1 因為有chōe-chōe人將咱中間已經成ê事bat kia̍h筆來排列做傳； 2 就是照hiahê做道理ê差用ê人，tùi起頭親目看見，來傳hō͘咱ê； 3 我已經tùi起頭詳細查考lóng總ê事，就想tio̍h照次序寫伊，來寄hō͘ Thê-o-hui-lô大人， 4 hō͘你知所學習ê ê確實。 5 當偤太王希律ê時，有屬A-pí-a班ê祭司，名撒迦利亞；伊ê bó͘是亞倫ê後裔，名叫以利沙白。 6 In兩人tī上帝ê面前是義ê人，照主一切ê誡命禮儀來行，無thang嫌。 7 總是in無kiáⁿ，因為以利沙白bōe懷孕，兩人年歲又koh老。 8 Hit時撒迦利亞照伊ê班列行祭司ê職tī上帝ê面前， 9 照祭司職份ê例抽籤得tio̍h入主ê殿燒香； 10 當燒香ê時，百姓kui陣tī外面祈禱。 11 主ê天使出現hō͘伊看，khiā tī香壇ê chiàⁿ-pêng。 12 撒迦利亞看見，就gông-ngia̍h，驚惶。 13 天使對伊講，撒迦利亞ah，莫得驚，因為你ê祈禱已經聽見lah；你ê bó͘以利沙白beh生kiáⁿ，你tio̍h kā伊號名叫約翰。 14 你beh歡喜koh快樂；chōe-chōe人也beh為tio̍h伊出世來歡喜。 15 因為伊tī主ê面前beh做大，葡萄酒kap一切ê酒lóng無lim；tùi老母ê胎就hō͘聖神充滿。 16 伊beh hō͘以色列後裔chōe-chōe人oa̍t-tńg來歸主，就是in ê上帝。 17 伊beh用以利亞ê心神kap才能行做頭tī主ê面前，hō͘做父ê oa̍t-tńg心ǹg tī kiáⁿ，hō͘悖逆ê人thàn義人ê智慧，為tio̍h主備辦合用ê百姓。 18 撒迦利亞tùi天使講，我tùi怎樣會知chitê事ah？因為我已經老，我ê bó͘年歲也老lah。 19 天使應伊講，我就是Ka-pek-lia̍t，khiā tī上帝ê面前ê，奉差kap你講話，報你chiahê好消息。 20 Taⁿ你beh靜靜bōe講話，到chiahê事得tio̍h成ê日，因為你m̄信我ê話，就是hiahê到期beh應驗ê話。 21 百姓thèng候撒迦利亞，奇怪伊久久tī殿內； 22 到出來bōe kap in講話，就知伊tī殿裡有看見異象；伊就對in比意思，竟然是啞口。 23 到伊照職份服事ê日滿，就tò去in tau。 24 Chiahê日了後，伊ê bó͘以利沙白有身，tiàm密五月日， 25 講，主tī看顧我ê日款待我親像án-ni，來洗我ê見笑tī人ê中間。 26 到六月日天使Ka-pek-lia̍t奉上帝所差到加利利一个城，名叫拿撒勒， 27 就近一个在室女，是已經配定tio̍h hō͘大衛家ê一人，名叫約瑟；chitê在室女名叫馬利亞。 28 天使入去對伊講，得tio̍h大恩ê人ah，平安；主kap你tī-teh。 29 馬利亞不止gông-ngia̍h伊ê話，想chitê請安是甚麼意思。 30 天使kā伊講，馬利亞ah，莫得驚，因為你得tio̍h上帝ê恩典。 31 Taⁿ你beh懷孕生kiáⁿ，tio̍h kā伊號名叫耶穌。 32 伊beh做大，稱做至koân ê ê Kiáⁿ；主上帝beh用伊ê祖大衛ê位hō͘伊。 33 伊beh做王tī雅各ê家到代代，伊ê國也無窮盡。 34 馬利亞tùi天使講，我bē有嫁人，怎樣beh有chitê事？ 35 天使應伊講，聖神beh臨到你，至koân ê ê權能beh致蔭你；所以對你生ê beh稱做聖，做上帝ê Kiáⁿ。 36 Koh你ê親戚以利沙白已經老，也懷孕；平素稱做bōe懷孕ê，taⁿ有身六月日lah； 37 因為上帝所講ê話，無一句無力。 38 馬利亞講，我是主ê女婢；願照你ê話應驗tī我。天使就離開伊去。 39 Tī chiahê日ê中間馬利亞起身，趕緊去山地，到偤太一个城， 40 入撒迦利亞ê厝，請安以利沙白。 41 以利沙白一下聽見馬利亞請安，胎孕tī腹肚內就tiô跳。以利沙白hō͘聖神充滿， 42 就大聲講，眾婦人人ê中間你得tio̍h福氣，你所懷孕ê也得tio̍h福氣。 43 我ê主ê老母來就近我，我tùi tá-lo̍h能得tio̍h án-ni ah？ 44 因為你請安ê聲一下入我ê耳孔，tī我腹肚內ê胎就歡喜來tiô跳。 45 信ê婦人人有福氣ah，因為主所kā伊講ê話beh應驗。 46 馬利亞講，我ê心尊敬主做大， 47 我ê神因為救我ê上帝來歡喜。 48 因為伊看顧女婢ê卑微； Tùi taⁿ以後萬世代beh講我有福氣。 49 因為hitê有權能ê為tio̍h我做大ê tāi-chì， 伊ê名是聖。 50 敬畏伊ê人伊憐憫in， 到代代。 51 伊bat用伊ê手出氣力， 心志驕傲ê人伊有趕散in。 52 有權能ê人，伊lut in ê位， 卑微ê人，伊升in做高。 53 Iau ê人伊用好物hō͘ in食到飽， 富ê人，伊hō͘ in空空tò去。 54 伊扶助伊ê奴僕以色列， 來記念憐憫， 55 (照伊對咱ê祖所講ê話) ， 來施落hō͘亞伯拉罕kap伊ê後裔到永世代。 56 馬利亞kap伊saⁿ-kap tòa約略有三月日，chiah tò去in tau。 57 以利沙白生產ê期已經到，就生kiáⁿ。 58 厝邊親戚聽見主大憐憫伊，就kap伊saⁿ-kap歡喜。 59 到第八日in來beh kā嬰á行割禮，ài照伊ê老父ê名號伊做撒迦利亞。 60 伊ê老母應講，無lah，tio̍h名伊做約翰。 61 In就對伊講，你ê親戚中無人號chitê名。 62 In就比意思問伊ê老父，ài kā伊號甚麼名。 63 伊ê老父討寫字ê板，寫講，伊ê名是約翰。大家奇怪。 64 撒迦利亞ê嘴liâm-piⁿ開，舌也tháu，就講話來o-ló上帝。 65 四圍khiā起ê人lóng驚。Chiahê一切ê話遍遍報揚tī偤太ê山地。 66 聽見ê人lóng將chiahê事khǹg tī心裡，講，Án-ni，chitê嬰á將來beh怎樣？因為主ê手kap伊tī-teh。 67 伊ê老父撒迦利亞就hō͘聖神充滿，做先知來講， 68 Tio̍h o-ló主，以色列ê上帝， 因為伊有看顧伊ê百姓來贖回伊； 69 替咱興起拯救ê角， Tī伊ê奴僕大衛ê家。 70 照伊tùi有世間以來用伊聖ê先知ê嘴所講ê， 71 就是救咱脫離對敵kap見若怨恨咱ê人ê手， 72 來行憐憫tī咱ê列祖， 來記念伊聖ê約； 73 就是kap咱ê祖亞伯拉罕所chiù ê chōa， 74 Hō͘咱已經脫離chiahê對敵ê手， 75 一世人tī伊ê面前用聖用義無驚來服事伊。 76 嬰á ah，你也beh稱做至koân ê ê先知， 因為你beh行tī主ê面前來備辦伊ê路， 77 Hō͘伊ê百姓tùi得tio̍h赦罪， 就知拯救ê恩， 78 為tio̍h咱ê上帝憐憫ê心， Tùi án-ni hō͘早起時ê日tùi頂面來到tī咱， 79 來照hiahê坐tī烏暗kap死蔭中ê人， Chhōa咱ê腳入平安ê路。 80 嬰á漸漸大，心神日日勇壯；tiàm tī曠野到顯明tī以色列ê日。
1 In-ūi ū chōe-chōe lâng chiong lán tiong-kan í-keng chiâⁿ ê sū bat kia̍h pit lâi pâi-lia̍t chòe toān; 2 chiū-sī chiàu hiah ê chòe tō-lí ê chhe-ēng ê lâng, tùi khí-thâu chhin-ba̍k khòaⁿ-kìⁿ, lâi thoân hō͘ lán ê; 3 góa í-keng tùi khí-thâu siông-sè chhâ-khó lóng-chóng ê sū, chiū siūⁿ tio̍h chiàu chhù-sū siá i, lâi kià hō͘ Thê-o-hui-lô tāi-jîn, 4 hō͘ lí chai só͘ ha̍k-si̍p ê ê khak-si̍t. 5 Tng Iû-thài ông Hi-lu̍t ê sî, ū sio̍k A-pí-a pan ê chè-si, miâ Sat-ka-lī-a; i ê bó͘ sī A-lûn ê hō͘-è, miâ kiò Í-lī-sa-pek. 6 In nn̄g lâng tī Siōng-tè ê bīn-chêng sī gī ê lâng, chiàu Chú it-chhè ê kài-bēng lé-gî lâi kiâⁿ, bô thang hiâm. 7 Chóng-sī in bô kiáⁿ, in-ūi Í-lī-sa-pek bōe hoâi-īn, nn̄g lâng nî-hè iū-koh lāu. 8 Hit sî Sat-ka-lī-a chiàu i ê pan-lia̍t kiâⁿ chè-si ê chit tī Siōng-tè ê bīn-chêng, 9 chiàu chè-si chit-hūn ê lē thiu-chhiam tit-tio̍h ji̍p Chú ê tiān sio hiuⁿ; 10 tng sio hiuⁿ ê sî, peh-sìⁿ kui tīn tī gōa-bīn kî-tó. 11 Chú ê thiⁿ-sài chhut-hiān hō͘ i khòaⁿ, khiā tī hiuⁿ-tôaⁿ ê chiàⁿ-pêng. 12 Sat-ka-lī-a khòaⁿ-kìⁿ, chiū gông-ngia̍h, kiaⁿ-hiâⁿ. 13 Thiⁿ-sài tùi i kóng, Sat-ka-lī-a ah, bo̍h-tit kiaⁿ, in-ūi lí ê kî-tó í-keng thiaⁿ-kìⁿ lah; lí ê bó͘ Í-lī-sa-pek beh siⁿ kiáⁿ, lí tio̍h kā i hō miâ kiò Iok-hān. 14 Lí beh hoaⁿ-hí koh khoài-lo̍k; chōe-chōe lâng iā beh ūi-tio̍h i chhut-sì lâi hoaⁿ-hí. 15 In-ūi i tī Chú ê bīn-chêng beh chòe tōa, phû-tô chiú kap it-chhè ê chiú lóng bô lim; tùi lāu-bú ê thai chiū hō͘ Sèng Sîn chhiong-móa. 16 I beh hō͘ Í-sek-lia̍t hō͘-è chōe-chōe lâng oa̍t-tńg lâi kui Chú, chiū-sī in ê Siōng-tè. 17 I beh ēng Í-lī-a ê sim-sîn kap châi-lêng kiâⁿ chòe-thâu tī Chú ê bīn-chêng, hō͘ chòe pē ê oa̍t-tńg sim ǹg tī kiáⁿ, hō͘ pōe-ge̍k ê lâng thàn gī lâng ê tì-hūi, ūi-tio̍h Chú pī-pān ha̍p-ēng ê peh-sìⁿ. 18 Sat-ka-lī-a tùi thiⁿ-sài kóng, Góa tùi cháiⁿ-iūⁿ ōe chai chit ê sū ah? In-ūi góa í-keng lāu, góa ê bó͘ nî-hè iā lāu lah. 19 Thiⁿ-sài ìn i kóng, Góa chiū-sī Ka-pek-lia̍t, khiā tī Siōng-tè ê bīn-chêng ê, hōng-chhe kap lí kóng ōe, pò lí chiah ê hó siau-sit. 20 Taⁿ lí beh chēng-chēng bōe kóng ōe, kàu chiah ê sū tit-tio̍h chiâⁿ ê ji̍t, in-ūi lí m̄ sìn góa ê ōe, chiū-sī hiah-ê kàu kî beh èng-giām ê ōe. 21 Peh-sìⁿ thèng-hāu Sat-ka-lī-a, kî-koài i kú-kú tī tiān-lāi; 22 kàu chhut-lâi bōe kap in kóng ōe, chiū chai i tī tiān-ni̍h ū khòaⁿ-kìⁿ īⁿ-siōng; i chiū tùi in pí ì-sù, kèng-jiân sī é-káu. 23 Kàu i chiàu chit-hūn ho̍k-sāi ê ji̍t móa, chiū tò-khì in tau. 24 Chiah ê ji̍t liáu-āu, i ê bó͘ Í-lī-sa-pek ū-sin, tiàm ba̍t gō͘ ge̍h ji̍t, 25 kóng, Chú tī khòaⁿ-kò͘ góa ê ji̍t khoán-thāi góa chhin-chhiūⁿ án-ni, lâi sóe góa ê kiàn-siàu tī lâng ê tiong-kan. 26 Kàu la̍k ge̍h ji̍t thiⁿ-sài Ka-pek-lia̍t hōng Siōng-tè só͘ chhe kàu Ka-lī-lī chi̍t ê siâⁿ, miâ kiò Ná-sat-le̍k, 27 chiū-kūn chi̍t ê chāi-sek-lú, sī í-keng phòe tiāⁿ-tio̍h hō͘ Tāi-pi̍t ke ê chi̍t lâng, miâ kiò Iok-sek; chit ê chāi-sek-lú miâ kiò Má-lī-a. 28 Thiⁿ-sài ji̍p-khì tùi i kóng, Tit-tio̍h tōa un ê lâng ah, pêng-an; Chú kap lí tī-teh. 29 Má-lī-a put-chí gông-ngia̍h i ê ōe, siūⁿ chit ê chhéng-an sī sím-mi̍h ì-sù. 30 Thiⁿ-sài kā i kóng, Má-lī-a ah, bo̍h-tit kiaⁿ, in-ūi lí tit-tio̍h Siōng-tè ê un-tián. 31 Taⁿ lí beh hoâi-īn siⁿ kiáⁿ, tio̍h kā I hō miâ kiò Iâ-so͘. 32 I beh chòe tōa, chheng chòe Chì-koâiⁿ-ê ê Kiáⁿ; Chú Siōng-tè beh ēng I ê chó͘ Tāi-pi̍t ê ūi hō͘ I. 33 I beh chòe ông tī Ngá-kok ê ke kàu tāi-tāi, I ê kok iā bô kiông-chīn. 34 Má-lī-a tùi thiⁿ-sài kóng, Góa bē ū kè lâng, cháiⁿ-iūⁿ beh ū chit ê sū? 35 Thiⁿ-sài ìn i kóng, Sèng Sîn beh lîm-kàu lí, Chì-koâiⁿ-ê ê koân-lêng beh tì-ìm lí; só͘-í tùi lí siⁿ-ê beh chheng chòe Sèng, chòe Siōng-tè ê Kiáⁿ. 36 Koh lí ê chhin-chhek Í-lī-sa-pek í-keng lāu, iā hoâi-īn; pêng-sò͘ chheng chòe bōe hoâi-īn ê, taⁿ ū-sin la̍k ge̍h ji̍t lah; 37 in-ūi Siōng-tè só͘ kóng ê ōe, bô chi̍t kù bô la̍t. 38 Má-lī-a kóng, Góa sī Chú ê lú-pī; goān chiàu lí ê ōe èng-giām tī góa. Thiⁿ-sài chiū lī-khui i khì. 39 Tī chiah ê ji̍t ê tiong-kan Má-lī-a khí-sin, kóaⁿ-kín khì soaⁿ-tōe, kàu Iû-thài chi̍t ê siâⁿ, 40 ji̍p Sat-ka-lī-a ê chhù, chhéng-an Í-lī-sa-pek. 41 Í-lī-sa-pek chi̍t-ē thiaⁿ-kìⁿ Má-lī-a chhéng-an, thai-īn tī pak-tó͘ lāi chiū tiô-thiàu. Í-lī-sa-pek hō͘ Sèng Sîn chhiong-móa, 42 chiū tōa siaⁿ kóng, Chèng hū-jîn-lâng ê tiong-kan lí tit-tio̍h hok-khì, lí só͘ hoâi-īn ê iā tit-tio̍h hok-khì. 43 Góa ê Chú ê lāu-bú lâi chiū-kūn góa, góa tùi tá-lo̍h ōe tit-tio̍h án-ni ah? 44 In-ūi lí chhéng-an ê siaⁿ chi̍t-ē ji̍p góa ê hī-khang, tī góa pak-tó͘ lāi ê thai chiū hoaⁿ-hí lâi tiô-thiàu. 45 Sìn ê hū-jîn-lâng ū hok-khì ah, in-ūi Chú só͘ kā i kóng ê ōe beh èng-giām. 46 Má-lī-a kóng, Góa ê sim chun-kèng Chú chòe tōa, 47 Góa ê sîn in-ūi kiù góa ê Siōng-tè lâi hoaⁿ-hí. 48 In-ūi I khòaⁿ-kò͘ lú-pī ê pi-bî; Tùi taⁿ í-āu bān sè-tāi beh kóng góa ū hok-khì. 49 In-ūi hit ê ū koân-lêng ê ūi-tio̍h góa chòe tōa ê tāi-chì, I ê miâ sī sèng. 50 Kèng-ùi I ê lâng I lîn-bín in, Kàu tāi-tāi. 51 I bat ēng I ê chhiú chhut khùi-la̍t, Sim-chì kiau-ngō͘ ê lâng I ū kóaⁿ-sòaⁿ in. 52 Ū koân-lêng ê lâng, I lut in ê ūi, Pi-bî ê lâng, I seng in chòe koâiⁿ. 53 Iau ê lâng I ēng hó mi̍h hō͘ in chia̍h kàu pá, Pù ê lâng, I hō͘ in khang-khang tò-khì. 54 I hû-chō͘ I ê lô͘-po̍k Í-sek-lia̍t, Lâi kì-liām lîn-bín, 55 (Chiàu I tùi lán ê chó͘ só͘ kóng ê ōe), Lâi si-lo̍h hō͘ A-pek-la̍h-hán kap i ê hō͘-è kàu éng sè-tāi. 56 Má-lī-a kap i saⁿ-kap tòa iok-lio̍k ū saⁿ ge̍h ji̍t, chiah tò-khì in tau. 57 Í-lī-sa-pek seng-sán ê kî í-keng kàu, chiū siⁿ kiáⁿ. 58 Chhù-piⁿ chhin-chhek thiaⁿ-kìⁿ Chú tōa lîn-bín i, chiū kap i saⁿ-kap hoaⁿ-hí. 59 Kàu tē poeh ji̍t in lâi beh kā eⁿ-á kiâⁿ kat-lé, ài chiàu i ê lāu-pē ê miâ hō i chòe Sat-ka-lī-a. 60 I ê lāu-bú ìn kóng, Bô lah, tio̍h miâ i chòe Iok-hān. 61 In chiū tùi i kóng, Lí ê chhin-chhek tiong bô lâng hō chit ê miâ. 62 In chiū pí ì-sù mn̄g i ê lāu-pē, ài kā i hō sím-mi̍h miâ. 63 I ê lāu-pē thó siá-jī ê pán, siá kóng, I ê miâ sī Iok-hān. Tāi-ke kî-koài. 64 Sat-ka-lī-a ê chhùi liâm-piⁿ khui, chi̍h iā tháu, chiū kóng ōe lâi o-ló Siōng-tè. 65 Sì-ûi khiā-khí ê lâng lóng kiaⁿ. Chiah ê it-chhè ê ōe piàn-piàn pò-iông tī Iû-thài ê soaⁿ-tōe. 66 Thiaⁿ-kìⁿ ê lâng lóng chiong chiah ê sū khǹg tī sim-ni̍h, kóng, Án-ni, chit-ê eⁿ-á chiong-lâi beh cháiⁿ-iūⁿ? In-ūi Chú ê chhiú kap i tī-teh. 67 I ê lāu-pē Sat-ka-lī-a chiū hō͘ Sèng Sîn chhiong-móa, chòe sian-ti lâi kóng, 68 Tio̍h o-ló Chú, Í-sek-lia̍t ê Siōng-tè, In-ūi I ū khòaⁿ-kò͘ I ê peh-sìⁿ lâi sio̍k-hôe i; 69 Thòe lán heng-khí chín-kiù ê kak, Tī I ê lô͘-po̍k Tāi-pi̍t ê ke. 70 Chiàu I tùi ū sè-kan í-lâi ēng I sèng ê sian-ti ê chhùi só͘ kóng ê, 71 Chiū-sī kiù lán thoat-lī tùi-te̍k kap kìⁿ-nā oàn-hūn lán ê lâng ê chhiú, 72 Lâi kiâⁿ lîn-bín tī lán ê lia̍t-chó͘, Lâi kì-liām I sèng ê iok; 73 Chiū-sī kap lán ê chó͘ A-pek-la̍h-hán só͘ chiù ê chōa, 74 Hō͘ lán í-keng thoat-lī chiah ê tùi-te̍k ê chhiú, 75 Chi̍t-sì-lâng tī I ê bīn-chêng ēng sèng ēng gī bô kiaⁿ lâi ho̍k-sāi I. 76 Eⁿ-á ah, lí iā beh chheng chòe Chì-koâiⁿ-ê ê sian-ti, In-ūi lí beh kiâⁿ tī Chú ê bīn-chêng lâi pī-pān I ê lō͘, 77 Hō͘ I ê peh-sìⁿ tùi tit-tio̍h sià-chōe, Chiū chai chín-kiù ê un, 78 Ūi-tio̍h lán ê Siōng-tè lîn-bín ê sim, Tùi án-ni hō͘ chá-khí sî ê ji̍t tùi téng-bīn lâi kàu tī lán, 79 Lâi chiò hiah-ê chē tī o͘-àm kap sí-ìm tiong ê lâng, Chhōa lán ê kha ji̍p pêng-an ê lō͘. 80 Eⁿ-á chiām-chiām tōa, sim-sîn ji̍t-ji̍t ióng-chòng; tiàm tī khòng-iá kàu hián-bêng tī Í-sek-lia̍t ê ji̍t.
1 當hit時該撒A-kó͘-sū-tok有出詔，命令天下lóng造家甲。 2 這頭一pái ê家甲是Ku-lí-liú做敘利亞總督ê時來做ê。 3 眾人去造家甲，ta̍k人tò去本城。 4 約瑟ê世系屬tī大衛ê家，所以tùi加利利ê拿撒勒城上去偤太，到大衛ê城，名叫伯利恆ê，beh kap伊所聘定ê馬利亞saⁿ-kap造家甲； 5 hit時馬利亞已經有身孕。 6 In tī hia ê時，生產ê期到。 7 就生頭chiūⁿ kiáⁿ，用布包伊，hō͘伊睏tī槽裡；因為客館無所在thang容允in。 8 Hit地方有顧羊ê tòa tī山裡，暝時守更顧in ê羊群。 9 主ê天使khiā tī in ê身邊，主ê榮光圍纍照in；顧羊ê大驚。 10 天使kā in講，莫得驚；因為我報lín大歡喜ê好消息，hō͘百姓lóng有份； 11 因為今á日tī大衛ê城已經為tio̍h lín生一个拯救ê，就是主基督。 12 Lín beh看見一个嬰á用布包，睏tī槽裡ê，chitê就是hō͘ lín做記號。 13 忽然有chōe-chōe天兵kap hitê天使saⁿ-kap tī-teh，o-ló上帝，講， 14 Tī極高ê位榮光歸tī上帝， 地上和平tī伊所歡喜ê人ê中間。 15 Chiahê天使離開in上天ê時，顧羊ê saⁿ-kap講，Taⁿ咱來去伯利恆，看所成ê事，就是主所報咱知ê。 16 就緊緊去，chhē-tio̍h馬利亞kap約瑟，koh看見嬰á睏tī槽裡。 17 看了，就將天使所對in講chitê嬰á ê事報人知。 18 聽見ê人lóng奇怪顧羊ê所對in講ê事。 19 獨獨馬利亞將chiahê話記tiâu-tiâu，心內常常teh想。 20 顧羊ê tò去，為tio̍h所聽見ê，所看見ê，就是天使所對in講ê，來歸榮光o-ló上帝。 21 到第八日，kā嬰á行割禮ê期，就號伊ê名叫耶穌，就是伊bē投胎ê時天使所號ê。 22 照摩西ê律例，in清氣ê日已經滿，就抱嬰á上耶路撒冷，beh獻hō͘主， 23 (照主ê律例所記載講，見若頭chiūⁿ ê ta-po͘-kiáⁿ beh稱做聖，歸tī主) ， 24 也beh獻祭，照主ê律例所講，用一對ê Ka-chui，á是兩隻鴿á-kiáⁿ。 25 Tú-tn̄g tī耶路撒冷有一人，名叫西門；chit人義koh敬虔，平時欣慕hitê安慰以色列ê；聖神tiàm tī伊。 26 伊bat得tio̍h聖神指示，知伊iáu-bē死beh事先看見主ê基督。 27 伊hō͘聖神感動就入殿；tú-á耶穌ê父母抱嬰á入來，beh kā伊照律法ê例來行， 28 hit時西門用手chih嬰á，o-ló上帝講， 29 主ah，taⁿ照祢ê話teh tháu放你ê奴僕 安然過世。 30 因為我ê目睭已經看見你ê拯救， 31 就是你所備辦tī萬百姓ê面前ê， 32 做光來照外邦， Koh做你以色列百姓ê榮光。 33 伊ê父kap伊ê母teh奇怪所論嬰á ê話； 34 西門kā in祝福，koh對伊ê老母馬利亞講，Chitê嬰á受設立beh hō͘以色列中chōe-chōe人跋倒，chōe-chōe人起來，也做受辯駁ê記號； 35 (koh你家己ê心也beh有劍鑿透過) ；hō͘ chōe-chōe人心內ê念頭會露出。 36 Koh有A-siat ê支派，Hoat-lōe-le̍k ê cha-bó͘-kiáⁿ，A-ná，伊是做先知，(年歲已經老，tùi在室女ê時嫁hō͘丈夫七年久， 37 就守寡八十四年) ，lóng無離開殿，禁食祈禱，暝日服事。 38 Tú-tú hit時伊進前，稱謝上帝，tùi見若欣慕耶路撒冷得tio̍h贖回ê人講起chitê嬰á ê事。 39 In照主ê律法行ta̍k項tāi-chì明白，tò去加利利，到本城拿撒勒。 40 嬰á漸漸大，日日勇壯，智慧充滿；上帝ê恩典kap伊tī-teh。 41 Ta̍k年pôaⁿ過節ê時伊ê父母去耶路撒冷。 42 到伊十二歲ê時，照節期ê例lóng上耶路撒冷。 43 節期已經明白，in tò去ê時，gín-ná耶穌iáu tòa tī耶路撒冷；伊ê父母m̄知。 44 phah算伊tī同行ê人ê中間，行一日ê路站；chiah tī親戚kap相識ê人ê中間chhē伊。 45 Chhē無tio̍h，就倒tńg去耶路撒冷chhē伊。 46 三日後chhē-tio̍h伊tī殿裡，坐tī hiahê先生ê中間，也teh聽，也teh問。 47 聽伊ê人lóng奇怪伊ê聰明kap伊ê應答。 48 父母看見伊就gông-ngia̍h；伊ê老母對伊講，Kiáⁿ ah，你啥事án-ni款待阮？你看，你ê父kap我傷心chhē你。 49 伊kā in講，啥事chhē我？Kiám m̄知我應該tī我ê父ê厝mah？ 50 In bōe曉得伊所kā in講ê話。 51 耶穌就kap in落去到拿撒勒，來承順in。伊ê老母將chiahê話lóng記tī心裡。 52 耶穌ê智慧kap年歲ná加添，上帝kap人ná疼伊。
1 Tng hit sî Kai-sat A-kó͘-sū-tok ū chhut chiàu, bēng-lēng thiⁿ-ē lóng chō ke-kah. 2 Che thâu chi̍t pái ê ke-kah sī Ku-lí-liú chòe Sū-lī-a chóng-tok ê sî lâi chòe ê. 3 Chèng lâng khì chō ke-kah, ta̍k lâng tò-khì pún siâⁿ. 4 Iok-sek ê sè-hē sio̍k tī Tāi-pi̍t ê ke, só͘-í tùi Ka-lī-lī ê Ná-sat-le̍k siâⁿ chiūⁿ-khì Iû-thài, kàu Tāi-pi̍t ê siâⁿ, miâ kiò Pek-lī-hêng ê, beh kap i só͘ phèng-tiāⁿ ê Má-lī-a saⁿ-kap chō ke-kah; 5 hit sî Má-lī-a í-keng ū sin-īn. 6 In tī hia ê sî seng-sán ê kî kàu. 7 Chiū siⁿ thâu-chiūⁿ kiáⁿ, ēng pò͘ pau I, hō͘ I khùn tī chô-ni̍h; in-ūi kheh-koán bô só͘-chāi thang iông-ún in. 8 Hit tōe-hng ū kò͘-iûⁿ ê tòa tī soaⁿ-ni̍h, mî-sî chiú-kiⁿ kò͘ in ê iûⁿ-kûn. 9 Chú ê thiⁿ-sài khiā tī in ê sin-piⁿ, Chú ê êng-kng ûi-lûi chiò in; kò͘-iûⁿ ê tōa kiaⁿ. 10 Thiⁿ-sài kā in kóng, Bo̍h-tit kiaⁿ; in-ūi góa pò lín tōa hoaⁿ-hí ê hó siau-sit, hō͘ peh-sìⁿ lóng ū hūn; 11 in-ūi kin-á-ji̍t tī Tāi-pi̍t ê siâⁿ í-keng ūi-tio̍h lín siⁿ chi̍t ê Chín-kiù-ê, chiū-sī Chú Ki-tok. 12 Lín beh khòaⁿ-kìⁿ chi̍t ê eⁿ-á ēng pò͘ pau, khùn tī chô-ni̍h ê, chit-ê chiū-sī hō͘ lín chòe kì-hō. 13 Hut-jiân ū chōe-chōe thian-peng kap hit ê thiⁿ-sài saⁿ-kap tī-teh, o-ló Siōng-tè, kóng, 14 Tī ke̍k koâiⁿ ê ūi êng-kng kui tī Siōng-tè, Tōe-chiūⁿ hô-pêng tī I só͘ hoaⁿ-hí ê lâng ê tiong-kan. 15 Chiah ê thiⁿ-sài lī-khui in chiūⁿ thiⁿ ê sî, kò͘-iûⁿ ê saⁿ-kap kóng, Taⁿ lán lâi khì Pek-lī-hêng, khòaⁿ só͘ chiâⁿ ê sū, chiū-sī Chú só͘ pò lán chai ê. 16 Chiū kín-kín khì, chhē-tio̍h Má-lī-a kap Iok-sek, koh khòaⁿ-kìⁿ eⁿ-á khùn tī chô-ni̍h. 17 Khòaⁿ-liáu, chiū chiong thiⁿ-sài só͘ tùi in kóng chit ê eⁿ-á ê sū pò lâng chai. 18 Thiaⁿ-kìⁿ ê lâng lóng kî-koài kò͘-iûⁿ ê só͘ tùi in kóng ê sū. 19 To̍k-to̍k Má-lī-a chiong chiah ê ōe kì tiâu-tiâu, sim-lāi siông-siông teh siūⁿ. 20 Kò͘-iûⁿ ê tò-khì, ūi-tio̍h só͘ thiaⁿ-kìⁿ ê, só͘ khòaⁿ-kìⁿ ê, chiū-sī thiⁿ-sài só͘ tùi in kóng ê, lâi kui êng-kng o-ló Siōng-tè. 21 Kàu tē poeh ji̍t, kā eⁿ-á kiâⁿ kat-lé ê kî, chiū hō I ê miâ kiò Iâ-so͘, chiū-sī I bē tâu-thai ê sî thiⁿ-sài só͘ hō ê. 22 Chiàu Mô͘-se ê lu̍t-lē, in chheng-khì ê ji̍t í-keng móa, chiū phō eⁿ-á chiūⁿ Iâ-lō͘-sat-léng, beh hiàn hō͘ Chú, 23 (chiàu Chú ê lu̍t-lē só͘ kì-chài kóng, Kìⁿ-nā thâu-chiūⁿ ê ta-po͘-kiáⁿ beh chheng chòe sèng, kui tī Chú), 24 iā beh hiàn-chè, chiàu Chú ê lu̍t-lē só͘ kóng, Ēng chi̍t tùi ê ka-chui, á-sī nn̄g chiah chíⁿ-á-kiáⁿ. 25 Tú-tn̄g tī Iâ-lō͘-sat-léng ū chi̍t lâng, miâ kiò Se-biān; chit lâng gī koh kèng-khiân, pêng-sî him-bō͘ hit ê an-ùi Í-sek-lia̍t ê; Sèng Sîn tiàm tī i. 26 I bat tit-tio̍h Sèng Sîn chí-sī, chai i iáu-bē sí beh tāi-seng khòaⁿ-kìⁿ Chú ê Ki-tok. 27 I hō͘ Sèng Sîn kám-tōng chiū ji̍p tiān; tú-á Iâ-so͘ ê pē-bú phō eⁿ-á ji̍p-lâi, beh kā I chiàu lu̍t-hoat ê lē lâi kiâⁿ, 28 hit sî Se-biān ēng chhiú chih eⁿ-á, o-ló Siōng-tè kóng, 29 Chú ah, taⁿ chiàu lí ê ōe teh tháu-pàng lí ê lô͘-po̍k An-jiân kè-sì. 30 In-ūi góa ê ba̍k-chiu í-keng khòaⁿ-kìⁿ lí ê chín-kiù, 31 Chiū-sī lí só͘ pī-pān tī bān peh-sìⁿ ê bīn-chêng ê, 32 Chòe kng lâi chiò gōa-pang, Koh chòe lí Í-sek-lia̍t peh-sìⁿ ê êng-kng. 33 I ê pē kap I ê bú teh kî-koài só͘ lūn eⁿ-á ê ōe; 34 Se-biān kā in chiok-hok, koh tùi I ê lāu-bú Má-lī-a kóng, Chit ê eⁿ-á siū siat-li̍p beh hō͘ Í-sek-lia̍t tiong chōe-chōe lâng poa̍h-tó, chōe-chōe lâng khí-lâi, iā chòe siū piān-pok ê kì-hō; 35 (koh lí ka-kī ê sim iā beh ū kiàm chha̍k thàu-kè); hō͘ chōe-chōe lâng sim-lāi ê liām-thâu ōe lō͘-chhut. 36 Koh ū A-siat ê chi-phài, Hoat-lōe-le̍k ê cha-bó͘-kiáⁿ, A-ná, i sī chòe sian-ti, (nî-hè í-keng lāu, tùi chāi-sek-lú ê sî kè hō͘ tiōng-hu chhit nî kú, 37 chiū chiú-kóaⁿ poeh-cha̍p-sì nî), lóng bô lī-khui tiān, kìm-chia̍h kî-tó, mî-ji̍t ho̍k-sāi. 38 Tú-tú hit sî i chìn-chêng, chheng-siā Siōng-tè, tùi kìⁿ-nā him-bō͘ Iâ-lō͘-sat-léng tit-tio̍h sio̍k-hôe ê lâng kóng-khí chit ê eⁿ-á ê sū. 39 In chiàu Chú ê lu̍t-hoat kiâⁿ ta̍k hāng tāi-chì bêng-pe̍k, tò-khì Ka-lī-lī, kàu pún siâⁿ Ná-sat-le̍k. 40 Eⁿ-á chiām-chiām tōa, ji̍t-ji̍t ióng-chòng, tì-hūi chhiong-móa; Siōng-tè ê un-tián kap I tī-teh. 41 Ta̍k nî pôaⁿ-kè-choeh ê sî I ê pē-bú khì Iâ-lō͘-sat-léng. 42 Kàu I cha̍p-jī hè ê sî, chiàu choeh-kî ê lē lóng chiūⁿ Iâ-lō͘-sat-léng. 43 Choeh-kî í-keng bêng-pe̍k, in tò-khì ê sî, gín-ná Iâ-so͘ iáu tòa tī Iâ-lō͘-sat-léng; I ê pē-bú m̄ chai. 44 Phah-sǹg I tī tâng kiâⁿ ê lâng ê tiong-kan, kiâⁿ chi̍t ji̍t ê lō͘-chām; chiah tī chhin-chhek kap saⁿ-bat ê lâng ê tiong-kan chhē I. 45 Chhē bô tio̍h, chiū tò-tńg khì Iâ-lō͘-sat-léng chhē I. 46 Saⁿ ji̍t āu chhē-tio̍h I tī tiān-ni̍h, chē tī hiah ê sian-siⁿ ê tiong-kan, iā teh thiaⁿ, iā teh mn̄g. 47 Thiaⁿ I ê lâng lóng kî-koài I ê chhang-miâ kap I ê ìn-tap. 48 Pē-bú khòaⁿ-kìⁿ I chiū gông-ngia̍h; I ê lāu-bú tùi I kóng, Kiáⁿ ah, lí siáⁿ-sū án-ni khoán-thāi goán? lí khòaⁿ, lí ê pē kap góa siong-sim chhē lí. 49 I kā in kóng, Siáⁿ-sū chhē góa? Kiám m̄ chai góa eng-kai tī góa ê Pē ê chhù mah? 50 In bōe hiáu-tit I só͘ kā in kóng ê ōe. 51 Iâ-so͘ chiū kap in lo̍h-khì kàu Ná-sat-le̍k, lâi sêng-sūn in. I ê lāu-bú chiong chiah ê ōe lóng kì tī sim-ni̍h. 52 Iâ-so͘ ê tì-hūi kap nî-hè ná ke-thiⁿ, Siōng-tè kap lâng ná thiàⁿ I.
1 Thê-pì-liû該撒坐位ê十五年本丟彼拉多做偤太ê總督，希律做加利利分封ê人君，伊ê兄弟腓力做Í-thó͘-lī-a kap Tek-lia̍p-khó-nî地方分封ê人君，Lū-sat-liap做A-pí-lī-nî分封ê人君， 2 A-ná kap Kai-a-hoat做祭司頭ê時，撒迦利亞ê Kiáⁿ約翰tī曠野裡，上帝ê話到tī伊。 3 伊就到約旦河ê四方，傳反悔ê洗禮，hō͘人得tio̍h赦罪。 4 親像先知以賽亞冊裡所記ê話，講， 有teh叫tī曠野ê，伊ê聲講， 備辦主ê路， 修直伊ê小路。 5 Chiahê山谷lóng beh thūn-tīⁿ， Chiahê大小ê山頭lóng beh hō͘伊低， 彎曲ê，beh hō͘伊直， Khâm-khia̍t ê，beh hō͘伊平； 6 凡有肉體ê beh看見上帝ê拯救。 7 Chōe-chōe人出來beh受約翰ê洗禮，伊就對in講，毒蛇ê類ah，是誰-á指示lín閃避將來ê受氣ah？ 8 所以lín tio̍h結hit號合tī反悔ê果子。莫得家己phah算，有亞伯拉罕做阮ê父；因為我kā lín講，上帝會tùi chiahê石頭出kiaⁿ孫hō͘亞伯拉罕。 9 Taⁿ斧頭已經hē tī樹頭；見若樹無結好果子ê，就chhò伊，hiat落火。 10 眾人問伊講，Án-ni，阮tio̍h怎樣做？ 11 伊應講，有兩領衫ê tio̍h分hō͘無ê；有物thang食ê，也tio̍h án-ni。 12 抽餉ê也來beh受洗禮，對伊講，先生ah，阮tio̍h怎樣做？ 13 伊對in講，定tio̍h ê餉以外，莫得加the̍h。 14 兵丁也問伊講，也阮tio̍h怎樣做？伊對in講，莫得勒索人，莫得歪人；tio̍h掠lín所得tio̍h ê糧做夠額。 15 百姓teh ǹg望ê時，眾人心內teh議論約翰kiám-chhái是基督， 16 約翰應眾人講，我用水kā lín行洗禮；獨獨有一个比我khah有權能ê beh來，就若tháu伊ê鞋帶我也bōe堪得；伊beh用聖神kap火kā lín洗。 17 伊ê手the̍h簸箕，beh將伊hit場一盡簸，收麥入伊ê倉；但是麥hiūⁿ就用bōe hoa ê火燒伊。 18 約翰另外用chōe-chōe項苦勸來傳福音hō͘百姓。 19 獨獨分封ê人君希律，因為伊ê兄弟ê bó͘ Hi-lô-tí ê緣故，koh因為所行lóng總ê pháiⁿ tāi，hō͘約翰責備， 20 taⁿ koh加一項，就是將約翰關tī監裡。 21 眾百姓已經受洗禮，耶穌也已經受洗禮，祈禱ê時，天開， 22 聖神降臨tī伊ê頂面，形狀親像鴿á；koh tùi天有聲講，你是我疼ê Kiáⁿ，我歡喜你。 23 耶穌出頭ê時約略三十歲；伊(照人看) 是約瑟ê Kiáⁿ，約瑟是Hi-lí ê Kiáⁿ， 24 Hi-lí是Má-thap ê Kiáⁿ，Má-thap是利未ê Kiáⁿ，利未是Be̍k-ki ê Kiáⁿ，Be̍k-ki是Ngá-ná ê Kiáⁿ，Ngá-ná是約瑟ê Kiáⁿ， 25 約瑟是Má-tāi-thê-a ê kiáⁿ，Má-tāi-thê-a是A-mô͘-sū ê kiáⁿ，A-mô͘-sū是Ná-hông ê kiáⁿ，Ná-hông是Í-sū-lí ê kiáⁿ，Í-sū-lí是Ná-kai ê kiáⁿ， 26 Ná-kai是Má-ap ê Kiáⁿ，Má-ap是Má-tāi-thê-a ê Kiáⁿ，Má-tāi-thê-a是Se-bí ê Kiáⁿ，Se-bí是約瑟ê Kiáⁿ，約瑟是偤大ê Kiáⁿ，偤大是Iok-a-ná ê Kiáⁿ， 27 Iok-a-ná是Lī-sat ê Kiáⁿ，Lī-sat是Só͘-lô-pa-pek ê Kiáⁿ，Só͘-lô-pa-pek是Sat-lia̍p-thiat ê Kiáⁿ，Sat-lia̍p-thiat是Nî-lī ê Kiáⁿ， 28 Nî-lī是Be̍k-ki ê Kiáⁿ，Be̍k-ki是A-tí ê Kiáⁿ，A-tí是Ko-song ê Kiáⁿ，Ko-song是Í-mô͘-tông ê Kiáⁿ，Í-mô͘-tông是Jíⁿ ê Kiáⁿ，Jíⁿ是Iok-sè ê Kiáⁿ， 29 Iok-sè是Í-lia̍t-sat ê Kiáⁿ，Í-lia̍t-sat是Iok-lēng ê Kiáⁿ，Iok-lēng是Má-thap ê Kiáⁿ，Má-thap是利未ê Kiáⁿ， 30 利未是西門ê Kiáⁿ，西門是偤大ê Kiáⁿ。偤大是約瑟ê Kiáⁿ，約瑟是Iok-lâm ê Kiáⁿ，Iok-lâm是Í-lī-a-kim ê Kiáⁿ， 31 Í-lī-a-kim是Bí-lī-a ê Kiáⁿ，Bí-lī-a是Mái-lâm ê Kiáⁿ，Mái-lâm是Má-ta̍t-thaⁿ ê Kiáⁿ，Má-ta̍t-thaⁿ是Ná-taⁿ ê Kiáⁿ，Ná-tan是大衛ê Kiáⁿ， 32 大衛是Iâ-se ê Kiáⁿ，Iâ-se是O-pek ê Kiáⁿ，O-pek是Pho-sū ê Kiáⁿ，Pho-sū是Sat-bûn ê Kiáⁿ，Sat-bûn是Ná-sūn ê Kiáⁿ， 33 Ná-sūn是A-bí-ná-ta̍t ê Kiáⁿ，A-bí-ná-ta̍t是A-lân ê Kiáⁿ，A-lân是Í-sū-lûn ê Kiáⁿ，Í-sū-lûn是Hoat-le̍k-sū ê Kiáⁿ，Hoat-le̍k-sū是偤大ê Kiáⁿ， 34 偤大是雅各ê Kiáⁿ，雅各是以撒ê Kiáⁿ，以撒是亞伯拉罕ê Kiáⁿ，亞伯拉罕是Thaⁿ-la̍h ê Kiáⁿ，Thaⁿ-la̍h是Ná-ho̍k ê Kiáⁿ， 35 Ná-ho̍k是Sat-lo̍k ê Kiáⁿ，Sat-lo̍k是Lia̍p-kó͘ ê Kiáⁿ，Lia̍p-kó͘是Hoat-le̍k ê Kiáⁿ，Hoat-le̍k是Hi-pek ê Kiáⁿ，Hi-pek是Sat-lia̍p ê Kiáⁿ， 36 Sat-lia̍p是Kai-lâm ê Kiáⁿ，Kai-lâm是A-hoat-sat ê Kiáⁿ，A-hoat-sat是Siám ê Kiáⁿ，Siám是挪亞ê Kiáⁿ，挪亞是La̍h-be̍k ê Kiáⁿ， 37 La̍h-be̍k是Má-thó͘-sat-la̍h ê Kiáⁿ，Má-thó͘-sat-la̍h是Í-lo̍k ê Kiáⁿ，Í-lo̍k是Ngá-lia̍t ê Kiáⁿ，Ngá-lia̍t是Má-le̍k-lia̍t ê Kiáⁿ，Má-le̍k-lia̍t是Kai-lâm ê Kiáⁿ，Kai-lâm是Í-ná-sū ê Kiáⁿ， 38 Í-ná-sū是Siat ê Kiáⁿ，Siat是亞當ê Kiáⁿ，亞當是上帝ê Kiáⁿ。
1 Thê-pì-liû Kai-sat chē ūi ê cha̍p-gō͘ nî Pún-tiu Pí-lia̍p-to chòe Iû-thài ê chóng-tok, Hi-lu̍t chòe Ka-lī-lī hun-hong ê jîn-kun, i ê hiaⁿ-tī Hui-le̍k chòe Í-thó͘-lī-a kap Tek-lia̍p-khó-nî tōe-hng hun-hong ê jîn-kun, Lū-sat-liap chòe A-pí-lī-nî hun-hong ê jîn-kun, 2 A-ná kap Kai-a-hoat chòe chè-si-thâu ê sî, Sat-ka-lī-a ê kiáⁿ Iok-hān tī khòng-iá-ni̍h, Siōng-tè ê ōe kàu tī i. 3 I chiū kàu Iok-tàn hô ê sì-hng, thoân hoán-hóe ê sóe-lé, hō͘ lâng tit-tio̍h sià-chōe. 4 Chhin-chhiūⁿ sian-ti Í-sài-a chheh-ni̍h só͘ kì ê ōe, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió lō͘. 5 Chiah ê soaⁿ-kok lóng beh thūn-tīⁿ, Chiah ê tōa sió ê soaⁿ-thâu lóng beh hō͘ i kē, Oan-khiau ê, beh hō͘ i ti̍t, Khâm-khia̍t ê, beh hō͘ i pîⁿ; 6 Hoān ū jio̍k-thé ê beh khòaⁿ-kìⁿ Siōng-tè ê chín-kiù. 7 Chōe-chōe lâng chhut-lâi beh siū Iok-hān ê sóe-lé, i chiū tùi in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah? 8 Só͘-í lín tio̍h kiat hit hō ha̍p tī hoán-hóe ê ké-chí. Bo̍h-tit ka-kī phah-sǹg, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán. 9 Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé. 10 Chèng lâng mn̄g i kóng, Án-ni, goán tio̍h cháiⁿ-iūⁿ chòe? 11 I ìn kóng, Ū nn̄g niá saⁿ ê tio̍h pun hō͘ bô ê; ū mi̍h thang chia̍h ê, iā tio̍h án-ni. 12 Thiu-hiòng ê iā lâi beh siū sóe-lé, tùi i kóng, Sian-siⁿ ah, goán tio̍h cháiⁿ-iūⁿ chòe? 13 I tùi in kóng, Tiāⁿ-tio̍h ê hiòng í-gōa, bo̍h-tit ke the̍h. 14 Peng-teng iā mn̄g i kóng, Iā goán tio̍h cháiⁿ-iūⁿ chòe? I tùi in kóng, Bo̍h-tit le̍k-sek lâng, bo̍h-tit oaiⁿ lâng; tio̍h lia̍h lín só͘ tit-tio̍h ê niû chòe kàu-gia̍h. 15 Peh-sìⁿ teh ǹg-bāng ê sî, chèng lâng sim-lāi teh gī-lūn Iok-hān kiám-chhái sī Ki-tok, 16 Iok-hān ìn chèng lâng kóng, Góa ēng chúi kā lín kiâⁿ sóe-lé; to̍k-to̍k ū chi̍t-ê pí góa khah ū koân-lêng ê beh lâi, chiū nā tháu I ê ôe-tòa góa iā bōe kham-tit; I beh ēng Sèng Sîn kap hé kā lín sóe. 17 I ê chhiú the̍h pòa-ki, beh chiong I hit tiûⁿ it-chīn pòa, siu be̍h ji̍p I ê chhng; nā-sī be̍h-hiūⁿ chiū ēng bōe hoa ê hé sio i. 18 Iok-hān lēng-gōa ēng chōe-chōe hāng khó͘-khǹg lâi thoân hok-im hō͘ peh-sìⁿ. 19 To̍k-to̍k hun-hong ê jîn-kun Hi-lu̍t, in-ūi i ê hiaⁿ-tī ê bó͘ Hi-lô-tí ê iân-kò͘, koh in-ūi só͘ kiâⁿ lóng-chóng ê pháiⁿ tāi, hō͘ Iok-hān chek-pī, 20 taⁿ koh ke chi̍t hāng, chiū-sī chiong Iok-hān koaiⁿ tī kaⁿ-ni̍h. 21 Chèng peh-sìⁿ í-keng siū sóe-lé, Iâ-so͘ iā í-keng siū sóe-lé, kî-tó ê sî, thiⁿ khui, 22 Sèng Sîn kàng-lîm tī I ê téng-bīn, hêng-chōng chhin-chhiūⁿ chíⁿ-á; koh tùi thiⁿ ū siaⁿ kóng, Lí sī góa thiàⁿ ê Kiáⁿ, góa hoaⁿ-hí lí. 23 Iâ-so͘ chhut-thâu ê sî iok-lio̍k saⁿ-cha̍p hè; I (chiàu lâng khòaⁿ) sī Iok-sek ê kiáⁿ, Iok-sek sī Hi-lí ê kiáⁿ, 24 Hi-lí sī Má-thap ê kiáⁿ, Má-thap sī Lī-bī ê kiáⁿ, Lī-bī sī Be̍k-ki ê kiáⁿ, Be̍k-ki sī Ngá-ná ê kiáⁿ, Ngá-ná sī Iok-sek ê kiáⁿ, 25 Iok-sek sī Má-tāi-thê-a ê kiáⁿ, Má-tāi-thê-a sī A-mô͘-sū ê kiáⁿ, A-mô͘-sū sī Ná-hông ê kiáⁿ, Ná-hông sī Í-sū-lí ê kiáⁿ, Í-sū-lí sī Ná-kai ê kiáⁿ, 26 Ná-kai sī Má-ap ê kiáⁿ, Má-ap sī Má-tāi-thê-a ê kiáⁿ, Má-tāi-thê-a sī Se-bí ê kiáⁿ, Se-bí sī Iok-sek ê kiáⁿ, Iok-sek sī Iû-tāi ê kiáⁿ, Iû-tāi sī Iok-a-ná ê kiáⁿ, 27 Iok-a-ná sī Lī-sat ê kiáⁿ, Lī-sat sī Só͘-lô-pa-pek ê kiáⁿ, Só͘-lô-pa-pek sī Sat-lia̍p-thiat ê kiáⁿ, Sat-lia̍p-thiat sī Nî-lī ê kiáⁿ, 28 Nî-lī sī Be̍k-ki ê kiáⁿ, Be̍k-ki sī A-tí ê kiáⁿ, A-tí sī Ko-song ê kiáⁿ, Ko-song sī Í-mô͘-tông ê kiáⁿ, Í-mô͘-tông sī Jíⁿ ê kiáⁿ, Jíⁿ sī Iok-sè ê kiáⁿ, 29 Iok-sè sī Í-lia̍t-sat ê kiáⁿ, Í-lia̍t-sat sī Iok-lēng ê kiáⁿ, Iok-lēng sī Má-thap ê kiáⁿ, Má-thap sī Lī-bī ê kiáⁿ, 30 Lī-bī sī Se-biān ê kiáⁿ, Se-biān sī Iû-tāi ê kiáⁿ. Iû-tāi sī Iok-sek ê kiáⁿ, Iok-sek sī Iok-lâm ê kiáⁿ, Iok-lâm sī Í-lī-a-kim ê kiáⁿ, 31 Í-lī-a-kim sī Bí-lī-a ê kiáⁿ, Bí-lī-a sī Mái-lâm ê kiáⁿ, Mái-lâm sī Má-ta̍t-thaⁿ ê kiáⁿ, Má-ta̍t-thaⁿ sī Ná-tan ê kiáⁿ, Ná-tan sī Tāi-pi̍t ê kiáⁿ, 32 Tāi-pi̍t sī Iâ-se ê kiáⁿ, Iâ-se sī O-pek ê kiáⁿ, O-pek sī Pho-sū ê kiáⁿ, Pho-sū sī Sat-bûn ê kiáⁿ, Sat-bûn sī Ná-sūn ê kiáⁿ, 33 Ná-sūn sī A-bí-ná-ta̍t ê kiáⁿ, A-bí-ná-ta̍t sī A-lân ê kiáⁿ, A-lân sī Í-sū-lûn ê kiáⁿ, Í-sū-lûn sī Hoat-le̍k-sū ê kiáⁿ, Hoat-le̍k-sū sī Iû-tāi ê kiáⁿ, 34 Iû-tāi sī Ngá-kok ê kiáⁿ, Ngá-kok sī Í-sat ê kiáⁿ, Í-sat sī A-pek-la̍h-hán ê kiáⁿ, A-pek-la̍h-hán sī Thaⁿ-la̍h ê kiáⁿ, Thaⁿ-la̍h sī Ná-ho̍k ê kiáⁿ, 35 Ná-ho̍k sī Sat-lo̍k ê kiáⁿ, Sat-lo̍k sī Lia̍p-kó͘ ê kiáⁿ, Lia̍p-kó͘ sī Hoat-le̍k ê kiáⁿ, Hoat-le̍k sī Hi-pek ê kiáⁿ, Hi-pek sī Sat-lia̍p ê kiáⁿ, 36 Sat-lia̍p sī Kai-lâm ê kiáⁿ, Kai-lâm sī A-hoat-sat ê kiáⁿ, A-hoat-sat sī Siám ê kiáⁿ, Siám sī Ná-a ê kiáⁿ, Ná-a sī La̍h-be̍k ê kiáⁿ, 37 La̍h-be̍k sī Má-thó͘-sat-la̍h ê kiáⁿ, Má-thó͘-sat-la̍h sī Í-lo̍k ê kiáⁿ, Í-lo̍k sī Ngá-lia̍t ê kiáⁿ, Ngá-lia̍t sī Má-le̍k-lia̍t ê kiáⁿ, Má-le̍k-lia̍t sī Kai-lâm ê kiáⁿ, Kai-lâm sī Í-ná-sū ê kiáⁿ, 38 Í-ná-sū sī Siat ê kiáⁿ, Siat sī A-tong ê kiáⁿ, A-tong sī Siōng-tè ê kiáⁿ.
1 耶穌受聖神充滿，tùi約旦河tò來；hō͘聖神chhōa伊tī曠野裡四十日久，hō͘魔鬼試伊； 2 chiahê日ê中間無食甚麼物，後來就iau。 3 魔鬼kā伊講，你若是上帝ê Kiáⁿ，tio̍h kah chitê石變做餅。 4 耶穌應伊講，有記載講，人ê活m̄-nā óa靠餅。 5 魔鬼koh chhōa伊peh上高，一目nih久用天下萬國hō͘伊看， 6 就kā伊講，Chitê一切ê權，kap in ê榮光我beh hō͘你；因為chitê已經交hō͘我，chhut-chāi我beh hō͘甚麼人就hō͘伊； 7 所以你若拜tī我ê面前，就lóng總是你ê。 8 耶穌應伊講，有記載講，Tio̍h拜主，你ê上帝，獨獨服事伊nā-tiāⁿ。 9 Koh chhōa伊到耶路撒冷，hō͘伊khiā tī殿ê尾溜，kā伊講，你若是上帝ê Kiáⁿ，tio̍h tùi chia家己tiô落去； 10 因為有記載講， 伊beh為tio̍h你命令伊ê天使保護你； 11 Koh講， In beh用手扶你， 免得你ê腳tak-tio̍h石。 12 耶穌應伊講，有講，莫得試主，你ê上帝。 13 魔鬼已經盡ta̍k項ê試，就暫時離開伊。 14 耶穌tī聖神ê權能倒tńg去加利利。伊ê名聲遍傳tī四圍ê地方。 15 伊tī in ê會堂教示，hō͘眾人o-ló伊。 16 耶穌到拿撒勒，就是伊長成ê所在；tī安歇日照伊平常ê法度日會堂，就khiā-teh beh讀。 17 有人將先知以賽亞ê冊hō͘伊；伊就掀開，chhē-tio̍h hit所在，記講， 18 主ê神臨到我， 因為伊用油抹我，hō͘我傳福音hō͘ sòng-hiong人； 伊有差我kā受掠ê人講，in會得tháu放，Kā chhiⁿ-mî ê講，in會得tio̍h koh光， 來tháu放受壓制ê人， 19 宣傳主歡喜ê年。 20 耶穌ha̍p冊，還執事，就坐teh；tī會堂ê眾人lóng注目看伊 21 伊就開嘴對in講，Chitê聖經ê應驗，lín今á日有聽見lah。 22 眾人lóng干證伊，奇怪伊ê嘴所出恩典ê話；就講，Chitê Kiám m̄是約瑟ê Kiáⁿ mah？ 23 伊就對in講，Lín的確引chitê俗語，tùi我講，醫生ah，你tio̍h家己醫；見若阮聽見你行tī迦百農ê，也tio̍h行tī chia，就是你ê本所在。 24 Koh講，我實在kā lín講，Bē有先知tī本所在hō͘人接納伊 25 但是我真實kā lín講，當以利亞ê時，天炕旱三年半，遍地大飢荒，hit時以色列中有chōe-chōe守寡人， 26 以利亞bē bat奉差去chhē in一人；只有去Se-tùn ê Sat-le̍k-tāi，chhē一个守寡人。 27 Koh先知Í-lī-sa ê時，以色列中有chōe-chōe thái-ko ê；其中無一人得tio̍h清氣，只有敘利亞人Nái-bān nā-tiāⁿ。 28 Tī會堂ê人聽見chiahê話，lóng滿心受氣； 29 就起來趕伊出城外，in ê城起tī山頂，眾人帶伊到山崁，beh kā伊chhia落去。 30 但是耶穌對in中間行過，做伊去。 31 落去到迦百農，就是加利利一个城；tī安歇日教示人。 32 人奇怪伊ê教示，因為伊ê話有權。 33 會堂內有一个犯tio̍h鬼ê人，大聲叫講， 34 Hàiⁿ，拿撒勒ê耶穌，阮kap你甚麼干涉，你來beh滅阮mah？我知你是誰，就是上帝ê聖ê。 35 耶穌責備伊講，你tio̍h靜靜，tùi伊出去。鬼就chhia-tó Hit人tī眾人ê中間，chiah出去，lóng無傷tio̍h伊。 36 眾人gông-ngia̍h saⁿ-kap議論講，這是甚麼話ah？因為伊用權柄kap能力命令chiahê邪神，in就出去。 37 伊ê名聲就遍傳tī四圍ê地方。 38 耶穌tùi會堂起來，入西門ê家。西門ê丈姆患tio̍h重ê熱病；人替伊求耶穌。 39 耶穌khiā-óa，àⁿ落責備伊ê熱病，熱就退；婦人人隨時起來，伺候in。 40 日落ê時，見若有病ê，不論患tio̍h甚麼病，人lóng tòa in來就近耶穌。耶穌hōaⁿ手tī in ta̍k人ê身上，來醫好in。 41 Koh有鬼tùi chōe-chōe人出去，叫講，你就是上帝ê Kiáⁿ。耶穌因為鬼bat伊是基督，就責備in，m̄准in講。 42 天光ê時耶穌去tī曠野ê所在；kui陣人chhē伊，就近伊，ài留伊，hō͘伊莫得離開in去。 43 但是伊對in講，我也tio̍h tī別個城傳上帝國ê福音，因為我奉差就是為tio̍h這。 44 伊就tī加利利chiahê會堂來宣傳。
1 Iâ-so͘ siū Sèng Sîn chhiong-móa, tùi Iok-tàn hô tò-lâi; hō͘ Sèng Sîn chhōa I tī khòng-iá-ni̍h sì-cha̍p ji̍t kú, hō͘ Mô͘-kúi chhì I; 2 chiah ê ji̍t ê tiong-kan bô chia̍h sím-mi̍h mi̍h, āu-lâi chiū iau. 3 Mô͘-kúi kā I kóng, Lí nā sī Siōng-tè ê Kiáⁿ, tio̍h kah chit ê chio̍h pìⁿ-chòe piáⁿ. 4 Iâ-so͘ ìn i kóng, Ū kì-chài kóng, Lâng ê oa̍h m̄ nā óa-khò piáⁿ. 5 Mô͘-kúi koh chhōa I peh-chiūⁿ koâiⁿ, chi̍t-ba̍k-nih kú ēng thiⁿ-ē bān kok hō͘ I khòaⁿ, 6 chiū kā I kóng, Chit ê it-chhè ê koân, kap in ê êng-kng góa beh hō͘ lí; in-ūi chit-ê í-keng kau hō͘ góa, chhut-chāi góa beh hō͘ sím-mi̍h lâng chiū hō͘ i; 7 só͘-í lí nā pài tī góa ê bīn-chêng, chiū lóng-chóng sī lí ê. 8 Iâ-so͘ ìn i kóng, Ū kì-chài kóng, Tio̍h pài Chú, lí ê Siōng-tè, to̍k-to̍k ho̍k-sāi I nā-tiāⁿ. 9 Koh chhōa I kàu Iâ-lō͘-sat-léng, hō͘ I khiā tī tiān ê bé-liu, kā I kóng, Lí nā sī Siōng-tè ê Kiáⁿ, tio̍h tùi chia ka-kī tiô-lo̍h-khì; 10 in-ūi ū kì-chài kóng, I beh ūi-tio̍h lí bēng-lēng I ê thiⁿ-sài pó-hō͘ lí; 11 Koh kóng, In beh ēng chhiú hû lí, Bián-tit lí ê kha tak-tio̍h chio̍h. 12 Iâ-so͘ ìn i kóng, Ū kóng, Bo̍h-tit chhì Chú, lí ê Siōng-tè. 13 Mô͘-kúi í-keng chīn ta̍k hāng ê chhì, chiū chiām-sî lī-khui I. 14 Iâ-so͘ tī Sèng Sîn ê koân-lêng tò-tńg-khì Ka-lī-lī. I ê miâ-siaⁿ piàn thoân tī sì-ûi ê tōe-hng. 15 I tī in ê hōe-tn̂g kà-sī, hō͘ chèng lâng o-ló I. 16 Iâ-so͘ kàu Ná-sat-le̍k, chiū-sī I tióng-sêng ê só͘-chāi; tī an-hioh-ji̍t chiàu I pêng-siông ê hoat-tō͘ ji̍p hōe-tn̂g, chiū khiā-teh beh tha̍k. 17 Ū lâng chiong sian-ti Í-sài-a ê chheh hō͘ I; I chiū hian-khui, chhē-tio̍h hit só͘-chāi, kì kóng, 18 Chú ê Sîn lîm-kàu góa, In-ūi I ēng iû boah góa, hō͘ góa thoân hok-im hō͘ sòng-hiong lâng; I ū chhe góa kā siū lia̍h ê lâng kóng, in ōe tit tháu-pàng, Kā chhiⁿ-mî ê kóng, in ōe tit-tio̍h koh kng, Lâi tháu-pàng siū ap-chè ê lâng, 19 Soan-thoân Chú hoaⁿ-hí ê nî. 20 Iâ-so͘ ha̍p chheh, hêng chip-sū, chiū chē-teh; tī hōe-tn̂g ê chèng lâng lóng chù-ba̍k khòaⁿ I. 21 I chiū khui chhùi tùi in kóng, Chit ê sèng-keng ê èng-giām, lín kin-á-ji̍t ū thiaⁿ-kìⁿ lah. 22 Chèng lâng lóng kan-chèng I, kî-koài I ê chhùi só͘ chhut un-tián ê ōe; chiū kóng, Chit-ê kiám m̄ sī Iok-sek ê kiáⁿ mah? 23 I chiū tùi in kóng, Lín tek-khak ín chit ê sio̍k-gú, tùi góa kóng, I-seng ah, lí tio̍h ka-kī i; kìⁿ-nā goán thiaⁿ-kìⁿ lí kiâⁿ tī Ka-pek-lông ê, iā tio̍h kiâⁿ tī chia, chiū-sī lí ê pún só͘-chāi. 24 Koh kóng, Góa si̍t-chāi kā lín kóng, Bē ū sian-ti tī pún só͘-chāi hō͘ lâng chiap-la̍p i. 25 Nā-sī góa chin-si̍t kā lín kóng, Tng Í-lī-a ê sî, thiⁿ khòng-hān saⁿ nî pòaⁿ, piàn-tōe tōa ki-hng, hit sî Í-sek-lia̍t tiong ū chōe-chōe chiú-kóaⁿ lâng, 26 Í-lī-a bē bat hōng-chhe khì chhē in chi̍t lâng; chí ū khì Se-tùn ê Sat-le̍k-tāi, chhē chi̍t ê chiú-kóaⁿ lâng. 27 Koh sian-ti Í-lī-sa ê sî, Í-sek-lia̍t tiong ū chōe-chōe thái-ko ê; kî-tiong bô chi̍t lâng tit-tio̍h chheng-khì, chí-ū Sū-lī-a lâng Nái-bān nā-tiāⁿ. 28 Tī hōe-tn̂g ê lâng thiaⁿ-kìⁿ chiah ê ōe, lóng móa-sim siū-khì; 29 chiū khí-lâi kóaⁿ I chhut siâⁿ-gōa, in ê siâⁿ khí tī soaⁿ-téng, chèng lâng tòa I kàu soaⁿ-khàm, beh kā I chhia-lo̍h-khì. 30 Nā-sī Iâ-so͘ tùi in tiong-kan kiâⁿ-kè, chòe I khì. 31 Lo̍h-khì kàu Ka-pek-lông, chiū-sī Ka-lī-lī chi̍t ê siâⁿ; tī an-hioh-ji̍t kà-sī lâng. 32 Lâng kî-koài I ê kà-sī, in-ūi I ê ōe ū koân. 33 Hōe-tn̂g lāi ū chi̍t ê hoān-tio̍h kúi ê lâng, tōa siaⁿ kiò kóng, 34 Hàiⁿ, Ná-sat-le̍k ê Iâ-so͘, goán kap lí sím-mi̍h kan-sia̍p, lí lâi beh bia̍t goán mah? Góa chai lí chī-chūi, chiū-sī Siōng-tè ê Sèng-ê. 35 Iâ-so͘ chek-pī i kóng, Lí tio̍h chēng-chēng, tùi i chhut-khì. Kúi chiū chhia-tó hit lâng tī chèng lâng ê tiong-kan, chiah chhut-khì, lóng bô siong-tio̍h i. 36 Chèng lâng gông-ngia̍h saⁿ-kap gī-lūn kóng, Che sī sím-mi̍h ōe ah? in-ūi I ēng koân-pèng kap lêng-le̍k bēng-lēng chiah ê siâ-sîn, in chiū chhut-khì. 37 I ê miâ-siaⁿ chiū piàn-thoân tī sì-ûi ê tōe-hng. 38 Iâ-so͘ tùi hōe-tn̂g khí-lâi, ji̍p Se-bûn ê ke. Se-bûn ê tiūⁿ-ḿ hoān-tio̍h tāng ê jia̍t-pīⁿ; lâng thòe i kiû Iâ-so͘. 39 Iâ-so͘ khiā-óa, àⁿ-lo̍h chek-pī i ê jia̍t-pīⁿ, jia̍t chiū thè; hū-jîn-lâng sûi-sî khí-lâi, su-hāu in. 40 Ji̍t lo̍h ê sî, kìⁿ-nā ū pīⁿ ê, put-lūn hoān-tio̍h sím-mi̍h pīⁿ, lâng lóng tòa in lâi chiū-kūn Iâ-so͘. Iâ-so͘ hōaⁿ chhiú tī in ta̍k lâng ê sin-chiūⁿ, lâi i-hó in. 41 Koh ū kúi tùi chōe-chōe lâng chhut-khì, kiò kóng, Lí chiū-sī Siōng-tè ê Kiáⁿ. Iâ-so͘ in-ūi kúi bat I sī Ki-tok, chiū chek-pī in, m̄ chún in kóng. 42 Thiⁿ-kng ê sî Iâ-so͘ khì tī khòng-iá ê só͘-chāi; kui tīn lâng chhē I, chiū-kūn I, ài lâu I, hō͘ I bo̍h-tit lī-khui in khì. 43 Nā-sī I tùi in kóng, Góa iā tio̍h tī pa̍t ê siâⁿ thoân Siōng-tè kok ê hok-im, in-ūi góa hōng-chhe chiū-sī ūi-tio̍h che. 44 I chiū tī Ka-lī-lī chiah ê hōe-tn̂g lâi soan-thoân.
1 當眾人oe-khoeh伊，teh聽上帝ê道理ê時，耶穌khiā tī Kek-nî-sat-le̍k湖邊， 2 看見兩隻船tī湖邊，討魚人離開船teh洗網。 3 其中一隻是西門ê，耶穌上去，請伊將船放khah開。就坐tī船裡教示眾人。 4 講soah就對西門講，放到深ê所在，拋網討魚。 5 西門應講，先生，阮thong暝tio̍h磨，討lóng無；總是因為你ê話，我就beh拋網。 6 In拋落去，就圍tio̍h魚真chōe，網到beh裂； 7 就ia̍t別隻船ê同伴來tàu saⁿ-kāng；in就來，拾魚滿兩隻船到beh沉落去。 8 西門彼得看見án-ni，就仆tī耶穌ê腳下講，主ah，離開我，我是有罪ê人。 9 因為西門kap同tī-teh ê人，為tio̍h in一下拋落去所掠tio̍h ê魚，無m̄ gông-ngia̍h； 10 西門ê同伴，Se-pí-thài ê Kiáⁿ雅各、約翰，也是án-ni。耶穌tùi西門講，莫得驚，tùi chit-tia̍p了後你beh得tio̍h人。 11 In已經拖船óa岸，就放sak一切來tè伊。 12 耶穌tī一个城，tú-tn̄g有一人遍身thái-ko，看見伊就面仆tī地裡，求講，主ah，你若肯，就會hō͘我清氣。 13 伊伸手摸伊講，我肯，你thang清氣。Thái-ko即時除去。 14 耶穌吩咐伊莫得kā人講；獨獨tio̍h去，將本身hō͘祭司驗，也為tio̍h你得tio̍h清氣獻摩西所吩咐ê，來做證據tī人。 15 總是伊ê名聲益發報揚；kui大陣ê人聚集beh聽，也beh得tio̍h醫好in ê病。 16 但是耶穌退去，tiàm tī曠野祈禱。 17 有一日耶穌teh教示人；有法利賽人kap教律法ê先生tī hia teh坐，in是tùi加利利ta̍k鄉社kap偤太kap耶路撒冷來ê；主ê權能kap耶穌tī-teh，hō͘伊醫好人。 18 Tú-tn̄g有人將舖á扛piàn-sūi ê來，ài beh扛入去hē tī伊ê面前。 19 因為人chōe，chhē無縫thang扛入去；就上厝頂，tùi厝蓋中將人連舖á墜落去，hē tī中央，tī耶穌ê面前。 20 耶穌看見in ê信就講，某人ah，你ê罪赦lah。 21 經學士kap法利賽人就議論講，Chitê講僭權lām-sám ê話ê是是誰 ah？上帝以外，是誰能赦罪ah？ 22 耶穌知in ê議論，就應講，Lín心內teh議論甚麼ah？ 23 講，你ê罪赦á是講，你起來行，tá-lo̍h一項khah快？ 24 總是beh hō͘ lín知人子tī地裡有權thang赦免罪，(就kā 半遂ê講) ，我kā你講，起來，giâ你ê舖á tò去你ê厝。 25 Hit人tī眾人ê面前即時起來，giâ伊所睏ê，tò去伊ê厝，歸榮光上帝。 26 眾人lóng gông-ngia̍h，也歸榮光上帝；koh滿心驚惶講，咱今á日看見意外ê事。 27 Chiahê tāi-chì了後，耶穌出去，看見一个抽餉ê，名叫利未，坐tī餉關；就kā伊講，Tè我。 28 伊就放sak一切，起來tè伊 29 利未為tio̍h伊辦大筵席tī in tau；有抽餉ê以及別人chōe-chōe kap in同坐桌。 30 法利賽人kap in ê經學士tùi伊ê學生nga̍uh-nga̍uh念，講，Lín啥事kap抽餉ê以及pháiⁿ人lim食ah？ 31 耶穌應講，勇壯ê人無欠用醫生，但是破病ê人就tio̍h； 32 我來m̄是beh招義人，是beh招pháiⁿ人來反悔。 33 In對伊講，約翰ê學生ta̍uh-ta̍uh禁食祈禱；法利賽ê學生也是án-ni；但是你ê學生也lim也食。 34 耶穌對in講，新kiáⁿ婿kap賀娶ê人saⁿ-kap tī-teh，kiám會hō͘賀娶ê人禁食mah？ 35 但是日子beh到，新kiáⁿ婿對in中間無--去；tī hiahê日in就beh禁食。 36 Koh用譬喻對in講，無人拆新衫來補舊衫；若án-ni，就拆破新衫，koh所補hit塊新ê無合tī舊ê。 37 也無人用新酒tóe tī舊皮囊；若án-ni，就新酒beh爆裂皮囊，酒漏，lông也phah pháiⁿ。 38 獨獨新酒tio̍h入tī新ê皮囊。 39 Koh無人lim舊酒也ài hitê新ê；因為講，舊ê是好。
1 Tng chèng lâng oe-khoeh I, teh thiaⁿ Siōng-tè ê tō-lí ê sî, Iâ-so͘ khiā tī Kek-nî-sat-le̍k ô͘-piⁿ, 2 khòaⁿ-kìⁿ nn̄g chiah chûn tī ô͘-piⁿ, thó-hî lâng lī-khui chûn teh sóe bāng. 3 Kî-tiong chi̍t chiah sī Se-bûn ê, Iâ-so͘ chiūⁿ-khì, chhiáⁿ i chiong chûn pàng khah khui. Chiū chē tī chûn-ni̍h kà-sī chèng lâng. 4 Kóng soah chiū tùi Se-bûn kóng, Pàng kàu chhim ê só͘-chāi, pha bāng thó-hî. 5 Se-bûn ìn kóng, Sian-siⁿ, goán thong mî tio̍h-bôa, thó lóng bô; chóng-sī in-ūi lí ê ōe, góa chiū beh pha bāng. 6 In pha-lo̍h-khì, chiū ûi-tio̍h hî chin chōe, bāng kàu beh li̍h; 7 chiū ia̍t pa̍t chiah chûn ê tâng-phōaⁿ lâi tàu saⁿ-kāng; in chiū lâi, khioh hî móa nn̄g chiah chûn kàu beh tîm-lo̍h-khì. 8 Se-bûn Pí-tek khòaⁿ-kìⁿ án-ni, chiū phak tī Iâ-so͘ ê kha-ē kóng, Chú ah, lī-khui góa, góa sī ū chōe ê lâng. 9 In-ūi Se-bûn kap tâng tī-teh ê lâng, ūi-tio̍h in chi̍t-ē pha-lo̍h-khì só͘ lia̍h-tio̍h ê hî, bô m̄ gông-ngia̍h; 10 Se-bûn ê tâng-phōaⁿ, Se-pí-thài ê kiáⁿ Ngá-kok, Iok-hān, iā sī án-ni. Iâ-so͘ tùi Se-bûn kóng, Bo̍h-tit kiaⁿ, tùi chit tia̍p liáu-āu lí beh tit-tio̍h lâng. 11 In í-keng thoa chûn óa hōaⁿ, chiū pàng-sak it-chhè lâi tè I. 12 Iâ-so͘ tī chi̍t ê siâⁿ, tú-tn̄g ū chi̍t lâng piàn-sin thái-ko, khòaⁿ-kìⁿ I chiū bīn phak tī tōe-ni̍h, kiû kóng, Chú ah, lí nā khéng, chiū ōe hō͘ góa chheng-khì. 13 I chhun chhiú bong i kóng, Góa khéng, lí thang chheng-khì. Thái-ko chek-sî tû-khì. 14 Iâ-so͘ hoan-hù i bo̍h-tit kā lâng kóng; to̍k-to̍k tio̍h khì, chiong pún-sin hō͘ chè-si giām, iā ūi-tio̍h lí tit-tio̍h chheng-khì hiàn Mô͘-se só͘ hoan-hù ê, lâi chòe chèng-kù tī lâng. 15 Chóng-sī I ê miâ-siaⁿ it-hoat pò-iông; kui tōa tīn ê lâng chū-chi̍p beh thiaⁿ, iā beh tit-tio̍h i-hó in ê pīⁿ. 16 Nā-sī Iâ-so͘ thè-khì, tiàm tī khòng-iá kî-tó. 17 Ū chi̍t ji̍t Iâ-so͘ teh kà-sī lâng; ū Hoat-lī-sài lâng kap kà lu̍t-hoat ê sian-siⁿ tī hia teh chē, in sī tùi Ka-lī-lī ta̍k hiuⁿ-siā kap Iû-thài kap Iâ-lō͘-sat-léng lâi ê; Chú ê koân-lêng kap Iâ-so͘ tī-teh, hō͘ I i-hó lâng. 18 Tú-tn̄g ū lâng chiong pho͘-á kng piàn-sūi ê lâi, ài beh kng ji̍p-khì hē tī I ê bīn-chêng. 19 In-ūi lâng chōe, chhē bô phāng thang kng ji̍p-khì; chiū chiūⁿ chhù-téng, tùi chhù-kòa tiong chiong lâng liân pho͘-á tūi-lo̍h-khì, hē tī tiong-ng, tī Iâ-so͘ ê bīn-chêng. 20 Iâ-so͘ khòaⁿ-kìⁿ in ê sìn chiū kóng, Bó͘ lâng ah, lí ê chōe sià lah. 21 Keng-ha̍k-sū kap Hoat-lī-sài lâng chiū gī-lūn kóng, Chit ê kóng chhiàm-koân lām-sám ê ōe ê sī chī-chūi ah? Siōng-tè í-gōa, chī-chūi ōe sià-chōe ah? 22 Iâ-so͘ chai in ê gī-lūn, chiū ìn kóng, Lín sim-lāi teh gī-lūn sím-mi̍h ah? 23 Kóng, Lí ê chōe sià á-sī kóng, Lí khí-lâi kiâⁿ, tá-lo̍h chi̍t hāng khah khoài? 24 Chóng-sī beh hō͘ lín chai Jîn-chú tī tōe-ni̍h ū koân thang sià-bián chōe, (chiū kā piàn-sūi ê kóng), Góa kā lí kóng, Khí-lâi, giâ lí ê pho͘-á tò-khì lí ê chhù. 25 Hit lâng tī chèng lâng ê bīn-chêng chek-sî khí-lâi, giâ i só͘ khùn ê, tò-khì i ê chhù, kui êng-kng Siōng-tè. 26 Chèng lâng lóng gông-ngia̍h, iā kui êng-kng Siōng-tè; koh móa-sim kiaⁿ-hiâⁿ kóng, Lán kin-á-ji̍t khòaⁿ-kìⁿ ì-gōa ê sū. 27 Chiah ê tāi-chì liáu-āu, Iâ-so͘ chhut-khì, khòaⁿ-kìⁿ chi̍t ê thiu-hiòng ê, miâ kiò Lī-bī, chē tī hiòng-koan; chiū kā i kóng, Tè góa. 28 I chiū pàng-sak it-chhè, khí-lâi tè I. 29 Lī-bī ūi-tio̍h I pān tōa iân-sia̍h tī in tau; ū thiu-hiòng ê í-ki̍p pa̍t lâng chōe-chōe kap in tâng chē toh. 30 Hoat-lī-sài lâng kap in ê keng-ha̍k-sū tùi I ê ha̍k-seng nga̍uh-nga̍uh-liām, kóng, Lín siáⁿ-sū kap thiu-hiòng ê í-ki̍p pháiⁿ lâng lim-chia̍h ah? 31 Iâ-so͘ ìn kóng, Ióng-chòng ê lâng bô khiàm-ēng i-seng, nā-sī phòa-pīⁿ ê lâng chiū tio̍h; 32 góa lâi m̄ sī beh chio gī lâng, sī beh chio pháiⁿ lâng lâi hoán-hóe. 33 In tùi I kóng, Iok-hān ê ha̍k-seng ta̍uh-ta̍uh kìm-chia̍h kî-tó; Hoat-lī-sài ê ha̍k-seng iā sī án-ni; nā-sī lí ê ha̍k-seng iā lim iā chia̍h. 34 Iâ-so͘ tùi in kóng, Sin-kiáⁿ-sài kap hō-chhōa ê lâng saⁿ-kap tī-teh, kiám ōe hō͘ hō-chhōa ê lâng kìm-chia̍h mah? 35 Nā-sī ji̍t-chí beh kàu, sin-kiáⁿ-sài tùi in tiong-kan bô--khì; tī hiah ê ji̍t in chiū beh kìm-chia̍h. 36 Koh ēng phì-jū tùi in kóng, Bô lâng thiah sin saⁿ lâi pó͘ kū saⁿ; nā án-ni, chiū thiah-phòa sin saⁿ, koh só͘ pó͘ hit tè sin ê bô ha̍h tī kū ê. 37 Iā bô lâng ēng sin chiú tóe tī kū phê-lông; nā án-ni, chiū sin chiú beh piak-li̍h phê-lông, chiú lāu, lông iā phah pháiⁿ. 38 To̍k-to̍k sin chiú tio̍h ji̍p tī sin ê phê-lông. 39 Koh bô lâng lim kū chiú iā ài hit ê sin ê; in-ūi kóng, Kū ê sī hó.
1 有一个安歇日耶穌tùi麥園經過，伊ê學生摘麥穗，用手揉伊來食。 2 有法利賽幾nā人講，安歇日所m̄應該行ê，lín啥事行伊？ 3 耶穌應講，大衛kap跟tè ê人Iau ê時所行ê，lín bē讀tio̍h mah？ 4 伊入上帝ê厝，the̍h排列ê餅來食，koh hō͘伊跟tè ê人；chit號餅，若m̄是祭司，就lóng m̄應該食。 5 Koh kā in講，人子也是安歇日ê主。 6 Koh一个安歇日，耶穌入會堂教示；tī hia有一人伊ê chiàⁿ手枯焦。 7 經學士kap法利賽人當看伊tī安歇日beh醫病á無；意思是ài chhē縫thang告伊。 8 耶穌知in ê意思，就kā hitê手枯焦ê人講，起來，khiā tī中央；伊就起來khiā。 9 耶穌就對in講，我問lín，tī安歇日行好事行pháiⁿ事，救性命害性命，tá-lo̍h一項khah合宜ah？ 10 就四界看眾人，kā hit人講，伸你ê手。伊伸出去；手就好好。 11 Hiah-ê人滿心受氣；saⁿ-kap議論tio̍h怎樣來辦耶穌。 12 當hit時耶穌出去山裡祈禱，thong暝祈求上帝。 13 到天光就叫伊ê學生來；對in中間揀十二人，稱in做使徒； 14 有西門，耶穌koh號伊ê名做彼得，kap伊ê兄弟安得烈，koh有雅各kap約翰，腓力kap巴多羅買； 15 馬太kap多馬，亞勒腓ê Kiáⁿ雅各kap稱做西羅底ê西門， 16 雅各ê Kiáⁿ偤大，kap賣先生ê加略人偤大。 17 耶穌kap in落來khiā tī平ê所在，有伊chōe-chōe ê學生kap Kui大陣ê百姓，tùi偤太全地kap耶路撒冷以及Chhui-lô Se-tùn沿海墘ê地來beh聽伊，也beh得tio̍h醫好in ê病； 18 koh有hō͘邪神所刁難ê也得tio̍h醫好。 19 眾人lóng ài摸伊，因為有權能對伊出，來醫好in大家。 20 耶穌kia̍h目看伊ê學生，講，Lín sòng-hiong ê人有福氣ah，因為上帝ê國是lín ê。 21 Lín現在teh iau ê人有福氣ah；因為lín beh得tio̍h飽。Lín現在啼哭ê人有福氣ah，因為lín teh-beh笑。 22 人為tio̍h人子來怨恨lín，拒絕lín，lóe罵lín，掠lín ê名做pháiⁿ來棄sak伊，lín就有福氣ah。 23 當hit日lín tio̍h歡喜tiô跳；因為tī天裡lín ê報賞是大，是in ê祖款待先知也是án-ni。 24 但是lín好額人有災禍ah！因為lín已經受tio̍h lín ê安慰。 25 Lín現在飽ê人有災禍ah！因為lín teh-beh iau。Lín現在笑ê人有災禍ah！因為lín beh哀傷啼哭。 26 Lín Hō͘眾人o-ló ê有災禍ah！因為in ê祖款待假ê先知也是án-ni。 27 但是我kā lín teh聽ê人講，對敵lín ê tio̍h疼in；怨恨lín ê，tio̍h好款待in； 28 lóe罵lín ê，tio̍h kā in祝福；凌辱lín ê，tio̍h替in祈禱。 29 人siàn你chit-pêng ê嘴phóe，就tio̍h oa̍t hit-pêng ǹg伊。人the̍h lín ê外衫，連內衫也莫得擋伊。 30 凡若求你ê tio̍h hō͘伊；the̍h你ê物ê，莫得koh kā伊討。 31 Lín ài人怎樣款待lín，也tio̍h án-ni款待人。 32 Lín若疼hiahê疼lín ê，有甚麼恩惠？因為pháiⁿ人也是疼hiahê疼in ê人。 33 Lín若好款待hiahê好款待lín ê，有甚麼恩惠？因為pháiⁿ人也是án-ni行。 34 Lín若借hiahê有thang ǹg望伊還ê，有甚麼恩惠？因為pháiⁿ人也借pháiⁿ人，ài in照數額來還。 35 但是lín tio̍h疼lín ê對敵好款待in；借人也無絕望；lín ê報賞就大，koh lín beh做至koân ê ê Kiáⁿ兒；因為伊好款待蒙恩kap pháiⁿ ê人。 36 所以lín tio̍h有憐憫，親像lín ê父ê憐憫一樣。 37 莫得批評人，就無tú-tio̍h批評；莫得責罪人，就無tú-tio̍h責罪；lín放人soah，就beh放lín soah； 38 hō͘人，就beh hō͘ lín；beh用足額ê斗，ji̍h，搖，hō͘伊cha̍t到pôaⁿ出來，拚tī lín ê衫á-phè。因為lín用甚麼量來量，也beh án-ni倒量hō͘ lín。 39 Koh用譬喻kā in講，Chhiⁿ-mî ê能kā chhiⁿ-mî ê chhōa路mah？兩ê Kiám bōe lóng跋落陷坑mah？ 40 學生bōe會pôaⁿ過先生；總是見若成做齊備ê beh親像伊ê先生。 41 Koh你怎樣看見兄弟目睭內ê草á幼，也無想你目睭內ê楹á柴ah？ 42 á是beh-thái會kā你ê兄弟講，兄弟ah，你目睭內ê草á幼hō͘我kā你the̍h去，也本身無看見你目睭內ê楹á柴ah？假好ê人ah，事先the̍h去你目睭內ê楹á柴，chiah會明明看見thang the̍h去兄弟目睭內ê草á幼。 43 因為無有好樹結pháiⁿ果子；也無有pháiⁿ樹結好果子。 44 因為ta̍k叢樹對伊家己ê果子來bat伊；刺phè內無人挽無花果，草刺內無人摘葡萄。 45 好人對伊ê心所積聚ê好來發出好；pháiⁿ人對伊所積聚ê pháiⁿ來發出pháiⁿ；因為tùi心所充滿ê，嘴就講出。 46 Lín啥事稱呼我，主ah，主ah，也無行我所講ê ah？ 47 見若就近我，聽我chiahê話來行伊ê人，我beh報lín知hitê人親像甚麼。 48 伊是親像人起厝，掘hō͘伊深，hē地基tī石磐頂；大水一下到，溪流沖tio̍h厝，bōe會搖動伊，因為伊起得好。 49 但是聽了無行ê人，是親像人起厝tī土頂，無hē地基；溪流沖tio̍h伊，就倒；hit間厝ê倒壞是傷重。
1 Ū chi̍t ê an-hioh-ji̍t Iâ-so͘ tùi be̍h-hn̂g keng-kè, I ê ha̍k-seng tiah be̍h-sūi, ēng chhiú jê i lâi chia̍h. 2 Ū Hoat-lī-sài kúi-nā lâng kóng, An-hioh-ji̍t só͘ m̄ eng-kai kiâⁿ ê, lín siáⁿ-sū kiâⁿ i? 3 Iâ-so͘ ìn kóng, Tāi-pi̍t kap kun-tè ê lâng iau ê sî só͘ kiâⁿ ê, lín bē tha̍k-tio̍h mah? 4 I ji̍p Siōng-tè ê chhù, the̍h pâi-lia̍t ê piáⁿ lâi chia̍h, koh hō͘ i kun-tè ê lâng; chit hō piáⁿ, nā m̄ sī chè-si, chiū lóng m̄ eng-kai chia̍h. 5 Koh kā in kóng, Jîn-chú iā sī an-hioh-ji̍t ê Chú. 6 Koh chi̍t ê an-hioh-ji̍t, Iâ-so͘ ji̍p hōe-tn̂g kà-sī; tī hia ū chi̍t lâng i ê chiàⁿ chhiú ko͘-tâ. 7 Keng-ha̍k-sū kap Hoat-lī-sài lâng tng khòaⁿ I tī an-hioh-ji̍t beh i-pīⁿ á bô; ì-sù sī ài chhē phāng thang kò I. 8 Iâ-so͘ chai in ê ì-sù, chiū kā hit-ê chhiú ko͘-tâ ê lâng kóng, khí-lâi, khiā tī tiong-ng; i chiū khí-lâi khiā. 9 Iâ-so͘ chiū tùi in kóng, Góa mn̄g lín, tī an-hioh-ji̍t kiâⁿ hó sū kiâⁿ pháiⁿ sū, kiù sìⁿ-miā hāi sìⁿ-miā, tá-lo̍h chi̍t hāng khah ha̍p-gî ah? 10 Chiū sì-kè khòaⁿ chèng lâng, kā hit lâng kóng, Chhun lí ê chhiú. I chhun-chhut-khì; chhiú chiū hó-hó. 11 Hiah ê lâng móa-sim siū-khì; saⁿ-kap gī-lūn tio̍h cháiⁿ-iūⁿ lâi pān Iâ-so͘. 12 Tng hit sî Iâ-so͘ chhut-khì soaⁿ-ni̍h kî-tó, thong mî kî-kiû Siōng-tè. 13 Kàu thiⁿ-kng chiū kiò I ê ha̍k-seng lâi; tùi in tiong-kan kéng cha̍p-jī lâng, chheng in chòe sù-tô͘; 14 ū Se-bûn, Iâ-so͘ koh hō i ê miâ chòe Pí-tek, kap i ê hiaⁿ-tī An-tek-lia̍t, koh ū Ngá-kok kap Iok-hān, Hui-le̍k kap Pa-to-lô-mái; 15 Má-thài kap To-má, A-le̍k-hui ê kiáⁿ Ngá-kok kap chheng chòe Se-lô-tí ê Se-bûn, 16 Ngá-kok ê kiáⁿ Iû-tāi, kap bōe sian-siⁿ ê Ka-lio̍k lâng Iû-tāi. 17 Iâ-so͘ kap in lo̍h-lâi khiā tī pîⁿ ê só͘-chāi, ū I chōe-chōe ê ha̍k-seng kap kui tōa tīn ê peh-sìⁿ, tùi Iû-thài choân-tōe kap Iâ-lō͘-sat-léng í-ki̍p Chhui-lô Se-tùn iân hái-kîⁿ ê tōe lâi beh thiaⁿ I, iā beh tit-tio̍h i-hó in ê pīⁿ; 18 koh ū hō͘ siâ-sîn só͘ thiau-lân ê iā tit-tio̍h i-hó. 19 Chèng lâng lóng ài bong I, in-ūi ū koân-lêng tùi I chhut, lâi i-hó in tāi-ke. 20 Iâ-so͘ kia̍h ba̍k khòaⁿ I ê ha̍k-seng, kóng, Lín sòng-hiong ê lâng ū hok-khì ah, in-ūi Siōng-tè ê kok sī lín ê. 21 Lín hiān-chāi teh iau ê lâng ū hok-khì ah; in-ūi lín beh tit-tio̍h pá. Lín hiān-chāi thî-khàu ê lâng ū hok-khì ah, in-ūi lín teh-beh chhiò. 22 Lâng ūi-tio̍h Jîn-chú lâi oàn-hūn lín, kū-choa̍t lín, lóe-mē lín, lia̍h lín ê miâ chòe pháiⁿ lâi khì-sak i, lín chiū ū hok-khì ah. 23 Tng hit ji̍t lín tio̍h hoaⁿ-hí tiô-thiàu; in-ūi tī thiⁿ-ni̍h lín ê pò-siúⁿ sī tōa, sī in ê chó͘ khoán-thāi sian-ti iā sī án-ni. 24 Nā-sī lín hó-gia̍h lâng ū chai-ē ah! in-ūi lín í-keng siū-tio̍h lín ê an-ùi. 25 Lín hiān-chāi pá ê lâng ū chai-ē ah! in-ūi lín teh-beh iau. Lín hiān-chāi chhiò ê lâng ū chai-ē ah! in-ūi lín beh ai-siong thî-khàu. 26 Lín hō͘ chèng lâng o-ló ê ū chai-ē ah! in-ūi in ê chó͘ khoán-thāi ké ê sian-ti iā sī án-ni. 27 Nā-sī góa kā lín teh thiaⁿ ê lâng kóng, Tùi-te̍k lín ê tio̍h thiàⁿ in; oàn-hūn lín ê, tio̍h hó khoán-thāi in; 28 lóe-mē lín ê, tio̍h kā in chiok-hok; lêng-jio̍k lín ê, tio̍h thòe in kî-tó. 29 Lâng siàn lí chit pêng ê chhùi-phóe, chiū tio̍h oa̍t hit pêng ǹg i. Lâng the̍h lín ê gōa-saⁿ, liân lāi-saⁿ iā bo̍h-tit tòng i. 30 Hoān-nā kiû lí ê tio̍h hō͘ i; the̍h lí ê mi̍h ê, bo̍h-tit koh kā i thó. 31 Lín ài lâng cháiⁿ-iūⁿ khoán-thāi lín, iā tio̍h án-ni khoán-thāi lâng. 32 Lín nā thiàⁿ hiah-ê thiàⁿ lín ê, ū sím-mi̍h un-hūi? in-ūi pháiⁿ lâng iā sī thiàⁿ hiah-ê thiàⁿ in ê lâng. 33 Lín nā hó khoán-thāi hiah-ê hó khoán-thāi lín ê, ū sím-mi̍h un-hūi? in-ūi pháiⁿ lâng iā sī án-ni kiâⁿ. 34 Lín nā chioh hiah-ê ū thang ǹg-bāng i hêng ê, ū sím-mi̍h un-hūi? in-ūi pháiⁿ lâng iā chioh pháiⁿ lâng, ài in chiàu siàu-gia̍h lâi hêng. 35 Nā-sī lín tio̍h thiàⁿ lín ê tùi-te̍k hó khoán-thāi in; chioh lâng iā bô choa̍t-bāng; lín ê pò-siúⁿ chiū tōa, koh lín beh chòe Chì-koâiⁿ-ê ê kiáⁿ-jî; in-ūi I hó khoán-thāi bông-un kap pháiⁿ ê lâng. 36 Só͘-í lín tio̍h ū lîn-bín, chhin-chhiūⁿ lín ê Pē ê lîn-bín chi̍t iūⁿ. 37 Bo̍h-tit phoe-phêng lâng, chiū bô tú-tio̍h phoe-phêng; bo̍h-tit chek-chōe lâng, chiū bô tú-tio̍h chek-chōe; lín pàng lâng soah, chiū beh pàng lín soah; 38 hō͘ lâng, chiū beh hō͘ lín; beh ēng chiok-gia̍h ê táu, ji̍h, iô, hō͘ i cha̍t kàu pôaⁿ-chhut-lâi, piàⁿ tī lín ê saⁿ-á-phè. In-ūi lín ēng sím-mi̍h niû lâi niû, iā beh án-ni tò niû hō͘ lín. 39 Koh ēng phì-jū kā in kóng, Chhiⁿ-mî ê ōe kā chhiⁿ-mî ê chhōa lō͘ mah? Nn̄g-ê kiám bōe lóng poa̍h-lo̍h hām-khiⁿ mah? 40 Ha̍k-seng bōe-ōe pôaⁿ-kè sian-siⁿ; chóng-sī kìⁿ-nā chiâⁿ chòe chiâu-pī ê beh chhin-chhiūⁿ i ê sian-siⁿ. 41 Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu lāi ê chháu-á-iù, iā bô siūⁿ lí ba̍k-chiu lāi ê îⁿ-á-chhâ ah? 42 Á-sī beh-thái ōe kā lí ê hiaⁿ-tī kóng, Hiaⁿ-tī ah, lí ba̍k-chiu lāi ê chháu-á-iù hō͘ góa kā lí the̍h-khì, iā pún-sin bô khòaⁿ-kìⁿ lí ba̍k-chiu lāi ê îⁿ-á-chhâ ah? Ké-hó ê lâng ah, tāi-seng the̍h-khì lí ba̍k-chiu lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu lāi ê chháu-á-iù. 43 In-ūi bô ū hó chhiū kiat pháiⁿ ké-chí; iā bô ū pháiⁿ chhiū kiat hó ké-chí. 44 In-ūi ta̍k châng chhiū tùi i ka-kī ê ké-chí lâi bat i; chhì-phè lāi bô lâng bán bû-hoa-kó, chháu-chhì lāi bô lâng tiah phû-tô. 45 Hó lâng tùi i ê sim só͘ chek-chū ê hó lâi hoat-chhut hó; pháiⁿ lâng tùi i só͘ chek-chū ê pháiⁿ lâi hoat-chhut pháiⁿ; in-ūi tùi sim só͘ chhiong-móa ê, chhùi chiū kóng chhut. 46 Lín siáⁿ-sū chheng-ho͘ góa, Chú ah, Chú ah, iā bô kiâⁿ góa só͘ kóng ê ah? 47 Kìⁿ-nā chiū-kūn góa, thiaⁿ góa chiah ê ōe lâi kiâⁿ i ê lâng, góa beh pò lín chai hit ê lâng chhin-chhiūⁿ sím-mi̍h. 48 I sī chhin-chhiūⁿ lâng khí chhù, ku̍t hō͘ i chhim, hē tōe-ki tī chio̍h-pôaⁿ téng; tōa chúi chi̍t-ē kàu, khoe lâu chhiong-tio̍h chhù, bōe-ōe iô-tāng i, in-ūi i khí-tit hó. 49 Nā-sī thiaⁿ-liáu bô kiâⁿ ê lâng, sī chhin-chhiūⁿ lâng khí chhù tī thô͘-téng, bô hē tōe-ki; khoe lâu chhiong-tio̍h i, chiū tó; hit keng chhù ê tó-hoāi sī siong-tiōng.
1 耶穌講hō͘百姓聽ê話lóng明白，就入迦百農。 2 有一个百總所對重ê奴僕患tio̍h病，teh-beh死。 3 百總聽見耶穌ê事，就差偤太ê長老幾nā人，求伊來救伊ê奴僕。 4 In就近耶穌切切求伊講，Chit人會堪得你kā伊行chitê tāi-chì； 5 因為伊疼咱ê百姓，koh本身替咱起會堂。 6 耶穌kap in去。離厝無jōa遠，百總差幾nā ê朋友就近伊，kā伊講，主ah，m̄-thang勞煩；你到我ê厝我當bōe起； 7 我也掠做家己bōe堪得就近你；你若講一句話，我ê奴僕就會好。 8 因為我也是hō͘人管ê人，也有兵hō͘我管；kā chitê講，去，伊就去；kā hitê講，來，伊就來；kā我ê奴僕講，行án-ni，伊就行án-ni。 9 耶穌聽見chiahê話就奇怪伊，oa̍t-tńg身kā tè伊ê眾人講，我kā lín講，親像chit號ê信，連以色列中我iáu-bē bat tú-tio̍h。 10 所差ê人tò去到厝，看見奴僕已經好好。 11 Koh無jōa久，耶穌去一个城名叫Ná-in；伊ê學生kap Kui陣人kap伊同行。 12 Beh近城門，tú-tn̄g有人扛一个死人出來，伊ê老母孤孤生chitê Kiáⁿ，koh是守寡。城內有chōe-chōe人teh送伊。 13 主看見就憐憫伊，kā伊講，莫得哮。 14 就óa去，摸hitê Khòa身屍ê架，扛ê人停腳；伊就講，少年人ah，我kā你講，起來。 15 死ê人就起來坐，續講話。耶穌就將伊hō͘伊ê老母。 16 眾人lóng驚惶，歸榮光上帝講，大先知有興起tī咱中間；koh講，上帝有看顧伊ê百姓。 17 Tùi án-ni耶穌chitê名聲遍傳tī偤太kap周圍ê地方。 18 約翰ê學生將chiahê事lóng總報in ê先生知。 19 伊就叫伊ê學生兩人來，差in就近主講，所beh來ê是你mah？á是阮tio̍h ǹg望別人ah？ 20 Hit兩人已經到，就講，行洗禮約翰差阮就近你，講，Beh來ê是你mah？á是阮tio̍h ǹg望別人ah？ 21 Hit時耶穌醫好chōe-chōe破病ê，痛疼ê，犯tio̍h鬼ê，koh hō͘ chōe-chōe chhiⁿ-mî ê得tio̍h看見。 22 就應講，Lín tio̍h去，將lín所看見所聽見ê報約翰知；就是chhiⁿ-mî ê看見，跛腳ê行，thái-ko ê清氣，臭耳人ê聽見，死ê人koh活，sòng-hiong人得tio̍h聽福音； 23 見若無tī我來tio̍h-tak ê，有福氣。 24 約翰所差ê人去了，耶穌chiah提起約翰，tùi眾人講，Lín前出去曠野，beh看甚麼？是蘆竹hō͘風吹振動mah？ 25 Lín出去beh看甚麼？是人穿幼軟ê衣裳mah？你看，穿衫hâng-ngó͘享受宴樂ê是tī王宮。 26 Án-ni，lín出去beh看甚麼？先知人mah？是lah，我kā lín講，也是khah贏過先知ê。 27 Chit人就是經裡所指ê，講， 你看，我差我ê使者tī你ê面前， 伊beh tī你ê頭前備辦你ê路。 28 我kā lín講，婦人人所生bē有khah大約翰ê；總是tī上帝國ê微細ê iáu khah大伊。 29 眾百姓kap抽餉ê人，已經受約翰ê洗禮，一下聽見這，就稱呼上帝做義。 30 若是法利賽人kap教律法ê先生無受伊ê洗禮，家己phah無上帝ê旨意。 31 主講，Chit世代ê人，我beh用甚麼來比並in？in是親像甚麼ah？ 32 是親像gín-ná坐tī街市裡，saⁿ叫講，阮對lín pûn笛á，lín無跳舞；阮bat悲哀，lín無啼哭。 33 因為行洗禮ê約翰來，無食餅無lim酒，lín就講，伊犯tio̍h鬼。 34 人子來也食也lim，lín就講，伊是貪食好酒ê人，抽餉ê Kap pháiⁿ人ê朋友。 35 若是智慧對伊ê眾kiáⁿ顯明伊是tio̍h。 36 有一个法利賽人請耶穌saⁿ-kap食，伊就入法利賽人ê厝坐桌。 37 Tú-tn̄g城內有一个pháiⁿ婦人人，知伊坐桌tī法利賽人ê厝，就tòa tóe香油ê玉罐來； 38 khiā tī耶穌ê後面，óa伊ê腳teh啼哭；有目屎滴tâm伊ê腳，就用伊ê頭毛拭伊；koh chia̍p-chia̍p chim伊ê腳，用香油抹伊。 39 請耶穌ê法利賽人看見án-ni，心內想講，Chit人若是先知，的確會知摸伊ê人是是誰，koh是甚麼號ê婦人人，就是pháiⁿ人。 40 耶穌應伊講，西門，我有話beh kā你講。西門講，先生，請你講。 41 伊就講，某個債主有兩人欠伊ê債，一个欠伊五百ê銀á，一个欠伊五十。 42 In既然無thang還，債主就赦免in兩人。Án-ni，就tá-lo̍h一个khah疼債主ah？ 43 西門應講，我phah算是hitê hō͘伊赦免khah chōe ê。耶穌kā伊講，你所斷ê是tio̍h。 44 就oa̍t頭ǹg婦人人，kā西門講，你看見chitê婦人人無？我入你ê厝，你無用水hō͘我洗腳；但是伊用目屎滴tâm我ê腳，用頭毛拭伊。 45 你無kā我chim；獨獨伊tùi我入來ê時chim我ê腳無soah。 46 你無用油抹我ê頭殼；但是伊用香油抹我ê腳。 47 所以我kā你講，伊chōe-chōe ê罪kòa已經赦免，因為伊ê疼是chōe；但是得tio̍h赦免少ê，伊ê疼也是少。 48 就kā婦人人講，你ê罪赦lah。 49 同桌ê人心內講，Chitê teh赦罪ê是甚麼人？ 50 耶穌tùi婦人人講，你ê信有救你；做你安心tò去。
1 Iâ-so͘ kóng hō͘ peh-sìⁿ thiaⁿ ê ōe lóng bêng-pe̍k, chiū ji̍p Ka-pek-lông. 2 Ū chi̍t ê pé-chóng só͘ tùi-tiōng ê lô͘-po̍k hoān-tio̍h pīⁿ, teh-beh sí. 3 Pé-chóng thiaⁿ-kìⁿ Iâ-so͘ ê sū, chiū chhe Iû-thài ê tiúⁿ-ló kúi-nā lâng, kiû I lâi kiù i ê lô͘-po̍k. 4 In chiū-kūn Iâ-so͘ chhiat-chhiat kiû I kóng, Chit lâng ōe kham-tit lí kā i kiâⁿ chit ê tāi-chì; 5 in-ūi i thiàⁿ lán ê peh-sìⁿ, koh pún-sin thòe lán khí hōe-tn̂g. 6 Iâ-so͘ kap in khì. Lī chhù bô jōa hn̄g, pé-chóng chhe kúi-nā ê pêng-iú chiū-kūn I, kā I kóng, Chú ah, m̄-thang lô-hoân; lí kàu góa ê chhù góa tng bōe khí; 7 góa iā lia̍h chòe ka-kī bōe kham-tit chiū-kūn lí; lí nā kóng chi̍t kù ōe, góa ê lô͘-po̍k chiū ōe hó. 8 In-ūi góa iā sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni. 9 Iâ-so͘ thiaⁿ-kìⁿ chiah ê ōe chiū kî-koài i, oa̍t-tńg-sin kā tè I ê chèng lâng kóng, Góa kā lín kóng, chhin-chhiūⁿ chit hō ê sìn liân Í-sek-lia̍t tiong góa iáu-bē bat tú-tio̍h. 10 Só͘ chhe ê lâng tò-khì kàu chhù, khòaⁿ-kìⁿ lô͘-po̍k í-keng hó-hó. 11 Koh bô jōa kú, Iâ-so͘ khì chi̍t ê siâⁿ miâ kiò Ná-in; I ê ha̍k-seng kap kui tīn lâng kap I tâng kiâⁿ. 12 Beh kūn siâⁿ-mn̂g, tú-tn̄g ū lâng kng chi̍t ê sí-lâng chhut-lâi, i ê lāu-bú ko͘-ko͘ siⁿ chit ê kiáⁿ, koh sī chiú-kóaⁿ. Siâⁿ-lāi ū chōe-chōe lâng teh sàng i. 13 Chú khòaⁿ-kìⁿ chiū lîn-bín i, kā i kóng, Bo̍h-tit háu. 14 Chiū óa-khì, bong hit-ê khòa sin-si ê kè, kng ê lâng thêng-kha; I chiū kóng, Siàu-liân lâng ah, góa kā lí kóng, Khí-lâi. 15 Sí ê lâng chiū khí-lâi chē, sòa kóng ōe. Iâ-so͘ chiū chiong i hō͘ i ê lāu-bú. 16 Chèng lâng lóng kiaⁿ-hiâⁿ, kui êng-kng Siōng-tè kóng, Tōa sian-ti ū heng-khí tī lán tiong-kan; koh kóng, Siōng-tè ū khòaⁿ-kò͘ I ê peh-sìⁿ. 17 Tùi án-ni Iâ-so͘ chit ê miâ-siaⁿ piàn thoân tī Iû-thài kap chiu-ûi ê tōe-hng. 18 Iok-hān ê ha̍k-seng chiong chiah ê sū lóng-chóng pò in ê sian-siⁿ chai. 19 I chiū kiò i ê ha̍k-seng nn̄g lâng lâi, chhe in chiū-kūn Chú kóng, Só͘ beh lâi ê sī lí mah? Á-sī goán tio̍h ǹg-bāng pa̍t lâng ah? 20 Hit nn̄g lâng í-keng kàu, chiū kóng, Kiâⁿ sóe-lé Iok-hān chhe goán chiū-kūn lí, kóng, Beh lâi ê sī lí mah? Á-sī goán tio̍h ǹg-bāng pa̍t lâng ah? 21 Hit sî Iâ-so͘ i-hó chōe-chōe phòa-pīⁿ ê, thàng-thiàⁿ ê, hoān-tio̍h kúi ê, koh hō͘ chōe-chōe chhiⁿ-mî ê tit-tio̍h khòaⁿ-kìⁿ. 22 Chiū ìn kóng, Lín tio̍h khì, chiong lín só͘ khòaⁿ-kìⁿ só͘ thiaⁿ-kìⁿ ê pò Iok-hān chai; chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im; 23 kìⁿ-nā bô tī góa lâi tio̍h-tak ê, ū hok-khì. 24 Iok-hān só͘ chhe ê lâng khì-liáu, Iâ-so͘ chiah thê-khí Iok-hān, tùi chèng lâng kóng, Lín chêng chhut-khì khòng-iá, beh khòaⁿ sím-mi̍h? sī lô͘-tek hō͘ hong chhe tín-tāng mah? 25 Lín chhut-khì beh khòaⁿ sím-mi̍h? sī lâng chhēng iù-nńg ê i-chiûⁿ mah? Lí khòaⁿ, chhēng saⁿ hâng-ngó͘ hióng-siū iàn-lo̍k ê sī tī ông-kiong. 26 Án-ni, lín chhut-khì beh khòaⁿ sím-mi̍h? sian-ti lâng mah? Sī lah, góa kā lín kóng, iā sī khah iâⁿ-kè sian-ti ê. 27 Chit lâng chiū-sī keng-ni̍h só͘ chí ê, kóng, Lí khòaⁿ, góa chhe góa ê sù-chiá tī lí ê bīn-chêng, I beh tī lí ê thâu-chêng pī-pān lí ê lō͘. 28 Góa kā lín kóng, Hū-jîn-lâng só͘ siⁿ bē ū khah tōa Iok-hān ê; chóng-sī tī Siōng-tè kok ê bî-sòe ê iáu khah tōa i. 29 Chèng peh-sìⁿ kap thiu-hiòng ê lâng, í-keng siū Iok-hān ê sóe-lé, chi̍t-ē thiaⁿ-kìⁿ che, chiū chheng-ho͘ Siōng-tè chòe gī. 30 Nā-sī Hoat-lī-sài lâng kap kà lu̍t-hoat ê sian-siⁿ bô siū i ê sóe-lé, ka-kī phah-bô Siōng-tè ê chí-ì. 31 Chú kóng, Chit sè-tāi ê lâng, góa beh ēng sím-mi̍h lâi pí-phēng in? In sī chhin-chhiūⁿ sím-mi̍h ah? 32 Sī chhin-chhiūⁿ gín-ná chē tī koe-chhī-ni̍h, saⁿ kiò kóng, Goán tùi lín pûn ta̍t-á, lín bô thiàu-bú; goán bat pi-ai, lín bô thî-khàu. 33 In-ūi kiâⁿ sóe-lé ê Iok-hān lâi, bô chia̍h piáⁿ bô lim chiú, lín chiū kóng, I hoān-tio̍h kúi. 34 Jîn-chú lâi iā chia̍h iā lim, lín chiū kóng, I sī tham-chia̍h hò͘ⁿ-chiú ê lâng, thiu-hiòng ê kap pháiⁿ lâng ê pêng-iú. 35 Nā-sī Tì-hūi tùi i ê chèng kiáⁿ hián-bêng i sī tio̍h. 36 Ū chi̍t ê Hoat-lī-sài lâng chhiáⁿ Iâ-so͘ saⁿ-kap chia̍h. I chiū ji̍p Hoat-lī-sài lâng ê chhù chē toh. 37 Tú-tn̄g siâⁿ-lāi ū chi̍t ê pháiⁿ hū-jîn-lâng, chai I chē toh tī Hoat-lī-sài lâng ê chhù, chiū tòa tóe hiuⁿ-iû ê ge̍k-koàn lâi; 38 khiā tī Iâ-so͘ ê āu-bīn, óa I ê kha teh thî-khàu; ū ba̍k-sái tih-tâm I ê kha, chiū ēng i ê thâu-mn̂g chhit i; koh chia̍p-chia̍p chim I ê kha, ēng hiuⁿ-iû boah i. 39 Chhiáⁿ Iâ-so͘ ê Hoat-lī-sài lâng khòaⁿ-kìⁿ án-ni, sim-lāi siūⁿ kóng, Chit lâng nā sī sian-ti, tek-khak ōe chai bong I ê lâng sī chī-chūi, koh sī sím-mi̍h hō ê hū-jîn-lâng, chiū-sī pháiⁿ lâng. 40 Iâ-so͘ ìn i kóng, Se-bûn, góa ū ōe beh kā lí kóng. Se-bûn kóng, Sian-siⁿ, chhiáⁿ lí kóng. 41 I chiū kóng, Bó͘ ê chè-chú ū nn̄g lâng khiàm i ê chè, chi̍t-ê khiàm i gō͘-pah ê gûn-á, chi̍t-ê khiàm i gō͘-cha̍p. 42 In kì-jiân bô thang hêng, chè-chú chiū sià-bián in nn̄g lâng. Án-ni, chiū tá-lo̍h chi̍t-ê khah thiàⁿ chè-chú ah? 43 Se-bûn ìn kóng, Góa phah-sǹg sī hit-ê hō͘ i sià-bián khah chōe ê. Iâ-so͘ kā i kóng, Lí só͘ toàn ê sī tio̍h. 44 Chiū oa̍t thâu ǹg hū-jîn-lâng, kā Se-bûn kóng, Lí khòaⁿ-kìⁿ chit ê hū-jîn-lâng bô? Góa ji̍p lí ê chhù, lí bô ēng chúi hō͘ góa sóe kha; nā-sī i ēng ba̍k-sái tih-tâm góa ê kha, ēng thâu-mn̂g chhit i. 45 Lí bô kā góa chim; to̍k-to̍k i tùi góa ji̍p-lâi ê sî chim góa ê kha bô soah. 46 Lí bô ēng iû boah góa ê thâu-khak; nā-sī i ēng hiuⁿ-iû boah góa ê kha. 47 Só͘-í góa kā lí kóng, I chōe-chōe ê chōe-kòa í-keng sià-bián, in-ūi i ê thiàⁿ sī chōe; nā-sī tit-tio̍h sià-bián chió ê, i ê thiàⁿ iā sī chió. 48 Chiū kā hū-jîn-lâng kóng, Lí ê chōe sià lah. 49 Tâng toh ê lâng sim-lāi kóng, Chit-ê teh sià chōe ê sī sím-mi̍h lâng? 50 Iâ-so͘ tùi hū-jîn-lâng kóng, Lí ê sìn ū kiù lí; chòe lí an-sim tò-khì.
1 過無幾日，耶穌四界行ta̍k ê城ta̍k ê鄉社，宣傳來報揚上帝國ê福音；十二個學生也kap伊去； 2 也有幾nā ê婦人人，有ê bat犯tio̍h鬼，有ê有破病，taⁿ已經得tio̍h醫好；其中有Boa̍t-tāi-lia̍p ê馬利亞，bat有七個鬼對伊出去； 3 koh有希律ê管家Khó͘-sat ê bó͘ Iok-a-ná；koh有So͘-sat-ná；以外iáu有chōe-chōe婦人人，lóng用in所有ê來服事in。 4 有chōe-chōe人聚集，koh有人tùi ta̍k ê城來就近伊； 5 hit時耶穌設譬喻kā in講，有掖種ê出去掖種。Teh也ê時，有ê Ka-la̍uh tī路邊，hō͘人所踏，天中ê飛鳥一盡食伊。 6 有ê ka-la̍uh tī石磐頂，發起來就乾去，因為無潤澤。 7 有ê ka-la̍uh tī刺á中，刺á平平發起來，遮蔽伊。 8 有ê ka-la̍uh tī好ê土地，發起來結實到一百倍。Chiahê話講了，就叫講，有耳孔thang聽ê，tio̍h聽。 9 伊ê學生問伊chitê譬喻怎樣。 10 耶穌講，上帝國ê奧妙hō͘ lín知；但是tùi別人就用譬喻，beh hō͘ in看，看bōe見，聽也bōe曉悟。 11 Chitê譬喻就是án-ni:種子就是上帝ê道理。 12 Tī路邊ê，就是人聽見道理；魔鬼就來，對in ê心內將道理搶去，免得in信來得tio̍h救。 13 Tī石磐頂ê，就是人聽了歡喜承受道理；但是in無根，是暫時信nā-tiāⁿ，tú-tio̍h試煉ê時就pōe-biū。 14 落tī刺á內ê，chiahê就是人聽了就去，hō͘在生ê掛慮、貨財、宴樂所遮蔽，就結m̄成粒。 15 Tī好土地ê，chiahê就是人用好koh善良ê心聽道理來執守伊，koh吞忍來結實。 16 無人點燈用器具來蓋伊，á是hē tī眠床下，就是hē tī燈台頂，hō͘入來ê人看見hitê光。 17 因為無有隱密，也將來無露現ê；無有祕密，將來無hō͘人知koh露現ê。 18 所以lín tio̍h謹慎怎樣來聽；因為見若有ê，beh hō͘伊；無ê，連伊家己掠做有ê，也beh kā伊搶去。 19 耶穌ê老母kap兄弟來就近伊；因為人chōe，bōe得近óa。 20 有人kā伊講，你ê老母kap你ê兄弟khiā tī外面，ài beh看你。 21 伊應講，我ê老母kap我ê兄弟就是chiahê聽上帝ê道理來行ê人。 22 有一日耶穌kap伊ê學生上船，kā in講，咱來去湖ê hit-pêng岸。就開船。 23 行ê時耶穌睏去。有報頭風phah落來湖裡，船內ê水差不多滿，盡在危險。 24 學生近óa，叫伊醒，講，先生ah，先生ah，beh無命lah。伊就醒，責備風kap海湧，風湧就soah，也平定。 25 伊就kā學生講，Lín ê信tī tá-lo̍h？In就驚惶奇怪，saⁿ-kap講，這是甚麼人，命令風kap水，in也順伊？ 26 船到Keh-lah-sim人ê地方，就是加利利ê對面。 27 耶穌離開船，上岸；有一人tùi城裡出來tú-tio̍h伊，是犯tio̍h鬼ê，久久無穿衫無tiàm厝內，獨獨tiàm tī墳墓中。 28 看見耶穌就喉叫，仆tī伊ê面前，大聲講，至koân上帝ê Kiáⁿ耶穌，我kap你有甚麼干涉？求你莫得苦楚我。 29 因為耶穌有命令邪神tùi hitê人出來。因為邪神常常掠伊；人用鐵鏈鏈伊，用腳銬銬伊，來顧守伊；伊就chhoah斷所縛伊ê器具，伊hō͘鬼趕到曠野。 30 耶穌問伊講，你叫甚麼名？伊講，營；因為有chōe-chōe鬼入伊。 31 鬼求耶穌莫得吩咐in入深淵。 32 Tī hia有kui陣豬，tī山裡teh討食。鬼求伊准in入hiahê豬。就准in。 33 鬼就tùi hit人出去，入hiahê豬；kui陣豬就走落山坪，chông落湖，格死。 34 顧豬ê看見chitê tāi-chì就走去，報城內kap鄉社ê人知。 35 In就出來，ài看chitê tāi-chì；就近耶穌，tú-tio̍h鬼所對伊出來hit人，穿衫，hāi-chāi，坐tī耶穌腳下；in就驚。 36 看見ê人將犯tio̍h鬼ê人怎樣得tio̍h救報in知。 37 Keh-lah-sim四方ê人lóng求耶穌離開in；因為in大驚ê緣故；伊就上船倒tńg去。 38 鬼所對伊出去ê人求beh kap伊去。但是耶穌差伊去講， 39 tò去lín tau，將上帝為tio̍h你行hiah大ê事排列hō͘人知。伊就去，遍城宣傳耶穌為tio̍h伊所行hiah大ê事。 40 耶穌倒tńg來ê時眾人接納伊；因為in lóng teh thèng候祂。 41 有一人，名Gâi-ló͘，就是管會堂ê，來仆tī耶穌ê腳下，求伊到伊ê家； 42 因為伊有孤生ê cha-bó͘-kiáⁿ約略十二歲，teh-beh死。耶穌去ê時，眾人oe-khoeh祂。 43 有一个婦人人，血漏十二年，因為請醫生家伙破到了，無一人能醫好伊， 44 來到耶穌ê ka-chiah後，摸伊衫á裾ê鬚；血漏即時止。 45 耶穌講，摸我ê是是誰？大家講無；彼得kap同行ê人講，先生，眾人逼óa，khoeh-tio̍h你。 46 耶穌講，有人摸我，因為我知有權能tùi我出。 47 婦人人看伊khǹg bōe密，ngia̍uh-ngia̍uh-chhoah來仆tī伊腳下；當眾人ê面前講明摸伊ê緣故，kap伊怎樣liâm-piⁿ好。 48 耶穌kā伊講，婦人人ah，你ê信有救你，做你安心tò去。 49 伊iáu teh講ê時，有人tùi趕會堂ê ê家來講，你ê cha-bó͘-kiáⁿ已經死，免勞動先生。 50 耶穌聽見就應伊講，M̄免驚，只有tio̍h信，伊就得tio̍h救。 51 已經到伊ê家，tī彼得，約翰，雅各，kap cha-bó͘ gín-ná ê父母以外，m̄准別人kap伊入去。 52 眾人teh啼哭，為tio̍h伊來搥胸；耶穌講，莫得啼哭，因為伊m̄是死，是teh睏nā-tiāⁿ。 53 In就恥笑伊，因為知伊已經死lah。 54 耶穌牽cha-bó͘ gín-ná ê手叫講，Cha-bó͘ gín-ná，起來。 55 伊ê神復到，即時起來；耶穌吩咐hō͘伊食。 56 伊ê父母gông-ngia̍h；耶穌命令in莫得將所行ê kā人講。
1 Kè bô kúi ji̍t, Iâ-so͘ sì-kè kiâⁿ ta̍k ê siâⁿ ta̍k ê hiuⁿ-siā, soan-thoân lâi pò-iông Siōng-tè kok ê hok-im; cha̍p-jī ê ha̍k-seng iā kap I khì; 2 iā ū kúi-nā ê hū-jîn-lâng, ū-ê bat hoān-tio̍h kúi, ū-ê ū phòa-pīⁿ, taⁿ í-keng tit-tio̍h i-hó; kî-tiong ū Boa̍t-tāi-lia̍p ê Má-lī-a, bat ū chhit ê kúi tùi i chhut-khì; 3 koh ū Hi-lu̍t ê koán-ke Khó͘-sat ê bó͘ Iok-a-ná; koh ū So͘-sat-ná; í-gōa iáu ū chōe-chōe hū-jîn-lâng, lóng ēng in só͘ ū ê lâi ho̍k-sāi in. 4 Ū chōe-chōe lâng chū-chi̍p, koh ū lâng tùi ta̍k ê siâⁿ lâi chiū-kūn I; 5 hit sî Iâ-so͘ siat phì-jū kā in kóng, Ū iā chéng ê chhut-khì iā chéng. Teh iā ê sî, ū-ê ka-la̍uh tī lō͘-piⁿ, hō͘ lâng só͘ ta̍h, thiⁿ-tiong ê pe-chiáu it-chīn chia̍h i. 6 Ū-ê ka-la̍uh tī chio̍h-pôaⁿ téng, hoat-khí-lâi chiū ta-khì, in-ūi bô lūn-te̍k. 7 Ū-ê ka-la̍uh tī chhì-á tiong, chhì-á pîⁿ-pîⁿ hoat-khí-lâi, jia-pè i. 8 Ū-ê ka-la̍uh tī hó ê thó͘-tōe, hoat-khí-lâi kiat-si̍t kàu chi̍t-pah pē. Chiah ê ōe kóng-liáu, chiū kiò kóng, Ū hī-khang thang thiaⁿ ê, tio̍h thiaⁿ. 9 I ê ha̍k-seng mn̄g I chit ê phì-jū cháiⁿ-iūⁿ. 10 Iâ-so͘ kóng, Siōng-tè kok ê ò-biāu hō͘ lín chai; nā-sī tùi pa̍t lâng chiū ēng phì-jū, beh hō͘ in khòaⁿ, khòaⁿ bōe kìⁿ, thiaⁿ iā bōe hiáu-ngō͘. 11 Chit ê phì-jū chiū-sī án-ni: Chéng-chí chiū-sī Siōng-tè ê tō-lí. 12 Tī lō͘-piⁿ ê, chiū-sī lâng thiaⁿ-kìⁿ tō-lí; Mô͘-kúi chiū lâi, tùi in ê sim-lāi chiong tō-lí chhiúⁿ-khì, bián-tit in sìn lâi tit-tio̍h kiù. 13 Tī chio̍h-pôaⁿ téng ê, chiū-sī lâng thiaⁿ-liáu hoaⁿ-hí sêng-siū tō-lí; nā-sī in bô kun, sī chiām-sî sìn nā-tiāⁿ, tú-tio̍h chhì-liān ê sî chiū pōe-biū. 14 Lo̍h tī chhì-á lāi ê, chiah-ê chiū-sī lâng thiaⁿ-liáu chiū khì, hō͘ chāi-siⁿ ê khòa-lū, hè-châi, iàn-lo̍k só͘ jia-pè, chiū kiat m̄ chiâⁿ lia̍p. 15 Tī hó thó͘-tōe ê, chiah-ê chiū-sī lâng ēng hó koh siān-liông ê sim thiaⁿ tō-lí lâi chip-siú i, koh thun-lún lâi kiat-si̍t. 16 Bô lâng tiám teng ēng khì-kū lâi khàm i, á-sī hē tī bîn-chhn̂g ē, chiū-sī hē tī teng-tâi téng, hō͘ ji̍p-lâi ê lâng khòaⁿ-kìⁿ hit ê kng. 17 In-ūi bô ū ún-ba̍t, iā chiong-lâi bô lō͘-hiān ê; bô ū pì-ba̍t, chiong-lâi bô hō͘ lâng chai koh lō͘-hiān ê. 18 Só͘-í lín tio̍h kín-sīn cháiⁿ-iūⁿ lâi thiaⁿ; in-ūi kìⁿ-nā ū ê, beh hō͘ i; bô ê, liân i ka-kī lia̍h-chòe ū ê, iā beh kā i chhiúⁿ-khì. 19 Iâ-so͘ ê lāu-bú kap hiaⁿ-tī lâi chiū-kūn I; in-ūi lâng chōe, bōe-tit kūn-óa. 20 Ū lâng kā I kóng, Lí ê lāu-bú kap lí ê hiaⁿ-tī khiā tī gōa-bīn, ài beh khòaⁿ lí. 21 I ìn kóng, Góa ê lāu-bú kap góa ê hiaⁿ-tī chiū-sī chiah ê thiaⁿ Siōng-tè ê tō-lí lâi kiâⁿ ê lâng. 22 Ū chi̍t ji̍t Iâ-so͘ kap I ê ha̍k-seng chiūⁿ chûn, kā in kóng, Lán lâi khì ô͘ ê hit pêng hōaⁿ. Chiū khui chûn. 23 Kiâⁿ ê sî Iâ-so͘ khùn-khì. Ū pò-thâu-hong phah-lo̍h-lâi ô͘-ni̍h, chûn-lāi ê chúi chha-put-to móa, chīn-chāi gûi-hiám. 24 Ha̍k-seng kūn-óa, kiò I chhíⁿ, kóng, Sian-siⁿ ah, sian-siⁿ ah, beh bô miā lah. I chiū chhíⁿ, chek-pī hong kap hái-éng, hong éng chiū soah, iā pîⁿ-tiāⁿ. 25 I chiū kā ha̍k-seng kóng, Lín ê sìn tī tá-lo̍h? In chiū kiaⁿ-hiâⁿ kî-koài, saⁿ-kap kóng, Che sī sím-mi̍h lâng, bēng-lēng hong kap chúi, in iā sūn I? 26 Chûn kàu Keh-lah-sim lâng ê tōe-hng, chiū-sī Ka-lī-lī ê tùi-bīn. 27 Iâ-so͘ lī-khui chûn, chiūⁿ hōaⁿ; ū chi̍t lâng tùi siâⁿ-ni̍h chhut-lâi tú-tio̍h I, sī hoān-tio̍h kúi ê, kú-kú bô chhēng saⁿ bô tiàm chhù-lāi, to̍k-to̍k tiàm tī hûn-bōng tiong. 28 Khòaⁿ-kìⁿ Iâ-so͘ chiū âu-kiò, phak tī I ê bīn-chêng, tōa siaⁿ kóng, Chì-koâiⁿ Siōng-tè ê Kiáⁿ Iâ-so͘, góa kap lí ū sím-mi̍h kan-sia̍p? kiû lí bo̍h-tit khó͘-chhó͘ góa. 29 In-ūi Iâ-so͘ ū bēng-lēng siâ-sîn tùi hit ê lâng chhut-lâi. In-ūi siâ-sîn siông-siông lia̍h i; lâng ēng thih-liān liān i, ēng kha-khàu khàu i, lâi kò͘-siú i; i chiū chhoah-tn̄g só͘ pa̍k i ê khì-kū, i hō͘ kúi kóaⁿ kàu khòng-iá. 30 Iâ-so͘ mn̄g i kóng, Lí kiò sím-mi̍h miâ? I kóng, Iâⁿ; in-ūi ū chōe-chōe kúi ji̍p i. 31 Kúi kiû Iâ-so͘ bo̍h-tit hoan-hù in ji̍p chhim-ian. 32 Tī hia ū kui tīn ti, tī soaⁿ-ni̍h teh thó-chia̍h. Kúi kiû I chún in ji̍p hiah ê ti. Chiū chún in. 33 Kúi chiū tùi hit lâng chhut-khì, ji̍p hiah ê ti; kui tīn ti chiū cháu-lo̍h soaⁿ-phiâⁿ, chông-lo̍h ô͘, kek-sí. 34 Kò͘-ti ê khòaⁿ-kìⁿ chit ê tāi-chì chiū cháu-khì, pò siâⁿ-lāi kap hiuⁿ-siā ê lâng chai. 35 In chiū chhut-lâi, ài khòaⁿ chit ê tāi-chì; chiū-kūn Iâ-so͘, tú-tio̍h kúi só͘ tùi i chhut-lâi hit lâng, chhēng saⁿ, hāi-chāi, chē tī Iâ-so͘ kha-ē; in chiū kiaⁿ. 36 Khòaⁿ-kìⁿ ê lâng chiong hoān-tio̍h kúi ê lâng cháiⁿ-iūⁿ tit-tio̍h kiù pò in chai. 37 Keh-lah-sim sì-hng ê lâng lóng kiû Iâ-so͘ lī-khui in; in-ūi in tōa kiaⁿ ê iân-kò͘; I chiū chiūⁿ chûn tò-tńg-khì. 38 Kúi só͘ tùi i chhut-khì ê lâng kiû beh kap I khì. Nā-sī Iâ-so͘ chhe i khì kóng, 39 Tò-khì lín tau, chiong Siōng-tè ūi-tio̍h lí kiâⁿ hiah tōa ê sū pâi-lia̍t hō͘ lâng chai. I chiū khì, piàn siâⁿ soan-thoân Iâ-so͘ ūi-tio̍h i só͘ kiâⁿ hiah tōa ê sū. 40 Iâ-so͘ tò-tńg-lâi ê sî chèng lâng chiap-la̍p I; in-ūi in lóng teh thèng-hāu I. 41 Ū chi̍t lâng, miâ Gâi-ló͘, chiū-sī koán hōe-tn̂g ê, lâi phak tī Iâ-so͘ ê kha-ē, kiû I kàu i ê ke; 42 in-ūi i ū ko͘-siⁿ ê cha-bó͘-kiáⁿ iok-lio̍k cha̍p-jī hè, teh-beh sí. Iâ-so͘ khì ê sî, chèng lâng oe-khoeh I. 43 Ū chi̍t ê hū-jîn-lâng, hiat-lāu cha̍p-jī nî, in-ūi chhiáⁿ i-seng ke-hé phòa kàu liáu, bô chi̍t lâng ōe i-hó i, 44 lâi kàu Iâ-so͘ ê ka-chiah-āu, bong I saⁿ-á-ku ê chhiu; hiat-lāu chek-sî chí. 45 Iâ-so͘ kóng, Bong góa ê sī chī-chūi? Tāi-ke kóng bô; Pí-tek kap tâng kiâⁿ ê lâng kóng, Sian-siⁿ, chèng lâng pek-óa, khoeh-tio̍h lí. 46 Iâ-so͘ kóng, Ū lâng bong góa, in-ūi góa chai ū koân-lêng tùi góa chhut. 47 Hū-jîn-lâng khòaⁿ i khǹg bōe ba̍t, ngia̍uh-ngia̍uh-chhoah lâi phak tī I kha-ē; tng chèng lâng ê bīn-chêng kóng-bêng bong I ê iân-kò͘, kap i cháiⁿ-iūⁿ liâm-piⁿ hó. 48 Iâ-so͘ kā i kóng, Hū-jîn-lâng ah, lí ê sìn ū kiù lí, chòe lí an-sim tò-khì. 49 I iáu teh kóng ê sî, ū lâng tùi koán hōe-tn̂g ê ê ke lâi kóng, Lí ê cha-bó͘-kiáⁿ í-keng sí, bián lô-tōng sian-siⁿ. 50 Iâ-so͘ thiaⁿ-kìⁿ chiū ìn i kóng, M̄ bián kiaⁿ, chí-ū tio̍h sìn, i chiū tit-tio̍h kiù. 51 Í-keng kàu i ê ke, tī Pí-tek, Iok-hān, Ngá-kok, kap cha-bó͘ gín-ná ê pē-bú í-gōa, m̄ chún pa̍t lâng kap I ji̍p-khì. 52 Chèng lâng teh thî-khàu, ūi-tio̍h i lâi tûi heng; Iâ-so͘ kóng, Bo̍h-tit thî-khàu, in-ūi i m̄ sī sí, sī teh khùn nā-tiāⁿ. 53 In chiū thí-chhiò I, in-ūi chai i í-keng sí lah. 54 Iâ-so͘ khan cha-bó͘ gín-ná ê chhiú kiò kóng, Cha-bó͘ gín-ná, khí-lâi. 55 I ê sîn ho̍k-tò, chek-sî khí-lâi; Iâ-so͘ hoan-hù hō͘ i chia̍h. 56 I ê pē-bú gông-ngia̍h; Iâ-so͘ bēng-lēng in bo̍h-tit chiong só͘ kiâⁿ ê kā lâng kóng.
1 耶穌叫十二個學生lóng來，hō͘ in有能力權柄，能制壓lóng總ê鬼，醫好病症。 2 就差in去傳上帝ê國，醫好破病人。 3 Koh對in講，莫得帶路費，莫得柺á，莫得tah-liân，莫得乾糧，莫得銀，也莫得兩領衫。 4 見所入ê厝，tio̍h tòa tī hia，也tio̍h tùi hia起身。 5 凡若m̄接納lín ê，出in ê城ê時，tio̍h拌去lín腳裡ê土粉，來干證in。 6 學生就出去，遍行hiahê鄉社傳福音，ta̍k所在醫病。 7 分封ê人君希律聽見一切ê事，就不止躊躇，因為有人講，約翰tùi死人中koh活； 8 有ê講，以利亞出現；也有ê講，古早ê先知一人koh活。 9 但是希律講，約翰我已經kā伊刣頭；taⁿ我聽見伊chit號事，這是甚麼人？就chhē機會ài看見伊 10 使徒tò來，將in所行ê排列hō͘耶穌聽。耶穌就chhōa in退開到一个城，名Pek-sài-tāi。 11 但是眾人知就tè伊；伊接納in，對in講論上帝ê國；凡若欠用醫病，就kā伊醫。 12 日beh落，十二個學生來kā伊講，請四散眾人，hō͘ in去四圍ê鄉社kap山場投歇，設法食；因為咱chia是曠野ê所在。 13 耶穌對in講，Lín Hō͘ in食。In講，阮若無去替chiahê眾人買食，就不過有五個餅，兩尾魚nā-tiāⁿ。 14 因為hiahê人約略有五千。耶穌tùi學生講，Hō͘眾人坐kui列，每列五十人。 15 學生照án-ni行，hō͘眾人lóng坐。 16 耶穌the̍h五個餅兩尾魚，ǹg天祝謝來peh伊，hō͘學生排tī眾人ê面前。 17 Lóng食到飽；拾所chhun ê屑á十二筐。 18 耶穌家己teh祈禱，學生kap伊tī hia；伊就問in講，眾人講我是是誰？ 19 應講，是行洗禮ê約翰；也有人講，是以利亞；koh有人講，是古早ê先知一人koh活。 20 伊kā in講，若是lín講我是是誰？彼得應講，是上帝ê基督。 21 伊就禁戒in莫得將這kā人講； 22 續講，人子的確tio̍h受chōe-chōe艱苦，hō͘ chiahê長老、祭司頭、經學士所棄sak，koh受害死，第三日koh活。 23 Koh對眾人講，若有人ài tè我，就tio̍h看無家己，日日giâ伊ê十字架來tè我。 24 因為見若ài救伊ê性命ê beh失落伊；總是見若為tio̍h我來失落伊ê性命ê teh-beh救伊。 25 因為人若得tio̍h全世界來失落家己，損壞家己，有甚麼利益ah？ 26 見若掠我kap我ê話做見笑ê，人子用家己kap父kap聖天使ê榮光來ê時，也beh掠hit人做見笑。 27 我真實kā lín講，Khiā tī chia ê，有人iáu-bē死，beh看見上帝ê國。 28 講chiahê話了後差不多八日，耶穌帶彼得、約翰、雅各saⁿ-kap上山祈禱。 29 祈禱ê時伊ê面貌有koh-iūⁿ，伊ê衫白，koh光nà-nà。 30 忽然有兩人kap伊講話，就是摩西、以利亞。 31 In tī榮光出現，談論伊ê過世，就是伊tī耶路撒冷所beh歷過ê。 32 彼得kap同tī-teh ê人厭倦眠去；到in精神，就看見耶穌ê榮光，以及kap伊khiā-teh hit兩人。 33 當hit兩人離別伊ê時，彼得tùi耶穌講，先生，咱tī chia真好；阮來搭三間寮á，一間hō͘你，一間hō͘摩西，一間hō͘以利亞；是m̄知伊所講ê。 34 講chiahê話ê時，有雲罩in；in入tī雲內就驚。 35 有聲tùi雲裡出，講，chitê是我ê Kiáⁿ，我所揀ê；lín tio̍h聽伊 36 Hit-ê聲已經出，就看見耶穌家己tī-teh。學生靜靜；hit時無將所看見ê Kā人講。 37 隔日in落山ê時，有kui陣人來接伊 38 從中有一人大聲叫講，先生ah，求你看我ê Kiáⁿ，伊是我孤生ê。 39 有神掠伊，就liâm-piⁿ喉叫，hō͘伊thiu-chhoah到流nōa，koh重重傷伊；離開伊實在oh。 40 我bat求你ê學生趕伊，也in bōe能。 41 耶穌應講，Hàiⁿ ah，m̄信koh悖逆ê世代ah，我kap lín tòa，吞忍lín，beh到jōa久ah？Tio̍h chhōa你ê Kiáⁿ來chia。 42 來ê時鬼siak hō͘伊倒，hō͘伊大thiu-chhoah。耶穌就責備邪神，醫好hitê gín-ná，交hō͘伊ê老父。 43 眾人lóng gông-ngia̍h上帝ê大威嚴。 眾人奇怪伊所做lóng總ê事，hit時耶穌tùi伊ê學生講， 44 Chiahê話lín tio̍h聽去落耳；因為人子beh tú-tio̍h解送tī人ê手。 45 學生bōe曉悟chitê話，是對in隱密，hō͘ in bōe明白；in也m̄敢用chitê話問伊。 46 學生中生起辯論，看是誰 beh做大。 47 但是耶穌看出in心內所辯論，就牽一个gín-ná hō͘伊khiā tī身邊， 48 chiah kā in講，見若為tio̍h我ê名接納chitê gín-ná ê就是接納我；見若接納我ê是接納差我ê；因為lín眾人ê中間第一微細ê，伊是做大ê。 49 約翰應講，先生，阮bat看見一人用你ê名趕鬼；阮就禁止伊，因為伊無kap阮tè你。 50 耶穌對伊講，莫得禁止伊，因為見若無攻擊lín ê就是為lín。 51 耶穌受chih接上天ê日期beh到，就決意ǹg耶路撒冷來行，差使者做頭去； 52 in去入撒馬利亞人一个鄉社，beh kā伊備辦。 53 但是in m̄接納伊，因為伊ǹg耶路撒冷teh行。 54 伊ê學生雅各約翰看見án-ni，就講，主ah，你ài阮叫火tùi天落來滅in mah？ 55 耶穌oa̍t-tńg身責備in。 56 大家就去別個鄉社。 57 In行路ê時有人tùi耶穌講，你無論tá-lo̍h去，我beh tè你。 58 耶穌kā伊講，狐狸有孔，天中ê飛鳥有巢；獨獨人子無khòa頭殼ê所在。 59 Koh對一人講，Tè我。Hit人講，主ah，hō͘我tò去，先埋葬我ê老父。 60 耶穌kā伊講，chhut-chāi死人埋葬in ê死人；但是你tio̍h去傳報上帝ê國。 61 Koh一人講，主ah，我beh tè你；總是准我先去kap家內ê人相辭。 62 耶穌對伊講，見若手hōaⁿ犁尾來看後面ê，無合tī上帝ê國。
1 Iâ-so͘ kiò cha̍p-jī ê ha̍k-seng lóng lâi, hō͘ in ū lêng-le̍k koân-pèng, ōe chè-ap lóng-chóng ê kúi, i-hó pīⁿ-chèng. 2 Chiū chhe in khì thoân Siōng-tè ê kok, i-hó phòa-pīⁿ lâng. 3 Koh tùi in kóng, Bo̍h-tit tòa lō͘-hùi, bo̍h-tit koáiⁿ-á, bo̍h-tit tah-liân, bo̍h-tit kan-niû, bo̍h-tit gûn, iā bo̍h-tit nn̄g niá saⁿ. 4 Kìⁿ só͘ ji̍p ê chhù, tio̍h tòa tī hia, iā tio̍h tùi hia khí-sin. 5 Hoān-nā m̄ chiap-la̍p lín ê, chhut in ê siâⁿ ê sî, tio̍h pōaⁿ-khì lín kha-ni̍h ê thô͘-hún, lâi kan-chèng in. 6 Ha̍k-seng chiū chhut-khì, piàn-kiâⁿ hiah ê hiuⁿ-siā thoân hok-im, ta̍k só͘-chāi i-pīⁿ. 7 Hun-hong ê jîn-kun Hi-lu̍t thiaⁿ-kìⁿ it-chhè ê sū, chiū put-chí tiû-tû, in-ūi ū lâng kóng, Iok-hān tùi sí-lâng tiong koh-oa̍h; 8 ū-ê kóng, Í-lī-a chhut-hiān; iā ū-ê kóng, kó͘-chá ê sian-ti chi̍t lâng koh-oa̍h. 9 Nā-sī Hi-lu̍t kóng, Iok-hān góa í-keng kā i thâi-thâu; taⁿ góa thiaⁿ-kìⁿ I chit hō sū, che sī sím-mi̍h lâng? Chiū chhē ki-hōe ài khòaⁿ-kìⁿ I. 10 Sù-tô͘ tò-lâi, chiong in só͘ kiâⁿ ê pâi-lia̍t hō͘ Iâ-so͘ thiaⁿ. Iâ-so͘ chiū chhōa in thè-khui kàu chi̍t ê siâⁿ, miâ Pek-sài-tāi. 11 Nā-sī chèng lâng chai chiū tè I; I chiap-la̍p in, tùi in káng-lūn Siōng-tè ê kok; hoān-nā khiàm-ēng i-pīⁿ, chiū kā i i. 12 Ji̍t beh lo̍h, cha̍p-jī ê ha̍k-seng lâi kā I kóng, Chhiáⁿ sì-sòaⁿ chèng lâng, hō͘ in khì sì-ûi ê hiuⁿ-siā kap soaⁿ-tiûⁿ tâu-hioh siat-hoat chia̍h; in-ūi lán chia sī khòng-iá ê só͘-chāi. 13 Iâ-so͘ tùi in kóng, Lín hō͘ in chia̍h. In kóng, Goán nā bô khì thòe chiah ê chèng lâng bóe chia̍h, chiū put-kò ū gō͘ ê piáⁿ, nn̄g bé hî nā-tiāⁿ. 14 In-ūi hiah ê lâng iok-lio̍k ū gō͘-chheng. Iâ-so͘ tùi ha̍k-seng kóng, Hō͘ chèng lâng chē kui lia̍t, múi lia̍t gō͘-cha̍p lâng. 15 Ha̍k-seng chiàu án-ni kiâⁿ, hō͘ chèng lâng lóng chē. 16 Iâ-so͘ the̍h gō͘ ê piáⁿ nn̄g bé hî, ǹg thiⁿ chiok-siā lâi peh i, hō͘ ha̍k-seng pâi tī chèng lâng ê bīn-chêng. 17 Lóng chia̍h kàu pá; khioh só͘ chhun ê sut-á cha̍p-jī kheng. 18 Iâ-so͘ ka-kī teh kî-tó, ha̍k-seng kap I tī hia; I chiū mn̄g in kóng, Chèng lâng kóng góa sī chī-chūi? 19 Ìn kóng, sī kiâⁿ sóe-lé ê Iok-hān; iā ū lâng kóng, sī Í-lī-a; koh ū lâng kóng, sī kó͘-chá ê sian-ti chi̍t lâng koh-oa̍h. 20 I kā in kóng, Nā-sī lín kóng góa sī chī-chūi? Pí-tek ìn kóng, Sī Siōng-tè ê Ki-tok. 21 I chiū kìm-kài in bo̍h-tit chiong che kā lâng kóng; 22 sòa kóng, Jîn-chú tek-khak tio̍h siū chōe-chōe kan-khó͘, hō͘ chiah ê tiúⁿ-ló, chè-si-thâu, keng-ha̍k-sū só͘ khì-sak, koh siū hāi-sí, tē saⁿ ji̍t koh-oa̍h. 23 Koh tùi chèng lâng kóng, Nā ū lâng ài tè góa, chiū tio̍h khòaⁿ-bô ka-kī, ji̍t-ji̍t giâ i ê si̍p-jī-kè lâi tè góa. 24 In-ūi kìⁿ-nā ài kiù i ê sìⁿ-miā ê beh sit-lo̍h i; chóng-sī kìⁿ-nā ūi-tio̍h góa lâi sit-lo̍h i ê sìⁿ-miā ê teh-beh kiù i. 25 In-ūi lâng nā tit-tio̍h choân sè-kài lâi sit-lo̍h ka-kī, sún-hoāi ka-kī, ū sím-mi̍h lī-ek ah? 26 Kìⁿ-nā lia̍h góa kap góa ê ōe chòe kiàn-siàu ê, Jîn-chú ēng ka-kī kap Pē kap sèng thiⁿ-sài ê êng-kng lâi ê sî, iā beh lia̍h hit lâng chòe kiàn-siàu. 27 Góa chin-si̍t kā lín kóng, Khiā tī chia ê, ū lâng iáu-bē sí, beh khòaⁿ-kìⁿ Siōng-tè ê kok. 28 Kóng chiah ê ōe liáu-āu chha-put-to poeh ji̍t, Iâ-so͘ tòa Pí-tek, Iok-hān, Ngá-kok saⁿ-kap chiūⁿ soaⁿ kî-tó. 29 Kî-tó ê sî I ê bīn-māu ū koh-iūⁿ, I ê saⁿ pe̍h, koh kng nà-nà. 30 Hut-jiân ū nn̄g lâng kap I kóng ōe, chiū-sī Mô͘-se, Í-lī-a. 31 In tī êng-kng chhut-hiān, tâm-lūn I ê kè-sì, chiū-sī I tī Iâ-lō͘-sat-léng só͘ beh le̍k-kè ê. 32 Pí-tek kap tâng tī-teh ê lâng ià-siān bîn-khì; kàu in cheng-sîn, chiū khòaⁿ-kìⁿ Iâ-so͘ ê êng-kng, í-ki̍p kap I khiā-teh hit nn̄g lâng. 33 Tng hit nn̄g lâng lī-pia̍t I ê sî, Pí-tek tùi Iâ-so͘ kóng, Sian-siⁿ, lán tī chia chin hó; goán lâi tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a; sī m̄ chai i só͘ kóng ê. 34 Kóng chiah ê ōe ê sî, ū hûn tà in; in ji̍p tī hûn-lāi chiū kiaⁿ. 35 Ū siaⁿ tùi hûn-ni̍h chhut, kóng, Chit-ê sī góa ê Kiáⁿ, góa só͘ kéng ê; lín tio̍h thiaⁿ I. 36 Hit ê siaⁿ í-keng chhut, chiū khòaⁿ-kìⁿ Iâ-so͘ ka-kī tī-teh. Ha̍k-seng chēng-chēng; hit sî bô chiong só͘ khòaⁿ-kìⁿ ê kā lâng kóng. 37 Keh ji̍t in lo̍h soaⁿ ê sî, ū kui tīn lâng lâi chih I. 38 Chiông-tiong ū chi̍t lâng tōa siaⁿ kiò kóng, Sian-siⁿ ah, kiû lí khòaⁿ góa ê kiáⁿ, i sī góa ko͘-siⁿ ê. 39 Ū sîn lia̍h i, chiū liâm-piⁿ âu-kiò, hō͘ i thiu-chhoah kàu lâu nōa, koh tāng-tāng siong i; lī-khui i si̍t-chāi oh. 40 Góa bat kiû lí ê ha̍k-seng kóaⁿ i, iā in bōe-ōe. 41 Iâ-so͘ ìn kóng, Hàiⁿ ah, m̄ sìn koh pōe-ge̍k ê sè-tāi ah, góa kap lín tòa, thun-lún lín, beh kàu jōa kú ah? Tio̍h chhōa lí ê kiáⁿ lâi chia. 42 Lâi ê sî kúi siak hō͘ i tó, hō͘ i tōa thiu-chhoah. Iâ-so͘ chiū chek-pī siâ-sîn, i-hó hit ê gín-ná, kau hō͘ i ê lāu-pē. 43 Chèng lâng lóng gông-ngia̍h Siōng-tè ê tōa ui-giâm. Chèng lâng kî-koài I só͘ chòe lóng-chóng ê sū, hit sî Iâ-so͘ tùi I ê ha̍k-seng kóng, 44 Chiah ê ōe lín tio̍h thiaⁿ khì lo̍h-hī; in-ūi Jîn-chú beh tú-tio̍h ké-sàng tī lâng ê chhiú. 45 Ha̍k-seng bōe hiáu-ngō͘ chit ê ōe, sī tùi in ún-ba̍t, hō͘ in bōe bêng-pe̍k; in iā m̄ káⁿ ēng chit ê ōe mn̄g I. 46 Ha̍k-seng tiong siⁿ-khí piān-lūn, khòaⁿ chī-chūi beh chòe tōa. 47 Nā-sī Iâ-so͘ khòaⁿ-chhut in sim-lāi só͘ piān-lūn, chiū khan chi̍t ê gín-ná hō͘ i khiā tī sin-piⁿ, 48 chiah kā in kóng, Kìⁿ-nā ūi-tio̍h góa ê miâ chiap-la̍p chit ê gín-ná ê chiū-sī chiap-la̍p góa; kìⁿ-nā chiap-la̍p góa ê sī chiap-la̍p chhe góa ê; in-ūi lín chèng lâng ê tiong-kan tē it bî-sòe ê, i sī chòe tōa ê. 49 Iok-hān ìn kóng, Sian-siⁿ, goán bat khòaⁿ-kìⁿ chi̍t lâng ēng lí ê miâ kóaⁿ kúi; goán chiū kìm-chí i, in-ūi i bô kap goán tè lí. 50 Iâ-so͘ tùi i kóng, Bo̍h-tit kìm-chí i, in-ūi kìⁿ-nā bô kong-kek lín ê chiū-sī ūi lín. 51 Iâ-so͘ siū chih-chiap chiūⁿ thiⁿ ê ji̍t-kî beh kàu, chiū koat-ì ǹg Iâ-lō͘-sat-léng lâi kiâⁿ, chhe sù-chiá chòe-thâu khì; 52 in khì ji̍p Sat-má-lī-a lâng chi̍t ê hiuⁿ-siā, beh kā I pī-pān. 53 Nā-sī in m̄ chiap-la̍p I, in-ūi I ǹg Iâ-lō͘-sat-léng teh kiâⁿ. 54 I ê ha̍k-seng Ngá-kok Iok-hān khòaⁿ-kìⁿ án-ni, chiū kóng, Chú ah, lí ài goán kiò hé tùi thiⁿ lo̍h-lâi bia̍t in mah? 55 Iâ-so͘ oa̍t-tńg-sin chek-pī in. 56 Tāi-ke chiū khì pa̍t ê hiuⁿ-siā. 57 In kiâⁿ lō͘ ê sî ū lâng tùi Iâ-so͘ kóng, Lí bô lūn tá-lo̍h khì, góa beh tè lí. 58 Iâ-so͘ kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi. 59 Koh tùi chi̍t lâng kóng, Tè góa. Hit lâng kóng, Chú ah, hō͘ góa tò-khì, seng bâi-chòng góa ê lāu-pē. 60 Iâ-so͘ kā i kóng, Chhut-chāi sí-lâng bâi-chòng in ê sí-lâng; nā-sī lí tio̍h khì thoân-pò Siōng-tè ê kok. 61 Koh chi̍t lâng kóng, Chú ah, góa beh tè lí; chóng-sī chún góa seng khì kap ke-lāi ê lâng saⁿ-sî. 62 Iâ-so͘ tùi i kóng, Kìⁿ-nā chhiú hōaⁿ lôe-bé lâi khòaⁿ āu-bīn ê, bô ha̍p tī Siōng-tè ê kok.
1 Chiahê tāi-chì了後，主koh設立七十人，一對一對差in做頭去伊所beh到ta̍k ê城，ta̍k ê所在； 2 對in講，Thang收成ê是chōe，做工ê是少；所以lín tio̍h求園主逼工去kā伊收成。 3 lín去ah，我差lín親像羊á入豺狼ê中間。 4 莫得帶錢袋，莫得tah-liân，莫得鞋；路裡莫得kā人請安。 5 無論入甚麼厝，tio̍h事先講，願chit家平安。 6 設使有合宜得tio̍h平安ê人tī hia，就lín ê平安會到tī伊；若無，就倒歸tī lín。 7 Tio̍h tiàm tī hit家，lim食in所供給ê，因為做工人堪得得tio̍h伊ê工錢；莫得tùi chit家徙去hit家。 8 無論入甚麼城，人若接納lín，tio̍h食in所排tī lín面前ê。 9 城內有病ê，tio̍h醫好in，續kā in講，上帝國近lín lah。 10 但是無論入甚麼城，人m̄接納lín，就tio̍h出去in ê大街路講， 11 連lín ê城ê土粉，tiâu tī阮ê腳ê，阮也tùi lín拭去；總是lín tio̍h知上帝ê國近lah。 12 我kā lín講，Tī hit日所多瑪比hitê城iáu khah快擔當。 13 Ko-lia̍p-sìn ah，你有災禍！Pek-sài-tāi ah，你有災禍！因為tī lín中間所行chiahê權能，若有行tī Chhui-lô kap Se-tùn，就in早早穿麻衫sám火灰坐teh來反悔。 14 但是當審判ê時Chhui-lô kap Se-tùn比lín iáu khah快擔當。 15 迦百農ah，你kiám會得tio̍h舉起到天mah？你beh chhia落陰府。 16 聽lín ê就是聽我；棄sak lín ê就是棄sak我；棄sak我ê就是棄sak差我ê。 17 Hiah-ê七十人倒tńg來teh歡喜講，主ah，用你ê名鬼也降服阮。 18 耶穌kā in講，我有看見撒旦親像sih-nà tùi天跋落來。 19 我已經hō͘ lín有權thang踏蛇kap蠍á蟲，koh贏過對敵lóng總ê氣力；決斷無一項會害tio̍h lín。 20 總是莫得因為chiahê神降服lín來歡喜；tio̍h因為lín ê名記tī天裡來歡喜。 21 當hit時耶穌tī聖神快樂，講，父ah，天地ê主，我o-ló你，因為你將chiahê事對智慧聰明ê有隱密伊，對細kiáⁿ有顯明伊；父ah，是lah，因為你看án-ni做歡喜。萬項有tùi我ê父lóng交付我； 22 父以外無一个bat kiáⁿ是是誰；Kiáⁿ kap Kiáⁿ所ài beh指示ê以外，也無一个bat父是是誰。 23 就oa̍t-tńg身暗靜對學生講，看見lín所看見ê，hiahê目睭有福氣。 24 因為我kā lín講，前有chōe-chōe先知kap君王ài看lín所看見ê，也無看見，ài聽lín所聽見ê，也無聽見。 25 有一个教律法ê先生起來試伊講，先生ah，我tio̍h怎樣做chiah會得tio̍h永活？ 26 耶穌對伊講，Tī律法有記甚麼？你讀了怎樣？ 27 伊應講，你tio̍h盡心、盡性、盡力、盡意疼主你ê上帝；也tio̍h疼厝邊親像家己。 28 耶穌kā伊講，你所應ê是tio̍h；行chitê，就會活。 29 但是伊ài顯明家己做tio̍h，就對耶穌講，Chī-chūi是我ê厝邊？ 30 耶穌應伊講，有一人tùi耶路撒冷落去耶利哥，tú-tio̍h賊pak伊ê衣裳，phah伊到半死，放hē-teh，做in去。 31 Chhàu-khám有一个祭司tùi hit條路落去，看見伊，就閃tùi hit-pêng過去。 32 Koh有一个利未人到hit所在，看了猶原tùi hit-pêng過去。 33 獨獨有一个撒馬利亞人行路tùi hia過，看見就憐憫伊； 34 近óa，用酒thîn tī伊tio̍h傷ê所在，kā伊包teh，將家己ê cheng-siⁿ hō͘伊騎，chhōa伊到客店，來照顧伊 35 隔日the̍h銀á兩個hō͘店主，講，Tio̍h照顧chit人；所費若khah加，我倒tńg來chiah還你。 36 Chit三人中你phah算tá-lo̍h一个做tú-tio̍h賊hit人ê厝邊？ 37 伊講，憐憫伊ê，就是。耶穌kā伊講，你去，照án-ni來行。 38 In行ê時，耶穌入一个鄉社；有一个婦人人，名Má-tāi，接納伊tī伊ê厝。 39 伊有一个姊妹，叫做馬利亞，坐tī主ê腳下，來聽伊ê話。 40 Má-tāi因為接待in，tāi-chì chōe，心忙；就近耶穌講，主ah，我ê姊妹放我家己teh摸，你無要緊mah？Tio̍h kah伊來贊我。 41 但是主應講，Má-tāi ah，Má-tāi ah，你為tio̍h chōe-chōe tāi-chì掛慮紛雜； 42 但是所欠用ê是一項nā-tiāⁿ；因為馬利亞已經揀tio̍h好ê份額，就是bōe kā伊搶得ê。
1 Chiah ê tāi-chì liáu-āu, Chú koh siat-li̍p chhit-cha̍p lâng, chi̍t tùi chi̍t tùi chhe in chòe-thâu khì I só͘ beh kàu ta̍k ê siâⁿ, ta̍k ê só͘-chāi; 2 tùi in kóng, Thang siu-sêng ê sī chōe, chòe-kang ê sī chió; só͘-í lín tio̍h kiû hn̂g Chú pek kang khì kā I siu-sêng. 3 Lín khì ah, góa chhe lín chhin-chhiūⁿ iûⁿ-á ji̍p chhâi-lông ê tiong-kan. 4 Bo̍h-tit tòa chîⁿ-tē, bo̍h-tit tah-liân, bo̍h-tit ôe; lō͘-ni̍h bo̍h-tit kā lâng chhéng-an. 5 Bô lūn ji̍p sím-mi̍h chhù, tio̍h tāi-seng kóng, Goān chit ke pêng-an. 6 Siat-sú ū ha̍p-gî tit-tio̍h pêng-an ê lâng tī hia, chiū lín ê pêng-an ōe kàu tī i; nā bô, chiū tò kui tī lín. 7 Tio̍h tiàm tī hit ke, lim-chia̍h in só͘ kiong-kip ê, in-ūi chòe-kang lâng kham-tit tit-tio̍h i ê kang-chîⁿ; bo̍h-tit tùi chit ke sóa khì hit ke. 8 Bô lūn ji̍p sím-mi̍h siâⁿ, lâng nā chiap-la̍p lín, tio̍h chia̍h in só͘ pâi tī lín bīn-chêng ê. 9 Siâⁿ-lāi ū pīⁿ ê, tio̍h i-hó in, sòa kā in kóng, Siōng-tè kok kūn lín lah. 10 Nā-sī bô lūn ji̍p sím-mi̍h siâⁿ, lâng m̄ chiap-la̍p lín, chiū tio̍h chhut-khì in ê tōa ke-lō͘ kóng, 11 Liân lín ê siâⁿ ê thô͘-hún, tiâu tī goán ê kha ê, goán iā tùi lín chhit-khì; chóng-sī lín tio̍h chai Siōng-tè ê kok kūn lah. 12 Góa kā lín kóng, Tī hit ji̍t Só͘-to-má pí hit ê siâⁿ iáu khah khoài tam-tng. 13 Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê koân-lêng, nā ū kiâⁿ tī Chhui-lô kap Se-tùn, chiū in chá-chá chhēng môa-saⁿ sám hé-hu chē-teh lâi hoán-hóe. 14 Nā-sī tng sím-phòaⁿ ê sî Chhui-lô kap Se-tùn pí lín iáu khah khoài tam-tng. 15 Ka-pek-lông ah, lí kiám ōe tit-tio̍h kú-khí kàu thiⁿ mah? Lí beh chhia lo̍h im-hú. 16 Thiaⁿ lín ê chiū-sī thiaⁿ góa; khì-sak lín ê chiū-sī khì-sak góa; khì-sak góa ê chiū-sī khì-sak chhe góa ê. 17 Hiah ê chhit-cha̍p lâng tò-tńg-lâi teh hoaⁿ-hí kóng, Chú ah, ēng lí ê miâ kúi iā hâng-ho̍k goán. 18 Iâ-so͘ kā in kóng, Góa ū khòaⁿ-kìⁿ Sat-tàn chhin-chhiūⁿ sih-nà tùi thiⁿ poa̍h-lo̍h-lâi. 19 Góa í-keng hō͘ lín ū koân thang ta̍h chôa kap giat-á-thâng, koh iâⁿ-kè tùi-te̍k lóng-chóng ê khùi-la̍t; koat-toàn bô chi̍t hāng ōe hāi-tio̍h lín. 20 Chóng-sī bo̍h-tit in-ūi chiah ê sîn hâng-ho̍k lín lâi hoaⁿ-hí; tio̍h in-ūi lín ê miâ kì tī thiⁿ-ni̍h lâi hoaⁿ-hí. 21 Tng hit sî Iâ-so͘ tī Sèng Sîn khoài-lo̍k, kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i; Pē ah, sī lah, in-ūi lí khòaⁿ án-ni chòe hoaⁿ-hí. Bān-hāng-ū tùi góa ê Pē lóng kau-hù góa; 22 Pē í-gōa bô chi̍t-ê bat Kiáⁿ sī chī-chūi; Kiáⁿ kap Kiáⁿ só͘ ài beh chí-sī ê í-gōa, iā bô chi̍t-ê bat Pē sī chī-chūi. 23 Chiū oa̍t-tńg-sin àm-chīⁿ tùi ha̍k-seng kóng, Khòaⁿ-kìⁿ lín só͘ khòaⁿ-kìⁿ ê, hiah ê ba̍k-chiu ū hok-khì. 24 In-ūi góa kā lín kóng, Chêng ū chōe-chōe sian-ti kap kun-ông ài khòaⁿ lín só͘ khòaⁿ-kìⁿ ê, iā bô khòaⁿ-kìⁿ, ài thiaⁿ lín só͘ thiaⁿ-kìⁿ ê , iā bô thiaⁿ-kìⁿ. 25 Ū chi̍t ê kà lu̍t-hoat ê sian-siⁿ khí-lâi chhì I kóng, Sian-siⁿ ah, góa tio̍h cháiⁿ-iūⁿ chòe chiah ōe tit-tio̍h éng-oa̍h? 26 Iâ-so͘ tùi i kóng, Tī lu̍t-hoat ū kì sím-mi̍h? Lí tha̍k-liáu cháiⁿ-iūⁿ? 27 I ìn kóng, Lí tio̍h chīn-sim, chīn-sèng, chīn-la̍t, chīn-ì thiàⁿ Chú lí ê Siōng-tè; iā tio̍h thiàⁿ chhù-piⁿ chhin-chhiūⁿ ka-kī. 28 Iâ-so͘ kā i kóng, Lí só͘ ìn ê sī tio̍h; kiâⁿ chit-ê, chiū ōe oa̍h. 29 Nā-sī i ài hián-bêng ka-kī chòe tio̍h, chiū tùi Iâ-so͘ kóng, Chī-chūi sī góa ê chhù-piⁿ? 30 Iâ-so͘ ìn i kóng, Ū chi̍t lâng tùi Iâ-lō͘-sat-léng lo̍h-khì Iâ-lī-ko, tú-tio̍h chha̍t pak i ê i-chiûⁿ, phah i kàu pòaⁿ-sí, pàng hē-teh, chòe in khì. 31 Chhàu-khám ū chi̍t ê chè-si tùi hit tiâu lō͘ lo̍h-khì, khòaⁿ-kìⁿ i, chiū siám tùi hit pêng kè-khì. 32 Koh ū chi̍t ê Lī-bī lâng kàu hit só͘-chāi, khòaⁿ-liáu iû-goân tùi hit pêng kè-khì. 33 To̍k-to̍k ū chi̍t ê Sat-má-lī-a lâng kiâⁿ lō͘ tùi hia kè, khòaⁿ-kìⁿ chiū lîn-bín i; 34 kūn-óa, ēng chiú thîn tī i tio̍h-siong ê só͘-chāi, kā i pau-teh, chiong ka-kī ê cheng-siⁿ hō͘ i khiâ, chhōa i kàu kheh-tiàm, lâi chiàu-kò͘ i. 35 Keh ji̍t the̍h gûn-á nn̄g-ê hō͘ tiàm-chú, kóng, Tio̍h chiàu-kò͘ chit lâng; só͘-hùi nā khah ke, góa tò-tńg-lâi chiah hêng lí. 36 Chit saⁿ lâng tiong lí phah-sǹg tá-lo̍h chi̍t-ê chòe tú-tio̍h chha̍t hit lâng ê chhù-piⁿ? 37 I kóng, Lîn-bín i ê, chiū-sī. Iâ-so͘ kā i kóng, Lí khì, chiàu án-ni lâi kiâⁿ. 38 In kiâⁿ ê sî, Iâ-so͘ ji̍p chi̍t ê hiuⁿ-siā; ū chi̍t ê hū-jîn-lâng, miâ Má-tāi, chiap-la̍p I tī i ê chhù. 39 I ū chi̍t ê chí-bē, kiò chòe Má-lī-a, chē tī Chú ê kha-ē, lâi thiaⁿ I ê ōe. 40 Má-tāi in-ūi chiap-thāi in, tāi-chì chōe, sim bâng; chiū-kūn Iâ-so͘ kóng, Chú ah, góa ê chí-bē pàng góa ka-kī teh bong, lí bô iàu-kín mah? Tio̍h kah i lâi chān góa. 41 Nā-sī Chú ìn kóng, Má-tāi ah, Má-tāi ah, lí ūi-tio̍h chōe-chōe tāi-chì khòa-lū hun-cha̍p; 42 nā-sī só͘ khiàm-ēng ê sī chi̍t hāng nā-tiāⁿ; in-ūi Má-lī-a í-keng kéng-tio̍h hó ê hūn-gia̍h, chiū-sī bōe kā i chhiúⁿ-tit ê.
1 耶穌tī一所在祈禱，已經soah，伊ê學生一人對伊講，主ah，教示阮祈禱，親像約翰也bat教示伊ê學生。 2 伊就kā in講，Lín祈禱ê時tio̍h講，父ah，願你ê名聖；你ê國臨到； 3 阮ê日食日日hō͘阮； 4 赦免阮ê罪，因為阮也赦免辜負阮ê人；莫得chhōa阮入tī試。 5 Koh對in講，Lín甚麼人有朋友，你半暝去chhē伊，kā伊講，朋友ah，the̍h三個餅借我: 6 因為我有朋友tùi路裡來chhē我，我無物thang請伊 7 伊tùi內面應講，莫得chô-chak我；門已經關，gín-ná kap我tī床裡；我bōe得thang起來the̍h hō͘你。 8 我kā你講，雖然無為tio̍h伊做朋友起來the̍h hō͘伊，iáu-kú為tio̍h伊ê迫切beh起來，照伊所欠用ê hō͘伊。 9 我koh kā lín講，求就hō͘ lín；chhē就tú-tio̍h；phah門就kā lín開。 10 因為見若求ê得tio̍h，chhē ê tú-tio̍h；phah門ê Kā in開。 11 Lín tá-lo̍h一个做父ê，有kiáⁿ來討餅，kiám beh將石頭hō͘伊mah？á是beh魚，kiám beh將蛇準做魚hō͘伊mah？ 12 á是討卵，kiám beh將蠍á蟲hō͘伊mah？ 13 Lín chiahê雖然pháiⁿ，iáu-kú會曉得用好物hō͘ lín ê Kiáⁿ兒，何況lín tī天裡ê父，kiám無用聖神來hō͘求伊ê人mah？ 14 耶穌趕一个啞口鬼；已經出，啞口ê就講話；眾人奇怪。 15 內中有幾nā人講，伊趕鬼是靠鬼王Pia̍t-se-pok。 16 Koh有人試伊，對伊求tùi天來ê神蹟。 17 耶穌知in ê意思就kā in講，凡若國家己爭拚，會致到拋荒，厝一間一間倒壞； 18 若撒旦家己爭拚，伊ê國thái-thó khiā會tiâu？因為lín講我靠Pia̍t-se-pok趕鬼。 19 設使我靠Pia̍t-se-pok趕鬼，就lín ê子弟趕鬼，óa靠是誰 ah？Án-ni in beh擬斷lín。 20 獨獨我若靠上帝ê手趕鬼，就上帝ê國已經到tī lín。 21 猛人穿盔甲kia̍h ke-si顧守伊ê厝，伊所有ê就安穩。 22 總是比伊khah猛ê到來贏伊，就搶伊所óa靠全副ê戰器，來分伊ê物件。 23 無同我ê就是對敵我；無kap我收拾ê就是teh phah散。 24 邪神已經離開人，經過無水ê地，求安歇；無得tio̍h，就講，我beh tò去所出來ê厝。 25 到tè，就看見拚掃齊整； 26 就去koh帶七個神比家己khah pháiⁿ，入去khiā起。Hit人路尾ê景況比起頭khah慘。 27 伊講chiahê話ê時，眾人中有一个婦人人大聲kā伊講，生你ê腹肚，hō͘你suh ê奶頭有福氣ah。 28 但是耶穌講：M̄達tio̍h聽上帝ê道理來守ê Khah有福氣。 29 人聚集ná chōe，耶穌就講，Chit世代是pháiⁿ ê世代，in求神蹟，但是除約拿ê神蹟以外，無beh神蹟hō͘伊。 30 因為約拿成做神蹟來hō͘尼尼微人，親像án-ni人子也beh成做神蹟來hō͘ chit世代。 31 南方ê女王當審判ê時，beh kap chit世代ê人saⁿ-kap起來，續擬定chit世代ê罪；因為伊tùi地ê極頭來聽所羅門知識ê話，何況tī chia有比所羅門khah大ê。 32 尼尼微人當審判ê時beh kap chit世代ê人saⁿ-kap khiā起來，續擬定chit世代ê罪；因為in tùi約拿所傳ê來反悔，何況tī chia有比約拿khah大ê。 33 無人點燈hē tī隱密ê所在，á是tī斗下；就是hē tī燈台頂，hō͘入來ê人看見hitê光。 34 身軀ê燈就是你ê目睭；你ê目睭若金，就thong身軀也光；你ê目睭若花，就身軀也暗。 35 所以tio̍h謹慎驚了你內面ê 光是暗。 36 設使你thong身軀lóng光，無一跡暗，就beh完全光，親像燈ê 光nà-nà teh照你。 37 講話ê時有法利賽人請伊saⁿ-kap食。耶穌就入去坐。 38 Hit-ê法利賽人看見伊bē洗來食，就奇怪。 39 主就對伊講，Taⁿ lín法利賽人清氣杯kap盤 ê外面；但是lín內面就有搶劫kap惡毒滿滿。 40 Lín戇人ah，創造外面ê kiám無也創造內面mah？ 41 總是tio̍h將chiahê內面ê物賑濟人，就ta̍k項物在lín lóng清氣。 42 Lín法利賽人有災禍ah！因為lín將薄荷，芸香kap ta̍k樣ê菜蔬十份抽一份，但是公義kap疼上帝ê事就放無要緊；總是chiahê是應該tio̍h行ê，hiahê也m̄-thang放sak。 43 Lín法利賽人有災禍ah！因為lín ài會堂內坐高位，街市裡hō͘人請安。 44 Lín有災禍ah！因為lín親像隱密ê墓，人行tī hit頂面m̄知。 45 有一个教律法ê先生應伊講，先生，你講chiahê話也暴辱tio̍h阮。 46 但是伊講：Lín教律法ê先生也有災禍ah！因為lín將oh得擔ê擔hō͘人擔；但是lín本身無用一支指頭á來摸hiahê擔。 47 Lín有災禍ah！因為lín chhòng先知人ê墓，也lín ê祖bat害死in。 48 Án-ni，lín ê祖所做ê，lín做干證，koh歡喜伊；因為in害死in，也lín chhòng in ê墓。 49 所以上帝ê智慧有講，我beh差先知kap使徒就近in，其中有ê in beh害死伊，有ê in beh khún-tio̍k伊； 50 致到tùi創造世間以來所流眾先知ê血lóng beh kā chit世代討； 51 就是tùi亞伯ê血到撒迦利亞死tī殿kap壇ê中間ê血，實在ah，我kā lín講，lóng beh對chit世代討。 52 Lín教律法ê先生有災禍ah！因為lín將知識ê鎖匙kia̍h去；lín家己m̄入，teh-beh入ê人lín就阻擋伊 53 耶穌tùi hia出來ê時，經學士kap法利賽人出力逼伊，激伊講khah chōe話； 54 當等伊，ài掠伊ê話縫。
1 Iâ-so͘ tī chi̍t só͘-chāi kî-tó, í-keng soah, I ê ha̍k-seng chi̍t lâng tùi I kóng, Chú ah, kà-sī goán kî-tó, chhin-chhiūⁿ Iok-hān iā bat kà-sī i ê ha̍k-seng. 2 I chiū kā in kóng, Lín kî-tó ê sî tio̍h kóng, Pē ah, goān lí ê miâ sèng; lí ê kok lîm-kàu; 3 goán ê ji̍t-si̍t ji̍t-ji̍t hō͘ goán; 4 sià-bián goán ê chōe, in-ūi goán iā sià-bián ko͘-hū goán ê lâng; bo̍h-tit chhōa goán ji̍p tī chhì. 5 Koh tùi in kóng, Lín sím-mi̍h lâng ū pêng-iú, lí pòaⁿ-mî khì chhē i, kā i kóng, Pêng-iú ah, the̍h saⁿ ê piáⁿ chioh góa: 6 in-ūi góa ū pêng-iú tùi lō͘-ni̍h lâi chhē góa, góa bô mi̍h thang chhiáⁿ i. 7 I tùi lāi-bīn ìn kóng, Bo̍h-tit chô-chak góa; mn̂g í-keng koaiⁿ, gín-ná kap góa tī chhn̂g-ni̍h; góa bōe tit thang khí-lâi the̍h hō͘ lí. 8 Góa kā lí kóng, sui-jiân bô ūi-tio̍h i chòe pêng-iú khí-lâi the̍h hō͘ i, iáu-kú ūi-tio̍h i ê pek-chhiat beh khí-lâi, chiàu i só͘ khiàm-ēng ê hō͘ i. 9 Góa koh kā lín kóng, Kiû chiū hō͘ lín; chhē chiū tú-tio̍h; phah mn̂g chiū kā lín khui. 10 In-ūi kìⁿ-nā kiû ê tit-tio̍h, chhē ê tú-tio̍h; phah mn̂g ê kā in khui. 11 Lín tá-lo̍h chi̍t-ê chòe pē ê, ū kiáⁿ lâi thó piáⁿ, kiám beh chiong chio̍h-thâu hō͘ i mah? Á-sī beh hî, kiám beh chiong chôa chún-chòe hî hō͘ i mah? 12 Á-sī thó nn̄g, kiám beh chiong giat-á-thâng hō͘ i mah? 13 Lín chiah-ê sui-jiân pháiⁿ, iáu-kú ōe hiáu-tit ēng hó mi̍h hō͘ lín ê kiáⁿ-jî, hô-hòng lín tī thiⁿ-ni̍h ê Pē kiám bô ēng Sèng Sîn lâi hō͘ kiû I ê lâng mah? 14 Iâ-so͘ kóaⁿ chi̍t ê é-káu kúi; í-keng chhut, é-káu ê chiū kóng ōe; chèng lâng kî-koài. 15 Lāi-tiong ū kúi-nā lâng kóng, I kóaⁿ kúi sī khò kúi-ông Pia̍t-se-pok. 16 Koh ū lâng chhì I, tùi I kiû tùi thiⁿ lâi ê sîn-jiah. 17 Iâ-so͘ chai in ê ì-sù chiū kā in kóng, Hoān-nā kok ka-kī cheng-piàⁿ, ōe tì-kàu pha-hng, chhù chi̍t keng chi̍t keng tó-hoāi; 18 nā Sat-tàn ka-kī cheng-piàⁿ, i ê kok thái-thó khiā ōe tiâu? in-ūi lín kóng góa khò Pia̍t-se-pok kóaⁿ kúi. 19 Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi, óa-khò chī-chūi ah? Án-ni in beh gí-toàn lín. 20 To̍k-to̍k góa nā khò Siōng-tè ê chhiú kóaⁿ kúi, chiū Siōng-tè ê kok í-keng kàu tī lín. 21 Béng lâng chhēng khoe-kah kia̍h ke-si kò͘-siú i ê chhù, i só͘ ū ê chiū an-ún. 22 Chóng-sī pí i khah béng ê kàu lâi iâⁿ i, chiū chhiúⁿ i só͘ óa-khò choân-hù ê chiàn-khì, lâi pun i ê mi̍h-kiāⁿ. 23 Bô tâng góa ê chiū-sī tùi-te̍k góa; bô kap góa siu-khioh ê chiū-sī teh phah-sòaⁿ. 24 Siâ-sîn í-keng lī-khui lâng, keng-kè bô chúi ê tōe, kiû an-hioh; bô tit-tio̍h, chiū kóng, Góa beh tò-khì só͘ chhut-lâi ê chhù. 25 Kàu tè, chiū khòaⁿ-kìⁿ piàⁿ-sàu chôe-chéng; 26 chiū khì koh tòa chhit ê sîn pí ka-kī khah pháiⁿ, ji̍p-khì khiā-khí. Hit lâng lō͘-bé ê kéng-hóng pí khí-thâu khah chhám. 27 I kóng chiah ê ōe ê sî, chèng lâng tiong ū chi̍t ê hū-jîn-lâng tōa siaⁿ kā I kóng, Siⁿ lí ê pak-tó͘, hō͘ lí suh ê lin-thâu ū hok-khì ah. 28 Nā-sī Iâ-so͘ kóng, M̄ ta̍t-tio̍h thiaⁿ Siōng-tè ê tō-lí lâi siú ê khah ū hok-khì. 29 Lâng chū-chi̍p ná chōe, Iâ-so͘ chiū kóng, Chit sè-tāi sī pháiⁿ ê sè-tāi, in kiû sîn-jiah, nā-sī tû Iok-ná ê sîn-jiah í-gōa, bô beh sîn-jiah hō͘ i. 30 In-ūi Iok-ná chiâⁿ-chòe sîn-jiah lâi hō͘ Nî-nî-bî lâng, chhin-chhiūⁿ án-ni Jîn-chú iā beh chiâⁿ-chòe sîn-jiah lâi hō͘ chit sè-tāi. 31 Lâm-hng ê lú-ông tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí-tiāⁿ chit sè-tāi ê chōe; in-ūi i tùi tōe ê ke̍k-thâu lâi thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê. 32 Nî-nî-bî lâng tng sím-phòaⁿ ê sî beh kap chit sè-tāi ê lâng saⁿ-kap khiā-khí-lâi, sòa gí-tiāⁿ chit sè-tāi ê chōe; in-ūi in tùi Iok-ná só͘ thoân ê lâi hoán-hóe, hô-hòng tī chia ū pí Iok-ná khah tōa ê. 33 Bô lâng tiám teng hē tī ún-ba̍t ê só͘-chāi, á-sī tī táu ē; chiū-sī hē tī teng-tâi téng, hō͘ ji̍p-lâi ê lâng khòaⁿ-kìⁿ hit ê kng. 34 Seng-khu ê teng chiū-sī lí ê ba̍k-chiu; lí ê ba̍k-chiu nā kim, chiū thong seng-khu iā kng; lí ê ba̍k-chiu nā hoe, chiū seng-khu iā àm. 35 Só͘-í tio̍h kín-sīn kiaⁿ-liáu lí lāi-bīn ê kng sī àm. 36 Siat-sú lí thong seng-khu lóng kng, bô chi̍t jiah àm, chiū beh oân-choân kng, chhin-chhiūⁿ teng ê kng nà-nà teh chiò lí. 37 Kóng ōe ê sî ū Hoat-lī-sài lâng chhiáⁿ i saⁿ-kap chia̍h. Iâ-so͘ chiū ji̍p-khì chē. 38 Hit ê Hoat-lī-sài lâng khòaⁿ-kìⁿ I bē sóe lâi chia̍h, chiū kî-koài. 39 Chú chiū tùi i kóng, Taⁿ lín Hoat-lī-sài lâng chheng-khì poe kap pôaⁿ ê gōa-bīn; nā-sī lín lāi-bīn chiū ū chhiúⁿ-kiap kap ok-to̍k móa-móa. 40 Lín gōng lâng ah, chhòng-chō gōa-bīn ê kiám bô iā chhòng-chō lāi-bīn mah? 41 Chóng-sī tio̍h chiong chiah ê lāi-bīn ê mi̍h chín-chè lâng, chiū ta̍k hāng mi̍h chāi lín lóng chheng-khì. 42 Lín Hoat-lī-sài lâng ū chai-ē ah! in-ūi lín chiong po̍k-hô, ûn-hiong, kap ta̍k iūⁿ ê chhài-soe cha̍p hūn thiu chi̍t hūn, nā-sī kong-gī kap thiàⁿ Siōng-tè ê sū chiū pàng bô iàu-kín; chóng-sī chiah-ê sī eng-kai tio̍h kiâⁿ ê, hiah-ê iā m̄-thang pàng-sak. 43 Lín Hoat-lī-sài lâng ū chai-ē ah! in-ūi lín ài hōe-tn̂g lāi chē koâiⁿ ūi, koe-chhī-ni̍h hō͘ lâng chhéng-an. 44 Lín ū chai-ē ah! in-ūi lín chhin-chhiūⁿ ún-ba̍t ê bōng, lâng kiâⁿ tī hit téng-bīn m̄ chai. 45 Ū chi̍t ê kà lu̍t-hoat ê sian-siⁿ ìn I kóng, Sian-siⁿ, lí kóng chiah ê ōe iā pō͘-jio̍k-tio̍h goán. 46 Nā-sī I kóng, Lín kà lu̍t-hoat ê sian-siⁿ iā ū chai-ē ah! in-ūi lín chiong oh-tit taⁿ ê tàⁿ hō͘ lâng taⁿ; nā-sī lín pún-sin bô ēng chi̍t ki chńg-thâu-á lâi bong hiah ê tàⁿ. 47 Lín ū chai-ē ah! in-ūi lín chhòng sian-ti lâng ê bōng, iā lín ê chó͘ bat hāi-sí in. 48 Án-ni, lín ê chó͘ só͘ chòe ê, lín chòe kan-chèng, koh hoaⁿ-hí i; in-ūi in hāi-sí in, iā lín chhòng in ê bōng. 49 Só͘-í Siōng-tè ê Tì-hūi ū kóng, Góa beh chhe sian-ti kap sù-tô͘ chiū-kūn in, kî-tiong ū-ê in beh hāi-sí i, ū-ê in beh khún-tio̍k i; 50 tì-kàu tùi chhòng-chō sè-kan í-lâi só͘ lâu chèng sian-ti ê huih lóng beh kā chit sè-tāi thó; 51 chiū-sī tùi A-pek ê huih kàu Sat-ka-lī-a sí tī tiān kap tôaⁿ ê tiong-kan ê huih, si̍t-chāi ah, góa kā lín kóng, lóng beh tùi chit sè-tāi thó. 52 Lín kà lu̍t-hoat ê sian-siⁿ ū chai-ē ah! in-ūi lín chiong chai-bat ê só-sî kia̍h-khì; lín ka-kī m̄ ji̍p, teh-beh ji̍p ê lâng lín chiū chó͘-tòng i. 53 Iâ-so͘ tùi hia chhut-lâi ê sî, keng-ha̍k-sū kap Hoat-lī-sài lâng chhut-la̍t pek I, kek I kóng khah chōe ōe; 54 tng-tán I, ài lia̍h I ê ōe-phāng.
1 Hit時人聚集幾nā萬，致到相thún踏，耶穌開嘴事先對伊ê學生講，Lín tio̍h持防法利賽人ê酵，就是假好。 2 無有蓋密也無露現ê，隱密無hō͘人知ê。 3 所以lín tī烏暗ê中間所講ê，beh tī光明hō͘人聽見；lín tī密房àⁿ耳孔邊所講ê，beh報揚tī厝頂。 4 我ê朋友ah，我kā lín講，害死lín身軀了後bōe會做別項ê，莫得驚in。 5 我beh指示lín所tio̍h驚ê；tio̍h驚hitê害死了後koh有權hiat tī地獄ê；實在ah，我kā lín講，所tio̍h驚ê是chitê。 6 五個雀鳥á kiám m̄是賣兩分銀mah？tī上帝ê面前連一隻也無bōe記得。 7 就lín ê頭毛也lóng計算。莫得驚；lín比chōe-chōe雀鳥á khah貴氣。 8 我也kā lín講，見若tī人ê面前認我ê，人子tī上帝ê天使ê面前也beh認伊。 9 若是tī人ê面前無認我ê，tī上帝ê天使ê面前，也beh m̄認伊。 10 凡若講話來攻擊人子ê，beh赦免伊；但是褻瀆聖神ê，無beh赦免伊 11 人帶lín到會堂kap辦政事以及有權ê ê面前，莫得掛慮beh怎樣分訴，beh分訴甚麼，beh講甚麼； 12 因為hit時聖神beh教示lín所tio̍h講ê。 13 眾人中有一人kā伊講，先生ah，請你kah我ê兄弟kap我分祖業。 14 但是耶穌kā伊講，你chitê人ah，是誰設立我做lín ê審判官，á是做分家業ê mah？ 15 就對眾人講，Tio̍h謹慎，約束家己，lóng無貪心；因為人ê活命不在伊所積聚ê豐盛。 16 就用譬喻對in講，有一个富人伊ê田園真好收。 17 伊想來想去講，我無所在thang囤我ê土產，taⁿ beh怎樣？ 18 Koh講，我beh án-ni做，beh拆我ê粟倉，起khah大ê；就我ê五穀kap財物lóng beh囤tī hia； 19 也beh kā我ê靈魂講，靈魂ah，你有chōe-chōe財物積聚做chōe-chōe年ê路用，thang清閒、lim食、快樂。 20 但是上帝kā伊講，戇人ah，今暝beh對你討你ê靈魂；就你所備辦ê beh歸甚麼人ah？ 21 見若為tio̍h家己積聚財寶，tī上帝ê面前無好額ê，也是án-ni。 22 Koh對伊ê學生講，所以我kā lín講，莫得為tio̍h性命掛慮beh食甚麼，á是為tio̍h lín ê身軀掛慮beh穿甚麼； 23 因為性命比米糧khah對重，身軀比衣裳khah對重。 24 Tio̍h試想烏鴉，in無種作無收成，也無庫房無粟倉，上帝iáu-kú養飼in；lín比鳥á hitê貴氣到怎樣？ 25 Lín甚麼人會用掛慮hō͘性命khah長一刻久ah？ 26 Án-ni至sió-khóa ê lín iáu-kú無法得，啥事掛慮其餘ê ah？ 27 試想百合花怎樣ná大叢，伊無tio̍h磨無紡績；但是我kā lín講，當所羅門極hâng-ngó͘ ê時，伊所穿m̄達tio̍h chit號花ê一蕊。 28 Taⁿ山裡ê草，今á日tī-teh，明á日hiat tī火爐，上帝尚且hō͘伊穿到án-ni，何況lín小信ê人ah？ 29 Lín莫得求beh食甚麼beh lim甚麼，也莫得煩心； 30 因為chiahê lóng是世間ê列邦人所求ê，lín ê父也知chiahê是lín欠用ê。 31 獨獨lín tio̍h求伊ê國，就chiahê物beh續hō͘ lín。 32 Lín細ê羊群ah，莫得驚，因為lín ê父歡喜用國hō͘ lín。 33 Tio̍h賣lín所有ê來賑濟人；為tio̍h lín本身備辦bōe會舊ê錢袋，tī天裡用bōe了ê財寶，就是賊bōe到，蟲bōe蛀ê所在。 34 因為lín ê財寶tī hia，lín ê心也beh tī hia。 35 Lín ê腰tio̍h hâ-teh，lín ê燈tio̍h點teh； 36 lín tio̍h親像人teh thèng候in ê主人tùi婚姻ê筵桌tò來；到tè phah門thang liâm-piⁿ kā伊開。 37 主人到，看見in警醒，hiahê奴僕有福氣。我實在kā lín講，主人beh hō͘ in坐桌，家己hâ帶，進前來伺候in。 38 Kiám-chhái二更á是三更到，看見in án-ni，hiah奴僕有福氣。 39 家主若知賊甚麼時beh到，伊就tiuⁿ-tî，不致伊ê厝受iah孔，這是lín所知。 40 Lín也tio̍h備辦便，因為lín無phah算ê時人子來lah。 41 彼得講，主ah，你設chitê譬喻是對阮講，á是也對眾人ah？ 42 主講，甚麼人是盡忠知識ê管家，主人所beh設立來管理伊家內ê人，照時發米糧hō͘ in ah？ 43 伊ê主人來看見伊án-ni行，hitê奴僕有福氣。 44 我實在kā lín講，主人beh設立伊來管理伊一切所有ê。 45 設使hitê奴僕心內phah算，我ê主人延chhiân chiah beh來，就phah hiahê奴僕女婢，lim食koh酒醉， 46 就tī無phài-phe ê日m̄知ê時，hitê奴僕ê主人beh到，重重刑罰伊，辦伊kap m̄信ê人同等。 47 奴僕知伊ê主人ê意思，也無備辦，也無順伊ê意思來行，beh受phah chōe下。 48 但是m̄知來行應該受phah ê事，伊beh受phah少下。見若hō͘伊chōe ê，beh kā伊the̍h chōe；託重伊chōe ê，beh kā伊討khah chōe。 49 我來是beh用火hiat tī地裡；火若已經to̍h，我iáu-kú ài甚麼？ 50 我有應該受ê洗；hitê洗iáu-bē成，我迫切到怎樣？ 51 Lín phah算我來是beh hō͘地上和平mah？我kā lín講，m̄是，反tńg是冤家。 52 Taⁿ了後一家五人beh冤家，三個kap兩個冤家，兩個kap三個冤家。 53 父kap Kiáⁿ，kiáⁿ kap父，老母kap cha-bó͘-kiáⁿ，cha-bó͘-kiáⁿ kap老母，ta-ke kap伊ê sim-pū，sim-pū kap ta-ke，in lóng beh冤家。 54 伊就koh對眾人講，Lín看見雲tùi西勢起，lín就講，Beh落雨；果然有án-ni； 55 看見風tùi南勢吹來，lín就講，Beh燒熱；也有án-ni。 56 假好ê人ah，天kap地ê形式lín to看會出，怎樣bōe會看出chitê時ah？ 57 Lín家己怎樣無省察hitê合tī義ê ah？ 58 因為你kap告你ê去見官府，iáu tī路裡tio̍h營為hō͘伊放你soah；驚了伊拖你到tī審判官，審判官將你交差役，差役續將你關落監。 59 我kā你講，一絲一毫bē還，你決斷bōe會出hia。
1 Hit sî lâng chū-chi̍p kúi-nā bān, tì-kàu saⁿ thún-ta̍h, Iâ-so͘ khui chhùi tāi-seng tùi I ê ha̍k-seng kóng, Lín tio̍h tî-hông Hoat-lī-sài lâng ê kàⁿ, chiū-sī ké-hó. 2 Bô ū khàm-ba̍t iā bô lō͘-hiān ê, ún-ba̍t bô hō͘ lâng chai ê. 3 Só͘-í lín tī o͘-àm ê tiong-kan só͘ kóng ê, beh tī kng-bêng hō͘ lâng thiaⁿ-kìⁿ; lín tī ba̍t-pâng àⁿ hī-khang-piⁿ só͘ kóng ê, beh pò-iông tī chhù-téng. 4 Góa ê pêng-iú ah, góa kā lín kóng, Hāi-sí lín seng-khu liáu-āu bōe-ōe chòe pa̍t hāng ê, bo̍h-tit kiaⁿ in. 5 Góa beh chí-sī lín só͘ tio̍h kiaⁿ ê; tio̍h kiaⁿ hit-ê hāi-sí liáu-āu koh ū koân hiat tī tē-ge̍k ê; si̍t-chāi ah, góa kā lín kóng, Só͘ tio̍h kiaⁿ ê sī chit-ê. 6 Gō͘ ê chhek-chiáu-á kiám m̄ sī bōe nn̄g hun gûn mah? tī Siōng-tè ê bīn-chêng liân chi̍t chiah iā bô bōe kì-tit. 7 Chiū lín ê thâu-mn̂g iā lóng kè-sǹg. Bo̍h-tit kiaⁿ; lín pí chōe-chōe chhek-chiáu-á khah kùi-khì. 8 Góa iā kā lín kóng, Kìⁿ-nā tī lâng ê bīn-chêng jīn góa ê, Jîn-chú tī Siōng-tè ê thiⁿ-sài ê bīn-chêng iā beh jīn i. 9 Nā-sī tī lâng ê bīn-chêng bô jīn góa ê, tī Siōng-tè ê thiⁿ-sài ê bīn-chêng, iā beh m̄ jīn i. 10 Hoān-nā kóng ōe lâi kong-kek Jîn-chú ê, beh sià-bián i; nā-sī siat-to̍k Sèng Sîn ê, bô beh sià-bián i. 11 Lâng tòa lín kàu hōe-tn̂g kap pān chèng-sū í-ki̍p ū koân ê ê bīn-chêng, bo̍h-tit khòa-lū beh cháiⁿ-iūⁿ hun-sò͘, beh hun-sò͘ sím-mi̍h, beh kóng sím-mi̍h; 12 in-ūi hit sî Sèng Sîn beh kà-sī lín só͘ tio̍h kóng ê. 13 Chèng lâng tiong ū chi̍t lâng kā I kóng, Sian-siⁿ ah, chhiáⁿ lí kah góa ê hiaⁿ-tī kap góa pun chó͘-gia̍p. 14 Nā-sī Iâ-so͘ kā i kóng, Lí chit ê lâng ah, chī-chūi siat-li̍p góa chòe lín ê sím-phòaⁿ koaⁿ, á-sī chòe pun ke-gia̍p ê mah? 15 Chiū tùi chèng lâng kóng, Tio̍h kín-sīn, iok-sok ka-kī, lóng bô tham-sim; in-ūi lâng ê oa̍h-miā put-chāi i só͘ chek-chū ê hong-sēng. 16 Chiū ēng phì-jū tùi in kóng, Ū chi̍t ê pù lâng i ê chhân-hn̂g chin hó siu. 17 I siūⁿ-lâi siūⁿ-khì kóng, Góa bô só͘-chāi thang tún góa ê thó͘-sán, taⁿ beh cháiⁿ-iūⁿ? 18 Koh kóng, Góa beh án-ni chòe, beh thiah góa ê chhek-chhng, khí khah tōa ê; chiū góa ê gō͘-kak kap châi-bu̍t lóng beh tún tī hia; 19 iā beh kā góa ê lêng-hûn kóng, Lêng-hûn ah, lí ū chōe-chōe châi-bu̍t chek-chū chòe chōe-chōe nî ê lō͘-ēng, thang chheng-êng, lim-chia̍h, khoài-lo̍k. 20 Nā-sī Siōng-tè kā i kóng, Gōng lâng ah, Kim mî beh tùi lí thó lí ê lêng-hûn; chiū lí só͘ pī-pān ê beh kui sím-mi̍h lâng ah? 21 Kìⁿ-nā ūi-tio̍h ka-kī chek-chū châi-pó, tī Siōng-tè ê bīn-chêng bô hó-gia̍h ê, iā sī án-ni. 22 Koh tùi I ê ha̍k-seng kóng, Só͘-í góa kā lín kóng, Bo̍h-tit ūi-tio̍h sìⁿ-miā khòa-lū beh chia̍h sím-mi̍h, á-sī ūi-tio̍h lín ê seng-khu khòa-lū beh chhēng sím-mi̍h; 23 in-ūi sìⁿ-miā pí bí-niû khah tùi-tiōng, seng-khu pí i-chiûⁿ khah tùi-tiōng. 24 Tio̍h chhì-siūⁿ o͘-a, in bô chèng-choh bô siu-sêng, iā bô khò͘-pâng bô chhek-chhng, Siōng-tè iáu-kú iúⁿ-chhī in; lín pí chiáu-á hit ê kùi-khì kàu cháiⁿ-iūⁿ? 25 Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú ah? 26 Án-ni chì sió-khóa ê lín iáu-kú bô hoat-tit, siáⁿ-sū khòa-lū kî-û ê ah? 27 Chhì-siūⁿ pek-ha̍p-hoe cháiⁿ-iūⁿ ná tōa châng, i bô tio̍h-bôa bô pháng-cheh; nā-sī góa kā lín kóng, Tng Só͘-lô-bûn ke̍k hâng-ngó͘ ê sî, i só͘ chhēng m̄ ta̍t-tio̍h chit hō hoe ê chi̍t lúi. 28 Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè siōng-chhiáⁿ hō͘ i chhēng kàu án-ni, hô-hòng lín sió-sìn ê lâng ah? 29 Lín bo̍h-tit kiû beh chia̍h sím-mi̍h beh lim sím-mi̍h, iā bo̍h-tit hoân-sim; 30 in-ūi chiah-ê lóng sī sè-kan ê lia̍t-pang lâng só͘ kiû ê, lín ê Pē iā chai chiah-ê sī lín khiàm-ēng ê. 31 To̍k-to̍k lín tio̍h kiû I ê kok, chiū chiah ê mi̍h beh sòa hō͘ lín. 32 Lín sòe ê iûⁿ-kûn ah, bo̍h-tit kiaⁿ, in-ūi lín ê Pē hoaⁿ-hí ēng kok hō͘ lín. 33 Tio̍h bōe lín só͘ ū ê lâi chín-chè lâng; ūi-tio̍h lín pún-sin pī-pān bōe-ōe kū ê chîⁿ-tē, tī thiⁿ-ni̍h ēng bōe liáu ê châi-pó, chiū-sī chha̍t bōe kàu, thâng bōe chiù ê só͘-chāi. 34 In-ūi lín ê châi-pó tī hia, lín ê sim iā beh tī hia. 35 Lín ê io tio̍h hâ-teh, lín ê teng tio̍h tiám-teh; 36 lín tio̍h chhin-chhiūⁿ lâng teh thèng-hāu in ê chú-lâng tùi hun-in ê iân-toh tò-lâi; kàu tè phah mn̂g thang liâm-piⁿ kā i khui. 37 Chú-lâng kàu, khòaⁿ-kìⁿ in kéng-séng, hiah ê lô͘-po̍k ū hok-khì. Góa si̍t-chāi kā lín kóng, Chú-lâng beh hō͘ in chē toh, ka-kī hâ tòa, chìn-chêng lâi su-hāu in. 38 Kiám-chhái jī kiⁿ á-sī saⁿ kiⁿ kàu, khòaⁿ-kìⁿ in án-ni, hiah lô͘-po̍k ū hok-khì. 39 Ke-chú nā chai chha̍t sím-mi̍h sî beh kàu, i chiū tiuⁿ-tî, put-tì i ê chhù siū iah khang, che sī lín só͘ chai. 40 Lín iā tio̍h pī-pān piān, in-ūi lín bô phah-sǹg ê sî Jîn-chú lâi lah. 41 Pí-tek kóng, Chú ah, lí siat chit ê phì-jū sī tùi goán kóng, á-sī iā tùi chèng lâng ah? 42 Chú kóng, Sím-mi̍h lâng sī chīn-tiong tì-sek ê koán-ke, chú-lâng só͘ beh siat-li̍p lâi koán-lí i ke-lāi ê lâng, chiàu sî hoat bí-niû hō͘ in ah? 43 I ê chú-lâng lâi khòaⁿ-kìⁿ i án-ni kiâⁿ, hit ê lô͘-po̍k ū hok-khì. 44 Góa si̍t-chāi kā lín kóng, chú-lâng beh siat-li̍p i lâi koán-lí i it-chhè só͘ ū ê. 45 Siat-sú hit ê lô͘-po̍k sim-lāi phah-sǹg, Góa ê chú-lâng iân-chhiân chiah beh lâi, chiū phah hiah ê lô͘-po̍k lú-pī, lim-chia̍h koh chiú-chùi, 46 chiū tī bô phài-phe ê ji̍t m̄ chai ê sî, hit ê lô͘-po̍k ê chú-lâng beh kàu, tāng-tāng hêng-hoa̍t i, pān i kap m̄ sìn ê lâng tâng-téng. 47 Lô͘-po̍k chai i ê chú-lâng ê ì-sù, iā bô pī-pān, iā bô sūn i ê ì-sù lâi kiâⁿ, beh siū phah chōe ē. 48 Nā-sī m̄ chai lâi kiâⁿ eng-kai siū phah ê sū i beh siū phah chió ē. Kìⁿ-nā hō͘ i chōe ê, beh kā i the̍h chōe; thok-tiōng i chōe ê, beh kā i thó khah chōe. 49 Góa lâi sī beh ēng hé hiat tī tōe-ni̍h; hé nā í-keng to̍h, góa iáu-kú ài sím-mi̍h? 50 Góa ū eng-kai siū ê sóe; hit ê sóe iáu-bē chiâⁿ, góa pek-chhiat kàu cháiⁿ-iūⁿ? 51 Lín phah-sǹg góa lâi sī beh hō͘ tōe-chiūⁿ hô-pêng mah? Góa kā lín kóng, M̄ sī, hoán-tńg sī oan-ke. 52 Taⁿ liáu-āu chi̍t ke gō͘ lâng beh oan-ke, saⁿ-ê kap nn̄g-ê oan-ke, nn̄g-ê kap saⁿ-ê oan-ke. 53 Pē kap kiáⁿ, kiáⁿ kap pē, lāu-bú kap cha-bó͘-kiáⁿ, cha-bó͘-kiáⁿ kap lāu-bú, ta-ke kap i ê sim-pū, sim-pū kap ta-ke, in lóng beh oan-ke. 54 I chiū koh tùi chèng lâng kóng, Lín khòaⁿ-kìⁿ hûn tùi sai-sì khí, lín chiū kóng, Beh lo̍h hō͘; kó-jiân ū án-ni; 55 khòaⁿ-kìⁿ hong tùi lâm-sì chhe lâi, lín chiū kóng, Beh sio-joa̍h; iā ū án-ni. 56 Ké-hó ê lâng ah, thiⁿ kap tōe ê hêng-sek lín to khòaⁿ ōe chhut, cháiⁿ-iūⁿ bōe-ōe khòaⁿ-chhut chit ê sî ah? 57 Lín ka-kī cháiⁿ-iūⁿ bô séng-chhat hit-ê ha̍p tī gī ê ah? 58 In-ūi lí kap kò lí ê khì kìⁿ koaⁿ-hú, iáu tī lō͘-ni̍h tio̍h êng-ûi hō͘ i pàng lí soah; kiaⁿ-liáu i thoa lí kàu tī sím-phòaⁿ koaⁿ, sím-phòaⁿ koaⁿ chiong lí kau chhe-ia̍h, chhe-ia̍h sòa chiong lí koaiⁿ lo̍h kaⁿ. 59 Góa kā lí kóng, Chi̍t si chi̍t hô bē hêng, lí koat-toàn bōe-ōe chhut hia.
1 當hit時有幾nā人tī-teh，將加利利人ê事kā耶穌講，就是彼拉多將in ê血chham tī in ê牲禮ê。 2 耶穌應講，因為chiahê加利利人受chit號ê害，lín phah算in比眾加利利人khah有罪mah？ 3 我kā lín講，m̄是；lín若無反悔，lóng beh親像án-ni滅無。 4 á是hit十八人，hō͘西羅亞ê塔倒落來teh死ê，lín phah算in比lóng總khiā起tī耶路撒冷ê人犯罪khah重mah？ 5 我kā lín講，m̄是；lín若無反悔，lóng beh照án-ni滅無。 6 伊就設一个譬喻講，某人有一叢無花果樹栽tī伊ê葡萄園裡；就來hit叢chhē果子，chhē無。 7 Chiah對管園ê講，你看，我連連三年來tùi chit叢無花果樹chhē果子，chhē無。Tio̍h kā伊chhò起來；啥事hō͘伊也tìn所在？ 8 應伊講，主ah，今年請koh容允伊；thèng候我四圍掘鬆èng肥； 9 後來若結果子，就好；若無，你chiah kā伊chhò起來。 10 安歇日耶穌tī一个會堂teh教示人； 11 tú-tn̄g有一个婦人人，犯tio̍h邪神致病十八年久，ún-ku lóng bōe伸直。 12 耶穌看見就叫伊講，婦人人ah，taⁿ你脫離你ê病lah。 13 就用雙手kā伊hōaⁿ；伊即時伸直，就歸榮光上帝。 14 管會堂ê，因為耶穌tī安歇日醫病，就受氣，對眾人應講，有六日應該tio̍h做工，hit六日間thang來受醫；安歇日m̄-thang。 15 但是主應伊講，假好ê人ah，tī安歇日lín kiám無ta̍k人tùi槽裡tháu伊ê牛á是驢，牽去食水mah？ 16 Chitê婦人人是亞伯拉罕ê後裔，hō͘撒旦縛伊已經十八年久，Kiám m̄應該tī安歇ê日tháu伊ê結mah？ 17 耶穌講án-ni，chiahê對敵lóng見笑；眾人因為伊所行一切榮光ê事，lóng總歡喜。 18 耶穌就講，上帝ê國親像甚麼？我beh用甚麼來比並伊？ 19 是親像一粒芥菜子，人the̍h去種tī伊家己ê園，就大叢成做樹，空中ê鳥來歇tī伊ê枝。 20 Koh講，我beh用甚麼來比並上帝ê國？ 21 是親像酵，婦人人the̍h去hē tī三斗ê麵粉內，到lóng總發酵。 22 耶穌經過chiahê城chiahê鄉社教示人，也ǹg耶路撒冷teh行。 23 有一人kā伊講，主ah，得tio̍h救ê人是少mah？ 24 耶穌對in講，Tio̍h盡力tùi狹門入去；因為我kā lín講，beh有chōe-chōe人求入也bōe得tio̍h。 25 到家主起來關門，lín chiah khiā tī外面，phah門，講，主ah，kā阮開leh，伊就beh應lín講，Lín tùi tó位來，我m̄-bat lín。 26 Lín就beh講，阮bat tī你ê面前lim食；你也bat tī阮ê街路教示。 27 伊beh講，我kā lín講，我m̄知lín tùi tó位來； 28 lín行不義ê人lóng tio̍h離開我。Lín teh-beh看見亞伯拉罕、以撒、雅各kap眾先知tī上帝ê國，也lín家己受趕出tī外面；當hit時tī hia beh有啼哭咬牙切齒。 29 Tùi東tùi西tùi南tùi北，beh有人來坐桌tī上帝ê國。 30 有路尾ê beh做事先，也有事先ê beh做路尾。 31 Hit時有法利賽幾nā人來kā伊講，你tio̍h離開chia去別位，因為希律ài beh 刣你。 32 伊kā in講，lín去kā hit隻狐狸講，你看，今á日，明á日我趕鬼醫病，到第三日我就完全。 33 雖然án-ni，今á日，明á日kap後日我應該tio̍h行；因為不該有先知受害死tī耶路撒冷ê外面。 34 耶路撒冷ah，耶路撒冷ah，就是刣死先知人，用石頭tìm奉差到tī伊ê，我jōa chōe pái ài聚集你ê Kiáⁿ兒，親像雞母聚集伊ê雞á tī翼下；但是lín m̄ ài。 35 你看，lín ê厝放teh hō͘ lín；koh我kā lín講，Lín決斷bōe看見我，thèng候lín講，Tī主ê名來ê得tio̍h福氣。
1 Tng hit sî ū kúi-nā lâng tī-teh, chiong Ka-lī-lī lâng ê sū kā Iâ-so͘ kóng, chiū-sī Pí-lia̍p-to chiong in ê huih chham tī in ê seng-lé ê. 2 Iâ-so͘ ìn kóng, In-ūi chiah ê Ka-lī-lī lâng siū chit hō ê hāi, lín phah-sǹg in pí chèng Ka-lī-lī lâng khah ū chōe mah? 3 Góa kā lín kóng, M̄ sī; lín nā bô hoán-hóe, lóng beh chhin-chhiūⁿ án-ni bia̍t-bô. 4 Á-sī hit cha̍p-poeh lâng, hō͘ Se-lô-a ê thah tó-lo̍h-lâi teh-sí ê, lín phah-sǹg in pí lóng-chóng khiā-khí tī Iâ-lō͘-sat-léng ê lâng hoān-chōe khah tāng mah? 5 Góa kā lín kóng, M̄ sī; lín nā bô hoán-hóe, lóng beh chiàu án-ni bia̍t-bô. 6 I chiū siat chi̍t ê phì-jū kóng, Bó͘ lâng ū chi̍t châng bû-hoa-kó chhiū chai tī i ê phû-tô hn̂g-ni̍h; chiū lâi hit châng chhē ké-chí, chhē bô. 7 Chiah tùi koán-hn̂g ê kóng, Lí khòaⁿ, góa liân-liân saⁿ nî lâi tùi chit châng bû-hoa-kó chhiū chhē ké-chí, chhē bô. Tio̍h kā i chhò-khí-lâi; siáⁿ-sū hō͘ i iā tìn só͘-chāi? 8 Ìn i kóng, Chú ah, kin-nî chhiáⁿ koh iông-ún i; thèng-hāu góa sì-ûi ku̍t-sang èng-pûi; 9 āu-lâi nā kiat ké-chí, chiū hó; nā bô, lí chiah kā i chhò-khí-lâi. 10 An-hioh-ji̍t Iâ-so͘ tī chi̍t ê hōe-tn̂g teh kà-sī lâng; 11 tú-tn̄g ū chi̍t ê hū-jîn-lâng, hoān-tio̍h siâ-sîn tì pīⁿ cha̍p-poeh nî kú, ún-ku lóng bōe chhun ti̍t. 12 Iâ-so͘ khòaⁿ-kìⁿ chiū kiò i kóng, Hū-jîn-lâng ah, taⁿ lí thoat-lī lí ê pīⁿ lah. 13 Chiū ēng siang-chhiú kā i hōaⁿ; i chek-sî chhun ti̍t, chiū kui êng-kng Siōng-tè. 14 Koán hōe-tn̂g ê, in-ūi Iâ-so͘ tī an-hioh-ji̍t i-pīⁿ, chiū siū-khì, tùi chèng lâng ìn kóng, Ū la̍k ji̍t eng-kai tio̍h chòe kang, hit la̍k ji̍t kan thang lâi siū i; an-hioh-ji̍t m̄-thang. 15 Nā-sī Chú ìn i kóng, Ké-hó ê lâng ah, tī an-hioh-ji̍t lín kiám bô ta̍k lâng tùi chô-ni̍h tháu i ê gû á-sī lû, khan-khì chia̍h chúi mah? 16 Chit ê hū-jîn-lâng sī A-pek-la̍h-hán ê hō͘-è, hō͘ Sat-tàn pa̍k i í-keng cha̍p-poeh nî kú, kiám m̄ eng-kai tī an-hioh ê ji̍t tháu i ê kat mah? 17 Iâ-so͘ kóng án-ni, chiah ê tùi-te̍k lóng kiàn-siàu; chèng lâng in-ūi I só͘ kiâⁿ it-chhè êng-kng ê sū, lóng-chóng hoaⁿ-hí. 18 Iâ-so͘ chiū kóng, Siōng-tè ê kok chhin-chhiūⁿ sím-mi̍h? Góa beh ēng sím-mi̍h lâi pí-phēng i? 19 Sī chhin-chhiūⁿ chi̍t lia̍p kòa-chhài chí, lâng the̍h khì chèng tī i ka-kī ê hn̂g, chiū tōa châng chiâⁿ chòe chhiū, khong-tiong ê chiáu lâi hioh tī i ê ki. 20 Koh kóng, Góa beh ēng sím-mi̍h lâi pí-phēng Siōng-tè ê kok? 21 Sī chhin-chhiūⁿ kàⁿ, hū-jîn-lâng the̍h khì hē tī saⁿ táu ê mī-hún lāi, kàu lóng-chóng hoat-kàⁿ. 22 Iâ-so͘ keng-kè chiah ê siâⁿ chiah ê hiuⁿ-siā kà-sī lâng, iā ǹg Iâ-lō͘-sat-léng teh kiâⁿ. 23 Ū chi̍t lâng kā I kóng, Chú ah, tit-tio̍h kiù ê lâng sī chió mah? 24 Iâ-so͘ tùi in kóng, Tio̍h chīn-la̍t tùi oe̍h mn̂g ji̍p-khì; in-ūi góa kā lín kóng, beh ū chōe-chōe lâng kiû ji̍p iā bōe tit-tio̍h. 25 Kàu ke-chú khí-lâi koaiⁿ mn̂g, lín chiah khiā tī gōa-bīn, phah mn̂g, kóng, Chú ah, kā goán khui leh, I chiū beh ìn lín kóng, Lín tùi tó-ūi lâi, góa m̄ bat lín. 26 Lín chiū beh kóng, Goán bat tī lí ê bīn-chêng lim-chia̍h; lí iā bat tī goán ê ke-lō͘ kà-sī. 27 I beh kóng, Góa kā lín kóng, góa m̄ chai lín tùi tó-ūi lâi; 28 lín kiâⁿ put-gī ê lâng lóng tio̍h lī-khui góa. Lín teh-beh khòaⁿ-kìⁿ A-pek-la̍h-hán, Í-sat, Ngá-kok kap chèng sian-ti tī Siōng-tè ê kok, iā lín ka-kī siū kóaⁿ-chhut tī gōa-bīn; tng hit sî tī hia beh ū thî-khàu kā-gê chhiat-chhí. 29 Tùi tang tùi sai tùi lâm tùi pak, beh ū lâng lâi chē toh tī Siōng-tè ê kok. 30 Ū lō͘-bé ê beh chòe tāi-seng, iā ū tāi-seng ê beh chòe lō͘-bé. 31 Hit sî ū Hoat-lī-sài kúi-nā lâng lâi kā I kóng, Lí tio̍h lī-khui chia khì pa̍t ūi, in-ūi Hi-lu̍t ài beh thâi lí. 32 I kā in kóng, Lín khì kā hit chiah hô͘-lî kóng, Lí khòaⁿ, kin-á-ji̍t, bîn-á-ji̍t góa kóaⁿ kúi i-pīⁿ, kàu tē saⁿ ji̍t góa chiū oân-choân. 33 Sui-jiân án-ni, kin-á-ji̍t, bîn-á-ji̍t kap āu-ji̍t góa eng-kai tio̍h kiâⁿ; in-ūi put-kai ū sian-ti siū hāi-sí tī Iâ-lō͘-sat-léng ê gōa-bīn. 34 Iâ-lō͘-sat-léng ah, Iâ-lō͘-sat-léng ah, chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê, góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài. 35 Lí khòaⁿ, lín ê chhù pàng teh hō͘ lín; koh góa kā lín kóng, Lín koat-toàn bōe khòaⁿ-kìⁿ góa, thèng-hāu lín kóng, Tī Chú ê miâ lâi ê tit-tio̍h hok-khì.
1 安歇日耶穌入一个法利賽頭人ê厝，beh食；in teh當等伊 2 Tú-tn̄g tī伊ê面前有一个蠱脹ê人。 3 耶穌對教律法ê先生kap法利賽人講，安歇日醫病thang á m̄-thang？ 4 In靜靜。耶穌牽hitê人，醫好伊，hō͘伊去。 5 續對in講，Lín中間甚麼人有驢á是牛tī安歇日跋落溝窟，也無liâm-piⁿ牽伊起來mah？ 6 Chiahê話in bōe會應。 7 耶穌看hiahê人客揀大位，就設譬喻對in講， 8 Lín Hō͘人請去赴婚姻ê筵桌，莫得坐大位，驚了比你khah尊貴ê也hō͘伊請，就請你kap請伊ê來kā你講，讓位hō͘ chit人； 9 你就見笑，退去坐tī尾位。 10 獨獨hō͘人請ê時tio̍h去坐尾位，就請你ê來kā你講，朋友ah，坐起來；hit時你tī同桌ê人ê面前就有體面。 11 因為見若自高ê beh hō͘伊卑微；家己卑微ê beh高升伊。 12 耶穌也kā請伊ê人講，你辦日晝頓á是ê-hng頓，m̄-thang請你ê朋友，á是兄弟，á是親戚，á是好額ê厝邊，驚了in倒請你，你就受報答。 13 但是你辦筵桌ê時，tio̍h請sòng-hiong ê、破相ê、跛腳ê、chhiⁿ-mî ê；你就有福氣； 14 因為in無thang報答你；就tī義人koh活ê時你beh得tio̍h報答。 15 同桌ê一人聽見chiahê話，就kā伊講，Beh tī上帝ê國食ê，有福氣ah。 16 但是耶穌kā伊講，有一人辦大筵席，所請ê chōe-chōe。 17 到beh食ê時，差伊ê奴僕kā所請ê人講，Tio̍h來，百項物便lah。 18 眾人就同一樣心推辭。頭一个kā伊講，我有買園，ko͘-put-chiong tio̍h去看伊；請hō͘我辭。 19 Koh一人講，我有買牛五對，beh去驗看，請hō͘我辭。 20 Koh一个講，我有娶bó͘，chiah bōe得來。 21 奴僕tò去將chiahê事kā伊ê主人講。家主受氣，kā伊ê奴僕講，緊緊出去到城內ê大街小巷，chhōa hiahê sòng-hiong ê、破相ê、chhiⁿ-mî ê、跛腳ê來chia。 22 奴僕講，主ah，你所命令ê已經行伊；但是iáu-kú有chhun位。 23 主人對伊ê奴僕講，出去路裡kap籬笆邊勉強人入來，hō͘我ê厝滿滿。 24 因為我kā lín講，前所請ê無一人會得食我ê筵席。 25 Chōe-chōe人kap伊同行，伊就oa̍t過來，對in講， 26 若有人就近我，也無怨恨伊ê父母、bó͘-kiáⁿ、兄弟、姊妹，以及家己ê性命，就bōe能做我ê學生。 27 無giâ家己ê十字架來tè我ê，也bōe能做我ê學生。 28 Lín中間甚麼人beh起塔，kiám無事先坐teh，來算hitê所費，看能起到成bōe？ 29 驚了kiám-chhái hē地基，也bōe能起到好；就看見ê人lóng恥笑伊，講， 30 Chitê人有動工，也bōe起到好。 31 á是甚麼王出來beh kap別個王交戰，kiám無事先坐teh參謀；看能用一萬兵抵敵hitê chhōa兩萬兵來攻擊伊ê，á bōe？ 32 若bōe，就趁伊iáu遠，差使者去kap伊講和。 33 Án-ni，lín中間見若無放sak一切所有ê，bōe能做我ê學生。 34 Taⁿ鹽是好，鹽若續失味，beh用甚麼復到伊ê味？ 35 也bōe落園得，也bōe做肥得；只有hiat tī外面。有耳孔thang聽ê，tio̍h聽。
1 An-hioh-ji̍t Iâ-so͘ ji̍p chi̍t ê Hoat-lī-sài thâu-lâng ê chhù, beh chia̍h; in teh tng-tán I. 2 Tú-tn̄g tī I ê bīn-chêng ū chi̍t ê kó͘-tiòng ê lâng. 3 Iâ-so͘ tùi kà lu̍t-hoat ê sian-siⁿ kap Hoat-lī-sài lâng kóng, An-hioh-ji̍t i-pīⁿ thang á m̄-thang? 4 In chēng-chēng. Iâ-so͘ khan hit ê lâng, i-hó i, hō͘ i khì. 5 Sòa tùi in kóng, Lín tiong-kan sím-mi̍h lâng ū lû á-sī gû tī an-hioh-ji̍t poa̍h-lo̍h kau-khut, iā bô liâm-piⁿ khan i khí-lâi mah? 6 Chiah ê ōe in bōe-ōe ìn. 7 Iâ-so͘ khòaⁿ hiah ê lâng-kheh kéng tōa ūi, chiū siat phì-jū tùi in kóng, 8 Lín hō͘ lâng chhiáⁿ khì hù hun-in ê iân-toh, bo̍h-tit chē tōa ūi, kiaⁿ-liáu pí lí khah chun-kùi ê iā hō͘ i chhiáⁿ, chiū chhiáⁿ lí kap chhiáⁿ i ê lâi kā lí kóng, Niū ūi hō͘ chit lâng; 9 lí chiū kiàn-siàu, thè-khì chē tī bé ūi. 10 To̍k-to̍k hō͘ lâng chhiáⁿ ê sî tio̍h khì chē bé ūi, chiū chhiáⁿ lí ê lâi kā lí kóng, Pêng-iú ah, chē khí-lâi; hit sî lí tī tâng toh ê lâng ê bīn-chêng chiū ū thé-biān. 11 In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i. 12 Iâ-so͘ iā kā chhiáⁿ I ê lâng kóng, Lí pān ji̍t-tàu tǹg á-sī ê-hng tǹg, m̄-thang chhiáⁿ lí ê pêng-iú, á-sī hiaⁿ-tī, á-sī chhin-chhek, á-sī hó-gia̍h ê chhù-piⁿ, kiaⁿ-liáu in tò chhiáⁿ lí, lí chiū siū pò-tap. 13 Nā-sī lí pān iân-toh ê sî, tio̍h chhiáⁿ sòng-hiong ê, phòa-siùⁿ ê, pái-kha ê, chhiⁿ-mî ê; lí chiū ū hok-khì; 14 in-ūi in bô thang pò-tap lí; chiū tī gī lâng koh-oa̍h ê sî lí beh tit-tio̍h pò-tap. 15 Tâng toh ê chi̍t lâng thiaⁿ-kìⁿ chiah ê ōe, chiū kā I kóng, Beh tī Siōng-tè ê kok chia̍h ê, ū hok-khì ah. 16 Nā-sī Iâ-so͘ kā i kóng, Ū chi̍t lâng pān tōa iân-sia̍h, só͘ chhiáⁿ ê chōe-chōe. 17 Kàu beh chia̍h ê sî, chhe i ê lô͘-po̍k kā só͘ chhiáⁿ ê lâng kóng, Tio̍h lâi, pah hāng mi̍h piān lah. 18 Chèng lâng chiū tâng chi̍t iūⁿ sim the-sî. Thâu-chi̍t-ê kā i kóng, Góa ū bóe hn̂g, ko͘-put-chiong tio̍h khì khòaⁿ i; chhiáⁿ hō͘ góa sî. 19 Koh chi̍t lâng kóng, Góa ū bóe gû gō͘ tùi, beh khì giām-khòaⁿ, chhiáⁿ hō͘ góa sî. 20 Koh chi̍t ê kóng, Góa ū chhōa bó͘, chiah bōe tit lâi. 21 Lô͘-po̍k tò-khì chiong chiah ê sū kā i ê chú-lâng kóng. Ke-chú siū-khì, kā i ê lô͘-po̍k kóng, Kín-kín chhut-khì kàu siâⁿ-lāi ê tōa koe sió hāng, chhōa hiah ê sòng-hiong ê, phòa-siùⁿ ê, chhiⁿ-mî ê, pái-kha ê lâi chia. 22 Lô͘-po̍k kóng, Chú ah, lí só͘ bēng-lēng ê í-keng kiâⁿ i; nā-sī iáu-kú ū chhun ūi. 23 Chú-lâng tùi i ê lô͘-po̍k kóng, Chhut-khì lō͘-ni̍h kap lî-pa piⁿ bián-kióng lâng ji̍p-lâi, hō͘ góa ê chhù móa-móa. 24 In-ūi góa kā lín kóng, Chêng só͘ chhiáⁿ ê bô chi̍t lâng ōe tit chia̍h góa ê iân-sia̍h. 25 Chōe-chōe lâng kap I tâng kiâⁿ, I chiū oa̍t-kè-lâi, tùi in kóng, 26 Nā ū lâng chiū-kūn góa, iā bô oàn-hūn i ê pē-bú, bó͘-kiáⁿ, hiaⁿ-tī, chí-bē, í-ki̍p ka-kī ê sìⁿ-miā, chiū bōe-ōe chòe góa ê ha̍k-seng. 27 Bô giâ ka-kī ê si̍p-jī-kè lâi tè góa ê, iā bōe-ōe chòe góa ê ha̍k-seng. 28 Lín tiong-kan sím-mi̍h lâng beh khí thah, kiám bô tāi-seng chē-teh, lâi sǹg hit ê só͘-hùi, khòaⁿ ōe khí kàu chiâⁿ bōe? 29 Kiaⁿ-liáu kiám-chhái hē tōe-ki, iā bōe-ōe khí kàu hó; chiū khòaⁿ-kìⁿ ê lâng lóng thí-chhiò i, kóng, 30 Chit ê lâng ū tāng kang, iā bōe khí kàu hó. 31 Á-sī sím-mi̍h ông chhut-lâi beh kap pa̍t ê ông kau-chiàn, kiám bô tāi-seng chē-teh chham-bô͘; khòaⁿ ōe ēng chi̍t-bān peng tí-te̍k hit-ê chhōa nn̄g-bān peng lâi kong-kek i ê, á bōe? 32 Nā bōe, chiū thàn i iáu hn̄g, chhe sù-chiá khì kap i káng hô. 33 Án-ni, lín tiong-kan kìⁿ-nā bô pàng-sak it-chhè só͘ ū ê, bōe-ōe chòe góa ê ha̍k-seng. 34 Taⁿ iâm sī hó, iâm nā sòa sit-bī, beh ēng sím-mi̍h ho̍k-tò i ê bī? 35 Iā bōe lo̍h hn̂g tit, iā bōe chòe pûi tit; chí ū hiat tī gōa-bīn. Ū hī-khang thang thiaⁿ ê, tio̍h thiaⁿ.
1 眾抽餉ê Kap pháiⁿ人teh就近耶穌來聽伊 2 法利賽人kap經學士nga̍uh-nga̍uh念講，Chitê人接納pháiⁿ人，續kap in食。 3 耶穌設chitê譬喻對in講， 4 Lín中間甚麼人有一百隻羊，失落一隻，kiám無請放九十九隻tī山裡，去chhē所失落ê到得tio̍h mah？ 5 已經chhē-tio̍h就歡喜，背伊tī肩頭頂。 6 到厝就聚集伊ê朋友厝邊，kā in講，Tio̍h kap我歡喜，因為所失落ê羊我已經chhē-tio̍h。 7 我kā lín講，Pháiⁿ人中有一人反悔，就tī天裡也beh án-ni為tio̍h伊歡喜，比為tio̍h九十九ê義人m̄免反悔ê，koh khah歡喜。 8 Á是甚麼婦人人有十個銀á，若失落一个，kiám無點燈、掃厝，勤勤chhē到tio̍h mah？ 9 已經chhē-tio̍h，就聚集伊ê朋友厝邊講，Tio̍h kap我歡喜，因為所失落ê銀á我已經chhē-tio̍h。 10 我kā lín講，Pháiⁿ人中有一人反悔，就tī上帝天使ê面前為tio̍h伊歡喜也是án-ni。 11 Koh講，某人有兩個kiáⁿ； 12 hitê第二ê Kā老父講，阿爸ah，將我應得ê業，分hō͘我。伊ê老父就kā in分家伙。 13 Koh無幾日，hitê第二kiáⁿ一盡收拾伊ê物，出外去遠遠ê所在；tī hia放蕩毀壞伊ê業。 14 已經sńg了了，tú-tio̍h hit所在大飢荒，伊chiah知欠缺ê艱苦。 15 就去óa Hit所在一个百姓；hit人差伊去山裡飼豬； 16 ài將豬所食ê豆koeh來止饑，也無人hō͘伊。 17 伊醒悟就講，我ê老父有jōa chōe長工，米糧食有chhun；但是我tī chia teh-beh餓死ah。 18 我beh起來去chhē我ê老父，kā伊講，阿爸ah，我有得罪天kap tī你ê面前； 19 taⁿ了後我bōe堪得叫做你ê Kiáⁿ，tio̍h hō͘我親像你ê長工ê一个。 20 就起來去chhē伊ê老父。相離iáu-kú遠，伊ê老父看見伊，就憐憫伊，走去抱伊ê頷頸，直直kā伊chim。 21 Kiáⁿ就kā伊講，阿爸ah，我有得罪天kap tī你ê面前；taⁿ了後bōe堪得叫做你ê Kiáⁿ。 22 但是老父對伊hiahê奴僕講，緊緊hiaⁿh siōng好ê衫來kā伊穿，koh kā伊掛手指，續kā伊穿鞋； 23 也牽hit隻肥ê牛á來刣，咱食來歡喜。 24 因為我chitê Kiáⁿ死有koh活，失落有koh得tio̍h。In就saⁿ-kap歡喜。 25 Hit時伊ê大kiáⁿ tī園裡；tò來beh到厝，聽見作樂kap跳舞ê聲。 26 就叫一个奴僕來問伊teh啥事。 27 伊kā伊講，Lín小弟來lah；lín老父因為得tio̍h伊好好tò來，所以刣 hit隻肥ê牛á。 28 大kiáⁿ受氣，m̄入去；伊ê老父出來勸伊。 29 伊應伊ê老父講，你看，我服事你hiah chōe年，lóng bē bat違逆你ê命令；你也bē bat hō͘我一隻羊á-kiáⁿ，thang kap我ê朋友saⁿ-kap歡喜。 30 總是你chitê kiáⁿ，交陪娼妓，一盡破費你ê業，一下tò來，你就為tio̍h伊刣肥ê牛á。 31 老父就kā伊講，Kiáⁿ ah，你常常kap我tī-teh，凡我所有ê lóng是你ê；但是你chitê小弟死有koh活，失落有koh得tio̍h，咱應該tio̍h歡喜快樂。 32 【併tī頂節】
1 Chèng thiu-hiòng ê kap pháiⁿ lâng teh chiū-kūn Iâ-so͘ lâi thiaⁿ I. 2 Hoat-lī-sài lâng kap keng-ha̍k-sū nga̍uh-nga̍uh-liām kóng, Chit ê lâng chiap-la̍p pháiⁿ lâng, sòa kap in chia̍h. 3 Iâ-so͘ siat chit ê phì-jū tùi in kóng, 4 Lín tiong-kan sím-mi̍h lâng ū chi̍t-pah chiah iûⁿ, sit-lo̍h chi̍t chiah, kiám bô chhiáⁿ pàng káu-cha̍p-káu chiah tī soaⁿ-ni̍h, khì chhē só͘ sit-lo̍h ê kàu tit-tio̍h mah? 5 Í-keng chhē-tio̍h chiū hoaⁿ-hí, pē i tī keng-thâu téng. 6 Kàu chhù chiū chū-chi̍p i ê pêng-iú chhù-piⁿ, kā in kóng, Tio̍h kap góa hoaⁿ-hí, in-ūi só͘ sit-lo̍h ê iûⁿ góa í-keng chhē-tio̍h. 7 Góa kā lín kóng, Pháiⁿ lâng tiong ū chi̍t lâng hoán-hóe, chiū tī thiⁿ-ni̍h iā beh án-ni ūi-tio̍h i hoaⁿ-hí, pí ūi-tio̍h káu-cha̍p-káu ê gī lâng m̄ bián hoán-hóe ê, koh khah hoaⁿ-hí. 8 Á-sī sím-mi̍h hū-jîn-lâng ū cha̍p ê gûn-á, nā sit-lo̍h chi̍t ê, kiám bô tiám teng, sàu chhù, khûn-khûn chhē kàu tio̍h mah? 9 Í-keng chhē-tio̍h, chiū chū-chi̍p i ê pêng-iú chhù-piⁿ kóng, Tio̍h kap góa hoaⁿ-hí, in-ūi só͘ sit-lo̍h ê gûn-á góa í-keng chhē-tio̍h. 10 Góa kā lín kóng, Pháiⁿ lâng tiong ū chi̍t lâng hoán-hóe, chiū tī Siōng-tè thiⁿ-sài ê bīn-chêng ūi-tio̍h i hoaⁿ-hí iā sī án-ni. 11 Koh kóng, Bó͘ lâng ū nn̄g ê kiáⁿ; 12 hit-ê tē jī ê kā lāu-pē kóng, A-pà ah, chiong góa èng tit ê gia̍p, pun hō͘ góa. I ê lāu-pē chiū kā in pun ke-hé. 13 Koh bô kúi ji̍t, hit ê tē jī kiáⁿ it-chīn siu-si̍p i ê mi̍h, chhut-gōa khì hn̄g-hn̄g ê só͘-chāi; tī hia hòng-tōng húi-hoāi i ê gia̍p. 14 Í-keng sńg liáu-liáu, tú-tio̍h hit só͘-chāi tōa ki-hng, i chiah chai khiàm-kheh ê kan-khó͘. 15 Chiū khì óa hit só͘-chāi chi̍t ê peh-sìⁿ; hit lâng chhe i khì soaⁿ-ni̍h chhī ti; 16 ài chiong ti só͘ chia̍h ê tāu-koeh lâi chí-ki, iā bô lâng hō͘ i. 17 I chhíⁿ-gō͘ chiū kóng, Góa ê lāu-pē ū jōa chōe tn̂g-kang, bí-niû chia̍h ū chhun; nā-sī góa tī chia teh-beh gō-sí ah. 18 Góa beh khí-lâi khì chhē góa ê lāu-pē, kā i kóng, A-pà ah, góa ū tek-chōe thiⁿ kap tī lí ê bīn-chêng; 19 taⁿ liáu-āu góa bōe kham-tit kiò chòe lí ê kiáⁿ, tio̍h hō͘ góa chhin-chhiūⁿ lí ê tn̂g-kang ê chi̍t ê. 20 Chiū khí-lâi khì chhē i ê lāu-pē. Saⁿ-lī iáu-kú hn̄g, i ê lāu-pē khòaⁿ-kìⁿ i, chiū lîn-bín i, cháu-khì phō i ê ām-kún, ti̍t-ti̍t kā i chim. 21 Kiáⁿ chiū kā i kóng, A-pà ah, góa ū tek-chōe thiⁿ kap tī lí ê bīn-chêng; taⁿ liáu-āu bōe kham-tit kiò chòe lí ê kiáⁿ. 22 Nā-sī lāu-pē tùi i hiah ê lô͘-po̍k kóng, Kín-kín hiaⁿh siōng-hó ê saⁿ lâi kā i chhēng, koh kā i kòa chhiú-chí, sòa kā i chhēng ôe; 23 iā khan hit chiah pûi ê gû-á lâi thâi, lán chia̍h lâi hoaⁿ-hí. 24 In-ūi góa chit ê kiáⁿ sí ū koh-oa̍h, sit-lo̍h ū koh tit-tio̍h. In chiū saⁿ-kap hoaⁿ-hí. 25 Hit sî i ê tōa-kiáⁿ tī hn̂g-ni̍h; tò-lâi beh kàu chhù, thiaⁿ-kìⁿ chok-ga̍k kap thiàu-bú ê siaⁿ. 26 Chiū kiò chi̍t ê lô͘-po̍k lâi mn̄g i teh siáⁿ tāi. 27 I kā i kóng, Lín sió-tī lâi lah; lín lāu-pē in-ūi tit-tio̍h i hó-hó tò-lâi, só͘-í thâi hit chiah pûi ê gû-á. 28 Tōa-kiáⁿ siū-khì, m̄ ji̍p-khì; i ê lāu-pē chhut-lâi khǹg i. 29 I ìn i ê lāu-pē kóng, Lí khòaⁿ, góa ho̍k-sāi lí hiah chōe nî, lóng bē bat ûi-ke̍h lí ê bēng-lēng; lí iā bē bat hō͘ góa chi̍t chiah iûⁿ-á-kiáⁿ, thang kap góa ê pêng-iú saⁿ-kap hoaⁿ-hí. 30 Chóng-sī lí chit ê kiáⁿ, kau-pôe chhiong-ki, it-chīn phòa-hùi lí ê gia̍p, chi̍t-ē tò-lâi, lí chiū ūi-tio̍h i thâi pûi ê gû-á. 31 Lāu-pē chiū kā i kóng, Kiáⁿ ah, lí siông-siông kap góa tī-teh, hoān góa só͘ ū ê lóng sī lí ê; nā-sī lí chit ê sió-tī sí ū koh-oa̍h, sit-lo̍h ū koh tit-tio̍h, lán eng-kai tio̍h hoaⁿ-hí khoài-lo̍k. 32 【pēng tī téng chat】
1 耶穌koh對學生講，某個好額人有一个管家ê；有人將伊破費主人ê業對伊ê主人告伊。 2 主人叫伊來kā伊講，我所聽見你chitê tāi-chì是怎樣？Taⁿ你管家ê事tio̍h kap我清楚，因為你bōe能猶原做管家。 3 管家ê心內想講，主人lut我管家ê職，我beh怎樣ah？kia̍h鋤頭無氣力，做乞食mī見笑。 4 Taⁿ我知所tio̍h做lah，到lut管家ê職，hit時人chiah beh接納我入in ê家。 5 伊就叫欠伊主人ê債ê，一个一个來；kā頭一个講，你欠我ê主人jōa chōe？ 6 應講，油，一百桶。就kā伊講，The̍h你ê賬，緊緊坐，寫五十。 7 Koh kā別ê講，你欠jōa chōe？伊講，麥，一百石。kā伊講，The̍h你ê賬，寫八十。 8 主人就o-ló chitê不義ê管家，為tio̍h伊所做有知識；因為chit世間ê人為tio̍h世情來圖謀，比光明ê人khah有知識。 9 我也kā lín講，tio̍h用不義ê錢財結交朋友，到錢財了去ê時，in chiah beh接納lín入永遠ê帳房。 10 Tī至sió-khóa ê事盡忠ê，tī大ê也盡忠；tī至sió-khóa ê事不義ê，tī大ê也不義。 11 Tī不義ê錢財lín若無盡忠，是誰 beh用真ê託重lín？ 12 Koh tī屬別人ê，lín若無盡忠，是誰 beh用屬lín ê hō͘ lín ah？ 13 一个奴僕bōe能服事兩個主人；因為伊會怨恨chitê，疼hitê；á是會對重chitê，看輕hitê；lín bōe能服事上帝續服事錢財。 14 法利賽人是貪財ê，聽見chiahê lóng總ê話，就冷笑伊 15 耶穌kā in講，Lín是tī人ê面前家己稱做義ê，但是上帝知lín ê心；因為tī人ê中間所推尊ê tī上帝ê面前是可惡。 16 律法kap先知到約翰；tùi hit時上帝國ê福音傳報，人盡力來入。 17 天地ê廢無比律法一劃ê失落是khah快。 18 見若離伊ê bó͘來娶別人是行姦淫；娶別人所離ê，也是行姦淫。 19 有一个富人穿紫色kap幼苧布ê衣裳，ta̍k日奢華宴樂； 20 koh有一个乞食名拉撒路，遍身生痛； 21 人hē伊tī富人ê大門口，ài將富人桌腳所ka-la̍uh ê來度飽；狗也來chī伊生痛ê位。 22 Sòng-hiong人死，hō͘天使扶伊到亞伯拉罕ê胸前；富人也死，續埋葬。 23 Tī陰間，痛苦ê中間，kia̍h目遠遠看見亞伯拉罕，koh拉撒路tī伊ê胸前。 24 就叫講，我ê祖亞伯拉罕ah，可憐我，差拉撒路用指頭á尾ùn水來涼我ê舌，因為我tī chit火燄中真悽慘。 25 但是亞伯拉罕講，Kiáⁿ ah，tio̍h記得你在生享受你ê福氣，拉撒路受tio̍h艱苦；taⁿ伊tī chia得tio̍h安慰，也你受悽慘。 26 M̄-nā án-ni，tī阮kap lín ê中間有大深淵隔teh，致到beh tùi chia過去lín hia bōe能，tùi hia過來阮chia也bōe能。 27 伊就講，既然án-ni，求祖你差拉撒路去阮父ê厝； 28 因為我有五個兄弟，hō͘伊對in做干證，免得in也到chitê痛苦ê所在。 29 亞伯拉罕講，In有摩西kap hiahê先知，thang聽in。 30 應講，我ê祖亞伯拉罕ah，bōe lah；若有人tùi死人中去chhē in，in就beh反悔。 31 亞伯拉罕kā伊講，In若m̄聽摩西kap先知，就有人tùi死人中koh活，in也m̄受苦勸。
1 Iâ-so͘ koh tùi ha̍k-seng kóng, Bó͘ ê hó-gia̍h lâng ū chi̍t ê koán-ke ê; ū lâng chiong i phòa-hùi chú-lâng ê gia̍p tùi i ê chú-lâng kò i. 2 Chú-lâng kiò i lâi kā i kóng, Góa só͘ thiaⁿ-kìⁿ lí chit ê tāi-chì sī cháiⁿ-iūⁿ? Taⁿ lí koán-ke ê sū tio̍h kap góa chheng-chhó, in-ūi lí bōe-ōe iû-goân chòe koán-ke. 3 Koán-ke ê sim-lāi siūⁿ kóng, Chú-lâng lut góa koán-ke ê chit, góa beh cháiⁿ-iūⁿ ah? kia̍h tî-thâu bô khùi-la̍t, chòe khit-chia̍h mī kiàn-siàu. 4 Taⁿ góa chai só͘ tio̍h chòe lah, kàu lut koán-ke ê chit, hit sî lâng chiah beh chiap-la̍p góa ji̍p in ê ke. 5 I chiū kiò khiàm i chú-lâng ê chè ê, chi̍t-ê chi̍t-ê lâi; kā thâu-chi̍t-ê kóng, Lí khiàm góa ê chú-lâng jōa chōe? 6 Ìn kóng, Iû, chi̍t-pah tháng. Chiū kā i kóng, The̍h lí ê siàu, kín-kín chē, siá gō͘-cha̍p. 7 Koh kā pa̍t-ê kóng, Lí khiàm jōa chōe? I kóng, Be̍h, chi̍t-pah chio̍h. Kā i kóng, The̍h lí ê siàu, siá poeh-cha̍p. 8 Chú-lâng chiū o-ló chit ê put-gī ê koán-ke, ūi-tio̍h i só͘ chòe ū tì-sek; in-ūi chit sè-kan ê lâng ūi-tio̍h sè-chêng lâi tô͘-bô͘, pí kng-bêng ê lâng khah ū tì-sek. 9 Góa iā kā lín kóng, Tio̍h ēng put-gī ê chîⁿ-châi kiat-kau pêng-iú, kàu chîⁿ-châi liáu-khì ê sî, in chiah beh chiap-la̍p lín ji̍p éng-oán ê tiùⁿ-pâng. 10 Tī chì sió-khóa ê sū chīn-tiong ê, tī tōa ê iā chīn-tiong; tī chì sió-khóa ê sū put-gī ê, tī tōa ê iā put-gī. 11 Tī put-gī ê chîⁿ-châi lín nā bô chīn-tiong, chī-chūi beh ēng chin-ê thok-tiōng lín? 12 Koh tī sio̍k pa̍t lâng ê, lín nā bô chīn-tiong, chī-chūi beh ēng sio̍k lín ê hō͘ lín ah? 13 Chi̍t ê lô͘-po̍k bōe-ōe ho̍k-sāi nn̄g ê chú-lâng; in-ūi i ōe oàn-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi. 14 Hoat-lī-sài lâng sī tham châi ê, thiaⁿ-kìⁿ chiah ê lóng-chóng ê ōe, chiū léng-chhiò I. 15 Iâ-so͘ kā in kóng, Lín sī tī lâng ê bīn-chêng ka-kī chheng-chòe-gī ê, nā-sī Siōng-tè chai lín ê sim; in-ūi tī lâng ê tiong-kan só͘ chhui-chun ê tī Siōng-tè ê bīn-chêng sī khó-ò͘ⁿ. 16 Lu̍t-hoat kap sian-ti kàu Iok-hān; tùi hit sî Siōng-tè kok ê hok-im thoân-pò, lâng chīn la̍t lâi ji̍p. 17 Thiⁿ tōe ê hòe-bô pí lu̍t-hoat chi̍t u̍ih ê sit-lo̍h sī khah khoài. 18 Kìⁿ-nā lî i ê bó͘ lâi chhōa pa̍t lâng sī kiâⁿ kan-îm; chhōa pa̍t lâng só͘ lî ê, iā sī kiâⁿ kan-îm. 19 Ū chi̍t ê pù lâng chhēng chí-sek kap iù-tōe pò͘ ê i-chiûⁿ, ta̍k ji̍t chhia-hôa iàn-lo̍k; 20 koh ū chi̍t ê khit-chia̍h miâ Lia̍p-sat-lō͘, piàn-sin siⁿ-thiàⁿ; 21 lâng hē i tī pù lâng ê tōa-mn̂g-kháu, ài chiong pù lâng toh-kha só͘ ka-la̍uh ê lâi tō͘-pá; káu iā lâi chī i siⁿ-thiàⁿ ê ūi. 22 Sòng-hiong lâng sí, hō͘ thiⁿ-sài hû i kàu A-pek-la̍h-hán ê heng-chêng; pù lâng iā sí, sòa bâi-chòng. 23 Tī im-kan, thòng-khó͘ ê tiong-kan, kia̍h ba̍k hn̄g-hn̄g khòaⁿ-kìⁿ A-pek-la̍h-hán, koh Lia̍p-sat-lō͘ tī i ê heng-chêng. 24 Chiū kiò kóng, Góa ê chó͘ A-pek-la̍h-hán ah, khó-lîn góa, chhe Lia̍p-sat-lō͘ ēng chńg-thâu-á bé ùn chúi lâi liâng góa ê chi̍h, in-ūi góa tī chit hé-iām tiong chin chhiⁿ-chhám. 25 Nā-sī A-pek-la̍h-hán kóng, Kiáⁿ ah, tio̍h kì-tit lí chāi-siⁿ hióng-siū lí ê hok-khì, Lia̍p-sat-lō͘ siū-tio̍h kan-khó͘; taⁿ i tī chia tit-tio̍h an-ùi, iā lí siū chhiⁿ-chhám. 26 M̄-nā án-ni, tī goán kap lín ê tiong-kan ū tōa chhim-ian keh-teh, tì-kàu beh tùi chia kè-khì lín hia bōe-ōe, tùi hia kè-lâi goán chia iā bōe-ōe. 27 I chiū kóng, Kì-jiân án-ni, kiû chó͘ lí chhe Lia̍p-sat-lō͘ khì goán pē ê chhù; 28 in-ūi góa ū gō͘ ê hiaⁿ-tī, hō͘ i tùi in chòe kan-chèng, bián-tit in iā kàu chit ê thòng-khó͘ ê só͘-chāi. 29 A-pek-la̍h-hán kóng, In ū Mô͘-se kap hiah ê sian-ti, thang thiaⁿ in. 30 Ìn kóng, Góa ê chó͘ A-pek-la̍h-hán ah, bōe lah; nā ū lâng tùi sí-lâng tiong khì chhē in, in chiū beh hoán-hóe. 31 A-pek-la̍h-hán kā i kóng, In nā m̄ thiaⁿ Mô͘-se kap sian-ti, chiū ū lâng tùi sí-lâng tiong koh-oa̍h, in iā m̄ siū khó͘-khǹg.
1 耶穌koh對伊ê學生講，塞礙人ê事bōe免得有；總是看tùi 是誰來，hit人有災禍！ 2 設使hō͘ chiahê微細ê一个受塞礙，khah好hō͘人用大石磨吊伊ê頷頸，kā伊hiat落海。 3 Lín tio̍h家己謹慎；若lín ê兄弟犯罪，tio̍h責備伊；伊若反悔，tio̍h赦免伊 4 若是伊一日得罪你七pái，也七pái oa̍t-tńg kā你講，我反悔lah，你就tio̍h赦免伊 5 使徒kā主講，加添阮ê信。 6 主講，Lín若有信親像一粒ê芥菜子，就命令chit叢桑châi樹講，拔你ê根去栽tī海裡，伊也beh順thàn你。 7 Lín中間甚麼人有奴僕teh作園á是顧羊，tùi園裡tò來，kiám beh kā伊講，即時坐來食mah？ 8 Kiám無beh kā伊講，備辦hō͘我食，hâ帶來服事我；thèng候我lim食soah，你chiah thang lim食mah？ 9 奴僕行所命令ê，kiám有kā伊說謝mah？ 10 Án-ni，lín已經一盡行所命令lín ê，就tio̍h講，阮是無利益ê奴僕，行所應該行ê nā-tiāⁿ。 11 耶穌去耶路撒冷ê時，tùi撒馬利亞kap加利利交界經過。 12 入一个鄉社ê時，有十個thái-ko ê tú-tio̍h伊，遠遠teh khiā， 13 出聲講，耶穌先生，憐憫阮。 14 耶穌看見，kā in講，lín去將本身hō͘祭司驗。In去ê時就得tio̍h清氣。 15 其中一人看見家己已經好，就倒tńg來大聲o-ló上帝， 16 仆落tī耶穌ê腳前，來感謝伊；chit人是撒馬利亞人。 17 耶穌應講，十人kiám無lóng得tio̍h清氣mah？hit九個tī tá-lo̍h？ 18 Chitê別族ê人以外，iáu無別人倒tńg來歸榮光上帝mah？ 19 就kā hit人講，起來，做你去，你ê信有救你。 20 法利賽人問上帝ê國tī時會臨到。耶穌應講，上帝ê國臨到m̄是顯然； 21 也bōe講得，Tī chia，á是，Tī hia，因為上帝ê國是tī lín內中。 22 Koh對學生講，時日beh到，lín真ài看見人子ê一日，也無thang看見。 23 Beh有人kā lín講，你看，tī hia！你看，tī chia！lín莫得去，莫得tè in。 24 因為親像閃nà tùi天chit邊teh閃，光照到天hit邊，人子tī伊ê日也beh án-ni。 25 總是伊的確tio̍h事先受chōe-chōe艱苦，也hō͘ chit世代棄sak。 26 親像tī挪亞ê日怎樣，tī人子ê日也beh án-ni。 27 In teh lim食，teh嫁娶，到挪亞入大船ê日，大水到，滅in眾人。 28 Koh親像tī羅得ê日，in teh lim食、買賣、種作、起厝； 29 但是羅得出所多瑪ê日，tùi天落火kap硫磺，滅眾人； 30 tī人子顯現ê日也beh án-ni。 31 當hit日tī厝頂ê，伊ê物tī厝內，莫得落來the̍h伊；tī園裡ê也莫得倒tńg來。 32 Tio̍h記得羅得ê bó͘。 33 見若致意顧伊ê性命ê，beh失落伊；見若失落伊ê，beh保全伊 34 我kā lín講，Hit暝兩人siāng床，一个取去，一个放去。 35 兩個婦人人同挨磨，一个取去，一个放去。 36 37 In應伊講，主ah，tī甚麼所在ah？伊kā in講，身屍若tī hia，鷹鳥也beh聚集tī hia。
1 Iâ-so͘ koh tùi I ê ha̍k-seng kóng, That-gāi lâng ê sū bōe bián-tit ū; chóng-sī khòaⁿ tùi chī-chūi lâi, hit lâng ū chai-ē! 2 Siat-sú hō͘ chiah ê bî-sòe ê chi̍t-ê siū that-gāi, khah hó hō͘ lâng ēng tōa chio̍h-bō tiàu i ê ām-kún, kā i hiat-lo̍h hái. 3 Lín tio̍h ka-kī kín-sīn; nā lín ê hiaⁿ-tī hoān-chōe, tio̍h chek-pī i; i nā hoán-hóe, tio̍h sià-bián i. 4 Nā-sī i chi̍t ji̍t tek-chōe lí chhit pái, iā chhit pái oa̍t-tńg kā lí kóng, Góa hoán-hóe lah, lí chiū tio̍h sià-bián i. 5 Sù-tô͘ kā Chú kóng, Ke-thiⁿ goán ê sìn. 6 Chú kóng, Lín nā ū sìn chhin-chhiūⁿ chi̍t lia̍p ê kòa-chhài chí, chiū bēng-lēng chit châng sng-châi chhiū kóng, Pu̍ih lí ê kun khì chai tī hái-ni̍h, i iā beh sūn-thàn lí. 7 Lín tiong-kan sím-mi̍h lâng ū lô͘-po̍k teh choh-hn̂g á-sī kò͘-iûⁿ, tùi hn̂g-ni̍h tò-lâi, kiám beh kā i kóng, Chek-sî chē lâi chia̍h mah? 8 Kiám bô beh kā i kóng, Pī-pān hō͘ góa chia̍h, hâ tòa lâi ho̍k-sāi góa; thèng-hāu góa lim-chia̍h soah, lí chiah thang lim-chia̍h mah? 9 Lô͘-po̍k kiâⁿ só͘ bēng-lēng ê, kiám ū kā i seh-siā mah? 10 Án-ni, lín í-keng it-chīn kiâⁿ só͘ bēng-lēng lín ê, chiū tio̍h kóng, Goán sī bô lī-ek ê lô͘-po̍k, kiâⁿ só͘ eng-kai kiâⁿ ê nā-tiāⁿ. 11 Iâ-so͘ khì Iâ-lō͘-sat-léng ê sî, tùi Sat-má-lī-a kap Ka-lī-lī kau-kài keng-kè. 12 Ji̍p chi̍t ê hiuⁿ-siā ê sî, ū cha̍p ê thái-ko ê tú-tio̍h I, hn̄g-hn̄g teh khiā, 13 chhut siaⁿ kóng, Iâ-so͘ sian-siⁿ, lîn-bín goán. 14 Iâ-so͘ khòaⁿ-kìⁿ, kā in kóng, Lín khì chiong pún-sin hō͘ chè-si giām. In khì ê sî chiū tit-tio̍h chheng-khì. 15 Kî-tiong chi̍t lâng khòaⁿ-kìⁿ ka-kī í-keng hó, chiū tò-tńg-lâi tōa siaⁿ o-ló Siōng-tè, 16 phak-lo̍h tī Iâ-so͘ ê kha-chêng, lâi kám-siā I; chit lâng sī Sat-má-lī-a lâng. 17 Iâ-so͘ ìn kóng, Cha̍p lâng kiám bô lóng tit-tio̍h chheng-khì mah? hit káu-ê tī tá-lo̍h? 18 Chit-ê pa̍t cho̍k ê lâng í-gōa, iáu bô pa̍t lâng tò-tńg-lâi kui êng-kng Siōng-tè mah? 19 Chiū kā hit lâng kóng, Khí-lâi chòe lí khì, lí ê sìn ū kiù lí. 20 Hoat-lī-sài lâng mn̄g Siōng-tè ê kok tī-sî ōe lîm-kàu. Iâ-so͘ ìn kóng, Siōng-tè ê kok lîm-kàu m̄ sī hián-jiân; 21 iā bōe kóng-tit, Tī chia, á-sī, Tī hia, in-ūi Siōng-tè ê kok sī tī lín lāi-tiong. 22 Koh tùi ha̍k-seng kóng, Sî-ji̍t beh kàu, lín chin ài khòaⁿ-kìⁿ Jîn-chú ê chi̍t ji̍t, iā bô thang khòaⁿ-kìⁿ. 23 Beh ū lâng kā lín kóng, Lí khòaⁿ, tī hia! Lí khòaⁿ, tī chia! lín bo̍h-tit khì, bo̍h-tit tè in. 24 In-ūi chhin-chhiūⁿ sih-nà tùi thiⁿ chit piⁿ teh sih, kng chiò kàu thiⁿ hit piⁿ, Jîn-chú tī I ê ji̍t iā beh án-ni. 25 Chóng-sī I tek-khak tio̍h tāi-seng siū chōe-chōe kan-khó͘, iā hō͘ chit sè-tāi khì-sak. 26 Chhin-chhiūⁿ tī Ná-a ê ji̍t cháiⁿ-iūⁿ, tī Jîn-chú ê ji̍t iā beh án-ni. 27 In teh lim-chia̍h, teh kè-chhōa, kàu Ná-a ji̍p tōa chûn ê ji̍t, tōa chúi kàu, bia̍t in chèng lâng. 28 Koh chhin-chhiūⁿ tī Lô-tek ê ji̍t, in teh lim-chia̍h, bóe-bōe, chèng-choh, khí-chhù; 29 nā-sī Lô-tek chhut Só͘-to-má ê ji̍t, tùi thiⁿ lo̍h hé kap jiû-n̂g, bia̍t chèng lâng; 30 tī Jîn-chú hián-hiān ê ji̍t iā beh án-ni. 31 Tng hit ji̍t tī chhù-téng ê, i ê mi̍h tī chhù-lāi, bo̍h-tit lo̍h-lâi the̍h i; tī hn̂g-ni̍h ê iā bo̍h-tit tò-tńg-lâi. 32 Tio̍h kì-tit Lô-tek ê bó͘. 33 Kìⁿ-nā tì-ì kò͘ i ê sìⁿ-miā ê, beh sit-lo̍h i; kìⁿ-nā sit-lo̍h i ê, beh pó-choân i. 34 Góa kā lín kóng, Hit mî nn̄g lâng siāng chhn̂g, chi̍t-ê chhú-khì, chi̍t-ê pàng-khì. 35 Nn̄g ê hū-jîn-lâng tâng oe bō, chi̍t-ê chhú-khì, chi̍t-ê pàng-khì. 36 37 In ìn I kóng, Chú ah, tī sím-mi̍h só͘-chāi ah? I kā in kóng, Sin-si nā tī hia, eng-chiáu iā beh chū-chi̍p tī hia.
1 耶穌設一个譬喻，教示in tio̍h常常祈禱，m̄-thang厭，講， 2 某城有一个審判官，無驚上帝也無對重人。 3 Tī hitê城內有一个守寡人ta̍uh-ta̍uh去見伊講，有人kap我做對敵，求你替我伸冤。 4 伊久久無beh；後來想講，我雖然無驚上帝，無對重人； 5 但是因為chitê守寡人ta̍uh-ta̍uh來攪擾，我beh替伊伸冤，免得伊永永來苦楚我。 6 主koh講，Lín tio̍h聽chitê不義ê官所講ê。 7 何況上帝揀ê百姓暝日喉叫伊，伊也為tio̍h in寬容，kiám無beh替in伸冤mah？ 8 我kā lín講，伊beh緊緊替in伸冤。雖然án-ni，人子到ê時，kiám beh tú-tio̍h世間有信mah？ 9 有óa靠家己做義來看輕別人ê，耶穌設一个譬喻kā in講， 10 有兩人上殿beh祈禱，一个是法利賽人，一个是抽餉ê。 11 法利賽人khiā-teh，家己祈禱講，上帝ah，我感謝你，因為我無親像別人，勒索、不義、姦淫，也無親像chitê抽餉ê。 12 我一禮拜禁食兩pái；koh將凡所得tio̍h ê，十份抽一份。 13 但是hitê抽餉ê遠遠khiā-teh，連kia̍h目ǹg天也m̄敢；kan-ta搥胸講，上帝ah，憐憫我chitê有罪ê人。 14 我kā lín講，Chitê人tò去伊ê厝得tio̍h稱做義贏過hitê人。因為見若自高ê beh hō͘伊卑微；家己卑微ê beh高升伊 15 有人帶嬰á就近耶穌，beh hō͘伊摸in；學生看見就責備in。 16 但是耶穌叫hiahê嬰á來講，容允細kiáⁿ就近我，莫得禁伊；因為上帝ê國是chit號人ê。 17 我實在kā lín講，凡若承接上帝ê國無親像細kiáⁿ ê，決斷bōe得thang入去。 18 有一个做官ê問伊講，好ê先生ah，我tio̍h怎樣做，chiah thang承接永活？ 19 耶穌kā伊講，你啥事稱呼我是好ah？無一个好，獨獨上帝nā-tiāⁿ。 20 Chiahê誡你已經知，莫得姦淫，莫得刣死人，莫得偷the̍h，莫得lām-sám做干證，Tio̍h敬你ê父母。 21 伊就講，Chiahê我tùi細漢lóng守伊lah。 22 耶穌聽見就kā伊講，你iáu欠一項，tio̍h賣你一切所有ê來hō͘ sòng-hiong人，就beh有財寶tī天裡；koh來tè我。 23 Hit人聽見chiahê話真憂悶，因為伊真好額。 24 耶穌看見伊就講，富人入上帝ê國oh--ah。 25 因為駱駝穿過針鼻，比富人入上帝ê國，iáu khah快。 26 聽見ê人講，Án-ni，是誰能得tio̍h救ah？ 27 耶穌講，在人所bōe能ê，在上帝是能。 28 彼得講，阮已經放sak家己所有ê來tè你。 29 耶穌kā in講，我實在kā lín講，無有人為tio̍h上帝ê國來放sak厝宅，á是bó͘，á是兄弟，á是父母，á是kiáⁿ兒， 30 也無tī chit世得tio̍h幾nā倍khah chōe，來世得tio̍h永活。 31 耶穌帶十二個學生，對in講，你看，咱chiahê上耶路撒冷，見若tùi先知所記ê lóng beh應驗tī人子。 32 因為伊beh受解送hō͘異邦人，koh受戲弄、凌辱、phùi-nōa； 33 in beh鞭phah來害死伊；第三日伊beh koh活。 34 Hiah-ê tāi-chì學生無一項會曉得；koh chitê話tùi tī in是隱密，in也m̄知伊所講ê。 35 近耶利哥ê時，有一个chhiⁿ-mî ê坐tī路邊teh乞食； 36 聽見chōe-chōe人經過，就問是甚麼tāi-chì。 37 人kā伊講，拿撒勒耶穌tùi chia過。 38 伊就喉叫講，大衛ê後裔，耶穌，可憐我。 39 頭前行ê人責備伊，kah伊tio̍h靜靜；但是伊益發大聲喉叫講，大衛ê後裔ah，可憐我。 40 耶穌停腳，kah人牽伊來；已經近óa，就問伊講， 41 Ài我kā你做甚麼？伊就講，主ah，我ài得tio̍h看見。 42 耶穌kā伊講，你thang得tio̍h看見，你ê信有救你lah。 43 伊liâm-piⁿ得tio̍h看見，就tè耶穌歸榮光上帝；眾人看見也lóng歸榮光上帝。
1 Iâ-so͘ siat chi̍t ê phì-jū, kà-sī in tio̍h siông-siông kî-tó, m̄-thang ià, kóng, 2 Bó͘ siâⁿ ū chi̍t ê sím-phòaⁿ koaⁿ, bô kiaⁿ Siōng-tè iā bô tùi-tiōng lâng. 3 Tī hit ê siâⁿ-lāi ū chi̍t ê chiú-kóaⁿ lâng ta̍uh-ta̍uh khì kìⁿ i kóng, Ū lâng kap góa chòe tùi-te̍k, kiû lí thòe góa sin-oan. 4 I kú-kú bô beh; āu-lâi siūⁿ kóng, Góa sui-jiân bô kiaⁿ Siōng-tè, bô tùi-tiōng lâng; 5 nā-sī in-ūi chit ê chiú-kóaⁿ lâng ta̍uh-ta̍uh lâi kiáu-jiáu, góa beh thòe i sin-oan, bián-tit i éng-éng lâi khó͘-chhó͘ góa. 6 Chú koh kóng, Lín tio̍h thiaⁿ chit ê put-gī ê koaⁿ só͘ kóng ê. 7 Hô-hòng Siōng-tè kéng ê peh-sìⁿ mî-ji̍t âu-kiò I, I iā ūi-tio̍h in khoan-iông, kiám bô beh thòe in sin-oan mah? 8 Góa kā lín kóng, I beh kín-kín thòe in sin-oan. Sui-jiân án-ni, Jîn-chú kàu ê sî, kiám beh tú-tio̍h sè-kan ū sìn mah? 9 Ū óa-khò ka-kī chòe gī lâi khòaⁿ-khin pa̍t lâng ê, Iâ-so͘ siat chi̍t ê phì-jū kā in kóng, 10 Ū nn̄g lâng chiūⁿ tiān beh kî-tó, chi̍t-ê sī Hoat-lī-sài lâng, chi̍t-ê sī thiu-hiòng ê. 11 Hoat-lī-sài lâng khiā-teh, ka-kī kî-tó kóng, Siōng-tè ah, góa kám-siā lí, in-ūi góa bô chhin-chhiūⁿ pa̍t lâng, le̍k-sek, put-gī, kan-îm, iā bô chhin-chhiūⁿ chit ê thiu-hiòng ê. 12 Góa chi̍t lé-pài kìm-chia̍h nn̄g pái; koh chiong hoān só͘ tit-tio̍h ê, cha̍p hūn thiu chi̍t hūn. 13 Nā-sī hit ê thiu-hiòng ê hn̄g-hn̄g khiā-teh, liân kia̍h ba̍k ǹg thiⁿ iā m̄ káⁿ; kan-ta tûi heng kóng, Siōng-tè ah, lîn-bín góa chit-ê ū chōe ê lâng. 14 Góa kā lín kóng, Chit ê lâng tò-khì i ê chhù tit-tio̍h chheng-chòe-gī iâⁿ-kè hit ê lâng. In-ūi kìⁿ-nā chū-ko ê beh hō͘ i pi-bî; ka-kī pi-bî ê beh ko-seng i. 15 Ū lâng tòa eⁿ-á chiū-kūn Iâ-so͘, beh hō͘ I bong in; Ha̍k-seng khòaⁿ-kìⁿ chiū chek-pī in. 16 Nā-sī Iâ-so͘ kiò hiah ê eⁿ-á lâi kóng, Iông-ún sòe-kiáⁿ chiū-kūn góa, bo̍h-tit kìm i; in-ūi Siōng-tè ê kok sī chit hō lâng ê. 17 Góa si̍t-chāi kā lín kóng, Hoān-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-toàn bōe tit thang ji̍p-khì. 18 Ū chi̍t ê chòe-koaⁿ ê mn̄g I kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-oa̍h? 19 Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chi̍t-ê hó, to̍k-to̍k Siōng-tè nā-tiāⁿ. 20 Chiah ê kài lí í-keng chai, Bo̍h-tit kan-îm, Bo̍h-tit thâi-sí lâng, Bo̍h-tit thau-the̍h, Bo̍h-tit lām-sám chòe kan-chèng, Tio̍h kèng lí ê pē-bú. 21 I chiū kóng, Chiah-ê góa tùi sòe-hàn lóng siú i lah. 22 Iâ-so͘ thiaⁿ-kìⁿ chiū kā i kóng, Lí iáu khiàm chi̍t hāng, tio̍h bōe lí it-chhè só͘ ū ê lâi hō͘ sòng-hiong lâng, chiū beh ū châi-pó tī thiⁿ-ni̍h; koh lâi tè góa. 23 Hit lâng thiaⁿ-kìⁿ chiah ê ōe chin iu-būn, in-ūi i chin hó-gia̍h. 24 Iâ-so͘ khòaⁿ-kìⁿ i chiū kóng, Pù lâng ji̍p Siōng-tè ê kok oh--ah. 25 In-ūi lo̍k-tô chhng-kè chiam-phīⁿ, pí pù lâng ji̍p Siōng-tè ê kok, iáu khah khoài. 26 Thiaⁿ-kìⁿ ê lâng kóng, Án-ni, chī-chūi ōe tit-tio̍h kiù ah? 27 Iâ-so͘ kóng, Chāi lâng só͘ bōe-ōe ê, chāi Siōng-tè sī ōe. 28 Pí-tek kóng, Goán í-keng pàng-sak ka-kī só͘ ū ê lâi tè lí. 29 Iâ-so͘ kā in kóng, Góa si̍t-chāi kā lín kóng, Bô ū lâng ūi-tio̍h Siōng-tè ê kok lâi pàng-sak chhù-the̍h, á-sī bó͘, á-sī hiaⁿ-tī, á-sī pē-bú, á-sī kiáⁿ-jî, 30 iā bô tī chit-sì tit-tio̍h kúi-nā pē khah chōe, lâi-sè tit-tio̍h éng-oa̍h. 31 Iâ-so͘ tòa cha̍p-jī ê ha̍k-seng, tùi in kóng, Lí khòaⁿ, lán chiah-ê chiūⁿ Iâ-lō͘-sat-léng, kìⁿ-nā tùi sian-ti só͘ kì ê lóng beh èng-giām tī Jîn-chú. 32 In-ūi I beh siū ké-sàng hō͘ īⁿ-pang lâng, koh siū hì-lāng lêng-jio̍k phùi-nōa; 33 in beh piⁿ-phah lâi hāi-sí I; tē saⁿ ji̍t I beh koh-oa̍h. 34 Hiah ê tāi-chì ha̍k-seng bô chi̍t hāng ōe hiáu-tit; koh chit ê ōe tùi tī in sī ún-ba̍t, in iā m̄ chai I só͘ kóng ê. 35 Kūn Iâ-lī-ko ê sî, ū chi̍t ê chhiⁿ-mî ê chē tī lō͘-piⁿ teh khit-chia̍h; 36 thiaⁿ-kìⁿ chōe-chōe lâng keng-kè, chiū mn̄g sī sím-mi̍h tāi-chì. 37 Lâng kā i kóng, Ná-sat-le̍k Iâ-so͘ tùi chia kè. 38 I chiū âu-kiò kóng, Tāi-pi̍t ê hō͘-è, Iâ-so͘, khó-lîn góa. 39 Thâu-chêng kiâⁿ ê lâng chek-pī i, kah i tio̍h chēng-chēng; nā-sī i it-hoat tōa siaⁿ âu-kiò kóng, Tāi-pi̍t ê hō͘-è ah, khó-lîn góa. 40 Iâ-so͘ thêng-kha, kah lâng khan i lâi; í-keng kūn-óa, chiū mn̄g i kóng, 41 Ài góa kā lí chòe sím-mi̍h? I chiū kóng, Chú ah, góa ài tit-tio̍h khòaⁿ-kìⁿ. 42 Iâ-so͘ kā i kóng, Lí thang tit-tio̍h khòaⁿ-kìⁿ, lí ê sìn ū kiù lí lah. 43 I liâm-piⁿ tit-tio̍h khòaⁿ-kìⁿ, chiū tè Iâ-so͘ kui êng-kng Siōng-tè; chèng lâng khòaⁿ-kìⁿ iā lóng kui êng-kng Siōng-tè.
1 耶穌入耶利哥，teh過去ê時， 2 有一人名叫撒該，是做抽餉ê頭人，也是好額。 3 伊ài beh看耶穌是甚麼人，但是人chōe，看bōe tio̍h，因為伊身軀矮細。 4 就走做前，peh上桑châi樹，beh看伊；因為耶穌beh tùi hia過。 5 耶穌到hit位，kia̍h頭看伊講，撒該緊緊落來，因為今á日我的確tio̍h tiàm你ê家。 6 就緊緊落來，歡喜接納伊 7 眾人看見，nga̍uh-nga̍uh念講，伊入去歇tī pháiⁿ人ê厝。 8 撒該khiā-teh，對主講，主ah，我將所有ê一半hō͘ sòng-hiong人；若是bat歪甚麼人，就將四倍賠伊 9 耶穌對伊講，今á日拯救到tī chitê家；為tio̍h伊也是亞伯拉罕ê Kiaⁿ孫。 10 因為人子到，是beh chhē失落ê，來救伊。 11 In聽見chiahê話ê時，耶穌koh設一个譬喻，是因為伊已經近耶路撒冷，in也phah算上帝ê國beh liâm-piⁿ顯明。 12 伊就講，有一个尊貴ê人去遠遠ê所在beh受封來得tio̍h國，chiah 倒tńg來。 13 就叫伊十個奴僕，用銀十斤hō͘ in，對in講，去做seng-lí到我tò來。 14 總是伊本國ê百姓怨恨伊，差使者tè後去講，阮m̄ ài chit人做阮ê王。 15 伊得tio̍h國倒tńg來，就吩咐叫hiahê對伊領銀ê奴僕來，ài beh知in做seng-lí所thàn ê。 16 頭一个來伊ê面前講，主ah，你一斤ê銀已經thàn十斤lah。 17 伊kā伊講，好ah，好ê奴僕，因為你tī至sió-khóa ê事已經盡忠，taⁿ hō͘你管十個城。 18 Hit-ê第二個來講，主ah，你一斤ê銀已經得tio̍h五斤lah。 19 伊也kā伊講，hō͘你也管五個城。 20 Koh一个來講，主ah，你看，你一斤ê銀tī chia，我用手巾包khǹg-teh； 21 因為我驚你，你是嚴核ê人，the̍h所無hē ê，割所無掖ê。 22 伊kā伊講，Pháiⁿ ê奴僕ah，就你所講ê我beh擬斷你。你既然知我是嚴核ê人，the̍h所無hē ê，割所無掖ê； 23 啥事m̄將我ê銀去lok tī錢店，到我來ê時，thang連hitê利息續the̍h？ 24 就kā邊á khiā ê人講，將伊一斤ê銀kā伊the̍h來，hō͘ hitê有十斤ê。 25 In kā伊講，主ah，伊有十斤lah。 26 我kā lín講，見若有ê beh hō͘伊；無ê，連伊所有ê也beh kā伊the̍h去。 27 但是我hiahê對敵，m̄ ài我做in ê王ê，tio̍h拖in來，tī我ê面前刣死in。 28 耶穌講soah，進前行，上耶路撒冷。 29 行近Pek-hoat-kî kap 伯大尼，tī hitê名叫橄欖ê山，就差兩個學生，講， 30 lín去對面ê鄉社，入去ê時beh tú-tio̍h一隻驢á縛tī hia，iáu-bē bat有人騎ê，tháu開kā伊牽來。 31 若有人問lín，Tháu驢beh啥事？lín tio̍h講，主欠用伊。 32 所差ê人去，果然tú-tio̍h照伊所kā in講ê。 33 Tháu驢á ê時，主人對in講，Tháu驢á beh啥事？ 34 In講，主欠用伊。 35 就牽伊就近耶穌；將in ê衫phoa̍h tī驢á頂，扶耶穌騎伊。 36 伊行ê時，人用in ê衫鋪tī路裡。 37 已經近，beh落橄欖山，kui陣ê學生就歡喜，大聲o-ló上帝，為tio̍h所看見lóng總ê權能； 38 講，Tī主ê名來ê王，應該得tio̍h o-ló，tī天裡和平，tī至koân ê位榮光。 39 眾人中有幾nā ê法利賽人對伊講，先生ah，tio̍h責備你ê學生。 40 伊應講，我kā lín講，in若靜靜，hiahê石頭beh喉叫。 41 已經近，看見城就為tio̍h伊啼哭，講， 42 設使你tī chit日若知關係平安ê事！總是taⁿ對你ê目睭隱密。 43 因為時日beh到，你ê對敵beh周圍起土城來圍你，四面困苦你； 44 koh beh hō͘你kap你內中ê kiáⁿ兒lóng倒地；無留兩塊石相疊；因為你m̄知眷顧你ê日。 45 已經入殿堂，就趕出hiahê賣物ê； 46 kā in講，有記載講，我ê厝beh做祈禱ê厝，但是lín hō͘伊做賊巢。 47 耶穌日日tī殿裡教示人。Chiahê祭司頭、經學士以及百姓ê序大計謀beh滅伊； 48 總是chhē無步，因為百姓lóng致意聽伊。
1 Iâ-so͘ ji̍p Iâ-lī-ko, teh kè-khì ê sî, 2 ū chi̍t lâng miâ kiò Sat-kai, sī chòe thiu-hiòng ê thâu-lâng, iā sī hó-gia̍h. 3 I ài beh khòaⁿ Iâ-so͘ sī sím-mi̍h lâng, nā-sī lâng chōe, khòaⁿ bōe tio̍h, in-ūi i seng-khu óe-sòe. 4 Chiū cháu chòe chêng, peh-chiūⁿ sng-châi chhiū, beh khòaⁿ I; in-ūi Iâ-so͘ beh tùi hia kè. 5 Iâ-so͘ kàu hit ūi, kia̍h thâu khòaⁿ i kóng, Sat-kai kín-kín lo̍h-lâi, in-ūi kin-á-ji̍t góa tek-khak tio̍h tiàm lí ê ke. 6 Chiū kín-kín lo̍h-lâi, hoaⁿ-hí chiap-la̍p I. 7 Chèng lâng khòaⁿ-kìⁿ, nga̍uh-nga̍uh-liām kóng, I ji̍p khì hioh tī pháiⁿ lâng ê chhù. 8 Sat-kai khiā-teh, tùi Chú kóng, Chú ah, góa chiong só͘ ū ê chi̍t pòaⁿ hō͘ sòng-hiong lâng; nā sī bat oaiⁿ sím-mi̍h lâng, chiū chiong sì-pē pê i. 9 Iâ-so͘ tùi i kóng, Kin-á-ji̍t chín-kiù kàu tī chit ê ke; ūi-tio̍h i iā sī A-pek-la̍h-hán ê kiáⁿ-sun. 10 In-ūi Jîn-chú kàu, sī beh chhē sit-lo̍h ê, lâi kiù i. 11 In thiaⁿ-kìⁿ chiah ê ōe ê sî, Iâ-so͘ koh siat chi̍t ê phì-jū, sī in-ūi I í-keng kūn Iâ-lō͘-sat-léng, in iā phah-sǹg Siōng-tè ê kok beh liâm-piⁿ hián-bêng. 12 I chiū kóng, Ū chi̍t ê chun-kùi ê lâng khì hn̄g-hn̄g ê só͘-chāi beh siū hong lâi tit-tio̍h kok, chiah tò-tńg lâi. 13 Chiū kiò i cha̍p ê lô͘-po̍k, ēng gûn cha̍p kun hō͘ in, tùi in kóng, Khì chòe seng-lí kàu góa tò-lâi. 14 Chóng-sī i pún-kok ê peh-sìⁿ oàn-hūn i, chhe sù-chiá tè-āu khì kóng, Goán m̄ ài chit lâng chòe goán ê ông. 15 I tit-tio̍h kok tò-tńg lâi, chiū hoan-hù kiò hiah ê tùi i niá gûn ê lô͘-po̍k lâi, ài beh chai in chòe seng-lí só͘ thàn ê. 16 Thâu-chi̍t-ê lâi i ê bīn-chêng kóng, Chú ah, lí chi̍t kun ê gûn í-keng thàn cha̍p kun lah. 17 I kā i kóng, Hó ah, hó ê lô͘-po̍k, in-ūi lí tī chì sió-khóa ê sū í-keng chīn-tiong, taⁿ hō͘ lí koán cha̍p ê siâⁿ. 18 Hit ê tē jī ê lâi kóng, Chú ah, lí chi̍t kun ê gûn í-keng tit-tio̍h gō͘ kun lah. 19 I iā kā i kóng, Hō͘ lí iā koán gō͘ ê siâⁿ. 20 Koh chi̍t ê lâi kóng, Chú ah, lí khòaⁿ, lí chi̍t kun ê gûn tī chia, góa ēng chhiú-kun pau khǹg-teh; 21 in-ūi góa kiaⁿ lí, lí sī giâm-ha̍t ê lâng, the̍h só͘ bô hē ê, koah só͘ bô iā ê. 22 I kā i kóng, Pháiⁿ ê lô͘-po̍k ah, chiū lí só͘ kóng ê góa beh gí-toàn lí. Lí kì-jiân chai góa sī giâm-ha̍t ê lâng, the̍h só͘ bô hē ê, koah só͘ bô iā ê; 23 siáⁿ-sū m̄ chiong góa ê gûn khì lok tī chîⁿ-tiàm, kàu góa lâi ê sî, thang liân hit ê lī-sek sòa the̍h? 24 Chiū kā piⁿ-á khiā ê lâng kóng, Chiong i chi̍t kun ê gûn kā i the̍h-lâi, hō͘ hit ê ū cha̍p kun ê. 25 In kā i kóng, Chú ah, i ū cha̍p kun lah. 26 Góa kā lín kóng, Kìⁿ-nā ū-ê beh hō͘ i; bô-ê, liân i só͘ ū ê iā beh kā i the̍h-khì. 27 Nā-sī góa hiah ê tùi-te̍k, m̄ ài góa chòe in ê ông ê, tio̍h thoa in lâi, tī góa ê bīn-chêng thâi-sí in. 28 Iâ-so͘ kóng soah, chìn-chêng kiâⁿ, chiūⁿ Iâ-lō͘-sat-léng. 29 Kiâⁿ kūn Pek-hoat-kî kap Pek-tāi-nî, tī hit-ê miâ kiò Kaⁿ-ná ê soaⁿ, chiū chhe nn̄g ê ha̍k-seng, kóng, 30 Lín khì tùi-bīn ê hiuⁿ-siā, ji̍p-khì ê sî beh tú-tio̍h chi̍t chiah lû-á pa̍k tī hia, iáu-bē bat ū lâng khiâ ê, tháu-khui kā i khan lâi. 31 Nā ū lâng mn̄g lín, Tháu lû beh siáⁿ-sū? lín tio̍h kóng, Chú khiàm-ēng i. 32 Só͘ chhe ê lâng khì, kó-jiân tú-tio̍h chiàu I só͘ kā in kóng ê. 33 Tháu lû-á ê sî, chú-lâng tùi in kóng, Tháu lû-á beh siáⁿ-sū? 34 In kóng, Chú khiàm-ēng i. 35 Chiū khan i chiū-kūn Iâ-so͘; chiong in ê saⁿ phoa̍h tī lû-á téng, hû Iâ-so͘ khiâ i. 36 I kiâⁿ ê sî, lâng ēng in ê saⁿ pho͘ tī lō͘-ni̍h. 37 Í-keng kūn, beh lo̍h Kaⁿ-ná soaⁿ, kui tīn ê ha̍k-seng chiū hoaⁿ-hí, tōa siaⁿ o-ló Siōng-tè, ūi-tio̍h só͘ khòaⁿ-kìⁿ lóng-chóng ê koân-lêng; 38 kóng, Tī Chú ê miâ lâi ê ông, eng-kai tit-tio̍h o-ló, tī thiⁿ-ni̍h hô-pêng, tī chì-koâiⁿ ê ūi êng-kng. 39 Chèng lâng tiong ū kúi-nā ê Hoat-lī-sài lâng tùi I kóng, Sian-siⁿ ah, tio̍h chek-pī lí ê ha̍k-seng. 40 I ìn kóng, Góa kā lín kóng, in nā chēng-chēng, hiah ê chio̍h-thâu beh âu-kiò. 41 Í-keng kūn, khòaⁿ-kìⁿ siâⁿ chiū ūi-tio̍h i thî-khàu, kóng, 42 Siat-sú lí tī chit ji̍t nā chai koan-hē pêng-an ê sū! chóng-sī taⁿ tùi lí ê ba̍k-chiu ún-ba̍t. 43 In-ūi sî-ji̍t beh kàu, lí ê tùi-te̍k beh chiu-ûi khí thô͘-siâⁿ lâi ûi lí, sì-bīn khùn-khó͘ lí; 44 koh beh hō͘ lí kap lí lāi-tiong ê kiáⁿ-jî lóng tó tōe; bô lâu nn̄g tè chio̍h saⁿ-tha̍h; in-ūi lí m̄ chai koàn-kò͘ lí ê ji̍t. 45 Í-keng ji̍p tiān-tn̂g, chiū kóaⁿ-chhut hiah ê bōe mi̍h ê; 46 kā in kóng, Ū kì-chài kóng, Góa ê chhù beh chòe kî-tó ê chhù, nā-sī lín hō͘ i chòe chha̍t-siū. 47 Iâ-so͘ ji̍t-ji̍t tī tiān-ni̍h kà-sī lâng. Chiah ê chè-si-thâu keng-ha̍k-sū í-ki̍p peh-sìⁿ ê sī-tōa kè-bô͘ beh bia̍t I; 48 chóng-sī chhē bô pō͘, in-ūi peh-sìⁿ lóng tì-ì thiaⁿ I.
1 有一日耶穌tī殿裡教示百姓，傳福音ê時，hiahê祭司頭經學士kap長老逼óa來對伊講， 2 Tio̍h kā阮講，你用甚麼權行chiahê事？koh用chitê權hō͘你ê是是誰？ 3 伊應講，我也問lín一句話，lín kā我講， 4 約翰ê洗禮是tùi天á是tùi人ah？ 5 In saⁿ-kap議論講，若講，Tùi thiⁿ；伊beh講，Án-ni，lín啥事m̄信伊？ 6 若講，Tùi人，百姓lóng beh用石頭tìm咱；因為百姓lóng深信約翰做先知。 7 In就應講，m̄知伊是tùi tá-lo̍h。 8 耶穌就kā in講，我也無beh kā lín講我是用甚麼權行chiahê tāi-chì。 9 耶穌就設chitê譬喻對百姓講，有一人栽葡萄園，租hō͘佃戶，就去別位久久。 10 到期差一个奴僕就近佃戶，kah in將園內ê果子納伊；總是佃戶phah伊，hō͘伊空空去。 11 Koh差別個奴僕；in也phah伊，也凌辱伊，hō͘伊空空去。 12 Koh差第三個；in也傷伊，koh chhia伊出去。 13 園主就講，我beh怎樣做ah？我beh差我所疼ê Kiáⁿ，in敢會敬伊。 14 但是佃戶看見伊，就saⁿ-kap議論講，chitê是伊承接業ê Kiáⁿ，咱來害死伊，hō͘ hitê業歸tī咱。 15 就chhia伊出園外，來害死伊園主beh怎樣來辦in ah？ 16 伊beh來滅hiahê佃戶，將伊ê園交帶別人。In聽見就講，莫得有án-ni。 17 耶穌看in就講，所記載講， 師傅所棄sak ê石， 成做厝角頭ê石， 18 chit句怎樣ah？見若跋倒tī chit塊石頂ê teh-beh破kô͘-kô͘；hō͘ chit塊石teh伊ê頂面ê beh幼boa̍h-boa̍h。 19 Hit時hiahê經學士kap祭司頭知伊chitê譬喻是指in來講，就ài beh下手掠伊，但是驚百姓。 20 就當伊，也差sòe-choh假做義人，beh掠伊ê話縫，thang將伊交付總督ê政治kap權柄。 21 就問伊講，先生ah，阮知你所講所教示ê是正直，你也無用外貌取人，就是真實用上帝ê路教示人。 22 阮納稅hō͘該撒，合宜á無？ 23 但是耶穌知in ê奸詐，就對in講， 24 將一个銀á hō͘我看。Chitê像kap號是是誰 ah？In講，該撒。 25 伊就kā in講，Án-ni，lín tio̍h將該撒ê物納hō͘該撒，將上帝ê物納hō͘上帝。 26 In當百姓ê面前bōe會掠伊ê話縫；koh奇怪伊ê應答，就靜靜。 27 有撒都該人，就是講人無koh活ê，幾nā ê就近來問耶穌講， 28 先生ah，摩西有記來指示阮講，若有人，伊ê兄死有bó͘也無kiáⁿ，伊ê小弟tio̍h娶伊ê bó͘，生kiáⁿ來續接伊ê兄。 29 Án-ni，有兄弟七人，大ê娶bó͘，無kiáⁿ就死； 30 第二個、第三個也娶伊； 31 七個lóng án-ni，無留kiáⁿ就死去。 32 後來婦人人也死。 33 Án-ni，tī koh活ê時，chitê婦人人beh做in中間tá-lo̍h一个ê bó͘？因為chit七人lóng有娶伊做bó͘。 34 耶穌kā in講，Chit世界ê人有嫁有娶； 35 但是算做能堪得得tio̍h hitê世界，也tùi死人中koh活ê，就無嫁無娶； 36 因為也bōe會koh死；是親像天使一樣；已經做koh活ê人，就做上帝ê Kiáⁿ。 37 論死人koh活，摩西tī刺phè hit篇有指明，稱呼主做亞伯拉罕ê上帝，以撒ê上帝，雅各ê上帝。 38 伊m̄是死人ê上帝，是活人ê上帝；因為眾人為tio̍h伊來活。 39 有經學士幾nā人應講，先生ah，你所講ê是好。 40 因為in m̄敢koh問伊甚麼。 41 耶穌就對in講，人怎樣講基督做大衛ê後裔ah？ 42 因為tī詩篇中大衛家己講， 主kā我ê主講， 坐我ê大pêng， 43 thèng候我將你ê對敵做你ê腳踏椅。 44 大衛既然稱伊做主，就基督怎樣做伊ê後裔ah？ 45 當眾百姓teh聽ê時，伊就kā伊ê學生講， 46 Tio̍h持防hiahê經學士，in ài穿長衫四界行，真ài tī街市裡hō͘人請安，會堂內坐高位，筵桌裡坐大位； 47 in hiau-thun守寡人ê家伙，假意長長祈禱；in beh受罪koh-khah重。
1 Ū chi̍t ji̍t Iâ-so͘ tī tiān-ni̍h kà-sī peh-sìⁿ, thoân hok-im ê sî, hiah ê chè-si-thâu keng-ha̍k-sū kap tiúⁿ-ló pek-óa lâi tùi I kóng, 2 Tio̍h kā goán kóng, Lí ēng sím-mi̍h koân kiâⁿ chiah ê sū? koh ēng chit ê koân hō͘ lí ê sī chī-chūi? 3 I ìn kóng, Góa iā mn̄g lín chi̍t kù ōe, lín kā góa kóng, 4 Iok-hān ê sóe-lé sī tùi thiⁿ á-sī tùi lâng ah? 5 In saⁿ-kap gī-lūn kóng, Nā kóng, Tùi thiⁿ; I beh kóng, Án-ni, lín siáⁿ-sū m̄ sìn i? 6 Nā kóng, Tùi lâng, peh-sìⁿ lóng beh ēng chio̍h-thâu tìm lán; in-ūi peh-sìⁿ lóng chhim-sìn Iok-hān chòe sian-ti. 7 In chiū ìn kóng, M̄ chai i sī tùi tá-lo̍h. 8 Iâ-so͘ chiū kā in kóng, Góa iā bô beh kā lín kóng góa sī ēng sím-mi̍h koân kiâⁿ chiah ê tāi-chì. 9 Iâ-so͘ chiū siat chit ê phì-jū tùi peh-sìⁿ kóng, Ū chi̍t lâng chai phû-tô hn̂g, cho͘ hō͘ tiān-hō͘, chiū khì pa̍t ūi kú-kú. 10 Kàu kî chhe chi̍t ê lô͘-po̍k chiū-kūn tiān-hō͘, kah in chiong hn̂g-lāi ê ké-chí la̍p i; chóng-sī tiān-hō͘ phah i, hō͘ i khang-khang khì. 11 Koh chhe pa̍t ê lô͘-po̍k; in iā phah i, iā lêng-jio̍k i, hō͘ i khang-khang khì. 12 Koh chhe tē saⁿ ê; in iā siong i, koh chhia i chhut-khì. 13 Hn̂g-chú chiū kóng, Góa beh cháiⁿ-iūⁿ chòe ah? Góa beh chhe góa só͘ thiàⁿ ê kiáⁿ, in káⁿ ōe kèng i. 14 Nā-sī tiān-hō͘ khòaⁿ-kìⁿ i, chiū saⁿ-kap gī-lūn kóng, Chit-ê sī i sêng-chiap gia̍p ê kiáⁿ, lán lâi hāi-sí i, hō͘ hit ê gia̍p kui tī lán. 15 Chiū chhia i chhut hn̂g gōa, lâi hāi-sí i. Hn̂g-chú beh cháiⁿ-iūⁿ lâi pān in ah? 16 I beh lâi bia̍t hiah ê tiān-hō͘, chiong i ê hn̂g kau-tāi pa̍t lâng. In thiaⁿ-kìⁿ chiū kóng, Bo̍h-tit ū án-ni. 17 Iâ-so͘ khòaⁿ in chiū kóng, Só͘ kì-chài kóng, Sai-hū só͘ khì-sak ê chio̍h, Chiâⁿ-chòe chhù-kak-thâu ê chio̍h, 18 chit kù cháiⁿ-iūⁿ ah? Kìⁿ-nā poa̍h-tó tī chit tè chio̍h téng ê teh-beh phòa kô͘-kô͘; hō͘ chit tè chio̍h teh i ê téng-bīn ê beh iù boa̍h-boa̍h. 19 Hit sî hiah ê keng-ha̍k-sū kap chè-si-thâu chai I chit ê phì-jū sī chí in lâi kóng, chiū ài beh hē chhiú lia̍h I, nā-sī kiaⁿ peh-sìⁿ. 20 Chiū tng I, iā chhe sòe-choh ké-chòe gī lâng, beh lia̍h i ê ōe-phāng, thang chiong I kau-hù chóng-tok ê chèng-tī kap koân-pèng. 21 Chiū mn̄g I kóng, Sian-siⁿ ah, goán chai lí só͘ kóng só͘ kà-sī ê sī chèng-ti̍t, lí iā bô ēng gōa-māu chhú lâng, chiū-sī chin-si̍t ēng Siōng-tè ê lō͘ kà-sī lâng. 22 Goán la̍p-sè hō͘ Kai-sat, ha̍p-gî á bô? 23 Nā-sī Iâ-so͘ chai in ê kan-chà, chiū tùi in kóng, 24 Chiong chi̍t ê gûn-á hō͘ góa khòaⁿ. Chit ê siōng kap hō sī chī-chūi ah? In kóng, Kai-sat. 25 I chiū kā in kóng, Án-ni, lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè. 26 In tng peh-sìⁿ ê bīn-chêng bōe-ōe lia̍h I ê ōe-phāng; koh kî-koài I ê ìn-tap, chiū chēng-chēng. 27 Ū Sat-thó͘-kai lâng, chiū-sī kóng lâng bô koh-oa̍h ê, kúi-nā ê chiū-kūn lâi mn̄g Iâ-so͘ kóng, 28 Sian-siⁿ ah, Mô͘-se ū kì lâi chí-sī goán kóng, Nā ū lâng, i ê hiaⁿ sí ū bó͘ iā bô kiáⁿ, i ê sió-tī tio̍h chhōa i ê bó͘, siⁿ kiáⁿ lâi sòa-chiap i ê hiaⁿ. 29 Án-ni, ū hiaⁿ-tī chhit lâng, tōa-ê chhōa bó͘, bô kiáⁿ chiū sí; 30 tē jī ê tē saⁿ ê iā chhōa i; 31 chhit ê lóng án-ni, bô lâu kiáⁿ chiū sí-khì. 32 Āu-lâi hū-jîn-lâng iā sí. 33 Án-ni, tī koh-oa̍h ê sî, chit ê hū-jîn-lâng beh chòe in tiong-kan tá-lo̍h chi̍t-ê ê bó͘? in-ūi chí chhit lâng lóng ū chhōa i chòe bó͘. 34 Iâ-so͘ kā in kóng, Chit sè-kài ê lâng ū kè ū chhōa; 35 nā-sī sǹg chòe ōe kham-tit tit-tio̍h hit ê sè-kài, iā tùi sí-lâng tiong koh-oa̍h ê, chiū bô kè bô chhōa; 36 in-ūi iā bōe-ōe koh sí; sī chhin-chhiūⁿ thiⁿ-sài chi̍t iūⁿ; í-keng chòe koh-oa̍h ê lâng, chiū chòe Siōng-tè ê kiáⁿ. 37 Lūn sí-lâng koh-oa̍h, Mô͘-se tī Chhì-phè hit phiⁿ ū chí-bêng, chheng-ho͘ Chú chòe A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè. 38 I m̄ sī sí-lâng ê Siōng-tè, sī oa̍h-lâng ê Siōng-tè; in-ūi chèng lâng ūi-tio̍h I lâi oa̍h. 39 Ū keng-ha̍k-sū kúi-nā lâng ìn kóng, Sian-siⁿ ah, lí só͘ kóng ê sī hó. 40 In-ūi in m̄ káⁿ koh mn̄g I sím-mi̍h. 41 Iâ-so͘ chiū tùi in kóng, Lâng cháiⁿ-iūⁿ kóng Ki-tok chòe Tāi-pi̍t ê hō͘-è ah? 42 In-ūi tī Si-phian tiong Tāi-pi̍t ka-kī kóng, Chú kā góa ê Chú kóng, Chē góa ê tōa pêng, 43 Thèng-hāu góa chiong lí ê tùi-te̍k chòe lí ê kha-ta̍h-í. 44 Tāi-pi̍t kì-jiân chheng I chòe Chú, chiū Ki-tok cháiⁿ-iūⁿ chòe i ê hō͘-è ah? 45 Tng chèng peh-sìⁿ teh thiaⁿ ê sî, I chiū kā I ê ha̍k-seng kóng, 46 Tio̍h tî-hông hiah ê keng-ha̍k-sū, in ài chhēng tn̂g saⁿ sì-kè kiâⁿ, chin ài tī koe-chhī-ni̍h hō͘ lâng chhéng-an, hōe-tn̂g lāi chē koâiⁿ ūi, iân-toh-ni̍h chē tōa ūi; 47 in hiau-thun chiú-kóaⁿ lâng ê ke-hé, ké-ì tn̂g-tn̂g kî-tó; in beh siū-chōe koh khah tāng.
1 耶穌kia̍h目看見chiahê好額人將in所獻ê hiat落庫房。 2 Koh看見一个sòng-hiong ê守寡人將兩個半釐hiat落去。 3 就講，我真實kā lín講，Chitê sòng-hiong ê守寡人所hiat ê比眾人所hiat ê khah chōe。 4 因為眾人是對in有chhun ê hiat落去獻；但是chitê婦人人是對伊ê無夠ê一盡hiat伊所óa靠來活ê。 5 有人講起殿堂是用好石kap所獻ê物來裝飾， 6 hit時耶穌講，Lín所看見hiahê物，日子beh到，tī chia beh無一塊石留tī石ê頂面，也無chhia落去。 7 In就問伊講，先生ah，án-ni甚麼時beh有hiahê事？Koh chiahê事beh成ê時，有甚麼兆頭ah？ 8 耶穌講，Tio̍h謹慎免得受迷惑。因為beh有chōe-chōe人託我ê名來講，我就是基督；koh講，時近lah；lín m̄-thang去tè in。 9 Lín beh聽見交戰kap擾亂ê事，hit時m̄免驚惶。因為chiahê tāi-chì的確事先有；總是末期無liâm-piⁿ到。 10 就kā in講，百姓beh起來攻擊百姓，國也beh起來攻擊國。 11 地beh大振動，也chōe-chōe所在有飢荒、瘟疫；tùi天裡也beh有thang驚ê象kap大ê神蹟。 12 Chiahê事ê事先人beh下手掠lín，khún-tio̍k lín，將lín送交tī會堂kap監牢，也為tio̍h我ê名帶lín到tī君王官府ê面前。 13 Chiahê事beh成做lín ê干證。 14 所以lín ê心志tio̍h決斷無事先掛慮beh怎樣分訴。 15 因為我beh賞賜lín口才、智慧，就是lín ê眾對敵所bōe能抵擋辯駁ê。 16 Lín也beh hō͘父母、兄弟、親戚、朋友解送； 17 lín中間有ê beh hō͘ in害死；lín因為我ê名beh hō͘眾人怨恨； 18 總是lín一支頭毛也bōe失落。 19 lín用吞忍得tio̍h lín ê活命。 20 Lín看見耶路撒冷hō͘軍兵所圍，就知伊ê拋荒近lah。 21 Hit時tī偤太ê tio̍h走去山裡；tī城內ê tio̍h出來；tī園裡ê m̄-thang入城。 22 因為chiahê日是伸冤ê日，hō͘所有記載ê lóng應驗。 23 當hiahê日有身孕kap hō͘嬰á食奶ê婦人人有災禍；因為beh有大ê困苦到tī hitê地方，也受氣到tī chitê百姓； 24 in beh hō͘刀刣死，受掠到萬邦；耶路撒冷beh hō͘列邦人thún踏，到列邦ê期滿。 25 Tī日、月、星辰teh-beh有兆頭，tī地上列邦困苦；為tio̍h海kap湧ê hōa-hōa哮，就紛亂； 26 人對驚惶以及thèng候所beh到tī天下ê事就昏去；因為天上beh振動。 27 Tī hit時beh看見人子用權能kap大榮光坐雲來。 28 Tú-tú有chiahê事，lín tio̍h挺身起來kia̍h頭；因為lín ê贖回近lah。 29 Koh用譬喻kā in講，試看無花果kap lóng總ê樹， 30 in puh-íⁿ ê時lín看見，就家己知夏天近lah。 31 Án-ni，lín看見chiahê事就tio̍h知上帝ê國近lah。 32 我實在kā lín講，Chit世代iáu-bē過去，chiahê tāi-chì lóng beh成。 33 天kap地beh無去，我ê話bōe無去。 34 但是lín tio̍h家己謹慎，驚了lín ê心hō͘貪食、酒醉，kap chit世間ê掛慮phah亂，就hit日親像活tauh忽然到tī lín； 35 因為hit日beh親像án-ni到tī見若khiā起全地面ê眾人。 36 但是lín tio̍h ta̍k時警醒、祈禱，hō͘ lín會得閃避將來lóng總ê事，來khiā tī人子ê面前。 37 耶穌日時tī殿裡教示人；暝時出去，歇tī hitê名做橄欖ê山。 38 眾百姓透早去殿裡chhē伊，ài beh聽伊
1 Iâ-so͘ kia̍h ba̍k khòaⁿ-kìⁿ chiah ê hó-gia̍h lâng chiong in só͘ hiàn ê hiat-lo̍h khò͘-pâng. 2 Koh khòaⁿ-kìⁿ chi̍t ê sòng-hiong ê chiú-kóaⁿ lâng chiong nn̄g ê pòaⁿ-lî hiat-lo̍h-khì. 3 Chiū kóng, Góa chin-si̍t kā lín kóng, Chit ê sòng-hiong ê chiú-kóaⁿ lâng só͘ hiat ê pí chèng lâng só͘ hiat ê khah chōe. 4 In-ūi chèng lâng sī tùi in ū chhun ê hiat-lo̍h-khì hiàn; nā-sī chit ê hū-jîn-lâng sī tùi i ê bô kàu ê it-chīn hiat i só͘ óa-khò lâi oa̍h ê. 5 Ū lâng kóng-khí tiān-tn̂g sī ēng hó chio̍h kap só͘ hiàn ê mi̍h lâi chng-thāⁿ, 6 hit sî Iâ-so͘ kóng, Lín só͘ khòaⁿ-kìⁿ hiah ê mi̍h, ji̍t-chí beh kàu, tī chia beh bô chi̍t tè chio̍h lâu tī chio̍h ê téng-bīn, iā bô chhia-lo̍h-khì. 7 In chiū mn̄g I kóng, Sian-siⁿ ah, án-ni sím-mi̍h sî beh ū hiah ê sū? Koh chiah ê sū beh chiâⁿ ê sî, ū sím-mi̍h tiāu-thâu ah? 8 Iâ-so͘ kóng, Tio̍h kín-sīn bián-tit siū bê-he̍k. In-ūi beh ū chōe-chōe lâng thok góa ê miâ lâi kóng, Góa chiū-sī Ki-tok; koh kóng, Sî kūn lah; lín m̄-thang khì tè in. 9 Lín beh thiaⁿ-kìⁿ kau-chiàn kap jiáu-loān ê sū, hit sî m̄-bián kiaⁿ-hiâⁿ. In-ūi chiah ê tāi-chì tek-khak tāi-seng ū; chóng-sī boa̍t-kî bô liâm-piⁿ kàu. 10 Chiū kā in kóng, Peh-sìⁿ beh khí-lâi kong-kek peh-sìⁿ, kok iā beh khí-lâi kong-kek kok. 11 Tōe beh tōa tín-tāng, iā chōe-chōe só͘-chāi ū ki-hng un-e̍k; tùi thiⁿ-ni̍h iā beh ū thang kiaⁿ ê siōng kap tōa ê sîn-jiah. 12 Chiah ê sū ê tāi-seng lâng beh hē chhiú lia̍h lín, khún-tio̍k lín, chiong lín sàng-kau tī hōe-tn̂g kap kaⁿ-lô, iā ūi-tio̍h góa ê miâ tòa lín kàu tī kun-ông koaⁿ-hú ê bīn-chêng. 13 Chiah ê sū beh chiâⁿ-chòe lín ê kan-chèng. 14 Só͘-í lín ê sim-chì tio̍h koat-toàn bô tāi-seng khòa-lū beh cháiⁿ-iūⁿ hun-sò͘. 15 In-ūi góa beh siúⁿ-sù lín kháu-châi tì-hūi, chiū-sī lín ê chèng tùi-te̍k só͘ bōe-ōe tí-tng piān-pok ê. 16 Lín iā beh hō͘ pē-bú, hiaⁿ-tī, chhin-chhek, pêng-iú ké-sàng; 17 lín tiong-kan ū ê beh hō͘ in hāi-sí; lín in-ūi góa ê miâ beh hō͘ chèng lâng oàn-hūn; 18 chóng-sī lín chi̍t ki thâu-mn̂g iā bōe sit-lo̍h. 19 Lín ēng thun-lún tit-tio̍h lín ê oa̍h-miā. 20 Lín khòaⁿ-kìⁿ Iâ-lō͘-sat-léng hō͘ kun-peng só͘ ûi, chiū chai i ê pha-hng kūn lah. 21 Hit sî tī Iû-thài ê tio̍h cháu-khì soaⁿ-ni̍h; tī siâⁿ-lāi ê tio̍h chhut-lâi; tī hn̂g-ni̍h ê m̄-thang ji̍p siâⁿ. 22 In-ūi chiah ê ji̍t sī sin-oan ê ji̍t, hō͘ só͘ ū kì-chài ê lóng èng-giām. 23 Tng hiah ê ji̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē; in-ūi beh ū tōa ê khùn-khó͘ kàu tī hit ê tōe-hng, iā siū-khì kàu tī chit ê peh-sìⁿ; 24 in beh hō͘ to thâi-sí, siū lia̍h kàu bān pang; Iâ-lō͘-sat-léng beh hō͘ lia̍t-pang lâng thún-ta̍h, kàu lia̍t-pang ê kî móa. 25 Tī ji̍t, ge̍h, chhiⁿ-sîn teh-beh ū tiāu-thâu, tī tōe-chiūⁿ lia̍t-pang khùn-khó͘; ūi-tio̍h hái kap éng ê hōa-hōa-háu chiū hun-loān; 26 lâng tùi kiaⁿ-hiâⁿ í-ki̍p thèng-hāu só͘ beh kàu tī thiⁿ-ē ê sū chiū hun-khì; in-ūi thiⁿ-siōng beh tín-tāng. 27 Tī hit sî beh khòaⁿ-kìⁿ Jîn-chú ēng koân-lêng kap tōa êng-kng chē hûn lâi. 28 Tú-tú ū chiah ê sū, lín tio̍h thêng-sin khí-lâi kia̍h thâu; in-ūi lín ê sio̍k-hôe kūn lah. 29 Koh ēng phì-jū kā in kóng, Chhì-khòaⁿ bû-hoa-kó kap lóng-chóng ê chhiū, 30 in puh-íⁿ ê sî lín khòaⁿ-kìⁿ, chiū ka-kī chai hē-thiⁿ kūn lah. 31 Án-ni, lín khòaⁿ-kìⁿ chiah ê sū chiū tio̍h chai Siōng-tè ê kok kūn lah. 32 Góa si̍t-chāi kā lín kóng, Chit sè-tāi iáu-bē kè-khì, chiah ê tāi-chì lóng beh chiâⁿ. 33 Thiⁿ kap tōe beh bô-khì, góa ê ōe bōe bô-khì. 34 Nā-sī lín tio̍h ka-kī kín-sīn, kiaⁿ-liáu lín ê sim hō͘ tham-chia̍h, chiú-chùi, kap chit sè-kan ê khòa-lū phah-loān, chiū hit ji̍t chhin-chhiūⁿ oa̍h-tauh hut-jiân kàu tī lín; 35 in-ūi hit ji̍t beh chhin-chhiūⁿ án-ni kàu tī kìⁿ-nā khiā-khí choân tōe-bīn ê chèng lâng. 36 Nā-sī lín tio̍h ta̍k sî kéng-séng, kî-tó, hō͘ lín ōe tit siám-pī chiong-lâi lóng-chóng ê sū, lâi khiā tī Jîn-chú ê bīn-chêng. 37 Iâ-so͘ ji̍t-sî tī tiān-ni̍h kà-sī lâng; mî-sî chhut-khì, hioh tī hit-ê miâ chòe Kaⁿ-ná ê soaⁿ. 38 Chèng peh-sìⁿ thàu-chá khì tiān-ni̍h chhē I, ài beh thiaⁿ I.
1 除酵節，也名pôaⁿ過節，近lah。 2 Chiahê祭司頭kap經學士chhē看有甚麼法thang害死耶穌；因為是驚百姓。 3 撒旦入tī hitê叫做Ka-lio̍k ê偤大，伊是十二個學生ê一个； 4 就去kap chiahê祭司頭有司官saⁿ-kap參詳，beh用甚麼法將耶穌交in。 5 In歡喜，約beh銀hō͘伊。 6 偤大允伊；就chhē機會，當百姓無tī-teh ê時，將耶穌交in。 7 除酵節，應該刣 pôaⁿ過節ê羊羔，hitê日已經到， 8 耶穌差彼得、約翰講，lín去替咱備辦pôaⁿ過節ê筵席，hō͘咱thang來食。 9 In kā伊講，Ài阮tī甚麼所在備辦？ 10 伊kā in講，lín去入城，就有一人帶水瓶beh tú-tio̍h lín，tio̍h tè伊入伊所入ê厝。 11 Kā hit間厝ê主人講，先生問講，客廳tī tá-lo̍h？我beh tī hia kap我ê學生食pôaⁿ過節。 12 伊beh用樓頂排設ê大聽hō͘ lín看；lín tio̍h tī hia備辦。 13 In去，果然tú-tio̍h照伊所kā in講ê，就tī hia備辦pôaⁿ過節。 14 時到耶穌坐桌，使徒也kap伊坐。 15 伊對in講，Tī受害ê事先，我不止意愛kap lín食chitê pôaⁿ過節； 16 因為我kā lín講，我無beh koh食伊，到伊應驗tī上帝ê國。 17 就接杯，祝謝了講，Lín將chitê分hō͘ lín ta̍k人； 18 因為我kā lín講，taⁿ了後我無beh lim葡萄汁，到上帝ê國來。 19 Koh the̍h餅祝謝來peh hō͘ in，講，chitê是我ê身軀，為tio̍h lín來獻ê；lín行chitê來記念我。 20 食了後捧杯也是án-ni，講，Chitê杯是新約，tī我ê血來設立ê，就是為tio̍h lín流出ê。 21 但是賣我ê人，伊ê手kap我tī桌裡。 22 因為人子真正去，照所定tio̍h ê；但是伊hō͘甚麼人賣，hit人有災禍！ 23 In就相對問其中甚麼人beh做chitê tāi-chì。 24 In有teh相爭，看從中甚麼人算做大。 25 耶穌就kā in講，列邦ê君王做主來治理in；管轄in ê稱做恩主。 26 但是lín就m̄是án-ni；lín中間最大ê tio̍h親像序細，做頭ê tio̍h親像差用。 27 甚麼號人最大？是坐桌ê，á是做差用ê ah？Kiám m̄是坐桌ê mah？但是我tī lín中間親像做差用ê。 28 Lín就是常常kap我tī試煉中ê， 29 我用國封lín，親像我ê父bat用國封我一樣； 30 hō͘ lín tī我ê國lim食tī我ê桌；lín也beh坐tī座位，審判以色列十二個支派。 31 Koh講，西門，西門ah，你看，撒旦bat ài得tio̍h lín，ài簸lín親像簸麥； 32 但是我有替你祈禱，hō͘你ê信無失落；你歸正了後，tio̍h堅固你ê兄弟。 33 彼得kā伊講，主ah，我便便kap你關落監，也kap你死。 34 伊就講，彼得ah，我kā你講，今á日雞iáu-bē啼，你beh三pái m̄認我。 35 Koh kā學生講，我前差lín無帶錢袋，kap tah-liân，kap鞋，lín有欠甚麼無？In講，無。 36 伊就kā in講，若是taⁿ有錢袋ê tio̍h帶伊，有tah-liân ê也tio̍h án-ni；無刀ê，tio̍h賣伊ê衫，來買刀。 37 因為我kā lín講，所記載ê講，算伊kap不法ê人同列，chit句話的確應驗tī我；因為干涉我ê taⁿ beh成lah。 38 In講，主ah，你看，tī chia有兩支刀。伊kā in講，夠額lah。 39 耶穌出去，照常去橄欖山；學生也tè伊。 40 到hit所在就kā in講，Lín tio̍h祈禱，免得入迷惑。 41 就離開in約略有hiat石頭ê遠，跪落去祈禱講， 42 父ah，你若肯，tio̍h將chitê杯離開我；獨獨m̄是我ê意思，是你ê意思tio̍h成。 43 有一个天使tùi天出現，來壯伊ê力。 44 耶穌苦痛到極，祈禱ná迫切；伊ê汗是親像大點血滴落地。 45 祈禱soah起來，去就近學生，看見in為tio̍h憂悶teh睏； 46 就kā in講，啥事睏？起來祈禱，免得入迷惑。 47 Iáu teh講ê時，有kui陣人到；十二學生ê一个，hitê叫做偤大ê，行tī in ê頭前，近óa耶穌beh kā伊chim。 48 但是耶穌kā伊講，偤大，你用chim嘴賣人子mah？ 49 左右ê人看見所beh到ê事就講，主ah，阮tio̍h用刀來刣 in mah？ 50 其中一人刣祭司頭ê奴僕，削去伊chiàⁿ-pêng ê耳á。 51 耶穌應講，Tāi-chì到án-ni，請容允這；就摸伊ê耳á，來醫好伊 52 耶穌tùi hiahê來攻擊伊ê祭司頭、殿司、長老講，Lín kia̍h刀kap鎚出來親像攻擊賊mah？ 53 我日日kap lín tī殿裡，lín無伸手攻擊我；但是chit tia̍p是lín ê時，kap烏暗ê權勢。 54 In就掠伊，帶伊去，帶伊入祭司頭ê厝。彼得遠遠tè伊。 55 人tī埕裡起火，saⁿ-kap teh坐，彼得也坐tī in中間。 56 有一个女婢看見伊ǹg火光teh坐，注目看伊，講，Chit人也是kap伊做陣。 57 伊m̄認講，婦人人ah，我m̄-bat伊 58 Tiap-á久koh一人看見講，你也是in ê人。彼得講，人ah，我m̄是。 59 過半時久，koh一人出力講，Chit人真正kap伊做陣，因為伊也是加利利人。 60 但是彼得講，人ah，你所講ê，我m̄知。Iáu teh講ê時，雞liâm-piⁿ啼。 61 主oa̍t頭看彼得。彼得就記得主ê話，有怎樣kā伊講，今á日雞啼ê事先，你beh三pái m̄認我。 62 伊就出去外面，大啼哭。 63 顧守耶穌ê人戲弄伊，phah伊； 64 掩伊ê面，問伊講，你tio̍h做先知來講，phah你ê是是誰 ah。 65 Koh講chōe-chōe項來褻瀆伊 66 到天光，百姓ê長老會聚集，其中有chiahê祭司頭kap經學士；in就帶耶穌到in ê公會講， 67 你若是基督tio̍h kā阮講。 68 耶穌kā in講，我若kā lín講，lín m̄信；若問lín，lín也m̄應。 69 總是taⁿ了後，人子beh坐tī上帝權能ê大pêng。 70 大家講，Án-ni，就你是上帝ê Kiáⁿ mah？伊對in講，Lín講我就是。 71 In講，Mih-sái用別項ê干證？咱本身有聽見伊親嘴所講ê。
1 Tû-kàⁿ-choeh, iā miâ pôaⁿ-kè-choeh, kūn lah. 2 Chiah ê chè-si-thâu kap keng-ha̍k-sū chhē-khòaⁿ ū sím-mi̍h hoat thang hāi-sí Iâ-so͘; in-ūi sī kiaⁿ peh-sìⁿ. 3 Sat-tàn ji̍p tī hit-ê kiò chòe Ka-lio̍k ê Iû-tāi, i sī cha̍p-jī ê ha̍k-seng ê chi̍t ê; 4 chiū khì kap chiah ê chè-si-thâu iú-si-koaⁿ saⁿ-kap chham-siông, beh ēng sím-mi̍h hoat chiong Iâ-so͘ kau in. 5 In hoaⁿ-hí, iok beh gûn hō͘ i. 6 Iû-tāi ín i; chiū chhē ki-hōe, tng peh-sìⁿ bô tī-teh ê sî, chiong Iâ-so͘ kau in. 7 Tû-kàⁿ-choeh, eng-kai thâi pôaⁿ-kè-choeh ê iûⁿ-ko, hit ê ji̍t í-keng kàu, 8 Iâ-so͘ chhe Pí-tek Iok-hān kóng, Lín khì thòe lán pī-pān pôaⁿ-kè-choeh ê iân-sia̍h, hō͘ lán thang lâi chia̍h. 9 In kā I kóng, Ài goán tī sím-mi̍h só͘-chāi pī-pān? 10 I kā in kóng, Lín khì ji̍p siâⁿ, chiū ū chi̍t lâng tòa chúi-pân beh tú-tio̍h lín, tio̍h tè i ji̍p i só͘ ji̍p ê chhù. 11 Kā hit keng chhù ê chú-lâng kóng, Sian-siⁿ mn̄g kóng, Kheh-thiaⁿ tī tá-lo̍h? góa beh tī hia kap góa ê ha̍k-seng chia̍h pôaⁿ-kè-choeh. 12 I beh ēng lâu-téng pâi-siat ê tōa thiaⁿ hō͘ lín khòaⁿ; lín tio̍h tī hia pī-pān. 13 In khì, kó-jiân tú-tio̍h chiàu I só͘ kā in kóng ê, chiū tī hia pī-pān pôaⁿ-kè-choeh. 14 Sî kàu Iâ-so͘ chē toh, sù-tô͘ iā kap I chē. 15 I tùi in kóng, Tī siū hāi ê tāi-seng góa put-chí ì-ài kap lín chia̍h chit ê pôaⁿ-kè-choeh; 16 in-ūi góa kā lín kóng, góa bô beh koh chia̍h i, kàu i èng-giām tī Siōng-tè ê kok. 17 Chiū chih poe, chiok-siā liáu kóng, Lín chiong chit-ê pun hō͘ lín ta̍k lâng; 18 in-ūi góa kā lín kóng, taⁿ liáu-āu góa bô beh lim phû-tô chiap, kàu Siōng-tè ê kok lâi. 19 Koh the̍h piáⁿ chiok-siā lâi peh hō͘ in, kóng, Chit-ê sī góa ê seng-khu, ūi-tio̍h lín lâi hiàn ê; lín kiâⁿ chit-ê lâi kì-liām góa. 20 Chia̍h liáu-āu phâng poe iā sī án-ni, kóng, Chit ê poe sī sin-iok, tī góa ê huih lâi siat-li̍p ê, chiū-sī ūi-tio̍h lín lâu-chhut ê. 21 Nā-sī bōe góa ê lâng, i ê chhiú kap góa tī toh-ni̍h. 22 In-ūi Jîn-chú chin-chiàⁿ khì, chiàu só͘ tiāⁿ-tio̍h ê; nā-sī I hō͘ sím-mi̍h lâng bōe, hit lâng ū chai-ē! 23 In chiū saⁿ tùi-mn̄g kî-tiong sím-mi̍h lâng beh chòe chit ê tāi-chì. 24 In ū teh saⁿ-chiⁿ, khòaⁿ chiông-tiong sím-mi̍h lâng sǹg chòe tōa. 25 Iâ-so͘ chiū kā in kóng, Lia̍t-pang ê kun-ông chòe chú lâi tī-lí in; koán-hat in ê chheng chòe Un-chú. 26 Nā-sī lín chiū m̄ sī án-ni; lín tiong-kan chòe tōa ê tio̍h chhin-chhiūⁿ sī-sòe, chòe thâu ê tio̍h chhin-chhiūⁿ chhe-ēng. 27 Sím-mi̍h hō lâng chòe tōa? sī chē toh ê, á-sī chòe chhe-ēng ê ah? kiám m̄ sī chē toh ê mah? Nā-sī góa tī lín tiong-kan chhin-chhiūⁿ chòe chhe-ēng ê. 28 Lín chiū-sī siông-siông kap góa tī chhì-liān tiong ê, 29 góa ēng kok hong lín, chhin-chhiūⁿ góa ê Pē bat ēng kok hong góa chi̍t iūⁿ; 30 hō͘ lín tī góa ê kok lim-chia̍h tī góa ê toh; lín iā beh chē tī chō-ūi, sím-phòaⁿ Í-sek-lia̍t cha̍p-jī ê chi-phài. 31 Koh kóng, Se-bûn, Se-bûn ah, lí khòaⁿ, Sat-tàn bat ài tit-tio̍h lín, ài pòa lín chhin-chhiūⁿ pòa be̍h; 32 nā-sī góa ū thòe lí kî-tó, hō͘ lí ê sìn bô sit-lo̍h; lí kui-chèng liáu-āu, tio̍h kian-kò͘ lí ê hiaⁿ-tī. 33 Pí-tek kā I kóng, Chú ah, góa piān-piān kap lí koaiⁿ lo̍h kaⁿ, iā kap lí sí. 34 I chiū kóng, Pí-tek ah, góa kā lí kóng, kin-á-ji̍t koe iáu-bē thî, lí beh saⁿ pái m̄ jīn góa. 35 Koh kā ha̍k-seng kóng, Góa chêng chhe lín bô tòa chîⁿ-tē, kap tah-liân, kap ôe, lín ū khiàm sím-mi̍h bô? In kóng, Bô. 36 I chiū kā in kóng, Nā-sī taⁿ ū chîⁿ-tē ê tio̍h tòa i, ū tah-liân ê iā tio̍h án-ni; bô to ê, tio̍h bōe i ê saⁿ, lâi bóe to. 37 In-ūi góa kā lín kóng, só͘ kì-chài ê kóng, Sǹg I kap put-hoat ê lâng tâng lia̍t, chit kù ōe tek-khak èng-giām tī góa; in-ūi kan-sia̍p góa ê taⁿ beh chiâⁿ lah. 38 In kóng, Chú ah, lí khòaⁿ, tī chia ū nn̄g ki to. I kā in kóng, Kàu-gia̍h lah. 39 Iâ-so͘ chhut-khì, chiàu-siông khì Kaⁿ-ná soaⁿ; ha̍k-seng iā tè I. 40 Kàu hit só͘-chāi chiū kā in kóng, Lín tio̍h kî-tó, bián-tit ji̍p bê-he̍k. 41 Chiū lī-khui in iok-lio̍k ū hiat chio̍h-thâu ê hn̄g, kūi-lo̍h-khì kî-tó kóng, 42 Pē ah, lí nā khéng, tio̍h chiong chit ê poe lī-khui góa; to̍k-to̍k m̄ sī góa ê ì-sù, sī lí ê ì-sù tio̍h chiâⁿ. 43 Ū chi̍t ê thiⁿ-sài tùi thiⁿ chhut-hiān, lâi chòng I ê la̍t. 44 Iâ-so͘ khó͘-thàng kàu ke̍k, kî-tó ná pek-chhiat; I ê kōaⁿ sī chhin-chhiūⁿ tōa tiám huih tih lo̍h tōe. 45 Kî-tó soah khí-lâi, khì chiū-kūn ha̍k-seng, khòaⁿ-kìⁿ in ūi-tio̍h iu-būn teh khùn; 46 chiū kā in kóng, Siáⁿ-sū khùn? khí-lâi kî-tó, bián-tit ji̍p bê-he̍k. 47 Iáu teh kóng ê sî ū kui tīn lâng kàu; cha̍p-jī ha̍k-seng ê chi̍t ê, hit ê kiò chòe Iû-tāi ê, kiâⁿ tī in ê thâu-chêng, kūn-óa Iâ-so͘ beh kā I chim. 48 Nā-sī Iâ-so͘ kā i kóng, Iû-tāi, lí ēng chim-chhùi bōe Jîn-chú mah? 49 Chó-iū ê lâng khòaⁿ-kìⁿ só͘ beh kàu ê sū chiū kóng, Chú ah, goán tio̍h ēng to lâi thâi in mah? 50 Kî-tiong chi̍t lâng thâi chè-si-thâu ê lô͘-po̍k, siah-khì i chiàⁿ pêng ê hī-á. 51 Iâ-so͘ ìn kóng, Tāi-chì kàu án-ni, chhiáⁿ iông-ún che; chiū bong i ê hī-á, lâi i-hó i. 52 Iâ-so͘ tùi hiah ê lâi kong-kek I ê chè-si-thâu, tiān-si, tiúⁿ-ló kóng, Lín kia̍h to kap thûi chhut-lâi chhin-chhiūⁿ kong-kek chha̍t mah? 53 Góa ji̍t-ji̍t kap lín tī tiān-ni̍h, lín bô chhun chhiú kong-kek góa; nā-sī chit tia̍p sī lín ê sî, kap o͘-àm ê koân-sè. 54 In chiū lia̍h I, tòa I khì, tòa I ji̍p chè-si-thâu ê chhù. Pí-tek hn̄g-hn̄g tè I. 55 Lâng tī tiâⁿ-ni̍h khí hé, saⁿ-kap teh chē, Pí-tek iā chē tī in tiong-kan. 56 Ū chi̍t ê lú-pī khòaⁿ-kìⁿ i ǹg hé-kng teh chē, chù-ba̍k khòaⁿ i, kóng, Chit lâng iā sī kap I chòe tīn. 57 I m̄ jīn kóng, Hū-jîn-lâng ah, góa m̄ bat I. 58 Tiap-á-kú koh chi̍t lâng khòaⁿ-kìⁿ kóng, Lí iā sī in ê lâng. Pí-tek kóng, Lâng ah, góa m̄ sī. 59 Kè pòaⁿ-sî kú, koh chi̍t lâng chhut-la̍t kóng, Chit lâng chin-chiàⁿ kap I chòe tīn, in-ūi i iā sī Ka-lī-lī lâng. 60 Nā-sī Pí-tek kóng, Lâng ah, lí só͘ kóng ê, góa m̄ chai. Iáu teh kóng ê sî, koe liâm-piⁿ thî. 61 Chú oa̍t thâu khòaⁿ Pí-tek. Pí-tek chiū kì-tit Chú ê ōe, ū cháiⁿ-iūⁿ kā i kóng, Kin-á-ji̍t koe thî ê tāi-seng, lí beh saⁿ pái m̄ jīn góa. 62 I chiū chhut-khì gōa-bīn, tōa thî-khàu. 63 Kò͘-siú Iâ-so͘ ê lâng hì-lāng I, phah I; 64 ng I ê bīn, mn̄g I kóng, Lí tio̍h chòe sian-ti lâi kóng, phah lí ê sī chī-chūi ah. 65 Koh kóng chōe-chōe hāng lâi siat-to̍k I. 66 Kàu thiⁿ kng, peh-sìⁿ ê tiúⁿ-ló-hōe chū-chi̍p, kî-tiong ū chiah ê chè-si-thâu kap keng-ha̍k-sū; in chiū tòa Iâ-so͘ kàu in ê kong-hōe kóng, 67 Lí nā sī Ki-tok tio̍h kā goán kóng. 68 Iâ-so͘ kā in kóng, Góa nā kā lín kóng, lín m̄ sìn; nā mn̄g lín, lín iā m̄ ìn. 69 Chóng-sī taⁿ liáu-āu Jîn-chú beh chē tī Siōng-tè koân-lêng ê tōa pêng. 70 Tāi-ke kóng, Án-ni, chiū lí sī Siōng-tè ê Kiáⁿ mah? I tùi in kóng, Lín kóng góa chiū-sī. 71 In kóng, Mih-sái ēng pa̍t hāng ê kan-chèng? lán pún-sin ū thiaⁿ-kìⁿ I chhin-chhùi só͘ kóng ê.
1 In全會ê人lóng起來，帶伊到彼拉多ê面前； 2 告伊講，阮看chit人迷惑阮ê百姓，禁人納稅hō͘該撒，家己稱做基督，做王。 3 彼拉多問伊講，你是偤太人ê王mah？應伊講，你講，就是。 4 彼拉多tùi hiahê祭司頭kap Kui陣ê人講，我看chit人無罪。 5 總是in ná出力講，伊搖動百姓，遍偤太傳教，tùi加利利起到chia。 6 彼拉多一下聽見，就問看chit人是加利利人á m̄是。 7 已經知伊屬tī希律所管轄，就送伊hō͘希律；hit時希律也tī耶路撒冷。 8 希律看見耶穌就真歡喜，是久久ài看見伊，因為bat聽見伊ê事，koh ǹg望看見伊行神蹟。 9 就用chōe-chōe話問伊；但是耶穌無應伊一句。 10 Hiah-ê祭司頭kap經學士khiā-teh，出力告伊。 11 希律kap伊ê兵目底無伊，戲弄伊；用súi ê衫kā伊穿，koh送還彼拉多。 12 希律kap彼拉多平時結怨，hit日就做朋友。 13 彼拉多召hiahê祭司頭，kap有司chham百姓來， 14 對in講，Lín帶chitê人到我chia，講伊是迷惑百姓ê；你看，我tī lín ê面前已經審問伊；總是論到lín所告伊ê事，我查出伊lóng無罪。 15 希律也是án-ni；因為有將伊送還咱；也你看，伊所行無一項應該死ê事。 16 所以我beh phah來tháu放伊 17 18 In一齊喉叫講，Tio̍h除去chitê人，放巴拉巴hō͘阮。 19 Chitê 巴拉巴，因為tī城內作亂koh 刣-死人，chiah關落監。 20 彼拉多ài放耶穌，就koh kap in講。 21 但是in叫，釘伊十字架，釘伊十字架。 22 彼拉多第三pái對in講，是怎樣？伊有行甚麼pháiⁿ？我看伊無一項應該死ê罪；所以beh phah來tháu放伊 23 In大聲迫切求釘伊tī十字架。In ê聲khah贏。 24 彼拉多擬斷照in所求ê來行: 25 就tháu放in所求hitê為tio̍h作亂續刣死人關落監ê；將耶穌交in，來順in ê意思。 26 帶耶穌去ê時，有一个Kó͘-lī-nāi ê人，西門，tùi鄉下來，in就khiú伊來，將十字架掛tī伊ê肩頭，hō͘伊giâ來tè耶穌。 27 Tè伊ê人有百姓kap婦人人chōe-chōe，婦人人為tio̍h伊搥胸哀傷。 28 耶穌oa̍t頭對in講，耶路撒冷ê婦人人ah，莫得為tio̍h我啼哭，tio̍h為tio̍h lín家己kap家己ê Kiáⁿ兒來啼哭: 29 因為時beh到，人beh講，bōe會懷孕ê婦人人，bē bat生產ê胎，bē bat hō͘ gín-ná suh ê奶頭，有福氣。 30 Hit時人就beh對山講，Teh阮；也對山á講，蓋阮。 31 因為tī青ê樹木若行án-ni，就tī乾ê樹木beh怎樣ah？ 32 Koh有兩個犯人hō͘人帶去，kap耶穌同受死。 33 到一所在名叫頭殼碗，就tī hia釘伊tī十字架；koh釘hiahê犯人，一个tī chiàⁿ-pêng，一个tī tò-pêng。 34 耶穌講，父ah，赦免in，因為in所做ê，in m̄知。人就拈鬮分伊ê衫。 35 Hiah-ê有司譏刺伊講，伊bat救別人；若是做上帝ê基督，受揀選ê，tio̍h救家己。 36 兵丁也戲弄伊，近óa用醋hō͘伊， 37 講，你若是偤太人ê王，tio̍h救家己。 38 Tī伊ê頂面有斬條寫講，chitê是偤太人ê王。 39 受吊teh ê犯人一个褻瀆伊，講，你Kiám m̄是基督mah？Tio̍h救家己kap阮。 40 第二個應來責備伊，講，你既然同受罪，連上帝也m̄驚mah？ 41 咱受罪是公道；因為咱所受ê合tī咱所行；但是chit人所行ê，無一項m̄ tio̍h。 42 就講，耶穌ah，你tī你ê國來ê時，tio̍h記得我。 43 耶穌就kā伊講，我實在kā你講，今á日你beh kap我tī樂園。 44 日中晝，全地烏暗；到三點鐘ê時，日ê光無去； 45 殿內ê帳tùi中裂開。 46 耶穌大聲叫，就講，父ah，我ê神交帶你ê手。Chiahê話講soah，氣就斷。 47 百總看見chitê tāi-chì，歸榮光上帝，講，Chitê真正是義ê人。 48 聚集teh看ê眾人看見chiahê tāi-chì，lóng搥胸tò去。 49 Hiah-ê Kap耶穌相識ê，以及hiahê tùi加利利tè伊來ê婦人人，lóng遠遠teh khiā，來看chiahê事。 50 有一人名約瑟，伊是議員，做人好koh義； 51 伊無同hiahê人所計謀所做ê，伊是屬偤太人ê A-lī-má-thài城，平素欣慕上帝國ê。 52 Chit人去見彼拉多，來求耶穌ê身屍。 53 就收伊落來，用幼苧布包伊，hē tī石鑿ê墓，lóng bē bat埋葬人ê。 54 Hit日就是備辦節ê日，安歇日近lah。 55 Tùi加利利kap耶穌saⁿ-kap來hiahê婦人人tè tī後面，看伊ê墓，kap怎樣hē伊ê身屍。 56 就tò去備辦香料、香油；當安歇日照誡命來歇。
1 In choân-hōe ê lâng lóng khí-lâi, tòa I kàu Pí-lia̍p-to ê bīn-chêng; 2 kò I kóng, Goán khòaⁿ chit lâng bê-he̍k goán ê peh-sìⁿ, kìm lâng la̍p sè hō͘ Kai-sat, ka-kī chheng chòe Ki-tok, chòe ông. 3 Pí-lia̍p-to mn̄g I kóng, Lí sī Iû-thài lâng ê ông mah? Ìn i kóng, Lí kóng, chiū-sī. 4 Pí-lia̍p-to tùi hiah ê chè-si-thâu kap kui tīn ê lâng kóng, Góa khòaⁿ chit lâng bô chōe. 5 Chóng-sī in ná chhut-la̍t kóng, I iô-tāng peh-sìⁿ, piàn Iû-thài thoân kàu, tùi Ka-lī-lī khí kàu chia. 6 Pí-lia̍p-to chi̍t-ē thiaⁿ-kìⁿ, chiū mn̄g khòaⁿ chit lâng sī Ka-lī-lī lâng á m̄ sī. 7 Í-keng chai I sio̍k tī Hi-lu̍t só͘ koán-hat, chiū sàng I hō͘ Hi-lu̍t; hit sî Hi-lu̍t iā tī Iâ-lō͘-sat-léng. 8 Hi-lu̍t khòaⁿ-kìⁿ Iâ-so͘ chiū chin hoaⁿ-hí, sī kú-kú ài khòaⁿ-kìⁿ I, in-ūi bat thiaⁿ-kìⁿ I ê sū, koh ǹg-bāng khòaⁿ-kìⁿ I kiâⁿ sîn-jiah. 9 Chiū ēng chōe-chōe ōe mn̄g I; nā-sī Iâ-so͘ bô ìn i chi̍t kù. 10 Hiah ê chè-si-thâu kap keng-ha̍k-sū khiā-teh, chhut-la̍t kò I. 11 Hi-lu̍t kap i ê peng ba̍k-tē-bô I, hì-lāng I; ēng súi ê saⁿ kā I chhēng, koh sàng hêng Pí-lia̍p-to. 12 Hi-lu̍t kap Pí-lia̍p-to pêng-sî kiat-oàn, hit ji̍t chiū chòe pêng-iú. 13 Pí-lia̍p-to tiàu hiah ê chè-si-thâu, kap iú-si chham peh-sìⁿ lâi, 14 tùi in kóng, Lín tòa chit ê lâng kàu góa chia, kóng I sī bê-he̍k peh-sìⁿ ê; lí khòaⁿ, góa tī lín ê bīn-chêng í-keng sím-mn̄g I; chóng-sī lūn-kàu lín só͘ kò I ê sū, góa chhâ-chhut I lóng bô chōe. 15 Hi-lu̍t iā sī án-ni; in-ūi ū chiong I sàng hêng lán; iā lí khòaⁿ, I só͘ kiâⁿ bô chi̍t hāng eng-kai sí ê sū. 16 Só͘-í góa beh phah lâi tháu-pàng I. 17 18 In chi̍t chôe âu-kiò kóng, Tio̍h tû-khì chit ê lâng, pàng Pa-lia̍p-pa hō͘ goán. 19 Chit ê Pa-lia̍p-pa, in-ūi tī siâⁿ-lāi chok-loān koh thâi-sí lâng, chiah koaiⁿ lo̍h kaⁿ. 20 Pí-lia̍p-to ài pàng Iâ-so͘, chiū koh kap in kóng. 21 Nā-sī in kiò, Tèng I si̍p-jī-kè, tèng I si̍p-jī-kè. 22 Pí-lia̍p-to tē saⁿ pái tùi in kóng, Sī cháiⁿ-iūⁿ? I ū kiâⁿ sím-mi̍h pháiⁿ? Góa khòaⁿ I bô chi̍t hāng eng-kai sí ê chōe; só͘-í beh phah lâi tháu-pàng I. 23 In tōa siaⁿ pek-chhiat kiû tèng I tī si̍p-jī-kè. In ê siaⁿ khah-iâⁿ. 24 Pí-lia̍p-to gí-toàn chiàu in só͘ kiû ê lâi kiâⁿ: 25 chiū tháu-pàng in só͘ kiû hit ê ūi-tio̍h chok-loān sòa thâi-sí lâng koaiⁿ lo̍h kaⁿ ê; chiong Iâ-so͘ kau in, lâi sūn in ê ì-sù. 26 Tòa Iâ-so͘ khì ê sî, ū chi̍t ê Kó͘-lī-nāi ê lâng, Se-bûn, tùi hiuⁿ-ē lâi, in chiū khiú i lâi, chiong si̍p-jī-kè khòa tī i ê keng-thâu, hō͘ i giâ lâi tè Iâ-so͘. 27 Tè I ê lâng ū peh-sìⁿ kap hū-jîn-lâng chōe-chōe, hū-jîn-lâng ūi-tio̍h I tûi heng ai-siong. 28 Iâ-so͘ oa̍t thâu tùi in kóng, Iâ-lō͘-sat-léng ê hū-jîn-lâng ah, bo̍h-tit ūi-tio̍h góa thî-khàu, tio̍h ūi-tio̍h lín ka-kī kap ka-kī ê kiáⁿ-jî lâi thî-khàu: 29 in-ūi sî beh kàu, lâng beh kóng, Bōe-ōe hoâi-īn ê hū-jîn-lâng, bē bat seng-sán ê thai, bē bat hō͘ gín-ná suh ê lin-thâu, ū hok-khì. 30 Hit sî lâng chiū beh tùi soaⁿ kóng, Teh goán; iā tùi soaⁿ-á kóng, Khàm goán. 31 In-ūi tī chhiⁿ ê chhiū-ba̍k nā kiâⁿ án-ni, chiū tī ta ê chhiū-ba̍k beh cháiⁿ-iūⁿ ah? 32 Koh ū nn̄g ê hoān-lâng hō͘ lâng tòa-khì, kap Iâ-so͘ tâng siū sí. 33 Kàu chi̍t só͘-chāi miâ kiò Thâu-khak-óaⁿ, chiū tī hia tèng I tī si̍p-jī-kè; koh tèng hiah ê hoān-lâng, chi̍t-ê tī chiàⁿ pêng, chi̍t-ê tī tò pêng. 34 Iâ-so͘ kóng, Pē ah, sià-bián in, in-ūi in só͘ chòe ê, in m̄ chai. Lâng chiū liam-khau pun I ê saⁿ. 35 Hiah ê iú-si ki-chhì I kóng, I bat kiù pa̍t lâng; nā sī chòe Siōng-tè ê Ki-tok, siū kéng-soán ê, tio̍h kiù ka-kī. 36 Peng-teng iā hì-lāng I, kūn-óa ēng chhò͘ hō͘ I, 37 kóng, Lí nā sī Iû-thài lâng ê ông, tio̍h kiù ka-kī. 38 Tī I ê téng-bīn ū chám-tiâu siá kóng, Chit-ê sī Iû-thài lâng ê ông. 39 Siū tiàu-teh ê hoān-lâng chi̍t-ê siat-to̍k I, kóng, Lí kiám m̄ sī Ki-tok mah? Tio̍h kiù ka-kī kap goán. 40 Tē jī ê ìn lâi chek-pī i, kóng, Lí kì-jiân tâng siū chōe, liân Siōng-tè iā m̄ kiaⁿ mah? 41 Lán siū chōe sī kong-tō; in-ūi lán só͘ siū ê ha̍p tī lán só͘ kiâⁿ; nā-sī chit lâng só͘ kiâⁿ ê, bô chi̍t hāng m̄ tio̍h. 42 Chiū kóng, Iâ-so͘ ah, lí tī lí ê kok lâi ê sî, tio̍h kì-tit góa. 43 Iâ-so͘ chiū kā i kóng, Góa si̍t-chāi kā lí kóng, Kin-á-ji̍t lí beh kap góa tī Lo̍k-hn̂g. 44 Ji̍t tiong-tàu, choân tōe o͘-àm; kàu saⁿ tiám cheng ê sî, ji̍t ê kng bô-khì; 45 tiān-lāi ê tiùⁿ tùi tiong li̍h-khui. 46 Iâ-so͘ tōa siaⁿ kiò, chiū kóng, Pē ah, góa ê sîn kau-tāi lí ê chhiú. Chiah ê ōe kóng soah, khùi chiū tn̄g. 47 Pé-chóng khòaⁿ-kìⁿ chit ê tāi-chì, kui êng-kng Siōng-tè, kóng, Chit-ê chin-chiàⁿ sī gī ê lâng. 48 Chū-chi̍p teh khòaⁿ ê chèng lâng khòaⁿ-kìⁿ chiah ê tāi-chì, lóng tûi heng tò-khì. 49 Hiah-ê kap Iâ-so͘ saⁿ-bat ê, í-ki̍p hiah-ê tùi Ka-lī-lī tè I lâi ê hū-jîn-lâng, lóng hn̄g-hn̄g teh khiā, lâi khòaⁿ chiah ê sū. 50 Ū chi̍t lâng miâ Iok-sek, i sī gī-oân, chòe lâng hó koh gī; 51 i bô tâng hiah ê lâng só͘ kè-bô͘ só͘ chòe ê, i sī sio̍k Iû-thài lâng ê A-lī-má-thài siâⁿ, pêng-sò͘ him-bō͘ Siōng-tè kok ê. 52 Chit lâng khì kìⁿ Pí-lia̍p-to, lâi kiû Iâ-so͘ ê sin-si. 53 Chiū siu I lo̍h-lâi, ēng iù-tōe pò͘ pau I, hē tī chio̍h chha̍k ê bōng, lóng bē bat bâi-chòng lâng ê. 54 Hit ji̍t chiū-sī pī-pān choeh ê ji̍t, an-hioh-ji̍t kūn lah. 55 Tùi Ka-lī-lī kap Iâ-so͘ saⁿ-kap lâi hiah ê hū-jîn-lâng tè tī āu-bīn, khòaⁿ I ê bōng, kap cháiⁿ-iūⁿ hē I ê sin-si. 56 Chiū tò-khì pī-pān hiuⁿ-liāu hiuⁿ-iû; tng an-hioh-ji̍t chiàu kài-bēng lâi hioh.
1 七日ê頭一日，天phú光，hiahê婦人人帶所備辦hiahê香料到墓； 2 看見石已經tùi墓門kō開。 3 就入去，無看見主ê身屍。 4 為tio̍h án-ni teh躊躇ê時，忽然有兩人khiā tī in身邊，衣裳光nà-nà。 5 婦人人驚惶，面àⁿ落地；hit兩人kā in講，啥事tī死人中chhē活人ah？ 6 伊無tī chia，已經koh活。Lín tio̍h記得伊iáu tī加利利ê時有怎樣kā lín講， 7 人子的確tio̍h交tī罪人ê手，hō͘ in釘tī十字架，第三日koh活。 8 In就記得伊ê話； 9 tùi墓裡tò去，將chiahê事lóng報hō͘十一个學生kap其餘ê眾人知。 10 去tùi使徒講chiahê tāi-chì ê，就是Boa̍t-tāi-lia̍p ê馬利亞，kap Iok-a-ná，kap雅各ê老母馬利亞，以及其餘kap in做伴ê婦人人。 11 使徒看hiahê話做無影，也m̄信伊 12 但是彼得起來走到墓裡，àⁿ落去看，只有看見幼苧布nā-tiāⁿ；就tò去in厝，teh奇怪所經過ê事。 13 Siāng hit日，學生中有兩人去一个鄉社，名Í-má-ngó͘，離耶路撒冷二十五里。 14 In saⁿ-kap談論所經過lóng總ê事。 15 In teh談論相問ê時，耶穌本身近óa，kap in saⁿ-kap行。 16 In兩人迷目，致到bōe認得伊。 17 伊對in講，Lín行ê時，saⁿ-kap辯論ê是甚麼話？In就khiā-teh，面帶憂容。 18 其中一个，名Kek-liû-pa，應伊講，你kiám單身出外tī耶路撒冷，也m̄知近日tī hia所經過ê事mah？ 19 伊kā in講，甚麼事ah？In kā伊講，就是拿撒勒人耶穌ê事；伊是先知人，tī上帝kap眾百姓ê面前所講所行有權能； 20 也hiahê祭司頭kap咱ê序大解送伊去定死罪，釘伊tī十字架。 21 但是阮平素teh ǹg望伊就是hitê beh贖回以色列ê。M̄-nā án-ni，koh chiahê事成已經三日lah。 22 Koh阮中間幾nā ê婦人人hō͘阮真gông-ngia̍h；因為in phah-phú光到墓裡； 23 無看見伊ê身屍，就來講，in有看見天使出現，講伊koh活lah。 24 阮中間幾nā人到墓裡，果然看見照婦人人所講ê；總是無看見伊 25 耶穌對in講，無知ê人ah，先知所講一切ê話，lín ê心怎樣hiah oh信ah！ 26 基督受chiahê艱苦，來入伊ê榮光，Kiám m̄應該mah？ 27 就tùi摩西kap眾先知起，見若聖經中所指伊ê，lóng kā in解明。 28 將近所去ê鄉社，耶穌親像beh行khah遠。 29 兩人強留伊講，請kap阮tòa；時已經òaⁿ，日beh落lah。伊就入去，beh kap in tòa。 30 Saⁿ-kap坐桌ê時，耶穌the̍h餅祝謝，peh來hō͘ in。 31 In ê目睭開，就認得伊；liâm-piⁿ無koh看見。 32 In就saⁿ-kap講，路裡伊kap咱講話，開拆聖經ê時，咱ê心kiám無熱mah？ 33 就即時起身，tò去耶路撒冷，tú-tio̍h十一个學生，kap同tī-teh ê人聚集teh講， 34 主果然koh活，也出現hō͘西門看見。 35 In兩人也講起tī路裡所tú-tio̍h ê事，kap tī peh餅ê時in怎樣認得伊 36 In teh講chiahê話ê時，耶穌本身khiā tī in中間，kā in講，願lín平安。 37 In gông-ngia̍h koh驚，掠做所看見ê是神。 38 伊就kā in講，Lín啥事jû亂，心內生起僥疑ah？ 39 Tio̍h看我ê手我ê腳，就是我本身；摸我，就知；因為神無骨無肉，照lín看見我lóng是有。 40 講án-ni，就將手kap腳hō͘ in看。 41 學生為tio̍h歡喜ê緣故，iáu-kú無信，koh teh奇怪，伊kā in講，Lín tī chia有甚麼thang食無？ 42 In就將pek ê魚一片hō͘伊； 43 伊the̍h去，當in ê面前食伊。 44 Koh對in講，Chiahê就是我iáu-kú kap lín tī-teh ê時所對lín講ê話，講見若tī摩西ê律法，kap hiahê先知，以及詩篇，所記載指我ê話lóng的確tio̍h應驗。 45 就開in ê心竅，hō͘ in能曉悟hiahê聖經。 46 Koh kā in講，有án-ni記載，基督tio̍h受苦，第三日tùi死人中koh活； 47 也反悔kap赦罪ê道理beh tī伊ê名來傳到萬邦，是tùi耶路撒冷起。 48 Lín做chiahê tāi-chì ê干證。 49 也我beh差我ê父所應允ê到tī lín；總是lín tio̍h tiàm tī chitê城，thèng候tùi頂面落來ê權能親像衫kā lín穿。 50 就chhōa in出去到伯大尼 ê對面，kia̍h起手，kā in祝福。 51 祝福ê時，就離別in，受chih接上天。 52 In就拜伊；就倒tńg去耶路撒冷，大大歡喜: 53 常常tī殿內，o-ló上帝。
1 Chhit-ji̍t ê thâu chi̍t ji̍t, thiⁿ phú-kng, hiah ê hū-jîn-lâng tòa só͘ pī-pān hiah ê hiuⁿ-liāu kàu bōng; 2 khòaⁿ-kìⁿ chio̍h í-keng tùi bōng-mn̂g kō khui. 3 Chiū ji̍p-khì, bô khòaⁿ-kìⁿ Chú ê sin-si. 4 Ūi-tio̍h án-ni teh tiû-tû ê sî, hut-jiân ū nn̄g lâng khiā tī in sin-piⁿ, i-chiûⁿ kng nà-nà. 5 Hū-jîn-lâng kiaⁿ-hiâⁿ, bīn àⁿ-lo̍h tōe; hit nn̄g lâng kā in kóng, Siáⁿ-sū tī sí-lâng tiong chhē oa̍h-lâng ah? 6 I bô tī chia, í-keng koh-oa̍h. Lín tio̍h kì-tit I iáu tī Ka-lī-lī ê sî ū cháiⁿ-iūⁿ kā lín kóng, 7 Jîn-chú tek-khak tio̍h kau tī chōe-jîn ê chhiú, hō͘ in tèng tī si̍p-jī-kè, tē saⁿ ji̍t koh-oa̍h. 8 In chiū kì-tit I ê ōe; 9 tùi bōng-ni̍h tò-khì, chiong chiah ê sū lóng pò hō͘ cha̍p-it ê ha̍k-seng kap kî-û ê chèng lâng chai. 10 Khì tùi sù-tô͘ kóng chiah ê tāi-chì ê, chiū-sī Boa̍t-tāi-lia̍p ê Má-lī-a, kap Iok-a-ná, kap Ngá-kok ê lāu-bú Má-lī-a, í-ki̍p kî-û kap in chòe-phōaⁿ ê hū-jîn-lâng. 11 Sù-tô͘ khòaⁿ hiah ê ōe chòe bô iáⁿ, iā m̄ sìn i. 12 Nā-sī Pí-tek khí-lâi cháu kàu bōng-ni̍h, àⁿ-lo̍h-khì khòaⁿ, chí-ū khòaⁿ-kìⁿ iù-tōe pò͘ nā-tiāⁿ; chiū tò-khì in chhù, teh kî-koài só͘ keng-kè ê sū. 13 Siāng hit ji̍t ha̍k-seng tiong ū nn̄g lâng khì chi̍t ê hiuⁿ-siā, miâ Í-má-ngó͘, lī Iâ-lō͘-sat-léng jī-cha̍p-gō͘ lí. 14 In saⁿ-kap tâm-lūn só͘ keng-kè lóng-chóng ê sū. 15 In teh tâm-lūn saⁿ-mn̄g ê sî, Iâ-so͘ pún-sin kūn-óa, kap in saⁿ-kap kiâⁿ. 16 In nn̄g lâng bê-ba̍k, tì-kàu bōe jīn-tit I. 17 I tùi in kóng, Lín kiâⁿ ê sî, saⁿ-kap piān-lūn ê sī sím-mi̍h ōe? In chiū khiā-teh, bīn tài-iu-iông. 18 Kî-tiong chi̍t-ê, miâ Kek-liû-pa, ìn I kóng, Lí kiám toaⁿ-sin chhut-gōa tī Iâ-lō͘-sat-léng, iā m̄ chai kūn-ji̍t tī hia só͘ keng-kè ê sū mah? 19 I kā in kóng, Sím-mi̍h sū ah? In kā I kóng, Chiū-sī Ná-sat-le̍k lâng Iâ-so͘ ê sū; I sī sian-ti lâng, tī Siōng-tè kap chèng peh-sìⁿ ê bīn-chêng só͘ kóng só͘ kiâⁿ ū koân-lêng; 20 iā hiah ê chè-si-thâu kap lán ê sī-tōa ké-sàng I khì tēng sí chōe, tèng I tī si̍p-jī-kè. 21 Nā-sī goán pêng-sò͘ teh ǹg-bāng I chiū-sī hit-ê beh sio̍k-hôe Í-sek-lia̍t ê. M̄ nā án-ni, koh chiah ê sū chiâⁿ í-keng saⁿ ji̍t lah. 22 Koh goán tiong-kan kúi-nā ê hū-jîn-lâng hō͘ goán chin gông-ngia̍h; in-ūi in phah-phú-kng kàu bōng-ni̍h; 23 bô khòaⁿ-kìⁿ I ê sin-si, chiū lâi kóng, in ū khòaⁿ-kìⁿ thiⁿ-sài chhut-hiān, kóng I koh-oa̍h lah. 24 Goán tiong-kan kúi-nā lâng kàu bōng-ni̍h, kó-jiân khòaⁿ-kìⁿ chiàu hū-jîn-lâng só͘ kóng ê; chóng-sī bô khòaⁿ-kìⁿ I. 25 Iâ-so͘ tùi in kóng, Bû-ti ê lâng ah, sian-ti só͘ kóng it-chhè ê ōe, lín ê sim cháiⁿ-iūⁿ hiah oh sìn ah! 26 Ki-tok siū chiah ê kan-khó͘, lâi ji̍p I ê êng-kng, kiám m̄ eng-kai mah? 27 Chiū tùi Mô͘-se kap chèng sian-ti khí, kìⁿ-nā sèng-keng tiong só͘ chí I ê, lóng kā in kóe-bêng. 28 Chiong-kūn só͘ khì ê hiuⁿ-siā, Iâ-so͘ chhin-chhiūⁿ beh kiâⁿ khah hn̄g. 29 Nn̄g lâng kiông lâu I kóng, Chhiáⁿ kap goán tòa; sî í-keng òaⁿ, ji̍t beh lo̍h lah. I chiū ji̍p-khì, beh kap in tòa. 30 Saⁿ-kap chē toh ê sî, Iâ-so͘ the̍h piáⁿ chiok-siā, peh lâi hō͘ in. 31 In ê ba̍k-chiu khui, chiū jīn-tit I; liâm-piⁿ bô koh khòaⁿ-kìⁿ. 32 In chiū saⁿ-kap kóng, Lō͘-ni̍h I kap lán kóng ōe, khui-thiah sèng-keng ê sî, lán ê sim kiám bô jia̍t mah? 33 Chiū chek-sî khí-sin, tò-khì Iâ-lō͘-sat-léng, tú-tio̍h cha̍p-it ê ha̍k-seng, kap tâng tī-teh ê lâng chū-chi̍p teh kóng, 34 Chú kó-jiân koh-oa̍h, iā chhut-hiān hō͘ Se-bûn khòaⁿ-kìⁿ. 35 In nn̄g lâng iā kóng-khí tī lō͘-ni̍h só͘ tú-tio̍h ê sū, kap tī peh piáⁿ ê sî in cháiⁿ-iūⁿ jīn-tit I. 36 In teh kóng chiah ê ōe ê sî, Iâ-so͘ pún-sin khiā tī in tiong-kan, kā in kóng, Goān lín pêng-an. 37 In gông-ngia̍h koh kiaⁿ, lia̍h-chòe só͘ khòaⁿ-kìⁿ ê sī sîn. 38 I chiū kā in kóng, Lín siáⁿ-sū jû-loān, sim-lāi siⁿ-khí giâu-gî ah? 39 Tio̍h khòaⁿ góa ê chhiú góa ê kha, chiū-sī góa pún-sin; bong góa, chiū chai; in-ūi sîn bô kut bô bah, chiàu lín khòaⁿ-kìⁿ góa lóng sī ū. 40 Kóng án-ni, chiū chiong chhiú kap kha hō͘ in khòaⁿ. 41 Ha̍k-seng ūi-tio̍h hoaⁿ-hí ê iân-kò͘, iáu-kú bô sìn, koh teh kî-koài, I kā in kóng, Lín tī chia ū sím-mi̍h thang chia̍h bô? 42 In chiū chiong pek ê hî chi̍t phìⁿ hō͘ I; 43 I the̍h-khì, tng in ê bīn-chêng chia̍h i. 44 Koh tùi in kóng, Chiah-ê chiū-sī góa iáu-kú kap lín tī-teh ê sî só͘ tùi lín kóng ê ōe, kóng kìⁿ-nā tī Mô͘-se ê lu̍t-hoat, kap hiah ê sian-ti, í-ki̍p Si-phian, só͘ kì-chài chí góa ê ōe lóng tek-khak tio̍h èng-giām. 45 Chiū khui in ê sim-khiàu, hō͘ in ōe hiáu-ngō͘ hiah ê sèng-keng. 46 Koh kā in kóng, Ū án-ni kì-chài, Ki-tok tio̍h siū khó͘, tē saⁿ ji̍t tùi sí-lâng tiong koh-oa̍h; 47 iā hoán-hóe kap sià-chōe ê tō-lí beh tī I ê miâ lâi thoân kàu bān pang, sī tùi Iâ-lō͘-sat-léng khí. 48 Lín chòe chiah ê tāi-chì ê kan-chèng. 49 Iā góa beh chhe góa ê Pē só͘ èng-ún ê kàu tī lín; chóng-sī lín tio̍h tiàm tī chit ê siâⁿ, thèng-hāu tùi téng-bīn lo̍h-lâi ê koân-lêng chhin-chhiūⁿ saⁿ kā lín chhēng. 50 Chiū chhōa in chhut-khì kàu Pek-tāi-nî ê tùi-bīn, kia̍h-khí chhiú, kā in chiok-hok. 51 Chiok-hok ê sî, chiū lī-pia̍t in, siū chih-chiap chiūⁿ thiⁿ. 52 In chiū pài I; chiū tò-tńg-khì Iâ-lō͘-sat-léng, tōa-tōa hoaⁿ-hí: 53 siông-siông tī tiān-lāi, o-ló Siōng-tè.