iok-su-a tùi Si̍p-têng àm-chīⁿ chhe nn̄g-lâng chòe cheng-thàm, hoan-hù in kóng, Lín khì khòaⁿ hit ê tōe, kap Iâ-lī-ko. In chiū khì, kàu chi̍t ê chhiong-ki Lat-ha̍p ê chhù, chiū hioh tī-hia. 2 Ū lâng pò Iâ-lī-ko ông kóng, Khòaⁿ ah, kin-àm ū Í-sek-lia̍t lâng lâi chia thau-khòaⁿ chit ê tōe. 3 Iâ-lī-ko ông chhe lâng khì Lat-ha̍p hia kóng, Hiah-ê lâi lí chia, ji̍p lí ê chhù ê lâng, lí tio̍h chhōa in chhut-lâi; in-ūi in lâi, sī beh thau-khòaⁿ chit ê choân-tōe. 4 Hū-jîn-lâng chiong hí nn̄g-lâng khǹg-ba̍t, chiū ìn kóng, Chin-chiàⁿ ū lâng lâi góa chia; chóng-sī in tùi toh-lo̍h lâi, góa m̄-chai; 5 ji̍t àm, beh koaiⁿ siâⁿ-mn̂g ê sî, hiah ê lâng chhut-khì; in khì toh-lo̍h góa m̄-chai, lín kín-kín khì jip, chiū ōe jip-tio̍h. 6 (Chóng-sī hū-jîn-lâng í-keng chhōa in chiūⁿ chhù-téng, chiong só͘ pâi tī chhù-téng ê môa-kó lâi khàm in.) 7 Hiah ê lâng chiū àn Iok-tàn hit tiâu lō͘ jip i, kàu lō͘-thâu; jip in ê lâng chi̍t-ē chhut-khì, siâⁿ-mn̂g chiū koaiⁿ. 8 Nn̄g-lâng iáu-bē khì khùn, hū-jîn-lâng chiū chiūⁿ chhù-téng kàu in hia; 9 tùi in kóng, Góa chai Iâ-hô-hoa í-keng chiong chit ê tōe siúⁿ-sù lín, koh in-ūi lín ê iân-kò͘ goán lóng kiaⁿ, chit só͘-chāi it-chhè khiā-khí ê peh-sìⁿ, tī lín ê bīn-chêng lóng sit-táⁿ. 10 In-ūi goán ū thiaⁿ-kìⁿ lín chhut Ai-ki̍p ê sî, Iâ-hô-hoa cháiⁿ-iūⁿ tī lín ê thâu-chêng hō͘ Âng-hái ê chúi ta-khì; koh lín cháiⁿ-iūⁿ khoán-thāi Iok-tàn hit pêng nn̄g ê A-mô͘-lī ông, Se-hông kap Go̍k, chiū-sī lín só͘ húi-bia̍t-ê. 11 Goán chi̍t-ē thiaⁿ-kìⁿ chiah ê sū, chiū sit-táⁿ, in-ūi lín ê iân-kò͘ ta̍k-ê sîn put-hū-thé; in-ūi Iâ-hô-hoa lín ê Siōng-tè, tī thiⁿ-téng tōe-ē chòe Siōng-tè. 12 Taⁿ góa í-keng hó khoán-thāi lín, chhiáⁿ lín kí Iâ-hô-hoa tùi góa chiù-chōa, beh hó khoán-thāi góa lāu-pē ê ke, sòa hō͘ góa chi̍t-ê si̍t-chāi ê kì-hō; 13 beh kiù-oa̍h góa ê lāu-pē, lāu-bú, góa ê hiaⁿ-tī, chí-bē, kap it-chhè sio̍k in só͘-ū-ê, chín-kiù goán ê sìⁿ-miā bián sí. 14 Nn̄g-lâng ìn i kóng, Lí nā bô lāu-siat goán chit ê sū, goán kam-goān ēng goán ê sìⁿ-miā thòe lín, kàu Iâ-hô-hoa chiong chit ê tōe siúⁿ-sù goán ê sî, goán beh ēng chû-ài sêng-si̍t khoán-thāi lí. 15 Tùi án-ni i ēng soh tùi thang-á kā in tūi-lo̍h-khì; in-ūi i ê chhù khí tī siâⁿ-chhiûⁿ, i iā khiā-khí tī chhiûⁿ-téng. 16 I tùi in kóng, Lín tio̍h chiūⁿ-khì soaⁿ-ni̍h, kiaⁿ-liáu tui-jip ê lâng tú-tio̍h lín; tio̍h tī-hia bih saⁿ-ji̍t, thèng-hāu tui-jip ê lâng tò-lâi; jiân-āu chiah thang kiâⁿ lín ê lō͘. 17 Nn̄g-lâng tùi i kóng, Lí kah goán só͘ chiù-chōa ê, goán tek-khak bô ūi-tio̍h hit-ê lâi hoān-chōe; 18 goán nā kàu chit só͘-chāi ê sî, lí tio̍h chiong chit-tiâu chu-âng ê soh pa̍k tī tūi goán lo̍h-khì ê thang-á-ni̍h; iā tio̍h chū-chi̍p lí ê lāu-pē, lāu-bú, hiaⁿ-tī, kap lí ê lāu-pē choân-ke lóng tiàm lí ê chhù-lāi; 19 kìⁿ-nā chhut lí ê ke ê mn̂g khì ke-lō͘-ê, i ê sí sī chū-chhú-ê, bô goán ê chōe; kìⁿ-nā kap lí tī chhù-lāi-ê, nā ū lâng hē-chhiú hāi i, chiū i ê sí sī goán ê chōe; 20 chóng-sī lí nā lāu-siat goán chit ê sū, chiū lí só͘ kah goán chiù-chōa-ê, kap goán bô kan-sia̍p. 21 I kóng, Thang chiàu lín ê ōe lâi kiâⁿ. Tùi án-ni i chhe in khì; in chiū khì; i ēng chu-âng ê soh pa̍k tī thang-á. 22 Nn̄g-lâng khì kàu soaⁿ-ni̍h, tiàm hia saⁿ-ji̍t, thèng-hāu tui-jip ê lâng tò-khì, tui-jip ê lâng iân-lō͘ chhē in, iā chhē-bô-tio̍h. 23 Nn̄g-lâng chiū lo̍h-soaⁿ tò-lâi, kè hô kàu Lùn ê kiáⁿ Iok-su-a hia; tùi i kóng-khí in só͘ tú-tio̍h it-chhè ê sū. 24 Koh tùi Iok-su-a kóng, Iâ-hô-hoa kó-jiân ēng hit ê choân-tōe kau tī lán ê chhiú; hit só͘-chāi it-chhè khiā-khí ê peh-sìⁿ, tī lán ê bīn-chêng lóng sit-táⁿ.
1 天光約書亞透早起來，kap以色列眾人lóng離開Si̍p-têng，來到約旦；iáu未過去，就歇tī-hia，thèng候過河。 2 過三日，官長遍行營中； 3 命令百姓講：Lín看見耶和華lín上帝ê約櫃，koh看見祭司利未人扛伊ê時，tio̍h離開lín ê所在，來tè in ê後面。 4 總是lín kap約櫃相離，約略tio̍h量兩千肘ê遠；m̄-thang 逼近伊，hō͘ lín知所tio̍h行ê路；因為lín平時m̄-bat行chit條路。 5 約書亞對百姓講：Lín tio̍h家己聖潔，因為明á日耶和華beh tī lín中間行奇事。 6 約書亞koh吩咐祭司講：Lín扛約櫃起來，tī百姓ê頭前行；in就扛約櫃起來，行tī百姓ê頭前。 7 耶和華對約書亞講：Tùi今á日起，我beh hō͘你tī以色列眾人ê目睭前做大，hō͘ in知我kap你tī-teh，親像前kap摩西tī-teh一樣。 8 你tio̍h吩咐扛約櫃ê祭司講：Lín到約旦水邊ê時，tio̍h停腳tī約旦。 9 約書亞對以色列人講：Lín近前來，聽耶和華lín上帝ê話。 10 約書亞koh講：Tùi án-ni，lín thang知活ê上帝tī lín中間，beh tī lín ê頭前趕逐迦南人，Hek人、Hi-bī人、Pí-lī-sé人、Kek-ka-sat人、A-mô͘-lī人、Iâ-pò͘-su人。 11 看ah，普天下ê主宰ê約櫃beh tī lín ê頭前過去，入約旦。 12 Lín taⁿ tio̍h tùi以色列支派中揀十二人，每支派一个人； 13 到扛普天下ê主耶和華ê約櫃ê祭司，in ê腳khiā tī約旦河ê水，約旦河ê水，就是tùi頂面流落來ê水，beh截斷，khiā起來kui堆。 14 百姓離開布棚，beh過約旦ê時，祭司就扛約櫃tī百姓ê頭前。 15 Tī收成ê時，約旦ê水常常pôaⁿ過伊ê岸。扛約櫃ê到約旦，扛約櫃ê祭司，腳一下ùn-tio̍h水， 16 hitê tùi頂面流落來ê水，就khiā起來kui堆，相離真遠，tī Sat-la̍h-tàn邊頭ê亞當城；hitê流tī A-la̍h-pa海，就是鹽海，hiahê水全然截斷；百姓就tī耶利哥ê對面過去。 17 扛耶和華約櫃ê祭司tī約旦ê乾地定定khiā-teh；以色列眾人lóng tùi乾地過去，直到百姓一盡過約旦。
1 Thiⁿ-kng Iok-su-a thàu-chá khí-lâi, kap Í-sek-lia̍t chèng lâng lóng lī-khui Si̍p-têng, lâi kàu Iok-tàn; iáu-bē kè-khì, chiū hioh tī-hia, thèng-hāu kè-hô. 2 Kè saⁿ-ji̍t, koaⁿ-tiúⁿ piàn-kiâⁿ iâⁿ-tiong; 3 bēng-lēng peh-sìⁿ kóng, Lín khòaⁿ-kìⁿ Iâ-hô-hoa lín Siōng-tè ê iok-kūi, koh khòaⁿ-kìⁿ chè-si Lī-bī lâng kng i ê sî, tio̍h lī-khui lín ê só͘-chāi, lâi tè in ê āu-bīn. 4 Chóng-sī lín kap iok-kūi saⁿ-lī, iok-lio̍k tio̍h niû nn̄g-chheng tiú ê hn̄g; m̄-thang pek-kūn i, hō͘ lín chai só͘ tio̍h kiâⁿ ê lō͘; in-ūi lín pêng-sî m̄-bat kiâⁿ chit tiâu lō͘. 5 Iok-su-a tùi peh-sìⁿ kóng, Lín tio̍h ka-kī sèng-kiat, in-ūi bîn-á-ji̍t Iâ-hô-hoa beh tī lín tiong-kan kiâⁿ kî-sū. 6 Iok-su-a koh hoan-hù chè-si kóng, Lín kng iok-kūi khí-lâi, tī peh-sìⁿ ê thâu-chêng kiâⁿ; in chiū kng iok-kūi khí-lâi, kiâⁿ tī peh-sìⁿ ê thâu-chêng. 7 Iâ-hô-hoa tùi Iok-su-a kóng, Tùi kin-á-ji̍t khí, Góa beh hō͘ lí tī Í-sek-lia̍t chèng-lâng ê ba̍k-chiu-chêng chòe-tōa, hō͘ in chai Góa kap lí tī-teh, chhin-chhiūⁿ chêng kap Mô͘-se tī-teh chi̍t-iūⁿ. 8 Lí tio̍h hoan-hù kng iok-kūi ê chè-si kóng, Lín kàu Iok-tàn chúi-piⁿ ê sî, tio̍h thêng-kha tī Iok-tàn. 9 Iok-su-a tùi Í-sek-lia̍t lâng kóng, Lín kūn-chêng lâi, thiaⁿ Iâ-hô-hoa lín Siōng-tè ê ōe. 10 Iok-su-a koh kóng, Tùi án-ni lín thang chai oa̍h ê Siōng-tè tī lín tiong-kan, beh tī lín ê thâu-chêng kóaⁿ-tio̍k Ka-lâm lâng, Hek lâng, Hi-bī lâng, Pí-lī-sé lâng, Kek-ka-sat lâng, A-mô͘-lī lâng, Iâ-pò͘-su lâng. 11 Khòaⁿ ah, phó͘-thiⁿ-ē ê Chú-cháiⁿ ê iok-kūi beh tī lín ê thâu-chêng kè-khì, ji̍p Iok-tàn. 12 Lín taⁿ tio̍h tùi Í-sek-lia̍t chi-phài-tiong kéng cha̍p-jī lâng, múi chi-phài chi̍t ê lâng; 13 kàu kng phó͘-thiⁿ-ē ê Chú Iâ-hô-hoa ê iok-kūi ê chè-si, in ê kha khiā tī Iok-tàn hô ê chúi, Iok-tàn hô ê chúi, chiū-sī tùi téng-bīn lâu-lo̍h-lâi ê chúi, beh chia̍t-tn̄g, khiā-khí-lâi kui-tui. 14 Peh-sìⁿ lī-khui pò͘-pîⁿ, beh kè Iok-tàn ê sî, chè-si chiū kng iok-kūi tī peh-sìⁿ ê thâu-chêng. 15 Tī siu-sêng ê sî, Iok-tàn ê chúi siông-siông pôaⁿ-kè i ê hōaⁿ. Kng iok-kūi-ê kàu Iok-tàn, kng iok-kūi ê chè-si, kha chi̍t-ē ùn-tio̍h chúi, 16 hit-ê tùi téng-bīn lâu-lo̍h-lâi ê chúi, chiū khiā-khí-lâi kui-tui, saⁿ-lī chin-hn̄g, tī Sat-la̍h-tàn piⁿ-thâu ê A-tong siâⁿ; hit ê lâu tī A-la̍h-pa hái, chiū-sī Iâm-hái, hiah ê chúi choân-jiân chia̍t-tn̄g; peh-sìⁿ chiū tī Iâ-lī-ko ê tùi-bīn kè-khì. 17 Kng Iâ-hô-hoa iok-kūi ê chè-si tī Iok-tàn ê ta-tōe tiāⁿ-tiāⁿ khiā-teh; Í-sek-lia̍t chèng-lâng lóng tùi ta-tōe kè-khì, ti̍t-kàu peh-sìⁿ it-chīn kè Iok-tàn.
1 百姓已經一盡過約旦，耶和華就吩咐約書亞講： 2 Tio̍h tùi百姓中揀十二人，每支派一人； 3 命令in講：Lín tùi hia，tùi約旦河中，祭司ê腳定定khiā ê所在，取十二塊石，帶伊kap lín過去，hē tī lín今暝beh歇ê所在。 4 約書亞就照伊tùi以色列人中所備辦ê hit十二人，每支派一人，lóng叫in來。 5 約書亞就kā in講：Lín過去tī耶和華lín上帝約櫃ê頭前，到約旦河中，照以色列人支派ê數額，ta̍k人取一塊石頭giâ tī肩頭裡； 6 thang用chitê tī lín中間做證據；日後lín ê kiáⁿ孫問lín講：chiahê石頭，對tī lín甚麼意思？ 7 Lín就對in講，是因為前約旦ê水，tī耶和華ê約櫃前截斷；約櫃過約旦ê時，約旦ê水截斷，chiahê石beh做以色列人永遠ê記念。 8 以色列人照約書亞所命令ê來行；照以色列人支派ê數額，tùi約旦河中取十二塊石，lóng照耶和華對約書亞所講ê；in就續帶in過去，到in歇睏ê所在，就hē tī-hia。 9 約書亞另外用十二塊石，khiā tī約旦河中，tī 扛約櫃ê祭司腳khiā teh ê所在；到今á日hiahê石iáu-kú tī-hia。 10 扛約櫃ê祭司khiā tī約旦河中，thèng候耶和華命令約書亞對百姓講ê事做明白，是照摩西所命令約書亞一切ê話，百姓就緊緊過去。 11 眾百姓一盡過去，耶和華ê約櫃kap祭司就tī百姓ê面前過去。 12 Liû-piān人、Ka-tek人、Má-ná-se半支派ê人，lóng照摩西所對in講ê，帶軍器tī以色列人ê頭前過去； 13 約略有四萬人，lóng備辦交戰，tī耶和華ê面前過去，到耶利哥ê平洋，便便beh交戰。 14 當hit日耶和華hō͘約書亞tī以色列眾人ê目睭前做大；tī伊一生ê日，百姓敬畏伊，親像早前敬畏摩西一樣。 15 耶和華吩咐約書亞講： 16 你命令扛法櫃ê祭司，tùi約旦河上來。 17 約書亞就命令祭司講：Lín tùi約旦河上來。 18 扛耶和華約櫃ê祭司tùi約旦河上來；祭司ê腳掌tú-tú跨(hoa̍h)上乾地ê時，約旦河ê水就流到原位；照舊漲滿雙pêng ê岸。 19 正月初十日，百姓tùi約旦上來，就安營tī Kiat-kah，tī耶利哥東勢ê界。 20 In tùi約旦所取hit十二塊石，約書亞就khiā 伊tī Kiat-kah； 21 就對以色列人講：日後lín ê kiáⁿ孫問in ê老父講： 22 Chiahê石甚麼意思？hit時就tio̍h報lín ê kiáⁿ知，講：以色列人bat行乾地，過chitê約旦河。 23 因為耶和華lín ê上帝tī lín ê頭前hō͘約旦ê水乾去，thèng候lín過來，親像耶和華lín上帝前tī紅海所做一樣，就是hō͘伊tī咱ê頭前乾去，thèng候咱過來； 24 beh hō͘地上萬百姓lóng知耶和華ê手有大能力；也beh hō͘ lín永遠敬畏耶和華lín ê上帝。
1 Peh-sìⁿ í-keng it-chīn kè Iok-tàn, Iâ-hô-hoa chiū hoan-hù Iok-su-a kóng, 2 Tio̍h tùi peh-sìⁿ-tiong kéng cha̍p-jī lâng, múi chi-phài chi̍t-lâng; 3 bēng-lēng in kóng, Lín tùi hia, tùi Iok-tàn hô-tiong, chè-si ê kha tiāⁿ-tiāⁿ khiā ê só͘-chāi, chhú cha̍p-jī tè chio̍h, tòa i kap lín kè-khì, hē tī lín kim-mî beh hioh ê só͘-chāi. 4 Iok-su-a chiū chiàu i tùi Í-sek-lia̍t lâng tiong só͘ pī-pān ê hí cha̍p-jī lâng, múi chi-phài chi̍t-lâng, lóng kiò in lâi. 5 Iok-su-a chiū kā in kóng, Lín kè-khì tī Iâ-hô-hoa lín Siōng-tè iok-kūi ê thâu-chêng, kàu Iok-tàn hô-tiong, chiàu Í-sek-lia̍t lâng chi-phài ê siàu-gia̍h, ta̍k-lâng chhú chi̍t tè chio̍h-thâu giâ tī keng-thâu-ni̍h; 6 thang ēng chit-ê tī lín tiong-kan chòe chèng-kù; ji̍t-āu lín ê kiáⁿ-sun mn̄g lín kóng, Chiah ê chio̍h-thâu, tùi tī lín sím-mi̍h ì-sù? 7 lín chiū tùi in kóng, Sī in-ūi chêng Iok-tàn ê chúi, tī Iâ-hô-hoa ê iok-kūi chêng chia̍t-tn̄g; iok-kūi kè Iok-tàn ê sî, Iok-tàn ê chúi chia̍t-tn̄g, chiah ê chio̍h beh chòe Í-sek-lia̍t lâng éng-oán ê kì-liām. 8 Í-sek-lia̍t lâng chiàu Iok-su-a só͘ bēng-lēng-ê lâi kiâⁿ; chiàu Í-sek-lia̍t lâng chi-phài ê siàu-gia̍h, tùi Iok-tàn hô-tiong chhú cha̍p-jī tè chio̍h, lóng chiàu Iâ-hô-hoa tùi Iok-su-a só͘ kóng-ê; in chiū sòa tòa in kè-khì, kàu in hioh-khùn ê só͘-chāi, chiū hē tī-hia. 9 Iok-su-a lēng-gōa ēng cha̍p-jī tè chio̍h, khiā tī Iok-tàn hô-tiong, tī kng iok-kūi ê chè-si kha khiā-teh ê só͘-chāi; kàu kin-á-ji̍t hiah ê chio̍h iáu-kú tī-hia. 10 Kng iok-kūi ê chè-si khiā tī Iok-tàn hô-tiong, thèng-hāu Iâ-hô-hoa bēng-lēng Iok-su-a tùi peh-sìⁿ kóng ê sū chòe bêng-pe̍k, sī chiàu Mô͘-se só͘ bēng-lēng Iok-su-a it-chhè ê ōe, peh-sìⁿ chiū kín-kín kè-khì. 11 Chèng peh-sìⁿ it-chīn kè-khì, Iâ-hô-hoa ê iok-kūi kap chè-si chiū tī peh-sìⁿ ê bīn-chêng kè-khì. 12 Liû-piān lâng, Ka-tek lâng, Má-ná-se pòaⁿ-chi-phài ê lâng, lóng chiàu Mô͘-se só͘ tùi in kóng ê, tòa kun-khì tī Í-sek-lia̍t lâng ê thâu-chêng kè-khì; 13 iok-lio̍k ū sì-bān lâng, lóng pī-pān kau-chiàn, tī Iâ-hô-hoa ê bīn-chêng kè-khì, kàu Iâ-lī-ko ê pîⁿ-iûⁿ, piān-piān beh kau-chiàn. 14 Tng hit-ji̍t Iâ-hô-hoa hō͘ Iok-su-a tī Í-sek-lia̍t chèng-lâng ê ba̍k-chiu-chêng chòe-tōa; tī i it-seng ê ji̍t, peh-sìⁿ kèng-ùi i, chhin-chhiūⁿ chá-chêng kèng-ùi Mô͘-se chi̍t-iūⁿ. 15 Iâ-hô-hoa hoan-hù Iok-su-a kóng, 16 Lí bēng-lēng kng hoat-kūi ê chè-si, tùi Iok-tàn hô chiūⁿ-lâi. 17 Iok-su-a chiū bēng-lēng chè-si kóng, Lín tùi Iok-tàn hô chiūⁿ-lâi. 18 Kng Iâ-hô-hoa iok-kūi ê chè-si tùi Iok-tàn hô chiūⁿ-lâi; chè-si ê kha-chiúⁿ tú-tú hoa̍h-chiūⁿ ta-tōe ê sî, Iok-tàn hô ê chúi chiū lâu kàu goân-ūi; chiàu-kū tiòng-móa siang-pêng ê hōaⁿ. 19 Chiaⁿ-ge̍h chhoe-cha̍p ji̍t, peh-sìⁿ tùi Iok-tàn chiūⁿ-lâi, chiū an-iâⁿ tī Kiat-kah, tī Iâ-lī-ko tang-sì ê kài. 20 In tùi Iok-tàn só͘ chhú hí cha̍p-jī tè chio̍h, Iok-su-a chiū khiā i tī Kiat-kah; 21 chiū tùi Í-sek-lia̍t lâng kóng, Ji̍t-āu lín ê kiáⁿ-sun mn̄g in ê lāu-pē kóng, 22 Chiah ê chio̍h sím-mi̍h ì-sù? hit-sî chiū tio̍h pò lín ê kiáⁿ chai, kóng, Í-sek-lia̍t lâng bat kiâⁿ ta-tōe, kè chit ê Iok-tàn hô. 23 In-ūi Iâ-hô-hoa lín ê Siōng-tè tī lín ê thâu-chêng hō͘ Iok-tàn ê chúi ta-khì, thèng-hāu lín kè-lâi, chhin-chhiūⁿ Iâ-hô-hoa lín Siōng-tè chêng tī Âng-hái só͘ chòe chi̍t-iūⁿ, chiū-sī hō͘ i tī lán ê thâu-chêng ta-khì, thèng-hāu lán kè-lâi; 24 beh hō͘ tōe-chiūⁿ bān peh-sìⁿ lóng chai Iâ-hô-hoa ê chhiú ū tōa lêng-le̍k; iā beh hō͘ lín éng-oán kèng-ùi Iâ-hô-hoa lín ê Siōng-tè.
1 約旦河西勢ê A-mô͘-lī人chiahê王，kap óa海ê迦南人chiahê王，聽見耶和華tī以色列人ê面前hō͘約旦ê水乾去，thèng候咱過去；in ê心因為以色列人ê緣故就失膽，神不附體。 2 Hit時耶和華對約書亞講：你tio̍h chhòng火石刀，第二pái kā以色列人行割禮。 3 約書亞就chhòng火石刀，tī除去皮山hia，kā以色列人行割禮。 4 約書亞kā in行割禮ê緣故，是因為tùi埃及出來ê眾百姓，見能交戰ê ta-po͘丁，出埃及以後tī路裡死tī曠野。 5 因為出來ê眾百姓lóng受割禮；獨獨出埃及以後tī曠野ê路裡所生ê眾百姓，lóng無受割禮。 6 以色列人tī曠野行四十年，到眾百姓，就是出埃及ê戰士，一盡消滅；因為in無聽thàn耶和華ê話，耶和華bat對in chiù-chōa，m̄-hō͘ in看見耶和華對in列祖所chiù-chōa beh賞賜咱ê地，就是流奶kap蜜ê地。 7 In ê kiáⁿ孫，就是伊所興起來續接in ê，lóng無受割禮，因為in tī路裡無kā in行割禮；約書亞chiah kā in行。 8 百姓lóng受割禮明白，就tiàm tī營內家己ê所在，thèng候好。 9 耶和華對約書亞講：我今á日將埃及ê凌辱移徙離開lín；tùi án-ni，hit所在名叫Kiat-kah，直到今á日。 10 Hit時以色列人紮營tī Kiat-kah；hit月十四ê-hng，tī耶利哥ê平洋守pôaⁿ過節。 11 pôaⁿ過節ê隔日in就食hit所在所出ê，tú-tú hit日食無酵餅kap烘ê五穀； 12 in食hit所在所出ê，隔日má-ná就停歇；以色列人也無koh有má-ná；hit年in就食迦南地ê土產。 13 約書亞óa近耶利哥ê時kia̍h目看，看見有一人手拔刀，khiā tī伊ê對面；約書亞近óa伊，問伊講：你是為阮ê，á是為阮ê對敵ah？ 14 伊應講，無，我來是做耶和華ê軍長。約書亞就仆tī地裡拜伊，講：我ê主命令奴僕甚麼？ 15 耶和華ê軍長對約書亞講：Thǹg你腳裡ê鞋，因為你所khiā ê所在是聖ê；約書亞就照án-ni行。
1 Iok-tàn hô sai-sì ê A-mô͘-lī lâng chiah ê ông, kap óa-hái ê Ka-lâm lâng chiah ê ông, thiaⁿ-kìⁿ Iâ-hô-hoa tī Í-sek-lia̍t lâng ê bīn-chêng hō͘ Iok-tàn ê chúi ta-khì, thèng-hāu lán kè-khì; in ê sim in-ūi Í-sek-lia̍t lâng ê iân-kò͘ chiū sit-táⁿ, sîn put-hū-thé. 2 Hit-sî Iâ-hô-hoa tùi Iok-su-a kóng, Lí tio̍h chhòng hé-chio̍h to, tē-jī pái kā Í-sek-lia̍t lâng kiâⁿ kat-lé. 3 Iok-su-a chiū chhòng hé-chio̍h to, tī tû-khì-phê soaⁿ hia, kā Í-sek-lia̍t lâng kiâⁿ kat-lé. 4 Iok-su-a kā in kiâⁿ kat-lé ê iân-kò͘, sī in-ūi tùi Ai-ki̍p chhut-lâi ê chèng peh-sìⁿ, kìⁿ ōe kau-chiàn ê ta-po͘-teng, chhut Ai-ki̍p í-āu tī lō͘-ni̍h sí tī khòng-iá. 5 In-ūi chhut-lâi ê chèng peh-sìⁿ lóng siū kat-lé; to̍k-to̍k chhut Ai-ki̍p í-āu tī khòng-iá ê lō͘-ni̍h só͘ siⁿ ê chèng peh-sìⁿ, lóng bô siū kat-lé. 6 Í-sek-lia̍t lâng tī khòng-iá kiâⁿ sì-cha̍p nî, kàu chèng peh-sìⁿ, chiū-sī chhut Ai-ki̍p ê chiàn-sū, it-chīn siau-bia̍t; in-ūi in bô thiaⁿ-thàn Iâ-hô-hoa ê ōe, Iâ-hô-hoa bat tùi in chiù-chōa, m̄-hō͘ in khòaⁿ-kìⁿ Iâ-hô-hoa tùi in lia̍t-chó͘ só͘ chiù-chōa beh siúⁿ-sù lán ê tōe, chiū-sī lâu lin kap bi̍t ê tōe. 7 In ê kiáⁿ-sun, chiū-sī I só͘ heng-khí lâi sòa-chiap in ê, lóng bô siū kat-lé, in-ūi in tī lō͘-ni̍h bô kā in kiâⁿ kat-lé; Iok-su-a chiah kā in kiâⁿ. 8 Peh-sìⁿ lóng siū kat-lé bêng-pe̍k, chiū tiàm tī iâⁿ-lāi ka-kī ê só͘-chāi, thèng-hāu hó. 9 Iâ-hô-hoa tùi Iok-su-a kóng, Góa kin-á-ji̍t chiong Ai-ki̍p ê lêng-jio̍k î-sóa lī-khui lín; tùi án-ni hit só͘-chāi miâ kiò Kiat-kah, ti̍t-kàu kin-á-ji̍t. 10 Hit-sî Í-sek-lia̍t lâng chat-iâⁿ tī Kiat-kah; hit-ge̍h cha̍p-sì ê-hng, tī Iâ-lī-ko ê pîⁿ-iûⁿ siú pôaⁿ-kè-choeh. 11 Pôaⁿ-kè-choeh ê keh-ji̍t in chiū chia̍h hit só͘-chāi só͘ chhut ê, tú-tú hit-ji̍t chia̍h bô-kàⁿ-piáⁿ kap hang ê ngó͘-kok; 12 in chia̍h hit só͘-chāi só͘ chhut ê, keh-ji̍t má-ná chiū thêng-hioh; Í-sek-lia̍t lâng iā bô koh ū má-ná; hit-nî in chiū chia̍h Ka-lâm tōe ê thó͘-sán. 13 Iok-su-a óa-kūn Iâ-lī-ko ê sî kia̍h-ba̍k khòaⁿ, khòaⁿ-kìⁿ ū chi̍t-lâng chhiú pu̍ih-to, khiā tī i ê tùi-bīn; Iok-su-a kūn-óa i, mn̄g i kóng, Lí sī ūi goán ê, á-sī ūi goán ê tùi-te̍k ah? 14 I ìn kóng, Bô, góa lâi sī chòe Iâ-hô-hoa ê kun-tiúⁿ. Iok-su-a chiū phak tī tōe-ni̍h pài i, kóng, Góa ê Chú bēng-lēng lô͘-po̍k sím-mi̍h? 15 Iâ-hô-hoa ê kun-tiúⁿ tùi Iok-su-a kóng, Thǹg lí kha-ni̍h ê ôe, in-ūi lí só͘ khiā ê só͘-chāi sī sèng ê; Iok-su-a chiū chiàu án-ni kiâⁿ.
1 (耶利哥ê城門，因為以色列人ê緣故，就關tiâu-tiâu，無人出，也無人入。) 2 耶和華kā約書亞講：看ah，我有將耶利哥kap伊ê王，kap伊大力ê勇士，lóng交tī你ê手。 3 Lín一切ê戰士tio̍h圍se̍h chitê城一pái；六日lóng tio̍h án-ni行； 4 七個祭司tio̍h kia̍h七支羊角ê號筒行tī約櫃ê頭前，到第七日lín tio̍h se̍h城七pái，祭司也tio̍h pûn號筒； 5 in pûn角ê聲拖長，lín聽見號筒ê聲，眾百姓tio̍h大聲hoah，城牆就beh倒平平，ta̍k人lóng tio̍h直直進前去。 6 Lùn ê kiáⁿ約書亞叫祭司來，kā in講：Lín tio̍h 扛約櫃，祭司七人kia̍h七支羊角ê號筒tī耶和華ê櫃前。 7 Koh kā百姓講：Lín tio̍h進前去se̍h城，帶軍器ê tio̍h行tī耶和華ê櫃前。 8 約書亞對百姓講soah，七個祭司kia̍h七支羊角ê號筒，行tī耶和華ê面前，pûn號筒，耶和華ê約櫃tè tī in ê後面； 9 帶軍器ê行tī pûn號筒ê祭司ê頭前，後隊tè約櫃行；祭司ná行ná-pûn號筒。 10 約書亞命令百姓講：Lín m̄-thang hoah，m̄-thang hō͘人聽見lín ê聲，連一句也m̄-thang出嘴，thèng候我吩咐lín hoah ê日，hit時chiah thang hoah。 11 Tùi án-ni，伊hō͘耶和華ê約櫃圍城，se̍h一pái；in就tò來營盤，歇tī營內。 12 天光約書亞早早起來，祭司也扛耶和華ê約櫃。 13 Kia̍h七支羊角ê號筒ê七個祭司，tī耶和華ê櫃前直直行，pûn號筒；帶軍器ê tī in ê頭前行；後隊tè耶和華ê約櫃行，祭司ná行ná-pûn號筒； 14 第二日in se̍h城一pái；就tò來營盤；六日lóng是án-ni行。 15 第七日phah-phú光ê時，in早早起來，照án-ni se̍h城七pái；只有chit日se̍h城七pái。 16 到第七pái，祭司pûn號筒ê時，約書亞kā百姓講：Tio̍h hoah ah，因為耶和華用城交hō͘ lín lah。 17 Chitê城kap其中一切所有ê，lóng tio̍h分別歸hō͘耶和華；只有娼妓Lat-ha̍p，以及一切kap伊tī厝內ê，thang活teh；因為伊有khǹg密咱所差ê使者。 18 Lín tī應該滅ê物tio̍h家己謹慎，驚了lín the̍h應該滅ê物，致到家己也做應該滅ê；koh連累以色列全營也做應該滅ê，來害tio̍h伊。 19 只有金、銀，kap銅鐵ê器具，lóng tio̍h分別歸hō͘耶和華，收入耶和華ê府庫。 20 百姓就hoah，祭司也pûn號筒；百姓聽見號筒ê聲，就大聲hoah，城牆就倒到平平，百姓就進前入城，ta̍k人直直去；tùi án-ni，取hitê城。 21 Koh將城內所有ê，無論男女老幼、牛、羊，kap驢，lóng用刀一盡滅伊。 22 約書亞kā偵探hitê地hit兩人講：Lín入去hitê娼妓ê厝，照lín對伊所chiù-chōa-ê，chhōa hitê婦人人kap一切屬tī伊ê lóng tùi-hia出來。 23 Hiah-ê做偵探ê少年人就入去，chhōa Lat-ha̍p kap伊ê老父、老母、兄弟，以及一切屬tī伊ê出來，也chhōa伊ê親戚出來，hō͘ in tòa tī以色列ê營外。 24 In就用火燒hitê城kap其中一切所有ê；獨獨金、銀，kap銅鐵ê器具，lóng hē tī耶和華厝內ê府庫。 25 約書亞就保全娼妓Lat-ha̍p，kap伊老父ê家眷，kap一切屬tī伊ê ê活命；因為伊有khǹg密約書亞所差偷看耶利哥ê使者；伊就tiàm tī以色列中，到今á日。 26 當時約書亞對眾人chiù-chōa講：見若起來起造chitê耶利哥城ê，tio̍h tī耶和華ê面前受咒詛；伊hē地基ê時，beh死大kiáⁿ，hē門ê時beh死soah尾kiáⁿ。 27 耶和華kap約書亞相kap tī-teh，伊ê名聲滿滿tī hit所在。
1 (Iâ-lī-ko ê siâⁿ-mn̂g, in-ūi Í-sek-lia̍t lâng ê iân-kò͘, chiū koaiⁿ tiâu-tiâu, bô lâng chhut, iā bô lâng ji̍p.) 2 Iâ-hô-hoa kā Iok-su-a kóng, Khòaⁿ ah, Góa ū chiong Iâ-lī-ko kap i ê ông, kap i tōa-la̍t ê ióng-sū, lóng kau tī lí ê chhiú. 3 Lín it-chhè ê chiàn-sū tio̍h ûi-se̍h chit ê siâⁿ chi̍t-pái; la̍k-ji̍t lóng tio̍h án-ni kiâⁿ; 4 chhit ê chè-si tio̍h kia̍h chhit ki iûⁿ-kak ê hō-tâng kiâⁿ tī iok-kūi ê thâu-chêng, kàu tē-chhit ji̍t lín tio̍h se̍h-siâⁿ chhit-pái, chè-si iā tio̍h pûn hō-tâng; 5 in pûn-kak ê siaⁿ thoa-tn̂g, lín thiaⁿ-kìⁿ hō-tâng ê siaⁿ, chèng peh-sìⁿ tio̍h tōa-siaⁿ hoah, siâⁿ-chhiûⁿ chiū beh tó pîⁿ-pîⁿ, ta̍k-lâng lóng tio̍h ti̍t-ti̍t chìn-chêng khì. 6 Lùn ê kiáⁿ Iok-su-a kiò chè-si lâi, kā in kóng, Lín tio̍h kng iok-kūi, chè-si chhit-lâng kia̍h chhit ki iûⁿ-kak ê hō-tâng tī Iâ-hô-hoa ê kūi-chêng. 7 Koh kā peh-sìⁿ kóng, Lín tio̍h chìn-chêng khì se̍h-siâⁿ, tòa kun-khì-ê tio̍h kiâⁿ tī Iâ-hô-hoa ê kūi-chêng. 8 Iok-su-a tùi peh-sìⁿ kóng soah, chhit ê chè-si kia̍h chhit ki iûⁿ-kak ê hō-tâng, kiâⁿ tī Iâ-hô-hoa ê bīn-chêng, pûn hō-tâng, Iâ-hô-hoa ê iok-kūi tè tī in ê āu-bīn; 9 tòa kun-khì-ê kiâⁿ tī pûn hō-tâng ê chè-si ê thâu-chêng, āu-tūi tè iok-kūi kiâⁿ; chè-si ná-kiâⁿ ná-pûn hō-tâng. 10 Iok-su-a bēng-lēng peh-sìⁿ kóng, Lín m̄-thang hoah, m̄-thang hō͘ lâng thiaⁿ-kìⁿ lín ê siaⁿ, liân chi̍t-kù iā m̄-thang chhut-chhùi, thèng-hāu góa hoan-hù lín hoah ê ji̍t, hit-sî chiah thang hoah. 11 Tùi án-ni, i hō͘ Iâ-hô-hoa ê iok-kūi ûi-siâⁿ, se̍h chi̍t-pái; in chiū tò-lâi iâⁿ-pôaⁿ, hioh tī iâⁿ-lāi. 12 Thiⁿ-kng Iok-su-a chá-chá khí-lâi, chè-si iā kng Iâ-hô-hoa ê iok-kūi. 13 Kia̍h chhit ki iûⁿ-kak ê hō-tâng ê chhit ê chè-si, tī Iâ-hô-hoa ê kūi-chêng ti̍t-ti̍t kiâⁿ, pûn hō-tâng; tòa kun-khì-ê tī in ê thâu-chêng kiâⁿ; āu-tūi tè Iâ-hô-hoa ê iok-kūi kiâⁿ, chè-si ná-kiâⁿ ná-pûn hō-tâng; 14 tē-jī ji̍t in se̍h-siâⁿ chi̍t-pái; chiū tò-lâi iâⁿ-pôaⁿ; la̍k-ji̍t lóng sī án-ni kiâⁿ. 15 Tē-chhit ji̍t phah-phú-kng ê sî, in chá-chá khí-lâi, chiàu án-ni se̍h-siâⁿ chhit-pái; chí-ū chit-ji̍t se̍h-siâⁿ chhit-pái. 16 Kàu tē-chhit pái, chè-si pûn hō-tâng ê sî, Iok-su-a kā peh-sìⁿ kóng, Tio̍h hoah ah, in-ūi Iâ-hô-hoa ēng siâⁿ kau hō͘ lín lah. 17 Chit ê siâⁿ kap kî-tiong it-chhè só͘-ū-ê, lóng tio̍h hun-piat kui hō͘ Iâ-hô-hoa; chí-ū chhiong-ki Lat-ha̍p, í-ki̍p it-chhè kap i tī chhù-lāi-ê, thang oa̍h-teh; in-ūi i ū khǹg-ba̍t lán só͘ chhe ê sù-chiá. 18 Lín tī eng-kai bia̍t ê mi̍h tio̍h ka-kī kín-sīn, kiaⁿ-liáu lín the̍h eng-kai bia̍t ê mi̍h, tì-kàu ka-kī iā chòe eng-kai bia̍t-ê; koh liân-lūi Í-sek-lia̍t choân-iâⁿ iā chòe eng-kai bia̍t-ê, lâi hāi-tio̍h i. 19 Chí-ū kim, gûn, kap tâng thih ê khì-kū, lóng tio̍h hun-piat kui hō͘ Iâ-hô-hoa, siu-ji̍p Iâ-hô-hoa ê hú-khò͘. 20 Peh-sìⁿ chiū hoah, chè-si iā pûn hō-tâng; peh-sìⁿ thiaⁿ-kìⁿ hō-tâng ê siaⁿ, chiū tōa-siaⁿ hoah, siâⁿ-chhiûⁿ chiū tó kàu pîⁿ-pîⁿ, peh-sìⁿ chiū chìn-chêng ji̍p siâⁿ, ta̍k-lâng ti̍t-ti̍t khì; tùi án-ni chhú hit ê siâⁿ. 21 Koh chiong siâⁿ-lāi só͘-ū-ê, bô-lūn lâm-lú ló-iù, gû, iûⁿ, kap lû, lóng ēng to it-chīn bia̍t i. 22 Iok-su-a kā cheng-thàm hit ê tōe hí nn̄g lâng kóng, Lín ji̍p-khì hit ê chhiong-ki ê chhù, chiàu lín tùi i só͘ chiù-chōa-ê, chhōa hit ê hū-jîn-lâng kap it-chhè sio̍k tī i-ê lóng tùi-hia chhut-lâi. 23 Hiah ê chòe cheng-thàm ê siàu-liân lâng chiū ji̍p-khì, chhōa Lat-ha̍p kap i ê lāu-pē, lāu-bú, hiaⁿ-tī, í-ki̍p it-chhè sio̍k tī i-ê chhut-lâi, iā chhōa i ê chhin-chhek chhut-lâi, hō͘ in tòa tī Í-sek-lia̍t ê iâⁿ-gōa. 24 In chiū ēng hé sio hit ê siâⁿ kap kî-tiong it-chhè só͘-ū-ê; to̍k-to̍k kim, gûn, kap tâng thih ê khì-kū, lóng hē tī Iâ-hô-hoa chhù-lāi ê hú-khò͘. 25 Iok-su-a chiū pó-choân chhiong-ki Lat-ha̍p, kap i lāu-pē ê ke-koàn, kap it-chhè sio̍k tī i-ê ê oa̍h-miā; in-ūi i ū khǹg-ba̍t Iok-su-a só͘ chhe thau-khòaⁿ Iâ-lī-ko ê sù-chiá; i chiū tiàm tī Í-sek-lia̍t tiong, kàu kin-á-ji̍t. 26 Tng-sî Iok-su-a tùi chèng-lâng chiù-chōa kóng, Kìⁿ-nā khí-lâi khí-chō chit ê Iâ-lī-ko siâⁿ ê, tio̍h tī Iâ-hô-hoa ê bīn-chêng siū chiù-chó͘; i hē tōe-ki ê sî, beh sí tōa-kiáⁿ, hē-mn̂g ê sî beh sí soah-bé-kiáⁿ. 27 Iâ-hô-hoa kap Iok-su-a saⁿ-kap tī-teh, i ê miâ-siaⁿ móa-móa tī hit só͘-chāi.
1 總是以色列人tī應該獻ê物有犯罪；因為偤大ê支派中，謝拉 ê曾孫，Sat-tí ê孫，Ka-bí ê kiáⁿ，A-kan the̍h應該獻ê物；耶和華就受氣以色列人。 2 約書亞tùi耶利哥差人去Pek-te̍k-lī東勢，óa近Pek-a-bûn ê Ai城，吩咐in講：Lín上去偷看hitê地；in就上去偷看Ai ê城。 3 In tò來到約書亞hia，kā伊講，m̄免hō͘眾百姓上去；大約兩三千人上去phah Ai城，就好；m̄免勞動眾百姓去到hia；因為hia ê人少少。 4 Tùi án-ni，百姓中約略三千人上去hia；竟然tī Ai城ê人ê面前逃走。 5 Ai城ê人刣死in約略三十六人；in tùi城門前追趕in，到Sī-pa-lîm tī in落 低ê所在phah死in；眾百姓就失膽，軟弱親像水。 6 約書亞就拆裂衫；伊kap以色列ê長老，tī耶和華ê櫃前，仆tī土腳，到ê-hng，也用塵埃sám tī頭殼。 7 約書亞講：Ai-ah，主耶和華ah，你啥事chhōa chiahê百姓過chitê約旦，將阮交tī A-mô͘-lī人ê手，hō͘阮滅無ah？可惜阮無掠tiàm tī約旦hit-pêng做夠額。 8 主ah，以色列人已經tī對敵ê面前oa̍t-tńg身走，我iáu有甚麼thang講ah？ 9 因為迦南人kap chit所在一切khiā起ê百姓聽見，就beh圍困阮，除滅阮ê名tī地上；hit時你為tio̍h你ê大-名beh怎樣ah？ 10 耶和華kā約書亞講：起來，你啥事án-ni仆tī地裡ah？ 11 以色列犯罪，違背我所命令in ê約，取應該獻ê物，也偷the̍h，也行詭詐，khǹg tī in ê家器中。 12 因為án-ni以色列人tī對敵ê面前khiā-bōe-tiâu；in tī對敵ê面前oa̍t-tńg身走，是因為in成做受咒詛；lín若無將應該獻ê物，tùi lín中間除去，我就無koh kap lín相kap tī-teh。 13 你起來，hō͘百姓清氣，kā in講：Lín tio̍h家己清氣備辦明á日；因為耶和華以色列ê上帝án-ni講：以色列ah，lín iáu未交出hitê物，就tī對敵ê面前lín beh khiā-bōe-tiâu。 14 明á早起lín tio̍h照lín ê支派近前來；耶和華所取ê支派，tio̍h照宗族近前來；耶和華所取ê宗族，tio̍h照家眷近前來；耶和華所取ê家眷，tio̍h照人丁，一个一个近前來。 15 受取tio̍h ê人，有應該獻ê物tī伊hia，伊kap 伊所有ê，tio̍h受火燒；因為伊有背耶和華ê約，koh因為伊tī以色列中有行戇戇ê事。 16 天光，約書亞早早起來，hō͘以色列人照支派近前來；取tio̍h-ê是偤大支派； 17 Hō͘偤大ê宗族近前來，就取tio̍h 謝拉 ê宗族；hō͘ 謝拉宗族ê人丁一个一个近前來，就取tio̍h Sat-tí； 18 Hō͘伊ê家照人丁一个一个近前來，就取tio̍h偤大支派ê人謝拉 ê曾孫，Sat-tí ê孫，Ka-bí ê kiáⁿ A-kan。 19 約書亞對A-kan講：我ê kiáⁿ，我勸你tio̍h歸榮光耶和華以色列ê上帝，tī伊ê面前認罪，將你所做ê事kā我講：m̄-thang對我隱瞞。 20 A-kan 應約書亞講：我實在得罪耶和華以色列ê上帝；我所做ê事是án-ni，án-ni； 21 我tī所搶ê財物中看見一領Sī-ná ê súi衫，銀兩百sià-khek-le̍k，金一tiāⁿ，重五十sià-khek-le̍k，我貪 chiahê物，就the̍h伊，taⁿ 埋 tī我ê布棚內ê土腳下，銀tī伊ê下底。 22 約書亞就差人去，in就去，到伊ê布棚；看ah，hitê物果然khǹg tī伊ê布棚內，銀tī下底。 23 In就tùi布棚內the̍h出來，帶到約書亞kap以色列眾人hia，hē tī耶和華ê面前。 24 約書亞kap以色列眾人，將謝拉 ê曾孫A-kan，kap hitê銀，hit 件衫，hit錠金，kap伊ê kiáⁿ、cha-bó͘-kiáⁿ、牛、驢、羊、布棚，以及伊一切所有ê，lóng帶到A-kat ê山谷。 25 約書亞講：你啥事害阮？今á日耶和華也beh害你。Tùi án-ni，以色列眾人用石頭tìm死伊；用火燒in，將石頭tìm in。 26 眾人tī伊ê頂面疊一大堆ê石，到tī今á日；tùi án-ni，耶和華收回伊ê大受氣。所以hit所在名叫A-kat ê山谷，到今á日。
1 Chóng-sī Í-sek-lia̍t lâng tī eng-kai hiàn ê mi̍h ū hoān-chōe; in-ūi Iû-tāi ê chi-phài-tiong, Siā-la̍h ê cheng-sun, Sat-tí ê sun, Ka-bí ê kiáⁿ, A-kan the̍h eng-kai hiàn ê mi̍h; Iâ-hô-hoa chiū siū-khì Í-sek-lia̍t lâng. 2 Iok-su-a tùi Iâ-lī-ko chhe lâng khì Pek-te̍k-lī tang-sì, óa-kūn Pek-a-bûn ê Ai siâⁿ, hoan-hù in kóng, Lín chiūⁿ-khì thau-khòaⁿ hit ê tōe; in chiū chiūⁿ-khì thau-khòaⁿ Ai ê siâⁿ. 3 In tò-lâi kàu Iok-su-a hia, kā i kóng, M̄-bián hō͘ chèng peh-sìⁿ chiūⁿ-khì; tāi-iok nn̄g-saⁿ chheng lâng chiūⁿ-khì phah Ai siâⁿ, chiū hó; m̄-bián lô-tōng chèng peh-sìⁿ khì kàu hia; in-ūi hia ê lâng chió-chió. 4 Tùi án-ni peh-sìⁿ-tiong iok-lio̍k saⁿ-chheng lâng chiūⁿ-khì hia; kéng-jiân tī Ai siâⁿ ê lâng ê bīn-chêng tô-cháu. 5 Ai siâⁿ ê lâng thâi-sí in iok-lio̍k saⁿ-cha̍p-la̍k lâng; in tùi siâⁿ-mn̂g-chêng tui-kóaⁿ in, kàu Sī-pa-lîm tī in lo̍h-kē ê só͘-chāi phah-sí in; chèng peh-sìⁿ chiū sit-táⁿ, loán-jio̍k chhin-chhiūⁿ chúi. 6 Iok-su-a chiū thiah-li̍h saⁿ; i kap Í-sek-lia̍t ê tiúⁿ-ló, tī Iâ-hô-hoa ê kūi-chêng, phak tī thô͘-kha, kàu ê-hng, iā ēng tîn-ai sám tī thâu-khak. 7 Iok-su-a kóng, Ai-ah, Chú Iâ-hô-hoa ah, Lí siáⁿ-sū chhōa chiah ê peh-sìⁿ kè chit ê Iok-tàn, chiong goán kau tī A-mô͘-lī lâng ê chhiú, hō͘ goán bia̍t-bô ah? Khó-sioh goán bô lia̍h tiàm tī Iok-tàn hit-pêng chòe kàu-gia̍h. 8 Chú ah, Í-sek-lia̍t lâng í-keng tī tùi-te̍k ê bīn-chêng oa̍t-tńg-sin cháu, góa iáu-ū sím-mi̍h thang kóng ah? 9 In-ūi Ka-lâm lâng kap chit só͘-chāi it-chhè khiā-khí ê peh-sìⁿ thiaⁿ-kìⁿ, chiū beh ûi-khùn goán, tû-bia̍t goán ê miâ tī tōe-chiūⁿ; hit-sî Lí ūi-tio̍h Lí ê tōa-miâ beh cháiⁿ-iūⁿ ah? 10 Iâ-hô-hoa kā Iok-su-a kóng, Khí-lâi, lí siáⁿ-sū án-ni phak tī tōe-ni̍h ah? 11 Í-sek-lia̍t hoān-chōe, ûi-pōe Góa só͘ bēng-lēng in ê iok, chhú eng-kai hiàn ê mi̍h, iā thau-the̍h, iā kiâⁿ khúi-chà, khǹg tī in ê ke-khì-tiong. 12 In-ūi án-ni Í-sek-lia̍t lâng tī tùi-te̍k ê bīn-chêng khiā-bōe-tiâu; in tī tùi-te̍k ê bīn-chêng oa̍t-tńg-sin cháu, sī in-ūi in chiâⁿ-chòe siū chiù-chó͘; lín nā bô chiong eng-kai hiàn ê mi̍h, tùi lín tiong-kan tû-khì, Góa chiū bô koh kap lín saⁿ-kap tī-teh. 13 Lí khí-lâi, hō͘ peh-sìⁿ chheng-khì, kā in kóng, Lín tio̍h ka-kī chheng-khì pī-pān bîn-á-ji̍t; in-ūi Iâ-hô-hoa Í-sek-lia̍t ê Siōng-tè án-ni kóng, Í-sek-lia̍t ah, lín iáu-bē kau-chhut hit ê mi̍h, chiū tī tùi-te̍k ê bīn-chêng lín beh khiā-bōe-tiâu. 14 Bîn-á-chá-khí lín tio̍h chiàu lín ê chi-phài kūn-chêng lâi; Iâ-hô-hoa só͘ chhú ê chi-phài, tio̍h chiàu chong-cho̍k kūn-chêng lâi; Iâ-hô-hoa só͘ chhú ê chong-cho̍k, tio̍h chiàu ke-koàn kūn-chêng lâi; Iâ-hô-hoa só͘ chhú ê ke-koàn, tio̍h chiàu jîn-teng, chi̍t-ê chi̍t-ê kūn-chêng lâi. 15 Siū chhú-tio̍h ê lâng, ū eng-kai hiàn ê mi̍h tī i hia, i kap i só͘-ū-ê, tio̍h siū hé sio; in-ūi i ū pōe Iâ-hô-hoa ê iok, koh in-ūi i tī Í-sek-lia̍t tiong ū kiâⁿ gōng-gōng ê sū. 16 Thiⁿ-kng, Iok-su-a chá-chá khí-lâi, hō͘ Í-sek-lia̍t lâng chiàu chi-phài kūn-chêng lâi; chhú-tio̍h-ê sī Iû-tāi chi-phài; 17 hō͘ Iû-tāi ê chong-cho̍k kūn-chêng-lâi, chiū chhú-tio̍h Siā-la̍h ê chong-cho̍k; hō͘ Siā-la̍h chong-cho̍k ê jîn-teng chi̍t-ê chi̍t-ê kūn-chêng lâi, chiū chhú-tio̍h Sat-tí; 18 hō͘ i ê ke chiàu jîn-teng chi̍t-ê chi̍t-ê kūn-chêng lâi, chiū chhú-tio̍h Iû-tāi chi-phài ê lâng Siā-la̍h ê cheng-sun, Sat-tí ê sun, Ka-bí ê kiáⁿ A-kan. 19 Iok-su-a tùi A-kan kóng, Góa ê kiáⁿ, góa khǹg lí tio̍h kui êng-kng Iâ-hô-hoa Í-sek-lia̍t ê Siōng-tè, tī I ê bīn-chêng jīn-chōe, chiong lí só͘ chòe ê sū kā góa kóng, m̄-thang tùi góa ún-môa. 20 A-kan ìn Iok-su-a kóng, Góa si̍t-chāi tek-chōe Iâ-hô-hoa Í-sek-lia̍t ê Siōng-tè; góa só͘ chòe ê sū sī án-ni, án-ni; 21 góa tī só͘ chhiúⁿ ê châi-bu̍t-tiong khòaⁿ-kìⁿ chi̍t-niá Sī-ná ê súi-saⁿ, gûn nn̄g-pah sià-khek-le̍k, kim chi̍t-tiāⁿ, tāng gō͘-cha̍p sià-khek-le̍k, góa tham chiah ê mi̍h, chiū the̍h i, taⁿ tâi tī góa ê pò͘-pîⁿ-lāi ê thô͘-kha-ē, gûn tī i ê ē-tóe. 22 Iok-su-a chiū chhe lâng khì, in chiū khì, kàu i ê pò͘-pîⁿ; khòaⁿ ah, hit ê mi̍h kó-jiân khǹg tī i ê pò͘-pîⁿ-lāi, gûn tī ē-tóe. 23 In chiū tùi pò͘-pîⁿ-lāi the̍h-chhut-lâi, tòa kàu Iok-su-a kap Í-sek-lia̍t chèng-lâng hia, hē tī Iâ-hô-hoa ê bīn-chêng. 24 Iok-su-a kap Í-sek-lia̍t chèng-lâng, chiong Siā-la̍h ê cheng-sun A-kan, kap hit ê gûn, hit kiāⁿ saⁿ, hit tiāⁿ kim, kap i ê kiáⁿ, cha-bó͘-kiáⁿ, gû, lû, iûⁿ, pò͘-pîⁿ, í-ki̍p i it-chhè só͘-ū-ê, lóng tòa kàu A-kat ê soaⁿ-kok. 25 Iok-su-a kóng, Lí siáⁿ-sū hāi goán? kin-á-ji̍t Iâ-hô-hoa iā beh hāi lí. Tùi án-ni Í-sek-lia̍t chèng-lâng ēng chio̍h-thâu tìm-sí i; ēng hé sio in, chiong chio̍h-thâu tìm in. 26 Chèng-lâng tī i ê téng-bīn thia̍p chi̍t tōa-tui ê chio̍h, kàu tī kin-á-ji̍t; tùi án-ni Iâ-hô-hoa siu-hôe I ê tōa siū-khì. Só͘-í hit só͘-chāi miâ-kiò A-kat ê soaⁿ-kok, kàu kin-á-ji̍t.
1 耶和華對約書亞講：莫得驚，也莫得懍；你起來chhōa lóng總ê戰士上去Ai城，我已經將Ai城ê王，kap伊ê百姓，伊ê城，伊ê地，lóng交tī你ê手。 2 你款待Ai城，kap伊ê王，tio̍h親像前款待耶利哥kap伊ê王一樣；總是所搶伊ê財物，kap cheng-siⁿ，lín thang 取做家己ê；你tio̍h用兵埋伏tī城後。 3 Tùi án-ni，約書亞kap一切ê戰士lóng起來，beh上去Ai城；約書亞揀三萬大力ê勇士，暝時差in去； 4 吩咐in講：Lín tio̍h埋伏兵攻城，就是tī城後，m̄-thang離開城siuⁿ遠，lóng tio̍h備辦便。 5 我kap我所chhōa ê眾百姓beh近óa城；in親像頭pái出來攻擊阮，hit時阮就beh tī in ê面前逃走。 6 In beh出來追jip阮，到阮引誘in離開城；因為in beh講：chiahê人親像頭pái tī阮ê面前逃走；所以阮beh tī in ê面前逃走； 7 Hit時lín就tio̍h tùi埋伏ê所在起來，取hitê城，因為耶和華lín ê上帝beh將伊交tī lín ê手。 8 Lín已經取城，就tio̍h用火燒城，tio̍h照耶和華ê話行；看ah，這是我所命令lín ê。 9 約書亞差in，in就去埋伏ê所在，tiàm tī Pek-te̍k-lī kap Ai城ê中間，就是Ai城ê西勢；hit暝約書亞歇tī百姓ê中間。 10 天光約書亞早早起來，點算百姓；伊kap以色列ê長老tī百姓ê頭前上去Ai城。 11 眾百姓，就是kap伊tī-teh ê戰士，lóng上去近óa城ê頭前，tī Ai ê北pêng紮營；tī伊kap Ai ê中間有一个山谷。 12 伊約略有揀五千人，hō͘ in埋伏tī Pek-te̍k-lī kap Ai城ê中間，就是tī城ê西勢。 13 Tùi án-ni，安置百姓，就是城北勢ê全軍，kap城西勢埋伏ê兵；chit暝約書亞入山谷中。 14 Ai城ê王看見，城內hiahê人趕緊透早起來，照所定tio̍h ê時，出去到A-la̍h-pa ê頭前，beh kap以色列人交戰，王kap眾百姓lóng去；總是in m̄知tī城後有兵埋伏，beh攻擊in。 15 約書亞kap以色列ê眾人tī in ê頭前假刣輸，tùi曠野ê路逃走。 16 城內ê眾百姓lóng聚集，追jip in；in追jip約書亞，就受引誘離開in ê城。 17 Ai城，kap Pek-te̍k-lī城，無留一人無出去追jip以色列人；城門放開開，去追jip以色列人。 18 耶和華對約書亞講：你伸出手裡所kia̍h ê鎗來kí Ai城；因為我beh將伊交tī你ê手。約書亞就伸出手裡所kia̍h ê鎗來kí hitê城。 19 伊一下伸手，埋伏ê兵就對伊ê所在緊緊起來，走去入城取伊，緊緊放火燒城。 20 Ai城ê人oa̍t頭一下看；無phah算，城內火煙chhèng上天；in就走chia走hia，lóng無路；hiahê走去曠野ê百姓就hoan頭來攻擊追jip in。 21 約書亞kap以色列ê眾人看見埋伏ê兵已經取城，城內火煙chhèng上高，就oa̍t-tńg身刣死Ai城ê人； 22 埋伏ê兵也出來攻擊in；in受圍困tī以色列人ê中間，前後lóng是以色列人；tùi án-ni，刣死in；無一个留teh，也無一个走去。 23 In就活掠Ai城ê王，押伊到約書亞hia。 24 以色列人一盡刣死khiā起tī Ai ê百姓，tī田裡，tī曠野jip-tio̍h ê所在，in lóng倒tī刀下，到滅無。以色列眾人就倒tńg來Ai城，用刀刣城中ê人。 25 當hit日刣死ê男女，共一萬兩千，就是Ai城ê百姓。 26 約書亞無kiu伊伸出鎗ê手，直到一盡滅Ai城ê百姓。 27 獨獨cheng-siⁿ，kap所搶城內ê財物，以色列人lóng 取做家己ê，照耶和華所命令約書亞ê話。 28 約書亞燒Ai城，hō͘伊永永做土堆，荒廢到今á日； 29 koh吊Ai城ê王tī樹裡；到黃昏日落ê時，約書亞出命令，人就tùi樹裡收身屍落來，hiat tī城門口；tī hit頂面疊一大堆ê石頭，到今á日iáu tī-teh。 30 Hit時約書亞tī Í-pa-lō͘山，為耶和華以色列ê上帝，起一座壇； 31 是用自然ê石，hit頂面無動tio̍h鐵器ê，來起伊，照耶和華ê奴僕摩西所命令以色列人ê話，照摩西律法冊內所記ê；in tī chitê壇頂獻燒祭hō͘耶和華，也奉謝恩ê祭。 32 約書亞tī-hia用摩西ê律法抄寫tī石頂，就是伊tī以色列人ê面前所寫ê。 33 以色列眾人，kap in ê長老、官長，以及審判官，lóng khiā tī約櫃ê雙pêng，tī 扛耶和華約櫃ê祭司利未人ê面前，無論是本地人，是寄腳-ê；一半tī Ki-lī-sim山ê頭前，一半tī Í-pa-lō͘山ê頭前，kā以色列百姓祝福，照耶和華ê奴僕摩西前所命令ê。 34 然後約書亞讀律法lóng總ê話，祝福ê，咒詛ê，照lóng總記tī律法ê。 35 摩西所命令一切ê話，約書亞tī以色列ê全會，kap婦人人、gín-ná，kap in中間往來出外人ê面前，無一句無讀。
1 Iâ-hô-hoa tùi Iok-su-a kóng, Bo̍h-tit kiaⁿ, iā bo̍h-tit lún; lí khí-lâi chhōa lóng-chóng ê chiàn-sū chiūⁿ-khì Ai siâⁿ, Góa í-keng chiong Ai siâⁿ ê ông, kap i ê peh-sìⁿ, i ê siâⁿ, i ê tōe, lóng kau tī lí ê chhiú. 2 Lí khoán-thāi Ai siâⁿ, kap i ê ông, tio̍h chhin-chhiūⁿ chêng khoán-thāi Iâ-lī-ko kap i ê ông chi̍t-iūⁿ; chóng-sī só͘ chhiúⁿ i ê châi-bu̍t, kap cheng-siⁿ, lín thang chhú chòe ka-kī ê; lí tio̍h ēng peng bâi-ho̍k tī siâⁿ-āu. 3 Tùi án-ni Iok-su-a kap it-chhè ê chiàn-sū lóng khí-lâi, beh chiūⁿ-khì Ai siâⁿ; Iok-su-a kéng saⁿ-bān tōa-la̍t ê ióng-sū, mî-sî chhe in khì; 4 hoan-hù in kóng, Lín tio̍h bâi-ho̍k peng kong-siâⁿ, chiū-sī tī siâⁿ-āu, m̄-thang lī-khui siâⁿ siuⁿ hn̄g, lóng tio̍h pī-pān piān. 5 Góa kap góa só͘ chhōa ê chèng peh-sìⁿ beh kūn-óa siâⁿ; in chhin-chhiūⁿ thâu-pái chhut-lâi kong-kek goán, hit-sî goán chiū beh tī in ê bīn-chêng tô-cháu. 6 In beh chhut-lâi tui-jip goán, kàu goán ín-iú in lī-khui siâⁿ; in-ūi in beh kóng, Chiah ê lâng chhin-chhiūⁿ thâu-pái tī goán ê bīn-chêng tô-cháu; só͘-í goán beh tī in ê bīn-chêng tô-cháu; 7 hit-sî lín chiū tio̍h tùi bâi-ho̍k ê só͘-chāi khí-lâi, chhú hit ê siâⁿ, in-ūi Iâ-hô-hoa lín ê Siōng-tè beh chiong i kau tī lín ê chhiú. 8 Lín í-keng chhú siâⁿ, chiū tio̍h ēng hé sio siâⁿ, tio̍h chiàu Iâ-hô-hoa ê ōe kiâⁿ; khòaⁿ ah, che sī góa só͘ bēng-lēng lín ê. 9 Iok-su-a chhe in, in chiū khì bâi-ho̍k ê só͘-chāi, tiàm tī Pek-te̍k-lī kap Ai siâⁿ ê tiong-kan, chiū-sī Ai siâⁿ ê sai-sì; hit-mî Iok-su-a hioh tī peh-sìⁿ ê tiong-kan. 10 Thiⁿ-kng Iok-su-a chá-chá khí-lâi, tiám-sǹg peh-sìⁿ; i kap Í-sek-lia̍t ê tiúⁿ-ló tī peh-sìⁿ ê thâu-chêng chiūⁿ-khì Ai siâⁿ. 11 Chèng peh-sìⁿ, chiū-sī kap i tī-teh ê chiàn-sū, lóng chiūⁿ-khì kūn-óa siâⁿ ê thâu-chêng, tī Ai ê pak-pêng chat-iâⁿ; tī i kap Ai ê tiong-kan ū chi̍t ê soaⁿ-kok. 12 I iok-lio̍k ū kéng gō͘-chheng lâng, hō͘ in bâi-ho̍k tī Pek-te̍k-lī kap Ai siâⁿ ê tiong-kan, chiū-sī tī siâⁿ ê sai-sì. 13 Tùi án-ni an-tì peh-sìⁿ, chiū-sī siâⁿ pak-sì ê choân-kun, kap siâⁿ sai-sì bâi-ho̍k ê peng; chit-mî Iok-su-a ji̍p soaⁿ-kok tiong. 14 Ai siâⁿ ê ông khòaⁿ-kìⁿ, siâⁿ-lāi hiah ê lâng kóaⁿ-kín thàu-chá khí-lâi, chiàu só͘ tiāⁿ-tio̍h ê sî, chhut-khì kàu A-la̍h-pa ê thâu-chêng, beh kap Í-sek-lia̍t lâng kau-chiàn, ông kap chèng peh-sìⁿ lóng khì; chóng-sī in m̄-chai tī siâⁿ-āu ū peng bâi-ho̍k, beh kong-kek in. 15 Iok-su-a kap Í-sek-lia̍t ê chèng-lâng tī in ê thâu-chêng ké thâi-su, tùi khòng-iá ê lō͘ tô-cháu. 16 Siâⁿ-lāi ê chèng peh-sìⁿ lóng chū-chi̍p, tui-jip in; in tui-jip Iok-su-a, chiū siū ín-iú lī-khui in ê siâⁿ. 17 Ai siâⁿ, kap Pek-te̍k-lī siâⁿ, bô lâu chi̍t-lâng bô chhut-khì tui-jip Í-sek-lia̍t lâng; siâⁿ-mn̂g pàng khui-khui, khì tui-jip Í-sek-lia̍t lâng. 18 Iâ-hô-hoa tùi Iok-su-a kóng, Lí chhun-chhut chhiú-ni̍h só͘ kia̍h ê chhiuⁿ lâi kí Ai siâⁿ; in-ūi Góa beh chiong i kau tī lí ê chhiú. Iok-su-a chiū chhun-chhut chhiú-ni̍h só͘ kia̍h ê chhiuⁿ lâi kí hit ê siâⁿ. 19 I chi̍t-ē chhun chhiú, bâi-ho̍k ê peng chiū tùi i ê só͘-chāi kín-kín khí-lâi, cháu-khì ji̍p siâⁿ chhú i, kín-kín pàng hé sio siâⁿ. 20 Ai siâⁿ ê lâng oa̍t-thâu chi̍t-ē khòaⁿ; bô phah-sǹg, siâⁿ-lāi hé-ian chhèng chiūⁿ thiⁿ; in chiū cháu-chia cháu-hia, lóng bô lō͘; hiah ê cháu-khì khòng-iá ê peh-sìⁿ chiū hoan-thâu lâi kong-kek tui-jip in. 21 Iok-su-a kap Í-sek-lia̍t ê chèng-lâng khòaⁿ-kìⁿ bâi-ho̍k ê peng í-keng chhú siâⁿ, siâⁿ-lāi hé-ian chhèng chiūⁿ-koâiⁿ, chiū oa̍t-tńg-sin thâi-sí Ai siâⁿ ê lâng; 22 bâi-ho̍k ê peng iā chhut-lâi kong-kek in; in siū ûi-khùn tī Í-sek-lia̍t lâng ê tiong-kan, chêng-āu lóng sī Í-sek-lia̍t lâng; tùi án-ni thâi-sí in; bô chi̍t-ê lâu-teh, iā bô chi̍t-ê cháu-khì. 23 In chiū oa̍h-lia̍h Ai siâⁿ ê ông, ah i kàu Iok-su-a hia. 24 Í-sek-lia̍t lâng it-chīn thâi-sí khiā-khí tī Ai ê peh-sìⁿ, tī chhân-ni̍h, tī khòng-iá jip-tio̍h ê só͘-chāi, in lóng tó tī to-ē, kàu bia̍t-bô. Í-sek-lia̍t chèng-lâng chiū tò-tńg lâi Ai siâⁿ, ēng to thâi siâⁿ-tiong ê lâng. 25 Tng hit-ji̍t thâi-sí ê lâm-lú, kiōng chi̍t-bān nn̄g-chheng, chiū-sī Ai siâⁿ ê peh-sìⁿ. 26 Iok-su-a bô kiu i chhun-chhut chhiuⁿ ê chhiú, ti̍t-kàu it-chīn bia̍t Ai siâⁿ ê peh-sìⁿ. 27 To̍k-to̍k cheng-siⁿ, kap só͘ chhiúⁿ siâⁿ-lāi ê châi-bu̍t, Í-sek-lia̍t lâng lóng chhú chòe ka-kī-ê, chiàu Iâ-hô-hoa só͘ bēng-lēng Iok-su-a ê ōe. 28 Iok-su-a sio Ai siâⁿ, hō͘ i éng-éng chòe thô͘-tui, hong-hòe kàu kin-á-ji̍t; 29 koh tiàu Ai siâⁿ ê ông tī chhiū-ni̍h; kàu hông-hun ji̍t-lo̍h ê sî, Iok-su-a chhut bēng-lēng, lâng chiū tùi chhiū-ni̍h siu sin-si lo̍h-lâi, hiat tī siâⁿ-mn̂g-kháu; tī hit téng-bīn thia̍p chi̍t tōa-tui ê chio̍h-thâu, kàu kin-á-ji̍t iáu tī-teh. 30 Hit-sî Iok-su-a tī Í-pa-lō͘ soaⁿ, ūi Iâ-hô-hoa Í-sek-lia̍t ê Siōng-tè, khí chi̍t chō tôaⁿ; 31 sī ēng chū-jiân ê chio̍h, hí téng-bīn bô tāng-tio̍h thih-khì-ê, lâi khí i, chiàu Iâ-hô-hoa ê lô͘-po̍k Mô͘-se só͘ bēng-lēng Í-sek-lia̍t lâng ê ōe, chiàu Mô͘-se lu̍t-hoat chheh-lāi só͘ kì ê; in tī chit ê tôaⁿ-téng hiàn sio-chè hō͘ Iâ-hô-hoa, iā hōng siā-un ê chè. 32 Iok-su-a tī-hia ēng Mô͘-se ê lu̍t-hoat chhau-siá tī chio̍h-téng, chiū-sī i tī Í-sek-lia̍t lâng ê bīn-chêng só͘ siá-ê. 33 Í-sek-lia̍t chèng-lâng, kap in ê tiúⁿ-ló, koaⁿ-tiúⁿ, í-ki̍p sím-phòaⁿ-koaⁿ, lóng khiā tī iok-kūi ê siang-pêng, tī kng Iâ-hô-hoa iok-kūi ê chè-si Lī-bī lâng ê bīn-chêng, bô-lūn sī pún-tōe lâng, sī kià-kha-ê; chi̍t-pòaⁿ tī Ki-lī-sim soaⁿ ê thâu-chêng, chi̍t-pòaⁿ tī Í-pa-lō͘ soaⁿ ê thâu-chêng, kā Í-sek-lia̍t peh-sìⁿ chiok-hok, chiàu Iâ-hô-hoa ê lô͘-po̍k Mô͘-se chêng só͘ bēng-lēng ê. 34 Jiân-āu Iok-su-a tha̍k lu̍t-hoat lóng-chóng ê ōe, chiok-hok-ê, chiù-chó͘-ê, chiàu lóng-chóng kì tī lu̍t-hoat ê. 35 Mô͘-se só͘ bēng-lēng it-chhè ê ōe, Iok-su-a tī Í-sek-lia̍t ê choân-hōe, kap hū-jîn-lâng, gín-ná, kap in tiong-kan óng-lâi chhut-gōa lâng ê bīn-chêng, bô chi̍t-kù bô tha̍k.
1 約旦hit-pêng，或是tī山地，或是tī平洋，或是tī大海Lī-pa-lùn相對ê邊á，Hek人、A-mō͘-lī人、迦南人、Pí-lī-sé人、Hi-bī人、Iâ-pò͘-su人，chiahê王一下聽見這， 2 就lóng聚集，同心合意，beh kap約書亞kap以色列人交戰。 3 總是Ki-piàn khiā起ê百姓聽見約書亞對耶利哥kap Ai城所行ê事； 4 就設詭計，假做使者，用舊ê袋，kap破裂koh補ê舊酒袋，hō͘驢馱(tô)伊； 5 腳裡穿過補ê舊鞋，身軀穿舊衫，in所備辦ê餅lóng是乾koh臭phú。 6 In到Kiat-kah營中見約書亞，對伊kah以色列人講：阮是tùi真遠ê所在來ê；taⁿ求你kap阮立約。 7 以色列人對chiahê Hi-bī人講：Kiám-chhái lín是khiā起tī阮中間ê，beh怎樣kap lín立約ah？ 8 In對約書亞講：阮是你ê奴僕。約書亞問in講：Lín是甚麼人，是tùi toh落來ê？ 9 In對伊講，你ê奴僕tùi極遠ê所在來，為tio̍h耶和華你上帝ê名；因為阮已經聽見伊ê名聲，kap伊tī埃及一切所行ê； 10 以及伊tī約旦hit-pêng tùi A-mô͘-lī兩個王，就是Hi-si̍t-pún王Se-hông，kap tī A-su-tha-lio̍k ê Pa-san王Go̍k，一切所行ê事。 11 阮ê長老kap阮hia khiā起ê百姓就kā阮講：Lín手tio̍h 帶路裡用ê食物，去迎接in，對in講，阮是你ê奴僕，taⁿ求你kap阮立約。 12 阮出來beh來lín chia ê日，tùi厝內帶出chiahê餅做路中ê路用，hit時iáu燒燒；看ah，taⁿ已經lóng乾 koh臭phú lah； 13 Chiahê酒囊阮貯酒ê時，iáu是新ê，看ah，taⁿ已經破裂；阮chiahê衫kap鞋也lóng穿舊，因為路真遠。 14 以色列人就tùi in ê食物the̍h淡薄，也無請問耶和華。 15 約書亞就kap in講和，kap in立約，容允in活；會眾ê首領也對in chiù-chōa。 16 Kap in立約了後，過三日，chiah聽見in是近近，tiàm tī in中間。 17 以色列起身，第三日到in ê城；hiahê城就是Ki-piàn、Ki-hui-la̍h、Pí-lio̍k、Ki-lia̍t-iâ-lîm。 18 因為會眾ê首領已經指耶和華以色列ê上帝對in chiù-chōa，所以以色列人無phah in；全會眾就哀怨hiahê首領。 19 眾首領對全會講：阮已經指耶和華以色列ê上帝對in chiù-chōa，taⁿ咱m̄-thang 磕tio̍h in。 20 咱tio̍h án-ni款待in，容允in活teh，驚了咱為tio̍h所對in chiù-chōa-ê，受氣到tī咱。 21 首領koh對in講，Tio̍h容允in活；tùi án-ni，in就kā會眾做破柴chhiūⁿ水ê人，照首領所kā in講ê話。 22 約書亞叫in來，kā in講：啥事騙阮講：阮離開lín真遠ah？其實lín是tiàm tī阮中間。 23 Taⁿ lín是受咒詛ê，lín中間做奴才ê永無斷，kā我上帝ê殿做破柴chhiūⁿ水ê。 24 In應約書亞講：因為有人確實報你ê奴僕講：耶和華你ê上帝bat命令伊ê奴僕摩西，將chitê全地賞賜lín，掖tī lín ê頭前剿滅chitê所在一切khiā起ê百姓；所以阮因為lín ê緣故，驚了無命，chiah做chitê tāi-chì。 25 Taⁿ阮tī你ê手頭；你看做好做正直ê，照án-ni行來款待阮。 26 約書亞就án-ni款待in，救in脫離以色列人ê手；所以in就無刣 in。 27 當hit日，約書亞hō͘ in kā會眾kap耶和華ê壇，做破柴kap chhiūⁿ水ê人，tī伊所beh揀ê所在，到今á日。
1 Iok-tàn hit-pêng, he̍k-sī tī soaⁿ-tōe, he̍k-sī tī pîⁿ-iûⁿ, he̍k-sī tī tōa-hái Lī-pa-lùn saⁿ-tùi ê piⁿ-á, Hek-lâng, A-mō͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng, chiah ê ông chi̍t-ē thiaⁿ-kìⁿ che, 2 chiū lóng chū-chi̍p, tâng-sim ha̍p-ì, beh kap Iok-su-a kap Í-sek-lia̍t lâng kau-chiàn. 3 Chóng-sī Ki-piàn khiā-khí ê peh-sìⁿ thiaⁿ-kìⁿ Iok-su-a tùi Iâ-lī-ko kap Ai siâⁿ só͘ kiâⁿ ê sū; 4 chiū siat khúi-kè, ké-chòe sù-chiá, ēng kū ê tē, kap phòa-li̍h koh pó͘ ê kū chiú-tē, hō͘ lû tô i; 5 kha-ni̍h chhēng kè-pó͘ ê kū-ôe, seng-khu chhēng kū-saⁿ, in só͘ pī-pān ê piáⁿ lóng sī ta koh chhàu-phú. 6 In kàu Kiat-kah iâⁿ-tiong kìⁿ Iok-su-a, tùi i kah Í-sek-lia̍t lâng kóng, Goán sī tùi chin-hn̄g ê só͘-chāi lâi ê; taⁿ kiû lí kap goán li̍p-iok. 7 Í-sek-lia̍t lâng tùi chiah ê Hi-bī lâng kóng, Kiám-chhái lín sī khiā-khí tī goán tiong-kan ê, beh cháiⁿ-iūⁿ kap lín li̍p-iok ah? 8 In tùi Iok-su-a kóng, Goán sī lí ê lô͘-po̍k. Iok-su-a mn̄g in kóng, Lín sī sím-mi̍h lâng, sī tùi toh-lo̍h lâi ê? 9 In tùi i kóng, Lí ê lô͘-po̍k tùi ke̍k-hn̄g ê só͘-chāi lâi, ūi-tio̍h Iâ-hô-hoa lí Siōng-tè ê miâ; in-ūi goán í-keng thiaⁿ-kìⁿ I ê miâ-siaⁿ, kap I tī Ai-ki̍p it-chhè só͘ kiâⁿ ê; 10 í-ki̍p I tī Iok-tàn hit-pêng tùi A-mô͘-lī nn̄g ê ông, chiū-sī Hi-si̍t-pún ông Se-hông, kap tī A-su-tha-lio̍k ê Pa-san ông Go̍k, it-chhè só͘ kiâⁿ ê sū. 11 Goán ê tióng-ló kap goán hia khiā-khí ê peh-sìⁿ chiū kā goán kóng, Lín chhiú tio̍h tòa lō͘-ni̍h ēng ê chia̍h-mi̍h, khì ngiâ-chih in, tùi in kóng, Goán sī lí ê lô͘-po̍k, taⁿ kiû lí kap goán li̍p-iok. 12 Goán chhut-lâi beh lâi lín chia ê ji̍t, tùi chhù-lāi tòa-chhut chiah ê piáⁿ chòe lō͘-tiong ê lō͘-ēng, hit-sî iáu sio-sio; khòaⁿ ah, taⁿ í-keng lóng ta koh chhàu-phú lah; 13 chiah ê chiú-lông goán tóe-chiú ê sî, iáu sī sin-ê, khòaⁿ ah, taⁿ í-keng phòa-li̍h; goán chiah ê saⁿ kap ôe iā lóng chhēng-kū, in-ūi lō͘ chin-hn̄g. 14 Í-sek-lia̍t lâng chiū tùi in ê chia̍h-mi̍h the̍h tām-po̍h, iā bô chhéng-mn̄g Iâ-hô-hoa. 15 Iok-su-a chiū kap in káng-hô, kap in li̍p-iok, iông-ún in oa̍h; hōe-chiòng ê siú-léng iā tùi in chiù-chōa. 16 Kap in li̍p-iok liáu-āu, kè saⁿ-ji̍t, chiah thiaⁿ-kìⁿ in sī kūn-kūn, tiàm tī in tiong-kan. 17 Í-sek-lia̍t khí-sin, tē-saⁿ ji̍t kàu in ê siâⁿ; hiah ê siâⁿ chiū-sī Ki-piàn, Ki-hui-la̍h, Pí-lio̍k, Ki-lia̍t-iâ-lîm. 18 In-ūi hōe-chiòng ê siú-léng í-keng chí Iâ-hô-hoa Í-sek-lia̍t ê Siōng-tè tùi in chiù-chōa, só͘-í Í-sek-lia̍t lâng bô phah in; choân hōe-chiòng chiū ai-oàn hiah ê siú-léng. 19 Chèng siú-léng tùi choân-hōe kóng, Goán í-keng chí Iâ-hô-hoa Í-sek-lia̍t ê Siōng-tè tùi in chiù-chōa, taⁿ lán m̄-thang kha̍p-tio̍h in. 20 Lán tio̍h án-ni khoán-thāi in, iông-ún in oa̍h-teh, kiaⁿ-liáu lán ūi-tio̍h só͘ tùi in chiù-chōa-ê, siū-khì kàu tī lán. 21 Siú-léng koh tùi in kóng, Tio̍h iông-ún in oa̍h; tùi án-ni in chiū kā hōe-chiòng chòe phòa-chhâ chhiūⁿ-chúi ê lâng, chiàu siú-léng só͘ kā in kóng ê ōe. 22 Iok-su-a kiò in lâi, kā in kóng, Siáⁿ-sū phiàn goán kóng, Goán lī-khui lín chin-hn̄g ah? Kî-si̍t lín sī tiàm tī goán tiong-kan. 23 Taⁿ lín sī siū chiù-chó͘-ê, lín tiong-kan chòe lô͘-châi-ê éng bô tn̄g, kā góa Siōng-tè ê tiān chòe phòa-chhâ chhiūⁿ-chúi ê. 24 In ìn Iok-su-a kóng, In-ūi ū lâng khak-si̍t pò lí ê lô͘-po̍k kóng, Iâ-hô-hoa lí ê Siōng-tè bat bēng-lēng I ê lô͘-po̍k Mô͘-se, chiong chit ê choân-tōe siúⁿ-sù lín, iā tī lín ê thâu-chêng châu-bia̍t chit ê só͘-chāi it-chhè khiā-khí ê peh-sìⁿ; só͘-í goán in-ūi lín ê iân-kò͘, kiaⁿ-liáu bô-miā, chiah chòe chit ê tāi-chì. 25 Taⁿ goán tī lí ê chhiú-thâu; lí khòaⁿ-chòe hó chòe chèng-ti̍t ê, chiàu án-ni kiâⁿ lâi khoán-thāi goán. 26 Iok-su-a chiū án-ni khoán-thāi in, kiù in thoat-lī Í-sek-lia̍t lâng ê chhiú; só͘-í in chiū bô thâi in. 27 Tng hit-ji̍t Iok-su-a hō͘ in kā hōe-chiòng kap Iâ-hô-hoa ê tôaⁿ, chòe phòa-chhâ kap chhiūⁿ-chúi ê lâng, tī I só͘ beh kéng ê só͘-chāi, kàu kin-á-ji̍t.
1 耶路撒冷王A-to-nî-sé-tek聽見約書亞取Ai城，一盡滅伊，款待Ai城kap伊ê王，親像前款待耶利哥kap伊ê王一樣；koh聽見Ki-piàn khiā起ê百姓kap以色列人立和約，khiā起tī in中間； 2 就真驚；因為Ki-piàn是大城，親像一个京城，比Ai城khah大；koh城內ê人lóng是勇士。 3 Tùi án-ni，耶路撒冷王A-to-nî-sé-tek差人去見Hi-pek-lûn王Hô-hâm，Iâ-boa̍t王Pí-lân，拉結王Ngá-hui-a，kap I-ki-lûn王Tí-phek，講： 4 請lín上來我chia，幫贊我；咱thang來去phah Ki-piàn，因為伊kap約書亞kap以色列立和約。 5 Tùi án-ni，A-mô͘-lī人五個王，就是耶路撒冷王、Hi-pek-lûn王、Iâ-boa̍t王、拉結王、I-ki-lûn王，大家聚集，kap in ê軍隊上去，紮營tī Ki-piàn ê對面，beh攻擊伊。 6 Ki-piàn人就差人去Kiat-kah ê營，見約書亞講：你m̄-thang kiu手m̄看你ê奴僕；求你緊緊來chia拯救阮，幫贊阮；因為khiā起山地A-mô͘-lī人hiahê王，lóng聚集來攻擊阮。 7 Tùi án-ni，約書亞，kap伊一切ê戰士，以及一切大力ê勇士，lóng tùi Kiat-kah上去。 8 耶和華kā約書亞講：莫得驚in，因為我已經將in交tī你ê手；in無一人能khiā-tiâu tī你ê面前。 9 約書亞忽然到in hia，因為伊tùi Kiat-kah thong暝上去。 10 耶和華hō͘ in tī以色列人ê面前紛亂；就tī Ki-piàn 刣死in真chōe；追jip in tī上 Pek-hô-lûn ê路，phah in到A-se-ka kap Má-ki-tāi。 11 In tī以色列人ê面前逃走；tī Pek-hô-lûn落去ê時，耶和華tùi天落大雹tī in ê身上，到A-se-ka，hō͘ in死；hiahê hō͘雹phah死ê，比以色列人用刀刣死ê，khah-chōe。 12 當耶和華將A-mô͘-lī人交tī以色列人ê日，約書亞就kā耶和華講：也tī以色列人ê面前講： 日頭ah，你tio̍h停tī Ki-piàn ê頂面， 月ah，你tio̍h停tī A-ngá-lûn ê山谷。 13 日頭就停teh，月就歇teh， thèng候百姓報仇tī in ê對敵。Chitê事kiám m̄是寫tī Ngá-soah-jíⁿ ê冊mah？日頭停tī天ê中央，無緊緊落去，約略有一日ê久。 14 以前以後無有親像hit一日，得tio̍h耶和華聽人ê聲；是因為耶和華替以色列人交戰。 15 約書亞kap以色列眾人tò來Kiat-kah ê營內。 16 Hit五個王逃走，bih tī Má-ki-tāi ê洞內。 17 有人去kā約書亞講：Hit五個王已經chhē-tio̍h lah，lóng bih tī Má-ki-tāi ê洞內。 18 約書亞講：徙大塊石到洞口，派人tiàm hia顧守in； 19 總是lín m̄-thang停腳，tio̍h追jip lín ê對敵，phah in ê後隊，m̄-thang容允in入in ê城；因為耶和華lín ê上帝已經將in交tī lín ê手。 20 約書亞kap以色列大大刣死in，到一盡剿滅chiah soah；其中chhun ê人lóng入堅固ê城； 21 眾百姓就安然tò來Má-ki-tāi ê營，到約書亞hia；無一人敢出聲攻擊以色列人。 22 約書亞講：開洞口，掠hit五個王出洞，來我chia。 23 In就án-ni行，掠hit五個王，就是耶路撒冷王、Hi-pek-lûn王、Iâ-boa̍t王、拉結王、I-ki-lûn王，tùi洞內出來，帶到伊hia。 24 掠hiahê王出來到約書亞hia ê時，約書亞就叫以色列眾人來，對hiahê kap伊相kap去ê軍長講：Lín近前來，將腳踏tī chiahê王ê頷頸；in就近前來，用腳踏tī in ê頷頸。 25 約書亞對in講，Lín莫得驚，也莫得懍，tio̍h勇敢壯膽；因為lín所beh攻擊一切ê對敵，耶和華beh án-ni款待in。 26 後來約書亞phah死in，吊in tī五叢樹；in吊tī樹裡到ê-hng。 27 日落ê時，約書亞出令，就tùi樹裡收身屍落來，hiat tī in所bih ê洞，將kúi-nā塊大石hē tī 洞口，到taⁿ iáu tī-teh。 28 Hit日約書亞取Má-ki-tāi，用刀刣死in kap in ê王；hit內面ê人一盡剿滅，無留一个；伊款待Má-ki-tāi ê王，親像前款待耶利哥王一樣。 29 約書亞kap以色列眾人tùi Má-ki-tāi hia去到Li̍p-ná，攻擊Li̍p-ná。 30 耶和華將伊kap伊ê王交tī以色列人ê手；伊用刀刣死伊，kap hit內面ê眾人，無留一个；伊款待伊ê王，親像前款待耶利哥王一樣。 31 約書亞kap以色列眾人tùi Li̍p-ná hia去到拉結，紮營tī伊ê對面，來攻擊伊。 32 耶和華將拉結交tī以色列人ê手；隔日就取伊，用刀刣死伊，kap hit內面ê眾人；是照伊對Li̍p-ná一切所行ê。 33 Hit時Ki-sek ê王Hô-lân來beh幫贊拉結；約書亞就phah死伊，kap伊ê百姓；lóng無kā伊留一个。 34 約書亞kap以色列眾人tùi拉結去到I-ki-lûn，tī伊ê對面紮營，攻擊伊； 35 Hit日就取伊，用刀phah伊；tī hit日一盡剿滅hit內面ê眾人；是照伊tùi拉結一切所行ê。 36 約書亞kap以色列眾人tùi I-ki-lûn上去到Hi-pek-lûn，攻擊伊； 37 就取伊，用刀phah伊，kap伊ê王，以及伊所屬ê城；刣死hit內面ê百姓，lóng無留一个；是照伊對I-ki-lûn一切所行ê，一盡剿滅伊，kap hit內面ê眾百姓。 38 約書亞kap以色列眾人tò來到Tí-phek，攻擊伊； 39 就取伊，kap伊ê王，以及屬伊ê城，用刀phah伊；一盡滅hit內面ê眾人，無留一个，照伊前款待Hi-pek-lûn ê，taⁿ也款待Tí-phek kap伊ê王；也照伊前款待Li̍p-ná kap伊ê王一樣。 40 Án-ni約書亞phah全地，就是山地，南方ê地、平洋、山坪，kap in lóng總ê王，無留一个；見有喘氣ê一盡剿滅，照耶和華以色列ê上帝所命令ê。 41 Tùi Ka-te-su-pa-nî-a到Ka-sat，koh Ko-san全地，以及Ki-piàn，lóng hō͘約書亞phah。 42 Hiah-ê王kap in ê地，約書亞做一時取in；因為耶和華以色列ê上帝替以色列交戰。 43 約書亞kap以色列ê眾人就tò來到Kiat-kah ê營盤。
1 Iâ-lō͘-sat-léng ông A-to-nî-sé-tek thiaⁿ-kìⁿ Iok-su-a chhú Ai siâⁿ, it-chīn bia̍t i, khoán-thāi Ai siâⁿ kap i ê ông, chhin-chhiūⁿ chêng khoán-thāi Iâ-lī-ko kap i ê ông chi̍t-iūⁿ; koh thiaⁿ-kìⁿ Ki-piàn khiā-khí ê peh-sìⁿ kap Í-sek-lia̍t lâng li̍p hô-iok, khiā-khí tī in tiong-kan; 2 chiū chin kiaⁿ; in-ūi Ki-piàn sī tōa-siâⁿ, chhin-chhiūⁿ chi̍t ê kiaⁿ-siâⁿ, pí Ai siâⁿ khah-tōa; koh siâⁿ-lāi ê lâng lóng sī ióng-sū. 3 Tùi án-ni Iâ-lō͘-sat-léng ông A-to-nî-sé-tek chhe lâng khì kìⁿ Hi-pek-lûn ông Hô-hâm, Iâ-boa̍t ông Pí-lân, La̍h-kiat ông Ngá-hui-a, kap I-ki-lûn ông Tí-phek, kóng, 4 Chhiáⁿ lín chiūⁿ-lâi góa chia, pang-chān góa; lán thang lâi khì phah Ki-piàn, in-ūi i kap Iok-su-a kap Í-sek-lia̍t li̍p hô-iok. 5 Tùi án-ni A-mô͘-lī lâng gō͘ ê ông, chiū-sī Iâ-lō͘-sat-léng ông, Hi-pek-lûn ông, Iâ-boa̍t ông, La̍h-kiat ông, I-ki-lûn ông, tāi-ke chū-chi̍p, kap in ê kun-tūi chiūⁿ-khì, chat-iâⁿ tī Ki-piàn ê tùi-bīn, beh kong-kek i. 6 Ki-piàn lâng chiū chhe lâng khì Kiat-kah ê iâⁿ, kìⁿ Iok-su-a kóng, Lí m̄-thang kiu chhiú m̄-khòaⁿ lí ê lô͘-po̍k; kiû lí kín-kín lâi chia chín-kiù goán, pang-chān goán; in-ūi khiā-khí soaⁿ-tōe A-mô͘-lī lâng hiah ê ông, lóng chū-chi̍p lâi kong-kek goán. 7 Tùi án-ni Iok-su-a, kap i it-chhè ê chiàn-sū, í-ki̍p it-chhè tōa-la̍t ê ióng-sū, lóng tùi Kiat-kah chiūⁿ-khì. 8 Iâ-hô-hoa kā Iok-su-a kóng, Bo̍h-tit kiaⁿ in, in-ūi Góa í-keng chiong in kau tī lí ê chhiú; in bô chi̍t-lâng ōe khiā-tiâu tī lí ê bīn-chêng. 9 Iok-su-a hut-jiân kàu in hia, in-ūi i tùi Kiat-kah thong-mî chiūⁿ-khì. 10 Iâ-hô-hoa hō͘ in tī Í-sek-lia̍t lâng ê bīn-chêng hun-loān; chiū tī Ki-piàn thâi-sí in chin-chōe; tui-jip in tī chiūⁿ Pek-hô-lûn ê lō͘, phah in kàu A-se-ka kap Má-ki-tāi. 11 In tī Í-sek-lia̍t lâng ê bīn-chêng tô-cháu; tī Pek-hô-lûn lo̍h-khì ê sî, Iâ-hô-hoa tùi thiⁿ lo̍h tōa pha̍uh tī in ê sin-chiūⁿ, kàu A-se-ka, hō͘ in sí; hiah ê hō͘ pha̍uh phah-sí-ê, pí Í-sek-lia̍t lâng ēng to thâi-sí-ê, khah-chōe. 12 Tng Iâ-hô-hoa chiong A-mô͘-lī lâng kau tī Í-sek-lia̍t lâng ê ji̍t, Iok-su-a chiū kā Iâ-hô-hoa kóng, iā tī Í-sek-lia̍t lâng ê bīn-chêng kóng, Ji̍t-thâu ah, lí tio̍h thêng tī Ki-piàn ê téng-bīn, Ge̍h ah, lí tio̍h thêng tī A-ngá-lûn ê soaⁿ-kok. 13 Ji̍t-thâu chiū thêng-teh, ge̍h chiū hioh-teh, Thèng-hāu peh-sìⁿ pò-siû tī in ê tùi-te̍k. Chit ê sū kiám m̄-sī siá tī Ngá-soah-jíⁿ ê chheh mah? Ji̍t-thâu thêng tī thiⁿ ê tiong-ng, bô kín-kín lo̍h-khì, iok-lio̍k ū chi̍t-ji̍t ê kú. 14 Í-chêng í-āu bô ū chhin-chhiūⁿ hí chi̍t-ji̍t, tit-tio̍h Iâ-hô-hoa thiaⁿ lâng ê siaⁿ; sī in-ūi Iâ-hô-hoa thòe Í-sek-lia̍t lâng kau-chiàn. 15 Iok-su-a kap Í-sek-lia̍t chèng-lâng tò-lâi Kiat-kah ê iâⁿ-lāi. 16 Hí gō͘ ê ông tô-cháu, bih tī Má-ki-tāi ê tōng-lāi. 17 Ū lâng khì kā Iok-su-a kóng, Hí gō͘ ê ông í-keng chhē-tio̍h lah, lóng bih tī Má-ki-tāi ê tōng-lāi. 18 Iok-su-a kóng, Sóa tōa tè chio̍h kàu tōng-kháu, phài lâng tiàm hia kò͘-siú in; 19 chóng-sī lín m̄-thang thêng-kha, tio̍h tui-jip lín ê tùi-te̍k, phah in ê āu-tūi, m̄-thang iông-ún in ji̍p in ê siâⁿ; in-ūi Iâ-hô-hoa lín ê Siōng-tè í-keng chiong in kau tī lín ê chhiú. 20 Iok-su-a kap Í-sek-lia̍t tōa-tōa thâi-sí in, kàu it-chīn châu-bia̍t chiah soah; kî-tiong chhun ê lâng lóng ji̍p kian-kò͘ ê siâⁿ; 21 chèng peh-sìⁿ chiū an-jiân tò-lâi Má-ki-tāi ê iâⁿ, kàu Iok-su-a hia; bô chi̍t-lâng káⁿ chhut-siaⁿ kong-kek Í-sek-lia̍t lâng. 22 Iok-su-a kóng, Khui tōng-kháu, lia̍h hí gō͘ ê ông chhut-tōng, lâi góa chia. 23 In chiū án-ni kiâⁿ, lia̍h hí gō͘ ê ông, chiū-sī Iâ-lō͘-sat-léng ông, Hi-pek-lûn ông, Iâ-boa̍t ông, La̍h-kiat ông, I-ki-lûn ông, tùi tōng-lāi chhut-lâi, tòa kàu i hia. 24 Lia̍h hiah ê ông chhut-lâi kàu Iok-su-a hia ê sî, Iok-su-a chiū kiò Í-sek-lia̍t chèng-lâng lâi, tùi hiah ê kap i saⁿ-kap khì ê kun-tiúⁿ kóng, Lín kūn-chêng lâi, chiong kha ta̍h tī chiah ê ông ê ām-kún; in chiū kūn-chêng lâi, ēng kha ta̍h tī in ê ām-kún. 25 Iok-su-a tùi in kóng, Lín bo̍h-tit kiaⁿ, iā bo̍h-tit lún, tio̍h ióng-kám chòng-táⁿ; in-ūi lín só͘ beh kong-kek it-chhè ê tùi-te̍k, Iâ-hô-hoa beh án-ni khoán-thāi in. 26 Āu-lâi Iok-su-a phah-sí in, tiàu in tī gō͘ châng chhiū; in tiàu tī chhiū-ni̍h kàu ê-hng. 27 Ji̍t-lo̍h ê sî, Iok-su-a chhut-lēng, chiū tùi chhiū-ni̍h siu sin-si lo̍h-lâi, hiat tī in só͘ bih ê tōng, chiong kúi-nā tè tōa-chio̍h hē tī tōng-kháu, kàu-taⁿ iáu tī-teh. 28 Hit-ji̍t Iok-su-a chhú Má-ki-tāi, ēng to thâi-sí in kap in ê ông; hí lāi-bīn ê lâng it-chīn châu-bia̍t, bô lâu chi̍t-ê; i khoán-thāi Má-ki-tāi ê ông, chhin-chhiūⁿ chêng khoán-thāi Iâ-lī-ko ông chi̍t-iūⁿ. 29 Iok-su-a kap Í-sek-lia̍t chèng-lâng tùi Má-ki-tāi hia khì kàu Li̍p-ná, kong-kek Li̍p-ná. 30 Iâ-hô-hoa chiong i kap i ê ông kau tī Í-sek-lia̍t lâng ê chhiú; i ēng to thâi-sí i, kap hí lāi-bīn ê chèng-lâng, bô lâu chi̍t-ê; i khoán-thāi i ê ông, chhin-chhiūⁿ chêng khoán-thāi Iâ-lī-ko ông chi̍t-iūⁿ. 31 Iok-su-a kap Í-sek-lia̍t chèng-lâng tùi Li̍p-ná hia khì kàu La̍h-kiat, chat-iâⁿ tī i ê tùi-bīn, lâi kong-kek i. 32 Iâ-hô-hoa chiong La̍h-kiat kau tī Í-sek-lia̍t lâng ê chhiú; keh-ji̍t chiū chhú i, ēng to thâi-sí i, kap hí lāi-bīn ê chèng-lâng; sī chiàu i tùi Li̍p-ná it-chhè só͘ kiâⁿ ê. 33 Hit-sî Ki-sek ê ông Hô-lân lâi beh pang-chān La̍h-kiat; Iok-su-a chiū phah-sí i, kap i ê peh-sìⁿ; lóng bô kā i lâu chi̍t-ê. 34 Iok-su-a kap Í-sek-lia̍t chèng-lâng tùi La̍h-kiat khì kàu I-ki-lûn, tī i ê tùi-bīn chat-iâⁿ, kong-kek i; 35 hit-ji̍t chiū chhú i, ēng to phah i; tī hit-ji̍t it-chīn châu-bia̍t hí lāi-bīn ê chèng-lâng; sī chiàu i tùi La̍h-kiat it-chhè só͘ kiâⁿ ê. 36 Iok-su-a kap Í-sek-lia̍t chèng-lâng tùi I-ki-lûn chiūⁿ-khì kàu Hi-pek-lûn, kong-kek i; 37 chiū chhú i, ēng to phah i, kap i ê ông, í-ki̍p i só͘ sio̍k ê siâⁿ; thâi-sí hí lāi-bīn ê peh-sìⁿ, lóng bô lâu chi̍t-ê; sī chiàu i tùi I-ki-lûn it-chhè só͘ kiâⁿ ê, it-chīn châu-bia̍t i, kap hí lāi-bīn ê chèng peh-sìⁿ. 38 Iok-su-a kap Í-sek-lia̍t chèng-lâng tò-lâi kàu Tí-phek, kong-kek i; 39 chiū chhú i, kap i ê ông, í-ki̍p sio̍k i ê siâⁿ, ēng to phah i; it-chīn bia̍t hí lāi-bīn ê chèng-lâng, bô lâu chi̍t-ê, chiàu i chêng khoán-thāi Hi-pek-lûn ê, taⁿ iā khoán-thāi Tí-phek kap i ê ông; iā chiàu i chêng khoán-thāi Li̍p-ná kap i ê ông chi̍t-iūⁿ. 40 Án-ni Iok-su-a phah choân-tōe, chiū-sī soaⁿ-tōe, lâm-hng ê tōe, pîⁿ-iûⁿ, soaⁿ-phiâⁿ, kap in lóng-chóng ê ông, bô lâu chi̍t-ê; kìⁿ-ū chhoán-khùi-ê it-chīn châu-bia̍t, chiàu Iâ-hô-hoa Í-sek-lia̍t ê Siōng-tè só͘ bēng-lēng ê. 41 Tùi Ka-te-su-pa-nî-a kàu Ka-sat, koh Ko-san choân-tōe, í-ki̍p Ki-piàn, lóng hō͘ Iok-su-a phah. 42 Hiah ê ông kap in ê tōe, Iok-su-a chòe chi̍t-sî chhú in; in-ūi Iâ-hô-hoa Í-sek-lia̍t ê Siōng-tè thòe Í-sek-lia̍t kau-chiàn. 43 Iok-su-a kap Í-sek-lia̍t ê chèng-lâng chiū tò-lâi kàu Kiat-kah ê iâⁿ-pôaⁿ.
1 Hā-só王Iâ-pin聽見chitê tāi-chì，就差人去見Má-tùn王Iok-pa，kap Sin-lûn ê王、Ap-soah ê王； 2 也到北方，山地，kap Ki-nî-lia̍t南勢ê A-la̍h-pa，平洋，kap西勢To-jíⁿ ê山頭，chiahê王。 3 Koh去見東勢kap西勢ê迦南人，kap A-mô͘-lī人、Hek人、Pí-lī-sé人，kap Iâ-pò͘-sū人，khiā起tī山地ê，以及Hek-bûn山腳Bí-su-pa地ê Hi-bī人。 4 In kap in ê眾軍隊lóng出來，人額真chōe親像海邊ê沙；馬kap車也真chōe。 5 Chiahê王lóng聚集，來到Bí-lûn ê水邊，平平安營，beh kap以色列交戰。 6 耶和華kā約書亞講：m̄免為tio̍h in來驚，因為明á日差不多chit時，我用刣死ê眾人交tī以色列ê面前；你tio̍h割斷in ê馬腿ê大筋，用火燒in ê車。 7 約書亞kap lóng總ê戰士，忽然到Bí-lûn ê水邊；tú-tio̍h in就phah in。 8 耶和華將in交tī以色列人ê手，in就phah in，追jip in到大Se-tùn，也到Bí-su-lī-hut-má-im，直到東勢Bí-su-pa ê平洋，刣死in，無留一个。 9 約書亞就照耶和華所命令ê款待in；馬就割斷in ê腿ê大筋，車就用火燒。 10 Hit時約書亞oa̍t-tńg來取Hā-só，用刀刣伊ê王；因為Hā-só平時做chiahê國ê頭。 11 以色列人用刀刣死hit內面ê眾人，一盡滅in；見有喘氣ê無留一个；koh用火燒Hā-só。 12 約書亞取hiahê王lóng總ê城，以及in ê王，用刀刣死in，一盡滅in，照耶和華ê奴僕摩西所命令ê。 13 Hiah-ê起tī崙á頂ê城，除Hā-só以外，以色列人lóng無燒伊；只有Hā-só hō͘約書亞燒去。 14 Tī hiahê城所搶ê物，kap cheng-siⁿ，以色列人lóng 取做家己ê；獨獨人，lóng用刀刣死到滅無；見有喘氣ê無留一个。 15 耶和華命令伊ê奴僕摩西ê，摩西照án-ni命令約書亞，約書亞án-ni行；見耶和華所命令摩西ê，約書亞無一項無行。 16 Án-ni約書亞取hitê全地，就是山地，南方全地，Ko-san全地，kap平洋A-la̍h-pa，以色列ê山地，kap伊ê平洋； 17 tùi上去Se-jíⁿ ê Hap-la̍h山，到Hek-bûn山腳，Lī-pa-lùn山谷ê Pa-le̍k-ka-tek；也掠hit所在hiahê王，phah hō͘ in死。 18 約書亞kap chiahê王交戰真久。 19 除Ki-piàn ê Hi-bī人以外，無一个城kap以色列人講和；in lóng tùi交戰來取伊。 20 因為tùi耶和華hō͘ in ê心硬，抵敵以色列，來kap in交戰，hō͘ in一盡受滅，無得tio̍h憐憫，致到一盡滅無，照耶和華所命令摩西ê。 21 Hit時約書亞到，就tùi山地、Hi-pek-lûn、Tí-phek、A-ná-pek、偤大山地、以色列山地，剪除A-la̍p族ê人；約書亞一盡滅in，kap in hiahê城。 22 Tī以色列人ê地lóng無留一个A-la̍p族ê人；獨獨tī Ka-sat、Ka-te̍k，kap A-si̍t-tu̍t有chhun淡薄。 23 Án-ni約書亞照耶和華所命令摩西一切ê話，取hitê全地；約書亞將地分hō͘以色列做業，照in ê支派，in ê宗族；tùi án-ni，hitê地太平無交戰。
1 Hā-só ông Iâ-pin thiaⁿ-kìⁿ chit ê tāi-chì, chiū chhe lâng khì kìⁿ Má-tùn ông Iok-pa, kap Sin-lûn ê ông, Ap-soah ê ông; 2 iā kàu pak-hng, soaⁿ-tōe, kap Ki-nî-lia̍t lâm-sì ê A-la̍h-pa, pîⁿ-iûⁿ, kap sai-sì To-jíⁿ ê soaⁿ-thâu, chiah ê ông. 3 Koh khì kìⁿ tang-sì kap sai-sì ê Ka-lâm lâng, kap A-mô͘-lī lâng, Hek lâng, Pí-lī-sé lâng, kap Iâ-pò͘-sū lâng, khiā-khí tī soaⁿ-tōe ê, í-ki̍p Hek-bûn soaⁿ-kha Bí-su-pa tōe ê Hi-bī lâng. 4 In kap in ê chèng kun-tūi lóng chhut-lâi, lâng-gia̍h chin-chōe chhin-chhiūⁿ hái-piⁿ ê soa; bé kap chhia iā chin-chōe. 5 Chiah ê ông lóng chū-chi̍p, lâi kàu Bí-lûn ê chúi-piⁿ, pîⁿ-pîⁿ an-iâⁿ, beh kap Í-sek-lia̍t kau-chiàn. 6 Iâ-hô-hoa kā Iok-su-a kóng, M̄-bián ūi-tio̍h in lâi kiaⁿ, in-ūi bîn-á-ji̍t chha-put-to chit-sî, Góa ēng thâi-sí ê chèng-lâng kau tī Í-sek-lia̍t ê bīn-chêng; lí tio̍h koah-tn̄g in ê bé-thúi ê tōa-kun, ēng hé sio in ê chhia. 7 Iok-su-a kap lóng-chóng ê chiàn-sū, hut-jiân kàu Bí-lûn ê chúi-piⁿ; tú-tio̍h in chiū phah in. 8 Iâ-hô-hoa chiong in kau tī Í-sek-lia̍t lâng ê chhiú, in chiū phah in, tui-jip in kàu tōa Se-tùn, iā kàu Bí-su-lī-hut-má-im, ti̍t-kàu tang-sì Bí-su-pa ê pîⁿ-iûⁿ, thâi-sí in, bô lâu chi̍t-ê. 9 Iok-su-a chiū chiàu Iâ-hô-hoa só͘ bēng-lēng-ê khoán-thāi in; bé chiū koah-tn̄g in ê thúi ê tōa-kun, chhia chiū ēng hé sio. 10 Hit-sî Iok-su-a oa̍t-tńg-lâi chhú Hā-só, ēng to thâi i ê ông; in-ūi Hā-só pêng-sî chòe chiah ê kok ê thâu. 11 Í-sek-lia̍t lâng ēng to thâi-sí hí lāi-bīn ê chèng-lâng, it-chīn bia̍t in; kìⁿ-ū chhoán-khùi-ê bô lâu chi̍t-ê; koh ēng hé sio Hā-só. 12 Iok-su-a chhú hiah ê ông lóng-chóng ê siâⁿ, í-ki̍p in ê ông, ēng to thâi-sí in, it-chīn bia̍t in, chiàu Iâ-hô-hoa ê lô͘-po̍k Mô͘-se só͘ bēng-lēng ê. 13 Hiah ê khí tī lūn-á-téng ê siâⁿ, tû Hā-só í-gōa, Í-sek-lia̍t lâng lóng bô sio i; chí-ū Hā-só hō͘ Iok-su-a sio-khì. 14 Tī hiah ê siâⁿ só͘ chhiúⁿ ê mi̍h, kap cheng-siⁿ, Í-sek-lia̍t lâng lóng chhú chòe ka-kī ê; to̍k-to̍k lâng, lóng ēng to thâi-sí kàu bia̍t-bô; kìⁿ-ū chhoán-khùi-ê bô lâu chi̍t-ê. 15 Iâ-hô-hoa bēng-lēng I ê lô͘-po̍k Mô͘-se ê, Mô͘-se chiàu án-ni bēng-lēng Iok-su-a, Iok-su-a án-ni kiâⁿ; kìⁿ Iâ-hô-hoa só͘ bēng-lēng Mô͘-se ê, Iok-su-a bô chi̍t-hāng bô kiâⁿ. 16 Án-ni Iok-su-a chhú hit ê choân-tōe, chiū-sī soaⁿ-tōe, lâm-hng choân-tōe, Ko-san choân-tōe, kap pîⁿ-iûⁿ A-la̍h-pa, Í-sek-lia̍t ê soaⁿ-tōe, kap i ê pîⁿ-iûⁿ; 17 tùi chiūⁿ-khì Se-jíⁿ ê Hap-la̍h soaⁿ, kàu Hek-bûn soaⁿ-kha, Lī-pa-lùn soaⁿ-kok ê Pa-le̍k-ka-tek; iā lia̍h hit só͘-chāi hiah ê ông, phah hō͘ in sí. 18 Iok-su-a kap chiah ê ông kau-chiàn chin-kú. 19 Tû Ki-piàn ê Hi-bī lâng í-gōa, bô chi̍t ê siâⁿ kap Í-sek-lia̍t lâng káng-hô; in lóng tùi kau-chiàn lâi chhú i. 20 In-ūi tùi Iâ-hô-hoa hō͘ in ê sim ngī, tí-te̍k Í-sek-lia̍t, lâi kap in kau-chiàn, hō͘ in it-chīn siū-bia̍t, bô tit-tio̍h lîn-bín, tì-kàu it-chīn bia̍t-bô, chiàu Iâ-hô-hoa só͘ bēng-lēng Mô͘-se ê. 21 Hit-sî Iok-su-a kàu, chiū tùi soaⁿ-tōe, Hi-pek-lûn, Tí-phek, A-ná-pek, Iû-tāi soaⁿ-tōe, Í-sek-lia̍t soaⁿ-tōe, chián-tû A-la̍p cho̍k ê lâng; Iok-su-a it-chīn bia̍t in, kap in hiah ê siâⁿ. 22 Tī Í-sek-lia̍t lâng ê tōe lóng bô lâu chi̍t ê A-la̍p cho̍k ê lâng; to̍k-to̍k tī Ka-sat, Ka-te̍k, kap A-si̍t-tu̍t ū chhun tām-po̍h. 23 Án-ni Iok-su-a chiàu Iâ-hô-hoa só͘ bēng-lēng Mô͘-se it-chhè ê ōe, chhú hit ê choân-tōe; Iok-su-a chiong tōe pun hō͘ Í-sek-lia̍t chòe-gia̍p, chiàu in ê chi-phài, in ê chong-cho̍k; tùi án-ni hit ê tōe thài-pêng bô kau-chiàn.
1 Tī約旦hit-pêng ǹg日出ê所在，tùi A-lùn ê山谷到Hek-bûn山，kap東勢A-la̍h-pa ê全地，以色列人phah hiahê王，取in ê地，記tī下底。 2 A-mô͘-lī人ê王，就是khiā起tī Hi-si̍t-pún ê Se-hông，伊所管ê地，是tùi A-lùn山谷邊ê A-lô-jíⁿ，kap山谷中ê城，以及Ki-lia̍t ê一半，直到A-bûn人ê境界，就是Ngá-phok河。 3 Koh A-la̍h-pa東勢到Ki-nî-lia̍t海，koh到東勢A-la̍h-pa ê海，就是鹽海，thàng到Pek-iâ-se-boa̍t ê路，以及南方，直到Pí-su-ka ê山腳； 4 koh有Pa-sán王Go̍k ê境界，伊是Lī-hoa̍t-im人所chhun ê，tiàm tī A-su-tha-lio̍k kap Í-tek-lâi； 5 伊所管ê地，是Hek-bûn山、Sat-ka、Pa-san全地，到Ki-su̍t人kap Má-ka人ê境界，以及Ki-lia̍t ê一半，直到Hi-si̍t-pún王Se-hông ê境界。 6 In是耶和華ê奴僕摩西kap以色列人所phah ê；耶和華ê奴僕摩西將in ê地hō͘ Liû-piān人、Ka-tek人，kap Má-ná-se半支派ê人做業。 7 Tī約旦ê西pêng，tùi Lī-pa-lùn山谷ê Pa-le̍k-ka-tek，到上去Se-jíⁿ ê Hap-la̍h山，約書亞kap以色列人phah in ê地；約書亞就將地分hō͘以色列各支派照in ê宗族做業； 8 就是tī山地，tī平洋，tī A-la̍h-pa，tī山腳，tī曠野，tī南方ê地，是Hek人、A-mô͘-lī人、迦南人、Pí-lī-sé人、Hi-bī人、Iâ-pò͘-su人chiahê王記tī下底； 9 一个是耶利哥王；一个是óa近Pek-te̍k-lī Ai城ê王； 10 一个是耶路撒冷王；一个是Hi-pek-lûn王； 11 一个是Iâ-boa̍t王；一个是拉結王； 12 一个是I-ki-lûn王；一个是Ki-sek王； 13 一个是Tí-phek王；一个是Ki-tak王； 14 一个是Hô-jíⁿ-má王；一个是A-la̍h-tek王； 15 一个是Li̍p-ná王；一个是A-tō-lân王； 16 一个是Má-ki-tāi王；一个是Pek-te̍k-lī王； 17 一个是Tha-phó͘-a王；一个是Hi-hut王； 18 一个是A-hut王；一个是La̍h-sa-lûn王； 19 一个是Má-tùn王；一个是Hā-só王； 20 一个是Sin-lûn-bí-lûn王；一个是Ap-soah王； 21 一个是Tha-la̍p王；一个是Bí-kiat-to王； 22 一个是Ki-te-su王；一个是óa近Ka-bi̍t ê Iok-liām王； 23 一个是To-jíⁿ山頭ê To-jíⁿ王；一个是Kiat-kah ê Ko-ìn王； 24 一个是Tek-sat王；計共三十一ê王。
1 Tī Iok-tàn hit-pêng ǹg ji̍t-chhut ê só͘-chāi, tùi A-lùn ê soaⁿ-kok kàu Hek-bûn soaⁿ, kap tang-sì A-la̍h-pa ê choân-tōe, Í-sek-lia̍t lâng phah hiah ê ông, chhú in ê tōe, kì tī ē-tóe. 2 A-mô͘-lī lâng ê ông, chiū-sī khiā-khí tī Hi-si̍t-pún ê Se-hông, i só͘ koán ê tōe, sī tùi A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, í-ki̍p Ki-lia̍t ê chi̍t-pòaⁿ, ti̍t-kàu A-bûn lâng ê kéng-kài, chiū-sī Ngá-phok hô. 3 Koh A-la̍h-pa tang-sì kàu Ki-nî-lia̍t hái, koh kàu tang-sì A-la̍h-pa ê hái, chiū-sī Iâm-hái, thàng-kàu Pek-iâ-se-boa̍t ê lō͘, í-ki̍p lâm-hng, ti̍t-kàu Pí-su-ka ê soaⁿ-kha; 4 koh ū Pa-sán ông Go̍k ê kéng-kài, i sī Lī-hoa̍t-im lâng só͘ chhun ê, tiàm tī A-su-tha-lio̍k kap Í-tek-lâi; 5 i só͘ koán ê tōe, sī Hek-bûn soaⁿ, Sat-ka, Pa-san choân-tōe, kàu Ki-su̍t lâng kap Má-ka lâng ê kéng-kài, í-ki̍p Ki-lia̍t ê chi̍t-pòaⁿ, ti̍t-kàu Hi-si̍t-pún ông Se-hông ê kéng-kài. 6 In sī Iâ-hô-hoa ê lô͘-po̍k Mô͘-se kap Í-sek-lia̍t lâng só͘ phah ê; Iâ-hô-hoa ê lô͘-po̍k Mô͘-se chiong in ê tōe hō͘ Liû-piān lâng, Ka-tek lâng, kap Má-ná-se pòaⁿ-chi-phài ê lâng chòe-gia̍p. 7 Tī Iok-tàn ê sai-pêng, tùi Lī-pa-lùn soaⁿ-kok ê Pa-le̍k-ka-tek, kàu chiūⁿ-khì Se-jíⁿ ê Hap-la̍h soaⁿ, Iok-su-a kap Í-sek-lia̍t lâng phah in ê tōe; Iok-su-a chiū chiong tōe pun hō͘ Í-sek-lia̍t kok chi-phài chiàu in ê chong-cho̍k chòe-gia̍p; 8 chiū-sī tī soaⁿ-tōe, tī pîⁿ-iûⁿ, tī A-la̍h-pa, tī soaⁿ-kha, tī khòng-iá, tī lâm-hng ê tōe, sī Hek lâng, A-mô͘-lī lâng, Ka-lâm lâng, Pí-lī-sé lâng, Hi-bī lâng, Iâ-pò͘-su lâng chiah ê ông kì tī ē-tóe; 9 chi̍t-ê sī Iâ-lī-ko ông; chi̍t-ê sī óa-kūn Pek-te̍k-lī Ai siâⁿ ê ông; 10 chi̍t-ê sī Iâ-lō͘-sat-léng ông; chi̍t-ê sī Hi-pek-lûn ông; 11 chi̍t-ê sī Iâ-boa̍t ông; chi̍t-ê sī La̍h-kiat ông; 12 chi̍t-ê sī I-ki-lûn ông; chi̍t-ê sī Ki-sek ông; 13 chi̍t-ê sī Tí-phek ông; chi̍t-ê sī Ki-tak ông; 14 chi̍t-ê sī Hô-jíⁿ-má ông; chi̍t-ê sī A-la̍h-tek ông; 15 chi̍t-ê sī Li̍p-ná ông; chi̍t-ê sī A-tō-lân ông; 16 chi̍t-ê sī Má-ki-tāi ông; chi̍t-ê sī Pek-te̍k-lī ông; 17 chi̍t-ê sī Tha-phó͘-a ông; chi̍t-ê sī Hi-hut ông; 18 chi̍t-ê sī A-hut ông; chi̍t-ê sī La̍h-sa-lûn ông; 19 chi̍t-ê sī Má-tùn ông; chi̍t-ê sī Hā-só ông; 20 chi̍t-ê sī Sin-lûn-bí-lûn ông; chi̍t-ê sī Ap-soah ông; 21 chi̍t-ê sī Tha-la̍p ông; chi̍t-ê sī Bí-kiat-to ông; 22 chi̍t-ê sī Ki-te-su ông; chi̍t-ê sī óa-kūn Ka-bi̍t ê Iok-liām ông; 23 chi̍t-ê sī To-jíⁿ soaⁿ-thâu ê To-jíⁿ ông; chi̍t-ê sī Kiat-kah ê Ko-ìn ông; 24 chi̍t-ê sī Tek-sat ông; kè-kiōng saⁿ-cha̍p-it ê ông.
1 約書亞歲壽chōe，年老，耶和華對伊講，你歲壽chōe，年老，應該取ê地，iáu有chhun真chōe； 2 所chhun ê地，就是腓利士人ê全境，kap Ki-su̍t人ê全地； 3 tùi埃及頭前ê Se-hat，ǹg北到Í-kek-lûn ê境界，這就算做迦南人ê地；腓利士人五個首領，就是Ka-sat人、A-si̍t-tu̍t人、A-si̍t-ki-lûn人、Ka-tek人、Í-kek-lûn人；koh有南方A-ōe人； 4 迦南人ê全地，Se-tùn人ê Bí-a-la̍h，到A-hut，直到A-mô͘-lī人ê交界； 5 koh有Ka-pa-le̍k人ê地，kap ǹg日出ka-nn̂g ê Lī-pa-lùn，tùi Hek-bûn山腳ê Pa-le̍k-ka-tek，到Hap-má ê路口； 6 khiā起山地lóng總ê百姓，tùi Lī-pa-lùn到Bí-su-lī-hut-má-im、Se-tùn ê眾人，我beh tī以色列人ê面前趕in出去；你thang照我所命令你ê，分hiahê地hō͘以色列人做業。 7 Taⁿ你tio̍h將chitê地分hō͘九支派kap Má-ná-se半支派做業。 8 Liû-piān、Ka-tek，兩支派，kap Má-ná-se iáu半支派，相kap得tio̍h摩西所賞賜ê業，tī約旦東勢hit-pêng，就是照耶和華ê奴僕摩西所hō͘ in ê。 9 是tùi A-lùn山谷邊ê A-lô-jíⁿ，kap山谷中ê城，以及Bí-tí-pa ê全平洋，直到Tí-pún； 10 kap tiàm tī Hi-si̍t-pún做王，A-mô͘-lī人ê王Se-hông chiahê城，到A-bûn人ê交界； 11 koh有Ki-lia̍t地，Ki-su̍t人、Má-ka人ê地界，kap ka-nn̂g ê Hek-bûn山，ka-nn̂g ê Pa-san，到Sat-ka； 12 koh Pa-san王Go̍k ê全國，伊tī A-su-tha-lio̍k kap Í-tek-lâi做王；伊是Lī-hoa̍t-im族所chhun-ê；因為chiahê lóng是摩西所phah ê，所趕ê。 13 總是以色列人無趕Ki-su̍t人、Má-ka人；到今á日Ki-su̍t、Má-ka猶原tiàm tī以色列人ê中間。 14 獨獨無分業hō͘利未ê支派；耶和華以色列ê上帝燒祭ê祭物做in ê業，照伊所對伊講ê。 15 摩西分hō͘ Liû-piān支派ê，照in ê宗族。 16 In ê境界是A-lùn山谷邊ê A-lô-jíⁿ，kap山谷中ê城，óa近Bí-tí-pa ê全平洋， 17 Hi-si̍t-pún kap伊平洋hiahê城，Tí-pún、Pa-boa̍t-pa-le̍k、Pek-pa-le̍k-bián； 18 Ngá-cha̍p、Ki-tí-bo̍k、Bí-hoat-ap； 19 Ki-lia̍t-têng、Se-pí-má，kap山谷中ê山Sè-lia̍t-hap-sa-hat； 20 Pek-pì-jíⁿ、Pì-su-ka ê山坪，Pek-iâ-se-boa̍t； 21 koh平洋hiahê城，tī Hi-si̍t-pún做王ê A-mô͘-lī人ê王Se-hông ê全國；摩西phah 伊kap米甸hiahê首領，就是Í-bī、Lī-kim、So͘-jíⁿ、Hō͘-jíⁿ、Lī-pa；chiahê lóng是tiàm tī hit所在做首領，屬tī Se-hông ê。 22 以色列人刣 hiahê人ê時，也用刀刣 Pí-jíⁿ ê kiáⁿ，術士Pa-lân。 23 Liû-piān人ê境界，伊ê業tī約旦kap河邊ê地。這是Liû-piān人ê業，照in ê宗族，chiahê城，chiahê鄉社。 24 摩西分hō͘ Ka-tek人，照Ka-tek支派ê宗族。 25 In ê境界是Ngá-siā kap Ki-lia̍t一切ê城，kap A-bûn人一半ê地，到La̍h-pa頭前ê A-lô-jíⁿ。 26 Tùi Hi-si̍t-pún到La̍h-boa̍t-bí-su-pa，kap Pí-to-lêng，koh tùi Má-hap-liām，到Tí-phek ê境界； 27 kap山谷中ê Pek-a-lân、Pek-lêng-la̍h、So͘-kat，Sat-hun，就是Hi-si̍t-pún王Se-hông國內所chhun ê地，以及約旦河kap河邊ê地，直到Ki-nî-lia̍t海ê極頭，tī約旦hit-pêng ê東勢。 28 這是Ka-tek人照伊ê宗族所得tio̍h做業chiahê城，kap鄉社。 29 摩西分hō͘ Má-ná-se半支派ê，是照Má-ná-se人半支派ê宗族。 30 In ê境界是tùi Má-hap-liām起，包含Pa-san全地，就是Pa-san王Go̍k ê全國，kap tī Pa-san、Gāi-jíⁿ一切ê城，共六十ê城； 31 Ki-lia̍t ê一半，kap A-su-tha-lio̍k，Í-tek-lâi，是屬Pa-san王Go̍k ê國ê城，是hō͘ Má-ná-se ê kiáⁿ，Má-kiat，就是Má-kiat ê kiáⁿ孫ê一半，照伊ê宗族。 32 頂面是摩西tī約旦hit-pêng東勢，耶利哥對面Mô͘-ap ê平洋，所分ê業。 33 獨獨利未支派，摩西無分業hō͘ in；耶和華以色列ê上帝是做in ê產業，照伊所kā in講ê。
1 Iok-su-a hè-siū chōe, nî-lāu, Iâ-hô-hoa tùi i kóng, Lí hè-siū chōe, nî-lāu, eng-kai chhú ê tōe, iáu ū chhun chin-chōe; 2 só͘ chhun ê tōe, chiū-sī Hui-lī-sū lâng ê choân-kéng, kap Ki-su̍t lâng ê choân-tōe; 3 tùi Ai-ki̍p thâu-chêng ê Se-hat, ǹg-pak kàu Í-kek-lûn ê kéng-kài, che chiū sǹg-chòe Ka-lâm lâng ê tōe; Hui-lī-sū lâng gō͘ ê siú-léng, chiū-sī Ka-sat lâng, A-si̍t-tu̍t lâng, A-si̍t-ki-lûn lâng, Ka-tek lâng, Í-kek-lûn lâng; koh ū lâm-hng A-ōe lâng; 4 Ka-lâm lâng ê choân-tōe, Se-tùn lâng ê Bí-a-la̍h, kàu A-hut, ti̍t-kàu A-mô͘-lī lâng ê kau-kài; 5 koh ū Ka-pa-le̍k lâng ê tōe, kap ǹg ji̍t-chhut ka-nn̂g ê Lī-pa-lùn, tùi Hek-bûn soaⁿ-kha ê Pa-le̍k-ka-tek, kàu Hap-má ê lō͘-kháu; 6 khiā-khí soaⁿ-tōe lóng-chóng ê peh-sìⁿ, tùi Lī-pa-lùn kàu Bí-su-lī-hut-má-im, Se-tùn ê chèng-lâng, Góa beh tī Í-sek-lia̍t lâng ê bīn-chêng kóaⁿ in chhut-khì; lí thang chiàu Góa só͘ bēng-lēng lí ê, pun hiah ê tōe hō͘ Í-sek-lia̍t lâng chòe-gia̍p. 7 Taⁿ lí tio̍h chiong chit ê tōe pun hō͘ káu chi-phài kap Má-ná-se pòaⁿ-chi-phài chòe-gia̍p. 8 Liû-piān, Ka-tek, nn̄g chi-phài, kap Má-ná-se iáu pòaⁿ-chi-phài, saⁿ-kap tit-tio̍h Mô͘-se só͘ siúⁿ-sù ê gia̍p, tī Iok-tàn tang-sì hit-pêng, chiū-sī chiàu Iâ-hô-hoa ê lô͘-po̍k Mô͘-se só͘ hō͘ in ê. 9 Sī tùi A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, í-ki̍p Bí-tí-pa ê choân pîⁿ-iûⁿ, ti̍t-kàu Tí-pún; 10 kap tiàm tī Hi-si̍t-pún chòe-ông, A-mô͘-lī lâng ê ông Se-hông chiah ê siâⁿ, kàu A-bûn lâng ê kau-kài; 11 koh ū Ki-lia̍t tōe, Ki-su̍t lâng, Má-ka lâng ê tōe-kài, kap ka-nn̂g ê Hek-bûn soaⁿ, ka-nn̂g ê Pa-san, kàu Sat-ka; 12 koh Pa-san ông Go̍k ê choân-kok, i tī A-su-tha-lio̍k kap Í-tek-lâi chòe-ông; i sī Lī-hoa̍t-im cho̍k só͘ chhun-ê; in-ūi chiah-ê lóng sī Mô͘-se só͘ phah ê, só͘ kóaⁿ ê. 13 Chóng-sī Í-sek-lia̍t lâng bô kóaⁿ Ki-su̍t lâng, Má-ka lâng; kàu kin-á-ji̍t Ki-su̍t, Má-ka iû-goân tiàm tī Í-sek-lia̍t lâng ê tiong-kan. 14 To̍k-to̍k bô pun gia̍p hō͘ Lī-bī ê chi-phài; Iâ-hô-hoa Í-sek-lia̍t ê Siōng-tè sio-chè ê chè-mi̍h chòe in ê gia̍p, chiàu I só͘ tùi i kóng ê. 15 Mô͘-se pun hō͘ Liû-piān chi-phài ê, chiàu in ê chong-cho̍k. 16 In ê kéng-kài sī A-lùn soaⁿ-kok-piⁿ ê A-lô-jíⁿ, kap soaⁿ-kok-tiong ê siâⁿ, óa-kūn Bí-tí-pa ê choân pîⁿ-iûⁿ, 17 Hi-si̍t-pún kap i pîⁿ-iûⁿ hiah ê siâⁿ, Tí-pún, Pa-boa̍t-pa-le̍k, Pek-pa-le̍k-bián; 18 Ngá-cha̍p, Ki-tí-bo̍k, Bí-hoat-ap; 19 Ki-lia̍t-têng, Se-pí-má, kap soaⁿ-kok tiong ê soaⁿ Sè-lia̍t-hap-sa-hat; 20 Pek-pì-jíⁿ, Pì-su-ka ê soaⁿ-phiâⁿ, Pek-iâ-se-boa̍t; 21 koh pîⁿ-iûⁿ hiah ê siâⁿ, tī Hi-si̍t-pún chòe-ông ê A-mô͘-lī lâng ê ông Se-hông ê choân-kok; Mô͘-se phah i kap Bí-tiân hiah ê siú-léng, chiū-sī Í-bī, Lī-kim, So͘-jíⁿ, Hō͘-jíⁿ, Lī-pa; chiah-ê lóng sī tiàm tī hit só͘-chāi chòe siú-léng, sio̍k tī Se-hông ê. 22 Í-sek-lia̍t lâng thâi hiah ê lâng ê sî, iā ēng to thâi Pí-jíⁿ ê kiáⁿ, su̍t-sū Pa-lân. 23 Liû-piān lâng ê kéng-kài, i ê gia̍p tī Iok-tàn kap hô-piⁿ ê tōe. Che sī Liû-piān lâng ê gia̍p, chiàu in ê chong-cho̍k, chiah ê siâⁿ, chiah ê hiuⁿ-siā. 24 Mô͘-se pun hō͘ Ka-tek lâng, chiàu Ka-tek chi-phài ê chong-cho̍k. 25 In ê kéng-kài sī Ngá-siā kap Ki-lia̍t it-chhè ê siâⁿ, kap A-bûn lâng chi̍t-pòaⁿ ê tōe, kàu La̍h-pa thâu-chêng ê A-lô-jíⁿ. 26 Tùi Hi-si̍t-pún kàu La̍h-boa̍t-bí-su-pa, kap Pí-to-lêng, koh tùi Má-hap-liām, kàu Tí-phek ê kéng-kài; 27 kap soaⁿ-kok-tiong ê Pek-a-lân, Pek-lêng-la̍h, So͘-kat, Sat-hun, chiū-sī Hi-si̍t-pún ông Se-hông kok-lāi só͘ chhun ê tōe, í-ki̍p Iok-tàn hô kap hô-piⁿ ê tōe, ti̍t-kàu Ki-nî-lia̍t hái ê ke̍k-thâu, tī Iok-tàn hit-pêng ê tang-sì. 28 Che sī Ka-tek lâng chiàu i ê chong-cho̍k só͘ tit-tio̍h chòe-gia̍p chiah ê siâⁿ, kap hiuⁿ-siā. 29 Mô͘-se pun hō͘ Má-ná-se pòaⁿ-chi-phài-ê, sī chiàu Má-ná-se lâng pòaⁿ-chi-phài ê chong-cho̍k. 30 In ê kéng-kài sī tùi Má-hap-liām khí, pau-hâm Pa-san choân-tōe, chiū-sī Pa-san ông Go̍k ê choân-kok, kap tī Pa-san Gāi-jíⁿ it-chhè ê siâⁿ, kiōng la̍k-cha̍p ê siâⁿ; 31 Ki-lia̍t ê chi̍t-pòaⁿ, kap A-su-tha-lio̍k, Í-tek-lâi, sī sio̍k Pa-san ông Go̍k ê kok ê siâⁿ, sī hō͘ Má-ná-se ê kiáⁿ, Má-kiat, chiū-sī Má-kiat ê kiáⁿ-sun ê chi̍t-pòaⁿ, chiàu i ê chong-cho̍k. 32 Téng-bīn sī Mô͘-se tī Iok-tàn hit-pêng tang-sì, Iâ-lī-ko tùi-bīn Mô͘-ap ê pîⁿ-iûⁿ, só͘ pun ê gia̍p. 33 To̍k-to̍k Lī-bī chi-phài, Mô͘-se bô pun-gia̍p hō͘ in; Iâ-hô-hoa Í-sek-lia̍t ê Siōng-tè sī chòe in ê sán-gia̍p, chiàu I só͘ kā in kóng ê.
1 以色列人tī迦南地所得tio̍h ê業，就是祭司Í-lī-a-sat，kap Lùn ê kiáⁿ約書亞，kap以色列ta̍k支派ê族長，所分hō͘ in ê，lóng記tī下底。 2 是照耶和華託摩西所命令ê，拈鬮分hō͘九支派koh半支派。 3 因為摩西tī約旦河hit-pêng，已經分業hō͘兩個支派koh半支派；獨獨tī in中間無分業hō͘利未人。 4 因為約瑟ê kiáⁿ孫是兩支派，就是Má-ná-se kap Í-hoat-liân；總是無用地分hō͘利未人做業；只有hō͘ in城thang khiā起，kap城ê郊野，thang做cheng-siⁿ kap財物ê路用。 5 以色列人照耶和華所命令摩西ê去行，來分hitê地。 6 Hit時偤大人tī Kiat-kah見約書亞；有Ki-nî-sé族，Iâ-hu-nî ê kiáⁿ迦勒，kā伊講，早tī Ka-te-su-pa-nî-a，耶和華對上帝ê奴僕摩西所講：關係你我ê tāi-chì ê，你lóng知。 7 耶和華ê奴僕摩西tùi Ka-te-su-pa-nî-a差我偷看chitê地，hit時我tú-á四十歲；我盡我ê心回覆伊。 8 總是kap我上去hiahê兄弟hō͘百姓心失志；獨獨我專心tè耶和華我ê上帝。 9 當日摩西chiù-chōa講：你ê腳所踏ê地，定tio̍h beh歸你kap你ê kiáⁿ孫，永遠做業；因為你專心跟tè耶和華我ê上帝。 10 看ah，耶和華照伊所講ê，hō͘我活teh已經四十五年，就是tùi以色列人行tī曠野，耶和華kā摩西講這話ê時；看ah，現今我八十五歲 lah。 11 我iáu-kú勇健，親像摩西差我去hit日一樣，無論是爭戰，是出入，我ê氣力hit時怎樣，現在我ê氣力也是án-ni。 12 求你用耶和華hit日所講ê山地hō͘我；因為hit日你也有聽見；tī-hia有A-la̍p族ê人，伊ê城闊大堅固；若耶和華kap我tī-teh，我就beh趕in出，照耶和華所講ê。 13 約書亞就kā伊祝福，用Hi-pek-lûn hō͘ Iâ-hu-nî ê kiáⁿ迦勒做業。 14 所以Hi-pek-lûn做Ki-nî-sé族Iâ-hu-nî ê kiáⁿ迦勒ê產業，直到今á日；因為伊專心跟tè耶和華以色列ê上帝。 15 Hi-pek-lûn前叫Ki-lia̍t-a-pa；chitê A-pa是A-la̍p族中第一大ê人。Tùi án-ni，國內太平，無koh交戰。
1 Í-sek-lia̍t lâng tī Ka-lâm tōe só͘ tit-tio̍h ê gia̍p, chiū-sī chè-si Í-lī-a-sat, kap Lùn ê kiáⁿ Iok-su-a, kap Í-sek-lia̍t ta̍k chi-phài ê cho̍k-tiúⁿ, só͘ pun hō͘ in ê, lóng kì tī ē-tóe. 2 Sī chiàu Iâ-hô-hoa thok Mô͘-se só͘ bēng-lēng ê, liam-khau pun hō͘ káu chi-phài koh pòaⁿ-chi-phài. 3 In-ūi Mô͘-se tī Iok-tàn hô hit-pêng, í-keng pun-gia̍p hō͘ nn̄g ê chi-phài koh pòaⁿ-chi-phài; to̍k-to̍k tī in tiong-kan bô pun-gia̍p hō͘ Lī-bī lâng. 4 In-ūi Iok-sek ê kiáⁿ-sun sī nn̄g chi-phài, chiū-sī Má-ná-se kap Í-hoat-liân; chóng-sī bô ēng tōe pun hō͘ Lī-bī lâng chòe-gia̍p; chí-ū hō͘ in siâⁿ thang khiā-khí, kap siâⁿ ê kau-iá, thang chòe cheng-siⁿ kap châi-bu̍t ê lō͘-ēng. 5 Í-sek-lia̍t lâng chiàu Iâ-hô-hoa só͘ bēng-lēng Mô͘-se ê khì kiâⁿ, lâi pun hit ê tōe. 6 Hit-sî Iû-tāi lâng tī Kiat-kah kìⁿ Iok-su-a; ū Ki-nî-sé cho̍k, Iâ-hu-nî ê kiáⁿ Ka-le̍k, kā i kóng, Chá tī Ka-te-su-pa-nî-a, Iâ-hô-hoa tùi Siōng-tè ê lô͘-po̍k Mô͘-se só͘ kóng, koan-hē lí góa ê tāi-chì ê, lí lóng chai. 7 Iâ-hô-hoa ê lô͘-po̍k Mô͘-se tùi Ka-te-su-pa-nî-a chhe góa thau-khòaⁿ chit ê tōe, hit-sî góa tú-á sì-cha̍p hè; góa chīn góa ê sim hê-hok i. 8 Chóng-sī kap góa chiūⁿ-khì hiah ê hiaⁿ-tī hō͘ peh-sìⁿ sim sit-chì; to̍k-to̍k góa choan-sim tè Iâ-hô-hoa góa ê Siōng-tè. 9 Tng-ji̍t Mô͘-se chiù-chōa kóng, Lí ê kha só͘ ta̍h ê tōe, tiāⁿ-tio̍h beh kui lí kap lí ê kiáⁿ-sun, éng-oán chòe-gia̍p; in-ūi lí choan-sim kun-tè Iâ-hô-hoa góa ê Siōng-tè. 10 Khòaⁿ ah, Iâ-hô-hoa chiàu I só͘ kóng ê, hō͘ góa oa̍h-teh í-keng sì-cha̍p-gō͘ nî, chiū-sī tùi Í-sek-lia̍t lâng kiâⁿ tī khòng-iá, Iâ-hô-hoa kā Mô͘-se kóng che ōe ê sî; khòaⁿ ah, hiān-kim góa poeh-cha̍p-gō͘ hè lah. 11 Góa iáu-kú ióng-kiāⁿ, chhin-chhiūⁿ Mô͘-se chhe góa khì hit-ji̍t chi̍t-iūⁿ, bô-lūn sī cheng-chiàn, sī chhut-ji̍p, góa ê khùi-la̍t hit-sî cháiⁿ-iūⁿ, hiān-chāi góa ê khùi-la̍t iā sī án-ni. 12 Kiû lí ēng Iâ-hô-hoa hit-ji̍t só͘ kóng ê soaⁿ-tōe hō͘ góa; in-ūi hit-ji̍t lí iā ū thiaⁿ-kìⁿ; tī-hia ū A-la̍p cho̍k ê lâng, i ê siâⁿ khoah-tōa kian-kò͘; nā Iâ-hô-hoa kap góa tī-teh, góa chiū beh kóaⁿ in chhut, chiàu Iâ-hô-hoa só͘ kóng ê. 13 Iok-su-a chiū kā i chiok-hok, ēng Hi-pek-lûn hō͘ Iâ-hu-nî ê kiáⁿ Ka-le̍k chòe-gia̍p. 14 Só͘-í Hi-pek-lûn chòe Ki-nî-sé cho̍k Iâ-hu-nî ê kiáⁿ Ka-le̍k ê sán-gia̍p, ti̍t-kàu kin-á-ji̍t; in-ūi i choan-sim kun-tè Iâ-hô-hoa Í-sek-lia̍t ê Siōng-tè. 15 Hi-pek-lûn chêng kiò Ki-lia̍t-a-pa; chit ê A-pa sī A-la̍p cho̍k-tiong tē-it tōa ê lâng. Tùi án-ni kok-lāi thài-pêng, bô koh kau-chiàn.
1 偤大支派照宗族拈鬮所得tio̍h ê地，是tī極南勢，到Í-tong ê交界，ǹg南直到Sîm ê曠野。 2 In南勢ê界，是tùi鹽海ê極頭，就是ǹg南ê海灣； 3 thàng到A-khek-la̍h-pin山坪ê南勢，連到Sîm，上到Ka-te-su-pa-nî-a ê南勢，koh過Hi-su-lûn，上到A-ta̍t-jíⁿ，se̍h到Kah-ka； 4 連到Ap-bún，thàng到埃及ê小河，chitê界到海為止；這就是lín南勢ê界； 5 東勢ê界，就是鹽海，到約旦河口；北勢ê界，是tùi約旦河口ê海灣起； 6 上到Pek-hat-la̍h，過Pek-a-la̍h-pa ê北勢，上到Liû-piān ê kiáⁿ Pho-hán ê石磐； 7 Hit-ê界koh tùi A-kat ê山谷上到Tí-phek，tùi北勢上去，ǹg A-to͘-bêng ê山坪對面ê Kiat-kah，tī河ê南pêng ê；hitê界到Ún-sī-be̍k ê水，到Ún-lô-kiat為止； 8 Chitê界經過Piān-him-lùn ê山谷，上到Iâ-pò͘-su山墘ê南勢，(Iâ-pò͘-su就是耶路撒冷) ；hitê界koh上到Piān-him-lùn山谷西勢ê山頂，就是Lī-hoat-im山谷北勢ê極頭； 9 Hit-ê界koh tùi山頂到Nî-hut-to-a ê水泉，thàng到Í-hut-lûn山hiahê城；hitê界koh到Pa-la̍h， (Pa-la̍h就是Ki-lia̍t-iâ-lîm) ； 10 Hit-ê界koh tùi Pa-la̍h ǹg西勢se̍h到Se-jíⁿ山，過到Iâ-lîm山邊ê北pêng (Iâ-lîm就是Ki-sat-lûn) ，koh落去到Pek-sī-be̍k，經過Têng-la̍p； 11 Hit-ê界koh thàng到Í-kek-lûn邊á ê北勢，hitê界續到Si-kí-lûn，經過到Pa-la̍h山，koh thàng到Ngá-pí-liap；chitê界到海為止； 12 西勢ê界到大海，kap伊ê海墘。這是偤大人，照in ê宗族，四圍ê交界。 13 照耶和華命令約書亞ê，伊就tī偤大ê族中，將一份hō͘ Iâ-hu-nî ê kiáⁿ迦勒做業，就是Ki-lia̍t-a-pa，也名Hi-pek-lûn；A-pa是A-la̍p族ê祖。 14 迦勒tùi hia趕出A-la̍p三個kiáⁿ，就是Sī-su、A-hi-bān、That-mái，lóng是A-la̍p ê kiáⁿ。 15 Koh tùi hia上去攻Tí-phek khiā起ê百姓；chitê Tí-phek前名叫Ki-lia̍t-se-hut。 16 迦勒講：若有人phah Ki-lia̍t-se-hut來取伊，我beh將我ê cha-bó͘-kiáⁿ Ap-sat hō͘伊做bó͘。 17 迦勒ê兄弟Ki-la̍p-su ê kiáⁿ Gô-tô-liap取伊；伊就將伊ê cha-bó͘-kiáⁿ Ap-sat hō͘伊做bó͘。 18 Ap-sat過門ê時，勸丈夫tùi in老父討一坵田；Ap-sat tùi驢落來；迦勒問講：你beh甚麼ah？ 19 伊講：求你賜福我；你已經安置我tī南方ê地，求你hō͘我水泉。伊就用頂ê水泉，下ê水泉hō͘伊。 20 這是偤大人ê支派所得tio̍h ê業，照伊ê宗族。 21 偤大人ê支派南勢極頭ê城，kap Í-tong 交界相近ê，就是Kah-siat、Í-tek、Ngá-ko͘-jíⁿ； 22 Ki-ná、Tí-mô͘-ná、A-tāi-ta̍t； 23 Ki-te-su、Hā-só、Í-thê-lâm； 24 Se-hut、Thê-liān、Pí-a-lio̍k； 25 Hā-só-hap-tāi-tha、Ka-lio̍k-hi-su-lûn，(就是Hā-só) ； 26 A-bān、Sī-má、Mô͘-la̍h-tāi； 27 Hap-sat-ka-tāi、Hek-si̍t-bûn、Pek-phàⁿ-lia̍t； 28 Hap-sat-su-a、別是巴、Pí-su-iok-tha； 29 Pa-la̍h、Í-in、Í-sim； 30 I-le̍k-to-lia̍p、Ki-sit、Hô-jíⁿ-má； 31 Sé-kek-la̍h、Be̍k-má-ná、Sam-sat-ná； 32 Lī-pa-bu̍t、Si̍t-him、A-in、Lîm-bûn；共二十九座城，kap in ê鄉社。 33 Tī平洋有Í-si̍t-tô、Só-la̍h、A-si̍t-ná； 34 Sat-lô-a、Ún-kan-lêng、Tha-phó͘-a、Í-lâm； 35 Iâ-boa̍t、A-tō͘-lân、So-ko、A-se-ka； 36 Sa-la̍h-im、A-tí-tha-im、Ki-tí-la̍h、Ki-tí-lô-tha-im；共十四座城，kap伊ê鄉社。 37 Sé-lâm、Hap-tāi-sa、Be̍k-tāi-ka-tek； 38 Tí-liân、Bí-su-pa、Iok-thiap； 39 拉結、Pho-su-ka、I-ki-lûn； 40 Ka-pún、La̍h-bān、Ki-thê-lī； 41 Ki-te-lô、Pek-tāi-kún、Ná-má、Má-ki-tāi；共十六座城，kap伊ê鄉社。 42 Li̍p-ná、Í-thiap、A-san； 43 Ek-hut-tha、A-si̍t-ná、Nî-sek； 44 Ki-i-la̍h、A-kek-sek、Má-lī-sa；共九座城，kap伊ê鄉社。 45 Koh有Í-kek-lûn kap伊ê街市，伊ê鄉社； 46 tùi Í-kek-lûn到海，一切óa近A-si̍t-tu̍t ê，kap伊ê鄉社。 47 A-si̍t-tu̍t kap伊ê街市，伊ê鄉社；Ka-sat，kap伊ê街市，伊ê鄉社；到埃及小河，kap大海，以及伊ê海墘。 48 Tī山地有Sa-bi̍t、Ngá-thê-jíⁿ、So-ko； 49 Tāi-ná、Ki-lia̍t-sat-ná，就是Tí-phek； 50 A-ná-pek、Í-si̍t-thê-bo̍k、A-liām； 51 Ko-san、Hô-lûn、Ki-lô；共十一座城，kap伊ê鄉社。 52 Koh有A-la̍h、Tō͘-má、Í-san； 53 Ngá-lông、Pek-tha-phó͘-a、A-hui-ka； 54 Hông-tha、Ki-lia̍t-a-pa，就是Hi-pek-lûn，Sé-jíⁿ；共九座城，kap伊ê鄉社。 55 Koh有Má-hûn、Ka-bi̍t、Se-hut、Iû-tha； 56 Iâ-su-lia̍t、Iok-tiān、Sat-lô-a； 57 該隱、Ki-pí-a、Têng-la̍p；共十座城，kap伊ê鄉社。 58 Koh有Hap-hut、Pek-siok、Ki-tu̍t； 59 Má-lia̍p、Pek-a-lo̍k、Í-le̍k-thê-kun；共六個城，kap伊ê鄉社。 60 Koh有Ki-lia̍t-pa-le̍k，就是Ki-lia̍t-iâ-lîm、La̍h-pa；共兩座城，kap伊ê鄉社。 61 Tī曠野有Pek-a-la̍h-pa、Bi̍t-teng、Se-ka-ka； 62 Le̍k-san、鹽城、Ún-ki-tí；共六座城，kap伊ê鄉社。 63 論到tiàm tī耶路撒冷ê Iâ-pò͘-su人、偤大人bōe會趕in出去；總是Iâ-pò͘-su tī耶路撒冷kap偤大人相kap khiā起直到今á日。
1 Iû-tāi chi-phài chiàu chong-cho̍k liam-khau só͘ tit-tio̍h ê tōe, sī tī ke̍k lâm-sì, kàu Í-tong ê kau-kài, ǹg-lâm ti̍t-kàu Sîm ê khòng-iá. 2 In lâm-sì ê kài, sī tùi Iâm-hái ê ke̍k-thâu, chiū-sī ǹg-lâm ê hái-oan; 3 thàng-kàu A-khek-la̍h-pin soaⁿ-phiâⁿ ê lâm-sì, liân-kàu Sîm, chiūⁿ-kàu Ka-te-su-pa-nî-a ê lâm-sì, koh kè Hi-su-lûn, chiūⁿ kàu A-ta̍t-jíⁿ, se̍h kàu Kah-ka; 4 liân kàu Ap-bún, thàng-kàu Ai-ki̍p ê sió-hô, chit ê kài kàu hái ûi-chí; che chiū-sī lín lâm-sì ê kài; 5 tang-sì ê kài, chiū-sī Iâm-hái, kàu Iok-tàn hô-kháu; pak-sì ê kài, sī tùi Iok-tàn hô-kháu ê hái-oan khí; 6 chiūⁿ-kàu Pek-hat-la̍h, kè Pek-a-la̍h-pa ê pak-sì, chiūⁿ-kàu Liû-piān ê kiáⁿ Pho-hán ê chio̍h-pôaⁿ; 7 hit ê kài koh tùi A-kat ê soaⁿ-kok chiūⁿ-kàu Tí-phek, tùi pak-sì chiūⁿ-khì, ǹg A-to͘-bêng ê soaⁿ-phiâⁿ tùi-bīn ê Kiat-kah, tī hô ê lâm-pêng ê; hit ê kài kàu Ún-sī-be̍k ê chúi, kàu Ún-lô-kiat ûi-chí; 8 chit ê kài keng-kè Piān-him-lùn ê soaⁿ-kok, chiūⁿ kàu Iâ-pò͘-su soaⁿ-kîⁿ ê lâm-sì, (Iâ-pò͘-su chiū-sī Iâ-lō͘-sat-léng); hit ê kài koh chiūⁿ-kàu Piān-him-lùn soaⁿ-kok sai-sì ê soaⁿ-téng, chiū-sī Lī-hoat-im soaⁿ-kok pak-sì ê ke̍k-thâu; 9 hit ê kài koh tùi soaⁿ-téng kàu Nî-hut-to-a ê chúi-chôaⁿ, thàng-kàu Í-hut-lûn soaⁿ hiah ê siâⁿ; hit ê kài koh kàu Pa-la̍h, (Pa-la̍h chiū-sī Ki-lia̍t-iâ-lîm); 10 hit ê kài koh tùi Pa-la̍h ǹg sai-sì se̍h kàu Se-jíⁿ soaⁿ, kè-kàu Iâ-lîm soaⁿ-piⁿ ê pak-pêng (Iâ-lîm chiū-sī Ki-sat-lûn), koh lo̍h-khì kàu Pek-sī-be̍k, keng-kè Têng-la̍p; 11 hit ê kài koh thàng-kàu Í-kek-lûn piⁿ-á ê pak-sì, hit ê kài sòa kàu Si-kí-lûn, keng-kè kàu Pa-la̍h soaⁿ, koh thàng-kàu Ngá-pí-liap; chit ê kài kàu hái ûi-chí; 12 sai-sì ê kài kàu tōa-hái, kap i ê hái-kîⁿ. Che sī Iû-tāi lâng, chiàu in ê chong-cho̍k, sì-ûi ê kau-kài. 13 Chiàu Iâ-hô-hoa bēng-lēng Iok-su-a ê, i chiū tī Iû-tāi ê cho̍k-tiong, chiong chi̍t-hūn hō͘ Iâ-hu-nî ê kiáⁿ Ka-le̍k chòe-gia̍p, chiū-sī Ki-lia̍t-a-pa, iā miâ Hi-pek-lûn; A-pa sī A-la̍p cho̍k ê chó͘. 14 Ka-le̍k tùi hia kóaⁿ-chhut A-la̍p saⁿ ê kiáⁿ, chiū-sī Sī-su, A-hi-bān, That-mái, lóng sī A-la̍p ê kiáⁿ. 15 Koh tùi hia chiūⁿ-khì kong Tí-phek khiā-khí ê peh-sìⁿ; chit ê Tí-phek chêng miâ kiò Ki-lia̍t-se-hut. 16 Ka-le̍k kóng, Nā ū lâng phah Ki-lia̍t-se-hut lâi chhú i, góa beh chiong góa ê cha-bó͘-kiáⁿ Ap-sat hō͘ i chòe-bó͘. 17 Ka-le̍k ê hiaⁿ-tī Ki-la̍p-su ê kiáⁿ Gô-tô-liap chhú i; i chiū chiong i ê cha-bó͘-kiáⁿ Ap-sat hō͘ i chòe-bó͘. 18 Ap-sat kè-mn̂g ê sî, khǹg tiōng-hu tùi in lāu-pē thó chi̍t khu chhân; Ap-sat tùi lû lo̍h-lâi; Ka-le̍k mn̄g kóng, Lí beh sím-mi̍h ah? 19 I kóng, Kiû lí sù-hok góa; lí í-keng an-tì góa tī lâm-hng ê tōe, kiû lí hō͘ góa chúi-chôaⁿ. I chiū ēng téng ê chúi-chôaⁿ, ē ê chúi-chôaⁿ hō͘ i. 20 Che sī Iû-tāi lâng ê chi-phài só͘ tit-tio̍h ê gia̍p, chiàu i ê chong-cho̍k. 21 Iû-tāi lâng ê chi-phài lâm-sì ke̍k-thâu ê siâⁿ, kap Í-tong kau-kài saⁿ-kūn ê, chiū-sī Kah-siat, Í-tek, Ngá-ko͘-jíⁿ; 22 Ki-ná, Tí-mô͘-ná, A-tāi-ta̍t; 23 Ki-te-su, Hā-só, Í-thê-lâm; 24 Se-hut, Thê-liān, Pí-a-lio̍k; 25 Hā-só-hap-tāi-tha, Ka-lio̍k-hi-su-lûn, (chiū-sī Hā-só); 26 A-bān, Sī-má, Mô͘-la̍h-tāi; 27 Hap-sat-ka-tāi, Hek-si̍t-bûn, Pek-phàⁿ-lia̍t; 28 Hap-sat-su-a, Pia̍t-sī-pa, Pí-su-iok-tha; 29 Pa-la̍h, Í-in, Í-sim; 30 I-le̍k-to-lia̍p, Ki-sit, Hô-jíⁿ-má; 31 Sé-kek-la̍h, Be̍k-má-ná, Sam-sat-ná; 32 Lī-pa-bu̍t, Si̍t-him, A-in, Lîm-bûn; kiōng jī-cha̍p-káu chō siâⁿ, kap in ê hiuⁿ-siā. 33 Tī pîⁿ-iûⁿ ū Í-si̍t-tô, Só-la̍h, A-si̍t-ná; 34 Sat-lô-a, Ún-kan-lêng, Tha-phó͘-a, Í-lâm; 35 Iâ-boa̍t, A-tō͘-lân, So-ko, A-se-ka; 36 Sa-la̍h-im, A-tí-tha-im, Ki-tí-la̍h, Ki-tí-lô-tha-im; kiōng cha̍p-sì chō siâⁿ, kap i ê hiuⁿ-siā. 37 Sé-lâm, Hap-tāi-sa, Be̍k-tāi-ka-tek; 38 Tí-liân, Bí-su-pa, Iok-thiap; 39 La̍h-kiat, Pho-su-ka, I-ki-lûn; 40 Ka-pún, La̍h-bān, Ki-thê-lī; 41 Ki-te-lô, Pek-tāi-kún, Ná-má, Má-ki-tāi; kiōng cha̍p-la̍k chō siâⁿ, kap i ê hiuⁿ-siā. 42 Li̍p-ná, Í-thiap, A-san; 43 Ek-hut-tha, A-si̍t-ná, Nî-sek; 44 Ki-i-la̍h, A-kek-sek, Má-lī-sa; kiōng káu chō siâⁿ, kap i ê hiuⁿ-siā. 45 Koh ū Í-kek-lûn kap i ê koe-chhī, i ê hiuⁿ-siā; 46 tùi Í-kek-lûn kàu hái, it-chhè óa-kūn A-si̍t-tu̍t ê, kap i ê hiuⁿ-siā. 47 A-si̍t-tu̍t kap i ê koe-chhī, i ê hiuⁿ-siā; Ka-sat, kap i ê koe-chhī, i ê hiuⁿ-siā; kàu Ai-ki̍p sió-hô, kap tōa-hái, í-ki̍p i ê hái-kîⁿ. 48 Tī soaⁿ-tōe ū Sa-bi̍t, Ngá-thê-jíⁿ, So-ko; 49 Tāi-ná, Ki-lia̍t-sat-ná, chiū-sī Tí-phek; 50 A-ná-pek, Í-si̍t-thê-bo̍k, A-liām; 51 Ko-san, Hô-lûn, Ki-lô; kiōng cha̍p-it chō siâⁿ, kap i ê hiuⁿ-siā. 52 Koh ū A-la̍h, Tō͘-má, Í-san; 53 Ngá-lông, Pek-tha-phó͘-a, A-hui-ka; 54 Hông-tha, Ki-lia̍t-a-pa, chiū-sī Hi-pek-lûn, Sé-jíⁿ; kiōng káu chō siâⁿ, kap i ê hiuⁿ-siā. 55 Koh ū Má-hûn, Ka-bi̍t, Se-hut, Iû-tha; 56 Iâ-su-lia̍t, Iok-tiān, Sat-lô-a; 57 Kai-ún, Ki-pí-a, Têng-la̍p; kiōng cha̍p chō siâⁿ, kap i ê hiuⁿ-siā. 58 Koh ū Hap-hut, Pek-siok, Ki-tu̍t; 59 Má-lia̍p, Pek-a-lo̍k, Í-le̍k-thê-kun; kiōng la̍k ê siâⁿ, kap i ê hiuⁿ-siā. 60 Koh ū Ki-lia̍t-pa-le̍k, chiū-sī Ki-lia̍t-iâ-lîm, La̍h-pa; kiōng nn̄g chō siâⁿ, kap i ê hiuⁿ-siā. 61 Tī khòng-iá ū Pek-a-la̍h-pa, Bi̍t-teng, Se-ka-ka; 62 Le̍k-san, Iâm-siâⁿ, Ún-ki-tí; kiōng la̍k chō siâⁿ, kap i ê hiuⁿ-siā. 63 Lūn-kàu tiàm tī Iâ-lō͘-sat-léng ê Iâ-pò͘-su lâng, Iû-tāi lâng bōe-ōe kóaⁿ in chhut-khì; chóng-sī Iâ-pò͘-su tī Iâ-lō͘-sat-léng kap Iû-tāi lâng saⁿ-kap khiā-khí ti̍t-kàu kin-á-ji̍t.
1 約瑟ê kiáⁿ孫拈鬮所得tio̍h ê地，是tùi óa近耶利哥ê約旦河起，tī耶利哥水ê東pêng，tùi耶利哥上去，thàng過山地ê曠野，到Pek-te̍k-lī； 2 koh tùi Pek-te̍k-lī到Lō͘-su，連到A-ki人ê境界，到A-tha-lio̍k； 3 koh ǹg西落去到Ap-lī-thê人ê境界，到下面ê Pek-hô-lûn ê境界，直到Ki-sek，thàng到海為止。 4 約瑟ê kiáⁿ Má-ná-se、Í-hoat-liân就得tio̍h這做in ê業。 5 Í-hoat-liân kiáⁿ孫ê境界，照in ê宗族所得tio̍h ê，記tī下面；in ê業東勢ê界是A-tha-lio̍k-a-ta̍t到頂面ê Pek-hô-lûn； 6 Hit-ê界ǹg西thàng到北pêng ê Bi̍t-bí-tha，hitê界ǹg東se̍h到Tha-la̍p-sī-lô，koh連到Ngá-lô-hap ê東pêng。 7 Tùi Ngá-lô-hap落去到A-tha-lio̍k，koh到Ná-la̍h，透到耶利哥，thàng到約旦為止。 8 Hit-ê界tùi Tha-phó͘-a ǹg西，到Ka-ná河，thàng到海為止。這就是Í-hoat-liân人ê支派，照in ê宗族，所得tio̍h ê業。 9 另外tī Má-ná-se kiáⁿ孫ê業中，有分別ê城；hiahê城，kap伊ê鄉社，lóng分hō͘ Í-hoat-liân人。 10 In無趕出tiàm tī Ki-sek ê迦南人；總是迦南人tiàm tī Í-hoat-liân人ê中間，做苦工ê奴僕，到今á日。
1 Iok-sek ê kiáⁿ-sun liam-khau só͘ tit-tio̍h ê tōe, sī tùi óa-kūn Iâ-lī-ko ê Iok-tàn hô khí, tī Iâ-lī-ko chúi ê tang-pêng, tùi Iâ-lī-ko chiūⁿ-khì, thàng-kè soaⁿ-tōe ê khòng-iá, kàu Pek-te̍k-lī; 2 koh tùi Pek-te̍k-lī kàu Lō͘-su, liân kàu A-ki lâng ê kéng-kài, kàu A-tha-lio̍k; 3 koh ǹg-sai lo̍h-khì kàu Ap-lī-thê lâng ê kéng-kài, kàu ē-bīn ê Pek-hô-lûn ê kéng-kài, ti̍t-kàu Ki-sek, thàng-kàu hái ûi-chí. 4 Iok-sek ê kiáⁿ Má-ná-se Í-hoat-liân chiū tit-tio̍h che chòe in ê gia̍p. 5 Í-hoat-liân kiáⁿ-sun ê kéng-kài, chiàu in ê chong-cho̍k só͘ tit-tio̍h ê, kì tī ē-bīn; in ê gia̍p tang-sì ê kài sī A-tha-lio̍k-a-ta̍t kàu téng-bīn ê Pek-hô-lûn; 6 hit ê kài ǹg sai thàng-kàu pak-pêng ê Bi̍t-bí-tha, hit ê kài ǹg tang se̍h kàu Tha-la̍p-sī-lô, koh liân kàu Ngá-lô-hap ê tang-pêng. 7 Tùi Ngá-lô-hap lo̍h-khì kàu A-tha-lio̍k, koh kàu Ná-la̍h, thàu-kàu Iâ-lī-ko, thàng-kàu Iok-tàn ûi-chí. 8 Hit ê kài tùi Tha-phó͘-a ǹg-sai, kàu Ka-ná hô, thàng-kàu hái ûi-chí. Che chiū-sī Í-hoat-liân lâng ê chi-phài, chiàu in ê chong-cho̍k, só͘ tit-tio̍h ê gia̍p. 9 Lēng-gōa tī Má-ná-se kiáⁿ-sun ê gia̍p-tiong, ū hun-piat ê siâⁿ; hiah ê siâⁿ, kap i ê hiuⁿ-siā, lóng pun hō͘ Í-hoat-liân lâng. 10 In bô kóaⁿ-chhut tiàm tī Ki-sek ê Ka-lâm lâng; chóng-sī Ka-lâm lâng tiàm tī Í-hoat-liân lâng ê tiong-kan, chòe khó͘-kang ê lô͘-po̍k, kàu kin-á-ji̍t.
1 這是Má-ná-se ê支派拈鬮所得tio̍h ê業；因為伊是約瑟ê大kiáⁿ。論到Má-kiat，是Má-ná-se ê大kiáⁿ，Ki-lia̍t ê老父，因為伊是勇士，就得tio̍h Ki-lia̍t kap Pa-san。 2 Má-ná-se其餘ê kiáⁿ孫，照in ê宗族，拈鬮分地；就是A-pí-í-siā ê kiáⁿ孫，Hi-le̍k ê kiáⁿ孫，A-su-lia̍t ê kiáⁿ孫，示劍ê kiáⁿ孫，Hi-hut ê kiáⁿ孫，Sī-bí-tāi ê kiáⁿ孫；chiahê照in ê宗族，lóng是約瑟ê kiáⁿ Má-ná-se ê ta-po͘丁。 3 Má-ná-se ê元孫，Má-kiat ê曾孫，Ki-lia̍t ê孫，Hi-hut ê kiáⁿ Se-lô-hui-hap無kiáⁿ，只有cha-bó͘-kiáⁿ；伊ê cha-bó͘-kiáⁿ名叫Má-la̍h、挪亞、Hat-la̍h、Bi̍t-ka、Tek-sat。 4 In來到祭司Í-lī-a-sat kap Lùn ê kiáⁿ約書亞，kap眾首領ê面前，講：耶和華bat命令摩西，tī阮兄弟中分業hō͘阮；伊就照耶和華所命令ê，tī in老父ê兄弟中，分業hō͘ in。 5 Tī約旦hit-pêng、Ki-lia̍t kap Pa-san地以外，Má-ná-se koh 拈鬮得tio̍h十份ê地。 6 因為Má-ná-se hiahê cha-bó͘孫，tī Má-ná-se ê kiáⁿ孫中，得tio̍h業。Ki-lia̍t地是屬Má-ná-se其餘ê kiáⁿ孫。 7 Má-ná-se ê地界，tùi A-siat起，到示劍ê頭前ê Bi̍t-bí-tha，hitê界ǹg chiàⁿ手pêng，到Ún-tha-phó͘-a khiā起ê百姓hia。 8 Tha-phó͘-a ê地歸Má-ná-se；獨獨Má-ná-se ê交界ê Tha-phó͘-a歸Í-hoat-liân ê kiáⁿ孫。 9 伊ê界落去到Ka-ná河；tī河ê南pêng，tī Má-ná-se hiahê城ê中間，chiahê城是屬Í-hoat-liân；Má-ná-se ê地界是tī河ê北勢，thàng到海為止。 10 南屬Í-hoat-liân，北屬Má-ná-se，用海做伊ê界；北pêng到A-siat，東pêng到Í-sat-ka。 11 Má-ná-se tī Í-sat-ka kap A-siat ê境內，有Pek-siān kap伊ê鄉社，Í-pek-liân kap伊ê鄉社，Tô-jíⁿ khiā起ê百姓kap伊ê鄉社；koh有三所在山地，就是Ún-to-jíⁿ kap伊ê鄉社，Tha-la̍p khiā起ê百姓kap伊ê鄉社，Bí-kiat-to khiā起ê百姓kap伊ê鄉社。 12 總是Má-ná-se ê kiáⁿ孫bōe會趕出hiahê城ê百姓；迦南人決意beh tiàm tī hitê地； 13 到以色列人強盛ê時就hō͘迦南人做苦工，無一盡趕in出。 14 約瑟ê kiáⁿ孫對約書亞講：耶和華平時賜福阮，阮就成做大族，你啥事kan-ta用一khau ê份額hō͘阮做業ah？ 15 約書亞對in講，Lín若果然成做大族，Í-hoat-liân地對tī lín是khah 狹細，就你thang上去樹林，tī Pí-lī-sé人、Lī-hoa̍t-im人ê地，tī-hia為家己來開墾。 16 約瑟ê kiáⁿ孫講：hitê地無夠額容允阮；koh tiàm tī平洋ê迦南人，就是tiàm-tī Pek-siān kap伊ê鄉社，kap tiàm Iâ-su-lia̍t平洋ê人，lóng有鐵車。 17 約書亞對約瑟ê家，就是Í-hoat-liân kap Má-ná-se ê人，講：你是大族koh強盛；m̄-nā一khau ê份額， 18 山地也beh歸你；雖然是樹林你也thang剉伊；伊ê極頭也beh屬你；迦南人雖然有鐵車，koh強盛，你也會趕in出去。
1 Che sī Má-ná-se ê chi-phài liam-khau só͘ tit-tio̍h ê gia̍p; in-ūi i sī Iok-sek ê tōa-kiáⁿ. Lūn-kàu Má-kiat, sī Má-ná-se ê tōa-kiáⁿ, Ki-lia̍t ê lāu-pē, in-ūi i sī ióng-sū, chiū tit-tio̍h Ki-lia̍t kap Pa-san. 2 Má-ná-se kî-û ê kiáⁿ-sun, chiàu in ê chong-cho̍k, liam-khau pun-tōe; chiū-sī A-pí-í-siā ê kiáⁿ-sun, Hi-le̍k ê kiáⁿ-sun, A-su-lia̍t ê kiáⁿ-sun, Sī-kiàm ê kiáⁿ-sun, Hi-hut ê kiáⁿ-sun, Sī-bí-tāi ê kiáⁿ-sun; chiah-ê chiàu in ê chong-cho̍k, lóng sī Iok-sek ê kiáⁿ Má-ná-se ê ta-po͘-teng. 3 Má-ná-se ê goân-sun, Má-kiat ê cheng-sun, Ki-lia̍t ê sun, Hi-hut ê kiáⁿ Se-lô-hui-hap bô kiáⁿ, chí-ū cha-bó͘-kiáⁿ; i ê cha-bó͘-kiáⁿ miâ-kiò Má-la̍h, Ná-a, Hat-la̍h, Bi̍t-ka, Tek-sat. 4 In lâi kàu chè-si Í-lī-a-sat kap Lùn ê kiáⁿ Iok-su-a, kap chèng siú-léng ê bīn-chêng, kóng, Iâ-hô-hoa bat bēng-lēng Mô͘-se, tī goán hiaⁿ-tī-tiong pun gia̍p hō͘ goán; i chiū chiàu Iâ-hô-hoa só͘ bēng-lēng ê, tī in lāu-pē ê hiaⁿ-tī-tiong, pun gia̍p hō͘ in. 5 Tī Iok-tàn hit-pêng, Ki-lia̍t kap Pa-san tōe í-gōa, Má-ná-se koh liam-khau tit-tio̍h cha̍p-hūn ê tōe. 6 In-ūi Má-ná-se hiah ê cha-bó͘-sun, tī Má-ná-se ê kiáⁿ-sun-tiong, tit-tio̍h gia̍p. Ki-lia̍t tōe sī sio̍k Má-ná-se kî-û ê kiáⁿ-sun. 7 Má-ná-se ê tōe-kài, tùi A-siat khí, kàu Sī-kiàm ê thâu-chêng ê Bi̍t-bí-tha, hit ê kài ǹg chiàⁿ-chhiú-pêng, kàu Ún-tha-phó͘-a khiā-khí ê peh-sìⁿ hia. 8 Tha-phó͘-a ê tōe kui Má-ná-se; to̍k-to̍k Má-ná-se ê kau-kài ê Tha-phó͘-a kui Í-hoat-liân ê kiáⁿ-sun. 9 I ê kài lo̍h-khì kàu Ka-ná hô; tī hô ê lâm-pêng, tī Má-ná-se hiah ê siâⁿ ê tiong-kan, chiah ê siâⁿ sī sio̍k Í-hoat-liân; Má-ná-se ê tōe-kài sī tī hô ê pak-sì, thàng-kàu hái ûi-chí. 10 Lâm sio̍k Í-hoat-liân, pak sio̍k Má-ná-se, ēng hái chòe i ê kài; pak-pêng kàu A-siat, tang-pêng kàu Í-sat-ka. 11 Má-ná-se tī Í-sat-ka kap A-siat ê kéng-lāi, ū Pek-siān kap i ê hiuⁿ-siā, Í-pek-liân kap i ê hiuⁿ-siā, Tô-jíⁿ khiā-khí ê peh-sìⁿ kap i ê hiuⁿ-siā; koh ū saⁿ só͘-chāi soaⁿ-tōe, chiū-sī Ún-to-jíⁿ kap i ê hiuⁿ-siā, Tha-la̍p khiā-khí ê peh-sìⁿ kap i ê hiuⁿ-siā, Bí-kiat-to khiā-khí ê peh-sìⁿ kap i ê hiuⁿ-siā. 12 Chóng-sī Má-ná-se ê kiáⁿ-sun bōe-ōe kóaⁿ-chhut hiah ê siâⁿ ê peh-sìⁿ; Ka-lâm lâng koat-ì beh tiàm tī hit ê tōe; 13 kàu Í-sek-lia̍t lâng kiông-sēng ê sî chiū hō͘ Ka-lâm lâng chòe khó͘-kang, bô it-chīn kóaⁿ in chhut. 14 Iok-sek ê kiáⁿ-sun tùi Iok-su-a kóng, Iâ-hô-hoa pêng-sî sù-hok goán, goán chiū chiâⁿ-chòe tōa-cho̍k, lí siáⁿ-sū kan-ta ēng chi̍t-khau ê hūn-gia̍h hō͘ goán chòe-gia̍p ah? 15 Iok-su-a tùi in kóng, Lín nā kó-jiân chiâⁿ-chòe tōa-cho̍k, Í-hoat-liân tōe tùi tī lín sī khah oe̍h-sòe, chiū lí thang chiūⁿ-khì chhiū-nâ, tī Pí-lī-sé lâng, Lī-hoa̍t-im lâng ê tōe, tī-hia ūi ka-kī lâi khai-khún. 16 Iok-sek ê kiáⁿ-sun kóng, Hit ê tōe bô kàu-gia̍h iông-ún goán; koh tiàm tī pîⁿ-iûⁿ ê Ka-lâm lâng, chiū-sī tiàm-tī Pek-siān kap i ê hiuⁿ-siā, kap tiàm Iâ-su-lia̍t pîⁿ-iûⁿ ê lâng, lóng ū thih-chhia. 17 Iok-su-a tùi Iok-sek ê ke, chiū-sī Í-hoat-liân kap Má-ná-se ê lâng, kóng, Lí sī tōa-cho̍k koh kiông-sēng; m̄-nā chi̍t-khau ê hūn-gia̍h, 18 soaⁿ-tōe iā beh kui lí; sui-jiân sī chhiū-nâ lí iā thang chhò i; i ê ke̍k-thâu iā beh sio̍k lí; Ka-lâm lâng sui-jiân ū thih-chhia, koh kiông-sēng, lí iā ōe kóaⁿ in chhut-khì.
1 以色列人ê全會lóng聚集tī Sī-lô，搭會幕tī-hia；因為地方已經hō͘ in khah贏。 2 以色列人中，iáu有七支派未得tio̍h in ê業。 3 約書亞對以色列人講：耶和華，lín列祖ê上帝，所賞賜lín ê地，lín 延chhiân m̄去取伊，beh到tī時ah？ 4 Lín ta̍k支派tio̍h揀三人，我beh 差in去；in就起身遍行hitê地，照in ê份額畫圖，就tò來我chia。 5 In tio̍h將地分做七份；偤大猶原tī南方，tiàm tī伊ê境內；約瑟家猶原tī北方tiàm tī伊ê境內。 6 Lín tio̍h將地分做七份，畫圖the̍h來我chia；我就beh tī耶和華咱上帝ê面前kā lín 拈鬮。 7 獨獨利未人tī lín中間無份，因為耶和華祭司ê職就是in ê業；Ka-tek、Liû-piān kap Má-ná-se半支派，已經tī約旦hit-pêng東勢得tio̍h地做業，就是耶和華ê奴僕摩西所hō͘ in ê。 8 Hiah-ê人起身去；約書亞命令hiahê去beh畫地圖ê人講：lín去遍行hitê地，畫圖倒tńg來我chia；我beh tī Sī-lô chia，耶和華ê面前，kā lín 拈鬮。 9 In就去，遍行hitê地，照in ê城畫做七份，記tī冊裡，倒tńg到Sī-lô ê營中，見約書亞。 10 約書亞就tī Sī-lô耶和華ê面前，kā in 拈鬮；約書亞tī-hia分地hō͘以色列人，照in ê宗族。 11 Kā便雅憫ê支派拈鬮，照in ê宗族所得tio̍h ê地；hitê界是tī偤大ê kiáⁿ孫，約瑟ê kiáⁿ孫ê中間。 12 In北pêng ê界，是tùi約旦河起；伊ê界上去到耶利哥邊á ê北勢，koh上去，pôaⁿ過山，ǹg西勢去，直直到Pek-a-bûn ê曠野。 13 Hit-ê界tùi-hia去到Lō͘-su，到Lō͘-su南勢ê邊á ( Lō͘-su就是Pek-te̍k-lī)。伊ê界koh落去到A-tha-lio̍k-a-ta̍t，óa近下面ê Pek-hô-lûn南pêng ê山； 14 伊ê界tùi西勢oat落南，tùi Pek-hô-lûn頭前南勢ê山，直到偤大人ê城Ki-lia̍t-pa-le̍k，(就是Ki-lia̍t-iâ-lîm) ；這是in西勢ê界。 15 南pêng是tùi Ki-lia̍t-iâ-lîm ê極頭起；伊ê界tùi西勢出，到Nî-hut-to-a ê水泉； 16 伊ê界koh落去到Piān-him-lùn山谷對面ê山邊，就是Lī-hoa̍t-im山谷北勢ê山；koh落去到Him-lùn山谷，到Iâ-pò͘-su ê南pêng；koh落去到Ún-lô-kiat； 17 koh tùi北勢出去，到Ún-sī-le̍k，出去到A-to͘-bêng山坪對面ê Ki-lī-lio̍k，koh落去到Liû-piān ê kiáⁿ Pho-hán ê石磐。 18 koh去A-la̍h-pa對面北勢ê邊á，落去到A-la̍h-pa； 19 伊ê界到Pek-hat-la̍h 北勢ê邊á；chitê界直直到鹽海北pêng ê海灣，就是約旦南勢ê河口；這是伊南pêng ê界； 20 東pêng ê界到約旦河。這是便雅憫人ê業，照in ê宗族，in四圍ê交界。 21 便雅憫ê支派照in ê宗族所得tio̍h ê城，就是耶利哥、Pek-hat-la̍h、I-be̍k-ki-sek； 22 Pek-a-la̍h-pa、Sé-má-liám、Pek-te̍k-lī； 23 A-bûn、Pa-la̍h、Gô-hut-la̍h； 24 Ki-hoat-a-mô͘-nî、Gô-hut-nî、Ka-pa；共十二座城，kap伊ê鄉社。 25 Koh有Ki-piàn、La̍h-má、Pí-lo̍k； 26 Bí-su-pa、Ki-hui-la̍h、Mô͘-sat； 27 Lī-kian、I-lī-pì-le̍k、Tha-la̍h-la̍h； 28 Sé-la̍h、Í-lī-hut、Iâ-pò͘-su，就是耶路撒冷、Ki-pí-a、Ki-lia̍t；共十四座城，kap伊ê鄉社。這是便雅憫人所得tio̍h ê業，照in ê宗族。
1 Í-sek-lia̍t lâng ê choân-hōe lóng chū-chi̍p tī Sī-lô, tah hōe-bō͘ tī-hia; in-ūi tōe-hng í-keng hō͘ in khah-iâⁿ. 2 Í-sek-lia̍t lâng tiong, iáu ū chhit chi-phài bē tit-tio̍h in ê gia̍p. 3 Iok-su-a tùi Í-sek-lia̍t lâng kóng, Iâ-hô-hoa, lín lia̍t-chó͘ ê Siōng-tè, só͘ siúⁿ-sù lín ê tōe, lín iân-chhiân m̄-khì chhú i, beh kàu tī-sî ah? 4 Lín ta̍k chi-phài tio̍h kéng saⁿ-lâng, góa beh chhe in khì; in chiū khí-sin piàn-kiâⁿ hit ê tōe, chiàu in ê hūn-gia̍h ūi-tô͘, chiū tò-lâi góa chia. 5 In tio̍h chiong tōe pun chòe chhit-hūn; Iû-tāi iû-goân tī lâm-hng, tiàm tī i ê kéng-lāi; Iok-sek ke iû-goân tī pak-hng tiàm tī i ê kéng-lāi. 6 Lín tio̍h chiong tōe pun chòe chhit-hūn, ūi-tô͘ the̍h-lâi góa chia; góa chiū beh tī Iâ-hô-hoa lán Siōng-tè ê bīn-chêng kā lín liam-khau. 7 To̍k-to̍k Lī-bī lâng tī lín tiong-kan bô hūn, in-ūi Iâ-hô-hoa chè-si ê chit chiū-sī in ê gia̍p; Ka-tek Liû-piān kap Má-ná-se pòaⁿ-chi-phài, í-keng tī Iok-tàn hit-pêng tang-sì tit-tio̍h tōe chòe-gia̍p, chiū-sī Iâ-hô-hoa ê lô͘-po̍k Mô͘-se só͘ hō͘ in ê . 8 Hiah ê lâng khí-sin khì; Iok-su-a bēng-lēng hiah-ê khì beh ūi tē-tô͘ ê lâng kóng, Lín khì piàn-kiâⁿ hit ê tōe, ūi-tô͘ tò-tńg-lâi góa chia; góa beh tī Sī-lô chia, Iâ-hô-hoa ê bīn-chêng, kā lín liam-khau. 9 In chiū khì, piàn-kiâⁿ hit ê tōe, chiàu in ê siâⁿ ūi-chòe chhit-hūn, kì tī chheh-ni̍h, tò-tńg kàu Sī-lô ê iâⁿ-tiong, kìⁿ Iok-su-a. 10 Iok-su-a chiū tī Sī-lô Iâ-hô-hoa ê bīn-chêng, kā in liam-khau; Iok-su-a tī-hia pun-tōe hō͘ Í-sek-lia̍t lâng, chiàu in ê chong-cho̍k. 11 Kā Piān-ngá-bín ê chi-phài liam-khau, chiàu in ê chong-cho̍k só͘ tit-tio̍h ê tōe; hit ê kài sī tī Iû-tāi ê kiáⁿ-sun, Iok-sek ê kiáⁿ-sun ê tiong-kan. 12 In pak-pêng ê kài, sī tùi Iok-tàn hô khí; i ê kài chiūⁿ-khì kàu Iâ-lī-ko piⁿ-á ê pak-sì, koh chiūⁿ-khì, pôaⁿ-kè soaⁿ, ǹg sai-sì khì, ti̍t-ti̍t kàu Pek-a-bûn ê khòng-iá. 13 Hit ê kài tùi-hia khì kàu Lō͘-su, kàu Lō͘-su lâm-sì ê piⁿ-á ( Lō͘-su chiū-sī Pek-te̍k-lī). I ê kài koh lo̍h-khì kàu A-tha-lio̍k-a-ta̍t, óa-kūn ē-bīn ê Pek-hô-lûn lâm-pêng ê soaⁿ; 14 i ê kài tùi sai-sì oat-lo̍h lâm, tùi Pek-hô-lûn thâu-chêng lâm-sì ê soaⁿ, ti̍t-kàu Iû-tāi lâng ê siâⁿ Ki-lia̍t-pa-le̍k, (chiū-sī Ki-lia̍t-iâ-lîm); che sī in sai-sì ê kài. 15 Lâm-pêng sī tùi Ki-lia̍t-iâ-lîm ê ke̍k-thâu khí; i ê kài tùi sai-sì chhut, kàu Nî-hut-to-a ê chúi-chôaⁿ; 16 i ê kài koh lo̍h-khì kàu Piān-him-lùn soaⁿ-kok tùi-bīn ê soaⁿ-piⁿ, chiū-sī Lī-hoa̍t-im soaⁿ-kok pak-sì ê soaⁿ; koh lo̍h-khì kàu Him-lùn soaⁿ-kok, kàu Iâ-pò͘-su ê lâm-pêng; koh lo̍h-khì kàu Ún-lô-kiat; 17 koh tùi pak-sì chhut-khì, kàu Ún-sī-le̍k, chhut-khì kàu A-to͘-bêng soaⁿ-phiâⁿ tùi-bīn ê Ki-lī-lio̍k, koh lo̍h-khì kàu Liû-piān ê kiáⁿ Pho-hán ê chio̍h-pôaⁿ. 18 Koh khì A-la̍h-pa tùi-bīn pak-sì ê piⁿ-á, lo̍h-khì kàu A-la̍h-pa; 19 i ê kài kàu Pek-hat-la̍h pak-sì ê piⁿ-á; chit ê kài ti̍t-ti̍t kàu Iâm-hái pak-pêng ê hái-oan, chiū-sī Iok-tàn lâm-sì ê hô-kháu; che sī i lâm-pêng ê kài; 20 tang-pêng ê kài kàu Iok-tàn hô. Che sī Piān-ngá-bín lâng ê gia̍p, chiàu in ê chong-cho̍k, in sì-ûi ê kau-kài. 21 Piān-ngá-bín ê chi-phài chiàu in ê chong-cho̍k só͘ tit-tio̍h ê siâⁿ, chiū-sī Iâ-lī-ko, Pek-hat-la̍h, I-be̍k-ki-sek; 22 Pek-a-la̍h-pa, Sé-má-liám, Pek-te̍k-lī; 23 A-bûn, Pa-la̍h, Gô-hut-la̍h; 24 Ki-hoat-a-mô͘-nî, Gô-hut-nî, Ka-pa; kiōng cha̍p-jī chō siâⁿ, kap i ê hiuⁿ-siā. 25 Koh ū Ki-piàn, La̍h-má, Pí-lo̍k; 26 Bí-su-pa, Ki-hui-la̍h, Mô͘-sat; 27 Lī-kian, I-lī-pì-le̍k, Tha-la̍h-la̍h; 28 Sé-la̍h, Í-lī-hut, Iâ-pò͘-su, chiū-sī Iâ-lō͘-sat-léng, Ki-pí-a, Ki-lia̍t; kiōng cha̍p-sì chō siâⁿ, kap i ê hiuⁿ-siā. Che sī Piān-ngá-bín lâng só͘ tit-tio̍h ê gia̍p, chiàu in ê chong-cho̍k.
1 第二pái 拈鬮是為tio̍h西門，就是為tio̍h西門人ê支派；照in ê宗族。In ê業是tī偤大人ê業ê中間。 2 In所得tio̍h ê產業，就是別是巴、Sī-pa、Mô͘-la̍h-tāi； 3 Hap-sat-su-a、Pa-la̍h、Í-sim； 4 I-lī-to-la̍h、Pí-thó͘-le̍k、Hô-jíⁿ-má； 5 Sé-kek-la̍h、Pek-má-ka-phok、Hap-sat-so͘-sat； 6 Pek-lī-pa-bu̍t、Sa-ló͘-hiám；共十三座城，kap伊ê鄉社。 7 A-in、Lī-bûn、Í-thiap、A-san；共四座城，kap伊ê鄉社； 8 kap chiahê城四圍一切ê鄉社，直到Pa-la̍h-pí-jíⁿ南勢ê La̍h-má。這是西門人ê支派所得tio̍h ê業，照in ê宗族。 9 西門人ê業是tùi偤大人ê業中得tio̍h ê；因為偤大人ê份業siuⁿ-chōe；所以西門人tī in ê業中得tio̍h業。 10 第三pái 拈鬮是為tio̍h Se-pò͘-lûn人，照in ê宗族。 11 In ê業ê地界是到Sat-li̍p；in ê界西勢上去到Má-la̍h-la̍h，透到Tāi-pa-siat，koh透到 Iok-liām頭前ê溪； 12 koh tùi Sat-li̍p oat tùi東勢，ǹg日出ê所在，到Kiat-su-lio̍k-tha-po̍k ê交界；koh thàng到Tāi-pi-la̍h，上到Ngá-hui-a。 13 Tùi hia ǹg東去到Ka-te̍k-hí-hut，koh到Í-te̍k-ka-sìn，koh出去Lîm-bûn，thàng到Nî-a； 14 Hit-ê界tùi北方se̍h伊，到Hap-ná-tùn，thàng到I-hut-tha-i-le̍k ê山谷止； 15 iáu有Ka-tha、Ná-hap-la̍h、Sin-lûn、Í-tāi-la̍h、伯利恆；共十二座城，kap in ê鄉社。 16 Chiahê城，kap in ê鄉社，就是Se-pò͘-lûn人所得tio̍h ê業，照in ê宗族。 17 第四pái 拈鬮為tio̍h Í-sat-ka，就是為tio̍h Í-sat-ka人，照in ê宗族； 18 in ê地界有Iâ-su-lia̍t、Ki-so͘-lu̍t、Su-liām； 19 Hap-hut-liân、Sī-àn、A-ná-hap-la̍h； 20 La̍h-phek、Ki-siān、A-pia̍t； 21 Lī-bia̍t、Ún-kan-lêng、Ún-hap-tāi、Pek-phàⁿ-siat； 22 Hit-ê交界到Tha-po̍k、Sa-hap-sé-má、Pek-sī-be̍k；in ê界ê極頭是tī約旦；共十六座城，kap in ê鄉社。 23 Chiahê城，kap in ê鄉社，就是Í-sat-ka人ê支派所得tio̍h ê業，照in ê宗族。 24 第五pái 拈鬮是為tio̍h A-siat人ê支派，照in ê宗族。 25 In ê地界是Hek-kah、Hap-lī、Pí-tiân、Ap-soah； 26 A-la̍h-bí-le̍k、A-boa̍t、Bí-sa-le̍k，ǹg西勢到Ka-bi̍t，koh到Hi-hat-li̍p-la̍p； 27 oat ǹg日出ê所在，到Pek-tāi-kún，thàng到Se-pò͘-lûn，oat北勢到I-hut-tha-i-le̍k山谷，到Pek-í-be̍k，kap Nî-gia̍p，也thàng到Ka-pō͘-le̍k ê tò-pêng。 28 Koh到Gī-pek-lûn、Lī-ha̍p、Hap-bûn、Ka-ná，直到Se-tùn ê大城。 29 Hit-ê界oat到La̍h-má，kap堅固ê城Chhui-lô；hitê界koh se̍h到Hô-sat；伊ê極頭到tī海，近A-hek-sek一帶ê地方； 30 koh有O͘-má、A-hut、Lī-ha̍p；共二十二座城，kap伊ê鄉社。 31 Chiahê城，kap in ê鄉社，就是A-siat人ê支派所得tio̍h ê業，照in ê宗族。 32 第六pái 拈鬮為tio̍h Ná-hut-tha-lī人，就是Ná-hut-tha-lī ê人，照in ê宗族。 33 In ê界是tùi Hi-lī-hut，tùi Sat-ná-im ê橡樹，tùi A-tāi-bí-nî-kiat，kap Ngá-pí-liap，直到La̍h-kiōng，thàng到約旦河； 34 Hit-ê界oat ǹg西勢，到A-su-la̍p-tha-po̍k；tùi hia出去到Hō͘-kat，南pêng到Se-pò͘-lûn，西pêng到A-siat；koh ǹg日出ê所在，透到約旦河hia，到偤大。 35 堅固ê城就是Se-teng，Chhek-jíⁿ，Hap-boa̍t，La̍h-kah，Ki-nî-lia̍t； 36 A-tāi-má，La̍h-má，Hā-só； 37 Ki-te-su，Í-tek-lâi，Ún-hā-só； 38 Í-lī-ún，Bi̍t-tāi-i-le̍k，Hô-liân，Pek-a-la̍p，Pek-sī-be̍k；共十九座城，kap in ê鄉社。 39 Chiahê城kap in ê鄉社就是Ná-hut-tha-lī人ê支派所得tio̍h ê業，照in ê宗族。 40 第七pái 拈鬮為tio̍h Tàn ê kiáⁿ孫ê支派，照in ê宗族。 41 In ê業ê地界是Só-la̍h，Í-si̍t-tô，I-jíⁿ-sī-be̍k； 42 Sa-la̍h-pin，A-ngá-lûn，I-thê-la̍h； 43 Í-lûn，Têng-ná-tha，Í-kek-lûn； 44 I-lī-thê-ki，Ki-pí-tùn，Pa-la̍h； 45 I-ô͘-tek，Pí-nî-pí-la̍h，Ka-te̍k-lîm-bûn； 46 Bí-iâ-khun，La̍h-khun，kap約帕對面ê地界。 47 Tàn ê kiáⁿ孫ê地界pôaⁿ過in ê本-業；因為Tàn ê kiáⁿ孫上去攻擊Lī-siān，來取伊，用刀刣城內ê人，得tio̍h hitê城；用in祖公Tàn ê名叫Lī-siān做Tàn。 48 Chiahê城，kap in ê鄉社，就是Tàn ê kiáⁿ孫ê支派所得tio̍h ê業，照in ê宗族。 49 In照地界分地做業已經完，以色列人就tī in中間將地 hō͘ Lùn ê kiáⁿ約書亞做業。 50 照耶和華ê命令，將伊所求ê城hō͘伊，就是Í-hoat-liân山地ê Têng-ná-se-la̍h；伊就起hitê城，tiàm tī hit中間。 51 Chiahê就是祭司Í-lī-a-sat，kap Lùn ê kiáⁿ約書亞，以及以色列人支派中ê族長，tī Sī-lô，tī會幕門口，耶和華ê面前，拈鬮所分ê業。Án-ni in分完hitê地。
1 Tē-jī pái liam-khau sī ūi-tio̍h Se-biān, chiū-sī ūi-tio̍h Se-biān lâng ê chi-phài; chiàu in ê chong-cho̍k. In ê gia̍p sī tī Iû-tāi lâng ê gia̍p ê tiong-kan. 2 In só͘ tit-tio̍h ê sán-gia̍p, chiū-sī Pia̍t-sī-pa, Sī-pa, Mô͘-la̍h-tāi; 3 Hap-sat-su-a, Pa-la̍h, Í-sim; 4 I-lī-to-la̍h, Pí-thó͘-le̍k, Hô-jíⁿ-má; 5 Sé-kek-la̍h, Pek-má-ka-phok, Hap-sat-so͘-sat; 6 Pek-lī-pa-bu̍t, Sa-ló͘-hiám; kiōng cha̍p-saⁿ chō siâⁿ, kap i ê hiuⁿ-siā. 7 A-in, Lī-bûn, Í-thiap, A-san; kiōng sì chō siâⁿ, kap i ê hiuⁿ-siā; 8 kap chiah ê siâⁿ sì-ûi it-chhè ê hiuⁿ-siā, ti̍t-kàu Pa-la̍h-pí-jíⁿ lâm-sì ê La̍h-má. Che sī Se-biān lâng ê chi-phài só͘ tit-tio̍h ê gia̍p, chiàu in ê chong-cho̍k. 9 Se-biān lâng ê gia̍p sī tùi Iû-tāi lâng ê gia̍p-tiong tit-tio̍h ê; in-ūi Iû-tāi lâng ê hūn-gia̍p siuⁿ-chōe; só͘-í Se-biān lâng tī in ê gia̍p-tiong tit-tio̍h gia̍p. 10 Tē-saⁿ pái liam-khau sī ūi-tio̍h Se-pò͘-lûn lâng, chiàu in ê chong-cho̍k. 11 In ê gia̍p ê tōe-kài sī kàu Sat-li̍p; in ê kài sai-sì chiūⁿ-khì kàu Má-la̍h-la̍h, thàu-kàu Tāi-pa-siat, koh thàu-kàu Iok-liām thâu-chêng ê khoe; 12 koh tùi Sat-li̍p oat tùi tang-sì, ǹg ji̍t-chhut ê só͘-chāi, kàu Kiat-su-lio̍k-tha-po̍k ê kau-kài; koh thàng-kàu Tāi-pi-la̍h, chiūⁿ kàu Ngá-hui-a. 13 Tùi hia ǹg-tang khì kàu Ka-te̍k-hí-hut, koh kàu Í-te̍k-ka-sìn, koh chhut-khì Lîm-bûn, thàng-kàu Nî-a; 14 hit ê kài tùi pak-hng se̍h i, kàu Hap-ná-tùn, thàng-kàu I-hut-tha-i-le̍k ê soaⁿ-kok chí; 15 iáu ū Ka-tha, Ná-hap-la̍h, Sin-lûn, Í-tāi-la̍h, Pek-lī-hêng; kiōng cha̍p-jī chō siâⁿ, kap in ê hiuⁿ-siā. 16 Chiah ê siâⁿ, kap in ê hiuⁿ-siā, chiū-sī Se-pò͘-lûn lâng só͘ tit-tio̍h ê gia̍p, chiàu in ê chong-cho̍k. 17 Tē-sì pái liam-khau ūi-tio̍h Í-sat-ka, chiū-sī ūi-tio̍h Í-sat-ka lâng, chiàu in ê chong-cho̍k; 18 in ê tōe-kài ū Iâ-su-lia̍t, Ki-so͘-lu̍t, Su-liām; 19 Hap-hut-liân, Sī-àn, A-ná-hap-la̍h; 20 La̍h-phek, Ki-siān, A-pia̍t; 21 Lī-bia̍t, Ún-kan-lêng, Ún-hap-tāi, Pek-phàⁿ-siat; 22 hit ê kau-kài kàu Tha-po̍k, Sa-hap-sé-má, Pek-sī-be̍k; in ê kài ê ke̍k-thâu sī tī Iok-tàn; kiōng cha̍p-la̍k chō siâⁿ, kap in ê hiuⁿ-siā. 23 Chiah ê siâⁿ, kap in ê hiuⁿ-siā, chiū-sī Í-sat-ka lâng ê chi-phài só͘ tit-tio̍h ê gia̍p, chiàu in ê chong-cho̍k. 24 Tē-gō͘ pái liam-khau sī ūi-tio̍h A-siat lâng ê chi-phài, chiàu in ê chong-cho̍k. 25 In ê tōe-kài sī Hek-kah, Hap-lī, Pí-tiân, Ap-soah; 26 A-la̍h-bí-le̍k, A-boa̍t, Bí-sa-le̍k, ǹg sai-sì kàu Ka-bi̍t, koh kàu Hi-hat-li̍p-la̍p; 27 oat ǹg ji̍t-chhut ê só͘-chāi, kàu Pek-tāi-kún, thàng-kàu Se-pò͘-lûn, oat pak-sì kàu I-hut-tha-i-le̍k soaⁿ-kok, kàu Pek-í-be̍k, kap Nî-gia̍p, iā thàng-kàu Ka-pō͘-le̍k ê tò-pêng. 28 Koh kàu Gī-pek-lûn, Lī-ha̍p, Hap-bûn, Ka-ná, ti̍t-kàu Se-tùn ê tōa-siâⁿ. 29 Hit ê kài oat kàu La̍h-má, kap kian-kò͘ ê siâⁿ Chhui-lô; hit ê kài koh se̍h kàu Hô-sat; i ê ke̍k-thâu kàu tī hái, kūn A-h[k]ek-sek it-tài ê tōe-hng; 30 koh ū O͘-má, A-hut, Lī-ha̍p; kiōng jī-cha̍p-jī chō siâⁿ, kap i ê hiuⁿ-siā. 31 Chiah ê siâⁿ, kap in ê hiuⁿ-siā, chiū-sī A-siat lâng ê chi-phài só͘ tit-tio̍h ê gia̍p, chiàu in ê chong-cho̍k. 32 Tē-la̍k pái liam-khau ūi-tio̍h Ná-hut-tha-lī lâng, chiū-sī Ná-hut-tha-lī ê lâng, chiàu in ê chong-cho̍k. 33 In ê kài sī tùi Hi-lī-hut, tùi Sat-ná-im ê siōng-chhiū, tùi A-tāi-bí-nî-kiat, kap Ngá-pí-liap, ti̍t-kàu La̍h-kiōng, thàng-kàu Iok-tàn hô; 34 hit ê kài oat ǹg sai-sì, kàu A-su-la̍p-tha-po̍k; tùi hia chhut-khì kàu Hō͘-kat, lâm-pêng kàu Se-pò͘-lûn, sai-pêng kàu A-siat; koh ǹg ji̍t-chhut ê só͘-chāi, thàu-kàu Iok-tàn hô hia, kàu Iû-tāi. 35 Kian-kò͘ ê siâⁿ chiū-sī Se-teng, Chhek-jíⁿ, Hap-boa̍t, La̍h-kah, Ki-nî-lia̍t; 36 A-tāi-má, La̍h-má, Hā-só; 37 Ki-te-su, Í-tek-lâi, Ún-hā-só; 38 Í-lī-ún, Bi̍t-tāi-i-le̍k, Hô-liân, Pek-a-la̍p, Pek-sī-be̍k; kiōng cha̍p-káu chō siâⁿ, kap in ê hiuⁿ-siā. 39 Chiah ê siâⁿ kap in ê hiuⁿ-siā chiū-sī Ná-hut-tha-lī lâng ê chi-phài só͘ tit-tio̍h ê gia̍p, chiàu in ê chong-cho̍k. 40 Tē-chhit pái liam-khau ūi-tio̍h Tàn ê kiáⁿ-sun ê chi-phài, chiàu in ê chong-cho̍k. 41 In ê gia̍p ê tōe-kài sī Só-la̍h, Í-si̍t-tô, I-jíⁿ-sī-be̍k; 42 Sa-la̍h-pin, A-ngá-lûn, I-thê-la̍h; 43 Í-lûn, Têng-ná-tha, Í-kek-lûn; 44 I-lī-thê-ki, Ki-pí-tùn, Pa-la̍h; 45 I-ô͘-tek, Pí-nî-pí-la̍h, Ka-te̍k-lîm-bûn; 46 Bí-iâ-khun, La̍h-khun, kap Iok-phàⁿ tùi-bīn ê tōe-kài. 47 Tàn ê kiáⁿ-sun ê tōe-kài pôaⁿ-kè in ê pún-gia̍p; in-ūi Tàn ê kiáⁿ-sun chiūⁿ-khì kong-kek Lī-siān, lâi chhú i, ēng to thâi siâⁿ-lāi ê lâng, tit-tio̍h hit ê siâⁿ; ēng in chó͘-kong Tàn ê miâ kiò Lī-siān chòe Tàn. 48 Chiah ê siâⁿ, kap in ê hiuⁿ-siā, chiū-sī Tàn ê kiáⁿ-sun ê chi-phài só͘ tit-tio̍h ê gia̍p, chiàu in ê chong-cho̍k. 49 In chiàu tōe-kài pun tōe chòe-gia̍p í-keng oân, Í-sek-lia̍t lâng chiū tī in tiong-kan chiong tōe hō͘ Lùn ê kiáⁿ Iok-su-a chòe-gia̍p. 50 Chiàu Iâ-hô-hoa ê bēng-lēng, chiong i só͘ kiû ê siâⁿ hō͘ i, chiū-sī Í-hoat-liân soaⁿ-tōe ê Têng-ná-se-la̍h; i chiū khí hit ê siâⁿ, tiàm tī hit tiong-kan. 51 Chiah-ê chiū-sī chè-si Í-lī-a-sat, kap Lùn ê kiáⁿ Iok-su-a, í-ki̍p Í-sek-lia̍t lâng chi-phài-tiong ê cho̍k-tiúⁿ, tī Sī-lô, tī hōe-bō͘ mn̂g-kháu, Iâ-hô-hoa ê bīn-chêng, liam-khau só͘ pun ê gia̍p. Án-ni in pun-oân hit ê tōe.
1 耶和華吩咐約書亞講： 2 你吩咐以色列人，講：Lín tio̍h照我託摩西所kā lín講ê，為家己設立逃閃ê城； 3 Hō͘ hitê無意中錯誤刣人ê，thang走到hia；hiahê城thang做lín閃避報人命ê人ê所在。 4 伊beh走到chiahê城ê一个，khiā tī城門口，將伊ê事情講hō͘ hitê城ê長老聽；in就收伊入城，hō͘伊一所在，hō͘伊tiàm tī in中間。 5 報人命ê若追jip伊，in m̄-thang用刣人ê交tī伊ê手；因為伊錯誤刣死伊ê厝邊，平素無怨恨伊。 6 伊beh tòa tī hitê城，thèng候khiā tī會眾ê面前受審判，thèng候hit時ê祭司長已經死，刣人ê chiah thang tò去到本城，本家，就是伊所tùi hia走出來hitê城。 7 In就定tio̍h 設 tī Ná-hut-tha-lī山地，tī加利利ê Ki-te-su，kap tī Í-hoat-liân山地ê示劍，以及tī偤大山地ê Ki-lia̍t-a-pa，就是Hi-pek-lûn。 8 Koh tī約旦hit-pêng，近耶利哥東勢，設立屬Liû-piān支派，tī曠野，tī平洋ê Pí-sek；kap屬Ka-tek支派Ki-lia̍t ê La̍h-boa̍t；以及屬Má-ná-se支派，Pa-san ê Ko-lân。 9 Chiahê是為tio̍h以色列眾人，kap寄腳tī中間所設ê城，hō͘錯誤刣人ê lóng thang走到hia，無死tī報人命ê人ê手，thèng候伊khiā tī會眾ê面前。
1 Iâ-hô-hoa hoan-hù Iok-su-a kóng, 2 Lí hoan-hù Í-sek-lia̍t lâng, kóng, Lín tio̍h chiàu Góa thok Mô͘-se só͘ kā lín kóng ê, ūi ka-kī siat-li̍p tô-siám ê siâⁿ; 3 hō͘ hit ê bô-ì-tiong chhò-gō͘ thâi-lâng-ê, thang cháu kàu hia; hiah ê siâⁿ thang chòe lín siám-pī pò-jîn-bēng ê lâng ê só͘-chāi. 4 I beh cháu kàu chiah ê siâⁿ ê chi̍t-ê, khiā tī siâⁿ-mn̂g-kháu, chiong i ê sū-chêng kóng hō͘ hit ê siâⁿ ê tiúⁿ-ló thiaⁿ; in chiū siu i ji̍p siâⁿ, hō͘ i chi̍t só͘-chāi, hō͘ i tiàm tī in tiong-kan. 5 Pò-jîn-bēng-ê nā tui-jip i, in m̄-thang ēng thâi-lâng-ê kau tī i ê chhiú; in-ūi i chhò-gō͘ thâi-sí i ê chhù-piⁿ, pêng-sò͘ bô oàn-hūn i. 6 I beh tòa tī hit ê siâⁿ, thèng-hāu khiā tī hōe-chiòng ê bīn-chêng siū sím-phòaⁿ, thèng-hāu hit-sî ê chè-si-tiúⁿ í-keng sí, thâi-lâng-ê chiah thang tò-khì kàu pún-siâⁿ, pún-ke, chiū-sī i só͘ tùi hia cháu-chhut-lâi hit ê siâⁿ. 7 In chiū tiāⁿ-tio̍h siat tī Ná-hut-tha-lī soaⁿ-tōe, tī Ka-lī-lī ê Ki-te-su, kap tī Í-hoat-liân soaⁿ-tōe ê Sī-kiàm, í-ki̍p tī Iû-tāi soaⁿ-tōe ê Ki-lia̍t-a-pa, chiū-sī Hi-pek-lûn. 8 Koh tī Iok-tàn hit-pêng, kūn Iâ-lī-ko tang-sì, siat-li̍p sio̍k Liû-piān chi-phài, tī khòng-iá, tī pîⁿ-iûⁿ ê Pí-sek; kap sio̍k Ka-tek chi-phài Ki-lia̍t ê La̍h-boa̍t; í-ki̍p sio̍k Má-ná-se chi-phài, Pa-san ê Ko-lân. 9 Chiah-ê sī ūi-tio̍h Í-sek-lia̍t chèng-lâng, kap kià-kha tī tiong-kan só͘ siat ê siâⁿ, hō͘ chhò-gō͘ thâi-lâng-ê lóng thang cháu kàu hia, bô sí tī pò-jîn-bēng ê lâng ê chhiú, thèng-hāu i khiā tī hōe-chiòng ê bīn-chêng.
1 hit時利未人chiahê族長就近祭司Í-lī-a-sat，kap Lùn ê kiáⁿ約書亞，以及以色列人支派chiahê族長； 2 tī迦南地ê Sī-lô kā in講：前耶和華託摩西hō͘阮有城thang khiā起，有郊野thang做飼cheng-siⁿ ê路用。 3 以色列人就照耶和華所命令ê，tùi家己ê業中，將下面所記chiahê城，kap in ê郊野，hō͘利未人。 4 為 Ko-hat chiahê族拈鬮；利未人中祭司亞倫ê kiáⁿ孫，tùi偤大支派，西門支派，便雅憫支派，liam-tio̍h十三座城。 5 Ko-hat其餘ê kiáⁿ孫，tùi Í-hoat-liân支派ê宗族，tùi Tàn ê支派，tùi Má-ná-se半支派，liam-tio̍h十座城。 6 Kek-sūn ê kiáⁿ孫，tùi Í-sat-ka支派ê宗族，tùi A-siat ê支派，tùi Ná-hut-tha-lī ê支派，tùi tiàm tī Pa-san ê Má-ná-se半支派，liam-tio̍h十三座城。 7 Bí-la̍h-lī ê kiáⁿ孫，照in ê宗族，tùi Liû-piān ê支派，tùi Ka-tek ê支派，tùi Se-pò͘-lûn ê支派，得tio̍h十二座城。 8 以色列人照耶和華託摩西所命令ê，將chiahê城，kap in ê郊野，拈鬮分hō͘利未人。 9 Koh tùi偤大kiáⁿ孫ê支派，西門kiáⁿ孫ê支派，下面記名hiahê城hō͘ in； 10 就是hō͘利未kiáⁿ孫中，Ko-hat宗族中，亞倫ê kiáⁿ孫；因為hō͘ in事先拈鬮； 11 用偤大山地ê Ki-lia̍t-a-pa，(就是Hi-pek-lûn，) kap伊四圍ê郊野，hō͘ in；A-pa是A-la̍p族ê祖。 12 獨獨hitê城ê田，kap伊ê鄉社，in hō͘ Iâ-hu-nî ê kiáⁿ迦勒做業。 13 Koh用Hi-pek-lûn，kap伊ê郊野，就是刣死人逃閃ê城；以及Li̍p-ná kap伊ê郊野，hō͘祭司亞倫ê kiáⁿ孫； 14 koh hō͘ in Ngá-thê-jíⁿ，kap伊ê郊野，Í-si̍t-thê-bo̍k，kap伊ê郊野； 15 Hô-lûn kap伊ê郊野，Tí-phek kap伊ê郊野； 16 A-in，kap伊ê郊野，U-tha kap伊ê郊野，Pek-sī-be̍k kap伊ê郊野；共九座城，lóng是tùi chí兩支派hō͘ in。 17 Koh tùi便雅憫ê支派，hō͘ in Ki-piàn kap伊ê郊野，Ka-pa kap伊ê郊野； 18 A-ná-tu̍t kap伊ê郊野，A-le̍k-bûn kap伊ê郊野，共四座城； 19 亞倫ê kiáⁿ孫做祭司ê所得tio̍h ê城共十三座城，kap伊ê郊野。 20 利未人Ko-hat kiáⁿ孫ê宗族，就是Ko-hat其餘ê kiáⁿ孫，拈鬮所得tio̍h ê城是tùi Í-hoat-liân支派中分出ê。 21 Koh用Í-hoat-liân山地ê示劍，就是刣死人ê逃閃ê城，kap in ê郊野，以及Ki-sek kap伊ê郊野； 22 Ki-pek-sian kap伊ê郊野，Pek-hô-lûn kap伊ê郊野hō͘ in；共四座城。 23 Koh tùi Tàn ê支派中，hō͘ in I-lī-thê-ki kap伊ê郊野，Ki-pí-tùn kap伊ê郊野； 24 A-ngá-lûn kap伊ê郊野，Ka-te̍k-lîm-bûn kap伊ê郊野；共四座城。 25 Koh tùi Má-ná-se半支派中hō͘ in Tha-la̍p kap伊ê郊野，以及Ka-te̍k-lîm-bûn kap伊ê郊野；共兩座城。 26 Ko-hat ê kiáⁿ孫其餘ê宗族，所得tio̍h ê城，共十座，kap in ê郊野。 27 Koh tùi Má-ná-se半支派ê業中，將Pa-san ê Ko-lân，就是刣人ê逃閃ê城，kap伊ê郊野，以及Pí-si-thê-la̍h kap伊ê郊野，共兩座城，hō͘利未宗族Kek-sūn ê kiáⁿ孫。 28 Koh tùi Í-sat-ka支派ê業中，用Ki-siān kap伊ê郊野，Tāi-pí-la̍h kap伊ê郊野； 29 Iâ-boa̍t kap伊ê郊野，Ún-kan-lêng kap伊ê郊野，共四座城，hō͘ in。 30 Koh tùi A-siat支派ê業中，用Bí-sa-le̍k kap伊ê郊野，Ap-tùn kap伊ê郊野； 31 Hek-kah kap伊ê郊野，Lī-ha̍p kap伊ê郊野，共四座城，hō͘ in。 32 Koh tùi Ná-hut-tha-lī支派ê業中，用加利利ê Ki-te-su，就是刣人ê逃閃ê城，kap伊ê郊野，以及Hap-boa̍t-to-jíⁿ kap伊ê郊野，Ka-jíⁿ-thán kap伊ê郊野，共三座城，hō͘ in。 33 Kek-sūn人ê城照伊ê宗族，共十三座城kap伊ê郊野。 34 Tùi Se-pò͘-lûn支派ê業中，將 Iok-liām kap伊ê郊野，Ka-jíⁿ-tha kap伊ê郊野； 35 Teng-ná kap伊ê郊野，Ná-hap-la̍h kap伊ê郊野，共四座城，hō͘其餘ê利未人，就是Bí-la̍h-lī kiáⁿ孫ê宗族。 36 Koh tùi Liû-piān支派ê業中，用Pí-sek kap伊ê郊野，Ngá-cha̍p kap伊ê郊野； 37 Ki-tí-bo̍k kap伊ê郊野，Bí-hoat-ap kap伊ê郊野，共四座城，hō͘ in。 38 Koh tùi Ka-tek支派ê業中，將Ki-lia̍t ê La̍h-boa̍t，就是刣死人ê逃閃ê城，kap伊ê郊野，以及Má-hap-liām kap伊ê郊野； 39 Hi-si̍t-pún kap伊ê郊野，Ngá-siā kap伊ê郊野，共四座城，hō͘ in。 40 利未人其餘ê宗族，就是Bí-la̍h-lī ê kiáⁿ孫，照in ê宗族，拈鬮所得tio̍h chiahê城，共十二座城。 41 利未人tī以色列ê業中所得tio̍h ê城，共四十八座城，kap in ê郊野。 42 Chiahê城四圍lóng有伊ê郊野，ta̍k-ê lóng是án-ni。 43 Án-ni耶和華將伊前chiù-chōa beh hō͘ in列祖ê全地，hō͘以色列人；in就得tio̍h做業，tiàm tī-hia khiā起。 44 耶和華照伊對in ê列祖一切所chiù-chōa-ê，hō͘ in四圍平安；in ê對敵，無一人能khiā-tiâu tī in ê面前；耶和華將in ê對敵lóng交tī in ê手。 45 見耶和華對以色列家所講ê好話，無一句落空，lóng有應驗。
1 Hit-sî Lī-bī lâng chiah ê cho̍k-tiúⁿ chiū-kūn chè-si Í-lī-a-sat, kap Lùn ê kiáⁿ Iok-su-a, í-ki̍p Í-sek-lia̍t lâng chi-phài chiah ê cho̍k-tiúⁿ; 2 tī Ka-lâm tōe ê Sī-lô kā in kóng, Chêng Iâ-hô-hoa thok Mô͘-se hō͘ goán ū siâⁿ thang khiā-khí, ū kau-iá thang chòe chhī cheng-siⁿ ê lō͘-ēng. 3 Í-sek-lia̍t lâng chiū chiàu Iâ-hô-hoa só͘ bēng-lēng ê, tùi ka-kī ê gia̍p-tiong, chiong ē-bīn só͘ kì chiah ê siâⁿ, kap in ê kau-iá, hō͘ Lī-bī lâng. 4 Ūi Ko-hat chiah ê cho̍k liam-khau; Lī-bī lâng tiong chè-si A-lûn ê kiáⁿ-sun, tùi Iû-tāi chi-phài, Se-biān chi-phài, Piān-ngá-bín chi-phài, liam-tio̍h cha̍p-saⁿ chō siâⁿ. 5 Ko-hat kî-û ê kiáⁿ-sun, tùi Í-hoat-liân chi-phài ê chong-cho̍k, tùi Tàn ê chi-phài, tùi Má-ná-se pòaⁿ-chi-phài, liam-tio̍h cha̍p chō siâⁿ. 6 Kek-sūn ê kiáⁿ-sun, tùi Í-sat-ka chi-phài ê chong-cho̍k, tùi A-siat ê chi-phài, tùi Ná-hut-tha-lī ê chi-phài, tùi tiàm tī Pa-san ê Má-ná-se pòaⁿ-chi-phài, liam-tio̍h cha̍p-saⁿ chō siâⁿ. 7 Bí-la̍h-lī ê kiáⁿ-sun, chiàu in ê chong-cho̍k, tùi Liû-piān ê chi-phài, tùi Ka-tek ê chi-phài, tùi Se-pò͘-lûn ê chi-phài, tit-tio̍h cha̍p-jī chō siâⁿ. 8 Í-sek-lia̍t lâng chiàu Iâ-hô-hoa thok Mô͘-se só͘ bēng-lēng-ê, chiong chiah ê siâⁿ, kap in ê kau-iá, liam-khau pun hō͘ Lī-bī lâng. 9 Koh tùi Iû-tāi kiáⁿ-sun ê chi-phài, Se-biān kiáⁿ-sun ê chi-phài, ē-bīn kì-miâ hiah ê siâⁿ hō͘ in; 10 chiū-sī hō͘ Lī-bī kiáⁿ-sun-tiong, Ko-hat chong-cho̍k-tiong, A-lûn ê kiáⁿ-sun; in-ūi hō͘ in tāi-seng liam-khau; 11 ēng Iû-tāi soaⁿ-tōe ê Ki-lia̍t-a-pa, (chiū-sī Hi-pek-lûn,) kap i sì-ûi ê kau-iá, hō͘ in; A-pa sī A-la̍p cho̍k ê chó͘. 12 To̍k-to̍k hit ê siâⁿ ê chhân, kap i ê hiuⁿ-siā, in hō͘ Iâ-hu-nî ê kiáⁿ Ka-le̍k chòe-gia̍p. 13 Koh ēng Hi-pek-lûn, kap i ê kau-iá, chiū-sī thâi-sí-lâng tô-siám ê siâⁿ; í-ki̍p Li̍p-ná kap i ê kau-iá, hō͘ chè-si A-lûn ê kiáⁿ-sun; 14 koh hō͘ in Ngá-thê-jíⁿ, kap i ê kau-iá, Í-si̍t-thê-bo̍k, kap i ê kau-iá; 15 Hô-lûn kap i ê kau-iá, Tí-phek kap i ê kau-iá; 16 A-in, kap i ê kau-iá, U-tha kap i ê kau-iá, Pek-sī-be̍k kap i ê kau-iá; kiōng káu chō siâⁿ, lóng sī tùi chí nn̄g chi-phài hō͘ in. 17 Koh tùi Piān-ngá-bín ê chi-phài, hō͘ in Ki-piàn kap i ê kau-iá, Ka-pa kap i ê kau-iá; 18 A-ná-tu̍t kap i ê kau-iá, A-le̍k-bûn kap i ê kau-iá, kiōng sì chō siâⁿ; 19 A-lûn ê kiáⁿ-sun chòe chè-si-ê só͘ tit-tio̍h ê siâⁿ kiōng cha̍p-saⁿ chō siâⁿ, kap i ê kau-iá. 20 Lī-bī lâng Ko-hat kiáⁿ-sun ê chong-cho̍k, chiū-sī Ko-hat kî-û ê kiáⁿ-sun, liam-khau só͘ tit-tio̍h ê siâⁿ sī tùi Í-hoat-liân chi-phài-tiong pun-chhut-ê. 21 Koh ēng Í-hoat-liân soaⁿ-tōe ê Sī-kiàm, chiū-sī thâi-sí-lâng-ê tô-siám ê siâⁿ, kap in ê kau-iá, í-ki̍p Ki-sek kap i ê kau-iá; 22 Ki-pek-sian kap i ê kau-iá, Pek-hô-lûn kap i ê kau-iá hō͘ in; kiōng sì chō siâⁿ. 23 Koh tùi Tàn ê chi-phài-tiong, hō͘ in I-lī-thê-ki kap i ê kau-iá, Ki-pí-tùn kap i ê kau-iá; 24 A-ngá-lûn kap i ê kau-iá, Ka-te̍k-lîm-bûn kap i ê kau-iá; kiōng sì chō siâⁿ. 25 Koh tùi Má-ná-se pòaⁿ-chi-phài tiong hō͘ in Tha-la̍p kap i ê kau-iá, í-ki̍p Ka-te̍k-lîm-bûn kap i ê kau-iá; kiōng nn̄g chō siâⁿ. 26 Ko-hat ê kiáⁿ-sun kî-û ê chong-cho̍k, só͘ tit-tio̍h ê siâⁿ, kiōng cha̍p-chō, kap in ê kau-iá. 27 Koh tùi Má-ná-se pòaⁿ-chi-phài ê gia̍p-tiong, chiong Pa-san ê Ko-lân, chiū-sī thâi-lâng-ê tô-siám ê siâⁿ, kap i ê kau-iá, í-ki̍p Pí-si-thê-la̍h kap i ê kau-iá, kiōng nn̄g chō siâⁿ, hō͘ Lī-bī chong-cho̍k Kek-sūn ê kiáⁿ-sun. 28 Koh tùi Í-sat-ka chi-phài ê gia̍p-tiong, ēng Ki-siān kap i ê kau-iá, Tāi-pí-la̍h kap i ê kau-iá; 29 Iâ-boa̍t kap i ê kau-iá, Ún-kan-lêng kap i ê kau-iá, kiōng sì chō siâⁿ, hō͘ in. 30 Koh tùi A-siat chi-phài ê gia̍p-tiong, ēng Bí-sa-le̍k kap i ê kau-iá, Ap-tùn kap i ê kau-iá; 31 Hek-kah kap i ê kau-iá, Lī-ha̍p kap i ê kau-iá, kiōng sì chō siâⁿ, hō͘ in. 32 Koh tùi Ná-hut-tha-lī chi-phài ê gia̍p-tiong, ēng Ka-lī-lī ê Ki-te-su, chiū-sī thâi-lâng-ê tô-siám ê siâⁿ, kap i ê kau-iá, í-ki̍p Hap-boa̍t-to-jíⁿ kap i ê kau-iá, Ka-jíⁿ-thán kap i ê kau-iá, kiōng saⁿ chō siâⁿ, hō͘ in. 33 Kek-sūn lâng ê siâⁿ chiàu i ê chong-cho̍k, kiōng cha̍p-saⁿ chō siâⁿ kap i ê kau-iá. 34 Tùi Se-pò͘-lûn chi-phài ê gia̍p-tiong, chiong Iok-liām kap i ê kau-iá, Ka-jíⁿ-tha kap i ê kau-iá; 35 Teng-ná kap i ê kau-iá, Ná-hap-la̍h kap i ê kau-iá, kiōng sì chō siâⁿ, hō͘ kî-û ê Lī-bī lâng, chiū-sī Bí-la̍h-lī kiáⁿ-sun ê chong-cho̍k. 36 Koh tùi Liû-piān chi-phài ê gia̍p-tiong, ēng Pí-sek kap i ê kau-iá, Ngá-cha̍p kap i ê kau-iá; 37 Ki-tí-bo̍k kap i ê kau-iá, Bí-hoat-ap kap i ê kau-iá, kiōng sì chō siâⁿ, hō͘ in. 38 Koh tùi Ka-tek chi-phài ê gia̍p-tiong, chiong Ki-lia̍t ê La̍h-boa̍t, chiū-sī thâi-sí-lâng-ê tô-siám ê siâⁿ, kap i ê kau-iá, í-ki̍p Má-hap-liām kap i ê kau-iá; 39 Hi-si̍t-pún kap i ê kau-iá, Ngá-siā kap i ê kau-iá, kiōng sì chō siâⁿ, hō͘ in. 40 Lī-bī lâng kî-û ê chong-cho̍k, chiū-sī Bí-la̍h-lī ê kiáⁿ-sun, chiàu in ê chong-cho̍k, liam-khau só͘ tit-tio̍h chiah ê siâⁿ, kiōng cha̍p-jī chō siâⁿ. 41 Lī-bī lâng tī Í-sek-lia̍t ê gia̍p-tiong só͘ tit-tio̍h ê siâⁿ, kiōng sì-cha̍p-poeh chō siâⁿ, kap in ê kau-iá. 42 Chiah ê siâⁿ sì-ûi lóng ū i ê kau-iá, ta̍k-ê lóng sī án-ni. 43 Án-ni Iâ-hô-hoa chiong I chêng chiù-chōa beh hō͘ in lia̍t-chó͘ ê choân-tōe, hō͘ Í-sek-lia̍t lâng; in chiū tit-tio̍h chòe-gia̍p, tiàm tī-hia khiā-khí. 44 Iâ-hô-hoa chiàu I tùi in ê lia̍t-chó͘ it-chhè só͘ chiù-chōa-ê, hō͘ in sì-ûi pêng-an; in ê tùi-te̍k, bô chi̍t-lâng ōe khiā-tiâu tī in ê bīn-chêng; Iâ-hô-hoa chiong in ê tùi-te̍k lóng kau tī in ê chhiú. 45 Kìⁿ Iâ-hô-hoa tùi Í-sek-lia̍t ke só͘ kóng ê hó-ōe, bô chi̍t-kù lo̍k-khong, lóng ū èng-giām.
1 Hit時約書亞叫Liû-piān人、Ka-tek人，Kap Má-ná-se半支派ê人來， 2 對in講，耶和華ê奴僕摩西所命令lín ê，lín lóng遵守，我所命令lín ê，lín也lóng聽thàn； 3 lín chiah-chōe日，lóng無離開lín ê兄弟，直到今á日，lín也有守耶和華lín上帝所命令lín tio̍h守ê。 4 Taⁿ耶和華lín上帝照祂所應允ê，hō͘ lín兄弟得tio̍h平安；taⁿ lín thang 倒tńg去lín ê布棚，到耶和華ê奴僕摩西tī約旦hit-pêng所賜hō͘ lín做業ê地。 5 總是lín切切tio̍h謹慎，遵thàn耶和華ê奴僕摩西所命令lín ê誡命律法，疼耶和華lín ê上帝，行伊一切ê道路，守伊ê誡命，結聯tī伊，盡心盡性服事伊。 6 Tùi án-ni，約書亞kā in祝福，差in去；in就tò去in ê布棚。 7 Má-ná-se半支派，摩西已經tī Pa-san分業hō͘ in；iáu半支派約書亞tī約旦hit-pêng西勢，tī in兄弟中分業hō͘ in；約書亞差in tò去布棚ê時，kā in祝福； 8 吩咐in講：Lín tio̍h 帶chōe-chōe財物，chōe-chōe cheng-siⁿ，kap銀、金、銅、鐵，kap chōe-chōe衣服，tò去lín ê布棚；將lín所搶對敵ê贓物，kap lín ê兄弟相kap分。 9 Tùi án-ni，Liû-piān人、Ka-tek人、Má-ná-se半支派ê人，tùi迦南地ê Sī-lô起身，離開以色列人，beh tò去in得tio̍h Ki-lia̍t地；就是照耶和華託摩西所命令ê，得tio̍h做業ê地。 10 Liû-piān人、Ka-tek人，kap Má-ná-se半支派，到約旦河邊一帶ê迦南地，就tī近約旦hia，起一座壇，hitê壇看了真大。 11 以色列人聽見講：看ah，Liû-piān人、Ka-tek人，kap Má-ná-se半支派有起一座壇tī迦南地ê頭前，約旦ê邊á，以色列人過去ê所在。 12 以色列人聽見，以色列人全會lóng聚集tī Sī-lô，beh上去kap in交戰。 13 以色列人差祭司Í-lī-a-sat ê kiáⁿ Hui-nî-hap去Ki-lia̍t地見Liû-piān人、Ka-tek人，Má-ná-se半支派； 14 koh差十個首領kap伊去，就是以色列ta̍k支派ta̍k族一个首領ta̍k人tī以色列軍隊中做族長。 15 In到Ki-lia̍t地，見Liû-piān人、Ka-tek人，kap Má-ná-se半支派，對in講， 16 耶和華全會ê眾人án-ni講：Lín干犯以色列ê上帝，今á日oa̍t-tńg無tè耶和華，為家己起一座壇，致到今á日悖逆耶和華，犯tio̍h這是甚麼罪ah？ 17 早對tī Pí-jíⁿ ê罪，咱iáu掠做小khóa mah？雖然瘟疫到耶和華ê會眾，到今á日咱iáu未清氣； 18 lín今á日竟然oa̍t-tńg無tè耶和華ah！lín今á日悖逆耶和華，明á日伊beh受氣以色列ê全會。 19 Lín所得tio̍h做業ê地，若無清氣，就thang過來耶和華ê地ê業，就是耶和華會幕所tiàm ê所在，tī阮中間得tio̍h業；總是m̄-thang悖逆耶和華，也m̄-thang悖逆阮，m̄-thang tī耶和華咱上帝ê壇以外，為家己koh起壇。 20 前謝拉 ê曾孫A-kan，kiám無tī hitê應該獻ê物犯罪，就有受氣臨到tī以色列ê全會mah？hitê人tī伊所犯ê罪，m̄-nā伊家己一人死。 21 Tùi án-ni，Liû-piān人、Ka-tek人、Má-ná-se半支派應以色列軍隊ê頭人講： 22 全能ê上帝耶和華，全能ê上帝耶和華，伊知，以色列也beh知，阮若有悖逆ê意思，á是干犯耶和華， 23 (今á日無救阮) ，為家己起壇，beh oa̍t-tńg無tè耶和華，á是beh獻燒祭、素祭、謝恩祭，tī hit頂面，耶和華beh歸咎伊； 24 阮做chitê tāi-chì是為tio̍h持防chiah故意做；是驚了後日lín ê kiáⁿ孫對阮ê kiáⁿ孫講：Lín kap耶和華以色列ê上帝有甚麼關係ah？ 25 Liû-piān人、Ka-tek人ah，耶和華設 chitê約旦，tī lín kap阮ê中間做界限；taⁿ lín tī耶和華無份；án-ni就lín ê kiáⁿ孫會hō͘阮ê kiáⁿ孫無koh敬畏耶和華。 26 所以阮相kap講：Taⁿ咱tio̍h為家己起一座壇，m̄是為tio̍h燒祭，也m̄是為tio̍h別號ê祭； 27 就是為tio̍h lín阮ê中間，以及lín kap阮後代ê中間做證據；hō͘阮thang tī耶和華ê面前，用阮ê燒祭、謝恩祭，kap別號祭，來服事伊；免得lín ê kiáⁿ孫後日對阮ê kiáⁿ孫講：Lín無份tī耶和華。 28 所以阮講：別日in若對阮，á是阮ê後代，án-ni講：阮thang應講，Lín thang看耶和華ê壇ê款式，就是阮ê列祖前所起ê；m̄是為tio̍h燒祭kap別號ê祭，就是為tio̍h beh做lín阮中間ê證據。 29 阮tī耶和華咱上帝會幕前以外，另外koh起一座壇，為tio̍h燒祭、素祭，kap別號ê祭，來悖逆耶和華，今á日oa̍t-tńg無tè耶和華，阮決斷無chit號意思。 30 祭司Hui-nî-hap kap會中hiahê首領，以及kap伊相kap來以色列中軍隊ê頭人，就是kap伊相kap來ê，聽見Liû-piān人、Ka-tek人、Má-ná-se人，所講ê話，就lóng掠做好。 31 祭司Í-lī-a-sat ê kiáⁿ Hui-nî-hap對Liû-piān人、Ka-tek人、Má-ná-se人講：今á日阮知耶和華tī咱ê中間，因為lín無犯tio̍h chitê罪來得罪耶和華；taⁿ lín有救以色列人脫離耶和華ê手。 32 祭司Í-lī-a-sat ê kiáⁿ Hui-nî-hap，kap hiahê首領，離別Liû-piān人、Ka-tek人，tùi Ki-lia̍t地 tò去迦南地，到以色列人hia，回覆in。 33 以色列人掠chitê事做好；tùi án-ni，以色列人o-ló上帝，無koh提起beh上去kap Liû-piān人、Ka-tek人交戰，來毀壞in所khiā起ê地。 34 Liû-piān人、Ka-tek人叫hitê壇名做證據；因為講：chitê壇tī咱中間證明耶和華是上帝。
1 Hit-sî Iok-su-a kiò Liû-piān lâng, Ka-tek lâng, kap Má-ná-se pòaⁿ-chi-phài ê lâng lâi, 2 tùi in kóng, Iâ-hô-hoa ê lô͘-po̍k Mô͘-se só͘ bēng-lēng lín ê, lín lóng chun-siú, góa só͘ bēng-lēng lín ê, lín iā lóng thiaⁿ-thàn; 3 lín chiah-chōe ji̍t, lóng bô lī-khui lín ê hiaⁿ-tī, ti̍t-kàu kin-á-ji̍t, lín iā ū siú Iâ-hô-hoa lín Siōng-tè só͘ bēng-lēng lín tio̍h siú ê. 4 Taⁿ Iâ-hô-hoa lín Siōng-tè chiàu I só͘ èng-ún-ê, hō͘ lín hiaⁿ-tī tit-tio̍h pêng-an; taⁿ lín thang tò-tńg-khì lín ê pò͘-pîⁿ, kàu Iâ-hô-hoa ê lô͘-po̍k Mô͘-se tī Iok-tàn hit-pêng só͘ sù-hō͘ lín chòe-gia̍p ê tōe. 5 Chóng-sī lín chhiat-chhiat tio̍h kín-sīn, chun-thàn Iâ-hô-hoa ê lô͘-po̍k Mô͘-se só͘ bēng-lēng lín ê kài-bēng lu̍t-hoat, thiàⁿ Iâ-hô-hoa lín ê Siōng-tè, kiâⁿ I it-chhè ê tō-lō͘, siú I ê kài-bēng, kiat-liân tī I, chīn-sim chīn-sèng ho̍k-sāi I. 6 Tùi án-ni Iok-su-a kā in chiok-hok, chhe in khì; in chiū tò-khì in ê pò͘-pîⁿ. 7 Má-ná-se pòaⁿ-chi-phài, Mô͘-se í-keng tī Pa-san pun-gia̍p hō͘ in; iáu pòaⁿ-chi-phài Iok-su-a tī Iok-tàn hit-pêng sai-sì, tī in hiaⁿ-tī-tiong pun-gia̍p hō͘ in; Iok-su-a chhe in tò-khì pò͘-pîⁿ ê sî, kā in chiok-hok; 8 hoan-hù in kóng, Lín tio̍h tòa chōe-chōe châi-bu̍t, chōe-chōe cheng-siⁿ, kap gûn, kim, tâng, thih, kap chōe-chōe i-ho̍k, tò-khì lín ê pò͘-pîⁿ; chiong lín só͘ chhiúⁿ tùi-te̍k ê chong-bu̍t, kap lín ê hiaⁿ-tī saⁿ-kap pun. 9 Tùi án-ni Liû-piān lâng, Ka-tek lâng, Má-ná-se pòaⁿ-chi-phài ê lâng, tùi Ka-lâm tōe ê Sī-lô khí-sin, lī-khui Í-sek-lia̍t lâng, beh tò-khì in tit-tio̍h Ki-lia̍t tōe; chiū-sī chiàu Iâ-hô-hoa thok Mô͘-se só͘ bēng-lēng ê, tit-tio̍h chòe-gia̍p ê tōe. 10 Liû-piān lâng, Ka-tek lâng, kap Má-ná-se pòaⁿ-chi-phài, kàu Iok-tàn hô-piⁿ it-tài ê Ka-lâm tōe, chiū tī kūn Iok-tàn hia, khí chi̍t chō tôaⁿ, hit ê tôaⁿ khòaⁿ-liáu chin-tōa. 11 Í-sek-lia̍t lâng thiaⁿ-kìⁿ kóng, Khòaⁿ ah, Liû-piān lâng, Ka-tek lâng, kap Má-ná-se pòaⁿ-chi-phài ū khí chi̍t chō tôaⁿ tī Ka-lâm tōe ê thâu-chêng, Iok-tàn ê piⁿ-á, Í-sek-lia̍t lâng kè-khì ê só͘-chāi. 12 Í-sek-lia̍t lâng thiaⁿ-kìⁿ, Í-sek-lia̍t lâng choân-hōe lóng chū-chi̍p tī Sī-lô, beh chiūⁿ-khì kap in kau-chiàn. 13 Í-sek-lia̍t lâng chhe chè-si Í-lī-a-sat ê kiáⁿ Hui-nî-hap khì Ki-lia̍t tōe kìⁿ Liû-piān lâng, Ka-tek lâng, Má-ná-se pòaⁿ-chi-phài; 14 koh chhe cha̍p ê siú-léng kap i khì, chiū-sī Í-sek-lia̍t ta̍k chi-phài ta̍k-cho̍k chi̍t ê siú-léng ta̍k-lâng tī Í-sek-lia̍t kun-tūi-tiong chòe cho̍k-tiúⁿ. 15 In kàu Ki-lia̍t tōe, kìⁿ Liû-piān lâng, Ka-tek lâng, kap Má-ná-se pòaⁿ-chi-phài, tùi in kóng, 16 Iâ-hô-hoa choân-hōe ê chèng-lâng án-ni kóng, Lín kan-hoān Í-sek-lia̍t ê Siōng-tè, kin-á-ji̍t oa̍t-tńg bô tè Iâ-hô-hoa, ūi ka-kī khí chi̍t chō tôaⁿ, tì-kàu kin-á-ji̍t pōe-ge̍k Iâ-hô-hoa, hoān-tio̍h che sī sím-mi̍h chōe ah? 17 Chá tùi tī Pí-jíⁿ ê chōe, lán iáu lia̍h-chòe sió-khóa mah? Sui-jiân un-e̍k kàu Iâ-hô-hoa ê hōe-chiòng, kàu kin-á-ji̍t lán iáu-bē chheng-khì; 18 lín kin-á-ji̍t kéng-jiân oa̍t-tńg bô tè Iâ-hô-hoa ah! lín kin-á-ji̍t pōe-ge̍k Iâ-hô-hoa, bîn-á-ji̍t I beh siū-khì Í-sek-lia̍t ê choân-hōe. 19 Lín só͘ tit-tio̍h chòe-gia̍p ê tōe, nā bô chheng-khì, chiū thang kè-lâi Iâ-hô-hoa ê tōe ê gia̍p, chiū-sī Iâ-hô-hoa hōe-bō͘ só͘ tiàm ê só͘-chāi, tī goán tiong-kan tit-tio̍h gia̍p; chóng-sī m̄-thang pōe-ge̍k Iâ-hô-hoa, iā m̄-thang pōe-ge̍k goán, m̄-thang tī Iâ-hô-hoa lán Siōng-tè ê tôaⁿ í-gōa, ūi ka-kī koh khí tôaⁿ. 20 Chêng Siā-la̍h ê cheng-sun A-kan, kiám bô tī hit ê eng-kai hiàn ê mi̍h hoān-chōe, chiū ū siū-khì lîm-kàu tī Í-sek-lia̍t ê choân-hōe mah? hit ê lâng tī i só͘ hoān ê chōe, m̄-nā i ka-kī chi̍t-lâng sí. 21 Tùi án-ni Liû-piān lâng, Ka-tek lâng, Má-ná-se pòaⁿ-chi-phài ìn Í-sek-lia̍t kun-tūi ê thâu-lâng kóng, 22 Choân-lêng ê Siōng-tè Iâ-hô-hoa, choân-lêng ê Siōng-tè Iâ-hô-hoa, I chai, Í-sek-lia̍t iā beh chai, goán nā ū pōe-ge̍k ê ì-sù, á-sī kan-hoān Iâ-hô-hoa, 23 (kin-á-ji̍t bô kiù goán), ūi ka-kī khí tôaⁿ, beh oa̍t-tńg bô tè Iâ-hô-hoa, á-sī beh hiàn sio-chè, sò͘-chè, siā-un chè, tī hí téng-bīn, Iâ-hô-hoa beh kui-kiū i; 24 goán chòe chit ê tāi-chì sī ūi-tio̍h tî-hông chiah kò͘-ì chòe; sī kiaⁿ-liáu āu-ji̍t lín ê kiáⁿ-sun tùi goán ê kiáⁿ-sun kóng, Lín kap Iâ-hô-hoa Í-sek-lia̍t ê Siōng-tè ū sím-mi̍h koan-hē ah? 25 Liû-piān lâng, Ka-tek lâng ah, Iâ-hô-hoa siat chit ê Iok-tàn, tī lín kap goán ê tiong-kan chòe kài-hān; taⁿ lín tī Iâ-hô-hoa bô hūn; án-ni chiū lín ê kiáⁿ-sun ōe hō͘ goán ê kiáⁿ-sun bô koh kèng-ùi Iâ-hô-hoa. 26 Só͘-í goán saⁿ-kap kóng, Taⁿ lán tio̍h ūi ka-kī khí chi̍t chō tôaⁿ, m̄-sī ūi-tio̍h sio-chè, iā m̄-sī ūi-tio̍h pa̍t-hō ê chè; 27 chiū-sī ūi-tio̍h lín goán ê tiong-kan, í-ki̍p lín kap goán āu-tāi ê tiong-kan chòe chèng-kù; hō͘ goán thang tī Iâ-hô-hoa ê bīn-chêng, ēng goán ê sio-chè, siā-un-chè, kap pa̍t-hō chè, lâi ho̍k-sāi I; bián-tit lín ê kiáⁿ-sun āu-ji̍t tùi goán ê kiáⁿ-sun kóng, Lín bô hūn tī Iâ-hô-hoa. 28 Só͘-í goán kóng, Pa̍t-ji̍t in nā tùi goán, á-sī goán ê āu-tāi, án-ni kóng, goán thang ìn kóng, Lín thang khòaⁿ Iâ-hô-hoa ê tôaⁿ ê khoán-sit, chiū-sī goán ê lia̍t-chó͘ chêng só͘ khí-ê; m̄-sī ūi-tio̍h sio-chè kap pa̍t-hō ê chè, chiū-sī ūi-tio̍h beh chòe lín goán tiong-kan ê chèng-kù. 29 Goán tī Iâ-hô-hoa lán Siōng-tè hōe-bō͘-chêng í-gōa, lēng-gōa koh khí chi̍t chō tôaⁿ, ūi-tio̍h sio-chè, sò͘-chè, kap pa̍t-hō ê chè, lâi pōe-ge̍k Iâ-hô-hoa, kin-á-ji̍t oa̍t-tńg bô tè Iâ-hô-hoa, goán koat-toàn bô chit-hō ì-sù. 30 Chè-si Hui-nî-hap kap hōe-tiong hiah ê siú-léng, í-ki̍p kap i saⁿ-kap lâi Í-sek-lia̍t tiong kun-tūi ê thâu-lâng, chiū-sī kap i saⁿ-kap lâi-ê, thiaⁿ-kìⁿ Liû-piān lâng, Ka-tek lâng, Má-ná-se lâng, só͘ kóng ê ōe, chiū lóng lia̍h-chòe hó. 31 Chè-si Í-lī-a-sat ê kiáⁿ Hui-nî-hap tùi Liû-piān lâng, Ka-tek lâng, Má-ná-se lâng kóng, Kin-á-ji̍t goán chai Iâ-hô-hoa tī lán ê tiong-kan, in-ūi lín bô hoān-tio̍h chit ê chōe lâi tek-chōe Iâ-hô-hoa; taⁿ lín ū kiù Í-sek-lia̍t lâng thoat-lī Iâ-hô-hoa ê chhiú. 32 Chè-si Í-lī-a-sat ê kiáⁿ Hui-nî-hap, kap hiah ê siú-léng, lī-pia̍t Liû-piān lâng, Ka-tek lâng, tùi Ki-lia̍t tōe tò-khì Ka-lâm tōe, kàu Í-sek-lia̍t lâng hia, hê-hok in. 33 Í-sek-lia̍t lâng lia̍h chit ê sū chòe-hó; tùi án-ni Í-sek-lia̍t lâng o-ló Siōng-tè, bô koh thê-khí beh chiūⁿ-khì kap Liû-piān lâng Ka-tek lâng kau-chiàn, lâi húi-hoāi in só͘ khiā-khí ê tōe. 34 Liû-piān lâng Ka-tek lâng kiò hit ê tôaⁿ miâ chòe Chèng-kù; in-ūi kóng, Chit ê tôaⁿ tī lán tiong-kan chèng-bêng Iâ-hô-hoa sī Siōng-tè.
1 耶和華已經hō͘以色列人安靜，無kap四圍一切ê對敵交戰，已經歷過chōe-chōe日，約書亞也歲壽chōe，年老； 2 Hit時約書亞就叫以色列眾人，in ê長老，kap in ê族長，in ê審判官，in ê官長，lóng總來，對in講，我已經歲壽chōe，年老； 3 耶和華lín ê上帝，因為lín ê緣故，對hiahê國所行一切ê事，lín有看見；因為替lín交戰ê是耶和華lín ê上帝。 4 所chhun chiahê國，以及我所剪除hiahê國，tùi約旦到大海，ǹg日落ê所在，我已經分hō͘ lín ta̍k支派做業。 5 耶和華lín ê上帝beh tùi lín ê面前趕逐in，也beh tùi lín ê頭前激逐(tio̍k) in；lín就beh得tio̍h in ê地做業，照耶和華lín ê上帝所對lín講ê。 6 所以lín tio̍h大大壯膽，執守來行摩西律法ê冊一切所記載ê，m̄-thang離開伊來偏左偏右； 7 tī lín中間所chhun hiahê國，lín m̄-thang kap伊chham-chhap，m̄-thang提起in hiahê上帝ê名，m̄-thang hō͘人kí in來chiù-chōa，也m̄-thang服事伊，m̄-thang跪拜伊； 8 總是tio̍h照lín到今á日所行ê，結聯耶和華lín ê上帝。 9 因為耶和華已經用大koh強ê國tùi lín ê面前趕出；到今á日無一人能khiā-tiâu tī lín ê面前。 10 Lín一人beh趕逐一千人，因為替lín交戰ê，是耶和華lín ê上帝，照伊所對lín講ê。 11 Lín tio̍h大大家己謹慎，疼耶和華lín ê上帝。 12 Lín若略á倒退，kap存tī lín中間所chhun hiahê百姓結聯，kap in結親，相kap往來； 13 lín tio̍h確實知，耶和華lín ê上帝的確無beh koh將hiahê百姓tùi lín ê面前趕出；總是in beh成做lín ê羅網活tauh，phah lín身軀ê箠，目睭內ê刺，直到lín對tī耶和華lín上帝所賞賜lín chitê好ê地滅無。 14 看ah，我今á日beh行世間人所tio̍h行ê路；lín一心一意知耶和華lín上帝所應允賜福lín ê話，無一句落空，lóng應驗tī lín ê身上，其中無落空一項。 15 耶和華lín上帝所應允一切ê福氣，怎樣臨到lín ê，耶和華也beh照án-ni hō͘ ta̍k樣ê災厄到tī lín，直到伊滅無lín tī耶和華lín上帝所賞賜lín chitê好ê地。 16 Lín若違背耶和華lín上帝所命令lín ê約，去服事別ê上帝，跪拜伊，耶和華ê受氣beh tùi lín發出，lín beh緊緊滅無tī伊所賞賜lín好ê地。
1 Iâ-hô-hoa í-keng hō͘ Í-sek-lia̍t lâng an-chēng, bô kap sì-ûi it-chhè ê tùi-te̍k kau-chiàn, í-keng le̍k-kè chōe-chōe ji̍t, Iok-su-a iā hè-siū chōe, nî-lāu; 2 hit-sî Iok-su-a chiū kiò Í-sek-lia̍t chèng-lâng, in ê tiúⁿ-ló, kap in ê cho̍k-tiúⁿ, in ê sím-phòaⁿ-koaⁿ, in ê koaⁿ-tiúⁿ, lóng-chóng lâi, tùi in kóng, Góa í-keng hè-siū chōe, nî-lāu; 3 Iâ-hô-hoa lín ê Siōng-tè, in-ūi lín ê iân-kò͘, tùi hiah ê kok só͘ kiâⁿ it-chhè ê sū, lín ū khòaⁿ-kìⁿ; in-ūi thòe lín kau-chiàn-ê sī Iâ-hô-hoa lín ê Siōng-tè. 4 Só͘ chhun chiah ê kok, í-ki̍p góa só͘ chián-tû hiah ê kok, tùi Iok-tàn kàu tōa-hái, ǹg ji̍t-lo̍h ê só͘-chāi, góa í-keng pun hō͘ lín ta̍k chi-phài chòe-gia̍p. 5 Iâ-hô-hoa lín ê Siōng-tè beh tùi lín ê bīn-chêng kóaⁿ-tio̍k in, iā beh tùi lín ê thâu-chêng kek-tio̍k in; lín chiū beh tit-tio̍h in ê tōe chòe-gia̍p, chiàu Iâ-hô-hoa lín ê Siōng-tè só͘ tùi lín kóng ê. 6 Só͘-í lín tio̍h tōa-tōa chòng-táⁿ, chip-siú lâi kiâⁿ Mô͘-se lu̍t-hoat ê chheh it-chhè só͘ kì-chài ê, m̄-thang lī-khui i lâi phian-chó phian-iū; 7 tī lín tiong-kan só͘ chhun hiah ê kok, lín m̄-thang kap i chham-chhap, m̄-thang thê-khí in hiah ê siōng-tè ê miâ, m̄-thang hō͘ lâng kí in lâi chiù-chōa, iā m̄-thang ho̍k-sāi i, m̄-thang kūi-pài i; 8 chóng-sī tio̍h chiàu lín kàu kin-á-ji̍t só͘-kiâⁿ-ê, kiat-liân Iâ-hô-hoa lín ê Siōng-tè. 9 In-ūi Iâ-hô-hoa í-keng ēng tōa koh kiông ê kok tùi lín ê bīn-chêng kóaⁿ-chhut; kàu kin-á-ji̍t bô chi̍t-lâng ōe khiā-tiâu tī lín ê bīn-chêng. 10 Lín chi̍t-lâng beh kóaⁿ-tio̍k chi̍t-chheng lâng, in-ūi thòe lín kau-chiàn-ê, sī Iâ-hô-hoa lín ê Siōng-tè, chiàu I só͘ tùi lín kóng-ê. 11 Lín tio̍h tōa-tōa ka-kī kín-sīn, thiàⁿ Iâ-hô-hoa lín ê Siōng-tè. 12 Lín nā lio̍h-á tò-thè, kap chûn tī lín tiong-kan só͘ chhun hiah ê peh-sìⁿ kiat-liân, kap in kiat-chhin, saⁿ-kap óng-lâi; 13 lín tio̍h khak-si̍t chai, Iâ-hô-hoa lín ê Siōng-tè tek-khak bô beh koh chiong hiah ê peh-sìⁿ tùi lín ê bīn-chêng kóaⁿ-chhut; chóng-sī in beh chiâⁿ-chòe lín ê lô-bāng oa̍h-tauh, phah lín seng-khu ê chhê, ba̍k-chiu-lāi ê chhì, ti̍t-kàu lín tùi tī Iâ-hô-hoa lín Siōng-tè só͘ siúⁿ-sù lín chit ê hó ê tōe bia̍t-bô. 14 Khòaⁿ ah, góa kin-á-ji̍t beh kiâⁿ sè-kan lâng só͘ tio̍h kiâⁿ ê lō͘; lín chi̍t-sim chi̍t-ì chai Iâ-hô-hoa lín Siōng-tè só͘ èng-ún sù-hok lín ê ōe, bô chi̍t-kù lo̍k-khong, lóng èng-giām tī lín ê sin-chiūⁿ, kî-tiong bô lo̍k-khong chi̍t-hāng. 15 Iâ-hô-hoa lín Siōng-tè só͘ èng-ún it-chhè ê hok-khì, cháiⁿ-iūⁿ lîm-kàu lín ê, Iâ-hô-hoa iā beh chiàu án-ni hō͘ ta̍k-iūⁿ ê chai-ē kàu tī lín, ti̍t-kàu I bia̍t-bô lín tī Iâ-hô-hoa lín Siōng-tè só͘ siúⁿ-sù lín chit ê hó ê tōe. 16 Lín nā ûi-pōe Iâ-hô-hoa lín Siōng-tè só͘ bēng-lēng lín ê iok, khì ho̍k-sāi pa̍t ê siōng-tè, kūi-pài i, Iâ-hô-hoa ê siū-khì beh tùi lín hoat-chhut, lín beh kín-kín bia̍t-bô tī I só͘ siúⁿ-sù lín hó ê tōe.
1 約書亞聚集以色列眾支派到tī示劍，召以色列ê長老，kap in ê族長、審判官，以及官長來；in就khiā tī上帝ê面前。 2 約書亞kā眾百姓講：耶和華以色列ê上帝án-ni講：在早lín ê列祖，就是亞伯拉罕ê老父，Ná-ho̍k ê老父，Tha-la̍h，tiàm tī大河hit-pêng，服事別ê上帝。 3 我取lín ê祖亞伯拉罕tùi大河hit-pêng chhōa伊遍行迦南全地；koh hō͘伊ê kiáⁿ孫chōe-chōe，用以撒賞賜伊； 4 koh用雅各kap以掃賞賜以撒，將Se-jíⁿ山賞賜以掃做業；後來雅各kap伊ê kiáⁿ孫落去埃及。 5 我差摩西kap亞倫，我也降災厄tī埃及，照我tī hit中間所行ê；然後chhōa lín出來。 6 我chhōa lín ê列祖出埃及，lín就到海墘，埃及人chhōa in ê車kap馬兵追jip lín ê列祖到紅海； 7 in求叫耶和華，伊就用烏暗hē tī lín kap埃及人ê中間，koh hō͘海來淹密in；我tī埃及所行ê事lín親目看見；lín tiàm tī曠野chōe-chōe日。 8 我chhōa lín到khiā起tī約旦hit-pêng，A-mô͘-lī人ê地；in kap lín交戰；我將in交tī lín ê手；lín就得tio̍h in ê地；我剿滅in tī lín ê面前。 9 Hit時Mô͘-ap王Se-phoat ê kiáⁿ Pa-le̍k起來kap以色列交戰；差人去叫Pí-jíⁿ ê kiáⁿ Pa-lân來咒詛lín。 10 我m̄聽Pa-lân ê話；所以伊連連kā lín祝福；án-ni，我就救lín脫離伊ê手。 11 Lín過約旦，到耶利哥；耶利哥人、A-mô͘-lī人、Pí-lī-sé人、迦南人、Hek人、Kek-ka-sat人、Hi-bī人、Iâ-pò͘-su人，lóng kap lín交戰；我將in交tī lín ê手。 12 我差大隻蜂飛tī lín ê頭前，將A-mô͘-lī人兩個王，tùi lín ê面前趕出去；m̄是用你ê刀，也m̄是用你ê弓。 13 我賞賜lín ê土地，m̄是lín所tio̍h磨ê，也賞賜lín城，m̄是lín所起造ê，lín就tiàm tī hit中間；koh m̄是lín所栽種ê葡萄園橄欖-園，lín得tio̍h食伊ê果子。 14 Taⁿ lín tio̍h敬畏耶和華，誠心實意服事伊，將lín列祖tī大河hit-pêng kap tī埃及所服事ê上帝除去，來服事耶和華。 15 Nā是lín掠服事耶和華做m̄好，今á日lín tio̍h揀lín所beh服事ê；看是lín列祖tī大河hit-pêng所服事hiahê上帝，á是lín所khiā起in ê地， A-mô͘-lī人，hiahê上帝ah。論到我kap我ê家，阮決斷beh服事耶和華。 16 百姓應講，阮決斷無意思beh棄sak耶和華去服事別ê上帝。 17 因為耶和華阮ê上帝bat chhōa阮kap阮ê列祖tùi埃及地做奴才ê家出來，tī阮ê目睭前行hiahê大ê神蹟，tī阮所行一切ê路，所經過ê ta̍k國，lóng有保護阮。 18 耶和華也tī阮ê面前趕出lóng總ê百姓，趕出khiā起chitê所在ê A-mô͘-lī人；所以阮也beh服事耶和華，因為祂是阮ê上帝。 19 約書亞對百姓講：Lín bōe會服事耶和華，因為伊是聖ê上帝，決斷無容允用別ê上帝匹配伊，無beh赦免lín ê過失，lín ê罪惡。 20 Lín若離開耶和華去服事外邦ê上帝，耶和華tī降福氣hō͘ lín了後，beh oa̍t-tńg來降災厄hō͘ lín，滅無lín。 21 百姓ìn約書亞講：無lah；阮定tio̍h beh服事耶和華。 22 約書亞對百姓講：Lín揀耶和華beh服事伊，lín家己做lín ê干證。In應講，好，阮做干證。 23 約書亞講：Lín taⁿ tio̍h除去lín中間所有外邦ê上帝，hō͘ lín專心歸向耶和華以色列ê上帝。 24 百姓ìn約書亞講：阮beh服事耶和華阮ê上帝，聽thàn伊ê話。 25 Hit日約書亞就kap百姓立約，tī示劍kā in設立律例法度。 26 約書亞將chiahê話lóng寫tī上帝律法ê冊，koh將一塊大石頭khiā tī-hia，tī橡樹腳，耶和華聖所ê邊á。 27 約書亞對眾百姓講：看ah，chitê石頭beh做咱ê干證；因為伊有聽見耶和華所吩咐咱一切ê話，所以beh對lín做干證，驚了lín悖逆lín ê上帝。 28 約書亞就差百姓去；ta̍k人就tò去伊所得tio̍h ê地。 29 Chiahê事以後，耶和華ê奴僕，Lùn ê kiáⁿ約書亞，一百一十歲就死。 30 In就埋葬伊tī伊ê業ê界內，就是tī Í-hoat-liân山地ê Têng-ná-se-la̍h，tī Ka-si̍t山ê北勢。 31 約書亞tī-teh ê日，kap約書亞死了後，hiahê知耶和華為以色列人所行chiahê事ê長老iáu tī-teh ê時，以色列人服事耶和華。 32 以色列人tùi埃及所帶來約瑟ê骨頭，in埋葬伊tī示劍，就是雅各早前用一百銀tùi示劍ê老父Hap-boa̍t hiahê kiáⁿ所買ê地；就做約瑟kiáⁿ孫ê業。 33 亞倫ê kiáⁿ Í-lī-a-sat也死；in就埋葬伊tī伊ê kiáⁿ Hui-nî-hap所得tio̍h ê山崙á，就是tī Í-hoat-liân ê山地。
1 Iok-su-a chū-chi̍p Í-sek-lia̍t chèng chi-phài kàu tī Sī-kiàm, tiàu Í-sek-lia̍t ê tiúⁿ-ló, kap in ê cho̍k-tiúⁿ, sím-phòaⁿ-koaⁿ, í-ki̍p koaⁿ-tiúⁿ lâi; in chiū khiā tī Siōng-tè ê bīn-chêng. 2 Iok-su-a kā chèng peh-sìⁿ kóng, Iâ-hô-hoa Í-sek-lia̍t ê Siōng-tè án-ni kóng, Chāi-chá lín ê lia̍t-chó͘, chiū-sī A-pek-la̍h-hán ê lāu-pē, Ná-ho̍k ê lāu-pē, Tha-la̍h, tiàm tī Tōa-hô hit-pêng, ho̍k-sāi pa̍t ê siōng-tè. 3 Góa chhú lín ê chó͘ A-pek-la̍h-hán tùi Tōa-hô hit-pêng chhōa i piàn-kiâⁿ Ka-lâm choân-tōe; koh hō͘ i ê kiáⁿ-sun chōe-chōe, ēng Í-sat siúⁿ-sù i; 4 koh ēng Ngá-kok kap Í-sò siúⁿ-sù Í-sat, chiong Se-jíⁿ soaⁿ siúⁿ-sù Í-sò chòe-gia̍p; āu-lâi Ngá-kok kap i ê kiáⁿ-sun lo̍h-khì Ai-ki̍p. 5 Góa chhe Mô͘-se kap A-lûn, Góa iā kàng chai-ē tī Ai-ki̍p, chiàu Góa tī hí tiong-kan só͘ kiâⁿ ê; jiân-āu chhōa lín chhut-lâi. 6 Góa chhōa lín ê lia̍t-chó͘ chhut Ai-ki̍p, lín chiū kàu hái-kîⁿ, Ai-ki̍p lâng chhōa in ê chhia kap bé-peng tui-jip lín ê lia̍t-chó͘ kàu Âng-hái; 7 in kiû-kiò Iâ-hô-hoa, I chiū ēng o͘-àm hē tī lín kap Ai-ki̍p lâng ê tiong-kan, koh hō͘ hái lâi im-ba̍t in; Góa tī Ai-ki̍p só͘ kiâⁿ ê sū lín chhin-ba̍k khòaⁿ-kìⁿ; lín tiàm tī khòng-iá chōe-chōe ji̍t. 8 Góa chhōa lín kàu khiā-khí tī Iok-tàn hit-pêng, A-mô͘-lī lâng ê tōe; in kap lín kau-chiàn; Góa chiong in kau tī lín ê chhiú; lín chiū tit-tio̍h in ê tōe; Góa châu-bia̍t in tī lín ê bīn-chêng. 9 Hit-sî Mô͘-ap ông Se-phoat ê kiáⁿ Pa-le̍k khí-lâi kap Í-sek-lia̍t kau-chiàn; chhe lâng khì kiò Pí-jíⁿ ê kiáⁿ Pa-lân lâi chiù-chó͘ lín. 10 Góa m̄-thiaⁿ Pa-lân ê ōe; só͘-í i liân-liân kā lín chiok-hok; án-ni, Góa chiū kiù lín thoat-lī i ê chhiú. 11 Lín kè Iok-tàn, kàu Iâ-lī-ko; Iâ-lī-ko lâng, A-mô͘-lī lâng, Pí-lī-sé lâng, Ka-lâm lâng, Hek lâng, Kek-ka-sat lâng, Hi-bī lâng, Iâ-pò͘-su lâng, lóng kap lín kau-chiàn ; Góa chiong in kau tī lín ê chhiú. 12 Góa chhe tōa-chiah-phang pe tī lín ê thâu-chêng, chiong A-mô͘-lī lâng nn̄g ê ông, tùi lín ê bīn-chêng kóaⁿ-chhut-khì; m̄-sī ēng lí ê to, iā m̄-sī ēng lí ê keng. 13 Góa siúⁿ-sù lín ê thó͘-tōe, m̄-sī lín só͘ tio̍h-bôa-ê, iā siúⁿ-sù lín siâⁿ, m̄-sī lín só͘ khí-chō-ê, lín chiū tiàm tī hí tiong-kan; koh m̄-sī lín só͘ chai-chèng ê phû-tô-hn̂g kaⁿ-ná-hn̂g, lín tit-tio̍h chia̍h i ê ké-chí. 14 Taⁿ lín tio̍h kèng-ùi Iâ-hô-hoa, sêng-sim si̍t-ì ho̍k-sāi I, chiong lín lia̍t-chó͘ tī Tōa-hô hit-pêng kap tī Ai-ki̍p só͘ ho̍k-sāi ê siōng-tè tû-khì, lâi ho̍k-sāi Iâ-hô-hoa. 15 Nā sī lín lia̍h ho̍k-sāi Iâ-hô-hoa chòe m̄-hó, kin-á-ji̍t lín tio̍h kéng lín só͘ beh ho̍k-sāi-ê; khòaⁿ sī lín lia̍t-chó͘ tī Tôa-hô hit-pêng só͘ ho̍k-sāi hiah ê siōng-tè, á-sī lín só͘ khiā-khí in ê tōe, A-mô͘-lī lâng, hiah ê siōng-tè ah. Lūn-kàu góa kap góa ê ke, goán koat-toàn beh ho̍k-sāi Iâ-hô-hoa. 16 Peh-sìⁿ ìn kóng, Goán koat-toàn bô ì-sù beh khì-sak Iâ-hô-hoa khì ho̍k-sāi pa̍t ê siōng-tè. 17 In-ūi Iâ-hô-hoa goán ê Siōng-tè bat chhōa goán kap goán ê lia̍t-chó͘ tùi Ai-ki̍p tōe chòe lô͘-châi ê ke chhut-lâi, tī goán ê ba̍k-chiu-chêng kiâⁿ hiah ê tōa ê sîn-jiah, tī goán só͘ kiâⁿ it-chhè ê lō͘, só͘ keng-kè ê ta̍k-kok, lóng ū pó-hō͘ goán. 18 Iâ-hô-hoa iā tī goán ê bīn-chêng kóaⁿ-chhut lóng-chóng ê peh-sìⁿ, kóaⁿ-chhut khiā-khí chit ê só͘-chāi ê A-mô͘-lī lâng; só͘-í goán iā beh ho̍k-sāi Iâ-hô-hoa, in-ūi I sī goán ê Siōng-tè. 19 Iok-su-a tùi peh-sìⁿ kóng, Lín bōe-ōe ho̍k-sāi Iâ-hô-hoa, in-ūi I sī sèng ê Siōng-tè, koat-toàn bô iông-ún ēng pa̍t ê Siōng-tè phit-phòe I, bô beh sià-bián lín ê kè-sit, lín ê chōe-ok. 20 Lín nā lī-khui Iâ-hô-hoa khì ho̍k-sāi gōa-pang ê Siōng-tè, Iâ-hô-hoa tī kàng hok-khì hō͘ lín liáu-āu, beh oa̍t-tńg lâi kàng chai-ē hō͘ lín, bia̍t-bô lín. 21 Peh-sìⁿ ìn Iok-su-a kóng, Bô-lah; goán tiāⁿ-tio̍h beh ho̍k-sāi Iâ-hô-hoa. 22 Iok-su-a tùi peh-sìⁿ kóng, Lín kéng Iâ-hô-hoa beh ho̍k-sāi I, lín ka-kī chòe lín ê kan-chèng. In ìn kóng, Hó, goán chòe kan-chèng. 23 Iok-su-a kóng, Lín taⁿ tio̍h tû-khì lín tiong-kan só͘ ū gōa-pang ê siōng-tè, hō͘ lín choan-sim kui-ǹg Iâ-hô-hoa Í-sek-lia̍t ê Siōng-tè. 24 Peh-sìⁿ ìn Iok-su-a kóng, Goán beh ho̍k-sāi Iâ-hô-hoa goán ê Siōng-tè, thiaⁿ-thàn I ê ōe. 25 Hit-ji̍t Iok-su-a chiū kap peh-sìⁿ li̍p-iok, tī Sī-kiàm kā in siat-li̍p lu̍t-lē hoat-tō͘. 26 Iok-su-a chiong chiah ê ōe lóng siá tī Siōng-tè lu̍t-hoat ê chheh, koh chiong chi̍t-tè tōa chio̍h-thâu khiā tī-hia, tī siōng-chhiū kha, Iâ-hô-hoa sèng-só͘ ê piⁿ-á. 27 Iok-su-a tùi chèng peh-sìⁿ kóng, Khòaⁿ ah, chit ê chio̍h-thâu beh chòe lán ê kan-chèng; in-ūi i ū thiaⁿ-kìⁿ Iâ-hô-hoa só͘ hoan-hù lán it-chhè ê ōe, só͘-í beh tùi lín chòe kan-chèng, kiaⁿ-liáu lín pōe-ge̍k lín ê Siōng-tè. 28 Iok-su-a chiū chhe peh-sìⁿ khì; ta̍k-lâng chiū tò-khì i só͘ tit-tio̍h ê tōe. 29 Chiah ê sū í-āu, Iâ-hô-hoa ê lô͘-po̍k, Lùn ê kiáⁿ Iok-su-a, chi̍t-pah it-cha̍p hè chiū sí. 30 In chiū bâi-chòng i tī i ê gia̍p ê kài-lāi, chiū-sī tī Í-hoat-liân soaⁿ-tōe ê Têng-ná-se-la̍h, tī Ka-si̍t soaⁿ ê pak-sì. 31 Iok-su-a tī-teh ê ji̍t, kap Iok-su-a sí liáu-āu, hiah ê chai Iâ-hô-hoa ūi Í-sek-lia̍t lâng só͘ kiâⁿ chiah ê sū ê tióng-ló iáu tī-teh ê sî, Í-sek-lia̍t lâng ho̍k-sāi Iâ-hô-hoa. 32 Í-sek-lia̍t lâng tùi Ai-ki̍p só͘ tòa lâi Iok-sek ê kut-thâu, in bâi-chòng i tī Sī-kiàm, chiū-sī Ngá-kok chá-chêng ēng chi̍t-pah gûn tùi Sī-kiàm ê lāu-pē Hap-boa̍t hiah ê kiáⁿ só͘ bóe ê tōe; chiū chòe Iok-sek kiáⁿ-sun ê gia̍p. 33 A-lûn ê kiáⁿ Í-lī-a-sat iā sí; in chiū bâi-chòng i tī i ê kiáⁿ Hui-nî-hap só͘ tit-tio̍h ê soaⁿ-lūn-á, chiū-sī tī Í-hoat-liân ê soaⁿ-tōe.