1 亞伯拉罕ê後裔，大衛ê後裔，耶穌基督ê家譜。 2 亞伯拉罕生以撒；以撒生雅各；雅各生偤大kap伊ê兄弟； 3 偤大tùi Tāi-má氏生Hoat-le̍k-sū kap撒拉；Hoat-le̍k-sū生Í-sū-lûn；Í-sū-lûn生A-lân； 4 A-lân生A-bí-ná-ta̍t；A-bí-ná-ta̍t生Ná-sūn；Ná-sūn生Sat-bûn； 5 Sat-bûn tùi Lat-ha̍p氏生Pho-sū；Pho-sū tùi Lō͘-tek氏生O-pek；O-pek生Iâ-se； 6 Iâ-se生大衛王。大衛tùi O͘-lī-a ê bó͘生所羅門； 7 所羅門生Lô-pho-àm；Lô-pho-àm生A-pí-a；A-pí-a生A-sat； 8 A-sat生Iok-sa-hoat；Iok-sa-hoat生Iok-lân；Iok-lân生O͘-se-a； 9 O͘-se-a生約旦；約旦生A-khap-sū；A-khap-sū生Hi-se-ka； 10 Hi-se-ka生Má-ná-se；Má-ná-se生A-bûn；A-bûn生Iok-se-a； 11 百姓受遷徙到巴比倫ê時，Iok-se-a生Iâ-ko-nî-a kap伊ê兄弟。 12 遷徙到巴比倫了後，Iâ-ko-nî-a生Sat-lia̍p-thiat；Sat-lia̍p-thiat生Só͘-lô-pá-pek； 13 Só͘-lô-pá-pek生A-pí-ut；A-pí-ut生Í-lī-a-kim；Í-lī-a-kim生A-só͘； 14 A-só͘生Sat-to̍k；Sat-to̍k生A-kim；A-kim生Í-lu̍t； 15 Í-lu̍t生Í-lī-a-sat；Í-lī-a-sat生Má-tàn；Má-tàn生雅各； 16 雅各生約瑟，就是馬利亞ê丈夫；稱做基督ê耶穌，是tùi chitê馬利亞生ê。 17 Án-ni, tùi亞伯拉罕到大衛，共十四代；tùi大衛到遷徙去巴比倫ê時，亦十四代；tùi遷徙去巴比倫ê時到基督，koh十四代。 18 耶穌基督ê出世，記tī下底：伊ê老母馬利亞已經做約瑟定tio̍h，iáu-bē娶過門，就tùi聖神有身孕。 19 伊ê丈夫約瑟是義ê人，m̄ ài顯然辦伊，按算beh暗靜廢親。 20 Teh想ê時，有主ê天使tī伊ê眠夢中出現講，大衛ê後裔，約瑟ah，莫得驚，tio̍h娶你ê bó͘馬利亞過門；因為伊所懷孕ê是tùi聖神。 21 伊beh生kiáⁿ，你tio̍h叫伊ê名做耶穌；因為伊beh救伊ê百姓 脫出in ê罪惡。 22 Chitê事lóng成，是beh應驗主託先知所講ê，講， 23 你看，在室女beh身孕生kiáⁿ； 人beh叫伊ê名做以馬內利；翻譯就是上帝kap咱tī-teh。 24 約瑟睏醒起來，照主ê天使所命令去行，娶伊ê bó͘過門； 25 無kap伊同房，到伊生kiáⁿ；就叫伊ê名做耶穌。
1 A-pek-la̍h-hán ê hō͘-è, Tāi-pi̍t ê hō͘-è, Iâ-so͘ Ki-tok ê ka-phó͘. 2 A-pek-la̍h-hán siⁿ Í-sat; Í-sat siⁿ Ngá-kok; Ngá-kok siⁿ Iû-tāi kap i ê hiaⁿ-tī; 3 Iû-tāi tùi Tāi-má--sī siⁿ Hoat-le̍k-sū kap Sat-la̍h; Hoat-le̍k-sū siⁿ Í-sū-lûn; Í-sū-lûn siⁿ A-lân; 4 A-lân siⁿ A-bí-ná-ta̍t; A-bí-ná-ta̍t siⁿ Ná-sūn; Ná-sūn siⁿ Sat-bûn; 5 Sat-bûn tùi Lat-ha̍p--sī siⁿ Pho-sū; Pho-sū tùi Lō͘-tek--sī siⁿ O-pek; O-pek siⁿ Iâ-se; 6 Iâ-se siⁿ Tāi-pi̍t ông; Tāi-pi̍t tùi O͘-lī-a ê bó͘ siⁿ Só͘-lô-bûn; 7 Só͘-lô-bûn siⁿ Lô-pho-àm; Lô-pho-àm siⁿ A-pí-a; A-pí-a siⁿ A-sat; 8 A-sat siⁿ Iok-sa-hoat; Iok-sa-hoat siⁿ Iok-lân; Iok-lân siⁿ O͘-se-a; 9 O͘-se-a siⁿ Iok-tàn; Iok-tàn siⁿ A-khap-sū; A-khap-sū siⁿ Hi-se-ka; 10 Hi-se-ka siⁿ Má-ná-se; Má-ná-se siⁿ A-bûn; A-bûn siⁿ Iok-se-a; 11 peh-sìⁿ siū chhian-sóa kàu Pa-pí-lûn ê sî, Iok-se-a siⁿ Iâ-ko-nî-a kap i ê hiaⁿ-tī. 12 Chhian-sóa kàu Pa-pí-lûn liáu-āu, Iâ-ko-nî-a siⁿ Sat-lia̍p-thiat; Sat-lia̍p-thiat siⁿ Só͘-lô-pá-pek; 13 Só͘-lô-pá-pek siⁿ A-pí-ut; A-pí-ut siⁿ Í-lī-a-kim; Í-lī-a-kim siⁿ A-só͘; 14 A-só͘ siⁿ Sat-to̍k; Sat-to̍k siⁿ A-kim; A-kim siⁿ Í-lu̍t; 15 Í-lu̍t siⁿ Í-lī-a-sat; Í-lī-a-sat siⁿ Má-tàn; Má-tàn siⁿ Ngá-kok; 16 Ngá-kok siⁿ Iok-sek, chiū-sī Má-lī-a ê tiōng-hu; chheng chòe Ki-tok ê Iâ-so͘, sī tùi chit ê Má-lī-a siⁿ ê. 17 Án-ni, tùi A-pek-la̍h-hán kàu Tāi-pi̍t, kiōng cha̍p-sì tāi; tùi Tāi-pi̍t kàu chhian-sóa khì Pa-pí-lûn ê sî, ia̍h cha̍p-sì tāi; tùi chhian-sóa khì Pa-pí-lûn ê sî kàu Ki-tok, koh cha̍p-sì tāi. 18 Iâ-so͘ Ki-tok ê chhut-sì, kì tī ē-tóe: I ê lāu-bú Má-lī-a í-keng chòe Iok-sek tiāⁿ-tio̍h, iáu-bē chhōa kè-mn̂g, chiū tùi Sèng Sîn ū sin-īn. 19 I ê tiōng-hu Iok-sek sī gī ê lâng, m̄ ài hián-jiân pān i, àn-sǹg beh àm-chīⁿ hòe-chhin. 20 Teh siūⁿ ê sî, ū Chú ê thiⁿ-sài tī i ê bîn-bāng-tiong chhut-hiān kóng, Tāi-pi̍t ê hō͘-è, Iok-sek ah, bo̍h-tit kiaⁿ, tio̍h chhōa lí ê bó͘ Má-lī-a kè-mn̂g; in-ūi i só͘ hoâi-īn ê sī tùi Sèng Sîn. 21 I beh siⁿ kiáⁿ, lí tio̍h kiò I ê miâ chòe Iâ-so͘; in-ūi I beh kiù I ê peh-sìⁿ thoat-chhut in ê chōe-ok. 22 Chit ê sū lóng chiâⁿ, sī beh èng-giām Chú thok sian-ti só͘ kóng ê, kóng, 23 Lí khòaⁿ, chāi-sek-lú beh sin-īn siⁿ kiáⁿ; Lâng beh kiò I ê miâ chòe Í-má-lōe-lī; hoan-e̍k chiū-sī Siōng-tè kap lán tī-teh. 24 Iok-sek khùn-chhíⁿ khí-lâi, chiàu Chú ê thiⁿ-sài só͘ bēng-lēng khì kiâⁿ, chhōa i ê bó͘ kè-mn̂g; 25 bô kap i tâng pâng, kàu i siⁿ kiáⁿ; chiū kiò I ê miâ chòe Iâ-so͘.
1 當希律王ê時，耶穌已經出世tī偤太ê伯利恆，有幾nā個博士tùi東方來到耶路撒冷，
2 講，出世做偤太人ê王ê tī tá-lo̍h？因為阮tī東方有看見伊ê星，chiah來beh拜伊。
3 希律王聽見就peh-pak，thong耶路撒冷亦是án-ni。
4 就聚集眾祭司頭，kap百姓間ê經學士，問in基督tio̍h tī甚麼所在出世。
5 In kā伊講，Tī偤太ê伯利恆；因為先知有記載講，
6 偤太地，伯利恆ah， Tī偤太chiahê頭人中，
你lóng m̄是第一細ê； 因為beh有一个人君對你出，
來照顧我ê百姓以色列。
7 Tùi án-ni，希律暗靜召博士，對in詳細查hitê星出現ê時。
8 就差in去伯利恆講，Lín去詳細探聽hitê嬰á ê事；chhē-tio̍h就來kā我講，hō͘我也thang去拜伊。
9 In聽王ê話就去；忽然東方所看見ê星做頭chhōa in，到嬰á ê所在，就歇tī hit頂面。
10 In看見hitê星，歡喜到bōe顧得。
11 入厝，看見嬰á kap伊ê老母馬利亞；就仆落拜嬰á；開in ê寶盒，獻禮物hō͘伊，就是黃金、乳香、沒藥。
12 Koh tī眠夢中得tio̍h指點，教in m̄-thang 倒tńg去就近希律，就tùi別條路倒去本所在。
13 In倒去了，有主ê天使tī約瑟眠夢中出現講，起來，chhōa嬰á kap伊ê老母，走去埃及，tòa hia到我kā你講；因為希律beh chhē嬰á來滅伊。
14 伊就起來，透暝chhōa嬰á kap伊ê老母去埃及；
15 tòa hia到希律死；是beh應驗主託先知所講ê，講，我bat召我ê kiáⁿ出埃及。
16 Hit時希律知hō͘博士設去，就大受氣，差人將伯利恆kap周圍所有ê ta-po͘ gín-ná，照伊tùi博士詳細查ê時，凡若二歲以下ê一盡刣。
17 Án-ni應驗早託先知耶利米所講ê，講，
18 Tī Lia̍p-má聽見聲， 啼哭koh大傷悲， 拉結哭伊ê kiáⁿ兒； M̄願受安慰，因為in無--去。
19 希律已經死，主ê天使tī埃及，tī約瑟眠夢中出現講，
20 起來，chhōa嬰á kap伊ê老母去以色列地；因為hiahê ài害嬰á ê性命ê已經死lah。
21 伊就起來，chhōa嬰á kap伊ê老母到以色列地。
22 總是聽見A-ki-ló續接伊ê老父希律tī偤太做王，就m̄敢去hia；既然tī眠夢中得tio̍h指點，就退去加利利ê境內。
23 到一个城，名拿撒勒，tiàm hia khiā起；是beh應驗早託chiahê先知所講ê講，伊beh叫做拿撒勒人。
1 Tng Hi-lu̍t ông ê sî, Iâ-so͘ í-keng chhut-sì tī Iû-thài ê Pek-lī-hêng, ū kúi-nā ê phok-sū tùi tang-hng lâi kàu Iâ-lō͘-sat-léng, 2 kóng, Chhut-sì chòe Iû-thài lâng ê ông ê tī tá-lo̍h? in-ūi goán tī tang-hng ū khòaⁿ-kìⁿ I ê chhiⁿ, chiah lâi beh pài I. 3 Hi-lu̍t ông thiaⁿ-kìⁿ chiū peh-pak, thong Iâ-lō͘-sat-léng ia̍h sī án-ni. 4 Chiū chū-chi̍p chèng chè-si-thâu, kap peh-sìⁿ-kan ê keng-ha̍k-sū, mn̄g in Ki-tok tio̍h tī sím-mi̍h só͘-chāi chhut-sì. 5 In kā i kóng, Tī Iû-thài ê Pek-lī-hêng; in-ūi sian-ti ū kì-chài kóng, 6 Iû-thài tōe, Pek-lī-hêng ah, Tī Iû-thài chiah ê thâu-lâng tiong, lí lóng m̄ sī tē it sòe ê; In-ūi beh ū chi̍t ê jîn-kun tùi lí chhut, lâi chiàu-kò͘ góa ê peh-sìⁿ Í-sek-lia̍t. 7 Tùi án-ni, Hi-lu̍t àm-chīⁿ tiàu phok-sū, tùi in siông-sè chhâ hit ê chhiⁿ chhut-hiān ê sî. 8 Chiū chhe in khì Pek-lī-hêng kóng, Lín khì siông-sè thàm-thiaⁿ hit ê eⁿ-á ê sū; chhē-tio̍h chiū lâi kā góa kóng, hō͘ góa iā thang khì pài I. 9 In thiaⁿ ông ê ōe chiū khì; hut-jiân tang-hng só͘ khòaⁿ-kìⁿ ê chhiⁿ chòe thâu chhōa in, kàu eⁿ-á ê só͘-chāi, chiū hioh tī hit téng-bīn. 10 In khòaⁿ-kìⁿ hit ê chhiⁿ, hoaⁿ-hí kàu bōe kò͘-tit. 11 Ji̍p chhù, khòaⁿ-kìⁿ eⁿ-á kap I ê lāu-bú Má-lī-a; chiū phak-lo̍h pài eⁿ-á; khui in ê pó-a̍h, hiàn lé-mi̍h hō͘ I, chiū-sī n̂g-kim, jú-hiuⁿ, bu̍t-io̍h. 12 Koh tī bîn-bāng-tiong tit-tio̍h chí-tiám, kah in m̄-thang tò-tńg khì chiū-kūn Hi-lu̍t, chiū tùi pa̍t tiâu lō͘ tò-khì pún só͘-chāi. 13 In tò-khì liáu, ū Chú ê thiⁿ-sài tī Iok-sek bîn-bāng-tiong chhut-hiān kóng, Khí-lâi, chhōa eⁿ-á kap I ê lāu-bú, cháu khì Ai-ki̍p, tòa hia kàu góa kā lí kóng; in-ūi Hi-lu̍t beh chhē eⁿ-á lâi bia̍t I. 14 I chiū khí-lâi, thàu-mî chhōa eⁿ-á kap I ê lāu-bú khì Ai-ki̍p; 15 tòa hia kàu Hi-lu̍t sí; sī beh èng-giām Chú thok sian-ti só͘ kóng ê, kóng, Góa bat tiàu góa ê kiáⁿ chhut Ai-ki̍p. 16 Hit sî Hi-lu̍t chai hō͘ phok-sū siat-khì, chiū tōa siū-khì, chhe lâng chiong Pek-lī-hêng kap chiu-ûi só͘ ū ê ta-po͘ gín-ná, chiàu i tùi phok-sū siông-sè chhâ ê sî, hoān-nā nn̄g hè í-hā ê it-chīn thâi. 17 Án-ni èng-giām chá thok sian-ti Iâ-lī-bí só͘ kóng ê, kóng, 18 Tī Lia̍p-má thiaⁿ-kìⁿ siaⁿ, Thî-khàu koh tōa siong-pi, Lia̍p-kiat khàu i ê kiáⁿ-jî; M̄ goān siū an-ùi, in-ūi in bô--khì. 19 Hi-lu̍t í-keng sí, Chú ê thiⁿ-sài tī Ai-ki̍p, tī Iok-sek bîn-bāng-tiong chhut-hiān kóng, 20 Khí-lâi, chhōa eⁿ-á kap I ê lāu-bú khì Í-sek-lia̍t tōe; in-ūi hiah-ê ài hāi eⁿ-á ê sìⁿ-miā ê í-keng sí lah. 21 I chiū khí-lâi, chhōa eⁿ-á kap I ê lāu-bú kàu Í-sek-lia̍t tōe. 22 Chóng-sī thiaⁿ-kìⁿ A-ki-ló sòa-chiap i ê lāu-pē Hi-lu̍t tī Iû-thài chòe ông, chiū m̄ káⁿ khì hia; kì-jiân tī bîn-bāng-tiong tit-tio̍h chí-tiám, chiū thè-khì Ka-lī-lī ê kéng-lāi. 23 Kàu chi̍t ê siâⁿ, miâ Ná-sat-le̍k, tiàm hia khiā-khí; sī beh èng-giām chá thok chiah ê sian-ti só͘ kóng ê kóng, I beh kiò chòe Ná-sat-le̍k lâng.
1 當hit時，行洗禮ê約翰來，tī偤太ê曠野宣傳講， 2 Lín tio̍h反悔；因為天國近lah。 3 Chit人就是主託先知以賽亞所指ê，講， 有teh叫tī曠野ê，伊ê聲講， 備辦主ê路， 修直伊ê小路。 4 Chitê約翰穿駱駝毛ê衫，腰hâ皮帶；伊所食是草蜢kap山野ê蜜。 5 Hit時耶路撒冷kap thong偤太，以及約旦四方ê眾人出來就近伊； 6 tī約旦河tùi伊受洗禮，認in ê罪。 7 約翰看見法利賽kap撒都該人，chōe-chōe就近伊ê洗禮，就kā in講，毒蛇ê類ah，是誰-á指示lín閃避將來ê受氣ah？ 8 所以lín tio̍h結hit號合tī反悔ê果子。 9 莫得家己phah算講，有亞伯拉罕做阮ê父；因為我kā lín講，上帝會tùi chiahê石頭出kiáⁿ孫hō͘亞伯拉罕。 10 Taⁿ斧頭已經hē tī樹頭；見若樹無結好果子ê，就chhò伊，hiat落火。 11 我用水kā lín行洗禮，beh hō͘ lín反悔；但是tè尾我來ê，比我khah有權能，伊ê鞋我亦bōe堪得the̍h；伊beh用聖神kap火kā lín洗。 12 伊ê手the̍h簸箕，beh將伊hit場一盡簸，收伊ê麥入倉；若是麥hiūⁿ就用bōe-hoa ê火燒伊。 13 Hit時耶穌tùi加利利到約旦，就近約翰，beh tùi伊受洗禮。 14 但是約翰阻止伊講，我ha̍p-kai對你受洗禮，你反tńg就近我mah？ 15 耶穌應伊講，Taⁿ請允我，因為咱合宜tio̍h án-ni，來盡lóng總ê義。就允伊。 16 耶穌已經受洗禮，liâm-piⁿ tùi水上來：天忽然為tio̍h伊開，伊就看見上帝ê神，親像鴿á降臨tī伊ê頂面。 17 Koh tùi天有聲講，chitê是我疼ê Kiáⁿ，我所歡喜ê。
1 Tng hit sî, kiâⁿ sóe-lé ê Iok-hān lâi, tī Iû-thài ê khòng-iá soan-thoân kóng, 2 Lín tio̍h hoán-hóe; in-ūi thian-kok kūn lah. 3 Chit lâng chiū-sī Chú thok sian-ti Í-sài-a só͘ chí ê, kóng, Ū teh kiò tī khòng-iá ê, i ê siaⁿ kóng, Pī-pān Chú ê lō͘, Siu ti̍t I ê sió-lō͘. 4 Chit ê Iok-hān chhēng lo̍k-tô-mn̂g ê saⁿ, io hâ phê-tòa; i só͘ chia̍h sī chháu-meh kap soaⁿ-iá ê bi̍t. 5 Hit sî Iâ-lō͘-sat-léng kap thong Iû-thài, í-ki̍p Iok-tàn sì-hng ê chèng lâng chhut-lâi chiū-kūn i; 6 tī Iok-tàn hô tùi i siū sóe-lé, jīn in ê chōe. 7 Iok-hān khòaⁿ-kìⁿ Hoat-lī-sài kap Sat-thó͘-kai lâng, chōe-chōe chiū-kūn i ê sóe-lé, chiū kā in kóng, To̍k-chôa ê lūi ah, chī-chūi-á chí-sī lín siám-pī chiong-lâi ê siū-khì ah? 8 Só͘-í lín tio̍h kiat hit hō ha̍p tī hoán-hóe ê ké-chí. 9 Bo̍h-tit ka-kī phah-sǹg kóng, Ū A-pek-la̍h-hán chòe goán ê pē; in-ūi góa kā lín kóng, Siōng-tè ōe tùi chiah ê chio̍h-thâu chhut kiáⁿ-sun hō͘ A-pek-la̍h-hán. 10 Taⁿ pó͘-thâu í-keng hē tī chhiū-thâu; kìⁿ-nā chhiū bô kiat hó ké-chí ê, chiū chhò i, hiat-lo̍h hé. 11 Góa ēng chúi kā lín kiâⁿ sóe-lé, beh hō͘ lín hoán-hóe; nā-sī tè-bé góa lâi ê, pí góa khah ū koân-lêng, I ê ôe góa ia̍h bōe kham-tit the̍h; I beh ēng Sèng Sîn kap hé kā lín sóe. 12 I ê chhiú the̍h pòa-ki, beh chiong I hit tiûⁿ it-chīn pòa, siu I ê be̍h ji̍p chhng; nā-sī be̍h-hiūⁿ chiū ēng bōe hoa ê hé sio i. 13 Hit sî Iâ-so͘ tùi Ka-lī-lī kàu Iok-tàn, chiū-kūn Iok-hān, beh tùi i siū sóe-lé. 14 Nā-sī Iok-hān chó͘-chí I kóng, Góa ha̍p-kai tùi lí siū sóe-lé, lí hoán-tńg chiū-kūn góa mah? 15 Iâ-so͘ ìn i kóng, Taⁿ chhiáⁿ ún góa, in-ūi lán ha̍p-gî tio̍h án-ni, lâi chīn lóng-chóng ê gī. Chiū ún I. 16 Iâ-so͘ í-keng siū sóe-lé, liâm-piⁿ tùi chúi chiūⁿ-lâi: thiⁿ hut-jiân ūi-tio̍h I khui, I chiū khòaⁿ-kìⁿ Siōng-tè ê Sîn, chhin-chhiūⁿ chíⁿ-á kàng-lîm tī I ê téng-bīn. 17 Koh tùi thiⁿ ū siaⁿ kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê.
1 Hit時耶穌hō͘聖神chhōa到曠野，beh受魔鬼試。 2 已經禁食四十日暝，後來就iau。 3 試ê óa來kā伊講，你若是上帝ê Kiáⁿ，就教chiahê石變做餅。但是伊應講， 4 有記載講，人ê活，m̄-nā óa靠餅，就是óa靠tùi上帝ê嘴所出lóng總ê話。 5 魔鬼就chhōa伊到聖城，hō͘伊khiā tī殿ê尾溜，kā伊講， 6 你若是上帝ê Kiáⁿ，tio̍h家己tiô落去；因為有記載講， 伊beh為tio̍h你命令伊ê天使， In beh用手扶你， 免得你ê腳tak-tio̍h石。 7 耶穌kā伊講，Koh有記載講，莫得試主你ê上帝。 8 魔鬼koh chhōa伊上極高ê山，用天下萬國kap in ê榮光hō͘伊看； 9 kā伊講，你若仆落拜我，chiahê我lóng hō͘你。 10 耶穌就kā伊講，撒旦，退去；因為有記載講，Tio̍h拜主，你ê上帝；獨獨服事伊nā-tiāⁿ。 11 Tùi án-ni魔鬼離開伊；有天使到，來伺候伊。 12 耶穌聽見約翰關監，就退去加利利； 13 離開拿撒勒，去迦百農khiā起；chit所在tī海邊，tī Se-pò͘-lûn kap La̍p-tāi-lī ê交界； 14 是beh應驗早託先知以賽亞所講ê，講， 15 Se-pò͘-lûn ê地，La̍p-tāi-lī ê地， 沿海墘ê路，約旦ê河外， 外邦ê加利利； 16 坐tī烏暗ê百姓 ， Bat看見大光； 坐tī死蔭ê地ê， 有光起來照in。 17 Tùi hit時耶穌起頭宣傳講，Lín tio̍h反悔，因為天國近lah。 18 耶穌行tī加利利ê海墘；看見兩個兄弟á，就是西門，叫做彼得，kap伊ê兄弟安得烈，拋網tī海裡，因為是討魚人。 19 伊就kā in講，來tè我，我beh hō͘ lín得tio̍h人親像討魚ê。 20 In liâm-piⁿ離開網來tè伊。 21 Tùi chia進前，koh看見兩個兄弟á，就是西庇太ê Kiáⁿ雅各kap伊ê兄弟約翰，kap in老父西庇太tī船裡teh補網；耶穌招in。 22 In liâm-piⁿ離開船，拜別in ê老父，來tè伊。 23 耶穌遍行加利利，tī in ê會堂教示，宣傳天國ê福音，醫好百姓間ta̍k樣ê症頭，kap ta̍k樣ê病痛。 24 伊ê名聲報揚到thong敘利亞；凡有致病ê，tú-tio̍h chōe-chōe樣ê症頭kap痛疼ê，犯tio̍h鬼ê、羊hîn ê，piàn-sūi ê，chhōa in lóng來就近伊，伊就醫好in。 25 Hit時，tùi加利利、Te-ka-pho-lī、耶路撒冷、偤太，kap約旦外，有 chōe-chōe陣ê人來tè伊。
1 Hit sî Iâ-so͘ hō͘ Sèng Sîn chhōa kàu khòng-iá, beh siū Mô͘-kúi chhì. 2 Í-keng kìm-chia̍h sì-cha̍p ji̍t-mî, āu-lâi chiū iau. 3 Chhì-ê óa-lâi kā I kóng, Lí nā sī Siōng-tè ê Kiáⁿ, chiū kah chiah ê chio̍h pìⁿ chòe piáⁿ. Nā-sī I ìn kóng, 4 Ū kì-chài kóng, Lâng ê oa̍h, m̄ nā óa-khò piáⁿ, chiū-sī óa-khò tùi Siōng-tè ê chhùi só͘ chhut lóng-chóng ê ōe. 5 Mô͘-kúi chiū chhōa I kàu sèng siâⁿ, hō͘ I khiā tī tiān ê bé-liu, kā I kóng, 6 Lí nā sī Siōng-tè ê Kiáⁿ, tio̍h ka-kī tiô-lo̍h-khì; in-ūi ū kì-chài kóng, I beh ūi-tio̍h lí bēng-lēng I ê thiⁿ-sài, In beh ēng chhiú hû lí, Bián-tit lí ê kha tak-tio̍h chio̍h. 7 Iâ-so͘ kā i kóng, Koh ū kì-chài kóng, Bo̍h-tit chhì Chú lí ê Siōng-tè. 8 Mô͘-kúi koh chhōa I chiūⁿ ke̍k koâiⁿ ê soaⁿ, ēng thiⁿ-ē bān kok kap in ê êng-kng hō͘ I khòaⁿ; 9 kā I kóng, Lí nā phak-lo̍h pài góa, chiah-ê góa lóng hō͘ lí. 10 Iâ-so͘ chiū kā i kóng, Sat-tàn, thè-khì; in-ūi ū kì-chài kóng, Tio̍h pài Chú, lí ê Siōng-tè; to̍k-to̍k ho̍k-sāi I nā-tiāⁿ. 11 Tùi án-ni Mô͘-kúi lī-khui I; ū thiⁿ-sài kàu, lâi su-hāu I. 12 Iâ-so͘ thiaⁿ-kìⁿ Iok-hān koaiⁿ-kaⁿ, chiū thè-khì Ka-lī-lī; 13 lī-khui Ná-sat-le̍k, khì Ka-pek-lông khiā-khí; chit só͘-chāi tī hái-piⁿ, tī Se-pò͘-lûn kap La̍p-tāi-lī ê kau-kài; 14 sī beh èng-giām chá thok sian-ti Í-sài-a só͘ kóng ê, kóng, 15 Se-pò͘-lûn ê tōe, La̍p-tāi-lī ê tōe, Iân hái-kîⁿ ê lō͘, Iok-tàn ê hô gōa, Gōa-pang ê Ka-lī-lī; 16 Chē tī o͘-àm ê peh-sìⁿ, Bat khòaⁿ-kìⁿ tōa kng; Chē tī sí-ìm ê tōe ê, Ū kng khí-lâi chiò in. 17 Tùi hit sî Iâ-so͘ khí-thâu soan-thoân kóng, Lín tio̍h hoán-hóe, in-ūi thian-kok kūn lah. 18 Iâ-so͘ kiâⁿ tī Ka-lī-lī ê hái-kîⁿ; khòaⁿ-kìⁿ nn̄g ê hiaⁿ-tī-á, chiū-sī Se-bûn, kiò chòe Pí-tek, kap i ê hiaⁿ-tī An-tek-lia̍t, pha bāng tī hái-ni̍h, in-ūi sī thó-hî lâng. 19 I chiū kā in kóng, Lâi tè góa, góa beh hō͘ lín tit-tio̍h lâng chhin-chhiūⁿ thó-hî ê. 20 In liâm-piⁿ lī-khui bāng lâi tè I. 21 Tùi chia chìn-chêng, koh khòaⁿ-kìⁿ nn̄g ê hiaⁿ-tī-á, chiū-sī Se-pí-thài ê kiáⁿ Ngá-kok kap i ê hiaⁿ-tī Iok-hān, kap in lāu-pē Se-pí-thài tī chûn-ni̍h teh pó͘ bāng; Iâ-so͘ chio in. 22 In liâm-piⁿ lī-khui chûn, pài-pia̍t in ê lāu-pē, lâi tè I. 23 Iâ-so͘ piàn kiâⁿ Ka-lī-lī, tī in ê hōe-tn̂g kà-sī, soan-thoân thian-kok ê hok-im, i-hó peh-sìⁿ-kan ta̍k iūⁿ ê chèng-thâu, kap ta̍k iūⁿ ê pīⁿ-thiàⁿ. 24 I ê miâ-siaⁿ pò-iông kàu thong Sū-lī-a; hoān ū tì pīⁿ ê, tú-tio̍h chōe-chōe iūⁿ ê chèng-thâu kap thàng-thiàⁿ ê, hoān-tio̍h kúi ê, iûⁿ-hîn ê, piàn-sūi ê, chhōa in lóng lâi chiū-kūn I, I chiū i-hó in. 25 Hit sî, tùi Ka-lī-lī, Te-ka-pho-lī, Iâ-lō͘-sat-léng, Iû-thài, kap Iok-tàn gōa, ū chōe-chōe tīn ê lâng lâi tè I.
1 耶穌看見hiahê kui陣ê人，就peh上山；已經坐，伊ê學生就近伊。 2 伊開嘴教示in講， 3 心內sòng-hiong ê人有福氣，因為天國是in ê。 4 憂悶ê人有福氣，因為in beh受安慰。 5 溫柔ê人有福氣，因為in beh承接土地。 6 Iau嘴乾欣慕義ê人有福氣，因為in beh得tio̍h飽。 7 憐憫人ê人有福氣，因為in beh得tio̍h憐憫。 8 清氣心肝ê人有福氣，因為in beh看見上帝。 9 hō͘人和平ê人有福氣，因為in beh稱做上帝ê Kiáⁿ。 10 為tio̍h義bat受khún-tio̍k ê人有福氣，因為天國是in ê。 11 為tio̍h我，人chiah lóe罵lín，khún-tio̍k lín，譭謗lín萬項ê pháiⁿ，lín就有福氣。 12 Tio̍h歡喜快樂，因為lín tī天裡ê報賞是大；因為lín以前ê先知人，人亦án-ni khún-tio̍k in。 13 Lín是地上ê鹽；鹽若失味，beh用甚麼hō͘伊鹹？後來無路用，不過hiat tī外面，hō͘人thún踏nā-tiāⁿ。 14 Lín是世間ê光；城起tī山頂bōe-ōe隱密。 15 無人點燈hē tī斗下，就是hē tī燈台頂，就遍照厝內ê人。 16 Án-ni lín ê光tio̍h照tī人ê面前，hō͘ in看見lín ê好所行，來歸榮光hō͘ lín tī天裡ê父。 17 莫得phah算我來是beh廢無律法，á是先知；我來m̄是beh廢無，是beh應驗。 18 因為我實在kā lín講，就到天地廢無，律法ê一點一畫亦決斷bōe廢無，到lóng總成。 19 所以見若毀壞chiahê誡命至微細ê一條，續 án-ni教示人ê，tī天國beh稱伊做至微細；獨獨見若行續教示人ê，tī天國beh稱伊做大。 20 因為我kā lín講，設使lín ê義無贏過經學士kap法利賽人ê義，決斷bōe得入天國。 21 Lín bat聽見有對古早人講，M̄-thang害死人；害死人ê tio̍h受審判。 22 總是我kā lín講，見若受氣伊ê兄弟ê，tio̍h受審判；見若對伊ê兄弟講Lia̍p-ka ê，tio̍h受公會辦；見若講Mô͘-lī ê，tio̍h受地獄ê火。 23 所以你若teh獻你ê禮物tī祭壇，也tī hia記得你ê兄弟有甚麼hia̍p-hiâm你； 24 tio̍h tī hia放下你ê禮物tī壇前，事先去kap你ê兄弟和好，然後來獻你ê禮物。 25 你iáu kap你ê對敵tī路裡，tio̍h緊緊kap伊和，驚了對敵交你hō͘審判官，審判官交你hō͘衙役，你就受關落監。 26 我實在kā你講，一絲一毫bē還，你決斷bōe-ōe出hia。 27 Lín bat聽見有話講，M̄-thang行姦淫； 28 但是我kā lín講，見若看見婦女，來動起慾念ê，心內已經淫伊。 29 設使你ê chiàⁿ目致到你犯罪，就tio̍h iah hiat-ka̍k；寧可百體喪失一體，免致你全身hiat落地獄。 30 設使你ê chiàⁿ手致到你犯罪，就tio̍h斬hiat-ka̍k；寧可百體喪失一體，免致你全身去地獄。 31 Koh有話講，人若beh離伊ê bó͘，tio̍h用離書hō͘伊； 32 但是我kā lín講，見若m̄是為tio̍h姦淫ê緣故來離伊ê bó͘，便是hō͘伊做有îm-hēng ê；見若chhōa所離ê，亦是行姦淫。 33 Koh Lín bat聽見有對古早人講，M̄-thang背chiù-chōa，你所chiù ê chōa，tio̍h還hō͘主； 34 但是我kā lín講，一概莫得chiù-chōa；莫得kí天，因為天是上帝ê座位； 35 莫得kí地，因為地是伊ê腳踏；莫得kí耶路撒冷，因為是大人君ê城。 36 亦莫得kí你ê頭殼來chiù-chōa，因為一支頭毛，你bōe hō͘伊做烏做白。 37 但是lín ê話tio̍h講，是，就是；m̄是，就m̄是；chiahê以外是tùi hitê pháiⁿ-ê出。 38 Lín bat聽見有話講，目睭賠目睭，嘴齒賠嘴齒； 39 但是我kā lín講，莫得kap pháiⁿ抵敵；若有人siàn你chiàⁿ-pêng ê嘴phóe，tò-pêng-ê亦oa̍t hō͘伊。 40 有人ài告你，the̍h你ê內衫，外衫亦放hō͘伊。 41 有人勉強你行一里，就kap伊行兩里。 42 對你求ê，hō͘伊；beh kā你借ê，莫得oa̍t走。 43 Lín bat聽見有話講，Tio̍h疼你ê厝邊，怨恨你ê對敵； 44 但是我kā lín講，對敵lín ê，tio̍h疼in；khún-tio̍k lín ê，tio̍h替in祈禱； 45 hō͘ lín成做lín tī天裡ê父ê Kiáⁿ；因為伊hō͘伊ê日起來照pháiⁿ人kap好人，亦用雨ak義kap不義ê人。 46 因為lín若疼疼lín ê，有甚麼報賞？hiahê抽餉ê kiám無án-ni行mah？ 47 Lín kan-ta請安lín ê兄弟，有甚麼khah贏人？外邦人kiám無án-ni行mah？ 48 所以lín tio̍h純全，親像lín ê天父ê純全。
1 Iâ-so͘ khòaⁿ-kìⁿ hiah ê kui-tīn ê lâng, chiū peh-chiūⁿ soaⁿ; í-keng chē, I ê ha̍k-seng chiū-kūn I. 2 I khui chhùi kà-sī in kóng, 3 Sim-lāi sòng-hiong ê lâng ū hok-khì, in-ūi thian-kok sī in ê. 4 Iu-būn ê lâng ū hok-khì, in-ūi in beh siū an-ùi. 5 Un-jiû ê lâng ū hok-khì, in-ūi in beh sêng-chiap thó͘-tōe. 6 Iau chhùi-ta him-bō͘ gī ê lâng ū hok-khì, in-ūi in beh tit-tio̍h pá. 7 Lîn-bín lâng ê lâng ū hok-khì, in-ūi in beh tit-tio̍h lîn-bín. 8 Chheng-khì sim-koaⁿ ê lâng ū hok-khì, in-ūi in beh khòaⁿ-kìⁿ Siōng-tè. 9 Hō͘ lâng hô-pêng ê lâng ū hok-khì, in-ūi in beh chheng chòe Siōng-tè ê kiáⁿ. 10 Ūi-tio̍h gī bat siū khún-tio̍k ê lâng ū hok-khì, in-ūi thian-kok sī in ê. 11 Ūi-tio̍h góa, lâng chiah lóe-mē lín, khún-tio̍k lín, húi-pòng lín bān hāng ê pháiⁿ, lín chiū ū hok-khì. 12 Tio̍h hoaⁿ-hí khoài-lo̍k, in-ūi lín tī thiⁿ-ni̍h ê pò-siúⁿ sī tōa; in-ūi lín í-chêng ê sian-ti lâng, lâng ia̍h án-ni khún-tio̍k in. 13 Lín sī tōe-chiūⁿ ê iâm; iâm nā sit bī, beh ēng sím-mi̍h hō͘ i kiâm? Āu-lâi bô lō͘-ēng, put-kò hiat tī gōa-bīn, hō͘ lâng thún-ta̍h nā-tiāⁿ. 14 Lín sī sè-kan ê kng; siâⁿ khí tī soaⁿ-téng bōe-ōe ún-ba̍t. 15 Bô lâng tiám teng hē tī táu ē, chiū-sī hē tī teng-tâi téng, chiū piàn chiò chhù-lāi ê lâng. 16 Án-ni lín ê kng tio̍h chiò tī lâng ê bīn-chêng, hō͘ in khòaⁿ-kìⁿ lín ê hó só͘ kiâⁿ, lâi kui êng-kng hō͘ lín tī thiⁿ-ni̍h ê Pē. 17 Bo̍h-tit phah-sǹg góa lâi sī beh hòe-bô lu̍t-hoat á-sī sian-ti; góa lâi m̄ sī beh hòe-bô, sī beh èng-giām. 18 In-ūi góa si̍t-chāi kā lín kóng, Chiū kàu thiⁿ tōe hòe-bô, lu̍t-hoat ê chi̍t tiám chi̍t u̍ih ia̍h koat-toàn bōe hòe-bô, kàu lóng-chóng chiâⁿ. 19 Só͘-í kìⁿ-nā húi-hoāi chiah ê kài-bēng chì-bî-sòe ê chi̍t tiâu, sòa án-ni kà-sī lâng ê, tī thian-kok beh chheng i chòe chì-bî-sòe; to̍k-to̍k kìⁿ-nā kiâⁿ sòa kà-sī lâng ê, tī thian-kok beh chheng i chòe tōa. 20 In-ūi góa kā lín kóng, siat-sú lín ê gī bô iâⁿ-kè keng-ha̍k-sū kap Hoat-lī-sài lâng ê gī, koat-toàn bōe-tit ji̍p thian-kok. 21 Lín bat thiaⁿ-kìⁿ ū tùi kó͘-chá lâng kóng, M̄-thang hāi-sí lâng; hāi-sí lâng ê tio̍h siū sím-phòaⁿ. 22 Chóng-sī góa kā lín kóng, kìⁿ-nā siū-khì i ê hiaⁿ-tī ê, tio̍h siū sím-phòaⁿ; kìⁿ-nā tùi i ê hiaⁿ-tī kóng Lia̍p-ka ê, tio̍h siū kong-hōe pān; kìⁿ-nā kóng Mô͘-lī ê, tio̍h siū tē-ge̍k ê hé. 23 Só͘-í lí nā teh hiàn lí ê lé-mi̍h tī chè-tôaⁿ, iā tī hia kì-tit lí ê hiaⁿ-tī ū sím-mi̍h hia̍p-hiâm lí; 24 tio̍h tī hia pàng-hē lí ê lé-mi̍h tī tôaⁿ-chêng, tāi-seng khì kap lí ê hiaⁿ-tī hô-hó, jiân-āu lâi hiàn lí ê lé-mi̍h. 25 Lí iáu kap lí ê tùi-te̍k tī lō͘-ni̍h, tio̍h kín-kín kap i hô, kiaⁿ-liáu tùi-te̍k kau lí hō͘ sím-phòaⁿ koaⁿ, sím-phòaⁿ koaⁿ kau lí hō͘ gê-ia̍h, lí chiū siū koaiⁿ lo̍h kaⁿ. 26 Góa si̍t-chāi kā lí kóng, Chi̍t si chi̍t hô bē hêng, lí koat-toàn bōe-ōe chhut hia. 27 Lín bat thiaⁿ-kìⁿ ū ōe kóng, M̄-thang kiâⁿ kan-îm; 28 nā-sī góa kā lín kóng, kìⁿ-nā khòaⁿ-kìⁿ hū-lú, lâi tōng-khí io̍k-liām ê, sim-lāi í-keng îm i. 29 Siat-sú lí ê chiàⁿ ba̍k tì-kàu lí hoān-chōe, chiū tio̍h iah hiat-ka̍k; lêng-khó͘ pah-thé sòng-sit chi̍t thé, bián-tì lí choân-sin hiat-lo̍h tē-ge̍k. 30 Siat-sú lí ê chiàⁿ chhiú tì-kàu lí hoān-chōe, chiū tio̍h chām hiat-ka̍k; lêng-khó͘ pah-thé sòng-sit chi̍t thé, bián-tì lí choân-sin khì tē-ge̍k. 31 Koh ū ōe kóng, Lâng nā beh lî i ê bó͘, tio̍h ēng lî-chu hō͘ i; 32 nā-sī góa kā lín kóng, kìⁿ-nā m̄ sī ūi-tio̍h kan-îm ê iân-kò͘ lâi lî i ê bó͘, piān sī hō͘ i chòe ū îm-hēng ê; kìⁿ-nā chhōa só͘ lî ê, ia̍h sī kiâⁿ kan-îm. 33 Koh lín bat thiaⁿ-kìⁿ ū tùi kó͘-chá lâng kóng, M̄-thang pōe chiù-chōa, lí só͘ chiù ê chōa, tio̍h hêng hō͘ Chú; 34 nā-sī góa kā lín kóng, It-khài bo̍h-tit chiù-chōa; bo̍h-tit kí thiⁿ, in-ūi thiⁿ sī Siōng-tè ê chō-ūi; 35 bo̍h-tit kí tōe, in-ūi tōe sī I ê kha-ta̍h; bo̍h-tit kí Iâ-lō͘-sat-léng, in-ūi sī tōa Jîn-kun ê siâⁿ. 36 Ia̍h bo̍h-tit kí lí ê thâu-khak lâi chiù-chōa, in-ūi chi̍t ki thâu-mn̂g, lí bōe hō͘ i chòe o͘ chòe pe̍h. 37 Nā-sī lín ê ōe tio̍h kóng, Sī, chiū Sī; M̄ sī, chiū M̄ sī; chiah-ê í-gōa sī tùi hit ê pháiⁿ-ê chhut. 38 Lín bat thiaⁿ-kìⁿ ū ōe kóng, Ba̍k-chiu pê ba̍k-chiu, chhùi-khí pê chhùi-khí; 39 nā-sī góa kā lín kóng, Bo̍h-tit kap pháiⁿ tí-te̍k; nā ū lâng siàn lí chiàⁿ-pêng ê chhùi-phóe, tò-pêng-ê ia̍h oa̍t hō͘ i. 40 Ū lâng ài kò lí, the̍h lí ê lāi-saⁿ, gōa-saⁿ ia̍h pàng hō͘ i. 41 Ū lâng bián-kióng lí kiâⁿ chi̍t lí, chiū kap i kiâⁿ nn̄g lí. 42 Tùi lí kiû ê, hō͘ i; beh kā lí chioh ê, bo̍h-tit oa̍t-cháu. 43 Lín bat thiaⁿ-kìⁿ ū ōe kóng, Tio̍h thiàⁿ lí ê chhù-piⁿ, oàn-hūn lí ê tùi-te̍k; 44 nā-sī góa kā lín kóng, Tùi-te̍k lín ê, tio̍h thiàⁿ in; khún-tio̍k lín ê, tio̍h thòe in kî-tó; 45 hō͘ lín chiâⁿ-chòe lín tī thiⁿ-ni̍h ê Pē ê kiáⁿ; in-ūi I hō͘ I ê ji̍t khí lâi chiò pháiⁿ lâng kap hó lâng, ia̍h ēng hō͘ ak gī kap put-gī ê lâng. 46 In-ūi lín nā thiàⁿ thiàⁿ lín ê, ū sím-mi̍h pò-siúⁿ? hiah ê thiu-hiòng ê kiám bô án-ni kiâⁿ mah? 47 Lín kan-ta chhéng-an lín ê hiaⁿ-tī, ū sím-mi̍h khah-iâⁿ lâng? gōa-pang lâng kiám bô án-ni kiâⁿ mah? 48 Só͘-í lín tio̍h sûn-choân, chhin-chhiūⁿ lín ê Thiⁿ Pē ê sûn-choân.
1 謹慎莫得tī人ê面前行lín ê義，故意hō͘ in看見；若án-ni，就無得tio̍h報賞tī lín天裡ê父。 2 所以賑濟ê時，莫得tī你ê面前pûn號頭，親像假好ê人tī會堂kap街路所做ê，ài人榮光in。我實在kā lín講，In已經受tio̍h in ê報賞lah。 3 獨獨你賑濟ê時，莫得hō͘你ê tò手知你ê chiàⁿ手ê所做； 4 hō͘你ê賑濟隱密；就你ê父，鑑察tī隱密ê，beh報答你。 5 Lín祈禱ê時，莫得親像假好ê人；因為in ài khiā tī會堂kap大街面ê oat-kak祈禱，beh hō͘人看見。我實在kā lín講，In已經受tio̍h in ê報賞lah。 6 獨獨你祈禱ê時，tio̍h入你ê密房，關門，求你ê父，tiàm tī隱密ê；就你ê父，鑑察tī隱密ê，beh報答你。 7 Koh lín祈禱ê時，話莫得ta̍uh-ta̍uh重(têng)，親像外邦人；因為in phah算講chōe-chōe話，chiah得tio̍h聽見。 8 所以lín莫得學in；因為lín bē求伊ê事先，lín ê父已經知lín所欠用ê。 9 所以lín tio̍h án-ni祈禱：阮tī天裡ê父，願你ê名聖。 10 你ê國臨到。你ê旨意得成，tī地裡親像tī天裡。 11 阮ê日食，今á日hō͘阮。 12 赦免阮ê辜負，親像阮亦有赦免辜負阮ê人。 13 莫得chhōa阮入tī試，tio̍h救阮脫離hitê pháiⁿ-ê。 14 因為lín若赦免人ê過失，lín ê天父亦beh赦免lín。 15 Lín若無赦免人ê過失，lín ê父亦無beh赦免lín ê過失。 16 Koh lín禁食ê時，莫得親像假好ê人帶憂容；因為in將in ê面變pháiⁿ看，beh hō͘人看見in teh禁食。我實在kā lín講，In已經受tio̍h in ê報賞lah。 17 獨獨你禁食ê時，tio̍h抹你ê頭，洗你ê面； 18 無hō͘人看見你teh禁食，是hō͘你tòa tī隱密ê父看見；就你ê父，鑑察tī隱密ê，beh報答你。 19 莫得為tio̍h家己積聚財寶tī地裡，有蟲kap sian phah-pháiⁿ，也有賊iah孔偷the̍h ê所在。 20 獨獨為tio̍h家己積聚財寶tī天裡，蟲kap sian無phah-pháiⁿ，也無賊iah孔偷the̍h ê所在。 21 因為lín ê財寶tī hia，lín ê心也beh tī hia。 22 身軀ê燈就是目睭；你ê目睭若金，thong身軀就光。 23 你ê目睭若花，thong身軀就暗。你內面ê光若暗，hitê暗jōa大ah！ 24 無人會服事兩個主人；因為伊會怨恨chitê，疼hitê；á是會tùi-tiōng chitê，看輕hitê；lín bōe-ōe服事上帝續服事錢財。 25 所以我kā lín講，莫得掛慮lín ê性命beh食甚麼，beh lim甚麼，á是lín ê身軀beh穿甚麼。Lín ê性命kiám無khah大tī米糧，也lín ê身軀kiám無khah大tī衣裳mah？ 26 試看天中ê飛鳥，無種作，無收成，無積聚tī粟倉，lín ê天父也teh飼in。Lín kiám無比hiahê khah貴氣mah？ 27 Lín甚麼人會用掛慮hō͘性命khah長一刻久？ 28 啥事為tio̍h衣裳掛慮ah？試想山裡ê百合花，怎樣大叢；in無tio̍h磨，無紡績(cheh)； 29 但是我kā lín講，當所羅門極hâng-ngó͘ ê時，伊所穿ê m̄值tio̍h chit號花ê一蕊。 30 Taⁿ山裡ê草，今á日tī-teh，明á日hiat tī火爐，上帝hō͘伊穿到án-ni，何況lín，小信ê人ah？ 31 所以莫得掛慮講，阮beh食甚麼？Beh lim甚麼？Beh穿甚麼？ 32 因為chiahê lóng是外邦人所求ê；lín ê天父也知chiahê lóng是lín欠用ê。 33 獨獨事先求伊ê國kap伊ê義，就chiahê物lóng beh 續 hō͘ lín。 34 所以莫得為tio̍h明á日掛慮；因為hitê明á日，伊beh家己掛慮。一日ê艱苦tī一日夠額。
1 Kín-sīn bo̍h-tit tī lâng ê bīn-chêng kiâⁿ lín ê gī, kò͘-ì hō͘ in khòaⁿ-kìⁿ; nā án-ni, chiū bô tit-tio̍h pò-siúⁿ tī lín thiⁿ-ni̍h ê Pē. 2 Só͘-í chín-chè ê sî, bo̍h-tit tī lí ê bīn-chêng pûn hō-thâu, chhin-chhiūⁿ ké-hó ê lâng tī hōe-tn̂g kap ke-lō͘ só͘ chòe ê, ài lâng êng-kng in. Góa si̍t-chāi kā lín kóng, In í-keng siū-tio̍h in ê pò-siúⁿ lah. 3 To̍k-to̍k lí chín-chè ê sî, bo̍h-tit hō͘ lí ê tò-chhiú chai lí ê chiàⁿ-chhiú ê só͘ chòe; 4 hō͘ lí ê chín-chè ún-ba̍t; chiū lí ê Pē, kàm-chhat tī ún-ba̍t ê, beh pò-tap lí. 5 Lín kî-tó ê sî, bo̍h-tit chhin-chhiūⁿ ké-hó ê lâng; in-ūi in ài khiā tī hōe-tn̂g kap tōa koe-bīn ê oat-kak kî-tó, beh hō͘ lâng khòaⁿ-kìⁿ. Góa si̍t-chāi kā lín kóng, In í-keng siū-tio̍h in ê pò-siúⁿ lah. 6 To̍k-to̍k lí kî-tó ê sî, tio̍h ji̍p lí ê ba̍t-pâng, koaiⁿ mn̂g, kiû lí ê Pē, tiàm tī ún-ba̍t ê; chiū lí ê Pē, kàm-chhat tī ún-ba̍t ê, beh pò-tap lí. 7 Koh lín kî-tó ê sî, ōe bo̍h-tit ta̍uh-ta̍uh têng, chhin-chhiūⁿ gōa-pang lâng; in-ūi in phah-sǹg kóng chōe-chōe ōe, chiah tit-tio̍h thiaⁿ-kìⁿ. 8 Só͘-í lín bo̍h-tit o̍h in; in-ūi lín bē kiû I ê tāi-seng, lín ê Pē í-keng chai lín só͘ khiàm-ēng ê. 9 Só͘-í lín tio̍h án-ni kî-tó: Goán tī thiⁿ-ni̍h ê Pē, Goān lí ê miâ sèng. 10 Lí ê kok lîm-kàu. Lí ê chí-ì tit chiâⁿ, tī tōe-ni̍h chhin-chhiūⁿ tī thiⁿ-ni̍h. 11 Goán ê ji̍t-si̍t, kin-á-ji̍t hō͘ goán. 12 Sià-bián goán ê ko͘-hū, chhin-chhiūⁿ goán ia̍h ū sià-bián ko͘-hū goán ê lâng. 13 Bo̍h-tit chhōa goán ji̍p tī chhì, tio̍h kiù goán thoat-lī hit ê pháiⁿ-ê. 14 In-ūi lín nā sià-bián lâng ê kè-sit, lín ê Thiⁿ Pē ia̍h beh sià-bián lín. 15 Lín nā bô sià-bián lâng ê kè-sit, lín ê Pē ia̍h bô beh sià-bián lín ê kè-sit. 16 Koh lín kìm-chia̍h ê sî, bo̍h-tit chhin-chhiūⁿ ké-hó ê lâng tài iu-iông; in-ūi in chiong in ê bīn pìⁿ pháiⁿ khòaⁿ, beh hō͘ lâng khòaⁿ-kìⁿ in teh kìm-chia̍h. Góa si̍t-chāi kā lín kóng, In í-keng siū-tio̍h in ê pò-siúⁿ lah. 17 To̍k-to̍k lí kìm-chia̍h ê sî, tio̍h boah lí ê thâu, sóe lí ê bīn; 18 bô hō͘ lâng khòaⁿ-kìⁿ lí teh kìm-chia̍h, sī hō͘ lí tòa tī ún-ba̍t ê Pē khòaⁿ-kìⁿ; chiū lí ê Pē, kàm-chhat tī ún-ba̍t ê, beh pò-tap lí. 19 Bo̍h-tit ūi-tio̍h ka-kī chek-chū châi-pó tī tōe-ni̍h, ū thâng kap sian phah-pháiⁿ, iā ū chha̍t iah khang thau-the̍h ê só͘-chāi. 20 To̍k-to̍k ūi-tio̍h ka-kī chek-chū châi-pó tī thiⁿ-ni̍h, thâng kap sian bô phah-pháiⁿ, iā bô chha̍t iah khang thau-the̍h ê só͘-chāi. 21 In-ūi lín ê châi-pó tī hia, lín ê sim iā beh tī hia. 22 Seng-khu ê teng chiū-sī ba̍k-chiu; lí ê ba̍k-chiu nā kim, thong seng-khu chiū kng. 23 Lí ê ba̍k-chiu nā hoe, thong seng-khu chiū àm. Lí lāi-bīn ê kng nā àm, hit ê àm jōa tōa ah! 24 Bô lâng ōe ho̍k-sāi nn̄g ê chú-lâng; in-ūi i ōe oàn-hūn chit-ê, thiàⁿ hit-ê; á-sī ōe tùi-tiōng chit-ê, khòaⁿ-khin hit-ê; lín bōe-ōe ho̍k-sāi Siōng-tè sòa ho̍k-sāi chîⁿ-châi. 25 Só͘-í góa kā lín kóng, Bo̍h-tit khòa-lū lín ê sìⁿ-miā beh chia̍h sím-mi̍h, beh lim sím-mi̍h, á-sī lín ê seng-khu beh chhēng sím-mi̍h. Lín ê sìⁿ-miā kiám bô khah tōa tī bí-niû, iā lín ê seng-khu kiám bô khah tōa tī i-chiûⁿ mah? 26 Chhì-khòaⁿ thiⁿ-tiong ê pe-chiáu, bô chèng-choh, bô siu-sêng, bô chek-chū tī chhek-chhng, lín ê Thiⁿ Pē iā teh chhī in. Lín kiám bô pí hiah-ê khah kùi-khì mah? 27 Lín sím-mi̍h lâng ōe ēng khòa-lū hō͘ sìⁿ-miā khah tn̂g chi̍t khek kú? 28 Siáⁿ-sū ūi-tio̍h i-chiûⁿ khòa-lū ah? Chhì-siūⁿ soaⁿ-ni̍h ê pek-ha̍p-hoe, cháiⁿ-iūⁿ tōa châng; in bô tio̍h-bôa, bô pháng cheh; 29 nā-sī góa kā lín kóng, tng Só͘-lô-bûn ke̍k hâng-ngó͘ ê sî, i só͘ chhēng ê m̄ ta̍t-tio̍h chit hō hoe ê chi̍t lúi. 30 Taⁿ soaⁿ-ni̍h ê chháu, kin-á-ji̍t tī-teh, bîn-á-ji̍t hiat tī hé-lô͘, Siōng-tè hō͘ i chhēng kàu án-ni, hô-hòng lín, sió-sìn ê lâng ah? 31 Só͘-í bo̍h-tit khòa-lū kóng, Goán beh chia̍h sím-mi̍h? Beh lim sím-mi̍h? Beh chhēng sím-mi̍h? 32 In-ūi chiah-ê lóng sī gōa-pang lâng só͘ kiû ê; lín ê Thiⁿ Pē iā chai chiah-ê lóng sī lín khiàm-ēng ê. 33 To̍k-to̍k tāi-seng kiû I ê kok kap I ê gī, chiū chiah ê mi̍h lóng beh sòa hō͘ lín. 34 Só͘-í bo̍h-tit ūi-tio̍h bîn-á-ji̍t khòa-lū; in-ūi hit ê bîn-á-ji̍t, i beh ka-kī khòa-lū. Chi̍t ji̍t ê kan-khó͘ tī chi̍t ji̍t kàu-gia̍h.
1 莫得批評人，chiah免tú-tio̍h批評。 2 因為lín用甚麼批評來批評，亦beh án-ni受批評；lín用甚麼量來量，亦beh án-ni量hō͘ lín。 3 Koh你怎樣看見兄弟目睭內ê草á幼，亦無想你目睭內ê楹á柴ah？ 4 Beh怎樣kā你ê兄弟講，你目睭內ê草á幼hō͘我kā你the̍h起來，亦你目睭內竟然有楹á柴ah？ 5 假好ê人ah，事先the̍h去你目睭內ê楹á柴，chiah會明明看見thang the̍h去兄弟目睭內ê草á幼。 6 莫得用聖ê物hō͘狗，亦莫得用lín ê珍珠hiat tī豬ê頭前；驚了in用腳踏伊，oa̍t-lìn-tńg來咬lín。 7 求就hō͘ lín，chhē就tú-tio̍h，phah門就kā lín開。 8 因為見若求ê得tio̍h；chhē ê tú-tio̍h；phah門ê，就kā伊開。 9 Lín中間有甚麼人，伊ê Kiáⁿ kā伊討餅，kiám beh用石頭hō͘伊？ 10 á是beh ti̍h魚，kiám beh用蛇hō͘伊？ 11 Lín chiahê雖然pháiⁿ，iáu-kú會曉得用好物hō͘ lín ê Kiáⁿ兒，何況lín tī天裡ê父，kiám無beh用好物hō͘求伊ê人mah？ 12 所以lín見若ài人款待lín ê，lín亦tio̍h án-ni款待人；因為這是律法kap先知。 13 Lín tio̍h tùi hitê狹門入；因為透到滅無ê，hitê門闊，hitê路大條，tùi hia入ê人chōe。 14 透到活ê，hitê門狹，hitê路細條，chhē-tio̍h ê人少。 15 謹慎持防假ê先知，in就近lín，外面是羊羔，內面是狠惡ê豺狼。 16 Lín beh tùi in ê果子來bat伊；kiám tùi刺phè挽(bán)葡萄，tùi蒺藜(chi̍t-lê)挽無花果mah？ 17 Án-ni見若好樹結好果子；pháiⁿ樹結pháiⁿ果子。 18 好樹bōe結pháiⁿ果子，pháiⁿ樹bōe結好果子。 19 見若樹無結好果子ê，就chhò伊，hiat落火。 20 所以lín beh tùi in ê果子來bat伊。 21 見若稱呼我講，主ah，主ah ê，無一盡入天國；獨獨行我tī天裡ê父ê旨意ê，chiah會。 22 當hit日chōe-chōe人beh kā我講，主ah，主ah，阮kiám m̄是用你ê名傳教，用你ê名趕鬼，用你ê名行chōe-chōe權能mah？ 23 就hit時我beh明明kā in講，我lóng m̄-bat lín；做不法ê，tio̍h離開我去。 24 所以見若聽我chiahê話來行ê，beh比並知識ê人，起伊ê厝tī石磐頂； 25 雨落，大水到，風吹，衝tio̍h hit間厝，亦無倒；因為地基tī石磐頂。 26 見若聽我chiahê話，無行ê，beh比並戇人，起伊ê厝tī沙頂； 27 雨落，大水到，風吹，衝tio̍h hit間厝，就倒；koh伊ê倒是傷重。 28 耶穌講chiahê話soah，眾人奇怪伊ê教示。 29 因為伊教示人，親像有權能ê，無親像in ê經學士。
1 Bo̍h-tit phoe-phêng lâng, chiah bián tú-tio̍h phoe-phêng. 2 In-ūi lín ēng sím-mi̍h phoe-phêng lâi phoe-phêng, ia̍h beh án-ni siū phoe-phêng; lín ēng sím-mi̍h niû lâi niû, ia̍h beh án-ni niû hō͘ lín. 3 Koh lí cháiⁿ-iūⁿ khòaⁿ-kìⁿ hiaⁿ-tī ba̍k-chiu-lāi ê chháu-á-iù, ia̍h bô siūⁿ lí ba̍k-chiu-lāi ê îⁿ-á-chhâ ah? 4 Beh cháiⁿ-iūⁿ kā lí ê hiaⁿ-tī kóng, Lí ba̍k-chiu-lāi ê chháu-á-iù hō͘ góa kā lí the̍h-khí-lâi, ia̍h lí ba̍k-chiu-lāi kèng-jiân ū îⁿ-á-chhâ ah? 5 Ké-hó ê lâng ah, tāi-seng the̍h-khì lí ba̍k-chiu-lāi ê îⁿ-á-chhâ, chiah ōe bêng-bêng khòaⁿ-kìⁿ thang the̍h-khì hiaⁿ-tī ba̍k-chiu-lāi ê chháu-á-iù. 6 Bo̍h-tit ēng sèng ê mi̍h hō͘ káu, ia̍h bo̍h-tit ēng lín ê chin-chu hiat tī ti ê thâu-chêng; kiaⁿ-liáu in ēng kha ta̍h i, oa̍t-lìn-tńg lâi kā lín. 7 Kiû chiū hō͘ lín, chhē chiū tú-tio̍h, phah mn̂g chiū kā lín khui. 8 In-ūi kìⁿ-nā kiû ê tit-tio̍h; chhē ê tú-tio̍h; phah mn̂g ê, chiū kā i khui. 9 Lín tiong-kan ū sím-mi̍h lâng, i ê kiáⁿ kā i thó piáⁿ, kiám beh ēng chio̍h-thâu hō͘ i? 10 á-sī beh ti̍h hî, kiám beh ēng chôa hō͘ i? 11 Lín chiah-ê sui-jiân pháiⁿ, iáu-kú ōe hiáu-tit ēng hó mi̍h hō͘ lín ê kiáⁿ-jî, hô-hòng lín tī thiⁿ-ni̍h ê Pē, kiám bô beh ēng hó mi̍h hō͘ kiû I ê lâng mah? 12 Só͘-í lín kìⁿ-nā ài lâng khoán-thāi lín ê, lín ia̍h tio̍h án-ni khoán-thāi lâng; in-ūi che sī lu̍t-hoat kap sian-ti. 13 Lín tio̍h tùi hit ê oe̍h mn̂g ji̍p; in-ūi thàu kàu bia̍t-bô ê, hit ê mn̂g khoah, hit ê lō͘ tōa tiâu, tùi hia ji̍p ê lâng chōe. 14 Thàu kàu oa̍h ê, hit ê mn̂g oe̍h, hit ê lō͘ sòe tiâu, chhē-tio̍h ê lâng chió. 15 Kín-sīn tî-hông ké ê sian-ti, in chiū-kūn lín, gōa-bīn sī iûⁿ-ko, lāi-bīn sī hiông-ok ê chhâi-lông. 16 Lín beh tùi in ê ké-chí lâi bat i; kiám tùi chhì-phè bán phû-tô, tùi chi̍t-lê bán bû-hoa-kó mah? 17 Án-ni kìⁿ-nā hó chhiū kiat hó ké-chí; pháiⁿ chhiū kiat pháiⁿ ké-chí. 18 Hó chhiū bōe kiat pháiⁿ ké-chí, pháiⁿ chhiū bōe kiat hó ké-chí. 19 Kìⁿ-nā chhiū bô kiat hó ké-chí ê, chiū chhò i, hiat-lo̍h hé. 20 Só͘-í lín beh tùi in ê ké-chí lâi bat i. 21 Kìⁿ-nā chheng-ho͘ góa kóng, Chú ah, Chú ah ê, bô it-chīn ji̍p thian-kok; to̍k-to̍k kiâⁿ góa tī thiⁿ-ni̍h ê Pē ê chí-ì ê, chiah ōe. 22 Tng hit ji̍t chōe-chōe lâng beh kā góa kóng, Chú ah, Chú ah, goán kiám m̄ sī ēng lí ê miâ thoân kàu, ēng lí ê miâ kóaⁿ kúi, ēng lí ê miâ kiâⁿ chōe-chōe koân-lêng mah? 23 Chiū hit sî góa beh bêng-bêng kā in kóng, Góa lóng m̄ bat lín; chòe put-hoat ê, tio̍h lī-khui góa khì. 24 Só͘-í kìⁿ-nā thiaⁿ góa chiah ê ōe lâi kiâⁿ ê, beh pí-phēng tì-sek ê lâng, khí i ê chhù tī chio̍h-pôaⁿ téng; 25 hō͘ lo̍h, tōa chúi kàu, hong chhe, chhiong-tio̍h hit keng chhù, ia̍h bô tó; in-ūi tōe-ki tī chio̍h-pôaⁿ téng. 26 Kìⁿ-nā thiaⁿ góa chiah ê ōe, bô kiâⁿ ê, beh pí-phēng gōng lâng, khí i ê chhù tī soa téng; 27 hō͘ lo̍h, tōa chúi kàu, hong chhe, chhiong-tio̍h hit keng chhù, chiū tó; koh i ê tó sī siong-tiōng. 28 Iâ-so͘ kóng chiah ê ōe soah, chèng lâng kî-koài I ê kà-sī. 29 In-ūi I kà-sī lâng, chhin-chhiūⁿ ū koân-lêng ê, bô chhin-chhiūⁿ in ê keng-ha̍k-sū.
1 耶穌已經落山，kui大陣ê人tè伊。 2 Tú-tn̄g有一个thái-ko ê就近來拜伊講，主ah，你若肯，就會hō͘我清氣。 3 伊就伸手摸伊講，我肯，你thang清氣；伊ê thái-ko liâm-piⁿ清氣。 4 耶穌koh kā伊講，謹慎莫得kā人講；獨獨去，將本身hō͘祭司驗，亦tio̍h獻摩西所吩咐ê禮物，來做證據tī人。 5 已經入迦百農，有百總就近伊，來求伊講， 6 主ah，我ê奴僕piàn-sūi，倒tī厝內，艱苦到極。 7 伊就kā伊講，我來去kā醫伊。 8 百總應講，主ah，你到我tau，我當bōe起；你kan-ta講一句話，我ê奴僕就會好。 9 因為我亦是hō͘人管ê人，也有兵hō͘我管；kā chitê講，去，伊就去；kā hitê講，來，伊就來；kā我ê奴僕講，行án-ni，伊就行án-ni。 10 耶穌聽見就奇怪，kā tè伊ê人講，我實在kā lín講，親像chit號ê深信，連以色列中，我bē bat tú-tio̍h。 11 我koh kā lín講，tùi東tùi西，有chōe-chōe人beh到，kap亞伯拉罕、以撒、雅各，坐桌tī天國； 12 但是國ê子民beh tú-tio̍h趕出tī外面ê烏暗；tī hia beh有啼哭咬牙切齒。 13 耶穌就kā百總講，去ah，照你ê信kā你成；tú-tú hit時，伊ê奴僕就好。 14 耶穌入彼得ê家，看見伊ê丈姆，患tio̍h熱病倒teh。 15 就摸伊ê手，熱就退；婦人人就起來伺候伊。 16 到黃昏暗，有人chhōa chōe-chōe犯tio̍h鬼ê就近伊；伊用一句話趕出hiahê神；koh醫好一切有病ê人； 17 就是beh應驗先知以賽亞所講ê，講，伊本身替受咱ê軟弱，擔當咱ê病症。 18 耶穌看見kui大陣ê人圍伊，就吩咐過去hit pêng岸。 19 有一个經學士來，kā伊講，先生ah，你無論tá落去，我beh tè你。 20 耶穌就kā伊講，狐狸有孔，天中ê飛鳥有siū；獨獨人子無khòa頭殼ê所在。 21 Koh一个學生kā伊講，主ah，hō͘我先倒去埋葬我ê老父。 22 獨獨耶穌kā伊講，你tè我，chhut-chāi死人去埋葬in ê死人。 23 已經落船，伊ê學生tè伊。 24 忽然海裡起大風湧，致到船hō͘湧蓋；但是耶穌teh睏。 25 學生就近來叫伊起來，講，主ah，救o͘h，beh無命lah！ 26 伊就kā in講，小信ê人ah，怎樣hiah無膽？就起來，責備風kap海，就大平定。 27 Hiah-ê人奇怪講，chitê是甚麼號人，風kap海亦順伊？ 28 已經過去hit pêng岸，到Ka-tāi-lia̍p人ê地；有犯tio̍h鬼ê，兩人，tùi塚墓出來，tú-tio̍h伊，勢面狠kài-kài；致到無人敢tùi hit條路過。 29 In忽然喉叫講，上帝ê Kiáⁿ ah，阮kap你有甚麼干涉？時bē到，你來chia是beh苦楚阮mah？ 30 離in遠遠有大群ê豬teh討食； 31 hiahê鬼求伊講，你若趕阮，就差阮入豬群。 32 伊就kā in講，去ah。鬼就出來，去入豬；忽然全群chông落山崁，入海，死tī水裡。 33 顧豬ê走去入城；將chiahê事，以及犯tio̍h鬼ê人所tú-tio̍h ê，lóng kā人講。 34 Thong城ê人出去，chhē-tio̍h耶穌；已經見tio̍h，就求伊離開in ê地界。
1 Iâ-so͘ í-keng lo̍h soaⁿ, kui tōa tīn ê lâng tè I. 2 Tú-tn̄g ū chi̍t ê thái-ko ê chiū-kūn lâi pài I kóng, Chú ah, lí nā khéng, chiū ōe hō͘ góa chheng-khì. 3 I chiū chhun chhiú bong i kóng, Góa khéng, lí thang chheng-khì; i ê thái-ko liâm-piⁿ chheng-khì. 4 Iâ-so͘ koh kā i kóng, Kín-sīn bo̍h-tit kā lâng kóng; to̍k-to̍k khì, chiong pún-sin hō͘ chè-si giām, ia̍h tio̍h hiàn Mô͘-se só͘ hoan-hù ê lé-mi̍h, lâi chòe chèng-kù tī lâng. 5 Í-keng ji̍p Ka-pek-lông, ū pé-chóng chiū-kūn I, lâi kiû I kóng, 6 Chú ah, góa ê lô͘-po̍k piàn-sūi, tó tī chhù-lāi, kan-khó͘ kàu ke̍k. 7 I chiū kā i kóng, Góa lâi khì i i. 8 Pé-chóng ìn kóng, Chú ah, lí kàu góa tau, góa tng bōe khí; lí kan-ta kóng chi̍t kù ōe, góa ê lô͘-po̍k chiū ōe hó. 9 In-ūi góa ia̍h sī hō͘ lâng koán ê lâng, iā ū peng hō͘ góa koán; kā chit-ê kóng, Khì, i chiū khì; kā hit-ê kóng, Lâi, i chiū lâi; kā góa ê lô͘-po̍k kóng, Kiâⁿ án-ni, i chiū kiâⁿ án-ni. 10 Iâ-so͘ thiaⁿ-kìⁿ chiū kî-koài, kā tè I ê lâng kóng, Góa si̍t-chāi kā lín kóng, chhin-chhiūⁿ chit hō ê chhim sìn, liân Í-sek-lia̍t tiong, góa bē bat tú-tio̍h. 11 Góa koh kā lín kóng, tùi tang tùi sai, ū chōe-chōe lâng beh kàu, kap A-pek-la̍h-hán, Í-sat, Ngá-kok, chē toh tī thian-kok; 12 nā-sī kok ê chú-bîn beh tú-tio̍h kóaⁿ-chhut tī gōa-bīn ê o͘-àm; tī hia beh ū thî-khàu kā-gê chhiat-chhí. 13 Iâ-so͘ chiū kā pé-chóng kóng, Khì ah, chiàu lí ê sìn kā lí chiâⁿ; tú-tú hit sî, i ê lô͘-po̍k chiū hó. 14 Iâ-so͘ ji̍p Pí-tek ê ke, khòaⁿ-kìⁿ i ê tiūⁿ-ḿ, hoān-tio̍h jia̍t-pīⁿ tó-teh. 15 Chiū bong i ê chhiú, jia̍t chiū thè; hū-jîn-lâng chiū khí-lâi su-hāu I. 16 Kàu hông-hun-àm, ū lâng chhōa chōe-chōe hoān-tio̍h kúi ê chiū-kūn I; I ēng chi̍t kù ōe kóaⁿ-chhut hiah ê sîn; koh i-hó it-chhè ū pīⁿ ê lâng; 17 chiū-sī beh èng-giām sian-ti Í-sài-a só͘ kóng ê, kóng, I pún-sin thòe-siū lán ê loán-jio̍k, tam-tng lán ê pīⁿ-chèng. 18 Iâ-so͘ khòaⁿ-kìⁿ kui tōa tīn ê lâng ûi I, chiū hoan-hù kè-khì hit pêng hōaⁿ. 19 Ū chi̍t ê keng-ha̍k-sū lâi, kā I kóng, Sian-siⁿ ah, lí bô lūn tá-lo̍h khì, góa beh tè lí. 20 Iâ-so͘ chiū kā i kóng, Hô͘-lî ū khang, thiⁿ-tiong ê pe-chiáu ū siū; to̍k-to̍k Jîn-chú bô khòa thâu-khak ê só͘-chāi. 21 Koh chi̍t ê ha̍k-seng kā I kóng, Chú ah, hō͘ góa seng tò-khì bâi-chòng góa ê lāu-pē. 22 To̍k-to̍k Iâ-so͘ kā i kóng, Lí tè góa, chhut-chāi sí lâng khì bâi-chòng in ê sí lâng. 23 Í-keng lo̍h chûn, I ê ha̍k-seng tè I. 24 Hut-jiân hái-ni̍h khí tōa hong-éng, tì-kàu chûn hō͘ éng khàm; nā-sī Iâ-so͘ teh khùn. 25 Ha̍k-seng chiū-kūn lâi kiò I khí-lâi, kóng, Chú ah, kiù o͘h, beh bô miā lah! 26 I chiū kā in kóng, Sió-sìn ê lâng ah, cháiⁿ-iūⁿ hiah bô táⁿ? Chiū khí-lâi, chek-pī hong kap hái, chiū tōa pîⁿ-tiāⁿ. 27 Hiah ê lâng kî-koài kóng, chit-ê sī sím-mi̍h hō lâng, hong kap hái ia̍h sūn I? 28 Í-keng kè-khì hit pêng hōaⁿ, kàu Ka-tāi-lia̍p lâng ê tōe; ū hoān-tio̍h kúi ê, nn̄g lâng, tùi thióng-bōng chhut-lâi, tú-tio̍h I, sè-bīn hiông kài-kài; tì-kàu bô lâng káⁿ tùi hit tiâu lō͘ kè. 29 In hut-jiân âu-kiò kóng, Siōng-tè ê Kiáⁿ ah, goán kap lí ū sím-mi̍h kan-sia̍p? sî bē kàu, lí lâi chia sī beh khó͘-chhó͘ goán mah? 30 Lī in hn̄g-hn̄g ū tōa kûn ê ti teh thó-chia̍h; 31 hiah ê kúi kiû I kóng, Lí nā kóaⁿ goán, chiū chhe goán ji̍p ti kûn. 32 I chiū kā in kóng, Khì ah. Kúi chiū chhut-lâi, khì ji̍p ti; hut-jiân choân-kûn chông lo̍h soaⁿ-khàm, ji̍p hái, sí tī chúi-ni̍h. 33 Kò͘ ti ê cháu khì ji̍p siâⁿ; chiong chiah ê sū, í-ki̍p hoān-tio̍h kúi ê lâng só͘ tú-tio̍h ê, lóng kā lâng kóng. 34 Thong siâⁿ ê lâng chhut-khì, chhē-tio̍h Iâ-so͘; í-keng kìⁿ-tio̍h, chiū kiû I lī-khui in ê tōe-kài.
1 耶穌落船過海，去到伊ê本城。 2 Tú-tn̄g有人扛一个piàn-sūi ê倒tī舖á裡來就近伊；耶穌看見in ê信，就kā piàn-sūi ê講，Kiáⁿ ah，做你安心，你ê罪赦lah。 3 有經學士幾nā人心內講，Chit人僭權lām-sám講。 4 耶穌知in ê心意，就講，Lín啥事心內khǹg pháiⁿ意思ah？ 5 講，你ê罪赦，á是講，起來行，tá-lo̍h一項khah快？ 6 總是beh hō͘ lín知，人子tī地裡有權thang赦罪，就kā piàn-sūi ê講，起來，giâ你ê舖á，tò去你ê厝。 7 伊就起來，tò去伊ê厝。 8 眾人看見就驚；歸榮光上帝，就是用chit號權hō͘人ê。 9 耶穌tùi hia經過，看見一人，名馬太，坐tī餉關；就kā伊講，Tè我；伊就起來tè伊。 10 耶穌坐桌tī伊ê厝，有chōe-chōe抽餉ê kap pháiⁿ人來，kap耶穌chham伊ê學生同坐。 11 法利賽人看見，kā伊ê學生講，Lín先生啥事kap抽餉ê以及pháiⁿ人saⁿ-kap食？ 12 耶穌聽見就講，勇健ê人無欠用醫生，獨獨破病ê就tio̍h。 13 總是，我ài憐憫，m̄ ài祭祀，chit句甚麼意義，lín tio̍h去學。因為我來m̄是beh招義人，是beh招pháiⁿ人。 14 Hit時約翰ê學生就近伊講，阮kap法利賽人ta̍uh-ta̍uh禁食，但是你ê學生無禁食，是怎樣？ 15 耶穌kā in講，新kiáⁿ婿kap賀娶ê人saⁿ-kap tī-teh，賀娶ê人kiám會哀傷mah？獨獨時日beh到，新kiáⁿ婿tùi in中間無--去，hit時in就beh禁食。 16 無人用新布補舊衫；因為所補ê hit塊，會kiù裂hit領衫，伊ê破孔koh khah大。 17 人也無用新酒tóe tī舊皮囊；若是有，就lông裂，酒漏，lông亦續 pháiⁿ；獨獨用新酒tóe tī新皮囊，就兩項lóng保全。 18 講chiahê話ê時，tú-tn̄g有一个官來拜伊講，我ê cha-bó͘-kiáⁿ tú-á死，總是你來用手摸伊，伊就會活。 19 耶穌起來tè伊去，伊ê學生亦去。 20 Tú-tn̄g有一个婦人人，血漏十二年，行óa伊ê ka-chiah後，摸伊衫á裾ê鬚； 21 因為伊心內phah算講，我kan-ta摸伊ê衫，就會好。 22 耶穌oa̍t-tńg身，看伊就講，婦人人ah，做你安心，你ê信hō͘你好lah；tùi hit時婦人人就好。 23 耶穌到hitê官ê厝，看見pûn笛á ê，也有眾人teh哭； 24 就講，退去，因為cha-bó͘ gín-ná m̄是死，是teh睏。In就冷笑伊。 25 已經趕眾人出，就入去，牽伊ê手；cha-bó͘ gín-ná就起來。 26 Chitê風聲遍傳tī hitê地方。 27 耶穌tùi hia經過，有兩個chhiⁿ-mî人tè伊，叫講，大衛ê後裔，憐憫阮。 28 已經入厝，chhiⁿ-mî人就近伊。耶穌kā in講，Lín信我會做chitê事mah？應講，主ah，有。 29 伊就摸in ê目睭講，照lín ê信，kā lín做成。 30 In ê目睭就開。耶穌嚴嚴吩咐in講，謹慎莫得hō͘人知。 31 但是in出去，遍傳伊ê名tī hit地方。 32 In出去ê時，tú-tn̄g有人chhōa一个啞口犯tio̍h鬼ê來就近耶穌。 33 鬼已經趕出，啞口ê就講話；hiahê眾人lóng奇怪講，以色列中bē bat看見án-ni。 34 但是法利賽人講，伊óa靠鬼王來趕鬼。 35 耶穌遍行chiahê城chiahê鄉社，tī in ê會堂教示人，傳天國ê福音，醫好ta̍k樣ê症頭，ta̍k樣ê病痛。 36 伊看見hiahê眾人，就可憐in；因為in困苦四散，親像羊無牧者。 37 Tùi án-ni就kā伊ê學生講，Thang收成ê是chōe，做工ê是少； 38 所以lín tio̍h求園主逼工去kā伊收成。
1 Iâ-so͘ lo̍h chûn kè hái, khì kàu I ê pún siâⁿ. 2 Tú-tn̄g ū lâng kng chi̍t ê piàn-sūi ê tó tī pho͘-á-ni̍h lâi chiū-kūn I; Iâ-so͘ khòaⁿ-kìⁿ in ê sìn, chiū kā piàn-sūi ê kóng, Kiáⁿ ah, chòe lí an-sim, lí ê chōe sià lah. 3 Ū keng-ha̍k-sū kúi-nā lâng sim-lāi kóng, Chit lâng chhiàm-koân lām-sám kóng. 4 Iâ-so͘ chai in ê sim-ì, chiū kóng, Lín siáⁿ-sū sim-lāi khǹg pháiⁿ ì-sù ah? 5 Kóng, Lí ê chōe sià, á-sī kóng, Khí-lâi kiâⁿ, tá-lo̍h chi̍t hāng khah khoài? 6 Chóng-sī beh hō͘ lín chai, Jîn-chú tī tōe-ni̍h ū koân thang sià chōe, chiū kā piàn-sūi ê kóng, Khí-lâi, giâ lí ê pho͘-á, tò-khì lí ê chhù. 7 I chiū khí-lâi, tò-khì i ê chhù. 8 Chèng lâng khòaⁿ-kìⁿ chiū kiaⁿ; kui êng-kng Siōng-tè, chiū-sī ēng chit hō koân hō͘ lâng ê. 9 Iâ-so͘ tùi hia keng-kè, khòaⁿ-kìⁿ chi̍t lâng, miâ Má-thài, chē tī hiòng-koan; chiū kā i kóng, Tè góa; i chiū khí-lâi tè I. 10 Iâ-so͘ chē toh tī i ê chhù, ū chōe-chōe thiu-hiòng ê kap pháiⁿ lâng lâi, kap Iâ-so͘ chham I ê ha̍k-seng tâng chē. 11 Hoat-lī-sài lâng khòaⁿ-kìⁿ, kā I ê ha̍k-seng kóng, Lín sian-siⁿ siáⁿ-sū kap thiu-hiòng ê í-ki̍p pháiⁿ lâng saⁿ-kap chia̍h? 12 Iâ-so͘ thiaⁿ-kìⁿ chiū kóng, Ióng-kiāⁿ ê lâng bô khiàm-ēng i-seng, to̍k-to̍k phòa-pīⁿ ê chiū tio̍h. 13 Chóng-sī, Góa ài lîn-bín, m̄ ài chè-sū, chit kù sím-mi̍h ì-gī, lín tio̍h khì o̍h. In-ūi góa lâi m̄ sī beh chio gī lâng, sī beh chio pháiⁿ lâng. 14 Hit sî Iok-hān ê ha̍k-seng chiū-kūn I kóng, Goán kap Hoat-lī-sài lâng ta̍uh-ta̍uh kìm-chia̍h, nā-sī lí ê ha̍k-seng bô kìm-chia̍h, sī cháiⁿ-iūⁿ? 15 Iâ-so͘ kā in kóng, Sin-kiáⁿ-sài kap hō-chhōa ê lâng saⁿ-kap tī-teh, hō-chhōa ê lâng kiám ōe ai-siong mah? to̍k-to̍k sî-ji̍t beh kàu, sin-kiáⁿ-sài tùi in tiong-kan bô--khì, hit sî in chiū beh kìm-chia̍h. 16 Bô lâng ēng sin pò͘ pó͘ kū saⁿ; in-ūi só͘ pó͘ ê hit tè, ōe kiù-li̍h hit niá saⁿ, i ê phòa-khang koh khah tōa. 17 Lâng iā bô ēng sin chiú tóe tī kū phê-lông; nā sī ū, chiū lông li̍h, chiú lāu, lông ia̍h sòa pháiⁿ; to̍k-to̍k ēng sin chiú tóe tī sin phê-lông, chiū nn̄g hāng lóng pó-choân. 18 Kóng chiah ê ōe ê sî, tú-tn̄g ū chi̍t ê koaⁿ lâi pài I kóng, Góa ê cha-bó͘-kiáⁿ tú-á sí, chóng-sī lí lâi ēng chhiú bong i, i chiū ōe oa̍h. 19 Iâ-so͘ khí-lâi tè i khì, I ê ha̍k-seng ia̍h khì. 20 Tú-tn̄g ū chi̍t ê hū-jîn-lâng, hiat-lāu cha̍p-jī nî, kiâⁿ óa I ê ka-chiah-āu, bong I saⁿ-á-ku ê chhiu; 21 in-ūi i sim-lāi phah-sǹg kóng, Góa kan-ta bong I ê saⁿ, chiū ōe hó. 22 Iâ-so͘ oa̍t-tńg-sin, khòaⁿ i chiū kóng, Hū-jîn-lâng ah, chòe lí an-sim, lí ê sìn hō͘ lí hó lah; tùi hit sî hū-jîn-lâng chiū hó. 23 Iâ-so͘ kàu hit ê koaⁿ ê chhù, khòaⁿ-kìⁿ pûn ta̍t-á ê, iā ū chèng lâng teh khàu; 24 chiū kóng, Thè-khì, in-ūi cha-bó͘ gín-ná m̄ sī sí, sī teh khùn. In chiū léng-chhiò I. 25 Í-keng kóaⁿ chèng lâng chhut, chiū ji̍p-khì, khan i ê chhiú; cha-bó͘ gín-ná chiū khí-lâi. 26 Chit ê hong-siaⁿ piàn thoân tī hit ê tōe-hng. 27 Iâ-so͘ tùi hia keng-kè, ū nn̄g ê chhiⁿ-mî lâng tè I, kiò kóng, Tāi-pi̍t ê hō͘-è, lîn-bín goán. 28 Í-keng ji̍p chhù, chhiⁿ-mî lâng chiū-kūn I. Iâ-so͘ kā in kóng, Lín sìn góa ōe chòe chit ê sū mah? Ìn kóng, Chú ah, ū. 29 I chiū bong in ê ba̍k-chiu kóng, chiàu lín ê sìn, kā lín chòe chiâⁿ. 30 In ê ba̍k-chiu chiū khui. Iâ-so͘ giâm-giâm hoan-hù in kóng, Kín-sīn bo̍h-tit hō͘ lâng chai. 31 Nā-sī in chhut-khì, piàn thoân I ê miâ tī hit tōe-hng. 32 In chhut-khì ê sî, tú-tn̄g ū lâng chhōa chi̍t ê é-káu hoān-tio̍h kúi ê lâi chiū-kūn Iâ-so͘. 33 Kúi í-keng kóaⁿ chhut, é-káu ê chiū kóng ōe; hiah ê chèng lâng lóng kî-koài kóng, Í-sek-lia̍t tiong bē bat khòaⁿ-kìⁿ án-ni. 34 Nā-sī Hoat-lī-sài lâng kóng, I óa-khò kúi-ông lâi kóaⁿ kúi. 35 Iâ-so͘ piàn kiâⁿ chiah ê siâⁿ chiah ê hiuⁿ-siā, tī in ê hōe-tn̂g kà-sī lâng, thoân thian-kok ê hok-im, i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ. 36 I khòaⁿ-kìⁿ hiah ê chèng lâng, chiū khó-lîn in; in-ūi in khùn-khó͘ sì-sòaⁿ, chhin-chhiūⁿ iûⁿ bô bo̍k-chiá. 37 Tùi án-ni chiū kā I ê ha̍k-seng kóng, Thang siu-sêng ê sī chōe, chòe kang ê sī chió; 38 só͘-í lín tio̍h kiû hn̂g Chú pek kang khì kā I siu-sêng.
1 耶穌就叫伊十二個學生來，hō͘ in有制壓邪神ê權，來趕逐in，續醫好ta̍k樣ê症頭，ta̍k樣ê病痛。 2 十二使徒ê名就是chiahê：頭一个西門(叫做彼得)，kap伊ê兄弟安得烈；西庇太ê Kiáⁿ雅各，kap伊ê兄弟約翰； 3 腓力，kap Pa-to-lô-mái；To-má，kap抽餉ê馬太；A-le̍k-hui ê Kiáⁿ雅各，kap Ta̍t-thài； 4 Ka-ná-nî ê西門，kap加略人偤大，就是賣耶穌ê。 5 耶穌差chit十二人，續吩咐in講，外邦ê路莫得行，撒馬利亞人ê城莫得入； 6 khah好tio̍h去就近以色列家失落ê羊。 7 行ê時，tio̍h傳講，天國近lah。 8 醫好有病ê；hō͘死ê koh活；hō͘ thái-ko ê清氣；趕鬼；lín白白得tio̍h，tio̍h白白hō͘人。 9 Lín ê腰肚內，lóng m̄-thang有金、銀、銅； 10 路裡亦莫得有tah-連，莫得兩領衫，莫得鞋，莫得柺á；因為做工人堪得得tio̍h伊ê lim食。 11 Lín所入ê，無論甚麼城，甚麼鄉里，tio̍h探聽其中是誰會堪得，就tiàm tī hia，到離開ê時。 12 入hitê厝，tio̍h kā伊請安。 13 Hit-ê厝若會堪得，就hō͘ lín ê平安到tī伊；若bōe堪得，就hō͘ lín ê平安歸tī lín。 14 見若m̄接納lín，m̄聽lín ê話ê，出hitê厝，hitê城ê時，tio̍h拌 (pōaⁿ)去lín腳裡ê土粉。 15 我實在kā lín講，當審判ê日，所多馬kap Gô͘-mô͘-la̍h ê地方比hitê城iáu khah快擔當。 16 Taⁿ我差lín親像羊tī豺狼ê中間；所以lín tio̍h知識親像蛇，純良親像鴿á。 17 總是tio̍h持防人；因為in beh將lín交hō͘公會，亦beh tī lín ê會堂鞭phah lín； 18 koh lín亦beh為tio̍h我ê緣故，受拖到總督kap君王ê面前，來做干證tī in kap外邦人。 19 但是lín受送交ê時，莫得掛慮beh怎樣講，á是講甚麼話；因為所tio̍h講ê，beh tī hit時賞賜lín。 20 因為m̄是lín家己講，是lín ê父ê神tiàm-tī lín teh講。 21 兄弟beh將兄弟送交去死，父款待kiáⁿ亦án-ni；kiáⁿ兒beh起來攻擊父母，hō͘ in死。 22 亦lín因為我ê名beh hō͘眾人怨恨，獨獨吞忍到路尾ê，伊beh得tio̍h救。 23 Tī chitê城khún-tio̍k lín，tio̍h走到hit城；我實在kā lín講，以色列chiahê城，lín行bē thàng，人子就到。 24 學生bōe pôaⁿ過先生，奴僕bōe pôaⁿ過主人。 25 學生親像先生，奴僕親像主人，就夠額。人既然叫家主做Pia̍t-se-pok，何況叫伊家內ê人。 26 所以莫得驚in；因為無有蓋密後來無露出ê事；亦無有隱密後來無hō͘人知ê。 27 我tī暗中kā lín講ê，lín tio̍h tī光明ê所在講出；àⁿ tī耳孔kā lín講ê，tio̍h tī厝頂傳伊。 28 Hiah-ê害死身軀，bōe害死靈魂ê，莫得驚in；獨獨hitê會滅靈魂kap身軀tī地獄ê，khah tio̍h驚。 29 兩隻雀鳥á kiám m̄是賣一分銀mah？若m̄是lín ê父有准，一隻亦bōe ka-la̍uh地； 30 就lín ê頭毛亦lóng計算。 31 所以lín莫得驚；lín比chōe-chōe雀鳥á khah貴氣。 32 所以見若tī人ê面前認我ê，我亦tī我tī天裡ê父ê面前beh認伊。 33 見若tī人ê面前m̄認我ê，我亦tī我tī天裡ê父ê面前beh m̄認伊。 34 莫得phah算我來是beh hō͘地上和平；我來m̄是beh hō͘伊和平，就是hiat落刀劍。 35 因為我來，是hō͘ kiáⁿ kap伊ê老父絕情，cha-bó͘-kiáⁿ kap伊ê老母，sim-pū kap伊ê ta-ke，亦beh án-ni。 36 Koh人ê對敵就是伊家己家內ê人。 37 疼父母khah過頭tī疼我ê，bōe堪得tī我；疼kiáⁿ, cha-bó͘-kiáⁿ khah過頭tī疼我ê，bōe堪得tī我； 38 m̄背家己ê十字架來tè tī我ê後面ê，亦bōe堪得tī我。 39 得tio̍h伊ê性命ê人，beh失落伊；為tio̍h我失落伊ê性命ê人，beh得tio̍h伊。 40 接納lín ê，就是接納我；接納我ê，就是接納差我ê。 41 為tio̍h先知ê名來接納先知ê，beh得tio̍h先知ê賞；為tio̍h義人ê名來接納義人ê，beh得tio̍h義人ê賞。 42 見若為tio̍h學生ê名，kan-ta用一杯冷水hō͘ chiahê細kiáⁿ ê一个lim ê，我實在kā lín講，伊決斷bōe失落伊ê賞。
1 Iâ-so͘ chiū kiò I cha̍p-jī ê ha̍k-seng lâi, hō͘ in ū chè-ap siâ-sîn ê koân, lâi kóaⁿ-tio̍k in, sòa i-hó ta̍k iūⁿ ê chèng-thâu, ta̍k iūⁿ ê pīⁿ-thiàⁿ. 2 Cha̍p-jī sù-tô͘ ê miâ chiū-sī chiah-ê: thâu-chi̍t-ê Se-bûn( kiò chòe Pí-tek), kap i ê hiaⁿ-tī An-tek-lia̍t; Se-pí-thài ê kiáⁿ Ngá-kok, kap i ê hiaⁿ-tī Iok-hān; 3 Hui-le̍k, kap Pa-to-lô-mái; To-má, kap thiu-hiòng ê Má-thài; A-le̍k-hui ê kiáⁿ Ngá-kok, kap Ta̍t-thài; 4 Ka-ná-nî ê Se-bûn, kap Ka-lio̍k lâng Iû-tāi, chiū-sī bōe Iâ-so͘ ê. 5 Iâ-so͘ chhe chí cha̍p-jī lâng, sòa hoan-hù in kóng, Gōa-pang ê lō͘ bo̍h-tit kiâⁿ, Sat-má-lī-a lâng ê siâⁿ bo̍h-tit ji̍p; 6 khah hó tio̍h khì chiū-kūn Í-sek-lia̍t ke sit-lo̍h ê iûⁿ. 7 Kiâⁿ ê sî, tio̍h thoân kóng, Thian-kok kūn lah. 8 I-hó ū pīⁿ ê; hō͘ sí ê koh-oa̍h; hō͘ thái-ko ê chheng-khì; kóaⁿ kúi; lín pe̍h-pe̍h tit-tio̍h, tio̍h pe̍h-pe̍h hō͘ lâng. 9 Lín ê io-tó͘ lāi, lóng m̄-thang ū kim, gûn, tâng; 10 lō͘-ni̍h ia̍h bo̍h-tit ū tah-liân, bo̍h-tit nn̄g niá saⁿ, bo̍h-tit ôe, bo̍h-tit koáiⁿ-á; in-ūi chòe-kang lâng kham-tit tit-tio̍h i ê lim-chia̍h. 11 Lín só͘ ji̍p ê, bô lūn sím-mi̍h siâⁿ, sím-mi̍h hiuⁿ-lí, tio̍h thàm-thiaⁿ kî-tiong chī-chūi ōe kham-tit, chiū tiàm tī hia, kàu lī-khui ê sî. 12 Ji̍p hit ê chhù, tio̍h kā i chhéng-an. 13 Hit ê chhù nā ōe kham-tit, chiū hō͘ lín ê pêng-an kàu tī i; nā bōe kham-tit, chiū hō͘ lín ê pêng-an kui tī lín. 14 Kìⁿ-nā m̄ chiap-la̍p lín, m̄ thiaⁿ lín ê ōe ê, chhut hit ê chhù, hit ê siâⁿ ê sî, tio̍h pōaⁿ-khì lín kha-ni̍h ê thô͘-hún. 15 Góa si̍t-chāi kā lín kóng, Tng sím-phòaⁿ ê ji̍t, Só͘-to-má kap Gô͘-mô͘-la̍h ê tōe-hng pí hit ê siâⁿ iáu khah khoài tam-tng. 16 Taⁿ góa chhe lín chhin-chhiūⁿ iûⁿ tī chhâi-lông ê tiong-kan; só͘-í lín tio̍h tì-sek chhin-chhiūⁿ chôa, sûn-liông chhin-chhiūⁿ chíⁿ-á. 17 Chóng-sī tio̍h tî-hông lâng; in-ūi in beh chiong lín kau hō͘ kong-hōe, ia̍h beh tī lín ê hōe-tn̂g piⁿ-phah lín; 18 koh lín ia̍h beh ūi-tio̍h góa ê iân-kò͘, siū thoa kàu chóng-tok kap kun-ông ê bīn-chêng, lâi chòe kan-chèng tī in kap gōa-pang lâng. 19 Nā-sī lín siū sàng-kau ê sî, bo̍h-tit khòa-lū beh cháiⁿ-iūⁿ kóng, á-sī kóng sím-mi̍h ōe; in-ūi só͘ tio̍h kóng ê, beh tī hit sî siúⁿ-sù lín. 20 In-ūi m̄ sī lín ka-kī kóng, sī lín ê Pē ê Sîn tiàm-tī lín teh kóng. 21 Hiaⁿ-tī beh chiong hiaⁿ-tī sàng-kau khì sí, pē khoán-thāi kiáⁿ ia̍h án-ni; kiáⁿ-jî beh khí-lâi kong-kek pē-bú, hō͘ in sí. 22 Ia̍h lín in-ūi góa ê miâ beh hō͘ chèng lâng oàn-hūn, to̍k-to̍k thun-lún kàu lō͘-bé ê, i beh tit-tio̍h kiù. 23 Tī chit ê siâⁿ khún-tio̍k lín, tio̍h cháu kàu hit siâⁿ; góa si̍t-chāi kā lín kóng, Í-sek-lia̍t chiah ê siâⁿ, lín kiâⁿ bē thàng, Jîn-chú chiū kàu. 24 Ha̍k-seng bōe pôaⁿ-kè sian-siⁿ, lô͘-po̍k bōe pôaⁿ-kè chú-lâng. 25 Ha̍k-seng chhin-chhiūⁿ sian-siⁿ, lô͘-po̍k chhin-chhiūⁿ chú-lâng, chiū kàu-gia̍h. Lâng kì-jiân kiò ke-chú chòe Pia̍t-se-pok, hô-hòng kiò i ke-lāi ê lâng. 26 Só͘-í bo̍h-tit kiaⁿ in; in-ūi bô ū khàm-ba̍t āu-lâi bô lō͘-chhut ê sū; ia̍h bô ū ún-ba̍t āu-lâi bô hō͘ lâng chai ê. 27 Góa tī àm-tiong kā lín kóng ê, lín tio̍h tī kng-bêng ê só͘-chāi kóng-chhut; àⁿ tī hī-khang kā lín kóng ê, tio̍h tī chhù-téng thoân i. 28 Hiah ê hāi-sí sin-khu, bōe hāi-sí lêng-hûn ê, bo̍h-tit kiaⁿ in; to̍k-to̍k hit-ê ōe bia̍t lêng-hûn kap sin-khu tī tē-ge̍k ê, khah tio̍h kiaⁿ. 29 Nn̄g chiah chhek-chiáu-á kiám m̄ sī bōe chi̍t hun gûn mah? nā m̄ sī lín ê Pē ū chún, chi̍t chiah ia̍h bōe ka-la̍uh tōe; 30 chiū lín ê thâu-mn̂g ia̍h lóng kè-sǹg. 31 Só͘-í lín bo̍h-tit kiaⁿ; lín pí chōe-chōe chhek-chiáu-á khah kùi-khì. 32 Só͘-í kìⁿ-nā tī lâng ê bīn-chêng jīn góa ê, góa ia̍h tī góa tī thiⁿ-ni̍h ê Pē ê bīn-chêng beh jīn i. 33 Kìⁿ-nā tī lâng ê bīn-chêng m̄ jīn góa ê, góa ia̍h tī góa tī thiⁿ-ni̍h ê Pē ê bīn-chêng beh m̄ jīn i. 34 Bo̍h-tit phah-sǹg góa lâi sī beh hō͘ tōe-chiūⁿ hô-pêng; góa lâi m̄ sī beh hō͘ i hô-pêng, chiū-sī hiat-lo̍h to-kiàm. 35 In-ūi góa lâi, sī hō͘ kiáⁿ kap i ê lāu-pē choa̍t-chêng, cha-bó͘-kiáⁿ kap i ê lāu-bú, sim-pū kap i ê ta-ke, ia̍h beh án-ni. 36 Koh lâng ê tùi-te̍k chiū-sī i ka-kī ke-lāi ê lâng. 37 Thiàⁿ pē-bú khah kè-thâu tī thiàⁿ góa ê, bōe kham-tit tī góa; thiàⁿ kiáⁿ cha-bó͘-kiáⁿ khah kè-thâu tī thiàⁿ góa ê, bōe kham-tit tī góa; 38 m̄ pē ka-kī ê si̍p-jī-kè lâi tè tī góa ê āu-bīn ê, ia̍h bōe kham-tit tī góa. 39 Tit-tio̍h i ê sìⁿ-miā ê lâng, beh sit-lo̍h i; ūi-tio̍h góa sit-lo̍h i ê sìⁿ-miā ê lâng, beh tit-tio̍h i. 40 Chiap-la̍p lín ê, chiū-sī chiap-la̍p góa; chiap-la̍p góa ê, chiū-sī chiap-la̍p chhe góa ê. 41 Ūi-tio̍h sian-ti ê miâ lâi chiap-la̍p sian-ti ê, beh tit-tio̍h sian-ti ê siúⁿ; ūi-tio̍h gī lâng ê miâ lâi chiap-la̍p gī lâng ê, beh tit-tio̍h gī lâng ê siúⁿ. 42 Kìⁿ-nā ūi-tio̍h ha̍k-seng ê miâ, kan-ta ēng chi̍t poe léng-chúi hō͘ chiah ê sòe-kiáⁿ ê chi̍t ê lim ê, góa si̍t-chāi kā lín kóng, i koat-toàn bōe sit-lo̍h i ê siúⁿ.
1 耶穌吩咐伊十二個學生明白，就離開hia，beh tī in hiahê城教示人kap傳道。 2 約翰tī監裡聽見基督所行ê事；就差學生問伊講， 3 所beh來ê，是你mah？á是阮tio̍h ǹg望別人ah？ 4 耶穌應講，Lín tio̍h去，將lín所聽見所看見ê，kā約翰講； 5 就是chhiⁿ-mî ê看見，跛腳ê行，thái-ko ê清氣，chhàu-hī人ê聽見，死ê人koh活，sòng-hiong人得tio̍h聽福音。 6 見若無tī我來tio̍h-tak ê，有福氣。 7 In去ê時，耶穌chiah提起約翰，kā眾人講，Lín前出去曠野，beh看甚麼？是蘆竹hō͘風吹振動mah？ 8 Lín出去ài看甚麼？是人穿幼軟ê衣裳mah？你看，穿幼軟ê是tī王宮。 9 若是án-ni lín出去beh啥事？是beh看先知mah？是lah。我kā lín講，伊是iáu khah贏過先知。 10 Chit人就是經裡所指ê，講， 我差我ê使者tī你ê面前； 伊beh tī你ê頭前備辦你ê路。 11 我實在kā lín講，婦人人所生ê，從中bē有興起khah大tī行洗禮ê約翰；總是tī天國ê微細ê，iáu khah大伊。 12 Tùi行洗禮約翰ê時日到taⁿ，天國hō͘人強強取，強ê人用力取伊。 13 因為眾先知kap律法有讖語到約翰ê時。 14 Lín若甘願承受，chit人就是teh-beh來ê以利亞。 15 有耳孔thang聽ê，tio̍h聽。 16 Chit世代我beh用甚麼來比並伊？是親像gín-ná坐tī街市裡，來叫in ê同伴講， 17 阮tùi lín pûn笛á，lín無跳舞；阮bat悲哀，lín無搥胸。 18 因為約翰來，無食無lim；人就講，伊犯tio̍h鬼。 19 人子來亦食亦lim；人就講，伊是貪食好酒ê人，抽餉kap pháiⁿ人ê朋友。但是智慧tùi伊ê所行顯明伊是tio̍h。 20 耶穌bat tī hiahê城行chōe-chōe權能，因為in lóng無反悔，hit時chiah責備in講， 21 Ko-lia̍p-sìn ah，你有災禍！Pek-sài-tāi ah，你有災禍！因為tī lín中間所行chiahê權能，若有行tī Chhui-lô kap Se-tùn，in就早早穿麻衫sám火灰(hu)來反悔。 22 但是我kā lín講，當審判ê日，Chhui-lô kap Se-tùn比lín iáu khah快擔當。 23 迦百農ah，你kiám會得tio̍h舉起到天mah？你beh墮落陰府；因為tī你ê中間所行chiahê權能，若有行tī Só͘-to-má，就到今á日伊iáu tī-teh。 24 但是我kā lín講，當審判ê日，Só͘ -to-má ê地方比你khah快擔當。 25 當hit時耶穌應講，父ah，天地ê主，我o-ló你，因為你將chiahê事，tùi智慧聰明ê有隱密伊，tùi細kiáⁿ有顯明伊； 26 父ah，是lah；因為你看án-ni做歡喜。 27 萬項有tùi我ê父交付我，父以外無一个bat Kiáⁿ；Kiáⁿ kap Kiáⁿ所ài beh指示ê以外，無一个bat父。 28 Lín見若tio̍h磨擔(taⁿ)重擔(tàⁿ)ê，tio̍h就近我；我beh hō͘ lín安歇。 29 我心內溫柔謙遜；lín背我ê taⁿ，來tùi我學，就lín ê心神會得tio̍h安歇。 30 因為我ê taⁿ是快，我ê擔是輕。
1 Iâ-so͘ hoan-hù I cha̍p-jī ê ha̍k-seng bêng-pe̍k, chiū lī-khui hia, beh tī in hiah ê siâⁿ kà-sī lâng kap thoân-tō. 2 Iok-hān tī kaⁿ-ni̍h thiaⁿ-kìⁿ Ki-tok só͘ kiâⁿ ê sū; chiū chhe ha̍k-seng mn̄g I kóng, 3 Só͘ beh lâi ê, sī lí mah? á-sī goán tio̍h ǹg-bāng pa̍t lâng ah? 4 Iâ-so͘ ìn kóng, Lín tio̍h khì, chiong lín só͘ thiaⁿ-kìⁿ só͘ khòaⁿ-kìⁿ ê, kā Iok-hān kóng; 5 chiū-sī chhiⁿ-mî ê khòaⁿ-kìⁿ, pái-kha ê kiâⁿ, thái-ko ê chheng-khì, chhàu-hī-lâng ê thiaⁿ-kìⁿ, sí ê lâng koh-oa̍h, sòng-hiong lâng tit-tio̍h thiaⁿ hok-im. 6 Kìⁿ-nā bô tī góa lâi tio̍h-tak ê, ū hok-khì. 7 In khì ê sî, Iâ-so͘ chiah thê-khí Iok-hān, kā chèng lâng kóng, Lín chêng chhut-khì khòng-iá, beh khòaⁿ sím-mi̍h? Sī lô͘-tek hō͘ hong chhe tín-tāng mah? 8 Lín chhut-khì ài khòaⁿ sím-mi̍h? Sī lâng chhēng iù-nńg ê i-chiûⁿ mah? Lí khòaⁿ, chhēng iù-nńg ê sī tī ông-kiong. 9 Nā-sī án-ni lín chhut-khì beh siáⁿ-sū? Sī beh khòaⁿ sian-ti mah? Sī lah. Góa kā lín kóng, i sī iáu khah iâⁿ-kè sian-ti. 10 Chit lâng chiū-sī keng-ni̍h só͘ chí ê, kóng, Góa chhe góa ê sù-chiá tī lí ê bīn-chêng; I beh tī lí ê thâu-chêng pī-pān lí ê lō͘. 11 Góa si̍t-chāi kā lín kóng, Hū-jîn-lâng só͘ siⁿ ê, chiông-tiong bē ū heng-khí khah tōa tī kiâⁿ sóe-lé ê Iok-hān; chóng-sī tī thian-kok ê bî-sòe ê, iáu khah tōa i. 12 Tùi kiâⁿ sóe-lé Iok-hān ê sî-ji̍t kàu taⁿ, thian-kok hō͘ lâng kiông-kiông chhú, kiông ê lâng ēng la̍t chhú i. 13 In-ūi chèng sian-ti kap lu̍t-hoat ū chhàm-gú kàu Iok-hān ê sî. 14 Lín nā kam-goān sêng-siū, chit lâng chiū-sī teh-beh lâi ê Í-lī-a. 15 Ū hī-khang thang thiaⁿ ê, tio̍h thiaⁿ. 16 Chit sè-tāi góa beh ēng sím-mi̍h lâi pí-phēng i? Sī chhin-chhiūⁿ gín-ná chē tī koe-chhī-ni̍h, lâi kiò in ê tâng-phōaⁿ kóng, 17 Goán tùi lín pûn ta̍t-á, lín bô thiàu-bú; goán bat pi-ai, lín bô tûi heng. 18 In-ūi Iok-hān lâi, bô chia̍h bô lim; lâng chiū kóng, I hoān-tio̍h kúi. 19 Jîn-chú lâi ia̍h chia̍h ia̍h lim; lâng chiū kóng, I sī tham-chia̍h hò͘ⁿ-chiú ê lâng, thiu-hiòng kap pháiⁿ lâng ê pêng-iú. Nā-sī Tì-hūi tùi i ê só͘ kiâⁿ hián-bêng i sī tio̍h. 20 Iâ-so͘ bat tī hiah ê siâⁿ kiâⁿ chōe-chōe koân-lêng, in-ūi in lóng bô hoán-hóe, hit sî chiah chek-pī in kóng, 21 Ko-lia̍p-sìn ah, lí ū chai-ē! Pek-sài-tāi ah, lí ū chai-ē! in-ūi tī lín tiong-kan só͘ kiâⁿ chiah ê koân-lêng, nā ū kiâⁿ tī Chhui-lô kap Se-tùn, in chiū chá-chá chhēng môa saⁿ sám hé-hu lâi hoán-hóe. 22 Nā-sī góa kā lín kóng, tng sím-phòaⁿ ê ji̍t, Chhui-lô kap Se-tùn pí lín iáu khah khoài tam-tng. 23 Ka-pek-lông ah, lí kiám ōe tit-tio̍h kú-khí kàu thiⁿ mah? lí beh tūi-lo̍h im-hú; in-ūi tī lí ê tiong-kan só͘ kiâⁿ chiah ê koân-lêng, nā ū kiâⁿ tī Só͘-to-má, chiū kàu kin-á-ji̍t i iáu tī-teh. 24 Nā-sī góa kā lín kóng, tng sím-phòaⁿ ê ji̍t, Só͘-to-má ê tōe-hng pí lí khah khoài tam-tng. 25 Tng hit sî Iâ-so͘ ìn kóng, Pē ah, thiⁿ tōe ê Chú, góa o-ló lí, in-ūi lí chiong chiah ê sū, tùi tì-hūi chhang-miâ ê ū ún-ba̍t i, tùi sòe-kiáⁿ ū hián-bêng i; 26 Pē ah, sī lah; in-ūi lí khòaⁿ án-ni chòe hoaⁿ-hí. 27 Bān-hāng-ū tùi góa ê Pē kau-hù góa, Pē í-gōa bô chi̍t-ê bat Kiáⁿ; Kiáⁿ kap Kiáⁿ só͘ ài beh chí-sī ê í-gōa, bô chi̍t-ê bat Pē. 28 Lín kìⁿ-nā tio̍h-bôa taⁿ tāng-tàⁿ ê, tio̍h chiū-kūn góa; góa beh hō͘ lín an-hioh. 29 Góa sim-lāi un-jiû khiam-sùn; lín pē góa ê taⁿ, lâi tùi góa o̍h, chiū lín ê sim-sîn ōe tit-tio̍h an-hioh. 30 In-ūi góa ê taⁿ sī khoài, góa ê tàⁿ sī khin.
1 當hit時，耶穌tī安歇日tùi麥園經過；伊ê學生iau，就摘(tiah)麥穗來食。 2 但是法利賽人看見就kā伊講，你看，你ê學生行安歇日所m̄應該行ê事。 3 耶穌就kā in講，大衛kap跟tè ê人iau ê時所行ê，lín無讀tio̍h mah？ 4 就是伊入上帝ê厝，食排列ê餅；這m̄是伊kap跟tè ê人所thang食ê，獨獨祭司thang nā-tiāⁿ。 5 á是lín亦m̄-bat讀律法所記載，當安歇日祭司tī殿裡患tio̍h安歇亦是無罪mah？ 6 獨獨我kā lín講，tī chia有比殿khah大ê。 7 總是lín若知，我ài憐憫，無ài祭祀，chit句ê意義，就無責罪無罪ê人。 8 因為人子是安歇日ê主。 9 耶穌離開hia，入in ê會堂；tú-tn̄g有人一手枯焦(tâ)。 10 人問伊講，安歇日行醫，thang mah？意思ài beh告伊。 11 伊就kā in講，Lín中間甚麼人有一隻羊，若tī安歇日跋落坑，無kā伊掠起來mah？ 12 何況人比羊加jōa貴氣ah！所以安歇日行好事是thang。 13 就kā hit人講，伸你ê手。伊就伸，隨時好好，親像別支手。 14 法利賽人出去，saⁿ-kap計謀攻擊耶穌，看thang怎樣滅伊。 15 耶穌知，就退去，離開hia；有chōe-chōe人tè伊，就lóng kā in醫； 16 亦警戒in莫得將伊報揚； 17 是beh應驗託先知以賽亞所講ê，講， 18 你看，我ê奴僕，我所揀ê， 我所疼ê，我ê心所歡喜ê； 我beh將我ê神付hō͘伊。 伊beh用判斷通知外邦。 19 伊無beh相爭，無beh喧嚷； Tī街市無人聽見伊ê聲。 20 受傷ê蘆竹，伊無beh at折， Beh hoa ê火星，伊無phah熄， 到hō͘公義會得勝。 21 外邦亦beh靠伊ê名來ǹg望。 22 Hit時有chhōa一个犯tio̍h鬼，chhiⁿ-mî kòa啞口ê來就近伊。伊就醫好伊，hō͘啞口ê講話，續會看見。 23 眾人lóng gông-ngia̍h，講，Chitê總無是大衛ê後裔o͘h？ 24 但是法利賽人聽見就講，Chit人趕鬼無m̄是靠鬼王Pia̍t-se-pok。 25 耶穌知in ê意思，就kā in講，見若國家己爭拚，會致到拋荒；見若城á是家家己爭拚，的確khiā bōe tiâu。 26 若撒旦趕撒旦，是家己爭拚，伊ê國thái-thó khiā會tiâu？ 27 設使我靠Pia̍t-se-pok趕鬼，就lín ê子弟趕鬼óa靠是誰 ah？Án-ni in beh擬斷lín。 28 獨獨我若靠上帝ê神趕鬼，就上帝ê國已經到lín lah。 29 人怎樣會入猛人ê厝，劫伊ê家伙？kiám m̄ tio̍h事先縛猛人，然後劫伊ê厝mah？ 30 無同我ê，就是對敵我；無kap我收拾ê，就是teh phah散。 31 所以我kā lín講，見若罪惡謗瀆，lóng beh赦免伊；獨獨謗瀆聖神ê，無beh赦免伊。 32 見若講話攻擊人子ê，beh赦免伊；獨獨見若講話攻擊聖神ê，不論今世來世，無beh赦免伊。 33 Lín tio̍h掠hitê樹做好，伊ê果子亦做好；或是掠hitê樹做pháiⁿ，伊ê果子亦做pháiⁿ；因為tùi果子來bat樹。 34 毒蛇ê類ah，lín已經是pháiⁿ，thài會講好話？因為是tùi心所充滿ê，嘴就講出。 35 好人tùi所積聚ê好，來發出chiahê好；pháiⁿ人tùi所積聚ê pháiⁿ，來發出chiahê pháiⁿ。 36 我kā lín講，見若人所講ê閒á話，in tī審判ê日，ta̍k句tio̍h訴明。 37 因為對你ê話beh稱你做義；亦對你ê話beh擬你有罪。 38 Hit時有經學士kap法利賽幾nā人應伊講，先生ah，阮ài tùi你看一个神蹟。 39 但是伊應講，惡毒姦淫ê世代求神蹟；tû先知約拿ê神蹟以外，無beh神蹟hō͘ in； 40 因為親像約拿三日三暝tī大魚ê腹肚內，人子亦beh án-ni三日三暝tī地內。 41 尼尼微人當審判ê時，beh kap chit世代ê人saⁿ-kap起來，續擬in ê罪；因為in tùi約拿所傳來反悔；何況tī chia有比約拿khah大ê。 42 南方ê女王，當審判ê時beh kap chit世代ê人saⁿ-kap起來，續擬in ê罪；因為伊tùi地ê極頭來，beh聽所羅門知識ê話，何況tī chia有比所羅門khah大ê。 43 邪神已經離開人，經過無水ê地，求安歇亦無得tio̍h。 44 就講，我beh tò去所出來ê厝；到tè，就看見空空，拚掃，修整； 45 就去，koh帶七個神，比家己khah pháiⁿ ê，入去khiā起；hit人路尾ê景況，比起頭ê khah慘。Chitê pháiⁿ ê世代亦beh親像án-ni。 46 伊iáu對眾人講話ê時，tú-tn̄g伊ê老母kap伊ê兄弟khiā tī外面，ài beh kap伊講話。 47 有人kā伊講，你看，你ê老母kap你ê兄弟khiā tī外面，ài beh kap你講話。 48 就應hitê kā伊講ê講，甚麼人是我ê老母？甚麼人是我ê兄弟ah？ 49 就伸手kí伊ê學生講，你看，我ê老母kap我ê兄弟。 50 因為見若行我tī天裡ê父ê旨意ê，就是我ê兄弟、姊妹，kap老母。
1 Tng hit sî, Iâ-so͘ tī an-hioh-ji̍t tùi be̍h-hn̂g keng-kè; I ê ha̍k-seng iau, chiū tiah be̍h-sūi lâi chia̍h. 2 Nā-sī Hoat-lī-sài lâng khòaⁿ-kìⁿ chiū kā I kóng, Lí khòaⁿ, lí ê ha̍k-seng kiâⁿ an-hioh-ji̍t só͘ m̄ eng-kai kiâⁿ ê sū. 3 Iâ-so͘ chiū kā in kóng, Tāi-pi̍t kap kun-tè ê lâng iau ê sî só͘ kiâⁿ ê, lín bô tha̍k-tio̍h mah? 4 Chiū-sī i ji̍p Siōng-tè ê chhù, chia̍h pâi-lia̍t ê piáⁿ; che m̄ sī i kap kun-tè ê lâng só͘ thang chia̍h ê, to̍k-to̍k chè-si thang nā-tiāⁿ. 5 Á-sī lín ia̍h m̄ bat tha̍k lu̍t-hoat só͘ kì-chài, tng an-hioh-ji̍t chè-si tī tiān-ni̍h hoān-tio̍h an-hioh ia̍h sī bô chōe mah? 6 To̍k-to̍k góa kā lín kóng, tī chia ū pí tiān khah tōa ê. 7 Chóng-sī lín nā chai, Góa ài lîn-bín, bô ài chè-sū, chit kù ê ì-gī, chiū bô chek-chōe bô chōe ê lâng. 8 In-ūi Jîn-chú sī an-hioh-ji̍t ê chú. 9 Iâ-so͘ lī-khui hia, ji̍p in ê hōe-tn̂g; tú-tn̄g ū lâng chi̍t chhiú ko͘-tâ. 10 Lâng mn̄g I kóng, An-hioh-ji̍t hêng i, thang mah? ì-sù ài beh kò I. 11 I chiū kā in kóng, Lín tiong-kan sím-mi̍h lâng ū chi̍t chiah iûⁿ, nā tī an-hioh-ji̍t poa̍h-lo̍h khiⁿ, bô kā i lia̍h-khí-lâi mah? 12 Hô-hòng lâng pí iûⁿ ke jōa kùi-khì ah! Só͘-í an-hioh-ji̍t kiâⁿ hó-sū sī thang. 13 Chiū kā hit lâng kóng, Chhun lí ê chhiú. I chiū chhun, sûi-sî hó-hó, chhin-chhiūⁿ pa̍t ki chhiú. 14 Hoat-lī-sài lâng chhut-khì, saⁿ-kap kè-bô͘ kong-kek Iâ-so͘, khòaⁿ thang cháiⁿ-iūⁿ bia̍t I. 15 Iâ-so͘ chai, chiū thè-khì, lī-khui hia; ū chōe-chōe lâng tè I, chiū lóng kā in i; 16 ia̍h kéng-kài in bo̍h-tit chiong I pò-iông; 17 sī beh èng-giām thok sian-ti Í-sài-a só͘ kóng ê, kóng, 18 Lí khòaⁿ, góa ê lô͘-po̍k, góa só͘ kéng ê, Góa só͘ thiàⁿ ê, góa ê sim só͘ hoaⁿ-hí ê; Góa beh chiong góa ê Sîn hù-hō͘ I. I beh ēng phòaⁿ-toàn thong-ti gōa-pang. 19 I bô beh saⁿ-chiⁿ, bô beh soan-jióng; Tī koe-chhī bô lâng thiaⁿ-kìⁿ I ê siaⁿ. 20 Siū-siong ê lô͘-tek, I bô beh at-chi̍h, Beh hoa ê hé-chhiⁿ, I bô phah-sit, Kàu hō͘ kong-gī ōe tek-sèng. 21 Gōa-pang ia̍h beh khò I ê miâ lâi ǹg-bāng. 22 Hit sî ū chhōa chi̍t ê hoān-tio̍h kúi, chhiⁿ-mî kòa é-káu ê lâi chiū-kūn I. I chiū i-hó i, hō͘ é-káu ê kóng ōe, sòa ōe khòaⁿ-kìⁿ. 23 Chèng lâng lóng gông-ngia̍h, kóng, Chit-ê chóng-bô sī Tāi-pi̍t ê hō͘-è o͘h? 24 Nā-sī Hoat-lī-sài lâng thiaⁿ-kìⁿ chiū kóng, Chit lâng kóaⁿ kúi bô m̄ sī khò kúi-ông Pia̍t-se-pok. 25 Iâ-so͘ chai in ê ì-sù, chiū kā in kóng, Kìⁿ-nā kok ka-kī cheng-piàⁿ, ōe tì-kàu pha-hng; kìⁿ-nā siâⁿ á-sī ke ka-kī cheng-piàⁿ, tek-khak khiā bōe tiâu. 26 Nā Sat-tàn kóaⁿ Sat-tàn, sī ka-kī cheng-piàⁿ, i ê kok thái-thó khiā ōe tiâu? 27 Siat-sú góa khò Pia̍t-se-pok kóaⁿ kúi, chiū lín ê chú-tē kóaⁿ kúi óa-khò chī-chūi ah? Án-ni in beh gí-toàn lín. 28 To̍k-to̍k góa nā khò Siōng-tè ê Sîn kóaⁿ kúi, chiū Siōng-tè ê kok í-keng kàu lín lah. 29 Lâng cháiⁿ-iūⁿ ōe ji̍p béng lâng ê chhù, kiap i ê ke-hé? kiám m̄ tio̍h tāi-seng pa̍k béng lâng, jiân-āu kiap i ê chhù mah? 30 Bô tâng góa ê, chiū-sī tùi-te̍k góa; bô kap góa siu-khioh ê, chiū-sī teh phah-sòaⁿ. 31 Só͘-í góa kā lín kóng, Kìⁿ-nā chōe-ok pòng-to̍k, lóng beh sià-bián i; to̍k-to̍k pòng-to̍k Sèng Sîn ê, bô beh sià-bián i. 32 Kìⁿ-nā kóng ōe kong-kek Jîn-chú ê, beh sià-bián i; to̍k-to̍k kìⁿ-nā kóng ōe kong-kek Sèng Sîn ê, put-lūn kim-sè lâi-sè, bô beh sià-bián i. 33 Lín tio̍h lia̍h hit ê chhiū chòe hó, i ê ké-chí ia̍h chòe hó; he̍k-sī lia̍h hit ê chhiū chòe pháiⁿ, i ê ké-chí ia̍h chòe pháiⁿ; in-ūi tùi ké-chí lâi bat chhiū. 34 To̍k-chôa ê lūi ah, lín í-keng sī pháiⁿ, thài ōe kóng hó ōe? in-ūi sī tùi sim só͘ chhiong-móa ê, chhùi chiū kóng chhut. 35 Hó lâng tùi só͘ chek-chū ê hó, lâi hoat-chhut chiah ê hó; pháiⁿ lâng tùi só͘ chek-chū ê pháiⁿ, lâi hoat-chhut chiah ê pháiⁿ. 36 Góa kā lín kóng, kìⁿ-nā lâng só͘ kóng ê êng-á-ōe, in tī sím-phòaⁿ ê ji̍t, ta̍k kù tio̍h sò͘-bêng. 37 In-ūi tùi lí ê ōe beh chheng lí chòe gī; ia̍h tùi lí ê ōe beh gí lí ū chōe. 38 Hit sî ū keng-ha̍k-sū kap Hoat-lī-sài kúi-nā lâng ìn I kóng, Sian-siⁿ ah, goán ài tùi lí khòaⁿ chi̍t ê sîn-jiah. 39 Nā-sī I ìn kóng, Ok-to̍k kan-îm ê sè-tāi kiû sîn-jiah; tû sian-ti Iok-ná ê sîn-jiah í-gōa, bô beh sîn-jiah hō͘ in; 40 in-ūi chhin-chhiūⁿ Iok-ná saⁿ ji̍t saⁿ mî tī tōa hî ê pak-tó͘ lāi, Jîn-chú ia̍h beh án-ni saⁿ ji̍t saⁿ mî tī tōe-lāi. 41 Nî-nî-bî lâng tng sím-phòaⁿ ê sî, beh kap chit sè-tāi ê lâng saⁿ-kap khí-lâi, sòa gí in ê chōe; in-ūi in tùi Iok-ná só͘ thoân lâi hoán-hóe; hô-hòng tī chia ū pí Iok-ná khah tōa ê. 42 Lâm-hng ê lú-ông, tng sím-phòaⁿ ê sî beh kap chit sè-tāi ê lâng saⁿ-kap khí-lâi, sòa gí in ê chōe; in-ūi i tùi tōe ê ke̍k-thâu lâi, beh thiaⁿ Só͘-lô-bûn tì-sek ê ōe, hô-hòng tī chia ū pí Só͘-lô-bûn khah tōa ê. 43 Siâ-sîn í-keng lī-khui lâng, keng-kè bô chúi ê tōe, kiû an-hioh ia̍h bô tit-tio̍h. 44 Chiū kóng, Góa beh tò-khì só͘ chhut-lâi ê chhù; kàu tè, chiū khòaⁿ-kìⁿ khang-khang, piàⁿ-sàu, siu-chéng; 45 chiū khì, koh tòa chhit ê sîn, pí ka-kī khah pháiⁿ ê, ji̍p-khì khiā-khí; hit lâng lō͘-bé ê kéng-hóng, pí khí-thâu ê khah chhám. Chit ê pháiⁿ ê sè-tāi ia̍h beh chhin-chhiūⁿ án-ni. 46 I iáu tùi chèng lâng kóng ōe ê sî, tú-tn̄g I ê lāu-bú kap I ê hiaⁿ-tī khiā tī gōa-bīn, ài beh kap I kóng ōe. 47 Ū lâng kā I kóng, Lí khòaⁿ, lí ê lāu-bú kap lí ê hiaⁿ-tī khiā tī gōa-bīn, ài beh kap lí kóng ōe. 48 Chiū ìn hit ê kā I kóng ê kóng, Sím-mi̍h lâng sī góa ê lāu-bú? sím-mi̍h lâng sī góa ê hiaⁿ-tī ah? 49 Chiū chhun chhiú kí I ê ha̍k-seng kóng, Lí khòaⁿ, góa ê lāu-bú kap góa ê hiaⁿ-tī. 50 In-ūi kìⁿ-nā kiâⁿ góa tī thiⁿ-ni̍h ê Pē ê chí-ì ê, chiū-sī góa ê hiaⁿ-tī, chí-bē, kap lāu-bú.
1 當hit日，耶穌tùi厝內出去，坐tī海邊。 2 有chōe-chōe陣ê人聚集就近伊，致到伊上船來坐，kui陣ê人lóng khiā tī岸裡。 3 就用chōe-chōe項設譬喻kā in講，你看，有掖種ê出去掖種； 4 掖ê時，有ê ka-la̍uh tī路邊，飛鳥到，一盡食伊； 5 有ê ka-la̍uh tī石格ê地，土淺ê位；因為土無深，就發真緊； 6 但是日出曝伊；因為無根，就枯焦。 7 亦有ê ka-la̍uh tī刺á內，刺á發起遮蔽伊； 8 有ê ka-la̍uh tī好ê土地，結實，有ê百倍，有ê六十倍，有ê三十倍。 9 有耳孔ê，tio̍h聽。 10 學生就近伊講，你用譬喻kā in講是怎樣？ 11 伊應講，天國ê奧妙hō͘ lín知，亦無hō͘ in。 12 因為見若有ê，beh hō͘伊，就伊有chhun；無ê，連伊所有ê亦beh搶伊。 13 所以我用譬喻kā in講；因為in看，亦看無見；聽，亦聽無現，亦無曉悟。 14 以賽亞所讖語ê，是應驗tī in，講， Lín聽是beh聽，但是決斷無曉悟； Lín看是beh看，但是決斷看無見； 15 因為chitê百姓心鈍，耳孔重， In ê目睭放khoeh； 驚了in用目睭看見， 用耳孔聽見， 用心曉悟， 來oa̍t-lìn-tńg， 我就醫好in。 16 但是lín ê目睭有福氣，因為in看見；lín ê耳孔有福氣，因為in聽見。 17 因為我實在kā lín講，前有chōe-chōe先知kap義人，ài看lín所看見ê，亦無看見；ài聽lín所聽見ê，亦無聽見。 18 Taⁿ chitê掖種子ê ê譬喻，lín tio̍h聽。 19 見若聽天國ê道理也無曉悟ê，hitê pháiⁿ-ê就到，將所掖tī伊ê心ê搶去；這是掖tī路邊ê。 20 掖tī石格ê地ê，這是人聽道理，liâm-piⁿ歡喜承受伊； 21 總是內面無根，不過是暫時nā-tiāⁿ；到為tio̍h道理tú-tio̍h有患難khún-tio̍k liâm-piⁿ tio̍h-tak。 22 掖tī刺á內ê，這是人聽道理，亦世間ê掛慮，錢財ê迷惑，遮蔽hitê道理，就無結實。 23 掖tī好土地ê，這是人聽道理來曉悟，伊實在結實；所結ê，有ê百倍，有ê六十倍，有ê三十倍。 24 Koh設譬喻對in講，天國親像人掖好種子tī伊ê園； 25 人睏ê時，伊ê kiû-siû來，掖稗tī麥中，就去。 26 到麥發起來，續結穗ê時，稗亦出現。 27 家主ê奴僕來kā伊講，頭家ah，你kiám m̄是掖好種子tī你ê園mah？tùi tá-lo̍h有稗？ 28 伊kā in講，這就是kiû-siû做ê。奴僕kā伊講，你ài阮去khau伊mah？ 29 伊就講，無，驚了lín khau稗，連麥續拔起來。 30 容允兩項平平大叢，thèng候收割；到收割ê時，我beh kā割ê講，事先拾hiahê稗，hâ kui把thang燒伊；獨獨麥tio̍h收入我ê粟倉。 31 Koh設譬喻對in講，天國親像一粒芥菜子，人the̍h去亦tī伊ê園； 32 chitê是百項種子ê第一細；到伊大叢，是khah大lóng總ê菜蔬，續成做樹，致到空中ê鳥來歇tī伊ê枝。 33 Koh用譬喻kā in講，天國親像酵，婦人人the̍h去khǹg tī三斗麵粉ê內面，到lóng發酵。 34 Chiahê lóng是耶穌用譬喻kā眾人講；若m̄是用譬喻，就無所kā in講； 35 來應驗早託先知所講ê，講， 我beh開嘴設譬喻， 闡明創造世間以來所隱密ê。 36 Hit時耶穌hō͘眾人四散，chiah入厝；伊ê學生就近伊講，園ê稗á ê譬喻，kā阮解明。 37 伊應講，掖好種子ê是人子；園就是世間； 38 好種子ê就是天國ê Kiáⁿ；稗，就是pháiⁿ-ê ê Kiáⁿ； 39 掖稗ê kiû-siû，就是魔鬼；收割ê時，是世界ê路尾；割ê，就是天使。 40 所以親像拾稗á來用火燒；tī世界ê路尾亦beh án-ni。 41 人子beh差伊ê天使tùi伊ê國內收拾見若hō͘人tio̍h-tak ê，kap做不法ê； 42 hiat in tī火爐，tī hia beh有啼哭咬牙切齒。 43 Hit時義人beh發出光親像日，tī in ê父ê國。有耳孔ê tio̍h聽。 44 天國親像寶貝khǹg tī園裡；人tú-tio̍h就khǹg密伊；因為歡喜chiah去賣一切所有ê，來買hit khu園。 45 Koh天國親像seng-lí人chhē好ê珠； 46 tú-tio̍h一粒不止值錢ê，就去賣一切所有ê來買伊。 47 Koh天國親像網拋tī海裡，聚集ta̍k類ê水族； 48 已經滿，就拖上坪(phiâⁿ)；坐teh，拾好ê入器具，m̄好ê hiat-ka̍k tī外面。 49 世界ê路尾，亦beh án-ni；chiahê天使beh出來，tùi義人ê中間來分別pháiⁿ人； 50 hiat in tī火爐，tī hia beh有啼哭咬牙切齒。 51 Chiahê lín lóng會曉得bōe？In講，會。 52 伊kā in講，所以見若經學士做天國ê學生ê，是親像家主tùi伊ê庫房the̍h出新舊ê物ê。 53 耶穌已經講chiahê譬喻明白，就離開hia。 54 到伊ê本鄉，tī in ê會堂教示in；致到in gông-ngia̍h講，Chit人tùi tá-lo̍h得tio̍h chitê智慧，kap chiahê權能ah？ 55 Chitê kiám m̄是木匠ê Kiáⁿ mah？伊ê老母kiám m̄是叫做馬利亞，伊ê兄弟雅各、約瑟、西門、偤大mah？ 56 伊ê姊妹kiám無lóng kap咱tī chia mah？Án-ni chit人tùi tá-lo̍h得tio̍h chiahê一切ah？ 57 In就厭賤伊。但是耶穌kā in講，先知人tī本鄉本家以外，無m̄尊貴。 58 耶穌tī hia無行chōe-chōe權能，因為in無信伊。
1 Tng hit ji̍t, Iâ-so͘ tùi chhù-lāi chhut-khì, chē tī hái-piⁿ. 2 Ū chōe-chōe tīn ê lâng chū-chi̍p chiū-kūn I, tì-kàu I chiūⁿ chûn lâi chē, kui tīn ê lâng lóng khiā tī hōaⁿ-ni̍h. 3 Chiū ēng chōe-chōe hāng siat phì-jū kā in kóng, Lí khòaⁿ, ū iā chéng ê chhut-khì iā chéng; 4 iā ê sî, ū-ê ka-la̍uh tī lō͘-piⁿ, pe-chiáu kàu, it-chīn chia̍h i; 5 ū-ê ka-la̍uh tī chio̍h-keh ê tōe, thô͘ chhián ê ūi; in-ūi thô͘ bô chhim, chiū hoat chin kín; 6 nā-sī ji̍t chhut pha̍k i; in-ūi bô kun, chiū ko͘-tâ. 7 Ia̍h ū-ê ka-la̍uh tī chhì-á-lāi, chhì-á hoat-khí jia-pè i; 8 ū-ê ka-la̍uh tī hó ê thó͘-tōe, kiat-si̍t, ū-ê pah pē, ū-ê la̍k-cha̍p pē, ū-ê saⁿ-cha̍p pē. 9 Ū hī-khang ê, tio̍h thiaⁿ. 10 Ha̍k-seng chiū-kūn I kóng, Lí ēng phì-jū kā in kóng sī cháiⁿ-iūⁿ? 11 I ìn kóng, Thian-kok ê ò-biāu hō͘ lín chai, ia̍h bô hō͘ in. 12 In-ūi kìⁿ-nā ū ê, beh hō͘ i, chiū i ū chhun; bô ê, liân i só͘ ū ê ia̍h beh chhiúⁿ i. 13 Só͘-í góa ēng phì-jū kā in kóng; in-ūi in khòaⁿ, ia̍h khòaⁿ bô kìⁿ; thiaⁿ, ia̍h thiaⁿ bô hiān, ia̍h bô hiáu-ngō͘. 14 Í-sài-a só͘ chhàm-gú ê, sī èng-giām tī in, kóng, Lín thiaⁿ sī beh thiaⁿ, nā-sī koat-toàn bô hiáu-ngō͘; Lín khòaⁿ sī beh khòaⁿ, nā-sī koat-toàn khòaⁿ bô kìⁿ; 15 In-ūi chit ê peh-sìⁿ sim tūn, Hī-khang tāng, In ê ba̍k-chiu pàng khoeh; Kiaⁿ-liáu in ēng ba̍k-chiu khòaⁿ-kìⁿ, Ēng hī-khang thiaⁿ-kìⁿ, Ēng sim hiáu-ngō͘, Lâi oa̍t-lìn-tńg, Góa chiū i-hó in. 16 Nā-sī lín ê ba̍k-chiu ū hok-khì, in-ūi in khòaⁿ-kìⁿ; lín ê hī-khang ū hok-khì, in-ūi in thiaⁿ-kìⁿ. 17 In-ūi góa si̍t-chāi kā lín kóng, Chêng ū chōe-chōe sian-ti kap gī lâng, ài khòaⁿ lín só͘ khòaⁿ-kìⁿ ê, ia̍h bô khòaⁿ-kìⁿ; ài thiaⁿ lín só͘ thiaⁿ-kìⁿ ê, ia̍h bô thiaⁿ-kìⁿ. 18 Taⁿ chit-ê iā chéng-chí ê ê phì-jū, lín tio̍h thiaⁿ. 19 Kìⁿ-nā thiaⁿ thian-kok ê tō-lí iā bô hiáu-ngō͘ ê, hit ê pháiⁿ-ê chiū kàu, chiong só͘ iā tī i ê sim ê chhiúⁿ-khì; che sī iā tī lō͘-piⁿ ê. 20 Iā tī chio̍h-keh ê tōe ê, che sī lâng thiaⁿ tō-lí, liâm-piⁿ hoaⁿ-hí sêng-siū i; 21 chóng-sī lāi-bīn bô kun, put-kò sī chiām-sî nā-tiāⁿ; kàu ūi-tio̍h tō-lí tú-tio̍h ū hoān-lān khún-tio̍k liâm-piⁿ tio̍h-tak. 22 Iā tī chhì-á-lāi ê, che sī lâng thiaⁿ tō-lí, ia̍h sè-kan ê khòa-lū, chîⁿ-châi ê bê-he̍k, jia-pè hit ê tō-lí, chiū bô kiat-si̍t. 23 Iā tī hó thó͘-tōe ê, che sī lâng thiaⁿ tō-lí lâi hiáu-ngō͘, i si̍t-chāi kiat-si̍t; só͘ kiat ê, ū-ê pah pē, ū-ê la̍k-cha̍p pē, ū-ê saⁿ-cha̍p pē. 24 Koh siat phì-jū tùi in kóng, Thian-kok chhin-chhiūⁿ lâng iā hó chéng-chí tī i ê hn̂g; 25 lâng khùn ê sî, i ê kiû-siû lâi, iā phōe tī be̍h tiong, chiū khì. 26 Kàu be̍h hoat-khí-lâi, sòa kiat sūi ê sî, phōe ia̍h chhut-hiān. 27 Ke-chú ê lô͘-po̍k lâi kā i kóng, Thâu-ke ah, lí kiám m̄ sī iā hó chéng-chí tī lí ê hn̂g mah? tùi tá-lo̍h ū phōe? 28 I kā in kóng, Che chiū-sī kiû-siû chòe ê. Lô͘-po̍k kā i kóng, Lí ài goán khì khau i mah? 29 I chiū kóng, Bô, kiaⁿ-liáu lín khau phōe, liân be̍h sòa pu̍ih-khí-lâi. 30 Iông-ún nn̄g hāng pîⁿ-pîⁿ tōa châng, thèng-hāu siu-koah; kàu siu-koah ê sî, góa beh kā koah-ê kóng, Tāi-seng khioh hiah ê phōe, hâ kui pé thang sio i; to̍k-to̍k be̍h tio̍h siu-ji̍p góa ê chhek-chhng. 31 Koh siat phì-jū tùi in kóng, Thian-kok chhin-chhiūⁿ chi̍t lia̍p kòa-chhài chí, lâng the̍h khì iā tī i ê hn̂g; 32 chit-ê sī pah hāng chéng-chí ê tē it sòe; kàu i tōa châng, sī khah tōa lóng-chóng ê chhài-soe, sòa chiâⁿ chòe chhiū, tì-kàu khong-tiong ê chiáu lâi hioh tī i ê ki. 33 Koh ēng phì-jū kā in kóng, Thian-kok chhin-chhiūⁿ kàⁿ, hū-jîn-lâng the̍h khì khǹg tī saⁿ táu mī-hún ê lāi-bīn, kàu lóng hoat kàⁿ. 34 Chiah-ê lóng sī Iâ-so͘ ēng phì-jū kā chèng lâng kóng; nā m̄ sī ēng phì-jū, chiū bô só͘ kā in kóng; 35 lâi èng-giām chá thok sian-ti só͘ kóng ê, kóng, Góa beh khui chhùi siat phì-jū, Chhián-bêng chhòng-chō sè-kan í-lâi só͘ ún-ba̍t ê. 36 Hit sî Iâ-so͘ hō͘ chèng lâng sì-sòaⁿ, chiah ji̍p chhù; I ê ha̍k-seng chiū-kūn I kóng, Hn̂g ê phōe-á ê phì-jū, kā goán kóe-bêng. 37 I ìn kóng, Iā hó chéng-chí ê sī Jîn-chú; hn̂g chiū-sī sè-kan; 38 hó chéng-chí ê chiū-sī thian-kok ê kiáⁿ; phōe, chiū-sī pháiⁿ-ê ê kiáⁿ; 39 iā phōe ê kiû-siû, chiū-sī Mô͘-kúi; siu-koah ê sî, sī sè-kài ê lō͘-bé; koah ê, chiū-sī thiⁿ-sài. 40 Só͘-í chhin-chhiūⁿ khioh phōe-á lâi ēng hé sio; tī sè-kài ê lō͘-bé ia̍h beh án-ni. 41 Jîn-chú beh chhe I ê thiⁿ-sài tùi I ê kok-lāi siu-si̍p kìⁿ-nā hō͘ lâng tio̍h-tak ê, kap chòe put-hoat ê; 42 hiat in tī hé-lô͘, tī hia beh ū thî-khàu kā-gê chhiat-chhí. 43 Hit sî gī lâng beh hoat-chhut kng chhin-chhiūⁿ ji̍t, tī in ê Pē ê kok. Ū hī-khang ê tio̍h thiaⁿ. 44 Thian-kok chhin-chhiūⁿ pó-pòe khǹg tī hn̂g-ni̍h; lâng tú-tio̍h chiū khǹg-ba̍t i; in-ūi hoaⁿ-hí chiah khì bōe it-chhè só͘ ū ê, lâi bóe hit khu hn̂g. 45 Koh thian-kok chhin-chhiūⁿ seng-lí lâng chhē hó ê chu; 46 tú-tio̍h chi̍t lia̍p put-chí ta̍t chîⁿ ê, chiū khì bōe it-chhè só͘ ū ê lâi bóe i. 47 Koh thian-kok chhin-chhiūⁿ bāng pha tī hái-ni̍h, chū-chi̍p ta̍k lūi ê chúi-cho̍k; 48 í-keng móa, chiū thoa chiūⁿ phiâⁿ; chē-teh, khioh hó ê ji̍p khì-kū, m̄ hó ê hiat-ka̍k tī gōa-bīn. 49 Sè-kài ê lō͘-bé, ia̍h beh án-ni; chiah ê thiⁿ-sài beh chhut-lâi, tùi gī lâng ê tiong-kan lâi hun-piat pháiⁿ lâng; 50 hiat in tī hé-lô͘, tī hia beh ū thî-khàu kā-gê chhiat-chhí. 51 Chiah-ê lín lóng ōe hiáu-tit bōe? In kóng, Ōe. 52 I kā in kóng, Só͘-í kìⁿ-nā keng-ha̍k-sū chòe thian-kok ê ha̍k-seng ê, sī chhin-chhiūⁿ ke-chú tùi i ê khò͘-pâng the̍h-chhut sin kū ê mi̍h ê. 53 Iâ-so͘ í-keng kóng chiah ê phì-jū bêng-pe̍k, chiū lī-khui hia. 54 Kàu I ê pún hiuⁿ, tī in ê hōe-tn̂g kà-sī in; tì-kàu in gông-ngia̍h kóng, Chit lâng tùi tá-lo̍h tit-tio̍h chit ê tì-hūi, kap chiah ê koân-lêng ah? 55 Chit-ê kiám m̄ sī ba̍k-chhiūⁿ ê kiáⁿ mah? I ê lāu-bú kiám m̄ sī kiò chòe Má-lī-a, I ê hiaⁿ-tī Ngá-kok, Iok-sek, Se-bûn, Iû-tāi mah? 56 I ê chí-bē kiám bô lóng kap lán tī chia mah? Án-ni chit lâng tùi tá-lo̍h tit-tio̍h chiah-ê it-chhè ah? 57 In chiū iàm-chiān I. Nā-sī Iâ-so͘ kā in kóng, Sian-ti lâng tī pún hiuⁿ pún ke í-gōa, bô m̄ chun-kùi. 58 Iâ-so͘ tī hia bô kiâⁿ chōe-chōe koân-lêng, in-ūi in bô sìn I.
1 當hit時，分封ê人君希律聽見耶穌ê名聲； 2 就kā伊ê差用講，Chitê就是行洗禮ê約翰，伊是tùi死人中koh活；所以有chiahê權能tùi伊顯出。 3 因為前希律為tio̍h伊ê兄弟腓力ê bó͘希羅底ê緣故，有掠約翰縛伊，關落監。 4 因為約翰bat kā伊講，你接納chitê婦人人是不法。 5 希律ài 刣伊，獨獨驚百姓 ；因為in掠約翰做先知。 6 Tú-tio̍h希律做生日，希羅底ê cha-bó͘-kiáⁿ跳舞tī in中間，來hō͘希律歡喜。 7 Tùi án-ni chiù-chōa，允beh照伊所ài求ê lóng hō͘伊。 8 伊hō͘ in老母使唆，就講，將行洗禮約翰ê頭殼tóe tī盤裡，就chia hō͘我。 9 王真憂悶；總是為tio̍h所chiù ê chōa，koh有同桌ê人tī-teh，就命令hō͘伊； 10 差人去監裡刣約翰。 11 將伊ê頭殼tóe tī盤裡，來hō͘ cha-bó͘ gín-ná；伊就捧去hō͘伊ê老母。 12 伊ê學生來收伊ê身屍，去埋葬；就去kā耶穌講。 13 耶穌聽見就上船，tùi hia退去曠野，家己tòa；眾人聽見，就tùi chiahê城步行tè伊。 14 伊出去，看見kui大陣ê人，就憐憫in，醫好in中間有病ê。 15 日mńg晡，學生就近伊講，chia是曠野，koh時已經過；tio̍h hō͘眾人四散，thang去鄉社買食。 16 耶穌kā in講，In m̄免去，lín hō͘ in食。 17 In kā伊講，阮tī chia只有五個餅，兩尾魚。 18 伊講，The̍h來hō͘我。 19 就吩咐眾人坐tī草埔，就the̍h hit五個餅，兩尾魚，ǹg天來祝謝，peh餅hō͘學生，學生hō͘眾人。 20 Lóng食到飽；拾所chhun ê屑á，滿十二筐(kheng)。 21 食ê人，婦人人gín-ná以外，約略五千。 22 伊隨時逼學生上船，事先過去hit pêng，thèng候伊四散眾人。 23 四散眾人了後，就家己上山祈禱；已經暗，只有伊家己tī hia。 24 Hit時船tī海中，hō͘湧搖choah；因為是對頭風。 25 暝時四更，耶穌tùi海面行，就近in。 26 學生看見伊行tī海面，就生驚，講，是怪物；因為驚就喉叫。 27 耶穌liâm-piⁿ kap in講話，講，安lín ê心；是我；m̄免驚。 28 彼得應伊講，主ah，果然是你，就命令我行水面就近你。 29 伊講，來。彼得就tùi船裡落去，行水面，beh就近耶穌。 30 總是看見風，就驚；teh-beh沉落去，就喉叫講，主ah，救我。 31 耶穌隨時伸手牽伊，講，小信ê人，啥事僥疑？ 32 In上船，風就定。 33 船裡ê人拜伊講，你真正是上帝ê Kiáⁿ。 34 已經過去，就到Kek-nî-sat-le̍k地。 35 Hit位ê人bat伊，差人去四方，chhōa一切有病ê來就近伊； 36 求伊但使hō͘ in摸伊ê衫á裾ê鬚；見若摸ê人齊全好。
1 Tng hit sî, hun-hong ê jîn-kun Hi-lu̍t thiaⁿ-kìⁿ Iâ-so͘ ê miâ-siaⁿ; 2 chiū kā i ê chhe-ēng kóng, Chit-ê chiū-sī kiâⁿ sóe-lé ê Iok-hān, i sī tùi sí-lâng tiong koh-oa̍h; só͘-í ū chiah ê koân-lêng tùi i hián-chhut. 3 In-ūi chêng Hi-lu̍t ūi-tio̍h i ê hiaⁿ-tī Hui-le̍k ê bó͘ Hi-lô-tí ê iân-kò͘, ū lia̍h Iok-hān pa̍k i, koaiⁿ lo̍h kaⁿ. 4 In-ūi Iok-hān bat kā i kóng, Lí chiap-la̍p chit ê hū-jîn-lâng sī put-hoat. 5 Hi-lu̍t ài thâi i, to̍k-to̍k kiaⁿ peh-sìⁿ; in-ūi in lia̍h Iok-hān chòe sian-ti. 6 Tú-tio̍h Hi-lu̍t chòe siⁿ-ji̍t, Hi-lô-tí ê cha-bó͘-kiáⁿ thiàu-bú tī in tiong-kan, lâi hō͘ Hi-lu̍t hoaⁿ-hí. 7 Tùi án-ni chiù-chōa, ún beh chiàu i só͘ ài kiû ê lóng hō͘ i. 8 I hō͘ in lāu-bú sái-sō, chiū kóng, Chiong kiâⁿ sóe-lé Iok-hān ê thâu-khak tóe tī pôaⁿ-ni̍h, chiū chia hō͘ góa. 9 Ông chin iu-būn; chóng-sī ūi-tio̍h só͘ chiù ê chōa, koh ū tâng toh ê lâng tī-teh, chiū bēng-lēng hō͘ i; 10 chhe lâng khì kaⁿ-ni̍h thâi Iok-hān. 11 Chiong i ê thâu-khak tóe tī pôaⁿ-ni̍h, lâi hō͘ cha-bó͘ gín-ná; i chiū phâng-khì hō͘ i ê lāu-bú. 12 I ê ha̍k-seng lâi siu i ê sin-si, khì bâi-chòng; chiū khì kā Iâ-so͘ kóng. 13 Iâ-so͘ thiaⁿ-kìⁿ chiū chiūⁿ chûn, tùi hia thè-khì khòng-iá, ka-kī tòa; chèng lâng thiaⁿ-kìⁿ, chiū tùi chiah ê siâⁿ pō͘-kiâⁿ tè I. 14 I chhut-khì, khòaⁿ-kìⁿ kui tōa tīn ê lâng, chiū lîn-bín in, i-hó in tiong-kan ū pīⁿ ê. 15 Ji̍t mńg-po͘, ha̍k-seng chiū- kūn I kóng, Chia sī khòng-iá, koh sî í-keng kè; tio̍h hō͘ chèng lâng sì-sòaⁿ, thang khì hiuⁿ-siā bóe chia̍h. 16 Iâ-so͘ kā in kóng, In m̄ bián khì, lín hō͘ in chia̍h. 17 In kā I kóng, Goán tī chia chí ū gō͘ ê piáⁿ, nn̄g bé hî. 18 I kóng, The̍h lâi hō͘ góa. 19 Chiū hoan-hù chèng lâng chē tī chháu-po͘, chiū the̍h hit gō͘ ê piáⁿ, nn̄g bé hî, ǹg thiⁿ lâi chiok-siā, peh piáⁿ hō͘ ha̍k-seng, ha̍k-seng hō͘ chèng lâng. 20 Lóng chia̍h kàu pá; khioh só͘ chhun ê sut-á, móa cha̍p-jī kheng. 21 Chia̍h ê lâng, hū-jîn-lâng gín-ná í-gōa, iok-lio̍k gō͘ chheng. 22 I sûi-sî pek ha̍k-seng chiūⁿ chûn, tāi-seng kè-khì hit pêng, thèng-hāu I sì-sòaⁿ chèng lâng. 23 Sì-sòaⁿ chèng lâng liáu-āu, chiū ka-kī chiūⁿ soaⁿ kî-tó; í-keng àm, chí ū I ka-kī tī hia. 24 Hit sî chûn tī hái-tiong, hō͘ éng iô-choah; in-ūi sī tùi-thâu hong. 25 Mî-sî sì kiⁿ, Iâ-so͘ tùi hái-bīn kiâⁿ, chiū-kūn in. 26 Ha̍k-seng khòaⁿ-kìⁿ I kiâⁿ tī hái-bīn, chiū chhiⁿ-kiaⁿ, kóng, Sī koài mi̍h; in-ūi kiaⁿ chiū âu-kiò. 27 Iâ-so͘ liâm-piⁿ kap in kóng ōe, kóng, An lín ê sim; sī góa; m̄ bián kiaⁿ. 28 Pí-tek ìn I kóng, Chú ah, kó-jiân sī lí, chiū bēng-lēng góa kiâⁿ chúi-bīn chiū-kūn lí. 29 I kóng, Lâi. Pí-tek chiū tùi chûn-ni̍h lo̍h-khì, kiâⁿ chúi-bīn, beh chiū-kūn Iâ-so͘. 30 Chóng-sī khòaⁿ-kìⁿ hong, chiū kiaⁿ; teh-beh tîm-lo̍h-khì, chiū âu-kiò kóng, Chú ah, kiù góa. 31 Iâ-so͘ sûi-sî chhun chhiú khan i, kóng, Sió-sìn ê lâng, siáⁿ-sū giâu-gî? 32 In chiūⁿ chûn, hong chiū tiāⁿ. 33 Chûn-ni̍h ê lâng pài I kóng, Lí chin-chiàⁿ sī Siōng-tè ê Kiáⁿ. 34 Í-keng kè-khì, chiū kàu Kek-nî-sat-le̍k tōe. 35 Hit ūi ê lâng bat I, chhe lâng khì sì-hng, chhōa it-chhè ū pīⁿ ê lâi chiū-kūn I; 36 kiû I nā-sái hō͘ in bong I ê saⁿ-á-ku ê chhiu; kìⁿ-nā bong ê lâng chiâu-chn̂g hó.
1 Hit時有法利賽人kap經學士，tùi耶路撒冷來就近耶穌，講， 2 你ê學生啥事犯tio̍h古早人ê流傳？因為食ê時in無洗手。 3 伊就應講，啥事lín亦tùi lín ê流傳來犯tio̍h上帝ê命令ah？ 4 因為上帝講，Tio̍h敬lín ê父，lín ê母；koh有講，罵父á是罵母ê，的確tio̍h hō͘伊死。 5 但是lín就講，見若人tùi父á是母講， 6 你本所會thang tùi我得tio̍h ê利益，已經獻去；hit人就決斷無敬伊ê父。Lín就tùi lín ê流傳已經廢上帝ê道理。 7 假好ê人ah，以賽亞指lín來讖語ê真正tio̍h；伊講， 8 Chitê百姓 用嘴唇尊敬我； 但是in ê心離開我遠遠。 9 In敬拜我是空空， 因為in用人所命令ê做教示來教示人。 10 就叫眾人來，kā in講，Lín tio̍h聽來曉悟。 11 m̄是tùi嘴入ê話hō͘人污穢；就是tùi嘴出ê，chitê話hō͘人污穢。 12 Hit時學生就近來kā伊講，法利賽人聽見chitê話，真m̄願，你知mah？ 13 伊應講，見若栽種ê物m̄是我ê天父所栽種ê，beh拔伊ê根。 14 chhut-chāi in；in是chhiⁿ-mî teh chhōa路ê。若是chhiⁿ-mî kā chhiⁿ-mî ê chhōa路，兩個teh-beh跋落陷坑。 15 彼得應伊講，Chitê譬喻，請kā阮解明。 16 伊就講，Lín亦iáu-kú bē曉悟mah？ 17 Kiám bōe曉得，見若tùi嘴入ê，落tī腹肚，來放tī廁池ah？ 18 但是tùi嘴出ê；是tùi心內發出；chiahê hō͘人污穢。 19 因為tùi心發出pháiⁿ念頭，行兇、姦淫、私通、偷the̍h、lām-sám干證、謗瀆； 20 chiahê是hō͘人污穢；但是無洗手來食，bōe hō͘人污穢。 21 耶穌tùi hia出去退去到Chhui-lô Se-tùn ê境界。 22 Tú-tn̄g有迦南ê婦人人出in ê交界，喉叫講，主ah，大衛ê後裔，憐憫我；我ê cha-bó͘-kiáⁿ犯tio̍h鬼，真艱苦。 23 耶穌無應伊一句。伊ê學生來，求伊講，Tio̍h kah伊去，因為伊tī咱ê後面teh喉叫。 24 伊就應講，我奉差，無m̄是就近以色列家失落ê羊nā-tiāⁿ。 25 婦人人來拜伊講，主ah，幫贊我。 26 但是伊講，The̍h kiáⁿ兒ê餅，hiat hō͘狗á，是m̄合。 27 婦人人講，主ah，tio̍h；因為連狗á亦會得食in ê主人桌腳ka-la̍uh ê餅幼。 28 Tùi án-ni耶穌應講，婦人人ah，你ê信大lah；照你所ài ê，kā你做成。Tùi hit時伊ê cha-bó͘-kiáⁿ已經好。 29 耶穌離開hia，到加利利海邊；上山teh坐。 30 有chōe-chōe陣ê人就近伊，續帶跛腳ê、chhiⁿ-mî ê、啞口ê、破相ê，kap chōe-chōe別款ê來，hē tī伊ê腳前；就醫好in。 31 致到眾人gông-ngia̍h；因為看見啞口ê講話，破相ê lóng好，跛腳ê行，chhiⁿ-mî ê看見；就歸榮光以色列ê上帝。 32 耶穌叫伊ê學生來，講，我憐憫chiahê人，因為in已經kap我tòa三日；亦無物thang食；我m̄甘hō͘ in iau-iau去，驚了in路裡厭倦。 33 學生kā伊講，阮tī曠野，tùi tá-lo̍h有hiah chōe餅thang hō͘ chiah chōe人食飽？ 34 耶穌kā in講，Lín有jōa chōe餅？應講，七個，kap淡薄細尾魚。 35 就吩咐眾人坐tī地裡； 36 The̍h hit七個餅kap魚，祝謝peh，交hō͘學生，學生就hō͘眾人。 37 Lóng食到飽；拾所chhun ê屑á，tóe滿七籃。 38 食ê，婦人人gín-ná以外，共四千人。 39 既然hō͘眾人四散，就上船，到Má-ka-tàn ê交界。
1 Hit sî ū Hoat-lī-sài lâng kap keng-ha̍k-sū, tùi Iâ-lō͘-sat-léng lâi chiū-kūn Iâ-so͘, kóng, 2 Lí ê ha̍k-seng siáⁿ-sū hoān-tio̍h kó͘-chá lâng ê liû-thoân? in-ūi chia̍h ê sî in bô sóe chhiú. 3 I chiū ìn kóng, Siáⁿ-sū lín ia̍h tùi lín ê liû-thoân lâi hoān-tio̍h Siōng-tè ê bēng-lēng ah? 4 In-ūi Siōng-tè kóng, Tio̍h kèng lín ê pē, lín ê bú; koh ū kóng, Mē pē á-sī mē bú ê, tek-khak tio̍h hō͘ i sí. 5 Nā-sī lín chiū kóng, Kìⁿ-nā lâng tùi pē á-sī bú kóng, 6 Lí pún só͘ ōe thang tùi góa tit-tio̍h ê lī-ek, í-keng hiàn-khì; hit lâng chiū koat-toàn bô kèng i ê pē. Lín chiū tùi lín ê liû-thoân í-keng hòe Siōng-tè ê tō-lí. 7 Ké-hó ê lâng ah, Í-sài-a chí lín lâi chhàm-gú ê chin-chiàⁿ tio̍h; i kóng, 8 Chit ê peh-sìⁿ ēng chhùi-tûn chun-kèng góa; Nā-sī in ê sim lī-khui góa hn̄g-hn̄g. 9 In kèng-pài góa sī khang-khang, In-ūi in ēng lâng só͘ bēng-lēng ê chòe kà-sī lâi kà-sī lâng. 10 Chiū kiò chèng lâng lâi, kā in kóng, Lín tio̍h thiaⁿ lâi hiáu-ngō͘. 11 M̄ sī tùi chhùi ji̍p-ê ōe hō͘ lâng ù-òe; chiū-sī tùi chhùi chhut-ê, chit-ê ōe hō͘ lâng ù-òe. 12 Hit sî ha̍k-seng chiū-kūn lâi kā I kóng, Hoat-lī-sài lâng thiaⁿ-kìⁿ chit ê ōe, chin m̄ goān, lí chai mah? 13 I ìn kóng, Kìⁿ-nā chai-chèng ê mi̍h m̄ sī góa ê Thiⁿ Pē só͘ chai-chèng ê, beh pu̍ih i ê kun. 14 Chhut-chāi in; in sī chhiⁿ-mî teh chhōa lō͘ ê. Nā sī chhiⁿ-mî kā chhiⁿ-mî ê chhōa lō͘, nn̄g ê teh-beh poa̍h-lo̍h hām-khiⁿ. 15 Pí-tek ìn I kóng, Chit ê phì-jū, chhiáⁿ kā goán kóe-bêng. 16 I chiū kóng, Lín ia̍h iáu-kú bē hiáu-ngō͘ mah? 17 Kiám bōe hiáu-tit, kìⁿ-nā tùi chhùi ji̍p ê, lo̍h tī pak-tó͘, lâi pàng tī chhè-tî ah? 18 Nā-sī tùi chhùi chhut ê; sī tùi sim-lāi hoat-chhut; chiah-ê hō͘ lâng ù-òe. 19 In-ūi tùi sim hoat-chhut pháiⁿ liām-thâu, hêng-hiong, kan-îm, su-thong, thau-the̍h, lām-sám kan-chèng, pòng-to̍k; 20 chiah-ê sī hō͘ lâng ù-òe; nā-sī bô sóe chhiú lâi chia̍h, bōe hō͘ lâng ù-òe. 21 Iâ-so͘ tùi hia chhut-khì thè-khì kàu Chhui-lô Se-tùn ê kéng-kài. 22 Tú-tn̄g ū Ka-lâm ê hū-jîn-lâng chhut in ê kau-kài, âu-kiò kóng, Chú ah, Tāi-pi̍t ê hō͘-è, lîn-bín góa; góa ê cha-bó͘-kiáⁿ hoān-tio̍h kúi, chin kan-khó͘. 23 Iâ-so͘ bô ìn i chi̍t kù. I ê ha̍k-seng lâi, kiû I kóng, Tio̍h kah i khì, in-ūi i tī lán ê āu-bīn teh âu-kiò. 24 I chiū ìn kóng, Góa hōng chhe, bô m̄ sī chiū-kūn Í-sek-lia̍t ke sit-lo̍h ê iûⁿ nā-tiāⁿ. 25 Hū-jîn-lâng lâi pài I kóng, Chú ah, pang-chān góa. 26 Nā-sī I kóng, The̍h kiáⁿ-jî ê piáⁿ, hiat hō͘ káu-á, sī m̄ ha̍p. 27 Hū-jîn-lâng kóng, Chú ah, tio̍h; in-ūi liân káu-á ia̍h ōe tit chia̍h in ê chú-lâng toh-kha ka-la̍uh ê piáⁿ-iù. 28 Tùi án-ni Iâ-so͘ ìn kóng, Hū-jîn-lâng ah, lí ê sìn tōa lah; chiàu lí só͘ ài ê, kā lí chòe chiâⁿ. Tùi hit sî i ê cha-bó͘-kiáⁿ í-keng hó. 29 Iâ-so͘ lī-khui hia, kàu Ka-lī-lī hái-piⁿ; chiūⁿ soaⁿ teh chē. 30 Ū chōe-chōe tīn ê lâng chiū-kūn I, sòa tòa pái-kha ê, chhiⁿ-mî ê, é-káu ê, phòa-siùⁿ ê, kap chōe-chōe pa̍t khoán ê lâi, hē tī I ê kha-chêng; chiū i-hó in. 31 Tì-kàu chèng lâng gông-ngia̍h; in-ūi khòaⁿ-kìⁿ é-káu ê kóng ōe, phòa-siùⁿ ê lóng hó, pái-kha ê kiâⁿ, chhiⁿ-mî ê khòaⁿ-kìⁿ; chiū kui êng-kng Í-sek-lia̍t ê Siōng-tè. 32 Iâ-so͘ kiò I ê ha̍k-seng lâi, kóng, Góa lîn-bín chiah ê lâng, in-ūi in í-keng kap góa tòa saⁿ ji̍t; ia̍h bô mi̍h thang chia̍h; góa m̄ kam hō͘ in iau-iau khì, kiaⁿ-liáu in lō͘-ni̍h ià-siān. 33 Ha̍k-seng kā I kóng, Goán tī khòng-iá, tùi tá-lo̍h ū hiah chōe piáⁿ thang hō͘ chiah chōe lâng chia̍h pá? 34 Iâ-so͘ kā in kóng, Lín ū jōa chōe piáⁿ? ìn kóng, Chhit ê, kap tām-po̍h sòe bé hî. 35 Chiū hoan-hù chèng lâng chē tī tōe-ni̍h; 36 The̍h hí chhit ê piáⁿ kap hî, chiok-siā peh, kau hō͘ ha̍k-seng, ha̍k-seng chiū hō͘ chèng lâng. 37 Lóng chia̍h kàu pá; khioh só͘ chhun ê sut-á, tóe-móa chhit nâ. 38 Chia̍h ê, hū-jîn-lâng gín-ná í-gōa, kiōng sì-chheng lâng. 39 Kì-jiân hō͘ chèng lâng sì-sòaⁿ, chiū chiūⁿ chûn, kàu Má-ka-tàn ê kau-kài.
1 法利賽kap撒都該人來試耶穌，請伊用tùi天 ê神蹟hō͘ in看。 2 但是伊應講，Ê-hng時lín講，會好天lah，因為天色紅。 3 亦早起時lín講，今á日有風雨，因為天色烏áu。Lín會曉分別天色，獨獨bōe分別chiahê時ê神蹟。 4 惡毒姦淫ê世代求神蹟；獨獨約拿ê神蹟以外，無beh神蹟hō͘伊。就離別in去。 5 學生過去hit pêng，bōe記得帶餅。 6 耶穌kā in講，Tio̍h謹慎持防法利賽kap撒都該人ê酵。 7 學生saⁿ-kap議論講，是咱無帶餅o͘h。 8 耶穌知，就講，小信ê人ah，啥事因為無餅saⁿ-kap議論ah？ 9 Lín iáu-kú bōe曉得，亦bōe記得五千人食五個餅，lín拾幾筐ah？ 10 亦四千人食七個餅，lín拾幾籃ah？ 11 Lín怎樣bōe曉得我所kā lín講ê，m̄是指餅，獨獨tio̍h持防法利賽kap撒都該人ê酵。 12 In chiah會曉得伊所講ê m̄是持防餅ê酵，就是法利賽kap撒都該人ê教。 13 耶穌已經到該撒利亞腓立比ê境界，問伊ê學生講，人teh講人子是是誰？ 14 In講，有ê講是行洗禮ê約翰；有ê講是以利亞；koh有ê講是耶利米，á是先知人ê一个。 15 伊就kā in講，若是lín講我是是誰？ 16 西門彼得應講，你是基督，真活上帝ê Kiáⁿ。 17 耶穌應伊講，西門，巴約拿，你有福氣ah；因為血氣肉體ê無指示你，就是我tī天裡ê父指示你。 18 我koh kā你講，你就是彼得，tī chitê石磐頂我beh起造我ê教會，陰府ê關隘也bōe贏伊。 19 我beh用天國ê鎖匙hō͘你；見若你tī地裡縛ê，tī天裡亦beh縛伊；見若你tī地裡放ê，tī天裡亦beh放伊。 20 Hit時就禁戒學生，莫得kā人講伊是基督。 21 Tùi hit tia̍p起，耶穌chiah指示伊ê學生知伊tio̍h去耶路撒冷，tùi chiahê長老、祭司頭、經學士受tio̍h chōe-chōe苦楚；koh受害死，第三日koh活。 22 彼得牽伊，責備伊講，主ah，千萬m̄-thang，chitê決斷無beh到tī你。 23 耶穌oa̍t-tńg身，kā彼得講，撒旦，退去我ê後面；你是我ê塞礙；因為你所想m̄是上帝ê事，是人ê事。 24 Hit時耶穌kā伊ê學生講，人若ài tè我tio̍h看無家己，giâ伊ê十字架，來tè我。 25 因為見若ài救伊ê性命ê，beh失落伊；見若為tio̍h我來失落伊ê性命ê，beh得tio̍h伊。 26 人若得tio̍h全世界，來喪失伊ê性命，有甚麼利益？á是人beh出甚麼來對換伊ê性命。 27 因為人子用伊ê父ê榮光，kap伊ê天使beh來，hit時beh照ta̍k人ê所行來報應。 28 我實在kā lín講，Khiā tī chia ê，有人iáu-bē死，會看見人子tī伊ê國來。
1 Hoat-lī-sài kap Sat-thó͘-kai lâng lâi chhì Iâ-so͘, chhiáⁿ I ēng tùi thiⁿ ê sîn-jiah hō͘ in khòaⁿ. 2 Nā-sī I ìn kóng, Ê-hng sî lín kóng, Ōe hó thiⁿ lah, in-ūi thiⁿ-sek âng. 3 Ia̍h chá-khí sî lín kóng, Kin-á-ji̍t ū hong-hō͘, in-ūi thiⁿ-sek o͘-áu. Lín ōe hiáu hun-piat thiⁿ-sek, to̍k-to̍k bōe hun-piat chiah ê sî ê sîn-jiah. 4 Ok-to̍k kan-îm ê sè-tāi kiû sîn-jiah; to̍k-to̍k Iok-ná ê sîn-jiah í-gōa, bô beh sîn-jiah hō͘ i. Chiū lī-pia̍t in khì. 5 Ha̍k-seng kè-khì hit pêng, bōe kì-tit tòa piáⁿ. 6 Iâ-so͘ kā in kóng, Tio̍h kín-sīn tî-hông Hoat-lī-sài kap Sat-thó͘-kai lâng ê kàⁿ. 7 Ha̍k-seng saⁿ-kap gī-lūn kóng, Sī lán bô tòa piáⁿ o͘h. 8 Iâ-so͘ chai, chiū kóng, Sió-sìn ê lâng ah, siáⁿ-sū in-ūi bô piáⁿ saⁿ-kap gī-lūn ah? 9 Lín iáu-kú bōe hiáu-tit, ia̍h bōe kì-tit gō͘-chheng lâng chia̍h gō͘ ê piáⁿ, lín khioh kúi kheng ah? 10 Ia̍h sì-chheng lâng chia̍h chhit ê piáⁿ, lín khioh kúi nâ ah? 11 Lín cháiⁿ-iūⁿ bōe hiáu-tit góa só͘ kā lín kóng ê, m̄ sī chí piáⁿ, to̍k-to̍k tio̍h tî-hông Hoat-lī-sài kap Sat-thó͘-kai lâng ê kàⁿ. 12 In chiah ōe hiáu-tit I só͘ kóng ê m̄ sī tî-hông piáⁿ ê kàⁿ, chiū-sī Hoat-lī-sài kap Sat-thó͘-kai lâng ê kàu. 13 Iâ-so͘ í-keng kàu Kai-sat-lī-a Hui-li̍p-pí ê kéng-kài, mn̄g I ê ha̍k-seng kóng, Lâng teh kóng Jîn-chú sī chī-chūi? 14 In kóng, Ū-ê kóng sī kiâⁿ sóe-lé ê Iok-hān; ū-ê kóng sī Í-lī-a; koh ū-ê kóng sī Iâ-lī-bí, á-sī sian-ti lâng ê chi̍t-ê. 15 I chiū kā in kóng, Nā-sī lín kóng góa sī chī-chūi? 16 Se-bûn Pí-tek ìn kóng, Lí sī Ki-tok, chin-oa̍h Siōng-tè ê Kiáⁿ. 17 Iâ-so͘ ìn i kóng, Se-bûn, Pa-Iok-ná, lí ū hok-khì ah; in-ūi hiat-khì jio̍k-thé ê bô chí-sī lí, chiū-sī góa tī thiⁿ-ni̍h ê Pē chí-sī lí. 18 Góa koh kā lí kóng, Lí chiū-sī Pí-tek, tī chit ê chio̍h-pôaⁿ téng góa beh khí-chō góa ê kàu-hōe, im-hú ê koan-ài iā bōe iâⁿ i. 19 Góa beh ēng thian-kok ê só-sî hō͘ lí; kìⁿ-nā lí tī tōe-ni̍h pa̍k ê, tī thiⁿ-ni̍h ia̍h beh pa̍k i; kìⁿ-nā lí tī tōe-ni̍h pàng ê, tī thiⁿ-ni̍h ia̍h beh pàng i. 20 Hit sî chiū kìm-kài ha̍k-seng, bo̍h-tit kā lâng kóng I sī Ki-tok. 21 Tùi hit tia̍p khí, Iâ-so͘ chiah chí-sī I ê ha̍k-seng chai I tio̍h khì Iâ-lō͘-sat-léng, tùi chiah ê tiúⁿ-ló, chè-si-thâu, keng-ha̍k-sū siū-tio̍h chōe-chōe khó͘-chhó͘; koh siū hāi-sí, tē saⁿ ji̍t koh-oa̍h. 22 Pí-tek khan I, chek-pī I kóng, Chú ah, chhian-bān m̄-thang, chit ê koat-toàn bô beh kàu tī lí. 23 Iâ-so͘ oa̍t-tńg-sin, kā Pí-tek kóng, Sat-tàn, thè-khì góa ê āu-bīn; lí sī góa ê that-gāi; in-ūi lí só͘ siūⁿ m̄ sī Siōng-tè ê sū, sī lâng ê sū. 24 Hit sî Iâ-so͘ kā I ê ha̍k-seng kóng, Lâng nā ài tè góa tio̍h khòaⁿ-bô ka-kī, giâ i ê si̍p-jī-kè, lâi tè góa. 25 In-ūi kìⁿ-nā ài kiù i ê sìⁿ-miā ê, beh sit-lo̍h i; kìⁿ-nā ūi-tio̍h góa lâi sit-lo̍h i ê sìⁿ-miā ê, beh tit-tio̍h i. 26 Lâng nā tit-tio̍h choân sè-kài, lâi sòng-sit i ê sìⁿ-miā, ū sím-mi̍h lī-ek? á-sī lâng beh chhut sím-mi̍h lâi tùi-ōaⁿ i ê sìⁿ-miā. 27 In-ūi Jîn-chú ēng I ê Pē ê êng-kng, kap I ê thiⁿ-sài beh lâi, hit sî beh chiàu ta̍k lâng ê só͘ kiâⁿ lâi pò-èng. 28 Góa si̍t-chāi kā lín kóng, Khiā tī chia ê, ū lâng iáu-bē sí, ōe khòaⁿ-kìⁿ Jîn-chú tī I ê kok lâi.
1 過六日，耶穌另外帶彼得、雅各，kap雅各ê兄弟約翰，chhōa in peh上高山； 2 當in ê面前形狀變換，伊ê面光映映，親像日，伊ê衫白，親像光。 3 忽然有摩西、以利亞tùi in顯現，kap伊講話。 4 彼得應耶穌講，主ah，咱tī chia真好；你若ài，我beh tī chia搭三間寮á；一間hō͘你，一間hō͘摩西，一間hō͘以利亞。 5 伊iáu teh講話ê時，忽然有光光ê雲罩in，koh有聲tùi雲裡出，講，chitê是我疼ê Kiáⁿ，我所歡喜ê；lín tio̍h聽伊。 6 學生聽見，就仆落去，盡在驚。 7 耶穌進前摸in，講，起來，莫得驚。 8 In kia̍h目，無看見一人，只有耶穌nā-tiāⁿ。 9 落山ê時耶穌命令in，講，人子iáu-bē tùi死人中koh活，莫得用所看見ê kā人講。 10 伊ê學生問伊講，Án-ni就經學士講以利亞tio̍h先來，是怎樣？ 11 伊應講，以利亞果然來，beh興起萬項事； 12 但是我kā lín講，以利亞已經來，也in m̄-bat伊；照in所ài來款待伊；親像án-ni人子亦beh受in ê陷害。 13 學生chiah會曉得伊所kā in講ê，是指行洗禮約翰。 14 已經到眾人hia，有一人就近伊，跪伊講， 15 主ah，憐憫我ê Kiáⁿ，因為伊iûⁿ-hîn真艱苦；ta̍uh-ta̍uh跋落火，ta̍uh-ta̍uh跋落水。 16 我chhōa伊就近你ê學生，in bōe-ōe醫好伊。 17 耶穌應講，Hàiⁿ ah！m̄信koh悖逆ê世代ah，我beh kap lín tòa jōa久？我beh吞忍lín jōa久？帶伊來chia就近我。 18 耶穌責備鬼；鬼就tùi伊出；tùi hit一時gín-ná就好。 19 Hit時學生àm-chīⁿ就近耶穌講，阮怎樣bōe趕伊？ 20 伊kā in講，是為tio̍h lín ê小信；我實在kā lín講，Lín若有信親像一粒芥菜子，lín就beh kā chitê山講，Tùi chia徙去hia，亦beh徙去；koh lín teh-beh無一項bōe。 21 22 In iáu tòa加利利ê時，耶穌kā學生講，人子beh受送交tī人ê手。 23 In beh 刣伊，第三日koh活。學生真憂悶。 24 In到迦百農，有收丁稅ê就近彼得，講，Lín先生kiám無納丁稅mah？伊講，有。 25 已經入厝，耶穌事先kā伊講，西門ah，你phah算怎樣？世上chiahê王，tùi 是誰收餉kap抽丁稅？是tùi家己ê Kiáⁿ兒，á是tùi外面人ah？ 26 伊一下講，Tùi外面人。耶穌就kā伊講，若是án-ni，就kiáⁿ兒thang m̄免。 27 總是免致塞礙in，你去海裡放釣，掠事先上釣ê魚，開伊ê嘴，beh得tio̍h銀一个；the̍h來，為tio̍h我kap你納hō͘ in。
1 Kè la̍k ji̍t, Iâ-so͘ lēng-gōa tòa Pí-tek, Ngá-kok, kap Ngá-kok ê hiaⁿ-tī Iok-hān, chhōa in peh-chiūⁿ koâiⁿ soaⁿ; 2 tng in ê bīn-chêng hêng-chōng piàn-ōaⁿ, I ê bīn kng iàⁿ-iàⁿ, chhin-chhiūⁿ ji̍t, I ê saⁿ pe̍h, chhin-chhiūⁿ kng. 3 Hut-jiân ū Mô͘-se, Í-lī-a tùi in hián-hiān, kap I kóng ōe. 4 Pí-tek ìn Iâ-so͘ kóng, Chú ah, lán tī chia chin hó; lí nā ài, góa beh tī chia tah saⁿ keng liâu-á; chi̍t keng hō͘ lí, chi̍t keng hō͘ Mô͘-se, chi̍t keng hō͘ Í-lī-a. 5 I iáu teh kóng ōe ê sî, hut-jiân ū kng-kng ê hûn tà in, koh ū siaⁿ tùi hûn-ni̍h chhut, kóng, Chit-ê sī góa thiàⁿ ê Kiáⁿ, góa só͘ hoaⁿ-hí ê; lín tio̍h thiaⁿ I. 6 Ha̍k-seng thiaⁿ-kìⁿ, chiū phak-lo̍h-khì, chīn-chāi kiaⁿ. 7 Iâ-so͘ chìn-chêng bong in, kóng, Khí-lâi, bo̍h-tit kiaⁿ. 8 In kia̍h ba̍k, bô khòaⁿ-kìⁿ chi̍t lâng, chí-ū Iâ-so͘ nā-tiāⁿ. 9 Lo̍h soaⁿ ê sî Iâ-so͘ bēng-lēng in, kóng, Jîn-chú iáu-bē tùi sí-lâng tiong koh-oa̍h, bo̍h-tit ēng só͘ khòaⁿ-kìⁿ ê kā lâng kóng. 10 I ê ha̍k-seng mn̄g I kóng, Án-ni chiū keng-ha̍k-sū kóng Í-lī-a tio̍h seng lâi, sī cháiⁿ-iūⁿ? 11 I ìn kóng, Í-lī-a kó-jiân lâi, beh heng-khí bān-hāng sū; 12 nā-sī góa kā lín kóng, Í-lī-a í-keng lâi, iā in m̄ bat i; chiàu in só͘ ài lâi khoán-thāi i; chhin-chhiūⁿ án-ni Jîn-chú ia̍h beh siū in ê hām-hāi. 13 Ha̍k-seng chiah ōe hiáu-tit I só͘ kā in kóng ê, sī chí kiâⁿ sóe-lé Iok-hān. 14 Í-keng kàu chèng lâng hia, ū chi̍t lâng chiū-kūn I, kūi I kóng, 15 Chú ah, lîn-bín góa ê kiáⁿ, in-ūi i iûⁿ-hîn chin kan-khó͘; ta̍uh-ta̍uh poa̍h-lo̍h hé, ta̍uh-ta̍uh poa̍h-lo̍h chúi. 16 Góa chhōa i chiū-kūn lí ê ha̍k-seng, in bōe-ōe i-hó i. 17 Iâ-so͘ ìn kóng, Hàiⁿ ah! m̄ sìn koh pōe-ge̍k ê sè-tāi ah, góa beh kap lín tòa jōa kú? góa beh thun-lún lín jōa kú? tòa i lâi chia chiū-kūn góa. 18 Iâ-so͘ chek-pī kúi; kúi chiū tùi i chhut; tùi hit chi̍t sî gín-ná chiū hó. 19 Hit sî ha̍k-seng àm-chīⁿ chiū-kūn Iâ-so͘ kóng, Goán cháiⁿ-iūⁿ bōe kóaⁿ i? 20 I kā in kóng, Sī ūi-tio̍h lín ê sió sìn; góa si̍t-chāi kā lín kóng, Lín nā ū sìn chhin-chhiūⁿ chi̍t lia̍p kòa-chhài chí, lín chiū beh kā chit ê soaⁿ kóng, Tùi chia sóa khì hia, ia̍h beh sóa khì; koh lín teh-beh bô chi̍t hāng bōe. 21 22 In iáu tòa Ka-lī-lī ê sî, Iâ-so͘ kā ha̍k-seng kóng, Jîn-chú beh siū sàng-kau tī lâng ê chhiú. 23 In beh thâi I, tē saⁿ ji̍t koh-oa̍h. Ha̍k-seng chin iu-būn. 24 In kàu Ka-pek-lông, ū siu teng-sè ê chiū-kūn Pí-tek, kóng, Lín sian-siⁿ kiám bô la̍p teng-sè mah? i kóng, Ū. 25 Í-keng ji̍p chhù, Iâ-so͘ tāi-seng kā i kóng, Se-bûn ah, lí phah-sǹg cháiⁿ-iūⁿ? Sè-chiūⁿ chiah ê ông, tùi chī-chūi siu hiòng kap thiu teng-sè? sī tùi ka-kī ê kiáⁿ-jî, á-sī tùi gōa-bīn lâng ah? 26 I chi̍t-ē kóng, Tùi gōa-bīn lâng. Iâ-so͘ chiū kā i kóng, Nā-sī án-ni, chiū kiáⁿ-jî thang m̄ bián. 27 Chóng-sī bián-tì that-gāi in, lí khì hái-ni̍h pàng tiò, lia̍h tāi-seng chiūⁿ-tiò ê hî, khui i ê chhùi, beh tit-tio̍h gûn chi̍t ê; the̍h-lâi, ūi-tio̍h góa kap lí la̍p hō͘ in.
1 當hit時，學生就近耶穌講，Tī天國甚麼人做大？ 2 耶穌就叫一个細漢gín-ná，hō͘伊khiā tī in中間； 3 講，我實在kā lín講，Lín若無oa̍t-tńg來成做親像細漢gín-ná ê，決斷bōe入天國。 4 所以見若家己謙卑親像chitê細漢gín-ná ê，伊tī天國就是做大。 5 見若tī我ê名接納chit號細漢gín-ná ê一个，就是接納我。 6 見若hō͘ chiahê信我ê微細ê一个受塞礙，hit人寧可有大石磨召伊ê頷頸，thiām tī深海。 7 Chit世間有災禍ah，tùi有塞礙人ê事；因為塞礙ê事，bōe免得有；總是塞礙ê事tùi 是誰來，hit人有災禍。 8 設使你一手一腳塞礙你，就tio̍h斬hiat-ka̍k；你破相á是跛腳入tī活是好，khah得兩手兩腳hiat落永遠ê火。 9 設使你一目塞礙你，就tio̍h iah hiat-ka̍k；你一目入tī活是好，khah得兩目hiat落地獄ê火。 10 Lín tio̍h謹慎，莫得看輕chiahê微細中ê一个；因為我kā lín講，In ê天使tī天裡，常常見我tī天裡ê父ê面。 11 12 Lín phah算怎樣？人若有一百隻羊，來phah-m̄見一隻，kiám無且放下hit九十九隻，去山裡chhē hit隻phah-m̄見ê mah？ 13 若果然chhē-tio̍h，我實在kā lín講，伊為tio̍h hit隻歡喜，贏過九十九隻無phah-m̄見ê。 14 Án-ni chiahê微細中ê一个沉淪，也m̄是lín tī天裡ê父ê旨意。 15 設使你ê兄弟得罪你，就tio̍h去，kan-ta你kap伊tī-teh ê時，指明伊ê m̄-tio̍h；伊若聽你，就得tio̍h你ê兄弟。 16 伊若m̄聽，就tio̍h chhōa一兩人saⁿ-kap去，用兩三人ê嘴做干證，ta̍k句話thang做憑準。 17 若m̄肯聽in，就kā教會講；若koh m̄肯聽教會，就tio̍h看伊親像外邦人，kap抽餉ê一樣。 18 我實在kā lín講，凡若lín tī地裡縛ê，tī天裡也beh縛in；凡若lín tī地裡tháu ê，tī天裡也beh tháu in。 19 我koh kā lín講，設使lín中間兩人tī地裡無論求甚麼，若是同心，就我tī天裡ê父beh kā in做成。 20 因為不論甚麼所在有兩三人tī我ê名聚集，我也tī in中間。 21 Hit時彼得óa來kā伊講，主ah，我ê兄弟得罪我，我赦免伊tio̍h幾pái？Tio̍h七pái mah？ 22 耶穌kā伊講，我無kā你講tio̍h到七pái，就是到七十ê七pái。 23 所以天國比並人君ài beh kap伊ê奴僕算賬。 24 起頭算ê時，有chhōa一个欠伊千萬銀ê來。 25 既然無thang還，伊ê主人命令tio̍h賣伊本身，kap伊ê bó͘-kiáⁿ，連伊一切所有ê，來還。 26 Hit-ê奴僕就仆teh，拜伊，講，主ah，tio̍h寬容我，我beh lóng總還。 27 奴僕ê主人就憐憫來放伊，koh赦免伊ê債。 28 Hit-ê奴僕出去，tú-tio̍h伊一个同做奴僕ê，欠伊一百ê銀á，就掠伊，叉伊ê頷頸，講，你所欠ê tio̍h還。 29 同做奴僕ê仆teh，求伊講，Tio̍h寬容我，我beh還你。 30 但是伊m̄肯，就去kā伊關落監，來thèng候伊還所欠ê。 31 Chiahê同做奴僕ê看見chitê tāi-chì，真憂悶，將lóng總ê事對主人講明。 32 Tùi án-ni伊ê主人召伊來，kā伊講，Pháiⁿ ê奴僕ah，因為你對我求，我就將你所欠ê lóng赦免。 33 你kiám m̄ tio̍h憐憫你同做奴僕ê，親像我憐憫你？ 34 伊ê主人受氣，將伊交帶刑杖，thèng候伊一盡還所欠ê。 35 Án-ni lín ta̍k人無用心赦免lín ê兄弟，就我ê天父也beh án-ni款待lín。
1 Tng hit sî, ha̍k-seng chiū-kūn Iâ-so͘ kóng, Tī thian-kok sím-mi̍h lâng chòe tōa? 2 Iâ-so͘ chiū kiò chi̍t ê sòe-hàn gín-ná, hō͘ i khiā tī in tiong-kan; 3 kóng, Góa si̍t-chāi kā lín kóng, Lín nā bô oa̍t-tńg lâi chiâⁿ-chòe chhin-chhiūⁿ sòe-hàn gín-ná ê, koat-toàn bōe ji̍p thian-kok. 4 Só͘-í kìⁿ-nā ka-kī khiam-pi chhin-chhiūⁿ chit ê sòe-hàn gín-ná ê, i tī thian-kok chiū-sī chòe tōa. 5 Kìⁿ-nā tī góa ê miâ chiap-la̍p chit hō sòe-hàn gín-ná ê chi̍t ê, chiū-sī chiap-la̍p góa. 6 Kìⁿ-nā hō͘ chiah ê sìn góa ê bî-sòe ê chi̍t ê siū that-gāi, hit lâng lêng-khó͘ ū tōa chio̍h-bō tiàu i ê ām-kún, thiām tī chhim hái. 7 Chit sè-kan ū chai-ē ah, tùi ū that-gāi lâng ê sū; in-ūi that-gāi ê sū, bōe bián-tit ū; chóng-sī that-gāi ê sū tùi chī-chūi lâi, hit lâng ū chai-ē. 8 Siat-sú lí chi̍t chhiú chi̍t kha that-gāi lí, chiū tio̍h chām hiat-ka̍k; lí phòa-siùⁿ á-sī pái-kha ji̍p tī oa̍h sī hó, khah-tit nn̄g chhiú nn̄g kha hiat-lo̍h éng-oán ê hé. 9 Siat-sú lí chi̍t ba̍k that-gāi lí, chiū tio̍h iah hiat-ka̍k; lí chi̍t ba̍k ji̍p tī oa̍h sī hó, khah-tit nn̄g ba̍k hiat-lo̍h tē-ge̍k ê hé. 10 Lín tio̍h kín-sīn, bo̍h-tit khòaⁿ-khin chiah ê bî-sòe tiong ê chi̍t-ê; in-ūi góa kā lín kóng, In ê thiⁿ-sài tī thiⁿ-ni̍h, siông-siông kìⁿ góa tī thiⁿ-ni̍h ê Pē ê bīn. 11 12 Lín phah-sǹg cháiⁿ-iūⁿ? Lâng nā ū chi̍t pah chiah iûⁿ, lâi phah-m̄-kìⁿ chi̍t chiah, kiám bô chhiáⁿ pàng-hē hit káu-cha̍p-káu chiah, khì soaⁿ-ni̍h chhē hit chiah phah-m̄-kìⁿ ê mah? 13 Nā kó-jiân chhē-tio̍h, góa si̍t-chāi kā lín kóng, i ūi-tio̍h hit chiah hoaⁿ-hí, iâⁿ-kè káu-cha̍p-káu chiah bô phah-m̄-kìⁿ ê. 14 Án-ni chiah ê bî-sòe tiong ê chi̍t-ê tîm-lûn, iā m̄ sī lín tī thiⁿ-ni̍h ê Pē ê chí-ì. 15 Siat-sú lí ê hiaⁿ-tī tek-chōe lí , chiū tio̍h khì, kan-ta lí kap i tī-teh ê sî, chí-bêng i ê m̄-tio̍h; i nā thiaⁿ lí, chiū tit-tio̍h lí ê hiaⁿ-tī. 16 I nā m̄ thiaⁿ, chiū tio̍h chhōa chi̍t nn̄g lâng saⁿ-kap khì, ēng nn̄g saⁿ lâng ê chhùi chòe kan-chèng, ta̍k kù ōe thang chòe pîn-chún. 17 Nā m̄ khéng thiaⁿ in, chiū kā kàu-hōe kóng; nā koh m̄ khéng thiaⁿ kàu-hōe, chiū tio̍h khòaⁿ i chhin-chhiūⁿ gōa-pang lâng, kap thiu-hiòng ê chi̍t iūⁿ. 18 Góa si̍t-chāi kā lín kóng, Hoān-nā lín tī tōe-ni̍h pa̍k ê, tī thiⁿ-ni̍h iā beh pa̍k in; hoān-nā lín tī tōe-ni̍h tháu ê, tī thiⁿ-ni̍h iā beh tháu in. 19 Góa koh kā lín kóng, siat-sú lín tiong-kan nn̄g lâng tī tōe-ni̍h bô lūn kiû sím-mi̍h, nā sī tâng-sim, chiū góa tī thiⁿ-ni̍h ê Pē beh kā in chòe chiâⁿ. 20 In-ūi put-lūn sím-mi̍h só͘-chāi ū nn̄g saⁿ lâng tī góa ê miâ chū-chi̍p, góa iā tī in tiong-kan. 21 Hit sî Pí-tek óa-lâi kā I kóng, Chú ah, góa ê hiaⁿ-tī tek-chōe góa, góa sià-bián i tio̍h kúi pái? Tio̍h chhit pái mah? 22 Iâ-so͘ kā i kóng, Góa bô kā lí kóng tio̍h kàu chhit pái, chiū-sī kàu chhit-cha̍p ê chhit pái. 23 Só͘-í thian-kok pí-phēng jîn-kun ài beh kap i ê lô͘-po̍k sǹg-siàu. 24 Khí-thâu sǹg ê sî, ū chhōa chi̍t-ê khiàm i chheng-bān gûn ê lâi. 25 Kì-jiân bô thang hêng, i ê chú-lâng bēng-lēng tio̍h bōe i pún-sin, kap i ê bó͘-kiáⁿ, liân i it-chhè só͘ ū ê, lâi hêng. 26 Hit ê lô͘-po̍k chiū phak-teh, pài i, kóng, Chú ah, tio̍h khoan-iông góa, góa beh lóng-chóng hêng. 27 Lô͘-po̍k ê chú-lâng chiū lîn-bín lâi pàng i, koh sià-bián i ê chè. 28 Hit ê lô͘-po̍k chhut-khì, tú-tio̍h i chi̍t-ê tâng chòe lô͘-po̍k ê, khiàm i chi̍t pah ê gûn-á, chiū lia̍h i, chhe i ê ām-kún, kóng, Lí só͘ khiàm ê tio̍h hêng. 29 Tâng chòe lô͘-po̍k ê phak-teh, kiû i kóng, Tio̍h khoan-iông góa, góa beh hêng lí. 30 Nā-sī i m̄ khéng, chiū khì kā i koaiⁿ-lo̍h kaⁿ, lâi thèng-hāu i hêng só͘ khiàm ê. 31 Chiah-ê tâng chòe lô͘-po̍k ê khòaⁿ-kìⁿ chit ê tāi-chì, chin iu-būn, chiong lóng-chóng ê sū tùi chú-lâng kóng bêng. 32 Tùi án-ni i ê chú-lâng tiàu i lâi, kā i kóng, Pháiⁿ ê lô͘-po̍k ah, in-ūi lí tùi góa kiû, góa chiū chiong lí só͘ khiàm ê lóng sià-bián. 33 Lí kiám m̄ tio̍h lîn-bín lí tâng chòe lô͘-po̍k ê, chhin-chhiūⁿ góa lîn-bín lí? 34 I ê chú-lâng siū-khì, chiong i kau-tāi hêng-tiōng, thèng-hāu i it-chīn hêng só͘ khiàm ê. 35 Án-ni lín ta̍k lâng bô ēng sim sià-bián lín ê hiaⁿ-tī, chiū góa ê Thiⁿ Pē iā beh án-ni khoán-thāi lín.
1 耶穌講chiahê話soah，就離開加利利，到偤太ê境內，約旦河外； 2 有kui大陣ê人tè伊，就tī hia醫好in。 3 有法利賽人來試伊，講，人不論甚麼緣故thang離伊ê bó͘ mah？ 4 就應講，Lín kiám無讀tio̍h創造ê主源起頭創造in有男有女？ 5 續講，因為án-ni人beh離開父母，結聯伊ê bó͘，兩個beh成做一體； 6 親像án-ni無koh做兩個，是做一體。所以上帝所配合ê，人m̄-thang分開伊。 7 In kā伊講，若是án-ni，摩西怎樣吩咐用離書hō͘伊，來離伊ah？ 8 伊kā in講，摩西因為lín ê心硬，准lín離bó͘；但是tùi起頭m̄是án-ni。 9 Koh我kā lín講，見若人，m̄是為tio̍h姦淫ê緣故，離伊ê bó͘來chhōa別ê，就是行淫；chhōa人所離出ê也是行淫。 10 學生kā伊講，人kap伊ê bó͘ ê事既然是án-ni，寧可無chhōa。 11 伊就kā in講，chit號話m̄是眾人所會承受ê；只有得tio̍h賞賜ê chiah會。 12 因為有閹ê，tùi母胎出世就án-ni；也有hō͘人閹ê；也有為tio̍h天國家己閹ê。會承受ê tio̍h承受伊。 13 Hit時有人chhōa細kiáⁿ就近伊，ài伊用手hōaⁿ in，來祈禱；學生責備in。 14 但是耶穌講，容允細kiáⁿ就近我，莫得禁伊；因為天國是屬tī chit號ê。 15 就用手hōaⁿ in；離開hia去。 16 Tú-tn̄g有一人就近伊，講，先生，我tio̍h行甚麼好thang得tio̍h永活？ 17 伊kā伊講，你怎樣提起好，來問我？好ê是一个。總是你若ài入tī活，tio̍h守chiahê誡命。 18 伊kā伊講，是甚麼ê？耶穌講，莫得刣死人，莫得行淫，莫得偷the̍h，莫得lām-sám做干證， 19 敬你ê父母，Tio̍h疼你ê厝邊親像家己。 20 少年人kā伊講，Chiahê我lóng有守伊；iáu-kú欠甚麼？ 21 耶穌kā伊講，你若ài做完全，tio̍h去賣你所有ê來hō͘ sòng-hiong人，就有財寶tī天裡；koh來tè我。 22 少年人聽見這話，憂悶就去；因為伊產業真chōe。 23 耶穌就kā伊ê學生講，我實在kā lín講，富人入天國oh--ah！ 24 我koh kā lín講，駱駝穿過針鼻，比富人入上帝ê國，khah快。 25 學生聽見大gông-ngia̍h，講，若是án-ni，就是誰會得tio̍h救ah？ 26 耶穌看in講，在tī人是bōe-ōe，在tī上帝，萬事lóng會。 27 Hit時彼得應伊講，阮bat放sak一切來tè你，阮beh得tio̍h甚麼ah？ 28 耶穌kā in講，我實在kā lín講，lín chiahê tè我，到koh興起ê時，人子坐伊榮光ê座位，lín也beh坐十二ê座位，來審判以色列十二ê支派。 29 見若為tio̍h我ê名放sak厝宅，á是兄弟、姊妹、老父、老母、kiáⁿ兒，á是田園，beh得tio̍h百倍，來承接永活。 30 總是事先ê chōe-chōe beh做路尾；路尾ê beh做事先。
1 Iâ-so͘ kóng chiah ê ōe soah, chiū lī-khui Ka-lī-lī, kàu Iû-thài ê kéng-lāi, Iok-tàn hô gōa; 2 ū kui tōa tīn ê lâng tè I, chiū tī hia i-hó in. 3 Ū Hoat-lī-sài lâng lâi chhì I, kóng, Lâng put-lūn sím-mi̍h iân-kò͘ thang lî i ê bó͘ mah? 4 Chiū ìn kóng, Lín kiám bô tha̍k-tio̍h chhòng-chō ê Chú goân khí-thâu chhòng-chō in ū lâm ū lú? 5 sòa kóng, In-ūi án-ni lâng beh lī-khui pē-bú, kiat-liân i ê bó͘, nn̄g-ê beh chiâⁿ-chòe chi̍t thé; 6 chhin-chhiūⁿ án-ni bô koh chòe nn̄g-ê, sī chòe chi̍t thé. Só͘-í Siōng-tè só͘ phòe-ha̍p ê, lâng m̄-thang pun-khui i. 7 In kā I kóng, Nā-sī án-ni, Mô͘-se cháiⁿ-iūⁿ hoan-hù ēng lî-chu hō͘ i, lâi lî i ah? 8 I kā in kóng, Mô͘-se in-ūi lín ê sim ngī, chún lín lî bó͘; nā-sī tùi khí-thâu m̄ sī án-ni. 9 Koh góa kā lín kóng, Kìⁿ-nā lâng, m̄ sī ūi-tio̍h kan-îm ê iân-kò͘, lî i ê bó͘ lâi chhōa pa̍t-ê, chiū-sī kiâⁿ îm; chhōa lâng só͘ lî-chhut ê iā sī kiâⁿ îm. 10 Ha̍k-seng kā I kóng, Lâng kap i ê bó͘ ê sū kì-jiân sī án-ni, lêng-khó͘ bô chhōa. 11 I chiū kā in kóng, Chit hō ōe m̄ sī chèng lâng só͘ ōe sêng-siū ê; chí ū tit-tio̍h siúⁿ-sù ê chiah ōe. 12 In-ūi ū iam ê, tùi bú-thai chhut-sì chiū án-ni; iā ū hō͘ lâng iam ê; iā ū ūi-tio̍h thian-kok ka-kī iam ê. Ōe sêng-siū ê tio̍h sêng-siū i. 13 Hit sî ū lâng chhōa sòe-kiáⁿ chiū-kūn I, ài I ēng chhiú hōaⁿ in, lâi kî-tó; ha̍k-seng chek-pī in. 14 Nā-sī Iâ-so͘ kóng, Iông-ún sòe-kiáⁿ chiū-kūn góa, bo̍h-tit kìm i; in-ūi thian-kok sī sio̍k tī chit hō ê. 15 Chiū ēng chhiú hōaⁿ in; lī-khui hia khì. 16 Tú-tn̄g ū chi̍t lâng chiū-kūn I, kóng, Sian-siⁿ, góa tio̍h kiâⁿ sím-mi̍h hó thang tit-tio̍h éng-oa̍h? 17 I kā i kóng, Lí cháiⁿ-iūⁿ thê-khí hó, lâi mn̄g góa? Hó-ê sī chi̍t-ê. Chóng-sī lí nā ài ji̍p tī oa̍h, tio̍h siú chiah ê kài-bēng. 18 I kā I kóng, Sī sím-mi̍h ê? Iâ-so͘ kóng, Bo̍h-tit thâi-sí lâng, Bo̍h-tit kiâⁿ îm, Bo̍h-tit thau-the̍h, Bo̍h-tit lām-sám chòe kan-chèng, 19 Kèng lí ê pē-bú, Tio̍h thiàⁿ lí ê chhù-piⁿ chhin-chhiūⁿ ka-kī. 20 Siàu-liân lâng kā I kóng, Chiah-ê góa lóng ū siú i; iáu-kú khiàm sím-mi̍h? 21 Iâ-so͘ kā i kóng, Lí nā ài chòe oân-choân, tio̍h khì bōe lí só͘ ū ê lâi hō͘ sòng-hiong lâng, chiū ū châi-pó tī thiⁿ-ni̍h; koh lâi tè góa. 22 Siàu-liân lâng thiaⁿ-kìⁿ che ōe, iu-būn chiū khì; in-ūi i sán-gia̍p chin chōe. 23 Iâ-so͘ chiū kā I ê ha̍k-seng kóng, Góa si̍t-chāi kā lín kóng, Pù lâng ji̍p thian-kok oh--ah! 24 Góa koh kā lín kóng, Lo̍k-tô chhng-kè chiam-phīⁿ, pí pù lâng ji̍p Siōng-tè ê kok, khah khoài. 25 Ha̍k-seng thiaⁿ-kìⁿ tōa gông-ngia̍h, kóng, Nā-sī án-ni, chiū chī-chūi ōe tit-tio̍h kiù ah? 26 Iâ-so͘ khòaⁿ in kóng, Chāi-tī lâng sī bōe-ōe, chāi-tī Siōng-tè, bān sū lóng ōe. 27 Hit sî Pí-tek ìn I kóng, Goán bat pàng-sak it-chhè lâi tè lí, goán beh tit-tio̍h sím-mi̍h ah? 28 Iâ-so͘ kā in kóng, Góa si̍t-chāi kā lín kóng, lín chiah-ê tè góa, kàu koh heng-khí ê sî, Jîn-chú chē I êng-kng ê chō-ūi, lín iā beh chē cha̍p-jī ê chō-ūi, lâi sím-phòaⁿ Í-sek-lia̍t cha̍p-jī ê chi-phài. 29 Kìⁿ-nā ūi-tio̍h góa ê miâ pàng-sak chhù-the̍h, á-sī hiaⁿ-tī, chí-bē, lāu-pē, lāu-bú, kiáⁿ-jî, á-sī chhân-hn̂g, beh tit-tio̍h pah-pē, lâi sêng-chiap éng-oa̍h. 30 Chóng-sī tāi-seng ê chōe-chōe beh chòe lō͘-bé; lō͘-bé ê beh chòe tāi-seng.
1 因為天國親像家主透早出去倩(chhiàⁿ)工入伊ê葡萄園； 2 kap做工ê人約一日一錢銀；就差in入伊ê園。 3 九點ê時出去，koh看見有閒閒khiā tī街市裡ê，就kā in講， 4 Lín亦去葡萄園，我beh照公道hō͘ lín；in就去。 5 十二點kap三點ê時koh出去，也án-ni做。 6 五點ê時出去，koh tú-tio̍h有人khiā-teh，就kā in講，Lín啥事thong日閒閒khiā tī chia ah？ 7 In kā伊講，因為無人倩阮。伊kā in講，Lín也去葡萄園。 8 到日暗，園主kā伊ê管家講，叫做工ê，hō͘ in工錢，tùi路尾來ê起，到事先來ê為止。 9 Hiah-ê五點鐘所倩ê到，ta̍k-ê領一錢銀。 10 事先倩ê到，in phah算beh領khah chōe；m̄-kú in也ta̍k-ê領一錢銀。 11 領了，就對家主nga̍uh-nga̍uh念講， 12 阮thong日拖磨受熱；hiahê路尾倩ê，做工一點鐘久，竟然hō͘ in kap阮平。 13 伊就對in一人應講，朋友ah，我m̄是無公道款待你；你kiám m̄是kap我約一錢銀mah？ 14 你ê你the̍h，做你去。我beh hō͘ chitê路尾ê kap你平。 15 用我ê物，行我所ài，kiám bōe做得？á是因為我做好，你teh目赤mah？ 16 親像án-ni，路尾ê beh做事先，事先ê beh做路尾。 17 耶穌上耶路撒冷ê時tī路裡chhōa十二ê學生到邊á，kā in講， 18 Taⁿ咱上耶路撒冷；人子beh受解送hō͘ chiahê祭司頭kap經學士，in beh擬伊死罪； 19 也beh解送伊hō͘外邦人，致到戲弄伊，鞭phah伊，釘伊tī十字架；第三日伊beh koh活。 20 Hit時西庇太ê Kiáⁿ ê老母kap伊ê Kiáⁿ就近來拜伊，求一項事。 21 伊kā伊講，你ài甚麼？應講，願你出命令，hō͘我chit兩個kiáⁿ tī你ê國，一个坐你ê chiàⁿ-pêng，一个坐你ê tò-pêng。 22 耶穌應講，Lín所求ê，lín m̄知。我所beh lim ê杯，lín會lim mah？應講，會。 23 伊kā in講，我ê杯lín果然beh lim；總是坐我ê chiàⁿ-pêng tò-pêng，m̄是我會thang hō͘人，獨獨是我ê父為tio̍h甚麼人備辦ê，就hō͘ in。 24 十個學生聽見，就受氣hit兩個兄弟。 25 耶穌叫in來講，Lín知外邦ê人君做主來治理in，in ê大人管轄in； 26 獨獨lín中間m̄是án-ni；lín中間ài做大ê，beh做lín ê差用； 27 ài做頭ê，beh做lín ê奴僕。 28 親像人子來，m̄是beh差用人，是beh hō͘人差用；koh獻伊ê性命，來贖回chōe-chōe人。 29 In出耶利哥ê時，kui大陣ê人tè伊。 30 Tú-tn̄g有兩個chhiⁿ-mî ê坐tī路邊，聽見耶穌tùi hia過，就hoah講，主，大衛ê後裔ah，憐憫阮。 31 眾人嫌in，kah in靜靜；但是in koh khah大聲叫講，主，大衛ê後裔ah，憐憫阮。 32 耶穌停腳，叫in來講，Ài我kā lín做甚麼？ 33 In kā伊講，主ah，阮ài得tio̍h目睭開。 34 耶穌可憐in，摸in ê目睭；in liâm-piⁿ看見，就tè伊。
1 In-ūi thian-kok chhin-chhiūⁿ ke-chú thàu-chá chhut-khì chhiàⁿ kang ji̍p i ê phû-tô-hn̂g; 2 kap chòe-kang ê lâng iok chi̍t ji̍t chi̍t chîⁿ gûn; chiū chhe in ji̍p i ê hn̂g. 3 Káu tiám ê sî chhut-khì, koh khòaⁿ-kìⁿ ū êng-êng khiā tī koe-chhī-ni̍h ê, chiū kā in kóng, 4 Lín ia̍h khì phû-tô-hn̂g, góa beh chiàu kong-tō hō͘ lín; in chiū khì. 5 Cha̍p-jī tiám kap saⁿ tiám ê sî koh chhut-khì, iā án-ni chòe. 6 Gō͘ tiám ê sî chhut-khì, koh tú-tio̍h ū lâng khiā-teh, chiū kā in kóng, Lín siáⁿ-sū thong ji̍t êng-êng khiā tī chia ah? 7 In kā i kóng, In-ūi bô lâng chhiàⁿ goán. I kā in kóng, Lín iā khì phû-tô-hn̂g. 8 Kàu ji̍t àm, hn̂g-chú kā i ê koán-ke kóng, Kiò chòe-kang ê, hō͘ in kang-chîⁿ, tùi lō͘-bé lâi ê khí, kàu tāi-seng lâi ê ûi-chí. 9 Hiah-ê gō͘ tiám cheng só͘ chhiàⁿ ê kàu, ta̍k-ê niá chi̍t chîⁿ gûn. 10 Tāi-seng chhiàⁿ ê kàu, in phah-sǹg beh niá khah chōe; m̄-kú in iā ta̍k-ê niá chi̍t chîⁿ gûn. 11 Niá liáu, chiū tùi ke-chú nga̍uh-nga̍uh-liām kóng, 12 Goán thong ji̍t thoa-bôa siū joa̍h; hiah-ê lō͘-bé chhiàⁿ ê, chòe kang chi̍t tiám-cheng kú, kèng-jiân hō͘ in kap goán pîⁿ. 13 I chiū tùi in chi̍t lâng ìn kóng, Pêng-iú ah, góa m̄ sī bô kong-tō khoán-thāi lí; lí kiám m̄ sī kap góa iok chi̍t chîⁿ gûn mah? 14 Lí-ê lí the̍h, chòe lí khì. Góa beh hō͘ chit-ê lō͘-bé ê kap lí pîⁿ. 15 Ēng góa ê mi̍h, kiâⁿ góa só͘ ài, kiám bōe chòe-tit? Á-sī in-ūi góa chòe hó, lí teh ba̍k-chhiah mah? 16 Chhin-chhiūⁿ án-ni, lō͘-bé ê beh chòe tāi-seng, tāi-seng ê beh chòe lō͘-bé. 17 Iâ-so͘ chiūⁿ Iâ-lō͘-sat-léng ê sî tī lō͘-ni̍h chhōa cha̍p-jī ê ha̍k-seng kàu piⁿ-á, kā in kóng, 18 Taⁿ lán chiūⁿ Iâ-lō͘-sat-léng; Jîn-chú beh siū ké-sàng hō͘ chiah ê chè-si-thâu kap keng-ha̍k-sū, in beh gí I sí-chōe; 19 iā beh ké-sàng I hō͘ gōa-pang lâng, tì-kàu hì-lāng I, piⁿ phah I, tèng I tī si̍p-jī-kè; tē saⁿ ji̍t I beh koh-oa̍h. 20 Hit sî Se-pí-thài ê kiáⁿ ê lāu-bú kap i ê kiáⁿ chiū-kūn lâi pài I, kiû chi̍t hāng sū. 21 I kā i kóng, Lí ài sím-mi̍h? Ìn kóng, Goān lí chhut bēng-lēng, hō͘ góa chit nn̄g ê kiáⁿ tī lí ê kok, chi̍t-ê chē lí ê chiàⁿ-pêng, chi̍t-ê chē lí ê tò-pêng. 22 Iâ-so͘ ìn kóng, Lín só͘ kiû ê, lín m̄ chai. Góa só͘ beh lim ê poe, lín ōe lim mah? Ìn kóng, Ōe. 23 I kā in kóng, Góa ê poe lín kó-jiân beh lim; chóng-sī chē góa ê chiàⁿ-pêng tò-pêng, m̄ sī góa ōe thang hō͘ lâng, to̍k-to̍k sī góa ê Pē ūi-tio̍h sím-mi̍h lâng pī-pān ê, chiū hō͘ in. 24 Cha̍p ê ha̍k-seng thiaⁿ-kìⁿ, chiū siū-khì hit nn̄g ê hiaⁿ-tī. 25 Iâ-so͘ kiò in lâi kóng, Lín chai gōa-pang ê jîn-kun chòe chú lâi tī-lí in, in ê tāi-jîn koán-hat in; 26 to̍k-to̍k lín tiong-kan m̄ sī án-ni; lín tiong-kan ài chòe tōa ê, beh chòe lín ê chhe-ēng; 27 ài chòe thâu ê, beh chòe lín ê lô͘-po̍k. 28 Chhin-chhiūⁿ Jîn-chú lâi, m̄ sī beh chhe-ēng lâng, sī beh hō͘ lâng chhe-ēng; koh hiàn I ê sìⁿ-miā, lâi sio̍k-hôe chōe-chōe lâng. 29 In chhut Iâ-lī-ko ê sî, kui tōa tīn ê lâng tè I. 30 Tú-tn̄g ū nn̄g ê chhiⁿ-mî ê chē tī lō͘-piⁿ, thiaⁿ-kìⁿ Iâ-so͘ tùi hia kè, chiū hoah kóng, Chú, Tāi-pi̍t ê hō͘-è ah, lîn-bín goán. 31 Chèng lâng hiâm in, kah in chēng-chēng; nā-sī in koh khah tōa siaⁿ kiò kóng, Chú, Tāi-pi̍t ê hō͘-è ah, lîn-bín goán. 32 Iâ-so͘ thêng-kha, kiò in lâi kóng, Ài góa kā lín chòe sím-mi̍h? 33 In kā I kóng, Chú ah, goán ài tit-tio̍h ba̍k-chiu khui. 34 Iâ-so͘ khó-lîn in, bong in ê ba̍k-chiu; in liâm-piⁿ khòaⁿ-kìⁿ, chiū tè I.
1 In行近耶路撒冷，到Pek-hoat-kî kap橄欖山ê時，耶穌差兩個學生，kā in講， 2 Lín去對面ê鄉社，liâm-piⁿ會tú-tio̍h一隻驢縛teh，有驢á kap伊tī-teh；tháu開，牽伊來我chia。 3 若有人kā lín講甚麼，就tio̍h講，主欠用伊，伊liâm-piⁿ beh送伊來。 4 Chitê事成，是beh應驗早託先知所講ê，講， 5 Tio̍h kā郇(Sûn)ê cha-bó͘-kiáⁿ講， 你ê王來就近你， 溫柔koh騎驢， Kap驢所生ê驢á。 6 學生去，照耶穌所吩咐in ê去行。 7 牽驢kap驢á來，將家己ê衫chhu tī in頂面，耶穌就上去騎。 8 眾人中khah chōe將家己ê衫鋪tī路裡；有ê chhò樹枝鋪tī路裡。 9 前行後tè ê眾人hoah講，大衛ê後裔，和散那，tī主ê名來ê得tio̍h o-ló，tī至koân ê，和散那。 10 伊入耶路撒冷，thong城搖choah，講，Chitê 是誰？ 11 眾人講，chitê是先知耶穌，tùi加利利ê拿撒勒來ê。 12 耶穌入上帝ê殿，趕出殿內一切買賣ê人，chhia倒換錢ê人ê桌，kap賣鴿á ê人ê椅。 13 kā in講，有記載講，我ê厝beh稱做祈禱ê厝，但是lín chiahê hō͘伊做賊巢(siū)。 14 Chhiⁿ-mî ê，跛腳ê，tī殿裡就近耶穌，伊就醫好in。 15 獨獨chiahê祭司頭kap經學士看見伊所行ê奇事，koh看見gín-ná tī殿裡hoah講，大衛ê後裔，和散那，就受氣；kā伊講，In teh講ê，你聽見無？ 16 耶穌kā in講，有；lín kiám m̄-bat讀tio̍h hit句，講，Tùi gín-ná kap食奶ê ê嘴，你hō͘ o-ló ê話齊備mah？ 17 就離開in，出城到伯大尼；tī hia歇暝。 18 隔早起，tò來城裡ê時，耶穌iau； 19 看見路邊一叢無花果樹，就óa近去，挽lóng無，只有葉nā-tiāⁿ；就kā樹講，Taⁿ了後，你永永無koh結果子；hit叢無花果樹liâm-piⁿ枯焦。 20 學生看了就奇怪，講，無花果樹怎樣liâm-piⁿ枯焦？ 21 耶穌應講，我實在kā lín講，Lín若有信無僥疑，m̄-nā chit號行tī無花果樹ê事lín會行；就若tùi chitê山講，Tio̍h徙去hiat落海，亦beh成。 22 Koh祈禱ê時，見若lín所求ê，信就得tio̍h。 23 耶穌入殿，教示人ê時，chiahê祭司頭，kap百姓 ê長老，就近伊講，你用甚麼權行chiahê事？koh 是誰 hō͘你chitê權？ 24 耶穌應講，我亦有一句話beh問lín，lín若kā我講，我chiah beh kā lín講我用甚麼權行chiahê事。 25 約翰ê洗禮是tùi tá-lo̍h來？是tùi天，á是tùi人？In su-khia議論講，若講，Tùi天，伊beh kā咱講，Án-ni lín啥事m̄信伊？ 26 若講，對人，咱又驚百姓 ；in lóng掠約翰做先知。 27 就應耶穌講，阮m̄知。伊就kā in講，我亦無beh kā lín講我是用甚麼權行chiahê事。總是lín phah算怎樣？ 28 人有兩個kiáⁿ，就近hitê頭一个講，Kiáⁿ ah，今á日去葡萄園做工。 29 應講，我m̄；後來反悔就去。 30 Koh就近第二個，亦án-ni講。應講，主ah，我beh；就竟然無去。 31 此(Chí)兩個tá-lo̍h一个行老父ê意思ah？In講，頭一个。耶穌kā in講，我實在kā lín講，chiahê抽餉ê kap娼妓事先lín入上帝ê國。 32 因為約翰tī義ê路就近lín，lín無信伊；抽餉ê kap娼妓就信伊；koh lín看了，亦無反悔去信伊。 33 Koh聽一个譬喻：有一个家主，知一園葡萄，用籬笆圍伊，內面開酒窟，起一个守更樓，租hō͘佃戶，就去別所在。 34 收果子ê時beh到，就差伊ê奴僕就近佃戶，收伊ê果子。 35 佃戶掠伊ê奴僕，一个phah，一个刣，一个用石頭tìm。 36 Koh差別個奴僕，比前khah chōe；in猶原án-ni款待in。 37 後來差伊ê Kiáⁿ就近in，想講，In beh尊敬我ê Kiáⁿ。 38 但是佃戶看見hitê Kiáⁿ，就saⁿ-kap講，chitê是伊ê後嗣；來，kā伊刣死，thang得伊ê業。 39 就掠伊，chhia伊出園外，害死伊。 40 Taⁿ園主若到，beh怎樣來辦chiahê佃戶？ 41 In kā伊講，伊beh用惡報來滅chiahê惡人；將葡萄園租別個佃戶，就是照時納果子ê。 42 耶穌對in講，經裡所記載， 師傅所棄sak ê石， 成做厝角頭ê石； 這是主所成ê， 咱ê目睭看做奇怪，lín kiám bē讀mah？ 43 所以我kā lín講，上帝ê國beh tùi lín搶去，來賞賜結伊ê果子ê百姓 44 Koh跋倒(poa̍h-tó)tī chit塊石頂ê teh-beh破kô͘-kô͘；hō͘ chit塊石teh tī伊頂面ê beh幼boa̍h-boa̍h。 45 Chiahê祭司頭kap法利賽人聽見伊ê譬喻，知伊所講ê是指in。 46 就ài beh掠伊，但是驚眾人；因為眾人掠伊做先知。
1 In kiâⁿ kūn Iâ-lō͘-sat-léng, kàu Pek-hoat-kî kap Kaⁿ-ná soaⁿ ê sî, Iâ-so͘ chhe nn̄g ê ha̍k-seng, kā in kóng, 2 Lín khì tùi-bīn ê hiuⁿ-siā, liâm-piⁿ ōe tú-tio̍h chi̍t chiah lû pa̍k-teh, ū lû-á kap i tī-teh; tháu-khui, khan i lâi góa chia. 3 Nā ū lâng kā lín kóng sím-mi̍h, chiū tio̍h kóng, Chú khiàm-ēng i, i liâm-piⁿ beh sàng i lâi. 4 Chit ê sū chiâⁿ, sī beh èng-giām chá thok sian-ti só͘ kóng ê, kóng, 5 Tio̍h kā Sûn ê cha-bó͘-kiáⁿ kóng, Lí ê ông lâi chiū-kūn lí, Un-jiû koh khiâ lû, Kap lû só͘ siⁿ ê lû-á. 6 Ha̍k-seng khì, chiàu Iâ-so͘ só͘ hoan-hù in ê khì kiâⁿ. 7 Khan lû kap lû-á lâi, chiong ka-kī ê saⁿ chhu tī in téng-bīn, Iâ-so͘ chiū chiūⁿ-khì khiâ. 8 Chèng lâng tiong khah chōe chiong ka-kī ê saⁿ pho͘ tī lō͘-ni̍h; ū-ê chhò chhiū-ki pho͘ tī lō͘-ni̍h. 9 Chêng kiâⁿ āu tè ê chèng lâng hoah kóng, Tāi-pi̍t ê hō͘-è, Hô-sàn-ná, tī Chú ê miâ lâi ê tit-tio̍h o-ló, tī chì-koâiⁿ ê, Hô-sàn-ná. 10 I ji̍p Iâ-lō͘-sat-léng, thong siâⁿ iô-choah, kóng, Chit-ê chī-chūi? 11 Chèng lâng kóng, Chit-ê sī sian-ti Iâ-so͘, tùi Ka-lī-lī ê Ná-sat-le̍k lâi ê. 12 Iâ-so͘ ji̍p Siōng-tè ê tiān, kóaⁿ-chhut tiān-lāi it-chhè bóe-bōe ê lâng, chhia-tó ōaⁿ chîⁿ ê lâng ê toh, kap bōe chíⁿ-á ê lâng ê í. 13 Kā in kóng, Ū kì-chài kóng, Góa ê chhù beh chheng chòe kî-tó ê chhù, nā-sī lín chiah ê hō͘ i chòe chha̍t-siū. 14 Chhiⁿ-mî ê, pái-kha ê, tī tiān-ni̍h chiū-kūn Iâ-so͘, I chiū i-hó in. 15 To̍k-to̍k chiah ê chè-si-thâu kap keng-ha̍k-sū khòaⁿ-kìⁿ I só͘ kiâⁿ ê kî-sū, koh khòaⁿ-kìⁿ gín-ná tī tiān-ni̍h hoah kóng, Tāi-pi̍t ê hō͘-è, Hô-sàn-ná, chiū siū-khì; kā I kóng, In teh kóng ê, lí thiaⁿ-kìⁿ bô? 16 Iâ-so͘ kā in kóng, Ū; lín kiám m̄ bat tha̍k-tio̍h hit kù, kóng, Tùi gín-ná kap chia̍h lin ê ê chhùi, lí hō͘ o-ló ê ōe chiâu-pī mah? 17 Chiū lī-khui in, chhut siâⁿ kàu Pek-tāi-nî; tī hia hioh mî. 18 Keh chá-khí, tò-lâi siâⁿ-ni̍h ê sî, Iâ-so͘ iau; 19 khòaⁿ-kìⁿ lō͘-piⁿ chi̍t châng bû-hoa-kó chhiū, chiū óa-kūn khì, bán lóng bô, chí-ū hio̍h nā-tiāⁿ; chiū kā chhiū kóng, Taⁿ liáu-āu, lí éng-éng bô koh kiat ké-chí; hit châng bû-hoa-kó chhiū liâm-piⁿ ko͘-tâ. 20 Ha̍k-seng khòaⁿ-liáu chiū kî-koài, kóng, Bû-hoa-kó chhiū cháiⁿ-iūⁿ liâm-piⁿ ko͘-tâ? 21 Iâ-so͘ ìn kóng, Góa si̍t-chāi kā lín kóng, Lín nā ū sìn bô giâu-gî, m̄ nā chit hō kiâⁿ tī bû-hoa-kó chhiū ê sū lín ōe kiâⁿ; chiū nā tùi chit ê soaⁿ kóng, Tio̍h sóa-khì hiat-lo̍h hái, ia̍h beh chiâⁿ. 22 Koh kî-tó ê sî, kìⁿ-nā lín só͘ kiû ê, sìn chiū tit-tio̍h. 23 Iâ-so͘ ji̍p tiān, kà-sī lâng ê sî, chiah ê chè-si-thâu, kap peh-sìⁿ ê tiúⁿ-ló, chiū-kūn I kóng, Lí ēng sím-mi̍h koân kiâⁿ chiah ê sū? koh chī-chūi hō͘ lí chit ê koân? 24 Iâ-so͘ ìn kóng, Góa ia̍h ū chi̍t kù ōe beh mn̄g lín, lín nā kā góa kóng, góa chiah beh kā lín kóng góa ēng sím-mi̍h koân kiâⁿ chiah ê sū. 25 Iok-hān ê sóe-lé sī tùi tá-lo̍h lâi? sī tùi thiⁿ, á-sī tùi lâng? In su-khia gī-lūn kóng, Nā kóng, Tùi thiⁿ, I beh kā lán kóng, Án-ni lín siáⁿ-sū m̄ sìn i? 26 Nā kóng, Tùi lâng, lán iū kiaⁿ peh-sìⁿ; in lóng lia̍h Iok-hān chòe sian-ti. 27 Chiū ìn Iâ-so͘ kóng, Goán m̄ chai. I chiū kā in kóng, Góa ia̍h bô beh kā lín kóng góa sī ēng sím-mi̍h koân kiâⁿ chiah ê sū. Chóng-sī lín phah-sǹg cháiⁿ-iūⁿ? 28 Lâng ū nn̄g ê kiáⁿ, chiū-kūn hit ê thâu-chi̍t-ê kóng, Kiáⁿ ah, kin-á-ji̍t khì phû-tô-hn̂g chòe kang. 29 Ìn kóng, Góa m̄; āu-lâi hoán-hóe chiū khì. 30 Koh chiū-kūn tē-jī-ê, ia̍h án-ni kóng. Ìn kóng, Chú ah, góa beh; chiū kèng-jiân bô khì. 31 Chí nn̄g ê tá-lo̍h chi̍t ê kiâⁿ lāu-pē ê ì-sù ah? In kóng, Thâu-chi̍t-ê. Iâ-so͘ kā in kóng, Góa si̍t-chāi kā lín kóng chiah ê thiu-hiòng ê kap chhiong-ki tāi-seng lín ji̍p Siōng-tè ê kok. 32 In-ūi Iok-hān tī gī ê lō͘ chiū-kūn lín, lín bô sìn i; thiu-hiòng ê kap chhiong-ki chiū sìn i; koh lín khòaⁿ-liáu, ia̍h bô hoán-hóe khì sìn i. 33 Koh thiaⁿ chi̍t ê phì-jū: Ū chi̍t ê ke-chú, chai chi̍t hn̂g phû-tô, ēng lî-pa ûi i, lāi-bīn khui chiú-khut, khí chi̍t ê chiú-kiⁿ lâu, cho͘ hō͘ tiān-hō͘, chiū khì pa̍t só͘-chāi. 34 Siu ké-chí ê sî beh kàu, chiū chhe i ê lô͘-po̍k chiū-kūn tiān-hō͘, siu i ê ké-chí. 35 Tiān-hō͘ lia̍h i ê lô͘-po̍k, chi̍t-ê phah, chi̍t-ê thâi, chi̍t-ê ēng chio̍h-thâu tìm. 36 Koh chhe pa̍t ê lô͘-po̍k, pí chêng khah chōe; in iû-goân án-ni khoán-thāi in. 37 Āu-lâi chhe i ê kiáⁿ chiū-kūn in, siūⁿ kóng, In beh chun-kèng góa ê kiáⁿ. 38 Nā-sī tiān-hō͘ khòaⁿ-kìⁿ hit ê kiáⁿ, chiū saⁿ-kap kóng, Chit-ê sī i ê hō͘-sû; lâi, kā i thâi-sí, thang tit i ê gia̍p. 39 Chiū lia̍h i, chhia i chhut hn̂g-gōa, hāi-sí i. 40 Taⁿ hn̂g-chú nā kàu, beh cháiⁿ-iūⁿ lâi pān chiah ê tiān-hō͘? 41 In kā I kóng, I beh ēng ok-pò lâi bia̍t chiah ê ok-lâng; chiong phû-tô-hn̂g cho͘ pa̍t ê tiān-hō͘, chiū-sī chiàu-sî la̍p ké-chí ê. 42 Iâ-so͘ tùi in kóng, Keng-ni̍h só͘ kì-chài, Sai-hū só͘ khì-sak ê chio̍h, Chiâⁿ-chòe chhù-kak-thâu ê chio̍h; Che sī Chú só͘ chiâⁿ ê, Lán ê ba̍k-chiu khòaⁿ chòe kî-koài, lín kiám bē tha̍k mah? 43 Só͘-í góa kā lín kóng, Siōng-tè ê kok beh tùi lín chhiúⁿ-khì, lâi siúⁿ-sù kiat i ê ké-chí ê peh-sìⁿ. 44 Koh poa̍h-tó tī chit tè chio̍h téng ê teh-beh phòa kô͘-kô͘; hō͘ chit tè chio̍h teh tī i téng-bīn ê beh iù boa̍h-boa̍h. 45 Chiah ê chè-si-thâu kap Hoat-lī-sài lâng thiaⁿ-kìⁿ I ê phì-jū, chai I só͘ kóng ê sī chí in. 46 Chiū ài beh lia̍h I, nā-sī kiaⁿ chèng lâng; in-ūi chèng lâng lia̍h I chòe sian-ti.
1 耶穌應伊，koh用譬喻kā in講， 2 天國比並人君，kā伊ê Kiáⁿ備辦婚姻ê筵席。 3 差伊ê奴僕召所請ê來赴筵席；但是in m̄來。 4 Koh差別個奴僕講，去kā所請ê講，我ê桌已經備辦便，我ê牛kap肥ê cheng-siⁿ已經刣，百項物lóng便，tio̍h來赴筵席。 5 In無要緊，做in去；一个去伊ê田園，一个去伊ê seng-lí場； 6 其餘ê掠伊ê奴僕，凌辱in，刣 in。 7 人君受氣，差伊ê軍兵剿滅hiahê凶犯，續燒in ê城。 8 就kā伊ê奴僕講，婚姻ê筵席已經便，但是所請ê bōe堪得。 9 所以lín去大路頭，見若所tú-tio̍h ê lóng請伊來赴筵席。 10 Hiah-ê奴僕出去路裡，聚集凡所tú-tio̍h ê，無論好pháiⁿ；婚姻ê客廳人客就滿。 11 人君入去看人客，看見tī hia一人無穿禮服； 12 kā伊講，朋友ah，你無穿婚姻ê禮服，怎樣入來chia？伊就靜靜。 13 Hit時人君kā chiahê差用講，縛伊ê腳手，將伊hiat tī外面烏暗ê所在；tī hia beh有啼哭咬牙切齒。 14 因為受召ê chōe，受揀ê少。 15 Hit時法利賽人去參詳，看thang怎樣就伊ê話來tauh伊。 16 就差in ê學生kap希律黨就近伊講，先生ah，阮知你是真實，koh用真實將上帝ê路教示人；你也無掠甚麼人做要緊，因為你無看人ê外貌。 17 納稅hō͘該撒合宜á無？你phah算怎樣？請kā阮講。 18 耶穌知in ê pháiⁿ，就講，假好ê人ah，啥事試我。 19 用納稅ê銀á hō͘我看。In就the̍h一个銀á hō͘伊。 20 耶穌kā in講，Chitê像(siōng)kap號是是誰？ 21 kā伊講，該撒。伊就kā in講，Án-ni，lín tio̍h將該撒ê物納hō͘該撒，將上帝ê物納hō͘上帝。 22 In聽見就奇怪，離開伊去。 23 Hit日有撒都該人，就是講人無koh活ê，就近伊，問講， 24 先生ah，摩西講，人死也無kiáⁿ，伊ê小弟tio̍h娶伊ê bó͘；生kiáⁿ來續接伊ê兄。 25 Taⁿ阮中間有兄弟七人；大ê娶，就死去，無kiáⁿ；留伊ê bó͘ hō͘小弟。 26 第二ê，第三ê，到第七ê也lóng是án-ni。 27 到尾，hitê婦人人也死。 28 Án-ni tī koh活ê時，七人中婦人人beh做是誰 ê bó͘？因為lóng有娶伊。 29 耶穌應伊講，Lín錯lah，因為lín m̄-bat聖經kap上帝ê權能。 30 因為koh活ê時，無嫁無娶；是親像天使tī天裡。 31 論到死人koh活，kiám bē讀tio̍h上帝所kā lín講ê講， 32 我就是亞伯拉罕ê上帝，以撒ê上帝，雅各ê上帝？伊m̄是死人ê上帝，是活人ê上帝。 33 眾人聽見，奇怪伊ê教示。 34 法利賽人聽見伊已經塞密撒都該人ê嘴，就saⁿ-kap聚集。 35 其中一人做教法師ê試伊，問講， 36 先生ah，律法中，甚麼誡最大？ 37 伊kā伊講，你tio̍h盡心，盡性，盡意疼主你ê上帝。 38 Chitê誡是大ê，也是頭一个。 39 第二個也saⁿ親像，是講，你tio̍h疼厝邊親像家己。 40 Chit兩條誡是全律法kap先知ê總根頭。 41 法利賽人聚集ê時耶穌問in講， 42 論基督lín phah算怎樣？伊是是誰 ê後裔？In kā伊講，是大衛ê。 43 伊kā in講，Án-ni，就大衛hō͘聖神感動，怎樣稱伊做主ah，講， 44 主kā我ê主講， 坐我ê大pêng， thèng候我將你chiahê對敵hē tī你ê腳下？ 45 大衛既然稱伊做主，就基督怎樣做伊ê後裔ah？ 46 無人會應伊一句；tùi hit日也無人敢koh問伊。
1 Iâ-so͘ ìn i, koh ēng phì-jū kā in kóng, 2 Thian-kok pí-phēng jîn-kun, kā i ê kiáⁿ pī-pān hun-in ê iân-sia̍h. 3 Chhe i ê lô͘-po̍k tiàu só͘ chhiáⁿ ê lâi hù iân-sia̍h; nā-sī in m̄ lâi. 4 Koh chhe pa̍t ê lô͘-po̍k kóng, Khì kā só͘ chhiáⁿ ê kóng, Góa ê toh í-keng pī-pān piān, góa ê gû kap pûi ê cheng-siⁿ í-keng thâi, pah-hāng mi̍h lóng piān, tio̍h lâi hù iân-sia̍h. 5 In bô iàu-kín, chòe in khì; chi̍t ê khì i ê chhân-hn̂g, chi̍t ê khì i ê seng-lí tiûⁿ; 6 kî-û ê lia̍h i ê lô͘-po̍k, lêng-jio̍k in, thâi in. 7 Jîn-kun siū-khì, chhe i ê kun-peng châu-bia̍t hiah ê hiong-hoān, sòa sio in ê siâⁿ. 8 Chiū kā i ê lô͘-po̍k kóng, Hun-in ê iân-sia̍h í-keng piān, nā-sī só͘ chhiáⁿ ê bōe kham-tit. 9 Só͘-í lín khì tōa lō͘-thâu, kìⁿ-nā só͘ tú-tio̍h ê lóng chhiáⁿ i lâi hù iân-sia̍h. 10 Hiah ê lô͘-po̍k chhut-khì lō͘-ni̍h, chū-chi̍p hoān só͘ tú-tio̍h ê, bô lūn hó pháiⁿ; hun-in ê kheh-thiaⁿ lâng-kheh chiū móa. 11 Jîn-kun ji̍p-khì khòaⁿ lâng-kheh, khòaⁿ-kìⁿ tī hia chi̍t lâng bô chhēng lé-ho̍k; 12 kā i kóng, Pêng-iú ah, lí bô chhēng hun-in ê lé-ho̍k, cháiⁿ-iūⁿ ji̍p-lâi chia? I chiū chēng-chēng. 13 Hit sî jîn-kun kā chiah ê chhe-ēng kóng, Pa̍k i ê kha-chhiú, chiong i hiat tī gōa-bīn o͘-àm ê só͘-chāi; tī hia beh ū thî-khàu kā-gê chhiat-chhí. 14 In-ūi siū tiàu ê chōe, siū kéng ê chió. 15 Hit sî Hoat-lī-sài lâng khì chham-siông, khòaⁿ thang cháiⁿ-iūⁿ chiū I ê ōe lâi tauh I. 16 Chiū chhe in ê ha̍k-seng kap Hi-lu̍t tóng chiū-kūn I kóng, Sian-siⁿ ah, goán chai lí sī chin-si̍t, koh ēng chin-si̍t chiong Siōng-tè ê lō͘ kà-sī lâng; lí iā bô lia̍h sím-mi̍h lâng chòe iàu-kín, in-ūi lí bô khòaⁿ lâng ê gōa-māu. 17 La̍p sè hō͘ Kai-sat ha̍p-gî á bô? Lí phah-sǹg cháiⁿ-iūⁿ? chhiáⁿ kā goán kóng. 18 Iâ-so͘ chai in ê pháiⁿ, chiū kóng, Ké-hó ê lâng ah, siáⁿ-sū chhì góa. 19 Ēng la̍p sè ê gûn-á hō͘ góa khòaⁿ. In chiū the̍h chi̍t ê gûn-á hō͘ I. 20 Iâ-so͘ kā in kóng, Chit ê siōng kap hō sī chī-chūi? 21 Kā I kóng, Kai-sat. I chiū kā in kóng, Án-ni, lín tio̍h chiong Kai-sat ê mi̍h la̍p hō͘ Kai-sat, chiong Siōng-tè ê mi̍h la̍p hō͘ Siōng-tè. 22 In thiaⁿ-kìⁿ chiū kî-koài, lī-khui I khì. 23 Hit ji̍t ū Sat-thó͘-kai lâng, chiū-sī kóng lâng bô koh-oa̍h ê, chiū-kūn I, mn̄g kóng, 24 Sian-siⁿ ah, Mô͘-se kóng, Lâng sí iā bô kiáⁿ, i ê sió-tī tio̍h chhōa i ê bó͘; siⁿ kiáⁿ lâi sòa-chiap i ê hiaⁿ. 25 Taⁿ goán tiong-kan ū hiaⁿ-tī chhit lâng; tōa-ê chhōa, chiū sí-khì, bô kiáⁿ; lâu i ê bó͘ hō͘ sió-tī. 26 Tē jī ê, tē saⁿ ê, kàu tē chhit ê iā lóng sī án-ni. 27 Kàu bé, hit ê hū-jîn-lâng iā sí. 28 Án-ni tī koh-oa̍h ê sî, chhit lâng tiong hū-jîn-lâng beh chòe chī-chūi ê bó͘? in-ūi lóng ū chhōa i. 29 Iâ-so͘ ìn i kóng, Lín chhò lah, in-ūi lín m̄ bat sèng-keng kap Siōng-tè ê koân-lêng. 30 In-ūi koh-oa̍h ê sî, bô kè bô chhōa; sī chhin-chhiūⁿ thiⁿ-sài tī thiⁿ-ni̍h. 31 Lūn-kàu sí-lâng koh-oa̍h, kiám bē tha̍k-tio̍h Siōng-tè só͘ kā lín kóng ê kóng, 32 Góa chiū-sī A-pek-la̍h-hán ê Siōng-tè, Í-sat ê Siōng-tè, Ngá-kok ê Siōng-tè? I m̄ sī sí-lâng ê Siōng-tè, sī oa̍h-lâng ê Siōng-tè. 33 Chèng lâng thiaⁿ-kìⁿ, kî-koài I ê kà-sī. 34 Hoat-lī-sài lâng thiaⁿ-kìⁿ I í-keng that-ba̍t Sat-thó͘-kai lâng ê chhùi, chiū saⁿ-kap chū-chi̍p. 35 Kî-tiong chi̍t lâng chòe kàu-hoat-su ê chhì I, mn̄g kóng, 36 Sian-siⁿ ah, lu̍t-hoat tiong, sím-mi̍h kài chòe tōa? 37 I kā i kóng, Lí tio̍h chīn sim, chīn sèng, chīn ì thiàⁿ Chú lí ê Siōng-tè. 38 Chit ê kài sī tōa ê, iā sī thâu chi̍t ê. 39 Tē jī ê iā saⁿ chhin-chhiūⁿ, sī kóng, Lí tio̍h thiàⁿ chhù-piⁿ chhin-chhiūⁿ ka-kī. 40 Chit nn̄g tiâu kài sī choân lu̍t-hoat kap sian-ti ê chóng-kun-thâu. 41 Hoat-lī-sài lâng chū-chi̍p ê sî Iâ-so͘ mn̄g in kóng, 42 Lūn Ki-tok lín phah-sǹg cháiⁿ-iūⁿ? I sī chī-chūi ê hō͘-è? In kā I kóng, Sī Tāi-pi̍t ê. 43 I kā in kóng, Án-ni, chiū Tāi-pi̍t hō͘ Sèng Sîn kám-tōng, cháiⁿ-iūⁿ chheng I chòe Chú ah, kóng, 44 Chú kā góa ê Chú kóng, Chē góa ê tōa pêng, Thèng-hāu góa chiong lí chiah ê tùi-te̍k hē tī lí ê kha-ē? 45 Tāi-pi̍t kì-jiân chheng I chòe Chú, chiū Ki-tok cháiⁿ-iūⁿ chòe I ê hō͘-è ah? 46 Bô lâng ōe ìn I chi̍t kù; tùi hit ji̍t iā bô lâng káⁿ koh mn̄g I.
1 Hit時耶穌kā眾人kap伊ê學生講， 2 經學士kap法利賽人坐摩西ê位。 3 所以見若in所kā lín講ê，lóng tio̍h行來守伊；總是莫得照in ê所做來行；因為in有講，也無行。 4 In用重koh oh擔ê擔縛來hē tī人ê肩頭頂，但是in家己m̄肯用一支指頭á振動伊。 5 In一切ê所做，lóng是beh hō͘人看chiah做；因為in ê背經(pōe-keng)做khah闊，衫á裾ê鬚做khah長。 6 Ài筵桌裡坐大位，會堂內坐高位， 7 街市裡hō͘人請安，也hō͘人稱呼in拉比。 8 但是lín莫得hō͘人稱做拉比；因為lín ê先生是一个，lín lóng是兄弟。 9 Tī地裡也莫得稱人做父；因為lín ê父是一个，就是tī天裡ê。 10 也莫得hō͘人稱做先生；因為lín ê先生是一个，就是基督。 11 但是lín中間做大ê，beh做lín ê差用。 12 凡若自高ê，beh hō͘伊卑微；家己卑微ê，beh高升伊。 13 Lín假好ê經學士kap法利賽人，有災禍ah！因為lín tī人ê面前關密天國；lín家己無入，teh-beh入ê人，lín也m̄准in入。 14 15 Lín假好ê經學士kap法利賽人，有災禍ah！因為lín遍行水路陸路，hō͘一人入教；既然入，就hō͘伊做地獄ê人，比lín加倍。 16 Lín chhiⁿ-mî做chhōa頭ê，有災禍ah！lín講，見若kí殿來chiù-chōa ê，無事；獨獨見若kí殿裡ê金來chiù-chōa ê，就tio̍h守伊。 17 Lín戇koh chhiⁿ-mî；因為tá-lo̍h一項khah大，是金，á是hō͘金成聖ê殿ah？ 18 Lín亦講，見若kí壇來chiù-chōa ê，無事；獨獨見若kí壇頂ê禮物來chiù-chōa ê，就tio̍h守伊。 19 Lín chhiⁿ-mî ah；因為tá-lo̍h一項khah大，是禮物á是hō͘禮物成聖ê壇？ 20 所以人kí壇來chiù-chōa，是kí壇kap見若tī伊頂面ê，來chiù-chōa。 21 人kí殿來chiù-chōa，是kí殿kap tiàm tī hit內面ê來chiù-chōa。 22 人kí天來chiù-chōa，是kí上帝ê座位kap坐tī hit頂面ê，來chiù-chōa。 23 Lín假好ê經學士kap法利賽人，有災禍ah！因為lín將薄荷、八角、馬芹，十份抽一份；但是律法ê khah tùi-tiōng ê，就是公義、憐憫kap信實，lín就放sak；總是chiahê是應該tio̍h行ê，hiahê也是m̄-thang放sak。 24 Lín chhiⁿ-mî做chhōa頭ê，蚊á就lū起來，駱駝就吞落去。 25 Lín假好ê經學士kap法利賽人，有災禍ah！因為lín清氣杯盤ê外面，但是hit內面tóe勒索kap放蕩滿滿。 26 你chhiⁿ-mî ê法利賽人ah，事先清氣杯盤ê內面，hō͘伊ê外面亦會清氣。 27 Lín假好ê經學士kap法利賽人，有災禍ah！因為lín親像粉白ê 墓，外面看是súi，但是內面tóe死人ê骨頭kap ta̍k項ê污穢滿滿。 28 Án-ni，lín外面hō͘人看是義，但是內面就假好kap不法滿滿。 29 Lín假好ê經學士kap法利賽人，有災禍ah！因為lín chhòng先知人ê 墓，修整義人ê墳墓； 30 亦講，設使阮tī阮祖ê時，就無kap in有份tī流先知人ê血。 31 Án-ni，lín家己干證是做刣先知人ê ê後裔。 32 做lín去滿lín祖ê份量。 33 蛇ah！毒蟲ê類ah！lín thài會逃閃地獄ê刑罰？ 34 所以我差先知知識ê人，經學士就近lín；有ê lín beh 刣伊，beh釘伊tī十字架；也有ê beh tī lín ê會堂用鞭phah伊，tùi chitê城趕逐in到hitê城。 35 致到地上所流義人ê血，lóng歸tī lín，就是tùi義人A-pek ê血到Pa-lia̍p-ka ê Kiáⁿ撒迦利亞ê血，伊是lín所刣 tī殿kap壇ê中間ê。 36 我實在kā lín講，Chiahê事lóng beh歸tī chit代。 37 耶路撒冷ah！耶路撒冷ah！就是刣死先知人，用石頭tìm奉差到tī伊ê；我jōa chōe pái ài聚集你ê kiáⁿ兒，親像雞母聚集伊ê雞á tī翼(si̍t)下；但是lín m̄ ài。 38 你看！lín ê厝beh拋荒，留teh hō͘ lín。 39 因為我kā lín講，Taⁿ了後，lín無看見我；thèng候lín講，Tī主ê名來ê，得tio̍h福氣。
1 Hit sî Iâ-so͘ kā chèng lâng kap I ê ha̍k-seng kóng, 2 Keng-ha̍k-sū kap Hoat-lī-sài lâng chē Mô͘-se ê ūi. 3 Só͘-í kìⁿ-nā in só͘ kā lín kóng ê, lóng tio̍h kiâⁿ lâi siú i; chóng-sī bo̍h-tit chiàu in ê só͘ chòe lâi kiâⁿ; in-ūi in ū kóng, iā bô kiâⁿ. 4 In ēng tāng koh oh taⁿ ê tàⁿ pa̍k lâi hē tī lâng ê keng-thâu téng, nā-sī in ka-kī m̄ khéng ēng chi̍t ki chńg-thâu-á tín-tāng i. 5 In it-chhè ê só͘ chòe, lóng sī beh hō͘ lâng khòaⁿ chiah chòe; in-ūi in ê pōe-keng chòe khah khoah, saⁿ-á-ku ê chhiu chòe khah tn̂g. 6 Ài iân-toh-ni̍h chē tōa ūi, hōe-tn̂g lāi chē koâiⁿ ūi, 7 koe-chhī-ni̍h hō͘ lâng chhéng-an, iā hō͘ lâng chheng-ho͘ in Lia̍p-pí. 8 Nā-sī lín bo̍h-tit hō͘ lâng chheng chòe Lia̍p-pí; in-ūi lín ê sian-siⁿ sī chi̍t ê, lín lóng sī hiaⁿ-tī. 9 Tī tōe-ni̍h iā bo̍h-tit chheng lâng chòe pē; in-ūi lín ê Pē sī chi̍t ê, chiū-sī tī thiⁿ-ni̍h ê. 10 Iā bo̍h-tit hō͘ lâng chheng chòe sian-siⁿ; in-ūi lín ê sian-siⁿ sī chi̍t ê, chiū-sī Ki-tok. 11 Nā-sī lín tiong-kan chòe tōa ê, beh chòe lín ê chhe-ēng. 12 Hoān-nā chū-ko ê, beh hō͘ i pi-bî; ka-kī pi-bî ê, beh ko-seng i. 13 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín tī lâng ê bīn-chêng koaiⁿ-ba̍t thian-kok; lín ka-kī bô ji̍p, teh-beh ji̍p ê lâng, lín iā m̄ chún in ji̍p. 14 15 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín piàn kiâⁿ chúi-lō͘ lio̍k-lō͘, hō͘ chi̍t lâng ji̍p kàu; kì-jiân ji̍p, chiū hō͘ i chòe tē-ge̍k ê lâng, pí lín ka-pē. 16 Lín chhiⁿ-mî chòe chhōa-thâu ê, ū chai-ē ah! lín kóng, Kìⁿ-nā kí tiān lâi chiù-chōa ê, bô sū; to̍k-to̍k kìⁿ-nā kí tiān-ni̍h ê kim lâi chiù-chōa ê, chiū tio̍h siú i. 17 Lín gōng koh chhiⁿ-mî; in-ūi tá-lo̍h chi̍t hāng khah tōa, sī kim, á-sī hō͘ kim chiâⁿ sèng ê tiān ah? 18 Lín ia̍h kóng, Kìⁿ-nā kí tôaⁿ lâi chiù-chōa ê, bô sū; to̍k-to̍k kìⁿ-nā kí tôaⁿ-téng ê lé-mi̍h lâi chiù-chōa ê, chiū tio̍h siú i. 19 Lín chhiⁿ-mî ah; in-ūi tá-lo̍h chi̍t hāng khah tōa, sī lé-mi̍h á-sī hō͘ lé-mi̍h chiâⁿ sèng ê tôaⁿ? 20 Só͘-í lâng kí tôaⁿ lâi chiù-chōa, sī kí tôaⁿ kap kìⁿ-nā tī i téng-bīn ê, lâi chiù-chōa. 21 Lâng kí tiān lâi chiù-chōa, sī kí tiān kap tiàm tī hit lāi-bīn ê lâi chiù-chōa. 22 Lâng kí thiⁿ lâi chiù-chōa, sī kí Siōng-tè ê chō-ūi kap chē tī hit téng-bīn ê, lâi chiù-chōa. 23 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chiong po̍k-hô, poeh-kak, má-khûn, cha̍p hūn thiu chi̍t hūn; nā-sī lu̍t-hoat ê khah tùi-tiōng ê, chiū-sī kong-gī, lîn-bín kap sìn-si̍t, lín chiū pàng-sak; chóng-sī chiah-ê sī eng-kai tio̍h kiâⁿ ê, hiah-ê iā sī m̄-thang pàng-sak. 24 Lín chhiⁿ-mî chòe chhōa-thâu ê, báng-á chiū lū-khí-lâi, lo̍k-tô chiū thun-lo̍h-khì. 25 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chheng-khì poe-pôaⁿ ê gōa-bīn, nā-sī hit lāi-bīn tóe le̍k-sek kap hòng-tōng móa-móa. 26 Lí chhiⁿ-mî ê Hoat-lī-sài lâng ah, tāi-seng chheng-khì poe-pôaⁿ ê lāi-bīn, hō͘ i ê gōa-bīn ia̍h ōe chheng-khì. 27 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhin-chhiūⁿ hún pe̍h ê bōng, gōa-bīn khòaⁿ sī súi, nā-sī lāi-bīn tóe sí-lâng ê kut-thâu kap ta̍k hāng ê ù-òe móa-móa. 28 Án-ni, lín gōa-bīn hō͘ lâng khòaⁿ sī gī, nā-sī lāi-bīn chiū ké-hó kap put-hoat móa-móa. 29 Lín ké-hó ê keng-ha̍k-sū kap Hoat-lī-sài lâng, ū chai-ē ah! in-ūi lín chhòng sian-ti lâng ê bōng, siu-chéng gī lâng ê hûn-bōng; 30 ia̍h kóng, Siat-sú goán tī goán chó͘ ê sî, chiū bô kap in ū hūn tī lâu sian-ti lâng ê huih. 31 Án-ni, lín ka-kī kan-chèng sī chòe thâi sian-ti lâng ê ê hō͘-è. 32 Chòe lín khì móa lín chó͘ ê hūn-liōng. 33 Chôa ah! to̍k-thâng ê lūi ah! lín thài ōe tô-siám tē-ge̍k ê hêng-hoa̍t? 34 Só͘-í góa chhe sian-ti tì-sek ê lâng, keng-ha̍k-sū chiū-kūn lín; ū-ê lín beh thâi i, beh tèng i tī si̍p-jī-kè; iā ū-ê beh tī lín ê hōe-tn̂g ēng piⁿ phah i, tùi chit ê siâⁿ kóaⁿ-tio̍k in kàu hit ê siâⁿ. 35 Tì-kàu tōe-chiūⁿ só͘ lâu gī lâng ê huih, lóng kui tī lín, chiū-sī tùi gī lâng A-pek ê huih kàu Pa-lia̍p-ka ê kiáⁿ Sat-ka-lī-a ê huih, i sī lín só͘ thâi tī tiān kap tôaⁿ ê tiong-kan ê. 36 Góa si̍t-chāi kā lín kóng, Chiah ê sū lóng beh kui tī chit tāi. 37 Iâ-lō͘-sat-léng ah! Iâ-lō͘-sat-léng ah! chiū-sī thâi-sí sian-ti lâng, ēng chio̍h-thâu tìm hōng-chhe kàu tī i ê; góa jōa chōe pái ài chū-chi̍p lí ê kiáⁿ-jî, chhin-chhiūⁿ koe-bú chū-chi̍p i ê koe-á tī si̍t-ē; nā-sī lín m̄ ài. 38 Lí khòaⁿ! lín ê chhù beh pha-hng, lâu-teh hō͘ lín. 39 In-ūi góa kā lín kóng, Taⁿ liáu-āu, lín bô khòaⁿ-kìⁿ góa; thèng-hāu lín kóng, Tī Chú ê miâ lâi ê, tit-tio̍h hok-khì.
1 耶穌出殿，tú teh行，伊ê學生就近伊，用殿堂hiahê厝報伊看。 2 但是伊應講，Lín無看見chiahê mah？我實在kā lín講，Tī chia beh無一塊石留tī石頂，也無chhia落去。 3 耶穌坐tī橄欖山ê時，學生su-khia就近伊講，請kā阮講，tī時有chiahê tāi-chì？也你koh來，kap世界ê結局有甚麼兆頭？ 4 耶穌應講，Tio̍h謹慎，莫得hō͘人迷惑。 5 因為beh有chōe-chōe人tī我ê名來，講，我是基督，來迷惑chōe-chōe人。 6 Lín beh聽見交戰kap交戰ê風聲，謹慎莫得驚；因為chiahê的確有，總是末期iáu-bē到。 7 因為百姓 beh起來攻擊百姓 ，國beh起來攻擊國；chōe-chōe所在beh有飢荒、地動。 8 Chiahê lóng是苦痛ê起頭。 9 Hit時人beh交付lín tī患難，刣死lín。Lín因為我ê名beh hō͘萬邦怨恨。 10 也hit時chōe-chōe人beh受塞礙，saⁿ解送，saⁿ怨恨。 11 Koh有chōe-chōe假先知beh起來迷惑chōe-chōe人。 12 因為不法大大加添，chōe-chōe人ê疼漸漸冷淡。 13 獨獨吞忍到路尾ê，伊會得tio̍h救。 14 Chitê天國ê福音beh傳到thong天下，做干證tī萬邦；hit時末期就到。 15 所以lín看見早託先知但以理所講，hitê殘害可惡ê khiā tī聖ê所在，(讀ê人tio̍h曉悟) ， 16 hit時tī偤太ê tio̍h走去山裡； 17 tī厝頂ê莫得落來the̍h伊家內ê物； 18 tī園裡ê莫得tò去hiaⁿh伊ê衫。 19 當hiahê日，有身孕kap hō͘嬰á食奶ê婦人人有災禍ah！ 20 Lín tio̍h祈禱，免得lín ê逃走tī冬天時，á是安歇日。 21 因為hit時beh有大患難，tùi世間ê起頭到taⁿ bē bat有án-ni；後來也決斷無。 22 若無減少hiahê日，就凡有肉體ê無一个得救，獨獨為tio̍h揀ê百姓 ，hiahê日beh減少。 23 Hit時若有人kā lín講，你看，基督tī chia，á是講，Tī hia，lín莫得信。 24 因為beh有假基督、假先知起來行大ê神蹟kap兆頭；beh是會，連揀ê百姓也迷惑伊。 25 我已經事先kā lín講。 26 所以人若kā lín講，你看，伊是tī曠野，lín莫得出去；á是講，你看，伊是tī密厝，lín莫得信。 27 因為親像sih-nà tùi東勢teh sih，若到西勢，人子ê koh來也beh án-ni。 28 身屍若tī hia，鷹鳥也beh聚集tī hia。 29 Tú-tú chiahê日ê患難了後，日beh烏暗，月無出光，星tùi天ka-la̍uh，天象振動。 30 Hit時人子ê兆頭beh出現tī天裡；tī地裡chiahê族類lóng beh啼哭，也beh看見人子用權能kap大榮光坐天 ê雲臨到。 31 伊beh差伊ê天使，用號頭響亮ê聲，in beh tùi四方chit pêng ê天邊到hit pêng ê天邊，聚集伊所揀ê百姓 32 Lín tio̍h tùi無花果樹取譬喻；當伊枝軟葉發ê時，就知夏天近lah。 33 Án-ni，lín看lóng總chiahê事，就知已經近，到門口lah。 34 我實在kā lín講，Chit世代決斷bē過去，到chiahê tāi-chì lóng成。 35 天kap地beh廢無，我ê話bōe廢無。 36 但是論hit日、hit時，人m̄知，天使也m̄知，Kiáⁿ也m̄知，獨獨父知nā-tiāⁿ。 37 Koh親像挪亞ê日，人子ê koh來也beh án-ni。 38 因為大水ê事先hiahê日，人teh lim食、嫁娶，到挪亞入大船ê日， 39 in竟然m̄知，到大水到，一盡滅in，人子ê koh來也beh án-ni。 40 Hit時beh有兩人tī園裡，一个取去，一个放teh。 41 兩個婦人人挨磨，一个取去，一个放teh。 42 所以tio̍h tiuⁿ-tî，因為lín m̄知lín ê主甚麼日beh來。 43 家主若知賊甚麼更beh到，伊就tiuⁿ-tî，無容允人iah孔伊ê厝，這是lín所知。 44 所以lín亦tio̍h備辦便；因為lín無phah算ê時，人子來lah。 45 Chī-chūi是盡忠智慧ê奴僕，主人所設立來管伊家內ê人，thang照時pun米糧hō͘ in。 46 主人來，tú-tio̍h伊án-ni行，hitê奴僕有福氣。 47 我實在kā lín講，主人beh設立伊來管伊一切所有ê。 48 獨獨hitê pháiⁿ ê奴僕，若心內講，我ê主人teh 延chhiân； 49 就phah hiahê kap伊同做奴僕ê，koh kap醉漢saⁿ-kap lim食， 50 就tī無phài-phe ê日，m̄知ê時，hitê奴僕ê主人beh到， 51 重重刑罰伊，chhú-tī伊kap假好ê人平等，tī hia beh有啼哭咬牙切齒。
1 Iâ-so͘ chhut tiān, tú teh kiâⁿ, I ê ha̍k-seng chiū-kūn I, ēng tiān-tn̂g hiah ê chhù pò I khòaⁿ. 2 Nā-sī I ìn kóng, Lín bô khòaⁿ-kìⁿ chiah ê mah? góa si̍t-chāi kā lín kóng, Tī chia beh bô chi̍t tè chio̍h lâu tī chio̍h téng, iā bô chhia-lo̍h-khì. 3 Iâ-so͘ chē tī Kaⁿ-ná soaⁿ ê sî, ha̍k-seng su-khia chiū-kūn I kóng, Chhiáⁿ kā goán kóng, tī-sî ū chiah ê tāi-chì? iā lí koh lâi, kap sè-kài ê kiat-kio̍k ū sím-mi̍h tiāu-thâu? 4 Iâ-so͘ ìn kóng, Tio̍h kín-sīn, bo̍h-tit hō͘ lâng bê-he̍k. 5 In-ūi beh ū chōe-chōe lâng tī góa ê miâ lâi, kóng, Góa sī Ki-tok, lâi bê-he̍k chōe-chōe lâng. 6 Lín beh thiaⁿ-kìⁿ kau-chiàn kap kau-chiàn ê hong-siaⁿ, kín-sīn bo̍h-tit kiaⁿ; in-ūi chiah-ê tek-khak ū, chóng-sī boa̍t-kî iáu-bē kàu. 7 In-ūi peh-sìⁿ beh khí-lâi kong-kek peh-sìⁿ, kok beh khí-lâi kong-kek kok; chōe-chōe só͘-chāi beh ū ki-hng, tōe-tāng. 8 Chiah-ê lóng sī khó͘-thàng ê khí-thâu. 9 Hit sî lâng beh kau-hù lín tī hoān-lān, thâi-sí lín. Lín in-ūi góa ê miâ beh hō͘ bān pang oàn-hūn. 10 Iā hit sî chōe-chōe lâng beh siū that-gāi, saⁿ ké-sàng, saⁿ oàn-hūn. 11 Koh ū chōe-chōe ké sian-ti beh khí-lâi bê-he̍k chōe-chōe lâng. 12 In-ūi put-hoat tōa-tōa ke-thiⁿ, chōe-chōe lâng ê thiàⁿ chiām-chiām léng-tām. 13 To̍k-to̍k thun-lún kàu lō͘-bé ê, i ōe tit-tio̍h kiù. 14 Chit ê thian-kok ê hok-im beh thoân kàu thong thiⁿ-ē, chòe kan-chèng tī bān pang; hit sî boa̍t-kî chiū kàu. 15 Só͘-í lín khòaⁿ-kìⁿ chá thok sian-ti Tàn-í-lí só͘ kóng, hit ê chân-hāi khó-ò͘ⁿ ê khiā tī sèng ê só͘-chāi, (tha̍k ê lâng tio̍h hiáu-ngō͘), 16 hit sî tī Iû-thài ê tio̍h cháu-khì soaⁿ-ni̍h; 17 tī chhù-téng ê bo̍h-tit lo̍h-lâi the̍h i ke-lāi ê mi̍h; 18 tī hn̂g-ni̍h ê bo̍h-tit tò-khì hiaⁿh i ê saⁿ. 19 Tng hiah ê ji̍t, ū sin-īn kap hō͘ eⁿ-á chia̍h lin ê hū-jîn-lâng ū chai-ē ah! 20 Lín tio̍h kî-tó, bián-tit lín ê tô-cháu tī tang-thiⁿ sî, á-sī an-hioh-ji̍t. 21 In-ūi hit sî beh ū tōa hoān-lān, tùi sè-kan ê khí-thâu kàu taⁿ bē bat ū án-ni; āu-lâi iā koat-toàn bô. 22 Nā bô kiám-chió hiah ê ji̍t, chiū hoān ū jio̍k-thé ê bô chi̍t-ê tit kiù, to̍k-to̍k ūi-tio̍h kéng ê peh-sìⁿ, hiah ê ji̍t beh kiám-chió. 23 Hit sî nā ū lâng kā lín kóng, Lí khòaⁿ, Ki-tok tī chia, á-sī kóng, Tī hia, lín bo̍h-tit sìn. 24 In-ūi beh ū ké Ki-tok, ké sian-ti khí-lâi kiâⁿ tōa ê sîn-jiah kap tiāu-thâu; beh sī ōe, liân kéng ê peh-sìⁿ iā bê-he̍k i. 25 Góa í-keng tāi-seng kā lín kóng. 26 Só͘-í lâng nā kā lín kóng, Lí khòaⁿ, I sī tī khòng-iá, lín bo̍h-tit chhut-khì; á-sī kóng, Lí khòaⁿ, I sī tī ba̍t chhù, lín bo̍h-tit sìn. 27 In-ūi chhin-chhiūⁿ sih-nà tùi tang-sì teh sih, nā kàu sai-sì, Jîn-chú ê koh lâi iā beh án-ni. 28 Sin-si nā tī hia, eng-chiáu iā beh chū-chi̍p tī hia. 29 Tú-tú chiah ê ji̍t ê hoān-lān liáu-āu, ji̍t beh o͘-àm, ge̍h bô chhut kng, chhiⁿ tùi thiⁿ ka-la̍uh, thiⁿ-siōng tín-tāng. 30 Hit sî Jîn-chú ê tiāu-thâu beh chhut-hiān tī thiⁿ-ni̍h; tī tōe-ni̍h chiah ê cho̍k-lūi lóng beh thî-khàu, iā beh khòaⁿ-kìⁿ Jîn-chú ēng koân-lêng kap tōa êng-kng chē thiⁿ ê hûn lîm-kàu. 31 I beh chhe I ê thiⁿ-sài, ēng hō-thâu hiáng-liāng ê siaⁿ, in beh tùi sì-hng chit pêng ê thiⁿ-piⁿ kàu hit pêng ê thiⁿ-piⁿ, chū-chi̍p I só͘ kéng ê peh-sìⁿ. 32 Lín tio̍h tùi bû-hoa-kó chhiū chhú phì-jū; tng i ki nńg hio̍h hoat ê sî, chiū chai hē-thiⁿ kūn lah. 33 Án-ni, lín khòaⁿ lóng-chóng chiah ê sū, chiū chai í-keng kūn, kàu mn̂g-kháu lah. 34 Góa si̍t-chāi kā lín kóng, Chit sè-tāi koat-toàn bē kè-khì, kàu chiah ê tāi-chì lóng chiâⁿ. 35 Thiⁿ kap tōe beh hòe-bô, góa ê ōe bōe hòe-bô. 36 Nā-sī lūn hit ji̍t, hit sî, lâng m̄ chai, thiⁿ-sài iā m̄ chai, Kiáⁿ iā m̄ chai, to̍k-to̍k Pē chai nā-tiāⁿ. 37 Koh chhin-chhiūⁿ Ná-a ê ji̍t, Jîn-chú ê koh lâi iā beh án-ni. 38 In-ūi tōa chúi ê tāi-seng hiah ê ji̍t, lâng teh lim-chia̍h, kè-chhōa, kàu Ná-a ji̍p tōa chûn ê ji̍t, 39 in kèng-jiân m̄ chai, kàu tōa chúi kàu, it-chīn bia̍t in, Jîn-chú ê koh lâi iā beh án-ni. 40 Hit sî beh ū nn̄g lâng tī hn̂g-ni̍h, chi̍t-ê chhú-khì, chi̍t-ê pàng-teh. 41 Nn̄g ê hū-jîn-lâng oe bō, chi̍t-ê chhú-khì, chi̍t-ê pàng-teh. 42 Só͘-í tio̍h tiuⁿ-tî, in-ūi lín m̄ chai lín ê Chú sím-mi̍h ji̍t beh lâi. 43 Ke-chú nā chai chha̍t sím-mi̍h kiⁿ beh kàu, i chiū tiuⁿ-tî, bô iông-ún lâng iah khang i ê chhù, che sī lín só͘ chai. 44 Só͘-í lín ia̍h tio̍h pī-pān piān; in-ūi lín bô phah-sǹg ê sî, Jîn-chú lâi lah. 45 Chī-chūi sī chīn-tiong tì-hūi ê lô͘-po̍k, chú-lâng só͘ siat-li̍p lâi koán i ke-lāi ê lâng, thang chiàu sî pun bí-niû hō͘ in. 46 Chú-lâng lâi, tú-tio̍h i án-ni kiâⁿ, hit ê lô͘-po̍k ū hok-khì. 47 Góa si̍t-chāi kā lín kóng, chú-lâng beh siat-li̍p i lâi koán i it-chhè só͘ ū ê. 48 To̍k-to̍k hit ê pháiⁿ ê lô͘-po̍k, nā sim-lāi kóng, Góa ê chú-lâng teh iân-chhiân; 49 chiū phah hiah-ê kap i tâng chòe lô͘-po̍k ê, koh kap chùi-hàn saⁿ-kap lim-chia̍h, 50 chiū tī bô phài-phe ê ji̍t, m̄ chai ê sî, hit ê lô͘-po̍k ê chú-lâng beh kàu, 51 tāng-tāng hêng-hoa̍t i, chhú-tī i kap ké-hó ê lâng pîⁿ-téng, tī hia beh ū thî-khàu kā-gê chhiat-chhí.
1 Hit時天國beh比並十個在室女，kia̍h in ê燈，出去迎接新kiáⁿ婿。 2 其中五個戇ê，五個知識ê。 3 戇ê kia̍h in ê燈，無另外帶油。 4 獨獨知識ê kia̍h in ê燈另外帶油tī in ê器具內。 5 新kiáⁿ婿延chhiân，就lóng tuh-ka-chē teh睏。 6 半暝，有大聲叫講，新kiáⁿ婿來lah；lín出來chih伊。 7 Hit時chiahê在室女lóng起來，修整in ê燈。 8 戇ê kā知識ê講，請將lín ê油pun阮，因為阮ê燈beh hoa lah。 9 知識ê應講，驚了lín阮lóng無夠；khah好去tùi賣ê人家己買。 10 去買ê時，新kiáⁿ婿到，hiahê便ê kap伊入婚姻ê筵桌；門就關。 11 然後其餘ê在室女亦來，講，主ah，主ah，kā阮開。 12 但是伊應講，我實在kā lín講，我m̄-bat lín。 13 所以tio̍h tiuⁿ-tî，因為lín m̄知hitê日，hitê時。 14 因為親像一人beh去外國；就召伊家己ê奴僕將所有ê交帶in。 15 一个hō͘伊銀五千，一个hō͘伊兩千，一个hō͘伊一千；各照in ê châi-tiāu；就去外國。 16 領五千ê，隨時去做seng-lí，koh thàn五千。 17 領兩千ê亦是án-ni，koh thàn兩千。 18 獨獨hitê領一千ê去，就掘地，來khǹg密伊ê主人ê銀。 19 過久久，chiahê奴僕ê主人到，kap in算賬。 20 領五千ê來，koh帶五千，講，主ah，你交帶我五千；你看，我有koh thàn五千。 21 伊ê主人kā伊講，好ah，好koh盡忠ê奴僕，你tī少(chió)ê已經盡忠，我beh設立你來管chōe-ê；thang入你ê主人ê快樂。 22 領兩千ê亦來，講，主ah，你交帶我兩千；你看，我有koh thàn兩千。 23 伊ê主人kā伊講，好ah，好koh盡忠ê奴僕，你tī少ê已經盡忠，我beh設立你來管chōe-ê；thang入你ê主人ê快樂。 24 領一千ê亦來，講，主ah，我知你是嚴核(ha̍t)ê人；bē掖ê所在，就beh收割；bē分散ê所在，就beh拾做堆。 25 所以我驚，就將你一千銀去埋 tī地裡；taⁿ你ê原物還你。 26 伊ê主人就應伊講，Pháiⁿ koh pîn-tōaⁿ ê奴僕ah，你既然知我bē掖ê所在，就beh收割，bē分散ê所在，就beh拾做堆。 27 就tio̍h將我ê銀hē tī錢店；我來ê時thang得tio̍h我ê本銀kap利息。 28 所以tio̍h tùi伊the̍h hit一千，來hō͘ hitê有十千ê。 29 因為見若有ê，beh hō͘伊，hō͘伊有chhun；無ê，連伊所有ê，亦beh the̍h伊。 30 亦hitê無利益ê奴僕，趕伊tī外面烏暗ê所在；tī hia beh有啼哭，咬牙切齒。 31 當人子tī伊ê榮光，kap lóng總ê天使來ê時，伊beh坐伊榮光ê座位， 32 聚集萬邦tī伊ê面前；伊就beh分別in，親像牧者分別綿羊離開山羊。 33 將綿羊hē tī伊ê chiàⁿ-pêng，山羊hē tī伊ê tò-pêng。 34 Hit時王beh kā chiàⁿ-pêng ê講，Lín tùi我ê父得tio̍h恩典ê，進前來承接國，就是tùi創造世間以來kā lín備辦ê。 35 因為我iau，Lín bat hō͘我食；我嘴乾，lín hō͘我lim；我出外，lín hō͘我tòa；我thǹg-pak-theh，lín hō͘我穿； 36 我破病，lín看顧我；我tī監裡，lín來chhē我。 37 Hit時義人beh應伊講，主ah，阮甚麼時看見你iau，來hō͘你食？嘴乾，來hō͘你lim？ 38 甚麼時看見你出外，來hō͘你tòa？thǹg-pak-theh，來hō͘你穿？ 39 甚麼時看見你破病，á是tī監裡，來chhē你？ 40 王beh應伊講，我實在kā lín講，Lín既然行伊tī我ê兄弟至微細ê ê一个，就是行伊tī我。 41 Koh beh kā tò-pêng ê講，Lín受咒詛 ê，tio̍h離開我，入永遠ê火，就是為tio̍h魔鬼kap伊chiahê使者所備辦ê。 42 因為我iau，lín m̄-bat hō͘我食；我嘴乾，lín m̄-bat hō͘我lim；我出外，lín m̄-bat hō͘我tòa； 43 我thǹg-pak-theh，lín m̄-bat hō͘我穿；我破病kap tī監裡，lín m̄-bat看顧我。 44 In亦beh應講，主ah，阮甚麼時看見你iau，á是嘴乾，á是出外，á是thǹg-pak-theh，á是破病，á是tī監裡，來無服事你ah？ 45 伊就beh應伊講，我實在kā lín講，Lín既然無行伊tī chiahê至微細ê ê一个，就是無行伊tī我。 46 Chiahê人beh去入永遠ê刑罰；但是義ê人入永遠活。
1 Hit sî thian-kok beh pí-phēng cha̍p ê chāi-sek-lú, kia̍h in ê teng, chhut-khì ngiâ-chih sin-kiáⁿ-sài. 2 Kî-tiong gō͘-ê gōng ê, gō͘-ê tì-sek ê. 3 Gōng ê kia̍h in ê teng, bô lēng-gōa tòa iû. 4 To̍k-to̍k tì-sek ê kia̍h in ê teng lēng-gōa tòa iû tī in ê khì-kū lāi. 5 Sin-kiáⁿ-sài iân-chhiân, chiū lóng tuh-ka-chē teh khùn. 6 Pòaⁿ mî, ū tōa siaⁿ kiò kóng, Sin-kiáⁿ-sài lâi lah; lín chhut-lâi chih i. 7 Hit sî chiah ê chāi-sek-lú lóng khí-lâi, siu-chéng in ê teng. 8 Gōng ê kā tì-sek ê kóng, chhiáⁿ chiong lín ê iû pun goán, in-ūi goán ê teng beh hoa lah. 9 Tì-sek ê ìn kóng, Kiaⁿ-liáu lín goán lóng bô kàu; khah hó khì tùi bōe ê lâng ka-kī bóe. 10 Khì bóe ê sî, sin-kiáⁿ-sài kàu, hiah ê piān-ê kap i ji̍p hun-in ê iân-toh; mn̂g chiū koaiⁿ. 11 Jiân-āu kî-û ê chāi-sek-lú ia̍h lâi, kóng, Chú ah, Chú ah, kā goán khui. 12 Nā-sī i ìn kóng, Góa si̍t-chāi kā lín kóng, Góa m̄ bat lín. 13 Só͘-í tio̍h tiuⁿ-tî, in-ūi lín m̄ chai hit ê ji̍t, hit ê sî. 14 In-ūi chhin-chhiūⁿ chi̍t lâng beh khì gōa-kok; chiū tiàu i ka-kī ê lô͘-po̍k chiong só͘ ū ê kau-tāi in. 15 Chi̍t-ê hō͘ i gûn gō͘ chheng, chi̍t-ê hō͘ i nn̄g chheng, chi̍t-ê hō͘ i chi̍t chheng; kok chiàu in ê châi-tiāu; chiū khì gōa-kok. 16 Niá gō͘ chheng ê, sûi-sî khì chòe seng-lí, koh thàn gō͘ chheng. 17 Niá nn̄g chheng ê ia̍h sī án-ni, koh thàn nn̄g chheng. 18 To̍k-to̍k hit-ê niá chi̍t chheng ê khì, chiū ku̍t tōe, lâi khǹg-ba̍t i ê chú-lâng ê gûn. 19 Kè kú-kú, chiah ê lô͘-po̍k ê chú-lâng kàu, kap in sǹg-siàu. 20 Niá gō͘ chheng ê lâi, koh tòa gō͘ chheng, kóng, Chú ah, lí kau-tāi góa gō͘ chheng; lí khòaⁿ, góa ū koh thàn gō͘ chheng. 21 I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k. 22 Niá nn̄g chheng ê ia̍h lâi, kóng, Chú ah, lí kau-tāi góa nn̄g chheng; lí khòaⁿ, góa ū koh thàn nn̄g chheng. 23 I ê chú-lâng kā i kóng, Hó ah, hó koh chīn-tiong ê lô͘-po̍k, lí tī chió-ê í-keng chīn-tiong, góa beh siat-li̍p lí lâi koán chōe-ê; thang ji̍p lí ê chú-lâng ê khoài-lo̍k. 24 Niá chi̍t chheng ê ia̍h lâi, kóng, Chú ah, góa chai lí sī giâm-ha̍t ê lâng; bē iā ê só͘-chāi, chiū beh siu-koah; bē hun-sòaⁿ ê só͘-chāi, chiū beh khioh chòe tui. 25 Só͘-í góa kiaⁿ, chiū chiong lí chi̍t chheng gûn khì tâi tī tōe-ni̍h; taⁿ lí ê goân-mi̍h hêng lí. 26 I ê chú-lâng chiū ìn i kóng, Pháiⁿ koh pîn-tōaⁿ ê lô͘-po̍k ah, lí kì-jiân chai góa bē iā ê só͘-chāi, chiū beh siu-koah, bē hun-sòaⁿ ê só͘-chāi, chiū beh khioh chòe tui. 27 Chiū tio̍h chiong góa ê gûn hē tī chîⁿ-tiàm; góa lâi ê sî thang tit-tio̍h góa ê pún-gûn kap lī-sek. 28 Só͘-í tio̍h tùi i the̍h hit chi̍t chheng, lâi hō͘ hit ê ū cha̍p chheng ê. 29 In-ūi kìⁿ-nā ū ê, beh hō͘ i, hō͘ i ū chhun; bô ê, liân i só͘ ū ê, ia̍h beh the̍h i. 30 Ia̍h hit ê bô lī-ek ê lô͘-po̍k, kóaⁿ i tī gōa-bīn o͘-àm ê só͘-chāi; tī hia beh ū thî-khàu, kā-gê chhiat-chhí. 31 Tng Jîn-chú tī I ê êng-kng, kap lóng-chóng ê thiⁿ-sài lâi ê sî, I beh chē I êng-kng ê chō-ūi, 32 chū-chi̍p bān pang tī I ê bīn-chêng; I chiū beh hun-piat in, chhin-chhiūⁿ bo̍k-chiá hun-piat mî-iûⁿ lī-khui soaⁿ-iûⁿ. 33 Chiong mî-iûⁿ hē tī I ê chiàⁿ-pêng, soaⁿ-iûⁿ hē tī I ê tò-pêng. 34 Hit sî Ông beh kā chiàⁿ-pêng ê kóng, Lín tùi góa ê Pē tit-tio̍h un-tián ê, chìn-chêng lâi sêng-chiap kok, chiū-sī tùi chhòng-chō sè-kan í-lâi kā lín pī-pān ê. 35 In-ūi góa iau, lín bat hō͘ góa chia̍h; góa chhùi-ta, lín hō͘ góa lim; góa chhut-gōa, lín hō͘ góa tòa; góa thǹg-pak-theh, lín hō͘ góa chhēng; 36 góa phòa-pīⁿ, lín khòaⁿ-kò͘ góa; góa tī kaⁿ-ni̍h, lín lâi chhē góa. 37 Hit sî gī lâng beh ìn I kóng, Chú ah, goán sím-mi̍h sî khòaⁿ-kìⁿ lí iau, lâi hō͘ lí chia̍h? chhùi-ta, lâi hō͘ lí lim? 38 Sím-mi̍h sî khòaⁿ-kìⁿ lí chhut-gōa, lâi hō͘ lí tòa? thǹg-pak-theh, lâi hō͘ lí chhēng? 39 Sím-mi̍h sî khòaⁿ-kìⁿ lí phòa-pīⁿ, á-sī tī kaⁿ-ni̍h, lâi chhē lí? 40 Ông beh ìn i kóng, Góa si̍t-chāi kā lín kóng, Lín kì-jiân kiâⁿ i tī góa ê hiaⁿ-tī chì-bî-sòe ê ê chi̍t-ê, chiū-sī kiâⁿ i tī góa. 41 Koh beh kā tò-pêng ê kóng, Lín siū chiù-chó͘ ê, tio̍h lī-khui góa, ji̍p éng-oán ê hé, chiū-sī ūi-tio̍h Mô͘-kúi kap i chiah ê sù-chiá só͘ pī-pān ê. 42 In-ūi góa iau, lín m̄ bat hō͘ góa chia̍h; góa chhùi-ta, lín m̄ bat hō͘ góa lim; góa chhut-gōa, lín m̄ bat hō͘ góa tòa; 43 góa thǹg-pak-theh, lín m̄ bat hō͘ góa chhēng; góa phòa-pīⁿ kap tī kaⁿ-ni̍h, lín m̄ bat khòaⁿ-kò͘ góa. 44 In ia̍h beh ìn kóng, Chú ah, goán sím-mi̍h sî khòaⁿ-kìⁿ lí iau, á-sī chhùi-ta, á-sī chhut-gōa, á-sī thǹg-pak-theh, á-sī phòa-pīⁿ, á-sī tī kaⁿ-ni̍h, lâi bô ho̍k-sāi lí ah? 45 I chiū beh ìn i kóng, Góa si̍t-chāi kā lín kóng, Lín kì-jiân bô kiâⁿ i tī chiah ê chì-bî-sòe ê ê chi̍t ê, chiū-sī bô kiâⁿ i tī góa. 46 Chiah ê lâng beh khì ji̍p éng-oán ê hêng-hoa̍t; nā-sī gī ê lâng ji̍p éng-oán oa̍h.
1 耶穌講chiahê話soah，就kā伊ê學生講， 2 Lín知過兩日pôaⁿ過節就到，人子tú-tio̍h解送去釘十字架。 3 Hit時hiahê祭司頭kap百姓 ê長老聚集tī祭司頭，名該亞法ê院， 4 saⁿ-kap參詳用詭譎ê計掠耶穌來刣伊。 5 總是講，當節期m̄-thang，驚了百姓 ê中間有擾亂。 6 耶穌tī伯大尼，thái-ko西門ê厝， 7 有婦人人tòa玉瓶，內面tóe極貴氣ê香油，就近伊，當伊坐桌ê時拚(piàⁿ)tī伊頭殼頂。 8 學生看見就受氣，講，Án-ni破費有啥路用？ 9 因為chitê油能賣得chōe-chōe銀，來hō͘ sòng-hiong人。 10 耶穌知就kā in講，Lín啥事刁難chitê婦人人ah？因為伊所行來款待我ê是好事。 11 因為常常有sòng-hiong人kap lín tī-teh，但是我無常常kap lín tī-teh。 12 因為伊倒chitê油tī我身軀，就是備辦我埋葬來行ê。 13 我實在kā lín講，普天下，無論甚麼所在傳chitê福音，也beh講起chitê婦人人所行，來記念伊。 14 Hit時十二個學生一个，名做加略人偤大，去見hiahê祭司頭， 15 講，Lín beh hō͘我jōa chōe，我beh將伊交hō͘ lín？In就kap伊約，hō͘伊銀三十。 16 Tùi hit時伊chhē機會將耶穌交hō͘ in。 17 除酵節ê頭一日，學生就近耶穌講，Ài阮tī甚麼所在kā你備辦食pôaⁿ過節？ 18 伊講，Lín入城chhē某人，kā伊講，先生講，我ê時近lah；我kap我ê學生守pôaⁿ過節tī你tau。 19 學生照耶穌所吩咐ê去行；就備辦pôaⁿ過節。 20 到日暗耶穌kap十二個學生坐桌。 21 食ê時，耶穌講，我實在kā lín講，lín中間一人beh賣我。 22 眾人真憂悶，一个一个kā伊講，主ah，總無是我o͘h？ 23 伊應講，Kap我伸手tī盤裡ê，hitê beh賣我。 24 人子tò去照所記載指伊ê話；但是賣人子ê有災禍ah！hit人無出世khah好。 25 賣伊ê偤大講，拉比，總無是我o͘h？kā伊講，你已經講lah。 26 In teh食ê時，耶穌the̍h餅，祝謝peh破，pun hō͘學生，講，the̍h去食；chitê是我ê身軀。 27 Koh捧(phâng)杯祝謝hō͘ in，講，Lín lóng tio̍h lim伊； 28 chitê是我ê血，就是盟約ê血，為tio̍h chōe-chōe人來流出ê，致到罪得tio̍h赦免。 29 但是我kā lín講，taⁿ了後我無lim chitê葡萄ê汁，thèng候hit日我kap lín lim hitê新ê tī我ê父ê國。 30 已經吟詩，就出來，去橄欖山。 31 Hit時耶穌kā in講，今暝lín lóng beh為tio̍h我來受塞礙，因為有記載講，我beh phah牧者，就羊群四散。 32 但是我koh活了後beh事先lín去加利利。 33 彼得應伊講，眾人雖然為tio̍h你來受塞礙，也我永永無受塞礙。 34 耶穌kā伊講，我實在kā你講，今暝雞iáu-bē啼，你beh三pái m̄認我。 35 彼得kā伊講，我就若tio̍h kap你死，也決斷無m̄認你。眾學生也lóng是án-ni講。 36 耶穌kap in到一所在，名客西馬尼，kā伊ê學生講，Lín chiahê坐chia，thèng候我去hia祈禱。 37 Chiah chhōa彼得kap西庇太兩個kiáⁿ saⁿ-kap去；就憂悶、慘慼。 38 kā in講，我ê心真憂悶到beh死，lín tòa chia kap我警醒。 39 Lio̍h-lio̍h-á進前，面phak tī地裡，祈禱，講，我ê父ah，若會做得，tio̍h hō͘ chitê杯離開我；總是m̄是照我所ài，是照你所ài。 40 就來學生hia，看見in teh睏，kā彼得講，Án怎樣，lín bōe-ōe kap我警醒半時久ah？ 41 Tio̍h警醒，tio̍h祈禱，免得入tī迷惑；心神甘願，但是肉體軟chiáⁿ。 42 第二pái koh去祈禱，講，我ê父ah，chitê杯若bōe得離開我，的確tio̍h我lim伊，就願你ê旨意得成。 43 koh再來看見in又teh睏，因為in ê目睭siap。 44 離開in koh去，第三pái祈禱，也是講hiahê話。 45 Hit-tia̍p koh就近學生，kā in講，Taⁿ thang睏來安歇lah。時近lah，人子受賣tī罪人ê手。 46 起來saⁿ-kap行；賣我ê人近lah。 47 Iáu-teh講ê時，忽然十二個學生ê一个，偤大，來，也有kui陣人kia̍h刀kap槌á，tùi chiahê祭司頭kap百姓 ê長老hia saⁿ-kap來。 48 賣伊ê bat kap in套暗號，講，我kā伊chim ê，hit人就是，lín thang掠伊。 49 即時就近耶穌，講，拉比，平安；就直直kā伊chim。 50 耶穌kā伊講，朋友ah，你beh來做ê，就做。Hiah-ê人就進前，起手掠耶穌。 51 忽然有kap耶穌tī-teh ê一人伸手拔刀，刣祭司頭ê奴僕，削去伊一个耳á。 52 耶穌就kā伊講，收你ê刀入原位，因為凡若kia̍h刀ê beh tùi刀死。 53 Á是你phah算我bōe-ōe求我ê父，就伊tī chit-tia̍p beh kā我差十二營khah加ê天使mah？ 54 若án-ni，就聖經所講chitê tāi-chì的確有ê，怎樣會應驗ah？ 55 Hit時耶穌kā in hiahê人講，Lín kia̍h刀kap槌á出來掠我，親像beh掠賊mah？我日日坐tī殿內教示人，也lín無掠我。 56 總是chitê事lóng成，是beh應驗先知所記載ê。Hit時學生lóng離開伊走。 57 掠耶穌ê帶伊到祭司頭該亞法ê所在，tī hia hiahê經學士kap長老已經聚集。 58 彼得遠遠tè伊到祭司頭ê院，入內面kap hiahê差役saⁿ-kap坐，beh看hitê結局。 59 Chiahê祭司頭kap全公會chhē lām-sám ê干證攻擊耶穌，ài hō͘伊死。 60 雖然chōe-chōe lām-sám干證ê來，也無得tio̍h。後來有兩個到，講， 61 Chit人bat講，我會毀壞上帝ê殿，三日就起伊。 62 祭司頭起來kā伊講，你lóng無應mah？Chiahê人所干證你ê是甚麼？ 63 但是耶穌靜靜。祭司頭kā伊講，當chitê真活上帝，我命令你chiù-chōa來kā阮講，你果然是上帝ê Kiáⁿ，基督，á m̄是。 64 耶穌kā伊講，你已經講lah；但是我kā lín講，Tùi chit-tia̍p了後lín beh看見人子坐tī有權能ê ê大pêng，坐天 ê雲來。 65 Tùi án-ni祭司頭拆裂家己ê衫，講，伊講出僭權褻瀆ê話；咱iáu-kú欠甚麼干證ah？Taⁿ lín已經聽見伊ê僭權褻瀆lah。 66 Lín phah算怎樣？應講，伊該死。 67 就phùi-nōa tī伊ê面，用拳頭母cheng伊；也有ê用手siàn伊， 68 講，基督ah，你是先知，tio̍h kā阮講，phah你ê是是誰。 69 彼得坐tī外院；有一个女婢近óa伊講，你也bat kap加利利人耶穌做陣。 70 彼得當眾人ê面前m̄認講，我m̄知你teh講甚麼。 71 出去到院門，koh一个女婢看見伊，kā tī hia ê人講，Chitê也bat kap拿撒勒人耶穌做陣。 72 彼得koh m̄認，續chiù-chōa講，我m̄-bat hitê人。 73 有hiah久，邊á teh khiā ê人近óa kā彼得講，你實在也是in ê黨，因為對你ê腔口露出。 74 伊chiah咒罵，koh chiù-chōa，講，我m̄-bat hitê人。雞就啼。 75 彼得就記得耶穌ê話講，雞iáu-bē啼，你beh三pái m̄認我。就出去外面，大啼哭。
1 Iâ-so͘ kóng chiah ê ōe soah, chiū kā I ê ha̍k-seng kóng, 2 Lín chai kè nn̄g ji̍t pôaⁿ-kè-choeh chiū kàu, Jîn-chú tú-tio̍h kè-sàng khì tèng si̍p-jī-kè. 3 Hit sî hiah ê chè-si-thâu kap peh-sìⁿ ê tiúⁿ-ló chū-chi̍p tī chè-si-thâu, miâ Kai-a-hoat ê īⁿ, 4 saⁿ-kap chham-siông ēng khúi-khiat ê kè lia̍h Iâ-so͘ lâi thâi I. 5 Chóng-sī kóng, Tng choeh-kî m̄-thang, kiaⁿ-liáu peh-sìⁿ ê tiong-kan ū jiáu-loān. 6 Iâ-so͘ tī Pek-tāi-nî, thái-ko Se-bûn ê chhù, 7 ū hū-jîn-lâng tòa ge̍k-pân, lāi-bīn tóe ke̍k kùi-khì ê hiuⁿ-iû, chiū-kūn I, tng I chē toh ê sî piàⁿ tī I thâu-khak téng. 8 Ha̍k-seng khòaⁿ-kìⁿ chiū siū-khì, kóng, Án-ni phòa-hùi ū siáⁿ lō͘-ēng? 9 In-ūi chit ê iû ōe bōe-tit chōe-chōe gûn, lâi hō͘ sòng-hiong lâng. 10 Iâ-so͘ chai chiū kā in kóng, Lín siáⁿ-sū thiau-lân chit ê hū-jîn-lâng ah? in-ūi i só͘ kiâⁿ lâi khoán-thāi góa ê sī hó sū. 11 In-ūi siông-siông ū sòng-hiong lâng kap lín tī-teh, nā-sī góa bô siông-siông kap lín tī-teh. 12 In-ūi i tò chit ê iû tī góa seng-khu, chiū-sī pī-pān góa bâi-chòng lâi kiâⁿ ê. 13 Góa si̍t-chāi kā lín kóng, Phó͘ thiⁿ-ē, bô lūn sím-mi̍h só͘-chāi thoân chit ê hok-im, iā beh kóng-khí chit ê hū-jîn-lâng só͘ kiâⁿ, lâi kì-liām i. 14 Hit sî cha̍p-jī ê ha̍k-seng chi̍t-ê, miâ chòe Ka-lio̍k lâng Iû-tāi, khì kìⁿ hiah ê chè-si-thâu, 15 kóng, Lín beh hō͘ góa jōa chōe, góa beh chiong I kau hō͘ lín? In chiū kap i iok, hō͘ i gûn saⁿ-cha̍p. 16 Tùi hit sî i chhē ki-hōe chiong Iâ-so͘ kau hō͘ in. 17 Tû-kàⁿ-choeh ê thâu-chi̍t ji̍t, ha̍k-seng chiū-kūn Iâ-so͘ kóng, Ài goán tī sím-mi̍h só͘-chāi kā lí pī-pān chia̍h pôaⁿ-kè-choeh? 18 I kóng, Lín ji̍p siâⁿ chhē bó͘ lâng, kā i kóng, Sian-siⁿ kóng, Góa ê sî kūn lah; góa kap góa ê ha̍k-seng siú pôaⁿ-kè-choeh tī lí tau. 19 Ha̍k-seng chiàu Iâ-so͘ só͘ hoan-hù ê khì kiâⁿ; chiū pī-pān pôaⁿ-kè-choeh. 20 Kàu ji̍t àm Iâ-so͘ kap cha̍p-jī ê ha̍k-seng chē toh. 21 Chia̍h ê sî, Iâ-so͘ kóng, Góa si̍t-chāi kā lín kóng, lín tiong-kan chi̍t lâng beh bōe góa. 22 Chèng lâng chin iu-būn, chi̍t-ê chi̍t-ê kā I kóng, Chú ah, chóng bô sī góa o͘h? 23 I ìn kóng, Kap góa chhun chhiú tī pôaⁿ-ni̍h ê, hit-ê beh bōe góa. 24 Jîn-chú tò-khì chiàu só͘ kì-chài chí I ê ōe; nā-sī bōe Jîn-chú ê ū chai-ē ah! hit lâng bô chhut-sì khah hó. 25 Bōe I ê Iû-tāi kóng, Lia̍p-pí, chóng bô sī góa o͘h? Kā i kóng, Lí í-keng kóng lah. 26 In teh chia̍h ê sî, Iâ-so͘ the̍h piáⁿ, chiok-siā peh-phòa, pun hō͘ ha̍k-seng, kóng, The̍h-khì chia̍h; chit-ê sī góa ê seng-khu. 27 Koh phâng poe chiok-siā hō͘ in, kóng, Lín lóng tio̍h lim i; 28 chit-ê sī góa ê huih, chiū-sī bêng iok ê huih, ūi-tio̍h chōe-chōe lâng lâi lâu-chhut ê, tì-kàu chōe tit-tio̍h sià-bián. 29 Nā-sī góa kā lín kóng, taⁿ liáu-āu góa bô lim chit ê phû-tô ê chiap, thèng-hāu hit ji̍t góa kap lín lim hit ê sin-ê tī góa ê Pē ê kok. 30 Í-keng gîm si, chiū chhut-lâi, khì Kaⁿ-ná soaⁿ. 31 Hit sî Iâ-so͘ kā in kóng, Kim-mî lín lóng beh ūi-tio̍h góa lâi siū that-gāi, in-ūi ū kì-chài kóng, Góa beh phah bo̍k-chiá, chiū iûⁿ-kûn sì-sòaⁿ. 32 Nā-sī góa koh-oa̍h liáu-āu beh tāi-seng lín khì Ka-lī-lī. 33 Pí-tek ìn I kóng, Chèng lâng sui-jiân ūi-tio̍h lí lâi siū that-gāi, iā góa éng-éng bô siū that-gāi. 34 Iâ-so͘ kā i kóng, Góa si̍t-chāi kā lí kóng, kim-mî koe iáu-bē thî, lí beh saⁿ pái m̄ jīn góa. 35 Pí-tek kā I kóng, Góa chiū nā tio̍h kap lí sí, iā koat-toàn bô m̄ jīn lí. Chèng ha̍k-seng iā lóng sī án-ni kóng. 36 Iâ-so͘ kap in kàu chi̍t só͘-chāi, miâ Khek-se-má-nî, kā I ê ha̍k-seng kóng, Lín chiah-ê chē chia, thèng-hāu góa khì hia kî-tó. 37 Chiah chhōa Pí-tek kap Se-pí-thài nn̄g ê kiáⁿ saⁿ-kap khì; chiū iu-būn, chhám-chhoeh. 38 Kā in kóng, Góa ê sim chin iu-būn kàu beh sí, lín tòa chia kap góa kéng-séng. 39 Lio̍h-lio̍h-á chìn-chêng, bīn phak tī tōe-ni̍h, kî-tó, kóng, Góa ê Pē ah, nā ōe chòe-tit, tio̍h hō͘ chit ê poe lī-khui góa; chóng-sī m̄ sī chiàu góa só͘ ài, sī chiàu lí só͘ ài. 40 Chiū lâi ha̍k-seng hia, khòaⁿ-kìⁿ in teh khùn, kā Pí-tek kóng, Án-cháiⁿ-iūⁿ, lín bōe-ōe kap góa kéng-séng pòaⁿ-sî kú ah? 41 Tio̍h kéng-séng, tio̍h kî-tó, bián-tit ji̍p tī bê-he̍k; sim-sîn kam-goān, nā-sī jio̍k-thé nńg-chiáⁿ. 42 Tē jī pái koh khì kî-tó, kóng, Góa ê Pē ah, chit-ê poe nā bōe-tit lī-khui góa, tek-khak tio̍h góa lim i, chiū goān lí ê chí-ì tit chiâⁿ. 43 Koh-chài lâi khòaⁿ-kìⁿ in iū teh khùn, in-ūi in ê ba̍k-chiu siap. 44 Lī-khui in koh khì, tē saⁿ pái kî-tó, iā sī kóng hiah ê ōe. 45 Hit tia̍p koh chiū-kūn ha̍k-seng, kā in kóng, Taⁿ thang khùn lâi an-hioh lah. Sî kūn lah, Jîn-chú siū bōe tī chōe-jîn ê chhiú. 46 Khí-lâi saⁿ-kap kiâⁿ; bōe góa ê lâng kūn lah. 47 Iáu teh kóng ê sî, hut-jiân cha̍p-jī ê ha̍k-seng ê chi̍t ê, Iû-tāi, lâi, iā ū kui tīn lâng kia̍h to kap thûi-á, tùi chiah ê chè-si-thâu kap peh-sìⁿ ê tiúⁿ-ló hia saⁿ-kap lâi. 48 Bōe I ê bat kap in thò àm-hō, kóng, Góa kā I chim ê, hit lâng chiū-sī, lín thang lia̍h I. 49 Chek-sî chiū-kūn Iâ-so͘, kóng, Lia̍p-pí, pêng-an; chiū ti̍t-ti̍t kā I chim. 50 Iâ-so͘ kā i kóng, Pêng-iú ah, lí beh lâi chòe ê, chiū chòe. Hiah ê lâng chiū chìn-chêng, khí chhiú lia̍h Iâ-so͘. 51 Hut-jiân ū kap Iâ-so͘ tī-teh ê chi̍t lâng chhun chhiú pu̍ih to, thâi chè-si-thâu ê lô͘-po̍k, siah-khì i chi̍t ê hī-á. 52 Iâ-so͘ chiū kā i kóng, Siu lí ê to ji̍p goân-ūi, in-ūi hoān-nā kia̍h to ê beh tùi to sí. 53 Á-sī lí phah-sǹg góa bōe-ōe kiû góa ê Pē, chiū I tī chit tia̍p beh kā góa chhe cha̍p-jī iâⁿ khah ke ê thiⁿ-sài mah? 54 Nā án-ni, chiū sèng-keng só͘ kóng chit ê tāi-chì tek-khak ū ê, cháiⁿ-iūⁿ ōe èng-giām ah? 55 Hit sî Iâ-so͘ kā in hiah ê lâng kóng, Lín kia̍h to kap thûi-á chhut-lâi lia̍h góa, chhin-chhiūⁿ beh lia̍h chha̍t mah? Góa ji̍t-ji̍t chē tī tiān-lāi kà-sī lâng, iā lín bô lia̍h góa. 56 Chóng-sī chit ê sū lóng chiâⁿ, sī beh èng-giām sian-ti só͘ kì-chài ê. Hit sî ha̍k-seng lóng lī-khui I cháu. 57 Lia̍h Iâ-so͘ ê tòa I kàu chè-si-thâu Kai-a-hoat ê só͘-chāi, tī hia hiah ê keng-ha̍k-sū kap tiúⁿ-ló í-keng chū-chi̍p. 58 Pí-tek hn̄g-hn̄g tè I kàu chè-si-thâu ê īⁿ, ji̍p lāi-bīn kap hiah ê chhe-ia̍h saⁿ-kap chē, beh khòaⁿ hit ê kiat-kio̍k. 59 Chiah ê chè-si-thâu kap choân kong-hōe chhē lām-sám ê kan-chèng kong-kek Iâ-so͘, ài hō͘ I sí. 60 Sui-jiân chōe-chōe lām-sám kan-chèng ê lâi, iā bô tit-tio̍h. Āu-lâi ū nn̄g-ê kàu, kóng, 61 Chit lâng bat kóng, Góa ōe húi-hoāi Siōng-tè ê tiān, saⁿ ji̍t chiū khí i. 62 Chè-si-thâu khí-lâi kā I kóng, Lí lóng bô ìn mah? Chiah ê lâng só͘ kan-chèng lí ê sī sím-mi̍h? 63 Nā-sī Iâ-so͘ chēng-chēng. Chè-si-thâu kā I kóng, Tng chit ê chin-oa̍h Siōng-tè, góa bēng-lēng lí chiù-chōa lâi kā goán kóng, lí kó-jiân sī Siōng-tè ê Kiáⁿ, Ki-tok, á m̄ sī. 64 Iâ-so͘ kā i kóng, Lí í-keng kóng lah; nā-sī góa kā lín kóng, Tùi chit tia̍p liáu-āu lín beh khòaⁿ-kìⁿ Jîn-chú chē tī ū koân-lêng ê ê tōa pêng, chē thiⁿ ê hûn lâi. 65 Tùi án-ni chè-si-thâu thiah-li̍h ka-kī ê saⁿ, kóng, I kóng-chhut chhiàm-koân siat-to̍k ê ōe; lán iáu-kú khiàm sím-mi̍h kan-chèng ah? Taⁿ lín í-keng thiaⁿ-kìⁿ I ê chhiàm-koân siat-to̍k lah. 66 Lín phah-sǹg cháiⁿ-iūⁿ? Ìn kóng, I kai sí. 67 Chiū phùi-nōa tī I ê bīn, ēng kûn-thâu-bú cheng I; iā ū-ê ēng chhiú siàn I, 68 kóng, Ki-tok ah, lí sī sian-ti, tio̍h kā goán kóng, phah lí ê sī chī-chūi. 69 Pí-tek chē tī gōa īⁿ; ū chi̍t ê lú-pī kūn-óa i kóng, Lí iā bat kap Ka-lī-lī lâng Iâ-so͘ chòe tīn. 70 Pí-tek tng chèng lâng ê bīn-chêng m̄ jīn kóng, Góa m̄ chai lí teh kóng sím-mi̍h. 71 Chhut-khì kàu īⁿ mn̂g, koh chi̍t ê lú-pī khòaⁿ-kìⁿ i, kā tī hia ê lâng kóng, Chit-ê iā bat kap Ná-sat-le̍k lâng Iâ-so͘ chòe tīn. 72 Pí-tek koh m̄ jīn, sòa chiù-chōa kóng, Góa m̄ bat hit ê lâng. 73 Ū hiah kú, piⁿ-á teh khiā ê lâng kūn-óa kā Pí-tek kóng, Lí si̍t-chāi iā sī in ê tóng, in-ūi tùi lí ê khiuⁿ-kháu lō͘-chhut. 74 I chiah chiù-mē, koh chiù-chōa, kóng, Góa m̄ bat hit ê lâng. Koe chiū thî. 75 Pí-tek chiū kì-tit Iâ-so͘ ê ōe kóng, Koe iáu-bē thî, lí beh saⁿ pái m̄ jīn góa. Chiū chhut-khì gōa-bīn, tōa thî-khàu.
1 到天光，眾祭司頭kap百姓 ê長老saⁿ-kap計謀攻擊耶穌，ài hō͘伊死。 2 已經縛伊，就帶去交hō͘總督彼拉多。 3 Hit時賣伊ê偤大看見耶穌受定罪，就退悔，將hiahê三十銀還chiahê祭司頭kap長老， 4 講，我賣無罪ê ê血，有罪lah。In講，Kap阮啥干涉？你家己打算。 5 偤大hiat hiahê銀tī殿裡，退去家己吊死。 6 Hiah-ê祭司頭the̍h hitê銀，講，這是血ê價，m̄-thang lok tī庫房。 7 In就參詳，將hitê銀去買燒磁人ê園，thang埋葬出外人。 8 所以hit khu園到taⁿ稱做血園。 9 Tùi án-ni應驗早託先知耶利米所講ê，講，In the̍h受苦ê ê價銀三十，就是以色列ê kiaⁿ孫中有人所估ê； 10 用伊來買燒磁ê ê園，照主所命令我ê。 11 耶穌khiā tī總督ê面前；總督問伊講，你是偤太人ê王mah？耶穌kā伊講，你講，就是。 12 伊hō͘ hiahê祭司頭長老告，伊也無應。 13 Hit時，彼拉多kā伊講，Hiah-ê人干證你到hiah chōe項，你無聽見mah？ 14 耶穌無應伊一句話，致到總督大奇怪。 15 到節期總督照例放一个犯人hō͘眾人，是照in所ài ê。 16 Hit時有出名ê犯人，名叫巴拉巴。 17 In已經聚集，彼拉多kā in講，Lín ài我放是誰 hō͘ lín？是巴拉巴，á是稱做基督ê耶穌？ 18 因為知in為tio̍h怨妒chiah解送耶穌。 19 伊坐堂ê時，伊ê bó͘差人kā伊講，Chitê義人你m̄-thang干涉tio̍h；因為我今á日tī眠夢中為tio̍h伊chōe-chōe艱苦。 20 Chiahê祭司頭kap長老kiau-so眾人，求放巴拉巴，滅耶穌。 21 總督應講，Chit兩人lín ài我放tá-lo̍h一个hō͘ lín？In講，巴拉巴。 22 彼拉多kā in講，Án-ni，就稱做基督ê耶穌，我tio̍h怎樣辦伊？In lóng講，釘伊十字架。 23 總督講，怎樣，伊有行甚麼pháiⁿ？In大聲hoah講，釘伊十字架。 24 彼拉多看見無chhái-kang，反tńg ná擾亂，就捧水，tī眾人ê面前洗手，講，Tī chitê義人ê血我無罪，lín家己打算。 25 百姓 lóng應伊講，伊ê血歸tī阮kap阮ê kiaⁿ孫。 26 伊就放巴拉巴hō͘ in。已經鞭phah耶穌，就發交去釘十字架。 27 Hit時總督ê兵帶耶穌入公堂，聚集thong營圍伊。 28 Thǹg伊ê衫，將紅袍kā伊穿； 29 用刺á編冕旒，tì tī伊ê頭殼，用蘆竹hē tī伊ê 正手，跪tī伊ê面前戲弄伊講，偤太人ê王，平安。 30 就kā伊phùi-nōa，kia̍h hit支蘆竹，來sut伊ê頭殼。 31 戲弄soah，hit領袍就kā伊thǹg起來，將伊家己ê衫kā伊穿，帶伊去釘十字架。 32 出來ê時tú-tio̍h一个Kó͘-lī-nāi人名西門，勉強伊saⁿ-kap去，hō͘伊giâ耶穌ê十字架。 33 到一所在，名各各他，就是頭殼碗ê所在，就用苦膽所調和ê酒hō͘伊lim； 34 伊試看，就m̄ lim。 35 已經釘伊tī十字架，就做鬮pun伊ê衣服； 36 koh坐tī hia顧守伊。 37 就hē斬條tī伊ê頭殼ê頂面，寫講，chitê是偤太人ê王，耶穌。 38 Hit時，有兩個賊kap伊同釘tī十字架，一个tī chiàⁿ-pêng，一个tī tò-pêng。 39 經過ê人譏刺伊，搖頭講， 40 你毀壞殿，三日koh起ê，tio̍h救家己；你若是上帝ê Kiáⁿ，tio̍h tùi十字架落來。 41 Hiah-ê祭司頭kap經學士以及長老也是án-ni戲弄伊，講， 42 伊bat救別人，bōe-ōe救家己。伊做以色列ê王，taⁿ tio̍h tùi十字架落來，阮就beh信伊。 43 伊óa靠上帝，上帝若歡喜伊，taⁿ就tio̍h救伊；因為伊講，我就是上帝ê Kiáⁿ。 44 Kap伊同釘hit兩個賊也是án-ni罵伊。 45 Tùi日中晝到三點，遍地烏暗。 46 差不多三點，耶穌大聲喉叫講，Í-lī，Í-lī，lia̍p-má sat-pok-tāi-nî，就是講，我ê上帝，我ê上帝，你啥事放離我？ 47 邊頭khiā ê有人聽見就講，伊teh叫以利亞。 48 中間一人即時走去，the̍h海絨，浸醋，hâ tī蘆竹á尾，hō͘伊suh。 49 其餘ê講，且慢，看以利亞來救伊á無。 50 耶穌koh大聲喉叫，就斷氣。 51 忽然殿內ê帳，tùi頂到下，裂做兩pêng；地動，石磐裂； 52 墓開，已經teh睏ê聖徒，in ê身軀chōe-chōe起來，tùi in ê墓出； 53 到耶穌koh活了後，in入聖城，出現tī chōe-chōe人。 54 百總kap相同顧守耶穌ê，看見地動，kap所經過ê事，不止驚，講，Chitê果然是上帝ê Kiáⁿ。 55 有chōe-chōe婦人人tī hia遠遠teh看；in就是tùi加利利跟tè耶穌來服事伊ê； 56 從中有抹大拉ê馬利亞，雅各約西ê老母馬利亞，kap西庇太ê Kiáⁿ ê老母。 57 已經暗，有A-lī-má-thài ê好額人來，名做約瑟，伊也是耶穌ê學生。 58 Hit人去見彼拉多，求耶穌ê身屍；彼拉多吩咐tio̍h hō͘伊。 59 約瑟收hitê身屍，用清氣ê幼布包伊； 60 hē tī伊家己ê新墓，就是伊tī石磐所phah ê；就kō大塊石tī墓門，chiah去。 61 有抹大拉ê馬利亞kap別個馬利亞tī hia，坐tī墓ê對面。 62 隔日，就是備辦節後ê一日，hiahê祭司頭kap法利賽人聚集見彼拉多講， 63 大人ah，阮記得hitê迷惑人ê，活teh ê時bat講，三日後我beh koh活。 64 所以請你命令顧守hitê墓，到第三日；驚了伊ê學生來偷伊去，亦kā百姓講，伊tùi死人中koh活；án-ni，就後來ê差謬，比事先khah厲害。 65 彼拉多kā in講，Lín領兵去，照lín所知影ê去顧守。 66 In就去，封石kap設兵，來顧守hitê墓。
1 Kàu thiⁿ-kng, chèng chè-si-thâu kap peh-sìⁿ ê tiúⁿ-ló saⁿ-kap kè-bô͘ kong-kek Iâ-so͘, ài hō͘ I sí. 2 Í-keng pa̍k I, chiū tòa-khì kau hō͘ chóng-tok Pí-lia̍p-to. 3 Hit sî bōe I ê Iû-tāi khòaⁿ-kìⁿ Iâ-so͘ siū tēng-chōe, chiū thè-hóe, chiong hiah ê saⁿ-cha̍p gûn hêng chiah ê chè-si-thâu kap tiúⁿ-ló, 4 kóng, Góa bōe bô chōe ê ê huih, ū chōe lah. In kóng, Kap goán siáⁿ kan-sia̍p? Lí ka-kī táⁿ-sǹg. 5 Iû-tāi hiat hiah ê gûn tī tiān-ni̍h, thè-khì ka-kī tiàu-sí. 6 Hiah ê chè-si-thâu the̍h hit ê gûn, kóng, Che sī huih ê kè, m̄-thang lok tī khò͘-pâng. 7 In chiū chham-siông, chiong hit ê gûn khì bóe sio-hûi lâng ê hn̂g, thang bâi-chòng chhut-gōa lâng. 8 Só͘-í hit khu hn̂g kàu taⁿ chheng chòe Huih-hn̂g. 9 Tùi án-ni èng-giām chá thok sian-ti Iâ-lī-bí só͘ kóng ê, kóng, In the̍h siū-kó͘-ê ê kè-gûn saⁿ-cha̍p, chiū-sī Í-sek-lia̍t ê kiáⁿ-sun tiong ū lâng só͘ kó͘ ê; 10 ēng i lâi bóe sio-hûi-ê ê hn̂g, chiàu Chú só͘ bēng-lēng góa ê. 11 Iâ-so͘ khiā tī chóng-tok ê bīn-chêng; chóng-tok mn̄g I kóng, Lí sī Iû-thài lâng ê ông mah? Iâ-so͘ kā i kóng, Lí kóng, chiū-sī. 12 I hō͘ hiah ê chè-si-thâu tiúⁿ-ló kò, I iā bô ìn. 13 Hit sî Pí-lia̍p-to kā I kóng, Hiah ê lâng kan-chèng lí kàu hiah chōe hāng, lí bô thiaⁿ-kìⁿ mah? 14 Iâ-so͘ bô ìn i chi̍t kù ōe, tì-kàu chóng-tok tōa kî-koài. 15 Kàu choeh-kî chóng-tok chiàu-lē pàng chi̍t-ê hoān-lâng hō͘ chèng lâng, sī chiàu in só͘ ài ê. 16 Hit sî ū chhut-miâ ê hoān-lâng, miâ kiò Pa-lia̍p-pa. 17 In í-keng chū-chi̍p, Pí-lia̍p-to kā in kóng, Lín ài góa pàng chī-chūi hō͘ lín? sī Pa-lia̍p-pa, á-sī chheng chòe Ki-tok ê Iâ-so͘? 18 In-ūi chai in ūi-tio̍h oàn-tò͘ chiah ké-sàng Iâ-so͘. 19 I chē tn̂g ê sî, i ê bó͘ chhe lâng kā i kóng, Chit ê gī lâng lí m̄-thang kan-sia̍p-tio̍h; in-ūi góa kin-á-ji̍t tī bîn-bāng tiong ūi-tio̍h I chōe-chōe kan-khó͘. 20 Chiah ê chè-si-thâu kap tiúⁿ-ló kiau-so chèng lâng, kiû pàng Pa-lia̍p-pa, bia̍t Iâ-so͘. 21 Chóng-tok ìn kóng, Chit nn̄g lâng lín ài góa pàng tá-lo̍h chi̍t-ê hō͘ lín? In kóng, Pa-lia̍p-pa. 22 í-lia̍p-to kā in kóng, Án-ni, chiū chheng chòe Ki-tok ê Iâ-so͘, góa tio̍h cháiⁿ-iūⁿ pān I? In lóng kóng, Tèng I si̍p-jī-kè. 23 Chóng-tok kóng, Cháiⁿ-iūⁿ, I ū kiâⁿ sím-mi̍h pháiⁿ? In tōa siaⁿ hoah kóng, Tèng I si̍p-jī-kè. 24 Pí-lia̍p-to khòaⁿ-kìⁿ bô chhái-kang, hoán-tńg ná jiáu-loān, chiū phâng chúi, tī chèng lâng ê bīn-chêng sóe chhiú, kóng, Tī chit ê gī lâng ê huih góa bô chōe, lín ka-kī táⁿ-sǹg. 25 Peh-sìⁿ lóng ìn i kóng, I ê huih kui tī goán kap goán ê kiáⁿ-sun. 26 I chiū pàng Pa-lia̍p-pa hō͘ in. Í-keng piⁿ-phah Iâ-so͘, chiū hoat-kau khì tèng si̍p-jī-kè. 27 Hit sî chóng-tok ê peng tòa Iâ-so͘ ji̍p kong-tn̂g, chū-chi̍p thong iâⁿ ûi I. 28 Thǹg I ê saⁿ, chiong âng phàu kā I chhēng; 29 ēng chhì-á pīⁿ bián-liû, tì tī I ê thâu-khak, ēng lô͘-tek hē tī I ê chiàⁿ-chhiú, kūi tī I ê bīn-chêng hì-lāng I kóng, Iû-thài lâng ê ông, pêng-an. 30 Chiū kā I phùi-nōa, kia̍h hit ki lô͘-tek, lâi sut I ê thâu-khak. 31 Hì-lāng soah, hit niá phàu chiū kā I thǹg-khí-lâi, chiong I ka-kī ê saⁿ kā I chhēng, tòa I khì tèng si̍p-jī-kè. 32 Chhut-lâi ê sî tú-tio̍h chi̍t ê Kó͘-lī-nāi lâng miâ Se-bûn, bián-kióng i saⁿ-kap khì, hō͘ i giâ Iâ-so͘ ê si̍p-jī-kè. 33 Kàu chi̍t só͘-chāi, miâ Kok-kok-thaⁿ, chiū-sī thâu-khak-óaⁿ ê só͘-chāi, chiū ēng khó͘-táⁿ só͘ tiâu-hô ê chiú hō͘ I lim; 34 I chhì-khòaⁿ, chiū m̄ lim. 35 Í-keng tèng I tī si̍p-jī-kè, chiū chòe-khau pun I ê i-ho̍k; 36 koh chē tī hia kò͘-siú I. 37 Chiū hē chám-tiâu tī I ê thâu-khak ê téng-bīn, siá kóng, Chit-ê sī Iû-thài lâng ê ông, Iâ-so͘. 38 Hit sî ū nn̄g ê chha̍t kap I tâng tèng tī si̍p-jī-kè, chi̍t-ê tī chiàⁿ-pêng, chi̍t-ê tī tò-pêng. 39 Keng-kè ê lâng ki-chhì I, iô thâu kóng, 40 Lí húi-hoāi tiān, saⁿ ji̍t koh khí ê, tio̍h kiù ka-kī; lí nā sī Siōng-tè ê Kiáⁿ, tio̍h tùi si̍p-jī-kè lo̍h-lâi. 41 Hiah ê chè-si-thâu kap keng-ha̍k-sū í-ki̍p tiúⁿ-ló iā sī án-ni hì-lāng I, kóng, 42 I bat kiù pa̍t lâng, bōe-ōe kiù ka-kī. I chòe Í-sek-lia̍t ê ông, taⁿ tio̍h tùi si̍p-jī-kè lo̍h-lâi, goán chiū beh sìn I. 43 I óa-khò Siōng-tè, Siōng-tè nā hoaⁿ-hí I, taⁿ chiū tio̍h kiù I; in-ūi I kóng, Góa chiū-sī Siōng-tè ê Kiáⁿ. 44 Kap I tâng tèng hit nn̄g ê chha̍t iā sī án-ni mē I. 45 Tùi ji̍t-tiong-tàu kàu saⁿ tiám, piàn tōe o͘-àm. 46 Chha-put-to saⁿ tiám, Iâ-so͘ tōa siaⁿ âu-kiò kóng, Í-lī, Í-lī, lia̍p-má sat-pok-tāi-nî, chiū-sī kóng, Góa ê Siōng-tè, góa ê Siōng-tè, lí siáⁿ-sū pàng-lī góa? 47 Piⁿ-thâu khiā ê ū lâng thiaⁿ-kìⁿ chiū kóng, I teh kiò Í-lī-a. 48 Tiong-kan chi̍t lâng chek-sî cháu-khì, the̍h hái-jiông, chìm chhò͘, hâ tī lô͘-tek-á bé, hō͘ I suh. 49 Kî-û ê kóng, Chhiáⁿ bān, khòaⁿ Í-lī-a lâi kiù I á bô. 50 Iâ-so͘ koh tōa siaⁿ âu-kiò, chiū tn̄g khùi. 51 Hut-jiân tiān-lāi ê tiùⁿ, tùi téng kàu ē, li̍h chòe nn̄g pêng; tōe tāng, chio̍h-pôaⁿ li̍h; 52 bōng khui, í-keng teh khùn ê sèng-tô͘, in ê sin-khu chōe-chōe khí-lâi, tùi in ê bōng chhut; 53 kàu Iâ-so͘ koh-oa̍h liáu-āu, in ji̍p sèng siâⁿ, chhut-hiān tī chōe-chōe lâng. 54 Pé-chóng kap saⁿ-tâng kò͘-siú Iâ-so͘ ê, khòaⁿ-kìⁿ tōe-tāng, kap só͘ keng-kè ê sū, put-chí kiaⁿ, kóng, Chit-ê kó-jiân sī Siōng-tè ê Kiáⁿ. 55 Ū chōe-chōe hū-jîn-lâng tī hia hn̄g-hn̄g teh khòaⁿ; in chiū-sī tùi Ka-lī-lī kun-tè Iâ-so͘ lâi ho̍k-sāi I ê; 56 chiông-tiong ū Boa̍t-tāi-lia̍p ê Má-lī-a, Ngá-kok Iok-se ê lāu-bú Má-lī-a, kap Se-pí-thài ê kiáⁿ ê lāu-bú. 57 Í-keng àm, ū A-lī-má-thài ê hó-gia̍h lâng lâi, miâ chòe Iok-sek, i iā sī Iâ-so͘ ê ha̍k-seng. 58 Hit lâng khì kìⁿ Pí-lia̍p-to, kiû Iâ-so͘ ê sin-si; Pí-lia̍p-to hoan-hù tio̍h hō͘ i. 59 Iok-sek siu hit ê sin-si, ēng chheng-khì ê iù-pò͘ pau i; 60 hē tī i ka-kī ê sin bōng, chiū-sī i tī chio̍h-pôaⁿ só͘ phah ê; chiū kō tōa tè chio̍h tī bōng-mn̂g, chiah khì. 61 Ū Boa̍t-tāi-lia̍p ê Má-lī-a kap pa̍t ê Má-lī-a tī hia, chē tī bōng ê tùi-bīn. 62 Keh ji̍t, chiū-sī pī-pān choeh āu ê chi̍t ji̍t, hiah ê chè-si-thâu kap Hoat-lī-sài lâng chū-chi̍p kìⁿ Pí-lia̍p-to kóng, 63 Tāi-jîn ah, goán kì-tit hit ê bê-he̍k lâng ê, oa̍h-teh ê sî bat kóng, Saⁿ ji̍t āu góa beh koh-oa̍h. 64 Só͘-í chhiáⁿ lí bēng-lēng kò͘-siú hit ê bōng, kàu tē saⁿ ji̍t; kiaⁿ-liáu I ê ha̍k-seng lâi thau I khì, ia̍h kā peh-sìⁿ kóng, I tùi sí-lâng tiong koh-oa̍h; án-ni, chiū āu-lâi ê chha-biū, pí tāi-seng khah lī-hāi. 65 Pí-lia̍p-to kā in kóng, Lín niá peng khì, chiàu lín só͘ chai-iáⁿ ê khì kò͘-siú. 66 In chiū khì, hong chio̍h kap siat peng, lâi kò͘-siú hit ê bōng.
1 安歇日後，七日ê頭一日，天phú光。抹大拉ê馬利亞kap別個馬利亞來beh看hitê墓。 2 忽然地大振動，因為主ê天使tùi天落來，kō開hit塊石，來坐tī頂面。 3 伊ê面貌親像sih-nà，衫白親像雪。 4 顧守ê人因為驚，就ngia̍uh-ngia̍uh-chhoah，變親像死。 5 天使應hiahê婦人人講，Lín m̄免驚，因為我知lín teh chhē釘十字架ê耶穌。 6 伊無tī chia，因為伊已經koh活，照伊所講ê；lín來看主所倒ê所在。 7 也tio̍h緊緊去kā伊ê學生講，伊tùi死人中koh活，也beh事先lín去加利利，tī hia lín beh看見伊；我已經kā lín講lah。 8 In緊緊離開墓，也驚也大歡喜，走去報伊ê學生。 9 忽然耶穌tú-tio̍h in，講，平安。In進前，抱伊ê腳，拜伊。 10 耶穌就kā in講，M̄免驚，去報我ê兄弟，kah in去加利利，tī hia beh看見我。 11 婦人人去ê時，顧守ê兵有ê入城，用所經過ê事一盡報chiahê祭司頭。 12 In就kap長老聚集，saⁿ-kap參詳，用chōe-chōe銀hō͘兵，講， 13 Lín tio̍h講，阮teh睏ê時，伊ê學生暝時來偷去。 14 設使chitê tāi-chì hō͘總督聽見，阮就beh勸伊，hō͘ lín無事。 15 In the̍h hiahê銀，照所教in ê去行；chitê話就遍傳偤太人中，到tī今á日。 16 但是十一个學生去加利利，到耶穌所bat kā in tiāⁿ-tio̍h ê山。 17 看見伊，就拜伊；總是有ê僥疑。 18 耶穌近óa來對in講話，講，天頂地下ê權，已經lóng總hō͘我。 19 所以lín tio̍h去招萬百姓 來做學生，kā in行洗禮，hō͘ in歸tī父，Kiáⁿ，聖神ê名； 20 見若我所有命令lín ê，tio̍h教示in守；koh我日日kap lín tī-teh，到世間ê路尾。
1 An-hioh-ji̍t āu, chhit ji̍t ê thâu chi̍t ji̍t, thiⁿ phú-kng. Boa̍t-tāi-lia̍p ê Má-lī-a kap pa̍t ê Má-lī-a lâi beh khòaⁿ hit ê bōng. 2 Hut-jiân tōe tōa tín-tāng, in-ūi Chú ê thiⁿ-sài tùi thiⁿ lo̍h-lâi, kō khui hit tè chio̍h, lâi chē tī téng-bīn. 3 I ê bīn-māu chhin-chhiūⁿ sih-nà, saⁿ pe̍h chhin-chhiūⁿ seh. 4 Kò͘-siú ê lâng in-ūi kiaⁿ, chiū ngia̍uh-ngia̍uh-chhoah, piàn chhin-chhiūⁿ sí. 5 Thiⁿ-sài ìn hiah ê hū-jîn-lâng kóng, Lín m̄ bián kiaⁿ, in-ūi góa chai lín teh chhē tèng si̍p-jī-kè ê Iâ-so͘. 6 I bô tī chia, in-ūi I í-keng koh-oa̍h, chiàu I só͘ kóng ê; lín lâi khòaⁿ Chú só͘ tó ê só͘-chāi. 7 Iā tio̍h kín-kín khì kā I ê ha̍k-seng kóng, I tùi sí-lâng tiong koh-oa̍h, iā beh tāi-seng lín khì Ka-lī-lī, tī hia lín beh khòaⁿ-kìⁿ I; góa í-keng kā lín kóng lah. 8 In kín-kín lī-khui bōng, iā kiaⁿ iā tōa hoaⁿ-hí, cháu khì pò I ê ha̍k-seng. 9 Hut-jiân Iâ-so͘ tú-tio̍h in, kóng, Pêng-an. In chìn-chêng, phō I ê kha, pài I. 10 Iâ-so͘ chiū kā in kóng, M̄ bián kiaⁿ, khì pò góa ê hiaⁿ-tī, kah in khì Ka-lī-lī, tī hia beh khòaⁿ-kìⁿ góa. 11 Hū-jîn-lâng khì ê sî, kò͘-siú ê peng ū-ê ji̍p siâⁿ, ēng só͘ keng-kè ê sū it-chīn pò chiah ê chè-si-thâu. 12 In chiū kap tiúⁿ-ló chū-chi̍p, saⁿ-kap chham-siông, ēng chōe-chōe gûn hō͘ peng, kóng, 13 Lín tio̍h kóng, Goán teh khùn ê sî, I ê ha̍k-seng mî-sî lâi thau-khì. 14 Siat-sú chit ê tāi-chì hō͘ chóng-tok thiaⁿ-kìⁿ, goán chiū beh khǹg i, hō͘ lín bô sū. 15 In the̍h hiah ê gûn, chiàu só͘ kà in ê khì kiâⁿ; chit ê ōe chiū piàn thoân Iû-thài lâng tiong, kàu tī kin-á-ji̍t. 16 Nā-sī cha̍p-it ê ha̍k-seng khì Ka-lī-lī, kàu Iâ-so͘ só͘ bat kā in tiāⁿ-tio̍h ê soaⁿ. 17 Khòaⁿ-kìⁿ I, chiū pài I; chóng-sī ū-ê giâu-gî. 18 Iâ-so͘ kūn-óa lâi tùi in kóng ōe, kóng, Thiⁿ-téng tōe-ē ê koân, í-keng lóng-chóng hō͘ góa. 19 Só͘-í lín tio̍h khì chio bān peh-sìⁿ lâi chòe ha̍k-seng, kā in kiâⁿ sóe-lé, hō͘ in kui tī Pē, Kiáⁿ, Sèng Sîn ê miâ; 20 kìⁿ-nā góa só͘ ū bēng-lēng lín ê, tio̍h kà-sī in siú; koh góa ji̍t-ji̍t kap lín tī-teh, kàu sè-kan ê lō͘-bé.