1 掃羅死了，也大衛刣死A-má-le̍k人tò來ê時，大衛tòa tī Sé-kek-la̍h兩日。 2 到第三日，看ah，有一人tùi營盤，tùi掃羅hia，來，衣裳拆裂，頭殼sám土粉，到大衛hia，就仆tī地裡拜伊。 3 大衛問伊講，你tùi toh落來？伊應講，我tùi以色列ê軍營走來。 4 大衛koh問伊，講，Tāi-chì怎樣？請你kā我講。伊應講，百姓tùi戰陣逃走，百姓chōe-chōe倒teh死去；掃羅kap伊ê kiáⁿ約拿單也死。 5 大衛kā對伊講ê少年人講，你怎樣知掃羅kap伊ê kiáⁿ約拿單死ah？ 6 kā伊講ê少年人講，我偶然到Ki-lī-pho山，看見掃羅óa tī伊ê鎗，有戰車馬兵jip-óa伊。 7 伊oa̍t頭看我，就叫我；我應講，我tī-chia。 8 伊問我講，你是甚麼人？我應講，我是A-má-le̍k人。 9 伊koh kā我講，請你近óa我來刣死我，因為我真痛苦，我ê性命iáu好好。 10 我就近óa伊，來刣死伊，因為我知伊倒落去了，的確bōe活；我就the̍h伊頭殼裡ê冕旒，kap伊ê手環，帶到我ê主chia。 11 大衛就拆裂衫，跟tè伊ê人也是án-ni。 12 為tio̍h掃羅kap伊ê kiáⁿ約拿單kap耶和華ê百姓，kap以色列家，悲哀啼哭禁食到日暗，因為in倒tī刀下。 13 大衛kā對伊講ê少年人講，你tùi toh落來？應講，我是出外人ê kiáⁿ，A-má-le̍k人。 14 大衛對伊講，你伸手刣死耶和華所抹油ê，怎樣無驚ah？ 15 大衛叫一个少年人，講，你近óa去刣死伊。伊就去phah hō͘伊死。 16 大衛kā伊講，你ê血歸tī你ê頭殼，因為你ê嘴家己干證你講，我刣死耶和華所抹油ê。 17 大衛做哀歌，追悼掃羅kap伊ê kiáⁿ約拿單。 18 Koh講，將chitê 哀歌教示偤大人；chitê哀歌名叫弓歌，寫tī Ngá-soah-jíⁿ ê冊。歌講， 19 以色列ah，你ê榮顯ê受刣 tī山頭； 害ah，英雄ê死到án-ni ah！ 20 莫得tī Ka-te̍k報告， 莫得tī A-si̍t-ki-lûn ê街路報揚， 驚了腓利士ê cha-bó͘-gín-ná歡喜， 驚了無受割禮ê人ê cha-bó͘-gín-ná大悅。 21 Ki-lī-pho山ah， 願無露水，無雨，tī你hia，也無出禮物ê田； 因為tī-hia勇士ê藤牌受hiat-ka̍k， 掃羅ê藤牌，親像無受抹油ê。 22 Tùi受刣-ê ê血，tùi勇士ê油， 約拿單ê弓無倒退， 掃羅ê刀無空空倒tńg。 23 掃羅kap約拿單活ê時thang疼，thang歡喜ê； 死ê時也無分離； In比鷹鳥khah緊， 比獅khah強。 24 以色列ê cha-bó͘-kiáⁿ ah，tio̍h為tio̍h掃羅啼哭， 伊bat hō͘ lín穿朱紅色來歡喜； Hō͘ lín ê衣服有黃金ê裝飾。 25 勇士怎樣倒tī戰陣！ 約拿單受刣 tī你ê山頭。 26 我ê兄約拿單ah，我為你傷心； 我盡在歡喜你； 你ê疼我真奇妙， 贏過婦人人ê疼。 27 勇士死到án-ni， 戰器毀滅到án-ni！
1 Sò-lô sí-liáu, iā Tāi-pi̍t thâi-sí A-má-le̍k lâng tò-lâi ê sî, Tāi-pi̍t tòa tī Sé-kek-la̍h nn̄g-ji̍t. 2 Kàu tē-saⁿ ji̍t, khòaⁿ ah, ū chi̍t-lâng tùi iâⁿ-pôaⁿ, tùi Sò-lô hia, lâi, i-chiûⁿ thiah-li̍h, thâu-khak sám thô͘-hún, kàu Tāi-pi̍t hia, chiū phak tī tōe--nih pài i. 3 Tāi-pi̍t mn̄g i kóng, Lí tùi toh-lo̍h lâi? I ìn kóng, Góa tùi Í-sek-lia̍t ê kun-iâⁿ cháu-lâi. 4 Tāi-pi̍t koh mn̄g i, kóng, Tāi-chì cháiⁿ-iūⁿ? chhiáⁿ lí kā góa kóng. I ìn kóng, Peh-sìⁿ tùi chiàn-tīn tô-cháu, peh-sìⁿ chōe-chōe tó-teh sí--khì; Sò-lô kap i ê kiáⁿ Iok-ná-tan iā sí. 5 Tāi-pi̍t kā tùi i kóng ê siàu-liân lâng kóng, Lí cháiⁿ-iūⁿ chai Sò-lô kap i ê kiáⁿ Iok-ná-tan sí ah? 6 Kā i kóng ê siàu-liân lâng kóng, Góa ngó͘-jiân kàu Ki-lī-pho soaⁿ, khòaⁿ-kìⁿ Sò-lô òa(**óa) tī i ê chhiuⁿ, ū chiàn-chhia bé-peng jip-óa i. 7 I oa̍t-thâu khòaⁿ góa, chiū kiò góa; góa ìn kóng, Góa tī-chia. 8 I mn̄g góa kóng, Lí sī sím-mi̍h lâng? Góa ìn kóng, Góa sī A-má-le̍k lâng. 9 I koh kā góa kóng, Chhiáⁿ lí kūn-óa góa lâi thâi-sí góa, in-ūi góa chin thòng-khó͘, góa ê sìⁿ-miā iáu hó-hó. 10 Góa chiū kūn-óa i, lâi thâi-sí i, in-ūi góa chai i tó--lo̍h-khì liáu, tek-khak bōe oa̍h; góa chiū the̍h i thâu-khak--nih ê bián-liû, kap i ê chhiú-khoân, tòa kàu góa ê chú chia. 11 Tāi-pi̍t chiū thiah-li̍h saⁿ, kun-tè i ê lâng iā sī án-ni. 12 Ūi-tio̍h Sò-lô kap i ê kiáⁿ Iok-ná-tan kap Iâ-hô-hoa ê peh-sìⁿ, kap Í-sek-lia̍t ke, pi-ai thî-khàu kìm-chia̍h kàu ji̍t-àm, in-ūi in tó tī to-ē. 13 Tāi-pi̍t kā tùi i kóng ê siàu-liân lâng kóng, Lí tùi toh-lo̍h lâi? Ìn kóng, Góa sī chhut-gōa lâng ê kiáⁿ, A-má-le̍k lâng. 14 Tāi-pi̍t tùi i kóng, Lí chhun-chhiú thâi-sí Iâ-hô-hoa só͘ boah-iû-ê, cháiⁿ-iūⁿ bô kiaⁿ ah? 15 Tāi-pi̍t kiò chi̍t ê siàu-liân lâng, kóng, Lí kūn-óa khì thâi-sí i. I chiū khì phah hō͘ i sí. 16 Tāi-pi̍t kā i kóng, Lí ê huih kui tī lí ê thâu-khak, in-ūi lí ê chhùi ka-kī kan-chèng lí kóng, Góa thâi-sí Iâ-hô-hoa só͘ boah-iû-ê. 17 Tāi-pi̍t chòe ai-ko, tui-tō Sò-lô kap i ê kiáⁿ Iok-ná-tan. 18 Koh kóng, Chiong chit ê ai-ko kà-sī Iû-tāi lâng; chit ê ai-ko miâ kiò Keng-ko, siá tī Ngá-soah-jíⁿ ê chheh. Koa kóng, 19 Í-sek-lia̍t ah, lí ê êng-hián--ê siū thâi tī soaⁿ-thâu; Hāi ah, eng-hiông-ê sí kàu án-ni ah! 20 Bo̍h-tit tī Ka-te̍k pò-kò, Bo̍h-tit tī A-si̍t-ki-lûn ê ke-lō͘ pò-iông, Kiaⁿ-liáu Hui-lī-sū ê cha-bó͘-gín-ná hoaⁿ-hí, Kiaⁿ-liáu bô siū kat-lé ê lâng ê cha-bó͘-gín-ná tāi-ia̍t. 21 Ki-lī-pho soaⁿ ah, Goān bô lō͘-chúi, bô hō͘, tī lí hia, iā bô chhut lé-mi̍h ê chhân; In-ūi tī-hia ióng-sū ê tîn-pâi siū hiat-ka̍k, Sò-lô ê tîn-pâi, chhin-chhiūⁿ bô siū boah-iû ê. 22 Tùi siū-thâi-ê ê huih, tùi ióng-sū ê iû, Iok-ná-tan ê keng bô tò-thè, Sò-lô ê to bô khang-khang tò-tńg. 23 Sò-lô kap Iok-ná-tan oa̍h ê sî thang thiàⁿ, thang hoaⁿ-hí ê; Sí ê sî iā bô pun-lī; In pí eng-chiáu khah-kín, Pí sai khah-kiông. 24 Í-sek-lia̍t ê cha-bó͘-kiáⁿ ah, tio̍h ūi-tio̍h Sò-lô thî-khàu, I bat hō͘ lín chhēng chu-âng-sek lâi hoaⁿ-hí; Hō͘ lín ê i-ho̍k ū n̂g-kim ê chng-thāⁿ. 25 Ióng-sū cháiⁿ-iūⁿ tó tī chiàn-tīn! Iok-ná-tan siū-thâi tī lí ê soaⁿ-thâu. 26 Góa ê hiaⁿ Iok-ná-tan ah, góa ūi lí siong-sim; Góa chīn-chāi hoaⁿ-hí lí; Lí ê thiàⁿ góa chin kî-biāu, Iâⁿ-kè hū-jîn-lâng ê thiàⁿ. 27 Ióng-sū sí kàu án-ni, Chiàn-khì húi-bia̍t kàu án-ni!
1 後來大衛問耶和華講，我上去偤大一个城thang mah？耶和華kā伊講，Thang上去。大衛講，我tio̍h上去toh落？伊講，到Hi-pek-lûn。 2 大衛就kap伊兩個bó͘，就是Iâ-su-lia̍t人A-hi-loán，kap Ka-bi̍t人bat做Ná-pat ê bó͘，名A-pí-kai，lóng上去hia。 3 大衛也hō͘跟tè伊ê人，kap in ta̍k人ê家眷，lóng上去；in就tiàm tī Hi-pek-lûn hiahê城。 4 偤大人到，tī-hia用油抹大衛做偤大家ê王。 有人kā大衛講，埋葬掃羅ê是Ki-lia̍t Ngá-pí ê人。 5 大衛就差使者去見Ki-lia̍t Ngá-pí ê人，kā in講，願耶和華賜福lín，因為lín用chitê仁慈款待你ê主掃羅，kā伊埋葬。 6 願耶和華用仁慈誠實款待lín；我也beh答lín chitê仁慈，因為lín有行chitê事。 7 Lín ê手tio̍h giám硬，lín tio̍h勇敢，因為lín ê主掃羅已經死，偤大族也有用油抹我做in ê王。 8 掃羅ê軍長Nî-jíⁿ ê kiáⁿ Ap-nî-jíⁿ bat將掃羅ê kiáⁿ I-si-pho-siat帶伊過去Má-hap-liām， 9 設立伊做王治理Ki-lia̍t、A-su-lī、Iâ-su-lia̍t、Í-hoat-liân、便雅憫，kap以色列ê眾人。 10 掃羅ê kiáⁿ I-si-pho-siat起頭做以色列王，hit時四十歲；坐位兩年。獨獨偤大族tè大衛。 11 大衛tī Hi-pek-lûn做偤大族ê王，歷過七年koh六月日。 12 Nî-jíⁿ ê kiáⁿ Ap-nî-jíⁿ，kap掃羅ê kiáⁿ I-si-pho-siat ê人臣，tùi Má-hap-liām出來去Ki-piàn。 13 Sé-ló͘-ngá ê kiáⁿ約押kap大衛ê人臣，也出來，tī Ki-piàn ê池邊相tú-tio̍h；in就坐teh，一隊坐tī池ê chit-pêng，一隊坐tī池ê hit-pêng。 14 Ap-nî-jíⁿ對約押講，請你hō͘少年人起來，tī咱ê面前kún笑。約押講，Thang hō͘伊起來。 15 In就起來照數額過去；屬掃羅ê kiáⁿ I-si-pho-siat ê便雅憫人十二名，大衛ê人臣也有十二名。 16 Ta̍k-ê khiú伊ê對面hit人ê頭殼，用刀鑿伊對面hit人ê hia̍p，做一下倒落去死；所以hit所在叫做Hi-lī-kah-hap-sò͘-lîm，就是tī Ki-piàn。 17 Hit日ê交戰真雄；Ap-nî-jíⁿ kap以色列人khah輸tī大衛ê兵ê面前。 18 Tī-hia有Sé-ló͘-ngá三個kiáⁿ，約押、A-pí-su、A-sat-hek；A-sat-hek ê腳gâu走，親像野鹿一般。 19 A-sat-hek追jip Ap-nî-jíⁿ；無偏左右，直直jip Ap-nî-jíⁿ。 20 Ap-nî-jíⁿ oa̍t頭看講，A-sat-hek ah，是你á m̄是？應講，是我。 21 Ap-nî-jíⁿ kā伊講，你tio̍h oa̍t-tńg chiàⁿ-pêng，á是tò-pêng，掠一个少年人，為你本身剝(pak)伊ê戰衫；總是A-sat-hek直直追伊，m̄肯oa̍t-tńg。 22 Ap-nî-jíⁿ koh kā A-sat-hek講，你oa̍t-tńg莫得追jip我；我啥事tio̍h phah你倒地？若án-ni，我有甚麼面目thang去見你ê兄約押。 23 伊猶原m̄肯oa̍t-tńg；Ap-nî-jíⁿ chiah用鎗柄後ê刀鑿入伊ê腹肚；鎗就thàng過伊ê ka-chiah後，伊就倒tī-hia死；見若來到A-sat-hek倒teh死ê所在，就lóng停腳。 24 約押kap A-pí-su追jip Ap-nî-jíⁿ；in到Ki-a相對面ê A-má山，tī Ki-piàn曠野ê路，日就落。 25 便雅憫人聚集tè Ap-nî-jíⁿ做一陣，khiā tī山頂。 26 Ap-nî-jíⁿ叫約押講，刀劍刣人永無soah mah？你kiám m̄知到尾有艱苦mah？你beh到甚麼時hō͘百姓tò去，無jip in ê兄弟ah？ 27 約押講，我kí永活ê上帝來chiù-chōa，若m̄是你講，早起百姓就tò去，無jip伊ê兄弟。 28 Tùi án-ni，約押pûn哨角，眾百姓就khiā-teh，無koh追jip以色列人，也無koh交戰。 29 Ap-nî-jíⁿ kap tè伊ê人thong暝行，經過A-la̍h-pa，過約旦，tùi Pit-lûn 過去到Má-hap-liām。 30 約押無koh jip Ap-nî-jíⁿ，就tò來，聚集眾百姓；大衛ê兵減十九人，kap A-sat-hek。 31 總是大衛ê兵phah死便雅憫人，kap tè Ap-nî-jíⁿ ê人，共三百六十人。 32 In扛A-sat-hek去伯利恆，埋葬tī in老父ê墓。約押kap tè伊ê人thong暝行，到Hi-pek-lûn ê時，天tú-á光。
1 Āu-lâi Tāi-pi̍t mn̄g Iâ-hô-hoa kóng, Góa chiūⁿ-khì Iû-tāi chi̍t ê siâⁿ thang mah? Iâ-hô-hoa kā i kóng, Thang chiūⁿ khì. Tāi-pi̍t kóng, Góa tio̍h chiūⁿ-khì toh-lo̍h? I kóng, Kàu Hi-pek-lûn. 2 Tāi-pi̍t chiū kap i nn̄g ê bó͘, chiū-sī Iâ-su-lia̍t lâng A-hi-loán, kap Ka-bi̍t lâng bat chòe Ná-pat ê bó͘, miâ A-pí-kai, lóng chiūⁿ-khì hia. 3 Tāi-pi̍t iā hō͘ kun-tè i ê lâng, kap in ta̍k-lâng ê ke-koàn, lóng chiūⁿ-khì; in chiū tiàm tī Hi-pek-lûn hiah ê siâⁿ. 4 Iû-tāi lâng kàu, tī-hia ēng iû boah Tāi-pi̍t chòe Iû-tāi ke ê ông. Ū lâng kā Tāi-pi̍t kóng, Bâi-chòng Sò-lô--ê sī Ki-lia̍t Ngá-pí ê lâng. 5 Tāi-pi̍t chiū chhe sù-chiá khì kìⁿ Ki-lia̍t Ngá-pí ê lâng, kā in kóng, Goān Iâ-hô-hoa sù-ho̍k lín, in-ūi lín ēng chit ê jîn-chû khoán-thāi lí ê chú Sò-lô, kā i bâi-chòng. 6 Goān Iâ-hô-hoa ēng jîn-chû sêng-si̍t khoán-thāi lín; góa iā beh tap lín chit ê jîn-chû, in-ūi lín ū kiâⁿ chit ê sū. 7 Lín ê chhiú tio̍h giám-ngī, lín tio̍h ióng-kám, in-ūi lín ê chú Sò-lô í-keng sí, Iû-tāi cho̍k iā ū ēng iû boah góa chòe in ê ông. 8 Sò-lô ê kun-tiúⁿ Nî-jíⁿ ê kiáⁿ Ap-nî-jíⁿ bat chiong Sò-lô ê kiáⁿ I-si-pho-siat tòa i kè--khì Má-hap-liām, 9 siat-li̍p i chòe-ông tī-lí Ki-lia̍t, A-su-lī, Iâ-su-lia̍t, Í-hoat-liân, Piān-ngá-bín, kap Í-sek-lia̍t ê chèng-lâng. 10 Sò-lô ê kiáⁿ I-si-pho-siat khí-thâu chòe Í-sek-lia̍t ông, hit-sî sì-cha̍p hè; chē-ūi nn̄g-nî. To̍k-to̍k Iû-tāi cho̍k tè Tāi-pi̍t. 11 Tāi-pi̍t tī Hi-pek-lûn chòe Iû-tāi cho̍k ê ông, le̍k-kè chhit-nî koh la̍k-ge̍h-ji̍t. 12 Nî-jíⁿ ê kiáⁿ Ap-nî-jíⁿ, kap Sò-lô ê kiáⁿ I-si-pho-siat ê jîn-sîn, tùi Má-hap-liām chhut-lâi khì Ki-piàn. 13 Sé-ló͘-ngá ê kiáⁿ Iok-ap kap Tāi-pi̍t ê jîn-sîn, iā chhut-lâi, tī Ki-piàn ê tî-piⁿ saⁿ tú-tio̍h; in chiū chē--teh, chi̍t-tūi chē tī tî ê chit-pêng, chi̍t-tūi chē tī tî ê hit-pêng. 14 Ap-nî-jíⁿ tùi Iok-ap kóng, Chhiáⁿ lí hō͘ siàu-liân lâng khí-lâi, tī lán ê bīn-chêng kún-chhiò. Iok-ap kóng, Thang hō͘ i khí-lâi. 15 In chiū khí-lâi chiàu siàu-gia̍h kè-khì; sio̍k Sò-lô ê kiáⁿ I-si-pho-siat ê Piān-ngá-bín lâng cha̍p-jī miâ, Tāi-pi̍t ê jîn-sîn iā ū cha̍p-jī miâ. 16 Ta̍k-ê khiú i ê tùi-bīn hit-lâng ê thâu-khak, ēng to chha̍k i tùi-bīn hit-lâng ê hia̍p, chòe chi̍t-ē tó--lo̍h-khì sí; só͘-í hit só͘-chāi kiò-chòe Hi-lī-kah-hap-sò͘-lîm, chiū-sī tī Ki-piàn. 17 Hit-ji̍t ê kau-chiàn chin-hiông; Ap-nî-jíⁿ kap Í-sek-lia̍t lâng khah-su tī Tāi-pi̍t ê peng ê bīn-chêng. 18 Tī-hia ū Sé-ló͘-ngá saⁿ ê kiáⁿ, Iok-ap, A-pí-su, A-sat-hek; A-sat-hek ê kha gâu cháu, chhin-chhiūⁿ iá-lo̍k chi̍t-poaⁿ. 19 A-sat-hek tui-jip Ap-nî-jíⁿ; bô phian chó-iū, ti̍t-ti̍t jip Ap-nî-jíⁿ. 20 Ap-nî-jíⁿ oa̍t-thâu khòaⁿ kóng, A-sat-hek ah, sī lí á m̄-sī? Ìn kóng, Sī góa. 21 Ap-nî-jíⁿ kā i kóng, Lí tio̍h oa̍t-tńg chiàⁿ-pêng, á-sī tò-pêng, lia̍h chi̍t ê siàu-liân lâng, ūi lí pún-sin pak i ê chiàn-saⁿ; chóng-sī A-sat-hek ti̍t-ti̍t tui i, m̄-khéng oa̍t-tńg. 22 Ap-nî-jíⁿ koh kā A-sat-hek kóng, Lí oa̍t-tńg bo̍h--tit tui-jip góa; góa siáⁿ-sū tio̍h phah lí tó-tōe? nā án-ni, góa ū sím-mi̍h bīn-ba̍k thang khì kìⁿ lí ê hiaⁿ Iok-ap. 23 I iû-goân m̄-khéng oa̍t-tńg; Ap-nî-jíⁿ chiah ēng chhiuⁿ-pìⁿ-āu ê to chha̍k-ji̍p i ê pak-tó͘; chhiuⁿ chiū thàng-kè i ê ka-chiah-āu, i chiū tó tī-hia sí; kìⁿ-nā lâi kàu A-sat-hek tó-teh sí ê só͘-chāi, chiū lóng thêng-kha. 24 Iok-ap kap A-pí-su tui-jip Ap-nî-jíⁿ; in kàu Ki-a saⁿ tùi-bīn ê A-má soaⁿ, tī Ki-piàn khòng-iá ê lō͘, ji̍t chiū lo̍h. 25 Piān-ngá-bín lâng chū-chi̍p tè Ap-nî-jíⁿ chòe chi̍t-tīn, khiā tī soaⁿ-téng. 26 Ap-nî-jíⁿ kiò Iok-ap kóng, To-kiàm thâi lâng éng bô soah mah? Lí kiám m̄-chai kàu-bé ū kan-khó͘ mah? lí beh kàu sím-mi̍h sî hō͘ peh-sìⁿ tò-khì, bô jip in ê hiaⁿ-tī ah? 27 Iok-ap kóng, Góa kí éng-oa̍h ê Siōng-tè lâi chiù-chōa, nā m̄-sī lí kóng, chá-khí peh-sìⁿ chiū tò-khì, bô jip i ê hiaⁿ-tī. 28 Tùi án-ni, Iok-ap pûn sàu-kak, chèng peh-sìⁿ chiū khiā-teh, bô koh tui-jip Í-sek-lia̍t lâng, iā bô koh kau-chiàn. 29 Ap-nî-jíⁿ kap tè i ê lâng thong-mî kiâⁿ, keng-kè A-la̍h-pa, kè Iok-tàn, tùi Pit-lûn kè-khì kàu Má-hap-liām. 30 Iok-ap bô koh jip Ap-nî-jíⁿ, chiū tò-lâi, chū-chi̍p chèng peh-sìⁿ; Tāi-pi̍t ê pêng kiám cha̍p-káu lâng, kap A-sat-hek. 31 Chóng-sī Tāi-pi̍t ê peng phah-sí Piān-ngá-bín lâng, kap tè Ap-nî-jíⁿ ê lâng, kiōng saⁿ-pah la̍k-cha̍p lâng. 32 In kng A-sat-hek khì Pek-lī-hêng, bâi-chòng tī in lāu-pē ê bōng. Iok-ap kap tè i ê lâng thong-mî kiâⁿ, kàu Hi-pek-lûn ê sî, thiⁿ tú-á kng.
1 掃羅ê家kap大衛ê家交戰久久；大衛ná強盛，掃羅ê家ná衰弱。 2 大衛tī Hi-pek-lûn生kúi-nā ê kiáⁿ；大kiáⁿ Àm-lùn，是Iâ-su-lia̍t人A-hi-loán所生ê； 3 第二個Ki-lī-ap，是bat做Ka-bi̍t人Ná-pat ê bó͘ A-pí-kai所生ê；第三個，押沙龍，是Ki-su̍t王Ta̍t-mái ê cha-bó͘-kiáⁿ Má-ka ê kiáⁿ； 4 第四個，A-to-nî-ngá，是Hap-ki̍p ê kiáⁿ；第五個，Sī-hoat-thê-ngá，是A-pí-tha ê kiáⁿ； 5 第六個，Í-te̍k-liām，是大衛ê bó͘ Í-kek-la̍h所生ê；chiahê是大衛tī Hi-pek-lûn所生ê。 6 掃羅ê家kap大衛ê家交戰ê時，Ap-nî-jíⁿ tī掃羅ê家家己強。 7 掃羅有一个妃，名叫Lī-su-pa，是Ài-a ê cha-bó͘-kiáⁿ。I-si-pho-siat對Ap-nî-jíⁿ講，你啥事kap我老父ê妃同房ah？ 8 Ap-nî-jíⁿ因為I-si-pho-siat ê話，就真受氣，講，我kiám是偤大ê狗頭mah？我好款待你ê老父掃羅ê家，kap伊ê兄弟朋友，無將你交tī大衛ê手，你今á日竟然因為chitê婦人人責備我mah？ 9 我若無照耶和華所對大衛chiù-chōa-ê來行tī伊，就願上帝加倍責罰。 10 Ap-nî-jíⁿ，beh tùi掃羅ê家移徙國位，來建立大衛ê位，hō͘伊治理以色列kap偤大，tùi Tàn到別是巴。 11 I-si-pho-siat，因為驚Ap-nî-jíⁿ，bōe應一句話。 12 Ap-nî-jíⁿ為tio̍h本身差使者去見大衛講，chitê地方屬是誰 ah？Koh講，你kap我立約，我ê手beh幫贊你，hō͘以色列lóng歸你。 13 大衛講，好，我kap你立約；總是我beh對你討一項，就是你來見我ê面hit時，若無將掃羅ê cha-bó͘-kiáⁿ Bí-kah chhōa來，的確bōe見我ê面。 14 大衛就差使者去見掃羅ê kiáⁿ I-si-pho-siat，講，你tio̍h將我ê bó͘ Bí-kah還我，伊就是我bat用腓利士人一百陽物ê皮所聘定ê。 15 I-si-pho-siat就差人對伊ê丈夫La̍h-ek ê kiáⁿ Phàⁿ-thiat hia，帶伊來。 16 伊ê丈夫tè伊ê後面，ná行ná哮，kap伊到Pa-hō͘-lîm。Ap-nî-jíⁿ kā伊講，tò去ah。伊就tò去。 17 Ap-nî-jíⁿ kap以色列ê長老參詳，講，Lín前欣慕大衛做王治理lín；taⁿ tio̍h行伊； 18 因為耶和華bat論到大衛講，我beh用我ê奴僕大衛ê手救我ê百姓以色列脫離腓利士人ê手，kap眾對敵ê手。 19 Ap-nî-jíⁿ也講hō͘便雅憫人聽；koh到Hi-pek-lûn，將以色列人，kap便雅憫全家，一切所看做好ê，講hō͘大衛聽。 20 Ap-nî-jíⁿ kap二十人到Hi-pek-lûn見大衛。大衛為tio̍h Ap-nî-jíⁿ，以及kap伊來ê人，設筵席。 21 Ap-nî-jíⁿ kā大衛講，我beh起來，去招集以色列眾人來見我ê主我ê王，hō͘ in thang kap你立約，你就thang做王，照心所ài來管理。大衛就送Ap-nî-jíⁿ去；伊就平安去。 22 大衛ê兵kap約押出軍tò來，帶chōe-chōe搶ê物來；hit時Ap-nî-jíⁿ無tī Hi-pek-lûn大衛hia，因為大衛已經送伊去，伊也平安去。 23 約押kap tè伊ê全軍已經到，有人通知約押講，Nî-jíⁿ ê kiáⁿ Ap-nî-jíⁿ來見王，王送伊去，伊也平安去。 24 約押去見王講，你做甚麼ah？看ah，Ap-nî-jíⁿ來見你，你啥事送伊去？taⁿ伊去了lah； 25 你知Nî-jíⁿ ê kiáⁿ Ap-nî-jíⁿ來，是beh騙你，ài知你ê出kap你ê入，kap你一切所做ê事。 26 約押tùi大衛hia出來，就差使者去jip Ap-nî-jíⁿ；in就tùi Se-la̍h ê井帶伊來；總是大衛m̄知。 27 Ap-nî-jíⁿ 倒tńg來到Hi-pek-lûn，約押chhōa伊到城門口，假beh暗靜kap伊講話，就tī-hia鑿透伊ê腹肚，伊就死；這是為tio̍h伊ê小弟A-sat-hek hō͘伊刣死。 28 後來大衛聽見，就講，流Nî-jíⁿ ê kiáⁿ Ap-nî-jíⁿ ê血，chitê罪tī耶和華ê面前的確永遠無歸tī我，kap我ê國。 29 願hitê歸tī約押ê頭殼，kap伊ê老父全家；koh願約押ê家患tio̍h下痟-ê，thái-ko-ê，á是óa柺á ê，hō͘刀刣死ê，無thang食ê，永無斷。 30 約押kap伊ê小弟A-pí-su 刣死Ap-nî-jíⁿ，是因為伊tī Ki-piàn交戰ê時，刣死in ê小弟A-sat-hek。 31 大衛kā約押kap tè伊ê眾百姓講，Lín tio̍h拆裂衫，hâ麻布，tī Ap-nî-jíⁿ面前啼哭。大衛王也tè tī伊ê棺材後。 32 In埋葬Ap-nî-jíⁿ tī Hi-pek-lûn；王óa Ap-nî-jíⁿ ê墓來啼哭，眾百姓也啼哭。 33 王為tio̍h Ap-nî-jíⁿ悲哀講， Ap-nî-jíⁿ怎樣親像戇人ê死ah？ 34 你ê手無綑縛，你ê腳無鎖鏈； 你死親像人死tī pháiⁿ人ê面前。 35 Tùi án-ni，眾百姓koh為tio̍h伊哀哭。日未落ê時，眾百姓來勸大衛食餅；總是大衛chiù-chōa講，我若tī日未落ê事先食淡薄餅，á是食別項物，願上帝加倍責罰我。 36 眾百姓注意看，lóng看做好，親像王凡所做ê，眾百姓lóng看做好。 37 Hit日眾百姓kap以色列眾人chiah知刣死Nî-jíⁿ ê kiáⁿ Ap-nî-jíⁿ，lóng m̄是出tī王ê意思。 38 王kā伊ê人臣講，Lín kiám m̄知今á日tī以色列中，死一个豪傑ê大偉人mah？ 39 我雖然受抹油做王，今á日iáu是軟弱；Sé-ló͘-ngá ê kiáⁿ，chiahê人比我khah強；行pháiⁿ ê人，願耶和華照伊ê pháiⁿ報應伊。
1 Sò-lô ê ke kap Tāi-pi̍t ê ke kau-chiàn kú-kú; Tāi-pi̍t ná kiông-sēng, Sò-lô ê ke ná soe-jio̍k. 2 Tāi-pi̍t tī Hi-pek-lûn siⁿ kui-nā ê kiáⁿ; toa-kiáⁿ Àm-lùn, sī Iâ-su-lia̍t lâng A-hi-loán só͘ siⁿ ê; 3 tē-jī-ê Ki-lī-ap, sī bat chòe Ka-bi̍t lâng Ná-pat ê bó͘ A-pí-kai só͘ siⁿ ê; tē-saⁿ-ê, Ap-sa-liông, sī Ki-su̍t ông Ta̍t-mái ê cha-bó͘-kiáⁿ Má-ka ê kiáⁿ; 4 tē-sì-ê, A-to-nî-ngá, sī Hap-ki̍p ê kiáⁿ; tē-gō͘-ê, Sī-hoat-thê-ngá, sī A-pí-tha ê kiáⁿ; 5 tē-la̍k-ê, Í-te̍k-liām, sī Tāi-pi̍t ê bó͘ Í-kek-la̍h só͘ siⁿ ê; chiah-ê sī Tāi-pi̍t tī Hi-pek-lûn só͘ siⁿ ê. 6 Sò-lô ê ke kap Tāi-pi̍t ê ke kau-chiàn ê sî, Ap-nî-jíⁿ tī Sò-lô ê ke ka-kī kiông. 7 Sò-lô ū chi̍t ê hui, miâ kiò Lī-su-pa, sī Ài-a ê cha-bó͘-kiáⁿ. I-si-pho-siat tùi Ap-nî-jíⁿ kóng, Lí siáⁿ-sū kap góa lāu-pē ê hui tâng-pâng ah? 8 Ap-nî-jíⁿ in-ūi I-si-pho-siat ê ōe, chiū chin siū-khì, kóng, Góa kiám-sī Iû-tāi ê káu-thâu mah? góa hó khoán-thāi lí ê lāu-pē Sò-lô ê ke, kap i ê hiaⁿ-tī pêng-iú, bô chiong lí kau tī Tāi-pi̍t ê chhiú, lí kin-á-ji̍t kéng-jiân in-ūi chit ê hū-jîn-lâng chek-pī góa mah? 9 Góa nā bô chiàu Iâ-hô-hoa só͘ tùi Tāi-pi̍t chiù-chōa-ê lâi kiâⁿ tī i, chiū goān Siōng-tè ka-pē chek-hoa̍t. 10 Ap-nî-jíⁿ, beh tùi Sò-lô ê ke î-sóa kok-ūi, lâi kiàn-li̍p Tāi-pi̍t ê ūi, hō͘ i tī-lí Í-sek-lia̍t kap Iû-tāi, tùi Tàn kàu Pia̍t-sī-pa. 11 I-si-pho-siat, in-ūi kiaⁿ Ap-nî-jíⁿ, bōe ìn chi̍t-kù-ōe. 12 Ap-nî-jíⁿ ūi-tio̍h pún-sin chhe sù-chiá khì kìⁿ Tāi-pi̍t kóng, Chit ê tōe-hng sio̍k chī-chūi ah? Koh kóng, Lí kap góa li̍p-iok, góa ê chhiú beh pang-chān lí, hō͘ Í-sek-lia̍t lóng kui lí. 13 Tāi-pi̍t kóng, Hó, góa kap lí li̍p-iok; chóng-sī góa beh tùi lí thó chi̍t-hāng, chiū-sī lí lâi kìⁿ góa ê bīn hit-sî, nā bô chiong Sò-lô ê cha-bó͘-kiáⁿ Bí-kah chhōa-lâi, tek-khak bōe kìⁿ góa ê bīn. 14 Tāi-pi̍t chiū chhe sù-chiá khì kìⁿ Sò-lô ê kiáⁿ I-si-pho-siat, kóng, Lí tio̍h chiong góa ê bó͘ Bí-kah hêng góa, i chiū-sī góa bat ēng Hui-lī-sū lâng chi̍t-pah iông-bu̍t ê phê só͘ phèng-tiāⁿ ê. 15 I-si-pho-siat chiū chhe lâng tùi i ê tiōng-hu La̍h-ek ê kiáⁿ Phàⁿ-thiat hia, tòa i lâi. 16 I ê tiōng-hu tè i ê āu-bīn, ná-kiâⁿ ná-háu, kap i kàu Pa-hō͘-lîm. Ap-nî-jíⁿ kā i kóng, Tò--khì ah. I chiū tò--khì. 17 Ap-nî-jíⁿ kap Í-sek-lia̍t ê tióng-ló chham-siông, kóng, Lín chêng him-bō͘ Tāi-pi̍t chòe ông tī-lí lín; taⁿ tio̍h kiâⁿ i; 18 in-ūi Iâ-hô-hoa bat lūn-kàu Tāi-pi̍t kóng, Góa beh ēng Góa ê lô͘-po̍k Tāi-pi̍t ê chhiú kiù Góa ê peh-sìⁿ Í-sek-lia̍t thoat-lī Hui-lī-sū lâng ê chhiú, kap chèng tùi-tek ê chhiú. 19 Ap-nî-jíⁿ iā kóng hō͘ Piān-ngá-bín lâng thiaⁿ; koh kàu Hi-pek-lûn, chiong Í-sek-lia̍t lâng, kap Piān-ngá-bín choân-ke, it-chhè só͘ khòaⁿ-chòe hó ê, kóng hō͘ Tāi-pi̍t thiaⁿ. 20 Ap-nî-jíⁿ kap jī-cha̍p lâng kàu Hi-pek-lûn kìⁿ Tāi-pi̍t. Tāi-pi̍t ūi-tio̍h Ap-nî-jíⁿ, í-ki̍p kap i lâi ê lâng, siat iân-sia̍h. 21 Ap-nî-jíⁿ kā Tāi-pi̍t kóng, Góa beh khí--lâi, khì chio-chi̍p Í-sek-lia̍t chèng-lâng lâi kìⁿ góa ê chú góa ê ông, hō͘ in thang kap lí li̍p-iok, lí chiū thang chòe-ông, chiàu sim só͘ ài lâi koán-lí. Tāi-pi̍t chiū sàng Ap-nî-jíⁿ khì; i chiū pêng-an khì. 22 Tāi-pi̍t ê peng kap Iok-ap chhut-kun tò--lâi, tòa chōe-chōe chhiúⁿ ê mi̍h lâi; hit-sî Ap-nî-jíⁿ bô tī Hi-pek-lûn Tāi-pi̍t hia, in-ūi Tāi-pi̍t í-keng sàng i khì, i iā pêng-an khì. 23 Iok-ap kap tè i ê choân-kun í-keng kàu, ū lâng thong-ti Iok-ap kóng, Nî-jíⁿ ê kiáⁿ Ap-nî-jíⁿ lâi kìⁿ ông, ông sàng i khì, i iā pêng-an khì. 24 Iok-ap khì kìⁿ ông kóng, Lí chòe sím-mi̍h ah? Khòaⁿ ah, Ap-nî-jíⁿ lâi kìⁿ lí, lí siáⁿ-sū sàng i khì? taⁿ i khì-liáu lah; 25 lí chai Nî-jíⁿ ê kiáⁿ Ap-nî-jíⁿ lâi, sī beh phiàn lí, ài chai lí ê chhut kap lí ê ji̍p, kap lí it-chhè só͘ chòe ê sū. 26 Iok-ap tùi Tāi-pi̍t hia chhut-lâi, chiū chhe sù-chiá khì jip Ap-nî-jíⁿ; in chiū tùi Se-la̍h ê chíⁿ tòa i lâi; chóng-sī Tāi-pi̍t m̄-chai. 27 Ap-nî-jíⁿ tò-tńg-lâi kàu Hi-pek-lûn, Iok-ap chhōa i kàu siâⁿ-mn̂g-kháu, ké beh àm-chīⁿ kap i kóng-ōe, chiū tī-hia chha̍k-thàu i ê pak-tó͘, i chiū sí; che sī ūi-tio̍h i ê sió-tī A-sat-hek hō͘ i thâi-sí. 28 Āu-lâi Tāi-pi̍t thiaⁿ-kìⁿ, chiū kóng, Lâu Nî-jíⁿ ê kiáⁿ Ap-nî-jíⁿ ê huih, chit ê chōe tī Iâ-hô-hoa ê bīn-chêng tek-khak éng-oán bô kui tī góa, kap góa ê kok. 29 Goān hit-ê kui tī Iok-ap ê thâu-khak, kap i ê lāu-pē choân-ke; koh goān Iok-ap ê ke hoān-tio̍h hā-siau-ê, thái-ko-ê, á-sī òa koáiⁿ-á ê, hō͘ to thâi-sí-ê, bô thang chia̍h ê, éng bô tn̄g. 30 Iok-ap kap i ê sió-tī A-pí-su thâi-sí Ap-nî-jíⁿ, sī in-ūi i tī Ki-piàn kau-chiàn ê sî, thâi-sí in ê sió-tī A-sat-hek. 31 Tāi-pi̍t kā Iok-ap kap tè i ê chèng peh-sìⁿ kóng, Lín tio̍h thiah-li̍h saⁿ, hâ môa-pò͘, tī Ap-nî-jíⁿ bīn-chêng thî-khàu. Tāi-pi̍t ông iā tè tī i ê koaⁿ-chhâ-āu. 32 In bâi-chòng Ap-nî-jíⁿ tī Hi-pek-lûn; ông óa Ap-nî-jíⁿ ê bōng lâi thî-khàu, chèng peh-sìⁿ iā thî-khàu. 33 Ông ūi-tio̍h Ap-nî-jíⁿ pi-ai kóng, Ap-nî-jíⁿ cháiⁿ-iūⁿ chhin-chhiūⁿ gōng-lâng ê sí ah? 34 Lí ê chhiú bô khún-pa̍k, lí ê kha bô só-liān; Lí sí chhin-chhiūⁿ lâng sí tī pháiⁿ-lâng ê bīn-chêng. 35 Tùi án-ni chèng peh-sìⁿ koh ūi-tio̍h i ai-khàu. Ji̍t bē lo̍h ê sî, chèng peh-sìⁿ lâi khǹg Tāi-pi̍t chia̍h piáⁿ; chóng-sī Tāi-pi̍t chiù-chōa kóng, Góa nā tī ji̍t bē lo̍h ê tāi-seng chia̍h tām-po̍h piáⁿ, á-sī chia̍h pa̍t hāng mi̍h, goān Siōng-tè ka-pē chek-hoa̍t góa. 36 Chèng peh-sìⁿ chù-ì khòaⁿ, lóng khòaⁿ-chòe hó, chhin-chhiūⁿ ông hoān só͘ chòe ê, chèng peh-sìⁿ lóng khòaⁿ-chòe hó. 37 Hit-ji̍t chèng peh-sìⁿ kap Í-sek-lia̍t chèng-lâng chiah chai thâi-sí Nî-jíⁿ ê kiáⁿ Ap-nî-jíⁿ, lóng m̄-sī chhut tī ông ê ì-sù. 38 Ông kā i ê jîn-sîn kóng, Lín kiám m̄-chai kin-á-ji̍t tī Í-sek-lia̍t tiong, sí chi̍t ê hô-kia̍t ê tāi úi-jîn mah? 39 Góa sui-jiân siū boah-iû chòe ông, kin-á-ji̍t iáu sī loán-jio̍k; Sé-ló͘-ngá ê kiáⁿ, chiah ê lâng pí góa khah-kiông; kiâⁿ-pháiⁿ ê lâng, goān Iâ-hô-hoa chiàu i ê pháiⁿ pò-èng i.
1 掃羅ê kiáⁿ聽見Ap-nî-jíⁿ死tī Hi-pek-lûn，手就軟落去。以色列眾人也lóng gāng-gāng。 2 掃羅ê kiáⁿ有兩個隊長，一个名Pa-ná，一个名Lī-kah，是便雅憫支派，Pí-lio̍k人Lîm-bûn ê kiáⁿ；因為Pí-lio̍k也屬tī便雅憫。 3 Pí-lio̍k人早前走到Ki-tha-im，出外tī-hia，到今á日。 4 掃羅ê kiáⁿ約拿單有一个kiáⁿ兩腳lóng 跛，名叫Bí-hui-pho-siat；當掃羅kap約拿單ê消息tùi Iâ-su-lia̍t傳來ê時，伊tú-á五歲；伊ê奶母抱伊走；因為走真緊，gín-ná跋落來，就致跛腳。 5 Pí-lio̍k人，Lîm-bûn ê kiáⁿ Lī-kah kap Pa-ná，出去，約略日燒lō ê時，到I-si-pho-siat ê厝。伊tī中晝tú-á teh睏。 6 In入厝內假影beh put麥，就刺透I-si-pho-siat ê腹肚；Lī-kah kap伊ê兄弟Pa-ná就逃走。 7 In入房內ê時，I-si-pho-siat tú-á tī房內倒tī床裡teh睏；in就phah伊，刣死伊，割伊ê頭殼，帶伊去，tùi A-la̍h-pa ê路透暝行。 8 In帶I-si-pho-siat ê頭殼到Hi-pek-lûn大衛hia，kā王講，你ê對敵掃羅bat siàu想你ê性命ê，看ah，這是伊ê kiáⁿ I-si-pho-siat ê頭殼。耶和華今á日為tio̍h我ê主我ê王報仇tī掃羅kap伊ê後裔。 9 大衛應Pí-lio̍k人Lîm-bûn ê kiáⁿ Lī-kah kap伊ê兄弟Pa-ná，kā伊講，耶和華救贖我ê性命脫離lóng總ê苦難；我kí伊ê永活來chiù-chōa； 10 前有人報我講，掃羅已經死，伊家己掠做是報好消息，我就掠伊tī Sé-keh-la̍h kā伊刣死，這是我hō͘伊做傳消息ê報賞； 11 何況pháiⁿ人入義人ê厝，刣伊tī眠床裡，我kiám無beh tùi lín ê手討伊ê血，除滅lín tī地上mah？ 12 大衛命令伊ê少年人，in就刣死in，斬斷in ê腳手，吊tī Hi-pek-lûn ê池邊；也將I-si-pho-siat ê頭殼埋葬tī Hi-pek-lûn Ap-nî-jíⁿ ê墓。
1 Sò-lô ê kiáⁿ thiaⁿ-kìⁿ Ap-nî-jíⁿ sí tī Hi-pek-lûn, chhiú chiū nńg--lo̍h-khì. Í-sek-lia̍t chèng-lâng iā lóng gāng-gāng. 2 Sò-lô ê kiáⁿ ū nn̄g ê tūi-tiúⁿ, chi̍t-ê miâ Pa-ná, chi̍t-ê miâ Lī-kah, sī Piān-ngá-bín chi-phài, Pí-lio̍k lâng Lîm-bûn ê kiáⁿ; in-ūi Pí-lio̍k iā sio̍k tī Piān-ngá-bín. 3 Pí-lio̍k lâng chá-chêng cháu kàu Ki-tha-im, chhut-gōa tī-hia, kàu kin-á-ji̍t. 4 Sò-lô ê kiáⁿ Iok-ná-tan ū chi̍t ê kiáⁿ nn̄g-kha lóng pái, miâ-kiò Bí-hui-pho-siat; tng Sò-lô kap Iok-ná-tan ê siau-sit tùi Iâ-su-lia̍t thoân-lâi ê sî, i tú-á gō͘-hè; i ê ni-bú phō i cháu; in-ūi cháu chin-kín, gín-ná poa̍h--lo̍h-lâi, chiū tì pái-kha. 5 Pí-lio̍k lâng, Lîm-bûn ê kiáⁿ Lī-kah kap Pa-ná, chhut-khì, iok-lio̍k ji̍t sio-lō ê sî, kàu I-si-pho-siat ê chhù. I tī tiong-tàu tú-á teh khùn. 6 In ji̍p chhù-lāi ké-iáⁿ beh put be̍h, chiū chhì-thàu I-si-pho-siat ê pak-tó͘; Lī-kah kap i ê hiaⁿ-tī Pa-ná chiū tô-cháu. 7 In ji̍p pâng-lâi ê sî, I-si-pho-siat tú-á tī pâng-lāi tó tī chhn̂g--nih teh khùn; in chiū phah i, thâi-sí i, koah i ê thâu-khak, tòa i khì, tùi A-la̍h-pa ê lō͘ thàu-mî kiâⁿ. 8 In tòa I-si-pho-siat ê thâu-khak kàu Hi-pek-lûn Tāi-pi̍t hia, kā ông kóng, Lí ê tùi-te̍k Sò-lô bat siàu-siūⁿ lí ê sìⁿ-miā ê, khòaⁿ ah, che sī i ê kiáⁿ I-si-pho-siat ê thâu-khak. Iâ-hô-hoa kin-á-ji̍t ūi-tio̍h góa ê chú góa ê ông pò-siû tī Sò-lô kap i ê hō͘-è. 9 Tāi-pi̍t ìn Pí-lio̍k lâng Lîm-bûn ê kiáⁿ Lī-kah kap i ê hiaⁿ-tī Pa-ná, kā i kóng, Iâ-hô-hoa kiù-sio̍k góa ê sìⁿ-miā thoat-lī lóng-chóng ê khó͘-lān; góa kí I ê éng-oa̍h lâi chiù-chōa; 10 chêng ū lâng pò góa kóng, Sò-lô í-keng sí, i kā-kī lia̍h-chòe sī pò hó siau-sit, góa chiū lia̍h i tī Sé-keh-la̍h kā i thâi-sí, che sī góa hō͘ i chòe thoân siau-sit ê pò-siúⁿ; 11 hô-hòng pháiⁿ-lâng ji̍p gī-lâng ê chhù, thâi i tī bîn-chhn̂g--nih, góa kiám bô beh tùi lín ê chhiú thó i ê huih, tû-bia̍t lín tī tōe-chiūⁿ mah? 12 Tāi-pi̍t bēng-lēng i ê siàu-liân lâng, in chiū thâi-sí in, chām-tn̄g in ê kha-chhiú, tiàu tī Hi-pek-lûn ê tî-piⁿ; iā chiong I-si-pho-siat ê thâu-khak bâi-chòng tī Hi-pek-lûn Ap-nî-jíⁿ ê bōng.
1 當時以色列眾支派到Hi-pek-lûn，見大衛講，看ah，阮是你ê骨肉。 2 前掃羅做阮ê王ê時，chhōa以色列出入ê是你；耶和華也bat kā你講，你beh照顧我ê百姓以色列，也beh做以色列ê君王。 3 Tùi án-ni，以色列ê長老lóng來Hi-pek-lûn見王。大衛王tī Hi-pek-lûn耶和華ê面前kap in立約。In就用油抹大衛做以色列ê王。 4 大衛坐位ê時三十歲，伊坐位四十年。 5 Tī Hi-pek-lûn做偤大王七年koh六月日；tī耶路撒冷做thong以色列kap偤大ê王三十三年。 6 王kap tè伊ê人來到耶路撒冷beh攻擊khiā起hit所在ê Iâ-pò͘-su人。In對大衛講，你若無除chiahê chhiⁿ-mî-ê、跛腳ê，就bōe入chit所在；in phah算大衛決斷bōe入chia。 7 總是大衛攻擊錫安ê衛所，這就是大衛ê城。 8 當hit日，大衛講，Chī-chūi phah Iâ-pò͘-su人，tio̍h tùi水溝上去phah大衛ê心所怨恨跛腳ê、chhiⁿ-mî-ê。Tùi án-ni，有俗語講，有chhiⁿ-mî跛腳ê；人bōe能入厝。 9 大衛tiàm tī衛所，稱hit所在做大衛ê城。大衛tùi Bí-lô四圍起造，也ǹg內面。 10 大衛ná久ná強盛，因為耶和華萬軍ê上帝kap伊tī-teh。 11 Chhui-lô王Hi-lân 差使者帶柏香柴kap木匠石匠到大衛hia。In kā大衛起厝。 12 大衛知耶和華定tio̍h設立伊做以色列王；koh為tio̍h伊ê百姓以色列來興起伊ê國。 13 大衛tùi Hi-pek-lûn來了後，tùi耶路撒冷koh立后妃。大衛koh生kiáⁿ，cha-bó͘-kiáⁿ。 14 Tī耶路撒冷所生ê kiáⁿ就是Sa-bó͘-a、Sok-pā、Ná-tan、所羅門； 15 Ek-hat、Í-lī-su-a、Nî-húi、Ngá-hui-a； 16 Í-lī-sa-má、Í-lī-ngá-tāi、Í-lī-hoat-lia̍t。 17 腓利士人聽見人用油抹大衛做以色列王；腓利士ê眾人就上來siàu想大衛。大衛聽見就落去到營寨。 18 腓利士人已經來，布置tī Lī-hoa̍t-im ê山谷。 19 大衛問耶和華講，我thang上去攻腓利士人mah？你beh將in交tī我ê手mah？耶和華kā大衛講，你thang上去，因為我的確beh將腓利士人交tī你ê手。 20 大衛來到Pa-le̍k-pí-la̍h-sim；大衛tī-hia phah in，講，耶和華tī我ê面前沖散我ê對敵，親像水ê沖散一樣；所以名hit所在做Pa-le̍k-pí-la̍h-sim。 21 In棄sak in ê偶像tī-hia；大衛kap tè伊ê人拾伊去。 22 腓利士人koh上來，布置tī Lī-hoa̍t-im ê山谷。 23 大衛問耶和華；耶和華講，M̄-thang直直上去，tio̍h彎到in ê後面，tùi桑材樹對面phah in； 24 你聽見tī桑材樹尾，有腳步聲，就tio̍h趕緊進行，因為hit時耶和華已經tùi lín ê頭前出去，攻擊腓利士人ê軍隊。 25 大衛就照耶和華所吩咐ê去行，攻擊腓利士人，tùi Ka-pa到Ki-sek。
1 Tng-sî Í-sek-lia̍t chèng chi-phài kàu Hi-pek-lûn, kìⁿ Tāi-pi̍t kóng, Khòaⁿ ah, goán sī lí ê kut-jio̍k. 2 Chêng Sò-lô chòe goán ê ông ê sî, chhōa Í-sek-lia̍t chhut-ji̍p-ê sī lí; Iâ-hô-hoa iā bat kā lí kóng, Lí beh chiàu-kò͘ Góa ê peh-sìⁿ Í-sek-lia̍t, iā beh chòe Í-sek-lia̍t ê kun-ông. 3 Tùi án-ni Í-sek-lia̍t ê tióng-ló lóng lâi Hi-pek-lûn kìⁿ ông. Tāi-pi̍t ông tī Hi-pek-lûn Iâ-hô-hoa ê bīn-chêng kap in li̍p-iok. In chiū ēng iû boah Tāi-pi̍t chòe Í-sek-lia̍t ê ông. 4 Tāi-pi̍t chē-ūi ê sî saⁿ-cha̍p hè, i chē-ūi sì-cha̍p nî. 5 Tī Hi-pek-lûn chòe Iû-tāi ông chhit-nî koh la̍k-ge̍h-ji̍t; tī Iâ-lō͘-sat-léng chòe thong Í-sek-lia̍t kap Iû-tāi ê ông saⁿ-cha̍p-saⁿ nî. 6 Ông kap tè i ê lâng lâi kàu Iâ-lō͘-sat-léng beh kong-kek khiā-khí hit só͘-chāi ê Iâ-pò͘-su lâng. In tùi Tāi-pi̍t kóng, Lí nā bô tû chiah ê chhiⁿ-mî-ê, pái-kha-ê, chiū bōe ji̍p chit só͘-chāi; in phah-sǹg Tāi-pi̍t koat-toàn bōe ji̍p chia. 7 Chóng-sī Tāi-pi̍t kong-kek Sek-an ê ōe-só͘, che chiū-sī Tāi-pi̍t ê siâⁿ. 8 Tng hit-ji̍t Tāi-pi̍t kóng, Chī-chūi phah Iâ-pò͘-su lâng, tio̍h tùi chúi-kau chiūⁿ khì phah Tāi-pi̍t ê sim só͘ oàn-hūn pái-kha-ê, chhiⁿ-mî-ê. Tùi án-ni ū sio̍k-gú kóng, Ū chhiⁿ-mî pái-kha-ê; lâng bōe-ōe ji̍p chhù. 9 Tāi-pi̍t tiàm tī ōe-só͘, chheng hit só͘-chāi chòe Tāi-pi̍t ê siâⁿ. Tāi-pi̍t tùi Bí-lô sì-ûi khí-chō, iā ǹg lāi-bīn. 10 Tāi-pi̍t ná-kú ná kiông-sēng, in-ūi Iâ-hô-hoa bān-kun ê Siōng-tè kap i tī-teh. 11 Chhui-lô ông Hi-lân chhe sù-chiá tòa pek-hiuⁿ-chhâ kap ba̍k-chhiūⁿ chio̍h-chhiūⁿ kàu Tāi-pi̍t hia. In kā Tāi-pi̍t khí chhù. 12 Tāi-pi̍t chai Iâ-hô-hoa tiāⁿ-tio̍h siat-li̍p i chòe Í-sek-lia̍t ông; koh ūi-tio̍h I ê peh-sìⁿ Í-sek-lia̍t lâi heng-khí i ê kok. 13 Tāi-pi̍t tùi Hi-pek-lûn lâi liáu-āu, tùi Iâ-lō͘-sat-léng koh li̍p hō͘-hui. Tāi-pi̍t koh siⁿ kiáⁿ, cha-bó͘-kiáⁿ. 14 Tī Iâ-lō͘-sat-léng só͘ siⁿ ê kiáⁿ chiū-sī Sa-bó͘-a, Sok-pā, Ná-tan, Só͘-lô-bûn; 15 Ek-hat, Í-lī-su-a, Nî-húi, Ngá-hui-a; 16 Í-lī-sa-má, Í-lī-ngá-tāi, Í-lī-hoat-lia̍t. 17 Hui-lī-sū lâng thiaⁿ-kìⁿ lâng ēng iû boah Tāi-pi̍t chòe Í-sek-lia̍t ông; Hui-lī-sū ê chèng-lâng chiū chiūⁿ-lâi siàu-siūⁿ Tāi-pi̍t. Tāi-pi̍t thiaⁿ-kìⁿ chiū lo̍h-khì kàu iâⁿ-chē. 18 Hui-lī-sū lâng í-keng lâi, pò͘-tì tī Lī-hoa̍t-im ê soaⁿ-kok. 19 Tāi-pi̍t mn̄g Iâ-hô-hoa kóng, Góa thang chiūⁿ--khì kong Hui-lī-sū lâng mah? Lí beh chiong in kau tī góa ê chhiú mah? Iâ-hô-hoa kā Tāi-pi̍t kóng, Lí thang chiūⁿ--khì, in-ūi Góa tek-khak beh chiong Hui-lī-sū lâng kau tī lí ê chhiú. 20 Tāi-pi̍t lâi kàu Pa-le̍k-pí-la̍h-sim; Tāi-pi̍t tī-hia phah in, kóng, Iâ-hô-hoa tī góa ê bīn-chêng chhiong-sòaⁿ góa ê tùi-te̍k, chhin-chhiūⁿ chúi ê chhiong-sòaⁿ chi̍t-iūⁿ; só͘-í miâ hit só͘-chāi chòe Pa-le̍k-pí-la̍h-sim. 21 In khì-sak in ê ngó͘-siōng tī-hia; Tāi-pi̍t kap tè i ê lâng khioh i khì. 22 Hui-lī-sū lâng koh chiūⁿ--lâi, pò͘-tì tī Lī-hoa̍t-im ê soaⁿ-kok. 23 Tāi-pi̍t mn̄g Iâ-hô-hoa; Iâ-hô-hoa kóng, M̄-thang ti̍t-ti̍t chiūⁿ--khì, tio̍h oan kàu in ê āu-bīn, tùi sng-châi-chhiū tùi-bīn phah in; 24 lí thiaⁿ-kìⁿ tī sng-châi-chhiū bé, ū kha-pō͘ siaⁿ, chiū tio̍h kóaⁿ-kín chìn-hêng, in-ūi hit-sî Iâ-hô-hoa í-keng tùi lín ê thâu-chêng chhut-khì, kong-kek Hui-lī-sū lâng ê kun-tūi. 25 Tāi-pi̍t chiū chiàu Iâ-hô-hoa só͘ hoan-hù-ê khì kiâⁿ, kong-kek Hui-lī-sū lâng, tùi Ka-pa kàu Ki-sek.
1 大衛koh聚集以色列中所揀ê三萬人。 2 大衛起身chhōa tè伊ê眾百姓，tùi Pa-la̍h偤大去，beh tùi hia扛上帝ê櫃來；chitê櫃ê名是用坐tī兩個ki-lō͘-peng ê中間萬軍ê耶和華ê名來稱ê。 3 In hē上帝ê櫃tī新ê車，tùi山頂A-pí-ná-ta̍t ê家載出來；A-pí-ná-ta̍t兩個kiáⁿ，O͘-sat kap A-hi-iok，趕hitê新車。 4 In將伊kap上帝ê約櫃，tùi山頂A-pí-ná-ta̍t ê家載出來。A-hi-iok行tī櫃ê頭前。 5 大衛kap以色列ê全家，tī耶和華ê面前用松柴所造ta̍k號ê樂器，kap琴、瑟、lin-long鼓、大鼓、鈸(poa̍t)，來作樂跳舞。 6 In到Ná-kùn ê五穀場，O͘-sat伸手扶上帝ê約櫃，因為牛tio̍h-tak。 7 耶和華受氣O͘-sat；上帝tī-hia因為伊ê錯誤來phah伊，伊就死tī-hia，tī上帝ê櫃邊。 8 因為耶和華忽然phah死O͘-sat，大衛無歡喜；就稱hit所在做Pí-lia̍t-su-o͘-sat，到今á日。 9 當hit日大衛驚耶和華，講，耶和華ê櫃thái-thó thang到我ê所在。 10 Tùi án-ni，大衛m̄肯將耶和華ê櫃扛入大衛ê城，到家己ê所在；大衛就扛伊oat入Ka-te̍k人Gô-piat-í-tong ê家。 11 耶和華ê櫃tiàm tī Ka-te̍k人Gô-piat-í-tong ê厝三月日，耶和華賜福氣hō͘ Gô-piat-í-tong kap伊ê全家。 12 有人kā大衛王講，耶和華因為上帝ê櫃，賜福tī Gô-piat-í-tong ê家，kap見若屬tī伊ê。大衛就去，歡喜扛上帝ê櫃tùi Gô-piat-í-tong ê厝，到大衛ê城。 13 扛耶和華約櫃ê人行六步，大衛就獻一隻牛，kap一隻肥ê cheng-siⁿ，做祭祀。 14 大衛tī耶和華ê面前盡力跳舞。大衛hâ幼苧布ê í-hut-tek。 15 Án-ni大衛kap以色列全家扛耶和華ê櫃上來，出歡喜ê聲，pûn哨角。 16 耶和華ê櫃入大衛城ê時，掃羅ê cha-bó͘-kiáⁿ Bí-kah tùi窗á門看，看見大衛chông起來跳舞tī耶和華ê面前，心就看輕伊。 17 In扛耶和華ê櫃入去，hē tī伊ê所在，就是大衛所為伊搭ê布棚；大衛tī耶和華ê面前獻燒祭kap謝恩祭。 18 大衛獻燒祭kap謝恩祭明白，就用萬軍耶和華ê名kā百姓祝福。 19 Koh tī hiahê眾百姓，就是以色列眾人，無論男女，每人分hō͘ in一个餅，一塊肉，一个葡萄干餅；眾百姓就去，ta̍k人tò去in ê厝。 20 大衛tò去beh kā伊ê家眷祝福，掃羅ê cha-bó͘-kiáⁿ Bí-kah出來迎接大衛，講，以色列王今á日有jōa大榮光ah！今á日露體tī人臣ê女婢目睭前，親像一个無hē落人無畏見笑露體一樣。 21 大衛kā Bí-kah講，這是tī耶和華ê面前，伊揀我pôaⁿ過你ê老父kap伊ê全家，設立我做耶和華ê百姓以色列ê君王，所以我beh tī耶和華ê面前跳舞； 22 我beh比chitê koh khah粗俗，家己看做卑賤；你所講hiahê女婢，我beh受in尊重。 23 Tùi án-ni，掃羅ê cha-bó͘-kiáⁿ Bí-kah到死ê日無生kiáⁿ兒。
1 Tāi-pi̍t koh chū-chi̍p Í-sek-lia̍t tiong só͘ kéng ê saⁿ-bān lâng. 2 Tāi-pi̍t khí-sin chhōa tè i ê chèng peh-sìⁿ, tùi Pa-la̍h Iû-tāi khì, beh tùi hia kng Siōng-tè ê kūi lâi; chit ê kūi ê miâ sī ēng chē tī nn̄g ê ki-lō͘-peng ê tiong-kan bān-kun ê Iâ-hô-hoa ê miâ lâi chheng--ê. 3 In hē Siōng-tè ê kūi tī sin ê chhia, tùi soaⁿ-téng A-pí-ná-ta̍t ê ke chài--chhut-lâi; A-pí-ná-ta̍t nn̄g ê kiáⁿ, O͘-sat kap A-hi-iok, kóaⁿ hit ê sin-chhia. 4 In chiong i kap Siōng-tè ê iok-kūi, tùi soaⁿ-téng A-pí-ná-ta̍t ê ke chài--chhut-lâi. A-hi-iok kiâⁿ tī kūi ê thâu-chêng. 5 Tāi-pi̍t kap Í-sek-lia̍t ê choân-ke, tī Iâ-hô-hoa ê bīn-chêng ēng siōng-chhâ só͘ cho ta̍k-hō ê ga̍k-khì, kap khîm, sek, lin-long-kó͘ tōa-kó͘, poa̍t, lâi chok-ga̍k thiàu-bú. 6 In kàu Ná-kùn ê gō͘-kak-tiûⁿ, O͘-sat chhun-chhiú hû Siōng-tè ê iok-kūi, in-ūi gû tio̍h-tak. 7 Iâ-hô-hoa siū-khì O͘-sat; Siōng-tè tī-hia in-ūi i ê chhò-gō͘ lâi phah i, i chiū sí tī-hia, tī Siōng-tè ê kūi-piⁿ. 8 In-ūi Iâ-hô-hoa hut-jiân phah-sí O͘-sat, Tāi-pi̍t bô hoaⁿ-hí; chiū chheng hit só͘-chāi chòe Pí-lia̍t-su-o͘-sat, kàu kin-á-ji̍t. 9 Tng hit-ji̍t Tāi-pi̍t kiaⁿ Iâ-hô-hoa, kóng, Iâ-hô-hoa ê kūi thái-thó thang kàu góa ê só͘-chāi. 10 Tùi án-ni Tāi-pi̍t m̄-khéng chiong Iâ-hô-hoa ê kūi kng ji̍p Tāi-pi̍t ê siâⁿ, kàu ka-kī ê só͘-chāi; Tāi-pi̍t chiū kng i oat-ji̍p Ka-te̍k lâng Gô-piat-í-tong ê ke. 11 Iâ-hô-hoa ê kūi tiàm tī Ka-te̍k lâng Gô-piat-í-tong ê chhù saⁿ ge̍h-ji̍t, Iâ-hô-hoa sù hok-khì hō͘ Gô-piat-í-tong kap i ê choân-ke. 12 Ū lâng kā Tāi-pi̍t ông kóng, Iâ-hô-hoa in-ūi Siōng-tè ê kūi, sù-hok tī Gô-piat-í-tong ê ke, kap kìⁿ-nā sio̍k tī i ê. Tāi-pi̍t chiū khì, hoaⁿ-hí kng Siōng-tè ê kūi tùi Gô-piat-í-tong ê chhù, kàu Tāi-pi̍t ê siâⁿ. 13 Kng Iâ-hô-hoa iok-kūi ê lâng kiâⁿ la̍k-pō͘, Tāi-pi̍t chiū hiàn chi̍t chiah gû, kap chi̍t chiah pûi ê cheng-siⁿ, chòe chè-sū. 14 Tāi-pi̍t tī Iâ-hô-hoa ê bīn-chêng chīn-la̍t thiàu-bú. Tāi-pi̍t hâ iù-tōe-pò͘ ê í-hut-tek. 15 Án-ni Tāi-pi̍t kap Í-sek-lia̍t choân-ke kng Iâ-hô-hoa ê kūi chiūⁿ--lâi, chhut hoaⁿ-hí ê siaⁿ, pûn sàu-kak. 16 Iâ-hô-hoa ê kūi ji̍p Tāi-pi̍t siâⁿ ê sî, Sò-lô ê cha-bó͘-kiáⁿ Bí-kah tùi thang-á-mn̂g khòaⁿ, khòaⁿ-kìⁿ Tāi-pi̍t chông--khí-lâi thiàu-bú tī Iâ-hô-hoa ê bīn-chêng, sim chiū khòaⁿ-khin i. 17 In kng Iâ-hô-hoa ê kūi ji̍p--khì, hē tī i ê só͘-chāi, chiū-sī Tāi-pi̍t só͘ ūi i tah ê pò͘-pîⁿ; Tāi-pi̍t tī Iâ-hô-hoa ê bīn-chêng hiàn sio-chè kap siā-un-chè. 18 Tāi-pi̍t hiàn sio-chè kap siā-un-chè bêng-pe̍k, chiū ēng bān-kun Iâ-hô-hoa ê miâ kā peh-sìⁿ chiok-hok. 19 Koh tī hiah ê chèng peh-sìⁿ, chiū-sī Í-sek-lia̍t chèng-lâng, bô-lūn lâm-lú, múi-lâng pun hō͘ in chi̍t ê piáⁿ, chi̍t tè bah, chi̍t ê phû-tô-koaⁿ piáⁿ; chèng peh-sìⁿ chiū khì, ta̍k-lâng tò-khì in ê chhù. 20 Tāi-pi̍t tò-khì beh kā i ê ke-koàn chiok-hok, Sò-lô ê cha-bó͘-kiáⁿ Bí-kah chhut-lâi ngiâ-chih Tāi-pi̍t, kóng, Í-sek-lia̍t ông kin-á-ji̍t ū jōa-tōa êng-kng ah! kin-á-ji̍t lō͘-thé tī jîn-sîn ê lú-pī ba̍k-chiu chêng, chhin-chhiūⁿ chi̍t ê bô hē-lo̍h lâng bô ùi kiàn-siàu lō͘-thé chi̍t-iūⁿ. 21 Tāi-pi̍t kā Bí-kah kóng, Che sī tī Iâ-hô-hoa ê bīn-chêng, I kéng góa pôaⁿ-kè lí ê lāu-pē kap i ê choân-ke, siat-li̍p góa chòe Iâ-hô-hoa ê peh-sìⁿ Í-sek-lia̍t ê kun-ông, só͘-í góa beh tī Iâ-hô-hoa ê bīn-chêng thiàu-bú; 22 góa beh pí chit-ê koh khah chho͘-sio̍k, ka-kī khòaⁿ-chòe pi-chiān; lí só͘ kóng hiah ê lú-pī, góa beh siū in chun-tiōng. 23 Tùi án-ni Sò-lô ê cha-bó͘-kiáⁿ Bí-kah kàu sí ê ji̍t bô siⁿ kiáⁿ-jî.
1 當王tiàm tī厝內，耶和華也已經hō͘伊脫離四圍ê對敵，得tio̍h安靜ê時， 2 王kā先知Ná-tan講，看ah，我tiàm tī柏香柴ê厝內，總是上帝ê櫃tiàm tī帳籬內。 3 Ná-tan對王講，見若你ê心所想ê，thang去做；因為耶和華kap你tī-teh。 4 Hit暝耶和華ê話臨到Ná-tan講， 5 你去kā我ê奴僕大衛講，耶和華án-ni講，你beh起厝hō͘我khiā起mah？ 6 Tùi我chhōa以色列人出埃及ê日到今á日，我bē-bat tiàm tī厝裡，常常行tī布棚kap會幕。 7 見我kap以色列人所行到ê所在，kiám bat對以色列一支派ê士師，就是我命令照顧我ê百姓以色列ê，講，Lín啥事無kā我起柏香柴ê厝ah？ 8 Taⁿ你tio̍h kā我ê奴僕大衛講，萬軍ê耶和華án-ni講，我tùi羊椆中，你teh thàn羊群，揀你，做我ê百姓以色列ê君王。 9 你無論去toh落，我常常kap你tī-teh，tī你ê面前剪除你一切ê對敵。我的確hō͘你得tio̍h大名，親像世上hiahê偉人ê大名一樣。 10 我beh為tio̍h我ê百姓以色列定tio̍h一个所在，栽培in，hō͘ in tiàm tī家己ê所在，無koh遷徙，兇惡ê類無親像早前攪擾in， 11 也無親像對我命令士師管理我ê百姓以色列ê日；我beh hō͘你脫離一切ê對敵，得tio̍h安靜。Koh耶和華kā你講，耶和華beh kā你建立家。 12 到你ê日子已經滿，你kap你ê列祖相kap睏ê時，我beh設立你所出ê後裔來續接你，我也beh堅固伊ê國； 13 伊beh為我ê名起殿；我beh堅固伊ê國位，直到永遠。 14 我beh做伊ê父，伊beh做我ê kiáⁿ；伊若犯罪，我beh用人ê柺，世間人ê鞭，責督伊。 15 總是我ê慈愛無beh離開伊，親像我hō͘伊離開掃羅，就是我所棄sak tī你ê面前ê。 16 你ê家kap你ê國，beh永遠建立tī你ê面前；你ê國位也beh堅固到永遠。 17 Ná-tan就照這一切ê話，照這一切ê啟示，án-ni kā大衛講。 18 大衛王就入去，坐tī耶和華ê面前，講，主耶和華ah，我是是誰，我ê家算做甚麼，你竟然chhōa我到chitê地位ah？ 19 主耶和華ah，這你iáu看做小khóa，你koh論到你ê奴僕ê家到tī久長；主耶和華ah，這是人間ê例。 20 大衛iáu有甚麼話thang對你講ah？主耶和華ah，你知你ê奴僕。 21 為tio̍h你ê話，koh照你ê心，你行這一切ê大事，hō͘你ê奴僕知； 22 耶和華上帝ah，你是至大；照阮ê耳孔所聽見ê，無一个能比得你，你以外無有上帝。 23 地上有甚麼國親像你ê百姓以色列ah？就是上帝去救贖伊，歸tī家己做百姓，hō͘伊有名聲，koh tī你ê百姓ê面前，就是你tùi埃及，kap列邦，以及in hiahê上帝所救贖出來ê，為tio̍h lín行大ê tāi-chì，為tio̍h你ê地做thang驚ê事ah？ 24 你bat為家己建立你ê百姓以色列永遠做你ê百姓；耶和華ah，你也做in ê上帝。 25 耶和華上帝ah，taⁿ你所論到你ê奴僕，kap你ê奴僕ê家，願你永遠堅固伊，照你所講ê來行。 26 願人永永尊你ê名做大，講，萬軍ê耶和華是管理以色列ê上帝；koh你ê奴僕大衛ê家beh tī你ê面前堅固。 27 萬軍ê耶和華，以色列ê上帝ah，因為你啟示你ê奴僕，講，我beh kā你建立家，所以你ê奴僕好膽用chitê祈禱來對你祈禱。 28 Taⁿ主耶和華ah，你是上帝ah，你ê話是真實，你也用chitê福氣應允你ê奴僕； 29 taⁿ求你賜福你ê奴僕ê家，hō͘伊永遠tī你ê面前；主耶和華ah，因為你有講伊，願你ê奴僕ê家tùi你ê賜福來得tio̍h福氣，到永遠。
1 Tng ông tiàm tī chhù-lāi, Iâ-hô-hoa iā í-keng hō͘ i thoat-lī sì-ûi ê tùi-te̍k, tit-tio̍h an-chēng ê sî, 2 ông kā sian-ti Ná-tan kóng, Khòaⁿ ah, góa tiàm tī pek-hiuⁿ-chhâ ê chhù-lāi, chóng-sī Siōng-tè ê kūi tiàm tī tiùⁿ-lî-lāi. 3 Ná-tan tùi ông kóng, Kìⁿ-nā lí ê sim só͘-siūⁿ-ê, thang khì chòe; in-ūi Iâ-hô-hoa kap lí tī-teh. 4 Hit-mî Iâ-hô-hoa ê ōe lîm-kàu Ná-tan kóng, 5 Lí khì kā Góa ê lô͘-po̍k Tāi-pi̍t kóng, Iâ-hô-hoa án-ni kóng, Lí beh khí chhù hō͘ Góa khiā-khí mah? 6 Tùi Góa chhōa Í-sek-lia̍t lâng chhut Ai-ki̍p ê ji̍t kàu kin-á-ji̍t, Góa bē-bat tiàm tī chhù--nih, siông-siông kiâⁿ tī pò͘-pîⁿ kap hōe-bō͘. 7 Kìⁿ góa kap Í-sek-lia̍t lâng só͘ kiâⁿ-kàu ê só͘-chāi, kiám bat tùi Í-sek-lia̍t chi̍t chi-phài ê sū-su, chiū-sī Góa bēng-lēng chiàu-kò͘ Góa ê peh-sìⁿ Í-sek-lia̍t ê, kóng, Lín siáⁿ-sū bô kā Góa khí pek-hiuⁿ-chhâ ê chhù ah? 8 Taⁿ lí tio̍h kā Góa ê lô͘-po̍k Tāi-pi̍t kóng, Bān-kun ê Iâ-hô-hoa án-ni kóng, Góa tùi iûⁿ-tiâu-tiong, lí teh thàn iûⁿ-kûn, kéng lí, chòe Góa ê peh-sìⁿ Í-sek-lia̍t ê kun-ông. 9 Lí bô-lūn khì toh-lo̍h, Góa siông-siông kap lí tī-teh, tī lí ê bīn-chêng chián-tû lí it-chhè ê tùi-te̍k. Góa tek-khak hō͘ lí tit-tio̍h tōa-miâ, chhin-chhiūⁿ sè-chiūⁿ hiah ê úi-jîn ê tōa-miâ chi̍t-iūⁿ. 10 Góa beh ūi-tio̍h Góa ê peh-sìⁿ Í-sek-lia̍t tiāⁿ-tio̍h chi̍t ê só͘-chāi, chai-pôe in, hō͘ in tiàm tī ka-kī ê só͘-chāi, bô koh chhian-sóa, hiong-ok ê lūi bô chhin-chhiūⁿ chá-chêng kiáu-jiáu in, 11 iā bô chhin-chhiūⁿ tùi Góa bēng-lēng sū-su koán-lí Góa ê peh-sìⁿ Í-sek-lia̍t ê ji̍t; Góa beh hō͘ lí thoat-lī it-chhè ê tùi-te̍k, tit-tio̍h an-chēng. Koh Iâ-hô-hoa kā lí kóng, Iâ-hô-hoa beh kā lí kiàn-li̍p ke. 12 Kàu lí ê ji̍t-chí í-keng móa, lí kap lí ê lia̍t-chó͘ saⁿ-kap khùn ê sî, Góa beh siat-li̍p lí só͘ chhut ê hō͘-è lâi sòa-chiap lí, Góa iā beh kian-kò͘ i ê kok; 13 i beh ūi Góa ê miâ khí tiān; Góa beh kian-kò͘ i ê kok-ūi, ti̍t-kàu éng-oán. 14 Góa beh chòe i ê pē, i beh chòe Góa ê kiáⁿ; i nā hoān-chōe, Góa beh ēng lâng ê koáiⁿ, sè-kan lâng ê piⁿ, chek-tok i. 15 Chóng-sī Góa ê chû-ài bô beh lī-khui i, chhin-chhiūⁿ Góa hō͘ i lī-khui Sò-lô, chiū-sī Góa só͘ khì-sak tī lí ê bīn-chêng ê. 16 Lí ê ke kap lí ê kok, beh éng-oán kiàn-li̍p tī lí ê bīn-chêng; lí ê kok-ūi iā beh kian-kò͘ kàu éng-oán. 17 Ná-tan chiu chiàu che it-chhè ê ōe, chiàu che it-chhè ê khé-sī, án-ni kā Tāi-pi̍t kóng. 18 Tāi-pi̍t ông chiū ji̍p--khì, chē tī Iâ-hô-hoa ê bīn-chêng, kóng, Chú Iâ-hô-hoa ah, góa sī chī-chūi, góa ê ke sǹg-chòe sím-mi̍h, Lí kèng-jiân chhōa góa kàu chit ê tōe-ūi ah? 19 Chú Iâ-hô-hoa ah, che Lí iáu khòaⁿ-chòe sió-khóa, Lí koh lūn-kàu Lí ê lô͘-po̍k ê ke kàu tī kú-tn̂g; Chú Iâ-hô-hoa ah, che sī jîn-kan ê lē. 20 Tāi-pi̍t iáu ū sím-mi̍h ōe thang tùi Lí kóng ah? Chú Iâ-hô-hoa ah, Lí chai Lí ê lô͘-po̍k. 21 Ūi-tio̍h Lí ê ōe, koh chiàu Lí ê sim, Lí kiâⁿ che it-chhè ê tōa-sū, hō͘ Lí ê lô͘-po̍k chai; 22 Iâ-hô-hoa Siōng-tè ah, Lí sī chì-tōa; chiàu goán ê hī-khang só͘ thiaⁿ-kìⁿ ê, bô chi̍t-ê ōe pí-tit Lí, Lí í-gōa bô ū Siōng-tè. 23 Tōe-chiūⁿ ū sím-mi̍h kok chhin-chhiūⁿ Lí ê peh-sìⁿ Í-sek-lia̍t ah? chiū-sī Siōng-tè khì kiù-sio̍k i, kui tī ka-kī chòe peh-sìⁿ, hō͘ I ū miâ-siaⁿ, koh tī Lí ê peh-sìⁿ ê bīn-chêng, chiū-sī Lí tùi Ai-ki̍p, kap lia̍t-pang, í-ki̍p in hiah ê siōng-tè só͘ kiù-sio̍k chhut-lâi ê, ūi-tio̍h lín kiâⁿ tōa ê tāi-chì, ūi-tio̍h Lí ê tōe chòe thang kiaⁿ ê sū ah? 24 Lí bat ūi ka-kī kiàn-li̍p Lí ê peh-sìⁿ Í-sek-lia̍t éng-oán chòe Lí ê peh-sìⁿ; Iâ-hô-hoa ah, Lí iā chòe in ê Siōng-tè. 25 Iâ-hô-hoa Siōng-tè ah, taⁿ Lí só͘ lūn-kàu Lí ê lô͘-po̍k, kap Lí ê lô͘-po̍k ê ke, goān Lí éng-oán kian-kò͘ i, chiàu Lí só͘-kóng-ê lâi kiâⁿ. 26 Goān lâng éng-éng chun Lí ê miâ chòe-tōa, kóng, Bān-kun ê Iâ-hô-hoa sī koán-lí Í-sek-lia̍t ê Siōng-tè; koh Lí ê lô͘-po̍k Tāi-pi̍t ê ke beh tī Lí ê bīn-chêng kian-kò͘. 27 Bān-kun ê Iâ-hô-hoa, Í-sek-lia̍t ê Siōng-tè ah, in-ūi Lí khé-sī Lí ê lô͘-po̍k, kóng, Góa beh kā lí kiàn-li̍p ke, só͘-í Lí ê lô͘-po̍k hó-táⁿ ēng chit ê kî-tó lâi tùi Lí kî-tó. 28 Taⁿ Chú Iâ-hô-hoa ah, Lí sī Siōng-tè ah, Lí ê ōe sī chin-si̍t, Lí iā ēng chit ê hok-khì èng-ún Lí ê lô͘-po̍k; 29 taⁿ kiû Lí sù-hok Lí ê lô͘-po̍k ê ke, hō͘ i éng-oán tī Lí ê bīn-chêng; Chú Iâ-hô-hoa ah, in-ūi Lí ū kóng i, goān Lí ê lô͘-po̍k ê ke tùi Lí ê sù-ho̍k lâi tit-tio̍h hok-khì, kàu éng-oán.
1 Chit-tia̍p了後，大衛phah腓利士人，hō͘ in降服；大衛koh tùi腓利士人ê手取Bí-tek-an-má。 2 Koh phah Mô͘-ap，hō͘ in倒tī地裡，用索量伊，量兩條索ê hō͘伊死，量滿一條索ê hō͘伊活；Mô͘-ap人就歸服大衛，來進貢。 3 大衛phah Só-pa王Lī-ha̍p ê kiáⁿ Hap-tāi-tí-siā，tī伊去大河，beh恢(khoe)復伊ê權ê時。 4 大衛掠伊ê馬兵一千七百，步兵兩萬；大衛將伊戰車ê馬割斷伊ê腳筋；只有留一百張車ê馬。 5 大馬色ê A-lân人來幫贊Só-pa王Hap-tāi-tí-siā，大衛就刣死A-lân人兩萬兩千。 6 Tùi án-ni，大衛tī大馬色ê A-lân設立軍營。A-lân人就歸服大衛，來進貢。大衛無論去toh落，耶和華lóng hō͘伊khah贏。 7 大衛取Hap-tāi-tí-siā hiahê人臣所kōaⁿ金ê屏牌，帶到耶路撒冷。 8 大衛王koh tùi屬Hap-tāi-tí-siā ê Pí-tha kap Pí-lô-tha ê城，得tio̍h chōe-chōe銅。 9 Hap-ná王Tô-í聽見大衛phah贏Hap-tāi-tí-siā ê全軍； 10 Tô-í就差伊ê kiáⁿ Iok-lân去見大衛王，請安伊，kā伊祝福，因為伊phah贏Hap-tāi-tí-siā；因為Hap-tāi-tí-siā kap Tô-í常常交戰。Iok-lân ê手也帶銀器、金器、銅器。 11 大衛王就用chiahê物做聖，獻hō͘耶和華，親像前用伊所khah贏列國ê金銀做聖來獻一樣； 12 就是tùi A-lân、Mô͘-ap、A-bûn人、腓利士人、A-má-le̍k，所得tio̍h ê，以及tùi Só-pa王Lī-ha̍p ê kiáⁿ Hap-tāi-tí-siā所搶ê。 13 大衛tī鹽ê山谷phah死A-lân一萬八千人；tò來ê時，就得tio̍h大名聲。 14 Koh 伊tī Í-tong設軍營；就是tī Í-tong全地設軍營。Í-tong人就lóng 歸服大衛。大衛無論去toh落，耶和華lóng hō͘伊khah贏。 15 大衛做以色列眾人ê王。大衛秉公行義tī伊ê眾百姓。 16 Sé-ló͘-ngá ê kiáⁿ約押做軍長；A-hi-lu̍t ê kiáⁿ Iok-sa-hoat做史官。 17 A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k做祭司；Se-lâi-ngá做書記； 18 Iâ-hô-iâ-tāi ê kiáⁿ Pí-ná-ngá統轄 Ki-lī-thê人，kap Pí-lí-thê人；大衛hiahê kiáⁿ做領袖。
1 Chit-tia̍p liáu-āu Tāi-pi̍t phah Hui-lī-sū lâng, hō͘ in hâng-ho̍k; Tāi-pi̍t koh tùi Hui-lī-sū lâng ê chhiú chhú Bí-tek-an-má. 2 Koh phah Mô͘-ap, hō͘ in tó tī tōe--nih, ēng soh niû i, niû nn̄g tiâu soh-ê hō͘ i sí, niû móa chi̍t tiâu soh-ê hō͘ i oa̍h; Mô͘-ap lâng chiū kui-ho̍k Tāi-pi̍t, lâi chìn-kòng. 3 Tāi-pi̍t phah Só-pa ông Lī-ha̍p ê kiáⁿ Hap-tāi-tí-siā, tī i khì Tōa-hô, beh khoe-ho̍k i ê koân ê sî. 4 Tāi-pi̍t lia̍h i ê bé-peng chi̍t-chheng chhit pah, pō͘-peng nn̄g-bān; Tāi-pi̍t chiong i chiàn-chhia ê bé koah-tn̄g i ê kha-kun; chí-ū lâu chi̍t-pah tiuⁿ chhia ê bé. 5 Tāi-má-sek ê A-lân lâng lâi pang-chān Só-pa ông Hap-tāi-tí-siā, Tāi-pi̍t chiū thâi-sí A-lân lâng nn̄g-bān nn̄g-chheng. 6 Tùi án-ni Tāi-pi̍t tī Tāi-má-sek ê A-lân siat-li̍p kun-iâⁿ. A-lân lâng chiū kui-ho̍k Tāi-pi̍t, lâi chìn-kòng. Tāi-pi̍t bô-lūn khì toh-lo̍h, Iâ-hô-hoa lóng hō͘ i khah-iâⁿ. 7 Tāi-pi̍t chhú Hap-tāi-tí-siā hiah ê jîn-sîn só͘ kōaⁿ kim ê pîn-pâi, tòa kàu Iâ-lō͘-sat-léng. 8 Tāi-pi̍t ông koh tùi sio̍k Hap-tāi-tí-siā ê Pí-tha kap Pí-lô-tha ê siâⁿ, tit-tio̍h chōe-chōe tâng. 9 Hap-ná ông Tô-í thiaⁿ-kìⁿ Tāi-pi̍t phah-iâⁿ Hap-tāi-tí-siā ê choân-kun; 10 Tô-í chiū chhe i ê kiáⁿ Iok-lân khì kìⁿ Tāi-pi̍t ông, chhéng-an i, kā i chiok-hok, in-ūi i phah-iâⁿ Hap-tāi-tí-siā; in-ūi Hap-tāi-tí-siā kap Tô-í siông-siông kau-chiàn. Iok-lân ê chhiú iā tòa gûn-khì, kim-khì, tâng-khì. 11 Tāi-pi̍t ông chiū ēng chiah ê mi̍h chòe-sèng, hiàn hō͘ Iâ-hô-hoa, chhin-chhiūⁿ chêng ēng i só͘ khah-iâⁿ lia̍t-kok ê kim-gûn chòe-sèng lâi hiàn chi̍t-iūⁿ; 12 chiū-sī tùi A-lân, Mô͘-ap, A-bûn lâng, Hui-lī-sū lâng, A-má-le̍k, só͘ tit-tio̍h ê, í-ki̍p tùi Só-pa ông Lī-ha̍p ê kiáⁿ Hap-tāi-tí-siā só͘ chhiúⁿ ê. 13 Tāi-pi̍t tī Iâm ê soaⁿ-kok phah-sí A-lân chi̍t-bān poeh-chheng lâng; tò--lâi ê sî, chiū tit-tio̍h tōa miâ-siaⁿ. 14 Koh i tī Í-tong siat kun-iâⁿ; chiū-sī tī Í-tong choân-tōe siat kun-iâⁿ. Í-tong lâng chiū lóng kui-ho̍k Tāi-pi̍t. Tāi-pi̍t bô-lūn khì toh-lo̍h, Iâ-hô-hoa lóng hō͘ i khah-iâⁿ. 15 Tāi-pi̍t chòe Í-sek-lia̍t chèng-lâng ê ông. Tāi-pi̍t péng-kong kiâⁿ-gī tī i ê chèng peh-sìⁿ. 16 Sé-ló͘-ngá ê kiáⁿ Iok-ap chòe kun-tiúⁿ; A-hi-lu̍t ê kiáⁿ Iok-sa-hoat chòe sú-koaⁿ. 17 A-hi-tu̍t ê kiáⁿ Sat-tok kap A-pí-a-tha ê kiáⁿ A-hi-bí-le̍k chòe chè-si; Se-lâi-ngá chòe su-kì; 18 Iâ-hô-iâ-tāi ê kiáⁿ Pí-ná-ngá thóng-hat Ki-lī-thê lâng, kap Pí-lí-thê lâng; Tāi-pi̍t hiah ê kiáⁿ chòe léng-siù.
1 大衛問講，掃羅ê家iáu有chhun人無，我thang因為約拿單ê緣故來施恩hō͘伊？ 2 掃羅ê家有一个奴僕，名叫Sé-pa，人叫伊去大衛hia；王就kā伊講，你是Sé-pa mah？ 3 應講，你ê奴僕就是伊。王講，掃羅ê家iáu有人無，我thang將上帝ê恩施hō͘伊？ 4 Sé-pa對王講，約拿單iáu有一个kiáⁿ，是跛腳ê。王kā伊講，伊tī toh落？Sé-pa應王講，伊tī Lô-tí-pa A-bí-lī ê kiáⁿ Má-kiat ê家。 5 大衛王就差人去，tùi Lô-tí-pa A-bí-lī ê kiáⁿ Má-kiat ê家帶伊來。 6 掃羅ê孫，約拿單ê kiáⁿ，Bí-hui-pho-siat來見大衛，仆落去拜。大衛講，Bí-hui-pho-siat ah。伊應講，你ê奴僕tī-chia。 7 大衛講，你莫得驚，我beh 因為你ê父約拿單ê緣故施恩hō͘你；我beh將你ê公掃羅一切ê田園lóng還你；你也beh常常tī我ê桌相kap食。 8 伊koh仆teh拜伊，講，你ê奴僕是甚麼ah？是親像一隻死狗，你竟然看顧我ah。 9 王叫掃羅ê奴僕Sé-pa來，kā伊講，我已經將屬掃羅kap伊全家-ê lóng hō͘你ê主人ê kiáⁿ。 10 你kap你hiahê kiáⁿ，你hiahê奴僕，tio̍h kā伊種作田園，帶所出產ê hō͘你ê主ê kiáⁿ有物thang食；總是你ê主人ê kiáⁿ Bí-hui-pho-siat beh常常tī我ê桌相kap食。 11 Sé-pa有十五ê kiáⁿ，二十個奴僕。Sé-pa對王講，見我ê主我ê王所吩咐奴僕ê，你ê奴僕lóng beh照án-ni行。王koh講，Bí-hui-pho-siat beh tī我ê桌相kap食，親像王ê kiáⁿ一樣。 12 Bí-hui-pho-siat有一个kiáⁿ iáu細漢，名叫Bí-ka。見若tòa tī Sé-pa ê家ê人，lóng做Bí-hui-pho-siat ê奴僕。 13 Tùi án-ni，Bí-hui-pho-siat tiàm tī耶路撒冷；因為伊常常tī王ê桌相kap食；koh伊兩腳lóng跛(pái)。
1 Tāi-pi̍t mn̄g kóng, Sò-lô ê ke iáu ū chhun lâng bô, góa thang in-ūi Iok-ná-tan ê iân-kò͘ lâi si-un hō͘ i? 2 Sò-lô ê ke ū chi̍t ê lô͘-po̍k, miâ kiò Sé-pa, lâng kiò i khì Tāi-pi̍t hia; ông chiū kā i kóng, Lí sī Sé-pa mah? 3 Ìn kóng, Lí ê lô͘-po̍k chiū-sī i. Ông kóng, Sò-lô ê ke iáu ū lâng bô, góa thang chiong Siōng-tè ê un si hō͘ i? 4 Sé-pa tùi ông kóng, Iok-ná-tan iáu ū chi̍t ê kiáⁿ, sī pái-kha ê. Ông kā i kóng, I tī toh-lo̍h? Sé-pa ìn ông kóng, I tī Lô-tí-pa A-bí-lī ê kiáⁿ Má-kiat ê ke. 5 Tāi-pi̍t ông chiū chhe lâng khì, tùi Lô-tí-pa A-bí-lī ê kiáⁿ Má-kiat ê ke tòa i lâi. 6 Sò-lô ê sun, Iok-ná-tan ê kiáⁿ, Bí-hui-pho-siat lâi kìⁿ Tāi-pi̍t, phak--lo̍h-khì pài. Tāi-pi̍t kóng, Bí-hui-pho-siat ah. I ìn kóng, Lí ê lô͘-po̍k tī-chia. 7 Tāi-pi̍t kóng, Lí bo̍h-tit kiaⁿ, góa beh in-ūi lí ê pē Iok-ná-tan ê iân-kò͘ si-un hō͘ lí; góa beh chiong lí ê kong Sò-lô it-chhè ê chhân-hn̂g lóng hêng lí; lí iā beh siông-siông tī góa ê toh saⁿ-kap chia̍h. 8 I koh phak--teh pài i, kóng, Lí ê lô͘-po̍k sī sím-mi̍h ah? sī chhin-chhiūⁿ chi̍t chiah sí-káu, lí kéng-jiân khòaⁿ-kò͘ góa ah. 9 Ông kiò Sò-lô ê lô͘-po̍k Sé-pa lâi, kā i kóng, Góa í-keng chiong sio̍k Sò-lô kap i choân-ke--ê lóng hō͘ lí ê chú-lâng ê kiáⁿ. 10 Lí kap lí hiah ê kiáⁿ, lí hiah ê lô͘-po̍k, tio̍h kā i chèng-choh chhân-hn̂g, tòa só͘ chhut-sán-ê hō͘ lí ê chú ê kiáⁿ ū mi̍h thang chia̍h; chóng-sī lí ê chú-lâng ê kiáⁿ Bí-hui-pho-siat beh siông-siông tī góa ê toh saⁿ-kap chia̍h. 11 Sé-pa ū cha̍p-gō͘ ê kiáⁿ, jī-cha̍p ê lô͘-po̍k. Sé-pa tùi ông kóng, Kìⁿ góa ê chú góa ê ông só͘ hoan-hù lô͘-po̍k ê, lí ê lô͘-po̍k lóng beh chiàu án-ni kiâⁿ. Ông koh kóng, Bí-hui-pho-siat beh tī góa ê toh saⁿ-kap chia̍h, chhin-chhiūⁿ ông ê kiáⁿ chi̍t-iūⁿ. 12 Bí-hui-pho-siat ū chi̍t ê kiáⁿ iáu sòe-hàn, miâ kiò Bí-ka. Kìⁿ-nā tòa tī Sé-pa ê ke ê lâng, lóng chòe Bí-hui-pho-siat ê lô͘-po̍k. 13 Tùi án-ni Bí-hui-pho-siat tiàm tī Iâ-lō͘-sat-léng; in-ūi i siông-siông tī ông ê toh saⁿ-kap chia̍h; koh i nn̄g-kha lóng pái.
1 Chit-tia̍p以後，A-bûn人ê王死，伊ê kiáⁿ Hap-lùn續接伊做王。 2 大衛講，我beh施恩hō͘ Ná-hat ê kiáⁿ Hap-lùn，親像伊ê老父施恩hō͘我一樣。大衛就差人臣，託重in安慰伊死老父。大衛ê人臣到A-bûn人ê境內。 3 總是A-bûn人ê首領差人kā in ê主Hap-lùn講，大衛差人來你chia慰問你，你phah算伊是尊敬你ê父mah？大衛差伊ê人臣，kiám m̄是beh偵探chitê城，詳細看來chhia倒伊mah？ 4 Hap-lùn就將大衛ê人臣ê嘴鬚剃一半，koh對中割斷伊ê衫，到大腿頂，差in tò去。 5 有人kā大衛講。伊就差人去迎接in，因為hiahê人見笑到極。王講，Thang tiàm tī耶利哥thèng候嘴鬚發長，chiah tò來。 6 A-bûn人知in hō͘大衛厭惡；A-bûn人就差人去倩Pek-Lī-ha̍p ê A-lân人，kap Só-pa ê A-lân人，步兵兩萬，kap Má-ka王ê人一千，Tô-pek人一萬兩千。 7 大衛聽見，就差約押chhōa勇士全軍。 8 A-bûn人出來排陣tī城門口；Só-pa kap Lī-ha̍p ê A-lân人、Tô-pek人，kap Má-ka人，另外排陣tī郊野。 9 約押看見前後有對敵排陣，就tùi以色列精兵ê中間koh再揀伊來排陣，抵敵A-lân人； 10 其餘ê百姓交伊ê小弟A-pí-su，hō͘伊排陣抵敵A-bûn人。 11 Koh講，Nā A-lân人khah強我，你就來幫贊我；若A-bûn人khah強你，我就去幫贊你。 12 Tio̍h勇敢，咱tio̍h為咱ê百姓kap咱上帝ê城做大丈夫；願耶和華照伊所看做好ê來行。 13 Tùi án-ni，約押kap tè伊ê百姓進前kap A-lân人交戰；in就tī伊ê面前逃走。 14 A-bûn人看見A-lân人逃走，in也tī A-pí-su ê面前走入城。約押就tùi A-bûn人hia tò去，到耶路撒冷。 15 A-lân人看見in 刣輸tī以色列人ê面前，就koh聚集。 16 Hap-tāi-tí-siā差人召河外ê A-lân人出來；in到Hi-lân；Hap-tāi-tí-siā ê軍長Sok-hoat chhōa in。 17 有人報大衛知；伊就聚集以色列眾人，過約旦河來到Hi-lân；A-lân人排陣攻擊大衛，kap伊交戰。 18 A-lân人逃走tī以色列ê面前；大衛刣死A-lân七百張戰車ê兵，馬兵四萬；koh phah in ê軍長Sok-hoat，hō͘伊死tī-hia。 19 降服Hap-tāi-tí-siā hiahê王看見in 刣輸tī以色列ê面前，就kap以色列和好，來降服in。Tùi án-ni，A-lân人m̄敢koh幫贊A-bûn人。
1 Chit-tia̍p í-āu, A-bûn lâng ê ông sí, i ê kiáⁿ Hap-lùn sòa-chiap i chòe ông. 2 Tāi-pi̍t kóng, Góa beh si-un hō͘ Ná-hat ê kiáⁿ Hap-lùn, chhin-chhiūⁿ i ê lāu-pē si-un hō͘ góa chi̍t-iūⁿ. Tāi-pi̍t chiū chhe jîn-sîn, thok-tiōng in an-ùi i sí lāu-pē. Tāi-pi̍t ê jîn-sîn kàu A-bûn lâng ê kéng-lāi. 3 Chóng-sī A-bûn lâng ê siú-léng chhe lâng kā in ê chú Hap-lùn kóng, Tāi-pi̍t chhe lâng lâi lí chia ùi-būn lí, lí phah-sǹg i sī chun-kèng lí ê pē mah? Tāi-pi̍t chhe i ê jîn-sîn, kiám-m̄-sī beh cheng-thàm chit ê siâⁿ, siông-sè khòaⁿ lâi chhia-tó i mah? 4 Hap-lùn chiū chiong Tāi-pi̍t ê jîn-sîn ê chhùi-chhiu thì chi̍t-pòaⁿ, koh tùi-tiong koah-tn̄g i ê saⁿ, kàu tōa-thúi-téng, chhe in tò--khì. 5 Ū lâng kā Tāi-pi̍t kóng. I chiū chhe lâng khì ngiâ-chih in, in-ūi hiah ê lâng kiàn-siàu kàu-ke̍k. Ông kóng, Thang tiàm tī Iâ-lī-ko thèng-hāu chhùi-chhiu hoat-tn̂g, chiah tò--lâi. 6 A-bûn lâng chai in hō͘ Tāi-pi̍t iàm-ò͘ⁿ; A-bûn lâng chiū chhe lâng khì chhiàⁿ Pek-lī-ha̍p ê A-lân lâng, kap Só-pa ê A-lân lâng, pō͘-peng nn̄g-bān, kap Má-ka ông ê lâng chi̍t-chheng, Tô-pek lâng chi̍t-bān nn̄g-chheng. 7 Tāi-pi̍t thiaⁿ-kìⁿ, chiū chhe Iok-ap chhōa ióng-sū choân-kun. 8 A-bûn lâng chhut-lâi pâi-tīn tī siâⁿ-mn̂g-kháu; Só-pa kap Lī-ha̍p ê A-lân lâng, Tô-pek lâng, kap Má-ka lâng, lēng-gōa pâi-tīn tī kau-iá. 9 Iok-ap khòaⁿ-kìⁿ chêng-āu ū tùi-te̍k pâi-tīn, chiū tùi Í-sek-lia̍t cheng-peng ê tiong-kan koh-chài kéng i lâi pâi-tīn, tí-te̍k A-lân lâng; 10 kî-û ê peh-sìⁿ kau i ê sió-tī A-pí-su, hō͘ i pâi-tīn tí-te̍k A-bûn lâng. 11 Koh kóng, Nā A-lân lâng khah-kiông góa, lí chiū lâi pang-chān góa; nā A-bûn lâng khah-kiông lí, góa chiū khì pang-chān lí. 12 Tio̍h ióng-kám, lán tio̍h ūi lán ê peh-sìⁿ kap lán Siōng-tè ê siâⁿ chòe tāi-tiōng-hu; goān Iâ-hô-hoa chiàu I só͘ khòaⁿ-chòe hó-ê lâi kiâⁿ. 13 Tùi án-ni Iok-ap kap tè i ê peh-sìⁿ chìn-chêng kap A-lân lâng kau-chiàn; in chiū tī i ê bīn-chêng tô-cháu. 14 A-bûn lâng khòaⁿ-kìⁿ A-lân lâng tô-cháu, in iā tī A-pí-su ê bīn-chêng cháu ji̍p siâⁿ. Iok-ap chiū tùi A-bûn lâng hia tò-khì, kàu Iâ-lō͘-sat-léng. 15 A-lân lâng khòaⁿ-kìⁿ in thâi-su tī Í-sek-lia̍t lâng ê bīn-chêng, chiū koh chū-chi̍p. 16 Hap-tāi-tí-siā chhe lâng tiàu Hô-gōa ê A-lân lâng chhut-lâi; in kàu Hi-lân; Hap-tāi-tí-siā ê kun-tiúⁿ Sok-hoat chhōa in. 17 Ū lâng pò Tāi-pi̍t chai; i chiū chū-chi̍p Í-sek-lia̍t chèng-lâng, kè Iok-tàn hô lâi kàu Hi-lân; A-lân lâng pâi-tīn kong-kek Tāi-pi̍t, kap i kau-chiàn. 18 A-lân lâng tô-cháu tī Í-sek-lia̍t ê bīn-chêng; Tāi-pi̍t thâi-sí A-lân chhit-pah tiuⁿ chiàn-chhia ê peng, bé-peng sì-bān; koh phah in ê kun-tiúⁿ Sok-hoat, hō͘ i sí tī-hia. 19 Hâng-ho̍k Hap-tāi-tí-siā hiah ê ông khòaⁿ-kìⁿ in thâi-su tī Í-sek-lia̍t ê bīn-chêng, chiū kap Í-sek-lia̍t hô-hó, lâi hâng-ho̍k in. Tùi án-ni A-lân lâng m̄-káⁿ koh pang-chān A-bûn lâng.
1 年頭，列王出戰ê時，大衛差約押kap伊ê人臣，kap以色列ê眾人，出去；in就刣贏A-bûn人，圍攻La̍h-pa。大衛猶原tiàm tī耶路撒冷。 2 有一日beh暗ê時，大衛tùi床裡起來，tī王宮ê厝頂行來行去；tùi厝頂看見一个婦人人teh洗浴；婦人人生做真súi。 3 大衛為tio̍h hitê婦人人就差人去探聽；有人講，伊kiám m̄是Í-liân ê cha-bó͘-kiáⁿ，Hek人烏利亞ê bó͘，Poa̍t-sī-pa mah？ 4 大衛差使者去chhōa伊來，伊就來到伊hia，大衛kap伊同房；(婦人人清氣伊ê無清氣)；就tò去in厝。 5 婦人人懷孕，差人kā大衛講，我已經懷孕。 6 大衛差人到約押hia，講，你差 Hek人烏利亞來我chia。約押就差烏利亞去見大衛。 7 烏利亞已經來伊hia，大衛問看約押好mah？百姓好mah？交戰好勢mah？ 8 大衛kā烏利亞講，你落去lín tau洗腳。烏利亞出王宮了後，王就送一份食物hō͘伊。 9 總是烏利亞kap伊主人ê奴僕相kap睏tī王宮ê門口，無落去in tau。 10 有人kā大衛講，烏利亞無落去伊ê厝。大衛就問烏利亞講，你kiám m̄是tùi遠路來mah？啥事m̄落去你ê家ah？ 11 烏利亞對大衛講，約櫃kap以色列kap偤大lóng tiàm tī草寮á；我ê主約押，kap我ê主ê奴僕，lóng紮營tī田野；我kiám thang tò去我ê家lim食，kap我ê bó͘相kap睏mah？我chí你ê活，kap你靈魂ê活來chiù-chōa，我決斷無beh行chitê事。 12 大衛kā烏利亞講，你今á日猶原tòa chia，明á載我hō͘你去。烏利亞就tī hit日kap 第二日tòa tī耶路撒冷。 13 大衛叫烏利亞來，伊就tī伊ê面前lim食；伊hō͘伊醉；已經暗，烏利亞出去伊ê床裡睏，kap伊ê主chiahê奴僕相kap做伴；也無落去in tau。 14 隔早起，大衛寫一張phoe hō͘約押，託烏利亞ê手帶去。 15 Phoe內寫講，Tio̍h派烏利亞tī陣前極危急ê所在，lín就對伊ê後面退來，hō͘伊受phah死。 16 約押圍城ê時，tī伊所知有勇士ê所在，就派烏利亞tī-hia。 17 城內ê人有出來kap約押交戰；大衛ê奴僕死kúi-nā人，Hek人烏利亞也死。 18 約押差人用交戰ê事lóng kā大衛講； 19 就吩咐使者講，你用交戰一切ê事kā王講明白， 20 王若受氣，kā lín講，Lín交戰ê時，啥事逼近城牆？kiám m̄知in會tùi城頂射箭mah？ 21 前phah死Iâ-lō͘-pí-siat ê kiáⁿ A-pí-bí-le̍k-ê是是誰？kiám m̄是一个婦人人，tùi牆頂hiat石磨ê頂tún tī伊ê頂面，hō͘伊死tī Thê-pī-su mah？lín啥事逼近城ah？你tio̍h講，你ê奴僕Hek人烏利亞也死。 22 使者去，照約押一切所命令ê來kā大衛講。 23 使者kā大衛講，對敵比阮khah強，出來郊野攻擊阮，阮phah伊到城門口。 24 射箭ê人tùi牆頂射你ê奴僕；王ê奴僕死kúi-nā人，你ê奴僕Hek人烏利亞也死。 25 大衛kā hitê使者講，你tio̍h án-ni kā約押講，m̄免掛慮chitê事，因為刀劍刣死人，chitê hitê無一定；你tio̍h koh-khah盡力攻城，來chhia倒伊；tio̍h án-ni勉勵伊。 26 烏利亞ê bó͘聽見丈夫烏利亞已經死，就為伊ê丈夫啼哭。 27 Teng-iu已經明白，大衛差人chhōa伊到宮內；伊就做伊ê bó͘，kā伊生一个kiáⁿ。總是大衛所行ê事，耶和華真無歡喜。
1 Nî-thâu, lia̍t-ông chhut-chiàn ê sî, Tāi-pi̍t chhe Iok-ap kap i ê jîn-sîn, kap Í-sek-lia̍t ê chèng-lâng, chhut-khì; in chiū thâi-iâⁿ A-bûn lâng, ûi-kong La̍h-pa. Tāi-pi̍t iû-goân tiàm tī Iâ-lō͘-sat-léng. 2 Ū chi̍t-ji̍t beh àm ê sî, Tāi-pi̍t tùi chhn̂g--nih khí-lâi, tī ông-kiong ê chhù-téng kiâⁿ-lâi kiâⁿ-khì; tùi chhù-téng khòaⁿ-kìⁿ chi̍t ê hū-jîn-lâng teh sóe-e̍k; hū-jîn-lâng siⁿ-chòe chin-súi. 3 Tāi-pi̍t ūi-tio̍h hit ê hū-jîn-lâng chiū chhe lâng khì thàm-thiaⁿ; ū lâng kóng, I kiám-m̄-sī Í-liân ê cha-bó͘-kiáⁿ, Hek-lâng O͘-lī-à ê bó͘, Poa̍t-sī-pa mah? 4 Tāi-pi̍t chhe sù-chiá khì chhōa i lâi, i chiū lâi kàu i hia, Tāi-pi̍t kap i tâng-pâng; (hū-jîn-lâng chheng-khì i ê bô chheng-khì;) chiū tò-khì in chhù. 5 Hū-jîn-lâng hoâi-īn, chhe lâng kā Tāi-pi̍t kóng, Góa í-keng hoâi-īn. 6 Tāi-pi̍t chhe lâng kàu Iok-ap hia, kóng, Lí chhe Hek-lâng O͘-lī-à lâi góa chia. Iok-ap chiū chhe O͘-lī-à khì kìⁿ Tāi-pi̍t. 7 O͘-lī-à í-keng lâi i hia, Tāi-pi̍t mn̄g-khòaⁿ Iok-ap hó mah? peh-sìⁿ hó mah? kau-chiàn hó-sè mah? 8 Tāi-pi̍t kā O͘-lī-à kóng, Lí lo̍h--khì lín tau sóe-kha. O͘-lī-à chhut ông-kiong liáu-āu, ông chiū sàng chi̍t-hūn chia̍h-mi̍h hō͘ i. 9 Chóng-sī O͘-lī-à kap i chú-lâng ê lô͘-po̍k saⁿ-kap khùn tī ông-kiong ê mn̂g-kháu, bô lo̍h-khì in tau. 10 Ū lâng kā Tāi-pi̍t kóng, O͘-lī-à bô lo̍h-khì i ê chhù. Tāi-pi̍t chiū mn̄g O͘-lī-à kóng, Lí kiám-m̄-sī tùi hn̄g-lō͘ lâi mah? siáⁿ-sū m̄ lo̍h-khì lí ê ke ah? 11 O͘-lī-à tùi Tāi-pi̍t kóng, Iok-kūi kap Í-sek-lia̍t kap Iû-tāi lóng tiàm tī chháu-liâu-á; góa ê chú Iok-ap, kap góa ê chú ê lô͘-po̍k, lóng chat-iâⁿ tī chhân-iá; góa kiám thang tò--khì góa ê ke lim-chia̍h, kap góa ê bó͘ saⁿ-kap khùn mah? góa chí lí ê oa̍h, kap lí lêng-hûn ê oa̍h lâi chiù-chōa, góa koat-toàn bô beh kiâⁿ chi̍t ê sū. 12 Tāi-pi̍t kā O͘-lī-à kóng, Lí kin-á-ji̍t iû-goân tòa chia, bîn-á-chài góa hō͘ lí khì. O͘-lī-à chiū tī hit-ji̍t kap tē-jī ji̍t tòa tī Iâ-lō͘-sat-léng. 13 Tāi-pi̍t kiò O͘-lī-à lâi, i chiū tī i ê bīn-chêng lim-chia̍h; i hō͘ i chùi; í-keng àm, O͘-lī-à chhut-khì i ê chhn̂g--nih khùn, kap i ê chú chiah ê lô͘-po̍k saⁿ-kap chòe-phōaⁿ; iā bô lo̍h-khì in tau. 14 Keh chá-khí Tāi-pi̍t siá chi̍t tiuⁿ phoe hō͘ Iok-ap, thok O͘-lī-à ê chhiú tòa--khì. 15 Phoe-lāi siá kóng, Tio̍h phài O͘-lī-à tī tīn-chêng ke̍k gûi-kip ê só͘-chāi, lín chiū tùi i ê āu-bīn thè--lâi, hō͘ i siū phah-sí. 16 Iok-ap ûi-siâⁿ ê sî, tī i só͘ chai ū ióng-sū ê só͘-chāi, chiū phài O͘-lī-à tī-hia. 17 Siâⁿ-lāi ê lâng ū chhut-lâi kap Iok-ap kau-chiàn; Tai-pi̍t ê lô͘-po̍k sí kúi-nā lâng, Hek-lâng O͘-lī-à iā sí. 18 Iok-ap chhe lâng ēng kau-chiàn ê sū lóng kā Tāi-pi̍t kóng; 19 chiū hoan-hù sù-chiá kóng, Lí ēng kau-chiàn it-chhè ê sū kā ông kóng bêng-pe̍k, 20 ông nā siū-khì, kā lín kóng, Lín kau-chiàn ê sî, siáⁿ-sū pek-kūn siâⁿ-chhiûⁿ? kiám m̄-chai in ōe tùi siâⁿ-téng siā-chìⁿ mah? 21 Chêng phah-sí Iâ-lō͘-pí-siat ê kiáⁿ A-pí-bí-le̍k-ê sī chī-chūi? kiám-m̄-sī chi̍t ê hū-jîn-lâng, tùi chhiûⁿ-téng hiat chio̍h-bō ê téng-tún tī i ê téng-bīn, hō͘ i sí tī Thê-pī-su mah? lín siáⁿ-sū pek-kūn siâⁿ ah? lí tio̍h kóng, Lí ê lô͘-po̍k Hek-lâng O͘-lī-à iā sí. 22 Sù-chiá khì, chiàu Iok-ap it-chhè só͘ bēng-lēng-ê lâi kā Tāi-pi̍t kóng. 23 Sù-chiá kā Tāi-pi̍t kóng, Tùi-te̍k pí goán khah-kiông, chhut-lâi kau-iá kong-kek goán, goán phah i kàu siâⁿ-mn̂g-kháu. 24 Siā-chìⁿ ê lâng tùi chhiûⁿ-téng siā lí ê lô͘-po̍k; ông ê lô͘-po̍k sí kúi-nā lâng, lí ê lô͘-po̍k Hek-lâng O͘-lī-à iā sí. 25 Tāi-pi̍t kā hit ê sù-chiá kóng, Lí tio̍h án-ni kā Iok-ap kóng, M̄-bián khòa-lū chit ê sū, in-ūi to-kiàm thâi-sí lâng, chit-ê hit-ê bô it-tēng; lí tio̍h koh-khah chīn-la̍t kong-siâⁿ, lâi chhia-tó i; tio̍h án-ni bián-lē i. 26 O͘-lī-à ê bó͘ thiaⁿ-kìⁿ tiōng-hu O͘-lī-à í-keng sí, chiū ūi i ê tiōng-hu thî-khàu. 27 Teng-iu í-keng bêng-pe̍k, Tāi-pi̍t chhe lâng chhōa i kàu kiong-lāi; i chiū chòe i ê bó͘, kā i siⁿ chi̍t ê kiáⁿ. Chóng-sī Tāi-pi̍t só͘ kiâⁿ ê sū, Iâ-hô-hoa chin bô hoaⁿ-hí.
1 耶和華差Ná-tan去見大衛；伊到伊hia，kā伊講，Tī一个城有兩人，一个好額，一个sòng-hiong。 2 好額ê有牛羊真chōe； 3 sòng-hiong人無甚麼，只有一隻羊種á，就是伊所買來飼ê，伊kap伊tī-hia，kap伊ê kiáⁿ相kap長大，食伊所食ê，lim伊ê杯，睏tī伊ê胸前，看伊親像家己ê cha-bó͘-kiáⁿ。 4 有一个出外人到好額人hia，好額人m̄甘對伊ê羊群牛群取來備辦hō͘人客食；反tńg 取sòng-hiong人ê羊á，備辦來hō͘人客食。 5 大衛大受氣hit人，kā Ná-tan講，我kí永活ê耶和華來chiù-chōa，行chitê tāi-chì ê人tio̍h死； 6 tio̍h賠伊ê羊á 四倍；因為伊行chitê事，也因為伊無憐憫ê心。 7 Ná-tan kā大衛講，你就是hit人。耶和華以色列ê上帝án-ni講，我用油抹你做以色列ê王，救你脫離掃羅ê手。 8 我koh用你ê主ê厝宅hō͘你，用你ê主hiahê bó͘交tī你ê胸前；koh用以色列kap偤大家hō͘你；chiahê若iáu掠做小khóa，我會加添chit號hit號hō͘你。 9 你啥事看輕耶和華ê命令，行伊所看做pháiⁿ ê事？你用刀刣死Hek人烏利亞，就是借A-bûn人ê刀刣死伊，koh娶伊ê bó͘做你ê bó͘。 10 Taⁿ刀劍beh永遠無離開你ê家，因為你看輕我，chhōa Hek人烏利亞ê bó͘做你ê bó͘。 11 耶和華koh án-ni講，看ah，我beh對你ê家興起災厄攻擊你；我beh tī你ê目睭前，用你hiahê bó͘ hō͘你ê厝邊，伊beh tī青天白日kap你hiahê bó͘同房。 12 因為你tī暗中行伊，總是我beh tī青天白日，tī以色列眾人ê面前，行chitê事。 13 大衛kā Ná-tan講，我有得罪耶和華。Ná-tan kā大衛講，耶和華已經除去你ê罪，你bōe致到死。 14 總是因為你行chitê事，hō͘耶和華ê對敵有褻瀆ê因由，所以伊kā你所生ê kiáⁿ的確死。 15 Ná-tan就tò去in厝。 耶和華phah烏利亞ê bó͘ kā大衛所生ê嬰á，伊就破病真傷重。 16 大衛就為tio̍h hitê kiáⁿ祈禱上帝。大衛koh禁食，入內面thong暝倒tī地裡。 17 伊家中hiahê老人起來，到伊ê身邊，beh扶伊tùi地起來；總是伊m̄肯，也無beh kap in相kap食。 18 到第七日gín-ná死；大衛ê人臣m̄敢kā伊講gín-ná死lah；因為in講，Gín-ná iáu活teh ê時，咱勸伊，伊尚且m̄聽咱ê話，若kā伊講gín-ná死，伊傷心beh到怎樣？ 19 大衛看見伊ê人臣chī-bú-chī-chū teh講，大衛就知gín-ná已經死。大衛就問伊ê人臣講，Gín-ná死lah mah？In講，死lah。 20 大衛就tùi地裡起來，洗身軀，抹油，換衫，入耶和華ê殿敬拜；然後tò去伊ê厝。伊吩咐人排物tī伊ê面前，伊就食。 21 人臣問伊講，你所行ê是怎樣？Gín-ná活teh ê時，你禁食啼哭；gín-ná死，你反tńg起來食。 22 大衛講，Gín-ná iáu活teh，我禁食啼哭，因為我phah算講，Kiám-chhái耶和華憐憫我，hō͘ gín-ná活teh，也敢。 23 Gín-ná已經死，我禁食beh啥事？我kiám會hō͘伊倒tńg來mah？我beh去伊 hia，伊bōe會來我chia。 24 大衛安慰伊ê bó͘ Poa̍t-sī-pa，入去kap伊同房，伊就生kiáⁿ；就kā伊號名叫所羅門； 25 耶和華也疼伊，就託先知Ná-tan kā伊號名叫Iâ-tí-tí-a，因為耶和華疼伊。 26 約押攻A-bûn人ê La̍h-pa，取in ê京城。 27 約押差使者去見大衛講，我攻La̍h-pa，已經取伊ê水城。 28 Taⁿ你tio̍h聚集其餘ê百姓來，紮營攻chitê城來取伊；驚了我取chitê城，人就用我ê名來叫伊。 29 大衛就聚集眾百姓，去La̍h-pa攻擊，來取伊。 30 伊取in ê王頭殼頂ê冕旒，伊ê金重一tha-liân-tek，koh鑲寶石；將chitê來戴tī大衛ê頭殼。伊koh tùi城內取真chōe財物。 31 Koh掠hiahê城ê百姓出來，hō͘ in用鋸á，kap鐵耙(pē)，以及鐵ê斧頭做苦工，á是tī瓦窯tio̍h磨；伊款待A-bûn人hiahê城lóng是án-ni。大衛就kap眾百姓tò去耶路撒冷。
1 Iâ-hô-hoa chhe Ná-tan khì kìⁿ Tāi-pi̍t; i kàu i hia, kā i kóng, Tī chi̍t ê siâⁿ ū nn̄g-lâng, chi̍t-ê hó-gia̍h, chi̍t-ê sòng-hiong. 2 Hó-gia̍h-ê ū gû iûⁿ chin-chōe; 3 sòng-hiong lâng bô sím-mi̍h, chí-ū chi̍t chiah iûⁿ-chéng-á, chiū-sī i só͘ bóe lâi chhī ê, i kap i tī-hia, kap i ê kiáⁿ saⁿ-kap tióng-tōa, chia̍h i só͘ chia̍h-ê, lim i ê poe, khùn tī i ê heng-chêng, khòaⁿ i chhin-chhiūⁿ ka-kī ê cha-bó͘-kiáⁿ. 4 Ū chi̍t ê chhut-gōa lâng kàu hó-gia̍h lâng hia, hó-gia̍h lâng m̄-kam tùi i ê iûⁿ-kûn gû-kûn chhú lâi pī-pān hō͘ lâng-kheh chia̍h; hoán-tńg chhú sòng-hiong lâng ê iûⁿ-á, pī-pān lâi hō͘ lâng-kheh chia̍h. 5 Tāi-pi̍t tōa siū-khì hit-lâng, kā Ná-tan kóng, Góa kí éng-oa̍h ê Iâ-hô-hoa lâi chiù-chōa, kiâⁿ chit ê tāi-chì ê lâng tio̍h sí; 6 tio̍h pê i ê iûⁿ-á sì-pē; in-ūi i kiâⁿ chit ê sū, iā in-ūi i bô lîn-bín ê sim. 7 Ná-tan kā Tāi-pi̍t kóng, Lí chiū-sī hit-lâng. Iâ-hô-hoa Í-sek-lia̍t ê Siōng-tè án-ni kóng, Góa ēng iû boah lí chòe Í-sek-lia̍t ê ông, kiù lí thoat-lī Sò-lô ê chhiú. 8 Góa koh ēng lí ê chú ê chhù-the̍h hō͘ lí, ēng lí ê chú hiah ê bó͘ kau tī lí ê heng-chêng; koh ēng Í-sek-lia̍t kap Iû-tāi ke hō͘ lí; chiah-ê nā iáu lia̍h-chòe sió-khóa, Góa ōe ke-thiⁿ chit-hō hit-hō hō͘ lí. 9 Lí siáⁿ-sū khòaⁿ-khin Iâ-hô-hoa ê bēng-lēng, kiâⁿ I só͘ khòaⁿ-chòe pháiⁿ ê sū? lí ēng to thâi-sí Hek-lâng O͘-lī-à, chiū-sī chioh A-bûn lâng ê to thâi-sí i, koh chhōa i ê bó͘ chòe lí ê bó͘. 10 Taⁿ to-kiàm beh éng-oán bô lī-khui lí ê ke, in-ūi lí khòaⁿ-khin Góa, chhōa Hek-lâng O͘-lī-à ê bó͘ chòe lí ê bó͘. 11 Iâ-hô-hoa koh án-ni kóng, Khòaⁿ ah, Góa beh tùi lí ê ke heng-khí chai-ē kong-kek lí; Góa beh tī lí ê ba̍k-chiu-chêng, ēng lí hiah ê bó͘ hō͘ lí ê chhù-piⁿ, i beh tī chheng-thian pe̍k-ji̍t kap lí hiah ê bó͘ tâng-pâng. 12 In-ūi lí tī àm-tiong kiâⁿ i, chóng-sī Góa beh tī chheng-thian pe̍k-ji̍t, tī Í-sek-lia̍t chèng-lâng ê bīn-chêng, kiâⁿ chit ê sū. 13 Tāi-pi̍t kā Ná-tan kóng, Góa ū tek-chōe Iâ-hô-hoa. Ná-tan kā Tāi-pi̍t kóng, Iâ-hô-hoa í-keng tû-khì lí ê chōe, lí bōe tì-kàu sí. 14 Chóng-sī in-ūi lí kiâⁿ chit ê sū, hō͘ Iâ-hô-hoa ê tùi-te̍k ū siat-to̍k ê in-iû, só͘-í i kā lí só͘ siⁿ ê kiáⁿ tek-khak sí. 15 Ná-tan chiū tò-khì in chhù. Iâ-hô-hoa phah O͘-lī-à ê bó͘ kā Tāi-pi̍t só͘ siⁿ ê eⁿ-á, i chiū phòa-pīⁿ chin siong-tiōng. 16 Tāi-pi̍t chiū ūi-tio̍h hit ê kiáⁿ kî-tó Siōng-tè. Tāi-pi̍t koh kìm-chia̍h, ji̍p lāi-bīn thong-mî tó tī tōe--nih. 17 I ke-tiong hiah ê lāu-lâng khí-lâi, kàu i ê sin-piⁿ, beh hû i tùi tōe khí-lâi; chóng-sī i m̄-khéng, iā bô beh kap in saⁿ-kap chia̍h. 18 Kàu tē-chhit ji̍t gín-ná sí; Tāi-pi̍t ê jîn-sîn m̄-káⁿ kā i kóng gín-ná sí lah; in-ūi in kóng, Gín-ná iáu oa̍h-teh ê sî, lán khǹg i, i siōng-chhiáⁿ m̄-thiaⁿ lán ê ōe, nā kā i kóng gín-ná sí, i siong-sim beh kàu cháiⁿ-iūⁿ? 19 Tāi-pi̍t khòaⁿ-kìⁿ i ê jîn-sîn chī-bú-chī-chū teh kóng, Tāi-pi̍t chiū chai gín-ná í-keng sí. Tāi-pi̍t chiū mn̄g i ê jîn-sîn kóng, Gín-ná sí--lah mah? In kóng, Sí--lah. 20 Tāi-pi̍t chiū tùi tōe--nih khí-lâi, sóe sin-khu, boah iû, ōaⁿ-saⁿ, ji̍p Iâ-hô-hoa ê tiān kèng-pài; jiân-āu tò-khì i ê chhù. I hoan-hù lâng pâi mi̍h tī i ê bīn-chêng, i chiū chia̍h. 21 Jîn-sîn mn̄g i kóng, Lí só͘ kiâⁿ--ê sī cháiⁿ-iūⁿ? Gín-ná oa̍h--teh ê sî, lí kìm-chia̍h thî-khàu; gín-ná sí, lí hoán-tńg khí-lâi chia̍h. 22 Tāi-pi̍t kóng, Gín-ná iáu oa̍h--teh, góa kìm-chia̍h thî-khàu, in-ūi góa phah-sǹg kóng, Kiám-chhái Iâ-hô-hoa lîn-bín góa, hō͘ gín-ná oa̍h--teh, iā káⁿ. 23 Gín-ná í-keng sí, góa kìm-chia̍h beh siáⁿ-sū? góa kiám ōe hō͘ i tò-tńg--lâi mah? góa beh khì i hia, i bōe-ōe lâi góa chia. 24 Tāi-pi̍t an-ùi i ê bó͘ Poa̍t-sī-pa, ji̍p--khì kap i tâng-pâng, i chiū siⁿ-kiáⁿ; chiū kā i hō-miâ kiò Só͘-lô-bûn; 25 Iâ-hô-hoa iā thiàⁿ i, chiū thok sian-ti Ná-tan kā i hō miâ kiò Iâ-tí-tí-a, in-ūi Iâ-hô-hoa thiàⁿ i. 26 Iok-ap kong A-bûn lâng ê La̍h-pa, chhú in ê kiaⁿ-siâⁿ. 27 Iok-ap chhe sù-chiá khì kìⁿ Tāi-pi̍t kóng, Góa kong La̍h-pa, í-keng chhú i ê chúi-siâⁿ. 28 Taⁿ lí tio̍h chū-chi̍p kî-û ê peh-sìⁿ lâi, chat-iâⁿ kong chit ê siâⁿ lâi chhú i; kiaⁿ-liáu góa chhú chit ê siâⁿ, lâng chiū ēng góa ê miâ lâi kiò i. 29 Tāi-pi̍t chiū chū-chi̍p chèng peh-sìⁿ, khì La̍h-pa kong-kek, lâi chhú i. 30 I chhú in ê ông thâu-khak-téng ê bián-liû, i ê kim tāng chi̍t tha-liân-tek, koh siuⁿ pó-chio̍h; chiong chit-ê lâi tì tī Tāi-pi̍t ê thâu-khak. I koh tùi siâⁿ-lāi chhú chin-chōe châi-bu̍t. 31 Koh lia̍h hiah ê siâⁿ ê peh-sìⁿ chhut-lâi, hō͘ in ēng kù-á, kap thih-pē, í-ki̍p thih ê pó͘-thâu chòe khó͘-kang, á-sī tī hiā-iô tio̍h-bôa; i khoán-thāi A-bûn lâng hiah ê siâⁿ lóng sī án-ni. Tāi-pi̍t chiū kap chèng peh-sìⁿ tò-khì Iâ-lō͘-sat-léng.
1 Chitê以後，大衛ê kiáⁿ Ap-sa-liông有一个真súi ê小妹，名叫Tha-má；大衛ê kiáⁿ Àm-lùn疼伊。 2 Àm-lùn為tio̍h伊ê小妹Tha-má鬱卒到破病；因為伊是在室女，Àm-lùn家己知oh得對伊做甚麼tāi-chì。 3 Àm-lùn有一个朋友，名叫Iok-ná-ta̍t，是大衛ê兄Sī-bí-a ê kiáⁿ。Iok-ná-ta̍t是真靈竅ê人。 4 伊對Àm-lùn講，王ê kiáⁿ ah，你啥事一日一日khah消瘦ah？啥事m̄ kā我講？ Àm-lùn kā伊講，我疼我ê小弟押沙龍ê小妹Tha-má。 5 Iok-ná-ta̍t kā伊講，你tio̍h倒tī眠床裡，假做破病；你ê老父來看你，就對伊講，求你准我ê小妹Tha-má來我chia，用食物hō͘我，備辦tī我ê面前，hō͘我看見，對伊ê手接來食。 6 Àm-lùn就倒teh假破病；王來bāi伊。 Àm-lùn就對王講，求你hō͘我ê小妹Tha-má來，tī我ê面前kā我做兩塊餅，我thang對伊ê手接來食伊。 7 大衛就差人到Tha-má ê厝，kā伊講，Taⁿ你去你ê兄 Àm-lùn ê厝，kā伊備辦食物。 8 Tha-má就到伊ê兄 Àm-lùn ê厝；Àm-lùn倒teh。Tha-má the̍h麵粉，tī伊ê面前chhiau做餅，koh pek hiahê餅； 9 就將煎盤piàⁿ tī伊ê面前。 Àm-lùn m̄食，就講，眾人tio̍h離開我出去；眾人就離開伊出去。 10 Àm-lùn kā Tha-má講你捧食物入睏房，我thang對你ê手接來食。Tha-má就捧所做ê餅入睏房到伊ê兄 Àm-lùn hia。 11 伊捧去hō͘伊食，伊就khiú伊，kā伊講，我ê小妹ah，你來kap我相kap睏。 12 伊kā伊講，我ê兄，m̄-thang，莫得凌辱我，因為tī以色列中m̄應該án-ni行；你莫得做chitê戇事； 13 也我，我beh怎樣洗我ê見笑？也你，你tī以色列做戇人ê一个；taⁿ請你對王講，伊無beh禁止我嫁hō͘你。 14 總是Àm-lùn m̄肯聽伊ê話；因為伊比伊khah有力，就凌辱伊，kap伊相kap睏。 15 以後Àm-lùn極其怨恨伊；hitê怨恨伊ê怨恨，比前疼伊ê疼koh khah大。 Àm-lùn就kā伊講，起來，去ah。 16 伊kā伊講，M̄-thang án-ni，你趕我出去ê害tio̍h我，比你前款待我ê khah-thiám。總是Àm-lùn m̄肯聽伊； 17 就叫hitê伺候伊ê奴僕講，Tio̍h趕chitê cha-bó͘-gín-ná tùi我chia出去；伊出去，門就tio̍h chhòaⁿ。 18 Hit時Tha-má穿彩色ê衫，因為王ê cha-bó͘-kiáⁿ，iáu未出嫁ê，lóng穿chit號衫；Àm-lùn ê奴僕就牽伊出去；出去了，門就chhòaⁿ-teh。 19 Tha-má sám火灰tī頭殼，拆裂所穿彩色ê衫，用手抱頭殼來行；ná行ná哮。 20 伊ê兄押沙龍問伊講，你ê兄 Àm-lùn bat kap你做堆mah？我ê小妹ah，taⁿ無做聲，伊是你ê兄，莫得掛意chitê事。Tha-má就單身tiàm tī伊ê兄押沙龍ê厝。 21 大衛王聽見chiahê事，就不止受氣。 22 押沙龍無kap Àm-lùn講好講pháiⁿ；因為押沙龍怨恨Àm-lùn，是伊有凌辱伊ê小妹Tha-má。 23 過兩年，押沙龍tī近Í-hoat-liân ê Pa-le̍k-hā-só，有人kā伊剪羊毛；押沙龍請王ê眾kiáⁿ lóng總去。 24 押沙龍來見王，講，Taⁿ你ê奴僕有用人teh剪羊毛，請王，kap王ê人臣，kap奴僕，相kap去。 25 王kā押沙龍講，我ê kiáⁿ ah，m̄-thang，阮m̄-thang lóng去，驚了你開費siuⁿ傷重。押沙龍逼伊，總是伊m̄去；kan-ta kā伊祝福。 26 押沙龍講，若無，就hō͘我ê兄 Àm-lùn kap阮去。王講，啥事tio̍h伊kap你去ah？ 27 押沙龍逼伊。王就允准Àm-lùn kap王ê眾kiáⁿ相kap去。 28 押沙龍吩咐伊ê奴僕講，Lín tio̍h注意，看Àm-lùn lim酒tek-kái ê時，我kā lín講，Phah Àm-lùn，lín就tio̍h 刣死伊，莫得驚；這kiám m̄是我吩咐lín-ê mah？Lín做lín好膽勇敢。 29 押沙龍ê奴僕就照押沙龍所吩咐ê，來行tī Àm-lùn；王ê眾kiáⁿ lóng peh起來，ta̍k人騎伊ê騾逃走。 30 In iáu tī路裡有風聲傳到大衛，講，押沙龍有刣死王ê眾kiáⁿ，無留一个。 31 王就起來拆裂衫，倒tī地裡；王ê人臣也拆裂衫，khiā tī伊ê身邊。 32 大衛ê兄Sī-bí-a ê kiáⁿ，Iok-ná-ta̍t應講，我ê主，莫得phah算王ê眾kiáⁿ，hiahê少年人lóng hō͘伊刣死；只有Àm-lùn死nā-tiāⁿ；因為tùi Àm-lùn凌辱伊ê小妹Tha-má hit日，押沙龍就已經有chitê意思。 33 Taⁿ我ê主我ê王，莫得掛意chitê事，phah算王ê眾kiáⁿ lóng死；其實只有Àm-lùn死nā-tiāⁿ。 34 押沙龍就逃走。守望ê少年人kia̍h目看，看見chōe-chōe百姓tùi伊ê後面，tùi山邊ê路來。 35 Iok-ná-ta̍t kā王講，看ah，王ê眾kiáⁿ lóng來lah，果然照你ê奴僕所講ê。 36 話tú-á講soah，王hiahê kiáⁿ就到，開聲啼哭；王kap人臣也lóng大啼哭到極。 37 押沙龍走到Ki-su̍t王A-bí-hut ê kiáⁿ Ta̍t-mái hia；大衛日日為tio̍h伊ê kiáⁿ悲哀。 38 押沙龍走到Ki-su̍t，tiàm hia三年。 39 大衛王ê心切切siàu念押沙龍；因為Àm-lùn已經死，就受安慰。
1 Chit-ê í-āu Tāi-pi̍t ê kiáⁿ Ap-sa-liông ū chi̍t-ê chin-súi ê sió-bē, miâ kiò Tha-má; Tāi-pi̍t ê kiáⁿ Àm-lùn thiàⁿ i. 2 Àm-lùn ūi-tio̍h i ê sió-bē Tha-má ut-chut kàu phòa-pīⁿ; in-ūi i sī chāi-sek-lú, Àm-lùn ka-kī chai oh-tit tùi i chòe sím-mi̍h tāi-chì. 3 Àm-lùn ū chi̍t ê pêng-iú, miâ kiò Iok-ná-ta̍t, sī Tāi-pi̍t ê hiaⁿ Sī-bí-a ê kiáⁿ. Iok-ná-ta̍t sī chin lêng-khiàu ê lâng. 4 I tùi Àm-lùn kóng, Ông ê kiáⁿ ah, lí siáⁿ-sū chi̍t-ji̍t chi̍t-ji̍t khah siau-sán ah? siáⁿ-sū m̄ kā góa kóng? Àm-lùn kā i kóng, Góa thiàⁿ góa ê sió-tī Ap-sa-liông ê sió-bē Tha-má. 5 Iok-ná-ta̍t kā i kóng, Lí tio̍h tó tī bîn-chhn̂g--nih, ké-chòe phòa-pīⁿ; lí ê lāu-pē lâi khòaⁿ lí, chiū tùi i kóng, Kiû lí chún góa ê sió-bē Tha-má lâi góa chia, ēng chia̍h-mi̍h hō͘ góa, pī-pān tī góa ê bīn-chêng, hō͘ góa khòaⁿ-kìⁿ, tùi i ê chhiú chih lâi chia̍h. 6 Àm-lùn chiū tó-teh ké phòa-pīⁿ; ông lâi bāi i. Àm-lùn chiū tùi ông kóng, Kiû lí hō͘ góa ê sió-bē Tha-má lâi, tī góa ê bīn-chêng kā góa chòe nn̄g tè piáⁿ, góa thang tùi i ê chhiú chih lâi chia̍h i. 7 Tāi-pi̍t chiū chhe lâng kàu Tha-má ê chhù, kā i kóng, Taⁿ lí khì lí ê hiaⁿ Àm-lùn ê chhù, kā i pī-pān chia̍h-mi̍h. 8 Tha-má chiū kàu i ê hiaⁿ Àm-lùn ê chhù; Àm-lùn tó-teh. Tha-má the̍h mī-hún, tī i ê bīn-chêng chhiau chòe piáⁿ, koh pek hiah ê piáⁿ; 9 chiū chiong chian-pôaⁿ piàⁿ tī i ê bīn-chêng. Àm-lùn m̄-chia̍h, chiū kóng, Chèng-lâng tio̍h lī-khui góa chhut-khì; chèng-lâng chiū lī-khui i chhut-khì. 10 Àm-lùn kā Tha-má kóng Lí phâng chia̍h-mi̍h ji̍p khùn-pâng, góa thang tùi lí ê chhiú chih lâi chia̍h. Tha-má chiū phâng só͘ chòe ê piáⁿ ji̍p khùn-pâng kàu i ê hiaⁿ Àm-lùn hia. 11 I phâng khì hō͘ i chia̍h, i chiū khiú i, kā i kóng, Góa ê sió-bē ah, lí lâi kap góa saⁿ-kap khùn. 12 I kā i kóng, Góa ê hiaⁿ, m̄-thang, bo̍h-tit lêng-jio̍k góa, in-ūi tī Í-sek-lia̍t tiong m̄-eng-kai án-ni kiâⁿ; lí bo̍h-tit chòe chit ê gōng-sū; 13 iā góa, góa beh cháiⁿ-iūⁿ sóe góa ê kiàn-siàu? iā lí, lí tī Í-sek-lia̍t chòe gōng-lâng ê chi̍t-ê; taⁿ chhiáⁿ lí tùi ông kóng, i bô beh kìm-chí góa kè hō͘ lí. 14 Chóng-sī Àm-lùn m̄-khéng thiaⁿ i ê ōe; in-ūi i pí i khah ū la̍t, chiū lêng-jio̍k i, kap i saⁿ-kap khùn. 15 Í-āu Àm-lùn ke̍k-kî oàn-hūn i; hit ê oàn-hūn i ê oàn-hūn, pí chêng thiàⁿ i ê thiàⁿ koh khah-tōa. Àm-lùn chiū kā i kóng, Khí-lâi, khì ah. 16 I kā i kóng, M̄-thang án-ni, lí kóaⁿ góa chhut-khì ê hāi-tio̍h góa, pí lí chêng khoán-thāi góa-ê khah-thiám. Chóng-sī Àm-lùn m̄-khéng thiaⁿ i; 17 chiū kiò hit ê su-hāu i ê lô͘-po̍k kóng, Tio̍h kóaⁿ chit ê cha-bó͘-gín-ná tùi góa chia chhut-khì; i chhut-khì, mn̂g chiū tio̍h chhòaⁿ. 18 Hit-sî Tha-má chhēng chhái-sek ê saⁿ, in-ūi ông ê cha-bó͘-kiáⁿ, iáu-bē chhut-kè ê, lóng chhēng chit hō saⁿ; Àm-lùn ê lô͘-po̍k chiū khan i chhut-khì; chhut-khì liáu, mn̂g chiū chhòaⁿ--teh. 19 Tha-má sám hé-hu tī thâu-khak, thiah-li̍h só͘ chhēng chhái-sek ê saⁿ, ēng chhiú phō thâu-khak lâi kiâⁿ; ná-kiâⁿ ná-háu. 20 I ê hiaⁿ Ap-sa-liông mn̄g i kóng, Lí ê hiaⁿ Àm-lùn bat kap lí chòe-tui mah? Góa ê sió-bē ah, taⁿ bô chòe siaⁿ, i sī lí ê hiaⁿ, bo̍h-tit khòa-ì chit ê sū. Tha-má chiū toaⁿ-sin tiàm tī i ê hiaⁿ Ap-sa-liông ê chhù. 21 Tāi-pi̍t ông thiaⁿ-kìⁿ chiah ê sū, chiū put-chí siū-khì. 22 Ap-sa-liông bô kap Àm-lùn kóng-hó kóng-pháiⁿ; in-ūi Ap-sa-liông oàn-hūn Àm-lùn, sī i ū lêng-jio̍k i ê sió-bē Tha-má. 23 Kè nn̄g-nî, Ap-sa-liông tī kūn Í-hoat-liân ê Pa-le̍k-hā-só, ū lâng kā i chián iûⁿ-mn̂g; Ap-sa-liông chhiáⁿ ông ê chèng-kiáⁿ lóng-chóng khì. 24 Ap-sa-liông lâi kìⁿ ông, kóng, Taⁿ lí ê lô͘-po̍k ū ēng lâng teh chián iûⁿ-mn̂g, chhiáⁿ ông, kap ông ê jîn-sîn, kap lô͘-po̍k, saⁿ-kap khì. 25 Ông kā Ap-sa-liông kóng, Góa ê kiáⁿ ah, m̄-thang, goán m̄-thang lóng khì, kiaⁿ-liáu lí khai-hùi siuⁿ siong-tiōng. Ap-sa-liông pek i, chóng-sī i m̄-khì; kan-ta kā i chiok-hok. 26 Ap-sa-liông kóng, Nā bô, chiū hō͘ góa ê hiaⁿ Àm-lùn kap goán khì. Ông kóng, Siáⁿ-sū tio̍h i kap lí khì ah? 27 Ap-sa-liông pek i. Ông chiū ún-chún Àm-lùn kap ông ê chèng-kiáⁿ saⁿ-kap khì. 28 Ap-sa-liông hoan-hù i ê lô͘-po̍k kóng, Lín tio̍h chù-ì, khòaⁿ Àm-lùn lim-chiú tek-kái ê sî, góa kā lín kóng, Phah Àm-lùn, lín chiū tio̍h thâi-sí i, bo̍h-tit kiaⁿ; che kiám-m̄-sī góa hoan-hù lín--ê mah? Lín chòe lín hó-táⁿ ióng-kám. 29 Ap-sa-liông ê lô͘-po̍k chiū chiàu Ap-sa-liông só͘ hoan-hù ê, lâi kiâⁿ tī Àm-lùn; ông ê chèng-kiáⁿ lóng peh--khí-lâi, ta̍k-lâng khiâ i ê lô tô-cháu. 30 In iáu tī lō͘--nih ū hong-siaⁿ thoân kàu Tāi-pi̍t, kóng, Ap-sa-liông ū thâi-sí ông ê chèng-kiáⁿ, bô lâu chi̍t-ê. 31 Ông chiū khí--lâi thiah-li̍h saⁿ, tó tī tōe--nih; ông ê jîn-sîn iā thiah-li̍h saⁿ, khiā tī i ê sin-piⁿ. 32 Tāi-pi̍t ê hiaⁿ Sī-bí-a ê kiáⁿ, Iok-ná-ta̍t ìn kóng, Góa ê chú, bo̍h-tit phah-sǹg ông ê chèng-kiáⁿ, hiah ê siàu-liân lâng lóng hō͘ i thâi-sí; chí-ū Àm-lùn sí nā-tiāⁿ; in-ūi tùi Àm-lùn lêng-jio̍k i ê sió-bē Tha-má hit-ji̍t, Ap-sa-liông chiū í-keng ū chit ê ì-sù. 33 Taⁿ góa ê chú góa ê ông, bo̍h-tit khòa-ì chit ê sū, phah-sǹg ông ê chèng-kiáⁿ lóng sí; kî-si̍t chí-ū Àm-lùn sí nā-tiāⁿ. 34 Ap-sa-liông chiū tô-cháu. Siú-bāng ê siàu-liân lâng kia̍h-ba̍k khòaⁿ, khòaⁿ-kìⁿ chōe-chōe peh-sìⁿ tùi i ê āu-bīn, tùi soaⁿ-piⁿ ê lō͘ lâi. 35 Iok-ná-ta̍t kā ông kóng, Khòaⁿ ah, ông ê chèng-kiáⁿ lóng lâi lah, kó-jiân chiàu lí ê lô͘-po̍k só͘ kóng ê. 36 Ōe tú-á kóng-soah, ông hiah ê kiáⁿ chiū kàu, khui-siaⁿ thî-khàu; ông kap jîn-sîn iā lóng tōa thî-khàu kàu-ke̍k. 37 Ap-sa-liông cháu kàu Ki-su̍t ông A-bí-hut ê kiáⁿ Ta̍t-mái hia; Tāi-pi̍t ji̍t-ji̍t ūi-tio̍h i ê kiáⁿ pi-ai. 38 Ap-sa-liông cháu kàu Ki-su̍t, tiàm hia saⁿ-nî. 39 Tāi-pi̍t ông ê sim chhiat-chhiat siàu-liām Ap-sa-liông; in-ūi Àm-lùn í-keng sí, chiū siū an-ùi.
1 Sé-ló͘-ngá ê kiáⁿ約押知王ê心意向押沙龍； 2 就差人去Thê-ko-a，tùi hia叫一个聰明ê婦人人來，kā伊講，請你假做khiā孝(hà)ê，穿孝衫，莫得用油抹身軀，tio̍h裝做為tio̍h死人久久悲哀ê婦人人； 3 入去見王，照chitê款對伊án-ni講。約押就將所tio̍h講ê話kà婦人人講。 4 Thê-ko-a ê婦人人對王講ê時，面仆tī地裡，拜講，王ah，救我。 5 王問伊講，你有甚麼tāi-chì ah？伊應講，我實在是寡婦，我ê丈夫已經死。 6 女婢有兩個kiáⁿ，in兩個tī田裡相phah，無人tī in中間排解；chitê phah hitê hō͘伊死。 7 Taⁿ全家ê人lóng起來攻擊你ê女婢，講，你tio̍h將hitê phah死兄弟ê交出來，阮thang hō͘伊死，賠伊phah死兄弟ê性命，絕伊ê後嗣；án-ni in beh將我chhun ê火炭phah-hoa，無hō͘我ê丈夫留名留後裔tī世間。 8 王kā婦人人講，你thang tò去lín tau，我beh為tio̍h你出命令。 9 Thê-ko-a ê婦人人koh kā王講，我ê主我ê王，願chitê罪歸tī我，kap我ê父ê家；王kap伊ê位lóng無罪。 10 王講，見若有kap你加講話ê，你就chhōa伊到我chia，伊就無koh來kāng你。 11 婦人人講，願王記念耶和華你ê上帝，m̄-thang准報人命ê行滅絕，驚了in滅絕我ê kiáⁿ。王講，我kí永活ê耶和華來chiù-chōa，你ê kiáⁿ，連一支頭毛也bōe ka-la̍uh tī地裡。 12 婦人人講，求你容允你ê女婢對我ê主我ê王koh講一句話。王講，做你講。 13 婦人人講，你啥事想án-ni來攻擊上帝ê百姓ah？王講chitê話，親像有罪，因為王無hō͘伊ê逃命ê tò來。 14 因為咱lóng的確tio̍h死，親像水潑tī地裡，bōe能koh收倒tńg；總是上帝無搶人ê性命，是設法hō͘逃命ê人免受革逐離開伊。 15 我來將chitê話kā我ê主我ê王講，是因為百姓hō͘我驚惶，所以女婢講，Taⁿ我beh kā王講，kiám-chhái王beh成女婢ê所求。 16 人beh將我kap我ê kiáⁿ tùi上帝ê業做一下除滅；總是王beh聽，救伊ê女婢脫離hit人ê手。 17 女婢koh講，願我ê主我ê王ê話來安慰；因為我ê主我ê王能分別是非，親像上帝ê使者一樣；獨獨願耶和華你ê上帝kap你tī-teh。 18 王應婦人人kā伊講，我見若所beh問你ê，lóng m̄-thang對我khǹg密。婦人人講，願我ê主我ê王講伊。 19 王講，Chiahê kiám m̄是約押kap你通套ê mah？婦人人講，我ê主我ê王ah，我kí你ê活命來chiù-chōa，我ê主我ê王所講ê，無人會偏左á偏右來閃避伊。因為你ê奴僕約押吩咐我，用chiahê話lóng教你ê女婢講。 20 你ê奴僕約押做án-ni，是beh hō͘ chitê事勢轉彎；我ê主有智慧，親像上帝使者ê智慧，能透徹世上一切ê事。 21 王kā約押講，我的確行chitê事；taⁿ你tio̍h去，chhōa hitê少年人押沙龍tò來。 22 約押仆tī地裡來拜，祝謝王；約押講，我ê主我ê王ah，王既然行你ê奴僕所求ê，今á日你ê奴僕知我有得tio̍h恩典tī你ê目睭前。 23 Tùi án-ni，約押起身去Ki-su̍t，chhōa Ap-sa-liông到耶路撒冷。 24 王講，Kah伊tò去伊ê厝，m̄-thang見我ê面。押沙龍就tò去伊ê厝，無見王ê面。 25 押沙龍生做真好看，thong以色列中無人親像伊得tio̍h人o-ló；tùi kha-chiah底到頭殼頂lóng無瑕疵。 26 伊剪頭毛ê時，秤(chhìn)伊ê頭毛，照王ê秤，重兩百sià-khek-le̍k；伊剪髮是tī ta̍k-ê年尾，因為伊ê頭毛真重，所以tio̍h剪伊。 27 押沙龍生三個kiáⁿ，一个cha-bó͘-kiáⁿ；cha-bó͘-kiáⁿ名叫Tha-má，是一个面貌真súi ê cha-bó͘-gín-ná。 28 押沙龍tòa tī耶路撒冷滿兩年，無見王ê面。 29 押沙龍差人叫約押，beh 差伊去見王。總是約押m̄肯來伊hia；伊第二pái差人去叫伊，伊猶原m̄來。 30 所以押沙龍對伊ê奴僕講，Lín看，約押ê園近我ê園，伊有大麥tī-hia；lín去放火燒伊。押沙龍ê奴僕就去放火燒伊。 31 約押就起來到押沙龍ê厝，問伊講，你ê奴僕啥事放火燒我ê園？ 32 押沙龍應約押講，我差人kā你講，來chia，hō͘我thang 差你去見王，kā伊講，我啥事tùi Ki-su̍t tò來ah？我m̄值tio̍h猶原tòa hia；taⁿ tio̍h准我見王ê面，我若有罪，伊thang 刣我。 33 約押就去見王kā伊講。伊叫押沙龍；押沙龍就來見王，tī王ê面前仆tī地裡。王就chim押沙龍。
1 Sé-ló͘-ngá ê kiáⁿ Iok-ap chai ông ê sim ì-hiòng Ap-sa-liông; 2 chiū chhe lâng khì Thê-ko-a, tùi hia kiò chi̍t ê chhang-miâ ê hū-jîn-lâng lâi, kā i kóng, Chhiáⁿ lí ké-chòe khiā-hà-ê, chhēng hà-saⁿ, bo̍h-tit ēng iû boah seng-khu, tio̍h chng-chòe ūi-tio̍h sí-lâng kú-kú pi-ai ê hū-jîn-lâng; 3 ji̍p-khì kìⁿ ông, chiàu chit ê khoán tùi i án-ni kóng. Iok-ap chiū chiong só͘ tio̍h kóng ê ōe kà hū-jîn-lâng kóng. 4 Thê-ko-a ê hū-jîn-lâng tùi ông kóng ê sî, bīn phak tī tōe--nih, pài kóng, Ông ah, kiù góa. 5 Ông mn̄g i kóng, Lí ū sím-mi̍h tāi-chì ah? I ìn kóng, Góa si̍t-chāi sī kóaⁿ-hū, góa ê tiōng-hu í-keng sí. 6 Lú-pī ū nn̄g ê kiáⁿ, in nn̄g-ê tī chhân--nih saⁿ-phah, bô lâng tī in tiong-kan pâi-kái; chit-ê phah hit-ê hō͘ i sí. 7 Taⁿ choân-ke ê lâng lóng khí-lâi kong-kek lí ê lú-pī, kóng, Lí tio̍h chiong hit ê phah-sí hiaⁿ-tī-ê kau--chhut-lâi, goán thang hō͘ i sí, pê i phah-sí hiaⁿ-tī ê sìⁿ-miā, choa̍t i ê hō͘-sû; án-ni in beh chiong góa chhun ê hé-thòaⁿ phah-hoa, bô hō͘ góa ê tiōng-hu lâu-miâ lâu hō͘-è tī sè-kan. 8 Ông kā hū-jîn-lâng kóng, Lí thang tò-khì lín tau, góa beh ūi-tio̍h lí chhut bēng-lēng. 9 Thê-ko-a ê hū-jîn-lâng koh kā ông kóng, Góa ê chú góa ê ông, goān chit ê chōe kui tī góa, kap góa ê pē ê ke; ông kap i ê ūi lóng bô chōe. 10 Ông kóng, Kìⁿ-nā ū kap lí ke-kóng ōe ê, lí chiū chhōa i kàu góa chia, i chiū bô koh lâi kāng lí. 11 Hū-jîn-lâng kóng, Goān ông kì-liām Iâ-hô-hoa lí ê Siōng-tè, m̄-thang chún pò-jîn-bēng-ê kiâⁿ bia̍t-choa̍t, kiaⁿ-liáu in bia̍t-choa̍t góa ê kiáⁿ. Ông kóng, góa kí éng-oa̍h ê Iâ-hô-hoa lâi chiù-chōa, lí ê kiáⁿ, liân chi̍t ki thâu-mn̂g iā bōe ka-la̍uh tī tōe--nih. 12 Hū-jîn-lâng kóng, Kiû lí iông-ún lí ê lú-pī tùi góa ê chú góa ê ông koh kóng chi̍t kù ōe. Ông kóng, Chòe lí kóng. 13 Hū-jîn-lâng kóng, Lí siáⁿ-sū siūⁿ án-ni lâi kong-kek Siōng-tè ê peh-sìⁿ ah? Ông kóng chit ê ōe, chhin-chhiūⁿ ū-chōe, in-ūi ông bô hō͘ i ê tô-miā-ê tò--lâi. 14 In-ūi lán lóng tek-khak tio̍h sí, chhin-chhiūⁿ chúi phoah tī tōe--nih, bōe-ōe koh siu tò-tńg; chóng-sī Siōng-tè bô chhiúⁿ lâng ê sìⁿ-miā, sī siat-hoat hō͘ tô-miā ê lâng bián siū kek-tio̍k lī-khui I. 15 Góa lâi chiong chit ê ōe kā góa ê chú góa ê ông kóng, sī in-ūi peh-sìⁿ hō͘ góa kiaⁿ-hiâⁿ, só͘-í lú-pī kóng, Taⁿ góa beh kā ông kóng, kiám-chhái ông beh chiâⁿ lú-pī ê só͘ kiû. 16 Lâng beh chiong góa kap góa ê kiáⁿ tùi Siōng-tè ê gia̍p chòe chi̍t-ē tû-bia̍t; chóng-sī ông beh thiaⁿ, kiù i ê lú-pī thoat-lī hit-lâng ê chhiú. 17 Lú-pī koh kóng, Goān góa ê chú góa ê ông ê ōe lâi an-ùi; in-ūi góa ê chú góa ê ông ōe hun-piat sī-hui, chhin-chhiūⁿ Siōng-tè ê sù-chiá chi̍t-iūⁿ; to̍k-to̍k goān Iâ-hô-hoa lí ê Siōng-tè kap lí tī-teh. 18 Ông ìn hū-jîn-lâng kā i kóng, góa kìⁿ-nā só͘ beh mn̄g lí ê, lóng m̄-thang tùi góa khǹg-ba̍t. Hū-jîn-lâng kóng, Goān góa ê chú góa ê ông kóng i. 19 Ông kóng, Chiah-ê kiám-m̄-sī Iok-ap kap lí thong-thò-ê mah? Hū-jîn-lâng kóng, Góa ê chú góa ê ông ah, góa kí lí ê oa̍h-miā lâi chiù-chōa, góa ê chú góa ê ông só͘ kóng--ê, bô lâng ōe phian-chó á phian-iū lâi siám-pī i. In-ūi lí ê lô͘-po̍k Iok-ap hoan-hù góa, ēng chiah ê ōe lóng kà lí ê lú-pī kóng. 20 Lí ê lô͘-po̍k Iok-ap chòe án-ni, sī beh hō͘ chit ê sū-sè choán-oan; góa ê chú ū tì-hūi, chhin-chhiūⁿ Siōng-tè sù-chiá ê tì-hūi, ōe thàu-thiat sè-chiūⁿ it-chhè ê sū. 21 Ông kā Iok-ap kóng, Góa tek-khak kiâⁿ chit ê sū; taⁿ lí tio̍h khì, chhōa hit ê siàu-liân lâng Ap-sa-liông tò--lâi. 22 Iok-ap phak tī tōe--nih lâi pài, chiok-siā ông; Iok-ap kóng, Góa ê chú góa ê ông ah, ông kì-jiân kiâⁿ lí ê lô͘-po̍k só͘ kiû--ê, kin-á-ji̍t lí ê lô͘-po̍k chai góa ū tit-tio̍h un-tián tī lí ê ba̍k-chiu-chêng. 23 Tùi án-ni Iok-ap khí-sin khì Ki-su̍t, chhōa Ap-sa-liông kàu Iâ-lō͘-sat-léng. 24 Ông kóng, Kah i tò-khì i ê chhù, m̄-thang kìⁿ góa ê bīn. Ap-sa-liông chiū tò-khì i ê chhù, bô kìⁿ ông ê bīn. 25 Ap-sa-liông siⁿ-chòe chin hó-khòaⁿ, thong Í-sek-lia̍t tiong bô lâng chhin-chhiūⁿ i tit-tio̍h lâng o-ló; tùi kha-chiah-tóe kàu thâu-khak-téng lóng bô hâ-chhû. 26 I chián thâu-mn̂g ê sî, chhìn i ê thâu-mn̂g, chiàu ông ê chhìn, tāng nn̄g-pah sià-khek-le̍k; i chián-hoat sī tī ta̍k ê nî-bé, in-ūi i ê thâu-mn̂g chin-tāng, só͘-í tio̍h chián i. 27 Ap-sa-liông siⁿ saⁿ ê kiáⁿ, chi̍t ê cha-bó͘-kiáⁿ; cha-bó͘-kiáⁿ miâ kiò Tha-má, sī chi̍t-ê bīn-māu chin-súi ê cha-bó͘-gín-ná. 28 Ap-sa-liông tòa tī Iâ-lō͘-sat-léng móa nn̄g-nî, bô kìⁿ ông ê bīn. 29 Ap-sa-liông chhe lâng kiò Iok-ap, beh chhe i khì kìⁿ ông. Chóng-sī Iok-ap m̄-khéng lâi i hia; i tē-jī pái chhe lâng khì kiò i, i iû-goân m̄-lâi. 30 Só͘-í Ap-sa-liông tùi i ê lô͘-po̍k kóng, Lín khòaⁿ, Iok-ap ê hn̂g kūn góa ê hn̂g, i ū tōa-be̍h tī-hia; lín khì pàng-hé sio i. Ap-sa-liông ê lô͘-po̍k chiū khì pàng-hé sio i. 31 Iok-ap chiū khí-lâi kàu Ap-sa-liông ê chhù, mn̄g i kóng, Lí ê lô͘-po̍k siáⁿ-sū pàng-hé sio góa ê hn̂g? 32 Ap-sa-liông ìn Iok-ap kóng, Góa chhe lâng kā lí kóng, Lâi chia, hō͘ góa thang chhe lí khì kìⁿ ông, kā i kóng, Góa siáⁿ-sū tùi Ki-su̍t tò-lâi ah? góa m̄-ta̍t-tio̍h iû-goân tòa hia; taⁿ tio̍h chún góa kìⁿ ông ê bīn, góa nā ū chōe, i thang thâi góa. 33 Iok-ap chiū khì kìⁿ ông kā i kóng. I kiò Ap-sa-liông; Ap-sa-liông chiū lâi kìⁿ ông, tī ông ê bīn-chêng phak tī tōe--nih. Ông chiū chim Ap-sa-liông.
1 Chit-tia̍p了後，押沙龍為家己備辦車馬，koh五十人走tī伊ê頭前。 2 押沙龍早早起來，khiā tī城門ê路邊；若有人來，有案件tio̍h hō͘王判斷ê，押沙龍就叫伊來，問伊講，你是toh落一个城ê人？伊應講，奴僕是以色列一个支派ê人。 3 押沙龍kā伊講，你ê tāi-chì是好，是有情理；總是王無交帶人聽你ê話。 4 押沙龍koh講，可惜無設立我做chitê地方ê審判司；見有相告tio̍h判斷ê事ê，來到我chia，我beh照公義判決伊。 5 見有人近óa來拜伊，伊就伸手牽伊，kā伊chim。 6 以色列人ê中間，見若beh去見王求判斷ê，押沙龍lóng án-ni款待in。Án-ni押沙龍暗靜得tio̍h以色列人ê心。 7 過四年，押沙龍對王講，求你准我去Hi-pek-lûn，還我對耶和華所hē ê願。 8 因為奴僕tiàm tī A-lân ê Ki-su̍t bat hē願講，耶和華若果然hō͘我koh tò來耶路撒冷，我beh服事耶和華。 9 王kā伊講，你thang平安去。押沙龍就起來，去Hi-pek-lûn。 10 押沙龍差偵探行遍以色列ta̍k支派，講，Lín一下聽見哨角ê聲，就講，押沙龍tī Hi-pek-lûn做王lah。 11 押沙龍所請hí兩百人kap伊tùi耶路撒冷去；hiahê人lóng是bû-ì中去，m̄知hitê事。 12 大衛ê 謀士A-hi-to-hut是Ki-lô人，當獻祭ê時，押沙龍差人召伊，對伊ê本城Ki-lô來；tùi án-ni，叛逆ê勢面ná 強；因為tè押沙龍ê百姓日日ná-chōe。 13 有人來報大衛講，以色列人ê心lóng歸向押沙龍lah。 14 大衛kā hiahê kap伊tī耶路撒冷ê人臣講，起來，咱tio̍h逃走；若無，lóng bōe能閃避押沙龍；tio̍h緊緊去，驚了伊緊緊到來jip-tio̍h咱，陷害咱，用刀刣死城內ê人。 15 王ê人臣kā王講，看ah，我ê主我ê王所主意ê，你ê奴僕lóng beh行。 16 王出去，伊ê家眷lóng tè伊；王留十個嬪妃顧厝。 17 王出去，眾百姓lóng tè伊；到Pek-be̍k-hap就歇。 18 王ê人臣lóng tī伊ê面前行過去，一切ê Ki-lī-thê人、Pí-lī-thê人，kap Ka-te̍k人，就是tùi Ka-te̍k tè伊來ê六百人，也lóng tī王ê面前行過去。 19 王kā Ka-te̍k人Í-thài講，你啥事kap阮去？thang tò去kap王相kap tòa；你是外邦人，遷徙tī外面，thang tò去本所在。 20 你昨日chiah來，我今á日kiám thang勞煩你kap阮漂流ah？我去我所去ê所在；你thang tò去，帶你ê兄弟相kap tò去；願恩典誠實kap你tī-teh。 21 Í-thài ìn王講，我kí永活ê耶和華，kap我ê主我ê王ê活命，來chiù-chōa，我ê主我ê王或活或死，見所tī-teh ê所在，你ê奴僕也tī-hia。 22 大衛kā Í-thài講，你去，過去。Ka-te̍k人Í-thài kap hiahê tè伊ê人，kap所有ê gín-ná就lóng過去。 23 遍地大聲啼哭；眾百姓lóng過去，王也過Khip-lûn溪；眾百姓過去，ǹg曠野teh行。 24 Sat-tok kap lóng總tè伊ê利未人扛上帝ê約櫃來；in hē上帝ê櫃tī-hia。A-pí-a-tha上來，thèng候眾百姓tùi城內出來，lóng過去。 25 王kā Sat-tok講，你扛上帝ê櫃tò去城內；我若得tio̍h恩典tī耶和華ê目前，伊beh hō͘我tò來，hō͘我koh看見伊，kap伊khiā起ê所在。 26 設使伊講，我無歡喜你；看ah，我tī-chia，願伊照伊看做好ê行tī我。 27 王koh kā祭司Sat-tok講，你kiám m̄是先見mah？你thang安然tò去城內；你ê kiáⁿ A-hi-má-su，kap A-pí-a-tha ê kiáⁿ約拿單，lín chit兩個kiáⁿ lóng thang kap你去。 28 看ah，我tī曠野ê渡口thèng候tùi你hia有消息來，報我知實情。 29 Tùi án-ni，Sat-tok kap A-pí-a-tha扛上帝ê櫃tò去耶路撒冷；in就tòa tī-hia。 30 大衛tùi上橄欖山ê路上去，ná上去ná哮；罩頭殼thǹg赤腳來行；tè伊去ê眾百姓也罩頭殼上去，ná上去ná哮。 31 有人報大衛講，A-hi-to-hut也tè押沙龍tī叛黨 ê中間。大衛講，耶和華ah，求你hō͘ A-hi-to-hut ê計謀變做戇。 32 大衛上到山頂，敬拜上帝ê所在，看見A-ki人Hō͘-su，衫拆裂，頭殼sám塵埃，來迎接伊。 33 大衛kā伊講，你若kap我去，會拖thūi我； 34 你若tò去城內，kā押沙龍講，王ah，我beh做你ê奴僕；我前做你ê父ê奴僕，taⁿ我也beh án-ni做你ê奴僕，你就thang kā我破壞A-hi-to-hut ê計謀。 35 祭司Sat-tok kap A-pí-a-tha kiám無kap你tī-hia mah？你tùi王宮內所聽見ê，就tio̍h kā祭司Sat-tok kap A-pí-a-tha講。 36 Sat-tok ê kiáⁿ A-hi-má-su，A-pí-a-tha ê kiáⁿ約拿單，chit兩個kiáⁿ也kap in tī-hia；見若lín所聽見ê，thang託重in來報我。 37 Tùi án-ni，大衛ê朋友Hō͘-su入城。押沙龍也入耶路撒冷。
1 Chit-tia̍p liáu-āu Ap-sa-liông ūi ka-kī pī-pān chhia-bé, koh gō͘-cha̍p lâng cháu tī i ê thâu-chêng. 2 Ap-sa-liông chá-chá khí-lâi, khiā tī siâⁿ-mn̂g ê lō͘-piⁿ; nā ū lâng lâi, ū àn-kiāⁿ tio̍h hō͘ ông phòaⁿ-toàn ê, Ap-sa-liông chiū kiò i lâi, mn̄g i kóng, Lí sī toh-lo̍h chi̍t ê siâⁿ ê lâng? I ìn kóng, Lô͘-po̍k sī Í-sek-lia̍t chi̍t ê chi-phài ê lâng. 3 Ap-sa-liông kā i kóng, Lí ê tāi-chì sī hó, sī ū chêng-lí; chóng-sī ông bô kau-tài lâng thiaⁿ lí ê ōe. 4 Ap-sa-liông koh kóng, Khó-sioh bô siat-li̍p góa chòe chit ê tōe-hng ê sím-phòaⁿ-si; kìⁿ-ū saⁿ-kò tio̍h phòaⁿ-toàn ê sū ê, lâi kàu góa chia, góa beh chiàu kong-gī phòaⁿ-koat i. 5 Kìⁿ-ū lâng kūn-óa lâi pài i, i chiū chhun-chhiú khan i, kā i chim. 6 Í-sek-lia̍t lâng ê tiong-kan, kìⁿ-nā beh khì kìⁿ ông kiû phòaⁿ-toàn ê, Ap-sa-liông lóng án-ni khoán-thāi in. Án-ni Ap-sa-liông àm-chīⁿ tit-tio̍h Í-sek-lia̍t lâng ê sim. 7 Kè sì-nî, Ap-sa-liông tùi ông kóng, Kiû lí chún góa khì Hi-pek-lûn, hêng góa tùi Iâ-hô-hoa só͘ hē ê goān. 8 In-ūi lô͘-po̍k tiàm tī A-lân ê Ki-su̍t bat hē goān kóng, Iâ-hô-hoa nā kó-jiân hō͘ góa koh tò-lâi Iâ-lō͘-sat-léng, góa beh ho̍k-sāi Iâ-hô-hoa. 9 Ông kā i kóng, Lí thang pêng-an khì. Ap-sa-liông chiū khí-lâi, khì Hi-pek-lûn. 10 Ap-sa-liông chhe cheng-thàm kiâⁿ piàn Í-sek-lia̍t ta̍k chi-phài, kóng, Lín chi̍t-ē thiaⁿ-kìⁿ sàu-kak ê siaⁿ, chiū kóng, Ap-sa-liông tī Hi-pek-lûn chòe-ông lah. 11 Ap-sa-liông só͘ chhiáⁿ hí(**hit) nn̄g-pah lâng kap i tùi Iâ-lō͘-sat-léng khì; hiah ê lâng lóng sī bû-ì-tiong khì, m̄-chai hit ê sū. 12 Tāi-pi̍t ê bô͘-sū A-hi-to-hut sī Ki-lô lâng, tng hiàn-chè ê sî, Ap-sa-liông chhe lâng tiàu i, tùi i ê pún-siâⁿ Ki-lô lâi; tùi án-ni poān-ge̍k ê sè-bīn ná kiông; in-ūi tè Ap-sa-liông ê peh-sìⁿ ji̍t-ji̍t ná-chōe. 13 Ū lâng lâi pò Tāi-pi̍t kóng, Í-sek-lia̍t lâng ê sim lóng kui-ǹg Ap-sa-liông lah. 14 Tāi-pi̍t kā hiah ê kap i tī Iâ-lō͘-sat-léng ê jîn-sîn kóng, Khí-lâi, lán tio̍h tô-cháu; nā bô, lóng bōe-ōe siám-pī Ap-sa-liông; tio̍h kín-kín khì, kiaⁿ-liáu i kín-kín kàu lâi jip-tio̍h lán, hām-hāi lán, ēng to thâi-sí siâⁿ-lāi ê lâng. 15 Ông ê jîn-sîn kā ông kóng, Khòaⁿ ah, góa ê chú góa ê ông só͘ chú-ì ê, lí ê lô͘-po̍k lóng beh kiâⁿ. 16 Ông chhut-khì, i ê ke-koàn lóng tè i; ông lâu cha̍p ê pìn-hui kò͘ chhù. 17 Ông chhut-khì, chèng peh-sìⁿ lóng tè i; kàu Pek-be̍k-hap chiū hioh. 18 Ông ê jîn-sîn lóng tī i ê bīn-chêng kiâⁿ-kè--khì, it-chhè ê Ki-lī-thê lâng, Pí-lī-thê lâng, kap Ka-te̍k lâng, chiū-sī tùi Ka-te̍k tè i lâi ê la̍k-pah lâng, iā lóng tī ông ê bīn-chêng kiâⁿ-kè--khì. 19 Ông kā Ka-te̍k lâng Í-thài kóng, Lí siáⁿ-sū kap goán khì? thang tò-khì kap ông saⁿ-kap tòa; lí sī gōa-pang lâng, chhian-sóa tī gōa-bīn, thang tò-khì pún só͘-chāi. 20 Lí chā-ji̍t chiah lâi, góa kin-á-ji̍t kiám thang lô-hoân lí kap goán phiau-liû ah? góa khì góa só͘ khì ê só͘-chāi; lí thang tò-khì, tòa lí ê hiaⁿ-tī saⁿ-kap tò-khì; goān un-tián sêng-si̍t kap lí tī-teh. 21 Í-thài ìn ông kóng, Góa kí éng-oa̍h ê Iâ-hô-hoa, kap góa ê chú góa ê ông ê oa̍h-miā, lâi chiù-chōa, góa ê chú góa ê ông he̍k-oa̍h he̍k-sí, kìⁿ só͘ tī-teh ê só͘-chāi, lí ê lô͘-po̍k iā tī-hia. 22 Tāi-pi̍t kā Í-thài kóng, Lí khì, kè--khì. Ka-te̍k lâng Í-thài kap hiah ê tè i ê lâng, kap só͘ ū ê gín-ná chiū lóng kè--khì. 23 Piàn-tōe tōa-siaⁿ thî-khàu; chèng peh-sìⁿ lóng kè--khì, ông iā kè Khip-lûn khoe; chèng peh-sìⁿ kè--khì, ǹg khòng-iá teh-kiâⁿ. 24 Sat-tok kap lóng-chóng tè i ê Lī-bī lâng kng Siōng-tè ê iok-kūi lâi; in hē Siōng-tè ê kūi tī-hia. A-pí-a-tha chiūⁿ--lâi, thèng-hāu chèng peh-sìⁿ tùi siâⁿ-lāi chhut-lâi, lóng kè--khì. 25 Ông kā Sat-tok kóng, Lí kng Siōng-tè ê kūi tò-khì siâⁿ-lāi; góa nā tit-tio̍h un-tián tī Iâ-hô-hoa ê ba̍k-chêng, I beh hō͘ góa tò-lâi, hō͘ góa koh khòaⁿ-kìⁿ i, kap I khiā-khí ê só͘-chāi. 26 Siat-sú I kóng, Góa bô hoaⁿ-hí lí; khòaⁿ ah, góa tī-chia, goān I chiàu I khòaⁿ-chòe hó-ê kiâⁿ tī góa. 27 Ông koh kā chè-si Sat-tok kóng, Lí kiám m̄-sī sian-kiàn mah? Lí thang an-jiân tò-khì siâⁿ-lāi; lí ê kiáⁿ A-hi-má-su, kap A-pí-a-tha ê kiáⁿ Iok-ná-tan, lín chit nn̄g ê kiáⁿ lóng thang kap lí khì. 28 Khòaⁿ ah, góa tī khòng-iá ê tō͘-kháu thèng-hāu tùi lí hia ū siau-sit lâi, pò góa chai si̍t-chêng. 29 Tùi án-ni Sat-tok kap A-pí-a-tha kng Siōng-tè ê kūi tò-khì Iâ-lō͘-sat-léng; in chiū tòa tī-hia. 30 Tāi-pi̍t tùi chiūⁿ Kaⁿ-ná soaⁿ ê lō͘ chiūⁿ-khì, ná chiūⁿ-khì ná-háu; tà thâu-khak thǹg-chiah-kha lâi kiâⁿ; tè i khì ê chèng peh-sìⁿ iā tà thâu-khak chiūⁿ--khì, ná chiūⁿ-khì ná-háu. 31 Ū lâng pò Tāi-pi̍t kóng, A-hi-to-hut iā tè Ap-sa-liông tī poān-tóng ê tiong-kan. Tāi-pi̍t kóng, Iâ-hô-hoa ah, kiû Lí hō͘ A-hi-to-hut ê kè-bô͘ pìⁿ-chòe gōng. 32 Tāi-pi̍t chiūⁿ kàu soaⁿ-téng, kèng-pài Siōng-tè ê só͘-chāi, khòaⁿ-kìⁿ A-ki lâng Hō͘-su, saⁿ thiah-li̍h, thâu-khak sám tîn-ai, lâi ngiâ-chih i. 33 Tāi-pi̍t kā i kóng, Lí nā kap góa khì, ōe thoa-thūi góa; 34 lí nā tò-khì siâⁿ-lāi, kā Ap-sa-liông kóng, Ông ah, góa beh chòe lí ê lô͘-po̍k; góa chêng chòe lí ê pē ê lô͘-po̍k, taⁿ góa iā beh án-ni chòe lí ê lô͘-po̍k, lí chiū thang kā góa phò-hoāi A-hi-to-hut ê kè-bô͘. 35 Chè-si Sat-tok kap A-pí-a-tha kiám bô kap lí tī-hia mah? Lí tùi ông-kiong-lāi só͘ thiaⁿ-kìⁿ-ê, chiū tio̍h kā chè-si Sat-tok kap A-pí-a-tha kóng. 36 Sat-tok ê kiáⁿ A-hi-má-su, A-pí-a-tha ê kiáⁿ Iok-ná-tan, chí(**chit) nn̄g ê kiáⁿ iā kap in tī-hia; kìⁿ-nā lín só͘ thiaⁿ-kìⁿ ê, thang thok-tiōng in lâi pò góa. 37 Tùi án-ni, Tāi-pi̍t ê pêng-iú Hō͘-su ji̍p siâⁿ. Ap-sa-liông iā ji̍p Iâ-lō͘-sat-léng.
1 大衛過山頂無jōa遠，看見Bí-hui-pho-siat ê奴僕，Sé-pa來tú-tio̍h伊，帶掛鞍ê驢兩隻，載餅兩百，葡萄干一百pha，夏天ê果子一百，酒一皮囊。 2 王問Sé-pa講，你帶chiahê來是甚麼意思？Sé-pa講，驢是beh hō͘王ê家眷騎，餅kap夏天ê果子，是beh hō͘少年人食；酒是beh hō͘ tī曠野厭倦ê人lim。 3 王問講，你ê主人ê kiáⁿ tī toh落？Sé-pa 應王講，伊猶原tī耶路撒冷；因為伊講，以色列人今á日beh將我ê父ê國還我。 4 王kā Sé-pa講，Bí-hui-pho-siat所有ê lóng歸hō͘你。Sé-pa講，我跪拜；願得tio̍h恩典tī我ê主我ê王ê面前。 5 大衛王到Pa-hō͘-lîm ê時，看ah，有掃羅族ê家一人出來，就是Ki-la̍h ê kiáⁿ，名叫Sī-múi；伊出來，ná行ná咒詛； 6 koh拾石頭tìm大衛kap大衛王ê人臣；hit時眾百姓kap勇士lóng tī王ê左右。 7 Sī-múi咒詛講，你chitê流人ê血ê人ah，你chitê pháiⁿ人ah，去ah，去ah。 8 你替掃羅做王，taⁿ耶和華用伊ê家ê血lóng歸tī你；耶和華用chitê國交tī你ê kiáⁿ押沙龍ê手；taⁿ你tú-tio̍h惡報，因為你是流人ê血ê人。 9 Sé-ló͘-ngá ê kiáⁿ A-pí-su kā王講，chit隻死狗，kiám thang咒詛我ê主我ê王mah？求你准我過去，割伊ê頭。 10 王講，Sé-ló͘-ngá chiahê kiáⁿ ah，我kap lín有甚麼干涉？chhut-chāi伊咒詛，因為耶和華吩咐伊講，你tio̍h咒詛大衛；án-ni 是誰敢講，你啥事án-ni行ah？ 11 大衛koh kā A-pí-su，kap伊ê眾人臣講，我親生ê kiáⁿ尚且siàu想我ê性命，何況chitê便雅憫人ah？容允伊，chhut-chāi伊咒詛；因為這是耶和華kah伊ê。 12 Kiám-chhái耶和華鑑察我ê冤枉，因為伊今á日ê咒詛，耶和華beh用好報我。 13 大衛kap tè伊ê人行路去。Sī-múi行tī伊相對ê山坪，ná行ná咒詛，koh tìm石頭，掖土。 14 王kap tè伊ê眾百姓真厭倦，到一所在，就tī-hia歇睏。 15 押沙龍kap眾百姓以色列人，來到耶路撒冷。A-hi-to-hut也kap伊tī-hia。 16 大衛ê朋友，A-ki人Hō͘-su，來到押沙龍hia；Hō͘-su kā押沙龍講，願王萬歲，願王萬歲。 17 押沙龍kā Hō͘-su講，你好款待你ê朋友是án-ni mah？啥事無kap你ê朋友相kap去ah？ 18 Hō͘-su kā押沙龍講，m̄是án-ni，耶和華kap chitê百姓，kap以色列眾人，所揀ê，我beh歸伊，也beh kap伊tòa。 19 Koh一項，我tio̍h服事是誰 ah？kiám m̄是tī伊ê kiáⁿ ê面前mah？我怎樣tī你ê老父ê面前服事，也beh án-ni tī你ê面前。 20 押沙龍kā A-hi-to-hut講，Lín tio̍h計畫，看咱tio̍h怎樣行。 21 A-hi-to-hut kā押沙龍講，你ê老父所留teh顧厝hiahê嬪妃，你tio̍h kap伊睏；就以色列ê眾人聽見你hō͘你ê老父厭惡，見若歸你ê人，伊ê手beh giám硬。 22 In就kā押沙龍搭布棚，tī王宮ê磚棚頂。押沙龍就tī以色列眾人ê面前入去，kap伊ê老父ê嬪妃睏。 23 Hit時A-hi-to-hut所計畫ê計畫，親像人問上帝ê話一樣；A-hi-to-hut對tī大衛á是對tī押沙龍所計畫ê，lóng是án-ni。
1 Tāi-pi̍t kè soaⁿ-téng bô jōa-hn̄g, khòaⁿ-kìⁿ Bí-hui-pho-siat ê lô͘-po̍k, Sé-pa lâi tú-tio̍h i, tòa kòa-oaⁿ ê lû nn̄g-chiah, chài piáⁿ nn̄g-pah, phû-tô-koaⁿ chi̍t-pah pha, hē-thiⁿ ê ké-chí chi̍t pah, chiú chi̍t phê-lông. 2 Ông mn̄g Sé-pa kóng, Lí tòa chiah-ê lâi sī sím-mi̍h ì-sù? Sé-pa kóng, Lû sī beh hō͘ ông ê ke-koàn khiâ, piáⁿ kap hē-thiⁿ ê ké-chí, sī beh hō͘ siàu-liân lâng chia̍h; chiú sī beh hō͘ tī khòng-iá ià-siān ê lâng lim. 3 Ông mn̄g kóng, Lí ê chú-lâng ê kiáⁿ tī toh-lo̍h? Sé-pa ìn ông kóng, I iû-goân tī Iâ-lō͘-sat-léng; in-ūi i kóng, Í-sek-lia̍t lâng kin-á-ji̍t beh chiong góa ê pē ê kok hêng góa. 4 Ông kā Sé-pa kóng, Bí-hui-pho-siat só͘ ū-ê lóng kui hō͘ lí. Sé-pa kóng, Góa kūi-pài; goān tit-tio̍h un-tián tī góa ê chú góa ê ông ê bīn-chêng. 5 Tāi-pi̍t ông kàu Pa-hō͘-lîm ê sî, khòaⁿ ah, ū Sò-lô cho̍k ê ke chi̍t-lâng chhut-lâi, chiū-sī Ki-la̍h ê kiáⁿ, miâ kiò Sī-múi; i chhut-lâi, ná-kiâⁿ ná chiù-chó͘; 6 koh khioh chio̍h-thâu tìm Tāi-pi̍t kap Tāi-pi̍t ông ê jîn-sîn; hit-sî chèng peh-sìⁿ kap ióng-sū lóng tī ông ê chó-iū. 7 Sī-múi chiù-chó͘ kóng, Lí chit ê lâu lâng ê huih ê lâng ah, lí chit ê pháiⁿ-lâng ah, khì--ah, khì--ah. 8 Lí thòe Sò-lô chòe ông, taⁿ Iâ-hô-hoa ēng i ê ke ê huih lóng kui tī lí; Iâ-hô-hoa ēng chit ê kok kau tī lí ê kiáⁿ Ap-sa-liông ê chhiú; taⁿ lí tú-tio̍h ok-pò, in-ūi lí sī lâu lâng ê huih ê lâng. 9 Sé-ló͘-ngá ê kiáⁿ A-pí-su kā ông kóng, Chit chiah sí-káu, kiám thang chiù-chó͘ góa ê chú góa ê ông mah? kiû lí chún góa kè--khì, koah i ê thâu. 10 Ông kóng, Sé-ló͘-ngá chiah ê kiáⁿ ah, góa kap lín ū sím-mi̍h kan-sia̍p? chhut-chāi i chiù-chó͘, in-ūi Iâ-hô-hoa hoan-hù i kóng, Lí tio̍h chiù-chó͘ Tāi-pi̍t; án-ni chī-chūi káⁿ kóng, Lí siáⁿ-sū án-ni kiâⁿ ah? 11 Tāi-pi̍t koh kā A-pí-su, kap i ê chèng jîn-sîn kóng, Góa chhin-siⁿ ê kiáⁿ siōng-chhiáⁿ siàu-siūⁿ góa ê sìⁿ-miā, hô-hòng chit ê Piān-ngá-bín lâng ah? iông-ún i, chhut-chāi i chiù-chó͘; in-ūi che sī Iâ-hô-hoa kah i ê. 12 Kiám-chhái Iâ-hô-hoa kàm-chhat góa ê oan-óng, in-ūi i kin-á-ji̍t ê chiù-chó͘, Iâ-hô-hoa beh ēng hó pò góa. 13 Tāi-pi̍t kap tè i ê lâng kiâⁿ lō͘ khì. Sī-múi kiâⁿ tī i saⁿ-tùi ê soaⁿ-phiâⁿ, ná-kiâⁿ ná chiù-chó͘, koh tìm chio̍h-thâu, iā thô͘. 14 Ông kap tè i ê chèng peh-sìⁿ chin ià-siān, kàu chi̍t só͘-chāi, chiū tī-hia hioh-khùn. 15 Ap-sa-liông kap chèng peh-sìⁿ Í-sek-lia̍t lâng, lâi kàu Iâ-lō͘-sat-léng. A-hi-to-hut iā kap i tī-hia. 16 Tāi-pi̍t ê pêng-iú, A-ki lâng Hō͘-su, lâi kàu Ap-sa-liông hia; Hō͘-su kā Ap-sa-liông kóng, Goān ông bān-sòe, goān ông bān-sòe. 17 Ap-sa-liông kā Hō͘-su kóng, Lí hó khoán-thāi lí ê pêng-iú sī án-ni mah? siáⁿ-sū bô kap lí ê pêng-iú saⁿ-kap khì ah? 18 Hō͘-su kā Ap-sa-liông kóng, M̄-sī án-ni, Iâ-hô-hoa kap chit ê peh-sìⁿ, kap Í-sek-lia̍t chèng-lâng, só͘ kéng ê, góa beh kui i, iā beh kap i tòa. 19 Koh chi̍t-hāng, góa tio̍h ho̍k-sāi chī-chūi ah? kiám-m̄-sī tī i ê kiáⁿ ê bīn-chêng mah? Góa cháiⁿ-iūⁿ tī lí ê lāu-pē ê bīn-chêng ho̍k-sāi, iā beh án-ni tī lí ê bīn-chêng. 20 Ap-sa-liông kā A-hi-to-hut kóng, Lín tio̍h kè-e̍k, khòaⁿ lán tio̍h cháiⁿ-iūⁿ kiâⁿ. 21 A-hi-to-hut kā Ap-sa-liông kóng, Lí ê lāu-pē só͘ lâu--teh kò͘-chhù hiah ê pìn-hui, lí tio̍h kap i khùn; chiū Í-sek-lia̍t ê chèng-lâng thiaⁿ-kìⁿ lí hō͘ lí ê lāu-pē iàm-ò͘ⁿ, kìⁿ-nā kui lí ê lâng, i ê chhiú beh giám-ngī. 22 In chiū kā Ap-sa-liông tah pò͘-pîⁿ, tī ông-kiong ê chng-pîⁿ-téng. Ap-sa-liông chiū tī Í-sek-lia̍t chèng-lâng ê bīn-chêng ji̍p--khì, kap i ê lāu-pē ê pìn-hui khùn. 23 Hit-sî A-hi-to-hut só͘ kè-e̍k ê kè-e̍k, chhin-chhiūⁿ lâng mn̄g Siōng-tè ê ōe chi̍t-iūⁿ; A-hi-to-hut tùi-tī Tāi-pi̍t á-sī tùi-tī Ap-sa-liông só͘ kè-e̍k ê, lóng sī án-ni.
1 A-hi-to-hut koh kā押沙龍講，請你准我揀一萬兩千人，今暝我beh起身追jip大衛； 2 趁伊厭倦手軟，我beh jip-tio̍h伊，hō͘伊驚惶，tè伊ê眾百姓beh lóng逃走；我就kan-ta 刣死王nā-tiāⁿ； 3 Hō͘眾百姓lóng 歸你；你所chhē hit人是親像眾人倒tńg來一樣；án-ni百姓lóng平安。 4 押沙龍kap以色列ê長老lóng掠chitê話做好。 5 押沙龍講，Tio̍h叫A-ki人Hō͘-su來，咱也thang聽伊所講ê。 6 Hō͘-su到押沙龍hia，押沙龍kā伊講，A-hi-to-hut講án-ni，咱tio̍h照伊ê話行mah？若無，你就tio̍h講。 7 Hō͘-su kā押沙龍講，A-hi-to-hut chit-pái所計畫ê m̄好。 8 Hō͘-su koh講，你知你ê老父，kap tè伊ê人，lóng是勇士；taⁿ in ê心猛烈，親像田野失落kiáⁿ ê熊母一般。Koh你ê老父是戰士，的確無kap百姓相kap歇。 9 看ah，伊taⁿ bih tī山坑á是別所在；若有kúi-nā人事先hō͘伊刣死，見若聽見ê人beh講，Tè押沙龍ê百姓其中有受刣。 10 雖然有人好膽，in ê心親像獅ê心，也beh lóng消溶；因為以色列人lóng知你ê父是勇士，tè伊ê人也lóng是好膽。 11 所以我舉議，tio̍h hō͘以色列眾人，tùi Tàn到別是巴，聚集來你chia，親像海邊ê沙hiah-chōe，你也親身督陣。 12 Án-ni，無論tī甚麼所在tú-tio̍h伊，咱beh攻擊伊，落tī伊ê頂面親像露水落tī地裡一般，hō͘伊kap tè ê人無留一个。 13 伊若入城，以色列眾人beh帶索到hitê城，咱beh kā伊拖落河，致到tī-hia無看見一塊石頭á。 14 押沙龍kap以色列眾人講，A-ki人，Hō͘-su ê計畫，比A-hi-to-hut ê計畫khah好；因為耶和華定tio̍h beh破壞A-hi-to-hut ê好計畫，致到耶和華thang降災厄hō͘押沙龍。 15 Hō͘-su kā祭司Sat-tok kap A-pí-a-tha講，A-hi-to-hut kā押沙龍kap以色列ê長老所計畫ê是án-ni，án-ni，我所kā伊計畫ê是án-ni，án-ni。 16 Taⁿ lín tio̍h趕緊差人去，kā大衛講，今暝m̄-thang tiàm tī曠野ê渡口，的確tio̍h過河，免得王kap tè伊ê人lóng受吞滅。 17 Hit時約拿單kap A-hi-má-su tiàm tī Ún-lô-kiat teh thèng候，因為m̄敢hō͘人看見in入城。有一个女婢來kā in講，in就去kā大衛王講。 18 總是有一个gín-ná看見in，就去kā押沙龍講；in兩人趕緊走到Pa-hō͘-lîm，某人ê厝；hit人ê院內有井，in兩人就落去hia； 19 hit家ê婦人人用蓋(kòa)蓋井嘴，頂面舖麥屑，tāi-chì就無漏洩。 20 押沙龍ê奴僕來到婦人人hit間厝，問伊講，A-hi-má-su kap約拿單tī toh落？婦人人講，In過溪去lah。奴僕chhē in，chhē無tio̍h，就tò去耶路撒冷。 21 In tò去了，兩人tùi井裡起來，去kā大衛王講；in kā大衛講，Lín tio̍h起來，緊緊過水，因為A-hi-to-hut有án-ni，án-ni計畫，beh害你。 22 大衛kap tè伊ê人就起來，過約旦；到天光，無chhun一人無過約旦。 23 A-hi-to-hut看見無照伊ê計畫行，就備辦驢起身，tò去伊ê城，到伊ê家，吩咐伊ê家事，就家己吊死，埋葬tī伊ê老父ê墓。 24 大衛到Má-hap-liām。押沙龍，kap tè伊ê以色列人，也lóng過約旦。 25 押沙龍設立A-má-sat做軍長替約押。 A-má-sat是以色列人，Í-te̍k-la̍h ê kiáⁿ；Í-te̍k-la̍h bat kap Ná-hat ê cha-bó͘-kiáⁿ A-pí-kai同房。Chitê A-pí-kai kap約押ê老母Sé-ló͘-ngá是姊妹。 26 以色列人kap押沙龍紮營tī Ki-lia̍t地。 27 大衛到Má-hap-liām hit時，A-bûn族ê La̍h-pa人Ná-hat ê kiáⁿ Sok-pí，Lô-tí-pa人A-bí-lī ê kiáⁿ Má-kiat，Ki-lia̍t ê Lô-ki-lîm人Pa-se-lâi， 28 帶舖á、盆、磁器、小麥、大麥、麵粉、炒ê五穀、豆á、紅豆、炒豆、 29 蜜、奶油、羊、牛奶餅，供給大衛kap tè伊ê人thang食；因為in講，百姓tī曠野必定會iau、厭倦、嘴乾。
1 A-hi-to-hut koh kā Ap-sa-liông kóng, chhiáⁿ lí chún góa kéng chi̍t-bān nn̄g-chheng lâng, kim-mî góa beh khí-sin tui-jip Tāi-pi̍t; 2 thàn i ià-siān chhiú nńg, góa beh jip-tio̍h i, hō͘ i kiaⁿ-hiâⁿ, tè i ê chèng peh-sìⁿ beh lóng tô-cháu; góa chiū kan-ta thâi-sí ông nā-tiāⁿ; 3 hō͘ chèng peh-sìⁿ lóng kui lí; lí só͘ chhē hit-lâng sī chhin-chhiūⁿ chèng-lâng tò-tńg--lâi chi̍t-iūⁿ; án-ni peh-sìⁿ lóng pêng-an. 4 Ap-sa-liông kap Í-sek-lia̍t ê tióng-ló lóng lia̍h chit ê ōe chòe hó. 5 Ap-sa-liông kóng, Tio̍h kiò A-ki lâng Hō͘-su lâi, lán iā thang thiaⁿ i só͘ kóng ê. 6 Hō͘-su kàu Ap-sa-liông hia, Ap-sa-liông kā i kóng, A-hi-to-hut kóng án-ni, lán tio̍h chiàu i ê ōe kiâⁿ mah? Nā bô, lí chiū tio̍h kóng. 7 Hō͘-su kā Ap-sa-liông kóng, A-hi-to-hut chit-pái só͘ kè-e̍k--ê m̄-hó. 8 Hō͘-su koh kóng, Lí chai lí ê lāu-pē, kap tè i ê lâng, lóng sī ióng-sū; taⁿ in ê sim béng-lia̍t, chhin-chhiūⁿ chhân-iá sit-lo̍h kiáⁿ ê hîm-bú chi̍t-poaⁿ. Koh lí ê lāu-pē sī chiàn-sū, tek-khak bô kap peh-sìⁿ saⁿ-kap hioh. 9 Khòaⁿ ah, i taⁿ bih tī soaⁿ-khiⁿ á-sī pa̍t só͘-chāi; nā ū kúi-nā lâng tāi-seng hō͘ i thâi-sí, kìⁿ-nā thiaⁿ-kìⁿ ê lâng beh kóng, Tè Ap-sa-liông ê peh-sìⁿ kî-tiong ū siū-thâi. 10 Sui-jiân ū lâng hó-táⁿ, in ê sim chhin-chhiūⁿ sai ê sim, iā beh lóng siau-iûⁿ; in-ūi Í-sek-lia̍t lâng lóng chai lí ê pē sī ióng-sū, tè i ê lâng iā lóng sī hó-táⁿ. 11 Só͘-í góa kú-gī, tio̍h hō͘ Í-sek-lia̍t chèng-lâng, tùi Tàn kàu Pia̍t-sī-pa, chū-chi̍p lâi lí chia, chhin-chhiūⁿ hái-piⁿ ê soa hiah-chōe, lí iā chhin-sin tok-tīn. 12 Án-ni, bô-lūn tī sím-mi̍h só͘-chāi tú-tio̍h i, lán beh kong-kek i, lo̍h tī i ê téng-bīn chhin-chhiūⁿ lō͘-chúi lo̍h tī tōe--nih chi̍t-poaⁿ, hō͘ i kap tè ê lâng bô lâu chi̍t-ê. 13 I nā ji̍p siâⁿ, Í-sek-lia̍t chèng-lâng beh tòa soh kàu hit ê siâⁿ, lán beh kā i thoa lo̍h hô, tì-kàu tī-hia bô khòaⁿ-kìⁿ chi̍t tè chio̍h-thâu-á. 14 Ap-sa-liông kap Í-sek-lia̍t chèng-lâng kóng, A-ki lâng, Hō͘-su ê kè-e̍k, pí A-hi-to-hut ê kè-e̍k khah-hó; in-ūi Iâ-hô-hoa tiāⁿ-tio̍h beh phò-hoāi A-hi-to-hut ê hó kè-e̍k, tì-kàu Iâ-hô-hoa thang kàng chai-ē hō͘ Ap-sa-liông. 15 Hō͘-su kā chè-si Sat-tok kap A-pí-a-tha kóng, A-hi-to-hut kā Ap-sa-liông kap Í-sek-lia̍t ê tiúⁿ-ló só͘ kè-e̍k-ê sī án-ni, án-ni, góa só͘ kā i kè-e̍k ê sī àn(**án)-ni, àn(**án)-ni. 16 Taⁿ lín tio̍h kóaⁿ-kín chhe lâng khì, kā Tāi-pi̍t kóng, kim-mî m̄-thang tiàm tī khòng-iá ê tō͘-kháu, tek-khak tio̍h kè-hô, bián-tit ông kap tè i ê lâng lóng siū thun-bia̍t. 17 Hit-sî Iok-ná-tan kap A-hi-má-su tiàm tī Ún-lô-kiat teh thèng-hāu, in-ūi m̄-káⁿ hō͘ lâng khòaⁿ-kìⁿ in ji̍p siâⁿ. Ū chi̍t ê lú-pī lâi kā in kóng, in chiū khì kā Tāi-pi̍t ông kóng. 18 Chóng-sī ū chi̍t ê gín-ná khòaⁿ-kìⁿ in, chiū khì kā Ap-sa-liông kóng; in nn̄g-lâng kóaⁿ-kín cháu kàu Pa-hō͘-lîm, bó͘-lâng ê chhù; hit-lâng ê īⁿ-lāi ū chíⁿ, in nn̄g lâng chiū lo̍h--khì hia; 19 hit-ke ê hū-jîn-lâng ēng kòa khàm chíⁿ-chhùi, téng-bīn pho͘ be̍h-sut, tāi-chì chiū bô lāu-siat. 20 Ap-sa-liông ê lô͘-po̍k lâi kàu hū-jîn-lâng hit keng chhù, mn̄g i kóng, A-hi-má-su kap Iok-ná-tan tī toh-lo̍h? Hū-jîn-lâng kóng, In kè-khoe khì lah. Lô͘-po̍k chhē in, chhē-bô-tio̍h, chiū tò-khì Iâ-lō͘-sat-léng. 21 In tò-khì liáu, nn̄g-lâng tùi chíⁿ--nih khí-lâi, khì kā Tāi-pi̍t ông kóng; in kā Tāi-pi̍t kóng, Lín tio̍h khí-lâi, kín-kín kè-chúi, in-ūi A-hi-to-hut ū án-ni, án-ni kè-e̍k, beh hāi lí. 22 Tāi-pi̍t kap tè i ê lâng chiū khí-lâi, kè Iok-tàn; kàu thiⁿ-kng, bô chhun chi̍t-lâng bô kè Iok-tàn. 23 A-hi-to-hut khòaⁿ-kìⁿ bô chiàu i ê kè-e̍k kiâⁿ, chiū pī-pān lû khí-sin, tò-khì i ê siâⁿ, kàu i ê ke, hoan-hù i ê ke-sū, chiū ka-kī tiàu--sí, bâi-chòng tī i ê lāu-pē ê bōng. 24 Tāi-pi̍t kàu Má-hap-liām. Ap-sa-liông, kap tè i ê Í-sek-lia̍t lâng, iā lóng kè Iok-tàn. 25 Ap-sa-liông siat-li̍p A-má-sat chòe kun-tiúⁿ thòe Iok-ap. A-má-sat sī Í-sek-lia̍t lâng, Í-te̍k-la̍h ê kiáⁿ; Í-te̍k-la̍h bat kap Ná-hat ê cha-bó͘-kiáⁿ A-pí-kai tâng-pâng. Chit ê A-pí-kai kap Iok-ap ê lāu-bú Sé-ló͘-ngá sī chí-bē. 26 Í-sek-lia̍t lâng kap Ap-sa-liông chat-iâⁿ tī Ki-lia̍t tōe. 27 Tāi-pi̍t kàu Má-hap-liām hit-sî, A-bûn cho̍k ê La̍h-pa lâng Ná-hat ê kiáⁿ Sok-pí, Lô-tí-pa lâng A-bí-lī ê kiáⁿ Má-kiat, Ki-lia̍t ê Lô-ki-lîm lâng Pa-se-lâi, 28 tòa pho͘-á, phûn, hûi-khì, sió-be̍h, tōa-be̍h, mī-hún, chhá ê gō͘-kak, tāu-á, âng-tāu, chhá-tāu, 29 bi̍t, lin-iû, iûⁿ, gû-lin-piáⁿ, kiong-kip Tāi-pi̍t kap tè i ê lâng thang chia̍h; in-ūi in kóng, Peh-sìⁿ tī khòng-iá pit-tiāⁿ ōe iau, ià-siān, chhùi-ta.
1 大衛算tè伊ê百姓，設立千總百總chhōa in。 2 大衛差百姓出去，三份一交約押ê手，三份一交Sé-ló͘-ngá ê kiáⁿ約押ê兄弟A-pí-su ê手，三份一交Ka-te̍k人Í-thài ê手。王kā百姓講，我的確kap lín出去。 3 總是百姓講，你m̄-thang出去；若阮逃走，對敵無掠阮做要緊；阮若陣亡一半，對敵也無掠阮做要緊，因為你一人擋得阮一萬人；你tùi城內幫贊阮khah好。 4 王kā in講，Lín所看做好ê，我beh行伊；Tùi án-ni，王khiā tī城門-邊，百姓有ê一百，有ê一千，照次序出去。 5 王命令約押、A-pí-su、Í-thài，講，Lín帶tio̍h我，款待hitê少年人押沙龍tio̍h khah寬。王為tio̍h押沙龍命令hiahê首領ê話，百姓lóng有聽見。 6 百姓就出去田野抵敵以色列人，tī Í-hoat-liân ê樹林交戰。 7 Tī-hia以色列人刣輸tī大衛hiahê奴僕ê面前；hit日陣亡ê真chōe，共有兩萬人。 8 因為戰陣線真開，遍遍tī hit所在；樹林所吞滅ê，比hō͘刀所吞滅ê khah-chōe。 9 押沙龍偶然tú-tio̍h大衛ê奴僕。押沙龍khiā伊ê騾(lô)，騾走tùi大叢橡樹ām ê樹枝下經過，伊ê頭殼kùi-tio̍h橡樹，吊tī半空中；所騎ê騾做伊去。 10 有一个人看見，就kā約押講，我看見押沙龍kùi tī橡樹裡。 11 約押kā報伊ê人講，你已經看見，啥事m̄ tùi-hia phah伊，hō͘伊墮落地ah？我就賞你十個銀，kap一條帶。 12 Hit-ê人kā約押講，我就得tio̍h一千銀tī我ê手，也m̄敢伸手害王ê kiáⁿ；因為阮聽見王命令你kap A-pí-su Í-thài講，Lín tio̍h細膩m̄-thang害hitê少年人押沙龍。 13 我若lām-sám做，來害伊ê性命，無一項能瞞得王，你就beh khiā tī邊á m̄-chhap我。 14 約押講，我m̄-thang kap你延chhiân。約押手kia̍h三支短鎗，hit時押沙龍吊tī橡樹，iáu活teh，就鑿透伊ê心。 15 Kā約押kia̍h ke-si ê少年人十個，圍押沙龍phah hō͘伊死。 16 約押pûn哨角，百姓就tò來，無koh jip以色列人；因為約押阻止百姓。 17 In將押沙龍hiat tī樹林內一个大深坑，頂面疊一大堆ê石頭；以色列眾人ta̍k-ê走tò去in ê布棚。 18 押沙龍活teh ê時，tī王ê山谷為家己khiā一支柱；因為伊講，我無kiáⁿ thang留我ê名；就用家己ê名稱hit支柱；到今á日稱做押沙龍ê號表。 19 Sat-tok ê kiáⁿ A-hi-má-su講，准我走去，報消息hō͘王，就是耶和華有怎樣對伊ê對敵報仇。 20 約押kā伊講，你今á日m̄-thang去報消息，別日你thang報消息；總是今á日你m̄-thang報消息，因為王ê kiáⁿ已經死。 21 約押kā Kó͘-sī人講，你去將你所看見ê kā王講。Kó͘-sī人對約押鞠躬就走去。 22 Sat-tok ê kiáⁿ A-hi-má-su koh kā約押講，無論怎樣，求你准我tè Kó͘-sī人走去。約押講，我ê kiáⁿ，你報消息，既然bōe得tio̍h 賞，啥事ài走去ah？ 23 伊koh講，無論怎樣，我beh走去。約押講，你走去。A-hi-má-su就tùi平洋ê路走去；走做Kó͘-sī人ê頭前。 24 大衛tú-á坐tī門ê城牆ê中間；守望ê人peh上城牆，到城門ê樓頂，kia̍h目觀看，看見一人單身走來。 25 守望ê叫，來kā王講。王講，伊若家己來，的確有消息beh報。伊ná走ná近óa來。 26 守望ê人koh看見一人走來，守望ê kā顧城門ê人講，看ah，有一人單身走來。王講，這也是報消息ê。 27 守望ê講，我看見頭前teh走ê親像Sat-tok ê kiáⁿ A-hi-má-su teh走ê款。王講，伊是好人，來報好消息。 28 A-hi-má-su對王叫講，平安lah；就tī王ê面前仆tī地裡拜，講，耶和華你ê上帝是應該tio̍h o-ló ê；因為伊已經將hiahê起手攻擊我ê主我ê王ê人交hō͘你。 29 王講，少年人押沙龍平安á無？A-hi-má-su應講，約押差王ê奴僕，kap你ê奴僕，hit時我看見大喊hōa，m̄知是甚麼tāi-chì。 30 王講，你行開，khiā tī邊á。伊就行開，khiā-teh。 31 Kó͘-sī人也到；Kó͘-sī人講，有消息報hō͘我ê主我ê王；耶和華今á日對一切興起攻擊你ê人kā你報仇。 32 王kā Kó͘-sī人講，少年人押沙龍平安無？Kó͘-sī人應講，願我ê主我ê王ê對敵，kap一切興起攻擊你，beh害你ê人，lóng親像hitê少年人一樣。 33 王就不止傷心，上城門頂ê樓啼哭，ná行ná講，我ê kiáⁿ押沙龍ah，我ê kiáⁿ，我ê kiáⁿ，押沙龍ah；我恨bōe替你死，押沙龍ah，我ê kiáⁿ，我ê kiáⁿ。
1 Tāi-pi̍t sǹg tè i ê peh-sìⁿ, siat-li̍p chhian-chóng peh-chóng chhōa in. 2 Tāi-pi̍t chhe peh-sìⁿ chhut-khì, saⁿ-hūn-chi̍t kau Iok-ap ê chhiú, saⁿ-hūn-chi̍t kau Sé-ló͘-ngá ê kiáⁿ Iok-ap ê hiaⁿ-tī A-pí-su ê chhiú, saⁿ-hūn-chi̍t kau Ka-te̍k lâng Í-thài ê chhiú. Ông kā peh-sìⁿ kóng, Góa tek-khak kap lín chhut-khì. 3 Chóng-sī peh-sìⁿ kóng, Lí m̄-thang chhut-khì; nā goán tô-cháu, tùi-te̍k bô lia̍h goán chòe iàu-kín; goán nā tīn-bông chi̍t-pòaⁿ, tùi-te̍k iā bô lia̍h goán chòe iàu-kín, in-ūi lí chi̍t-lâng tòng-tit goán chi̍t-bān lâng; lí tùi siâⁿ-lāi pang-chān goán khah-hó. 4 Ông kā in kóng, Lín só͘ khòaⁿ-chòe hó-ê, góa beh kiâⁿ i; tùi án-ni ông khiā tī siâⁿ-mn̂g-piⁿ, peh-sìⁿ ū-ê chi̍t-pah, ū-ê chi̍t-chheng, chiàu chhù-sū chhut-khì. 5 Ông bēng-lēng Iok-ap, A-pí-su, Í-thài, kóng, Lín tòa-tio̍h góa, khoán-thāi hit ê siàu-liân lâng Ap-sa-liông tio̍h khah-khoan. Ông ūi-tio̍h Ap-sa-liông bēng-lēng hiah ê siú-léng ê ōe, peh-sìⁿ lóng ū thiaⁿ-kìⁿ. 6 Peh-sìⁿ chiū chhut-khì chhân-iá tí-te̍k Í-sek-lia̍t lâng, tī Í-hoat-liân ê chhiū-nâ kau-chiàn. 7 Tī-hia Í-sek-lia̍t lâng thâi-su tī Tāi-pi̍t hiah ê lô͘-po̍k ê bīn-chêng; hit-ji̍t tīn-bông-ê chin-chōe, kiōng ū nn̄g-bān lâng. 8 In-ūi chiàn-tīn-sòaⁿ chin khui, piàn-piàn tī hit só͘-chāi; chhiū-nâ só͘ thun-bia̍t-ê, pí hō͘ to só͘ thun-bia̍t-ê khah-chōe. 9 Ap-sa-liông ngó͘-jiân tú-tio̍h Tāi-pi̍t ê lô͘-po̍k. Ap-sa-liông khiā i ê lô, lô cháu tùi tōa-châng siōng-chhiū ām ê chhiū-ki-ē keng-kè, i ê thâu-khak kùi--tio̍h siōng-chhiū, tiàu tī pòaⁿ-khong-tiong; só͘ khiâ ê lô chòe i khì. 10 Ū chi̍t-ê lâng khòaⁿ-kìⁿ, chiū kā Iok-ap kóng, Góa khòaⁿ-kìⁿ Ap-sa-liông kùi tī siōng-chhiū--nih. 11 Iok-ap kā pò i ê lâng kóng, Lí í-keng khòaⁿ-kìⁿ, siáⁿ-sū m̄ tùi-hia phah i, hō͘ i tūi-lo̍h tōe ah? Góa chiū siúⁿ lí cha̍p ê gûn, kap chi̍t tiâu tòa. 12 Hit ê lâng kā Iok-ap kóng, Góa chiū tit-tio̍h chi̍t-chheng gûn tī góa ê chhiú, iā m̄-káⁿ chhun-chhiú hāi ông ê kiáⁿ; in-ūi goán thiaⁿ-kìⁿ ông bēng-lēng lí kap A-pí-su Í-thài kóng, Lín tio̍h sòe-jī m̄-thang hāi hit ê siàu-liân lâng Ap-sa-liông. 13 Góa nā lām-sám chòe, lâi hāi i ê sìⁿ-miā, bô chi̍t-hāng ōe môa-tit ông, lí chiū beh khiā tī piⁿ-á m̄-chhap góa. 14 Iok-ap kóng, Góa m̄-thang kap lí iân-chhiân. Iok-ap chhiú kia̍h saⁿ ki té-chhiuⁿ, hit-sî Ap-sa-liông tiàu tī siōng-chhiū, iáu oa̍h--teh, chiū chha̍k-thàu i ê sim. 15 Kā Iok-ap kia̍h ke-si ê siàu-liân lâng cha̍p-ê, ûi Ap-sa-liông phah hō͘ i sí. 16 Iok-ap pûn sàu-kak, peh-sìⁿ chiū tò-lâi, bô koh jip Í-sek-lia̍t lâng; in-ūi Iok-ap chó͘-chí peh-sìⁿ. 17 In chiong Ap-sa-liông hiat tī chhiū-nâ-lāi chi̍t ê tōa chhim-khiⁿ, téng-bīn thia̍p chi̍t tōa tui ê chio̍h-thâu; Í-sek-lia̍t chèng-lâng ta̍k-ê cháu tò-khì in ê pò͘-pîⁿ. 18 Ap-sa-liông oa̍h-teh ê sî, tī Ông ê soaⁿ-kok ūi ka-kī khiā chi̍t ki thiāu; in-ūi i kóng, Góa bô kiáⁿ thang lâu góa ê miâ; chiū ēng ka-kī ê miâ chheng hit ki thiāu; kàu kin-á-ji̍t chheng chòe Ap-sa-liông ê hō-piáu. 19 Sat-tok ê kiáⁿ A-hi-má-su kóng, Chún góa cháu--khì, pò siau-sit hō͘ ông, chiū-sī Iâ-hô-hoa ū cháiⁿ-iūⁿ tùi i ê tùi-te̍k pò-siû. 20 Iok-ap kā i kóng, Lí kin-á-ji̍t m̄-thang khì pò siau-sit, pa̍t-ji̍t lí thang pò siau-sit; chóng-sī kin-á-ji̍t lí m̄-thang pò siau-sit, in-ūi ông ê kiáⁿ í-keng sí. 21 Iok-ap kā Kó͘-sī lâng kóng, Lí khì chiong lí só͘ khòaⁿ-kìⁿ-ê kā ông kóng. Kó͘-sī lâng tùi Iok-ap kiok-kiong chiū cháu--khì. 22 Sat-tok ê kiáⁿ A-hi-má-su koh kā Iok-ap kóng, Bô-lūn cháiⁿ-iūⁿ, kiû lí chún góa tè Kó͘-sī lâng cháu-khì. Iok-ap kóng, Góa ê kiáⁿ, lí pò siau-sit, kì-jiân bōe tit-tio̍h siúⁿ, siáⁿ-sū ài cháu--khì ah? 23 I koh kóng, Bô-lūn cháiⁿ-iūⁿ, góa beh cháu--khì. Iok-ap kóng, Lí cháu--khì. A-hi-má-su chiū tùi Pîⁿ-iûⁿ ê lō͘ cháu--khì; cháu chòe Kó͘-sī lâng ê thâu-chêng. 24 Tāi-pi̍t tú-á chē tī mn̂g ê siâⁿ-chhiûⁿ ê tiong-kan; siú-bāng ê lâng peh-chiūⁿ siâⁿ-chhiûⁿ, kàu siâⁿ-mn̂g ê lâu-téng, kia̍h-ba̍k koan-khòaⁿ, khòaⁿ-kìⁿ chi̍t-lâng toaⁿ-sin cháu--lâi. 25 Siú-bāng-ê kiò, lâi kā ông kóng. Ông kóng, I nā ka-kī lâi, tek-khak ū siau-sit beh pò. I ná-cháu ná-kūn-óa lâi. 26 Siú-bāng ê lâng koh khòaⁿ-kìⁿ chi̍t-lâng cháu--lâi, siú-bāng-ê kā kò͘ siâⁿ-mn̂g ê lâng kóng, Khòaⁿ ah, ū chi̍t-lâng toaⁿ-sin cháu--lâi. Ông kóng, Che iā-sī pò siau-sit ê. 27 Siú-bāng-ê kóng, Góa khòaⁿ-kìⁿ thâu-chêng teh-cháu-ê chhin-chhiūⁿ Sat-tok ê kiáⁿ A-hi-má-su teh-cháu ê khoán. Ông kóng, I sī hó lâng, lâi pò hó siau-sit. 28 A-hi-má-su tùi ông kiò kóng, Pêng-an lah; chiū tī ông ê bīn-chêng phak tī tōe--nih pài, kóng, Iâ-hô-hoa lí ê Siōng-tè sī eng-kai tio̍h o-ló ê; in-ūi I í-keng chiong hiah ê khí-chhiú kong-kek góa ê chú góa ê ông ê lâng kau hō͘ lí. 29 Ông kóng, Siàu-liân lâng Ap-sa-liông pêng-an á-bô? A-hi-má-su ìn kóng, Iok-ap chhe ông ê lô͘-po̍k, kap lí ê lô͘-po̍k, hit-sî góa khòaⁿ-kìⁿ tōa hán-hōa, m̄-chai sī sím-mi̍h tāi-chì. 30 Ông kóng, Lí kiâⁿ-khui, khiā tī piⁿ-á. I chiū kiâⁿ-khui, khiā-teh. 31 Kó͘-sī lâng iā kàu; Kó͘-sī lâng kóng, Ū siau-sit pò hō͘ góa ê chú góa ê ông; Iâ-hô-hoa kin-á-ji̍t tùi it-chhè heng-khí kong-kek lí ê lâng kā lí pò-siû. 32 Ông kā Kó͘-sī lâng kóng, Siàu-liân lâng Ap-sa-liông pêng-an bô? Kó͘-sī lâng ìn kóng, Goān góa ê chú góa ê ông ê tùi-te̍k, kap it-chhè heng-khí kong-kek lí, beh hāi lí ê lâng, lóng chhin-chhiūⁿ hit ê siàu-liân lâng chi̍t-iūⁿ. 33 Ông chiū put-chí siong-sim, chiūⁿ siâⁿ-mn̂g-téng ê lâu thî-khàu, ná-kiâⁿ ná-kóng, Góa ê kiáⁿ Ap-sa-liông ah, góa ê kiáⁿ, góa ê kiáⁿ, Ap-sa-liông ah; góa hūn bōe thòe lí sí, Ap-sa-liông ah, góa ê kiáⁿ, góa ê kiáⁿ.
1 有人kā約押講，看ah，王為tio̍h押沙龍啼哭悲哀。 2 Hit日ê得勝變做眾百姓ê悲哀；因為hit日百姓聽見講，王為tio̍h伊ê kiáⁿ憂悶。 3 Hit日百姓暗靜入城，親像tī陣裡逃走見笑ê百姓暗靜入來一樣。 4 王罩伊ê面，王大聲哮，講，我ê kiáⁿ押沙龍ah，押沙龍，我ê kiáⁿ，我ê kiáⁿ ah。 5 約押入厝去見王講，你今á日hō͘你一切ê奴僕無體面；in今á日救你ê性命，kap你ê kiáⁿ cha-bó͘-kiáⁿ ê性命，你hiahê bó͘ ê性命，你hiahê細姨ê性命； 6 因為怨恨你ê，你疼伊；疼你ê，你怨恨伊。你今á日已經顯明你無要緊hiahê首領kap人臣；我今á日看出，若押沙龍活teh，阮今á日lóng死，你就歡喜。 7 Taⁿ你tio̍h起來出去，安慰你ê奴僕ê心；我kí耶和華來chiù-chōa，你若無出去，今暝無一人kap你tī-teh；這災厄比你tùi少年到taⁿ所tú-tio̍h-ê khah慘。 8 王就起來，坐tī城門裡；有人kā眾百姓講，看ah，王坐tī城門裡；百姓就lóng到王ê面前。 以色列人已經逃走，ta̍k人tò去伊ê布棚。 9 以色列眾支派ê人紛紛議論，講，王bat救咱脫離對敵ê手，koh救咱脫離腓利士人ê手；taⁿ伊閃避押沙龍走tī外面。 10 咱用油抹押沙龍治理咱，伊已經陣亡。Lín taⁿ啥事m̄出一句，請王tò來ah？ 11 大衛王差人去見祭司Sat-tok kap A-pí-a-tha，講，Lín tio̍h kā偤大ê長老講，以色列眾人已經有話到tī王，請王tò來伊ê厝；lín請王tò來，啥事做人ê路尾ah？ 12 Lín是我ê兄弟，是我ê骨肉；請王tò來啥事做人ê路尾ah？ 13 也kā A-má-sat講，你kiám m̄是我ê骨肉mah？我若無設立你替約押長長tī我ê面前做軍長，願上帝加倍責罰我。 14 Tùi án-ni，伊就感激偤大眾人ê心，親像一人ê心；in就差人去見王講，願你kap你ê眾人臣tò來。 15 王就tò來，到約旦；偤大人來到Kiat-kah，beh迎接王，chhōa王過約旦。 16 Pa-hō͘-lîm ê便雅憫人，Ki-la̍h ê kiáⁿ Sī-múi趕緊kap偤大人落來迎接大衛王。 17 kap伊來ê，有一千ê便雅憫人，也有掃羅家ê奴僕Sé-pa，kap伊十五個kiáⁿ，二十個奴僕，in lóng tī王ê面前過約旦。 18 有渡船過去，載王ê家眷，chhut-chāi王用。王過約旦ê時，Ki-la̍h ê kiáⁿ Sī-múi就仆tī王ê面前； 19 kā王講，我ê主我ê王出耶路撒冷ê日，你ê奴僕行悖逆ê事；taⁿ求我ê主莫得責罪我，莫得記得，王也莫得hē tī心裡。 20 你ê奴僕明明知家己有罪，所以約瑟全家今á日我第一事先落來迎接我ê主我ê王。 21 Sé-ló͘-ngá ê kiáⁿ A-pí-su講，Sī-múi bat咒詛耶和華所抹油ê，kiám m̄-tio̍h因為án-ni hō͘伊死mah？ 22 大衛講，Sé-ló͘-ngá ê kiáⁿ ah，我kap lín甚麼干涉，hō͘ lín今á日反對我ah？今á日以色列中kiám thang hō͘人死mah？我kiám m̄知我今á日做以色列王mah？ 23 Tùi án-ni，王kā Sī-múi講，你m̄免死；王就對伊chiù-chōa。 24 掃羅ê孫，Bí-hui-pho-siat也落去迎接王；伊tùi王去ê日到王平安tò來ê日，伊無修整腳，也無修整嘴鬚，也無洗衫。 25 伊tī耶路撒冷迎接王ê時，王kā伊講，Bí-hui-pho-siat，你啥事無kap我落去？ 26 伊應講，我ê主我ê王ah，當時你ê奴僕想講，我beh備辦驢，騎伊kap王相kap去；因為你ê奴僕是跛腳；總是我ê奴僕騙我； 27 koh tī我ê主我ê王ê面前譭謗你ê奴僕；獨獨我ê主我ê王親像上帝ê使者，照你所看做好ê行伊。 28 因為我ê祖全家，tī我ê主我ê王ê面前，lóng是tio̍h死ê人；總是你hō͘你ê奴僕kap你一桌ê人相kap食，我iáu有甚麼理由thang koh對王求叫ah？ 29 王對伊講，你啥事koh講你ê tāi-chì ah？我講，你kap Sé-pa tio̍h平分hiahê業產。 30 Bí-hui-pho-siat kā王講，我ê主我ê王已經平安tò來宮內，kù-chāi伊lóng the̍h去，也thang。 31 Ki-lia̍t人Pa-se-lâi tùi Lô-ki-lîm落來，beh送王過約旦，就kap王過約旦。 32 Pa-se-lâi真老，已經八十歲；王tòa tī Má-hap-liām ê時，伊用食物供給王；因為伊是大好額人。 33 王kā Pa-se-lâi講，你kap我過去，kap我tòa耶路撒冷，我beh供給你。 34 Pa-se-lâi kā王講，我ê性命iáu有kúi nî，幾日，hō͘我kap王相kap上耶路撒冷ah？ 35 我現今已經八-十歲 lah，iáu ōe分別好pháiⁿ mah？你ê奴僕iáu ōe chhì lim食ê滋味mah？唱歌ê男女我會曉聽伊ê聲音mah？奴僕啥事拖累我ê主我ê王ah？ 36 你ê奴僕只有是beh kap王過約旦一站á；王啥事tio̍h用chitê報賞報賞我ah？ 37 求你准你ê奴僕tò去，hō͘我thang死tī我ê本城，我ê父母ê墓hia。看ah，你ê奴僕Kim-hán tī-chia；hō͘伊kap我ê主我ê王過去；照你所看做好ê款待伊。 38 王講，Kim-hán thang kap我去；我beh照你所看做好ê來款待伊；你見有對我求ê，我beh kā你成。 39 Tùi án-ni，眾百姓過約旦，王也過去；王就kap Pa-se-lâi chim嘴，kā伊祝福；伊就tò去伊本所在。 40 Tùi án-ni，王過去，到Kiat-kah；Kim-hán也kap伊過去；偤大眾百姓，kap以色列百姓ê一半，也lóng送王過去。 41 以色列眾人來見王，kā伊講，阮ê兄弟偤大人啥事偷你去，來chhōa王kap伊ê家眷，kap跟tè大衛ê人，lóng相kap 過約旦？ 42 偤大眾人應以色列人，講，因為王kap阮是同宗，lín啥事因為chitê事受氣ah？阮bat食tio̍h王甚麼ah？王bat用甚麼送阮mah？ 43 以色列人應偤大人講，照支派，chitê王阮有十份，阮對tī大衛比lín khah有關係；lín啥事看輕阮，chhōa阮ê王tò來，無事先kap阮參詳ah？獨獨偤大人ê話，比以色列人ê話，khah硬。
1 Ū lâng kā Iok-ap kóng, Khòaⁿ ah, ông ūi-tio̍h Ap-sa-liông thî-khàu pi-ai. 2 Hit-ji̍t ê tek-sèng piàn-chòe chèng peh-sìⁿ ê pi-ai; in-ūi hit-ji̍t peh-sìⁿ thiaⁿ-kìⁿ kóng, Ông ūi-tio̍h i ê kiáⁿ iu-būn. 3 Hit-ji̍t peh-sìⁿ àm-chīⁿ ji̍p siâⁿ, chhin-chhiūⁿ tī tīn--nih tô-cháu kiàn-siàu ê peh-sìⁿ àm-chīⁿ ji̍p-lâi chi̍t-iūⁿ. 4 Ông tà i ê bīn, ông tōa-siaⁿ háu, kóng, Góa ê kiáⁿ Ap-sa-liông ah, Ap-sa-liông, góa ê kiáⁿ, góa ê kiáⁿ ah. 5 Iok-ap ji̍p chhù khì kìⁿ ông kóng, Lí kin-á-ji̍t hō͘ lí it-chhè ê lô͘-po̍k bô thé-biān; in kin-á-ji̍t kiù lí ê sìⁿ-miā, kap lí ê kiáⁿ cha-bó͘-kiáⁿ ê sìⁿ-miā, lí hiah ê bó͘ ê sìⁿ-miā, lí hiah ê sòe-î ê sìⁿ-miā; 6 in-ūi oàn-hūn lí ê, lí thiàⁿ i, thiàⁿ lí ê, lí oàn-hūn i. Lí kin-á-ji̍t í-keng hián-bêng lí bô iàu-kín hiah ê siú-léng kap jîn-sîn; góa kin-á-ji̍t khòaⁿ-chhut, nā Ap-sa-liông oa̍h-teh, goán kin-á-ji̍t lóng sí, lí chiū hoaⁿ-hí. 7 Taⁿ lí tio̍h khí-lâi chhut-khì, an-ùi lí ê lô͘-po̍k ê sim; góa kí Iâ-hô-hoa lâi chiù-chōa, lí nā bô chhut-khì, kim-mî bô chi̍t-lâng kap lí tī-teh; che chai-ē pí lí tùi siàu-liân kàu taⁿ só͘ tú-tio̍h-ê khah-chhám. 8 Ông chiū khí-lâi, chē tī siâⁿ-mn̂g--nih; ū lâng kā chèng peh-sìⁿ kóng, Khòaⁿ ah, ông chē tī siâⁿ-mn̂g--nih; peh-sìⁿ chiū lóng kàu ông ê bīn-chêng. Í-sek-lia̍t lâng í-keng tô-cháu, ta̍k-lâng tò-khì i ê pò͘-pîⁿ. 9 Í-sek-lia̍t chèng chi-phài ê lâng hun-hun gī-lūn, kóng, Ông bat kiù lán thoat-lī tùi-te̍k ê chhiú, koh kiù lán thoat-lī Hui-lī-sū lâng ê chhiú; taⁿ i siám-pī Ap-sa-liông cháu tī gōa-bīn. 10 Lán ēng iû boah Ap-sa-liông tī-lí lán, i í-keng tīn-bông. Lín taⁿ siáⁿ-sū m̄ chhut chi̍t-kù, chhiáⁿ ông tò-lâi ah? 11 Tāi-pi̍t ông chhe lâng khì kìⁿ chè-si Sat-tok kap A-pí-a-tha, kóng, Lín tio̍h kā Iû-tāi ê tióng-ló kóng, Í-sek-lia̍t chèng-lâng í-keng ū ōe kàu tī ông, chhiáⁿ ông tò-lâi i ê chhù; lín chhiáⁿ ông tò-lâi, siáⁿ-sū chòe lâng ê lō͘-bé ah? 12 Lín sī góa ê hiaⁿ-tī, sī góa ê kut-jio̍k; chhiáⁿ ông tò-lâi siáⁿ-sū chòe lâng ê lô͘-bé ah? 13 Iā kā A-má-sat kóng, Lí kiám m̄-sī góa ê kut-jio̍k mah? Góa nā bô siat-li̍p lí thòe Iok-ap tn̂g-tn̂g tī góa ê bīn-chêng chòe kun-tiúⁿ, goān Siōng-tè ka-pē chek-hoa̍t góa. 14 Tùi án-ni, i chiū kám-kek Iû-tāi chèng-lâng ê sim, chhin-chhiūⁿ chi̍t-lâng ê sim; in chiū chhe lâng khì kìⁿ ông kóng, Goān lí kap lí ê chèng jîn-sîn tò-lâi. 15 Ông chiū tò-lâi, kàu Iok-tàn; Iû-tāi lâng lâi kàu Kiat-kah, beh ngiâ-chih ông, chhōa ông kè Iok-tàn. 16 Pa-hō͘-lîm ê Piān-ngá-bín lâng, Ki-la̍h ê kiáⁿ Sī-múi kóaⁿ-kín kap Iû-tāi lâng lo̍h--lâi ngiâ-chih Tāi-pi̍t ông. 17 Kap i lâi ê, ū chi̍t-chheng ê Piān-ngá-bín lâng, iā ū Sò-lô ke ê lô͘-po̍k Sé-pa, kap i cha̍p-gō͘ ê kiáⁿ, jī-cha̍p ê lô͘-po̍k, in lóng tī ông ê bīn-chêng kè Iok-tàn. 18 U tō͘-chûn kè--khì, chài ông ê ke-koàn, chhut-chāi ông ēng. Ông kè Iok-tàn ê sî, Ki-la̍h ê kiáⁿ Sī-múi chiū phak tī ông ê bīn-chêng; 19 kā ông kóng, Góa ê chú góa ê ông chhut Iâ-lō͘-sat-léng ê ji̍t, lí ê lô͘-po̍k kiâⁿ pōe-ge̍k ê sū; taⁿ kiû góa ê chú bo̍h-tit chek-chōe góa, bo̍h-tit kì-tit, ông iā bo̍h-tit hē tī sim--nih. 20 Lí ê lô͘-po̍k bêng-bêng chai ka-kī ū chōe, só͘-í Iok-sek choân-ke kin-á-ji̍t góa tē-it tāi-seng lo̍h-lâi ngiâ-chih góa ê chú góa ê ông. 21 Sé-ló͘-ngá ê kiáⁿ A-pí-su kóng, Sī-múi bat chiù-chó͘ Iâ-hô-hoa só͘ boah-iû--ê, kiám m̄-tio̍h in-ūi án-ni hō͘ i sí mah? 22 Tāi-pi̍t kóng, Sé-ló͘-ngá ê kiáⁿ ah, góa kap lín sím-mi̍h kan-sia̍p, hō͘ lín kin-á-ji̍t hoán-tùi góa ah? kin-á-ji̍t Í-sek-lia̍t tiong kiám thang hō͘ lâng sí mah? góa kiám m̄-chai góa kin-á-ji̍t chòe Í-sek-lia̍t ông mah? 23 Tùi án-ni ông kā Sī-múi kóng, Lí m̄-bián sí; ông chiū tùi i chiù-chōa. 24 Sò-lô ê sun, Bí-hui-pho-siat iā lo̍h-khì ngiâ-chih ông; i tùi ông khì ê ji̍t kàu ông pêng-an tò-lâi ê ji̍t, i bô siu-chéng kha, iā bô siu-chéng chhùi-chhiu, iā bô sóe-saⁿ. 25 I tī Iâ-lō͘-sat-léng ngiâ-chih ông ê sî, ông kā i kóng, Bí-hui-pho-siat, lí siáⁿ-sū bô kap góa lo̍h--khì? 26 I ìn kóng, Góa ê chú góa ê ông ah, tng-sî lí ê lô͘-po̍k siūⁿ kóng, góa beh pī-pān lû, khiâ i kap ông saⁿ-kap khì; in-ūi lí ê lô͘-po̍k sī pái-kha; chóng-sī góa ê lô͘-po̍k phiàn góa; 27 koh tī góa ê chú góa ê ông ê bīn-chêng húi-pòng lí ê lô͘-po̍k; to̍k-to̍k góa ê chú góa ê ông chhin-chhiūⁿ Siōng-tè ê sù-chiá, chiàu lí só͘ khòaⁿ-chòe hó-ê kiâⁿ i. 28 In-ūi góa ê chó͘ choân-ke, tī góa ê chú góa ê ông ê bīn-chêng, lóng sī tio̍h sí ê lâng; chóng-sī lí hō͘ lí ê lô͘-po̍k kap lí chi̍t-toh ê lâng saⁿ-kap chia̍h, góa iáu ū sím-mi̍h lí-iû thang koh tùi ông kiû-kiò ah? 29 Ông tùi i kóng, Lí siáⁿ-sū koh kóng lí ê tāi-chì ah? Góa kóng, Lí kap Sé-pa tio̍h pîⁿ-pun hiah ê gia̍p-sán. 30 Bí-hui-pho-siat kā ông kóng, Góa ê chú góa ê ông í-keng pêng-an tò-lâi kiong-lāi, kù-chāi i lóng the̍h--khì, iā thang. 31 Ki-lia̍t lâng Pa-se-lâi tùi Lô-ki-lîm lo̍h-lâi, beh sàng ông kè Iok-tàn, chiū kap ông kè Iok-tàn. 32 Pa-se-lâi chin-lāu, í-keng poeh-cha̍p hè; ông tòa tī Má-hap-liām ê sî, i ēng chia̍h-mi̍h kiong-kip ông; in-ūi i sī tōa hó-gia̍h lâng. 33 Ông kā Pa-se-lâi kóng, Lí kap góa kè--khì, kap góa tòa Iâ-lō͘-sat-léng, góa beh kiong-kip lí. 34 Pa-se-lâi kā ông kóng, Góa ê sìⁿ-miā iáu ū kúi nî, kúi ji̍t, hō͘ góa kap ông saⁿ-kap chiūⁿ Iâ-lō͘-sat-léng ah? 35 Góa hiān-kim í-keng poeh-cha̍p hè lah, iáu ōe hun-piat hó-pháiⁿ mah? Lí ê lô͘-po̍k iáu ōe chhì lim-chia̍h ê chu-bī mah? chhiùⁿ-koa ê lâm-lú góa ōe hiáu thiaⁿ i ê siaⁿ-im mah? Lô͘-po̍k siáⁿ-sū thoa-lūi góa ê chú góa ê ông ah? 36 Lí ê lô͘-po̍k chí-ū sī beh kap ông kè Iok-tàn chi̍t-chām-á; ông siáⁿ-sū tio̍h ēng chit ê pò-siúⁿ pò-siúⁿ góa ah? 37 Kiû lí chún lí ê lô͘-po̍k tò-khì, hō͘ góa thang sí tī góa ê pún siâⁿ, góa ê pē-bú ê bōng hia. Khòaⁿ ah, lí ê lô͘-po̍k Kim-hán tī-chia; hō͘ i kap góa ê chú góa ê ông kè-khì; chiàu lí só͘ khòaⁿ-chòe hó-ê khoán-thāi i. 38 Ông kóng, Kim-hán thang kap góa khì; góa beh chiàu lí só͘ khòaⁿ-chòe hó-ê lâi khoán-thāi i; lí kìⁿ-ū tùi góa kiû--ê, góa beh kā lí chiâⁿ. 39 Tùi án-ni chèng peh-sìⁿ kè Iok-tàn, ông iā kè--khì; ông chiū kap Pa-se-lâi chim-chhùi, kā i chiok-hok; i chiū tò-khì i pún só͘-chāi. 40 Tùi án-ni ông kè-khì, kàu Kiat-kah; Kim-hán iā kap i kè-khì; Iû-tāi chèng peh-sìⁿ, kap Í-sek-lia̍t peh-sìⁿ ê chi̍t-pòaⁿ, iā lóng sàng ông kè-khì. 41 Í-sek-lia̍t chèng-lâng lâi kìⁿ ông, kā i kóng, Goán ê hiaⁿ-tī Iû-tāi lâng siáⁿ-sū thau lí khì, lâi chhōa ông kap i ê ke-koàn, kap kun-tè Tāi-pi̍t ê lâng, lóng saⁿ-kap kè Iok-tàn? 42 Iû-tāi chèng-lâng ìn Í-sek-lia̍t lâng, kóng, In-ūi ông kap goán sī tâng-chong, lín siáⁿ-sū in-ūi chit ê sū siū-khì ah? Goán bat chia̍h-tio̍h ông sím-mi̍h ah? ông bat ēng sím-mi̍h sàng goán mah? 43 Í-sek-lia̍t lâng ìn Iû-tāi lâng kóng, Chiàu chi-phài, chit ê ông goán ū cha̍p-hūn, goán tùi-tī Tāi-pi̍t pí lín khah ū koan-hē; lín siáⁿ-sū khòaⁿ-khin goán, chhōa goán ê ông tò-lâi, bô tāi-seng kap goán chham-siông ah? To̍k-to̍k Iû-tāi lâng ê ōe, pí Í-sek-lia̍t lâng ê ōe, khah-ngī.
1 Tī-hia tú-tn̄g有一个匪類，是便雅憫人，Pí-ki-lī ê kiáⁿ，名叫Sī-pa；伊pûn哨角講，阮對tī大衛無份，阮對tī耶西ê kiáⁿ無干涉；以色列人ah，lín ta̍k人tò去lín ê布棚。 2 Tùi án-ni，以色列眾人lóng離開大衛，去tè Pí-ki-lī ê kiáⁿ Sī-pa；獨獨偤大人，tùi約旦到耶路撒冷，lóng tè伊ê王tiâu-tiâu。 3 大衛到耶路撒冷，入伊ê王宮；王將前所留teh顧厝ê十個嬪妃，關禁in tī別間厝，供給in食用，無kap in親近；in受關禁，親像寡婦，直到in死ê日。 4 王kā A-má-sat講，你tio̍h tī三日內kā我招集偤大人來，你也tio̍h來chia。 5 A-má-sat就去招集偤大人，總是伊延chhiân過所限ê期。 6 大衛kā A-pí-su講，Taⁿ Pí-ki-lī ê kiáⁿ Sī-pa beh害咱，比押沙龍khah傷重；你tio̍h帶你主人ê奴僕追jip伊，驚了伊得tio̍h堅固ê城，閃避咱。 7 約押ê人，kap Ki-lī-thê人、Pí-lī-thê人，kap眾勇士，lóng出去tè A-pí-su，tùi耶路撒冷出去，追jip Pí-ki-lī ê kiáⁿ Sī-pa。 8 In到Ki-piàn ê大石磐hia，A-má-sat來到in ê面前；hit時約押所穿ê戰甲，hâ tī伊ê身軀，外面有帶，koh有劍縛tī腰裡，插tī鞘內；伊行ê時，劍tùi鞘裡lak出來。 9 約押kā A-má-sat講，我ê兄，你平安mah？約押就用chiàⁿ手loa̍h A-má-sat ê嘴鬚，beh kap伊chim嘴。 10 A-má-sat無tiuⁿ-tî約押手裡所kia̍h ê劍；約押用hit支刺入伊ê腹肚hō͘伊ê腸á流tī地裡；無koh鑿伊，就死。約押kap伊ê小弟A-pí-su去追jip Pí-ki-lī ê kiáⁿ Sī-pa。 11 約押ê少年人中，有一个khiā tī hit邊á，講，Chī-chūi歡喜約押，是誰歸順大衛，就tio̍h tè約押去。 12 A-má-sat tī路中kō tī伊ê血裡；hit人看見眾百姓lóng停腳，就將A-má-sat tùi路中徙到田裡，用衫蓋伊；因為看見到hia ê人lóng停腳。 13 身屍tùi路中徙去以後，眾百姓就lóng tè約押，去追jip Pí-ki-lī ê kiáⁿ Sī-pa。 14 伊遍行以色列chiahê支派，直到Pek-má-ka ê A-pí-la̍h，kap Pí-lī人；in也聚集來tè伊。 15 In到Pek-má-ka ê A-pí-la̍h，圍困伊，就tī城外起土堆，起tī外城ê對面。約押kap tè伊ê眾百姓lòng城beh hō͘ 伊倒。 16 有一个聰明ê婦人人tùi城裡叫講，聽ah，聽ah；求lín kā約押講，請你來chia，我beh kap你講話。 17 伊就行óa來；婦人人講，你是約押á m̄是？伊應講，我是lah。婦人人講，求你聽女婢ê話。應講，我teh聽。 18 婦人人講，古早人常常講，Tio̍h tī A-pí-la̍h請問，tāi-chì chiah能解決。 19 阮tī以色列中，是和平忠厚ê；你想beh滅以色列中一个府城；你啥事ài吞滅耶和華ê產業ah？ 20 約押應講，我決斷m̄-ài吞，決斷m̄-ài滅。 21 Tāi-chì m̄是án-ni；不過是因為Í-hoat-liân山地有一个人，Pí-ki-lī ê kiáⁿ，名叫Sī-pa，有起手攻擊王，就是大衛；若將伊一人交出，我就離開chitê城。婦人人kā約押講，你看，伊ê頭殼beh tùi城頂hiat hō͘你。 22 婦人人就照伊ê智慧勸眾人；in就斬Pí-ki-lī ê kiáⁿ Sī-pa ê頭殼，hiat hō͘約押。伊就pûn哨角，眾人就離開城四散；ta̍k人tò去伊ê布棚。約押tò去耶路撒冷，到王hia。 23 約押做以色列ê總軍長；Iâ-hô-iâ-tāi ê kiáⁿ Pí-ná-ngá管轄Ki-lī-thê人kap Pí-lī-thê人。 24 A-to-lân管理做王ê工ê；A-hi-lu̍t ê kiáⁿ Iok-sa-hoat做史官；Sī-hoat做秘書。 25 Sat-tok kap A-pí-a-tha做祭司； 26 Gâi-jíⁿ人Í-la̍h做大衛ê領袖。
1 Tī-hia tú-tn̄g ū chi̍t ê húi-lūi, sī Piān-ngá-bín lâng, Pí-ki-lī ê kiáⁿ, miâ kiò Sī-pa; i pûn sàu-kak kóng, Goán tùi-tī Tāi-pi̍t bô-hūn, goán tùi-tī Iâ-se ê kiáⁿ bô kan-sia̍p; Í-sek-lia̍t lâng ah, lín ta̍k-lâng tò-khì lín ê pò͘-pîⁿ. 2 Tùi án-ni, Í-sek-lia̍t chèng-lâng lóng lī-khui Tāi-pi̍t, khì tè Pí-ki-lī ê kiáⁿ Sī-pa; to̍k-to̍k Iû-tāi lâng, tùi Iok-tàn kàu Iâ-lō͘-sat-léng, lóng tè i ê ông tiâu-tiâu. 3 Tāi-pi̍t kàu Iâ-lō͘-sat-léng, ji̍p i ê ông-kiong; ông chiong chêng só͘ lâu-teh kò͘-chhù ê cha̍p ê pìn-hui, koaiⁿ-kìm in tī pa̍t keng chhù, kiong-kip in chia̍h-ēng, bô kap in chhin-kūn; in siū koaiⁿ-kìm, chhin-chhiūⁿ kóaⁿ-hū, ti̍t-kàu in sí ê ji̍t. 4 Ông kā A-má-sat kóng, Lí tio̍h tī saⁿ-ji̍t-lāi kā góa chio-chi̍p Iû-tāi lâng lâi, lí iā tio̍h lâi chia. 5 A-má-sat chiū khì chio-chi̍p Iû-tāi lâng, chóng-sī i iân-chhiân kè só͘ hān ê kî. 6 Tāi-pi̍t kā A-pí-su kóng, Taⁿ Pí-ki-lī ê kiáⁿ Sī-pa beh hāi lán, pí Ap-sa-liông khah siong-tiōng; lí tio̍h tòa lí chú-lâng ê lô͘-po̍k tui-jip i, kiaⁿ-liáu i tit-tio̍h kian-kò͘ ê siâⁿ, siám-pī lán. 7 Iok-ap ê lâng, kap Ki-lī-thê lâng, Pí-lī-thê lâng, kap chèng ióng-sū, lóng chhut-khì tè A-pí-su, tùi Iâ-lō͘-sat-léng chhut-khì, tui-jip Pí-ki-lī ê kiáⁿ Sī-pa. 8 In kàu Ki-piàn ê tōa chio̍h-pôaⁿ hia, A-má-sat lâi kàu in ê bīn-chêng; hit-sî Iok-ap só͘ chhēng ê chiàn-kah, hâ tī i ê seng-khu, gōa-bīn ū tòa, koh ū kiàm pa̍k tī io--nih, chhah tī siù-lāi; i kiâⁿ ê sî, kiàm tùi siù--nih lak--chhut-lâi. 9 Iok-ap kā A-má-sat kóng, Góa ê hiaⁿ, lí pêng-an mah? Iok-ap chiū ēng chiàⁿ-chhiú loa̍h A-má-sat ê chhùi-chhiu, beh kap i chim-chhùi. 10 A-má-sat bô tiuⁿ-tî Iok-ap chhiú--nih só͘ kia̍h ê kiàm; Iok-ap ēng hit ki chhì-ji̍p i ê pak-tó͘ hō͘ i ê tn̂g-á lâu tī tōe--nih; bô koh chha̍k i, chiū sí. Iok-ap kap i ê sió-tī A-pí-su khì tui-jip Pí-ki-lī ê kiáⁿ Sī-pa. 11 Iok-ap ê siàu-liân lâng tiong, ū chi̍t-ê khiā tī hí piⁿ-á, kóng, Chī-chūi hoaⁿ-hí Iok-ap, chī-chūi kui-sūn Tāi-pi̍t, chiū tio̍h tè Iok-ap khì. 12 A-má-sat tī lō͘-tiong kō tī i ê huih--nih; hit-lâng khòaⁿ-kìⁿ chèng peh-sìⁿ lóng thêng-kha, chiū chiong A-má-sat tùi lō͘-tiong sóa kàu chhân--nih, ēng saⁿ khàm i; in-ūi khòaⁿ-kìⁿ kàu hia ê lâng lóng thêng-kha. 13 Sin-si tùi lō͘-tiong sóa--khì í-āu, chèng peh-sìⁿ chiū lóng tè Iok-ap, khì tui-jip Pí-ki-lī ê kiáⁿ Sī-pa. 14 I piàn-kiâⁿ Í-sek-lia̍t chiah ê chi-phài, ti̍t-kàu Pek-má-ka ê A-pí-la̍h, kap Pí-lī lâng; in iā chū-chi̍p lâi tè i. 15 In kàu Pek-má-ka ê A-pí-la̍h, ûi-khùn i, chiū tī siâⁿ-gōa khí thô͘-tui, khí tī gōa-siâⁿ ê tùi-bīn. Iok-ap kap tè i ê chèng peh-sìⁿ lòng siâⁿ beh hō͘ i tó. 16 Ū chi̍t ê chhang-miâ ê hū-jîn-lâng tùi siâⁿ--nih kiò kóng, Thiaⁿ ah, thiaⁿ ah; kiû lín kā Iok-ap kóng, Chhiáⁿ lí lâi chia, góa beh kap lí kóng-ōe. 17 I chiū kiâⁿ-óa--lâi; hū-jîn-lâng kóng, Lí sī Iok-ap á m̄-sī? I ìn kóng, Góa sī lah. Hū-jîn-lâng kóng, Kiû lí thiaⁿ lú-pī ê ōe. Ìn kóng, Góa teh thiaⁿ. 18 Hū-jîn-lâng kóng, Kó͘-chá lâng siông-siông kóng, Tio̍h tī A-pí-la̍h chhéng-mn̄g, tāi-chì chiah ōe kái-koat. 19 Goán tī Í-sek-lia̍t tiong, sī hô-pêng tiong-hō͘ ê; lí siūⁿ beh bia̍t Í-sek-lia̍t tiong chi̍t ê hú-siâⁿ; lí siáⁿ-sū ài thun-bia̍t Iâ-hô-hoa ê sán-gia̍p ah? 20 Iok-ap ìn kóng, Góa koat-toàn m̄-ài thun, koat-toàn m̄-ài bia̍t. 21 Tāi-chì m̄-sī án-ni; put-kò sī in-ūi Í-hoat-liân soaⁿ-tōe ū chi̍t ê lâng, Pí-ki-lī ê kiáⁿ, miâ-kiò Sī-pa, ū khí-chhiú kong-kek ông, chiū-sī Tāi-pi̍t; nā chiong i chi̍t-lâng kau-chhut, góa chiū lī-khui chit ê siâⁿ. Hū-jîn-lâng kā Iok-ap kóng, Lí khòaⁿ, i ê thâu-khak beh tùi siâⁿ-téng hiat hō͘ lí. 22 Hū-jîn-lâng chiū chiàu i ê tì-hūi khǹg chèng-lâng; in chiū chám Pí-ki-lī ê kiáⁿ Sī-pa ê thâu-khak, hiat hō͘ Iok-ap. I chiū pûn sàu-kak, chèng-lâng chiū lī-khui siâⁿ sì-sòaⁿ; ta̍k-lâng tò-khì i ê pò͘-pîⁿ. Iok-ap tò-khì Iâ-lō͘-sat-léng, kàu ông hia. 23 Iok-ap chòe Í-sek-lia̍t ê chóng-kun-tiúⁿ; Iâ-hô-iâ-tāi ê kiáⁿ Pí-ná-ngá koán-hat Ki-lī-thê lâng kap Pí-lī-thê lâng. 24 A-to-lân koán-lí chòe ông ê kang ê; A-hi-lu̍t ê kiáⁿ Iok-sa-hoat chòe sú-koaⁿ; Sī-hoat chòe pì-su. 25 Sat-tok kap A-pí-a-tha chòe chè-si; 26 Gâi-jíⁿ lâng Í-la̍h chòe Tāi-pi̍t ê léng-siù.
1 Tī大衛ê時有飢荒，連連三年；大衛就問耶和華。耶和華講，是因為掃羅kap伊ê家，流人ê血ê，因為伊刣死Ki-piàn人。 2 Ki-piàn人本m̄是以色列人，就是A-mô͘-lī人所chhun ê；以色列人bat對in chiù-chōa，m̄ 刣 in；總是掃羅為tio̍h以色列人kap偤大人熱心，想計謀刣 in；王就召Ki-piàn人來，kā in講。 3 大衛kā Ki-piàn人講，我tio̍h為lín做甚麼？我tio̍h用甚麼來替贖，hō͘ lín祝福耶和華ê產業ah？ 4 Ki-piàn人講，阮kap掃羅kap伊ê家ê事無關係金銀，也m̄-thang為tio̍h阮ê緣故害死一个以色列人。伊講，Lín所講怎樣，我beh為lín行伊。 5 In對王講，hitê從前毀壞阮，謀害阮，beh滅阮，hō͘阮bōe得thang khiā起tī以色列ê境內ê； 6 taⁿ願用伊ê後裔七人交付阮，阮beh tī耶和華ê面前，將in吊tī耶和華所揀掃羅ê Ki-pí-a。王講，我beh交hō͘ lín。 7 掃羅ê kiáⁿ約拿單，伊ê kiáⁿ Bí-hui-pho-siat王保惜，因為大衛kap掃羅ê kiáⁿ約拿單前bat kí耶和華ê名來chiù-chōa。 8 總是王將Ài-ngá ê cha-bó͘-kiáⁿ Lī-su-pa kā掃羅所生兩個kiáⁿ，A-mô͘-nî、Bí-hui-pho-siat；kap掃羅ê cha-bó͘-kiáⁿ Bí-kah kā Bí-hô-la̍h人Pa-se-lâi ê kiáⁿ A-tek-lia̍t所生ê五個kiáⁿ， 9 lóng交tī Ki-piàn人ê手，in就吊in tī山裡，tī耶和華ê面前；chit七人lóng做一下倒落來，lóng總死tī起頭收割ê時，就是起頭割大麥ê時。 10 Ài-ngá ê cha-bó͘-kiáⁿ Lī-su-pa the̍h 粗麻布，為家己chhu tī石磐頂，tùi起頭收割ê時，到天落雨水tī身屍ê時；m̄准日時空中ê鳥，kap暝時ê走獸，到tī hiahê身屍。 11 有人將掃羅ê妃Ài-ngá ê cha-bó͘-kiáⁿ Lī-su-pa所做ê事kā大衛講。 12 大衛就去，tùi Ki-lia̍t-ngá-pí人the̍h掃羅ê骨，kap伊ê kiáⁿ約拿單ê骨，in bat tùi Pek-san ê街路偷the̍h，因為腓利士人前tī Ki-lī-pho 刣死掃羅ê時，腓利士人有吊in tī-hia。 13 伊就tùi hia帶掃羅ê骨，kap伊ê kiáⁿ約拿單ê骨，tò來；人就收拾hiahê受吊死ê ê骨。 14 就埋葬掃羅kap伊ê kiáⁿ約拿單ê骨tī便雅憫地ê Sé-la̍h，tī掃羅ê父Ki-sū ê墓；照王一切所命令ê去行；chit-tia̍p了後，上帝為tio̍h hitê地方聽in ê祈禱。 15 腓利士人koh kap以色列人交戰。大衛kap伊ê奴僕落去，kap腓利士人交戰；大衛真厭倦。 16 有大漢族ê一人名叫Í-si̍t-pí-lo̍k，伊ê鎗ê銅重三百sià-khek-le̍k，koh背新ê刀，beh 刣大衛。 17 總是Sé-ló͘-ngá ê kiáⁿ A-pí-su保護大衛，phah死hitê腓利士人。當時tè大衛ê人對伊chiù-chōa，講，Chit-tia̍p了後，你m̄-thang koh kap阮出戰，驚了phah-hoa以色列ê燈。 18 後來koh kap腓利士人交戰tī Ko-pek；hit時有Hō͘-sa人Se-pí-kai 刣死一个大漢族ê人，名做Sat-hut。 19 koh再tī Ko-pek kap腓利士人交戰；伯利恆人Ngá-lûi-gô-jíⁿ-kim ê kiáⁿ I-le̍k-hap-lân 刣死Ka-te̍k人Ko-lī-à；伊ê鎗柄親像布機ê軸心。 20 Koh tī Ka-te̍k交戰；tī-hia有一个大漢人，兩支手各有六支指頭á，兩支腳各有六支指頭á，共有二十四支；伊也是大漢族人ê kiáⁿ。 21 Chit人藐視以色列ê時，大衛ê兄Sī-bí-a ê kiáⁿ約拿單就kā伊刣死。 22 Chit四人是Ka-te̍k大漢人所生ê；lóng死tī大衛ê手，kap伊ê奴僕ê手。
1 Tī Tāi-pi̍t ê sî ū ki-hng, liân-liân saⁿ-nî; Tāi-pi̍t chiū mn̄g Iâ-hô-hoa. Iâ-hô-hoa kóng, Sī in-ūi Sò-lô kap i ê ke, lâu lâng ê huih ê, in-ūi i thâi-sí Ki-piàn lâng. 2 Ki-piàn lâng pún m̄-sī Í-sek-lia̍t lâng, chiū-sī A-mô͘-lī lâng só͘ chhun ê; Í-sek-lia̍t lâng bat tùi in chiù-chōa, m̄ thâi in; chóng-sī Sò-lô ūi-tio̍h Í-sek-lia̍t lâng kap Iû-tāi lâng jia̍t-sim, siūⁿ kè-bô͘ thâi in; ông chiū tiàu Ki-piàn lâng lâi, kā in kóng. 3 Tāi-pi̍t kā Ki-piàn lâng kóng, Góa tio̍h ūi lín chòe sím-mi̍h? góa tio̍h ēng sím-mi̍h lâi thòe-sio̍k, hō͘ lín chiok-hok Iâ-hô-hoa ê sán-gia̍p ah? 4 Ki-piàn lâng kóng, Goán kap Sò-lô kap i ê ke ê sū bô koan-hē kim-gûn, iā m̄-thang ūi-tio̍h goán ê iân-kò͘ hāi-sí chi̍t ê Í-sek-lia̍t lâng. I kóng, Lín só͘ kóng cháiⁿ-iūⁿ, góa beh ūi lín kiâⁿ i. 5 In tùi ông kóng, Hit ê chiông-chêng húi-hoāi goán, bô͘-hāi goán, beh bia̍t goán, hō͘ goán bōe-tit-thang khiā-khí tī Í-sek-lia̍t ê kéng-lāi ê; 6 taⁿ goān ēng i ê hō͘-è chhit-lâng kau-hù goán, goán beh tī Iâ-hô-hoa ê bīn-chêng, chiong in tiàu tī Iâ-hô-hoa só͘ kéng Sò-lô ê Ki-pí-a. Ông kóng, Góa beh kau-hō͘ lín. 7 Sò-lô ê kiáⁿ Iok-ná-tan, i ê kiáⁿ Bí-hui-pho-siat ông pó-sioh, in-ūi Tāi-pi̍t kap Sò-lô ê kiáⁿ Iok-ná-tan chêng bat kí Iâ-hô-hoa ê miâ lâi chiù-chōa. 8 Chóng-sī ông chiong Ài-ngá ê cha-bó͘-kiáⁿ Lī-su-pa kā Sò-lô só͘ siⁿ nn̄g ê kiáⁿ, A-mô͘-nî, Bí-hui--pho-siat; kap Sò-lô ê cha-bó͘-kiáⁿ Bí-kah kā Bí-hô-la̍h lâng Pa-se-lâi ê kiáⁿ A-tek-lia̍t só͘ siⁿ ê gō͘ ê kiáⁿ, 9 lóng kau tī Ki-piàn lâng ê chhiú, in chiū tiàu in tī soaⁿ--nih, tī Iâ-hô-hoa ê bīn-chêng; chí(**chit) chhit-lâng lóng chòe chi̍t-ē tó--lo̍h-lâi, lóng-chóng sí tī khí-thâu siu-koah ê sî, chiū-sī khí-thâu koah tōa-be̍h ê sî. 10 Ài-ngá ê chá-bó͘-kiáⁿ Lī-su-pa the̍h chho͘-môa-pò͘, ūi ka-kī chhu tī chio̍h-pôaⁿ-téng, tùi khí-thâu siu-koah ê sî, kàu thiⁿ lo̍h hō͘-chúi tī sin-si ê sî; m̄-chún ji̍t-sî khong-tiong ê chiáu, kap mî-sî ê cháu-siù, kàu tī hiah ê sin-si. 11 Ū lâng chiong Sò-lô ê hui Ài-ngá ê cha-bó͘-kiáⁿ Lī-su-pa só͘ chòe ê sū kā Tāi-pi̍t kóng. 12 Tāi-pi̍t chiū khì, tùi Ki-lia̍t-ngá-pí lâng the̍h Sò-lô ê kut, kap i ê kiáⁿ Iok-ná-tan ê kut, in bat tùi Pek-san ê ke-lō͘ thau-the̍h, in-ūi Hui-lī-sū lâng chêng tī Ki-lī-pho thâi-sí Sò-lô ê sî, Hui-lī-sū lâng ū tiàu in tī-hia. 13 I chiū tùi hia tòa Sò-lô ê kut, kap i ê kiáⁿ Iok-ná-tan ê kut, tò-lâi; lâng chiū siu-si̍p hiah-ê siū tiàu-sí-ê ê kut. 14 Chiū bâi-chòng Sò-lô kap i ê kiáⁿ Iok-ná-tan ê kut tī Piān-ngá-bín tōe ê Sé-la̍h, tī Sò-lô ê pē Ki-sū ê bōng; chiàu ông it-chhè só͘ bēng-lēng ê khì kiâⁿ; chit-tia̍p liáu-āu Siōng-tè ūi-tio̍h hit ê tōe-hng thiaⁿ in ê kî-tó. 15 Hui-lī-sū lâng koh kap Í-sek-lia̍t lâng kau-chiàn. Tāi-pi̍t kap i ê lô͘-po̍k lo̍h-khì, kap Hui-lī-sū lâng kau-chiàn; Tāi-pi̍t chin ià-siān. 16 Ū tōa-hàn-cho̍k ê chi̍t-lâng miâ-kiò Í-si̍t-pí-lo̍k, i ê chhiuⁿ ê tâng tāng saⁿ-pah sià-khek-le̍k, koh pē sin ê to, beh thâi Tāi-pi̍t. 17 Chóng-sī Sé-ló͘-ngá ê kiáⁿ A-pí-su pó-hō͘ Tāi-pi̍t, phah-sí hit ê Hui-lī-sū lâng. Tng-sî tè Tāi-pi̍t ê lâng tùi i chiù-chōa, kóng, Chit-tia̍p liáu-āu lí m̄-thang koh kap goán chhut-chiàn, kiaⁿ-liáu phah-hoa Í-sek-lia̍t ê teng. 18 Āu-lâi koh kap Hui-lī-sū lâng kau-chiàn tī Ko-pek; hit-sî ū Hō͘-sa lâng Se-pí-kai thâi-sí chi̍t ê tōa-hàn-cho̍k ê lâng, miâ-chòe Sat-hut. 19 Koh-chài tī Ko-pek kap Hui-lī-sū lâng kau-chiàn; Pek-lī-hêng lâng Ngá-lûi-gô-jíⁿ-kim ê kiáⁿ I-le̍k-hap-lân thâi-sí Ka-te̍k lâng Ko-lī-à; i ê chhiuⁿ-pìⁿ chhin-chhiūⁿ pò͘-kui(**ki) ê te̍k-sim. 20 Koh tī Ka-te̍k kau-chiàn; tī-hia ū chi̍t ê tōa-hàn lâng, nn̄g ki chhiú kok ū la̍k ki chńg-thâu-á, nn̄g ki kha kok ū la̍k ki chńg--thâu-á, kiōng ū jī-cha̍p-sì ki; i iā sī tōa-hàn-cho̍k lâng ê kiáⁿ. 21 Chit-lâng biáu-sī Í-sek-lia̍t ê sî, Tāi-pi̍t ê hiaⁿ Sī-bí-a ê kiáⁿ Iok-ná-tan chiū kā i thâi-sí. 22 Chí(**Chit) sì-lâng sī Ka-te̍k tōa-hàn lâng só͘ siⁿ ê; lóng sí tī Tāi-pi̍t ê chhiú, kap i ê lô͘-po̍k ê chhiú.
1 當耶和華救大衛脫離一切ê對敵ê手，kap掃羅ê手ê日，伊ǹg耶和華念chitê詩ê話，講， 2 耶和華是我ê山巖，我ê營寨，拯救我ê。 3 上帝是我ê石磐，我beh óa靠伊； 伊是藤牌，是拯救我ê角，是我ê高台，是我ê避難所； 拯救我ê ah，你是救我脫離強暴ê。 4 我beh求叫耶和華，伊是應該o-ló ê； Án-ni我beh得tio̍h救，脫離我ê對敵。 5 死無ê水湧圍我， 匪類ê氾濫hō͘我驚。 6 陰間ê索纏我， 死無ê活tauh到tī我。 7 我tī患難中求叫耶和華， 我求叫我ê上帝。 伊tùi殿裡聽我ê聲， 我ê求叫入伊ê耳孔。 8 地就振動搖choah， 天ê根基也gī-gī顫， 為tio̍h伊ê受氣來振動。 9 Tùi伊ê鼻孔有煙chhèng上去， Tùi伊ê嘴有出燒滅ê火， 碳tùi án-ni to̍h。 10 伊hō͘天低落來，就降臨， Tī伊ê腳下有烏雲。 11 伊騎ki-lō͘-peng teh飛， Tī風ê翼頂顯現。 12 伊用烏暗做周圍ê帳房， 就是聚集ê水，kap空中ê密雲。 13 因為伊面前ê光， 火炭就to̍h起來。 14 耶和華tùi天起雷， 至koân ê發出伊ê聲。 15 伊射箭來趕散in， Sih-nà來hō͘ in亂。 16 海底就出現， 大地ê根基也露現， 是因為耶和華ê責備， 也因為伊ê鼻孔pûn出ê氣。 17 伊tùi頂面伸手khiú我， Tùi大水中牽我出； 18 伊救我脫離勇猛ê對敵， Kap hiahê怨恨我ê人， 因為in比我khah有力。 19 我tú-tio̍h患難ê日，in來窘迫我， 總是耶和華是我所óa靠ê。 20 伊chhōa我到開闊ê所在； 伊救我，因為伊歡喜我。 21 耶和華照我ê公義報答我， 照我ê手ê清氣報賞我。 22 因為我守耶和華ê道路， Bē-bat做pháiⁿ，離開我ê上帝。 23 伊一切ê法度tī我ê面前， 伊ê律例，我也無悖逆。 24 我對tī伊是完全， 我也守本身無行我ê pháiⁿ。 25 所以耶和華報賞我，是照我ê公義， 也照我tī伊ê目睭前ê清氣。 26 對tī仁慈ê人，你顯明家己是仁慈， 對tī完全ê人，你顯明家己是完全； 27 對tī清氣ê人，你顯明家己是清氣； 對tī乖癖ê人，你顯明家己是彎曲。 28 困苦ê百姓，你救伊。 你ê目睭看驕傲ê人，hō͘伊降低。 29 耶和華ah，你是我ê燈， 耶和華beh照光我ê烏暗。 30 因為我óa靠你衝入軍隊， óa靠我ê上帝，就跳過牆。 31 論到上帝，伊ê道路是完全ê， 耶和華ê話，是過鍛鍊ê； 見若óa靠伊ê，伊就做in ê藤牌。 32 耶和華以外，是誰是上帝ah？ 咱ê上帝以外，是誰是石磐ah？ 33 上帝是我堅固ê營寨， 伊引chhōa完全ê人行伊ê路。 34 伊hō͘我ê腳親像鹿母， hō͘我khiā tī我高ê所在。 35 伊教示我ê手能交戰， 致到我ê手骨能開銅弓。 36 你用你ê拯救hō͘我做藤牌， 你ê溫柔hō͘我做大。 37 你hō͘我ê腳所踏ê地開闊， 我ê腳也bē-bat踏thu̍t。 38 我追jip我ê對敵，來剪除in； In bē剿滅ê事先，我無倒tńg來。 39 我剿滅in，phah傷in， Hō͘ in bōe起來，倒tī我ê腳下。 40 因為你bat用氣力hâ我，hō͘我能交戰， 你hō͘ hiahê起來攻擊我ê，lóng降服我。 41 你hō͘我ê對敵ǹg我oa̍t-tńg身， hō͘我thang剪除hiahê怨恨我ê人。 42 In四界看，也無拯救in ê， 就ǹg望耶和華，伊也m̄應伊。 43 我搥in幼幼，親像地上ê塵埃， 我踏in親像街路ê土糜，hō͘ in四散。 44 你救我脫離我ê百姓ê相爭， 保存我做列國ê頭目； 我所m̄-bat ê百姓beh服事我。 45 外邦人beh投降我， 一下聽見，就beh遵thàn我。 46 外邦人beh衰敗， Tùi in秘密ê所在ngia̍uh-ngia̍uh-chhoah出來。 47 耶和華是活ê，願我ê石磐得tio̍h o-ló， 願上帝，就是救我ê石磐ê，得tio̍h尊做高； 48 就是替我伸冤ê上帝， Hō͘ hiahê百姓降服我ê； 49 救我脫離我ê對敵ê； Koh舉起我khah高hiahê起來攻擊我ê。 你救我脫離強暴ê人。 50 耶和華ah，因為án-ni我beh tī列邦感謝你， 也beh唱歌o-ló你ê名。 51 耶和華大大拯救伊所設立ê王， 施慈愛hō͘伊所抹油ê， 就是hō͘大衛kap伊ê後裔，到永遠。
1 Tng Iâ-hô-hoa kiù Tāi-pi̍t thoat-lī it-chhè ê tùi-te̍k ê chhiú, kap Sò-lô ê chhiú ê ji̍t, i ǹg Iâ-hô-hoa liām chit ê si ê ōe, kóng, 2 Iâ-hô-hoa sī góa ê soaⁿ-giâm, góa ê iâⁿ-chē, chín-kiù góa ê. 3 Siōng-tè sī góa ê chio̍h-pôaⁿ, góa beh óa-khò I; I sī tîn-pâi, sī chín-kiù góa ê kak, sī góa ê koâiⁿ-tâi, sī góa ê pī-lān-só͘; Chín-kiù góa ê ah, Lí sī kiù góa thoat-lī kiông-pō ê. 4 Góa beh kiû-kiò Iâ-hô-hoa, I sī eng-kai o-ló ê; Án-ni góa beh tit-tio̍h kiù, thoat-lī góa ê tùi-te̍k. 5 Sí-bô ê chúi-éng ûi góa, Húi-lūi ê hoàn-lām hō͘ góa kiaⁿ. 6 Im-kan ê soh tîⁿ góa, Sí-bô ê oa̍h-tauh kàu tī góa. 7 Góa tī hoān-lān tiong kiû-kiò Iâ-hô-hoa, Góa kiû-kiò góa ê Siōng-tè. I tùi tiān--nih thiaⁿ góa ê siaⁿ, Góa ê kiû-kiò ji̍p I ê hī-khang. 8 Tōe chiū tín-tāng iô-choah, Thiⁿ ê kun-ki iā gī-gī-chùn, Ūi-tio̍h I ê siū-khì lâi tín-tāng. 9 Tùi I ê phīⁿ-khang ū ian chhèng chiūⁿ-khì, Tùi I ê chhùi ū chhut sio-bia̍t ê hé, Thòaⁿ tùi án-ni to̍h. 10 I hō͘ thiⁿ kē--lo̍h-lâi, chiū kàng-lîm, Tī I ê kha-ē ū o͘-hûn. 11 I khiâ ki-lō͘-peng teh pe, Tī hong ê si̍t-téng hián-hiān. 12 I ēng o͘-àm chòe chiu-ûi ê tiùⁿ-pâng, Chiū-sī chū-chi̍p ê chúi, kap khong-tiong ê ba̍t-hûn. 13 In-ūi I bīn-chêng ê kng, Hé-thòaⁿ chiū to̍h--khí-lâi. 14 Iâ-hô-hoa tùi thiⁿ khí lûi, Chì-koâiⁿ--ê hoat-chhut I ê siaⁿ. 15 I siā chìⁿ lâi kóaⁿ-sòaⁿ in, Sih-nà lâi hō͘ in loān. 16 Hái-tóe chiū chhut-hiān, Tōa-tōe ê kun-ki iā lō͘-hiān, Sī in-ūi Iâ-hô-hoa ê chek-pī, Iā in-ūi I ê phīⁿ-khang pûn-chhut ê khì. 17 I tùi téng-bīn chhun-chhiú khiú góa, Tùi tōa-chúi-tiong khan góa chhut; 18 I kiù góa thoat-lī ióng-béng ê tùi-te̍k, Kap hiah ê oàn-hūn góa ê lâng, In-ūi in pí góa khah ū la̍t. 19 Góa tú-tio̍h hoān-lān ê ji̍t, in lâi khún-pek góa, Chóng-sī Iâ-hô-hoa sī góa só͘ óa-khò ê. 20 I chhōa góa kàu khui-khoah ê só͘-chāi; I kiù góa, in-ūi I hoaⁿ-hí góa. 21 Iâ-hô-hoa chiàu góa ê kong-gī pò-tap góa, Chiàu góa ê chhiú ê chheng-khì pò-siúⁿ góa. 22 In-ūi góa siú Iâ-hô-hoa ê tō-lō͘, Bē-bat chòe pháiⁿ, lī-khui góa ê Siōng-tè. 23 I it-chhè ê hoat-tō͘ tī góa ê bīn-chêng, I ê lu̍t-lē, góa iā bô pōe-ge̍k. 24 Góa tùi-tī I sī oân-choân, Góa iā siú pún-sin bô kiâⁿ góa ê pháiⁿ. 25 Só͘-í Iâ-hô-hoa pò-siúⁿ góa, sī chiàu góa ê kong-gī, Iā chiàu góa tī I ê ba̍k-chiu-chêng ê chheng-khì. 26 Tùi-tī jîn-chû ê lâng, Lí hián-bêng ka-kī sī jîn-chû, Tùi-tī oân-choân ê lâng, Lí hián-bêng ka-kī sī oân-choân; 27 Tùi-tī chheng-khì ê lâng, Lí hián-bêng ka-kī sī chheng-khì; Tùi-tī koai-phiah ê lâng, Lí hián-bêng ka-kī sī oan-khiau. 28 Khùn-khó͘ ê peh-sìⁿ, Lí kiù i. Lí ê ba̍k-chiu khòaⁿ kiau-ngō͘ ê lâng, hō͘ i kàng-kē. 29 Iâ-hô-hoa ah, Lí sī góa ê teng, Iâ-hô-hoa beh chiò-kng góa ê o͘-àm. 30 In-ūi góa óa-khò Lí chhiong-ji̍p kun-tūi, Óa-khò góa ê Siōng-tè, chiū thiàu-kè chhiûⁿ. 31 Lūn-kàu Siōng-tè, I ê tō-lō͘ sī oân-choân ê, Iâ-hô-hoa ê ōe, sī kè thoàn-liān ê; Kìⁿ-nā óa-khò I ê, I chiū chòe in ê tîn-pâi. 32 Iâ-hô-hoa í-gōa, chī-chūi sī Siōng-tè ah? Lán ê Siōng-tè í-gōa, chī-chūi sī chio̍h-pôaⁿ ah? 33 Siōng-tè sī góa kian-kò͘ ê iâⁿ-chē, I ín-chhōa oân-choân ê lâng kiâⁿ I ê lō͘. 34 I hō͘ góa ê kha chhin-chhiūⁿ lo̍k-bú, Hō͘ góa khiā tī góa koâiⁿ ê só͘-chāi. 35 I kà-sī góa ê chhiú ōe kau-chiàn, Tì-kàu góa ê chhiú-kut ōe khui tâng-keng. 36 Lí ēng Lí ê chín-kiù hō͘ góa chòe tîn-pâi, Lí ê un-jiû hō͘ góa chòe tōa. 37 Lí hō͘ góa ê kha só͘ ta̍h ê tōe khui-khoah, Góa ê kha iā bē-bat ta̍h-thu̍t. 38 Góa tui-jip góa ê tùi-te̍k, lâi chián-tû in; In bē châu-bia̍t ê tāi-seng, góa bô tò-tńg-lâi. 39 Góa châu-bia̍t in, phah-siong in, Hō͘ in bōe khí-lâi, tó tī góa ê kha-ē. 40 In-ūi Lí bat ēng khùi-la̍t hâ góa, hō͘ góa ōe kau-chiàn, Lí hō͘ hiah ê khí-lâi kong-kek góa ê, lóng hâng-ho̍k góa. 41 Lí hō͘ góa ê tùi-te̍k ǹg góa oa̍t-tńg-sin, Hō͘ góa thang chián-tû hiah ê oàn-hūn góa ê lâng. 42 In sì-kòe khòaⁿ, iā bô chín-kiù in ê, Chiū ǹg-bāng Iâ-hô-hoa, I iā m̄ ìn i. 43 Góa tûi in iù-iù, chhin-chhiūⁿ tōe-chiūⁿ ê tîn-ai, Góa ta̍h in chhin-chhiūⁿ ke-lō͘ ê thô͘-bê, hō͘ in sì-sòaⁿ. 44 Lí kiù góa thoat-lī góa ê peh-sìⁿ ê saⁿ-chiⁿ, Pó-chûn góa chòe lia̍t-kok ê thâu-ba̍k; Góa só͘ m̄-bat ê peh-sìⁿ beh ho̍k-sāi góa. 45 Gōa-pang lâng beh tâu-hâng góa, Chi̍t-ē thiaⁿ-kìⁿ, chiū beh chun-thàn góa. 46 Gōa-pang lâng beh soe-pāi, Tùi in pì-ba̍t ê só͘-chāi ngia̍uh-ngia̍uh-chhoah chhut-lâi. 47 Iâ-hô-hoa sī oa̍h ê, goān góa ê chio̍h-pôaⁿ tit-tio̍h o-ló, Goān Siōng-tè, chiū-sī kiù góa ê Chio̍h-pôaⁿ--ê, tit-tio̍h chun-chòe koâiⁿ; 48 Chiū-sī thòe góa sin-oan ê Siōng-tè, Hō͘ hiah ê peh-sìⁿ hâng-ho̍k góa ê; 49 Kiù góa thoat-lī góa ê tùi-te̍k ê; Koh kú-khí góa khah koâiⁿ hiah ê khí-lâi kong-kek góa ê. Lí kiù góa thoat-lī kiông-pō ê lâng. 50 Iâ-hô-hoa ah, in-ūi án-ni góa beh tī lia̍t-pang kám-siā Lí, Iā beh chhiùⁿ-koa o-ló Lí ê miâ. 51 Iâ-hô-hoa tōa-tōa chín-kiù I só͘ siat-li̍p ê ông, Si chû-ài hō͘ I só͘ boah-iû-ê, Chiū-sī hō͘ Tāi-pi̍t kap i ê hō͘-è, kàu éng-oán.
1 大衛結尾ê話，排列tī下底。耶西ê kiáⁿ大衛講， 得tio̍h升高ê人， 是雅各ê上帝所抹油ê， Tī以色列gâu做歌ê講： 2 耶和華ê神用我來講， 伊ê話tī我ê舌。 3 以色列ê上帝有講， 以色列ê石磐對我講： 用公義治理人， 敬畏上帝來治理ê， 4 伊beh親像透早日tú-á出ê光， 無雲ê清早， 雨落過身ê光彩； Hō͘地發幼幼ê草。 5 我ê家tī上帝ê面前m̄是án-ni； Iáu-kú伊有kap我立永遠ê約， 無m̄照次序排列koh堅固； 雖然伊無hō͘伊生長， 這就是我一切ê拯救，一切ê意願。 6 總是匪類lóng親像刺á beh受割sak， 人m̄敢用手the̍h伊； 7 Beh摸伊ê人， tio̍h用鐵器kap鎗柄， Tī伊ê所在beh hō͘火一盡燒去。 8 大衛勇士ê名記tī下底；軍長ê頭，Tha-kek-bûn人Iok-siat-pa-siat；就是I-su-nî人A-tí-lô，一時phah死八百人。 9 Koh一个是A-ha̍p人Tó-to ê kiáⁿ Í-lī-a-sat；前腓利士人聚集beh交戰，以色列人已經去，有三個勇士tè大衛，對腓利士人討戰；伊是in中間ê一个。 10 伊起來phah腓利士人，到手酸，手kap劍相liâm。Hit日耶和華大大khah贏，眾百姓oa̍t-tńg tī伊ê後面，顧搶物nā-tiāⁿ。 11 Koh一个是Ha̍p-la̍h人A-ki ê kiáⁿ Sa-má；有一日腓利士人聚集成陣，tī一坵紅豆ê園；百姓就tī腓利士人ê面前逃走。 12 伊擋tiâu tī hit坵園，來保守伊，phah腓利士人；耶和華大大khah贏。 13 收割ê時，三十個首領中有三人落去到A-tō͘-lân洞，見大衛。腓利士人軍兵紮營tī Lī-hoa̍t-im ê山谷。 14 Hit時大衛tī山寨；腓利士人防守ê兵tī伯利恆。 15 大衛欣羨講，Chī-chūi會用伯利恆城門邊ê井水hō͘我lim？ 16 Chit三個勇士就衝過腓利士人ê營盤，tùi伯利恆城門邊ê井chhiūⁿ水，kōaⁿ來hō͘大衛；總是伊m̄甘lim，就piàⁿ tī耶和華ê面前，講， 17 耶和華ah，我決斷m̄做án-ni；這kiám m̄是phe命去ê人ê血？所以伊m̄-lim。Chit三個大勇士有做chiahê tāi-chì。 18 Sé-ló͘-ngá ê kiáⁿ約押ê小弟A-pí-su是做三個勇士ê頭人；伊kia̍h伊ê鎗phah死三百人，就tī三個勇士中有名。 19 伊 kiám m̄是三個勇士中ê第一尊貴ê mah？所以做in ê頭；總是不及前三個勇士。 20 Koh有Kah-siat人大勇士Iâ-hô-iâ-tāi ê kiáⁿ Pí-ná-ngá；伊有行出chōe-chōe大事；伊刣死Mô͘-ap人A-lī-i-le̍k兩個kiáⁿ；koh tī落雪ê時落坑內，刣死一隻獅。 21 Koh 刣死埃及一个大漢人；埃及人手裡kia̍h鎗，Pí-ná-ngá只有kia̍h錘落去伊hia，搶埃及人手裡ê鎗，用hit支鎗kā伊chân死。 22 這是Iâ-hô-iâ-tāi ê kiáⁿ Pí-ná-ngá所行ê事；就tī三個勇士中得tio̍h名。 23 伊比三十個勇士khah尊貴；總是不及前三個勇士。大衛設立伊做伊ê侍衛長。 24 三十個勇士中有約押ê小弟A-sat-hek；koh有伯利恆人Tó-to ê kiáⁿ Í-le̍k-hap-lân； 25 Hap-lu̍t人Sa-má，Hap-lu̍t人Í-lī-ka； 26 Phaⁿ-le̍k-thê人Hi-lī-su，Thê-ko-a人Ek-kiat ê kiáⁿ Í-la̍h； 27 A-ná-tu̍t人A-pí-í-siā，Hō͘-sa人Bí-pún-nái； 28 A-ha̍p人Sat-bûn，Nî-tô-hoat人Má-hap-lâi； 29 Nî-tô-hoat人Pa-ná ê kiáⁿ Hi-li̍p，便雅憫族Ki-pí-a人Lī-pài ê kiáⁿ Í-thài； 30 Pí-la̍h-tùn人Pí-ná-ngá，Ka-si̍t溪人Hi-thài； 31 Pek-a-la̍h-pa人A-pí-a-pún，Pa-ló͘-bí人Ap-su-má-hut； 32 Sa-pún人Í-lī-ngá-hap-pa，Ngá-siān chiahê kiáⁿ中ê約拿單； 33 Hap-la̍h人Sa-má，Hap-la̍h人Sa-la̍h ê kiáⁿ A-hi-àm； 34 Má-ka人A-hap-pài ê kiáⁿ Í-lī-hoat-lia̍t，Ki-lô人A-hi-to-hut ê kiáⁿ Í-liân ； 35 Ka-bi̍t人Hi-su-lâi，A-pa人Phàⁿ-lâi； 36 Só-pa人Ná-tan ê kiáⁿ Í-kah，Ka-te̍k人Pa-nî； 37 A-bûn人Sé-le̍k，Pí-lio̍k人Ná-hap-lâi，是kā Sé-ló͘-ngá ê kiáⁿ約押kia̍h軍器ê； 38 Í-thiap人Í-la̍h，Í-thiap人Ka-li̍p； 39 Hek人烏利亞；共三十七人。
1 Tāi-pi̍t kiat-bé ê ōe, pâi-lia̍t tī ē-tóe. Iâ-se ê kiáⁿ Tāi-pi̍t kóng, Tit-tio̍h seng-koâiⁿ ê lâng, Sī Ngá-kok ê Siōng-tè só͘ boah-iû ê, Tī Í-sek-lia̍t gâu chòe-koa--ê kóng: 2 Iâ-hô-hoa ê Sîn ēng góa lâi kóng, I ê ōe tī góa ê chi̍h. 3 Í-sek-lia̍t ê Siōng-tè ū kóng, Í-sek-lia̍t ê Chio̍h-pôaⁿ tùi góa kóng: Ēng kong-gī tī-lí lâng, Kèng-ùi Siōng-tè lâi tī-lí ê, 4 I beh chhin-chhiūⁿ thàu-chá ji̍t tú-á chhut ê kng, Bô hûn ê chheng-chá, Hō͘ lo̍h kè-sin ê kng-chhái; Hō͘ tōe hoat iù-iù ê chháu. 5 Góa ê ke tī Siōng-tè ê bīn-chêng m̄-sī án-ni; Iáu-kú I ū kap góa li̍p éng-oán ê iok, Bô m̄ chiàu chhù-sū pâi-lia̍t koh kian-kò͘; Sui-jiân I bô hō͘ i seng-tióng, Che chiū-sī góa it-chhè ê chín-kiù, it-chhè ê ì-goān. 6 Chóng-sī húi-lūi lóng chhin-chhiūⁿ chhì-á beh siū koah-sak, Lâng m̄-káⁿ ēng chhiú the̍h i; 7 Beh bong i ê lâng, Tio̍h ēng thih-khì kap chhiuⁿ-pìⁿ, Tī i ê só͘-chāi beh hō͘ hé it-chīn sio-khì. 8 Tāi-pi̍t ióng-sū ê miâ kì tī ē-tóe; kun-tiúⁿ ê thâu, Tha-kek-bûn lâng Iok-siat-pa-siat; chiū-sī I-su-nî lâng A-tí-lô, chi̍t-sî phah-sí poeh-pah lâng. 9 Koh chi̍t-ê sī A-ha̍p lâng Tó-to ê kiáⁿ Í-lī-a-sat; chêng Hui-lī-sū lâng chū-chi̍p beh kau-chiàn, Í-sek-lia̍t lâng í-keng khì, ū saⁿ ê ióng-sū tè Tāi-pi̍t, tùi Hui-lī-sū lâng thó-chiàn; i sī in tiong-kan ê chi̍t-ê. 10 I khí-lâi phah Hui-lī-sū lâng, kàu chhiú sng, chhiú kap kiàm saⁿ-liâm. Hit-ji̍t Iâ-hô-hoa tōa-tōa khah-iâⁿ, chèng peh-sìⁿ oa̍t-tńg tī i ê āu-bīn, kò͘ chhiúⁿ-mi̍h nā-tiāⁿ. 11 Koh chi̍t-ê sī Ha̍p-la̍h lâng A-ki ê kiáⁿ Sa-má; ū chi̍t-ji̍t Hui-lī-sū lâng chū-chi̍p chiâⁿ-tīn, tī chi̍t-khu âng-tāu ê hn̂g; peh-sìⁿ chiū tī Hui-lī-sū lâng ê bīn-chêng tô-cháu. 12 I tòng-tiâu tī hit khu hn̂g, lâi pó-siú i, phah Hui-lī-sū lâng; Iâ-hô-hoa tōa-tōa khah-iâⁿ. 13 Siu-koah ê sî, saⁿ-cha̍p ê siú-léng tiong ū saⁿ lâng lo̍h-khì kàu A-tō͘-lân tōng, kìⁿ Tāi-pi̍t. Hui-lī-sū lâng kun-peng chat-iâⁿ tī Lī-hoa̍t-im ê soaⁿ-kok. 14 Hit-sî Tāi-pi̍t tī soaⁿ-chē; Hui-lī-sū lâng hông-siú ê peng tī Pek-lī-hêng. 15 Tāi-pi̍t him-soān kóng, Chī-chūi ōe ēng Pek-lī-hêng siâⁿ-mn̂g-piⁿ ê chíⁿ-chúi hō͘ góa lim? 16 Chí(**Chit) saⁿ ê ióng-sū chiū chhiong-kè Hui-lī-sū lâng ê iâⁿ-pôaⁿ, tùi Pek-lī-hêng siâⁿ-mn̂g-piⁿ ê chíⁿ chhiūⁿ-chúi, kōaⁿ lâi hō͘ Tāi-pi̍t; chóng-sī i m̄-kam lim, chiū piàⁿ tī Iâ-hô-hoa ê bīn-chêng, kóng, 17 Iâ-hô-hoa ah, góa koat-toàn m̄-chòe án-ni; che kiám m̄-sī phe-miā khì ê lâng ê huih? Só͘-í i m̄-lim. Chí(**Chit) saⁿ ê tōa ióng-sū ū chòe chiah ê tāi-chì. 18 Sé-ló͘-ngá ê kiáⁿ Iok-ap ê sió-tī A-pí-su sī chòe saⁿ ê ióng-sū ê thâu-lâng; i kia̍h i ê chhiuⁿ phah-sí saⁿ-pah lâng, chiū tī saⁿ ê ióng-sū tiong ū miâ. 19 I kiám m̄-sī saⁿ ê ióng-sū tiong ê tē-it chun-kùi-ê mah? só͘-í chòe in ê thâu; chóng-sī put-ki̍p chêng saⁿ ê ióng-sū. 20 Koh ū Kah-siat lâng tōa ióng-sū Iâ-hô-iâ-tāi ê kiáⁿ Pí-ná-ngá; i ū kiâⁿ-chhut chōe-chōe tōa-sū; i thâi-sí Mô͘-ap lâng A-lī-i-le̍k nn̄g ê kiáⁿ; koh tī lo̍h-seh ê sî lo̍h khiⁿ-lāi, thâi-sí chi̍t chiah sai. 21 Koh thâi-sí Ai-ki̍p chi̍t ê tōa-hàn lâng; Ai-ki̍p lâng chhiú--nih kia̍h chhiuⁿ, Pí-ná-ngá chí-ū kia̍h thûi lo̍h-khì i hia, chhiúⁿ Ai-ki̍p lâng chhiú--nih ê chhiuⁿ, ēng hit ki chhiuⁿ kā i chân--sí. 22 Che sī Iâ-hô-iâ-tāi ê kiáⁿ Pí-ná-ngá só͘ kiâⁿ ê sū; chiū tī saⁿ ê ióng-sū tiong tit-tio̍h miâ. 23 I pí saⁿ-cha̍p ê ióng-sū khah chun-kùi; chóng-sī put-ki̍p chêng saⁿ ê ióng-sū. Tāi-pi̍t siat-li̍p i chòe i ê sī-ōe-tiúⁿ. 24 Saⁿ-cha̍p ê ióng-sū tiong ū Iok-ap ê sió-tī A-sat-hek; koh ū Pek-lī-hêng lâng Tó-to ê kiáⁿ Í-le̍k-hap-lân; 25 Hap-lu̍t lâng Sa-má, Hap-lu̍t lâng Í-lī-ka; 26 Phaⁿ-le̍k-thê lâng Hi-lī-su, Thê-ko-a lâng Ek-kiat ê kiáⁿ Í-la̍h; 27 A-ná-tu̍t lâng A-pí-í-siā, Hō͘-sa lâng Bí-pún-nái; 28 A-ha̍p lâng Sat-bûn, Nî-tô-hoat lâng Má-hap-lâi; 29 Nî-tô-hoat lâng Pa-ná ê kiáⁿ Hi-li̍p, Piān-ngá-bín cho̍k Ki-pí-a lâng Lī-pài ê kiáⁿ Í-thài; 30 Pí-la̍h-tùn lâng Pí-ná-ngá, Ka-si̍t khoe lâng Hi-thài; 31 Pek-a-la̍h-pa lâng A-pí-a-pún, Pa-ló͘-bí lâng Ap-su-má-hut; 32 Sa-pún lâng Í-lī-ngá-hap-pa, Ngá-siān chiah ê kiáⁿ tiong ê Iok-ná-tan; 33 Hap-la̍h lâng Sa-má, Hap-la̍h lâng Sa-la̍h ê kiáⁿ A-hi-àm; 34 Má-ka lâng A-hap-pài ê kiáⁿ Í-lī-hoat-lia̍t, Ki-lô lâng A-hi-to-hut ê kiáⁿ Í-liân; 35 Ka-bi̍t lâng Hi-su-lâi, A-pa lâng Phàⁿ-lâi; 36 Só-pa lâng Ná-tan ê kiáⁿ Í-kah, Ka-te̍k lâng Pa-nî; 37 A-bûn lâng Sé-le̍k, Pí-lio̍k lâng Ná-hap-lâi, sī kā Sé-ló͘-ngá ê kiáⁿ Iok-ap kia̍h kun-khì ê; 38 Í-thiap lâng Í-la̍h, Í-thiap lâng Ka-li̍p; 39 Hek lâng O͘-lī-à; kiōng saⁿ-cha̍p-chhit lâng.
1 耶和華koh受氣以色列人，激動大衛來害in，就講，Tio̍h去算以色列kap偤大人。 2 王吩咐kap伊tī-teh ê軍長約押講，你taⁿ去遍行以色列眾支派，tùi Tàn到別是巴，點算百姓，hō͘我知百姓ê數額。 3 約押kā王講，無論百姓jōa-chōe，願耶和華你ê上帝加添百倍，koh hō͘我ê主我ê王親目看見；總是我ê主我ê王啥事歡喜chitê事ah？ 4 總是王ê話贏過約押kap hiahê軍長。約押kap hiahê軍長就tùi王ê面前出去，點算以色列ê百姓。 5 In過約旦，紮營tī A-lô-jíⁿ，tī Ka-tek山谷中ê城ê chiàⁿ-pêng，kap Ngá-siā相近； 6 koh到Ki-lia̍t，kap Tha-thêng-ha̍p-sī ê地，koh到Tàn-ngá-an，se̍h到Se-tùn； 7 koh到Chhui-lô堅固ê城，kap Hi-bī人以及迦南人一切ê城；koh出去到偤大南方ê別是巴。 8 In遍行全地，歷過九月日koh二十日；就倒tńg到耶路撒冷。 9 約押用算百姓ê數額晉(chìn)hō͘王知。以色列人kia̍h刀ê勇士八十萬，偤大人有五十萬。 10 大衛算百姓ê數額了後，心就家己責備。大衛kā耶和華講，我行chitê事大大有犯罪。耶和華ah，求你除去你ê奴僕ê過失，因為我所行ê真戇。 11 大衛天光早起來ê時，耶和華ê話臨到先知Ka-tek，就是大衛ê先見ê，講， 12 你去kā大衛講，耶和華án-ni講，Taⁿ我用三項hō͘你，你揀一項，我thang行tī你。 13 Ka-tek就來通知大衛，對伊講，你ài你ê地飢荒七年久mah？á是ài你ê對敵追jip你，你逃走tī伊ê面前三月日久ah？á是ài瘟疫tī你ê地三日久ah？Taⁿ你tio̍h 斟酌想看cheh，我thang用甚麼話回覆差我ê。 14 大衛kā Ka-tek講，我真為難，咱寧可陷落tī耶和華ê手，因為伊有豐盛ê憐憫；我m̄願陷落tī人ê手。 15 耶和華就降瘟疫hō͘以色列，tùi清早到所定tio̍h ê時，tùi Tàn到別是巴；百姓間死七萬人。 16 當天使伸手tī耶路撒冷，beh滅伊ê時，耶和華就退悔降落chitê災厄，就kā滅百姓ê天使講，夠額lah，kiu你ê手；hit時耶和華ê使者tī Iâ-pò͘-su人A-lô-ná ê五穀場。 17 大衛看見phah百姓ê天使，就kā耶和華講，看ah，犯罪ê是我，悖逆ê也是我；總是chiahê kui群ê羊有做甚麼ah？願你ê手攻擊我，kap我父ê家。 18 Hit日Ka-tek來見大衛，kā伊講，你上去，tī Iâ-pò͘-su人A-lô-ná ê五穀場，kā耶和華起一座壇。 19 大衛照Ka-tek ê話上去，照耶和華ê命令。 20 A-lô-ná teh看，看見王kap伊ê人臣對面來；A-lô-ná就出去，仆tī地裡拜王。 21 A-lô-ná講，我ê主我ê王來奴僕chia啥事？大衛講，我來beh買你chitê五穀場，kā耶和華起一座壇，hō͘百姓間ê瘟疫soah。 22 A-lô-ná kā大衛講，我ê主我ê王，照你所看做好ê the̍h來獻伊；看ah，chia有牛，thang做燒祭，有phah五穀ê器具，kap套牛ê ka-chhia，thang做柴。 23 王ah，A-lô-ná用這一切送hō͘王。A-lô-ná koh kā王講，願耶和華你ê上帝接納你。 24 王kā A-lô-ná講，M̄-thang ah，我beh照價錢kā你買；我m̄肯用白白得tio̍h ê物做燒祭，獻hō͘耶和華我ê上帝。大衛就用五十sià-khek-le̍k ê銀，買hitê五穀場kap牛。 25 大衛tī-hia kā耶和華起一座壇，獻燒祭kap謝恩祭；án-ni耶和華聽in為地方所求ê，瘟疫tī以色列中就soah。
1 Iâ-hô-hoa koh siū-khì Í-sek-lia̍t lâng, kek-tōng Tāi-pi̍t lâi hāi in, chiū kóng, Tio̍h khì sǹg Í-sek-lia̍t kap Iû-tāi lâng. 2 Ông hoan-hù kap i tī-teh ê kun-tiúⁿ Iok-ap kóng, Lí taⁿ khì piàn-kiâⁿ Í-sek-lia̍t chèng chi-phài, tùi Tàn kàu Pia̍t-sī-pa, tiám-sǹg peh-sìⁿ, hō͘ góa chai peh-sìⁿ ê siàu-gia̍h. 3 Iok-ap kā ông kóng, Bô-lūn peh-sìⁿ jōa-chōe, goān Iâ-hô-hoa lí ê Siōng-tè ke-thiⁿ pah-pē, koh hō͘ góa ê chú góa ê ông chhin-ba̍k khòaⁿ-kìⁿ; chóng-sī góa ê chú góa ê ông siáⁿ-sū hoaⁿ-hí chit ê sū ah? 4 Chóng-sī ông ê ōe iâⁿ-kè Iok-ap kap hiah ê kun-tiúⁿ. Iok-ap kap hiah ê kun-tiúⁿ chiū tùi ông ê bīn-chêng chhut-khì, tiám-sǹg Í-sek-lia̍t ê peh-sìⁿ. 5 In kè Iok-tàn, chat-iâⁿ tī A-lô-jíⁿ, tī Ka-tek soaⁿ-kok tiong ê siâⁿ ê chiàⁿ-pêng, kap Ngá-siā saⁿ-kūn; 6 koh kàu Ki-lia̍t, kap Tha-thêng-ha̍p-sī ê tōe, koh kàu Tàn-ngá-an, se̍h kàu Se-tùn; 7 koh kàu Chhui-lô kian-kò͘ ê siâⁿ, kap Hi-bī lâng í-ki̍p Ka-lâm lâng it-chhè ê siâⁿ; koh chhut-khì kàu Iû-tāi lâm-hng ê Pia̍t-sī-pa. 8 In piàn-kiâⁿ choân-tōe, le̍k-kè káu-ge̍h-ji̍t koh jī-cha̍p ji̍t; chiū tò-tńg kàu Iâ-lō͘-sat-léng. 9 Iok-ap ēng sǹg peh-sìⁿ ê siàu-gia̍h chìn hō͘ ông chai. Í-sek-lia̍t lâng kia̍h to ê ióng-sū poeh-cha̍p bān, Iû-tāi lâng ū gō͘-cha̍p bān. 10 Tāi-pi̍t sǹg peh-sìⁿ ê siàu-gia̍h liáu-āu, sim chiū ka-kī chek-pī. Tāi-pi̍t kā Iâ-hô-hoa kóng, Góa kiâⁿ chit ê sū tōa-tōa ū hoān-chōe. Iâ-hô-hoa ah, kiû Lí tû-khì Lí ê lô͘-po̍k ê kè-sit, in-ūi góa só͘-kiâⁿ-ê chin gōng. 11 Tāi-pi̍t thiⁿ-kng-chá khí-lâi ê sî, Iâ-hô-hoa ê ōe lîm-kàu sian-ti Ka-tek, chiū-sī Tāi-pi̍t ê sian-kiàn ê, kóng, 12 Lí khì kā Tāi-pi̍t kóng, Iâ-hô-hoa án-ni kóng, Taⁿ Góa ēng saⁿ-hāng hō͘ lí, lí kéng chi̍t-hāng, Góa thang kiâⁿ tī lí. 13 Ka-tek chiū lâi thong-ti Tāi-pi̍t, tùi i kóng, Lí ài lí ê tōe ki-hng chhit-nî kú mah? á-sī ài lí ê tùi-te̍k tui-jip lí, lí tô-cháu tī i ê bīn-chêng saⁿ-ge̍h-ji̍t kú ah? á-sī ài un-e̍k tī lí ê tōe saⁿ-ji̍t kú ah? Taⁿ lí tio̍h chim-chiok siūⁿ-khòaⁿ cheh, góa thang ēng sím-mi̍h ōe hê-hok chhe góa ê. 14 Tāi-pi̍t kā Ka-tek kóng, Góa chin ûi-lân, lán lêng-khó͘ hām-lo̍h tī Iâ-hô-hoa ê chhiú, in-ūi I ū hong-sēng ê lîn-bín; góa m̄-goān hām-lo̍h tī lâng ê chhiú. 15 Iâ-hô-hoa chiū kàng un-e̍k hō͘ Í-sek-lia̍t, tùi chheng-chá kàu só͘ tiāⁿ-tio̍h ê sî, tùi Tàn kàu Pia̍t-sī-pa; peh-sìⁿ-kan sí chhit-bān lâng. 16 Tng thiⁿ-sài chhun-chhiú tī Iâ-lō͘-sat-léng, beh bia̍t i ê sî, Iâ-hô-hoa chiū thè-hóe kàng-lo̍h chit ê chai-ē, chiū kā bia̍t peh-sìⁿ ê thiⁿ-sài kóng, Kàu-gia̍h lah, kiu lí ê chhiú; hit-sî Iâ-hô-hoa ê sù-chiá tī Iâ-pò͘-su lâng A-lô-ná ê gō͘-kak-tiûⁿ. 17 Tāi-pi̍t khòaⁿ-kìⁿ phah peh-sìⁿ ê thiⁿ-sài, chiū kā Iâ-hô-hoa kóng, Khòaⁿ ah, hoān-chōe-ê sī góa, pōe-ge̍k-ê iā sī góa; chóng-sī chiah ê kui-kûn ê iûⁿ ū chòe sím-mi̍h ah? goān Lí ê chhiú kong-kek góa, kap góa pē ê ke. 18 Hit-ji̍t Ka-tek lâi kìⁿ Tāi-pi̍t, kā i kóng, Lí chiūⁿ-khì, tī Iâ-pò͘-su lâng A-lô-ná ê gō͘-kak-tiûⁿ, kā Iâ-hô-hoa khí chi̍t chō tôaⁿ. 19 Tāi-pi̍t chiàu Ka-tek ê ōe chiūⁿ-khì, chiàu Iâ-hô-hoa ê bēng-lēng. 20 A-lô-ná teh khòaⁿ, khòaⁿ-kìⁿ ông kap i ê jîn-sîn tùi-bīn lâi; A-lô-ná chiū chhut-khì, phak tī tōe--nih pài ông. 21 A-lô-ná kóng, Góa ê chú góa ê ông lâi lô͘-po̍k chia siáⁿ-sū? Tāi-pi̍t kóng, Góa lâi beh bóe lí chit ê gō͘-kak-tiûⁿ, kā Iâ-hô-hoa khí chi̍t chō tôaⁿ, hō͘ peh-sìⁿ-kan ê un-e̍k soah. 22 A-lô-ná kā Tāi-pi̍t kóng, Góa ê chú góa ê ông, chiàu lí só͘ khòaⁿ-chòe hó-ê the̍h-lâi hiàn i; khòaⁿ ah, chia ū gû, thang chòe sio-chè, ū phah gō͘-kak ê khì-kū, kap thò gû ê ka-chhia, thang chòe chhâ. 23 Ông ah, A-lô-ná ēng che it-chhè sàng hō͘ ông. A-lô-ná koh kā ông kóng, Goān Iâ-hô-hoa lí ê Siōng-tè chiap-la̍p lí. 24 Ông kā A-lô-ná kóng, M̄-thang ah, góa beh chiàu kè-chîⁿ kā lí bóe; góa m̄-khéng ēng pe̍h-pe̍h tit-tio̍h ê mi̍h chòe sio-chè, hiàn hō͘ Iâ-hô-hoa góa ê Siōng-tè. Tāi-pi̍t chiū ēng gō͘-cha̍p sià-khek-le̍k ê gûn, bóe hit ê gō͘-kak-tiûⁿ kap gû. 25 Tāi-pi̍t tī-hia kā Iâ-hô-hoa khí chi̍t chō tôaⁿ, hiàn sio-chè kap siā-un-chè; án-ni Iâ-hô-hoa thiaⁿ in ūi tōe-hng só͘ kiû ê, un-e̍k tī Í-sek-lia̍t tiong chiū soah.