1 俄巴底亞所得tio̍h ê默示。 主耶和華論到Í-tong講：阮tùi耶和華hia聽見消息，也有使者奉差去列國，講，起來ah，咱tio̍h起來kap伊交戰。 2 看ah，我hō͘你tī列國中做微細，hō͘人大大看輕。 3 Tiàm-tī石洞內，khiā起高ê所在ê ah，你ê心ê驕傲騙你，心內講，Chī-chūi能kā我降落地ah？ 4 你雖然升高親像鷹鳥，作巢 tī星ê中間，我beh tùi-hia kā你降落；這是耶和華講ê。 5 賊若來你hia，á是強盜暝時來，kiám m̄是偷到滿意nā-tiāⁿ？挽葡萄ê若來到你hia挽，kiám無iáu留幾粒á mah？你tú-tio̍h剪除到怎樣ah！ 6 以掃怎樣受chhiau-chhē ah！伊所khǹg ê寶物怎樣受查出ah！ 7 kap你結約ê lóng帶你到邊界；kap你和好ê欺騙你，khah贏你；食你ê米糧ê設活tauh tī你ê下面；伊ê心lóng無智識。 8 耶和華講，到hit日我kiám無tùi Í-tong除滅智慧ê人，tùi以掃ê山除滅聰明ê人？ 9 Thê-bān ah，你ê勇士beh驚惶，致到tiàm以掃ê山，ta̍k人受刣死剪除。 10 因為你暴虐你ê兄弟雅各，你beh tú-tio̍h大大見笑；你亦beh永遠受剪除。 11 當你khiā tī邊頭ê日，外人搶伊ê財物，異邦人入伊ê城門，為耶路撒冷拈鬮，hit日你親像in中間ê一个。 12 當你ê兄弟ê日，就是伊tú-tio̍h患難ê日，你m̄應該khiā-teh看；偤大人受滅ê日，你m̄應該為tio̍h án-ni來歡喜；in tú-tio̍h災難ê日，你m̄應該講大話。 13 我ê百姓tú-tio̍h災厄ê日，你m̄應該入伊ê門；in tú-tio̍h災厄ê日，你m̄應該看in teh受苦；in tú-tio̍h災厄ê日，你m̄應該摸tio̍h in ê財物。 14 你m̄應該khiā tī雙叉路，遮(cha̍h)in中間逃走ê人；in tú-tio̍h災難ê日，你m̄應該將in chhun ê人交付對敵。 15 因為耶和華辨理萬國ê日近lah；照你所行ê，也beh án-ni行tī你；你所做ê，beh歸tī你ê頭殼。 16 因為親像lín tī我ê聖山bat lim，萬國也beh親像án-ni長長lim，亦lim也吞落去，in就beh歸tī無。 17 Tī錫安山beh有逃脫ê人，亦beh成做聖；雅各家beh得tio̍h伊本有ê業。 18 雅各家beh成做火，約瑟家beh成做火燄，以掃ê家beh做稻稿，火beh燒來滅伊；以掃ê家beh無留一个；因為耶和華有講伊。 19 南方ê人beh得tio̍h以掃ê山，平洋ê人beh得tio̍h腓利士，亦beh得tio̍h Í-hoat-liân ê田，kap撒馬利亞ê田；便雅憫人beh得tio̍h Ki-lia̍t。 20 以色列軍隊chiahê受掠ê beh得tio̍h屬迦南人ê地，直到Sat-le̍k-hoat；tiàm-tī Se-hoat-la̍h受掠ê耶路撒冷人beh得tio̍h南方ê城。 21 Beh有chiahê拯救ê上錫安山，來審判以掃ê山；國度就歸耶和華。
1 Gô-pa-tí-a só͘ tit-tio̍h ê be̍k-sī. Chú Iâ-hô-hoa lūn-kàu Í-tong kóng: Goán tùi Iâ-hô-hoa hia thiaⁿ-kìⁿ siau-sit, iā ū sù-chiá hōng-chhe khì lia̍t-kok, kóng, Khí--lâi ah, lán tio̍h khí-lâi kap i kau-chiàn. 2 Khòaⁿ ah, Góa hō͘ lí tī lia̍t-kok-tiong chòe bî-sòe, hō͘ lâng tōa-tōa khòaⁿ-khin. 3 Tiàm-tī chio̍h-tōng-lāi, khiā-khí koâiⁿ ê só͘-chāi-ê ah, lí ê sim ê kiau-ngō͘ phiàn lí, sim-lāi kóng, Chī-chūi ōe kā góa kàng-lo̍h tōe ah? 4 Lí sui-jiân seng-koâiⁿ chhin-chhiūⁿ eng-chiáu, choh-siū tī chhiⁿ ê tiong-kan, Góa beh tùi-hia kā lí kàng-lo̍h; che sī Iâ-hô-hoa kóng--ê. 5 Chha̍t nā lâi lí hia, á-sī kiông-tō mî--sî lâi, kiám m̄-sī thau kàu móa-ì nā-tiāⁿ? bán phû-tô--ê nā lâi kàu lí hia bán, kiám bô iáu lâu kúi-lia̍p-á mah? lí tú-tio̍h chián-tû kàu cháiⁿ-iūⁿ ah! 6 Í-sò cháiⁿ-iūⁿ siū chhiau-chhē ah! i só͘ khǹg ê pó-mi̍h cháiⁿ-iūⁿ siū chhâ-chhut ah! 7 Kap lí kiat-iok-ê lóng tòa lí kàu pian-kài; kap lí hô-hó--ê khi-phiàn lí, khah-iâⁿ lí; chia̍h lí ê bí-niû--ê siat oa̍h-tauh tī lí ê ē-bīn; i ê sim lóng bô tì-sek. 8 Iâ-hô-hoa kóng, Kàu hit-ji̍t Góa kiám bô tùi Í-tong tû-bia̍t tì-hūi ê lâng, tùi Í-sò ê soaⁿ tû-bia̍t chhang-miâ ê lâng? 9 Thê-bān ah, lí ê ióng-sū beh kiaⁿ-hiâⁿ, tì-kàu tiàm Í-sò ê soaⁿ, ta̍k-lâng siū thâi-sí chián-tû. 10 In-ūi lí pō-gio̍k lí ê hiaⁿ-tī Ngá-kok, lí beh tú-tio̍h tōa-tōa kiàn-siàu; lí ia̍h beh éng-oán siū chián-tû. 11 Tng lí khiā tī piⁿ--thâu ê ji̍t, gōa-lâng chhiúⁿ i ê châi-bu̍t, īⁿ-pang-lâng ji̍p i ê siâⁿ-mn̂g, ūi Iâ-lō͘-sat-léng liam-khau, hit-ji̍t lí chhin-chhiūⁿ in tiong-kan ê chi̍t-ê. 12 Tng lí ê hiaⁿ-tī ê ji̍t, chiū-sī i tú-tio̍h hoān-lān ê ji̍t, lí m̄ eng-kai khiā-teh khòaⁿ; Iû-tāi lâng siū-bia̍t ê ji̍t, lí m̄ eng-kai ūi-tio̍h án-ni lâi hoaⁿ-hí; in tú-tio̍h chai-lān ê ji̍t, lí m̄ eng-kai kóng tōa-ōe. 13 Góa ê peh-sìⁿ tú-tio̍h chai-ē ê ji̍t, lí m̄ eng-kai ji̍p i ê mn̂g; in tú-tio̍h chai-ē ê ji̍t, lí m̄ eng-kai khòaⁿ in teh siū-khó͘; in tú-tio̍h chai-ē ê ji̍t, lí m̄ eng-kai bong-tio̍h in ê châi-bu̍t. 14 Lí m̄ eng-kai khiā tī siang-chhe lō͘, cha̍h in tiong-kan tô-cháu ê lâng; in tú-tio̍h chai-lān ê ji̍t, lí m̄ eng-kai chiong in chhun ê lâng kau-hù tùi-te̍k. 15 In-ūi Iâ-hô-hoa pān-lí bān-kok ê ji̍t kūn--lah; chiàu lí só͘ kiâⁿ--ê, iā beh án-ni kiâⁿ tī lí; lí só͘ chòe--ê, beh kui tī lí ê thâu-khak. 16 In-ūi chhin-chhiūⁿ lín tī Góa ê sèng-soaⁿ bat lim, bān-kok iā beh chhin-chhiūⁿ án-ni tn̂g-tn̂g lim, ia̍h lim iā thun--lo̍h-khì, in chiū beh kui tī bô. 17 Tī Sek-an soaⁿ beh ū tô-thoat ê lâng, ia̍h beh chiâⁿ-chòe sèng; Ngá-kok-ke beh tit-tio̍h i pún ū ê gia̍p. 18 Ngá-kok-ke beh chiâⁿ-chòe hé, Iok-sek ke beh chiâⁿ-chòe hé-iām, Í-sò ê ke beh chòe tiū-kó, hé beh sio lâi bia̍t i; Í-sò ê ke beh bô lâu chi̍t-ê; in-ūi Iâ-hô-hoa ū kóng i. 19 Lâm-hng ê lâng beh tit-tio̍h Í-sò ê soaⁿ, pîⁿ-iûⁿ ê lâng beh tit-tio̍h Hui-lī-sū, ia̍h beh tit-tio̍h Í-hoat-liân ê chhân, kap Sat-má-lī-a ê chhân; Piān-ngá-bín lâng beh tit-tio̍h Ki-lia̍t. 20 Í-sek-lia̍t kun-tūi chiah-ê siū-lia̍h--ê beh tit-tio̍h sio̍k Ka-lâm lâng ê tōe, ti̍t-kàu Sat-le̍k-hoat; tiàm-tī Se-hoat-la̍h siū-lia̍h ê Iâ-lō͘-sat-léng lâng beh tit-tio̍h Lâm-hng ê siâⁿ. 21 Beh ū chiah-ê chín-kiù--ê chiūⁿ Sek-an soaⁿ, lâi sím-phòaⁿ Í-sò ê soaⁿ; kok-tō͘ chiū kui Iâ-hô-hoa.