1 無行pháiⁿ人ê計謀，
無khiā罪人ê路，
無坐侮慢ê人ê位，chit號人有福氣。
2 伊所歡喜ê就是耶和華ê律法；
暝日三思ê，也是伊ê律法；
3 伊beh親像樹栽tī溪邊，
照時結果子，
伊ê葉也bōe乾去；
伊所做ê一盡興通。
4 Pháiⁿ人m̄是án-ni；
是親像粗糠hō͘風吹散。
5 所以tī審判，pháiⁿ人khiā-bōe-tiâu；
罪人tī義人ê會中，亦是án-ni。
6 因為耶和華知義人ê路，
若是pháiⁿ人ê路會滅無。
1 Bô kiâⁿ pháiⁿ-lâng ê kè-bô͘, Bô khiā chōe-jîn ê lō͘, Bô chē bú-bān ê lâng ê ūi, chit-hō lâng ū hok-khì. 2 I só͘ hoaⁿ-hí--ê chiū-sī Iâ-hô-hoa ê lu̍t-hoat; Mî-ji̍t sàm-su--ê, iā sī I ê lu̍t-hoat; 3 I beh chhin-chhiūⁿ chhiū chai tī khoe-piⁿ, Chiàu-sî kiat ké-chí, I ê hio̍h iā bōe ta--khì; I só͘ chòe--ê it-chīn heng-thong. 4 Pháiⁿ-lâng m̄-sī án-ni; Sī chhin-chhiūⁿ chho͘-khng hō͘ hong chhe-sòaⁿ. 5 Só͘-í tī sím-phòaⁿ, pháiⁿ-lâng khiā-bōe-tiâu; Chōe-jîn tī gī-lâng ê hōe-tiong, ia̍h sī án-ni. 6 In-ūi Iâ-hô-hoa chai gī-lâng ê lō͘, Nā-sī pháiⁿ-lâng ê lō͘ ōe bia̍t-bô.
1 列邦啥事喧嘩，
眾百姓啥事計謀空空ê事？
2 世上ê君王khiā起來，
掌權柄ê相kap議論，
Beh抵敵耶和華，也抵敵伊ê受抹油ê。
3 講，咱tio̍h chhoah斷in ê綑縛，
Hiat-ka̍k in ê索。
4 坐tī天頂ê beh笑，
主beh藐視in。
5 Hit時伊beh tī伊ê受氣中來對伊講，
Tī伊ê大受氣來hō͘ in驚。
6 主講，我已經設立我ê王，
Tī錫安，我ê聖山。
7 我beh傳聖旨，
耶和華bat kā我講，你是我ê kiáⁿ，
我今á日生你。
8 你求我，我就將列邦hō͘你做基業；
將地ê極頭hō͘你做產業。
9 你beh用鐵柺phah破in；
Beh kòng碎in親像燒磁人ê磁器。
10 Taⁿ lín列王tio̍h有智慧；
Lín世上ê審判官tio̍h受警戒。
11 Tio̍h用敬畏來服事耶和華，
Tio̍h用驚惶來歡喜。
12 Tio̍h用嘴chim聖Kiáⁿ，驚了伊受氣，lín就滅無tī路中。
因為伊ê受氣beh緊緊發出。
凡若óa靠伊ê，lóng是有福氣ê人。
1 Lia̍t-pang siáⁿ-sū soan-hoa, Chèng peh-sìⁿ siáⁿ-sū kè-bô͘ khang-khang ê sū? 2 Sè-chiūⁿ ê kun-ông khiā--khí-lâi, Chiáng koân-pèng--ê saⁿ-kap gī-lūn, Beh tí-te̍k Iâ-hô-hoa, iā tí-te̍k I ê siū boah-iû--ê. 3 Kóng, Lán tio̍h chhoah-tn̄g in ê khún-pa̍k, Hiat-ka̍k in ê soh. 4 Chē tī thiⁿ-téng--ê beh chhiò, Chú beh biáu-sī in. 5 Hit-sî I beh tī I ê siū-khì-tiong lâi tùi i kóng, Tī I ê tōa siū-khì lâi hō͘ in kiaⁿ. 6 Chú kóng, Góa í-keng siat-li̍p Góa ê ông, Tī Sek-an, Góa ê sèng-soaⁿ. 7 Góa beh thoân sèng-chí, Iâ-hô-hoa bat kā góa kóng, Lí sī Góa ê kiáⁿ, Góa kin-á-ji̍t siⁿ lí. 8 Lí kiû Góa, Góa chiū chiong lia̍t-pang hō͘ lí chòe ki-gia̍p; Chiong tōe ê ke̍k-thâu hō͘ lí chòe sán-gia̍p. 9 Lí beh ēng thih-koáiⁿ phah-phòa in; Beh kòng-chhùi in chhin-chhiūⁿ sio-hûi lâng ê hûi-khì. 10 Taⁿ lín lia̍t-ông tio̍h ū tì-hūi; Lín sè-chiūⁿ ê sím-phòaⁿ-koaⁿ tio̍h siū kéng-kài. 11 Tio̍h ēng kèng-ùi lâi ho̍k-sāi Iâ-hô-hoa, Tio̍h ēng kiaⁿ-hiâⁿ lâi hoaⁿ-hí. 12 Tio̍h ēng chhùi chim Sèng Kiáⁿ, kiaⁿ-liáu I siū-khì, lín chiū bia̍t-bô tī lō͘-tiong. In-ūi I ê siū-khì beh kín-kín hoat-chhut. Hoān-nā óa-khò I--ê, lóng sī ū hok-khì ê lâng.
1 大衛閃避伊ê kiáⁿ Ap-sa-liông ê時，來做ê詩。1) 耶和華ah，我ê對敵chiah-nih chōe！
Chōe-chōe人起來攻擊我。
2 Chōe-chōe人議論我講，
伊無thang得tio̍h上帝ê拯救。[Sè-la̍h]
3 總是，耶和華，你是我四圍ê藤牌；
是我ê榮光；koh是hō͘我ê頭kia̍h高ê。
4 我用我ê聲求叫耶和華，
伊tùi伊ê聖山應我。[Sè-la̍h]
5 我倒teh，我睏；我精神，
因為耶和華lóng保護我。
6 雖然千萬人起來，圍纍攻擊我，
我亦無驚。
7 耶和華ah，求你起來；
我ê上帝ah，求你拯救我，
因為你siàn我一切對敵ê嘴phóe，
Phah折pháiⁿ人ê嘴齒。
8 拯救屬tī耶和華；
願你賜福你ê百姓。[Sè-la̍h]
1 Tāi-pi̍t siám-pī i ê kiáⁿ Ap-sa-liông ê sî, lâi chòe ê si.1) Iâ-hô-hoa ah, góa ê tùi-te̍k chiah--nih chōe! Chōe-chōe lâng khí--lâi kong-kek góa. 2 Chōe-chōe lâng gī-lūn góa kóng, I bô thang tit-tio̍h Siōng-tè ê chín-kiù. [Sè-la̍h 3 Chóng-sī, Iâ-hô-hoa, Lí sī góa sì-ûi ê tîn-pâi; Sī góa ê êng-kng; koh sī hō͘ góa ê thâu kia̍h-koâiⁿ--ê. 4 Góa ēng góa ê siaⁿ kiû-kiò Iâ-hô-hoa, I tùi I ê sèng-soaⁿ ìn góa. [Sè-la̍h 5 Góa tó--teh, góa khùn; Góa cheng-sîn, in-ūi Iâ-hô-hoa lóng pó-hō͘ góa. 6 Sui-jiân chheng-bān lâng khí--lâi, ûi-lûi kong-kek góa, Góa ia̍h bô kiaⁿ. 7 Iâ-hô-hoa ah, kiû Lí khí--lâi; Góa ê Siōng-tè ah, kiû Lí chín-kiù góa, In-ūi Lí siàn góa it-chhè tùi-te̍k ê chhùi-phóe, Phah-chi̍h pháiⁿ-lâng ê chhùi-khí. 8 Chín-kiù sio̍k-tī Iâ-hô-hoa; Goān Lí sù-hok Lí ê peh-sìⁿ. [Sè-la̍h
1 大衛ê詩，交hō͘樂官；用絲絃ê樂器。1) 顯明我ê義ê上帝ah，
我求叫ê時，求你應我。
我tī困苦ê中間，你bat hō͘我寬闊。
Taⁿ求你憐憫我，來聽我ê祈禱。
2 Lín chiahê上等人ah，將我ê榮光變做凌辱，beh到tī時？
Lín意愛空虛，chhiau-chhē無影跡，beh到tī時？[Sè-la̍h]
3 Lín tio̍h知耶和華已經分別敬虔ê人做伊家己ê。
我求叫耶和華，伊beh聽我。
4 Lín tio̍h驚惶，m̄-thang犯罪；
Tī眠床裡，心tio̍h三思，亦tio̍h肅靜。[Sè-la̍h]
5 Tio̍h獻義ê祭，
亦tio̍h óa靠耶和華。
6 Chōe-chōe人講，Chī-chūi會指示阮甚麼好處？
耶和華ah，求你用你ê面ê光來照阮。
7 你hō͘我心內有歡喜，
贏過人得tio̍h chōe-chōe五穀kap新酒ê時。
8 我beh安然倒teh睏，
因為只有耶和華你hō͘我安穩khiā起。
1 Tāi-pi̍t ê si, kau hō͘ Ga̍k-koaⁿ; ēng si hiân ê ga̍k-khì.1) Hián-bêng góa ê gī ê Siōng-tè ah, góa kiû-kiò ê sî, kiû Lí ìn góa. Góa tī khùn-khó͘ ê tiong-kan, Lí bat hō͘ góa khoan-khoah. Taⁿ kiû Lí lîn-bín góa, lâi thiaⁿ góa ê kî-tó. 2 Lín chiah ê siōng-téng-lâng ah, chiong góa ê êng-kng piàn-chòe lêng-jio̍k, beh kàu tī-sî? Lín ì-ài khang-hu, chhiau-chhē bô iáⁿ-chiah, beh kàu tī-sî? [Sè-la̍h 3 Lín tio̍h chai Iâ-hô-hoa í-keng hun-piat kèng-khiân ê lâng chòe I ka-kī ê. Góa kiû-kiò Iâ-hô-hoa, I beh thiaⁿ góa. 4 Lín tio̍h kiaⁿ-hiâⁿ, m̄-thang hoān-chōe; Tī bîn-chhn̂g--nih, sim tio̍h sàm-su, ia̍h tio̍h siok-chēng. [Sè-la̍h 5 Tio̍h hiàn gī ê chè, Ia̍h tio̍h óa-khò Iâ-hô-hoa. 6 Chōe-chōe lâng kóng, Chī-chūi ōe chí-sī goán sím-mi̍h hó--chhù? Iâ-hô-hoa ah, kiû Lí ēng Lí ê bīn ê kng lâi chiò goán. 7 Lí hō͘ góa sim-lāi ū hoaⁿ-hí, Iâⁿ-kè lâng tit-tio̍h chōe-chōe gō͘-kak kap sin-chiú ê sî. 8 Góa beh an-jiân tó--teh khùn, In-ūi chí-ū Iâ-hô-hoa Lí hō͘ góa an-ún khiā-khí.
1 大衛ê詩，交hō͘樂官；用pûn ê樂器。1) 耶和華ah，求你àⁿ耳孔聽我ê話。
鑑察我ê心思。
2 我ê王，我ê上帝ah，求你àⁿ落聽我求叫ê聲； 因為我ǹg你祈禱。
3 耶和華ah，早起時你會聽我ê聲；
早起時我beh對你排列我ê心意，續beh瞭望。
4 因為你m̄是歡喜罪惡ê上帝；
Pháiⁿ-ê bōe得thang kap你同khiā起。
5 驕傲ê人bōe能khiā tī你ê面前；
做pháiⁿ ê人lóng是你所怨恨。
6 講白賊ê，你beh滅in；
Ài 刣人kap奸詭ê，lóng是耶和華所厭惡。
7 論到我，我beh憑你豐盛ê慈愛入你ê厝；
我beh chûn敬畏你ê心，ǹg你ê聖殿來敬拜。
8 耶和華ah，求你因為我ê對敵，憑你ê公義chhōa我；
Hō͘你ê路tī我ê面前正直。
9 因為in ê嘴無老實；
In ê心惡毒滿滿；
In ê嚨喉是開開ê墓；
In用舌諂媚人。
10 上帝ah，求你定in ê罪；
Hō͘ in tùi家己ê計謀跋倒。
In ê罪過真chōe，願你將in趕出；
因為in背叛你。
11 見若óa靠你ê，願in歡喜；願in永永歡喜出聲；
因為你庇佑in。
Koh願hiahê疼惜你ê名ê人，lóng tiàm-tī你來歡喜。
12 因為你beh賜福hō͘義人；
耶和華ah，你beh用恩惠，親像藤牌，四面圍伊。
1 Tāi-pi̍t ê si, kau hō͘ Ga̍k-koaⁿ; ēng pûn ê ga̍k-khì.1) Iâ-hô-hoa ah, kiû Lí àⁿ hī-khang thiaⁿ góa ê ōe. Kàm-chhat góa ê sim-su. 2 Góa ê Ông, góa ê Siōng-tè ah, Kiû Lí àⁿ-lo̍h thiaⁿ góa kiû-kiò ê siaⁿ; In-ūi góa ǹg Lí kî-tó. 3 Iâ-hô-hoa ah, chá-khí-sî Lí ōe thiaⁿ góa ê siaⁿ; Chá-khí-sî góa beh tùi Lí pâi-lia̍t góa ê sim-ì, sòa beh liâu-bāng. 4 In-ūi Lí m̄-sī hoaⁿ-hí chōe-ok ê Siōng-tè; Pháiⁿ--ê bōe-tit-thang kap Lí tâng khiā-khí. 5 Kiau-ngō͘ ê lâng bōe-ōe khiā tī Lí ê bīn-chêng; Chòe-pháiⁿ ê lâng lóng sī Lí só͘ oàn-hūn. 6 Kóng pe̍h-chha̍t--ê, Lí beh bia̍t in; Ài thâi lâng kap kan-kúi--ê, lóng sī Iâ-hô-hoa só͘ iàm-ò͘ⁿ. 7 Lūn-kàu góa, góa beh pîn Lí hong-sēng ê chû-ài ji̍p Lí ê chhù; Góa beh chûn kèng-ùi Lí ê sim, ǹg Lí ê sèng-tiān lâi kèng-pài. 8 Iâ-hô-hoa ah, kiû Lí in-ūi góa ê tùi-te̍k, pîn Lí ê kong-gī chhōa góa; Hō͘ Lí ê lō͘ tī góa ê bīn-chêng chèng-ti̍t. 9 In-ūi in ê chhùi bô láu-si̍t; In ê sim ok-to̍k móa-móa; In ê nâ-âu sī khui-khui ê bōng; In ēng chi̍h thiám-mī lâng. 10 Siōng-tè ah, kiû Lí tēng in ê chōe; Hō͘ in tùi ka-kī ê kè-bô͘ poa̍h-tó. In ê chōe-kòa chin-chōe, goān Lí chiong in kóaⁿ-chhut; In-ūi in pōe-poān Lí. 11 Kìⁿ-nā óa-khò Lí--ê, goān in hoaⁿ-hí; Goān in éng-éng hoaⁿ-hí chhut-siaⁿ; in-ūi Lí pì-iū in. Koh goān hiah ê thiàⁿ-sioh Lí ê miâ ê lâng, lóng tiàm-tī Lí lâi hoaⁿ-hí. 12 In-ūi Lí beh sù-hok hō͘ gī-lâng; Iâ-hô-hoa ah, Lí beh ēng un-hūi, chhin-chhiūⁿ tîn-pâi, sì-bīn ûi--i.
1 大衛ê詩，交hō͘樂官；用絲絃ê樂器；調用第八。1) 耶和華ah，m̄-thang tī你ê受氣中責備我，
亦m̄-thang tī你大受氣中譴責我。
2 耶和華ah，求你可憐我，因為我衰lám；
耶和華ah，求你醫治我，因為我ê骨頭ngia̍uh-ngia̍uh-chhoah。
3 我ê心大大驚惶；
耶和華ah，你beh到tī時chiah救我？
4 耶和華ah，求你oa̍t倒tńg救我ê性命；
為tio̍h你ê慈愛來救我。
5 因為死無ê中間，無記念你；
陰府ê中間，是誰感謝你？
6 我因為haiⁿ-haiⁿ-chhan來厭倦；
我ta̍k-mî流目屎，淹我ê眠床，
濕透我ê褥á。
7 我因為憂悶，目睭phah-pháiⁿ；
Koh因為我一切ê對敵，來目睭花。
8 Lín一切做pháiⁿ ê人，tio̍h離開我；
因為耶和華聽見我啼哭ê聲。
9 耶和華有聽我ê懇求；
耶和華beh接納我ê祈禱。
10 我ê對敵lóng beh見笑，大大驚惶；
In beh退倒tńg，忽然見笑。
1 Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì; tiāu, ēng tē poeh.1) Iâ-hô-hoa ah, m̄-thang tī Lí ê siū-khì-tiong chek-pī góa, Ia̍h m̄-thang tī Lí tōa siū-khì-tiong khiàn-chek góa. 2 Iâ-hô-hoa ah, kiû Lí khó-lîn góa, in-ūi góa soe-lám; Iâ-hô-hoa ah, kiû Lí i-tī góa, in-ūi góa ê kut-thâu ngia̍uh-ngia̍uh-chhoah. 3 Góa ê sim tōa-tōa kiaⁿ-hiâⁿ; Iâ-hô-hoa ah, Lí beh kàu tī-sî chiah kiù góa? 4 Iâ-hô-hoa ah, kiû Lí oa̍t-tò-tńg kiù góa ê sìⁿ-miā; Ūi-tio̍h Lí ê chû-ài lâi kiù góa. 5 In-ūi sí-bô ê tiong-kan, bô kì-liām Lí; Im-hú ê tiong-kan, chī-chūi kám-siā Lí? 6 Góa in-ūi haiⁿ-haiⁿ-chhan lâi ià-siān; Góa ta̍k-mî lâu ba̍k-sái, im góa ê bîn-chhn̂g, Sip-thàu góa ê jio̍k-á. 7 Góa in-ūi iu-būn, ba̍k-chiu phah-pháiⁿ; Koh in-ūi góa it-chhè ê tùi-te̍k, lâi ba̍k-chiu hoe. 8 Lín it-chhè chòe pháiⁿ ê lâng, tio̍h lī-khui góa; In-ūi Iâ-hô-hoa thiaⁿ-kìⁿ góa thî-khàu ê siaⁿ. 9 Iâ-hô-hoa ū thiaⁿ góa ê khún-kiû; Iâ-hô-hoa beh chiap-la̍p góa ê kî-tó. 10 Góa ê tùi-te̍k lóng beh kiàn-siàu, tōa-tōa kiaⁿ-hiâⁿ; In beh thè tò-tńg, hut-jiân kiàn-siàu.
1 大衛指便雅憫人Kó͘-si̍t ê話，ǹg耶和華唱歌；調用Si-kai-un。1) 耶和華我ê上帝ah，我óa靠你；
求你救我脫離一切追趕我ê人，救我出來。
2 驚了伊親像獅，拆裂我；
拆到碎碎，無拯救我ê。
3 耶和華我ê上帝ah，我若行chitê；
若有罪惡tī我ê手；
4 我若用pháiⁿ報hitê kap我和好ê人；
(其實連hitê無緣故kap我做對敵ê人，我亦有救伊；)
5 就chhut-chāi對敵追jip我，到jip-tio̍h；
將我ê性命踏tī土腳，將我ê榮光hē tī土粉。[Sè-la̍h]
6 耶和華ah，求你tī你ê受氣中起來，
Peh起來khiā，抵擋我ê對敵ê大受氣，
求你為tio̍h我來醒，照你所定tio̍h來審判。
7 願列邦ê會圍你；
願你倒tńg tī高位tī in ê頂面。
8 耶和華審判眾百姓；
耶和華ah，求你判斷我，照我ê義kap我心內ê正直。
9 願pháiⁿ人ê pháiⁿ到chia soah，義人你hō͘伊khiā在；
因為公義ê上帝鑑察人ê心腸。
10 我ê藤牌在tī上帝，
伊拯救心內正直ê人。
11 上帝是公義ê審判司；
亦是日日發出受氣ê上帝。
12 人若m̄反悔，伊beh磨伊ê刀；
伊有張伊ê弓，備辦便便。
13 伊備辦會hō͘人死ê ke-si，
伊所射ê箭是火箭。
14 你看，pháiⁿ人圖謀奸惡，
懷孕毒害，生出虛假。
15 伊開窟，掘hō͘伊深；
竟然跋落tī伊所開ê陷坑。
16 伊ê毒害beh 倒tńg到伊ê頭殼；
伊ê強暴beh落tī伊ê頭殼頂。
17 我beh照耶和華ê公義感謝伊；
Koh o-ló至koân耶和華ê名。
1 Tāi-pi̍t chí Piān-ngá-bín lâng Kó͘-si̍t ê ōe, ǹg Iâ-hô-hoa chhiùⁿ-koa; tiāu, ēng Si-kai-un.1) Iâ-hô-hoa góa ê Siōng-tè ah, góa óa-khò Lí; Kiû Lí kiù góa thoat-lī it-chhè tui-kóaⁿ góa ê lâng, kiù góa chhut-lâi. 2 Kiaⁿ-liáu i chhin-chhiūⁿ sai, thiah-li̍h góa; Thiah kàu chhùi-chhùi, bô chín-kiù góa--ê. 3 Iâ-hô-hoa góa ê Siōng-tè ah, góa nā kiâⁿ chit-ê; Nā ū chōe-ok tī góa ê chhiú; 4 Góa nā ēng pháiⁿ pò hit ê kap góa hô-hó ê lâng; (Kî-si̍t liân hit ê bô iân-kò͘ kap góa chòe tùi-te̍k ê lâng, góa ia̍h ū kiù i;) 5 Chiū chhut-chāi tùi-te̍k tui-jip góa, kàu jip-tio̍h; Chiong góa ê sìⁿ-miā ta̍h tī thô͘-kha, Chiong góa ê êng-kng hē tī thô͘-hún. [Sè-la̍h 6 Iâ-hô-hoa ah, kiû Lí tī Lí ê siū-khì-tiong khí--lâi, Peh--khí-lâi khiā, tí-tng góa ê tùi-te̍k ê tōa siū-khì, Kiû Lí ūi-tio̍h góa lâi chhíⁿ, chiàu Lí só͘ tiāⁿ-tio̍h lâi sím-phòaⁿ. 7 Goān lia̍t-pang ê hōe ûi Lí; Goān Lí tò-tńg tī koâiⁿ-ūi tī in ê téng-bīn. 8 Iâ-hô-hoa sím-phòaⁿ chèng peh-sìⁿ; Iâ-hô-hoa ah, kiû Lí phòaⁿ-toàn góa, chiàu góa ê gī kap góa sim-lāi ê chèng-ti̍t. 9 Goān pháiⁿ-lâng ê pháiⁿ kàu chia soah, gī-lâng Lí hō͘ i khiā-chāi; In-ūi kong-gī ê Siōng-tè kàm-chhat lâng ê sim-tn̂g. 10 Góa ê tîn-pâi chāi-tī Siōng-tè, I chín-kiù sim-lāi chèng-ti̍t ê lâng. 11 Siōng-tè sī kong-gī ê sím-phòaⁿ-si; Ia̍h sī ji̍t-ji̍t hoat-chhut siū-khì ê Siōng-tè. 12 Lâng nā m̄ hoán-hóe, I beh bôa I ê to; I ū tiuⁿ I ê keng, pī-pān piān-piān. 13 I pī-pān ōe hō͘ lâng sí ê ke-si, I só͘ siā ê chìⁿ sī hé chìⁿ. 14 Lí khòaⁿ, pháiⁿ lâng tô͘-bô͘ kan-ok, Hoâi-īn to̍k-hāi, siⁿ-chhut hu-ké. 15 I khui khut, ku̍t hō͘ i chhim; Kéng-jiân poa̍h-lo̍h tī i só͘ khui ê hām-khiⁿ. 16 I ê to̍k-hāi beh tò-tńg kàu i ê thâu-khak; I ê kiông-pō beh lo̍h tī i ê thâu-khak-téng. 17 Góa beh chiàu Iâ-hô-hoa ê kong-gī kám-siā I; Koh o-ló chì-koâiⁿ Iâ-hô-hoa ê miâ.
1 大衛ê詩，交hō͘樂官，用Ka-te̍k ê樂器；1) 耶和華阮ê主ah，
你ê名tī全地到chiah高大！
你將你ê榮光排設tī天裡。
2 你因為你ê對敵ê緣故，tùi嬰á kap食奶ê ê嘴，建立能力；
Beh hō͘對敵kap報冤ê靜靜。
3 我看你ê天，你ê手所造ê，
Kap你所排列ê月kap星；
4 世間人是甚麼，你siàu念伊？
人ê kiáⁿ是甚麼，你眷顧伊？
5 你hō͘伊比天使釐á khah輸，
Koh賞賜伊榮光尊貴做冕旒。
6 你設立伊管理你ê手所造ê，
Hē萬物tī伊ê腳下；
7 就是一切ê羊kap牛，
山野ê走獸；
8 天中ê鳥，海內ê魚，
Kap見若經過海裡ê路ê，lóng hē tī伊ê腳下。
9 耶和華，阮ê主ah，
你ê名tī全地到hiah高大！
1 Tāi-pi̍t ê si, kau hō͘ Ga̍k-koaⁿ, ēng Ka-te̍k ê ga̍k-khì;1) Iâ-hô-hoa goán ê Chú ah, Lí ê miâ tī choân-tōe kàu chiah koâiⁿ-tōa! Lí chiong Lí ê êng-kng pâi-siat tī thiⁿ--nih. 2 Lí in-ūi Lí ê tùi-te̍k ê iân-kò͘, tùi eⁿ-á kap chia̍h-leng--ê ê chhùi, kiàn-li̍p lêng-le̍k; Beh hō͘ tùi-te̍k kap pò-oan--ê chēng-chēng. 3 Góa khòaⁿ Lí ê thiⁿ, Lí ê chhiú só͘ chō--ê, Kap Lí só͘ pâi-lia̍t ê ge̍h kap chhiⁿ; 4 Sè-kan lâng sī sím-mi̍h, Lí siàu-liām i? Lâng ê kiáⁿ sī sím-mi̍h, Lí koàn-kò͘--i? 5 Lí hō͘ i pí thiⁿ-sài lî-á khah-su, Koh siúⁿ-sù i êng-kng chun-kùi chòe bián-liû. 6 Lí siat-li̍p i koán-lí Lí ê chhiú só͘ chō--ê, Hē bān-mi̍h tī i ê kha-ē; 7 Chiū-sī it-chhè ê iûⁿ kap gû, Soaⁿ-iá ê cháu-siù; 8 Thiⁿ-tiong ê chiáu, hái-lāi ê hî, Kap kìⁿ-nā keng-kè hái--nih ê lō͘ ê, lóng hē tī i ê kha-ē. 9 Iâ-hô-hoa, goán ê Chú ah, Lí ê miâ tī choân-tōe kàu hiah koâiⁿ-tōa!
1 大衛ê詩，交hō͘樂官，調用Bō͘-la̍h-piān。1) 我beh全心感謝耶和華；
我beh報揚你一切奇妙ê所做。
2 我beh在tī你歡喜快樂；
至koân ê ah，我beh o-ló你ê名。
3 我ê對敵oa̍t-tńg身退去ê時，
就tī你ê面前跋倒滅無。
4 你已經替我伸冤，替我辯明；
你坐tī寶座，照公義審判。
5 你有責備列邦，你有滅無pháiⁿ人，
你有擦滅in ê名到永遠。
6 對敵到結局，受荒廢到永遠；
你毀壞in ê城；連in ê記念亦無去。
7 獨獨耶和華坐位到永遠；
伊已經ūi審判，安置伊ê寶座。
8 伊beh照公義審判世界，
照正直判斷眾百姓。
9 耶和華koh beh做受壓迫ê人ê高台，
Tī患難ê時ê高台。
10 Bat你ê名ê人beh óa靠你；
因為，耶和華，你bē-bat棄sak chhē你ê人。
11 Tio̍h o-ló khiā起錫安ê耶和華，
將伊所行ê報揚tī眾百姓ê中間。
12 因為hitê查辦命案ê記得in；
無bōe記得困苦人ê哀求。
13 耶和華ah，求你憐憫我；
你是tùi死門救我起來ê，
Tio̍h鑑察hiahê怨恨我ê人所hō͘我tú-tio̍h ê苦難。
14 Thang hō͘我講起你一切ê好名聲；
我beh tī錫安城ê門，
為tio̍h你ê救恩來歡喜。
15 列邦陷落tī in所開ê陷坑；
In ê腳纏tī in暗靜設ê羅網。
16 耶和華已經顯明家己，伊已經行審判；
Pháiⁿ人hō͘家己ê手所做ê纏tio̍h。[Hi-kai-un, Sè-la̍h]
17 Pháiⁿ人beh歸tī陰府，
Bōe記得上帝ê列邦亦beh án-ni。
18 因為sòng-hiong人的確無永遠hō͘上帝bōe記得，
困苦ê人ê ǹg望，的確bōe永永無去。
19 耶和華ah，求你起來，m̄-thang容允人khah贏；
願列邦tī你ê面前受審判。
20 耶和華ah，求你hō͘ in驚惶；
願列邦知家己不過是人nā-tiāⁿ。[Sè-la̍h]
1 Tāi-pi̍t ê si, kau hō͘ Ga̍k-koaⁿ, tiāu, ēng Bō͘-la̍h-piān.1) Góa beh choân-sim kám-siā Iâ-hô-hoa; Góa beh pò-iông Lí it-chhè kî-biāu ê só͘-chòe. 2 Góa beh chāi-tī Lí hoaⁿ-hí khoài-lo̍k; Chì-koâiⁿ--ê ah, góa beh o-ló Lí ê miâ. 3 Góa ê tùi-te̍k oa̍t-tńg-sin thè--khì ê sî, Chiū tī Lí ê bīn-chêng poa̍h-tó bia̍t-bô. 4 Lí í-keng thòe góa sin-oan, thòe góa piān-bêng; Lí chē tī pó-chō, chiàu kong-gī sím-phòaⁿ. 5 Lí ū chek-pī lia̍t-pang, Lí ū bia̍t-bô pháiⁿ-lâng, Lí ū chhat-bia̍t in ê miâ kàu éng-oán. 6 Tùi-te̍k kàu kiat-kio̍k, siū hong-hòe kàu éng-oán; Lí húi-hoāi in ê siâⁿ; Liân in ê kì-liām ia̍h bô--khì. 7 To̍k-to̍k Iâ-hô-hoa chē-ūi kàu éng-oán; I í-keng ūi sím-phòaⁿ, an-tì I ê pó-chō. 8 I beh chiàu kong-gī sím-phòaⁿ sè-kài, Chiàu chèng-ti̍t phòaⁿ-toàn chèng peh-sìⁿ. 9 Iâ-hô-hoa koh beh chòe siū ap-pek ê lâng ê koâiⁿ-tâi, Tī hoān-lān ê sî ê koâiⁿ-tâi. 10 Bat Lí ê miâ ê lâng beh óa-khò Lí; In-ūi, Iâ-hô-hoa, Lí bē-bat khì-sak chhē Lí ê lâng. 11 Tio̍h o-ló khiā-khí Sek-an ê Iâ-hô-hoa, Chiong I só͘ kiâⁿ--ê pò-iông tī chèng peh-sìⁿ ê tiong-kan. 12 In-ūi hit ê cha-pān bēng-àn--ê kì-tit in; Bô bōe kì-tit khùn-khó͘ lâng ê ai-kiû. 13 Iâ-hô-hoa ah, kiû Lí lîn-bín góa; Lí sī tùi sí-mn̂g kiù góa khí--lâi--ê, Tio̍h kàm-chhat hiah ê oàn-hūn góa ê lâng só͘ hō͘ góa tú-tio̍h ê khó͘-lān. 14 Thang hō͘ góa kóng-khí Lí it-chhè ê hó miâ-siaⁿ; Góa beh tī Sek-an siâⁿ ê mn̂g, Ūi-tio̍h Lí ê kiù-un lâi hoaⁿ-hí. 15 Lia̍t-pang hām-lo̍h tī in só͘ khui ê hām-khiⁿ; In ê kha tîⁿ tī in àm-chīⁿ siat ê lô-bāng. 16 Iâ-hô-hoa í-keng hián-bêng ka-kī, I í-keng kiâⁿ sím-phòaⁿ; Pháiⁿ lâng hō͘ ka-kī ê chhiú só͘ chòe--ê tîⁿ--tio̍h. [Hi-kai-un. Sè-la̍h 17 Pháiⁿ-lâng beh kui tī im-hú, Bōe kì--tit Siōng-tè ê lia̍t-pang ia̍h beh án-ni. 18 In-ūi sòng-hiong-lâng tek-khak bô éng-oán hō͘ Siōng-tè bōe kì-tit, Khùn-khó͘ ê lâng ê ǹg-bāng, tek-khak bōe éng-éng bô--khì. 19 Iâ-hô-hoa ah, kiû Lí khí--lâi, m̄-thang iông-ún lâng khah-iâⁿ; Goān lia̍t-pang tī Lí ê bīn-chêng siū sím-phòaⁿ. 20 Iâ-hô-hoa ah, kiû Lí hō͘ in kiaⁿ-hiâⁿ; Goān lia̍t-pang chai ka-kī put-kò sī lâng nā-tiāⁿ. [Sè-la̍h
1 耶和華ah，你啥事遠遠teh khiā？
Tī患難ê時，你啥事tiàm密？
2 Pháiⁿ人tī驕傲ê中間，追jip困苦ê人真緊急，
願in陷落tī家己所設ê計謀。
3 Pháiⁿ人誇口伊ê心所ài，
貪心ê棄sak耶和華，koh侮慢伊。
4 Pháiⁿ人面tài驕傲，講，伊無beh究勘；
伊所想ê lóng掠做無上帝。
5 見若伊所行ê常常穩當；
你ê審判pôaⁿ過伊ê gán-kài；
論到伊一切ê對敵，伊lóng藐視in。
6 伊心內講，我的確bōe搖choah，代代bōe tú-tio̍h災難。
7 伊ê嘴滿滿咒罵，奸詐，欺壓；
伊ê舌下惡毒，虛假。
8 伊tī鄉村埋伏ê所在坐teh；
伊tī隱密ê所在害死無罪ê人，
伊ê目睭暗靜直直siòng無依óa ê人。
9 伊埋伏tī暗靜ê所在，親像獅bih tī伊ê穴；
伊埋伏beh掠sòng-hiong人；
用網圍sòng-hiong人，來掠tio̍h伊。
10 伊屈身仆teh，
無依óa ê人就倒tī伊jiáu-gê-ê下面。
11 伊心內講，上帝bōe記得；
掩伊ê面；永遠無看見。
12 耶和華ah，求你起來；上帝ah，kia̍h起你ê手；
M̄-thang bōe記得sòng-hiong人。
13 Pháiⁿ人啥事藐視上帝，
心內講，你無beh根究？
14 你已經看見；
因為惡毒怨妒，你lóng鑑察，
Beh用你ê手報應；
無依óa ê人，將本身交帶你；
你是幫贊無父ê kiáⁿ-ê。
15 願你phah折pháiⁿ人ê手骨；
論到惡人，願你根究伊ê pháiⁿ到徹底。
16 耶和華做王，tùi永遠到永遠；
列邦人tùi伊ê地lóng滅無。
17 耶和華ah，謙卑ê人ê心願，你已經聽見；
你beh備辦in ê心，你beh àⁿ耳孔來聽。
18 Beh替無父ê kiáⁿ，以及受壓迫ê人，伸冤。
Hō͘世間人無koh háng-hoah人。
1 Iâ-hô-hoa ah, Lí siáⁿ-sū hn̄g-hn̄g teh khiā? Tī hoān-lān ê sî, Lí siáⁿ-sū tiàm-ba̍t? 2 Pháiⁿ-lâng tī kiau-ngō͘ ê tiong-kan, tui-jip khùn-khó͘ ê lâng chin kín-kip, Goān in hām-lo̍h tī ka-kī só͘ siat ê kè-bô͘. 3 Pháiⁿ-lâng khoa-kháu i ê sim só͘ ài, Tham--sim--ê khì-sak Iâ-hô-hoa, koh bú-bān I. 4 Pháiⁿ-lâng bīn tài kiau-ngō͘, kóng, I bô-beh kiù-khàm; I só͘ siūⁿ--ê lóng lia̍h-chòe bô Siōng-tè. 5 Kìⁿ-nā i só͘ kiâⁿ--ê siông-siông ún-tàng; Lí ê sím-phòaⁿ pôaⁿ-kè i ê gán-kài; Lūn-kàu i it-chhè ê tùi-te̍k, i lóng biáu-sī in. 6 I sim-lāi kóng, Góa tek-khak bōe iô-choah, Tāi-tāi bōe tú-tio̍h chai-lān. 7 I ê chhùi móa-móa chiù-mē, kan-chà, khi-ap; I ê chi̍h-ē ok-to̍k, hu-ké. 8 I tī hiuⁿ-chhng bâi-ho̍k ê só͘-chāi chē-teh; I tī ún-ba̍t ê só͘-chāi hāi-sí bô chōe ê lâng, I ê ba̍k-chiu àm-chīⁿ ti̍t-ti̍t siòng bô i-óa ê lâng. 9 I bâi-ho̍k tī àm-chīⁿ ê só͘-chāi, chhin-chhiūⁿ sai bih tī i ê hia̍t; I bâi-ho̍k beh lia̍h sòng-hiong lâng; Ēng bāng ûi sòng-hiong lâng, lâi lia̍h--tio̍h i. 10 I khut-sin phak--teh, Bô i-óa ê lâng chiū tó tī i jiáu-gê--ê ē-bīn. 11 I sim-lāi kóng, Siōng-tè bōe-kì-tit; Ng I ê bīn; éng-oán bô khòaⁿ-kìⁿ. 12 Iâ-hô-hoa ah, kiû Lí khí--lâi; Siōng-tè ah, kia̍h-khí Lí ê chhiú; M̄-thang bōe kì-tit sòng-hiong-lâng. 13 Pháiⁿ-lâng siáⁿ-sū biáu-sī Siōng-tè, Sim-lāi kóng, Lí bô beh kun-kiù? 14 Lí í-keng khòaⁿ-kìⁿ; in-ūi ok-to̍k oàn-tò͘, Lí lóng kàm-chhat, beh ēng Lí ê chhiú pò-èng; Bô i-óa ê lâng, chiong pún-sin kau-tài Lí; Lí sī pang-chān bô pē ê kiáⁿ--ê. 15 Goān Lí phah-chi̍h pháiⁿ-lâng ê chhiú-kut; Lūn-kàu ok-lâng, goān Lí kun-kiù i ê pháiⁿ kàu thiat-tí. 16 Iâ-hô-hoa chòe ông, tùi éng-oán kàu éng-oán; Lia̍t-pang-lâng tùi I ê tōe lóng bia̍t-bô. 17 Iâ-hô-hoa ah, khiam-pi ê lâng ê sim-goān, Lí í-keng thiaⁿ-kìⁿ; Lí beh pī-pān in ê sim, Lí beh àⁿ hī-khang lâi thiaⁿ. 18 Beh thòe bô pē ê kiáⁿ, í-ki̍p siū ap-pek ê lâng, sin-oan. Hō͘ sè-kan-lâng bô koh háng-hoah lâng.
1 大衛ê詩，交hō͘樂官。1) 我是óa靠耶和華；
Lín啥事tùi我ê神魂講，
你tio̍h親像鳥，飛去lín ê山。
2 看ah，pháiⁿ人張弓，
安in ê箭tī弓絃，
Beh暗靜射心內正直ê人。
3 地基若倒壞，
義人iáu會做甚麼？
4 耶和華tī伊ê聖殿，
耶和華ê寶座tī天裡；
伊ê目睭teh看，伊ê目睭鑑察世間人。
5 耶和華試驗義人，
獨獨pháiⁿ人kap ài強暴ê，伊ê心怨恨伊。
6 伊beh將羅網拋tī pháiⁿ人ê身上；
有火燄、硫磺，kap熱熱ê風，做in杯中ê份額。
7 因為耶和華是公義；伊歡喜公義。
正直ê人beh見tio̍h伊ê面。
1 Tāi-pi̍t ê si, kau hō͘ Ga̍k-koaⁿ.1) Góa sī óa-khò Iâ-hô-hoa; Lín siáⁿ-sū tùi góa ê sîn-hûn kóng, Lí tio̍h chhin-chhiūⁿ chiáu, pe--khì lín ê soaⁿ. 2 Khòaⁿ ah, pháiⁿ-lâng tiuⁿ keng, An in ê chìⁿ tī keng-hiân, Beh àm-chīⁿ siā sim-lāi chèng-ti̍t ê lâng. 3 Tōe-ki nā tó-hoāi, Gī-lâng iáu ōe chòe sím-mi̍h? 4 Iâ-hô-hoa tī I ê sèng-tiān, Iâ-hô-hoa ê pó-chō tī thiⁿ--nih; I ê ba̍k-chiu teh khòaⁿ, I ê ba̍k-chiu kàm-chhat sè-kan-lâng. 5 Iâ-hô-hoa chhì-giām gī-lâng, to̍k-to̍k pháiⁿ-lâng kap ài kiông-pō--ê, I ê sim oàn-hūn i. 6 I beh chiong lô-bāng pha tī pháiⁿ-lâng ê sin-chiūⁿ; Ū hé-iām, jiû-n̂g, kap jia̍t-jia̍t ê hong, chòe in poe-tiong ê hūn-gia̍h. 7 In-ūi Iâ-hô-hoa sī kong-gī; I hoaⁿ-hí kong-gī, Chèng-ti̍t ê lâng beh kìⁿ-tio̍h I ê bīn.
1 大衛ê詩，交hō͘樂官；調用第八。1) 耶和華ah，求你拯救；因為虔誠ê人絕lah；
世間人ê中間，忠信ê人無lah。
2 人人kap厝邊講白賊；
用諂媚ê嘴唇，kap兩樣ê心來講話。
3 耶和華beh割斷諂媚ê嘴唇，以及講大話ê舌。
4 In bat講，阮beh用舌來khah贏；
阮ê嘴唇是阮ê；是誰會做阮ê主ah？
5 耶和華講，因為困苦ê人ê冤枉，kap sòng-hiong人ê吐氣， 我taⁿ beh起來，安置伊tī伊所切切欣慕穩當ê所在。
6 耶和華ê話是純全清氣ê話； 親像銀tī土ê爐鍛鍊，鍛過七pái。
7 耶和華ah，你beh保護in， Beh庇佑in，永遠脫離chit世代ê人。
8 不重用人高升tī世間人ê中間， 就pháiⁿ人ta̍k所在teh行遊。
1 Tāi-pi̍t ê si, kau hō͘ Ga̍k-koaⁿ; tiāu, ēng tē poeh.1) Iâ-hô-hoa ah, kiû Lí chín-kiù; In-ūi khiân-sêng ê lâng choa̍t--lah; sè-kan-lâng ê tiong-kan, tiong-sìn ê lâng bô--lah. 2 Lâng-lâng kap chhù-piⁿ kóng pe̍h-chha̍t; Ēng thiám-mī ê chhùi-tûn, kap nn̄g-iūⁿ ê sim lâi kóng-ōe. 3 Iâ-hô-hoa beh koah-tn̄g thiám-mī ê chhùi-tûn, Í-ki̍p kóng tōa-ōe ê chi̍h. 4 In bat kóng, Goán beh ēng chi̍h lâi khah-iâⁿ; Goán ê chhùi-tûn sī goán ê; chī-chūi ōe chòe goán ê chú ah? 5 Iâ-hô-hoa kóng, In-ūi khùn-khó͘ ê lâng ê oan-óng, kap sòng-hiong lâng ê thó͘-khùi, Góa taⁿ beh khí--lâi, an-tì i tī i só͘ chhiat-chhiat him-bō͘ ún-tàng ê só͘-chāi. 6 Iâ-hô-hoa ê ōe sī sûn-choân chheng-khì ê ōe; Chhin-chhiūⁿ gûn tī thô͘ ê lô͘ thoàn-liān, Thoàn-kè chhit-pái. 7 Iâ-hô-hoa ah, Lí beh pó-hō͘ in, Beh pì-iū in, éng-oán thoat-lī chit sè-tāi ê lâng. 8 Put-tiòng-iōng lâng ko-seng tī sè-kan-lâng ê tiong-kan, Chiū pháiⁿ-lâng ta̍k só͘-chāi teh kiâⁿ-iû.
1 大衛ê詩，交hō͘樂官。1) 耶和華ah，你bōe記得我，beh jōa久ah？到永遠mah？
你掩面m̄看我，beh jōa久ah？
2 我ê心神想來想去，我ê心thong日憂苦，beh到jōa久ah？
我ê對敵高升贏過我beh到jōa久ah？
3 耶和華我ê上帝ah，求你看顧我，聽我；
Hō͘我ê目睭光明；驚了我睏到死；
4 驚了我ê對敵講，我khah贏伊；
驚了我ê仇讎tī我搖choah ê時來歡喜。
5 總是我óa靠你ê慈愛；
我ê心因為你ê拯救來快樂。
6 我beh唱歌o-ló耶和華；
因為伊用大恩款待我。
1 Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, Lí bōe-kì-tit góa, beh jōa-kú ah? kàu éng-oán mah? Lí ng bīn m̄ khòaⁿ góa, beh jōa-kú ah? 2 Góa ê sim-sîn siūⁿ-lâi siūⁿ-khì, góa ê sim thong-ji̍t iu-khó͘, beh kàu jōa-kú ah? Góa ê tùi-te̍k ko-seng iâⁿ-kè góa beh kàu jōa-kú ah? 3 Iâ-hô-hoa góa ê Siōng-tè ah, kiû Lí khòaⁿ-kò͘ góa, thiaⁿ góa; Hō͘ góa ê ba̍k-chiu kng-bêng; kiaⁿ-liáu góa khùn kàu sí; 4 Kiaⁿ-liáu góa ê tùi-te̍k kóng, Góa khah-iâⁿ i; Kiaⁿ-liáu góa ê kiû-siû tī góa iô-choah ê sî lâi hoaⁿ-hí. 5 Chóng-sī góa óa-khò Lí ê chû-ài; Góa ê sim in-ūi Lí ê chín-kiù lâi khoài-lo̍k. 6 Góa beh chhiùⁿ-koa o-ló Iâ-hô-hoa; In-ūi I ēng tōa-un khoán-thāi góa.
1 大衛ê詩，交hō͘樂官。1) 戇人心內講，無有上帝。
In thàn邪惡，行可惡ê事；
無一人行好。
2 耶和華tùi天àⁿ落看世間人，
Beh看有明理ê，
有chhē求上帝ê á無。
3 In lóng歪chhoa̍h，一概變做污穢；
無人行好，連一个亦無。
4 做pháiⁿ ê人kiám lóng bōe曉得mah？
In吞食我ê百姓親像食餅，
亦無求叫耶和華。
5 In tī-hia大大驚惶；
因為上帝tī義人ê族類中。
6 Lín hō͘ sòng-hiong人ê計謀變做見笑，
總是耶和華做伊逃閃ê所在。
7 願以色列ê拯救tùi錫安出！
耶和華救伊受掠ê百姓倒tńg來，
Hit時雅各beh快樂，以色列beh歡喜。
1 Tāi-pi̍t ê si, kau hō͘ Ga̍k-koaⁿ.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê sū; Bô chi̍t-lâng kiâⁿ-hó. 2 Iâ-hô-hoa tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí--ê, Ū chhē-kiû Siōng-tè--ê á-bô. 3 In lóng oai-chhoa̍h, it-khài piàn-chòe ù-òe; Bô lâng kiâⁿ-hó, liân chi̍t-ê ia̍h bô. 4 Chòe-pháiⁿ ê lâng kiám lóng bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h piáⁿ, Ia̍h bô kiû-kiò Iâ-hô-hoa. 5 In tī-hia tōa-tōa kiaⁿ-hiâⁿ; In-ūi Siōng-tè tī gī-lâng ê cho̍k-lūi-tiong. 6 Lín hō͘ sòng-hiong lâng ê kè-bô͘ pìⁿ-chòe kiàn-siàu, Chóng-sī Iâ-hô-hoa chòe i tô-siám ê só͘-chāi. 7 Goān Í-sek-lia̍t ê chín-kiù tùi Sek-an chhut! Iâ-hô-hoa kiù I siū-lia̍h ê peh-sìⁿ tò-tńg-lâi, Hit-sî Ngá-kok beh khoài-lo̍k, Í-sek-lia̍t beh hoaⁿ-hí.
1 大衛ê詩。1) 耶和華ah，是誰會寄腳tī你ê布棚？
Chī-chūi會khiā起tī你ê聖山？
2 就是所行正直，所做公義，
心內講誠實ê人。
3 伊無用舌加誣人，
無pháiⁿ款待朋友，
人譭謗厝邊，伊無四界謠。
4 伊ê目睭看輕匪類，
尊重敬畏耶和華ê人。
伊chiù-chōa，雖bóng家己剋虧，亦無變換。
5 伊銀借人無為tio̍h利息；
無受pò͘賂來害無罪ê；
行chit號事ê人永永無搖choah。
1 Tāi-pi̍t ê si.1) Iâ-hô-hoa ah, chī-chūi ōe kià-kha tī Lí ê pò͘-pîⁿ? Chī-chūi ōe khiā-khí tī Lí ê Sèng-soaⁿ? 2 Chiū-sī só͘ kiâⁿ chèng-ti̍t, só͘-chòe kong-gī, Sim-lāi kóng sêng-si̍t ê lâng. 3 I bô ēng chi̍h ka-bû lâng, Bô pháiⁿ khoán-thāi pêng-iú, Lâng húi-pòng chhù-piⁿ, i bô sì-kòe iâu. 4 I ê ba̍k-chiu khòaⁿ-khin húi-lūi, Chun-tiōng kèng-ùi Iâ-hô-hoa ê lâng. I chiù-chōa, sui-bóng ka-kī khek-khui, ia̍h bô piàn-ōaⁿ. 5 I gûn chioh lâng bô ūi-tio̍h lī-sek; Bô siū pò͘-lō͘ lâi hāi bô chōe--ê; Kiâⁿ chit-hō sū ê lâng éng-éng bô iô-choah.
1 大衛金ê詩。1) 上帝ah，求你保護我；因為我óa靠你。
2 我ê靈ah，你bat對耶和華講，你是我ê主，
你以外，我無福氣。
3 論到地上聖ê百姓，
In是極其好，是我所深深歡喜ê。
4 用別ê神替換耶和華ê，in ê憂苦beh ná加添；
In獻tiān-血ê祭，我無beh獻；
我ê嘴唇亦m̄提起in ê名。
5 耶和華是我ê產業，kap我杯中ê份額；
我所應得ê，你kā我顧守。
6 所量hō͘我ê地，是tī真súi ê所在；
我ê產業實在真好。
7 我beh o-ló hitê教示我ê耶和華；
暝時我ê心腸亦指點我。
8 我常常敬奉耶和華tī我ê面前；
因為伊tī我ê chiàⁿ-pêng，我就無搖choah。
9 因為án-ni我ê心歡喜，我ê神快樂；
我ê肉身亦beh安然khiā起。
10 因為你無將我ê靈魂放下tī陰間；
亦無hō͘你ê聖ê tú-tio̍h朽爛。
11 你beh將活命ê路指示我；
Tī你ê面前有滿足ê歡喜；
Tī你ê chiàⁿ手有永遠ê快樂。
1 Tāi-pi̍t kim ê si.1) Siōng-tè ah, kiû Lí pó-hō͘ góa; in-ūi góa óa-khò Lí. 2 Góa ê lêng ah, lí bat tùi Iâ-hô-hoa kóng, Lí sī góa ê Chú, Lí í-gōa, góa bô hok-khì. 3 Lūn-kàu tōe-chiūⁿ sèng ê peh-sìⁿ, In sī ke̍k-kî hó, sī góa só͘ chhim-chhim hoaⁿ-hí ê. 4 Ēng pa̍t ê sîn thòe-ōaⁿ Iâ-hô-hoa ê, in ê iu-khó͘ beh ná ke-thiⁿ; In hiàn tiān-huih ê chè, góa bô beh hiàn; Góa ê chhùi-tûn ia̍h m̄ thê-khí in ê miâ. 5 Iâ-hô-hoa sī góa ê sán-gia̍p, kap góa poe-tiong ê hūn-gia̍h; Góa só͘ èng-tit--ê, Lí kā góa kò͘-siú. 6 Só͘ niû hō͘ góa ê tōe, sī tī chin súi ê só͘-chāi; Góa ê sán-gia̍p si̍t-chāi chin hó. 7 Góa beh o-ló hit ê kà-sī góa ê Iâ-hô-hoa; Mî--sî góa ê sim-tn̂g ia̍h chí-tiám góa. 8 Góa siông-siông kèng-hōng Iâ-hô-hoa tī góa ê bīn-chêng; In-ūi I tī góa ê chiàⁿ-pêng, góa chiū bô iô-choah. 9 In-ūi án-ni góa ê sim hoaⁿ-hí, góa ê sîn khoài-lo̍k; Góa ê jio̍k-sin ia̍h beh an-jiân khiā-khí. 10 In-ūi Lí bô chiong góa ê lêng-hûn pàng-hē tī im-kan; Ia̍h bô hō͘ Lí ê sèng--ê tú-tio̍h hiú-nōa. 11 Lí beh chiong oa̍h-miā ê lō͘ chí-sī góa; Tī Lí ê bīn-chêng ū móa-chiok ê hoaⁿ-hí; Tī Lí ê chiàⁿ-chhiú ū éng-oán ê khoài-lo̍k.
1 大衛ê祈禱。1) 耶和華ah，求你聽公義，留心聽我ê求叫；
我ê祈禱m̄是tùi奸詐ê嘴唇出；求你àⁿ耳孔來聽。
2 願我ê判詞tùi你ê面前發出，
願你ê目睭鑑察正直。
3 你已經試驗我ê心，你tī暝時鑑察我；
你鍛鍊我，無chhē-tio̍h甚麼；
我立志，hō͘我ê嘴無有過失。
4 論到人ê行做，我thàn你所講ê話，
家己謹守，無行強惡人ê路。
5 我ê腳定定行你ê路，
我ê腳bē-bat踏chhū。
6 上帝ah，論到我，我bat求叫你，因為你beh 應我；
求你àⁿ耳孔聽我ê話。
7 求你顯明你各樣ê仁慈，你是用chiàⁿ手救óa靠你ê人，
脫離hiahê起來攻擊in-ê。
8 求你保護我親像保護目睭仁，
將我蓋密tī你ê翼下。
9 Hō͘我脫離hiahê搶劫我ê pháiⁿ人，
就是圍困我，beh害我性命ê對敵。
10 In hō͘家己ê油包密；
In ê嘴講驕傲ê話。
11 In現在圍困阮ê腳步；
In注目beh chhia倒阮tī地裡。
12 In親像獅siàu想beh咬物；
Koh親像猛ê獅á-thûn bih tī暗密ê所在。
13 耶和華ah，求你起來，抵擋對敵；
將伊打倒；
用你ê刀救我ê性命脫離pháiⁿ人。
14 耶和華ah，用你ê手救我脫離世間人；
脫離hiahê tī 今生有福份ê世間人。
你將你ê財寶充滿in ê腹肚；
In有kiáⁿ兒到心滿意足；
將其餘ê財物留hō͘ in ê嬰á。
15 論到我，我beh tī義ê中間看見你ê面；
我睏醒ê時，看見你ê形容，就心滿意足。
1 Tāi-pi̍t ê kî-tó.1) Iâ-hô-hoa ah, kiû Lí thiaⁿ kong-gī, liû-sim thiaⁿ góa ê kiû-kiò; Góa ê kî-tó m̄-sī tùi kan-chà ê chhùi-tûn chhut; kiû Lí àⁿ hī-khang lâi thiaⁿ. 2 Goān góa ê phòaⁿ-sû tùi Lí ê bīn-chêng hoat-chhut, Goān Lí ê ba̍k-chiu kàm-chhat chèng-ti̍t. 3 Lí í-keng chhì-giām góa ê sim, Lí tī mî--sî kàm-chhat góa; Lí thoàn-liān góa, bô chhē--tio̍h sím-mi̍h; Góa li̍p-chì, hō͘ góa ê chhùi bô ū kè-sit. 4 Lūn-kàu lâng ê kiâⁿ-chòe, góa thàn Lí só͘ kóng ê ōe, Ka-kī kín-siú, bô kiâⁿ kiông-ok lâng ê lō͘. 5 Góa ê kha tiāⁿ-tiāⁿ kiâⁿ Lí ê lō͘, Góa ê kha bē-bat ta̍h-chhū. 6 Siōng-tè ah, lūn-kàu góa, góa bat kiû-kiò Lí, in-ūi Lí beh ìn góa; Kiû Lí àⁿ hī-khang thiaⁿ góa ê ōe. 7 Kiû Lí hián-bêng Lí koh-iūⁿ ê jîn-chû, Lí sī ēng chiàⁿ-chhiú kiù óa-khò Lí ê lâng, Thoat-lī hiah ê khí-lâi kong-kek in--ê. 8 Kiû Lí pó-hō͘ góa chhin-chhiūⁿ pó-hō͘ ba̍k-chiu-jîn, Chiong góa khàm-ba̍t tī Lí ê si̍t-ē. 9 Hō͘ góa thoat-lī hiah ê chhiúⁿ-kiap góa ê pháiⁿ-lâng, Chiū-sī ûi-khùn góa, beh hāi góa sìⁿ-miā ê tùi-te̍k. 10 In hō͘ ka-kī ê iû pau-ba̍t; In ê chhùi kóng kiau-ngō͘ ê ōe. 11 In hiān-chāi ûi-khùn goán ê kha-pō͘; In chù-ba̍k beh chhia-tó goán tī tōe--nih. 12 In chhin-chhiūⁿ sai siàu-siūⁿ beh kā mi̍h; Koh chhin-chhiūⁿ béng ê sai-á-thûn bih tī àm-ba̍t ê só͘-chāi. 13 Iâ-hô-hoa ah, kiû Lí khí--lâi, tí-tng tùi-te̍k; Chiong i táⁿ-tó; Ēng Lí ê to kiù góa ê sìⁿ-miā thoat-lī pháiⁿ-lâng. 14 Iâ-hô-hoa ah, ēng Lí ê chhiú kiù góa thoat-lī sè-kan-lâng; Thoat-lī hiah ê tī kim-seng ū hok-hūn ê sè-kan-lâng. Lí chiong Lí ê châi-pó chhiong-móa in ê pak-tó͘; In ū kiáⁿ-jî kàu sim-móa ì-chiok; Chiong kî-û ê châi-bu̍t lâu hō͘ in ê eⁿ-á. 15 Lūn-kàu góa, góa beh tī gī ê tiong-kan khòaⁿ-kìⁿ Lí ê bīn; Góa khùn-chhíⁿ ê sî, khòaⁿ-kìⁿ Lí ê hêng-iông, chiū sim-móa ì-chiok.
1 耶和華ê奴僕大衛ê詩；交hō͘樂官。Tng耶和華救伊脫離一切ê對敵，kap掃羅ê手ê日，伊對耶和華念chitê詩ê話；講，1) 耶和華我ê氣力ah，我疼你。
2 耶和華是我ê山巖，我ê山寨，我ê救主；
我ê上帝，我ê石磐，我beh óa靠伊；
伊是我ê藤牌，是救我ê角，是我ê高台。
3 我beh求叫應該o-ló ê耶和華；
我就得tio̍h救脫離我ê對敵。
4 死無ê索纏我，
匪類ê大水hō͘我驚。
5 陰間ê索圍困我，
死無ê羅網臨到我。
6 我tī苦難中祈求耶和華，
對我ê上帝求叫；
伊tùi伊ê殿內聽我ê聲，
我tī伊ê面前所求ê入tī伊ê耳孔。
7 因為伊受氣，地就搖koh choah；
山ê地基亦振動搖choah。
8 Tùi伊ê鼻孔chhèng出煙，
Tùi伊ê嘴內發出火，
土炭tùi án-ni to̍h。
9 伊hō͘天垂落低，本身臨到，
伊ê腳下烏暗暗。
10 伊騎ki-lō͘-peng teh飛；
伊用風ê翼緊緊飛。
11 伊用烏暗做bih身ê所在，做帳房來圍伊；
就是水ê烏暗，空中ê密雲。
12 因為伊頭前ê光，就伊ê密雲行過去，
有雹kap to̍h ê土炭。
13 耶和華tī天裡起雷，
至koân ê出伊ê聲；
有雹kap to̍h ê土炭。
14 伊射出伊ê箭，hō͘對敵四散；
發出chōe-chōe sih-nà，hō͘ in擾亂。
15 耶和華ah，你ê責備一下發，
你ê鼻孔ê氣一下出，
水底就出現，
大地ê根基亦露現。
16 伊tùi頂面伸手khiú我，
牽我出大水ê中間。
17 伊救我脫離我猛ê對敵，
以及hiahê怨恨我ê人；
因為in比我khah強。
18 我tú-tio̍h災難ê日，in來攻擊我；
總是耶和華是我所óa靠ê。
19 伊亦chhōa我到開闊ê所在，
伊救我，因為伊歡喜我。
20 耶和華照我ê義報答我；
照我手ê清氣報賞我。
21 因為我遵守耶和華ê道路，
Bē-bat做pháiⁿ，離開我ê上帝。
22 伊ê法律lóng tī我ê面前；
伊ê禮儀，我bē-bat棄sak。
23 我tī伊ê面前做完全，
我亦保守家己，離開我ê罪惡。
24 所以耶和華報賞我，是照我ê義；
亦是照我tī伊ê目睭前，我手ê清氣。
25 慈愛ê人，你用慈愛款待伊；
完全ê人，你用完全款待伊；
26 清氣ê人，你用清氣款待伊；
乖僻ê人，你用彎曲款待伊。
27 因為困苦ê百姓，你beh救伊；
自高ê目睭，你beh hō͘伊hê落去。
28 因為你beh點to̍h我ê燈；
耶和華我ê上帝beh照光我ê暗。
29 因為我óa靠你，衝入軍隊，
Óa靠我ê上帝跳過牆。
30 論到上帝，伊ê路是完全；
耶和華ê話是過鍛鍊ê；
見若óa靠伊ê，伊就做in ê藤牌。
31 因為耶和華以外，是誰是上帝？
阮ê上帝以外，是誰是石磐？
32 就是hitê用氣力hâ我ê腰，
Hō͘我ê路完全ê上帝。
33 伊hō͘我ê腳親像鹿母ê腳，
Koh安置我tī我高ê所在。
34 伊教示我ê手gâu交戰，
致到我ê手骨能開銅ê弓。
35 你用你救恩ê藤牌hō͘我；
你用chiàⁿ手扶持我；
你ê溫和hō͘我最大。
36 你hō͘我所踏ê地開闊；
我ê腳bē-bat踏chhū。
37 我beh追我ê對敵，亦beh jip-tio̍h in；
In iáu未滅無ê事先，我無beh 倒tńg。
38 我beh phah in thiám-thiám，致到in bōe起來；
In beh倒tī我ê腳下。
39 因為你bat用氣力hâ我ê腰，hō͘我gâu交戰；
你hō͘ hiahê起來攻擊我ê，lóng降服tī我ê下面。
40 你亦hō͘我ê對敵oa̍t-tńg身逃走；
Hō͘我能剿滅hiahê怨恨我ê人。
41 In求叫，亦無人救in；
就求叫耶和華，伊亦無應。
42 我搥in到碎碎，親像風吹ê土粉；
Piàⁿ出in，親像街路ê土糜。
43 你救我脫離百姓ê相爭；
你設立我做列邦ê頭；
我本然m̄-bat ê百姓beh服事我；
44 In一下聽見我ê名就beh順thàn我；
異邦ê人beh投降我。
45 異邦人beh衰退，
驚惶ngia̍uh-ngia̍uh-chhoah，出in ê營寨。
46 耶和華是活ê，願我ê石磐得tio̍h o-ló；
願救我ê上帝得tio̍h升高。
47 Chitê上帝就是hitê kā我伸冤，
Hō͘眾百姓降服tī我ê下面ê。
48 伊救我脫離我ê對敵，
你將我舉起khah高hiahê起來攻擊我ê；
你救我脫離強暴ê人。
49 耶和華ah，因為án-ni我beh tī列邦中感謝你；
唱歌o-ló你ê名。
50 耶和華賞賜極大ê救恩，hō͘伊所設立ê王；
施出慈愛hō͘伊受抹油ê，
就是hō͘大衛kap伊ê後裔，直到永遠。
1 Iâ-hô-hoa ê lô͘-po̍k Tāi-pi̍t ê si; kau hō͘ Ga̍k-koaⁿ. Tng Iâ-hô-hoa kiù i thoat-lī it-chhè ê tùi-te̍k, kap Sò-lô ê chhiú ê ji̍t, i tùi Iâ-hô-hoa liām chit ê si ê ōe; kóng,1) Iâ-hô-hoa góa ê khùi-la̍t ah, góa thiàⁿ Lí. 2 Iâ-hô-hoa sī góa ê soaⁿ-giâm, góa ê soaⁿ-chē, góa ê Kiù-chú; Góa ê Siōng-tè, góa ê chio̍h-pôaⁿ, góa beh óa-khò I; I sī góa ê tîn-pâi, sī kiù góa ê kak, sī góa ê koâiⁿ-tâi. 3 Góa beh kiû-kiò eng-kai o-ló ê Iâ-hô-hoa; Góa chiū tit-tio̍h kiù thoat-lī góa ê tùi-te̍k. 4 Sí-bô ê soh tîⁿ góa, Húi-lūi ê tōa-chúi hō͘ góa kiaⁿ. 5 Im-kan ê soh ûi-khùn góa, Sí-bô ê lô-bāng lîm-kàu góa. 6 Góa tī khó͘-lān-tiong kî-kiû Iâ-hô-hoa, Tùi góa ê Siōng-tè kiû-kiò; I tùi I ê tiān-lāi thiaⁿ góa ê siaⁿ, Góa tī I ê bīn-chêng só͘ kiû--ê ji̍p tī I ê hī-khang. 7 In-ūi I siū-khì, tōe chiū iô koh choah; Soaⁿ ê tōe-ki ia̍h tín-tāng iô-choah. 8 Tùi I ê phīⁿ-khang chhèng-chhut ian, Tùi I ê chhùi-lāi hoat-chhut hé, Thô͘-thòaⁿ tùi án-ni to̍h. 9 I hō͘ thiⁿ sûi-lo̍h kē, pún-sin lîm-kàu, I ê kha-ē o͘-àm-àm. 10 I khiâ ki-lō͘-peng teh pe; I ēng hong ê si̍t kín-kín pe. 11 I ēng o͘-àm chòe bih-sin ê só͘-chāi, chòe tiùⁿ-pâng lâi ûi I; Chiū-sī chúi ê o͘-àm, khong-tiong ê ba̍t-hûn. 12 In-ūi I thâu-chêng ê kng, chiū I ê ba̍t-hûn kiâⁿ kè-khì, Ū pha̍uh kap to̍h ê thô͘-thòaⁿ. 13 Iâ-hô-hoa tī thiⁿ--nih khí lûi, Chì-koâiⁿ--ê chhut I ê siaⁿ; Ū pha̍uh kap to̍h ê thô͘-thòaⁿ. 14 I siā-chhut I ê chìⁿ, hō͘ tùi-te̍k sì-sòaⁿ; Hoat-chhut chōe-chōe sih-nà, hō͘ in jiáu-loān. 15 Iâ-hô-hoa ah, Lí ê chek-pī chi̍t-ē hoat, Lí ê phīⁿ-khang ê khì chi̍t-ē chhut, Chúi-tóe chiū chhut-hiān, Tōa-tōe ê kun-ki ia̍h lō͘-hiān. 16 I tùi téng-bīn chhun-chhiú khiú góa, Khan góa chhut tōa-chúi ê tiong-kan. 17 I kiù góa thoat-lī góa béng ê tùi-te̍k, Í-ki̍p hiah ê oàn-hūn góa ê lâng; In-ūi in pí góa khah-kiông. 18 Góa tú-tio̍h chai-lān ê ji̍t, in lâi kong-kek góa; Chóng-sī Iâ-hô-hoa sī góa só͘ óa-khò--ê. 19 I ia̍h chhōa góa kàu khui-khoah ê só͘-chāi, I kiù góa, in-ūi I hoaⁿ-hí góa. 20 Iâ-hô-hoa chiàu góa ê gī pò-tap góa; Chiàu góa chhiú ê chheng-khì pò-siúⁿ góa. 21 In-ūi góa chun-siú Iâ-hô-hoa ê tō-lō͘, Bē-bat chòe-pháiⁿ, lī-khui góa ê Siōng-tè. 22 I ê hoat-lu̍t lóng tī góa ê bīn-chêng; I ê lé-gî, góa bē-bat khì-sak. 23 Góa tī I ê bīn-chêng chòe oân-choân, Góa ia̍h pó-siú ka-kī, lī-khui góa ê chōe-ok. 24 Só͘-í Iâ-hô-hoa pò-siúⁿ góa, sī chiàu góa ê gī; Ia̍h sī chiàu góa tī I ê ba̍k-chiu chêng, góa chhiú ê chheng-khì. 25 Chû-ài ê lâng, Lí ēng chû-ài khoán-thāi i; Oân-choân ê lâng, Lí ēng oân-choân khoán-thāi i; 26 Chheng-khì ê lâng, Lí ēng chheng-khì khoán-thāi i; Koāi-phiah ê lâng, Lí ēng oan-khiau khoán-thāi i. 27 In-ūi khùn-khó͘ ê peh-sìⁿ, Lí beh kiù i; Chū-ko ê ba̍k-chiu, Lí beh hō͘ i hê--lo̍h-khì. 28 In-ūi Lí beh tiám-to̍h góa ê teng; Iâ-hô-hoa góa ê Siōng-tè beh chiò-kng góa ê àm. 29 In-ūi góa óa-khò Lí, chhiong-ji̍p kun-tūi, Óa-khò góa ê Siōng-tè thiàu-kè chhiûⁿ. 30 Lūn-kàu Siōng-tè, I ê lō͘ sī oân-choân; Iâ-hô-hoa ê ōe sī kè thoàn-liān--ê; Kìⁿ-nā óa-khò I--ê, I chiū chòe in ê tîn-pâi. 31 In-ūi Iâ-hô-hoa í-gōa, chī-chūi sī Siōng-tè? Goán ê Siōng-tè í-gōa, chī-chūi sī chio̍h-pôaⁿ? 32 Chiū-sī hit ê ēng khùi-la̍t hâ góa ê io, Hō͘ góa ê lō͘ oân-choân ê Siōng-tè. 33 I hō͘ góa ê kha chhin-chhiūⁿ lo̍k-bú ê kha, Koh an-tì góa tī góa koâiⁿ ê só͘-chāi. 34 I kà-sī góa ê chhiú gâu kau-chiàn, Tì-kàu góa ê chhiú-kut ōe khui tâng ê keng. 35 Lí ēng Lí kiù-un ê tîn-pâi hō͘ góa; Lí ēng chiàⁿ-chhiú hû-chhî góa; Lí ê un-hô hō͘ góa chòe tōa. 36 Lí hō͘ góa só͘ ta̍h ê tōe khui-khoah; Góa ê kha bē-bat ta̍h-chhū. 37 Góa beh tui góa ê tùi-te̍k, ia̍h beh jip--tio̍h in; In iáu-bē bia̍t-bô ê tāi-seng, góa bô beh tò-tńg. 38 Góa beh phah in thiám-thiám, tì-kàu in bōe khí-lâi; In beh tó tī góa ê kha-ē. 39 In-ūi Lí bat ēng khùi-la̍t hâ góa ê io, hō͘ góa gâu kau-chiàn; Lí hō͘ hiah ê khí-lâi kong-kek góa--ê, lóng hâng-ho̍k tī góa ê ē-bīn. 40 Lí ia̍h hō͘ góa ê tùi-te̍k oa̍t-tńg-sin tô-cháu; Hō͘ góa ōe châu-bia̍t hiah ê oàn-hūn góa ê lâng. 41 In kiû-kiò, ia̍h bô lâng kiù in; Chiū kiû-kiò Iâ-hô-hoa, I ia̍h bô ìn. 42 Góa tûi in kàu chhùi-chhùi, chhin-chhiūⁿ hong chhe ê thô͘-hún; Piàⁿ-chhut in, chhin-chhiūⁿ ke-lō͘ ê thô͘-bê. 43 Lí kiù góa thoat-lī peh-sìⁿ ê saⁿ-chiⁿ; Lí siat-li̍p góa chòe lia̍t-pang ê thâu; Góa pún-jiân m̄-bat ê peh-sìⁿ beh ho̍k-sāi góa; 44 In chi̍t-ē thiaⁿ-kìⁿ góa ê miâ chiū beh sūn-thàn góa; Īⁿ-pang ê lâng beh tâu-hâng góa. 45 Īⁿ-pang lâng beh soe-thè, Kiaⁿ-hiâⁿ ngia̍uh-ngia̍uh-chhoah, chhut in ê iâⁿ-chē. 46 Iâ-hô-hoa sī oa̍h--ê, goān góa ê chio̍h-pôaⁿ tit-tio̍h o-ló; Goān kiù góa ê Siōng-tè tit-tio̍h seng-koâiⁿ. 47 Chit ê Siōng-tè chiū-sī hit ê kā góa sin-oan, Hō͘ chèng peh-sìⁿ hâng-ho̍k tī góa ê ē-bīn--ê. 48 I kiù góa thoat-lī góa ê tùi-te̍k, Lí chiong góa kú-khí khah koâiⁿ hiah ê khí-lâi kong-kek góa ê; Lí kiù góa thoat-lī kiông-pō ê lâng. 49 Iâ-hô-hoa ah, in-ūi án-ni góa beh tī lia̍t-pang-tiong kám-siā Lí; Chhiùⁿ-koa o-ló Lí ê miâ. 50 Iâ-hô-hoa siúⁿ-sù ke̍k-tōa ê kiù-un, hō͘ I só͘ siat-li̍p ê ông; Si-chhut chû-ài hō͘ I siū-boah-iû ê, Chiū-sī hō͘ Tāi-pi̍t kap i ê hō͘-è, ti̍t-kàu éng-oán.
1 大衛ê詩；交hō͘樂官。1) Chiahê天講起上帝ê榮光，
穹蒼報揚伊ê手所做ê。
2 Chit日tùi hit日發出言語，
Chit暝tùi hit暝傳出知識。
3 無言無語；
In ê聲無thang聽見。
4 In ê準繩遍tī天下，
In ê言語到tī地極。
上帝tī in中間為tio̍h日頭安置帳房。
5 日頭親像新kiáⁿ婿出伊ê房，
亦親像猛勇ê人歡喜走伊ê路。
6 伊tùi天ê chit-pêng出，
Se̍h到天ê hit-pêng；
無一項物khǹg密，無得tio̍h伊ê熱氣。
7 耶和華ê律法齊全，能hō͘人ê心神活起來；
耶和華ê干證確實，能hō͘戇人有智慧。
8 耶和華ê教示正直，能hō͘人ê心歡喜；
耶和華ê命令清潔，能hō͘人ê目睭光明。
9 敬畏耶和華ê道理是清氣，永遠存在；
耶和華ê判斷真實，一概是公義。
10 比金，比chōe-chōe好金，khah thang欣慕；
比蜜，比蜂房滴落來ê蜜khah甜。
11 Koh你ê奴僕tùi chiahê受警戒；
守chiahê有大賞賜。
12 Chī-chūi會知伊ê失錯ah？
求你除去我暗靜ê過失。
13 求你阻止你ê奴僕，無故意犯罪；
M̄准hitê罪惡管轄我；
我就完全，免犯大罪。
14 耶和華我ê石磐，救贖我ê主ah；
願我ê嘴所講ê，心所想ê，tī你ê面前得tio̍h接納。
1 Tāi-pi̍t ê si; kau hō͘ Ga̍k-koaⁿ.1) Chiah ê thiⁿ kóng-khí Siōng-tè ê êng-kng, Kiong-chhong pò-iông I ê chhiú só͘ chòe--ê. 2 Chit-ji̍t tùi hit-ji̍t hoat-chhut giân-gú, Chit-mî tùi hit-mî thoân-chhut chai-bat. 3 Bô giân bô gú; In ê siaⁿ bô thang thiaⁿ-kìⁿ. 4 In ê chún-chîn piàn tī thiⁿ-ē, In ê giân-gú kàu tī tōe-ke̍k. Siōng-tè tī in tiong-kan ūi-tio̍h ji̍t-thâu an-tì tiùⁿ-pâng. 5 Ji̍t-thâu chhin-chhiūⁿ sin-kiáⁿ-sài chhut i ê pâng, Ia̍h chhin-chhiūⁿ béng-ióng ê lâng hoaⁿ-hí cháu i ê lō͘. 6 I tùi thiⁿ ê chit-pêng chhut, Se̍h kàu thiⁿ ê hit-pêng; Bô chi̍t-hāng-mi̍h khǹg-ba̍t, bô tit-tio̍h i ê jia̍t-khì. 7 Iâ-hô-hoa ê lu̍t-hoat chiâu-chn̂g, ōe hō͘ lâng ê sim-sîn oa̍h--khí-lâi; Iâ-hô-hoa ê kan-chèng khak-si̍t, ōe hō͘ gōng-lâng ū tì-hūi. 8 Iâ-hô-hoa ê kà-sī chèng-ti̍t, ōe hō͘ lâng ê sim hoaⁿ-hí; Iâ-hô-hoa ê bēng-lēng chheng-kiat, ōe hō͘ lâng ê ba̍k-chiu kng-bêng. 9 Keng-ùi Iâ-hô-hoa ê tō-lí sī chheng-khì, éng-oán chûn-chāi; Iâ-hô-hoa ê phòaⁿ-toàn chin-si̍t, it-khài sī kong-gī. 10 Pí kim, pí chōe-chōe hó kim, khah thang him-bō͘; Pí bi̍t, pí phang-pâng tih--lo̍h-lâi ê bi̍t khah-tiⁿ. 11 Koh Lí ê lô͘-po̍k tùi chiah-ê siū kéng-kài; Siú chiah-ê ū tōa siúⁿ-sù. 12 Chī-chūi ōe chai i ê sit-chhò ah? Kiû Lí tû--khì góa àm-chīⁿ ê kè-sit. 13 Kiû Lí chó͘-chí Lí ê lô͘-po̍k, bô kò͘-ì hoān-chōe; M̄-chún hit ê chōe-ok koán-hat góa; Góa chiū oân-choân, bián hoān tōa-chōe. 14 Iâ-hô-hoa góa ê chio̍h-pôaⁿ, kiù-sio̍k góa ê Chú ah; Goān góa ê chhùi só͘ kóng--ê, sim só͘ siūⁿ--ê, tī Lí ê bīn-chêng tit-tio̍h chiap-la̍p.
1 大衛ê詩；交hō͘樂官。1) 願耶和華tī患難ê日聽你；
願雅各ê上帝ê名安置你tī高ê所在；
2 Tùi聖所幫贊你，
Tùi錫安扶持你。
3 記念你一切所獻ê，
接納你ê燒祭。[Sè-la̍h]
4 照你ê心所ài-ê hō͘你，
成你一切ê計畫。
5 阮beh因為你ê救恩來唱歌；
阮beh奉阮ê上帝ê名來khiā旗。
願耶和華成你一切所求ê。
6 Taⁿ我知耶和華救伊受抹油ê，
Beh對伊聖ê天聽伊；
用伊chiàⁿ手ê氣力救伊。
7 有人óa靠車，有人óa靠馬；
獨獨阮beh講起耶和華阮上帝ê名。
8 In仆落跋倒；
阮就起來khiā在在。
9 求耶和華拯救；
阮求叫ê時，願王聽阮。
1 Tāi-pi̍t ê si; kau hō͘ Ga̍k-koaⁿ.1) Goān Iâ-hô-hoa tī hoān-lān ê ji̍t thiaⁿ lí; Goān Ngá-kok ê Siōng-tè ê miâ an-tì lí tī koâiⁿ ê só͘-chāi; 2 Tùi sèng-só͘ pang-chān lí, Tùi Sek-an hû-chhî lí. 3 Kì-liām lí it-chhè só͘ hiàn--ê, Chiap-la̍p lí ê sio-chè. [Sè-la̍h 4 Chiàu lí ê sim só͘-ài-ê hō͘ lí, Chiâⁿ lí it-chhè ê kè-e̍k. 5 Goán beh in-ūi Lí ê kiù-un lâi chhiùⁿ-koa; Goán beh hōng goán ê Siōng-tè ê miâ lâi khiā-kî. Goān Iâ-hô-hoa chiâⁿ lí it-chhè só͘ kiû--ê. 6 Taⁿ góa chai Iâ-hô-hoa kiù I siū-boah-iû--ê, Beh tùi I sèng ê thiⁿ thiaⁿ--i; Ēng i chiàⁿ-chhiú ê khùi-la̍t kiù i. 7 Ū lâng óa-khò chhia, ū lâng óa-khò bé; To̍k-to̍k goán beh kóng-khí Iâ-hô-hoa goán Siōng-tè ê miâ. 8 In phak-lo̍h poa̍h-tó; Goán chiū khí--lâi khiā chāi-chāi. 9 Kiû Iâ-hô-hoa chín-kiù; Goán kiû-kiò ê sî, goān Ông thiaⁿ goán.
1 大衛ê詩；交hō͘樂官。1) 耶和華ah，王beh因為你ê氣力來歡喜。
因為你ê拯救，伊ê快樂怎樣ê大！
2 伊ê心所ài-ê，你已經hō͘伊；
伊ê嘴所求ê，你無m̄允伊。[Sè-la̍h]
3 因為你用大福氣迎接伊，
用好金ê冕旒戴tī伊ê頭殼。
4 伊對你求活命，你就hō͘伊；
就是長歲壽到tī永遠。
5 伊因為你ê拯救，有大榮光；
你koh將尊貴威嚴hē tī伊ê身上。
6 你hō͘伊有大福氣，到tī永遠；
Koh hō͘伊tī你ê面前歡喜快樂。
7 因為王óa靠耶和華；
Tī至koân--ê ê慈愛無致到搖choah。
8 你ê手beh chhē-tio̍h你一切ê對敵；
你ê chiàⁿ手beh chhē-tio̍h hiahê怨恨你ê人。
9 你受氣ê時，beh hō͘ in親像炎熱ê火爐；
耶和華beh tī伊ê大受氣中吞in，
火beh kā in燒lio去。
10 你beh tùi世上剿滅in ê kiáⁿ孫；
Tùi人ê中間剿滅in ê後裔。
11 因為in有意思beh害你；
In 設計謀，總是bōe成。
12 你beh hō͘ in oa̍t-tńg身走，
你beh開弓，射in ê面。
13 耶和華ah，願你tùi你ê氣力升高；
Án-ni阮beh吟詩o-ló你ê大權能。
1 Tāi-pi̍t ê si; kau hō͘ Ga̍k-koaⁿ.1) Iâ-hô-hoa ah, ông beh in-ūi Lí ê khùi-la̍t lâi hoaⁿ-hí. In-ūi Lí ê chín-kiù, i ê khoài-lo̍k cháiⁿ-iūⁿ ê tōa! 2 I ê sim só͘-ài--ê, Lí í-keng hō͘ i; I ê chhùi só͘ kiû--ê, Lí bô m̄ ún i. [Sè-la̍h 3 In-ūi Lí ēng tōa hok-khì ngiâ-chih i, Ēng hó-kim ê bián-liû tì tī i ê thâu-khak. 4 I tùi Lí kiû oa̍h-miā, Lí chiū hō͘ i; Chiū-sī tn̂g hè-siū kàu tī éng-oán. 5 I in-ūi Lí ê chín-kiù, ū tōa êng-kng; Lí koh chiong chun-kùi ui-giâm hē tī i ê sin-chiūⁿ. 6 Lí hō͘ i ū tōa hok-khì, kàu tī éng-oán; Koh hō͘ i tī Lí ê bīn-chêng hoaⁿ-hí khoài-lo̍k. 7 In-ūi ông óa-khò Iâ-hô-hoa; Tī Chì-koâiⁿ--ê ê chû-ài bô tì-kàu iô-choah. 8 Lí ê chhiú beh chhē-tio̍h Lí it-chhè ê tùi-te̍k; Lí ê chiàⁿ-chhiú beh chhē-tio̍h hiah ê oàn-hūn Lí ê lâng. 9 Lí siū-khì ê sî, beh hō͘ in chhin-chhiūⁿ iām-jia̍t ê hé-lô͘; Iâ-hô-hoa beh tī I ê tōa siū-khì-tiong thun--in, Hé beh kā in sio-lio--khì. 10 Lí beh tùi sè-chiūⁿ châu-bia̍t in ê kiáⁿ-sun; Tùi lâng ê tiong-kan châu-bia̍t in ê hō͘-è. 11 In-ūi in ū ì-sù beh hāi Lí; In siat kè-bô͘, chóng-sī bōe chiâⁿ. 12 Lí beh hō͘ in oa̍t-tńg-sin cháu, Lí beh khui keng, siā in ê bīn. 13 Iâ-hô-hoa ah, goān Lí tùi Lí ê khùi-la̍t seng-koâiⁿ; Án-ni goán beh gîm-si o-ló Lí ê tōa koân-lêng.
1 大衛ê詩；交hō͘樂官；調用「早起時ê鹿母」。1) 我ê上帝，我ê上帝，啥事放離我？
啥事離開遠遠，無救我；m̄聽我喉叫ê話？
2 我ê上帝ah，我日時求叫，你無聽我；
暝時求叫，我亦無靜靜。
3 總是你是聖，
你是用以色列ê o-ló做座位ê。
4 阮ê列祖óa靠你，
In óa靠你，你就拯救in。
5 In哀求你，就得tio̍h拯救；
In óa靠你就不致見笑。
6 總是我是蟲thōa，m̄是人；
Hō͘人譏刺，hō͘百姓看輕。
7 凡若看見我ê，lóng恥笑我；
In ngiauh-嘴搖頭，講，
8 Tio̍h將本身交帶耶和華，伊thang救伊；
耶和華既然歡喜伊，伊thang救伊。
9 總是你是hō͘我出老母ê胎ê，
我tī老母ê胸前，你hō͘我óa靠你。
10 我tùi胎裡出，就交帶你；
Tùi我出老母ê腹肚，你是我ê上帝。
11 M̄-thang離開我遠遠；因為患難逼近，
無有幫贊我ê。
12 有chōe-chōe牛káng圍纍我；
Pa-san勇ê牛四面圍困我。
13 In ǹg我開嘴，
親像teh peh拆，teh大聲哮ê獅。
14 我親像水piàⁿ出，我ê骨lóng thu̍t-lûn；
我ê心親像蠟，消熔tī腹內。
15 我ê精力枯焦，親像hāu-phiaⁿ-phè；
我ê舌連tī我ê chiūⁿ-kiuⁿ；
你hē我tī死地ê土粉。
16 狗ê類圍我；
Pháiⁿ黨包圍我；
In鑿我ê手，我ê腳。
17 我ê骨頭，我lóng會算得；
In teh看我，teh siòng我。
18 In分我ê衫，
Liam-khau我ê衣服。
19 耶和華ah，求你m̄-thang離開我遠遠；
我ê氣力ah，求你緊緊來幫贊我。
20 求你救我ê神魂脫離刀劍；
救我ê性命脫離狗ê類ê勢力。
21 救我脫離獅ê嘴；
你已經聽我，hō͘我脫離野牛ê角。
22 我beh報揚你ê名tī我ê兄弟；
我beh o-ló你tī會中。
23 Lín驚畏耶和華ê，tio̍h o-ló伊；
雅各ê後裔，lóng tio̍h榮光伊。
以色列ê後裔，lóng tio̍h敬畏伊。
24 因為伊無看輕，亦無厭賤，困苦人ê困苦；
亦無對伊掩面；
伊求叫伊ê時，伊就聽伊。
25 我tī大聚會ê中間所o-ló-ê，是tùi你來；
我beh tī驚畏伊ê人ê面前，謝我ê願。
26 謙卑ê人beh得tio̍h食飽；
Chhē耶和華ê人beh o-ló伊；
願lín ê心活到永遠。
27 地ê極頭lóng beh siàu念，來歸順耶和華；
列邦ê萬族lóng beh敬拜tī你ê面前。
28 因為國是耶和華ê；
伊是萬國ê主宰。
29 地上一切好漢ê人beh lim食來敬拜；
見若歸土ê人，bōe能保全性命ê，lóng beh仆拜tī祂ê面前。
30 有後裔beh服事伊；
主ê tāi-chì beh傳tī後代。
31 In beh來，亦beh傳伊ê公義，
Hō͘得beh出世ê百姓知chitê事是伊做ê。
1 Tāi-pi̍t ê si; kau hō͘ Ga̍k-koaⁿ; tiāu, ēng "Chá-khí sî ê lo̍k-bú".1) Góa ê Siōng-tè, góa ê Siōng-tè, siáⁿ-sū pàng-lī góa? Siáⁿ-sū lī-khui hn̄g-hn̄g, bô kiù góa; m̄-thiaⁿ góa âu-kiò ê ōe? 2 Góa ê Siōng-tè ah, góa ji̍t--sî kiû-kiò, Lí bô thiaⁿ góa; Mî--sî kiû-kiò, góa ia̍h bô chēng-chēng. 3 Chóng-sī Lí sī sèng, Lí sī ēng Í-sek-lia̍t ê o-ló chòe chō-ūi--ê. 4 Goán ê lia̍t-chó͘ óa-khò Lí, In óa-khò Lí, Lí chiū chín-kiù in. 5 In ai-kiû Lí, chiū tit-tio̍h chín-kiù; In óa-khò Lí chiū put-tì kiàn-siàu. 6 Chóng-sī góa sī thâng-thōa, m̄-sī lâng; Hō͘ lâng ki-chhì, hō͘ peh-sìⁿ khòaⁿ-khin. 7 Hoān-nā khòaⁿ-kìⁿ góa ê, lóng thí-chhiò góa; In ngiauh-chhùi iô-thâu, kóng, 8 Tio̍h chiong pún-sin kau-tài Iâ-hô-hoa, I thang kiù--i; Iâ-hô-hoa kì-jiân hoaⁿ-hí i, I thang kiù--i. 9 Chóng-sī Lí sī hō͘ góa chhut lāu-bú ê thai--ê, Góa tī lāu-bú ê heng-chêng, Lí hō͘ góa óa-khò Lí. 10 Góa tùi thai--nih chhut, chiū kau-tài Lí; Tùi góa chhut lāu-bú ê pak-tó͘, Lí sī góa ê Siōng-tè. 11 M̄-thang lī-khui góa hn̄g-hn̄g; in-ūi hoān-lān pek-kūn, Bô ū pang-chān góa ê. 12 Ū chōe-chōe gû-káng ûi-lûi góa; Pa-san ióng ê gû sì-bīn ûi-khùn góa. 13 In ǹg góa khui-chhùi, Chhin-chhiūⁿ teh peh-thiah, teh tōa-siaⁿ háu ê sai. 14 Góa chhin-chhiūⁿ chúi piàⁿ-chhut, Góa ê kut lóng thu̍t-lûn; Góa ê sim chhin-chhiūⁿ la̍h, Siau-iûⁿ tī pak-lāi. 15 Góa ê cheng-le̍k ko͘-tâ, chhin-chhiūⁿ hāu-phiaⁿ-phè; Góa ê chi̍h liâm tī góa ê chiūⁿ-kiuⁿ; Lí hē góa tī sí-tōe ê thô͘-hún. 16 Káu ê lūi ûi góa; Pháiⁿ-tóng pau-ûi góa; In chha̍k góa ê chhiú, góa ê kha. 17 Góa ê kut-thâu, góa lóng ōe sǹg-tit; In teh khòaⁿ góa, teh siòng góa. 18 In pun góa ê saⁿ, Liam-khau góa ê i-ho̍k. 19 Iâ-hô-hoa ah, kiû Lí m̄-thang lī-khui góa hn̄g-hn̄g; Góa ê khùi-la̍t ah, kiû Lí kín-kín lâi pang-chān góa. 20 Kiû Lí kiù góa ê sîn-hûn thoat-lī to-kiàm; Kiù góa ê sìⁿ-miā thoat-lī káu ê lūi ê sè-le̍k. 21 Kiù góa thoat-lī sai ê chhùi; Lí í-keng thiaⁿ góa, hō͘ góa thoat-lī iá-gû ê kak. 22 Góa beh pò-iông Lí ê miâ tī góa ê hiaⁿ-tī; Góa beh o-ló Lí tī hōe-tiong. 23 Lín kiaⁿ-ùi Iâ-hô-hoa--ê, tio̍h o-ló I; Ngá-kok ê hō͘-è, lóng tio̍h êng-kng I. Í-sek-lia̍t ê hō͘-è, lóng tio̍h kèng-ùi I. 24 In-ūi I bô khòaⁿ-khin, ia̍h bô iàm-chiān, khùn-khó͘ lâng ê khùn-khó͘; Ia̍h bô tùi i ng-bīn; I kiû-kiò I ê sî, I chiū thiaⁿ i. 25 Góa tī tōa chū-hōe ê tiong-kan só͘ o-ló--ê, sī tùi lí lâi; Góa beh tī kiaⁿ-ùi I ê lâng ê bīn-chêng, siā góa ê goān. 26 Khiam-pi ê lâng beh tit-tio̍h chia̍h-pá; Chhē Iâ-hô-hoa ê lâng beh o-ló I; Goān lín ê sim oa̍h kàu éng-oán. 27 Tōe ê ke̍k-thâu lóng beh siàu-liām, lâi kui-sūn Iâ-hô-hoa; Lia̍t-pang ê bān-cho̍k lóng beh kèng-pài tī Lí ê bīn-chêng. 28 In-ūi kok sī Iâ-hô-hoa ê; I sī bān-kok ê chú-cháiⁿ. 29 Tōe-chiūⁿ it-chhè hó-hàn ê lâng beh lim chia̍h lâi kèng-pài; Kìⁿ-nā kui-thó͘ ê lâng, bōe-ōe pó-choân sìⁿ-miā--ê, lóng beh phak-pài tī I ê bīn-chêng. 30 Ū hō͘-è beh ho̍k-sāi I; Chú ê tāi-chì beh thoân tī āu-tāi. 31 In beh lâi, ia̍h beh thoân I ê kong-gī, Hō͘ tit-beh chhut-sì ê peh-sìⁿ chai chit ê sū sī I chòe--ê.
1 大衛ê詩。1) 耶和華是我ê牧者，我無欠缺。
2 伊hō͘我倒tī青翠ê草埔；
Chhōa我tī安靜ê水邊。
3 伊hō͘我ê靈魂精英；
為tio̍h伊ê名，chhōa我行義ê路。
4 我雖然行過死蔭ê山谷，亦m̄驚災害；
因為你kap我tī-teh；
你ê槌，你ê柺，安慰我。
5 Tī我對敵ê面前，你kā我排設筵席；
你用油抹我ê頭殼；我ê杯滿出來。
6 恩典kap慈悲的確tè我到一世人；
我beh永遠khiā起tī耶和華ê厝。
1 Tāi-pi̍t ê si.1) Iâ-hô-hoa sī góa ê bo̍k-chiá, góa bô khiàm-kheh. 2 I hō͘ góa tó tī chhiⁿ-chhùi ê chháu-po͘; Chhōa góa tī an-chēng ê chúi-piⁿ. 3 I hō͘ góa ê lêng-hûn cheng-eng; Ūi-tio̍h I ê miâ, chhōa góa kiâⁿ gī ê lō͘. 4 Góa sui-jiân kiâⁿ-kè sí-ìm ê soaⁿ-kok, Ia̍h m̄-kiaⁿ chai-hāi; In-ūi Lí kap góa tī-teh; Lí ê thûi, Lí ê koáiⁿ, an-ùi góa. 5 Tī góa tùi-te̍k ê bīn-chêng, Lí kā góa pâi-siat iân-sia̍h; Lí ēng iû boah góa ê thâu-khak; góa ê poe móa--chhut-lâi. 6 Un-tián kap chû-pi tek-khak tè góa kàu chi̍t-sì-lâng; Góa beh éng-oán khiā-khí tī Iâ-hô-hoa ê chhù.
1 大衛ê詩。1) 地kap其中所充滿ê，
世界kap tiàm tī伊中間ê，lóng屬耶和華。
2 伊將地建立tī海ê頂面，
安置tī大水ê頂面。
3 Chī-chūi能上耶和華ê山？
Chī-chūi能khiā tī伊聖ê所在？
4 就是手清氣，心清潔；
存心無ǹg虛假，chiù-chōa無khǹg奸詭ê人。
5 Chit號人beh得tio̍h耶和華賜福；
Koh tùi救伊ê上帝得tio̍h義。
6 Chiahê是chhē耶和華ê族類，
雅各ê上帝ah，這是ài見你ê面ê人。[Sè-la̍h]
7 城門ah，kia̍h起lín ê頭；
永遠ê門ah，lín tio̍h受舉起；
榮光ê王beh入。
8 Hit-ê榮光ê王是是誰？
就是大氣力大權能ê耶和華，
Tī交戰有大權能ê耶和華。
9 城門ah，kia̍h起lín ê頭，
永遠ê門ah，lín亦tio̍h kia̍h起；
榮光ê王beh入。
10 Hit-ê榮光ê王是是誰？
萬軍ê耶和華，伊是榮光ê王。[Sè-la̍h]
1 Tāi-pi̍t ê si.1) Tōe kap kî-tiong só͘ chhiong-móa ê, Sè-kài kap tiàm tī i tiong-kan ê, lóng sio̍k Iâ-hô-hoa. 2 I chiong tōe kiàn-li̍p tī hái ê téng-bīn, An-tì tī tōa-chúi ê téng-bīn. 3 Chī-chūi ōe chiūⁿ Iâ-hô-hoa ê soaⁿ? Chī-chūi ōe khiā tī I sèng ê só͘-chāi? 4 Chiū-sī chhiú chheng-khì, sim chheng-kiat; Chûn-sim bô ǹg hu-ké, chiù-chōa bô khǹg kan-kúi ê lâng. 5 Chit-hō lâng beh tit-tio̍h Iâ-hô-hoa sù-hok; Koh tùi kiù i ê Siōng-tè tit-tio̍h gī. 6 Chiah-ê sī chhē Iâ-hô-hoa ê cho̍k-lūi, Ngá-kok ê Siōng-tè ah, che sī ài kìⁿ Lí ê bīn ê lâng. [Sè-la̍h 7 Siâⁿ-mn̂g ah, kia̍h-khí lín ê thâu; Éng-oán ê mn̂g ah, lín tio̍h siū kú-khí; Êng-kng ê Ông beh ji̍p. 8 Hit ê êng-kng ê Ông sī chī-chūi? Chiū-sī tōa khùi-la̍t tōa koân-lêng ê Iâ-hô-hoa, Tī kau-chiàn ū tōa koân-lêng ê Iâ-hô-hoa. 9 Siâⁿ-mn̂g ah, kia̍h-khí lín ê thâu, Éng-oán ê mn̂g ah, lín ia̍h tio̍h kia̍h-khí; Êng-kng ê Ông beh ji̍p. 10 Hit ê êng-kng ê Ông sī chī-chūi? Bān-kun ê Iâ-hô-hoa, I sī êng-kng ê Ông. [Sè-la̍h
1 大衛ê詩。1) 耶和華ah，我ê心神仰望你。
2 我ê上帝ah，我平素óa靠你，m̄-thang hō͘我見笑。
M̄-thang hō͘我ê對敵因為贏我來誇口。
3 見若thèng候你ê，的確無見笑；
Hiah-ê無緣故行奸詐ê，beh見笑。
4 耶和華ah，求你將你ê道路指示我，
將你ê路途教示我。
5 求你chhōa我tī你ê真理，koh 教示我；
因為你是救我ê上帝。我thong日thèng候你。
6 耶和華ah，求你記念你ê憐憫kap你ê慈愛；
因為這是古早以來常常有ê。
7 求你m̄-thang記念我少年ê罪過，kap我ê過失；
耶和華ah，求你照你ê慈愛，因為你ê恩惠記念我。
8 耶和華是好koh正直；
所以伊beh指示罪人行正路。
9 伊beh用公平引chhōa謙遜ê人，
伊beh用伊ê道路教示謙遜ê人。
10 見若守伊ê約，kap伊ê干證ê人，
耶和華款待in lóng是用慈愛誠實。
11 耶和華ah，我ê罪真重；
求你因為你ê名赦免我。
12 甚麼人敬畏耶和華？
耶和華beh指示伊所tio̍h揀ê路。
13 伊ê心神beh得tio̍h安歇；
伊ê後裔beh承接土地。
14 耶和華kap敬畏祂ê人親密；
Koh beh將祂ê約指示in。
15 我ê目睭常常ǹg耶和華；
因為伊beh hō͘我ê腳脫離羅網。
16 求你oa̍t-tńg ǹg我，可憐我；
因為我是孤單koh困苦。
17 我ê心內ê憂苦真chōe，
求你救我脫離tī我lóng總ê患難。
18 求你看我ê艱難kap我ê勞苦；
赦免我一切ê罪。
19 求你看我ê對敵，因為in真chōe；
In怨恨我真惡毒。
20 求你保護我ê性命，拯救我；
Hō͘我無見笑，因為我óa靠你。
21 願純全正直保護我，
因為我thèng候你。
22 上帝ah，求你救贖以色列，
脫離伊一切ê艱苦。
1 Tāi-pi̍t ê si.1) Iâ-hô-hoa ah, góa ê sim-sîn gióng-bōng Lí. 2 Góa ê Siōng-tè ah, góa pêng-sò͘ óa-khò Lí, m̄-thang hō͘ góa kiàn-siàu. M̄-thang hō͘ góa ê tùi-te̍k in-ūi iâⁿ góa lâi khoa-kháu. 3 Kìⁿ-nā thèng-hāu Lí--ê, tek-khak bô kiàn-siàu; Hiah ê bô iân-kò͘ kiâⁿ kan-chà--ê, beh kiàn-siàu. 4 Iâ-hô-hoa ah, kiû Lí chiong Lí ê tō-lō͘ chí-sī góa, Chiong Lí ê lō͘-tô͘ kà-sī góa. 5 Kiû Lí chhōa góa tī Lí ê chin-lí, koh kà-sī góa; In-ūi Lí sī kiù góa ê Siōng-tè. Góa thong-ji̍t thèng-hāu Lí. 6 Iâ-hô-hoa ah, kiû Lí kì-liām Lí ê lîn-bín kap Lí ê chû-ài; In-ūi che sī kó͘-chá í-lâi siông-siông ū--ê. 7 Kiû Lí m̄-thang kì-liām góa siàu-liân ê chē-kòa, kap góa ê kè-sit; Iâ-hô-hoa ah, kiû Lí chiàu Lí ê chû-ài, in-ūi Lí ê un-hūi kì-liām góa. 8 Iâ-hô-hoa sī hó koh chèng-ti̍t; Só͘-í I beh chí-sī chōe-jîn kiâⁿ chiàⁿ-lō͘. 9 I beh ēng kong-pêng ín-chhōa khiam-sùn ê lâng, I beh ēng I ê tō-lō͘ kà-sī khiam-sùn ê lâng. 10 Kìⁿ-nā siú I ê iok, kap I ê kan-chèng ê lâng, Iâ-hô-hoa khoán-thāi in lóng sī ēng chû-ài sêng-si̍t. 11 Iâ-hô-hoa ah, góa ê chōe chin tāng; Kiû Lí in-ūi Lí ê miâ sià-bián góa. 12 Sím-mi̍h lâng kèng-ùi Iâ-hô-hoa? Iâ-hô-hoa beh chí-sī i só͘ tio̍h kéng ê lō͘. 13 I ê sim-sîn beh tit-tio̍h an-hioh; I ê hō͘-è beh sêng-chiap thó͘-tōe. 14 Iâ-hô-hoa kap kèng-ùi I ê lâng chhin-bi̍t; Koh beh chiong I ê iok chí-sī in. 15 Góa ê ba̍k-chiu siông-siông ǹg Iâ-hô-hoa; In-ūi I beh hō͘ góa ê kha thoat-lī lô-bāng. 16 Kiû Lí oa̍t-tńg ǹg góa, khó-lîn góa; In-ūi góa sī ko͘-toaⁿ koh khùn-khó͘. 17 Góa ê sim-lāi ê iu-khó͘ chin chōe, Kiû Lí kiù góa thoat-lī tī góa lóng-chóng ê hoān-lān. 18 Kiû Lí khòaⁿ góa ê kan-lân kap góa ê lô-khó͘; Sià-bián góa it-chhè ê chōe. 19 Kiû Lí khòaⁿ góa ê tùi-te̍k, in-ūi in chin chōe; In oàn-hūn góa chin ok-to̍k. 20 Kiû Lí pó-hō͘ góa ê sìⁿ-miā, chín-kiù góa; Hō͘ góa bô kiàn-siàu, in-ūi góa óa-khò Lí. 21 Goān sûn-choân chèng-ti̍t pó-hō͘ góa, In-ūi góa thèng-hāu Lí. 22 Siōng-tè ah, kiû Lí kiù-sio̍k Í-sek-lia̍t, Thoat-lī i it-chhè ê kan-khó͘.
1 大衛ê詩。1) 耶和華ah，求你kā我判斷；因為我有照我ê純全來行；
我óa靠耶和華無搖choah。
2 耶和華ah，求你鑑察我，試驗我；
鍛鍊我ê心腸。
3 因為你ê慈愛常常tī我ê目睭前；
我亦有照你ê真理行。
4 我bē-bat kap hong-hàm ê人相kap坐；
亦無kap假做ê人做陣。
5 我怨恨pháiⁿ人ê會；
無beh kap惡毒ê人同坐。
6 耶和華ah，我beh洗手表明我ê無罪，
Chiah來se̍h你ê祭壇；
7 Thang hō͘人聽見感謝ê聲，
Koh thang講起你一切奇妙ê所做。
8 耶和華ah，我疼惜你所tòa ê厝；
以及你榮光所tī-teh ê所在。
9 M̄-thang將我ê靈魂 kap罪人做一下收拾去；
M̄-thang將我ê活命kap 刣人ê做一下收拾去。
10 In ê手中有奸惡；
In ê chiàⁿ手滿滿pò͘賂。
11 論到我，我beh照我ê純全來行；
求你救贖我，憐憫我。
12 我ê腳khiā tī平坦ê所在，
Tī眾會中，我beh o-ló耶和華。
1 Tāi-pi̍t ê si.1) Iâ-hô-hoa ah, kiû Lí kā góa phòaⁿ-toàn; in-ūi góa ū chiàu góa ê sûn-choân lâi kiâⁿ; Góa óa-khò Iâ-hô-hoa bô iô-choah. 2 Iâ-hô-hoa ah, kiû Lí kàm-chhat góa, chhì-giām góa; Thoàn-liān góa ê sim-tn̂g. 3 In-ūi Lí ê chû-ài siông-siông tī góa ê ba̍k-chiu-chêng; Góa ia̍h ū chiàu Lí ê chin-lí kiâⁿ. 4 Góa bē-bat kap hong-hàm ê lâng saⁿ-kap chē; Ia̍h bô kap ké-chòe ê lâng chòe-tīn. 5 Góa oàn-hūn pháiⁿ-lâng ê hōe; Bô beh kap ok-to̍k ê lâng tâng chē. 6 Iâ-hô-hoa ah, góa beh sóe chhiú piáu-bêng góa ê bô chōe, Chiah lâi se̍h Lí ê chè-tôaⁿ; 7 Thang hō͘ lâng thiaⁿ-kìⁿ kám-siā ê siaⁿ, Koh thang kóng-khí Lí it-chhè kî-biāu ê só͘-chòe. 8 Iâ-hô-hoa ah, góa thiàⁿ-sioh Lí só͘ tòa ê chhù; Í-ki̍p Lí êng-kng só͘ tī-teh ê só͘-chāi. 9 M̄-thang chiong góa ê lêng-hûn kap chōe-jîn chòe chi̍t-ē siu-si̍p--khì; M̄-thang chiong góa ê oa̍h-miā kap thâi-lâng--ê chòe chi̍t-ē siu-si̍p--khì. 10 In ê chhiú-tiong ū kan-ok; In ê chiàⁿ-chhiú móa-móa pò͘-lō͘. 11 Lūn-kàu góa, góa beh chiàu góa ê sûn-choân lâi kiâⁿ; Kiû Lí kiù-sio̍k góa, lîn-bín góa. 12 Góa ê kha khiā tī pîⁿ-tháⁿ ê só͘-chāi, Tī chèng-hōe-tiong, góa beh o-ló Iâ-hô-hoa.
1 大衛ê詩。1) 耶和華是我ê光，是我ê拯救；我beh kiaⁿ 是誰？
耶和華是我活命ê氣力；我beh kiaⁿ 是誰？
2 Hiah-ê做pháiⁿ ê人，就是我ê仇讎，我ê對敵，來攻擊我，beh食我ê肉，
Hit時in就tio̍h-tak跋倒。
3 雖然有軍兵紮營，beh攻擊我，
我ê心亦無驚惶；
雖然興起刀兵攻擊我，
我猶原自在。
4 有一項事我bat對耶和華求，我猶原致意ài得tio̍h；
就是一世人khiā起耶和華ê厝，
看伊ê榮光，siàu念伊ê殿。
5 因為患難ê日，伊beh暗靜保護我tī伊ê帳帷內；
將我khǹg tī伊布棚蓋密ê所在；舉起我tī石磐頂。
6 Taⁿ我ê頭殼得tio̍h kia̍h起，khah高tī我四面ê對敵；
我beh tī伊ê布棚獻歡喜ê祭；
我beh吟詩，亦beh唱歌o-ló耶和華。
7 耶和華ah，我出聲求叫ê時，求你聽；
Koh求你憐憫我，應我。
8 你bat講，Lín tio̍h欣慕見我ê面；hit時我ê心tùi你講，
耶和華ah，我beh欣慕見你ê面。
9 M̄-thang對我掩你ê面；
M̄-thang受氣來趕你ê奴僕；
你平素是做我ê幫贊；
救我ê上帝ah，m̄-thang放sak我，亦m̄-thang離開我。
10 因為父母離開我，
耶和華beh收留我。
11 耶和華ah，求你用你ê道路指示我；
因為我ê對敵ê緣故，chhōa我tī平坦ê路。
12 M̄-thang將我交hō͘對敵，成in ê心願；
因為lām-sám干證ê人起來攻擊我，in亦吐出兇惡ê話。
13 我若m̄信tī活人ê地得tio̍h看見耶和華ê恩惠，
就的確絕望。
14 Tio̍h thèng候耶和華，
Tio̍h勇壯，你ê心tio̍h堅固；
實在tio̍h thèng候耶和華。
1 Tāi-pi̍t ê si.1) Iâ-hô-hoa sī góa ê kng, sī góa ê chín-kiù; góa beh kiaⁿ chī-chūi? Iâ-hô-hoa sī góa oa̍h-miā ê khùi-la̍t; góa beh kiaⁿ chī-chūi? 2 Hiah ê chòe pháiⁿ ê lâng, chiū-sī góa ê kiû-siû, góa ê tùi-te̍k, lâi kong-kek góa, beh chia̍h góa ê bah, Hit-sî in chiū tio̍h-tak poa̍h-tó. 3 Sui-jiân ū kun-peng chat-iâⁿ, beh kong-kek góa, Góa ê sim ia̍h bô kiaⁿ-hiâⁿ; Sui-jiân heng-khí to-peng kong-kek góa, Góa iû-goân chū-chāi. 4 Ū chi̍t hāng sū góa bat tùi Iâ-hô-hoa kiû, góa iû-goân tì-ì ài tit-tio̍h; Chiū-sī chi̍t-sì-lâng khiā-khí Iâ-hô-hoa ê chhù, Khòaⁿ I ê êng-kng, siàu-liām I ê tiān. 5 In-ūi hoān-lān ê ji̍t, I beh àm-chīⁿ pó-hō͘ góa tī I ê tiùⁿ-ûi lāi; Chiong góa khǹg tī I pò͘-pîⁿ khàm-ba̍t ê só͘-chāi; Kú-khí góa tī chio̍h-pôaⁿ-téng. 6 Taⁿ góa ê thâu-khak tit-tio̍h kia̍h-khí, khah-koâiⁿ tī góa sì-bīn ê tùi-te̍k; Góa beh tī I ê pò͘-pîⁿ hiàn hoaⁿ-hí ê chè; Góa beh gîm-si, ia̍h beh chhiùⁿ-koa o-ló Iâ-hô-hoa. 7 Iâ-hô-hoa ah, góa chhut-siaⁿ kiû-kiò ê sî, kiû Lí thiaⁿ; Koh kiû Lí lîn-bín góa, ìn góa. 8 Lí bat kóng, Lín tio̍h him-bō͘ kìⁿ Góa ê bīn; hit-sî góa ê sim tùi Lí kóng, Iâ-hô-hoa ah, góa beh him-bō͘ kìⁿ Lí ê bīn. 9 M̄-thang tùi góa ng Lí ê bīn; M̄-thang siū-khì lâi kóaⁿ Lí ê lô͘-po̍k; Lí pêng-sò͘ sī chòe góa ê pang-chān; Kiù góa ê Siōng-tè ah, m̄-thang pàng-sak góa, ia̍h m̄-thang lī-khui góa. 10 In-ūi pē-bú lī-khui góa, Iâ-hô-hoa beh siu-liû góa. 11 Iâ-hô-hoa ah, kiû Lí ēng Lí ê tō-lō͘ chí-sī góa; In-ūi góa ê tùi-te̍k ê iân-kò͘, chhōa góa tī pîⁿ-tháⁿ ê lō͘. 12 M̄-thang chiong góa kau hō͘ tùi-te̍k, chiâⁿ in ê sim-goān; In-ūi lām-sám kan-chèng ê lâng khí-lâi kong-kek góa, in ia̍h thò͘-chhut hiong-ok ê ōe. 13 Góa nā m̄-sìn tī oa̍h-lâng ê tōe tit-tio̍h khòaⁿ-kìⁿ Iâ-hô-hoa ê un-hūi, Chiū tek-khak choa̍t-bāng. 14 Tio̍h thèng-hāu Iâ-hô-hoa, Tio̍h ióng-chòng, lí ê sim tio̍h kian-kò͘; Si̍t-chāi tio̍h thèng-hāu Iâ-hô-hoa.
1 大衛ê詩。1) 耶和華ah，我beh求叫你；
我ê石磐ah，m̄-thang無beh聽我。
若你tùi我靜靜，
我就親像入墓ê人一樣。
2 我求叫你，ǹg你ê至聖所kia̍h手ê時，求你聽我懇求ê聲。
3 M̄-thang將我kap pháiⁿ人，以及作孽ê人，做一下除去。
In kap厝邊講和平ê話，總是in ê心kan-hiám。
4 願你照in所做ê，也照in所行ê pháiⁿ-tāi，款待in；
願你照in ê手所做ê，款待in；
將in所應該tú-tio̍h-ê報應in。
5 In既然無留心tī耶和華所行ê，
以及伊ê手所做ê；
伊就beh毀壞in，無beh建立in。
6 耶和華是應該o-ló-ê，
因為伊聽我懇求ê聲。
7 耶和華是我ê氣力，亦是我ê藤牌。
我ê心óa靠伊，我就得tio̍h幫贊。
所以我ê心大歡喜；
我beh用我ê詩歌o-ló伊。
8 耶和華是伊ê百姓ê氣力；
也是伊受抹油ê得救ê衛所。
9 求你拯救你ê百姓，賜福你ê產業，
養飼in，扶持in，到tī永遠。
1 Tāi-pi̍t ê si.1) Iâ-hô-hoa ah, góa beh kiû-kiò Lí; Góa ê chio̍h-pôaⁿ ah, m̄-thang bô beh thiaⁿ góa. Nā Lí tùi góa chēng-chēng, Góa chiū chhin-chhiūⁿ ji̍p bōng ê lâng chi̍t-iūⁿ. 2 Góa kiû-kiò Lí, ǹg Lí ê chì-sèng-só͘ kia̍h chhiú ê sî, kiû Lí thiaⁿ góa khún-kiû ê siaⁿ. 3 M̄-thang chiong góa kap pháiⁿ-lâng, í-ki̍p chok-gia̍t ê lâng, chòe chi̍t-ē tû--khì. In kap chhù-piⁿ kóng hô-pêng ê ōe, chóng-sī in ê sim kan-hiám. 4 Goān Lí chiàu in só͘ chòe--ê, iā chiàu in só͘ kiâⁿ ê pháiⁿ-tāi, khoán-thāi in; Goān Lí chiàu in ê chhiú só͘ chòe--ê, khoán-thāi in; Chiong in só͘ eng-kai tú-tio̍h-ê pò-èng in. 5 In kì-jiân bô liû-sim tī Iâ-hô-hoa só͘ kiâⁿ--ê, Í-ki̍p I ê chhiú só͘ chòe--ê; I chiū beh húi-hoāi in, bô beh kiàn-li̍p in. 6 Iâ-hô-hoa sī eng-kai o-ló--ê, In-ūi I thiaⁿ góa khún-kiû ê siaⁿ. 7 Iâ-hô-hoa sī góa ê khùi-la̍t, ia̍h sī góa ê tîn-pâi. Góa ê sim óa-khò I, góa chiū tit-tio̍h pang-chān. Só͘-í góa ê sim tōa hoaⁿ-hí; Góa beh ēng góa ê si-koa o-ló I. 8 Iâ-hô-hoa sī I ê peh-sìⁿ ê khùi-la̍t; Iā sī I siū boah-iû--ê tit-kiù ê ōe-só͘. 9 Kiû Lí chín-kiù Lí ê peh-sìⁿ, sù-hok Lí ê sán-gia̍p, Iúⁿ-chhī in, hû-chhî in, kàu tī éng-oán.
1 大衛ê詩。1) 大權能ê ê kiáⁿ ah，lín tio̍h將榮光氣力歸hō͘耶和華，
歸hō͘耶和華。
2 Tio̍h將耶和華ê名所應該得tio̍h ê榮光歸hō͘伊。
用聖潔ê裝飾敬拜耶和華。
3 耶和華ê聲tī水面；
榮光ê上帝起雷；
耶和華tī chōe-chōe水ê頂面。
4 耶和華ê聲有大氣力；
耶和華ê聲滿滿威嚴。
5 耶和華ê聲phah折柏香樹；
耶和華phah碎黎巴嫩ê柏香樹。
6 伊亦hō͘伊tiô跳親像牛á；
Hō͘ 黎巴嫩kap Se-liân tiô跳親像野牛ê kiáⁿ。
7 耶和華ê聲hō͘火燄分叉。
8 耶和華ê聲振動曠野；
耶和華振動Ka-te-su ê曠野。
9 耶和華ê聲hō͘鹿母kiaⁿ-tio̍h，來生kiáⁿ；
亦hō͘樹林ê樹葉lak光光；
見若tī殿內ê lóng講，榮光。
10 大水氾濫ê時，耶和華坐teh做王，
耶和華坐teh做王，直到永遠。
11 耶和華beh賞賜氣力hō͘伊ê百姓；
耶和華beh用平安賜福伊ê百姓。
1 Tāi-pi̍t ê si.1) Tōa koân-lêng--ê ê kiáⁿ ah, lín tio̍h chiong êng-kng khùi-la̍t kui hō͘ Iâ-hô-hoa, Kui hō͘ Iâ-hô-hoa. 2 Tio̍h chiong Iâ-hô-hoa ê miâ só͘ eng-kai tit-tio̍h ê êng-kng kui hō͘ I. Ēng sèng-kiat ê chng-thāⁿ kèng-pài Iâ-hô-hoa. 3 Iâ-hô-hoa ê siaⁿ tī chúi-bīn; Êng-kng ê Siōng-tè khí lûi; Iâ-hô-hoa tī chōe-chōe chúi ê téng-bīn. 4 Iâ-hô-hoa ê siaⁿ ū tōa khùi-la̍t; Iâ-hô-hoa ê siaⁿ móa-móa ui-giâm. 5 Iâ-hô-hoa ê siaⁿ phah-chi̍h pek-hiuⁿ-chhiū; Iâ-hô-hoa phah-chhùi Lī-pa-lùn ê pek-hiuⁿ-chhiū. 6 I ia̍h hō͘ i tiô-thiàu chhin-chhiūⁿ gû-á; Hō͘ Lī-pa-lùn kap Se-liân tiô-thiàu chhin-chhiūⁿ iá-gû ê kiáⁿ. 7 Iâ-hô-hoa ê siaⁿ hō͘ hé-iām pun-chhe. 8 Iâ-hô-hoa ê siaⁿ tín-tāng khòng-iá; Iâ-hô-hoa tín-tāng Ka-te-su ê khòng-iá. 9 Iâ-hô-hoa ê siaⁿ hō͘ lo̍k-bú kiaⁿ-tio̍h, lâi siⁿ-kiáⁿ; Ia̍h hō͘ chhiū-nâ ê chhiū-hio̍h lak kng-kng; Kìⁿ-nā tī tiān-lāi--ê lóng kóng, Êng-kng. 10 Tōa-chúi hoàn-lām ê sî, Iâ-hô-hoa chē-teh chòe ông, Iâ-hô-hoa chē-teh chòe ông, ti̍t kàu éng-oán. 11 Iâ-hô-hoa beh siúⁿ-sù khùi-la̍t hō͘ I ê peh-sìⁿ; Iâ-hô-hoa beh ēng pêng-an sù-hok I ê peh-sìⁿ.
1 Chitê詩是獻宮殿ê歌；大衛做ê。1) 耶和華ah，我beh尊重你做至koân，因為你bat 提拔我，
無hō͘我ê仇讎對我誇口。
2 耶和華我ê上帝ah，
我bat求叫你，你就醫好我。
3 耶和華ah，你bat救我ê靈魂tùi陰間起來。
你hō͘我活teh，免致入墓。
4 耶和華聖ê百姓ah，lín tio̍h唱歌o-ló祂，
記念祂ê聖名來感謝祂。
5 因為伊ê受氣不過目nih久；
伊ê恩典是一生ê久；
Kui暝雖然有啼哭，
早起時就有歡喜。
6 論到我，我tī興通ê時就講，
我永bōe搖choah。
7 耶和華ah，你bat施恩，hō͘我ê山khiā在堅固，
你掩你ê面，我就擘腹。
8 耶和華ah，我求叫你；
我對耶和華求恩，講，
9 我流血，我入墓，有啥利益？
塵埃kiám會o-ló你？kiám會報揚你ê真實mah？
10 耶和華ah，求你聽我，憐憫我；
耶和華ah，求你幫贊我。
11 你已經將我ê啼哭變做跳舞；
你將我ê麻衫thǹg去，用歡喜kā我hâ；
12 Thang hō͘我ê心神唱歌，o-ló你，亦無靜靜。
耶和華我ê上帝ah，我beh感謝你，到永遠。
1 Chit ê si sī hiàn kiong-tiān ê koa; Tāi-pi̍t chòe--ê.1) Iâ-hô-hoa ah, góa beh chun-tiōng Lí chòe chì-koâiⁿ, in-ūi Lí bat thê-poa̍t góa, Bô hō͘ góa ê kiû-siû tùi góa khoa-kháu. 2 Iâ-hô-hoa góa ê Siōng-tè ah, Góa bat kiû-kiò Lí, Lí chiū i-hó góa. 3 Iâ-hô-hoa ah, Lí bat kiù góa ê lêng-hûn tùi im-kan khí--lâi. Lí hō͘ góa oa̍h-teh, bián-tì ji̍p bōng. 4 Iâ-hô-hoa sèng ê peh-sìⁿ ah, lín tio̍h chhiùⁿ-koa o-ló I, Kì-liām I ê sèng miâ lâi kám-siā I. 5 In-ūi I ê siū-khì put-kò ba̍k-nih-kú; I ê un-tián sī it-seng ê kú; Kui-mî sui-jiân ū thî-khàu, Chá-khí sî chiū ū hoaⁿ-hí. 6 Lūn-kàu góa, góa tī heng-thong ê sî chiū kóng, Góa éng bōe iô-choah. 7 Iâ-hô-hoa ah, Lí bat si-un, hō͘ góa ê soaⁿ khiā-chāi kian-kò͘, Lí ng Lí ê bīn, góa chiū peh-pak. 8 Iâ-hô-hoa ah, góa kiû-kiò Lí; Góa tùi Iâ-hô-hoa kiû un, kóng, 9 Góa lâu-huih, góa ji̍p bōng, ū siáⁿ lī-ek? Tîn-ai kiám ōe o-ló Lí? kiám ōe pò-iông Lí ê chin-si̍t mah? 10 Iâ-hô-hoa ah, kiû Lí thiaⁿ góa, lîn-bín góa; Iâ-hô-hoa ah, kiû Lí pang-chān góa. 11 Lí í-keng chiong góa ê thî-khàu piàn-chòe thiàu-bú; Lí chiong góa ê môa-saⁿ thǹg--khì, ēng hoaⁿ-hí kā góa hâ; 12 Thang hō͘ góa ê sim-sîn chhiùⁿ-koa, o-ló Lí, ia̍h bô chēng-chēng. Iâ-hô-hoa góa ê Siōng-tè ah, góa beh kám-siā Lí, kàu éng-oán.
1 大衛ê詩；交hō͘樂官。1) 耶和華ah，我óa靠你，求你hō͘我永永無見笑；
照你ê公義拯救我。
2 求你àⁿ耳孔聽我，緊緊來救我；
做我堅固ê石磐，做拯救我ê衛所。
3 因為你是我ê山巖，我ê山寨。
所以求你因為你ê名來引chhōa我，指點我。
4 人暗靜張羅網beh網我，求你救我脫離；
因為你是我ê衛所。
5 我將我ê靈魂交tī你ê手；
耶和華真實ê上帝ah，你有救贖我。
6 我怨恨hiahê信奉虛假ê人；
獨獨我óa靠耶和華。
7 我因為你ê慈愛beh歡喜快樂；
因為你有看見我ê艱苦，
知我心神ê艱難。
8 你bē-bat將我交tī對敵ê手；
你hō͘我ê腳khiā tī開闊ê所在。
9 耶和華ah，我tī患難中，求你憐憫我；
我ê目睭因為憂悶phah-pháiⁿ，我ê心神，我ê身體，亦是án-ni。
10 我ê性命因為憂苦來消無，
我ê年歲為tio̍h吐氣亦án-ni；
我ê氣力因為我ê罪惡來衰lám；
我ê骨頭亦枯焦。
11 我因為我一切ê對敵成做凌辱；
Tī我ê厝邊tau koh-khah傷重；hiahê bat我ê人lóng驚我；
Tī外面看見我ê人走閃離開我。
12 我親像死人hō͘人bōe記得，無人siàu念；
我親像破碎ê器具。
13 因為我聽見chōe-chōe人ê譭謗，四圍lóng是驚惶；
In相kap參詳攻擊我ê時，
就計謀beh害我ê性命。
14 耶和華ah，我猶原óa靠你；
我講，你是我ê上帝。
15 我ê遭遇tī你ê手；
求你救我脫離我ê對敵ê手，以及窘迫我ê人。
16 求你hō͘你ê面照光你ê奴僕；
照你ê慈愛拯救我。
17 耶和華ah，求你hō͘我無見笑；因為我有求叫你。
求你hō͘ pháiⁿ人見笑，hō͘ in tī陰間靜chauh-chauh。
18 願你hō͘ hiahê白賊ê嘴piàn啞口；
就是驕傲看輕，lām-sám侮慢義人ê。
19 敬畏你ê人，你為tio̍h in所積聚ê恩惠，
為tio̍h óa靠你ê人，tī世間人ê面前，所施行ê恩惠，怎樣hiah大！
20 你beh將in khǹg tī你ê面前隱密ê所在；免致tú-tio̍h人ê計謀；
你beh暗靜保守in tī帳帷內，免受嘴舌ê爭辯。
21 耶和華是應該o-ló-ê，
因為伊tī堅固ê城對我施出伊奇妙ê慈愛。
22 論到我，我bat著急講，tùi你ê目睭前，我受隔斷；
總是我求叫你ê時，你猶原聽我懇求ê聲。
23 耶和華聖ê百姓ah，lín lóng tio̍h疼伊；
耶和華保守誠實ê人，重重報應行驕傲ê人。
24 見若ǹg望耶和華ê人，
Lín tio̍h壯膽，lín ê心tio̍h堅固。
1 Tāi-pi̍t ê si; kau hō͘ Ga̍k-koaⁿ.1) Iâ-hô-hoa ah, góa óa-khò Lí, kiû Lí hō͘ góa éng-éng bô kiàn-siàu; Chiàu Lí ê kong-gī chín-kiù góa. 2 Kiû Lí àⁿ hī-khang thiaⁿ góa, kín-kín lâi kiù góa; Chòe góa kian-kò͘ ê chio̍h-pôaⁿ, chòe chín-kiù góa ê ōe-só͘. 3 In-ūi Lí sī góa ê soaⁿ-giâm, góa ê soaⁿ-chē. Só͘-í kiû Lí in-ūi Lí ê miâ lâi ín-chhōa góa, chí-tiám góa. 4 Lâng àm-chīⁿ tiuⁿ lô-bāng beh bāng góa, kiû Lí kiù góa thoat-lī; In-ūi Lí sī góa ê ōe-só͘. 5 Góa chiong góa ê lêng-hûn kau tī Lí ê chhiú; Iâ-hô-hoa chin-si̍t ê Siōng-tè ah, Lí ū kiù-sio̍k góa. 6 Góa oàn-hūn hiah ê sìn-hōng hu-ké ê lâng; To̍k-to̍k góa óa-khò Iâ-hô-hoa. 7 Góa in-ūi Lí ê chû-ài beh hoaⁿ-hí khoài-lo̍k; In-ūi Lí ū khòaⁿ-kìⁿ góa ê kan-khó͘, Chai góa sim-sîn ê kan-lân. 8 Lí bē-bat chiong góa kau tī tùi-te̍k ê chhiú; Lí hō͘ góa ê kha khiā tī khui-khoah ê só͘-chāi. 9 Iâ-hô-hoa ah, góa tī hoān-lān tiong, kiû Lí lîn-bín góa; Góa ê ba̍k-chiu in-ūi iu-būn phah-pháiⁿ, Góa ê sim-sîn, góa ê sin-thé, ia̍h sī án-ni. 10 Góa ê sìⁿ-miā in-ūi iu-khó͘ lâi siau-bô, Góa ê nî-hè ūi-tio̍h thó͘-khùi ia̍h án-ni; Góa ê khùi-la̍t in-ūi góa ê chōe-ok lâi soe-lám; Góa ê kut-thâu ia̍h ko͘-tâ. 11 Góa in-ūi góa it-chhè ê tùi-te̍k chiâⁿ-chòe lêng-jio̍k; Tī góa ê chhù-piⁿ-tau koh-khah siong-tiōng; hiah ê bat góa ê lâng lóng kiaⁿ góa; Tī gōa-bīn khòaⁿ-kìⁿ góa ê lâng cháu-siám lī-khui góa. 12 Góa chhin-chhiūⁿ sí-lâng hō͘ lâng bōe kì-tit, bô lâng siàu-liām; Góa chhin-chhiūⁿ phòa-chhùi ê khì-kū. 13 In-ūi góa thiaⁿ-kìⁿ chōe-chōe lâng ê húi-pòng, Sì-ûi lóng sī kiaⁿ-hiâⁿ; In saⁿ-kap chham-siông kong-kek góa ê sî, Chiū kè-bô͘ beh hāi góa ê sìⁿ-miā. 14 Iâ-hô-hoa ah, góa iû-goân óa-khò Lí; Góa kóng, Lí sī góa ê Siōng-tè. 15 Góa ê cho-gū tī Lí ê chhiú; Kiû Lí kiù góa thoat-lī góa ê tùi-te̍k ê chhiú, í-ki̍p khún-pek góa ê lâng. 16 Kiû Lí hō͘ Lí ê bīn chiò-kng Lí ê lô͘-po̍k; Chiàu Lí ê chû-ài chín-kiù góa. 17 Iâ-hô-hoa ah, kiû Lí hō͘ góa bô kiàn-siàu; in-ūi góa ū kiû-kiò Lí. Kiû Lí hō͘ pháiⁿ-lâng kiàn-siàu, hō͘ in tī im-kan chēng chauh-chauh. 18 Goān Lí hō͘ hiah ê pe̍h-chha̍t ê chhùi piàn é-káu; Chiū-sī kiau-ngō͘ khòaⁿ-khin, lām-sám bú-bān gī-lâng--ê. 19 Kèng-ùi Lí ê lâng, Lí ūi-tio̍h in só͘ chek-chū ê un-hūi, Ūi-tio̍h óa-khò Lí ê lâng, tī sè-kan-lâng ê bīn-chêng, só͘ si-hêng ê un-hūi, cháiⁿ-iūⁿ hiah tōa! 20 Lí beh chiong in khǹg tī Lí ê bīn-chêng ún-ba̍t ê só͘-chāi; bián-tì tú-tio̍h lâng ê kè-bô͘; Lí beh àm-chīⁿ pó-siú in tī tiùⁿ-ûi-lāi, bián siū chhùi-chi̍h ê cheng-piān. 21 Iâ-hô-hoa sī eng-kai o-ló--ê, In-ūi I tī kian-kò͘ ê siâⁿ tùi góa si-chhut I kî-biāu ê chû-ài. 22 Lūn-kàu góa, góa bat tio̍h-kip kóng, Tùi Lí ê ba̍k-chiu-chêng, góa siū keh-tn̄g; Chóng-sī góa kiû-kiò Lí ê sî, Lí iû-goân thiaⁿ góa khún-kiû ê siaⁿ. 23 Iâ-hô-hoa sèng ê peh-sìⁿ ah, lín lóng tio̍h thiàⁿ I; Iâ-hô-hoa pó-siú sêng-si̍t ê lâng, Tāng-tāng pò-èng kiâⁿ kiau-ngō͘ ê lâng. 24 Kìⁿ-nā ǹg-bāng Iâ-hô-hoa ê lâng, Lín tio̍h chòng-táⁿ, lín ê sim tio̍h kian-kò͘.
1 大衛ê教示ê詩。1) 過失得tio̍h赦免，罪過得tio̍h遮蓋ê，這人有福氣。 2 耶和華無算伊做有罪，伊ê心無奸詐ê，這人有福氣。 3 我靜靜ê時，我ê骨頭枯焦； 因為我thong日大聲哮。 4 因為暝日你ê手重重chhi̍h我； 我ê精液變親像夏天ê乾燥。[Sè-la̍h] 5 我對你排列我ê罪過，無隱瞞我ê罪惡； 我講，我beh對耶和華承認我ê過失； 你就赦免我犯法ê罪。[Sè-la̍h] 6 因為án-ni，見若虔誠ê人，tī thang chhē-tio̍h你ê時，tio̍h祈禱你。 大水氾濫ê時，的確bōe到伊hia。 7 你是我閃bih ê所在；你beh庇佑我脫離艱苦； 你beh用得救ê歌四面圍我。[Sè-la̍h] 8 我beh教示你，指示你應該行ê路； 我beh注目看你，來勸解你。 9 M̄-thang親像bé，lô，in無知識； Tio̍h用bé-ka-kiuⁿ bé-le̍k-soh約束in， 若無，in就m̄ óa近你。 10 Pháiⁿ人受chōe-chōe苦難； 獨獨óa靠耶和華ê人beh有慈愛四面圍伊。 11 Lín義人ah，tio̍h因為耶和華來歡喜快樂； 心正直ê人ah，lín tio̍h出歡喜ê聲。
1 Tāi-pi̍t ê kà-sī ê si.1) Kè-sit tit-tio̍h sià-bián, chōe-kòa tit-tio̍h jia-khàm--ê, che lâng ū hok-khì. 2 Iâ-hô-hoa bô sǹg i chòe ū chōe, I ê sim bô kan-chà--ê, che lâng ū hok-khì. 3 Góa chēng-chēng ê sî, góa ê kut-thâu ko͘-tâ; In-ūi góa thong-ji̍t tōa-siaⁿ háu. 4 In-ūi mî-ji̍t Lí ê chhiú tāng-tāng chhi̍h góa; Góa ê cheng-e̍k pìⁿ chhin-chhiūⁿ hē-thiⁿ ê ta-sò. [Sè-la̍h 5 Góa tùi Lí pâi-lia̍t góa ê chōe-kòa, bô ún-môa góa ê chōe-ok; Góa kóng, Góa beh tùi Iâ-hô-hoa sêng-jīn góa ê kè-sit; Lí chiū sià-bián góa hoān-hoat ê chōe. [Sè-la̍h 6 In-ūi án-ni, kìⁿ-nā khiân-sêng ê lâng, tī thang chhē--tio̍h Lí ê sî, tio̍h kî-tó Lí. Tōa-chúi hoàn-lām ê sî, tek-khak bōe kàu i hia. 7 Lí sī góa siám-bih ê só͘-chāi; Lí beh pì-iū góa thoat-lī kan-khó͘; Lí beh ēng tit-kiù ê koa sì-bīn ûi góa. [Sè-la̍h 8 Góa beh kà-sī lí, chí-sī lí eng-kai kiâⁿ ê lō͘; Góa beh chù-ba̍k khòaⁿ lí, lâi khoàn-kài lí. 9 M̄-thang chhin-chhiūⁿ bé, lô, in bô tì-sek; Tio̍h ēng bé-ka-kiuⁿ bé-le̍k-soh iok-sok--in, Nā bô, in chiū m̄ óa-kūn lí. 10 Pháiⁿ-lâng siū chōe-chōe khó͘-lān; to̍k-to̍k óa-khò Iâ-hô-hoa ê lâng beh ū chû-ài sì-bīn ûi i. 11 Lín gī-lâng ah, tio̍h in-ūi Iâ-hô-hoa lâi hoaⁿ-hí khoài-lo̍k; Sim chèng-ti̍t ê lâng ah, lín tio̍h chhut hoaⁿ-hí ê siaⁿ.
1 Lín義人ah，tio̍h因為耶和華來歡喜；
正直ê人ê o-ló是合宜。
2 Lín tio̍h彈琴感謝耶和華；
用十條絃ê瑟o-ló伊。
3 Tio̍h對伊唱新ê歌，
Tôaⁿ到真好，聲音響亮。
4 因為耶和華ê言語正直；
凡伊所做ê，一盡是誠實。
5 伊歡喜義理kap公平；
耶和華ê慈愛滿滿tī地上。
6 Chiahê天 tùi耶和華ê話來造，
天裡ê萬類tùi伊ê嘴ê氣來成。
7 伊聚集海水親像kui堆，
收khǹg深淵tī庫房。
8 全地tio̍h敬畏耶和華；
凡若khiā起tī世上-ê，lóng tio̍h驚伊。
9 因為伊講出就有；
伊命令就khiā在。
10 耶和華hō͘列邦ê計畫歸tī空空；
Hō͘眾百姓所想ê，無功效。
11 耶和華ê計畫永遠khiā在，
伊ê心所想ê到萬世代。
12 認耶和華做伊ê上帝ê，hit國有福氣；
伊揀選做伊ê產業ê，hitê百姓有福氣。
13 耶和華tùi天teh看；
伊鑑察lóng總ê世間人。
14 伊tùi伊khiā起ê所在ǹg外面，
看地上一切khiā起ê百姓。
15 伊是造成in眾人ê心ê，
留心tī in一切ê所做ê。
16 君王bōe能因為兵chōe得tio̍h救；
猛人bōe能因為氣力大得tio̍h救出。
17 Óa靠馬得tio̍h救，是無chhái-kang；
Bōe能用伊ê大力來救人。
18 耶和華ê目睭看敬畏伊ê人，
看ǹg望伊ê慈愛ê人；
19 Beh救in ê性命脫離死無，
保存in ê活命tī飢荒ê時。
20 阮ê心神平素thèng候耶和華
伊是做阮ê幫贊，做阮ê藤牌。
21 阮ê心beh óa靠伊來歡喜，
因為阮平素óa靠伊ê聖名。
22 耶和華ah，願你ê慈愛臨到阮，
照阮所ǹg望你ê。
1 Lín gī-lâng ah, tio̍h in-ūi Iâ-hô-hoa lâi hoaⁿ-hí; Chèng-ti̍t ê lâng ê o-ló sī ha̍p-gî. 2 Lín tio̍h tôaⁿ-khîm kám-siā Iâ-hô-hoa; Ēng cha̍p-tiâu hiân ê sek o-ló I. 3 Tio̍h tùi I chhiùⁿ sin ê koa, Tôaⁿ kàu chin hó, siaⁿ-im hiáng-liāng. 4 In-ūi Iâ-hô-hoa ê giân-gú chèng-ti̍t; Hoān I só͘ chòe--ê, it-chīn sī sêng-si̍t. 5 I hoaⁿ-hí gī-lí kap kong-pêng; Iâ-hô-hoa ê chû-ài móa-móa tī tōe-chiūⁿ. 6 Chiah ê thiⁿ tùi Iâ-hô-hoa ê ōe lâi chō, Thiⁿ--nih ê bān-lūi tùi I ê chhùi ê khì lâi chiâⁿ. 7 I chū-chi̍p hái-chúi chhin-chhiūⁿ kui-tui, Siu-khǹg chhim-ian tī khò͘-pâng. 8 Choân-tōe tio̍h kèng-ùi Iâ-hô-hoa; Hoān-nā khiā-khí tī sè-chiūⁿ--ê, lóng tio̍h kiaⁿ I. 9 In-ūi I kóng-chhut chiū ū; I bēng-lēng chiū khiā-chāi. 10 Iâ-hô-hoa hō͘ lia̍t-pang ê kè-e̍k kui tī khang-khang; Hō͘ chèng peh-sìⁿ só͘ siūⁿ--ê, bô kong-hāu. 11 Iâ-hô-hoa ê kè-e̍k éng-oán khiā-chāi, I ê sim só͘ siūⁿ--ê kàu bān sè-tāi. 12 Jīn Iâ-hô-hoa chòe i ê Siōng-tè--ê, hit kok ū hok-khì; I kéng-soán chòe I ê sán-gia̍p--ê, hit ê peh-sìⁿ ū hok-khì. 13 Iâ-hô-hoa tùi thiⁿ teh khòaⁿ; I kàm-chhat lóng-chóng ê sè-kan lâng. 14 I tùi I khiā-khí ê só͘-chāi ǹg gōa-bīn, Khòaⁿ tōe-chiūⁿ it-chhè khiā-khí ê peh-sìⁿ. 15 I sī chō-chiâⁿ in chèng-lâng ê sim--ê, Liû-sim tī in it-chhè ê só͘-chòe--ê. 16 Kun-ông bōe-ōe in-ūi peng chōe tit-tio̍h kiù; Béng-lâng bōe-ōe in-ūi khùi-la̍t tōa tit-tio̍h kiù-chhut. 17 Óa-khò bé tit-tio̍h kiù, sī bô chhái-kang; Bōe-ōe ēng i ê tōa la̍t lâi kiù lâng. 18 Iâ-hô-hoa ê ba̍k-chiu khòaⁿ kèng-ùi I ê lâng, Khòaⁿ ǹg-bāng I ê chû-ài ê lâng; 19 Beh kiù in ê sìⁿ-miā thoat-lī sí-bô, Pó-chûn in ê oa̍h-miā tī ki-hng ê sî. 20 Goán ê sim-sîn pêng-sò͘ thèng-hāu Iâ-hô-hoa; I sī chòe goán ê pang-chān, chòe goán ê tîn-pâi. 21 Goán ê sim beh óa-khò I lâi hoaⁿ-hí, In-ūi goán pêng-sò͘ óa-khò I ê sèng-miâ. 22 Iâ-hô-hoa ah, goān Lí ê chû-ài lîm-kàu goán, Chiàu goán só͘ ǹg-bāng Lí ê.
1 大衛ê詩；就是伊tī A-pì-bí-le̍k ê面前假瘋癲，受趕出去ê時所做ê。1) 我beh時時o-ló耶和華；
O-ló伊ê話beh常常tī我ê嘴。
2 我ê心神beh因為耶和華來誇口；
謙卑ê人聽見，亦beh歡喜。
3 Lín kap我tio̍h o-ló耶和華做大，
相kap chun伊ê名做高。
4 我bat求耶和華，伊就應我；
救我脫離我一切thang驚ê事。
5 In kia̍h頭看伊，就得tio̍h光明；
In ê面永bōe見笑。
6 Chitê困苦ê人求叫，耶和華聽見；
救伊脫離伊一切ê患難。
7 耶和華ê使者tī敬畏伊ê人ê四圍紮營，
來拯救in。
8 Lín tio̍h試看，就知耶和華是好；
Óa靠伊ê人有福氣。
9 耶和華聖ê百姓ah，lín tio̍h敬畏伊；
因為敬畏伊ê人無欠缺一項。
10 獅á-thûn有欠缺，有iau；
獨獨chhē耶和華ê人無欠甚麼項ê好。
11 細kiáⁿ ah，lín tio̍h來聽我，
我beh將敬畏耶和華ê道理教示lín。
12 甚麼人ài活命，
欣慕歲壽，beh得tio̍h福氣？
13 就tio̍h禁你ê舌無講pháiⁿ話；
你ê嘴唇無講奸詐ê話。
14 Tio̍h離開pháiⁿ，行好；
Chhē和平，來追jip伊。
15 耶和華ê目睭看義人；
伊ê耳孔聽in ê祈禱。
16 耶和華ê面ǹg行pháiⁿ ê人，
Beh tùi世間除滅in ê名字。
17 義人求叫，耶和華聽見，
就救in脫離一切ê患難。
18 耶和華óa近傷心ê人，
拯救靈性痛悔ê人。
19 義人有chōe-chōe苦難，
總是耶和華救伊lóng脫離。
20 保全伊lóng總ê骨；
一支亦無phah折。
21 罪惡beh害死pháiⁿ人；
怨恨義人ê beh受定罪。
22 耶和華救贖伊ê奴僕ê神魂；
凡若óa靠伊ê，無一个受定罪。
1 Tāi-pi̍t ê si; chiū-sī i tī A-pì-bí-le̍k ê bīn-chêng ké hong-tian, siū kóaⁿ--chhut-khì ê sî só͘ chòe--ê.1) Góa beh sî-sî o-ló Iâ-hô-hoa; O-ló I ê ōe beh siông-siông tī góa ê chhùi. 2 Góa ê sim-sîn beh in-ūi Iâ-hô-hoa lâi khoa-kháu; Khiam-pi ê lâng thiaⁿ-kìⁿ, ia̍h beh hoaⁿ-hí. 3 Lín kap góa tio̍h o-ló Iâ-hô-hoa chòe tōa, Saⁿ-kap chun I ê miâ chòe koâiⁿ. 4 Góa bat kiû Iâ-hô-hoa, I chiū ìn góa; Kiù góa thoat-lī góa it-chhè thang kiaⁿ ê sū. 5 In kia̍h-thâu khòaⁿ I, chiū tit-tio̍h kng-bêng; In ê bīn éng bōe kiàn-siàu. 6 Chit ê khùn-khó͘ ê lâng kiû-kiò, Iâ-hô-hoa thiaⁿ-kìⁿ; Kiù i thoat-lī i it-chhè ê hoān-lān. 7 Iâ-hô-hoa ê sù-chiá tī kèng-ùi I ê lâng ê sì-ûi chat-iâⁿ, Lâi chín-kiù in. 8 Lín tio̍h chhì-khòaⁿ, chiū chai Iâ-hô-hoa sī hó; Óa-khò I ê lâng ū hok-khì. 9 Iâ-hô-hoa sèng ê peh-sìⁿ ah, lín tio̍h kèng-ùi I; In-ūi kèng-ùi I ê lâng bô khiàm-kheh chi̍t-hāng. 10 Sai-á-thûn ū khiàm-kheh, ū iau; To̍k-to̍k chhē Iâ-hô-hoa ê lâng bô khiàm sím-mi̍h hāng ê hó. 11 Sòe-kiáⁿ ah, lín tio̍h lâi thiaⁿ góa, Góa beh chiong kèng-ùi Iâ-hô-hoa ê tō-lí kà-sī lín. 12 Sím-mi̍h lâng ài oa̍h-miā, Him-bō͘ hè-siū, beh tit-tio̍h hok-khì? 13 Chiū tio̍h kìm lí ê chi̍h bô kóng pháiⁿ-ōe; Lí ê chhùi-tûn bô kóng kan-chà ê ōe. 14 Tio̍h lī-khui pháiⁿ, kiâⁿ hó; Chhē hô-pêng, lâi tui-jip--i. 15 Iâ-hô-hoa ê ba̍k-chiu khòaⁿ gī-lâng; I ê hī-khang thiaⁿ in ê kî-tó. 16 Iâ-hô-hoa ê bīn ǹg kiâⁿ-pháiⁿ ê lâng, Beh tùi sè-kan tû-bia̍t in ê miâ-jī. 17 Gī-lâng kiû-kiò, Iâ-hô-hoa thiaⁿ-kìⁿ, Chiū kiù in thoat-lī it-chhè ê hoān-lān. 18 Iâ-hô-hoa óa-kūn siong-sim ê lâng, Chín-kiù lêng-sèng thòng-hóe ê lâng. 19 Gī-lâng ū chōe-chōe khó͘-lān, Chóng-sī Iâ-hô-hoa kiù i lóng thoat-lī. 20 Pó-choân i lóng-chóng ê kut; Chi̍t-ki ia̍h bô phah-chi̍h. 21 Chōe-ok beh hāi-sí pháiⁿ-lâng; Oàn-hūn gī-lâng--ê beh siū tēng-chōe. 22 Iâ-hô-hoa kiù-sio̍k I ê lô͘-po̍k ê sîn-hûn; Hoān-nā óa-khò I--ê, bô chi̍t-ê siū tēng-chōe.
1 大衛ê詩。1) 耶和華ah，kap我相爭ê，求你kap in相爭；
Kap我交戰-ê，求你kap in交戰。
2 The̍h大細ê藤牌，
起來幫贊我。
3 抽出鎗，阻止hiahê追趕我ê；
Tùi我ê神魂講，我是拯救你ê。
4 願hiahê siàu想我ê性命ê人受見笑凌辱；
願hiahê計謀害我ê人oa̍t倒tńg漏氣。
5 願in親像風吹ê粗糠；
有耶和華ê使者teh趕in。
6 願in ê路暗koh滑，有耶和華ê使者teh趕in。
7 因為in無因端為我暗設羅網tī坑內，
無因端ku̍t陷坑beh害我ê性命。
8 願tī伊無phah算ê時，災厄到伊ê身上；
願伊暗設 ê羅網纏tio̍h伊家己；
願伊跋落hí內面，受害。
9 就我ê心beh tī耶和華來快樂；
Tī伊ê救恩來歡喜。
10 我ê骨頭lóng beh講，
耶和華ah，是誰 ōe親像你？
你拯救困苦ê人，脫離hiahê比伊khah強ê；
拯救困苦kap sòng-hiong ê人脫離hiahê搶奪伊ê。
11 兇惡ê干證ê起來；
我所m̄知ê事，in查問我。
12 In對tī我用pháiⁿ報好：
Hō͘我ê神魂孤單。
13 論到我，當in破病ê時，我就穿麻衫，
用禁食刻苦我ê心神；
我所求ê，lóng歸tī家己ê心懷。
14 我án-ni行，親像伊是我ê朋友，我ê兄弟；
我屈落身軀悲哀，親像人為tio̍h老母哀傷。
15 我tú-tio̍h患難，in就歡喜，相kap聚集；
我所m̄相識ê 下等人聚集攻擊我；
In khiú-la̍k我無soah。
16 In親像戲hiauh，pián食ê無hē落人，
對我咬嘴齒根。
17 主ah，你定定teh看，beh到jōa久？
求你救我ê神魂脫離in ê殘害，
救我ê性命脫離猛ê獅á-thûn。
18 我tī大聚會ê中間beh感謝你；
Tī眾百姓ê中間beh o-ló你。
19 求你莫得容允hiahê無理由對敵我ê，對我誇口；
莫得容允hiahê無因端怨恨我ê gîn我。
20 因為in無講和平ê話；
就是計謀詭譎ê話；害地上安份ê人。
21 In大大開嘴攻擊我；
講，Ho͘h-chāi！Ho͘h-chāi！
阮ê目睭已經看見lah。
22 耶和華ah，你已經看見；求你m̄-thang靜靜；
主ah，m̄-thang離開我。
23 我ê上帝，我ê主ah，求你精神，起來；
判決我ê事，辨理我ê案。
24 耶和華我ê上帝ah，求你照你ê公義判斷我；
莫得容允in對我誇口。
25 莫得容允in心內講，
Ho͘h-chāi，照阮ê心願lah；
莫得容允in講，阮已經kā伊吞落去lah。
26 願hiahê歡喜我tú-tio̍h患難ê，lóng見笑漏氣；
願hiahê對我家己尊大ê，受見笑lak臉。
27 願hiahê ài我得tio̍h伸冤ê人，出歡喜ê聲快樂；
願in常常講，tio̍h尊耶和華做大。
因為伊歡喜伊ê奴僕平安。
28 我ê舌beh講起你ê義，
Thong日o-ló你。
1 Tāi-pi̍t ê si.1) Iâ-hô-hoa ah, kap góa saⁿ-chiⁿ-ê, kiû Lí kap in saⁿ-chiⁿ; Kap góa kau-chiàn--ê, kiû Lí kap in kau-chiàn. 2 The̍h tōa-sòe ê tîn-pâi, Khí-lâi pang-chān góa. 3 Thiu-chhut chhiuⁿ, chó͘-chí hiah ê tui-kóaⁿ góa--ê; Tùi góa ê sîn-hûn kóng, Góa sī chín-kiù lí--ê. 4 Goān hiah ê siàu-siūⁿ góa ê sìⁿ-miā ê lâng siū kiàn-siàu lêng-jio̍k; Goān hiah ê kè-bô͘ hāi góa ê lâng oa̍t-tò-tńg làu-khùi. 5 Goān in chhin-chhiūⁿ hong chhe ê chho͘-khng; Ū Iâ-hô-hoa ê sù-chiá teh kóaⁿ in. 6 Goān in ê lō͘ àm koh ku̍t, Ū Iâ-hô-hoa ê sù-chiá teh kóaⁿ in. 7 In-ūi in bô in-toaⁿ ūi góa àm-siat lô-bāng tī khiⁿ-lāi, Bô in-toaⁿ ku̍t hām-khiⁿ beh hāi góa ê sìⁿ-miā. 8 Goān tī i bô phah-sǹg ê sî, chai-ē kàu i ê sin-chiūⁿ; Goān i àm-siat ê lô-bāng tîⁿ-tio̍h i ka-kī; Goān i poa̍h-lo̍h hí lāi-bīn, siū hāi. 9 Chiū góa ê sim beh tī Iâ-hô-hoa lâi khoài-lo̍k; Tī I ê kiù-un lâi hoaⁿ-hí. 10 Góa ê kut-thâu lóng beh kóng, Iâ-hô-hoa ah, chī-chūi ōe chhin-chhiūⁿ Lí? Lí chín-kiù khùn-khó͘ ê lâng, thoat-lī hiah ê pí i khah-kiông--ê; Chín-kiù khùn-khó͘ kap sòng-hiong ê lâng thoat-lī hiah ê chhiúⁿ-toa̍t i--ê. 11 Hiong-ok ê kan-chèng--ê khí-lâi; Góa só͘ m̄-chai ê sū, in chhâ-mn̄g góa. 12 In tùi-tī góa ēng pháiⁿ pò hó: Hō͘ góa ê sîn-hûn ko͘-toaⁿ. 13 Lūn-kàu góa, tng in phòa-pīⁿ ê sî, góa chiū chhēng môa-saⁿ, Ēng kìm-chia̍h khek-khó͘ góa ê sim-sîn; Góa só͘ kiû--ê, lóng kui tī ka-kī ê sim-hoâi. 14 Góa án-ni kiâⁿ, chhin-chhiūⁿ i sī góa ê pêng-iú, góa ê hiaⁿ-tī; Góa khut-lo̍h seng-khu pi-ai, chhin-chhiūⁿ lâng ūi-tio̍h lāu-bú ai-siong. 15 Góa tú-tio̍h hoān-lān, in chiū hoaⁿ-hí, saⁿ-kap chū-chi̍p; Góa só͘ m̄ saⁿ-bat ê hā-téng-lâng chū-chi̍p kong-kek góa; In khiú-la̍k góa bô soah. 16 In chhin-chhiūⁿ hì-hiauh, pián-chia̍h ê bô hē-lo̍h lâng, Tùi góa kā chhùi-khí-kun. 17 Chú ah, Lí tiāⁿ-tiāⁿ teh khòaⁿ, beh kàu jōa-kú? Kiû Lí kiù góa ê sîn-hûn thoat-lī in ê chân-hāi, Kiù góa ê sìⁿ-miā thoat-lī béng ê sai-á-thûn. 18 Góa tī tōa chū-hōe ê tiong-kan beh kám-siā Lí; Tī chèng peh-sìⁿ ê tiong-kan beh o-ló Lí. 19 Kiû Lí bo̍h-tit iông-ún hiah ê bô lí-iû tùi-te̍k góa-ê, tùi góa khoa-kháu; Bo̍h-tit iông-ún hiah ê bô in-toaⁿ oàn-hūn góa-ê gîn--góa. 20 In-ūi in bô kóng hô-pêng ê ōe; Chiū-sī kè-bô͘ khúi-khiat ê ōe; hāi tōe-chiūⁿ an-hūn ê lâng. 21 In tōa-tōa khui-chhùi kong-kek góa; Kóng, Ho͘h--chāi! Ho͘h--chāi! Goán ê ba̍k-chiu í-keng khòaⁿ-kìⁿ lah. 22 Iâ-hô-hoa ah, Lí í-keng khòaⁿ-kìⁿ; kiû Lí m̄-thang chēng-chēng; Chú ah, m̄-thang lī-khui góa. 23 Góa ê Siōng-tè, góa ê Chú ah, kiû Lí cheng-sîn, khí--lâi; Phòaⁿ-koat góa ê sū, pān-lí góa ê àn. 24 Iâ-hô-hoa góa ê Siōng-tè ah, kiû Lí chiàu Lí ê kong-gī phòaⁿ-toàn góa; Bo̍h-tit iông-ún in tùi góa khoa-kháu. 25 Bo̍h-tit iông-ún in sim-lāi kóng, Ho͘h--chāi, chiàu goán ê sim-goān lah; Bo̍h-tit iông-ún in kóng, Goán í-keng kā i thun--lo̍h-khì lah. 26 Goān hiah ê hoaⁿ-hí góa tú-tio̍h hoān-lān--ê, lóng kiàn-siàu làu-khùi; Goān hiah ê tùi góa ka-kī chun-tōa--ê, siū kiàn-siàu lak-lián. 27 Goān hiah ê ài góa tit-tio̍h sin-oan ê lâng, chhut hoaⁿ-hí ê siaⁿ khoài-lo̍k; Goān in siông-siông kóng, Tio̍h chun Iâ-hô-hoa chòe tōa. In-ūi I hoaⁿ-hí I ê lô͘-po̍k pêng-an. 28 Góa ê chi̍h beh kóng-khí Lí ê gī, Thong-ji̍t o-ló Lí.
1 （耶和華ê奴僕大衛ê詩，交hō͘樂官） 1 Pháiⁿ人ê罪過，有話tī我ê心講，
伊ê目睭中無驚上帝。
2 因為tī伊ê目睭內伊家己諂媚，
Phah算伊ê罪惡永bōe露現，bōe受怨恨。
3 伊嘴內ê話，lóng是罪惡kap奸詐；
伊kap智慧好ê所行已經斷絕。
4 伊tī眠床圖謀罪惡，
伊定tio̍h意思khiā tī m̄好ê路；
伊無怨恨pháiⁿ-tāi。
5 耶和華ah，你ê慈愛是tī天裡；
你ê信實到tī穹蒼。
6 你ê義親像極高ê山；
你ê判斷是親像深淵。
耶和華ah，人kap cheng-siⁿ，你lóng保護in。
7 上帝ah，你ê慈愛怎樣hiah寶貝ah！
世間人bih tī你翼股ê致蔭下。
8 In beh因為你ê厝ê好物，得tio̍h飽足；
你亦beh hō͘ in lim你快樂ê河水。
9 因為活命ê源頭，在tī你hia；
Tī你ê光，阮beh看見光。
10 願你常常施慈愛hō͘ bat你ê人；
常常用你ê公義施hō͘心內正直ê人。
11 M̄-thang容允驕傲ê人ê腳thún踏我，
M̄-thang容允兇惡ê人ê手趕逐我。
12 Tī-hia做pháiⁿ ê人已經倒落去；
伊受chhia倒，bōe能koh起來。
1 Iâ-hô-hoa ê lô͘-po̍k Tāi-pi̍t ê si, kau-hō͘ Ga̍k-koaⁿ.1) Pháiⁿ-lâng ê chōe-kòa, ū ōe tī góa ê sim kóng, I ê ba̍k-chiu-tiong bô kiaⁿ Siōng-tè. 2 In-ūi tī i ê ba̍k-chiu-lāi i ka-kī thiám-mī, Phah-sǹg i ê chōe-ok éng bōe lō͘-hiān, bōe siū oàn-hūn. 3 I chhùi-lāi ê ōe, lóng sī chōe-ok kap kan-chà; I kap tì-hūi hó ê só͘-kiâⁿ í-keng toān-choa̍t. 4 I tī bîn-chhn̂g tô͘-bô͘ chōe-ok, I tiāⁿ-tio̍h ì-sù khiā tī m̄-hó ê lō͘; I bô oàn-hūn pháiⁿ-tāi. 5 Iâ-hô-hoa ah, Lí ê chû-ài sī tī thiⁿ--nih; Lí ê sìn-si̍t kàu tī kiong-chhong. 6 Lí ê gī chhin-chhiūⁿ ke̍k-koâiⁿ ê soaⁿ; Lí ê phòaⁿ-toàn sī chhin-chhiūⁿ chhim-ian. Iâ-hô-hoa ah, lâng kap cheng-siⁿ, Lí lóng pó-hō͘ in. 7 Siōng-tè ah, Lí ê chû-ài cháiⁿ-iūⁿ hiah pó-pòe ah! Sè-kan-lâng bih tī Lí si̍t-kó͘ ê tì-ìm-ē. 8 In beh in-ūi Lí ê chhù ê hó-mi̍h, tit-tio̍h pá-chiok; Lí ia̍h beh hō͘ in lim Lí khoài-lo̍k ê hô-chúi. 9 In-ūi oa̍h-miā ê goân-thâu, chāi tī Lí hia; Tī Lí ê kng, goán beh khòaⁿ-kìⁿ kng. 10 Goān Lí siông-siông si chû-ài hō͘ bat Lí ê lâng; Siông-siông ēng Lí ê kong-gī si hō͘ sim-lāi chèng-ti̍t ê lâng. 11 M̄-thang iông-ún kiau-ngō͘ ê lâng ê kha thún-ta̍h góa, M̄-thang iông-ún hiong-ok ê lâng ê chhiú kóaⁿ-tio̍k góa. 12 Tī-hia chòe pháiⁿ ê lâng í-keng tó--lo̍h-khì; I siū chhia-tó, bōe-ōe koh khí-lâi.
1 大衛ê詩。1) M̄-thang因為做pháiⁿ ê人，心內不平；
亦m̄-thang怨妒行不義ê人。
2 因為in親像草快快割；
Koh親像青翠ê菜老(láu)去。
3 Tio̍h óa靠耶和華來行好，
Tiàm tī chitê土地，用誠實做米糧。
4 Tio̍h掠耶和華做歡喜，
伊beh將你ê心所求ê hō͘你。
5 Tio̍h將你ê tāi-chì交帶耶和華；
Koh óa靠伊，伊beh hō͘伊成。
6 伊beh hō͘你ê義發出親像光；
你ê判斷，親像中晝ê光。
7 Tio̍h靜靜tī耶和華ê面前，寬心thèng候伊；
M̄-thang因為hit號事事興通ê，
Kap hit號pháiⁿ計謀得tio̍h成ê，來不平。
8 Tio̍h soah受氣，離開大受氣；
M̄-thang不平，驚了會做pháiⁿ。
9 因為行pháiⁿ ê人beh受剿滅；
獨獨thèng候耶和華ê人，in beh承接土地。
10 因為koh tiap-á久，pháiⁿ人beh無去；
你若詳細查伊ê所在，伊亦無去；
11 獨獨謙卑ê人beh承接土地；
因為平安豐盛大沉歡喜。
12 Pháiⁿ人設計謀beh害義人，
Koh ǹg伊咬嘴齒根。
13 主beh笑伊，
因為看見伊ê日子beh到。
14 Pháiⁿ人拔刀開弓，beh打倒困苦sòng-hiong ê人；
Beh 刣死行做正直ê人。
15 In ê刀beh 刺入家己ê心，
In ê keng beh受at折。
16 義人所有ê少少，
贏過chōe-chōe pháiⁿ人ê富有。
17 因為pháiⁿ人ê手beh受at折；
獨獨耶和華扶持義ê人。
18 耶和華知完全ê人ê時日；
In ê產業beh永遠tī-teh。
19 In tī患難ê時不致見笑；
Tī飢荒ê日beh得tio̍h飽足。
20 總是pháiⁿ人beh滅無，
耶和華ê對敵beh親像草埔ê茂盛；
In beh消無親像火薰ê消無。
21 Pháiⁿ人kā人借，也無還；
但是義人行憐憫，捨施人。
22 耶和華賜福ê人，in beh承接土地；
Hō͘伊咒詛ê人beh受滅無。
23 義人ê腳步是耶和華所安置；
Koh I歡喜伊ê路。
24 伊雖bóng跋倒，亦無夠kui身siak落去；
因為耶和華用伊ê手扶伊。
25 我前少年，taⁿ年老；
總是bē-bat看見義人受放sak，
亦伊ê後裔做乞食。
26 伊thong日憐憫人，借人，
伊ê後裔得tio̍h福氣。
27 你tio̍h離開pháiⁿ，行好，
Chiah thang永遠khiā起。
28 因為耶和華歡喜公平，
無放sak伊聖ê百姓；
In永遠受保護，
獨獨pháiⁿ人ê後裔beh受剿滅。
29 義人beh承接土地，
永遠tiàm tī-hia。
30 義人ê嘴講智慧，
伊ê舌談論公平。
31 伊ê上帝ê律法tī伊ê心內；
伊ê腳lóng bōe踏thu̍t。
32 Pháiⁿ人偷看義人，
Siàu想刣伊。
33 耶和華無放sak伊tī pháiⁿ人ê手；
當審判ê時，亦無定伊ê罪。
34 你tio̍h thèng候耶和華遵守伊ê道路；
伊就高升你，hō͘你承接土地；
Pháiⁿ人受剿滅ê時，你beh看見。
35 我bat看見pháiⁿ人有大勢力，
Koh發達親像ām ê樹tī伊ê本土地。
36 有人tùi hia經過，看ah，伊無去lah；
我亦chhē伊，chhē bōe tio̍h。
37 你tio̍h詳細看hitê完全ê人，看hitê正直ê人，
因為和平ê人有好ê結局。
38 論到犯法ê人，beh做一下滅無；
Pháiⁿ人ê結局beh受剿滅。
39 總是義人得tio̍h救，是tùi耶和華；
當患難ê時，伊做in ê營寨。
40 耶和華幫贊in，拯救in；
伊拯救in脫離pháiⁿ人，來牽救in；
因為in óa靠伊。
1 Tāi-pi̍t ê si.1) M̄-thang in-ūi chòe pháiⁿ ê lâng, sim-lāi put-pêng; Ia̍h m̄-thang oàn-tò͘ kiâⁿ put-gī ê lâng. 2 In-ūi in chhin-chhiūⁿ chháu khoài-khoài koah; Koh chhin-chhiūⁿ chhiⁿ-chhùi ê chhài lāu--khì. 3 Tio̍h óa-khò Iâ-hô-hoa lâi kiâⁿ hó, Tiàm tī chit ê thó͘-tōe, ēng sêng-si̍t chòe bí-niû. 4 Tio̍h lia̍h Iâ-hô-hoa chòe hoaⁿ-hí, I beh chiong lí ê sim só͘ kiû--ê hō͘ lí. 5 Tio̍h chiong lí ê tāi-chì kau-tài Iâ-hô-hoa; Koh óa-khò I, I beh hō͘ i chiâⁿ. 6 I beh hō͘ lí ê gī hoat-chhut chhin-chhiūⁿ kng; Lí ê phòaⁿ-toàn, chhin-chhiūⁿ tiong-tàu ê kng. 7 Tio̍h chēng-chēng tī Iâ-hô-hoa ê bīn-chêng, khoan-sim thèng-hāu I; M̄-thang in-ūi hit-hō sū-sū heng-thong-ê, Kap hit-hō pháiⁿ kè-bô͘ tit-tio̍h chiâⁿ--ê, lâi put-pêng. 8 Tio̍h soah siū-khì, lī-khui tōa siū-khì; M̄-thang put-pêng, kiaⁿ-liáu ōe chòe pháiⁿ. 9 In-ūi kiâⁿ-pháiⁿ ê lâng beh siū châu-bia̍t; To̍k-to̍k thèng-hāu Iâ-hô-hoa ê lâng, in beh sêng-chiap thó͘-tōe. 10 In-ūi koh tiap-á-kú, pháiⁿ-lâng beh bô--khì; Lí nā siông-sè chhâ i ê só͘-chāi, i ia̍h bô--khì; 11 To̍k-to̍k khiam-pi ê lâng beh sêng-chiap thó͘-tōe; In-ūi pêng-an hong-sēng tōa-tîm hoaⁿ-hí. 12 Pháiⁿ-lâng siat kè-bô͘ beh hāi gī-lâng, Koh ǹg i kā chhùi-khí-kun. 13 Chú beh chhiò i, In-ūi khòaⁿ-kìⁿ i ê ji̍t-chí beh kàu. 14 Pháiⁿ-lâng pu̍ih-to khui-keng, beh táⁿ-tó khùn-khó͘ sòng-hiong ê lâng; Beh thâi-sí kiâⁿ-chòe chèng-ti̍t ê lâng. 15 In ê to beh chhì-ji̍p ka-kī ê sim, In ê keng beh siū at-chi̍h. 16 Gī-lâng só͘-ū-ê chió-chió, Iâⁿ-kè chōe-chōe pháiⁿ-lâng ê pù-ū. 17 In-ūi pháiⁿ-lâng ê chhiú beh siū at-chi̍h; To̍k-to̍k Iâ-hô-hoa hû-chhî gī ê lâng. 18 Iâ-hô-hoa chai oân-choân ê lâng ê sî-ji̍t; In ê sán-gia̍p beh éng-oán tī-teh. 19 In tī hoān-lān ê sî put-tì kiàn-siàu; Tī ki-hng ê ji̍t beh tit-tio̍h pá-chiok. 20 Chóng-sī pháiⁿ-lâng beh bia̍t-bô, Iâ-hô-hoa ê tùi-te̍k beh chhin-chhiūⁿ chháu-po͘ ê bō͘-sēng; In beh siau-bô chhin-chhiūⁿ hé-hun ê siau-bô. 21 Pháiⁿ-lâng kā lâng chioh, iā bô hêng; Nā-sī gī-lâng kiâⁿ lîn-bín, siá-si lâng. 22 Iâ-hô-hoa sù-hok ê lâng, in beh sêng-chiap thó͘-tōe; Hō͘ I chiù-chó͘ ê lâng beh siū bia̍t-bô. 23 Gī-lâng ê kha-pō͘ sī Iâ-hô-hoa só͘ an-tì; Koh I hoaⁿ-hí i ê lō͘. 24 I sui-bóng poa̍h-tó, ia̍h bô kàu kui-sin siak--lo̍h-khì; In-ūi Iâ-hô-hoa ēng I ê chhiú hû i. 25 Góa chêng siàu-liân, taⁿ nî lāu; Chóng-sī bē-bat khòaⁿ-kìⁿ gī-lâng siū pàng-sak, Ia̍h i ê hō͘-è chòe khit-chia̍h. 26 I thong-ji̍t lîn-bín lâng, chioh lâng, I ê hō͘-è tit-tio̍h hok-khì. 27 Lí tio̍h lī-khui pháiⁿ, kiâⁿ hó, Chiah thang éng-oán khiā-khí. 28 In-ūi Iâ-hô-hoa hoaⁿ-hí kong-pêng, Bô pàng-sak I sèng ê peh-sìⁿ; In éng-oán siū pó-hō͘, To̍k-to̍k pháiⁿ-lâng ê hō͘-è beh siū châu-bia̍t. 29 Gī-lâng beh sêng-chiap thó͘-tōe, Éng-oán tiàm tī-hia. 30 Gī-lâng ê chhùi kóng tì-hūi, I ê chi̍h tâm-lūn kong-pêng. 31 I ê Siōng-tè ê lu̍t-hoat tī i ê sim-lāi; I ê kha lóng bōe ta̍h-thu̍t. 32 Pháiⁿ-lâng thau-khòaⁿ gī-lâng, Siàu-siūⁿ thâi--i. 33 Iâ-hô-hoa bô pàng-sak i tī pháiⁿ lâng ê chhiú; Tng sím-phòaⁿ ê sî, ia̍h bô tēng i ê chōe. 34 Lí tio̍h thèng-hāu Iâ-hô-hoa chun-siú I ê tō-lō͘; I chiū ko-seng lí, hō͘ lí sêng-chiap thó͘-tōe; Pháiⁿ-lâng siū châu-bia̍t ê sî, lí beh khòaⁿ-kìⁿ. 35 Góa bat khòaⁿ-kìⁿ pháiⁿ-lâng ū tōa sè-le̍k, Koh hoat-ta̍t chhin-chhiūⁿ ām ê chhiū tī i ê pún thó͘-tōe. 36 Ū lâng tùi hia keng-kè, khòaⁿ ah, i bô--khì lah; Góa ia̍h chhē i, chhē bōe tio̍h. 37 Lí tio̍h siông-sè khòaⁿ hit ê oân-choân ê lâng, khòaⁿ hit ê chèng-ti̍t ê lâng, In-ūi hô-pêng ê lâng ū hó ê kiat-kio̍k. 38 Lūn-kàu hoān-hoat ê lâng, beh chòe-chi̍t-ē bia̍t-bô; Pháiⁿ-lâng ê kiat-kio̍k beh siū châu-bia̍t. 39 Chóng-sī gī-lâng tit-tio̍h kiù, sī tùi Iâ-hô-hoa; Tng hoān-lān ê sî, I chòe in ê iâⁿ-chē. 40 Iâ-hô-hoa pang-chān in, chín-kiù in; I chín-kiù in thoat-lī pháiⁿ-lâng, lâi khan-kiù in; In-ūi in óa-khò I.
1 大衛ê記念詩。1) 耶和華ah，求你m̄-thang tī受氣中責備我；
M̄-thang tī大受氣中警戒我。
2 因為你ê箭射我ê身軀，
你ê手重重chhi̍h我。
3 因為你ê受氣，我ê肉無一位完全；
因為我ê罪過，我ê骨亦無平安。
4 我ê罪惡pôaⁿ過我ê頭殼，
親像重擔hō͘我taⁿ-bōe-khí。
5 因為我ê愚戇，
我ê傷爛，koh臭。
6 我痛疼koh khiau-ku，
Thong日哀傷。
7 因為我滿腰是火；
我ê肉無一位完全。
8 我受phah傷，真無力；
因為我ê心不安，就大哀chhan。
9 主ah，我ê心願lóng tī你ê面前，
我ê吐氣無對你隱瞞。
10 我ê心pho̍k-pho̍k-chhéng ，我ê力衰微；
連我目睭中ê光亦離開我。
11 疼我ê人kap我ê朋友，因為我ê pháiⁿ症頭，lóng閃tī邊á；
我ê親戚亦遠遠teh khiā。
12 Hiah-ê siàu想我ê性命ê 設羅網；
想beh害我ê，講出惡毒ê話；
Thong日想詭譎ê計謀。
13 總是我親像臭耳人ê無聽見，
親像啞口ê，無開嘴。
14 我亦親像無聽見ê人，
嘴無應答ê。
15 耶和華ah，我thèng候你；
主，我ê上帝ah，你beh聽我。
16 因為我bat講，驚了in對我誇口；
我ê腳踏thu̍t ê時，in對我家己尊大。
17 因為我險險跋倒，
我ê憂悶常常tī我ê面前。
18 因為我beh認我ê罪惡；
Koh為tio̍h我ê罪來憂悶。
19 總是我ê對敵也活動，亦勇猛；
無理由怨恨我ê，加添ná-chōe。
20 用pháiⁿ報好ê，kap我做對頭；
因為我是追jip好。
21 耶和華ah，m̄-thang放sak我；
我ê上帝ah，m̄-thang離開我遠遠。
22 主ah，拯救我ê，
求你緊緊幫贊我。
1 Tāi-pi̍t ê kì-liām si.1) Iâ-hô-hoa ah, kiû Lí m̄-thang tī siū-khì-tiong chek-pī góa; M̄-thang tī tōa siū-khì-tiong kéng-kài góa. 2 In-ūi Lí ê chìⁿ siā góa ê seng-khu, Lí ê chhiú tāng-tāng chhi̍h góa. 3 In-ūi Lí ê siū-khì, góa ê bah bô chi̍t-ūi oân-choân; In-ūi góa ê chōe-kòa, góa ê kut ia̍h bô pêng-an. 4 Góa ê chōe-ok pôaⁿ-kè góa ê thâu-khak, Chhin-chhiūⁿ tāng-tàⁿ hō͘ góa taⁿ-bōe-khí. 5 In-ūi góa ê gû-gōng, Góa ê siong nōa, koh chhàu. 6 Góa thàng-thiàⁿ koh khiau-ku, Thong-ji̍t ai-siong. 7 In-ūi góa móa-io sī hé; Góa ê bah bô chi̍t-ūi oân-choân. 8 Góa siū phah-siong, chin bô la̍t; In-ūi góa ê sim put-an, chiū tōa ai-chhan. 9 Chú ah, góa ê sim-goān lóng tī Lí ê bīn-chêng, Góa ê thó͘-khùi bô tùi Lí ún-môa. 10 Góa ê sim pho̍k-pho̍k-chhéng, góa ê la̍t soe-bî; Liân góa ba̍k-chiu-tiong ê kng ia̍h lī-khui góa. 11 Thiàⁿ góa ê lâng kap góa ê pêng-iú, in-ūi góa ê pháiⁿ chèng-thâu, lóng siám tī piⁿ-á; Góa ê chhin-chhek ia̍h hn̄g-hn̄g teh khiā. 12 Hiah ê siàu-siūⁿ góa ê sìⁿ-miā--ê siat lô-bāng; Siūⁿ beh hāi góa ê, kóng-chhut ok-to̍k ê ōe; Thong-ji̍t siūⁿ khúi-khiat ê kè-bô͘. 13 Chóng-sī góa chhin-chhiūⁿ chhàu-hī-lâng--ê bô thiaⁿ-kìⁿ, Chhin-chhiūⁿ é-káu--ê, bô khui chhùi. 14 Góa ia̍h chhin-chhiūⁿ bô thiaⁿ-kìⁿ ê lâng, Chhùi bô ìn-tap--ê. 15 Iâ-hô-hoa ah, góa thèng-hāu Lí; Chú, Góa ê Siōng-tè ah, Lí beh thiaⁿ góa. 16 In-ūi góa bat kóng, Kiaⁿ-liáu in tùi góa khoa-kháu; Góa ê kha ta̍h-thu̍t ê sî, in tùi góa ka-kī chun-tōa. 17 In-ūi góa hiám-hiám poa̍h-tó, Góa ê iu-būn siông-siông tī góa ê bīn-chêng. 18 In-ūi góa beh jīn góa ê chōe-ok; Koh ūi-tio̍h góa ê chōe lâi iu-būn. 19 Chóng-sī góa ê tùi-te̍k iā oa̍h-tāng, ia̍h ióng-béng; Bô lí-iû oàn-hūn góa ê, ke-thiⁿ ná-chōe. 20 Ēng pháiⁿ pò hó--ê, kap góa chòe tùi-thâu; In-ūi góa sī tui-jip hó. 21 Iâ-hô-hoa ah, m̄-thang pàng-sak góa; Góa ê Siōng-tè ah, m̄-thang lī-khui góa hn̄g-hn̄g. 22 Chú ah, Chín-kiù góa ê, Kiû Lí kín-kín pang-chān góa.
1 大衛ê詩，交hō͘樂官，Iâ-tō͘-tùn。1) 我bat講，我beh謹慎我ê路，
免得用我ê舌犯罪；
Pháiⁿ人tī我面前ê時，
我beh約束我ê嘴親像馬咬韁。
2 我靜靜無聲，連好話亦無講出嘴；
我ê憂悶就giâ起來。
3 我ê心tī我ê內面熱熱；
我靜靜想ê時，火就to̍h起來；
我就用舌來講：
4 耶和華ah，求你hō͘我知本身ê結局，
Kap我年歲ê數額jōa-chōe；
Hō͘我知軟弱到怎樣。
5 你hō͘我ê日子親像一巴掌，
我一生ê年-hé，tī你ê面前親像無；
Ta̍k人khiā在ê時，真正lóng是空空。[Sè-la̍h]
6 世間人行做實在親像iáⁿ；
In無閒chhih-chhih，真正無chhái-kang；
伊所積聚-ê，m̄知將來是誰得去。
7 主ah，我taⁿ thèng候甚麼？
我ê ǹg望在tī你。
8 求你救我脫離我一切ê過失；
M̄-thang hō͘我受戇人ê凌辱。
9 我靜靜無開嘴；
因為是你做ê。
10 你所降ê責罰求你kā我除去；
因為你ê手ê督責，我就消滅。
11 你因為人ê罪惡，警戒伊ê時，
Hō͘伊所歡喜ê消滅，親像tio̍h蛀蟲；
世間人真正是空空。 [Sè-la̍h]
12 耶和華ah，求你聽我ê祈禱，àⁿ耳孔聽我ê求叫，
我流目屎，求你m̄-thang無出聲；
因為我tī你ê面前是出外人，
是寄腳ê，親像我ê列祖一般樣。
13 求你寬容我，hō͘我iáu未去來歸tī無ê事先，
Thang得tio̍h爽快。
1 Tāi-pi̍t ê si, kau hō͘ Ga̍k-koaⁿ, Iâ-tō͘-tùn.1) Góa bat kóng, Góa beh kín-sīn góa ê lō͘, Bián-tit ēng góa ê chi̍h hoān-chōe; Pháiⁿ-lâng tī góa bīn-chêng ê sî, Góa beh iok-sok góa ê chhùi chhin-chhiūⁿ bé-kā-kiuⁿ. 2 Góa chēng-chēng bô siaⁿ, liân hó-ōe ia̍h bô kóng-chhut chhùi; Góa ê iu-būn chiū giâ--khí-lâi. 3 Góa ê sim tī góa ê lāi-bīn jia̍t-jia̍t; Góa chēng-chēng siūⁿ ê sî, hé chiū to̍h--khí-lâi; Góa chiū ēng chi̍h lâi kóng: 4 Iâ-hô-hoa ah, kiû Lí hō͘ góa chai pún-sin ê kiat-kio̍k, Kap góa nî-hè ê siàu-gia̍h jōa-chōe; Hō͘ góa chai loán-jio̍k kàu cháiⁿ-iūⁿ. 5 Lí hō͘ góa ê ji̍t-chí chhin-chhiūⁿ chi̍t-pa-chiúⁿ, Góa it-seng ê nî-hé, tī Lí ê bīn-chêng chhin-chhiūⁿ bô; Ta̍k-lâng khiā-chāi ê sî, chin-chiàⁿ lóng sī khang-khang. [Sè-la̍h 6 Sè-kan-lâng kiâⁿ-chòe si̍t-chāi chhin-chhiūⁿ iáⁿ; In bô-êng chhih-chhih, chin-chiàⁿ bô chhái-kang; I só͘ chek-chū--ê, m̄-chai chiong-lâi chī-chūi tit--khì. 7 Chú ah, góa taⁿ thèng-hāu sím-mi̍h? Góa ê ǹg-bāng chāi-tī Lí. 8 Kiû Lí kiù góa thoat-lī góa it-chhè ê kè-sit; M̄-thang hō͘ góa siū gōng-lâng ê lêng-jio̍k. 9 Góa chēng-chēng bô khui-chhùi; In-ūi sī Lí chòe ê. 10 Lí só͘ kàng ê chek-hoa̍t kiû Lí kā góa tû--khì; In-ūi Lí ê chhiú ê tok-chek, góa chiū siau-bia̍t. 11 Lí in-ūi lâng ê chōe-ok, kéng-kài i ê sî, Hō͘ i só͘ hoaⁿ-hí--ê siau-bia̍t, chhin-chhiūⁿ tio̍h chiù-thâng; Sè-kan lâng chin-chiàⁿ sī khang-khang. [Sè-la̍h 12 Iâ-hô-hoa ah, kiû Lí thiaⁿ góa ê kî-tó, àⁿ hī-khang thiaⁿ góa ê kiû-kiò, Góa lâu ba̍k-sái, kiû Lí m̄-thang bô chhut siaⁿ; In-ūi góa tī Lí ê bīn-chêng sī chhut-gōa-lâng, Sī kià-kha--ê, chhin-chhiūⁿ góa ê lia̍t-chó͘ chi̍t-poaⁿ-iūⁿ. 13 Kiû Lí khoan-iông góa, hō͘ góa iáu-bē khì lâi kui tī bô ê tāi-seng, Thang tit-tio̍h sóng-khoài.
1 大衛ê詩，交hō͘樂官。1) 我bat吞忍thèng候耶和華；
伊àⁿ落ǹg我，聽我ê求叫。
2 伊tùi thang驚ê陷坑，tùi土糜中，牽我起來；
Hō͘我ê腳khiā tī石磐頂，hō͘我ê腳步在伍。
3 伊hō͘我ê嘴唱新ê歌，就是o-ló阮ê上帝ê；
Chōe-chōe人beh看見來驚畏，
亦beh óa靠耶和華。
4 獨獨óa靠耶和華，無chhap hiahê驕傲，以及偏ǹg虛假ê人，
Chit號人有福氣。
5 耶和華我ê上帝ah，你所行ê奇事，
以及你對阮所存ê念頭真chōe；
Bōe能對你排列；
我若beh提起來講，
Hit-ê數額算bōe了。
6 祭祀kap禮物你無歡喜；
你有開我ê耳孔；
燒祭kap贖罪祭，你無ài-ti̍h：
7 Hit時我講，你看，我來lah；
我ê事已經記tī冊裡。
8 我ê上帝ah，你ê旨意我歡喜thàn；
你ê律法tī我ê心內。
9 我tī大聚會ê中間，宣傳公義ê好消息；
我無beh停止我ê嘴唇；
耶和華ah，這是你所知ê。
10 我bē-bat將你ê公義蓋密tī我ê心內；
我已經排列你ê信實，kap你ê救恩。
我對大聚會bē-bat隱khǹg你ê慈愛kap誠實。
11 耶和華ah，求你m̄-thang對我停止你ê慈悲；
願你ê慈愛kap誠實常常保護我。
12 因為有bōe算得ê災厄圍困我；
我ê罪惡jip-tio̍h我，hō͘我bōe能kia̍h目；
Chiahê罪惡比我ê頭毛khah-chōe；我ê心續離開我。
13 耶和華ah，求你歡喜拯救我；
耶和華ah，求你緊緊幫贊我。
14 願hiahê siàu想beh害我性命ê做一下見笑，漏氣；
願hiahê歡喜我受陷害ê，oa̍t倒tńg受凌辱。
15 願hiahê對我講，Ho͘h-chāi，Ho͘h-chāi ê，
因為見笑來敗無。
16 願一切chhē你ê，因為你來歡喜快樂；
願hiahê欣慕你救恩-ê常常講，
Tio̍h尊耶和華做大。
17 總是我是困苦sòng-hiong-ê，主iáu-kú siàu念我；
你是幫贊我ê，拯救我ê；
我ê上帝ah，求你m̄-thang延chhiân。
1 Tāi-pi̍t ê si, kau hō͘ Ga̍k-koaⁿ.1) Góa bat thun-lún thèng-hāu Iâ-hô-hoa; I àⁿ-lo̍h ǹg góa, thiaⁿ góa ê kiû-kiò. 2 I tùi thang kiaⁿ ê hām-khiⁿ, tùi thô͘-bê tiong, khan góa khí-lâi; Hō͘ góa ê kha khiā tī chio̍h-pôaⁿ-téng, hō͘ góa ê kha-pō͘ chāi-ngó͘. 3 I hō͘ góa ê chhùi chhiùⁿ sin ê koa, chiū-sī o-ló goán ê Siōng-tè--ê; Chōe-chōe lâng beh khòaⁿ-kìⁿ lâi kiaⁿ-ùi, Ia̍h beh óa-khò Iâ-hô-hoa. 4 To̍k-to̍k óa-khò Iâ-hô-hoa, bô chhap hiah ê kiau-ngō͘, í-ki̍p phian-ǹg hu-ké ê lâng, Chit-hō lâng ū hok-khì. 5 Iâ-hô-hoa góa ê Siōng-tè ah, Lí só͘ kiâⁿ ê kî-sū, Í-ki̍p Lí tùi goán só͘ chûn ê liām-thâu chin-chōe; Bōe-ōe tùi Lí pâi-lia̍t; Góa nā beh thê-khí lâi kóng, Hit ê siàu-gia̍h sǹg-bōe-liáu. 6 Chè-sū kap lé-mi̍h Lí bô hoaⁿ-hí; Lí ū khui góa ê hī-khang; Sio-chè kap sio̍k-chōe-chè, Lí bô ài-ti̍h: 7 Hit-sî góa kóng, Lí khòaⁿ, Góa lâi lah; Góa ê sū í-keng kì tī chheh--nih. 8 Góa ê Siōng-tè ah, Lí ê chí-ì góa hoaⁿ-hí thàn; Lí ê lu̍t-hoat tī góa ê sim-lāi. 9 Góa tī tōa chū-hōe ê tiong-kan, soan-thoân kong-gī ê hó siau-sit; Góa bô beh thêng-chí góa ê chhùi-tûn; Iâ-hô-hoa ah, che sī Lí só͘ chai ê. 10 Góa bē-bat chiong Lí ê kong-gī khàm-ba̍t tī góa ê sim-lāi; Góa í-keng pâi-lia̍t Lí ê sìn-si̍t, kap Lí ê kiù-un. Góa tùi tōa chū-hōe bē-bat ún-khǹg Lí ê chû-ài kap sêng-si̍t. 11 Iâ-hô-hoa ah, kiû Lí m̄-thang tùi góa thêng-chí Lí ê chû-pi; Goān Lí ê chû-ài kap sêng-si̍t siông-siông pó-hō͘ góa. 12 In-ūi ū bōe-sǹg-tit ê chai-ē ûi-khùn góa; Góa ê chōe-ok jip-tio̍h góa, hō͘ góa bōe-ōe kia̍h-ba̍k; Chiah ê chōe-ok pí góa ê thâu-mn̂g khah-chōe; góa ê sim sòa lī-khui góa. 13 Iâ-hô-hoa ah, kiû Lí hoaⁿ-hí chín-kiù góa; Iâ-hô-hoa ah, kiû Lí kín-kín pang-chān góa. 14 Goān hiah ê siàu-siūⁿ beh hāi góa sìⁿ-miā--ê chòe chi̍t-ē kiàn-siàu, làu-khùi; Goān hiah ê hoaⁿ-hí góa siū hām-hāi--ê, oa̍t-tò-tńg siū lêng-jio̍k. 15 Goān hiah ê tùi góa kóng, Ho͘h--chāi, Ho͘h--chāi ê, In-ūi kiàn-siàu lâi pāi-bô. 16 Goān it-chhè chhē Lí ê, in-ūi Lí lâi hoaⁿ-hí khoài-lo̍k; Goān hiah ê him-bō͘ Lí kiù-un--ê siông-siông kóng, Tio̍h chun Iâ-hô-hoa chòe tōa. 17 Chóng-sī góa sī khùn-khó͘ sòng-hiong--ê, Chú iáu-kú siàu-liām góa; Lí sī pang-chān góa--ê, chín-kiù góa--ê; Góa ê Siōng-tè ah, kiû Lí m̄-thang iân-chhiân.
1 大衛ê詩，交hō͘樂官。1) 眷顧sòng-hiong人ê，有福氣；
當患難ê日，耶和華beh救伊。
2 耶和華beh保全伊，hō͘伊活teh，伊beh tī地上享福；
求你m̄-thang將伊交hō͘對敵，來照in所ài。
3 伊倒在床，耶和華beh扶持伊；
伊破病ê時，你beh料理伊ê被舖。
4 我bat講，耶和華ah，求你憐憫我；
醫好我ê心神，因為我有得罪tī你。
5 我ê對敵用pháiⁿ話議論我，講，
伊tī時會死，伊ê名tī時會滅無？
6 伊若來看我，就講無影話；
伊ê心積聚奸惡，
出去外口，就四界講。
7 一切怨恨我ê人chi-bú chi-chū議論我；
In 設計謀beh害我；
8 In講，有怪病tiâu tī伊ê身軀；
伊已經倒床，永bōe koh起來。
9 連我知己ê朋友，我所óa靠，食我ê餅ê，
Kia̍h起腳後tiⁿ踢我。
10 耶和華ah，求你憐憫我，
Hō͘我起來thang報應in。
11 因為我ê對敵bōe得tio̍h對我誇口khah贏；
我tùi án-ni就知你歡喜我。
12 論到我，你因為我ê純全就扶持我，
Hō͘我永遠khiā tī你ê面前。
13 Tio̍h o-ló耶和華以色列ê上帝，
Tùi永遠到永遠，
A-bēng，koh A-bēng。
1 Tāi-pi̍t ê si, kau hō͘ Ga̍k-koaⁿ.1) Koàn-kò͘ sòng-hiong lâng ê, ū hok-khì; Tng hoān-lān ê ji̍t, Iâ-hô-hoa beh kiù i. 2 Iâ-hô-hoa beh pó-choân i, hō͘ i oa̍h--teh, i beh tī tōe-chiūⁿ hióng-hok; Kiû Lí m̄-thang chiong i kau hō͘ tùi-te̍k, lâi chiàu in só͘ ài. 3 I tó chāi-chhn̂g, Iâ-hô-hoa beh hû-chhî i; I phòa-pīⁿ ê sî, Lí beh liāu-lí i ê phē-pho͘. 4 Góa bat kóng, Iâ-hô-hoa ah, kiû Lí lîn-bín góa; I-hó góa ê sim-sîn, in-ūi góa ū tek-chōe tī Lí. 5 Góa ê tùi-te̍k ēng pháiⁿ-ōe gī-lūn góa, kóng, I tī-sî ōe sí, i ê miâ tī-sî ōe bia̍t-bô? 6 I nā lâi khòaⁿ góa, chiū kóng bô-iáⁿ ōe; I ê sim chek-chū kan-ok, Chhut-khì gōa-kháu, chiū sì-kòe kóng. 7 It-chhè oàn-hūn góa ê lâng chi-bú chi-chū gī-lūn góa; In siat kè-bô͘ beh hāi góa; 8 In kóng, Ū koài-pīⁿ tiâu tī i ê seng-khu; I í-keng tó-chhn̂g, éng bōe koh khí--lâi. 9 Liân góa ti-kí ê pêng-iú, góa só͘ óa-khò, chia̍h góa ê piáⁿ--ê, Kia̍h-khí kha-āu-tiⁿ that góa. 10 Iâ-hô-hoa ah, kiû Lí lîn-bín góa, Hō͘ góa khí-lâi thang pò-èng in. 11 In-ūi góa ê tùi-te̍k bōe tit-tio̍h tùi góa khoa-kháu khah-iâⁿ; Góa tùi án-ni chiū chai Lí hoaⁿ-hí góa. 12 Lūn-kàu góa, Lí in-ūi góa ê sûn-choân chiū hû-chhî góa, Hō͘ góa éng-oán khiā tī Lí ê bīn-chêng. 13 Tio̍h o-ló Iâ-hô-hoa Í-sek-lia̍t ê Siōng-tè, Tùi éng-oán kàu éng-oán, A-bēng, koh A-bēng.
1 Khó-la̍h後裔教示ê詩，交hō͘樂官。1) 上帝ah，我ê心切切欣慕你，
親像鹿切切欣慕溪水。
2 我ê心嘴乾，欣慕上帝，就是活ê上帝；
我啥時能到上帝面前，來見伊ah？
3 我暝日用我ê目屎chún飯食，
In對我講無soah，你ê上帝tī toh落？
4 我早前kap眾人做陣去，chhōa in到上帝ê厝；
用歡喜o-ló ê聲，大家守節；
我追念chiahê事，我ê心極其悲傷。
5 我ê心ah，你啥事鬱卒？
啥事tī我ê內面著急？
你tio̍h ǹg望上帝，
因為伊ê面ǹg我，來拯救我；所以我iáu-kú beh o-ló伊。
6 我ê上帝ah，我ê心tī我ê內面鬱卒；
所以我tùi約旦ê地kap Hek-bûn，
亦tùi Bí-sat ê山記念你。
7 你ê瀑布出聲，就深淵kap深淵相叫應；
你ê波浪，你ê大湧，lóng淹密我。
8 總是耶和華日時beh施出伊ê慈愛；
暝時伊hō͘我唱歌，
來求賞賜我活命ê上帝。
9 我beh對上帝，我ê石磐，講，你啥事bōe記得我？
我啥事因為對敵ê壓迫，憂悶來行ah？
10 我ê對敵譏刺我，親像phah碎我ê骨頭；
In對我講無soah，你ê上帝tī toh落？
11 我ê心ah，你啥事鬱卒？
啥事tī我ê內面著急？
你tio̍h ǹg望上帝；因為我iáu-kú beh o-ló伊；
伊是我ê面ê榮光，亦是我ê上帝。
1 Khó-la̍h hō͘-è kà-sī ê si, kau hō͘ Ga̍k-koaⁿ.1) Siōng-tè ah, góa ê sim chhiat-chhiat him-bō͘ Lí, Chhin-chhiūⁿ lo̍k chhiat-chhiat him-bō͘ khoe-chúi. 2 Góa ê sim chhùi-ta, him-bō͘ Siōng-tè, chiū-sī oa̍h ê Siōng-tè; Góa siáⁿ-sî ōe kàu Siōng-tè bīn-chêng, lâi kìⁿ I ah? 3 Góa mî-ji̍t ēng góa ê ba̍k-sái chún pn̄g chia̍h, In tùi góa kóng bô soah, Lí ê Siōng-tè tī toh-lo̍h? 4 Góa chá-chêng kap chèng-lâng chòe-tīn khì, chhōa in kàu Siōng-tè ê chhù; Ēng hoaⁿ-hí o-ló ê siaⁿ, tāi-ke siú choeh; Góa tui-liām chiah ê sū, góa ê sim ke̍k-kî pi-siong. 5 Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè, In-ūi I ê bīn ǹg góa, lâi chín-kiù góa; só͘-í góa iáu-kú beh o-ló I. 6 Góa ê Siōng-tè ah, góa ê sim tī góa ê lāi-bīn ut-chut; Só͘-í góa tùi Iok-tàn ê tōe kap Hek-bûn, Ia̍h tùi Bí-sat ê soaⁿ kì-liām Lí. 7 Lí ê pho̍k-pò͘ chhut-siaⁿ, chiū chhim-ian kap chhim-ian saⁿ kiò ìn; Lí ê pho-lōng, Lí ê tōa-éng, lóng im-ba̍t góa. 8 Chóng-sī Iâ-hô-hoa ji̍t--sî beh si-chhut I ê chû-ài; Mî--sî I hō͘ góa chhiùⁿ-koa, Lâi kiû siúⁿ-sù góa oa̍h-miā ê Siōng-tè. 9 Góa beh tùi Siōng-tè, góa ê chio̍h-pôaⁿ, kóng, Lí siáⁿ-sū bōe-kì-tit góa? Góa siáⁿ-sū in-ūi tùi-te̍k ê ap-pek, iu-būn lâi kiâⁿ ah? 10 Góa ê tùi-te̍k ki-chhì góa, chhin-chhiūⁿ phah-chhùi góa ê kut-thâu; In tùi góa kóng bô soah, Lí ê Siōng-tè tī toh-lo̍h? 11 Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè; in-ūi góa iáu-kú beh o-ló I; I sī góa ê bīn ê êng-kng, ia̍h sī góa ê Siōng-tè.
1 上帝ah，求祢kā我判斷；對無虔誠ê國，辯明我ê案。
求祢救我脫離奸詐不義ê人。
2 因為你是hō͘我有氣力ê上帝；啥事放sak我？
我啥事因為對敵ê壓迫，常常憂悶來行ah？
3 求你發出你ê光kap你ê真實，hō͘伊chhōa我；
帶我到你ê聖山，到你ê會幕。
4 我就beh到上帝ê祭壇，到我極歡喜ê上帝hia；
上帝ah，我ê上帝ah，我beh彈琴來o-ló你。
5 我ê心ah，你啥事鬱卒？
啥事tī我ê內面著急？
你tio̍h ǹg望上帝；
因為我iáu-kú beh o-ló伊；
伊是我ê面ê榮光，亦是我ê上帝。
1 Siōng-tè ah, kiû Lí kā góa phòaⁿ-toàn; tùi bô khiân-sêng ê kok, piān-bêng góa ê àn. Kiû Lí kiù góa thoat-lī kan-chà put-gī ê lâng. 2 In-ūi Lí sī hō͘ góa ū khùi-la̍t ê Siōng-tè; siáⁿ-sū pàng-sak góa? Góa siáⁿ-sū in-ūi tùi-te̍k ê ap-pek, siông-siông iu-būn lâi kiâⁿ ah? 3 Kiû Lí hoat-chhut Lí ê kng kap Lí ê chin-si̍t, hō͘ i chhōa góa; Tòa góa kàu Lí ê sèng-soaⁿ, kàu Lí ê hōe-bō͘. 4 Góa chiū beh kàu Siōng-tè ê chè-tôaⁿ, kàu góa ke̍k hoaⁿ-hí ê Siōng-tè hia; Siōng-tè ah, góa ê Siōng-tè ah, góa beh tôaⁿ khîm lâi o-ló Lí. 5 Góa ê sim ah, lí siáⁿ-sū ut-chut? Siáⁿ-sū tī góa ê lāi-bīn tio̍h-kip? Lí tio̍h ǹg-bāng Siōng-tè; In-ūi góa iáu-kú beh o-ló I; I sī góa ê bīn ê êng-kng, ia̍h sī góa ê Siōng-tè.
1 Khó-la̍h後裔教示ê詩，交hō͘樂官。1) 上帝ah，你tī古早，阮ê列祖ê時，所行ê事，阮親耳聽見，
阮ê列祖亦有對阮講起。
2 你bat用你ê手趕列邦，來栽培阮ê列祖，
你苦楚hiahê族，來hō͘ in發達。
3 因為in m̄是tùi in ê刀劍來得tio̍h土地；
亦m̄是in ê手救in；
就是你ê chiàⁿ手，你ê手骨，你ê面ê光救in；
因為你歡喜in。
4 上帝ah，你是我ê王；
求你出令，拯救雅各。
5 阮óa靠你，beh chhia倒阮ê對敵；
阮óa靠你ê名，beh thún踏hiahê起來攻擊阮ê人。
6 因為我無beh óa靠我ê弓，
我ê刀亦bōe救我。
7 獨獨你bat救阮脫離對敵，
Hō͘怨恨阮ê人見笑。
8 阮thong日因為上帝來誇口，
阮beh o-ló你ê名到永遠。 [Sè-la̍h]
9 總是現今你放sak阮，hō͘阮受凌辱；
無kap阮ê軍兵相kap出去。
10 你hō͘阮tī對敵ê面前oa̍t-tńg身走；
Hiah-ê怨恨阮ê人，chhut-chāi in來搶the̍h。
11 你hō͘阮親像羊做人ê食物；
Hō͘阮四散tī列邦中。
12 你bōe你ê百姓，亦無thàn-錢，
所得tio̍h ê價錢，也無加添你ê好額。
13 你hō͘阮受隔壁國ê凌辱；
受四圍ê人恥笑譏刺。
14 你hō͘阮tī列邦中做話柄；
Hō͘眾百姓對阮搖頭。
15 我ê凌辱thong日tī我ê頭前；
我ê面ê見笑遮蓋我；
16 是因為hitê詈罵、譭謗ê人ê聲，
Koh因為對敵kap報冤ê人ê緣故。
17 Chiahê lóng臨到阮，阮無bōe記得你。
亦無假影守你ê約。
18 阮ê心無pōe你；
阮ê腳步無偏離你ê路。
19 你竟然tī山狗ê所在teh傷阮，
用死ê蔭影遮蓋阮。
20 設使阮bōe記得阮ê上帝ê名，
Á是ǹg別ê神kia̍h起手；
21 上帝kiám無鑑察chitê事mah？
因為伊知人心內ê隱密。
22 阮因為你ê緣故，thong日受刣；
看做親像beh 刣 ê羊。
23 主ah，求你精神，啥事teh睏？
求你起來，m̄-thang永遠棄sak阮。
24 你啥事掩你ê面？
啥事bōe記得阮所受ê苦難kap壓制？
25 因為阮ê性命仆tī土粉；
阮ê腹肚連tī地面。
26 求你起來幫贊阮，帶念你ê慈愛救贖阮。
1 Khó-la̍h hō͘-è kà-sī ê si, kau hō͘ Ga̍k-koaⁿ.1) Siōng-tè ah, Lí tī kó͘-chá, goán ê lia̍t-chó͘ ê sî, só͘ kiâⁿ ê sū, goán chhin-hī thiaⁿ-kìⁿ, Goán ê lia̍t-chó͘ ia̍h ū tùi goán kóng-khí. 2 Lí bat ēng Lí ê chhiú kóaⁿ lia̍t-pang, lâi chai-pôe goán ê lia̍t-chó͘, Lí khó͘-chhó͘ hiah ê cho̍k, lâi hō͘ in hoat-ta̍t. 3 In-ūi in m̄-sī tùi in ê to-kiàm lâi tit-tio̍h thó͘-tōe; Ia̍h m̄-sī in ê chhiú kiù in; Chiū-sī Lí ê chiàⁿ-chhiú, Lí ê chhiú-kut, Lí ê bīn ê kng kiù in; In-ūi Lí hoaⁿ-hí in. 4 Siōng-tè ah, Lí sī góa ê Ông; Kiû Lí chhut lēng, chín-kiù Ngá-kok. 5 Goán óa-khò Lí, beh chhia-tó goán ê tùi-te̍k; Goán óa-khò Lí ê miâ, beh thún-ta̍h hiah ê khí-lâi kong-kek goán ê lâng. 6 In-ūi góa bô beh óa-khò góa ê keng, Góa ê to ia̍h bōe kiù góa. 7 To̍k-to̍k Lí bat kiù goán thoat-lī tùi-te̍k, Hō͘ oàn-hūn goán ê lâng kiàn-siàu. 8 Goán thong-ji̍t in-ūi Siōng-tè lâi khoa-kháu, Goán beh o-ló Lí ê miâ kàu éng-oán. [Sè-la̍h 9 Chóng-sī hiān-kim Lí pàng-sak goán, hō͘ goán siū lêng-jio̍k; Bô kap goán ê kun-peng saⁿ-kap chhut-khì. 10 Lí hō͘ goán tī tùi-te̍k ê bīn-chêng oa̍t-tńg-sin cháu; Hiah ê oàn-hūn goán ê lâng, chhut-chāi in lâi chhiúⁿ-the̍h. 11 Lí hō͘ goán chhin-chhiūⁿ iûⁿ chòe lâng ê chia̍h-mi̍h; Hō͘ goán sì-sòaⁿ tī lia̍t-pang tiong. 12 Lí bōe Lí ê peh-sìⁿ, ia̍h bô thàn-chîⁿ, só͘ tit-tio̍h ê kè-chîⁿ, iā bô ke-thiⁿ Lí ê hó-gia̍h. 13 Lí hō͘ goán siū keh-piah kok ê lêng-jio̍k; Siū sì-ûi ê lâng thí-chhiò ki-chhì. 14 Lí hō͘ goán tī lia̍t-pang-tiong chòe ōe-pìⁿ; Hō͘ chèng peh-sìⁿ tùi goán iô-thâu. 15 Góa ê lêng-jio̍k thong-ji̍t tī góa ê thâu-chêng; Góa ê bīn ê kiàn-siàu jia-khàm góa; 16 Sī in-ūi hit ê lóe-mē, húi-pòng ê lâng ê siaⁿ, Koh in-ūi tùi-te̍k kap pò-oan ê lâng ê iân-kò͘. 17 Chiah-ê lóng lîm-kàu goán, goán bô bōe-kì-tit Lí. Ia̍h bô ké-iáⁿ siú Lí ê iok. 18 Goán ê sim bô pōe Lí; Goán ê kha-pō͘ bô phian-lī Lí ê lō͘. 19 Lí kéng-jiân tī soaⁿ-káu ê só͘-chāi teh-siong goán, Ēng sí ê ìm-ńg jia-khàm goán. 20 Siat-sú goán bōe-kì-tit goán ê Siōng-tè ê miâ, Á-sī ǹg pa̍t ê sîn kia̍h-khí chhiú; 21 Siōng-tè kiám bô kàm-chhat chit ê sū mah? In-ūi I chai lâng sim-lāi ê ún-ba̍t. 22 Goán in-ūi Lí ê iân-kò͘, thong-ji̍t siū thâi; Khòaⁿ chòe chhin-chhiūⁿ beh thâi ê iûⁿ. 23 Chú ah, kiû Lí cheng-sîn, siáⁿ-sū teh khùn? Kiû Lí khí--lâi, m̄-thang éng-oán khì-sak goán. 24 Lí siáⁿ-sū ng Lí ê bīn? Siáⁿ-sū bōe-kì-tit goán só͘ siū ê khó͘-lān kap ap-chè? 25 In-ūi goán ê sìⁿ-miā phak tī thô͘-hún; Goán ê pak-tó͘ liâm tī tōe-bīn. 26 Kiû Lí khí-lâi pang-chān goán, Tài-liām Lí ê chû-ài kiù-sio̍k goán.
1 Khó-la̍h後裔教示ê詩，koh是愛慕ê歌；交hō͘樂官；調是用「百合花」。1) 我ê心chhèng出好ê話；
我講起我為tio̍h王所做ê；
我ê舌是敏捷ê人ê筆。
2 你比世間人khah好看，
Tī你ê嘴滿滿有恩惠，
所以上帝賜福你，直到永遠。
3 大權能ê ah，你tio̍h背劍tī腰裡，
顯出你ê榮光kap威嚴。
4 Koh tī威嚴ê中間，為tio̍h真理、謙卑、公義，
你坐車進前去，無m̄得勝；
你ê chiàⁿ手beh做thang驚ê事，hō͘你看。
5 你ê箭肉真利，
射tio̍h王ê對敵ê心，
列邦倒tī你ê下面。
6 上帝ah，你ê寶座是永永遠遠ê，
你ê國ê權柄是正直ê權柄。
7 你歡喜公義，怨恨不法，
所以上帝，你ê上帝，用歡喜ê油抹你，
贏過你chiahê同伴。
8 你ê衣裳lóng有沒藥、沉香、肉桂ê芳；
Tùi象牙ê王宮，有絲絃ê樂器hō͘你歡喜。
9 有王ê cha-bó͘-kiáⁿ tī你尊貴婦女ê中間；
王后用Gô-hui ê金裝飾，khiā tī你ê chiàⁿ-pêng。
10 Cha-bó͘-gín-á ah，你tio̍h聽，tio̍h看，tio̍h àⁿ耳孔；
M̄-thang記得你ê百姓，kap你ê老父ê家；
11 王就beh欣慕你ê súi；
因為伊是你ê主，你tio̍h拜伊。
12 Chhui-lô ê百姓beh來送禮物，
百姓中ê好額人beh對你求恩。
13 王ê cha-bó͘-kiáⁿ tī王宮內，極其榮華；
伊ê衣服是用金線繡ê。
14 伊beh穿繡花ê衣服，受chhōa到王ê面前；
做伴跟隨伊ê在室女亦beh受chhōa到你ê面前；
15 In beh歡喜快樂受引chhōa；
In beh進入王宮。
16 你ê kiáⁿ孫beh續接你ê列祖；
你beh設立in tī全地做王。
17 我beh hō͘你ê名萬代hō͘人記念；
所以萬百姓beh永永遠遠感謝你。
1 Khó-la̍h hō͘-è kà-sī ê si, koh sī ài-bō͘ ê koa; kau hō͘ Ga̍k-koaⁿ; tiāu, sī ēng "Pek-ha̍p-hoe".1) Góa ê sim chhèng-chhut hó ê ōe; Góa kóng-khí góa ūi-tio̍h ông só͘ chòe--ê; Góa ê chi̍h sī bín-chia̍t ê lâng ê pit. 2 Lí pí sè-kan lâng khah hó-khòaⁿ, Tī lí ê chhùi móa-móa ū un-hūi, Só͘-í Siōng-tè sù-hok lí, ti̍t-kàu éng-oán. 3 Tōa koân-lêng--ê ah, lí tio̍h pē kiàm tī io--nih, Hián-chhut lí ê êng-kng kap ui-giâm. 4 Koh tī ui-giâm ê tiong-kan, ūi-tio̍h chin-lí, khiam-pi, kong-gī, Lí chē-chhia chìn-chêng khì, bô m̄ tek-sèng; Lí ê chiàⁿ-chhiú beh chòe thang kiaⁿ ê sū, hō͘ lí khòaⁿ. 5 Lí ê chìⁿ-bah chin lāi, Siā-tio̍h ông ê tùi-te̍k ê sim, Lia̍t-pang tó tī lí ê ē-bīn. 6 Siōng-tè ah, Lí ê pó-chō sī éng-éng oán-oán ê, Lí ê kok ê koân-pèng sī chèng-ti̍t ê koân-pèng. 7 Lí hoaⁿ-hí kong-gī, oàn-hūn put-hoat, Só͘-í Siōng-tè, lí ê Siōng-tè, ēng hoaⁿ-hí ê iû boah lí, Iâⁿ-kè lí chiah ê tâng-phōaⁿ. 8 Lí ê i-chiûⁿ lóng ū bu̍t-io̍h, tîm-hiuⁿ, jio̍k-kùi ê phang; Tùi chhiūⁿ-gê ê ông-kiong, ū si-hiân ê ga̍k-khì hō͘ lí hoaⁿ-hí. 9 Ū ông ê cha-bó͘-kiáⁿ tī lí chun-kùi hū-lú ê tiong-kan; Ông-hō͘ ēng Gô-hui ê kim chng-thāⁿ, khiā tī lí ê chiàⁿ-pêng. 10 Cha-bó͘-gín-á ah, lí tio̍h thiaⁿ, tio̍h khòaⁿ, tio̍h àⁿ hī-khang; M̄-thang kì-tit lí ê peh-sìⁿ, kap lí ê lāu-pē ê ke; 11 Ông chiū beh him-bō͘ lí ê súi; In-ūi i sī lí ê chú, lí tio̍h pài i. 12 Chhui-lô ê peh-sìⁿ beh lâi sàng lé-mi̍h, Peh-sìⁿ tiong ê hó-gia̍h lâng beh tùi lí kiû un. 13 Ông ê cha-bó͘-kiáⁿ tī ông-kiong-lāi, ke̍k-kî êng-hôa; I ê i-ho̍k sī ēng kim-sòaⁿ siù--ê. 14 I beh chhēng siù-hoe ê i-ho̍k, siū chhōa kàu ông ê bīn-chêng; Chòe-phōaⁿ kun-sûi i ê chāi-sek-lú ia̍h beh siū chhōa kàu lí ê bīn-chêng; 15 In beh hoaⁿ-hí khoài-lo̍k siū ín-chhōa; In beh chìn-ji̍p ông-kiong. 16 Lí ê kiáⁿ-sun beh sòa-chiap lí ê lia̍t-chó͘; Lí beh siat-li̍p in tī choân-tōe chòe-ông. 17 Góa beh hō͘ lí ê miâ bān-tāi hō͘ lâng kì-liām; Só͘-í bān peh-sìⁿ beh éng-éng oán-oán kám-siā lí.
1 Khó-la̍h後裔ê詩；交hō͘樂官；調是用女音。1) 上帝是阮逃閃ê所在kap氣力。
亦是患難中及時ê幫贊。
2 所以地雖然變遷，
山雖然搖動到海中，
3 其中ê水雖然hōa-hōa哮giâ湧，
山雖然因為海漲搖choah，阮亦無驚。 [Sè-la̍h]
4 有一條河，伊ê開叉hō͘上帝ê城歡喜；
就是至koân ê所khiā起聖ê所在。
5 上帝tī hit中間，城的確bōe搖動；
天phú光，上帝beh幫贊伊。
6 異邦hōa-hōa哮，列國搖動；
上帝出伊ê聲，地就消溶。
7 萬軍ê耶和華kap阮tī-teh，
雅各ê上帝做阮ê高台。 [Sè-la̍h]
8 來ah，來看耶和華ê所做，
看伊hō͘地荒廢到怎樣。
9 伊hō͘交戰soah，到tī地極；
伊at折弓，斬斷鎗；
將戰車燒tī火中。
10 Lín tio̍h定定，tio̍h知我是上帝；
我beh tī列邦中做高大，受尊做大，
Tī遍地上亦做高大。
11 萬軍ê耶和華kap阮tī-teh；
雅各ê上帝做阮ê高台。
1 Khó-la̍h hō͘-è ê si; kau hō͘ Ga̍k-koaⁿ; tiāu, sī ēng lú-im.1) Siōng-tè sī goán tô-siám ê só͘-chāi kap khùi-la̍t. Ia̍h sī hoān-lān-tiong ki̍p-sî ê pang-chān. 2 Só͘-í tōe sui-jiân piàn-chhian, Soaⁿ sui-jiân iô-tāng kàu hái-tiong, 3 Kî-tiong ê chúi sui-jiân hōa-hōa-háu giâ-éng, Soaⁿ sui-jiân in-ūi hái-tiòng iô-choah, goán ia̍h bô kiaⁿ. [Sè-la̍h 4 Ū chi̍t tiâu hô, i ê khui-chhe hō͘ Siōng-tè ê siâⁿ hoaⁿ-hí; Chiū-sī Chì-koâiⁿ--ê só͘ khiā-khí sèng ê só͘-chāi. 5 Siōng-tè tī hit tiong-kan, siâⁿ tek-khak bōe iô-tāng; Thiⁿ-phú-kng, Siōng-tè beh pang-chān i. 6 Īⁿ-pang hōa-hōa-háu, lia̍t-kok iô-tāng; Siōng-tè chhut I ê siaⁿ, tōe chiū siau-iûⁿ. 7 Bān-kun ê Iâ-hô-hoa kap goán tī--teh, Ngá-kok ê Siōng-tè chòe goán ê koâiⁿ-tâi. [Sè-la̍h 8 Lâi ah, lâi khòaⁿ Iâ-hô-hoa ê só͘-chòe, Khòaⁿ I hō͘ tōe hong-hòe kàu cháiⁿ-iūⁿ. 9 I hō͘ kau-chiàn soah, kàu tī tōe-ke̍k; I at-chi̍h keng, chām-tn̄g chhiuⁿ; chiong chiàn-chhia sio tī hé-tiong. 10 Lín tio̍h tiāⁿ-tiāⁿ, tio̍h chai Góa sī Siōng-tè; Góa beh tī lia̍t-pang-tiong chòe koâiⁿ-tōa, siū chun chòe tōa, Tī piàn tōe-chiūⁿ ia̍h chòe koâiⁿ-tōa. 11 Bān-kun ê Iâ-hô-hoa kap goán tī-teh; Ngá-kok ê Siōng-tè chòe goán ê koâiⁿ-tâi.
1 Khó-la̍h後裔ê詩；交hō͘樂官。1) Lín眾百姓ah，lín lóng tio̍h搭手；
Tio̍h用得勝ê聲，大聲o-ló上帝。
2 因為耶和華至koân ê，thang驚ê，
伊是大君王，管理全地。
3 伊beh hō͘萬百姓降服tī阮ê下面；
亦beh hō͘列邦tī阮ê腳下。
4 伊kā阮揀阮ê產業，
就是伊所疼ê雅各ê榮光。[Sè-la̍h]
5 上帝上去，有hoah ê聲tè伊，
耶和華上去，有號頭ê聲tè伊。
6 Lín tio̍h唱歌，o-ló上帝，tio̍h唱歌o-ló；
唱歌o-ló咱ê王，tio̍h唱歌o-ló；
7 因為上帝是全地ê王，
Tio̍h用智慧唱歌o-ló伊。
8 上帝做王治理萬國；
上帝坐tī伊聖ê寶座。
9 列邦ê貴族聚集，beh做亞伯拉罕ê上帝ê百姓；
因為世界ê藤牌是屬tī上帝；
伊是極高。
1 Khó-la̍h hō͘-è ê si; kau hō͘ Ga̍k-koaⁿ.1) Lín chèng peh-sìⁿ ah, lín lóng tio̍h tah-chhiú; Tio̍h ēng tek-sèng ê siaⁿ, tōa-siaⁿ o-ló Siōng-tè. 2 In-ūi Iâ-hô-hoa chì-koâiⁿ--ê, thang kiaⁿ--ê, I sī tōa kun-ông, koán-lí choân-tōe. 3 I beh hō͘ bān peh-sìⁿ hâng-ho̍k tī goán ê ē-bīn; Ia̍h beh hō͘ lia̍t-pang tī goán ê kha-ē. 4 I kā goán kéng goán ê sán-gia̍p, Chiū-sī I só͘ thiàⁿ ê Ngá-kok ê êng-kng. [Sè-la̍h 5 Siōng-tè chiūⁿ-khì, ū hoah ê siaⁿ tè--I, Iâ-hô-hoa chiūⁿ-khì, ū hō-thâu ê siaⁿ tè--I. 6 Lín tio̍h chhiùⁿ-koa, o-ló Siōng-tè, tio̍h chhiùⁿ-koa o-ló; Chhiùⁿ-koa o-ló lán ê Ông, tio̍h chhiùⁿ-koa o-ló; 7 In-ūi Siōng-tè sī choân-tōe ê Ông, Tio̍h ēng tì-hūi chhiùⁿ-koa o-ló I. 8 Siōng-tè chòe ông tī-lí bān-kok; Siōng-tè chē tī I sèng ê pó-chō. 9 Lia̍t-pang ê kùi-cho̍k chū-chi̍p, Beh chòe A-pek-la̍h-hán ê Siōng-tè ê peh-sìⁿ; In-ūi sè-kài ê tîn-pâi sī sio̍k tī Siōng-tè; I sī ke̍k-koâiⁿ.
1 Khó-la̍h後裔ê詩歌。1) 耶和華至大，應該大大得tio̍h o-ló；
就是tī咱上帝ê城，tī伊聖ê山。
2 錫安山，大君王ê城，tī北面，
高大koh好看，hō͘全地所歡喜。
3 上帝tī祂ê宮殿內，
家己顯明做高台。
4 看ah，列王聚集，
In相kap tùi-chia經過。
5 In看見就gông-ngia̍h；
驚惶kín-緊走。
6 In tī-hia ngia̍uh-ngia̍uh-chhoah，
痛疼親像生kiáⁿ ê婦人人。
7 你用東風，
Phah破Tha-si ê船。
8 阮tī萬軍ê耶和華ê城中，就是阮ê上帝ê城中，
所看見-ê tú-tú照阮所聽見；
上帝beh hō͘ chitê城堅固到永遠。 [Sè-la̍h]
9 上帝ah，阮tī你ê殿內，
Siàu念你ê慈愛。
10 上帝ah，你所受ê o-ló，
Tú-tú kap你ê名相合，到tī地極。
你ê chiàⁿ手滿滿公義。
11 因為你ê判斷，
錫安山tio̍h歡喜，
偤大ê城tio̍h快樂。
12 Lín tio̍h se̍h錫安，四圍行伊，
算伊ê城樓，
13 詳細看伊ê城牆，
省察伊ê王宮，
Beh hō͘ lín宣傳tī後代。
14 因為chitê上帝永永遠遠做咱ê上帝；
伊beh chhōa咱到tī死ê時。
1 Khó-la̍h hō͘-è ê si-koa.1) Iâ-hô-hoa chì tōa, eng-kai tōa-tōa tit-tio̍h o-ló; Chiū-sī tī lán Siōng-tè ê siâⁿ, tī I sèng ê soaⁿ. 2 Sek-an soaⁿ, tōa kun-ông ê siâⁿ, tī pak-bīn, Koâiⁿ-tōa koh hó-khòaⁿ, Hō͘ choân-tōe só͘ hoaⁿ-hí. 3 Siōng-tè tī i ê keng-tiān-lāi, ka-kī hián-bêng chòe koâiⁿ-tâi. 4 Khòaⁿ ah, lia̍t-ông chū-chi̍p, In saⁿ-kap tùi-chia keng-kè. 5 In khòaⁿ-kìⁿ chiū gông-ngia̍h; Kiaⁿ-hiâⁿ kín-kín cháu. 6 In tī-hia ngia̍uh-ngia̍uh-chhoah, Thàng-thiàⁿ chhin-chhiūⁿ siⁿ-kiáⁿ ê hū-jîn-lâng. 7 Lí ēng tang-hong, Phah-phòa Tha-si ê chûn. 8 Goán tī bān-kun ê Iâ-hô-hoa ê siâⁿ-tiong, chiū-sī goán ê Siōng-tè ê siâⁿ-tiong, Só͘ khòaⁿ-kìⁿ-ê tú-tú chiàu goán só͘ thiaⁿ-kìⁿ; Siōng-tè beh hō͘ chit ê siâⁿ kian-kò͘ kàu éng-oán. [Sè-la̍h 9 Siōng-tè ah, goán tī Lí ê tiān-lāi, Siàu-liām Lí ê chû-ài. 10 Siōng-tè ah, Lí só͘ siū ê o-ló, Tú-tú kap Lí ê miâ saⁿ-ha̍p, kàu tī tōe-ke̍k. Lí ê chiàⁿ-chhiú móa-móa kong-gī. 11 In-ūi Lí ê phòaⁿ-toàn, Sek-an soaⁿ tio̍h hoaⁿ-hí, Iû-tāi ê siâⁿ tio̍h khoài-lo̍k. 12 Lín tio̍h se̍h Sek-an, sì-ûi kiâⁿ i, Sǹg i ê siâⁿ-lâu, 13 Siông-sè khòaⁿ i ê siâⁿ-chhiûⁿ, Séng-chhat i ê ông-kiong, Beh hō͘ lín soan-thoân tī āu-tāi. 14 In-ūi chit ê Siōng-tè éng-éng oán-oán chòe lán ê Siōng-tè; I beh chhōa lán kàu tī sí ê sî.
1 Khó-la̍h後裔ê詩；交hō͘樂官；1) 眾百姓ah，lín lóng tio̍h聽chitê，
世上lóng總khiā起ê百姓，lín tio̍h àⁿ耳孔；
2 無論下等上等，
好額sòng-hiong，lóng tio̍h án-ni。
3 我ê嘴beh講智慧，
我ê心所想是通達。
4 我beh àⁿ耳孔聽譬喻，
我beh用琴解明我ê奧妙。
5 奸惡tè我ê腳後tiⁿ四面圍我，
Tī chit號患難ê日我mih-sái驚？
6 Hiah-ê óa靠in ê勢力，
誇口in ê富有ê人，
7 無一个有法度thang贖回家己ê兄弟，
亦bōe能替伊將贖回ê價錢hō͘上帝；
8 (因為贖回in ê性命ê價錢真貴，
只有永遠放soah；)
9 Hō͘伊長長活teh，
無看見朽壞；
10 因為伊看見智慧ê人死，
愚戇ê人，kap親像cheng-siⁿ hit款ê人，亦做一下滅無；
留in ê錢財hō͘別人。
11 In心內想in ê厝beh永永tī-teh，
In khiā起ê所在beh到萬代；
In用家己ê名來名家己ê地。
12 總是人tiàm tī尊貴ê中間，bōe久長；
親像會死ê cheng-siⁿ。
13 In行chitê路，是in ê戇；
總是in以後ê人iáu-kú掠in ê話做tio̍h。 [Sè-la̍h]
14 In親像羊群，定tio̍h tio̍h落陰間；
死無beh做in ê牧者；
到早起時，正直ê人beh管轄in；
In ê súi beh hō͘陰間滅去，
致到無khiā起ê所在。
15 獨獨上帝beh贖回我ê靈魂，脫離陰間ê權柄；
因為伊beh接納我。 [Sè-la̍h]
16 人發財，家庭加添榮光，
你m̄免因為án-ni來驚；
17 因為伊死，無一項能帶去，
伊ê榮光bōe會tè伊去。
18 伊在生雖然家己誇口有福氣，
(你若gâu照顧家己，人beh o-ló你)，
19 但是伊beh歸到伊歷代ê祖公hia，
In永遠無看見光。
20 人tiàm tī尊貴ê中間，亦無醒悟，
是親像會死ê cheng-siⁿ。
1 Khó-la̍h hō͘-è ê si; kau hō͘ Ga̍k-koaⁿ;1) Chèng peh-sìⁿ ah, lín lóng tio̍h thiaⁿ chit-ê, Sè-chiūⁿ lóng-chóng khiā-khí ê peh-sìⁿ, lín tio̍h àⁿ hī-khang; 2 Bô-lūn hā-téng siōng-téng, Hó-gia̍h sòng-hiong, lóng tio̍h án-ni. 3 Góa ê chhùi beh kóng tì-hūi, Góa ê sim só͘ siūⁿ sī thong-ta̍t. 4 Góa beh àⁿ hī-khang thiaⁿ phì-jū, Góa beh ēng khîm kóe-bêng góa ê ò-biāu. 5 Kan-ok tè góa ê kha-āu-tiⁿ sì-bīn ûi góa, Tī chit-hō hoān-lān ê ji̍t góa mih-sái kiaⁿ? 6 Hiah ê óa-khò in ê sè-le̍k, Κhoa-kháu in ê pù-ū ê lâng, 7 Bô chi̍t-ê ū hoat-tō͘ thang sio̍k-hôe ka-kī ê hiaⁿ-tī, Ia̍h bōe-ōe thòe i chiong sio̍k-hôe ê kè-chîⁿ hō͘ Siōng-tè; 8 (In-ūi sio̍k-hôe in ê sìⁿ-miā ê kè-chîⁿ chin kùi, Chí-ū éng-oán pàng-soah;) 9 Hō͘ i tn̂g-tn̂g oa̍h--teh, Bô khòaⁿ-kìⁿ hiú-hoāi; 10 In-ūi i khòaⁿ-kìⁿ tì-hūi ê lâng sí, Gû-gōng ê lâng, kap chhin-chhiūⁿ cheng-siⁿ hit-khoán ê lâng, ia̍h chòe-chi̍t-ē bia̍t-bô; Lâu in ê chîⁿ-châi hō͘ pa̍t-lâng. 11 In sim-lāi siūⁿ in ê chhù beh éng-éng tī-teh, In khiā-khí ê só͘-chāi beh kàu bān-tāi; In ēng ka-kī ê miâ lâi miâ ka-kī ê tōe. 12 Chóng-sī lâng tiàm tī chun-kùi ê tiong-kan, bōe kú-tn̂g; Chhin-chhiūⁿ ōe sí ê cheng-siⁿ. 13 In kiâⁿ chit ê lō͘, sī in ê gōng; Chóng-sī in í-āu ê lâng iáu-kú lia̍h in ê ōe chòe tio̍h. [Sè-la̍h 14 In chhin-chhiūⁿ iûⁿ-kûn, tiāⁿ-tio̍h tio̍h lo̍h im-kan; Sí-bô beh chòe in ê bo̍k-chiá; Kàu chá-khí sî, chèng-ti̍t ê lâng beh koán-hat in; In ê súi beh hō͘ im-kan bia̍t--khì, Tì-kàu bô khiā-khí ê só͘-chāi. 15 To̍k-to̍k Siōng-tè beh sio̍k-hôe góa ê lêng-hûn, thoat-lī im-kan ê koân-pèng; In-ūi I beh chiap-la̍p góa. [Sè-la̍h 16 Lâng hoat-châi, ka-têng ke-thiⁿ êng-kng, Lí m̄-bián in-ūi án-ni lâi kiaⁿ; 17 In-ūi i sí, bô chi̍t-hāng ōe tòa khì, I ê êng-kng bōe-ōe tè i khì. 18 I chāi-siⁿ sui-jiân ka-kī khoa-kháu ū hok-khì, (Lí nā gâu chiàu-kò͘ ka-kī, lâng beh o-ló lí), 19 Nā-sī i beh kui kàu i le̍k-tāi ê chó͘-kong hia, In éng-oán bô khòaⁿ-kìⁿ kng. 20 Lâng tiàm tī chun-kùi ê tiong-kan, ia̍h bô chhíⁿ-gō͘, Sī chhin-chhiūⁿ ōe sí ê cheng-siⁿ.
1 A-sat ê詩。1) 全能ê上帝耶和華有講出話，來召天下；
Tùi日出到日落ê所在。
2 Tùi齊全súi ê錫安，
上帝有發出光。
3 阮ê上帝beh來，決斷無靜靜；
有火tī伊ê面前teh燒，
有風tī伊ê四圍真透。
4 伊beh叫頂面ê天kap地；
為tio̍h beh審判伊ê百姓；
5 講，tio̍h招集我聖ê百姓來我chia，
就是hiahê用祭祀kap我立約ê人。
6 Chiahê天 beh顯明伊ê公義；
因為上帝本身是做審判ê。 [Sè-la̍h]
7 我ê百姓ah，lín tio̍h聽，我beh講；
以色列ah，我beh警戒你；
我是上帝，你ê上帝。
8 我無因為你ê祭祀責備你；
你ê燒祭常常tī我ê面前。
9 我無tùi你ê厝取公ê牛，
亦無tùi你ê寮取公ê山羊。
10 因為樹林內ê百獸，
千山ê cheng-siⁿ，lóng是我ê。
11 山中ê飛鳥，我lóng知；
曠野ê走獸亦lóng屬tī我。
12 我若iau，無beh kā你講；
因為世界kap其中所充滿ê，lóng是我ê。
13 我kiám beh食牛káng ê肉，
Á是lim山羊káng ê血mah？
14 你tio̍h用感謝做祭，獻hō͘上帝；
Koh tio̍h tùi至koân ê，謝你ê願；
15 Tī患難ê日tio̍h求叫我；
我beh救你，你亦beh榮光我。
16 但是上帝對pháiⁿ人講，
你thái-thó敢傳我ê律例，
嘴講起我ê約ah？
17 其實你厭賤教示，
將我ê話hiat tī你ê ka-chiah後。
18 你看見賊，就kap伊同心；
Koh kap行姦淫ê人相kap有份。
19 你hō͘你ê嘴常常講pháiⁿ話，
你ê舌造作奸詐。
20 你坐teh譭謗你ê兄弟；
誣賴你ê同胞。
21 你行chiahê事，我靜靜無講；
你phah算我tú-tú kap你一樣。
其實我beh責備你；將chiahê事排tī你ê目睭前。
22 Lín bōe記得上帝ê人，tio̍h想chitê事，
免致我將lín拆碎，無人拯救。
23 見若用感謝獻做祭ê，就是榮光我；
謹慎行ê人，
我beh hō͘伊看見上帝ê救恩。
1 A-sat ê si.1) Choân-lêng ê Siōng-tè Iâ-hô-hoa ū kóng-chhut ōe, lâi tiàu thiⁿ-ē; Tùi ji̍t-chhut kàu ji̍t-lo̍h ê só͘-chāi. 2 Tùi chiâu-chn̂g súi ê Sek-an, Siōng-tè ū hoat-chhut kng. 3 Goán ê Siōng-tè beh lâi, koat-toàn bô chēng-chēng; Ū hé tī I ê bīn-chêng teh sio, Ū hong tī I ê sì-ûi chin thàu. 4 I beh kiò téng-bīn ê thiⁿ kap tōe; Ūi-tio̍h beh sím-phòaⁿ I ê peh-sìⁿ; 5 Kóng, Tio̍h chio-chi̍p Góa sèng ê peh-sìⁿ lâi Góa chia, Chiū-sī hiah-ê ēng chè-sū kap Góa li̍p-iok ê lâng. 6 Chiah ê thiⁿ beh hián-bêng I ê kong-gī; In-ūi Siōng-tè pún-sin sī chòe sím-phòaⁿ--ê. [Sè-la̍h 7 Góa ê peh-sìⁿ ah, lín tio̍h thiaⁿ, Góa beh kóng; Í-sek-lia̍t ah, Góa beh kéng-kài lí; Góa sī Siōng-tè, lí ê Siōng-tè. 8 Góa bô in-ūi lí ê chè-sū chek-pī lí; Lí ê sio-chè siông-siông tī Góa ê bīn-chêng. 9 Góa bô tùi lí ê chhù chhú kang ê gû, Ia̍h bô tùi lí ê tiâu chhú kang ê soaⁿ-iûⁿ. 10 In-ūi chhiū-nâ-lāi ê pah-siù, Chheng-soaⁿ ê cheng-siⁿ, lóng sī Góa ê. 11 Soaⁿ-tiong ê pe-chiáu, Góa lóng chai; Khòng-iá ê cháu-siù ia̍h lóng sio̍k tī Góa. 12 Góa nā iau, bô beh kā lí kóng; In-ūi sè-kài kap kî-tiong só͘ chhiong-móa ê, lóng sī Góa ê. 13 Góa kiám beh chia̍h gû-káng ê bah, Á-sī lim soaⁿ-iûⁿ-káng ê huih mah? 14 Lí tio̍h ēng kám-siā chòe chè, hiàn hō͘ Siōng-tè; Koh tio̍h tùi Chì-koâiⁿ--ê, siā lí ê goān; 15 Tī hoān-lān ê ji̍t tio̍h kiû-kiò Góa; Góa beh kiù lí, lí ia̍h beh êng-kng Góa. 16 Nā-sī Siōng-tè tùi pháiⁿ-lâng kóng, Lí thái-thó káⁿ thoân Góa ê lu̍t-lē, Chhùi kóng-khí Góa ê iok ah? 17 Kî-si̍t lí iàm-chiān kà-sī, Chiong Góa ê ōe hiat tī lí ê ka-chiah-āu. 18 Lí khòaⁿ-kìⁿ chha̍t, chiū kap i tâng-sim; Koh kap kiâⁿ kan-îm ê lâng saⁿ-kap ū hūn. 19 Lí hō͘ lí ê chhùi siông-siông kóng pháiⁿ-ōe, Lí ê chi̍h chō-chok kan-chà. 20 Lí chē-teh húi-pòng lí ê hiaⁿ-tī; Bû-lōa lí ê tâng-pau. 21 Lí kiâⁿ chiah ê sū, Góa chēng-chēng bô kóng; Lí phah-sǹg Góa tú-tú kap lí chi̍t-iūⁿ. Kî-si̍t Góa beh chek-pī lí; chiong chiah ê sū pâi tī lí ê ba̍k-chiu-chêng. 22 Lín bōe-kì-tit Siōng-tè ê lâng, tio̍h siūⁿ chit ê sū, Bián-tì Góa chiong lín thiah-chhùi, bô lâng chín-kiù. 23 Kìⁿ-nā ēng kám-siā hiàn chòe chè-ê, chiū-sī êng-kng Góa; Kín-sīn kiâⁿ ê lâng, Góa beh hō͘ i khòaⁿ-kìⁿ Siōng-tè ê kiù-un.
1 大衛kap Poa̍t-sī-pa同房以後，先知Ná-tan來見伊，伊做chitê詩；交hō͘樂官。1) 上帝ah，照你ê慈愛憐憫我；
照你豐盛ê慈悲擦消我ê過失；
2 將我ê罪惡一盡洗除，
亦洗清我，到無罪。
3 因為我家己知我ê過失；
我ê罪常常tī我ê面前。
4 我所犯tio̍h-ê，就是得罪你nā-tiāⁿ，
Tī你ê目睭前行chit號pháiⁿ；
致到你講話ê時，顯明做義；
判斷ê時，顯明公道。
5 我是tī罪惡中生ê，
Tī罪ê中間，我ê老母懷孕我。
6 你所ài-ê是心內誠實；
Tī我ê腹內，你beh hō͘我得tio̍h智慧。
7 求你用牛膝草洗我，我就清氣；
求你洗我，我就比雪khah白。
8 求你hō͘我得tio̍h聽見歡喜快樂ê聲；
Hō͘你所at折ê骨thang歡喜。
9 求你掩你ê面，無看我ê罪，
擦消我一切ê罪惡。
10 上帝ah，求你kā我創造清氣ê心，
Hō͘我ê內面有換新正直ê神。
11 M̄-thang 趕我，hō͘我離開你ê面；
M̄-thang tùi我收回你聖ê神。
12 求你hō͘我猶原得tio̍h你救恩ê快樂；
賞賜我有自由ê神，來扶持我。
13 我就將你ê道路指示有過失ê人；
有罪ê人就beh歸順你。
14 上帝ah，你是救我ê上帝，
求你救我脫離刣人ê罪；
我ê舌beh大聲吟詩o-ló你ê義。
15 主ah，求你開我ê嘴唇；
我ê嘴就beh報揚你ê好名聲。
16 因為你無ài祭物；若ài，我就beh獻；
燒祭你亦無歡喜。
17 上帝所ài ê祭，就是憂傷ê神；
上帝ah，憂傷痛悔ê心，你無beh看輕伊。
18 求你照你ê好意思，好款待錫安；
起造耶路撒冷ê城牆。
19 Hit時你beh歡喜義ê祭，kap燒祭，以及ka-nn̂g-chiah cheng-siⁿ ê燒祭；
Hit時人beh將公ê牛獻tī你ê壇。
1 Tāi-pi̍t kap Poa̍t-sī-pa tâng-pâng í-āu, sian-ti Ná-tan lâi kìⁿ i, i chòe chit ê si; kau hō͘ Ga̍k-koaⁿ.1) Siōng-tè ah, chiàu Lí ê chû-ài lîn-bín góa; Chiàu Lí hong-sēng ê chû-pi chhat-siau góa ê kè-sit; 2 Chiong góa ê chōe-ok it-chīn sóe-tû, Ia̍h sóe-chheng góa, kàu bô chōe. 3 In-ūi góa ka-kī chai góa ê kè-sit; Góa ê chōe siông-siông tī góa ê bīn-chêng. 4 Góa só͘ hoān-tio̍h--ê, chiū-sī tek-chōe Lí nā-tiāⁿ, Tī Lí ê ba̍k-chiu-chêng kiâⁿ chit-hō pháiⁿ; Tì-kàu Lí kóng-ōe ê sî, hián-bêng chòe-gī; Phòaⁿ-toàn ê sî, hián-bêng kong-tō. 5 Góa sī tī chōe-ok-tiong siⁿ--ê, Tī chōe ê tiong-kan, góa ê lāu-bú hoâi-īn góa. 6 Lí só͘ ài--ê sī sim-lāi sêng-si̍t; Tī góa ê pak-lāi, Lí beh hō͘ góa tit-tio̍h tì-hūi. 7 Kiû Lí ēng giû-chhek-chháu sóe góa, góa chiū chheng-khì; Kiû Lí sóe góa, góa chiū pí seh khah-pe̍h. 8 Kiû Lí hō͘ góa tit-tio̍h thiaⁿ-kìⁿ hoaⁿ-hí khoài-lo̍k ê siaⁿ; Hō͘ Lí só͘ at-chi̍h ê kut thang hoaⁿ-hí. 9 Kiû Lí ng Lí ê bīn, bô khòaⁿ góa ê chōe, Chhat-siau góa it-chhè ê chōe-ok. 10 Siōng-tè ah, kiû Lí kā góa chhòng-chō chheng-khì ê sim, Hō͘ góa ê lāi-bīn ū ōaⁿ-sin chèng-ti̍t ê sîn. 11 M̄-thang kóaⁿ góa, hō͘ góa lī-khui Lí ê bīn; M̄-thang tùi góa siu-hôe Lí sèng ê sîn. 12 Kiû Lí hō͘ góa iû-goân tit-tio̍h Lí kiù-un ê khoài-lo̍k; Siúⁿ-sù góa ū chū-iû ê sîn, lâi hû-chhî góa. 13 Góa chiū chiong Lí ê tō-lō͘ chí-sī ū kè-sit ê lâng; Ū chōe ê lâng chiū beh kui-sūn Lí. 14 Siōng-tè ah, Lí sī kiù góa ê Siōng-tè, Kiû Lí kiù góa thoat-lī thâi-lâng ê chōe; Góa ê chi̍h beh tōa-siaⁿ gîm-si o-ló Lí ê gī. 15 Chú ah, kiû Lí khui góa ê chhùi-tûn; Góa ê chhùi chiū beh pò-iông Lí ê hó miâ-siaⁿ. 16 In-ūi Lí bô ài chè-mi̍h; nā ài, góa chiū beh hiàn; Sio-chè Lí ia̍h bô hoaⁿ-hí. 17 Siōng-tè só͘ ài ê chè, chiū-sī iu-siong ê sîn; Siōng-tè ah, iu-siong thòng-hóe ê sim, Lí bô beh khòaⁿ-khin i. 18 Kiû Lí chiàu Lí ê hó ì-sù, hó khoán-thāi Sek-an; Khí-chō Iâ-lō͘-sat-léng ê siâⁿ-chhiûⁿ. 19 Hit-sî Lí beh hoaⁿ-hí gī ê chè, kap sio-chè, í-ki̍p ka-nn̂g-chiah cheng-siⁿ ê sio-chè; Hit-sî lâng beh chiong kang ê gû hiàn tī Lí ê tôaⁿ.
1 Í-tong人To-ek來報掃羅講，大衛到A-hi-bí-le̍k ê家。Hit時大衛做chitê教示ê詩；交hō͘樂官。1) 勇猛ê人ah，你啥事為tio̍h做pháiⁿ來誇口？
上帝ê慈愛永遠tī-teh。
2 你ê舌圖謀邪惡；
親像內ê剃頭刀，行奸詐。
3 你ài pháiⁿ贏過ài好；
Ài白賊贏過ài講義理。[Sè-la̍h]
4 詭譎ê舌ah，
你ài講一切吞食ê話。
5 上帝亦beh毀壞你，到永遠，
祂beh掠你，tùi你ê布棚中khiú出來；
Tùi活人ê地，將你拔出來。[Sè-la̍h]
6 義人beh看見來驚惶，
亦beh笑伊，講，
7 看ah，這就是hit號無掠上帝做伊ê氣力ê人；
是óa靠伊ê錢財ê罪，
Tī邪惡家己khiā在。
8 論到我，我是親像上帝厝內青翠ê橄欖樹；
我永永遠遠óa靠上帝ê慈愛。
9 因為你行這，我beh感謝你到永遠；
我亦beh tī你聖ê百姓ê面前ǹg望你ê名；因為伊ê名是好。
1 Í-tong lâng To-ek lâi pò Sò-lô kóng, Tāi-pi̍t kàu A-hi-bí-le̍k ê ke. Hit-sî Tāi-pi̍t chòe chit ê kà-sī ê si; kau hō͘ Ga̍k-koaⁿ.1) Ióng-béng ê lâng ah, lí siáⁿ-sū ūi-tio̍h chòe-pháiⁿ lâi khoa-kháu? Siōng-tè ê chû-ài éng-oán tī-teh. 2 Lí ê chi̍h tô͘-bô͘ siâ-ok; Chhin-chhiūⁿ lāi ê thì-thâu-to, kiâⁿ kan-chà. 3 Lí ài pháiⁿ iâⁿ-kè ài hó; Ài pe̍h-chha̍t iâⁿ-kè ài kóng gī-lí. [Sè-la̍h 4 Khúi-khiat ê chi̍h ah, Lí ài kóng it-chhè thun-chia̍h ê ōe. 5 Siōng-tè ia̍h beh húi-hoāi lí, kàu éng-oán, I beh lia̍h lí, tùi lí ê pò͘-pîⁿ-tiong khiú--chhut-lâi; Tùi oa̍h lâng ê tōe, chiong lí pu̍ih chhut lâi. [Sè-la̍h 6 Gī-lâng beh khòaⁿ-kìⁿ lâi kiaⁿ-hiâⁿ, Ia̍h beh chhiò i, kóng, 7 Khòaⁿ ah, che chiū-sī hit-hō bô lia̍h Siōng-tè chòe i ê khùi-la̍t ê lâng; Sī óa-khò i ê chîⁿ-châi ê chōe, Tī siâ-ok ka-kī khiā-chāi. 8 Lūn-kàu góa, góa sī chhin-chhiūⁿ Siōng-tè chhù-lāi chhiⁿ-chhùi ê kaⁿ-ná-chhiū; Góa éng-éng oán-oán óa-khò Siōng-tè ê chû-ài. 9 In-ūi Lí kiâⁿ che, góa beh kám-siā Lí kàu éng-oán; Góa ia̍h beh tī Lí sèng ê peh-sìⁿ ê bīn-chêng ǹg-bāng Lí ê miâ; in-ūi i ê miâ sī hó.
1 大衛教示ê詩；交hō͘樂官；調是用Bâ-hap-la̍h。1) 戇人心內講，無有上帝。
In thàn邪惡，行可惡ê罪；
無一人行好。
2 上帝tùi天àⁿ落看世間人，
Beh看有明理ê人，
有chhē求上帝ê人á無。
3 In ta̍k人lóng退後，一概變做污穢；
無人行好，連一个亦無。
4 做pháiⁿ ê人kiám bōe曉得mah？
In吞食我ê百姓親像食餅。
亦無求叫上帝。
5 In tī無thang驚惶ê所在，就大大驚惶；
因為上帝將hitê安營攻擊你ê人ê骨頭phah散；
你hō͘ in見笑，因為上帝棄sak in。
6 願以色列ê拯救tùi錫安出；
上帝救伊受掠ê百姓倒tńg來，
Hit時雅各beh快樂，以色列beh歡喜。
1 Tāi-pi̍t kà-sī ê si; kau hō͘ Ga̍k-koaⁿ; tiāu, sī ēng Bâ-hap-la̍h.1) Gōng-lâng sim-lāi kóng, Bô ū Siōng-tè. In thàn siâ-ok, kiâⁿ khó-ò͘ⁿ ê chōe; Bô chi̍t-lâng kiâⁿ hó. 2 Siōng-tè tùi thiⁿ àⁿ-lo̍h khòaⁿ sè-kan-lâng, Beh khòaⁿ ū bêng-lí ê lâng, Ū chhē-kiû Siōng-tè ê lâng á-bô. 3 In ta̍k-lâng lóng thè-āu, it-khài piàn-chòe ù-òe; Bô lâng kiâⁿ hó, liân chi̍t-ê ia̍h bô. 4 Chòe pháiⁿ ê lâng kiám bōe hiáu-tit mah? In thun-chia̍h Góa ê peh-sìⁿ chhin-chhiūⁿ chia̍h-piáⁿ. Ia̍h bô kiû-kiò Siōng-tè. 5 In tī bô thang kiaⁿ-hiâⁿ ê só͘-chāi, chiū tōa-tōa kiaⁿ-hiâⁿ; In-ūi Siōng-tè chiong hit-ê an-iâⁿ kong-kek lí ê lâng ê kut-thâu phah-sòaⁿ; Lí hō͘ in kiàn-siàu, in-ūi Siōng-tè khì-sak in. 6 Goān Í-sek-lia̍t ê chín-kiù tùi Sek-an chhut; Siōng-tè kiù I siū-lia̍h ê peh-sìⁿ tò-tńg--lâi, Hit-sî Ngá-kok beh khoài-lo̍k, Í-sek-lia̍t beh hoaⁿ-hí.
1 Se-hut人來對掃羅講，大衛kiám m̄是bih tī阮hia mah？Hit時大衛做chitê教示ê詩；交hō͘樂官；用絲絃ê樂器。1) 上帝ah，求你用你ê名救我；
用你ê大權能替我伸冤。
2 上帝ah，求你聽我ê祈禱；
Àⁿ耳孔聽我ê嘴所講ê話。
3 因為外人起來攻擊我，強惡 ê人siàu想我ê性命；
In無敬奉上帝tī in ê面前。[Sè-la̍h]
4 上帝是幫贊我ê，
主是扶持我ê活命ê。
5 伊beh將我ê對敵所行ê pháiⁿ報應in；
求你照你ê誠實滅無in。
6 我beh將甘心ê祭祀獻hō͘你；
耶和華ah，我beh感謝o-ló你ê名；因為你ê名是好。
7 伊救我出一切ê患難；
我親目看見我ê對敵tú-tio̍h報應。
1 Se-hut lâng lâi tùi Sò-lô kóng, Tāi-pi̍t kiám-m̄-sī bih tī goán hia mah? Hit-sî Tāi-pi̍t chòe chit ê kà-sī ê si; kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí ēng Lí ê miâ kiù góa; Ēng Lí ê tōa koân-lêng thòe góa sin-oan. 2 Siōng-tè ah, kiû Lí thiaⁿ góa ê kî-tó; Àⁿ hī-khang thiaⁿ góa ê chhùi só͘ kóng ê ōe. 3 In-ūi gōa-lâng khí-lâi kong-kek góa, Kiông-ok ê lâng siàu-siūⁿ góa ê sìⁿ-miā; In bô kèng-hōng Siōng-tè tī in ê bīn-chêng. [Sè-la̍h 4 Siōng-tè sī pang-chān góa ê, Chú sī hû-chhî góa ê oa̍h-miā ê. 5 I beh chiong góa ê tùi-te̍k só͘ kiâⁿ ê pháiⁿ pò-èng in; Kiû Lí chiàu Lí ê sêng-si̍t bia̍t-bô in. 6 Góa beh chiong kam-sim ê chè-sū hiàn hō͘ Lí; Iâ-hô-hoa ah, góa beh kám-siā o-ló Lí ê miâ; in-ūi Lí ê miâ sī hó. 7 I kiù góa chhut it-chhè ê hoān-lān; Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng.
1 大衛教示ê詩；交hō͘樂官；用絲絃ê樂器。1) 上帝ah，求你àⁿ耳孔聽我ê祈禱；
M̄-thang tiàm-密，m̄聽我ê懇求。
2 求你àⁿ落聽我，應我；
我悲傷無平安，haiⁿ-haiⁿ-chhan；
3 Lóng是因為對敵ê聲，pháiⁿ人ê制壓；
因為in將罪過chhia hō͘我，用受氣pek我。
4 我ê心tī我內面真苦痛；
死無ê驚惶到tī我。
5 驚惶ngia̍uh-ngia̍uh-chhoah到tī我，
驚惶淹密我。
6 我就講，願我得tio̍h si̍t，親像鴿(kap)，
我就飛去，得tio̍h安然khiā起。
7 我beh飛去遠遠，
歇tī曠野。 [Sè-la̍h]
8 我beh緊緊走到閃避ê所在，
脫離狂風報頭。
9 主ah，求你吞滅in，分開in ê舌；
因為我tī城內bat看見強暴kap相爭ê事。
10 In暝日行se̍h tī城牆頂；
Tī城內有虛假惡毒。
11 邪惡tī hit內面；
壓制奸詐無離開伊ê街路。
12 因為譭謗我ê，m̄是對敵；
設使是，就iáu能忍得；
自高攻擊我ê，m̄是怨恨我ê人；
設使是，就會bih來閃伊。
13 無phah算是你，都是我平輩 ê人，
我ê同伴，我知己 ê朋友。
14 咱平素相kap談論真親密，
咱kap眾人相kap行tī上帝ê厝。
15 願死無忽然到tī in，hō͘ in活活落陰間；
因為邪惡tī in khiā起ê所在，tī in ê中間。
16 論到我，我beh求叫上帝；
耶和華beh救我。
17 Ê-hng、早起、日晝，我beh哀傷吐氣；
伊亦beh聽我ê聲。
18 伊救贖我ê性命，脫離攻擊我ê人；hō͘我得tio̍h平安；
因為反對我ê人chōe。
19 Tùi古早常常tī-teh ê上帝，
Beh聽見，亦beh報應in；[Sè-la̍h] 就是hiahê無改變，無敬畏上帝ê人。
20 伊伸手攻擊kap伊相和ê人；
伊已經背伊ê約。
21 伊ê嘴滑澤(tia̍h)，親像奶油；
伊ê心khǹg交戰；
伊ê話柔軟，khah贏膏油，
其實是出鞘ê刀。
22 Tio̍h將你ê擔，卸hō͘耶和華；
伊beh扶持你，伊永永無hō͘義人搖choah。
23 上帝ah，你beh hō͘ in陷落tī滅無ê坑；
Thâi-死人行奸詐ê，bōe活到中年；
獨獨我beh óa靠你。
1 Tāi-pi̍t kà-sī ê si; kau hō͘ Ga̍k-koaⁿ; ēng si-hiân ê ga̍k-khì. 1) Siōng-tè ah, kiû Lí àⁿ hī-khang thiaⁿ góa ê kî-tó; M̄-thang tiàm-ba̍t, m̄ thiaⁿ góa ê khún-kiû. 2 Kiû Lí àⁿ-lo̍h thiaⁿ góa, ìn góa; Góa pi-siong bô pêng-an, haiⁿ-haiⁿ-chhan; 3 Lóng sī in-ūi tùi-te̍k ê siaⁿ, pháiⁿ-lâng ê chè-ap; In-ūi in chiong chōe-kòa chhia hō͘ góa, ēng siū-khì pek góa. 4 Góa ê sim tī góa lāi-bīn chin khó͘-thàng; Sí-bô ê kiaⁿ-hiâⁿ kàu tī góa. 5 Kiaⁿ-hiâⁿ ngia̍uh-ngia̍uh-chhoah kàu tī góa, Kiaⁿ-hiâⁿ im-ba̍t góa. 6 Góa chiū kóng, Goān góa tit-tio̍h si̍t, chhin-chhiūⁿ kap, Góa chiū pe--khì, tit-tio̍h an-jiân khiā-khí. 7 Góa beh pe--khì hn̄g-hn̄g, Hioh tī khòng-iá. [Sè-la̍h 8 Góa beh kín-kín cháu kàu siám-pī ê só͘-chāi, Thoat-lī kông-hong pò-thâu. 9 Chú ah, kiû Lí thun-bia̍t in, pun-khui in ê chi̍h; In-ūi góa tī siâⁿ-lāi bat khòaⁿ-kìⁿ kiông-pō kap saⁿ-chiⁿ ê sū. 10 In mî-ji̍t kiâⁿ-se̍h tī siâⁿ-chhiûⁿ-téng; Tī siâⁿ-lāi ū hu-ké ok-to̍k. 11 Siâ-ok tī hit lāi-bīn; Ap-chè kan-chà bô lī-khui i ê ke-lō͘. 12 In-ūi húi-pòng góa--ê, m̄-sī tùi-te̍k; Siat-sú sī, chiū iáu ōe lún--tit; Chū-ko kong-kek góa--ê, m̄-sī oàn-hūn góa ê lâng; Siat-sú sī, chiū ōe bih lâi siám i. 13 Bô phah-sǹg sī lí, to͘ sī góa pêng-pòe ê lâng, Góa ê tâng-phōaⁿ, góa ti-kí ê pêng-iú. 14 Lán pêng-sò͘ saⁿ-kap tâm-lūn chin chhin-bi̍t, Lán kap chèng-lâng saⁿ-kap kiâⁿ tī Siōng-tè ê chhù. 15 Goān sí-bô hut-jiân kàu tī in, Hō͘ in oa̍h-oa̍h lo̍h im-kan; In-ūi siâ-ok tī in khiā-khí ê só͘-chāi, tī in ê tiong-kan. 16 Lūn-kàu góa, góa beh kiû-kiò Siōng-tè; Iâ-hô-hoa beh kiù góa. 17 Ê-hng, chá-khí, ji̍t-tàu, góa beh ai-siong thó͘-khùi; I ia̍h beh thiaⁿ góa ê siaⁿ. 18 I kiù-sio̍k góa ê sìⁿ-miā, thoat-lī kong-kek góa ê lâng; hō͘ góa tit-tio̍h pêng-an; In-ūi hoán-tùi góa ê lâng chōe. 19 Tùi kó͘-chá siông-siông tī-teh ê Siōng-tè, Beh thiaⁿ-kìⁿ, ia̍h beh pò-èng in; [Sè-la̍h Chiū-sī hiah ê bô kóe-pìⁿ, bô kèng-ùi Siōng-tè ê lâng. 20 I chhun-chhiú kong-kek kap i saⁿ-hô ê lâng; I í-keng pōe i ê iok. 21 I ê chhùi ku̍t-tia̍h, chhin-chhiūⁿ lin-iû; I ê sim khǹg kau-chiàn; I ê ōe jiû-loán, khah-iâⁿ ko-iû, Kî-si̍t sī chhut-siù ê to. 22 Tio̍h chiong lí ê tàⁿ, sià hō͘ Iâ-hô-hoa; I beh hû-chhî lí, I éng-éng bô hō͘ gī-lâng iô-choah. 23 Siōng-tè ah, Lí beh hō͘ in hām-lo̍h tī bia̍t-bô ê khiⁿ; Thâi-sí lâng kiâⁿ kan-chà ê, bōe oa̍h kàu tiong-liân; To̍k-to̍k góa beh óa-khò Lí.
1 腓利士人tī Ka-te̍k掠tio̍h大衛，hit時伊做chitê金ê詩；交hō͘樂官；調是用「遠遠無聲ê鴿」1) 上帝ah，求你可憐我，因為人beh吞食我；
Thong日攻擊，壓制我。
2 我ê對敵thong日beh吞食我，
因為起驕傲攻擊我ê人真chōe。
3 我tī驚惶ê時，
我beh óa靠你。
4 我靠上帝，我beh o-ló伊ê話；
我已經óa靠上帝，我就無驚。
屬tī血氣ê beh啥法得我ta-ôa？
5 In thong日改chhoa̍h我ê話；
In對我所想ê，lóng是beh害我。
6 In聚集、埋伏，teh siòng我ê腳步，
親像當等beh害我ê性命。
7 In做pháiⁿ kiám會逃脫mah？
上帝ah，求你tī受氣中，hō͘眾百姓墮落。
8 我ê流落，你lóng 記數；
求你將我ê目屎siu tī你ê皮囊；
這kiám無lóng記tī你ê冊mah？
9 我求叫ê日，我ê對敵lóng beh oa̍t-tńg身退去；
上帝為我，這是我所知。
10 我靠上帝，我beh o-ló伊ê話；
我靠耶和華，我beh o-ló伊ê話。
11 我已經óa靠上帝，我就無驚；
人beh啥法得我ta-ôa？
12 上帝ah，我對你所hē ê願tī我ê身上；
我beh用謝恩ê祭獻hō͘你。
13 因為你救我ê活命脫離死無；
你kiám m̄是保護我ê腳無跋倒mah？
Hō͘我tī上帝ê面前，行tī活命ê光中mah？
1 Hui-lī-sū lâng tī Ka-te̍k lia̍h-tio̍h Tāi-pi̍t, hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "hn̄g-hn̄g bô siaⁿ ê kap"1) Siōng-tè ah, kiû Lí khó-lîn góa, in-ūi lâng beh thun-chia̍h góa; Thong-ji̍t kong-kek, ap-chè góa. 2 Góa ê tùi-te̍k thong-ji̍t beh thun-chia̍h góa, In-ūi khí kiau-ngō͘ kong-kek góa ê lâng chin chōe. 3 Góa tī kiaⁿ-hiâⁿ ê sî, Góa beh óa-khò Lí. 4 Góa khò Siōng-tè, góa beh o-ló I ê ōe; Góa í-keng óa-khò Siōng-tè, góa chiū bô kiaⁿ. Sio̍k tī hiat-khì--ê beh siáⁿ hoat-tit góa ta-ôa? 5 In thong-ji̍t kóe-chhoa̍h góa ê ōe; In tùi góa só͘-siūⁿ--ê, lóng sī beh hāi góa. 6 In chū-chi̍p, bâi-ho̍k, teh siòng góa ê kha-pō͘, Chhin-chhiūⁿ tng-tán beh hāi góa ê sìⁿ-miā. 7 In chòe-pháiⁿ kiám ōe tô-thoat mah? Siōng-tè ah, kiû Lí tī siū-khì-tiong, hō͘ chèng peh-sìⁿ tūi-lo̍h. 8 Góa ê liû-lo̍k, Lí lóng kì-siàu; Kiû Lí chiong góa ê ba̍k-sái siu tī Lí ê phê-lông; Che kiám bô lóng kì tī Lí ê chheh mah? 9 Góa kiû-kiò ê ji̍t, góa ê tùi-te̍k lóng beh oa̍t-tńg-sin thè--khì; Siōng-tè ūi góa, che sī góa só͘ chai. 10 Góa khò Siōng-tè, góa beh o-ló I ê ōe; Góa khò Iâ-hô-hoa, góa beh o-ló I ê ōe. 11 Góa í-keng óa-khò Siōng-tè, góa chiū bô kiaⁿ; Lâng beh siáⁿ hoat-tit góa ta-ôa? 12 Siōng-tè ah, góa tùi Lí só͘ hē ê goān tī góa ê sin-chiūⁿ; Góa beh ēng siā-un ê chè hiàn hō͘ Lí. 13 In-ūi Lí kiù góa ê oa̍h-miā thoat-lī sí-bô; Lí kiám-m̄-sī pó-hō͘ góa ê kha bô poa̍h-tó mah? Hō͘ góa tī Siōng-tè ê bīn-chêng, kiâⁿ tī oa̍h-miā ê kng tiong mah?
1 大衛閃避掃羅，bih tī洞內；hit時伊做chitê金ê詩；交hō͘樂官；調是用「莫得毀壞ê」。1) 上帝ah，求你可憐我，可憐我；
我ê身beh投歇tī你；
我beh 投歇tī你翼股ê致蔭下，
Thèng候chiahê災厄經過。
2 我beh求叫至koân ê上帝；
就是kā我chhiâⁿ-tî ta̍k項事ê上帝。
3 當hitê beh吞食我ê人譭謗我ê時，
上帝beh施恩，tùi天救我；[Sè-la̍h]
亦beh發出伊ê慈愛，kap伊ê誠實。
4 我ê性命tī獅ê中間；我倒tī親像火to̍h ê世間人ê中間；
In ê嘴齒是鎗是箭，
In ê舌是利刀。
5 上帝ah，願你高大pôaⁿ過chiahê天，
願你ê榮光pôaⁿ過全地。
6 In kā我ê腳步設羅網，
壓制我ê心神；
In tī我ê面前開陷坑，
家己反tńg跋落hit內面。 [Sè-la̍h]
7 上帝ah，我ê心自在，我ê心自在；
我beh吟詩，我beh唱歌o-ló。
8 我ê神ah，你tio̍h精神起來；
琴ah，瑟ah，lín tio̍h精神起來；
我本身beh真早精神起來。
9 主ah，我beh tī 萬百姓ê中間感謝你；
Tī列邦ê中間唱歌o-ló你。
10 因為你ê慈愛大到抵天，
你ê誠實到穹蒼。
11 上帝ah，願你高大pôaⁿ過chiahê天；
願你ê榮光pôaⁿ過全地。
1 Tāi-pi̍t siám-pī Sò-lô, bih tī tōng-lāi; hit-sî i chòe chit ê kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hoāi--ê".1) Siōng-tè ah, kiû Lí khó-lîn góa, khó-lîn góa; Góa ê sin beh tâu-hioh tī Lí; Góa beh tâu-hioh tī Lí si̍t-kó͘ ê tì-ìm-ē, Thèng-hāu chiah ê chai-ē keng-kè. 2 Góa beh kiû-kiò Chì-koâiⁿ ê Siōng-tè; Chiū-sī kā góa chhiâⁿ-tî ta̍k-hāng sū ê Siōng-tè. 3 Tng hit ê beh thun-chia̍h góa ê lâng húi-pòng góa ê sî, Siōng-tè beh si-un, tùi thiⁿ kiù góa; [Sè-la̍h Ia̍h beh hoat-chhut I ê chû-ài, kap I ê sêng-si̍t. 4 Góa ê sìⁿ-miā tī sai ê tiong-kan; Góa tó tī chhin-chhiūⁿ hé to̍h ê sè-kan lâng ê tiong-kan; In ê chhùi-khí sī chhiuⁿ sī chìⁿ, In ê chi̍h sī lāi-to. 5 Siōng-tè ah, goān Lí koâiⁿ-tōa pôaⁿ-kè chiah ê thiⁿ, Goān Lí ê êng-kng pôaⁿ-kè choân-tōe. 6 In kā góa ê kha-pō͘ siat lô-bāng, Ap-chè góa ê sim-sîn; In tī góa ê bīn-chêng khui hām-khiⁿ, Ka-kī hoán-tńg poa̍h-lo̍h hit lāi-bīn. [Sè-la̍h 7 Siōng-tè ah, góa ê sim chū-chāi, góa ê sim chū-chāi; Góa beh gîm-si, góa beh chhiùⁿ-koa o-ló. 8 Góa ê sîn ah, lí tio̍h cheng-sîn khí-lâi; Khîm ah, sek ah, lín tio̍h cheng-sîn khí-lâi; Góa pún-sin beh chin chá cheng-sîn khí-lâi. 9 Chú ah, Góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí. 10 In-ūi Lí ê chû-ài tōa kàu tú-thiⁿ, Lí ê sêng-si̍t kàu kiong-chhong. 11 Siōng-tè ah, goān Lí koâiⁿ-tōa pôaⁿ-kè chiah ê thiⁿ; Goān Lí ê êng-kng pôaⁿ-kè choân-tōe.
1 大衛金ê詩；交hō͘樂官；調是用「莫得毀壞」。1) 世間人ah，lín靜靜kiám真正講公義mah？
Lín kiám照誠實行審判mah？
2 M̄是，lín是心內做pháiⁿ；
Lín tī地上，用lín ê手所做ê強暴，秤(chhìn)hō͘人。
3 Pháiⁿ人一下出母胎，就kap上帝生疏；
一下離開老母ê腹肚，就行叉路，講白賊話。
4 In ê毒親像蛇ê毒，
In親像臭耳人ê毒蛇塞密耳孔；
5 M̄聽驅蛇ê人ê聲，
雖bóng gâu畫符念咒ê，in亦m̄聽。
6 上帝ah，求你phah折in嘴內ê齒；
耶和華ah，求你phah折獅á-thûn ê大支嘴齒。
7 願in消滅親像緊緊流ê水；
In ê箭比beh射ê時，願in ê箭親像phah折。
8 願in親像lô͘螺，消溶去；
Koh親像婦人人ka-la̍uh無見tio̍h天日ê胎。
9 Lín用刺á hiâⁿ火，鼎iáu未熱，
伊beh用捲螺風，將生ê kap to̍h-ê，做一下掃去。
10 義人看見報應ê事，就歡喜；
伊beh tī pháiⁿ人ê血洗伊ê腳。
11 人就beh講，義人真正有好報；
Tī地面上果然有上帝teh判斷。
1 Tāi-pi̍t kim ê si; kau hō͘ Ga̍k-koaⁿ; tiāu, sī ēng "Bo̍h-tit húi-hoāi".1) Sè-kan lâng ah, lín chēng-chēng kiám chin-chiàⁿ kóng kong-gī mah? Lín kiám chiàu sêng-si̍t kiâⁿ sím-phòaⁿ mah? 2 M̄-sī, lín sī sim-lāi chòe pháiⁿ; Lín tī tōe-chiūⁿ, ēng lín ê chhiú só͘ chòe ê kiông-pō, chhìn hō͘ lâng. 3 Pháiⁿ-lâng chi̍t-ē chhut bú-thai, chiū kap Siōng-tè chhiⁿ-so͘; Chi̍t-ē lī-khui lāu-bú ê pak-tó͘, chiū kiâⁿ chha-lō͘, kóng pe̍h-chha̍t ōe. 4 In ê to̍k chhin-chhiūⁿ chôa ê to̍k, In chhin-chhiūⁿ chhàu-hī-lâng ê to̍k-chôa that-ba̍t hī-khang; 5 M̄-thiaⁿ khu-chôa ê lâng ê siaⁿ, Sui-bóng gâu ūi-hû liām-chiù--ê, in ia̍h m̄-thiaⁿ. 6 Siōng-tè ah, kiû Lí phah-chi̍h in chhùi-lāi ê khí; Iâ-hô-hoa ah, kiû Lí phah-chi̍h sai-á-thûn ê tōa ki chhùi-khí. 7 Goān in siau-bia̍t chhin-chhiūⁿ kín-kín lâu ê chúi; In ê chìⁿ pí beh siā ê sî, goān in ê chìⁿ chhin-chhiūⁿ phah-chi̍h. 8 Goān in chhin-chhiūⁿ lō͘-lê, siau-iûⁿ--khì; Koh chhin-chhiūⁿ hū-jîn-lâng ka-la̍uh bô kìⁿ-tio̍h thiⁿ-ji̍t ê thai. 9 Lín ēng chhì-á hiâⁿ hé, tiáⁿ iáu-bē jia̍t, I beh ēng kńg-lê-hong, chiong chhiⁿ--ê kap to̍h--ê, chòe chi̍t-ē sàu--khì. 10 Gī-lâng khòaⁿ-kìⁿ pò-èng ê sū, chiū hoaⁿ-hí; I beh tī pháiⁿ-lâng ê huih sóe i ê kha. 11 Lâng chiū beh kóng, Gī-lâng chin-chiàⁿ ū hó-pò; Tī tōe-bīn-chiūⁿ kó-jiân ū Siōng-tè teh phòaⁿ-toàn.
1 掃羅差人去埋伏大衛ê厝，beh 刣伊；hit時大衛做chitê金ê詩；交hō͘樂官；調用「莫得毀壞」。1) 我ê上帝ah，求你救我脫離我ê對敵；
安置我tī高ê所在，得tio̍h脫離hiahê起來攻擊我ê人。
2 求你救我脫離做pháiⁿ ê人，
Koh救我脫離ài 刣-死人ê人。
3 因為in埋伏beh害我ê性命；
有猛人聚集來攻擊我；
耶和華ah，這m̄是因為我ê過失，亦m̄是因為我ê罪過。
4 我雖然無過失，in走來，備辦beh害我；
求你精神起來幫贊我，來鑑察。
5 萬軍ê上帝耶和華，就是以色列ê上帝ah，
求你起來，辨理萬國；m̄-thang憐憫見若行奸詐ê pháiⁿ人。[Sè-la̍h]
6 In ê-hng時tò來，喉叫親像狗；
Tī城裡四界行。
7 In ê嘴吐出pháiⁿ話，嘴唇有刀。
因為in講，Chī-chūi聽見？
8 但是你耶和華beh笑in，
你beh chhìn笑列邦。
9 我ê氣力ah，我beh ǹg望你；
因為上帝是我ê高台。
10 我ê上帝beh用慈愛迎接我；
上帝beh hō͘我看見我ê對敵受報應。
11 莫得剿滅in，驚見我ê百姓bōe記得；
主ah，阮ê藤牌ah，
求你用你ê氣力，hō͘ in四散，koh降低。
12 因為in嘴ê罪過kap嘴唇ê話，
以及in所講ê咒罵kap白賊，
願in tī驕傲ê中間受掠tio̍h。
13 求你受氣剿滅in，剿滅in，到lóng無去；
Hō͘ in知上帝tī雅各ê中間掌權，
到tī地極。[Sè-la̍h]
14 In ê-hng時tò來，喉叫親像狗；
Tī城裡四界行。
15 In beh走來走去chhē食物；
若無得tio̍h飽，就thong暝thèng候。
16 但是我beh唱歌o-ló你ê氣力，
早起時beh大聲o-ló你ê慈愛；
因為你bat做我ê高台，
Tī患難ê日，做我逃閃ê所在。
17 我ê氣力ah，我beh唱歌o-ló你；
因為上帝是我ê高台，是我慈愛ê上帝。
1 Sò-lô chhe lâng khì bâi-ho̍k Tāi-pi̍t ê chhù, beh thâi--i; hit-sî Tāi-pi̍t chòe chit ê kim ê si; kau hō͘ Ga̍k-koaⁿ; tiāu, ēng "Bo̍h-tit húi-hoāi".1) Góa ê Siōng-tè ah, kiû Lí kiù góa thoat-lī góa ê tùi-te̍k; An-tì góa tī koâiⁿ ê só͘-chāi, tit-tio̍h thoat-lī hiah-ê khí-lâi kong-kek góa ê lâng. 2 Kiû Lí kiù góa thoat-lī chòe-pháiⁿ ê lâng, Koh kiù góa thoat-lī ài thâi-sí lâng ê lâng. 3 In-ūi in bâi-ho̍k beh hāi góa ê sìⁿ-miā; Ū béng-lâng chū-chi̍p lâi kong-kek góa; Iâ-hô-hoa ah, che m̄-sī in-ūi góa ê kè-sit, ia̍h m̄-sī in-ūi góa ê chōe-kòa. 4 Góa sui-jiân bô kè-sit, in cháu lâi, pī-pān beh hāi góa; Kiû Lí cheng-sîn khí-lâi pang-chān góa, lâi kàm-chhat. 5 Bān-kun ê Siōng-tè Iâ-hô-hoa, chiū-sī Í-sek-lia̍t ê Siōng-tè ah, Kiû Lí khí--lâi, pān-lí bān-kok; m̄-thang lîn-bín kìⁿ-nā kiâⁿ kan-chà ê pháiⁿ-lâng. [Sè-la̍h 6 In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ. 7 In ê chhùi thò͘-chhut pháiⁿ-ōe, Chhùi-tûn ū to. In-ūi in kóng, Chī-chūi thiaⁿ-kìⁿ? 8 Nā-sī Lí Iâ-hô-hoa beh chhiò in, Lí beh chhìn-chhiò lia̍t-pang. 9 Góa ê khùi-la̍t ah, góa beh ǹg-bāng Lí; In-ūi Siōng-tè sī góa ê koâiⁿ-tâi. 10 Góa ê Siōng-tè beh ēng chû-ài ngiâ-chih góa; Siōng-tè beh hō͘ góa khòaⁿ-kìⁿ góa ê tùi-te̍k siū pò-èng. 11 Bo̍h-tit châu-bia̍t in, kiaⁿ-kìⁿ góa ê peh-sìⁿ bōe-kì-tit; Chú ah, goán ê tîn-pâi ah, Kiû Lí ēng Lí ê khùi-la̍t, hō͘ in sì-sòaⁿ, koh kàng-kē. 12 In-ūi in chhùi ê chōe-kòa kap chhùi-tûn ê ōe, Í-ki̍p in só͘ kóng ê chiù-mē kap pe̍h-chha̍t, Goān in tī kiau-ngō͘ ê tiong-kan siū lia̍h-tio̍h. 13 Kiû Lí siū-khì châu-bia̍t in, châu-bia̍t in, kàu lóng bô--khì; Hō͘ in chai Siōng-tè tī Ngá-kok ê tiong-kan chiáng-koân, Kàu tī tōe-ke̍k. [Sè-la̍h 14 In ê-hng-sî tò--lâi, âu-kiò chhin-chhiūⁿ káu; Tī siâⁿ--nih sì-kòe kiâⁿ. 15 In beh cháu-lâi cháu-khì chhē chia̍h-mi̍h; Nā bô tit-tio̍h pá, chiū thong-mî thèng-hāu. 16 Nā-sī góa beh chhiùⁿ-koa o-ló Lí ê khùi-la̍t, Chá-khí-sî beh tōa-siaⁿ o-ló Lí ê chû-ài; In-ūi Lí bat chòe góa ê koâiⁿ-tâi, Tī hoān-lān ê ji̍t, chòe góa tô-siám ê só͘-chāi. 17 Góa ê khùi-la̍t ah, góa beh chhiùⁿ-koa o-ló Lí; In-ūi Siōng-tè sī góa ê koâiⁿ-tâi, sī góa chû-ài ê Siōng-tè.
1 大衛tī兩條溪ê A-lân，以及Só-pa ê A-lân，交戰ê時，Iok-ap tò來tī鹽谷，刣死Í-tong人一萬兩千，hit時大衛做chitê金ê詩，hō͘人學習；交hō͘樂官；調用「做干證ê百合花」。1) 上帝ah，你bat棄sak阮，破壞阮；
你bat受氣阮，求你hō͘阮koh興起。
2 你hō͘地振動，亦hō͘伊崩裂；
願你醫好伊ê裂痕；因為地搖動。
3 你hō͘你ê百姓tú-tio̍h艱難；
你hō͘阮lim hitê hō͘人顛來倒去ê酒。
4 你用旗賞賜敬畏你ê人，
Thang為真理kia̍h起來ia̍t。[Sè-la̍h]
5 求你聽阮，用chiàⁿ手牽救阮，
Thang hō͘你所疼ê人得tio̍h救。
6 上帝已經kí伊ê聖潔來講，我beh大悅，
我beh分開示劍，量So͘-kat ê山谷。
7 Ki-lia̍t是我ê，Má-ná-se亦是我ê；
Í-hoat-liân是我ê頭盔；
偤大是我ê權柄。
8 Mô͘-ap beh做我ê浴盆；我beh hiat我ê鞋tī Í-tong；
腓利士地ah，你因為我來大聲hoah。
9 Chī-chūi能chhōa我入堅固ê城？
Chī-chūi chhōa我入Í-tong ê地？
10 上帝ah，你kiám m̄是棄sak阮mah？
上帝ah，你無kap阮ê軍兵相kap出去。
11 求你幫贊阮攻擊對敵；
因為人ê拯救是空空。
12 阮óa靠上帝，做成大tāi-chì；
因為thún踏阮ê對敵ê，就是伊。
1 Tāi-pi̍t tī nn̄g-tiâu khoe ê A-lân, í-ki̍p Só-pa ê A-lân, kau-chiàn ê sî, Iok-ap tò-lâi tī Iâm-kok, thâi-sí Í-tong lâng chi̍t-bān nn̄g-chheng, hit-sî Tāi-pi̍t chòe chit ê kim ê si, hō͘ lâng ha̍k-si̍p; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Siōng-tè ah, Lí bat khì-sak goán, phò-hoāi goán; Lí bat siū-khì goán, kiû Lí hō͘ goán koh heng-khí. 2 Lí hō͘ tōe tín-tāng, ia̍h hō͘ i pang-li̍h; Goān Lí i-hó i ê li̍h-hûn; in-ūi tōe iô-tāng. 3 Lí hō͘ Lí ê peh-sìⁿ tú-tio̍h kan-lân; Lí hō͘ goán lim hit ê hō͘ lâng tian-lâi tó-khì ê chiú. 4 Lí ēng kî siúⁿ-sù kèng-ùi Lí ê lâng, Thang ūi chin-lí kia̍h--khí-lâi ia̍t. [Sè-la̍h 5 Kiû Lí thiaⁿ goán, ēng chiàⁿ-chhiú khan-kiù goán, Thang hō͘ Lí só͘ thiàⁿ ê lâng tit-tio̍h kiù. 6 Siōng-tè í-keng kí I ê sèng-kiat lâi kóng, Góa beh tāi-ia̍t, Góa beh pun-khui Sī-kiàm, niû So͘-kat ê soaⁿ-kok. 7 Ki-lia̍t sī Góa-ê, Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê koân-pèng. 8 Mô͘-ap beh chòe Góa ê e̍k-phûn; Góa beh hiat Góa ê ôe tī Í-tong; Hui-lī-sū tōe ah, lí in-ūi Góa lâi tōa-siaⁿ hoah. 9 Chī-chūi ōe chhōa góa ji̍p kian-kò͘ ê siâⁿ? Chī-chūi chhōa góa ji̍p Í-tong ê tōe? 10 Siōng-tè ah, Lí kiám m̄-sī khì-sak goán mah? Siōng-tè ah, Lí bô kap goán ê kun-peng saⁿ-kap chhut-khì. 11 Kiû Lí pang-chān goán kong-kek tùi-te̍k; In-ūi lâng ê chín-kiù sī khang-khang. 12 Goán óa-khò Siōng-tè, chòe-chiâⁿ tōa tāi-chì; In-ūi thún-ta̍h goán ê tùi-te̍k--ê, chiū-sī I.
1 大衛ê詩，交hō͘樂官；用絲絃ê樂器。1) 上帝ah，求你聽我ê求叫；
Àⁿ落聽我ê祈禱。
2 我ê心失志ê時，就beh tùi地極求叫你；
求你chhōa我到hitê比我khah高ê石磐。
3 因為你bat做我逃閃ê所在。
做我堅固ê台，來脫離對敵。
4 我beh永遠tòa tī你ê布棚；
我beh bih tī你翼下隱密ê所在。 [Sè-la̍h]
5 上帝ah，我所hē ê願，你有聽見；
你有將產業賞賜敬畏你ê名ê人。
6 你beh加添王ê歲壽；
伊ê年歲beh到代代。
7 伊beh永遠坐位tī上帝ê面前；
願你備辦慈愛kap誠實來保護伊。
8 Án-ni我beh唱歌o-ló你ê名，到永遠；
Thang日日謝我ê願。
1 Tāi-pi̍t ê si, kau hō͘ Ga̍k-koaⁿ; ēng si-hiân ê ga̍k-khì.1) Siōng-tè ah, kiû Lí thiaⁿ góa ê kiû-kiò; Àⁿ-lo̍h thiaⁿ góa ê kî-tó. 2 Góa ê sim sit-chì ê sî, chiū beh tùi tōe-ke̍k kiû-kiò Lí; Kiû Lí chhōa góa kàu hit-ê pí góa khah-koâiⁿ ê chio̍h-pôaⁿ. 3 In-ūi Lí bat chòe góa tô-siám ê só͘-chāi. Chòe góa kian-kò͘ ê tâi, lâi thoat-lī tùi-te̍k. 4 Góa beh éng-oán tòa tī Lí ê pò͘-pîⁿ; Góa beh bih tī Lí si̍t-ē ún-ba̍t ê só͘-chāi. [Sè-la̍h 5 Siōng-tè ah, góa só͘ hē ê goān, Lí ū thiaⁿ-kìⁿ; Lí ū chiong sán-gia̍p siúⁿ-sù kèng-ùi Lí ê miâ ê lâng. 6 Lí beh ke-thiⁿ ông ê hè-siū; I ê nî-hè beh kàu tāi-tāi. 7 I beh éng-oán chē-ūi tī Siōng-tè ê bīn-chêng; Goān Lí pī-pān chû-ài kap sêng-si̍t lâi pó-hō͘ i. 8 Án-ni góa beh chhiùⁿ-koa o-ló Lí ê miâ, kàu éng-oán; Thang ji̍t-ji̍t siā góa ê goān.
1 大衛ê詩，照Iâ-tō͘-tùn ê做法；交hō͘樂官。1) 我ê心靜靜，專務thèng候上帝，
我ê拯救是tùi祂來。
2 獨獨伊是我ê石磐，拯救我ê；
伊是我ê高台，我bōe大搖動。
3 Lín大家攻擊人，
將伊毀壞，
親像毀壞khi斜ê牆，beh倒ê壁，beh到tī時ah？
4 In相kap計謀專務beh tùi伊尊貴ê位kā伊chhia落去，
In歡喜白賊；
In嘴祝福，心咒詛。[Sè-la̍h]
5 我ê神ah，你tio̍h靜靜，專務thèng候上帝；
因為我ê ǹg望是tùi祂來。
6 獨獨伊是我ê石磐，是拯救我ê；
伊是我ê高台，我bōe搖動。
7 我ê拯救，我ê榮光，在tī上帝；
我ê氣力ê石磐，我ê閃避ê所在，亦在tī上帝。
8 Lín眾百姓，tio̍h時時óa靠伊；
Tī伊ê面前piàⁿ出lín ê心；
上帝是咱逃閃ê所在。[Sè-la̍h]
9 卑微ê人真正是空虛，尊貴ê人也是虛假；
Hē tī天秤碗，的確浮起來，
In一概比呼吸ê氣khah輕。
10 M̄-thang óa靠暴虐；
M̄-thang因為搶the̍h來驕傲；
若財寶加添，m̄-thang注意tī-hia。
11 上帝講一pái，
我有聽見兩項；
就是權能屬tī上帝。
12 主ah，慈愛亦是屬tī你；
因為你照ta̍k人ê所行來報應伊。
1 Tāi-pi̍t ê si, chiàu Iâ-tō͘-tùn ê chòe-hoat; kau hō͘ Ga̍k-koaⁿ.1) Góa ê sim chēng-chēng, choan-bū thèng-hāu Siōng-tè, Góa ê chín-kiù sī tùi I lâi. 2 To̍k-to̍k I sī góa ê chio̍h-pôaⁿ, chín-kiù góa-ê; I sī góa ê koâiⁿ-tâi, góa bōe tōa iô-tāng. 3 Lín tāi-ke kong-kek lâng, Chiong i húi-hoāi, Chhin-chhiūⁿ húi-hoāi khi-chhiâ ê chhiûⁿ, beh tó ê piah, beh kàu tī-sî ah? 4 In saⁿ-kap kè-bô͘ choan-bū beh tùi i chun-kùi ê ūi kā i chhia--lo̍h-khì, In hoaⁿ-hí pe̍h-chha̍t; In chhùi chiok-hok, sim chiù-chó͘. [Sè-la̍h 5 Góa ê sîn ah, lí tio̍h chēng-chēng, choan-bū thèng-hāu Siōng-tè; In-ūi góa ê ǹg-bāng sī tùi I lâi. 6 To̍k-to̍k I sī góa ê chio̍h-pôaⁿ, sī chín-kiù góa ê; I sī góa ê koâiⁿ-tâi, góa bōe iô-tāng. 7 Góa ê chín-kiù, góa ê êng-kng, chāi-tī Siōng-tè; Góa ê khùi-la̍t ê chio̍h-pôaⁿ, góa ê siám-pī ê só͘-chāi, ia̍h chāi-tī Siōng-tè. 8 Lín chèng peh-sìⁿ, tio̍h sî-sî óa-khò I; Tī I ê bīn-chêng piàⁿ-chhut lín ê sim; Siōng-tè sī lán tô-siám ê só͘-chāi. [Sè-la̍h 9 Pi-bî ê lâng chin-chiàⁿ sī khang-hu, chun-kùi ê lâng iā sī hu-ké; Hē tī thian-phêng-óaⁿ, tek-khak phû--khí-lâi, In it-khài pí ho͘-khip ê khì khah-khin. 10 M̄-thang óa-khò pō-gio̍k; M̄-thang in-ūi chhiúⁿ-the̍h lâi kiau-ngō͘; Nā châi-pó ke-thiⁿ, m̄-thang chù-ì tī-hia. 11 Siōng-tè kóng chi̍t-pái, Góa ū thiaⁿ-kìⁿ nn̄g-hāng; Chiū-sī koân-lêng sio̍k tī Siōng-tè. 12 Chú ah, chû-ài ia̍h sī sio̍k tī Lí; In-ūi Lí chiàu ta̍k-lâng ê só͘-kiâⁿ lâi pò-èng i.
1 大衛tī偤大曠野ê時做chit首詩。1) 上帝ah，你是我ê上帝；
我趁早beh chhē你。
Tī炕旱，困苦，無水ê地，
我ê心嘴乾siàu念你，我ê肉體切切欣慕你。
2 我bat án-ni tī聖所朝見你，
為tio̍h ài看你ê權能kap你ê榮光。
3 因為你ê慈愛比性命khah好，
我ê嘴唇beh o-ló你。
4 我iáu活ê時，beh án-ni o-ló你；
我beh奉你ê名，kia̍h起我ê手。
5 我ê心神beh飽足，親像食骨髓油膩；
我亦beh用歡喜ê嘴唇o-ló你；
6 就是我倒tī眠床記念你，
Tī暝間ta̍k更siàu念你ê時。
7 因為你bat幫贊我，
我tiàm tī你翼股ê致蔭下beh歡喜出聲。
8 我ê心tè你tiâu-tiâu；
你ê chiàⁿ手扶持我。
9 獨獨hiahê siàu想beh滅我ê性命ê人，
伊beh陷落tī地下深ê所在。
10 In beh hō͘刀劍刣；
In beh hō͘山狗食。
11 總是王beh因為上帝來歡喜；
凡若kí伊來chiù-chōa-ê teh-beh誇口；
因為白賊人ê嘴beh受塞密。
1 Tāi-pi̍t tī Iû-tāi khòng-iá ê sî chòe chit siú si.1) Siōng-tè ah, Lí sī góa ê Siōng-tè; góa thàn-chá beh chhē Lí. Tī khòng-hān, khùn-khó͘, bô chúi ê tōe, Góa ê sim chhùi-ta siàu-liām Lí, góa ê jio̍k-thé chhiat-chhiat him-bō͘ Lí. 2 Góa bat án-ni tī sèng-só͘ tiâu-kìⁿ Lí, Ūi-tio̍h ài khòaⁿ Lí ê koân-lêng kap Lí ê êng-kng. 3 In-ūi Lí ê chû-ài pí sìⁿ-miā khah-hó, Góa ê chhùi-tûn beh o-ló Lí. 4 Góa iáu-oa̍h ê sî, beh án-ni o-ló Lí; Góa beh hōng Lí ê miâ, kia̍h-khí góa ê chhiú. 5 Góa ê sim-sîn beh pá-chiok chhin-chhiūⁿ chia̍h kut-chhé iû-jī; Góa ia̍h beh ēng hoaⁿ-hí ê chhùi-tûn o-ló Lí; 6 Chiū-sī góa tó tī bîn-chhn̂g kì-liām Lí, Tī mî-kan ta̍k-kiⁿ siàu-liām Lí ê sî. 7 In-ūi Lí bat pang-chān góa, Góa tiàm tī Lí si̍t-kó͘ ê tì-ìm-ē beh hoaⁿ-hí chhut-siaⁿ. 8 Góa ê sim tè Lí tiâu-tiâu; Lí ê chiàⁿ-chhiú hû-chhî góa. 9 To̍k-to̍k hiah ê siàu-siūⁿ beh bia̍t góa ê sìⁿ-miā ê lâng, I beh hām-lo̍h tī tōe-ē chhim ê só͘-chāi. 10 In beh hō͘ to-kiàm thâi; In beh hō͘ soaⁿ-káu chia̍h. 11 Chóng-sī ông beh in-ūi Siōng-tè lâi hoaⁿ-hí; Hoān-nā kí I lâi chiù-chōa--ê teh-beh khoa-kháu; In-ūi pe̍h-chha̍t lâng ê chhùi beh siū that-ba̍t.
1 大衛ê詩，交hō͘樂官。1) 上帝ah，我哀傷ê時，求你聽我ê聲；
求你保護我ê活命免驚對敵。
2 求你將我khǹg密，hō͘我脫離做pháiⁿ ê人暗靜ê計謀，
Kap行不義ê人ê擾亂。
3 In磨in ê舌親像刀；
In比準in ê箭，就是惡毒ê話。
4 Beh tī暗靜ê所在射完全ê人；
In忽然射tio̍h伊，亦m̄驚。
5 In相勉勵設pháiⁿ計謀；
In參詳暗靜張羅網；
講，Chī-chūi能看見in？
6 In圖謀pháiⁿ-tāi，講，阮盡力圖謀已經有tú好ê計謀；
In ta̍k人ê念頭kap心思不止深。
7 總是上帝beh用箭射in；
In忽然tio̍h傷。
8 In beh tio̍h-tak，in ê舌會害in本身；
凡若看見in ê，lóng beh搖頭。
9 眾人lóng beh驚惶，
Beh報揚上帝所做ê，
Koh詳細想伊ê所行。
10 義人beh因為耶和華來歡喜，亦beh óa靠伊；
凡若心正直ê人，lóng beh誇口。
1 Tāi-pi̍t ê si, kau hō͘ Ga̍k-koaⁿ.1) Siōng-tè ah, góa ai-siong ê sî, kiû Lí thiaⁿ góa ê siaⁿ; Kiû Lí pó-hō͘ góa ê oa̍h-miā bián kiaⁿ tùi-te̍k. 2 Kiû Lí chiong góa khǹg-ba̍t, hō͘ góa thoat-lī chòe-pháiⁿ ê lâng àm-chīⁿ ê kè-bô͘, Kap kiâⁿ put-gī ê lâng ê jiáu-loān. 3 In bôa in ê chi̍h chhin-chhiūⁿ to; In pí-chún in ê chìⁿ, chiū-sī ok-to̍k ê ōe. 4 Beh tī àm-chīⁿ ê só͘-chāi siā oân-choân ê lâng; In hut-jiân siā-tio̍h i, ia̍h m̄-kiaⁿ. 5 In saⁿ bián-lē siat pháiⁿ kè-bô͘; In chham-siông àm-chīⁿ tiuⁿ lô-bāng; Kóng, Chī-chūi ōe khòaⁿ-kìⁿ in? 6 In tô͘-bô͘ pháiⁿ-tāi, kóng, Goán chīn-la̍t tô͘-bô͘ í-keng ū tú-hó ê kè-bô͘; In ta̍k-lâng ê liām-thâu kap sim-su put-chí chhim. 7 Chóng-sī Siōng-tè beh ēng chìⁿ siā in; In hut-jiân tio̍h-siong. 8 In beh tio̍h-tak, in ê chi̍h ōe hāi in pún-sin; Hoān-nā khòaⁿ-kìⁿ in ê , lóng beh iô-thâu. 9 Chèng-lâng lóng beh kiaⁿ-hiâⁿ, Beh pò-iông Siōng-tè só͘ chòe--ê, Koh siông-sè siūⁿ I ê só͘-kiâⁿ. 10 Gī-lâng beh in-ūi Iâ-hô-hoa lâi hoaⁿ-hí, ia̍h beh óa-khò I; Hoān-nā sim chèng-ti̍t ê lâng, lóng beh khoa-kháu.
1 大衛ê詩歌，交hō͘樂官。1) 上帝ah，tī錫安有人o-ló teh thèng候你；
亦beh對你謝所hē ê願。
2 聽人祈禱ê主ah，
見有血氣ê lóng beh就近你。
3 罪惡khah贏我；
論到阮ê過失，你lóng beh赦免。
4 你所揀選，hō͘伊親近你，
Tiàm tī你ê院內ê，chit號人有福氣；
阮beh因為你ê厝，你ê聖殿ê福氣，
來心滿意足。
5 救阮ê上帝ah，
你beh用威嚴，秉公義來應阮；
你是地極kap海面遠遠ê人，
Lóng總所óa靠ê。
6 伊已經用大權能縖腰；
就用伊ê氣力安定chiahê山。
7 Chiahê海hōa-hōa哮，kap其中海湧hōa-hōa哮，
以及萬百姓ê 喧嘩，伊hō͘ in平靜。
8 Khiā起地極ê人因為你ê神跡來驚惶；
日出日落ê所在，你hō͘ in lóng歡喜。
9 你眷顧土地，落雨灌ak伊，hō͘伊真肥；
上帝ê河，伊ê水滿滿；
你án-ni備辦土地，就是替人備辦五穀。
10 你灌ak田園，滿伊ê溝，修平伊ê稜；
落好ê雨水，hō͘土地軟軟；
其中所發生ê得tio̍h你賜福。
11 你用你ê恩典做年冬ê冕旒，
你ê路徑lóng有油teh滴。
12 滴tī曠野ê草埔；
山頭用歡喜做帶來hâ。
13 草埔用羊群做衫來穿；
山谷用五穀做moa來蓋；
In lóng歡喜出聲，來吟詩。
1 Tāi-pi̍t ê si-koa, kau hō͘ Ga̍k-koaⁿ.1) Siōng-tè ah, tī Sek-an ū lâng o-ló teh thèng-hāu Lí; Ia̍h beh tùi Lí siā só͘ hē ê goān. 2 Thiaⁿ lâng kî-tó ê Chú ah, Kìⁿ ū hiat-khì-ê lóng beh chiū-kūn Lí. 3 Chōe-ok khah-iâⁿ góa; Lūn-kàu goán ê kè-sit, Lí lóng beh sià-bián. 4 Lí só͘ kéng-soán, hō͘ i chhin-kūn Lí, Tiàm tī Lí ê īⁿ-lāi--ê, chit-hō lâng ū hok-khì; Goán beh in-ūi Lí ê chhù, Lí ê sèng-tiān ê hok-khì, Lâi sim-móa ì-chiok. 5 Kiù goán ê Siōng-tè ah, Lí beh ēng ui-giâm, péng kong-gī lâi ìn goán; Lí sī tōe-ke̍k kap hái-bīn hn̄g-hn̄g ê lâng, Lóng-chóng só͘ óa-khò--ê. 6 I í-keng ēng tōa koân-lêng hâ-io; Chiū ēng I ê khùi-la̍t an-tiāⁿ chiah ê soaⁿ. 7 Chiah ê hái hōa-hōa-háu, kap kî-tiong hái-éng hōa-hōa-háu, Í-ki̍p bān peh-sìⁿ ê soan-hoa, I hō͘ in pêng-chēng. 8 Khiā-khí tōe-ke̍k ê lâng in-ūi Lí ê sîn-jiah lâi kiaⁿ-hiâⁿ; Ji̍t-chhut ji̍t-lo̍h ê só͘-chāi, Lí hō͘ in lóng hoaⁿ-hí. 9 Lí koàn-kò͘ thó͘-tōe, lo̍h hō͘ koàn-ak i, hō͘ i chin-pûi; Siōng-tè ê hô, i ê chúi móa-móa; Lí án-ni pī-pān thó͘-tōe, chiū-sī thòe lâng pī-pān gō͘-kak. 10 Lí koàn-ak chhân-hn̂g, móa i ê kau, siu pîⁿ i ê lêng; Lo̍h hó ê hō͘-chúi, hō͘ thó͘-tōe nńg-nńg; Kî-tiong só͘ hoat-siⁿ--ê tit-tio̍h Lí sù-hok. 11 Lí ēng Lí ê un-tián chòe nî-tang ê bián-liû, Lí ê lō͘-kèng lóng ū iû teh tih. 12 Tih tī khòng-iá ê chháu-po͘; Soaⁿ-thâu ēng hoaⁿ-hí chòe-tòa lâi hâ. 13 Chháu-po͘ ēng iûⁿ-kûn chòe saⁿ lâi chhēng; Soaⁿ-kok ēng gō͘-kak chòe moa lâi khàm; In lóng hoaⁿ-hí chhut-siaⁿ, lâi gîm-si.
1 （一篇詩歌，交hō͘樂官。1) 全地lóng tio̍h tùi上帝來出歡喜ê聲；
2 唱歌o-ló伊ê名ê榮光；
用o-ló ê話來顯明伊ê榮光。
3 Tio̍h對上帝講，祢ê所做到hiah thang驚！
因為祢ê大權能，祢ê對敵beh降服祢。
4 全地beh敬拜你，
吟詩o-ló你；
Beh吟詩o-ló你ê名。[Sè-la̍h]
5 Lín tio̍h來，來看上帝所行ê事，
伊對世間人所做ê，不止thang驚。
6 伊將海變做乾地；
In步行過河；
Tī-hia阮因為伊來歡喜。
7 伊用伊ê權治理，直到永遠；
伊ê目睭鑑察列邦；
悖逆ê人m̄-thang自高。[Sè-la̍h]
8 萬百姓ah，lín tio̍h o-ló阮ê上帝；
Hō͘人聽見o-ló伊ê聲。
9 伊hō͘阮ê性命活teh；
亦無hō͘阮ê腳搖動。
10 上帝ah，你bat試驗阮；
鍛鍊阮親像鍛鍊銀一樣。
11 你hō͘阮入羅網；
用重擔hē tī阮ê身上。
12 你hō͘人坐車，pôaⁿ過阮ê頭殼；
阮經過水火。
總是你hō͘阮到富有ê所在。
13 我beh用燒祭進入祢ê厝；
我beh對祢謝我ê願，
14 就是tī我患難ê時，我ê嘴唇所講ê，
我ê嘴所hē ê願。
15 我beh用肥ê cheng-siⁿ ê燒祭，
Kap kang-羊 ê芳味，獻hō͘你；
Koh用公ê牛，公ê山羊，來獻。[Sè-la̍h]
16 凡若敬畏上帝ê人，lín lóng tio̍h來聽；
我beh講起伊為我所行ê事。
17 我bat用我ê嘴求叫伊；
用我ê舌o-ló伊做高。
18 我若心內注重罪惡，
主的確無beh聽；
19 總是上帝實在有聽見；
已經àⁿ落聽我祈禱ê聲。
20 上帝是應該o-ló-ê，
伊bē-bat推辭我ê祈禱，亦bē-bat hō͘伊ê慈愛離開我。
1 Chi̍t phiⁿ si-koa, kau hō͘ Ga̍k-koaⁿ.1) Choân-tōe lóng tio̍h tùi Siōng-tè lâi chhut hoaⁿ-hí ê siaⁿ; 2 Chhiùⁿ-koa o-ló I ê miâ ê êng-kng; Ēng o-ló ê ōe lâi hián-bêng I ê êng-kng. 3 Tio̍h tùi Siōng-tè kóng, Lí ê só͘-chòe kàu hiah thang kiaⁿ! In-ūi Lí ê tōa koân-lêng, Lí ê tùi-te̍k beh hâng-ho̍k Lí. 4 Choân-tōe beh kèng-pài Lí, Gîm-si o-ló Lí; Beh gîm-si o-ló Lí ê miâ. [Sè-la̍h 5 Lín tio̍h lâi, lâi khòaⁿ Siōng-tè só͘-kiâⁿ ê sū, I tùi sè-kan-lâng só͘-chòe--ê, put-chí thang kiaⁿ. 6 I chiong hái piàn-chòe ta-tōe; In pō͘-kiâⁿ kè-hô; Tī-hia goán in-ūi I lâi hoaⁿ-hí. 7 I ēng I ê koân tī-lí, ti̍t kàu éng-oán; I ê ba̍k-chiu kàm-chhat lia̍t-pang; Pōe-ge̍k ê lâng m̄-thang chū-ko. [Sè-la̍h 8 Bān peh-sìⁿ ah, lín tio̍h o-ló goán ê Siōng-tè; Hō͘ lâng thiaⁿ-kìⁿ o-ló I ê siaⁿ. 9 I hō͘ goán ê sìⁿ-miā oa̍h-teh; Ia̍h bô hō͘ goán ê kha iô-tāng. 10 Siōng-tè ah, Lí bat chhì-giām goán; Thoàn-liān goán chhin-chhiūⁿ thoàn-liān gûn chi̍t-iūⁿ. 11 Lí hō͘ goán ji̍p lô-bāng; Ēng tāng-tàⁿ hē tī goán ê sin-chiūⁿ. 12 Lí hō͘ lâng chē-chhia, pôaⁿ-kè goán ê thâu-khak; Goán keng-kè chúi-hé. Chóng-sī Lí hō͘ goán kàu pù-ū ê só͘-chāi. 13 Góa beh ēng sio-chè chìn-ji̍p Lí ê chhù; Góa beh tùi Lí siā góa ê goān, 14 Chiū-sī tī góa hoān-lān ê sî, góa ê chhùi-tûn só͘ kóng--ê, Góa ê chhùi só͘ hē ê goān. 15 Góa beh ēng pûi ê cheng-siⁿ ê sio-chè, Kap kang-iûⁿ ê phang-bī, hiàn hō͘ Lí; Koh ēng kang ê gû, kang ê soaⁿ-iûⁿ, lâi hiàn. [Sè-la̍h 16 Hoān-nā kèng-ùi Siōng-tè ê lâng, lín lóng tio̍h lâi thiaⁿ; Góa beh kóng-khí I ūi góa só͘ kiâⁿ ê sū. 17 Góa bat ēng góa ê chhùi kiû-kiò I; Ēng góa ê chi̍h o-ló I chòe koâiⁿ. 18 Góa nā sim-lāi chù-tiōng chōe-ok, Chú tek-khak bô beh thiaⁿ; 19 Chóng-sī Siōng-tè si̍t-chāi ū thiaⁿ-kìⁿ; Í-keng àⁿ-lo̍h thiaⁿ góa kî-tó ê siaⁿ. 20 Siōng-tè sī eng-kai o-ló--ê, I bē-bat the-sî góa ê kî-tó, ia̍h bē-bat hō͘ I ê chû-ài lī-khui góa.
1 一篇詩歌，交hō͘樂官；用絲絃ê樂器。1) 願上帝憐憫阮，賜福阮；
Hō͘伊ê面照光阮；[Sè-la̍h]
2 Thang hō͘世界知你ê道路，
萬國中知你ê救恩。
3 上帝ah，願列邦o-ló你；
願列邦lóng o-ló你。
4 願萬國快樂，出歡喜ê聲；
因為你beh照公道審判列邦；
治理地上ê萬國。[Sè-la̍h]
5 上帝ah，願列邦o-ló你；
願列邦lóng o-ló你。
6 地已經出土產，
上帝，就是阮ê上帝，beh賜福阮。
7 上帝beh賜福阮；
地ê四極lóng beh敬畏伊。
1 Chi̍t phiⁿ si-koa, kau hō͘ Ga̍k-koaⁿ; ēng si-hiân ê ga̍k-khì.1) Goān Siōng-tè lîn-bín goán, sù-hok goán; Hō͘ I ê bīn chiò-kng goán; [Sè-la̍h 2 Thang hō͘ sè-kài chai Lí ê tō-lō͘, Bān-kok-tiong chai Lí ê kiù-un. 3 Siōng-tè ah, goān lia̍t-pang o-ló Lí; Goān lia̍t-pang lóng o-ló Lí. 4 Goān bān-kok khoài-lo̍k, chhut hoaⁿ-hí ê siaⁿ; In-ūi Lí beh chiàu kong-tō sím-phòaⁿ lia̍t-pang; Tī-lí tōe-chiūⁿ ê bān-kok. [Sè-la̍h 5 Siōng-tè ah, goān lia̍t-pang o-ló Lí; Goān lia̍t-pang lóng o-ló Lí. 6 Tōe í-keng chhut thó͘-sán, Siōng-tè, chiū-sī goán ê Siōng-tè, beh sù-hok goán. 7 Siōng-tè beh sù-hok goán; Tōe ê sì-ke̍k lóng beh kèng-ùi I.
1 大衛ê詩歌；交hō͘樂官。1) 願上帝起來，hō͘伊ê對敵四散；
Hō͘怨恨伊ê人，tùi伊ê面前逃走。
2 你kā in趕散，親像煙受吹散；
Pháiⁿ人見tio̍h上帝ê面就消滅；
親像蠟見tio̍h火就熔去。
3 總是義人beh歡喜，in tī上帝ê面前beh快樂；
In亦beh歡歡喜喜。
4 Lín tio̍h對上帝吟詩，唱歌o-ló伊ê名；
為tio̍h hitê坐車經過曠野ê，修造大路；
伊ê名是耶和華。
Tio̍h tī伊ê面前快樂。
5 上帝tī伊聖ê所在，做孤兒ê父；
做寡婦ê伸冤ê。
6 上帝hō͘孤單ê人有家；
Hō͘受關監ê人出來享福；
獨獨悖逆ê人tiàm tī乾燥ê地。
7 上帝ah，早你行tī百姓ê頭前，
經過曠野；[Sè-la̍h]
8 Hit時地見tio̍h上帝ê面就振動，
天亦落雨；
Hit-ê西奈也振動，是見tio̍h上帝，以色列ê上帝ê面。
9 上帝ah，你落大雨，
你ê產業以色列厭倦ê時，你hō͘伊堅固。
10 你ê會眾tiàm tī hit中間；
上帝ah，你為tio̍h sòng-hiong人備辦恩惠。
11 主出命令；
傳好消息ê婦女chiâⁿ大陣。
12 管兵ê王逃走lah，逃走lah，
Tiàm tī家內ê婦女分tio̍h所搶ê物。
13 Lín倒tī羊椆內ê時，
親像鴿ê翼鑲白銀；
伊ê毛鑲黃金。
14 全能ê tī hit內面趕散列王ê時，
勢面親像tī Sat-bûn山落雪。
15 Pa-san山是上帝ê山；
Pa-san山是chōe-chōe山尖ê山。
16 Lín chōe-chōe山尖ê山ah，
Lín啥事gîn上帝所ài khiā起ê山？
耶和華beh tiàm tī-hia到永遠。
17 上帝ê車千千萬萬；
主tī hit中間，親像tī西奈，tī聖ê所在。
18 你已經上到高ê所在，掠hiahê受掠-ê；
你tī人ê中間受in所獻ê，連悖逆ê人亦獻；
Hō͘耶和華上帝thang khiā起in中間。
19 主是應該o-ló-ê，伊日日pē阮ê擔；
就是救阮ê上帝。[Sè-la̍h]
20 上帝是kā阮行ta̍k樣拯救ê上帝；
能脫離死無，是在tī主耶和華。
21 總是上帝beh phah破伊ê對敵ê頭殼；
就是hitê常常犯罪ê人ê頭殼。
22 主講，我beh hō͘ in tùi Pa-san 倒tńg來，
Tùi深淵hō͘ in 倒tńg來；
23 Hō͘你phah碎in，你ê腳踏tī對敵ê血；
你ê狗ê舌舐(chī)in。
24 上帝ah，你是我ê上帝，我ê王；
人已經看見你teh行，行入聖ê所在。
25 唱歌ê行tī頭前，作樂ê tè tī後面，
搖lin-long鼓ê cha-bó͘-gín-á tī中間。
26 Tùi以色列ê源頭來ê，
Tī ta̍k ê會中，tio̍h o-ló上帝，就是主。
27 Tī-hia有管轄in ê小便雅憫，
有偤大ê族長kap in kui群ê眾人；
有Se-pò͘-lûn ê族長，有Ná-hut-tha-lī ê族長。
28 你ê上帝定tio̍h你ê氣力；
上帝ah，求你堅固你kā阮所成ê事。
29 為tio̍h你耶路撒冷ê殿，
列王beh tòa禮物獻hō͘你。
30 求你責備蘆葦中ê野獸，
Kap kui群ê牛káng，以及列邦中ê牛á，
將銀踏tī腳下；
上帝趕散ài交戰ê百姓。
31 大官beh tùi埃及來；
Kó͘-si̍t beh趕緊ǹg上帝來kia̍h起手。
32 世上ê列國ah，lín tio̍h對上帝唱歌，
願lín吟詩o-ló主。[Sè-la̍h]
33 就是o-ló hitê坐tī tùi kó͘-早就有，極高ê天 ê主。
伊發出伊ê聲，就是極大ê聲。
34 Lín tio̍h將權能歸hō͘上帝；
伊ê威嚴tī以色列ê頂面，
伊ê權能是tī穹蒼。
35 上帝ah，你tùi你聖ê所在真正thang驚；
以色列ê上帝是hitê將氣力權能賞賜伊ê百姓ê，
上帝是應該o-ló ê。
1 Tāi-pi̍t ê si-koa; kau hō͘ Ga̍k-koaⁿ.1) Goān Siōng-tè khí--lâi, hō͘ I ê tùi-te̍k sì-sòaⁿ; Hō͘ oàn-hūn I ê lâng, tùi I ê bīn-chêng tô-cháu. 2 Lí kā in kóaⁿ-sòaⁿ, chhin-chhiūⁿ ian siū chhe-sòaⁿ; Pháiⁿ-lâng kìⁿ-tio̍h Siōng-tè ê bīn chiū siau-bia̍t; Chhin-chhiūⁿ la̍h kìⁿ-tio̍h hé chiū iûⁿ--khì. 3 Chóng-sī gī-lâng beh hoaⁿ-hí, in tī Siōng-tè ê bīn-chêng beh khoài-lo̍k; In ia̍h beh hoaⁿ-hoaⁿ hí-hí. 4 Lín tio̍h tùi Siōng-tè gîm-si, chhiùⁿ-koa o-ló I ê miâ; Ūi-tio̍h hit ê chē-chhia keng-kè khòng-iá--ê, siu-chō tōa-lō͘; I ê miâ sī Iâ-hô-hoa. Tio̍h tī I ê bīn-chêng khoài-lo̍k. 5 Siōng-tè tī I sèng ê só͘-chāi, chòe ko͘-jî ê pē; Chòe kóaⁿ-hū ê sin-oan--ê. 6 Siōng-tè hō͘ ko͘-toaⁿ ê lâng ū ke; Hō͘ siū koaiⁿ-kaⁿ ê lâng chhut-lâi hióng-hok; To̍k-to̍k pōe-ge̍k ê lâng tiàm tī ta-sò ê tōe. 7 Siōng-tè ah, chá Lí kiâⁿ tī peh-sìⁿ ê thâu-chêng, Keng-kè khòng-iá; [Sè-la̍h 8 Hit-sî tōe kìⁿ-tio̍h Siōng-tè ê bīn chiū tín-tāng, Thiⁿ ia̍h lo̍h hō͘; Hit ê Se-nái iā tín-tāng, sī kìⁿ-tio̍h Siōng-tè, Í-sek-lia̍t ê Siōng-tè ê bīn. 9 Siōng-tè--ah, Lí lo̍h tōa hō͘, Lí ê sán-gia̍p Í-sek-lia̍t ià-siān ê sî, Lí hō͘ i kian-kò͘. 10 Lí ê hōe-chiòng tiàm tī hit tiong-kan; Siōng-tè ah, Lí ūi-tio̍h sòng-hiong lâng pī-pān un-hūi. 11 Chú chhut bēng-lēng; Thoân hó siau-sit ê hū-lú chiâⁿ tōa-tīn. 12 Koán-peng ê ông tô-cháu lah, tô-cháu lah, Tiàm tī ke-lāi ê hū-lú pun-tio̍h só͘ chhiúⁿ ê mi̍h. 13 Lín tó tī iûⁿ-tiâu-lāi ê sî, Chhin-chhiūⁿ kap ê si̍t siuⁿ pe̍h-gûn; I ê mn̂g siuⁿ n̂g-kim. 14 Choân-lêng--ê tī hit lāi-bīn kóaⁿ-sòaⁿ lia̍t-ông ê sî, Sè-bīn chhin-chhiūⁿ tī Sat-bûn-soaⁿ lo̍h-seh. 15 Pa-san soaⁿ sī Siōng-tè ê soaⁿ; Pa-san soaⁿ sī chōe-chōe soaⁿ-chiam ê soaⁿ. 16 Lín chōe-chōe soaⁿ-chiam ê soaⁿ ah, Lín siáⁿ-sū gîn Siōng-tè só͘ ài khiā-khí ê soaⁿ? Iâ-hô-hoa beh tiàm tī-hia kàu éng-oán. 17 Siōng-tè ê chhia chheng-chheng bān-bān; Chú tī hit tiong-kan, chhin-chhiūⁿ tī Se-nái, tī sèng ê só͘-chāi. 18 Lí í-keng chiūⁿ kàu koâiⁿ ê só͘-chāi, lia̍h hiah ê siū-lia̍h--ê; Lí tī lâng ê tiong-kan siū in só͘ hiàn--ê, liân pōe-ge̍k ê lâng ia̍h hiàn; Hō͘ Iâ-hô-hoa Siōng-tè thang khiā-khí in tiong-kan. 19 Chú sī eng-kai o-ló--ê, I ji̍t-ji̍t pē goán ê tàⁿ; Chiū-sī kiù goán ê Siōng-tè. [Sè-la̍h 20 Siōng-tè sī kā goán kiâⁿ ta̍k-iūⁿ chín-kiù ê Siōng-tè; Ōe thoat-lī sí-bô, sī chāi-tī Chú Iâ-hô-hoa. 21 Chóng-sī Siōng-tè beh phah-phòa I ê tùi-te̍k ê thâu-khak; Chiū-sī hit ê siông-siông hoān-chōe ê lâng ê thâu-khak. 22 Chú kóng, Góa beh hō͘ in tùi Pa-san tò-tńg--lâi, Tùi chhim-ian hō͘ in tò-tńg-lâi; 23 Hō͘ lí phah-chhùi in, lí ê kha ta̍h tī tùi-te̍k ê huih; Lí ê káu ê chi̍h chī--in. 24 Siōng-tè ah, Lí sī góa ê Siōng-tè, góa ê ông; Lâng í-keng khòaⁿ-kìⁿ Lí teh kiâⁿ, kiâⁿ ji̍p sèng ê só͘-chāi. 25 Chhiùⁿ-koa--ê kiâⁿ tī thâu-chêng, chok-ga̍k--ê tè tī āu-bīn, Iô lin-long-kó͘ ê cha-bó͘-gín-á tī tiong-kan. 26 Tùi Í-sek-lia̍t ê goân-thâu lâi--ê, Tī ta̍k ê hōe-tiong, tio̍h o-ló Siōng-tè, chiū-sī Chú. 27 Tī-hia ū koán-hat in ê sió Piān-ngá-bín, Ū Iû-tāi ê cho̍k-tiúⁿ kap in kui-kûn ê chèng-lâng; Ū Se-pò͘-lûn ê cho̍k-tiúⁿ, ū Ná-hut-tha-lī ê cho̍k-tiúⁿ. 28 Lí ê Siōng-tè tiāⁿ-tio̍h lí ê khùi-la̍t; Siōng-tè ah, kiû Lí kian-kò͘ Lí kā goán só͘ chiâⁿ ê sū. 29 Ūi-tio̍h Lí Iâ-lō͘-sat-léng ê tiān, Lia̍t-ông beh tòa lé-mi̍h hiàn hō͘ Lí. 30 Kiû Lí chek-pī lô͘-úi-tiong ê iá-siù, Kap kui-kûn ê gû-káng, í-ki̍p lia̍t-pang-tiong ê gû-á, Chiong gûn ta̍h tī kha-ē; Siōng-tè kóaⁿ-sòaⁿ ài kau-chiàn ê peh-sìⁿ. 31 Tōa-koaⁿ beh tùi Ai-ki̍p lâi; Kó͘-si̍t beh kóaⁿ-kín ǹg Siōng-tè lâi kia̍h-khí chhiú. 32 Sè-chiūⁿ ê lia̍t-kok ah, lín tio̍h tùi Siōng-tè chhiùⁿ-koa, Goān lín gîm-si o-ló Chú. [Sè-la̍h 33 Chiū-sī o-ló hit ê chē tī tùi kó͘-chá chiū ū, ke̍k-koâiⁿ ê thiⁿ ê Chú. I hoat-chhut I ê siaⁿ, chiū-sī ke̍k-tōa ê siaⁿ. 34 Lín tio̍h chiong koân-lêng kui hō͘ Siōng-tè; I ê ui-giâm tī Í-sek-lia̍t ê téng-bīn, I ê koân-lêng sī tī kiong-chhong. 35 Siōng-tè ah, Lí tùi Lí sèng ê só͘-chāi chin-chiàⁿ thang kiaⁿ; Í-sek-lia̍t ê Siōng-tè sī hit ê chiong khùi-la̍t koân-lêng siúⁿ-sù I ê peh-sìⁿ ê, Siōng-tè sī eng-kai o-ló ê.
1 大衛ê詩；交hō͘樂官；調是用「百合花」。1) 上帝ah，求你救我，
因為chiahê水beh淹我ê性命。
2 我陷落tī深ê土糜內，無thang khiā腳ê所在；
我到深ê水內，大水淹密我。
3 我因為我ê喉叫到厭倦，我ê嚨喉乾去；
我因為thèng候我ê上帝，目睭花。
4 無因端怨恨我ê khah chōe我ê頭毛；
Lām-sám做我ê對敵，beh滅無我ê，不止強猛；
我所無搶ê，我也tio̍h hêng。
5 上帝ah，我ê愚戇你本知；
我ê罪過無隱瞞tī你。
6 萬軍ê主耶和華ah，求你m̄-thang hō͘ hiahê thèng候你ê人為tio̍h我來見笑；
以色列ê上帝ah，求你m̄-thang hō͘ hiahê chhē你ê人為tio̍h我來受凌辱。
7 因為我為tio̍h你ê緣故受詈罵，
我滿面見笑。
8 我ê兄弟看我做過路ê人，
我ê同胞看我做外邦人。
9 因為我為tio̍h你ê厝心內親像火to̍h；
Koh詈罵你ê人ê詈罵lóng到tī我。
10 我流目屎，用禁食刻苦我ê心；
這反tńg做我ê凌辱。
11 我用麻布做衣裳，
人就用我做笑談。
12 坐tī城門-ê談論我；
酒漢用我做歌曲。
13 總是我tī得tio̍h接納ê時，對耶和華祢祈禱；
上帝ah，求祢照祢慈愛ê豐盛，
照祢拯救ê真實來應我。
14 求你救我出土糜，hō͘我無沉落去；
求你救我脫離怨恨我ê人，hō͘我出深ê水。
15 求你莫得容允大水淹密我；
莫得容允深淵吞我；
莫得ióng-ún陷坑hām我。
16 耶和華ah，求你應我，因為你ê慈愛是好；
求你照你慈悲ê豐盛oa̍t過來看我。
17 M̄-thang掩面m̄看你ê奴僕；
因為我tī患難ê中間，求你緊緊來應我。
18 求你親近我ê靈魂來救贖伊；
求你因為我ê對敵來贖回我。
19 你知我所受ê詈罵，見笑，凌辱；
我ê對敵lóng tī你ê面前。
20 詈罵已經拆裂我ê心，
我ê憂悶滿滿；我ǹg望人可憐，也無一个，
Ǹg望人安慰，也chhē無一个。
21 In the̍h苦膽hō͘我做食物，
我嘴乾，in用醋hō͘我lim。
22 願in ê筵桌tī in ê面前變做羅網，
Tī in平安ê時，變做活tauh。
23 願in ê目睭烏暗bōe看見，
願你hō͘ in ê腰常常gī-gī-chhoah。
24 願你ê痛恨piàⁿ tī in ê身上；
Hō͘你烈烈ê受氣jip-tio̍h in。
25 願in khiā起ê所在變做拋荒；
願in ê布棚無人khiā起。
26 因為你所phah hitê人，in就窘迫伊；
你所phah傷hiahê人，in搬tia̍h in ê憂苦。
27 願你tī in ê罪上加罪；
莫得容允in有份你ê義。
28 願in tùi活命ê冊受擦滅，
無記tī義人ê中間。
29 總是我是困苦憂傷ê人；
上帝ah，願你ê救恩安置我tī高ê所在。
30 我beh用詩歌o-ló上帝ê名；
也beh用感謝稱祂做大。
31 這是hō͘耶和華歡喜，贏過獻牛，
Á是獻有角有蹄ê牛káng。
32 謙卑ê人看見就歡喜；
Lín chhē上帝ê人，願lín ê心活起來。
33 因為耶和華聽sòng-hiong ê人，
無看輕為tio̍h伊受關監ê人。
34 願天kap地o-ló伊；
海kap其中一切ê動物也tio̍h o-ló伊。
35 因為上帝beh救錫安，起造偤大ê城；
In beh khiā起tī-hia，得tio̍h伊做業。
36 伊ê奴僕ê後裔beh續接伊，
疼伊ê名ê人beh tiàm tī hit中間。
1 Tāi-pi̍t ê si; kau hō͘ Ga̍k-koaⁿ; tiāu sī ēng "Pek-ha̍p-hoe".1) Siōng-tè ah, kiû Lí kiù góa, In-ūi chiah ê chúi beh im góa ê sìⁿ-miā. 2 Góa hām-lo̍h tī chhim ê thô͘-bê-lāi, bô thang khiā-kha ê só͘-chāi; Góa kàu chhim ê chúi-lāi, tōa-chúi im-ba̍t góa. 3 Góa in-ūi góa ê âu-kiò kàu ià-siān, góa ê nâ-âu ta--khì; Góa in-ūi thèng-hāu góa ê Siōng-tè, ba̍k-chiu hoe. 4 Bô in-toaⁿ oàn-hūn góa-ê khah chōe góa ê thâu-mn̂g; Lām-sám chòe góa ê tùi-te̍k, beh bia̍t-bô góa-ê, put-chí kiông-béng; Góa só͘ bô chhiúⁿ ê, góa iā tio̍h hêng. 5 Siōng-tè ah, góa ê gû-gōng Lí pún chai; Góa ê chōe-kòa bô ún-môa tī Lí. 6 Bān-kun ê Chú Iâ-hô-hoa ah, kiû Lí m̄-thang hō͘ hiah ê thèng-hāu Lí ê lâng ūi-tio̍h góa lâi kiàn-siàu; Í-sek-lia̍t ê Siōng-tè ah, kiû Lí m̄-thang hō͘ hiah ê chhē Lí ê lâng ūi-tio̍h góa lâi siū lêng-jio̍k. 7 In-ūi góa ūi-tio̍h Lí ê iân-kò͘ siū lóe-mē, Góa móa-bīn kiàn-siàu. 8 Góa ê hiaⁿ-tī khòaⁿ góa chòe kè-lō͘ ê lâng, Góa ê tâng-pau khòaⁿ góa chòe gōa-pang-lâng. 9 In-ūi góa ūi-tio̍h Lí ê chhù sim-lāi chhin-chhiūⁿ hé to̍h; Koh lóe-mē Lí ê lâng ê lóe-mē lóng kàu tī góa. 10 Góa lâu ba̍k-sái, ēng kìm-chia̍h khek-khó͘ góa ê sim; Che hoán-tńg chòe góa ê lêng-jio̍k. 11 Góa ēng môa-pò͘ chòe i-chiûⁿ, Lâng chiū ēng góa chòe chhiàu-tâm. 12 Chē tī siâⁿ-mn̂g--ê tâm-lūn góa; Chiú-hàn ēng góa chòe koa-khek. 13 Chóng-sī góa tī tit-tio̍h chiap-la̍p ê sî, tùi Iâ-hô-hoa Lí kî-tó; Siōng-tè ah, kiû Lí chiàu Lí chû-ài ê hong-sēng, Chiàu Lí chín-kiù ê chin-si̍t lâi ìn góa. 14 Kiû Lí kiù góa chhut thô͘-bê, hō͘ góa bô tîm--lo̍h-khì; Kiû Lí kiù góa thoat-lī oàn-hūn góa ê lâng, hō͘ góa chhut chhim ê chúi. 15 Kiû Lí bo̍h-tit iông-ún tōa-chúi im-ba̍t góa; Bo̍h-tit iông-ún chhim-ian thun góa; Bo̍h-tit iông-ún hām-khiⁿ hām góa. 16 Iâ-hô-hoa ah, kiû Lí ìn góa, in-ūi Lí ê chû-ài sī hó; Kiû Lí chiàu Lí chû-pi ê hong-sēng oa̍t--kè-lâi khòaⁿ góa. 17 M̄-thang ng-bīn m̄-khòaⁿ Lí ê lô͘-po̍k; In-ūi góa tī hoān-lān ê tiong-kan, kiû Lí kín-kín lâi ìn góa. 18 Kiû Lí chhin-kūn góa ê lêng-hûn lâi kiù-sio̍k i; Kiû Lí in-ūi góa ê tùi-te̍k lâi sio̍k-hôe góa. 19 Lí chai góa só͘ siū ê lóe-mē, kiàn-siàu, lêng-jio̍k; Góa ê tùi-te̍k lóng tī Lí ê bīn-chêng. 20 Lóe-mē í-keng thiah-li̍h góa ê sim, góa ê iu-būn móa-móa; Góa ǹg-bāng lâng khó-lîn, iā bô chi̍t-ê, Ǹg-bāng lâng an-ùi, iā chhē bô chi̍t-ê. 21 In the̍h khó͘-táⁿ hō͘ góa chòe chia̍h-mi̍h, Góa chhùi-ta, in ēng chhò͘ hō͘ góa lim. 22 Goān in ê iân-toh tī in ê bīn-chêng pìⁿ-chòe lô-bāng, Tī in pêng-an ê sî, pìⁿ-chòe oa̍h-tauh. 23 Goān in ê ba̍k-chiu o͘-àm bōe khòaⁿ-kìⁿ, Goān Lí hō͘ in ê io siông-siông gī-gī-chhoah. 24 Goān Lí ê thòng-hūn piàⁿ tī in ê sin-chiūⁿ; Hō͘ Lí lia̍t-lia̍t ê siū-khì jip--tio̍h in. 25 Goān in khiā-khí ê só͘-chāi pìⁿ-chòe pha-hng; Goān in ê pò͘-pîⁿ bô lâng khiā-khí. 26 In-ūi Lí só͘ phah hit ê lâng, in chiū khún-pek i; Lí só͘ phah-siong hiah ê lâng, in poaⁿ-tia̍h in ê iu-khó͘. 27 Goān Lí tī in ê chōe-siōng ka chōe; Bo̍h-tit iông-ún in ū hūn Lí ê gī. 28 Goān in tùi oa̍h-miā ê chheh siū chhat-bia̍t, Bô kì tī gī-lâng ê tiong-kan. 29 Chóng-sī góa sī khùn-khó͘ iu-siong ê lâng; Siōng-tè ah, goān Lí ê kiù-un an-tì góa tī koâiⁿ ê só͘-chāi. 30 Góa beh ēng si-koa o-ló Siōng-tè ê miâ; Iā beh ēng kám-siā chheng I chòe tōa. 31 Che sī hō͘ Iâ-hô-hoa hoaⁿ-hí, iâⁿ-kè hiàn gû, Á-sī hiàn ū-kak ū-tôe ê gû-káng. 32 Khiam-pi ê lâng khòaⁿ-kìⁿ chiū hoaⁿ-hí; Lín chhē Siōng-tè ê lâng, goān lín ê sim oa̍h--khí-lâi. 33 In-ūi Iâ-hô-hoa thiaⁿ sòng-hiong ê lâng, Bô khòaⁿ-khin ūi-tio̍h I siū koaiⁿ-kaⁿ ê lâng. 34 Goān thiⁿ kap tōe o-ló I; Hái kap kî-tiong it-chhè ê tōng-bu̍t iā tio̍h o-ló I. 35 In-ūi Siōng-tè beh kiù Sek-an, khí-chō Iû-tāi ê siâⁿ; In beh khiā-khí tī-hia, tit-tio̍h i chòe-gia̍p. 36 I ê lô͘-po̍k ê hō͘-è beh sòa-chiap i, Thiàⁿ I ê miâ ê lâng beh tiàm tī hit tiong-kan.
1 大衛ê記念詩；交hō͘樂官。1) 上帝ah，求你緊緊拯救我；
耶和華ah，求你緊緊幫贊我。
2 願hiahê siàu想我ê性命ê人，見笑漏氣；
願hiahê歡喜我受陷害ê，oa̍t倒tńg受凌辱。
3 願hiahê講，Ho͘h-chāi，Ho͘h-chāi ê，
因為見笑來oa̍t倒tńg。
4 願一切chhē你ê因為你歡喜快樂；
願hiahê欣慕你救恩ê常常講，
Tio̍h尊上帝做大。
5 總是我是困苦sòng-hiong-ê，
上帝ah，求你緊緊到我chia；
你是幫贊我ê，拯救我ê，
耶和華ah，求你m̄-thang 延chhiân。
1 Tāi-pi̍t ê kì-liām si; kau hō͘ Ga̍k-koaⁿ.1) Siōng-tè ah, kiû Lí kín-kín chín-kiù góa; Iâ-hô-hoa ah, kiû Lí kín-kín pang-chān góa. 2 Goān hiah ê siàu-siūⁿ góa ê sìⁿ-miā ê lâng, kiàn-siàu làu-khùi; Goān hiah ê hoaⁿ-hí góa siū hām-hāi--ê, oa̍t-tò-tńg siū lêng-jio̍k. 3 Goān hiah-ê kóng, Ho͘h-chāi, Ho͘h--chāi ê, In-ūi kiàn-siàu lâi oa̍t-tò-tńg. 4 Goān it-chhè chhē Lí ê in-ūi Lí hoaⁿ-hí khoài-lo̍k; Goān hiah ê him-bō͘ Lí kiù-un-ê siông-siông kóng, Tio̍h chun Siōng-tè chòe tōa. 5 Chóng-sī góa sī khùn-khó͘ sòng-hiong-ê, Siōng-tè ah, kiû Lí kín-kín kàu góa chia; Lí sī pang-chān góa ê, chín-kiù góa ê, Iâ-hô-hoa ah, kiû Lí m̄-thang iân-chhiân.
1 耶和華ah，我óa靠你，
求你hō͘我永永無見笑。
2 照你ê公義拯救我，hō͘我脫離；
Àⁿ耳孔聽我，來救我。
3 求你做我thang khiā起ê石磐，hō͘我常常去tiàm hia；
你已經命令beh救我。
因為你是我ê山巖，我ê山寨。
4 我ê上帝ah，求你救我脫離pháiⁿ人ê手，
脫離不義kap殘忍ê人ê手頭。
5 因為主耶和華，你是我所ǹg望-ê；
Tùi我少年ê時你是我所óa靠ê。
6 我tùi胎裡hō͘你扶持，
hō͘我出老母ê腹肚ê，是你；
我beh常常o-ló你。
7 Chōe-chōe人掠我做奇怪；
總是你是我堅固逃閃ê所在。
8 我滿嘴beh o-ló你，
Thong日beh榮光你。
9 我年老ê時，求你m̄-thang放sak我；
我氣力衰lám ê時，求你m̄-thang離開我。
10 因為我ê對敵議論我；
Hiah-ê當等beh害我ê性命ê相kap參詳，
11 講，上帝已經放sak伊；
Taⁿ tio̍h追趕伊，掠伊；因為無救伊ê。
12 上帝ah，求你m̄-thang離開我遠遠；
我ê上帝ah，求你緊緊來幫贊我。
13 願hiahê做我性命ê對敵ê，受見笑滅無；
願hiahê計謀害我ê，受凌辱漏氣。
14 總是我beh常常ǹg望，
我beh ná久ná o-ló你，
15 你ê公義，以及你ê拯救算bōe了，
我ê嘴thong日beh講起。
16 我beh來講主耶和華大權能ê事；
我單單beh講起你ê義。
17 上帝ah，tùi我少年ê時你有教示我；
到現今我bat報揚你奇妙ê所做。
18 上帝ah，我到年老；頭毛-白ê時，求你m̄-thang放sak我；
Thèng候我將你ê氣力指示下代，
將你ê大權能指示一切將來ê人。
19 上帝ah，你ê義真高；
上帝ah，你bat行大ê事；
Chī-chūi能親像你？
20 你是hō͘阮歷過chōe-chōe大患難ê；
你beh hō͘阮koh再活；
也beh救阮tùi地ê深淵起來。
21 求你hō͘我ná高大，
Koh 倒tńg安慰我。
22 我ê上帝ah，我beh彈瑟o-ló你，
O-ló你ê真實；
以色列ê聖ê ah，
我beh彈琴o-ló你。
23 我唱歌o-ló你ê時，
我ê嘴唇，以及你所救贖我ê靈魂，beh歡喜出聲。
24 Koh我ê舌kui日beh講論你ê義，
因為hiahê計謀害我ê人已經見笑受凌辱。
1 Iâ-hô-hoa ah, góa óa-khò Lí, Kiû Lí hō͘ góa éng-éng bô kiàn-siàu. 2 Chiàu Lí ê kong-gī chín-kiù góa, hō͘ góa thoat-lī; Àⁿ hī-khang thiaⁿ góa, lâi kiù góa. 3 Kiû Lí chòe góa thang khiā-khí ê chio̍h-pôaⁿ, hō͘ góa siông-siông khì tiàm hia; Lí í-keng bēng-lēng beh kiù góa. In-ūi Lí sī góa ê soaⁿ-giâm, góa ê soaⁿ-chē. 4 Góa ê Siōng-tè ah, kiû Lí kiù góa thoat-lī pháiⁿ-lâng ê chhiú, Thoat-lī put-gī kap chân-jím ê lâng ê chhiú-thâu. 5 In-ūi Chú Iâ-hô-hoa, Lí sī góa só͘ ǹg-bāng-ê; Tùi góa siàu-liân ê sî Lí sī góa só͘ óa-khò-ê. 6 Góa tùi thai--nih hō͘ Lí hû-chhî, Hō͘ góa chhut lāu-bú ê pak-tó͘ ê, sī Lí; Góa beh siông-siông o-ló Lí. 7 Chōe-chōe lâng lia̍h góa chòe kî-koài; Chóng-sī Lí sī góa kian-kò͘ tô-siám ê só͘-chāi. 8 Góa móa-chhùi beh o-ló Lí, Thong-ji̍t beh êng-kng Lí. 9 Góa nî-lāu ê sî, kiû Lí m̄-thang pàng-sak góa; Góa khùi-la̍t soe-lám ê sî, kiû Lí m̄-thang lī-khui góa. 10 In-ūi góa ê tùi-te̍k gī-lūn góa; Hiah-ê tng-tán beh hāi góa ê sìⁿ-miā--ê saⁿ-kap chham-siông, 11 Kóng, Siōng-tè í-keng pàng-sak i; Taⁿ tio̍h tui-kóaⁿ i, lia̍h i; in-ūi bô kiù i ê. 12 Siōng-tè ah, kiû Lí m̄-thang lī-khui góa hn̄g-hn̄g; Góa ê Siōng-tè ah, kiû Lí kín-kín lâi pang-chān góa. 13 Goān hiah-ê chòe góa sìⁿ-miā ê tùi-te̍k ê, siū kiàn-siàu bia̍t-bô; Goān hiah ê kè-bô͘ hāi góa ê, siū lêng-jio̍k làu-khùi. 14 Chóng-sī góa beh siông-siông ǹg-bāng, Góa beh ná-kú ná o-ló Lí, 15 Lí ê kong-gī, í-ki̍p Lí ê chín-kiù sǹg-bōe-liáu, Góa ê chhùi thong-ji̍t beh kóng-khí. 16 Góa beh lâi kóng Chú Iâ-hô-hoa tōa koân-lêng ê sū; Góa toaⁿ-toaⁿ beh kóng-khí Lí ê gī. 17 Siōng-tè ah, tùi góa siàu-liân ê sî Lí ū kà-sī góa; Kàu hiān-kim góa bat pò-iông Lí kî-biāu ê só͘-chòe. 18 Siōng-tè ah, góa kàu nî-lāu; thâu-mn̂g-pe̍h ê sî, kiû Lí m̄-thang pàng-sak góa; Thèng-hāu góa chiong Lí ê khùi-la̍t chí-sī ē-tāi, Chiong Lí ê tōa koân-lêng chí-sī it-chhè chiong-lâi ê lâng. 19 Siōng-tè ah, Lí ê gī chin koâiⁿ; Siōng-tè ah, Lí bat kiâⁿ tōa ê sū; Chī-chūi ōe chhin-chhiūⁿ Lí? 20 Lí sī hō͘ goán le̍k-kè chōe-chōe tōa hoān-lān ê; Lí beh hō͘ goán koh-chài oa̍h; Iā beh kiù goán tùi tōe ê chhim-ian khí-lâi. 21 Kiû Lí hō͘ góa ná koâiⁿ-tōa, Koh tò-tńg an-ùi góa. 22 Góa ê Siōng-tè ah, góa beh tôaⁿ-sek o-ló Lí, O-ló Lí ê chin-si̍t; Í-sek-lia̍t ê Sèng-ê ah, Góa beh tôaⁿ-khîm o-ló Lí. 23 Góa chhiùⁿ-koa o-ló Lí ê sî, Góa ê chhùi-tûn, í-ki̍p Lí só͘ kiù-sio̍k góa ê lêng-hûn, beh hoaⁿ-hí chhut-siaⁿ. 24 Koh góa ê chi̍h kui-ji̍t beh káng-lūn Lí ê gī, In-ūi hiah ê kè-bô͘ hāi góa ê lâng í-keng kiàn-siàu siū lêng-jio̍k.
1 所羅門ê詩。1) 上帝ah，求你將你ê判斷賞賜王，
將你ê公義賞賜王ê kiáⁿ。
2 伊beh照公義審判你ê百姓，
照公平判斷你hiahê困苦ê人。
3 大山 beh因為公義，hō͘百姓平安，
山á也beh án-ni。
4 伊beh kā百姓中困苦ê人判斷，
伊beh救sòng-hiong ê人，
伊beh teh碎暴虐ê人。
5 人beh敬畏你日久月長，
直到萬世代。
6 伊beh降臨親像雨落tī已經割ê草，
親像及時ê雨潤澤土地。
7 Tī伊ê日子義人beh興旺；
大大平安kap月平久。
8 伊beh掌權tùi chitê海到hitê海，
Tùi大河到地極。
9 Khiā起tī曠野ê beh跪拜tī伊ê面前；
伊ê對敵beh舐(chī)土粉。
10 Tha-si kap海嶼ê列王beh進貢；
Sī-pa kap Se-pa ê王beh獻禮物。
11 列王lóng beh仆落拜伊，
萬國lóng beh服事伊。
12 因為sòng-hiong人求叫ê時，伊beh救伊；
困苦無依óa ê人伊也beh救。
13 伊beh憐憫清淡sòng-hiong ê人，
伊beh拯救sòng-hiong人ê性命。
14 伊beh救贖in ê性命脫離壓迫kap暴虐；
伊beh看in ê血做寶貝。
15 伊beh活teh；beh將Sī-pa ê金hō͘伊，
Beh常常為伊祈禱，thong日o-ló伊。
16 Tī地裡，tī山頂，五穀的確茂盛，
所結ê五穀beh搖動，親像黎巴嫩ê樹；
城內ê人beh興旺，親像地上ê草。
17 伊ê名beh留到永遠；
伊ê名beh流傳親像日ê久；
人beh因為伊來得tio̍h福氣；
萬國beh稱呼伊有福氣。
18 耶和華上帝，就是以色列ê上帝，
只有伊行奇異ê事，應該o-ló伊。
19 願伊榮光ê名永遠受o-ló；
願伊ê榮光充滿全地。
A-bēng，koh A-bēng。
20 耶西ê kiáⁿ大衛ê祈禱明白。
1 Só͘-lô-bûn ê si.1) Siōng-tè ah, kiû Lí chiong Lí ê phòaⁿ-toàn siúⁿ-sù ông, Chiong Lí ê kong-gī siúⁿ-sù ông ê kiáⁿ. 2 I beh chiàu kong-gī sím-phòaⁿ Lí ê peh-sìⁿ, Chiàu kong-pêng phòaⁿ-toàn Lí hiah ê khùn-khó͘ ê lâng. 3 Tōa-soaⁿ beh in-ūi kong-gī, hō͘ peh-sìⁿ pêng-an, Soaⁿ-á iā beh án-ni. 4 I beh kā peh-sìⁿ-tiong khùn-khó͘ ê lâng phòaⁿ-toàn, I beh kiù sòng-hiong ê lâng, I beh teh-chhùi pō-gio̍k ê lâng. 5 Lâng beh kèng-ùi Lí ji̍t-kú ge̍h-tn̂g, Ti̍t-kàu bān sè-tāi. 6 I beh kàng-lîm chhin-chhiūⁿ hō͘ lo̍h tī í-keng koah ê chháu, Chhin-chhiūⁿ ki̍p-sî ê hō͘ lūn-te̍k thó͘-tōe. 7 Tī I ê ji̍t-chí gī-lâng beh heng-ōng; Tōa-tōa pêng-an kap ge̍h pîⁿ kú. 8 I beh chiáng-koân tùi chit ê hái kàu hit ê hái, Tùi Tōa-hô kàu tōe-ke̍k. 9 Khiā-khí tī khòng-iá-ê beh kūi-pài tī i ê bīn-chêng; I ê tùi-te̍k beh chī thô͘-hún. 10 Tha-si kap hái-sū ê lia̍t-ông beh chìn-kòng; Sī-pa kap Se-pa ê ông beh hiàn lé-mi̍h. 11 Lia̍t-ông lóng beh phak-lo̍h pài i, Bān-kok lóng beh ho̍k-sāi i. 12 In-ūi sòng-hiong lâng kiû-kiò ê sî, i beh kiù i; Khùn-khó͘ bô i-óa ê lâng i iā beh kiù. 13 I beh lîn-bín chheng-tām sòng-hiong ê lâng, I beh chín-kiù sòng-hiong lâng ê sìⁿ-miā. 14 I beh kiù-sio̍k in ê sìⁿ-miā thoat-lī ap-pek kap pō-gio̍k; I beh khòaⁿ in ê huih chòe pó-pòe. 15 I beh oa̍h--teh; beh chiong Sī-pa ê kim hō͘ i, Beh siông-siông ūi i kî-tó, Thong-ji̍t o-ló i. 16 Tī tōe--nih, tī soaⁿ-téng, gō͘-kak tek-khak bō͘-sēng, Só͘ kiat ê gō͘-kak beh iô-tāng, chhin-chhiūⁿ Lī-pa-lùn ê chhiū; Siâⁿ-lāi ê lâng beh heng-ōng, chhin-chhiūⁿ tōe-chiūⁿ ê chháu. 17 I ê miâ beh lâu kàu éng-oán; I ê miâ beh liû-thoân chhin-chhiūⁿ ji̍t ê kú; Lâng beh in-ūi i lâi tit-tio̍h hok-khì; Bān-kok beh chheng-ho͘ i ū hok-khì. 18 Iâ-hô-hoa Siōng-tè, chiū-sī Í-sek-lia̍t ê Siōng-tè, Chí-ū I kiâⁿ kî-īⁿ ê sū, eng-kai o-ló I. 19 Goān I êng-kng ê miâ éng-oán siū o-ló; Goān I ê êng-kng chhiong-móa choân-tōe. A-bēng, koh A-bēng. 20 Iâ-se ê kiáⁿ Tāi-pi̍t ê kî-tó bêng-pe̍k.
1 A-sat ê詩。1) 上帝實在好款待以色列，
好款待hiahê心清氣ê人。
2 總是論到我，我ê腳險險踏thu̍t，
我ê腳險險chhū落去。
3 因為我看見pháiⁿ人kap驕傲ê人興旺，
Hit時我就不平。
4 因為in死ê時無痛疼，
In ê氣力也勇健。
5 In無親像別人勞苦，
也無親像別人受災厄。
6 所以用驕傲做鍊á掛tī in ê頷頸，
用暴虐做衣裳遮(jia)in ê身軀。
7 In因為身體肥，目睭就phòng出；
In所得tio̍h-ê，贏過心所ài-ê。
8 In譏刺人，照pháiⁿ意思講制壓人ê話；
In講大話。
9 In ê嘴褻瀆天，
In ê舌ho͘-hat全地。
10 所以伊ê百姓歸óa tī-chia，滿杯ê水in lim到了。
11 In講，上帝thái-thó會知？
至koân ê kiám會曉得mah？
12 看，chiahê就是pháiⁿ人；
In常常安逸，財寶ná加添。
13 我清氣我ê心實在空空；
我無罪來洗手也是空空。
14 因為我thong日tú-tio̍h災厄，
Ta̍k早起受責備。
15 我若講，我beh án-ni講，
這是用奸詐款待你ê kiáⁿ類。
16 我teh想ài明白chitê理，
看了實在為難；
17 到我入上帝聖ê所在，
詳細想in ê結局。
18 你實在將in hē tī滑滑ê地，
Hō͘ in跋tī沉淪ê中間。
19 In目nih久成做hiah-nih悽凊；
In hō͘驚惶滅到了。
20 人睏精神怎樣看伊ê bāng，
主ah，你精神也beh án-ni看輕in ê影像。
21 因為我ê心真酸，
我ê臟腑刺鑿。
22 我chit款ê愚戇，無知；
Tī你ê面前親像cheng-siⁿ一般。
23 總是我常常kap你tī-teh，
你牽我ê chiàⁿ手。
24 你beh用你ê教示引chhōa我，
後來beh接納我入tī榮光。
25 你以外tī天裡我有是誰？
你以外tī地裡我無所欣慕。
26 我ê肉體，我ê心腸，消無，
總是上帝是我心肝ê氣力，也是我ê基業直到永遠。
27 離開你遠遠-ê的確死無；
凡若放sak你行姦淫ê，你lóng滅無in。
28 總是我就近上帝是做我ê利益；
我用主耶和華做我閃避ê所在，
Thang hō͘我講起你一切ê所做。
1 A-sat ê si.1) Siōng-tè si̍t-chāi hó khoán-thāi Í-sek-lia̍t, Hó khoán-thāi hiah ê sim chheng-khì ê lâng. 2 Chóng-sī lūn-kàu góa, góa ê kha hiám-hiám ta̍h-thu̍t, Góa ê kha hiám-hiám chhū--lo̍h-khì. 3 In-ūi góa khòaⁿ-kìⁿ pháiⁿ-lâng kap kiau-ngō͘ ê lâng heng-ōng, Hit-sî góa chiū put-pêng. 4 In-ūi in sí ê sî bô thàng-thiàⁿ, In ê khùi-la̍t iā ióng-kiāⁿ. 5 In bô chhin-chhiūⁿ pa̍t-lâng lô-khó͘, Iā bô chhin-chhiūⁿ pa̍t-lâng siū chai-ē. 6 Só͘-í ēng kiau-ngō͘ chòe liān-á kòa tī in ê ām-kún, Ēng pō-gio̍k chòe i-chiûⁿ jia in ê seng-khu. 7 In in-ūi sin-thé pûi, ba̍k-chiu chiū phòng-chhut; In só͘ tit-tio̍h-ê, iâⁿ-kè sim só͘ ài--ê. 8 In ki-chhì lâng, chiàu pháiⁿ ì-sù kóng chè-ap lâng ê ōe; In kóng tōa-ōe. 9 In ê chhùi siat-to̍k thiⁿ, In ê chi̍h ho͘-hat choân-tōe. 10 Só͘-í i ê peh-sìⁿ kui-óa tī-chia, Móa-poe ê chúi in lim kàu liáu. 11 In kóng, Siōng-tè thái-thó ōe chai? Chì-koâiⁿ--ê kiám ōe hiáu-tit mah? 12 Khòaⁿ, chiah-ê chiū-sī pháiⁿ-lâng; In siông-siông an-ia̍t, châi-pó ná ke-thiⁿ. 13 Góa chheng-khì góa ê sim si̍t-chāi khang-khang; Góa bô chōe lâi sóe chhiú iā sī khang-khang. 14 In-ūi góa thong-ji̍t tú-tio̍h chai-ē, Ta̍k chá-khí siū chek-pī. 15 Góa nā kóng, Góa beh án-ni kóng, Che sī ēng kan-chà khoán-thāi Lí ê kiáⁿ-lūi. 16 Góa teh siūⁿ ài bêng-pe̍k chit ê lí, Khòaⁿ-liáu si̍t-chāi ûi-lân; 17 Kàu góa ji̍p Siōng-tè sèng ê só͘-chāi, Siông-sè siūⁿ in ê kiat-kio̍k. 18 Lí si̍t-chāi chiong in hē tī ku̍t-ku̍t ê tōe, Hō͘ in poa̍h tī tîm-lûn ê tiong-kan. 19 In ba̍k-nih-kú chiâⁿ-chòe hiah-nih chhiⁿ-chhìn; In hō͘ kiaⁿ-hiâⁿ bia̍t kàu liáu. 20 Lâng khùn cheng-sîn cháiⁿ-iūⁿ khòaⁿ i ê bāng, Chú ah, Lí cheng-sîn iā beh án-ni khòaⁿ-khin in ê iáⁿ-siōng. 21 In-ūi góa ê sim chin sng, Góa ê chōng-hú chhì-chha̍k. 22 Góa chit-khoán ê gû-gōng, bû-ti; Tī Lí ê bīn-chêng chhin-chhiūⁿ cheng-siⁿ chi̍t-poaⁿ. 23 Chóng-sī góa siông-siông kap Lí tī-teh, Lí khan góa ê chiàⁿ-chhiú. 24 Lí beh ēng Lí ê kà-sī ín-chhōa góa, Āu-lâi beh chiap-la̍p góa ji̍p tī êng-kng. 25 Lí í-gōa tī thiⁿ--nih góa ū chī-chūi? Lí í-gōa tī tōe--nih góa bô só͘ him-bō͘. 26 Góa ê jio̍k-thé, góa ê sim-tn̂g, siau-bô, Chóng-sī Siōng-tè sī góa sim-koaⁿ ê khùi-la̍t, iā sī góa ê ki-gia̍p ti̍t-kàu éng-oán. 27 Lī-khui Lí hn̄g-hn̄g-ê tek-khak sí-bô; Hoān-nā pàng-sak Lí kiâⁿ kan-îm-ê, Lí lóng bia̍t-bô in. 28 Chóng-sī góa chiū-kūn Siōng-tè sī chòe góa ê lī-ek; Góa ēng Chú Iâ-hô-hoa chòe góa siám-pī ê só͘-chāi, Thang hō͘ góa kóng-khí Lí it-chhè ê só͘-chòe.
1 A-sat教示ê詩。1) 上帝ah，你啥事永遠放sak阮？
你啥事受氣你草場ê羊，親像出火煙？
2 求你記念你早時所得tio̍h ê會眾，
就是你所贖回做你ê業ê支派ê；
也tio̍h記念你平時所khiā起ê錫安山。
3 求你行到hiahê久久拋荒ê地，
看對敵tī聖所一切所毀壞ê。
4 你ê對敵tī你ê會內hōa-hōa哮；
In khiā in ê旗做記號。
5 In親像人kia̍h起斧頭，
來chhò樹林ê樹。
6 聖所ê內面一切雕刻-ê，
In現在用斧頭kap槌一盡phah-pháiⁿ。
7 In放火燒你ê聖所，
Phah lâ-sâm你ê名所khiā起ê所在，成做平地。
8 In心內講，咱tio̍h一盡毀壞in；
In tī遍地將上帝ê會堂lóng燒lio去。
9 阮無看見阮ê兆頭，
無koh有先知；
阮中間也無人知beh到甚麼時。
10 上帝ah，對敵譏刺beh到甚麼時？
仇讎褻瀆你ê名beh到永遠mah？
11 你為何kiu你ê手，就是你ê chiàⁿ手？
求你tùi你ê胸前伸出來，毀滅in。
12 總是上帝tùi早以來做我ê王，
Tī地裡行拯救。
13 你bat用你ê權能將海分開；
Phah破水中大動物ê頭殼。
14 你bat kòng碎鱷魚ê頭殼，
將伊hō͘曠野ê野獸做食物。
15 你bat分開水源kap河；
你bat hō͘長流ê江河乾去。
16 日時屬你，暝時也屬你；
光 kap日頭是你所備辦-ê。
17 地上一切ê界限是你所設立；
夏天kap冬天是你所定tio̍h。
18 耶和華ah，求你記得，對敵有譭謗，
戇ê百姓褻瀆你ê名。
19 你ê ka-chui ê性命，m̄-thang交hō͘野獸；
你sòng-hiong人ê活命m̄-thang永遠bōe記得。
20 求你siàu念所立ê約；
因為地上烏暗ê所在滿滿是強暴ê巢穴。
21 受壓制ê人，m̄-thang hō͘ in見笑tò去；
困苦sòng-hiong ê人tio̍h hō͘ in o-ló你ê名。
22 上帝ah，求你起來為家己分訴；
Tio̍h記得戇人thong日怎樣teh譭謗你。
23 M̄-thang bōe記得你ê對敵ê聲；
Hiah-ê起來攻擊你ê人，in ê hán-hōa常常上到頂面。
1 A-sat kà-sī ê si.1) Siōng-tè ah, Lí siáⁿ-sū éng-oán pàng-sak goán? Lí siáⁿ-sū siū-khì Lí chháu-tiûⁿ ê iûⁿ, chhin-chhiūⁿ chhut hé-ian? 2 Kiû Lí kì-liām Lí chá-sî só͘ tit-tio̍h ê hōe-chiòng, Chiū-sī Lí só͘ sio̍k-hôe chòe Lí ê gia̍p ê chi-phài ê; Iā tio̍h kì-liām Lí pêng-sî só͘ khiā-khí ê Sek-an soaⁿ. 3 Kiû Lí kiâⁿ kàu hiah ê kú-kú pha-hng ê tōe, Khòaⁿ tùi-te̍k tī sèng-só͘ it-chhè só͘ húi-hoāi ê. 4 Lí ê tùi-te̍k tī Lí ê hōe-lāi hōa-hōa-háu; In khiā in ê kî chòe kì-hō. 5 In chhin-chhiūⁿ lâng kia̍h-khí pó͘-thâu, Lâi chhò chhiū-nâ ê chhiū. 6 Sèng-só͘ ê lāi-bīn it-chhè tiau-khek-ê, In hiān-chāi ēng pó͘-thâu kap thûi it-chīn phah-pháiⁿ. 7 In pàng-hé sio Lí ê sèng-só͘, Phah lâ-sâm Lí ê miâ só͘ khiā-khí ê só͘-chāi, chiâⁿ-chòe pîⁿ-tōe. 8 In sim-lāi kóng, Lán tio̍h it-chīn húi-hoāi in; In tī piàn-tōe chiong Siōng-tè ê hōe-tn̂g lóng sio-lio--khì. 9 Goán bô khòaⁿ-kìⁿ goán ê tiāu-thâu, Bô koh ū sian-ti; Goán tiong-kan iā bô lâng chai beh kàu sím-mi̍h sî. 10 Siōng-tè ah, tùi-te̍k ki-chhì beh kàu sím-mi̍h sî? Kiû-siû siat-to̍k Lí ê miâ beh kàu éng-oán mah? 11 Lí ūi-hô kiu Lí ê chhiú, chiū-sī Lí ê chiàⁿ-chhiú? Kiû Lí tùi Lí ê heng-chêng chhun-chhut--lâi, húi-bia̍t in. 12 Chóng-sī Siōng-tè tùi chá í-lâi chòe góa ê ông, Tī tōe--nih kiâⁿ chín-kiù. 13 Lí bat ēng Lí ê koân-lêng chiong hái pun-khui; Phah-phòa chúi-tiong tōa tōng-bu̍t ê thâu-khak. 14 Lí bat kòng-chhùi go̍k-hî ê thâu-khak, Chiong i hō͘ khòng-iá ê iá-siù chòe chia̍h-mi̍h. 15 Lí bat pun-khui chúi-goân kap hô; Lí bat hō͘ tn̂g-lâu ê kang-hô ta--khì. 16 Ji̍t--sî sio̍k Lí, mî--sî iā sio̍k Lí; Kng kap ji̍t-thâu sī Lí só͘ pī-pān--ê. 17 Tōe-chiūⁿ it-chhè ê kài-hān sī Lí só͘ siat-li̍p; Hē-thiⁿ kap tang-thiⁿ sī Lí só͘ tiāⁿ-tio̍h. 18 Iâ-hô-hoa ah, kiû Lí kì-tit, tùi-te̍k ū húi-pòng, Gōng ê peh-sìⁿ siat-to̍k Lí ê miâ. 19 Lí ê ka-chui ê sìⁿ-miā, m̄-thang kau hō͘ iá-siù; Lí sòng-hiong lâng ê oa̍h-miā m̄-thang éng-oán bōe kì-tit. 20 Kiû Lí siàu-liām só͘ li̍p ê iok; In-ūi tōe-chiūⁿ o͘-àm ê só͘-chāi móa-móa sī kiông-pō ê châu-hia̍t 21 Siū ap-chè ê lâng, m̄-thang hō͘ in kiàn-siàu tò--khì; Khùn-khó͘ sòng-hiong ê lâng tio̍h hō͘ in o-ló Lí ê miâ. 22 Siōng-tè ah, kiû Lí khí-lâi ūi ka-kī hun-sò͘; Tio̍h kì--tit gōng-lâng thong-ji̍t cháiⁿ-iūⁿ teh húi-pòng Lí. 23 M̄-thang bōe-kì--tit Lí ê tùi-te̍k ê siaⁿ; Hiah ê khí-lâi kong-kek Lí ê lâng, in ê hán-hōa siông-siông chiūⁿ kàu téng-bīn.
1 A-sat ê詩歌，交hō͘樂官；調是用「莫得毀壞ê」。1) 上帝ah，阮感謝你，
阮感謝你，因為你ê名近近；
人報揚你奇妙ê所做。
2 我到定tio̍h ê日期，
我beh照正直審判。
3 地kap地上khiā起ê百姓lóng消溶；
我斟酌 khiā在地ê柱。[Sè-la̍h]
4 我對驕傲ê人講，莫得驕傲；
對pháiⁿ人講，莫得kia̍h起你ê角；
5 莫得高高kia̍h起你ê角；
莫得硬你ê頷頸來講話。
6 因為m̄是tùi東，m̄是tùi西，
亦m̄是tùi南來得tio̍h舉起；
7 只有上帝是判斷ê，
伊hō͘ chitê降低，hō͘ hitê升高。
8 耶和華手裡有杯，其中ê酒起沫(phe̍h)；
杯內有過透ê酒滿滿，伊piàⁿ出來；
地上ê pháiⁿ人beh lóng lim chitê酒ê渣滓，lim到了了。
9 獨獨我beh報揚直到永遠；
我beh唱歌o-ló雅各ê上帝。
10 Pháiⁿ人一切ê角，我beh斬斷；
義人ê角beh得tio̍h舉起。
1 A-sat ê si-koa, kau hō͘ Ga̍k-koaⁿ; tiāu, sī ēng "Bo̍h-tit húi-hoāi--ê".1) Siōng-tè ah, goán kám-siā Lí, Goán kám-siā Lí, in-ūi Lí ê miâ kūn-kūn; Lâng pò-iông Lí kî-biāu ê só͘-chòe. 2 Góa kàu tiāⁿ-tio̍h ê ji̍t-kî, Góa beh chiàu chèng-ti̍t sím-phòaⁿ. 3 Tōe kap tōe-chiūⁿ khiā-khí ê peh-sìⁿ lóng siau-iûⁿ; Góa chim-chio̍k khiā-chāi tōe ê thiāu. [Sè-la̍h 4 Góa tùi kiau-ngō͘ ê lâng kóng, Bo̍h-tit kiau-ngō͘; Tùi pháiⁿ-lâng kóng, Bo̍h-tit kia̍h-khí lí ê kak; 5 Bo̍h-tit koâiⁿ-koâiⁿ kia̍h-khí lí ê kak; Bo̍h-tit ngī lí ê ām-kún lâi kóng-ōe. 6 In-ūi m̄-sī tùi tang, m̄-sī tùi sai, Ia̍h m̄-sī tùi lâm lâi tit-tio̍h kú-khí; 7 Chí-ū Siōng-tè sī phòaⁿ-toàn--ê, I hō͘ chit-ê kàng-kē, hō͘ hit-ê seng-koâiⁿ. 8 Iâ-hô-hoa chhiú--nih ū poe, kî-tiong ê chiú khí phe̍h; Poe-lāi ū kè-thàu ê chiú móa-móa, I piàⁿ--chhut-lâi; Tōe-chiūⁿ ê pháiⁿ-lâng beh lóng lim chit ê chiú ê che-tái, lim kàu liáu-liáu. 9 To̍k-to̍k góa beh pò-iông ti̍t kàu éng-oán; Góa beh chhiùⁿ-koa o-ló Ngá-kok ê Siōng-tè. 10 Pháiⁿ-lâng it-chhè ê kak, Góa beh chām-tn̄g; Gī-lâng ê kak beh tit-tio̍h kú-khí.
1 A-sat ê詩歌，交hō͘樂官；用絲絃ê樂器。1) Tī偤大上帝hō͘人所bat；
Tī以色列伊ê名做大。
2 Tī Sat-léng有伊ê帳房，
Tī錫安有伊khiā起ê所在。
3 伊tī-hia at折弓ê箭，
Kap藤牌、刀劍，以及交戰ê ke-si。[Sè-la̍h]
4 你tùi搶物ê山寨來，有榮光kap威嚴。
5 心勇敢ê人lóng受搶劫；in ê睏是長長睏；
英雄ê人，無一个會出手。
6 雅各ê上帝ah，你ê責備一下發出，
車、馬，lóng睏重眠。
7 獨獨你是thang驚ê；
你ê受氣一下發出，是誰 tī你ê面前khiā能tiâu ah？
8 你tùi天裡hō͘人聽判斷；
地就驚惶靜靜；
9 就是上帝起來審判，
Beh救地上一切謙卑ê人。[Sè-la̍h]
10 人ê受氣，的確hō͘你得tio̍h o-ló；
其餘ê受氣，你beh禁止。
11 Lín tio̍h對lín ê上帝耶和華下願koh謝願；
四圍ê人tio̍h tòa禮物貢獻tī thang敬畏ê主。
12 祂beh遏止貴族ê驕氣，
祂hō͘世上ê列王驚畏。
1 A-sat ê si-koa, kau hō͘ Ga̍k-koaⁿ; ēng si-hiân ê ga̍k-khì.1) Tī Iû-tāi Siōng-tè hō͘ lâng só͘ bat; Tī Í-sek-lia̍t I ê miâ chòe tōa. 2 Tī Sat-léng ū I ê tiùⁿ-pâng, Tī Sek-an ū I khiā-khí ê só͘-chāi. 3 I tī-hia at-chi̍h keng ê chìⁿ, Kap tîn-pâi, to-kiàm, í-ki̍p kau-chiàn ê ke-si. [Sè-la̍h 4 Lí tùi chhiúⁿ-mi̍h ê soaⁿ-chē lâi, ū êng-kng kap ui-giâm. 5 Sim ióng-kám ê lâng lóng siū chhiúⁿ-kiap; in ê khùn sī tn̂g-tn̂g khùn; Eng-hiông ê lâng, bô chi̍t-ê ōe chhut-chhiú. 6 Ngá-kok ê Siōng-tè ah, Lí ê chek-pī chi̍t-ē hoat-chhut, Chhia, bé, lóng khùn tāng-bîn. 7 To̍k-to̍k Lí sī thang kiaⁿ--ê; Lí ê siū-khì chi̍t-ē hoat-chhut, chī-chūi tī Lí ê bīn-chêng khiā-ōe-tiâu ah? 8 Lí tùi thiⁿ--nih hō͘ lâng thiaⁿ phòaⁿ-toàn; Tōe chiū kiaⁿ-hiâⁿ chēng-chēng; 9 Chiū-sī Siōng-tè khí--lâi sím-phòaⁿ, Beh kiù tōe-chiūⁿ it-chhè khiam-pi ê lâng. [Sè-la̍h 10 Lâng ê siū-khì, tek-khak hō͘ Lí tit-tio̍h o-ló; Kî-û ê siū-khì, Lí beh kìm-chí. 11 Lín tio̍h tùi lín ê Siōng-tè Iâ-hô-hoa hē-goān koh siā-goān; Sì-ûi ê lâng tio̍h tòa lé-mi̍h kòng-hiàn tī thang kèng-ùi ê Chú. 12 I beh at-chí kùi-cho̍k ê kiau-khì, I hō͘ sè-chiūⁿ ê lia̍t-ông kiaⁿ-ùi.
1 A-sat ê詩，照Iâ-tō͘-tùn ê做法；交hō͘樂官。1) 我beh對上帝出聲求叫；
我對上帝出聲，伊beh àⁿ耳孔聽我。
2 Tī我患難ê日我chhē主；
我tī暝時kia̍h起手無停，
我ê心m̄肯受安慰。
3 我siàu念上帝，就擘腹；
我靜靜想，心神暈去。[Sè-la̍h]
4 你hō͘我ê目睭無一時khoeh；
我煩惱到lóng bōe講話。
5 我追念古早ê日，就是極早ê年。
6 我想起我暝間ê詩歌，
我摸心家己問，
我ê心神亦詳細省察。
7 主kiám beh永遠放sak mah？
無koh施恩mah？
8 伊ê慈愛kiám永遠窮盡mah？
伊ê應允kiám代代廢無mah？
9 上帝kiám bōe記得施恩mah？
Kiám因為受氣塞密伊ê慈悲mah？[Sè-la̍h]
10 我講，這就是我ê軟弱；
至koân ê伸出chiàⁿ手ê年，我beh siàu念。
11 我beh講起耶和華ê所行，
Siàu念伊早時ê神跡。
12 我beh忖度你ê所行，
靜靜想你ê所做。
13 上帝ah，你ê路是聖ê；
有甚麼神明大親像上帝？
14 你是行奇事ê上帝；
你bat tī 萬百姓ê中間，顯明你ê權能。
15 你bat用你ê手贖回你ê百姓，
就是雅各kap約瑟ê kiáⁿ孫。[Sè-la̍h]
16 上帝ah，chiahê水見tio̍h你，
Chiahê水見tio̍h你，lóng驚惶，
深淵亦ngia̍uh-ngia̍uh-chhoah。
17 密雲piàⁿ出水，
穹蒼出聲，
你ê箭四界射。
18 Tī捲螺風內有你雷ê聲；
Sih-nà ê光sih到thong世間；
地ngia̍uh-ngia̍uh-chhoah，koh振動。
19 你ê道路tī海中，
你ê路徑tī大水中，
你ê腳跡無人能知。
20 早你用摩西亞倫ê手，
Chhōa你ê百姓親像羊群。
1 A-sat ê si, chiàu Iâ-tō͘-tùn ê chòe-hoat; kau hō͘ Ga̍k-koaⁿ.1) Góa beh tùi Siōng-tè chhut-siaⁿ kiû-kiò; Góa tùi Siōng-tè chhut-siaⁿ, I beh àⁿ hī-khang thiaⁿ góa. 2 Tī góa hoān-lān ê ji̍t góa chhē Chú; Góa tī mî--sî kia̍h-khí chhiú bô thêng, Góa ê sim m̄-khéng siū an-ùi. 3 Góa siàu-liām Siōng-tè, chiū peh-pak; Góa chēng-chēng siūⁿ, sim-sîn hūn--khì. [Sè-la̍h 4 Lí hō͘ góa ê ba̍k-chiu bô chi̍t-sî khoeh; Góa hoân-ló kàu lóng bōe kóng-ōe. 5 Góa tui-liām kó͘-chá ê ji̍t, Chiū-sī ke̍k-chá ê nî. 6 Góa siūⁿ-khí góa mî-kan ê si-koa, Góa bong-sim ka-kī mn̄g, Góa ê sim-sîn ia̍h siông-sè séng-chhat. 7 Chú kiám beh éng-oán pàng-sak mah? Bô koh si-un mah? 8 I ê chû-ài kiám éng-oán kiông-chīn mah? I ê èng-ún kiám tāi-tāi hòe-bô mah? 9 Siōng-tè kiám bōe-kì-tit si-un mah? Kiám in-ūi siū-khì that-ba̍t I ê chû-pi mah? [Sè-la̍h 10 Góa kóng, Che chiū-sī góa ê loán-jio̍k; Chì-koâiⁿ--ê chhun-chhut chiàⁿ-chhiú ê nî, góa beh siàu-liām. 11 Góa beh kóng-khí Iâ-hô-hoa ê só͘-kiâⁿ, Siàu-liām I chá-sî ê sîn-jiah. 12 Góa beh chhún-to̍k Lí ê só͘-kiâⁿ, Chēng-chēng siūⁿ Lí ê só͘-chòe. 13 Siōng-tè ah, Lí ê lō͘ sī sèng--ê; Ū sím-mi̍h sîn-bêng tōa chhin-chhiūⁿ Siōng-tè? 14 Lí sī kiâⁿ kî-sū ê Siōng-tè; Lí bat tī bān peh-sìⁿ ê tiong-kan, hián-bêng Lí ê koân-lêng. 15 Lí bat ēng Lí ê chhiú sio̍k-hôe Lí ê peh-sìⁿ, Chiū-sī Ngá-kok kap Iok-sek ê kiáⁿ-sun. [Sè-la̍h 16 Siōng-tè ah, chiah ê chúi kìⁿ-tio̍h Lí, Chiah ê chúi kìⁿ-tio̍h Lí, lóng kiaⁿ-hiâⁿ, Chhim-ian ia̍h ngia̍uh-ngia̍uh-chhoah. 17 Ba̍t-hûn piàⁿ-chhut chúi, Kiong-chhong chhut-siaⁿ, Lí ê chìⁿ sì-kòe siā. 18 Tī kńg-lê-hong-lāi ū Lí lûi ê siaⁿ; Sih-nà ê kng sih kàu thong sè-kan; Tōe ngia̍uh-ngia̍uh-chhoah, koh tín-tāng. 19 Lí ê tō-lō͘ tī hái-tiong, Lí ê lō͘-kèng tī tōa-chúi-tiong, Lí ê kha-jiah bô lâng ōe chai. 20 Chá Lí ēng Mô͘-se A-lûn ê chhiú, Chhōa Lí ê peh-sìⁿ chhin-chhiūⁿ iûⁿ-kûn.
1 A-sat教示ê詩。1) 我ê百姓ah，lín tio̍h聽我ê教示，
Àⁿ耳孔聽我ê嘴ê話。
2 我beh開嘴設譬喻，
我beh講出古早隱密ê話，
3 就是阮所聽見，所知ê；
亦是阮ê祖公傳hō͘阮ê。
4 阮無beh將chiahê事對in ê kiáⁿ孫隱瞞；
Beh將耶和華ê名聲kap伊ê權能，以及伊所行奇妙ê事，
傳hō͘後世代。
5 因為伊tī雅各立干證ê話，tī以色列設律法；
是伊命令咱ê祖公ê，thang傳hō͘ in ê kiáⁿ孫。
6 Hō͘後代，就是得beh出世ê kiáⁿ孫知；
In亦beh起來傳hō͘ in ê kiáⁿ孫；
7 Hō͘ in ê ǹg望在tī上帝，
無bōe記得全能ê ê所做，
是beh遵守伊ê誡命。
8 免得親像in ê祖公，
是硬心悖逆ê世代，
是存心無四正ê世代，
In ǹg上帝ê心無堅固。
9 Í-hoat-liân ê kiáⁿ孫kia̍h ke-si kap弓箭，
臨陣ê日，oa̍t-tńg身退後。
10 In無遵守上帝ê約，
M̄肯照伊ê律法來行。
11 Koh bōe記得伊所行ê，
Kap伊所hō͘ in看奇妙ê事。
12 伊tī埃及地，Só-an ê田，
Tī in祖公ê目睭前，行奇異ê事。
13 伊分開海，hō͘ in過去；
Koh hō͘水khiā起來，親像土堆。
14 伊日時用雲chhōa-in，
Thong暝用火ê光chhōa-in。
15 伊tī曠野hō͘石磐裂開，
Hō͘ in chōe-chōe水thang lim，親像tùi深淵出。
16 伊hō͘水tùi石磐chhèng出，
Hō͘水親像江河流落。
17 In猶原ta̍uh-ta̍uh得罪伊；
Tī乾燥ê地悖逆至koân ê。
18 In心內試上帝，
照in家己所ài-ê求食物。
19 In lām-sám議論上帝，講，
全能ê主tī曠野kiám會辦桌mah？
20 伊bat phah石磐hō͘水chhèng出，
江河滿出來；
伊也會賞賜米糧mah？
伊也會kā伊ê百姓備辦肉mah？
21 所以耶和華聽見就受氣，
就有焰火燒雅各ê家，
受氣發起tī以色列族。
22 因為in m̄信服上帝，
M̄ óa靠伊ê救恩。
23 總是伊就命令tī頂面ê穹蒼，
Koh開天ê門；
24 伊降落má-ná親像落雨，hō͘ in食；
將天ê米糧賞賜in。
25 人食大權能ê ê食物；
伊賞賜米糧hō͘ in飽足。
26 伊hō͘東風起tī天裡；
用伊ê權能chhōa南風來。
27 伊降落肉tī in中間，chōe親像土粉，
Koh飛鳥chōe親像海沙。
28 落tī in ê營中，
Tī in khiā起ê所在ê四圍。
29 In就食到飽飽；
伊照in所ài-ê hō͘ in。
30 In ê所ài，iáu未飽厭，
In ê食物iáu tī in ê嘴內ê時，
31 上帝就對in發起受氣，
Thâi死in中間ê好漢人，
打倒以色列ê少年人。
32 雖然án-ni，in猶原koh犯罪；
無因為伊奇怪ê所做來信伊。
33 所以伊hō͘ in空空過日；
Hō͘ in歷年驚惶。
34 伊刣 in ê時，in chiah來求伊；
就oa̍t倒tńg切切求上帝。
35 In亦追念上帝是in ê石磐，
至koân ê全能ê是贖回in-ê。
36 總是in用嘴諂媚伊，
用舌對伊講白賊。
37 因為in無堅心意向伊，
無盡忠守伊ê約。
38 總是伊有憐憫，赦免in ê罪惡，無滅無in；
Koh ta̍uh-ta̍uh消伊ê受氣，
無一盡發出伊ê受氣。
39 伊想tio̍h in不過是血氣，
是chhe過去無倒tńg ê風。
40 In tī曠野悖逆伊，
Tī拋荒ê所在，hō͘伊憂悶，到hiah chōe pái ah！
41 In再三試上帝，
抵觸(tú-tak)以色列ê聖ê。
42 In bōe記得伊ê權能，
Kap贖回in脫離對敵ê日；
43 伊怎樣tī埃及顯出伊ê神跡；
Tī Só-an chhân，顯出奇事；
44 將in ê江河變做血，
In ê káng亦是án-ni，致到lóng bōe lim-得。
45 伊hō͘胡蠅kui陣到in中間來沾in；
Koh hō͘田蛙á來害 in。
46 將in ê土產，交hō͘蟲thōa；
將in勞苦來得tio̍h-ê交hō͘草蜢。
47 伊落雹，毀壞in ê葡萄樹，
落霜，毀壞in ê桑材樹。
48 Koh將in ê cheng-siⁿ交hō͘雹，
將in kui群ê cheng-siⁿ交hō͘ sih-nà。
49 伊發出伊ê大受氣，
以及受氣，痛恨，苦難，
Kui陣降災厄ê使者lóng到tī in。
50 伊為tio̍h家己ê受氣pho͘-pîⁿ伊ê路；
Hō͘ in ê性命bōe免得死；
將in ê活命交hō͘瘟疫。
51 Tī埃及phah死一切ê大kiáⁿ，
Tī Hâm ê布棚中phah死in ê頭chiūⁿ-kiáⁿ。
52 總是伊chhōa出家己ê百姓，親像羊；
Tī曠野chhōa in親像羊群。
53 伊chhōa in安穩，hō͘ in無驚惶；
海就淹死in ê對敵。
54 伊koh chhōa in到聖地ê交界；
到伊chiàⁿ手所得tio̍h chitê山。
55 伊tī in ê面前趕出列邦人；
用索á將外邦人ê地量hō͘ in做業；
Hō͘以色列ê支派khiā起in ê布棚。
56 In猶原chhì至koân ê上帝，來悖逆伊；
無守伊干證ê話。
57 失信悖逆，無各樣in ê祖公；
變款親像弓péng-lìn-tńg。
58 因為in用in山頭ê壇，惹tio̍h伊ê受氣；
用in雕刻ê偶像，hō͘伊痛恨。
59 上帝聽見就受氣，
大厭惡以色列。
60 甚至棄sak Sī-lô ê會幕，
就是伊tī人ê中間所搭ê布棚。
61 Koh將伊ê氣力，交hō͘人搶去；將伊ê榮光交tī對敵ê手。
62 亦將伊ê百姓交hō͘刀劍，
來受氣伊ê家業。
63 In ê少年人hō͘火燒滅，
In ê在室女無得tio̍h人ê賀喜。
64 祭司倒tī刀下，
守寡人亦無啼哭。
65 Hit時主親像睏ê人精神；
親像勇猛ê人，lim酒teh hoah。
66 伊phah退伊ê對敵；
Hō͘ in永永受凌辱。
67 Koh伊棄sak約瑟ê布棚，
無揀選Í-hoat-liân ê支派；
68 總是揀偤大ê支派，
伊所意愛ê錫安山。
69 Koh起造伊ê聖所，高親像天，
Koh親像伊建立永永tī-teh ê地。
70 Koh揀伊ê奴僕大衛，
Chhōa伊tùi羊椆來。
71 Hō͘伊無koh tè hiahê羊bú，
Beh hō͘伊養飼伊ê百姓雅各，kap伊ê家業以色列，
72 伊就照伊心內ê正直養飼in；
Koh用伊巧妙ê手引chhōa in。
1 A-sat kà-sī ê si.1) Góa ê peh-sìⁿ ah, lín tio̍h thiaⁿ góa ê kà-sī, Àⁿ hī-khang thiaⁿ góa ê chhùi ê ōe. 2 Góa beh khui-chhùi siat phì-jū, Góa beh kóng-chhut kó͘-chá ún-ba̍t ê ōe, 3 Chiū-sī goán só͘ thiaⁿ-kìⁿ, só͘ chai ê; Ia̍h sī goán ê chó͘-kong thoân hō͘ goán--ê. 4 Goán bô beh chiong chiah ê sū tùi in ê kiáⁿ-sun ún-môa; Beh chiong Iâ-hô-hoa ê miâ-siaⁿ kap I ê koân-lêng, í-ki̍p I só͘ kiâⁿ kî-biāu ê sū, Thoân hō͘ āu sè-tāi. 5 In-ūi I tī Ngá-kok li̍p kan-chèng ê ōe, tī Í-sek-lia̍t siat lu̍t-hoat; Sī I bēng-lēng lán ê chó͘-kong ê, thang thoân hō͘ in ê kiáⁿ-sun. 6 Hō͘ āu-tāi, chiū-sī tit-beh chhut-sì ê kiáⁿ-sun chai; In ia̍h beh khí-lâi thoân hō͘ in ê kiáⁿ-sun; 7 Hō͘ in ê ǹg-bāng chāi-tī Siōng-tè, Bô bōe-kì-tit Choân-lêng--ê ê só͘ chòe, Sī beh chun-siú I ê kài-bēng. 8 Bián-tit chhin-chhiūⁿ in ê chó͘-kong, Sī ngī-sim pōe-ge̍k ê sè-tāi, Sī chûn-sim bô sì-chiàⁿ ê sè-tāi, In ǹg Siōng-tè ê sim bô kian-kò͘. 9 Í-hoat-liân ê kiáⁿ-sun kia̍h ke-si kap keng-chìⁿ, Lîm-tīn ê ji̍t, oa̍t-tńg-sin thè-āu. 10 In bô chun-siú Siōng-tè ê iok, M̄-khéng chiàu I ê lu̍t-hoat lâi kiâⁿ. 11 Koh bōe-kì-tit I só͘-kiâⁿ-ê, Kap I só͘ hō͘ in khòaⁿ kî-biāu ê sū. 12 I tī Ai-ki̍p tōe, Só-an ê chhân, Tī in chó͘-kong ê ba̍k-chiu chêng, kiâⁿ kî-īⁿ ê sū. 13 I pun-khui hái, hō͘ in kè--khì; Koh hō͘ chúi khiā--khí-lâi, chhin-chhiūⁿ thô͘-tui. 14 I ji̍t--sî ēng hûn chhōa--in, Thong-mî ēng hé ê kng chhōa--in. 15 I tī khòng-iá hō͘ chio̍h-pôaⁿ li̍h-khui, Hō͘ in chōe-chōe chúi thang lim, chhin-chhiūⁿ tùi chhim-ian chhut. 16 I hō͘ chúi tùi chio̍h-pôaⁿ chhèng-chhut, Hō͘ chúi chhin-chhiūⁿ kang-hô lâu-lo̍h. 17 In iû-goân ta̍uh-ta̍uh tek-chōe I; Tī ta-sò ê tōe pōe-ge̍k Chì-koâiⁿ--ê. 18 In sim-lāi chhì Siōng-tè, Chiàu in ka-kī só͘-ài--ê kiû chia̍h-mi̍h. 19 In lām-sám gī-lūn Siōng-tè, kóng, Choân-lêng ê Chú tī khòng-iá kiám ōe pān-toh mah? 20 I bat phah chio̍h-pôaⁿ hō͘ chúi chhèng-chhut, Kang-hô móa--chhut-lâi; I iā ōe siúⁿ-sù bí-niû mah? I iā ōe kā I ê peh-sìⁿ pī-pān bah mah? 21 Só͘-í Iâ-hô-hoa thiaⁿ-kìⁿ chiū siū-khì, Chiū ū iām-hé sio Ngá-kok ê ke, Siū-khì hoat-khí tī Í-sek-lia̍t cho̍k. 22 In-ūi in m̄ sìn-ho̍k Siōng-tè, M̄ óa-khò I ê kiù-un. 23 Chóng-sī I chiū bēng-lēng tī téng-bīn ê kiong-chhong, Koh khui thiⁿ ê mn̂g; 24 I kàng-lo̍h má-ná chhin-chhiūⁿ lo̍h hō͘, hō͘ in chia̍h; Chiong thiⁿ ê bí-niû siúⁿ-sù in. 25 Lâng chia̍h tōa-koân-lêng--ê ê chia̍h-mi̍h; I siúⁿ-sù bí-niû hō͘ in pá-chiok. 26 I hō͘ tang-hong khí tī thiⁿ--nih; Ēng I ê koân-lêng chhōa lâm-hong lâi. 27 I kàng-lo̍h bah tī in tiong-kan, chōe chhin-chhiūⁿ thô͘-hún, Koh pe-chiáu chōe chhin-chhiūⁿ hái-soa. 28 Lo̍h tī in ê iâⁿ-tiong, Tī in khiā-khí ê só͘-chāi ê sì-ûi. 29 In chiū chia̍h kàu pá-pá; I chiàu in só͘-ài-ê hō͘ in. 30 In ê só͘-ài, iáu-bē pá-ià, In ê chia̍h-mi̍h iáu tī in ê chhùi-lāi ê sî, 31 Siōng-tè chiū tùi in hoat-khí siū-khì, Thâi-sí in tiong-kan ê hó-hàn lâng, Táⁿ-tó Í-sek-lia̍t ê siàu-liân lâng. 32 Sui-jiân án-ni, in iû-goân koh hoān-chōe; Bô in-ūi I kî-koài ê só͘-chòe lâi sìn I. 33 Só͘-í I hō͘ in khang-khang kè-ji̍t; Hō͘ in le̍k-nî kiaⁿ-hiâⁿ. 34 I thâi in ê sî, in chiah lâi kiû I; Chiū oa̍t-tò-tńg chhiat-chhiat kiû Siōng-tè. 35 In ia̍h tui-liām Siōng-tè sī in ê chio̍h-pôaⁿ, Chì-koâiⁿ ê Choân-lêng-ê sī sio̍k-hôe in--ê. 36 Chóng-sī in ēng chhùi thiám-mī I, Ēng chi̍h tùi I kóng pe̍h-chha̍t. 37 In-ūi in bô kian-sim ì-hiòng I, Bô chīn-tiong siú I ê iok. 38 Chóng-sī I ū lîn-bín, sià-bián in ê chōe-ok, bô bia̍t-bô in; Koh ta̍uh-ta̍uh siau I ê siū-khì, Bô it-chīn hoat-chhut I ê siū-khì. 39 I siūⁿ-tio̍h in put-kò sī hiat-khì, Sī chhe-kè--khì bô tò-tńg ê hong. 40 In tī khòng-iá pōe-ge̍k I, Tī pha-hng ê só͘-chāi, hō͘ I iu-būn, kàu hiah chōe pái ah! 41 In chài-saⁿ chhì Siōng-tè, Tú-tak Í-sek-lia̍t ê Sèng--ê. 42 In bōe-kì-tit I ê koân-lêng, Kap sio̍k-hôe in thoat-lī tùi-te̍k ê ji̍t; 43 I cháiⁿ-iūⁿ tī Ai-ki̍p hián-chhut I ê sîn-jiah; Tī Só-an chhân, hián-chhut kî-sū; 44 Chiong in ê kang-hô pìⁿ-chòe huih, In ê káng ia̍h sī án-ni, tì-kàu lóng bōe lim--tit. 45 I hō͘ hô͘-sîn kui-tīn kàu in tiong-kan lâi cham in; Koh hō͘ chhân-kap-á lâi hāi in. 46 Chiong in ê thó͘-sán, kau hō͘ thâng-thōa; Chiong in lô-khó͘ lâi tit-tio̍h-ê kau hō͘ chháu-meh. 47 I lo̍h-pha̍uh, húi-hoāi in ê phû-tô-chhiū, Lo̍h-sng, húi-hoāi in ê sng-châi-chhiū. 48 Koh chiong in ê cheng-siⁿ kau hō͘ pha̍uh, Chiong in kui-kûn ê cheng-siⁿ kau hō͘ sih-nà. 49 I hoat-chhut I ê tōa siū-khì, Í-ki̍p siū-khì, thòng-hūn, khó͘-lān, Kui-tīn kàng chai-ē ê sù-chiá lóng kàu tī in. 50 I ūi-tio̍h ka-kī ê siū-khì pho͘-pîⁿ I ê lō͘; Hō͘ in ê sìⁿ-miā bōe bián-tit sí; Chiong in ê oa̍h-miā kau hō͘ un-e̍k. 51 Tī Ai-ki̍p phah-sí it-chhè ê tōa-kiáⁿ, Tī Hâm ê pò͘-pîⁿ-tiong phah-sí in ê thâu-chiūⁿ-kiáⁿ. 52 Chóng-sī I chhōa-chhut ka-kī ê peh-sìⁿ, chhin-chhiūⁿ iûⁿ; Tī khòng-iá chhōa in chhin-chhiūⁿ iûⁿ-kûn. 53 I chhōa in an-ún, hō͘ in bô kiaⁿ-hiâⁿ; Hái chiū im-sí in ê tùi-te̍k. 54 I koh chhōa in kàu sèng-tōe ê kau-kài; Kàu I chiàⁿ-chhiú só͘ tit-tio̍h chit ê soaⁿ. 55 I tī in ê bīn-chêng kóaⁿ-chhut lia̍t-pang-lâng; Ēng soh-á chiong gōa-pang-lâng ê tōe niû hō͘ in chòe-gia̍p; Hō͘ Í-sek-lia̍t ê chi-phài khiā-khí in ê pò͘-pîⁿ. 56 In iû-goân chhì chì-koâiⁿ ê Siōng-tè, lâi pōe-ge̍k I; Bô siú I kan-chèng ê ōe. 57 Sit-sìn pōe-ge̍k, bô koh-iūⁿ in ê chó͘-kong; Piàn-khoán chhin-chhiūⁿ keng péng-lìn-tńg. 58 In-ūi in ēng in soaⁿ-thâu ê tôaⁿ, jiá-tio̍h I ê siū-khì; Ēng in tiau-khek ê ngó͘-siōng, hō͘ I thòng-hūn. 59 Siōng-tè thiaⁿ-kìⁿ chiū siū-khì, Tōa iàm-ò͘ⁿ Í-sek-lia̍t. 60 Sīm-chì khì-sak Sī-lô ê hōe-bō͘, Chiū-sī I tī lâng ê tiong-kan só͘ tah ê pò͘-pîⁿ. 61 Koh chiong I ê khùi-la̍t, kau hō͘ lâng chhiúⁿ--khì; Chiong I ê êng-kng kau tī tùi-te̍k ê chhiú. 62 Ia̍h chiong I ê peh-sìⁿ kau hō͘ to-kiàm, Lâi siū-khì I ê ke-gia̍p. 63 In ê siàu-liân lâng hō͘ hé sio-bia̍t, In ê chāi-sek-lú bô tit-tio̍h lâng ê hō-hí. 64 Chè-si tó tī to-ē, Chiú-kóaⁿ-lâng ia̍h bô thî-khàu. 65 Hit-sî Chú chhin-chhiūⁿ khùn ê lâng cheng-sîn; Chhin-chhiūⁿ ióng-béng ê lâng, lim-chiú teh hoah. 66 I phah-thè I ê tùi-te̍k; Hō͘ in éng-éng siū lêng-jio̍k. 67 Koh I khì-sak Iok-sek ê pò͘-pîⁿ, Bô kéng-soán Í-hoat-liân ê chi-phài; 68 Chóng-sī kéng Iû-tāi ê chi-phài, I só͘ ì-ài ê Sek-an soaⁿ. 69 Koh khí-chō I ê Sèng-só͘, koâiⁿ chhin-chhiūⁿ thiⁿ, Koh chhin-chhiūⁿ I kiàn-li̍p éng-éng tī-teh ê tōe. 70 Koh kéng I ê lô͘-po̍k Tāi-pi̍t, Chhōa i tùi iûⁿ-tiâu lâi. 71 Hō͘ i bô koh tè hiah ê iûⁿ-bú, Beh hō͘ i iúⁿ-chhī I ê peh-sìⁿ Ngá-kok, kap I ê ke-gia̍p Í-sek-lia̍t, 72 I chiū chiàu i sim-lāi ê chèng-ti̍t iúⁿ-chhī in; Koh ēng i khiáu-biāu ê chhiú ín-chhōa in.
1 A-sat ê詩。1) 上帝ah，外邦人進入你ê產業，
Phah lâ-sâm你ê聖殿，
Hō͘耶路撒冷變-成土堆。
2 In將你ê奴僕ê身屍，交hō͘空中ê飛鳥，做食物；
將你聖ê百姓ê肉，交hō͘地上ê野獸。
3 Tī耶路撒冷周圍，流in ê血親像水；
亦無人埋葬伊。
4 阮hō͘阮隔壁kok所凌辱，
Hō͘阮四圍ê人冷笑譏刺。
5 耶和華ah，你ê受氣beh jōa久，到永遠mah？
你ê受氣beh親像火to̍h mah？
6 願你將你ê受氣piàⁿ落tī hiahê m̄-bat你ê外邦，
以及hiahê無求叫你ê名ê列國。
7 因為in吞食雅各，
Hō͘伊khiā起ê所在拋荒。
8 求你m̄-thang記得阮ê祖公ê罪，來tùi阮討；
願你ê慈悲緊緊臨到阮；
因為阮落到極卑微ê地位。
9 救阮ê上帝ah，求你因為你ê名ê榮光幫贊阮；
因為你ê名ê緣故救阮，赦免阮ê罪。
10 啥事致到外邦人講，In ê上帝tī toh落？
願你申你ê奴僕流血ê冤，
Hō͘外邦人知，hō͘阮親目看見。
11 願囚犯ê吐氣透到你ê面前；
願你，照你ê大權能，保存hiahê擬定tio̍h死ê人。
12 主ah，願你將阮隔壁國所凌辱你ê凌辱，
加添七倍，歸tī in ê身上。
13 Án-ni阮做你ê百姓，你ê草場ê羊ê，
Beh感謝你到永遠；
Beh o-ló你ê名到萬世代。
1 A-sat ê si.1) Siōng-tè ah, gōa-pang-lâng chìn-ji̍p Lí ê sán-gia̍p, Phah lâ-sâm Lí ê sèng-tiān, Hō͘ Iâ-lō͘-sat-léng pìⁿ-chiâⁿ thô͘-tui. 2 In chiong Lí ê lô͘-po̍k ê sin-si, kau hō͘ khong-tiong ê pe-chiáu, chòe chia̍h-mi̍h; Chiong Lí sèng ê peh-sìⁿ ê bah, kau hō͘ tōe-chiūⁿ ê iá-siù. 3 Tī Iâ-lō͘-sat-léng chiu-ûi, lâu in ê huih chhin-chhiūⁿ chúi; Ia̍h bô lâng bâi-chòng i. 4 Goán hō͘ goán keh-piah kok só͘ lêng-jio̍k, Hō͘ goán sì-ûi ê lâng léng-chhiò ki-chhì. 5 Iâ-hô-hoa ah, Lí ê siū-khì beh jōa-kú, kàu éng-oán mah? Lí ê siū-khì beh chhin-chhiūⁿ hé to̍h mah? 6 Goān Lí chiong Lí ê siū-khì piàⁿ-lo̍h tī hiah ê m̄-bat Lí ê gōa-pang, Í-ki̍p hiah-ê bô kiû-kiò Lí ê miâ ê lia̍t-kok. 7 In-ūi in thun-chia̍h Ngá-kok, Hō͘ i khiā-khí ê só͘-chāi pha-hng. 8 Kiû Lí m̄-thang kì-tit goán ê chó͘-kong ê chōe, lâi tùi goán thó; Goān Lí ê chû-pi kín-kín lîm-kàu goán; In-ūi goán lo̍h kàu ke̍k pi-bî ê tōe-ūi. 9 Kiù goán ê Siōng-tè ah, kiû Lí in-ūi Lí ê miâ ê êng-kng pang-chān goán; In-ūi Lí ê miâ ê iân-kò͘ kiù goán, sià-bián goán ê chōe. 10 Siáⁿ-sū tì-kàu gōa-pang lâng kóng, In ê Siōng-tè tī toh-lo̍h? Goān Lí sin Lí ê lô͘-po̍k lâu-huih ê oan, hō͘ gōa-pang lâng chai, Hō͘ goán chhin-ba̍k khòaⁿ-kìⁿ. 11 Goān siû-hoān ê thó͘-khùi thàu-kàu Lí ê bīn-chêng; Goān Lí, chiàu Lí ê tōa koân-lêng, pó-chûn hiah ê gí-tiāⁿ tio̍h-sí ê lâng. 12 Chú ah, goān Lí chiong goán keh-piah kok só͘ lêng-jio̍k Lí ê lêng-jio̍k, Ke-thiⁿ chhit-pē, kui tī in ê sin-chiūⁿ. 13 Án-ni goán chòe Lí ê peh-sìⁿ, Lí ê chháu-tiûⁿ ê iûⁿ-ê, Beh kám-siā Lí kàu éng-oán; Beh o-ló Lí ê miâ kàu bān sè-tāi.
1 A-sat ê詩；交hō͘樂官；調用「做干證ê百合花」。1) 以色列ê牧者ah，chhōa約瑟親像羊群ê，求你àⁿ耳孔聽；
坐tī ki-lō͘-peng ê頂面ê，求你發出你ê光。
2 Tī Í-hoat-liân、便雅憫、Má-ná-se ê面前，展出你ê權能，
來救阮。
3 上帝ah，hō͘阮倒tńg；
Hō͘你ê面發出光，阮就得tio̍h救。
4 萬軍ê上帝耶和華ah，
你ǹg你ê百姓ê祈禱發出受氣，beh jōa久ah？
5 你用目屎做食物，hō͘ in食；
Koh量chōe-chōe目屎hō͘ in lim。
6 你hō͘隔壁國因為阮來相爭，
阮ê對敵相kap teh笑。
7 萬軍ê上帝ah，hō͘阮倒tńg，
Hō͘你ê面發出光，阮就得tio̍h救。
8 你tùi埃及徙一叢葡萄樹，
趕出列邦，來栽伊，
9 你tī伊ê頭前piàⁿ空土地；
伊ê根釘深，就生湠滿地。
10 伊ê影遮密chiahê山，
伊ê枝親像真好ê柏香樹。
11 發出伊ê枝，伸到大海，
伊ê藤thòaⁿ到大河。
12 你啥事拆毀伊ê籬笆，
Chhut-chāi一切過路ê人挽伊？
13 樹林內出來ê山豬 蹧躂伊，
曠野ê走獸食伊。
14 萬軍ê上帝ah，求你倒tńg；
Tùi天àⁿ落看，照顧chit叢葡萄樹，
15 保護你chiàⁿ手所栽ê，
Kap你為家己所堅固ê枝。
16 伊已經受火燒，受刀剉；
為tio̍h你ê面ê受氣，in就滅無。
17 願你ê手岸tī你chiàⁿ-pêng ê人，
就是你為家己所堅固ê人子。
18 Án-ni，阮就無倒退離開你；
求你hō͘阮得tio̍h活，阮就beh求叫你ê名。
19 萬軍ê上帝耶和華ah，hō͘阮倒tńg；
Hō͘你ê面發出光，阮就得tio̍h救。
1 A-sat ê si; kau hō͘ Ga̍k-koaⁿ; tiāu, ēng "Chòe kan-chèng ê pek-ha̍p-hoe".1) Í-sek-lia̍t ê bo̍k-chiá ah, chhōa Iok-sek chhin-chhiūⁿ iûⁿ-kûn--ê, kiû Lí àⁿ hī-khang thiaⁿ; Chē tī ki-lō͘-peng ê téng-bīn--ê, kiû Lí hoat-chhut Lí ê kng. 2 Tī Í-hoat-liân, Piān-ngá-bín, Má-ná-se ê bīn-chêng, tián-chhut Lí ê koân-lêng, Lâi kiù goán. 3 Siōng-tè ah, hō͘ goán tò-tńg; Hō͘ Lí ê bīn hoat-chhut kng, goán chiū tit-tio̍h kiù. 4 Bān-kun ê Siōng-tè Iâ-hô-hoa ah, Lí ǹg Lí ê peh-sìⁿ ê kî-tó hoat-chhut siū-khì, beh jōa-kú ah? 5 Lí ēng ba̍k-sái chòe chia̍h-mi̍h, hō͘ in chia̍h; Koh niû chōe-chōe ba̍k-sái hō͘ in lim. 6 Lí hō͘ keh-piah-kok in-ūi goán lâi saⁿ-chiⁿ, Goán ê tùi-te̍k saⁿ-kap teh chhiò. 7 Bān-kun ê Siōng-tè ah, hō͘ goán tò-tńg, Hō͘ Lí ê bīn hoat-chhut kng, goán chiū tit-tio̍h kiù. 8 Lí tùi Ai-ki̍p sóa chi̍t-châng phû-tô-chhiū, Kóaⁿ-chhut lia̍t-pang, lâi chai--i, 9 Lí tī i ê thâu-chêng piàⁿ-khang thó͘-tōe; I ê kun tèng chhim, chiū siⁿ-thòaⁿ móa-tōe. 10 I ê iáⁿ jia-ba̍t chiah ê soaⁿ, I ê ki chhin-chhiūⁿ chin-hó ê peh-hiuⁿ-chhiū. 11 Hoat-chhut i ê ki, chhun kàu tōa-hái, I ê tîn thòaⁿ kàu Tōa-hô. 12 Lí siáⁿ-sū thiah-húi i ê lî-pa, Chhut-chāi it-chhè kè-lō͘ ê lâng bán--i? 13 Chhiū-nâ-lāi chhut-lâi ê soaⁿ-ti chau-that--i, Khòng-iá ê cháu-siù chia̍h--i. 14 Bān-kun ê Siōng-tè ah, kiû Lí tò-tńg; Tùi thiⁿ àⁿ-lo̍h khòaⁿ, chiàu-kò͘ chit châng phû-tô-chhiū, 15 Pó-hō͘ Lí chiàⁿ-chhiú só͘ chai--ê, Kap Lí ūi ka-kī só͘ kian-kò͘ ê ki. 16 I í-keng siū hé sio, siū to chhò; Ūi-tio̍h Lí ê bīn ê siū-khì, in chiū bia̍t-bô. 17 Goān Lí ê chhiú hōaⁿ tī Lí chiàⁿ-pêng ê lâng, Chiū-sī Lí ūi ka-kī só͘ kian-kò͘ ê jîn-chú. 18 Án-ni, goán chiū bô tò-thè lī-khui Lí; Kiû Lí hō͘ goán tit-tio̍h oa̍h, goán chiū beh kiû-kiò Lí ê miâ. 19 Bān-kun ê Siōng-tè Iâ-hô-hoa ah, hō͘ goán tò-tńg; Hō͘ Lí ê bīn hoat-chhut kng, goán chiū tit-tio̍h kiù.
1 A-sat ê詩；交hō͘樂官；用Ka-te̍k ê調。1) 上帝是阮ê氣力，lín tio̍h大聲o-ló伊；
Tio̍h出歡喜ê聲，o-ló雅各ê上帝。
2 Tio̍h唱詩歌，搖lin-long鼓；
彈好聽ê琴kap瑟。
3 Tio̍h tī初一十五，
阮節期ê日，pûn哨角。
4 因為這是kā以色列定tio̍h ê律例，
雅各ê上帝ê禮儀。
5 伊去攻擊埃及地ê時，
Tī約瑟ê中間，立chitê做干證；
Tī-hia我聽見所bōe曉得ê話。
6 上帝講，我hō͘伊ê肩頭脫離重擔，
Hō͘伊ê手放落筐á。
7 你tī患難中求叫，我bat救你；
我tī雷隱密ê所在應你；
我tī Bí-lī-pa ê水邊試你。[Sè-la̍h]
8 我ê百姓ah，你tio̍h聽；我beh對你做干證；
以色列ah，願你聽thàn我。
9 Tī你ê中間m̄-thang有別ê上帝，
外邦ê上帝，你亦m̄-thang跪拜。
10 我是耶和華，你ê上帝，
Bat chhōa你tùi埃及地上來；
Tio̍h大開你ê嘴，我就充滿伊。
11 總是我ê百姓m̄聽我ê聲；
以色列全然m̄ chhiù-chhái我。
12 我就chhut-chāi in，照in ê心ê固執；
Hō͘ in照in家己ê計謀去行。
13 願我ê百姓肯聽我；
以色列肯行我ê路。
14 我就緊緊制壓in ê仇讎；
Oa̍t-tńg我ê手，攻擊in ê對敵。
15 怨恨耶和華ê人，beh來投降伊，
總是in ê時代beh久長tī-teh。
16 伊亦beh用好ê麥hō͘ in食；
我用tùi石磐出ê蜜，hō͘ in食飽。
1 A-sat ê si; kau hō͘ Ga̍k-koaⁿ; ēng Ka-te̍k ê tiāu.1) Siōng-tè sī goán ê khùi-la̍t, lín tio̍h tōa-siaⁿ o-ló I; Tio̍h chhut hoaⁿ-hí ê siaⁿ, o-ló Ngá-kok ê Siōng-tè. 2 Tio̍h chhiùⁿ si-koa, iô lin-long-kó͘; Tôaⁿ hó-thiaⁿ ê khîm kap sek. 3 Tio̍h tī chhoe-it cha̍p-gō͘, Goán choeh-kî ê ji̍t, pûn sàu-kak. 4 In-ūi che sī kā Í-sek-lia̍t tiāⁿ-tio̍h ê lu̍t-lē, Ngá-kok ê Siōng-tè ê lé-gî. 5 I khì kong-kek Ai-ki̍p tōe ê sî, Tī Iok-sek ê tiong-kan, li̍p chit-ê chòe kan-chèng; Tī-hia góa thiaⁿ-kìⁿ só͘ bōe hiáu-tit ê ōe. 6 Siōng-tè kóng, Góa hō͘ i ê keng-thâu thoat-lī tāng-tàⁿ, Hō͘ i ê chhiú pàng-lo̍h kheng-á. 7 Lí tī hoān-lān-tiong kiû-kiò, Góa bat kiù lí; Góa tī lûi ún-ba̍t ê só͘-chāi ìn lí; Góa tī Bí-lī-pa ê chúi-piⁿ chhì lí. [Sè-la̍h 8 Góa ê peh-sìⁿ ah, lí tio̍h thiaⁿ; Góa beh tùi lí chòe kan-chèng; Í-sek-lia̍t ah, goān lí thiaⁿ-thàn Góa. 9 Tī lí ê tiong-kan m̄-thang ū pa̍t ê siōng-tè, Gōa-pang ê siōng-tè, lí ia̍h m̄-thang kūi-pài. 10 Góa sī Iâ-hô-hoa, lí ê Siōng-tè, Bat chhōa lí tùi Ai-ki̍p tōe chiūⁿ--lâi; Tio̍h tōa khui lí ê chhùi, Góa chiū chhiong-móa--i. 11 Chóng-sī Góa ê peh-sìⁿ m̄-thiaⁿ Góa ê siaⁿ; Í-sek-lia̍t choân-jiân m̄ chhiù-chhái Góa. 12 Góa chiū chhut-chāi in, chiàu in ê sim ê kò͘-chip; Hō͘ in chiàu in ka-kī ê kè-bô͘ khì kiâⁿ. 13 Goān Góa ê peh-sìⁿ khéng thiaⁿ Góa; Í-sek-lia̍t khéng kiâⁿ Góa ê lō͘. 14 Góa chiū kín-kín chè-ap in ê kiû-siû; Oa̍t-tńg Góa ê chhiú, kong-kek in ê tùi-te̍k. 15 Oàn-hūn Iâ-hô-hoa ê lâng, beh lâi tâu-hâng I, Chóng-sī in ê sî-tāi beh kú-tn̂g tī-teh. 16 I ia̍h beh ēng hó ê be̍h hō͘ in chia̍h; Góa ēng tùi chio̍h-pôaⁿ chhut ê bi̍t, hō͘ in chia̍h pá.
1 A-sat ê詩。1) 上帝khiā tī上帝ê會中，
Tī chiahê上帝 ê中間teh審判。
2 Lín審判無照公義，
Sûn pháiⁿ人ê情面，beh到tī時ah？[Sè-la̍h]
3 Lín tio̍h kā sòng-hiong人kap無父ê kiáⁿ伸冤；
Tio̍h kā困苦kap欠缺ê人行公義。
4 Tio̍h拯救sòng-hiong kap欠缺ê人，
Hō͘ in脫離pháiⁿ人ê手。
5 In m̄知，亦無明理；
In tī烏暗中行來行去；
地ê根基lóng搖動。
6 我bat講，Lín是siōng-tè。
Lín lóng是至koân ê ê kiáⁿ；
7 總是lín會死，kap世間人一樣；
Beh倒落去，親像貴族ê一个。
8 上帝ah，求你起來，審判世界；
因為你beh得tio̍h萬國做基業。
1 A-sat ê si.1) Siōng-tè khiā tī Siōng-tè ê hōe-tiong, Tī chiah ê siōng-tè ê tiong-kan teh sím-phòaⁿ. 2 Lín sím-phòaⁿ bô chiàu kong-gī, Sûn pháiⁿ-lâng ê chêng-biān, beh kàu tī-sî ah? [Sè-la̍h 3 Lín tio̍h kā sòng-hiong-lâng kap bô-pē ê kiáⁿ sin-oan; Tio̍h kā khùn-khó͘ kap khiàm-kheh ê lâng kiâⁿ kong-gī. 4 Tio̍h chín-kiù sòng-hiong kap khiàm-kheh ê lâng, Hō͘ in thoat-lī pháiⁿ-lâng ê chhiú. 5 In m̄-chai, ia̍h bô bêng-lí; In tī o͘-àm-tiong kiâⁿ-lâi kiâⁿ-khì; Tōe ê kun-ki lóng iô-tāng. 6 Góa bat kóng, Lín sī siōng-tè. Lín lóng sī Chì-koâiⁿ--ê ê kiáⁿ; 7 Chóng-sī lín ōe sí, kap sè-kan lâng chi̍t-iūⁿ; Beh tó--lo̍h-khì, chhin-chhiūⁿ kùi-cho̍k ê chi̍t-ê. 8 Siōng-tè ah, kiû Lí khí--lâi, sím-phòaⁿ sè-kài; In-ūi Lí beh tit-tio̍h bān-kok chòe ki-gia̍p.
1 A-sat ê詩歌。1) 上帝ah，求你m̄-thang靜靜；
上帝ah，求你m̄-thang無開嘴，亦m̄-thang無做聲；
2 因為你ê對敵hōa-hōa嚷；
怨恨你ê人kia̍h起頭。
3 In用奸詐ê計謀beh害你ê百姓；
In相kap議論，beh害你所khǹg密ê人。
4 In講，來ah，咱來滅無in，hō͘ in bōe成kok，
Hō͘以色列ê名無koh hō͘人記念。
5 In同心相kap參詳，
相kap結約beh抵敵你；
6 就是khiā起布棚ê Í-tong kap以實瑪利人，
Mô͘-ap kap Hā-kah人，
7 Ka-pa-le̍k、A-bûn，kap A-má-le̍k；
腓利士，以及Chhui-lô khiā起ê百姓；
8 亞述亦kap in連合，
In做羅得ê kiáⁿ孫ê幫手。[Sè-la̍h]
9 求你款待in，親像早款待米甸；
親像tī Ki-sūn河，款待Se-se-lah kap Iâ-pin一樣。
10 In tī Ún-tô-jíⁿ滅無，
成做地上ê糞土。
11 求你hō͘ in ê領袖親像O͘-li̍p kap Se-i-pek；
Hō͘ in ê軍長lóng親像Se-pa kap Sat-bûn-ná。
12 In講，咱tio̍h將上帝khiā起ê所在，
佔來做家己ê。
13 我ê上帝ah，求你hō͘ in親像捲螺風ê塵埃，
親像風前ê稻屑；
14 親像火燒樹林，
親像火燄sio山頭。
15 求你亦親像án-ni用你ê狂風追趕in，
用你ê大風hō͘ in驚惶。
16 耶和華ah，求你hō͘ in滿面見笑，
Thang來祈求你ê名。
17 Hō͘ in永遠見笑，驚惶；
Hō͘ in漏氣滅無。
18 Hō͘ in知只有你，名做耶和華ê，
是全-地上至koân ê。
1 A-sat ê si-koa.1) Siōng-tè ah, kiû Lí m̄-thang chēng-chēng; Siōng-tè ah, kiû Lí m̄-thang bô khui-chhùi, ia̍h m̄-thang bô chòe-siaⁿ; 2 In-ūi Lí ê tùi-te̍k hōa-hōa-jióng; Oàn-hūn Lí ê lâng kia̍h-khí thâu. 3 In ēng kan-chà ê kè-bô͘ beh hāi Lí ê peh-sìⁿ; In saⁿ-kap gī-lūn, beh hāi Lí só͘ khǹg-ba̍t ê lâng. 4 In kóng, Lâi ah, lán lâi bia̍t-bô in, hō͘ in bōe chiâⁿ kok, Hō͘ Í-sek-lia̍t ê miâ bô koh hō͘ lâng kì-liām. 5 In tâng-sim saⁿ-kap chham-siông, Saⁿ-kap kiat-iok beh tí-te̍k Lí; 6 Chiū-sī khiā-khí pò͘-pîⁿ ê Í-tong kap Í-si̍t-má-lī lâng, Mô͘-ap kap Hā-kah lâng, 7 Ka-pa-le̍k, A-bûn, kap A-má-le̍k; Hui-lī-sū, í-ki̍p Chhui-lô khiā-khí ê peh-sìⁿ; 8 A-su̍t ia̍h kap in liân-ha̍p, In chòe Lô-tek ê kiáⁿ-sun ê pang-chhiú. [Sè-la̍h 9 Kiû Lí khoán-thāi in, chhin-chhiūⁿ chá khoán-thāi Bí-tiân; Chhin-chhiūⁿ tī Ki-sūn hô, khoán-thāi Se-se-lah kap Iâ-pin chi̍t-iūⁿ. 10 In tī Ún-tô-jíⁿ bia̍t-bô, Chiâⁿ-chòe tōe-chiūⁿ ê pùn-thô͘. 11 Kiû Lí hō͘ in ê léng-siù chhin-chhiūⁿ O͘-li̍p kap Se-i-pek; Hō͘ in ê kun-tiúⁿ lóng chhin-chhiūⁿ Se-pa kap Sat-bûn-ná. 12 In kóng, Lán tio̍h chiong Siōng-tè khiā-khí ê só͘-chāi, Chiàm lâi chòe ka-kī ê. 13 Góa ê Siōng-tè ah, kiû Lí hō͘ in chhin-chhiūⁿ kńg-lê-hong ê tîn-ai, Chhin-chhiūⁿ hong-chêng ê tiū-sap; 14 Chhin-chhiūⁿ hé sio chhiū-nâ, Chhin-chhiūⁿ hé-iām sio soaⁿ-thâu. 15 Kiû Lí ia̍h chhin-chhiūⁿ án-ni ēng Lí ê kông-hong tui-kóaⁿ in, Ēng Lí ê tōa-hong hō͘ in kiaⁿ-hiâⁿ. 16 Iâ-hô-hoa ah, kiû Lí hō͘ in móa-bīn kiàn-siàu, Thang lâi kî-kiû Lí ê miâ. 17 Hō͘ in éng-oán kiàn-siàu, kiaⁿ-hiâⁿ; Hō͘ in làu-khùi bia̍t-bô. 18 Hō͘ in chai chí-ū Lí, miâ chòe Iâ-hô-hoa ê, Sī choân-tōe-chiūⁿ chì-koâiⁿ ê.
1 Khó-la̍h ê後裔ê詩；交hō͘樂官；用Ka-te̍k ê樂器。1) 萬軍ê耶和華ah，
你khiā起ê所在，怎樣hiah thang意愛。
2 我ê心神戀慕耶和華ê殿院到暈去；
我ê心腸，我ê肉體，ǹg活ê上帝求叫。
3 萬軍ê耶和華，我ê王，我ê上帝ah，
雀鳥á為tio̍h家己chhē-tio̍h一个厝，
燕á為tio̍h家己chhē-tio̍h pū-kiáⁿ ê巢；
就是tī你hiahê祭壇hia。
4 Khiā起tī你ê厝ê，hit號人有福氣；
In beh直直o-ló你。[Sè-la̍h]
5 伊ê力在tī你，
In ê心意向錫安ê大路ê，hit號人有福氣。
6 In經過Lâu-目屎ê山谷，hō͘伊變做水泉ê所在；
Koh有秋天ê雨ê福氣kā伊蓋滿。
7 In ná行，氣力ná加添，
Ta̍k人到錫安朝見上帝。
8 萬軍ê上帝耶和華ah，求你聽我ê祈禱；
雅各ê上帝ah，求你àⁿ耳孔來聽。[Sè-la̍h]
9 做阮ê藤牌ê上帝ah，你tio̍h看；
看你受抹油ê ê面。
10 Tī你ê殿院 tòa一日，khah好一千日；
寧可tī我ê上帝ê厝顧門，
Khah好tiàm tī pháiⁿ人ê布棚，
11 因為耶和華上帝是日頭，是藤牌；
耶和華賞賜恩惠kap榮光；
伊bē-bat留一項好物，無hō͘ hiahê行正直ê人。
12 萬軍ê耶和華ah，
Óa靠你ê人有福氣。
1 Khó-la̍h ê hō͘-è ê si; kau hō͘ Ga̍k-koaⁿ; ēng Ka-te̍k ê ga̍k-khì.1) Bān-kun ê Iâ-hô-hoa ah, Lí khiā-khí ê só͘-chāi, cháiⁿ-iūⁿ hiah thang ì-ài. 2 Góa ê sim-sîn loân-bō͘ Iâ-hô-hoa ê tiān-īⁿ kàu hūn--khì; Góa ê sim-tn̂g, góa ê jio̍k-thé, ǹg oa̍h ê Siōng-tè kiû-kiò. 3 Bān-kun ê Iâ-hô-hoa, góa ê Ông, góa ê Siōng-tè ah, Chhek-chiáu-á ūi-tio̍h ka-kī chhē-tio̍h chi̍t ê chhù, Ìⁿ-á ūi-tio̍h ka-kī chhē-tio̍h pū-kiáⁿ ê siū; Chiū-sī tī Lí hiah ê chè-tôaⁿ hia. 4 Khiā-khí tī Lí ê chhù ê, hit hō lâng ū hok-khì; In beh ti̍t-ti̍t o-ló Lí. [Sè-la̍h 5 I ê la̍t chāi-tī Lí, In ê sim ì-hiòng Sek-an ê tōa-lō͘--ê, hit-hō lâng ū hok-khì. 6 In keng-kè Lâu-ba̍k-sái ê soaⁿ-kok, hō͘ i pìⁿ-chòe chúi-chôaⁿ ê só͘-chāi; Koh ū chhiu-thiⁿ ê hō͘ ê hok-khì kā i khàm-móa. 7 In ná-kiâⁿ, khùi-la̍t ná ke-thiⁿ, Ta̍k-lâng kàu Sek-an tiâu-kìⁿ Siōng-tè. 8 Bān-kun ê Siōng-tè Iâ-hô-hoa ah, kiû Lí thiaⁿ góa ê kî-tó; Ngá-kok ê Siōng-tè ah, kiû Lí àⁿ hī-khang lâi thiaⁿ. [Sè-la̍h 9 Chòe goán ê tîn-pâi ê Siōng-tè ah, Lí tio̍h khòaⁿ; Khòaⁿ Lí siū boah-iû--ê ê bīn. 10 Tī Lí ê tiān-īⁿ tòa chi̍t-ji̍t, khah-hó chi̍t-chheng ji̍t; Lêng-khó͘ tī góa ê Siōng-tè ê chhù kò͘-mn̂g, Khah-hó tiàm tī pháiⁿ-lâng ê pò͘-pîⁿ, 11 In-ūi Iâ-hô-hoa Siōng-tè sī ji̍t-thâu, sī tîn-pâi; Iâ-hô-hoa siúⁿ-sù un-hūi kap êng-kng; I bē-bat lâu chi̍t-hāng hó-mi̍h, Bô hō͘ hiah ê kiâⁿ chèng-ti̍t ê lâng. 12 Bān-kun ê Iâ-hô-hoa ah, Óa-khò Lí ê lâng ū hok-khì.
1 Khó-la̍h ê後裔ê詩；交hō͘樂官。1) 耶和華ah，你已經施恩tī你ê地，
雅各受掠ê人，你救伊tò來。
2 你赦免你ê百姓ê罪惡，
你遮蓋in一切ê罪過。[Sè-la̍h]
3 你收回你一切ê受氣，
Soah你猛烈ê受氣。
4 救阮ê上帝ah，求你hō͘阮倒tńg，
Soah你ǹg阮ê受氣。
5 你beh受氣阮到永遠mah？
你beh將你ê受氣留到萬代mah？
6 你kiám m̄ koh將阮救活，
Hō͘你ê百姓因為你來歡喜mah？
7 耶和華ah，求你hō͘阮看見你ê慈愛；
Koh將你ê救恩賞賜阮。
8 我願聽全能ê耶和華所beh講ê；
因為祂beh對祂ê百姓，kap祂聖ê百姓，講平安；
總是in m̄-thang koh去lām-sám行。
9 伊ê救恩實在近tī驚畏伊ê人；
Hō͘榮光tiàm tī咱ê境內。
10 慈愛kap真實相tú-tio̍h；
公義kap平安相chim嘴。
11 真實tùi地裡發生，
公義tùi天看落來。
12 耶和華beh賞賜好物，
咱ê土地beh出伊ê土產。
13 公義beh行tī伊ê頭前，
Hō͘伊ê腳跡成做lō͘。
1 Khó-la̍h ê hō͘-è ê si; kau hō͘ Ga̍k-koaⁿ.1) Iâ-hô-hoa ah, Lí í-keng si-un tī Lí ê tōe, Ngá-kok siū-lia̍h ê lâng, Lí kiù i tò-lâi. 2 Lí sià-bián Lí ê peh-sìⁿ ê chōe-ok, Lí jia-khàm in it-chhè ê chōe-kòa. [Sè-la̍h 3 Lí siu-hôe Lí it-chhè ê siū-khì, Soah Lí béng-lia̍t ê siū-khì. 4 Kiù goán ê Siōng-tè ah, kiû Lí hō͘ goán tò-tńg, Soah Lí ǹg goán ê siū-khì. 5 Lí beh siū-khì goán kàu éng-oán mah? Lí beh chiong Lí ê siū-khì lâu kàu bān-tāi mah? 6 Lí kiám m̄ koh chiong goán kiù oa̍h, Hō͘ Lí ê peh-sìⁿ in-ūi Lí lâi hoaⁿ-hí mah? 7 Iâ-hô-hoa ah, kiû Lí hō͘ goán khòaⁿ-kìⁿ Lí ê chû-ài; Koh chiong Lí ê kiù-un siúⁿ-sù goán. 8 Góa goān thiaⁿ Choân-lêng ê Iâ-hô-hoa só͘ beh kóng--ê; In-ūi I beh tùi I ê peh-sìⁿ, kap I sèng ê peh-sìⁿ, kóng pêng-an; Chóng-sī in m̄-thang koh khì lām-sám kiâⁿ. 9 I ê kiù-un si̍t-chāi kūn tī kiaⁿ-ùi I ê lâng; Hō͘ êng-kng tiàm tī lán ê kéng-lāi. 10 Chû-ài kap chin-si̍t saⁿ tú-tio̍h; Kong-gī kap pêng-an saⁿ chim-chhùi. 11 Chin-si̍t tùi tōe--nih hoat-siⁿ, Kong-gī tùi thiⁿ khòaⁿ--lo̍h-lâi. 12 Iâ-hô-hoa beh siúⁿ-sù hó-mi̍h, Lán ê thó͘-tōe beh chhut i ê thó͘-sán. 13 Kong-gī beh kiâⁿ tī I ê thâu-chêng, Hō͘ I ê kha-jiah chiâⁿ-chòe lō͘.
1 大衛ê祈禱。1) 耶和華ah，求你àⁿ耳孔聽我；
因為我是困苦sòng-hiong ê。
2 求你保存我ê性命，因為我是虔誠ê人。
我ê上帝ah，你ê奴僕óa靠你；求你拯救伊。
3 主ah，求你憐憫我；
因為我thong日求叫你。
4 主ah，求你hō͘你ê奴僕心歡喜；
因為我用我ê心仰望你。
5 主ah，因為你是好，歡喜赦免人；
有豐盛ê慈愛，賞賜凡若求叫你ê人。
6 耶和華ah，求你àⁿ耳孔聽我ê祈禱；
Àⁿ落聽我懇求ê聲。
7 Tī我患難ê日，beh求叫你；
你beh 應我。
8 主ah，chiahê上帝 ê中間，無一个能比得你；
你ê所做亦無thang比並。
9 主ah，你所造ê萬邦lóng beh來仆拜tī你ê面前；
In亦beh榮光你ê名。
10 因為你做大，koh行奇妙ê事；
只有你是上帝。
11 耶和華ah，求你將你ê道路指示我；我beh照你ê真理來行；
Hō͘我專一ê心敬畏你ê名。
12 主，我ê上帝ah，我beh全心o-ló你；
我beh榮光你ê名到永遠。
13 因為你對我發出大ê慈愛，
你救我ê性命免落極深ê陰間。
14 上帝ah，驕傲ê人起來攻擊我；
Koh有強暴ê黨siàu想我ê性命；
In無敬奉你tī in ê面前。
15 主ah，你是仁慈恩典ê上帝；
無快快受氣，koh有豐盛ê慈愛kap誠實。
16 求你oa̍t過來看我，可憐我；
將你ê氣力賞賜你ê奴僕，
救你ê女婢ê kiáⁿ。
17 求你顯出恩典我ê憑據，
Hō͘怨恨我ê人看見來見笑；
因為耶和華你幫贊我，安慰我。
1 Tāi-pi̍t ê kî-tó.1) Iâ-hô-hoa ah, kiû Lí àⁿ hī-khang thiaⁿ góa; In-ūi góa sī khùn-khó͘ sòng-hiong ê. 2 Kiû Lí pó-chûn góa ê sìⁿ-miā, in-ūi góa sī khiân-sêng ê lâng. Góa ê Siōng-tè ah, Lí ê lô͘-po̍k óa-khò Lí; kiû Lí chín-kiù i. 3 Chú ah, kiû Lí lîn-bín góa; In-ūi góa thong-ji̍t kiû-kiò Lí. 4 Chú ah, kiû Lí hō͘ Lí ê lô͘-po̍k sim hoaⁿ-hí; In-ūi góa ēng góa ê sim gióng-bōng Lí. 5 Chú ah, in-ūi Lí sī hó, hoaⁿ-hí sià-bián lâng; Ū hong-sēng ê chû-ài, siúⁿ-sù hoān-nā kiû-kiò Lí ê lâng. 6 Iâ-hô-hoa ah, kiû Lí àⁿ hī-khang thiaⁿ góa ê kî-tó; Àⁿ-lo̍h thiaⁿ góa khún-kiû ê siaⁿ. 7 Tī góa hoān-lān ê ji̍t, beh kiû-kiò Lí; Lí beh ìn góa. 8 Chú ah, chiah ê siōng-tè ê tiong-kan, bô chi̍t-ê ōe pí-tit Lí; Lí ê só͘ chòe ia̍h bô thang pí-phēng. 9 Chú ah, Lí só͘ chō ê bān-pang lóng beh lâi phak-pài tī Lí ê bīn-chêng; In ia̍h beh êng-kng Lí ê miâ. 10 In-ūi Lí chòe tōa, koh kiâⁿ kî-biāu ê sū; Chí-ū Lí sī Siōng-tè. 11 Iâ-hô-hoa ah, kiû Lí chiong Lí ê tō-lō͘ chí-sī góa; góa beh chiàu Lí ê chin-lí lâi kiâⁿ; Hō͘ góa choan-it ê sim kèng-ùi Lí ê miâ. 12 Chú, góa ê Siōng-tè ah, góa beh choân-sim o-ló Lí; Góa beh êng-kng Lí ê miâ kàu éng-oán. 13 In-ūi Lí tùi góa hoat-chhut tōa ê chû-ài, Lí kiù góa ê sìⁿ-miā bián lo̍h ke̍k-chhim ê im-kan. 14 Siōng-tè ah, kiau-ngō͘ ê lâng khí-lâi kong-kek góa; Koh ū kiông-pō ê tóng siàu-siūⁿ góa ê sìⁿ-miā; In bô kèng-hōng Lí tī in ê bīn-chêng. 15 Chú ah, Lí sī jîn-chû un-tián ê Siōng-tè; Bô khoài-khoài siū-khì, koh ū hong-sēng ê chû-ài kap sêng-si̍t. 16 Kiû Lí oa̍t--kè-lâi khòaⁿ góa, khó-lîn góa; Chiong Lí ê khùi-la̍t siúⁿ-sù Lí ê lô͘-po̍k, Kiù Lí ê lú-pī ê kiáⁿ. 17 Kiû Lí hián-chhut un-tián góa ê pîn-kù, Hō͘ oàn-hūn góa ê lâng khòaⁿ-kìⁿ lâi kiàn-siàu; In-ūi Iâ-hô-hoa Lí pang-chān góa, an-ùi góa.
1 Khó-la̍h ê後裔ê詩歌。1) 伊ê地基在tī聖山。
2 耶和華疼錫安ê門，
贏過雅各lóng總khiā起ê所在。
3 上帝ê城ah，
有榮光ê事，是指你來講ê。 [Sè-la̍h]
4 我beh算La̍h-hap-pek kap巴比倫tī bat我ê ê內面；
看ah，腓利士、Chhui-lô、Kó͘-si̍t，
Chitê出世tī-hia。
5 論到錫安beh講，Chitê，hitê，出世tī hit中間；
Koh至koân ê beh親身堅固伊。
6 當耶和華記萬百姓數額ê時，
伊beh算chitê出世tī-hia。[Sè-la̍h]
7 唱歌ê，跳舞ê，lóng beh講，
我ê水源lóng在tī你。
1 Khó-la̍h ê hō͘-è ê si-koa.1) I ê tōe-ki chāi-tī sèng-soaⁿ. 2 Iâ-hô-hoa thiàⁿ Sek-an ê mn̂g, Iâⁿ-kè Ngá-kok lóng-chóng khiā-khí ê só͘-chāi. 3 Siōng-tè ê siâⁿ ah, Ū êng-kng ê sū, sī chí lí lâi kóng--ê. [Sè-la̍h 4 Góa beh sǹg La̍h-hap-pek kap Pa-pí-lûn tī bat Góa--ê ê lāi-bīn; Khòaⁿ ah, Hui-lī-sū, Chhui-lô, Kó͘-si̍t, Chit-ê chhut-sì tī-hia. 5 Lūn-kàu Sek-an beh kóng, Chit-ê, hit-ê, chhut-sì tī hit tiong-kan; Koh Chì-koâiⁿ-ê beh chhin-sin kian-kò͘--i. 6 Tng Iâ-hô-hoa kì bān peh-sìⁿ siàu-gia̍h ê sî, I beh sǹg chit-ê chhut-sì tī-hia. [Sè-la̍h 7 Chhiùⁿ-koa-ê, thiàu-bú-ê, lóng beh kóng, Góa ê chúi-goân lóng chāi-tī Lí.
1 Khó-la̍h後裔ê詩歌，就是以斯拉人Hi-bān教示ê詩；交hō͘樂官；調用Mô͘-ha̍p-la̍h Lī-àm-ngô͘。1) 耶和華，救我ê上帝ah，
我日暝tī你ê面前求叫。
2 願我ê祈禱到你ê面前；
求你àⁿ耳孔聽我ê祈求。
3 因為我ê心滿滿患難，
我ê性命近tī陰間。
4 我算kap落穴ê人同列；
也親像無得tio̍h幫贊ê人。
5 我受hiat-ka̍k tī死人中，
親像受刣 ê人倒tī墓內；
In是你無koh記得ê，
Tùi你ê手隔斷。
6 你hē我tī極深ê穴；
Tī烏暗ê地方，tī深淵。
7 你ê受氣重重teh我；
你用你一切ê海湧苦楚窘迫我。[Sè-la̍h]
8 Kap我相識ê人你hō͘ in離開我遠遠，
Hō͘ in厭惡我；
我受關禁，bōe得出來。
9 我ê目睭因為困苦phah-pháiⁿ；
耶和華ah，我日日求叫你，
我ǹg你kia̍h-手。
10 你kiám beh行奇事hō͘死人看mah？
總無陰魂iáu會起來o-ló你ah？[Sè-la̍h]
11 Kiám會tī墓內講起你ê慈愛mah？
Kiám會tī滅無ê中間講起你ê信實mah？
12 Tī烏暗ê所在，kiám會知你ê奇事mah？
Tī bōe記得tāi-chì ê地方，kiám會知你ê公義mah？
13 耶和華ah，我有祈求你；
Tī早起時我ê祈禱beh透到你ê面前。
14 耶和華ah，你啥事棄sak我？
啥事掩你ê面，m̄看我？
15 我tùi少年受苦，險險死；
我受tio̍h你ê驚惶，致到心紛亂。
16 你ê大受氣淹密我；
你用驚惶除滅我。
17 Chiahê thong日親像水圍我；
一齊來圍困我。
18 你將我ê良朋密友隔開遠遠；
Hō͘我所相識ê人入tī烏暗ê所在。
1 Khó-la̍h hō͘-è ê si-koa, chiū-sī Í-sū-la̍h lâng Hi-bān kà-sī ê si; kau hō͘ Ga̍k-koaⁿ; tiāu, ēng Mô͘-ha̍p-la̍h Lī-àm-ngô͘.1) Iâ-hô-hoa, kiù góa ê Siōng-tè ah, Góa ji̍t-mî tī Lí ê bīn-chêng kiû-kiò. 2 Goān góa ê kî-tó kàu Lí ê bīn-chêng; Kiû Lí àⁿ hī-khang thiaⁿ góa ê kî-kiû. 3 In-ūi góa ê sim móa-móa hoān-lān, Góa ê sìⁿ-miā kūn tī im-kan. 4 Góa sǹg kap lo̍h-hia̍t ê lâng tâng-lia̍t; Iā chhin-chhiūⁿ bô tit-tio̍h pang-chān ê lâng. 5 Góa siū hiat-ka̍k tī sí-lâng-tiong, Chhin-chhiūⁿ siū-thâi ê lâng tó tī bōng-lāi; In sī Lí bô koh kì-tit-ê, Tùi Lí ê chhiú keh-tn̄g. 6 Lí hē góa tī ke̍k-chhim ê hia̍t; Tī o͘-àm ê tōe-hng, tī chhim-ian. 7 Lí ê siū-khì tāng-tāng teh góa; Lí ēng Lí it-chhè ê hái-éng khó͘-chhó͘ khún-pek góa. [Sè-la̍h 8 Kap góa sio-bat ê lâng Lí hō͘ in lī-khui góa hn̄g-hn̄g, Hō͘ in iàm-ò͘ⁿ góa; Góa siū koaiⁿ-kìm, bōe-tit chhut-lâi. 9 Góa ê ba̍k-chiu in-ūi khùn-khó͘ phah-pháiⁿ; Iâ-hô-hoa ah, góa ji̍t-ji̍t kiû-kiò Lí, Góa ǹg Lí kia̍h-chhiú. 10 Lí kiám beh kiâⁿ kî-sū hō͘ sí-lâng khòaⁿ mah? Chóng-bô im-hûn iáu ōe khí-lâi o-ló Lí ah? [Sè-la̍h 11 Kiám ōe tī bōng-lāi kóng-khí Lí ê chû-ài mah? Kiám ōe tī bia̍t-bô ê tiong-kan kóng-khí Lí ê sìn-si̍t mah? 12 Tī o͘-àm ê só͘-chāi, kiám ōe chai Lí ê kî-sū mah? Tī bōe-kì-tit tāi-chì ê tōe-hng, kiám ōe chai Lí ê kong-gī mah? 13 Iâ-hô-hoa ah, góa ū kî-kiû Lí; Tī chá-khí-sî góa ê kî-tó beh thàu kàu Lí ê bīn-chêng. 14 Iâ-hô-hoa ah, Lí siáⁿ-sū khì-sak góa? Siáⁿ-sū ng Lí ê bīn, m̄ khòaⁿ góa? 15 Góa tùi siàu-liân siū-khó͘, hiám-hiám sí; Góa siū-tio̍h Lí ê kiaⁿ-hiâⁿ, tì-kàu sim hun-loān. 16 Lí ê tōa siū-khì im-ba̍t góa; Lí ēng kiaⁿ-hiâⁿ tû-bia̍t góa. 17 Chiah-ê thong-ji̍t chhin-chhiūⁿ chúi ûi góa; Chi̍t-chôe lâi ûi-khùn góa. 18 Lí chiong góa ê liông-pêng bi̍t-iú keh-khui hn̄g-hn̄g; Hō͘ góa só͘ saⁿ-bat ê lâng ji̍p tī o͘-àm ê só͘-chāi.
1 Í-su-la̍h人，Í-thàm，教示ê詩。1) 我beh唱歌o-ló耶和華ê慈愛到tī永遠。
Beh用我ê嘴傳你ê信實到代代。
2 因為我bat講，慈愛beh受建立到永遠；
你beh將你ê信實堅固tī天裡。
3 我kap我所揀ê人立約，
對我ê奴僕大衛chiù-chōa。
4 我beh hō͘你ê後裔堅固到永遠，
Koh hō͘你ê寶座建立到代代。 [Sè-la̍h]
5 耶和華ah，chiahê天 beh o-ló你ê奇事；
Tī聖ê ê會中，beh o-ló你ê信實。
6 Tī空中是誰能比得耶和華？
大權能ê ê眾kiáⁿ中，是誰能親像耶和華？
7 伊tī聖ê ê議會中，是大大有威嚴ê上帝；
比一切tī伊四圍ê，koh-khah thang驚畏。
8 萬軍ê上帝耶和華ah，
Toh落一个大權能ê，親像你耶和華？
你ê信實tī你ê四圍。
9 海水漲高，你管轄伊；
海湧giâ起來，你hō͘伊平。
10 你phah碎La̍h-hap-pek，親像已經刣死ê人；
你用有氣力ê手phah散你ê對敵。
11 天屬你，地亦屬你；
世界kap其中所充滿ê，lóng是你所建立。
12 南北是你所創造；
Tha-po̍k kap Hek-bûn，因為你ê名來歡喜。
13 你有大權能ê手，
你ê手有力，你ê chiàⁿ手kia̍h高高。
14 公平kap義理是你ê寶座ê地基；
慈愛kap誠實行tī你ê面前。
15 能bat歡喜ê聲-ê，hitê百姓有福氣；
耶和華ah，in tī你ê面所發出ê光teh行。
16 In日日因為你ê名來歡喜；
因為你ê公義得tio̍h升高。
17 因為你是in氣力ê榮光；
Koh因為你歡喜阮，阮ê角beh得tio̍h kia̍h高。
18 阮ê藤牌屬tī耶和華；
阮ê王屬tī以色列ê聖ê。
19 當時你tī異象中吩咐你聖ê百姓，講，
我用幫贊ê力，hē tī hitê有權能ê ê身上；
Tùi百姓中揀ê，我高升伊。
20 我chhē-tio̍h我ê奴僕大衛；
用我ê聖油抹伊。
21 我ê手beh常常kap伊tī-teh，
我ê手骨亦beh堅固伊。
22 對敵bōe能勒索伊；
兇惡ê人bōe能苦楚伊。
23 我beh tī伊ê面前phah碎伊ê對敵；
攻擊hitê怨恨伊ê人。
24 總是我ê信實，kap我ê慈愛，beh kap伊tī-teh；
因為我ê名，伊ê角beh得tio̍h kia̍h高。
25 我beh hō͘伊ê手伸到海；
Chiàⁿ手伸到chiahê河。
26 伊beh稱呼我講，你是我ê父，
是我ê上帝，是救我ê石磐。
27 我亦beh設立伊最大kiáⁿ，
做世上第一高ê君王。
28 我beh為tio̍h伊保存我ê慈愛到永遠；
我kap伊所立ê約，的確無變換。
29 我亦beh保存伊ê後裔到代代；
Hō͘伊ê寶座親像天ê久。
30 設使伊ê kiáⁿ孫放sak我ê律法；
無行我ê法度；
31 悖謬我ê律例，
無守我ê誡命；
32 我就beh用柺á責罰in ê過失；
用鞭責罰in ê罪惡。
33 總是我的確無將我ê慈愛一盡對伊收回；
亦的確無hō͘我ê信實廢無。
34 我的確無失我ê約，
亦無改換我ê嘴所講ê。
35 我一pái kí家己ê聖潔來chiù-chōa，
我決斷無tùi大衛講白賊；
36 伊ê後裔beh傳到永遠；
伊ê寶座tī我ê面前，親像日ê久長；
37 亦親像月ê永遠建立；
Koh親像天頂確實ê干證。[Sè-la̍h]
38 總是你有受氣你ê受抹油ê，
厭(iàm)賤棄sak伊。
39 你已經厭惡kap你ê奴僕所立ê約，
將伊ê冕旒蹧躂 tī地裡。
40 你已經拆伊一切ê籬笆；
Hō͘伊ê衛所變做拋荒ê所在。
41 過路人lóng搶the̍h伊；
伊成做隔壁kok所凌辱ê。
42 你hō͘伊ê對敵ê chiàⁿ手kia̍h高；
Hō͘伊ê仇讎lóng歡喜。
43 你hō͘伊ê刀劍倒鋩(tó-mî)，
Hō͘伊tī交戰ê時khiā-bōe-tiâu。
44 你hō͘伊ê榮顯無去，
將伊ê寶座chhia倒tī地裡。
45 你減少伊青年ê日子；
Koh hō͘伊滿滿見笑。 [Sè-la̍h]
46 耶和華ah，你beh jōa久家己khǹg密，到永遠mah？
你ê受氣親像火to̍h，beh jōa久ah？
47 求你記得我ê時間，怎樣hiah短少；
你創造一切ê世間人，hō͘ in到hiah空虛ah！
48 甚麼人能長長活，無見tio̍h死，
能救伊ê靈魂脫離陰間ê權柄ah？[Sè-la̍h]
49 主ah，你前憑你ê信實，對大衛chiù-chōa-ê，
Hiah-ê慈愛taⁿ tī toh落？
50 主ah，求你記念你ê奴僕所受ê凌辱，
記念我怎樣將一切強盛ê百姓ê凌辱存tī我ê心內；
51 耶和華ah，你ê對敵用chitê凌辱，
就是凌辱你受抹油ê ê蹤跡。
52 Tio̍h o-ló耶和華到永遠。
A-bēng，koh A-bēng。
1 Í-su-la̍h lâng, Í-thàm, kà-sī ê si.1) Góa beh chhiùⁿ-koa o-ló Iâ-hô-hoa ê chû-ài kàu tī éng-oán. Beh ēng góa ê chhùi thoân Lí ê sìn-si̍t kàu tāi-tāi. 2 In-ūi góa bat kóng, Chû-ài beh siū kiàn-li̍p kàu éng-oán; Lí beh chiong Lí ê sìn-si̍t kian-kò͘ tī thiⁿ--nih. 3 Góa kap Góa só͘ kéng ê lâng li̍p-iok, Tùi Góa ê lô͘-po̍k Tāi-pi̍t chiù-chōa. 4 Góa beh hō͘ lí ê hō͘-è kian-kò͘ kàu éng-oán, Koh hō͘ lí ê pó-chō kiàn-li̍p kàu tāi-tāi. [Sè-la̍h 5 Iâ-hô-hoa ah, chiah ê thiⁿ beh o-ló Lí ê kî-sū; Tī sèng--ê ê hōe-tiong, beh o-ló Lí ê sìn-si̍t. 6 Tī khong-tiong chī-chūi ōe pí-tit Iâ-hô-hoa? Tōa koân-lêng--ê ê chèng-kiáⁿ-tiong, chī-chūi ōe chhin-chhiūⁿ Iâ-hô-hoa? 7 I tī sèng--ê ê gī-hōe tiong, sī tōa-tōa ū ui-giâm ê Siōng-tè; Pí it-chhè tī I sì-ûi ê, koh-khah thang kiaⁿ-ùi. 8 Bān-kun ê Siōng-tè Iâ-hô-hoa ah, Toh-lo̍h chi̍t-ê tōa koân-lêng--ê, chhin-chhiūⁿ Lí Iâ-hô-hoa? Lí ê sìn-si̍t tī Lí ê sì-ûi. 9 Hái-chúi tiòng-koâiⁿ, Lí koán-hat--i; Hái-éng giâ--khí-lâi, Lí hō͘ i pîⁿ. 10 Lí phah chhùi La̍h-hap-pek, chhin-chhiūⁿ í-keng thâi-sí ê lâng; Lí ēng ū khùi-la̍t ê chhiú phah-sòaⁿ Lí ê tùi-te̍k. 11 Thiⁿ sio̍k Lí, tōe ia̍h sio̍k Lí; Sè-kài kap kî-tiong só͘ chhiong-móa--ê, lóng sī Lí só͘ kiàn-li̍p. 12 Lâm-pak sī Lí só͘ chhòng-chō; Tha-po̍k kap Hek-bûn, in-ūi Lí ê miâ lâi hoaⁿ-hí. 13 Lí ū tōa koân-lêng ê chhiú, Lí ê chhiú ū la̍t, Lí ê chiàⁿ-chhiú kia̍h koâiⁿ-koâiⁿ. 14 Kong-pêng kap gī-lí sī Lí ê pó-chō ê tōe-ki; Chû-ài kap sêng-si̍t kiâⁿ tī Lí ê bīn-chêng. 15 Ōe bat hoaⁿ-hí ê siaⁿ--ê, hit ê peh-sìⁿ ū hok-khì; Iâ-hô-hoa ah, in tī Lí ê bīn só͘ hoat-chhut ê kng teh kiâⁿ. 16 In ji̍t-ji̍t in-ūi Lí ê miâ lâi hoaⁿ-hí; In-ūi Lí ê kong-gī tit-tio̍h seng-koâiⁿ. 17 In-ūi Lí sī in khùi-la̍t ê êng-kng; Koh in-ūi Lí hoaⁿ-hí goán, goán ê kak beh tit-tio̍h kia̍h-koâiⁿ. 18 Goán ê tîn-pâi sio̍k tī Iâ-hô-hoa; Goán ê ông sio̍k tī Í-sek-lia̍t ê Sèng--ê. 19 Tng-sî Lí tī īⁿ-siōng-tiong hoan-hù Lí sèng ê peh-sìⁿ, kóng, Góa ēng pang-chān ê la̍t, hē tī hit ê ū koân-lêng--ê ê sin-chiūⁿ; Tùi peh-sìⁿ-tiong kéng--ê, Góa ko-seng--i. 20 Góa chhē-tio̍h Góa ê lô͘-po̍k Tāi-pi̍t; Ēng Góa ê sèng-iû boah--i. 21 Góa ê chhiú beh siông-siông kap i tī-teh, Góa ê chhiú-kut ia̍h beh kian-kò͘--i. 22 Tùi-te̍k bōe-ōe le̍k-sek i; Hiong-ok ê lâng bōe-ōe khó͘-chhó͘--i. 23 Góa beh tī i ê bīn-chêng phah-chhùi i ê tùi-te̍k; Kong-kek hit ê oàn-hūn i ê lâng. 24 Chóng-sī Góa ê sìn-si̍t, kap Góa ê chû-ài, beh kap i tī-teh; In-ūi Góa ê miâ, i ê kak beh tit-tio̍h kia̍h-koâiⁿ. 25 Góa beh hō͘ i ê chhiú chhun kàu hái; Chiàⁿ-chhiú chhun kàu chiah ê hô. 26 I beh chheng-ho͘ Góa kóng, Lí sī góa ê pē, Sī góa ê Siōng-tè, sī kiù góa ê chio̍h-pôaⁿ. 27 Góa ia̍h beh siat-li̍p i chòe tōa-kiáⁿ, Chòe sè-chiūⁿ tē-it koâiⁿ ê kun-ông. 28 Góa beh ūi-tio̍h i pó-chûn Góa ê chû-ài kàu éng-oán; Góa kap i só͘ li̍p ê iok, tek-khak bô piàn-ōaⁿ. 29 Góa ia̍h beh pó-chûn i ê hō͘-è kàu tāi-tāi; Hō͘ i ê pó-chō chhin-chhiūⁿ thiⁿ ê kú. 30 Siat-sú i ê kiáⁿ-sun pàng-sak Góa ê lu̍t-hoat; Bô kiâⁿ Góa ê hoat-tō͘; 31 Pōe-biū Góa ê lu̍t-lē, Bô siú Góa ê kài-bēng; 32 Góa chiū beh ēng koáiⁿ-á chek-hoa̍t in ê kè-sit; Ēng piⁿ chek-hoa̍t in ê chōe-ok. 33 Chóng-sī Góa tek-khak bô chiong góa ê chû-ài it-chīn tùi i siu-hôe; Ia̍h tek-khak bô hō͘ Góa ê sìn-si̍t hòe-bô. 34 Góa tek-khak bô sit Góa ê iok, Ia̍h bô kóe-ōaⁿ Góa ê chhùi só͘ kóng--ê. 35 Góa chi̍t-pái kí ka-kī ê sèng-kiat lâi chiù-chōa, Góa koat-toàn bô tùi Tāi-pi̍t kóng pe̍h-chha̍t; 36 I ê hō͘-è beh thoân kàu éng-oán; I ê pó-chō tī Góa ê bīn-chêng, chhin-chhiūⁿ ji̍t ê kú-tn̂g; 37 Ia̍h chhin-chhiūⁿ ge̍h ê éng-oán kiàn-li̍p; Koh chhin-chhiūⁿ thiⁿ-téng khak-si̍t ê kan-chèng. [Sè-la̍h 38 Chóng-sī Lí ū siū-khì Lí ê siū-boah-iû--ê, Iàm-chiān khì-sak i. 39 Lí í-keng iàm-ò͘ⁿ kap Lí ê lô͘-po̍k só͘ li̍p ê iok, Chiong i ê bián-liû chau-that tī tōe--nih. 40 Lí í-keng thiah i it-chhè ê lî-pa; Hō͘ i ê ōe-só͘ pìⁿ chòe pha-hng ê só͘-chāi. 41 Kè-lō͘ lâng lóng chhiúⁿ-the̍h i; I chiâⁿ-chòe keh-piah kok só͘ lêng-jio̍k--ê. 42 Lí hō͘ i ê tùi-te̍k ê chiàⁿ-chhiú kia̍h-koâiⁿ; Hō͘ i ê kiû-siû lóng hoaⁿ-hí. 43 Lí hō͘ i ê to-kiàm tó-mî, Hō͘ i tī kau-chiàn ê sî khiā-bōe-tiâu. 44 Lí hō͘ i ê êng-hián bô--khì, Chiong i ê pó-chō chhia-tó tī tōe--nih. 45 Lí kiám-chió i chheng-liân ê ji̍t-chí; Koh hō͘ i móa-móa kiàn-siàu. [Sè-la̍h 46 Iâ-hô-hoa ah, Lí beh jōa-kú ka-kī khǹg-ba̍t, kàu éng-oán mah? Lí ê siū-khì chhin-chhiūⁿ hé to̍h, beh jōa-kú ah? 47 Kiû Lí kì-tit góa ê sî-kan, cháiⁿ-iūⁿ hiah té-chió; Lí chhòng-chō it-chhè ê sè-kan lâng, hō͘ in kàu hiah khang-hu ah! 48 Sím-mi̍h lâng ōe tn̂g-tn̂g oa̍h, bô kìⁿ-tio̍h sí, Ōe kiù i ê lêng-hûn thoat-lī im-kan ê koân-pèng ah? [Sè-la̍h 49 Chú ah, Lí chêng pîn Lí ê sìn-si̍t, tùi Tāi-pi̍t chiù-chōa--ê, Hiah ê chû-ài taⁿ tī toh-lo̍h? 50 Chú ah, kiû Lí kì-liām Lí ê lô͘-po̍k só͘ siū ê lêng-jio̍k, Kì-liām góa cháiⁿ-iūⁿ chiong it-chhè kiông-sēng ê peh-sìⁿ ê lêng-jio̍k chûn tī góa ê sim-lāi; 51 Iâ-hô-hoa ah, Lí ê tùi-te̍k ēng chit ê lêng-jio̍k, Chiū-sī lêng-jio̍k Lí siū boah-iû--ê ê chong-chek. 52 Tio̍h o-ló Iâ-hô-hoa kàu éng-oán. A-bēng, koh A-bēng.
1 上帝ê人摩西ê祈禱。1) 主ah，你ta̍k世代做阮khiā起ê所在。
2 Chiah ê山iáu未生出，
地kap世界你iáu未造成，
Tùi永遠到永遠你是上帝。
3 你hō͘人歸土，講，
Lín世間人，tio̍h oa̍t倒tńg。
4 因為在你看，一千年親像已經過去ê昨日；
Koh親像暝間ê一更。
5 你親像用大水kā in流去；in親像睏一醒；
早起時in親像發生ê草。
6 早起時發生茂盛；
Ê-hng時受割就枯焦。
7 因為阮tùi你ê受氣就消滅，
Koh阮tùi你ê發性來驚惶。
8 你將阮ê罪惡排tī你ê面前，
將阮隱密ê pháiⁿ排tī你ê面ê光明中。
9 阮ê日子lóng經過tī你ê大受氣；
阮ê年歲過了，親像吐一个氣。
10 阮一生ê年日是七十歲，
若是勇壯thang到八十歲，
總是其中所誇口ê，不過是勞苦憂愁；
伊緊緊過，阮就飛去。
11 Chī-chūi知你受氣ê權勢，
亦照你應該受ê敬畏，知你ê受氣ah？
12 求你教示阮，怎樣算家己ê日子；
Hō͘阮得tio̍h智慧ê心。
13 耶和華ah，beh到tī時nih？求你倒tńg；
為tio̍h你ê奴僕來回心。
14 求你早起時用你ê慈愛hō͘阮滿足；
Hō͘阮一世人歡喜快樂。
15 求你照你苦楚阮ê日，
照阮tú-tio̍h患難ê年，hō͘阮歡喜。
16 願你ê所做對你ê奴僕顯現，
你ê榮光對in ê kiáⁿ孫顯明。
17 願主阮ê上帝ê美妙tiàm tī阮ê頂面；
願你堅固阮ê手所做ê工，
阮ê手所做ê工，願你堅固伊。
1 Siōng-tè ê lâng Mô͘-se ê kî-tó.1) Chú ah, Lí ta̍k sè-tāi chòe goán khiā-khí ê só͘-chāi. 2 Chiah ê soaⁿ iáu-bē siⁿ-chhut, Tōe kap sè-kài Lí iáu-bē chō-chiâⁿ, Tùi éng-oán kàu éng-oán Lí sī Siōng-tè. 3 Lí hō͘ lâng kui thó͘, Kóng, Lín sè-kan lâng, tio̍h oa̍t-tò-tńg. 4 In-ūi chāi Lí khòaⁿ, chi̍t-chheng nî chhin-chhiūⁿ í-keng kè--khì ê chā-ji̍t; Koh chhin-chhiūⁿ mî-kan ê chi̍t-kiⁿ. 5 Lí chhin-chhiūⁿ ēng tōa-chúi kā in lâu--khì; in chhin-chhiūⁿ khùn chi̍t-chhíⁿ; Chá-khí-sî in chhin-chhiūⁿ hoat-siⁿ ê chháu. 6 Chá-khí-sî hoat-siⁿ bō͘-sēng; Ê-hng-sî siū-koah chiū ko͘-tâ. 7 In-ūi goán tùi Lí ê siū-khì chiū siau-bia̍t, Koh goán tùi Lí ê hoat-sèng lâi kiaⁿ-hiâⁿ. 8 Lí chiong goán ê chōe-ok pâi tī Lí ê bīn-chêng, Chiong goán ún-ba̍t ê pháiⁿ pâi tī Lí ê bīn ê kng-bêng-tiong. 9 Goán ê ji̍t-chí lóng keng-kè tī Lí ê tōa siū-khì; Goán ê nî-hè kè-liáu, chhin-chhiūⁿ thó͘ chi̍t ê khùi. 10 Goán it-seng ê nî-ji̍t sī chhit-cha̍p hè, Nā sī ióng-chòng thang kàu poeh-cha̍p hè, Chóng-sī kî-tiong só͘ khoa-kháu--ê, put-kò sī lô-khó͘ iu-chhiû; I kín-kín kè, goán chiū pe--khì. 11 Chī-chūi chai Lí siū-khì ê koân-sè, Ia̍h chiàu Lí eng-kai siū ê kèng-ùi, chai Lí ê siū-khì ah? 12 Kiû Lí kà-sī goán, cháiⁿ-iūⁿ sǹg ka-kī ê ji̍t-chí; Hō͘ goán tit-tio̍h tì-hūi ê sim. 13 Iâ-hô-hoa ah, beh kàu tī-sî nih? kiû Lí tò-tńg; Ūi-tio̍h Lí ê lô͘-po̍k lâi hôe-sim. 14 Kiû Lí chá-khí-sî ēng Lí ê chû-ài hō͘ goán móa-chiok; Hō͘ goán chi̍t-sì-lâng hoaⁿ-hí khoài-lo̍k. 15 Kiû Lí chiàu Lí khó͘-chhó͘ goán ê ji̍t, Chiàu goán tú-tio̍h hoān-lān ê nî, hō͘ goán hoaⁿ-hí. 16 Goān Lí ê só͘-chòe tùi Lí ê lô͘-po̍k hián-hiān, Lí ê êng-kng tùi in ê kiáⁿ-sun hián-bêng. 17 Goān Chú goán ê Siōng-tè ê bí-biāu tiàm tī goán ê téng-bīn; Goān Lí kian-kò͘ goán ê chhiú só͘ chòe ê kang, Goán ê chhiú só͘ chòe ê kang, goān Lí kian-kò͘ i.
1 Tiàm tī至koân ê隱密ê所在ê，
Hit-ê人beh khiā起tī全能ê ê蔭影。
2 論到耶和華，我beh講，伊是我逃閃ê所在，
是我ê山寨；是我ê上帝，我所óa靠ê。
3 因為伊beh救你脫離tng鳥á ê羅網，
Kap 毒害 ê瘟疫。
4 伊beh用伊ê翼股âⁿ你，
你beh bih tī伊ê翼下，
伊ê誠實是大細ê藤牌。
5 你m̄免驚暝間ê驚惶，
Á是日時teh飛ê箭。
6 亦免驚烏暗中流行ê瘟疫，
Á是日中晝滅無人ê毒症。
7 有千人lek落去tī你ê身邊，
有萬人lek落去tī你ê chiàⁿ-pêng，
這亦bōe óa近你。
8 不過你會親目看見，
亦看見pháiⁿ人受報應。
9 因為耶和華你是我逃閃ê所在；
你bat用至koân ê做你khiā起ê所在；
10 就災害bōe到tī你，
瘟疫亦bōe óa近你ê布棚。
11 因為伊beh為tio̍h你吩咐伊ê使者，
Tī你一切ê路保護你。
12 In beh用手扶你，
免得你ê腳tak-tio̍h石。
13 你beh踏獅kap毒蛇，
Lap獅á-thûn kap大尾蛇。
14 因為伊真疼我，我就beh救伊；
因為伊bat我ê名，我就beh安置伊tī高ê所在。
15 伊求叫我，我就beh ìn伊；
伊tī危急ê時，我beh kap伊tī-teh；
我beh救伊，hō͘伊尊貴。
16 我beh用長歲壽hō͘伊滿足，
Hō͘伊看見我ê救恩。
1 Tiàm tī Chì-koâiⁿ--ê ún-ba̍t ê só͘-chāi--ê, Hit ê lâng beh khiā-khí tī Choân-lêng--ê ê ìm-ńg. 2 Lūn-kàu Iâ-hô-hoa, góa beh kóng, I sī góa tô-siám ê só͘-chāi, sī góa ê soaⁿ-chē; Sī góa ê Siōng-tè, góa só͘ óa-khò--ê. 3 In-ūi I beh kiù lí thoat-lī tng chiáu-á ê lô-bāng, Kap to̍k-hāi ê un-e̍k. 4 I beh ēng I ê si̍t-kó͘ âⁿ lí, Lí beh bih tī I ê si̍t-ē, I ê sêng-si̍t sī tōa-sòe ê tîn-pâi. 5 Lí m̄-bián kiaⁿ mî-kan ê kiaⁿ-hiâⁿ, Á-sī ji̍t--sî teh pe ê chìⁿ. 6 Ia̍h bián kiaⁿ o͘-àm-tiong liû-hêng ê un-e̍k, Á-sī ji̍t tiong-tàu bia̍t-bô lâng ê to̍k-chèng. 7 Ū chheng lâng lek--lo̍h-khì tī lí ê sin-piⁿ, Ū bān lâng lek--lo̍h-khì tī lí ê chiàⁿ-pêng, Che ia̍h bōe óa-kūn lí. 8 Put-kò lí ōe chhin-ba̍k khòaⁿ-kìⁿ, Ia̍h khòaⁿ-kìⁿ pháiⁿ-lâng siū pò-èng. 9 In-ūi Iâ-hô-hoa Lí sī góa tô-siám ê só͘-chāi; Lí bat ēng Chì-koâiⁿ--ê chòe lí khiā-khí ê só͘-chāi; 10 Chiū chai-hāi bōe kàu tī lí, Un-e̍k ia̍h bōe óa-kūn lí ê pò͘-pîⁿ. 11 In-ūi I beh ūi-tio̍h lí hoan-hù I ê sù-chiá, Tī lí it-chhè ê lō͘ pó-hō͘ lí. 12 In beh ēng chhiú hû lí, Bián-tit lí ê kha tak-tio̍h chio̍h. 13 Lí beh ta̍h sai kap to̍k-chôa, Lap sai-á-thûn kap tōa-bé chôa. 14 In-ūi i chin thiàⁿ Góa, Góa chiū beh kiù i; In-ūi i bat Góa ê miâ, Góa chiū beh an-tì i tī koâiⁿ ê só͘-chāi. 15 I kiû-kiò Góa, Góa chiū beh ìn--i; I tī gûi-kip ê sî, Góa beh kap i tī-teh; Góa beh kiù i, hō͘ i chun-kùi. 16 Góa beh ēng tn̂g hè-siū hō͘ i móa-chiok, Hō͘ i khòaⁿ-kìⁿ Góa ê kiù-un.
1 安歇日ê詩歌。1) 真好ah，感謝耶和華，
唱歌o-ló你至koân ê ê名；
2 早起時報揚你ê慈愛；
Ê-hng時報揚你ê信實。
3 用十條絃ê樂器kap瑟；
用琴彈莊嚴ê聲音。
4 因為耶和華你用你ê所行hō͘我歡喜；
我beh因為你ê手所做ê來快樂。
5 耶和華，你ê所做怎樣hiah大；
你ê心思極其深。
6 無知ê人bōe曉得，愚蠢ê人亦bōe明白chitê。
7 Pháiⁿ人發生親像草，
一切做pháiⁿ ê人茂盛ê時，
正是in beh滅無到永遠；
8 總是耶和華你是至koân，直到永遠。
9 耶和華ah，你看，你ê對敵，
你看，你ê對敵的確滅無；
一切做pháiⁿ ê人亦beh四散。
10 總是你hō͘我ê角kia̍h高，親像野牛ê角；
我是受新ê油抹ê。
11 我親目看見我ê對敵tú-tio̍h報應；
我親耳聽見hiahê起來攻擊我ê pháiⁿ人受刑罰。
12 義人beh興旺親像棗樹；
Beh長大親像黎巴嫩ê柏香樹。
13 見若栽tī耶和華ê厝ê，
Beh興旺tī咱ê上帝ê院內。
14 In年老ê時猶原beh結果子；
In ê汁滿滿，色青翠；
15 Thang顯明耶和華是正直ê，
伊是我ê石磐，伊lóng無不義。
1 An-hioh-ji̍t ê si-koa.1) Chin-hó ah, kám-siā Iâ-hô-hoa, Chhiùⁿ-koa o-ló Lí Chì-koâiⁿ--ê ê miâ; 2 Chá-khí-sî pò-iông Lí ê chû-ài; Ê-hng-sî pò-iông Lí ê sìn-si̍t. 3 Ēng cha̍p-tiâu-hiân ê ga̍k-khì kap sek; Ēng khîm tôaⁿ chong-giâm ê siaⁿ-im. 4 In-ūi Iâ-hô-hoa Lí ēng Lí ê só͘-kiâⁿ hō͘ góa hoaⁿ-hí; Góa beh in-ūi Lí ê chhiú só͘ chòe--ê lâi khoài-lo̍k. 5 Iâ-hô-hoa, Lí ê só͘-chòe cháiⁿ-iūⁿ hiah-tōa; Lí ê sim-su ke̍k-kî chhim. 6 Bû-ti ê lâng bōe hiáu-tit, Gû-chhún ê lâng ia̍h bōe bêng-pe̍k chit-ê. 7 Pháiⁿ-lâng hoat-siⁿ chhin-chhiūⁿ chháu, It-chhè chòe-pháiⁿ ê lâng bō͘-sēng ê sî, Chiàⁿ-sī in beh bia̍t-bô kàu éng-oán; 8 Chóng-sī Iâ-hô-hoa Lí sī chì-koâiⁿ, ti̍t-kàu éng-oán. 9 Iâ-hô-hoa ah, Lí khòaⁿ, Lí ê tùi-te̍k, Lí khòaⁿ, Lí ê tùi-te̍k tek-khak bia̍t-bô; It-chhè chòe-pháiⁿ ê lâng ia̍h beh sì-sòaⁿ. 10 Chóng-sī Lí hō͘ góa ê kak kia̍h-koâiⁿ, chhin-chhiūⁿ iá-gû ê kak; Góa sī siū sin ê iû boah--ê. 11 Góa chhin-ba̍k khòaⁿ-kìⁿ góa ê tùi-te̍k tú-tio̍h pò-èng; Góa chhin-hī thiaⁿ-kìⁿ hiah ê khí-lâi kong-kek góa ê pháiⁿ-lâng siū hêng-hoa̍t. 12 Gī-lâng beh heng-ōng chhin-chhiūⁿ chó-chhiū; Beh tióng-tōa chhin-chhiūⁿ Lī-pa-lùn ê pek-hiuⁿ-chhiū. 13 Kìⁿ-nā chai tī Iâ-hô-hoa ê chhù--ê, Beh heng-ōng tī lán ê Siōng-tè ê īⁿ-lāi. 14 In nî-lāu ê sî iû-goân beh kiat ké-chí; In ê chiap móa-móa, sek chhiⁿ-chhùi; 15 Thang hián-bêng Iâ-hô-hoa sī chèng-ti̍t--ê, I sī góa ê chio̍h-pôaⁿ, I lóng bô put-gī.
1 耶和華做王，伊用威嚴家己穿；
耶和華用氣力家己穿，家己hâ；
世界就堅固bōe搖動。
2 你ê寶座tùi古早建立，
你tùi永遠就有。
3 耶和華ah，大水已經發起，大水已經發起伊ê聲；
大水發起伊ê湧。
4 耶和華tī高位有大能力，
贏過chiahê水ê聲，
以及海裡ê大湧。
5 耶和華ah，你ê干證不止確實；
聖潔合tī你ê厝，到永遠。
1 Iâ-hô-hoa chòe ông, I ēng ui-giâm ka-kī chhēng; Iâ-hô-hoa ēng khùi-la̍t ka-kī chhēng, ka-kī hâ; Sè-kài chiū kian-kò͘ bōe iô-tāng. 2 Lí ê pó-chō tùi kó͘-chá kiàn-li̍p, Lí tùi éng-oán chiū ū. 3 Iâ-hô-hoa ah, tōa-chúi í-keng hoat-khí, Tōa-chúi í-keng hoat-khí i ê siaⁿ; Tōa-chúi hoat-khí i ê éng. 4 Iâ-hô-hoa tī koâiⁿ-ūi ū tōa lêng-le̍k, Iâⁿ-kè chiah ê chúi ê siaⁿ, Í-ki̍p hái--nih ê tōa-éng. 5 Iâ-hô-hoa ah, Lí ê kan-chèng put-chí khak-si̍t; Sèng-kiat ha̍p tī Lí ê chhù, kàu éng-oán.
1 耶和華伸冤ê上帝ah，
伸冤ê上帝ah，求你顯出光。
2 審判世界ê主ah，求你起來；
Hō͘驕傲ê人受應該受ê報應。
3 耶和華ah，pháiⁿ人beh jōa久ah？
Pháiⁿ人得勝大悅，beh jōa久ah？
4 In隨便講，講出驕傲ê話；
一切行pháiⁿ ê人lóng家己phín-phóng。
5 耶和華ah，in壓制你ê百姓；
苦楚你ê產業。
6 In 刣死守寡人kap出外人；
Koh害死孤兒。
7 In講，耶和華的確無teh看；
雅各ê上帝的確無致意。
8 Lín百姓中cheng-siⁿ hit款ê人tio̍h想；
愚戇ê人到tī時chiah有智慧ah？
9 安置耳孔ê，總無伊無聽見？
創造目睭ê，總無伊bōe看見mah？
10 教督列邦ê，就是hō͘人得tio̍h知識ê，
總無伊bōe曉辨理人mah？
11 耶和華知人ê心思，
知in是空空。
12 耶和華ah，你所教督koh用你ê律法所教示ê，
Hit-ê人有福氣。
13 Beh hō͘伊tī患難ê日，得tio̍h平安，
到tī為tio̍h pháiⁿ人開陷坑ê時。
14 因為耶和華的確無棄sak伊ê百姓；
亦無放離伊ê產業。
15 因為審判beh照公義，
心正直ê人beh lóng tè伊。
16 Chī-chūi beh為我起來攻擊pháiⁿ人？
Chī-chūi beh為我khiā起來攻擊行罪惡ê人？
17 若m̄是耶和華幫贊我，
就我ê神魂快快tiàm tī冷靜ê中間。
18 我講，我ê腳tio̍h-tak；
耶和華ah，hit時你ê慈愛扶持我。
19 我ê心chōe-chōe憂悶掛慮，
你ê安慰就hō͘我ê心神快樂。
20 奸惡ê座位，假藉律例，計謀殘害，
Kiám會kap你交通mah？
21 In大家聚集，攻擊義人ê性命；
將無罪ê人定死罪。
22 總是耶和華平時做我ê高台；
我ê上帝做我逃閃ê石磐。
23 伊hō͘ in ê罪惡歸tī in ê身上；
In tī行pháiⁿ ê時，伊beh剿滅in；
耶和華咱ê上帝beh剿滅in。
1 Iâ-hô-hoa sin-oan ê Siōng-tè ah, Sin-oan ê Siōng-tè ah, kiû Lí hián-chhut kng. 2 Sím-phòaⁿ sè-kài ê Chú ah, kiû Lí khí--lâi; Hō͘ kiau-ngō͘ ê lâng siū eng-kai siū ê pò-èng. 3 Iâ-hô-hoa ah, Pháiⁿ-lâng beh jōa-kú ah? Pháiⁿ-lâng tek-sèng tāi-ia̍t, beh jōa-kú ah? 4 In sûi-piān kóng, kóng-chhut kiau-ngō͘ ê ōe; It-chhè kiâⁿ-pháiⁿ ê lâng lóng ka-kī phín-phóng. 5 Iâ-hô-hoa ah, in ap-chè Lí ê peh-sìⁿ; Khó͘-chhó͘ Lí ê sán-gia̍p. 6 In thâi-sí chiú-kóaⁿ-lâng kap chhut-gōa lâng; Koh hāi-sí ko͘-jî. 7 In kóng, Iâ-hô-hoa tek-khak bô teh khòaⁿ; Ngá-kok ê Siōng-tè tek-khak bô tì-ì. 8 Lín peh-sìⁿ-tiong cheng-siⁿ hit-khoán ê lâng tio̍h siūⁿ; Gû-gōng ê lâng kàu tī-sî chiah ū tì-hūi ah? 9 An-tì hī-khang--ê, chóng bô I bô thiaⁿ-kìⁿ? Chhòng-chō ba̍k-chiu--ê, chóng bô I bōe khòaⁿ-kìⁿ mah? 10 Kàu-tok lia̍t-pang ê, chiū-sī hō͘ lâng tit-tio̍h tì-sek--ê, Chóng bô I bōe hiáu pān-lí lâng mah? 11 Iâ-hô-hoa chai lâng ê sim-su, Chai in sī khang-khang. 12 Iâ-hô-hoa ah, Lí só͘ kàu-tok koh ēng Lí ê lu̍t-hoat só͘ kà-sī--ê, Hit ê lâng ū hok-khì. 13 Beh hō͘ i tī hoān-lān ê ji̍t, tit-tio̍h pêng-an, Kàu tī ūi-tio̍h pháiⁿ-lâng khui hām-khiⁿ ê sî. 14 In-ūi Iâ-hô-hoa tek-khak bô khì-sak I ê peh-sìⁿ; Ia̍h bô pàng-lī I ê sán-gia̍p. 15 In-ūi sím-phòaⁿ beh chiàu kong-gī, Sim chèng-ti̍t ê lâng beh lóng tè I. 16 Chī-chūi beh ūi góa khí--lâi kong-kek pháiⁿ-lâng? Chī-chūi beh ūi góa khiā--khí-lâi kong-kek kiâⁿ chōe-ok ê lâng? 17 Nā m̄-sī Iâ-hô-hoa pang-chān góa, Chiū góa ê sîn-hûn khoài-khoài tiàm tī léng-chēng ê tiong-kan. 18 Góa kóng, Góa ê kha tio̍h-tak; Iâ-hô-hoa ah, hit-sî Lí ê chû-ài hû-chhî góa. 19 Góa ê sim chōe-chōe iu-būn khòa-lū, Lí ê an-ùi chiū hō͘ góa ê sim-sîn khoài-lo̍k. 20 Kan-ok ê chō-ūi, ká-chià lu̍t-lē, kè-bô͘ chân-hāi, Kiám ōe kap Lí kau-thong mah? 21 In tāi-ke chū-chi̍p, kong-kek gī-lâng ê sìⁿ-miā; Chiong bô-chōe ê lâng tēng sí-chōe. 22 Chóng-sī Iâ-hô-hoa pêng-sî chòe góa ê koâiⁿ-tâi; Góa ê Siōng-tè chòe góa tô-siám ê chio̍h-pôaⁿ. 23 I hō͘ in ê chōe-ok kui tī in ê sin-chiūⁿ; In tī kiâⁿ-pháiⁿ ê sî, I beh châu-bia̍t in; Iâ-hô-hoa lán ê Siōng-tè beh châu-bia̍t in.
1 來ah，咱tio̍h ǹg耶和華唱歌；
Ǹg救咱ê石磐出歡喜ê聲。
2 咱tio̍h到伊ê面前感謝伊，
用詩歌ǹg伊出歡喜ê聲。
3 因為耶和華是大ê上帝，
是大ê王，贏過lóng總ê上帝；
4 地深ê所在tī伊ê手中；
山高ê山尖亦屬tī伊。
5 洋海屬tī伊，是伊創造ê；
乾地亦是伊ê手造成ê。
6 來ah，咱tio̍h鞠躬敬拜；
跪落tī創造咱ê耶和華ê面前；
7 因為伊是咱ê上帝，
咱是伊養飼ê百姓，是伊手下ê羊。
今á日，lín若聽伊ê聲，
8 就m̄-thang硬lín ê心，親像tī Bí-lī-pa，
親像當日tī曠野ê Má-sat；
9 Hit時lín ê祖公試我，
驗我，koh看見我ê所做。
10 四十年久，我厭恨hit世代ê人，
講，Chiahê是心迷亂ê百姓，
M̄-bat我ê路；
11 所以我tī受氣ê中間，chiù-chōa講，
In斷斷bōe得thang入我ê安歇。
1 Lâi ah, lán tio̍h ǹg Iâ-hô-hoa chhiùⁿ-koa; Ǹg kiù lán ê chio̍h-pôaⁿ chhut hoaⁿ-hí ê siaⁿ. 2 Lán tio̍h kàu I ê bīn-chêng kám-siā I, Ēng si-koa ǹg I chhut hoaⁿ-hí ê siaⁿ. 3 In-ūi Iâ-hô-hoa sī tōa ê Siōng-tè, Sī tōa ê ông, iâⁿ-kè lóng-chóng ê siōng-tè; 4 Tōe chhim ê só͘-chāi tī I ê chhiú-tiong; Soaⁿ koâiⁿ ê soaⁿ-chiam ia̍h sio̍k tī I. 5 Iûⁿ-hái sio̍k tī I, sī I chhòng-chō--ê; Ta-tōe ia̍h sī I ê chhiú chō-chiâⁿ-ê. 6 Lâi ah, lán tio̍h kiok-kiong kèng-pài; Kūi-lo̍h tī chhòng-chō lán ê Iâ-hô-hoa ê bīn-chêng; 7 In-ūi I sī lán ê Siōng-tè, Lán sī I iúⁿ-chhī ê peh-sìⁿ, sī I chhiú-ē ê iûⁿ. Kin-á-ji̍t, lín nā thiaⁿ I ê siaⁿ, 8 Chiū m̄-thang ngī lín ê sim, chhin-chhiūⁿ tī Bí-lī-pa, Chhin-chhiūⁿ tong-ji̍t tī khòng-iá ê Má-sat; 9 Hit-sî lín ê chó͘-kong chhì Góa, Giām Góa, koh khòaⁿ-kìⁿ Góa ê só͘-chòe. 10 Sì-cha̍p nî kú, Góa iàm-hūn hit sè-tāi ê lâng, Kóng, Chiah-ê sī sim bê-loān ê peh-sìⁿ, M̄-bat Góa ê lō͘; 11 Só͘-í Góa tī siū-khì ê tiong-kan, chiù-chōa kóng, In toàn-toàn bōe-tit-thang ji̍p Góa ê an-hioh.
1 Lín tio̍h ǹg耶和華唱新ê歌，
全地lóng tio̍h ǹg耶和華唱歌。
2 Tio̍h ǹg耶和華唱歌，祝謝伊ê名；
日日傳報伊ê救恩。
3 Tī列邦ê中間講起伊ê榮光；
Tī 萬百姓ê中間講起伊奇妙ê所做。
4 因為耶和華最大，應該受極大ê o-ló；
伊tī眾神明ê頂面應該受敬畏。
5 因為列邦ê上帝 lóng是虛假；
獨獨耶和華創造chiahê天。
6 Tī伊ê面前有尊貴kap威嚴；
Tī伊ê聖所有權能kap榮光。
7 百姓中ê ta̍k族ah，lín tio̍h將權能榮光，
歸hō͘耶和華；歸hō͘耶和華。
8 用伊ê名所應該得tio̍h ê榮光，
歸hō͘耶和華；帶禮物來入伊ê院。
9 Tio̍h用聖潔ê裝飾敬拜耶和華；
全地tī伊ê面前ngia̍uh-ngia̍uh-chhoah。
10 Tī列邦中tio̍h講，耶和華做王，
世界堅固，bōe搖動；
伊beh照公平審判萬百姓。
11 願天歡喜，地快樂；
願海kap其中所充滿ê lóng出大聲；
12 願田園kap其中所有ê lóng快樂；
Hit時樹林內ê樹木lóng beh tī耶和華ê面前出歡喜ê聲；
13 因為伊來lah，伊來beh審判全地；
伊beh照公義審判世界，
照伊ê信實審判萬百姓。
1 Lín tio̍h ǹg Iâ-hô-hoa chhiùⁿ sin ê koa, Choân-tōe lóng tio̍h ǹg Iâ-hô-hoa chhiùⁿ-koa. 2 Tio̍h ǹg Iâ-hô-hoa chhiùⁿ-koa, chiok-siā I ê miâ; Ji̍t-ji̍t thoân-pò I ê kiù-un. 3 Tī lia̍t-pang ê tiong-kan kóng-khí I ê êng-kng; Tī bān peh-sìⁿ ê tiong-kan kóng-khí I kî-biāu ê só͘-chòe. 4 In-ūi Iâ-hô-hoa chòe tōa, eng-kai siū ke̍k-tōa ê o-ló; I tī chèng sîn-bêng ê téng-bīn eng-kai siū kèng-ùi. 5 In-ūi lia̍t-pang ê siōng-tè lóng sī hu-ké; To̍k-to̍k Iâ-hô-hoa chhòng-chō chiah ê thiⁿ. 6 Tī I ê bīn-chêng ū chun-kùi kap ui-giâm; Tī I ê sèng-só͘ ū koân-lêng kap êng-kng. 7 Peh-sìⁿ-tiong ê ta̍k-cho̍k ah, lín tio̍h chiong koân-lêng êng-kng, Kui hō͘ Iâ-hô-hoa; kui hō͘ Iâ-hô-hoa. 8 Ēng I ê miâ só͘ eng-kai tit-tio̍h ê êng-kng, kui hō͘ Iâ-hô-hoa; Tòa lé-mi̍h lâi ji̍p I ê īⁿ. 9 Tio̍h ēng sèng-kiat ê chng-thāⁿ kèng-pài Iâ-hô-hoa; Choân-tōe tī I ê bīn-chêng ngia̍uh-ngia̍uh-chhoah. 10 Tī lia̍t-pang-tiong tio̍h kóng, Iâ-hô-hoa chòe ông, Sè-kài kian-kò͘, bōe iô-tāng; I beh chiàu kong-pêng sím-phòaⁿ bān peh-sìⁿ. 11 Goān thiⁿ hoaⁿ-hí, tōe khoài-lo̍k; Goān hái kap kî-tiong só͘ chhiong-móa--ê lóng chhut tōa-siaⁿ; 12 Goān chhân-hn̂g kap kî-tiong só͘-ū--ê lóng khoài-lo̍k; Hit-sî chhiū-nâ-lāi ê chhiū-ba̍k lóng beh tī Iâ-hô-hoa ê bīn-chêng chhut hoaⁿ-hí ê siaⁿ; 13 In-ūi I lâi lah, I lâi beh sím-phòaⁿ choân-tōe; I beh chiàu kong-gī sím-phòaⁿ sè-kài, Chiàu I ê sìn-si̍t sím-phòaⁿ bān peh-sìⁿ.
1 耶和華做王；地tio̍h快樂；
眾海嶼tio̍h歡喜。
2 密雲kap烏暗tī伊ê四圍；
義理kap公平是伊寶座ê地基。
3 火行tī伊ê面前，
燒伊四圍ê對敵。
4 伊ê sih-nà照光世界；
地看見，就振動。
5 Tī耶和華ê面前，就是全地ê主ê面前，
Chiahê山消熔親像蠟。
6 Chiahê天顯明伊ê義，
列邦看見伊ê榮光。
7 凡若服事(sài)雕刻ê偶像，
用虛假ê神自誇ê，lóng tio̍h受見笑；
Lín chiahê神ah，lóng tio̍h敬拜伊；
8 耶和華ah，因為你ê判斷，
錫安聽見就歡喜，
偤大ê城亦lóng快樂。
9 因為耶和華你是至koân pôaⁿ過全地；
你是chì-chun，pôaⁿ過眾神明。
10 疼耶和華ê人，lín lóng tio̍h怨恨pháiⁿ；
伊保護伊聖ê百姓ê性命；
伊拯救in脫離pháiⁿ人ê手。
11 光明是為tio̍h義人來備辦，
歡喜是為tio̍h心正直ê人來備辦。
12 義人ah，lín tio̍h因為耶和華來歡喜；
記念伊ê聖名來o-ló。
1 Iâ-hô-hoa chòe ông; tōe tio̍h khoài-lo̍k; Chèng hái-sū tio̍h hoaⁿ-hí. 2 Ba̍t-hûn kap o͘-àm tī I ê sì-ûi; Gī-lí kap kong-pêng sī I pó-chō ê tōe-ki. 3 Hé kiâⁿ tī I ê bīn-chêng, Sio I sì-ûi ê tùi-te̍k. 4 I ê sih-nà chiò-kng sè-kài; Tōe khòaⁿ-kìⁿ, chiū tín-tāng. 5 Tī Iâ-hô-hoa ê bīn-chêng, chiū-sī choân-tōe ê Chú ê bīn-chêng, Chiah ê soaⁿ siau-iûⁿ chhin-chhiūⁿ la̍h. 6 Chiah ê thiⁿ hián-bêng I ê gī, Lia̍t-pang khòaⁿ-kìⁿ I ê êng-kng. 7 Hoān-nā ho̍k-sāi tiau-khek ê ngó͘-siōng, Ēng hu-ké ê sîn chū-khoa--ê, lóng tio̍h siū kiàn-siàu; Lín chiah ê sîn ah, lóng tio̍h kèng-pài I; 8 Iâ-hô-hoa ah, in-ūi Lí ê phòaⁿ-toàn, Sek-an thiaⁿ-kìⁿ chiū hoaⁿ-hí, Iû-tāi ê siâⁿ ia̍h lóng khoài-lo̍k. 9 In-ūi Iâ-hô-hoa Lí sī chì-koâiⁿ pôaⁿ-kè choân-tōe; Lí sī chì-chun, pôaⁿ-kè chèng sîn-bêng. 10 Thiàⁿ Iâ-hô-hoa ê lâng, lín lóng tio̍h oàn-hūn pháiⁿ; I pó-hō͘ I sèng ê peh-sìⁿ ê sìⁿ-miā; I chín-kiù in thoat-lī pháiⁿ-lâng ê chhiú. 11 Kng-bêng sī ūi-tio̍h gī-lâng lâi pī-pān, Hoaⁿ-hí sī ūi-tio̍h sim chèng-ti̍t ê lâng lâi pī-pān. 12 Gī-lâng ah, lín tio̍h in-ūi Iâ-hô-hoa lâi hoaⁿ-hí; Kì-liām I ê sèng-miâ lâi o-ló.
1 一篇詩。1) Lín tio̍h ǹg耶和華唱新ê歌；
因為伊bat行奇妙ê事；
伊ê chiàⁿ手，kap伊聖ê手骨，已經為家己行拯救。
2 耶和華hō͘人知伊ê拯救；
Tī列邦人ê目睭前顯明伊ê公義。
3 伊記念伊tùi以色列家所發出ê慈愛kap信實；
地ê四角lóng看見咱ê上帝ê拯救。
4 全地lóng tio̍h ǹg耶和華出歡喜ê聲；
Tio̍h出大聲歡喜唱歌o-ló伊。
5 Tio̍h彈琴唱歌o-ló耶和華；
Tio̍h彈琴和詩歌ê聲o-ló伊。
6 用號頭kap哨角ê聲，
Tī君王耶和華ê面前出歡喜ê聲。
7 願海，kap其中所充滿ê，lóng tio̍h出大聲；
世界，kap tiàm tī hit中間ê，亦tio̍h出聲；
8 願大水phah手掌，
願chiahê山tī耶和華ê面前出歡喜ê聲。
9 因為伊來beh審判全地；
伊beh照公義審判世界，
照伊ê正直審判列邦。
1 Chi̍t phiⁿ si.1) Lín tio̍h ǹg Iâ-hô-hoa chhiùⁿ sin ê koa; In-ūi I bat kiâⁿ kî-biāu ê sū; I ê chiàⁿ-chhiú, kap I sèng ê chhiú-kut, í-keng ūi ka-kī kiâⁿ chín-kiù. 2 Iâ-hô-hoa hō͘ lâng chai I ê chín-kiù; Tī lia̍t-pang-lâng ê ba̍k-chiu-chêng hián-bêng I ê kong-gī. 3 I kì-liām I tùi Í-sek-lia̍t ke só͘ hoat-chhut ê chû-ài kap sìn-si̍t; Tōe ê sì-kak lóng khòaⁿ-kìⁿ lán ê Siōng-tè ê chín-kiù. 4 Choân-tōe lóng tio̍h ǹg Iâ-hô-hoa chhut hoaⁿ-hí ê siaⁿ; Tio̍h chhut tōa-siaⁿ hoaⁿ-hí chhiùⁿ-koa o-ló I. 5 Tio̍h tôaⁿ-khîm chhiùⁿ-koa o-ló Iâ-hô-hoa; Tio̍h tôaⁿ-khîm hô si-koa ê siaⁿ o-ló I. 6 Ēng hō-thâu kap sàu-kak ê siaⁿ, Tī Kun-ông Iâ-hô-hoa ê bīn-chêng chhut hoaⁿ-hí ê siaⁿ. 7 Goān hái, kap kî-tiong só͘ chhiong-móa--ê, lóng tio̍h chhut tōa-siaⁿ; Sè-kài, kap tiàm tī hit tiong-kan--ê, ia̍h tio̍h chhut-siaⁿ; 8 Goān tōa-chúi phah chhiú-chiúⁿ, Goān chiah ê soaⁿ tī Iâ-hô-hoa ê bīn-chêng chhut hoaⁿ-hí ê siaⁿ. 9 In-ūi I lâi beh sím-phòaⁿ choân-tōe; I beh chiàu kong-gī sím-phòaⁿ sè-kài, Chiàu I ê chèng-ti̍t sím-phòaⁿ lia̍t-pang.
1 耶和華做王，列邦tio̍h ngia̍uh-ngia̍uh-chhoah；
伊坐tī ki-lō͘-peng，地tio̍h搖動。
2 耶和華tī錫安做大；
伊pôaⁿ過tī 萬百姓ê頂面。
3 In tio̍h o-ló你大koh thang驚畏 ê名；
伊是至聖。
4 王有氣力，歡喜公平；
你hō͘正直堅固。
Tī雅各中行公平kap義理。
5 Lín tio̍h尊重耶和華咱ê上帝，
Tī伊腳踏椅ê頭前跪拜；
伊是至聖。
6 Tī伊ê祭司中，有摩西kap亞倫，
Tī求叫伊ê名ê人ê中間，有撒母耳；
In求叫耶和華，伊就聽in。
7 伊tī雲柱ê中間對in講話；
In遵守伊干證ê話，kap伊所賞賜in ê律法。
8 耶和華阮ê上帝ah，你有應in；
你雖然照in ê所行報應in，
Iáu-kú你是赦免in ê上帝。
9 Lín tio̍h尊重耶和華咱ê上帝，
Tī伊ê聖山跪拜；
因為咱ê上帝耶和華是至聖。
1 Iâ-hô-hoa chòe ông, lia̍t-pang tio̍h ngia̍uh-ngia̍uh-chhoah; I chē tī ki-lō͘-peng, tōe tio̍h iô-tāng. 2 Iâ-hô-hoa tī Sek-an chòe tōa; I pôaⁿ-kè tī bān peh-sìⁿ ê téng-bīn. 3 In tio̍h o-ló Lí tōa koh thang kiaⁿ-ùi ê miâ; I sī chì-sèng. 4 Ông ū khùi-la̍t, hoaⁿ-hí kong-pêng; Lí hō͘ chèng-ti̍t kian-kò͘. Tī Ngá-kok tiong kiâⁿ kong-pêng kap gī-lí. 5 Lín tio̍h chun-tiōng Iâ-hô-hoa lán ê Siōng-tè, Tī I kha-ta̍h-í ê thâu-chêng kūi-pài; I sī chì-sèng. 6 Tī I ê chè-si-tiong, ū Mô͘-se kap A-lûn, Tī kiû-kiò I ê miâ ê lâng ê tiong-kan, ū Sat-bó͘-jíⁿ; In kiû-kiò Iâ-hô-hoa, I chiū thiaⁿ in. 7 I tī hûn-thiāu ê tiong-kan tùi in kóng-ōe; In chun-siú I kan-chèng ê ōe, kap I só͘ siúⁿ-sù in ê lu̍t-hoat. 8 Iâ-hô-hoa goán ê Siōng-tè ah, Lí ū ìn--in; Lí sui-jiân chiàu in ê só͘-kiâⁿ pò-èng in, Iáu-kú Lí sī sià-bián in ê Siōng-tè. 9 Lín tio̍h chun-tiōng Iâ-hô-hoa lán ê Siōng-tè, Tī I ê sèng-soaⁿ kūi-pài; In-ūi lán ê Siōng-tè Iâ-hô-hoa sī chì-sèng.
1 感謝ê詩。1) 全地tio̍h ǹg耶和華出歡喜ê聲。
2 Lín tio̍h歡喜ê心服事耶和華，
唱歌來到伊ê面前。
3 Lín tio̍h知耶和華是上帝；
咱是伊創造ê，咱亦是伊ê；
咱是伊ê百姓，亦是伊草場ê羊。
4 Tio̍h用感謝入伊ê門，
用o-ló入伊ê院；
Tio̍h感謝伊，o-ló伊ê名。
5 因為耶和華是好；伊ê慈愛到永遠；
伊ê信實到萬世代。
1 Kám-siā ê si.1) Choân-tōe tio̍h ǹg Iâ-hô-hoa chhut hoaⁿ-hí ê siaⁿ. 2 Lín tio̍h hoaⁿ-hí ê sim ho̍k-sāi Iâ-hô-hoa, Chhiùⁿ-koa lâi kàu I ê bīn-chêng. 3 Lín tio̍h chai Iâ-hô-hoa sī Siōng-tè; Lán sī I chhòng-chō-ê, lán ia̍h sī I ê; Lán sī I ê peh-sìⁿ, ia̍h sī I chháu-tiûⁿ ê iûⁿ. 4 Tio̍h ēng kám-siā ji̍p I ê mn̂g, Ēng o-ló ji̍p I ê īⁿ; Tio̍h kám-siā I, o-ló I ê miâ. 5 In-ūi Iâ-hô-hoa sī hó; I ê chû-ài kàu éng-oán; I ê sìn-si̍t kàu bān sè-tāi.
1 大衛ê詩。1) 我beh唱慈愛kap公平ê歌；
耶和華ah，我beh ǹg你唱o-ló ê歌。
2 我beh用智慧行tī完全ê路；
你beh啥時到我chia？
我beh用完全ê心行tī我ê家內。
3 邪癖ê事，我lóng m̄排tī我ê目前；
背道 ê人所做ê事，我真怨恨；
M̄ hō͘伊liâm-tio̍h我。
4 彎曲ê心的確hō͘伊離開我；
一切ê pháiⁿ我m̄-bat伊。
5 暗中譭謗伊ê厝邊ê，我beh滅伊；
目睭kho͘大ê，心驕傲ê人，我無容允伊。
6 我ê目睭beh看國內誠實ê人，hō͘ in kap我相kap tòa；
行tī完全ê路ê，伊beh服事我。
7 行詭詐ê人bōe得thang帶我ê家內；
講白賊話ê人bōe得thang khiā-tiâu tī我ê目睭前。
8 Ta̍k早起我beh滅無國內ê pháiⁿ人；
Thang將一切做pháiⁿ ê人，tùi耶和華ê城除去。
1 Tāi-pi̍t ê si.1) Góa beh chhiùⁿ chû-ài kap kong-pêng ê koa; Iâ-hô-hoa ah, góa beh ǹg Lí chhiùⁿ o-ló ê koa. 2 Góa beh ēng tì-hūi kiâⁿ tī oân-choân ê lō͘; Lí beh siáⁿ-sî kàu góa chia? Góa beh ēng oân-choân ê sim kiâⁿ tī góa ê ke-lāi. 3 Siâ-phiah ê sū, góa lóng m̄ pâi tī góa ê ba̍k-chêng; Pōe-tō ê lâng só͘ chòe ê sū, góa chin oàn-hūn; M̄ hō͘ i liâm-tio̍h góa. 4 Oan-khiau ê sim tek-khak hō͘ i lī-khui góa; It-chhè ê pháiⁿ góa m̄-bat i. 5 Àm-tiong húi-pòng i ê chhù-piⁿ--ê, góa beh bia̍t i; Ba̍k-chiu-kho͘ tōa ê, sim kiau-ngō͘ ê lâng, góa bô iông-ún i. 6 Góa ê ba̍k-chiu beh khòaⁿ kok-lāi sêng-si̍t ê lâng, hō͘ in kap góa saⁿ-kap tòa; Kiâⁿ tī oân-choân ê lō͘--ê, i beh ho̍k-sāi góa. 7 Kiâⁿ khúi-chà ê lâng bōe-tit-thang tòa góa ê ke-lāi; Kóng pe̍h-chha̍t-ōe ê lâng bōe-tit-thang khiā-tiâu tī góa ê ba̍k-chiu-chêng. 8 Ta̍k chá-khí góa beh bia̍t-bô kok-lāi ê pháiⁿ-lâng; Thang chiong it-chhè chòe-pháiⁿ ê lâng, tùi Iâ-hô-hoa ê siâⁿ tû--khì.
1 困苦ê人，極軟弱ê時，tī耶和華ê面前吐出苦情ê祈禱。1) 耶和華ah，求你聽我ê祈禱，
Hō͘我求叫ê聲透到你ê面前。
2 我tī危急ê日，m̄-thang掩你ê面m̄看我；
求你àⁿ耳孔聽我；我求叫ê日，求你緊緊應我。
3 因為我ê日子親像火薰消散，
我ê骨受燒，親像火中ê柴。
4 我ê心受傷，枯焦親像草；
我lóng bōe顧得食。
5 因為我吐氣ê聲，
我ê肉khi̍h tī骨裡。
6 我親像曠野ê 鵜鶘鳥，
亦親像拋荒ê所在ê暗光鳥。
7 我kui暝無睏；
亦親像厝頂孤單ê雀鳥á。
8 我ê對敵thong日褻瀆我；
痛恨我ê人kí我來咒詛。
9 我用火灰準飯食；
所lim-ê有chham目屎。
10 這是因為你ê發性大受氣；
因為你將我舉起，koh將我hiat落。
11 我ê日子親像日影已經chhiâ，
我亦親像草枯焦。
12 獨獨你耶和華永遠tī-teh；
你hō͘人記念到萬代。
13 你beh起來憐憫錫安，
因為現在是可憐伊ê時；定tio̍h ê期已經到lah。
14 你ê奴僕歡喜錫安ê石頭，
可憐伊ê土粉。
15 列國就beh敬畏耶和華ê名；
世上chiahê王lóng beh敬畏你ê榮光。
16 因為耶和華起造錫安，
Tī伊榮光中顯現。
17 伊àⁿ落聽sòng-hiong人ê祈禱，
無看輕in ê祈禱。
18 這beh為後代ê人記載，
將來受造ê百姓beh o-ló耶和華。
19 因為伊對伊至koân ê聖所看落來，
耶和華tùi天看落地；
20 Beh聽囚犯ê吐氣；
Beh tháu放擬定tio̍h死ê人。
21 Hō͘人tī錫安傳播耶和華ê名；
Tī耶路撒冷傳播 o-ló伊ê話。
22 就是萬百姓kap列國，
聚集服事耶和華ê時。
23 伊hō͘我ê氣力半路衰lám；
Hō͘我ê日子短少。
24 我講，我ê上帝ah，m̄-thang tī我中年討我ê性命；
你ê年歲萬世代bû-窮盡。
25 你起頭hē地ê地基；
天亦是你ê手所造ê。
26 In beh滅無，獨獨你久長tī-teh；
In beh親像衫漸漸舊；
你beh將in改換，親像改換衫；in就變換。
27 獨獨你無變換，
你ê歲壽無窮盡。
28 你ê奴僕ê kiáⁿ孫beh長長tī-teh；
In ê後裔beh khiā在tī你ê面前。
1 Khùn-khó͘ ê lâng, ke̍k loán-jio̍k ê sî, tī Iâ-hô-hoa ê bīn-chêng thò͘-chhut khó͘-chêng ê kî-tó.1) Iâ-hô-hoa ah, kiû Lí thiaⁿ góa ê kî-tó, Hō͘ góa kiû-kiò ê siaⁿ thàu kàu Lí ê bīn-chêng. 2 Góa tī gûi-kip ê ji̍t, m̄-thang ng Lí ê bīn m̄-khòaⁿ góa; kiû Lí àⁿ hī-khang thiaⁿ góa; Góa kiû-kiò ê ji̍t, kiû Lí kín-kín ìn--góa. 3 In-ūi góa ê ji̍t-chí chhin-chhiūⁿ hé-hun siau-sòaⁿ, Góa ê kut siū sio, chhin-chhiūⁿ hé-tiong ê chhâ. 4 Góa ê sim siū-siong, ko͘-tâ chhin-chhiūⁿ chháu; Góa lóng bōe kò͘--tit chia̍h. 5 In-ūi góa thó͘-khùi ê siaⁿ, Góa ê bah khi̍h tī kut--nih. 6 Góa chhin-chhiūⁿ khòng-iá ê thê-ô͘-chiáu, Ia̍h chhin-chhiūⁿ pha-hng ê só͘-chāi ê àm-kong-chiáu. 7 Góa kui-mî bô khùn; Ia̍h chhin-chhiūⁿ chhù-téng ko͘-toaⁿ ê chhek-chiáu-á. 8 Góa ê tùi-te̍k thong-ji̍t siat-to̍k góa; Thòng-hūn góa ê lâng kí góa lâi chiù-chó͘. 9 Góa ēng hé-hu chún pn̄g chia̍h; Só͘ lim--ê ū chham ba̍k-sái. 10 Che sī in-ūi Lí ê hoat-sèng tōa siū-khì; In-ūi Lí chiong góa kú-khí, koh chiong góa hiat-lo̍h. 11 Góa ê ji̍t-chí chhin-chhiūⁿ ji̍t-iáⁿ í-keng chhiâ, Góa ia̍h chhin-chhiūⁿ chháu ko͘-tâ. 12 To̍k-to̍k Lí Iâ-hô-hoa éng-oán tī-teh; Lí hō͘ lâng kì-liām kàu bān-tāi. 13 Lí beh khí--lâi lîn-bín Sek-an, In-ūi hiān-chāi sī khó-lîn i ê sî; tiāⁿ-tio̍h ê kî í-keng kàu lah. 14 Lí ê lô͘-po̍k hoaⁿ-hí Sek-an ê chio̍h-thâu, Khó-lîn i ê thô͘-hún. 15 Lia̍t-kok chiū beh kèng-ùi Iâ-hô-hoa ê miâ; Sè-chiūⁿ chiah ê ông lóng beh kèng-ùi Lí ê êng-kng. 16 In-ūi Iâ-hô-hoa khí-chō Sek-an, Tī I êng-kng-tiong hián-hiān. 17 I àⁿ-lo̍h thiaⁿ sòng-hiong lâng ê kî-tó, Bô khòaⁿ-khin in ê kî-tó. 18 Che beh ūi āu-tāi ê lâng kì-chài, Chiong-lâi siū-chō ê peh-sìⁿ beh o-ló Iâ-hô-hoa. 19 In-ūi I tùi I chì-koâiⁿ ê sèng-só͘ khòaⁿ--lo̍h-lâi, Iâ-hô-hoa tùi thiⁿ khòaⁿ lo̍h tōe; 20 Beh thiaⁿ siû-hoān ê thó͘-khùi; Beh tháu-pàng gí tiāⁿ-tio̍h sí ê lâng. 21 Hō͘ lâng tī Sek-an thoân-pò͘ Iâ-hô-hoa ê miâ; Tī Iâ-lō͘-sat-léng thoân-pò͘ o-ló I ê ōe. 22 Chiū-sī bān peh-sìⁿ kap lia̍t-kok, Chū-chi̍p ho̍k-sāi Iâ-hô-hoa ê sî. 23 I hō͘ góa ê khùi-la̍t pòaⁿ-lō͘ soe-lám; Hō͘ góa ê ji̍t-chí té-chió. 24 Góa kóng, Góa ê Siōng-tè ah, m̄-thang tī góa tiong-liân thó góa ê sìⁿ-miā; Lí ê nî-hè bān sè-tāi bû-kiông-chīn. 25 Lí khí-thâu hē tōe ê tōe-ki; Thiⁿ ia̍h sī Lí ê chhiú só͘ chō--ê. 26 In beh bia̍t-bô, to̍k-to̍k Lí kú-tn̂g tī-teh; In beh chhin-chhiūⁿ saⁿ chiām-chiām kū; Lí beh chiong in kóe-ōaⁿ, chhin-chhiūⁿ kóe-ōaⁿ saⁿ; in chiū piàn-ōaⁿ. 27 To̍k-to̍k Lí bô piàn-ōaⁿ, Lí ê hè-siū bô kiông-chīn. 28 Lí ê lô͘-po̍k ê kiáⁿ-sun beh tn̂g-tn̂g tī-teh; In ê hō͘-è beh khiā-chāi tī Lí ê bīn-chêng.
1 大衛ê詩。1) 我ê心神ah，你tio̍h o-ló耶和華；
凡若tī我內面ê，亦tio̍h o-ló伊ê聖名。
2 我ê心神ah，你tio̍h o-ló耶和華；
M̄-thang bōe記得伊一切ê恩惠；
3 伊赦免你lóng總ê罪；
醫好你lóng總ê病；
4 伊救贖你ê性命脫離死無；
用仁愛kap慈悲做你ê冕旒；
5 用好物足你ê心願；
Hō͘你復到少年親像鷹鳥。
6 耶和華行公義，
為tio̍h一切受冤屈ê人伸冤。
7 用伊ê道路指示摩西，
用伊ê行做指示以色列人。
8 耶和華有憐憫，有恩典；
無快快受氣，koh有豐盛ê慈愛。
9 伊無長長責備，
亦無永遠khǹg受氣。
10 伊無照咱ê罪過款待咱，
亦無照咱ê罪惡報應咱。
11 因為天離開地hiah-nih高，
伊ê慈愛對敬畏伊ê人亦是hiah-nih大。
12 東離開西有jōa遠，
伊hō͘咱ê罪過離開咱亦是hiah遠。
13 老父怎樣憐憫伊ê kiáⁿ兒，
耶和華憐憫敬畏伊ê人亦是án-ni。
14 因為伊知咱ê體質，
Siàu念咱是土粉。
15 論到人，伊ê日子親像草，
伊ê興旺親像山裡ê花。
16 經過風一下吹，就無去；
伊ê原位bōe koh認得。
17 總是耶和華ê慈愛歸tī敬畏伊ê人，tùi永遠到永遠；
伊ê公義也歸tī kiáⁿ-kiáⁿ孫孫；
18 就是hiahê遵守伊ê約，
記念伊ê教示來遵thàn ê人。
19 耶和華tī天頂設立伊ê寶座，
伊ê國權管轄萬項有。
20 Lín chiahê有大權能ê天使ah，
聽伊ê聲，成伊ê命令ê，
Lóng tio̍h o-ló耶和華。
21 Lín chiahê做伊ê眾軍兵，做伊ê差使，行伊所歡喜ê，
Lóng tio̍h o-ló耶和華。
22 Lín一切受伊創造ê，tī伊所管理ê ta̍k位，
Lóng tio̍h o-ló耶和華。
我ê心神ah，你tio̍h o-ló耶和華。
1 Tāi-pi̍t ê si.1) Góa ê sim-sîn ah, lí tio̍h o-ló Iâ-hô-hoa; Hoān-nā tī góa lāi-bīn--ê, ia̍h tio̍h o-ló I ê sèng-miâ. 2 Góa ê sim-sîn ah, lí tio̍h o-ló Iâ-hô-hoa; M̄-thang bōe-kì-tit I it-chhè ê un-hūi; 3 I sià-bián lí lóng-chóng ê chōe; I-hó lí lóng-chóng ê pīⁿ; 4 I kiù-sio̍k lí ê sìⁿ-miā thoat-lī sí-bô; Ēng jîn-ài kap chû-pi chòe lí ê bián-liû; 5 Ēng hó-mi̍h chiok lí ê sim-goān; Hō͘ lí ho̍k-tò siàu-liân chhin-chhiūⁿ eng-chiáu. 6 Iâ-hô-hoa kiâⁿ kong-gī, Ūi-tio̍h it-chhè siū un-khut ê lâng sin-oan. 7 Ēng I ê tō-lō͘ chí-sī Mô͘-se, Ēng I ê kiâⁿ-chòe chí-sī Í-sek-lia̍t lâng. 8 Iâ-hô-hoa ū lîn-bín, ū un-tián; Bô khoài-khoài siū-khì, koh ū hong-sēng ê chû-ài. 9 I bô tn̂g-tn̂g chek-pī, Ia̍h bô éng-oán khǹg siū-khì. 10 I bô chiàu lán ê chōe-kòa khoán-thāi lán, Ia̍h bô chiàu lán ê chōe-ok pò-èng lán. 11 In-ūi thiⁿ lī-khui tōe hiah--nih koâiⁿ, I ê chû-ài tùi kèng-ùi I ê lâng ia̍h sī hiah--nih tōa. 12 Tang lī-khui sai ū jōa-hn̄g, I hō͘ lán ê chōe-kòa lī-khui lán ia̍h sī hiah hn̄g. 13 Lāu-pē cháiⁿ-iūⁿ lîn-bín i ê kiáⁿ-jî, Iâ-hô-hoa lîn-bín kèng-ùi I ê lâng ia̍h sī án-ni. 14 In-ūi I chai lán ê thé-chit, Siàu-liām lán sī thô͘-hún. 15 Lūn-kàu lâng, i ê ji̍t-chí chhin-chhiūⁿ chháu, I ê heng-ōng chhin-chhiūⁿ soaⁿ--nih ê hoe. 16 Keng-kè hong chi̍t-ē chhe, chiū bô--khì; I ê goân-ūi bōe koh jīn--tit. 17 Chóng-sī Iâ-hô-hoa ê chû-ài kui tī kèng-ùi I ê lâng, tùi éng-oán kàu éng-oán; I ê kong-gī iā kui tī kiáⁿ-kiáⁿ sun-sun; 18 Chiū-sī hiah ê chun-siú I ê iok, Kì-liām I ê kà-sī lâi chun-thàn ê lâng. 19 Iâ-hô-hoa tī thiⁿ-téng siat-li̍p I ê pó-chō, I ê kok-koân koán-hat bān-hāng-ū. 20 Lín chiah ê ū tōa koân-lêng ê thiⁿ-sài ah, Thiaⁿ I ê siaⁿ, chiâⁿ I ê bēng-lēng ê, Lóng tio̍h o-ló Iâ-hô-hoa. 21 Lín chiah ê chòe I ê chèng kun-peng, chòe I ê chhe-sài, kiâⁿ I só͘ hoaⁿ-hí--ê, Lóng tio̍h o-ló Iâ-hô-hoa. 22 Lín it-chhè siū I chhòng-chō--ê, tī I só͘ koán-lí ê ta̍k-ūi, Lóng tio̍h o-ló Iâ-hô-hoa. Góa ê sim-sîn ah, lí tio̍h o-ló Iâ-hô-hoa.
1 我ê心神ah，你tio̍h o-ló耶和華。
耶和華我ê上帝ah，你是至大；
你用尊榮威嚴做衫來穿。
2 你穿光明親像外衫；
thí開天親像帳幅。
3 伊tī水中安置伊樓閣ê通楹，
用雲做伊ê車，
用風ê翼來行；
4 用風做伊ê使者，
用焰火做伊ê差用；
5 將地hē tī伊ê地基頂，
Hō͘伊永永無搖choah。
6 你用深淵親像衣裳遮蓋地面；
Chiahê水淹過山嶺。
7 你一下hoah，水就緊緊走；
你ê雷一下tân，水就緊緊流；
8 Chhèng到山頭，落到山谷，
歸tī你kā in定tio̍h ê所在。
9 你定tio̍h界限hō͘水bōe能pôaⁿ過，
無koh 倒tńg來遮蓋地面。
10 Hō͘水泉chhèng出tī山谷，
流tī山中；
11 Hō͘山裡ê走獸lóng有thang lim，
野驢得tio̍h 止嘴乾。
12 天中ê飛鳥歇tī水邊，
哮tī樹枝téng。
13 伊tùi伊ê樓閣中灌ak山嶺，
Tùi你所做ê效果地就充足。
14 伊hō͘草發生，hō͘ cheng-siⁿ thang食，
也有菜蔬做人ê路用，hō͘食物tùi地裡出。
15 Koh有酒hō͘人ê心歡喜，
有油潤澤人ê面，
有食物補養人ê心力。
16 耶和華ê樹lóng得tio̍h充足ê潤澤；
就是伊所栽黎巴嫩ê柏香樹。
17 飛鳥作巢 tī hit內面；
鶴khiā起tī松樹ê中間。
18 高山是hō͘野山羊tiàm，
石磐是沙番閃bih ê所在。
19 伊用月來定tio̍h時節；
日頭也知thang落。
20 你hō͘伊暗，就做暝時；
Hit時樹林內ê百獸就lóng爬出來。
21 獅á-thûn哮，beh jiàu物食，
Tùi上帝討in ê食物。
22 日頭一下出，in就走去bih，
倒tī in ê洞內。
23 人出去做工，
Tio̍h磨到ê-hng時。
24 耶和華ah，你所造ê怎樣hiah chōe！
lóng是你用智慧造成ê；
遍地滿滿你ê富有。
25 Hia有海，大koh闊，
其中有算bōe了ê動物，
大細ê活物lóng有。
26 Tī-hia有船teh行；
有你所創造ê大魚游來游去。
27 Chiahê lóng teh thèng候你，
Thang照時hō͘ in食物。
28 你hō͘ in，in就拾起來；
你thí開你ê手，in得tio̍h好物到飽。
29 你掩你ê面，in就掛慮；
你將in ê氣收回，in就死無，來歸tī土粉。
30 你發出你ê神，in就受創造；
你hō͘地面換做新。
31 願耶和華ê榮光永遠tī-teh；
願耶和華為tio̍h伊所造ê來歡喜。
32 伊看地，地就振動；
伊摸山，山就出煙。
33 我beh一世人ǹg耶和華吟詩；
我iáu活ê時beh ǹg我ê上帝唱歌o-ló。
34 願伊掠我ê靜靜想做合意；
我beh因為耶和華歡喜。
35 願罪人tùi世上消滅，
願pháiⁿ人lóng無去；
我ê心神ah，tio̍h o-ló耶和華；
Lín tio̍h o-ló耶和華。
1 Góa ê sim-sîn ah, lí tio̍h o-ló Iâ-hô-hoa. Iâ-hô-hoa góa ê Siōng-tè ah, Lí sī chì-tōa; Lí ēng chun-êng ui-giâm chòe-saⁿ lâi chhēng. 2 Lí chhēng kng-bêng chhin-chhiūⁿ gōa-saⁿ; Thí-khui thiⁿ chhin-chhiūⁿ tiùⁿ-pak. 3 I tī chúi-tiong an-tì I lâu-koh ê thong-îⁿ, Ēng hûn chòe I ê chhia, Ēng hong ê si̍t lâi kiâⁿ; 4 Ēng hong chòe I ê sù-chiá, Ēng iām-hé chòe I ê chhe-ēng; 5 Chiong tōe hē tī i ê tōe-ki téng, Hō͘ i éng-éng bô iô-choah. 6 Lí ēng chhim-ian chhin-chhiūⁿ i-chiûⁿ jia-khàm tōe-bīn; Chiah ê chúi im-kè soaⁿ-niá. 7 Lí chi̍t-ē hoah, chúi chiū kín-kín cháu; Lí ê lûi chi̍t-ē tân, chúi chiū kín-kín lâu; 8 Chhèng kàu soaⁿ-thâu, lo̍h kàu soaⁿ-kok, Kui tī Lí kā in tiāⁿ-tio̍h ê só͘-chāi. 9 Lí tiāⁿ-tio̍h kài-hān hō͘ chúi bōe-ōe pôaⁿ-kè, Bô koh tò-tńg-lâi jia-khàm tōe-bīn. 10 Hō͘ chúi-chôaⁿ chhèng-chhut tī soaⁿ-kok, Lâu tī soaⁿ-tiong; 11 Hō͘ soaⁿ--nih ê cháu-siù lóng ū thang lim, Iá-lû tit-tio̍h chí chhùi-ta. 12 Thiⁿ-tiong ê pe-chiáu hioh tī chúi-piⁿ, Háu tī chhiū-ki téng. 13 I tùi I ê lâu-koh-tiong koàn-ak soaⁿ-niá, Tùi Lí só͘ chòe ê hāu-kó tōe chiū chhiong-chiok. 14 I hō͘ chháu hoat-siⁿ, hō͘ cheng-siⁿ thang chia̍h, Iā ū chhài-soe chòe lâng ê lō͘-ēng, Hō͘ chia̍h-mi̍h tùi tōe--nih chhut. 15 Koh ū chiú hō͘ lâng ê sim hoaⁿ-hí, Ū iû lūn-te̍k lâng ê bīn, Ū chia̍h-mi̍h pó͘-ióng lâng ê sim-la̍t. 16 Iâ-hô-hoa ê chhiū lóng tit-tio̍h chhiong-chiok ê lūn-te̍k; Chiū-sī I só͘ chai Lī-pa-lùn ê pek-hiuⁿ-chhiū. 17 Pe-chiáu choh-siū tī hit lāi-bīn; Ho̍h khiā-khí tī siông-chhiū ê tiong-kan. 18 Koâiⁿ-soaⁿ sī hō͘ iá-soaⁿ-iûⁿ tiàm, Chio̍h-pôaⁿ sī sa-hoan siám-bih ê só͘-chāi. 19 I ēng ge̍h lâi tiāⁿ-tio̍h sî-choeh; Ji̍t-thâu iā chai thang lo̍h. 20 Lí hō͘ i àm, chiū chòe mî--sî; Hit-sî chhiū-nâ-lāi ê pah-siù chiū lóng pê--chhut-lâi. 21 Sai-á-thûn háu, beh jiàu mi̍h-chia̍h, Tùi Siōng-tè thó in ê chia̍h-mi̍h. 22 Ji̍t-thâu chi̍t-ē chhut, in chiū cháu--khì bih, Tó tī in ê tōng-lāi. 23 Lâng chhut-khì chòe-kang, Tio̍h-bôa kàu ê-hng-sî. 24 Iâ-hô-hoa ah, Lí só͘ chō--ê cháiⁿ-iūⁿ hiah chōe! Lóng sī Lí ēng tì-hūi chō-chiâⁿ--ê; Piàn-tōe móa-móa Lí ê pù-ū. 25 Hia ū hái, tōa koh khoah, Kî-tiong ū sǹg-bōe-liáu ê tōng-bu̍t, Tōa-sòe ê oa̍h-mi̍h lóng ū. 26 Tī-hia ū chûn teh kiâⁿ; Ū Lí só͘ chhòng-chō ê tōa-hî iû-lâi iû-khì. 27 Chiah-ê lóng teh thèng-hāu Lí, Thang chiàu-sî hō͘ in chia̍h-mi̍h. 28 Lí hō͘ in, in chiū khioh--khí-lâi; Lí thí-khui Lí ê chhiú, in tit-tio̍h hó-mi̍h kàu-pá. 29 Lí ng Lí ê bīn, in chiū khòa-lū; Lí chiong in ê khùi siu-hôe, in chiū sí-bô, Lâi kui tī thô͘-hún. 30 Lí hoat-chhut Lí ê sîn, in chiū siū chhòng-chō; Lí hō͘ tōe-bīn ōaⁿ chòe sin. 31 Goān Iâ-hô-hoa ê êng-kng éng-oán tī-teh; Goān Iâ-hô-hoa ūi-tio̍h I só͘-chō--ê lâi hoaⁿ-hí. 32 I khòaⁿ tōe, tōe chiū tín-tāng; I bong soaⁿ, soaⁿ chiū chhut-ian. 33 Góa beh chi̍t-sì-lâng ǹg Iâ-hô-hoa gîm-si; Góa iáu oa̍h ê sî beh ǹg góa ê Siōng-tè chhiùⁿ-koa o-ló. 34 Goān I lia̍h góa ê chēng-chēng-siūⁿ chòe ha̍h-ì; Góa beh in-ūi Iâ-hô-hoa hoaⁿ-hí. 35 Goān chōe-jîn tùi sè-chiūⁿ siau-bia̍t, Goān pháiⁿ-lâng lóng bô--khì; Góa ê sim-sîn ah, tio̍h o-ló Iâ-hô-hoa; Lín tio̍h o-ló Iâ-hô-hoa.
1 Lín tio̍h感謝耶和華，求叫伊ê名；
Tī萬百姓ê中間報揚伊ê所做。
2 Tio̍h ǹg伊吟詩，ǹg伊唱歌o-ló，
談論伊一切奇妙ê所行。
3 Tio̍h因為伊ê聖名來誇口；
Chhē耶和華ê人，心內tio̍h歡喜。
4 Tio̍h求耶和華kap伊ê權能；
常常chhē見伊ê面。
5 伊ê奴僕亞伯拉罕ê後裔，
伊所揀雅各ê kiáⁿ孫ah，
Lín tio̍h siàu念伊所做奇妙ê事，
Kap伊ê神跡，kap伊ê嘴判斷ê話。
6 【併tī頂節】
7 伊是耶和華，咱ê上帝；
全地lóng有伊ê判斷。
8 伊記念伊ê約，直到永遠；
伊所吩咐ê話，直到千代；
9 就是kap亞伯拉罕所立ê約，
對以撒所chiù ê chōa。
10 伊koh將chitê約對雅各定tio̍h做律例；
對以色列定tio̍h做永遠ê約。
11 講，我beh將迦南地賞賜你，
做你產業ê份額。
12 當時in ê人丁有限；
數額少少，koh tī-hia做出外。
13 In tùi chit族行到hit族，
Tùi chit國到別ê百姓。
14 伊無容允甚麼人欺負in，
為tio̍h in ê緣故譴責chiahê君王；
15 講，M̄-thang犯tio̍h我ê受抹油ê，
亦m̄-thang pháiⁿ款待我ê先知。
16 伊命令飢荒降落tī hitê土地；
將所óa靠ê米糧，一概斷絕。
17 伊tī in ê頭前差一人去；
約瑟受bōe做奴僕；
18 人用腳銬傷伊ê腳，
伊受鐵鏈綑縛；
19 耶和華ê話試煉伊，
直到伊所講ê應驗。
20 王差人kā伊tháu開，
就是治理百姓ê，kā伊tháu放；
21 設立伊做王-ka ê主，
管理伊一切所有ê，
22 Thang隨意縛伊ê人臣，
將智慧教示伊ê長老。
23 以色列亦到埃及，
雅各出外tī含ê地。
24 耶和華hō͘伊ê百姓生湠chōe-chōe；
Hō͘ in比對敵khah強。
25 伊變換對敵ê心，怨恨伊ê百姓，
續用詭譎ê計謀款待伊ê奴僕。
26 伊差伊ê奴僕摩西，
Kap伊所揀ê亞倫。
27 In tī對敵ê中間行伊ê神跡，
Tī含ê地行奇事。
28 伊命令烏暗，就有烏暗；
In無違逆伊ê話。
29 伊hō͘ in ê水piàn血，
Hō͘ in ê魚lóng死。
30 Tī in ê土地田蛙á生chōe-chōe，
連in ê王ê密房亦有。
31 伊一下出聲，胡蠅kui陣飛來，
Koh有蝨母tī in ê境內滿四界。
32 伊落雹hō͘ in做hō͘；
Tī in ê土地降落焰火。
33 伊亦phah in ê葡萄樹kap無花果樹，
毀壞in境內ê樹木。
34 伊一下出聲蝗蟲就來，
草蜢bōe算得。
35 一盡食in ê土地ê菜蔬，
Koh食in田園所出ê。
36 伊koh phah死in國內一切ê大kiáⁿ，
就是in氣力ê起頭。
37 伊chhōa in出來，帶銀帶金；
伊ê支派中，無一个軟弱ê人。
38 In出來ê時，埃及就歡喜，
因為埃及bat為tio̍h in來驚。
39 伊起雲做布篷，
暝時用火照光。
40 In一下求，伊就hō͘鵪鶉飛來，
Koh用天ê餅hō͘ in飽足。
41 伊phah開石磐，水就chhèng出；
Tī乾地水流親像河。
42 因為伊記念伊聖ê話，
Kap伊ê奴僕亞伯拉罕。
43 伊 chhōa伊ê百姓大悅出來，
Chhōa伊揀ê百姓唱歡喜ê歌出來。
44 伊將列國ê地賞賜in，
In就承接hiahê百姓tio̍h磨所得tio̍h-ê；
45 Beh hō͘ in thàn伊ê律例，
守伊ê法度。
Lín tio̍h o-ló耶和華。
1 Lín tio̍h kám-siā Iâ-hô-hoa, kiû-kiò I ê miâ; Tī bān peh-sìⁿ ê tiong-kan pò-iông I ê só͘-chòe. 2 Tio̍h ǹg I gîm-si, ǹg I chhiùⁿ-koa o-ló, Tâm-lūn I it-chhè kî-biāu ê só͘-kiâⁿ. 3 Tio̍h in-ūi I ê sèng-miâ lâi khoa-kháu; Chhē Iâ-hô-hoa ê lâng, sim-lāi tio̍h hoaⁿ-hí. 4 Tio̍h kiû Iâ-hô-hoa kap I ê koân-lêng; Siông-siông chhē-kìⁿ I ê bīn. 5 I ê lô͘-po̍k A-pek-la̍h-hán ê hō͘-è, I só͘ kéng Ngá-kok ê kiáⁿ-sun ah, Lín tio̍h siàu-liām I só͘-chòe kî-biāu ê sū, Kap I ê sîn-jiah, kap I ê chhùi phòaⁿ-toàn ê ōe. 6 【pēng tī téng chat】 7 I sī Iâ-hô-hoa, lán ê Siōng-tè; Choân-tōe lóng ū I ê phòaⁿ-toàn. 8 I kì-liām I ê iok, ti̍t-kàu éng-oán; I só͘ hoan-hù ê ōe, ti̍t-kàu chheng-tāi; 9 Chiū-sī kap A-pek-la̍h-hán só͘ li̍p ê iok, Tùi Í-sat só͘ chiù ê chōa. 10 I koh chiong chit ê iok tùi Ngá-kok tiāⁿ-tio̍h chòe lu̍t-lē; Tùi Í-sek-lia̍t tiāⁿ-tio̍h chòe éng-oán ê iok. 11 Kóng, Góa beh chiong Ka-lâm tōe siúⁿ-sù lí, Chòe lí sán-gia̍p ê hūn-gia̍h. 12 Tng-sî in ê jîn-teng iú-hān; Siàu-gia̍h chió-chió, koh tī-hia chòe chhut-gōa. 13 In tùi chit-cho̍k kiâⁿ kàu hit-cho̍k, Tùi chit-kok kàu pa̍t ê peh-sìⁿ. 14 I bô iông-ún sím-mi̍h lâng khi-hū in, Ūi-tio̍h in ê iân-kò͘ khiàn-chek chiah ê kun-ông; 15 Kóng, M̄-thang hoān-tio̍h Góa ê siū boah-iû--ê, Ia̍h m̄-thang pháiⁿ khoán-thāi Góa ê sian-ti. 16 I bēng-lēng ki-hng kàng-lo̍h tī hit ê thó͘-tōe; Chiong só͘ óa-khò ê bí-niû, it-khài toān-choa̍t. 17 I tī in ê thâu-chêng chhe chi̍t-lâng khì; Iok-sek siū-bōe chòe lô͘-po̍k; 18 Lâng ēng kha-khàu siong i ê kha, I siū thih-liān khún-pa̍k; 19 Iâ-hô-hoa ê ōe chhì-liān i, Ti̍t-kàu I só͘ kóng--ê èng-giām. 20 Ông chhe lâng kā i tháu-khui, Chiū-sī tī-lí peh-sìⁿ--ê, kā i tháu-pàng; 21 Siat-li̍p i chòe ông-ka ê chú, Koán-lí i it-chhè só͘-ū--ê, 22 Thang sûi-ì pa̍k i ê jîn-sîn, Chiong tì-hūi kà-sī i ê tióng-ló. 23 Í-sek-lia̍t ia̍h kàu Ai-ki̍p, Ngá-kok chhut-gōa tī Hâm ê tōe. 24 Iâ-hô-hoa hō͘ i ê peh-sìⁿ siⁿ-thòaⁿ chōe-chōe; Hō͘ in pí tùi-te̍k khah-kiông. 25 I piàn-ōaⁿ tùi-te̍k ê sim, oàn-hūn I ê peh-sìⁿ, Sòa ēng khúi-khiat ê kè-bô͘ khoán-thāi I ê lô͘-po̍k. 26 I chhe I ê lô͘-po̍k Mô͘-se, Kap I só͘ kéng ê A-lûn. 27 In tī tùi-te̍k ê tiong-kan kiâⁿ I ê sîn-jiah, Tī Hâm ê tōe kiâⁿ kî-sū. 28 I bēng-lēng o͘-àm, chiū ū o͘-àm; In bô ûi-ke̍h I ê ōe. 29 I hō͘ in ê chúi piàn huih, Hō͘ in ê hî lóng sí. 30 Tī in ê thó͘-tōe chhân-kap-á siⁿ chōe-chōe, Liân in ê ông ê ba̍t-pâng ia̍h ū. 31 I chi̍t-ē chhut-siaⁿ, hô͘-sîn kui-tīn pe--lâi, Koh ū sat-bú tī in ê kéng-lāi móa sì-kòe. 32 I lo̍h-pha̍uh hō͘ in chòe hō͘; Tī in ê thó͘-tōe kàng-lo̍h iām-hé. 33 I ia̍h phah in ê phû-tô-chhiū kap bû-hoa-kó chhiū, Húi-hoāi in kéng-lāi ê chhiū-ba̍k. 34 I chi̍t-ē chhut-siaⁿ hông-thiông chiū lâi, Chháu-meh bōe-sǹg--tit. 35 It-chīn chia̍h in ê thó͘-tōe ê chhài-soe, Koh chia̍h in chhân-hn̂g só͘ chhut--ê. 36 I koh phah-sí in kok-lāi it-chhè ê tōa-kiáⁿ, Chiū-sī in khùi-la̍t ê khí-thâu. 37 I chhōa in chhut-lâi, tòa gûn tòa kim; I ê chi-phài tiong, bô chi̍t ê loán-jio̍k ê lâng. 38 In chhut--lâi ê sî, Ai-ki̍p chiū hoaⁿ-hí, In-ūi Ai-ki̍p bat ūi-tio̍h in lâi kiaⁿ. 39 I khí hûn chòe pò͘-phâng, Mî--sî ēng hé chiò-kng. 40 In chi̍t-ē kiû, I chiū hō͘ ian-chhun pe--lâi, Koh ēng thiⁿ ê piáⁿ hō͘ in pá-chiok. 41 I phah-khui chio̍h-pôaⁿ, chúi chiū chhèng-chhut; Tī ta-tōe chúi lâu chhin-chhiūⁿ hô. 42 In-ūi I kì-liām I sèng ê ōe, Kap I ê lô͘-po̍k A-pek-la̍h-hán. 43 I chhōa I ê peh-sìⁿ tāi-ia̍t chhut-lâi, Chhōa I kéng ê peh-sìⁿ chhiùⁿ hoaⁿ-hí ê koa chhut--lâi. 44 I chiong lia̍t-kok ê tōe siúⁿ-sù in, In chiū sêng-chiap hiah ê peh-sìⁿ tio̍h-bôa só͘ tit-tio̍h--ê; 45 Beh hō͘ in thàn I ê lu̍t-lē, Siú I ê hoat-tō͘. Lín tio̍h o-ló Iâ-hô-hoa.
1 Lín tio̍h o-ló耶和華。
Lín tio̍h感謝耶和華；因為伊是好；
伊ê慈愛永遠tī-teh。
2 Chī-chūi能講起耶和華ê大權能？
Chī-chūi能表明伊一切ê名聲？
3 見若遵守公平，常常行公義ê；
Chit號人就有福氣。
4 耶和華ah，你用恩惠款待你ê百姓，求你亦用這記念我；
用你ê救恩臨到我。
5 Hō͘我看見你揀ê百姓ê福氣，
歡喜你ê國ê快樂，
Kap你ê產業相kap榮光。
6 阮kap阮ê祖公平平犯罪，
阮作孽，行pháiⁿ。
7 阮ê祖公tī埃及無明白你ê奇事；
無記念你豐盛ê慈愛；
反tńg tī hitê海，就是tī紅海，行悖逆。
8 但是伊因為家己ê名拯救in，
為tio̍h beh顯明伊ê大權能。
9 Koh hoah紅海，海就ta；
伊chhōa in經過深ê所在，ná親像經過曠野。
10 伊救in脫離怨恨in ê人ê手，
Tùi對敵ê手中救贖in。
11 水淹密in ê對敵；
In就無留一个。
12 Hit-tia̍p in chiah信伊ê話；
唱歌o-ló伊。
13 In快快bōe記得伊ê所做；
無thèng候伊ê指教；
14 反tńg tī曠野大起貪食；
Tī拋荒ê所在chhì上帝。
15 伊將in所求ê hō͘-in，
總是hō͘ in ê神魂衰lám。
16 In koh tī營中怨妒摩西，
Kap耶和華ê聖ê亞倫。
17 地就開，吞Tāi-tan，
掩密A-pí-lân ê黨。
18 有火 tī in ê黨中發起，
有火燄燒滅hiahê pháiⁿ人。
19 In tī Hô-lia̍t造牛á，
仆拜所鑄ê像。
20 Án-ni將in ê榮光，
換做食草ê牛á siōng。
21 Bōe記得救in ê上帝，
Bat行大ê tāi-chì tī埃及-ê；
22 行奇事tī含ê地，
行thang驚ê事tī紅海。
23 所以伊講beh滅無in，
若m̄是有伊所揀ê摩西，當決裂ê時，khiā伊ê面前，
挽回伊ê受氣，驚了伊滅無in。
24 In koh看輕hitê好ê地，
M̄信伊ê話。
25 Tī in布棚內發出怨恨ê話，
M̄聽耶和華ê聲。
26 所以伊對in kia̍h起手chiù-chōa，
Beh hō͘ in死tī曠野。
27 Hō͘ in ê後裔死tī列國ê中間，
四散tī ta̍k所在。
28 In koh kap Pa-le̍k-pí-jíⁿ連合，
食祭獻死ê ê物。
29 In án-ni行，惹伊ê受氣；
就有瘟疫流行tī in中間。
30 Hit時Hui-nî-hap起來，行刑罰；
瘟疫chiah soah。
31 Chitê就kā伊算做義，
世世代代，直到永遠。
32 In tī Bí-lī-pa ê水，koh hō͘耶和華受氣，
甚至摩西為tio̍h in ê緣故也受虧損；
33 是因為in忤逆伊ê神，
致到摩西講出躁性ê話。
34 耶和華吩咐in剿滅hiahê百姓；
In無聽thàn。
35 反tńg kap外邦人混雜，
學in ê所做；
36 服事in ê偶像，
這是成做害in ê活tauh。
37 將in ê kiáⁿ cha-bó͘-kiáⁿ祭祀鬼神，
38 流無罪ê人ê血，就是in ê kiáⁿ cha-bó͘-kiáⁿ ê血，
將in祭祀迦南ê偶像；
Hit-ê地就hō͘血phah lâ-sâm。
39 Án-ni in hō͘家己ê所做phah lâ-sâm，
Tī in ê所行犯tio̍h淫行。
40 所以耶和華ê受氣對伊ê百姓發出，
厭惡伊ê產業。
41 將in交帶外邦人ê手；
怨恨in ê人就管轄in。
42 In ê對敵也壓制in，
In就屈服tī對敵ê手下。
43 伊chōe-chōe pái拯救in；
總是in tī in ê計謀中悖逆伊；
因為家己ê罪惡降做卑賤。
44 Iáu-kú伊聽見in ai-叫ê時，
就體貼in ê危急；
45 為tio̍h in來記念伊ê約，
照伊豐盛ê慈愛回心轉(tńg)意。
46 伊也hō͘ in tī lóng總掠in ê人ê面前，
得tio̍h憐憫。
47 耶和華阮ê上帝ah，求你拯救阮，
Tùi外邦中聚集阮；
Thang hō͘阮祝謝你ê聖名，
掠你ê受o-ló做大悅。
48 Tio̍h o-ló耶和華，以色列ê上帝，
Tùi永遠到永遠。
願眾百姓lóng講，A-bēng。
Lín tio̍h o-ló耶和華。
1 Lín tio̍h o-ló Iâ-hô-hoa. Lín tio̍h kám-siā Iâ-hô-hoa; in-ūi I sī hó; I ê chû-ài éng-oán tī--teh. 2 Chī-chūi ōe kóng-khí Iâ-hô-hoa ê tōa koân-lêng? Chī-chūi ōe piáu-bêng I it-chhè ê miâ-siaⁿ? 3 Kìⁿ-nā chun-siú kong-pêng, siông-siông kiâⁿ kong-gī--ê; Chit-hō lâng chiū ū hok-khì. 4 Iâ-hô-hoa ah, Lí ēng un-hūi khoán-thāi Lí ê peh-sìⁿ, kiû Lí ia̍h ēng che kì-liām góa; Ēng Lí ê kiù-un lîm-kàu góa. 5 Hō͘ góa khòaⁿ-kìⁿ Lí kéng ê peh-sìⁿ ê hok-khì, Hoaⁿ-hí Lí ê kok ê khoài-lo̍k, Kap Lí ê sán-gia̍p saⁿ-kap êng-kng. 6 Goán kap goán ê chó͘-kong pîⁿ-pîⁿ hoān-chōe, Goán chok-gia̍t, kiâⁿ pháiⁿ. 7 Goán ê chó͘-kong tī Ai-ki̍p bô bêng-pe̍k Lí ê kî-sū; Bô kì-liām Lí hong-sēng ê chû-ài; Hoán-tńg tī hit ê hái, chiū-sī tī Âng-hái, kiâⁿ pōe-ge̍k. 8 Nā-sī I in-ūi ka-kī ê miâ chín-kiù in, Ūi-tio̍h beh hián-bêng I ê tōa koân-lêng. 9 Koh hoah Âng-hái, hái chiū ta; I chhōa in keng-kè chhim ê só͘-chāi, ná chhin-chhiūⁿ keng-kè khòng-iá. 10 I kiù in thoat-lī oàn-hūn in ê lâng ê chhiú, Tùi tùi-te̍k ê chhiú-tiong kiù-sio̍k in. 11 Chúi im-ba̍t in ê tùi-te̍k; In chiū bô lâu chi̍t-ê. 12 Hit-tia̍p in chiah sìn I ê ōe; Chhiùⁿ-koa o-ló I. 13 In khoài-khoài bōe-kì-tit I ê só͘-chòe; Bô thèng-hāu I ê chí-kàu; 14 Hoán-tńg tī khòng-iá tōa khí tham-chia̍h; Tī pha-hng ê só͘-chāi chhì Siōng-tè. 15 I chiong in só͘ kiû--ê hō͘--in, Chóng-sī hō͘ in ê sîn-hûn soe-lám. 16 In koh tī iâⁿ-tiong oàn-tò͘ Mô͘-se, Kap Iâ-hô-hoa ê sèng ê A-lûn. 17 Tōe chiū khui, thun Tāi-tan, Iám-ba̍t A-pí-lân ê tóng. 18 Ū hé tī in ê tóng-tiong hoat-khí, Ū hé-iām sio-bia̍t hiah ê pháiⁿ-lâng. 19 In tī Hô-lia̍t chō gû-á, Phak-pài só͘ chù ê siōng. 20 Án-ni chiong in ê êng-kng, Ōaⁿ chòe chia̍h-chháu ê gû-á siōng. 21 Bōe-kì-tit kiù in ê Siōng-tè, Bat kiâⁿ tōa ê tāi-chì tī Ai-ki̍p--ê; 22 Kiâⁿ kî-sū tī Hâm ê tōe, Kiâⁿ thang kiaⁿ ê sū tī Âng-hái. 23 Só͘-í I kóng beh bia̍t-bô in, Nā m̄-sī ū I só͘ kéng ê Mô͘-se, tng koat-lia̍t ê sî, khiā I ê bīn-chêng, Bán-hôe I ê siū-khì, kiaⁿ-liáu I bia̍t-bô in. 24 In koh khòaⁿ-khin hit ê hó ê tōe, M̄-sìn I ê ōe. 25 Tī in pò͘-pîⁿ-lāi hoat-chhut oàn-hūn ê ōe, M̄-thiaⁿ Iâ-hô-hoa ê siaⁿ. 26 Só͘-í I tùi in kia̍h-khí chhiú chiù-chōa, Beh hō͘ in sí tī khòng-iá. 27 Hō͘ in ê hō͘-è sí tī lia̍t-kok ê tiong-kan, Sì-sòaⁿ tī ta̍k só͘-chāi. 28 In koh kap Pa-le̍k-pí-jíⁿ liân-ha̍p, Chia̍h chè-hiàn sí--ê ê mi̍h. 29 In án-ni kiâⁿ, jiá I ê siū-khì; Chiū ū un-e̍k liû-hêng tī in tiong-kan. 30 Hit-sî Hui-nî-hap khí--lâi, kiâⁿ hêng-hoa̍t; Un-e̍k chiah soah. 31 Chit-ê chiū kā i sǹg-chòe gī, Sè-sè tāi-tāi, ti̍t kàu éng-oán. 32 In tī Bí-lī-pa ê chúi, koh hō͘ Iâ-hô-hoa siū-khì, Sīm-chì Mô͘-se ūi-tio̍h in ê iân-kò͘ iā siū khui-sún; 33 Sī in-ūi in ngó͘-ge̍k I ê sîn, Tì-kàu Mô͘-se kóng-chhut sò-sèng ê ōe. 34 Iâ-hô-hoa hoan-hù in châu-bia̍t hiah ê peh-sìⁿ; In bô thiaⁿ-thàn. 35 Hoán-tńg kap gōa-pang lâng hūn-cha̍p, O̍h in ê só͘-chòe; 36 Ho̍k-sāi in ê ngó͘-siōng, Che sī chiâⁿ-chòe hāi in ê oa̍h-tauh. 37 Chiong in ê kiáⁿ cha-bó͘-kiáⁿ chè-sū kúi-sîn, 38 Lâu bô-chōe ê lâng ê huih, chiū-sī in ê kiáⁿ cha-bó͘-kiáⁿ ê huih, chiong in chè-sū Ka-lâm ê ngó͘-siōng; Hit ê tōe chiū hō͘ huih phah lâ-sâm. 39 Án-ni in hō͘ ka-kī ê só͘-chòe phah lâ-sâm, Tī in ê só͘-kiâⁿ hoān-tio̍h îm-hēng. 40 Só͘-í Iâ-hô-hoa ê siū-khì tùi I ê peh-sìⁿ hoat-chhut, Iàm-ò͘ⁿ I ê sán-gia̍p. 41 Chiong in kau-tài gōa-pang lâng ê chhiú; Oàn-hūn in ê lâng chiū koán-hat in. 42 In ê tùi-te̍k iā ap-chè in, In chiū khut-ho̍k tī tùi-te̍k ê chhiú-ē. 43 I chōe-chōe pái chín-kiù in; Chóng-sī in tī in ê kè-bô͘-tiong pōe-ge̍k I; In-ūi ka-kī ê chōe-ok kàng-chòe pi-chiān. 44 Iáu-kú I thiaⁿ-kìⁿ in ai-kiò ê sî, Chiū thé-thiap in ê gûi-kip; 45 Ūi-tio̍h in lâi kì-liām I ê iok, Chiàu I hong-sēng ê chû-ài hôe-sim tńg-ì. 46 I iā hō͘ in tī lóng-chóng lia̍h in ê lâng ê bīn-chêng, Tit-tio̍h lîn-bín. 47 Iâ-hô-hoa goán ê Siōng-tè ah, kiû Lí chín-kiù goán, Tùi gōa-pang-tiong chū-chi̍p goán; Thang hō͘ goán chiok-siā Lí ê sèng-miâ, Lia̍h Lí ê siū o-ló chòe tāi-ia̍t. 48 Tio̍h o-ló Iâ-hô-hoa, Í-sek-lia̍t ê Siōng-tè, Tùi éng-oán kàu éng-oán. Goān chèng peh-sìⁿ lóng kóng, A-bēng. Lín tio̍h o-ló Iâ-hô-hoa.
1 Lín tio̍h感謝耶和華，因為伊是好，
因為伊ê慈愛永永tī-teh。
2 耶和華所救贖ê tio̍h講這話，
就是伊 tùi對敵手中所救贖ê；
3 Tùi ta̍k國，tùi東tùi西，tùi南tùi pak，
所聚集ê lóng tio̍h án-ni講。
4 In tī曠野拋荒ê路漂流，
Chhē無城thang khiā起。
5 也iau，也嘴乾，
In ê心神暈去。
6 In就tī苦難中哀求耶和華；
伊tùi in ê患難中拯救in。
7 Koh chhōa in行直ê路，
Hō͘ in去到thang khiā起ê城。
8 為tio̍h耶和華ê慈愛kap祂對世間人所行ê奇事，
願人lóng o-ló祂。
9 因為伊hō͘迫切欣慕ê心得tio̍h知足；
Hō͘ iau餓ê心得tio̍h好物到飽。
10 Hiah-ê坐tī烏暗死蔭中ê人，
受困苦kap鐵鏈pé-縛ê人；
11 是因為in悖逆上帝ê話，
看輕至koân ê ê旨意。
12 所以伊用勞苦教乖in ê心；
In跋倒，無人扶助。
13 In就tī苦難中哀求耶和華，
伊tùi in ê患難中牽救in。
14 伊tùi烏暗死蔭中chhōa in出來，
Chhoah斷縛in ê索。
15 為tio̍h耶和華ê慈愛kap伊對世間人所行ê奇事，
願人lóng o-ló伊。
16 因為伊phah破銅ê門，
斬斷鐵ê門栱。
17 戇人因為in ê過失，
Koh因為in ê罪惡，受苦楚。
18 In ê心厭惡ta̍k樣ê食物，
就óa近死ê門。
19 In就tī苦難中哀求耶和華；
伊tùi in ê患難中牽救in。
20 伊出命令醫好in，
救in脫離死無。
21 為tio̍h耶和華ê慈愛，kap伊對世間人所行ê奇事，
願人lóng o-ló伊。
22 亦願in獻感謝ê祭，
出歡喜ê聲講起伊ê所做。
23 坐船過海，
tī大水中經營事業ê，
24 In看見耶和華ê所做，
Kap伊tī深淵所行ê奇事；
25 因為伊一下命令，狂風就起；
海中ê湧就giâ起來；
26 In上到穹蒼，落到海底；
In因為危險，神魂就消散。
27 In顛顛倒倒，東倒西歪，親像酒醉ê人，
In ê智慧無法可施。
28 In就tī苦難中哀求耶和華，
伊tùi in ê患難中chhōa in出來。
29 伊hō͘狂風定，
海湧就平靜。
30 風定，湧靜，in就歡喜；
伊就chhōa in到所ài去ê海口。
31 為tio̍h耶和華ê慈愛kap伊對世間人所行ê奇事，
願人lóng o-ló伊。
32 願in tī百姓ê會中尊伊做高，
tī長老ê座位o-ló伊。
33 伊hō͘江河變做曠野，
Hō͘水泉變做乾燥ê地。
34 伊hō͘肥地變鹹ê地，
Lóng是因為khiā起tī-hia ê人ê罪惡。
35 伊hō͘曠野變做潭堀，
Hō͘乾地變做水泉。
36 伊hō͘ iau餓ê人tiàm tī-hia，
Hō͘ in能起造thang khiā起ê城；
37 Koh種作田園，栽葡萄，
得tio̍h所出ê土產。
38 伊koh賞賜福氣hō͘ in，hō͘ in生湠chōe-chōe，
亦hō͘ in ê cheng-siⁿ無減少。
39 In koh因為暴虐、患難、憂苦，
就減少koh卑下(kē)。
40 伊hō͘貴族受看輕，
Hō͘ in漂流tī拋荒無路ê所在。
41 總是伊舉起sòng-hiong人，hō͘ in脫離苦難，
Hō͘伊ê家族興旺親像羊群。
42 正直ê人beh看見來歡喜；
一切pháiⁿ人ê嘴beh塞密。
43 見若有智慧ê人beh關心chiahê tāi-chì，
亦beh siàu念耶和華ê慈愛。
1 Lín tio̍h kám-siā Iâ-hô-hoa, in-ūi I sī hó, In-ūi I ê chû-ài éng-éng tī-teh. 2 Iâ-hô-hoa só͘ kiù-sio̍k--ê tio̍h kóng che ōe, Chiū-sī I tùi tùi-te̍k chhiú-tiong só͘ kiù-sio̍k--ê; 3 Tùi ta̍k-kok, tùi tang tùi sai, tùi lâm tùi pak, Só͘ chū-chi̍p--ê lóng tio̍h án-ni kóng. 4 In tī khòng-iá pha-hng ê lō͘ phiau-liû, Chhē bô siâⁿ thang khiā-khí. 5 Iā iau, iā chhùi-ta, In ê sim-sîn hūn--khì. 6 In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong chín-kiù in. 7 Koh chhōa in kiâⁿ ti̍t ê lō͘, Hō͘ in khì kàu thang khiā-khí ê siâⁿ. 8 Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I. 9 In-ūi I hō͘ pek-chhiat him-bō͘ ê sim tit-tio̍h ti-chiok; Hō͘ iau-gō ê sim tit-tio̍h hó-mi̍h kàu pá. 10 Hiah-ê chē tī o͘-àm sí-ìm-tiong ê lâng, Siū khùn-khó͘ kap thih-liān pé-pa̍k ê lâng; 11 Sī in-ūi in pōe-ge̍k Siōng-tè ê ōe, Khòaⁿ-khin Chì-koâiⁿ--ê ê chí-ì. 12 Só͘-í I ēng lô-khó͘ kà-koai in ê sim; In poa̍h-tó, bô lâng hû-chō͘. 13 In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong khan-kiù in. 14 I tùi o͘-àm sí-ìm-tiong chhōa in chhut--lâi, Chhoah-tn̄g pa̍k in ê soh. 15 Ūi-tio̍h Iâ-hô-hoa ê chû-ài kap I tùi sè-kan lâng só͘ kiâⁿ ê kî-sū, Goān lâng lóng o-ló I. 16 In-ūi I phah-phòa tâng ê mn̂g, Chām-tn̄g thih ê mn̂g-kông. 17 Gōng-lâng in-ūi in ê kè-sit, Koh in-ūi in ê chōe-ok, siū khó͘-chhó͘. 18 In ê sim iàm-ò͘ⁿ ta̍k-iūⁿ ê chia̍h-mi̍h, Chiū óa-kūn sí ê mn̂g. 19 In chiū tī khó͘-lān-tiong ai-kiû Iâ-hô-hoa; I tùi in ê hoān-lān-tiong khan-kiù in. 20 I chhut bēng-lēng i-hó in, Kiù in thoat-lī sí-bô. 21 Ūi-tio̍h Iâ-hô-hoa ê chû-ài, kap I tùi sè-kan lâng só͘ kiâⁿ ê kî-sū, Goān lâng lóng o-ló I. 22 Ia̍h goān in hiàn kám-siā ê chè, Chhut hoaⁿ-hí ê siaⁿ kóng-khí I ê só͘-chòe. 23 Chē-chûn kè-hái, Tī tōa-chúi-tiong keng-êng sū-gia̍p--ê, 24 In khòaⁿ-kìⁿ Iâ-hô-hoa ê só͘-chòe, Kap I tī chhim-ian só͘ kiâⁿ ê kî-sū; 25 In-ūi I chi̍t-ē bēng-lēng, kông-hong chiū khí; Hái-tiong ê éng chiū giâ--khí-lâi; 26 In chiūⁿ kàu kiong-chhong, lo̍h kàu hái-tóe; In in-ūi gûi-hiám, sîn-hûn chiū siau-sòaⁿ. 27 In tian-tian tó-tó, tang-tó sai-oai, chhin-chhiūⁿ chiú-chùi ê lâng, In ê tì-hūi bû-hoat khó-si. 28 In chiū tī khó͘-lān-tiong ai-kiû Iâ-hô-hoa, I tùi in ê hoān-lān-tiong chhōa in chhut--lâi. 29 I hō͘ kông-hong tiāⁿ, Hái-éng chiū pêng-chēng. 30 Hong tiāⁿ, éng chēng, in chiū hoaⁿ-hí; I chiū chhōa in kàu só͘ ài khì ê hái-kháu. 31 Ūi-tio̍h Iâ-hô-hoa ê chû-ài kap I tùi sè-kan-lâng só͘ kiâⁿ ê kî-sū, Goān lâng lóng o-ló I. 32 Goān in tī peh-sìⁿ ê hōe-tiong chun I chòe koâiⁿ, Tī tióng-ló ê chē-ūi o-ló I. 33 I hō͘ kang-hô pìⁿ-chòe khòng-iá, Hō͘ chúi-chôaⁿ pìⁿ-chòe ta-sò ê tōe. 34 I hō͘ pûi-tōe pìⁿ kiâm ê tōe, Lóng sī in-ūi khiā-khí tī-hia ê lâng ê chōe-ok. 35 I hō͘ khòng-iá pìⁿ-chòe thâm-khut, Hō͘ ta-tōe pìⁿ-chòe chúi-chôaⁿ. 36 I hō͘ iau-gō ê lâng tiàm tī-hia, Hō͘ in ōe khí-chō thang khiā-khí ê siâⁿ; 37 Koh chèng-choh chhân-hn̂g, chai phû-tô, Tit-tio̍h só͘ chhut ê thó͘-sán. 38 I koh siúⁿ-sù hok-khì hō͘ in, hō͘ in siⁿ-thòaⁿ chōe-chōe, Ia̍h hō͘ in ê cheng-siⁿ bô kiám-chió. 39 In koh in-ūi pō-gio̍k, hoān-lān, iu-khó͘, Chiū kiám-chió koh pi-kē. 40 I hō͘ kùi-cho̍k siū khòaⁿ-khin, Hō͘ in phiau-liû tī pha-hng bô lō͘ ê só͘-chāi. 41 Chóng-sī I kú-khí sòng-hiong lâng, hō͘ in thoat-lī khó͘-lān, Hō͘ i ê ka-cho̍k heng-ōng chhin-chhiūⁿ iûⁿ-kûn. 42 Chèng-ti̍t ê lâng beh khòaⁿ-kìⁿ lâi hoaⁿ-hí; It-chhè pháiⁿ-lâng ê chhùi beh that-ba̍t. 43 Kìⁿ-nā ū tì-hūi ê lâng beh koan-sim chiah ê tāi-chì, Ia̍h beh siàu-liām Iâ-hô-hoa ê chû-ài.
1 大衛ê詩歌。1) 上帝ah，我ê心自在；
我beh吟詩，我ê心神beh唱歌o-ló。
2 琴ah，瑟ah，lín tio̍h精神起來；
我本身beh真早精神起來。
3 耶和華ah，我beh tī 萬百姓ê中間感謝你；
Tī列邦ê中間唱歌o-ló你。
4 因為你ê慈愛khah大天，
你ê誠實到穹蒼。
5 上帝ah，願你高大pôaⁿ過chiahê天；
願你ê榮光pôaⁿ過全地。
6 求你聽阮，用chiàⁿ手牽救阮；
Thang hō͘你所疼ê人得tio̍h救。
7 上帝已經chí伊ê聖潔來講，我beh大悅；
我beh分開示劍，量Sò͘-kat ê山谷。
8 Ki-lia̍t是我ê；Má-ná-se亦是我ê；
Í-hoat-liân是我ê頭盔；
偤大是我ê權柄。
9 Mô͘-ap beh做我ê浴盆；
我beh hiat我ê鞋tī Í-tong；
我beh因為khah贏腓利士來大聲hoah。
10 Chī-chūi能chhōa我入堅固ê城？Chī-chūi chhōa我入Í-tong ê地？
11 上帝ah，你kiám m̄是棄sak阮mah？
上帝ah，你無kap阮ê軍兵相kap去。
12 求你幫贊阮，攻擊對敵；
因為人ê拯救是空空。
13 阮óa靠上帝，做成大tāi-chì；
因為thún踏阮ê對敵ê，就是伊。
1 Tāi-pi̍t ê si-koa.1) Siōng-tè ah, góa ê sim chū-chāi; Góa beh gîm-si, góa ê sim-sîn beh chhiùⁿ-koa o-ló. 2 Khîm--ah, sek--ah, lín tio̍h cheng-sîn khí-lâi; Góa pún-sin beh chin-chá cheng-sîn khí--lâi. 3 Iâ-hô-hoa ah, góa beh tī bān peh-sìⁿ ê tiong-kan kám-siā Lí; Tī lia̍t-pang ê tiong-kan chhiùⁿ-koa o-ló Lí. 4 In-ūi Lí ê chû-ài khah-tōa thiⁿ, Lí ê sêng-si̍t kàu kiong-chhong. 5 Siōng-tè ah, goān Lí koâiⁿ-tōa pôaⁿ-kè chiah ê thiⁿ; Goān Lí ê êng-kng pôaⁿ-kè choân-tōe. 6 Kiû Lí thiaⁿ goán, ēng chiàⁿ-chhiú khan-kiù goán; Thang hō͘ Lí só͘ thiàⁿ ê lâng tit-tio̍h kiù. 7 Siōng-tè í-keng chí I ê sèng-kiat lâi kóng, Góa beh tāi-ia̍t; Góa beh pun-khui Sī-kiàm, niû Sò͘-kat ê soaⁿ-kok. 8 Ki-lia̍t sī Góa-ê; Má-ná-se ia̍h sī Góa-ê; Í-hoat-liân sī Góa ê thâu-khoe; Iû-tāi sī Góa ê koân-pèng. 9 Mô͘-ap beh chòe Góa ê e̍k-phûn; Góa beh hiat góa ê ôe tī Í-tong; Góa beh in-ūi khah-iâⁿ Hui-lī-sū lâi tōa-siaⁿ hoah. 10 Chī-chūi ōe chhōa góa ji̍p kian-kò͘ ê siâⁿ? Chī-chūi chhōa góa ji̍p Í-tong ê tōe? 11 Siōng-tè ah, Lí kiám m̄-sī khì-sak goán mah? Siōng-tè ah, Lí bô kap goán ê kun-peng saⁿ-kap khì. 12 Kiû Lí pang-chān goán, kong-kek tùi-te̍k; In-ūi lâng ê chín-kiù sī khang-khang. 13 Goán óa-khò Siōng-tè, chòe-chiâⁿ tōa tāi-chì; In-ūi thún-ta̍h goán ê tùi-te̍k--ê, chiū-sī I.
1 大衛ê詩；交hō͘樂官。1) 我所o-ló ê上帝ah，求你莫得靜靜；
2 因為pháiⁿ人ê嘴，kap奸詐ê嘴，in已經thí開攻擊我；
In用白賊ê舌對我講話。
3 In用怨恨ê話包圍我；
Koh無因端來攻擊我。
4 我疼in，in反tńg做我ê對敵；
獨獨我專務祈禱。
5 In對我用pháiⁿ報好，
用怨恨報仁愛。
6 願你派一个pháiⁿ人管轄伊，
派一个對敵khiā tī伊ê chiàⁿ-pêng。
7 伊受審判ê時，願伊出來受定罪；
願伊ê祈禱變做罪過。
8 願伊ê日子短少；
願別人得tio̍h伊ê職。
9 願伊ê kiáⁿ兒做孤兒，
伊ê bó͘做寡婦。
10 願伊ê kiáⁿ兒四界去求乞；
Tùi in拋荒ê所在出來討食。
11 願債主用計智取伊一切所有ê；
願生份人搶伊tio̍h-bòa所得tio̍h-ê。
12 願無人接續施恩hō͘伊；
願無人可憐伊ê孤兒。
13 願伊ê後裔斷絕，
In ê名字受擦滅，無傳tī 下代。
14 願伊ê祖公ê罪惡hō͘耶和華記得；
願伊ê老母ê罪過無得tio̍h擦消。
15 願hiahê罪惡常常tī耶和華ê面前，
致到伊滅in ê名tī世間。
16 因為伊無想tio̍h beh行憐憫；
反tńg窘迫hitê sòng-hiong困苦ê人，
Beh害死hiahê傷心ê人。
17 伊ài咒詛，咒詛就到tī伊；
伊m̄-ài祝福，祝福就離開伊遠遠。
18 伊用咒詛做衫來穿；
咒詛就親像水入伊ê腹內，
親像油入伊ê骨。
19 願chitê咒詛做伊穿tī身軀ê衣服，
做伊常常hâ ê腰帶。
20 這就是我ê對敵，kap用pháiⁿ話攻擊我ê神魂ê人，
Tùi耶和華hia所受ê報應。
21 主耶和華ah，求你因為你ê名好款待我；
因為你ê慈愛真好，求你牽救我。
22 因為我sòng-hiong、困苦，
我ê內心受傷。
23 我ê歲壽親像日影漸漸chhiâ；
我親像草蜢受趕出。
24 我因為禁食，腳頭u痠軟；
我ê肉消瘦，無潤澤。
25 我受in ê譭謗；
In看見我，就搖頭。
26 耶和華我ê上帝ah，求你幫贊我；
照你ê慈愛拯救我；
27 Hō͘ in知這是出tī你ê手；
是你耶和華所行ê事。
28 Chhut-chāi in咒詛，求你賜福；
In起來ê時，beh tú-tio̍h見笑，你ê奴僕beh歡喜。
29 願我ê對敵用凌辱做衫穿；
願in用in ê見笑做袍，moa身軀。
30 我beh用我ê嘴大大感謝耶和華；
我beh tī眾人ê中間o-ló伊。
31 因為伊beh khiā tī sòng-hiong人ê chiàⁿ-pêng，
Beh救伊脫離審判伊ê性命ê人。
1 Tāi-pi̍t ê si; kau hō͘ Ga̍k-koaⁿ.1) Góa só͘ o-ló ê Siōng-tè ah, kiû Lí bo̍h-tit chēng-chēng; 2 In-ūi pháiⁿ-lâng ê chhùi, kap kan-chà ê chhùi, in í-keng thí-khui kong-kek góa; In ēng pe̍h-chha̍t ê chi̍h tùi góa kóng-ōe. 3 In ēng oàn-hūn ê ōe pau-ûi góa; Koh bô in-toaⁿ lâi kong-kek góa. 4 Góa thiàⁿ--in, in hoán-tńg chòe góa ê tùi-te̍k; To̍k-to̍k góa choan-bū kî-tó. 5 In tùi góa ēng pháiⁿ pò hó, Ēng oàn-hūn pò jîn-ài. 6 Goān Lí phài chi̍t ê pháiⁿ-lâng koán-hat i, Phài chi̍t ê tùi-te̍k khiā tī i ê chiàⁿ-pêng. 7 I siū sím-phòaⁿ ê sî, goān i chhut-lâi siū tēng-chōe; Goān i ê kî-tó pìⁿ-chòe chōe-kòa. 8 Goān i ê ji̍t-chí té-chió; Goān pa̍t-lâng tit-tio̍h i ê chit. 9 Goān i ê kiáⁿ-jî chòe ko͘-jî, I ê bó͘ chòe kóaⁿ-hū. 10 Goān i ê kiáⁿ-jî sì-kòe khì kiû-khit; Tùi in pha-hng ê só͘-chāi chhut-lâi thó-chia̍h. 11 Goān chè-chú ēng kè-tì chhú i it-chhè só͘-ū--ê; Goān siⁿ-hūn-lâng chhiúⁿ i tio̍h-bòa só͘ tit-tio̍h--ê. 12 Goān bô lâng chiap-sio̍k si-un hō͘ i; Goān bô lâng khó-lîn i ê ko͘-jî. 13 Goān i ê hō͘-è toān-choa̍t, In ê miâ-jī siū chhat-bia̍t, bô thoân tī ē-tāi. 14 Goān i ê chó͘-kong ê chōe-ok hō͘ Iâ-hô-hoa kì-tit; Goān i ê lāu-bú ê chē-kòa bô tit-tio̍h chhat-siau. 15 Goān hiah ê chōe-ok siông-siông tī Iâ-hô-hoa ê bīn-chêng, Tì-kàu I bia̍t in ê miâ tī sè-kan. 16 In-ūi i bô siūⁿ-tio̍h beh kiâⁿ lîn-bín; Hoán-tńg khún-pek hit ê sòng-hiong khùn-khó͘ ê lâng, Beh hāi-sí hiah ê siong-sim ê lâng. 17 I ài chiù-chó͘, chiù-chó͘ chiū kàu tī i; I m̄-ài chiok-hok, chiok-hok chiū lī-khui i hn̄g-hn̄g. 18 I ēng chiù-chó͘ chòe saⁿ lâi chhēng; Chiù-chó͘ chiū chhin-chhiūⁿ chúi ji̍p i ê pak-lāi, Chhin-chhiūⁿ iû ji̍p i ê kut. 19 Goān chit ê chiù-chó͘ chòe i chhēng tī sin-khu ê i-ho̍k, Chòe i siông-siông hâ ê io-tòa. 20 Che chiū-sī góa ê tùi-te̍k, kap ēng pháiⁿ-ōe kong-kek góa ê sîn-hûn ê lâng, Tùi Iâ-hô-hoa hia só͘ siū ê pò-èng. 21 Chú Iâ-hô-hoa ah, kiû Lí in-ūi Lí ê miâ hó khoán-thāi góa; In-ūi Lí ê chû-ài chin-hó, kiû Lí khan-kiù góa. 22 In-ūi góa sòng-hiong, khùn-khó͘, Góa ê lāi-sim siū-siong. 23 Góa ê hè-siū chhin-chhiūⁿ ji̍t-iáⁿ chiām-chiām chhiâ; Góa chhin-chhiūⁿ chháu-meh siū kóaⁿ-chhut. 24 Góa in-ūi kìm-chia̍h, kha-thâu-u sng-nńg; Góa ê bah siau-sán, bô lūn-te̍k. 25 Góa siū in ê húi-pòng; In khòaⁿ-kìⁿ góa, chiū iô-thâu. 26 Iâ-hô-hoa góa ê Siōng-tè ah, kiû Lí pang-chān góa; Chiàu Lí ê chû-ài chín-kiù góa; 27 Hō͘ in chai che sī chhut tī Lí ê chhiú; Sī Lí Iâ-hô-hoa só͘ kiâⁿ ê sū. 28 Chhut-chāi in chiù-chó͘, kiû Lí sù-hok; In khí--lâi ê sî, beh tú-tio̍h kiàn-siàu, Lí ê lô͘-po̍k beh hoaⁿ-hí. 29 Goān góa ê tùi-te̍k ēng lêng-jio̍k chòe-saⁿ chhēng; Goān in ēng in ê kiàn-siàu chòe phàu, moa sin-khu. 30 Góa beh ēng góa ê chhùi tōa-tōa kám-siā Iâ-hô-hoa; Góa beh tī chèng-lâng ê tiong-kan o-ló I. 31 In-ūi I beh khiā tī sòng-hiong lâng ê chiàⁿ-pêng, Beh kiù i thoat-lī sím-phòaⁿ i ê sìⁿ-miā ê lâng.
1 大衛ê詩。1) 耶和華對我ê主講，你坐我ê右pêng，
Thèng候我hō͘你ê對敵做你ê腳踏。
2 耶和華beh tùi錫安伸出你有能力ê柺；
你tio̍h tī你對敵ê中間掌權。
3 你出軍ê日，你ê百姓beh用聖潔ê裝飾做衫，甘心獻家己；
你ê壯丁歸óa你，親像早起時所結ê露水。
4 耶和華已經chiù-chōa，的確無退悔，講，
你永遠做祭司，照Be̍k-ki-sé-tek ê班列。
5 Tī你chiàⁿ-pêng ê主，
當伊受氣ê日，beh phah敗列王。
6 伊beh tī列邦中來審判，伊beh hō͘身屍遍滿ta̍k所在；
伊beh tī chōe-chōe國phah破對敵ê頭殼。
7 伊beh lim路邊ê溪水；
因為án-ni，伊beh kia̍h起頭。
1 Tāi-pi̍t ê si.1) Iâ-hô-hoa tùi góa ê chú kóng, Lí chē Góa ê iū-pêng, Thèng-hāu Góa hō͘ lí ê tùi-te̍k chòe Lí ê kha-ta̍h. 2 Iâ-hô-hoa beh tùi Sek-an chhun-chhut lí ū lêng-le̍k ê koáiⁿ; Lí tio̍h tī lí tùi-te̍k ê tiong-kan chiáng-koân. 3 Lí chhut-kun ê ji̍t, lí ê peh-sìⁿ beh ēng sèng-kiat ê chng-thāⁿ chòe saⁿ, kam-sim hiàn ka-kī; Lí ê chòng-teng kui-óa lí, chhin-chhiūⁿ chá-khí-sî só͘ kiat ê lō͘-chúi. 4 Iâ-hô-hoa í-keng chiù-chōa, tek-khak bô thè-hóe, kóng, Lí éng-oán chòe chè-si, Chiàu Be̍k-ki-sé-tek ê pan-lia̍t. 5 Tī lí chiàⁿ-pêng ê Chú, Tng I siū-khì ê ji̍t, beh phah-pāi lia̍t-ông. 6 I beh tī lia̍t-pang-tiong lâi sím-phòaⁿ, I beh hō͘ sin-si piàn-móa ta̍k só͘-chāi; I beh tī chōe-chōe kok phah-phòa tùi-te̍k ê thâu-khak. 7 I beh lim lō͘-piⁿ ê khoe-chúi; In-ūi án-ni, i beh kia̍h-khí thâu.
1 Lín tio̍h o-ló耶和華。
Tī正直人ê會中，kap公會中，
我beh專心感謝耶和華。
2 耶和華ê所做真大，
凡若歡喜伊所做ê，lóng beh查考伊。
3 伊所行ê是尊貴威嚴；
伊ê義永永tī-teh。
4 伊行奇事，hō͘人記念；
耶和華有恩惠，有憐憫。
5 伊賞賜米糧hō͘敬畏伊ê人；
伊beh永遠記念伊ê約。
6 伊將伊大權能ê所做顯明tī伊ê百姓；
將列邦ê業賞賜in。
7 伊ê手所做是誠實公平；
伊ê教示lóng是確實。
8 是永世代堅固ê，
是照誠實正直設立ê。
9 伊ǹg伊ê百姓施行救贖；
伊定tio̍h伊ê約，直到永遠；
伊ê名是聖，thang驚畏。
10 敬畏耶和華是智慧ê根本；
見若照án-ni行ê，chiah有聰明；
耶和華ê名聲直到永遠。
1 Lín tio̍h o-ló Iâ-hô-hoa. Tī chèng-ti̍t lâng ê hōe-tiong, kap kong-hōe tiong, Góa beh choan-sim kám-siā Iâ-hô-hoa. 2 Iâ-hô-hoa ê só͘ chòe chin-tōa, Hoān-nā hoaⁿ-hí I só͘ chòe--ê, lóng beh chhâ-khó i. 3 I só͘ kiâⁿ--ê sī chun-kùi ui-giâm; I ê gī éng-éng tī-teh. 4 I kiâⁿ kî-sū, hō͘ lâng kì-liām; Iâ-hô-hoa ū un-hūi, ū lîn-bín. 5 I siúⁿ-sù bí-niû hō͘ kèng-ùi I ê lâng; I beh éng-oán kì-liām I ê iok. 6 I chiong I tōa koân-lêng ê só͘-chòe hián-bêng tī I ê peh-sìⁿ; Chiong lia̍t-pang ê gia̍p siúⁿ-sù in. 7 I ê chhiú só͘-chòe sī sêng-si̍t kong-pêng; I ê kà-sī lóng sī khak-si̍t. 8 Sī éng sè-tāi kian-kò͘--ê, Sī chiàu sêng-si̍t chèng-ti̍t siat-li̍p--ê. 9 I ǹg I ê peh-sìⁿ si-hêng kiù-sio̍k; I tiāⁿ-tio̍h I ê iok, ti̍t-kàu éng-oán; I ê miâ sī sèng, thang kiaⁿ-ùi. 10 Kèng-ùi Iâ-hô-hoa sī tì-hūi ê kun-pún; Kìⁿ-nā chiàu án-ni kiâⁿ-ê, chiah ū chhang-miâ; Iâ-hô-hoa ê miâ-siaⁿ ti̍t-kàu éng-oán.
1 Lín tio̍h o-ló耶和華。
敬畏耶和華，大歡喜伊ê命令ê，
Chit號人有福氣。
2 伊ê後裔tī世間的確強盛；
正直ê人ê後代，的確beh得tio̍h福氣。
3 伊ê家內有貨物，有錢財；
伊ê公義存到永遠。
4 正直ê人tī烏暗ê中間，有光為tio̍h伊發現；
伊有恩惠，有憐憫，有公義。
5 施恩來借人ê，有福氣；
伊受審判ê時，beh訴明家己ê事。
6 伊永永無搖choah；
義人受記念，直到永遠。
7 伊m̄驚pháiⁿ消息；
伊ê心堅固，óa靠耶和華。
8 伊ê心自在，lóng無驚惶，
直到伊看見伊ê對敵受報應。
9 伊大捨施，伊賑濟sòng-hiong人；
伊ê仁義存到永遠；
伊ê角得tio̍h舉起，有榮光。
10 Pháiⁿ人看了bōe-khat得，
的確咬牙切齒，來消滅；
Pháiⁿ人ê心願beh歸tī無。
1 Lín tio̍h o-ló Iâ-hô-hoa. Kèng-ùi Iâ-hô-hoa, tōa hoaⁿ-hí I ê bēng-lēng--ê, Chit-hō lâng ū hok-khì. 2 I ê hō͘-è tī sè-kan tek-khak kiông-sēng; Chèng-ti̍t ê lâng ê āu-tāi, tek-khak beh tit-tio̍h hok-khì. 3 I ê ke-lāi ū hè-mi̍h, ū chîⁿ-châi; I ê kong-gī chûn kàu éng-oán. 4 Chèng-ti̍t ê lâng tī o͘-àm ê tiong-kan, ū kng ūi-tio̍h i hoat-hiān; I ū un-hūi, ū lîn-bín, ū kong-gī. 5 Si-un lâi chioh lâng--ê, ū hok-khì; I siū sím-phòaⁿ ê sî, beh sò͘-bêng ka-kī ê sū. 6 I éng-éng bô iô-choah; Gī-lâng siū kì-liām, ti̍t-kàu éng-oán. 7 I m̄-kiaⁿ pháiⁿ siau-sit; I ê sim kian-kò͘, óa-khò Iâ-hô-hoa. 8 I ê sim chū-chāi, lóng bô kiaⁿ-hiâⁿ, Ti̍t-kàu i khòaⁿ-kìⁿ i ê tùi-te̍k siū pò-èng. 9 I tōa siá-si, i chín-chè sòng-hiong lâng; I ê jîn-gī chûn kàu éng-oán; I ê kak tit-tio̍h kú-khí, ū êng-kng. 10 Pháiⁿ-lâng khòaⁿ-liáu bōe-khat-tit, Tek-khak kā-gê chhiat-chhí, lâi siau-bia̍t; Pháiⁿ-lâng ê sim-goān beh kui tī bô.
1 Lín tio̍h o-ló耶和華。
耶和華ê奴僕ah，lín tio̍h o-ló，
O-ló耶和華ê名。
2 願耶和華ê名受o-ló，
Tùi chit時到永遠。
3 Tùi日出到日落ê所在，
耶和華ê名是應該o-ló-ê。
4 耶和華pôaⁿ過lóng總ê國，
伊ê榮光khah高tī chiahê天。
5 Chī-chūi親像耶和華咱ê上帝ah？
伊坐tī至koân ê所在ê。
6 伊家己謙卑，
觀看天頂地下ê tāi-chì。
7 伊tùi塵埃舉起sòng-hiong人，
Tùi糞埽堆提拔欠缺ê人；
8 Hō͘伊kap貴族相kap坐，
就是kap本國ê貴族相kap坐。
9 伊hō͘ bōe生育ê婦人人料理家；
做chōe-chōe kiáⁿ ê老母來歡喜。
Lín tio̍h o-ló耶和華。
1 Lín tio̍h o-ló Iâ-hô-hoa. Iâ-hô-hoa ê lô͘-po̍k ah, lín tio̍h o-ló, O-ló Iâ-hô-hoa ê miâ. 2 Goān Iâ-hô-hoa ê miâ siū o-ló, Tùi chit-sî kàu éng-oán. 3 Tùi ji̍t-chhut kàu ji̍t-lo̍h ê só͘-chāi, Iâ-hô-hoa ê miâ sī eng-kai o-ló--ê. 4 Iâ-hô-hoa pôaⁿ-kè lóng-chóng ê kok, I ê êng-kng khah-koâiⁿ tī chiah ê thiⁿ. 5 Chī-chūi chhin-chhiūⁿ Iâ-hô-hoa lán ê Siōng-tè ah? I chē tī chì-koâiⁿ ê só͘-chāi--ê. 6 I ka-kī khiam-pi, Koan-khòaⁿ thiⁿ-téng tōe-ē ê tāi-chì. 7 I tùi tîn-ai kú-khí sòng-hiong lâng, Tùi pùn-sò-tui thê-poa̍t khiàm-kheh ê lâng; 8 Hō͘ i kap kùi-cho̍k saⁿ-kap chē, Chiū-sī kap pún-kok ê kùi-cho̍k saⁿ-kap chē. 9 I hō͘ bōe seng-io̍k ê hū-jîn-lâng liāu-lí ke; Chòe chōe-chōe kiáⁿ ê lāu-bú lâi hoaⁿ-hí. Lín tio̍h o-ló Iâ-hô-hoa.
1 以色列出埃及。
雅各家離開言語bōe相通ê百姓；
2 Hit時偤大做伊ê聖所，
以色列做伊ê邦國。
3 大海看見就逃走，約旦河亦流倒tńg。
4 大山 tiô跳親像羊káng；
細山 tiô跳親像羊á-kiáⁿ。
5 大海ah，你為啥tāi-chì逃走？
約旦ah，你為啥tāi-chì流倒tńg？
6 大山ah，你怎樣tiô跳親像羊káng？
細山 ah，你怎樣tiô跳親像羊á-kiáⁿ？
7 地ah，你見tio̍h主ê面，
見tio̍h雅各ê上帝ê面，就tio̍h ngia̍uh-ngia̍uh-chhoah。
8 伊hō͘石磐變做水池，
Hō͘ tēng石變做水泉。
1 Í-sek-lia̍t chhut Ai-ki̍p. Ngá-kok-ke lī-khui giân-gú bōe siong-thong ê peh-sìⁿ; 2 Hit-sî Iû-tāi chòe I ê sèng-só͘, Í-sek-lia̍t chòe I ê pang-kok. 3 Tōa-hái khòaⁿ-kìⁿ chiū tô-cháu, Iok-tàn hô ia̍h lâu tò-tńg. 4 Tōa-soaⁿ tiô-thiàu chhin-chhiūⁿ iûⁿ-káng; Sòe-soaⁿ tiô-thiàu chhin-chhiūⁿ iûⁿ-á-kiáⁿ. 5 Tōa-hái ah, lí ūi siáⁿ tāi-chì tô-cháu? Iok-tàn ah, lí ūi siáⁿ tāi-chì lâu tò-tńg? 6 Tōa-soaⁿ ah, lí cháiⁿ-iūⁿ tiô-thiàu chhin-chhiūⁿ iûⁿ-káng? Sòe-soaⁿ ah, lí cháiⁿ-iūⁿ tiô-thiàu chhin-chhiūⁿ iûⁿ-á-kiáⁿ? 7 Tōe ah, lí kìⁿ-tio̍h Chú ê bīn, Kìⁿ-tio̍h Ngá-kok ê Siōng-tè ê bīn, chiū tio̍h ngia̍uh-ngia̍uh-chhoah. 8 I hō͘ chio̍h-pôaⁿ pìⁿ-chòe chúi-tî, Hō͘ tēng-chio̍h pìⁿ-chòe chúi-chôaⁿ.
1 耶和華ah，榮光莫得歸hō͘阮，莫得歸hō͘阮，
Tio̍h因為你ê慈愛kap誠實，歸tī你ê名。
2 Mih-sái tio̍h hō͘外邦人講，
Taⁿ，in ê上帝tī toh落？
3 總是阮ê上帝tī天頂；
Lóng照伊所ài-ê行tāi-chì。
4 In ê偶像是銀ê，金ê，
是人ê手所造ê。
5 In有嘴，亦bōe講話；
有目睭，亦bōe看；
6 In有耳孔，亦bōe聽；
有鼻孔，亦bōe鼻；
7 In有手，亦bōe the̍h；
有腳，亦bōe行；
In亦無用in ê嚨喉出聲。
8 造in-ê，靠in-ê，
Lóng beh親像in。
9 以色列ah，你tio̍h óa靠耶和華；
伊是in ê幫贊，in ê藤牌。
10 亞倫ê家ah，lín tio̍h óa靠耶和華；
伊是in ê幫贊，in ê藤牌。
11 Lín敬畏耶和華ê，tio̍h óa靠耶和華；
伊是in ê幫贊，in ê藤牌。
12 耶和華平時siàu念阮，伊beh賜福氣；
Beh賜福氣hō͘以色列ê家；
Beh賜福氣hō͘亞倫ê家。
13 見若敬畏耶和華ê人，
無論大細，伊beh賜福氣hō͘ in。
14 願耶和華加添lín，
加添lín kap lín ê kiáⁿ孫。
15 創造天地ê耶和華，
賞賜福氣hō͘ lín。
16 天是耶和華ê天，
地是伊hō͘世間人ê。
17 死人bōe能o-ló耶和華；
落到靜靜ê所在ê，亦lóng bōe能。
18 總是阮beh o-ló耶和華，
Tùi chit時到永遠。
Lín tio̍h o-ló耶和華。
1 Iâ-hô-hoa ah, êng-kng bo̍h-tit kui hō͘ goán, bo̍h-tit kui hō͘ goán, Tio̍h in-ūi Lí ê chû-ài kap sêng-si̍t, kui tī Lí ê miâ. 2 Mih-sái tio̍h hō͘ gōa-pang-lâng kóng, Taⁿ, in ê Siōng-tè tī toh-lo̍h? 3 Chóng-sī goán ê Siōng-tè tī thiⁿ-téng; Lóng chiàu I só͘-ài--ê kiâⁿ tāi-chì. 4 In ê ngó͘-siōng sī gûn--ê, kim--ê, Sī lâng ê chhiú só͘ chō--ê. 5 In ū chhùi, ia̍h bōe kóng-ōe; Ū ba̍k-chiu, ia̍h bōe khòaⁿ; 6 In ū hī-khang, ia̍h bōe thiaⁿ; Ū phīⁿ-khang, ia̍h bōe phīⁿ; 7 In ū chhiú, ia̍h bōe the̍h; Ū kha, ia̍h bōe kiâⁿ; In ia̍h bô ēng in ê nâ-âu chhut-siaⁿ. 8 Chō in ê, khò in ê, Lóng beh chhin-chhiūⁿ in. 9 Í-sek-lia̍t ah, lí tio̍h óa-khò Iâ-hô-hoa; I sī in ê pang-chān, in ê tîn-pâi. 10 A-lûn ê ke ah, lín tio̍h óa-khò Iâ-hô-hoa; I sī in ê pang-chān, in ê tîn-pâi. 11 Lín kèng-ùi Iâ-hô-hoa--ê, tio̍h óa-khò Iâ-hô-hoa; I sī in ê pang-chān, in ê tîn-pâi. 12 Iâ-hô-hoa pêng-sî siàu-liām goán, I beh sù hok-khì; Beh sù hok-khì hō͘ Í-sek-lia̍t ê ke; Beh sù hok-khì hō͘ A-lûn ê ke. 13 Kìⁿ-nā kèng-ùi Iâ-hô-hoa ê lâng, Bô-lūn tōa-sòe, I beh sù hok-khì hō͘ in. 14 Goān Iâ-hô-hoa ke-thiⁿ lín, Ke-thiⁿ lín kap lín ê kiáⁿ-sun. 15 Chhòng-chō thiⁿ tōe ê Iâ-hô-hoa, Siúⁿ-sù hok-khì hō͘ lín. 16 Thiⁿ sī Iâ-hô-hoa ê thiⁿ, Tōe sī I hō͘ sè-kan-lâng--ê. 17 Sí-lâng bōe-ōe o-ló Iâ-hô-hoa; Lo̍h kàu chēng-chēng ê só͘-chāi--ê, ia̍h lóng bōe-ōe. 18 Chóng-sī goán beh o-ló Iâ-hô-hoa, Tùi chit-sî kàu éng-oán. Lín tio̍h o-ló Iâ-hô-hoa.
1 我疼耶和華，因為伊聽我ê聲，我ê懇求。
2 伊已經àⁿ耳孔聽我；
所以我一世人beh求叫伊。
3 死無ê索纏tio̍h我，
陰間ê痛苦擒tio̍h我；
我tú-tio̍h患難憂苦。
4 我就求叫耶和華ê名，講，
耶和華ah，taⁿ求你救我ê性命。
5 耶和華有恩惠，有公義；
阮ê上帝有慈悲。
6 耶和華保護戇直ê人；
我到tī卑微ê地位，伊就救我。
7 我ê神魂ah，tio̍h歸tī你安歇ê所在，
因為耶和華用大恩款待你。
8 因為你救我ê性命免得死無；
救我ê目睭免流目屎；
救我ê腳免跋倒。
9 我beh tī耶和華ê面前，
行tī活人ê地。
10 我信，所以講；
我受極大ê困苦；
11 我bat著急來講，
人lóng是虛假。
12 耶和華賞賜我一切ê大恩，
我beh用甚麼報答伊？
13 我beh捧起救恩ê杯，
求叫耶和華ê名。
14 我beh tī伊眾百姓ê面前，
對耶和華謝我ê願。
15 耶和華看伊聖ê百姓ê死，
做真寶貝。
16 耶和華ah，我實在是你ê奴僕；
我是你ê奴僕，是你女婢ê kiáⁿ；
你已經tháu開綑縛我ê索。
17 我beh用感謝ê祭獻hō͘你；
Koh beh求叫耶和華ê名。
18 我beh tī伊眾百姓ê面前，
對耶和華謝我ê願。
19 Tī耶和華厝ê院內，
Tī你耶路撒冷ê中間；
Lín tio̍h o-ló耶和華。
1 Góa thiàⁿ Iâ-hô-hoa, In-ūi I thiaⁿ góa ê siaⁿ, góa ê khún-kiû. 2 I í-keng àⁿ hī-khang thiaⁿ góa; Só͘-í góa chi̍t-sì-lâng beh kiû-kiò I. 3 Sí-bô ê soh tîⁿ-tio̍h góa, Im-kan ê thòng-khó͘ khîⁿ-tio̍h góa; Góa tú-tio̍h hoān-lān iu-khó͘. 4 Góa chiū kiû-kiò Iâ-hô-hoa ê miâ, kóng, Iâ-hô-hoa ah, taⁿ kiû Lí kiù góa ê sìⁿ-miā. 5 Iâ-hô-hoa ū un-hūi, ū kong-gī; Goán ê Siōng-tè ū chû-pi. 6 Iâ-hô-hoa pó-hō͘ gōng-ti̍t ê lâng; Góa kàu tī pi-bî ê tōe-ūi, I chiū kiù góa. 7 Góa ê sîn-hûn ah, tio̍h kui tī lí an-hioh ê só͘-chāi, In-ūi Iâ-hô-hoa ēng tōa-un khoán-thāi lí. 8 In-ūi Lí kiù góa ê sìⁿ-miā bián-tit sí-bô; Kiù góa ê ba̍k-chiu bián lâu ba̍k-sái; Kiù góa ê kha bián poa̍h-tó. 9 Góa beh tī Iâ-hô-hoa ê bīn-chêng, Kiâⁿ tī oa̍h-lâng ê tōe. 10 Góa sìn, só͘-í kóng; Góa siū ke̍k-tōa ê khùn-khó͘; 11 Góa bat tio̍h-kip lâi kóng, Lâng lóng sī hu-ké. 12 Iâ-hô-hoa siúⁿ-sù góa it-chhè ê tōa-un, Góa beh ēng sím-mi̍h pò-tap I? 13 Góa beh phâng-khí kiù-un ê poe, Kiû-kiò Iâ-hô-hoa ê miâ. 14 Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān. 15 Iâ-hô-hoa khòaⁿ I sèng ê peh-sìⁿ ê sí, Chòe chin pó-pòe. 16 Iâ-hô-hoa ah, góa si̍t-chāi sī Lí ê lô͘-po̍k; Góa sī Lí ê lô͘-po̍k, sī Lí lú-pī ê kiáⁿ; Lí í-keng tháu-khui khún-pa̍k góa ê soh. 17 Góa beh ēng kám-siā ê chè hiàn hō͘ Lí; Koh beh kiû-kiò Iâ-hô-hoa ê miâ. 18 Góa beh tī I chèng peh-sìⁿ ê bīn-chêng, Tùi Iâ-hô-hoa siā góa ê goān. 19 Tī Iâ-hô-hoa chhù ê īⁿ-lāi, Tī lí Iâ-lō͘-sat-léng ê tiong-kan; Lín tio̍h o-ló Iâ-hô-hoa.
1 萬國ah，lín tio̍h o-ló耶和華；
萬百姓ah，lín tio̍h稱呼伊。
2 因為伊對咱大施慈愛；
耶和華ê誠實永遠tī-teh。
Lín tio̍h o-ló耶和華。
1 Ban-kok ah, lín tio̍h o-ló Iâ-hô-hoa; Bān peh-sìⁿ ah, lín tio̍h chheng-hō͘ I. 2 In-ūi I tùi lán tōa si chû-ài; Iâ-hô-hoa ê sêng-si̍t éng-oán tī-teh. Lín tio̍h o-ló Iâ-hô-hoa.
1 Lín tio̍h感謝耶和華，因為伊是好；
因為伊ê慈愛永遠tī-teh。
2 願以色列講，
伊ê慈愛永遠tī-teh。
3 願亞倫ê家講，
伊ê慈愛永遠tī-teh。
4 願敬畏耶和華ê人講，
伊ê慈愛永遠tī-teh。
5 我tī危急ê中間求叫耶和華；
耶和華就應我，將我hē tī寬闊ê所在。
6 有耶和華kap我tī-teh，我就無驚；
人beh啥法得我ta-ôa？
7 Tī hiahê幫贊我ê ê中間，有耶和華kap我tī-teh；
所以我beh看見hiahê怨恨我ê人受報應。
8 Óa靠耶和華，
比óa靠人khah好。
9 Óa靠耶和華，
比óa靠王親khah好。
10 萬百姓圍纍我；
我óa靠耶和華ê名，beh剿滅in。
11 In圍我，困我；
我óa靠耶和華ê名，beh剿滅in。
12 In親像蜂圍我；
親像燒刺phè ê火，受phah-hoa。
我óa靠耶和華ê名beh剿滅in。
13 你出力chhia我，beh hō͘我倒；
總是耶和華幫贊我。
14 耶和華是我ê氣力，是我ê詩歌；
伊亦成做拯救我ê。
15 Tī義人ê布棚內有歡喜ê聲，拯救ê聲；
耶和華ê chiàⁿ手施出大權能。
16 耶和華ê chiàⁿ手kia̍h高；
耶和華ê chiàⁿ手施出大權能。
17 我bōe致到死，iáu能活teh；
續beh報揚耶和華ê所做。
18 耶和華bat嚴嚴警戒我；
總是未有將我交tī死無。
19 Tio̍h kā我開義ê門；
我beh入去，感謝耶和華。
20 這是耶和華ê門，
義ê人beh入去。
21 我beh感謝你，因為你已經應我；
Koh成做拯救我ê。
22 師傅所棄sak ê石，
已經成做厝角頭ê石。
23 這是耶和華所做ê，
咱ê目睭看伊做奇怪。
24 這是耶和華所定tio̍h ê日；
咱tī chit日ê中間beh歡喜快樂。
25 耶和華ah，taⁿ求你拯救；
耶和華ah，taⁿ求你hō͘阮發達。
26 奉耶和華ê名來ê，應該得tio̍h福氣；
阮tùi耶和華ê厝kā lín祝福。
27 耶和華是上帝，伊ê光照阮；
Tio̍h用索縛祭祀ê cheng-siⁿ到壇角。
28 你是我ê上帝，我beh感謝你；
你是我ê上帝，我beh尊你做高。
29 Lín tio̍h感謝耶和華，因為伊是好；
因為伊ê慈愛永遠tī-teh。
1 Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh. 2 Goān Í-sek-lia̍t kóng, I ê chû-ài éng-oán tī-teh. 3 Goān A-lûn ê ke kóng, I ê chû-ài éng-oán tī-teh. 4 Goān kèng-ùi Iâ-hô-hoa ê lâng kóng, I ê chû-ài éng-oán tī-teh. 5 Góa tī gûi-kip ê tiong-kan kiû-kiò Iâ-hô-hoa; Iâ-hô-hoa chiū ìn góa, chiong góa hē tī khoan-khoah ê só͘-chāi. 6 Ū Iâ-hô-hoa kap góa tī-teh, góa chiū bô kiaⁿ; Lâng beh siáⁿ hoat-tit góa ta-ôa? 7 Tī hiah ê pang-chān góa--ê ê tiong-kan, ū Iâ-hô-hoa kap góa tī-teh; Só͘-í góa beh khòaⁿ-kìⁿ hiah ê oàn-hūn góa ê lâng siū pò-èng. 8 Óa-khò Iâ-hô-hoa, Pí óa-khò lâng khah-hó. 9 Óa-khò Iâ-hô-hoa, Pí óa-khò ông-chhin khah-hó. 10 Bān peh-sìⁿ ûi-lûi góa; Góa óa-khò Iâ-hô-hoa ê miâ, beh châu-bia̍t in. 11 In ûi--góa, khùn--góa; Góa óa-khò Iâ-hô-hoa ê miâ, beh châu-bia̍t in. 12 In chhin-chhiūⁿ phang ûi góa; Chhin-chhiūⁿ sio chhì-phè ê hé, siū phah-hoa. Góa óa-khò Iâ-hô-hoa ê miâ beh châu-bia̍t in. 13 Lí chhut-la̍t chhia góa, beh hō͘ góa tó; Chóng-sī Iâ-hô-hoa pang-chān góa. 14 Iâ-hô-hoa sī góa ê khùi-la̍t, sī góa ê si-koa; I ia̍h chiâⁿ-chòe chín-kiù góa ê. 15 Tī gī-lâng ê pò͘-pîⁿ-lāi ū hoaⁿ-hí ê siaⁿ, chín-kiù ê siaⁿ; Iâ-hô-hoa ê chiàⁿ-chhiú si-chhut tōa koân-lêng. 16 Iâ-hô-hoa ê chiàⁿ-chhiú kia̍h-koâiⁿ; Iâ-hô-hoa ê chiàⁿ-chhiú si-chhut tōa koân-lêng. 17 Góa bōe tì-kàu sí, iáu ōe oa̍h-teh; Sòa beh pò-iông Iâ-hô-hoa ê só͘-chòe. 18 Iâ-hô-hoa bat giâm-giâm kéng-kài góa; Chóng-sī bē ū chiong góa kau tī sí-bô. 19 Tio̍h kā góa khui gī ê mn̂g; Góa beh ji̍p--khì, kám-siā Iâ-hô-hoa. 20 Che sī Iâ-hô-hoa ê mn̂g, Gī ê lâng beh ji̍p--khì. 21 Góa beh kám-siā Lí, in-ūi Lí í-keng ìn góa; Koh chiâⁿ-chòe chín-kiù góa--ê. 22 Sai-hū só͘ khì-sak ê chio̍h, Í-keng chiâⁿ-chòe chhù-kak-thâu ê chio̍h. 23 Che sī Iâ-hô-hoa só͘-chòe--ê, Lán ê ba̍k-chiu khòaⁿ i chòe kî-koài. 24 Che sī Iâ-hô-hoa só͘ tiāⁿ-tio̍h ê ji̍t; Lán tī chit-ji̍t ê tiong-kan beh hoaⁿ-hí khoài-lo̍k. 25 Iâ-hô-hoa ah, taⁿ kiû Lí chín-kiù; Iâ-hô-hoa ah, taⁿ kiû Lí hō͘ goán hoat-ta̍t. 26 Hōng Iâ-hô-hoa ê miâ lâi--ê, eng-kai tit-tio̍h hok-khì; Goán tùi Iâ-hô-hoa ê chhù kā lín chiok-hok. 27 Iâ-hô-hoa sī Siōng-tè, I ê kng chiò goán; Tio̍h ēng soh pa̍k chè-sū ê cheng-siⁿ kàu tôaⁿ-kak. 28 Lí sī góa ê Siōng-tè, góa beh kám-siā Lí; Lí sī góa ê Siōng-tè, góa beh chun Lí chòe koâiⁿ. 29 Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh.
1 所行完全，遵thàn耶和華律法ê，
Chit號人有福氣。
2 遵守伊干證ê話，
專心chhē伊ê，chit號人有福氣。
3 In無做不義ê事；
In遵thàn伊ê道路。
4 你bat將你教示ê話吩咐阮；
是ài阮慇勤遵守。
5 願我ê趨向定tio̍h，
來守你ê律例。
6 我對重你一切ê誡命，
就不致見笑。
7 我學習你公義ê判斷，
就beh用正直ê心感謝你。
8 我beh守你ê律例；
求你m̄-thang一盡放sak我。
9 少年人tio̍h用甚麼來清氣伊ê所行？
是tio̍h照你ê話來細膩行。
10 我專心chhē你；
求你m̄-thang hō͘我迷路離開你ê誡命。
11 我將你ê言語khǹg tī我ê心內，
免得我得罪你。
12 耶和華ah，你是應該受o-ló-ê；
求你將你ê律例教示我。
13 你所講一切ê判詞，
我用嘴唇報揚伊。
14 我歡喜你干證ê路，
親像歡喜一切ê財物。
15 我beh靜靜想你教示ê話，
亦beh注重你ê道路。
16 我beh tī你ê律例中家己快樂，
我無bōe記得你ê話。
17 求你用大恩款待你ê奴僕，hō͘我得tio̍h活；
我就beh守你ê話。
18 求你開我ê目睭，
Hō͘我看出你律法中ê奇妙。
19 我tī地上是做寄腳ê；
求你m̄-thang對我隱密你ê誡命。
20 我ê心爆裂，
因為時常切切欣慕你ê判詞。
21 你責備驕傲受咒詛ê人，
就是迷路離開你ê誡命ê人。
22 求你kā我除去凌辱kap看輕，
因為我守你干證ê話。
23 貴族坐teh，lām-sám議論我；
但是你ê奴僕靜靜想你ê律例。
24 你干證ê話是我所歡喜ê，
是我ê謀士。
25 我ê性命kha̍h-tiâu tī土粉，
求你，照你ê話，拯救我活。
26 我講起我所行ê路，你應我；
求你將你ê律例教示我。
27 求你hō͘我明白你教示ê路，
我就靜靜想你ê奇事。
28 我ê心神因為憂苦來消溶；
求你，照你ê話，hō͘我勇健。
29 求你hō͘我離開奸詐ê路，
將你ê律法恩賜我。
30 我有揀信實ê路，
將你ê判詞hē tī我ê面前。
31 我戀慕你干證ê話；
耶和華ah，求你m̄-thang hō͘我見笑。
32 你開闊我ê心ê時，
我就走tī你誡命ê路。
33 耶和華ah，求你將你律例ê路指示我；
我beh徹底遵守。
34 求你hō͘我智慧，我就守你ê律法；
Koh beh專心執守。
35 求你hō͘我行你誡命ê路，
因為chitê路是我所歡喜ê。
36 求你hō͘我ê心ǹg你干證ê話，
無ǹg不義ê錢財。
37 求你hō͘我ê目睭oa̍t走，無看虛假；
Koh hō͘我tī你ê路中來活。
38 你ê奴僕敬畏你，
求你為伊堅固你ê話。
39 求你hō͘我所kiaⁿ ê凌辱離開我；
因為你ê判詞是好。
40 我欣慕你教示ê話；
求你，tī你ê公義，hō͘我來活。
41 耶和華ah，願你照你ê話，
Hō͘你ê慈愛，就是你ê救恩，臨到我。
42 我就有ōe-thang應hitê凌辱我ê；
因為我óa靠你ê話。
43 求你hō͘真理ê話無一盡離開我ê嘴；
因為我ǹg望你ê判斷。
44 我beh常常守你ê律法，
直到永遠。
45 我beh行tī寬闊ê所在，
因為我有講究你教示ê話。
46 我亦beh tī君王ê面前講論你干證ê話，
亦無致到見笑。
47 我beh tī你ê誡命中家己快樂；
Chiahê誡命平素是我所疼惜ê。
48 我疼惜你ê誡命，我beh對伊kia̍h起手；
你ê律例我亦beh靜靜想伊。
49 求你記得對你ê奴僕所應允ê話，
因為你bat hō͘我有ǹg望。
50 你ê話將我救活，
我tī患難中tùi這得tio̍h安慰。
51 驕傲ê人盡在侮慢我；
總是我bē-bat偏離你ê律法。
52 耶和華ah，我記念你tùi早以來ê判詞，
就家己得tio̍h安慰。
53 我因為棄sak你ê律法ê pháiⁿ人，
就大受氣，親像火to̍h。
54 我tī寄腳ê厝，
平時用你ê律例做詩歌。
55 耶和華ah，我暝間記念你ê名，
守你ê律法。
56 我得tio̍h án-ni，
是因為我守你教示ê話。
57 耶和華是我ê基業，
我bat講，我beh守你ê話。
58 我bat專心求你ê恩，
願你照你ê話憐憫我。
59 我深深想我所行ê路，
就oa̍t-tńg腳ǹg你干證ê話。
60 我守你ê誡命，
趕緊無延chhiân。
61 Pháiⁿ人ê索縛纏我；
總是我無bōe記得你ê律法。
62 我因為你公義ê判斷，
半暝beh起來感謝你。
63 見若敬畏你，kap守你ê教示ê人，
我kap in做伴。
64 耶和華ah，你ê慈愛遍滿地面；
求你將你ê律例教示我。
65 耶和華ah，你bat好款待你ê奴僕，
是照你所講ê話。
66 求你將好ê聰明kap知識，教示我；
因為我信你ê誡命。
67 我bē受苦以前，有行迷路；
總是我taⁿ守你ê話。
68 你是好，所行亦是好；
求你將你ê律例教示我。
69 驕傲ê人造作無影話，攻擊我；
總是我beh專心守你ê教示。
70 In ê心鈍，親像油包密；
總是我歡喜你ê律法。
71 我有受苦，是做我ê利益；
因為beh hō͘我學習你ê律例。
72 你所講ê律法是做我ê利益；
贏過千萬ê金銀。
73 你ê手創造我，chhiâⁿ-tî我；
求你hō͘我智慧，thang學習你ê誡命。
74 敬畏你ê人看見我就beh歡喜；
因為tī你ê話，我有ǹg望。
75 耶和華ah，我知你ê判斷是公義；
你hō͘我受苦是對tī信實。
76 求你用你ê慈愛安慰我；
照你對你ê奴僕所講ê話。
77 願你ê慈悲臨到我，hō͘我活；
因為你ê律法是我所歡喜ê。
78 願驕傲ê人受見笑，因為in無理由枉屈我；
總是我beh靜靜想你ê教示。
79 願敬畏你ê人歸向我；
In就知你干證ê話。
80 願我ê心完全守你ê律例，
Hō͘我不致見笑。
81 我ê心神欣慕你ê救恩到暈去；
總是tī你ê話，我有ǹg望。
82 我因為ǹg望你ê話，目睭花，
講，你甚麼時beh安慰我？
83 因為我親像tī火薰中ê皮袋；
總是我無bōe記得你ê律例。
84 你ê奴僕ê日子有jōa-chōe ah？
你beh tī時審判窘迫我ê人。
85 驕傲ê人，就是無thàn你ê律法-ê，
掘陷坑，beh害我。
86 你ê誡命一盡誠實；in無因端窘迫我；
求你幫贊我。
87 In險險滅無我tī世間；
總是我無放sak你ê教示。
88 求你照你ê慈愛hō͘我活；
我就beh守你ê嘴干證ê話。
89 耶和華ah，你ê話安定tī天裡，
直到永遠。
90 你ê誠實存到萬代；
你建立地，地就長長tī-teh。
91 照你ê定例，in到taⁿ iáu tī-teh；
因為萬物lóng是你ê差用。
92 我若m̄是歡喜你ê律法，
就早早tī我ê苦難中滅無lah。
93 我永永無bōe記得你ê教示；
因為你用這hō͘我活。
94 我是你ê，求你救我；
因為我chhē你ê教示。
95 Pháiⁿ人當等我，beh滅無我，
總是我beh講究你干證ê話。
96 我看所有ê完全，lóng是有限；
獨獨你ê命令極其開闊。
97 我疼惜你ê律法到怎樣ah！
我thong日靜靜想。
98 你ê誡命常常kap我tī-teh，
Hō͘我比我ê對敵khah有智慧。
99 我比我lóng總ê先生khah通達；
因為我靜靜想你干證ê話。
100 我比老人khah明白，
因為我守你ê教示。
101 我禁我ê腳，一切ê pháiⁿ路無行；
Hō͘我thang守你ê話。
102 我無偏離你ê判斷；
因為你有教示我。
103 你ê話tī我ê chiūⁿ-kiuⁿ到jōa甜！
Tī我ê嘴，比蜜khah甜。
104 我tùi你ê教示得tio̍h明白；
所以我怨恨一切ê斜路。
105 你ê話做我腳前ê燈，
做我路上ê光。
106 你公義ê判斷，我bat chiù-chōa beh遵守；
我決斷án-ni行。
107 我受苦到極；
耶和華ah，求你照你ê話hō͘我活。
108 耶和華ah，求你鑒納我ê嘴所歡喜獻ê o-ló，
Koh將你ê判詞教示我。
109 我ê性命常常tú-tio̍h危險；
Iáu-kú我無bōe記得你ê律法。
110 Pháiⁿ人設羅網beh害我；
總是我無偏離你ê教示。
111 我將你干證ê話，做永遠ê基業；
因為這是我心內所歡喜ê。
112 我hō͘我ê心專ǹg你ê律例；
永遠遵thàn，直到路尾。
113 兩樣心ê人是我所痛恨；
獨獨你ê律法是我所疼惜。
114 你是我閃bih ê所在，koh是我ê藤牌；
我tī你ê話有ǹg望。
115 做pháiⁿ ê人ah，lín tio̍h離開我；
Hō͘我thang守我ê上帝ê誡命。
116 求你照你ê話扶持我，hō͘我活；
亦無hō͘我因為所ǹg望ê來見笑。
117 求你扶持我，我就得救；
我beh常常對重你ê律例。
118 見若行叉路，離開你ê律例ê人，你看輕in；
因為in ê詭詐是虛假。
119 世間ê pháiⁿ人，你lóng kā in除去，親像渣滓；
因為án-ni，我疼惜你干證ê話。
120 我因為驚畏你，我ê肉就chhoah；
你ê判斷亦hō͘我驚惶。
121 我秉公行義；
求你m̄-thang將我放hō͘壓制我ê人。
122 求你保認你ê奴僕，thang得tio̍h好境遇；
莫得hō͘驕傲ê人壓制我。
123 我因為ǹg望你ê救恩，kap你公義ê話，
致到目睭花。
124 求你照你ê慈愛款待你ê奴僕；
將你ê律例教示我。
125 我是你ê奴僕，求你hō͘我智慧；
Hō͘我會知你干證ê話。
126 現今當是耶和華行tāi-chì ê時；
因為人廢無你ê律法。
127 所以我疼惜你ê誡命，
贏過金，亦贏過好金。
128 所以你一切ê教示，萬事，我lóng掠做正直；
Koh我怨恨一切ê 斜路。
129 你干證ê話是奇妙；
所以我ê心謹慎執守。
130 你ê話一下開拆，就發出光，
Hō͘戇人通達。
131 我開嘴直直喘；
因為我切切欣慕你ê誡命。
132 求你oa̍t-tńg ǹg我，憐憫我；
親像你平常款待hiahê敬愛你ê名ê人。
133 求你用你ê話hō͘我ê腳步穩當；
莫容允甚麼罪惡管轄我。
134 求你救贖我，脫離人ê壓制，
我就beh守你ê教示。
135 願你hō͘你ê面ê光照你ê奴僕；
Koh將你ê律例教示我。
136 我ê目屎親像溪水teh流；
因為in無守你ê律法。
137 耶和華，你是公義ê；
你ê判斷亦是正直ê。
138 你所命令干證ê話，是照公義，
極其誠實。
139 我ê心熱，親像火燒滅我；
因為我ê對敵bōe記得你ê話。
140 你ê話鍛鍊到真精；
所以你ê奴僕真意愛。
141 我卑微，hō͘人看輕，
總是我無bōe記得你ê教示。
142 你ê公義是永遠ê公義；
你ê律法是真實。
143 我tú-tio̍h患難憂苦；
總是你ê誡命是我所歡喜ê。
144 你干證ê話永遠是公義；
求你hō͘我智慧，我就會活。
145 耶和華ah，我專心求叫你，求你應我；
我beh謹慎守你ê律例。
146 我對你求叫，求你救我；
我就beh守你干證ê話。
147 我thàn天 bē光求叫你；
Tī你ê話我有ǹg望。
148 暝時，更iáu未深，我ê目睭已經nih開；
因為beh靜靜想你ê話。
149 求你照你ê慈愛，聽我ê聲；
耶和華ah，求你將你ê判斷，hō͘我能活。
150 慣練行pháiⁿ ê人逼óa來；
In離開你ê律法遠遠。
151 耶和華ah，你是近近；
你ê誡命lóng是真實。
152 我講究你干證ê話，早早已經知，
是你立定到永遠ê。
153 求你看顧我ê苦難，來牽救goa；
因為我無bōe記得你ê律法。
154 求你kā我伸冤，救贖我；
照你ê話hō͘我活。
155 救恩離開pháiⁿ人遠遠；
因為in無chhē你ê律例。
156 耶和華ah，你ê慈悲是大；
求你照你ê判斷hō͘我活。
157 窘迫我ê，抵敵我ê，真chōe，
總是我無偏離你干證ê話。
158 我看見奸惡ê人，就真厭惡；
因為in無守你ê話。
159 你看我怎樣疼惜你ê教示；
耶和華ah，求你照你ê慈愛hō͘我活。
160 你ê話ê總根頭是真實；
你一切公義ê判斷是永遠tī-teh。
161 貴族無因端窘迫我；
總是我ê心驚畏你ê話。
162 我歡喜你ê話，
親像人得tio̍h chōe-chōe 刣贏ê物。
163 白賊話是我所痛恨，所厭賤ê；
你ê律法是我所疼惜-ê。
164 我因為你公義ê判斷，
Ta̍k日七pái o-ló你。
165 疼惜你ê律法ê人有大平安，
無一項能纏絆in ê腳。
166 耶和華ah，我有teh ǹg望你ê救恩，
有行你ê誡命。
167 我ê心有守你干證ê話，
Chiahê話，我盡在意愛。
168 我有守你ê教示，kap你干證ê話；
因為我一切所行ê，lóng tī你ê面前。
169 耶和華ah，願我求叫ê聲透到你ê面前；
求你照你ê話，賞賜我智慧。
170 願我懇求ê話到你ê面前；
求你照你ê話牽救我。
171 願我ê嘴唇發出o-ló ê話，
因為你將你ê律例教示我。
172 願我ê舌唱歌o-ló你ê話；
因為你一切ê誡命lóng是公義。
173 願你伸手幫贊我；
因為我有揀你ê教示。
174 耶和華ah，我切切欣慕你ê救恩；
你ê律法亦是我所歡喜ê。
175 願我活teh，我ê神魂就beh o-ló你；
願你ê判斷幫贊我。
176 我迷路親像phah-m̄見ê羊；求你chhē你ê奴僕；
因為我無bōe記得你ê誡命。
1 Só͘ kiâⁿ oân-choân, chun-thàn Iâ-hô-hoa lu̍t-hoat ê, Chit-hō lâng ū hok-khì. 2 Chun-siú I kan-chèng ê ōe, Choan-sim chhē I--ê, chit-hō lâng ū hok-khì. 3 In bô chòe put-gī ê sū; In chun-thàn I ê tō-lō͘. 4 Lí bat chiong Lí kà-sī ê ōe hoan-hù goán; Sī ài goán un-khûn chun-siú. 5 Goān góa ê chhu-hiòng tiāⁿ-tio̍h, Lâi siú Lí ê lu̍t-lē. 6 Góa tùi-tiōng Lí it-chhè ê kài-bēng, Chiū put-tì kiàn-siàu. 7 Góa ha̍k-si̍p Lí kong-gī ê phòaⁿ-toàn, Chiū beh ēng chèng-ti̍t ê sim kám-siā Lí. 8 Góa beh siú Lí ê lu̍t-lē; Kiû Lí m̄-thang it-chīn pàng-sak góa. 9 Siàu-liân lâng tio̍h ēng sím-mi̍h lâi chheng-khì i ê só͘-kiâⁿ? Sī tio̍h chiàu Lí ê ōe lâi sòe-jī kiâⁿ. 10 Góa choan-sim chhē Lí; Kiû Lí m̄-thang hō͘ góa bê-lō͘ lī-khui Lí ê kài-bēng. 11 Góa chiong Lí ê giân-gú khǹg tī góa ê sim-lāi, Bián-tit góa tek-chōe Lí. 12 Iâ-hô-hoa ah, Lí sī eng-kai siū o-ló--ê; Kiû Lí chiong Lí ê lu̍t-lē kà-sī góa. 13 Lí só͘ kóng it-chhè ê phòaⁿ-sû, Góa ēng chhùi-tûn pò-iông--i. 14 Góa hoaⁿ-hí Lí kan-chèng ê lō͘, Chhin-chhiūⁿ hoaⁿ-hí it-chhè ê châi-bu̍t. 15 Góa beh chēng-chēng siūⁿ Lí kà-sī ê ōe, Ia̍h beh chù-tiōng Lí ê tō-lō͘. 16 Góa beh tī Lí ê lu̍t-lē-tiong ka-kī khoài-lo̍k, Góa bô bōe-kì-tit Lí ê ōe. 17 Kiû Lí ēng tōa-un khoán-thāi Lí ê lô͘-po̍k, hō͘ góa tit-tio̍h oa̍h; Góa chiū beh siú Lí ê ōe. 18 Kiû Lí khui góa ê ba̍k-chiu, Hō͘ góa khòaⁿ-chhut Lí lu̍t-hoat-tiong ê kî-biāu. 19 Góa tī tōe-chiūⁿ sī chòe kià-kha--ê; Kiû Lí m̄-thang tùi góa ún-ba̍t Lí ê kài-bēng. 20 Góa ê sim piak-li̍h, In-ūi sî-siông chhiat-chhiat him-bō͘ Lí ê phòaⁿ-sû. 21 Lí chek-pī kiau-ngō͘ siū chiù-chó͘ ê lâng, Chiū-sī bê-lō͘ lī-khui Lí ê kài-bēng ê lâng. 22 Kiû Lí kā góa tû--khì lêng-jio̍k kap khòaⁿ-khin, In-ūi góa siú Lí kan-chèng ê ōe. 23 Kùi-cho̍k chē-teh, lām-sám gī-lūn góa; Nā-sī Lí ê lô͘-po̍k chēng-chēng siūⁿ Lí ê lu̍t-lē. 24 Lí kan-chèng ê ōe sī góa só͘ hoaⁿ-hí--ê, Sī góa ê bô͘-sū. 25 Góa ê sìⁿ-miā kha̍h-tiâu tī thô͘-hún, Kiû Lí, chiàu Lí ê ōe, chín-kiù góa oa̍h. 26 Góa kóng-khí góa só͘ kiâⁿ ê lō͘, Lí ìn góa; Kiû Lí chiong Lí ê lu̍t-lē kà-sī góa. 27 Kiû Lí hō͘ góa bêng-pe̍k Lí kà-sī ê lō͘, Góa chiū chēng-chēng siūⁿ Lí ê kî-sū. 28 Góa ê sim-sîn in-ūi iu-khó͘ lâi siau-iûⁿ; Kiû Lí, chiàu Lí ê ōe, hō͘ góa ióng-kiāⁿ. 29 Kiû Lí hō͘ góa lī-khui kan-chà ê lō͘, Chiong Lí ê lu̍t-hoat un-sù góa. 30 Góa ū kéng sìn-si̍t ê lō͘, Chiong Lí ê phòaⁿ-sû hē tī góa ê bīn-chêng. 31 Góa loân-bō͘ Lí kan-chèng ê ōe; Iâ-hô-hoa ah, kiû Lí m̄-thang hō͘ góa kiàn-siàu. 32 Lí khui-khoah góa ê sim ê sî, Góa chiū cháu tī Lí kài-bēng ê lō͘. 33 Iâ-hô-hoa ah, kiû Lí chiong Lí lu̍t-lē ê lō͘ chí-sī góa; Góa beh thiat-tí chun-siú. 34 Kiû Lí hō͘ góa tì-hūi, góa chiū siú Lí ê lu̍t-hoat; Koh beh choan-sim chip-siú. 35 Kiû Lí hō͘ góa kiâⁿ Lí kài-bēng ê lō͘, In-ūi chit ê lō͘ sī góa só͘ hoaⁿ-hí ê. 36 Kiû Lí hō͘ góa ê sim ǹg Lí kan-chèng ê ōe, Bô ǹg put-gī ê chîⁿ-châi. 37 Kiû Lí hō͘ góa ê ba̍k-chiu oa̍t-cháu, bô khòaⁿ hu-ké; Koh hō͘ góa tī Lí ê lō͘-tiong lâi oa̍h. 38 Lí ê lô͘-po̍k kèng-ùi Lí, Kiû Lí ūi i kian-kò͘ Lí ê ōe. 39 Kiû Lí hō͘ góa só͘ kiaⁿ ê lêng-jio̍k lī-khui góa; In-ūi Lí ê phòaⁿ-sû sī hó. 40 Góa him-bō͘ Lí kà-sī ê ōe; Kiû Lí, tī Lí ê kong-gī, hō͘ góa lâi oa̍h. 41 Iâ-hô-hoa ah, goān Lí chiàu Lí ê ōe, Hō͘ Lí ê chû-ài, chiū-sī Lí ê kiù-un, lîm-kàu góa. 42 Góa chiū ū ōe thang ìn hit ê lêng-jio̍k góa--ê; In-ūi góa óa-khò Lí ê ōe. 43 Kiû Lí hō͘ chin-lí ê ōe bô it-chīn lī-khui góa ê chhùi; In-ūi góa ǹg-bāng Lí ê phòaⁿ-toàn. 44 Góa beh siông-siông siú Lí ê lu̍t-hoat, Ti̍t-kàu éng-oán. 45 Góa beh kiâⁿ tī khoan-khoah ê só͘-chāi, In-ūi góa ū káng-kiù Lí kà-sī ê ōe. 46 Góa ia̍h beh tī kun-ông ê bīn-chêng káng-lūn Lí kan-chèng ê ōe, Ia̍h bô tì-kàu kiàn-siàu. 47 Góa beh tī Lí ê kài-bēng-tiong ka-kī khoài-lo̍k; Chiah ê kài-bēng pêng-sò͘ sī góa só͘ thiàⁿ-sioh--ê. 48 Góa thiàⁿ-sioh Lí ê kài-bēng, góa beh tùi i kia̍h-khí chhiú; Lí ê lu̍t-lē góa ia̍h beh chēng-chēng siūⁿ i. 49 Kiû Lí kì-tit tùi Lí ê lô͘-po̍k só͘ èng-ún ê ōe, In-ūi Lí bat hō͘ góa ū ǹg-bāng. 50 Lí ê ōe chiong góa kiù-oa̍h, Góa tī hoān-lān-tiong tùi che tit-tio̍h an-ùi. 51 Kiau-ngō͘ ê lâng chīn-chāi bú-bān góa; Chóng-sī góa bē-bat phian-lī Lí ê lu̍t-hoat. 52 Iâ-hô-hoa ah, góa kì-liām Lí tùi chá í-lâi ê phòaⁿ-sû, Chiū ka-kī tit-tio̍h an-ùi. 53 Góa in-ūi khì-sak Lí ê lu̍t-hoat ê pháiⁿ-lâng, Chiū tōa siū-khì, chhin-chhiūⁿ hé to̍h. 54 Góa tī kià-kha ê chhù, Pêng-sî ēng Lí ê lu̍t-lē chòe si-koa. 55 Iâ-hô-hoa ah, góa mî-kan kì-liām Lí ê miâ, Siú Lí ê lu̍t-hoat. 56 Góa tit-tio̍h án-ni, Sī in-ūi góa siú Lí kà-sī ê ōe. 57 Iâ-hô-hoa sī góa ê ki-gia̍p, Góa bat kóng, Góa beh siú Lí ê ōe. 58 Góa bat choan-sim kiû Lí ê un, Goān Lí chiàu Lí ê ōe lîn-bín góa. 59 Góa chhim-chhim siūⁿ góa só͘ kiâⁿ ê lō͘, Chiū oa̍t-tńg kha ǹg Lí kan-chèng ê ōe. 60 Góa siú Lí ê kài-bēng, Kóaⁿ-kín bô iân-chhiân. 61 Pháiⁿ-lâng ê soh pa̍k-tîⁿ góa; Chóng-sī góa bô bōe-kì-tit Lí ê lu̍t-hoat. 62 Góa in-ūi Lí kong-gī ê phòaⁿ-toàn, Pòaⁿ-mî beh khí-lâi kám-siā Lí. 63 Kìⁿ-nā kèng-ùi Lí, kap siú Lí ê kà-sī ê lâng, Góa kap in chòe-phōaⁿ. 64 Iâ-hô-hoa ah, Lí ê chû-ài piàn-móa tōe-bīn; Kiû Lí chiong Lí ê lu̍t-lē kà-sī góa. 65 Iâ-hô-hoa ah, Lí bat hó khoán-thāi Lí ê lô͘-po̍k, Sī chiàu Lí só͘ kóng ê ōe. 66 Kiû Lí chiong hó ê chhang-miâ kap tì-sek, kà-sī góa; In-ūi góa sìn Lí ê kài-bēng. 67 Góa bē siū-khó͘ í-chêng, ū kiâⁿ bê-lō͘; Chóng-sī góa taⁿ siú Lí ê ōe. 68 Lí sī hó, só͘-kiâⁿ ia̍h sī hó; Kiû Lí chiong Lí ê lu̍t-lē kà-sī góa. 69 Kiau-ngō͘ ê lâng chō-chok bô-iáⁿ ōe, kong-kek góa; Chóng-sī góa beh choan-sim siú Lí ê kà-sī. 70 In ê sim tūn, chhin-chhiūⁿ iû pau-ba̍t; Chóng-sī góa hoaⁿ-hí Lí ê lu̍t-hoat. 71 Góa ū siū-khó͘, sī chòe góa ê lī-ek; In-ūi beh hō͘ góa ha̍k-si̍p Lí ê lu̍t-lē. 72 Lí só͘ kóng ê lu̍t-hoat sī chòe góa ê lī-ek; Iâⁿ-kè chheng-bān ê kim-gûn. 73 Lí ê chhiú chhòng-chō góa, chhiâⁿ-tî góa; Kiû Lí hō͘ góa tì-hūi, thang ha̍k-si̍p Lí ê kài-bēng. 74 Kèng-ùi Lí ê lâng khòaⁿ-kìⁿ góa chiū beh hoaⁿ-hí; In-ūi tī Lí ê ōe, góa ū ǹg-bāng. 75 Iâ-hô-hoa ah, góa chai Lí ê phòaⁿ-toàn sī kong-gī; Lí hō͘ góa siū-khó͘ sī tùi tī sìn-si̍t. 76 Kiû Lí ēng Lí ê chû-ài an-ùi góa; Chiàu Lí tùi Lí ê lô͘-po̍k só͘ kóng ê ōe. 77 Goān Lí ê chû-pi lîm-kàu góa, hō͘ góa oa̍h; In-ūi Lí ê lu̍t-hoat sī góa só͘ hoaⁿ-hí--ê. 78 Goān kiau-ngō͘ ê lâng siū kiàn-siàu, in-ūi in bô lí-iû óng-khut góa; Chóng-sī góa beh chēng-chēng siūⁿ Lí ê kà-sī. 79 Goān kèng-ùi Lí ê lâng kui-ǹg góa; In chiū chai Lí kan-chèng ê ōe. 80 Goān góa ê sim oân-choân siú Lí ê lu̍t-lē, Hō͘ góa put-tì kiàn-siàu. 81 Góa ê sim-sîn him-bō͘ Lí ê kiù-un kàu hūn--khì; Chóng-sī tī Lí ê ōe, góa ū ǹg-bāng. 82 Góa in-ūi ǹg-bāng Lí ê ōe, ba̍k-chiu hoe, Kóng, Lí sím-mi̍h sî beh an-ùi góa? 83 In-ūi góa chhin-chhiūⁿ tī hé-hun-tiong ê phê-tē; Chóng-sī góa bô bōe-kì-tit Lí ê lu̍t-lē. 84 Lí ê lô͘-po̍k ê ji̍t-chí ū jōa-chōe ah? Lí beh tī-sî sím-phòaⁿ khún-pek góa ê lâng. 85 Kiau-ngō͘ ê lâng, chiū-sī bô thàn Lí ê lu̍t-hoat--ê, Ku̍t hām-khiⁿ, beh hāi góa. 86 Lí ê kài-bēng it-chīn sêng-si̍t; in bô in-toaⁿ khún-pek góa; Kiû Lí pang-chān góa. 87 In hiám-hiám bia̍t-bô góa tī sè-kan; Chóng-sī góa bô pàng-sak Lí ê kà-sī. 88 Kiû Lí chiàu Lí ê chû-ài hō͘ góa oa̍h; Góa chiū beh siú Lí ê chhùi kan-chèng ê ōe. 89 Iâ-hô-hoa ah, Lí ê ōe an-tiāⁿ tī thiⁿ--nih, Ti̍t-kàu éng-oán. 90 Lí ê sêng-si̍t chûn kàu bān-tāi; Lí kiàn-li̍p tōe, tōe chiū tn̂g-tn̂g tī--teh. 91 Chiàu Lí ê tēng-lē, in kàu-taⁿ iáu tī--teh; In-ūi bān-mi̍h lóng sī Lí ê chhe-ēng. 92 Góa nā m̄-sī hoaⁿ-hí Lí ê lu̍t-hoat, Chiū chá-chá tī góa ê khó͘-lān-tiong bia̍t-bô lah. 93 Góa éng-éng bô bōe-kì-tit Lí ê kà-sī; In-ūi Lí ēng che hō͘ góa oa̍h. 94 Góa sī Lí-ê, kiû Lí kiù góa; In-ūi góa chhē Lí ê kà-sī. 95 Pháiⁿ-lâng tng-tán góa, beh bia̍t-bô góa, Chóng-sī góa beh káng-kiù Lí kan-chèng ê ōe. 96 Góa khòaⁿ só͘-ū ê oân-choân, lóng sī iú-hān; To̍k-to̍k Lí ê bēng-lēng ke̍k-kî khui-khoah. 97 Góa thiàⁿ-sioh Lí ê lu̍t-hoat kàu cháiⁿ-iūⁿ ah! Góa thong-ji̍t chēng-chēng siūⁿ. 98 Lí ê kài-bēng siông-siông kap góa tī--teh, Hō͘ góa pí góa ê tùi-te̍k khah ū tì-hūi. 99 Góa pí góa lóng-chóng ê sian-siⁿ khah thong-ta̍t; In-ūi góa chēng-chēng siūⁿ Lí kan-chèng ê ōe. 100 Góa pí lāu-lâng khah bêng-pe̍k, In-ūi góa siú Lí ê kà-sī. 101 Góa kìm góa ê kha, it-chhè ê pháiⁿ-lō͘ bô kiâⁿ; Hō͘ góa thang siú Lí ê ōe. 102 Góa bô phian-lī Lí ê phòaⁿ-toàn; In-ūi Lí ū kà-sī góa. 103 Lí ê ōe tī góa ê chiūⁿ-kiuⁿ kàu jōa tiⁿ! Tī góa ê chhùi, pí bi̍t khah-tiⁿ. 104 Góa tùi Lí ê kà-sī tit-tio̍h bêng-pe̍k; Só͘-í góa oàn-hūn it-chhè ê siâ-lō͘. 105 Lí ê ōe chòe góa kha-chêng ê teng, Chòe góa lō͘-chiūⁿ ê kng. 106 Lí kong-gī ê phòaⁿ-toàn, góa bat chiù-chōa beh chun-siú; Góa koat-toàn án-ni kiâⁿ. 107 Góa siū-khó͘ kàu-ke̍k; Iâ-hô-hoa ah, kiû Lí chiàu Lí ê ōe hō͘ góa oa̍h. 108 Iâ-hô-hoa ah, kiû Lí kàm-la̍p góa ê chhùi só͘ hoaⁿ-hí hiàn ê o-ló, Koh chiong Lí ê phòaⁿ-sû kà-sī góa. 109 Góa ê sìⁿ-miā siông-siông tú-tio̍h gûi-hiám; Iáu-kú góa bô bōe-kì-tit Lí ê lu̍t-hoat. 110 Pháiⁿ-lâng siat lô-bāng beh hāi góa; Chóng-sī góa bô phian-lī Lí ê kà-sī. 111 Góa chiong Lí kan-chèng ê ōe, chòe éng-oán ê ki-gia̍p; In-ūi che sī góa sim-lāi só͘ hoaⁿ-hí--ê. 112 Góa hō͘ góa ê sim choan ǹg Lí ê lu̍t-lē; Éng-oán chun-thàn, ti̍t-kàu lō͘-bé. 113 Nn̄g-iūⁿ sim ê lâng sī góa só͘ thòng-hūn; To̍k-to̍k Lí ê lu̍t-hoat sī góa só͘ thiàⁿ-sioh. 114 Lí sī góa siám-bih ê só͘-chāi, koh sī góa ê tîn-pâi; Góa tī Lí ê ōe ū ǹg-bāng. 115 Chòe-pháiⁿ ê lâng ah, lín tio̍h lī-khui góa; Hō͘ góa thang siú góa ê Siōng-tè ê kài-bēng. 116 Kiû Lí chiàu Lí ê ōe hû-chhî góa, hō͘ góa oa̍h; Ia̍h bô hō͘ góa in-ūi só͘ ǹg-bāng--ê lâi kiàn-siàu. 117 Kiû Lí hû-chhî góa, góa chiū tit-kiù; Góa beh siông-siông tùi-tiōng Lí ê lu̍t-lē. 118 Kìⁿ-nā kiâⁿ chha-lō͘, lī-khui Lí ê lu̍t-lē ê lâng, Lí khòaⁿ-khin in; In-ūi in ê khúi-chà sī hu-ké. 119 Sè-kan ê pháiⁿ-lâng, Lí lóng kā in tû--khì, chhin-chhiūⁿ che-tái; In-ūi án-ni, góa thiàⁿ-sioh Lí kan-chèng ê ōe. 120 Góa in-ūi kiaⁿ-ùi Lí, góa ê bah chiū chhoah; Lí ê phòaⁿ-toàn ia̍h hō͘ góa kiaⁿ-hiâⁿ. 121 Góa péng-kong kiâⁿ-gī; Kiû Lí m̄-thang chiong góa pàng hō͘ ap-chè góa ê lâng. 122 Kiû Lí pó-jīn Lí ê lô͘-po̍k, thang tit-tio̍h hó kéng-gū; Bo̍h-tit hō͘ kiau-ngō͘ ê lâng ap-chè góa. 123 Góa in-ūi ǹg-bāng Lí ê kiù-un, kap Lí kong-gī ê ōe, Tì-kàu ba̍k-chiu hoe. 124 Kiû Lí chiàu Lí ê chû-ài khoán-thāi Lí ê lô͘-po̍k; Chiong Lí ê lu̍t-lē kà-sī góa. 125 Góa sī Lí ê lô͘-po̍k, kiû Lí hō͘ góa tì-hūi; Hō͘ góa ōe chai Lí kan-chèng ê ōe. 126 Hiān-kim tng sī Iâ-hô-hoa kiâⁿ tāi-chì ê sî; In-ūi lâng hòe-bô Lí ê lu̍t-hoat. 127 Só͘-í góa thiàⁿ-sioh Lí ê kài-bēng, Iâⁿ-kè kim, ia̍h iâⁿ-kè hó-kim. 128 Só͘-í Lí it-chhè ê kà-sī, bān-sū, góa lóng lia̍h-chòe chèng-ti̍t; Koh góa oàn-hūn it-chhè ê siâ-lō͘. 129 Lí kan-chèng ê ōe sī kî-biāu; Só͘-í góa ê sim kín-sīn chip-siú. 130 Lí ê ōe chi̍t-ē khui-thiah, chiū hoat-chhut kng, Hō͘ gōng-lâng thong-ta̍t. 131 Góa khui-chhùi ti̍t-ti̍t chhoán; In-ūi góa chhiat-chhiat him-bō͘ Lí ê kài-bēng. 132 Kiû Lí oa̍t-tńg ǹg góa, lîn-bín góa; Chhin-chhiūⁿ Lí pêng-siông khoán-thāi hiah ê kèng-ài Lí ê miâ ê lâng. 133 Kiû Lí ēng Lí ê ōe hō͘ góa ê kha-pō͘ ún-tàng; Bo̍h iông-ún sím-mi̍h chōe-ok koán-hat góa. 134 Kiû Lí kiù-sio̍k góa, thoat-lī lâng ê ap-chè, Góa chiū beh siú Lí ê kà-sī. 135 Goān Lí hō͘ Lí ê bīn ê kng chiò Lí ê lô͘-po̍k; Koh chiong Lí ê lu̍t-lē kà-sī góa. 136 Góa ê ba̍k-sái chhin-chhiūⁿ khoe-chúi teh lâu; In-ūi in bô siú Lí ê lu̍t-hoat. 137 Iâ-hô-hoa, Lí sī kong-gī-ê; Lí ê phòaⁿ-toàn ia̍h sī chèng-ti̍t--ê. 138 Lí só͘ bēng-lēng kan-chèng ê ōe, sī chiàu kong-gī, Ke̍k-kî sêng-si̍t. 139 Góa ê sim jia̍t, chhin-chhiūⁿ hé sio-bia̍t góa; In-ūi góa ê tùi-te̍k bōe-kì-tit Lí ê ōe. 140 Lí ê ōe thoàn-liān kàu chin cheng; Só͘-í Lí ê lô͘-po̍k chin ì-ài. 141 Góa pi-bî, hō͘ lâng khòaⁿ-khin, Chóng-sī góa bô bōe-kì-tit Lí ê kà-sī. 142 Lí ê kong-gī sī éng-oán ê kong-gī; Lí ê lu̍t-hoat sī chin-si̍t. 143 Góa tú-tio̍h hoān-lān iu-khó͘; Chóng-sī Lí ê kài-bēng sī góa só͘ hoaⁿ-hí--ê. 144 Lí kan-chèng ê ōe éng-oán sī kong-gī; Kiû Lí hō͘ góa tì-hūi, góa chiū ōe oa̍h. 145 Iâ-hô-hoa ah, góa choan-sim kiû-kiò Lí, kiû Lí ìn góa; Góa beh kín-sīn siú Lí ê lu̍t-lē. 146 Góa tùi Lí kiû-kiò, kiû Lí kiù góa; Góa chiū beh siú Lí kan-chèng ê ōe. 147 Góa thàn thiⁿ bē kng kiû-kiò Lí; Tī Lí ê ōe góa ū ǹg-bāng. 148 Mî--sî, kiⁿ iáu-bē chhim, góa ê ba̍k-chiu í-keng nih-khui; In-ūi beh chēng-chēng siūⁿ Lí ê ōe. 149 Kiû Lí chiàu Lí ê chû-ài, thiaⁿ góa ê siaⁿ; Iâ-hô-hoa ah, kiû Lí chiong Lí ê phòaⁿ-toàn, hō͘ góa ōe oa̍h. 150 Koàn-liān kiâⁿ-pháiⁿ ê lâng pek-óa lâi; In lī-khui Lí ê lu̍t-hoat hn̄g-hn̄g. 151 Iâ-hô-hoa ah, Lí sī kūn-kūn; Lí ê kài-bēng lóng sī chin-si̍t. 152 Góa káng-kiù Lí kan-chèng ê ōe, chá-chá í-keng chai, Sī Lí li̍p-tiāⁿ kàu éng-oán--ê. 153 Kiû Lí khòaⁿ-kò͘ góa ê khó͘-lān, lâi khan-kiù góa; In-ūi góa bô bōe-kì-tit Lí ê lu̍t-hoat. 154 Kiû Lí kā góa sin-oan, kiù-sio̍k góa; Chiàu Lí ê ōe hō͘ góa oa̍h. 155 Kiù-un lī-khui pháiⁿ-lâng hn̄g-hn̄g; In-ūi in bô chhē Lí ê lu̍t-lē. 156 Iâ-hô-hoa ah, Lí ê chû-pi sī tōa; Kiû Lí chiàu Lí ê phòaⁿ-toàn hō͘ góa oa̍h. 157 Khún-pek góa ê, tí-te̍k góa ê, chin-chōe, Chóng-sī góa bô phian-lī Lí kan-chèng ê ōe. 158 Góa khòaⁿ-kìⁿ kan-ok ê lâng, chiū chin iàm-ò͘ⁿ; In-ūi in bô siú Lí ê ōe. 159 Lí khòaⁿ góa cháiⁿ-iūⁿ thiàⁿ-sioh Lí ê kà-sī; Iâ-hô-hoa ah, kiû Lí chiàu Lí ê chû-ài hō͘ góa oa̍h. 160 Lí ê ōe ê chóng-kun-thâu sī chin-si̍t; Lí it-chhè kong-gī ê phòaⁿ-toàn sī éng-oán tī-teh. 161 Kùi-cho̍k bô in-toaⁿ khún-pek góa; Chóng-sī góa ê sim kiaⁿ-ùi Lí ê ōe. 162 Góa hoaⁿ-hí Lí ê ōe, Chhin-chhiūⁿ lâng tit-tio̍h chōe-chōe thâi-iâⁿ ê mi̍h. 163 Pe̍h-chha̍t-ōe sī góa só͘ thòng-hūn, só͘ iàm-chiān--ê; Lí ê lu̍t-hoat sī góa só͘ thiàⁿ-sioh--ê. 164 Góa in-ūi Lí kong-gī ê phòaⁿ-toàn, Ta̍k-ji̍t chhit-pái o-ló Lí. 165 Thiàⁿ-sioh Lí ê lu̍t-hoat ê lâng ū tōa pêng-an, Bô chi̍t-hāng ōe tîⁿ-pòaⁿ in ê kha. 166 Iâ-hô-hoa ah, góa ū teh ǹg-bāng Lí ê kiù-un, Ū kiâⁿ Lí ê kài-bēng. 167 Góa ê sim ū siú Lí kan-chèng ê ōe, Chiah ê ōe, góa chīn-chāi ì-ài. 168 Góa ū siú Lí ê kà-sī, kap Lí kan-chèng ê ōe; In-ūi góa it-chhè só͘ kiâⁿ--ê, lóng tī Lí ê bīn-chêng. 169 Iâ-hô-hoa ah, goān góa kiû-kiò ê siaⁿ thàu-kàu Lí ê bīn-chêng; Kiû Lí chiàu Lí ê ōe, siúⁿ-sù góa tì-hūi. 170 Goān góa khún-kiû ê ōe kàu Lí ê bīn-chêng; Kiû Lí chiàu Lí ê ōe khan-kiù góa. 171 Goān góa ê chhùi-tûn hoat-chhut o-ló ê ōe, In-ūi Lí chiong Lí ê lu̍t-lē kà-sī góa. 172 Goān góa ê chi̍h chhiùⁿ-koa o-ló Lí ê ōe; In-ūi Lí it-chhè ê kài-bēng lóng sī kong-gī. 173 Goān Lí chhun-chhiú pang-chān góa; In-ūi góa ū kéng Lí ê kà-sī. 174 Iâ-hô-hoa ah, góa chhiat-chhiat him-bō͘ Lí ê kiù-un; Lí ê lu̍t-hoat ia̍h sī góa só͘ hoaⁿ-hí--ê. 175 Goān góa oa̍h--teh, góa ê sîn-hûn chiū beh o-ló Lí; Goān Lí ê phòaⁿ-toàn pang-chān góa. 176 Góa bê-lō͘ chhin-chhiūⁿ phah-m̄-kìⁿ ê iûⁿ; kiû Lí chhē Lí ê lô͘-po̍k; In-ūi góa bô bōe-kì-tit Lí ê kài-bēng.
1 上崎á ê詩。1) 我tī危急中求叫耶和華，
伊就應我。
2 耶和華ah，求你救我脫離白賊ê嘴唇，
Kap詭詐ê舌。
3 詭詐ê舌ah，主beh hō͘你甚麼ah？
Beh用甚麼加添hō͘你ah？
4 就是勇猛ê人ê利箭，
Kap lô-thêng柴ê熱炭。
5 我真慘ah，寄腳tī Bí-siat，
khiā起tī Ki-ta̍t hiahê布棚ê中間。
6 我kap hiahê怨恨和平ê人，
久久相kap khiā起。
7 我愛和平；
總是我開嘴，in就beh爭戰。
1 Chiūⁿ kiā-á ê si.1) Góa tī gûi-kip-tiong kiû-kiò Iâ-hô-hoa, I chiū ìn góa. 2 Iâ-hô-hoa ah, kiû Lí kiù góa thoat-lī pe̍h-chha̍t ê chhùi-tûn, Kap khúi-chà ê chi̍h. 3 Khúi-chà ê chi̍h ah, Chú beh hō͘ lí sím-mi̍h ah? Beh ēng sím-mi̍h ke-thiⁿ hō͘ lí ah? 4 Chiū-sī ióng-béng ê lâng ê lāi-chìⁿ, Kap lô-thêng-chhâ ê jia̍t-thòaⁿ. 5 Góa chin chhám ah, kià-kha tī Bí-siat, Khiā-khí tī Ki-ta̍t hiah ê pò͘-pîⁿ ê tiong-kan. 6 Góa kap hiah ê oàn-hūn hô-pêng ê lâng, Kú-kú saⁿ-kap khiā-khí. 7 Góa ài hô-pêng; Chóng-sī góa khui-chhùi, in chiū beh cheng-chiàn.
1 上崎á ê詩。1) 我beh kia̍h目ǹg山；
我ê幫贊tùi toh落來？
2 我ê幫贊tùi耶和華來；
伊是創造天地ê。
3 伊無beh hō͘你ê腳搖choah；
保守你ê的確無tuh眠。
4 看ah，保守以色列ê，
也無tuh眠，也無睏去。
5 保守你ê是耶和華；
耶和華tī你ê chiàⁿ-pêng做你ê蔭影。
6 日時太陽無傷你，
暝時月亦bōe害你。
7 耶和華beh保守你，免受一切ê災害；
伊beh保守你ê性命。
8 你出，你入，耶和華beh保守你，
Tùi chit時直到永遠。
1 Chiūⁿ kiā-á ê si.1) Góa beh kia̍h-ba̍k ǹg soaⁿ; Góa ê pang-chān tùi toh-lo̍h lâi? 2 Góa ê pang-chān tùi Iâ-hô-hoa lâi; I sī chhòng-chō thiⁿ tōe ê. 3 I bô beh hō͘ lí ê kha iô-choah; Pó-siú lí ê tek-khak bô tuh-bîn. 4 Khòaⁿ ah, pó-siú Í-sek-lia̍t ê, Iā bô tuh-bîn, iā bô khùn--khì. 5 Pó-siú lí--ê sī Iâ-hô-hoa; Iâ-hô-hoa tī lí ê chiàⁿ-pêng chòe lí ê ìm-ńg. 6 Ji̍t--sî thài-iông bô siong lí, Mî--sî ge̍h ia̍h bōe hāi lí. 7 Iâ-hô-hoa beh pó-siú lí, bián siū it-chhè ê chai-hāi; I beh pó-siú lí ê sìⁿ-miā. 8 Lí chhut, lí ji̍p, Iâ-hô-hoa beh pó-siú lí, Tùi chit-sî ti̍t-kàu éng-oán.
1 上崎á ê詩；大衛所做ê。1) 人對我講，咱來去耶和華ê厝，
我就歡喜。
2 耶路撒冷ah，
阮ê腳khiā tī你ê門內。
3 耶路撒冷受起造，
親像連絡整齊ê城。
4 Chiahê支派，就是耶和華ê支派，
照以色列定tio̍h ê例，
上去hia beh o-ló耶和華ê名。
5 因為tī-hia設立審判ê寶座，
就是大衛ke ê寶座。
6 Tio̍h替耶路撒冷求平安；
見若疼你ê人的確安樂。
7 願你城內平安，
願你ê宮內安樂。
8 因為我ê兄弟kap同伴ê緣故，
我beh講，願平安tī你ê內面。
9 因為耶和華咱ê上帝ê厝ê緣故，
我beh替你求福氣。
1 Chiūⁿ kiā-á ê si; Tāi-pi̍t só͘ chòe-ê.1) Lâng tùi góa kóng, Lán lâi khì Iâ-hô-hoa ê chhù, Góa chiū hoaⁿ-hí. 2 Iâ-lō͘-sat-léng ah, Goán ê kha khiā tī lí ê mn̂g-lāi. 3 Iâ-lō͘-sat-léng siū khí-chō, Chhin-chhiūⁿ liân-lo̍k chéng-chôe ê siâⁿ. 4 Chiah ê chi-phài, chiū-sī Iâ-hô-hoa ê chi-phài, Chiàu Í-sek-lia̍t tiāⁿ-tio̍h ê lē, Chiūⁿ-khì hia beh o-ló Iâ-hô-hoa ê miâ. 5 In-ūi tī-hia siat-li̍p sím-phòaⁿ ê pó-chō, Chiū-sī Tāi-pi̍t ke ê pó-chō. 6 Tio̍h thòe Iâ-lō͘-sat-léng kiû pêng-an; Kìⁿ-nā thiàⁿ lí ê lâng tek-khak an-lo̍k. 7 Goān Lí siâⁿ-lāi pêng-an, Goān Lí ê kiong-lāi an-lo̍k. 8 In-ūi góa ê hiaⁿ-tī kap tâng-phōaⁿ ê iân-kò͘, Góa beh kóng, Goān pêng-an tī lí ê lāi-bīn. 9 In-ūi Iâ-hô-hoa lán ê Siōng-tè ê chhù ê iân-kò͘, Góa beh thòe lí kiû hok-khì.
1 上崎á ê詩。1) 坐tī天頂ê主ah，
我kia̍h目ǹg你。
2 看ah，做奴僕ê ê目睭，怎樣ǹg主人ê手，
做女婢-ê ê目睭，怎樣ǹg主母ê手，
阮ê目睭亦照án-ni ǹg耶和華阮ê上帝；
直直到伊憐憫阮。
3 耶和華ah，可憐阮，可憐阮；
因為阮hō͘人看輕，已經到極。
4 阮ê心hō͘ hiahê lâ-êng ê人冷笑，
Hō͘驕傲ê人看輕，已經到極。
1 Chiūⁿ kiā-á ê si.1) Chē tī thiⁿ-téng ê Chú ah, Góa kia̍h-ba̍k ǹg Lí. 2 Khòaⁿ ah, chòe lô͘-po̍k--ê ê ba̍k-chiu, cháiⁿ-iūⁿ ǹg chú-lâng ê chhiú, Chòe lú-pī--ê ê ba̍k-chiu, cháiⁿ-iūⁿ ǹg chú-bú ê chhiú, Goán ê ba̍k-chiu ia̍h chiàu án-ni ǹg Iâ-hô-hoa goán ê Siōng-tè; Ti̍t-ti̍t kàu I lîn-bín goán. 3 Iâ-hô-hoa ah, khó-lîn goán, khó-lîn goán; In-ūi goán hō͘ lâng khòaⁿ-khin, í-keng kàu-ke̍k. 4 Goán ê sim hō͘ hiah ê lâ-êng ê lâng léng-chhiò, Hō͘ kiau-ngō͘ ê lâng khòaⁿ-khin, Í-keng kàu-ke̍k.
1 上崎á ê詩；大衛所做。1) 以色列taⁿ tio̍h講，
若m̄是耶和華贊阮，
2 若m̄是耶和華贊阮，
Tī人起來攻擊阮，
3 Tī in對阮發受氣ê時，
就將阮活活吞落去；
4 Hit時chiahê水的確pôaⁿ過阮，
河水的確淹密阮。
5 凶狂ê水的確淹密阮。
6 願耶和華受o-ló，
因為伊無將阮做食物，交hō͘ in pō͘-食。
7 阮ê性命親像鳥á，脫離掠鳥-ê ê羅網；
羅網破裂，阮就脫離。
8 阮得tio̍h幫贊，是靠耶和華ê名，
伊是創造天地ê。
1 Chiūⁿ kiā-á ê si; Tāi-pi̍t só͘ chòe.1) Í-sek-lia̍t taⁿ tio̍h kóng, Nā m̄-sī Iâ-hô-hoa chān goán, 2 Nā m̄-sī Iâ-hô-hoa chān goán, Tī lâng khí-lâi kong-kek goán, 3 Tī in tùi goán hoat siū-khì ê sî, Chiū chiong goán oa̍h-oa̍h thun--lo̍h-khì; 4 Hit-sî chiah ê chúi tek-khak pôaⁿ-kè goán, Hô-chúi tek-khak im-ba̍t goán. 5 Hiong-kông ê chúi tek-khak im-ba̍t goán. 6 Goān Iâ-hô-hoa siū o-ló, In-ūi I bô chiong goán chòe chia̍h-mi̍h, kau hō͘ in pō͘-chia̍h. 7 Goán ê sìⁿ-miā chhin-chhiūⁿ chiáu-á, thoat-lī lia̍h-chiáu--ê ê lô-bāng; Lô-bāng phòa-li̍h, goán chiū thoat-lī. 8 Goán tit-tio̍h pang-chān, sī khò Iâ-hô-hoa ê miâ, I sī chhòng-chō thiⁿ-tōe--ê.
1 上崎á ê詩。1) Óa靠耶和華ê人，
親像永永khiā在，bōe搖choah ê錫安山。
2 眾山包圍耶路撒冷，
耶和華亦án-ni包圍伊ê百姓；
Tùi chit-tia̍p到永遠。
3 罪惡ê權柄bōe定定tī義人ê份額；
免得義人伸手做pháiⁿ。
4 耶和華ah，求你好款待hiahê做好ê，
以及心正直ê人。
5 論到hiahê歪chhoa̍h，行伊彎曲ê路ê人，
耶和華的確hō͘ in kap做pháiⁿ ê人同等。
願平安歸tī以色列。
1 Chiūⁿ kiā-á ê si.1) Óa-khò Iâ-hô-hoa ê lâng, Chhin-chhiūⁿ éng-éng khiā-chāi, bōe iô-choah ê Sek-an soaⁿ. 2 Chèng-soaⁿ pau-ûi Iâ-lō͘-sat-léng, Iâ-hô-hoa ia̍h án-ni pau-ûi I ê peh-sìⁿ; Tùi chit-tia̍p kàu éng-oán. 3 Chōe-ok ê koân-pèng bōe tiāⁿ-tiāⁿ tī gī-lâng ê hūn-gia̍h; Bián-tit gī-lâng chhun chhiú chòe-pháiⁿ. 4 Iâ-hô-hoa ah, kiû Lí hó khoán-thāi hiah ê chòe hó--ê, Í-ki̍p sim chèng-ti̍t ê lâng. 5 Lūn-kàu hiah ê oai-chhoa̍h, kiâⁿ i oan-khiau ê lō͘ ê lâng, Iâ-hô-hoa tek-khak hō͘ in kap chòe-pháiⁿ ê lâng tâng-téng. Goān pêng-an kui tī Í-sek-lia̍t.
1 上崎á ê詩。1) 耶和華chhōa hiahê受掠ê人倒tńg來錫安；
Hit時咱親像眠夢。
2 Hit時咱ê嘴hah-hah笑，
咱ê舌出大歡喜ê聲；
外邦中就有人講，
耶和華為in行大事。
3 耶和華有為咱行大事，
咱就歡喜。
4 耶和華ah，求你hō͘阮受掠ê人倒tńg，
親像南方ê溪水koh lâu。
5 流目屎掖種子ê，
Beh出歡喜ê聲收割。
6 Hit-ê流目屎帶種子出去ê，
的確beh帶伊ê稻把歡歡喜喜tò來。
1 Chiūⁿ kiā-á ê si.1) Iâ-hô-hoa chhōa hiah ê siū-lia̍h ê lâng tò-tńg lâi Sek-an; Hit-sî lán chhin-chhiūⁿ bîn-bāng. 2 Hit-sî lán ê chhùi hah-hah-chhiò, Lán ê chi̍h chhut tōa hoaⁿ-hí ê siaⁿ; Gōa-pang-tiong chiū ū lâng kóng, Iâ-hô-hoa ūi in kiâⁿ tōa-sū. 3 Iâ-hô-hoa ū ūi lán kiâⁿ tōa-sū, Lán chiū hoaⁿ-hí. 4 Iâ-hô-hoa ah, kiû Lí hō͘ goán siū-lia̍h ê lâng tò-tńg, Chhin-chhiūⁿ lâm-hng ê khoe-chúi koh lâu. 5 Lâu ba̍k-sái iā chéng-chí--ê, Beh chhut hoaⁿ-hí ê siaⁿ siu-koah. 6 Hit ê lâu ba̍k-sái tòa chéng-chí chhut-khì--ê, Tek-khak beh tòa i ê tiū-pé hoaⁿ-hoaⁿ hí-hí tò--lâi.
1 上崎á ê詩；所羅門所做ê。1) 厝宅若m̄是耶和華起造，
起造伊ê人就空空tio̍h磨；
城池若m̄是耶和華顧守，
就顧守ê人空空警醒。
2 Lín早早起，òaⁿ-òaⁿ睏，
食勞碌所得tio̍h ê飯，亦是空空；
耶和華所疼ê人，伊beh hō͘伊好睏。
3 看ah，kiáⁿ兒是耶和華所賞賜ê產業；
懷孕ê胎，是伊所hō͘伊ê報賞。
4 少年ê時所生ê kiáⁿ，
親像勇士手中ê箭。
5 伊ê箭袋充滿ê人有福氣；
In tī城-門口kap對敵講話，
的確不致見笑。
1 Chiūⁿ kiā-á ê si; Só͘-lô-bûn só͘ chòe-ê.1) Chhù-the̍h nā m̄-sī Iâ-hô-hoa khí-chō, Khí-chō i ê lâng chiū khang-khang tio̍h-bôa; Siâⁿ-tî nā m̄-sī Iâ-hô-hoa kò͘-siú, Chiū kò͘-siú ê lâng khang-khang kéng-séng. 2 Lín chá-chá khí, òaⁿ-òaⁿ khùn, Chia̍h lô-lo̍k só͘ tit-tio̍h ê pn̄g, ia̍h sī khang-khang; Iâ-hô-hoa só͘ thiàⁿ ê lâng, I beh hō͘ i hó-khùn. 3 Khòaⁿ ah, kiáⁿ-jî sī Iâ-hô-hoa só͘ siúⁿ-sù ê sán-gia̍p; Hoâi-īn ê thai, sī I só͘ hō͘ i ê pò-siúⁿ. 4 Siàu-liân ê sî só͘-siⁿ ê kiáⁿ, Chhin-chhiūⁿ ióng-sū chhiú-tiong ê chìⁿ. 5 I ê chìⁿ-tē chhiong-móa ê lâng ū hok-khì; In tī siâⁿ-mn̂g-kháu kap tùi-te̍k kóng-ōe, Tek-khak put-tì kiàn-siàu.
1 上崎á ê詩。1) 見若敬畏耶和華，行tī伊ê路ê，
Hit號人有福氣。
2 你beh食你ê手tio̍h磨所得tio̍h-ê，
你beh享福，事事興通。
3 你ê bó͘ tī你ê厝ê房內，親像結chōe-chōe果子ê葡萄樹；
你ê kiáⁿ兒圍纍你ê桌，親像橄欖栽。
4 看ah，敬畏耶和華ê人，
的確beh án-ni得tio̍h福氣。
5 耶和華beh tùi錫安賜福你；
你一生beh看見耶路撒冷ê福氣。
6 你beh看見你ê kiáⁿ ê kiáⁿ。
願平安歸tī以色列。
1 Chiūⁿ kiā-á ê si.1) Kìⁿ-nā kèng-ùi Iâ-hô-hoa, kiâⁿ tī I ê lō͘--ê, Hit-hō lâng ū hok-khì. 2 Lí beh chia̍h lí ê chhiú tio̍h-bôa só͘ tit-tio̍h--ê, Lí beh hióng-hok, sū-sū heng-thong. 3 Lí ê bó͘ tī lí ê chhù ê pâng-lāi, chhin-chhiūⁿ kiat chōe-chōe ké-chí ê phû-tô-chhiū; Lí ê kiáⁿ-jî ûi-lûi lí ê toh, chhin-chhiūⁿ kaⁿ-ná-chai. 4 Khòaⁿ ah, kèng-ùi Iâ-hô-hoa ê lâng, Tek-khak beh án-ni tit-tio̍h hok-khì. 5 Iâ-hô-hoa beh tùi Sek-an sù-hok lí; Lí it-seng beh khòaⁿ-kìⁿ Iâ-lō͘-sat-léng ê hok-khì. 6 Lí beh khòaⁿ-kìⁿ lí ê kiáⁿ ê kiáⁿ. Goān pêng-an kui tī Í-sek-lia̍t.
1 上崎á ê詩。1) 以色列tio̍h講，tùi我細漢ê時，
In ta̍uh-ta̍uh苦楚我。
2 Tùi我細漢ê時in ta̍uh-ta̍uh苦楚我；
總是in bē-bat khah贏我。
3 Hōaⁿ犁ê人犁我ê ka-chiah-phiaⁿ，
犁ê溝痕拖真長。
4 耶和華是公義ê；
伊有斬斷pháiⁿ人ê索。
5 見若怨恨錫安ê，
願in tú-tio̍h見笑退後。
6 願in親像厝頂ê草，
Bē大叢就枯焦；
7 割ê割無滿把，hâ-ê hâ無kui攬(lám)。
8 過路ê人亦無講，
願耶和華賜lín福氣；
阮奉耶和華ê名，kā lín祝福。
1 Chiūⁿ kiā-á ê si.1) Í-sek-lia̍t tio̍h kóng, Tùi góa sòe-hàn ê sî, In ta̍uh-ta̍uh khó͘-chhó͘ góa. 2 Tùi góa sòe-hàn ê sî in ta̍uh-ta̍uh khó͘-chhó͘ góa; Chóng-sī in bē-bat khah-iâⁿ góa. 3 Hōaⁿ-lôe ê lâng lôe góa ê ka-chiah-phiaⁿ, Lôe ê kau-hûn thoa chin-tn̂g. 4 Iâ-hô-hoa sī kong-gī--ê; I ū chām-tn̄g pháiⁿ-lâng ê soh. 5 Kìⁿ-nā oàn-hūn Sek-an--ê, Goān in tú-tio̍h kiàn-siàu thè-āu. 6 Goān in chhin-chhiūⁿ chhù-téng ê chháu, Bē tōa-châng chiū ko͘-tâ; 7 Koah-ê koah bô móa-pé, Hâ-ê hâ bô kui-lám. 8 Kè-lō͘ ê lâng ia̍h bô kóng, Goān Iâ-hô-hoa sù lín hok-khì; Goán hōng Iâ-hô-hoa ê miâ, kā lín chiok-hok.
1 上崎á ê詩。1) 耶和華ah，我tùi深淵求叫你，
2 主ah，求你聽我ê聲；
願你àⁿ耳孔聽我懇求ê聲。
3 主耶和華ah，你若究勘罪惡，
Chī-chūi khiā-ōe-tiâu？
4 總是你有赦免ê恩，
Beh hō͘人敬畏你。
5 我thèng候耶和華，我ê心神teh thèng候；
Tī伊ê話我有ǹg望。
6 我ê心神thèng候主，
比守更ê人thèng候天光khah切，
比守更ê人thèng候天光khah切。
7 以色列ah，你tio̍h ǹg望耶和華；
因為tī耶和華有慈愛，
Tī伊有豐盛ê救贖。
8 伊的確救贖以色列，
脫離伊一切ê罪惡。
1 Chiūⁿ kiā-á ê si.1) Iâ-hô-hoa ah, góa tùi chhim-ian kiû-kiò Lí, 2 Chú ah, kiû Lí thiaⁿ góa ê siaⁿ; Goān Lí àⁿ hī-khang thiaⁿ góa khún-kiû ê siaⁿ. 3 Chú Iâ-hô-hoa ah, Lí nā kiù-khàm chōe-ok, Chī-chūi khiā-ōe-tiâu? 4 Chóng-sī Lí ū sià-bián ê un, Beh hō͘ lâng kèng-ùi Lí. 5 Góa thèng-hāu Iâ-hô-hoa, góa ê sim-sîn teh thèng-hāu; Tī I ê ōe góa ū ǹg-bāng. 6 Góa ê sim-sîn thèng-hāu Chú, Pí chiú-kiⁿ ê lâng thèng-hāu thiⁿ-kng khah-chhiat, Pí chiú-kiⁿ ê lâng thèng-hāu thiⁿ-kng khah-chhiat. 7 Í-sek-lia̍t ah, lí tio̍h ǹg-bāng Iâ-hô-hoa; In-ūi tī Iâ-hô-hoa ū chû-ài, Tī I ū hong-sēng ê kiù-sio̍k. 8 I tek-khak kiù-sio̍k Í-sek-lia̍t, Thoat-lī i it-chhè ê chōe-ok.
1 上崎á ê詩；大衛做ê。1) 耶和華ah，我心無驕傲，我ê 目頭無高；
大項ê事，kap奇妙想bōe出ê，
我m̄敢行。
2 我真正hō͘我ê心平穩安靜；
親像斷奶ê gín-ná，óa tī伊ê老母，
我ê心tī我ê內面親像斷奶ê gín-ná。
3 以色列ah，你tio̍h ǹg望耶和華，
Tùi chit時到永遠。
1 Chiūⁿ kiā-á ê si; Tāi-pi̍t chòe ê.1) Iâ-hô-hoa ah, góa sim bô kiau-ngō͘, góa ê ba̍k-thâu bô koâiⁿ; Tōa-hāng ê sū, kap kî-biāu siūⁿ-bōe-chhut ê, Góa m̄-káⁿ kiâⁿ. 2 Góa chin-chiàⁿ hō͘ góa ê sim pêng-ún an-chēng; Chhin-chhiūⁿ tn̄g-lin ê gín-ná, óa tī i ê lāu-bú, góa ê sim tī góa ê lāi-bīn chhin-chhiūⁿ tn̄g-lin ê gín-ná. 3 Í-sek-lia̍t ah, lí tio̍h ǹg-bāng Iâ-hô-hoa, Tùi chit-sî kàu éng-oán.
1 上崎á ê詩。1) 耶和華ah，大衛所受一切ê苦難，
求你記念伊；
2 伊怎樣對耶和華chiù-chōa，
對雅各ê大權能ê下願；
3 講，我的確無入我ê家ê布棚，
也無上我ê眠床；
4 我無容允我ê目睭睏去，
也無容允我ê目睭皮合óa；
5 Thèng候我為tio̍h耶和華chhē-tio̍h所在，
為雅各ê大權能ê chhē-tio̍h khiā起ê所在。
6 看ah，阮聽見約櫃tī Í-hoat-tha；
阮tī樹林ê田tú-tio̍h伊。
7 阮beh入伊khiā起ê所在；
阮beh拜tī伊ê腳踏椅前。
8 耶和華ah，求你起來；
你kap你ê氣力ê約櫃相kap入你歇睏ê所在。
9 願你ê祭司穿公義做衫；
願你聖ê百姓出歡喜ê聲。
10 求你因為你ê奴僕大衛ê緣故，
莫得棄sak你ê受抹油ê。
11 耶和華用誠實對大衛chiù-chōa，
的確無反覆，
講，我beh hō͘你所生ê坐tī你ê寶座。
12 你ê kiáⁿ若守我ê約，
Kap我所beh教示in ê法度，
In ê kiáⁿ孫beh永遠坐tī你ê寶座。
13 因為耶和華有揀錫安，
Ài用伊做本身khiā起ê所在；
14 講，這是我永遠歇睏ê所在；
我beh tiàm tī-chia，因為是我所意愛ê。
15 我beh hō͘伊ê米糧豐盛，
我beh用食物hō͘伊ê sòng-hiong人夠額。
16 我beh hō͘伊ê祭司穿救恩做衫；
伊聖ê百姓beh出大歡喜ê聲。
17 我beh hō͘大衛ê角tī-hia發生；
我為tio̍h我ê受抹油ê備辦光燈。
18 我beh hō͘伊ê對敵穿見笑做衫；
總是伊ê冕旒beh tī伊ê頭殼頂發出光。
1 Chiūⁿ kiā-á ê si.1) Iâ-hô-hoa ah, Tāi-pi̍t só͘ siū it-chhè ê khó͘-lān, Kiû Lí kì-liām i; 2 I cháiⁿ-iūⁿ tùi Iâ-hô-hoa chiù-chōa, Tùi Ngá-kok ê tōa Koân-lêng--ê hē-goān; 3 Kóng, Góa tek-khak bô ji̍p góa ê ke ê pò͘-pîⁿ, Iā bô chiūⁿ góa ê bîn-chhn̂g; 4 Góa bô iông-ún góa ê ba̍k-chiu khùn--khì, Iā bô iông-ún góa ê ba̍k-chiu-phê ha̍p-óa; 5 Thèng-hāu góa ūi-tio̍h Iâ-hô-hoa chhē-tio̍h só͘-chāi, Ūi Ngá-kok ê tōa Koân-lêng--ê chhē-tio̍h khiā-khí ê só͘-chāi. 6 Khòaⁿ ah, goán thiaⁿ-kìⁿ iok-kūi tī Í-hoat-tha; Goán tī chhiū-nâ ê chhân tú-tio̍h i. 7 Goán beh ji̍p I khiā-khí ê só͘-chāi; Goán beh pài tī I ê kha-ta̍h-í chêng. 8 Iâ-hô-hoa ah, kiû Lí khí-lâi; Lí kap Lí ê khùi-la̍t ê iok-kūi saⁿ-kap ji̍p Lí hioh-khùn ê só͘-chāi. 9 Goān Lí ê chè-si chhēng kong-gī chòe saⁿ; Goān Lí sèng ê peh-sìⁿ chhut hoaⁿ-hí ê siaⁿ. 10 Kiû Lí in-ūi Lí ê lô͘-po̍k Tāi-pi̍t ê iân-kò͘, Bo̍h-tit khì-sak Lí ê siū-boah-iû--ê. 11 Iâ-hô-hoa ēng sêng-si̍t tùi Tāi-pi̍t chiù-chōa, Tek-khak bô hoán-hok, Kóng, Góa beh hō͘ lí só͘-siⁿ-ê chē tī lí ê pó-chō. 12 Lí ê kiáⁿ nā siú Góa ê iok, Kap Góa só͘ beh kà-sī in ê hoat-tō͘, In ê kiáⁿ-sun beh éng-oán chē tī lí ê pó-chō. 13 In-ūi Iâ-hô-hoa ū kéng Sek-an, Ài ēng i chòe pún-sin khiā-khí ê só͘-chāi; 14 Kóng, Che sī Góa éng-oán hioh-khùn ê só͘-chāi; Góa beh tiàm tī-chia, In-ūi sī Góa só͘ ì-ài ê. 15 Góa beh hō͘ i ê bí-niû hong-sēng, Góa beh ēng chia̍h-mi̍h hō͘ i ê sòng-hiong-lâng kàu-gia̍h. 16 Góa beh hō͘ i ê chè-si chhēng kiù-un chòe saⁿ; I sèng ê peh-sìⁿ beh chhut tōa hoaⁿ-hí ê siaⁿ. 17 Góa beh hō͘ Tāi-pi̍t ê kak tī-hia hoat-siⁿ; Góa ūi-tio̍h Góa ê siū-boah-iû--ê pī-pān kng-teng. 18 Góa beh hō͘ i ê tùi-te̍k chhēng kiàn-siàu chòe saⁿ; Chóng-sī i ê bián-liû beh tī i ê thâu-khak-téng hoat-chhut kng.
1 上崎á ê詩；大衛所做。1) 看ah，兄弟和好相kap khiā起，是何等ê好，何等ê安樂！
2 這thang比並hitê貴氣ê油thîn tī頭殼頂，
流到嘴鬚，
就是亞倫ê嘴鬚，
Koh流到伊ê衫á裾。
3 也thang比並Hek-bûn ê露水，
落tī錫安chiahê山；
因為tī-hia耶和華有定tio̍h賜福，
就是永遠ê活命。
1 Chiūⁿ kiā-á ê si; Tāi-pi̍t só͘ chòe.1) Khòaⁿ ah, hiaⁿ-tī hô-hó saⁿ-kap khiā-khí, Sī hô-téng ê hó, hô-téng ê an-lo̍k! 2 Che thang pí-phēng hit ê kùi-khì ê iû thîn tī thâu-khak-téng, Lâu kàu chhùi-chhiu, Chiū-sī A-lûn ê chhùi-chhiu, Koh lâu kàu i ê saⁿ-á-ku. 3 Iā thang pí-phēng Hek-bûn ê lō͘-chúi, Lo̍h tī Sek-an chiah ê soaⁿ; In-ūi tī-hia Iâ-hô-hoa ū tiāⁿ-tio̍h sù-hok, Chiū-sī éng-oán ê oa̍h-miā.
1 上崎á ê詩。1) 看ah，耶和華chiahê奴僕，暝間tiàm耶和華厝內ê，Lín lóng tio̍h o-ló耶和華。 2 Lín tio̍h ǹg聖所kia̍h起lín ê手，O-ló耶和華。 3 願創造天地ê耶和華，tùi錫安賜福氣hō͘你。
1 Chiūⁿ kiā-á ê si.1) Khòaⁿ ah, Iâ-hô-hoa chiah ê lô͘-po̍k, mî-kan tiàm Iâ-hô-hoa chhù-lāi ê, Lín lóng tio̍h o-ló Iâ-hô-hoa. 2 Lín tio̍h ǹg sèng-só͘ kia̍h-khí lín ê chhiú, O-ló Iâ-hô-hoa. 3 Goān chhòng-chō thiⁿ tōe ê Iâ-hô-hoa, Tùi Sek-an sù hok-khì hō͘ lí.
1 Lín tio̍h o-ló耶和華。
Lín tio̍h o-ló耶和華ê名；
耶和華chiahê奴僕，tiàm tī耶和華ê厝，
2 Tiàm tī咱ê上帝ê厝ê院內ê，
Lín tio̍h o-ló伊。
3 Lín tio̍h o-ló耶和華，因為耶和華是好；
Tio̍h唱歌o-ló伊ê名，因為這是真妙。
4 因為耶和華揀雅各歸伊家己，
揀以色列做家己特別ê百姓。
5 我知耶和華做大，
也知咱ê主pôaⁿ過lóng總ê神明。
6 耶和華tī天頂，tī地上，tī海中，tī一切ê深淵，
Lóng chhut-chāi伊ê意思來行。
7 伊hō͘雲霧tùi地極chhèng起；
為tio̍h hō͘創造sih-nà，Tùi伊ê庫房中帶風出來。
8 伊將埃及人kap cheng-siⁿ頭chiūⁿ-ê，
Lóng kā in phah死。
9 埃及ah，伊行神跡奇事tī你ê中間，
Tī法老kap伊ê眾人臣。
10 伊phah贏chōe-chōe邦國，
Koh 刣死大權能ê王；
11 就是A-mô͘-lī 王Se-hông，
Kap Pa-san 王Go̍k，
以及迦南ta̍k國。
12 將in ê地做業，
就是hō͘伊ê百姓以色列做業。
13 耶和華ah，你ê名留到永遠；
耶和華ah，你thang記念ê名留到萬代。
14 因為耶和華beh kā伊ê百姓伸冤；
為tio̍h伊chiahê奴僕回心轉意。
15 外邦ê偶像是銀ê金ê，
是人ê手所造ê。
16 In有嘴，也bōe講話；
有目睭，也bōe看；
17 In有耳孔，也bōe聽；
嘴內也無喘氣。
18 造in-ê，靠in-ê，
Lóng beh親像in。
19 以色列家ah，lín tio̍h o-ló耶和華；
亞倫ê家ah，lín tio̍h o-ló耶和華；
20 利未ê家ah，lín tio̍h o-ló耶和華；
敬畏耶和華ê人ah，lín tio̍h o-ló耶和華。
21 耶和華khiā起tī耶路撒冷；
願伊tùi錫安得tio̍h o-ló。
Lín tio̍h o-ló耶和華。
1 Lín tio̍h o-ló Iâ-hô-hoa. Lín tio̍h o-ló Iâ-hô-hoa ê miâ; Iâ-hô-hoa chiah ê lô͘-po̍k, tiàm tī Iâ-hô-hoa ê chhù, 2 Tiàm tī lán ê Siōng-tè ê chhù ê īⁿ-lāi ê, Lín tio̍h o-ló I. 3 Lín tio̍h o-ló Iâ-hô-hoa, in-ūi Iâ-hô-hoa sī hó; Tio̍h chhiùⁿ-koa o-ló I ê miâ, in-ūi che sī chin biāu. 4 In-ūi Iâ-hô-hoa kéng Ngá-kok kui I ka-kī, Kéng Í-sek-lia̍t chòe ka-kī te̍k-pia̍t ê peh-sìⁿ. 5 Góa chai Iâ-hô-hoa chòe tōa, Iā chai lán ê Chú pôaⁿ-kè lóng-chóng ê sîn-bêng. 6 Iâ-hô-hoa tī thiⁿ-téng, tī tōe-chiūⁿ, tī hái-tiong, tī it-chhè ê chhim-ian, Lóng chhut-chāi I ê ì-sù lâi kiâⁿ. 7 I hō͘ hûn-bū tùi tōe-ke̍k chhèng-khí; Ūi-tio̍h hō͘ chhòng-chō sih-nà, Tùi I ê khò͘-pâng tiong tòa hong chhut-lâi. 8 I chiong Ai-ki̍p lâng kap cheng-siⁿ thâu-chiūⁿ-ê, Lóng kā in phah-sí. 9 Ai-ki̍p ah, I kiâⁿ sîn-jiah kî-sū tī lí ê tiong-kan, Tī Hoat-ló kap i ê chèng jîn-sîn. 10 I phah-iâⁿ chōe-chōe pang-kok, Koh thâi-sí tōa koân-lêng ê ông; 11 Chiū-sī A-mô͘-lī ông Se-hông, Kap Pa-san ông Go̍k, Í-ki̍p Ka-lâm ta̍k-kok. 12 Chiong in ê tōe chòe gia̍p, Chiū-sī hō͘ I ê peh-sìⁿ Í-sek-lia̍t chòe gia̍p. 13 Iâ-hô-hoa ah, Lí ê miâ lâu kàu éng-oán; Iâ-hô-hoa ah, Lí thang kì-liām ê miâ lâu kàu bān-tāi. 14 In-ūi Iâ-hô-hoa beh kā I ê peh-sìⁿ sin-oan; Ūi-tio̍h I chiah ê lô͘-po̍k hê-sim tńg-ì. 15 Gōa-pang ê ngó͘-siōng sī gûn--ê kim--ê, Sī lâng ê chhiú só͘ chō--ê. 16 In ū chhùi, iā bōe kóng-ōe; Ū ba̍k-chiu, iā bōe khòaⁿ; 17 In ū hī-khang, iā bōe thiaⁿ; Chhùi-lāi iā bô chhoán-khùi. 18 Chō-in--ê khò-in--ê, Lóng beh chhin-chhiūⁿ in. 19 Í-sek-lia̍t-ke ah, lín tio̍h o-ló Iâ-hô-hoa; A-lûn ê ke ah, lín tio̍h o-ló Iâ-hô-hoa; 20 Lī-bī ê ke ah, lín tio̍h o-ló Iâ-hô-hoa; Kèng-ùi Iâ-hô-hoa ê lâng ah, lín tio̍h o-ló Iâ-hô-hoa. 21 Iâ-hô-hoa khiā-khí tī Iâ-lō͘-sat-léng; Goān I tùi Sek-an tit-tio̍h o-ló. Lín tio̍h o-ló Iâ-hô-hoa.
1 Lín tio̍h感謝耶和華，因為伊是好；
因為伊ê慈愛永遠tī-teh。
2 Lín tio̍h感謝chiahê上帝 ê上帝；
因為伊ê慈愛永遠tī-teh。
3 Lín tio̍h感謝萬主ê主；
因為伊ê慈愛永遠tī-teh。
4 感謝hitê家己行大奇事ê；
因為伊ê慈愛永遠tī-teh。
5 感謝hitê用智慧創造天ê；
因為伊ê慈愛永遠tī-teh。
6 感謝hitê鋪地tī水ê頂面ê；
因為伊ê慈愛永遠tī-teh。
7 感謝hitê創造大ê光體ê；
因為伊ê慈愛永遠tī-teh。
8 就是日頭來管日時；
因為伊ê慈愛永遠tī-teh；
9 月kap星管暝時；
因為伊ê慈愛永遠tī-teh。
10 感謝hitê phah死埃及人ê大kiáⁿ ê；
因為伊ê慈愛永遠tī-teh。
11 Chhōa以色列人tùi in中間出來ê；
因為伊ê慈愛永遠tī-teh。
12 用大權能ê手kap伸出來ê手骨；
因為伊ê慈愛永遠tī-teh。
13 感謝hitê分開紅海ê；
因為伊ê慈愛永遠tī-teh。
14 也chhōa以色列tùi hitê中間經過ê；
因為伊ê慈愛永遠tī-teh。
15 將法老kap伊ê軍兵hiat tī紅海ê；
因為伊ê慈愛永遠tī-teh。
16 感謝hitê chhōa伊ê百姓行tī曠野ê；
因為伊ê慈愛永遠tī-teh。
17 感謝hitê phah死大君王ê；
因為伊ê慈愛永遠tī-teh。
18 刣死有名聲ê王ê；
因為伊ê慈愛永遠tī-teh。
19 刣死A-mô͘-lī 王Se-hông；
因為伊ê慈愛永遠tī-teh。
20 Koh 刣死Pa-san 王Go̍k；
因為伊ê慈愛永遠tī-teh。
21 將in ê地賞賜做業；
因為伊ê慈愛永遠tī-teh。
22 就是賞賜伊ê奴僕以色列做業；
因為伊ê慈愛永遠tī-teh。
23 伊siàu念咱tī卑微ê位；
因為伊ê慈愛永遠tī-teh。
24 拯救咱脫離咱ê對敵；
因為伊ê慈愛永遠tī-teh。
25 祂賞賜米糧hō͘見有血氣ê；
因為祂ê慈愛永遠tī-teh。
26 Lín tio̍h感謝天頂ê上帝；
因為伊ê慈愛永遠tī-teh。
1 Lín tio̍h kám-siā Iâ-hô-hoa, in-ūi I sī hó; In-ūi I ê chû-ài éng-oán tī-teh. 2 Lín tio̍h kám-siā chiah ê siōng-tè ê Siōng-tè; In-ūi I ê chû-ài éng-oán tī-teh. 3 Lín tio̍h kám-siā bān-chú ê Chú; In-ūi I ê chû-ài éng-oán tī-teh. 4 Kám-siā hit ê ka-kī kiâⁿ tōa kî-sū ê; In-ūi I ê chû-ài éng-oán tī-teh. 5 Kám-siā hit ê ēng tì-hūi chhòng-chō thiⁿ ê; In-ūi I ê chû-ài éng-oán tī-teh. 6 Kám-siā hit ê pho͘ tōe tī chúi ê téng-bīn ê; In-ūi I ê chû-ài éng-oán tī-teh. 7 Kám-siā hit ê chhòng-chō tōa ê kng-thé ê; In-ūi I ê chû-ài éng-oán tī-teh. 8 Chiū-sī ji̍t-thâu lâi koán ji̍t--sî; In-ūi I ê chû-ài éng-oán tī-teh; 9 Ge̍h kap chhiⁿ koán mî--sî; In-ūi I ê chû-ài éng-oán tī-teh. 10 Kám-siā hit ê phah-sí Ai-ki̍p lâng ê tōa-kiáⁿ ê; In-ūi I ê chû-ài éng-oán tī-teh. 11 Chhōa Í-sek-lia̍t lâng tùi in tiong-kan chhut-lâi ê; In-ūi I ê chû-ài éng-oán tī-teh. 12 Ēng tōa koân-lêng ê chhiú kap chhun-chhut-lâi ê chhiú-kut; In-ūi I ê chû-ài éng-oán tī-teh. 13 Kám-siā hit ê pun-khui Âng-hái ê; In-ūi I ê chû-ài éng-oán tī-teh. 14 Iā chhōa Í-sek-lia̍t tùi hit ê tiong-kan keng-kè ê; In-ūi I ê chû-ài éng-oán tī-teh. 15 Chiong Hoat-ló kap i ê kun-peng hiat tī Âng-hái ê; In-ūi I ê chû-ài éng-oán tī-teh. 16 Kám-siā hit ê chhōa I ê peh-sìⁿ kiâⁿ tī khòng-iá ê; In-ūi I ê chû-ài éng-oán tī-teh. 17 Kám-siā hit ê phah-sí tōa kun-ông ê; In-ūi I ê chû-ài éng-oán tī-teh. 18 Thâi-sí ū miâ-siaⁿ ê ông ê; In-ūi I ê chû-ài éng-oán tī-teh. 19 Thâi-sí A-mô͘-lī ông Se-hông; In-ūi I ê chû-ài éng-oán tī-teh. 20 Koh thâi-sí Pa-san ông Go̍k; In-ūi I ê chû-ài éng-oán tī-teh. 21 Chiong in ê tōe siúⁿ-sù chòe gia̍p; In-ūi I ê chû-ài éng-oán tī-teh. 22 Chiū-sī siúⁿ-sù I ê lô͘-po̍k Í-sek-lia̍t chòe gia̍p; In-ūi I ê chû-ài éng-oán tī-teh. 23 I siàu-liām lán tī pi-bî ê ūi; In-ūi I ê chû-ài éng-oán tī-teh. 24 Chín-kiù lán thoat-lī lán ê tùi-te̍k; In-ūi I ê chû-ài éng-oán tī-teh. 25 I siúⁿ-sù bí-niû hō͘ kìⁿ ū hiat-khì ê; In-ūi I ê chû-ài éng-oán tī-teh. 26 Lín tio̍h kám-siā thiⁿ-téng ê Siōng-tè; In-ūi I ê chû-ài éng-oán tī-teh.
1 阮bat坐tī巴比倫ê河邊，
一下想tio̍h錫安，目屎就流。
2 阮將阮ê琴，吊tī hit位ê柳樹。
3 因為tī-hia掠阮ê，ài阮唱歌，
搶阮ê ài阮快樂，
講，Lín tio̍h kā阮唱一首錫安ê歌。
4 阮tī外邦，
Thái-thó ōe唱耶和華ê歌？
5 耶路撒冷ah，我若bōe記得你，
願我ê chiàⁿ手失落伊ê本事。
6 我若bōe記得你，
若無看耶路撒冷khah過頭tī我所第一歡喜ê，
願我ê舌連tī我ê chiūⁿ-kiuⁿ。
7 耶路撒冷tú-tio̍h患難ê時，
Í-tong人講，拆毀伊，拆毀伊，
直直拆到地基；
耶和華ah，求你記得hit日。
8 Teh-beh受滅ê巴比倫城ah，
報應你親像你款待阮ê，
Hit號人有福氣。
9 掠你ê嬰á，siak tī石磐ê，
Hit號人有福氣。
1 Goán bat chē tī Pa-pí-lûn ê hô-piⁿ, Chi̍t-ē siūⁿ-tio̍h Sek-an, ba̍k-sái chiū lâu. 2 Goán chiong goán ê khîm, Tiàu tī hit-ūi ê liú-chhiū. 3 In-ūi tī-hia lia̍h-goán--ê, ài goán chhiùⁿ-koa, Chhiúⁿ-goán--ê ài goán khoài-lo̍k, Kóng, Lín tio̍h kā goán chhiùⁿ chi̍t siú Sek-an ê koa. 4 Goán tī gōa-pang, Thái-thó ōe chhiùⁿ Iâ-hô-hoa ê koa? 5 Iâ-lō͘-sat-léng ah, góa nā bōe-kì-tit lí, Goān góa ê chiàⁿ-chhiú sit-lo̍h i ê pún-sū. 6 Góa nā bōe-kì-tit lí, Nā bô khòaⁿ Iâ-lō͘-sat-léng khah kè-thâu tī góa só͘ tē-it hoaⁿ-hí ê, Goān góa ê chi̍h liâm tī góa ê chiūⁿ-kiuⁿ. 7 Iâ-lō͘-sat-léng tú-tio̍h hoān-lān ê sî, Í-tong lâng kóng, Thiah-húi i, thiah-húi i, Ti̍t-ti̍t thiah kàu tōe-ki; Iâ-hô-hoa ah, kiû Lí kì-tit hit-ji̍t. 8 Teh-beh siū bia̍t ê Pa-pí-lûn siâⁿ ah, Pò-èng lí chhin-chhiūⁿ lí khoán-thāi goán ê, Hit-hō lâng ū hok-khì. 9 Lia̍h lí ê eⁿ-á, siak tī chio̍h-pôaⁿ ê, Hit-hō lâng ū hok-khì.
1 大衛ê詩。1) 我beh專心感謝你，
tī chiahê上帝 ê面前beh唱歌o-ló你。
2 我beh ǹg你ê聖殿跪拜，
因為你ê慈愛kap誠實，o-ló你ê名；
因為你hō͘你ê話做大，贏過你所有ê名。
3 我求叫ê日你就應我，
鼓舞我，hō͘我ê心有氣力。
4 耶和華ah，世上ê君王lóng beh感謝你，
因為in有聽見你ê嘴所講ê話。
5 In beh唱歌o-ló耶和華ê行做，
因為耶和華ê榮光真大。
6 耶和華雖然真高，iáu-kú看顧卑微ê人；
總是I tùi遠遠看出驕傲ê人。
7 我雖然行tī患難中，你beh hō͘我活；
我ê對敵受氣，你beh伸手來抵擋伊，
你ê chiàⁿ手亦beh救我。
8 關係我ê事，耶和華beh成伊；
耶和華ah，你ê慈愛永遠tī-teh；
求你莫得放sak你ê手所造ê。
1 Tāi-pi̍t ê si.1) Góa beh choan-sim kám-siā Lí, Tī chiah ê siōng-tè ê bīn-chêng beh chhiùⁿ-koa o-ló Lí. 2 Góa beh ǹg Lí ê sèng-tiān kūi-pài, In-ūi Lí ê chû-ài kap sêng-si̍t, o-ló Lí ê miâ; In-ūi Lí hō͘ Lí ê ōe chòe tōa, iâⁿ-kè Lí só͘ ū ê miâ. 3 Góa kiû-kiò ê ji̍t Lí chiū ìn góa, Kó͘-bú góa, hō͘ góa ê sim ū khùi-la̍t. 4 Iâ-hô-hoa ah, sè-chiūⁿ ê kun-ông lóng beh kám-siā Lí, In-ūi in ū thiaⁿ-kìⁿ Lí ê chhùi só͘ kóng ê ōe. 5 In beh chhiùⁿ-koa o-ló Iâ-hô-hoa ê kiâⁿ-chòe, In-ūi Iâ-hô-hoa ê êng-kng chin-tōa. 6 Iâ-hô-hoa sui-jiân chin koâiⁿ, iáu-kú khòaⁿ-kò͘ pi-bî ê lâng; Chóng-sī I tùi hn̄g-hn̄g khòaⁿ-chhut kiau-ngō͘ ê lâng. 7 Góa sui-jiân kiâⁿ tī hoān-lān-tiong, Lí beh hō͘ góa oa̍h; Góa ê tùi-te̍k siū-khì, Lí beh chhun-chhiú lâi tí-tng i, Lí ê chiàⁿ-chhiú ia̍h beh kiù góa. 8 Koan-hē góa ê sū, Iâ-hô-hoa beh chiâⁿ--i; Iâ-hô-hoa ah, Lí ê chû-ài éng-oán tī-teh; Kiû Lí bo̍h-tit pàng-sak Lí ê chhiú só͘ chō--ê.
1 大衛ê詩，交hō͘樂官。1) 耶和華ah，你已經鑑察我，bat我。
2 我坐落去，我peh起來，你lóng知；
你tùi遠遠知我ê念頭。
3 我行路，我倒tī眠床，你lóng詳細知；
我一切所行ê，你也深知。
4 耶和華ah，我ê嘴所講ê話，
你無一句m̄知。
5 你tī我ê前後圍我，
按手tī我ê頂面。
6 Chit款ê知識奇妙，我bōe能測度；
真高，我bōe能到。
7 我beh去toh落，閃避你ê神？
我beh走去toh落，閃避你ê面？
8 我若上天，你tī-hia；
我若睏tī陰間，你亦tī-hia。
9 我若thí開清早ê翼，
飛到海ê極頭來khiā起；
10 就若tī-hia，你ê手亦beh引chhōa我，
你ê chiàⁿ手亦beh 牽我。
11 我若講，烏暗beh遮蓋我，
Koh四圍ê光beh變做暗暝；
12 就烏暗亦bōe能遮蓋我，hō͘你無看見；
烏暗暝親像日時發光。
烏暗kap光明，在你看lóng是一樣。
13 因為我ê臟腑，是你所創造ê；
我tī老母ê腹肚內，你有庇佑我。
14 我beh感謝你，因為我受造奇妙thang驚；
你ê所做奇妙；這是我ê心深知ê。
15 我tī暗中受造，
Tī地ê真底受連絡，
Hit時我ê形體無隱瞞tī你。
16 我bē成形ê體質，
你ê目睭已經看見，
所定tio̍h ê日，iáu未有一日，
Lóng記tī你ê冊。
17 上帝ah，你ê意思對tī我，到chiah寶貝！
Hit-ê數額，到chiah chōe！
18 我若beh算伊，比海沙khah-chōe；
我睏精神ê時，猶原kap你相kap tī-teh。
19 上帝ah，你的確beh剿滅pháiⁿ人；
所以lín chiahê ài hō͘人流血ê，tio̍h離開我去。
20 因為in講pháiⁿ話，抵觸你；
你ê對敵亦lām-sám稱你ê名。
21 耶和華ah，怨恨你ê，我kiám無怨恨in mah？
起來攻擊你ê，我kiám無厭賤in mah？
22 我盡在怨恨in，掠in做我ê對敵。
23 上帝ah，求你鑑察我，知我ê心思；
試驗我，知我ê意思。
24 看我有甚麼pháiⁿ所行無，
Chhōa我行永活ê路。
1 Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, Lí í-keng kàm-chhat góa, bat góa. 2 Góa chē--lo̍h-khì, góa peh--khí-lâi, Lí lóng chai; Lí tùi hn̄g-hn̄g chai góa ê liām-thâu. 3 Góa kiâⁿ-lō͘, góa tó tī bîn-chhn̂g, Lí lóng siông-sè chai; Góa it-chhè só͘-kiâⁿ--ê, Lí iā chhim-chai. 4 Iâ-hô-hoa ah, góa ê chhùi só͘ kóng ê ōe, Lí bô chi̍t-kù m̄-chai. 5 Lí tī góa ê chêng-āu ûi góa, Hōaⁿ-chhiú tī góa ê téng-bīn. 6 Chit khoán ê chai-bat kî-biāu, góa bōe-ōe chhek-to̍k; Chin-koâiⁿ, góa bōe-ōe kàu. 7 Góa beh khì toh-lo̍h, siám-pī Lí ê sîn? Góa beh cháu-khì toh-lo̍h, siám-pī Lí ê bīn? 8 Góa nā chiūⁿ thiⁿ, Lí tī-hia; Góa nā khùn tī im-kan, Lí ia̍h tī-hia. 9 Góa nā thí-khui chheng-chá ê si̍t, Pe kàu hái ê ke̍k-thâu lâi khiā-khí; 10 Chiū nā tī-hia, Lí ê chhiú ia̍h beh ín-chhōa góa, Lí ê chiàⁿ-chhiú ia̍h beh khan góa. 11 Góa nā kóng, O͘-àm beh jia-khàm góa, Koh sì-ûi ê kng beh pìⁿ-chòe àm-mî; 12 Chiū o͘-àm ia̍h bōe-ōe jia-khàm góa, hō͘ Lí bô khòaⁿ-kìⁿ; O͘-àm mî chhin-chhiūⁿ ji̍t--sî hoat-kng. O͘-àm kap kng-bêng, chāi Lí khòaⁿ lóng sī chi̍t-iūⁿ. 13 In-ūi góa ê chōng-hú, sī Lí só͘ chhòng-chō--ê; Góa tī lāu-bú ê pak-tó͘-lāi, Lí ū pì-iū góa. 14 Góa beh kám-siā Lí, in-ūi góa siū-chō kî-biāu thang kiaⁿ; Lí ê só͘-chòe kî-biāu; Che sī góa ê sim chhim chai--ê. 15 Góa tī àm-tiong siū-chō, Tī tōe ê chin-tóe siū liân-lo̍k, Hit-sî góa ê hêng-thé bô ún-môa tī Lí. 16 Góa bē chiâⁿ-hêng ê thé-chit, Lí ê ba̍k-chiu í-keng khòaⁿ-kìⁿ, Só͘ tiāⁿ-tio̍h ê ji̍t, iáu-bē ū chi̍t-ji̍t, Lóng kì tī Lí ê chheh. 17 Siōng-tè ah, Lí ê ì-sù tùi tī góa, kàu chiah pó-pòe! Hit ê siàu-gia̍h, kàu chiah chōe! 18 Góa nā beh sǹg--i, pí hái-soa khah-chōe; Góa khùn cheng-sîn ê sî, iû-goân kap Lí saⁿ-kap tī-teh. 19 Siōng-tè ah, Lí tek-khak beh châu-bia̍t pháiⁿ-lâng; Só͘-í lín chiah ê ài hō͘ lâng lâu-huih--ê, tio̍h lī-khui góa khì. 20 In-ūi in kóng pháiⁿ-ōe, tú-tak Lí; Lí ê tùi-te̍k ia̍h lām-sám chheng Lí ê miâ. 21 Iâ-hô-hoa ah, oàn-hūn Lí--ê, góa kiám bô oàn-hūn in mah? Khí-lâi kong-kek Lí--ê, góa kiám bô iàm-chiān in mah? 22 Góa chīn-chāi oàn-hūn in, lia̍h in chòe góa ê tùi-te̍k. 23 Siōng-tè ah, kiû Lí kàm-chhat góa, chai góa ê sim-su; Chhì-giām góa, chai góa ê ì-sù. 24 Khòaⁿ góa ū sím-mi̍h pháiⁿ só͘-kiâⁿ bô, Chhōa góa kiâⁿ éng-oa̍h ê lō͘.
1 大衛ê詩，交hō͘樂官。1) 耶和華ah，求你救我脫離pháiⁿ人；
保護我脫離強惡 ê人。
2 In ê心內圖謀奸惡，
常常聚集ài交戰。
3 In hō͘ in ê舌利親像蛇；
嘴唇下有毒蛇ê毒。[Sè-la̍h]
4 耶和華ah，求你保守我脫離pháiⁿ人ê手；
保護我脫離強惡 ê人；
In想beh chhia hō͘我跋倒。
5 驕傲ê人為我暗靜張活tauh kap索；
In tī路邊an羅網，設環套，beh害我。[Sè-la̍h]
6 我bat對耶和華講，你是我ê上帝；
耶和華ah，求你àⁿ耳孔聽我懇求ê聲。
7 主耶和華，我救恩ê力ah，
Tī交戰ê日，你jia遮我ê頭殼。
8 耶和華ah，求你m̄-thang照pháiⁿ人ê所ài；
M̄-thang成in ê計謀，驚了in自高。[Sè-la̍h]
9 論到hiahê圍困我ê人ê頭，
願in嘴唇ê奸惡淹密in家己；
10 願熱熱ê火炭落tī in ê身上；
願in受hiat tī hé-nih，
Hiat tī深坑內，bōe koh起來。
11 講pháiⁿ話ê人tī地上的確khiā-bōe-tiâu；
災厄的確追jip強暴ê人，將in打倒。
12 我知耶和華beh為困苦ê人伸冤，
Beh為sòng-hiong人辯明冤屈。
13 義人的確beh感謝你ê名；
正直人beh khiā起你ê面前。
1 Tāi-pi̍t ê si, kau hō͘ Ga̍k-koaⁿ.1) Iâ-hô-hoa ah, kiû Lí kiù góa thoat-lī pháiⁿ-lâng; Pó-hō͘ góa thoat-lī kiông-ok ê lâng. 2 In ê sim-lāi tô͘-bô͘ kan-ok, Siông-siông chū-chi̍p ài kau-chiàn. 3 In hō͘ in ê chi̍h lāi chhin-chhiūⁿ chôa; Chhùi-tûn-ē ū to̍k-chôa ê to̍k. [Sè-la̍h 4 Iâ-hô-hoa ah, kiû Lí pó-siú góa thoat-lī pháiⁿ-lâng ê chhiú; Pó-hō͘ góa thoat-lī kiông-ok ê lâng; In siūⁿ beh chhia hō͘ góa poa̍h-tó. 5 Kiau-ngō͘ ê lâng ūi góa àm-chīⁿ tiuⁿ oa̍h-tauh kap soh; In tī lō͘-piⁿ an lô-bāng, Siat khoân-thò, beh hāi góa. [Sè-la̍h 6 Góa bat tùi Iâ-hô-hoa kóng, Lí sī góa ê Siōng-tè; Iâ-hô-hoa ah, kiû Lí àⁿ hī-khang thiaⁿ góa khún-kiû ê siaⁿ. 7 Chú Iâ-hô-hoa, góa kiù-un ê la̍t ah, Tī kau-chiàn ê ji̍t, Lí jia-cha̍h góa ê thâu-khak. 8 Iâ-hô-hoa ah, kiû Lí m̄-thang chiàu pháiⁿ-lâng ê só͘ ài; M̄-thang chiâⁿ in ê kè-bô͘, kiaⁿ-liáu in chū-ko. [Sè-la̍h 9 Lūn-kàu hiah-ê ûi-khùn góa ê lâng ê thâu, Goān in chhùi-tûn ê kan-ok im-ba̍t in ka-kī; 10 Goān jia̍t-jia̍t ê hé-thòaⁿ lo̍h tī in ê sin-chiūⁿ; Goān in siū hiat tī hé--nih, Hiat tī chhim-khiⁿ-lāi, bōe koh khí-lâi. 11 Kóng pháiⁿ-ōe ê lâng tī tōe-chiūⁿ tek-khak khiā-bōe-tiâu; Chai-ē tek-khak tui-jip kiông-pō ê lâng, chiong in táⁿ-tó. 12 Góa chai Iâ-hô-hoa beh ūi khùn-khó͘ ê lâng sin-oan, Beh ūi sòng-hiong lâng piān-bêng un-khut. 13 Gī-lâng tek-khak beh kám-siā Lí ê miâ; Chèng-ti̍t lâng beh khiā-khí Lí ê bīn-chêng.
1 大衛ê詩。1) 耶和華ah，我bat求叫你；
求你緊緊臨到我；
我求叫你ê時，
願你àⁿ耳孔聽我ê聲。
2 願我ê祈禱，親像香，排tī你ê面前；
願我ê kia̍h起手，親像ê-hng時ê祭祀。
3 耶和華ah，求你顧守我ê嘴；
把守我嘴唇ê門。
4 求你無hō͘我ê心偏ǹg邪惡，
致到我kap作孽ê人同行pháiⁿ-tāi；
亦無hō͘我食in ê好物。
5 義人phah我，我算做仁慈；
伊責備我，我算做頭殼頂抹油；
我ê頭殼無beh oa̍t-siám；
當in行pháiⁿ ê時，我猶原beh祈禱。
6 In ê審判官受hiat落山崁；
In beh聽我ê話，因為這話是甜。
7 阮ê骨頭四散tī墓邊；
親像人作田，犁開hitê土。
8 主耶和華ah，我ê目睭ǹg你；
我óa靠你，求你m̄-thang放sak我ê神魂無依óa。
9 求你保護我脫離in為tio̍h我張ê活tauh，
Kap行pháiⁿ ê人ê環套。
10 願pháiⁿ人陷落tī in ê羅網；
總是我得tio̍h脫離。
1 Tāi-pi̍t ê si.1) Iâ-hô-hoa ah, góa bat kiû-kiò Lí; Kiû Lí kín-kín lîm-kàu góa; Góa kiû-kiò Lí ê sî, Goān Lí àⁿ hī-khang thiaⁿ góa ê siaⁿ. 2 Goān góa ê kî-tó, chhin-chhiūⁿ hiuⁿ, pâi tī Lí ê bīn-chêng; Goān góa ê kia̍h-khí chhiú, chhin-chhiūⁿ ê-hng-sî ê chè-sū. 3 Iâ-hô-hoa ah, kiû Lí kò͘-siú góa ê chhùi; Pé-siú góa chhùi-tûn ê mn̂g. 4 Kiû Lí bô hō͘ góa ê sim phian-ǹg siâ-ok, Tì-kàu góa kap chok-gia̍t ê lâng tâng-kiâⁿ pháiⁿ-tāi; Ia̍h bô hō͘ góa chia̍h in ê hó-mi̍h. 5 Gī-lâng phah góa, góa sǹg-chòe jîn-chû; I chek-pī góa, góa sǹg-chòe thâu-khak-téng boah-iû; Góa ê thâu-khak bô beh oa̍t-siám; Tng in kiâⁿ-pháiⁿ ê sî, góa iû-goân beh kî-tó. 6 In ê sím-phòaⁿ-koaⁿ siū hiat-lo̍h soaⁿ-khàm; In beh thiaⁿ góa ê ōe, in-ūi che ōe sī tiⁿ. 7 Goán ê kut-thâu sì-sòaⁿ tī bōng-piⁿ; Chhin-chhiūⁿ lâng choh-chhân, lôe-khui hit ê thô͘. 8 Chú Iâ-hô-hoa ah, góa ê ba̍k-chiu ǹg Lí; Góa óa-khò Lí, kiû Lí m̄-thang pàng-sak góa ê sîn-hûn bô i-óa. 9 Kiû Lí pó-hō͘ góa thoat-lī in ūi-tio̍h góa tiuⁿ ê oa̍h-tauh, Kap kiâⁿ-pháiⁿ ê lâng ê khoân-thò. 10 Goān pháiⁿ-lâng hām-lo̍h tī in ê lô-bāng; Chóng-sī góa tit-tio̍h thoat-lī.
1 大衛tī洞內ê時，做chitê教示ê詩；亦是祈禱。1) 我出聲喉叫耶和華，
出聲懇求耶和華。
2 我tī伊ê面前吐出我ê苦情。
我tī伊ê面前排列我ê患難。
3 我ê神tī我ê內面暈去ê時，你知我ê路；
tī我行ê路，in為tio̍h我暗靜張活tauh。
4 求你ǹg我ê chiàⁿ-pêng來看，因為無人bat我；
我無tè thang逃閃，亦無人看顧我。
5 耶和華ah，我bat對你哀求；
我講，你是我逃閃ê所在，Tī活人ê地，你是我ê基業。
6 求你àⁿ耳孔聽我ê求叫；因為我落到極-kē ê位；
求你救我脫離窘迫我ê人，因為in比我khah強。
7 求你chhōa我出監，我就thang o-ló你ê名；
義人beh圍我，因為你用恩典款待我。
1 Tāi-pi̍t tī tōng-lāi ê sî, chòe chit ê kà-sī ê si; ia̍h sī kî-tó.1) Góa chhut-siaⁿ âu-kiò Iâ-hô-hoa, Chhut-siaⁿ khún-kiû Iâ-hô-hoa. 2 Góa tī I ê bīn-chêng thò͘-chhut góa ê khó͘-chêng. Góa tī I ê bīn-chêng pâi-lia̍t góa ê hoān-lān. 3 Góa ê sîn tī góa ê lāi-bīn hūn--khì ê sî, Lí chai góa ê lō͘; Tī góa kiâⁿ ê lō͘, in ūi-tio̍h góa àm-chīⁿ tiuⁿ oa̍h-tauh. 4 Kiû Lí ǹg góa ê chiàⁿ-pêng lâi khòaⁿ, in-ūi bô lâng bat góa; Góa bô tè thang tô-siám, ia̍h bô lâng khòaⁿ-kò͘ góa. 5 Iâ-hô-hoa ah, góa bat tùi Lí ai-kiû; Góa kóng, Lí sī góa tô-siám ê só͘-chāi, Tī oa̍h-lâng ê tōe, Lí sī góa ê ki-gia̍p. 6 Kiû Lí àⁿ hī-khang thiaⁿ góa ê kiû-kiò; in-ūi góa lo̍h kàu ke̍k-kē ê ūi; Kiû Lí kiù góa thoat-lī khún-pek góa ê lâng, in-ūi in pí góa khah-kiông. 7 Kiû Lí chhōa góa chhut kaⁿ, góa chiū thang o-ló Lí ê miâ; Gī-lâng beh ûi góa, in-ūi Lí ēng un-tián khoán-thāi góa.
1 大衛ê詩。1) 耶和華ah，求你聽我ê祈禱，àⁿ耳孔聽我ê懇求；
照你ê信實，照你ê公義，來應我。
2 求你莫得審問你ê奴僕，
因為tī你ê面前，活teh ê人，無一个稱做義。
3 對敵窘迫我，
將我ê性命，phah倒tī地裡；
Hō͘我tiàm tī烏暗ê所在，親像死久久ê人一樣。
4 所以我ê神魂tī我ê內面暈去；
我ê心tī我ê內面悽凊。
5 我記得古早ê日；
Siàu念你一切ê所行；
靜靜想你ê手ê所做。
6 我ǹg你kia̍h起手，
我ê心欣慕你，親像炕旱ê地一樣。[Sè-la̍h]
7 耶和華ah，求你緊緊應我；
我ê心神廢了了；M̄-thang對我掩面；免得我親像落墓ê人。
8 求你hō͘我早起時聽見你慈愛ê聲，
因為我óa靠你；
求你hō͘我知應該行ê路。
因為我ê心仰望你。
9 耶和華ah，求你救我脫離我ê對敵；
我走去bih tī你hia。
10 你是我ê上帝，求你教示我行你ê旨意；
你ê神是好，求你chhōa我tī平直ê地。
11 耶和華ah，求你為tio̍h你ê名hō͘我活；
照你ê公義，chhōa我出患難中。
12 照你ê慈愛，除去我ê對敵，
剿滅一切苦楚我ê人；
因為我是你ê奴僕。
1 Tāi-pi̍t ê si.1) Iâ-hô-hoa ah, kiû Lí thiaⁿ góa ê kî-tó, àⁿ hī-khang thiaⁿ góa ê khún-kiû; Chiàu Lí ê sìn-si̍t, chiàu Lí ê kong-gī, lâi ìn góa. 2 Kiû Lí bo̍h-tit sím-mn̄g Lí ê lô͘-po̍k, In-ūi tī Lí ê bīn-chêng, oa̍h-teh ê lâng, bô chi̍t-ê chheng-chòe-gī. 3 Tùi-te̍k khún-pek góa, Chiong góa ê sìⁿ-miā, phah-tó tī tōe--nih; Hō͘ góa tiàm tī o͘-àm ê só͘-chāi, chhin-chhiūⁿ sí kú-kú ê lâng chi̍t-iūⁿ. 4 Só͘-í góa ê sîn-hûn tī góa ê lāi-bīn hūn-khì; Góa ê sim tī góa ê lāi-bīn chhiⁿ-chhìn. 5 Góa kì-tit kó͘-chá ê ji̍t; Siàu-liām Lí it-chhè ê só͘-kiâⁿ; Chēng-chēng siūⁿ Lí ê chhiú ê só͘-chòe. 6 Góa ǹg Lí kia̍h-khí chhiú, Góa ê sim him-bō͘ Lí, chhin-chhiūⁿ khòng-hān ê tōe chi̍t-iūⁿ. [Sè-la̍h 7 Iâ-hô-hoa ah, kiû Lí kín-kín ìn góa; Góa ê sim-sîn hùi-liáu-liáu; M̄-thang tùi góa ng bīn; Bián-tit góa chhin-chhiūⁿ lo̍h-bōng ê lâng. 8 Kiû Lí hō͘ góa chá-khí-sî thiaⁿ-kìⁿ Lí chû-ài ê siaⁿ, In-ūi góa óa-khò Lí; Kiû Lí hō͘ góa chai eng-kai kiâⁿ ê lō͘. In-ūi góa ê sim gióng-bōng Lí. 9 Iâ-hô-hoa ah, kiû Lí kiù góa thoat-lī góa ê tùi-te̍k; Góa cháu--khì bih tī Lí hia. 10 Lí sī góa ê Siōng-tè, kiû Lí kà-sī góa kiâⁿ Lí ê chí-ì; Lí ê sîn sī hó, kiû Lí chhōa góa tī pîⁿ-ti̍t ê tōe. 11 Iâ-hô-hoa ah, kiû Lí ūi-tio̍h Lí ê miâ hō͘ góa oa̍h; Chiàu Lí ê kong-gī, chhōa góa chhut hoān-lān-tiong. 12 Chiàu Lí ê chû-ài, tû-khì góa ê tùi-te̍k, Châu-bia̍t it-chhè khó͘-chhó͘ góa ê lâng; In-ūi góa sī Lí ê lô͘-po̍k.
1 大衛ê詩。1) 耶和華我ê石磐，是應該o-ló-ê；
伊教示我ê手能爭戰，
教示我ê指頭á能相刣。
2 伊是我ê慈愛，我ê山寨，
我ê高台，我ê救主；
我ê藤牌，是我所óa靠ê；
伊hō͘我ê百姓降服tī我ê下面。
3 耶和華ah，人是甚麼，你竟然bat伊？
人ê kiáⁿ是甚麼，你竟然siàu念伊？
4 人親像pûn一个氣；
伊ê日子親像影過去。
5 耶和華ah，求你hō͘天垂落，親身降臨；
摸山，山就出煙。
6 求你發出sih-nà，hō͘ in四散；
射出你ê箭，hō͘ in擾亂。
7 你tùi頂面伸手救我；
救我出大水，救我脫離外邦人ê手。
8 In ê嘴講白賊，
In ê chiàⁿ手是奸詐ê chiàⁿ手。
9 上帝ah，我beh對你唱新ê歌；
用十條絃ê瑟，唱歌o-ló你。
10 你是hitê拯救列王ê，
你是hitê救奴僕大衛脫離害命ê刀ê。
11 求你拯救我，救我脫離外邦人ê手；
In ê嘴講白賊，
In ê chiàⁿ手是奸詐ê chiàⁿ手。
12 阮ê ta-po͘-kiáⁿ當少年ê時，親像樹á大叢；
阮ê cha-bó͘-kiáⁿ親像厝角ê石，照起宮ê款式雕琢ê。
13 阮ê粟倉滿滿，會出ta̍k樣ê米糧；
阮ê羊tī山野生湠，chiâⁿ千chiâⁿ萬。
14 阮ê牛拖物滿載；
無有人入來侵佔，亦免出去爭戰；
阮ê街市，亦無有啼哭ê聲。
15 Tú-tio̍h chit號景況ê百姓，有福氣；
有耶和華做in ê上帝，chit號ê百姓有福氣。
1 Tāi-pi̍t ê si.1) Iâ-hô-hoa góa ê chio̍h-pôaⁿ, sī eng-kai o-ló--ê; I kà-sī góa ê chhiú ōe cheng-chiàn, Kà-sī góa ê chńg-thâu-á ōe saⁿ-thâi. 2 I sī góa ê chû-ài, góa ê soaⁿ-chē, Góa ê koâiⁿ-tâi, góa ê kiù-chú; Góa ê tîn-pâi, sī góa só͘ óa-khò--ê; I hō͘ góa ê peh-sìⁿ hâng-ho̍k tī góa ê ē-bīn. 3 Iâ-hô-hoa ah, lâng sī sím-mi̍h, Lí kéng-jiân bat i? Lâng ê kiáⁿ sī sím-mi̍h, Lí kéng-jiân siàu-liām i? 4 Lâng chhin-chhiūⁿ pûn chi̍t ê khùi; I ê ji̍t-chí chhin-chhiūⁿ iáⁿ kè--khì. 5 Iâ-hô-hoa ah, kiû Lí hō͘ thiⁿ sûi-lo̍h, chhin-sin kàng-lîm; Bong soaⁿ, soaⁿ chiū chhut ian. 6 Kiû Lí hoat-chhut sih-nà, hō͘ in sì-sòaⁿ; Siā-chhut Lí ê chìⁿ, hō͘ in jiáu-loān. 7 Lí tùi téng-bīn chhun-chhiú kiù góa; Kiù góa chhut tōa-chúi, Kiù góa thoat-lī gōa-pang lâng ê chhiú. 8 In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú. 9 Siōng-tè ah, góa beh tùi Lí chhiùⁿ sin ê koa; Ēng cha̍p-tiâu-hiân ê sek, chhiùⁿ-koa o-ló Lí. 10 Lí sī hit ê chín-kiù lia̍t-ông--ê, Lí sī hit ê kiù lô͘-po̍k Tāi-pi̍t thoat-lī hāi-miā ê to--ê. 11 Kiû Lí chín-kiù góa, kiù góa thoat-lī gōa-pang lâng ê chhiú; In ê chhùi kóng pe̍h-chha̍t, In ê chiàⁿ-chhiú sī kan-chà ê chiàⁿ-chhiú. 12 Goán ê ta-po͘-kiáⁿ tng siàu-liân ê sî, chhin-chhiūⁿ chhiū-á tōa-châng; Goán ê cha-bó͘-kiáⁿ chhin-chhiūⁿ chhù-kak ê chio̍h, chiàu khí-keng ê khoán-sit tiau-tok--ê. 13 Goán ê chhek-chhng móa-móa, ōe chhut ta̍k-iūⁿ ê bí-niû; Goán ê iûⁿ tī soaⁿ-iá siⁿ-thòaⁿ, chiâⁿ-chheng chiâⁿ-bān. 14 Goán ê gû thoa-mi̍h móa-chāi; Bô ū lâng ji̍p-lâi chhim-chiàm, ia̍h bián chhut-khì cheng-chiàn; Goán ê koe-chhī, ia̍h bô ū thî-khàu ê siaⁿ. 15 Tú-tio̍h chit-hō kéng-hóng ê peh-sìⁿ, ū hok-khì; Ū Iâ-hô-hoa chòe in ê Siōng-tè, chit-hō ê peh-sìⁿ ū hok-khì.
1 大衛o-ló ê詩。1) 我ê上帝我ê王ah，
我beh尊你做高，我beh永遠o-ló你ê名。
2 我beh日日祝謝你；
亦beh永遠o-ló你ê名。
3 耶和華至大，應該受大ê o-ló；
伊ê大到bōe測度-得。
4 Chit代beh對hit代o-ló你ê所做；
亦beh報揚你大權能ê事。
5 我beh靜靜想你尊貴榮光ê威嚴，
Kap你奇妙ê所做。
6 人人beh講起你thang驚ê事ê大權能；
我亦beh報揚你ê至大。
7 In beh報揚你大恩 ê記念，
亦beh唱歌o-ló你ê公義。
8 耶和華有恩惠，有憐憫；
無快快受氣，大大有慈愛。
9 耶和華好款待萬類；
伊ê憐憫致蔭伊一切所造ê。
10 耶和華ah，你一切所造ê beh感謝你；
你聖ê百姓亦beh o-ló你。
11 In講起你ê國ê榮光；
談論你ê大權能。
12 Thang hō͘世間人知你大權能ê所做，
Kap你國威嚴ê榮光。
13 你ê國是永遠ê國；
你執掌ê權柄到萬代。
14 凡若跋倒ê，耶和華扶持in；
凡若受壓制ê，扶in起來。
15 萬項有lóng kia̍h目ǹg你，
你照時hō͘ in食物。
16 你開你ê手，
Hō͘有活氣ê lóng照所ài飽足。
17 耶和華tī伊一切所行ê，無m̄公義，
Tī伊一切所做ê，lóng有慈愛。
18 凡若求叫耶和華ê，耶和華kap in親近，
就是親近hiahê誠實求叫伊ê。
19 敬畏伊ê，伊beh成in ê心所ài；
亦beh聽in ê求叫，來拯救in。
20 耶和華保護一切疼伊ê人；
總是一切做pháiⁿ ê人，伊beh滅無in。
21 我ê嘴beh講出o-ló耶和華ê話；
願見有血氣ê，lóng永遠o-ló伊ê聖名。
1 Tāi-pi̍t o-ló ê si.1) Góa ê Siōng-tè góa ê Ông ah, Góa beh chun Lí chòe koâiⁿ, góa beh éng-oán o-ló Lí ê miâ. 2 Góa beh ji̍t-ji̍t chiok-siā Lí; Ia̍h beh éng-oán o-ló Lí ê miâ. 3 Iâ-hô-hoa chì-tōa, eng-kai siū tōa ê o-ló; I ê tōa kàu bōe chhek-to̍k--tit. 4 Chit-tāi beh tùi hit-tāi o-ló Lí ê só͘-chòe; Ia̍h beh pò-iông Lí tōa koân-lêng ê sū. 5 Góa beh chēng-chēng siūⁿ Lí chun-kùi êng-kng ê ui-giâm, Kap Lí kî-biāu ê só͘-chòe. 6 Lâng-lâng beh kóng-khí Lí thang kiaⁿ ê sū ê tōa koân-lêng; Góa ia̍h beh pò-iông Lí ê chì-tōa. 7 In beh pò-iông Lí tōa-un ê kì-liām, Ia̍h beh chhiùⁿ-koa o-ló Lí ê kong-gī. 8 Iâ-hô-hoa ū un-hūi, ū lîn-bín; Bô khoài-khoài siū-khì, tōa-tōa ū chû-ài. 9 Iâ-hô-hoa hó khoán-thāi bān-lūi; I ê lîn-bín tì-ìm I it-chhè só͘ chō--ê. 10 Iâ-hô-hoa ah, Lí it-chhè só͘ chō--ê beh kám-siā Lí; Lí sèng ê peh-sìⁿ ia̍h beh o-ló Lí. 11 In kóng-khí Lí ê kok ê êng-kng; Tâm-lūn Lí ê tōa koân-lêng. 12 Thang hō͘ sè-kan-lâng chai Lí tōa koân-lêng ê só͘-chòe, Kap Lí kok ui-giâm ê êng-kng. 13 Lí ê kok sī éng-oán ê kok; Lí chip-chiáng ê koân-pèng kàu bān-tāi. 14 Hoān-nā poa̍h-tó--ê, Iâ-hô-hoa hû-chhî in; Hoān-nā siū ap-chè--ê, hû in khí--lâi. 15 Bān-hāng-ū lóng kia̍h-ba̍k ǹg Lí, Lí chiàu-sî hō͘ in chia̍h-mi̍h. 16 Lí khui Lí ê chhiú, Hō͘ ū oa̍h-khì--ê lóng chiàu só͘-ài pá-chiok. 17 Iâ-hô-hoa tī I it-chhè só͘ kiâⁿ--ê, bô m̄ kong-gī, Tī I it-chhè só͘ chòe--ê, lóng ū chû-ài. 18 Hoān-nā kiû-kiò Iâ-hô-hoa ê, Iâ-hô-hoa kap in chhin-kūn, Chiū-sī chhin-kūn hiah ê sêng-si̍t kiû-kiò I ê. 19 Kèng-ùi I ê, I beh chiâⁿ in ê sim só͘ ài; Ia̍h beh thiaⁿ in ê kiû-kiò, lâi chín-kiù in. 20 Iâ-hô-hoa pó-hō͘ it-chhè thiàⁿ I ê lâng; Chóng-sī it-chhè chòe-pháiⁿ ê lâng, I beh bia̍t-bô in. 21 Góa ê chhùi beh kóng-chhut o-ló Iâ-hô-hoa ê ōe; Goān kìⁿ ū hiat-khì--ê, lóng éng-oán o-ló I ê sèng-miâ.
1 Lín tio̍h o-ló耶和華。
我ê心ah，你tio̍h o-ló耶和華。
2 我一生beh o-ló耶和華；
我iáu活ê時，beh唱歌o-ló我ê上帝。
3 Lín莫得óa靠君王，莫得óa靠世間人；
In一點á bōe能幫贊。
4 伊一下斷氣，就歸土；
伊所計畫-ê，tī hit日就消滅。
5 有雅各ê上帝做伊ê幫贊，
Ǹg望伊ê上帝耶和華ê，chit號人有福氣；
6 伊是創造天，地，海，kap其中ê萬物；
伊保守誠實到tī永遠；
7 伊為tio̍h受冤屈ê人伸冤；
賞賜食物hō͘ iau餓-ê。
耶和華tháu放受關監-ê；
8 耶和華開chhiⁿ-mî人ê目睭；
耶和華扶起受壓制ê人；
耶和華疼惜義人；
9 耶和華保護出外人；
扶持孤兒寡婦；
獨獨pháiⁿ人ê道路，hō͘伊彎曲。
10 耶和華beh做王到永遠；
錫安ah，你ê上帝beh做王到萬代。
Lín tio̍h o-ló耶和華。
1 Lín tio̍h o-ló Iâ-hô-hoa. Góa ê sim ah, lí tio̍h o-ló Iâ-hô-hoa. 2 Góa it-seng beh o-ló Iâ-hô-hoa; Góa iáu-oa̍h ê sî, beh chhiùⁿ-koa o-ló góa ê Siōng-tè. 3 Lín bo̍h--tit óa-khò kun-ông, bo̍h--tit óa-khò sè-kan lâng; In chi̍t-tiám-á bōe-ōe pang-chān. 4 I chi̍t-ē tn̄g-khùi, chiū kui-thó͘; I só͘ kè-e̍k--ê, tī hit-ji̍t chiū siau-bia̍t. 5 Ū Ngá-kok ê Siōng-tè chòe i ê pang-chān, Ǹg-bāng i ê Siōng-tè Iâ-hô-hoa ê, chit-hō lâng ū hok-khì; 6 I sī chhòng-chō thiⁿ, tōe, hái, kap kî-tiong ê bān-mi̍h; I pó-siú sêng-si̍t kàu tī éng-oán; 7 I ūi-tio̍h siū un-khut ê lâng sin-oan; Siúⁿ-sù chia̍h-mi̍h hō͘ iau-gō--ê. Iâ-hô-hoa tháu-pàng siū koaiⁿ-kaⁿ--ê; 8 Iâ-hô-hoa khui chhiⁿ-mî-lâng ê ba̍k-chiu; Iâ-hô-hoa hû-khí siū ap-chè ê lâng; Iâ-hô-hoa thiàⁿ-sioh gī-lâng; 9 Iâ-hô-hoa pó-hō͘ chhut-gōa lâng; Hû-chhî ko͘-jî kóaⁿ-hū; To̍k-to̍k pháiⁿ-lâng ê tō-lō͘, hō͘ i oan-khiau. 10 Iâ-hô-hoa beh chòe ông kàu éng-oán; Sek-an ah, lí ê Siōng-tè beh chòe ông kàu bān-tāi. Lín tio̍h o-ló Iâ-hô-hoa.
1 Lín tio̍h o-ló耶和華；
因為唱歌o-ló咱ê上帝，是真好真妙；
O-ló是合宜。
2 耶和華起造耶路撒冷；
聚集以色列中受遷徙ê人；
3 伊醫好傷心ê人；
包in ê傷。
4 伊算星辰ê數額；
Sûi粒kā伊號名。
5 咱ê主至大，極有氣力；
伊ê智慧無窮盡。
6 耶和華扶持謙卑ê人；
將pháiⁿ人降低到土腳。
7 Lín tio̍h用感謝ǹg耶和華唱歌；
彈琴唱歌，o-ló咱ê上帝。
8 伊起雲遮天，
為tio̍h地備辦雨，
Hō͘山發草。
9 伊賞賜食物hō͘走獸，
Kap teh-哮ê烏鴉kiáⁿ。
10 伊無意愛馬ê力大，
伊無歡喜人ê腳gâu走。
11 耶和華是歡喜敬畏伊，
Kap ǹg望伊慈愛ê人。
12 耶路撒冷ah，你tio̍h稱呼耶和華；
錫安ah，你tio̍h o-ló你ê上帝。
13 因為伊堅固你ê門栱；
賜福hō͘你中間ê kiáⁿ兒。
14 伊hō͘你ê境內太平；
用siōng好ê麥hō͘你食飽。
15 伊發出命令tī地裡，
伊ê話頒行真緊。
16 伊降落雪親像棉花，
亦落霜親像火灰。
17 伊 hiat落雹一塊一塊；
伊發出寒凊，是誰擋ōe-tiâu？
18 伊一下出令，chiahê就lóng溶；
伊hō͘風吹，水就流。
19 伊將伊ê話指示雅各，
將伊ê律例kap判斷，指示以色列。
20 伊m̄-bat án-ni款待別國；
伊ê判斷，in lóng m̄-bat。
Lín tio̍h o-ló耶和華。
1 Lín tio̍h o-ló Iâ-hô-hoa; In-ūi chhiùⁿ-koa o-ló lán ê Siōng-tè, sī chin-hó chin-biāu; O-ló sī ha̍p-gî. 2 Iâ-hô-hoa khí-chō Iâ-lō͘-sat-léng; Chū-chi̍p Í-sek-lia̍t tiong siū chhian-sóa ê lâng; 3 I i-hó siong-sim ê lâng; Pau in ê siong. 4 I sǹg chhiⁿ-sîn ê siàu-gia̍h; Sûi-lia̍p kā i hō-miâ. 5 Lán ê Chú chì-tōa, ke̍k ū khùi-la̍t; I ê tì-hūi bû-kiông-chīn. 6 Iâ-hô-hoa hû-chhî khiam-pi ê lâng; Chiong pháiⁿ-lâng kàng-kē kàu thô͘-kha. 7 Lín tio̍h ēng kám-siā ǹg Iâ-hô-hoa chhiùⁿ-koa; Tôaⁿ-khîm chhiùⁿ-koa, o-ló lán ê Siōng-tè. 8 I khí-hûn jia-thiⁿ, Ūi-tio̍h tōe pī-pān hō͘, Hō͘ soaⁿ hoat-chháu. 9 I siúⁿ-sù chia̍h-mi̍h hō͘ cháu-siù, Kap teh-háu ê o͘-a-kiáⁿ. 10 I bô ì-ài bé ê la̍t tōa, I bô hoaⁿ-hí lâng ê kha gâu-cháu. 11 Iâ-hô-hoa sī hoaⁿ-hí kèng-ùi I, Kap ǹg-bāng I chû-ài ê lâng. 12 Iâ-lō͘-sat-léng ah, lí tio̍h chheng-ho͘ Iâ-hô-hoa; Sek-an ah, lí tio̍h o-ló lí ê Siōng-tè. 13 In-ūi I kian-kò͘ lí ê mn̂g-kông; Sù-hok hō͘ lí tiong-kan ê kiáⁿ-jî. 14 I hō͘ lí ê kéng-lāi thài-pêng; Ēng siōng-hó ê be̍h hō͘ lí chia̍h-pá. 15 I hoat-chhut bēng-lēng tī tōe--nih, I ê ōe pan-hêng chin-kín. 16 I kàng-lo̍h seh chhin-chhiūⁿ mî-hoe, Ia̍h lo̍h-sng chhin-chhiūⁿ hé-hu. 17 I hiat-lo̍h pha̍uh chi̍t-tè chi̍t-tè; I hoat-chhut kôaⁿ-chhìn, chī-chūi tòng-ōe-tiâu? 18 I chi̍t-ē chhut-lēng, chiah-ê chiū lóng iûⁿ; I hō͘ hong chhe, chúi chiū lâu. 19 I chiong I ê ōe chí-sī Ngá-kok, Chiong I ê lu̍t-lē kap phòaⁿ-toàn, chí-sī Í-sek-lia̍t. 20 I m̄-bat án-ni khoán-thāi pa̍t-kok; I ê phòaⁿ-toàn, in lóng m̄-bat. Lín tio̍h o-ló Iâ-hô-hoa.
1 Lín tio̍h o-ló耶和華。
Tùi天頂o-ló耶和華；
Tī高ê所在o-ló伊。
2 伊ê眾使者ah，lín tio̍h o-ló伊。
伊ê眾天軍ah，lín tio̍h o-ló伊。
3 日kap月ah，lín tio̍h o-ló伊；
發光ê星辰ah，lín lóng tio̍h o-ló伊。
4 天頂ê天，kap 天以上ê水ah，
Lín lóng tio̍h o-ló伊。
5 Chiahê lóng tio̍h o-ló耶和華ê名；
因為伊一下命令，就lóng受創造。
6 伊將chiahê建立，到永永遠遠；
伊有定例，bōe會廢無。
7 Tùi地上tio̍h o-ló耶和華，
就是大魚kap一切ê深淵；
8 火kap冰雹，雪kap雲霧；
Thàn伊ê話ê狂風；
9 大山 kap一切ê小山；
結果子ê樹，kap一切ê柏香樹；
10 野獸kap一切ê cheng-siⁿ；
蟲thōa kap飛鳥；
11 世上ê君王kap萬民；
貴族kap世上一切ê審判官；
12 少年人kap在室女；
老人kap gín-ná；
13 Chiahê lóng tio̍h o-ló耶和華ê名；
因為只有伊ê名受尊做高；
伊ê榮光pôaⁿ過天地。
14 伊興起伊ê百姓ê角，
Hō͘伊聖ê百姓lóng o-ló伊，
就是以色列人，親近主hitê百姓。
Lín tio̍h o-ló耶和華。
1 Lín tio̍h o-ló Iâ-hô-hoa. Tùi thiⁿ-téng o-ló Iâ-hô-hoa; Tī koâiⁿ ê só͘-chāi o-ló I. 2 I ê chèng sù-chiá ah, lín tio̍h o-ló I. I ê chèng thian-kun ah, lín tio̍h o-ló I. 3 Ji̍t kap ge̍h ah, lín tio̍h o-ló I; Hoat-kng ê chhiⁿ-sîn ah, lín lóng tio̍h o-ló I. 4 Thiⁿ-téng ê thiⁿ, kap thiⁿ í-chiūⁿ ê chúi ah, Lín lóng tio̍h o-ló I. 5 Chiah-ê lóng tio̍h o-ló Iâ-hô-hoa ê miâ; In-ūi I chi̍t-ē bēng-lēng, chiū lóng siū chhòng-chō. 6 I chiong chiah-ê kiàn-li̍p, kàu éng-éng oán-oán; I ū tēng-lē, bōe-ōe hòe-bô. 7 Tùi tōe-chiūⁿ tio̍h o-ló Iâ-hô-hoa, Chiū-sī tōa-hî kap it-chhè ê chhim-ian; 8 Hé kap peng-pha̍uh, seh kap hûn-bū; Thàn I ê ōe ê kông-hong; 9 Tōa-soaⁿ kap it-chhè ê sió-soaⁿ; Kiat ké-chí ê chhiū, kap it-chhè ê pek-hiuⁿ-chhiū; 10 Iá-siù kap it-chhè ê cheng-siⁿ; Thâng-thōa kap pe-chiáu; 11 Sè-chiūⁿ ê kun-ông kap bān-bîn; Kùi-cho̍k kap sè-chiūⁿ it-chhè ê sím-phòaⁿ-koaⁿ; 12 Siàu-liân-lâng kap chāi-sek-lú; Lāu-lâng kap gín-ná; 13 Chiah-ê lóng tio̍h o-ló Iâ-hô-hoa ê miâ; In-ūi chí-ū I ê miâ siū chun chòe koâiⁿ; I ê êng-kng pôaⁿ-kè thiⁿ tōe. 14 I heng-khí I ê peh-sìⁿ ê kak, Hō͘ I sèng ê peh-sìⁿ lóng o-ló I, Chiū-sī Í-sek-lia̍t lâng, chhin-kūn Chú hit ê peh-sìⁿ. Lín tio̍h o-ló Iâ-hô-hoa.
1 Lín tio̍h o-ló耶和華。
Tio̍h唱新ê歌，o-ló耶和華；Tī聖ê百姓ê會中o-ló伊。
2 願以色列因為造伊ê主來歡喜；
願錫安ê百姓因為in ê王來快樂。
3 願in跳舞o-ló伊ê名；
Phah鼓彈琴，唱歌o-ló伊。
4 因為耶和華歡喜伊ê百姓；
伊beh用救恩做謙卑ê人ê裝飾。
5 願聖ê百姓因為所得tio̍h ê榮光來歡喜；
願in tī眠床裡出歡喜ê聲。
6 願in ê嘴o-ló上帝做高，
手kia̍h雙面利ê劍；
7 Thang報應外邦，
刑罰列國；
8 用鏈縛in ê君王，用鐵釦來鎖in ê人臣；
9 Beh tī in ê身上行所記載ê判斷；
伊聖ê百姓lóng有chit號榮光。
Lín tio̍h o-ló耶和華。
1 Lín tio̍h o-ló Iâ-hô-hoa. Tio̍h chhiùⁿ sin ê koa, o-ló Iâ-hô-hoa; Tī sèng ê peh-sìⁿ ê hōe-tiong o-ló I. 2 Goān Í-sek-lia̍t in-ūi chō i ê Chú lâi hoaⁿ-hí; Goān Sek-an ê peh-sìⁿ in-ūi in ê Ông lâi khoài-lo̍k. 3 Goān in thiàu-bú o-ló I ê miâ; Phah-kó͘ tôaⁿ-khîm, chhiùⁿ-koa o-ló I. 4 In-ūi Iâ-hô-hoa hoaⁿ-hí I ê peh-sìⁿ; I beh ēng kiù-un chòe khiam-pi ê lâng ê chng-thāⁿ. 5 Goān sèng ê peh-sìⁿ in-ūi só͘ tit-tio̍h ê êng-kng lâi hoaⁿ-hí; Goān in tī bîn-chhn̂g--nih chhut hoaⁿ-hí ê siaⁿ. 6 Goān in ê chhùi o-ló Siōng-tè chòe-koâiⁿ, Chhiú kia̍h siang-bīn lāi ê kiàm; 7 Thang pò-èng gōa-pang, Hêng-hoa̍t lia̍t-kok; 8 Ēng liān pa̍k in ê kun-ông, Ēng thih-khàu lâi só in ê jîn-sîn; 9 Beh tī in ê sin-chiūⁿ kiâⁿ só͘ kì-chài ê phòaⁿ-toàn; I sèng ê peh-sìⁿ lóng ū chit-hō êng-kng. Lín tio̍h o-ló Iâ-hô-hoa.
1 Lín tio̍h o-ló耶和華。
Tio̍h tī上帝ê聖所o-ló伊；
Tio̍h tī伊權能ê穹蒼o-ló伊。
2 Tio̍h因為伊大權能ê行做，o-ló伊；
照伊美妙ê高大，o-ló伊。
3 Tio̍h pûn哨角o-ló伊；
彈瑟彈琴o-ló伊。
4 Phah鼓跳舞o-ló伊；
用絲絃ê樂器kap pûn簫o-ló伊。
5 用聲大ê鐃鈸o-ló伊；用音高ê鐃鈸o-ló伊。
6 凡若有喘氣ê，lóng tio̍h o-ló耶和華。
Lín tio̍h o-ló耶和華。
1 Lín tio̍h o-ló Iâ-hô-hoa. Tio̍h tī Siōng-tè ê sèng-só͘ o-ló I; Tio̍h tī I koân-lêng ê kiong-chhong o-ló I. 2 Tio̍h in-ūi I tōa koân-lêng ê kiâⁿ-chòe, o-ló I; Chiàu I bí-biāu ê koâiⁿ-tōa, o-ló I. 3 Tio̍h pûn sàu-kak o-ló I; Tôaⁿ-sek tôaⁿ-khîm o-ló I. 4 Phah-kó͘ thiàu-bú o-ló I; Ēng si-hiân ê ga̍k-khì kap pûn-siau o-ló I. 5 Ēng siaⁿ-tōa ê lâ-poa̍h o-ló I; Ēng im-koâiⁿ ê lâ-poa̍h o-ló I. 6 Hoān-nā ū chhoán-khùi--ê, lóng tio̍h o-ló Iâ-hô-hoa. Lín tio̍h o-ló Iâ-hô-hoa.