1 上帝ê Kiáⁿ耶穌基督福音ê起頭。 2 親像tī先知以賽亞ê冊所記載講， 我差我ê使者tī你ê面前， 來修整你ê路； 3 有teh叫tī曠野ê，伊ê聲講， Tio̍h備辦主ê路， 修直伊ê小路。 4 約翰來tī曠野行洗禮，傳反悔ê洗禮，hō͘人得tio̍h赦罪。 5 Thong偤太地kap耶路撒冷ê眾人lóng出來就近伊，認in ê罪，tī約旦河tùi伊受洗禮。 6 Chitê約翰穿駱駝毛，腰hâ皮帶，食草蜢kap山野ê蜜。 7 伊傳講，有一个比我khah有權能ê tè尾我來；就屈落來tháu伊ê鞋帶，我也bōe堪得。 8 我bat用水kā lín行洗禮，伊beh用聖神kā lín洗。 9 當chiahê日耶穌tùi加利利ê拿撒勒來，tī約旦河tùi約翰受洗禮。 10 即時tùi水起來，就看見天裂開，聖神親像鴿á降臨tī伊ê頂面； 11 koh tùi天有聲講，你是我所疼ê Kiáⁿ，我歡喜你。 12 聖神即時逼伊去曠野。 13 Tī曠野四十日，tú-tio̍h撒旦試，也kap野獸saⁿ-kap tòa；有天使伺候伊。 14 約翰已經關監，耶穌到加利利，傳上帝ê福音，講， 15 日期滿lah，上帝ê國近lah；lín tio̍h反悔來信福音。 16 耶穌經過加利利ê海墘，看見西門kap伊ê兄弟安得烈拋網tī海裡；因為是討魚人。 17 耶穌kā in講，Lín來tè我，我beh hō͘ lín得tio̍h人親像討魚ê。 18 In liâm-piⁿ離開網，來tè伊。 19 Lio̍h-á進前，看見西庇太ê Kiáⁿ雅各kap伊ê兄弟約翰tī船裡teh補網。 20 伊liâm-piⁿ招in，in就拜別in老父西庇太kap倩工人tī船裡，來tè tī伊ê後面。 21 In入迦百農，耶穌tī安歇日入會堂，教示人。 22 人奇怪伊ê教示；因為伊教示人親像有權ê，無親像經學士。 23 Tú-á會堂內有一个犯tio̍h鬼ê人喉叫講， 24 拿撒勒人耶穌，阮kap你甚麼干涉？你來beh滅阮mah？我知你是是誰，就是上帝ê聖ê。 25 耶穌責備伊講，你tio̍h靜靜，tùi chit人出去。 26 邪神thiu-chhoah hit人，大聲叫，就tùi伊出去。 27 眾人lóng gông-ngia̍h，致到saⁿ辯論，講，chitê是怎樣？是新ê教示。伊用權命令邪神，邪神也sūn-thàn伊。 28 伊ê名聲隨時遍傳加利利ê四方。 29 In已經出會堂，隨時kap雅各約翰入西門kap安得烈ê家。 30 西門ê丈姆患tio̍h熱病倒teh，隨時有人將這kā耶穌講。 31 伊近óa牽伊ê手，hō͘伊起來，熱就退；婦人人就伺候in。 32 到黃昏暗，日落了，有人chhōa lóng總有破病ê，kap犯tio̍h鬼ê人就近伊。 33 Thong城lóng聚集tī門口。 34 耶穌醫好ta̍k樣病ê人chōe-chōe，koh趕chōe-chōe鬼；因為鬼bat伊，所以m̄准in講。 35 隔早起，天iáu不止暗，耶穌起來出去曠野ê所在，tī hia祈禱。 36 西門kap同伴ê人追chhē伊。 37 已經tú-tio̍h就kā伊講，眾人lóng teh chhē你。 38 伊kā in講，咱來去別位；到附近ê埠頭，hō͘我thang tī hia傳道；因為我為tio̍h chitê事，chiah出來。 39 就去遍加利利，入in ê會堂，宣傳道理，koh趕鬼。 40 有一个thái-ko ê就近伊，求伊，跪伊，kā伊講，你若肯，就會hō͘我清氣。 41 耶穌可憐，伸手摸伊，kā伊講，我肯，你thang清氣。 42 Thái-ko即時除去；伊就清氣。 43 耶穌嚴嚴警戒伊，隨時kah伊去；也kā伊講， 44 Tio̍h謹慎莫得kā人講甚麼；獨獨tio̍h去，將本身hō͘祭司驗，亦為tio̍h你得tio̍h清氣，獻摩西所吩咐ê，來做證據tī人。 45 總是伊出去，就大大宣傳，四界報揚chitê事；致到耶穌無thang koh顯然入城，獨獨tòa tī外面曠野ê所在。人tùi四方就近伊。
1 Siōng-tè ê Kiáⁿ Iâ-so͘ Ki-tok hok-im ê khí-thâu. 2 Chhin-chhiūⁿ tī sian-ti Í-sài-a ê chheh só͘ kì-chài kóng, Góa chhe góa ê sù-chiá tī lí ê bīn-chêng, Lâi siu-chéng lí ê lō͘; 3 Ū teh kiò tī khòng-iá ê, i ê siaⁿ kóng, Tio̍h pī-pān Chú ê lō͘, Siu ti̍t I ê sió lō͘. 4 Iok-hān lâi tī khòng-iá kiâⁿ sóe-lé, thoân hoán-hóe ê sóe-lé, hō͘ lâng tit-tio̍h sià-chōe. 5 Thong Iû-thài tōe kap Iâ-lō͘-sat-léng ê chèng lâng lóng chhut-lâi chiū-kūn i, jīn in ê chōe, tī Iok-tàn hô tùi i siū sóe-lé. 6 Chit ê Iok-hān chhēng lo̍k-tô-mn̂g, io hâ phê-tòa, chia̍h chháu-meh kap soaⁿ-iá ê bi̍t. 7 I thoân kóng, Ū chi̍t-ê pí góa khah ū koân-lêng ê tè-bé góa lâi; chiū khut-lo̍h lâi tháu I ê ôe-tòa, góa iā bōe kham-tit. 8 Góa bat ēng chúi kā lín kiâⁿ sóe-lé, I beh ēng Sèng Sîn kā lín sóe. 9 Tng chiah ê ji̍t Iâ-so͘ tùi Ka-lī-lī ê Ná-sat-le̍k lâi, tī Iok-tàn hô tùi Iok-hān siū sóe-lé. 10 Chek-sî tùi chúi khí-lâi, chiū khòaⁿ-kìⁿ thiⁿ li̍h-khui, Sèng Sîn chhin-chhiūⁿ chíⁿ-á kàng-lîm tī I ê téng-bīn; 11 koh tùi thiⁿ ū siaⁿ kóng, Lí sī góa só͘ thiàⁿ ê Kiáⁿ, góa hoaⁿ-hí lí. 12 Sèng Sîn chek-sî pek I khì khòng-iá. 13 Tī khòng-iá sì-cha̍p ji̍t, tú-tio̍h Sat-tàn chhì, iā kap iá-siù saⁿ-kap tòa; ū thiⁿ-sài su-hāu I. 14 Iok-hān í-keng koaiⁿ-kaⁿ, Iâ-so͘ kàu Ka-lī-lī, thoân Siōng-tè ê hok-im, kóng, 15 Ji̍t-kî móa lah, Siōng-tè ê kok kūn lah; lín tio̍h hoán-hóe lâi sìn hok-im. 16 Iâ-so͘ keng-kè Ka-lī-lī ê hái-kîⁿ, khòaⁿ-kìⁿ Se-bûn kap i ê hiaⁿ-tī An-tek-lia̍t pha bāng tī hái-ni̍h; in-ūi sī thó-hî lâng. 17 Iâ-so͘ kā in kóng, Lín lâi tè góa, góa beh hō͘ lín tit-tio̍h lâng chhin-chhiūⁿ thó-hî ê. 18 In liâm-piⁿ lī-khui bāng, lâi tè I. 19 Lio̍h-á chìn-chêng, khòaⁿ-kìⁿ Se-pí-thài ê kiáⁿ Ngá-kok kap i ê hiaⁿ-tī Iok-hān tī chûn-ni̍h teh pó͘ bāng. 20 I liâm-piⁿ chio in, in chiū pài-pia̍t in lāu-pē Se-pí-thài kap chhiàⁿ-kang lâng tī chûn-ni̍h, lâi tè tī I ê āu-bīn. 21 In ji̍p Ka-pek-lông, Iâ-so͘ tī an-hioh-ji̍t ji̍p hōe-tn̂g, kà-sī lâng. 22 Lâng kî-koài I ê kà-sī; in-ūi I kà-sī lâng chhin-chhiūⁿ ū koân ê, bô chhin-chhiūⁿ keng-ha̍k-sū. 23 Tú-á hōe-tn̂g lāi ū chi̍t ê hoān-tio̍h kúi ê lâng âu-kiò kóng, 24 Ná-sat-le̍k lâng Iâ-so͘, goán kap lí sím-mi̍h kan-sia̍p? Lí lâi beh bia̍t goán mah? Góa chai lí sī chī-chūi, chiū-sī Siōng-tè ê Sèng ê. 25 Iâ-so͘ chek-pī i kóng, Lí tio̍h chēng-chēng, tùi chit lâng chhut-khì. 26 Siâ-sîn thiu-chhoah hit lâng, tōa siaⁿ kiò, chiū tùi i chhut-khì. 27 Chèng lâng lóng gông-ngia̍h, tì-kàu saⁿ piān-lūn, kóng, Chit-ê sī cháiⁿ-iūⁿ? Sī sin ê kà-sī. I ēng koân bēng-lēng siâ-sîn, siâ-sîn iā sūn-thàn I. 28 I ê miâ-siaⁿ sûi-sî piàn thoân Ka-lī-lī ê sì-hng. 29 In í-keng chhut hōe-tn̂g, sûi-sî kap Ngá-kok Iok-hān ji̍p Se-bûn kap An-tek-lia̍t ê ke. 30 Se-bûn ê tiūⁿ-ḿ hoān-tio̍h jia̍t-pīⁿ tó-teh. Sûi-sî ū lâng chiong che kā Iâ-so͘ kóng. 31 I kūn-óa khan i ê chhiú, hō͘ i khí-lâi, jia̍t chiū thè; hū-jîn-lâng chiū su-hāu in. 32 Kàu hông-hun àm, ji̍t lo̍h liáu, ū lâng chhōa lóng-chóng ū phòa-pīⁿ ê, kap hoān-tio̍h kúi ê lâng chiū-kūn I. 33 Thong siâⁿ lóng chū-chi̍p tī mn̂g-kháu. 34 Iâ-so͘ i-hó ta̍k iūⁿ pīⁿ ê lâng chōe-chōe, koh kóaⁿ chōe-chōe kúi; in-ūi kúi bat I, só͘-í m̄ chún in kóng. 35 Keh chá-khí, thiⁿ iáu put-chí àm, Iâ-so͘ khí-lâi chhut-khì khòng-iá ê só͘-chāi, tī hia kî-tó. 36 Se-bûn kap tâng-phōaⁿ ê lâng tui-chhē I. 37 Í-keng tú-tio̍h chiū kā I kóng, Chèng lâng lóng teh chhē lí. 38 I kā in kóng, Lán lâi khì pa̍t ūi; kàu hū-kūn ê po͘-thâu, hō͘ góa thang tī hia thoân-tō; in-ūi góa ūi-tio̍h chit ê sū, chiah chhut-lâi. 39 Chiū khì piàn Ka-lī-lī, ji̍p in ê hōe-tn̂g, soan-thoân tō-lí, koh kóaⁿ kúi. 40 Ū chi̍t ê thái-ko ê chiū-kūn I, kiû I, kūi I, kā I kóng, Lí nā khéng, chiū ōe hō͘ góa chheng-khì. 41 Iâ-so͘ khó-lîn, chhun chhiú bong i, kā i kóng, Góa khéng, lí thang chheng-khì. 42 Thái-ko chek-sî tû--khì; i chiū chheng-khì. 43 Iâ-so͘ giâm-giâm kéng-kài i, sûi-sî kah i khì; iā kā i kóng, 44 Tio̍h kín-sīn bo̍h-tit kā lâng kóng sím-mi̍h; to̍k-to̍k tio̍h khì, chiong pún-sin hō͘ chè-si giām, ia̍h ūi-tio̍h lí tit-tio̍h chheng-khì, hiàn Mô͘-se só͘ hoan-hù ê, lâi chòe chèng-kù tī lâng. 45 Chóng-sī i chhut-khì, chiū tōa-tōa soan-thoân, sì-kè pò-iông chit ê sū; tì-kàu Iâ-so͘ bô thang koh hián-jiân ji̍p siâⁿ, to̍k-to̍k tòa tī gōa-bīn khòng-iá ê só͘-chāi. Lâng tùi sì-hng chiū-kūn I.
1 過kúi-nā日耶穌koh入迦百農； 2 人聽見伊tī厝內就chōe-chōe人聚集致到無空地，連門口也無；伊就講道理hō͘ in聽。 3 有帶一个piàn-sūi ê就近伊，是四人扛伊來。 4 因為人chōe，bōe會近óa，就tī耶穌tiàm ê所在，拆厝頂hō͘伊開孔；就將piàn-sūi ê倒tī舖á墜落去。 5 耶穌看見in ê信，就kā piàn-sūi ê講，細kiáⁿ，你ê罪赦免lah。 6 有kúi-nā ê經學士坐tī hia，心內議論講，Chitê人怎樣án-ni講ah？ 7 伊是僭權lām-sám；除上帝以外，是誰會赦免罪ah？ 8 耶穌心內liâm-piⁿ知in有chit號ê議論，就kā in講，Lín啥事tī心內議論chiahê ah？ 9 Kā piàn-sūi ê講，你ê罪赦lah，á是講，起來，giâ你ê舖á來行，tá-lo̍h一項khah快？ 10 獨獨beh hō͘ lín知人子tī地裡有權thang赦罪，(就kā piàn-sūi ê講)， 11 我kā你講，起來，giâ你ê舖á tò去你ê厝。 12 伊就起來，tī眾人ê面前隨時giâ伊ê舖á出去；致到眾人lóng gông-ngia̍h，歸榮光上帝講，阮從來bē bat看見án-ni-siⁿ。 13 耶穌koh出去到海墘；眾人lóng就近伊，就教示in。 14 經過ê時看見A-le̍k-hui ê Kiáⁿ Lī-bī坐tī餉關，就kā伊講，Tè我。伊就起來tè伊。 15 耶穌坐桌tī Lī-bī ê厝，有chōe-chōe抽餉ê kap pháiⁿ人kap耶穌chham伊ê學生同坐，因為hiahê人是chōe，也teh tè伊。 16 法利賽ê經學士看見伊kap pháiⁿ人以及抽餉ê saⁿ-kap食，就kā伊ê學生講，伊kap抽餉ê以及pháiⁿ人saⁿ-kap lim食ah。 17 耶穌聽見，就kā in講，勇健ê無欠醫生，但是破病ê就tio̍h；我來m̄是beh招義人，是beh招pháiⁿ人。 18 約翰ê學生kap法利賽人當teh禁食；in就近來kā伊講，約翰ê學生kap法利賽人ê學生禁食，你ê學生無禁食，是怎樣？ 19 耶穌kā in講，新kiáⁿ婿kap賀娶ê人tī-teh ê時，in kiám會禁食mah？新kiáⁿ婿iáu同tī-teh，in bōe會禁食。 20 但是時日beh到，新kiáⁿ婿beh tùi in中間無去，hit日in就beh禁食。 21 無人用新布補舊衫；若有，就所補ê hit塊會kiù裂伊，就是新ê kiù裂舊ê，伊ê破孔koh-khah大。 22 也無人用新酒tóe tī舊皮囊；若有，就新酒會爆裂皮囊，酒漏，lông也phah-pháiⁿ。獨獨新酒tio̍h入tī新皮囊。 23 耶穌tī安歇日tùi麥園經過，伊ê學生行路ê時摘麥穗。 24 法利賽人kā伊講，你看，in tī安歇日行所m̄應該行ê，是怎樣？ 25 耶穌kā in講，大衛kap跟tè ê人，當欠缺koh iau ê時所行ê，lín bē讀tio̍h mah？ 26 就是當A-pí-a-thah做祭司頭ê時伊有怎樣入上帝ê厝，食排列ê餅，續hō͘跟tè伊ê人；chit號餅，若m̄是祭司，就m̄-thang食。 27 Koh kā in講，安歇日為tio̍h人來設立，m̄是人為tio̍h安歇日。 28 所以人子也是安歇日ê主。
1 Kè kúi-nā ji̍t Iâ-so͘ koh ji̍p Ka-pek-lông; 2 lâng thiaⁿ-kìⁿ I tī chhù-lāi chiū chōe-chōe lâng chū-chi̍p tì-kàu bô khàng-tōe, liân mn̂g-kháu iā bô; I chiū kóng tō-lí hō͘ in thiaⁿ. 3 Ū tòa chi̍t ê piàn-sūi ê chiū-kūn I, sī sì lâng kng i lâi. 4 In-ūi lâng chōe, bōe-ōe kūn-óa, chiū tī Iâ-so͘ tiàm ê só͘-chāi, thiah chhù-téng hō͘ i kui khang; chiū chiong piàn-sūi ê tó tī pho͘-á tūi-lo̍h-khì. 5 Iâ-so͘ khòaⁿ-kìⁿ in ê sìn, chiū kā piàn-sūi ê kóng, Sòe-kiáⁿ, lí ê chōe sià-bián lah. 6 Ū kúi-nā ê keng-ha̍k-sū chē tī hia, sim-lāi gī-lūn kóng, Chit ê lâng cháiⁿ-iūⁿ án-ni kóng ah? 7 I sī chhiàm-koân lām-sám; tû Siōng-tè í-gōa, chī-chūi ōe sià-bián chōe ah? 8 Iâ-so͘ sim-lāi liâm-piⁿ chai in ū chit hō ê gī-lūn, chiū kā in kóng, Lín siáⁿ-sū tī sim-lāi gī-lūn chiah-ê ah? 9 Kā piàn-sūi ê kóng, Lí ê chōe sià lah, á-sī kóng, Khí-lâi, giâ lí ê pho͘-á lâi kiâⁿ, tá-lo̍h chi̍t hāng khah khoài? 10 To̍k-to̍k beh hō͘ lín chai Jîn-chú tī tōe-ni̍h ū koân thang sià chōe, (chiū kā piàn-sūi ê kóng), 11 Góa kā lí kóng, Khí-lâi, giâ lí ê pho͘-á tò-khì lí ê chhù. 12 I chiū khí-lâi, tī chèng lâng ê bīn-chêng sûi-sî giâ i ê pho͘-á chhut-khì; tì-kàu chèng lâng lóng gông-ngia̍h, kui êng-kng Siōng-tè kóng, Goán chiông-lâi bē bat khòaⁿ-kìⁿ án-ni-siⁿ. 13 Iâ-so͘ koh chhut-khì kàu hái-kîⁿ; chèng lâng lóng chiū-kūn I, chiū kà-sī in. 14 Keng-kè ê sî khòaⁿ-kìⁿ A-le̍k-hui ê kiáⁿ Lī-bī chē tī hiòng-koan, chiū kā i kóng, Tè góa. I chiū khí-lâi tè I. 15 Iâ-so͘ chē toh tī Lī-bī ê chhù, ū chōe-chōe thiu-hiòng ê kap pháiⁿ lâng kap Iâ-so͘ chham I ê ha̍k-seng tâng chē, in-ūi hiah ê lâng sī chōe, iā teh tè I. 16 Hoat-lī-sài ê keng-ha̍k-sū khòaⁿ-kìⁿ I kap pháiⁿ lâng í-ki̍p thiu-hiòng ê saⁿ-kap chia̍h, chiū kā I ê ha̍k-seng kóng, I kap thiu-hiòng ê í-ki̍p pháiⁿ lâng saⁿ-kap lim-chia̍h ah. 17 Iâ-so͘ thiaⁿ-kìⁿ, chiū kā in kóng, Ióng-kiāⁿ ê bô khiàm i-seng, nā-sī phòa-pīⁿ ê chiū tio̍h; góa lâi m̄ sī beh chio gī lâng, sī beh chio pháiⁿ lâng. 18 Iok-hān ê ha̍k-seng kap Hoat-lī-sài lâng tng teh kìm-chia̍h; in chiū-kūn lâi kā I kóng, Iok-hān ê ha̍k-seng kap Hoat-lī-sài lâng ê ha̍k-seng kìm-chia̍h, lí ê ha̍k-seng bô kìm-chia̍h, sī cháiⁿ-iūⁿ? 19 Iâ-so͘ kā in kóng, Sin-kiáⁿ-sài kap hō-chhōa ê lâng tī-teh ê sî, in kiám ōe kìm-chia̍h mah? sin-kiáⁿ-sài iáu tâng tī-teh, in bōe-ōe kìm-chia̍h. 20 Nā-sī sî-ji̍t beh kàu, sin-kiáⁿ-sài beh tùi in tiong-kan bô-khì, hit ji̍t in chiū beh kìm-chia̍h. 21 Bô lâng ēng sin pò͘ pó͘ kū saⁿ; nā ū, chiū só͘ pó͘ ê hit tè ōe kiù-li̍h i, chiū-sī sin ê kiù-li̍h kū ê, i ê phòa-khang koh khah tōa. 22 Iā bô lâng ēng sin chiú tóe tī kū phê-lông; nā ū, chiū sin chiú ōe piak-li̍h phê-lông, chiú lāu, lông iā phah-pháiⁿ. To̍k-to̍k sin chiú tio̍h ji̍p tī sin phê-lông. 23 Iâ-so͘ tī an-hioh-ji̍t tùi be̍h-hn̂g keng-kè, I ê ha̍k-seng kiâⁿ lō͘ ê sî tiah be̍h-sūi. 24 Hoat-lī-sài lâng kā I kóng, Lí khòaⁿ, in tī an-hioh-ji̍t kiâⁿ só͘ m̄ eng-kai kiâⁿ ê, sī cháiⁿ-iūⁿ? 25 Iâ-so͘ kā in kóng, Tāi-pi̍t kap kun-tè ê lâng, tng khiàm-kheh koh iau ê sî só͘ kiâⁿ ê, lín bē tha̍k-tio̍h mah? 26 Chiū-sī tng A-pí-a-thah chòe chè-si-thâu ê sî i ū cháiⁿ-iūⁿ ji̍p Siōng-tè ê chhù, chia̍h pâi-lia̍t ê piáⁿ, sòa hō͘ kun-tè i ê lâng; chi̍t hō piáⁿ, nā m̄ sī chè-si, chiū m̄ thang chia̍h. 27 Koh kā in kóng, An-hioh-ji̍t ūi-tio̍h lâng lâi siat-li̍p, m̄ sī lâng ūi-tio̍h an-hioh-ji̍t. 28 Só͘-í Jîn-chú iā sī an-hioh-ji̍t ê Chú.
1 耶穌koh入會堂；tī hia有人一手枯焦ê。 2 In當看伊tī安歇日beh醫治伊á無；意思ài beh告伊。 3 伊就kā手枯焦ê講，起來，khiā tī中央。 4 就kā in講，安歇日行好，行pháiⁿ，救性命，害性命，tá-lo̍h一項是合？In靜靜。 5 伊就受氣，四界看in，憂悶in ê心硬，kā hitê人講，伸你ê手。伊就伸去，手就好好。 6 法利賽人出去，就隨時kap希律ê黨saⁿ-kap計謀攻擊耶穌，看thang怎樣滅伊。 7 耶穌kap伊ê學生退去海邊，有kui大陣ê人tùi加利利tè伊； 8 也有tùi偤太、耶路撒冷、Í-thó͘-mái、約旦河外，kap Chhui-lô Se-tùn境內kui大陣ê人聽見伊所行hiah-ni̍h大ê事，就來就近伊。 9 因為人chōe，伊就kā伊ê學生講tio̍h備辦船á來thèng候，免得in oe-khoeh伊。 10 因為伊bat醫好chōe-chōe人，致到凡有破病ê逼óa，ài beh摸伊。 11 Hiah-ê邪神一下看見伊，就仆tī伊ê面前喉叫講，你是上帝ê Kiáⁿ。 12 伊chia̍p-chia̍p警戒in，莫得kā伊報揚。 13 伊上山，照家己所ài來召人；in來就近伊。 14 就設立十二人，thang kap伊常常tī-teh，也thang差in去宣傳道理， 15 koh有趕鬼ê權。 16 就稱西門做彼得。 17 Koh有西庇太ê Kiáⁿ雅各，kap雅各ê兄弟約翰；chit兩人伊稱in做Poàn-nî-kî，就是雷ê Kiáⁿ； 18 koh有安得烈、腓力、Pa-to-lô-mái、馬太、To-má，A-le̍k-hui ê Kiáⁿ雅各，koh Ta̍t-thài，kap Ka-ná-nî ê西門， 19 kap賣伊ê加略人偤大。 20 耶穌入厝，眾人koh聚集，致到in bōe顧得食。 21 伊ê親人聽見，就出來beh kā伊掠teh；因為講，伊是癲狂。 22 Tùi耶路撒冷落來ê經學士講，伊是hō͘ Pia̍t-se-pok附身；koh講，伊是óa靠鬼王來趕鬼。 23 伊叫in來，設譬喻kā in講，撒旦thái-thó會趕撒旦？ 24 國若ka-kī爭拚，hitê國就khiā bōe-tiâu。 25 家若家己爭拚，hitê家也khiā bōe-tiâu。 26 撒旦若起來家己爭拚，伊也khiā bōe-tiâu，的確會滅。 27 無人會入猛人ê厝來劫伊ê家伙；tio̍h事先縛hitê猛人，然後chiah beh劫伊ê厝。 28 我實在kā lín講，見若世間人所犯ê罪，kap in所謗瀆一切謗瀆ê話，lóng beh赦免in； 29 獨獨見若謗瀆聖神ê，永遠無得tio̍h赦免，就是患tio̍h永世代ê罪。 30 這是因為hiahê人講，伊犯tio̍h邪神。 31 伊ê老母kap伊ê兄弟來khiā tī外面，差人去叫伊。 32 有kui陣ê人圍伊teh坐；有人kā伊講，你看，你ê老母kap你ê兄弟tī外面teh chhē你。 33 伊就應講，甚麼人是我ê老母，我ê兄弟ah？ 34 就四界看hiahê圍伊teh坐ê人講， 35 你看，我ê老母kap我ê兄弟。因為見若行上帝ê旨意ê，就是我ê兄弟姊妹kap老母。
1 Iâ-so͘ koh ji̍p hōe-tn̂g; tī hia ū lâng chi̍t chhiú ko͘-tâ ê. 2 In tng-khòaⁿ I tī an-hioh-ji̍t beh i-tī i á bô; ì-sù ài beh kò I. 3 I chiū kā chhiú ko͘-tâ ê kóng, Khí-lâi, khiā tī tiong-ng. 4 Chiū kā in kóng, An-hioh-ji̍t kiâⁿ hó, kiâⁿ pháiⁿ, kiù sìⁿ-miā, hāi sìⁿ-miā, tá-lo̍h chi̍t hāng sī ha̍p? In chēng-chēng. 5 I chiū siū-khì, sì-kè khòaⁿ in, iu-būn in ê sim ngī, kā hit ê lâng kóng, Chhun lí ê chhiú. I chiū chhun-khì, chhiú chiū hó-hó. 6 Hoat-lī-sài lâng chhut-khì, chiū sûi-sî kap Hi-lu̍t ê tóng saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I. 7 Iâ-so͘ kap I ê ha̍k-seng thè-khì hái-piⁿ, ū kui tōa tīn ê lâng tùi Ka-lī-lī tè I; 8 iā ū tùi Iû-thài, Iâ-lō͘-sat-léng, Í-thó͘-mái, Iok-tàn hô gōa, kap Chhui-lô Se-tùn kéng-lāi kui tōa tīn ê lâng thiaⁿ-kìⁿ I só͘ kiâⁿ hiah-ni̍h tōa ê sū, chiū lâi chiū-kūn I. 9 In-ūi lâng chōe, I chiū kā I ê ha̍k-seng kóng tio̍h pī-pān chûn-á lâi thèng-hāu, bián-tit in oe-khoeh I. 10 In-ūi I bat i-hó chōe-chōe lâng, tì-kàu hoān ū phòa-pīⁿ ê pek-óa, ài beh bong I. 11 Hiah ê siâ-sîn chi̍t ē khòaⁿ-kìⁿ I, chiū phak tī I ê bīn-chêng âu-kiò kóng, Lí sī Siōng-tè ê Kiáⁿ. 12 I chia̍p-chia̍p kéng-kài in, bo̍h-tit kā I pò-iông. 13 I chiūⁿ soaⁿ, chiàu ka-kī só͘ ài lâi tiàu lâng; in lâi chiū-kūn I. 14 Chiū siat-li̍p cha̍p-jī lâng, thang kap I siông-siông tī-teh, iā thang chhe in khì soan-thoân tō-lí, 15 koh ū kóaⁿ kúi ê koân. 16 Chiū chheng Se-bûn chòe Pí-tek. 17 Koh ū Se-pí-thài ê kiáⁿ Ngá-kok, kap Ngá-kok ê hiaⁿ-tī Iok-hān; chit nn̄g lâng I chheng in chòe Poàn-nî-kî, chiū-sī Lûi ê kiáⁿ; 18 koh ū An-tek-lia̍t, Hui-le̍k, Pa-to-lô-mái, Má-thài, To-má, A-le̍k-hui ê kiáⁿ Ngá-kok, koh Ta̍t-thài, kap Ka-ná-nî ê Se-bûn, 19 kap bōe I ê Ka-lio̍k lâng Iû-tāi. 20 Iâ-so͘ ji̍p chhù. Chèng lâng koh chū-chi̍p, tì-kàu in bōe kò͘-tit chia̍h. 21 I ê chhin-lâng thiaⁿ-kìⁿ, chiū chhut-lâi beh kā I lia̍h-teh; in-ūi kóng, I sī tian-kông. 22 Tùi Iâ-lō͘-sat-léng lo̍h-lâi ê keng-ha̍k-sū kóng, I sī hō͘ Pia̍t-se-pok hū-sin; koh kóng, I sī óa-khò kúi-ông lâi kóaⁿ kúi. 23 I kiò in lâi, siat phì-jū kā in kóng, Sat-tàn thái-thó ōe kóaⁿ Sat-tàn? 24 Kok nā ka-kī cheng-piàⁿ, hit ê kok chiū khiā bōe tiâu. 25 Ke nā ka-kī cheng-piàⁿ, hit ê ke iā khiā bōe tiâu. 26 Sat-tàn nā khí-lâi ka-kī cheng-piàⁿ, i iā khiā bōe tiâu, tek-khak ōe bia̍t. 27 Bô lâng ōe ji̍p béng lâng ê chhù lâi kiap i ê ke-hé; tio̍h tāi-seng pa̍k hit ê béng lâng, jiân-āu chiah beh kiap i ê chhù. 28 Góa si̍t-chāi kā lín kóng, Kìⁿ-nā sè-kan lâng só͘ hoān ê chōe, kap in só͘ pòng-to̍k it-chhè pòng-to̍k ê ōe, lóng beh sià-bián in; 29 to̍k-to̍k kìⁿ-nā pòng-to̍k Sèng Sîn ê, éng-oán bô tit-tio̍h sià-bián, chiū-sī hoān-tio̍h éng sè-tāi ê chōe. 30 Che sī in-ūi hiah ê lâng kóng, I hoān-tio̍h siâ-sîn. 31 I ê lāu-bú kap I ê hiaⁿ-tī lâi khiā tī gōa-bīn, chhe lâng khì kiò I. 32 Ū kui tīn ê lâng ûi I teh chē; ū lâng kā I kóng, Lí khòaⁿ, lí ê lāu-bú kap lí ê hiaⁿ-tī tī gōa-bīn teh chhē lí. 33 I chiū ìn kóng, Sím-mi̍h lâng sī góa ê lāu-bú, góa ê hiaⁿ-tī ah? 34 Chiū sì-kè khòaⁿ hiah ê ûi I teh chē ê lâng kóng, 35 Lí khòaⁿ, góa ê lāu-bú kap góa ê hiaⁿ-tī. In-ūi kìⁿ-nā kiâⁿ Siōng-tè ê chí-ì ê, chiū-sī góa ê hiaⁿ-tī chí-bē kap lāu-bú.
1 耶穌koh tī海邊開嘴教示，有kui大陣ê人聚集就近伊，致到伊上船浮tī海面teh坐；眾人lóng óa近海，khiā tī乾地。 2 伊就用譬喻教示in chōe-chōe項； 3 teh教示ê時kā in講，Tio̍h聽ah：你看，有掖種ê出去掖種； 4 掖ê時，有ê ka-la̍uh tī路邊，飛鳥到，一盡食伊。 5 有ê ka-la̍uh tī石格ê地，土淺ê位；因為土無深，就發真緊； 6 但是日出，曝伊，因為無根就枯焦。 7 有ê ka-la̍uh tī刺á內，刺á發起遮蔽伊，就無結實。 8 有ê ka-la̍uh tī好ê土地，就發起ná大叢，結實，有ê三十倍，有ê六十倍，有ê一百倍。 9 Koh講，有耳孔thang聽ê，tio̍h聽。 10 耶穌家己tī-teh ê時，tè伊ê人kap十二個學生問伊chiahê譬喻。 11 伊就kā in講，上帝國ê奧妙有hō͘ lín；但是hiahê外面人凡事是用譬喻； 12 hō͘ in看，會看，也bōe見；聽，會聽也bōe明；驚了in oa̍t-lín-tńg，來得tio̍h赦免。 13 Koh kā in講，Lín bōe曉得chitê譬喻mah？也thái-thó會知眾譬喻ah？ 14 掖種ê是報揚道理。 15 掖tī路邊，報揚道理ê所在ê，就是人聽道理，撒旦liâm-piⁿ來，將所掖tī in心內ê道理搶去。 16 Chiahê親像掖tī石格ê地ê，就是in聽tio̍h道理，liâm-piⁿ歡喜承受伊； 17 但是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k，liâm-piⁿ tio̍h-tak。 18 掖tī刺á內ê，就是人已經聽tio̍h道理， 19 就有世間ê掛慮，錢財ê迷惑，kap別物ê私慾入來遮蔽hitê道理，就無結實。 20 Chiahê掖tī好ê土地ê，就是人聽道理，亦承受伊，亦結實，有ê三十倍，有ê六十倍，有ê一百倍。 21 Koh kā in講，人kia̍h燈來，kiám是beh hē-tī斗下，á是床下？kiám m̄是beh hē-tī燈台頂？ 22 因為有隱密ê，無m̄是beh顯出；收khǹg ê，無m̄是beh露現。 23 若有耳孔thang聽ê，tio̍h聽。 24 Koh kā in講，Tio̍h謹慎所聽ê；lín用甚麼量來量，也beh用這量hō͘ lín；koh beh加添hō͘ lín。 25 因為見若有ê，beh hō͘伊；無ê，連伊所有ê，也beh kā伊搶去。 26 Koh講，上帝ê國親像人掖種tī地裡； 27 暝時睏，日時起來，hitê種子發，koh漸漸大，伊m̄知hitê所以然。 28 地自然生物；起頭是秧，後來有穗，koh後來穗就結成五穀。 29 五穀已經熟，就用koeh-á；因為收割ê時到lah。 30 Koh講，上帝ê國咱beh怎樣來比並伊？á是用甚麼譬喻表明伊ah？ 31 是親像一粒芥菜子掖落地，雖然比地上百項ê種子khah細粒， 32 但是已經掖落去，就發生漸漸khah大tī lóng總ê菜蔬；koh發出大ê枝，致到空中ê鳥ōe歇伊ê蔭下。 33 伊用chōe-chōe親像chit號ê譬喻傳道理hō͘ in，照in所會聽ê。 34 若無用譬喻就無kā in講；到單單學生kap伊tī-teh ê時，就lóng總kā in解明。 35 Hit日已經暗，伊kā學生講，咱過來去hit-pêng岸。 36 In離開眾人，chhōa耶穌就án-ni落船，kap in saⁿ-kap去；iáu有別隻船kap伊去。 37 報頭風大起，湧潑入船，致到船teh-beh滿。 38 但是伊tī船尾倒tī枕頭teh睏；學生叫伊醒，kā伊講，先生，阮beh無命，你無要緊mah？ 39 伊就醒，責備風，kā海講，Tio̍h靜靜。風就soah，也大平定。 40 伊就kā in講，Lín啥事hiah驚？lín iáu-bē有信mah？ 41 In就大驚，saⁿ-kap講，chitê是甚麼人，連風kap海lóng順伊？
1 Iâ-so͘ koh tī hái-piⁿ khui chhùi kà-sī. Ū kui tōa tīn ê lâng chū-chi̍p chiū-kūn I, tì-kàu I chiūⁿ chûn phû tī hái-bīn teh chē; chèng lâng lóng óa-kūn hái, khiā tī ta tōe. 2 I chiū ēng phì-jū kà-sī in chōe-chōe hāng; 3 teh kà-sī ê sî kā in kóng, Tio̍h thiaⁿ ah: Lí khòaⁿ, ū iā chéng ê chhut-khì iā chéng; 4 iā ê sî, ū-ê ka-la̍uh tī lō͘-pīⁿ, pe-chiáu kàu, it-chīn chia̍h i. 5 Ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín; 6 nā-sī ji̍t chhut, pha̍k i, in-ūi bô kun chiū ko͘-tâ. 7 Ū-ê ka-la̍uh tī chhì-á-lāi, chhì-á hoat-khí jia-pè i, chiū bô kiat-si̍t. 8 Ū-ê ka-la̍uh tī hó ê thó͘-tōe, chiū hoat-khí ná tōa châng, kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē. 9 Koh kóng, Ū hī-khang thang thiaⁿ ê, tio̍h thiaⁿ. 10 Iâ-so͘ ka-kī tī-teh ê sî, tè I ê lâng kap cha̍p-jī ê ha̍k-seng mn̄g I chiah ê phì-jū. 11 I chiū kā in kóng, Siōng-tè kok ê ò-biāu ū hō͘ lín; nā-sī hiah ê gōa-bīn lâng hoān-sū sī ēng phì-jū; 12 hō͘ in khòaⁿ, ōe khòaⁿ, iā bōe kìⁿ; thiaⁿ, ōe thiaⁿ iā bōe bêng; kiaⁿ-liáu in oa̍t-lìn-tńg, lâi tit-tio̍h sià-bián. 13 Koh kā in kóng, Lín bōe hiáu-tit chit ê phì-jū mah? iā thái-thó ōe chai chèng phì-jū ah? 14 Iā chéng ê sī pò-iông tō-lí. 15 Iā tī lō͘-piⁿ, pò-iông tō-lí ê só͘-chāi ê, chiū-sī lâng thiaⁿ tō-lí, Sat-tàn liâm-piⁿ lâi, chiong só͘ iā tī in sim-lāi ê tō-lí chhiúⁿ-khì. 16 Chiah-ê chhin-chhiūⁿ iā tī chio̍h-keh ê tōe ê, chiū-sī in thiaⁿ-tio̍h tō-lí, liâm-piⁿ hoaⁿ-hí sêng-siū i; 17 nā-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k, liâm-piⁿ tio̍h-tak. 18 Iā tī chhì-á lāi ê, chiū-sī lâng í-keng thiaⁿ-tio̍h tō-lí, 19 chiū ū sè-kan ê khòa-lū, chîⁿ-châi ê bê-he̍k, kap pa̍t mi̍h ê su-io̍k ji̍p lâi jia-pè hit ê tō-lí, chiū bô kiat-si̍t. 20 Chiah-ê iā tī hó ê thó͘-tōe ê, chiū-sī lâng thiaⁿ tō-lí, ia̍h sêng-siū i, ia̍h kiat-si̍t, ū-ê saⁿ-cha̍p pē, ū-ê la̍k-cha̍p pē, ū-ê chi̍t-pah pē. 21 Koh kā in kóng, Lâng kia̍h teng lâi, kiám sī beh hē tī táu ē á-sī chhn̂g ē? kiám m̄ sī beh hē tī teng-tâi téng? 22 In-ūi ū ún-ba̍t ê, bô m̄ sī beh hián-chhut; siu-khǹg ê, bô m̄ sī beh lō͘-hiān. 23 Nā ū hī-khang thang thiaⁿ ê, tio̍h thiaⁿ. 24 Koh kā in kóng, Tio̍h kín-sīn só͘ thiaⁿ ê; lín ēng sím-mi̍h niû lâi niû, iā beh ēng che niû hō͘ lín; koh beh ke-thiⁿ hō͘ lín. 25 In-ūi kìⁿ-nā ū ê, beh hō͘ i; bô ê, liân i só͘ ū ê, iā beh kā i chhiúⁿ-khì. 26 Koh kóng, Siōng-tè ê kok chhin-chhiūⁿ lâng iā chéng tī tōe-ni̍h; 27 mî-sî khùn, ji̍t-sî khí-lâi, hit ê chéng-chí hoat, koh chiām-chiām tōa, i m̄ chai hit ê só͘-í-jiân. 28 Tōe chū-jiân siⁿ mi̍h; khí-thâu sī ng, āu-lâi ū sūi, koh āu-lâi sūi chiū kiat-chiâⁿ gō͘-kak. 29 Gō͘-kak í-keng se̍k, chiū ēng koeh-á; in-ūi siu-koah ê sî kàu lah. 30 Koh kóng, Siōng-tè ê kok lán beh cháiⁿ-iūⁿ lâi pí-phēng i? á-sī ēng sím-mi̍h phì-jū piáu-bêng i ah? 31 Sī chhin-chhiūⁿ chi̍t lia̍p kòa-chhài chí iā lo̍h tōe, sui-jiân pí tōe-chiūⁿ pah-hāng ê chéng-chí khah sòe lia̍p, 32 nā-sī í-keng iā lo̍h-khì, chiū hoat-siⁿ chiām-chiām khah tōa tī lóng-chóng ê chhài-soe; koh hoat-chhut tōa ê ki tì-kàu khong-tiong ê chiáu ōe hioh i ê ìm-ē. 33 I ēng chōe-chōe chhin-chhiūⁿ chit hō ê phì-jū thoân tō-lí hō͘ in, chiàu in só͘ ōe thiaⁿ ê. 34 Nā bô ēng phì-jū chiū bô kā in kóng; kàu toaⁿ-toaⁿ ha̍k-seng kap I tī-teh ê sî, chiū lóng-chóng kā in kóe-bêng. 35 Hit ji̍t í-keng àm I kā ha̍k-seng kóng, Lán kè-lâi khì hit pêng hōaⁿ. 36 In lī-khui chèng lâng, chhōa Iâ-so͘ chiū án-ni lo̍h chûn, kap in saⁿ-kap khì; iáu ū pa̍t chiah chûn kap I khì. 37 Pò-thâu hong tōa khí, éng phoah ji̍p chûn, tì-kàu chûn teh-beh móa. 38 Nā-sī I tī chûn-bé tó tī chím-thâu teh khùn; ha̍k-seng kiò I chhíⁿ, kā I kóng, Sian-siⁿ, goán beh bô miā, lí bô iàu-kín mah? 39 I chiū chhíⁿ, chek-pī hong, kā hái kóng, Tio̍h chēng-chēng. Hong chiū soah, iā tōa pîⁿ-tiāⁿ. 40 I chiū kā in kóng, Lín siáⁿ-sū hiah kiaⁿ? lín iáu-bē ū sìn mah? 41 In chiū tōa kiaⁿ, saⁿ-kap kóng, Chit-ê sī sím-mi̍h lâng, liân hong kap hái lóng sūn I?
1 In就到海ê對面岸，到Kek-lah-sim人ê地方。 2 耶穌離開船；liâm-piⁿ有一人tùi墳墓中出來tú-tio̍h伊，就是hō͘邪神附身ê，平素khiā起tī墳墓中。 3 無人會縛伊，雖然用鐵鏈也bōe會； 4 因為ta̍uh-ta̍uh用腳銬鐵鏈縛伊，但是鐵鏈hō͘伊chhoah斷，腳銬hō͘伊kòng碎；無人有氣力thang制壓伊。 5 暝日常常tī墳墓中，tī山裡，喉叫，將石頭家己傷。 6 遠遠看見耶穌；就走來拜伊， 7 大聲喉叫，講，至koân上帝ê Kiáⁿ耶穌，我kap你甚麼干涉？我kí上帝來懇求你莫得苦楚我。 8 因為耶穌bat kā伊講，邪神ah，tio̍h tùi hitê人出去。 9 耶穌問伊講，你號做甚麼名？應講，我名做營，因為阮chiahê真chōe。 10 伊就切切求伊，莫得趕in出hitê地方。 11 Tī hitê山坪有大陣豬teh討食。 12 In就求伊講，差阮入hiahê豬，hō͘阮thang入去。 13 就允in。Hiah-ê邪神就出去，來入hiahê豬；hit陣豬走落山坪chông落海，約量兩千隻，tī海裡格死。 14 顧豬ê人走去，kā城內kap鄉社ê人講。人就出來看所tú-tio̍h ê事是怎樣。 15 就來就近耶穌，看見hitê犯tio̍h鬼ê就是hō͘營所纏ê，坐teh穿衫，hāi-chāi；就驚。 16 看見ê人將犯tio̍h鬼ê人所tú-tio̍h ê，kap kui陣豬ê事lóng kā in講。 17 In就求耶穌離開in ê境內。 18 耶穌tú-á上船，hitê bat犯tio̍h鬼ê求伊准伊saⁿ-kap去。 19 耶穌m̄允伊，講，tò去你ê家chhē你ê親人，將主kā你行hiah大ê事kap所憐憫你ê kā in講。 20 Hit人去，tī Te-ka-pho-lī報揚耶穌所kā伊行ê大事。眾人lóng奇怪。 21 耶穌坐船koh過去hit pêng，kui大陣ê人聚集就近伊；hit時耶穌tī海邊。 22 有一个管會堂ê，名做Gâi-ló͘來，已經看見耶穌，就仆tī伊ê腳下， 23 切切求伊講，我細漢ê cha-bó͘-kiáⁿ差不多beh死；請你來用手hōaⁿ伊，hō͘伊得tio̍h救來活。 24 耶穌kap伊去，kui大陣ê人tè伊，真oe-khoeh。 25 有一个婦人人，血漏十二年， 26 bat tùi chōe-chōe ê醫生受tio̍h chōe-chōe艱苦，koh一盡破費伊所有ê，但是無一絲á利益，反tńg ná傷重， 27 聽見耶穌ê事，就來tī眾人中，tùi伊ê後面來摸伊ê衫， 28 因為講，我kan-ta摸伊ê衫，就會好。 29 Tùi án-ni血漏liâm-piⁿ止，本身知伊ê病痛已經好。 30 耶穌即時家己知有權能tùi伊出，就oa̍t-tńg身，tī眾人中講，Chī-chūi摸我ê衫？ 31 伊ê學生kā伊講，你看見kui陣人teh oe-khoeh你，iáu-kú問， Chī-chūi有摸我？ 32 耶穌遍遍看，ài看做chitê事ê婦人人。 33 婦人人知本身所歷過，驚惶ngia̍uh-ngia̍uh-chhoah，就來仆tī伊ê面前，lóng照實kā伊講。 34 伊就kā伊講，婦人人ah，你ê信已經救你；thang安然tò去，你ê病全然好。 35 Teh講ê時，有tùi管會堂ê家來講，你ê cha-bó͘-kiáⁿ死lah；mih-sái iáu teh勞煩先生？ 36 耶穌邊á聽見所講ê話，kā管會堂ê講，莫得驚，只有tio̍h信。 37 耶穌tī彼得、雅各kap雅各ê兄弟約翰以外，m̄准別人tè伊saⁿ-kap去。 38 到管會堂ê家，看見有hōa-hōa哮，也有啼哭大聲哮ê人。 39 已經入去就kā in講，Lín啥事hōa-hōa哮teh啼哭ah？Gín-ná m̄是死，是teh睏nā-tiāⁿ。 40 In就恥笑伊。但是伊趕in眾人出去，就chhōa gín-ná ê父母以及kap伊來ê人，入gín-ná所tòa ê所在； 41 就牽gín-ná ê手kā伊講，Tāi-lī-tāi-kó͘-bí，翻譯就是講，Cha-bó͘ gín-ná，我命令你，起來。 42 Cha-bó͘ gín-ná liâm-piⁿ起來行；因為伊十二歲lah。眾人就大gông-ngia̍h奇怪。 43 耶穌嚴嚴禁戒in莫得hō͘人知；就吩咐tio̍h hō͘ cha-bó͘ gín-ná食。
1 In chiū kàu hái ê tùi-bīn hōaⁿ, kàu Κek-lah-sim lâng ê tōe-hng. 2 Iâ-so͘ lī-khui chûn; liâm-piⁿ ū chi̍t lâng tùi hûn-bōng tiong chhut-lâi tú-tio̍h I, chiū-sī hō͘ siâ-sîn hū-sin ê, pêng-sò͘ khiā-khí tī hûn-bōng tiong. 3 Bô lâng ōe pa̍k i, sui-jiân ēng thih-liān iā bōe-ōe; 4 in-ūi ta̍uh-ta̍uh ēng kha-khàu thih-liān pa̍k i, nā-sī thih-liān hō͘ i chhoah-tn̄g, kha-khàu hō͘ i kòng-chhùi; bô lâng ū khùi-la̍t thang chè-ap i. 5 Mî-ji̍t siông-siông tī hûn-bōng tiong, tī soaⁿ-ni̍h, âu-kiò, chiong chio̍h-thâu ka-kī siong. 6 Hn̄g-hn̄g khòaⁿ-kìⁿ Iâ-so͘; chiū cháu lâi pài I, 7 tōa siaⁿ âu-kiò, kóng, Chì-koâiⁿ Siōng-tè ê Kiáⁿ Iâ-so͘, góa kap lí sím-mi̍h kan-sia̍p? Góa kí Siōng-tè lâi khún-kiû lí bo̍h-tit khó͘-chhó͘ góa. 8 In-ūi Iâ-so͘ bat kā i kóng, Siâ-sîn ah, tio̍h tùi hit ê lâng chhut-khì. 9 Iâ-so͘ mn̄g i kóng, Lí hō-chòe sím-mi̍h miâ? ìn kóng, Góa miâ chòe Iâⁿ, in-ūi goán chiah-ê chin chōe. 10 I chiū chhiat-chhiat kiû I, bo̍h-tit kóaⁿ in chhut hit ê tōe-hng. 11 Tī hit ê soaⁿ-phiâⁿ ū tōa tīn ti teh thó-chia̍h. 12 In chiū kiû I kóng, Chhe goán ji̍p hiah ê ti, hō͘ goán thang ji̍p-khì. 13 Chiū ún in. Hiah ê siâ-sîn chiū chhut-khì, lâi ji̍p hiah ê ti; hit tīn ti cháu-lo̍h soaⁿ-phiâⁿ chông-lo̍h hái, iok-liōng nn̄g chheng chiah, tī hái-ni̍h kek-sí. 14 Kò͘-ti ê lâng cháu-khì, kā siâⁿ-lāi kap hiuⁿ-siā ê lâng kóng. Lâng chiū chhut-lâi khòaⁿ só͘ tú-tio̍h ê sū sī cháiⁿ-iūⁿ. 15 Chiū lâi chiū-kūn Iâ-so͘, khòaⁿ-kìⁿ hit ê hoān-tio̍h kúi ê chiū-sī hō͘ iâⁿ só͘ tîⁿ ê, chē-teh chhēng saⁿ, hāi-chāi; chiū kiaⁿ. 16 Khòaⁿ-kìⁿ ê lâng chiong hoān-tio̍h kúi ê lâng só͘ tú-tio̍h ê, kap kui tīn ti ê sū lóng kā in kóng. 17 In chiū kiû Iâ-so͘ lī-khui in ê kéng-lāi. 18 Iâ-so͘ tú-á chiūⁿ chûn, hit ê bat hoān-tio̍h kúi ê kiû I chún i saⁿ-kap khì. 19 Iâ-so͘ m̄ ún i, kóng, Tò-khì lí ê ke chhē lí ê chhin-lâng, chiong Chú kā lí kiâⁿ hiah tōa ê sū kap só͘ lîn-bín lí ê kā in kóng. 20 Hit lâng khì, tī Te-ka-pho-lī pò-iông Iâ-so͘ só͘ kā i kiâⁿ ê tōa sū. Chèng lâng lóng kî-koài. 21 Iâ-so͘ chē chûn koh kè-khì hit pêng, kui tōa tīn ê lâng chū-chi̍p chiū-kūn I; hit sî Iâ-so͘ tī hái-piⁿ. 22 Ū chi̍t ê koán hōe-tn̂g ê, miâ chòe Gâi-ló͘ lâi, í-keng khòaⁿ-kìⁿ Iâ-so͘, chiū phak tī I ê kha-ē, 23 chhiat-chhiat kiû I kóng, Góa sòe-hàn ê cha-bó͘-kiáⁿ chha-put-to beh sí; chhiáⁿ lí lâi ēng chhiú hōaⁿ i, hō͘ i tit-tio̍h kiù lâi oa̍h. 24 Iâ-so͘ kap i khì, kui tōa tīn ê lâng tè I, chin oe-khoeh. 25 Ū chi̍t ê hū-jîn-lâng, hiat-lāu cha̍p-jī nî, 26 bat tùi chōe-chōe ê i-seng siū-tio̍h chōe-chōe kan-khó͘, koh it-chīn phòa-hùi i só͘ ū ê, nā-sī bô chi̍t si-á lī-ek, hoán-tńg ná siong-tiōng, 27 thiaⁿ-kìⁿ Iâ-so͘ ê sū, chiū lâi tī chèng lâng tiong, tùi I ê āu-bīn lâi bong I ê saⁿ, 28 in-ūi kóng, Góa kan-ta bong I ê saⁿ, chiū ōe hó. 29 Tùi án-ni hiat-lāu liâm-piⁿ chí, pún-sin chai i ê pīⁿ-thiàⁿ í-keng hó. 30 Iâ-so͘ chek-sî ka-kī chai ū koân-lêng tùi I chhut, chiū oa̍t-tńg-sin, tī chèng lâng tiong kóng, Chī-chūi bong góa ê saⁿ? 31 I ê ha̍k-seng kā I kóng, Lí khòaⁿ-kìⁿ kui tīn lâng teh oe-khoeh lí, iáu-kú mn̄g, Chī-chūi ū bong góa? 32 Iâ-so͘ piàn-piàn khòaⁿ, ài khòaⁿ chòe chit ê sū ê hū-jîn-lâng. 33 Hū-jîn-lâng chai pún-sin só͘ le̍k-kè, kiaⁿ-hiâⁿ ngia̍uh-ngia̍uh-chhoah, chiū lâi phak tī I ê bīn-chêng, lóng chiàu-si̍t kā I kóng. 34 I chiū kā i kóng, Hū-jîn-lâng ah, lí ê sìn í-keng kiù lí; thang an-jiân tò-khì, lí ê pīⁿ choân-jiân hó. 35 Teh kóng ê sî, ū tùi koán hōe-tn̂g ê ke lâi kóng, Lí ê cha-bó͘-kiáⁿ sí lah; mih-sái iáu teh lô-hoân sian-siⁿ? 36 Iâ-so͘ piⁿ-á thiaⁿ-kìⁿ só͘ kóng ê ōe, kā koán hōe-tn̂g ê kóng, Bo̍h-tit kiaⁿ, chí ū tio̍h sìn. 37 Iâ-so͘ tī Pí-tek, Ngá-kok, kap Ngá-kok ê hiaⁿ-tī Iok-hān í-gōa, m̄ chún pa̍t lâng tè I saⁿ-kap khì. 38 Kàu koán hōe-tn̂g ê ke, khòaⁿ-kìⁿ ū hōa-hōa-háu, iā ū thî-khàu tōa siaⁿ háu ê lâng. 39 Í-keng ji̍p-khì chiū kā in kóng, Lín siáⁿ-sū hōa-hōa-háu teh thî-khàu ah? Gín-ná m̄ sī sí, sī teh khùn nā-tiāⁿ. 40 In chiū thí-chhiò I. Nā-sī I kóaⁿ in chèng lâng chhut-khì, chiū chhōa gín-ná ê pē-bú í-ki̍p kap I lâi ê lâng, ji̍p gín-ná só͘ tòa ê só͘-chāi; 41 chiū khan gín-ná ê chhiú kā i kóng, Tāi-lī-tāi kó͘-bí, hoan-e̍k chiū-sī kóng, Cha-bó͘ gín-ná, góa bēng-lēng lí, khí-lâi. 42 Cha-bó͘ gín-ná liâm-piⁿ khí-lâi kiâⁿ; in-ūi i cha̍p-jī hè lah. Chèng lâng chiū tōa gông-ngia̍h kî-koài. 43 Iâ-so͘ giâm-giâm kìm-kài in bo̍h-tit hō͘ lâng chai; chiū hoan-hù tio̍h hō͘ cha-bó͘ gín-ná chia̍h.
1 耶穌tùi hia出去，到伊ê本鄉，伊ê學生tè伊。 2 到安歇日就tī會堂教示人。Chōe-chōe人聽見就奇怪講，Chitê人tùi tá-lo̍h會án-ni ah？koh所賞賜hō͘伊ê智慧是甚麼ah？也有án-ni ê大權能tùi伊ê嘴出，是怎樣？ 3 Chitê kiám m̄是木工mah？kiám m̄是馬利亞ê Kiáⁿ，雅各、約西、偤大、西門ê兄弟mah？伊ê姊妹kiám m̄是kap咱tī chia mah？In就厭賤伊。 4 耶穌就kā in講，先知tī本鄉、宗族，家己ê家以外，無m̄尊貴。 5 伊tī hia bōe得行甚麼權能，不過用手hōaⁿ kúi-nā ê病人，來醫好in。 6 Koh奇怪in m̄信。就四界行hiahê鄉社，教示人。 7 耶穌召十二個學生來，就差in一對一對出去，賞賜in有權來制壓hiahê邪神； 8 koh吩咐in莫得帶路費，獨獨一支柺á，莫得乾糧，莫得tah-liân，莫得khǹg錢tī腰帶； 9 tio̍h穿出露ê鞋；也莫得穿兩領衫。 10 Koh kā in講，見若lín所入ê厝，tio̍h tòa tī hia，直到離開hitê地方ê時。 11 無論甚麼所在m̄接納lín，m̄聽lín ê，到離開hia ê時，tio̍h拌去腳chiah底 ê土粉，來對in做干證。 12 In就出去宣傳，講人tio̍h反悔。 13 In也趕出chōe-chōe鬼，用油抹chōe-chōe破病ê人，醫好in。 14 希律王聽見，因為耶穌ê名聲已經出；就講，行洗禮ê約翰tùi死人中koh活，所以有chiahê權能tùi伊顯出。 15 但是有別人講，是以利亞。Koh有人講，是先知，親像先知中ê一个。 16 總是希律聽見就講，我所刣頭ê約翰已經koh活。 17 因為希律家己bat差人掠約翰，縛伊tī監裡，是為tio̍h希律ê兄弟腓力ê bó͘希羅底ê緣故；因為希律有娶伊。 18 是約翰bat kā希律講，你娶兄弟ê bó͘是不該。 19 希羅底就怨恨約翰，ài 刣伊，也bōe得tio̍h。 20 因為希律知約翰ê做人義koh聖，所以驚畏，來保護伊；聽伊ê話，就大大躊躇，也歡喜聽伊。 21 tn̄g-tio̍h好機會ê日，就是希律tī生日辦桌，請hiahê大官、千總kap加利利尊貴ê人。 22 希羅底親生ê cha-bó͘-kiáⁿ入去跳舞，hō͘希律kap同桌ê人lóng歡喜；王就kā cha-bó͘ gín-ná講，見若你所ài ê，求我，我beh hō͘你。 23 Koh kap伊chiù-chōa講，見若你所求我ê，雖然我國ê一半，我也beh hō͘你。 24 Cha-bó͘ gín-ná出去kā伊ê老母講，我beh求甚麼？應講，行洗禮約翰ê頭殼。 25 Cha-bó͘ gín-ná liâm-piⁿ走入去，見王求講，我ài你將行洗禮約翰ê頭殼tóe tī盤裡即時hō͘我。 26 王就大憂悶；總是為tio̍h伊所chiù ê chōa，koh有同桌ê人tī-teh，所以m̄ ài推辭。 27 王即時差一个侍衛，吩咐取伊ê頭殼來； 28 伊就去監裡，刣伊ê頭，tóe伊ê頭殼tī盤裡，捧來hō͘ cha-bó͘ gín-ná，cha-bó͘ gín-ná就hō͘伊ê老母。 29 約翰ê學生聽見，就來收伊ê身屍，埋葬tī墓裡。 30 使徒聚集就近耶穌，將in所行所教示ê lóng kā伊講。 31 耶穌kā in講，Lín家己kap我來去曠野ê所在，歇睏tiap-á-kú。因為往來ê人chōe，連食也bōe顧得。 32 In就上船，去曠野ê所在，家己tòa。 33 眾人看見in去，有chōe-chōe人知；就tùi ta̍k ê城步行saⁿ-kap走，事先in到。 34 耶穌出去看見kui大陣ê人，就憐憫伊，因為in親像羊無牧者；chiah用chōe-chōe項教示in。 35 日beh落，伊ê學生就近伊講，Chia就是曠野，日beh落lah； 36 請四散眾人，hō͘ in去周圍ê鄉社，家己買物thang食。 37 伊應講，Lín hō͘ in食。In kā伊講，總無阮用兩百ê銀á去買餅來hō͘ in食mah？ 38 伊kā in講，Lín有餅jōa chōe，去看māi。已經知就講，五個餅，兩尾魚。 39 伊就吩咐in hō͘眾人排kui列，坐tī青翠ê草埔。 40 In就分隊來坐，有ê一百，有ê五十。 41 耶穌the̍h hit五個餅，兩尾魚，ǹg天來祝謝；peh餅hō͘學生來排tī眾人ê面前；也用兩尾魚pun hō͘眾人。 42 In lóng食到飽。 43 拾hiahê餅碎kap魚屑滿十二筐。 44 食餅ê人ta-po͘ ê有五千。 45 耶穌liâm-piⁿ逼伊ê學生上船事先過去hit-pêng岸，到伯賽大，thèng候伊四散眾人。 46 已經kap in離別，就去山裡祈禱。 47 已經暗，船tī海中，只有耶穌家己tī岸裡。 48 看見學生划槳，真艱苦，因為是對頭風。暝時約略四更，耶穌tùi海面行就近in，ài beh tùi in hia過去。 49 In看見伊行tī海面，掠做怪物，就喉叫； 50 因為in lóng看見伊，就生驚。耶穌liâm-piⁿ kap in講話，kā in講，安lín ê心，是我，m̄免驚。 51 就上船就近in；風就定；in心內不止gông-ngia̍h； 52 因為in bōe曉悟hitê餅ê神蹟，也in ê心鈍。 53 過去了，就到Kek-nî-sat-le̍k地，船拋tī岸裡。 54 已經離開船，人liâm-piⁿ認得伊， 55 遍遍走hitê地方；聽見伊tī甚麼所在，就將舖á扛病人到hia。 56 見若伊所入ê鄉社、城市、鄉下，in將病人hē tī街市，求伊若sái hō͘ in摸伊ê衫á裾ê 鬚；見若摸ê人lóng得tio̍h好。
1 Iâ-so͘ tùi hia chhut-khì, kàu I ê pún-hiuⁿ, I ê ha̍k-seng tè I. 2 Kàu an-hioh-ji̍t chiū tī hōe-tn̂g kà-sī lâng. Chōe-chōe lâng thiaⁿ-kìⁿ chiū kî-koài kóng, Chit ê lâng tùi tá-lo̍h ōe án-ni ah? Koh, só͘ siúⁿ-sù hō͘ I ê tì-hūi sī sím-mi̍h ah? iā ū án-ni ê tōa koân-lêng tùi I ê chhùi chhut, sī cháiⁿ-iūⁿ? 3 Chit-ê kiám m̄ sī ba̍k-kang mah? kiám m̄ sī Má-lī-a ê kiáⁿ, Ngá-kok, Iok-se, Iû-tāi, Se-bûn ê hiaⁿ-tī mah? I ê chí-bē kiám m̄ sī kap lán tī chia mah? In chiū iàm-chiān I. 4 Iâ-so͘ chiū kā in kóng, Sian-ti tī pún-hiuⁿ, chong-cho̍k, ka-kī ê ke í-gōa, bô m̄ chun-kùi. 5 I tī hia bōe-tit kiâⁿ sím-mi̍h koân-lêng, put-kò ēng chhiú hōaⁿ kúi-nā ê pīⁿ lâng, lâi i-hó in. 6 Koh kî-koài in m̄ sìn. Chiū sì-kè kiâⁿ hiah ê hiuⁿ-siā, kà-sī lâng. 7 Iâ-so͘ tiàu cha̍p-jī ê ha̍k-seng lâi, chiū chhe in chi̍t tùi chi̍t tùi chhut-khì, siúⁿ-sù in ū koân lâi chè-ap hiah ê siâ-sîn; 8 koh hoan-hù in bo̍h-tit tòa lō͘-hùi, to̍k-to̍k chi̍t ki koáiⁿ-á, bo̍h-tit kan-niû, bo̍h-tit tah-liân, bo̍h-tit khǹg chîⁿ tī io-tòa; 9 tio̍h chhēng chhut-lō͘ ê ôe; iā bo̍h-tit chhēng nn̄g niá saⁿ. 10 Koh kā in kóng, Kìⁿ-nā lín só͘ ji̍p ê chhù, tio̍h tòa tī hia, ti̍t-kàu lī-khui hit ê tōe-hng ê sî. 11 Bô lūn sím-mi̍h só͘-chāi m̄ chiap-la̍p lín, m̄ thiaⁿ lín ê, kàu lī-khui hia ê sî, tio̍h pōaⁿ-khì kha-chiah-tóe ê thô͘-hún, lâi tùi in chòe kan-chèng. 12 In chiū chhut-khì soan-thoân, kóng lâng tio̍h hoán-hóe. 13 In iā kóaⁿ-chhut chōe-chōe kúi, ēng iû boah chōe-chōe phòa-pīⁿ ê lâng, i-hó in. 14 Hi-lu̍t ông thiaⁿ-kìⁿ, in-ūi Iâ-so͘ ê miâ-siaⁿ í-keng chhut; chiū kóng, Kiâⁿ sóe-lé ê Iok-hān tùi sí-lâng tiong koh-oa̍h, só͘-í ū chiah ê koân-lêng tùi i hián-chhut. 15 Nā-sī ū pa̍t lâng kóng, Sī Í-lī-a. Koh ū lâng kóng, Sī sian-ti, chhin-chhiūⁿ sian-ti tiong ê chi̍t-ê. 16 Chóng-sī Hi-lu̍t thiaⁿ-kìⁿ chiū kóng, Góa só͘ thâi-thâu ê Iok-hān í-keng koh-oa̍h. 17 In-ūi Hi-lu̍t ka-kī bat chhe lâng lia̍h Iok-hān, pa̍k i tī kaⁿ-ni̍h, sī ūi-tio̍h Hi-lu̍t ê hiaⁿ-tī Hui-le̍k ê bó͘ Hi-lô-tí ê iân-kò͘; in-ūi Hi-lu̍t ū chhōa i. 18 Sī Iok-hān bat kā Hi-lu̍t kóng, Lí chhōa hiaⁿ-tī ê bó͘ sī put-kai. 19 Hi-lô-tí chiū oàn-hūn Iok-hān, ài thâi i, iā bōe tit-tio̍h. 20 In-ūi Hi-lu̍t chai Iok-hān ê chòe-lâng gī koh sèng, só͘-í kiaⁿ-ùi, lâi pó-hō͘ i; thiaⁿ i ê ōe, chiū tōa-tōa tiû-tû, iā hoaⁿ-hí thiaⁿ i. 21 Tn̄g-tio̍h hó ki-hōe ê ji̍t, chiū-sī Hi-lu̍t tī siⁿ-ji̍t pān-toh, chhiáⁿ hiah ê tōa koaⁿ, chhian-chóng, kap Ka-lī-lī chun-kùi ê lâng. 22 Hi-lô-tí chhin-siⁿ ê cha-bó͘-kiáⁿ ji̍p-khì thiàu-bú, hō͘ Hi-lu̍t kap tâng-toh ê lâng lóng hoaⁿ-hí; ông chiū kā cha-bó͘ gín-ná kóng, Kìⁿ-nā lí só͘ ài ê, kiû góa, góa beh hō͘ lí. 23 Koh kap i chiù-chōa kóng, Kìⁿ-nā lí só͘ kiû góa ê, sui-jiân góa kok ê chi̍t pòaⁿ, góa iā beh hō͘ lí. 24 Cha-bó͘ gín-ná chhut-khì kā i ê lāu-bú kóng, Góa beh kiû sím-mi̍h? Ìn kóng, Kiâⁿ sóe-lé Iok-hān ê thâu-khak. 25 Cha-bó͘ gín-ná liâm-piⁿ cháu ji̍p-khì, kìⁿ ông kiû kóng, Góa ài lí chiong kiâⁿ sóe-lé Iok-hān ê thâu-khak tóe tī pôaⁿ-ni̍h chek-sî hō͘ góa. 26 Ông chiū tōa iu-būn; chóng-sī ūi-tio̍h i só͘ chiù ê chōa, koh ū tâng-toh ê lâng tī-teh, só͘-í m̄ ài the-sî. 27 Ông chek-sî chhe chi̍t ê sī-ōe, hoan-hù chhú i ê thâu-khak lâi; 28 i chiū khì kaⁿ-ni̍h, thâi i ê thâu, tóe i ê thâu-khak tī pôaⁿ-ni̍h, phâng lâi hō͘ cha-bó͘ gín-ná, cha-bó͘ gín-ná chiū hō͘ i ê lāu-bú. 29 Iok-hān ê ha̍k-seng thiaⁿ-kìⁿ, chiū lâi siu i ê sin-si, bâi-chòng tī bōng-ni̍h. 30 Sù-tô͘ chū-chi̍p chiū-kūn Iâ-so͘, chiong in só͘ kiâⁿ só͘ kà-sī ê lóng kā I kóng. 31 Iâ-so͘ kā in kóng, Lín ka-kī kap góa lâi khì khòng-iá ê só͘-chāi, hioh-khùn tiap-á-kú. In-ūi óng-lâi ê lâng chōe, liân chia̍h iā bōe kò͘-tit. 32 In chiū chiūⁿ chûn, khì khòng-iá ê só͘-chāi, ka-kī tòa. 33 Chèng lâng khòaⁿ-kìⁿ in khì, ū chōe-chōe lâng chai; chiū tùi ta̍k ê siâⁿ pō͘-kiâⁿ saⁿ-kap cháu, tāi-seng in kàu. 34 Iâ-so͘ chhut-khì khòaⁿ-kìⁿ kui tōa tīn ê lâng, chiū lîn-bín i, in-ūi in chhin-chhiūⁿ iûⁿ bô bo̍k-chiá; chiah ēng chōe-chōe hāng kà-sī in. 35 Ji̍t beh lo̍h, I ê ha̍k-seng chiū-kūn I kóng, Chia chiū-sī khòng-iá, ji̍t beh lo̍h lah; 36 chhiáⁿ sì-sòaⁿ chèng lâng, hō͘ in khì chiu-ûi ê hiuⁿ-siā, ka-kī bóe mi̍h thang chia̍h. 37 I ìn kóng, Lín hō͘ in chia̍h. In kā I kóng, Chóng bô goán ēng nn̄g pah ê gûn-á khì bóe piáⁿ lâi hō͘ in chia̍h mah? 38 I kā in kóng, Lín ū piáⁿ jōa chōe, khì khòaⁿ-māi. Í-keng chai chiū kóng, Gō͘ ê piáⁿ, nn̄g bé hî. 39 I chiū hoan-hù in hō͘ chèng lâng pâi kui-lia̍t, chē tī chhiⁿ-chhùi ê chháu-po͘. 40 In chiū hun-tūi lâi chē, ū-ê chi̍t-pah, ū-ê gō͘-cha̍p. 41 Iâ-so͘ the̍h hit gō͘ ê piáⁿ, nn̄g bé hî, ǹg thiⁿ lâi chiok-siā; peh piáⁿ hō͘ ha̍k-seng lâi pâi tī chèng lâng ê bīn-chêng; iā ēng nn̄g bé hî pun hō͘ chèng lâng. 42 In lóng chia̍h kàu pá. 43 Khioh hiah ê piáⁿ-chhùi kap hî-sut móa cha̍p-jī kheng. 44 Chia̍h piáⁿ ê lâng ta-po͘ ê ū gō͘-chheng. 45 Iâ-so͘ liâm-piⁿ pek I ê ha̍k-seng chiūⁿ chûn tāi-seng kè-khì hit pêng hōaⁿ, kàu Pek-sài-tāi, thèng-hāu I sì-sòaⁿ chèng lâng. 46 Í-keng kap in lī-pia̍t, chiū khì soaⁿ-ni̍h kî-tó. 47 Í-keng àm, chûn tī hái-tiong, chí-ū Iâ-so͘ ka-kī tī hōaⁿ-ni̍h. 48 Khòaⁿ-kìⁿ ha̍k-seng kò-chiúⁿ, chin kan-khó͘, in-ūi sī tùi-thâu hong. Mî-sî iok-lio̍k sì kiⁿ, Iâ-so͘ tùi hái-bīn kiâⁿ chiū-kūn in, ài beh tùi in hia kè-khì. 49 In khòaⁿ-kìⁿ I kiâⁿ tī hái-bīn, lia̍h chòe koài mi̍h, chiū âu-kiò; 50 in-ūi in lóng khòaⁿ-kìⁿ I, chiū chhiⁿ-kiaⁿ. Iâ-so͘ liâm-piⁿ kap in kóng ōe, kā in kóng, An lín ê sim, sī góa, m̄ bián kiaⁿ. 51 Chiū chiūⁿ chûn chiū-kūn in; hong chiū tiāⁿ; in sim-lāi put-chí gông-ngia̍h; 52 in-ūi in bōe hiáu-ngō͘ hit ê piáⁿ ê sîn-jiah, iā in ê sim tūn. 53 Kè-khì liáu, chiū kàu Kek-nî-sat-le̍k tōe, chûn pha tī hōaⁿ-ni̍h. 54 Í-keng lī-khui chûn, lâng liâm-piⁿ jīn-tit I, 55 piàn-piàn cháu hit ê tōe-hng; thiaⁿ-kìⁿ I tī sím-mi̍h só͘-chāi, chiū chiong pho͘-á kng pīⁿ-lâng kàu hia. 56 Kìⁿ-nā I só͘ ji̍p ê hiuⁿ-siā, siâⁿ-chhī, hiuⁿ-ē, in chiong pīⁿ-lâng hē tī koe-chhī, kiû I nā sái hō͘ in bong I ê saⁿ-á-ku ê chhiu; kìⁿ-nā bong ê lâng lóng tit-tio̍h hó.
1 有法利賽人kap kúi-nā ê經學士聚集就近耶穌；in是tùi耶路撒冷來， 2 也bat看見伊ê學生中有ê用俗手teh食，就是未有洗ê手。 3 因為法利賽人kap眾偤太人lóng是拘執古早人ê流傳；若無出力洗伊ê手就無食； 4 tùi街市tò來，若無洗也無食；in所受來執守ê iáu有chōe-chōe項，親像洗杯、罐、銅器，hiahê。 5 法利賽人kap經學士問伊講，你ê學生無照古早人ê流傳來行，用俗手來食是怎樣？ 6 伊kā in講，以賽亞所讖語指lín假好ê人真正tio̍h，照所記載講， Chitê百姓用嘴唇尊敬我， 但是in ê心離開我遠遠； 7 In敬拜我是空空， 因為in用人所命令做教示，來教示人。 8 Án-ni lín是放sak上帝ê誡命，拘執人ê流傳。 9 Koh kā in講，Lín實在是棄sak上帝ê誡命，beh守lín ê流傳。 10 因為摩西bat講，Tio̍h尊敬你ê老父kap你ê老母；koh講，罵父罵母ê人的確tio̍h hō͘伊死。 11 但是lín講，人若對伊ê父á是伊ê母講，你本所會thang tùi我得tio̍h ê利益已經做Kok-pán，(就是講，禮物)； 12 以後lín就m̄准伊用甚麼服事伊ê父 á是伊ê母； 13 是將lín所傳授ê流傳廢無上帝ê道理；koh lín所做ê chōe-chōe親像chit號款。 14 就koh叫眾人就近伊，kā in講，Lín lóng tio̍h聽我來曉悟； 15 見若tùi人ê外面入ê bōe會bak lâ-sâm人；獨獨tùi人ê內面出ê，chiahê就是bak lâ-sâm人。 16 17 耶穌離開眾人入厝，伊ê學生將chitê譬喻問伊。 18 伊就kā in講，Lín也án-ni bōe曉悟mah？ 19 Kiám m̄知見若tùi外面入tī人ê，bōe會bak lâ-sâm人；因為m̄是入伊ê心，就是入伊ê腹肚，來放tī廁池。伊講án-ni是hō͘ ta̍k項ê食物lóng清氣。 20 Koh講，Tùi人ê內面出ê，就是bak lâ-sâm人。 21 因為tùi內面，就是tùi人ê心，出chiahê pháiⁿ念頭，私通、偷the̍h、刣人， 22 姦淫、貪心、邪惡、奸詐、好色、pháiⁿ目，譭謗，驕傲，猖狂； 23 凡若chiah ê pháiⁿ lóng是tùi內面出，也bak lâ-sâm人。 24 耶穌tùi hia起身，去到Chhui-lô Se-tùn ê交界，入一間厝，m̄ ài人知；但是khǹg bōe密。 25 Liâm-piⁿ有一个婦人人，伊ê細漢cha-bó͘-kiáⁿ hō͘邪神附身，聽見耶穌ê事，就來仆tī伊ê腳下。 26 Chitê婦人人是Hi-lī-nî人，屬Sū-lī-hui-nî-ki ê族；伊求耶穌趕鬼離開伊ê cha-bó͘-kiáⁿ。 27 耶穌kā伊講，Tio̍h hō͘ gín-ná事先食飽；因為the̍h gín-ná ê餅hiat hō͘狗是m̄好。 28 婦人人應伊講，主ah，是lah；總是桌腳ê狗也食細kiáⁿ ê餅碎。 29 耶穌kā伊講，因為chit句話你thang tò去，鬼已經離開你ê cha-bó͘-kiáⁿ出去。 30 婦人人tò去in tau，看見cha-bó͘-kiáⁿ倒tī眠床，鬼已經出去。 31 耶穌koh tùi Chhui-lô ê境界，經過Se-tùn，tùi Te-ka-pho-lī境ê中央，到加利利海。 32 有人chhōa一个臭耳人kòa tiuh舌根ê就近伊，求伊kā伊hōaⁿ手。 33 耶穌chhōa hit人離開眾人到邊頭，就用指頭á探伊雙pêng ê耳孔，koh phùi-hōa來摸伊ê舌， 34 ǹg天吐氣，kā伊講，Í-hoat-tāi，就是講，開。 35 伊雙pêng ê耳孔就開，舌根也tháu，講話明明。 36 耶穌警戒in莫得kā人講；總是ná警戒，in ná報揚。 37 也不止奇怪講，伊所做lóng是好，hō͘臭耳人ê聽見，啞口ê講話。
1 Ū Hoat-lī-sài lâng kap kúi-nā ê keng-ha̍k-sū chū-chi̍p chiū-kūn Iâ-so͘; in sī tùi Iâ-lō͘-sat-léng lâi, 2 iā bat khòaⁿ-kìⁿ I ê ha̍k-seng tiong ū-ê ēng sio̍k-chhiú teh chia̍h, chiū-sī bē ū sóe ê chhiú. 3 In-ūi Hoat-lī-sài lâng kap chèng Iû-thài lâng lóng sī khu-chip kó͘-chá lâng ê liû-thoân; nā bô chhut-la̍t sóe i ê chhiú chiū bô chia̍h; 4 tùi koe-chhī tò-lâi, nā bô sóe iā bô chia̍h; in só͘ siū lâi chip-siú ê iáu ū chōe-chōe hāng, chhin-chhiūⁿ sóe poe, koàn, tâng-khì, hiah-ê. 5 Hoat-lī-sài lâng kap keng-ha̍k-sū mn̄g I kóng, Lí ê ha̍k-seng bô chiàu kó͘-chá lâng ê liû-thoân lâi kiâⁿ, ēng sio̍k-chhiú lâi chia̍h sī cháiⁿ-iūⁿ? 6 I kā in kóng, Í-sài-a só͘ chhàm-gú chí lín ké-hó ê lâng chin-chiàⁿ tio̍h, chiàu só͘ kì-chài kóng, Chit ê peh-sìⁿ ēng chhùi-tûn chun-kèng góa, Nā-sī in ê sim lī-khui góa hn̄g-hn̄g; 7 In kèng-pài góa sī khang-khang, In-ūi in ēng lâng só͘ bēng-lēng chòe kà-sī, lâi kà-sī lâng. 8 Án-ni lín sī pàng-sak Siōng-tè ê kài-bēng, khu-chip lâng ê liû-thoân. 9 Koh kā in kóng, Lín si̍t-chāi sī khì-sak Siōng-tè ê kài-bēng, beh siú lín ê liû-thoân. 10 In-ūi Mô͘-se bat kóng, Tio̍h chun-kèng lí ê lāu-pē kap lí ê lāu-bú; koh kóng, Mē pē mē bú ê lâng tek-khak tio̍h hō͘ i sí. 11 Nā-sī lín kóng, Lâng nā tùi i ê pē á-sī i ê bú kóng, Lí pún só͘ ōe thang tùi góa tit-tio̍h ê lī-ek í-keng chòe Kok-pán, (chiū-sī kóng, Lé-mi̍h); 12 í-āu lín chiū m̄ chún i ēng sím-mi̍h ho̍k-sāi i ê pē á-sī i ê bú; 13 sī chiong lín só͘ thoân-siū ê liû-thoân hòe-bô Siōng-tè ê tō-lí; koh lín só͘ chòe ê chōe-chōe chhin-chhiūⁿ chit hō khoán. 14 Chiū koh kiò chèng lâng chiū-kūn I, kā in kóng, Lín lóng tio̍h thiaⁿ góa lâi hiáu-ngō͘; 15 kìⁿ-nā tùi lâng ê gōa-bīn ji̍p ê bōe-ōe bak lâ-sâm lâng; to̍k-to̍k tùi lâng ê lāi-bīn chhut ê, chiah-ê chiū-sī bak lâ-sâm lâng. 16 17 Iâ-so͘ lī-khui chèng lâng ji̍p chhù, I ê ha̍k-seng chiong chit ê phì-jū mn̄g I. 18 I chiū kā in kóng, Lín iā án-ni bōe hiáu-ngō͘ mah? 19 Kiám m̄ chai kìⁿ-nā tùi gōa-bīn ji̍p tī lâng ê, bōe-ōe bak lâ-sâm lâng; in-ūi m̄ sī ji̍p i ê sim, chiū-sī ji̍p i ê pak-tó͘, lâi pàng tī chhè-tî. I kóng án-ni sī hō͘ ta̍k hāng ê chia̍h-mi̍h lóng chheng-khì. 20 Koh kóng, Tùi lâng ê lāi-bīn chhut ê, chiū-sī bak lâ-sâm lâng. 21 In-ūi tùi lāi-bīn, chiū-sī tùi lâng ê sim, chhut chiah ê pháiⁿ liām-thâu, su-thong, thau-the̍h, thâi lâng, 22 kan-îm, tham-sim, siâ-ok, kan-chà, hò͘ⁿ-sek, pháiⁿ-ba̍k, húi-pòng, kiau-ngō͘, chhiong-kông; 23 hoān-nā chiah ê pháiⁿ lóng sī tùi lāi-bīn chhut, iā bak lâ-sâm lâng. 24 Iâ-so͘ tùi hia khí-sin, khì kàu Chhui-lô Se-tùn ê kau-kài, ji̍p chi̍t keng chhù, m̄ ài lâng chai; nā-sī khǹg bōe ba̍t. 25 Liâm-piⁿ ū chi̍t ê hū-jîn-lâng, i ê sòe-hàn cha-bó͘-kiáⁿ hō͘ siâ-sîn hū-sin, thiaⁿ-kìⁿ Iâ-so͘ ê sū, chiū lâi phak tī I ê kha-ē. 26 Chit ê hū-jîn-lâng sī Hi-lī-nî lâng, sio̍k Sū-lī-hui-nî-ki ê cho̍k; i kiû Iâ-so͘ kóaⁿ kúi lī-khui i ê cha-bó͘-kiáⁿ. 27 Iâ-so͘ kā i kóng, Tio̍h hō͘ gín-ná tāi-seng chia̍h pá; in-ūi the̍h gín-ná ê piáⁿ hiat hō͘ káu sī m̄ hó. 28 Hū-jîn-lâng ìn I kóng, Chú ah, sī lah; chóng-sī toh-kha ê káu iā chia̍h sòe-kiáⁿ ê piáⁿ-chhùi. 29 Iâ-so͘ kā i kóng, In-ūi chit kù ōe lí thang tò-khì, kúi í-keng lī-khui lí ê cha-bó͘-kiáⁿ chhut-khì. 30 Hū-jîn-lâng tò-khì in tau, khòaⁿ-kìⁿ cha-bó͘-kiáⁿ tó tī bîn-chhn̂g, kúi í-keng chhut-khì. 31 Iâ-so͘ koh tùi Chhui-lô ê kéng-kài, keng-kè Se-tùn, tùi Te-ka-pho-lī kéng ê tiong-ng, kàu Ka-lī-lī hái. 32 Ū lâng chhōa chi̍t ê chhàu-hī-lâng kòa tiuh-chi̍h-kun ê chiū-kūn I, kiû I kā i hōaⁿ chhiú. 33 Iâ-so͘ chhōa hit lâng lī-khui chèng lâng kàu piⁿ-thâu, chiū ēng chńg-thâu-á thàm i siang-pêng ê hī-khang, koh phùi-nōa lâi bong i ê chi̍h, 34 ǹg thiⁿ thó͘-khùi, kā i kóng, Í-hoat-tāi, chiū-sī kóng, Khui. 35 I siang-pêng ê hī-khang chiū khui, chi̍h-kun iā tháu, kóng ōe bêng-bêng. 36 Iâ-so͘ kéng-kài in bo̍h-tit kā lâng kóng; chóng-sī ná kéng-kài, in ná pò-iông. 37 Iā put-chí kî-koài kóng, I só͘ chòe lóng sī hó, hō͘ chhàu-hī-lâng ê thiaⁿ-kìⁿ, é-káu ê kóng ōe.
1 當hit幾日眾人koh大聚集，無甚麼thang食，耶穌叫伊ê學生來kā in講， 2 我可憐眾人，因為in已經kap我tòa三日，也無物thang食； 3 我若hō͘ in iau-iau tò去in厝，in tī路裡會厭倦，因為in中間有ê tùi遠遠來。 4 學生應伊講，Tī chitê曠野，tùi tá-lo̍h會得tio̍h餅hō͘ hiahê人食飽？ 5 耶穌問in講，Lín有jōa chōe餅？In講，七個。 6 就命令眾人坐tī地裡；the̍h hí七個餅，祝謝來peh，交hō͘伊ê學生，hō͘ in排列；in就排列tī眾人ê面前。 7 Koh有淡薄細尾魚；已經祝謝，也kah in tio̍h排列。 8 人lóng食到飽；拾所chhun ê餅碎七籃。 9 人額約略有四千。就hō͘ in四散。 10 本身liâm-piⁿ kap學生搭船，到Tāi-má-lô͘-tāi ê境界。 11 法利賽人出去，就辯駁伊，對伊求一个出tī天裡ê神蹟，是beh試伊。 12 耶穌心內大吐氣講，Chit世代啥事求神蹟ah？我實在kā lín講，決斷無beh用神蹟hō͘ chit世代。 13 就離開in，koh搭船，去hit-pêng岸。 14 學生bōe記得帶餅，船內只有一个餅，以外無別項ê食物。 15 耶穌警戒in講，Lín tio̍h謹慎，持防法利賽人ê酵，kap希律ê酵。 16 學生saⁿ-kap議論講，是咱無餅。 17 耶穌知，就kā in講，啥事因為無餅teh saⁿ-kap議論ah？Lín iáu-kú bē知，bē曉悟mah？lín ê心iáu-kú鈍mah？ 18 Lín有目睭也無teh看，有耳孔也無teh聽，也bōe記得mah？ 19 我peh五個餅pun hō͘五千人，lín拾餅碎滿幾筐ah？In講，十二。 20 Koh七個餅pun hō͘四千人，lín拾餅碎滿kúi籃ah？In講，七籃。 21 就kā in講，Lín iáu-kú bē曉悟mah？ 22 Saⁿ-kap到伯賽大，有人chhōa一个chhiⁿ-mî ê就近伊，求伊摸伊。 23 耶穌牽chhiⁿ-mî人ê手，chhōa伊出鄉里外；phùi-nōa tī伊兩蕊目睭，用手hōaⁿ伊，問講，你有看見甚麼無？ 24 伊kia̍h頭看講，我看見人，因為看見in親像樹也teh行。 25 Koh用手hōaⁿ伊兩蕊ê目睭；伊注目看，就齊全好，看ta̍k項物到明明。 26 耶穌kah伊tò去in tau，講，Chitê鄉社你也莫得入。 27 耶穌kap學生出去到該撒利亞腓立比屬hiahê鄉社；路裡問伊ê學生講，人講我是是誰？ 28 In kā伊講，行洗禮ê約翰；也有人講，以利亞；koh有人講，先知中ê一个。 29 伊koh問in講，若是lín講我是是誰？彼得應伊講，你是基督。 30 伊就禁戒in莫得將伊ê事kā人講。 31 就教示in講，人子的確tio̍h受chōe-chōe苦楚，hō͘ chiahê長老、祭司頭、經學士棄sak，koh受害死，過三日就koh活。 32 耶穌用chitê話明明kā in講。彼得牽來責備伊。 33 但是伊oa̍t-tńg身看伊ê學生，就責備彼得講，撒旦，退去我ê後面；因為你所想m̄是上帝ê事，是人ê事。 34 就叫眾人kap伊ê學生來，kā in講，若有人ài tè我，就tio̍h看無家己，giâ伊ê十字架，來tè我。 35 因為見若ài救伊ê性命ê beh失落伊；見若為tio̍h我kap福音來失落伊ê性命ê beh救伊。 36 人若得tio̍h全世界，來喪失伊ê性命，有甚麼利益？ 37 因為人beh出甚麼來對換伊ê性命？ 38 凡若tī chitê姦淫有罪ê世代掠我kap我ê話做見笑ê，人子用父ê榮光kap chiahê聖ê天使來ê時，也beh掠伊做見笑。
1 Tng hit kúi ji̍t chèng lâng koh tōa chū-chi̍p, bô sím-mi̍h thang chia̍h, Iâ-so͘ kiò I ê ha̍k-seng lâi kā in kóng, 2 Góa khó-lîn chèng lâng, in-ūi in í-keng kap góa tòa saⁿ ji̍t, iā bô mi̍h thang chia̍h; 3 góa nā hō͘ in iau-iau tò-khì in chhù, in tī lō͘-ni̍h ōe ià-siān, in-ūi in tiong-kan ū-ê tùi hn̄g-hn̄g lâi. 4 Ha̍k-seng ìn I kóng, Tī chit ê khòng-iá, tùi tá-lo̍h ōe tit-tio̍h piáⁿ hō͘ hiah ê lâng chia̍h pá? 5 Iâ-so͘ mn̄g in kóng, Lín ū jōa chōe piáⁿ? In kóng, Chhit ê. 6 Chiū bēng-lēng chèng lâng chē tī tōe-ni̍h; the̍h hí chhit ê piáⁿ, chiok-siā lâi peh, kau hō͘ I ê ha̍k-seng, hō͘ in pâi-lia̍t; in chiū pâi-lia̍t tī chèng lâng ê bīn-chêng. 7 Koh ū tām-po̍h sòe bé hî; í-keng chiok-siā, iā kah in tio̍h pâi-lia̍t. 8 Lâng lóng chia̍h kàu pá; khioh só͘ chhun ê piáⁿ-chhùi chhit nâ. 9 Lâng-gia̍h iok-lio̍k ū sì-chheng. Chiū hō͘ in sì-sòaⁿ. 10 Pún-sin liâm-piⁿ kap ha̍k-seng tah chûn, kàu Tāi-má-lô͘-tāi ê kéng-kài. 11 Hoat-lī-sài lâng chhut-khì, chiū piān-pok I, tùi I kiû chi̍t-ê chhut tī thiⁿ-ni̍h ê sîn-jiah, sī beh chhì I. 12 Iâ-so͘ sim-lāi tōa thó͘-khùi kóng, Chit sè-tāi siáⁿ-sū kiû sîn-jiah ah? Góa si̍t-chāi kā lín kóng, Koat-toàn bô beh ēng sîn-jiah hō͘ chit sè-tāi. 13 Chiū lī-khui in, koh tah chûn, khì hit pêng hōaⁿ. 14 Ha̍k-seng bōe kì-tit tòa piáⁿ, chûn-lāi chí ū chi̍t ê piáⁿ, í-gōa bô pa̍t hāng ê chia̍h-mi̍h. 15 Iâ-so͘ kéng-kài in kóng, Lín tio̍h kín-sīn, tî-hông Hoat-lī-sài lâng ê kàⁿ, kap Hi-lu̍t ê kàⁿ. 16 Ha̍k-seng saⁿ-kap gī-lūn kóng, Sī lán bô piáⁿ. 17 Iâ-so͘ chai, chiū kā in kóng, Siáⁿ-sū in-ūi bô piáⁿ teh saⁿ-kap gī-lūn ah? Lín iáu-kú bē chai, bē hiáu-ngō͘ mah? lín ê sim iáu-kú tūn mah? 18 Lín ū ba̍k-chiu iā bô teh khòaⁿ, ū hī-khang iā bô teh thiaⁿ, iā bōe kì-tit mah? 19 Góa peh gō͘ ê piáⁿ pun hō͘ gō͘-chheng lâng, lín khioh piáⁿ-chhùi móa kúi kheng ah? In kóng, Cha̍p-jī. 20 Koh chhit ê piáⁿ pun hō͘ sì-chheng lâng, lín khioh piáⁿ-chhùi móa kúi nâ ah? In kóng, Chhit nâ. 21 Chiū kā in kóng, Lín iáu-kú bē hiáu-ngō͘ mah? 22 Saⁿ-kap kàu Pek-sài-tāi. Ū lâng chhōa chi̍t ê chhiⁿ-mî ê chiū-kūn I, kiû I bong i. 23 Iâ-so͘ khan chhiⁿ-mî lâng ê chhiú, chhōa i chhut hiuⁿ-lí gōa; phùi-nōa tī i nn̄g lúi ba̍k-chiu, ēng chhiú hōaⁿ i, mn̄g kóng, Lí ū khòaⁿ-kìⁿ sím-mi̍h bô? 24 I kia̍h thâu khòaⁿ kóng, Góa khòaⁿ-kìⁿ lâng, in-ūi khòaⁿ-kìⁿ in chhin-chhiūⁿ chhiū iā teh kiâⁿ. 25 Koh ēng chhiú hōaⁿ i nn̄g lúi ê ba̍k-chiu; i chù-ba̍k khòaⁿ, chiū chiâu-chn̂g hó, khòaⁿ ta̍k hāng mi̍h kàu bêng-bêng. 26 Iâ-so͘ kah i tò-khì in tau, kóng, Chit ê hiuⁿ-siā lí iā bo̍h-tit ji̍p. 27 Iâ-so͘ kap ha̍k-seng chhut-khì kàu Kai-sat-lī-a Hui-li̍p-pí sio̍k hiah ê hiuⁿ-siā; lō͘-ni̍h mn̄g I ê ha̍k-seng kóng, Lâng kóng góa sī chī-chūi? 28 In kā I kóng, Kiâⁿ sóe-lé ê Iok-hān; iā ū lâng kóng, Í-lī-a; koh ū lâng kóng, Sian-ti tiong ê chi̍t-ê. 29 I koh mn̄g in kóng, Nā-sī lín kóng góa sī chī-chūi? Pí-tek ìn I kóng, Lí sī Ki-tok. 30 I chiū kìm-kài in bo̍h-tit chiong I ê sū kā lâng kóng. 31 Chiū kà-sī in kóng, Jîn-chú tek-khak tio̍h siū chōe-chōe khó͘-chhó͘, hō͘ chiah ê tiúⁿ-ló, chè-si-thâu, keng-ha̍k-sū khì-sak, koh siū hāi-sí, kè saⁿ ji̍t chiū koh-oa̍h. 32 Iâ-so͘ ēng chit ê ōe bêng-bêng kā in kóng. Pí-tek khan lâi chek-pī I. 33 Nā-sī I oa̍t-tńg-sin khòaⁿ I ê ha̍k-seng, chiū chek-pī Pí-tek kóng, Sat-tàn, thè-khì góa ê āu-bīn; in-ūi lí só͘ siūⁿ m̄ sī Siōng-tè ê sū, sī lâng ê sū. 34 Chiū kiò chèng lâng kap I ê ha̍k-seng lâi, kā in kóng, Nā ū lâng ài tè góa, chiū tio̍h khòaⁿ-bô ka-kī, giâ i ê si̍p-jī-kè, lâi tè góa. 35 In-ūi kìⁿ-nā ài kiù i ê sìⁿ-miā ê beh sit-lo̍h i; kìⁿ-nā ūi-tio̍h góa kap hok-im lâi sit-lo̍h i ê sìⁿ-miā ê beh kiù i. 36 Lâng nā tit-tio̍h choân sè-kài, lâi sòng-sit i ê sìⁿ-miā, ū sím-mi̍h lī-ek? 37 In-ūi lâng beh chhut sím-mi̍h lâi tùi-ōaⁿ i ê sìⁿ-miā? 38 Hoān-nā tī chit ê kan-îm ū chōe ê sè-tāi lia̍h góa kap góa ê ōe chòe kiàn-siàu ê, Jîn-chú ēng Pē ê êng-kng kap chiah ê sèng ê thiⁿ-sài lâi ê sî, iā beh lia̍h i chòe kiàn-siàu.
1 耶穌Koh kā in講，我實在kā lín講，Khiā-tī chia ê有人iáu-bē死，會看見上帝ê國用權能臨到。 2 過六日耶穌帶彼得、雅各、約翰，另外chhōa in peh上高山，kan-ta in kap伊tī-teh； 3 當in ê面前形狀變換，伊ê衫燦爛，極其白，世間漂布ê bōe會hō͘伊白到án-ni。 4 有以利亞kap摩西對in顯現，kap耶穌講話。 5 彼得對耶穌講，拉比，咱tī chia真好，阮來搭三間寮á，一間hō͘你，一間hō͘摩西，一間hō͘以利亞。 6 是伊m̄知tio̍h怎樣講，因為in真驚。 7 就有雲罩in，koh有聲tùi雲裡出講，chitê是我疼ê Kiáⁿ，lín tio̍h聽伊。 8 In忽然四界看，無看見一人，只有耶穌kap in tī hia nā-tiāⁿ。 9 In落山ê時耶穌禁in講，人子iáu-bē tùi死人中koh活，莫得用所看見ê kā人講。 10 學生執chit句話，saⁿ-kap議論看tùi死人中koh活，chit句甚麼意思。 11 Koh問耶穌講，經學士講，以利亞tio̍h事先到，是怎樣？ 12 伊應講，以利亞果然事先來興起萬項事；koh怎樣記載講，人子tio̍h受chōe-chōe艱苦，hō͘人看輕ah？ 13 但是我kā lín講，以利亞已經到，人也chhut-chāi意思款待伊，lóng照所記載指伊ê話。 14 已經到學生ê所在，就看見kui大陣人圍in，也有經學士kap in辯論。 15 人看見耶穌liâm-piⁿ大gông-ngia̍h，走來就近伊，kā伊請安。 16 伊問in講，Lín kap in辯論甚麼？ 17 眾人中一人應伊講，先生，我有chhōa我ê Kiáⁿ到你chia，伊患tio̍h啞口ê神； 18 無論tī甚麼所在掠伊，就kā伊siak倒；伊就流nōa，咬齒，koh tâ-lâ去；我bat請你ê學生趕伊，也in bōe會。 19 耶穌應講，Hàiⁿ ah，m̄信ê世代ah，我beh kap lín tòa jōa久ah？我beh吞忍lín jōa久ah？帶伊來就近我。 20 In就帶伊來。一下看見耶穌，hitê鬼liâm-piⁿ hō͘伊大thiu-chhoah，就倒tī土腳翻來翻去流nōa。 21 耶穌問伊ê老父講，伊患tio̍h chitê jōa久lah？講，Tùi細漢ê時。 22 Ta̍uh-ta̍uh將伊hiat落火，hiat落水，beh滅伊。總是你若會做甚麼，tio̍h憐憫來幫贊阮。 23 耶穌kā伊講，怎樣講，你若會ah？有信ê人，ta̍k項lóng會。 24 Gín-ná ê老父liâm-piⁿ喉叫講，我信lah；我所信無夠ê，你tio̍h幫贊我。 25 耶穌看見kui陣人走óa來，就責備hitê邪神，kā伊講，你啞口臭耳人ê神ah，我命令你離開chitê人，無koh入伊。 26 Hit-ê神喉叫，大khiú-la̍k伊，chiah出去；hitê gín-ná親像死一樣，致到人khah chōe講，伊已經死。 27 但是耶穌牽伊ê手，扶伊起來；伊就起來。 28 入厝，伊ê學生暗靜問伊講，阮bōe趕伊是怎樣？ 29 伊kā in講，若m̄是用祈禱，chit類就bōe得伊出。 30 In tùi hia去經過加利利，耶穌m̄ ài人知。 31 因為伊教示伊ê學生，kā in講，人子beh受解送tī人ê手，人beh害死伊；害死了後三日beh koh活。 32 In bōe曉悟chitê話，也m̄敢問伊。 33 In來到迦百農，耶穌tī厝內問in講，Lín tī路裡議論甚麼？ 34 學生靜靜，因為tī路裡bat爭論是誰最大。 35 伊就坐teh，叫十二個學生，kā in講，若ài做事先ê tio̍h做眾人ê路尾，也做眾人ê差用。 36 Koh chhōa一个gín-ná，hō͘伊khiā tī中間，續抱伊； 37 kā學生講，見若為tio̍h我ê名接納一个親像chit號ê gín-ná ê，就是接納我；見若接納我ê，m̄是接納我，就是接納差我ê。 38 約翰kā耶穌講，先生，阮bat看見一人用你ê名趕鬼；阮就禁止伊，因為伊無tè咱。 39 耶穌講，莫得禁伊，因為無有人奉我ê名行權能，也會liâm-piⁿ譭謗我。 40 見若無攻擊咱ê就是為咱。 41 見若因為lín屬基督，就用一杯水hō͘ lín lim ê，我實在kā lín講，伊將來無失落伊ê賞。 42 見若hō͘ chiahê信我ê微細ê一个去犯罪，hit人寧可受大石磨縛伊ê頷頸，hiat tī海裡。 43 設使你一手致到你犯罪就tio̍h斬斷伊；你寧可破相入tī活，莫得兩手去地獄，入bōe hoa ê火。 44 45 設使你一腳致到你犯罪，就tio̍h斬斷伊；你寧可跛腳入活，莫得兩腳受hiat落地獄。 46 47 設使你一目致到你犯罪，就tioh削去；你寧可一目入tī上帝ê國，莫得兩目hiat落地獄； 48 tī hia in ê蟲無死，火無hoa。 49 因為ta̍k人beh用火來sīⁿ伊。 50 鹽是好；鹽若失落伊ê 鹹，beh用甚麼來復到伊ê味？Lín ê內面應該tio̍h有鹽；也大家tio̍h saⁿ和好。
1 Iâ-so͘ koh kā in kóng, góa si̍t-chāi kā lín kóng, Khiā-tī chia ê ū lâng iáu-bē sí, ōe khòaⁿ-kìⁿ Siōng-tè ê kok ēng koân-lêng lîm-kàu. 2 Kè la̍k ji̍t Iâ-so͘ tòa Pí-tek, Ngá-kok, Iok-hān, lēng-gōa chhōa in peh-chiūⁿ koâiⁿ soaⁿ, kan-ta in kap I tī-teh; 3 tng in ê bīn-chêng hêng-chōng piàn-ōaⁿ, I ê saⁿ chhàn-lān, ke̍k-kî pe̍h, sè-kan phio-pò͘ ê bōe-ōe hō͘ i pe̍h kàu án-ni. 4 Ū Í-lī-a kap Mô͘-se tùi in hián-hiān, kap Iâ-so͘ kóng ōe. 5 Pí-tek tùi Iâ-so͘ kóng, Lia̍p-pí, lán tī chia chin hó, goán lâi tah saⁿ keng liâu-á, chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a. 6 Sī i m̄ chai tio̍h cháiⁿ-iūⁿ kóng, in-ūi in chin kiaⁿ. 7 Chiū ū hûn tà in, koh ū siaⁿ tùi hûn-ni̍h chhut kóng, Chit-ê sī góa thiàⁿ ê Kiáⁿ, lín tio̍h thiaⁿ I. 8 In hut-jiân sì-kè khòaⁿ, bô khòaⁿ-kìⁿ chi̍t lâng, chí ū Iâ-so͘ kap in tī hia nā-tiāⁿ. 9 In lo̍h soaⁿ ê sî Iâ-so͘ kìm in kóng, Jîn-chú iáu-bē tùi sí-lâng tiong koh-oa̍h, bo̍h-tit ēng só͘ khòaⁿ-kìⁿ ê kā lâng kóng. 10 Ha̍k-seng chip chit kù ōe, saⁿ-kap gī-lūn khòaⁿ tùi sí-lâng tiong koh-oa̍h, chit kù sím-mi̍h ì-sù. 11 Koh mn̄g Iâ-so͘ kóng, Keng-ha̍k-sū kóng, Í-lī-a tio̍h tāi-seng kàu, sī cháiⁿ-iūⁿ? 12 I ìn kóng, Í-lī-a kó-jiân tāi-seng lâi heng-khí bān hāng sū; koh cháiⁿ-iūⁿ kì-chài kóng, Jîn-chú tio̍h siū chōe-chōe kan-khó͘, hō͘ lâng khòaⁿ-khin ah? 13 Nā-sī góa kā lín kóng, Í-lī-a í-keng kàu, lâng iā chhut-chāi ì-sù khoán-thāi i, lóng chiàu só͘ kì-chài chí i ê ōe. 14 Í-keng kàu ha̍k-seng ê só͘-chāi, chiū khòaⁿ-kìⁿ kui tōa tīn lâng ûi in, iā ū keng-ha̍k-sū kap in piān-lūn. 15 Lâng khòaⁿ-kìⁿ Iâ-so͘ liâm-piⁿ tōa gông-ngia̍h, cháu lâi chiū-kūn I, kā I chhéng-an. 16 I mn̄g in kóng, Lín kap in piān-lūn sím-mi̍h? 17 Chèng lâng tiong chi̍t lâng ìn I kóng, Sian-siⁿ, góa ū chhōa góa ê kiáⁿ kàu lí chia, i hoān-tio̍h é-káu ê sîn; 18 bô lūn tī sím-mi̍h só͘-chāi lia̍h i, chiū kā i siak-tó; i chiū lâu-nōa, kā-khí, koh tâ-lâ-khì; góa bat chhiáⁿ lí ê ha̍k-seng kóaⁿ i, iā in bōe-ōe. 19 Iâ-so͘ ìn kóng, Hàiⁿ ah, m̄ sìn ê sè-tāi ah, góa beh kap lín tòa jōa kú ah? góa beh thun-lún lín jōa kú ah? Tòa i lâi chiū-kūn góa. 20 In chiū tòa i lâi. Chi̍t ē khòaⁿ-kìⁿ Iâ-so͘, hit ê kúi liâm-piⁿ hō͘ i tōa thiu-chhoah, chiū tó tī thô͘-kha hoan-lâi hoan-khì lâu-nōa. 21 Iâ-so͘ mn̄g i ê lāu-pē kóng, I hoān-tio̍h chit-ê jōa kú lah? Kóng, Tùi sòe-hàn ê sî. 22 Ta̍uh-ta̍uh chiong i hiat-lo̍h hé, hiat-lo̍h chúi, beh bia̍t i. Chóng-sī lí nā ōe chòe sím-mi̍h, tio̍h lîn-bín lâi pang-chān goán. 23 Iâ-so͘ kā i kóng, Cháiⁿ-iūⁿ kóng, Lí nā ōe ah? ū sìn ê lâng, ta̍k hāng lóng ōe. 24 Gín-ná ê lāu-pē liâm-piⁿ âu-kiò kóng, Góa sìn lah; góa só͘ sìn bô kàu ê, lí tio̍h pang-chān góa. 25 Iâ-so͘ khòaⁿ-kìⁿ kui tīn lâng cháu-óa lâi, chiū chek-pī hit ê siâ-sîn, kā i kóng, Lí é-káu chhàu-hī-lâng ê sîn ah, góa bēng-lēng lí lī-khui chit ê lâng, bô koh ji̍p i. 26 Hit ê sîn âu-kiò, tōa khiú-la̍k i, chiah chhut-khì; hit ê gín-ná chhin-chhiūⁿ sí chi̍t iūⁿ, tì-kàu lâng khah chōe kóng, I í-keng sí. 27 Nā-sī Iâ-so͘ khan i ê chhiú, hû i khí-lâi; i chiū khí-lâi. 28 Ji̍p chhù I ê ha̍k-seng àm-chīⁿ mn̄g I kóng, Goán bōe kóaⁿ i sī cháiⁿ-iūⁿ? 29 I kā in kóng, Nā m̄ sī ēng kî-tó, chit lūi chiū bōe tit i chhut. 30 In tùi hia khì keng-kè Ka-lī-lī, Iâ-so͘ m̄ ài lâng chai. 31 In-ūi I kà-sī I ê ha̍k-seng, kā in kóng, Jîn-chú beh siū kè-sàng tī lâng ê chhiú, lâng beh hāi-sí I; hāi-sí liáu-āu saⁿ ji̍t beh koh-oa̍h. 32 In bōe hiáu-ngō͘ chit ê ōe, iā m̄ káⁿ mn̄g I. 33 In lâi kàu Ka-pek-lông, Iâ-so͘ tī chhù-lāi mn̄g in kóng, Lín tī lō͘-ni̍h gī-lūn sím-mi̍h? 34 Ha̍k-seng chēng-chēng, in-ūi tī lō͘-ni̍h bat cheng-lūn chī-chūi chòe tōa. 35 I chiū chē-teh, kiò cha̍p-jī ê ha̍k-seng, kā in kóng, Nā ài chòe tāi-seng ê tio̍h chòe chèng lâng ê lō͘-bé, iā chòe chèng lâng ê chhe-ēng. 36 Koh chhōa chi̍t ê gín-ná, hō͘ i khiā tī tiong-kan, sòa phō i; 37 kā ha̍k-seng kóng, Kìⁿ-nā ūi-tio̍h góa ê miâ chiap-la̍p chi̍t-ê chhin-chhiūⁿ chit hō ê gín-ná ê, chiū-sī chiap-la̍p góa; kìⁿ-nā chiap-la̍p góa ê, m̄ sī chiap-la̍p góa, chiū-sī chiap-la̍p chhe góa ê. 38 Iok-hān kā Iâ-so͘ kóng, Sian-siⁿ, goán bat khòaⁿ-kìⁿ chi̍t lâng ēng lí ê miâ kóaⁿ kúi; goán chiū kìm-chí i, in-ūi i bô tè lán. 39 Iâ-so͘ kóng, Bo̍h-tit kìm i, in-ūi bô ū lâng hōng góa ê miâ kiâⁿ koân-lêng, iā ōe liâm-piⁿ húi-pòng góa. 40 Kìⁿ-nā bô kong-kek lán ê chiū-sī ūi lán. 41 Kìⁿ-nā in-ūi lín sio̍k Ki-tok, chiū ēng chi̍t poe chúi hō͘ lín lim ê, góa si̍t-chāi kā lín kóng, i chiong-lâi bô sit-lo̍h i ê siúⁿ. 42 Kìⁿ-nā hō͘ chiah ê sìn góa ê bî-sòe ê chi̍t-ê khì hoān-chōe, hit lâng lêng-khó͘ siū tōa chio̍h-bō pa̍k i ê ām-kún, hiat tī hái-ni̍h. 43 Siat-sú lí chi̍t chhiú tì-kàu lí hoān-chōe chiū tio̍h chám-tn̄g i; lí lêng-khó͘ phòa-siùⁿ ji̍p tī oa̍h, bo̍h-tit nn̄g chhiú khì tē-ge̍k, ji̍p bōe hoa ê hé. 44 45 Siat-sú lí chi̍t kha tì-kàu lí hoān-chōe, chiū tio̍h chám-tn̄g i; lí lêng-khó͘ pái-kha ji̍p oa̍h, bo̍h-tit nn̄g kha siū hiat-lo̍h tē-ge̍k. 46 47 Siat-sú lí chi̍t ba̍k tì-kàu lí hoān-chōe, chiū tio̍h iah-khì; lí lêng-khó͘ chi̍t ba̍k ji̍p tī Siōng-tè ê kok, bo̍h-tit nn̄g ba̍k hiat-lo̍h tē-ge̍k; 48 tī hia in ê thâng bô sí, hé bô hoa. 49 In-ūi ta̍k lâng beh ēng hé lâi sīⁿ i. 50 Iâm sī hó; iâm nā sit-lo̍h i ê kiâm, beh ēng sím-mi̍h lâi ho̍k-tò i ê bī? Lín ê lāi-bīn eng-kai tio̍h ū iâm; iā tāi-ke tio̍h saⁿ hô-hó.
1 耶穌tùi hia起身到偤太ê地界，到約旦河外；chōe-chōe陣 ê人koh聚集就近伊；伊照常koh教示in。 2 有法利賽人就近伊，問講，人離出伊ê bó͘，thang mah？是teh試伊。 3 耶穌應講，摩西命令lín怎樣？ 4 In講，摩西准人寫離書，來離伊。 5 但是耶穌kā in講，摩西因為lín ê心硬，chiah寫chitê命令hō͘ lín； 6 總是tùi造化ê起頭，主創造in有男有女。 7 因為án-ni人beh離開父母，結聯伊ê bó͘，兩個beh成做一體； 8 親像án-ni，無做兩個，是做一體。 9 所以上帝所配合ê，人m̄-thang分開伊。 10 入厝學生koh將chitê tāi-chì問伊。 11 伊kā in講，凡若離出伊ê bó͘來娶別ê ê，是行姦淫來辜負伊； 12 bó͘若棄sak伊ê丈夫來嫁別ê，也是行姦淫。 13 有人帶細kiáⁿ就近耶穌beh hō͘伊摸in；學生責備in。 14 耶穌看見án-ni，大無歡喜，kā學生講，容允細kiáⁿ就近我，莫得禁in；因為上帝ê國是chit號人ê。 15 我實在kā lín講，凡若承接上帝ê國無親像細kiáⁿ ê，決斷bōe得入去。 16 就抱in，kā in hōaⁿ手，祝福in。 17 耶穌出去tī路裡，有一人走進前來跪伊，問講，好ê先生ah，我tio̍h怎樣做，chiah thang承接永活？ 18 耶穌kā伊講，你啥事稱呼我是好ah？無一个好，獨獨上帝nā-tiāⁿ。 19 Chiahê誡你已經知，莫得刣死人，莫得姦淫，莫得偷the̍h，莫得lām-sám做干證，莫得剋虧人，Tio̍h敬你ê父母。 20 伊應講，先生ah，chiahê我tùi細漢lóng守伊。 21 耶穌看伊，疼伊，就kā伊講，你iáu欠一項；tio̍h去賣你凡所有ê，來hō͘ sòng-hiong人，就beh有財寶tī天裡，koh來tè我。 22 伊聽chitê話，面就失色，憂悶就去。因為伊產業真chōe。 23 耶穌四界看，kā伊ê學生講，富人入上帝ê國oh---ah。 24 學生奇怪伊ê話；耶穌koh應講，細kiáⁿ ah，óa靠錢財ê人入上帝ê國oh--ah。 25 駱駝穿過針鼻比富人入上帝ê國iáu khah快。 26 學生益發gông-ngia̍h，kā伊講，Án-ni 是誰會得tio̍h救ah？ 27 耶穌看in講，在人是bōe會，在上帝就m̄是án-ni；因為在上帝萬事lóng會。 28 彼得就kā伊講，阮bat放sak一切來tè你。 29 耶穌講，我實在kā lín講，無有人為tio̍h我kap福音ê緣故放sak厝宅、兄弟、姊妹、老母、老父、kiáⁿ兒、田園， 30 就tī現時無得tio̍h百倍，就是厝宅、兄弟、姊妹、母親、kiáⁿ兒、田園，兼有khún-tio̍k，koh tī來世beh得tio̍h永活。 31 總是事先ê chōe-chōe beh做路尾，路尾ê也beh做事先。 32 In上耶路撒冷，tī路裡耶穌行tī頭前，學生gông-ngia̍h，tè ê人驚惶。耶穌koh帶十二個學生，將伊所beh tú-tio̍h ê事kā in講， 33 Taⁿ咱上耶路撒冷，人子beh受解送hō͘ chiahê祭司頭，kap經學士；jn beh擬伊死罪，也beh 解送伊hō͘外邦人； 34 jn beh戲弄伊，phùi-nōa伊，鞭phah伊，害死伊；過三日伊beh koh活。 35 西庇太ê Kiáⁿ雅各kap約翰就近來kā伊講，先生ah，見若阮所對你求ê，ài你kā阮行伊。 36 伊就kā in講，Ài我kā lín行甚麼ah？ 37 In kā伊講，准阮tī你ê榮光，一个坐你ê chiàⁿ-pêng，一个坐你ê tò-pêng。 38 但是耶穌kā in講，Lín所求ê，lín m̄知。我所lim ê杯，lín會lim mah？我所受ê洗，lín會受mah？ 39 In講會。伊kā in講，我所lim ê杯，lín beh lim伊，我所受ê洗，lín beh受伊； 40 總是坐我ê chiàⁿ-pêng tò-pêng m̄是我會thang hō͘人，獨獨為tio̍h甚麼人備辦ê就hō͘伊。 41 十個學生聽見，就受氣雅各kap約翰。 42 耶穌叫in來kā in講，Lín知外邦所尊做人君ê做主來治理in，in ê大人管轄in。 43 獨獨lín中間m̄是án-ni；lín中間ài做大ê beh做lín ê差用； 44 lín中間ài做頭ê beh做眾人ê奴僕。 45 因為人子到m̄是beh差用人，是beh hō͘人差用，koh獻伊ê性命來贖回chōe-chōe人。 46 In到耶利哥；耶穌kap伊ê學生kap大陣人出耶利哥ê時，有Tí-mái ê Kiáⁿ，巴底買，就是chhiⁿ-mî做乞食ê，坐tī路邊； 47 已經聽見是拿撒勒人耶穌，就喉叫講，大衛ê後裔，耶穌，可憐我。 48 Chōe-chōe人責備伊，kah伊靜靜；但是伊益發大聲喉叫講，大衛ê後裔ah，可憐我。 49 耶穌停腳講，叫伊來。就叫chhiⁿ-mî人，kā伊講，安你ê心，起來，伊teh叫你ah。 50 伊就放sak伊ê衫，跳起來去就近耶穌。 51 耶穌應伊講，Ài我kā你做甚麼？Chhiⁿ-mî人kā伊講，Lia̍p-pho-nî，我ài得tio̍h看見。 52 耶穌kā伊講，去ah，你ê信有救你lah。伊liâm-piⁿ得tio̍h看見，就tī路裡tè耶穌。
1 Iâ-so͘ tùi hia khí-sin kàu Iû-thài ê tōe-kài, kàu Iok-tàn hô gōa; chōe-chōe tīn ê lâng koh chū-chi̍p chiū-kūn I; I chiàu siông koh kà-sī in. 2 Ū Hoat-lī-sài lâng chiū-kūn I, mn̄g kóng, Lâng lî-chhut i ê bó͘, thang mah? sī teh chhì I. 3 Iâ-so͘ ìn kóng, Mô͘-se bēng-lēng lín cháiⁿ-iūⁿ? 4 In kóng, Mô͘-se chún lâng siá lî-chu, lâi lî i. 5 Nā-sī Iâ-so͘ kā in kóng, Mô͘-se in-ūi lín ê sim ngī, chiah siá chit ê bēng-lēng hō͘ lín; 6 chóng-sī tùi chō-hòa ê khí-thâu, Chú chhòng-chō in ū lâm ū lú. 7 In-ūi án-ni lâng beh lī-khui pē-bú, kiat-liân i ê bó͘, nn̄g ê beh chiâⁿ-chòe chi̍t thé; 8 chhin-chhiūⁿ án-ni, bô chòe nn̄g ê, sī chòe chi̍t thé. 9 Só͘-í Siōng-tè só͘ phòe-ha̍p ê, lâng m̄ thang pun-khui i. 10 Ji̍p chhù ha̍k-seng koh chiong chit ê tāi-chì mn̄g I. 11 I kā in kóng, Hoān-nā lî-chhut i ê bó͘ lâi chhōa pa̍t-ê ê, sī kiâⁿ kan-îm lâi ko͘-hū i; 12 bó͘ nā khì-sak i ê tiōng-hu lâi kè pa̍t-ê, iā sī kiâⁿ kan-îm. 13 Ū lâng tòa sòe-kiáⁿ chiū-kūn Iâ-so͘ beh hō͘ I bong in; ha̍k-seng chek-pī in. 14 Iâ-so͘ khòaⁿ-kìⁿ án-ni, tōa bô hoaⁿ-hí, kā ha̍k-seng kóng, Iông-ún sòe-kiáⁿ chiū-kūn góa, bo̍h-tit kìm in; in-ūi Siōng-tè ê kok sī chit hō lâng ê. 15 Góa si̍t-chāi kā lín kóng, Hoān-nā sêng-chiap Siōng-tè ê kok bô chhin-chhiūⁿ sòe-kiáⁿ ê, koat-toàn bōe tit ji̍p-khì. 16 Chiū phō in, kā in hōaⁿ chhiú, chiok-hok in. 17 Iâ-so͘ chhut-khì tī lō͘-ni̍h, ū chi̍t lâng cháu chìn-chêng lâi kūi I, mn̄g kóng, Hó ê sian-siⁿ ah, góa tio̍h cháiⁿ-iūⁿ chòe, chiah thang sêng-chiap éng-oa̍h? 18 Iâ-so͘ kā i kóng, Lí siáⁿ-sū chheng-ho͘ góa sī hó ah? Bô chi̍t-ê hó, to̍k-to̍k Siōng-tè nā-tiāⁿ. 19 Chiah ê kài lí í-keng chai, Bo̍h-tit thâi-sí lâng, Bo̍h-tit kan-îm, Bo̍h-tit thau-the̍h, Bo̍h-tit lām-sám chòe kan-chèng, Bo̍h-tit khek-khui lâng, Tio̍h kèng lí ê pē-bú. 20 I ìn kóng, Sian-siⁿ ah, chiah-ê góa tùi sòe-hàn lóng siú i. 21 Iâ-so͘ khòaⁿ i, thiàⁿ i, chiū kā i kóng, Lí iáu khiàm chi̍t hāng; tio̍h khì bōe lī hoān só͘ ū ê, lâi hō͘ sòng-hiong lâng, chiū beh ū châi-pó tī thiⁿ-ni̍h, koh lâi tè góa. 22 I thiaⁿ chit ê ōe, bīn chiū sit-sek, iu-būn chiū khì. In-ūi i sán-gia̍p chin chōe. 23 Iâ-so͘ sì-kè khòaⁿ, kā I ê ha̍k-seng kóng, Pù lâng ji̍p Siōng-tè ê kok oh---ah. 24 Ha̍k-seng kî-koài I ê ōe; Iâ-so͘ koh ìn kóng, Sòe-kiáⁿ ah, óa-khò chîⁿ-châi ê lâng ji̍p Siōng-tè ê kok oh--ah. 25 Lo̍k-tô chhng-kè chiam-phīⁿ pí pù lâng ji̍p Siōng-tè ê kok iáu khah khoài. 26 Ha̍k-seng it-hoat gông-ngia̍h, kā I kóng, Án-ni chī-chūi ōe tit-tio̍h kiù ah? 27 Iâ-so͘ khòaⁿ in kóng, Chāi lâng sī bōe-ōe, chāi Siōng-tè chiū m̄ sī án-ni; in-ūi chāi Siōng-tè bān sū lóng ōe. 28 Pí-tek chiū kā I kóng, Goán bat pàng-sak it-chhè lâi tè lí. 29 Iâ-so͘ kóng, Góa si̍t-chāi kā lín kóng, Bô ū lâng ūi-tio̍h góa kap hok-im ê iân-kò͘ pàng-sak chhù-the̍h, hiaⁿ-tī, chí-bē, lāu-bú, lāu-pē, kiáⁿ-jî, chhân-hn̂g, 30 chiū tī hiān-sî bô tit-tio̍h pah pē, chiū-sī chhù-the̍h, hiaⁿ-tī, chí-bē, bú-chhin, kiáⁿ-jî, chhân-hn̂g, kiam ū khún-tio̍k, koh tī lâi-sè beh tit-tio̍h éng-oa̍h. 31 Chóng-sī tāi-seng ê chōe-chōe beh chòe lō͘-bé, lō͘-bé ê iā beh chòe tāi-seng. 32 In chiūⁿ Iâ-lō͘-sat-léng, tī lō͘-ni̍h Iâ-so͘ kiâⁿ tī thâu-chêng, ha̍k-seng gông-ngia̍h, tè ê lâng kiaⁿ-hiâⁿ. Iâ-so͘ koh tòa cha̍p-jī ê ha̍k-seng, chiong I só͘ beh tú-tio̍h ê sū kā in kóng, 33 Taⁿ lán chiūⁿ Iâ-lō͘-sat-léng, Jîn-chú beh siū kè-sàng hō͘ chiah ê chè-si-thâu, kap keng-ha̍k-sū; in beh gí I sí-chōe, iā beh kè-sàng I hō͘ gōa-pang-lâng; 34 in beh hì-lāng I, phùi-nōa I, piⁿ-phah I, hāi-sí I; kè saⁿ ji̍t I beh koh-oa̍h. 35 Se-pí-thài ê kiáⁿ Ngá-kok kap Iok-hān chiū-kūn lâi kā I kóng, Sian-siⁿ ah, kìⁿ-nā goán só͘ tùi lí kiû ê, ài lí kā goán kiâⁿ i. 36 I chiū kā in kóng, Ài góa kā lín kiâⁿ sím-mi̍h ah? 37 In kā I kóng, Chún goán tī lí ê êng-kng, chi̍t-ê chē lí ê chiàⁿ-pêng, chi̍t-ê chē lí ê tò-pêng. 38 Nā-sī Iâ-so͘ kā in kóng, Lín só͘ kiû ê, lín m̄ chai. Góa só͘ lim ê poe, lín ōe lim mah? góa só͘ siū ê sóe, lín ōe siū mah? 39 In kóng, Ōe. I kā in kóng, Góa só͘ lim ê poe, lín beh lim i, góa só͘ siū ê sóe, lín beh siū i; 40 chóng-sī chē góa ê chiàⁿ-pêng tò-pêng m̄ sī góa ōe thang hō͘ lâng, to̍k-to̍k ūi-tio̍h sím-mi̍h lâng pī-pān ê chiū hō͘ i. 41 Cha̍p-ê ha̍k-seng thiaⁿ-kìⁿ, chiū siū-khì Ngá-kok kap Iok-hān. 42 Iâ-so͘ kiò in lâi kā in kóng, Lín chai gōa-pang só͘ chun chòe jîn-kun ê chòe chú lâi tī-lí in, in ê tāi-jîn koán-hat in. 43 To̍k-to̍k lín tiong-kan m̄ sī án-ni; lín tiong-kan ài chòe tōa ê beh chòe lín ê chhe-ēng; 44 lín tiong-kan ài chòe thâu ê beh chòe chèng lâng ê lô͘-po̍k. 45 In-ūi Jîn-chú kàu m̄ sī beh chhe-ēng lâng, sī beh hō͘ lâng chhe-ēng, koh hiàn I ê sìⁿ-miā lâi sio̍k-hôe chōe-chōe lâng. 46 In kàu Iâ-lī-ko; Iâ-so͘ kap I ê ha̍k-seng kap tōa tīn lâng chhut Iâ-lī-ko ê sî, ū Tí-mái ê kiáⁿ, Pa-tí-mái, chiū-sī chhiⁿ-mî chòe khit-chia̍h ê, chē tī lō͘-piⁿ; 47 í-keng thiaⁿ-kìⁿ sī Ná-sat-le̍k lâng Iâ-so͘, chiū âu-kiò kóng, Tāi-pi̍t ê hō͘-è, Iâ-so͘, khó-lîn góa. 48 Chōe-chōe lâng chek-pī i, kah i chēng-chēng; nā-sī i it-hoat tōa siaⁿ âu-kiò kóng, Tāi-pi̍t ê hō͘-è ah, khó-lîn góa. 49 Iâ-so͘ thêng-kha kóng, Kiò i lâi. Chiū kiò chhiⁿ-mî lâng, kā i kóng, An lí ê sim, khí-lâi, I teh kiò lí ah. 50 I chiū pàng-sak i ê saⁿ, thiàu-khí-lâi khì chiū-kūn Iâ-so͘. 51 Iâ-so͘ ìn i kóng, Ài góa kā lí chòe sím-mi̍h? Chhiⁿ-mî lâng kā I kóng, Lia̍p-pho-nî, góa ài tit-tio̍h khòaⁿ-kìⁿ. 52 Iâ-so͘ kā i kóng, Khì ah, lí ê sìn ū kiù lí lah. I liâm-piⁿ tit-tio̍h khòaⁿ-kìⁿ, chiū tī lō͘-ni̍h tè Iâ-so͘.
1 In行近耶路撒冷，到橄欖山邊ê Pek-hoat-kî kap伯大尼ê時， 2 耶穌差兩個學生，kā in講，Lín去對面ê鄉社，已經入去就beh tú-tio̍h一隻驢á縛tī hia，iáu-bē bat有人騎ê；tháu開kā伊牽來。 3 若有人問lín講，啥事做án-ni？lín就tio̍h講，主欠用伊；liâm-pjn beh hō͘伊tò來chia。 4 兩人就去，tú-tio̍h一隻驢á，tī路裡ê oat角，縛tī門外，就tháu伊。 5 邊頭khiā ê人有ê講，Lín tháu驢á beh啥事？ 6 In照耶穌所講ê kā in講；hiahê人就放hō͘伊去。 7 In就牽驢á就近耶穌，續用家己ê衫phoa̍h tī hit頂面；耶穌就騎伊。 8 有chōe-chōe人用in ê衫鋪tī路裡；也有ê用樹枝，就是tùi園裡所chhò來ê。 9 前行後tè ê叫講，和散那，tī主ê名來ê，應該得tio̍h o-ló； 10 hitê teh-beh來ê國，就是咱ê祖公大衛ê國，應該得tio̍h o-ló ah；tī至koân ê位ah，和散那。 11 耶穌入耶路撒冷，入殿堂；四界看ta̍k項ê物；日已經暗，就kap十二個學生出去到伯大尼。 12 隔日，in tùi伯大尼出來，耶穌iau。 13 遠遠看見一叢無花果樹有葉，就去看tī hit頂面有所得tio̍h無；已經到，竟然無所得tio̍h，只有葉nā-tiāⁿ；因為m̄是無花果ê時； 14 就tùi hit叢樹講，Taⁿ了後永永無人食tio̍h你ê果子。伊ê學生也聽見。 15 In到耶路撒冷，耶穌入殿；就趕出殿內買賣ê人，chhia-tó換錢ê人ê 桌，kap賣鴿á ê人ê椅； 16 續m̄准人帶器具tùi殿裡經過。 17 Koh教示in講，Kiám無記載講，我ê厝beh稱做萬邦祈禱ê厝mah？但是lín hō͘伊做賊巢。 18 Chiahê祭司頭kap經學士聽見，就chhē看thang怎樣來滅伊，因為驚伊；是眾人lóng奇怪伊ê教示。 19 Ta̍k ê-hng耶穌出城去。 20 早起時，in tùi hia經過，就看見hit叢無花果樹根枝lóng枯焦去。 21 彼得記得就kā伊講，拉比，你看，你所咒詛 ê無花果樹已經乾去。 22 耶穌應講，Lín tio̍h信上帝。 23 我實在kā lín講，凡若kā chitê山講，徙去，hiat tī海裡，心內無僥疑，獨獨信伊所講ê的確成，就beh kā伊成。 24 所以我kā lín講，見若lín所祈禱來求ê，tio̍h信是已經得tio̍h，就beh kā lín成。 25 見若Lín khiā-teh祈禱ê時想tio̍h有人得罪你甚麼，就tio̍h赦免伊；hō͘ lín tī天裡ê父也赦免lín ê過失。 26 27 In koh到耶路撒冷；耶穌tī殿內teh行ê時，hiahê祭司頭經學士kap長老就近伊講， 28 你用甚麼權行chiahê事？koh 是誰 hō͘你chitê 權thang行伊ah？ 29 耶穌就kā in講，我也問lín一句話；lín若應我，我chiah beh kā lín講我用甚麼權行chiahê事。 30 約翰ê洗禮是tùi天á是tùi人ah？lín tio̍h應我。 31 In saⁿ-kap議論講，若講，Tùi天，伊beh講，Án-ni lín啥事m̄信伊？ 32 若講，Tùi人，—in就kiaⁿ百姓，因為眾人實在掠約翰做先知。 33 就應耶穌講，阮m̄知。耶穌就kā in講，我也無beh kā lín講我是用甚麼權行chiahê事。
1 In kiâⁿ kūn Iâ-lō͘-sat-léng, kàu Kaⁿ-ná soaⁿ-piⁿ ê Pek-hoat-kî kap Pek-tāi-nî ê sî, 2 Iâ-so͘ chhe nn̄g ê ha̍k-seng, kā in kóng, Lín khì tùi-bīn ê hiuⁿ-siā, í-keng ji̍p-khì chiū beh tú-tio̍h chi̍t chiah lû-á pa̍k tī hia, iáu-bē bat ū lâng khiâ ê; tháu-khui kā i khan lâi. 3 Nā ū lâng mn̄g lín kóng, Siáⁿ-sū chòe án-ni? lín chiū tio̍h kóng, Chú khiàm-ēng i; liâm-piⁿ beh hō͘ i tò-lâi chia. 4 Nn̄g lâng chiū khì, tú-tio̍h chi̍t chiah lû-á, tī lō͘-ni̍h ê oat-kak, pa̍k tī mn̂g-gōa, chiū tháu i. 5 Piⁿ-thâu khiā ê lâng ū-ê kóng, Lín tháu lû-á beh siáⁿ-sū? 6 In chiàu Iâ-so͘ só͘ kóng ê kā in kóng; hiah ê lâng chiū pàng hō͘ i khì. 7 In chiū khan lû-á chiū-kūn Iâ-so͘, sòa ēng ka-kī ê saⁿ phoa̍h tī hit téng-bīn; Iâ-so͘ chiū khiâ i. 8 Ū chōe-chōe lâng ēng in ê saⁿ pho͘ tī lō͘-ni̍h; iā ū-ê ēng chhiū-ki, chiū-sī tùi hn̂g-ni̍h só͘ chhò lâi ê. 9 Chêng kiâⁿ āu tè ê kiò kóng, Hô-sàn-ná, tī Chú ê miâ lâi ê, eng-kai tit-tio̍h o-ló; 10 hit-ê teh-beh lâi ê kok, chiū-sī lán ê chó͘-kong Tāi-pi̍t ê kok, eng-kai tit-tio̍h o-ló ah; tī chì-koâiⁿ ê ūi ah, Hô-sàn-ná. 11 Iâ-so͘ ji̍p Iâ-lō͘-sat-léng, ji̍p tiān-tn̂g; sì-kè khòaⁿ ta̍k hāng ê mi̍h; ji̍t í-keng àm, chiū kap cha̍p-jī ê ha̍k-seng chhut-khì kàu Pek-tāi-nî. 12 Keh ji̍t, in tùi Pek-tāi-nî chhut-lâi, Iâ-so͘ iau. 13 Hn̄g-hn̄g khòaⁿ-kìⁿ chi̍t châng bû-hoa-kó chhiū ū hio̍h, chiū khì khòaⁿ tī hit téng-bīn ū só͘ tit-tio̍h bô; í-keng kàu, kèng-jiân bô só͘ tit-tio̍h, chí ū hio̍h nā-tiāⁿ; in-ūi m̄ sī bû-hoa-kó ê sî; 14 chiū tùi hit châng chhiū kóng, Taⁿ liáu-āu éng-éng bô lâng chia̍h-tio̍h lí ê ké-chí. I ê ha̍k-seng iā thiaⁿ-kìⁿ. 15 In kàu Iâ-lō͘-sat-léng, Iâ-so͘ ji̍p tiān; chiū kóaⁿ-chhut tiān-lāi bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í; 16 sòa m̄ chún lâng tòa khì-kū tùi tiān-ni̍h keng-kè. 17 Koh kà-sī in kóng, Kiám bô kì-chài kóng, Góa ê chhù beh chheng chòe bān pang kî-tó ê chhù mah? nā-sī lín hō͘ i chòe chha̍t-siū. 18 Chiah ê chè-si-thâu kap keng-ha̍k-sū thiaⁿ-kìⁿ, chiū chhē-khòaⁿ thang cháiⁿ-iūⁿ lâi bia̍t I, in-ūi kiaⁿ I; sī chèng lâng lóng kî-koài I ê kà-sī. 19 Ta̍k ê-hng Iâ-so͘ chhut siâⁿ khì. 20 Chá-khí sî in tùi hia keng-kè, chiū khòaⁿ-kìⁿ hit châng bû-hoa-kó chhiū kun-ki lóng ko͘-tâ-khì. 21 Pí-tek kì-tit chiū kā I kóng, Lia̍p-pí, lí khòaⁿ, lí só͘ chiù-chó͘ ê bû-hoa-kó chhiū í-keng ta-khì. 22 Iâ-so͘ ìn kóng, Lín tio̍h sìn Siōng-tè. 23 Góa si̍t-chāi kā lín kóng, Hoān-nā kā chit ê soaⁿ kóng, Sóa-khì, hiat tī hái-ni̍h, sim-lāi bô giâu-gî, to̍k-to̍k sìn i só͘ kóng ê tek-khak chiâⁿ, chiū beh kā i chiâⁿ. 24 Só͘-í góa kā lín kóng, Kìⁿ-nā lín só͘ kî-tó lâi kiû ê, tio̍h sìn sī í-keng tit-tio̍h, chiū beh kā lín chiâⁿ. 25 Kìⁿ-nā lín khiā-teh kî-tó ê sî siūⁿ-tio̍h ū lâng tek-chōe lí sím-mi̍h, chiū tio̍h sià-bián i; hō͘ lín tī thiⁿ-ni̍h ê Pē iā siá-bián lín ê kè-sit. 26 27 In koh kàu Iâ-lō͘-sat-léng; Iâ-so͘ tī tiān-lāi teh kiâⁿ ê sî, hiah ê chè-si-thâu keng-ha̍k-sū kap tiúⁿ-ló chiū-kūn I kóng, 28 Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân thang kiâⁿ i ah? 29 Iâ-so͘ chiū kā in kóng, Góa iā mn̄g lín chi̍t kù ōe; lín nā ìn góa, góa chiah beh kā lín kóng góa ēng sím-mi̍h koân kiâⁿ chiah ê sū. 30 Iok-hān ê sóe-lé sī tùi thiⁿ á-sī tùi lâng ah? lín tio̍h ìn góa. 31 In saⁿ-kap gī-lūn kóng, Nā kóng, Tùi thiⁿ, I beh kóng, Án-ni lín siáⁿ-sū m̄ sìn i? 32 Nā kóng, Tùi lâng,—in chiū kiaⁿ peh-sìⁿ, in-ūi chèng lâng si̍t-chāi lia̍h Iok-hān chòe sian-ti. 33 Chiū ìn Iâ-so͘ kóng, Goán m̄ chai. Iâ-so͘ chiū kā in kóng, Góa iā bô beh kā lín kóng góa sī ēng sím-mi̍h koân kiâⁿ chiah ê sū.
1 耶穌就用譬喻tùi in講，有一人栽葡萄園，用籬笆圍伊，開一孔來做酒窟，起一座守更樓，租hō͘佃戶，就去別所在。 2 到期差一个奴僕就近佃戶，beh tùi佃戶收園內ê果子。 3 佃戶掠來phah伊，hō͘伊空空tò去。 4 Koh差別個奴僕就近in，佃戶傷伊ê頭殼，koh凌辱伊。 5 Koh差別個奴僕，in就刣死伊。Koh差chōe-chōe奴僕，有ê hō͘ in phah，也有ê hō͘ in 刣死。 6 伊iáu有一个，是伊所疼ê Kiáⁿ，路尾也差伊就近in；phah算講，In beh尊敬我ê Kiáⁿ。 7 但是chiahê佃戶saⁿ-kap講，chitê是伊ê後嗣；咱來kā伊刣死，業就歸咱。 8 就掠來kā伊害死，將伊hiat tī葡萄園外。 9 Án-ni園主beh怎樣做 ah？伊beh來滅chiahê佃戶，將伊ê園交帶別人。 10 聖經所記載講， 師傅所棄sak ê石， 成做厝角頭ê石； 11 這是主所成ê， 咱ê目睭看做奇怪， 12 Lín kiám bē讀mah？Hiah-ê人知chitê譬喻是指in來講，就ài beh掠伊，總是驚眾人。就離開伊去。 13 後來差法利賽kap希律黨kúi-nā人就近伊，ài就伊所講ê話來tng伊。 14 已經到，kā伊講，先生ah，阮知你是真實，也無掠甚麼人做要緊，因為你無看人ê外貌，就是真實將上帝ê路來教示人； 15 納稅hō͘該撒合宜，á無？阮tio̍h納á m̄免？但是耶穌知in ê假好，就kā in講，Lín啥事試我ah？The̍h一个銀á hō͘我看。 16 In就the̍h來。耶穌kā in講，Chitê像kap號是是誰？ 17 In kā伊講，該撒。耶穌kā in講，Lín tio̍h將該撒ê物納 hō͘該撒，將上帝ê物納 hō͘上帝。In大奇怪伊。 18 有撒都該人，就是講人無koh活ê，就近伊， 19 問講，先生ah，摩西寫來指示阮講，若有人伊ê兄死，留伊ê bó͘ tī-teh，也無留kiáⁿ，伊ê小弟tio̍h chhōa伊ê bó͘，生kiáⁿ來續接伊ê兄。 20 有兄弟七人，大ê娶bó͘，死也無留kiáⁿ。 21 第二ê娶伊，也無留kiáⁿ，就死；第三ê也是án-ni。 22 In七人lóng無留kiáⁿ。到路尾，婦人人也死。 23 到koh活ê時伊beh做in中間tá-lo̍h一个ê bó͘；因為chit七人lóng有娶伊。 24 耶穌kā in講，Lín ê 錯kiám m̄是tùi m̄-bat聖經kap上帝ê 權mah？ 25 因為tùi死人中koh活ê時，無嫁無娶，是親像天使tī天裡。 26 Taⁿ論死人koh活，Lín kiám bē讀tio̍h摩西ê冊，刺phè hit篇所記ê，上帝kā摩西講，我是亞伯拉罕ê上帝，以撒ê上帝，雅各ê上帝； 27 伊m̄是死人ê上帝，是活人ê上帝；lín有大大錯lah。 28 有經學士一人到，聽in辯論，知耶穌gâu應，就問伊講，Chiahê誡命中tá-lo̍h一條是第一要緊？ 29 耶穌應講，Hit-ê第一要緊ê是講，以色列ah，tio̍h聽；主咱ê上帝是獨一ê主； 30 你tio̍h盡心，盡性，盡意，盡力疼主，就是你ê上帝。 31 第二ê講，Tio̍h疼你ê厝邊親像家己。其餘ê誡命bē有比chit兩條khah大ê。 32 經學士kā伊講，好ah，先生ah，你所講ê真正tio̍h，上帝只有一个，以外無別ê； 33 若盡心，盡智，盡力疼伊，koh疼厝邊親像家己，就贏過lóng總kui隻cheng-siⁿ ê燒祭，kap祭祀。 34 耶穌看見伊應了真通，就kā伊講，你離開上帝國無遠lah。Tùi hit時無人敢koh問伊。 35 耶穌tī殿堂教示in講，Chiahê經學士怎樣講，基督做大衛ê後裔mah？ 36 大衛hō͘聖神感動來家己講， 主kā我ê主講， 坐我ê大pêng， thèng候我將你chiahê對敵做你ê腳踏椅。 37 大衛既然家己稱伊做主，就基督àn怎樣做伊ê後裔？眾人lóng歡喜聽伊。 38 耶穌教示ê時koh講，Tio̍h持防hiahê經學士，in ài穿長衫，四界行，ài tī街市裡hō͘人請安， 39 會堂內坐高位，筵桌裡坐大位； 40 in hiau吞守寡人ê家伙，假意長長祈禱。In beh受罪koh-khah重。 41 耶穌坐tī庫房ê對面；眾人teh用錢hiat落庫房；有chōe-chōe富人用chōe-chōe錢hiat落去。 42 有一个sòng-hiong ê守寡人來hiat兩個半釐ê，就是一釐。 43 耶穌就叫伊ê學生來kā in講，我實在kā lín講，Chitê sòng-hiong ê守寡人所hiat ê比眾hiat落庫房ê khah chōe。 44 因為hiahê眾人是tùi in有chhun ê來hiat；但是chitê婦人人是tùi tī伊ê無夠，來一盡hiat伊所有ê，就是伊所óa靠來活ê。
1 Iâ-so͘ chiū ēng phì-jū tùi in kóng, Ū chi̍t lâng chai phû-tô-hn̂g, ēng lî-pa ûi i, khui chi̍t khang lâi chòe chiú-khut, khí chi̍t chō chiú-kiⁿ-lâu, cho͘ hō͘ tiān-hō͘, chiū khì pa̍t só͘-chāi. 2 Kàu kî chhe chi̍t ê lô͘-po̍k chiū-kūn tiān-hō͘, beh tùi tiān-hō͘ siu hn̂g-lāi ê ké-chí. 3 Tiān-hō͘ lia̍h lâi phah i, hō͘ i khang-khang tò-khì. 4 Koh chhe pa̍t ê lô͘-po̍k chiū-kūn in, tiān-hō͘ siong i ê thâu-khak, koh lêng-jio̍k i. 5 Koh chhe pa̍t ê lô͘-po̍k, in chiū thâi-sí i. Koh chhe chōe-chōe lô͘-po̍k, ū-ê hō͘ in phah, iā ū-ê hō͘ in thâi-sí. 6 I iáu ū chi̍t-ê, sī i só͘ thiàⁿ ê kiáⁿ, lō͘-bé iā chhe i chiū-kūn in; phah-sǹg kóng, In beh chun-kèng góa ê kiáⁿ. 7 Nā-sī chiah ê tiān-hō͘ saⁿ-kap kóng, chit-ê sī i ê hō͘-sû; lán lâi kā i thâi-sí, gia̍p chiū kui lán. 8 Chiū lia̍h lâi kā i hāi-sí, chiong i hiat tī phû-tô-hn̂g gōa. 9 Án-ni hn̂g-chú beh cháiⁿ-iūⁿ chòe ah? I beh lâi bia̍t chiah ê tiān-hō͘, chiong i ê hn̂g kau-tāi pa̍t lâng. 10 Sèng-keng só͘ kì-chài kóng, Sai-hū só͘ khì-sak ê chio̍h, Chiâⁿ chòe chhù-kak thâu ê chio̍h; 11 Che sī Chú só͘ chiâⁿ ê, Lán ê ba̍k-chiu khòaⁿ chòe kî-koài, 12 Lín kiám bē tha̍k mah? Hiah ê lâng chai chit ê phì-jū sī chí in lâi kóng, chiū ài beh lia̍h I, chóng-sī kiaⁿ chèng lâng. Chiū lī-khui I khì. 13 Āu-lâi chhe Hoat-lī-sài kap Hi-lu̍t tóng kúi-nā lâng chiū-kūn I, ài chiū I só͘ kóng ê ōe lâi tng I. 14 Í-keng kàu, kā I kóng, Sian-siⁿ ah, goán chai lí sī chin-si̍t, iā bô lia̍h sím-mi̍h lâng chòe iàu-kín, in-ūi lí bô khòaⁿ lâng ê gōa-māu, chiū-sī chin-si̍t chiong Siōng-tè ê lō͘ lâi kà-sī lâng; 15 La̍p sè hō͘ Kai-sat ha̍p-gî, á bô? Goán tio̍h la̍p á m̄ bián? Nā-sī Iâ-so͘ chai in ê ké-hó, chiū kā in kóng, Lín siáⁿ-sū chhì góa ah? The̍h chi̍t ê gûn-á hō͘ góa khòaⁿ. 16 In chiū the̍h-lâi. Iâ-so͘ kā in kóng, Chit ê siōng kap hō sī chī-chūi? 17 In kā I kóng, Kai-sat. Iâ-so͘ kā in kóng, Lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè. In tōa kî-koài I. 18 Ū Sat-thó͘-kai lâng, chiū-sī kóng lâng bô koh-oa̍h ê, chiū-kūn I, 19 mn̄g kóng, Sian-siⁿ ah, Mô͘-se siá lâi chí-sī goán kóng, nā ū lâng i ê hiaⁿ sí, lâu i ê bó͘ tī-teh, iā bô lâu kiáⁿ, i ê sió-tī tio̍h chhōa i ê bó͘, siⁿ kiáⁿ lâi sòa-chiap i ê hiaⁿ. 20 Ū hiaⁿ-tī chhit lâng, tōa-ê chhōa bó͘, sí iā bô lâu kiáⁿ. 21 Tē jī ê chhōa i, iā bô lâu kiáⁿ, chiū sí; tē saⁿ ê iā sī án-ni. 22 In chhit lâng lóng bô lâu kiáⁿ. Kàu lō͘-bé, hū-jîn-lâng iā sí. 23 Kàu koh-oa̍h ê sî i beh chòe in tiong-kan tá-lo̍h chi̍t-ê ê bó͘; in-ūi chí chhit lâng lóng ū chhōa i. 24 Iâ-so͘ kā in kóng, Lín ê chhò kiám m̄ sī tùi m̄ bat sèng-keng kap Siōng-tè ê koân mah? 25 In-ūi tùi sí-lâng tiong koh-oa̍h ê sî, bô kè bô chhōa, sī chhin-chhiūⁿ thiⁿ-sài tī thiⁿ-ni̍h. 26 Taⁿ lūn sí-lâng koh-oa̍h, lín kiám bē tha̍k-tio̍h Mô͘-se ê chheh, Chhì-phè hit phiⁿ só͘ kì ê, Siōng-tè kā Mô͘-se kóng, Góa sī A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè; 27 I m̄ sī sí-lâng ê Siōng-tè, sī oa̍h-lâng ê Siōng-tè; lín ū tōa-tōa chhò lah. 28 Ū keng-ha̍k-sū chi̍t lâng kàu, thiaⁿ in piān-lūn, chai Iâ-so͘ gâu ìn, chiū mn̄g I kóng, Chiah ê kài-bēng tiong tá-lo̍h chi̍t tiâu sī tē it iàu-kín? 29 Iâ-so͘ ìn kóng, Hit-ê tē it iàu-kín ê sī kóng, Í-sek-lia̍t ah, tio̍h thiaⁿ; Chú lán ê Siōng-tè sī to̍k-it ê Chú; 30 lí tio̍h chīn sim, chīn sèng, chīn ì, chīn la̍t thiàⁿ Chú, chiū-sī lí ê Siōng-tè. 31 Tē jī ê kóng, Tio̍h thiàⁿ lí ê chhù-piⁿ chhin-chhiūⁿ ka-kī. Kî-û ê kài-bēng bē ū pí chí nn̄g tiâu khah tōa ê. 32 Keng-ha̍k-sū kā I kóng, Hó ah, sian-siⁿ ah, lí só͘ kóng ê chin-chiàⁿ tio̍h, Siōng-tè chí ū chi̍t-ê, í-gōa bô pa̍t-ê; 33 nā chīn sim, chīn tì, chīn la̍t thiàⁿ I, koh thiàⁿ chhù-piⁿ chhin-chhiūⁿ ka-kī, chiū iâⁿ-kè lóng-chóng kui chiah cheng-siⁿ ê sio-chè, kap chè-sū. 34 Iâ-so͘ khòaⁿ-kìⁿ i ìn-liáu chin thong, chiū kā i kóng, Lí lī-khui Siōng-tè kok bô hn̄g lah. Tùi hit sî bô lâng káⁿ koh mn̄g I. 35 Iâ-so͘ tī tiān-tn̂g kà-sī in kóng, Chiah ê keng-ha̍k-sū cháiⁿ-iūⁿ kóng, Ki-tok chòe Tāi-pi̍t ê hō͘-è mah? 36 Tāi-pi̍t hō͘ Sèng Sîn kám-tōng lâi ka-kī kóng, Chú kā góa ê Chú kóng, Chē góa ê tōa pêng, Thèng-hāu góa chiong lí chiah ê tùi-te̍k chòe lí ê kha-ta̍h-í. 37 Tāi-pi̍t kì-jiân ka-kī chheng I chòe Chú, chiū Ki-tok àn-cháiⁿ-iūⁿ chòe i ê hō͘-è? Chèng lâng lóng hoaⁿ-hí thiaⁿ I. 38 Iâ-so͘ kà-sī ê sî koh kóng, Tio̍h tî-hông hiah ê keng-ha̍k-sū, in ài chhēng tn̂g saⁿ, sì-kè kiâⁿ, ài tī koe-chhī-ni̍h hō͘ lâng chhéng-an, 39 hōe-tn̂g lāi chē koâiⁿ ūi, iân-toh-ni̍h chē tōa ūi; 40 in hiau-thun chiú-kóaⁿ-lâng ê ke-hé, ké-ì tn̂g-tn̂g kî-tó. In beh siū-chōe koh khah tāng. 41 Iâ-so͘ chē tī khò͘-pâng ê tùi-bīn; chèng lâng teh ēng chîⁿ hiat-lo̍h khò͘-pâng; ū chōe-chōe pù lâng ēng chōe-chōe chîⁿ hiat-lo̍h-khì. 42 Ū chi̍t ê sòng-hiong ê chiú-kóaⁿ lâng lâi hiat nn̄g ê pòaⁿ-lî ê, chiū-sī chi̍t lî. 43 Iâ-so͘ chiū kiò I ê ha̍k-seng lâi kā in kóng, Góa si̍t-chāi kā lín kóng, Chit ê sòng-hiong ê chiú-kóaⁿ lâng só͘ hiat ê pí chèng hiat-lo̍h khò͘-pâng ê khah chōe. 44 In-ūi hiah ê chèng lâng sī tùi in ū chhun ê lâi hiat; nā-sī chit ê hū-jîn-lâng sī tùi tī i ê bô kàu, lâi it-chīn hiat i só͘ ū ê, chiū-sī i só͘ óa-khò lâi oa̍h ê.
1 耶穌出殿 ê時，有一个學生kā伊講，先生，你看leh，chit號石，chit號厝宅！ 2 耶穌kā伊講，你看chiahê大厝mah？Tī chia beh無一塊石留tī石ê頂面，也無chhia落去。 3 耶穌tī橄欖山坐tī殿 ê對面；彼得、雅各、約翰kap安得烈暗靜問伊講， 4 請kā阮講，甚麼時有chiahê事？Koh chiahê事beh成ê時有甚麼兆頭ah？ 5 耶穌chiah kā in講，Lín tio̍h謹慎，莫得hō͘人迷惑。 6 Beh有chōe-chōe人託我ê名來講，我就是基督，來迷惑chōe-chōe人。 7 Koh lín聽見交戰kap交戰ê風聲ê時，莫得驚；因為chiahê事的確有，總是末期iáu-bē到。 8 因為百姓beh起來攻擊百姓，國也beh攻擊國；ta̍k所在beh有地動，也beh有飢荒；chiahê事就是苦痛ê起頭。 9 但是lín tio̍h家己謹慎，因為人beh將lín送交公會，lín beh受phah tī會堂裡；也beh為tio̍h我ê緣故khiā tī官府kap君王ê面前，來對in做干證。 10 總是福音的確事先傳tī萬邦。 11 人拖lín，將lín送交ê時，莫得事先掛慮beh怎樣講；當hit時所賞賜lín講ê lín tio̍h講伊；因為m̄是lín家己講，就是聖神teh講。 12 兄弟beh將兄弟送交去死；父款待kiáⁿ也是án-ni；kiáⁿ兒beh起來攻擊父母hō͘伊死。 13 也lín因為我ê名beh hō͘眾人怨恨；獨獨吞忍到路尾ê，伊beh得tio̍h救。 14 總是lín看見hitê殘害可惡ê khiā tī伊m̄應該khiā ê所在(讀ê人tio̍h曉悟)，hit時tī偤太ê tio̍h走去山裡； 15 tī厝頂ê莫得入去厝內the̍h甚麼； 16 tī園裡ê莫得tò來hiaⁿh伊ê衫。 17 當hiahê日有身孕kap hō͘嬰á食奶ê婦人人有災禍！ 18 Lín tio̍h祈禱免得冬天時tú-tio̍h chitê事。 19 因為hiahê日beh有患難，就是tùi上帝創造世間ê起頭，到chit tia̍p bē有án-ni，後來也無。 20 若m̄是主減少hiahê日，就凡有肉體ê無一个得救。總是為tio̍h揀ê百姓，就是伊所揀ê ê緣故，伊有減少hiahê日。 21 Hit時若有人kā lín講，基督tī chia，á是講，Tī hia，莫得信。 22 因為beh有假基督、假先知起來，行神蹟kap兆頭；beh是會，連揀ê百姓，也迷惑in。 23 總是lín tio̍h謹慎；我已經事先lóng kā lín講。 24 當hiahê日，hitê患難ê了後，日beh烏暗，月無出伊ê 光， 25 星tùi天ka-la̍uh，tī天裡ê象beh振動。 26 Hit時beh看見人子用大權能kap榮光，tī雲中臨到。 27 Hit時伊beh差伊ê天使tùi四方聚集伊所揀ê百姓，tùi地極到天邊。 28 Lín tio̍h學無花果樹chitê譬喻；當枝軟葉發ê時，lín就知夏天近lah。 29 Án-ni lín看chiahê事，tio̍h知是近，到門口lah。 30 我實在kā lín講，Chit世代iáu-bē過去，到chiahê tāi-chì lóng成。 31 天地beh廢無，我ê話bōe廢無。 32 但是論hit日hit時人m̄知，tī天裡ê天使也m̄知。Kiáⁿ也m̄知，獨獨父知伊。 33 Tio̍h謹慎警醒來祈禱，因為lín m̄知hitê期是tī甚麼時。 34 是親像一人離開伊ê家，去出外，將權交帶伊chiahê奴僕，有派工hō͘ ta̍k人做，koh吩咐顧門ê tio̍h tiuⁿ-tî。 35 所以lín tio̍h tiuⁿ-tî，因為lín m̄知lín ê主甚麼時beh來，或是日暗，或是半暝，或是雞啼，或是天光早； 36 驚了伊忽然來tú-tio̍h lín teh睏。 37 我所kā lín講ê，也kā眾人講，Tio̍h tiuⁿ-tî。
1 Iâ-so͘ chhut tiān ê sî ū chi̍t ê ha̍k-seng kā I kóng, Sian-siⁿ, lí khòaⁿ-leh, chit hō chio̍h, chit hō chhù-the̍h! 2 Iâ-so͘ kā i kóng, Lí khòaⁿ chiah ê tōa chhù mah? Tī chia beh bô chi̍t tè chio̍h lâu tī chio̍h ê téng-bīn, iā bô chhia-lo̍h-khì. 3 Iâ-so͘ tī Kaⁿ-ná soaⁿ chē tī tiān ê tùi-bīn; Pí-tek, Ngá-kok, Iok-hān kap An-tek-lia̍t àm-chīⁿ mn̄g I kóng, 4 Chhiáⁿ kā goán kóng, sím-mi̍h sî ū chiah ê sū? Koh chiah ê sū beh chiâⁿ ê sî ū sím-mi̍h tiāu-thâu ah? 5 Iâ-so͘ chiah kā in kóng, Lín tio̍h kín-sīn, bo̍h-tit hō͘ lâng bê-he̍k. 6 Beh ū chōe-chōe lâng thok góa ê miâ lâi kóng, Góa chiū-sī Ki-tok, lâi bê-he̍k chōe-chōe lâng. 7 Koh lín thiaⁿ-kìⁿ kau-chiàn kap kau-chiàn ê hong-siaⁿ ê sî, bo̍h-tit kiaⁿ; in-ūi chiah ê sū tek-khak ū, chóng-sī boa̍t-kî iáu-bē kàu. 8 In-ūi peh-sìⁿ beh khí-lâi kong-kek peh-sìⁿ, kok iā beh kong-kek kok; ta̍k só͘-chāi beh ū tōe-tāng, iā beh ū ki-hng; chiah ê sū chiū-sī khó͘-thàng ê khí-thâu. 9 Nā-sī lín tio̍h ka-kī kín-sīn, in-ūi lâng beh chiong lín sàng-kau kong-hōe, lín beh siū phah tī hōe-tn̂g-ni̍h; iā beh ūi-tio̍h góa ê iân-kò͘ khiā tī koaⁿ-hú kap kun-ông ê bīn-chêng, lâi tùi in chòe kan-chèng. 10 Chóng-sī hok-im tek-khak tāi-seng thoân tī bān pang. 11 Lâng thoa lín, chiong lín sàng-kau ê sî, bo̍h-tit tāi-seng khòa-lū beh cháiⁿ-iūⁿ kóng; tng hit sî só͘ siúⁿ-sù lín kóng ê lín tio̍h kóng i; in-ūi m̄ sī lín ka-kī kóng, chiū-sī Sèng Sîn teh kóng. 12 Hiaⁿ-tī beh chiong hiaⁿ-tī sàng-kau khì sí; pē khoán-thāi kiáⁿ iā sī án-ni; kiáⁿ-jî beh khí-lâi kong-kek pē-bú hō͘ i sí. 13 Iā lín in-ūi góa ê miâ beh hō͘ chèng lâng oàn-hūn; to̍k-to̍k thun-lún kàu lō͘-bé ê, i beh tit-tio̍h kiù. 14 Chóng-sī lín khòaⁿ-kìⁿ hit ê chân-hāi khó-ò͘ⁿ ê khiā tī i m̄ eng-kai khiā ê só͘-chāi (tha̍k ê lâng tio̍h hiáu-ngō͘), hit sî tī Iû-thài ê tio̍h cháu-khì soaⁿ-ni̍h; 15 tī chhù-téng ê bo̍h-tit ji̍p-khì chhù-lāi the̍h sím-mi̍h; 16 tī hn̂g-ni̍h ê bo̍h-tit tò-lâi hiaⁿh i ê saⁿ. 17 Tng hiah ê ji̍t ū sin-īn kap hō͘ eⁿ-á chia̍h lin ê hū-jîn-lâng ū chai-ē! 18 Lín tio̍h kî-tó bián-tit tang-thiⁿ sî tú-tio̍h chit ê sū. 19 In-ūi hiah ê ji̍t beh ū hoān-lān, chiū-sī tùi Siōng-tè chhòng-chō sè-kan ê khí-thâu, kàu chit tia̍p bē ū án-ni, āu-lâi iā bô. 20 Nā m̄ sī Chú kiám-chió hiah ê ji̍t, chiū hoān ū jio̍k-thé ê bô chi̍t-ê tit kiù. Chóng-sī ūi-tio̍h kéng ê peh-sìⁿ, chiū-sī I só͘ kéng ê, ê iân-kò͘, I ū kiám-chió hiah ê ji̍t. 21 Hit sî nā ū lâng kā lín kóng, Ki-tok tī chia, á-sī kóng, Tī hia, bo̍h-tit sìn. 22 In-ūi beh ū ké Ki-tok, ké sian-ti khí-lâi, kiâⁿ sîn-jiah kap tiāu-thâu; beh sī ōe, liân kéng ê peh-sìⁿ, iā bê-he̍k in. 23 Chóng-sī lín tio̍h kín-sīn; góa í-keng tāi-seng lóng kā lín kóng. 24 Tng hiah ê ji̍t, hit ê hoān-lān ê liáu-āu, ji̍t beh o͘-àm, ge̍h bô chhut i ê kng, 25 chhiⁿ tùi thiⁿ ka-la̍uh, tī thiⁿ-ni̍h ê siōng beh tín-tāng. 26 Hit sî beh khòaⁿ-kìⁿ Jîn-chú ēng tōa koân-lêng kap êng-kng, tī hûn-tiong lîm-kàu. 27 Hit sî I beh chhe I ê thiⁿ-sài tùi sì-hng chū-chi̍p I só͘ kéng ê peh-sìⁿ, tùi tōe-ke̍k kàu thiⁿ-piⁿ. 28 Lín tio̍h o̍h bû-hoa-kó chhiū chit ê phì-jū; tng ki nńg hio̍h hoat ê sî, lín chiū chai hē-thiⁿ kūn lah. 29 Án-ni lín khòaⁿ chiah ê sū, tio̍h chai sī kūn, kàu mn̂g-kháu lah. 30 Góa si̍t-chāi kā lín kóng, Chit sè-tāi iáu-bē kè-khì, kàu chiah ê tāi-chì lóng chiâⁿ. 31 Thiⁿ tōe beh hòe-bô, góa ê ōe bōe hòe-bô. 32 Nā-sī lūn hit ji̍t hit sî lâng m̄ chai, tī thiⁿ-ni̍h ê thiⁿ-sài iā m̄ chai. Kiáⁿ iā m̄ chai, to̍k-to̍k Pē chai i. 33 Tio̍h kín-sīn kéng-séng lâi kî-tó, in-ūi lín m̄ chai hit ê kî sī tī sím-mi̍h sî. 34 Sī chhin-chhiūⁿ chi̍t lâng lī-khui i ê ke, khì chhut-gōa, chiong koân kau-tāi i chiah ê lô͘-po̍k, ū phài kang hō͘ ta̍k lâng chòe, koh hoan-hù kò͘-mn̂g ê tio̍h tiuⁿ-tî. 35 Só͘-í lín tio̍h tiuⁿ-tî, in-ūi lín m̄ chai lín ê Chú sím-mi̍h sî beh lâi, he̍k-sī ji̍t-àm, he̍k-sī pòaⁿ-mî, he̍k-sī koe thî, he̍k-sī thiⁿ-kng chá; 36 kiaⁿ-liáu I hut-jiân lâi tú-tio̍h lín teh khùn. 37 Góa só͘ kā lín kóng ê, iā kā chèng lâng kóng, Tio̍h tiuⁿ-tî.
1 過兩日就是pôaⁿ過kap除酵ê節，chiahê祭司頭kap經學士chhē看tio̍h用甚麼詭計掠耶穌來害死伊。 2 因為講，當節期m̄-thang，驚了百姓有擾亂。 3 耶穌tī伯大尼，thái-ko西門ê厝；坐桌ê時有婦人人來，帶玉瓶，內面tóe極貴氣真ê ná-ta̍t香油，khà破玉瓶，拚tī耶穌ê頭殼。 4 有kúi-nā人受氣，saⁿ-kap講，Án-ni破費chitê香油有甚麼路用？ 5 因為chitê香油能賣得銀á三百外 ê，來hō͘ sòng-hiong人。就m̄願伊。 6 但是耶穌講，chhut-chāi伊；lín啥事刁難伊？伊所行來款待我ê是好事。 7 因為常常有sòng-hiong人kap lín tī-teh，ài好款待in，不管時lóng會；但是我無常常kap lín tī-teh。 8 Chitê婦人人是盡她所能ê來做；伊事先將油抹我ê身軀，來備辦埋葬。 9 我實在kā lín講，普天下無論甚麼所在傳福音，也beh講起chitê婦人人所行，來記念伊。 10 十二個學生ê一个，加略人偤大，去見hiahê祭司頭，beh將耶穌交hō͘ in。 11 In聽見就歡喜，koh允beh hō͘伊銀。伊就chhē看有甚麼機會thang將耶穌交hō͘ in。 12 除酵節ê頭一日，就是刣 pôaⁿ過節ê羊羔ê日，學生問伊講，你ài阮去甚麼所在備辦hō͘你食pôaⁿ過節ah？ 13 耶穌差兩個學生，kā in講，Lín入城，就有一人帶水瓶beh tú-tio̍h lín，lín tio̍h tè伊去； 14 tī伊所入ê所在kā hitê家主講，先生講，我ê客廳tī tá-lo̍h，我beh tī hia kap我ê學生食pôaⁿ過節。 15 伊beh用樓頂一間大聽，排設便便，hō͘ lín看；lín tī hia thang為tio̍h咱事先備辦。 16 學生出去入城；既然tú-tio̍h照伊所kā in講ê；就備辦pôaⁿ過節。 17 到日暗，耶穌kap十二個學生來。 18 坐teh食ê時，耶穌講，我實在kā lín講，Lín中間一人，kap我saⁿ-kap食ê，beh賣我。 19 眾人憂悶，一个一个問伊講，總無是我o͘h？ 20 伊kā in講，十二學生ê一个，kap我saⁿ-kap ùn tī盤裡ê，就是。 21 因為人子tò去，照所記載指伊ê話；但是賣人子ê有災禍ah！hit人無出世khah好。 22 In teh食ê時，耶穌the̍h餅祝謝，就peh破hō͘ in，講，the̍h去，chitê是我ê身軀。 23 捧杯祝謝hō͘ in；in lóng lim。 24 耶穌kā in講，chitê是我ê血，就是盟約ê血，為tio̍h chōe-chōe人來流出ê。 25 我實在kā lín講，Taⁿ了後我無koh lim葡萄ê汁，thèng候hit日我lim hitê新ê tī上帝ê國。 26 已經吟詩，就出來，去橄欖山。 27 耶穌kā in講，Lín lóng beh受塞礙；因為有記載講，我beh phah牧者，羊就四散； 28 但是我koh活了後beh事先lín去加利利。 29 彼得kā伊講，眾人雖然受塞礙，但是我無án-ni。 30 耶穌kā伊講，我實在kā你講，今á日就是tī今暝，雞啼二落ê事先，你beh三pái m̄認我。 31 彼得盡力講，我就若tio̍h kap你死，也決斷無m̄認你。眾人也lóng是án-ni講。 32 Saⁿ-kap到一所在，名叫客西馬尼，耶穌kā伊ê學生講，Lín坐tòa chia，thèng候我祈禱。 33 就帶彼得、雅各、約翰，kap伊saⁿ-kap去；耶穌gông-ngia̍h慘慼。 34 kā in講，我ê心真憂悶到beh死；lín tio̍h tòa chia來警醒。 35 Lio̍h-á進前仆tī地裡，祈求若能做得，就hō͘伊免tú-tio̍h chitê時。 36 Koh講，阿爸父ah，你萬事lóng能，願你hō͘ chitê杯離開我。總是m̄是照我所ài；是照你所ài。 37 Koh來，看見in teh睏，就kā彼得講，西門，你teh睏mah？bōe會警醒一時久mah？ 38 Lín tio̍h警醒祈禱，免得入tī迷惑；心神甘願，但是肉體軟chiáⁿ。 39 koh再去祈禱，也是講hiahê話。 40 Koh來看見in teh睏，因為in ê目睭真siap；in也m̄知tio̍h應怎樣。 41 第三pái來kā in講，Taⁿ thang睏來安歇lah；好lah，時到lah，人子受賣tī罪人ê手lah。 42 起來saⁿ-kap去；你看，賣我ê人近lah。 43 Iáu teh講ê時，liâm-piⁿ有十二個學生ê一个，偤大，來，也有kui陣人kia̍h刀kap槌á，tùi祭司頭、經學士kap長老hia saⁿ-kap來。 44 賣伊ê bat kap in套暗號講，我kā伊chim ê，hit人就是，lín thang掠伊，細膩拖伊去。 45 已經到，即時就近耶穌；講，拉比；就直直kā伊chim。 46 In就下手掠伊。 47 邊頭khiā ê一人拔刀，刣祭司頭ê奴僕，削去伊一个耳á。 48 耶穌kā in講，Lín kia̍h刀kap槌á出來掠我，親像beh掠賊mah？ 49 我日日tī殿內教示人，kap lín saⁿ-kap tī-teh，lín無掠我； 50 總是án-ni就是beh應驗聖經，學生lóng離開伊走。 51 有一个少年人thǹg-theh moa幼苧布tè耶穌；in掠伊； 52 就棄sak幼苧布，thǹg-theh來走。 53 Hiah-ê人帶耶穌到祭司頭ê所在；也有眾祭司頭、長老、經學士lóng來kap伊saⁿ-kap聚集。 54 彼得遠遠tè耶穌，到祭司頭ê院，入內面，kap hiahê差役坐teh烘火。 55 Chiahê祭司頭kap全公會chhē干證攻擊耶穌，beh hō͘伊死，也無得tio̍h。 56 因為lām-sám干證來攻擊伊ê chōe-chōe，但是in所干證ê無對同。 57 也有kúi-nā人起來，lām-sám干證伊講， 58 阮bat聽見伊講，我beh毀壞chit間人ê手所起ê殿，三日內koh起一間，m̄是人ê手所起 ê。 59 In干證án-ni也無對同。 60 祭司頭起來khiā tī中間，問耶穌講，你lóng無應mah？Chiahê人所干證你ê是甚麼？ 61 耶穌靜靜lóng無應。祭司頭koh問伊講，你是thang o-ló ê ê Kiáⁿ，基督，á m̄是？ 62 耶穌講，我是；lín beh看見人子坐tī有權能ê ê大pêng，kap天ê雲來。 63 祭司頭拆裂家己ê衫，講，咱iáu欠甚麼干證ah？ 64 Lín已經聽見伊ê僭權褻瀆lah；lín phah算àn怎樣？In lóng擬伊該死。 65 Hit時有人就phùi-nōa伊，掩伊ê面，用拳頭母cheng伊，kā伊講，你tio̍h做先知來講。Hiah-ê差役帶去，用手phah伊。 66 彼得tī下面外院ê時，有祭司頭一个女婢來； 67 看見彼得teh烘火，相伊，講，你也bat kap hitê拿撒勒人耶穌做陣。 68 伊m̄認講，我m̄知，也bōe曉得你teh講甚麼。就出去到前院。雞就啼。 69 Hit-ê女婢看見伊，koh kā邊á khiā ê人講，Chitê也是屬tī in ê黨。伊koh m̄認。 70 Koh tiap-á久，邊á khiā ê koh kā彼得講，你屬in ê黨；因為你是加利利人。 71 伊就咒詛 koh chiù-chōa講，Lín所講hitê人我m̄-bat伊。 72 雞即時啼二落。彼得就記得耶穌所kā伊講ê話，講，雞啼二落ê事先，你beh三pái m̄認我；想tio̍h就啼哭。
1 Kè nn̄g ji̍t chiū-sī pôaⁿ-kè kap tû-kàⁿ ê choeh, chiah ê chè-si-thâu kap keng-ha̍k-sū chhē-khòaⁿ tio̍h ēng sím-mi̍h khúi-kè lia̍h Iâ-so͘ lâi hāi-sí I. 2 In-ūi kóng, Tng choeh-kî m̄ thang, kiaⁿ-liáu peh-sìⁿ ū jiáu-loān. 3 Iâ-so͘ tī Pek-tāi-nî, thái-ko Se-bûn ê chhù; chē toh ê sî ū hū-jîn-lâng lâi, tòa ge̍k-pân, lāi-bīn tóe ke̍k kùi-khì chin ê ná-ta̍t hiuⁿ-iû, khà-phòa ge̍k-pân, piàⁿ tī Iâ-so͘ ê thâu-khak. 4 Ū kúi-nā lâng siū-khì, saⁿ-kap kóng, Án-ni phòa-hùi chit ê hiuⁿ-iû ū sím-mi̍h lō͘-ēng? 5 In-ūi chit ê hiuⁿ-iû ōe bōe-tit gûn-á saⁿ-pah gōa ê, lâi hō͘ sòng-hiong lâng. Chiū m̄ goān i. 6 Nā-sī Iâ-so͘ kóng, Chhut-chāi i; lín siáⁿ-sū thiau-lân i? i só͘ kiâⁿ lâi khoán-thāi góa ê sī hó sū. 7 In-ūi siông-siông ū sòng-hiong lâng kap lín tī-teh, ài hó khoán-thāi in, put-koán sî lóng ōe; nā-sī góa bô siông-siông kap lín tī-teh. 8 Chit ê hū-jîn-lâng sī chīn i só͘ ōe ê lâi chòe; i tāi-seng chiong iû boah góa ê seng-khu, lâi pī-pān bâi-chòng. 9 Góa si̍t-chāi kā lín kóng, Phó͘ thiⁿ-ē bô lūn sím-mi̍h só͘-chāi thoân hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i. 10 Cha̍p-jī ê ha̍k-seng ê chi̍t ê, Ka-lio̍k lâng Iû-tāi, khì kìⁿ hiah ê chè-si-thâu, beh chiong Iâ-so͘ kau hō͘ in. 11 In thiaⁿ-kìⁿ chiū hoaⁿ-hí, koh ún beh hō͘ i gûn. I chiū chhē-khòaⁿ ū sím-mi̍h ki-hōe thang chiong Iâ-so͘ kau hō͘ in. 12 Tû-kàⁿ-choeh ê thâu chi̍t ji̍t, chiū-sī thâi pôaⁿ-kè-choeh ê iûⁿ-ko ê ji̍t, ha̍k-seng mn̄g I kóng, Lí ài goán khì sím-mi̍h só͘-chāi pī-pān hō͘ lí chia̍h pôaⁿ-kè-choeh ah? 13 Iâ-so͘ chhe nn̄g ê ha̍k-seng, kā in kóng, Lín ji̍p siâⁿ, chiū ū chi̍t lâng tòa chúi-pân beh tú-tio̍h lín, lín tio̍h tè i khì; 14 tī i só͘ ji̍p ê só͘-chāi kā hit ê ke-chú kóng, Sian-siⁿ kóng, Góa ê kheh-thiaⁿ tī tá-lo̍h, góa beh tī hia kap góa ê ha̍k-seng chia̍h pôaⁿ-kè-choeh. 15 I beh ēng lâu-téng chi̍t keng tōa thiaⁿ, pâi-siat piān-piān, hō͘ lín khòaⁿ; lín tī hia thang ūi-tio̍h lán tāi-seng pī-pān. 16 Ha̍k-seng chhut-khì ji̍p siâⁿ; kì-jiân tú-tio̍h chiàu I só͘ kā in kóng ê; chiū pī-pān pôaⁿ-kè-choeh. 17 Kàu ji̍t àm Iâ-so͘ kap cha̍p-jī ê ha̍k-seng lâi. 18 Chē teh chia̍h ê sî, Iâ-so͘ kóng, Góa si̍t-chāi kā lín kóng, Lín tiong-kan chi̍t lâng, kap góa saⁿ-kap chia̍h ê, beh bōe góa. 19 Chèng lâng iu-būn, chi̍t-ê chi̍t-ê mn̄g I kóng, Chóng bô sī góa o͘h? 20 I kā in kóng, Cha̍p-jī ha̍k-seng ê chi̍t-ê, kap góa saⁿ-kap ùn tī pôaⁿ-ni̍h ê, chiū-sī. 21 In-ūi Jîn-chú tò-khì, chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó. 22 In teh chia̍h ê sî, Iâ-so͘ the̍h piáⁿ chiok-siā, chiū peh-phòa hō͘ in, kóng, The̍h-khì, chit-ê sī góa ê seng-khu. 23 Phâng poe chiok-siā hō͘ in; in lóng lim. 24 Iâ-so͘ kā in kóng, Chit-ê sī góa ê huih, chiū-sī bêng-iok ê huih, ūi-tio̍h chōe-chōe lâng lâi lâu-chhut ê. 25 Góa si̍t-chāi kā lín kóng, Taⁿ liáu-āu góa bô koh lim phû-tô ê chiap, thèng-hāu hit ji̍t góa lim hit ê sin ê tī Siōng-tè ê kok. 26 Í-keng gîm si, chiū chhut-lâi, khì Kaⁿ-ná soaⁿ. 27 Iâ-so͘ kā in kóng, Lín lóng beh siū that-gāi; in-ūi ū kì-chài kóng, Góa beh phah bo̍k-chiá, iûⁿ chiū sì-sòaⁿ; 28 nā-sī góa koh-oa̍h liáu-āu beh tāi-seng lín khì Ka-lī-lī. 29 Pí-tek kā I kóng, Chèng lâng sui-jiân siū that-gāi, nā-sī góa bô án-ni. 30 Iâ-so͘ kā i kóng, Góa si̍t-chāi kā lí kóng, Kin-á-ji̍t chiū-sī tī kim-mî, koe thî jī lo̍h ê tāi-seng, lí beh saⁿ pái m̄ jīn góa. 31 Pí-tek chīn-la̍t kóng, Góa chiū nā tio̍h kap lí sí, iā koat-toàn bô m̄ jīn lí. Chèng lâng iā lóng sī án-ni kóng. 32 Saⁿ-kap kàu chi̍t só͘-chāi, miâ kiò Khek-se-má-nî, Iâ-so͘ kā I ê ha̍k-seng kóng, Lín chē tòa chia, thèng-hāu góa kî-tó. 33 Chiū tòa Pí-tek, Ngá-kok, Iok-hān, kap I saⁿ-kap khì; Iâ-so͘ gông-ngia̍h chhám-chhoeh. 34 Kā in kóng, Góa ê sim chin iu-būn kàu beh sí; lín tio̍h tòa chia lâi kéng-séng. 35 Lio̍h-á chìn-chèng phak tī tōe-ni̍h, kî-kiû nā ōe chòe-tit, chiū hō͘ I bián tú-tio̍h chit ê sî. 36 Koh kóng, A-pà Pē ah, lí bān sū lóng ōe, goān lí hō͘ chit ê poe lī-khui góa. Chóng-sī m̄ sī chiàu góa só͘ ài; sī chiàu lí só͘ ài. 37 Koh lâi, khòaⁿ-kìⁿ in teh khùn, chiū kā Pí-tek kóng, Se-bûn, lí teh khùn mah? Bōe-ōe kéng-séng chi̍t sî kú mah? 38 Lín tio̍h kéng-séng kî-tó, bián-tit ji̍p tī bê-he̍k; sim-sîn kam-goān, nā-sī jio̍k-thé nńg-chiáⁿ. 39 Koh-chài khì kî-tó, iā sī kóng hiah ê ōe. 40 Koh lâi khòaⁿ-kìⁿ in teh khùn, in-ūi in ê ba̍k-chiu chin siap; in iā m̄ chai tio̍h ìn cháiⁿ-iūⁿ. 41 Tē saⁿ pái lâi kā in kóng, Taⁿ thang khùn lâi an-hioh lah; hó lah, sî kàu lah, Jîn-chú siū bōe tī chōe-jîn ê chhiú lah. 42 Khí-lâi saⁿ-kap khì; lí khòaⁿ, bōe góa ê lâng kūn lah. 43 Iáu teh kóng ê sî, liâm-piⁿ ū cha̍p-jī ê ha̍k-seng ê chi̍t-ê, Iû-tāi, lâi, iā ū kui tīn lâng kia̍h to kap thûi-á, tùi chè-si-thâu, keng-ha̍k-sū kap tiúⁿ-ló hia saⁿ-kap lâi. 44 Bōe I ê bat kap in thò àm-hō kóng, Góa kā I chim ê, hit lâng chiū-sī, lín thang lia̍h I, sòe-jī thoa I khì. 45 Í-keng kàu, chek-sî chiū-kūn Iâ-so͘; kóng, Lia̍p-pí; chiū ti̍t-ti̍t kā I chim. 46 In chiū hē chhiú lia̍h I. 47 Piⁿ-thâu khiā ê chi̍t lâng pu̍ih to, thâi chè-si-thâu ê lô͘-po̍k, siah-khì i chi̍t-ê hī-á. 48 Iâ-so͘ kā in kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah? 49 Góa ji̍t-ji̍t tī tiān-lāi kà-sī lâng, kap lín saⁿ-kap tī-teh, lín bô lia̍h góa; 50 chóng-sī án-ni chiū-sī beh èng-giām sèng-keng. Ha̍k-seng lóng lī-khui I cháu. 51 Ū chi̍t ê siàu-liân lâng thǹg-theh moa iù-tōe pò͘ tè Iâ-so͘; in lia̍h i; 52 chiū khì-sak iù-tōe pò͘, thǹg-theh lâi cháu. 53 Hiah ê lâng tòa Iâ-so͘ kàu chè-si-thâu ê só͘-chāi; iā ū chèng chè-si-thâu, tiúⁿ-ló, keng-ha̍k-sū lóng lâi kap i saⁿ-kap chū-chi̍p. 54 Pí-tek hn̄g-hn̄g tè Iâ-so͘, kàu chè-si-thâu ê īⁿ, ji̍p lāi-bīn, kap hiah ê chhe-ia̍h chē-teh hang-hé. 55 Chiah ê chè-si-thâu kap choân kong-hōe chhē kan-chèng kong-kek Iâ-so͘, beh hō͘ I sí, iā bô tit-tio̍h. 56 In-ūi lām-sám kan-chèng lâi kong-kek I ê chōe-chōe, nā-sī in só͘ kan-chèng ê bô tùi-tâng. 57 Iā ū kúi-nā lâng khí-lâi, lām-sám kan-chèng I kóng, 58 Goán bat thiaⁿ-kìⁿ I kóng, Góa beh húi-hoāi chit keng lâng ê chhiú só͘ khí ê tiān, saⁿ-ji̍t lāi koh khí chi̍t keng, m̄-sī lâng ê chhiú só͘ khí ê. 59 In kan-chèng án-ni iā bô tùi-tâng. 60 Chè-si-thâu khí-lāi khiā tī tiong-kan, mn̄g Iâ-so͘ kóng, Lí lóng bô ìn mah? Chiah ê lâng só͘ kan-chèng lí ê sī sím-mi̍h? 61 Iâ-so͘ chēng-chēng lóng bô ìn. Chè-si-thâu koh mn̄g I kóng, Lí sī thang o-ló ê ê Kiáⁿ, Ki-tok, á m̄ sī? 62 Iâ-so͘ kóng, Góa sī; lín beh khòaⁿ-kìⁿ Jîn-chú chē tī ū koân-lêng ê ê tōa pêng, kap thiⁿ ê hûn lâi. 63 Chè-si-thâu thiah-li̍h ka-kī ê saⁿ, kóng, Lán iáu khiàm sím-mi̍h kan-chèng ah? 64 Lín í-keng thiaⁿ-kìⁿ I ê chhiàm-koân siat-to̍k lah; lín phah-sǹg àn-cháiⁿ-iūⁿ? In lóng gí I kai sí. 65 Hit sî ū lâng chiū phùi-nōa I, ng I ê bīn, ēng kûn-thâu-bú cheng I, kā I kóng, Lí tio̍h chòe sian-ti lâi kóng. Hiah ê chhe-ia̍h tòa-khì, ēng chhiú phah I. 66 Pí-tek tī ē-bīn gōa īⁿ ê sî ū chè-si-thâu chi̍t ê lú-pī lâi; 67 khòaⁿ-kìⁿ Pí-tek teh hang-hé siòng i kóng, Lí iā bat kap hit ê Ná-sat-le̍k lâng Iâ-so͘ chòe tīn. 68 I m̄ jīn kóng, Góa m̄ chai, iā bōe hiáu-tit lí teh kóng sím-mi̍h. Chiū chhut-khì kàu chêng īⁿ. Koe chiū thî. 69 Hit ê lú-pī khòaⁿ-kìⁿ i, koh kā piⁿ-á khiā ê lâng kóng, Chit-ê iā sī sio̍k tī in ê tóng. I koh m̄ jīn. 70 Koh tiap-á-kú piⁿ-á khiā ê koh kā Pí-tek kóng, Lí sio̍k in ê tóng; in-ūi lí sī Ka-lī-lī lâng. 71 I chiū chiù-chó͘ koh chiù-chōa kóng, Lín só͘ kóng hit ê lâng góa m̄ bat I. 72 Koe chek-sî thî jī lo̍h. Pí-tek chiū kì-tit Iâ-so͘ só͘ kā i kóng ê ōe, kóng, Koe thî jī lo̍h ê tāi-seng, lí beh saⁿ pái m̄ jīn góa; siūⁿ-tio̍h chiū thî-khàu.
1 到天光，hiahê祭司頭、長老、經學士kap全公會saⁿ-kap議論，縛耶穌，帶伊去，交hō͘彼拉多。 2 彼拉多問伊講，你是偤太人ê王mah？伊應講，你講，就是。 3 祭司頭用chōe-chōe項告伊。 4 彼拉多koh問伊講，你lóng無應mah？你看，in告你hiah chōe項。 5 但是耶穌iáu-kú無應；致到彼拉多奇怪。 6 到節期，總督éng有放一个犯人hō͘ in，照in所求ê。 7 有一人，名巴拉巴，kap hiahê作亂ê人同受縛，in tī作亂ê時bat 刣死人。 8 眾人就起去，求彼拉多照常來行。 9 彼拉多應講，Lín ài我放偤太人ê王hō͘ lín mah？ 10 因為知hiahê祭司頭是為tio̍h怨妒，chiah 解送伊。 11 但是hiahê祭司頭使唆眾人，寧可求放巴拉巴hō͘ in。 12 彼拉多koh應講，Án-ni就lín所叫做偤太人ê王ê，我tio̍h怎樣辦伊？ 13 In koh喉叫講，釘伊tī十字架。 14 彼拉多kā in講，怎樣ah，伊做甚麼pháiⁿ？總是in ná大聲喉叫講，釘伊tī十字架。 15 彼拉多因為ài hō͘眾人歡喜，就放巴拉巴hō͘ in；已經鞭phah耶穌，就發交去釘十字架。 16 兵丁拖伊入院內，就是公堂，就會齊thong營， 17 用紫色ê袍hō͘伊穿，koh編刺á ê冕旒kā伊戴， 18 就kā伊請安，講，偤太人ê王，平安！ 19 Koh用蘆竹sut伊ê頭殼，kā伊phùi-nōa，跪落拜伊。 20 戲弄soah，hit領紫色ê袍就kā伊thǹg起來，將伊家己ê衫kā伊穿落去；帶伊出，beh釘伊十字架。 21 有Kó͘-lī-nāi人西門，就是亞力山大kap Ló͘-hu ê老父，tùi山場來àn hia過，in勉強伊saⁿ-kap去，來giâ耶穌ê十字架。 22 In帶耶穌到各各他ê所在，翻譯就是頭殼碗ê所在； 23 用kiáu沒藥ê酒hō͘伊；耶穌m̄受。 24 就釘伊tī十字架，pun伊ê衣服，拈鬮看甚麼人得tio̍h甚麼。 25 Hit時九點鐘，就釘伊tī十字架。 26 用斬條寫伊ê罪狀，講，偤太人ê王。 27 也有兩個賊kap伊同釘十字架，一个tī chiàⁿ-pêng，一个tī tò-pêng。 28 29 經過ê人褻瀆伊，搖頭講，Āi ah，你毀壞殿，三日起伊ê， 30 taⁿ tio̍h救家己，tùi十字架落來。 31 Hiah-ê祭司頭kap經學士也是án-ni恥笑伊，saⁿ-kap講，伊bat救別人，也bōe會救家己。 32 以色列ê王基督taⁿ tio̍h tùi十字架落來hō͘阮看來信伊。同釘tī十字架ê也罵伊。 33 日中晝全地烏暗，到三點鐘ê時； 34 三點鐘ê時，耶穌大聲叫講，Í-lô-i，Í-lô-i，lia̍p-má sat-pak-tāi-nî，翻譯就是，我ê上帝，我ê上帝，你啥事放離我。 35 邊頭khiā ê有人聽見，就講，你看，伊teh叫以利亞。 36 有一人走去用海絨浸醋，hâ tī蘆竹á尾，hō͘伊suh，講，且慢，試看以利亞來救伊落來á無。 37 耶穌大聲叫，氣就斷。 38 殿內ê帳籬tùi頂到下裂做兩pêng。 39 百總khiā tī耶穌ê對面，看見伊án-ni氣斷，就講，Chit人真正是上帝ê Kiáⁿ。 40 Koh有kúi-nā ê婦人人tùi遠遠teh看，從中有抹大拉ê馬利亞，kap小雅各約西ê老母馬利亞，以及Sat-lô-bí， 41 就是耶穌tī加利利ê時，跟tè來服事伊ê，也有chōe-chōe婦人人kap耶穌同上耶路撒冷ê，lóng遠遠teh看。 42 已經暗，因為hit日是備辦節ê日，就是安歇日前ê一日， 43 有A-lī-má-thài ê約瑟來，伊是尊貴ê議員，本身也是欣慕上帝ê國ê，好膽入去見彼拉多，求耶穌ê身屍。 44 彼拉多奇怪伊已經死；叫百總來問看伊死久bē。 45 已經tùi百總得tio̍h知，就用身屍hō͘約瑟。 46 約瑟買幼苧布，收耶穌落來；用幼苧布包伊，hē tī石磐所phah ê墓；也kō一塊石tī墓門。 47 抹大拉ê馬利亞，kap約西ê老母馬利亞，看見伊所埋葬ê所在。
1 Kàu thiⁿ-kng hiah-ê chè-si-thâu, tiúⁿ-ló, keng-ha̍k-sū kap choân kong-hōe saⁿ-kap gī-lūn, pa̍k Iâ-so͘, tòa I khì, kau hō͘ Pí-lia̍p-to. 2 Pí-lia̍p-to mn̄g I kóng, Lí sī Iû-thài lâng ê ông mah? I ìn kóng, Lí kóng, chiū-sī. 3 Chè-si-thâu ēng chōe-chōe hāng kò I. 4 Pí-lia̍p-to koh mn̄g I kóng, Lí lóng bô ìn mah? Lí khòaⁿ, in kò lí hiah chōe hāng. 5 Nā-sī Iâ-so͘ iáu-kú bô ìn; tì-kàu Pí-lia̍p-to kî-koài. 6 Kàu choeh-kî chóng-tok éng ū pàng chi̍t ê hoān-lâng hō͘ in, chiàu in só͘ kiû ê. 7 Ū chi̍t lâng, miâ Pa-lia̍p-pa, kap hiah ê chok-loān ê lâng tâng siū pa̍k, in tī chok-loān ê sî bat thâi-sí lâng. 8 Chèng lâng chiū khí-khì, kiû Pí-lia̍p-to chiàu siông lâi kiâⁿ. 9 Pí-lia̍p-to ìn kóng, Lín ài góa pàng Iû-thài lâng ê ông hō͘ lín mah? 10 In-ūi chai hiah ê chè-si-thâu sī ūi-tio̍h oàn-tò͘, chiah kè-sàng I. 11 Nā-sī hiah ê chè-si-thâu sái-sō chèng lâng, lêng-khó͘ kiû pâng Pa-lia̍p-pa hō͘ in. 12 Pí-lia̍p-to koh ìn kóng, Án-ni chiū lín só͘ kiò chòe Iû-thài lâng ê ông ê, góa tio̍h cháiⁿ-iūⁿ pān I? 13 In koh âu-kiò kóng, Tèng I tī si̍p-jī-kè. 14 Pí-lia̍p-to kā in kóng, Cháiⁿ-iūⁿ ah, I chòe sím-mi̍h pháiⁿ? Chóng-sī in ná tōa siaⁿ âu-kiò kóng, Tèng I tī si̍p-jī-kè. 15 Pí-lia̍p-to in-ūi ài hō͘ chèng lâng hoaⁿ-hí, chiū pàng Pa-lia̍p-pa hō͘ in; í-keng piⁿ-phah Iâ-so͘, chiū hoat-kau khì tèng si̍p-jī-kè. 16 Peng-teng thoa I ji̍p īⁿ-lāi, chiū-sī kong-tn̂g, chiū hōe-chôe thong iâⁿ, 17 ēng chí-sek ê phàu hō͘ I chhēng, koh pīⁿ chhì-á ê bián-liû kā I tì, 18 chiū kā I chhéng-an, kóng, Iû-thài lâng ê ông, pêng-an! 19 Koh ēng lô͘-tek sut I ê thâu-khak, kā I phùi-nōa, kūi-lo̍h pài I. 20 Hì-lāng soah, hit niá chí-sek ê phàu chiū kā I thǹg-khí-lâi, chiong I ka-kī ê saⁿ kā I chhēng-lo̍h-khì; tòa I chhut, beh tèng I si̍p-jī-kè. 21 Ū Kó͘-lī-nāi lâng Se-bûn, chiū-sī A-le̍k-san-tāi kap Ló͘-hu ê lāu-pē, tùi soaⁿ-tiûⁿ lâi àn hia kè, in bián-kióng i saⁿ-kap khì, lâi giâ Iâ-so͘ ê si̍p-jī-kè. 22 In tòa Iâ-so͘ kàu Kok-kok-thaⁿ ê só͘-chāi, hoan-e̍k chiū-sī Thâu-khak-óaⁿ ê só͘-chāi; 23 ēng kiáu bu̍t-io̍h ê chiú hō͘ I; Iâ-so͘ m̄ siū. 24 Chiū tèng I tī si̍p-jī-kè, pun I ê i-ho̍k, liam-khau khòaⁿ sím-mi̍h lâng tit-tio̍h sím-mi̍h. 25 Hit sî káu tiám cheng, chiū tèng I tī si̍p-jī-kè. 26 Ēng chám-tiâu siá I ê chōe-chōng, kóng, Iû-thài lâng ê ông. 27 Iā ū nn̄g ê chha̍t kap I tâng tèng si̍p-jī-kè, chi̍t-ê tī chiàⁿ-pêng, chi̍t-ê tī tò-pêng. 28 29 Keng-kè ê lâng siat-to̍k I, iô thâu kóng, Āi ah, lí húi-hoāi tiān, saⁿ ji̍t khí i ê, 30 taⁿ tio̍h kiù ka-kī, tùi si̍p-jī-kè lo̍h-lâi. 31 Hiah ê chè-si-thâu kap keng-ha̍k-sū iā sī án-ni thí-chhiò I, saⁿ-kap kóng, I bat kiù pa̍t lâng, iā bōe-ōe kiù ka-kī. 32 Í-sek-lia̍t ê ông Ki-tok taⁿ tio̍h tùi si̍p-jī-kè lo̍h-lâi hō͘ goán khòaⁿ lâi sìn I. Tâng tèng tī si̍p-jī-kè ê iā mē I. 33 Ji̍t tiong-tàu choân tōe o͘-àm, kàu saⁿ tiám cheng ê sî; 34 saⁿ tiám cheng ê sî Iâ-so͘ tōa siaⁿ kiò kóng, Í-lô-i, Í-lô-i, lia̍p-má sat-pak-tāi-nî, hoan-e̍k chiū-sī, Góa ê Siōng-tè, góa ê Siōng-tè, lí siáⁿ-sū pàng-lī góa. 35 Piⁿ-thâu khiā ê ū lâng thiaⁿ-kìⁿ, chiū kóng, Lí khòaⁿ, I teh kiò Í-lī-a. 36 Ū chi̍t lâng cháu-khì ēng hái-jiông chìm chhò͘, hâ tī lô͘-tek-á bé, hō͘ i suh, kóng, Chhiáⁿ bān, chhì-khòaⁿ Í-lī-a lâi kiù I lo̍h-lâi á bô. 37 Iâ-so͘ tōa siaⁿ kiò, khùi chiū tn̄g. 38 Tiān-lāi ê tiùⁿ-lî tùi téng kàu ē li̍h chòe nn̄g pêng. 39 Pé-chóng khiā tī Iâ-so͘ ê tùi-bīn, khòaⁿ-kìⁿ I án-ni khùi tn̄g, chiū kóng, Chit lâng chin-chiàⁿ sī Siōng-tè ê Kiáⁿ. 40 Koh ū kúi-nā ê hū-jîn-lâng tùi hn̄g-hn̄g teh khòaⁿ, chiông-tiong ū Boa̍t-tāi-lia̍p ê Má-lī-a, kap sió Ngá-kok Iok-se ê lāu-bú Má-lī-a, í-ki̍p Sat-lô-bí, 41 chiū-sī Iâ-so͘ tī Ka-lī-lī ê sî, kun-tè lâi ho̍k-sāi I ê, iā ū chōe-chōe hū-jîn-lâng kap Iâ-so͘ tâng chiūⁿ Iâ-lō͘-sat-léng ê, lóng hn̄g-hn̄g teh khòaⁿ. 42 Í-keng àm, in-ūi hit ji̍t sī pī-pān choeh ê ji̍t, chiū-sī an-hioh-ji̍t chêng ê chi̍t ji̍t, 43 ū A-lī-má-thài ê Iok-sek lâi, i sī chun-kùi ê gī-oân, pún-sin iā sī him-bō͘ Siōng-tè ê kok ê, hó-táⁿ ji̍p-khì kìⁿ Pí-lia̍p-to, kiû Iâ-so͘ ê sin-si. 44 Pí-lia̍p-to kî-koài I í-keng sí; kiò pé-chóng lâi mn̄g khòaⁿ I sí kú bē. 45 Í-keng tùi pé-chóng tit-tio̍h chai, chiū ēng sin-si hō͘ Iok-sek. 46 Iok-sek bóe iù-tōe pò͘, siu Iâ-so͘ lo̍h-lâi; ēng iù-tōe pò͘ pau I, hē tī chio̍h-pôaⁿ só͘ phah ê bōng; iā kō chi̍t tè chio̍h tī bōng-mn̂g. 47 Boa̍t-tāi-lia̍p ê Má-lī-a, kap Iok-se ê lāu-bú Má-lī-a, khòaⁿ-kìⁿ I só͘ bâi-chòng ê só͘-chāi.
1 安歇日已經過身，抹大拉ê馬利亞kap雅各ê老母馬利亞，kap Sat-lô-bí，有買香料，beh來抹耶穌。 2 七日頭一日，真早，日tú-á出，in到墓； 3 saⁿ-kap講，Chī-chūi-á beh替咱kō hit塊石離開墓門ah？ 4 Kia̍h目就看見hit塊石已經kō開；因為是真大塊。 5 入墓，看見一个少年人坐tī chiàⁿ-pêng，穿白衫；就gông-ngia̍h。 6 少年人kā in講，M̄免gông-ngia̍h，lín是chhē釘十字架ê拿撒勒人耶穌。伊已經koh活，無tī chia；你看，伊埋葬ê所在。 7 Taⁿ tio̍h去，kā伊ê學生kap彼得講，伊事先lín去加利利；lín tī hia beh看見伊，照伊所kā lín講ê。 8 Chiahê婦人人出去離開墓，就走，因為ngia̍uh-ngia̍uh-chhoah gông-ngia̍h；也無kā人講甚麼，因為in真驚。 9 七日ê頭日清早，耶穌已經koh活，事先出現tī抹大拉ê馬利亞，就是耶穌前bat tùi伊趕出七個鬼ê。 10 平時kap耶穌同tī-teh ê人，hit時teh憂悶啼哭；馬利亞去kā in講。 11 In聽見伊活，koh hō͘馬利亞看見，竟然m̄信。 12 以後in中間兩人去山場；teh行ê時，耶穌出現hō͘ in看見，伊ê 容貌kap平常無同。 13 In去kā其餘ê講；總是in hiahê人也m̄信。 14 後來十一个學生坐teh食ê時，耶穌出現hō͘ in看見，責備in ê m̄信kap硬心；因為有人看見伊已經koh活，in也m̄信hiahê人ê話。 15 耶穌koh kā in講，lín去普天下，傳福音hō͘萬百姓。 16 信來受洗禮ê，beh得tio̍h救；m̄信ê，beh受定罪。 17 信ê人beh有chiahê神蹟tè in；就是託重我ê名趕鬼，講新ê腔口； 18 掠蛇，á是lim-tio̍h甚麼毒，也lóng無傷害；koh用手hōaⁿ破病ê人，in就好。 19 主耶穌kap in講soah，就得tio̍h接納上天，坐tī上帝ê大pêng。 20 學生出去，ta̍k所在宣傳，主kap in做工，用tè in ê神蹟證明chitê道理。À-bēng。
1 An-hioh-ji̍t í-keng kè-sin, Boa̍t-tāi-lia̍p ê Má-lī-a kap Ngá-kok ê lāu-bú Má-lī-a, kap Sat-lô-bí, ū bóe hiuⁿ-liāu, beh lâi boah Iâ-so͘. 2 Chhit-ji̍t thâu chi̍t ji̍t, chin chá, ji̍t tú-á chhut, in kàu bōng; 3 saⁿ-kap kóng, Chī-chūi-á beh thòe lán kō hit tè chio̍h lī-khui bōng-mn̂g ah? 4 Kia̍h ba̍k chiū khòaⁿ-kìⁿ hit tè chio̍h í-keng kō khui; in-ūi sī chin tōa tè. 5 Ji̍p bōng, khòaⁿ-kìⁿ chi̍t ê siàu-liân lâng chē tī chiàⁿ-pêng, chhēng pe̍h saⁿ; chiū gông-ngia̍h. 6 Siàu-liân lâng kā in kóng, M̄ bián gông-ngia̍h, lín sī chhē tèng si̍p-jī-kè ê Ná-sat-le̍k lâng Iâ-so͘. I í-keng koh-oa̍h, bô tī chia; lí khòaⁿ, I bâi-chòng ê só͘-chāi. 7 Taⁿ tio̍h khì, kā I ê ha̍k-seng kap Pí-tek kóng, I tāi-seng lín khì Ka-lī-lī; lín tī hia beh khòaⁿ-kìⁿ I, chiàu I só͘ kā lín kóng ê. 8 Chiah ê hū-jîn-lâng chhut-khì lī-khui bōng, chiū cháu, in-ūi ngia̍uh-ngia̍uh-chhoah gông-ngia̍h; iā bô kā lâng kóng sím-mi̍h, in-ūi in chin kiaⁿ. 9 Chhit-ji̍t ê thâu ji̍t chheng chá, Iâ-so͘ í-keng koh-oa̍h, tāi-seng chhut-hiān tī Boa̍t-tāi-lia̍p ê Má-lī-a, chiū-sī Iâ-so͘ chêng bat tùi i kóaⁿ-chhut chhit ê kúi ê. 10 Pêng-sî kap Iâ-so͘ tâng tī-teh ê lâng hit sî teh iu-būn thî-khàu; Má-lī-a khì kā in kóng. 11 In thiaⁿ-kìⁿ I oa̍h, koh hō͘ Má-lī-a khòaⁿ-kìⁿ, kèng-jiân m̄ sìn. 12 Í-āu in tiong-kan nn̄g lâng khì soaⁿ-tiûⁿ; teh kiâⁿ ê sî, Iâ-so͘ chhut-hiān hō͘ in khòaⁿ-kìⁿ, I ê iông-māu kap pêng-siông bô tâng. 13 In khì kā kî-û ê kóng; chóng-sī in hiah ê lâng iā m̄ sìn. 14 Āu-lâi cha̍p-it ê ha̍k-seng chē teh chia̍h ê sî, Iâ-so͘ chhut-hiān hō͘ in khòaⁿ-kìⁿ, chek-pī in ê m̄ sìn kap ngī-sim; in-ūi ū lâng khòaⁿ-kìⁿ I í-keng koh-oa̍h, in iā m̄ sìn hiah ê lâng ê ōe. 15 Iâ-so͘ koh kā in kóng, Lín khì phó͘ thiⁿ-ē, thoân hok-im hō͘ bān peh-sìⁿ. 16 Sìn lâi siū sóe-lé ê, beh tit-tio̍h kiù; m̄ sìn ê, beh siū tēng-chōe. 17 Sìn ê lâng beh ū chiah ê sîn-jiah tè in; chiū-sī thok-tiōng góa ê miâ kóaⁿ kúi, kóng sin ê khiuⁿ-kháu; 18 lia̍h chôa, á-sī lim-tio̍h sím-mi̍h to̍k, iā lóng bô siong-hāi; koh ēng chhiú hōaⁿ phòa-pīⁿ ê lâng, in chiū hó. 19 Chú Iâ-so͘ kap in kóng soah, chiū tit-tio̍h chiap-la̍p chiūⁿ thiⁿ, chē tī Siōng-tè ê tōa pêng. 20 Ha̍k-seng chhut-khì, ta̍k só͘-chāi soan-thoân, Chú kap in chòe kang, ēng tè in ê sîn-jiah chèng-bêng chit ê tō-lí. À-bēng.